Powered By Blogger

Sunday, July 28, 2013

சிறகுகளை இரவல் வாங்குவோமா ?

நண்பர்களே,

வணக்கம். உடல் நலம் தேற நீங்கள் அன்பாய்த் தெரிவித்த வாழ்த்துக்கள் பலித்ததோ ; தொண்டையின் விஸ்தீரணத்தை விட மொக்கையாத் தோற்றம் தந்த மாத்திரைகள் வேலை செய்தனவோ தெரியாது - ஆனால் இரண்டுமே இணைந்து என்னை சென்ற வாரம் எழுந்து நடமாடச் செய்தன என்பதே நிஜம் ! Thanks a ton guys ! As always, you are awesome ! 

ஈரோட்டுப் புத்தகவிழாவினில் பங்கேற்கும் பதிப்பகங்களின் ஸ்டால் ஒதுக்கீடு - சென்ற வாரம் சென்னையில் ஒரு திருமண மஹாலில் குலுக்கல் முறையில் நடந்தேறியது ! இது நாள் வரை இது போன்ற நிகழ்வுகளுக்கு டிமிக்கி கொடுத்து வந்த நான் - ஒரு curiosity -ல் அன்றைய மதியம் அங்கு ஆஜரானேன் ! வழக்கமாய் இந்தப் புத்தக விழா circuit -ல் பங்கேற்கும் பதிப்பக /  விற்பனை நிறுவனங்களின் பிரதிநிதிகளுக்கு மத்தியில் புதுசாய் 'திரு திரு' விழியோடு அமர்ந்திருந்தவன் நான் மாத்திரமே என்று சொல்லலாம் ! ஒருவாறாக நமது முறை வந்த போது, டபராவிற்குள் கை விட்டு ஒரு நம்பரை நான் தேர்வு செய்து தர - 'ஸ்டால் # 78 - பிரகாஷ் பப்ளிஷர்ஸ், சிவகாசி' என்று வாசித்தார்கள். 'சிவகாசி' என்ற உடனேயே அங்கே புருவங்கள் சில உயர்ந்ததை உணர முடிந்தது ! பதிப்பகங்களின் மையம் சென்னையாகவும் ; தலைநகரைத் தாண்டிய புத்தகத் தயாரிப்பு மையங்கள் வெகு குறைச்சலே என்பதையும் புரிந்திட முடிந்தது ! அதிலும் சிவகாசியிலிருந்தொரு பதிப்பகம் எனும் போது அது ஏதேனும் 'சஸ்தாவான' ; தரமில்லா சரக்காய் இருக்குமென்ற ஒரு கணிப்பு இந்தத் துறையில் நிலவுவதை அன்று நெருடலோடு உணர இயன்றது ! ஈரோட்டில் இவ்விழாவை நடத்திடும் 'மக்கள் சிந்தனைப் பேரவை" கூட துவக்கத்தில் நமது விண்ணப்பத்தை அத்தனை சுவாரஸ்யமாய் வரவேற்கவில்லை என்பதற்கு காரணம் இந்த சிந்தனையே என்பதை நமது நண்பர் ஸ்டாலின் சொன்ன போது தான் NBS & சமீபத்திய வண்ண இதழ்களை அவர்கள் பார்வைக்கு அனுப்பிடத் தீர்மானித்தேன் ! நமக்காக நம் கடிதம் பேசியதோ - இல்லையோ ; நமது வண்ணங்களும், சித்திரங்களும் நிச்சயம் பேசி இருக்க வேண்டும் ! 'சிவகாசியிலிருந்தும் தரம் சாத்தியமே' என்ற புரிதலோடு அமைப்பாளர்கள் நமக்கு ஸ்டால் ஒதுக்க சம்மதித்துள்ளனர்  !'தொடரும் பிரதான புத்தக விழாக்களில் இனி தவறாது பங்கேற்பது ; நம் ஆக்கங்களை இத்துறையினில் பழம் தின்று கோட்டை போட்ட ஜாம்பவான்களுக்கும் அறியச் செய்வது' priority பட்டியலில் முதன்மை கொள்பவை என்று மனதுக்குள் தீர்மானித்துக் கொண்டேன்! 

'மனதில் மிருகம் வேண்டும்' பணிகள் நிறைவேறி ; பைண்டிங்கில் உள்ளதால் அதைப் பற்றி no issues ! திருவாளர் சுட்டி / குட்டி லக்கியின்     பணிகள் இப்போது தான் ஜரூராய் நடந்து வருவதால் - ஈரோட்டு விழாவின் தருவாயினில் தான் தயாராகும். So - ஆகஸ்ட் 3-ஆம் தேதியன்று இரு புது இதழ்களும் உங்களை வந்து சேரும் - ஈரோட்டில் இருந்தாலும் , சந்தாவில் இருந்தாலும் ! சமீபம் வரை நமக்கு ஸ்டால் கிட்டுவதே சஸ்பென்சாக இருந்து வந்ததால் துவக்க நாளுக்கு என்னால் திட்டமிட இயலவில்லை ! So ஆகஸ்ட் 11 (ஞாயிறு ) அங்கு attendance போடலாமென எண்ணியுள்ளேன் ! 'வாலிப- வயோதிக அன்பர்களே - டாக்டர் விஜயம் இன்ன இன்ன தேதியினில்  ' பாணியிலான விளம்பரம் இப்போது நினைவுக்கு வருவது ஏனோ தெரியவில்லை :-) Anyways - எப்போதும் போல் நண்பர்களை சந்திக்க ஆவலாய் இருப்பேன் ! Please do drop in folks !

கட்டிலைக் கட்டிக் கண்டு 4 நாட்களை நகற்ற முயன்ற பொழுதுகளில் ஏராளமாய் காமிக்ஸ் trailer களை எனது tablet pc -ல் பரிசீலிக்க இயன்றது ! இந்தாண்டு கோட்டா கிட்டத்தட்ட full என்ற போதிலும் +6 வரிசையில் இன்னும் இரு ரூ.50 இதழ்கள் காத்துள்ளன தானே ?! அவற்றில் ஒரு slot-க்கு ஒரு (புதிய) கார்ட்டூன் நாயகர் தயார் என்பதால், எஞ்சியுள்ள இதழில் எதாச்சும் offbeat ஆகச் செய்தால் நன்றாக இருக்குமே என்ற நமைச்சல் நிறையவே எனக்குள் ! சென்ற பதிவில் நண்பர் ஆதி தாமிரா குறிப்பிட்டு இருந்தது போல - 'ஒரு டெக்ஸ் வில்லரை அசைக்க நமது 'பிரளயத்தின் பிள்ளைகளுக்கோ ' ; இன்ன பிற கிராபிக் நாவல்களுக்கோ நிச்சயம் ஆற்றல் போறாது ' என்பதை நானும் ஏற்றுக் கொள்கிறேன் ; ஆனால் ஒரு சுகமான ; சலனமற்ற ; ரிஸ்கும் இல்லா வட்டத்துக்குள்ளே தொடரும் நமது பயணத்தை இன்னும் சற்று சுறுசுறுப்பாக்க அவ்வப்போது ஒரு பெக்  'நல்-நேர நஞ்சு' கிட்டினால் தப்பில்லை என்று தோன்றியது ! 

வழக்கமாய் ஒரு புதுத் தொடரைத் தேடித் புறப்படும் போது என்னவெல்லாம் நான் எதிர்பார்ப்பேனோ - அவை சகலத்தையும் சட்டை செய்யாமல் - விழிகளையும், சிந்தைகளையும் அகலத் திறந்து வைக்கும் போது - கொட்டிக் கிடக்கும் காமிக்ஸ் படைப்புகளின் வீச்சு மிரளச் செய்கிறது ! அனைத்தும் 'சூப்பர் ஹிட்'  என்றோ ; காவியங்கள் என்றோ சொல்லிட இயலாது தான் ; ஆனால் அந்த முயற்சிகளின் சுதந்திரம் ; வழக்கமாய் நாம் பார்த்துப் பழகிப் போன டமால்-டுமீல்களைத் தாண்டிய உலகின் பரிமாணம் ; ஆக்சனுக்கு பின்சீட் கொடுத்து விட்டு மனித உணர்வுகளை பிரதிபலிக்கச் செய்யும் படைப்புகள் என்று ஒவ்வொன்றும் ஒரு வகை ! அனைத்துமே வெவ்வேறு மொழிகளில் இருப்பதால் - கதைகளைப் படிப்பது சாத்தியமாகவில்லை எனினும், தேடிப் பிடித்து அவற்றின் விமர்சனங்கள் ; படைப்பாளிகள் தரும் பின்னணி ; சித்திரப் பாங்கு என்று நிறைய observe செய்ய முயன்றேன் !தொடரும் நாட்களில் shortlist செய்து வைத்துள்ள சில தொடர்களை இயன்றளவு விரிவாய் பரிசீலிக்க முயற்சி செய்வேன் ; அவற்றில் தேறுபவை 2014-ல் களமிறக்கப்படும் - நிச்சயமாய் ! 

