கொஞ்சம் ஊதிக்கவா பீப்பீயை ?

 நண்பர்களே,

வணக்கம். ஒவ்வொரு மாதமும் ரகரகமான புக்ஸ் கூட்டணி போட்டுத் தயாராகும் போதெல்லாம், அவற்றை உங்களிடம் ஒப்படைக்கும் ஆர்வம் அலையடிப்பது வாடிக்கை தான் ! But இந்த தபாவோ - அலையெல்லாம் நஹி ; சுனாமி ரேஞ்சுக்கு உள்ளுக்குள் ஆர்வம் ஊற்றடிக்குது !! ஆண்டின் இறுதி மாதமும் அதுவுமாய் - அட்டவணையிலிருந்து மாறுபடும் சில புக்ஸ் ; சில புத்தக விழா ஸ்பெஷல் இதழ்கள் ; ஒரு க்ளாஸிக் தடத்தின் முதல் ஆல்பம் - என கைகொள்ளா எண்ணிக்கையினில் புக்ஸ் ரெடி !! And அவை ஒவ்வொன்றுமே தத்தம் பாணிகளில் தெறி மிரட்டு மிரட்டுகின்றன !! பீப்பீ smurf ரேஞ்சுக்கு நானே பீப்பீ ஊதிப்பது அபச்சாரமாய் தோன்றிடலாம் தான் ; but ஏழேழு கழுதை வயசான எனக்கே இந்த மாதத்து அணிவகுப்பைப் பார்க்கும் போது, ஜிலோன்னு கீது ; so எச்சூஸ் தி பீப்பீ this one time ப்ளீஸ் மக்களே !!  

ஊதுறதுன்னு ஆன பிற்பாடு முழுசாய் ஊதிப்புடுவோமே - சரி தானுங்களா  ? இம்மாதத்தின் பிரதான highlight - "அச்சுத் தரம்" என்று சொன்னால் அது நிச்சயம் மிகையே நஹி என்பதை நாளைய பொழுதில் பார்சல்களை உடைத்துப் பார்க்கும் போதே உங்களுக்கும் புரியும் folks !! 

தோர்கல் ஒரு பக்கம் fire விட....

இன்னொரு பக்கம் கபிஷ் கலக்கியெடுக்க.....

புதுயுக கலரிங்கில் நம்ம தானைத் தலைவர் ஸ்பைடர் 2.0 மிரட்ட....

இவர்களுக்கெல்லாம் நடுவே நம்ம 'தல' The Magic Moments ஸ்பெஷல் இதழில் வண்ணத்தில் அடிக்கிறார் பாருங்கோ ஒரு சிக்ஸர் - அது முற்றிலுமாய் வேறொரு ரகம் !! 

அந்த இதழைக் கையில் ஏந்தும் நொடியினில் உள்ளுக்குள் பொங்கிய பெருமை இருக்கே - அதனை எழுத்தில் வடிப்பது உலகச் சிரமம் !!சத்தியமாய் இப்படியொரு ஆல்பத்தினை இந்தத் தரத்தில், இந்த விலையில், இன்றைய இந்த மார்க்கெட் சூழலில் வெளியிட, நம்ம லயனைத் தாண்டி வேற ஆருக்கும் சாத்தியமே லேது என்று கூவிட வேண்டும் போல இருந்தது !! Absolute தெறி !! 

And ELECTRIC '80s தனி தடத்தில் க்ளாஸிக் சாகசங்களுடன், நம்ம தலைவர் பவனி வரும் மெகா சைஸ் இதழைப் பார்க்கும் போது Phewwwwwwwww என்ற பெருமூச்சே சாத்தியமாகிறது !! இருநூறு ரூபாய்க்கு காலத்துக்கும் பத்திரப்படுத்தக் கூடியதொரு இதழை நீங்கள் ஆதரித்தால், இவற்றைத்  தூக்கிக்கினு தொள்ளாயிரம், ஆயிரம் என்று காமிக்ஸ் சேவை புரிய விழையும் ஆர்வலர்கள் சற்றே அடக்கி வாசிக்க வாய்ப்பிருக்கக்கூடும் ! This is a book you simply must have மக்கா !! 

நாளை காலை புக்ஸ் உங்கள் இல்லத்தினை எட்டிடும் தருணத்தில் மொத்த இதழ்களோடும் selfie-க்களைப் போட்டுத் தாக்கினால் - கடந்த 3 வாரங்களின் உழைப்பிற்கு எங்க டீம் மொத்தமாய் மகிழ்வுறும் !!! So கொஞ்சமே கொஞ்சமாய் நேரம் எடுத்துக் கொண்டு selfies ப்ளீஸ் !!

அப்புறம் சந்தா சார்ந்த குட்டியானதொரு நினைவூட்டலுமே folks : 

Before I sign out - இதோ நமது சேலம் புத்தக விழா சார்ந்த update :

நாளை துவங்கவுள்ள விழாவினில் ஸ்டால் நம்பர் 94-ல் உங்கள் வரவினை எதிர்நோக்கிக் காத்திருப்போம் !! Please do visit with family !!

அப்புறம் "பிரபல டாக்டர் சேலம் விசிட்" ரேஞ்சுக்கு இல்லாவிடினும்,  நம்ம சத்துக்கு ஏற்ப வரும் ஞாயிறன்று சேலத்தில் ஆஜராகிட எண்ணியுள்ளேன் !! Hope to see you there மக்களே !! Bye for now !! Happy Reading !!

டிசம்பரில் டைலன்!

நண்பர்களே,

வணக்கம். ‘தட‘ ‘தட‘வென சகலமும் fast forward-ல் ஓட்டம் எடுப்பது போலவே உள்ளது சமீப பொழுதுகளில்! 

**செப்டம்பரில் 4 புக்ஸ்

**அக்டோபரில் 4

**நவம்பரில் தீபாவளி மலர்கள் x 3

**இதோ - காத்திருக்கும் டிசம்பருக்கென இன்னொரு 4

**அப்பாலிக்கா சேலம் ஸ்பெஷல்ஸ்; 

**Electric '80s புக் # 1 

என சமீபத்தைய நமது திட்டமிடல்களில் புல்லெட் டிரெயினின் வேகம்! And அதற்கு மெருகூட்ட இதோ வரும் வார வெள்ளியன்று சேலத்தில் புத்தக விழா & டிசம்பரின் இறுதியிலேயே சென்னைப் புத்தக விழா என்ற அட்டவணைகளுமே அறிவிக்கப்பட்டிருக்க, வாரிச் சுருட்டிக் கொண்டு அவற்றிற்கான முஸ்தீபுகளிலுமே மூழ்கிடல் அவசியமாகிறது! இரண்டே ஆண்டுகளில் (நமக்கு) விற்பனையில் Top 3-க்குள் இடம்பிடித்து விட்டிருக்கும் சேலமும் இப்போதெல்லாம் ‘பெத்த தலைக்கட்டு‘ என்பதால் துளியும் அசட்டையாக இருக்கலாகாது தானே folks? So ஒரு கல்யாண வீட்டுக்கு ரெடியாகும் உற்சாகக் களேபரத்தில் நாட்கள் ஓட்டமெடுத்து வருகின்றன!

இதற்கு மத்தியில் நடப்பாண்டின் இறுதி batch சந்தா இதழ்களைப் பூர்த்தி செய்திடலில் கோட்டை விடலாகாது என்பதால் அக்கடவுமே நமது கவனங்கள் மையம் கொண்டுள்ளன! இதில் கொடுமை என்னவென்றால் வழக்கமாய் பெரிய சைஸ் புக்ஸ் / கலர் இதழ்களில் தான் பணிகள் ஜவ்விழுக்கும்! Black & White புக்ஸ்களில்; அதுவும் நூறு பக்கங்களுக்கு உட்பட்ட அந்த crisp வாசிப்புக்களம் சார்ந்த புக்ஸ்களில் பெருசாய் சிக்கல்கள் எழுந்திடாது தான்! ஆனால் சகலத்துக்குமே ஒரு முதல் தபா உண்டு தானே? அந்த முதல் முறை இதோ இந்த நொடியில் என் கேசத்துக்கு ஆபத்தை விளைவித்து வருகின்றது!

- The Magic Moments ஸ்பெஷல் ரொம்பச் சீக்கிரமே ரெடி! ‘தல‘ சாகஸங்கள் என்றைக்குமே ஒரு எடிட்டருக்கு கிருஷ்ணா ஸ்வீட்ஸ் மைசூர் பாகு போன்றவைகளே! சுவைகளிலும் சரி, சர்க்கரை வியாதிஸ்தனின் நாக்கில் வழுக்கிச் செல்லும் லாவகத்திலும் சரி, இரண்டுமே இணையற்றவை! So அக்கட துளியும் சிக்கலின்றி ரெடியாகி தற்போது புக் பைண்டிங்கில் உள்ளது!

- தோர்கலும் இந்த முறை இம்மி நோவுமின்றி ரெடியாகி, புக்காகி நம் ஆபீஸில் ஒரு வாரமாய் தேவுடா காத்து வருகிறது!

- Ditto for கபிஷ் ஸ்பெஷல் – 1! கலரில் கலக்கலாய் ரெடியாகி ஆபீஸில் பராக்கு பார்த்து நிற்கிறது!

- அதே போல க்ளாஸிக் சூப்பர் ஸ்டார்ஸ் ஸ்பெஷல் – 3 இதழுமே அச்சாகி, பைண்டாகி இன்னொரு திக்கில் குந்திங்க்ஸ்!

- Electric ‘80s – நம்ம ஸ்பைடரின் மெகா புக்கும் ரெடி!! 

அத்திரி பாச்சா – சிக்கலான சமாச்சாரங்களெல்லாம் ரெடியாகியாச்சு; இனி சிம்பிளான வேலைகள் மட்டுமே பாக்கி என்றபடிக்கே -

இளம் டெக்ஸ் – டெக்சாஸ் ரேஞ்சர்ஸ்

&

V காமிக்ஸ் – எழுந்து வந்த எதிரி (ஏஜெண்ட் ராபின்)

கதைகளுக்குள் புகுந்தால் – சலூனின் நடுக்கூடத்தில் ‘தல‘கிட்டே ‘ணங்‘ என்று குத்து வாங்கியது போலவே ஒரு பீலிங்கு! மூக்கில் ஒழுகிய நெத்தத்தை கர்சீப்பில் துடைத்தபடிக்கே பார்த்தால் – இளம் டெக்ஸில் களம் செம அழுத்தம்! மாமூலாய் தாண்டிப் போகும் துரிதத்தில் இங்கே பணிகளை முடிக்க சாத்தியமாகாது; நிரம்பவே நேரம் தந்து தான் எடிட்டிங் செய்திட வேணுமென்பது புரிந்தது. பற்றாக்குறைக்கு  இன்னிக்குக் காலையிலே போட்ட சொக்காய் எதுவென்று மதியமே மறந்து போயிருக்கும் எனும் போது, முந்தைய 2 இதழ்களின் கதை மாந்தர்கள்லாம் யாரென்று நமக்கு நினைவுக்கு வரவழைக்க செம பல்டி அவசியமாகிறது. So இளம் ‘தல‘ பணிகளை லாஸ்டாக முடிச்சுப்புடலாம் என்றபடிக்கே V காமிக்ஸின் ஏஜெண்ட் ராபினோடு பழகிப் பார்க்க புறப்பட்டேன்!

கதையை முழுசாய்ப் படித்துவிட்டு, மொழிபெயர்ப்பினை துவக்கிடும் பழக்கமே இல்லாது போனதன் கூமுட்டைத்தன பின்விளைவுகளை நிறையவே அனுபவித்துள்ளேன் தான்! & இது அதனது லேட்டஸ்ட் அத்தியாயம்! 

செம விறுவிறுப்பாய் புதுசாய் ஒரு டீமோடு நமது ராபின் 2.0 இந்த hi-tech கதையில் களமாட, எனக்கோ செம உற்சாகம்! புதுயுக பாணியில் கம்ப்யூட்டர்கள்; செல்ஃபோன்கள் கொண்டு அரங்கேற்றப்படும் கொலைகள் தான் கதையின் அச்சாணி என்ற போது – “ஹை... காலத்துக்கு ஏற்ற கதை தான் போல்!” என்று குஷியாகிப் போனேன். கொஞ்சம் டெக்னிகலான பத்தியொன்று வந்த போது நம்ம கார்த்திக் கிட்டே அது பற்றிக் கேட்டுத் தெரிந்து கொள்ளவெல்லாம் செய்தேன்! அப்டிக்கா எழுதிக் கொண்டே போகப் போக, கதையின் மீதப் பக்கங்கள் சொற்பமாகிக் கொண்டே போக – “இன்னிக்கே முடிச்சுப்புடலாம் ; நாளை இளம் தல திக்கில் கவனத்தைத் திருப்பலாம்!” என்று மனசு கூவியது! ஆனால்... ஆனால்... பக்கங்கள் குறைந்து கொண்டே போனாலும், கதையின் முடிச்சு இன்னும் அவிழ்ந்த பாட்டைக் காணோமேடா என்று வயிற்றில் புளி கரைந்து கொண்டே போக – வேக வேகமாய் கடைசிப் பக்கத்துக்குப் போனால் – இருளில் ஒரு வில்லன் அமர்ந்து ‘கெக்கே பெக்கே‘ என்று சிரித்துக் கொண்டிருக்கிறான்! அவன் சிரிப்பது என்னைப் பார்த்தே என்பது போலவே இருக்க – அப்புறமாய் போனெலியில் விசாரித்தால் தான் தெரிய வந்தது – இது தொடரின் மத்தியிலுள்ளதொரு நெடும் சாகஸம் என்பது! ராபின் எப்போதுமே சிங்கிள் ஆல்பங்களில் தடதடத்து முடித்து விடுவார் எனும் போது; இப்படியொரு நெடும் த்ரில்லர் இருக்கும் சாத்தியம் மண்டையில் உறைத்திருக்கவே இல்லை!

