நீலப் பொடியர்கள் - உங்கள் இல்லங்களில் !

நண்பர்களே,

வணக்கம். இன்னொரு புது நாள்.....இன்னுமொரு கத்தைப் புது இதழ்கள்.... தொடரும் ஒரு சுவாரஸ்யக் கதைத் தேடல் !! இவை போதாதா எந்தவொரு சோர்வையும் புறம்தள்ளிட ? செப்டெம்பரின் நான்கு இதழ்களும் ஒரு நாள் முன்னதாகவே தயாராகி விட, அவற்றைப் புரட்டும் போது உற்சாக மீட்டர் தானாய் வேகம் பிடிக்கிறது !! ஏற்கனவே பலமுறைகள் சொன்ன அதே விஷயம் தானெனினும் - ஒவ்வொருமுறையும் புதுத தயாரிப்புகளை ஒருசேரப் பார்க்கும் அனுபவத்தின் சந்தோஷம் எப்போதுமே அலாதியானது !! ஹிட்டோ-மொக்கையோ - தீர்ப்பெழுதும் பணி உங்களது என்பதால் அதைப் பற்றியெல்லாம்  அலட்டிக் கொள்ளாமல்,இதழ்களை புரட்டிப் பார்க்கும் அந்த ஒற்றை நொடியின்  carefree சந்தோஷம் ஒரு சூப்பர் அனுபவம் !!  இம்முறையும் அந்த வேலையை மட்டுமே செய்துவிட்டு - நம்மவர்கள் பேக்கிங் பணிகளில் ஈடுபடுவதை பராக்குப் பார்க்கக் கிளம்பி விட்டேன் ! நாளைய தினம் உங்கள் இல்லங்களில் தஞ்சம் புக நீலப் பொடியர்களும், XIII-காருவும், இரவுக் கழுகாரும் பரபரப்பாய் காத்துள்ளதால் நீங்களும் தயாராகிக் கொள்ளுங்களேன் ? அதிலும் இம்முறை SMURFS கதையானது ரொம்பவே cute என்று நினைத்தேன் !! கொஞ்சமாய் நேரம் ஒதுக்கிக் கொண்டு இந்தக் கதையைப் படித்திட முனையுங்களேன் - ஒவ்வொரு வீட்டிலும்...ஒவ்வொரு நட்பு வட்டத்திலும் ஒரு ஜோக்கர் smurf ; ஒரு ஜீனியஸ் smurf ; ஒரு பீம்பாய் smurf ; ஒரு பர்கர் smurf ; ஒரு சீனியர் smurf - என்று ஏதேனுமொரு SMURF பிரதிநிதி இருப்பது புரியும் ! ஒரே வருத்தம் - இந்தக் கதையானது நமது மாநிலத்தில் தேர்தல்கள் நடந்து கொண்டிருக்கும் வேளைதனில் வெளியாகியிருப்பின் இன்னமும் பொருத்தமாய் இருந்திருக்கும் !! 

அப்புறம் இம்மாத மறுபதிப்பான "காணாமல் போன கைதி" பற்றி ! இந்த இதழ் முதல் தொடரும் மறுபதிப்புகள் எல்லாமே - நாம் நார்மலாக டெக்ஸ் வில்லர் ; மார்ட்டின் கதைகளுக்குப் பயன்படுத்தும் அதே வெள்ளைத் தாளில் தான் தொடர்ந்திடும். இதுவரையிலும் மறுபதிப்புகளில் நாம் உபயோகித்து வந்த அந்த சற்றே மஞ்சள் கலந்த பேப்பரின் விலைகள் இந்த சீசனில் எட்டா தூரத்துக்குச் சென்றுவிட்டதால் நமக்கு இனி வேறு மார்க்கமில்லை ! கவனிக்க : பேப்பரின் ரகத்தில் மட்டுமே மாற்றமே தவிர - கனத்தில் அல்ல ! So மெல்லிசான பேப்பரோ ? என்ற சலனங்களுக்கு / புதுசாயொரு பஞ்சாயத்துக்கு அவசியமில்லை ! முதன்முறையாக மறுபதிப்புக் காணும் இந்தக் கதை அநேகரின் சேகரிப்பில் இருந்திடாதென்று நினைக்கிறேன் ! இம்முறையும் இந்த மறுபதிப்பின்  proof-reading பணியினை நமது வாசகர்களுள் இருவர் ஒருவருக்குப் பின் இன்னொருவராய் செய்துள்ளனர் ! இருவருமே அனாமதேயத்தையே நாடுவதால் பெவிக்கால் பெரியசாமி ஆஜர் ! Happy Reading !

எனக்கும் கூட ஒருவிதத்தில் சந்தோஷ வாசிப்பு அனுபவங்களே - 2017-ன் "TEX' கதைத் தேர்வினுள் ஈடுபட்டுக் கிடக்கும் முகாந்திரத்தினில் !! சுவாரஸ்யமான கதைகளின் பட்டியல் ஒன்றினை படைப்பாளிகளிடம் வாங்கி கொண்டு - அவற்றிலுள்ள  ஒவ்வொரு கதையின் சுருக்கத்தையும் ; அது குறித்த இதர மொழி வாசகர்களின் விமர்சனங்களையும் ; கதைகளின் ஓவிய பாணிகளையும்  , பக்க நீளங்கள் பற்றிய விபரங்களையும் - ஆங்காங்கே சிதறிக் கிடக்கும்  இணையதளக் குறிப்புகளிலிருந்து சேகரிப்பதை ஞாயிறு காலை துவக்கினேன் ! டெக்ஸ் கதைகளின் குவியலுக்குள் புகுந்தால்தான் புரிகிறது - அதன் பின்னணியில் எத்தனை எத்தனை அட்டகாசமான, ஆர்ப்பாட்டமான கதைக்களங்கள் உள்ளனவென்று ! மாமூலான செவ்விந்திய யுத்தம் ; நில ஆக்கிரமிப்பு ; ஆயுதக் கடத்தல் கதைகளுக்கும் பஞ்சமில்லை என்றாலும் - இப்போதெல்லாம் வெளியாகும் கதைகளில் தென்படும் variety மூச்சிரைக்கச் செய்கிறது ! தற்செயலாய்க் கண்ணில்பட்ட கதைகளுள் நாம் சம்பந்தப்பட்ட சாகசமும் ஒன்று உண்டு !!  "நாமென்றால்" - இந்தியர்கள்  என்ற முறையினில் ! ஆனால் தென்னமெரிக்கக் காட்டினில் காளி கோயில்...முரட்டுப் போக்கிரிகள் ...ஹிந்து தீவிரவாதிகள்  என்று கதை பயணிப்பதால் - நிச்சயமாய் நமக்கு ரசிக்காதென்று பட்டது ! திகைக்கச் செய்யும் ஓவிய ஸ்டைல்கள் ; எண்ணற்ற அசாத்திய அட்டைப்படங்கள் ; MAXI ; MEGA : குட்டிக் கதைகள் என்று 'தல' தேடலில் எனக்கு கிட்டிய விஷயங்கள் எக்கச்சக்கம் ! 

2015 வரையிலும் டெக்ஸ் கதைத்தொடர்களினில் பணிசெய்துள்ள ஓவியர்களின் எண்ணிக்கை 74 என்றால் நம்ப முடிகிறதா ?? இம்மாதம் நாம் ரசிக்கவிருக்கும் சித்திரங்களை உருவாக்கிய திரு.காலப்பினி தான் - 103 சாகசங்களுக்குப் படம் போட்டு பட்டியலின் முதலிடத்தில் உள்ளார் ! இரண்டாம் இடமோ - ("ஓக்லஹோமா " கதைப் புகழ் )- லெட்டெரி - 50 ஆல்பங்களுடன்  !! மூன்றாவது தலைமுறையாய்த் தொடர்ந்திடும் நமது இரவுக் கழுகாரின் பின்னே ஒரு ரயில்பெட்டியின் பயணிகள் எண்ணிக்கைக்கு ஈடாகப் படைப்பாளிகள் குவிந்திருப்பதைப் பார்க்கும் போது WOW என்று மட்டுமே சொல்லமுடிகிறது ! குறிப்பிட்ட கதைகளின் PDF பைல்களை வாங்கிக் கொண்டு அவற்றைப் புரட்டினால் - நம்மவரைத் தூக்கி ஜெயிலில் கடாசுகிறார்கள் ; சுவற்றில் கட்டித் தொங்க விடுகிறார்கள் ; சாட்டையால் ஒருத்தன் விளாசுகிறான் ; மண்ணுக்குள் புதைத்து வைக்கிறார்கள் !! வெள்ளிமுடியார் கார்சனோ பேங்கைக் கொள்ளையடிக்கிறார் ; இராணுவ உடுப்பில் கலக்குகிறார் ; ஹிப்னாடிச மயக்கத்தில் டெக்ஸை போட்டுத்தள்ளத் தயாராகுகிறார் ! இன்னும் கொஞ்சம் பக்கங்களைத் திருப்பினால் - ரகம் ரகமான சில்லுமூக்குகளை நம்மாள் - தயவு தாட்சண்யமின்றிப் பொத்தல் ஆக்கும் படலம் ஓடுகிறது ! இடைப்பட்ட அவகாசங்களில் நமது பதிவுக்குள் நுழைந்தால் - அந்த ஆக்ஷனுக்குத் துளியும் சளைக்காத கும்மா-கும் sequence இங்கேயும் ஓடுவதைப்  பார்க்க முடிந்த பொழுது - "இந்த வா-ர-ம் ஆக்ஷன் வாரம் !" போலும் என்று நினைத்துக் கொண்டேன் ! ஒரு மாதிரியாய் பழசும் ; புதுசும் கலந்ததொரு TEX அட்டவணையை நேற்றிரவு இறுதி செய்துள்ளேன் !! மாறுபட்ட கதை பாணிகள் ; ஆனால் அதே சமயம் டெக்சின் இமேஜுக்கு பாதகம் தந்திடாத தேர்வுகள் ; ஓவிய பாணிகளில் நெருடலின்மை ; வெவ்வேறு கதாசிரியர்களின் கைவண்ணங்கள் என்று இயன்றமட்டிலும் கவனமாய் பணி செய்துள்ளேன் ! அடுத்தாண்டின் இவ்வேளையில் "'தல' போல் வருமா ?" என்ற பாட்டு உங்களிடம் ஓடிக்கொண்டிருப்பின் - இப்போதைய ஆராய்ச்சிக்கொரு அர்த்தம் இருந்திடும் !! 

கதைத் தேர்வு ஒருபக்கமெனில் - தேர்வான கதைகளுக்கான பெயர்களை தயார் செய்யும் பணி இன்னொருபுறம் ! தெலுங்கு ரீமேக் படத் தலைப்புகள் போலவும் இல்லாது ; "இரத்தம் " ; "மரணம்"  "காட்டேரி" ;"பிசாசு"என்ற கொங்குராக் காரமான பெயர்களையும் இணைக்காது பெயர் வைக்க முனைந்து கொண்டுள்ளேன் ! இன்னொரு பக்கமோ - மார்டினின் வெற்றியைத் தொடர்ந்து அவரது அடுத்தாண்டின் கதைக்கென மெனக்கெடல் தொடங்கி விட்டது ! இம்முறை பெற்றுள்ள பெயரை அவர் தக்க வைத்துக் கொள்வது முக்கியமன்றோ ? ஆகையால் - மார்டினை உருவாக்கிய திரு. அல்பிரேடோ காஸ்டெல்லி அவர்களிடம் அவரது உதவியினை நாடி மின்னஞ்சல் அனுப்பியுள்ளேன் !! அவர் உதவி கிட்டின் அற்புதமாய் இருக்கும் ! இங்கும் கூட - தாஜ் மஹால்...இந்திய சாமியார்...என்ற ரீதியில் கதையொன்று உள்ளது ! ஆனால் அவற்றுள் இந்தியா பற்றி வழக்கமான சிலபல முன்தீர்மானம் செய்யப்பட விஷயங்கள் மிகுந்திருக்குமோ ? ; ஏகமாய் மாற்றம் கண்டுள்ள இன்றைய நாட்களில் நமக்கு அவை நெருடலாய் தோன்றிட வாய்ப்புள்ளதோ ? என்ற பயம் எனக்கு ! தட்டுத் தடுமாறி சில கதைகளை shortlist செய்துவிட்டு - அவற்றின் மீதான ஆராய்ச்சிகளைத் துவங்கியுள்ளேன் !! இந்தப் பணி - டெக்சின் கதைத் தேர்வை விடவும் சிரமமாய் உள்ளதென்பது மட்டும் புரிகிறது !! உர்ர்ர்..உர்ர்.....என்று ஜாவாவின் பாணியில் முனகிக் கொண்டே இன்றும் நள்ளிரவு எண்ணையை எரிக்கத் தயாராகிறேன் ! Bye now all !

P.S : இவ்வாரம் வெள்ளிக்கிழமை துவங்கவிருக்கும்  மதுரை புத்தக விழாவினில் நமது ஸ்டால் எண் : 71. ஒரு விசிட் அடிக்கலாமே - இந்தப் பக்கத்து நண்பர்கள் ?

http://lioncomics.in/monthly-packs/208-september-2016-pack.html

நமக்கு நாமே !

நண்பர்களே,

            

வணக்கம். "இவன் ரொம்பப் பேசுவானே...!!" என்ற தயக்கத்தோடு நமது ஞாயிறுப் பதிவுகளை அணுகுவது உங்கள் வழக்கமெனில் - இவ்வாரத்துக்கொரு 'டாட்டா' காட்டிவிடுவது சாலச் சிறந்தது என்று துவக்கத்திலேயே சொல்லி விடுகிறேனே !  நிறையவே  பேச / எழுத / டைப்படிக்க உள்ளேன்தான் இம்முறை ! And அவற்றுள் நிறைய விஷயங்கள் "மறு ஒளிபரப்பு"ப் போலவும் தோன்றிடலாம் தான் - but  கோர்வையாய் சில நிகழ்வுகளை முன்வைக்கும் பொருட்டே இந்த "ம.ஓ".!! 

சில நேரங்களில் பெரிதாய் நம் பக்கத்தினில் முயற்சிகளின்றியும் கூடப் பயணதிசை சரியாக அமைந்திடுவதுண்டு ! சமீபத்தைய சில பல நிகழ்வுகள் – பதிவுகள் – பின்னூட்டங்கள் எல்லாமே தற்செயலாய் ஒன்றன்பின் ஒன்றாய்க் கோர்வையாக அமைந்திட- சில முக்கிய 'செய் & செய்யாதேக்கள்' ஸ்பஷ்டமாய் நம் முன்நிற்கின்றன ! நிகழ்வு # 1 – ஈரோட்டுப் புத்தக விழாவும் அது சமயம் அரங்கேறிய வாசகர் சந்திப்பும் ! இதுவரை நாம் பார்த்திரா ஒரு அசாத்திய உற்சாகத்தோடு நடந்த நேர்முகச் சந்திப்பு ஏகப்பட்ட நூலான்படைகளை மூளைக்குள்ளிலிருந்து விலக்கியுள்ளது என்று சொல்வேன் ! காமிக்ஸ் வாசிப்பு ; காதல் என்பதெல்லாம் கருகிடவில்லை ; செழிப்பாய் ; ஆரோக்கியமாய் தொடர்கிறதென்பது அன்றைய தினத்தின் முதல் பாடம் ! அந்த காமிக்ஸ் காதலானது - சக வாசகர்களின் நட்போடு கைகோர்க்கும் போது ஒரு விவரிக்க இயலாப் புதுப்பரிமாணத்தை எட்டுகிறது என்பதை அன்றைய தினம் மட்டுமன்றி, தொடர்ந்த வாரங்களது பின்னூட்டங்களின் உற்சாகங்களும் பிடரியில் சாத்திச் சொல்லியதுதான் பாடம் # 2 ! அந்தப் பாசிட்டிவ் எனர்ஜியின் பிரவாகம் அட்டகாசமான புத்தக விமர்சனங்களாய் ஒரு கட்டத்தில் உருவெடுக்க – அவை கண்ணில்காட்டிய சூப்பர்- டூப்பர் பலன்களே நமது பாடம் # 3 ! Yes – ஆகஸ்ட் 6 முதல் இன்று வரைக்குமான நமது ஆன்லைன் ஸ்டோரின் வியாபாரம் – வழக்கத்தை விட இரு மடங்கு அதிகமாகியுள்ளது ! ரெகுலர் வாசகர்கள் என்றில்லாத விளிம்புநிலை நண்பர்கள் இணையத்தில் பொங்கும் உற்சாகத்தினால் ஈர்க்கப்பட்டு இம்மாத இதழ்களை மாத்திரமின்றி - முந்தைய இதழ்களையும் சேர்த்தே  வாங்கியுள்ளனர் என்பதே என் புத்திக்கு எட்டிய inference ! Of course - இந்த விற்பனை இரட்டிப்புக்கு வேறு காரணங்கள் இருக்கலாம்தான் ; குருவி டேரா போட - பனம்பழம் ட்ராப் ஆன கதையாகவும் இருக்கலாம்தான் ! ஆனால் - எனது உள்ளுணர்வு சொல்வதோ - இம்மாத மேளாவின் நேரடிப் பலனே இது என்று !! 

ரொம்ப காலமாகவே நான் சொல்ல நினைத்து; தயங்கி நின்று விடும் சமாச்சாரம் இது தொடர்பானதே ! பொதுவாய் ஒவ்வொரு இதழின் வருகையினைத் தொடர்ந்தும் நமது பதிவிலும், இன்னபிற சமூகவலைத்தள / வாட்சப் தகவல் பரிமாற்றங்களிலும் – பாராட்டுக்களும், குட்டுக்களும் ஒருசேர அரங்கேறுவதில் இரகசியங்கள் ஏதுமில்லை. சில தருணங்களில் பதிவாகிடும் அந்த நெகடிவ் விமர்சனங்களுக்கு நிறையவே முகாந்திரங்கள் இருப்பதுண்டு ! “கதை மொக்கை; அட்டைப்படம் சரியில்லை; மொழிபெயர்ப்பு சரியில்லை” என்று ஏதேனும் உருப்படியான காரணங்கள் இருக்கும் போது அவற்றைச் சரி செய்யும் உத்வேகத்தை எனக்குள் விதைத்துக் கொண்டு நகர்ந்து விடுவேன் ! வேறு சில வேளைகளிலோ - நண்பர்கள் நடத்திடும் நையாண்டி தர்பார்களின் நோக்கம் - ஜாலியான கலாய்ப்ஸ் அல்லது என்னை மண்டையில் தட்டி வைப்பதாக மாத்திரமே இருப்பதுண்டு ! அத்தகைய நிகழ்வுகள் அவர்களைப் பொறுத்தவரையிலும் ஒருத்தற்காலிக ‘புகை வெளியேற்றமாக‘ இருந்திடலாம் தான் ; ஆனால் ஒரு தொடர்விளைவாய் அவை உண்டாக்கக்கூடிய  வியாபாரச் சுணக்கங்களின் அளவுகளை நாம் யாருமே அறிந்திருக்க வாய்ப்பில்லை என்பது இன்றைக்கு லேசாய் சிந்திக்கச் செய்கிறது ! ! 

