கிரிக்கெட்...காமிக்ஸ்...கௌபாய்ஸ்....!

நண்பர்களே,

வணக்கம். இது கூட ஒரு விளையாட்டென்று யாராவது சொன்னால் மண்டை ஏற்றுக் கொள்ள மறுக்கின்றதே...! இதயம் தட தடக்க ; கடித்தது போக மீதமிருக்கும் நகத்தையும், விரலையும் வைத்துக் கொண்டு முடிந்ததை டைப் செய்கிறேன் !!  'ஏதேனும் ஒரு அதிசயம் நிகழ்ந்து எப்படியேனும் நமது அணி வெற்றி காண வேண்டுமே தெய்வமே !' என்ற நம் ஒவ்வொருவரின் பிரார்த்தனைகளும் பயனின்றிப் போக - 'இதுவும் கடந்து போகும்' என்றெல்லாம் தத்துவம் பேசிட இதயம் மறுக்கின்றது !! 

ஆனால் வெற்றியோ-தோல்வியோ - பூமி சுழன்றே தீர வேண்டும் ; காலை புலர்ந்தே ஆக வேண்டும் ; வழக்கம் போல் வயிறு பசிக்கவே செய்யும் ; கொத்தவால்சாவடியைக் கண்முன்னே கொணரும் முயற்சியில் "அந்த அலசல் - இந்த  அலசல்" என்ற பெயரில் வெள்ளையும், சொள்ளையுமாய் நிறையப் பேர் - உச்சஸ்தாயியில், ஏக சமயத்தில் அரற்றித் தள்ளுவதை டி-வி.க்களில் எப்போதும் போல்  பார்த்திடத் தான் போகிறோம் ; "இந்த வருஷம் வெயில் மண்டையைப் புளக்குதுலே பங்காளி  ?"  என்ற கேள்விகளை ஆங்காங்கே கேட்டுக் கொண்டே சிலபல கிலோ தர்பூசணிகளை  துவம்சம் செய்யத் தான் போகிறோம்..! So அந்தப் பட்டியலோடு - மாதத்தின் முதல் தேதியினை அறிவிக்கும் விதமாய் ஒரு டப்பாவோடு, கூரியர் நண்பர்கள் நாளைக் காலை உங்கள் இல்லங்களின் கதவுகளைத் தட்டப் போகும் வைபவத்தையும் சேர்த்துக் கொள்வோமா ? 

இன்று காலையே, சீக்கிரமாகவே உங்கள் சந்தாப் பிரதிகள் சகலமும் கூரியரிலும், பதிவுத் தபால்களிலும் பயணங்களைத் துவக்கி விட்டன என்பதால் நாளைய தினம் உங்கள் அனைவரின் கைகளிலும் நமது ஏப்ரல் இதழ்கள் குடியிருக்கப் போவது நிச்சயம் ! ஏகமாய் heavyweights நிறைந்த மாதம் இது என்பதோடு - முதல் முறையாக மெகா சைசில் நம் மெகா ஸ்டார் வலம் வரவிருக்கும் ஆல்பமும் இம்மாதப் பட்டியலில் சேர்த்தி என்பதால் - உங்களின் முதல் அபிப்பிராயங்களை ஆர்வமாய் எதிர்நோக்கிக் காத்திருப்போம் ! அது மட்டுமன்றி - 'தல'யின் இந்த ஸ்பெஷல் தருணத்தை காலத்துக்கும் நினைவில் நிலைக்கச் செய்யும் விதமாய் - SELFIE WITH டெக்ஸ்# என்ற பெயரோடு ஒரு க்ளிக் அனுப்புங்களேன் all ? அவற்றை நமது FB பக்கத்தில் வலையேற்றம் செய்வதோடு மட்டுமன்றி - இத்தாலிக்கும் அனுப்பி வைக்கலாம் ! இதோ என் சகோதரனின் குட்டீஸ்களின் கிளிக்கோடு ஆட்டத்தை ஆரம்பிக்கிறேன் !! (நீங்களும் இதற்கென இல்லத்துக் குட்டீஸ்களை நாடிட வேண்டுமென்றெல்லாம் இல்லை ; கையில் டெக்ஸ் சகிதம் உங்களையே ஒரு க்ளிக்கி அடித்தாலே போதுமே  ! )

And of course - இதழ்களின் தயாரிப்புத் தரங்கள் பற்றி  ;  முதல் பார்வையின் மதிப்பீடுகள் பற்றித் தெரிந்து கொள்ள எப்போதையும் இட இப்போது கூடுதல் ஆர்வத்துடன் தேவுடா காத்துக் கிடப்போம் ! So நாளைய பொழுது சுவாரஸ்யமான பொழுதாய் அமைய வேண்டுமென்ற வேண்டுதலோடு புறப்படுகிறேன் guys ! ஞாயிறு காலை புதிய பதிவோடு உங்களை சந்திக்கிறேன் ! And இயன்றால் ஞாயிறு காலை 10-12 -ல் இம்மாத இதழ்களுள் லார்கோவையோ ; டெக்சையோ  அலசும் வேலையைக் கையில் எடுத்துக் கொள்வோமா ? Do let me know please !

புறப்படும் முன்பாய் - இதோ ஸ்பைடர் caption போட்டியின் வெற்றி பெறும் என்ட்ரி ! சிலபல தீவிர ஸ்பைடர் ரசிகர்களின் கொலைவெறிக்கு ஆளாகிட எனக்குத் துணைக்கு இம்முறை சிக்கியிருப்பது ஈரோட்டுப் பூனையார் ! வாழ்த்துக்கள் நண்பரே ! 

Artwork : Podiyan.  Caption : ERODE Vijay

P.S : இம்மாதத்து ஆன்லைன் விற்பனை லிஸ்டிங் : http://lioncomics.in/monthly-packs/20794-april-2016-pack.html

ஒரு வி.பி.ப. !

நண்பர்களே,

            

வணக்கம். ஏப்ரலின் நாயகர்கள் அனைவரும் தத்தம் கூரியர் பயணங்களைத் துவக்க ஆயத்தமாகி வருகிறார்கள் !! பைண்டிங் பணிகள் முடிந்த கையோடு டப்பாக்களுள் அடைக்கலமாகி ஏப்ரல் முதல் தேதியன்று உங்கள் இல்லங்களைத் தட்டி நிற்பார்கள்! So இந்த வார இறுதியினை  நமது ஐரோப்பிய விருந்தாளிகளுக்காகக் கொஞ்சம் ஒதுக்கிடலாமா ? கடல் கடந்து வந்திருக்கும் இந்தக் கோடீஸ்வரரும், வுட்சிடியின் நீதிக் காவலர்களும், இத்தாலியின் ஆதர்ஷ புத்திரர்களும் ; மின்சாரத்தை டிபனாக்கிடும் இரும்புக்கரத்தாரும் உங்களது ஏப்ரலை அழகாய்த் துவக்கி வைக்கும் ஆர்வத்தில் இருப்பர் என்பது நிச்சயம்! And இம்மாதம் முதற்கொண்டு மாதத்தின் மையப் பகுதியின் ஒரு ஞாயிறு காலையை அந்தந்த மாதத்து இதழ்களின் review-க்கென ஒதுக்கிப் பார்ப்போமா? உங்களுக்குத் தோதானதொரு நேரத்திற்கு நானும் ஆன்லைன் வந்து விட்டேனெனில் இதழ்களை Surf excel போட்டு சலவை செய்து அலசிப் பார்த்திடலாமே? What say all? Maybe காலை 10-12 ? 

ஏப்ரல் இதழ்களுள் புது வரவுகள் மூன்றுக்கும் ஏகமாய் ஏற்கனவே பில்டப்கள் கொடுத்து விட்டபடியால் – எஞ்சி நிற்கும் நமது evergreen மாயாவிகாருவின் அட்டைப்படத்தை மாத்திரமே உங்களுக்கு காட்டும் வேலை பாக்கியுள்ளது! இதோ- ஒரிஜினலின் அதே டிசைன் – துளியும் மாற்றமின்றி! 

முத்து காமிக்ஸின் இதழ் # 3 ஆக வெளிவந்த இந்த சாகஸத்திற்கு இது எத்தனையாவது மறுபதிப்பு? என்ற பொதுஅறிவுக் கேள்வியை நிச்சயமாய் நான் கேட்கப் போவதில்லை becos – பதில் எனக்கே தெரியாது! ஆனால் one last time என்பது மாத்திரம் உறுதி! இந்த மறுபதிப்பின் proof reading பணிகளில் ஒத்தாசை செய்தது நமது நண்பர் பெங்களுர் பரணியே! (முதல் பக்கத்திலேயே ஒரு பிழை ‘ஙே‘ என்று பல்லைக் காட்டுவதற்கு அவர் பொறுப்பல்ல; நான் இறுதியாக எழுதித் தந்த title page-ன் ஆரம்ப வரிகளில் நம்மவர்கள் விட்ட கோட்டை அது!) ‘கொரில்லா சாம்ராஜ்யம்‘ வண்ணத்தில் தொடரும் ஆண்டில் வெளிவந்திடும் பொருட்டு ‘நாச அலைகள்‘ முந்திக் கொள்கிறது - தற்போதைய அட்டவணையில்! புராதனம் ‘கம கமக்கும்‘ நாச அலைகளின் அந்தத் தமிழாக்கத்தை – நமது பால்ய நினைவுகளின் நறுமணம் வெற்றி கண்டிடும் என்ற நம்பிக்கையில் மேலோட்டமான பட்டி-டிங்கரிங்கைத் தவிர்த்து வேறெதுவும் செய்திருக்கவில்லை! ஆனால் நியாயமாகப் பார்த்தால் அந்த ஹைதர் அலி பருவத்து மொழிபெயர்ப்பிற்குக் கல்தா கொடுத்து விட்டு – புதியதொரு நடையை நல்கியிருக்க வேண்டும்! துரதிர்ஷ்டவசமாய் நேரமின்மை ஒரு தடிமனான தடையாகி வருவதால் அது சாத்தியப்படவில்லை!

On the subject of translation – சமீபமாய் நண்பர்களிடம் மொழிபெயர்ப்பில் ஈடுபட ஆர்வமுள்ளதாவென்று நாம் கோரியிருந்தது நினைவிருக்கலாம் – ஏழு நண்பர்கள் ஆர்வம் தெரிவித்திருப்பினும் – பணியில் ஈடுபட நேரம் ஒதுக்க முடிந்துள்ளது இதுவரையிலும் ஒருவருக்கு மட்டுமே! 2016-ல் “மாதமொரு டெக்ஸ்“ + “மாதமொரு கார்ட்டூன்“ என்ற திட்டமிடல் அமலுக்கு வந்தது முதலாகவே எனக்கு வாயோரம் சோப்பு நுரை பொங்காத குறைதான்! ஸ்டைலாக அறிவிப்பை வெளியிட்டு விட்டு – அந்த ஆந்தை விழிகள் – பேய் முழி முழித்து வருவதே சமீப சமயங்களின் வாடிக்கை! டெக்ஸ் கதைகளைப் பொறுத்தவரையில் கருணையானந்தம் அவர்கள் எழுதிடும் ஸ்க்ரிப்டில் டெக்ஸ் / கார்சன் / கிட் / டைகர் பகுதிகளை முழுக்க முழுக்கவே மாற்றியமைக்க அவசியப்படும் போது – கிட்டத்தட்ட முழுக் கதையையுமே redo செய்ய வேண்டி வருகிறது ! இம்மாதத்து "தலையில்லாப் போராளி" ஒரு classic example. 224 பக்க நீளம் கொண்ட கதையினை ஒரிஜினல் இத்தாலியன்-ஆங்கில ஸ்க்ரிப்டையும் ஏந்திய கையோடு - மெருகூட்ட முனையும் பொழுது கிட்டத்தட்ட புதுசாய் எழுதுவதற்கான நேரம் எடுத்துக் கொண்டது ! சமீபமாய் ஓசையின்றி இன்னும் சிலபல freelance மொழிபெயர்ப்பாளர்களின் முயற்சிகளையும் பயன்படுத்திடப் பார்க்கிறோம் தான் – ஆனால் சரியோ – தப்போ – டெக்ஸ் கதைகளுக்கென நாம் பழகி விட்டிருக்கும் template-ஐ எட்டிப் பிடிக்க இன்னமும் சாத்தியமாகமாட்டேன்கிறது! And இது நமது flagship நாயகரின் தொடர் எனும் போது - 'கொஞ்சம் முன்னே பின்னே இருந்தாலும் பரவாயில்லை !' என்று அசட்டையாக இருக்கவும் வழியில்லை ! சென்ற மாத இதழான ‘விதி போட்ட விடுகதை‘யினை ஒரிஜினலாக தமிழாக்கம் செய்தது ஒரு புதிய மொழிபெயர்ப்பாளரே! ஆனால் அதனை செப்பனிடும் முயற்சியில் இருமடங்கு நேரம் செலவாவது போலத் தெரிந்ததால் கடைசி நேரத்தில் மொத்தத்தையும் தூக்கி ஓரம் கட்டி விட்டு , விடிய விடிய முழுசையுமே புதிதாய் எழுதிடும் ராக்கூத்துக்கள் அரங்கேறின ! 