புது முயற்சிகளின் தரம் ; அவற்றின் வெற்றி-தோல்வி சாத்தியங்கள்  ;' காமிக்ஸ் என்றால் நான் எதிர்பார்ப்பது பரிச்சயமான பாணி மாத்திரமே'  ரீதியிலான நண்பர்களின் conservative அணுகுமுறை ; இவை அனைத்தையும் தாண்டி பெரியதொரு அரணாய் இது போன்ற 'விஷப் பரீட்சை வேளைகளில் ' நிற்பது - 'ஆண்டுக்கு 12 இதழ்கள் + கொசுறாய் ஒரு சில' என்ற கட்டுப்பாடு மாத்திரமே ! புதிதாய் கண்ணில் படும் ஒவ்வொரு தொடரும் குறைந்தபட்சம் 4-6 பாகங்கள் கொண்டவை எனும் போது - அவற்றை ஆறப் போடாமல் சட சட வென வெளியிடுவதே அவற்றின் சுவை சிதையாதிருக்க உதவும். ஆனால் லார்கோ ; ஷெல்டன் ; டெக்ஸ் ; டைகர் ; லக்கி ; சிக் பில் ஒரு மொத்தமாய் கைகளில் ஒரு தடியோடு slow motion -ல் ஓடி வருவது என் மனக்கண்ணில் அவ்வப்போது தோன்றி மறையும் போது, மண்டையைச் சொறிய மாத்திரமே முடிகின்றது ! அதற்காக 'டமால்' என புதியதொரு இதழைத் துவக்கும் வாய்ப்புகளும் குறைச்சல் எனும் போது - 'பழைய பார்முலா + புது இணைப்புகள் ' என்று ஒரு balancing act அவசியமாகிறது! 

அத்தி பூத்தார் போல எப்போதாவது ஓரிரண்டு பாகங்கள் ; அல்லது ஒரே இதழோடு நிறைவாகும் ஆக்கமென்று வருவதும் உண்டு என்பதால், நான் அந்தத் தேடலில் ஆழ்ந்திட முயன்றேன் ! அதன் பலனாய்ச் சிக்கியதொரு one shot episode தான் நமது +6 முயற்சியின் இவ்வாண்டுக்கான இறுதி இதழாக அமையப் போகிறது ! இதுவும் கூட ஒரு இரண்டாம் உலக யுத்தப் பின்னணிக் கதையே - ஆனால் சோகமாய் பயணிக்காமல் ; ஆக்க்ஷன் ; யதார்த்தம் ; நட்பு என்று அழகாய் நடை போடும் ஒரு முயற்சி ! குறிப்பாக நாம் இது வரை யுத்த விமானங்களை முன்னிலைப்படுத்தி அதிகமாய்க் கதைகளை வெளியிட்டதில்லை ; அசாத்திய சித்திரத் தரத்தோடு வரவிருக்கும் இந்தக் கதை அந்தக் குறையை நிவர்த்தி செய்யும் ! இந்தப் பக்கத்தைப் பாருங்களேன் நிதானமாய் : 
வார்த்தைகளுக்கு விடை கொடுத்து விட்ட போதிலும், ஓராயிரம் ஓசைகளையும், ஒரு ஆக்ரோஷத்தையும் அட்டகாசமாய் நம் கண் முன்னே கொண்டு வந்து நிறுத்தும் இந்த ஓவியருக்கு விமானங்கள் மீது காதலாம் ! (ஷெல்டன் ஓவியர் ஒரு truck பிரியர்!!) 1930-களில் போருக்கு முந்தைய போலந்தில் வசிக்கும் 3 நண்பர்களோடு துவங்கும் இந்தக் கதை, சிறுவர்களுக்கே உரித்தான அந்த 'விமானக் காதல்' ; போரின் அண்மை கொண்டு வரும் சோதனைகள் ; நட்பின் வலிமை என்று வித்தியாசமான பாதையை தேர்ந்தெடுத்துச் செல்கிறது ! முழு வண்ணத்தில் வரவிருக்கும் இக்கதைக்கு ஓவியர் தீட்டிய சில boards இதோ உங்கள் பார்வைக்கு! 

ஓவியர் இவரே ! 
'ஐரோப்பாவில் அழகான வரவேற்பு பெற்ற இதழ் ' என்ற அடையாளம் இருப்பினும், முதல் பார்வையிலேயே இந்தக் கதையினில் ஏதோ ஒரு ஈர்ப்பு உள்ளதை உணர்ந்திட முடிந்தது ! எனது gut feel தவறாகவும் இருக்க வாய்ப்புகள் நிரம்பவே உண்டு தான் ; ஆனால் தடுமாறி விழாது நடக்கப் பயின்ற குழந்தை தான் எது ? முயற்சித்துத் தான் பார்ப்போமே என்று தோன்றியது - what say guys ?

கிராபிக் நாவல்களின் சுவைக்கு நாம் பரிச்சயம் கொண்டு விட்டால், காத்திருக்கும் களங்கள் ஏராளம் ! பாருங்களேன் நம் பரிசீலனையிலிருக்கும் சில படைப்புகளின் சித்திர விந்தைகளை !! 

இதுவொரு சிறார் மாயாஜால பாணிக் கதை ; இதனை இப்போதைக்குப் பிரசுரிக்க நம்மிடம் களமில்லை தான் - ஆனால் அந்த பேசும் சித்திரங்கள் மெய் மறக்கச் செய்கின்றன !
'சித்திரமும் பேசும் ' என்பதற்கு இதை விடவும் வேறு உதாரணங்கள் அவசியமா- என்ன ? பூமியில் உலவும் இது போன்ற அசாத்திய ஆற்றலாளர்களை கொஞ்சம் கொஞ்சமாய் நாம் ரசிக்கும் நாள் நிச்சயம் புலரும் என்ற நம்பிக்கையோடு விடை பெறுகிறேன் இப்போதைக்கு !  See you around soon ! Take care !

P.S: மொழிபெயர்ப்புப் போட்டியினைத் தொடர்ந்து "KAUN BANEGA GRAPHIC DESIGNER ?' என்ற டிசைன் திறமைகளை வெளிக்கொணரும் போட்டியைப் பற்றி ஹேஷ்யமாய் நாம் இங்கு பேசி இருக்கிறோம் ; ஆனால் முதன்முறையாக அதனை நடைமுறைப்படுத்திட எனக்கொரு சிந்தனை தோன்றியது ! வரவிருக்கும் நமது ஈரோடு புத்தக விழாவினில் நமது ஸ்டால் அலங்காரத்தின் பொருட்டு banner & printouts தயாரிக்கும் பணி நம் முன்னே காத்து நிற்கிறது ! ஆர்வமுள்ள நண்பர்கள் தம் கற்பனைகளுக்கு அழகாய் வடிவம் கொடுத்து - தம் கம்ப்யூட்டர் கிராபிக் திறமைகளையும் வெளிப்படுத்திட இது ஒரு வாய்ப்பாகுமே ? நமது தற்சமய நாயகர்களைக் கொண்டு ஒரு colorful கதக்கழியை நடத்திக் காட்டுங்களேன் guys ? உங்கள் ஆக்கங்களை உயர் resolution -ல் நமக்கு மின்னஞ்சலாய் அனுப்பிடலாமே ? இன்றிலிருந்து ஆகஸ்ட் 1 வரைக்குள்ளாக அவகாசம் எடுத்துக் கொள்ளலாம் ; டாப் தேர்வுகள் ஈரோட்டில் பளிச்சிடுவதொடு ; நமது தளத்திலும் ; தொடரும் இதழ்களிலும் வெளியாகும் !

Wednesday, July 24, 2013

மனதில் மகிழ்ச்சி வேண்டும் !

நண்பர்களே,

வணக்கம். Flu ஜூரம் ஒருபக்கமும், உடம்பு வலி இன்னொரு பக்கமும் போட்டுத் தாக்க- 4 நாட்கள் கட்டில் மாத்திரமே உற்ற தோழனாய்த் தோன்றியது ! So - இந்தப் பக்கமாய்த் தலை வைத்துக் கூடப் படுக்க இயலவில்லை ! Sorry guys !கடந்த பதிவிற்கு வந்திருந்த சுவாரஸ்யமான பல பின்னூட்டங்களுக்கும் பதில் தர இயலாது போனதில் வருத்தமே எனக்கு ! இயன்றளவு அவற்றை நாளை சரி செய்ய எண்ணியுள்ளேன் ! 

சந்தோஷச் சேதி : ஈரோடு புத்தகத் திருவிழாவில் நமக்கு ஒரு தனிப்பட்ட ஸ்டால் வழங்கியுள்ளனர் அமைப்பாளர்கள் ! ஆகஸ்ட் 3-15 நடக்கும் இவ்விழாவில் நமது ஸ்டாலின் எண் : 78. நமக்கொரு வாய்ப்பளித்த "மக்கள் சிந்தனைப் பேரவை"க்கு (புத்தக விழாவின் அமைப்பாளர்கள்)  நன்றிகள் பல ! ஸ்டால் பெற்றுத் தரும் முயற்சியில் ஈடுபட்ட நண்பர் ஸ்டாலினுக்கும் ; இதர ஈரோடு சகாக்களுக்கும் நமது நன்றிகள் :-)

'பில்டிங் ஸ்ட்ராங்கு ; பேஸ்மென்ட் வீக்கு ' என்ற கதையாக இன்னமும் லேசான தள்ளாட்டம் தொடர்வதால், விரிவான பதிவு நாளை ! இப்போதைக்கு - இதோ ஆகஸ்டின் முதல் வெளியீட்டின் ஒருகுட்டியான preview மாத்திரமே :


ஒரிஜினல் அட்டைப்படத்தினில் சின்னதாய்ப் பட்டி,டின்கெரிங்க் மட்டுமே செய்து தயாரித்துள்ளோம் ! முன்னட்டையில் கதையின் பெயர் வரும் இடம் metallic red foil-ல் மின்னிடும் !


GREEN MANOR 3 பாகங்களும் இந்த இதழோடு நிறைவாகின்றன ! (பரணிதரனும், இன்னும் சிலரும் பெருமூச்சு விடுவது கேட்காதில்லை ! )ஆனால் மாறுபட்ட கதைகளுக்கான நம் தேடல் நிச்சயமாய்த் தொடரும். அதிலும் 'பிரளயத்தின் பிள்ளைகள்' பாணியிலான கதைகள் / வரலாற்று நிஜங்கள் நமது தேடல்களில் பிரதான இடம் பிடிக்கும் என்பதும் உறுதி ! (கவலை வேண்டாம் ஆதி தாமிரா சார் !)

