Sunday, October 31, 2021

சாத்து வாங்கிய சாயந்திரமும், குதித்தெழுந்த பதிவும் !

 நண்பர்களே,

வணக்கம். சாயந்திரத்துக்குள் வேலைகளையெல்லாம் முடித்து, ஒதுக்கி வைத்து விட்டு, முறுக்கு...சிப்ஸ்... அப்பாலிக்கா யாரோவொரு அனாமதேய அன்பர் அனுப்பியிருந்த  ஒரு பெரிய Premium Giftbox-ன்  நொறுக்குத் தீனிகளையும் எட்டும் தொலைவில் வைத்துக் கொண்டு (thanks நண்பரே !!) டாணென்று ஏழரை மணிக்கு கிரிக்கெட் மேட்சைப் பார்க்க செம குஷியாய் அமர்ந்தது மட்டும் தான் ஞாபகமுள்ளது ! ஒரு முறுக்கை முழுங்கும் நேரத்துக்குள் நமது அணியில் பாதிப் பேர் முக்காடைப் போட்டபடிக்கே கிளம்பியிருக்க, சிப்ஸ் பாக்கெட்டை உடைப்பதற்குள் 20 ஓவர்களே முடிந்திருந்தன !! "இதுக்குப் பதிலா ஸ்டீல் பொழிந்து கொண்டிருந்த கவிதைகளைக் கூட ஜீரணிச்சிடலாம் போலும்" என்று தோன்றினாலும் - "ஆங்...பேட்டிங் சொதப்பியிருக்கலாம் ; பவுலிங்கில் பின்னாம விட மாட்டாங்க நம்ம ஆளுங்க !!" என்ற நம்பிக்கை ஒருபக்கம் எட்டிப் பார்த்தது ! ஆனால் இன்றைய மாலைக்கு புனித மனிடோவின் திட்டங்கள் வேறு போலும் !! "ஒரு இரும்பு தெய்வத்தின் கவிதைகளை புறக்கணிச்சிட்டா வந்தே - மவனே, இங்கேர்ந்து உன்னைத் துரத்தி விடறேனா இல்லியா பாரு ?!" என்று பவுலிங்கிலும் நம்மவர்கள் பீச்சோ பீச்சென்று பீச்சும் ஆட்டத்தைக் காட்டச் செய்து, என்னைத் தலை தெறிக்க இங்கே ஆஜர் ஆகச் செய்து விட்டார் ! ராத்திரி முழுக்க ஸ்டீல் - கொட்டையும், குழலையும் ஊதிக்கினே எத்தினி டப்பாங்குத்தைக் குத்தினாலும் பரவால்லே, இனி ஒரு ஆறு மாசத்துக்காச்சும் டி-வி பொட்டியின் பக்கமாய்த் தலை வைத்துப் படுப்பதாக இல்லை ! ஆத்தாடி...என்னவொரு மரண அடி !!

நேற்றின் பின்மாலைப் பொழுதும், இன்றைய நாளின் முழுமையும் "ஒற்றை நொடி...ஒன்பது தோட்டாக்கள்" இறுதி எடிட்டிங்கில் ஓட்டமெடுத்துள்ளது ! 270 பக்கங்கள் கொண்ட மெகா த்ரில்லர் எனும் போது, பிதுக்கி விட்டது வேலை ! நான் எழுதியதே என்றாலும், ஒரு கோர்வையாய் முழுக் கதையாய் வாசிக்கும் போது ஆங்காங்கே தென்பட்ட சொதப்பல்களை சரி செய்வதும் சுலபமான பணியாக இருக்கவே இல்லை ! எனக்குப் பொதுவாய் நெடும் கதைகளினுள் பணியாற்றும் போது நம்ம XIII-ன் வியாதி தொற்றிக் கொள்வதுண்டு ! "இந்தாளுக்கு கோவிந்த்சாமின்னு பேரா ? கொயந்தசாமின்னு பேரா ?" என்ற ரீதியில் சந்தேகங்கள் எழுந்திடுவதுண்டு ! இங்கோ ஒண்ணரை ஆண்டு இடைவெளிக்குப் பின்பாய்த் தொடர்ந்திடும் பணியெனும் போது - இந்தச் சிக்கல் நிரம்பவே படுத்தி எடுத்தது ! So துவக்க அறிமுகப் பக்கங்களில் பயன்படுத்தியிருந்த பெயர்களையெல்லாம் ஒரு நோட்டில் குறித்துக் கொண்டு அப்பப்போ அதனைப் பார்த்துக் கொண்டே தொடர்ந்தேன் ! And கதையை ஒரு முழு வாசிப்புக்கு உட்படுத்தும் போது - இதன் பிதாமகர்களின் விஸ்வரூபம் துல்லியமாய்த் தெரியத் துவங்கியது ! இந்தக் கதையின் துவக்கப் புள்ளியை உருவகப்படுத்திய சமயத்திலேயே கதாசிரியர் இங்கே 5 அத்தியாயங்களை தனக்குள் சிருஷ்டித்து - எந்தெந்த அத்தியாயங்களில் எந்தெந்த முடிச்சுகளை போடப் போகிறோம் ? என்பதையும் தெள்ளத்தெளிவாக ரெடி செய்திருக்க வேணும் என்பேன் !! Becos ஒற்றை முடிச்சு கூட விளக்கமின்றித் தொங்கிக் கொண்டிராது, கதை நிறைவுறும் வேளைக்குள்ளாக அத்தனைக்குமே  செம ஷார்ப்பான தீர்வுகளைத் தந்துள்ளார் ! Simply a masterpiece !! Maybe இதனை இன்னும் ரெண்டோ / மூன்றோ பாகங்களுக்கு நீட்டித்திருக்கவும் முடியும் தான் ; in fact இன்னும் கொஞ்சம் கதை மாந்தர்களைக் கூடுதலாக்கி - கதையின் வீரியத்தையுமே ஒரு மிடறு அதிகப்படுத்தியிருக்கலாம் தான் ! ஆனால் அம்சமான அளவே போதுமென்று 'சிக்' தீர்மானத்துடன் - கதாசிரியர் மிளிர்கிறார் !

And இங்கே பேனா பிடித்த அனுபவத்தினில், பைபிள் வரிகளைத் தேடுவதில் துவங்கி, லத்தீன் பாஷையின் சொற்றொடர்கள் ; அமெரிக்க அரசியல் வரலாறு ; அமெரிக்க சீரியல் கில்லர்கள் ; கொரிய யுத்தம் - என்று ஏதேதோ சமாச்சாரங்களை கூகுளில் துளாவிட்டதும் சேர்த்தி !! நிறைய ஆக்ஷன் கதைகளையெல்லாம் கையாண்டுள்ளோம் தான் ; XIII-ன் 18 பாக நீளங்களையும் பார்த்து விட்டோம் தான் ; அந்த அளவுகோளின்படிப் பார்த்தால் 270 பக்கங்கள் no big deal என்று தோணலாம் தான் ! ஆனால் நம் மத்தியில் நிரம்ப காலத்துக்கு நினைவில் நிற்கப்போகும் த்ரில்லராய் இது இராமல் போகாதென்று காதினுள் பட்சிராஜா சொல்கிறார் !! Fingers crossed !!

So அடுத்த சில நாட்களில் இன்றைய திருத்தங்களைப் போட்ட கையோடு, ஒருக்கா சரி பார்த்து விட்டு, அப்புறமாய் ஒரு உள்ளூர் பள்ளியின் சீனியர் தமிழாசிரியரிடம் பிழை திருத்தங்கள் போட மொத்தமாய் அனுப்பிட வேணும் ! இந்த  மாதம் முதலாய் அவர் நமக்கு உதவிடவுள்ளார் என்பதால் - பற்களை ஆடச் செய்யும் எழுத்துப் பிழைகள் தொடராதென்ற நம்பிக்கையுள்ளது !! ஆக FFS மெகா இதழின் ஒரு பாதி, தீபாவளி முடிந்த பிற்பாடே அச்சுக்கு கிளம்பிவிடும் !

And  நாளை நம்ம சிரிப்புப் பார்ட்டீஸான ஹெர்லக் ஷோம்ஸ் & வேஸ்ட்சன் உடன் எனக்கு அப்பாயிண்ட்மெண்ட் உள்ளது !! இவர்களின் இறுதி appearance ஆல்பம் என்பதால், அமர்க்களமாய் டாட்டா சொல்லி அனுப்பிட எண்ணியுள்ளேன் ! இரண்டு நாட்களுக்குள் அவர்களது மொழிபெயர்ப்பு நிறைவுற்று விட்டால் - அப்புறமாய் நமது XIII காத்திருப்பார் !! அவரை மட்டும் ஒரு நாலு நாட்களுக்குள் சமாளித்து விட்டால் - அதன் பின்பாய் FFS இதழ்களின் புக் # 1 பக்கமாய் குதித்து விடலாம் ! So குவிந்து கிடந்த "பணி மலை" அடுத்த வாரம் இந்நேரத்துக்கு - "தாண்டி முடித்த மலை"யாகியிருப்பின் - அப்புறம் ஸ்டீல் கச்சேரியில் நானுமே சேர்ந்து கொள்ள நேரமிருக்கும் !! உஷார் மக்களே !!

அப்புறமாய்  "கதை எழுதட்டா ? கவித எழுதட்டா ? பாட்டுப் பாடட்டா ?" என்று மாய்ந்து மாய்ந்து வாட்சப்பில் மெசேஜ் அனுப்பி வந்த சீனியர் எடிட்டருக்கு "GO AHEAD !" என்று பச்சை சிக்னலும் தந்து ; பதில்கள் கோரிய உங்களின் ஒரு டஜன் கேள்விகளையும் தந்தான பின்னே - ஸ்டார்டிங் ட்ரபிளோடு தடுமாறிடுபவரை அவசரப்படுத்தும் வேலை பாக்கியிருக்கும் !! "30 நாட்களில் எண்ணங்களை சுவாரஸ்ய எழுத்தாக்குவது எப்படி ?" என்ற புக்கை சீக்கிரமே சீ.எ.கரைத்துக் குடித்து விடுவாரென்ற நம்பிக்கையில் I am waitingggggg !! 

In the meanwhile - உங்களிடம் கோரிக்கைகள் guys :

1. FFS புக்கில் உங்களின் போட்டோக்கள் வேண்டுமெனில், சீக்கிரம் ப்ளீஸ் ! முன்னர் நான் சொன்ன டிசம்பர் 5 தேதிக்கு முன்பாகவே FFS புக் # 1-ம் அச்சுக்கு ரெடியாகி விடுமென்பதால் - the earlier the better folks !!

2. "வாசக நினைவலைகள்" அழகாய் எழுதி, நிறைய நண்பர்களின் flashbacks தேர்வானது நினைவிருக்கலாம் ! அந்த நண்பர்களுக்கொரு வேண்டுகோள் : ப்ளீஸ் - உங்களின் அந்தப் பின்னூட்டங்களை ஒரு மின்னஞ்சலாய்த் தட்டி விடுங்களேன்  ? நாலு நாளைக்கொரு பதிவென்று போட்டுத் தாக்கி வரும் மும்முரத்தில் உங்களின் பின்னூட்டங்கள் தாங்கிய பதிவானது பின்னே ஓடி விட்டிருக்கும் ! நேரம் செலவிட்டால் நாங்கள் அதனுள் துளாவித் தேடிடுவோம் தான் ; ஆனால் உங்களுக்கு அது சுலபப் பணியாக இருக்கும் பட்சத்தில் - please help ! 

Before I sign out - இந்த தீபாவளியைத் தெறிக்க விட்டு வரும் நமது மஞ்சச் சட்டைக்காரரின் இந்த படத்துக்கொரு கேப்ஷன் எழுதுங்களேன் - பார்க்கலாம் ? பரிசு ? அடுத்த டெக்ஸ் ஹார்ட்கவர் இதழ் - whichever that might be !! Top 3 கேப்ஷன்களுக்குப் பரிசிருக்கும் !! And ஆளுக்கு maximum மூன்றே வாய்ப்புகள் தான் !! So காட்டுங்களேன் உங்களின் வித்தைகளை guys !!

Bye all...see you around !! தீபாவளி அலசல்கள் தொடரட்டுமே ப்ளீஸ் ?

Thursday, October 28, 2021

அக்டோபரில் நவம்பர் !!

 நண்பர்களே,

வணக்கம். சொன்னதைச் செய்து காட்டிட ஏக்கமாய்க் குட்டிக்கரணங்கள் அவசியமாகிப் போக, இக்கட தலை காட்டக் கூட நேரமில்லை !! அந்தக் காரண- காரியங்கள் பற்றி நீட்டி முழக்குவதையெல்லாம் அப்புறமேட்டுக்கு வைத்துக் கொள்ளலாம் என்பதால் - இதோ சேதி : "பொட்டிகள் கிளம்பியாச்சூ !" இன்று மதியம் நவம்பர் இதழ்களுடனான உங்களின் டப்பிக்கள் கூரியர் ஆபீஸ்களின் நெரிசல்களுக்குள் புகுந்து விட்டன & நாளை முதலாய் பட்டுவாடாக்கள் துவங்கிட வேணும் !! Fingers crossed !! 

இம்முறை தீபாவளியின் பரபரப்பு ஒரு வாரத்துக்கு முன்னமே ஊரை அரவணைத்திருப்பதால் - திரும்பின திக்கிலெல்லாம் நம்ம தானைத் தலைவர் கவுண்டரைப் போல - "இங்கே நான் ஒரே பிசி" டயலாக்கைத் தான் ஆளாளுக்கு அள்ளி விட்டுக்கொண்டுள்ளனர் ! பைண்டிங்கில் பிசி ; சரக்கை ஏற்றிப் போகும் லோடு ஆட்டோக்கள் கூட பிசி ; கூரியரில் பிசியோ பிசி ; லாரி ஷெட்களில் தெறிக்கும் பிசி !! So இந்த பிசிக்களின் மத்தியில் புறப்பட்டுள்ள கூரியர் பார்சல்கள் இவ்வாரயிறுதிக்குள்ளாய் உங்களை எட்டிட புனித மனிடோ அருள் பாலிப்பாராக !! 

ஊரே பிஸியாயிருக்கும் போது நாம மட்டும் இளப்பமா - என்ன ? சும்மா கடந்த 4 நாட்களாய் ஆபீசே on fire !!  காத்துள்ள பணிகளின் மொத்தத்தையும் ஒரு பட்டியலிட்டுப் பார்க்க போன வார இறுதியினில் முனைந்த போது - லைட்டாக வயிற்றுக்குள் கொட கொடவென சத்தம் !! 

அடுத்த 20 நாட்களுக்குள் பூர்த்தி கண்டிட எனது பொறுப்பினில் மட்டுமே காத்திருந்தவை இவை  :

*ஒற்றை நொடி..ஒன்பது தோட்டாக்கள்" - எஞ்சி நின்ற  138 பக்கங்கள் 

"டேங்கோ" - 62 பக்கங்கள்

"(புது) வெட்டியான் ஸ்டெர்ன்" - 78 பக்கங்கள்

அலாவுதீனும், ஒரு புலானாய்வுப் பூதமும்" - 54 பக்கங்கள்

இரத்தப் படலம் - "நினைவோ ஒரு பறவை - 46 பக்கங்கள் 

ஆக சுமார் 375 + பக்கங்களின் மொழிபெயர்ப்பு ; அப்புறமாய் ஒட்டு மொத்த 600 பக்கங்களின் எடிட்டிங் ; அப்புறமாய் அந்த மாயாவியார் + ஸ்பைடர் + செக்ஸ்டன் ப்ளேக் இதழின் பணிகள் + "எலியப்பா & கோ.தோன்றும் விலையில்லா இதழ் - என்று அடையார் அனந்த பவனின் மெனு போல நீளமாய் நிற்பதை எழுதிப் பார்த்த போது, கண்ணைக் கட்டிக் கொண்டு வந்தது !! உத்தேசமாய் இவற்றை நிறைவு செய்திடத் தேவைப்படக்கூடிய அவகாசம் எவ்வளவென்று கணக்கிடவே கை நடுங்கியது !! வாய் கிழிய வாக்குறுதிகளை அள்ளிவிட்டாச்சு ; இனி சொதப்பினால் வெளியே தலை காட்ட முடியாதென்பது புரிந்த கணத்தில் எங்கிருந்தோ பிறந்த வெறித்தனமான உத்வேகம் என்னை மட்டுமன்றி, நமது DTP டீமையுமே தொற்றிக் கொண்டது ! 

4 நாட்களில் 178 பக்கங்கள் - இது எனது பேனாவின் output !! 

4 நாட்களில் 116 பக்கங்கள் - இது நமது DTP டீமின் output !! 

Phew ...நிறையவே பல்டிக்கள் அடித்துள்ளோம் கடந்த பத்தாண்டுகளில் ; ஆனால் this takes the cake !! அதிலும் - "ஒற்றை நொடி..ஒன்பது தோட்டாக்கள்" மொழியாக்கம் ஒரு flow-வில் தெறிக்க ஆரம்பித்த போது - அதனை வெறெந்தக் காரணத்தின் பொருட்டும் பாழ் பண்ணிட வேண்டாமே என்ற எண்ணத்தில் blog பக்கமாய்க் கூட எட்டிப் பார்த்திட முனையவில்லை ! அதுவும் போன மார்ச்சில், லாக்டௌன் துவங்கும் முன்னே துவங்கிய பணியிது ;  கோர்வைகளில் பிசிறின்றி flow தொடர்ந்திட வேண்டுமெனில்,  மீதப்பக்கங்களை இனியொரு இடைவெளி இன்றி எழுதி முடிக்க  வேண்டுமென்று பட்டது ! 

ஒரு தினுசான மோன நிலையில் ஓட்டமெட்டிருந்த இந்த நாட்களின் மத்தியில்  காத்துள்ள 'தல' தீபாவளி மலரின் preview போடவோ ; ட்யூக்கின் அட்டைப்படம் + preview கண்ணில் காட்டவோ ; உங்களுக்கோர் அறிவிப்பைப் போட்டு வைக்கவோ கூட தோன்றவே இல்லை !! இதோ - இந்த நொடியினில் கூட என் மண்டை - வெட்டியான் ஸ்டெர்ன் & கோ. சகிதம் கேன்சஸ் சிட்டியில் தான் வேரூன்றிக் கிடக்கிறது ! புனித மனிடோ அருளியுள்ள இந்த ராக்கெட் fuel டேங்க்கில் மீதம் இருக்கும் போதே - மிச்சப் பணிகளையும் கபளீகரம் செய்து முடித்து விட்டால் - டிசம்பரில் டென்ஷனின்றி உலாற்ற இயலும் என்பதால் மறுக்கா அந்த ஓட்டத்தைத் தொடரக் கிளம்புகிறேன் guys !!

But அந்த previews போடாது கிளம்பிட மாட்டேன் தான் !! Here you go :

அட்டைப்படத்தின் சித்திரம் ஒரிஜினலே ; வர்ணங்கள் + மெருகூட்டல் மாத்திரமே நமது டிசைனர் பொன்னனின் உபயம் ! And புக்கை நேரில் பார்க்கும் போது தான் அந்த அட்டைப்பட நகாசு வேலைகள் ; மினுமினுப்புகள் புரிபடும் ! So இங்குள்ள டிசைன் நாங்கள் பணியாற்றிய base மாத்திரமே ; இதன் மீது ஒரு லோடு வேலைப்பாடுகள் நடந்துள்ளன ! 


And இதோ - ஓவியர் சிவிடெல்லியின் கைவண்ணத்தில் இளம் டெக்ஸ் + ரெகுலர் டெக்ஸ் + இளம் தேஷா + ரெகுலர் தேஷா ரகளை செய்திடும் கலர் ஆல்பத்தின் preview !!