கார்ட்டூன் கதைகளிலோ – வேதாளம் புதையலைக் காவல் காத்து நிற்பது போல அத்தனையையும் என் தலையணைக்கடியிலேயே நான் பத்திரப்படுத்தி வைத்துக் கிடக்கிறேன்! இந்த genre-ல் எழுதுவதில் நோவு தெரிவதில்லை என்றாலும் – பக்கம் பக்கமாய், பத்தி பத்தியாய் சிரிப்பு நாயகர்கள் கதை நெடுகிலும் சலசலத்துச் செல்வதைப் பார்க்கும் போது – ‘பேச்சைக் குறைங்கப்பாடேய் !‘ என்று சொல்லத் தோன்றுகிறது! அம்மாதிரித் தருணங்களில் – அந்நாட்களின் மறுபதிப்புகளில் நடனமாடும் ‘மாயாவி மேலே பார்த்தார்‘; ‘விரலிலிருந்து புகை வந்தது‘; "மாயாவி சண்டை செய்தார்" ரீதியிலான டயலாக்குளை மொத்தமாய் தூக்கிப் போட்டு விட்டு புதுசாய் எழுதிடும் ‘தம்‘ எழுந்திட மறுக்கிறது! 

சரி... அந்நாட்களது மறுபதிப்புகளில் தான் இந்தக் கூத்தென்றால் – பெண்டை நிமிர்த்துவதில் நாங்களும் சளைத்தவர்களில்லை என்று ‘கெக்கே பிக்கே‘ காட்டுகிறார்கள் – உட்சிடியின் சிரிப்புப் பயில்வான்கள்! ‘நிழல் 1 – நிஜம் 2‘ மறுபதிப்பை அப்படியே டைப்செட் பண்ணினால் வேலை முடிந்தது என்று பந்தாவாக மைதீனிடம் தூக்கிக் கொடுக்க – தொடர்ந்த நாட்களில் பணி முடிந்த பக்கங்கள் என்னிடம் வந்து சேர்ந்தன! ‘அட... இந்தக் கதை நினைவுள்ளதா – பார்ப்போமே?!‘ என்றபடிக்கு வேக வேகமாய் அதனுள் நுழைந்தால் – ஏகப்பட்ட வசன பலூன்கள் காலியாய் பல்லிளித்துக் கொண்டு நின்று கொண்டிருந்தன! 'இதென்ன கூத்து?' என்றபடிக்கு நமது b&w ஒரிஜினல் இதழை எடுத்து ஒப்பிட்டுப் பார்த்தால் – ஷெரீப் டாக்புல்லின் அழகான வதனத்தைப் போலானது என் முகம்! இந்தக் கதையினை 1957-ல் ஒரிஜினலாக உருவாக்கியுள்ளனர் படைப்பாளிகள்! நமக்கு b&w இதழாக வெயியிட்டிட தரப்பட்ட version-ம் இதுவே! ஆனால் 1970-களின் இறுதிகளில் பல classic கதைகளை மெருகூட்டி, புதிய சித்திரங்களுடனும், புது வர்ணச் சேர்க்கைகளுடனும் remake செய்திருக்கிறார்கள்! அவ்விதம் மாற்றம் கண்டுள்ள ‘நிழல் 1 – நிஜம் 2‘ ஆல்பத்தில் நிறையவே மாற்றங்களும்; புதுச் சேர்க்கைகளையும் படைப்பாளிகள் செய்துள்ள விஷயம் இப்போது தான் புலனாகிறது! So அந்நாட்களில் வெளியான அதே கதை ; அதே plot தான் என்றாலும் – கதையின் ஓட்டத்தில் ஏகமாய் நகாசு வேலைகள் செய்துள்ளனர்! வேறு வழியேயின்றி – பிரெஞ்சிலிருந்து மறுபடியும் ஒரு முழு மொழிபெயர்ப்பைக் கோரி நமது மொழிபெயர்ப்பாளர்களைப் பிஸியாக்கியுள்ளோம்! அது கிட்டிய பிற்பாடு முடிந்த இடங்களில் பழைய வரிகள்; இதர இடங்களில் புதுசாய் வரிகள் என்று அந்தர்பல்டி அடிக்க வேண்டும்! So – மறுபதிப்பென்ற குடைக்குக் கீழே லைட்டாக இளைப்பாற நினைத்தால் – தெளியத் தெளிய சோடா அடித்து சும்மா கும்மு கும்மென்று கும்முகிறார்கள் உட்சிடிக்காரர்கள்! 'அட... சிவனேன்னு புதுசா படம் வரைஞ்சோமா – புக்கைப் போட்டோமா... என்றில்லாமல் இத்தனை கூடுதல் முயற்சிகள் தேவைதானா? என்று மனதுக்குள் நினைத்துக் கொண்ட கணத்தில் – ‘எக்ஸ்ட்ரா நம்பர் கேட்டேனா? நான் எக்ஸ்ட்ரா நம்பர் போடச் சொல்லிக் கேட்டேனா?‘ வடிவேலு தான் ஞாபகத்தக்கு வந்தார்! Anyways – “நிழல் 1 – நிஜம் 2” சீக்கிரமே வரும் – புதுப் பொலிவோடும், நிறைய மாற்றங்களோடும்! And நமது blog துவங்கிய நாட்களில் நாம் சந்தித்த பஞ்சாயத்துக்களுள் இதுவும் கூட ஒன்றென்பது நினைவிருக்கலாம் ! மறந்திருப்போர்க்கு நினைவூட்டிட இதோ அதன் லிங்க் : http://lion-muthucomics.blogspot.in/2012/02/blog-post_13.html

இந்தத் தருணத்தில் கையைத் தூக்கிக் கொண்டு – ‘என்னைப் பற்றியும் எழுதலியா?‘ எனக் கேள்வி எழுப்பும் நமது உடைந்த மூக்காரின் காத்திருக்கும் சாகஸத்தைப் பற்றியும் குறிப்பிட்டே தீர வேண்டும்! சவாலான எழுத்துக்கள் என்பது ஒரு பக்கமிருக்க – routine ஆன பணிகள் என்பதுகூட  வேறு விதத்தில் சிரமமே ! டைகர் கதைகளில் டெக்ஸ் பாணியிலான பன்ச் டயலாக்குகளோ, கார்சனின் ரக நையாண்டிகளோ அதிகம் அவசியப்படுவதில்லை என்றாலும் கதையைப் பக்கம் பக்கமாய் நகர்த்திச் செல்வதே வித்தியாசமானதொரு சவாலாகும்! “என் பெயர் டைகர்” கதையிலோ மைக் கிடைத்த அத்தனை பேரும் பேசிடும் நமது தேர்தல் மேடைகளைப் போல கதை மாந்தர்கள் அவ்வளவு பேரும் பேசிக் கொண்டே போவதை நமது கருணையானந்தம் அவர்கள் பொறுமையாகத் தமிழாக்கம் செய்துள்ளார். இது போன்ற கதைகளில் பணியாற்றும் போது ஒரு எழுத்தாளர் score செய்திட வாய்ப்புகள் சொற்பமே என்றாலும் – இது கூட ஒரு நெட்டியைக் கழற்றும் பணியே!

போன வாரம் “அட்டைப்பட வாரம்” என்பது போல – இந்த வாரம் “மொழிபெயர்ப்புப் பீலா வாரம்” என்ற எண்ணத்தை உங்களுக்குத் ஏற்படுத்துவதோ- ‘பார்த்தீங்களா மகாஜனங்களே... கம்பி மேலே நாங்கோ நடக்குது... அல்லாரும் ஜோரா ஒன் தபா கைதட்டுங்கோ! என்று வித்தை காட்டும் நோக்கமோ கிடையாது! மாறாக- சந்தா Z தள்ளிக் கொண்டே போவதற்கான இன்னுமொரு முக்கியக் காரணியை உங்களுக்கு மெதுவாய் புரியச் செய்திடும் முயற்சியே இது! இரவுக் கழுகாருக்கும், கார்ட்டூன்காரர்களுக்கும் இரண்டு ஷிப்ட் போட்டு கவனம் தர வேண்டியுள்ள சூழலில் – கிராபிக் நாவல் களங்களையும் உள்ளே புகுத்திக் கொண்டால் – ‘சேது‘ பட விக்ரம் போல சுற்றித் திரிய நேரிடுமோ என்ற பயம் பீறிடுகிறது! நிதி நிலைமை; விற்பனை நிலவரங்கள்; சென்னைப் புத்தகவிழா தள்ளிச் செல்வது; கிட்டங்கியின் நிரம்பி வழியும் நிலவரம் என்பன பிரதான காரணங்கள் எனில் – இந்த மொழியாக்கம் சடுகுடுக்களும், அவை கொணரும் நேர இக்கட்டுகளும் இரண்டாம் நிலைக் காரணங்களாக உருப்பெற்று நிற்கின்றன! “என் பெயர் டைகர்” பணிகளையும்; “முத்து மினி காமிக்ஸ்” மறுபதிப்புகளையும் மே மாதத்தினில் நிறைவு செய்து விட்டால் மண்டைக்குள் லேசான தெளிவும்; மூச்சு விடக் கொஞ்சமே கொஞ்சமாய் அவகாசமும் கிடைத்திடும்! இன்னொரு விஷயமும் மே மாதம் அரங்கேறவிருப்பதாய் ஆரம்பகட்டத் தகவல்கள் வந்துள்ளன – சென்னைப் புத்தக விழாவின் ரூபத்தில்! மே 24 – ஜுன் 7 வரையிலும் சென்னை நந்தனம் YMCA-வில் புத்தக விழா நடைபெற உள்ளதாகக் கேள்வி! So இது நிஜமாகிடும் பட்சத்தில் – விற்பனைக்கொரு வாயிலாகவும், நாம் சந்திப்பதற்கொரு சந்தர்ப்பமாகவும் அமைந்திடும்! இம்மாத டெக்ஸ் கதையில் வரும் ‘தலையில்லாப் பிசாசைப்‘ போல நானும் மண்டையைக் கழற்றி வைத்துத் திரியும் இந்தத் தருணத்தில் புதுத்தடப் பயணங்களின் திட்டமிடல்களை வைத்துக் கொள்வதை விட கொஞ்சம் நிதானமும், தெளிவும் குடிகொண்டிருக்கும் சமயத்தில் அதனை அணுகிடல் நலமென்று நினைத்தேன்!

On the flip side – புது இதழ்களின் தயாரிப்புச் சிரமங்கள்; மொழிபெயர்ப்பின் சிக்கல்களைத் தந்திடா Absolute Classics மறுபதிப்பு முயற்சிகளில் கவனம் செலுத்துவதும் இந்தத் தருணத்தில் ஒரு உருப்படியான சிந்தனையாக இருக்குமென்று தோன்றியது! திகிலில்; மினி லயனில் அந்நாட்களில் வெளியான சிலபல ப்ரான்கோ-பெல்ஜியக் கதைகள் அனைத்துமே வண்ணத்தில் மறுபதிப்பாகிடத் தகுதி வாய்ந்தவைகளே என்று சொல்லலாம்! புராதனம் சொட்டும் சில ப்ரூனோ பிரேசில் கதைகள் நீங்கலாகப் பார்த்தால் –

• - கேப்டன் பிரின்ஸ்
• - ரிப்போர்ட்டர் ஜானி
• - லக்கி லூக்
• - சிக் பில்
• - சுஸ்கி & விஸ்கி
• - சாகஸ வீரர் ரோஜர்
• - (சாவதற்கு நேரமில்லை) சைமன்
• - மாடஸ்டி பிளைசி

போன்ற தொடர்களை அழகாய் மலரச் செய்தால் எப்படியிருக்குமென்று தோன்றியது எனக்கு! ஏற்கனவே இது பற்றிப் பதிவிட்டது போல வழக்கமான பாணியில் நிறைய அச்சிட்டு கிட்டங்கியை ரொப்பிடும் வேலைகளை இதனில் செய்திடாது – சின்னதாயொரு printrun-ஐ நிர்ணயம் செய்து கொண்டோமேயானால்- நேரடியாய் நம்மிடம் வாங்கிக் கொள்ளும் நண்பர்களுக்கும்; புத்தக விழா விற்பனைகளுக்கும் மாத்திரமே இவற்றைப் பயன்படுத்திடலாம்! Of course கடன் கோரிடாது முன்பணம் அனுப்பும் முகவர்களுக்கும் பிரதியைத் தரலாம் தான்! இவற்றுள் எனக்குப் பெரிதாய் வேலைகள் ஏதுமிராது எனும் போது – ஜுனியர் எடிட்டரின் மேற்பார்வையே இதற்குப் போதுமானதாக இருந்திடலாம்! குறைவான printrun எனும் போது அதற்கேற்ப விலை அதிகமாகிடும் என்பது மாத்திரமே இதனில் உள்ள சிக்கல்! அதைச் சமாளித்துக் கொள்ளலாமெனில் பிரெஞ்சில் அவர்கள் வெளியிடுவது போல இரண்டோ; மூன்றோ கதைகளை ஒருங்கிணைத்து INTEGRAL ஆக வெளியிட்டால் எவ்விதமிருக்கும் folks ? இந்த விஷயத்தில் நம்மூர் பாணிகளில் “கூட்டணிகள்” சாத்தியமாகாது என்பதால் – ‘சிக்பில் டைஜெஸ்ட்‘; ‘லக்கி லூக் டைஜெஸ்ட்‘; ‘கேப்டன் பிரின்ஸ் டைஜெஸ்ட்‘ என்று அமைத்திடலாம்!