அப்புறமென்ன – what next? இந்த இடத்தில் யாரைப் புகுத்தலாமென்று, V எடிட்டரும், நானும் பேந்தப் பேந்த யோசிக்கும் போது டைலன் டாகின் “சட்டைப்பையில் சாவு” ஆல்பத்தை V காமிக்ஸ் எடிட்டர் எடுத்து நீட்டியது பலனாகியது! இதற்கான ராப்பரும் ரெடியாகக் காத்திருக்க – இதோ இன்று காலை (சனி) முதலாய் மாங்கு மாங்கென்று எழுதிக் கொண்டிருக்கிறேன் இந்த 96 பக்க சாகஸத்தின் தமிழாக்கத்தை! இந்தவாட்டியோ முதல் காரியமாய் கடைசிப் பக்கத்துக்குப் போய் – அங்கே சுபம் போட்டிருக்கிறதா? என்று சரிபார்த்த பின்னரே பிள்ளையார் சுழியையே போட முனைந்தேன்! So இந்தப் பதிவை எழுத மட்டும் ப்ரேக் எடுத்துக் கொண்டு பள்ளி விடுமுறைகளின் கடைசி நாளில் assignment-களை மாங்கு மாங்கென்று ஒட்டுமொத்தமாய் எழுதும் புள்ளையாண்டனைப் போல டைலனை எழுதிக் கொண்டிருக்கிறேன்! எண்ட குருவாயூரப்பா!

And சும்மா சொல்லக் கூடாது தான் – கதை தாறுமாறு – தக்காளிச் சோறாய் பறக்கிறது! யூகிக்கக் கூடியதொரு கதைக்கரு தான் என்றாலும் அதனை கதாசிரியர் கையாண்டுள்ள விதம் செம தெறி! அதிலும் சித்திரங்களில் மிரட்டோ மிரட்டென்று மிரட்டியுள்ளார்கள்! இதோ – அட்டைப்பட preview & உட்பக்க ட்ரெய்லர்!

So இன்னிக்கு சாமக்கோடாங்கியாய் கூத்தடித்தால் நாளை காலைக்குள் நமது அமானுஷ்ய ஆய்வாளர் சாரை கரை சேர்த்து விடலாம்! அப்புறமாய் இளம் டெக்ஸோடு கைகுலுக்கக் கிளம்பிடும் பட்சத்தில் – காத்திருக்கும் வாரயிறுதிக்குள்ளாக டிசம்பர் புக்ஸை டெஸ்பாட்ச் செய்திட சாத்தியமாகிடும்! ஜெய் ராக்கோழி!

Moving on சென்னைப் புத்தக விழா சற்றே முன்கூட்டித் துவங்கி, பொங்கலுக்கு முன்பாகவே நிறைவும் பெறுவதால் அதற்கான திட்டமிடல்களையுமே இதே போல காலில் வென்னீர் ஊற்றியபடியே நாம் செய்திட வேண்டி வரும்! சென்னை முடிந்த சூட்டோடு சூடாகத் திருப்பூரும் வெயிட்டிங்காம்! So மறுபதிப்புகள்; புத்தக விழாக்களுக்கென்றான திட்டமிடல்கள் வேக வேகமாய் அரங்கேறி வருகின்றன!

- இரும்புக்கை மாயாவி ஏதோ ஒரு வடிவத்தில் கணிசமாய் இல்லாது இந்தப் புத்தக விழாக்களுக்குச் சென்றால் குமட்டிலேயே குத்துவார்கள் என்பது அனுபவப்பாடம் என்பதால் நமது மறுபதிப்புப் பட்டியலில் அவர் தவறாமல் இடம் பிடித்திடுவார்!

- இன்னொரு புத்தக விழா favourite ஆன லக்கி லூக்கின் ஏதாச்சுமொரு மறுபதிப்புமே புத்தக விழாவிற்கு அவசியமாகிடும்.

- And of course – CID ஜான் மாஸ்டரின் மறுபதிப்புமே ரேடாரில் உள்ளது!

- இவை தவிர, சிறார்களோடு நமது ஸ்டால்களுக்கு வருகை தரும் பெற்றோர்களின் கவனங்களை ஈர்க்கக்கூடிய சில இதழ்களையும் தயார் செய்திட உள்ளோம்! And இது முழுக்கவே ஜுனியர் எடிட்டரின் வைண்ணத்திலிருக்கும்!

So ஒரு வண்டி நிறைய புக்ஸோடு காத்திருக்கும் புத்தக விழாக்களில் சந்திப்போமா மக்களே?

சேலம் புத்தகவிழாவிற்கு முதல் சனி மாலை (30th நவம்பர்)அல்லது இரண்டாம் சனி (டிசம்பர் 8) மாலையில் ஆஜராகிடத் திட்டமிட்டுள்ளேன்! அடுத்த சில நாட்ளில் அதை உறுதிப்படுத்தி விட்டுச் சொல்கிறேன் – அப்பகுதி நண்பர்களைச் சந்தித்த திருப்தி கிட்டும் என்ற அவாவில் வெயிட்டிங் 🔥

Bye all! See you around! Have a lovely Sunday!

பின்குறிப்பு : 

🦁 2025 சந்தாக்களுக்கொரு reminder folks 🙏🙏

🦁 Electric '80s சந்தாவிற்குமே ஒரு reminder 🙏🙏

🦁சேலம் ஸ்பெஷல்ஸ் கூட காத்திருக்கும் folks 🙏🙏

ஒரு மழைநாளின் நவம்பர் !

 நண்பர்களே,

ஒரு மழைநாள் மாலையின் வணக்கங்கள் ! அது இன்னா மாயமோ தெரியலை, மழை சொட்டும் அழகை ஜன்னல் வழியே ரசிக்கும் போது உலகுக்கே ஏதாச்சும் சேதி சொல்லணும் போலவே தோணுறது (எனக்கு) வழக்கம் ! அதுவும் அந்த rainy day ஒரு saturday-ல் அமைந்து போனால், உள்ளுக்குள் அடைபட்டுக் கிடக்கும் அரிஸ்ட்டாட்டிலும், சாக்ரடீசும் 'நானு..நீயு'ன்னு போட்டி போட்டுக்கினு வெளிப்பட முனைகிறார்கள் ! 'கொஞ்சம் அடங்குங்கப்பா...லோகத்துக்கு ஏற்கனவே கொள்ளை பேரு டிசைன் டிஸைனா சேதி சொல்லிப்புட்டாங்க - நாமளும் சேர்த்துப்புட்டா பூமி தாங்காது !' என்று கெஞ்சிக் கூத்தாடி அவர்களது வருகைகளுக்கு அணை கட்ட வேண்டியதாகிப் போச்சு ! 

வேறு ஒண்ணுமில்லீங்க - ஆண்டின் இறுதியினை நோக்கி உலகமே நடைபோட்டு வரும் இந்த வேளையினில், உலகெங்குமுள்ள காமிக்ஸ் பதிப்பகங்கள் 2025-க்கெனத் திட்டமிட்டுள்ள சிலபல அசாத்திய ஆல்பங்கள் கண்ணில் பட்டு வருகின்றன ! ஒவ்வொன்றும் ஒரு பாணியில், ஒரு ஜான்ராவில், ஒரு அழகில் மூச்சிரைக்கச் செய்து வர, மொழி தெரியாமலேயே அவற்றை ரசிக்கும் போதுமே இந்தப் பத்தியின் முதல் வரியானது நிஜமாகிட முனைகிறது !! இன்ன தான் ஒரு காமிக்ஸ் ஆக்கத்தின் வரம்பு என்றெல்லாம் இல்லாது, இப்போதெல்லாம் கதாசிரியர்கள் கையில் எடுக்கத் துவங்கியுள்ள களங்கள் மெய்யாலுமே மெர்சலூட்டுகின்றன !

காதலின் பற்பல பரிமாணங்களை தகிரியமாய் கையிலெடுத்து அலசுகிறார்கள் !! 

பிரபல புதினங்களைக் கையிலெடுத்து காமிக்ஸ் ஆல்பங்களாக்கி தெறிக்க விடுகிறார்கள் ! 

வரலாற்றுக்குள் புகுந்து செம்மையாய் ஒரு யு-டர்ன் போட்டு நாம் இதுகாரும் சிந்தைகளில் உருவகப்படுத்தி வைத்திருந்த சமாச்சாரங்களுக்கெல்லாம் புதுசாய் ஒரு கோணத்தில் விளக்கம் தர முற்படுகிறார்கள் ! 

சமகால உலக அரங்கில் அரங்கேறி வரும் அரசியல் சதுரங்கங்களை தோலுரித்து பட்டையைக் கிளப்புகிறார்கள் ! 

மருத்துவத்திற்கும் ஒரு காமிக்ஸ் பார்வையினை தந்து பார்க்கிறார்கள் ! 

கார்ட்டூன்களுக்கு புதுசாயொரு அர்த்தம் கற்பிக்கிறார்கள் !

அமானுஷ்யங்களை அசால்ட்டாக அரவணைக்கிறார்கள்...

And of course - நமக்குப் பிரியமான வெஸ்டர்ன் கதைகளையும் தடபுடலாக தாளித்துத் தள்ளுகிறார்கள் !!

So கடைவாயில் ஜொள்ளு ஒழுக இவற்றையெல்லாம் பார்த்துக் கொண்டிருக்கும் போது உள்ளுக்குள் கலவையாய் எண்ணங்கள் ஓட்டமெடுக்கின்றன !! பிரதானமானது - "நாம் இவுக உசரங்களுக்கு எண்ணிக்கைகளில், அளவீட்டில்  வளர முடியாங்காட்டியும், பன்முகத்தன்மையிலாச்சும் நெருங்கிட நினைத்தால் இன்னமும் எத்தனை ட்ரம் காம்பிளான் குடிக்க வேணும் ?" என்பதே !! 

இன்றைக்கெல்லாம் "அவை மேற்கத்திய ரசனைகள் !...நமக்கு ரசிக்காது !" என்றெல்லாம் சால்ஜாப்பு சொல்வது சரிப்படாது ! Netflix தளத்துக்குள் நுழைந்தால் அமெரிக்காவில் ஓடக்கூடிய டி-வி தொடர்கள் முதற்கொண்டு அணிவகுத்து நின்று சக்கை போடு போட்டு வருகின்றன ! So டாலர் தேசங்களும் சரி, யூரோ பூமிகளும் சரி, இன்றைக்கெல்லாம் ரசனைகளில் நமக்கு அந்நியமே அல்ல தான் ! யதார்த்தங்களும், மாறி வரும் பொழுதுபோக்கு பாணிகளும் புது ரூட்களில் சீறிப் பாய - நாம மட்டும் இன்னமும் "மாசிலா உண்மைக் காதலி !! மாறுமோ - செல்வம் வந்த போதிலே'ன்னு தலைவர் காலத்தின் மரங்களை சுற்றி டான்ஸ் ஆடிக் கொண்டிருக்கிறோமே ?!! அது why மக்கா ? எல்லாமே மாறி வரும் இந்த வேளைகளில் - ஒரு குட்டியூண்டு வட்டத்தின் காமிக்ஸ் வாசிப்புகள் மட்டும் ஒரு அகழி சூழப்பட்டதொரு இரும்புக்கோட்டையாய் ; பழசை ஆராதிக்கும் படையாய் ; மாற்றங்களை பகிஷ்கரிக்கும் பட்டாளமாய்த் தொடர்வது ஏனோ ? Why மக்கா ?

ஜன்னல் வழியே மழைத் தாண்டவங்களைப் பார்க்கும் போதே நமது ஜம்போ காமிக்ஸ் முயற்சியானது மனசில் 'ரா...ரா....சரசுக்கு ரா...ரா !!' என்று குதிக்கிறது ! ஜம்போ காமிக்ஸ் பின்னணியில் நாம் கொண்டிருந்தது - நாயக பிம்பங்களின் அவசியங்களின்றி, கதைகளுக்கு மட்டுமே முக்கியத்துவம் தந்திடும் one-shots இங்கு அணிவகுத்திட வேண்டும் என்ற அவாவே ! I agree - அங்கு நமது கதைத்தேர்வுகள் எல்லா தருணங்களிலும் bang on target இருந்திருக்கவில்லை  தான் ; but அதே சமயத்தில் அந்த தனித்தடமே மூணு, நாலு ஆண்டுகளில் மூலை சேர்ந்திட வேண்டிய அளவிற்கு டப்ஸாவாக இருக்கவுமில்லை தான் ! So why did it not click ? என்ற கேள்வியே இந்த நொடியில் என்னுள் !! 

சாப்பாட்டு பாணிகளில் மாற்றங்களை ஆர்வமாய் அரவணைத்திருக்கிறோம் ! நம்மூர் உணவுகளில் "பனீர்" எனும் ஐட்டத்தை நான்லாம் ஒரு 20 வயதான பிற்பாடு தான் பார்க்கவே செய்திருப்பேன் ! "ஷவர்மா' என்றால் ஷவரில் குளித்துக் கொண்டிருக்கிறோம் என்பதை அம்மாவிடம் உணர்த்தும் வார்த்தையாக மட்டுமே என் காலத்தில் இருந்து வந்தது ! KFC ; Subway ; McDonalds ; Popeyes ; Dominos ; Pizzahut என்பனவெல்லாமே அமெரிக்கா போயிட்டுத் திரும்புவோரின் பீட்டர்களில் காணப்பட்டு வந்த பெயர்களாய் மாத்திரமே இருந்து வந்தன ! ஆனால் இன்றைக்கோ நிலவரம் என்ன சொல்லுங்களேன் ? நம் வீட்டு அரை டிக்கெட்கள் தாமாய் KFC-ல் ஆர்டர் போட முனைந்து வருகின்றன !!

பொழுதுபோக்கு வழிமுறைகளிலும் தான் எம்புட்டு மாற்றங்கள் ? தூர்தர்ஷனில் ராமாயணம் சீரியலைப் பார்க்க ஞாயிறு காலையில் தேசமே டிவி பெட்டிகளின் முன்னே குவிந்த காலங்களெல்லாம் இன்றைய OTT தலைமுறைக்கு என்னவென்று கூடத் தெரியாது தானே ? "கொரியன் சினிமா பிடிக்கும் ya ; I like Scorcese ; இரானியன் சினிமாக்கள் ரெம்போ different தெரியுமா ? என்ற சம்பாஷணைகள் இன்றைக்கு நார்மலே !! 

