மார்ச் மங்காத்தா !

ஏப்ரல் இதழ்களை இப்போது ஆன்லைனிலும் வாங்கிடலாம் ! இங்கே க்ளிக் பண்ணுங்களேன் - ப்ளீஸ் :http://lioncomics.in/monthly-packs/351-april-2017-pack.html

"பைண்டிங்கிலேர்ந்து புக் ஏத்திட்டு வர ஆட்டோ போயாச்சாப்பா மைதீன்  ??

"டெக்ஸ் வில்லர் புக் இப்போ தான் மடிச்சிகிட்டே இருக்காங்க அண்ணாச்சி !"

"இப்போ வரைக்கும் என்ன செஞ்சுக்கிட்டு இருந்தாங்களாம் ?? இன்னிக்கு தான் புக் வேணும்னு தெரியும்லே ??"

"அது வந்து நாம நேத்திக்கு ராத்திரிலே தானே பிரிண்டிங்கே முடிச்சு கொடுத்தோம் ! நீங்க கரெக்ஷன் பாத்து கொடுத்ததே நேத்திக்கு சாயந்திரம் தானே ?!"

"ஆங்...ஆமால்லே ? செரி..செரி...எத்தனை மணிக்கு ரெடியாகுமாம் ?"

"12 மணிக்கு வாங்கிடலாம் அண்ணாச்சி ! "

""இந்த மாசத்து இலவச இணைப்பு ரெடியா இருக்குலே ?"

"ம்ம்...வந்து...அது ஒரு மணி நேரத்திலே ரெடியாகிடும்  ; ஆனா சின்ன சிக்கல் !"

" ஸ்ஸ்ஸ்...என்ன சிக்கல் ? "

"அது இந்த மாசக் கூரியர் டப்பாக்குள்ளே நுழைய மாட்டேங்குது !!"

"நாசமாப் போச்சு !! அதை எப்படி கவனிக்காமே விட்டீங்க ?"

"அந்த இலவச இணைப்பு என்னான்னு நேத்திக்கு தானே சொன்னீங்க அண்ணாச்சி ; டப்பா போன வாரமே செய்ய குடுத்திட்டோம் !"

"என்னத்தையாச்சும் சொல்லிக்கிட்டே இரு !! இப்போ புதுசா என்ன பண்றது ???"

"'அதையே'  ஒண்ணுக்கு ரெண்டா மடிச்சு உள்ளே நுழைச்சுடலாம் !"

"ஐயையோ...சுருக்கு விழுந்திட்டா  அசிங்கமா இருக்கும் ! பெரிய சைசுக்கு டப்பா உடனே ஏதாச்சும் கேட்டு பாக்க முடியுமா ?"

"இல்லே அண்ணாச்சி...குறைஞ்சது 3  நாளாச்சும்  டயம் கேப்பாங்க !!"

"செரி...டிசைனிங் கோகிலாவை வரச்  சொல்லு...!! "இது" தான் புது இணைப்பு ! ஒரே மணி நேரத்திலே ரெடி பண்றோம் ; பின்னாடியே பிராசஸிங் - பிரின்டிங் பண்றோம் ; மதியம் புக் வர்றதுக்குள்ளே "இது" ரெடியாகிடணும் !!"

ரைட்டு...சைத்தான் சைக்கிள்லே வருது-என்ற பீலிங்கோடு நம்மவர்கள் என்னைப் பார்த்துத் தலையாட்ட - தொடர்ந்த 3 மணி நேரங்கள் ஜெமினி சர்க்ஸுக்குப் போட்டியாக ஒரு களேபரத்தை அரங்கேற்றினோம் !!

"ஸ்டெல்லா ... வண்டி போயிடுச்சா - புக்கைத் தூக்க ?"

"வந்துக்கிட்டு இருக்கு சார் !"

"நாளைக்கு பேங்க் லீவு...சம்பளத்துக்கு பணம் டிரா பண்ணுனீங்களா ?"

"இனிமேல் தான் சார் !"

"பிரின்டிங் ரெடி பண்ணியாச்சா மைதீன் ?"

"இதோ ஷீட் உங்க டேபிள்லே இருக்கு !"

"மஞ்சள் இன்னும் கூட்டலாம்பா !! ஏன் அழுது வடியுது ??"

"ஆங் ..இப்போ தேவலை ! செரி..கொஞ்சம் லேசா காய விட்டுட்டு 'கட்' பண்ணுங்க !"

"வாசுகி...ஸ்டெல்லா...எல்லாருமே சீக்கிரமே சாப்ட்டிடுங்க...புக் வந்துட்டா அப்புறம் லேட் ஆகிடும் !"

சில பல மௌன மண்டையாட்டல்கள் !!

"ப்பாத்து.பாத்து...ஜெரெமியா புக்கைத் தனியா இருக்குங்க ! மறுப்பதிப்பை அந்த பக்கமா !!"

நமது வாடிக்கையான ஆட்டோ லோடு டீம் ஓசையின்றி சொன்னதைச் செய்கிறது !

"DTDC லே சொல்லிடீங்களா ? புக் வருதுன்னு ?!"

"சொல்லியாச்சு சார் !"

ST ஹெட் ஆபீஸ் கொண்டு வர சொன்னாங்களா ? பிராஞ்சுக்கா ? "

"ஹெட் ஆபீஸ் தான் சார் !"

"பார்சலுக்கு ரேட் கேட்டாச்சா ?"

"இனிமேல் தான் சார் !"

அலுவலக முன் அறையே கொஞ்ச நேரத்துக்கு சாரா சரக்கும் டேப் ஓட்டும் சத்தத்தோடு நிசப்தமாய்ப் பயணிக்கிறது !!

"கடைசியா வந்த சந்தா லிஸ்டை நாளைக்கு என்கிட்டே காட்டுங்க ; ஸ்பெல்லிங் மிஸ்டேக் நிறையத் தெரியுது !"

"செரி சார் !"

"SUPER 6 சந்தா-லே ஏதும் மிஸ் ஆகிடாம பாத்துக்கோங்க !"

"பாத்தாச்சு சார் !"

"சென்னை ஆதிமூலகிருஷ்ணன் சாருக்கு "தாய விளையாட்டு" போன மாச பார்சல்லே வைக்காம விட்டுட்டீங்களாம் ! இந்தவாட்டி அதைச் சேர்த்து வைச்சிடுங்க  !"

"வைச்சாச்சு சார் !!"

"ஒரு 100 புக் சேர்ந்தாச்சுன்னா ஆட்டோவுக்கு சொல்லி கூரியர்லே கொண்டு போய் சேருங்க ! இங்கேயே பொழுதைக் கடத்திட்டு   இருக்காதீங்க !!  "

"ஆட்டோ வந்திட்டு இருக்கு அண்ணாச்சி ! இப்போ போய்டும் !"

எப்போது மதியம் கடந்து போனது ? ; எப்போது லேசான தூறல் போட்டது ? எப்போது மாலை புலர்ந்தது ? எப்போது இருள் கவிழ்ந்தது ? எதுவும் நம்மவர்களுக்கு இன்றைய பொழுதினில் தெரிந்திருக்க வாய்ப்பில்லை என்றே நினைக்கிறேன் !!

வணக்கம் நண்பர்களே, WELCOME TO YET ANOTHER EPISODE OF DESPATCH DAY MADNESS !!

ஒவ்வொரு மாதத்தின் இறுதி நாளிலும் நான் சூளுரைக்கத் தவறுவதில்லை ! "நாளைக்கே அடுத்த மாச புக்குகளை 'மட மட' ன்னு ரெடி பண்றோம் - 15 -ம் தேதிக்குள்ளாற முடிக்கிறோம் !! ஹாயாக காலாட்டிட்டே அடுத்த மாச டெஸ்பாட்ச் பாக்குறோம் !!" - என்று லூசுப் பயல் போல என்னிடம் நானே ஒப்பித்துக் கொள்வேன் ! ஆனால் ஏதேதோ காரணங்கள் இடையில் தலைதூக்கும் ; பணிகளில் ஏதேனும் ஒரு ஸ்பீட் பிரேக்கர் நிகழும் ;  இறுதி வாரத்தில் 'தாண்டுறா ராமா !  அட்றா ராமா ' என்று குட்டிக் கரணங்கள் மட்டுமே போடுவோம் !! அதிலும் இன்றைய கரணம் - ஷப்பா !! பாவம் நம்மவர்கள் !! 

காலையில் அரைத்தூக்கத்தில் கண்ணைத் திறக்கும் போதே - "ஆஹா...இன்னிக்கு டெஸ்பாட்ச் தினமாச்சே !!" என்ற அலாரம் தலைக்குள் ஒலித்தது ! திரும்பிப் படுத்து இன்னொரு ரவுண்ட்  சொப்பன லோகம் போகும் ஆசையை உதைத்துத் தள்ளி விட்டு ஆபீசுக்கு கிளம்பிய நேரமே மண்டைக்குள் ஒரு பட்சி சொன்னது - இன்றைய பொழுது மறை கழன்ற தினமாக இருக்குமென்று !! நாளைய தினம் உங்கள் கைகளில் புக் இல்லாது போனால் பூமி மாற்றிச் சுற்றப் போவதில்லை தான் ; விராட் கோலியும் - ஆஸ்திரேலிய ஊடகங்களும் 'பாய்-பாய்' ஆகித் தோள்களில் கை போட்டுக் கொள்ளப் போவதுமில்லை தான் !! ஆனால் மாதத்தின் முதல் தேதிக்கு உங்கள் கைகளில் புக்கை ஒப்படைக்கும் ஒரு சன்ன திருப்தியும் ; இவ்வார இறுதியை சுவாரஸ்யமாக்கும் வாய்ப்பைத் தவற விட வேண்டாமே என்ற ஆதங்கமுமே என் மண்டைக்குள் ஒரு  நட்டுவாக்காலியை நர்த்தனம் ஆடச் செய்துள்ளதென்று நினைக்கிறேன் !! And ஏதோ சஞ்சீவி  மலையைத் தோளில் சுமந்துவந்து சாகசம் செய்து விட்ட ஆஞ்சநேயராக எனக்கு நானே பில்டப் தந்து கொள்ளும் முயற்சியல்ல மேற்கண்ட வர்ணனை !! காமிக்ஸ் எனும் பித்தின் காரணமாய் நான் அடிக்கும் பல்டிகளுக்கொரு முகாந்திரமுள்ளது ! ஆனால் - "பென்னியா  ?" அது பெஞ்சமினுக்குப் பெரிப்பா பையனா  ? "என்று கேட்கும் நம்மவர்களும் இந்தக் குட்டிக் காரணங்களில் எத்தனை ஐக்கியமாகிடுகிறார்கள் ; மௌனமான அவர்களது சுழற்சி இல்லையேல் இந்தப் பயணமே லேது ! என்பதை மீண்டுமொருமுறை சிலாகிக்கவே இந்தப் பதிவு ! Trust me guys - மாதயிறுதியில் என்னிடம் பணியாற்றுபவர்களை ஆண்டவன் தான் ரட்சித்தாக வேண்டும் !! முகம் சுளிக்காது  எனது ஒவ்வொரு குரங்குக கூத்துக்கும் ஈடு கொடுக்கும் இந்த டீம் எனது அசாத்திய பலம் !! இதனில் ஒற்றைச் சிறு கண்ணி இல்லாது போனால் கூட நான் எங்கேனும் குப்புறக் கிடப்பேன் என்பது உறுதி !! 

Anyways - கூரியர் படலம் 100 % வெற்றி என்பதால் - நாளைய தினம் இதழ்கள் உங்களிடமிருக்கும் !! Happy Reading Folks !!

And தர தரவென்று காலை முதல் ஆபீசில் தரையைச் சுத்தம் செய்து வரும் நாக்காரைச் சன்னம் சன்னமாய்ச் சுருட்டி வாய்க்குள் திணித்துக் கொண்டு வீட்டுக்குப் புறப்படும் முன்பாக - இதோ MMS இதழின் அட்டைப்பட முதல் பார்வை !! ஓவியர் ஹெர்மன் தனது ராப்பர் டிசைனே அட்சர சுத்தமாய்ப் பயன்பாட்டில் இருந்திட வேண்டுமென்று சொல்லியிருந்ததால் - முன் & பின் அவரது டிசைனே - லேசான வர்ண மெருகூட்டலோடு  மட்டும் ! வழக்கம் போல hardcover ! வழக்கம் போல ஜிகினா வேலைகள் !! எல்லாம் வழக்கம் போலிருப்பினும், இந்தக் கதைக் களம் ரொம்பவே மாறுபட்டது ! "கவ்பாய் தொடரோ ?" என்ற எண்ணத்தில் அணுகினால் - nopes என்ற பதிலை உணர்வீர்கள் சீக்கிரமே ! "எதிர்காலத்து sci -fi ரகக் கதையோ ?"  என்ற எதிர்பார்ப்போடு பக்கங்களைப் புரட்டினால் - கழுதை மேல் சவாரி செய்யும், சவரம் காணா நாயகர்கள் - 'பிம்பிலிக்கா - பிலாக்கி ' சொல்வார்கள் !! " "செரி..ஏதோ ஒரு மெகா plot நோக்கிச் செல்லும் கதையோ ? " என்ற பில்டப்போடு புறப்பட்டால் - அந்தக் கதையோட்டம் உங்களை பார்த்து டாட்டா காட்டும் ஜாலியாக !! 

Guys : ஒற்றை வரி advice ! எது மாதிரியும் இல்லாப் புது மாதிரி இது !! 

Bye all !! See you around !!

P.S : ஏப்ரல் இதழ்களின் ஆன்லைன் லிஸ்டிங்கும் ரெடி !! 

மாற்றங்கள் தொடர்கதை தானா ?

கூட்டாளிகளா,

வணக்கம் வைக்குறேன் !! இப்போ இன்னா சொல்ல வரேன்னா....தூத்தேறி...மறந்து போச்சே !! இன்னாமோ உருப்படியா சொல்ல நினைச்சுகினே வந்திட்டிருக்கப்போ இந்த இழவெடுத்த ஞாபக மறதி சும்மா உசிரே வாங்குது ! ஆங்...செரி.....மேட்டருக்கே வாரேன் லைன்னா !! 

Hold on guys !!! தவறான வலைப்பக்கத்துக்குள் நுழைந்து விட்டோமோ என்ற பீதியோ ; கோடை வெயிலுக்கு அதற்குள்ளாகவே ஒரு சேதாரமா ? என்ற பயமோ அனாவசியம் !! ஏப்ரல் மாதத்தில் தற்செயலாய் அமைந்து போன்றதொரு கதைக் கூட்டணியானது, அநியாயத்துக்கு கரடு முரடான ஸ்கிரிப்ட்டுடன்ஒட்டு மொத்தமாய்ப் போட்டுத் தாக்க, கடந்த 10 நாட்களாய் அவற்றோடு குப்பை கொட்டியதன் பலனாய் - வாயைத் திறந்தாலே கூவம் போல் மணக்கிறது !! ஏற்கனவே பதிவிட்டிருந்தது போல ஹெர்மனின் ஜெரெமியா கதை ரொம்பவே லோக்கலான இரு பசங்களின் பயணக் கதை !! பற்றாக்குறைக்கு இந்தக் கதைகளை ஹெர்மன் உருவாக்கிய  சமயம்  (1978) - அவர் கதாசிரியர் க்ரெக்குடன் லேசான மனத்தாங்கலில் இருந்தாராம் ! (கமான்சே கதைகளுக்கு ஹெர்மன் + கிரெக் கூட்டணி இணைந்து இயங்கி கொண்டிருந்த வேளை அது !! ) என்னாலும் சொந்தமாய்க் கதை எழுதி,  ஒரு கதாசிரியரின் ஆற்றலும் எனக்குள் உள்ளதென்று  நிரூபிக்க ஹெர்மன் முனைப்பாக இருக்க - அவரது டயலாக் வரிகளில் நிறைய நையாண்டி ; குதர்க்கம் என்று விரவி இருப்பதை நெடுக பார்க்க முடிந்தது !! And ரொம்பவே வித்தியாசமான கதை சொல்லும் பாணி கொண்ட மனுஷன் இவரென்பதை அந்த 136 பக்கங்களிலும் புரிந்து கொண்டேன் !! So சுத்தமாய் முதுகெலும்பைக் கழற்றித் தந்த கதைக்குள் கடப்பாரை நீச்சல் அடித்ததில்   எனக்குள்ளும் லேசாக தலைதூக்கிய மிஸ்டர் கடுப்ப்ஸ் - எனது வரிகளிலும் பிரதிபலிப்பது போல் தோன்றியது !!

