முச்சந்தியில் இன்னொருமுறை..!

TO THE PERSON(S) CONCERNED :

நான் ஏற்கனவே சொல்லி விட்டேன் - முச்சந்தியில் சலவை செய்யும் பழக்கம் எனக்கு ஏற்புடையது அல்லவென்று ! அதன் பின்னரும் இந்தப் பஞ்சாயத்தை இங்கே கொண்டு வருவதெனில், அதன் பின்னுள்ள லாஜிக் எனக்குப் புரியவில்லை !  

நடுநிலையின் பக்கம் மட்டுமே நீங்கள் நின்றிருப்பதாக இருப்பின், ஒதுங்கி நின்ற என்மீதும், இதனில் தம் அபிப்பிராயங்களை பதிவிட முயன்ற நண்பர்கள் மீதும் கடந்த சில நாட்களாய் குவிக்கப்பட்ட  அவதூறுகளின் கடுமையை கண்டும் காணாது பயணித்திருக்க இயலாது ! விமர்சனங்களும், பார்வைகளும் இருமுனைகள் கொண்ட வாள் என்பதை நான் சொல்லித் தான் நீங்கள் தெரிந்து கொள்ளவேண்டுமென்பதில்லை ! முகமறிந்த ; பழகிய நண்பர்களை தடித்த வார்த்தைகளில் அர்ச்சனை செய்த போது smiley-க்கள் கை தந்ததும், மூன்றே நாட்களில் நிலவரம் வேறு விதமாய் மாறும் போது எள்ளும் கொள்ளும் தாண்டவமாடுவதும் ரசிக்கும் விதமாகயில்லை !

உங்களிடம் போனில் சொன்னதையே இங்கே திரும்பவும் சொல்கிறேன் : ஒரு தவறான துவக்கத்தினில் ஏதோவொரு வகையினில் தொடர்பு கொண்டான பின்னே அதனிலிருந்து விலகிக் கொள்வதே உங்கள் மட்டிற்கு நலம் பயக்கும் !  மாறாக அதனை நியாயப்படுத்தும் முனைப்பினில், மேற்கொண்டும் மேற்கொண்டும் இக்கட்டுக்களை தேடிக் குவித்துக் கொள்ளாதீர்கள் என்பது மட்டுமே எனது ஒற்றைக் கோரிக்கை ! 

உங்களுக்கு யோசனை சொல்வதோ ; எனக்குச் சம்பந்தமில்லா விஷயத்தில் என்னை ஆழ்த்திக் கொள்வதோ எனது நோக்கமே அல்ல ! ஆனால் "இங்கே ஆரம்பிச்சது...இங்கேயே முடியானும்"...என்று நீங்களே இங்கு ஆஜரான பின்னேயும் நான் தொடர் மௌனம் காப்பது, எனது பொருட்டு காயங்களை தொடர்ந்து சந்தித்து வரும் நண்பர்களுக்கு ; நிஜத்தை வெளிக்கொண்டு வர பிரயத்தனங்கள் செய்த நண்பர்களுக்கு நான் செய்திடும் துரோகமாக இருந்திடும் ! அந்தப் பிழையை நான் இனியும் செய்வதாக இல்லை ! So ரௌத்திரத்தில் செலவிடும் சக்தியின் ஒரு சிறுபான்மையை பின்வரும் விஷயங்களின் பக்கமாய் திசைதிருப்பித் தான் பாருங்களேன் ப்ளீஸ் :

இலங்கையிலிருந்து வெளியிடப்படுவதான காமிக்ஸின் முகவரியை ஒரேயொரு முறை ஏதேனுமோர் கூகுள் தேடலில் கொஞ்சமாய் ஆட்படுத்தித் தான் பாருங்களேன் .... ! இன்றைக்கு ஒரு தலைவலி மாத்திரையை வாங்கும் முன்னே கூட  "அதை போட்டால் தலைவலி போகுமா ? பிராணன் போகுமா ? " என்று கூகுளில் தேடும் ஆட்கள் நாம் என்பது தானே யதார்த்தம் ?

அவர்களதாய்ப் பதிவாகியுள்ள மின்னஞ்சல் முகவரி எந்த நாட்டில் உருவாக்கப்பட்டு, பதிவாகியுள்ளது என்பதை அறிய சற்றே மெனெக்கெட முயற்சியுங்களேன்....

"உயிரைத் தேடி" கதைத்தொடரின் மெய்யான உரிமையாளர்களான DAN DARE CORPPORATION விளக்கம் கோரி அந்த மின்னஞ்சலுக்கு தகவல் அனுப்பிய அதே தினத்தினில், அடுத்த 2 மணி நேரங்களுக்குள் ஒரு "மரணச் சேதி" கிட்டியது மெய்யாகவே தற்செயல் தானா ? என்று அறிய நேரம் செலவிடுங்களேன்....