For starters – இது லக்கி லூக்கின் 70-வது ஆண்டென்பதால் லக்கியின் Top 3 Classic கதைகளைத் தேர்வு செய்தால் - அவற்றை ஏதேனும் ஒரு புதுக்கதையோடு இணைத்தும் வெளியிடலாம் ; அல்லது மறுபதிப்புத் தொகுப்பாகவே கொணரவும் செய்யலாம்! இதோ பாருங்களேன் - லக்கியின்  70-வது பிறந்தநாள் கொண்டாட்டங்களின் ஒரு  பகுதியாய் உருவாகி வரும் புது ஆல்பத்தின் preview :

"லக்கி லூக்கைக் கொன்ற ஆசாமி " என்பது இந்த ஆல்பத்தில் பெயர் & இதோ அதன் துவக்கப் பக்கம் ! 2 கிளாசிக் கதைகளின் மறுபதிப்பு + இந்த புது ஆல்பம் என்ற combo  எவ்விதம் இருந்திடுமென்று நினைக்கிறீர்கள் ?

இந்த மறுபதிப்புத் தடத்தை இந்தாண்டே துவங்கிடலாமா ? அதன் சாகத / பாதகங்கள் என்னவாக இருக்குமென்று உங்களுக்குத்  தோன்றுகிறது? பச்சைக் கொடி காட்டுவதாயிருப்பின் – இந்தப் பட்டியிலிலுள்ள தொடர்களின் Top 3 கதைகளைத் தேர்வு செய்திடலாமே? ‘மாதமொரு இதழ்‘ என்றெல்லாம் எவ்வித அட்டவணைகளையும் போட்டுக் கொள்ளாமல் – மூன்றோ-நான்கோ மாதங்களுக்கொரு ‘டைஜெஸ்ட்‘ என்று நிர்ணயித்துக் கொள்ளலாம்! இது பற்றிய உங்கள் எண்ணங்களுக்காகக் காத்திருப்போம்! 

And இந்த முயற்சி takeoff ஆவது சாத்தியமென்று நீங்கள் அபிப்பிராயப்பட்டால் – print run; விலை; எப்போதிருந்து துவக்குவமென்ற ஆராய்ச்சிகளை ஆரம்பித்து விடலாம்! So இந்த வாரத்துப் பொழுதை இது பற்றிய சிந்தனைகளுக்குச் செலவிடுவோமா? And வேதாளர் கதைகளின் பட்டியலோடு வேண்டுகோள் இந்த நொடியில் வேண்டாமே – ப்ளீஸ்?! அவற்றை நாம் திரும்பவும் வெளியிட வேண்டுமெனில் ஒன்றோ, இரண்டோ கதைகளோடு வண்டியை ஓட்ட சாத்தியமாகாது! ஆண்டுக்குக் கணிசமான அளவுக் கதைகளை வெளியிடும் திட்டமிடலோடு தான் ஒட்டுமொத்தமாய் கதைகளை படைப்பாளிகளிடம் வாங்கியாக வேண்டும்! So- நமது ரெகுலர் அட்டவணையிலும் வேதாளரைப் புகுத்தும் சந்தர்ப்பம் கனியும் சமயம், அவரை மறுபதிப்பிலும் ரசித்திடலாம்! இப்போதைக்கு, நமது முதல் சுற்று மறுபதிப்பு இலக்குகளை இந்தப் பட்டியலின் நாயகர்களிடமிருந்து ஆரம்பிப்போமே? உங்கள் சிந்தனைக் குதிரைகளை இந்தப் பக்கமாய் மேய்ச்சலுக்கு அனுப்பி விடுங்களேன் ? See you around soon folks ! Bye for now !

P.S : Caption போட்டிக்கான முடிவினை காலையில் இணைத்திடுகிரேனே இந்த பதிவில்...விட்டம் வரை விரியும் கொட்டாவிகள் இதற்கு மேல் டைப்படிக்க தடை சொல்லுகின்றன !! 

'தல'யும்..ஒரு தலையில்லாப் போராளியும்..!

நண்பர்களே,

            

வணக்கம். பேச்சுவழக்குத் தமிழில் ஒரு இன்றியமையாத இடம்பிடித்து விட்டிருக்கும் நடிகர் வடிவேலுவின் வரிகள் தான் கடந்த வார நாட்களில் நமது சின்ன டீமின் அங்கத்தினர்களின் உதடுகளில் இருந்திருக்கும்! குறிப்பாக மைதீனும், நமது டிசைனர் பொன்னனும் – ‘இவரென்ன பாஸா? இல்லே லூஸா?‘ என்று புருவங்களைத் தூக்கியிருப்பது உறுதியிலும் உறுதி! ஒவ்வொரு மாதமும் அட்டைப்பட டிசைனிங் என்பது கணிசமான நேரத்தையும், உழைப்பையும், பொறுமையையும் அவசியமாக்கிடும் சமாச்சாரம்! சில நேரங்களில் “கண்டேன் சீதையை!“ என முதல் முயற்சியிலேயே நாம் எதிர்பார்த்திடும் ரிசல்ட் கிடைத்துவிடுவதுண்டு – இம்மாத ‘ஆர்டினின் ஆயுதம்‘ அட்டைப்படத்தினில் நிகழ்ந்தது போல! வேறு சில வேளைகளிலோ – தெளியத் தெளிய வைத்து நமது ஆர்டிஸ்ட்களையும், டிசைனர்களையும் நான் கும்மாங்குத்து குத்திக் கொண்டே இருக்கவும் நேரிடும் – இம்மாத மெகா டெக்ஸ் அட்டைப்படப் பாணிகளில் நடந்து வந்துள்ளதைப் போல!

“தலையில்லாப் போராளி“ ஏப்ரலுக்குத் தீர்மானம் ஆன பொழுதே – இதன் பொருட்டு ஒரு பிரமாதமான அட்டைப்படத்தினை உருவாக்கிட வேண்டும் என்ற முனைப்பு என்னுள்ளிருந்தது! சமீப மாதத்துப் பாணிகளின் தொடர்ச்சியாய் – ஒரிஜினல் டிசைனையே பயன்படுத்திட வழியுள்ளதாவென்று பார்த்த போது ‘ஊஹும்...!‘ என்று தலையைத்தான் ஆட்டிடத் தோன்றியது... simply becos இந்தக் கதைக்குத் தேவையெனத் தோன்றிய fire சற்றே குறைச்சலாக இருந்தது போல எனக்குப்பட்டது. சரியென்று இன்டர்நெட்டை உருட்டிய போது, இதே கதைக்கென இன்னொரு பதிப்பகம் தயார் செய்திருந்த ராப்பர் கண்ணில்பட்டது! “அட... இதை மாதிரியாகக் கொண்டு நமது ஓவியரைக் களமிறக்கினால் நம் பாணிக்கு ராப்பர் தயாரித்து விடலாமே !“ என்று பரபரவென்று வேலையைத் தொடங்கினோம். And விரைவிலேயே ஒரிஜினலின் டிசைனுக்கு சற்றும் விடுதலின்றி மாலையப்பன் ஒரு அட்டைப்படத்தைத் தயார் செய்து தந்தார். இந்த டிஜிட்டல் யுகத்தில் நகாசு வேலைகளுக்கு எல்லைகளே கிடையாதெனும் போது பெயிண்டிங்குகளிலுள்ள சரக்கை மேற்கொண்டு முறுக்காக்கிட நமது டிசைனரை உள்ளே நுழைத்தோம்! அதைத் தொடர்ந்த நாட்களில் பொன்னன் பட்ட பாடு – நிச்சயமாய் கவுண்டரிடம் செந்தில் பட்டதை விடப் பன்மடங்கு ஜாஸ்தி! 

பேக்கிரவுண்டில் இருளும்... foreground-ல் வெளிச்சமும் அவசியமென்று தோன்றியது எனக்கு ; ‘சரி‘யென்று மனுஷன் அதற்கென ஒரு வர்ணப் பின்னணியினை தயார் செய்தார். இன்னமும் ஒரு பரபரப்பு டிசைனில் தென்படக் காணோமென்றேன் ; மாற்றங்கள் அரங்கேறின! ஊஹும்... I want more emotions என்றபடிக்கு இண்டர்நெட்டை மேற்கொண்டு நானே உருட்ட – நம் கதையில் வருவது போலவே குதிரை மீது அமர்க்களமாய் அமர்ந்திருக்கும் தலையில்லா முண்டமொன்றும் சிக்கியது! ‘விடாதே.... போட்டு அமுக்கு‘; இதையும் நமது ராப்பருக்குள் இணைத்தாலே ஆச்சென' ஒற்றைக்காலில் நின்றேன்! அதன்படியும் டிசைன்(கள்) தயாராயின! அப்புறமும் மண்டைக்குள் அலையடிக்கும் மாறுபட்ட எண்ணங்கள் தொடர்ந்தன ! ‘இந்தக் குதிரை கிராபிக்ஸ் effect போல் படுகிறது ; ஓவியர் வரைந்த டிசைனில் இந்த கிராபிக்ஸ் சமாச்சாரத்தை இணைக்கும் பொழுது sync ஆக மாட்டேன்கிறதே !!‘ என்று என் தலைக்குள் குறளி சத்தம் கொடுக்க – திரும்பவும் பாயைப் பிறாண்டச் செய்தேன் பொன்னனை! 

'ஒரேயடியாய் deep blue வர்ணப் பின்னணியாகவே  முயற்சித்து வருகிறோமே – கொஞ்சம் மாற்றம் தென்பட்டாலென்னவென்று' அடுத்து வேறு திசையில் புத்தி பிரயாணம் மேற்கொண்டது! அடிக்கும் வெயிலில் லேசாக எனக்குக் கழன்றிருக்குமென்ற புரிதலோடு ஒருவித brown வர்ணப் பின்னணியோடும் டிசைன் தயாரானது! ‘ஊஹும்... இதுக்கு அதுவே மேல்!‘ என்று மண்டையை ஆட்டிய போது எனக்கே கொஞ்சம் ஓவராய் அழும்பு பண்ணுவது போலப் பட்டது! ஆனால் ஒரு புத்தம்புதிய பாணிக்குத் திறவுகோலாக அமைந்திடக்கூடியதொரு இதழுக்கென்ற பணிகளில் compromise செய்திட மனசு கேட்கவேயில்லை! இதற்கு மத்தியில் பின்னட்டைக்கும் 5 முற்றிலும் வெவ்வேறு விதத்தில் டிசைன்கள் தயாரிக்கப்பட்டிருந்தன! அவற்றுள் அந்த அடர்சிகப்பில் டெக்ஸ் கறுப்பு silhouette –ல் நிற்பதே எனக்குப் பிடித்திருக்க- பாக்கி நான்கையும் கடாசி விட்டோம்! 