ஒரு உதாரணம் சொல்லுகிறேனே ! சின்னதொரு எண்ணிக்கையே நமது பிரிண்ட்ரன் எனும் போது- அச்சின் ஆரம்பகட்டத்துப் பேப்பர்களில் துல்லியம் குறைவாக இருக்கும் ! அவற்றை நாம் தூக்கிக் கடாசிவிட்டாலும் ஏதேனும் சில ஜோதியில் கலந்து, பைண்டிங்கிலும் பிரிக்கப்படாது உங்களை வந்து எட்டிடக்கூடும் ! அத்தகைய தருணங்களிலோ ; பைண்டிங்கில் பிழைகளுள்ள பிரதிகள் உங்களை சென்றடைந்திடும் சமயங்களிலோ- மறு கேள்வியின்றி மாற்றுப் புத்தகங்களை நம் செலவிலேயே அனுப்பியிருக்கிறோம். So அது போன்ற சிரமங்கள் நேரும் சமயங்களில் ஒரேயொரு பொறுமையான ஈ-மெயிலைத் தட்டி விட்டால் ஓசையின்றிப் பிரச்சனை தீர்ந்து விடும் ! மாறாக அந்தப் புத்தகத்தை போட்டோ எடுத்து, தத்தம் வாட்சப் / FB க்ரூப்களில் போட்டுக் கழுவிக் கழுவி காக்காய்க்கு ஊற்றும்போது அடங்கிடக்கூடியது நண்பர்களது எரிச்சலாக மாத்திரம் தானே  இருக்கக் கூடும் ?! ‘எடிட்டரை சும்மா பிரிச்சு மேய்ஞ்சுட்டேன்லே !!‘ என்ற உற்சாகமும் உங்களதாகலாம் ! ஆனால் அந்தத் தற்காலிகச் சந்தோஷத்தையும், அவை ஈட்டித் தரக்கூடிய "லைக்"களையும்  தாண்டி காரியார்த்தமாய் சாதித்திருக்கக் கூடியது என்னவென்று யோசிக்க அவர்கள் நேரம் எடுத்துக் கொண்டிருப்பின்- ‘பலன் பூஜ்யமே‘ என்பது புரிந்திருக்கும் ! ஸ்டேஷனுக்குள்ளேயே புகுந்து ஏட்டையாவை 'நச்'சென்று நடுமூக்கில் குத்தியதால் நீங்கள் ‘world famous’ ஆகப் போவதில்லையே - simply becos இந்த ஏட்டையா ஒரு சாதாரண சிரிப்புப் போலீஸ் மட்டும்தானே? இவரைச் சாத்தி நீங்கள் பிரசித்தி அடைவதை விட- ஒரு தவறை முறையான வழியில் சுட்டிக்காட்டி அதனைத் தொடர்ந்திடாதிருக்க உதவிய சிறு மௌனக் காரணியாக இருந்து விட்டுப் போவது – ‘காமிக்ஸ்‘ எனும் ரசனைக்கான long term உபகாரமாக இருந்திடாதா ?

‘ஆக விமர்சிக்கவே கூடாதாக்கும் ? ; நீ என்னத்தைப் போட்டாலும் பேஷ்-பேஷ் என்று பாராட்ட மட்டும்தான் செய்யணுமாக்கும் ?‘ என்ற கேள்வி உங்களுக்குள் ததும்புவது புரிகிறது ! என் நோக்கம் விமர்சனங்களில்லா இணையமல்ல ! கதைகளின் நிறை-குறைகளைத் தாராளமாய் விமர்சித்திடலாம் ! சொல்லப் போனால் - நாம் செல்வது முறையான பாதையில்தானா ? என்ற ஊர்ஜிதத்துக்கு உங்களின் விமர்சனங்கள் சர்வ நிச்சயமாய் அவசியம் ! "விடுதலையே - உன் விலை என்ன ? " ; "வானமே எங்கள் வீதி"  ; "விண்ணில் ஒரு வேங்கை" போன்ற கதைகளின் சுமாரான அம்சங்களை நீங்கள் எனக்குச் சுட்டிக் காட்டியிராவிடின் அவற்றின் ரோதனை நிச்சயமாய்த் தொடர்ந்திருக்கும் ! நீங்கள்  எனக்கொரு கோடி காட்டும் போதே நான் அத்தொடர்களின் எஞ்சிய கதைகளை பரணுக்கு பார்சல் பண்ணிவிட்டேன் - அவற்றுள் பல்லாயிரங்கள் முடங்கிக் கிடந்தாலும் !! So "விமர்சிக்க வேண்டாமே" - என்பதல்ல எனது கோரிக்கை ! 

ஆரோக்கியமான விமர்சனங்கள் ; ரசிக்கக் கூடிய நையாண்டி கொண்ட வரிகள் ; ஒப்பீடுகள் என்றைக்குமே படிக்கும் எவரையும் புன்னகைக்கச் செய்யும்தானே ? மாறாக - என்மீதான கோபங்களை இறக்கி வைக்குமொரு முகாந்திரமாய் அந்த அபிப்பிராயப் பகிரல் உருமாறும் போது  - விமர்சனங்களின் நோக்கமே திசைமாறிடுகிறது  என்பது மட்டும்தான் எனது ஆதங்கம் ! பாராட்டுக்களெனில் அவை கதைகளுக்கும், தயாரிப்புப் பணிகளுக்கும் உரியவை என்பதில் எனக்குள் எவ்விதக் குழப்பமுமில்லை ! அதே மூச்சில் - மண்டையில் குட்டெனில் அது எனது கதைத் தேர்வுக்கும், தயாரிப்பின் குறைகளுக்குமே - இதனில் தனிப்பட்ட எனது பாக்களிப்புகள் ஏதும் கிடையாது என்பதிலும் நான் தெளிவாக உள்ளேன் ! So – “இந்த இதழைப் பாராட்டித் தொலைத்தால் இந்தச் சொட்டைத்தலையனை ஏற்றி விட்டது போலல்லவா ஆகிவிடுமே ?” என்ற தயக்கங்களின் பொருட்டு நீங்கள் மௌனம் சாதிக்கத் தேவைகளே கிடையாது !! அதே போல  "வசமாய் முதுகில் நெய் தோசைகள் வார்த்துவிட்டோம் - தொல்லை தீர்ந்தது !" என்ற நிம்மதிப் பெருமூச்சுக்கும் வழியிராது - ஏனெனில் அடுத்த முப்பதாவது நாளே புதுசாய்  எதையேனும் ஏந்திக் கொண்டு உங்கள் முகங்களுக்குள் நான் நிற்கத்தான் போகிறேன் அல்லவா ?!  

படைப்பாளிகளுக்கும் - உங்களுக்குமிடையிலான போஸ்ட்மேன் மட்டுமே நான் என்பதில் துளியும் குழப்பங்களில்லை என்னுள் ! So ஒவ்வொரு படைப்பையும் அவற்றின் நிறை-குறைகள் சார்ந்த கண்ணோட்டத்தில் மட்டுமே பார்த்திட்டால்- நெட்டைக்கொக்காய் இடையில் நான் நிற்பதை சுலபமாக மறந்திட முடியும் ! நிறைகளை நிறைவாய்ப் பாராட்டினீர்களெனில் – நீங்கள் உற்பத்தி செய்து தரும் உற்சாகமும், பாசிட்டிவ் எனர்ஜியும் நிறையப் புது வாசகர்களை வசீகரித்திட உதவுமே ! After all – இந்த 4 ஆண்டுப் பயணத்தில் சந்தோஷப்படும் சமாச்சாரங்கள் நிச்சயமாய் உண்டுதானே ? 

- லார்கோ வின்ச் (கிட்டத்தட்ட) முழுத்தொடர்

- வேய்ன் ஷெல்டன் (கிட்டத்தட்ட) முழுத்தொடர்

- கமான்சே அறிமுகம்

- மின்னும் மரணம் தொகுப்பு

- LMS

- க்ரீன் மேனர்

-தலையில்லா போராளி 

- லயன் 250 

- XIII Spin Offs

- தோர்கல்

- பௌன்சர்

- கார்ட்டூன் தடம்

என்று சுவாரஸ்ய அனுபவங்களுக்குப் பஞ்சமிலாப் பயணமல்லவா இதுவரையிலாவது  ? ‘பேப்பர் சரியில்லை‘; ‘அச்சு சரியில்லை‘ என் பொத்தாம் பொதுவாய் இடப்படும் புகார்களையும் கூடக் களைய தலைகீழாய் நின்று தண்ணீர் குடித்து வருகிறோம். இந்தாண்டின் அச்சுத்தரம் நிச்சயமாய் குறைசொல்லும் விதங்களில்லை என்பது உங்குளுக்கும் தெரியும் – எனக்கும் தெரியும் ! அதே போல இந்தாண்டில் - "மரண மொக்கை" என்ற ரேஞ்சில் அமைந்துபோன இதழாய் எதுவும் இருந்ததுபோலவும் எனக்கு நினைவில்லை ! ஆக முந்தைய நாட்களில் செய்த தவறுகளிலிருந்து பாடம் படிக்க நமக்குத் தயக்கங்கள் இல்லை  என்று எடுத்துக் கொள்ளலாமே ? 'தொடர்ச்சியாய்த் தலையில் தட்டிக் கொண்டேயிராவிடின் மெத்தனம் குடிபுகுந்து விடுமோ ?' என்ற முன்ஜாக்கிரதைகளுக்கு அவசியமில்லை என்ற நம்பிக்கையில் சற்றே  ரிலாக்ஸ் செய்திடலாமன்றோ ? 

உங்கள் ஒவ்வொருவரின் ஆக்கபூர்வமான பங்களிப்புகளுமே - காமிக்ஸ்களுக்கான அசாத்தியமான தூதர்கள் என்பதை ஈரோடு நிரூபித்து விட்டது ! உங்களிடம் உறையும் அந்த ஆற்றலை முன்வைத்து, தொடரும் காலங்களில் இந்தப் பயண வேகத்தை இன்னுமொரு உச்சத்துக்கு எடுத்துச் சென்றால் ‘விற்பனைச் சுணக்கம்‘ என்ற பேய் நம்மைப் பீடிக்காது! அல்லவா ? உங்களிடம் நான் வைக்கும் கோரிக்கைதனில்  எங்களது சுயநலம் நிச்சயமாய்க் கலந்துள்ளது தான் ! ஆனால் உங்கள் ஒவ்வொருவரின் சகாயமும்தானே இந்த வண்டியின் பெட்ரோலே - ஆரம்ப நாள் முதலாய் ? FB -ல் எழுதுங்கள் ; உங்களது காமிக்ஸ் வலைப்பதிவில் எழுதுங்கள் ; ஏதோவொரு ஆக்கபூர்வமான ரூபத்தில் காமிக்ஸ் பற்றிய சுவாரஸ்ய ஜுவாலை உயிர்ப்போடு தொடரட்டுமே ? 

 ஈரோட்டில் நாங்கள் கற்ற பாடங்களின் அத்தியாயம் 2 பற்றி இனி ! For that matter – கோவையிலும் அதே பாடத்தின் சாயல்களே என்றும் சொல்லலாம் ! இந்தாண்டின் ஜனவரியில் சென்னையில் மாமூலான புத்தக விழா நடந்திடாது போய் - இறுதி நிமிடத்தில் மாற்றாய் இன்னொரு விழா நடந்தது ; அப்புறமாய் ஜுனில் மறுபடியும் சென்னையில் ; ஆகஸ்ட் துவக்கத்தில் ஈரோட்டில் & இறுதியில கோவையில் புத்தகவிழாக்கள் என்று இந்தாண்டின் நமது விற்பனை pattern ரொம்பவே இப்படியும்-அப்படியுமானது ! முறையாகப் பார்த்தால் 50 title-கள் கைவசமுள்ள சமயம் கிட்டும் விற்பனைக்கும், 130+ title-கள் கைவசமுள்ள நேரங்களில் சாத்தியமாகிடக் கூடிய விற்பனைக்கும் நிச்சயமாய் ஒரு கணிசமான வேறுபாடு இருந்திட வேண்டுமல்லவா ? அத்தகைய கனவே எங்களிடமும் இருந்தது இந்தாண்டு ! நிறைய டெக்ஸ் கதைகள் ; சில பல ஸ்பெஷல் இதழ்கள் ; ஏகமாய் கார்ட்டூன்ஸ் ; கணிசமாய் மறுபதிப்புகள் என all round ரசனைகளுக்கு இதழ்கள் நம்மிடம் உள்ளன எனும்போது- விற்பனை நிச்சயமாய் முந்தைய நம்பர்களைத் தூக்கிச் சாப்பிடும் விதமாய் இருக்குமென்று எதிர்பார்த்தோம் ! ஆனால் அவை வெறும் கனவுகளாகவே இருந்து விட்டன ! ஒரு casual walk-in வாசகருக்கு உள்ளது ஒரு குறிப்பிட்ட பட்ஜெட் மாத்திரமே போலும் ; So நம்மிடம் எத்தனை ரகங்கள் குவிந்திருப்பினும் அவர் செலவிடப் போவது அந்த முன்தீர்மானிக்கப்பட்ட தொகையினை மட்டுமே தான் ! 10 டெக்ஸ் வில்லர் இதழ்கள்  உள்ளனவா ? அவற்றுள் முதல் பார்வைக்கு அவரைக் கவரும் இதழ் எதுவோ- அதுவே அவரது அந்நேரத்தையக் கொள்முதலாக இருந்திடுகிறது ! ஆக நமது கையிருப்பு ரகங்களின் எண்ணிக்கை உயர்வு - விற்பனை எண்ணிக்கையின் உயர்வாக உருமாற்றம் காண்பதில்லை என்பதே இந்த ஆண்டின் bookfair அனுபவ பாடம் ! ‘அட... இது தான் எனக்குத் தெரியுமே! இதை நான் முன்கூட்டியே யூகித்திருந்தேனே!‘ என்று நீங்கள் தடாலடி அடித்தால் நீங்களொரு அசாத்திய தீர்க்கதரிசியே ! ஆனால் ஒரு 20% விற்பனை உயர்வு கூட இராது, வழக்கமான அதே விற்பனைகள் மட்டும் தான் சாத்தியமாகும் என்று யூகம் நிச்சயமாய் எங்களிடம் இருந்திருக்கவில்லை ! அந்த மட்டிற்கு 2017-ன் அட்டவணைத் திட்டமிடலின் இறுதிக் கட்டத்திலுள்ள வேளையிலாவது இந்த விடியல் புலர்ந்ததே என்ற சந்தோஷம் எனக்கு ! ஆண்டின் “புத்தக விழா விற்பனைத் தொகை” என்று இனியொரு realistic பட்ஜெட்டைப் போட்டு விட்டு எனது திட்டமிடல்களை நான் முன்கொண்டு சென்றால் - அடுத்தாண்டிலாவது கையிருப்புக் குவியலின் கஷ்டங்கள் மட்டுப்படுமல்லவா?

கையிருப்புகள் பற்றிய topic தான் அத்தியாயம் # 3 – சமீபத்தையத் தற்செயலான நிகழ்வுகளில் ! நண்பர் காமிக் லவர் சமீபமாய் முன்வைத்திருந்த ஸ்டாக் நிலவரப் பட்டியல் துல்லியமானதல்ல ; சில இதழ்களில் 300 / 400 என்ற ரீதியிலேயே ஸ்டாக் உள்ளது & பலவற்றில் கூடுதலாக  ! So மொத்த எண்ணம் அத்தனை மெகா சைஸல்ல என்றாலும்- நிச்சயமாய் ஒரு கணிசமான / மிகக் கணிசமான ஸ்டாக் நம்மிடமுள்ளது என்பதை மறுப்பதற்கில்லை ! மொத்த மார்கெட்டில் வாங்கும் போது ஒரு கிலோ மாம்பழம் ரூ.225 ; அதே நேரம் 3 கிலோவாக வாங்கினால் கிலோ ரூ.150 என்று விலைகள் அமைவதுண்டு தானே ? நமது இதழ்களின் pricing–ல் உள்ள தத்துவமும் (!!!) அதுவே ! முறையான தேவைக்கு மட்டுமே உற்பத்தி செய்தால் ஸ்டாக் சேராது ; ஆனால் இதழ்களின் விலை உயரத்தில் நிற்கும் ! அந்த விலையை எட்டும் தூரத்திற்கும் கொணர வேண்டுமெனில் உற்பத்தி எண்ணிக்கையைக் கூடுதலாக்கி விட்டு - மிஞ்சிடும் கையிருப்பை ஓராண்டுக்குள் விற்றுக் கொள்ளலாமென்ற நம்பிக்கை கொண்டாக வேண்டும் ! நாம் செய்து வருவது option # 2 தான் ! இந்தாண்டின் புத்தக விழா விற்பனைகள் நாம் எதிர்பார்த்தபடிக்குக் கூடியிருப்பின் இதே பாணியைக் கண தயக்கமுமின்றித் தொடர்ந்திடுவோம் ! ஆனால் யதார்த்தம் அதுவல்ல எனும் போது - பிரிண்ட் ரன்னைக் குறைப்பது எனது தலை காக்கத் தலையாயப் பணியாகிறது ! அதற்காக இனிமேல் விலை ரூ.100 ; ரூ. 90 என்றிருக்கும் என்ற அச்சம் தேவையில்லை. தொடரும் 2017-ல் ரூ.75/- என்ற விலையில் – குறைவான பிரிண்ட்ரன்னில் தொடரவுள்ளோம் ! இது ஸ்டாக் சேரவிடாது தவிர்க்குமே தவிர - சத்தியமாய் தம்புடி இலாபம் ஈட்ட வழிதராது என்பது நிதரிசனம் ! (விலை கூடுதல் ; இதே வேலையை நான் செய்தால் சஸ்தாவாக வழங்கிடுவேன் ! என்று ஏற்கனவே வாட்சப்களில் முழங்கிடும் நண்பர்கள் மன்னிப்பார்களாக ! ஆனால்  எனது சீட்டில் ஒரு மாதம் அமர்ந்து விழிபிதுங்கச் செய்யும் செலவுகளை நிர்வாகம் செய்து பார்த்தால் வீர முழக்கங்கள் mute mode-க்குப் போய்விடும் சாத்தியங்கள் ஏகம் !) ஒட்டுமொத்தமாய் விலையை ஏற்றுகிறேன் என்று நமது வாசக வட்டத்தை இன்னமும் குறுகலாக்கிடுவதை விடவும்- இப்போதைக்கு லாபம் இல்லை- நஷ்டமுமில்லை என்ற நிலை தொடர்ந்தால் போதுமென்று தீர்மானித்துள்ளோம் ! இது நிச்சயமொரு தற்காலிகத் தீர்வே ; எப்பாடுபட்டேனும் 2017-ல் நமது விற்பனையினை உயர்த்த வழி தேடியாகவேண்டும் என்பது புரிகிறது ! So இங்கே உங்களது புரிதலும், கரிசனமும் எங்களுக்குக் கிட்டின் - நம்பிக்கையோடு பணியாற்றுவோம் ! இங்கே ஒரு கொசுறுச் சேதி ! இதுவரையிலான சந்தா ஆண்டுகளில் நடப்பாண்டே THE BEST என்று சொல்லலாம் - சந்தாக்களின் ஒட்டு மொத்த எண்ணிக்கையினில் ! ஜனவரி - பிப்ரவரி என சோர்வாகவே சந்தாச் சேர்க்கை நடந்தது போல் தோற்றம் தந்தாலும் - இறுதி நம்பரானது இதுவரைக்கும் நாம் பார்த்துள்ளதில் டாப் !! 2017-ன் சந்தாவினில் இன்னமுமொரு சிறு அதிகரிப்பாவது நிகழும் பட்சத்தில் - துவக்கமே டாப் கியரில் இருந்திடும் ! Fingers seriously crossed !!

