ஒரு நீல மாதம் !

நண்பர்களே,

வணக்கம். வழக்கம் போல் இதழ்களின் இறுதிக் கட்டப் பணிகள் எடுக்கும் நேரமும், முயற்சியும் அதிகம் என்பதால் இங்கு பதிவிட நேரம் ஒதுக்க இயலாது போயிற்று ! அது மட்டுமல்லாது இம்மாத வெளியீடுகளில் ஒன்றான "கப்பலுக்குள் களேபரம்" இதழுக்கான ஒரிஜினல் CD -க்குப் பதிலாய் வேறொரு கதையின் CD நமக்கு வந்து சேர்ந்திட - அந்தக் குளறுபடியைச் சரி செய்து முடிக்கவும் நேரம் ஓடியே விட்டது ! Anyways ஒரு வழியாய் பணிகள் நிறைவேறி - அச்சுப் பணிகள் துவங்கியுள்ளன ; வரும் வியாழனன்று 2 இதழ்களும் உங்களைத் தேடித் புறப்படும் ! இதோ இம்மாத (தாமத) நாயகர்களின் அட்டைப்படம் + கதையின் முன்னோட்டம் ! 

சமீப மாதங்களின் அட்டைகளைப் போலவே இம்முறையும் ஒரிஜினல் டிசைனில் மேலோட்டமாய் நமது கைவரிசைகளைக் காட்டுவதோடு நிறுத்திக் கொண்டுள்ளோம் ; பின்னட்டை தான் நமது டிசைனரின் கைவண்ணம் ! கதையைப் பொறுத்த வரை - வழக்கமான நகைச்சுவை சங்கதிகளோடு கொஞ்சமாய் அந்த உள்நாட்டு யுத்தத்தின் வரலாற்றுப் பின்னணியையும் இணைத்துள்ளதை நீங்கள் பார்த்திட இயலும் ! யுத்தத்தின் அர்த்தமின்மையை ஒரு கார்ட்டூன் பாணியில் சொல்ல முனைவதே ப்ளூகோட் பட்டாளத்தின் சாராம்சம் என்று தைரியமாய்ச் சொல்லலாம் ! இந்த இதழில் நான் சொன்ன அந்த "சூப்பர்" அறிவிப்பும் இடம்பிடிக்கிறது ; இரத்த வெறியன் ஹாகர் + சிரிப்பின் நிறம் சிவப்பு கார்ட்டூன் filler pages சகிதமாய் ! 

சின்னச் சின்னதாய் சில updates :

• இம்மாதம் ஒரிஜினலாய் டைகரின் "அட்லாண்டாவில் ஆக்ரோஷம்" + டெக்ஸ் வில்லரின் "நில்..கவனி...சுடு.." இதழ்களே வருவதாய் இருந்தன ! ஆனால் இங்கு சமீபமாய் அரங்கேறி வரும் 'தல-தளபதி' ரேஞ்சிலான டிஷ்யூம் ..டிஷ்யூம்களைத் தொடர்ந்து - இரவுக் கழுகாரை மே மாதத்துக்கு மாற்றித் திட்டமிட்டுள்ளேன் ! சமீபமாய் ஒரு வாசகர் இது பற்றி எனக்கொரு நீண்ட விளக்கக் கடிதம் எழுதி இருந்தார் - "ஏன் இவர் அவரை விடப் பெரியவர் ; எவ்விதத்தில் அவர் இவரை விடப் பெரிய பிஸ்தா" என்பதாக ! விளையாட்டாய் துவங்கியதொரு கருத்து யுத்தத்தை நண்பர் ரொம்பவே சீரியசாக எடுத்துக் கொண்டு நிறைய நேரம் செலவழித்து - எக்கச்சக்க ஆராய்ச்சி எல்லாம் செய்து துல்லியமாய் புள்ளி விபரங்களை புட்டுப் புட்டு வைத்திருந்தார் ! அது மட்டுமல்லாது - இந்தக் கேள்வியினில் உங்கள் நிலைப்பாடு என்னவென்று நீங்கள் தெளிவுபடுத்தியே ஆக வேண்டும் என்பதாய் என்னையும் வம்பில் மாட்டிவிட ரூட் போட்டு வைத்திருந்தார் ! ஏற்கனவே வாய்க்குள் காலை விட்டுக் கொள்வதில் நான் நிபுணன் ; இந்த அழகில் புதுசாய் சாலமன் பாப்பையா வேலை பார்க்கப் போய் ட்ரவுசர் கழன்று போக இடம் தர வேண்டாமே என்று தோன்றியதால் ஐ ஆம் எஸ்கேப் !
• 
  
• தற்போதைய நம் கௌபாய் பட்டியலில் - டெக்ஸ் ; டைகர் & கமான்சே நீங்கலாய் இன்னுமொரு குதிரை நாயகரும் அணி சேர்கிறார் என்பதை சென்ற பதிவிலேயே கோடிட்டுக் காட்டி இருந்தேன் ! நேற்றைய தினம் தான் அவரது கதைகளுக்கான உரிமைகள் முறைப்படி நமக்கு உறுதியாகியுள்ளன ; வெகு சீக்கிரமே அவரது அறிமுகம் ஒரு பிரத்யேகப் பதிவின் மூலம் அரங்கேறிடும். மாமூலான 'டுமீல்..டுமீல்' ஆசாமியல்ல இவர் - முழு வண்ணத்தில் வரும் மிக வித்தியாசமான நாயகர் என்பது மட்டும் இப்போதைக்கு சொல்லி வைக்கிறேன் !  அது மட்டுமல்லாது - நம் நண்பர் XIII -க்கு நெருங்கியவர் இவர் !! இவ்வளவு கோடுகள் போதாதா - சூரர்களான நீங்கள் ஒரு நெடுஞ்சாலையே போட்டிட ? 
• 
  
• நீண்ட நெடுங்காலமாய் நமது காமிக்ஸ் மகளிர் அணியின் presence - ஆவ்ரெல் டால்டன் கணக்குப் பாடத்தில் வாங்கும் மதிப்பெண்ணை நகல் எடுத்தது போல் நிற்பது நாம் அறிந்ததே ! கூடிய விரைவில் அந்தக் குறையினையும் நிவர்த்தி செய்திடுவோமா folks ? தாட்டியமான நம் ஹீரோக்களுக்கு மத்தியில் வலம் வரக் காத்திருக்கும் மங்கை யாராக இருக்குமென்று யூகிக்கலாமே ?
• 
  
• புது அறிமுகங்களைப் பேசி முடித்திருப்பது ஒரு பக்கமிருக்க - 'கல்லைத் தூக்கிப் போடுவோமே - வந்தால் மாங்காய் ; போனால் கல் ' என்ற கதையாய் ஒரு முன்னணி ஐரோப்பிய நிறுவனத்திடம் - லார்கோ வின்ச் பாணியிலானதொரு கதைத் தொடருக்கு உரிமைகள் வாங்கிட முயற்சித்துப் பார்த்தோம் ! பெரியதாய் ஒரு நூறு வாட்ஸ் பல்ப் வாங்கியது தான் பலன் ! 'ஊஹூம் ...இப்போதைக்கு உங்களது தரம் எங்களுக்கு ஏற்புடையதாய் இல்லை ; இன்னும் பெரிய சைசில் - இன்னும் நேர்த்தியாய் தயாரிப்புத் தரங்களை உயர்த்தி விட்டு வாருங்கள் " என்று மூக்கில் குத்தி அனுப்பி விட்டனர் ! "ஆஹா...2 ஆண்டுகளுக்கு முன்பு வரை நாமிருந்த நியூஸ் பிரிண்ட் காகிதம் ; சின்ன சைஸ் ; பாக்கெட் சைஸ்களை மனுஷன் பார்த்திருந்தால் கட்டி வைத்து உதைத்திருப்பாரோ ?" என்று நினைக்கத் தோன்றியது ! 
• 
  