அத்தனை டிசைன்களையும் டிஜிட்டல் பிரிண்ட் அவுட்களாகப் போட்டுக் கொண்டு – வீட்டுக்கு எடுத்துச் சென்று எனது தலையணைகளைக் கீழே கடாசி விட்டு வரிசையாக டெக்சைஅடுக்கிக் கொண்டு கழுத்தை இப்படியும், அப்படியுமாகக் கோணிக் கொண்டு தேர்வுப் படலத்தை நடத்திப் பார்த்தேன் ! ‘அவன் குடலை மட்டும் உருவாமல் விட்டு வைப்பானேன்?‘ என்ற நல்லெண்ணத்தில் ஜுனியர் எடிட்டரையும் அழைத்து வந்து ஏதாவதொன்றை pick செய்யச் சொல்லிப் பார்த்தேன்! ஊஹும்...! நமக்குத் தான் தலைக்குள் ஒரு மந்திக் கூட்டமே ஒட்டுமொத்தமாய் குந்திக் கிடக்கும் போது யார் சொல்வது தான் எடுபட்டிருக்கும்? சரி... ரொம்பவே விஞ்ஞானபூர்வமாய் தேர்வு முறையை நிர்ணம் செய்வோமே என ‘இன்க்கி... பின்க்கி...‘ பாடலைப் போராட்டக் குழுவினரிடமிருந்து தற்காலிகமாய் இரவல் வாங்கிக் கொண்டு நடுச்சாமத்தில் முயற்சித்தும் பார்த்தேன்! யாரேனும் அந்த நள்ளிரவில் ஜன்னல் வழியாகக் கட்டில் முழுக்க இரைந்து கிடந்த டிசைன்களை நான் மண்டையைக் கோணிக் கொண்டு பார்வையிட்டவாறே முணுமுணுத்துக் கொண்டிருந்ததைப் பார்த்திருக்கும் பட்சத்தில் ஏர்வாடிக்கான பஸ் எத்தனை மணிக்கிருக்கும்? என்று சீரியஸாகவே விசாரித்திருப்பார்கள்! தேர்வு செய்வது எதை? என்பதை விட – நிராகரிப்பது எதை? என்று ரிவர்சில் வேலையை ஆரம்பித்தபோது கொஞ்சம் கொஞ்சமாய் தெளிவு பிறந்தது போலப்பட்டது! ஒவ்வொரு காரணத்திற்காய் ஒவ்வொன்றாய் காலி செய்துகொண்டே போன போது எஞ்சி நின்ற 2 டிசைன்களுக்கு மத்தியில் என் தேர்வை final ஆகச் செய்திட்டேன்! இதோ- கீழேயுள்ள சிலபல முயற்சிகளுக்குள் நாம் தேர்வு செய்துள்ள ராப்பரும் உண்டு! (நாம் முயற்சித்துப் பார்த்த 11 டிசைன்களுள் ஒரு பகுதி மாத்திரமே இங்கே உங்கள் பார்வைக்கு!!) தேர்வான ராப்பர் எதுவென்று any guesses guys?

“எல்லாமே சுமார்... இதுக்குத் தான் இத்தனை பீற்றலா?“ என்ற மைண்ட் வாய்ஸ் ஓடக்கூடிய நண்பர்களும் உண்டென்பதை நான் அறியாதில்லை; But இந்தக் காக்கைக்கு தனது சன்னமான டீம் உருவாக்குவதெல்லாமே மோனாலிசாக்களாய் தோன்றுவது தான் நிஜம் !

1

2

3

4

5

6

7

Anyways – டெக்ஸ் வில்லர் & கோவுக்கென இத்தனை கூத்துக்களெனில் – உட்சிட்டியின் கும்பலுக்கோ முதல் முயற்சியினிலேயே bullseye! பாருங்களேன் – ‘ஆர்டினின் ஆயுதம்‘ இதழுக்கென பொன்னன் போட்டுத் தந்த one & only டிசைன்! Original டிசைனே கார்ட்டூன் பாணிக்கு எடுப்பாக இருந்ததால் – கொஞ்சமாய் பின்னணியை ‘பளிச்‘ ஆக்கியவுடனேயே இந்த டிசைனுக்கு thumbs up சொல்ல முடிந்தது! And இதோ- இந்தாண்டின் முதல் டாக்புல் & ஆர்டின் சாகஸத்தின் உட்பக்கங்களிலிருந்து ஒரு சின்ன preview--ம் கூட !!

பாஸா? லூசா? கேள்வி நமது DTP பணிப்பெண்களிடமும் எதிரொலித்திருந்தால் ஆச்சர்யப்படமாட்டேன்; ஏனெனில் இம்மாத இதழ்களை எடிட்டிங்கில் மறுபடியும், மறுபடியும் துவைத்துத் தொங்கப் போட்டதும் நடந்தது! சிக்பில் கதைகளின் ஒரிஜினல் நடை தூய தமிழில் எழுதப்பட்டிருந்ததால் அதனை முற்றிலுமாய் rewrite செய்திட ஒரிஜினல் ஸ்க்ரிப்ட் மீதே நுணுக்கி நுணுக்கி எழுதி வைத்திருந்தேன்! So அதனை அச்சுக் கோர்க்கும் வேளைகளில் ஏராளமாய் தப்பும், தவறுகளும் எட்டிப் பார்க்க- மூன்று முறைகள் முழுக்கதையையும் proof reading செய்வது போலாகியது! லார்கோ கதையிலும், ஒரு முறை ஸ்க்ரிப்டைச் சரி பார்ப்பது; மறுமுறை படங்களின் கண்ணியத்தை (!!!) சரி பார்ப்பது; அப்புறம் இறுதியாய் ஒட்டுமொத்த package-ஐ சரி பார்ப்பது- என ஹாட்ரிக் பணிகள்! 

சகலத்திற்கும் சிகரம் வைத்தாற் போல் அனைவரது பெண்டுகளும் (என்னதும் சேர்த்துத் தான்) கழன்றது நமது “தலையில்லாப் போராளி“ இதழினில் தான்! 4 மாதங்களுக்கு முன்பாகவே இந்தக் கதையினை நமது கருணையானந்தம் அவர்களிடம் மொழிபெயர்க்கச் செய்து வாங்கியிருந்தேன். அவரது base script மீது டெக்ஸ் & கார்சனின் பகுதிகளை நான் மாற்றி எழுதுவது வழக்கம். இம்முறையோ இந்த சாகஸத்தின் ஒரிஜினலை ஆங்கிலப்படுத்தித் தந்திருந்ததொரு இத்தாலிய நண்பி முற்றிலும் புதுசு என்பதால் மணிரத்னம் திரைப்படத்தை, பாலாவின் கதாநாயகர்களோடு பார்த்ததொரு எஃபெக்டில் ஆங்கில ஸ்க்ரிப்ட் ரொம்பவே dark ஆக இருந்தது! So தமிழாக்கத்தில் நிறையவே தொய்வு தட்டுப்படுவதை காண முடிந்தது ! வேறு வழியின்றி எடிட்டிங்கின் போது எங்கெல்லாம் எனக்கு  நெருடியதோ- அங்கெல்லாம் google translator & இன்னுமொரு software-ஐப் பயன்படுத்தித் தட்டுத்தடுமாறி மறுமொழிபெயர்ப்பை ஆங்கிலத்தில் ஏற்படுத்திக் கொண்டு- அதனை அடிப்படையாக வைத்து தமிழாக்கத்தையும் செய்ய வேண்டிப்போனது! 224 பக்கங்கள் எனும் போது- இந்த ஒட்டுமொத்த சர்க்கஸ் வேலைகளைச் செய்து முடிப்பதற்குள் இரண்டு லோடு க்ளுகோஸும்; ஒன்றரை லோடு முதுகுவலித் தைலமும் செலவாகாத குறை தான்! Fresh ஆக எழுதுவது கூட இத்தனை சிரமமாகயிராது; ஆனால் இன்னொருவரது ஸ்க்ரிப்டை செப்பனிடுவது என்பது ஹாங்காங்-ஜிம்பாப்வே கிரிக்கெட் மேட்சைப் பார்ப்பதை விடவும் படு போரான விஷயம்! ‘மாதமொரு டெக்ஸ்‘ படிக்கும் போது பிரமாதமாக உள்ளது தான்; ஆனால் அதன் making-ல் உள்ள பளு மாதாமாதம் திணறடிக்கத் தான் செய்கிறது! But அடுத்த மாதம் காத்துள்ள “டாக்டர் டெக்ஸ்“ 110 பக்க சாகஸம் மாத்திரமே எனும் போது- ஒரு சின்ன relief!

இம்மாத இதழ்களுள் மாயாவிகாரு & சிக்பில் சார்வாள் அச்சுப் பணிகள் முடிந்த நிலையில் பைண்டிங் அலுவலகத்தில் தஞ்சம் புகுந்துள்ளனர். And “தலையில்லா போராளி“ நேற்று முதல் அச்சாகத் துவங்கியுள்ளது! அந்த மெகா சைஸில், டெக்ஸ் & கோவைத் துல்லியமான சித்திரங்களில் ரசிக்கும் போது ஏற்படும் உணர்வுகளைத் தலைகீழாய் நின்றால் கூட என்னால் வார்த்தைகளுக்குக் கொண்டு வர இயலாது! நாளை அந்தப் பணிகளும் அச்சுப் பிரிவில் நிறைவடைந்து விடும் நிலையில், திருவாளர் லார்கோ மட்டுமே பாக்கியிருப்பார்! எவ்விதம் பார்த்தாலும் இந்த மாதத்தின் இறுதித் தேதிக்கு உங்கள் கைகளில் ஏப்ரல் இதழ்கள் சகலமும் இருப்பது நிச்சயம்!

பரபரப்பாய் நாட்கள் நமக்கு ஓடிச் செல்லும் அதே பாணியில் ஐரோப்பாவில் XIII ரசிகர்களுக்கும் ஒரு காத்திருப்பு தொடர்கிறது! 2015-ன் டிசம்பரிலேயே வெளியாகியிருக்க வேண்டிய இரத்தப் படலத்தின் ஆல்பம் # 24- வரும் ஜுன் 10-ம் தேதிக்கே வெளிவரவிருக்கிறது! ஏகமாய் எதிர்பார்ப்புகள் ரசிகர்களிடையே எகிறிக் கிடக்கிறது – இந்த இரண்டாம் சுற்றின் இறுதி ஆல்பத்தில்  கதாசிரியர் என்ன முடிச்சை அவிழ்த்திடப் போகிறார்? எதனை புதிதாய் உருவாக்கிடப் போகிறாரென்று!! ஒரிஜினல் வெளியாகும் வேளையைத் தொடர்ந்த மாதத்தில் நம்மால் இந்த இறுதி பாகத்தை வெளியிட முடிந்திடும் பட்சத்தில்- பிறமொழியில் இந்த ஆல்பத்தை முதன் முதலில் வெளியிட்ட சந்தோஷம் நமதாகும்! And- நம் நண்பர்கள் பலரின் கனவுக்கன்னி பெட்டி பார்னோவ்ஸ்கியின் ஆல்பமும் விற்பனையில் சக்கை போடு போடுகிறதாம்! பாருங்களேன் !!

“அட்டைப்படங்களே“ இவ்வாரத்தின் prime topic ஆக இருந்திடும் நிலையில்- இன்னும் சின்னதொரு preview! இதோ- மே மாதத்து மறுபதிப்பான “சதிகாரர் சங்கத்திற்கு“த் தயாராகி வரும் அட்டைப்படத்தின் ஒரு மிக ஆரம்பநிலைச் சித்திரம்!! இதுவும் கூட நமது வாசக நண்பர்களின் கைவண்ணமே என்பதால்- ஆவலாய்க் காத்துள்ளேன் - பூர்த்தியான டிசைனை ரசித்திட! சீக்கிரமே நலம் பெற்று எழுந்து வாருங்கள் .A.T.ராஜேந்திரன் சார்- நிச்சயமாய் இந்த ராப்பர் உங்கள் ரசனைக்குரியதாக இருந்திடும்! And folks - இந்த  ஓவியம் யாரது கைவண்ணம் என்று யூகித்துப் பாருங்களேன் ? 

Before I sign off- சின்னதாயொரு ஜாலியான வேண்டுகோள்! மேலேயுள்ள 7 டெக்ஸ் அட்டைப்படங்களை உங்கள் பார்வைகளில் rate செய்திடுங்களேன்? ஒவ்வொரு சித்திரத்துக்கும் நம்பரிட்டுள்ளோம் - 1-7 வரை! உங்கள் ரசனைகளோடு எங்கள் ரசனைகள் எத்தனை தூரம் sync ஆகியுள்ளது என்பதைப் புரிந்து கொள்கிறோமே? மீண்டும் சந்திப்போம் folks! Bye for now! Have a rocking Sunday !!

P.S.: இது வரையிலான நமது ராப்பர்களில் உங்கள் நினைவுகளில் ‘பளிச்‘சென்று தங்கி விட்ட ஏதேனும் Top 3 ராப்பர்களைப் பட்டியலிட ஆசையா? துவக்கம் முதலான லயன்-திகில்-மினி லயன் இதழ்களுக்குள் உங்கள் தேர்வுகளை செய்திடலாம் !  கேட்க நான் ரெடி! 

அதிரடி ஏப்ரல்...!