தவிர, ஒரு எதிர்பாரா திக்கிலிருந்து கிட்டியுள்ளதொரு சன்னமான- ஆனால் அசாத்தியமான ஊக்குவிப்பு நமக்குப் பெரும் பலம் தந்துள்ளது - மனதளவிலாவது ! அது என்னவென்பதை உரிய வேளையில் தெரிவிக்கிறேன் ! ஆக 2017-ன் நமது திட்டமிடலின் ஒரு மேலோட்டமான, பூர்வாங்க அறிவிப்பு இதுவே ! ‘இது தேறாது... இதை அப்படிச் செய்திருக்க வேண்டும் ; விலை கூட்டினால் அடுத்த தலைமுறையை எட்டாது ;  எதிர்கால வாசகர்கள் மீது அக்கறை அவசியம்!‘ இத்யாதி... இத்யாதி என்ற விமர்சனங்களை இதற்குப் பின்தொடர்வாக அமைத்திடாது நண்பர்கள் எனக்குப் பணியாற்ற சுதந்திரம் நல்கினால் நிச்சயமாய் அழுத்தங்களின்றிப் பணியாற்றுவேன் ! தொடரும் தலைமுறை மீதும், காமிக்ஸ் எனும் ரசனை தொடர வேண்டியதன் அவசியம் மீதும் மிகுந்த அக்கறை நம்மிடமுள்ளது. ஆனால் ‘சுவர் இருந்தால் மட்டுமே சித்திரங்கள் சாத்தியம்‘ என்பதையும் ; இந்தக் கிழட்டுச் சுவரின் வலிமை என்னவென்பது பற்றியும் நன்றாகவே தெரிந்து வைத்திருப்பதால் சில கட்டாயத் தீர்மானங்கள் நிறைவேற்றும் அவசியங்கள் எழுகின்றன !

‘பிள்ளைகளுக்கு இது எட்டாது‘; ‘நிறைய வாசகர்களைப் போய்ச் சேர்ந்திட நடவடிக்கை எடுக்கத் தெரியாதா ?‘என்று  உங்களுக்குத் தோன்றலாம் தான் ! கண்ணில்படும் வினாக்களுக்கு என்னால் இயன்ற பதில்களைச் சொல்லிவிட்டு - நானுமே நகர்ந்திடுவேன் தான் ;  ஆனால் ஆங்காங்கே பதிவாகிக் கிடக்கும் உங்கள் சிந்தனைகள் - புது வாசகர்களின் மனதுகளில் ஏற்படுத்தக் கூடிய சலனங்கள் long term ! குட்டிக் கரணமே அடித்தாலும் கூட ; உலகின் தலையாய காமிக்ஸ் கதைகளைக் கொணர்ந்தால் கூட- மேலோட்டமான பராக்குப் பார்வைகளைத் தாண்டிய சுவாரஸ்யத்தை பொதுமக்களிடையே உண்டாக்க முடிவதில்லை என்பதைக் கடந்த சில நாட்களில் கண்கூடாய்ப் பார்த்து வருகிறோம் !! 

கோவைப் புத்தகவிழா நடைபெற்று வரும் கொடிசியா அரங்கின் இன்னொரு பாகத்தில் தினமலர் நடத்தும் வீட்டு உபயோகப் பொருட்களின் கண்காட்சி கடந்த வியாழன் முதல் நடைபெற்று வருகிறது. So அங்கே வருகை புரியும் மக்கள் குடும்பங்களோடு புத்தகவிழா அரங்கிற்குள்ளும் வலம் வருவதால் வியாழன் முதலே புத்தக அரங்கு நிரம்பி வழிகிறது. நமது ஸ்டாலிலும் சொல்லி மாளாக் கூட்டம்! ஆனால் இரவு 9 மணிக்கு அன்றன்றைய விற்பனைத் தொகைகளைக் கேட்கும் போது காதை ஒன்றுக்கு இரு முறைகள் குத்திவிட்டுப் பார்த்துக் கொள்ள வேண்டி வருகிறது - காதில் விழுந்தது சரியான தொகை தானா ? என்ற சந்தேகத்தில்  ! ‘காமிக்ஸ்‘ எனும் ரசனை தயக்கத்தோடு அணுகப்பட வேண்டியதொரு ஜீவனாய் மட்டுமே இன்னமும், பெரும்பாலானோர்க்குத்  தொடர்வதால் - கண்முன்னே ஒரு வண்டிக் காமிக்ஸ் புத்தகங்கள் கலர் கலராய்த் தட்டுப்படும் போது கூட அவற்றை மெதுமெதுவாய்  முயற்சிக்க மட்டுமே மக்கள்  முனைப்புக் காட்டுகிறார்கள் ! கடந்த 4 நாட்களில் கோவையில் நமது ஸ்டாலுக்கு வந்து சென்ற மக்கள் எண்ணிக்கை ஒரு மெகா பட்ஜெட்டிலான விளம்பர campaign-ல் கிடைத்திருக்கக் கூடிய கவனத்தை விடவும் ஜாஸ்தியாக ஈர்த்துள்ளது ! அற்புதமானதொரு விளம்பரமாய் அது அமைந்துள்ள போதிலும், அந்த ஜனத்திரளானது 10% விற்பனைகளாகக் கூட உருமாற்றம் காணவில்லை ! அதே போல - FB -ல் நமது விளம்பரப் போஸ்ட்களை பூஸ்ட் செய்திட  ஓசையின்றி மாதந்தோறும் ஒரு குறிப்பிட்ட தொகையைச் செலவிட்டு வருகிறோம் -ஒரு வருஷமாய்  ! இதன் பலனாய் நமது பக்கத்துக்கு கிட்டியுள்ள லைக்ஸ் ஓராண்டினில் இருமடங்காகியுள்ளது ! ஆனால் அவை விற்பனையாக உருமாற்றம் கண்டபாடைக் காணோம் ! ஆன்லைன் விற்பனையில் இந்த ஓராண்டில் சொல்லிக்கொள்ளும் விதமாய் எந்தவொரு உயர்வும் இருந்திருக்கவில்லை - "தலையில்லாப் போராளி" யின் ஏப்ரலில், இந்த ஆகஸ்டில் நீங்கலாக ! 

So ‘காமிக்ஸ்‘ எனும் ரசனை ஒரு வெகுஜனத் தேர்வாகிட நிறையவே நேரமும் ; முயற்சியும் தேவைப்படும் போலும்! சிறு தயக்கத்தோடு மேலோட்டமாய் மாயாவி, லக்கி லூக் என்று வாங்கிச் சென்றுள்ள அனைவருமே நமது ஆன்லைன் ஸ்டோர்கள் பற்றியும்; சந்தாக்கள் பற்றியும் கேட்டுத் தெரிந்து சென்றுள்ளனர் ! ஒரே ராத்திரியில் நிகழாது போயினும்- சிறுகச் சிறுகப் புது இரத்தம் உட்புகுவதற்கு கதவுகள் மெல்லத் திறந்து வருகின்றன என்பது தான் கோவையில் பார்க்க முடிந்துள்ள silver lining. இவர்களுள் பெரும்பாலானோர் இன்றைய தலைமுறையினர் என்பதால், இயல்பான  அடுத்தகட்ட நிகழ்வாக FB-ல் ; இணையத்தில் ; பதிவுகளில் என காமிக்ஸ் தொடர்பான தேடல்களுக்குள் ஈடுபடுவர் என்று  எதிர்பார்க்கலாம் ! அவர்களை வரவேற்பது காமிக்ஸ் சார்ந்த அழகான விமர்சனங்கள் ; ஆரோக்கியமான விவாதங்கள் என்றிருக்கக் கூடிய பட்சத்தில் நிச்சமாய் ஆயுட்கால காமிக்ஸ் ஆர்வலர்களாய் அவர்கள் உருமாற்றம் காணும் சாத்தியங்கள் பிரகாசம் ! அதற்குப் பதிலாய் நையாண்டிகள் ; சிலபல ரௌத்திரங்களின் பலனாய் முன்வைக்கப்படும் சீற்றங்கள் ; நிறைகள் நூறு கண்ணில் பட்டாலும் - குறைகளை மட்டுமே பறைசாற்றுவேன் என்ற வைராக்கியங்கள் ; க்ரே மார்கெட் கூத்துகள் ; நமக்கிடையிலான ஈகோ மோதல்கள் என்ற சமாச்சாரங்கள் தாண்டவமாடின் - அதன் பலன் எவ்விதம் இருக்குமென்பதை யூகிக்கச் சிரமமிராது தானே ? நூறு பேரது கருத்துக்களும் ரசனைகளும் எல்லாத் தருணங்களிலும் ஒரே சாலையில் பயணிக்க வேண்டியது கட்டாயமல்ல ; ஆனால் அதன் பொருட்டு உருவாகும் கருத்து வேறுபாடுகளை ஒரு தொடர்கதையாகக் கொண்டு செல்லாது - நமது focus காமிக்ஸ் ரசனைகள் மீது மட்டுமே என்ற உறுதியோடு தொடர்ந்திட்டால் இங்கே உதயமாகும் வெளிச்சமும், பாசிட்டிவ் எனர்ஜியும் நமது பயணத்தை புல்லட் ரயில் வேகத்துக்குக் கொண்டு சென்றிடாதா?

4½ ஆண்டுகளுக்கு முன்பாய் நான் இந்தப் பதிவுகள் படலத்தைத் தொடங்கிய போது இரு விஷயங்களை எனக்குள் இருத்திக் கொண்டேன் ! எந்தவொரு சந்தர்ப்பத்திலும் (நமது) காமிக்ஸ் சார்ந்த விஷயங்களைத் தவிர்த்து வேறு சமாச்சாரங்கள் எதன் மீதிலும் இங்கே மையல் காட்டிட மாட்டேனென்பது விஷயம் # 1. அதே போல எந்தவொரு சூழலிலும் ‘கருத்து கந்தசாமியாக‘ மாறி அட்வைஸ் மழை பொழியும் அபத்தங்களைச் செய்திடக் கூடாதென்பது தீர்மானம் # 2 ஆக இருந்தது ! முதன் முறையாக ‘அட்வைஸ்‘ ஜாடையில் இந்தப் பதிவு அமைந்திருப்பதாய் உங்களுக்குத் தோன்றினால் - மன்னியுங்கள் நண்பர்களே, எனது நோக்கம் அதுவல்ல ! எப்போதும் போலவே உங்கள் தோள்களில் கைபோடும் உரிமையை எனதாக்கிக் கொள்ளும் ஆர்வத்தோடு என் மனதில் பட்ட விஷயங்களைப் பகிர்ந்து கொள்ள மட்டுமே நினைத்திருக்கிறேன் ! திறந்த மனதோடு இதனைப் படித்திருக்கும் பட்சத்தில் நிச்சயமாய் உங்களுக்குள் இறுக்கங்கள் ஏதும் நேர்ந்திருக்க வாய்ப்பிராது ; அதே நேரம் என் மீதான ஏதோவொரு எரிச்சலைப் பின்புலத்தில் தக்க வைத்துக் கொண்டே வாசித்திருப்பின் – ‘இவனென்ன பெரிய புண்ணாக்கா? காமிக்ஸைக் காப்பாற்ற வந்த தேவமகனா - எனக்கு யோசனை சொல்ல??!‘ என்ற உஷ்ணம் உற்பத்தியாகலாம் ! இரண்டாம் ரகத்தவராக நீங்கள் இருக்கும் பட்சத்தில் - இந்தப் பதிவின் துவக்க வரிகளை மட்டுமே மறுபடியும் என்னால் நினைவுகூர்ந்திடச் சொல்லிட முடியும்  - with my apologies of course ! 

காமிக்ஸ் வட்டமென்பது சிறுகச் சிறுக நாமாய்ப் பராமரித்து; நாமாய் நீரூற்றி ; களையெடுத்து ; உரமிட்டு வளர்த்திட வேண்டியதொரு செடி - நமது மார்க்கெட்டிலாவது ! அந்தச் செடிக்கு நம்மாலான பணிவிடைகளைச் செய்வோமே, ஏதோவொரு ரூபத்தில்  ? என்பது மட்டுமே  எனது கோரிக்கை ! இந்தச் சின்ன உலகில் நாம் வளர- தெரிந்தோ, தெரியாமலோ நாமே நமக்குத் தடை போட்டுக் கொள்ள வேண்டாமே - ப்ளீஸ் ? 

For sure - நமக்கு நாமே  !!

இங்கே நான் எழுதியுள்ள சமாச்சாரங்களில் கலாய்ப்சுக்கு ஏகமாய் மேட்டர் கிட்டிடலாம் தான் ; ஆனால் அதனில் கிடைக்கக்கூடிய அப்போதைய நகைப்புகளைத் தாண்டியும், நையாண்டி செய்த திருப்திகளைத் தாண்டியும் ஆத்மார்த்தமாய் ஏதேனும் செய்யும் அவா உங்களுக்கு எழுந்திட வாய்ப்புகள் எக்கச்சக்கம்  என்ற நம்பிக்கையிலேயே நிறைய எழுதியுள்ளேன் ! அந்த நம்பிக்கை மெய்யானால் - இனியெல்லாம் சுகமே ! பொய்யானால் - ஞாயிறு டிபனுக்கு மணக்க மணக்க தோசைகள் வார்க்கவொரு முதுகு தயார் - வழக்கம் போலவே ! மனதில் பட்டதை எழுதிட முனைந்துள்ளேன் ! வழியில் சிலபல கால்சுட்டுவிரல்களின்மீது நான் இடறியிருக்கக் கூடும் ; நாளைக்கு காலையில் எழுந்து இதே பதிவை இன்னொருமுறை வாசித்தால் - இன்னும் கொஞ்சம் மாற்றி எழுதியிருக்கலாமோ ? என்ற எண்ணம் தோன்றவும் கூடும் தான் ! ஆனால் மனதில்பட்டதை உங்களிடம் நகாசுகளின்றி இறக்கி வைத்த சின்னதொரு திருப்தி இப்போதைக்கு மிஞ்சுகிறது !  சொன்ன சமாச்சாரங்களிலோ ; சொன்ன விதத்திலோ குறைபாடுகள் இருப்பின் - முன்கூட்டிய கைகூப்பல் படங்கள் சிலபல ! புலரவுள்ள  பொழுதும், காத்துள்ள நாட்களும் 'ஒரு தோசைத் திருவிழாவாக' இல்லாது போக புனித மனிடோ அருள்புரிவாராக !! 

நீ-ண்-ட-தொ-ரு பதிவுக்கு இத்தோடு மங்களம் பாடி விட்டு ஒற்றை ரன்னில் (கிரிக்கெட்டில்) தோற்ற சோகத்தை விழுங்கச் சிரமப்பட்டுக் கொண்டே தூங்கப் செல்கிறேன்  ! ஜாலியான சிலபல புள்ளி விபரங்ககள் கைவசமுள்ளன - தொடரவிருக்கும் அடுத்த சில நாட்களின் உப பதிவினில் எழுதிட  ! Adios until then ! 

P.S : இம்மாத இதழ்கள் வரும் 31-ஆம் தேதி இங்கிருந்து கிளம்பிடும் - முதல் தேதியன்று உங்களுக்குச் சலாம் சொல்லிட ! 

And சந்தாவின் இரண்டாம் (இறுதியும்) தவணை செலுத்தியிருக்கா நண்பர்களுக்கு மீண்டுமொரு அவசர நினைவூட்டல் !! ப்ளீஸ் - இம்மாத இதழ்களை சுணக்கமின்றிப் பெற்றுக் கொள்ள உங்களின் பாக்கித் தொகைகளை உடனே அனுப்பிடலாமே ? 

தாத்தாவின் தலையெழுத்து ?