• பல்ப் வாங்கிய அதே தினத்தில் சந்தோஷம் தரும் மின்னஞ்சல் ஒன்றும் கிட்டியது ! நமது TEX தீபாவளி மலரின் பிரதிகளில் ஒரு டஜனை ஏற்கனவே போனெல்லி நிறுவனத்திற்கு அனுப்பியிருந்தோம் ! அதனை இதர மொழிகளில் டெக்சை வெளியிடும் பதிப்பகங்களுக்கு அனுப்பி விட்டதாகவும், மேற்கொண்டு 10 பிரதிகள் முக்கிய நண்பர்களுக்கு விநியோகம் செய்திடும் பொருட்டு வேண்டுமென்றும் கோரிக்கை அனுப்பி இருந்தனர் ! 'வாழ்க இத்தாலி' என்று நினைத்துக் கொண்டேன் ! 
• 
  
• E-Bay-ல் சில சிக்கல்கள் காரணமாய் நாம் அங்கு விற்பனை செய்வதை தற்காலிகமாய் நிறுத்தி வைத்துள்ளோம். விரைவில் நமது வலைத்தளத்தில் இருந்தே நீங்கள் online purchase செய்திடும் வசதிகளை செய்திடவிருக்கிறோம் ; அது வரையினில் சந்தா செலுத்தி இருக்கா நண்பர்கள் நேரடியாக நமக்கு bank transfer மூலமாய் பணம் அனுப்பிப் பிரதிகளைப் பெற்றுக் கொள்ளலாம் !

• துப்பறிவாளர்கள் பட்டியலில் - நமது சோடாபுட்டி ஜெரோமின் சாகசங்கள் வண்ணத்தில் பிரெஞ்சு மொழியில் அழகாய் விற்பனையாகி வருவதை சமீபமாய் படைப்பாளிகளின் newsletter மூலம் அறிந்திட முடிந்தது ! வண்ணத்தில் மீண்டுமொரு வாய்ப்புக் கொடுத்துப் பார்ப்போமா சைக்கிளில் வலம் வரும் இந்த அலட்டலில்லா ஆசாமிக்கு ? 

• இது நண்பர் (பெங்களுரு) அஜய் பழனிசாமியின் கைவண்ணம் !! (கார்ட்டூனிலாவது   கேசத்தின் அடர்த்தியை அதிகமாக்கிக் காட்டி இருக்கலாம்...இல்லாங்காட்டி - டெக்சின் தொப்பியை என் தலையிலும் கவிழ்த்திருக்கலாம் !! ஹும்ம் !!) 

See you around folks ! Bye for now ! 

மேற்கே ஒரு புலியும் ; ஒரு கழுகும்...!

நண்பர்களே,

வணக்கம். பணிகளின் இறுதிக் கட்டங்கள் வழக்கம் போல் நேரத்தை விழுங்குவதால் இங்கு பதிவிட அவகாசம் கண்டு பிடிப்பது சிரமமாகிப் போனது ! அதன் மத்தியினில் - "மேற்கின் தளபதி - டெக்ஸா ? கேப்டன் டைகரா ?" என்ற பஞ்சாயத்து சாலமன் பாப்பையாவைக் கோரிடும் ரேஞ்சிற்கு இங்கு அரங்கேறுவதை அவ்வப்போது பார்த்திடத் தான் செய்தேன் ! இதோ - சம்பந்தப்பட்ட பார்ட்டிகளில் ஒருவர் களத்தில் இறங்கத் தயாராகி வருகிறார்  - முழு வண்ணத்தில் ! "அட்லாண்டாவில் ஆக்ரோஷம்" + "உதிரத்தின் விலை " என 2 பாகங்கள் இணைந்த இம்மாத வெளியீட்டின் அட்டைப்படம் இதோ : 

படைப்பாளிகளின் ஒரிஜினல் அட்டைப்படத்தினில் டைகர் & க்ரேசனின் முகங்களில் தேஜஸ் குறைவாய் தெரிந்ததால் - நமது ஓவியரைக் கொண்டு தனியாக ஒரு சித்திரத்தைத் தீட்டினோம்....ஆனால் அதனிலோ டைகர் & சகா ஓ.கே.வாய்த் தோன்றிட, background ரொம்ப சுமாராய் வந்திருந்தது ! So ஒரிஜினலின் பின்புலம் + நம் ஓவியரின் டைகர் என்ற கலவையாய் இம்மாத அட்டைப்படத்தினை அமைத்திட்டோம் ! வழக்கம் போல் அவர்களது ஒப்புதலைப் பெறும் பொருட்டு படைப்பாளிகளுக்கு இந்த டிசைனை அனுப்பிட - 30 நிமிடங்களிலேயே "Approved !" என்று பதில் வந்தது ! அவர்களுக்குப் பிடித்த டிசைன் உங்களுக்கும் பிடித்திருப்பின் இரட்டை சந்தோஷம் நமக்கு ! 

கதையைப் பொறுத்த வரை - இப்போது அரங்கேறி வருவது டைகரின் இளம் பிராயத்து சாகசங்கள் என்பதை நாம் அறிவோம் தானே... ?! ஒரு சங்கிலிக் கோர்வையாய் இந்தக் கதைவரிசை  பயணிப்பதால் - முந்தைய இதழ்களின் மாந்தர்களை ஆங்காங்கே நினைவில் வைத்திருத்தல் அவசியமாகிடும் !  ஒரு தொடர்கதை என்று சொல்லும் விதமாய் கதைகள் அமைக்கப்படவில்லை என்பது நிம்மதி தரும் விஷயம் ! இதோ இந்த சாகசத்திலிருந்து ஒரு சின்ன ட்ரைலர் ! வித்தியாசமான 'பளிச' ரக வண்ணங்களை வடிவமைத்திருப்பது ஜானெட் கேல் எனும் பெண்மணி ; so இந்த வர்ணங்களின் தோரணம் பிடித்திருப்பின் உங்கள் வாழ்த்துக்கள் அவரையே சார்ந்திட வேண்டும் !

கௌபாய் கதைகளின் தாக்கம் நம்மிடையே மிகுந்திருக்கும் இவ்வேளையில் - கடந்த பதிவின் பாணியிலேயே - இது வரை நாம் சந்தித்துள்ள "குதிரை மேய்ப்பர்களைப்" பற்றியதொரு பட்டியலைத் தயாரித்தால் என்னவென்று தோன்றியது ! So, here goes :

முத்து காமிக்ஸில் தொப்பி அணியும் உரிமைகளை நெடுங்காலமாய் குத்தகைக்கு வைத்திருந்தவர்கள் பட்லர் டெஸ்மாண்டும், மாயாஜால மன்னன் மாண்ட்ரேக்கும்  தான் என்பது எனது யூகம் ! முந்தைய இதழ்களை தலைக்குள்ளே slow motion -ல் ஓடச் செய்த போது நினைவுக்கு வந்த முதல் கௌபாய் ஆசாமி - சிஸ்கோ கிட் ! எனது நினைவு சரியாக இருக்கும் பட்சத்தில் "ரயில் கொள்ளை" என்ற சிஸ்கோ கதையே முத்துவின் முதல் அடி - கௌபாய் லோகத்தினுள் ! சிஸ்கோ & தொப்பை பாஞ்சோ அந்நாட்களிலேயே எனது personal favorites ! அவர்களது (ஆங்கிலக்) கதைகள் அந்நாட்களில் முத்து அலுவலகத்திற்கு தபாலில் வந்து சேரும் போது - முதலில் படிக்கும் வாய்ப்பு எப்போதுமே எனக்கே இருந்து வந்ததும் நினைவில் உள்ளது ! பள்ளியிலிருந்து வீடு திரும்பும் வழியில் இது போன்ற காமிக்ஸ் மேய்ச்சலில் ஈடுபடுவது எனக்கு அந்நாட்களில் சூப்பரானதொரு பொழுதுபோக்கு ! சிஸ்கோவைத் தாண்டி முத்து காமிக்ஸில் தலைகாட்டிய அடுத்த கௌபாய் எனக்கு நன்றாகவே நினைவில் நின்றதொரு one shot ஆசாமி ! அநேகமாய் 1982-ல் என்று நினைக்கிறேன் - "சூதாடும் சீமாட்டி" எனும் ஒரு கௌபாய் கதையினை முத்துவில் வெளியிட நேர்ந்தது ! அச்சமயம் நமது வழக்கமான மொழிபெயர்ப்பாளர் ஏதோ காரணத்தால் தாமதம் செய்திட - இக்கதையின் ஒரு 30% பகுதியினை அடியேன் எழுதித் தள்ளினேன் என்பதால் எனக்கு இக்கதையின் ஞாபகம் தலைக்குள்ளே ஒட்டிக் கொண்டுள்ளது ! பின்னாட்களில் முத்து காமிக்ஸ் எனது பொறுப்பிற்கு வந்தான பின்னே வெஸ் ஸ்லேட் கொஞ்ச காலம் குப்பை கொட்டிட - அதிரடி ஆட்டத்தைத் துவக்க வந்தார் நமது கேப்டன் டைகர் - தங்கக் கல்லறையின் மார்க்கமாய் ! நடு நடுவே.."ஒரு வீரனின் கதை" ; "எமனின் திசை மேற்கு" போன்ற ஒற்றை சாகச நாயகர்கள் தலை காட்டி இருப்பினும், கிட்டத்தட்ட 41 ஆண்டு காலமாய் வெளியாகிடும் நமது முத்துவின் "கௌபாய் பட்டியல் " குட்டிக் கட்சிகளின் வேட்பாளர் பட்டியலைப் போல நலிந்து - வெறும் மூன்றே நபர்களால் ஆனதாய் காட்சி தருவதை நம்ப முடிகிறதா ? சிஸ்கோ கிட் ; வெஸ் ஸ்லேட் ; கேப்டன் டைகர் !!!