நமது விடுமுறைத்தல செலெக்ஷன்களில் ; நடையுடைகளில் ; ஓட்டும் வண்டிகளில் ; அரசியல் பார்வைகளில் - என சகலத்திலும் மாற்றம் நிரந்தரம் என்றாகி விட்டது ! பச்சே - ஈ பொம்ம பொஸ்தவ வாசிப்பில் மட்டும் கட்டுப்பட்டிகளாகவே நாம் தொடர்வது ஏனோ சேட்டா ? நூத்தியொன்றாவது தபாவாக இந்தக் கேள்வி என்னுள் ! I agree, கி.நா.க்கள் இன்று நமக்கு அந்நியமல்ல தான் ; XIII ; தாத்தாஸ் / டெட்வுட் டிக் / நிஜங்களின் நிசப்தம் / கென்யா போன்ற செம offbeat கதைகளையும் இப்போதெல்லாம் ஏற்றுக் கொள்கிறோம் தான் ; but still நமது comfort zones மாயாவிகளோடும், ஸ்பைடர்களோடும், டெக்சோடும், டைகரோடும், லக்கி லூக்கோடும் ; ரிப்போர்ட்டர் ஜானிகளோடும் தானே பிரதானமாய் இருந்து வருகின்றன ? இந்த குட்டியூண்டு சமாச்சாரத்தினில் மட்டும் வெயிலடிச்சாலும், மழை பெய்ஞ்சாலும், புயல் வீசினாலும் நமது மைய ரசனைகள் இம்மியும் மாற்றம் காணாது தொடர்வதன் மாயம் தான் என்ன ? இது ஏற்கனவே நாம் பேசியுள்ள topic தான் என்றாலும், அகவைகளின் முன்னேற்றத்துடன் இதே கேள்வியினை மறுக்கா ஒருமுறை அணுகிப் பார்ப்பதில் தப்பில்லை என்றே தோன்றுகிறது ! 

இந்த வாரத்துக்கான கேள்வியாய் உங்களிடம் நான் முன்வைக்க விழைவது இதைத் தான் guys : என்றைக்கேனும் ஒரு கனவு ஆண்டினில் - ஒரு முழு வருஷச் சந்தாவிற்கும் big names இன்றி, புதியவர்களை ; புதுக் கதைகளை / தொடர்களை கொண்டு வெற்றிகரமாய் செதுக்கும் வாய்ப்பு அமையுமுங்களா ? அல்லாங்காட்டி - "வாய்ப்பில்லே ராஜா"ன்னு தான் நமக்கு நாமே சொல்லிக்கணுமா ? Your thoughts please ladies & gentlemen ?

ஆங்...மழை விட்டுப்புட, நமக்குள்ளான அந்த தத்துவ மேதைகளும் மண்டையை உள்ளுக்குள் இழுத்துக் கொள்ள, இதோ - டிசம்பரில் காத்துள்ள நமது fantasy நாயகர் தோர்கலின் பிரிவியூ !! In fact இந்த இதழ் போன வாரமே பிரிண்ட் ஆகி, பைண்டிங்கும் முடிந்து ரெடியாகி இருக்க - சும்மா அருண் ஐஸ்க்ரீமின் butterscotch 1 லிட்டர் bar போல புக் தகதகக்கிறது ! கருணையானந்தம் அங்கிளின் க்ளாஸிக் நடையில் இந்தக் கதையின் பணிகளை சுலபமாய் முடிக்க முடிந்ததால் - தோர்கல் இம்முறை ஜிலோவென்று ரெடியாகி விட்டார் ! இதோ - கெத்தாய் அம்மணி க்றிஸ் of வால்நார் காட்சி தரும் ஒரிஜினல் அட்டைப்படம் !! And உள்ளாற இந்த 2 அத்தியாய சாகசத்தில் கொஞ்சமே கொஞ்சமாய் 18+ சமாச்சாரங்களும் இடம்பெற்றுள்ளன ! No கத்திரி ; no எடிட்டிங் என படைப்பாளிகள் கறாராய் சொல்லிப்போட்டதால் உள்ளது உள்ளபடிக்கே !! எண்ட தெய்வமே !!  

தோர்கலின் இந்தக் குறிப்பிட்ட கதைச் சுற்று இன்னும் ஒரு ஆல்பத்தோடு நிறைவுறுகிறது ! So 2025-ன் துவக்க மாதங்களிலேயே அதனையும் வெளியிட்டு விடலாம் - கதை உங்களின் ஞாபகங்களில் இருக்கும் போதே ! அதையும் சேர்த்து 3 பாக ஆல்பமாய் இப்போதே போட்டிருக்கலாம் தான் - ஆனால் அவ்விதம் செய்திடும் பட்சத்தில் புக்கின் விலை ரூ.375 என்றாகியிருக்கும் ! And தோர்கலின் ஆல்பங்கள் அந்த விலைகளில் பெருசாய் ஸெல்ப் எடுப்பதே கிடையாது - என்பது தான் வார்னிஷ் இல்லாத நிஜம் ! 12 ஆண்டுகளுக்கு முன்பாய் துவங்கிய இத்தொடரின் சகல ஆல்பங்களும் இன்னமும் நம்மிடம் ஸ்டாக்கில் உள்ளன என்பதை நான் சொல்லவும் வேணுமா - என்ன ? So விற்பனை / வியாபார நோக்குகளும் உட்புகும் போது, கதைகளை பிரித்து வெளியிடுவதைத் தவிர்க்க இயலவில்லை guys !    உங்களின் புரிதல்களுக்கு முன்கூட்டிய நன்றிகள் !!

And இதோ - போன வாரம் போட விடுபட்டுப் போன இளம் டெக்சின் உட்பக்க preview !

Moving on, நவம்பரில் இறுதி வெள்ளியன்று சேலத்தில் புத்தக விழா துவங்கிடவுள்ளது என்பதால் அதற்கான முஸ்தீபுகளில் நம்மாட்கள் பிசி ! 

• கபிஷ் ஸ்பெஷல் 1 - ரெடி !
• க்ளாஸிக் சூப்பர்ஸ்டார்ஸ் ஸ்பெஷல் 3 - ரெடி !
• ELECTRIC '80s - முதல் இதழான ஸ்பைடர் ஸ்பெஷல் - ரெடி ! 

தவிர, டிசம்பர் புக்ஸ் அனைத்துமே சேலத்தில் ஒன்றிரண்டு நாட்களிலேயே கிடைக்கும் என்பதால் அப்பகுதி நண்பர்களின் ஷாப்பிங்குக்கு நிறையவே புக்ஸ் இருக்கும் ! And இன்னமும் ELECTRIC 80's / சேலம் ஸ்பெஷல் இதழ்களுக்கு முன்பதிவு செய்திருக்கா நண்பர்கள் - இனியும் தாமதிக்க வேண்டாமே ப்ளீஸ் ? கபிஷ் ஸ்பெஷல் கலரில் சும்மா எகிறி அடிக்கிறது என்பது கொசுறுத் தகவல் !! 

And சேலம் முடிந்த சற்றைக்கெல்லாமே சென்னைப் புத்தக விழாவுமே இம்முறை டிசம்பரில் இறுதியிலேயே துவக்கம் காணக்கூடும் என்ற சூழலில், அதற்கான திட்டமிடல்களுக்கும் கணிசமாகவே நேரம் தர வேண்டியுள்ளது ! By now - சென்னையில் எது தேவை ? எது விற்கும் ? எது விற்காது ? என்பதெல்லாம் கொஞ்சமாய் புரிபட ஆரம்பித்திருப்பதால் அதற்கேற்ப யோசனைகள் ஓடிக்கொண்டுள்ளன !! So அதனைத் தொடர்ந்திட நான் கிளம்புகிறேன் folks ; இயன்றால் எனது துவக்கப்பத்திகளின் அனற்றலுக்கு உங்கள் பார்வைகளிலான பதில்களை பதிவிட கோருகிறேன் ! 

Bye all...see you around ! Have a cool weekend !

மேஜிக் மொமெண்ட்ஸ்!

நண்பர்களே,

வணக்கம். தடதடத்து வரும் நடப்பாண்டு எக்ஸ்பிரஸ் மெதுமெதுவாய் அதன் இறுதி ஸ்டேஷனை நெருங்கிக் கொண்டிருக்கும் நேரமிது! டின்டின், லார்கோ ரகளை செய்த ஜனவரியெல்லாம் ரெம்போவே பின்னால் ஒரு தூரத்துப் புள்ளியாக மாத்திரமே இன்று நினைவுகளில் ஒட்டிக் கொண்டிருக்கின்றன! So இதோ - தொடும் அண்மையினில் காட்சி தந்து கொண்டிருக்கும் டிசம்பரின் மீதான பார்வைகளைப் படர விடலாமா folks?

The Magic Moments ஸ்பெஷல்!!

முழியாங்கண்ணனின் மேற்பார்வையினில் 1000+ இதழ்கள் உருவாகியிருப்பதைக் கொண்டாட நீங்கள் முன்மொழிந்து, பெயரிட்டும் தந்திருக்கும் இதழ் இது! (பெயரிட்ட நண்பரின் பெயர் மறந்து போச்சூ... தயைகூர்ந்து கரம் தூக்கி உங்களை அடையாளப்படுத்திக் கொள்ளுங்கள் நண்பரே - அந்த இதழினில் குறிப்பிட வேணும்!) 

நிஜத்தைச் சொல்வதானால் நம்ம STV இந்த மைல்கல் குறித்துப் பதிவிட்டிருக்காவிட்டால் இப்படியொரு சமாச்சாரம் பற்றியே எனது சிந்தனை போயிராது தான்! பல விதங்களில் எனது பணியானது ஒரு சர்க்கஸ் ரிங் மாஸ்டரின் பொறுப்பை ஒத்தது என்பேன்! "ஆங்... கூடாரம் செட் பண்ணியாச்சா? லைட்கள் பொருத்தியாச்சா? மரணக்கூண்டை மாட்டியாச்சா? அதிலே ஓட வேண்டிய மோட்டார் சைக்கிளை காயலான் கடையிலேர்ந்து எடுத்தாந்தாச்சா? கோமாளிகள் ரிகர்சல் பண்ணி விட்டார்களா? உசரத்திலே ட்ரபீஸில் கலக்க வேண்டிய கலைஞர்களுக்கான பாதுகாப்பு வலையெல்லாம் கச்சிதமா கீதா?" என்ற ரேஞ்சுக்கு வகைவகையான தயாரிப்புப் பணிகளுக்கு ஒரு உந்துதல் தருவதே எனது பிரதானப் பணி! Of course பேனா பிடிக்கும் பொறுப்பொன்றுமே எனக்குண்டு தான் – மறுக்க மாட்டேன்; ஆனால் ஒட்டுமொத்தமாய் சகல பணிகளையும் ஒருங்கிணைத்து ஒரு ஷோவை வெற்றிகரமாய் நடத்திக் காட்டுவதே ஒரு ரிங் மாஸ்டரின் முன்னுள்ள சவால்களின் உச்சம் என்பதைப் போல ஒவ்வொரு இதழினையும் பூர்த்தி செய்து கையில் ஏந்துவது தான் அடியேனின் மாதாந்திர சவால் quota! So இந்த நொடியில் 1000+ சர்க்கஸ் காட்சிகளை நமது டீமுடன் இணைந்து வெற்றிகரமாய் நடத்தி முடித்திருக்கும் மனநிறைவோடும், பணிவோடும் ரசித்து வருகிறேன்!

Looking back, இந்தப் பயண மும்முரத்தில் நாம் கடந்திருக்கும் தொலைவு குறித்தான புரிதல் என்னுள்ளே இருந்திருக்கவில்லை தான்! “ஆங்... இந்த மாசம் முடிஞ்சது; அடுத்து என்ன?” என்ற ரீதியிலேயே தான் நாட்களின் ஓட்டம் இருந்து வந்துள்ளது! So ஆயிரம் ப்ளஸ் இதழ்களைக் கடந்து 1100-ஐ நெருங்கிக் கொண்டிருக்கிறோம் என்று நம்ப நிரம்பவே கஷ்டமாகவுள்ளது! 

எத்தனை எத்தனை நாயகர்கள்... நாயகியர்! 

எத்தனை எத்தனை சைஸ்கள்... எத்தனை எத்தனை விலைகள்! 

எத்தனை எத்தனை உச்சங்கள்... எத்தனை எத்தனை பாதாளங்கள்! 

எத்தனை எத்தனை சந்தோஷங்கள்... எத்தனை எத்தனை சங்கடங்கள்? 

எத்தனை எத்தனை மைல்கல்கள்... எத்தனை எத்தனை அழுகிய முட்டைகள்! 

Phewww...! இதழியல் துறையினில் வாராந்திர, மாதம் இருமுறை இதழ்களை நடத்தி வரும் ஜாம்பவான்களுக்கெல்லாம் இந்த ஆயிரம் ப்ளஸ் என்ற நம்பரானது கொட்டாவியை வரவழைக்கவல்ல குயந்தைப்புள்ள மேட்டராக இருக்கக்கூடும் என்பது புரியாமலில்லை! ஆனால் குயந்தைப்புள்ளைகள் மாத்திரமே படிக்கும் ‘பொம்ம புக்குகள்‘ என்ற வெகு ஜன முத்திரை தாங்கி வரும் நமது துறைக்கு இந்த 1000+ ஒரு பெத்த மேட்டர் என்பதை மண்டை சொல்வதால் நெஞ்சம் ஏற்றுக் கொள்ள முயல்கிறது!

- இங்கிலாந்து

- அமெரிக்கா

- ப்ரான்ஸ்

- பெல்ஜியம்

- இத்தாலி

- ஹாலந்து

- டென்மார்க்

- ஸ்லொவேனியா

- ஜெர்மனி

- ஆஸ்திரேலியா

என்று உலக வரைபடத்தின் பல தேசங்களது கதைகள் / தொடர்களோடு அன்னம்-தண்ணீர் புழங்கியிருப்பது மகிழ்வின் ஒரு பகுதியெனில் – நாம் வெளியிட்டிருக்கும் எண்ணற்ற கதைகள் இந்தியாவில் மாத்திரமன்றி, ஆசியாவிலேயே முதல் தபாவாக வெளிவந்திருக்கின்றன என்பது இன்னொரு பகுதி! அட, ஒரு சில கதைகள் – ஒரிஜினலாய் வெளியான மொழிக்குப் பின்பாக நமது தமிழில் மட்டும் தான் வெளியாகியுள்ளன என்பதுமே ஒரு கொசுறுத் தகவல்!

நாற்பது ஆண்டுகளாய்த் தொடர்ந்திடும் பயணம் என்றாலுமே நமது வண்டி டாப் கியரைத் தொட்டு பந்தயக் குரிரையாய் பாய்ச்சல் எடுக்கத் துவங்கியிருப்பது நமது இரண்டாவது இன்னிங்ஸில் தான் என்பதில் ஏது இரகசியம்? 2012-க்கு பின்பான இந்தப் பன்னிரெண்டு ஆண்டுகளில் முதல் 28 ஆண்டுகளின் முயற்சிகளைக் காட்டிலும் ஜாஸ்தி சிக்ஸர்களை வெளுத்திருக்கிறோம்! So பழைய பாணிகளில் ஒரு பாதியும் புதுயுக பாணிகளில் மீதமும் நமது பட்டியலில் இருப்பது ஒரு சந்தோஷ முரண் என்பேன்!