மாற்றங்கள் - மாறுபட்ட விமர்சனங்களோடு வருவது சகஜமே என்பது நாம் அறியாதது அல்லவே ?! ஆகையால் எழும் முதல் மாற்று சிந்தனையைத் தொடர்ந்து நமது பாதையையும் மாற்றிக் கொள்ள நினைப்பது நிச்சயம் சரியாகாது ! 'பிடித்தால் படியுங்கள் ' என்று சொல்லி விட்டு நடையைக் கட்டுவதற்குப் பதிலாய் - 'பிடித்தாலும்-பிடிக்கா விட்டாலும் உங்களை உப்பு மூட்டையாகவேனும் சுமக்கத் தான் போகிறோம் ; நீங்களும் படிக்கத் தான் போகிறீர்கள் ; ரசிக்கப் பழகத் தான் போகிறீர்கள்' என்பதே நமது பாணியாக இருக்கப் போகிறது ! 

ALL NEW SPECIAL தந்த போதனை ALL IS WELL என்பதே..!

புது இதழ்களுக்கான பணிகள் ஜரூராய் ஒரு பக்கம் நடந்து கொண்டிருக்க, அலுவலக (தற்காலிக) இடமாற்றம் கொண்டு வந்தது நமது புராதன file சிலவற்றை ! இங்கு பரிச்சயமான பெயர்கள் சில அந்த அலிபாபா காலத்து கோப்பிலும் தட்டுப்பட்டது சந்தோஷமானதொரு ஆச்சர்யம் ! பாருங்களேன் :




மொழிபெயர்ப்புப் போட்டியினைத் தொடர்ந்து "KAUN BANEGA GRAPHIC DESIGNER ?' என்ற டிசைன் திறமைகளை வெளிக்கொணரும் போட்டியைப் பற்றி ஹேஷ்யமாய் நாம் இங்கு பேசி இருக்கிறோம் ; ஆனால் முதன்முறையாக அதனை நடைமுறைப்படுத்திட எனக்கொரு சிந்தனை தோன்றியது ! வரவிருக்கும் நமது ஈரோடு புத்தக விழாவினில் நமது ஸ்டால் அலங்காரத்தின் பொருட்டு banner & printouts தயாரிக்கும் பணி நம் முன்னே காத்து நிற்கிறது ! ஆர்வமுள்ள நண்பர்கள் தம் கற்பனைகளுக்கு அழகாய் வடிவம் கொடுத்து - தம் கம்ப்யூட்டர் கிராபிக் திறமைகளையும் வெளிப்படுத்திட இது ஒரு வாய்ப்பாகுமே ? நமது தற்சமய நாயகர்களைக் கொண்டு ஒரு  colorful கதக்கழியை நடத்திக் காட்டுங்களேன் guys ? உங்கள் ஆக்கங்களை உயர் resolution -ல் நமக்கு மின்னஞ்சலாய் அனுப்பிடலாமே ? இன்றிலிருந்து ஆகஸ்ட் 1 வரைக்குள்ளாக அவகாசம் எடுத்துக் கொள்ளலாம் ; டாப் தேர்வுகள் ஈரோட்டில் பளிச்சிடுவதொடு ; நமது தளத்திலும் ; தொடரும் இதழ்களிலும் வெளியாகும் !  

Wednesday, July 17, 2013

மாற்றமே - உன் விலை என்ன ?

நண்பர்களே 

வணக்கம். "ஒரு நாணயத்தின் இரு பக்கங்கள் " ; "வானவில்லின் இரு முனைகள்" ; என்றெல்லாம் ஆங்காங்கே படிக்கும் போது - தேய்ந்து போன சொற்றொடர்கள் தானே என இரண்டாவது சிந்தனைக்கு இடம் தராது நகன்று கொண்டே இருப்பது வழக்கம் ! ஆனால் அதை நயம்பட ; துளிப் பாசாங்குமின்றி நண்பரொருவர் நடைமுறைப்படுத்திக் காட்டும் போது -  கண்டும் காணாமல் செல்வது சாத்தியமாகுமா ? 'புதிர் போட்டுப் பேசுகிறானே ?' என்ற உங்களின் புருவ உயர்த்தல்களுக்கு இதோ இக்கடிதம் விடை தரலாம் ! இன்று காலை நம்மை வந்து சேர்ந்த தாரமங்கலம் நண்பர் பரணிதரனின் கடிதம் உங்கள் பார்வைக்காக : 
வார இறுதியில் நண்பர்களோடு போனில் நான் பேசும் முயற்சிகளுக்கு ஜீவன் இருந்த சென்றாண்டு தவறாது அழைக்கும் பரணிதரனை, அதற்கும் முன்பாகவே அவர்தம் அழகான கையெழுத்துடனான வாசகர் கடிதங்கள் வாயிலாக எனக்குப் பரிச்சயமே! என்றைக்குமே நமது நிறைகளை சிலாகித்தும் ; குறைகளை குறைத்தும் எடை போடும் காமிக்ஸ் அபிமானி என்பதில் சந்தேகம் கிடையாது ! இன்று அவரது கடிதத்தைப் படித்த போதே எனக்குள் ஒரு இனம் சொல்ல இயலா உணர்வு !ஒவ்வொரு முறையும் என்னால் இயன்ற அளவு வெவ்வேறு காலணிகளுக்குள் புகுந்து, ஒவ்வொருவரின் மாறுபட்ட கோணங்களில் இருந்தும் நமது கதைகளைப் பார்த்திட முயற்சிப்பது எனக்கொரு பொழுது போக்கு ! ஆல் நியூ ஸ்பெஷல் இதழின் பணிகள் நடந்தேறும் போதும் இம்முயற்சிக்கு விடுமுறை தந்திடவில்லை என்பதால் நண்பர் பரணியின் ஆதங்கமான கடிதம் முழுவதுமாய் ஒரு ஆச்சர்யமாய் எனக்கு வந்திடவில்லை ! இத்தகைய விமர்சனங்கள் வரவும் வாய்ப்புள்ளது என்ற புரிதலோடு நான் இருந்தேன் என்ற போதிலும், வெள்ளந்தியாய் தன உள்ளக் கிடங்கை வெளிப்படுத்தியுள்ள பரணியின்  பாங்கு சிந்தனையைத் தூண்டியது நிஜமே ! 

"நான் 'C 'கிளாஸ் தான் ; எனது ரசனைகள் இதர நண்பர்களின் அளவுகோல்களுக்கு முன்னே சற்று குறைச்சலே ; ஆனால் நான் கண்ட காமிக்ஸ் ஆகாயம் இதுவே ; இது மாத்திரமே எனக்குப் போதும் ! "என்று துளியும் பூசி மெழுகாமல் நெற்றிப் பொட்டில் துப்பாக்கி வைக்கும் டெக்சைப் போல் காட்சி தரும் நண்பர் பரணிதரனுக்கு என்ன பதில் சொல்வது என்ற சிந்தனை என்னுள்  காலை முதல் !  ! இது போன்ற உணர்வுகளை - இந்த நயமின்றி, நறுக்குத் தெரித்தாற் போல வெளிப்படுத்திய இன்னும் சொற்ப மின்னஞ்சல்களும் வந்துள்ளன எனும் போது, எண்ணிக்கையில் மைனாரிட்டியாக இருப்பினும், இவர்களது ஆதங்கங்களுக்கும் ஆறுதல் அவசியமே என்பது புரிந்தது ! 

ரசனைகள் என்பன ஒவ்வொருவரின் சிந்தனைக்கும் ஏற்ப மாறும் எனும் போது - வெவ்வேறு ரகங்களை, வெவ்வேறு  முத்திரைகள் குத்தி பட்டியல்கள் போட்டு அடைப்பது சிரமமே  ! 'இவருக்கு ஸ்பைடர்-மாயாவி இத்யாதி தான் பிடிக்கும் ; அதைத் தாண்டிட விரும்ப மாட்டார் ' என்ற அடையாளங்களோ ; ' இவர் hi -tech களங்கள் கொண்ட கதைகளை மாத்திரமே ரசிப்பவர் ; "காதுலே பூ" சங்கதிகள் எடுக்காது " என்ற சிந்தனைகளோ நிச்சயம் சல்லிக்காசுக்குப் பெறாது ! நண்பர்களுள் பலர் செம versatile என்பதால் - ஒரு பக்கம் பிரெஞ்சில் வரும் லேட்டஸ்ட் கதைகளின் மொழிபெயர்ப்புகளைப் படித்த கையோடு - ஸ்பைடரின் 150 பக்க மெகா சாகசத்தையும் படிக்க விருப்பம் தெரிவிக்கிறார்கள் ! அவர்களைப் போன்ற பல்ரசனைப் பிரியர்களை திருப்திப்படுத்துவது எத்தனை சிரமமோ ; அத்தனை கஷ்டமே - நண்பர் பரணியைப் போல ஒரு வட்டத்தைத் தாண்டிட விருப்பமில்லா நண்பர்களுக்கான படைப்புகளை மாத்திரமே தந்திடுவதும் !  