சிறு வயதினில் நம் இரவுக் கழுகாரின் அதிரடிக் கதைகளை (ஆங்கிலத்தில்) மெய்மறந்து படித்த பரிச்சயம் ஏகமாய் இருந்ததால் லயன் காமிக்ஸிற்கு அவரை வெகு சீக்கிரமே அழைத்து வந்ததன் மூலமாய் லயனில் western கதைகளுக்கென ஒரு சாலையை அமைத்திடுவது சுலபமாகிப் போனது என்றே சொல்வேன் ! "தலை வாங்கிக் குரங்கு" ஒரு அட்டகாசமான கதையாய் மாத்திரம் இருந்திடாது - நமது ரசனைகளைப் புதியதொரு ஜன்னல் வழியாய் திசை திருப்பிய இதழும் கூட ! ஸ்பைடரும், ஆர்ச்சியும் கோலோச்சிய அந்த சூப்பர் ஹீரோ திருவிழா நாட்களிலேயே, தனக்கென ஆண்டுக்கு 3-4 கதைகளை ரிசர்வ் செய்து கொள்ளும் ஆற்றல் டெக்சுக்கு இருந்து வந்ததை நிச்சயம் நான் மறந்திடவில்லை ! ஆனால் என்ன தான் டெக்ஸ் சக்கை போடு போட்டு வந்தாலும், ஏகப்பட்ட காலத்திற்கு அவருக்கு அடுத்த கௌபாய் அறிமுகம் லயனில் தலை காட்டவே இல்லை என்பதே நிஜம் ! அந்தப் பெருமையை தட்டிப் பறித்தவர்கள் இருவருமே ஜூனியர் லயனின் தவப் புதல்வர்கள் ! லக்கி லூக் & சிக் பில் குழு தான் டெக்சுக்கு அடுத்தபடியாய் நமது இதழ்களில் குதிரைகளை பொதி சுமக்கச் செய்த புண்ணியவான்கள் ! இடையிடையே - ஆக்க்ஷன் கௌபாய் ஸ்டீவ் ; "இரத்த பூமி" போன்ற one shots தலை காட்டி வந்த போதிலும், லயனின் முதுகெலும்பாய் ஒரு கால கட்டத்தில் நின்றவர் இரவுக் கழுகாரும், அவர்தம் குழுவினரும் மட்டுமே ! வெகு சமீபமாய் NBS வாயிலாக மறு பிரவேசம் செய்துள்ள கமான்சே இப்போது நம் கௌபாய் கதைப் பட்டியலுக்கு லேசாய் கனம் சேர்க்கிறார் ! So - திரும்பிய திக்கெல்லாம் கௌபாய் கதைகளாய்த் தெரியும் மாயை லேசாய் தெளிகிறது என்னுள் - "டெக்ஸ் வில்லர் ; கமான்சே ; லக்கி லூக் ; சிக் பில் " என்ற இந்தச் சன்னமான கௌபாய் பட்டியலை வாசிக்கும் போது !!  இவர்கள் தவிர, (ரெகுலர்) கௌபாய் நாயகர்கள் வேறு எவரும் விடுபட்டுப் போய் இருப்பின் - சுட்டிக் கட்டுங்களேன் ப்ளீஸ் ?!! 

கௌபாய் பட்டியலின் strength அத்தனை பிரமாண்டமாய்த்  தெரியவில்லை என்பதற்காக  - புதுசாய் தொப்பிவாலாக்களைத் தேடி நான் புறப்படப் போவதில்லை ! இருக்கும் ஆசாமிகளுக்கு மத்தியிலான குடுமிப் பிடிக்கே தீர்வு காண முடியாத நிலையில், அசலூரிலிருந்து புது வரவுகளைக் கொணர்ந்து குட்டையைக் குழப்பும் உத்தேசம் நிச்சயமாய் இல்லை - இப்போதைக்காவது ! புறப்படும் முன்னே, சின்னதாய் ஒரு தகவல் : இம்மாத இதழ்களில் சூப்பர் சுவாரஸ்யம் தரும் ஒரு  அறிவிப்பு காத்துள்ளது ! அது என்னவாக இருக்குமென்று கண்டுபிடித்திட  உங்களின் யூகக் குதிரைகளைக் கட்டவிழ்த்து விடுங்களேன் - நமது மிரட்டும் கௌபாய்களின் பாணியில்  ! See you around folks ! Adios for now !

சிரிப்போம் - சிந்திப்போம் !

நண்பர்களே,

வணக்கம் ! "என்ன வாழ்க்கைடா சாமி இது ? சரியான நாய்ப் பிழைப்பு !" என்று யாரேனும் உங்களிடம் அடுத்தவாட்டி அலுத்துக் கொள்ளும் பட்சத்தில் அவர் மீது பச்சாதாபம் காட்டுவது அவசியமாகாது என்றே நினைக்கிறேன் ! ஏனெனில் - நாய்கள் பல இல்லங்களின் செல்லப் பிள்ளைகளாய் உள்ளன ; பல வேளைகளில் எஜமானர்களின் உயில் சாசனங்களில் உயர்வான இடத்தைப் பெறுகின்றன ; இன்னும் சில நேரங்களிலோ அவை பிரத்யேகமான காமிக்ஸ் தொடர்களின் ஹீரோக்களாகக் கூடவும் பரிணமிக்கத் தான் செய்கின்றன ! So - நாய்ப்பிழைப்பு எல்லா நேரங்களிலும் நாராசமான பிழைப்பாய் இருத்தல் அவசியமில்லை ! இதை இப்போது சொல்ல முகாந்திரமென்னவொ ? என்ற மண்டைச் சொறிதலுக்கு இடம் தந்திடாமல் விஷயத்துக்கு நேராகவே வருகிறேன் ! நமது காமிக்ஸ் அணிவகுப்பின் அடுத்த புதுவரவு ஒரு நாலுகாலார் என்பதே விஷயம் ! 