இந்த ஆயிரம் இதழ் கண்ட அதகளப் பயணத்தில் எனது பெர்சனல் Top Moments பற்றி யோசிக்க முனைந்தால் – ‘மச மச‘ வென ஏகப்பட்ட சமாச்சாரங்கள் குறுக்கும் மறுக்குமாய் ஓடிவிளையாடி வருகின்றன!

- பிள்ளையார் சுழி போட்டுத் தந்த ‘கத்தி முனையில் மாடஸ்டி‘

- ‘எத்தனுக்கு எத்தன்‘ நான் – என்று கெத்து காட்டிய ஸ்பைடர் அறிமுக வேளை!

- முதல் தீபாவளி மலர்! பொங்கல் மலர்! கோடை மலர்!

- ‘தல‘ தாண்டவங்களைத் துவங்கிய “தலைவாங்கிக் குரங்கு” வெளியான தருணம்!

- ‘ட்ராகன் நகரம்‘ – லயனின் 50வது இதழ்!

- திகில்; ஜுனியர் லயன்; மினி லயன் அறிமுக நாட்கள்!

- முத்து காமிக்ஸ் எனது பொறுப்புக்கு வந்த பொழுது!

- லயன் தீபாவளி சூப்பர் ஸ்பெஷல் 1987!!

- XIII அதகளம் பண்ணத் துவங்கிய வேளைகள்!

- கேப்டன் டைகரின் வருகை!

- மெகா ட்ரீம் ஸ்பெஷலின் திட்டமிடல்!

- மின்னும் மரணம்!!

- நமது மீன்வருகையின் Comeback ஸ்பெஷல்!

- நெவர் பிஃபோர் ஸ்பெஷல் - சென்னை 2013

- LMS வெளியீடு – ஈரோடு 2014

- மின்னும் மரணம் – ஆயிரம் ரூபாயென்ற மைல்கல்லைத் தொட்ட அதிசயப் பொழுது...!

- இரத்தப் படல வண்ணத் தொகுப்புகள் – 2018 ஈரோடு

- கொரோனா லாக்டௌன் பொழுதுகளிலும் தடதடத்த மறக்கவியலா வேளைகள்!

- டின்டினின் அறிமுகம்!

- நடப்பாண்டின் ட்ரிபிள் தீபாவளி அதிரடிகள்!

என வாணவேடிக்கைகளாய் ஏதேதோ பளீரிடுகின்றன! Maybe இன்றிரவு படுத்துறங்கி விட்டு, நாளை கண்முழிக்கும் போது புதுசாய் இன்னொரு டஜன் அனுபவங்கள் மனசில் பிரதானப்பட்டும் இருக்கலாம் தான்! ஆனால் சகலத்துக்கும் மத்தியில் ஒற்றைச் சமாச்சாரம் மட்டும் பொதுவாக இருந்திடும்! And அது நாம் கூட்டாக உணர்ந்துள்ள மகிழ்ச்சிகளே!

காக்காய் தன்னோட குஞ்சுகளை எந்த ஊரில் அழகிப் போட்டிகளுக்கும் அனுப்பியதாய் எனக்குத் தெரிய தரவுகள் ஏதும் கிடையாது தான்; So ‘காக்காய் – பொன் குஞ்சு‘ என்ற உவமைகள்லாம் சொல்லி மொக்கை போட மாட்டேன்! மாறாக நமக்குப் பொருந்துகிற மாதிரியானதொரு உவமையை இறக்கி விடட்டுமா? ”ஆந்தையனுக்கு அவன் கைவண்ணமும் அதகளங்களே!” So என்னைக் கேட்டால் ஜடாமுடி ஜனநாதனின் கதைக்கே பில்டப் தருவேன் தான்! பச்சே இங்கே எனது அபிப்பிராயங்கள் பெருசாய் எதையும் சாதிக்கப் போவதில்லை! 

மாறாக – இந்த 1000+ இதழ்களின் மத்தியிலான உங்களின் Top 3 மறக்கவியலா தருணங்கள் எதுவென்று தெரிந்து கொள்ளத் தான் ஆர்வம்! So இந்தப் பயணப் படலத்தின் எந்தத் தருணத்தில் நீங்கள் இணைந்தவராக இருந்தாலும், உங்களை மகிழ்வித்த Top பொழுதுகள் எவையென்று அடையாளப்படுத்திடலாமே folks?

Moving on, இந்த MAGIC MOMENTS-க்கென காத்துள்ள நம்ம ‘தல‘ கலர் சாகஸ மேளாவின் first look இதோ!! ஒரிஜினல் போனெலி அட்டைப்படமே; துளி கூட கூட்டல் – குறைத்தலின்றி! ‘தல‘ firing squad முன்னே நிற்பதும், சாட்டையால் விளாசப்படுவதும் சில பாயாசப் பார்ட்டிகளின் கனவுகளில் மட்டுமே அரங்கேறியிருந்தாலும் – இதோ இந்த டிசம்பரில் அவற்றை ஜொலிக்கும் கலரில் பார்த்திடவுள்ளோம்! 

டெக்ஸ் தொடரில் ஒரு லாரி லோடு கதைகள் இருந்தாலும் – இந்த 40 ஆண்டு கால எடிட்டிங் அனுபவத்தில் ஒரு விஷயத்தை மட்டும் ஸ்பஷ்டமாய்ப் புரிந்து கொள்ள முடிந்துள்ளது :

- டெக்ஸின் சில சாகஸங்களில் அனல் பறக்கச் செய்யும் ஆக்ஷனிலும், பரபரக்கும் சம்பவக் கோர்வைகளிலுமே கதைகள் சிட்டாய்ப் பறந்து விடும்! So கதை நெடுக முகம் முழுக்கப் புன்னகையோடு பயணிக்க நமக்கு சாத்தியமாகிடும்!

- டெக்ஸின் மற்ற சாகஸங்களிலோ – நிறைய பில்டப்; கதைக்களங்களை நிறுவ நிறைய மெனக்கெடல்கள்; நிறைய கதைமாந்தர்கள்; அவர்களது பின்னணிகள் என்றிருக்கும்! So அங்கே கதையோடு ஒன்றி, சீரியஸான முகங்களோடு நாமும் ட்ராவல் செய்து கொண்டிருப்போம் – சமீபத்தைய “பனிமண்டலப் போராளிகள்” ஆல்பத்தைப் போல!

டெக்ஸ் ரசிகர்களாகிய நமக்கு இரண்டுமே புல் மீல்ஸ் போலானவை என்றாலும், எடிட்டர் என்ற குல்லாவோடிருக்கும் தருணங்களில் ரகம் # 1 செமத்தியாய் ரசித்திடும்! ‘ஆங்... குத்துங்க ‘தல‘! அவனைப் போடும்யா கார்சா! வுடாதே கிட் தம்பி! ‘இழுத்து வச்சு சாத்துப்பா டைகரு!‘ என்று குஷாலாய் குதி போட்டுக் கொண்டே எடிட்டிங்கை நகர்த்திச் செல்ல இயலும்!

இந்த MAGIC MOMENTS இதழில் காத்திருப்பதே இந்த breezy ரக அதிரடி! போன மாதம் நாம் படித்த நெடும் சாகஸமானது ஆர்டிக் துருவத்துக்கு இட்டுச் சென்றதென்றால் இந்த இதழோ நம்மை மெக்ஸிகோவுக்கு இட்டுச் செல்கிறது! பெரும் சூழ்ச்சியில் சிக்கிடும் டெக்ஸ் மெக்ஸிகோவில் கம்பி எண்ண நேரிட, தொடரும் பட்டாசுகள் பத்தாயிரம் வாலாவுக்கு சளைக்காதவை! And இந்த 250 பக்க சாகஸம் முழுவண்ணத்தில் வரவுள்ளதால் – ஒரு visual feast வெயிட்டிங்! ரூ.350 விலையில் காத்திருப்பது டெக்ஸ் தொடரின் ஒரு மைல்கல் இதழ் folks! So கூடியவரையில் இதனை உங்களிடம் ஒப்படைக்கும் ஆர்வத்தோடு வெயிட்டிங்!

And இதோ – இந்த இதழோடு குட்டியான விலையில் வரவிருக்கும் இளம் டெக்ஸின் சாகஸத்தின் அட்டைப்பட ட்ரெய்லருமே! இந்த 64 பக்க சிங்கிள் ஆல்பத்தோடு ஒரு கதைச் சுற்று நிறைவுறுவதால் ”டெக்ஸாஸ் ரேஞ்சர்ஸ்” solo சாகஸமாய் ரூ.50 விலையில் வரவுள்ளது.

இதனையும் MAGIC MOMENTS ஸ்பெஷல் இதழில் இணைத்து ரூ.400 விலைக்கு ஒரே புக்காய் வெளியிட்டிருக்கலாம் தான்; ஆனால் இளம் டெக்ஸ் ஏற்கனவே 2 black & white ஆல்பங்களில் தனித்தனியாய் வெளிவந்திருக்க, இந்த climax இதழை ஒரு பெரிய புக்குக்குள் நுழைத்தால் புத்தக விழாக்களில் வாங்கிடக் கூடிய புது வாசகர்களுக்கு சிரமமாகிடக் கூடும் என்று பட்டது! தவிர ஒரு fresh அட்டைப்படமும் சாத்தியமாகாது போயிருக்கும்! ஆகையால் 2 தனித்தனி இதழ்கள் எள்ற திட்டமிடல்! இதுவுமே ஒரிஜினல் அட்டைப்படமே! இதான் உட்பக்க preview அடுத்த வாரம்!

Before I sign out – சின்னதொரு தகவல்! 2024 அட்டவணையில் அறிவிக்கப்பட்டிருந்த

- மேற்கே போ மாவீரா – ரூ.250

&

- TEX – எல்லையோர ஓநாய்கள் – ரூ.160

ஆகிய 2 இதழ்களுக்குப் பதிலாகத் தான் Magic Moments ஸ்பெஷல் + டெக்ஸாஸ் ரேஞ்சர்கள் இதழ்கள் வெளிவருகின்றன! ஆகையால் “மேற்கே போ மாவீரா”வை விழுங்கிப்புட்டீங்களா? என்று நம்மாட்களின் சில்லுமூக்குளைச் சிதறச் செய்ய வேணாமே – ப்ளீஸ்?!

ரைட்டு... நம்ம தானைத் தலைவர் ஸ்பைடரின் “பாட்டில் பூதம்” எடிட்டிங் பணிகள் கூப்பிடுவதால் நடையைக் கட்டுகிறேன்! Bye all... See you around! Have a beautiful weekend ஆல்!

கடந்துள்ள வாரத்தினில் நமது சந்தா 2025 எக்ஸ்பிரஸ் செம வேகம் எடுத்துள்ளது! அதே துரிதத்தில் தொடரும் பொழுதுகளிலும் சந்தாக்கள் போட்டுத் தாக்கிடும் என்ற நம்பிக்கை நிரம்பவே உள்ளது! இன்னமும் இணைந்திருக்கா நண்பர்கள் - please do consider joining in at your earliest convenience 🙏

நவம்பரும், நடப்புகளும்....!!

நண்பர்களே,

வணக்கம். இதோ - இரண்டே நாட்கள் தான் ஆகியுள்ளன - அதிரசங்களையும், முறுக்குகளையும் தொந்திக்குள் புகுத்தி! இரண்டே நாட்கள் தான் கடந்துள்ளன பட்டாசைப் போட்டு, தெருவுக்கே ஒரு தேவலோக எஃபெக்ட் தந்து! இரண்டே நாட்கள் தான் நகர்ந்துள்ளன! - ‘தம்‘ கட்டி தொப்பைகளை உள்ளிழுத்து, புதுசாய் வாங்கின ஜீன்ஸ்களை இடுப்பில் நிறுத்த பாடாய்ப் பட்டு! ஆனால் தீபாவளிக்கான நமது மூன்று ஸ்பெஷல்களும் வெளியாகி ஒரு மகாமகமே கழிந்தது போல் தோன்றுகிறது உள்ளுக்குள்! And அந்த மூன்று இதழ்களுமே தத்தம் பாணிகளில் - பண்டிகைப் பொழுதுகளை ஜாலியாக்கிட உதவியுள்ளதில் நாங்கள் செம ஹேப்பி அண்ணாச்சி! So இன்னொரு 350 நாட்களுக்கு அப்பாலிக்கா காத்திருக்கப் போகும் அடுத்த தீபாவளிக்கு இன்னும் ஒரு படி கூடுதலாய்க் கலக்கிட என்ன செய்திடலாமென்ற யோசனையோடே it's back to the drawing board!

ரைட்டு... நவம்பரின் ரெகுலர் இதழ்களும் ஆச்சு! நடப்பாண்டில் டிசம்பரின் batch புக்ஸ் தவிர்த்து வேறு ஏதேனும் உண்டாடா தம்பி? என்ற கேள்வியை நீங்கள் கேட்கிறீர்களோ - இல்லையோ; என்னை நானே கேட்டுக் கொண்டேன்! அடிச்சுப் புடிச்சி தீபாவளி மலர்களை before time ரெடி பண்ணி விட்டதால் கிடைத்திருக்கும் இந்த இக்ளியூண்டு ஓய்வினில், ரெகுலர் தடத்தில் அல்லாத இதழ்களைத் தடதடக்கச் செய்யும் மகாசிந்தனைகள் துளிர் விடத் துவங்கி விட்டன! And இதோ - நபம்பர் 29ல் சேலம் புத்தக விழாவும் தொடங்கிடவிருப்பதால் அதனை அனுசரித்த பொழுதுகளில் அவற்றைக் களமிறக்கினால் சிறப்பு என்று பட்டது! So அந்த 3 ஸ்பெஷல்ஸும் இந்த நவம்பரின் பொழுதுகளை டாலடிக்கச் செய்திடுமென்று எதிர்பார்க்கலாம்!

- Electric '80s தனித்தட புக் # 1 - "The ஸ்பைடர் ஸ்பெஷல்"

- சுட்டிக் குரங்கு கபிஷ் ஸ்பெஷல் - 1!

- ஸ்பைடர் 2.0 - க்ளைமேக்ஸ் பாகம்!