சரி, இது தான் இப்படி என்று நமது சுட்டிக் . குட்டிப் பயல் பென்னியின் பக்கமாய் கொஞ்சம் ஒதுக்கினால் - அவன் சந்திக்கும் Ms .அட்டகாசமோ ஒரு ராங்கி ராணி !! அங்கேயும் லைட்டாக கச்சா-முச்சா பாஷை சடுகுடு ஆட - இறுதியாய் இரவு கழுகாரிடம் தஞ்சம் புகுந்தேன் !! இந்தாண்டின் முதல் சிங்கிள் ஆல்பம் என்பதால் 100 பக்கங்கள் மாத்திரமே ; அதுமட்டுமன்றி - கதையும் ஒருவிதத்தில் குழப்பங்களின்றித் தெரிந்ததால் கடைசி நேரத்தில் எழுதிக் கொள்ளலாம் என்ற மெத்தனத்தில் இருந்தேன் !! ஒரு வழியாக ஜெரெமியாவில் எனது பணிகளுக்கு "சுப மங்களம்" போட்டான பின்னே - "ஒரு வெறியனின் தடத்தில்" புறப்பட்டால் - கொஞ்ச நேரத்துக்கு மெர்ஸெல் ஆகிப் போனேன் !! ரொம்பவே ஆரவாரமான கதைக் களம் ; "சிங்கம் - சிங்கிளாத் தான் வரும் !!" என்பதற்கு அக்மார்க் உதாரணமாய் கதை நெடுக தனி ஆவர்த்தனத்தில் அதகளம் பண்ணும் TEX ; செம fresh ஆன புதியதொரு ஓவிய பாணி என்று கதை பட்டையைக் கிளப்பியது ! ஆனால் highlight அத்தோடு முடிந்திடவில்லை !!! கதையில் தலை காட்டுமொரு முதியவர் வாயைத் திறந்தாலே சும்மா கூவம் தோற்றது போங்கள் !! கதையின் முழுமையும் இந்தப் பெரியவரைச் சுற்றியே ஓடிட, அவருக்குப் பேனா பிடித்ததில் என் பேனாவே பேஜாராகிப் போச்சு !! So ஒரு வித்தியாசமான கதை கூட்டணியில், ஒரு வித்தியாசமான ஒற்றுமை இந்த ஏப்ரலை எனக்கும், உங்களுக்கும் பரபரப்பாக்கிடவுள்ளது என்பதே தலைப்புச் சேதி !! 

And இதோ - இந்த இதழ்களின் அட்டைப்படங்களும் ; உட்பக்கங்களும் டிரைலர்களாய் !! ஆட்டத்தை ஆரம்பித்து வைப்பது பொடியன் பென்னி !! வழக்கம் போல - இங்கே ஒரிஜினல் டிசைனையே நாம் பயன்படுத்திட வேண்டுமென்ற படைப்பாளிகளின் கண்டிஷன் அமலில் இருப்பதால்  - மூச் காட்டாமல் எழுத்துக்களை மட்டும் இணைத்து விட்டு ராப்பரை ரெடி செய்து விட்டோம் !! So இன்னமும் கொஞ்சம் நகாசு வேலைகள் பார்க்க ஆசை இருப்பினும் , no ஆணி புடுங்கிங்ஸ் என்று தீர்மானித்தோம் !! 

உட்பக்கத்திலிருந்தும் இதோவொரு டீசர் !!

இந்த 64 பக்க இதழைக் கையில் ஏந்தும் போது உங்களின் நார்மலான காமிக்ஸ் எதிர்பார்ப்புகள் ; "இன்ன மாதிரி இன்ன மாதிரி கதை ஓட வேண்டும் ; இந்த ரீதியில்  கிளைமாக்ஸ் அமைய வேண்டும்..இத்யாதி..இத்யாதி  !!" என்ற சிந்தனைகளை முடிந்தமட்டிற்கும் ஓரங்கட்டி விடுங்களேன் - ப்ளீஸ் !! இது நம்முள் ஒரு ஓரமாய்ப் பதுங்கி கிடக்கக் கூடிய மழலைத்தனத்தை அசாத்தியமாய்த் தட்டி எழுப்பும் ஆற்றல் கொண்ட கதை !! பென்னியோடு நாமும் பால்யங்களுக்குள் புகுந்து விட்டால் இந்த இதழானது கலப்படமில்லா குதூகலத்துக்கு உத்தரவாதம் !! TINTIN பாணியினை நினைவூட்டும் சித்திரங்கள் ; அதே classy வர்ணச் சேர்க்கைகள் ; கண்ணுக்கு இதமானபக்க அமைப்புகள் என நான் செம ஜாலியாய் ரசித்துப் பணியாற்றிய இதழிது !! பல்செட் கட்ட வேண்டிய வயதுக்காரர்களுடன் விடாப்பிடியாய் நமது பால்யங்களை வலம் வந்தே தீருவோம் என்று பிடிவாதம் காட்டும் நாம் - அதே பால்யங்களை - சற்றே மாறுபட்ட ரூட்டில் மறுவிசிட் அடித்துத் தான் பார்ப்போமே ? பென்னி - ஜாலிச் சூறாவளி !!

சூறாவளி என்ற உடனே ஒரு மஞ்சள்சட்டைக்காரரை நினைவு கூராது போவது சாத்தியமாகுமா ? இதோ ஏப்ரல் டேஸ் கோட்டாவின் அட்டைப்பட முதல் பார்வை !!

மிரட்டும் பணிமண்டலமே இந்தக் கதையின் முழுமைக்கும் பின்னணி என்பதால் நமது ஓவியரின் சகாயத்தோடு டெக்ஸுக்கு ஒரு தடிமனான கோட் வழங்கியுள்ளோம் !! ஓவியரின் டிசைனை சற்றே improve செய்ய முனைவது நமது டிசைனரின் முயற்சி !! பின்னட்டை நமது டிசைனர் பொன்னனின் கைவண்ணம் !  ரொம்பவே  வித்தியாசமான சித்திர பாணிகொண்ட இந்தக் கதைக்கு பின்ராப்பர் ஒரு சின்ன டிரைலர் என்று வைத்துக் கொள்ளுங்களேன் !! And இதோ அந்த black & white சித்திர பாணிக்கொரு சாம்பிள் :

இந்த சாகசத்தில் கார்சன் உடனில்லை எனினும், அந்தப் பெரியவரின் அதிரடி இருப்பு - கதைக்கு ஒரு நெருப்பைத் தருவது போலுள்ளது !! எல்லா பாணி TEX கதைகளையும் முயற்சித்த திருப்தி கிட்டட்டுமே என - நம்மவரின் solo சாகஸத்தைத் தேர்வு செய்தது நிச்சயம்  தவறில்லை என்று தோன்றுகிறது  !!  சிம்பிளான கதை அரங்கே - ஆனால் அதைச் சொன்ன விதமும், கதைக்கு நல்கியுள்ள ஸ்பீடையும் பார்த்து வாய் பிளக்காது இருக்க முடியவில்லை தான் !! அசாத்தியமானவர்கள் இந்தப் படைப்பாளிகள் !!

மெயின் பிக்சர் ஆச்சு ; இனி காத்திருப்பது மறுபதிப்பின் முன்னோட்டமே !! பூப்போட்ட ஸ்கார்பும், அண்டராயரும் டிரேட்மார்க்காய்க் கொண்ட நமது ஆதர்ஷ ஜானி நீரோவே இம்மாத மறுபதிப்புக் கோட்டாக்காரர் ! இதை எழுதுவதற்கு சில மணி நேரங்களுக்கு முன்பாகத் தான் அந்தக் கதையினைத் திருத்தும் வேலைகளைச் செய்து கொண்டிருந்தேன் என்பதால் இன்னமும் கெக்கே-பிக்கே ஓயவில்லை முழுமையாய் !! இதோ கொலைக்கரம் இதழின் அட்டைப்பட first லுக் !!

சமீப வழக்கப்படி இந்த மறுபதிப்புக்கும் நமது ஓவியரின் கைவண்ணமே - ஸ்டெல்லாவையும் அட்டைப்படத்தில் இணைத்து !! ஜானி நீரோவை நேராக வரைந்தால் தானே வம்பாகிப் போகிறது நம் ஓவியருக்கு - 'சிவனே' என்று குனிந்த தலை ஸ்டில்லைத் தேர்வு செய்து விடுவோம் என்று மகா சிந்தனை எழுந்தது அடியேனுக்கு ! தலை தப்பிக்கிறதா ? என்பதை நீங்கள் தான் சொல்லிட வேண்டும் !! "கதை"யைப் பொறுத்தவரை ....அதாவது, அந்தக் கதை இருக்கே ; ஆங்....இருக்கு..இருக்கு..கதை இருக்கவே இருக்கு....அது வந்து கழுத்தை ஒரே திருகாய்த் திருகி எதிரிகளை  போட்டுத் தள்ளும் ஒரு மெகா வில்லனை நம்மவர் போட்டுத் தாக்கும் சாகசமிது !! சொல்லப்போனால் - எனது பால்யங்களில் நான் ரொம்பவே ரசித்த கதையிது ! ஜானியின் குரவளையை வில்லன் நெரிக்க முற்படும் கட்டங்களில் வயிற்றில் பீதி பந்து சுருண்டதெல்லாம் நினைவுள்ளது !! ஆனால் இன்றைக்கு அதையே படிக்கும் போது பேந்தப் பேந்தத் தான் முழிக்க தோன்றுகிறது !! ஆண்டவா !! இதைத் தான் காலமாய் சிலாகித்தோமா ? என்ற கேள்வி ஜிங்கு ஜிங்கென்று ஆடுகிறது என் முன்னே !! Oh yes ...அற்புத ஆர்ட்ஒர்க் உள்ளது ; குழப்பமிலா கதையோட்டம் தான் !! ஆனால் ...ஆனால்...ஆனால்...!! சரி..விட்டுவிடுவோம்  !! இந்தப் பதிவின்  thuvakkathil கொப்பளித்த பாஷை மறுபடியும்  எட்டிப் பார்த்துத் தொலைக்கப் போகிறது !

Before I sign off - இப்போதைக்கு எனக்குள் விரவி நிற்கும் இந்தக் கேள்விக்கு விடை சொல்லுங்களேன் guys ? இன்னும் இருப்பதோ-முப்பதோ ஆண்டுகளுக்குப் பின்பாய் நாமிப்போது சிலாகித்து ரசிக்கும் கதைகளுமே இதே போல 'கெக்கே-பிக்கே' சிரிப்பினை உருவாக்கிடுமா ? "இதையாடா சாமி அன்றைக்கு ரசித்தோம் ?? "என்று ஒரு தூரத்து பொழுதில்  நாமும் புருவங்களை உயர்த்தத்தான் செய்வோமா ? ரசனைகள்  நம்மைச் சூழ்ந்துள்ள உலகினையும் சார்ந்ததே எனும் பொழுது இந்த மாற்றங்கள் தவிர்க்க இயலா நியதி தானா ? சொல்லுங்களேன் ப்ளீஸ் ?

 Bye all for now !! See you all on Sunday !!

P.S : இந்த வாரம் பணிகளின் சுமை தாக்குப் பிடிக்க இயலா அளவில் இருந்த காரணத்தினால் போன வாரத்துப் பதிவில் தலை காட்ட இயலவில்லை !! தினமும் தூங்கப் போகும் வேளையில் கூர்க்கா விசில் சத்தமே என்னைத் தாலாட்டி வந்துள்ளது இந்த வாரத்தின் முழுமைக்கும் !! So  முந்தய பதிவில்  நீங்கள் எழுப்பியிருக்கக் கூடிய கேள்விகளை சிரமம் பாராது இங்கேயும் பதிவிடுங்களேன் - ப்ளீஸ் ? நிச்சயம் பதில் தர முனைவேன் !!! Sorry guys !! 

கழன்ற மறையும் நல்லதே ?!!

நண்பர்களே,

வணக்கம். போன இடத்தில் குளிரின் தாக்கம் பற்களை வெடவெடக்கச் செய்ததென்றால் - இங்கேயோ உங்கள் அன்பின் கதகதப்பு பேஸ்மெண்டை வீக்காகுகின்றது ! தனித்தனியாய் வாழ்த்துச் சொன்ன நண்பர்கள் சகலருக்கும் ஒட்டுமொத்தமாய் “நன்றி” சொல்லிட மீண்டுமொரு முறை சிரம் தாழ்த்துகிறேன் !  Thanks from the bottom of my heart all !! நிறையத் தடவைகள் நான் பாடிய அதே கானம் தான் (நாங்களும் பறவை தானுங்களே?!) என்றாலும் - இது போன்ற தருணங்களில் இன்னொரு முறை அதனைத் தொடர்ந்திடுவதில் தவறில்லை என்று பட்டது ! பணம் பண்ண நூறு மார்க்கங்கள் பரந்து விரிந்து நிற்கலாம் ; ஆனால் நிஜமான புன்னகைகளை உருவாக்கும் பயணப் பாதைகள் மிகுந்திருப்பதில்லை ! ஆளரவம் குறைச்சலான அந்த இரண்டாவது பாதையை நமக்கு முன்நிறுத்தித் தந்த ஆண்டவனுக்கு நமது நன்றிகள் என்றைக்கும் இருந்திடும் ! நமது இரண்டாவது இன்னிங்க்ஸ் துவங்கிய நாள் முதலாய், உங்களோடு மெய்யாகவே கரம் கோர்த்து நடைபோடும் உணர்வானது முன் எப்போதையும் விடக் கூடுதலாய் வியாபித்து நிற்பது இப்போது என்று நான் சொன்னால் அது   நிச்சயம் எனது கற்பனையல்ல ! எல்லைகளில்லா இந்தப் பயணம் என்றைக்கும் இதே உற்சாகத்தோடு தொடரட்டுமே !!

மார்ச்சின் march past ஞாபகப் பேழைகளுக்குள் ஐக்கியமாகியுள்ள நிலையில், எதிர்நிற்கும் ஏப்ரலில் பார்வைகளைப் பதிக்கும் தருணமிது ! இம்மாதம் சந்தா A-வில் இதழ்கள் ஏதும் கிடையாதென்ற நிலையில் பிரதானமாய் கவனத்தை ஈர்க்கக் காத்திருப்பது நமது Million & More ஸ்பெஷலாகத் தானிருக்குமென்று நினைக்கிறேன்! ஜெரெமயா பணிகள் இங்கே பரபரப்பாய் நடந்திட - இந்த இதழின் பின்னணியை யோசித்துப் பார்க்கும் போது எனது மலைப்பு இரு தனித்தனி திசைகளில் விழி விரிந்து நிற்கின்றது !