சரியாகச் சொல்வதாயின் இவரொரு (!!) புது வரவல்ல....நமக்கு ஏற்கனவே பழக்கமானவரே ! ஆனால் ஒரு exclusive கதைவரிசைக்கு lead character ஆகப் புரமோஷன் கண்டிடும் ஒரு வாய்ப்போடு நம்மை சந்திக்கக் காத்துள்ள நபர் - மிஸ்டர்.ரின் டின் கேன் ! லக்கி லூக் கதைகளில் அவ்வப்போது தலை காட்டும் இந்த அசகாய அரைவேக்காட்டு நாய்க்கென 1987 முதலாகவே பிரான்கோ-பெல்ஜிய காமிக்ஸ் உலகில் ஒரு தொடர் உள்ளது ! RANTANPLAN என்ற பெயரோடு அங்கு வலம் வரும் இந்த "டுபுக்கு" நாய்க்கு தனிக்கதை அந்தஸ்த்து வழங்கியது காமிக்ஸ் உலக ஜாம்பவான்களான எழுத்தாளர் கோசினியும், ஓவியர் மோரிசுமே ! லக்கி லூக்கின் கதை வரிசையில் 1962-ல் வெளியான ஆல்பத்தில் முதன்முறையாக டால்டன் சகோதரர்களைக் கண்காணிக்கும் "காவல் திலகமாய்" அறிமுகமான ரின் டின் கேன் - தொடரும் நாட்களில் ; தொடர்ந்த கதைகளில் ஒரு நிலையான இடத்தைப் பிடித்துக் கொண்டது !

லக்கி கதைகளில் ஜாலி ஜம்பர் ; பொடியன் பில்லி ; டால்டன் சகோதரர்கள் ; மா டால்டன் ; போன்றோர் எத்தகைய permanent slot பிடித்துள்ளனரோ - அதே மாதிரியான நிரந்திரத்தைத் தக்க வைத்துக் கொண்டது ரின் டின் கேன் ! டால்டன்களுக்குக் காவல் நிற்கச் சொன்னால் அதனைத் தலைகீழாய்ப் புரிந்து கொண்டு அவர்களை எஜமானர்களாய் எண்ணிப் பாசமழை பொழியும் குடாக்குத்தனத்திலாகட்டும் ; தனது கோணங்கித்தனங்களால் ஜாலி ஜம்பரை எரிச்சல் மூட்டுவதிலாகட்டும் ; ஆவ்ரெல்லைப் போல தன முன்னே வைக்கப்படும் சோப்புக் கட்டியைக் கூட கபளீகரம் செய்யும் ஆற்றலில் ஆகட்டும் - ரின் டின் கேனுக்கு நிகர் ஏதும் கிடையாது ! 1987 முதல் 2003 வரை பயணித்த ரி,டி.கே தொடரில் மொத்தம் 20 ஆல்பம்கள் உள்ளன ! அவற்றை மெது மெதுவாய் நாம் முயற்சிக்கவுள்ளோம் - 2014-ன் மையப் பகுதியிலிருந்து ! லக்கி லூக் கதைகளைத் தாண்டி - குட்டீஸ்களுக்கென பிரமாதமாய் நம்மிடம் சரக்கெதும் இல்லையென்ற குறையை  ரி,டி.கே கொஞ்சமேனும் சரி செய்யுமென்ற நம்பிக்கையோடு இத்தொடரினுள் தலை நுழைக்கிறோம் ! 

கார்ட்டூன் கதைகளென்ற தலைப்பினில் சஞ்சாரம் செய்திடும் வேளையில் சின்னதாய் ஒரு பிளாஷ்பாக் படலமும் என்னுள் ஓடியது ! இது நாள் வரை நமது காமிக்ஸ் இதழ்களுள் தொடர்ச்சியாய்த் தலைகாட்டிய நாயகர்கள் யாரெல்லாம் என்று யோசித்துப் பார்த்தேன் ! முத்து காமிக்ஸின் பெரும் பகுதிக்கு விச்சு & கிச்சு ; கபிஷ் ; அதிமேதாவி அப்பு போன்ற filler page நாயகர்களைத் தாண்டி வேறு எவரும் என் நினைவுக்கு வந்திடவில்லை ! "கார்ட்டூன் கதைகள் ஒரு முழு நீள காமிக்ஸ் இதழுக்கான படைப்புகளல்ல  !" என்பது அந்நாட்களில் முத்து காமிக்ஸ் தனக்குத் தானே போட்டுக் கொண்டதொரு கட்டுப்பாடு ! So - அந்த 1 பக்க ; 4 பக்க, page ரொப்பும் ஆசாமிகளை ஆட்டத்தில் சேர்த்துக் கொள்ளாவிட்டால் எஞ்சி நிற்பவர்கள் யாரென்று யோசித்த போது - ஆச்சர்யமூட்டும் விதத்தில் விட்டத்தை மட்டுமே என்னால் வெறித்துப் பார்க்க முடிந்தது ! சரி - முத்துவில் சீரியஸ் ரக கதைகள் மாத்திரமே என்ற சமாதானத்தோடு லயனின் பக்கமாய்ப் பார்வையைத் திருப்பினேன் ! 

லயன் காமிக்சிலும் ஆங்காங்கே தலைகாட்டிய ஜோக்கர் ; இரத்த வெறியன் ஹாகர் ; சிரிப்பின் நிறம் சிகப்பு ; பரட்டைத்தலை ராஜா ; மிஸ்டர் மியாவ் போன்றோரை bit players ஆக மட்டுமே கருதினால் - எஞ்சி நிற்கும் முழு நீளக் கதை நாயகர்களின் அணிவகுப்பு - சொல்லிக் கொள்ளும் சைசுக்குத் தேறவில்லை என்பதே நிஜம் ! 1984-ல் துவங்கிய லயனில் - முதன்முறையாக ஒரு கார்ட்டூன் கதைக்கு வாய்ப்புக் கிட்டியது 1989-ல் தான் ! அது எந்தக் கதை என்ற சிந்தனையில் நீங்கள் இருக்கும் போதே - கார்ட்டூனுக்கென பிரத்யேகமாய் சாலையமைக்க முனைந்த ஜூனியர் லயன் & மினி லயனைப் பார்ப்போமா ?   

அந்தரத்தில் ஸ்கிப்பிங் ஆடிக் கொண்டே 1987-ல் "சூப்பர் சர்க்கஸ் " இதழின் வாயிலாக நமக்கு அறிமுகமான லக்கி லூக் தான் நமது சிரிப்புலகப் பயணத்தின் முன்னோடி ! அது வரை ஒரு முழு நீளத் (தமிழ்) காமிக்ஸ் இதழில் ஒரு சர்வதேச முழுநீளக் கார்ட்டூன் வெளியானதில்லை என்பதை என்னால் இன்றளவும் நம்பிட இயலவில்லை ! (1980-களில்முத்து காமிக்ஸில் வெளியான "நாடோடி ரெமி" பெயரளவிற்கொரு கார்ட்டூன் இதாலே தவிர, கதையில் humour மிகக் குறைச்சலே என்பது நாமறிந்தது தானே ?!) லக்கி லூக்கின் தரமும், கார்ட்டூன் பாணியின் இதமும் ஒருசேர நம்மை மயக்கியத்தில் வியப்பில்லை தான் ! தொடர்ந்த ஜூனியர் லயன் இதழ் # 2-ல் அறிமுகமான அலிபாபா - இன்னுமொரு smash hit ! மொத்தம் மூன்றே கதைகளோடு இத்தொடர் படைப்பாளிகளால் மங்களம் பாடப்பட்டதென்பது தான் வேதனையே ! ஆனால் நல்ல காலத்திற்கு ஜோ.லயனின் இதழ் # 3-ல் தலைகாட்டிய சிக் பில் கோஷ்டிக்கும் படைப்பாளிகள் அதே போன்ற சொற்ப ஆயுள் நிர்ணயம் செய்திடாது - அவர்களது சிரிப்புத் தோரணத்தை 60+ கதைகளுக்கு நீட்டித்தனர் ! இன்று வரை நம்மிடையே தூள் கிளப்பி வரும் இந்த நவீன கவுண்டமணி-செந்தில் ஜோடிக்கு காமடி பட்டியலில் ஒரு பிரதான இடமுண்டு !  