ஆக ‘புலி வருது... வருது‘ என்று மிரட்டிக் கொண்டிருந்த Electric '80s தனித்தடமானது - தனது முதல் ஆல்பத்தில் நம்ம தானைத் தலைவரின் "பாட்டில் பூதம்" + 2 சிறுகதைகள் என்ற காம்போவில் கலக்கவுள்ளது! இங்கொரு முக்கிய தகவல் folks! '90களில் இந்த “பாட்டில் பூதம்” ஒரிஜினலாய் நமது லயனில் வெளியான சமயத்தில் கணிசமாகவே ‘கத்திரி காத்தவராயன்‘ அவதாரில் உங்களது காதுகளை அதீத புய்ப்பச் சரங்களிலிருந்து காப்பாற்றிட முனைந்திருந்தேன்! ஆனால் இன்றைக்கு காமிக்ஸ் சேவை ஆற்றிட ஆவலாய் பறக்கும் ஆர்வலர் பார்ட்டீஸ் - ”விடுபட்ட பக்கங்களோடே பிரிண்ட் போட்டுத் தர்றோம் சார்... வாங்கோ சார்... வாங்கோ மா...!” என்று சபலமூட்டி வருவதால் காத்தவராயன் அவதாருக்கு டாட்டா சொல்லியாச்சு! ஆகையால் இம்மியும் குறைவின்றி - பூதத்தோடு நம்மவர் அடிக்கும் ரகளைகளை இந்த இதழில் பார்த்திடப் போகிறீர்கள்! ஜெய் பாட்டில்மணி! 

இதோ - MAXI சைஸிலான இந்த இதழுக்கு நமது அமெரிக்க ஓவியையின் டிஜிட்டல் ரீ-டச்சிங்கில் உருவாகியுள்ள அட்டைப்படம் & உட்பக்க preview!

And நினைவூட்டி விடுகிறேன் மக்களே - இது ELECTRIC `80s தனித்தட சந்தாவுக்கான இதழ் மாத்திரமே! So அதற்கான சந்தா செலுத்தியாச்சா? என்பதை மட்டும் சரிபார்த்து விடுங்களேன் ப்ளீஸ்!!

அடுத்ததாக மிரட்டக் காத்திருப்பது முழுவண்ணத் தொகுப்பில் முதன்முறையாக நமது சுட்டிக்குரங்கு கபிஷ்! அழகான, க்ளாஸிக் சிறுகதைகளை, ரம்யமாய் கலர் செய்து, ஒரிஜினல் ஓவியரிடமே அட்டைப்படமும் போட்டு வாங்கி கெத்தாய் களமிறக்கிடவுள்ளோம் - இந்த கபிஷ் ஸ்பெஷல் 1 இதழினில்! இங்கே நண்பர் ரபீக்கின் பங்களிப்பு மட்டும் இல்லாது போயின் இந்த இதழே சாத்தியமாகியிராது என்பதே யதார்த்தம்! Thanks a ton Sir! இதோ அட்டைப்படம் + உட்பக்க ப்ரிவியூ!

And இந்த இதழானது எந்தச் சந்தாவிலோ, தனித்தடத்திலோ இடம்பிடித்திடாத புத்தக விழா ஸ்பெஷல்! So சந்தாக்களின் அங்கமாகிடாது!

ஸ்பெஷல் # 3 - நமது தானைத் தலைவரின் 2.0 அவதாரின் க்ளைமேக்ஸ் அத்தியாயம்! ஏற்கனவே மாயாவியோடும், ஆர்ச்சியோடும் துப்பறியும் கம்ப்யூட்டரோடும், ஜேன் பாண்டோடும் ஒரண்டைகளை இரண்டு அத்தியாயங்களில் இழுத்து விட்டிருந்த ஸ்பைடர் ரகளையாய் மூன்றாவது அத்தியாயத்தோடு அந்த சாகஸத்தை நிறைவு செய்திடுகிறார்! க்ளாஸிக் நாயகர்களைத் தட்டி எழுப்புவது போதாதென, அவர்களுக்கான புதுப்புதுக் களங்களையுமே இன்று படைப்பாளிகள் தயார் பண்ணி வருகிறார்கள்! அந்த முயற்சிகளில் ஒன்று தான் இந்த கூட்டணிக் கதம்ப த்ரில்லர்! So “க்ளாஸிக் சூப்பர் ஸ்டார்ஸ் ஸ்பெஷல் - 3” preview இதோ!

And yes/ இந்த இதழுமே ஒரு புத்தக விழா ஸ்பெஷல் தான்!

டிசம்பரின் ரெகுலர் இதழ்கள் நவம்பர் 28-ம் தேதி டெஸ்பாட்ச் ஆகிடும்! அந்தக் கூரியர் டப்பியினில் ELECTRIC '80s-க்கு சந்தா செலுத்தியிருக்கும் பட்சத்தில் 'The ஸ்பைடர் ஸ்பெஷல்” MAXI சைஸிலான இதழும் இடம்பிடித்திடும்! And அவற்றோடே:

கபிஷ் ஸ்பெஷல் 1 (ரூ.100)

+

க்ளாஸிக் சூப்பர் ஸ்டார்ஸ் ஸ்பெஷல் 3 (ரூ.60)

இதழ்களைப் பெற்றிட விரும்பினால் சந்தாதாரர்கள் ரூ.160 மட்டும் அனுப்பினால் மதி!

சந்தாவில் அல்லாதோருக்கு மேற்படி 2 இதழ்கள் தேவையெனில் கூரியர் கட்டணம் சேர்த்து ரூ.200/- அனுப்பிட வேண்டியிருக்கும்!

Maybe இந்த புத்தகவிழா ஸ்பெஷல்களை சேலம் விழாவிலோ, தொடரக்கூடிய இன்னபிற புத்தக விழாக்களிலோ வாங்கிட எண்ணிடும் பட்சத்தில் no problems at all! நிச்சயம் ஸ்டாக் இருக்கும்!

Moving on,  நமது 2025 சந்தா சார்ந்ததொரு செம சுவாரஸ்ய தகவல்!! இதுவரைக்கும் கிட்டியுள்ள சந்தாக்களில், மொத்தம் இரண்டே நண்பர்கள் தான் - சந்தா LITE பிரிவினை தேர்வு செய்துள்ளனர்! பாக்கி அனைவருமே ரெகுலர், full சந்தாவில் தான் இடம் போட்டுள்ளனர்!! நமது 2025-க்கான பயணத்தினில் almost அனைவருமே ஒரே சந்தாப்பிரிவில் பயணிப்பர் எனும் போது - நம்ம front desk அம்மணியர் நிச்சயம் நிம்மதிப் பெருமூச்சிடுவர்! And தீபாவளிக்குப் பிற்பாடு சந்தாக்கள் வேகமெடுப்பது வழக்கம் ; இம்முறையும் அது தொடருமென்ற நம்பிக்கையில் காத்திருக்கிறோம்! இதோ - சின்ன நினைவூட்டலாய் சந்தா விபரங்கள் :

Before I sign out - இரு கேள்விகள் :

1.ஸ்பைடர் ஸ்பெஷல் : வாசிப்புக்கா? சேமிப்புக்கா?

https://strawpoll.com/XOgOV8QbQn3

2.2025-ன் ஏதாச்சும் ஒற்றை இதழை ஜனவரியிலேயே பார்க்க விரும்புவீர்கள் எனும் பட்சத்தில் what will be that?

Bye all... See you around! Have a great weekend!

P. S : நம்ம Youtube சேனலில் அடியேன் போட்டிருக்கும் லேட்டஸ்ட் மொக்கை  : https://youtu.be/inP9Stj7yVY?si=swwwLOPYHrbj6m59

பூம்..பூம்...பூம் படலம் !!

 நண்பர்களே,

வணக்கம். மட்டன் விருந்து ; கூட்டம் அலைமோதுது பந்தியிலே ;  எப்படியோ அடிச்சுப் புடிச்சி இலைக்கு முன்னே குந்தியாச்சு ; ஐட்டங்கள் பரிமாறப்படும் முன்னமே சமையலின் மணம் நாசியைத் துளைக்குது ; 'இல்லியே...இங்கே கடைவாயோரமாய் நேக்கு ஜொள்ளு கசியலியே' என்ற கெத்தை மெயின்டெய்ன் பண்ணினாலும், கண்ணு பூரா பிரியாணி தேக்சாவை ஏந்தியிருக்கும் மகராசன் மேலேயே நிலைச்சு நிக்குது ; 'டங்கு..டங்கு' என்று தேக்சாவின் விளிம்பில் அடிக்கொரு தடவை அடிச்சிக்கினே அவர் பரிமாற, 'தோ வந்துட்டாரு..நெருங்கிட்டாரு' என்று மனசு பூரிப்பதை காட்டிக்காம, சிக்கன் ரோஸ்ட் பேஸினை சுமந்து வரும் தேவதூதனை லைட்டா நோட்டம் விடத் தோணுது ; ஆவி பறக்கும் பிரியாணியை, கணிசமான பீஸ்களோடே ரெண்டு சட்டுவம் முழுசா பரிமாறிய நொடியில் மனசுக்குள்ளே கலர் கலராய் மத்தாப்பூ மலர்ந்தாலும், 'ரோஸ்டிலே நல்ல பீசா கெடைக்குமா - இல்லாங்காட்டி சில்லறை பீஸை வைச்சுப்புட்டு நகர்ந்திடுவாரோ ?' என்ற பயம் பிடுங்கித் தின்னுது ; 'ரோஸ்ட்லாம் ரெண்டாது ரவுண்டுக்கு வரவே வராது...ச்சை...அதோ, எதிர்த்த பந்தியிலே இருக்க புளிமூட்டைக்குலாம் சூப்பர் பீஸ் அமைஞ்சிருக்கே !!' என்றபடிக்கே அலைபாயும் மனசுக்கு கடிவாளம் போட முயற்சிக்கும் நொடியிலே லட்டு மெரி ரெண்டு பீஸ்களையும், கணிசமான மசாலையும் இலையில் ஒரு புண்ணியவான் வைச்சிட்டுப் போகும் நொடியில், 'முட்டை இன்னும் வரக்காணோமே...? முழுசா வைப்பாங்களா - இல்லே பாதியா கட் பண்ணி பெப்பரிலே குளிப்பாட்டி ஒப்பேத்திடுவாங்களா ?' என்ற விசனம் தோளில் தொற்றிக் கொள்ளும் அந்த நொடியிலேயே நல்லபடியாய் ரெண்டு பாதி முட்டைகளையும், எண்ணெய் இல்லாத பாயாவையும் பிரியாணி எனும் மேற்குத் தொடர்ச்சிமலைக்குன்றின் மீது ஊற்றிப் போகும் அதிசயம் நிகழ்ந்திடுகிறது ! 

இந்த நொடியில் அந்த இலைக்கு முன்னே குந்தியிருப்பவனின் அகமும், முகமும் எவ்விதம் புளகாங்கிதத்தில் திளைத்திருக்குமென்று மட்டும் உருவகப்படுத்திப் பாருங்களேன் - இங்கே this moment அடியேனின் வதனம் உங்களுக்கு மனதில் ஓடிட வாய்ப்புள்ளது !! இங்கிலீஷில் சொல்லுவார்கள் - "grinning like a cheshire cat" என்று ! Alice in Wonderland கதையில் வருமொரு மொக்கை சைஸ் மாயப்பூனை "ஈஈஈ" என்று பல்லைக்காட்டிக் கொண்டேயிருக்கும் ! அதன் உடல் கண்ணுக்குத் தெரியாது அரூபமாகிப் போனாலும், அந்த இளிப்பு மட்டும் காட்சி தந்து கொண்டேயிருக்கும் ! திஸ் மொமெண்ட் - அந்த இளிக்கும் பூனை = திஸ் ஆந்தையன் !! ஒரு மெகா விருந்துப் பந்தியில், சகலமும் எதிர்பார்த்தபடியே சிறப்பாய், சூப்பராய் கிட்டி விட்டால் சந்தோஷத்துக்கு கேட்கவா வேணும் ?

ஒன்றல்ல, இரண்டல்ல, மூன்று தீபாவளி மலர்கள் !! And மூன்றுமே ஒன்றுக்கொன்று போட்டியிட்டபடிக்கே அனல் பறக்கச் செய்திடும் வெற்றியினை ஈட்டிடுவதெல்லாம் கனவுகளின் சமாச்சாரங்களாச்சே ?! அந்தக் கனவு இன்று கண்முன்னே நனவாகிடும் போது - பிரியாணி, ரோஸ்ட், பாயா என்றெல்லாம் உவமைகள் துள்ளிக்குதிப்பதை தவிர்க்க முடியலை folks !! 

இந்தத் திட்டமிடல் நிகழ்ந்த போதே எனக்கு 2 விஷயங்கள் உறுதிபடத் தெரிந்திருந்தன :

முதலாவது - பணிகளில் நாக்கு தொங்கிப் போவது உறுதி என்பது !

இரண்டாவது - டெக்ஸ் ஒரு massive ஹிட்டடிக்கப் போகிறார் என்பது !!

இந்த நொடியின் சந்தோஷத்தில் விஷயம் # 1 ஒரு பொருட்டாகவே தோணலை ; உங்களின் இந்த உற்சாகங்களையும், உத்வேகங்களையும் தரிசிக்க 'தல' கூட இன்யூட்ஸ் பூமிக்கே நம்ம ஸ்கூட்டரை விடவும் செய்யலாமென்றே தோன்றுகிறது ! So அது பற்றி நான் மொக்கை போடப்போவதில்லை ! மாறாக - இந்த நொடியின் பத்தாயிரம்வாலா பார்ட்டியின் வெற்றி பற்றிய எனது ஆரூடத்தினைப் பேச மட்டுமே முனைந்திடப் போகிறேன் ! 

பொதுவாகவே இத்தனை நீளமானதொரு கதைக்களம் எனும் போது, பக்காவான திட்டமிடல் + சம்பவக்கோர்வைகள் இல்லாது கதாசிரியர்கள் களமிறங்க மாட்டார்கள் என்பது ஒரு பொதுவிதி ! And இது வெகு சமீபத்தைய ஆக்கம் எனும் போது, தனது ஆற்றல்களின் உச்சத்திலுள்ள மௌரோ போசெல்லி கிஞ்சித்தும் பிசக அனுமதித்திருக்க மாட்டார் என்பதையுமே அடித்துச் சொல்லும் 'தகிரியம்' உள்ளுக்குள் ஊற்றெடுத்தது ! எல்லாவற்றையும் விட கதைக்கான அந்தப் பின்னணி - ஆர்டிக் வடதுருவம் எனும் போது, நமது ஒட்டு மொத்த டீமுமே தங்களது comfort zone-லிருந்து முற்றிலுமாய் விலகி ஒரு புது பூமியில் சாதாரண மாந்தர்களாகவே உலவிட இருப்பது என்னை நிரம்பவே excite செய்தது ! இந்தக் கதையின் நீளம் சார்ந்த எனது அனுமானம் மாத்திரம் சொதப்பாது இருந்திருப்பின் - போன டிசம்பரில் மார்டினின் "பனி அசுரர் படலம்" + இந்த "பனிமண்டலப் போராளிகள்" ஒரே சமயத்தில் வெளியாகியிருக்க வேண்டும் ! இரு சாகசங்களும் அந்த 'வடமேற்குக் கடல்பாதை' சார்ந்த தேடலையும், இன்யூட் மக்களையும், ஆர்டிக் துருவத்தில் சிக்கிக்கொண்ட டெரர் மற்றும் யெரெபஸ் கப்பல் பயணங்களையும் சுற்றிச் சுழன்றடிப்பதால் ரொம்பவே வித்தியாசமான அனுபவமாய் அமைந்திருக்க வேண்டியது !! Just miss !! டெக்சின் கதை நீளமாகிப் போனதால் இந்த தீபாவளி மலருக்கென மாற்றிட வேண்டிப் போனது ! 