நண்பர்களே,

           

வணக்கம். என்ன தான் சர்வதேச அசுரர்கள் இந்திய சந்தைக்குள் அதிரடியாகப் புகுந்து, மாதமொரு புது டிசைனில் டூ வீலர்...4 வீலர் என்றெல்லாம் தங்கள் தயாரிப்புகளைக் களமிறக்கினாலும் – நம் எல்லோரது ஆதர்ஷ வாகனமும் அந்த சைக்கிள் தான் என்பது எனது அபிப்பிராயம்! கிடைக்கும் முதல் சந்தர்ப்பத்தில் ஒரு வாடகைச் சைக்கிளைத் தேடிப் பிடித்துக் கொண்டு – ‘ஞாபகம் வருதே... ஞாபகம் வருதே‘ என்று ஹாயாகச் சவாரி செய்வதே நம் எல்லோரது அவாவாகவும் இருப்பது நூற்றியோறாவது முறையாக நிரூபணமாகியுள்ள போது – என் அபிப்பிராயத்தில் தவறில்லை என்று தோன்றுகிறது! ஒரு பொழுதுபோகாத மதியப் பொழுதில் நமது இதுவரையிலான பதிவுகளையும் – அவற்றின் மீதான உங்கள் பார்வைகளின் எண்ணிக்கைகளையும் நமது லியனார்டோவைப் போல ஆராய்ச்சி செய்து கொண்டிருந்தேன்! NBS; LMS; லயன் 250; முத்து 350; சென்னை / ஈரோட்டுப் புத்தகத் திருவிழாக்கள் போன்ற landmark தருணங்களின் பதிவுகள் செமையாக ஹிட்டடித்திருந்தன! No surprises too! ஆனால் அவற்றை எட்டிப் பிடித்து – தோளோடு தோள் உரசி நிற்கும் இதரப் பதிவுகளின் பெரும்பான்மையினில் நமது பால்யங்களின் நினைவூட்டல் சமாச்சாரங்கள் தூக்கலாக இருந்து வந்துள்ளன! 

சென்ற ஞாயிறு பதிவில் கூட நயமான பல உரையாடல்களுக்கு மத்தியில் ‘பாட்டில் பூதமும்‘ ஒளிவட்டத்தைப் பகிர்ந்து கொண்டுள்ளது தானே? So- என்ன தான் பீட்ஸா; பர்கர்; டக்கிலோ; ஸ்ப்ரிங் ரோல்; கபாப் என்று ருசி பார்த்தாலும் – என்றைக்கோ வீட்டு மொட்டை மாடியில் சாப்பிட்டுப் பழகிய நிலாச்சோறுகளும்; பள்ளிக்கூட இன்டர்வலில் வாங்கித் தின்ன கடலைமிட்டாய்களும், குச்சி ஐஸ்களும் இன்றைக்கும் நாவில் ஜலம் ஊறச் செய்வது ஒரு ஜாலியான முரணல்லவா ? Anyways – ‘ஜெயிக்க முடியாததை கெலித்துக் காட்டுகிறேன் பேர்வழி‘ என்று மண்டையைப் புடைக்கச் செய்வதை விட அதனோடு கைகோர்த்து நம் சக்கரங்களைச் சுழலச் செய்திடப் பழகுவதே உருப்படியான காரியம் என்பதை நான் உணர்ந்து ஏக காலமாகி விட்டது! So- முத்து மினி காமிக்ஸ் முதல் சுற்றின் 6 இதழ்கள் மே மாதம் கிடைத்திடும் என்பதே இந்த வாரப் பதிவின் ஆரம்பச் சேதி! இதற்கென சந்தா – இத்யாதிகள் என்று ஏதும் கிடையாதென்பதால் 6 x 20 = ரூ.120 + கூரியர் ரூ.30 = ரூ.150/- வீதம் அனுப்பினால் உங்கள் வீடு தேடி இதழ்கள் வந்திடும்! ‘இவற்றுள் எனக்கு இந்தந்த புத்தகங்கள் வேண்டும்; இவை வேண்டாம்!' என்ற  ரீதியில் pick & choose செய்திடும் சுதந்திரம் மாத்திரம் இருந்திடாது! புத்தக விழாக்களில் தனித்தனிப் பிரதிகளாக வாங்கிக் கொள்ளலாமே தவிர; நம்மிடம் வாங்கும் போது – ஆறு இதழ்கள் இணைந்த pack ஆக மட்டுமே வாங்கிடலாம்! Hope for your understanding guys! So ரூ.150/- வீதம் நீங்கள் பணம் அனுப்பி விட்டு, சின்னதாகவொரு மின்னஞ்சலும் தட்டி விடுங்களேன் – நமது முன்பதிவுகளுக்கு!

From the past to the future – ஏப்ரலில் காத்துள்ள அதிரடிகளில் ஒரு பாதி அச்சுக்குச் செல்லும் நிலையில் தயாராகவுள்ளன! நாளைய தினம் (திங்கட்கிழமை) நமது கோடீஸ்வரர் லார்கோ ஒரு கடன் தீர்க்கக் கிளம்புவதை நமது அச்சகத்தில் பதிவிடப் போகிறோம் ! லார்கோவின் இந்த சாகஸம் முழுக்க முழுக்க ஹாங்காங்கில் நடந்தேறும் அதிரடி! அட்டைப்படத்தைப் பொறுத்த வரை – 2016-ன் theme ஆன – “ஒரிஜினல்களே – உள்ளது உள்ளபடி !!” இம்முறையும் தொடர்கிறது! லார்கோ போன்றதொரு சமகால – நவீன சித்திர பாணிகள் தாங்கிய கதைத் தொடருக்கு – நமது ஓவியங்கள் சரிப்படாது என்பதால் ‘சிவனே‘ என்று ஒரிஜினல்களையே கையாண்டு வருகிறோம்! இதோ – அட்டைப்படத்தின் முதல் பார்வை :

ஓவியர் பிலிப் ப்ரான்க் ஒவ்வொரு சாகஸத்திற்கும் சித்திரப் பணிகளை மேற்கொள்வதற்கு முன்பாக அந்தந்த நகர்களைப் பிரத்யேகமாக ‘விசிட்‘ அடித்து, ஏராளமான ஃபோட்டோக்களை எடுத்து – எக்கச்சக்கமாய் ‘ஹோம் ஒர்க்‘ செய்வது வழக்கமென்று படித்திருக்கிறேன்! “கடன் தீர்க்கும் நேரமிது” ஆல்பத்தை நீங்கள் புரட்டும் போது இந்த மனுஷனின் அசகாய ஆற்றல்களும், ஹாங்காங்கின் பிரமிப்பூட்டும் அழகும் நம்மைப் பிடரியோடு அறைவதை உணரப் போகிறீர்கள்! பாருங்களேன் ஓவியரும், கதாசிரியரும் ஹாங்காங்கில் - இந்த ஆல்பத்துக்குப் பூர்வாங்கத் திட்டமிடல்களின் பொழுது !! "பொம்மை புக் தானே !! "என்று வெளிப்பார்வைக்குப் பரிகசிக்கப்படும் இந்த காமிக்ஸ் உலகின் பின்னணியில் தான் எத்தனை அசுர உழைப்பு !! 

கேமராவைக் கையில் கொண்டிருப்பவர் தான் ஓவியர் !

ஒரு பரபரப்பான ஷாப்பிங் மாலில் சல்மான்கான் பாணியில் மேல்சட்டையில்லாமல் நம்மாள் ஓடி வரும் அந்தச் சித்திரங்களையும்; பேக்கிரவுண்ட்களையும் இந்த இதழின் teaser ஆக இதோ உங்கள் முன்னே பதிவிடுகிறேன்! 

வழக்கம் போல லார்கோ கதைகள் முன்வைத்திடும் எடிட்டிங் / சென்சார் இக்கட்டுகள் இம்முறையும் தொடர்ந்தன தான் – சற்றே சிறியதொரு பரிமாணத்தில்! ‘ஒட்டுங்கம்மா வசன பலூன்களை வில்லங்கமான பார்ட்டிகள் மீது !‘ என்று என் சார்பாக மைதீனே சொல்லி வைக்க – ‘பலூன் ஒட்டும் படலம்‘ இனிதே நடந்து முடிந்துள்ளது! As always இதன் பொருட்டு சில உஷ்ணமான "வாழ்த்துக்கள்" நமதாகிடும் என்பதில் சந்தேகமில்லை என்றாலும் எல்லைகளை இதற்கு மேல் விஸ்தீரணம் செய்திடும் ‘தம்‘ நம்மிடமில்லை. Anyways சிவகாசிப் பட்டாசாய் பரபரக்கும் இந்த சாகஸத்தினை லயித்துப் படிக்கும் போது இந்த சமாச்சாரங்கள் நிச்சயமாய் ஒரு பொருட்டாகவே தெரிந்திடாது என்ற நம்பிக்கையில் உள்ளேன்! Fingers Crossed!

ஏப்ரலில் சும்மாவே அக்னிப் பிரவாகம் இருந்திடும் கோடையின் புண்ணியத்தில்! இம்முறை நமது இரவுக் கழுகாரின் உபயத்தில்; அந்த ‘மெகா‘ சைஸ் சித்திரங்களின் துணையோடு – ”தலையில்லாப் போராளி” நமது நாடித்துடிப்புகளை ஒரு உச்சத்துக்குக் கொண்டு செல்லப் போவது உறுதி! மாதாமாதம் ஒவ்வொரு புது இதழுக்கும் நான் ‘பில்டப்‘ கொடுப்பது புதிதல்ல; ‘விடுதலையே உன் விலையென்ன?‘ முதல் ‘விண்ணில் ஒரு வேங்கை‘ வரை இதைச் செய்து வருகிறேன் தான் ; ஒவ்வொரு புதுப் பாணிக்குள் நுழைந்திடும் வேளைகளிலெல்லாம் அவற்றிலுள்ள plus points மாத்திரமே என் கண்களில் படுவது வாடிக்கையே! ஆனால் – இந்த முறை; இரவுக் கழுகாரின் இந்த ‘மெகா‘ இதழின் வாயிலில் நிற்கும் வேளைகளில் – ஒரு முற்றிலும் ‘வேறு மாதிரியான‘ அனுபவம் நமக்குக் காத்துள்ளதென்று பட்சி சொல்கிறது! ஓவியர் சிவிடெலியின் சித்திரங்களை மெகா சைஸில் பார்ப்பதே பரவசமெனில் கதாசிரியர் மௌரோ போசெல்லியின் ‘வூடு கட்டியடிக்கும் பாணி‘யைக் கண்டு எகிப்திய மம்மிகளே மீண்டுமொருமுறை வாய் பிளந்து விடும் எனலாம்! இரவுக்கழுகாரின் முழு டீமும் இம்முறையும் ஆஜராகிட, ஆக்ஷன்; அமானுஷ்யம்; மர்மம்; த்ரில் என நம்மை சீட்களின் விளிம்பில் தொற்றிக் கொள்ளச் செய்யும் அக்னி – கதையின் ஒவ்வொரு அங்குலத்திலும் இழையோடுகிறது! முதன்முறையாக டெக்ஸ் வில்லர் தொடருக்குள் கால் பதிக்கும் புது வாசகர்கள் யாரேனும் இருப்பின் – நமது 4 நண்பர்களும் 68 ஆண்டுகளுக்கு முன்பாக ஒரு இத்தாலியக் கதாசிரியரின் சிந்தையில் உதித்த கற்பனைக் கதாபாத்திரங்களென்று சத்தியமாய் நம்பிடமாட்டார்கள்! சிவிடெல்லியின் ஓவியங்கள் ஒவ்வொன்றும் நிஜ மனிதர்களின் ஃபோட்டோக்களை நகல் எடுத்தது போல உயிரோட்டத்தை உமிழ்ந்திட – கார்சனும், டெக்ஸும், கிட்டும் மட்டுமன்றி – கதையின் மையத்தில் வந்திடும் ஒரு யுவதியும் கண்ணைப் பறிக்கிறார்கள்!! சில்வர் மூனின் மீதிருந்த மையலே தணிந்திருக்கா தருணத்தில் இந்தப் புதுவரவு நிறைய இதயங்களைத் தனதாக்கிக் கொள்ளப் போவது உறுதி! இதோ – உங்கள் பார்வைக்கென ஒரு மினி டீசர்! ”தலையில்லாப் போராளி” – தகிக்கச் செய்யப் போகிறான் நம்மை! 

இது டிஜிடல் பைலின் நகல் அல்ல....என்னிடம் வீட்டில் தற்சமயம் உள்ள ஜெராக்ஸ் மாத்திரமே 

இதற்கென நாம் தயாரித்து வரும் ராப்பர் ஏராளமான நகாசு வேலைகளுக்கு ஆளாகி வருகிறது! மாலையப்பனின் ஓவியம்; அதன் மீது பொன்னனின் பணிகள்; பற்றாக்குறைக்கு நெட்டிலிருந்து நான் லபக்கித் தந்த சித்திரப் பின்னணிகள் என்ற கலவையில் இந்த ராப்பர் உருவாகி வருகிறது! தினமொரு மாற்றமும், திருத்தமும் எனக்குத் தலைக்குள் உதயமாவதால் பொன்னன் இந்த வாரம் முழுவதும் பாயைப் பிறாண்டாத குறை தான்! அடுத்த ஒன்றிரண்டு நாட்கள் பணிகளின் க்ளைமேக்ஸ் தினங்கள் என்பதால் – பொன்னன் பாடும் சரி; மைதீனின் பாடும் சரி – பரிதாபத்திற்குரியதே! ஆனால் – முதன்முறையாக இந்த மெகா சைஸிற்குள் நாம் பிரவேசிக்கும் போது – அட்டைப்படமும் அந்தத் தருணத்திற்கு நியாயம் செய்யும் விதமாய் அமைந்திட வேண்டுமே என்ற வேட்கை எனக்குள்! முயற்சித்துக் கொண்டிருக்கும் சிலபல டிசைன்களுள் இதுவும் ஒன்று ! Just a trial....not a cover yet !!