சிக் பில் & கோவிற்கு ஆயுசு கெட்டியாக இருந்த போதிலும், அவரை நமக்கு அறிமுகம் செய்து வைத்த ஜூனியர் லயனுக்கு அந்தப் பாக்கியம் இருந்திடவில்லை ! நான்கே இதழ்களோடு மினி லயனின் ஜோதிக்குள் ஐக்கியம் ஆகிப் போனது ! மினி-லயனில் அலிபாபா ; சிக் பில் ; ஆகியோரது சாகசங்கள் தொடர்ந்தன ! அவர்களுக்கு அடுத்தபடியாய்ப் பெயர் சொல்லிக் கொள்ளுமொரு இடம் பிடித்தது வால்ட் டிஸ்னியின் அங்கிள் ஸ்க்ரூஜ் & டொனால்ட் டக் கோஷ்டியே ! "ஒரு நாணயப் போராட்டம்" ; "நடுக்கடலில் எலிகள்" இங்குள்ள இன்றைய தலைமுறைக்கு நினைவிருப்பது சிரமமே ; ஆனால் 1988 & 89-களில் நமது அபிமானிகளுக்கு அவை மறக்க இயலா classics ! தொடர்ந்து அறிமுகம் கண்டதும் கூட இன்னொரு smash hit கதைவரிசையே ! முதன்முறையாக ஹாலந்து மாட்டிலிருந்து - டச் மொழியிலிருந்து தமிழுக்குள் அடி வைத்த பெருமைக்குச் சொந்தக்காரர்களான "சுஸ்கி & விஸ்கி " தான் அவர்கள் ! இன்றளவும் ஐரோப்பிய சேகரிப்பாளர்களின் தேடலுக்கும், உள்ளூர் காமிக்ஸ் ஆர்வலர்களின் நேசத்திற்கும் உரிய இவர்களது 3 இதழ்களுமே வெளியான சமயத்திலேயே செம ஹிட்ஸ் ! ஆனால் ரொம்பவே குழந்தைத்தனமான இதன் கதைக்களங்களை அன்றைய நாட்களின் போதே எக்கச்சக்கமாய் எடிட் செய்ய வேண்டிய நெருக்கடியையும் சந்தித்தேன் என்பதும் நிஜமே ! இப்போது கூட - "சுஸ்கி & விஸ்கி" வருமா சார் ?" என்று கண்கள் மிளிர புத்தகவிழாக்களின் போது சில நண்பர்கள் வினவுவதும், நான் இதே பதிலைச் சொல்லுவதும் வாடிக்கையே ! 

அலிபாபா கதைகள் மூன்றோடு முற்றுப்புள்ளி பெற்றவை எனும் போது - அவர் விட்ட இடத்தைப் பிடிப்பார் சிந்துபாத் என்ற நப்பாசையோடு இந்த ஜெர்மானியப் படைப்பை களமிறக்கினோம் ! ஆனால் துளியும் பரபரப்பை ஏற்படுத்தத் தவறிய இந்தத் தலைப்பாகை வீரரை அவர்தம் தாயகத்துக்கே வழியனுப்பி விட்டோம் ! மினி லயனில் ஏராளமான ஒரு பக்க ; இரு பக்க கார்டூன்கள் மட்டுமல்லாது - one shot இதழ்களும் வந்திருந்தன ! காமெடி கர்னல் ; தூங்கிப் போன டைம் பாம் புகழ் (!!) ஏஜண்ட் 00 போன்றோரை நான் தொடர் நாயகர் பட்டியலில் சேர்க்கவில்லை ! 40 இதழ்களோடு மினிலயன் மண்ணைக் கவ்வியான பின்னே லயனுக்கு transfer வாங்கிக் கொண்டவர்கள் லக்கி லூக்கும் ; சிக் பில்லும் மாத்திரமே ! ஆனால் லயனில் முதன்முறையாக ஒரு கார்ட்டூன் சாகசத்தில் வெளியான பெருமை அவர்களைச் சாராது ! 1989-ல் "வாரிசு வேட்டை" இதழில் தலை காட்டிய "ஹெர்லக் ஷோம்ஸ்" தான் இப்பட்டத்தைத் தட்டிச் செல்லும் பிரகஸ்பதி ! பின்னாட்களில் - அதுவும் லயனின் 100-வது இதழுக்குப் பின்னதாகவே கார்ட்டூன் நாயகர்கள் சிக் பில் & லக்கி லூக் களமிறங்கியதாய் ஞாபகம் ! அதன் பின்னர் வாய்ப்புப் பிடித்த குள்ளக் கத்திரிக்காய் "மதியில்லா மந்திரி" இன்றளவும் active ஆகா இருப்பது ஒரு ஆறுதல் ! 2013-ல் நமக்குப் பரிச்சயம் தேடித் தந்த ஸ்டீல்பாடியாரையும் ; ப்ளூகோட் பட்டாளத்தையும் பட்டியலில் சேர்க்கும் போது -  this is how it reads :

1. லக்கி லூக்  
2. அலிபாபா 
3. அங்கிள் ஸ்க்ரூஜ் 
4. சுஸ்கி & விஸ்கி 
5. சிந்துபாத் 
6. ஹெர்லக் ஷோம்ஸ் 
7. மதியில்லா மந்திரி 
8. ஸ்டீல்பாடியார் 
9. ப்ளூகோட் பட்டாளம் 

ஆக ஒரு 41 ஆண்டு கால முத்து காமிக்ஸ் பயணம் + almost 30 ஆண்டு கால லயன் காமிக்ஸ் பயணம் + 44 இதழ்களுக்கான ஜூ.லயன்+ மினிலயன் சஞ்சாரமும் ஒட்டு மொத்தமாய் நமக்கு நல்கியுள்ளது ஒன்பதே கார்ட்டூன் கதைவரிசைகள் மட்டுமே என்பது தான் hard facts ! இதனை சிறிது சிறிதாய் செப்பனிடும் பணியைத் துவக்குவது எத்தனை அவசியமென்பது எனக்கு நெத்தியடியாய்ப் புலனாகிறது ! நம் ரசனைகலுக்கெற்ற கார்ட்டூன் கதைகளுக்கு பஞ்சமா ? அல்லது ஆக்க்ஷன் ...கௌபாய்....டிடெக்டிவ் போன்ற genre களில் நாம் காட்டும் அதீத ஆர்வம் இப்பக்கமாய் நாம் திரும்பிட அவகாசம் தரவில்லையா ? சிந்திக்கும் குல்லாய்க்கு வேலை / வேளை வந்து விட்டதென்ற புரிதல் புலர்கிறது !

சென்ற சனிக்கிழமை முதலாய்த் துவங்கிய திருச்சி புத்தகக் காட்சியைப் பற்றிச் சொல்வதாயின் - ஒரு மாநகருக்கு இது மிகச் சிறியதொரு முயற்சியே ! அதுவும் 27 ஆண்டுகளாய் நடந்திடும் இந்தப் புத்தக விழாவின் அளவு ; பங்கேற்போரின் எண்ணிக்கை ஜாஸ்தி இருக்குமென்றே எதிர்பார்த்தோம் ! ஆனால் சின்னதாய் ஒரு அரங்கம் ; இரண்டே வரிசைகளில் சிக்கனமாய் 60+ ஸ்டால்கள் ; அவற்றில் ஒரு 10 ஸ்டால்களாவது வெற்றிடங்கள் ! ஞாயிறன்று காலை நான் சென்ற போது அங்கு நிலவிய அமைதி ஊக்கம் தரும் விதத்தில் இல்லை என்பதே நிஜம் ! ஈரோட்டிலும், சென்னையிலும் நாம் பார்த்துப் பழகி இருந்த ஜனத் திரளோ, விற்பனை விறுவிறுப்போ மருந்துக்குமில்லை ! நமது ஸ்டாலில் நண்பர்கள் திருச்சி விஜயஷங்கர் ; கருமண்டபம் செந்தில் ; மற்றும் கிறுக்கல் கிறுக்கனார் மாத்திரமே ஆஜர் ! குளித்தலையிலிருந்து நண்பரொருவரும் கலந்து கொள்ள - சாவகாசமாய் அரட்டைக் கச்சேரி ஓடியது ! அவ்வப்போது வருகை தந்தவர்கள் ஒன்றும் இரண்டுமாய் நமது இதழ்களை வாங்கிடுவதும் ; 'அட..இன்னமும் இதெல்லாம் வெளியாகிறதா ? ' என்ற ஆச்சர்யக் கேள்விகள் எழுப்புவதும் சகஜமாய் இருந்தது ! இங்கிலீஷில் காமிக்ஸ் ஏதும் இல்லையா ? என்ற கேள்விகளும், மாயாவி இருக்காரா ? என்ற வினவல்களும் வழக்கம் போலவே அவ்வப்போது ! மதிய உணவை அங்கிருந்த FOOD FAIR (!!) -ல் நண்பர்களோடு முடித்துக் கொண்டு நான் நடையைக் கட்டிய போது - 'ஆஹா...தெரியாத்தனமாய் ஸ்டால் போட்டு விட்டோமே !" என்ற ஆதங்கம் எனக்குள் இருந்தது ! ஆனால் அன்றிரவு நான் சிவகாசிக்குத் திரும்பிய சற்றைக்கெல்லாம் இராதாகிருஷ்ணன் போன் செய்த போது 10,000 ரூபாய்க்கு விற்பனை ஆகியுள்ளதென்று சொல்லக் கேட்ட போது எனக்கு 'அடடே..தேவலையே!' என்று நினைக்கத் தோன்றியது ! இவ்வாரத்தின் ஒரு நாள் நீங்கலாய் இதர நாட்கள் அனைத்திலும் சராசரியாய் ரூ.3000-ரூ.4000-க்கு விற்பனை எனும் போது - நிச்சயமாய் இதுவொரு பிரயோஜனமான முதலீடே என்பது உறுதியானது ! இன்னும் இரு நாட்கள் எஞ்சியுள்ள நிலையில் - நம்பிக்கையோடு காத்துள்ளோம் !