இன்னொரு காரணமென எனக்குத் தோன்றியது கதையில் தென்பட்ட மாந்தர்களின் எண்ணிக்கை ! இத்தனை பெரிய cast சகிதம் எடுக்குமொரு கதைக்களத்தில் சர்வநிச்சயமாய் வீரியம் இல்லாது போகாதென்று நம்பினேன் ! அப்புறம் இன்னொரு தொஸ்கான் காரணமும் உண்டு ; கர்னல் ஜிம் பிராண்டன் ரூபத்தில் ! இவர் நம்மைப் பொறுத்தவரைக்கும் ஒரு lucky charm ! இவர் தலைகாட்டும் கதைகள் சகலமும் நம்மிடையே ஹிட்ஸ் !! So இம்புட்டு காரணங்களையும் கூட்டிக் கழித்துப் பார்க்கும் போதே இந்த டெக்ஸ் மெகா சாகசம் தெறிக்க விடுமென்ற நம்பிக்கை பக்காவாக இருந்தது ! 

To a slightly lesser extent - மிஸ்டர் நோவின் V காமிக்ஸ் தீபாவளி மலரும் ஹிட்டடிக்கும் என்ற நம்பிக்கை எனக்கிருந்தது என்றே சொல்லியாகணும் ! அந்த நாயகரிடம் ஏதோவொரு ப்ளஸ் இருப்பதாய் ஜூனியர் எடிட்டருக்கு தென்பட்டதை கடந்த சில சாகசங்களிலேயே பார்த்து ஊர்ஜிதம் செய்து கொண்டிருந்தோம் ! அதிலும் அந்த 'கங்கசெய்ரோ' கதை (பெயர் சட்டுன்னு நினைவுக்கு வர மாட்டேன்கி !!) என்னை ரொம்பவே இம்ப்ரெஸ் செய்திருந்தது ! So அமேசான் கானகத்தில் ஒரு முழுநீள உலா போவதாயின் நிச்சயமாய் சோடை போகாதென்று நம்பியவனுக்கு, கதையின் மொழிபெயர்ப்புப் பணியே வந்து சேர்ந்த போது அந்த நம்பிக்கை L&T சிமெண்ட் தரும் பிராமிசைப் போல டபுள் உறுதியாகிப் போனது ! 

கொஞ்ச நேரத்துக்கு புலியா ? சிறுத்தையா ? ஜாகுவாரா ? என்றெல்லாம் போட்டு கூகுளில் ஆராய்ச்சிகள் பண்ணித் தள்ளினேன் & அதனில் கணிசமாகவே ருசிகர துணுக்குகள் கிட்டின ! சின்ன வயசில் எப்போவுமே - 'காட்டிலே சிங்கத்துக்கு, புலிக்கும், சண்டை வந்தாக்கா எது கெலிக்கும் ? எது ரொம்ப பலசாலி ? எது ரொம்பப் பெருசு ?' என்ற ரீதியில் என்னுள் ஒரு fascination ஓடிடுவதுண்டு ! இதோ, பணி நிமித்தம் அத்தகைய தகவல்களை சரி பார்க்க முடிந்த போது அண்ணாச்சி குஷியாகி போயி !!

• சிங்கங்களை விட அளவில், ஆற்றலில், பலத்தில் கூடுதல் திறன் கொண்டவை புலிகளே என்பது தெரியுமா ?
• உலகிலுள்ள மிருகங்களை பலத்தின் அடிப்படையில் வரிசைப்படுத்தியுள்ள BBC - புலிக்கு 8-ம் இடத்தைத் தந்துள்ளது !! அந்த லிஸ்ட்டில் சிங்கத்துக்கு இடமே லேது என்பது தெரியுமோ ?
• கடிக்கும் ஆற்றலில் ஜாகுவார்கள், புலிகளை விடவும் வலு கூடியவைகள் !
• பூனைகள் வம்சத்தில் - புலி, சிங்கத்துக்கு அடுத்தபடியான முரட்டு விலங்கு ஜாகுவார் தான் !  
• மூக்கிலிருந்து, நீண்டிருக்கும் வால் வரைக்கும் அளந்தால் ஒரு ஆண் ஜாகுவார் நெருக்கி எட்டடி இருக்குமாம் !! That is biggggg !!

So இந்த ஆல்பத்தின் மொழிபெயர்ப்பின் போதே புரிந்தது - இதுவும் தீபாவளிக்கு சரவெடியாய் பொரிந்திடுமென்பது !!

The real surprise pack has been ZAROFF !!

"வேங்கை என்றும் உறங்காது" என்ற தலைப்பு இன்றைக்கு செம பாந்தமாய் தென்பட்டாலும், அதனை போன வருஷம அட்டவணையில் அறிவித்த சமயத்தில் இந்த ஆல்பம் பற்றிய இரண்டு வரிக் கதைச்சுருக்கத்தைத் தாண்டி எனக்கு எதுவும் தெரிந்திருக்கவில்லை ! So குத்துமதிப்பாய் வைத்த தலைப்பு பொருந்திப் போனதில் மகிழ்ச்சி ஒருபக்கமெனில், இந்த அசாத்திய ஆக்ஷன் த்ரில்லர் 'தல' டெக்ஸுக்கே tough தரும் வீரியம் கொண்டிருப்பது டபுள் மகிழ்ச்சி ! இங்கே என்னை முதலில் திகைக்கச் செய்தது சித்திர + கலரிங் ஜாலங்களே ! And பிடரியில் அறையும் ஆக்ஷன் sequences மிகுந்து கிடக்கும் போது இந்தக் கதை நிச்சயமாய் நல்ல மார்க்ஸ் வாங்கித் தேறி விடுமென்றே எடிட்டிங் தருணத்தில் நினைக்கத் தோன்றியது ! ஆனால் அச்சுக்குச் சென்று, அங்கே செம்மையாய் ஸ்கோர் செய்து, புக்காகி கைக்கு வந்து சேர்ந்த போது - தேவா சாரின் ரீ-ரெக்கார்டிங் முடிந்த "பாஷா" திரைப்படம் போல பன்மடங்கு கெத்து கூடி இருப்பதாய் தோன்றியது ! அந்தத் தருணத்தில் தான் இந்த தீபாவளி மலரும் அல்லு தெறிக்க விடுமென்ற நம்பிக்கை துளிர் விட்டது !! இப்போது கண்முன்னே இந்த நம்பிக்கை நிஜமாகிடுவதைப் பார்க்கும் போது - விருந்து முடிச்சு எழும் வேளையினில் ஒரு ஜிகர்தாண்டாவை முன்னே நீட்டியது போலுள்ளது !!   

Thanks a ton folks !! இந்த தீபாவளியை தித்திக்கச் செய்து விட்டீர்கள் !! மனம் முழுக்க சந்தோஷத்தோடு இப்போதே அடுத்த தீபாவளிக்கொரு ஸ்கெட்ச் போட ஆரம்பிச்சாச்சூ ! And ஜூனியர் எடிட்டர் - மிஸ்டர் நோவில் ஒரு செம நீள அதிரடி காத்திருப்பதாகவும் காதில் சேதியொன்றைப் போடுகிறார் ! So இந்தாண்டின் வெற்றி அமைத்துத் தந்துள்ள template-ல் அடுத்தடுத்து அதிர்வேட்டுக்களை போட்டுத் தாக்க இதோ drawing board-க்குப் போயாச்சு !! வேட்டையன் பாணியில் சொல்வதானால் - "You haven't seen anything yet !!"

சீக்கிரமே ஸ்பைடர் சாரோடும், கபிஷ் ப்ரோவோடும் நவம்பரை கலக்கிடலாமா ? பணிகள் பரபரப்பாய் போயிங்ஸ் !! Bye all...see you around guys !! Have a fun weekend !

புதுசாயொரு உச்சம் !!

 நண்பர்களே,

வணக்கம். தீபாவளி மலர்களுக்கு நாம் புதியவர்களே அல்ல தான் ; ஆனால் மூன்று ஸ்பெஷல் இதழ்கள் ஒருசேர தெறிக்க விடுவது இது தான் மொத தபா என்று நினைக்கிறேன் ! லயன்-திகில்-மினி-லயன்-முத்து காமிக்ஸ் - என 4 இதழ்களை கட்டியிழுத்துக் கொண்டிருந்த நாட்களில் கூட 'ஏக் தம்'மில் தீன் மலர்கள் போட்ட நினைவில்லை எனக்கு ! திகிலில் கோடை மலர் போட்டிருக்கிறோம் தான் ; மினி லயனிலும் கோடை மலர் ; ஹாலிடே ஸ்பெஷல் ; வின்டர் ஸ்பெஷல் என்றெல்லாம் போட்டுள்ளோம் - but ஒரு தீபாவளி ஸ்பெஷலை போட்டுத் தாக்கியதாய் ஞாபகமில்லை ! So இந்தத் தருணமானது நமது பயணத்தில் ஒரு மைல்கல் என்பதில் no doubts ! And இந்த நொடியில் நடந்துள்ள சம்பவம் தான் இந்த மைல்கல்லுக்கே செம கெத்து சேர்த்திடுகிறது !! இன்னான்ரீங்களா ?

வேற ஒண்ணும் இல்லீங்கோ......!! "ஏய் மேன்...இன்னா நீ மட்டும் தான் ரெகார்ட் போடுவியா....? நாங்கள்லாம் என்ன தக்காளித் தொக்கா ?" என்றபடிக்கே தீபாவளி மலர் combo-வுக்கு ஆர்டர் போட்டிருக்கிறீர்கள் பாருங்க - மெய்யாலுமே மெர்சல் ! தாறுமாறு !! அதகளம் !! ரவுசோ ரவுசு !! Phewww .....!!!

நேற்றைக்கு சந்தா டெஸ்பாட்ச் முடிச்ச கையோடு ஆன்லைனிலும், GPay மூலமாகவும் ஆர்டர் செய்திருந்தோருக்கான டெஸ்பாட்ச் பக்கமாய் இன்று நம்மாட்கள் புகுந்த போது தான் உங்களின் விஸ்வரூபங்களின் முழுப்பரிமாணம் புரிபட்டது !! மாலை 7 மணி சுமாருக்கு நான் CC டிவியில் பார்த்த போதும் பேக்கிங் முடிந்தபாடில்லை !! And கொஞ்ச நேரத்துக்கு முன்னே கூரியர் லிஸ்ட் அனுப்பியிருந்தார்கள் ; அந்த எண்ணிக்கையைப் பார்த்த போது மெய்யாலுமே அரண்டு போனேன் !! ஒற்றை நாளின் ஆர்டர்களுக்கு இதுவொரு அசாத்திய உச்சம் guys !! கொரோனா லாக்டௌன் நேரத்தில் நடத்திய முதல் ஆன்லைன் மேளாவிற்கு அப்புறமாய் இப்படியொரு நம்பரை இன்றைக்குத் தான் பார்க்கின்றோம் ! Absolutely awesome !!!!!

And இது போதாதென ஏஜெண்ட்களின் ஆர்ட்ரைப் பார்த்தால், அங்கும் பட்டாசு தான் !! எட்டு மாசமாய் பணம் அனுப்பியிராதவருமே பழைய பாக்கியை செட்டில் செய்து விட்டு இன்றைக்கு மூன்று இதழ்களுக்கும்  போட்டிருக்கும் ஆர்டர் அம்புட்டு வெயிட் !! அக்டோபர் புக்ஸ் வெளியாகி மூன்றே வாரங்களில் மூன்று ஸ்பெஷல் இதழ்களோடு களமிறங்கியிருக்கிறோமே - முகவர்கள் திணறிடுவார்களோ ? என்ற பயம் லேசாய் இருந்தது உள்ளுக்குள் ! But "போலே...போய் அடுத்த வேலையை கவனி, இதை நாங்க பாத்துக்குறோம் !!" என்று சொல்லாது சொல்லி விட்டார்கள் முகவர்ஸ் !! Phewwwwwww !! 

இதில் best part என்னவெனில் - மூன்று மலர்களுமே ஆர்டர்களில் வெயிட்டான இடம்பிடித்துள்ளன ! Of course 'தல' டெக்ஸ் எப்போதும் போல் leader of the pack ; அவருக்கான ஆர்டர்கள் மற்றவற்றைக் காட்டிலும் என்றைக்குமே கூடுதலாக இருந்திடும் தான் ! But இந்தவாட்டி வேட்டையனும் சரி, மிஸ்டர் நோவும் சரி, சளைக்காது tough தந்து வருகின்றனர் !! இரு இதழ்களுமே தயாரிப்பிலும் அழகாய் அமைந்துவிட்டதால் - எதை முதலில் வாசிப்பது என்ற சந்தோஷக் குழப்பம் தாண்டவமாடப் போவது உறுதி !! 

So - அடிச்சு தூள் கிளம்பியுள்ள நீங்கள், அலசல்களோடும் அதகளம் செய்து விட்டால், இந்த தீபாவளி ஒரு தீபாதெறியாக உறுதிபட அமைந்து விடும் !! இந்த அன்புக்கும், எல்லையறியா காமிக்ஸ் நேசத்துக்கும் ஒரு கோடி நன்றிகள் மக்கா - happy reading !!!!