தட்டுத் தடுமாறி பாதி ஜீவனோடு நாம் இதழ்களை வெளியிட்டு வந்த காலத்தில், நமது (அப்போதைய) வலைத்தளத்தில் ஒரு discussion பக்கம் இருந்தது மிதமாக நினைவுள்ளது. வரிசையாய் உங்களது விமர்சனங்கள்; பின்னூட்டங்கள் என்று ஒரே தொடர்ச்சியாய் அது ஓடியதாக ஞாபகம்! இடையே spam போட்டுத் தாக்கிட - நமது வெளியீடுகளின் துரிதமும் ‘லைட்டாக‘ப் பல்லைக்காட்டத் துவங்கிட - குதிங்கால் பிடரியிலடிக்க மூட்டையைக் கட்டி விட்டோம் ! தொடர்ந்த காலங்களில் உங்களோடு நிறைய கண்ணாமூச்சி ஆடிவிட்டு ஒருவழியாக மறுவருகை புரிய நினைத்த நேரத்தில் எனக்குள் ரொம்பவே கூச்சமும், தயக்கமும் நிறைந்திருந்தது ! எந்த மூஞ்சியை வைத்துக் கொண்டு உங்களை எதிர்கொள்வது ? என்ற தடுமாற்றம் ஒரு பக்கம் ; ஏஜெண்ட்கள் வழியாக விநியோக முறைகள் சொதப்பலாகியிருந்த நிலையில் நேடியான சந்தா / புத்தக விழா விற்பனைகள் தான் மார்க்கமென்ற தருணத்தில் உங்களிடம் நமது நம்பகத்தன்மையை நிலைநாட்டுவது எவ்விதமென்ற தயக்கம் இன்னொரு பக்கம் ! Maybe அன்றைக்கு நீங்கள் மேலோங்கிய நையாண்டியோடே என்னை வரவேற்றிருப்பின் நிச்சயம் உங்கள் மீது குறை சொல்லிட எனக்கு முகாந்திரங்களிருந்திராது ! சொதப்பல்களைத் தொடர்ந்திடாது, நமது இதழ்களைத் தொய்வின்றி வெளியிட உள்ளுக்குள் நான் உறுதியாகயிருந்திருப்பினும் - காற்றில் கரைந்து போயிருந்த நமது Credibility-ன் தேடலில் எனது உறுதிகள் எத்தனை காலம் தாக்குப் பிடித்திருக்குமோ ? - நானறியேன் ! ஆனால் தொடர்ந்ததோ கனவிலும் எதிர்பார்த்திருக்கா சங்கிலித் தொடர் நிகழ்வுகள் !

2012-ன் ஆண்டுச் சந்தாவே ரூ.620/- தான் என்பதும், வண்ண இதழ்கள் வெகு சொற்பமே அன்றைய திட்டமிடலில் இருந்ததென்பதும் ஆண்டுக்கு ரூ.5000+க்கு வெடி வைத்திடும் இன்றைய பொழுதில் சிரிக்கச் செய்யும் மேட்டராகத் தென்படுகிறது ! ஆனால் - நமது மறுவருகையின் ஆரம்ப நாட்களில் அதுவே ஒரு அசாத்திய உச்சமாகத் தோற்றம் தந்தது தான் நிஜம் ! “இன்னொரு வாய்ப்புத் தந்து பாருங்களேன் - ப்ளீஸ் !" என்று கோரிடக் கூட எனக்கு அன்றைக்கு லஜ்ஜை பிடுங்கித் தின்றது ; ஆனால் நீங்களோ நிபந்தனைகளின்றி உங்களது பணத்தையும், அன்பையும், நேசத்தையும் நம் மீது வாரிக் குவித்த போது எனக்குள்ளே நிறைய விஷயங்கள் புதுப்பரிமாணங்களில் தோற்றம் தரத் தொடங்கின ! இந்தப் பளா-பளா கலர்; ஆர்ட் பேப்பர் அவதாரெல்லாமே post 2012 சமாச்சாரங்களே என்ற போது - அதற்கு முன்பான அந்தச் “சாணித் தாள் நாட்களை” - சாதனை நாட்களாகப் பார்த்தி்ட சத்தியமாய் எனக்குத் திராணியிருந்திருக்கவில்லை ! So அது வரையிலான அந்த ‘சஸ்தா‘ இதழ்களின் தாக்கமே இத்தனை ஆதர்ஷத்தை ஈட்டித் தந்துள்ளதென்ற போது, ‘புது யுக‘ இதழ்கள் உங்களை இன்னும் எத்தனை லயிக்கச் செய்திடக் கூடுமென்ற எதிர்ப்பார்ப்பே எனது சோம்பேறிமாடன் அவதாரத்தைக் கடாச உதவியது ! உங்கள் உற்சாகங்கள்; விமர்சனங்கள்; விவாதங்கள் ஒவ்வொரு மாதமும் இங்கே பதிவாகத் தொடங்கத் தொடங்க, பணிகளின் சவாலை விடவும் சுவாரஸ்யமானதொரு சவாலாக எனக்கவை வளர்ந்து நிற்பதாய்த் தோன்றியது ! So உங்களது அபிமானங்களைத் தக்க வைத்துக் கொள்ள எத்தனை குட்டிக்கரணங்கள் அடித்தாலும் தேவலாமென்ற தைரியம் துளிர்விடத் தொடங்கியது அந்த நாட்களில் தான் !

NBS தான் இந்தப் பதிவுப் பக்கத்தின் முதல் வெற்றிக் குழந்தை என்று சொன்னால் மிகையாகாது! “என் பெயர் லார்கோவும்; டபுள் த்ரில் ஸ்பெஷல்; Wild West ஸ்பெஷலும் வரிசையாய் ஹாட்ரிக் அடித்த போது எனக்கு வழக்கம் போலவே கிட்டிய அசட்டுத் துணிச்சலின் பலனே NBS-ன் அறிவிப்பு ! இன்றைய நிலையில் 400+ பக்கங்கள் கொண்டதொரு இதழை நான் அரைத் தூக்கத்தில் சுற்றி வந்தால் கூட, நம்மவர்கள் ஃப்பூ என்று ஊதித் தள்ளி விடும் தேர்ச்சியைக் கண்டெடுத்து விட்டார்கள் ! ஆனால் 2013-ல் இந்தப் பணித் தேர்ச்சியோ ; ஆட்பலமோ இல்லா நிலையில் NBS-ஐக் கரைசேர்க்க முடிந்தது நிச்சயமாய் வடதிசையின் தேவன் தோரின் புண்ணியமே என்பேன் ! ஆனால் அந்தக் கனவை எனக்குத் தந்தது இந்தப் பதிவுப் பக்கங்களில் நீங்கள் உற்பத்தி செய்து தந்த உத்வேகமே என்பதில் சந்தேகம் கிடையாது ! ஒரு பதிவுக்கு நூறு அல்லது நூற்றைம்பது பின்னூட்டங்கள் கிட்டினாலே பெரும் பாக்கியமென்றிருந்த நிலை சிறுகச் சிறுக NBS-ன் நெருக்கத்தில் எகிறத் தொடங்கியதை இப்போதும் பார்த்திட முடிகிறது stats பகுதியில் ! So வண்டியை இயக்கும் பெட்ரோலுமாகி; பிரயாணத்தை ரசிக்கும் பயணிகளுமாகி, நம் பாதையைப் படுசுலபமாக்கிய  பெருமை இந்தப் பக்கத்தைச் சுற்றி வரும் ஒவ்வொரு அன்புள்ளத்தையும் சாரும் ! Oh yes - நிறைய காரசாரங்கள் இடையிடையே தலைதூக்கியுள்ளன ; ஏகப்பட்ட அபிப்பிராய பேதங்கள் முளைவிட்டுள்ளன ; ஆரம்ப நாட்களது நண்பர்களில் சிலர் தற்போது இங்கு பதிவிடுவதில்லை தான் ! ஆனால் உரக்கவோ; மௌமாகவோ இந்தப் பக்கத்தை விடாப்பிடியாய்த் தொடர்ந்திடும் இயல்பே நம்மை ஒன்றிணைக்கும் காமிக்ஸ் நேசத்தின் வலிமைக்கொரு பறைசாற்றல் என்பேன் !

விளையாட்டாய் ஒரு லட்சம் பார்வைகள் ; இரண்டு லட்சம் பார்வைகளென்ற மைல்கல்களைத் தாண்டினோம் - கோவையிலுள்ளதொரு பாவப்பட்ட கீ-போர்ட் ஓடாய்த் தேய்ந்து போனதன் புண்ணியத்தில் ! ஆனால் தொடர்ந்த நாட்களில் LMS ; மின்னும் மரணம் ; லயன் 250 ; எ.பெ.டை. என்று விதவிதமான ஸ்பெஷல் இதழ்களும், நம் கருத்துகளுக்குத் தீனி போட, சுவாரஸ்ய மீட்டரும், பார்வைகளின் பதிவு மீட்டரும் எகிறத் தொடங்கியதை நாமறிவோம் ! Of course - Refresh பட்டனை நம்மவர்கள் அத்தனை பேரும் கதறக் கதறத் துவைத்தெடத்த புண்ணியவான்கள் என்பதை நான் மறந்து விட்டு, “ஹை... 40,000 பேர் மாசாமாசம் இங்கே ஆஜராக்கும்?!” என்று துள்ளிக் குதித்ததில்லை! மாறாக - "200 பேர்... 200 தடவை வருகை தந்திருக்கிறார்களே !!” என்று வியந்த நாட்களே அதிகம் ! உங்கள் நேரங்களைப் பங்குபோட்டுக் கொள்ள குடும்பப் பொறுப்புகள் ; பணிச் சுமைகள் ; நமது அரசியல் அஜால் குஜால்கள் ; டி.வி. ; இன்டர்நெட் என்று ஏகப்பட்ட சமாச்சாரங்கள் ரவுண்ட் கட்டி நிற்கும் தருணத்திலும் கூட இந்தப் பக்கத்தின் காமிக்ஸ் நடப்புகளுக்கும், நட்புகளுக்கும் நீங்கள் நல்கிடும் நேரமானது ரொம்ப ரொம்ப ஸ்பெஷல் என்பேன்! So எப்போதோ தாண்டிச் சென்று விட்ட அந்த “2 மில்லியன் பார்வைகள்” என்ற மைல்கல்லைப் பெருமைப்படுத்திடவே ஜெரெமயா வரக்காத்திருக்கிறார் ! கையில் சிக்கியுள்ளது ரவையா ? சுண்ணாம்பா ? கோலப் பொடியா ? என்றே தெரியாமல் 60+ மாதங்களுக்கு முன்பாகச் சின்னதாய் நாங்கள் போட முனைந்த புள்ளிக் கோலத்தை இன்றைக்கு ஒரு அழகான ரங்கோலியாக்கித் தந்திருக்கிறீர்கள்! So காத்திருக்கும் இந்த MMS இதழானது உங்கள் ஒவ்வொருவரின் நேரங்களுக்கும், நேசங்களுக்கும் நாங்கள் செய்திடும் மரியாதையாகப் பார்க்கிறேன் !

மலைப்பு # 2 – இந்த இதழுக்குக் கிட்டியுள்ள பிரெஞ்சு தேசத்தின் ஒத்தாசையை எண்ணி ! நிறையவே எழுதியிருக்கிறேன் - இந்த இதழின் தயாரிப்புச் செலவுகளுக்குப் பிரெஞ்சுக் கலாச்சார மையம் தொகையொன்றை மான்யமாக வழங்கியுள்ளதைப் பற்றி ! அந்த நாட்களை இப்போது சாவகாசமாய் அசைபோடும் போது நிஜமாகவே ‘டர்ராகிறது‘ - “ஆஹா. மெய்யாகவே நமக்கு இந்த அருகதையுள்ளதா?” என்று ! பார்வைக் கோணங்கள் ஆளாளுக்கு மாறும் என்பதில் ரகசியமேது ? So மாதாமாதம் ஒரு இதழ் மாற்றி  இதழ்   அடுத்த இதழ் பின்னேயெனத் தடதடவென ஓடிக் கொண்டேயிருக்கும் எங்களுக்கு பணிகளின் பரிமாணங்களாகவே எல்லா இதழ்களும் தோன்றிடுவது வாடிக்கை ! ‘ஹை... இந்த அட்டைப்படம் சூப்பராக வந்துள்ளதே !‘; “இந்த புக் செமையாய் அமைஞ்சு போச்சு!” என்ற சுவாரஸ்யத்தோடு அந்தந்த மாதத்து புக்குகளைப் புரட்டுவது ரொம்பச் சொற்ப நேரத்திற்கே ! அதற்கு மேல் புரட்டினால் எட்டிப் பார்த்துப் பல்லிளிக்கக் கூடிய எழுத்துப் பிழையோ ; கோடியில் திட்டுத் திட்டாய்த் தெரியும் மசியின் காரணமாய் கிட்டக் கூடிய திட்டுக்களோ ; ‘அட... இதுக்குப் பதிலா அந்தக் கதையைத் தேர்வு செய்திருக்கலாமோ?‘ என்ற காலம் கடந்த ஞானோதயங்களோ முளைத்திடும் ஆபத்துக்கள் அதிகம் என்பதால் எங்களது ரசனைப் படலம் ரொம்பவே லிமிடெட் ! ஆனால் இத்தனை காலம் நாம் சிந்திய வியர்வைகளை பிரெஞ்சு மையம், புருவம் உயர; கண்கள் அகல ரசித்த போது வயிற்றுக்குள் பட்டாம் பூச்சிகள் ‘ஏக் தம்மில்‘ செண்டா மேளத்தை முழக்கிக் கொண்டே கதக்களி ஆடியது போலிருந்தது ! “Don’t tell me all these are from french?” என்று வந்த மின்னஞ்சலிலேயே அவர்களது நாடிகள் அதிரடியாய்த் துடிப்பதை உணர முடிந்தது ! பற்றாக்குறைக்கு அந்தத் துறையின் தலைவரும், உபதலைவரும் காமிக்ஸ் காதலர்கள் எனும் போது கேட்கவும் வேண்டுமா அவர்களது குதூகலத்தை ?!! So ஏகமனதாய் நமக்கு ஒத்தாசை செய்திட அவர்கள் தீர்மானித்த அந்தத் தருணமும், அதனை நடைமுறைப்படுத்திடக் காத்துள்ள இந்த இதழும் நமது பயணத்திலொரு அசாத்திய மைல்கல் என்பேன்! அருகிலுள்ளோரின் அபிமானத்தையும், தொலைவிலுள்ளோரின் வாஞ்சையையும் ஒருசேர ஈட்டிடும் பெருமை எல்லா இதழ்களுக்கும் கிடைப்பதில்லை தானே ?