And தொடர்வது - "பருந்துக்கொரு பரலோகம்" black & white அதிரடி மேளாவின் preview ! இந்த முறையுமே டெக்ஸ் & கிட் center stage எடுத்துக் கொள்ள பட்டாசாய்ப் பொரிகிறது ஆக்ஷன் ! 

Last but not the least - கலர் டெக்ஸ் சிறுகதை ! நிறையவே ???? களையும், !!!!!! களையும் கொணரவுள்ள இந்தச் சிறுகதையின் preview இதோ !! மீதத்தை வெள்ளித்திரையில் காண்க !

அம்சமாய், hardcover-ல் கலக்கிடும் இந்த இதழ், நமது பண்டிகை தினங்களை அதிரச்செய்திட்டால் - 'எல்லாப் புகழும் போனெல்லிக்கே !!'

Before I sign out - இதோ ட்யூக் :


என்றைக்கேனும் ஒரு தூரத்து நாளில் இந்த 'பொம்ம புக்' பெயரைச் சொல்லி அடிக்க நேர்ந்த கூத்துக்களையெல்லாம் சிறுகச் சிறுக  நினைவு கூர்ந்திட ஒரு சாவகாசப் பொழுது அமையுமாயின் - இந்நாட்களை நிச்சயமாய் வாய் பிளந்தே அசைபோடுவேன் ! Simply becos - இந்த நொடியில் எங்களணிக்குள் புகுந்திருப்பது நிச்சயமாய் ஏதோ ஒரு காஞ்சனாவோ ; முனியோ ; அரண்மனை ஆவியோ தான் !! அது எந்த ரகமாகயிருந்தாலும், சரி, அதன் முதுகில் சவாரி செய்தபடிக்கே ஒரு வண்டியோ வண்டி வேலைகளை நிறைவு செய்ததை நிச்சயமாய் ரொம்பவே ஸ்பெஷலாய் நினைவு கூர்ந்திடுவேன் !! இன்னும் பாதித் தொலைவுள்ளது guys - ஓட்டமெடுக்கிறேன் அதனுள் மீண்டும் ஐக்கியமாகிட !! Bye all...see you around !!

P.S : ஆன்லைன் லிஸ்டிங்குகள் காலையில் ரெடியாகிடும் !

அப்புறம் sorry guys - டப்பிக்குள் ரவுண்டு பன் நுழைக்க இடமில்லை !! Hardcover டெக்ஸ் திடமாயிருக்க, மீத 2 ஆல்பங்களுமே டபுள்ஸ் என்பதால் டப்பியில் திணிக்க இடமில்லை ! So சாக்லெட்டோடு இந்தவாட்டி ஒப்பேற்றிடுங்கள் - ப்ளீஸ் !!

Saturday, October 23, 2021

சின்னச் சின்ன ஆசைகள் !!

 நண்பர்களே,

வணக்கம். சான் பிரான்சிஸ்கோவுக்கும், லாஸ் ஏஞ்சலீசுக்கும் மத்தியில் ஒன்றரை நாட்களாய்த் தெறிக்கும் பயணங்களில் இங்கே ஒரே பிசி ! "இவன் எப்போ மூட்டையைக் கட்டிக்கினு கிளம்பினானோ ?" என்று விழிக்க வேணாமே - எனது பயணம் குந்திய இடத்திலிருந்தே சாத்தியப்பட்டு வருகிறது - "ஒற்றை நொடி...ஒன்பது தோட்டாக்கள்"ஆல்பத்தின் புண்ணியத்தில் ! 

கதாசிரியர் இங்கே இருபதடி பாய்கிறாரெனில் - ஓவியரும் கலரிங் ஆர்டிஸ்ட்டும் நூற்றி இருபதைத் தாண்டிக் காட்டுகின்றனர் ! அதிலும் ஆக்ஷன் பிரேம்களில் 'ஆ.உஸ்கா...ஆ டிஷ்க்கா...!!" என்று குரல் கொடுக்காதது மட்டும் தான் பாக்கி ; மற்றபடிக்கு பராக்குப் பார்ப்பவனுக்கே - கேப்டன் பாணியில் லெப்ட்டை செவத்துலே ஊன்றி ரைட்டால் யாரையாச்சும் ஒரு போடு போட தோன்றுகிறது !! (சில புஷ்டியான இளவரசர்கள் முயற்சிக்க வேணாமென அறிவுறுத்தப்படுகிறது ; செவருக்கோ - சுற்றியிருப்போருக்கோ சீரியசான சேதாரம் நேரக்கூடுமென்பதால் !) நிறைய த்ரில்லர்ஸ் பார்த்திருக்கோம் தான் ; ஆக்ஷன் ஜானர் நமக்குப் புதிதே அல்ல தான் & ஏகப்பட்ட நெடும் சாகசங்களுக்கும் பரிச்சயம் கண்டவர்களே நாம் - ஆனால் இந்த 270 பக்க த்ரில்லர் முற்றிலும் வேறொரு லெவல் guys !! இது பற்றி அவ்வப்போது பதிவிட்டுள்ளேன் தான் ; ஆனால் ஈரோடு 2020 க்கென போன வருஷ மார்ச்சில் இதற்குப் பேனா பிடிக்கத் துவங்கியவன், அந்த முதல் நீண்ட லாக்டௌன் குறுக்கிட்ட போது, "ரைட்டு...அப்பாலிக்கா பாத்துக்கலாம் !!" என்றபடிக்கே இரண்டரை பாகங்களோடு மூலை சேர்த்திருந்தேன் ! ஒரு லாக்டவுனும் முடிந்து, இரண்டாவதும் முடிந்து - இனி தள்ளிப்போட வாய்ப்பே இல்லை என்றாகியுள்ள நடப்பினில், மொத்த 270 பக்கங்களையும் எடுத்து மறுக்கா வாசிக்க ஆரம்பித்த போதே ஜிவ்வென்று அந்தப் பரிச்சயமான பரபரப்பு தொற்றிக் கொண்டது ! பக்கங்களின் ஓட்டத்தோடு எனக்குள்ளான அங்கலாய்ப்புமே கூடிப் போனது !! இத்தனை தெறிக்கும் த்ரில்லரை கிட்டத்தட்ட இரண்டு ஆண்டுகளாய் அடைகாக்கும்படி ஆகிப் போனதே என்ற கவலை தான் அது ! Anyways better late than never என்று சொல்லிக்கொண்டே பாகம் 4 -ன் இறுதியினை எட்டிப் பிடிக்க முனைந்துகொண்டிருக்கிறேன் ! ஒரிஜினலாய் இந்த 5  பாக சாகஸத்தின் அட்டைப்படங்கள் மட்டும் ரொம்பவே மொக்கை ரகம் ; நம்மவர்கள் கொஞ்சமாச்சும் மெருகூட்ட இயன்ற பல்டிக்களை அடித்து வருகின்றனர் ! அட்டைப்படம் மட்டும் அழகாய் அமைந்துவிட்டால் FFS -ன் புக் # 2  ரொம்ப காலத்துக்குப் பேசப்படும் இதழாய் அமைந்திடுமென்பது உறுதி ! நமது டிசைனிங் டீமுக்கு புனித மனிடோ ஆற்றல் தருவாராக ! 

Moving on - ஆளாளுக்கு மூணு லட்டு ; நாலு லட்டு எனும் மோகங்களில் பிசியாக இருக்க, கூப்பிடு தொலைவிலுள்ள "ரவுண்டு பன் வேலை" பற்றிய எண்ணம் என்னுள் ஓடி வருகிறது ! "தீபாவளிக்கொரு ரவுண்டு பன்" என்று ஏற்கனவே அறிவித்திருக்க, பன்னும், புக்ஸும் போட்டி போட்டு ரெடியாகி வருகின்றன ! மூன்று முரட்டு புக்ஸ் நவம்பருக்கு எனும் போது பயந்து, பவ்யமாய்ப் பணிகளுக்குள் புகுந்திருந்ததன் புண்ணியத்தில் 'தல' பிரின்டிங் இவ்வாரத் துவக்கத்திலேயே நிறைவுற்றிருக்க, பைண்டிங்கில் தற்சமயம் பிஸியாய்ப் பணிகள் ரன்னிங் ! And "ஒல்லித் தல' இதோ, இன்று அச்சு நிறைவுற்ற நிலையில், திங்களன்று பைண்டிங் ஆபீசுக்குப் புறப்படவுள்ளார் ! ஹெர்மனின் புது வரவு ட்யூக் கடாசியாய் அச்சுக்குச் செல்லவுள்ளார் - திங்களன்று ! So ஏதாவது எதிர்பாரா இடர் குறிக்கிடா பட்சத்தில் வரும் விசாலக் கெயமை (28th அக்டோபர்)   புக்ஸ் இங்கிருந்து புறப்பட்டிட வேணும் ! தட்டுத் தடுமாறி "மாதத்தின் துவக்கத் தேதிக்கு புக்ஸ்" என்ற schedule-க்கு திரும்பிட முனைகிறோம் ! தெய்வமே...."கொரோனா டெல்டா sub-variant ; சூப்பரின்டென்டென்ட்" என்று மறுக்கா ஆங்காங்கே ஒலிக்கும் ஏதேதோ பூச்சாண்டிகள் நம்மூர்களுக்கு ஒரு ரவுண்ட் வராதிருக்கச் செய்யுங்களேன் - simply மிடிலே !! 

கொரோனா என்ற பெயரைச் சொல்லி மார்கெட்டில் பொதுவான விலைவாசிகள் எல்லாமே தீயாய், பேயாய் எகிறி வருவதில் ரகசியங்களில்லை தான் ; ஆனால் கடந்த முப்பது நாட்களுக்குள் பேப்பர் & அச்சுத் துறையினில் நிகழ்ந்து கொண்டிருக்கும் கிறுக்குத்தனங்களை சுத்தமாய் சகிக்க முடியலை !!  (நடப்பாண்டின்) பிப்ரவரி to அக்டோபர் என்ற இந்த 8 மாதங்களில், ஆர்ட்பேப்பர் விலைகள் அப்படியே இரு மடங்காகி விட்டுள்ளன ! அதுவும் கடைசி 20 நாட்களில் டன் ஒன்றுக்கு ரூ.20,000 எகிறியுள்ளது ! "சைனாவிலிருந்து சரக்கு no coming ; கண்டைனர் no getting ; உள்ளூர் மில்களுக்கு பேப்பர் செய்யும் உட்பொருட்கள் விலை climbing ; so வேணும்னா இந்த விலைக்கு இப்போ வாங்குறான் - வாங்காட்டி இடத்தைக் காலி பண்றான் - காத்தாவது வர்றான் !!" என்று சேட்டு முதலாளிகள் நிமிர்ந்து பார்க்கக்கூட நேரமின்றி போனில் candy crush ஆடியபடிக்கே சொல்லும் போது நம்பள்க்கு பேதி தான் வர்றான் ! "ரைட்டு, சேட்டு சார் அப்டி தான் பேசுவார் ; நம்ம ஊர்க்காரனுவ நம்மளைக் கைவிட மாட்டானுங்க !!"என்றபடிக்கே அட்டைப்படங்களுக்கு நாம் பயன்படுத்தும் போர்டு வாங்கப் போனால், அங்கே முதலாளி மௌன விரதத்தில் இருந்தார் ! ஒரு காகிதத்தை மட்டும் தூக்கி நீட்டினார் ! "என்னது சார் ?" என்று கேட்டால் - "ம்ம்...படிங்கோ !!" என்பதையும் சைகையிலேயே சொல்ல - நானும் வாசிச்சேன் ! "உபயகுசலோபரி ; இப்போவும் திங்கள் முதல் எல்லா அட்டை விலைகளும் டன்னுக்கு ரூ.5500 கூட இருப்பதால், புது விலைப்பட்டியல் வரும் வரைக்கும் புதிதாய் ஆர்டர் எதுவும் எடுக்க வேண்டாம் என அன்போடு, பண்போடு, பாசத்தோடு, நேசத்தோடு, கேட்டுக் கொள்ளையடிக்கப்படுகிறது....சாரி..கொள்ளப்படுகிறது  ! - இப்படிக்கு மொள்ளை போடும் மில் முதலாளி !!" என்றிருந்தது !! நிமிர்ந்து பார்த்தால் சாந்தம் வழியும் முகத்தில் ஒரு புன்னகையோடு - "கெளம்புறது ??" என்ற கேள்வியோடு உள்ளூர் முதலாளி வீற்றிருந்தார் ! சரியாய் இரண்டே வாரங்களுக்கு முன்னே தான் டன் ஒன்றுக்கு 3500 ஏற்றி இருந்தனர் என்பது இப்போது பேச்சுக்கான சமாச்சாரமே அல்ல என்பதை அவரது வதனம் அறிவுறுத்தியது !!

புடிச்சேன் பாருங்க ஒரு ஓட்டம் - சைக்கிள் ஓட்டப் பழகிய தினங்களில் நாய் துரத்திய போது சைக்கிளைக் கீழே கடாசி விட்டு ஓடியதை விடவும் வேகமாய் ஓடி - ஊரெல்லாம் தேடி, இறுதியில் ஜூனியர் எடிட்டரின் பள்ளி சீனியர் நடத்தும் பேப்பர் ஸ்டோரில் TNPL போர்டை புது விலைகள் அமலுக்கு வரும் முன்பான விலைக்கே வாங்க ஏற்பாடு செய்து மொத்தமாய் வாங்கிக் கொணர்ந்து குவித்தாச்சு !! நாம் இதுவரைக்கும் பயன்படுத்தி வந்தது இதர லோக்கல் மில் தயாரிப்புக்களே ! ஆனால் இன்றைக்குத் தேதிக்கு அந்த லோக்கல் சரக்கின் (புது) விலையும், TNPL மில்லின் போன வாரத்து விலையும் ஒன்றே என்றான பின்னே, "டாட்டா லோக்கல் மில்ஸ் !" என்று சொல்லி விட்டோம் ! So  ஜனவரி முதலாய் இனி TNPL அட்டையே 'ஜம்'மென்று தெறிக்க விடவுள்ளது !! 

ஏதேனும் ஒரு பெரும் அதிசயம் நிகழ்ந்து ; சர்வதேச வணிகத்தில் சைனா முன்போலவே தடையின்றிச் சரக்கு சப்ளை செய்திட வழிபிறந்து ; இங்குள்ள நடுமுதலாளிகள் தொந்திகளை இதற்கும் மேலாய்ப் பருக்கச் செய்திட வேணாமென்ற தீர்மானத்துக்கு வந்தாலொழிய - 2023 முதலாய் நாம் ஆர்ட்பேப்பருக்கு விடைகொடுத்துவிட்டு, நார்மல் தாள்களுக்கு மாற்றம் காண வேண்டியிருக்கும் !  காத்துள்ள புத்தாண்டுக்கு சிக்கல்களில்லை ; 2 மாதக் கடனில் கணிசமாய் பேப்பர் வாங்கி அடுக்கியாச்சு ; so 2022 திட்டமிட்டபடியே பயணித்திடும் ! ஏறிய விலைவாசிகள் ஏறிய வேகத்திலேயே இறங்கும் அதிசயம் நம் தேசத்துக்கு அந்நியமே என்பதால் "2023 & onwards in normal paper" என்ற மைண்ட்செட்டுக்கு நாம் சிறுகச் சிறுக மாறிக் கொள்ள வேண்டி வரும் ! For starters - புத்தக விழா ஸ்பெஷல் இதழ்களுக்கும், மறுபதிப்புகளுக்கும், நார்மல் காகிதத்தில் பழகிப் பார்க்கும் course-ல் முதல் பாகத்தை அமல்படுத்திப் பார்க்க வேண்டும் போலும் !!  Fingers crossed !

அடுத்த டிசம்பர் வரைக்குமாவது ஆர்ட்பேப்பர் தொடர்ந்திடும் என்பதால் - இதோ, தக தகக்கும் "ஒல்லித் தலையின்" preview :


ஒரிஜினல் அட்டைப்படம் - பின்னணிகளில் மட்டும் மாற்றங்களோடு ! And உட்பக்கங்கள் மோரிஸின் சித்திரங்கள், டிஜிட்டல் கலரினில் சும்மா தக தக வென மின்னுகின்றன ! ஜாலியான லக்கியின் template கதை எனும் போது மொழிபெயர்ப்பில் no நோவுகள் !! And இந்தவாட்டி "சார்வாள் ; சித்தே ; புள்ளையாண்டான் " போன்ற பதங்களுக்கு தடாவும் போட்டாச்சு ! So எப்படியும் அடுத்த batch "தடா தேர்வுகள்" சீக்கிரமே ரெடியாகிடுமென்று ஸ்டீலின் பட்சி சொல்கிறது ! வார்த்தைகளில் மாற்றங்கள் என்றான பின்னே "தாயில்லாமல் டால்டனில்லை" சாகசத்திலுமே களையெடுத்து விட்டாச்சு ! So hopefully வாசிப்பில் நெருடல்கள் இராதென்று நம்புவோம் !! இதோ - உட்பக்க previews :

மறுக்கா - லட்டுக்கள் திக்கில் திரும்பிட்டால் - "அந்த அட்டைப்பட அணிவகுப்பு + முதல் இதழின் replica முயற்சி" பற்றிய திட்டமிடல் பிரதானமாய் நிற்கிறது ! And  சமீபத்தைய உள்ளாட்சித் தேர்தல் முடிவுகள் போல இங்கு ஓட்டெடுப்பில் "வேணும் !!" என்ற அணிக்கு landslide வெற்றி கிட்டியிருப்பதால் என் வேலை இலகுவாகிடுகிறது ! So அட்டைப்படங்கள் + "இரும்புக்கை மாயாவி" முதல் இதழ் என்ற முன்மொழிவு நிஜமாகிடும் ! ஆனால் அவற்றையும் ஜனவரிக்கே என்று போட்டுத் தாக்கி ஓவராய்த் திகட்டச் செய்ய வேண்டாமே என்று நினைத்தேன் ! காத்துள்ள 2022 முழுக்கவே நமது பொன்விழா ஆண்டு தான் எனும் போது FFS இதழ்களும், SMASHING '70s - வேதாளன் ஆல்பமும் வெளியான பிற்பாடு இதை களமிறக்குவோமே guys ? அவற்றில் படிக்கப் புதிதாய் ஏதும் கிடையாதெனும் போது, "சூட்டோடு சூடாய் வந்தே தீரணும் !" என்ற கட்டாயங்கள் கிடையாது தானே ? And இதற்கென முன்பதிவு, சைடுபதிவென்றெல்லாம் எதுவும் இருந்திடாது ; "புக்ஸ் ரெடி" என ஒரு நாள் காலையில் அறிவித்த பின்னே நீங்கள் ஜாலியாய் வாங்கிக்கொள்ளலாம் - simple as that !!

அப்புறம் "புலி லட்டு" ; "ஆனை லட்டு" என்ற பற்பல முன்மொழிவுகள் காற்றில் இங்கும் அங்கும் பறப்பதைக் காண முடிந்தது ! கொஞ்சமே கொஞ்சமாய்ப் பொறுமை guys - FFS பணிகளை முடித்துத் தந்தான பின்னே , காத்துள்ள டிசம்பரின் 4 கதைகளுள் மூன்று எனது பொறுப்பிலானவைகள் ! அவற்றையும் போட்டுத் தாக்கி விட்டால் - எனது மண்டைக்குள் குடியிருக்கும் அந்த "திருவாரூர் தேரிழுக்கும் முனைப்பு" சற்றே சமனப்பட்டிருக்கும் ! அந்த நொடியினில் ஒரு "லட்டு டிப்போ"வுக்கென  ஓசையின்றி ரெடியாகியுள்ள ஏற்பாடுகள் பற்றி வாய் திறக்கிறேன் ! Trust me guys - சர்க்கரை நோயுள்ள எனக்கே, நாவில் ஜாலம் ஊறச் செய்யும் சமாச்சாரமது ! So யூத்தான உங்களுக்கு விருந்து வெய்டிங் !! Before I sign out - இன்னொரு கேள்வியுமே !!

