Powered By Blogger

Wednesday, February 27, 2013

முயற்சிக்கு மரியாதை !


நண்பர்களே,

வணக்கம். காமிக்ஸ் அல்லாத நம் பிற பணிகளுக்குக் கொஞ்சம் கூடுதல் அவகாசம் ஒதுக்கிடும் அவசியம் நேர்ந்ததால் கடந்த ஒரு வாரமாய் இங்கே தலை காட்ட இயலவில்லை ! இடைப்பட்ட நாட்களில் இங்கு உஷ்ணமாய் ; வருத்தமாய் பதிவுகள் பல நிறைந்திருப்பதை இன்று காலை தான் பார்த்திட்டேன். இன்னமும் முழுமையும் படித்திடவில்லை என்பது ஒரு பக்கமிருப்பினும், ஒரு பானை சோற்றின் ருசி அறிய ஒரு முழு விருந்து அவசியம் அல்ல தானே ?! 

மொழிபெயர்ப்புப் போட்டி தொடர்பான எனது முடிவுகளில் உங்களுக்கு நேர்ந்த வருத்தங்கள் நியாயமானதே. ஆனால் - அங்கொன்றும், இங்கொன்றுமாய் நண்பர்களில் சிலர் பதிவு செய்துள்ளது போல - வழக்கமான பாணியிலான மொழிபெயர்ப்பினை எதிர்பார்த்து வந்திடும் (வலைக்கு அப்பாலுள்ள) இதர வாசகர்களுக்கு - நம் வலைப் போட்டியாளர்களின் எழுத்துக்கள் எத்தனை தூரம் ஏற்புடையதாய் இருக்குமோ என்ற ஆதங்கமே எனது முடிவின் பின்னணிக் காரணி. முன்பொரு காலம் "வாசகர் ஸ்பாட்லைட் " பகுதியினை அறிமுகம்  செய்து நான் வாங்கிக் கட்டிக் கொண்ட உதைகள் ஆயுளுக்கு மறக்கா அனுபவம். ஆனால் இம்முறை நான் இந்த Kaun Banega Translator முயற்சிக்குத் தயாரானது நம் நண்பர்களின் ஆற்றல்களின் மீது எனக்குள்ள அசாத்திய நம்பிக்கையின் பொருட்டே !! மாற்றங்களை ஜாலியாய்க் கூட ஏற்றுக் கொள்ள விரும்பா வாசகர்களுக்கும் நம் போட்டியாளர்களின் எழுத்துக்களில் எவ்வித சஞ்சலமும் நேர்ந்திட வாய்ப்பிராது என்ற திட நம்பிக்கை தந்திட்ட தைரியமே !!  லார்கோவின் இதழினை ஒரு ''ஆல்-கலர் இதழ்' என தீர்மானித்த மறு கணமே - இந்தப் போட்டியின் வெற்றி பெறும் மொழிபெயர்ப்பினை இணைத்திட இது வாகான வாய்ப்பென மனதுக்குப் பட்டது.அவசரமாய்-ஒரே வாரத்தில் போட்டியாளர்களிடமிருந்து மொழிபெயர்ப்பினைக் கோரியதன் காரணம் வெற்றி பெறும் எழுத்துக்களை மார்ச் இதழில் (லார்கோ) இணைத்திட வேண்டுமென்ற ஆர்வத்தினாலேயே !  இதர பக்கங்கள் அச்சுக்குத் தயாராகி விட்ட நிலையில் - 'குட்டியான மந்திரியார் கதை தானே...? நண்பர்களுக்கு ஒரு வாரமே ஜாஸ்தி ! ' என்ற எண்ணத்தில் நான் விதித்த கால அவகாசமே - சிக்கலுக்கு வித்திட்டதென்று இப்போது புரிகிறது. இன்னும் சற்றே கூடுதலாய் அவகாசம் கொடுக்க சாத்தியப்பட்டிருக்கும் பட்சத்தில் - போட்டியாளர்களின் கைவண்ணம் நிச்சயம் ஒரு லெவல் உயரே சென்றிருக்கும் என்று நினைக்கத் தோன்றுகிறது. 

36 போட்டியாளர்களில், ஒரு பாதிக்கும் அதிகமானோர் முயற்சிக்கவே இல்லை என்ற போது ஆடுகளமே ரொம்பவும் குட்டியாகிக் போனது போல் பட்டது எனக்கு ! தவிரவும் அவசரத்தில் எழுதப்பட்டவை என்பதாலோ ; அல்லது மந்திரியாரின் கதைகள் நீண்டதொரு இடைவெளிக்குப் பின்னே வந்திடுவதால் அதன் ஸ்டைலுக்குப் பரிச்சயம் கொண்டிடுவது சற்றே சிரமமாய் தோன்றியதாலோ, போட்டியாளர்களின் எழுத்துக்களில் சின்னதாய் ஒரு தயக்கத்தை பார்த்திட முடிந்தது. 'பரவாயில்லை..ஜாலியான போட்டி தானே ? ...அப்படியே வெளியிடுவோம்..!' என நான் தீர்மானித்திடும்  பட்சத்தில் - 'காசு கொடுத்து வாங்குவது உம் தலையில் உதிக்கும் விஷப் பரீட்சைகளைப் படித்திடவா ?' என்ற ரீதியிலான காரசாரக் கடிதங்களுக்குப் பஞ்சமிராது என்று மனதுக்குப் பட்டதால் வேறு வழியின்றி அரக்கப் பறக்க எழுதி மந்திரியாரை அச்சுக்கு அனுப்பிட வேண்டியதாகிப் போனது !அந்த சடுதியில் நம் போட்டியாளர்களின் நிலைப்பாட்டிலிருந்து இந்த விஷயத்தை நான் ஒரு கணமேனும் அணுகிடத் தவறியது நிச்சயம் என் பிழையே !Sorry indeed guys !! 

நடந்திட்ட நிகழ்வுகளின் நிஜ விளக்கம் இதுவே தவிர - இதன் பின்னணியினில் சத்தியமாய் வேறு thought process துளியும் செல்லவில்லை ! எனது / எங்களது எழுத்து ஆற்றல்களை தம்பட்டம் அடித்துக் கொள்வதற்காகவோ ; 'எழுதிப் பார்த்தல் எத்தனை சிரமம் என்பதை நீங்களும் உணருங்கள் மக்கா' என்ற ரீதியினிலோ என் எண்ணங்கள் ஒரு போதும் பயணிக்கவில்லை. எழுதுவது தான் எங்கள் வேலை ; எங்கள் பணி எனும் போது - 'நாங்கள் பெரிய வஸ்தாதாக்கும் ; மகா சண்டியராக்கும்' என்றெல்லாம் பீற்றல் விடுவதற்கு வேலையே கிடையாதே என்ற school of thoughtஐ சேர்ந்திட்டவன் நான். வைத்தியம் தெரிந்தால் தானே அவர் ஒரு டாக்டர் ? ; எழுதத் தெரிந்தால் தானே எடிட்டரோ, இன்ன பிற அடைமொழிகளோ சாத்தியம் ? 

இதனில் நான் எதிர்பார்த்ததெல்லாம் - கூட்டாஞ்சோறாய் இன்று அரங்கேறி வரும் நம் காமிக்ஸ் சமையலில், நண்பர்களின் கைப்பக்குவமும் சிறிதேனும் இருந்திட்டால் இன்னும் சுவை சேர்க்குமே என்பது மாத்திரமே ! இன்றில்லாவிடினும் - வரும் நாட்களில் அந்தக் கனவை நிஜமாக்கிடுவேன் ! அதன் முதல் படியாக - மார்ச் வெளியீடான  "துரத்தும் தலைவிதி" இதழோடு ஒரு குட்டியான 8 பக்க black & white இணைப்பு, அதே மந்திரியாரின் கதையோடு - வெற்றி பெற்ற நண்பரின் மொழிபெயர்ப்போடு வெளியாகிடும் ! அவரது பெயர் இப்போதைக்கு suspense ஆக இருந்திடட்டுமே ?!மாற்றங்களை விரும்பிடா நண்பர்களுக்கும் சிக்கலின்றி ; போட்டியாளர்களின் ஆர்வத்தினையும் மதித்திட்டதொரு சிறு உபாயமாய் இது அமைந்திட்டால் நலமே ! 

இதனிலும் ஒரு flip side இல்லாதில்லை என்பதை மண்டை சுட்டிக் காட்டத் தான் செய்கிறது ! ' மொழிபெயர்ப்பில் ஏழு கழுதை வயசாகிட்ட உங்களின் எழுத்துக்களையும் ; அவசரத்தில் எழுதப்பட்ட வாசகரின் மொழிபெயர்ப்பையும் ஒருங்கே வெளியிட்டு - ஒப்பீட்டின் மூலம் மட்டம் தட்டப் பார்க்கிறீர்களா ?' என்ற கேள்விக்கு வாசல்கள் திறந்தே உள்ளன என்பதையும் நான் உணராதில்லை ! ஆனால் என் நோக்கம் அதுவல்ல என்பதை நண்பர்களுக்கு ஊர்ஜிதப்படுத்திட வேறு மார்க்கம் தெரியவில்லையே  எனக்கு ! அதே சமயம், 'நண்பரது மொழிபெயர்ப்பு என்னதை விட சூப்பர்' என்று வாசகர்கள் கருதிடக் கூடிய வாய்ப்பும் உள்ளது என்ற உல்டா சிந்தனையில் எனக்கு நானே தைரியம் சொல்லிக் கொள்ளலாமோ ?! Anyways, ஒரு விவாதமில்லாவிடின் சுவாரஸ்யம் குன்றிடும் என்பதாலோ என்னவோ ; அவ்வப்போது சர்ச்சைகளை தேடிச் சென்று தழுவிடுவதில் எனது தேர்ச்சி levelகள் உயரே உயரே சென்று கொண்டே உள்ளன ! "இனியெல்லாம் சுபமே' என்று இந்த சங்கதிக்கு end card போடும் முன்னே - இதோ புதிய அறிவிப்பு 10319....!