JEREMIAH தொடரைப் பொறுத்தவரையிலும் இதனில் பணியாற்றுவது ரொம்பவே மாறுபட்டதொரு அனுபவமாய் எங்களுக்கு இருந்து வருகிறது ! For starters - இது எதிர்காலக் கதையல்ல முழுமையான அர்த்தத்தில் ! So ராக்கெட்டிலிருந்து ‘ஜம்ப்‘ பண்ணும் அயல்கிரகவாசிகளோ ; ஏழு காது- மூன்று மூக்கு கொண்ட ஜந்துக்களோ இங்கே வலம் வரப் போவதில்லை ! அதே போல பால் மண்டலம்... விண்மண்டலம் என்று காலப் பிரயாணங்களும் இங்கே நஹி ! ஒரு அணு ஆயுதப் போருக்குப் பின்பாய்ப் பிளவுண்டு போய்க் கிடக்கும் சுடுகாடு போலான அமெரிக்கப் பின்னணியில் சொல்லப்பட்டிருக்கும் கதையிது ! So வழக்கமான சதையும், இரத்தமுமான மனிதர்களும் ; கரடுமுரடான அமெரிக்கப் பாலைப் பிரதேசமுமே நீங்கள் காணவிருக்கும் காட்சிகள் ! அதே போல கதையின் நாயகர்கள் இருவருமே நீதிக்காவலர்களோ; போலீஸ்காரர்களோ கிடையாது ; ஹெர்மனின் மாமூலான கச்சா-முச்சா மண்டையும், கேசமும் கொண்ட சாமான்யர்கள் ! இங்கே பூமியும்... மனிதர்களும் மட்டுமே கரடுமுரடாகப் படைக்கப்பட்டிருக்கவில்லை ; பயன்படுத்தப்பட்டிருக்கும் வசனங்களுமே ரொம்பவே கடா-முடா பணி ! So அதற்கு நியாயம் செய்யும் விதமாகவே மொழிபெயர்ப்பும் இருந்திடும் ! அதை நாசூக்காக்குகிறேன் பேர்வழி என்றோ ; அவர்களுக்கு சற்றே கண்ணியமான மொழிநடையை தானம் செய்கிறேன் என்றோ முயற்சிக்கவில்லை - simply becos ஹெர்மனின் அந்தக் கற்பனையுலகில் அனைவருமே - "ஏக் மார்..தோ துக்கடா !! பார்ட்டிகள் தான் ! கதையே ஒரு தொடரும் பயணத்தின் நூலிழையில் சுழல்கிறதென்பதால் ஒவ்வொரு ஆல்பத்தையும் தனித்தனியாகக் கூட வாசிக்கலாம் ! ஆனால் ஒரு தொகுப்பாக்கி (சு)வாசிக்கும் அனுபவத்தை ட்யுராங்கோ பச்சைக் கொடி காட்டித் துவக்கி வைத்து விட்டதால் ஜெரெமியாவுக்கும் அதே pattern தொடர்கிறது ! சக்கரங்கள் சுழலச் சுழல  - அற்புத வேகமெடுக்கும் தொடரிது ! ஓவியர் ஹெர்மனுக்குக் கதாசிரியர் ஹெர்மன் சவாலிடுவதை இந்தத் தொடரின் பயணப்போக்கில் நாம் காணவிருக்கிறோம் ! So நிதானமாய்ப், பொறுமையாய் இந்தப் புது வரவுக்கு ஸ்வாகதம் சொல்லின் இவரும் நம் நாயகர் பட்டியலில் ஒரு உச்சயிடத்தை ஆக்கிரமிக்கும் நாள் தொலைவில் இல்லை என்பேன் ! பாருங்களேன் ஒரு உட்பக்க ட்ரைலரை !

சித்திர மிரட்டலைப் பார்த்தீர்களா ? A maestro at work !!

Moving on,  இடையிடையே - "ஜாக்கி சான் கூப்டாகோ ; மைக்கேல் ஜாக்சன் கூப்டாகோ !!"என்று நான் விட்டு வந்த புதுக் கதை நாயகர்கள் / படைப்பாளிகள் பற்றிய அடுத்த கட்ட update / உசுப்பேற்றல் !!

1. சில காலமாகவே அட்லாண்டிக் பெருங்கடலுக்கு பீச்சாங்கைப் பக்கமிருக்கும் தேசத்தின் ஒரு அதிரடி நாயகருக்குத் தூண்டில் போட்டுக் கொண்டேயிருந்தேன் ! பேட்மேன் ; ஸ்பைடர்மேன் போல - ஏக் தம்மில், ஏகப்பட்ட கதைகளை ஆண்டொன்றுக்கு கொள்முதல் செய்ய வேண்டுமென்ற கண்டிஷன் போட்டிடாத நாயகர் இவர் ! So விடாப்பிடியாய் இவரை விரட்டித் திரிந்தவனுக்கு ஜெயம் கிட்டியுள்ளது ! காண்டிராக்ட் போடும் படலம் துவங்கவுள்ளதால், இன்னும் ஓரிரு மாதங்களுக்குள் அவர் தமிழ் பேசக் கற்கத் தொடங்கிடுவார் ! இந்தாண்டில் காலியாகி நிற்கும் அந்த ஒற்றை "சஸ்பென்ஸ் இதழ் " ஸ்லாட்டில் இவரை நுழைத்திடலாமா ? என்ற ரோசனை பலமாய் ஓடிக் கொண்டுள்ளது உள்ளுக்குள் !! 
2. அட்லாண்டிக்குக்குச் சோத்தாங்கைப் பக்கமிருக்கும் தேசத்திலோ - புதிதாயொரு நிறுவனத்தோடு 3 நாட்களுக்கு முன்பாய் ஒரு காமிக்ஸ் புதையலையே தோண்டிப் பிடிக்க இயன்றுள்ளது !! "ஐயோ...ஆயிரம் பொன்னும் எனக்கே எனக்கா ? ஒண்ணா..ரெண்டா..? ஆயிரம் ஆச்சே !! சொக்கா !! " என்று வியாழன் முதலாய் அரை மறையைக் கழற்றிய நிலையிலேயே சுற்றித் திரிகிறேன் ! "அந்தக் கதை ; அப்புறம் இந்தக் கதை ; ம்ம்ம்...அதுவும் கூட...எல்லாத்துக்கும் சாம்பிள் வேணுமே !" என்று நான் பிடுங்கிப் பிறாண்டுவதைப் பார்த்தவர்கள் 'சிவனே' என்று    அவர்களது வலைத்தளத்தில் கதைகளை முழுமையாய்ப் பார்வையிட அனுமதியும் ; அதற்கென ஒரு password -ம் வழங்கியுள்ளார்கள் ! So அரை மணி நேரத்திற்கொரு முறை அங்கே ஆஜராகி லிட்டர் லிட்டராக H2O உற்பத்தி செய்து வருகிறேன் !! ஒன்று மட்டும் நிச்சயமடா சாமி - இந்தாண்டு, எங்கள் பகுதிகளில் எத்தனை கடும் வறட்சி நிலவினாலும் சரி - எங்கள் வீட்டில் மட்டும் தண்ணீர் கஷ்டமே இருந்திடப் போவதில்லை ! இவற்றையெல்லாம் காண்டிராக்டுகளாக உருமாற்றம் காணச் செய்து, பணம் அனுப்பி, உரிமைகளை பெற்றிடும் பணிகள் சுலபமாய் சில பல மாதங்களை விழுங்கிடும் தான் ! இவற்றையெல்லாம் எங்கே ? எப்போது ? எவ்விதம் ? களமிறக்குவது என்ற குடைச்சலில் எனது நாட்கள் கழிந்து வருகின்றன !! 
3. பல காலம் முன்பாய் வேறொரு நிறுவனத்தின் மத்திம நிலை ஊழியராக பரிச்சயமுள்ளதொரு மனுஷன் தற்போது உலகின் டாப் காமிக்ஸ் நிறுவனங்களுள் ஒன்றின் டாப் பதவியில் அமர்ந்திருப்பதை ஏக சந்தோஷத்தோடு தற்செயலாகக் கவனித்தேன் ! அதற்கப்புறம் விடுவேனா மனுஷனை நிம்மதியாகத் தூங்க ? ஆரம்பிச்சாச்சு - தலீவரின் பாணியிலான கடிதமுனைத் தாக்குதல்களை !! வாழைப்பூ வடைகளுக்கோ ; நண்டு வறுவல்களுக்கோ மயங்குவதாகயில்லை என்று ஸ்பைடரின் SINISTER 7 கதை மீது சத்தியம் செய்து கொண்டு இந்த முயற்சியில் இறங்கியுள்ளேன் ! எனது 'குய்யோ-முறையோ' ஆர்வக் கூக்குரல்களுக்கு அவர்களது நிறுவனங்களது சம்பிரதாயப்படி இசைவு தெரிவிப்பதாக இருப்பினும் குறைந்தபட்சம் ஓரிரு மாதங்கள் ஆகி விடும் ! ஆனால் அவர்களது இன்றைய top man எனது அன்றைய தோஸ்த் என்பதால் - பதுங்குகுழிப் போராட்ட பாணியில் இம்முயற்சி இராதென்று சொல்லலாம் !கனவெல்லாம் கலர் கலராய் !!  
4. இன்னமும் முடிந்தபாடில்லேங்கோ ! கருப்பு முகமூடியும், வேளைக்கொரு முகமும் கொண்ட இத்தாலியக் கூர்மண்டைப் பார்ட்டியின் படைப்பாளிகளிடம் "அவரை" புனர்ஜென்மம் எடுக்கச் செய்யும் ஆர்வமுள்ளதா ? என்று வினவியுள்ளனர் !! என்ன பதில் சொல்லலாமென்று சொல்லுங்களேன் folks ?
5. More to come !! புதிதாயொரு கவ்பாய் தொடர் ; 12 கதைகள் கொண்டதொரு சங்கிலியை black & white -ல் உருவாகி வருகிறது ஐரோப்பிய தேசமொன்றில் ! அதன் படைப்பாளிக்கு பரஸ்பர நண்பர்கள் வாயிலாக நம்மைத் தெரிந்துள்ளது ! So புதிதாய் தயாராகி வரும் இந்தத் தொடரை தமிழில் வெளியிட ஆர்வமிருக்குமா ? என்று கேட்டு மின்னஞ்சல் அனுப்பியுள்ளார் !! கதையின் கருவையும், சித்திர மாதிரிகளையும் இணைத்தே அனுப்பியுள்ளார் ! முதல் பார்வைக்கு மிரட்டலாகவே தெரிகிறது ! மேற்கொண்டு விபரங்கள் கேட்டுள்ளேன் ; அடுத்த சில நாட்களுள் அவை கிட்டினால் - ஸ்டார்ட் தி மியூசிக் தான் !
6. Before I sign off : ஜனவரியில் புத்தக விழா சமயத்துப் பதிவில் - எனது திடீர் டெல்லிப் பயணம் பற்றியும், ஒரு புது ஐரோப்பிய படைப்பாளியுடனான சந்திப்பைப் பற்றியும் எழுதியிருந்தது நினைவிருக்கலாம் ! அவர்களோடு புதிதாயொரு கதை ஒப்பந்தம் இப்போது ரெடி ! இது வரையிலும் நாம் முயற்சித்தே பார்த்திரா ஒரு முற்றிலும் மாறுபட்ட கதை பாணிக்குள் குதிக்கவிருக்கிறோம் ! அதிரடியான, மிரட்டலான ZOMBIES களமிது !!!

"ஏற்கனவே உள்ள நாயகர் கும்பலுக்கு மத்தியில் புதுசு புதுசாய் இந்த வரவுகளை அழைத்து வந்து எங்கே நுழைப்பதாம் ? இதற்கான முன்பணங்களை எங்கிருந்து புரட்டுவதாம் ? " என்ற கேள்விகளை எனது மறை களறாத பாதி மண்டை கேட்டு வைக்கிறது ! ஆனால் புதுக் கதைகளைக் / களங்களைக் காணும் போதெல்லாம் 'லொடுக்குப் பாண்டி' யாகிப் போகும் அந்த மறு பாதியோ - "போய்க்கோடே..போய்க்கோடே...!! போற வழியிலே பார்த்துக்கலாம் !!" என்று சொல்லிய கையோடு டப்பாங்குத்து ஆடத் தொடங்கி விடுகிறது  ! 

ஏனோ தெரியவில்லை - " கறை நல்லது" என்று சொல்லும் SURF EXCEL அம்மாவைப் போலவே "கழன்ற மறையும் நல்லதே !!" என்று சொல்லத் தோன்றுகிறது !! வெயில் ஜாஸ்தியாகும் வேளைகளில் இதெல்லாம் சகஜம் தானே guys ?

மீண்டும் சந்திப்போம் all ! Bye for now !

P.S : பறவைகளாகிட இன்றைக்கு last chance !! இரத்தக் கோட்டை (WWF ஸ்பெஷல்) இதழுக்கான முன்பதிவுகளை இந்த ஞாயிறில் செய்திட்டால் - EARLYBIRD பட்டியலுக்குள் இடம் பிடிக்கலாம் !! Go for it guys !!

காற்றில் வந்த சேதி :  சீர்மிகு சீர்காழியில் நேற்றைக்குத் திடீரென பீதியாம் - நடப்பன ; பறப்பன ; நீந்துபவன காணாது போனதால் !! மன்னர் வீட்டில் "விலாவை"...சாரி..சாரி..."விழாவை" சிறப்பிக்கச் சென்ற அணியின் புண்ணியமென்று ஊருக்குள் பலமான பேச்சாம் !! 

மகிழ்வோம்..மகிழ்விப்போம் !!

நண்பர்களே,

வணக்கம். பின்னிரவில் ஊர் திரும்பி. அதிகாலையில் கண்ணைத் திறந்து பார்க்கும் போதே - load more தலைநோவுக்கு மத்தியிலும்   உங்களது அழகான வாழ்த்துக்கள் அணிவகுத்து நிற்பதைப் பார்த்திடும் போது நிறைவாக இருந்தது ! "அட...சில பல கழுதை வயசாவதையும் கூட, அன்பிற்குரியவர்களின் அண்மை இத்தனை அழகாக்குகிறதே" என்று நினைத்துக் கொண்டேன் !!  இங்கும் சரி ; FB -யிலும் சரி - வாழ்த்தியுள்ள / வாழ்த்தவுள்ள நண்பர்கள் அனைவருக்கும் thanks a ton !!

வழக்கம் போலவே ஏதேனும் வேறு பணிகளின் பெயரைச் சொல்லி பிளைட் டிக்கெட்டைப் போட்டுவிட்டு, சிக்கும் சந்தடி சாக்கில் - நமது காமிக்ஸ் வேலைகளை செய்திட இம்முறையும் தவறவில்லை !! And லாலா கடைக்குள் தொலைந்து போன பொடுசைப் போல வியாழனன்று விடத் துவங்கிய வாயோர ஜலப் பிரவாகம் இன்னமும் தீர்ந்தபாடில்லை !! ஷப்பா.....!!! .ஓராண்டுச் சந்தாவை முன்கூட்டியே மட்டும் அறிவிக்காது முன் போல - 'ஒரு ஸ்பெஷல் தோசை ; ஒரு பிளேட் லெமன் ரைஸ் ; நடுவே கொஞ்சம் ஐஸ் கிரீம் ; அப்புறம் புரோட்டா ; திரும்பவும் ஒரு பிளேட் பிரியாணி' என கலந்து கட்டும் வாய்ப்பு இருப்பின் அடுத்த மாசமே  அதகளம் பண்ணியிருக்கலாமே !! என்ற ஆதங்கம் தான் ஊர் திரும்பும் வழி நெடுகிலும் !! Anyways 2018 அத்தனை தூரமில்லை தானே என்று மனசைத் தேற்றிக் கொள்கிறேன் -ஜொள்ளைத் துடைக்கும் முயற்சிக்கு மத்தியினில் !! 