நமக்குக் கடல் கடந்தும் நண்பர்கள் ; ரசிகர்கள் உள்ளனர் என்பது நிஜமே ; ஆனால் சென்ற மாதம் நாம் வெளியிட்ட அதே கதையினை, அதே தலைப்போடும், அதே மொழிபெயர்ப்பொடும் அட்சர சுத்தமாய்  வெளியிடும் அளவிலான "ரசிகர்கள்" ஸ்ரீலங்காவிலிருந்து வெளியாகும் தினசரிப் பத்திரிகை ஒன்றிலும்  உள்ளதைப் பார்க்கும் போது திகைப்பாய் உள்ளது ! பாருங்களேன் - "யுத்தம் உண்டு..எதிரி இல்லை...!" - version 2 ! Phew !

சிங்கநகரில் நமது சிங்கம் !

நண்பர்களே,

வணக்கம். திருவிழா கூட்டத்தில் காணாமல் போன குழந்தையைப் போல ஒன்றரை டஜன் "Load More" கொடுத்து - உங்களின் பின்னூட்டக் குவியலுக்குள் தட்டுத் தடுமாறித் தான் நடமாட வேண்டியானது கடந்த பதிவினில் ! மேற்கின் மன்னர் யார் ? என்ற சர்ச்சைக்கு இப்போதைக்கொரு விடிவு பிறக்கப் போவதில்லை என்பதால் முன்செல்லும் காரியத்தைக் கவனிப்போமே ? நேற்றைய மதியமே பிப்ரவரியின் சந்தாப் பிரதிகளை கூரியர் & பதிவுத் தபால்களில் அனுப்பி விட்டோம். So - "காலையில் கூரியரைப் படை எடுப்போர்" சங்கத்தின் அங்கத்தினர் தம் பணியினை இன்று செய்திடலாம் ! அயல்நாட்டுச் சந்தாக்களும் அனுப்பியாகி விட்டோம் ; இங்கு சின்னதாய் ஒரு தகவல். நாளது தேதி வரை அயல்நாட்டுப் பார்சல்களை வான்மார்க்கப் பதிவுத் தபாலில் அனுப்ப இயன்றது - வழக்கமான தபால் கட்டணம் + சின்னதாய் ஒரு பதிவுக் கட்டணத்தோடு  ! ஆனால் கடந்த 15 நாட்களாய் இந்த முறையின் கட்டணங்களை கிட்டத்தட்ட இருமடங்காய் உயர்த்தி விட்டனர் ! So இம்மாதம் முதல் அனைத்து அயல்நாட்டுச் சந்தாக்களுமே பதிவுத் தபால் அல்லாத சாதா முறையிலேயே அனுப்பிடப்படுகிறது.(பதிவுத் தபாலெனில் - 3 இதழ்கள் கொண்ட பார்சலுக்கே ரூ.875 ஆகிறது இப்போது !!).

அயல்நாட்டில் நமது காமிக்ஸ் பற்றிய பேச்சு எழும் சமயத்திலேயே - சின்னதாய் இன்னொரு சந்தோஷத் தகவல் பரிமாற்றமும் கூட ! விளம்பரம் விரும்பா நமது நண்பர் ஒருவர் சிங்கப்பூரில் உள்ள 4 முக்கியப் பொது நூலகங்களுக்கு தன்னார்வத்தில் நமது காமிக்ஸ் இதழ்களை அன்பளிப்பாய் வழங்கியுள்ளார் ! அவற்றிற்குக் கிட்டிய நல்வரவேற்பா ?  அல்லது விடாமுயற்சியாய் நமது காமிக்ஸ்களைத் தருவித்து வைத்தால் இதற்கென ஒரு ஆர்வம் வளரும் என்ற நம்பிக்கையா ?.. தெரியவில்லை ! - ஆனால் அந்நூலகங்கள் நமது இதழ்களின் நிறையப் பிரதிகளை எவ்விதமோ வாங்கி தற்போது வைத்துள்ளனவாம் !! பாருங்களேன் பின்வரும் link களில் :

http://catalogue.nlb.gov.sg/cgi-bin/spydus.exe/ENQ/EXPNOS/BIBENQ?ENTRY=%E0%AE%B5%E0%AE%BF%E0%AE%9C%E0%AE%AF%E0%AE%A9%E0%AF%8D&ENTRY_NAME=BS&ENTRY_TYPE=K&SORTS=DTE.DATE1.DESC%5DHBT.SOVR

http://catalogue.nlb.gov.sg/cgi-bin/spydus.exe/FULL/EXPNOS/BIBENQ/32256718/11614290,3

சிங்கநகராம் சிங்கப்பூரில் வாழும் நமது நண்பர்கள் இதனைப் படிக்கும் பட்சத்தில், ஒரு எட்டு உங்களுக்கு அருகாமையில் உள்ள நூலகத்திற்குச் சென்று பார்த்திடலாமே ?! சிறு விதைகள் தான் பெரும் விருட்சங்களின் துவக்கம் எனும் போது - இது போன்றதொரு அற்புத தயாள சிந்தனை கொண்ட நம் நண்பருக்கு நமது நன்றிகளும், பாராட்டுக்களும் !! 

இம்மாத இதழ்கள் கிடைக்கப் பெற்ற பின்னே ; வழக்கமான உங்களின் அலசல்களுக்குப் பின்னே நான் அறிந்து கொள்ள விழையும் விஷயங்கள் சில உள்ளன :

1.ஜில் ஜோர்டன் கதையினைப் பற்றிய உங்களின் அபிப்ராயங்கள் ப்ளீஸ் ?  நகைச்சுவை இழையோடும் அதே சமயத்தில் சற்றே சீரியசாகவும் கதை சொல்ல எத்தனிக்கும் இந்தத் தொடரைத் தொடர்வதில் மாற்றுக் கருத்துக்கள் ஏதேனும் உள்ளனவா ? கார்ட்டூன் பாணிச் சித்திரங்களோடு உள்ள இத்தொடர் நமது இளம் வாசகர்களைச் சென்றடையவும் உதவும் என்பது எனது தனிப்பட்ட அபிப்ராயம் ; but உங்களின் சிந்தனைகளையும் அறிந்து கொள்வதில் ஆவல் !

2.சாகச வீரர் ரோஜர் !! நெடுந்துயில் முடித்துத் திரும்பியுள்ள இந்த dashing adventurer பற்றியும் அதே கேள்வியே ! மெய்மறக்கச் செய்யும் சித்திரங்களை தனது மிகப் பெரிய பலமாய்க் கொண்டிருக்கும் இந்த நாயகரை நாம் active ஆக ரசித்தது சுமார் 25 ஆண்டுகளுக்கு முன்பாக என்பதால் - இன்றைய நமது ரசனைகளின் எல்லைக்குள் இவர் தொடர்கிறாரா என்பதை ஊர்ஜிதம் செய்து கொள்ளவே இக்கேள்வி !