ஒரு மரணம் நிகழ்ந்திருப்பின் நிச்சயமாய் அது வருந்திட வேண்டிய நிகழ்வேயன்றி அரையணாவுக்குப் பெறுமானமில்லா பஞ்சாயத்துக்களுக்குள் அலசப்பட வேண்டியதொரு நிகழ்வே அல்ல ! ஆனால் உங்கள் குழுமத்தினில் அங்கத்தினர்களாக உள்ளோர்க்கே அதனிலும் எழுந்த நியாயமான சந்தேகம் உங்களுக்கே ஏன் எழவில்லை என்பதையும் உங்களையே சற்றே கேட்டுக் கொள்ள பாருங்களேன்...

ஏற்கனவே வெளியான முதல் இதழின் உரிமைகள் சர்வ நிச்சயமாய் பெறப்படவில்லை என்பதற்கு என் கையில் ஆதாரங்கள் இருந்தான பின்னேயே உங்களிடம் நான் தெள்ளத் தெளிவாய் போனில் பேசினேன் ! நீங்கள் வெளியிட்டுள்ளது DYNAMITE நிறுவனத்தின் உடைமையே அல்ல ; அவர்களே அதனை KING FEATURES-ல் தான் உரிமம் பெற்று வாங்கி வெளியிட்டுள்ளார்கள் ! அவ்விதமிருக்க அவர்கள் இதனை இலங்கைக்கோ ; இந்தியாவுக்கோ லைசென்ஸ் செய்திருக்க வாய்ப்பே கிடையாது ! தவிர King Features அமெரிக்காவுக்கு இங்கே மும்பையில் ஏஜெண்ட்கள் உள்ளனர் & அவர்களும் எனக்கு நன்கு அறிமுகம் ஆனவர்களே ! அவர்களும் இந்த விஷயத்தில் எவ்வித அங்கீகாரமும் , யாருக்கும், எப்போதும் வழங்கப்படவில்லை என்பதை ஊர்ஜிதம் செய்து விட்டுள்ளனர் ! இவை சகலமும் உங்களுக்கு 2 வாரங்களுக்கு முன்பான அந்த சனி மாலையின் 45 நிமிட போன்காலின் போது விளக்கிச் சொன்னவன் நானே ! And இவற்றுள் எதையுமே பொதுவெளிக்கு கொண்டு வர நான் பிரியப்படவுமில்லை - நீங்கள் சங்கடம் கொள்ள நேர்ந்திடுமே என்ற ஒற்றைக்காரணத்தினால்  ! ஆனால் நாசூக்காய் விலகிக் கொள்ள தரப்பட்ட வாய்ப்பையுமே பகடியாக்கிப் பார்க்க நீங்கள் துவங்கிய பிற்பாடே இத்தனை இன்னல்கள் தொடர்கதையாகியுள்ளன ! இதனில் பிழை யார் மீதென்று சிந்தியுங்களேன் ப்ளீஸ் ? 

இதோ இன்றைக்கு நெட்டில் பணி செய்ய ஆட்களைத் திரட்டிக் கொண்டிருக்கிறேன் - பிரெஞ்சு மொழிபெயர்ப்புக்கு ; தமிழ் மொழிபெயர்ப்புக்கென ! ஆனால் கற்றுக்குட்டிப் பெண்களே கூட அங்கே கேட்கும் முதல் கேள்வி - "இந்த வேலையை எங்களுக்குத் தர நினைக்கும் உங்களிடம் இவற்றிற்கான உரிமைகள் உள்ளன தானா ? அதை உறுதிப்படுத்திய பின்னேயே இதனில் நாம் தொடர்ந்திடலாம் !" என்று தான் ! 49 வருட அனுபவங்கள் எங்கள் நிறுவனப் பின்புலமாகிட்டாலுமே, ஒரு புதியவர் கூட எங்களிடம் நியாயமான இந்தக் கேள்வியை முன்வைக்காது காண்டிராக்ட் அடிப்படையில் கூட பணியாற்ற தயாரில்லை ! இது தான் நிதரிசனம் & அதனில் பிழைகள் நிச்சயமாய் கிடையவும் கிடையாது ! அவர்களின் கேள்விகளுக்குப் பதில் சொல்லும் கடமையும் எனக்குள்ளது  !! ஆனால்  "கிட்டத்தட்ட ஓராண்டாய் நான் அவர்களோடு தொடர்பில் உள்ளேன் ; இந்த "உயிரைத் தேடி" கதை தான் அவர்களின் "கனவு இதழ்" ; தினமலர் நிறுவனத்தோடெல்லாம் பேசி சரி செய்து விட்டார் (?????) என்றெல்லாம் சிலாகிக்கும் அளவிற்கு பரிச்சயம் இருந்த பின்னேயும் - உங்களுக்கு அவர்களின் உரிமையாளர் பெயர் கூடத் தெரியாத நிலையினை என்னவென்பது ? அட, அதையும் விடுங்களேன் - பெயரின்றியே பயணிப்பது தவறல்ல தான் - ஆனால் ஒரு காண்டிராக்ட் மொழிபெயர்ப்பாள கற்றுக்குட்டி கேட்கும் அடிப்படைக் கேள்வியினை எடிட்டராய் பொறுப்பேற்ற நீங்கள் கேட்டிருக்க வேண்டாமா - அம்முயற்சியின் ஆரம்பத்திலேயே ? அதன் பிழைக்கு பொறுப்பேற்க உங்களையன்றி வேறு யாரிருக்க முடியும் சார் ?