நண்பர்களே,

வணக்கம். எதிர்பார்த்தபடியே ஞாயிறின் பதிவு ஏகமாய் எண்ணச்  சிதறல்களைக் கொண்டு வந்திருந்ததில் மகிழ்ச்சியெனில் - அவை எல்லாமே பாசிட்டிவ் ரகத்திலிருந்தது டபுள் மகிழ்ச்சி ! அது மாத்திரமின்றி - மொசைக் தளத்தில் டிசைன் பதிப்பது போல - சில யதார்த்தப் பதிவுகளின் மூலமாய் நாம் செல்ல வேண்டிய திசையின் இலக்கைச் சுட்டிக் காட்டுமொரு சாத்தியம் பிறந்திருப்பதிலும் மகிழ்ச்சி ! தொடரும் பதிவில் அது பற்றி கொஞ்சம் விரிவாய் எழுதிடுக்கிறேன் !

இப்போதைக்கு சற்றே இலகுவான topic பக்கமாய் நம் இவ்வாரத்தைய கவனத்தைத் திருப்புவோமே ? இந்தாண்டின் இறுதி குவாட்டருக்கெனக் (!!) காத்திருக்கும் கார்ட்டூன் இதழ்களில் தற்போது பணியாற்றிக் கொண்டிருக்கிறேன் ! 2 SMURFS + 1 லக்கி லூக் + 1 லியனார்டோ என்பதே அந்த காம்போ ! SMURFS பற்றியும், லக்கி பற்றியும் எக்கச்சக்கமாய்ப் பேசி விட்டோம் என்பதால் அங்கே சிக்கல்களில்லை! ஆனால் நமது  தாடிக்காரத் தாத்தா லேசாய் மறக்கப்பட்டு விட்டதொரு ஜீவனாகிப் போனது போலொரு உணர்வு எனக்கு ! "விடிய விடிய விஞ்ஞானி" வெளியானது 4 கார்ட்டூன் இதழ்களுக்கு மத்தியினில் எனும் பொழுது ஒளி வட்டம் ஏகமாய்ப் பகிரப்பட்டது என்று சொல்லலாம் ! அதிலும் "7 நாட்களில் எமலோகம்" வாயிலாய் காரட்மீசை கிளிப்டன் அடித்த சிக்ஸரில் லியனார்டோ ஓரம் கட்டப் பட்டுவிட்டாரோ - என்னவோ ? அதுமட்டுமன்றி - ஒரு முழுநீளக் கதையாகயிராது - சிற்சிறு gags-களின் தொகுப்பாய் அமைந்திருந்ததிலும் நம்மவர்களில் ஒருசாராருக்குத் திருப்தி குறைவென்று தோன்றியது !

எது எப்படியோ - "விடிய விடிய விஞ்ஞானி" இதழினை இன்றைக்கொரு மறுவாசிப்புப் போட்டுத் தான் பாருங்களேன் ? ரின்டின் கேன் இரண்டாம் இன்னிங்சில் சாதித்துக் காட்டியது போல் லியனார்டோவும் மறுமுறை ஒரு மாயம் செய்திட இன்றைய உங்களது review-க்கள் உதவிடலாம் தானே ? "ஜீனியஸ் உறங்குவதில்லை" இந்தாண்டின் தீபாவளி (நவம்பர்) வெளியீடு ! (நம்மிடையிலான) தாத்தாவின்  தலையெழுத்தை நிர்ணயம் செய்யவிருக்கும் இதழும் கூட ! So இந்த நாயகர் தேறுவாரா ? மாட்டாரா ? என்பதற்கொரு கோடி காட்டுங்களேன் -தொடரும் நாட்களில் ? சில வயசறியா தாத்தாக்கள் தாதாக்களாகி உலவிடும் வேளையில் - இந்த மெய்யான தாத்தாக்கு இன்னொரு lifeline உண்டா ? 

Bye for now all !

P.S : http://lioncomics.in/largo-winch/204-largo-pack-10-discount.html

Private >>>> Public !

நண்பர்களே, 

வணக்கம். வாரத்தின் பிற்பகுதி வெளிமாநிலப் பயணம் ; வாரயிறுதியில் சிலபல சொந்த வேலைகள் என்று அட்டவணை அமைந்து போக, ஆபீஸ் பக்கமே தலைகாட்ட நேரமிருக்கவில்லை ! ஆங்காங்கே இருந்து மைதீனுக்கும், நமது மார்க்கெட்டிங் பிரிவுக்கும் போன் அடித்தே நிலவரங்களை சமாளித்து வருகிறேன் !  வெள்ளி மாலை கோவையில் துவங்கிய புத்தக விழாவின்முதல்  மாலை விற்பனை  'ஹி..ஹி..ஹி..' ரகமாகயிருந்து புளியைக் கரைக்க - மறு நாளோ 'ஹை...ஜாலி ! தலை தப்பிச்சது' ரகம் ! And இரு நாட்களுமே நமது ஸ்டாலில் கடல்யாழ் ரம்யா புது வாசகர்களுக்கு உதவும் பொறுப்பினை ஏற்றுக்கொள்ள  - முதல்முறையாக ஒரு முழுநேர காமிக்ஸ் consultant ஆஜர் !! ஞாயிறும் நமது மகளிரணித் தலைவி அங்கே செயலாற்ற சம்மதம் சொல்லியிருப்பதால் முதல் வாரயிறுதியினை சிக்கலின்றிக் கடந்து விடுவோம். தொடரும் வார நாட்களில் இல்லாது போயினும் - அடுத்த வெள்ளி / சனி / ஞாயிறுக்கு நண்பர்கள் யாரேனும் ஒத்தாசை செய்திட இஷ்டப்படும் பட்சத்தில் - தகவல் சொல்லுங்களேன் - ப்ளீஸ் ! 

And கோவையில் பரவலாய் என்ன விற்கிறதென்று ? யாரேனும் கேட்டால் உங்களுக்கு ஒன்றல்ல .. இரண்டல்ல .. மூன்றல்ல ...நான்கு யூக வாய்ப்புகள் தரலாம் !! முதலாம் வாய்ப்புக்கு "மாயாவி" என்று பதில் சொல்லிட நீங்களொரு அப்துல் கலாமாய் இருக்கத் தேவையில்லை தான் ! ஆனால் இரண்டாம் இடத்தில C.I.D லாரன்ஸ் & டேவிட் சேட்டன்கள் என்றும் ; மூன்றாம் இடத்தினில் ஜானி நீரோ & ஸ்டெல்லா சேச்சி என்றோ ; நான்காம் இடத்தினில் மாண்புமிகு கூர்மண்டையர் சார் என்றும் கனகச்சிதமாய்ச் சொல்லிட கொஞ்சம் திடசித்தம் தேவையே என்பேன் ! வாங்குவோர் அத்தனை பேரும் வாடகை சைக்கிளை எடுத்துக் கொண்டு சேரனைப் போல "ஞாபகம் வருதே.." பார்ட்டிகளாய் இருத்தல் சாத்தியமில்லைதான் எனும் பொழுது - இந்த phenomenon-ன் லாஜிக் எனக்குப் புரியவில்லை ! (செனா.அனா சார் - ஏதேனும் விஞ்ஞான விளக்கங்கள் ப்ளீஸ் ? ) நமது கோவைநகர விற்பனையாளர்களுள் ஒருவர் நேற்றைக்கு ஸ்டாலுக்கு வந்திருந்து - அத்தனை மறுபதிப்புகளிலும் மட்டும் தலா 20 பிரதிகள் வாங்கிப் போயிருக்கிறார் - சிவகாசிக்கு ஆர்டர் போட்டு அவை வரும்வரையில் காத்திருக்கும் பொறுமையின்றி ! போகிற போக்கில் சட்டித் தலையன் ஆர்ச்சி ; அப்புறம் வேதாளன் ; மாண்ட்ரேக் என்று ஒட்டுமொத்தமாய் VRS பார்ட்டிகளைக் களமிறக்கி விட்டு - "இதுதான் சந்தா Z ஷாமியோவ் !!" என்று நான் மீசையை முறுக்கும் நாளொன்றும் புலர்ந்தால் ஆச்சர்யம் வேண்டாமே !! சும்மா நெட்டை உருட்டி - தலையைப் பிய்த்து - புதுசாய் காண்டிராக்ட் போடக் காவடி எடுத்து எதையெதையோ வெளியிட மல்லுக்கட்டி - அவை விற்பனையில் "பிம்பிலிக்கா பிலாக்கி" என்று பல்லைக் காட்ட ; நமது 1960's தாத்தாக்களோ - விற்பனைமுனைகளில் தாதாக்களாகிட -"என்ன கொடுமை சரவணன் சார் ?!" என்று நான் ஆந்தை விழிகளை உருட்டத் தானே முடியும் ?!!  20% discount சார்ந்த பவுன்சர் பேக் ; கிராபிக் நாவல் பேக் ; டைகர் பேக் (!!) ஓரளவுக்கு நகரத் துவங்கியுள்ளன என்பதால் - வரும் நாட்களில் 12 மாதங்களுக்கு முந்தைய சில "மெதுநகர் ஆற்றல்" கொண்ட இதழ்களுக்கும் இதே பாணியில் விடைகொடுக்க முயற்சிப்போம் ! இந்த discounted packs எல்லாமே நமது ஆன்லைன் ஸ்டோரிலும் உள்ளன ! (BTW - நமது ஆன்லைன் ஸ்டோரினை நிர்வகிக்கும் Worldmart சமீபமாய் ஒரு புது செர்வருக்கு இடப்பெயர்ச்சி செய்திடும் முயற்சியின் மத்தியினில் உள்ளனர் என்பதால் அவ்வப்போது சில இதழ்களின் லிஸ்டிங்குகள் காணாமல் போவது ; ஆர்டர் செய்ய இயலாது போவது என்ற இடர்கள் தோன்றிடலாம் ; அவற்றை அவசரம் அவசரமாய் சரிசெய்ய ஏற்பாடுகள் நடந்து வருகின்றன ; இடைப்பட்ட வேளைகளில் சற்றே பொறுமை ப்ளீஸ் !) 

கோவையினைத் தொடர்ந்து மதுரை.....! அங்கும் ஜனங்களின் அபிமானம் இதே திசையினில் தொடர்ந்திடும் பட்சத்தில் - இரண்டு கன்னங்களிலும் முரட்டு மருக்களை ஒட்டிக் கொண்டு ஜார்கண்ட் பக்கமாய்ப் புறப்படலாமென்றிருக்கிறேன் கொஞ்ச காலத்துக்காவது ! யதார்த்தத்தைப் பார்ப்பின் - எது விற்றாலும் சந்தோஷமே  - இடம் காலியாகிறதே ; பணம் தேறும் வழி பிறக்கிறதே என்று நான் குஷியாகிட வேண்டும்தான் ! இன்றைய பதிப்புலகம் உள்ள நிலையில் கல்லாப்பெட்டி திறக்கும் ஓசையானது  எவ்வித முகாந்திரத்தின் பலனாய்க் கேட்பினும் அது கோவில்மணியோசைக்கு ஒப்பான சந்தோஷத்தையே தந்திடல் வேண்டும் தான்  ! ஆனால் புல்வெளியினில் ஓடுவதற்குப் பதிலாய்ச் செக்காலையில் 'ஏலேலோ ஐலசா !!' என்று சுற்றிவரும் தலையெழுத்து வாய்த்து விடுமோ என்பதே எனது மன பிராந்தி...விஸ்கி எல்லாமே !! ஆனாலும் மாயாவியின் சுட்டுவிரல் தாக்குதலுக்கும், டேவிட்டின் கராத்தே வெட்டுக்கும், ஜானி நீரோவின் பூப்போட்ட  அண்ட்ராயரின் ஜாலத்துக்கும் ; ஸ்பைடரின் பஞ்சுமிட்டாய் வலைப்பின்னலுக்கும் - லார்கோ ; ஷெல்டன் ; கமான்சே ; டைகர் ; தோர்கல் என்று சமகால ஜாம்பவான்கள் செம சாத்து வாங்குவதை ஜீரணிக்கத் தான் திணறுகிறது ! "பிராங்கோ-பெல்ஜியமா ? இங்கிலாந்தா ?" என்றால் இன்னமும் பின்னதே கெலிக்கிறதே ! எண்டே அம்மே !! ஞான் என்ன செய்யும் ? 

எது எப்படியோ - மனமொரு குரங்கு என்பதை நிரூபிக்கவேணும் எனது புத்தி as always கடல் கடந்து தேடல்களைத் தொடர்ந்து கொண்டேயுள்ளது ! ரொம்ப நாளாய் ஒரு ஜேம்ஸ் பாண்ட் பாணியிலான அதிரடி ஆக்ஷன் நாயகர் நம்மிடமில்லையே என்ற ஆதங்கம் எனக்குண்டு.....(maybe உங்களுக்கும் ?!) ! ஒரு கனகச்சிதமானபுதியவர் இந்தத் தேடலுக்கொரு விடையாய் கண்ணில்பட - கூடையைப் போட்டு கோழியை அமுக்குவது போல் அமுக்கியுள்ளேன் மனுஷனை ! நேர் கோட்டுக் கதைகள்  ; நெளிவு சுளிவுகள் இருப்பதெல்லாமே நாயகரின்தோழிகளிடம் மாத்திரமே ; அசாத்திய சித்திரத் தரம், அட்டகாச வர்ணச் சேர்க்கை என்ற கலவையைப் பார்த்த பொழுது - சோப் தண்ணீரைப் பார்த்த ரின் டின் கேனின் பாய்ச்சல் தான் முதல் reaction ஆகிறது ! "இருக்கும் நாயகர்களுக்கே ஸ்லாட் போதவில்லை - இந்த அழகில் புதுசாய் ஆள் சேர்ப்பானேன் ?" என்று என் மைண்ட் வாய்ஸ் மூக்கிலேயே குத்தினாலும் - "தக்காளி சட்னி பேஷ் ! " என்றுதான் துடைத்துக் கொள்ளத் தோன்றுகிறது ! இதுவொரு வரமா ? சாபமா ? - சத்தியமாய் பதில் தெரியவில்லை எனக்கு ! Anyways புதியவருக்கு 1 ஸ்லாட் உறுதி 2017-ல் !

Moving on - செப்டம்பரின் டெக்ஸ் சாகஸத்தின் புதிய பெயர் - "துரோகத்துக்கு முகமில்லை" ! போன பதிவில் நான் கொடுத்த முன்னுரைகள் நிஜமென்பதை - பசித்து, களைத்து, துவண்டு, சலித்துக் கிடக்கும் நம் இரவுக்கழுகாரைப் பார்க்கும் போதுபுரிந்து கொள்வீர்கள் ! ஒரு இரும்பு மனிதனுக்கும் இன்னொருபக்கம் உண்டென்பதை உணர்த்தும் கதையிது !! இதோ அட்டைப்படத்தின் first look - திருத்தங்கள் ; மாற்றங்கள் ; முன்னேற்றங்கள் நடந்தேறும் பணிக்கு மத்தியினில் ! கதையின் ஒரிஜினல் அட்டைப்பட டிசைன் இதுவே - ஆனால் சற்றே கூடுதல் விபரங்களோடு நமது ஓவியரைக் கொண்டு இதனை புதிதாய்ப் போட்டுள்ளோம் ! இயன்றளவு இதனை மெருகேற்றிடுவோம் அச்சுக்குச் செல்லும் முன்பாக ! 

ஆகஸ்டின் "திகிலூட்டும் நிமிடங்கள்" அட்டைப்பட நேர்த்தியில் சமீபநாட்களில் உங்களின் பாராட்டுக்களைப் பெற்றதொரு மறுபதிப்பு ! அந்த ஜோரிலேயே  - இம்மாத மறுபதிப்புக்கும் ஒரு அழகான டிசைன் தயார் செய்துள்ளோம் - மாலையப்பனின் உபயத்தில் ! பற்றாக்குறைக்கு இந்த ஜானி நீரோ சாகசம் இதுவரைக்கும் மறுபதிப்பு கண்டதில்லை என்று ஞாபகம் எனக்கு ! So நிறைய நினைவுக் கிளறல்களும், மலரும் நிலைகளும் செப்டெம்பரில் காத்துள்ளதாய் பட்சி சொல்கிறது ! இதோ அந்த ராப்பருமே !!  

விற்பனை - புத்தகக் கையிருப்பு - புது அட்டவணை - விலையேற்றம் - கதை விமர்சனங்கள் - முன்செல்லும் பாதை என கடந்த பதிவுகளில் நிறைய முக்கிய விஷயங்களை பிட் பிட்டாய் நான் போட்டிருக்க - இங்கும், நமது மின்னஞ்சல் பெட்டியிலும் நிறையவே சிந்தனைச் சிதறல்கள் உங்களிடமிருந்து  ! இம்முறை அவையெல்லாமே ரொம்பவே பாசிட்டிவான ;  மெய்யான அக்கறையுடனான கருத்துக்கள் என்பது நிஜமாக உள்ளத்தைக் குளிர்வித்தன ! சொல்லப்பட்ட விஷயங்களும் நயமாய், கவனத்தைக் கோரும் விதமாய் அமைந்திருக்க  - தொடரும் நாட்களில் அதுபற்றியதொரு பொதுக் கருத்துக் பரிமாற்றம் இங்கு நடைபெறுமென்றே எனக்குத் தோன்றுகிறது ! மொத்தம் 11 ஈ-மெயில்கள் வந்திருந்த போதிலும் அவற்றுள் 2 ஒரு குட்டியான rider சகிதம் வந்திருந்தன - " உங்களது அடுத்த பதிவினில் எனது இந்தக் கருத்தை ஒரு பின்னூட்டமாய் இட உத்தேசித்துள்ளேன்" என்று ! So நான் மௌனம் காத்தாலும் - அவை இரண்டுமே  உங்கள் பரிசீலனைகளுக்கு இங்கே முன்வைக்கப்படலாம் என்பது நிச்சயம் ! So நண்பர்களின் அந்த எண்ணவோட்டத்தைப் பற்றி மேலோட்டமாய் மட்டும்இங்கே எழுதுகிறேன் ! 

முதல் மின்னஞ்சல் - நமது தற்போதையக் கையிருப்பு மலை  பற்றியும் ; அதன் சிரமங்களை மட்டுப்படுத்திட - தொடரும் 2 ஆண்டுகளுக்கு மட்டுமாவது வெளியீடுகளின் பிரிண்ட் ரன்னைக் குறைப்பதைக் காட்டிலும், வெளியீடுகளின் எண்ணிக்கையை குறைவாக்கிக் கொள்ளல் பற்றியது ! 