3.இடியாப்பக் கதைகளுள் பிரதானமானவரான நமது ரிப்போர்டர் ஜானி பற்றியே கேள்வி # 3 ! சமீபமாய் வெளியான ரிப்போர்டர் ஜானி ஸ்பெஷல் (மறுபதிப்பு) இதழினைப் படித்த பின்னே, இவரது கதைகளைக் கோரி கணிசமான மின்னஞ்சல்கள் வந்துள்ளன ! இம்மாத இதழும் ஒரு crystal clear சாகசம் என்பதால் நிச்சயமாய் ரசிப்பதில் சிரமம் இராது ! நமது தற்சமய நாயகர் அணிவகுப்பில் பெயர் சொல்லிக் கொள்ளும் அளவில் டிடெக்டிவ் என வேறு யாரும் இல்லாத நிலையில் - ஜானிக்கு பதவி உயர்வு தருவது ஒ.கே. ஆகுமா ?

4.நாயகர்களுக்கு அப்பால் எழும் கேள்வி இது ! 52 பக்க format (லயனில் மட்டும் 56) என்பது நமது 2014-ன் பாணி என்றான பின்னே - ஒவ்வொரு பிரான்கோ-பெல்ஜிய சாகசமும் 44 பக்கங்களை ஆக்ரமித்துக் கொண்டான பின்னே மாமூலாய் எனது தலையங்கம் ஒன்றல்லது, இரண்டு பக்கங்கள் ; சிங்கத்தின் சிறுவயதில் - 2 பக்கங்கள் ; அடுத்த வெளியீடுகளின் விளம்பரமென இன்னொரு 2 பக்கங்கள் அமைந்தான பின்னே, காலி விழும் பக்கங்களை நிரப்பிட filler pages தான் சிரமம் தருகின்றன ! மதியில்லா மந்திரியார் ; லக்கி லூக் குட்டிக் கதைகள் 6-8 பக்க நீளம் கொண்டவை என்பதால் அவற்றினை உள்ளடக்குவது சாத்தியமாகாது ! மாதம் 3 இதழ்களெனும் போது - ஒட்டு மொத்தமாய் சுமார் 6 பக்கங்கள் துண்டு விழுகின்றன ; அவற்றை சுவாரஸ்யமாய் ரொப்பிட, வழக்கமான காமிக்ஸ் gags ; புதிர் போட்டி என்றில்லாமல் வேறு என்ன செய்யலாம் ? முன்போல் "வாசகர் ஸ்பாட்லைட் " பாணியிலான பக்கங்களை ஒதுக்கும் ஆசை எனக்குள்ளது ; ஆனால் அது இப்போதைய நம் ரசனைகளுக்கு சரி வருமா ? அது தவிர, வேறு என்ன முயற்சிக்கலாம் ? (தொடர்கதைகள் என்பது நிச்சயம் ஒரு option ஆகாது ; ஆர்ட் பேப்பரில் வரும் நமது தற்போதைய இதழ்களில் தொடர்கதைப் பக்கங்களைக் கிழித்து வைத்து கதையினை ஒருங்கிணைக்க  நிச்சயம் யாரும் ஆர்வம் காட்டப் போவதில்லை தானே ?!)  What else can be done ?

5.லயனின் 30-வது ஆண்டுமலரின் கதைத் தேர்வுகள் ஒரு பக்கமிருக்க ; இந்த இதழில் நண்பர்களது பங்களிப்பும் நிச்சயம் இருந்திட வேண்டுமென்பது என் அவா ! குறைந்த பட்சம் 10 பக்கங்கள் உங்களின் சிந்தனைச் சிதறல்களுக்கென ஒதுக்கவிருக்கிறேன் ! "லயனும், நீங்களும் " என்ற ரீதியில் உங்களின் சந்தோஷங்கள் ; வருத்தங்கள் ; உற்சாகங்கள் ; ஆதங்கங்கள் எதுவாக இருப்பினும் பகிர்ந்து கொள்ளலாம் ! இப்போதிலிருந்தே உங்களின் பேனாக்களை / கீ போர்டுகளை இதன் பொருட்டு நீங்கள் பிஸி ஆக்கிடலாம் ! கடிதமாகவோ ; அல்லது மின்னைஞ்சலாகவோ "லயனும் -நானும்" என்ற தலைப்போடு அனுப்புங்களேன் ! 

வரும் சனிக்கிழமை முதலாய் (8th.Feb) திருச்சி நகரில் துவங்கவிருக்கும் ரோட்டரி சங்க புத்தக விழாவில் நாமும் பங்கேற்கிறோம் என்பதை மீண்டும் ஒரு முறை நினைவூட்டுகிறேன் ! உங்களின் வருகைகள் நமக்குப் பெருமை சேர்க்கும் ; please do visit folks !! மீண்டும் சிந்திப்போம் ! Bye for now !

திருச்சியில் இன்று துவங்கும் புத்தகக் காட்சியில் நமது ஸ்டால் நம்பர் 13 !

பொன்னுக்கு நிகராய் ஒரு புதன் !

நண்பர்களே,

ஞாயிறு வணக்கம். 'பொன் கிடைத்தாலும் புதன் கிடைக்காதென்று' சொல்வது நிஜம் தானா ? என்று கண்டறிய ஒரு சின்ன வாய்ப்பு நம் முன்னே  ! அறிவித்தது போலவே பிப்ரவரியின் 2 இதழ்களும் தயாராகி விட்டன - நாளைய தினம் அனுப்பிட ! ஆனால் இதழ்கள் இரண்டையும் கையில் வைத்துப் புரட்டும் போது எனக்குள்ளே சின்னதாய் ஒரு நெருடல் ! கடந்த ஐந்தாறு மாதங்களாய் படிக்க ; ரசிக்க நிறையவே பக்கங்களையும், கதைகளையும் வழங்கியதன் மூலம் ஒரு வித  எதிர்பார்ப்பை ஏற்படுத்தி விட்டு -இம்மாதம் 56 + 52 = 108 பக்கங்களோடு மங்களம் பாடுவது என்பது முறையாகுமா ? என்ற கேள்வி என்னுள் எழுவதை உணர முடிந்தது  !அதிலும் இம்மாத ஜில் ஜோர்டான் கதையோ இலகு ரகம் & சாகச வீரர் ரோஜரின் கதையானது more of a visual feast எனும் போது - இம்மாத வாசிப்பு மெனுவில் "I want more emotions ! ' என்ற நினைப்பு எட்டிப் பார்க்கத் துவங்கியது ! தலைக்குள் இப்படி ஒரு குடைச்சல் குட்டியாய்க் குடி கொண்டு விட்ட பின்னர் கேட்கவா வேண்டும்......? 'பரபர'வென்று அடுத்த மாதங்களுக்கென பணித்துவக்கம் கண்டிருந்த கதைகள் சகலத்தையும் எடுத்துப் போட்டு உருட்டும் படலம் துவங்கியது ! சற்றே வெயிட்டான கதைக்களத்தோடு நின்ற ரிப்போர்ட்டர் ஜானியின் "நினைவுகளைத் துரத்துவோம் !" - சாகசத்தினைப் போர்க்கால வேகத்தில் தயாராக்கும் வேலைகள் முடுக்கி விடப்பட, செவ்வாய் இரவுக்குள் இந்த இதழும் தயாராகிடும் என்ற நிலை ! So - புதன் வரை பொறுமை காத்திடும் பட்சத்தில் 3 இதழ்களுமே ஒரு சேர உங்கள் இல்லங்களைத் தேடி வந்திடும் folks ! செவ்வாயே பணிகளை முடிக்க ஆன மட்டிலும் முயற்சிப்போம் ; ஆனால் புதன் எனும் பட்சத்தில் சற்றே மூச்சு விட்டுக் கொள்ள அவகாசம் கிட்டிடும் என்பதால் பொன்னுக்கு நிகரான இந்நாளைத் தேர்வு செய்வது தேவலை என நினைத்தேன் ! தொடரும் மாதங்களில் - "குறைந்த பட்சம் 3 இதழ்கள் ; இயன்றால் 4 !" என்பதே நமது பார்முலாவாக இருந்திடிட வேண்டும் என்பதையும் தலைக்குள் பதித்துக் கொண்டேன் ! அதன் பலனாய் மார்ச் மாதம் - ரூ.120 விலையில் கேப்டன் டைகரின் இரு பாக இதழான "அட்லாண்டாவில் ஆக்ரோஷம் " (108 பக்கங்கள்) + ரூ.60 விலையில் ப்ளூகோட் பட்டாளத்தின் "கப்பலுக்குள் களேபரம் !" இதழ்களும் வெளி வந்திடும் ! எண்ணிக்கையில் இவை இரண்டே எனினும், கதைகளின் எண்ணிக்கைப்படி அவை 3 என்பதாலும், நெடியதொரு இடைவெளிக்குப் பின்னே நம் அழுக்கு நாயகரின் இரட்டை பாக சாகசம் ஒருசேர வெளிவருகிறது என்பதாலும் மார்ச்சில் உங்கள் காமிக்ஸ் நேரம் சுவாரஸ்யமாக அமைந்திட எவ்விதக் குறைச்சலும் இருந்திடாது என்றே நினைக்கிறேன் !  