Load more மொக்கையைத் தவிர்க்க - இதோ வழக்கம் போலொரு உப பதிவு !! அட்டகாச மேடையாய் டாலடிக்கும் நமது சமீப நாட்களது வலைப் பக்கத்தை இதே போன்ற high voltage உற்சாகத்தோடு தொடரும் பாக்கியம் மட்டும் கிட்டின் - காமிக்ஸ் எனும் கைக்குழந்தையை உச்சி முகர ஒரு பட்டாளமே சீக்கிரம் தயாராகி விடுமென்பது உறுதி !! நம்பினால் நம்புங்கள் folks - கடந்த 1 வாரத்து ஆன்லைன் விற்பனை almost double than normal !! இங்கே நிலவி வரும் அந்த சந்தோஷ உச்சஸ்தாயிக்கும் அதற்கும் தொடர்பில்லை என நான் நினைப்பின் - ஆர்டினை விடப் பெரிய அசமஞ்சி நானே !! விற்பனைகள் என்பதையெல்லாம்  புறம் தள்ளிவிட்டுப் பார்க்கும் போது - இந்த சந்தோஷ சதிராட்டம் தரும் உற்சாகமும், கலப்படமற்ற மகிழ்வும் நமது நாட்களுக்கொரு புது மெருகூட்டுவது கண்கூடு !! மகிழ்வோம்..மகிழ்விப்போம் !!

ஞாயிறு பதிவு வரை உங்கள் பொழுதுகளை சுவாரஸ் யமாக்கிட இதோவொரு caption contest ! வெற்றி பெரும் வாசகருக்கு ஒரு WWF ஸ்பெஷல் பரிசு !! Bye now ! See you again soon ! 

ஒரு கோட்டையும்...பல பறவைகளும்...!

நண்பர்களே,

வணக்கம். "கோட்டை" என்றவுடனே தூள் கிளப்பும்  பாங்கு நமக்கெல்லாம் இரத்தத்திலேயே ஊறிப் போனதொன்று என்று தோன்றுகிறது ! இந்தக் கோட்டை ஜார்ஜ் கோட்டையோ ; செங்கோட்டையோ இல்லை தான் என்றாலும், வேஷ்டியை மடித்துக் கட்டி செயலில் இறங்கும் வேகத்தில் நாம் யாருக்கும் சளைத்தவர்களல்ல என்பதைக் கடந்த 2 நாட்களாய் நடைமுறையில் காட்டி வருகிறீர்கள்  !! ஆன்லைன் பதிவுகளிலும் சரி ; நேரடிப் பணப் பரிமாற்றத்திலும் சரி, அனல் பறந்து வருகிறது WWF இதழுக்காக முன்பதிவில் !! பணம் அனுப்பிய கையோடு - ஆபீஸுக்கு போன் செய்து "நான் மயிலா ? குயிலா ? கொக்கா ?" என்று சல்லடை போட்டுள்ள நண்பர்களும் எக்கமோ சக்கம் !!

ஊரிலிருந்து நான் புறப்பட்டது வெள்ளி மாலையே எனும் பொழுது இந்த இதழ் பற்றியோ ; முன்பதிவு பற்றியோ பெரிதாய் நம்மவர்களுக்கு எதுவும் சொல்லி இருக்கவில்லை !! நமக்குத் தான் ஞானோதயங்கள் ரயில்வே ஸ்டேஷன்களிலும், விமான நிலையங்களிலும் பிறப்பது வாடிக்கையாச்சே..? இந்த EARLYBIRD சமாச்சாரத்தை சைக்கிள் கேப்பில் பதிவினில் நுழைத்திருந்தேன், அது மண்டையில் உதித்த மறு நொடியே !!  So வழக்கம் போல் ஏதோ புதுக் கூத்தை மனுஷன் அரங்கேற்றியுளான் என்று யூகித்துக் கொண்டு பதிவைப் படித்துப் பார்த்து கொஞ்சமாய் புரிந்து கொண்டிருக்கிறார்கள் நம்மவர்கள்  ! இருந்தாலும் நீங்கள் எடுத்த ட்ரில்லில் குழம்பிப் போய் - நடுச்சாமத்திலிருந்த எனக்கு போன் அடித்து "சார்...ஒருத்தரே 4 புக் பதிவு பண்ணி இருந்தா அவருக்கு 4 பேட்ஜா ? 1 பேட்ஜா ? அவர் EARLYBIRD ஆ ? இல்லே EARLYBIRD கூட்டமா ? என்று  வேளை கெட்ட அந்த வேளையில் கேட்ட போதும் உங்களின் பிரித்து மேயும் உத்வேகத்தை புரிந்து கொள்ள முடிந்தது !!   

திங்கட்கிழமை மாலைக்குள் கிட்டத்தட்ட 150-ஐத் தொட்டிருக்கும்  முன்பதிவுப் பிரதிகளின் எண்ணிக்கை  !! And இன்னமும் உற்சாகமாய் தொடரும் புக்கிங்களையும், மின்னஞ்சல்களையும்  பார்க்கும் போது இந்தப் "பாசப்பறவைகள் கூட்டத்தைப் " பாகுபடுத்திப் பார்க்க மனசே வரமாட்டேன்கிறது ! பற்றாக்குறைக்கு, அயல்நாடுகளில் உள்ள நண்பர்களும் - "நாங்களும் பறப்போம்லே.....எங்களுக்கும் இறக்கை இருக்குலே..?"  என்று Angrybirds பாணியில் முறைப்பது மின்னஞ்சல்களில் பிரதிபலிக்கிறது ! இது போதாதென்று - "மணி ஆர்டர்களை திங்கள் அனுப்பியாச்சு ; அது லேட்டாகக் கிடைத்தால் நாங்க அதுக்கு என்ன பண்றது ? ஆன்லைன் வசதிகள் இல்லாதவர்களும் சிறகுகளுக்கு அருகத்தையுள்ளவர்கள் தானே ?" என்று லாஜிக்கான கொக்கியைப் போட்டுள்ளோரும் உண்டு !! 

இதில் அசாத்திய ஹைலைட்டே - அநேக முன்பதிவுகள் ரூ.500-க்கே என்பது தான் !! அதாவது ஈரோட்டில் நேரில் பெற்றுக் கொள்கிறோமென்ற அணி !! ரொம்பவே சீக்கிரமிது கணிப்புகளுக்கு ; இன்னமும் 5 மாதங்கள் உள்ள நிலையில் பிரயாணத் திட்டங்கள் நிறையவே மாற்றம் கண்டிடக் கூடும் தான் ; ஆனால் இதே வேகம் தொடர்ந்திடும் பட்சத்தில், ஒருத்தர் மடியில் தான் அடுத்தவர் உட்கார வேண்டி வரும் போலும் இந்தாண்டு ஈரோட்டில் !! ஆண்டவா - சந்தோஷத் தலைவலி என்பது இது தானோ ?!! இதுநாள் வரையிலும் மௌனத்தையே மொழியாகக் கொண்ட நண்பர்களும் நேரடிச் சந்திப்பில் கலந்து கொண்டிடும் பட்சத்தில் ஒரு திருவிழா காத்துள்ளது நிச்சயம் என்று தோன்றுகிறது !!

திருவிழாவெனில் பலகாரமும், பட்டாசும் இல்லாது போனால் எப்படி ? அதிலும் பட்டாசு நகரிலிருந்து கொண்டு ரகளை செய்யாது விட்டால் பொருந்துமா ? கலக்கிட இப்போதே சிலபல recipes ரெடி !! ஈரோட்டுக்கு டிக்கெட் போடக்  காரணம் # 3 !!!

சரி..."EARLYBIRD பஞ்சாயத்து என்னாச்சு ?" என்கிறீர்களா ? நியாயமான கோரிக்கைகள் என்பதால் அவற்றிற்கு செவி சாய்க்கிறேன் !! இந்த வார இறுதி வரையிலும் கிட்டும் அனைத்து முன்பதிவுகளுமே மயில் கூட்டத்தில் இணைந்திடலாம் ! அவர்கள் அனைவருக்குமே பேட்ஜ் + sneak previews அனுப்பிடுவோம் ! ஓ.கே.வா guys ? 

அப்புறம் அந்த "கௌபாய் ஓவர்டோஸ்" பற்றிய கேள்விக்கு "ஓவராவது - டோஸாவது !!"  என்ற பதிலே  90% கிட்டியிருப்பதை நீங்களும், நானும் பார்த்தோம் ! So இந்தக் குளிக்காக் குதிரைக்காரர்களின் சகாப்தம் நம்மிடையே தொடரும் - அதே வேகத்தோடு !! ஆகஸ்டில் "இரத்தக் கோட்டை" (WWF ஸ்பெஷல்) இதழுடன் காத்திருக்கும் ஒரு "சஸ்பென்ஸ் இதழும்" cowboy கதையாகவே இருக்குமா ? அல்லது வேறொரு அதிரடியாளரின் அறிமுகமா ? என்ற கேள்விக்கு இந்த நொடியில் நான் பதில் சொல்லப் போவதில்லை - simply  becos தெரிந்த திக்கில் எல்லாமே கல் வீசி வருகிறேன் - சில பல மாம்பழங்களையும், ஆப்பிள்களையும்   நோக்கி ! அவற்றுள் எது - எப்போது ஜெயமாகும் ? என்பது தொடரும் அடுத்த சில வாரங்களில் தெரியுமென்பதால் - அதை பொறுத்தே எனது தீர்மானம் அமையும் !! எது எப்படி இருப்பினும், ஈரோட்டில் உங்கள் கண்ணில் அதைக் காட்டும் வரைக்கும், பெவிகால் பெரியசாமியே களத்திலிருப்பான் !! ஈரோட்டுக்கு டிக்கெட் போடக்  காரணம் # 4 !!!

ஊரில் மண்டையைப் பிளக்கும் வெயிலைப் பார்த்துப் பல்லைக் கடித்துவிட்டுக்  கிளம்பியவனுக்கு, இங்கே உப்பளம் போல வீதியெல்லாம் வெள்ளைப் போர்வை கொண்ட ஊர்கள் - பற்களால் தந்தியடிக்கக் கற்றுத் தந்து வருகின்றன!! ஸ்கூபியும் , ரூபியும் தங்கம் தேடித் திரிந்த பிராந்தியத்தில் "சாமி....வெயிலு..வெயிலுன்னு ஒண்ணு உண்டே..யாராச்சும் பாத்திருக்கீக ??" என்ற கேள்வியோடு சுற்றி வருகிறேன் !! Bye for now !! See you around !!

கோட்டையைப் பிடிப்போமா ..?

நண்பர்களே,

வணக்கம். பதிவின் தலைப்பைப் பார்த்து விட்டு, “கிழிஞ்சது போ ! இவனுமா ??” என்று தப்பாய் எதையேனும் யூகம் செய்து கொள்ள வேண்டாமே ? கவுன்சிலர் எலெக்ஷனுக்கு நின்றால் 25 ஓட்டுக்கள் வாங்கிடக் கூட வழி லேது ! என்பதை புரிந்திராதவனல்ல எனும் போது - டுபுக்குத்தனமாய் எதையும் செய்து வைக்கும் ஆள் நானில்லை ! ஆனால் நிச்சயமாய் கோட்டையைப் பிடிக்கப் போகிறோம் - அதுவும் செங்கோட்டையை...அதுவும் சீக்கிரமே...!! என்று மட்டும் என்னால் உறுதிபடச் சொல்ல முடிகிறது ! Oh yes... நாம் பிடிக்கக் காத்துள்ள கோட்டையின் நிறமும் சிகப்பே... ஆனால் அது இரத்தத்தாலானதொரு கோட்டை ! இதற்கு மேலும் நான் ‘கடித்தால்‘ – ‘சூப்பர் ஹீரோ சூப்பர் ஸ்பெஷலை‘த் தூசி தட்டி, எடுத்துப் படிக்க ஆரம்பித்து விடுவீர்கள் என்ற ஆபத்துள்ளதால் நேராக விஷயத்துக்கு வருகிறேன் !

Project “இரத்தக் கோட்டை” is now officially on ! “மின்னும் மரணம்” மெகா இதழ் வெளியான நான் முதலே சன்னம் சன்னமாய் ஒலிக்கத் தொடங்கிய இந்தக் கோரிக்கைக் குரலானது - 2016 ஈரோட்டின் சந்திப்பில் “இப்போ என்னான்றீங்க?” என்ற உச்சத்தைத் தொட்டதால் அப்போதே ப்ராமிஸ் செய்திருந்தேன், தொடரும் ஆண்டின் ஈரோடு விழாவின் சமயம் “இரத்தக் கோட்டை” உங்கள் கரங்களிலிருக்குமென்று ! 2017-ன் சந்தா நிர்ணயம் செய்யும் போதே இதையும் பட்டியலில் நுழைத்திருக்கலாம் தான் ; ஆனால் இந்த மறுபதிப்பு இதழை வம்படியாய் உங்கள் மீது திணிக்க எனக்கு ஆர்வமில்லை என்பதோடு ; மொத்தத் தொகையும் ஜாஸ்தியாகித் தெரியுமே என்ற சங்கடமும் எனக்குள்ளிருந்தது ! So ஏப்ரல் புலரவிருக்கும் தருணத்தில் இதற்கான அறிவிப்பு + முன்பதிவுகளைத் துவக்கினால் பொருத்தமாகயிருக்குமென்று நினைத்தேன் ! தவிர regular சந்தாத் தடத்திலிருந்து விலகி நிற்கும் “Super 6” வரிசையும் சற்றே சூடுபிடித்த பிற்பாடு அடுத்த project பக்கமாய்க் கவனங்களைக் கொண்டு செல்ல நினைத்தேன் ! இதோ ஏப்ரலில் (ஜெரெமயா) MILLION & MORE ஸ்பெஷல்  ; தொடரும் மாதங்களில் கிட் ஆர்டின் Classic (யெஸ்... பெயர் மாற்றத்தோடு இந்த இதழ் வரவுள்ளது ! சும்மாக்காச்சும், ‘அமெரிக்க மாப்பிள்ளை‘ ரேஞ்சுக்கு மட்டுமே தலை காட்டும் அந்த சிக்பில் தம்பியைக் கதாநாயகரென்று பெயருக்கு ஏற்றுக் கொள்ளலாம் ; மெய்யான  ஸ்டார் - ஆர்டின் சார்வாள் தானே ?) ; அதற்கடுத்து “டிராகன் நகரம்” ; இறுதியாக “பிரின்ஸ் ஸ்பெஷல்” என்று Super 6 சக்கரம் தடதடக்கத் தயாராகி விட்டது என்பதால் - என்ளவில் வாய்க்குள் திணித்துக் கொள்ள புதிதாயொரு கட்டை விரல் சுற்றுமுற்றும் தட்டுப்படுகிறதாவென்று தேடத் தொடங்கினேன் ! தயாராய் நின்ற “இரத்தக் கோட்டை” கைதூக்கிட - இதோ புறப்பட்டாச்சு அறிவிப்போடு !

ஏற்கனவே நிறையப் பேசியுள்ளோம் இந்த இதழ் பற்றி ! But அதிகாரபூர்வமான அறிவிப்புத் தருணம் இதுவே எனும் போது - முறையாய்த் தகவல்களை இதோ முன்வைக்கிறேன்!

- இரத்தக் கோட்டை

- மேற்கே ஒரு மின்னல்

- தனியே ஒரு கழுகு

- மெக்சிகோ பயணம்

- செங்குருதிப் பாதை

என்ற இந்த 5 பாகங்களும் ஒன்றிணைந்த மெகா சாகஸமானது - 232 பக்க முழுவண்ண ஆல்பமாய், (வழக்கம் போல) ஹார்ட் கவரில் அட்டகாசமாய் WWF ஸ்பெஷல்  என்ற பெயரில் வெளிவரும் ! Wild West Forever !!