தொடரும் மாதங்களில் ஆங்கிலத்தில் "The Green Manor" என்ற பெயரினில் வெளிவந்திட்ட ரொம்பவே மாறுபட்டதொரு சிறுகதைத் தொகுப்பு நம் இதழ்களில் வரவுள்ளது .எட்டு அல்லது பத்துப் பக்க நீளம் கொண்ட இப்புது ரக மர்மக் கதைகளை மொழிபெயர்த்திட ஆர்வமுள்ள நண்பர்கள் விண்ணப்பிக்கலாம் ! மந்திரியாரின் காமெடி தோரணம் ஒரு விதமென்றால், Green Manor தந்திடவிருக்கும் இருண்ட மர்மங்கள் முற்றிலும் மாறுபட்ட சவாலாய் இருந்திடும்.  "Translation -சீசன் 2" என்ற தலைப்போடு ஒரு மின்னஞ்சல் தட்டி விடும் நண்பர்களுக்கும், இப்போட்டியினில் பங்கேற்க விழையும் வலைக்கு அப்பாலுள்ள நம் வாசகர்களுக்கும் கதையின் செராக்ஸ் பக்கங்கள் மார்ச் 15 தேதியன்று அனுப்பிடப்படும். 15 நாள் அவகாசம் எடுத்துக் கொண்டு இம்முறை தூள் கிளப்பிடுவீர்கள் என்ற நம்பிக்கை எனக்குள்ளது !

புதிய அறிவிப்பு : 163900 : இம்முறை (எனது கண்ணோட்டத்தில்) போட்டியினில் இரண்டாம் இடத்தை இணைந்து பிடித்துள்ள இரு நண்பர்களின் மொழிபெயர்ப்புகளும் இங்கே நம் வலைபக்கத்தில் லார்கோவின் இதழ் வெளியான பின்னே பிரசுரமாகும். (சித்திரங்களோடு அல்லாது ; வெறும் ஸ்கிரிப்ட் மாத்திரமே) ! So அவர்களது முயற்சிகளுக்கும் ஒரு அங்கீகாரம் கொடுத்தது போல் இருக்குமென்று நினைத்தேன். 

இப்போதைக்கு ஏதாச்சும் ஒரு theme song ஐ சீட்டியடித்துக் கொண்டே நான் குதிரையில் சேணத்தைக் கட்டிடும் நேரமாகி விட்டது ! லார்கோவின் புதிய இதழ் மார்ச் முதல் வாரத்தில் உங்களை சந்திக்க வந்திடும் ! See you then guys ! Take care ! 

Thursday, February 21, 2013

கடவுள் பாதி..மிருகம் பாதி...!


நண்பர்களே,

வணக்கம். சமீப காலமாய் - குறிப்பாக கணினித் துறையினில் நம்மவர்கள் முழுமூச்சாய் இறங்கிடத் துவங்கிய பின்னே நம்மைச் சுற்றி சின்னச் சின்னதாய் மாற்றங்கள் ; நவீனங்கள் இடம் பிடிப்பது ஓர் அன்றாட நிகழ்வாகிப் போய் விட்டது. ஒரே சமயத்தில் ஒன்றுக்கு மேற்பட்ட பணிகளில் கவனம் செலுத்திட முடிந்திடும் இந்தத் தலைமுறையின் ஆற்றலைக் குறிப்பிடும் multi -tasking என்ற சொல் கூட நம் பேச்சு வழக்கிற்கு வருகை தந்தது சமீபமாய் தானே ?! கொஞ்சம் கொஞ்சமாய் நானும் இந்தக் "கலையினை " பயின்றிட முயற்சித்தாலும் - நிறைய வேலைகளிலும் , வேளைகளிலும் பலன் பூஜ்யமாய் இருந்தே வருகிறது ! அதிலும் திருவாளர் லார்கோ வின்ச்சின் புதிய சாகசமொன்று வரவிருக்கும் வேளையினில், இதர வேலைகளிலும் கவனத்தை கொண்டு செல்ல முற்படுவது முழங்கால்களை நாமே சிராய்த்துக் கொள்வதற்கு சமானம் என்பது அனுபவப் பாடமாகியுள்ளது ! So - கடந்த சில நாட்களாய் இங்கே நம் வலைப்பதிவின் பக்கம் active ஆக இருந்திடல் சாத்தியப்படவில்லை. ஒரு வழியாக லார்கோ அச்சுக்குத் தயாராகும் நிலை எட்டி விட்டதால் கிட்டிய அவகாசத்தில் இங்கே "உள்ளேன் அய்யா" போட ஆஜராகி விட்டேன். நான் இங்கே ஆஜரானது ஒய்வு கிட்டியது என்பதன் பொருட்டு மாத்திரமல்லாது  உங்களிடம் பகிர்ந்திட ஜாலியான விஷயங்களும் உள்ளதனால் ! 

சமீபத்திய "வில்லனுக்கொரு வேலி" இதழுக்குக் கிட்டியுள்ள அழகான வரவேற்பு உற்சாகம் தரும் சங்கதி. லக்கி லூக்கின் சுவாரஸ்யமானதொரு    கதை + மறு வருகை புரிந்திட்ட மதியில்லா மந்திரியின் தூள் கிளப்பும் 2 குட்டிக் கதைகளும் கூட்டணி சேர்ந்தது ஒரு சந்தோஷத் தற்செயல் ! ஆனால் மந்திரியாரின் முதல் கதையினை வண்ணத்திலும், தொடர்ந்திட்டதை  கறுப்பு-வெள்ளையிலும் அமைத்திட வேண்டிய அவசியம், எனக்கே ஒரு வித உறுத்தலைத் தந்திட்டது. வெள்ளைக் காகிதத்தில் black & white கதையும் 'பளிச்' என்று தோன்றினாலும் கூட  இந்தப் பாகுபாட்டை நியாயப்படுத்திட  சிரமமாகத் தான் இருந்தது.


வண்ணப் பக்கங்களையும், வண்ணமிலா பக்கங்களையும் இணைத்திடுவதில் இப்போது தலை தூக்கிடும் தலையாய பிரச்சனை - எந்தக் கதைகளை இந்த segment -ல் நுழைத்திடுவது என்பதே ! ஒரிஜினலாகவே கறுப்பு-வெள்ளைப் படைப்புகளாய் இருந்திடும் ஸ்பைடர் ; ஆர்ச்சி ; ரிப் கிர்பி ; மாண்ட்ரக் ; ஜான் ஸ்டீல் போன்ற நிறையத் தொடர்களுக்கு நாம் VRS கொடுத்தாகியாச்சு என்பதால் அவர்கள் நம் ஆடுகளத்தில் இல்லை.காரிகன் ஒரு possibility ....வேதாளரின் கதைகளை முயற்சிக்கக் கோரியும் நண்பர்கள் அவ்வப்போது நினைவூட்டத் தவறுவதில்லை ; அதே போல் மாடஸ்டியும் இந்தப் பட்டியலில் சேர்த்திடலாம் தான். ஆனால் இதனில் புதியதொரு நடைமுறைச் சிக்கல் எழுந்துள்ளது ! (பழைய) குறைந்த விலைகள் - நியூஸ்பிரிண்ட் தரம் ; black & white என்ற செக்குமாட்டுச் சுற்றலில் உழன்றிருந்த வரையிலும் நம்மை அவ்வளவாகக் கண்டு கொள்ளாதிருந்த படைப்பாளிகள் இப்போதெல்லாம் நம் முயற்சிகளின் மீதும் focus காட்டத் துவங்கியுள்ளனர்  . நாமும் சிறிது சிறிதாய் வண்ணம் - தரம் என்ற பாதையை நாடிடத் துவங்கிய பின்னே அவர்களது பார்வை நம் மீதும் விழுந்து வருகின்றது என்பதில் சந்தோஷமே என்ற போதிலும், நம் கூட்டணிக் கலாச்சாரம்(!!!) சில வேளைகளில் அவர்களது சம்மதங்களைப் பெற்றிடுவதை சற்றே சிரமமாக்கி வருகின்றது. ஒரு டெக்ஸ் வில்லர் இதழில் லார்கோவின் விளம்பரம் வருவது கூட இத்தாலிய நிறுவனத்திற்குப் பிடிக்கவில்லை ; டயபாலிக் இதழினில் வேறு எந்தக் கலவைகளும் வேண்டாமே என்பது துவக்கத்தினிலேயே அவர்களது வலுவான கோரிக்கை ! அதே போல் பிரான்கோ - பெல்ஜியத் தயாரிப்புகளோடு, அமெரிக்க ஸ்ட்ரிப் தொடர்களை இணைப்பதில் அவர்களுக்கு மகிழ்ச்சியில்லை ! ஆண்டாண்டாய் அவர்களைச் சார்ந்துள்ளோம் நாம் என்ற கரிசனத்தின் காரணமாய் படைப்பாளிகள்  இதனை ஒரு கண்டிப்போடு சொல்லிடாமல், ஒரு அன்பான வேண்டுகோளாய் நம்மிடம் தொடுத்துள்ளனர். NBS இதழின் முக்காலே மூன்று வீசம் முழுக்க முழுக்க வண்ணம் + பிரான்கோ-பெல்ஜியக் கதைகள் வந்திருந்ததைப் பார்த்து ரொம்பவே உற்சாகமானவர்களுக்கு, லக்கி லூக்கில் -'கடவுள் பாதி ; மிருகம் பாதி' பாணியினில் மந்திரியார் வண்ணமும்,வெள்ளையுமாய் காட்சி தருவதில் மகிழ்ச்சியில்லை ! ஐரோப்பாவிலும் சரி ; உலக அரங்கிலும் சரி, நம் குள்ள மந்திரியாருக்கென பெரியதொரு ரசிகர் மன்றமே உள்ளதெனும் போது இந்த compromises தவிர்த்திடுவது நலம் என்று அவர்கள் அபிப்ராயப்படுவதில் நியாயம் இல்லாது இல்லை. பிரான்கோ-பெல்ஜியப் படைப்புகளில் நீளத்தினிலும்,பிரபல்யத்தினிலும்    குறைச்சலான சில அப்பாடக்கர்களின் கதைகளைத் தேர்வு செய்து அவற்றை துவக்கம் முதலே கறுப்பு- வெள்ளையினில் வெளியிட்டிடுவது இதற்கொரு தீர்வாக இருக்கக் கூடும் என்று பார்த்தால் - அவர்களிடம் இருப்பதன் பெரும்பான்மை 46 பக்க ஆல்பம்கள் ; அல்லது 1 பக்கத் துணுக்குத் தோரணங்கள்!  So - முதன்முறையாக முழுக்க முழுக்க வண்ணப் பக்கங்கள் மாத்திரமே அடங்கியதொரு இதழாய் "துரத்தும் தலைவிதி" அமைந்திடவிருக்கிறது.