இதோ இம்மாத இதழ்களின் நீங்கள் பார்த்திரா ராப்பர்கள் : 

ஜில் ஜோர்டனின் அட்டைப்படம் முழுக்கவே ஒரிஜினல் தான் ; லேசாய் நமது நகாசு வேலைகளோடு ! பின்னட்டையுமே படைப்பாளிகளின் ஆக்கமே ! So - இந்தாண்டின் இது வரையிலான வெளியீடுகளுக்கு ஒரிஜினல்கள் ; அல்லது அவற்றின் மெருகூட்டப்பட்ட பிரதிகள் மாத்திரமே அட்டைப்படங்களாய் அமைந்துள்ளன ! திடீர் inclusion ஆன ஜானியின் அட்டையும்  - ஒரிஜினலை ஆதாரமாகக் கொண்டு நமது ஓவியர் மாலையப்பன் வரைந்த முற்றிலும் புதிய ஓவியமே. ஜானியின் ஒரிஜினல் அட்டைகள் எப்போதுமே line drawing + color filling என்ற பாணியில் இருப்பதால் முகங்களில் ; உடுப்புகளில் தட்டையான வர்ணங்கள் மட்டுமே இருந்திடும் ! அவற்றில் லைட் & டார்க் வேறுபாடுகள் இருந்திடாது என்பதால் அதனைக் களையும் பொருட்டே    புதிதாய் நாம் ஒரு சித்திரத்தைத் தீட்டி விட்டோம். வழக்கமாய் துப்பாக்கியும் கையுமாய், பரபரப்பாய் ஓடும் பாணிகளில் போஸ் கொடுக்கும் ஆசாமி - புளிய மரத்தில் காரைச் சாத்தி விட்டு மல்லாக்க முழிக்கும் அந்த பாணி வித்தியாசமாய்ப்பட்டதால் அதனை அப்படியே நமது அட்டைக்கும் பயன்படுத்திக் கொண்டோம். இங்கு கணினிகளில் தெரியும் பின்புல ஆரஞ்சு வர்ணம் புக்கில் பார்த்திடும் போது இன்னும் depth கூடுதலாய் பளிச் எனத் தோற்றம் தருவதை சீக்கிரமே பார்த்திடப் போகிறீர்கள் ! கதையைப் பொறுத்த வரை ஜானியின் TOP 5 பட்டியலில் இடம் பிடித்த கதைகளுள் இதுவும் ஒன்று என்பதால் பரபரப்பிற்குப் பஞ்சமிராது ! இதோ முதல் பக்கமே ஒரு brisk pace-ல் துவங்குவதைப் பாருங்களேன் !

Original Cover

இன்றோடு நிறைவு பெரும் இராமநாதபுரம் புத்தகக் காட்சியில் ஒரு modest விற்பனை மட்டுமே சாத்தியமாகியுள்ளது நமக்கு ! பெரியதொரு எதிர்பார்ப்பு ஏற்படுத்திக் கொள்ளவில்லை எனினும், இத்தனை சன்னமான வரவேற்பே இருந்திடும் என்பதும் எதிர்பாராததே ! ஆனால் எண்ணற்ற பள்ளிகள் ; கல்லூரிகள் தத்தம் மாணாக்கர்களை புத்தகக் காட்சிக்கு வருகை புரியச் செய்து இங்கு நேரமும் செலவிட வைத்ததால் அவர்களின் அநேகர் நமது ஸ்டால்களுக்கு வந்து, இதழ்களைப் புரட்டினர்.  நமது மறு வருகையை இப்பகுதிகளுக்கு அறிவிக்கும் விதத்தில் பார்த்தோமேயானால் இந்தப் புத்தகக் காட்சி நிச்சயம் ஒரு success என்றே சொல்ல வேண்டும் ! அதிலும் நிறையப் பள்ளிகளின் தலைமை ஆசிரியர்கள், தங்கள் பள்ளி நூலகங்களுக்கென நமது இதழ்களை வாங்கிச் சென்றுள்ளதாய் நம்மவர் இராதாக்ருஷ்ணன் சொன்ன போது நிறைவாய் இருந்தது.  வ(ள)ரும் தலைமுறைக்கு காமிக்ஸ் வாசிப்பெனும் உலகிற்குள் அடியெடுத்து வைக்க துளியேனும் வாய்ப்புக் கிடைத்திருப்பது a step in the right direction தானே ?!!

தொடரும் சங்கிலியாய் வரும் பிப்ரவரி 8-ம் தேதி முதல் திருச்சி மாநகரில் ரோட்டரி சங்கம் சார்பாய் நடக்கவிருக்கும் புத்தக விழாவிலும் நாம் பங்கேற்கிறோம் ! அடுத்த ஞாயிற்றுக் கிழமைப் (9th) பொழுதை திருச்சியில் நமது ஸ்டாலில் செலவிட எண்ணியுள்ளேன் ! உங்களை அங்கு சந்திக்க வாய்ப்புக் கிடைப்பின் நிச்சயமாய் மகிழ்ச்சி கொள்வேன் ! Please do drop in folks ! திருப்பூர் புத்தக விழாவின் தேதிகளும், இராமநாதபுரம் + திருச்சி தேதிகளும் உதைப்பதால் இந்தாண்டு திருப்பூரில் ஸ்டால் அமைக்க இயலவில்லை ! நிச்சயம் கிடைக்கும் அடுத்த வாய்ப்பினைத் தவற விட மாட்டோம் ! தொடரும் நாட்களில் உங்கள் பகுதிகளில் நடைபெறவிருக்கும் புத்தக விழாக்கள் பற்றிய தகவல்களை நமக்கு அனுப்பிடவும் கோருகிறேன் ! மக்கள் நம்மை நாடி வர வேண்டுமென தவம் செய்வதை விட, நாமே மக்களை நாடிச் செல்வதும் உற்சாகமானதாய் இருப்பதை உணர்ந்து வருகிறோம் ! 'அட...நான் சின்ன வயசிலே படிச்ச முத்து ; லயன் காமிக்ஸ் எல்லாம் இன்னும் வருதா ?" என்ற அந்த மத்தாப்பூ புன்னகைகளைப் பற்பல முகங்களில் பார்த்திடும் சந்தோஷம் ஒன்றே - எங்கள் செலவுகளையும், சிரமங்களையும் ஈடு செய்து விடுகின்றது ! அப்படிப் பார்க்கையில் கிடைக்கும் விற்பனை முழுக்க ஒரு போனஸ் மாத்திரமே ! நமது எட்டுக்கள் சிறிதாய் இருப்பினும், அவை தரும் சந்தோஷங்கள் மலையளவு அன்றோ ?! Enjoy the Sunday !! Catch you soon !