இந்த சிக்கலிலிருந்து வெளியேறும் வாய்ப்பினை ஒரு பாராசூட்டாக இயன்ற சகல விதங்களிலும் உங்களுக்கு நான் வழங்கியிருந்தேன் என்பது நமது பரஸ்பர மனசாட்சிகளுக்குத் தெரியும்  ! ஆனால் அதனை உதாசீனப்படுத்த நீங்கள் முனைந்தது ஏனென்று மட்டும் சிந்தியிங்களேன் ! பின்னணியிலிருந்து "அடுத்து மெபிஸ்டோவை போடுங்க !" ; "ஒரு அப்பாவி மனுஷனை லயன் எடிட்டர் கொன்னுப்புட்டார் !" என்றெல்லாம் மனசாட்சிகளை அடகு வைத்த ஆசாமிகளின் உந்துதல்கள்,  உங்களின் சீர்தூக்கிடும் உணர்வினை அந்த நொடியினில் மட்டுப்படுத்தியிருக்கக்கூடும் என்பது தெளிவானதொரு பொழுதில் உங்களுக்குத் புலனாகாது போகாது ! 

பொதுவெளியில் தலைகுனிய நேர்வது எத்தனை வேதனையான அனுபவம் என்பதை இங்கே என்னைவிட அப்பட்டமாய் உணர்ந்திருக்கக்கூடியது வேறு யாராகவும் இருக்க முடியாது சார் ! எனது தவறுகள் சுட்டிக் காட்டப்பட்ட விதம் ரொம்பவே காரமானதாக இருந்திருக்கலாம் ; ஆனால் 'அதனை நான் மறுக்கிறேன் ; சமாதானம் சொல்கிறேன்' என்று முனைப்பு காட்டவே இல்லை ! விழுந்த செருப்படிகளை கைகட்டியே வாங்கியும் கொண்டேன் ! சாகும் வரையிலும் அந்தக் களங்கம் நீங்காதென்பது எனக்குத் தெரியும் தான் ; அதன் பொருட்டே சென்றாண்டு BBC ரேடியாவினில் என்னை பேட்டி கண்ட விஷயத்தைக் கூட இன்று வரைக்கும் சீனியர் எடிட்டருக்குக் கூட நான் சொல்லவில்லை ! முழுசாய் 45 நிமிடங்களுக்கு ஒலிபரப்பான அந்தப் பேட்டி பற்றி ஜூனியர் எடிட்டரைத் தவிர்த்து இந்த நொடி வரையிலும் யாருக்கும் தெரியாது ! பகடிகள் உருவாக்கவல்ல காயங்கள் அத்தகையவை ! ஆனால் "சிங்கமுத்து வாத்தியார்" என்று டைப்படித்து பகடிகளுக்குப் பரிச்சயப்பட்டுப் போன விரல்களுக்கு அதே வாளானது இன்று திசை திரும்பி நிற்கும் தருணத்தினில் வாளாவிருக்க இயலாது போவதே விதியின் வரிகள் !