96 வண்ணப் பக்கங்கள் + 40 b &w பக்கங்கள் என்பது நமது சமீப மாதங்களது ரூ.100 இதழ்களின் பார்முலா. அந்த 40 பக்கங்களுக்குக் கல்தா கொடுத்து விட்டு - அதன் இடத்தினில் ஆர்ட் பேப்பரில் கூடுதலாய் 16 வண்ணப் பக்கங்களை இணைப்பதெனத் தீர்மானித்துள்ளேன். So-112 முழு வண்ணப் பக்கங்கள் மாத்திரமே இம்முறை ! சத்தியமாக சைக்கிள் கேப்பில் கடா வெட்டிடும் முயற்சியல்ல இது  ; அந்தக் கறுப்பு-வெள்ளைப் பக்கங்களை நிரப்பிட வாகானதொரு கதைத்தொடர் கிட்டிடும் முதல் தருணத்தினில் - திரும்பவும் பழைய பார்முலாவிற்கே பயணிப்பதில் சிரமம் ஏதும் கிடையாது.  ஒருக்கால் இந்த ஆல்-கலர் பார்முலா பிடித்துப் போய் விட்டால் இதனையே உடும்புப் பிடியாய்ப் பற்றியும் கொள்ளலாம்.  "புத்தகம் இளைத்துப் போய் விட்டது " என்ற படபடப்பிற்கு இம்முறை இடமிராது - ஏனெனில் 40 பக்கங்களின் எடையும், ஆர்ட் பேப்பரின் 16 பக்க எடையும் almost identical !

இந்தக் கூடுதல் வண்ணப் பக்கங்களில் இடம் பிடிப்பது மீண்டும் நம் மதியில்லா மந்திரியாரே ! இம்முறை வரக் காத்திருக்கும் சாகசமோ   இங்கு நம் நண்பர்களின் பலருக்குப் பரிச்சயமானதொன்று  ! Yes, சென்ற வாரம் "Kaun Banega Translator " ஜாலிப் போட்டிக்காக அனுப்பிடப் பட்ட "The Invisible Menace " என்ற சிறுகதையே வண்ணத்தினில் வரக் காத்துள்ளது. மொத்தம் 36 நண்பர்கள் இந்த மொழிபெயர்ப்பு முயற்சியினில் பங்கேற்கக் கோரி மின்னஞ்சல் அனுப்பி இருந்தனர். அவர்களில் ஒரு சிலர் தம் முகவரிகள் தந்திடாத காரணத்தால் அவர்களுக்குப் பக்கங்களை அனுப்பிட இயலவில்லை. எஞ்சி இருந்த 33 ஆர்வலர்களில் மொழிபெயர்ப்பினைப் பண்ணி நமக்குத் திரும்ப  அனுப்பியுள்ளவர்களின் எண்ணம் 14 மாத்திரமே ! பாக்கிப் போட்டியாளர்கள் பிஸி ஆகிவிட்டார்களா ? ; ஆர்வமிழந்து போனார்களா ? ...அறியேன் !வந்துள்ள ஒவ்வொரு தமிழாக்க ஸ்க்ரிப்டும் படித்திட சுவாரஸ்யம் தருவதை நிச்சயம் மறுக்க இயலாது. தத்தம் பாணிகளில் நண்பர்கள் ஒவ்வொருவரும் கதைக்கு ஒரு ஜாலி feel கொணர்ந்திட முயற்சித்திருப்பது கண்கூடாய்த் தெரிகிறது. குறுகிய அவகாசத்தினில், ஒரு முதல் முயற்சி என்ற ரீதியில் அனைவரது உழைப்பும் பாராட்டுக்குரியது என்ற போதிலும் மொத்தமான மதிப்பீடு எனும் போது சற்றே disappointing என்று தான் சொல்லிடுவேன் ! நண்பர்களிடம் நான் எதிர்பார்த்தது நிச்சயம் இதற்கு இன்னும் ஒரு லெவல் கூடுதலான ஆக்கங்களை ! வந்திட்ட 14 ஸ்க்ரிப்ட்களில் - 'good' என்ற ரகத்தினில் ஒரு அண்டைப் பிரதேசத்து நண்பரின் எழுத்துக்களும் ; 'decent jobs' என்ற பிரிவினில் ஒரு அயல் மாநிலத்து அன்பரும் ; இன்னொரு அயல் தேசத்து நண்பரும் இடம் பிடிக்கின்றனர். அவர்கள் யாராக இருக்குமென்ற யூகங்களை உங்களது கற்பனைகளுக்கே விட்டு விடுவது உசிதம் என்ற தீர்மானத்தில் உள்ளேன் !எனது பாணி மொழிபெயர்ப்போடு வரவிருக்கும் இந்தக் கதையினை -போட்டியினில் பங்கேற்ற நண்பர்கள் அனைவரும் ரொம்பவே ஆர்வமாய் எதிர்பார்த்திடுவார்கள் என்பது உறுதி. எனக்குக் காத்துள்ள மார்க்குகள்   எத்தனை என்பது அடுத்த மாதம் தெரிந்திடுமே !

பணம் தொடர்பான விஷயம் எனும் போதே, 'ஆண்டுச் சந்தா செலுத்திடும் நண்பர்களுக்கு சற்றே சலுகை காட்டப்பட்டால் தேவலையே 'என்ற ரீதியினில் கடந்த பதிவில் சில பின்னூட்டங்கள் என் கவனத்தைத் தாண்டிடவில்லை. பிப்ரவரி - டிசம்பர் என்ற இந்த 11 மாதங்களுக்கு நாம் வசூலிப்பது ரூ.1320. அதன் break-up :

9 மாதங்களுக்கு ரூ.100 விலையினில் வரவிருக்கும் இதழ்களுக்கு = ரூ.900 
1 மாதத்திற்கு ரூ.200 விலையிலான ALL NEW ஸ்பெஷல்                     = ரூ.200
டிசெம்பர் 2013 -ல் மாத்திரம் ரூ.50 விலையினில் 1 இதழ்                        =  ரூ.  50
மாதம் ரூ.30 வீதம் - 10 மாதக் கூரியர் கட்டணம்                                          =  ரூ.300 
டிசம்பரில் மாத்திரம் கூரியர் கட்டணம்                                                              =   ரூ.20  
                                                                                                                                                 ------------
ஆக மொத்தம் ..............                                                                                             = ரூ.1470

(-) Less : 10% discount                                                                                                      =  ரூ. 150
                                                                                                                                               -------------
Nett Amount                                                                                                                      =   ரூ.1320
                                                                                                                                               -------------
இதழ்களின் விலைகளில் மாத்திரம் அல்லாது, கூரியர் கட்டணங்களிலும்     10% கழிவு வழங்கியே சந்தாத் தொகையினை நிர்ணயம் செய்துள்ளோம்.வெளி மாநிலத்திற்கும்,பதிவுத் தபால்களுக்கும் கட்டணங்கள் ஜாஸ்தி என்பதால் தலா ரூ.100 கூடுதலாய் வசூலித்துள்ளோம் என்பதை நான் சொல்லிடாதே நீங்கள் அறிவீர்கள் தானே !

அப்புறம் காமிக்ஸ் க்ளாசிக்ஸ் இதழ்களின் 2013-க்கான அட்டைப்படங்களை ஒருங்கே தயார் பண்ணும் முயற்சியினைத் துவக்கவிருக்கிறோம். சிக் பில் ஸ்பெஷலிலும்  ; ரிபோர்டர் ஜானி ஸ்பெஷலிலும் நீங்கள் ரசித்திட விரும்பும் கதைகளின் தேர்வுகளை உங்களிடமே விடப் போகின்றேன். ஒவ்வொரு தொடரிலும் தலா 2 கதைகளை உங்கள் choice ஆகத் தேர்வு செய்திடலாம் ! இங்கே பின்னூட்டங்களாகவோ ; மின்னஞ்சல்களாகவோ, கடிதங்களாகவோ அனுப்பிடலாம். அடுத்த 10 நாட்களுக்குள் பதிவாகும் மெஜாரிடியான தேர்வுகளை நம் 2013-ன் பட்டியலில் இணைத்திடுவோம் !




மின்னஞ்சல்கள் ; கடிதங்கள் என்ற subject -ல் இருந்திடும் போது - சின்னதாய் ஒரு வேண்டுகோள் !! ஆர்வ மிகுதியினில் அவ்வப்போது நண்பர்கள் நீ ---ள---மாய்  ; ரொம்பவே நீளமாய் சில மின்னஞ்சல்களை அனுப்பி விட்டு பதிலை எதிர்பார்த்துக் காத்திடுகின்றனர் ! நம் மீதுள்ள அக்கறையில் ; ஆர்வத்தில் தான் உங்களின் நேரத்தைச் செலவு செய்து இத்தனை சிரமம் மேற்கொள்கிறீர்கள் என்பதை நான் அறிவேன் ; எனினும் பாரா பாராவாய் நீண்டு செல்லும் ஒவ்வொரு கடிதத்தையும்  நான் படித்து, பூரணமாய்ப் பதில் போடுவதென்பது பல நேரங்களில் சாத்தியமாகிடாதே !அதிலும், இங்கே நமது வலைப்பதிவினில் நாம் அலசி ஆராய்ந்த அதே விஷயங்களை மறு ஒளிபரப்புச் செய்வது போன்ற பாணியினில் நான் பதிலாகவும் எழுதிட அவசியம் நேரும் போது ஆயாசம் தலை தூக்கிடுவதைத் தவிர்ப்பது சிரமாகிறது! சொல்ல வரும் சேதியினை இங்கே பதிவாய்ப் பரிமாறிக் கொண்டால் - அனைவருக்கும் பங்கேற்ற திருப்தியும் கிட்டிடுமே ; என் பணியும் சற்றே இலகுவாகிடுமே ! அதே சமயம் என் கவனத்திற்கு வர அவசியமான ;பிரத்யேகமான விஷயங்கள் இருப்பின் தயக்கமின்றி மின்னஞ்சல்களில் அனுப்பிடலாம் ! நிச்சயம் அதனை கவனத்தினில் கொண்டிடுவேன் !   Catch you soon guys ! Take care !                               