இந்தக் கூத்து ஒரு பக்கமெனில் – பார்த்த முதல் டிசைனிலேயே டபுள் ஓ.கே. சொல்லச் செய்தது நமது உட்சிட்டிப் பெரும்புள்ளிகளின் காமெடி மேளாவின் அட்டைப்படம்! இம்முறையும் ஒரிஜினல் டிசைனே என்றாலும் – முதல் முயற்சியிலேயே பொன்னனின் மெருகூட்டல் அட்டகாசமாய் அமைந்து போய் விட்டது! அடுத்த வாரத்துப் பதிவில் இவர்களது உறுதிசெய்யப்பட்ட அட்டைப்பட first looks! 

திருச்சிப் புத்தக விழாவின் இறுதி தினம் இன்று ! வார நாட்கள் அத்தனை விறுவிறுப்பாக இல்லையென்ற போதிலும் – ஒட்டுமொத்த விற்பனை திருப்பூருக்கும், சேலத்துக்கும் இடைப்பட்டதொரு நிலையிலிருக்குமென்று தெரிகிறது! பசித்துக் கிடப்பவனுக்குப் புளியோதரையோ; குஸ்காவோ கடவுளின் கொடையே எனும் போது – இந்த மித விற்பனை விழாக்களும் கூட நமக்கு இன்றியமையாதவைகளாக மாறிப் போகின்றன! 100+ டைட்டில்கள் ஸ்டாக்கில் உள்ளதெனும் போது – இது போன்ற புதுக்களங்களில் நம் ஸ்டாலுக்கு வருகை தரும் புதியவர்கள் நிஜமாக மலைத்துப் போவதை அறிய முடிகிறது! ‘அட... இதெல்லாம் இன்னுமா வருகிறது?‘ என்ற கேள்வி சற்றைக்கெல்லாம் ‘அடடா... இப்படியெல்லாமா வந்து கொண்டிருக்கிறது?‘ என்று மாறுகிறது! And இந்த வாரத்து ஆன்லைன் ஆர்டர்களைக் கொஞ்சம் மேலோட்டாய்க் கவனித்த போது – அவற்றின் ஒரு கணிசமான பகுதி திருச்சி; தஞ்சாவூர் பகுதிகளிலிருந்து கிட்டியிருப்பது தெரிந்தது! இது புத்தக விழா அறிமுகத்தின் பலனா? அல்லது ஒரு தற்செயலான நிகழ்வா? என்று தெரியாது தான்; ஆனால் புதிதாய் வாசகர்கள் எந்தத் தண்டவாளத்தின் புண்ணியத்தில் கிடைத்தாலும் நமக்கதில் சந்தோஷமே! 

ஜுன் மாதம் சென்னையில்; ஜுலையில் நெய்வேலியில்; ஆகஸ்டில் ஈரோட்டில்; செப்டம்பரில் மதுரையில் என கண்முன்னே நிறையப் பெருநகர விழாக்களின் அணிவகுப்பு தென்படுகிறது! ஜுன் மாத chennai விழா பற்றி அதிகாரபூர்வமாய் அறிவிப்புகள் ஏதுமில்லை என்றாலும் – பாக்கி 3 விழாக்களும் ஆண்டாண்டுகளாக நடந்து வருபவை! அங்கெல்லாம் நமக்கு ஸ்டால்கள் கிடைத்திடும் பட்சத்தில் நமது கிட்டங்கியின் சுமை சற்றே குறைந்திடக் கூடும் ! அதைவிடவும் முக்கியமாக புது அறிமுகங்கள் ; மறந்து போன நட்புகளின் மறுபரிச்ச்சயம் என எல்லாமே சாத்தியமாகும் ! So நம்பிக்கையோடு காத்திருப்போம்! And உங்களைச் சந்திக்கவும் இவையொரு சந்தர்ப்பத்தை ஏற்படுத்திடும் என்பதால் – இந்த விழாக்கள் பற்றிய எதிர்பார்ப்பு வழக்கத்தை விடவும் கூடுதலாக என்னுள் உள்ளன! மறுபதிப்புகள் ; சந்தா Z; இரத்தப் படலம் வண்ணப் பதிப்பு etc.... etc... என்று பேசிட விஷயங்கள் நிறையவே உள்ளதல்லவா? 

And இதோ உள்ளது – ‘என் பெயர் டைகர்‘ கலர் & b&w இதழ்களுக்கான updated முன்பதிவுப் பட்டியல்! நம்மாட்கள் உங்களுக்கு ஸ்டைலான புதுப் பெயர்கள் வழங்கியிருந்தாலோ; உங்கள் பெயர்களையே பட்டியலுக்குக் கொணர்ந்திராது 'ஸ்வாகா' செய்திருந்தாலோ – அருள்கூர்ந்து மின்னஞ்சல் மூலம் அதனைத் தெரியப்படுத்தக் கோருகிறேன்! திருத்தங்களை உடனே செய்து விடலாம்! இதன் பொருட்டு நமது பதிவில் பின்னூட்டங்கள் பிரயோஜனப்படாதென்பதால் மின்னஞ்சல்கள் மட்டுமே- ப்ளீஸ்!

நண்பர்களின் ஓவியத் திறமைகள் அவ்வப்போது நம் முன்னே பவனி வருவது வாடிக்கையே ! அவற்றின் ஒரு சமீப மாதிரி இதோ ! ஜாலியாய் லைன் டிராயிங்கில் நமது கூர்மண்டையரை வரைந்து அவர் அனுப்பியதை பாருங்களேன் ! அவரது அனுமதியோடு - இதனை இந்த வார caption எழுதும் போட்டிக்குப் பயன்படுத்திடுகிறேன் !! நயமான வரிகளுக்கு ஒரு முந்தைய (லயன்) ஸ்பைடர் புக் பரிசாக அனுப்பிடவுள்ளோம் ! Caption எழுதுவதோடு - இதனை வரைந்தனுப்பிய நண்பர் யாரென்பதையும் யூகித்துப் பார்க்கலாமே ?

வாசக ஓவியப் பங்களிப்பினில் முழுமை பெற்றுள்ளதொரு டிசைனைப் பாருங்களேன்  ! நண்பர் (பொடியன்) பிரதீப்பின் கைவண்ணம் இது  !! நான் சொன்ன அத்தனை மாற்றங்களுக்கும், மெருகூட்டல்களுக்கும் சளைக்காது ஒத்துழைத்த நண்பருக்கு நமது நன்றிகள் ஓராயிரம் உரித்தாகுக  !! அவரது பொறுமைக்கும், இந்த உழைப்புக்கும், மெனக்கெடலுக்கும் ஒரு பெரிய "ஓஓ ஓ ஓ ஓ " போடலாமே guys ? 

Before I sign off - சின்னதொரு கொசுறுச் சேதியும் கூட ! மே மாதம் உங்கள் சந்தா கவர்களில் ஒரு குட்டியான சர்ப்ரைஸ் காத்திருக்கும் ! அது என்னவாக இருக்குமென்ற யூகத்தில் நீங்கள் ஆழ்ந்திடும் வேளையில் நான் தூக்கத்தில் ஆழ்ந்திடப் புறப்படுகிறேன் ! See you around all....bye for now ! Have a lovely weekend !!

ஒரு புன்னகை தினம் !

நண்பர்களே,

வணக்கம். சில நேரங்களில் பெரியதொரு காரணமே இல்லாது போனாலும்,   பேய் முழியோடு சுற்றித் திரியும் நாட்கள் புலர்ந்திடும் ! சில சமயங்களிலோ - பொழுது விடிந்த நேரத்திலிருந்தே 'கோபால் பல்பொடி' விளம்பர மாடல் போல் மொச்சைக்கொட்டைப் பற்களைக் காட்டிக் கொண்டு பவனி வரத் தோன்றும் ! இன்றைய பொழுது பிந்தைய ரகத்தைச் சார்ந்ததாய் இருப்பதால் - காலையிலிருந்தே லானாவைக் கண்ட ஷெரீப் டாக்புல்லைப் போல சுற்றிக் கொண்டிருக்கிறேன் !  

மார்ச் இதழ்களின் reviews இன்னமும் முழுவீச்சில் அரங்கேறிடவில்லை என்றாலும் - இதுவரைப் பதிவாகியுள்ள கருத்துக்களின் பெரும்பான்மை 'தம்ப்ஸ் அப் ' தந்திடும் விதமாகவே இருப்பது எனது இளிப்பின் காரணமாய் இருக்கக் கூடும் ! டெக்ஸ் & கோ. "விதி போட்ட விடுகதை"யில் உங்களது கரகோஷங்களை ஈட்டியிருப்பதில் no surprises indeed ! சென்றாண்டின் பிற்பகுதியில் - டெக்ஸ் கதைத் தேர்வுக்குள் நீச்சலடித்துக் கொண்டிருந்த போது - சிக்கிய இத்தாலியக் குடல்கள் அத்தனையின் நீள-அகலங்களையும் அலசிப் பார்த்துக் கொண்டிருந்தேன் ! அப்போதே இந்த சாகசத்தின் பிற மொழிகளின் reviews நிறையவே பார்த்திட முடிந்தது ! எல்லோருமே கதையோட்டத்தை ; சித்திரங்களை ; கிட வில்லரின் காதல் track -ஐ ரொம்பவே சிலாகித்திருந்தனர் என்பதால் - 2016-ன் டெக்ஸ் கதைத் தேர்வினில் நான் அடித்த மூன்றாவது 'டிக்' இது தான் ! (முதல் டிக் - நெடுங்காலத்து வாக்குறுதி நிறைவேற்றலின் பொருட்டு "திகில் நகரில் டெக்ஸ் " & இரண்டாவது டிக் - "பழி வாங்கும் புயல்" மறுபதிப்பு !) ஒரு பொறுப்பான, பாசமான தந்தையாகவும் டெக்ஸ் இதில் மிளிர்வதைப் பற்றி வேற்று மொழி வாசகர்கள் அவர்களது களங்களில் பதிவிட்டிருந்ததைப் படிக்க முடிந்த போதே இந்த ஆல்பம் நமக்கொரு சுவாரஸ்யமான அனுபவமாய் அமைந்திடுமென்று தோன்றியது ! இத்தாலிய மொழிபெயர்ப்பு டிசம்பரிலேயே தயாராகி விட்ட போதிலும் - தமிழாக்கத்தினை பிப்ரவரி ஆரம்பம் வரையிலும் ஆரம்பிக்க இயலவில்லை ! முதல் பாதியைத் தாண்டிய போதே - இது டெக்ஸ் வரிசையில் ஒரு memorable இதழாக அமையப் போவது உறுதியென்று பட்சி சொன்னது ! சரியாக அதே வேளையில் பொன்னனின் அட்டைப்பட டிசைனும் அழகாய் அமைந்து போக - 'மார்ச் முதல் வாரம் எப்போது புலரும்டா சாமி ?' என்ற நமைச்சல் எடுக்கத் துவங்கிவிட்டது எனக்குள் ! எதிர்பார்ப்புகள் மெய்யாகும் போது அலையடிக்கும் ஒரு மெல்லிய திருப்தி - பல்லாயிரத்துக்கு ஈடாகும்  உணர்வன்றோ ? அதே போலவே, கமான்சே சாகசம் பற்றிய யூகங்களும் பிசிறடிக்கவில்லை ! யதார்த்தத்தின் வெளிப்பாடான series இது எனும் போது - டெக்ஸ் வில்லர் / பௌன்சர் / டைகர் கதைகளின் 'பட்டாசு பாலு' பரபரப்பினை இங்கே எதிர்பார்த்தல் சாத்தியமில்லை என்பதில் இரகசியமேது ? So ஆக்ஷன் ரசிகர்களுக்கு இது உறக்கம் கிடத்தும் தாலாட்டைப் போலவும் ; யதார்த்த விரும்பிகளுக்கு தெம்மாங்குப் பாட்டாகவும் தோன்றுவது உறுதி தானே ? சாத்தானின் உள்ளங்கையில் " ஆல்பத்தில் - நாயகன் ரெட் டஸ்ட் - எப்போதும் போலவே ஒளிவட்டத்தைத் தவிர்க்க முயற்சித்துக் கொண்டே - கதை முழுதிலும் ஒரு சராசரிக் கௌபாயாக வலம் வந்ததை கதாசிரியரின் தன்னம்பிக்கையின் வெளிப்பாடாகப் பார்த்தேன் நான் ! அந்தச் சித்திர அட்டகாசமும், அச்சின் துல்லியமும், வர்ணங்களின் இதமும் நான் ரசித்தவைகளாக மாத்திரமே இல்லாது - (இ. பி.பா. போராட்டக் குழு நீங்கலாக)  பாக்கி அனைவரின் ரசனைக்கும் ஏற்புடையவையாக அமைந்ததால் அடியேன் ஹேப்பி அண்ணாச்சி ! கிளைமாக்சில் துப்பாக்கிச் சண்டைகளெல்லாம் நிறைவுற்றான பின்னர், ரெட் டஸ்டும், தான்காணும் தரையில் கால் நீட்டி அமர்ந்து கொண்டு பேசிக் கொள்ளும் இடம் எனக்குப் பிடித்திருந்தது ! எந்த (சீரியஸ்) ஹீரோவை இப்படியொரு போஸில் நாம் ரசித்திருக்க முடியும் ? 'வயதாவதற்கும் வரம் வாங்கி வந்திருக்க வேண்டும்' என்ற ரீதியிலான டயலாக்கினைப் பேசுமிடத்தில் கதாசிரியரின் presence 'பளிச்'செனத் தெரிவதாக நினைத்தேன் ! கதாசிரியர் க்ரெக்கின் ஒரிஜினல் வசனங்களுக்கு மொழிபெயர்ப்பில்  நான் எத்தனை தூரம் நியாயம் செய்தேன் என்று தெரியவில்லை - ஆனால் இதுவரையிலும் நான் பணியாற்றியுள்ள பிரெஞ்சுக் கதைகளின் ஸ்க்ரிப்ட்களுள் one of the toughest என்பதில் சந்தேகமே கிடையாது ! இரண்டே வரிகளில் அவர்களது மொழியில் சொல்லச் சாத்தியமாகும் அந்த உணர்வுகளை சேதமின்றித் தமிழுக்குக் கொணர - கொஞ்சம் நீளமான வரிகளின் சகாயத்தை நாடுவதில் தப்பில்லை என்று நினைத்தேன் ! 