இரண்டாவது மின்னஞ்சலோ  - "ஒரு மேடு பள்ளமான சாலைப் பகுதியினில் சவாரி நடந்தேறும் இந்தத் தருணத்தில் சூப்பர் 6 தேவை தானா ? அதனிடத்தில் அப்படியே சந்தா Z -ஐ அமல்படுத்திடலாமே - customized imprints ஆக ; குறைவான பிரிண்ட் ரன்னோடு ? புதுக் கதைக் களங்களுக்கு இதுதானே  வாகான சந்தர்ப்பம் ? MMS நீங்கலாய் மற்ற  மறுபதிப்புகளைக் கொஞ்சம் கொஞ்சமாய் சந்தா D -க்குள்ளே கொண்டு சேர்த்திடலாமே ? " என்ற suggestion சகிதம் !!

இங்கும் FB-யிலும் ரெகுலராய்ப் பதிவிடும் நண்பரது எண்ணங்களுள்ளன  முதல் மின்னஞ்சலில்  !! தனிப்பட்ட முறையில் எனக்கு அடிக்கடி ஈ-மெயில் வாயிலாக கருத்துக்கள் சொல்லிடும்  இன்னொரு சீனியர் நண்பரின் எண்ண வெளிப்பாடே # 2 ! இவையிரண்டுமே சீக்கிரமே (இங்கே) உங்கள் முன்வைக்கப்படும் வாய்ப்புகள் பிரகாசம்  ! என்னுள் இரண்டுக்குமே பதில்கள் உள்ளன என்ற போதிலும் - இங்கே அவை இடம்பெறவிருப்பதால் உங்களின் பரவலான அபிப்பிராயங்களையும் தெரிந்து கொண்டு அதனையொட்டிப் பேசிடலாமென்று நினைத்தேன் ! எனது ஒரே வேண்டுகோள் - இரு சிந்தனைகளுக்குமே படபடப்பான பதில்களை போட்டுத் தாக்காது - ஆரோக்கியமானதொரு brainstorming session ஆக இதனை ஆக்கிட உதவிடுங்களேன் என்பது மட்டுமே ! 

"யோசனை கேட்பானேன் - நீ உன்பாட்டுக்கு மட்டுமே வண்டி ஓட்டப் போவது உறுதி என்றான பின்னே ?" என்ற எண்ணங்கள் உங்கள் உதடுகளில் தொங்கி கொண்டிருக்கலாம்தான் ! ஆனால் இந்த விஷயங்களை நான் கட்டவிழ்ப்பதன் பிரதான நோக்கமே - சொன்னபடிக்கே நண்பர்கள் தத்தம் எண்ணங்களை இங்கே பதிவிட்டால் - காரமான reactions வேண்டாமே என்று வேண்டுவதன் பொருட்டே  !  எனக்குள் இந்த 2 விஷயங்களிலும் ஒரு சீரான சிந்தனையோட்டம் உள்ளது  ; and உங்களின் பரவலான சிந்தனைகளுக்கேற்ப அந்தக் கருத்துக்களை மெருகூட்டிக் கொள்வேன் ! So திடும் மாற்றத்துக்கு அச்சாரமிடும் சமாச்சாரமாகவோ  ; "குழம்பிப் போயுள்ளேன்" என்ற ரீதியிலான அனற்றலாகவோ பார்த்திடாது இருப்பின் மகிழ்வேன் ! மாறாக Public  ஆகவிருக்கும் நண்பர்களின் சில private சிந்தனைகள் மீதான ஒரு கலந்தாய்வுக்கு உங்களை வரவேற்கும் முயற்சி மட்டுமே இது  ! சாந்தமாய் உரையாடுவோமா புலவர்களே ? 

Bet my bottom buck this is going to be a lively Sunday ! Bye for now !!

ஒரு விடுமுறைநாள் hello !

நண்பர்களே,

வணக்கமும்....சுதந்திர தின வாழ்த்துக்களும் ! வரிசையாய் 3 நாட்கள் லீவு அமைவதெல்லாம் ஷெரீப் டாக்புல்லின் தலையில் முடி முளைப்பதை விடவும் அபூர்வம் என்பதால் - கிடைத்துள்ள இந்த பிரேக்கை  ஆளுக்கொருவிதமாய் ஜமாய்த்து வருவீர்களென்பது நிச்சயம். Enjoy !! தலைமாட்டிற்கருகே கொஞ்சம் காமிக்ஸை அடுக்கிக் கொண்டு இதில் கொஞ்சம்...அதில் மிச்சம் என சாவகாசமாகப் புரட்டிக் கொண்டிருப்பின் - நீங்கள் தனியாக இல்லை சாமியோவ் ! சமீபத்து இதழ்களை அடுக்கி வைத்துக்கொண்டு அவற்றுக்குள் பார்வைகளை ஓடவிட்டுக் கொண்டே - 2017-ன் அட்டவணை பற்றியும் மெதுமெதுவாய் யோசிக்க இன்றைய பொழுது உபயோகப்படுகிறது எனக்கும் ! 2017-ன் ப்ளூபிரிண்ட் ஓரிரு மாதங்கள் முன்பாகவே ஒரு rough shape  பெற்றிருக்க, நியாயப்படி இந்நேரம் final touches தந்து கொண்டிருக்க வேண்டும் நாம் ! ஆனால் சமீப மாதங்களது விற்பனைக் காற்றுகள் வீசும் திசை சற்றே குழப்பத்தைக் கொணர்ந்துள்ளது ! பற்றாக்குறைக்கு ஈரோடு விழாவிலுமே அதே trend தொடர்வதாய் நம்மவர்கள் சொல்ல - கொஞ்சமே கொஞ்சமாய் அவகாசம் எடுத்துக் கொண்டு கதைத் தேர்வுகளை மீண்டுமொருமுறை முறைத்து முறைத்துப் பார்க்க வேண்டியுள்ளது ! 

ஆண்டின் விற்பனைகளை   மூன்று + 1/2 compartment-களாகப் பார்த்திடுகிறோம் - இப்போதெல்லாம் ! 

முதலும், பிரதானமானதும் : சந்தா முன்பதிவுகள் ! 

இரண்டாவது - ரொக்கமோ ; கடனோ - ஏதோவொரு வடிவில் நடந்திடும் ஏஜெண்ட்கள் சேல்ஸ் !

மூன்றாவது : சென்னை + ஈரோடு + (சென்றாண்டு முதலாய் )மதுரை + திருப்பூர் & maybe வேறேதேனும் சிறுநகர புத்தக விழா விற்பனைகள் ! 

இது தவிர்த்து - ஒரு முழு compartment என்று சொல்ல முடியாவிடினும் - at least பாதிக்குத் தகுதி பெற்றிடும் ஆன்லைன் விற்பனைகள் !

இந்த மூன்றரை விற்பனை வாய்ப்புகளுள்ளும் சேதாரம் இன்றிப் பாஸாகும் நாயகர்கள் யாரென்பது நமக்கு மனப்பாடமாய்த் தெரியும் ; so அதையே சொல்லி போர் அடிக்கப் போவதில்லை ! மாறாக - ஒவ்வொரு விற்பனைப் பிரிவின் பிரேத்யேகத்தன்மையைப் பற்றிக் கொஞ்சம் பகிர்ந்திடுகிறேனே ! 

முதல் பிரிவானது தான்- நமது சகலவித முயற்சிகளையும் முழுமனதாக ஆதரித்து, நிறை குறைகளை சுட்டிக் காட்டும் ஒன்று ! So மாயாவி முதல், மார்ட்டின் வரை இங்கே புதுமாப்பிள்ளைக்குரிய மரியாதையினை ஈட்டி வருகின்றனர் ! No problems whatsoever in here !!

பிரிவு நம்பர் 2-ல் கொஞ்சம் pick & choose தலைக்காட்டுகிறது ! அந்தந்த ஏரியாக்களில் கடைகளில் வாங்குவோரிடம் ஒரு buying pattern உள்ளது  போல்படுகிறது ! "கார்ட்டூன் மட்டும்"  ; " டெக்ஸ் மட்டும் " ; "மறுபதிப்பு மட்டும்" என்று ஏதேனும் சில அளவுகோல்களைக் கொண்டிருப்பதால் - அவர்களது முன்தீர்மானிக்கப்பட்ட சாய்ஸ்கள் நீங்கலாக மற்ற இதழ்கள் பக்கமாய்ப் பார்வைகளை ஜாஸ்தி ஓட விடுவதில்லை என்று புரிகிறது. அம்மாத இதழினுள் ஏதேனும் "பிரமாதம் " என்று இங்கோ ; FB-யிலோ விமர்சிக்கப்பட்டால் மட்டும் அந்த நேரம், அந்த புக்கைக் கூடுதலாய் வாங்கிடுகிறார்கள். நமது வலைப்பதிவில் இவர்கள் அனைவரும் active பங்கெடுக்கிறார்களோ - இல்லையோ ; வரிவிடாது  படிக்கவும், இங்குள்ள நடப்புகளை உள்வாங்கிக்கொள்ளவும் தவறுவதில்லை ! நம் ஏஜெண்ட்கள் ஒருத்தர் பாக்கியின்றிச் சொல்லும் ஒரே விஷயம் : "நெட்டில் நீங்க எழுதிட்டா மறுநாள் எங்களது கடை போன்கள் பிஸியாகிடும் " என்பதே !! So உங்கள் சிந்தனைப் பந்தல்கள் ; கதை விமர்சனங்கள் ; ஊக்கங்கள் எப்போதையும்விட இப்போது அதிக முக்கியத்துவம் பெற்றிடுகின்றன guys !!! 

விற்பனைப் பிரிவு # 3 - அதாவது புத்தகவிழா சேல்ஸ் மாத்திரம் எந்தவொரு கட்டுக்குள்ளும் அடைபடாது - எப்போதுமே ஊருக்கு ஊர் ; வேளைக்கு வேளை மாறுபடும் ! சென்னை - சகலத்தையும் ஏற்றுக்கொள்ளும் ரசனை கொண்டிருக்கும் ; ஈரோடு - ஒரு லெவல் குறைவாய் - கார்ட்டூன்களுக்கு கூடுதல் ஆதரவு தரும்விதமாய் ! சென்றாண்டில் மதுரையிலோ - லார்கோவும், டெக்ஸும் ஹிட்ஸ் ! ஆக - ஒரு பரவலான ; சகலத்தையும் பரிசீலிக்கும் வித விற்பனைகளை புத்தக விழாக்களில் பார்த்திட இயலும் - அதாவது இப்போது வரையிலும் ! ஈரோட்டில் இம்முறை நமக்கு கிட்டியுள்ளது கொஞ்சம் குழப்பமான செய்திகளே  - because விற்பனை நம்பர்கள் மோசமில்லை எனினும் - பரவலான விற்பனையின்றி - குறிப்பிட்ட ரகங்களிலேயே சேல்ஸ் நிலைகொண்டிருந்துள்ளது ! ஒற்றை நிகழ்வினைக்கொண்டு ஒரு தடாலடித்  தீர்ப்பெழுதப் போவதில்லை நாம் - ஆனால் கமான்சே ; பவுன்சர் ; ஷெல்டன் ; ரோஜர் ; மாடஸ்டி ; ஜானி ஆகியோரின் ஈரோட்டு விற்பனை நம்பர்கள் ஒற்றை  இலக்கத்தில் உள்ளதுதான் லேசாக நெருடுகிறது ! மறுபதிப்புகள் எல்லாமுமே விற்பனையாகியுள்ளன ; டெக்ஸ் சொல்லவே வேண்டாம் !! So கணிக்க இயலா விற்பனைப் பிரிவு இந்த # 3 !! 

இறுதிப் பிரிவானது தான் ரொம்பவே volatile ஆனதும் கூட ! இங்கு எல்லாமும் விற்கும் ; சமயத்துக்கு எதுவும் விற்காதும் போகும் ! புதிதாய் ஆன்லைனில் நம்மைக்    காணநேரிடும் நண்பர்கள் பட்டையைக் கிளப்பி பத்தாயிரத்துக்கு ஆர்டர் செய்வதும் உண்டு ; ஒரேயொரு மாயாவி பிரதியினை வாங்குவதும் உண்டு ! ஆனால் நமது பதிவுகளில்  அரங்கேறும் விவாதங்களும், விமர்சனங்களும் நேரடியாய் பிரதிபலிப்பது ஆன்லைன் தடத்தில் தானென்பேன் ! இம்மாத ஈரோட்டில் இத்தாலி + மார்ட்டின் + பென்னி இதழ்கள் வாங்கியுள்ள பாராட்டுக்கள் அப்படியே அங்கே விற்பனைகளாய் உருமாற்றம் கண்டுள்ளன ! ஏப்ரல் முதல் தொய்வாகவே காட்சிதந்த நமது ஆன்லைன் தளம் கடந்த ஒரு வாரத்தில் அக்னிப் பிழம்பாய்க் காட்சி தருகிறது - thanks to you guys !! விமர்சனங்களோ ; இல்லையோ - ரெகுலராய் மாதாமாதம் எல்லா இதழ்களையும் ஆன்லைனில் வாங்கிடுவோரும் நிறையவே உண்டு ; but நம் பதிவுகளின் தட்ப வெப்பநிலைக்கேற்ப இதழ்கள் வாங்கிடுவோரின் எண்ணிக்கையும்  அதிகமென்பேன் ! 

ஆக இந்த 3+1/2 விற்பனை வாயில்களுக்குள்ளும் நெருடல்களின்றிப் புகுந்திட யார் யார் சரிப்படுவார்கள் என்ற ஆராய்ச்சியினை புதிதாயொருமுறை துவக்கியுள்ளேன் ! ஆனால் இந்த விடுமுறை தினத்தின் சேதி அதுவல்ல !! நமக்கு ஒரு அற்புதமான விற்பனை பிரதிநிதியாய்ச் செயல்பட்டுவரும் உங்கள் உற்சாகங்களும், உத்வேகமுடனான விமர்சனங்களும் மாதாமாதம் தொடர்ந்திடும் பட்சத்தில் - விளிம்பு நிலையில் நிற்கும் சிலபல வாசகர்கள் சந்தோஷமாய் இதழ்களை  வாங்கும் தீர்மானத்தினுள் குதித்திடுவர் ! இம்மாத மார்ட்டின் ஒரு கிளாசிக் example !! வீறு கொண்டு இதனை அலசி ஆராய்ந்து சிலாகித்திட நீங்கள் முனைந்திருக்கா பட்சத்தில் - 'ஆ...மார்ட்டினா ?' என்ற தயக்கத்தோடே நிறைய பேர் விலகிப் போயிருக்கக் கூடும் ! இப்போதோ - மார்டினுக்குக் கூடுதல் slot தருவது பற்றிச் சிந்திக்கும் லெவலில் நிற்கிறோம் ! பென்னியும் கூட உங்கள் அரவணைப்பில் இத்தனை அன்பைப் பெற்றிராது போயிருந்தால் - ஓரஞ்சாரத்தில் ஓடும் ஒரு துக்கடா பார்ட்டியாகிப் போயிருக்கக்கூடும் ! ஆனால் இன்றோ பொடியன் நம்மிடையே ஒரு நிரந்தரனாகிடும் நிலையைத் தொட்டிருக்கிறான் ! உங்கள் எண்ணங்களின், எழுத்துக்களின் ஆற்றலின் வெளிப்பாடே இது guys ! You have the power to Make or Break !!! 

தொடர்ந்து எழுதுங்கள்..இங்கோ..வேறெங்கோ ! என்னைத் தலையில் தட்டி வைக்கும் நோக்கமிருப்பினும்கூட - கதைகளுக்கென  கொஞ்சம் நேரம் கொடுத்துவிட்டுத் தான் தொடருங்களேன் உங்கள் இலட்சியத்தில்  ?! மாதந்தோறும் நான் இங்கேயேதானிருப்பேன் - உங்களுக்கு தோசை வார்க்கும் முதுகோடு ; ஆனால் அந்தந்த மாதத்து இதழ்களுக்கும் கவனம் தர உங்கள் நேரங்களை ஒதுக்கினீர்களெனில் - காமிக்ஸ் எனும் செடிக்கு உங்களது சிறுபங்களிப்பைச் செய்த சந்தோஷம் உங்களதாகுமல்லவா ?   உங்களுக்குப் பிடிக்காதே போகும் கதைகளாயிருப்பினும் கூட  - அவற்றுக்குத் தரும் சலவையின் வீரியத்தை சற்றே மட்டுப்படுத்திக் கொள்ளின், தட்டுத் தடுமாறியேனும் அவை கரைசேர்ந்துவிடும் ! ஒரு இதழினைக் கல்லறைக்கு அனுப்பித்தான் உங்களது நகைச்சுவையுணர்வுகளை சகாக்களுக்குப் பறைசாற்றிட வேண்டுமென்பதில்லையே ; likes சேகரித்தாக வேண்டுமென்பதில்லையே ??! அதற்காக குறைபாடுகளை சுட்டிக் காட்ட வேண்டாமென்று சொல்லவில்லை ! தவறுகள் சுட்டிக் காட்டப்பட வேண்டியது சர்வ காலமும் அவசியமே ! விமர்சிக்கும் போது அதனில் தட்டுப்படும் சிற்சிறு பாசிட்டிவ்களையும் இணைத்துக் கொள்ளுங்களேன் என்பது தான் எனது வேண்டுகோள் !

உங்கள் உரிமை.....உங்கள் குரல்....ஆக்கபூர்வமாய்த் தொடர்ந்திடுங்களேன் guys !!! சந்தோஷத்தையும், உற்சாகத்தையும், அந்த feel good factor -ஐயும் இன்று போல் என்றும் தொடரச் செய்யுங்கள் ப்ளீஸ் ! அதனை பிராணவாயுவாகக் கருதிடுவோர் என்னைவிடவும்  நிறைய பேர் அரூபமாய் உள்ளனர் நம்மைச்  சுற்றிலும்  !!  Bye for now !! 

P.S : மீண்டுமொரு நெய் மைஸூர்பாகு டப்பா வென்றிடவொரு வாய்ப்பு guys - இதற்கொரு caption ப்ளீஸ் ? 

உயரே ஒரு இரவுக் கழுகு !