 - இதழின் விலை ரூ.550/-

- முன்பதிவிற்கு விலை ரூ.500/- கூரியர் / பதிவுத் தபாலில் தமிழகத்தினுள் : ரூ.50 extra ! பெங்களூருவிற்கெனில் : ரூ.75 extra !

- ஆகஸ்ட் 2017‘ல் ஈரோட்டுப் புத்தக விழாவின் போது இந்த இதழ் ரிலீஸாகிடும் !

- சரியாக 1000 பிரதிகள் மாத்திரமே அச்சிடவுள்ளோம் ; நம்பர்களோடு ! So “மின்னும் மரணம்” போல இது கையில் தேங்கிக் கிடக்கவோ ; ‘எப்போ வேணும்னானும் வாங்கிக்கலாம் !‘ என்ற நிலையிலோ நிச்சயம் இராது! This will be a true collector’s edition !

 - காமிக்ஸ் உலக ஜாம்பவானின் ஒரு மெகா ஹிட் தொடரின் தொகுப்பு இது என்பதால் - Moebius-ன் ஒரிஜினல் அட்டைப்படங்களே முன்னும், பின்னும் பயன்படுத்தி்டவுள்ளோம் ! ஜிகினா வேலைகள் குறைவாகவும் ; authenticity பிரதானமாகவும் அமைந்திட நிச்சயம் முயற்சிப்போம் !

- And yes - இரு தவணைகளிலும் இதற்கான பணம் செலுத்திடலாம் ! So கேப்டன் டைகர் தொடரின் ஒரு landmark சாகஸத்தை வண்ணத்தில் ரசித்திட - முன்பதிவு செய்வதில் உங்களுக்குச் சிரமங்கள் இராது என்று நம்புவோமாக !

- ஈரோட்டில் நேரடியாகப் பிரதிகளைப் பெற்றுக் கொள்ள விரும்பும் நண்பர்களிடம் கூரியர் கட்டணம் வசூலிக்கப் போவதில்லை ! முன்பதிவு செய்யும் போதே [O] நேரடி டெலிவரி ; [O] கூரியர் டெலிவரி என்று இரு options தந்திடவுள்ளோம் ; So ஈரோட்டுக்கு டிக்கெட் போட ஒரு டஜன் யோசனைகளுள் - இதுவே முதல் யோசனையாக இருந்து விட்டுப் போகட்டுமே ?!

- முன்பதிவுக்கு முந்திடும் முதல் 100 வாசகர்களுக்கு “EARLY BIRD” என்றதொரு அழகான கலர் பேட்ஜ் தந்திடவுள்ளோம் ! ஈரோடு புத்தக விழாவிற்கு ஆஜராகும் வேளையில் அதை பந்தாவாகக் கழுத்தில் மாட்டிக் கொண்டு வரலாமே ?! (ஈரோட்டுக்கு டிக்கெட்- யோசனை # 2) !! Earlybird வாசகர்களுக்கு நமது முக்கிய இதழ்கள் தொடர்பான அறிவிப்புகள் ; sneak previews - கொஞ்சம் முன்கூட்டியே தரப்படும் !

அவசியமான சமாச்சாரங்கள் சகலத்தையும் ஒன்பதாம் வாய்ப்பாடை ஒப்பிக்கும் மாணவனைப் போல புட்டுப் புட்டு வைத்து விட்டதால், இனி ‘ப்ளாக் பாணிக்கு‘ மாறிக் கொள்கிறேன் ! அவ்வப்போது ‘என்ன அறிவித்தோம்? ; என்ன அள்ளி விட்டோமென்ற ?‘ சந்தேகம் எனக்கே எழுவதுண்டு தான் எனும் போது - இந்த “ஒப்பித்தல் பாணியானது” is more for me !! 

So இன்று முதல் தொடங்கும் முன்பதிவானது ஆகஸ்டுக்கு முன்பாக ‘500‘ என்ற மந்திர எண்ணைத் தொட்டு விட்டால் / தாண்டி விட்டால் உம்மணாம் மூஞ்சி ஸ்மர்ஃப் அவதாரத்துக்கு அவசியமிராது எனக்கு ! ஆண்டவன் மீதும் ; உங்கள் மீதும், நமது தட்டை மூக்கார் மீதும் (அந்த வரிசையில்) நம்பிக்கை மலையளவு உள்ளதால் - கட்டை விரலை உயர்த்திக் காட்டும் வாய்ப்புகள் செம பிரகாசம் என்று பட்சி சொல்கிறது !

So கனவாகவும், மென்றிட அவலாகவும், இது நாள் வரையுமிருந்த சமாச்சாரமானது - நிஜமாகும் முனைப்பின் முதல் படியில் உள்ளது இப்போது ! அதனை ஏணிகளில் ஏற்றி ; பாம்புகளிடமிருந்து காத்து ; தாயங்கள் போட்டு - இலக்கைச் சென்றடையச் செய்யும் பொறுப்பு உங்களது ! Let’s rock guys !

ஒரு முக்கிய அறிவிப்பைச் செய்த குஷியில், இதனோடு சேர்த்தே நான் (சமீபமாய்) பிராமிஸ் செய்திருந்த “இன்னமுமொரு இதழ்” பற்றியும் பேசிடலாமா ? “ட்யுராங்கோ” வெளியான ஜனவரியில் எந்த context-ல் அந்த topic எழுந்ததென்பது எனக்கு நினைவில்லை ; ஆனால் இன்னமுமொரு “வித்தியாசமான“ கௌபாய் நாயகர் உள்ளாரென்று நான் வாயை விட்டிருந்ததும் ; அவரைக் கொண்டதொரு ஸ்பெஷல் இதழையும் 2017 ஈரோட்டின் போது வெளியிட நீங்கள் கோரியதும் நினைவுள்ளது ! அதை நனவாக்கிடுவதில் எனக்குப் பெரிய சிரமங்கள் இராது தான் ; ஆனால் சின்னதாயொரு சமாச்சாரத்தின் மீது கவனமும், சிந்தனையும் தந்த பின்னே அது பற்றிய இறுதி முடிவு எடுத்தல் நலமென்று மனதுக்குப் பட்டது ! So அதைப் பற்றி சற்றே உரக்கப் பேசிடுகிறேனே ?

“கௌபாய் ஓவர்டோஸ்” என்றதொரு syndrome மருத்துவ உலகில் உள்ளதா   ? என்ற கேள்வியை எழுப்பிடும் பட்சத்தில் நண்பர் செனா.அனா அதை அலசி, ஆராய்ந்து, சும்மா ‘கிழி கிழி‘யென்று கிழித்துத் தோரணம் தொங்க விட்டு விடுவார் என்பதை நாடே அறியும் ! இதனை ஆராய்ச்சி லெவலுக்குக் கொண்டு போகாவிட்டாலும், நமக்கு எட்டியதொரு சின்ன அளவிலாவது பேசி, விவாதித்துக் கொண்டால் இந்த வாரயிறுதியும் சுவாரஸ்யம் கண்டிடும் ; நமது பயணப் பாதையிலும் இடரின்றித் தப்பிடுமென்று பட்டது ! Here goes :

என்ன தான் A B C ... X Y Z என்று சிக்கிய எழுத்துக்கெல்லாமொரு ஜோடிப்பைத் தந்து சந்தாப் பிரிவுகளை வகைப்படுத்தினாலும் - ஆண்டின் showstoppers கௌபாய்களே என்பதில் சந்தேகமேது சமீப ஆண்டுகளில் ? “பௌன்சர்” என்ற கௌபாய் ராட்சஸன் அதிர்வலைகளை ஓடச் செய்தது ஒரு வருடமெனில் ; வில்லரின் விஸ்வரூபம் மறு வருடம் ! இந்தாண்டோ - சத்தமின்றி யுத்தம் செய்பவரின் ஆண்டு ! இடையிடையே “மின்னும் மரணம்”; “என் பெயர் டைகர்”; “மார்ஷல் டைகர்” என ட்சி-நா-பாவின் வன்மேற்குத் தாண்டவங்கள் ! “நான் எந்த வகையில் குறைந்து போனேன் ?” என்று கைதூக்கி நிற்கும் கேரட் மண்டை கமான்சேவும் குதிரைப் பசங்களின் பிரதிநிதியே ; ஜடாமுடியோடு - மாயம் ; மந்திரஜாலம் ; சாகஸம் என அழிச்சாட்டியம் செய்திடும் ‘மேஜிக் விண்டும்‘ வன்மேற்கின் விளைநிலன்களின் பலனே ! சரி... சிரிப்புப் பார்ட்டிகள் பக்கமாய்த் தலைதிருப்பலாமென்றால் - குதிரைகளில் சவாரி செய்து கொண்டே ‘கெக்கே பிக்கே‘ என்று சிரிக்கச் செய்யும் முதல்வர்கள் லக்கி லூக்கும்; சிக்பில் & கோவும் கௌபாய் கலாச்சாரக் காவலர்களே ! ரின்டின் கேனை ஏற்றிச் சுமக்க குதிரைகள் ஏதும் தயாரில்லை ; இல்லையேல் இந்த 4 கால் ஞானசூன்யமும் கூட ஒரு stetson தொப்பியைப் போட்டுக்கிட்டு - ‘இன்னா மாமே ?‘ என்று சலம்பினால் ஆச்சர்யப்பட்டிருக்க மாட்டோம் ! இது தான் நமது அணிவகுப்பின் தற்போதைய நிலவரம் !

உருப்படியான டிடெக்டிவ் நாயகர்களுக்கு நிஜமான பஞ்சமென்பதால் அந்த genre கதைகளுக்கு வலு சேர்த்திட ரிப்போர்ட்டர் ஜானியையும், C.I.D. ராபினையும் தவிர்த்து வேறு யாருமில்லை எனலாம ! லார்கோ; ஷெல்டன் & காத்திருக்கும் Lady S - ஆக்ஷன் without being detectives என்ற பாணிகளைச் சார்ந்தவர்கள் என்பதால் அவர்களது கதைகள் ரொம்பவே வித்தியாசமாய் ; ரசனைகளுக்கு உகந்தவைகளாய்த் தெரிவது இயல்பே ! அதே போல மர்ம மனிதன் மார்டின் ; டைலன் டாக் ; ஜேசன் ப்ரைஸ் ஆகியோரும் சற்றே அமானஷ்யம்; மர்மம்; fantasy சார்ந்த கதைகளின் சொந்தக்காரர்கள் எனும் போது ‘பன்ச்‘ டயலாக் பேசும் அதிரடி cowboy ஹீரோக்கள் பட்டியலுள் இடம் பிடிப்பதில்லை ! ஆனால் இவர்கள் எல்லோருமே ஊறுகாய் ரேஞ்சுக்கே நமது திட்டமிடல்களில் இடம் பிடிக்கின்றனர் - ஆண்டுக்கு ஒன்றோ, இரண்டோ ஸ்லாட்கள் மாத்திரமே அவர்களுக்கு ஒதுக்கப்படுவதன் காரணமாய் ! அதற்கு மேலாய் இடங்கள் ஒதுக்கிடப் பிரியப்பட்டாலும் - தொடர்களில் கதைக் குறைபடியோ ; நமது ரசனைகளின் அளவுகோள்களோ, ஒரு குறுக்கீடாய் அமைந்து விடுகின்றன !! 

VRS வாங்கிய Fleetway நாயகர்களை எப்படியாய்த் தட்டியெழுப்பி ; ‘பளா பளா‘வென்று ஒரு அண்டா நிறையக் கறுப்புச் சாயப் பொடியைக் கலக்கி வைத்து - அதற்குள் அவர்களைத் தலையை முக்கி எடுக்கச் செய்து, “ஹை... ஜுப்பராய் இளமையாகிட்டாங்களே!!” என்று குதூகலிப்பதை மறந்து விட்டுப் பார்த்தால் - பரவலாய்க் கண்ணில் படுவது தடித்தடியான குதிரை பாய்ஸே ! நிச்சயமாய் எனக்கு இது சலிக்கவில்லை தான் ; ஆனால் உங்களுக்கும் நெருடல்களில்லை என்பது உறுதிப்பட்டால் ‘ஸ்டார்ட் ம்யூசிக்‘ சொல்லி விடலாம் அந்த இன்னுமொரு (புது) கௌ-பாய்க்கு ! 

மாறாக-

தற்போதுள்ள கௌ-பாய் கோட்டாவே போதும் ; தினம் தினம் முட்டையிடுகிறதென்பதற்காக அதன் அடிவயிற்றை அறுத்துப் பார்ப்பானேன் ? என்ற சிந்தனைக்கு நீங்கள் சொந்தக்காரர்களெனில் உங்களது கருத்துக்களை (சாந்தமாக) பகிர்ந்திடலாமே ? கோலோச்சி வரும் தற்போதைய கௌ-பாய் நாயகர்கள் மீதான தீர்ப்போ ; மார்க் போடலோ இது இல்லை ! மாறாக - “வன்மேற்குக் கதைக்களங்களே” என்றதொரு பரந்த தலைப்பு பற்றிய உரத்த சிந்தனைகள் ! So டெக்ஸ் trashing ; டைகர் bashing என்ற ஜாலியான பொழுதுபோக்குகளுக்குள் புகுந்திடாது - in general தற்போதைய நிலவரத்தை அலசிட முயற்சியுங்களேன் ? கௌபாய்க் களத்தைத் தாண்டிய (புது) ஆசாமிகள் பக்கமாய் கவனம் தந்திடலாமா - இன்னொரு ஸ்பெஷல் இதழின் பொருட்டு ? - என்ற திக்கிலும் உங்கள் சிந்தனைக் குதிரைகளை மேய்ச்சலுக்கு அனுப்பிடலாம் தான் !! And சுவாரஸ்யமான பல "புதியவர்கள்' தமிழில்  மாட்லாட ரெடியாகி வருகிறார்கள் என்பது உபரித் தகவல் !! 

 விடைபெறும் முன்பாக சில குட்டி குட்டி updates !

1000 பிரதிகளே அச்சிடப்பட்ட “கழுகுமலைக் கோட்டை” almost காலி ! பாக்கெட் சைஸ் மாயமா ? வண்ணத்தின் ஜாலமா ? இவற்றின் கலவையா ? பதிலறியேன் ! ஆனால் தற்போதையக் கையிருப்பு 37 பிரதிகள் மட்டுமே!! திகைப்பாய் இருந்தது நம்மவர்கள் தகவல் சொன்ன போது !

சமீபமாய் FB-ல் கொஞ்சமாய் செலவு செய்து நமது இதழ்கள் பற்றிய விளம்பரங்களை / விபரங்களைக் கூடுதலான பயனீட்டாளர்களிடம் கொண்டு சேர்க்க  முயற்சித்தோம் ! அவற்றை உங்களுள் பலரும் தங்களது வட்டத்தினில் share செய்திருந்தீர்கள் ! கைமேல்ப் பலனாய் கடந்த 10 நாட்களாய் நமது ஆன்லைன் ஸ்டோரில் மாயாவிகாருவும் ; டெக்ஸ் வில்லரும் ; லக்கி லூக்கும் ரவுண்ட் கட்டி அடித்து வருகிறார்கள் ! So தொடர்ந்து உங்களது FB நேரத்தின் போது நமக்கென தம்மாத்துண்டு அவகாசத்தை ஒதுக்கி,நமது விளம்பரங்களை / அறிவிப்புகளை share செய்திட மெனக்கெடுங்களேன் ப்ளீஸ் ? புது வாசகர்கள் ; ‘டச்‘ விட்டுப் போயிருந்த வாசகர்கள் ; பழமைக் காதலர்கள் என்று பல ரகத்தில் வருகைகள் சாத்தியமாகிடும் போது பத்து சதவிகித விற்பனை கூடினாலும் எங்கள் உலகுகளில் ஒரு பெட்ரோமேக்ஸ் வெளிச்சம் கிட்டிடும் ! Please do chip in folks ?!