2022 முழுக்கவே உங்களுக்கான ஆண்டெனும் போது - உங்களின் கோரிக்கைகளை ; அவாக்களை இயன்ற மட்டிலும் நிறைவேற்ற இயன்ற பல்டிக்கள் அனைத்தும் அடித்திட தயாராய் இருப்போம் ! அதன் தொடர்பாய் ஒரேயொரு கேள்வி folks : 

"இந்த ஒரேயொரு விஷய(மு)ம்  நனவானால், இந்தப் பொன்விழா ஆண்டு என்னைப் பொறுத்தவரை ஒரு மறக்கவியலா ஆண்டாகிடும் !" என்று உங்களுக்குள் ஏதேனும் ரகசிய அவாக்கள் குடியிருப்பின் - அவற்றை பகிர்ந்திடுங்கள் ப்ளீஸ் !! உங்கள் "சின்னச் சின்ன ஆசைகள்" சாத்திய எல்லைகளுக்குள் இருந்து, அவை நம் நண்பர்களுக்கும் பிடித்திருக்குமென்ற நம்பிக்கைகளை விதைப்பதாக இருப்பின், அவற்றுக்கு சிறகுகள் தந்திட நிச்சயமாய் தயங்கிட மாட்டோம் ! 

I repeat - ஆளுக்கு ஒற்றை சின்னச் சின்ன ஆசை only !! And கல்யாண வீட்டு ஷாப்பிங் லிஸ்ட்கள் வேணாமே - ப்ளீஸ் !! Plus இல்லாதவற்றையோ, இயலாதென்று ஏற்கனவே சொல்லியுள்ளவற்றையோ கேட்டு மண்டையைச் சொறிய விட வேணாமே guys !! 

Bye all...அடுத்த பதிவில் 'தல' தீபாவளி மலர் பற்றி !! இப்போதைக்கு மறுக்கா சான் பிரான்சிஸ்கோ கிளம்பிடுகிறேன் !! See you around !!😃

Friday, October 22, 2021

ஒரு பட்டாம்பூச்சி தினம் !!

 நண்பர்களே,

வணக்கம். "சந்தோஷம்" என்பதற்கொரு உருவம் உண்டென்கில் நேற்றைய பதிவிற்கு நீங்கள் தந்துள்ள அசாத்திய வரவேற்பினில் - அதனைத் தொட்டு உணர்ந்திருக்க முடியும் ! ஒரு 'பொம்ம புக்' மட்டும் தான் ; ஒரு நூறு அன்றாடப் பொறுப்புகளுக்கு மத்தியினில் அதனை அணுகிட வேண்டியதொரு காலகட்டத்தில் இருக்கின்றோம் தான் ; காலங்கள் மாறியிருப்பினும் சில evergreen நாயகர்களின் மறுவருகைகள் நம் முகத்தினில் ஒரு புன்னகையைப் படர விடாது போகாதென்று எதிர்பார்க்கவும் செய்தேன் தான் ; ஆனாலும் கூட நேற்றைய சந்தோஷப் பிரவாகங்கள் absolutely stunning !! இரும்புக் கவிஞரின் நூற்றுச் சொச்சம் பின்னூட்டங்களுக்கு மத்தியில் ஒரு நூற்றுச் சொச்சம் நண்பர்களின் அந்தக் கலப்படமில்லா மகிழ்வும், அன்பும், ஆனந்தமும் என்னை ரொம்பவே...ரொம்ப ரொம்பவே humble ஆக உணரச் செய்து விட்டன folks !!  "ரெண்டு கடப்பாரைகளை காலை டிபனுக்கு விழுங்கணுமே !!" என்று சொன்னால் - "தொட்டுக்க காரச் சட்னியா ? மல்லிச் சட்னியா ?" என்று மட்டுமே கேட்கும் எருமையனாகி விட்டிருக்கும் எனக்கே கூட, நேற்றைய அனுபவம் நெஞ்சினில் பட்டாம்பூச்சிகளை நாட்டியமாடச் செய்து விட்டது !! ஓராயிரம் மும்முரங்களுக்கு மத்தியில் ஓடிக்கொண்டிருக்கும் ஒவ்வொருவரிடமும், வெறும் ஐந்தே நிமிடங்களுக்காவது ஒரு புன்னகையினை விதைக்க எனக்கு சாத்தியமாகி இருப்பின் - அது புனித மனிடோ வழங்கியுள்ள வரமாகவே இருக்கும் & இதற்கென ஓராயிர குட்டிக்கரணங்கள் அடித்தாலுமே தகும் !! Thank you for the umpteenth time guys !! 

நேற்றைய பொழுதில் பட்டாம்பூச்சிகளின் நடனத்தை நான் உணர்ந்த இரண்டாவது தருணமுமே இருந்தது தான் & அந்த முற்றிலும் எதிர்பாரா சிறு நிகழ்வினை இன்றைய உப பதிவினில் பகிர்ந்திடத் தோன்றுகிறது ! Maybe இதனில் பரவலாய் அனைவருக்குமொரு சுவாரஸ்யம் இருந்திடுமா ? என்றெல்லாம் சொல்லத் தெரியலை எனக்கு ; ஆனால் சலவைக்கு லுங்கியையும், பனியனையும் அனுப்பிய கதையைக் கூட நான் பகிர்ந்து வரும் இந்நாட்களில், கண்களைப் பனிக்கச் செய்ததொரு நிகழ்வினை பற்றிச் சொல்வது தப்பில்லை என்று பட்டது !! So here you go !!

நண்பர் ஒரு முதுகலை பொறியியல் பட்டதாரி ; டாக்டரேட் பட்டதாரியும் கூட ; அப்பாலிக்கா அரசுப் பொறியியல் கல்லூரியினில் துணைப் பேராசிரியராகவும் உள்ளவர் !! இங்கே ரெகுலராய் வருகை தந்திடும் நண்பர் ; அழகாய்க் கருத்துக்களை பகிர்ந்திடும் பண்பாளர் ! நேற்று காலை அவரிடமிருந்து வந்ததொரு மின்னஞ்சலையும், அதனிலிருந்து இணைப்பினையும் படித்த போது - தொண்டையில் ஏதோ அடைப்பது போலுணர்ந்தேன் !! முதலில் அந்த மின்னஞ்சலைப் படித்திடுங்களேன் : 

////////Sir,

During last week's pooja holidays I managed to recollect some old (comics related) memories in which the letter (hopefully from our senior editor! Kindly Confirm!) attached herewith is a testimony of everything that's been happening around (in my life) for more than three decades.

The efforts taken to write a letter to a school kid in 1995 itself is sooooo awesome/unimaginable and no words can replace what I do feel even now sir. All I remember was a verbal spat I had with my father for still being into comics during my +2 and he tore a postcard from sivakasi  in which the recent issues were listed. My father had called the Sivakasi office it seems and the result was this letter.

Still I preserve this letter and it reminds me of how (Y)our comics (with the general notion it is meant for kids!!!) treats its readers. Fabulous Sir...

Kindly convey this to the Senior editor and convey my pranams... _/\_

Awesome memories i had/having even now sir!!!

Thanks for everything!!!

Regards Ever


Dr.T.S.Murugesh M.E., Ph.D., MIE. 

Associate Professor

Department of Electronics and Communication Engineering

Government College of Engineering Srirangam

Tiruchirappalli. 620 012

////////////////////

And இதோ அந்த மின்னஞ்சலுடனான இணைப்புகள் :






Let me explain now guys : சீனியர் எடிட்டரின் கடிதமென நண்பர் எண்ணியிருந்த இந்தக் கடிதத்தை எழுதியுள்ளது எனது தாய்வழித் தாத்தா தான் !! 1995-ல் நமது அலுவலகம் செயல்பட்டு வந்தது அவரது இல்லத்தின் முன்பகுதியினில் எனும் போது - நானங்கு இருக்கும் நேரங்களை விடவும் தாத்தா தான் ஜாஸ்தி நேரம் இருந்திருப்பார் ! நண்பர் முருகேஷின் தந்தையார் நமது அலுவலகத்துக்கு போன் செய்து - "பையன் காமிக்ஸ்..காமிக்ஸ் என்று படிப்பைத் தொலைத்து விடுவானோ - என்று பயமாக உள்ளது ; இனிமேல் உங்கள் ஆபிசிலிருந்து அவனுக்கு காமிக்ஸ் புக் சம்பந்தமாய் எதுவும் அனுப்பிடாதீர்கள் !" என்ற ரீதியில் சொல்லியிருப்பார் போலும் !! And அந்த போனை எடுத்து பேசியது தாத்தாவாக இருந்திருக்க வேண்டும்  !! பேசி முடித்த கையோடு அன்றைய பள்ளி மாணவ நண்பர் முருகேஷுக்கு தன் கைப்பட இந்தக் கடிதத்தை எழுதி அனுப்பியுள்ளார் !! இது எதுவுமே எனக்கு நேற்றைய பொழுது வரையிலும் தெரியாது !! அன்றைய டீனேஜரை எத்தனை அழகாய்ப் புரிந்து கொண்டு, எத்தனை ஆத்மார்த்தமாய் தாத்தா எழுதியுள்ளார் என்பதை வாசித்த போது இனமறியா உணர்வுக்குள் உள்ளுக்குள் !!

1995 எனும் போது - தாத்தா காலமாகிடுவதற்கு இரண்டரை ஆண்டுகள் முன்பான நாட்களவை & அப்போது அவருக்கு அகவை 76 இருந்திருக்க வேண்டும் !! அந்தப் பொழுதிலும்,பேராண்டியின் முயற்சிகளை அவர் ஓசையின்றி ரசித்துக் கொண்டு, தன்னால் இயன்ற விதங்களிலெல்லாம் உதவிட எண்ணியிருப்பதை நண்பர் பத்திரப்படுத்தியிருக்கும் இந்தக் கடிதம் நூற்றியோராவது தடவையாய் எனக்கு நினைவூட்டிய போது மனசு ரொம்பவே கனத்துப் போனது ! தாத்தாவின் அந்தக் கையெழுத்து எனது ஆயுட்கால ஞாபகம் & தாத்தாவின் கடைசிப் 10 ஆண்டுகளில் அவர் அதிகமாய் நேரம் செலவிட்டிருந்தது என்னோடே !! நான் பெருசாய் எதையும் படித்து சாதித்திருக்காமல் போயிருக்கலாம் தான் ; ஆனால் "தாத்தா" எனும் பல்கலைக்கழகத்தில் "வாழ்க்கை" எனும் பாடத்தைப் படித்தவன் என்பது எனது பயணத்தின் ஒவ்வொரு அங்குலத்திலும் பிரதிபலிக்கும் உணர்வு !! அதனை நேற்றைக்கு அழுந்த உணர உதவிய நண்பர் முருகேஷ் அவர்களுக்கு எனது நன்றிகள் !!! You made my day sir !!

இங்கொரு நிஜத்தையுமே பகிர்ந்திடல் அவசியம் என்று பட்டது ! நான் யூத்தாக இருந்த அந்நாட்களில், தாத்தாவின் சற்றே அலங்கார பாணியிலான எழுத்து நடைகளிலும், எல்லோரையும் நிறைய விசாரித்து ; நிறைய பேசும் பாங்கிலும் எனக்கு அவ்வளவாய் உடன்பாடிருந்ததில்லை ! 'இது எதுக்கு ?? இவ்ளோ நீட்டி முழக்கணுமா ?" என்று உள்ளுக்குள் தோன்றும் தான் !! ஆனால் இன்றைக்கோ தொட்டு விடும் தொலைவினில் senior citizen அந்தஸ்து எனக்கே காத்துள்ள நிலையினில், எனது அபிப்பிராயங்கள் தான் என்னமாய் மாற்றம் கண்டுள்ளன ?!! தாத்தா பேசியதும், எழுதியதும் - அவரது அனுபவங்களை ; வாழ்க்கையின் பாடங்களை ஏதோவொரு விதத்தில் சுற்றியிருப்போருக்கு pass on செய்திட அவர் எடுத்த மெனெக்கெடலே என்பது இன்றைக்குப் புரிகிறது !! அவரது வயதை எட்ட முடிந்தால் பாக்கியமே & அவரது அன்பை தொட முடிந்தால் அது வரமே என்பது இந்த நொடியில் புரிகிறது !! விண்ணுலகை நோக்கிக் கரம்கூப்புகிறேன் !!

Bye guys..."ஒற்றை நொடி..ஒன்பது தோட்டாக்கள்" பாகம் 4 அழைக்கின்றது ! See you around !!

Thursday, October 21, 2021

மூணு லட்டு தின்ன ஆசையா ?

 நண்பர்களே,

வணக்கம். பதிவு நம்பர் : 800 !! இப்போதெல்லாம் ஒரு ரவுண்டு பன்னைப் போட்டுத் தாக்கும் நேரத்தை விடவும் குறைச்சலான சமயத்தில் பதிவுகளைப் போட்டு வருகிறோம் எனும் போது 800...900...என நம்பர்கள் ஓட்டமெடுப்பதில் வியப்பில்லை தான் ! And நடப்பாண்டில் ஏற்கனவே பதிவுகளின் எண்ணிக்கை நூறைத் தாண்டி விட்டுள்ளதெனும் பொழுது, புத்தாண்டு பிறப்பதற்குள் அங்கும் ஏதேனுமொரு பெரிய நம்பரைத் தொட்டு நிற்போம் என்றே படுகிறது !! 

Talking of "பெரிய numbers" - இந்த உப பதிவே பிறிதொரு களத்தில் நீங்கள் தொட்டுள்ள எண்ணிக்கையினைப் பற்றியே !! And அது நமது SMASHING '70s முன்பதிவு சார்ந்த சமாச்சாரமே !! கிட்டத்தட்ட இரண்டரை மாதங்களுக்குள் சாத்தியப்பட்டுள்ள புக்கிங்ஸ் - இந்தத் திட்டமிடலை அழகாய்த் துவக்கிடும் உத்வேகத்தினைத் தந்துள்ளன என்று சொல்லலாம் ! And நண்பர்களின் கணிசமானோர் இந்த முன்பதிவுக் காலக்கெடுவை சற்றே நீட்டிக்கக் கோரியுள்ளதால் - புதிய deadline ஆன நவம்பர் 15-க்குள் முன்பதிவுகள் இன்னமுமே ஆரோக்கியமான நம்பராக இருந்திடுமென்ற நம்பிக்கை திடமாயுள்ளது !! Thanks as always guys !! 

ரைட்டு....SMASHING '70s முதல் இதழான  "வேதாளன் ஸ்பெஷல்" பற்றி கொஞ்சமாய் தகவல்களை கசிய விடும் நேரமிது என்று தோன்றுகிறது !! For starters - வேதாளனின் இந்த இதழுக்காக அட்டைப்படத்தினை மாத்திரமன்றி, தொடரக்கூடிய அனைத்து PHANTOM கவர்களையும், செம ஸ்டைலிஷ் ஆன ஐரோப்பிய ஓவியர் ஒருவரே செய்திடுகிறார் ! அது மட்டுமன்றி சூப்பராய் சில வேதாளன் போஸ்டர்களும் அவரது கைவண்ணத்தில் காத்துள்ளன !! And அவை நமது முன்பதிவு நண்பர்களுக்கு, நமது அன்புடன் (விலையின்றி) இருந்திடும். As advertised - இந்த முதல் ஆல்பத்தில் மொத்தம் 9 முழுநீள சாகசங்கள் இடம்பிடித்திடவுள்ளன !! And அந்த MAXI சைசில் 208 பக்கங்கள் கொண்டதொரு hard cover மாதிரியையும் ரெடி பண்ணிப் பார்த்தாச்சு ; செம கம்பீரமாக உள்ளது தான் !! So FFS சார்ந்த பணிகளுக்கு இறுதி வடிவம் தந்த பின்னே வேதாளரோடு டென்காலி கானகத்தினுள் உலாற்ற உள்ளேன் ! 

அப்புறம் இந்த க்ளாஸிக் நாயகர்களின் ஒட்டுமொத்த மறுவருகையினை சாத்தியப்படுத்தியுள்ள முன்பதிவு நண்பர்களுக்கொரு ஸ்பெஷல் நியூஸுமே !!  

ஆளுக்கொரு favorite இருந்திடும் போது, மறுபதிப்புக் கோரிக்கைகளினில் ஆளுக்கொரு ஆதர்ஷ நாயகர் இருப்பதிலும் no secrets ! வேதாளர் ஒரு ஏகோபித்த தேர்வாய் இருக்கலாம் ; பாக்கி மூவருக்கும் ஒரு லெவல் குறைச்சலான எதிர்பார்ப்புகள் இருக்கக்கூடும்   என்பதை யூகம் பண்ண பெரிய சிரமமெல்லாம் இருந்திருக்கவில்லை ! And ஒருக்கால் நான் வேதாளன் கதைகளுக்கு மாத்திரமே உரிமைகள் வாங்கியிருப்பின் - "ரிப் கிர்பி கிடையாதா ? காரிகன்லாம் கண்ணுக்குத் தெரிலியா ? மாண்ட்ரேக்லாம் மனுஷனா தெரிலியா ?" என்ற கேள்விகள் சர்வ நிச்சயமாய்த் தொடர்ந்திருக்கவே செய்யும் என்றும் தோன்றியது ! So 'ஏக் தம்மில்' 4 நாயகர்களும் என்ற போது - ஒரு பெரும் குழுமத்திடம் உரிமைகள் வாங்குவதற்கு வழி பிறந்தார் போலவும் ஆச்சு ;   'இவர் இல்லியா ? அவர் இல்லியா ?' என்ற கேள்விகளுக்கு அவசியமின்றிச் செய்தது போலவும் ஆச்சு ! In effect  - வேதாளரின் வருகைக்கு சாலையமைத்துத் தந்துள்ளோர் - இதர 3 நாயகர்களும் ; தயங்காது  முன்பதிவு செய்து இந்தத் திட்டமிடலுக்குக் கரம் நீட்டியுள்ள நீங்களும் தான் !! And அந்த அன்புக்கு நிச்சயமாய் நம் சக்திக்கு உட்பட்ட நன்றி நவிலல் அத்தியாவசியமே !! 

So -  காத்துள்ள ஒவ்வொரு SMASHING '70s  ஆல்பத்துடனுமே வண்ணத்திலானதொரு சர்ப்ரைஸ் booklet முன்பதிவு செய்திருக்கும் நண்பர்களுக்கு நமது அன்புடன் வழங்கப்படும் ! அவற்றின் content என்னவாக இருக்கும் என்பதை வேதாளரும், ரிப் கிர்பியும், மாண்ட்ரேக்கும், காரிகனும் உரிய வேளையினில் உங்களுக்கு சொல்லிடுவார்கள் !! இந்த 4 சர்ப்ரைஸ் இதழ்களும் பின்னாட்களில் ஒரு  தொகுப்பாகி, ஏதேனுமொரு புத்தக விழாவின் போது விற்பனைக்குக் கிட்டிடும் !! இது அறிவிப்பு # 1 !

And 'ஒரு லட்டின் இடத்தினில் 2 லட்டுக்கள் இருந்தால் சிறப்பே' என்பதை பேரறிஞர் பவர் ஸ்டாரின் திரைப்படம் நமக்கு போதித்திருப்பதால் அதனையும் உதாசீனப்படுத்த இயலாதன்றோ ? So here you go with அறிவிப்பு # 2 !

FFS இதழின் அறிவிப்பும் ஆச்சு ; ALL NEW நாயகர்களின் ராஜ்ஜியம் இது என்பதும் உங்கள் மத்தியில் இப்போது தெரியும் ! ஒரு ரொம்பச் சின்ன நோஸ்டால்ஜியா அணி நண்பர்களைத் தாண்டி, பாக்கி அனைவருமே இந்தத் திட்டமிடலை குஷியாய் ஏற்றுக் கொண்டிருப்பது மெய்யாலுமே உற்சாகம் கொள்ளச் செய்கிறது ! இத்தகையதொரு மைல்கல் இதழினில் களம் காணவுள்ள  புதியவர்களையும் இம்மித் தயக்கங்களுமின்றி வரவேற்கத் தயாராகியுள்ள உங்களின் உத்வேகங்களுக்கு சின்னதொரு பரிசின்றிப் போனால் எப்புடி ? 