தீபாதெறி 🔥🔥

நண்பர்களே,

வணக்கம். பெரும் வாணவேடிக்கைகளோ, ஆர்ப்பாட்டங்களோ இல்லாததொரு compact சந்தா அட்டவணையினை வழங்கியிருக்கும் சன்னமான திருப்தி என்னுள் விரவி நிற்கின்றது! முன்நாட்களைப் போல வானத்தை எட்டிப் பிடிக்கவெல்லாம் நாம் முயற்சித்திடப் போவதில்லை என்பது எனக்கு இந்தத் திட்டமிடலின் ஆரம்பத்திலேயே புரிந்திருந்தது ! இந்த நொடியின் தேவைஸ் - முழுக்க முழுக்க உங்களின் வாசிப்புகளைக் கோரும் ஆற்றல் கொண்ட படைப்புகளை முன்நிறுத்துவது தான் என்பதால் “கம்பி மேலே நடக்குது ஷாமியோவ்!” என்று வித்தை காட்டும் விஜயேந்திர அவதாரினை எடுக்க முனைந்திடவே இல்லை! தவிர, டின்டின் போலான ஜாம்பவானுமே இன்றைக்கு நமது இருக்கைக்குக் கீழே நெருப்பைப் பற்ற வைத்திடும் ஆற்றலைக் கொண்டிருக்கவில்லை எனும் போது “புதுசாய் அதைத் தேடினோம் - இதைத் தேடினோம்" என்றெல்லாம் பல்டிகள் அடித்திடவும் பெரியளவில் பிரயாசை எடுத்திடவில்லை! மாறாக அந்த வித்தை காட்டும் படலங்களை - சந்தாக்களில் அல்லாத தடங்களில் / தருணங்களில் களமிறக்குவதில் உறுதியாக உள்ளோம்! So சந்தாத் தடத்தில் சீராய்ப் பயணிக்கும் “வந்தே பாரத்” எக்ஸ்பிரஸ் மாடுகளோடு மோதலின்றித் தடதடக்க ஒருபக்கம் தயாராகிட -

- Replica இதழ்கள் / க்ளாஸிக் மறுபதிப்புகள் வாகான தருணங்களில் சின்ன ப்ரிண்ட்-ரன்களில் வெளிவந்திடும்!

- And கிராபிக் நாவல்கள்; புதுப் பாணிகளிலான படைப்புகள்; குரங்குக் குட்டிக்கரணங்கள், ஆன்லைன் மேளாவின் போதும், புத்தக விழாக்களின் போதும் களம் கண்டிடும்! ஒரேயடியாய் மரத்தைச் சுற்றி டூயட் பாடும் நார்மலான கமர்ஷியல் கதைக்களங்களாய் போட்டுத் தாக்கிக் கொண்டிருந்தால், எனக்கே போரடித்துப் போய்விடும் ஆபத்துள்ளது! So “கோக்கோ-மாக்கோ கட்டைவிரலோ காதலியோ” தடமானதும் 2025-ல் மின்னலாய் பளீரிடும்!

அறிவிக்கப்பட்டுள்ள 2025 சந்தாவில் நான் கவனித்த வரைக்கும் தென்பட்ட விசனங்கள் இவையே:

1. V காமிக்ஸ் சேர்த்து மொத்த இதழ்களின் எண்ணிக்கை 32 மட்டுமே!

2. SODA-வைக் காணலை!

3. தங்கக் கல்லறை; இன்னபிற மறுபதிப்புகள் பற்றிய தகவல்கள் லேது!

இவை சகலத்திற்கும் போன பதிவிலேயே பதில் சொல்லியிருந்தேன் தான்! Yet - சுருக்கமாய் ஒரு மறு ஒலிபரப்பு!

“வாசிப்புக்கு நேரம் பற்றலை; புக்ஸ் தேங்குது” என்ற குரல்கள் ஒரு சிறிய நம்பரில் இருந்தாலும், கௌஷிக்கைப் போல குறுக்கும், மறுக்கும் உலாற்றுவதை மறுப்பதற்கில்லை! அந்த இடருக்கு மருந்திடவே எண்ணிக்கையில் சிக்கனம்!

மாறாக வரும் நாட்களில் “வாசிப்புக்கு புக் பற்றலை!” என்ற குரல்களும் ஒலிக்க மட்டும் ஆரம்பிக்கட்டுமே - பழைய பன்னீர்செல்வமாய் விஸ்வரூபமெடுத்து பின்னிப் பெடலெடுத்துப்புடலாம்! நிறைய சமைத்து, நிறைய மீதம் போக வேண்டாமே என்ற அக்கறையில் தான் உலை வைக்கும் பானையில் அரிசியை அளந்து போட நினைத்துள்ளோம்! “பற்றலையே... இன்னுமிருந்தால் தேவலாமே?” என்ற குரல்கள் ஒலிக்க நேர்ந்திட்டால் - rest assured ஜமாய்த்து விடலாம்!

And மறுபதிப்புகள், இனி என்றைக்குமே ரெகுலர் தடங்களில் இடம் பிடித்திடாது - “தங்கக் கல்லறை” போலான blockbuster ஆக இருந்தாலுமே! அவை எப்போதுமே தனியாகவே பயணித்திடும்!

By the way இன்னொரு கொசுறுச் சேதியுமே! “யார் அந்த மினி ஸ்பைடர்?” இதழினை அந்நாட்களில் வெளியிட்ட போது, ஓவரான புய்ப்பக் பக்கங்களை கத்திரி போட்டிருந்தோம்! “இதோ நான் ஆத்தப் போகும் கலைச்சேவையில் கத்திரியின்றி முழுசம் இருக்கும் மகாசனங்களே!” என்று மினி ஸ்பைடரைக் கொண்டு சேவை செய்திட ஒருத்தர் வீறுகொண்டதை நாமறிவோம்! அந்தத் தருணத்தில் நாம் குறுக்கிட்டு மினி-ஸ்பைடர் நார்மலான விலையில் நமது இதழாகவே வெளிவந்திடும் என்று ப்ராமிஸ் செய்திருந்ததையும் மறந்திருக்க மாட்டீர்கள்! இதோ - இங்கிலாந்தில் ஸ்பைரின் தொகுப்புகள் பிச்சு உதறுவதைத் தொடர்ந்து தொகுப்பு # 4-ல் மினி-ஸ்பைடர் அட்டகாசமாய் remaster செய்யப்பட்ட சித்திரங்களோடு ரெடியாகி வருகிறது! So ‘ஜம்‘மென்று மினி ஸ்பைடரை முழுக் கதையோடும் 2025-ல் நம் மத்தியில் சந்தித்திடலாம்!

And சமீபமாய் முகநூலில் ஒரு பின்னூட்டத்தையும் கவனித்தேன் - இங்கே blog-ல் கம்பு சுத்தும் வேகத்தை மறுபதிப்புகளை கலமிறக்குவதில் நான் காட்டுவதில்லை என்று! நண்பர் புரிந்து கொள்ளத் தவறிய சமாச்சாரத்தை இங்கே சுட்டிக் காட்டும் அவசியம் எனக்குள்ளது! வடை சுடும் கல்லா பார்ட்டிகளுக்கு ஒரிஜினல்கள் உயர்தரத்தில் இருக்க வேண்டுமென்ற அவசியங்கள் லேது ; சிக்கியதை ஸ்கேன் செய்து ஈரோட்டு டிஜிட்டல் பிரஸ்ஸில் கொடுத்து பிரிண்ட் போட்டு வாங்கினாலே போதும்! ஆனால் நமக்கோ நிலவரம் அவ்விதமல்ல! இந்த க்ளாசிக் Fleetway கதைகளின் ஒரிஜினல்களை கொஞ்சம் கொஞ்சமாகவே இங்கிலாந்தில் சீர் செய்து டிஜிட்டல் கோப்புகள் ஆக்கி வருகின்றனர்! முத்து வாராமலரில் தொடராய் வந்த மாயாவியின் "ஒற்றைக்கண் மர்மம்" கதை கூட அவர்களது restoration பிராசசில் உள்ளது! So அவை முறைப்படி ரெடியாகும் வரைக்கும் காத்திருக்கத் தேவைப்படும் தான்! "பல் கூசுது" என்ற சொல்லும் மறு நொடியிலேயே ரூட் கேனால் செய்திடவோ, பல்லைப் பிடுங்கிடவோ முனைவதில்லையே நண்பரே?! அதற்கான முன்னேற்பாட்டு அவகாசத்துக்கு காத்திருப்பது இயல்பு தானே? தவிர நமது பிரதானப் பணியான புது இதழ்களின் வெளியீட்டுக்கு நடுவாக்கில் தானே இந்த reprint முயற்சிகளை உட்புகுத்த நாம் முனைந்திட இயலும்? மறு நாளே வடைச்சட்டியை பரணிலிருந்து எடுத்து, மாவை தப்பி, வடைகளை சுடல் சாத்தியம் தான் ஆகிடுமா?

Moving on இந்த நொடியில் ஒளிவட்டத்தை முழுமையாய் கபளீகரம் செய்திட சரமாரியான நமது 3 தீபாவளி மலர்கள் வெயிட்டிங்ங்ங்...! இந்தப் பதிவின் ஹைலைட்டே அவை தான்!! We start with Tex!!

தீபாவளி with டெக்ஸ் ‘24!!

ஆண்டுமலர் வேளைகளென்றால் லக்கி லூக்கின் ஆட்டகளமென்று நிர்ணயமாகியிருப்பதைப் போலவே இப்போதெல்லாம் தீபாவளித் தருணங்கள் ‘தல‘ டெக்ஸின் சாம்ராஜ்ஜியமாகியுள்ளன! வீட்டில் நீங்கள் போடும் பட்டாசுகளுக்குச் சிஞ்சித்தும் சளைக்காத அதிர்வேட்டுக்களை நம்மவர்கள் போட்டுத் தாக்கி வருவது ஒரு காரணமென்றால், டெக்ஸின் positivity பண்டிகைக்குப் பொருத்தமான addition ஆக அமைந்திடுவது முக்கிய காரணமென்பேன்! இதோ இந்த தீபாவளிக்குக் காத்திருப்பதோ ஒரு செம நெடும saga!

“பனிமண்டலப் போராளிகள்!” இதுவுமொரு நார்மலான 224 பக்க டபுள் ஆல்ப சாகஸமே என்ற நினைப்பில் 2022ன் இறுதியிலேயே இதனை வாங்கியிருந்தோம்! And 2023 அட்டவணையில் விளம்பரமும் செய்திருந்தோம்! But கதைகளெல்லாம் வந்து சேர்ந்த பிற்பாடு அலசுகையில் தான் இதன் முழுமையான நீளம் 440 பக்கங்கள் என்பது புரிந்தது! நம்மிடம் முதல் பாதி மாத்திரமே இருந்ததால் பாக்கி 2 அத்தியாயங்களையம் வரவழைத்த கையோடு 2024-ன் தீபாவளி மலராக்கத் தீர்மானித்தோம்! And here we are!!

எத்தனை தான் திட்டமிட மெனக்கெட்டாலுமே ஆண்டின் ஒரு பகுதியில் வேலைப்பளு சற்றே லாத்தலாக இருப்பதும், இன்னொரு பகுதியில் நாக்குத் தொங்கச் செய்யும் விதத்திலும் இருப்பதைத் தவிர்க்கவே முடிவதில்லை! இதுவரையிலுமான நமது கம்பேக் ஆண்டுகளின் சகலத்திலும் இதுவே கதையாக இருந்துள்ளது! நடப்பாண்டிலும் அதே pattern தொடர்ந்துள்ளது - ஆண்டின் கடைசி க்வாட்டரில்! 

செப்டம்பரில் 4 

அக்டோபரில் 4 

அப்புறமாய் அட்டவணை 

நவம்பரில் 3 மெகா தீபாவளி மலர்கள் -

என்று அமைந்திட்ட பணிகள் கடந்த சில மாதங்களாகவே என்னை பாம்பு டான்ஸ் ஆடச் செய்து கொண்டிருந்தன! And எல்லாற்றையும் விட மெகா மிரட்டலாய் மண்டைக்குள் வீற்றிருந்ததோ - நம்ம தீபாவளி with டெக்ஸ் தான்; Simply becos 440 பக்கங்கள் எனும் போது, அசாத்தியமாய் பெண்டைக் கழற்றிடும் என்பதில் சந்தேகமே இருக்கவில்லை!

- 440 பக்கங்கள்!

- சராசரியாக பக்கமொன்றுக்கு 5 படங்கள்!

- படமொன்றுக்கு சராசரியாய் இரண்டோ, மூன்றோ வசனங்கள்!

- ஆக இந்த ஒற்றை இதழுக்கு மட்டுமே சுமார் 5000 வசன boxes & பலூன்ஸ்!!

இதனை மொழிபெயர்த்து வரும் நமது டீமின் youngest அம்மணிக்கோ இது கிட்டத்தட்ட 4 1/2 மாதங்களைப் பிடித்த பணி! And நானோ அதனை 'ஏக் தம்'மில் எடிட் செய்திடவும், திருத்தி எழுதவும், மெருகூட்டவும் வேணும்! அதை நினைத்தே கடந்த 1.5 மாதங்களாய் உச்சா போகாத வான்கோழியைப் போலவே ‘திரு திரு‘வென விழித்தபடிக்கே சுற்றிக் கொண்டிருந்தேன்!

“ஆங்... ஒரே நேரத்திலே மொத்தமா வேலைக்கு எடுத்தாத் தானே நோவு? ஒரு நாளைக்கு 20 பக்கம் வீதம் பிரிச்சுப் பிரிச்சுப் பார்க்க ஆரம்பிச்சா 22 நாட்களிலே இம்மி கூட சிரமமின்றி முடிச்சுப்புடலாமே?” என்ற மகாசிந்தனை எங்கிருந்தோ உதிக்க -மைதீனிடம் சொல்லி இருபது-இருபது பக்கக் கத்தைகளாக கதையின் முழுசையும் ஒன்றரை மாதங்களுக்கு முன்னமே வாங்கி விட்டேன்! அவனும் தினத்துக்கு “இன்னிக்கு கோட்டா முடிஞ்சதா அண்ணாச்சி?” என்று கேட்க ஆரம்பிக்க, நானோ - “இன்னைக்கு அஷ்டமி, நாளைக்கு நவமி” இதோ இதோ அடுத்த வாரத்திலே ஆரம்பிச்சுப்புடலாம்” என்று சதாய்ச்சபடியே நாட்களைக் கடத்தியிருந்தேன் - இந்தக் கண்ணாமூச்சி ஆட்டம் ஆடியதில் ஆரம்பித்து 20 பக்கங்களைத் தாண்டியபாட்டைக் காணோம் என்ற போது அவனும் கேட்பதையே விட்டுப்புட்டான்! அக்டோபர் இதழ்களும் ரெடியாகி; அக்டோபரின் முதல் வாரமும் பிறந்து; ஓடி முடிந்த போது தான் மெய்யாலுமே உறைத்தது - தீபாவளிக்குக் குறைந்தபட்சமாய் ஒரு வாரத்துக்கு முன்னமே புக்ஸை டெஸ்பாட்ச் செய்தாலொழிய கதை கந்தலாகிப் போகும் என்பது! ஆக மிகச் சரியாக இரண்டே வாரங்கள் அவகாசம் தானிருப்பது புரிந்தது - எடிட்டிங்; பிராசஸிங் & பிரிண்டிங் பணிகளை முடிக்க! ஆராமாய் பிட்டத்தை அத்தனை நாட்களாய் தேய்த்துக் கொண்டிருந்த சேருக்கு யாரோ ஒரு அக்னிச்சட்டியைப் பற்ற வைத்தது போலிருந்தது! To cut a very long story short - இந்த 440 பக்க டெக்ஸ் சாகஸத்தினை நான்கோ, ஐந்தோ நாட்களில் பூர்த்தி செய்தேன் - வெறி பிடித்தவனைப் போல! Phewww... சொல்லி மாளாது அந்தப் பனிமண்டல பணிநாட்களின் உக்கிரத்தை!