Thursday, February 14, 2013

ஒரு காதல் தின அத்தியாயம் !


நண்பர்களே,

வணக்கம். புதியதொரு பதிவின் மீது (இது வரை )3077 பார்வைகள்....விழி பிதுங்கச் செய்யும் 516 பின்னூட்டங்கள்...கடந்த 3 தினங்களாய்  ரகளையாய் வந்திடும் புதிய காமிக்ஸ் க்ளாசிக்ஸ் சந்தாக்கள்...மும்மூர்த்திகளின் தளரா விசிறிகளிடமிருந்து காரசாரமாய் கண்டன எழுத்துக்களைக் கொணரும் ஒரு சில ஊதா நிற இன்லண்டு கடிதங்கள் !! Phew ..... குட்டியாய் ஒரு பதிவு உண்டாக்கிய தாக்கத்தின் சக்தி எத்தகையது என்பதை இதை விட அதிரடியாய் வெளிப்படுத்திட இயலாதெனும் விதமாய் அமைந்து விட்டன கடந்த சில நாட்கள்...! இந்த "load  more " இம்சை மாத்திரம் இல்லாதிருப்பின், பின்னூட்ட எண்ணிக்கை இன்னமும் எகிறி இருக்குமென்று சொல்லத் தோன்றுகிறது ! Anyways - காமிக்ஸ் எனும் காதல் நம்மில் எத்தனை ஆழமாய் ஐக்கியம் ஆகியுள்ளதென்பதைப் பறைசாற்ற இந்தக் கலப்படமில்லா உத்வேகத்தின் பிரவாகம் போதாதா ?! உலகமே காதலைக் கொண்டாடும் ஒரு அழகான தினத்தில் - நம் காமிக்ஸ் காதலின் லேட்டஸ்ட் அத்தியாயத்தை களம் இறக்கிடுகிறோம் ! யெஸ்...லக்கி லூக்கின் "வில்லனுக்கொரு வேலி" இன்று ஒரு மொத்தமாய் (14th.Feb) டெஸ்பாட்ச் ஆகின்றது. இதோ இதழின் வண்ண அட்டைப்படம் ! 


இது இன்னொரு லக்கி லூக் கதைக்கான ஒரிஜினல் டிசைனை தழுவி, நமது ஓவியர் உருவாக்கியதொரு சித்திரம்.


நமது சமீபத்திய சற்றே refined look அட்டைப்படங்களில் இருந்து மாறுபட்டு - துவக்க காலத்து மினி லயன் பாணியில் இது இருப்பதாக எனக்குப் பட்டது.'கதைக்குத் துளி சம்பந்தமும் இல்லா டிசைன்' என்று New Look Special மீது விழுந்த குற்றச்சாட்டு இதற்குப் பொருந்தாது என்பது மாத்திரம் நிச்சயம் ! முழுக்க முழுக்க காமெடித் தோரணம் கண்டிடும் ஒரு இதழுக்கு இந்த ராப்பர் ஒ.கே.வா என்பதை தொடரவிருக்கும் உங்கள் பின்னூட்டங்கள் சொல்லிடும் என்பது உறுதி. லக்கி லூக்கின் இந்த இதழுக்காக ஒரிஜினலாய் தயாரிக்கப்பட்ட ராப்பர் ரொம்பவே weak ஆக இருந்திட்டதால் இம்முறை அதனை பயன்படுத்திட மனது வரவில்லை ! பாருங்களேன் அவர்களது பிரெஞ்சு இதழின் அட்டைப்படத்தினை :


72 பக்கங்கள் கொண்டிட்ட இந்த இதழில் ஒரு 46 பக்க லக்கி லூக் முழு வண்ண சாகசத்தைத் தொடர்ந்து மதியில்லா மந்திரியின் இரு எட்டுப் பக்க சாகசங்கள் + குட்டீஸ் கார்னர் & வழக்கமான பகுதிகள் இடம் பெறுகின்றன !  கிட்டத்தட்ட 78 கதைகள் கொண்ட லக்கி லூக் தொடரில் நாம் இது வரை வெளியிட்டுள்ளவை எத்தனை என்ற கணக்குப் போட்டு சொல்பவர்களுக்கு ஜாலி ஜம்பரின் சார்பில் ஒரு கூடை காரட் பரிசு ! (carrotகள் தான்....மினுமினுக்கும் caratகள் அல்லவே !)

ம.மந்திரியின் ஒரு சாகசம் வண்ணத்தில் - மற்றது black & white -ல் என்பது இங்கே நான் குறிப்பிட்டாக வேண்டும் ! But - வண்ணமின்றியும் மந்திரியார் 'பளிச்' என்று காட்சியளிக்கிறார் என்று தான் சொல்லுவேன் ! ம்.மந்திரியைப் பற்றிப் பேசிடும் போது, நேற்றைய தினம் கூரியர் மூலம் ஒரு 8 பக்க சிறுகதையின் பக்கங்களை "Kaun Banega Translator" போட்டியின் பொருட்டு - மொழிபெயர்த்திட அனுப்பியுள்ளோம்.18-பிப்ரவரிக்குள் எங்களுக்குக் கிட்டிடும் வகையினில் உங்களின் மொழிபெயர்ப்புகளை அனுப்பிடல் அவசியம். முழு முகவரியின்றி, வெறும் மின்னஞ்சல் மாத்திரம் அனுப்பியுள்ள நண்பர்களுக்கு இந்த வாய்ப்பு தந்திடப்படவில்லை ! அதே போல் அயல் நாட்டிலிருந்து இதனில் பங்கேற்க விருப்பம் தெரிவித்திருந்த நண்பர்களுக்கு நாளை மின்னஞ்சல் மூலம் PDF file அனுப்பிடப்படும்.

தொடரவிருக்கும் மாதத்து வெளியீடான "துரத்தும் தலைவிதி" (லார்கோ வின்ச்) பணிகளும் படு சுறுசுறுப்பாய் நடந்தேறி வருகின்றன. இதற்குத் தயாராகியுள்ள ராப்பர் ரொம்பவே வித்தியாசமானது என்று எனக்குத் தோன்றியது ! மார்ச் 15 வரைக் காத்திருக்க அவசியமின்றி - இந்த இதழினை முன் கூட்டியே அனுப்பிடுவோம் என்பது உறுதி !

அப்புறம், கொஞ்ச காலத்திற்கு முன்னே இங்கே நான் கேட்டிருந்த நமது காமிக்ஸ் தொடர்பான quiz போட்டிக்கான பதில்கள் (ஒரு வழியாக) இதோ : (சரியான விடைகளை அனுப்பிய நண்பர்களின் குட்டிப் பட்டியலை நாளைக் காலையில் இந்தப் பதிவோடு இணைத்திடுகிறேன் !) 



1.லயன் காமிக்ஸின் முதல் மறுபதிப்பு எது ?  

பழிவாங்கும் பொம்மை - ஸ்பைடர் - Title # 99.

2.ஆர்ச்சிக்குப் போட்டியாய் லயனில் வந்திட்ட "இரும்பு ஹீரோ" யார் ?

மிஸ்டர் ஜெட் 

3.ஒரே ஒரு கதையில் மாத்திரமே தலைகாட்டிய ஹீரோக்களில் யாரேனும் 3  பேரை லிஸ்ட் பண்ணுங்களேன் ?


மிஸ்டர் ஜெட்

அதிரடி வீரர் ஹெர்குலஸ் 
பீட்டர் பாலண்டைன்

கம்ப்யூட்டர் மனிதன்.     

டயபாலிக்
ஜேசன்

& many more..! 


4.ஒரு சாகசத்திற்கும் ; அடுத்த சாகசத்திற்குமிடையே மிக நீ.....ண்....ட இடைவெளி விட்ட நாயகர்(கள்) யார் ?  


மீட்போர் ஸ்தாபனம் - 1984 "கபாலர் கழகம் " (இதழ் நம்பர் 6) to "பெர்முடா படலம்"  (இதழ் நம்பர் 149) 




5.லயனில் இது வரை அதிகமான கதைகளில் தலைகாட்டியுள்ள ஹீரோ யாரோ ?

டெக்ஸ்வில்லர்

6.கேப்டன் பிரின்ஸ் லயனில் தலை காட்டிய முதல் இதழ் எது ?

ஒரு திகில் பயணம் 

7.லயனில் இது வரை மொத்தம் எத்தனை "ஸ்பெஷல்" இதழ்கள் வந்துள்ளன ?

இந்த ஒரு கேள்விக்கான விடை - கேள்வி எடுத்துக் கொள்ளப்படும் அர்த்தத்தைப் பொருத்தது என்பதால், இதனை seriousஆக எடுத்திடத் தேவையில்லை என்று நினைக்கிறேன். நான் கேட்டிருந்தது "வழக்கமான விலைகளில் அல்லாது - சிறப்பு விலைகளில் வந்திட்ட ஸ்பெஷல்  இதழ்கள் எவை ? என்ற தொனியினில். நாம் நிறைய தடவைகள் வழக்கமான இதழ்களுக்கும் கூட "ஆண்டு மலர் " என்று அடைமொழிகள் ஓட்டுப் போட்டு உள்ளதால் - நிறைய நண்பர்கள் அவற்றையும் பட்டியலில் இணைத்து அனுப்பி இருந்தனர்.  So இந்த ஒரு கேள்வி reject !