  • And அந்தப் பரிசு - "FFS-ல் க்ளாஸிக் பார்ட்டிகள் யாருமே கிடையாதா ?" என்ற ஆதங்கம் கொண்டுள்ள நண்பர்களைக் குளிர்விக்கும் ஒன்றாய் அமைந்திட்டால் ?? 
  • And அந்தப் பரிசே, FFS - புக் # 3 ஆக அமைந்திட்டால்  ??
  • And முத்துவின் முதல் நாயகனும், ஒரு காமிக்ஸ் தலைமகனுமான இரும்புக்கை மாயாவியின்றி எந்தவொரு கொண்டாட்டமும் முழுமை காணாதென்பதால் - கொஞ்ச காலம் முன்பாய் படைப்பாளிகள் உருவாக்கியிருக்கும் ஒரு புத்தம் புது மாயாவி சிறுகதையினை FFS -ன் புக் # 3 -ல் பிரதானமாக்கிட்டால் ??
  • And அவரை மட்டும் தனியாய் அனுப்பிடாது, பேச்சுத் துணைக்கு - லயனின் சார்பினில் ஒரு யுகத்தின் சாதனை மைந்தனான ஸ்பைடராரையும் , முழு வண்ணத்தினில் அதே இதழில் இணைத்திட்டால் ??
  • And க்ளாஸிக் முத்துவின் பிரதிநிதியாய் இன்னொரு நாயகரையுமே அதே இதழில் வலு சேர்க்க களமிறக்கிட்டால்..??
  • And அந்த நாயகர் ஒரு டிடெக்டிவ் ஆக இருந்து ; "செக்ஸ்டன் ப்ளேக்" என்ற பெயருக்குப் பதில் சொல்லிடுபவராகவும் இருந்திட்டால் ??
  • And "மறுக்கா பழம் பார்ட்டிகளோடு பழம் கதைகளா ?? ஹாவ்வ்வ்வ் !!" என்று கொட்டாவி விடக்கூடிய நண்பர்களைக் கூட லயிக்கச் செய்யும் விதமாய் இந்த புக் # 3-ன் கதைகள் அனைத்துமே புத்தியானவைகளாய் ; புதிதாய் இப்போது உருவாக்கப்பட்டவைகளாய் இருக்க நேர்ந்தால் ??
  • And ஒட்டுமொத்தத் திட்டமிடலின்படி :
  • **ஒரு புத்தம் புது மாயாவி black & white சிறுகதை சாகசம்
  • **ஒரு புத்தம் புது ஸ்பைடர் சிறுகதை சாகசம் - முழுவண்ணத்தில் !
  • **ஒரு புத்தம் புது முழு நீள black & white அதிரடி - with செக்ஸ்டன் ப்ளேக் !
  • **ஒரு புத்தம் புது மிரட்டலான முழுவண்ண செக்ஸ்டன் ப்ளேக் சிறுகதை சாகசம் என்று 68 பக்க வண்ணம் + black & white கூட்டணி இதழாய் இந்த புக் # 3 அமைந்திட்டால் ...?
  • And இந்த புக் # 3 நமது அன்புடன் 2022 சந்தாதாரர்களுக்கு உண்டென்று அறிவித்தால்...?
  • And சந்தாவினில் இணையாது போனாலும், FFS  இதழுக்கு நம்மிடம் முன்பதிவு செய்திடும் நண்பர்களுக்குமே இந்த புக் # 3 விலையின்றி இருந்திடுமென்று அறிவித்தால்..?
  • And ஒரு கொண்டாட்டத் தருணத்து இந்த இதழினை கடைகளில் வாங்கிக்கொள்வோருமே பெற்றிடும் வகையினில் ரூ.75 என்ற விலை நிர்ணயத்துடன் - விற்பனைக்கு அனுப்பிட்டால்.. ..?

சிறப்பாக இருக்குமென்று பட்டது !!! 

  • So FFS கொண்டாட்டத்திற்கென லட்டுக்கள் இரண்டல்ல - மூன்று !! (at least லட்டு # 4 என்று ஏதேனும் என் மண்டைக்குள் உதிக்கும் வரைக்கும் !!)
  • ஒரு சிறு அடையாளமாகவேனும் மாயாவியார் இந்த மைல்கல் இதழினில் இடம் பிடித்தார் போலவும் ஆச்சு ; க்ளாஸிக் செக்ஸ்டன் ப்ளேக் ஆஜரானது போலவும் ஆச்சு (நண்பர் Arvind : this one 's for you !!)
  • ஒரு அதிரடிப் புது முயற்சிக்குத் தோள் தரத் துளியும் தயக்கங்களின்றி முன்வந்திருக்கும் உங்கள் தில்லுக்குத் தலைவணங்கிய திருப்தியும் எங்களதாகியாச்சு !!
So பணிகளோடு பணிகளாய் இந்த 68 பக்க ஆல்பத்தையும் அதிரடியாய் தயார் செய்யும் முனைப்பினில் பிஸியாகிக்குவோம் !! (ஒரு landmark வேளைக்கென மெனெக்கெடாது வேறு என்ன ஆணியினைப் பிடுங்கப் போகிறேன் ?!!) 



SEXTON BLAKE - in color !!


Before I sign out - ஒரு வேண்டுகோள் !! சமீப நாட்களில் ஆங்காங்கே கூடி வரும் உஷ்ணங்களுக்கு மெய்யான பின்னணிக் காரணம் என்னவென்பதை நான் நன்றாகவே அறிவேன் தான் ! In fact கடந்த சில வாரங்களின் சில தென்னை மர தேள் கொட்டல்களுக்கு, பனைமர நெரிக்கட்டல் எதிரொலிகள் இராது போகாது  என்பதை எதிர்பார்த்திடவே செய்தேன் ! !! And இதோ இன்றைய இந்த FFS புக் # 3 சார்ந்த அறிவிப்பு கூட பாய்லரின் கொதிநிலையினை அடுத்த லெவெலுக்கு இட்டுச் செல்லும் வாய்ப்புகள் பிரகாசம் என்பதையும் யூகிக்க முடிகிறது - becos அதன் பின்னணியினில் உள்ள காரணம் அப்படி !  இந்த திரைமறைவு அபத்த சதிராட்டங்களெல்லாம் ஒரு தூரத்து நினைவாகிப் போகும் ஒரு பின்னாளில் இது பற்றி பேசிடலாம் guys ! தற்போதைக்கு எனது ஒரே கோரிக்கை : 

RELAX guys !!  வார்த்தைப் போர்கள் வெறும் அக்கப்போர்களே என்பது இந்தத் தருணத்திலிருந்து விலகி நகன்றிடும் வேளையினில் புரியாது போகாது & இன்று சிந்திடும் வார்த்தைகளை மீட்க அன்றைக்கு வழியும் இராது ! So நிதானம் ப்ளீஸ் ! அதிலும் ஒரு நண்பரின் ஈடு செய்திட இயலா இழப்புகளின் வலிகளையுமே பகடியாய் பொதுவெளியில் பகிர்வது நிச்சயமாய் அவலத்தின் உச்சம் !! நிஜ வாழ்வின் நிஜ இழப்புகளின் வலிகளைத் தாண்டிட நண்பருக்கு வலு தந்த இறைவன், இந்த வேளையிலும் அவரோடு இருக்க வேண்டிக்கொள்வேன் ! And நண்பரே : இந்த அட்டைக்கத்திப் போர்களுக்கு கொஞ்ச நாட்கள் விடுமுறை தந்து விட்டு வாழ்க்கையின் நிஜங்களுடன் ; உங்கள் உறவுகளுடன் கழியுங்கள் - அவையே நிரந்தரம் ! இந்தச் சோப்புக் குமிழ் கற்பனை யுத்தங்களல்ல தானே !! God be with you !!

Bye all !! See you around !! Have a cool Thursday !!

Monday, October 18, 2021

சில ஆணிகளும், ஒரு நேசமணியும் !!

 நண்பர்களே,

வணக்கம்.  "நெதத்துக்கும் ஒரு பதிவு" என்ற லாக்டௌன் தின ரவுசுகளின் போது, நேரம் கிடைக்கும் போதெல்லாம் எதையாச்சும் டைப்படித்துத் தயாராக வைத்திருப்பதுண்டு - அவசியப்படும் வேளைகளில் பொசுக்கென்று upload செய்து விடலாமே என்ற எண்ணத்தில் ! போகிற போக்கில் அதனை இப்போதும் கூட தொடர்கதையாக்கிட்டால் தேவலாம் போலும் - நீங்கள் தெறிக்க விடும் விறுவிறுப்பைப் பார்க்கும் போது ! இப்போதெல்லாம் நான் கதைகளுக்கு நேரம் செலவிடுகிறேனோ - இல்லியோ, இங்கே செய்து வரும் காலட்சேபங்களின் பொருட்டு ஏகமாகவே நேரங்களை செலவிட்டு வருகிறேன் !! 

Anyways - உப பதிவு என்பதால் Insta Reels சைசில் குட்டியாய் ஒரு பதிவைப் போட்டுத் தாக்கிய கையோடு நவம்பர் இதழ்களின் last minute பணிகளுக்குள் குதித்திடவுள்ளேன் ! And காத்திருக்கும் Fifty & Forever ஸ்பெஷல் இதழின் loose ends-களை சரி செய்திட இந்த "உ.ப" வை பயன்படுத்திடலாமா folks ? கதைகள் தேர்வு ஆச்சு ; பணிகள் தடதடத்து வருகின்றன ; விலைகள் நிர்ணயம் செய்தாச்சு ; உட்பக்கங்களின் contents பற்றியும் பேசியாச்சு ! எஞ்சியிருப்பன இரண்டே சமாச்சாரங்கள் மட்டுமே  : 

1 .முத்து காமிக்சின் அந்த 1 to 457 அட்டைப்பட thumbnail அணிவகுப்பை தயார் செய்வதாயின் - 52 பக்கங்கள் - ரூ.60 என்ற விலையினில் இருந்திடும் !

2 .முத்துவின் முதல் இதழை அதே சைசில் ஒரு அச்சு அசல் வார்ப்பாய் மறுபதிப்பு செய்வதாயின் - 128 பக்கங்கள் - black & white - ரூ.90 விலை என்று அமைக்க வேண்டி வரும் !

So அட்டைப்பட அணிவகுப்பு + முதல் இதழின் replica : ஆக மொத்தம் ரூ.150 என்றாகிடும் !! அதாவது - ஒரு நார்மலான எண்ணிக்கையினிலான நண்பர்களாவது (around 500 at least) இதனை வாங்கிட ஆர்வம் காட்டிடும் பட்சத்தில் ! வெறும் ஐம்பதோ - நூறோ பேர் தான் இதற்கு இசைவு சொல்வார்களெனில், விலைகள் எகிறி விடும் & அத்தகைய சூழலில் இந்தத் திட்டத்தை முன்னெடுப்பதில் அர்த்தமே இராதும் தான் ! 

இதனை சந்தாவில் நான் நுழைக்கத் திட்டமிட்டிருக்கவில்லை & திட்டமிடுவதாய் எண்ணிடவுமில்லை - becos "எவன் கேட்டான் இதையெல்லாம் ? இந்தக் காசுக்கு அழகாய் ஒரு டெக்ஸ் புக்கை போட்டுட்டுப் போயிருக்கலாமே ?" என்ற கண்சிவத்தல்கள் தொடர்ந்திருக்கும் என்பதை நீங்களும் அறிவீர்கள் ; நானும் அறிவேன் ! So  "தேவையெனில் வாங்கிக்கோங்கோ" - என்ற option-ல் மட்டுமே இது இருக்க சாத்தியமாகிடும் ! நிஜத்தைச் சொல்வதானால் - இது முழுக்கவே ஒரு அலங்காரச் சமாச்சாரமாய் இருக்குமே தவிர்த்து, இதனில் வாசிப்புக்கென புதிதாய் ஏதும் இராது தான் ! ஆனால் நோஸ்டால்ஜியா பிரியர்களான உங்களுக்கு இது அவசியமென்று படும் பட்சத்தில் மட்டுமே திட்டமிடலாம் !! 

So சொல்லுங்கண்ணே - இது பிடுங்க அவசியப்படும் ஆணியா ? அல்லது இங்கே நேசமணி கான்டிராக்டருக்கு ஜோலியே இல்லியா ?

"அவசிய ஆணி" அணியினர் - "A - AA -1"  (Avasiya AAni)

என்றும் ;

"அவசியமில்லை" அணியினர் - "NO-NE -1" (நோ நேசமணி) 

என்றும் பதிவிடலாம் !!

அப்புறம் இந்தப் பதிவின் கேள்வி # 2 & ஒரு விதத்தில் ரொம்பவே அவசரமாய் உங்களின் பதில்களைக் கோரிடுவதுமே :

காத்திருக்கும் லக்கி லுக் டபுள் ஆல்பத்தில் - "தாயில்லாமல் டால்டனில்லை" கிளாசிக் மறுபதிப்பும் உண்டென்பதை அறிவீர்கள் ! அதன் எடிட்டிங் தான் இன்றிரவுக்கான எனது பணி ! வாசிக்கும் போது - ஹ்யூமர் content இன்னும் சற்றே மேம்படுத்தப்படலாம் என்றும் ; ரின்டின் கேனின் வசனங்களை கணிசமாகவே improve செய்திடலாம் என்றும் தோன்றியது ! உங்களுக்குத் தெரியுமோ, தெரியாதோ, அது எனக்குத் தெரியாது - ஆனால் post comeback , லக்கியின் கதைகளினில், ஜாலி ஜம்பரின் வசனங்களுக்கும், ரின்டின் கேனின் வரிகளுக்கும் ரொம்பவே கவனம் தந்து வந்திருக்கிறேன் ! இதனில் ரெண்டுவிதமான கருத்துக்கள் உண்டென்பதில் ரகசியங்களில்லை தான் ; "உன்னை இதெல்லாம் செய்யச் சொல்லிக் கேட்டேனா ?" என்று குரல் உசத்த ஒரு அணியுண்டு என்பதிலும் no secrets !! இதுவொரு புது ஆல்பத்தின் பணியாக இருப்பின், குரலை உசத்தினாலும் சரி, துடைப்பத்தை உசத்தினாலும் சரி, makes no difference to me என்றபடிக்கே எழுதிக் கொண்டே நகர்ந்திருப்பேன் ! ஆனால் "நான் 11 வயசிலே டியூஷனிலே ஒளிச்சு வைச்சுப் படித்த புக் இது ; இதில் நீ மாற்றம் செஞ்சு சொதப்பிட்டியே !!" ; "பஜ்ஜி சாப்டுட்டே வாசித்த நினைவுகளை மறுக்கா வரச் செய்யும் புக் இது - பஜ்ஜி தான் இன்னிக்கு வராதுன்னா, வரிகளை மாத்திப்புட்டு, அந்த நினைவுகளையும் வராமல் பண்ணிப்புட்டியே படுபாவி !!" என்ற விசனங்களும் ஆங்காங்கே ஒலிப்பதால், இந்தக் கேள்வியினைக் கேட்டு வைக்கிறேன் ! 

Again இங்கே - "மாற்றங்கள், முன்னேற்றங்கள்" என்ற ஆணிகள் அவசியமா ? இல்லாங்காட்டி "NO PLUCKING NEEDED-ஆ" ? எனது ஆதங்கம் என்னவெனில், இன்றைக்கு இந்த ஆல்பத்தைப் புதுசாய்ப் படிக்கக்கூடிய ஒரு casual வாசகருக்கு - இந்த பிளாஷ்பேக் சுமைகள் ஏதும் இராதெனும் போது, maybe சற்றே மெருகூட்டப்பட்ட காமெடி இந்த இதழை கூடுதலாய் ரசிக்கச் செய்திடுமே ? என்பதே !! அதே போல வாசிக்கவுள்ள அனைவருக்குமே  அந்த நோஸ்டால்ஜியா மோகம் இருந்திடுமென்றும் சொல்ல முடியாது தானே ? அவர்களுக்குமே மாற்றங்களில்லா பழைய மொழிபெயர்ப்பு, சுமார் 25 வருஷங்களுக்குப் பின்னான வாசிப்பின் போது - "ப்ச்...இவ்ளோ தானா ?" என்று நினைக்கச் செய்திட வாய்ப்புண்டு தானே  ? So your பதில்கள் ப்ளீச் :

"மாற்றங்கள் ஓ.கே" அணியெனும் பட்சத்தில் - "A-AA -2

என்றும்

"ஈயடிச்சான் காப்பியே மதி " அணியெனில் - "NO-NE -2"

என்றும் பதிவிடலாம் !!

கேள்வி # 3 & இப்பதிவின் இறுதிக் கேள்வியுமே & இது தற்போதைய திட்டமிடல்களுக்கு எவ்விதத்திலும் சம்பந்தம் கொண்டதல்ல ! 

மாலையில் வேறேதோ ஒரு தேடலின் போது கண்ணில்பட்டது ஒரு புது திகில் தொடர் ! அக்மார்க் அமானுஷ்யம் ; பேய் ; பிசாசு ; hauntings ரீதியிலான ஆக்கமது & நமக்கு முற்றிலும் புதியதொரு பப்ளீஷரின் படைப்பு ! இந்த ரகக் கதைகளுக்கு நம் மத்தியில் ஒரு readership இருக்கிறதா ? இருக்கென்றால் பரவலா ? இம்மியூண்டா ? என்பதைத் தெரிந்து கொள்ள மட்டும் ஆர்வம் மேலோங்கியது ! ஏன் கேட்கிறேனென்றால் - புதுசாய் எதைப் பார்த்தாலும் நாவில் ஜலம் ஊரும் அந்த 'கொயந்த புள்ளை' ஆர்வம் எனக்கு மட்டுப்பட்டிருக்கவில்லை & என்னையாய் விட்டால், இந்நேரத்துக்கு அந்த பப்ளீஷரை குடலை உருவத் துவங்கியிருப்பேன் தான் ! ஆனால் நாம் அந்த ஜானரில் ஆர்வம் கொண்டிருப்போமா ? இல்லையா ? என்ற புரிதல் அதற்கு முன்பான அவசியமென்று சொல்லி எனக்கு நானே பிரேக் போட்டு வைத்திருக்கிறேன் ! Of course நீங்கள் ஓ.கே. சொன்னாலுமே அதனை 2023-க்கு முன்பாய் வெளியிட நம்மிடம் ஸ்லாட் லேது தான் ; but ஒரு அட்டவணையினை முடிச்ச கையோடே மண்டைக்குள் அடுத்த ரவுண்டுக்கான சக்கரங்கள் கரும்புச்சாறு மிஷினைப் போல சுழல்வது வாடிக்கையே ! So அதன் பொருட்டே இக்கேள்வி : 

பேய் வேணுமா ? வேணாமா ?

வாங்கலாமா ? வேணாமா ?

"வேணும்" எனில் - "A -AA 3"

என்றும்

"நீ படுத்துறே பாடே போதும், இதிலே புதுசா பேய் வேறேயா ?" அணியாய் நீங்கள் இருப்பின் - "NO -NE 3 "

என்றும் பதிவிடலாம் ! So இந்த "ஆணிகளும், நேசமணியும்" பதிவுக்கு அலைகடலெனத் திரண்டு வாரீர் - என்றபடிக்கே நான் கிளம்புகிறேன் ! Bye folks !! See you around !!

Saturday, October 16, 2021

விசில் போடு !!