இதில் உயர் ரசனை ; தாழ்வான ரசனை என்ற பேச்சுக்கே இடமில்லை பரணிதரன் சார் ....!  அடுத்தவருக்கு சுவையாகத் தோன்றும் பாயசம், நமக்குப் பாகற்காயை நினைவு படுத்தினால் அது குற்றமில்லை ! அதற்கென உங்களின் ரசனையை நீங்களே சாடுவதற்கு அவசியமில்லை ! வாழ்வில் எல்லாமே ஒரு பழக்கம்  தானே ? லார்கோவும், அவரது லியர்ஸ் ஜெட் விமானமும், ஒரு ஜூலையாகத் தானே நமக்குப் பரிச்சயம் ? ஷெல்டனின் ட்ரக்குகள் 2013-ன் நண்பர்கள் தானே ? அவர்களை ஏற்றுக் கொண்டு, அவர்களோடு பயணிக்கவும், ஜீவிக்கவும் பழகி விட்டோம் அன்றோ ? லார்கோ நாம் ஆண்டாண்டுகளாய் அறிந்து வைத்திருந்த துப்பறிவாளர் அல்லவே ? ஷெல்டன் ஒரு ரகசிய ஏஜென்ட் கிடையாதே ? இவர்களை ஏற்றுக் கொள்ளத் துவங்கும் போதே உங்கள் ரசனைகளின் விஸ்தீரணமும் விரிகிறது என்றாகாதா ? 

"கொலை செய்வீர் கனவான்களே" உங்களுக்கு அன்னியமாய்த் தோன்றுவதற்குக் காரணம் கண்டறிவதில் சிரமமில்லை ! 
  • அந்தப் புராதனம் சொட்டும் லண்டன் தான் கதைகளின் பின்னணி என்பது திகட்டல் # 1. 
  • சின்னச் சின்ன கதைகளாய் இருந்தது நோவு # 2. 
  • பிரதானமாய் - கதையில் ஒரு ஹீரோவோ ; ஒரு வில்லனோ  இல்லாமல் போனது சிக்கல் # 3 ! 
  • கனமான ஒரு கதைக்கு சிரிப்புச் சித்திரங்கள் போல் ஓவியங்கள் அமைந்தது குழப்பம் # 4 ! 
  • எல்லாவற்றிற்கும் மேலாக - ஒரு ஸ்பெஷல் எனும் போதெல்லாம் நாம் இது நாள் வரைப் பரிச்சயம் கொண்டுள்ளது "பளிச்" பெயர்களோடும் , நன்கு அறிமுகமான நாயகர்களோடுமே  ! ஆனால் ANS -ல் நாம் சந்தித்த ஆசாமிகளோ - நாடகங்களில் ராஜாவுக்கு சாமரணம் போடும் சைடு ஆர்டிஸ்ட்களைப்  போன்ற தோரணைக்குச் சொந்தக்காரர்களே ! இது தான் ஏமாற்றம் # 5! 

இவை ஒன்றாய் இணையும் போது எழும் ஏமாற்றம் - ஒட்டு மொத்தமாய் "புது பாணி" யின் மீது விழுவது புரிந்திட இயல்கிறது ! 

"தோட்டா தேசம் " எவருக்கும் சர்ச்சை தரா தேர்வு என்பதால், அதன் பொருட்டு கவலை இல்லை ! எஞ்சி இருப்பதோ - பிரளயத்தின் பிள்ளைகள்   - கிராபிக் நாவல் ! இதனைப் படிக்க நிச்சயம் கொஞ்சம் பொறுமை அவசியம் என்பதாலேயே, ANS தலையங்கப் பகுதியில் சின்னதாய் ஒரு "உஷார் நோடீஸ்" ஒட்டிட முனைந்திருந்தேன் ! ஒரு National Geographic சேனலின் படைப்பை - சிரிப்பொலிக்கும், கிரிகெட் மேட்ச் நடக்கும் சேனலுக்கும் நடுவிலே ரசிக்க முயல்வது அனைவருக்கும் சுலபமகாது என்பதை ஒத்துக் கொள்கிறேன் ! ஆனால் -  'இடர் மிகுந்த வாழ்வினில் நாங்கள் தேடி வருவது ஒரு மாற்றத்தை ; இங்கேயும் ஒரு வரலாற்று சோகத்தைச் சொல்லி சோதிக்க வேண்டுமா ?' என்ற நண்பர் பரணிதரனின் கேள்வியோடு நான் உடன்பாடு கொள்ளப் போவதில்லை ! செயற்கையாய் ஒரு சோகத்தை உருவாக்கி - நம்மில் புதைந்து கிடக்கும் கஷ்டங்களை நினைவுக்குக் கொணர்ந்து நம் மீதே ஒரு விதப் பச்சாதாபத்தைக் கொண்டு வரும் முயற்சியல்ல "பி.பி" நாவல் ! 'என்றோ ; எங்கோ அரங்கேறி முடிந்ததொரு சம்பவம் தானே - எனக்கென்ன அதிலொரு ஈடுபாடு ?' என்ற கேள்விக்கு - Auschwitz முகாமின் மியூசியத்தின் வாயிலில் பொறிக்கப் பட்டிருக்கும் வாசகங்களே பதில் சொல்லும் : "வரலாற்றை மறக்க எத்தனிப்போரை - அதனை மீண்டுமொருமுறை வாழ்ந்து அனுபவித்து நினைவு கூறச் செய்வது வாழ்க்கை நியதி"  என்று மொழிபெயர்க்கலாம் அந்த வரிகளை ! . 

உங்கள் மகனுக்கு நீங்கள் லக்கி லூக்கை புகட்டாவிடினும் 'நகைச்சுவை உணர்வைக் கற்றுக் கொடுக்கத் தவறி விட்டீர்களே அப்பா'  என்று உங்களைக் கோபிக்கப் போவதில்லை பரணி சார் ; டெக்ஸ் வில்லரின் அரிசோனாவுக்கு அவனே நேரில் சென்றும் என்றோ ஒரு நாள் பயணிக்க வாய்ப்புகள் உண்டு தான்  ; ஆனால் - வரலாற்றின் ஒரு கறும்புள்ளியைச் சொல்லும் ஒரு ஆக்கம் உங்கள் கைவசம் இருந்தும், அதனை உரிய வயதிலேயே எனக்குக் காட்டத் தவறி விட்டீர்களே ? என்று அவன் ஆதங்கம் கொள்ளும் நாள் வரும் பட்சத்தில் - உங்களிடம் அதற்கான பதில் இராது நண்பரே ! நித்தமும் வாழ்வு பல இன்னல்களுக்கு மத்தியிலானதே ; ஆனால் அதற்கென வரலாற்றை ஓரம் கட்டுவது சரியாகாது ! 

ரொம்பவே சீரியஸ் ஆக வேண்டாம் என்பதால் - உங்கள் பாணியிலேயே : "வரலாறு ரொம்பவே முக்கியம் அமைச்சரே !"  :-)

கவலை வேண்டாம் ; "மனதில் மிருகம் வேண்டும் " இதழோடு இந்த GREEN MANOR தொடர் நிறைவாகிறது ! அடுத்து வரவிருக்கும் "சிப்பாயின் சுவடுகள்" யதார்த்தம் + கொஞ்சமாய் flashback என்று நாம் இது வரை புகுந்திருக்கவே செய்யாத வியட்நாமில் சொல்லப்படும் ஒரு கதை ! நிச்சயம் "பிரளயத்தின் பிள்ளைகள்" பாணியில் இல்லாது, இது வேறொரு track -ல் இருக்கும் ! அதனைத் தொடர்வது உங்கள் அபிமான லார்கோ ; டெக்ஸ் ; டயபாலிக் ; டைகர் இத்யாதிகளே ! அப்புறம் 2014-ன் தேர்வுகளை ANS -ன் வெற்றி பெரிதாய் புரட்டிப் போடப் போவதில்லை நண்பரே ! மாற்றம் என்பது மாற்றத்திற்காக மட்டுமல்ல ; நமக்கு பயன் தரும் வகையிலும் இருக்க வேண்டும் என்பதில் கவனமாகவே இருப்போம். "புது பாணிகள்" என்பது அவ்வப்போது எழுந்திடும் "புது பேஷன்கள்" போலத் தானே ? பெல் பாட்டம் பாண்ட் போட்டோம் ; டைட்ஸ் போட்டோம் ; அதே போலத் தான் நம் பயணத்தில் இந்த மாறி வரும் ரசனைகளும். சிறிது சிறிதாய் புதுக் களங்களை நோட்டம் விடுவோம் ; யார் கண்டது - நமக்கு அங்கே ஒரு புதையலும்  காத்திருக்கலாம் அல்லவா ?

மற்ற நண்பர்களது நடை வேகம் துரிதமாய் இருப்பினும், உங்களால் அந்த வேகத்திற்கு ஈடு கொடுக்க இயலவில்லை எனினும் - நாங்கள் யாரும் உங்களைப் பின்னே விட்டுச் செல்வதாக இல்லை ! கொஞ்சம் கொஞ்சமாய் நீங்களும் வேக நடைக்குப் பழகிடும் நாள் வரும் போது நீங்களே சொல்லத் தான் போகிறீர்கள் - :I am a Complan Boy ! " என்று ! அந்த நாளும் நிச்சயம் தொலைவில் இல்லை ! உங்கள் வீட்டில் வசிக்கும் எங்களது நாளைய வாசகரையும் நலமாய்ப் பார்த்துக் கொள்ளுங்கள் ; (அனைத்து விதக்) காயங்களின் வலியும்  தீர எங்களின் பிரார்த்தனைகள் ! 