நண்பர்களே,

            

வணக்கம். ஒரு உப பதிவுக்கு இன்னொரு “உ.ப.” போட வேண்டிய சூழல் எழுந்ததாய் எனக்குச் சுத்தமாய் நினைவில்லை இத்தனை கால இந்த வலைப்பதிவு வரலாற்றில் (?!) !! ஏழு நாட்களுக்குள் 700+ பின்னூட்டங்கள் எனும் சேதி போதாதா சென்ற வாரத்து ஈரோட்டு விழாவின் தாக்கத்தை பிடரியில் அறைந்து சொல்லிட ?! 2012 முதலாகவே நண்பர்கள் சந்திப்பென்பது புத்தக அரங்குகளின் நடைபாதைகளிலும், மரத்தடிகளிலும், கார் பார்க்கிங்களிலும் தொடர்ந்து வருமொரு நிகழ்வே என்றாலும் - இம்முறை நாம் பார்த்த உற்சாக லெவல்கள் முற்றிலுமே வேறொரு தளத்தில் என்பேன் ! எண்ணிக்கையின் மிகுதி ஒருபுறமிருக்க- ஒவ்வொருவரிடமும் கொப்பளித்த அந்த அசாத்திய எனர்ஜியை உள்வாங்கிக் கொள்ள இரும்புக்கை மாயாவி மட்டும் அந்த அறையில் இருந்திருக்கும் பட்சத்தில் மனுஷன் அடுத்த ஒரு வருஷத்துக்கு அரூபமாகவே தான் சுற்றித் திரிய வேண்டி வந்திருக்கும் ! 

“சனிக்கிழமை விற்பனை நமக்குப் பிரமாதம்” என்று நான் எழுதியிருக்க, அக்கறையோடு அதைக் கேட்டுத் தெரிந்து, ஊர்ஜிதப்படுத்திக் கொண்டு,,அதனைத் தமது வெற்றியாய் ஆரவாரமாய்க் கொண்டாடிய அன்பு ; “போட்டோ எடுக்கும் போது என் தோளில் கை போடவில்லை சார்; மறுபடியும் எடுப்போமே?” என்று உரிமையோடு கேட்கும் பாங்கு; கோழிக் கீச்சலாய் நான் போட்டுத் தரும் கையெழுத்திற்கு முன்னுரையாய் ‘என்றும் அன்புடன்‘ என்ற வார்த்தைகள் விடபட்டுப் போயிருப்பின் அவற்றையும் சேர்த்துத் தரக் கோரிடும் ஆவல் ; பணி நிமித்தமாய்த் தன்னால் வர முடியாது போயினும், அதுவரையிலும் வீட்டை விட்டுத் தனியாக வெளியூர் சென்ற பரிச்சயமேயில்லா மனைவியையும், சிறு குழந்தைகளையும் அனுப்பி விட்டு, ‘விழா எப்படி நடந்தது சார்?‘ என்று வினவிய நேசம் ; நண்பர்களாக உணவருந்தச் சென்ற வேளையில், கோவாவிலிருந்து காரிலேயே வந்த அசதியையும் காட்டிக் கொள்ளாது,  சத்தமின்றி பில்லைப் பறிமுதல் செய்து மொத்தமாய்ப் பணத்தைப் பட்டுவாடா செய்து விட்டுப் புன்னகையோடு நிற்கும் அமைதி ; முதல்முறையாக நண்பர்களை சந்திக்க வரும் போதே கை நிறைய பண்டங்கள் ; டி-ஷர்ட்கள் என்று கொணர்ந்த ஈரம் ; எங்கெங்கிருந்தோ பஸ்களையும், இரயில்களையும், விமானங்களையும் பிடித்துக் கொண்டு ஈரோட்டை எட்டிப் பிடித்த தீவிரம் ; இந்த விழாவிற்கென ஒரு மாதமாய் பாடாய்ப்பட்ட மாயாவியும், சேந்தம்பட்டிக் குழுவினரும்  ; தயக்கங்களைத் தூக்கிப் போட்டுவிட்டு நட்புக்களை சந்திக்க வந்த மகளிரணி ; இன்னும் அடுக்கிக் கொண்டே போகலாம் உங்களின் உற்சாக உத்வேகங்களை நாங்கள் தரிசிக்க முடிந்த தருணங்களை ! இந்தப் பிரவாகத்தின் பின்னணிக் காரணங்கள் ஏகமாய் இருந்தாலும் அதன் மையத்திலிருப்பதோ நமது இரவுக் கழுகாரின் விஸ்வரூபம் தானென்பேன் ! போன வருடம் ‘வில்லரின் விஸ்வரூபம்‘ என்று லேசாக ஒரு கோட்டைக் கிழித்துக் காட்டியபோது- இத்தனை சீக்கிரத்தில், இத்தனை வீரியத்தில், இத்தனை பிரம்மாண்டத்தில் அது நிஜமாகிடுமென்று நான் எதிர்பார்த்திடவில்லை ! 2016-ன் ஆரம்பம் முதலாகவே மாதம் ஏதோவொரு விலையில் டெக்ஸ் ஆஜராகிக் கொண்டே வர- ஏப்ரலின் மெகா சைஸ் ‘தலையில்லாப் போராளி‘ நமது Tex காதலை  இன்னுமொரு உச்சத்திற்கு இட்டுச் சென்றுள்ளதாகவே நான் நினைக்கிறேன் ! And வண்ணத்தில் “பழிவாங்கும் புயல்” பின்தொடர- ‘TEX மேனியா‘ உச்சத்திலிருப்பதை ஈரோட்டில் கண்கூடாய்ப் பார்க்க முடிந்தது!

போனெல்லியில் எப்போதுமே நமது சன்னமான விற்பனைகளையும் ஒரு வாஞ்சையோடே அணுகுவார்கள் என்பதால் - அவர்களது தலைமகன் இங்கு ஈட்டிடும் வெற்றிகளை நான் அவ்வப்போது அவர்களோடு பகிர்ந்து கொள்வது நடைமுறை ! So சமீபத்தைய நமது ஈரோட்டுச் சந்திப்பு பற்றியும், நண்பர்களின் அதகள உற்சாகத்தையும் பற்றி, ஈரோட்டிலிருந்து திரும்பிய பின்னே ஏதோவொரு சமயம் தெரியப்படுத்தியிருந்தேன் ! சரி, தகவல் சொல்லி விட்டோமென்று நான் வேலைகளுக்குள் மூழ்கிட- பத்தாவது நிமிடமே பதில் வந்திருந்தது! “Wow... great news! Please share photos if you have any” என்று ! நம்மவர்கள் தான் ஃபோட்டோக்களைப் பிரித்து மேய்ந்திருந்தார்களே - அதனிலிருந்து ஒரு நாலைந்தை அனுப்பி வைத்தேன் மறுநொடியே ! அடுத்த பத்தாவது நிமிடம் வந்தது இன்னொரு மின்னஞ்சல் : “Awesome seeing such interest in our creations & Comics in general ! Mind if we share them on our pages?” என்று !! தலைகால் புரியவில்லை எனக்கு - உற்சாகத்தில் ! ஏதோவொரு மரியாதைக்காக ஃபோட்டோக்கள் கேட்டிருப்பார்கள் ; அதனால் அள்ளியடித்து ஒரு கத்தையைத் தூக்கி அனுப்புவானேன் ? என்று சுருக்கமான எண்ணிக்கையில் தான் முதலில் அனுப்பியிருந்தேன் ! அவர்களது சுவாரஸ்யத்தைப் பார்த்த மறுகணமே ஒரு 30 / 35 ஃபோட்டோக்களைத் தட்டி விட்டேன்! அவற்றைப் பார்த்தவுடன் நிஜமாகவே திகைத்துப் போய் விட்டார்கள் என்று தான் சொல்ல வேண்டும் ! ‘இது எந்த ஊரில் வைத்து நடந்தது ?‘ எந்தத் தேதியில் ? ; ‘விருந்தினர் யார் ?‘; எவ்வளவு வாசகர்கள் வந்திருந்தார்கள் ? மேடையில் உன்னருகே அமர்ந்திருப்போர் யார் ?  ‘புத்தக விழாவில் விற்பனை நிறைவாக உள்ளதா?‘ என்று சராமாரியாகக் கேள்விகள் தொடர்ந்தன ! அவற்றுள் ஒன்று தான் நம் நண்பர்களது டி-ஷர்ட்கள் பற்றிய கேள்வியும் ! :-))

கறுப்பு டி-ஷர்ட்; நெஞ்சில் டெக்ஸின் முகம் என்ற யூனிபார்மில் black cats பாணியில் நின்ற நண்பர்கள் ஃபோட்டோவையும், நமது சந்தா டி-ஷர்ட்களை அணிந்தவாறு நண்பர்கள் போஸ் கொடுத்திருந்த ஃபோட்டோவையும் பார்த்து விட்டு- ‘ஏதேனும் dress code மாதிரியா இது ? என்று ஆர்வமாய்க் கேட்டிருந்தனர் ! கறுப்பு டி-ஷர்ட்கள் நண்பர்கள் ஆர்வமிகுதியில் தாமாகவே தயாரித்துக் கொண்டது ; இதோ- இன்னொரு நண்பர் வட்டம் தாமாகத் தயாரித்த வெள்ளையில் TEX உருவம் பதிந்த டி-shirt & அந்த சாம்பல் வர்ணத்திலானது நமது சந்தா அன்பளிப்பு என்பதை விளக்கினேன் ! ‘அட... இத்தனை மெனக்கெடலா Tex-ன் பொருட்டு?‘ என்று குதூகலித்தவர்களிடம் அன்றைய நண்பர்கள் சந்திப்பின் முக்காலே மூன்றுவீசப் பொழுது டெக்சைச் சுற்றியே தான் சுழன்றடித்ததை விளக்கினேன் ! எல்லையில்லாப் பூரிப்பு அவர்களுக்கு ! (ஆகஸ்ட்) கோடை விடுமுறைகளில் உள்ள அவர்களது FB பக்க நிர்வாகி பணிக்குத் திரும்பிய பிற்பாடு ஃபோட்டோக்களையும்; நிகழ்வின் விபரங்களையும் அவரோடு பகிர்ந்திடுவதாக உறுதி சொல்லினர் ! மனுஷன் மனது வைத்தால் நாம் அவர்களது FB பக்கத்தில் கலக்கிடும் நாள் தொலைவிலில்லை!

இத்தனையும் அரங்கேறிய மறுநாளைக்கு நமது பதிவில் இந்த டி-ஷர்ட் சர்ச்சையை எழுப்பியொரு காரமான பின்னூட்டத்தைப் பார்த்த போது எனக்குத் துளி கூட சங்கடம் நேராது போனது ஏனென்பது அந்நேரம் நண்பர்களுக்குத் தெரிந்திருக்க வாய்ப்பில்லை தான் ! படைப்பாளிகளின் கண்களில் பட்டது அந்த வெளிப்படையான காமிக்ஸ் காதல் தான் என்பதை அங்கேயே, அப்போதே போட்டுடைக்க எனக்கு ரெண்டு நிமிடங்கள் போதுமானதாக இருந்திருக்கும்  ! ஆனால் ஒரு பின்னூட்டக் குவியலுக்குள் படைப்பாளிகளின் மகிழ்ச்சியைப் பத்தோடு பதினொன்றாய் பகிர்ந்து செல்ல எனக்கு மனதில்லை என்பதால் அங்கே நான் வாய் திறக்கவில்லை ! இதில் தொடர்ந்த இன்னொரு சம்பவம் தான் highlight-ம் கூட! 

மறுநாள் காலை போனெல்லியின் ஏஜெண்ட்களிடமிருந்து ஒரு க்ரூப் இ-மெயில் வந்திருந்தது- 2017-ல் போனெல்லியின் பிரதான நாயகர்கள் அத்தனை பேர்களது டி-ஷர்ட்களும் தயாரிக்க உள்ளதாகவும் ; விலை இந்த ரேஞ்சுகளில் இருக்குமென்றும் ; உங்கள் மார்கெட்டிற்குத் தேவையெனில் முன்பதிவு செய்து கொள்ளலாமென்றும் - விவரித்து! அதில் இருந்த விலைகள் நம்மூர் காசுக்கு ரொம்பவே costly என்பதால் அதன் பொருட்டு நான் அதிகம் கவனம் தரவில்லை. ஆனால் முந்தைய தினத்து நமது டி-ஷர்ட் விவாதங்களும்,  படைப்பாளிகளுடனான ஈ-மெயில் பரிமாற்றத்தின் போது நமது நண்பர்கள் அணிந்திருந்த டி-ஷர்ட்கள் எல்லாமே செமையாக இருந்தாக அவர்கள் குறிப்பிட்டிருந்தது எனக்கு ‘பட்‘டென்று நினைவுக்கு வந்தது. உடனடியாக ஒரு மெயில் எழுதத் தொடங்கினேன் - நமது திருப்பூர் நகர டி-ஷர்ட் உற்பத்தித் தொழில் பற்றியும் ; பல்வேறு சர்வதேச அசுரர்களுக்கு இங்கே டி-ஷர்ட்கள் தயாரிக்கப்படுவது பற்றியும் ; ஏற்றுமதி ஆவது பற்றியும் !! ஐரோப்பியத் தரத்தில்; நிச்சயமாய், நியாயமான விலைகளில் நம்மவர்களால் சப்ளை செய்திட முடியும் ; ஆர்வமிருப்பின் சம்பந்தப்பட்ட நண்பர்களோடு நேரடியாய்த் தொடர்பு ஏற்படுத்தித் தரலாமென்றும் நான் போனெல்லிக்கு எழுதிட- அன்றைக்கே எனது பரிந்துரையை சம்பந்தப்பட்ட அவர்களது டிபார்ட்மெண்டுக்கு அனுப்பி விட்டு; அவர்களும் பரிசீலனை செய்து சொல்வதாகப் பதில் போட்டுள்ளார்கள் ! So நேரம் கூடி வரும் பட்சத்தில்- உலகெங்கிலுமுள்ள டெக்ஸ் ரசிகர்களின் நெஞ்சங்களிலும் நமது ‘தல‘யை அலங்கரிக்கச் செய்யும் வாய்ப்பும் நம் நண்பர்கள் பக்கம் வந்திட வாய்ப்புள்ளது ! (சிபிஜி... வாய்ப்பு அமைந்தால் ‘சலோ இத்தாலி‘ தான் !) இது உறுதியாகிடும் பட்சம் தவிர முந்திரிக்கொட்டையாய் இந்தத் தருணத்திலேயே  நான் விஷயத்தைப் போட்டுடைத்திருக்க மாட்டேன்தான்  - ஆனால் சில நேரங்களில் நண்பர்களின் பொறுமையின்மையைச் சமாளிக்க ஓட்டைவாய் அவதாரமும் அவசியமாகிறதே   ! இந்தச் சன்னமான கல்லுக்கு மாங்காயும் கிட்டலாம்  ; பூஜ்யமும் கிட்டலாம் தான் - ஆனால் உலக அரங்கில் திருப்பூருக்குள்ள நற்பெயர் இந்தக் கனவு நனவாகிட உதவிடலாம் என்ற நம்பிக்கையில் முயற்சித்துள்ளேன். !! Fingers crossed !!

So- இந்த மூன்றெழுத்து மந்திரப் பெயரின் புண்ணியத்தில் நமது நாட்கள் சுவாரஸ்யத்தின் உச்சத்தில் தொடர்கின்றன ! புத்தக விழாவிலிருந்து கிட்டிடும் சேதிகளோ அதே விஷயத்தை இன்னமுமே அழுத்தம் திருத்தமாய்ப் பதிவிடுகின்றன ! நமது முகவர்களும், மார்கெட்டிங் பிரிவினரும் சொல்லும் சேதி நண்பர்களின் ஒரு சாராரை கலங்கச் செய்யக்கூடும் என்பதால் நான் விலாவாரியாக விவரிக்காமல் மேலோட்டமாய் மட்டுமே விஷயத்தைப் பகிர்ந்திடுகிறேனே?!

- மாயாவி

- டெக்ஸ் வில்லர்

- இதர மறுபதிப்புகள்

- லக்கி லூக்

- ஆகஸ்ட் மாத இதழ்கள்

- முத்து மினி காமிக்ஸ்

மேலே பட்டியலிலுள்ள இதழ்கள் தவிர, பாக்கி எல்லாமே ஈரோட்டுக்கு விருந்துக்குச் சென்றுள்ள மாப்பிள்ளைகளாய் மாத்திரமே தொடர்கிறார்களாம் நம் ஸ்டாலில் ! இங்கிருந்து புறப்பட்ட இதே எண்ணிக்கையில் விழா முடிவுறும் வேளையிலும் தொடர்ந்தார்களெனில் - நிச்சயமாய் அது பற்றி அலசும் அவசியம் நமக்கு எழுந்திடும் ! எதிர்ப்படும் வில்லன்களுக்கு மாத்திரமின்றி - ‘தேமே‘ என்று ஓரஞ்சாரங்களில் பராக்குப் பார்த்து நிற்கும் நம்மாட்களுக்கும் இரவுக்கழுகாரின் கும்மாங்குத்து ஸ்பெஷல் ட்ரீட்மெண்ட்டிலிருந்து பாதுகாப்பளிக்க என்ன செய்வதென்பது யோசிக்க வேண்டும் போல்படுகிறது!

ஈரோட்டின் உத்வேகத்தோடே செப்டம்பரின் டெக்ஸ் சாகஸத்திற்குள் நுழைந்தால் இதுவொரு புது அனுபவமாகத் தெரிகிறது. கருணையானந்தம் அவர்கள் எழுதிய கதையிது ; ஆனால் வழக்கம் போல நமது ரேஞ்சர்களின் portions களை rewrite செய்து கொண்டிருக்கிறேன் நான் ! எழுதும் போது பேனாவே அதகளம் செய்யத் தயாராகும் கதைக்களமிது. டெக்ஸின் துவக்க ஓவியரான காலெபினி பணியாற்றியுள்ள கதையிது... அனல் பறக்கிறது பக்கத்துக்குப் பக்கம் ! And for a change - கதையின் மேஜர் பகுதிக்கு டெக்ஸும், டைகர் ஜாக்குமே ஜோடியாய்ப் பயணிக்கிறார்கள் ! அடிபட்டு, உதைபட்டு, பசியோடு, தாகத்தோடு, தோல்வியில் துவண்ட சவரம் காணா முகத்தோடு, அவநம்பிக்கையில் தத்தளிக்கும் டெக்ஸை இதுவரையிலும் நாம் யாரும் பார்த்திருக்கிறோமா guys ? சத்தியமாய் எனக்கு அத்தகைய நினைவில்லை ; ஆனால் இங்கேயோ அந்தக் கொடுமை சகலத்தையும் காணவிருக்கிறோம் ! நேற்றிரவு இந்த வேலைக்குள் நுழைந்தவன் ஒரே தம்மில் 170 பக்கங்களைக் கடந்திருக்கிறேனெனில் - கதையின் சுவாரஸ்யத்தைப் புரிந்து கொள்ளலாம் தானே ?!! சமீப மாதங்களில் 100+ பக்க டெக்ஸ் சிறு கதைகளாகப் பார்த்து விட்டு இப்போது ஒரு முழுநீள 220 பக்க சாகஸத்துக்குள் புகுவது அட்டகாசமாக உள்ளது ! And இதற்கென நமது ஓவியர் தயார் செய்திருக்கும் அட்டைப்படமும் பிரமாதமாய் வந்துள்ளதென்பேன் ! டெக்ஸின் ‘ஹிட் லிஸ்டில்‘ இன்னுமொரு மைல்கல் தயார் என்றே சொல்லத் தோன்றுகிறது ! தலைப்பில் மாற்றமிருக்கும் என்பது மட்டுமே ஒரு கூடுதல் தகவல் இங்கே ! 