 நண்பர்களே,

வணக்கம். மழை பெய்து ஓய்ந்தது போலுள்ளது - ஐந்தரை மாதங்களாய் தலைக்குள் குந்திக்கிடந்த அட்டவணையினை ஒப்படைத்ததும் ; அதனைத் தொடர்ந்தான உங்களின் அலசல்களோடு பயணித்ததும் ! புனித மனிடோவின் புண்ணியத்தில் சிரத்துக்கு இம்முறை சேதாரம் சொற்பமே என்ற நிம்மதி ஒரு பக்கமும், புதுப் பயணப் பாதை சார்ந்த உங்களின் பாசிட்டிவான எண்ணங்களின் உற்சாகம் இன்னொரு பக்கமும் உரம் சேர்த்திட, விசில் போட காரணங்கள் கணிசமாகவே கிட்டி விட்டுள்ளன ! Anyways நான் தற்சமயத்துக்குச் செய்திருப்பது பணிகளின் சுலபப் பகுதியினை மாத்திரமே ; மெயின் பிக்சரில் தான் சவால்களே காத்துள்ளன என்பதை நான் மறந்திடவில்லை ! "Walking the talk" என்பார்கள் ; வாயால் சுடும் வடைகளை, செயலிலும் சுட்டுக் காட்ட வேண்டிய அவசியத்தினைக் குறிப்பிடும் விதமாய் !  2022-ன் முழுமையிலும் நான் செய்திட வேண்டியது அதையே எனும் போது, "30 நாட்களில் மொறு மொறு வடை சுடுவது எப்படி ?" என்று ஏதாச்சும் புக் கிடைக்கிறதா என்று தேடிக்கொண்டிருக்கிறேன் ! நம் மத்தியிலுள்ள வடை மாஸ்டர்களும் இயன்ற ஒத்தாசைகளைச் செய்யலாம் !! (பருப்பு வடையா ? உளுந்து வடையா ? உளுந்து வடையெனில் ஓட்டையோடா ? ஓட்டையின்றியா ? எது போட தெரிஞ்சிருக்கணும்னு  தெளிவா சொல்லலியேன்னு  அலசல்கள் பின்தொடர்ந்திடுமோ ?? )

ரைட்டு....இனி எதை பற்றிப் பேசலாம் ? இந்த 2 இதழ்கள் கொண்ட அட்டவணையினில் உள்ள பின்னணி stats பற்றிக் கொஞ்சம் ரமணா  ஸ்டைலில் பார்ப்போமா ? 

  • கதைகள்னு பார்த்தாக்கா - மொத்தம் 34 !!
  • அதிலே அத்தியாயங்கள்னு பார்த்தால்   - மொத்தம் 46 !! 
  • பக்கங்களோட எண்ணிக்கையோ - 3876 !!
  • இதிலே கலரிலே ...1980 பக்கங்கள் !!
  • Black & White-லே  ...1896 பக்கங்கள் !!
  • ஆக மாசம் ஒண்ணுக்கு சராசரியா நீங்க படிக்க வேண்டிப் போறது - 323 பக்கங்கள் !! 
  • இது கூட ஜம்போவோ ; அம்போவோன்னு புக்கு ஒண்ணு வருதே ......அதையும் சேர்த்துக்கிட்டா இந்த நம்பர் இன்னும் எகிறும் !!
  • Smashing 70's ன்னு வரப் போறதையும் சேர்த்துக்கிட்டா - இந்த ரமணாவுக்கு கால்குலேட்டரிலே பேட்டரி மாத்தித் தர வேண்டி வரும் !! 
  • மாசாமாசம் முழுசையும் படிச்சுட்டாக்கா, யாரையாச்சும் நடுமூக்கிலேயே குத்த  ரெடியாகிட்டீங்கன்னு அர்த்தம் !!
  • பாதி மட்டும் படிச்சாக்கா குப்புறப்படுத்துக் குறட்டை விட ரெடியாகிட்டீங்கன்னு அர்த்தம்  !!
  • டப்பாவையே ஓடைக்காம மொத்தத்தையும் பரணிலே போட்டு வைச்சாக்கா - ஐஞ்சே வருஷத்திலே சென்னையிலே ஒரு வீடு வாங்க ரெடியாகிடுவீங்கன்னு அர்த்தம் !

Jokes apart, எண்ணிக்கையில் இம்முறை இதழ்கள் குறைவெனினும், அவை முன்னிறுத்தவுள்ள வாசிப்புகள் செம விசாலம் ! And கென்யா, பொலிவியா, மாஸ்கோ ; பாரிஸ் ; பனாமா ; அமெரிக்க மேற்கு மாகாணங்கள் ; என்றொரு செம டூருமே காத்துள்ளது !! அதிலும் ஒற்றை நொடி..ஒன்பது தோட்டாக்கள் ஆல்பத்தின் அமெரிக்க தரிசனம் awesome ரகம் !! முன்னெல்லாம் "இதயம் பேசுகிறது" என்றொரு பத்திரிகையினில் அதன் எடிட்டர் திரு. மணியன் அவர்கள் தேசம் தேசமாய்ப் பயணித்து, அந்த அனுபவங்களை பயணக்கட்டுரையாய் எழுதுவது ரொம்பவே பிரபலம் ! அநேகமாய் அடுத்தாண்டின் இறுதியினில் நீங்களுமே - "எது, நம்ம சிகாகோ போற பஸ்லாம் நிக்குமே, அந்த சான் பிரான்சிஸ்கோ முனையிலே நிக்கிறேன் மாப்பிள்ளை ...யெஸ்...யெஸ்...!!" என்று அலப்பறைகள் விட்டாலும் no ஆச்சர்யம்ஸ் !!

இந்த முறை அட்டவணையினில் எல்லாமே கமர்ஷியல் ரகங்கள் என்றாலும், நான் குறிப்பாய் எதிர்பார்க்கும் கதைகள் சிலவுள்ளன !! 

அவற்றுள் முதலானது - நம்ம ப்ளூகோட்ஸ் கும்பலின் "களமெங்கும் காதல் !" யுத்தத்தில் சேதம் ரொம்ப ஆகுது ; சிப்பாய்களை தக்க வைக்க ஏதாச்சும் செய்தாகணுமே என்றெண்ணும் ஜெனெரல் ஒரு அழகான நர்ஸை களப்பணிக்கென நியமிக்கிறார் !! அப்புறமென்ன - நம்ம பயலுக அடிக்கும் லவ்ஸ் லூட்டிகள் வயிற்றைப் பதம் பார்க்கின்றன !! இப்போதெல்லாம் டெக்ஸ் நீங்கலாக பாக்கி உருப்படிகளுக்கெல்லாமே - "ஆண்டுக்கொரு ஸ்லாட் மதி" - எனவொரு mindset க்கு நாம் வந்திருக்க, இது போன்ற திறமையான அணிக்கும் ஸ்லாட்களை ரேஷன் தான் செய்திட வேண்டிப் போகிறது ! இல்லாவிடின் ஸ்கூபி & ரூபி இன்னொரு சீட் பிடித்திருப்பார்கள் !!

அப்புறம் நமது மேக் & ஜாக் ஜோடியின் அந்த "ரீலா..? ரியலா..?" சாகசமுமே பேனா பிடிக்க இப்போவே நமைச்சலை உண்டாக்கும் கதை !! ஒரு ஹாலிவுட் ஈரோ சார் திரையிலே புலி ; நெசத்துலே சுண்டெலி ! அவருக்கு ஒரு ஆபத்தெனும் போது, அவரை மாதிரியே இருக்கும் நம்ம ஜாக்கை கூட்டிப் போய் அவருக்கு டூப் போட வைக்கிறார்கள் ! ஆனால் அந்த ஈரோ சாருக்கு அநியாயத்துக்கு பெண்பிள்ளை ரசிகைகள் இருந்து வைக்க, அம்புட்டும் நம்ம ஜாக்கை மொய்க்க ஆரம்பிக்கின்றன !! செம ஜாலி ஆல்பம் !! 

And நம்ம லக்கியின் ஆல்பத்திலுமே அந்த "நில்..கவனி..சிரி"....சும்மா ரவுண்டு கட்டி அடிக்கிறது !! அதிலும் குறிப்பாய் அந்நாட்களின் பல்லை பிடுங்கும் அந்த டெக்னிக் - செமயோ செம ! டாக்டர் சுந்தர் கண்ணில மட்டும் இந்த ஆல்பத்தைக் காட்டப்படாது என்பேன் !! 

'தல' என்றென்றும் ரவுசுப் பார்ட்டியே என்றாலும், இம்முறை அவரது ஆல்பங்களில் பல எனக்குள் பரபரப்பை ஏற்றி விட்டுள்ளன !! முதலாவதானது - கலரில் காத்துள்ள "காதல் யுத்தம்" !! Tex வெளியீடு # 575-க்கென உருவான ஆல்பமிது, ஓவியர் சிவிடெல்லியின் கைவண்ணத்தினில் !! காதலி / மனைவி லிலித்துடன் ஒரு பொறியில் சிக்கிடும்  நம்மவர், அதனிலிருந்து விடுபட நடத்திடும் அதிரடிகள் தெறி மாஸ் ! And லிலித்துமே ஆக்ஷனில் சளைத்தவரல்ல என்பதை ரசித்திடவுள்ளோம் ! எதிர்பார்ப்பைப் தூண்டிய இன்னொரு ஆல்பம் - "புயலில் ஒரு புதையல் வேட்டை !" ஒரு தங்கத் தேட்டையின் தேடல்...கறுப்பின துவேஷ பூமியில் பயணம் என ஓட்டமெடுக்கும் கதையின் க்ளைமாக்சில், ஒரு சூறாவளியின் மத்தியில் நடக்கும் மோதல்கள் wow ரகம் !! 

And of course - தாத்தாக்களுடனான பயணத்தைக் தொடரவுமே ஐ-யா-ம் வெயிட்டிங்க்க்க் !! ஆண்டின் confirmed துடைப்பக் கட்டைச் சாத்து வாய்ப்புகள் கொண்ட ஒரே ஆல்பம் எனும் போது எனது ஆர்வங்களும் இரு மடங்காகின்றன !! ஆண்டின் முதல் காலிறுதியிலேயே பெருசுகளை களம் காணச் செய்தாக வேண்டுமென எண்ணியுள்ளேன் !! பார்ப்போமே !

Moving on, சில updates !! 

  • SMASHING '70s முன்பதிவுகள் கடைசி வாரத்தினில் செம விறுவிறுப்பு !! And சில நண்பர்களோ, தீபாவளி வரைக்குமாவது இதற்கான அவகாசத்தினை நீட்டித்துத் தரக்கோரி தினமும் போன் செய்து வருவதாய் நம்மாட்கள் சொல்லி வருகின்றனர் ! ரெகுலர் சந்தா அறிவிப்பு அக்டோபர் 15 என்பதால் அதற்கு முன்னமே SMASHING 70's முன்பதிவுக் கடையினை மூடிவிட்டால் தேவலாம் என்ற எண்ணத்தினில் தான் நானிருந்தேன் ; but நண்பர்களின் கோரிக்கை definitely logical ! So நவம்பர் 15 வரைக்கும் SMASHING 70's முன்பதிவு அவகாசத்தினை நீட்டித்துக் கொள்வதில் நிச்சயமாய் சிரமங்களிராது !!
  • புதுச் சந்தாக்களை 2 தவணைகளில் செலுத்திட ஏற்பாடுகளும்  இப்போது open ! ஆன்லைனில் சந்தா கட்டிடும் நண்பர்கள் இதனை பயன்படுத்திக் கொள்ளலாம் !!
  • அப்புறம் ஆச்சர்யமூட்டும் விதமாய் அந்த "இ.ப" மறுக்கா மறுக்கா மறுக்கா தயார் செய்திடும் முனைவிற்கு தம்மாத்தூண்டிலும் தம்மாத்துண்டு கோரிக்கைகளே இதுவரையிலும் வந்துள்ளன ! அந்த எண்ணிக்கையே ஆளாளுக்கு ரெண்டு, மூணு - என்ற ரீதியில் கோரியுள்ளதால் மாத்திரமே தேறியுள்ளது ! அவ்விதமின்றி, ஆளுக்கு "ஒண்ணே ஒண்ணு" என்று ஆர்டர் செய்திருப்பின், இரண்டே பேரின் கைவிரல்களுக்குள் ஒட்டு மொத்தமும் அடங்கியிருக்கும் ! So இன்னும் கொஞ்சம் அவகாசமாளித்து விட்டுப் பார்ப்போம் !! நெட்டில் ஓடி வந்த பத்தாயிரம், எட்டாயிரம் விலைகளெல்லாம் கண்கட்டி வித்தை என்பதாகவே தோணுகிறது ! நிச்சயமாய் 'பன்னு வேணும்..வெண்ணை வேணும்...இ.ப. வேணும்னு' சுற்றித்திரிய பெரும் திரளெல்லாம் இனியும் இல்லவே இல்லை !! 
Before I sign out, முக்கியமான சில கோரிக்கைகள் & வினவல்கள் & விண்ணப்பம் !! "என்னப்பு ...பீடிகைலாம் பலம்மா கீதே ? இன்னா மேட்டரு ?"  என்று தோன்றுகிறதா ? எல்லாமே காத்திருக்கும் நமது FFS சார்ந்தது !! So here goes :

Here is the கேள்வி :

  • FFS இதழின் கதைகள் பாட்டை நான் முழுசுமாய்ப் பார்த்துக் கொள்வேன் தான் ; no worries on that !! ஆனால் இந்த மைல்கல் இதழினில் கதைகளைத் தாண்டி நீங்கள் பார்க்க விரும்பிடும் பக்கங்கள் என்னவாக இருக்குமோ ? இப்போதைக்கு நான் போட்டு வைத்துள்ள பட்டியல் பின்வருமாறு :
  • சீனியரின் தலையங்கம்
  • நமது கருணையானந்தம் அவர்களின் நினைவலைகள் 
  • அப்புறம் 2 சர்ப்ரைஸ் flashbacks !
  • நமது மறைந்த ஓவியருக்கொரு tribute !
  • நமது பழம் ஓவியர் சிகாமணி பற்றி !
  • நமது தற்போதைய டீமின் போட்டோக்கள்  !
  • வாசக நினைவலைகள் 
  • என் பார்வையில் TOP 5 இதழ்கள் !
  • 50 ஆண்டுகளின் புக்ஸ் பட்டியல் 1 to 457 
இவை தவிர, வேறென்ன பகுதிகள் சேர்த்தால் சுவாரஸ்யமாக இருந்திடக்கூடுமோ ? Your thoughts ப்ளீஸ் ?

Here is the கோரிக்கை :
  • இந்த ஐம்பதாவது ஆண்டுமலர் நெருங்க நெருங்க எனக்கோ பணிகள் சார்ந்த பயத்தில் பட்டாம்பூச்சிகள் வயிற்றில் நாட்டியமாட, சீனியர் எடிட்டரோ - "நான் ஏதாச்சும் கட்டுரை எழுதட்டா ? நான் ஏதாச்சும் கவிதை எழுதட்டா ?" என்ற பரபரப்பில் வீட்டில் கிடக்கும் கோல புக்கின் ஓரஞ்சாரங்களில் கூட -"கண்மணி, அன்போடு - சீனியர் - நான் - எழுதும் கவிதையே !!" என்று எழுதிப் பார்த்துக் கொண்டிருக்கிறார் !! So அவரது ஆர்வத்துக்குத் தீனி போட முத்து காமிக்சின் துவக்க நாட்கள் சார்ந்த கேள்விகளாய் ஏதேனும் உங்களுக்கு இருப்பின், you can ask them !! இங்கே வேண்டாம் ப்ளீஸ் - நமது மின்னஞ்சலுக்கு (lioncomics@yahoo.com) - ASK THE SENIOR EDITOR என்ற தலைப்புடன் உங்கள் கேள்விகளை அனுப்பிடலாம் ! But "இதழ் நம்பர் 48-ல் பக்கம் நம்பர் 37-ல் அந்த படம் ஏன் ?" "புக் நம்பர் 16 க்கு அட்டைப்படம் போட்டது யார் ?" என்ற ரீதியிலான கேள்விகள் வேணாமே - ப்ளீஸ் ? அவரது வயதுக்கும், நினைவுத் திறனுக்கும் மதிப்பளிக்கும் கேள்விகளாய் இருப்பின் great !! சுவாரஸ்யமாய் கேள்விகளும், பதில்களும் அமைந்திடும் பட்சத்தில் அவற்றை FFS இதழினில் வெளியிடப் பார்க்கலாம் !! 

And here is the விண்ணப்பம் :

இது பொதுவானதொரு சமாச்சாரம் ! "விமர்சனம்னா காரமா தானிருக்கும் ; இங்கே உனக்கு பல்லாக்கு தூக்குறவங்களுக்கு தான் இடம் !! நல்லதுக்கு சொன்னா உனக்கு காதிலே ஏறாது !! கெட்டு, குட்டிச்சுவராகி தான் போவே " இத்யாதி..இத்யாதி என்ற அபத்தங்களோடு அவ்வப்போது யாரேனும் ஆஜராவது காலமாய் இங்கொரு தொடர்கதையாகவே இருந்து வருவதில் இரகசியங்களில்லை ! ஒரு செயலில் ; ஒரு கருத்தில் உடன்பாடில்லா முதல் நொடியில் ஆளாளுக்கு கண் சிவப்பதென்பது இப்போதெல்லாம் மாஸ்க் போடுவதைக் காட்டிலும் சுலபமாகிப் போய்விட்டுள்ளது ! And "கரடியாய்க் கத்தினாலும், செவிடன் காதிலே ஊதிய சங்காட்டம் இருக்கே !!" என்ற கடுப்பில் இன்ன பிற தளங்களில் போய் தங்கள் ரௌத்திரங்களுக்கு வடிகால் தேடுவதுமே தொடர்கிறது ! ராத்திரியே இது மாறிடவும் போவதில்லை ; ராத்திரியே என்னை யோக்கியனென்று ஏற்றுக் கொள்ளவும் போவதில்லை என்றாலும் ஒரு சின்ன நினைவுப் பகிரல் - இக்ளியூண்டு மாற்றத்தைக் கொணர உதவினாலும் நலமே என்ற எதிர்பார்ப்பினில் :

9 வருடங்களுக்கு முன்னே என்று நினைக்கிறேன் ! நமது மறுவருகை கொண்டாடப்பட்டு ; சமூக வலைத்தள புதியவனான நானும் சிலாகிக்கப்பட்டு, அப்பாலிக்கா பந்தாடவும்பட்ட நாட்களவை ! புள்ளையாண்டான் சென்னையில் கல்லூரியில் படித்துக் கொண்டிருக்க, இரண்டாம் ஆண்டின் நடுவாக்கிலிருந்து எனது வீட்டம்மா சிவகாசியில் பாதி நேரம், சென்னையில் மீதி நேரமென்று குப்பை கொட்டிக் கொண்டிருந்த நாட்கள் என்பதால், சிவகாசியில் வீட்டில் நானும், வேதாளங்களும் மாத்திரமே பெரும்பாலும் ஜாகை ! So வெறித்தனமாய் வேலை செய்து வருவேன் - வேளை கேட்ட வேளைகளிலும் !! கொஞ்சம் கொஞ்சமாய் நாம் சிறகுகள் விரித்து - "ஒரு சிப்பாயின் சுவடுகள்" என்ற கிராபிக் நாவலை முயற்சிக்கும் 'தகிரியத்தை' தேற்றியிருந்தோம் ! 