'வானவில்லின் இன்னொரு முனை' என்பதை நினைவு படுத்தும் விதமாய் - இதோ இன்று காலையே வந்து சேர்ந்த இன்னொரு நண்பரின் கடிதமும் : 

ஒவ்வொரு ஸ்பெஷல் இதழிலும் நான் பல்வகைக் கதைகளைப் புகுத்த முனையும் போதெல்லாம்   - 'வேண்டாமே இந்தக் கதம்ப மாலை' என்று நண்பர்கள் சிலர் ஆதங்கப்படுவது நாம் அறிந்ததே ! ஆனால் நான் விடாப்பிடியாக அந்தப் பாணியைத் தொடர்வது இயன்ற வரைக்கும் இது போன்ற சங்கடங்கள்  எழக் கூடாதென்ற முன்ஜாக்கிரதைகளினால் ! ஒரே கதை - ஒரு மெகா இதழ் எனும் போது - சேமிக்க ; பாதுகாக்க அது நிச்சயம் ஒரு அழகான இதழாக இருக்குமென்பதில் ஐயமில்லை ; ஆனால் நடைமுறைச் சிக்கல்கள் ஏராளம் அதனில் ! ஒரே கதை எனும் போது அந்தக் கதை பாணி ஏதோ காரணங்களால் சிலருக்குப் பிடிக்காது போயின், அந்த முழு இதழுமே அவரைப் பொறுத்த வரை துளிப் பிரயோஜனமில்லா குப்பையாகிடாதா ?! தவிரவும், லார்கோ வின்ச் போன்ற தொடரை ஒரு NBS போன்ற 400 பக்க இதழில் சோலோவாக வெளியிடும் பட்சத்தில் அந்தத் தொடரின் 60% காலியாகி விடும் ஒரே நொடியில் ! வெவ்வேறு நாயகர்களின் combo எனும் போது, ரசனைகள் மாறுபட்டாலும், அவரவர் ரசிக்க ஏதாவது இருந்திடுமே என்ற ஒரு சிறு திருப்தியே எனக்கு ! இதில் நிச்சயம் நண்பர்களுக்கு மாற்றுக் கருத்துக்கள் இருக்குமென்பது உறுதியே ; அவர்களது அபிப்ராயங்களுக்கு நிச்சயம் அவர்தம்  கண்ணோட்டங்களில் ஒரு வலுவான நியாயம் இருக்குமென்பதும் புரிகிறது ; ஆனால் XIII  போன்றதொரு single thread கதைத் தொடர் சிக்காத பட்சத்தில் - 'ஒரே கதை / ஹீரோ கொண்ட ஒரே மெகா இதழ்' என்பது சிரமமான சிந்தனையே ! 

Anyways, இதோ - ஒரே நாயகரின் ஒரு ஸ்பெஷல் இதழின் (தாமதமான) விளம்பரம் :


பாரிசில் நமது இதழ்கள் !! நண்பர் ப்ரபானந்தின் முயற்சிகளில் !



இவ்வாரத்து இந்தியா டுடே (தமிழ்) இதழில், காமிக்ஸ் பதிவுகள் பற்றிய 2 பக்கக் கட்டுரை வந்திருந்தது நமக்கெல்லாம் சந்தோஷமான சங்கதியே ! சவலைப் பிள்ளைகளான காமிக்ஸ் ரசிகர்களின் மீதும் வெளிச்சம் போடும் பணியை ஒரு முன்னணி ஊடகம் செய்ய முன்வரும் போது நமது நன்றிகள் அவர்களுக்கு உரித்தாகுக! இதன் பொருட்டு ஒரு துளியாகவேனும் காமிக்ஸ் ஆர்வம் துளிர் விடும் பட்சத்தில் நமக்கெல்லாம் குதூகலம் தானே ?! Take care folks ! Catch you soon !

Thursday, July 11, 2013

ஆடிக்கு முன்பே ஒரு offer !

நண்பர்களே,

வணக்கம். 100-வது பதிவின் சந்தோஷம்  + ANS விமர்சனங்களென   இவ்வார நாட்கள் அனைத்துமே supercharged ஆக இருந்துள்ளன !  ஒரு இதழை சிறப்பித்திட "பெரிய பெயர்கள்" அவசியமன்று -நல்ல கதைகள் இருந்தாலே போதுமென சந்தேகமறப் பதிவு செய்துள்ளீர்கள் guys ! Many many thanks ! வலைக்கு அப்பாலுள்ள நம்  "கடுதாசி நண்பர்களும் " இந்த இதழுக்கொரு thumbs up கொடுக்கும் பட்சத்தில் - முழு நிறைவாக இருக்கும் ! இந்தப் பக்கங்களுக்குள் நுழைந்தாலே, உங்களின் positive energy மின்னலாய்த் தொற்றிக் கொள்கிறது - மாயாவிக்குள் மின்சாரம் பாய்வது போல் ! மௌனப் பார்வையாளர்களாய் இருந்திடப் பிரியப்பட்டிருந்த  நண்பர்களையும் களத்திற்கு ஈர்த்து வந்துள்ள பெருமை உங்களின் இந்த அசாத்திய நேசத்திற்கும் , காமிக்ஸ் மீதுள்ள உங்களின் வற்றாக் காதலுக்குமே சாரும் guys  ! Awesome !! 

And to all our new entrants - welcome guys to our Lion's Club ! (கார்த்திக்கின் குரலில் ; கிரீன் மேனரின் பட்லர் தாமசின் modulation -ல் :-))

பொதுவாக ஒவ்வொரு முறையும் தொடரும் 3 மாதங்களுக்கான கதைகளின் review  ; மொழிபெயர்ப்புப் பணிகள் என்று திட்டமிடுவது வழக்கம். அவ்வேளைகளில் முதலில் தலைக்குள்ளே தோன்றுவது : 'லார்கோ ? டைகர் ? லக்கி லூக் ? ' டெக்ஸ்? ' என்ற "முரட்டுக் கைகளின் " பெயர்களே..! ஆனால் - சென்றாண்டின் கடைசிப் பகுதியினில் பாரிசில் நம் படைப்பாளிகளைச் சந்தித்து, அவர்களது சேகரிப்பிலிருந்து கைக்குச் சிக்கிய சாம்பிள்களை எல்லாம் வாங்கி பைக்குள் அடைக்கும் ஒரு தருவாயில் கவனத்தை ஈர்த்த GREEN MANOR - மௌனமாய் என்னுள் ஒரு முத்திரை பதித்திருந்தது. அன்று முதல் ஒவ்வொரு quarter -க்கான(!!!) கதைத் தேர்வுகளின் போதும் -  'இதனை எப்போது ரிலீஸ் செய்யலாம் ?' என்ற எண்ணம் மேலோங்கியே இருக்கும் ! ANS அதற்கொரு வாகான சந்தர்ப்பம் தந்திட,மீதச் சங்கதிகள் தான் நாம் அறிவோமே ?! என்ன தான் கதைகள் மாறுபட்டு இருந்தாலும், இந்தச் சிறுகதைப் பாணியை எவ்விதம் ஏற்றுக் கொள்வீர்களோ என்ற லேசான மிரட்சி என்னுள் இருந்தது நிஜமே ! But விரிவாகும் நம் ரசனைகளின் எல்லைகளுக்கு இதெல்லாம் ஒரு பொருட்டே அல்லவென்று மண்டையில் ஒரு குட்டு வைத்தாற் போல பதிவு செய்துள்ளீர்கள் ! 

சென்ற பதிவில் பின்னூட்டங்கள் 300-ஐத் தாண்டி விட்டதால்- அங்கு மேற்கொண்டு கருத்துக்களைப் பகிர்வது செல்போன் மூலம் பங்கேற்கும் நண்பர்களுக்கு மிகச் சிரமம் என்பதாலும், Kaun Banega Translator - 2-ன் இரண்டாமிட மொழிபெயர்ப்பை வெளியிட ஜகா வேண்டும் என்பதாலும், ஒரு புதிய பதிவை துவக்குவோமே என்று தோன்றியது !  So - ஒன்றுக்கு ஒன்று free என்ற ஆடி மாத பாணியிலான இணைப்பாக ; ANS பற்றிய பதிவின் தொடர்ச்சியாக - இப்பதிவைப் பார்த்திடலாம் !மேற்கொண்டு எழுத நான் அவகாசம் எடுத்துக் கொள்ளுமுன் நண்பர் சூப்பர் விஜயின் மொழியாக்கத்தை இங்கே upload செய்து விடுகிறேனே ? விஜய்யின் கையெழுத்தும் அழகாகவே உள்ளதால் - அதனை ஒரு முறை டைப்செட் செய்வதற்குப் பதிலாய் 'அப்படியே' வலையேற்றி உள்ளேன் ! படிக்க சிரமமாக இருப்பின், நாளை தட்டச்சு செய்யப்பட பிரதியினை இங்கு சரி செய்து விடலாம் ! இதோ : ALL NEW SPECIAL -ல் பக்கம் 34-40 வரையிலான கதைக்கு இன்னுமொரு மொழிபெயர்ப்பு !  







ஆபீஸ் ரூமை ஒதுக்கும் போது கிட்டியது ! 15 ஆண்டுகளுக்கு முந்தைய வாசகப் படைப்பு ! ஊரின் பெயரைக் கவனியுங்களேன் ! 
NBS -க்குப் பின்னதாக எங்களை நிறையவே வேலை வாங்கிய இந்த ANS -ன் making -ல் நிறையவே சுவாரஸ்யம் இருந்தது ! ஜாலியாய் அதைப் பற்றியும் இங்கே பங்கிட்டாலென்னவென்று தோன்றியது :

அட்டைப்படம் வடிவமைக்கும் பணி எப்போதுமே ஏகப்பட்ட நேரம் விழுங்கும் ஒரு வேலை. நமது டிசைனர் பொன்னன் இன்ன பிற வேலைகளுக்கு மத்தியில் ; எனது எண்ணற்ற போன் நினைவூட்டல்களுக்கும், தளரா நடை போடும் மைதீனின் நச்சரிப்புக்குமிடையே ஒரு டிசைனைப் போட்டுக் கொடுப்பது ; பின்னர் அதில் நான் 108 மாற்றங்கள் சொல்வதென இழுக்கும் ஜவ்வு மிட்டாய்ப் படலம்.