ஆர்டிக் துருவப் பனிமண்டலம்! 

இந்த பூமியும் சரி, அங்கே வசித்து வந்த இன்யூட் (எஸ்கிமோ) மக்களைப் பற்றியும் சரி, அவர்களது நம்பிக்கைகள் பற்றியும் - மர்ம மனிதன் மார்ட்டினின் “பனிஅசுரப் படலம்” வாயிலாக நாமறிவோம்! அது மட்டுமன்றி ”வடமேற்குப் பாதை” எனப்படும் கடல் பாதையினைத் தேடி ஐரோப்பியர்கள் அந்தப் பனி மண்டலத்தில் பட்ட அல்லல்களையுமே அந்தக் கதை நமக்குச் சொல்லியிருப்பது அட்லாண்டிக் சமுத்திரத்திற்கும், பசிபிக் பெருங்கடலுக்கும் மத்தியில் ஆர்டிக் கடல் வழியாக சிதறலாகக் கிடக்கும் தீவுகள் மற்றும் நிலப்பரப்புகள் வழியாக வளைந்து செல்லும் ஒரு கடல் மார்க்கத்தைக் கண்டுபிடித்து விட்டால் ஆசியாவோடு வணிகம் பண்ணிட சுலபமாய் சாத்தியப்படும் என்ற நம்பிக்கையில் வெறியோடு தேடல் நடத்தியது வரலாறு.

அந்த வரலாற்று நிகழ்வை எடுத்துக் கொண்டு நமது ரேஞ்சர்களின் முழு டீமையுமே ஆர்டிக்குக்குக் கொண்டு சென்றுள்ளார் கதாசிரியர்! வழக்கமாய் ஒரு டெரரான வில்லன் இடம்பிடித்த மறுகணமே அந்த ஆல்பத்தில் அனல் பற்றிக் கொள்ள ஆரம்பிப்பது வழக்கம்! இங்கேயோ அந்த வனாந்திர பூமியே அசாத்தியமான வில்லனாய் உருவெடுத்து நிற்க, கதை நெடுக ஒரு திகில் விரவி நிற்பதை உணரலாம்! அண்ட் இது ரொம்பவே சமீபப் படைப்பு என்பதால் கலரில் இன்னமும் தயாராகவில்லை; இல்லையேல் வண்ணத்தில் தாண்டவமாடியிருக்கும் இந்த ஆல்பம்! மிரட்டலான பனி பூமியில் குதிரைகள் லேது; கோவேறு கழுதைகளும் நஹி.. So பயணங்கள் சகலமுமே நடராஜா டிரான்ஸ்போர்ட்டில் தான்!

- டெக்ஸ், கார்சன், டைகர், கிட் வில்லர் மற்றும் கனேடிய போலீஸ் அதிகாரியான ஜிம் ப்ராண்டனும் ஒரு அணியாய் தேடலில் இறங்கிட...

- அவர்கள் தேடிச் செல்லும் அணியோ இரண்டு பிரிவுகளாகப் பிரிந்து தனித்தனியாகப் பயணிக்க,..

- அந்த அணிகளில் உள்ள பெண் வேட்டையர்களில் ஒருத்தி கடத்தப்பட்டு, வேறொரு பாதையில் பிரிந்து போக....

- இவை எதையுமே அறியாதவனாய் தன் காதலியை இந்த வனாந்திரத்தில் தேடிடும் கௌபாய் இன்னொரு தடத்தில் நடை போட...

- இவர்களில் யாரைப் புசிப்பது? என்ற பசியோடு அத்தனை பேரையும் பின்தொடர்ந்திடும் ஒரு வெறிபிடித்த கூட்டமும் பயணம் பண்ண...

- இவர்கள் அம்புட்டு பேரையும் பின்தொடரப் போவது நாம்! 

மெகா டெக்ஸ் சாகஸங்கள் நமக்குப் புதுசே அல்ல தான்; ஐநூற்றுச் சொச்சப் பக்கங்கள் கொண்ட டைனமைட் ஸ்பெஷலெல்லாம் நமது இடைவாரில் உள்ளதே! ஆனால் இதுவோ முற்றிலும் மாறுபட்டதொரு த்ரில்லர் folks! கூப்பிடு தொலைவில் சிறு நகரங்களது ஷெரீப்கள் கிடையாது; அவசரத்துக்குத் தந்தியடித்து வரவழைக்க இராணுவக் கோட்டைகள் கிடையாது; சொகுசாய்ப் படுத்துறங்கி ஓய்வெடுக்க விடுதிகள் கிடையாது! சுழற்றியடிக்கும் பனிக்காற்றின் மத்தியில் உறைந்து கிடக்கும் ஏரியின் மேல்பரப்பில் தங்களது படகுகளைக் குப்புறக் கவிழ்த்துப் போட்டு விட்டு அத்தனை பேரும் உறங்க முற்படும் போது, வாசிக்கும் நமக்கே நடுக்காது போகாது! அது மட்டுமன்றி இன்யூட் பழங்குடியினரின் நம்பிக்கைகள்; நரமாமிசங்கள் உண்ணும் கொடூரங்கள்; காணாமல் போன ஆய்வுக்கப்பல்களிலிருந்து எழும் அமானுஷ்ய மணியோசைகள் என கதாசிரியர் மௌரோ போசெலி கதை நெடுக திகில் தாண்டவமாடியுள்ளார்! அது மட்டுமன்றி இந்த மண்ணில் ஹீரோயிஸம் காட்டும் நாயகராய் டெக்ஸை சித்தரிக்காமல் - சூழலுக்கேற்ப அனைவரது உதவிகளையும் ஏற்றுப் பெற்று காரியம் சாதிக்க விழையும் யதார்த்த புருஷனாகக் காட்டியுள்ளார். In fact பழங்குடி மைந்தனை டைகர் ஜாக்ருககு இங்கே நிரம்பவே முக்கியப் பொறுப்புகளும் தந்திருக்கிறார்! So ஒரு முன்னாள் பல்லடத்துக்காரர் எம்புட்டு முக்கினாலும் இந்தவாட்டி பாயாசம் போடும் வாய்ப்புகள் செம சொற்பமே என்பேன்!

ஒற்றை வரியில் சொல்வதானால் - இதை மாத்திரமே சொல்வேன் : Folks... என்ன செய்வீர்களோ, ஏது செய்வீர்களோ தெரியாது; ஆனால் சூட்டோடு சூடாய் இந்த தீபாவளி டமாக்காவை வாசிக்க நேரம் ஏற்படுத்திக் கொள்ளுங்கள்!! முடிந்தால் இரண்டே இரவுகளில் இரண்டு ஆல்பங்களையும் (சு)வாசித்திட முயற்சி பண்ணுங்கள் - ப்ளீஸ்! ஆறப் போட்டுப் படிப்பதும் சரி, தவணை தவளையாய் படிப்பதும் சரி, இந்தக் கதையின் வீரியத்தை ஒற்றை மிடறு மட்டுப்படுத்தி விடக்கூடும்! So “குண்டு புக் லேதுவா பாவா?” என்று “கம்பு சுத்துவோர் கழகம்” களமிறங்கி ஆடித்து ஆட அட்டகாசமானதொரு வாய்ப்பு இது!

And இதோ - 4 ஒரிஜினல் அட்டைப்படங்களும் - தெறிக்கும் வர்ண மெருகூட்டலுடன்! (அந்த economy slipcase ரொம்பவெல்லாம் திடமாய் இராது guys - பக்காவான பொட்டிகள்லாம் இன்று நெருக்கி நூறு ரூபாய் கிரயம் புடிக்குறது 🤕)

Moving on, பணியும், பரபரப்பும், பட்டாசான ஆக்ஷனும் தொடர்கின்றன முத்து காமிக்ஸ் தீபாவளி ஸ்பெஷலிலும்! ஜம்போ காமிக்ஸில் 4 ஆண்டுகளுக்கு முன்பாக வெளிவந்த ஜாரோஃப் இன்னொரு ஒன்-ஷாட் அதிரடியோடு வெளிவந்திருக்கிறார் என்பதை அறிந்த நொடியே கதைக்கான உரிமைகளை வாங்கியிருந்தோம்! And பெரிய திட்டமிடல்களெல்லாம் இல்லாமலே - அகஸ்மாத்தாய் தீபாவளி ஸ்பெஷலாகவும் அறிவித்திருந்தோம்! ஆனால் கதையில் இப்படியொரு தெறியான fire இருந்திடக்கூடுமென்பதை சர்வநிச்சயமாய் நான் அறிந்திருக்கவில்லை! உலக யுத்தத்தில் சின்னாபின்னமாகிக் கிடக்கும் பனிக்காலத்து மாஸ்கோ தான் இங்கே கதைக்களம்! And பிறப்பால் ரஷ்யனான ஜாரோஃப் அந்த மண்ணுக்குத் திரும்பச் செல்லும் ஒரு நெருக்கடி எழுகிறது! மனுஷன் பிழைக்கப் போன அமேசான் காட்டிலேயே ராவான ரவுடியாய் ராட்சஸ ஆட்டம் போட்டான்; தனது தாய்மண்ணுக்குப் போகும் போது கேட்கவும் வேண்டுமா? தீபாவளிக்கு நீங்கள் வெடிக்கப் போவதெல்லாம் சும்மா ஜுஜுப்பி என்றாகும் விதமாய் இங்கே கதை நெடுக ஜாரோஃப் ரகளை பண்ணுகிறான்! And ஓவியரும் சரி, கலரிங் ஆர்டிஸ்டும் சரி, லேட்டஸ்ட் பாணிகளில் கலக்கியுள்ளார்கள்! பனி படர்ந்த இரவுகளில் நடக்கும் மோதல்களின் போது வெளிச்சச் சிதறல்கள் ஆங்காங்கே விரவிக் கிடக்கும் sequences ஒரு புது உச்சம்! இதோ – ஒரிஜினல் அட்டைப்படம் & உட்பக்க previews!

Last but not the least – நம்ம V காமிக்ஸின் தீபாவளி மலர்! அது என்ன மாயமோ – புரியவில்லை – ஆனால் V காமிக்ஸுக்கென அமைந்திடும் எல்லாமே துரித வாசிப்புகளுக்கு 100% உத்தரவாதம் தரும் சாகஸங்களாகவே இருந்திடுகின்றன! இம்முறையும் துளி கூடப் பிசகின்றி மிஸ்டர் நோவின் b&w சாகஸம் நம்மைக் கட்டிப் போட்டு விடுகின்றது! 

அதே அமேசான் கானகம்... இம்முறையோ இரு தனித்தனி அணிகள்! முதலாவது கேமராவால் சித்திர வேட்டையாட நினைத்திடுகிறது & இரண்டாவதோ தோட்டாக்களால் விலங்குகளை வேட்டையாட விழைகிறது! இதன் மத்தியிலோ கானகத்தின் கறுப்பு நிழலாய் ஒரு ராட்சஸ ஜாக்குவார்! இந்த சகலத்தின் மையப்புள்ளியாய் மிஸ்டர் நோ! கொஞ்சம் நல்ல காதல்; கொஞ்சம் கள்ளக் காதல்; எக்கச்சக்க ஆக்ஷன்; ஏராளமாய் பரபரப்பு; ஏகமாய் இயற்கையழகு என்று தடதடக்கும் இந்த 192 பக்க ஆல்பத்துக்குப் பேனா பிடித்திருந்த புது வரவு கொஞ்சம் தடுமாறியிருக்க, கடைசி நிமிஷத்தில் ஆந்தையன் ஆட்டத்தில் இறங்க நேரிட்டது! அமேசானில் ஒரு ஆயிரம்வாலா சரடிவெடி!

ரைட்டு... ஒரு பத்தாயிரம்வாலா சரவெடியாய் டெக்ஸும்; அணுகுண்டு டப்பியாய் ஜாரோஃப்பும்; ஆயிரம்வாலா சரமாக மிஸ்டர் நோவும் வரும் வியாழன்று இங்கிருந்து புறப்படத் தயாராகி விடுவார்கள்! மூன்றுமே பிரிண்டிங் முடிந்து, பைண்டிங்கில் உள்ளதால் despatch அக்டோபர் 24-க்கு இருந்திடும்! சொந்த ஊர்களுக்கோ, விடுமுறைப் பயணங்களிலோ நீங்கள் புறப்படுவதாகயிருந்தாலும், புக்ஸ் அதற்கு முன்பாகவே உங்களை எட்டிப்பிடித்து விடுமென்று நம்புகிறோம்! கூரியர்கார்கள் – கவுத்துப்புடாதீங்க – ப்ளீஸ்!

And இந்த 3 இதழ்களுமே ரெகுலர் சந்தாக்களின் அங்கங்களே! V காமிக்ஸிற்கு மட்டும் நீங்கள் ஜுலை to டிசம்பர் ’24 இரண்டாம் பாதிக்கான சந்தாவும் செலுத்தியிருக்கும் பட்சத்தில், மூன்று இதழ்களுமே உங்களைத் தேடி வந்திடும்! 

இதோ – சந்தாக்களில் அல்லாதோருக்கென நமது combo offer!

Of course, 2025-க்கான கலர் அட்டவணையும் இம்மாத புக்ஸோடு பயணமாகிடும்! அது டெக்ஸ் தீபாவளி மலருடனான இணைப்பு என்பதால், ஏஜெண்டுகளிடம் வாங்குவோராக இருக்கும் பட்சத்தில் கேட்டு வாங்கிடுங்களேன் பளீஸ்?! 

ரைட்டு... நம்ம வேலை முடிஞ்சூ என்பதால் டிசம்பரின் Magic Moments ஸ்பெஷல் பக்கமாய் சீட்டியடித்தபடிக்கே லூட்டியடிக்கக் கிளம்புகிறேன்! Bye all... have a lovely weekend! See you around!

And of course - 2025 சந்தாவுக்கான நினைவூட்டலுமே folks !!