And எனது அந்நேரத்து அனுபவத்தில் செம complex பணி அது ! கருணையானந்தம் அவர்களே அதற்குப் பேனா பிடித்திருந்தார் & நான் எடிட்டிங் மட்டும் செய்திருந்தேன் - தெரிந்த மேம்போக்குப் பாணியினில் ! இதழும் வெளியாகியது ; நிறைய பேர் டிரௌசருக்குள் பூரான் புகுந்தது போல தெறித்து ஓடியதும், கொஞ்சப் பேர் மெய்மறந்து ரசித்ததும் நடந்தது ! அப்போதெல்லாம் வீட்டிலிருந்த அலுவல் அறையினுள் ஒரு பக்கம் கம்பியூட்டர் ஆன் ஆகியே கிடக்கும் - சதா சர்வ காலமும் ! நம்ம ஸ்டீல் கவிதைகளெல்லாம் பொழிய துவங்கியிரா நாட்களெனும் போது - நான்பாட்டுக்கு தைரியமாய் நமது பிளாக்கில் குடி கிடப்பேன் ; comments வர வர வாசித்தபடிக்கே ! ஒரு கல்யாண வீட்டையே சுத்தம் செய்யத்தேவைப்படக்கூடிய துடைப்பங்களையும்  ; ஒரு டஜன் கல்யாண வீடுகளில் ஆட்டையைப் போடக்கூடிய எண்ணிக்கையிலான  செருப்புகளையுமே அந்நேரத்துக்கு அடியேன் சேகரித்திருந்தேன் தான் என்பதால் உசிரைக் கையில் பிடித்தபடிக்கே தான் அலசல்களைப் பார்த்துக் கொண்டிருப்பேன் ! ஒரு மாதிரியாய் "சிப்பாயின் சுவடுகள்" பெரும் சேதாரங்களை ஏற்படுத்தாது நீங்கி விட்டதாய் நான் நினைத்துக் கொண்டிருந்த போது தான் - 'காமா சோமா ' என்ற பெயரிருப்பினும் 'தெளிவா - திருத்தமா ' எழுதக்கூடிய அந்த நண்பரின் ஒரு நெடும் பின்னூட்டம் பதிவாகியது ! படித்த நொடியினில் எனது முதல் ரியாக்ஷன் 'சுள்ளென்ற' எரிச்சல் தான் என்பது நினைவுள்ளது ! 'இவருக்கு வேற வேலையே கிடையாது - குறை சொல்றதைத் தாண்டி !' என்றபடிக்கு சிஸ்டத்தை ஆப் செய்து விட்டு போய்ப் படுத்து விட்டேன் ! ஆனால் தூக்கம் பிடிக்கவில்லை ; அந்தப் பதிவினை நான் அரைகுறையாய் மட்டுமே வாசித்திருந்த போதிலும், எனக்குள்ளே ஒரு நெருடலாகவே தொடர்ந்திட, ராத்திரி 3 மணிக்கு எழுந்து சிஸ்டத்தை மறுபடியும் போட்டு விட்டு பின்னூட்டத்தை நிதானமாய்ப் படித்தேன் ! அதன் சாரம் இது தான் :

சிப்பாயின் சுவடுகள் கி.நா.வின் இறுதிப் பக்கத்தினில் - அந்தக் கதையின் பிரதான மனுஷனான அந்த பிரெஞ்சு ஜர்னலிஸ்ட்டை போட்டுத் தள்ள அரசாங்கமே ஆட்களை அனுப்பியிருக்கும் ! ஒரு கார் வந்து நிற்க, கொலையாளி இவரது வீட்டு பெல்லை அடிக்க - அப்புறமாய் மீதத்தை நமது கற்பனைக்கு விட்டுவிட்டு END போட்டிருப்பார் கதாசிரியர் ! ஆனால் - நாமோ அதனை சரியாய் உள்வாங்கியிருக்காது, யாரோ ஒரு ஆள் வந்து பெல் அடிக்கிறான் போல என்ற ரேஞ்சில் கையாண்டிருந்தோம் ! நமது நண்பரோ, இந்தப் பக்கத்தின் ஒரிஜினலை இன்னொரு நண்பரிடமிருந்து வாங்கி, பிரெஞ்சின் அர்த்தத்தை அவருடன் சேர்ந்து அலசி - நாம் செய்திருந்த பிழையைச் சுட்டிக் காட்டியிருந்தார் ! 

ராத்திரி 3 என்றாலும் எனக்கு தூக்கம் சுத்தமாய் தொலைந்திருந்தது ! பர பரவென எனது மேஜையிலிருந்த அந்த ஆல்பத்தை ; அதன் பிரெஞ்சு to இங்கிலீஷ் ஸ்கிரிப்டை ; அப்புறம் அச்சான நமது புக்கை எடுத்து வைத்துக் கொண்டு - google translator சகிதம் பொறுமையாய் ஆராய்ந்தால் - நண்பரின் குற்றச்சாட்டு 'காமா-சோமா' அல்ல ; சாரம் மிகுந்ததே என்பது புரிந்தது ! கடைசிப் பக்கம் என்பதால் சரி பார்ப்பதில் சிரமம் இருக்கவில்லை ; so பிழை எங்கு நேர்ந்தது என்று தேடுவதும் சுலபமாகவே இருந்தது ! பிரெஞ்சில் இருந்தான ஆங்கில மொழிபெயர்ப்பு துல்லியமாய் இல்லை என்பது முதல் குறையென்று புரிந்தது ! And அதனை தமிழில் மொழிபெயர்க்கும் சமயத்தில் முற்றிலுமாய் கோட்டை விட்டிருப்பதும் புரிந்தது !! 

கொஞ்ச நேரத்துக்கு காற்றாடி ஓடும் சத்தம் மட்டுமே எனக்குத் துணை ; நாலு மணிவாக்கிலேயே 'டிங்க டிங்க டிங்க' வென்று மணியடித்துக் கொண்டே பால் வண்டிகள் போகும் சத்தம் கேட்ட போது தான் தெளிந்தேன் ! நான் இதனை எவ்விதம் கோட்டை விட்டேன் ?' என்ற ஆராய்வுக்கு அவசியமே இருக்கவில்லை - simply becos அன்று வரையிலும் ஒவ்வொரு பிற மொழி ஆல்பத்து எடிட்டிங்கின் போதும்  மூலத்திலிருந்தான இங்கிலீஷ் ஸ்கிரிப்டை நான் ஒரு நாளும் கையில் வைத்துக் கொண்டிருக்க மெனெக்கெட்டதில்லை ! 'சரியாகத் தான் எழுதியிருப்பார் ; பன்ச் வரிகளில் மாற்றங்கள் ; பிழை திருத்தங்கள் ; காமெடிக்குத் தேவையான மாற்றங்கள் மட்டுமே நம்ம வேலை !' என்பதான நினைப்பில் இத்தனை காலத்தை ஒட்டியிருந்தேன் எனும் போது, சுலப, நேர்கோட்டுக் கதைக்களங்களில் இது போலான புரிதல் சார்ந்த சிக்கல்கள் பெருசாய் எழுந்திருக்கவில்லை ! ஆனால் இதுவோ செம complex கி.நா & நமக்கொரு first எனும் போது, ஒட்டு மொத்தமாய் நமது டீமே சொதப்பியிருந்தது புரிந்தது ! யார் எது செய்திருந்தாலும், செய்யாது போயிருந்தாலும், எடிட்டர் என்ற முறையில் அந்தப் பொறுப்பு முழுக்கவே என்னது ; so அந்த சொதப்பலின் பொறுப்பும் என்னது என்பதை உணர்ந்த போது கீழ்வானம் சிவக்க ஆரம்பித்திருந்தது ! 

அன்றைக்கு அரம்பித்தவன் தான் ; இதே போலான பிழை இனியொருமுறை நிகழ அனுமதிக்கலாகாது என்ற வெறியில் - இன்றைய நொடி வரையிலும் ஒவ்வொரு பணியின் போதும் ஒரிஜினல் ; english script ; தமிழாக்கம் என அத்தனையையும் தூக்கி வைத்துக் கொண்டு, அவசியப்பட்டால் கூகுள் ட்ரான்ஸ்லேட்டரையும் துணைக்கு அழைத்துக் கொண்டே பணியாற்றி வருகிறேன் ! Not that I have been flawless ; ஆனால் இது மாதிரியான ஜீவநாடிச் சொதப்பல்களுக்கு இடம் தந்திருக்கவில்லை என்ற நம்பிக்கை எனக்குள்ளது ! அன்றைக்கு அந்த நண்பர் தனது பின்னூட்டத்தையுமே 'காமா-சோமா'வென அமைத்திருப்பின், maybe கடுப்பில் தாண்டிப் போயிருந்திருப்பேன் & தொடர்ந்த நாட்களில் அதை விடவும் மட்டமானதொரு குழியில் விழவும் செய்திருப்பேன் ! அன்றைக்கு அவரது பின்னூட்டத்தில் சம அளவிலான சாரமும், காரமும் இருந்ததால் புரிதலில் சிரமம் இருக்கவில்லை & அது இன்று வரையிலும் எனக்கு உதவியுள்ளது ! 

And அந்தப் பழக்கத்தின் பலனை போன வருஷத்து 2132 மீட்டர் (XIII ஆல்பம்) எனக்கு நிரம்பவே சுட்டிக்காட்டியது ! நமது வழக்கமான மொழிபெயர்ப்பாள மேடம் எழுதியதை ; கருணையானந்தம் அவர்கள் தமிழாக்கம் செய்திருந்தார் ! ஆனால் எனக்கோ நெருட, Cinebook ஆங்கிலப் பதிப்பின் pdf கோரி ஒரு மின்னஞ்சலைத் தட்டி விட்டேன் & லொஜக்கென வந்து சேர்ந்தது ! ஒரு பிரெஞ்சு பிரஜை எழுதுவதற்கும், பிரெஞ்சைக் கற்றுக் கொண்டவர் எழுதுவதற்கும் மத்தியிலான வேறுபாட்டை அன்றைக்குத் தான் பிடரியில் அறைந்தது போல உணர்ந்தேன் ! நமது பிரெஞ்சு மொழிபெயர்ப்பாளரின் ஸ்கிரிப்ட் 90% சரியே ; ஆனால் இ.ப. போலொரு complex கதைக்கு நூற்றுக்கு நூறு இன்றிப் போனால் நொண்டியே அடிக்கணும் என்பது புரிந்திட, நான் Cinebook ஒரிஜினலைக் கையில் கொண்டு முழுசையும் மாற்றி எழுத நேரிட்டது ! So இங்கும் நான் உணர்ந்த பாடங்கள் இரண்டு !! ஒரு துளி ஆக்கபூர்வம் ஒரு ஆயுட்கால பலன் தரவல்லது ; அதே சமயம் காதிலே புகை உமிழ்ந்தபடியே கொட்டும் உஷ்ணங்கள் அடுத்த பொழுதில் காற்றோடு போகவல்லது என்பது பாடம் # 1 ! So உங்களின் சுவடுகள் எவ்விதம் தங்கி நிற்பது நலமென்ற தீர்மானத்தை உங்களிடமே விட்டு விடுகிறேன் ! And பாடம் # 2 : இ.ப. புது ஆல்பங்களை பொறுத்தவரையிலும் இனிமேல் Cinebook ஆங்கிலப்பதிப்பு வெளியாகிடும் வரையிலும் நாம் தமிழில் முந்திடும் எண்ணம் நஹி !!

விமர்சனத்திற்கு யாரும் விதிவிலக்கல்ல ; பிழைகளுக்குமே தான் ! ஆனால் என்னைப் பார்த்த நொடியினில் ; என்னோடு உடன்படா முதல் தருணத்தினில் - 'போட்றா தூக்கிலே !' என்று பாய்ந்திடும் முனைப்புகள் தான் சிக்கலே ! ஒரு கொலைக்குற்றவாளிக்குக் கூட சந்தேகத்தின் பலனைத் தரும் தேசத்தில் - ஒரு மாறுபட்ட எண்ணத்துக்கு இத்தனை பகடிகளும், ரௌத்திரங்களும் எழும் போது, அவற்றின் பின்னணியினில் உள்ளது உங்களின் காமிக்ஸ் நேசம் மட்டுமே தானா ? என்பது கேள்வியாகிடுகிறது !   உங்களின் அவாக்கள் மெய்யாகவே நமது நலன் சார்ந்தவைகளாக இருப்பினும், இந்த மூத்திரச் சந்துக்கு இட்டுச் செல்லும் ஆத்திரப்பாய்ச்சல்கள், அவற்றிற்கு வேறு மாதிரியான சாயம் பூசி விடுகின்றன & end of the day - செவிடன் காதில ஊதின சங்கு மட்டுமே பலன் ! 

இதோ இன்றைக்கும் நண்பர் இங்கு அவ்வப்போது வந்து போகிறார் தான் ; தெரிந்த மார்க்கங்களிலெல்லாம் வாரிடவும் செய்கிறார் தான் ! ஆனால் அவரை யாரும் கடிவதுமில்லை ; அவருக்கும் இங்கு வந்து செல்வதில் நெருடல்களுமில்லையே ? Constructive criticism ; ஆக்கபூர்வமான விமர்சனங்கள் அனைவருக்கும் நலம் பயக்கும் என்பதே இந்தக் கதையின் கருத்து !

And இதோ ஓரிரு தினங்களுக்கு முன்னே கூட நண்பரொருவர் இம்மாதத்து புக் சார்ந்த ஏதோவொரு விமர்சனத்தினில் "சித்தே" ' சித்தே " தொடர்கிறது என்று எழுதியிருந்தது நினைவுக்கு வருகிறது ! எழுத்தென்பது அவரவரது formative years களில் அவரவரது வாசிப்புகள் தாக்கங்களோடு பயணிப்பது என்பது எனது கருத்து ! So maybe நான் அந்நாட்களில் வாசித்த சமாச்சாரங்களுக்குள் இந்த "சித்தே" வார்த்தைப் பிரயோகம் இருந்திருக்கலாம் & அதுவே இன்றைக்கு எனது பேனாவின் வெளிப்பாட்டிலும் பிரதிபலித்திருக்கலாம் ! யோசித்துப் பார்க்கும் போது, இந்த வார்த்தை நமது சிறு வட்டத்துக்கு நெருடும் பட்சத்தில், அதனிடத்தில் வேறொரு பதத்தை நுழைப்பதொன்றும் கம்பு சுத்தும் சிரமமல்ல என்பது புரிந்தது !! ஏற்கனவே கருணையானந்தம் அவர்கள் பயன்படுத்தும் "சாக்கடைப் புழுவே " ; "அப்பனே" ; "பிரமணமாய்" போன்ற வார்த்தைகளை கண்ணில் காட்டுவதில்லை இப்போதெல்லாம் ! அந்த லிஸ்டுக்கு "சித்தே" வையும் pack up செய்தால் போச்சு !So சித்தே பொறுத்துக் கொள்ளுங்கள் நண்பரே ; ஏற்கனவே ரெடியாகி விட்டுள்ள புக்சில் அந்த வார்த்தை தென்பட்டால் சித்தே பல்லைக் கடித்துக் கொள்ளுங்கள் ; இனி வரவுள்ள பணிகளில் அந்த வார்த்தைக்கு பை-பாஸ் போட்டுத் தாண்டிச் செல்ல சித்தே அல்ல ; நிரம்பவே முயற்சிப்பேன் !! 

இதையும் வரி விடாமல் படித்து விட்டு, இன்றிரவே க்ரூப்களில் "கெக்கெக்கே.... முழியாங்கண்ணனை கடுப்பேத்த நாளைக்கு உன் turn மாப்பு ; ரெடியாகிக்கோ !!" என்ற பகடிகள் நிகழும் என்பதை அறியாதவனல்ல நான் ! But end of the day - இங்கு நிலவும் சந்தோஷத்தினையும், நட்பினையும் எதுவும் அசைக்காதென்பதை ஆண்டவன் சொல்றான் ; ஆந்தைவிழியன் 'ஆமாம்' போடறான் !! இப்போ நடையைக் கட்டுறான் !! Bye all ...see you around !!

And oh yes - சந்தாக்களை தெறிக்க விடத்துவங்கி விட்டீர்கள் முதலிரு தினங்களிலேயே !!! And surprise ...surprise ....95 சதவிகிதம் :ஒரே நாடு-ஒரே காமிக்ஸ்" சந்தாப் பிரிவுக்கே !! Thanks a ton folks !! விசில் போடுறேன் உங்கள் நேசங்களுக்கு !! Been a fantastic start !!!! 

Friday, October 15, 2021

The Day After ....

 நண்பர்களே,

வணக்கம். 5273 !! நேற்றைய ஒற்றை நாளின் நமது தளப்பார்வைகளின் எண்ணிக்கை இது !! Phew !!! விடுமுறை தினமே என்றாலும், நமக்கென இத்தனை நேரம் தந்திருப்பது மெய்யாகவே ஜிலீரென்கிறது !! 

அட்டவணை 2022 !! கிட்டத்தட்ட ஐந்தரை மாதங்களுக்கு முன்னே துவக்கம் கண்ட பணிகளின் பலன்களை நேற்றைக்கு உங்களிடம் ஒப்படைத்தது in many ways இந்தப் பயணத்தின் சுலபமான பகுதி ! இனி காத்திருக்கும் நடைமுறைப்படுத்தும் அத்தியாயமே சவாலானது ! எதிர்பார்ப்புகளை பூர்த்தி செய்வதும் ; ஒவ்வொரு படைப்புக்கும்  நியாயம் செய்வதுமான நடைமுறைகள் எங்களது 2022-ஐ சுவாரஸ்யமான சவால்களாக்கிடவுள்ளது !!  

அட்டவணையின் பின்னணியிலான திட்டமிடல்களைத்  துவங்கிய வேளையில் எனக்குள் மூன்று விஷயங்கள் முக்கியமோ, முக்கியமென்று கோவில் மணியாட்டம் ஒலித்துக் கொண்டிருந்தன ! 

1 . முத்து ஆண்டுமலர் # 50 சர்வ நிச்சயமாய் அனைவரையும் கவர்ந்திழுக்கும் காந்தமாய் அமைந்திட வேண்டுமென்பது எனது முதல் குறிக்கோளாக இருந்தது ! சென்டிமென்ட்களிலும், பழமையினைப் போற்றுவதிலும் சரி, செம strict ஆபீசர்களான உங்கள் ஒவ்வொருவருக்கும் இந்த இதழும் சரி, இந்தத் தருணமும் சரி, எத்தனை மகத்தானது என்பது புரிந்த நொடியில், FFS மீதான பொறுப்பு அந்தமட்டிற்கு ஜாஸ்தி ஆனதாய்ப்பட்டது ! And இங்கே என்ன தான் கடந்த 35 ஆண்டுகளாய் இன்ஜின் ட்ரைவராய் நான் பணியாற்றி வந்தாலுமே, இது சீனியரின் ரயிலே என்பதை நான் ஒருபோதும் மறந்திருக்கவில்லை ! So நம்ம வண்டியை கொஞ்சம் முன்ன பின்னே ஒட்டி புளிய மரத்திலே இடிச்சுக்கிட்டாலுமே பரவால்லே ; ஆனால் பொறுப்புத் தரப்பட்டிருக்கும் வண்டியை பத்திரமாய்ப் பார்த்தாக வேணுமே என்ற பயமும் ஒருபுறம் ! ஏற்கனவே 25 வருஷங்களுக்கு முன்னே செய்த பைத்தியக்காரத்தனங்களின் வடுக்களைக் காலம் முழுக்கச் சுமந்து திரியும் நிலையில், இந்த மைல்கல் நொடியினைச் சரியாகக் கையாள்வது காலத்தின் கட்டாயம் என்று புரிந்தது !