டயபாலிக்கின் பின்னட்டைப்பட டிசைனினில் அமர்க்களம் செய்திருந்த நமது வாசக நண்பர் ஷண்முகசுந்தரம், ANS அட்டைப்படப் பொறுப்பை ஏற்றுக் கொள்ள ஆர்வமாய் இருந்ததால், நானும்  சந்தோஷமாய் தலையாட்டினேன். நண்பரும் வெகுத் துரிதமாய்,  அழகாய் ஒரு ராப்பரை அனுப்பி இருந்தார் (பக்கம் : 5-ல் வரும் அந்தப் பச்சைப் பின்னணிக் குதிரை வண்டி டிசைனோடு ) ; ஆனால் அவரது வழக்கமான super duper பாணிக்கு ஒரு மாற்று கம்மியாக அந்த டிசைன் இருப்பது போல் எனக்குப் பட்டதால், இன்னும் ஒரு முயற்சி செய்து பார்ப்போமே என்று அபிப்ராயப்பட்டிருந்தேன். ஆனால் நண்பரின் பணிச் சூழல் அவருக்குப் போதிய அவகாசத்தை வழங்காததால் - அவரை மேற்கொண்டு சிரமத்திற்கு ஆளாக்க வேண்டாமே என பொன்னனின் கதவுகளில் மத்தளம் தட்டத் தொடங்கினோம் !
நண்பர் ஷண்முகசுந்தரத்தின் stylish ஆனதொரு  முயற்சி ! 
பொன்னனுக்கு இந்த GREEN MANOR கதாப்பாத்திரங்களைப் பார்க்கும் பொது கோமாளிகளைப் போல் தோன்றியதோ என்னவோ - கௌபாய் ரெட் டஸ்ட் -க்கு முன்னட்டைக்கு promotion கொடுத்து  வித விதமாய் போஸ் கொடுக்கச் செய்திருந்தார் ! சமீப மாதங்களாய் கௌபாய் கதைகளின் ஆதிக்கம் மிகுந்து வரும் வேளையில், ANS இதழிலும் ஒரு குதிரைக்கார ஆசாமி அட்டையில் வேண்டாமே என தோன்றியது எனக்கு ! அப்புறமே கிரீன் மேனரின் butler-ஐ அட்டைக்குப் பயணமாக்கினோம் ! பாருங்களேன் சில முயற்சிகளை :




டிசைன் # 3 - ஒரிஜினலின் ஈயடிச்சான் காப்பி என்பதாலும், சற்றே dull வர்ணங்களில் இருக்கும் சங்கதி என்பதால்  - அச்சில் இன்னமும் அழுத்தம் கூடும் போது ரொம்பவே இருண்டு விடுமென்று எனக்குப் பட்டதால் - பின்னணியை 'பளிச்' வர்ணமாய் மாற்றிடச் சொன்னேன். கதையின் தலைப்பிற்கேற்ப பச்சையாய் மாற்றிட தோன்றியது தான் - ஆனால் Vivid Green எனும் தனிப் பச்சை மசியைக் கொண்டு எக்ஸ்ட்ராவாக ஒரு கலர் அச்சிடாவிட்டால் - நாம் எதிர்பார்க்கும் richness கிடைக்காது என்பதே சிக்கல் . (வழக்கமான அச்சுப் ப்ராசசில் மஞ்சள் + ப்ளூ கூட்டணியில் கிடைக்கும் கலவையே - பச்சை நிறம் ). So bright red திரைசீலைகளின் மத்தியில் கொலை உபகரணங்களோடு butler காட்சி தந்ததன் பின்னணி இதுவே !

அட்டைப்பட கூத்து நடந்தேறும் வேளையில் -சென்றாண்டு ஆண்டுமலரின் ராப்பரில்  'பர்த்டே லயன்'  இடம்பெறாது போய், நான் டின் வாங்கிய அனுபவம் திடு திடுப்பென நினைவுக்கு வந்ததால் - விடாதே-புடி என்று திருவாளர் சிங்கத்தையும் அட்டையில் இணைத்தோம் ! செய்யும் பணிக்குப் பணம் பெறுகிறார் என்ற போதிலும், நமது 'ஒரே இரவில் ஒரு லட்சம் மாற்றங்கள் ' பாணியை முகம் சுளிக்காது ஏற்றுக் கொள்ளப் பழகி விட்டார் பொன்னன் என்றே சொல்ல வேண்டும் :-)

Monday, July 08, 2013

நம்பர்களும் ..,நண்பர்களும்...!


நண்பர்களே,,  

வணக்கம். நம்பர்களுடனான நமது காதல் நித்தமும் தொடர்வதால் இந்தக் கணம் சற்றே விசேஷமாய்த் தோன்றுகிறதோ - என்னவோ ! பதிவு எண் : 100 ; மூன்றிலக்கங்களின் முதல் படி என்பதால் 99-க்கும் - 101-க்கும் இல்லாத மரியாதை இடையிலிருக்கும் திருவாளர் 100-க்கு சரளமாய்க் கிட்டுகிறது போலும் ! So இந்தப் பதிவை மாமூலானதொரு சமாச்சாரமாக்கிடாமல் 'விசேஷமாய்' ஏதேனும் அறிவிப்போடு வரச் செய்தால்  தேவலையே என நண்பர்கள் ஆங்காங்கே பதிந்திருப்பதைக் கவனிக்கத் தான் செய்தேன் ! ´'விசேஷ அறிவிப்பானது ' :

  • "மின்னும் மரணத்தின்' மறுபதிப்பு பற்றியதாகவோ ;
  • லயனின் 30-வது ஆண்டுமலர் பற்றியதாகவோ ;
  • அல்லது 2014-ன் வெள்ளோட்டங்கள் பற்றியதாகவோ 

இருத்தல் தேவலை என்ற உங்களது mind voices எனக்குக் கேட்காமலில்லை ! ஆனால் இந்தக் கணத்திற்கு மெருகூட்டும் ஒரே காரணத்தைக் கையில் எடுத்துக் கொண்டு, எங்கோ தொலைவில் நிற்கும் சங்கதிகளின் மீது "சும்மாக்காச்சும்" இப்போவே வெளிச்சத்தைப் பாய்ச்ச முயற்சிப்பதை விட, மிக அருகாமையில் அடுத்த சில மாதங்களுக்குள் நம்மை எதிர்கொள்ளவிருக்கும் தீபாவளியைப் பற்றிப் பேசினால் என்னவென்று தோன்றியது எனக்கு !

நிஜத்தைச் சொல்வதானால் - இப்போதெல்லாம் மாதா மாதம் ரூ.100 / ரூ.200 என்று உங்கள் பர்ஸ்களுக்கு கண்ணி வெடி வைத்துக் கொண்டிருக்கும் இவ்வேளையில், தீபாவளி மலர் என்று தனியாகவொரு track வேண்டாமே என்பது தான் எனது எண்ணமாக இருந்தது ! ஆனால் ஒவ்வொரு சந்திப்பின் போதும், உங்களில் நிறையப் பேர் "தீபாவளி மலர்' இல்லாமல் நமது அட்டவணையில் ஒரு கிக் இல்லையே என்று ஆதங்கப்படுவதைக் கவனிக்கத் தான் செய்தேன் ! ஏறத்தாள 30 தீபாவளிகளுக்கு முன்பை ஒரு 'அக்மார்க்' உப்புமா இரும்பு மனிதன் ஆர்ச்சியின் கதையோடு துவங்கிய நமது தீபாவளிக் காதல்கள் வயதெனும் அரணையும் மீறி, இன்னமும் ஜீவனோடிருப்பது நிஜமாய் எனக்கு ஆச்சர்யமே ! பெரிய சைஸ்கள் ; பருமனான பாக்கட் சைஸ்கள் ; பல கதைக் combos ; சிங்கள் ஷாட் sagas ; என்று நிறைய நாம் பார்த்து விட்ட போதிலும், இன்றளவும் நமது 1987 லயன் தீபாவளி சூப்பர் ஸ்பெஷல் -ன் வெற்றியை வேறு எந்தத் திருநாளும் நமக்குக் காட்டியதில்லை ! 532 பக்கங்கள் ; 12 கதைகள் ; பாக்கட் சைஸ் - ரூ.10/ விலையில் என்பதை இன்று அசை போடும் போது, நாற்கால்ப் பாய்ச்சலில் குதி போடும் விலைவாசிகளின் தாக்கத்தை நன்றாகவே உணர முடிகிறது ! அன்று பத்து ரூபாயில் - 25% ஏஜென்ட் கமிஷன் கொடுத்த பின்னும் சாத்தியமான தயாரிப்பு budget - இன்று நமது வண்ண அவதாரில் வெறும் 10 பக்கங்களுக்கே போதாது ! Anyways , அக்டோபர் 1987 "சிங்கத்தின் சிறுவயதில்" பகுதியினில் கூப்பிடு தொலைவில் இருப்பதால் - மலரும் நினைவுகளை அங்கே தொடர்வதே உசிதம் !