இந்தக் கதை மாத்திரமின்றி 2016-க்கெனக் காத்திருக்கும் மீத TEX சாகஸங்களும் அனல் பிரவாகங்களே ! டிசம்பரின் முதல் வாரத்தில் கொஞ்சமே கொஞ்சமாய் நேரம் எடுத்துக் கொண்டு உங்கள் முன்னே நடப்பாண்டின் அத்தனை TEX இதழ்களையும் அடுக்கி வைத்துக் கொண்டு- கண்மூடி ஜனவரி முதல் டிசம்பர் வரையிலான இந்த வன்மேற்குப் பயணத்தை உருவகப்படுத்திப் பார்க்க முனையுங்களேன் - நிச்சயமாய் புரியும் நாம் கடந்துள்ள நாட்களின் வீரியம் ! And காத்திருக்கும் 2017-க்கென கதைத் தேர்வுகளுக்குள் புகுந்தால் தலைசுற்றாத குறை தான் - எதைத் தவிர்ப்பதென்று ! ஒரு புதுவித அனுபவத்திற்குத் தயாராகிக் கொண்டான பின்னே - கதைத் தேர்வில் கோட்டை விட்டுவிடக் கூடாதேயென்ற பயம் எப்போதையும் விட இப்போது அதிகமுள்ளது ! ஆண்டவா- எத்தனை விதவிதமான உணர்வுகளுக்கு இந்த மஞ்சள் சட்டைக்காரர் (நண்பர் ராட்ஜா அல்ல!!!) நம்மை ஆட்படுத்துகிறார்!

சாமான்ய மானிடர்களைப் பற்றிப் பேசிடலாமெனும் போது- துள்ளலாய் கண்முன்னே நிற்பது நமது ஜுனியர் பயில்வான் பென்னி தான் ! நிஜத்தைச் சொல்வதானால் - ஸ்மர்ஃப் நிறுவனத்தோடு ஒப்பந்தம் போடப் புறப்பட்ட போது எனக்கு இந்த அரை நிஜார் பார்ட்டி மீது அத்தனை அபிமானமில்லை தான் ! இது ரொம்பவே juvenile ஆக இருக்குமென்று எனக்குத் தோன்றியது. அவர்களது அலுவலகத்திலிருந்து ஏகமாய் சாம்பிள்களை அள்ளிக் கொண்டு வந்திருந்த போது- பென்னியின் முதல் சாகஸத்தின் ஆங்கிலப் பதிப்பும் அதில் கலந்திருந்தது. ஜென்வால் என்ற சிறுகிராமம் ஸ்மர்ஃப் அலுவலகத்தின் இருப்பிடம். அங்கிருந்து பிரஸ்ஸல்ஸ் நகருக்குத் திரும்பிட இரு இடங்களில் ரயில் மாறியாக வேண்டும். கையிலிருந்த கத்தைப் புத்தகங்களைப் புரட்டிக் கொண்டேயிருந்தவன் பென்னியைப் படிக்கத் துவங்க, நான் இறங்க வேண்டிய முதல் changeover ஸ்டேஷனை தவற விட்டுவிட்டேன் ! அடித்துப் பிடித்து அடுத்த பக்கம் போய் அடுத்த ரயிலைப் பிடித்து நான் ரூம் போய்ச் சேர நிறைய நேரமாகி விட்டது. அந்தத் துக்கடா ஸ்டேஷனில் குந்திக் கொண்டே படித்த போது பென்னி சுவாரஸ்யமாகப்பட- `worth a try` என்று தீர்மானித்தேன். அதன் பின்னர் அவசரம் அவசரமாய் அவர்களுக்கொரு மின்னஞ்சலைத் தட்டி விட்டு ஸ்மர்ஃப்ஸ் + பென்னிக்கும் சேர்த்து கான்டிராக்ட் போட்டு விடும்படித் தகவல் சொன்னேன் ! ஆனாலும் - இம்மாதம் நீங்கள் எல்லோருமே ‘பென்னிக்கு ஜே‘ சொல்லும் வரையிலும் எனக்குள் சின்னதாய் ஒரு பயமிருந்தது வாஸ்தவமே ! மானத்தைக் காப்பாற்றிய பென்னிக்கு என் சார்பிலும் ஒரு ‘ஜே‘! இங்கே நான் குறிப்பிட விரும்பும் 2 விஷயங்களும் உள்ளன!

முதலாவது சமாச்சாரம் - இந்தக் கதைத் தொடருக்கு மாத்திரம் ஆங்கிலப்பதிப்பு இல்லாது போயிருப்பின்- பிரெஞ்சு ஒரிஜினல்களை மட்டும் படம் பார்த்து ஒரு உருப்படியான முடிவுக்கு வந்திருப்பதில் சிரமப்பட்டிருப்பேன் என்பதே ! என்ன தான் நமது மொழிபெயர்ப்பாளரைக் கொண்டு கதைச்சுருக்கமோ ; மொழிபெயர்ப்போ ஏற்பாடு செய்திருப்பினும், ஒரு முழுமையான வாசிப்பின் இறுதியில் கிடைக்கும் தெளிவு அந்த நுனிப்புல் மேய்ச்சலில் கிடைத்திருக்குமாவென்பது கேள்விக்குறியே!

இரண்டாவது சமாச்சாரம்- இதைப் படிக்கும் போதே- “ஆங்கில மொழிபெயர்ப்பை CINEBOOK-லிருந்தோ Papercutz- லிருந்தோ நீ சுட்டால் தப்பில்லையாக்கும் ?” என்று எழக் காத்திருக்கும் கேள்விகள் பற்றி ! இது குறித்து ஏற்கனவே எப்போதோ நமது பதிவில் எழுதியுள்ளதாக நினைவுள்ளது ; ஆனால் லோடு லோடான பதிவுக் குமிக்குள் அதை ஞாபகத்தில் கொண்டிருப்பது சிரமமே என்பதால் இந்த மறு ஒலிபரப்பு ! ஒவ்வொரு Copyright நோட்டீஸின் பின்னணியிலும் “All rights reserved” என்று எழுதியிருப்பதன் முழுப் பொருளினை M.V. சார் போன்ற வக்கீல்கள் அல்லாத நம் போன்றோர்கள் அறிந்திருக்க வாய்ப்பில்லை. ஒரு ஆக்கத்தின்... படைப்பின் உரிமையாளருக்கு - அதனைச் சுற்றி உருவாக்கப்படும் சகல புனைவுகள் மீதும் ; மறு ஆக்கங்கள் மீதும் முதல் உரிமையுண்டு என்பதே அதன் முழுமையான அர்த்தம் - at least பதிப்பகத் துறையினில் !! நாம் போடும் அட்டைப்பட டிசைன்களிலிருந்து; நமது தமிழ் மொழிபெயர்ப்பு முதல் – போடும் விளம்பர பேன்னர் வரை அத்தனையின் முதல் உரிமைதாரர் படைப்பாளிகளே ! நமது தமிழாக்கங்களை அவர்கள் இஷ்டப்பட்டால் எவ்விதத்திலும் பயன்படுத்திக் கொள்ளலாம் ; நமது டிசைன்களைக் கோரிக்கையின்றியே எடுத்துக் கொள்ளலாம் !  ஆக CINEBOOK நிறுவனம் ஆங்கில மொழிபெயர்ப்பினைச் செய்திருப்பினும்- அதன் பிரயோக உரிமை படைப்பாளிகளுக்கு பூரணமாய் உண்டு ! அதனை நமக்கு மாத்திரமின்றி - சீனாவுக்கு; இந்தோனேஷியாவுக்கு; துருக்கிக்கு என மற்ற மொழிப் பதிப்பகங்களுக்கும் பகிர்வது சர்வசாதாரணமான நிகழ்வு. CINEBOOK புத்தகங்களில் அச்சிடப்பட்டுள்ள மொழிபெயர்ப்பு சார்ந்த Copyright notice- ன் நோக்கமோ- ஆங்கிலத்தில் அதை அப்படியே காப்பியடிக்க யாருக்கும் உரிமையில்லை என்பதை நிலைநாட்டுவதற்கே ! ஆங்கிலத்தில் அதனை பயன்படுத்தும் உரிமை அவர்களிடம் மட்டுமே என்று பதிவிட ! இது தான் யதார்த்தம் !  நமது டெக்ஸ் வில்லர் மொழிபெயர்ப்புகளின் ஆங்கில வார்ப்புகளின் ஏகம் - போனெல்லியில் உள்ளதென்பதும் கொசுறுச் செய்தி ! அவை பிறமொழிப் பதிப்பகங்களுக்கு வழங்கப்பட்டால் அதனை நாமொரு பெருமையாகத் தான் கருதுவோம் ! ஆகையால் CINEBOOK மொழிபெயர்ப்பில் வடை சுட்டு காசு மிச்சப்படுத்தும் அவசியமில்லை - simply becos குறி பார்த்துக் காத்திருந்து கிழவி கண்ணசரும் நேரத்தில் வடையை ஆட்டையைப் போடத் தேவையே கிடையாது ; இந்த வடைகள்  முற்றிலும் இலவசம் இங்கே !! பலநேரங்களில் நமக்கு அனுப்பப்படுபவை CINEBOOK கோப்புக்களே என்பதால் இங்கே ஆட்டையையோ ; ஒட்டையையோ போட யாருக்கும் முகாந்திரங்களில்லை ! 

 இம்மாதத்து அடுத்த surprise package மார்ட்டின் தான் ! இவரது கதைகள் என்றைக்குமே இலகுவான களங்களல்ல என்பதை அறிவோம் ! And இம்முறை வரலாறும், அறிவியலும், கைகோர்த்து ஒரு கலக்குக் கலக்குவதை நீங்கள் மௌனமாய் ரசித்திருப்பது ஆகஸ்டின் அட்டகாசமென்பேன் ! தொடரும் ஆண்டிற்கு அட்டவணை கிட்டத்தட்ட தயாரென்ற நிலையில் - மார்ட்டினுக்குக் கூடுதலாயொரு slot தந்திட வழியுள்ளதாவென்று தலையைச் சொரிந்து கொண்டிருக்கிறேன் ! வழி காட்ட வேண்டுமய்யா ராத்திரிப் பருந்தாரே !

இன்னொரு பக்கம் செப்டெம்பரின் வண்ண இதழுக்கென நமது ஞாபக மறதிக்காரரும் தயாராகிவருகிறார் ! இதோ அவரது அட்டைப்பட முதல்பார்வை ! இதுவரையிலான கதை பாகங்களிலிருந்து ஒரு முன்கதைச் சுருக்கத்தைத் தயார் செய்து அனுப்பிடக் கோரியிருந்தேன் - நண்பர்களுடனான அரட்டையின்  போது ! 'டாண்' என்று அனுப்பி புண்ணியம் சேர்த்துக் கொண்டுள்ளவர் நமது மேச்சேரிக்கார ஆர்டின் காதலர் !! நன்றிகள் நண்பரே - எனது நாக்கார் துள்ளிக் குதிக்கிறார் சந்தோஷத்தில் !! 

Before I wind off -  சின்னதொரு கொசுறுச்  சேதி ! நேற்றைய தினம் ஈரோட்டுக்கு சிறப்பு விருந்தினராய் வந்திருந்த நடிகர்  / இயக்குனர் கே.பாக்யராஜ்  சார் - நமது ஸ்டாலில் 6 இதழ்கள் வாங்கியிருக்கிறார் ! அவை என்னவாக இருக்குமென்று யூகித்துத் தான் சொல்லுங்களேன் ?! See you around ! Bye for now! 

P.S : ஆகஸ்ட் விமர்சனங்களைத்  தொடர்ந்திடலாமே ?

கோவை புத்தக விழா இந்தாண்டு விமரிசையாக இருக்கும் போல் தெரிகிறது. பெரிய பதிப்பகங்கள் பலவும் பங்கேற்க இறுதி நேரத்தில் ஆர்வம் காட்டியுள்ளன என்பதால் ஸ்டால்களின்   எண்ணிக்கை 260 வரை இருந்திடும் !

நமது ஸ்டால் நம்பர் : 181 !

விழாவின் தேதிகள் : ஆகஸ்ட் 19-28 வரையில் !

கொடிசியா அரங்கினில் ! 

தயாராகிக் கொள்ளுங்கள் கோவைப் பகுதியின் நண்பர்களே !! 

ஒரு உற்சாக உ.ப!!

நண்பர்களே,

வணக்கம். ஈரோட்டுக்கு இத்தாலியும் குற்றாலமும் ஒன்றன்பின் ஒன்றாய் விசிட் அடித்ததன் தாக்கத்திலிருந்து நீங்கள் மீண்டு விட்டீர்களோ - இல்லையோ - நானின்னும் வெளிவந்தபாடில்லை ! பற்றாக்குறைக்கு தொண்டையில் கிச்சு-கிச்சு என்ற ஆரம்பத்தோடு திருவாளர் 'ஜல்ப்பும்' கைகோர்த்துக் கொள்ள - ஒரு பூனையாரின் பாணியில் நானும் மல்லாக்கப்படுத்துக் கொண்டே லேப்டாப்பில் உள்ள உங்களது போட்டோக்களை பார்த்துக் கொண்டே பொழுதைக் கழித்தும் ; களித்தும் வருகிறேன் ! என்ன ஒரே வித்தியாசம் - இங்கே ஆப்பிள் ஜூஸ் ; ஆரஞ்சு ஜூஸ் என்பதற்குப் பதிலாக - சுக்கு காப்பியும் ; கஷாயமும் தலைமாட்டில் !! போட்டோக்களை பார்க்கப் பார்க்க - "ஐயோடா சாமி...இந்த நண்பரைக் கவனிக்க முடியாது போனதே ; அவரோடு பேச இயலாது போனதே !" என்ற ஆதங்கங்கள் சரமாரியாக தலைதூக்குகின்றன !! அடுத்தமுறை இன்னும் சற்றே பெரியதொரு இடத்தில அணிசேரும் வாய்ப்புக் கிட்டின் - வாசலில் நின்றே வருகை தரும் ஒவ்வொரு நண்பரின் கையையும் குலுக்கிய தீருவது என்று நினைத்துக் கொண்டேன் ! நேரம் ஓடிய சுவடே தெரியாது போனதால் விழாவின் முடிவின் போதாவது அவர்களைச் சந்தித்துப் பேசுவதற்கும் வழி இன்றிப் போனது ! So அத்தனை தூரம் வந்திருந்தும், நம்மால் அவர்களைச் சரியாய் வரவேற்க இயலாது போனதுதான் நெருடலை தந்தது ! And இறுதியிலான அந்த க்ரூப் போட்டோ செஷன் னின் போது நமது சிறப்பு விருந்தினர் சொக்கன் சாரையும் இணைத்துக் கொள்ள முடியாது போனதும் ஒரு வருத்தமே ! அடுத்தமுறை இரு தவறுகளையுமே சரி செய்திட இயன்றதைச் செய்வோம் ! 

உப பதிவு என்பதால் இங்கேயே நீட்டி முளக்காது - இம்மாத இதழ்கள் பற்றிய விமர்சனம் மீதாய்ப் பார்வைகளை ஓடிஏ விடுகிறேன் - சுருக்கமாய் ! இம்முறை அதனிலொரு welcome மாற்றத்தைக் கவனிக்கிறேன் ! ஒவ்வொருமுறையும் இதழ்கள் கிட்டிய பின்னே - சக நண்பர்களுக்கும் புக் கிடைத்து அவர்கள் வாசிக்கும்வரையிலும் விமர்சனங்கள் பதிவிடாது மௌனம் காத்து வந்தீர்கள் ! அதுவே முதல் வாரத்தைக் கபளீகரம் செய்திடும் போது - இதழ்களும் கொஞ்சம் பழசாகிப் போய் விட்டதொரு உணர்வு தலைதூக்க - மேலோட்டமான அலசல்கள் மட்டுமே நடைபெறுவது சமீபத்து வாடிக்கையாக இருந்து வந்துள்ளது ! ஆனால் இம்முறையோ - "கதையும் விவரிக்கப்பட்டுள்ளது" என்ற spoiler alert சகிதம் விமர்சனங்கள் சுடச் சுடப் பதிவாவது பிரமாதமாக உள்ளது ! "நன்கு ; சுமார் ; மொக்கை" என ரேட்டிங் ஏதுவாயிருப்பினும், அதனைச் சுடச் சுட ரசிக்கும் போது - அதுவரை புத்தகங்களை மேஜைகளில் துயில் பயிலச் செய்திருக்கக் கூடிய நண்பர்களும்  அவசரம் அவசரமாய் வாசிக்கவொரு தூண்டுதலை தந்தது போலிருக்குமல்லவா ? And  இதன் இன்னொரு பரிமாணம் நமக்கு உதவுவது - ஆன்லைன் விற்பனைகளில் ! சாவகாசமாய் வாங்கி கொள்வோமே என்றிருக்கக் கூடிய வாசகர்கள்கூட இம்முறை நமது ஆன்லைன் ஸ்டோரைச் சுறுசுறுப்பாய் அணுகுவதை பார்த்திட முடிகிறது ! So - "ஸ்பாய்லர் அலெர்ட்" சகிதம் கதைகளின் கிளைமாக்ஸை விவரிக்கா விதமாய் உங்கள் எண்ணங்களை எழுதுங்களேன் !