மார்ச்சின் இதழ் # 3 - நமது கர்னல்ஜியின் கார்ட்டூன் கலாட்டா ! இன்னமும் நண்பர்களில் நிறையப் பேர் இந்த ஆல்பத்தினுள்  புகுந்திருப்பது போல் தோன்றவில்லை என்பதால் இதற்கான விமர்சனங்களை ஜாஸ்தி பார்க்க முடியவில்லை ! Maybe இந்த வாரம் நமது focus -ஐ மீசைக்காரர் மீது  திருப்பிடுவோமா ? "நில்..சிரி...திருடு" பற்றிய உங்கள் பார்வைகளை முன்வைக்கலாமே folks  ?

கழுவிக் கழுவி காக்காய்க்கு ஊற்றப்பட்ட நமது ஸ்பைடர்காருவின் ராப்பர் பற்றிய சிறுகுறிப்பு ! இது நமது ஓவியரின் தயாரிப்பே என்றாலும் - வெறுமனே வர்ணம் பூசுவதும், பின்னணியில் கலர் சேர்ப்பதுமே அவரது பங்களிப்பு ! வலைமன்னரின் டிராயிங் Fleetway -ன் LION வாரயிதலின் அட்டைப்படத்தின் ஜெராக்சே ! And அதனை வரைந்திருப்பதும் ஸ்பைடர் தொடரின் ஒரு மூத்த ஓவியரே என்பதால் அதனை நோண்டிட முற்படவில்லை ! ஆனால் புத்தகமாகப் பார்க்கும் போது - பக்கத்து வீட்டுப் புள்ளையைக் கையைப் பிடித்து இழுத்து விட்டு, ஊர் பஞ்சாயத்துக்குப் பயந்து ஓட்டம் பிடிக்கும் பாவனை லைட்டாகத் தோன்றத்தான் செய்கிறது ! Anyways ஒரு வலைமன்னனின் வாழ்க்கையில் இதெல்லாம் சகஜமே என்பதால் - அடுத்த முறை இதனை ஈடு செய்யும் விதமாய் ஒரு சூப்பர் ராப்பரை தயார் பண்ணிட உறுதி சொல்கிறேன் !

Talking of wrappers - இதோ பாருங்களேன் நமது நண்பரின் கைவண்ணத்தை ! நாம் அனுப்பியிருந்த black & white பக்கங்களைப் பார்த்து - அதனிலிருந்து frame களைத் தேர்வு செய்து ; லைன் டிராயிங்காகவே வரைந்து, பின்னர் வர்ணம் பூசியதொடு மட்டுமல்லாது - தலைப்பையும் அமைத்து ; லோகோவையும் வண்ணத்தில் அனுப்பித் தந்துள்ளார் ! பெயரில் ஸ்மர்ப் இருப்பினும், ஆற்றலிலும், காமிக்ஸ் நேசத்திலும் விஸ்வரூபமெடுத்து நிற்கும் இவர் யாரென்று any guesses ?  

இன்னொரு நண்பரிடமும், இன்னொரு MMC இதழின் அட்டையினை டிசைன் செய்யும் பணியை ஒப்படைத்துள்ளோம் ! காத்திருப்போம் அவரது கைவண்ணத்தையும் ரசித்திட ! சும்மாயிருந்த நேரத்தில் மைதீனை நமது பரனை உருட்டச் செய்த போது சிக்கியவை தான் என்னவென்று பாருங்களேன் !! 

1973 & 74-ல் தீட்டப்பட்ட ஓவியங்கள் இன்னமும் ஒரு இம்மி மெருகு குறையாமல் டாலடித்துக் கொண்டுள்ளன நமது கிட்டங்கியில் ! அந்நாட்களில் ஓவியர்கள் பயன்படுத்தும் போஸ்டர் கலர்களில் கொஞ்சமாய் கோந்து சேர்த்துக் கொள்வதைப் பார்த்த ஞாபகம் உள்ளது ! அது ஏனென்று இன்றைக்குப் புரிகிறது ! இத்தனை இத்தனை ஆண்டுகள் கடந்து பின்னேயும் அந்த வர்ணங்கள் துளிகூட வீரியம் குறையாமல் தொடர்வதற்கு அந்தக் கொந்தும் ஒரு காரணம் போலும் !! ஒரிஜினல் பெயிண்டிங்குகள் பத்திரமாய் இருப்பதால் - அவற்றையே process செய்து - இயன்ற இடங்களில் ராப்பர்கலாக்கி விடுவோம் ! முதல் சுற்று முத்து மினி காமிக்ஸில் 6 இதழ்கள் ரூ.20 விலையில் வெளியாகிடும் ! எல்லாமே அந்நாட்களது கூட்டு எழுத்திலான ஸ்கிரிப்ட் என்பதால் ஒட்டு மொத்தமாய் புது டைப்செட்டிங் செய்திடவிருக்கிறோம் ! ஏப்ரல் இறுதியில் அல்லது மே துவக்கத்தில் இவை தயாராகி விடும் ! 

தேர்தலின் பொருட்டு ஏப்ரலில் நடைபெறுவதாகயிருந்த சென்னைப் புத்தக விழா தள்ளிச் செல்கிறது ! So இந்த MMC இதழ்களை வேறு ஏதேனுமொரு புத்தக விழாவினில் வெளியிட வேண்டி வரலாம் ! தற்போது திருச்சியில் நடந்து வரும் புத்தக விழா - அளவில் அத்தனை பெரிதல்ல என்றாலும் ஆச்சர்யமூட்டும் விதத்தில் சரளமான ஜனத்திரளைச் சந்தித்தே வந்துள்ளது - முதல் இரு நாட்களிலுமே !! பஸ் நிலையமருகே சென்ற முறை புத்தக விழா நடந்த பொழுதே விற்பனை ரொம்ப மந்தம் என்ற புள்ளி விபரம் தலைக்குள் குடியிருக்க - இம்முறை விழா அரங்கு சற்றே ஒதுக்குப்புறம்  என்று கேள்விப்பட்ட போது நான் மிரண்டு தான் போயிருந்தேன் ! ஆனால் நல்ல கூட்டம் ; decent விற்பனை என ஆரம்ப நாட்கள் உற்சாகமூட்டும் விதமாய் அமைந்துள்ளன ! பற்றாக்குறைக்கு, நமது (முன்னாள்) முகவர் ஒருவர் தற்செயலாக நம் ஸ்டாலுக்கு வந்திருக்க, உள்ளூர் வாசகர்களின் ஆர்வத்தை நேரடியாகப் பார்த்ததைத் தொடர்ந்து, ஏப்ரல் முதற்கொண்டு தன கடைக்கு மீண்டும் இதழ்களைத் தருவித்துக் கொள்ள உறுதி சொல்லியிருக்கிறார் ! ஸ்டாலுக்கு வந்திருந்த நண்பர்களின் செல்நம்பர்களைப் பெற்றுக் கொண்டு - இனி ரெகுலராகத் தொடர்பில் இருக்க சம்மதம் சொல்லியுள்ளார் ! தொடரும் நாட்களில் இது போல் இன்னம் சிறுகச் சிறுக கதவுகள் திறப்பின், மலைக்கோட்டை மாநகரில் நாம் "ஹி.ஹி.." என்று திரிய பெரியதொரு அவசியம் இருந்திடாது ! 

பரணில் பழைய பெயிண்டிங்குகளை உருட்டிக் கொண்டிருந்த தருணத்தில் கண்ணில்பட்ட இன்னுமொரு பழமையின் நினைவுச் சின்னம் முகம் நிறைய புன்னகையை வரச் செய்தது  ! இதோ - அந்த இதழின் அட்டைப்படம் ! 

"உன்னை விட வயதில் மூத்த இதழிது - தெரியுமா ? " என்று ஜூனியரிடம் இதனைக் காட்டிய போது ஒரு மெல்லிய பெருமிதம் எனக்குள் இருந்தது நிஜமே !  நியூஸ்பிரிண்ட் இதழ்கள்  என்றாலே காத தூரம் ஓடும் ஜூ.எ. ஒரு வித ஆச்சர்யத்தோடு இதைப் புரட்டிப் பார்த்தது வேடிக்கையாக இருந்தது எனக்கு ! 'இந்த ஆர்ட்பேப்பர் ; வர்ணம் ; இத்யாதி இத்யாதியெல்லாம் சமீபமாய்த் தான் அப்பு ; நாம் வளர்ந்ததே இந்தச் சாணித்தாள் எணியின் மீதேறித் தான் !" என்று உள்ளுக்குள் நினைத்துக் கொண்டேன் ! 24 ஆண்டுகளுக்கு முன்னர், கோடை (பள்ளி) விடுமுறைகளின் சமயம் நாம் தயாரித்த இதழிது என்று ஞாபகம் !  

ஸ்பைடர் மேனியா ஒரு விதத் தளர்நிலையில் இருந்த நேரமும் கூட  என்ற ஞாபகமும் உள்ளது ! ஸ்பைடர் கதைகள் கிட்டத்தட்ட காலியாகிப்  போகும் தருணம் என்பதால் மெது மெதுவாய் வேறு விதக் கதைக்களங்களுக்குள் கால் பதிக்கத் தொடங்கியிருந்தோம் ! அந்த நேரத்தில் இந்தக் கதையின் தலைப்பே ஒருவிதப் புத்துணர்ச்சியினை வழங்கிட - '90- களின் ஒரு மறக்க இயலா ஹிட்டாக இந்த இதழ் அமைந்தது அந்நாட்களது வாசகர்களுக்கு நினைவிருக்கலாம் ! நிஜத்தைச் சொல்வதானால் -கங்காரூ தன வயிற்றில் குட்டியைத் தூக்கிக் கொண்டே திரிவது போல்  இந்தக் கதையை 1988 முதலே நான் சுமந்து கொண்டிருந்தேன் - simply becos காதினில் இது சூட்டியது புஷ்பங்களை மாத்திரமல்ல - ஒரு புஷ்ப மார்கெட்டையே ! பாட்டிலுக்குள் கர்கோ பூதம் ; சாத்தான் ; டைனோசார்கள் ; அழகு ராணி ; கொலைகார கொரில்லாக்கள் ; இவர்களோடு  வலைமன்னன் மோதுவது என்று எங்கெங்கோ சுற்றித் திரியும் fantasy -ன் உச்சமாக இந்தக் கதை இருந்ததால் - தர்ம அடிக்குப் பயந்தே இதனை வெளியே கொண்டு வராது பத்திரப்படுத்தியிருந்தேன் ! ஆனால் கதைப் பஞ்சம் என்ற நிலை எழுந்த போது - "காதுலே புய்ப்பம்" - "அதிரடி ஆக்ஷனாக" காட்சி தர - ஹாலிடே சூப்பர் ஸ்பெஷல் தயாரானது ! அந்நேரம் நமது ஓவியர் மாலையப்பன் நம்மிடம் பணியாற்றவில்லை என்று நினைக்கிறேன் ; இந்த அட்டைப்படம் சிகாமணியின் கைவண்ணம். ! அதிலும் முதலில் பூதத்தை மட்டும் வரைந்து விட்டோம் ; அப்புறம் அட்டைப்படத்தில் 'தலைவர்' இல்லது போனால் மாஸ் இருக்காதென்று தோன்ற ஸ்பைடரின் அழகு வதனத்தை அப்புறமாய் இணைத்தோம் ! And டாலடிக்கும் ரோஸ் வர்ணம் இந்த ராப்பரில் கூடுதலாய் அச்சிடுவதெனத் தீர்மானித்ததால் - ஸ்பைடரின் முகத்தை பிங்கில் மட்டுமே வருமாறு பார்த்துக் கொண்டோம் ! அட்டையைப் பார்த்த போதே - நம்பிக்கை பிறந்தது - இது ஓடும் குதிரையென்று ! 