Getting back on track -  இந்தாண்டு வரவிருக்கும் தீபாவளிக்கு நமது லயன்-முத்து அட்டவணையில் லார்கோவின் ஒரு ருத்ரதாண்டவம் மாத்திரமே திட்டமிடலில் இருந்தது. "ஆதலினால் அதகளம் செய்வீர்" திரைப்படமாகவும் வந்ததொரு action சரவெடி என்பதால் - அதனையும், துணைக்கு சன்ஷைன் லைப்ரரியில் மறுபதிப்பு ஒன்றையும் november-ல் தட்டி விட்டால் போதுமென்று நினைத்திருந்தேன் ! இடைச்செருகலாய் ஒரு தீபாவளி மலரைப் புதிதாய்த் திட்டமிட்டு, மீண்டுமொருமுறை இதற்கான பணம் அனுப்பச் சொல்லி உங்களை சிரமத்திற்கு உள்ளாக்குவதிலும் எனக்கு உடன்பாடில்லை ! தவிரவும் நமது front office பணியாளர்களுக்கு அவ்வப்போது நான் தந்து வரும் தலைநோவை இன்னமும் அதிகரித்திட வேண்டாமே என்ற தயாள சிந்தையும் பின்னணியில் உண்டு ! லயன்-முத்து சந்தாத் தொகை ரூ.1320 என்று சொல்லி வைத்தேன் முதலில் ; அப்புறமாய் காமிக்ஸ் க்ளாசிக்ஸ் பிரதிகளுக்கென ரூ.540 வரும், அதனையும் சந்தாக்களில் இணைத்துக் கொள்ளுங்கள் என்றேன் ; தொடர்ந்த மாதங்களில் - காமிக்ஸ் க்ளாசிக்ஸ் என்பன இனி சன்ஷைன் லைப்ரரி என்ற லேபிலோடு வருமென்று தெரியப்படுத்தினேன் ; அப்புறமாக +6 உதயம் - ரூ.375 சந்தாவோடு என்றும் சொல்லி வைத்தேன் ! நமது காமிக்ஸ் 'கலாச்சாரங்களுக்கோ' ; செல்லும் பாதையில் ஒரு நூறு புது சிந்தனைகளுக்கு இடமளிக்கும் பாங்குகளுக்கோ  - நம்மவர்கள் பரிச்சயமற்றவர்கள் என்பதால் ஒவ்வொரு முறையும், ஏதாவதொரு மாற்றத்தையும் அவர்களுக்குத் தெரிவிக்கும் சமயங்களில் அவர்களது மிரண்ட விழிகள் எனக்குள் சின்னதாய் ஒரு சங்கடத்தை உருவாக்கும் !  -இந்நிலையில், 'தீபாவளி மலர்' ; இதற்கென புது புக்கிங் ; புது பண வரவுகள் என்று சொல்லி அவர்களிடத்தில் - 'இவரென்ன பாஸா ? இல்லே லூசா ?" என்ற சந்தேகத்தை ஏற்படுத்திட வேண்டாமே என்ற சிந்தனை ஓடியதால் - ஆபத்பாந்தவனாய் உதவிக்கு வந்தது நமது +6 !

எந்தவொரு அழுத்தமான திட்டமிடலும் இல்லாது அவ்வப்போது மனதில் தோன்றுவதைச் செயலாக்கிட ஒரு மார்க்கமிருந்தால் தேவலை என்பதே +6-ன் பின்னணி என்பதால் இந்தத் திடீர் தீபாவளி மலர் ஆவலைப் பூர்த்தி செய்யக் கச்சிதமாய் அது suit ஆகுமென்று புரிந்தது ! எனினும் இந்தாண்டு இன்னமும் எஞ்சியுள்ள வெளியீடுகளின் எண்ணிக்கை கணிசமாகவே பாக்கியுள்ளன எனும் போது ரொம்ப flashy ஆகவோ ; ஒரு மெகா இதழாகவோ திட்டமிட வாய்ப்புகளில்லை என்பதையும் நினைவில் இருத்திடும் அவசியமும் முன்னின்றது ! பெரிதாய் - விரிவாய் ஒரு canvas இன்றி 'சிக்' கென ஒரு சித்திரமே சாத்தியம் என்ற புரிதலோடு சிந்திக்கலானேன் !  ஆங்காங்கே, அவ்வப்போது நண்பர்கள் தெரிவிக்கும் சின்னச் சின்ன ஆசைகளுக்கு on the spot பைசல் செய்வதைக் கடைபிடிக்காது - ' உரிய சமயம் வரட்டுமே' என்ற பொறுமை காப்பதன் மூலம், உங்களில் பலரின் பொறுமைகளுக்கும் சோதனைகள் வைப்பதை நான் அறியாதில்லை ! எனினும், அந்த நியாயமான கோரிக்கைகள் நிச்சயமாய் கிடப்பிற்கு அனுப்பப்படுவதில்லை ! கொஞ்சகாலமாகவே நமது டெக்ஸ் வில்லரின் "அந்த" சைஸ் இதழொன்று வேண்டுமென்ற கோரிக்கை எழுவதும் ; நான் அதனைக் கண்டும், காணாதும் விடுவதும் நீங்கள் மறந்திருப்பினும், நான் மறக்கவில்லை ! So  - இந்தாண்டு "ரேஞ்சரோடு தீபாவளி' கொண்டாடத் தயாராகுங்கள் ! உங்கள் அபிமான டெக்ஸ் & கோ. ஒரு 456 பக்க black & white இதழில்,2 முழு நீள சாகசங்களோடு ரூ.100/ விலையில் அதிரடி செய்யக் காத்திருக்கின்றனர் ! "நீதியின் நிழலில்" + "மரண தேசம் மெக்சிகோ" இரு மாறுபட்ட கதைக் களங்கள் + ஓவியப் பாணிகளும் கூட ! சமீபமாய் சற்றே 'அமானுஷ்ய' ரூட்டில் சவாரி செய்து வந்து டெக்ஸ் & டீம் இம்முறை மோதுவதோ 2 கால் எதிரிகளோடு மாத்திரமே ! இந்த இதழின் highlight ஆக டெக்ஸ் ரசிகர்களுக்கு ஒரு pleasant surprise -ம்  காத்துள்ளது ! அது என்னவாக இருக்குமென்பதை உங்கள் யூகங்களுக்கே விட்டு விடுவோமே - இப்போதைக்கு ! ('இந்தாண்டு டெக்ஸ் சற்றே ஓவர்டோஸ் '  என்ற mind voice ஒலித்திடும்  நண்பர்களுக்கு : 2014-ல் இரவுக் கழுகார் 2 அல்லது 3 கதைகளில் மாத்திரமே தலை காட்டுவார் ! )
தீபாவளியை black & white -ல் கழிய அனுமதிக்க வேண்டாமே என்ற அவாவில், நவம்பரில் நமது +6-ன் இன்னொரு இதழையும் வண்ணத்தில் கொணர உத்தேசித்துள்ளேன் ! புதியதொரு அறிமுகம் என்பதால் - அதற்கான ஏற்பாடுகளை முழுமைப்படுத்தி விட்டு 'start music ' சொல்லலாமே ?! So தொடரும் வாரங்களில் அதைப் பற்றியதொரு பதிவும், அறிவிப்பும் காத்துள்ளது !

"3 மாதங்களுக்குப் பின் வரும் தீபாவளி மலர் அறிவிப்பெல்லாம் ஒ.கே. ; இந்த மாதம் வரவேண்டிய ALL NEW ஸ்பெஷல் என்னாச்சு ?" என்ற உங்களின் logical கேள்வி எழுவதை உணர்கிறேன் ! திடீர் பயணமாய் நான் ஸ்பெயின் நாட்டிற்குக் கிளம்பிட வேண்டிப் போனதால் - A.N.S அச்சுப் பணிகளைத் துவக்கி விட்டு பெட்டியைத் தூக்கி விட்டேன் ! இந்தப் பக்கங்களை நான் எனது டயரியில் எழுதுவது கூட பார்சிலோனா செல்லும் பிசாசு வேக ரயிலில் - அருகாமையிலிருக்கும் ஒரு முதியவரின் கேள்விக்குறியான பார்வையினில் அமர்ந்தபடியே !  தொடர்ச்சியாய் பணிகளைப் பூர்த்தி செய்து இன்று (8-ஜூலை) சந்தாப் பிரதிகள் அனைத்தையும் அனுப்பி விட்டார்களென மைதீன் update செய்துள்ளான் ; so நாளை உங்களது கூரியர் அலுவலகங்களைத் தொடர்பு கொண்டிடலாமே ?!  இதோ - A.N.S -ன் அட்டைப்படம் !