2. அழுத்தமாய் எனக்குள் அலையடித்த எண்ணம் # 2 - அந்த Feel Good Factor பற்றியானது ! கிராபிக் நாவல் ரசிகர்கள் அந்த அவலச் சுவைகளில் ; மாறுபட்ட களங்களில் பெரும் மகிழ்வைக் கண்டு வந்தாலும், ரெகுலர் நண்பர்கள் - "என்னமோ சொல்லுறே ; நாங்களும் கேட்டுக்குறோம் !!" என்ற ரீதியில் பின்தொடர்வதாகவே எனக்குப் பட்டு வந்தது ! கிராபிக் நாவல்களில் என்றைக்குமே ஒரு set pattern இருப்பதில்லை ; எந்த இரண்டு கதைகளும் ஒரே மாதிரி இருப்பதில்லை ; so இங்கு கதைத் தேர்வுகள் என்றென்றுமே ஒரு potential டைம்பாம் தான் - அதகளமும் செய்திடக்கூடும் ; மூஞ்சியிலேயே வெடித்தும் வைக்கக் கூடும் ! அவ்வித மூஞ்சியில் வெடிக்கும் தருணங்களில் முதல் சேதாரம் எனது வதனத்துக்கே என்றாலும், ரெகுலர் வாசகர்களின் உள்ளங்களில் அந்த நொடிகளில் ஓட்டமெடுக்கும் கடுப்ஸ் of இந்தியாக்களை யூகிக்க நானொரு அறிவுஜீவியாக இருக்க வேண்டுமென்பதில்லையே ?! "இந்த இழவுக்குப் பதிலா நான் கேட்ட அந்த மறுபதிப்ப போட்ருக்கலாமே ?" ; "இதெல்லாம் போட்டு சீவனை வாங்கறே நேரத்துக்கு  - ஒரு மெபிஸ்டோவைப் போடலாமே ?" என்ற ரீதியில் பொங்குவதில் வியப்புகளில்லை தான் ! Of course - ஒரு அணியாய் நாம் காமிக்ஸ் கடலின் பன்முகத்தன்மைகளை ரசிக்க இயன்றால் செமத்தியாக இருக்குமென்ற அவா தான் டைம்பாம் என்று தெரிந்திருந்தாலுமே கி.நா.க்களின் பின்னே என்னை ஓடச்செய்தன ; ஆனால் ஒரு கட்டத்தில் இந்தப் பரீட்சார்த்தங்கள் சார்ந்த அயர்வுகள் உங்கள் குரல்களில் அப்பட்டமாய் ஒலிப்பது கேட்க ஆரம்பித்த போது - மாற்றம் ; முன்னேற்றம் தேவைப்படுவது வண்டியின் பயணப்பாதையினில் தான் என்பது புரிந்தது - at least for now !! ஆக, இந்த 2022-ன் அட்டவணையினில் பத்தாண்டுகளுக்கு முன்னே உங்களிடம் ஏகோபித்து அலையடித்த அதே ஆர்வங்களையும், எதிர்பார்ப்புகளையும் மீட்டிட முயற்சிக்கும் முனைப்பு பிரதானமாக இருக்க வேண்டுமென்று தீர்மானித்தேன் !

3 The New Normal எனப் பற்பல மாற்றங்களுக்கு வாழ்க்கை நம்மை பழக்கியிருக்க - இனி வரும் காலங்களில் நாம் மட்டும் அதற்கொரு விதிவிலக்காக இருத்தல் அசாத்தியம் என்பது புரிந்தது  ! எந்நேரம் ; என்ன இடர் ; என்ன மாதிரியான சக்கையைக் குறுக்கே நுழைக்குமோ என்பது ஆண்டவன் மாத்திரமே அறிந்த புதிராய் தொடரவுள்ள பொழுதுகளில் - நமது காமிக்ஸ் திட்டமிடல்களில் ஒரு கணிச மாற்றத்தைக் கொணர்வது அவசியமென்று பட்டது ! அது தான் "குண்டு புக்ஸ்" சார்ந்த shift in thought process !! "மாசா மாசம் நாலு புக்கா ? ஹை...செம !! செம !!" என துவக்கத்தில் துள்ளிக் குதித்த நாட்களின் அதே துள்ளல் இன்றும் தொடர்கிறதா ? என்பது கேள்விக்குறி தானுங்களே ? (Of course - பத்தாண்டுகளில் தேய்ந்திருக்கக்கூடிய மூட்டுகளை வைத்துக் கொண்டு துள்ளிக் குதிப்பதெல்லாம் கொஞ்சம் ஓவர் தான் !!) "ஆங்....4 புக்கா ? அட்டைப்படம்லாம் படா ஷோக்கா கீதே..? ச்சே..கலர்லாம் சும்மா அள்ளுதே ; ப்ப்பா...மசி வாசனை நாசியைத் துளைக்குதே....சூட்டோடு சூடா படிச்சுப்புடனும்டோய் " என்று சொல்லிய கையோடு குப்புறப் படுத்துத் தூங்குவோர் நம்மிடையே கணிசம் என்பது எனது யூகம் ! ஆண்டினில் 40 / 50 புக்ஸ் என்று போட்டுத் தாக்குவதில், குறைந்த பட்சமாய் முதல் புரட்டலைத் தாண்டியிரா இதழ்களின் எண்ணிக்கை குறைந்தது 15 தேறும் என்பதுமே எனது அனுமானம் ! So நம் மீதும், காமிக்ஸ் மீதும், சேகரிப்பின் மீதுமான வாஞ்சைகள் இத்தனை தூரம் நம்மைக் கரம்பிடித்துக் கூட்டி வந்துள்ளன என்றாலும் - இதுவொரு ஆரோக்கிய வழிமுறையாய் இருந்திட இயலாதென்ற உறுத்தல் எனக்குள் இருந்து கொண்டே வந்தது ! Of course - "எனக்கு கல்லா கட்டியாச்சு ; இனி உங்க பாடு தெய்வங்களா !!" என்று சொல்லிக்கொண்டே நான் நகரலாம் தான் ; ஆனால் அந்த முட்டாள்களின் சொர்க்கத்தில் அதிக காலம் வாசம் செய்ய சாத்தியமாகாதே !! பணம் உங்களதாக இருந்தாலுமே, அதற்கான பிரதிபலன்கள் உங்களை முழுமையாய்ச் சென்றடையாத நிலையினில் - எனக்கு உங்களை short change செய்வதாகவே ஒரு உறுத்தல் !! So நம்பர்களில் இனியில்லை எதிர்காலம் ; குறைவான எண்ணிக்கையே ஆனாலும், நிறைவான இதழ்களிடமே இனி வரும் காலங்கள் இருக்க முடியுமென்பது பட்டது ! அதன் பலனே இந்த அட்டவணையினில் அதிரடியாய் எண்ணிக்கையினில் cut & குண்டு புக்சினில் jump !! Oh yes - மாதா மாதம் புக்ஸ் வந்த ரெண்டாம் நாளுக்குள்ளாகவே அத்தனையையும் வாசித்துக் கரைத்துக் குடிக்கும் நண்பர்கள் இதன் பொருட்டு கவலை கொள்ள நேரிடும் என்பதும் புரிந்தது தான் ; ஆனால் மாதம் 2 புக்ஸ் ; but செம த்ரில்லான வாசிப்புகள் ; செம நீள வாசிப்புகள் என்ற அனுபவத்தினை உணர்ந்திடும் முதல் நொடியினில் அவர்களது வருத்தங்கள் விலகிடும் என்று எனக்கு நானே தைரியம் சொல்லிக் கொண்டேன் !

So மேற்படி 3 சமாச்சாரங்களுக்கும் நிரம்ப வெயிட் தந்தபடிக்கே தேடல்களில் புகுந்தேன் and இதோ இங்கு நிற்கிறோமின்று !! "FFS இதழில் அத்தினியும் புதுசா ?? செம தைரியம் தான் !!" என்ற கருத்துக்கள் உங்களிடையே நிறையவே பார்த்திட முடிந்தது guys !! பலப்பல ஊர்களின் பலப்பல மு.ச. & மூ.ச. க்கள் தந்த திடம் ஒருபக்கமிருக்க - இந்தத் தீர்மானத்தினை யதார்த்தங்களே அவசியப்படுத்தின என்பன !! இப்படிப் பாருங்களேன் - முத்துவின் டாப் நாயகர்கள் யாரெல்லாம் என்று :

மாயாவி

CID லாரன்ஸ் டேவிட்

ஜானி நீரோ 

மேற்படி மூவரின் கதைகளை காவிரியில் பெருக்கெடுக்கும் முதல் நீர்வரத்தைப் பார்க்கும் வண்ணானை விட ஜாஸ்தியாய் நாம் துவைத்துத் தொங்கப்போட்டாச்சு !! இனியும் அவர்கள் முதுகுகளில் சவாரி செய்ய நினைத்தால் அடுக்குமா ?

வேதாளன்

ரிப் கிர்பி

மாண்ட்ரேக்

காரிகன் 

மேற்படி நால்வருமே SMASHING 70 'ஸ் புண்ணியத்தில் ஒரு full round அடிக்கவுள்ளனர் எனும் போது இங்கே அவர்களுக்கு ஜோலிகளே நஹி !

கேப்டன் டைகர் 

லார்கோ வின்ச் 

நிறையவே பேசியாச்சு ;  எஞ்சியுள்ள இவர்களது புதுக் கதைகளின் நிலைகள் பற்றி !! Truth to tell - 3 நாட்களுக்கு முன்வரைக்கும் "இளம் டைகர்" கதைகளை புரட்டோ, புரட்டென்று புரட்டினேன் தான் ! ஆனால் அங்கே மைக் டோனோவன் எனும் பிங்கர்டன் ஏஜெண்டைத் தான் கண்ணில் பார்க்க முடிந்ததே தவிர, நாம் காலமாய்ப் பார்த்துப் பழகிய டைகரை அல்ல !! So in effect இந்த நொடியினில் கவனத்தை ஈர்க்கும் ஒரு மாஸ் ஹீரோ என முத்துவில் யாருமே இல்லை என்பதே bottomline !! இது போலான வேளைகளில் தான் 'தல' டெக்சின் மகிமை இன்னமும் அழுந்தப் புரிகிறது !! Maybe இன்னுமொரு பத்துப் பதிமூன்று ஆண்டுகளுக்கு அப்பால், லயனின் ஐம்பதாவது ஆண்டுமலருக்குமே திட்டமிடும் இடத்தினில் ஆண்டவன் என்னை வைத்திருப்பாரெனில் - "ஆங்...அந்த 500 பக்க டெக்சிலே ஒண்ணு ; புதுசா வந்திருக்க MAXI டெக்சில ஒண்ணு ; classic மறுபதிப்பிலே ஒண்ணு ; இளம் டெக்சிலே ஒண்ணு !!" என்று சிம்பிளாக சோலியை முடித்திட முடிந்திடும் ; and துளி நெருடலுமின்றி கொண்டாடிடவும் சாத்தியப்படும் ! ஆனால் அந்த வசதி முத்துவில் நஹி என்ற போது தான் 2 தீர்மானங்கள் அவசியமாகின !! 

முதலாவது - புதியவர்களை நோக்கிய ஓட்டம் ; தேடல் !! இந்த ALPHA ; SISCO ; TANGO முக்கூட்டணியானது அடுத்த கொஞ்ச காலத்துக்காவது நம் மத்தியில் அதிரடி நாயகர்களாய் வலம் வருவர் என்ற நம்பிக்கை எனக்கு நிரம்பவே உள்ளது ! 

இரண்டாவது - ZAGOR நோக்கிய நகர்வு !! இவரும் போனெல்லியின் துருப்புச் சீட்டே ; எழுநூற்றி சொச்சம் தொடவுள்ளது இவரது ஆல்பங்களின் எண்ணிக்கை ; கலரில் / black & white -ல் ரவுண்டு கட்டி அடிப்பவர் ; pure commercial நாயகர் ! So ஒரு மார்ட்டின் கதையினில் பயந்து பயந்தே உட்புகுவது போலோ ; டைலன் டாகின் சமாச்சாரத்தில் தயங்கித் தயங்கி தலைநுழைப்பது போலோ ; மேஜிக் விண்டின் ஆல்பத்தினில் திரு திருவென்று முழிக்கும் அவசியங்கள் இராதென்றே  எனக்குப் பட்டது ! Fingers crossed !!

ஐந்தரை மாதங்களாய் தலைக்குள் அடை காத்த சமாச்சாரங்களை பகிர்ந்திட்டத்தில் ஒருவித relief உள்ளுக்குள் ; and அவற்றை நீங்கள் சந்தோஷமாய் ஏற்றுக்கொண்டிருப்பது icing on the cake !! Thanks a ton folks ; இனி இவற்றை அழகாய், ரசிக்கும் விதங்களில் செயல்படுத்திடும் பொறுப்பு எனதாகிறது !! ஜெய் பாகுபலி ; பிரார்த்தனைகள் புனித மனிடோ !! இன்னும் ஏதேதோ ஓடுகின்றது தலைக்குள் ; ஆனால் காத்திருக்கும் தீபாவளி மலரின் பணிகள் அழைப்பதால் அங்கே ஓட்டமெடுக்கப் புறப்படுகிறேன் !! Have a relaxed day all !!







Memes by MKS Ramm 😀😀😀

Thursday, October 14, 2021

ஒரு அட்டவணைத் திருவிழா !!

நண்பர்களே,

வணக்கம். பக்கத்து வீட்டுப் பசுமாடு கன்று போட்டாலே 14 பத்தி எழுதுபவனுக்கு, ஆண்டின் இந்த “அட்டவணை மேளா” சிக்கும் போது சொல்லவும் வேணுமா – உற்சாகத்துக்கு ? வெல்கம் guys – கடந்த பத்தாண்டுகளாய் அக்டோபர்களில் அரங்கேறி வரும் “வாத்திக்கொரு தேர்வு” ரகளையின் லேட்டஸ்ட் பதிப்புக்கு !

2022 !! பேரிடர்களின் சம்மட்டியடிகளைக் கடந்து நம்பிக்கை நட்சத்திரமாய் மிளிரும் ஆண்டு ! "அலையடிக்கும்.....புயலடிக்கும்" என்ற doomsday கொரோனோ ஆரூடங்கள் இன்னமும் புழக்கத்தில் இருந்து வந்தாலும், ஏதோ ஒரு மூலையில் மனசில் நம்பிக்கை ததும்புகிறது – காத்திருக்கும் ’22 நிச்சயமாய் காவு வாங்கிடாது ; காலை வாரிடாது என்று ! நித்தமும் கோடிகளில் நடந்து வரும் தடுப்பபூசிப் படலம் தரும் தைரியமா அது? இயற்கையின் கனிவின் மீதான நம்பிக்கையா? அல்லது அசட்டுக் கற்பனையா? என்று சொல்லத் தெரியவில்லை – ஆனால் அதள பாதாளங்களைப் பார்த்து விட்டான நமக்கு, இனியும் ஒரு bigger படுகுழியினைப் பார்க்க அவசியமிராது என்றே உள்ளுக்குள் சொல்லுகிறது! அந்த நம்பிக்கை நிஜமாகிட பெரும் தேவன் மணிடோவிடம் வேண்டியபடியே விஷயத்துக்குள் குதிக்கலாம் !

Oh yes – ஒவ்வொரு அட்டவணையின் போதும். வெளிச்ச வட்டத்தை ஆக்ரமித்திட டாப் நாயக / நாயகியர் மத்தியில் போட்டிகள் இருப்பதுண்டு தான் ! உச்சமாய் தல Vs. தளபதியின் மல்லுக்கட்டுக்களையும் பார்த்தவர்கள் தானே நாமெல்லாம்?! ஆனால் இந்த 2022-ல் நிலவரமே வேறு! துளிச் சந்தேகமுமின்றி இந்தப் 12 மாதங்களுக்குமே, தனது ஐம்பதாவது ஆண்டினைத் தொட்டு நிற்கும் நம் முத்து காமிக்ஸ் மீதும், அதன் பிதாமகரான சீனியர் எடிட்டர் மீதும், ஒளிவட்டம் நிலைத்திடுவது தானே பொருத்தமாக இருக்க முடியும்?! அரை நூற்றாண்டென்பது ஊடகத் துறையினில் ஒரு அசாத்திய மைல்கல்லாக இராது போகலாம் தான்; ஆனால் கொயந்தப் பசங்க படிக்க வேண்டிய பொம்ம புக்குகளோடு மட்டுமே 600 மாதங்களாய்க் குடித்தனம் செய்து வந்திருப்பது எத்தனை ரகளையான அனுபவமென்பது மெதுமெதுவாய் எனக்கே புரியத் துவங்குகிறது!

உள்ளதைச் சொல்வதானால் – ஒரு மாதத்துப் பணியிலிருந்து அடுத்த மாதத்துக்கென குரங்காட்டம் கடந்த பத்தாண்டுகளாய்த் தொடர்ந்து தாவி வந்திருக்கும் எனக்கு இந்தத் தருணத்தின் நிஜமான பரிமாணம் புரிந்திருக்கவில்லை தான் ! ”அடக்கமாய் ரூ.500/- விலையில் ஒரு ஸ்பெஷல் இதழ்“ என்பதே எனது ஒரிஜினல் திட்டமிடலாய் இருந்தது! ஆனால் நடப்பாண்டின் லாக்டௌன் தினங்களது தினப்படிப் பதிவு ரகளைகளின் போது உங்களின் வானளாவிய எதிர்பார்ப்புகள் அழுத்தம், திருத்தமாய் வெளிப்பட்ட போது, வேக வேகமாய்க் கோடுகளை அழித்து விட்டு, முதல்லேர்ந்து திட்டமிடத் திரும்பினேன்! எது எப்படிப் போனாலும் காத்திருக்கும் அட்டவணையின் highlight அந்த ஆண்டுமலர் #50 ஆகத்தானிருக்க முடியுமென்பதும் புரிந்தது! அதே சமயம் நடைமுறை யதார்த்தம், பட்ஜெட் சார்ந்த கட்டுப்பாடுகள்; இன்னமும் நார்மலுக்குத் திரும்பியிரா ஜீவனங்கள், என்ற சுடும் நிஜங்களுக்கும் மரியாதை தந்திட வேண்டுமென்ற புரிதலும் இல்லாது போகவில்லை! So நம்ம ஸ்டீல் அள்ளிவிடுவதைப் போல ”அஞ்சாயிரத்துக்கு பெஷல் புக்“ என்ற பகற்கனவில் திளைத்திடாது – சமீப ஆண்டுகளின் சந்தா பட்ஜெட்டுக்கு எகிறிடாது, அதற்குள்ளாகவே சகலத்தையும் அடக்கிட வேண்டுமென்பதே எனது முதல் இலட்சியமாயிருந்தது! அதனில் வெற்றி காண முடிந்தது எனக்கொரு சன்னமான திருப்தியை தந்த முதல் factor!

இரண்டாவதான ”திருப்தி factor“ வேறொரு மார்க்கத்தினில் ! 2012-ல் நாம் மறுவருகை செய்த போதே எனக்குள் ஒரு சிறுகுறிப்பைப் போட்டு வைத்துக் கொண்டேன் – “இனி வரக்கூடிய ஒவ்வொரு பத்தாண்டுகளுக்கும் நம்மை நாமே reinvent செய்திட வேண்டும்!” என்று ! சாணித் தாள்; கறுப்பு-வெள்ளை; தாமதத்துடன் கூட்டணி என்று இலக்கின்றித் திரிந்த நமக்கு – கடந்த 10 ஆண்டுகள் ஒரு மாற்றத்தைக் கண்ணில் காட்டியுள்ளதில் இரகசியங்கள் லேது! “ஹி…ஹி…ஆங்…” உங்க வேகம்லாம் ரெண்டு, மூணு மாசத்துக்குத் தொடருமா சார்? அப்பாலிக்கா பழைய முருங்கை மரத்தில் ஏறிடாமலா போவீர்கள்? என்று என் காதிலேயே நண்பரொருவர் ஓதிடும் அழகில் தான் இருந்தது – பத்தாண்டுகளுக்கு முன்பான நமது credibility ! But நல்ல பொழுதுகள்; கஷ்ட வேளைகள்; சந்தோஷத் தருணங்கள்; சங்கட நாட்கள்; புயல்கள்; வெள்ளங்கள்; பேரிடர்கள் என்று அத்தனைக்கும் மத்தியிலும் சொன்னதைச் சரியான நேரத்தில் செய்து காட்ட நமக்குமே முடியும் என்பதை இந்தப் பத்தாண்டுகளில் பிரதானமாய் எனக்கு நானே நிரூபித்துக் காட்டிக் கொண்ட திருப்தியுடன் – காத்திருக்கும் அடுத்த தசாப்தத்தில் செய்திடத் தேவைப்படக்கூடிய மாற்றம் என்னவாக இருக்கக்கூடுமோ? என்று யோசிக்க முனைந்தேன் ! கலரில் டீசன்டான தரத்தில் தற்போது கால்பதித்து நிற்பதால், அந்த திக்கில் எதுவும் நோண்ட பெரிதாய்த் தோணலை! வேறென்ன செய்யலாமென்று யோசித்த போது உறைத்தது தான் – நமது பொதுவான பயண திசையினில் சன்னமாய் – ரொம்ப சன்னமாய் மட்டும் செய்திடத் தேவைப்படக் கூடிய திசைமாற்றம் பற்றி! 2012-ல் பழைய பாணிக் கதை தேர்வுகளோடே ஆரம்பித்த நாம் – மெதுமெதுவாய் ஜானர்களில் பன்முகத்தன்மைகளை பரீட்சார்த்த முயற்சிகளாய் தொட்டு உரசிப் பார்க்க ஆரம்பித்தோம்! “கதையே நாயகன்” என்றாலுமே அவை கரை சேர்ந்திடும் என்ற நம்பிக்கையில் வெளியானவை தான் கீழ்க்கண்ட சிலபல கி.நா.க்கள்:

- சிப்பாயின் சுவடுகளில்

- வானமே எங்கள் வீதி

- தேவ இரகசியம் தேடலுக்கல்ல

- இரவே… இருளே… கொல்லாதே!