8.லயனின் முதல் கார்ட்டூன் சாகசம் எது ?

பயங்கர பொடியன்லக்கி லூக் சாகசம் - 1987 லயன் தீபாவளி சூப்பர் ஸ்பெஷல் !

9."கபாலர் கழகம்" இதழின் நாயகர் யார் ?  

மீட்போர் ஸ்தாபனம்.

10.லயனின் முதல் அறிமுகம் என்பதைத் தாண்டி மாடஸ்டி ப்ளைசிக்கு இன்னொரு பெருமையும் உண்டு ! அதென்ன ?

நமது லயனில் ஒரே ஹீரோயின் இவர் மட்டுமே .மற்றவர் அனைவரும் ஆடவர்கள்.

நாளைய மதியப் பொழுதில் இந்தப் பதிவினில் ஒரு சந்தோஷச் சேதியும் update ஆகிடும் என்ற நம்பிக்கையோடு குட்டியான இந்தப் பதிவுக்கு இப்போதைக்கு 'சுபம்' போட்டிடுகிறேன் ! !! Fingers crossed! See you soon folks ! 

நம் சிவகாசி நண்பரும், காமிக்ஸ் பதிவருமான சௌந்தரின் காமிக்ஸ் காதலைப் பற்றி நாம் அறிவோம் ! ஆனால் நண்பரின் இன்னொரு காதல் முகமானது இன்று திருமணம் எனும் சந்தோஷ பந்தம் வரை அவரை இட்டுச் சென்றுள்ளது  !! உலகக் காதலர் தினத்தன்று காதலித்தவரைக் கரம் பிடித்த சௌந்தருக்கும், அவர்தம் துணைவிக்கும் வாழ்த்துச் சொல்லிடுவோமே !!! லக்கி லுக்கும், ஜாலி ஜம்பரும் போல் ; லார்கோவும், சைமனும் போல் ; மாயாவியும், இரும்புக்கரமும் போல் -  என்றும் இணை பிரியாது சகல நலன்களோடும் புதுத் தம்பதியினர் வாழ்ந்திட நம் அனைவரின் வாழ்த்துக்களும் உரித்தாகுக !

Friday, February 08, 2013

ஆதலினால் அசடு வழிவீர் !



நண்பர்களே,

வணக்கம். கடந்த பதிவின் பின்னூட்டக் குவியலினுள் நண்பர் ஈரோடு விஜய் எழுப்பியிருந்த கேள்விகள் சமீபமாய் என் தலைக்குள் ஒலித்துக் கொண்டே இருந்த சில சங்கதிகளின் எதிரொலி என்று தான் சொல்லிட வேண்டும் ! So-அவற்றிற்கான பதில்களையே இப்போதொரு  பதிவாக்கியுள்ளேன் ! இது நிறைய மாறுபட்ட reactions-ஐக் கொணரவிருக்கும் பதிவு என்பதை அறிவேன் ; but இது இனியும் தள்ளிப் போடும் சங்கதியல்ல என்பதே நிஜம் ! 


சில கேள்விகளும், விடை தேடும் மனமும்...

1. CC பற்றிய ஆசிரியரின் தற்போதைய நிலைப்பாடு என்ன?


2. ஏற்கனவே அறிவித்த CC டைஜெஸ்டுகள் அறிவித்தபடியே வெளிவருமா அல்லது மாற்றம் இருக்குமா?


3. ஹிட் கொடுத்த கதைகளின் வண்ண மறுபதிப்புகளுக்கான கதைத் தேர்வு எப்போது அறிவிக்கப்படும்?

7. ஆசிரியரின் பதிவிற்குப் பின்பாவது CCக்கான சந்தா எண்ணிக்கையில் முன்னேற்றமிருக்கிறதா இல்லையா?


கேள்விகள் நான்கென்ற போதிலும்  பதில் கிட்டத்தட்டப் பொதுவானது என்பதால், here goes :  'பளிச்' என்று பதில் சொல்வதாக இருப்பின், CC பற்றிய எனது தற்சமய நிலைப்பாடு - தர்மசங்கடம் மாத்திரமே !  புதிய இதழ்களுக்கான வரவேற்பை விட இந்த golden oldies -க்கு பட்டையைக் கிளப்பிடும் ஆதரவிருக்கும் என்றே இதனை அறிவித்த சமயம் நான் எதிர்பார்த்திருந்தேன்.'இந்த selections -க்குப் பதிலாக  டெக்ஸ் வில்லர் ; பிரின்ஸ் ; லக்கி போன்ற புராதன நெடியற்ற கதைகளைத் தேர்ந்தெடுத்திருக்கலாமே..' என அப்போதே இங்கு பதிவுகள் பல எழுந்திருந்த போதிலும் - நான் அவற்றை பெரிதாய் எடுத்துக் கொள்ளவில்லை என்பதே நிஜம்.  நம் துவக்க காலத்து சூப்பர் ஸ்டார்களுக்காக  அப்போது ஒலித்து வந்த உரத்த குரல்கள் - இந்த CC டைஜஸ்ட்களை ஒரு சுலபமான வெற்றியாக்கிடும் என்று ஒரு வித மிதப்பினில் இருந்தேன் என்று கூட சொல்லிடலாம் ! ஆனால் இப்போது நடந்தேறி வருவதோ எங்கள் எதிர்பார்ப்புகள் ரொம்பவே off  target என்று சொல்லிடும் சங்கதிகள்.  

பொழுதுகள் பல கடந்த பின்னே ஒரு ஓய்வான மழைக்கால மதியத்தில் நம் துவக்க காலத்து ஜாம்பவான்களுக்கு இருந்திட்ட ஆதரவைப் பற்றி சிந்தித்தால் - 'சூப்பர் ஹீரோ சூப்பர் ஸ்பெஷலுக்கு  முன்' ;  'சூ.ஹீ.சூ.ஸ்'க்குப் பின்' என்றொரு மெல்லிய கோட்டின் தாக்கத்தை உணர்ந்திடல் சாத்தியமாகும் என்று தோன்றுகிறது. அது வரை சூப்பர் ஹீரோக்களின் தளரா ரசிகர்களாய் இருந்திட்ட பலரும் கூட - திகட்டத் திகட்ட அந்த மாயாவி + ஸ்பைடர் அதி நீளக் கதைகளைப் படித்த பின்னே ஒரு வித ஆயாசம் மேலோங்கி சற்றே பின்வாங்கியது போல் படுகின்றது. இடைப்பட்ட நாட்களில் லார்கொ ; டைகர் ; கிராபிக் நாவல் ;NBS -ன் glitzy அறிமுகங்கள் என்று நம் ரசனைகளும் வேறொரு தளத்திற்கு நகன்று விட்டதே இப்போது CC -க்கு கொட்டாவி விடும் ரக வரவேற்பு கிட்டியுள்ளதற்குக் காரணம் என்று நினைக்கத் தோன்றுகிறது !இந்த CC டைஜஸ்ட்களை சென்னைப் புத்தகத் திருவிழாவிற்குத் தயார் செய்திட இயன்றிருந்தால் ஓரளவிற்காவது விற்பனை ஆகி இருந்திருக்கும் ; ஆனால் டிசம்பரின் மின்வெட்டுச் சூழ்நிலையும் ; பைண்டிங்கில் நேர்ந்திட்ட சுணக்கங்களும் அதை இயலாக் காரியம் ஆக்கி விட்டது.இன்றுள்ள மித வரவேற்புச் சூழ்நிலையில் - கைவசம் உள்ள 172  CC சந்தாக்களுக்கான பிரதிகளை (!!!) அனுப்பி முடித்து விட்டால் - ஒன்றும் இரண்டுமாய் தினசரி வந்திடும் E -Bay விற்பனையினைத் தாண்டி நாம் நம்பிக்கையோடு  எதிர்பார்க்கக் கூடியது அடுத்த Comic Con & 2014-ன் சென்னை புத்தக விழாக்களே ! (அதிலும் இந்தாண்டு நம் மீது தாளா இறுக்கத்திலிருந்த புத்தக விழாவின் ஒரு சில நிர்வாகிகள் அடுத்த முறை நமக்கொரு தனி ஸ்டால் தந்திட சம்மதிப்பார்களா என்பதே சந்தேகமாய் உள்ளது ஒரு தனிக் கதை !) கொஞ்சமாய் இதழ்களை வாங்கிடும் நம் விற்பனையாளர்கள் கூட இப்போதெல்லாம் 
ரொம்பவே hi -tech ஆகி விட்டார்கள் ! வண்ண இதழ்கள் - ரூ.100 என்ற  பார்முலா செட் ஆகி விட்டது ; தயவு செய்து மாற்றாதீர்கள்  ! என்பது அவர்களது feedback.