"சாரி நண்பர்களே ; தெரியாது ஒரு தவறான முயற்சிக்கு நான் துணை போய்விட்டேன் ; இதனிலிருந்து என்னை தூரப்படுத்திக் கொள்கிறேன் ! " என்று மட்டும் நீங்கள் விலகி விட்டு, ஓரிரு வாரங்களுக்குப் பின்பாக _ "யாரையும் நம்பி இனி நான் மோசம் போவதாக இல்லை ; கையை ஊன்றிக் கரணம் போட்டாவது நானே ஒரு புது காமிக்ஸ் வெளியிட முயற்சிக்கப் போகிறேன் !" என்று நீங்களே அறிவித்திருந்தால் இன்று நீங்களொரு நாயகராய் நண்பர்களின் ஆராதனையை ஈட்டியிருப்பீர்கள் ! இன்றைக்கு அதே நண்பர்களின் பகடிகளின் இலக்காக மாறியிருக்க மாட்டீர்கள் ! இதனை நிச்சயமாய் உங்களின் ஆழ்மனசும் மறுக்காது என்பதில் மாற்றுக் கருத்தே கிடையாது ! 

தணிந்து நீங்கள் நிற்பதாகவும், உபதேசம் செய்யும் உசரத்தில் நான் இருப்பதாகவும் ஆண்டவன் சத்தியமாய் நான் எண்ணிடவில்லை சார் ; ஆனால் உங்களின் நெடும் பின்னூட்டத்தில் எனக்கிருந்த நெருடல்களை வெளிக்காட்ட இனியும் நான் தயங்கிட்டால் - அது உங்களை இத்தனை ஆண்டுகளாய் நான் அறிந்திருப்பதற்குமே பொருளின்றிப் போய்விடும் ! இன்றைய உலகில், சமூக வலைத்தளத்தில் வாள் சுழற்றுவதைத் தாண்டியும் நட்பு ; நேசம் ; சக மனிதனுக்கு மரியாதை ; விமர்சனங்களிலும் நிதானம் - என நிறைய விஷயங்களுக்கு இடமிருப்பதாகவே நான் நம்புகிறேன் ! இதோ இதே தளத்தில் - அவர் பார்வையிலான விஷயத்தை சுட்டிக்காட்ட முனைந்த நண்பர் டாக்டர் சுந்தரின் பின்னூட்டத்தை நீக்கியது நானே ; அது எனக்கு ஆதரவு சொல்லும்  விதமாயிருந்த போதிலும் ! உன்னதப் பணியில் உள்ளவர் இந்த சமீப நாட்களின் காரங்களுக்கு ஆட்பட வேண்டாமே என்ற அவாவே என்னுள்ளத்தில் !! (Sorry Doctor !!) அதன் பொருட்டு அவருக்கு நிச்சயமாய் வருத்தமிருக்கும் தான் ; ஆனால் அதை அவர் இன்னொரு நண்பரிடம் நாசூக்காய் வெளிப்படுத்தினாரே அன்றி, எங்கும் கண்சிவக்க முனையவில்லை ! நட்புக்கள் வலுப்பெறுவது இத்தகைய பாலங்களினால் தானே சார் ? மாறாக "எச்ச" ; "நாதாரி" என்ற பதங்கள் நம் யாருக்கும் பெருமை சேர்க்காதே ? தலீவர் பரணி ; செயலர் விஜய் ; இந்த விவகாரத்தில் தானென்று இல்லாது ஏகப்பட்ட தருணங்களில் என் மீதான கோப வெளிப்பாடுகளை தங்கள் மீதே வாங்கி வந்துள்ளனர் ! அவர்கள் அனைவருக்குமே நான் ஆயுட்காலக் கடமைப்பட்டுள்ளேன் ! காலம் கடந்திருந்தாலும் , நீங்கள் பட்டிருக்கக்கூடிய காயங்களுக்கு எனது மன்னிப்புகள் மருந்தாகிடட்டும் guys !! SORRY !!! 