வழக்கம் போலவே, இங்கு தெரியும் வர்ணங்களை விட அழுத்தமாய் அட்டைப்பட அச்சில் தெரிந்திடும் ; குறிப்பாக பின்னணிச் சிகப்பில் !பின்னட்டையில் 4 கதைகளின் preview -ம் இருந்தால் தேவலையே என தோன்றியதால் - சின்னச் சின்ன சித்திரங்களைத் தவிர்த்திட இயலவில்லை ! முன்னட்டை ஒரிஜினல் படைப்பே - பின்புலங்களிலும், வண்ணக் கலவைகளிலும் மாற்றங்களோடு ! இம்முறை மறவாமல் அட்டையில் நமது birthday boy -க்கு இடமளித்து விட்டோம் !
அப்புறம் நமது "KAUN BANEGA TRANSLATOR - சீசன் 2" போட்டியின் வெற்றியாளரை அறிவிக்கும் வேளையும் இதுவன்றோ ?! (ஏதோ ஒரு மாமாங்கத்தில் அது நடந்தது போன்ற பிரம்மை எனக்கு மாத்திரம் தானா ?) 36 நண்பர்கள் இதில் பங்கேற்க ஆவல் தெரிவித்திருந்தனர் ; ஆனால் மொழியாக்கம் செய்து அனுப்பியோரின் எண்ணிக்கை குறைவே !  நம்பர்களில் குறைவிருந்த போதிலும், நண்பர்களின் முயற்சிகளின் தரத்தில் குறை இல்லை ! வந்திருந்த ஆக்கங்களுக்குள் சிறந்ததாய் எனக்குப் பட்டது நண்பர் கார்த்திக் சோமலிங்காவின் எழுத்துக்களே ! சென்ற முறைத் தவற விட்ட முதலிடத்தை இம்முறை 'லபக்'கிய கார்த்திக்கிற்கு காங்க்ரத்ஸ் ! இரண்டாமிடத்தைப் பிடித்துள்ளது அன்றைய சுமார் மூஞ்சி குமார் என்ற ; இன்றைய சூப்பர் விஜயும் தான் !  Congrats too vijay ! கார்த்திக்கின் மொழியாக்கத்தை ANS -ல் பார்த்திட நாளை சாத்தியமாகும் என்பதால், இரண்டாமிடத்து (விஜயின்) translation -ஐ புதனன்று நான் ஊருக்குத் திரும்பியதும் ஏதாயினும் ஒரு தளத்தில் upload செய்து அதற்கான link இங்கு தர ஏற்பாடு செய்கிறேன் ! சென்ற போட்டிக்கான மதியில்லா மந்திரியின் சிறு கதைப் பாணி ஒரு விதமென்றால், இம்முறை வழங்கப்பட்டிருந்த Green Manor  முற்றிலும் மாறுபட்ட genre ! போட்டியில் கலந்து கொண்ட அனைவருமே அழகான முயற்சிகள் எடுத்துக் கொண்டிருந்தது ரசிக்கச் செய்தது ! A pat on the back guys ! Great job all...!

ANS -ன் பெரும்பான்மைப் பக்கங்களை ஆக்ரமிக்கும் "பிரளயத்தின் பிள்ளைகள்" கிராபிக் நாவலுக்கு உங்களின் response எவ்விதமென்று அறிந்திட நிஜமாய் ஆவலாய் உள்ளேன் ! வழக்கமான கதை பாணியோ ; இரண்டாம் உலக யுத்தத்தின் கோரங்களை வெளிச்சம் போட்டுக் காட்டி, நமது அனுதாபங்களைச் சம்பாதிக்கும் முயற்சியோ அல்ல இது ! ஒரு ஒடுக்கப்பட்ட இனத்தின் வாழ்க்கைப் பயணத்தில் யுத்தமெனும் பிரளயம் கொண்டு வரும் மாற்றங்களை ஒரு பயணமாய் சொல்லும் இந்தப் பக்கங்களுக்கு நாம் போடப் போகும் மார்க்குகள் என்ன ? Fingers crossed !

ரயில் பயணத்தின் போது தலைக்குள் ஓடிய சிந்தனைகளுள் -"அவ்வப்போது நான் காணாமல் போகிடும் தருணங்களில் இந்தப் பக்கத்தில் ஒரு சோம்பல் நிலவாதிருக்க என்ன செய்யலாம் ? " என்ற   எண்ணமும் சேர்த்தி ! நான் 'லீவு போட்டிடும்' வேளைகளில் மாத்திரம் உங்களில் ஒவ்வொருவராய்  turns எடுத்துக் கொண்டு இங்கு எழுதினால் எவ்விதமிருக்கும் ? காமிக்ஸ் பற்றிய தம் அனுபவங்கள் ; படித்து ரசித்த  (வேற்று மொழிப் படைப்புகளாக இருப்பினும் ) காமிக்ஸ்கள் பற்றி எழுதினால் - தொடர்ச்சியாய் எனது புராணங்களையே படித்து அயர்ச்சியை சந்திக்கும் நண்பர்களுக்குமொரு சின்ன மாற்றமாக இருந்திட வாய்ப்பாகுமே ? What say guys ? Worth a try ?

இந்த "100 பதிவுப் பயணம் " கொண்டாடப்பட வேண்டிய தருணம் என்றெல்லாம் நான் பகல் சொப்பனங்களில் ஆழ்ந்திருக்கவில்லை ! நமது பேங்க் விபரங்களை மாத்திரமே தாங்கி வந்த பதிவுகள் ; துவக்கத்தில் எழுதிய பல 10 வரிப் பதிவுகளும் இந்த 100-க்குள் ஐக்கியமென்பது நாம் அறிந்தது தானே ?! ஊர் கூடித் தேர் இழுக்கும் ஒரு அரங்கில் இளைப்பாற ஒரு இனிய தருணமாக இதைப் பார்ப்பதே பொருத்தமன்றோ ? ஆனால் கடந்த 18 மாதங்களில் என் வாழ்வில் ஒரு அங்கமாகி விட்ட இந்தப் பக்கத்தை - எனக்கே என்னைப் பல விதங்களில் அறிமுகம் செய்து வைத்துள்ளதொரு கருவியாய்ப் பார்க்க எனக்கு முடிகின்றது ! இங்கு பதிவிட்டுள்ள / பதிவிட்டு வரும் ஒவ்வொரு நண்பரின் எழுத்துக்களிலும் உணர சாத்தியமாகும்  காமிக்ஸ் காதல் ; சிந்தனைகளின் முதிர்ச்சி - ஒவ்வொரு வகையில் எனக்கு நிறையக் கற்றுத் தந்துள்ளதென்று சொல்வதற்கு  அவையடக்கம் காரணமாகாது ! "சிங்கத்தின் சிறு வயதில்" பகுதியைத் தொகுப்பாய் வெளியிட நினைப்பதை விட, இங்கு இந்த 4.75+ லட்சப் பார்வைகள் நல்கியுள்ள எண்ணிலடங்கா சந்தோஷத் தருணங்களை ; நகைச்சுவை மேளாக்களை ; ஒரு புத்தகம் ஆக்கிடும்  பட்சத்தில் - surefire ஹிட் ஆகுமென்பதில் ஐயமேது ?

இந்தப் 18 மாதங்களில் தான் எத்தனை - எத்தனை உணர்ச்சிப் பிரவாகங்கள் ? ஒரே நாளில் 2200+ பார்வைகள் என்ற உச்சம் ; 350+ பின்னூட்டங்கள் கொண்ட எக்கச்சக்கப் பதிவுகள் என்று அசத்திய அசாத்தியக் காமிக்ஸ் நேசம் ; அதே சமயம் ஒரு முழுப் பதிவையும், அது சார்ந்த பின்னூட்டங்களையும் மொத்தமாய் நீக்க நேர்ந்த சங்கட தினம் ; புதிதாய் நண்பர்கள் பலரை சம்பாதித்த சந்தோஷ வேளைகள் ; ஏதோவொரு மனத்தாங்கல் காரணமாய் அவர்களில் சிலர் தூரத்தை நாடிச் சென்ற துரதிர்ஷ்ட நேரங்கள் ; வெற்றிகளை வெறியோடு கொண்டாடிய நாட்கள் ; பிடித்தமில்லாது போன தங்கக் கல்லறைகளை துவைத்துத் தொங்கப் போட்ட சமயங்களென   - ஒரு 'சின்னப் புள்ளைங்க ' சமாச்சாரத்தின் பின்னே இத்தனை அனுபவங்கள் கதம்பமாய்ப் புனைந்திருப்பதை யார் தான் நம்புவர் ? அனுதினமும் இங்கு ஏதோ ஒரு வகையில் சந்தோஷத்தைப் பரப்பிட உதவிய அத்தனை 'சன்ஷைன் நெஞ்சங்களுக்கும் ' ஒரு salute ! ஏதோ ஒரு வகையில் உங்கள் ஒவ்வொருவரையும் எட்டிட நான் முயற்சித்துள்ளேன் ; அதில் வெற்றி கண்டேனா என்ற ஆராய்ச்சியை விட - எங்கோ சறுக்கி நண்பர்கள் சிலரை சங்கடப்படுத்தியுள்ளேன் என்பதை ஒத்துக் கொள்வதே பிரதானம் என்று தோன்றுகிறது ! எவரையும் காயப்படுத்திடும் எண்ணம் நிச்சயம் எனக்கில்லை ; எனினும் இந்த இணையப் பயணத்தில் என்னால் மனவருத்தம் கொள்ள நேரிட்ட அனைத்து நண்பர்களுக்கும் எனது unconditional apologies உரித்தாகட்டுமே  ! விலகி நின்றாலும் நாம் ஒரு நாளும் விரோதிகளல்ல என்பதையும் சரி ; காலத்தால் ஆற்றிட இயலாக் காயங்களே கிடையாதென்பதையும் ஒரு போதும் நான் மறவேன் ! Thanks guys - for being an integral part of life for me...!

நீண்டு செல்லும் இந்தப் பதிவை நிறைவு செய்யும் முன்னே சின்னதாய் ஒரு சந்தோஷப் பகிர்வு ! நம் நெடுநாள் காமிக்ஸ் நண்பரும் , இங்கு சமீபத்திய வருகையாளருமான பிரான்சிலிருக்கும் திருச்செல்வம் ப்ரபாநாத் - பிரான்சில் வசிக்கும் தமிழர்களிடையே நமது இதழ்களை அறிமுகம் செய்திடும் பொருட்டு முயற்சிகளைத் துவக்கியுள்ளார் ! தலை சுற்றச் செய்யும் air-mail கட்டணங்களையும் செலுத்தி நம்மிடமுள்ள சமீபத்திய இதழ்கள் அத்தனையிலும் ஒரு  சிறியளவுப் பிரதிகளைத் தருவித்துள்ளார் நண்பர் ! Let's wish him good luck !

நம்பர்கள் தராத பரிவை நண்பர்கள் தொடர்ச்சியாய் வெவ்வேறு ரூபங்களில் காட்டி வருவதே நாம் வாங்கி வந்த வரம் போலும்  !! Take care folks !