தமிழகத்தினில் அரங்கேறும் அத்தனை புத்தக விழாக்களிலும் பங்கேற்று விற்பனை செய்திடச் சொல்லி நண்பர் குபேரன் அவர்கள்
 உணர்ச்சிகரமாக சொல்லி இருந்த அறிவுரை  அழகானதே - ஆனால் சென்னைக்கு அப்பாற்பட்ட இதர நகர புத்தக விழாக்களின் விற்பனை வரவு செலவுகள் நண்பருக்குத் தெரிந்திருக்க வாய்ப்பில்லை தான் ! சினிமாவில்  நாயகர்கள் சொல்லிடும் புள்ளி விபர பாணியினில் எடுத்து விடுவதாக இருப்பின் :  சென்ற மாதம் சென்னையினில் பத்து நாட்கள் நடந்திட்ட விழாவிற்கு நமக்கு ஆகிட்ட மொத்தச் செலவு - ரூ.61565. (ஸ்டால் வாடகை ரூ.25,000 + மேஜை, நாற்காலி ; புத்தக ஷெல்ப்களுக்கான வாடகை ரூ.8250 இதனில் அடக்கம்) இங்கு நமக்குக் கிட்டிய விற்பனை ஐந்து லட்சத்திற்கு சற்றே அதிகம் ! கடந்தாண்டு மதுரையினில் இதே நீளத்திற்கு நடைபெற்றிட்ட புத்தக விழாவின் நம் மொத்த விற்பனைத் தொகை எவ்வளவு தெரியுமா ? ரூ.6000-க்கு சற்றே குறைவு ! ஈரோடு கொஞ்சம்  தேவலாம் - அங்குள்ள நம் நண்பர்கள் குழாமின் தளரா முயற்சிகளின் பலனாக ரூ.18,000 !இது யாரையும் குறை காணுமொரு முயற்சியோ ; இதர நகரங்களின் புத்தக விழாக்களை மட்டம் தட்டிடும் நோக்கம் கொண்டதோ அல்ல !  சென்னையின் ஜனத் திரளும், ஆர்வமும், வாங்கும் திறனும் தமிழகத்தினில் வேறெங்கும் சாத்தியமாவதில்லை என்பதை வெளிச்சமிட்டுக் காட்டிட மாத்திரமே!ஸ்டால் வாடகைகள் தவிர, பாக்கி அத்தனை செலவினங்களிலும் சென்னையும், இதர நகரத்து விழாக்களும் ஒன்றுக்கொன்று அதிக வேறுபாடு கொண்டவை அல்ல ! ஆனால் விற்பனையில் ஒன்றுக்கொன்று துளியும் தொடர்பில்லா  துருவங்கள் ! ஐந்து லட்ச விற்பனைக்கு ரூ.61,000 செலவென்பதெ ஒரு மிகப் பெரிய தொகை எனும் போது,  அதனில் இருபதில் ஒரு பங்கு கூட விற்றிட சாத்தியமில்லா ஒரு முயற்சியினில் ஒவ்வொரு மாதமும் ஊர் ஊராய்  நாம் ஈடுபட்டிட நிச்சயம் குபேர பகவானின் சகாயம் தேவை அன்றோ ?!  

வெற்றியையோ, லாபத்தையோ ஈட்டித் தரா முயற்சியாய் இருந்திட்டால் கூட  ;  மிகுதியான வாசகர்களிடம் சென்றடைந்தது என்ற குறைந்த பட்ச திருப்தியைத் தந்தாலாவது ஒரு ஆக்கத்தின் பின்னுள்ள உழைப்பிற்கு சின்னதாய் ஒரு அர்த்தம் இருந்திடுமே ?! தற்சமயம் காற்றாடும் எங்கள்  CC சந்தா நோட் அந்த குறைந்த பட்ச உத்திரவாதத்தைக் கூடத் தரும் நிலையில் இல்லை என்பதே நிஜம் ! இந்த சூழ்நிலையின் தர்மசங்கடம் நான் இது வரை உணர்ந்திராதொரு விஷயம் !  200 பிரதிகளின் தற்போதைய விற்பனைக்காக லட்சங்களில் பணத்தை முடக்குவதெனும் போது - விசாலமற்ற நமது பர்ஸ் மூச்சிரைப்பதை உணர முடிகின்றது! அதே சமயம் கொடுத்த வாக்குறுதிக்கு இப்படியொரு சோதனையா என்ற சிந்தனையும் மண்டைக்குள் சங்கடத்தை உருவாக்குகிறது ! சமீபத்திய தங்கக் கல்லறையும் மறுபதிப்பே...ஆனால் அதற்கு எழுந்த ஆவலும், எதிர்பார்ப்பும் எத்தனை அசாத்தியம் என்பதை நாம் அறிவோமே ! (சென்னையில் கூட விற்பனை எண்ணிக்கையில் முன்னணி இது தான் ! ) கதையின் அற்புத தரத்தைத் தாண்டி இதன் வெற்றிக்குக் காரணமென்று பார்த்திட்டால் - 1.வண்ணம்+ தரம் ; 2.இது வரை மறுபதிப்பே ஆகிடாதொரு கதை என்ற சங்கதி 3.தற்போதும் ஓடிடும் ஒரு சம காலத் தொடர் இது என்ற plus point! தொடரவிருக்கும் டைகரின் பரலோகப் பாதையின் வண்ண மறுபதிப்பிற்கும் - அதே உற்சாகம் & வெற்றி கிட்டிடும் என்பதை 'அந்த CC இதழை மாத்திரம் தருவித்திட  எவ்வளவு பணம் அனுப்பிடத் தேவை ?' என்று வினவி 
இப்போதே வந்திடும் கடிதங்களும் ; மின்னஞ்சல்களும் சொல்கின்றன :-(  இது தான் இன்றைய ; இப்போதைய சூழ்நிலை !! இப்போதெல்லாம் தினந்தோறும் நாங்கள் பார்த்திடும் மந்திர எண் 1320 ! இது லயன்-முத்து காமிக்ஸுக்கு மட்டுமான சந்தாத் தொகை என்பதில் ரகசியம் ஏதுமில்லையே?! வங்கி மூலமும், இதர மார்க்கங்கள் வாயிலாகவும் புது இதழ்களுக்குத் திரண்டிடும் சந்தாத் தொகைகள் எங்கள் முயற்சிகளுக்கு உத்வேகத்தைத் தந்திடும் அதே கணத்தில் - CC கொட்டாவி விடுகின்றதே என்ற ஆதங்கம் எழுந்திடுவதைத் தவிர்த்திட இயலவில்லை ! 

BN USA;KUBERAN போன்ற பழமை நேசிக்கும் நண்பர்களுக்கு எனது விளக்கங்கள் எரிச்சலையும், ஏமாற்றத்தையும் தான் தந்திடும் என்பதை நானறிவேன்! "நீங்கள் சந்தா கட்டாவிட்டால் நான் இதழ்களை வெளியிட மாட்டேன்" என்று blackmail செய்வது போன்றதொரு தோற்றத்தையும் கூட இந்த சூழ்நிலை தர வல்லது எனும் போது, சொல்லவும் இயலா ; மெல்லவும் இயலா லஜ்ஜை எனக்குள் ! NBS வெளியான பின்னே ;  சகஜ வாழ்க்கைக்குக் திரும்பிடும் வேளையினில்  CC -க்கான சந்தா வேகம் 'பிக்கப்' ஆகிடுமென்ற நம்பிக்கை என்னை ஒரு மாத காலம் மௌனமாய் ; பொறுமையாய் காத்திருக்கச் செய்தது ! ஆனால் இப்போதெல்லாம் நாட்கள் துவங்கி முடிவது 1320-ல் மட்டுமே என்பது ஒரு வித routine ஆகிப் போய் விட்ட பின்னே என் அவஸ்தையின் பரிமாணத்தை உங்களிடம் பகிர்ந்திடும் நேரம் வந்து விட்டதாய் தோன்றியது. வண்ணத்தில் என்ன வெளியிட்டாலும் அவை அழகாய் ஒரு வரவேற்பைப் பெற்றிடும் என்பது மாத்திரம் இப்போது தெளிவாய்த் தெரிவதால் CC -ல் '70களின் black & white நாயகர்களுக்குப் பதிலாய் - '80களில் அசத்திய லயன் ; திகில் & மினி லயனின் டாப் கதைகளை வண்ண மறுபதிப்புகளாய் கொணர்வது இந்த இக்கட்டிற்கு தீர்வாக இருக்குமென்று நினைக்கத் தோன்றுகிறது. இதோ - 2013-ல் CC -க்கு நாம் முயற்சிக்கக் கூடியதொரு முழு வண்ணப்  பட்டியல் :

1.டைகர் ஸ்பெஷல்- (பரலோகப் பாதை & இரும்புக்கை எத்தன்) - ரூ.100
2.பிரின்ஸ் ஸ்பெஷல்- (நரகத்தின் எல்லையில்+பற்றி எறியும் பாலைவனம் ) - ரூ.100
3.லக்கி ஸ்பெஷல்  - (சூப்பர் சர்க்கஸ்  & பொடியன் பில்லி)  ரூ.100
4.ஜானி ஸ்பெஷல் - (ஊடு சூன்யம் & சைத்தான் வீடு) - ரூ.100
5.ரத்தப் படலம் ஸ்பெஷல் - (பார்ட் 1 & 2) - ரூ.100 




இவற்றை அவ்வப்போது வெளியாகும் புது இதழ்களோடு இணைத்து அனுப்பிடும் போது கூரியர் செலவுகளில் பணம் மிச்சப்படுத்திட இயலும். உங்களுக்கும் அவ்வப்போது  கூடுதலாய் ஒரு 'பளிச்' வண்ண இதழ் கிட்டிடும் போது, சுவாரஸ்யத்திற்குக் குறைவிராதே ?! What say folks ?  

தவறானதொரு கணிப்பின் பலனாய் இன்று முகம் முழுக்க அசடு வழிய உங்கள் முன்னே  நிற்கிறேன் என்பதை மறுக்கவோ ; மறைக்கவோ நான் விழையவில்லை ! ஏமாற்றம் பொங்கிடும் பட்சங்களில் நண்பர்கள் சிலர் என் தலையில் குட்டு வைப்பார்கள் என்பதோ ; பரிகாசத்திற்கு ஆளாவேன் என்பதோ நான் அறியாததும் அல்ல ! எப்போதும் போல் இப்போதும் யதார்த்தத்தை   உங்களோடு பகிர்ந்து கொள்கிறேன் என்ற ஒரு திருப்தி போதும் ! Over to you guys now ! தொடரும் சென்னைப் புத்தகத் திருவிழாக்களின் போது, சந்தாக்களுக்கு அவசியமின்றி casual ஆக மாயாவி ; ஸ்பைடர் & இதர '70 s நாயகர்களின் மறுபதிப்புகளை வெளியிடுவதென்பது யாருக்கும் சிரமமில்லா தீர்வாக இருக்குமெனில் அதனை நிச்சயம் பரிசீலிப்போம் என்பது கொசுறுச் சேதி !          