அதே போல- இங்கும் சரி, இணையப் பொதுவெளியிலும் சரி, காமிக்ஸ் மீதான ஆரோக்கியமான உரையாடல்கள் அரங்கேறும் தருணங்களிலெல்லாம் தொய்வு கண்டு கிடக்கும் நமது ஆன்லைன் ஸ்டோருக்கு ஒரு புத்துயிர் கிட்டி வருகிறது ! So உங்களது வருகைகள் ; உற்சாகமான பங்களிப்புகள் ; ஜாலியான பின்னூட்டங்கள் - நம் பொருட்டு ஊரெல்லாம் சுற்றி வரும் ‘டை‘ கட்டிய ரெப்ரசன்டேடிவ்களாக உருமாறிடுவது நிதர்சனமாய்த் தெரிகிறது ! நமது வட்டம் ரொம்பச் சிறிதே ; ஆனால் ரசனையினில் நீங்கள் காட்டிடும் அந்த உத்வேகம் - ஒரு பெரும் திரள் இருப்பதான பிம்பத்தை உருவாக்குகிறது என்று சொன்னால் மிகையாகாது ! இங்கே பகிரப்படும் ஒவ்வொரு கருத்தும் பல நூறு மௌன நண்பர்களின் வரிக்கு வரி வாசிப்பிற்கு உட்படுகிறது எனும் போது - நீங்கள் ஒவ்வொருவருமே நம் விற்பனைக்கு ஒத்தாசை செய்திடும் ஆற்றலாளர்கள் ! Rock on guys !!

மீண்டும் சந்திப்போம் ! ஞாயிறு பகல் முழுவதுமொரு நெடும் பயணம் எதிர்நோக்கியுள்ளதால் 1 நாள் முன்பாகவே ஆஜராகி விட்டேன்! See you around! Bye for now!

ஒரு கதையின் கதை...!

நண்பர்களே,

            

வணக்கம். இது எத்தனை காலம் நீடிக்குமென்ற ஆரூடமெல்லாம் சொல்லத் தெரியவில்லை ; ஆனால் தடதடக்கும் இந்த நாட்களை ரொம்பவே நேசிக்க முடிகிறது ! சாணித் தாளில், தம்மாத்துண்டு சைஸ்களில் கறுப்பு -வெள்ளையில் நமது இதழ்கள் வெளியான வேளைகளிலேயே கொண்டாடியவர்கள் நீங்கள் ! இன்றைக்கோ வண்ணத்தில் ; அயல்நாட்டு ஆர்ட்பேப்பரில் நாம் வலம் வரும் வேளைகளில் உங்கள் மகிழ்வுகள் ஒரு புது உயரத்தை தொடாது போய் விடுமா - என்ன ? 2017-ன் இது வரையிலான 3 வெவ்வேறு combo இதழ்களுமே வெவ்வேறு விதங்களில் சாதித்துள்ளது ஒரு பக்கமெனில், பாக்கெட் சைஸில், மறுபதிப்பில் score செய்துள்ள மாடஸ்டி திறந்துள்ள வாயில்களின் பின்னே நமக்குக் காத்திருக்கும் வாய்ப்புகள் ஓராயிரம் ! 

எத்தனை மலைகளேறி ; எத்தனை சமுத்திரங்களைக் கடந்து ; எத்தனை பால்மண்டலங்களைத் தாண்டிப் போய் நான் புதுக் கதைகளைத் தேடிப் பிடித்து வந்து உங்கள் முன்னே நிறுத்தினாலும் - அந்த “அரை நிஜார் நினைவுகள்” கலந்த பழைய சமாச்சாரங்களைத் தொனிக்க வாய்ப்புகள் லேது ! என்பதை ஆயிரத்து எட்டாவது முறையாக உணர்ந்துள்ளேன் இம்மாதமும் ! பால்யத்துக் காதல்களோடு அந்த பாக்கட் சைஸ் மோகமும் ஒன்றிணைந்து கொள்ளும் போது, உங்களின் பரபரப்புகளைச் சொல்லவும் வேண்டுமா - என்ன ? கடந்த 4  நாட்களுக்குள் கிட்டத்தட்ட 20  மின்னஞ்சல்கள் + அரை டஜன் கடிதங்கள் படையெடுத்துள்ளன - "ஆஹா..பாக்கெட் சைஸ் !!" என்ற கூத்தாடல்களோடு !! 

Truth to tell- இந்த மாத “கழுகு மலைக் கோட்டை” இதழினைக் களமிறக்கும் முன்னே எனக்குள் நிறையவே சந்தேகப் பேய்கள் ‘ஜிங்கு‘ ஜிங்கென்று குதித்துக் கொண்டிருந்தன ! அது மாத்திரமின்றி நிறையவே நடைமுறைச் சிக்கல்களும் சிந்தைப் பிய்க்கச் செய்தன ! "ஒரிஜினல் பாக்கெட் சைஸ்" என்று அறிவித்து விட்டு ; அதே அளவில் வர்ணப் பூச்சுகளையும், டைப்செட்டிங் பணிகளையும் செய்யச் சொல்லி விட்டு, எல்லாம் தயாராகியிருந்த ஜனவரியின் இறுதியில் தான் இதற்கென பேப்பர் வேட்டையில் இறங்கினேன் ! முன்பெல்லாம் நாம் தினுசு தினுசான பாக்கெட் சைஸ்களில் இதழ்களை நியூஸ் பிரிண்ட்டில் வெளியிட்ட வேளைகளில் அவை ரீல்களாகக் கிடைக்கும் ; இஷ்டப்பட்ட சைஸ்களுக்கு அவற்றை வெட்டி வாங்கி வந்து எனது குரங்குச் சேட்டைகளைச் செய்து வைப்பேன் ! ஆனால் இன்றைக்கோ நாமிருப்பது இறக்குமதி செய்யப்படும் ஆர்ட் பேப்பர் segment-ல் ; அதுவும் ஒரு சொற்பமான சர்குலேஷனோடு ! ஆர்ட் பேப்பரிலும் ரீல்கள் கிடைக்கும் தான் ; ஆனால் குறைந்த பட்சமாய் நாம் ஆர்டர் செய்யக் கூடியதே சில ஆயிரம் கிலோக்கள் எனும் போது அது பற்றிச் சிந்திக்கக் கூட வாய்ப்பிருக்கவில்லை ! மாமூலாய் கி்டைத்து வரும் காகிதமோ நமது லக்கி லூக் சைஸ் அல்லது டெக்ஸ் வில்லர் (ரெகுலர்) சைஸ்கள் மட்டுமே !! இந்த இரண்டையுமே ஒன்றுக்குப் பாதியாக்கிப் பார்த்தாலும் நமக்குத் தேவைப்படும் பாக்கெட் சைஸ் சாத்தியமாகிடவில்லை ! ‘நிலவொளியில் நரபலி‘ சைஸுக்கு இழை அமைத்து விட்டு -பெரிய பாக்கெட்டுகள் கொண்ட “பட்டாப்பட்டி டிராயர்களை" இந்த மாதத்திற்கு மட்டுமாவது போட்டுக் கொள்ளுங்க மக்களே !” என்று சொல்லிப் பார்ப்போமா ? என்று கூட சபலம் தட்டியது ! ஆனால் அந்த சைஸில் 192 பக்கங்கள் எனும் போது விலை எகிறிக் கொண்டு போவது புரிந்தது ! அது மட்டுமன்றி - “பாக்கெட் சைஸ்” என்று ஆசை காட்டி விட்டு - செந்திலின் டண்டராயர் பாக்கெட் சைசுக்கு அசடு வழியவும் அச்சமாகயிருந்தது ! பிப்ரவரியிலேயே வெளியாகியிருக்க வேண்டிய இந்த இதழுக்கென பேப்பர் வேட்டையைத் தீவிரமாய்த் தொடங்கிய போது தான் சிக்கலின் பரிமாணம் புரிந்தது ! .

‘வாழை மீன் இருக்குங்கிறான்...விண்மீன் இருக்குங்கிறான்....கெண்டை மீன் இருக்குங்கிறான்...கெழுத்தி மீன் இருக்குங்கிறான்- ஆனால் "ஜாமீன்" மட்டும் இல்லேங்கிற" கதையாக நமக்குத் தேவையான சைஸ் தவிர்த்து என்னென்னமோ சிக்கியது ! கேரளாவில் ஒரு ஸ்டாக்கிஸ்டிடம் நமக்குப் பிரயோஜனமான சைஸ் உள்ளதென்ற சேதி காதில் விழ - நம்மாட்களை மம்மூட்டி – மோகன்லால் தேசத்துக்கு பஸ் ஏற்றி விட்டேன் ! ஆனால் அங்கேயோ - "பத்து டன்னுக்குக் கொறைச்சலான ஆர்ட்ரோ ? ஓ... அது ஷெரி... !அடுத்த பஸ் ஏழரைக்கு ! போய்க்கோ..போய்க்கோ !"என்று காத்தைச் சேர்த்து அடித்துப்  பேக்-அப் பண்ணி விட்டார்கள் ! 

அப்போது நமது அச்சகத்தில் ஏதோவொரு புக் பிரிண்ட் பண்ண இளஞ்சிகப்பு நிறத்திலானதொரு பேப்பர் வந்திருந்ததை பார்த்தேன் ! அது ஆர்ட் பேப்ர் அல்ல ; ஆனால் நமக்குத் தோதான சைஸ் ! அதிலொரு பேப்பரை மடித்து எடுத்துக் கொண்டு போய் தலையணைக்குக் கீழே வைத்திருந்து,கோணம் கோணமாய்ப் பார்த்து  பல்லி விழுந்த டீயைப் பரிசீலனை பண்ணும் செந்திலைப் போல நாலு நாட்களுக்கு தொடர் ஆராய்ச்சிக்கு உட்படுத்தினேன் ! ஐந்தாவது நாள் காலையில் அந்தப் பேப்பரையே காணோமே என்று தேடினால் - அது எங்கள் வீட்டில் சுட்ட பூரிக்கு blotting பேப்பர் அவதாரமெடுத்திருந்ததைப் பார்த்திட முடிந்தது ! ஏற்கனவே சிலபல இல்லங்களில் பூரிக்கட்டைகள் காங்கோக்களாக உருமாற்றம் பெற்றிடும் பௌதிக அதிசயங்களை நமது விழுப்புண் வீரர்கள்... சாரி... சாரி... நண்பர்கள் விவரித்திருந்தது நினைவுக்கு வந்ததால், "பூரி சூப்பர்” என்றபடிக்கே நடையைக் கட்டினேன் ! நிச்சயமாய் பெரும்தேவன் மனிடௌ ஒரு காமிக்ஸ் ரசிகரே என்பது ஒரு இலட்சமாவது தடவையாக அன்று பகல்பொழுதில் நிரூபணமாகியது - எனது நண்பரொருவர் வாயிலாக ! கம்ப்யூட்டர்களுக்கு கியாரண்டி கார்ட் / operation manuals போன்ற சமாச்சாரங்களைப் பிரத்யேகமாய் தயாரிப்பவர் அவர் ! அன்றைய பொழுது தற்செயலாய் சந்திக்க முடிந்த போது என்னென்னமோ பேசிய பின்னே, பேப்பர் இறக்குமதி பற்றி பேச்செழுந்தது. அவர்கள் சீஸனின் துவக்கத்திலேயே மொத்தமாய் இறக்குமதி செய்து ஸ்டாக் வைத்துக் கொள்ளும் ரொக்கப் புள்ளிகள் ! “அட... சும்மானாச்சும் கேட்டுப் பார்ப்போமே...?” என்ற நினைப்பில் நமது சைஸைச் சொல்லி “இந்த சைஸில் ஏதேனும் இருக்கா ?” என்று கேள்வியைப் போ்ட்டு வைத்தால் - Oh yes! என்று பதில் சொன்னார் ! அப்புறமென்ன ? மேலே விழுந்து, புடுங்கிப், பிறாண்டி எடுத்து நமக்குத் தேவையான சிறிதளவை மட்டுமே வாங்கி விட்டேன் ! ஆர்ட் பேப்பர் கிடைத்த பிறகு தான் மூச்சே வந்தது எனக்கு ! நான் பாட்டுக்கு ஆர்ட் பேப்பர் அல்லாத அந்த இளஞ்சிகப்புக் காகிதத்தில் அச்சிட்டுத் தந்திருந்தால் - “இளவரசியைக் கவுத்துப்புட்டான் !” என்று தஞ்சாவூர் பெரிய கோவிலுக்கு நாலு தெரு தள்ளியாவது ஒரு கல்வெட்டை “இ.மு.க.” நிர்மாணித்திருப்பது நிச்சயம் அல்லவா ?! அந்த வரலாற்றுப் பழியிலிருந்து just miss !! எத்தனை உயர் ரகப் பேப்பரைப் பயன்படுத்தியிருந்தாலும், ஆர்ட் பேப்பரின் அந்தத் தகதகப்பு கிட்டாது என்பதும் எனக்குள் நெருடிய விஷயமே ! 

ஒரு வழியாய் பேப்பர் வாங்கியான பின்னே தான், எடிட்டிங் பணிகளுக்குள் தலைநுழைத்தேன் ! என்னுள் குடிகொண்டிருந்த பிரதான சந்தேகப் பேய்  நமது கலரிங் பாணிகளின் பொருட்டு ! கதை கழுகுமலைப் பிராந்தியத்தைத் தொட்ட பிற்பாடு ஏகப்பட்ட outdoors ஷாட்களோடு பயணிக்கத் தொடங்கியிருந்த வேளையில் நமது கலரிங் ஆர்ட்டிஸ்ட் அழகாய்ப் பணி செய்திருந்ததை உணர முடிந்தது ! ஆனால் அடைத்த ரூமுக்குள் ஆளாளுக்குப் பேசிக் கொண்டிருக்கும் பிரேம்களில் பேக்கிரவுண்டுக்கு என்ன கலர் தருவது ? மேஜை... நாற்காலி... டபரா இத்யாதிகளுக்கு என்ன வர்ணம் பூசுவதென்ற தடுமாற்றம் எழுவதையும் புரிந்து கொள்ள முடிந்தது ! மாடஸ்டி கதைகள் உருவாக்கப்பட்டதே out & out கறுப்பு – வெள்ளை பாணிகளை மனதில் கொண்டே எனும் போது - நல்ல நாளைக்கே இதற்கு வர்ண ஜாலம் நல்கிடுவது சிரமம்! இந்த அழகில், பக்கத்துக்கு இரண்டே கட்டங்கள் என்ற அமைப்போடு இந்த புக் உருவாக்கப்பட்டிருக்க - ‘பப்பரப்பா‘ என்று காலிப் பின்னணிகள் அடிக்கொருதரம் தலைகாட்டி, தலைநோவை அதிகமாக்கின ! So எனக்கு எட்டிய மட்டிற்குக் கலரிங் திருத்தங்களை செய்யச் சொல்லி ஒரு மாதிரி மனதைத் தேற்றிக் கொண்டேன் !