சந்திக்கு வந்து விட்டதால் சிந்தனைப் பகிரல்கள் தவிர்க்க இயலாததாகி விட்டன தான் & இங்கே மேற்கொண்டும் பேசி விடுகிறேனே ! "Fan Made " ; Scanlations : வாசக pdf " என்று ஏதேதோ ஏக காலமாய் சுற்றில் இருப்பதில் ரகசியங்கள் ஏதுமில்லை ! துவக்க நாட்களில் அவற்றைத் தவிர்க்க நான் முயற்சித்தது நிஜமே ; ஆனால் பின்னாட்களில் அதனில் தீவிரம் காட்டவில்லை என்பதும் நிஜமே ! ஆர்வக் கோளாறில் நடந்திடும் நிகழ்வுகள் என்றமட்டுக்கு ஒதுங்கி விட்டேன் ! ஆனால் இதோ - போன சனியிரவு பதிவில் "உயிரைத் தேடி" நமது இதழாய் வெளிவரவுள்ளதை அறிவித்த மறுநாள் காலையிலேயே "வாசக பேராதரவு பெற்ற ; வாசக கோரிக்கைகளுக்கு இனங்க (ஆமாங்க ; ஒரு சுழி தானுங்க !!) கலர் PDF முகநூல் க்ரூப்பில் வெளிவந்ததை நான் ரசிக்கவில்லை தான் ! குருவி உட்கார பனம்பழங்கள் உலகெங்கும் விழலாம் தான் ; ஆனால் கோவையில் விழும் பழங்களின் பெரும்பான்மைகள் முறையற்ற pdf பழங்களாகவே இருப்பது தான் வேடிக்கையும், வாடிக்கையும் ! "நீ புக் போடப் போறியா ? இயன்றமட்டுக்கும் உன் விற்பனையை ஒக்குட எனக்கு இயன்றதைச் செய்வோமென" முனைப்பு மட்டுமே இங்கே தென்படுகிறது !  தவிர, நமது புது இதழ்களையும் scan செய்து pdf ஆக்கி சுற்றில் விடும் அந்தப் பாங்கை ஆர்வமான அந்த ஆர்வலர் ஒரு பத்திரிகைப் பேட்டியிலும் தனது தொலைபேசி நம்பரோடு தந்துள்ளார் ! ஒவ்வொரு இதழிலும் statutory warning தந்திருக்கிறோம் - electronic copying தடை செய்யப்பட்டுள்ளது என்று ! அப்புறமும் "நீ என்ன சொல்ல ? நான் என்ன கேட்க ?" என்ற மீறல்கள் இனி  நமது தொழில் முடக்க நடவடிக்கைகளாய்ப் பார்க்கப்படும் & அதற்கேற்ப இழப்பீடு கோரி நடவடிக்கைகள் சட்டப்படி மேற்கொள்ளப்படும் ! நான் மண்டையைப் போடும் வரைக்குமே சட்டப்படி அதற்கான தீர்வுகள் கிட்டாமலேயும் போகட்டுமே ; at least முயற்சிதோமென்ற எண்ணத்தோடு போய்ச் சேருவேன் அல்லவா ?

ஊர் இரண்டுபட்டால் கூத்தாடிக்கு கொண்டாட்டம் என்பார்கள் ; ஆனால் இந்தக் கூத்தாடிக்கோ கிஞ்சித்தும் மகிழ்வில்லை ! இன்று விரல் நீட்டும் அவசியம் எழுந்துள்ளது இன்றளவுக்கும் என்னோடு கை குலுக்கி; சிரித்துப் பேசி, பரஸ்பர நட்பைப் பரிமாறிக் கொண்டோரை நோக்கியே ! எந்தச் சூழலிலும் அது எனக்கு மகிழ்வைத் தரப்போவதில்லை ! ஆர்ச்சியின் கால இயந்திரத்தினில் ஏறி, பின்னோக்கிச் சென்று இந்த சமூக வலைத்தளத்தினுள் நான் தலைகாட்டிய நாட்களுக்கு முன்பான சகஜ நாட்களை மீட்டிட இயலுமெனில் இதைவிடவும் பெரிய வரமாய் நான் வேறெதையும் பார்த்திட மாட்டேன் ! இங்கிருந்து நடையைக் கட்டும் நாள் புலரும் போது - "எடிட்டர்-பப்ளீஷர்-மொழிபெயர்ப்பாளர்" இத்யாதி ,,இத்யாதி என்ற அடையாளங்களையெல்லாம் தூர எறிந்து விட்டு "ஒரு decent ஆன மனுஷன்" என்ற ஒற்றை அடையாளத்தை மட்டுமே கொண்டு செல்ல ஆண்டவன் வரம் தந்தால் அதை விடவும் பெரும் பாக்கியம் வேறேதும் இராது  ! அதன் பொருட்டே என்னளவுக்கு என்னால் இயன்ற பொறுமைகளோடு செயல்பட முனைகிறேன் & அதற்கு உறுதுணை நிற்கும் அத்தனை நண்பர்களுக்கும் ஒரு பெருநன்றி சொல்லிட இதையே வாய்ப்பாக்கிக் கொள்கிறேன் !! THANKS TO EVERY SINGLE ONE OF YOU FOLKS !! 

வேற்றுமைகளை பின்தள்ளுவோம் guys ; இவை ஒற்றுமைக்கான நாட்கள் !! உலகமே ஒரு பெரும் துயரினில் நிற்கும் தருணத்தில் நம் பிணக்குகளை தூர எறிந்து விட்டு நம்மை ஒன்றிணைக்கும் அந்த காமிக்ஸ் நேசமெனும் குடையின்  கீழ் இளைப்பாறுவோமே - ப்ளீஸ் ?

See you around ! Bye for now all !