========================================================================

4. சமீபத்திய வெளிநாட்டுப் பயணத்தில் ஆசிரியர் அள்ளிவந்த கதைகள் எவை? 

ஏற்கனவே 2013-க்கான முழுப் பட்டியலையும் போட்டு உடைத்து விட்டதில் சுவாரஸ்யம் குன்றி விட்டதாக நண்பர்கள் பலர் அபிப்ராயப்பட்டிருந்தனர் ! இப்போதே அடுத்த பட்டியலையும் open செய்து விட்டால் - த்ரில் இருந்திடாதே ! Wait n' Watch guys !  

========================================================================

5. +6 பற்றிய தற்போதைய நிலைப்பாடு என்ன?

ஓசையின்றிப் பணிகள் நடந்தேறி வருகின்றன என்பதை மாத்திரம் இப்போது சொல்கிறேன் ! +6 முழுக்க முழுக்க இத்தாலிய ஆக்ரமிப்பாய் இருந்திடும் என்பது கொசுறுச் சேதி ! 

============================================================================================

6.  மதியில்லா மந்திரிக்கான வாசகர் மொழிபெயர்ப்பு என்னவாயிற்று?

இன்று கூரியர் மூலம் அனுப்பப்படுகிறது ! அடுத்த வாரம் வெள்ளிக்கிழமைக்குள் எங்களுக்குத் திரும்பக் கிடைத்திடும் வண்ணம் நீங்கள் செயல்பட்டிட வேண்டும் ! So get cracking guys ! 

=============================================================================================

8. மார்ச் மாத லார்கோ ஸ்பெஷலுக்குப் பெயர் தெரிவு செய்யப்பட்டதா இல்லையா?

இது வரை வந்திட்ட பெயர் தேர்வுகளில் அத்தனை 'பளிச்' ரகத்தில் எதுவும் இல்லை என்பதால் - "லார்கோ Action ஸ்பெஷல் " என்றே இந்த இதழ் வெளி வந்திடும். ராப்பர்கள் இன்று அச்சாகின்றன என்பது கொசுறுச் சேதி ! 

=============================================================================================

9. NBS ஆரவாரமான வெற்றிக்குப் பின் ஆசிரியடரித்தும், வாசகர்களிடத்தும் சற்றே உற்சாகக் குறைவு (மந்த நிலை) ஏற்பட்டுள்ளதாகத் தோன்றுவது உண்மையா, இல்லையா?

புயலுக்குப் பின் வந்திடும் ஒரு  அமைதி ! என்னைப் பொறுத்த வரை நான் சற்றே மௌனமாய் இருந்திட்டதற்குக் காரணங்கள் ரொம்பவே சிம்பிள் ! லக்கி லூக்கின் இறுதிக் கட்டப் பணிகள் நேரத்தை கொஞ்சம் எடுத்துக் கொண்டன என்றால், லார்கோவின் மொழிபெயர்ப்புப் பணிகள் நடந்தேறிடும் போது மெய்யாகவே வேறு எதிலும் கவனம் செலுத்திடுவது சாத்தியமாவதில்லை என்பது தான் இன்னொரு காரணம் ! வழக்கம் போல் இம்முறையும் ரொம்பவே complex ஆனதொரு கதைக் கரு ....லார்கோ மட்டுமல்லாமல் சைமனுக்கும் கதையினில் பிரமாதமாய் பங்கு என்பதால் உரையாடல்களில் ஒரு கத்தி முனை விறுவிறுப்பைக் கொணர்வதற்குள் நாக்குத் தொங்கிப் போகின்றது ! அதற்கு மத்தியினில் CC பற்றிய இந்த இக்கட்டும் தலைக்குள் குடைந்து கொண்டே இருந்ததால் - இயல்பாய் இருந்திடல் சிரமமாகியது ! (கழுகுக் கண் தான் விஜய் !! )

========================================================================

10. ஏப்ரல் முதல் தேதியில் வரவிருக்கும் பரலோகப்பாதை + இரும்புக்கை எத்தன் வண்ணமறுபதிப்புக்கு தனியே ஒரு சந்தா கட்ட வேண்டியதிருக்குமா?

Of course not ! 

==================================================
பத்துக்கேள்விகளுக்கும் விடையளிப்பவருக்கு ஸ்டீல் க்ளாவுடன் ஒரு பைக் சவாரி இலவசமாக ஏற்பாடு செய்யப்படும்! :) - 

அந்த பைக் பின்சீட்டை காலியாய் வைத்திருங்கள் ஸ்டீல் க்ளா ! எனக்குத் தான் அந்த சவாரி கிட்டியுள்ளது - ஈரோடு விஜய் புண்ணியத்தில் !

Thanks guys & Catch you soon ! Take Care !

Friday, February 01, 2013

ஒரு கட்டைவிரல் காதல் !


நண்பர்களே,

வணக்கம். ஒரு வாரம் = ஏழு நாட்கள் = அத்தனை பெரியதொரு இடைவெளி இல்லை தான் - இயல்பு வாழ்க்கையினில் ! ஆனால் நமது காமிக்ஸ் காதலெனும் மாயாஜால உலகில் மாத்திரம் அதே ஏழு நாட்கள் பெரியதொரு யுகமாய்த் தோன்றிடுவது எதனால் ? விடை அறிந்தவர் இருப்பின் காது கொடுக்க நான் ரெடி ! பயணம் சென்று வந்த அலுப்பை விட ; மேஜையினில் குவிந்து கிடக்கும் பணிகளை எட்டத்திலிருந்து பார்ப்பதே பெரியதொரு ஆயாசமாய்த் தோன்றிடுவது எனக்கு மட்டும் தானா ? - அல்லது பெரியதொரு கும்பலில் நானும் ஒருவனா ? சரியான பதில் தெரிந்தவர்களுக்கு எங்கள் ஊர் பரோட்டா பார்சல் ரெடி ! Jokes apart, ஒரு மாதிரியாக backlog வேலைகளை முடித்து விட்டு நமது காமிக்ஸ் களத்தினில் கவனத்தைத் திருப்பிடும் போது - சந்தோஷமானதொரு update சொல்லி இந்தப் புதிய பதிவினைத் துவங்குவோமே என்று மனதில் பட்டது ! So - நியாயப்படி அடுத்த மாதம் அறிவிக்க வேண்டியதொரு சங்கதியினை இப்போதே கொணரும் முந்திரிக்கொட்டை சந்தோஷம் எனக்கு இப்போது ! 

காமிக்ஸ் க்ளாசிக்ஸ் இந்தாண்டுக் கோட்டாவினில் ஒரு முழு வண்ண இதழும் உண்டு ; அது நம் கௌபாய் புயலின் பரலோகப் பாதை + இரும்புக்கை எத்தன் கதைகளின் மறுபதிப்பு என்பதையும் நாம் அறிவோம் தானே ?! அந்த வண்ண இதழின் வருகைத் தேதி இப்போது உறுதியாகி விட்டது ! ஏப்ரல் முதல் தேதியன்று 'உலகத் தொலைக்காட்சிகளில் முதன் முறையாக' - காமிக்ஸ் க்ளாசிக்ஸ் முழு வண்ணத்தில் ; பெரிய சைசில் மிளிரக் காத்துள்ளது !


மூச்சிரைக்கச் செய்யும் இந்த அற்புத ஒரிஜினல் அட்டைப்படம் எந்தவொரு பட்டி-டிங்கரிங்கும் இல்லாது அப்படியே நம் இதழுக்கும் முன்னட்டையாகிடவுள்ளது ! அதே போல இரண்டாம் பாகத்திற்கு ஒரிஜினலாய் உருவாக்கப்பட்ட அட்டை - நமது பின்பக்க ராப்பராக வந்திடும் ! 