பாக்கெட் சைஸில் உட்பக்கச் சித்திரங்களும், எழுத்துக்களும் கச்சிதமாக இருப்பது போல்ப் பட்டபோதிலும், அட்டைப் படத்தில் பெரிய சைஸ்களுக்கானதொரு கம்பீரம் குறைவதாகத் தோன்றியது தான் பேய் # 2 ! பாக்கெட் சைஸில் அல்லாது, நண்பர் அஜயின் டிசைனை பெரியதொரு சைஸில் வெளியிட வாய்ப்பு இருந்திருப்பின் அதன் தாக்கம் இன்னமுமே ஒரு படி கூடுதலாய் இருந்திருக்குமென்ற ஆதங்கம் பெருச்சாளியைப் போல மனசைத் துளை போட்டுக் கொண்டிருந்தது ! ஆனால் “பாக்கெட் சைஸ்” என்ற லாஜிக்கிலா மாயாஜாலம் எப்படியேனும் நம்மைக் கரை சேர்த்து விடுமென்ற நம்பிக்கையோடு பணிகளுக்குள் முழுவீச்சில் புகுந்தேன் !

எடிட்டிங்கின் பொருட்டு கதையைக் கையில் ஏந்திய பிற்பாடு தான், "அடடே...பத்தோடு பதினொன்றல்ல  இது ;  ஒரு all time க்ளாசிக்கினைக் கையாளுகிறோம் !" என்ற புரிதல் புலர்ந்தது ! மாடஸ்டிக்கு நாம் புதியவர்களல்ல & vice versa...! ஆனால் இது மாடஸ்டி தொடரில் மட்டுமல்லாது ; எனது தனிப்பட்ட ஆதர்ஷ இதழ்களுள்ளும் ரொம்பவே செல்லமானதொரு இடத்தை ஆக்கிரமிக்கும் இதழ் எனும் போது ஒரு இனமறியாப் பரபரப்பு என்னோடு ஐக்கியமாகிக் கொண்டதை உணர முடிந்தது ! ரஷ்யாவும், அமெரிக்காவும் WWF பயில்வான்களைப் போல ஒருவரையொருவர் மிரட்டிக் கொண்டும், பழிப்புக் காட்டிக் கொண்டுமிருந்த ‘70-களின் cold war உலகம் பற்றிய பரிச்சயம் வரலாற்றுப் பாடப் புத்தகங்களைத் தாண்டி, இன்றைய தலைமுறைக்கு அதிகமிருக்க வாய்ப்புகள் குறைச்சல். ஆனால் ஜேம்ஸ் பாண்ட் நாவல்கள், சினிமாக்கள் ; அந்த யுகத்தின் தலைப்புச் செய்திகள் , கட்டுரைகள் என்று படித்து வளர்ந்த என் போன்ற வெள்ளிமுடியார்களுக்கு “கழுகுமலைக் கோட்டை” ஒரு பத்து சதவீதமாவது கூடுதலான தாக்கத்தைத் தாங்கிடுவது நிச்சயம் ! கதையின் ஒரிஜினல் மொழிபெயர்ப்பு நிச்சயமாய் அந்நாட்களிலேயே நமது கருணையானந்தம் அவர்களின் பேனாவின் உபயம் என்பதைப் பக்கங்களை புரட்ட ஆரம்பித்த இரண்டாம் நொடியே  ஸ்பஷ்டமாகப் புரிந்து கொள்ள முடிந்ததால் - எனக்குத் தலைநோவுகள் அதிகமிருக்கவில்லை ! கதையின் ஒரிஜினல் மொழியாக்கமே ‘பிரமாதமாய்த் தோன்றியதால், சிற்சிறு நகாசு வேலைகளைச் செய்ததைத் தவிர்த்து -  எனது திருக்கரங்களை ‘தேமே‘ என்று ஓரம் கட்டிடச் செய்தேன் !

கிட்டத்தட்ட 40+ ஆண்டுகளாய் நாமெல்லோரும் இதனை வாசித்த / நேசித்த கும்பலே எனும் போது கதையைப் பற்றிப் புதிதாக நான் சிலாகிக்க ஏதுமில்லை தான் ! இருந்தாலும் கதாசிரியரின் அந்த அசாத்தியக் கற்பனை வளத்தைக் கண்டு வாய்பிளக்காதிருக்க முடியவில்லை! சில கதைகளுக்கு ஒரு ஆயுள் நிர்ணயம் உண்டு ! குறிப்பிட்டதொரு காலகட்டத்துக்குப் பின்பாய், மீத்தேன் வாயுவைப் போலப் புறப்படும் புராதனத்தின் நெடி அதன் பலங்களைத் தரைமட்டமாக்கிடுவதுண்டு ! உள்ளதைச் சொல்வதானால்,  மாடஸ்டியின் தொடரிலேயே கூட இந்தக் குறைபாடோடு நிறையக் கதைகளுண்டு ! ஆனால் கழுகுமலைக் கோட்டையில் கதாசிரியர் சொல்ல முனைந்திருப்பது ஒரு கதையை அல்ல என்பேன் ! வழக்கம் போல அவர் இங்குமே ஒரு கதை சொல்லும் பணியையே பிரதானமாக கையிலெடுத்திருந்தால் - கால ஓட்டத்தின் முன்னே இந்த சாகசமுமே நிச்சயம் தளர்ச்சியை ஒப்புக் கொண்டிருக்கத்  தேவைப்பட்டிருக்கும் ! ஆனால் அவரிங்கு சித்தரிக்க முனைந்திருப்பதோ - சாகாவரம் படைத்த சில மானிட இயல்புகளை எனும் போது - காலமும், ரசனைகளும் தலைவணங்குவது கட்டாயமாகிப் போகிறது ! நட்பெனும் சங்கிலியின் வலிமையை highlight செய்வதே இங்கே கதாசிரியர் பீட்டர் ஓ டான்னெனின் முதல் இலட்சியம் என்று தோன்றுகிறது எனக்கு ! தன் ஆத்ம நண்பன் அரைப் பைத்தியமாகிக் கிடக்கும் போது come what may ; நான் அவரை மீட்காமல் விட மாட்டேன் என மார்தட்டும் (!!) இளவரசி ஒரு பக்கமெனில் ; குண்டடிபட்டுக் கிடப்பதாய் தான் நம்பும் மாடஸ்டியைக் காப்பாற்ற எந்தவொரு எல்லையையும் கடக்கத் தயாராகும் கார்வின் மறுபக்கம் ! இந்த வித்தியாசமான இரு ஜீவன்களுக்கு மத்தியில் கதாசிரியர் இழையோடச் செய்யும் நட்புக்கான அக்னிப் பரீட்சை தானே க.ம.கோ.? அது மாத்திரமன்றி - மனித மனத்தின் ஆழத்தை யாரொருவரும் கணிக்கவே முடியாது ; அவசியமென்றாகும் வேளைகளில் மாமலைகளும், தவிடுபொடியாகிடுவது இயல்பே என்பதை கார்வின் மனபிரமைகளைப் போராடிக் கொண்டே மலையிறங்கும் தருணங்களில் என்னமாய்ச் சித்தரித்துள்ளார் கதாசிரியர் ? இது கதை தான்... டூப் தான்... ரீல் தான்.... லுலுலாயி தான்... என்றெல்லாம் தெளிவாக மண்டைக்கு எட்டிடும் போதிலும், பக்கங்களைப் புரட்டப் புரட்ட அந்தச் சுடு பாலைவனத்தில் நாமும் பிரயத்தனங்கள் பல மேற்கொள்வது போலொரு உணர்வு வியாபித்திருப்பதைத் தவிர்க்க இயலவில்லை ! கிட்டத்தட்ட 35 ஆண்டுகளுக்குப் பின்பாய் இந்தக் கதையை நான் மீண்டும் படிக்கிறேன் என்பதாலோ என்னவோ, அந்தத் தாக்கத்தின் அதிர்வலைகள் சற்றே தூக்கலாய்த் தென்பட்டன ! நிறையப் பார்த்து விட்டேன்... நிறையப் படித்து விட்டேன்... இப்போதெல்லாம் கார்ட்டூன்கள் தவிர்த்த சீரியஸான கதைகளெல்லாம் என்னனை சுலபத்திற்குள் அசைத்துப் பார்ப்பதில்லை ! அதே போல மாடஸ்டியின் சிலபல சமீப கதைகள் average என்ற ரீதியிலேயே மார்க்குகள் பெற்றிருக்க, ஒரு சிகப்புக் கம்பள வரவேற்பை முன்வைக்க எனக்குத் தோன்றியிருக்கவில்லை ! ஆனால் லார்கோவின் “ஆதலினால் அதகளம் செய்வீர்” இதழுக்குப் பின்பாக என்னை impress செய்த கதைகளுள் “க.ம.கோ” ஒரு முக்கிய இடம் பெற்றிடும்  என்பேன் !

So இதழ் ஒரு வழியாகத் தயாராகி, அச்சாகி, பைண்டிங் முடிந்து என் கைகளுக்கு வந்தான போது - இன்னும் ஏதாவதொரு value addition செய்தாலென்னவென்று தோன்றிட dust jacket idea உதயமானது ! இதை முதலிலேயே நான் திட்டமிட்டிருந்தால், இதழைத் திறந்தவுடனான முதல் பக்கத்தில் க.ம.கோ.வின் ஒரிஜினல் ராப்பரை இடம்பெறச் செய்திருக்க மாட்டேன் ! ஆனால் நமக்கு மலரும் ஞானோதயங்கள் எல்லாமே நடுச்சாமங்களது பிள்ளைகள் தானே ? So அவதி அவதியாய் அவற்றையும் தயார் செய்து மாடஸ்டிக்கு அணிவித்து, பிரதிகளை உங்களுக்கு அனுப்பியான பின்னே ஒருவித திகிலோடு காத்திருந்தேன் ! மறு நாள் சிறுகச் சிறுக உங்கள் பின்னூட்டங்களை் வரத் தொடங்க... “ஆத்தா... இளவரசி பாஸாகிட்டா...!!” என்ற ஊர்ஜிதம் கிட்டக் கிட்ட... அமைதிப்படை நாகராஜ சோழன் M.A. சிறுகச் சிறுக வெளி வரத் தொடங்கினார்!

சூப்பர் 6-ன் ஒவ்வொரு இதழுமே ஒவ்வொரு விதத்தில் “சூப்பர்” என்ற அடைமொழிக்கு நியாயம் செய்திடும் விதமாய் இருந்திட வேண்டுமென்பதே என் கனவு ! Two down... 4 to go...! ஆண்டவன் துணை நிற்பாராக ! இளவரசியை வண்ணத்தில் ரசித்தான பின்னே, அடுத்ததொரு சந்தர்ப்பம் கிட்டும் போது இதை விடப் பட்டாசாய் இன்னுமொரு வண்ண இதழை தயாரிக்காமல் விட்டு விடுவோமா - என்ன? மாடஸ்டி தொடரின் இன்னுமொரு சூறாவளி சாகஸமான "பழி வாங்கும் புயல்" (“The Gabriel Setup”) நமது அடுத்த இலக்கு !! Again முழுவண்ணத்தில் & of course பாக்கெட் சைசில் !! எப்போது ? என்றெல்லாம் இப்போது கேட்காதீர்கள் ப்ளீஸ் !! வரும்... நிச்சயமாய் வரும் ! 

அவை மாத்திரமன்றி, ஜுனியர் லயனின் துவக்க பாக்கெட் சைஸ் வண்ண  இதழ்களையும் தூசித் தட்டி விடச் சொல்லியிருக்கிறேன் நம்மவர்களை ! பார்க்கலாமே, வரும் காலங்களின் பொழுதுகளுக்குள் அவற்றிற்குமொரு இடம் இருக்குமாவென்று ?!

மார்ச் இதழ்களின் விமர்சனங்களைத் தொடருங்கள் guys ! சந்தர்ப்பம் கிட்டினால் மார்ச்சின் ஏதேனுமொரு வாரத்தில் Thorgal & லக்கியை அலசுவோமா ? இரண்டுமே ரசனை அளவுகோல்களின் இரு வெவ்வேறு முனைகளே என்றாலும், ஜேசனையும், மந்திரியாரையும் பிப்ரவரியில் ரசித்த அதே லாவகத்தோடு இம்மாதத்து விசித்திரக் (கலர்) கூட்டணியையும் நீங்கள் கையாளுவீர்கள் என்ற நம்பிக்கை எனக்குள்ளது ! As always லக்கியை ரசிப்பது சுலபமே ; ஆனால் தோர்கல் நிச்சயமாயொரு மாறுபட்ட சமாச்சாரம் ! கடந்த ஆண்டுகளின் சில thorgal ஆல்பங்கள் முழுக்க முழுக்க விட்டலாச்சார்யா பட ரேஞ்சில் இருந்திட்டதால் அவற்றை ரசிப்பதில் சிரமம் எழுந்திருக்க வாய்ப்புகள் குறைவு ! ஆனால் இந்த மாதத்து இதழோ - பெயரளவிற்கே தோர்கலின் இளம் பிராய சித்தரிப்பு ; ஆனால் கதைகளுக்குள் கொஞ்சம் வைகிங் வரலாறு ; கொஞ்சம் சிந்துபாத் சமாச்சாரம் ; கொஞ்சம் sci-fi சங்கதிகள் என்று வான் ஹாம்மே கலந்து கட்டி அடித்திருக்கிறார் ! இந்தாண்டினில் இது வரையிலுமான மொழிபெயர்ப்புப் பணிகளில், மந்திரியார் ஒரு ஜாலியான சவாலாக அமைந்திருந்ததைத் தவிர்த்து பாக்கி சகலமும் அத்தனை பெரிய நோவுகளை முன்வைக்கவில்லை! ஆனால் அதற்கெல்லாம் சேர்த்து வைத்து தோர்கல் இம்மாதம் ரொம்பவே சுளுக்கெடுத்து விட்டார் என்றே சொல்லுவேன் ! அதிலும் அந்தத் "தாயத்து" கதையினை,  இதழ் அச்சாக வேண்டியதற்கு முந்தைய இரவினில் எழுதிட முனைந்த போது வான் ஹாம்மே வசிக்கும் மேற்கு திசையை நோக்கிக் கும்பிட்டு "தெய்வம் அய்யா நீர் !!" என்று சொல்லத் தோன்றியது ! ஒரு மொழிபெயர்ப்புக்கே நமக்குத் தஸ்-புஸ்சென்று தொங்கும் நாக்கு, கதையை உருவகப்படுத்திடுவது மாத்திரமன்றி, அதற்கான ஒரிஜினல் வசன வரிகளையும் படைத்திட எத்தனை பாடு பட்டிருக்கும் ? Fantasy என்பதும் ஒரு மிக மிக சீரியஸான சமாச்சாரம் என்பதை "விண்வெளியின் பிள்ளை"க்குப் பேனா பிடித்த இரவுகள் மண்டைக்கு உறைக்கச் செய்தன ! So ஜேசனை அலசியது போலவே ஆரிசியாவின் ஆத்துக்காரரையும் அலசுவோமா -  சமயம் கிடைக்கும் பொழுது ?

சரி..இப்போதைக்கு கிளம்புகிறேன் ! மார்ச் விமர்சனங்களைத் தொடருங்கள் guys !! See you around; Bye for now !

உங்க வீட்டுக் குட்டீஸ் - டால்டன்களைத் தேடிப் புறப்படும் அழகை போட்டோக்களாக்கி அனுப்புங்களேன் ? இங்கே ரசிப்போம் !