இம்மாத ஆரம்பத்து அதிரடி ஈரோட்டில் இத்தாலி என்றாலும் -  பென்னியும், மார்ட்டினும் பின்னிப் பெடல் எடுப்பதை புரிய முடிகிறது ! மகிழ்ச்சி !!!!  Carry on guys - மாலையில் சந்திக்கிறேன் ! Bye for now !

ஈரோட்டில் குற்றாலம் !!!!

நண்பர்களே,

வணக்கம். "திக்குமுக்காடிப் போனோம்" ; "திணறிப் போனோம்" ; "ஆனந்த அதிர்ச்சி " ; "திண்டாடிப் போனோம்" ்இத்யாதி..இத்யாதி என்ற cliche-கள் தேய்ந்து துரும்பாகிப் போனவை என்று தெரிந்தாலும் அவற்றை விடாப்பிடியாய் ஏன் பயன்படுத்திடுகிறோம் என்பதன் அர்த்தத்தை நேற்றைய பொழுது (சனி) நன்றாகவே வெளிச்சமிட்டுக் காட்டியது ! ஈரோடு புத்தக  விழா ; ஈரோட்டில் இத்தாலி ஸ்பெஷல் வெளியீடு ; புத்தக ரிலீஸ் ; சிறப்பு விருந்தினராக பிரபல எழுத்தாளர் சொக்கன் அவர்கள் ; வாசகர் சந்திப்பு என்று ஆர்வத்தைத் தூண்டும் விஷயங்கள் நிறையவே காத்திருந்ததால் இந்த வாரம் முழுவதுமே எனக்குள் ஒரு சன்னமான பரபரப்பு ! And தயாரிப்புப் பணிகளின் இறுதிக்கட்டம் எனும் பொழுது சின்னச் சின்ன நகாசு வேலைகளில் கூட குறை நேர்ந்திடக் கூடாதே என்ற பயத்தோடு எங்களது டீமை 'உண்டு-இல்லை' எனப் பதம் பார்த்துக் கொண்டிருந்தேன் ! திடீரென்று மார்ட்டின் கதைக்கு dust ஜாக்கெட் என்ற மகா சிந்தனை உதயமாகி - மறுபடியும் ஒரு ராப்பர் டிசைன் பண்ணச்  சொன்ன போது - 'மனுஷனுக்கு எந்த தர்காவில் மந்திரித்துத் தாயத்துக் கட்டணுமோ ?' என்ற சந்தேகம்  மைதீனுக்கும் , நமது டிசைன் பெண்களுக்கும் நிச்சயம் எழுந்திருக்கும் !  ஆனால் மறு பேச்சின்றி பணிகள் அரங்கேற - வியாழனன்று எல்லாப் பிரதிகளும் என் கைகளில் இருந்தன ! சில இதழ்கள் முதல்பார்வையிலேயே வசீகரிக்கும் ; ஒரு சிலவோ பார்க்கப் பார்க்கத்தான் பிடிக்கத் துவங்கும். "ஈரோட்டில் இத்தாலி" - "கண்டதும் காதல்" ரகத்தில் இருப்பதாய் எனக்குத் தோன்றினாலும் - உங்களது கண்ணோட்டம் எவ்விதமிருக்குமோ என்றதொரு  சிறு சந்தேகமும் இல்லாதில்லை ! So இதழ்கள் அனைத்தோடும் ஈரோட்டுக்கு வெள்ளி நள்ளிரவு வந்து சேர்ந்தோம் - படபடப்பும், நம்பிக்கையும் சரிசமக் கலவையாய் உள்ளுக்குள் குடியிருக்க ! 

புத்தக விழா நடக்கும் VOC பார்க்கின் வாசலில் உள்ள ஹோட்டலில் சென்றாண்டை விடவும் சற்றே பெரியதொரு அரங்கை நண்பர்கள் புக் செய்திருக்க, 'பாதி அரங்கு காலியாகத் தானிருக்கப் போகிறது' என்ற பயமும் எனக்குள் இருந்தது. அதே போல 11-00 மணி முதல் 2-00 மணி வரை காலை ஏற்பாடு செய்திடச் சொன்னவனே நான்தான் என்றாலும், அப்புறமாய்    - "மூன்று மணி நேரங்களை   தொய்வின்றிக் கடத்துவது சாத்தியமாகுமா ? ; ஒவ்வொரு வாரமும் ஒப்பிக்கும் அதே விஷயங்களை மறு ஒலிபரப்பு செய்தது போலாகிவிடக் கூடாதே !" என்ற உதறல் உள்ளுக்குள் ரொம்பவே இருந்தது. பற்றாக்குறைக்கு,  நமது நண்பர்கள் சந்திப்பினில்  முதல்முறையாக ஒரு பிரபலமும் கலந்து கொள்வதாக ஏற்பாடாகி இருக்க - அவர்முன்னே சொதப்பி வைத்திடக்கூடாதே என்ற பேஸ்மெண்ட் பெல்லி டான்சும் இன்னொரு பக்கம் சேர்ந்து கொண்டது !

எப்போதும் இல்லாத நடைமுறையாய் -  என்ன பேசுவது ? நண்பர்களை எவ்விதம் சுவாரஸ்யத்தைத் தொலையாது இருக்கச் செய்வது ? என்றெல்லாம் ஈரோடு வரும் வழியினில் கொஞ்சமாய் திட்டமிட்டிருந்தேன். So அந்தத் தெம்புடன் 10-45 சுமாருக்கு அரங்குக்குள் எட்டிப் பார்த்தால் - நண்பர்கள் ஒரு முப்பது-நாற்பது பேர் அதற்குள் ஆஜராகி உற்சாகத்தின் மறுவடிவாய் கலக்கிக் கொண்டிருக்க -  திரு. சொக்கன் அவர்களோ , மெல்லிய புன்சிரிப்போடு கவனித்துக் கொண்டிருந்தார். 11 மணி சுமாருக்கு சீனியர் எடிட்டர் அரங்குக்கு வந்த நேரம் அரங்கின் ஜனத் தொகை 80+ !! நாற்காலிகள் பற்றுமா ? உட்கார இடமிருக்குமா ? என்ற சந்தேகம் சீரியஸாகத் தோன்றத் தொடங்கியது எனக்கு - நொடிக்கு நொடி உள்ளே அணி வகுக்கும் நண்பர்களின் திரளை பார்த்த பொழுது !  பதினொன்றேகாலுக்கு மேடைக்கு சொக்கன் சாரை அழைத்து அமரச் செய்த போது சென்சுவரி போட்டிருந்தது வருகையாளர் பட்டியல் ! நல்ல நாளில் 10 நண்பர்கள் ஒன்று திரண்டாலே அந்த இடம் அதகளமாகிடும் ; 100 பேர் குழுமிடும் பட்சத்தில் அந்த அதிர்வு எவ்விதமிருக்குமென்று விவரிக்கவும் வேண்டுமா ? ஒன்று மட்டும் நிச்சயம் - அந்த அறைக்கு நேற்று இரும்புக்கை மாயாவி என்ட்ரி தந்திருந்தால் - எந்த மின்சார துவாரத்துக்குள்ளும் விரல் திணிக்கும் அவசியமே இல்லாது - அரூபமாகிப் போயிருப்பார் ! நண்பர்களிடையே ஜுரமாய் பாய்ந்து கொண்டிருந்த உற்சாகத்தின் வோல்டேஜ் அத்தனை ஜாஸ்தி ! சிறப்பு விருந்தினரை நண்பர்கள் கெளரவிக்க, மைக்கை கையில் ஒப்படைத்து விட்டார்கள் !

எழுதி வைத்துக் கொண்டு பேசுவதெல்லாம் நமக்கு என்றைக்குமே ஒத்து வராச் சமாச்சாரம் என்பதால் - மெதுவாய் ; மனதில் பட்டதை பேச அரம்பித்த போதே எனக்குள்ளிருந்த பட படப்பு தணியத்   தொடங்கி இருந்தது ! நானே மைக்கைக் குத்தகைக்கு எடுத்திருக்கப் போவதில்லை - நண்பர்களையும் பேசச் செய்ய வேண்டுமென்பதில் தீர்மானமாய் இருந்தது மாத்திரமின்றி - முதன்முறையாக சந்திக்கும் நிறைய புது நண்பர்களுக்கும்  அரங்கினில் அறிமுகமாகிக் கொள்ளும் வாய்ப்பைத்   தருவதே பொருத்தமாக இருக்கும் என்ற எண்ணம் மேலோங்கியது. So சொக்கன் சாரிலிருந்து துவங்கி அனைவருமே ஒரு சின்ன சுய அறிமுகம் செய்து கொள்ளும் விதமாய் மைக்கை ரவுண்டில் விட்டோம் ! மெலிதான தயக்கத்தோடு ஆரம்பித்த நண்பர்கள் நொடிக்கு நொடி உற்சாகம் கொப்பளிக்க தம்மை அறிமுகம் செய்து கொண்டதோடு - தங்கள் ஆர்வங்கள் ; ஆசைகள் ; எதிர்பார்ப்புகள் என்று குற்றாலமாய்க் கொட்டத் துவங்கினார்கள் ! முதன்முறையாக நேற்றைய சந்திப்பில் மகளிரணியும் ஆஜராகி இருந்தது ரொம்பவே ஒரு pleasant surprise  !! கோவையிலிருந்து "கடல்யாழ்" ரம்யா தனது தோழி விஷ்ணுப்ரியாவோடு வந்திருந்தது மாத்திரமின்றி - அவரையும் கூட ஒரு தீவிர TEX ரசிகையாய் மாற்றி இருந்தது செம highlight ! இருவருமே தயக்கமின்றிப் பேசியது நொடிப் பொழுதில்   நம் நண்பர்கள் அனைவருக்கும் கூடுதல் பூஸ்ட் தந்ததைக்  கண்கூடாய்ப்  பார்த்திட முடிந்தது ! இதை விட நண்பர் திருப்பூர் சிபிஜியின் புதல்வி நிகிதா லேசான தயக்கத்தோடு மைக்கைக் கையில் வாங்கிய பின்னே பேசிய அழகினை அரங்கமே ரசித்துப் பாராட்டியது ! நண்பர் கரூர் குணாவின் ஜுனியரும் மைக்கில் பேச - முதல்முறையாக நம் நண்பர்களுள் ஒரு இளம் தலைமுறையின் வருகையை உணர முடிந்தது ! திருப்பூரிலிருந்தும், தாராபுரத்திலிருந்தும் ஒரு இளைஞர் படையும் வந்திருந்தது - காமிக்ஸ் என்பது நம் நாட்களோடு காலாவதியாகிப் போகும் சமாச்சாரமல்ல என்பதை உணர்த்துவதை போல ! ஒவ்வொருவரும் மைக்கில் தங்கு தடையின்றிப் பேசிட - கிட்டத்தட்ட 1 மணி நேரம் ஓடியே தடமே தெரியவில்லை ! கடல் கடந்திருந்தாலும் இந்த காமிக்ஸ் தினத்தைத் தவற விடக்கூடாதென்ற ஆர்வத்தில் பங்கேற்று இருந்த நண்பர்களும் நேற்றைய பொழுதை தக தகக்கச் செய்ய உதவிய கூடுதல் காரணிகள்  என்பேன் ! பிரான்சிலிருந்து நண்பர்கள் ராட்ஜா   ; ஹாசன் ; அமெரிக்காவிலிருந்து நண்பர்கள் மகேந்திரன் பரமசிவம் ; R சரவணன் ; V கார்த்திகேயன் என்று இதுநாள் வரை ஐ.டி.களாய் மட்டுமே நமக்குத் பரிச்சயமாகியிருந்தவர்களை நேரில் பார்க்கும் பொழுது - காலமாய் பேசிப் பழகிய உணர்வே மேலோங்கியது ! பேசிய 90+ நண்பர்களின் சுவாசங்களை நிரப்பிக் கிடந்தது TEX >>>>TEX >>>>TEX என்ற ஒற்றைப் பெயரே ! நமது இரவுக் கழுகாரின்கீர்த்திக்கு புதிதாய் நான் அச்சாரம் போடத்   தேவையில்லைதான் ; ஆனால் நேற்றைக்கு அரங்கமே அந்தப் பெயரை உச்சரிப்பதை பார்த்த பொழுது புல்லரித்துப் போனது ! ஆனாலொரு ஆச்சர்ய highlight என்னவெனில் இளம் ரசிகர்களில் நிறைய பேர் கேப்டன் டைகரையும் அட்டகாசமாய் சிலாகித்தது தான் !!  மின்னும் மரணம் தொகுப்பையும் சரி ; அந்தக் கதையின் வீரியத்தையும் சரி நண்பர்கள் நினைவு கூர்ந்த தருணங்கள் ரொம்பவே ஸ்பெஷல் !! அது மட்டுமன்றி - இளம் வருகையாளர்கள் கிராபிக் நாவல் பற்றியும் ; sci -fi ரகக் கதைகள் பற்றியும் ரசித்துப் பேசியது என் கவனத்தைக் கோரியதொரு விஷயம் !!

தொடர்ந்த  ஒன்றரை மணி நேரத்தில் சொக்கன் சார் ; சீனியர் எடிட்டர் அப்புறம் மீண்டும்நண்பர்கள் என்று பேசிட - அரங்கம் முழுதும் காமிக்ஸ் வெள்ளம் கரைபுரண்டோடியது ! நம் சிறப்பு விருந்தினருக்கு பேச கூடுதலாய்  அவகாசம் வழங்க இயலாது போனது மாத்திரமே நேற்றைய காலையின் குறைபாடென்பென் ! குறைவான நேரமே  கிட்டிய  பொழுதும் அற்புதமாய்ப் பேசியவர் - க்ரீன் மேனர் கதைகள் பற்றி என்னிடம் தன்சந்தோஷத்தைப் பகிர்ந்து கொண்டார் ! 3 மணி நேரங்களை ஒப்பேற்றுவது எவ்விதமோ என்று தயங்கியதெல்லாம் அபத்தமென்று புரிந்தது மணி இரண்டான போது ! நண்பர்களுக்கென நான் தயார் செய்து கொண்டு வந்திருந்த "பரீட்சைப் பேப்பரை" வெளியே எடுக்கக் கூட அவகாசமின்றி கலைப் பொழுது பறந்தோடிப் போயிருந்தது !! அடித்துத் தாக்கிய போட்டோ படலம் துவங்கிட - யார் யாரது கேமராக்கள் எந்தத் திசையிலிருந்து பளீரிடுகின்றன என்பதே தெரியா விதமாய் கலக்கித் தள்ளிட - இரண்டரை மணிக்கு அரங்கிலிருந்து வெளியேறிய பொழுது யாருக்குமே கிளம்ப மனமில்லை என்பது புரிந்தது ! ஒரு அசாத்தியக் காலைப் பொழுது  கற்பனை செய்திரா ஒரு வெற்றியோடு நிறைவான மகிழ்ச்சி எனக்குள் பிரவாகமெடுத்துக் கொண்டிருந்தது ! பதிவின் ஆரம்ப வரிகளில் நான் குறிப்பிட்ட அந்த cliche க்கள் ஒன்று பாக்கியில்லாது எனக்குள் குதியாட்டம் போட்டதை நான் உணர்ந்த தருணமிது ! நண்பர்கள் ஒட்டு மொத்தமாய்க் குழுமி அதகளம் செய்து விட்ட சந்தோஷம் ஒருபுறமெனில் - வரும் நாட்களில் இத்தகைய சந்திப்புகள் மேலும் மேலும் high voltage சமாச்சாரங்களாகிடும் வாய்ப்புகளுக்கு இதுவொரு ஆரம்பப் புள்ளியே என்ற புரிதலும் ஜிவ்வென்ற உற்சாகத்தை ஊட்டியது !

அவகாசம் பற்றாது போய் விட, திடு திடுப்பென்று கூட்டத்தை நிறைவு செய்து கொள்ள வேண்டிப் போனதால் - நம் சிறப்பு விருந்தினருக்கோ ; ஏற்பாடுகளை தம் வீட்டு விசேஷம் போல் செய்திருந்த சேர்ந்தம்பட்டிக் குழுவினருக்கோ ; எங்கெங்கிருந்தோ இதற்கென மெனக்கெட்டு வந்திருந்த நண்பர்களுக்கோ நன்றி சொல்லிட எனக்கு நேரமிருக்கவில்லை ! அந்தத் தவறை சரி செய்துகொள்ள இந்தத் தருணத்தைப் பயன்படுத்திக் கொள்கிறேன் folks !! ஒரு கனவு நாளைக் கண்முன்னே நிஜமாக்கிக் காட்டி அளப்பரிய சாதனை செய்துள்ள உங்கள் ஒவ்வொருவருக்கும் எங்களால் "நன்றி" என்ற ஒற்றை வார்த்தையையும் ; வரும் நாட்களில் இன்னமும் உத்வேகத்தோடு   செயல்படுவோமென்ற உறுதியையும் மட்டுமே வழங்கிட இப்போதைக்கு முடிகின்றது ! இந்த நாளை மறக்க இயலா ஒன்றாய் மாற்றிய உங்களை எங்களுக்குத் தெரிந்த ஒரே விதத்தில் மகிழ்விக்க விரைவிலேயே ஒரு வழி தேடிப் பிடிப்பேன் என்பது உறுதி ! Take a bow guys...you have been massively awesome !!!!!!

PS : இன்னும் என்னென்னவோ எழுதிட எண்ணினாலும், நேற்றைய பொழுதின் உணர்வுகளை வார்த்தைகளுக்குள் கொணர திணறுகிறது ! So அந்த மின்சாரக் காலையை விவரிக்க நமது ஒளி ஓவியர்கள் போட்டுத் தாக்கிய போட்டோ மழை தான் சரிப்படும் ! அந்த போட்டோ  மழை இன்னும் சிறிது நேரத்தில் இங்கே துவங்கும் என்ற செய்தியோடு - இப்போதைக்கு கிளம்புகிறேன் !

12-00 சுமாருக்கு இன்று காலையும் நமது ஸ்டாலில்      ஆஜராகியிருப்பேன் ! And  நேற்றைய தினம் புத்தக விழாவில் விற்பனை அட்டகாசம் என்பது icing on the cake !! Simply superb day !!