ஒரிஜினலின் பாணியை அட்டைப்படத்தினில் மாத்திரமின்றி - நமது மொழிபெயர்ப்பிலும் தொடர்வது என்ற தீர்மானத்திற்கும் வந்துள்ளேன் ! 10 ஆண்டுகளுக்கு முன்பு (அல்லது இன்னும் அதிகமா ??) நாம் செய்திருந்த அதே மொழிபெயர்ப்பு இந்த இதழினிலும் இடம் பெறும். "தங்கக் கல்லறை" தந்த 'வரிக்கு வரி comparison ' ; 'பழசு போல் புதுசு இல்லை' என்ற அபிப்ராயங்கள் ஒரு காரணம் என்றால் - இன்னொரு முக்கிய ; சந்தோஷக் காரணமும் இந்தத் தீர்மானத்தின்  பின்னே உள்ளது ! சமீபத்திய சென்னைப் புத்தகத் திருவிழாவினில் நாங்கள் படித்திட்ட ; உணர்ந்திட்ட சில பாடங்கள் சில policy decisions எடுத்திட உதவியுள்ளது என்று சொல்வேன் ! சுருக்கமாய்ச் சொல்வதாயின் :
  • சென்னையினில் நமக்கு உற்சாகமான விற்பனை என்பதை நான் ஏற்கனவே சொல்லி இருந்தேன் ; ஆனால் நமது ஸ்டாக்கில் கிட்டத்தட்ட 70% தீர்ந்து போய் விட்டதென்பதை - நேற்றைய தினம் கணக்கெடுக்கும் போது தான் ஊர்ஜிதப்படுத்திக் கொள்ள முடிந்தது!! அதை விட ஒரு electrifying சேதி என்னவெனில் - நமது NBS இதழில் இன்னும் ஒரு 200+ பிரதிகள் மாத்திரமே எஞ்சியுள்ளன ! இரத்தப் படலம் Collector 's  ஸ்பெஷல் இதழை ஒன்றரை வருடம் வேதாளத்தைச்  சுமந்தது போல் உப்புமூட்டை தூக்கிப் பழகிப் போயிருந்த எங்களுக்கு இது ஒரு எதிர்பாரா சந்தோஷ உச்சம் !அச்சிட்ட பிரதிகளின் எண்ணிக்கை உலகை மிரளச் செய்யும் ஒரு எண்ணிக்கையல்ல தான் ; பெரிய பதிப்பகங்கள் இது போன்ற சின்ன printrunகளை ஒரு தமாஷான விஷயமாகப் பார்த்திடலாம் தான் ;  எனினும் சின்னதான நம் எதிர்பார்ப்புகளுக்கு அது பெரியதொரு சமாச்சாரமே !  
  • ஆண்டாண்டு காலமாய் கழுதைப் பொதியாய் ஸ்டாக் இருந்து வந்த போதெல்லாம் தோன்றிடாததொரு சிரமம் - இப்போது காற்றாடும் கிட்டங்கியைப் பார்த்திடும் போது ஏற்படுவது ஏனோ தெரியவில்லை ! அதுவும் நான் ஸ்டாக் எடுத்த சற்றைக்கெல்லாம் சிதம்பரம் லயன்ஸ் கிளப்பிலிருந்து - விரைவில் அங்கே நடைபெறவிருக்கும் புத்தகக் கண் காட்சியினில் பங்கேற்க அழைப்பு விடுத்து போன் செய்தார்கள் ! ஒரு மாதிரியாக அசடு வழிந்து சமாளித்து வைத்தேன் !தொடரும் நாட்களில் - அடுத்தடுத்து தமிழகத்தின் வெவ்வேறு நகரங்களில் சின்னதும், பெரிதுமாய் புத்தகத் திருவிழாக்கள் நடைபெறவிருப்பது தெரிந்த சங்கதியே . நாம் நேரடியாய் அங்கெல்லாம் ஸ்டால் போடுவது சாத்தியமில்லை எனினும், இதர பதிப்பக நண்பர்கள் மூலமாய் நமது இதழ்களை ஆங்காங்கே கொஞ்சம் கொஞ்சமாவது விற்பனை செய்திட முயற்சிக்கலாம் தான் ! ஆனால் - இப்போதோ பெரியதொரு range நம்மிடம் இல்லை என்பதால் அது சாத்தியமில்லை ! 
  • நம் காமிக்ஸ்களோடு சில / பல காலமாய்த் தொடர்பறுந்து போயிருந்த நண்பர்கள் பலரும் சென்னை புத்தகத் திருவிழாவில் நம் ஸ்டாலுக்கு வருகை தந்த போது - இரு மடங்கு உற்சாகம் கொண்டதை நம் பணியாளர்கள் எனக்கு விலாவாரியாகத் தெரிவித்தனர். நெடுநாளைய நண்பனை எதிர்பாராது மீண்டும் சந்திப்பதே சந்தோஷம் எனும் போது ; அதே நண்பன் - வெள்ளையும், சொள்ளையுமாய் 'பளிச்' என்று காட்சி தந்தால் மகிழ்ச்சிக்கு சொல்லவும் வேண்டுமா என்ன ? நமது வண்ண அவதாரை ; புதுப் பாணியினை அகன்ற விழிகளோடு ரசித்த நம் புது நண்பர்கள் - வண்ண இதழ்களின் பெரும்பான்மையை வாங்கித் தள்ளி விட்டனர். பழைய black & white இதழ்களையும் அவர்கள் வாங்கிய போதிலும், வண்ணத்தின் ஈர்ப்பு way ahead !  
  • தொடரும் நாட்களில் இந்த விற்பனை உத்வேகத்தைத் தொடர்வது எனில் - அழகான தரத்தில் இன்னும் நிறைய இதழ்கள் நம் ஸ்டாக்கிற்கு தேவை என்பது தெளிவு ! சென்னையின் விற்பனையில் ஐந்து சதவீதம் கூட இதர நகரத்து புத்தகத் திருவிழாக்களில் எதிர்பார்த்திடல் சாத்தியமல்ல என்ற போதிலும், 'பளிச்' என்று ஆங்காங்கே தலை காட்டிக் கொண்டே இருந்தால் - நம் காமிக்ஸ் பட்டாளம் சிறுகச் சிறுகப் பெருகிட வாய்ப்புண்டல்லவா ? ஆகையால் - வண்ணத்தில் மறுபதிப்புக் காண வாய்ப்புள்ள 'ஹிட்' தொடர்களில் இருந்து selective ஆக சில இதழ்களை - மாதந்தோறும் சிறுகச் சிறுகத் தயாரிக்கத் தொடங்குவது என்ற சிந்தனையினில் உள்ளேன் ! 
  • அவை எந்தத் தொடர்கள் ; எந்தக் கதைகள் ; எத்தனை இதழ்கள் ; எப்போது வெளியாகும் என்ற விபரங்களெல்லாம்  - இதழ்கள் ஓரளவிற்காவது ொத்தமாய்த் தயார் ஆகிட்ட நிலையினில் தெரியப்படுத்துவேன் ! சந்தா செலுத்திடும் அவசியமின்றி - உங்களின் தேவைக்கேற்ப தருவித்துக் கொண்டிடலாம் இவற்றைப் பொறுத்த வரை ! So உங்கள் அபிமான நாயகர்களுக்கும்   ; ஆதர்ஷ இதழ்களுக்கும் இந்த வண்ண மறுபதிப்புக் குவியலில்  இடம் கிட்டிடுமா என்ற சந்தோஷக் கனவுகளில் இப்போதைக்கு உங்களை உழல விடப் போகிறேன் !
  • ஒவ்வொரு மாதமும் அறிவிக்கப்பட்ட புது இதழ்களின் பணிகளோடு ஓசையின்றிப் பின்னணியினில் - இந்த மறுவருகை இதழ்களின் வேலைகளும் இணைந்திடவிருக்கும் பட்சத்தில் அவற்றிற்கு புதிதாய் ஒரு மொழிபெயர்ப்பினை தயார் செய்திடல் நடைமுறைச் சாத்தியமல்ல என்பதால், ஒரிஜினல்களையே பயன்படுத்துவது தவிர்க்க இயலா சங்கதியாகிறது ! அதன் துவக்கமாய் ஏப்ரலில் வரவிருக்கும்"டைகர் ஸ்பெஷலில்" அதே முந்தைய மொழிபெயர்ப்பு ! 
  • மாதந்தோறும் புது இதழ்களுக்கு அவசியப்படும் நேரமும் , அக்கறையும் , பணமும் போக எங்களிடம் எஞ்சி இருப்பது மாத்திரமே இந்த மறு வருகை முயற்சிக்கு செலவாகும் என்பதால் இப்போதைக்கு அவை நான்கா ? ; ஆறா ? ; பத்தா ? ; பதினாறு இதழ்களா ; என்பது நானே அறிந்திடா விஷயம் ! தவிரவும் இதன் தயாரிப்பினில் மேற்பார்வை என்பதைத் தாண்டி எனக்கு பெரிதாய் கம்பு சுற்றும் வேலை ஏதும் கிடையாதென்பதால் எனது focus ; priority ; கவனம் , துளியும் புது இதழ்களின் பாதையிலிருந்து அகன்றிடாது ! ஆகையால் -  இதனை ஒரு அகலக்கால் முயற்சியாய் பார்த்திடல் நிச்சயம் அவசியமல்லவே ! கைவசமிருந்த கறுப்பு வெள்ளை இதழ்களின் ஸ்டாக் உங்கள் அன்பினால் பணமாக மாறி இருப்பதை - மீண்டுமொருமுறை சற்றே hi -tech ஆன ஸ்டாக்காக மாற்றிடும் ஒரு வியாபார முயற்சியே இது ! (அடடா....வாய்க்குள்ளே கால் கட்டை விரலை விடுவதில் தான் எத்தனை சுகம் !!)
  • சந்தோஷங்களுக்கிடையே - சின்னதாய் ஒரு வருத்தமும் கூட ! மாயாவி ; லாரன்ஸ் - டேவிட் ; ஜானி நீரோ etc., மறுபதிப்புகள் வேண்டுமென்ற கோரிக்கை பலமாக ஒலித்த போதிலும், சந்தாக்களின் எண்ணிக்கையில் எஞ்சி நிற்பது பலவீனமே ! இது வரை காமிக்ஸ் க்ளாசிக்ஸ் சந்தாக்களின் எண்ணிக்கை 160 -ஐத் தாண்டிய பாடைக் காணோம் எனும் போது மண்டையைச் சொறியத் தான் தோன்றுகிறது.  சந்தா செலுத்தி ஒரு மொத்தமாய் எல்லா மறுபதிப்புகளையும் வாங்குவதை விட, தேவையானவற்றை மட்டும் அவ்வப்போது வாங்கிக் கொள்ளலாம் என்ற எண்ணமா ? - அல்லது புது யுகக் கதைகளின் ஈர்ப்பினால் பழசுக்கு மவுசு குறைந்து போய் விட்டதா ? - புரியாத புதிரே ! லயன்-முத்து காமிக்ஸ் புது இதழ்களுக்கான சந்தா புதுப்பித்தல் ஜரூராய் நடந்து வருகின்றது சற்றே ஆறுதல் தந்திடும் சங்கதி ! ஒன்று மட்டும் நிச்சயம் - வண்ணத்தின் வீரியம் டெக்ஸ் வில்லர் போன்ற விதிவிலக்கான அசாத்திய நாயகர்களைத் தவிர, பாக்கி அனைவரையும் சாய்த்து விடும் ஆற்றல் கொண்டதென்பது அப்பட்டம்! 
பிப்ரவரி 15 -ல் வரவிருக்கும் லக்கி லூக் இதழின் இறுதிக் கட்டப் பணிகள் மும்முரமாய் நடந்து வருகின்றன ! ஐம்பது ரூபாய் - வண்ண இதழ் - ஒரு முழு நீளக் கதை + குட்டிக் கதைகள் என்ற இந்த formula எப்படி work out ஆகக் காத்திருக்கிறதென்று அறிந்திட ஆவல் எனக்குள் ! முதல் பார்வையினில் - இது ஒ.கே. ஆகிடும் என்றே தோன்றுகிறது - ஆனால் அதை நீங்கள் உச்சரித்தால் மாத்திரமே ஜெயம் என்பதை நானறிவேன் ! Fingers crossed ! Catch you soon folks !