வழக்கமான கிறுகிறுக்கச் செய்யும் ஸ்பைடர் கதையை விட - நான் இந்த இதழில் ரசித்தது - ரிப் கிர்பியின் சாகசத்தை ! தன் கனவுக் கன்னியைத் தேடிச் செல்லும்  மொழு மொழு மண்டை டெஸ்மாண்ட் கதை முழுவதிலும் சுற்றி வருவதால் - செம சுவாரஸ்யமாய் பக்கங்களைப் புரட்ட முடிந்திருக்கும் !! ரிப் கிர்பியும் காரிகனும் தான் அந்நாட்களில் நம் மானம் காத்த ரட்சகர்கள் என்பதால் காரிகனுக்கும் இந்த இதழில் இடம் தவறாது இருந்தது ! அட்டைப்படத்தில் தொங்கு மீசை பாட்டில் பூதமெனில் - காரிகனின் கதையிலும் தொங்கு மீசை டாக்டர் 7 இருந்தார் ! Dr 7 கதைகள் எப்போதுமே விறுவிறுப்பாக இருக்குமென்பதால் இந்தக் கதையைக் குறிப்பாகத் தேடித் பிடித்து தேர்வு செய்தேன். FLEETWAY -ன் பெருச்சாளிப் பட்டாளம் (War ) சிறுகதை ; ராடார் சிறுகதை ; இறுதியாய் "மறையும் மாயாவி ஜாக்கின் : கதையொன்று என நீளமான cast  இருந்ததால் இதழ் நல்ல புஷ்டியாய் 224 பக்கங்களோடு அமைந்து போனது ! அந்நாட்களில் பத்து ரூபாய் என்பது இன்றைய நூறு ரூபாய்க்கு ஈடாகப் பார்த்திடலாம் எனும் போது - இயன்றதைச் செய்து இதழின் கனத்தை ஏற்றுவதே லட்சியமாக இருந்தது ! வெளியாகி ஒராண்டுக்குள்ளாகவே இந்த இதழ் காலியாகி விட்டதென்று தான் நினைக்கிறேன் ; இதனை ஸ்டாக்கில் அதிக நாட்கள் சுமந்து திரிந்ததாக நினைவில்லை ! And இந்த இதழினை தயாரித்துக் கொண்டிருந்த நாட்களை நினைவில் இருத்திக் கொள்ள கூடுதலாயும் ஒரு காரணமுண்டு ; அடியேனுக்குப் பெண் பார்க்கும் படலம் தீவிரமாய் நடந்து வந்த ஆண்டும் அது ! So கலர் கலராய் அமைந்தவை அந்நாட்களது அட்டைப்படங்கள் மாத்திரமல்ல என்பதைச் சொல்லவும் வேண்டுமா ? 

Back to the future  - இங்கி -பிங்கி-போட்டுக் கொண்டிருக்கும் போராட்டக் குழுவின் மனவுறுதியை அசைத்துப் பார்க்கும் பல ஐட்டங்கள் விறுவிறுப்பாய் தயாராகி வருகின்றன ஏப்ரலுக்கு ! கோடீஸ்வரரின் பணிகளும், வுட்சிடிகாரர்களின் பணிகளும் ஏற்கனவே முடிந்து விட்டன - அச்சு மாத்திரமே பாக்கி ! இரவுக் கழுகாரின் மெகா அவதாரமும் தொடரும் வாரத்தில் நிறைவு பெற்றிடும் என்பதால் - போங்கு இல்லா இ.பி.பா. ஏப்ரலிலும் தொடருமாயின் சங்கத்துக்குள் சில சலசலப்புகள் ஏற்பட வாய்ப்புகள் பிரகாசமெனத் தோன்றுகிறது !

Joking apart - "மாதமொரு டெக்ஸ்" என்ற அட்டவணை அமலுக்கு வந்த ஆரவாரத்தின் மத்தியினில் எனது பணிச்சுமை வெகுவாகக் கூடிப் போனதை உங்களில் பலர் கவனித்திருக்க வாய்ப்பில்லை ! எழுதிட டெக்ஸ் கதைகள் சுலபமே என்றாலும் - 224 பக்கங்கள் என்பது குறுக்கைப் பதம் பார்க்கும் விஷயம் ! எழுதிய பின்னே - மூன்று முறைகள் என் மேஜைக்கு வந்து செல்லும் - டெக்சின் டைப்செட் செய்யப்பட்ட பக்கங்கள் ! "சாமி..இதுக்கு மேல் இந்தக் கதையைப் பார்த்தால் நான் சுவற்றைப் பிறாண்டத் தொடங்கி விடுவேன் !" என்ற நிலையில் தான் அவை அச்சுக்குச் செல்லும் ! இதன் மத்தியினில் "இது எனக்கே - எனக்கு" என பூதம் போல் கார்ட்டூன் கதைகளையும் நானே அடைகாத்துக் கிடக்க - அதன் பணிகள் இன்னொரு பக்கம் நடந்தேறிடும். சின்னதாய் ஏதேனும் ஒய்வு கிடைக்கும் சமயம் unwind செய்யும் விதமாய் ஏதேனும் எழுதுவோமே என்று யோசிக்கும் போது - "என் பெயர் டைகர்" ஜிங்கு ஜிங்கென்று மேஜையில் குதிப்பது கண்ணுக்குப் படும் ! அல்லது - எதிர்பாரா சிக்கல்கள் ஏதேனும் தலைதூக்கும் - ஏப்ரலின் சிக் பில் கதையினில் நேர்ந்ததைப் போல ! இது சென்றாண்டே வேலைக்கு எடுத்துக் கொள்ளப்பட்ட கதை & இதனை நமது கருணையானந்தம் அவர்களை   எழுதச் சொலியிருந்தேன் ! ஏதோவொரு ஞாபகத்தில் அவர் இந்தக் கதைக்குமே தூய தமிழ் நடையைக் கையாண்டிருக்கிறார் ! எழுதி வந்த ஸ்கிரிப்ட் பீரோவுக்குள் தூங்க, போன வாரம் அதனை நமது பணியாளர்களிடம் தந்து டைப்செட் செய்தும் வாங்கி விட்டேன் ! எப்போதுமே கார்டூன் கதைகள் ; அதுவும் சிக் பில் கதைகள் எனும் போது எடிட்டிங் வேலைகள் ஜாலியாக ஓடியே விடும் ! அந்த நம்பிக்கையில் இதனையும் வீட்டுக்குத் தூக்கிப் போய் இரவு புரட்டினால் - தூக்கிவாரிப் போட்டுவிட்டது அந்த சீரியசான மொழிநடையைப் பார்த்தவுடன் ! டாக்புல்லும்  , ஆர்டின்னும் சுத்தமான தமிழ் செப்புவதைப் பார்க்கப் பார்க்க மிரட்சியாக இருந்தது ! முழுக் கதையையும் rewrite செய்வதைத் தாண்டி வேறு வழி ஏதும் புலப்படவில்லை ; ஒரிஜினலை ரிப்பேர் செய்வதைவிட, புதுசாய் எழுதி விடுவது எப்போதுமே உத்தமம் ! So ப்ளஸ் 2 பரீட்சைக்குப் பிள்ளைகள் படிக்கும் வேலையினில் நானும் வேதாளம் போல் எழுந்து உட்கார்ந்திருந்தேன் - திங்கள் இரவும், செவ்வாய் இரவும் !!

இன்னமும் "என் பெயர் டைகர்" 250 பக்கங்கள் என்னை உக்கிரமாய் முறைத்துக் கொண்டு நிற்கும் போது - போராட்டக் குழுவின் அரைகூவல்கள், தலீவரின் சாந்த முகத்தைப் போலவே சாதுவாய்த் தெரிவதில் வியப்பில்லையோ ? என்னதான் டெர்ரர் face காட்ட எக்கச்சக்கமாய் எத்தனித்தாலும், அந்தப் பிஞ்சு முகங்களுக்கு அது ஒத்து வருமா - என்ன ? தை பிறந்தால் வழி பிறக்குமோ - இல்லையோ -  "எ.பெ.டை" பிறந்தால் எனக்குக் கொஞ்சம் மூச்சு விட நேரம் பிறக்கும் ; மூச்சு விட நேரம் பிறந்தால் மற்றவை தொடரும்! என்ற நம்பிக்கையோடு - இ.பி..பா. போராட்டத்தை டெரர் பாய்ஸ் & girls (!!) கைவிடுமாறு கேட்டுக் கொள்வோமா folks ?

Before I sign off - ஒரு ஜாலியான குட்டிப் புள்ளிவிபரம் ! நமது ஆன்லைன் தளத்தில் பதிவாகியுள்ள வாடிக்கையாளர்களின் விபரங்களையும், சமீபமாய் (6 மாதங்கள்) ஆன்லைனில் விற்பனையாகியுள்ள இதழ்களின் விபரங்களையும் ஜூ.எ. எனக்குக் காட்டினார் ! அங்கு பதிவாகியுள்ளதில் 30% - பெண்களே !  (Maybe தம் வீட்டுப் பெண்களின் பெயர்களில் பிரதிகளை நம் நண்பர்கள் வரவழைத்திடவும்   வாய்ப்புண்டு தான் !) And அவர்கள் தவறாது வாங்குவது நமது 'தல' சாகசங்களையே !! ஆண்களிடம் மட்டுமன்றி - மகளிரிடமும் இரவுக் கழுகார் ரொம்பவே popular என்பது புரிகிறது !! 

சென்ற வாரம் சிவகாசியில் என்னை தயக்கத்தோடு சந்தித்த அன்பு நண்பர் ராஜசேகர் கூட - தன் இல்லத்தரசி ஒரு டெக்ஸ் ரசிகை என்று குறிப்பிட்டது நினைவில் உள்ளது ! இரண்டு பெரிய பாகெட் கடலை மிட்டாய்களை என்னிடம் தந்தவர் - தனது குட்டிப் பெண் வாரிசு தரை முழுக்க காமிக்ஸ் இதழ்களை நிரப்பிப் போட்டுக் கொண்டு அதன் மத்தியில் உற்சாகமாய்க் குதிக்கும் சின்னதொரு வீடியோ க்ளிப்பைக் காட்டிய போது - பசியோ, களைப்போ பெரிதாய்த் தோன்றவில்லை ! ஆந்தைகள் உறங்கும் வேளையிலும் விழித்துக் கொண்டு பணி செய்யும் சுமைகள் எல்லாமே இது போன்ற ஒற்றை நொடிகளின் மனநிறைவுகளின் முன்னே இலவம் பஞ்சுப் பொதியாய்த் தன் காட்சி தருகின்றன ! சொல்லுங்களேன் - நாள் முழுக்கப் புன்னகையோடு சுற்றி வர இது போன்ற காரணங்கள் போதாதா ?  Bye for now !! Have a great weekend !! 

மலைகோட்டை மாநகரில் புத்தக விழா - நாளை !

நண்பர்களே,

வணக்கம்.மலைக்கோட்டை மாநகரில் நாளை (மார்ச் 4-வெள்ளிக்கிழமை) துவங்கிடும் புத்தக விழாவில் நமது ஸ்டால் நம்பர் 54! 

இடம் : மாநகராட்சித் திடல், தென்னூர்.திருச்சி 

குடும்பத்துடன் வாருங்களேன் !!!!!

உங்கள் நண்பர்களுக்கு, திருச்சி நகரின் சுற்றுப்புறங்களிலுள்ள நட்புக்களுக்கு தகவலைப் பரிமாறிடுங்களேன் ? Thanks in advance !!