- க்ரீன் மேனர்

- Black & White கிராபிக் நாவல்கள்

- ஒரு தோழனின் கதை

etc… etc… etc…

அதன் லேட்டஸ்ட் அத்தியாயமாய் இதோ போன வாரம் வெளிவந்திருக்கும் ”அந்தியும் அழகே!“ இவற்றுள் நிறைய பிரமாதமாய் வெற்றி கண்டுள்ளன & சம அளவிற்குச் சாத்துக்களும் பெற்றுள்ளன! விழுந்தால் அடிபடுமே என்ற பயத்தோடே நடமாடினால் உயரங்களைத் தாண்டிக் குதிக்க முடியாதே! என்பதே எனது சித்தாந்தமாய் இருந்து வந்தது – இந்தத் தேடல்களின் பின்னணியில்! ஆனால் a good 120 months down the line – ஒற்றை விஷயம் ரொம்பவே, ரொம்ப ரொம்பவே தெளிவாய்ப் புரிந்துள்ளது! அது தான் உங்களின் ரசனைகளின் ஸ்திரத்தன்மை!! இதோ இந்தக் கையிலொரு லேட்டஸ்ட் கி.நா. & மறு கையில் ஒரு வேதாளன் மறுபதிப்போ ; சுஸ்கி விஸ்கி மறுபதிப்போ எனில் – பத்துக்கு ஒன்பது பேராவது எதை அள்ள வேகம் காட்டுவார்களென்பதில் இரகசியங்கள் இல்லையே?! And 2 ஆண்டுகளைத் தொடப் போகும் இந்தப் பேரிடரின் தாக்க நாட்களின் நீட்சியாக – இருண்ட களங்கள் ; offbeat பாதைகள்; அழுகாச்சிப் படலங்கள் என்பனவெல்லாமே சற்றே விலகி நிற்க வேண்டிய சமாச்சாரங்களாய்த் தென்படுவதன் லாஜிக்கும் தெளிவாய்ப் புரிகிறது! கொஞ்ச காலத்துக்காவது feel good கதைகள்; கமர்ஷியல் கதைகள்; பாஸிட்டிவான உணர்வுகளை விதைக்கும் கதைகளே உங்களின் தேடல்களில் முக்கிய இடம்பிடித்திடும் என்பது புரிகிறது ! So காத்திருக்கும் அடுத்த கொஞ்ச ஆண்டுகளில் உங்கள் மனம்கவர் feel good நாயக / நாயகியரே நம் மத்தியினில் தூக்கலாய் இடம்பிடிப்பர்! “எனக்கு நேர்கோட்டுக் கதைகளே போதுமே!“ என்று நீங்கள் நெளிய நெளிய – நான் மூக்கை முன்னூறு தபா சுற்றும் கதைகளையாய் போட்டுத் திணறடிப்பது வரும் காலங்களில் ரெகுலர் சந்தாக்களின் அங்கமே ஆகிடாது! பரீட்சார்த்த முயற்சிகள்; கிராபிக் நாவல்கள் etc… ஒட்டுமொத்தமாய் ஓரம்கட்டிடப்படாமல் – கிடைக்கும் ஆன்லைன் புத்தகவிழாத் தருணங்களில்; முன்பதிவுப் பதிப்பு ரூட்களில் மட்டுமே சின்னதொரு சதவிகிதத்தில் களம் கண்டிடும்! அதுக்காக “எட்றா சம்முவம் வண்டிய… போடுறா ஸ்பைடர் கதையை!” என்று ரிவர்ஸ் கியரெல்லாம் அடிக்கும் எண்ணமில்லை! And இது பற்றி நான் வாயால் சுடும் வடையைக் காட்டிலும், காத்திருக்கும் அட்டவணையானது ஒரு யதார்த்த விளக்கமாக இருந்திடக்கூடும்! So let’s get started!!

The Fifty & Forever Special ! சீனியர் எடிட்டரின் (இந்தப் பெயர்த் தேர்வே) புத்தாண்டினை நமக்கு அதிரடியாய்த் துவக்கித் தரவுள்ள முத்துவின் பொன்விழா ஆண்டுமலருக்கான பெயர் ! And லோகோவுமே சீனியரின் தேர்வுக்கே விட்டிருக்க அதற்கான வேலைகள் ஓடி வருகின்றன ! So பெயர் சார்ந்த விவாதங்களுக்குள் புகுந்திடாமல், கதைகள்; அமைப்பு பற்றியெல்லாம் பார்ப்போமா?

முதல் நாள் முதலாக - "ஒரே குண்டு புக்; NBS போலான கதம்ப ஸ்பெஷல்” என்பதே உங்களின் பெரும்பான்மையான அவாவாக இருந்து வந்துள்ளது! படைப்பாளிகள் இந்தக் கூட்டணியாட்சிகளுக்கு இப்போதெல்லாம் ‘தடா‘ போடுவதால் நானுமே “முடியாது… முடியாது… நஹி… not possible !!” என்றபடிக்கே சுற்றி வந்து கொண்டிருந்தேன்! So தனித்தனி இதழ்களாய் வெளியிட்டு, ஒரு ஸ்லிப் கேசில் மொத்தத்தையும் அடுக்கும் விதமாய் அமைக்கத் தான் வேண்டி வருமென்று நினைத்திருந்தேன்! ஆனால் மே மாத இறுதிவாக்கில் – “திசைக்கொன்றாய்க் கோரிக்கைகளை வீசித் தான் பார்ப்போமே… கிட்டினால் ஜெயம்; இல்லாங்காட்டி ‘மூச் காட்டாது ஸ்லிப் கேசில் ஐக்கியம் !‘ என்ற அசட்டு எண்ணம் தோன்றியது! அந்த ராத்திரிக்கே எழுந்து நமது பிரதான பப்ளிஷர்களுக்கெல்லாம் ஒரு மின்னஞ்சலைத் தட்டி விட்டேன் – Of course போனெல்லி நீங்கலாக! இத்தாலிய ஜாம்பவான் TEX – லயனின் பிள்ளை எனும் போது, அவரில்லாத பாக்கி நாயகர்களைக் கொண்டு திரட்டும் ஸ்பெஷல் இதழில் பெருசாய் வலு இராதென்பதால் இந்த ஆட்டத்துக்கு ப்ரெஞ்சு நாயக /நாயகியரை மட்டுமே சேர்த்துக் கொண்டிருந்தேன்!

வரிசையாய் – “சாரி… நோ!”; “ஊஹும்… இந்தக் கதாசிரியருக்கும், அந்த எழுத்தாளருக்கும் ஏழாம் பொருத்தம்; சம்மதிக்க மாட்டார்கள்!” என்ற ரீதியிலேயே பதில்கள் வந்தன! காற்றுப் போன பலூனாட்டம் ஆகிப் போன வேளையில் தான் நமது டாப் பப்ளிஷர்களுள் ஒன்றான லொம்பாவிலிருந்து பதில் கிட்டியது – ”சுவாரஸ்யமாய் தெரிகிறதே… கதைத் தேர்வுகளைப் பண்ணி விட்டுச் சொல்லுங்கள்; பார்க்கலாமே!” என்ற பதிலுடன்! சும்மாவே சாமியாடும் கோடங்கிக்கு இந்த ஊக்கம் போதாதோ – தொடர்ந்த பத்து நாட்களின் ராப்பொழுதுகளிலும் லொம்பா குழுமத்தின் படைப்புகளை அலசும் முனைப்பில் தூக்கங்களைத் தொலைத்தேன்! நமது தற்போதைய பட்டியலில் லொம்பா குழும நாயகர்கள் கீழ்க்கண்டவாறு:

- தோர்கல்

- ரிப்போர்டர் ஜானி

- சிக் பில்

- க்ளிப்டன்

So எனது ஆரம்பப் புள்ளி இவர்களிடமிருந்தே துவங்கியது! 2 தோர்கல் கதைகள் + ஒரு க்ளாஸிக் ஜானி + ஒரு புதுயுக ஜானி + ஒரு சிக்பில் + ஒரு கேரட் மீசைக்காரர் என்றபடிக்கே எழுதிவிட்டு அதை உற்று நோக்கிய போது எனக்கே பெருசாய் லயிக்கவில்லை ! தோர்கல் செம நாயகரே; வான் ஹாம் கற்பனைகளில் தெறிக்க விட்டு வருகிறார் தான்; ஆனால் நம் மத்தியில் இவர் இன்னமும் சூப்பர் ஸ்டார் அந்தஸ்த்திற்கு உசந்திருக்கவில்லை என்பது நிஜமே! கடைசி 24 மாதங்களின் “தோர்கல்” விற்பனை விபரங்களை ஜுனியர் எடிட்டரின் சகாயத்தோடு தோண்டியெடுத்த போது, எனது அந்த gut feel நிஜம் தானென்பது புரிந்தது! சந்தா வட்டத்தைத் தாண்டிய casual வாசக வட்டத்தினர் தோர்கல் பக்கமாய்ப் பெரியதொரு ஆர்வங்களைக் காட்டிடுவதேயில்லை என்பதைக் கையிலுள்ள இருப்பு நிலவரமும் சொன்னது! தவிர, புதுயுக ஜானியையுமே நீங்கள் வெறிக்க வெறிக்க அணுகுவது தெரிந்த சமாச்சாரம் என்பதால் அதிலுமே நெருடியது! And to top it all – க்ளிப்டன் அட்டவணையில் இடம் பிடித்தாலே தெய்வச் செயல் என்றாகியிருக்கும் நிலையில் அவருக்கு இந்த landmark இதழில் இடமாாா??? என்று எனக்கு ரொம்பவே உதைத்தது! So இந்த லிஸ்டிலிருந்து கிட் ஆர்டினும் டாக்புல்லும் மட்டுமே இருந்து பெரிதாய் பிரயோஜனங்களிராது என்பது புரிந்தது! 

கேப்டன் டைகரோ டார்கோ குழுமத்துச் சொத்து; ப்ளுகோட் & லார்கோவோ ட்யூப்பி குழும properties… and அவர்களெல்லாமே கூட்டணிக்கு ‘நோ‘ சொல்லிவிட்டிருந்தனர் ஏற்கனவே ! “ஆங்… இளம் டைகர் பாக்கி ஆல்பங்களையெல்லாம் திரட்டி ஒட்டேடடட புக்காக்கி அதகளம் பண்ணினாலென்ன?” என்ற மகாசிந்தனை அடுத்துத் தோன்றியது! வெவ்வேறு ஹீரோக்களை ஒன்று சேர்த்துக் கும்மியடிக்கத் தானே டார்கோ 'நோ' சொன்னார்கள் – இளம் டைகரை மட்டுமே தொகுப்பாக்கிட நிச்சயம் மறுப்பு இராதென்பதால் அந்த ரூட்டில் போகலாமென்றுபட்டது! பரபரவென நமது ப்ரெஞ்சு மொழிபெயர்ப்பாள மேடமுக்கு ஃபோன் அடித்தேன் – “இன்ன மாதிரி… இன்ன மாதிரி விஷயமுங்கோ… ஆகையால் அத்தியாயம் 9 to 21 வரைக்கும் மொழிபெயர்ப்பு பண்ணிடனுமே! என்று! கொஞ்ச நேரத்துக்கு மறுமுனையில் மௌனம்! “நல்லா யோசிச்சீட்டீங்களா விஜயன்?” என்று சுரத்தின்றிக் கேள்வி வந்த போதே எனக்குப் புரிந்து விட்டது! இடியாப்பச் சிக்கலான இரத்தப் படலக் கதைகளையோ; ஜானி கதைகளையோ; கிராபிக் நாவல்களையோ தயக்கங்களேயின்றிக் கையாண்டவருடன் ஒன்றரையாண்டுகளுக்கு முன்னமுமே இந்த இளம் டைகர் ஆல்பங்கள் பற்றிப் பேசியதும் நினைவில் இருந்தது! நாமோ பொழுதுக்கொரு புளியமரத்தில் ஏறும் வேதாளங்கள் எனும் போது, நமது ரசனைகளும், ரசனைசார் தீர்மானங்களும் வேளைக்கு வேளை மாற்றம் காண்பது சகஜமே! ஆனால் அவரோ இந்தப் பஞ்சாயத்துக்கெல்லாம் தலைநுழைப்பவரே கிடையாது; "இது ஓ.கே…. இது சுமார்…" என்பதோடு நிறுத்திக் கொள்வார்! So அவர் ஒன்றரையாண்டுகளுக்கு முன்னே சொல்லியிருந்த கருத்தையே இப்போதும் ஒப்பித்தார்: “பெருசாய் சுவாரஸ்யம் இல்லை; 12 பாகங்களை ஒட்டுமொத்தமாய்ப் படிப்பது எப்படி இருக்கும் என்பதை ஒரு தடவைக்கு ரெண்டுவாட்டி யோசித்துக் கொள்ளுங்கள்!“ என்று மட்டும் சொன்னார்… மறுக்கா பலூனில் காற்றுப் பிடுங்கப்பட்டது போலான உணர்வு தலைதூக்கியது! மறுக்கா நெட்டில் அலசல்கள் என்று நுழைந்த போது, தீவிர டைகர் ரசிகர்களுமே தங்களின் சங்கடங்களை இந்தத் தொடரின் பிற்பகுதியினில் வெளிப்படுத்தியிருப்பது உறுத்தலாய்க் கண்ணில் பட்டது! So maybe இன்னொரு தருணத்தில் முன்பதிவுக்கெனத் திட்டமிட்டு இந்த மீதக்கதைகளை மூன்றோ – நான்கோ இதழ்கள் கொண்ட தொகுப்புகளாய் வெளியிடுவதே வழி என்று தீர்மானித்தேன்!

மறுபடியும் ஆரம்பித்த இடத்திலேயே நிற்க; சாமி “குண்டு புக்“ வரம் கொடுத்துமே, கதைத் தேர்வெனும் பூசாரி சண்டித்தனம் செய்கிறாரே என்று பேய்முழி முழித்துக் கொண்டிருந்தேன்! அந்த நொடியில் தான், "புதுசு ; முற்றிலுமாய்ப் புதுசு" என்ற எண்ணம் லேசாய்த் துளிர்விட்டது ! எல்லா ஹீரோக்களுமே ஒரு காலத்தில் நமக்குப் புதியவர்களாக இருந்தவர்கள் தானே?! என்று மெதுமெதுவாய்த் தோன்ற ஆரம்பித்தது ! லார்கோ; ஷெல்டன் தொடர்களெல்லாம் effective ஆக நம்மளவில் ‘சுபம்‘ கண்டிருக்க, கௌபாய் அல்லாத ஆக்ஷன் நாயகர்களுக்கான வெற்றிடம் பெரிதாய் இருப்பதுமே புரிந்தது! கண்ணைச் சுழற்றிய தூக்கத்தை உதறிய கையோடு லொம்பா குழுமத்துக்கு ஒரு மின்னஞ்சலைத் தட்டி விட்டேன் – ஒரு நீளமான லிஸ்டுடன்! அத்தனையுமே சமீப வருஷங்களில் அவர்கள் வெளியிட்டிருந்த ஆக்ஷன் ஆல்பங்கள்! அவற்றின் கோப்புகளைக் கோரியிருக்க, அடுத்த 2 நாட்களில் அத்தனையையும் அனுப்பி தெறிக்க விட – ஒரு வண்டிக் கதைகளின் கத்தை கையிலிருந்தது! சொற்பமாய் இங்கிலீஷில்; நிறைய ப்ரெஞ்சில் என்றிருக்க ஜுன் மாதத்தின் பெரும்பகுதி இந்த வாசிப்புக்கென ஓட்டமெடுத்திருந்தது! And ஒரு மாதிரியாய் அந்தப் பிரிண்ட்-அவுட் சமுத்திரத்திலிருந்து வெளிப்பட்ட போது காது to காது வரை ஒரு இளிப்பு விரவியிருந்தது என்னில்! To cut a hugely long story short – அன்றைய தேடலில் கிடைத்த totally fresh நாயக நாயகியரே காத்திருக்கும் FFS இதழின் முதுகெலும்பாகிட உள்ளனர்! இன்னும் சொல்லப் போனால், இவர்களது தொடர்கள் எல்லாமே சமகாலத்துத் தொடர்கள் & ஓரளவுக்குக் கணிசமான கதையிருப்பும் உள்ளதால் – அடுத்த சில ஆண்டுகளுக்காவது இந்தப் புதியவர்கள் நம் மத்தியில் உலாவிடும் வாய்ப்புகள் பிரகாசம் என்று படுகிறது! So இதோ அந்தப் புது வரவுககள்:

  • CIA ஏஜெண்ட் ஆல்ஃபா!
  • French Secret Service ஏஜெண்ட் சிஸ்கோ!
  • ஆக்ஷன் ஸ்டார் டேங்கோ!

ஆல்ஃபா ஒரு 3 பாக சாகஸத்திலும்; சிஸ்கோ ஒரு டபுள் ஆல்ப சாகஸத்திலும், டேங்கோ சிங்கிள் சாகஸத்திலும் கரம் கோர்க்கின்றனர் ! இந்த 312 பக்க - 6 பாக ALL NEW சாகஸ சங்கமத்தோடு - 

As always – ஒற்றை லட்டோடு நிறுத்திக் கொள்ளாமல், இரண்டாவதாயொரு லட்டைத் திட்டமிட நினைத்தேன் & அது நீங்கள் யூகித்திருந்த "ஒற்றை நொடி,..ஒன்பது தோட்டாக்கள்" தான் !! மொத்தம் 5 அத்தியாயங்கள் ; 270 பக்கங்கள் என அசுர வேகத்தினில் தட தடுக்கும் க்ரைம் த்ரில்லர் ! இது பற்றி ஏற்கனவே நிறையவே பில்டப் பண்ணியாச்சு எனும் போது, அது பற்றி மேற்கொண்டும் பாட்டுப் பாடிடத் தேவையிராதென்றே நினைக்கிறேன் !!

And of course - சீனியர் எடிட்டரின் தலையங்கம் ; சில சர்ப்ரைஸ் பக்கங்கள் ; உங்களின் மலரும் நினைவுகள் ; இதுவரையிலான இதழ்களின் பட்டியல் etc ..etc இடம்பிடித்திடவும் செய்யும், ஆல்பங்களுக்கும், இத்தருணத்துக்கும் அழகு சேர்க்கும் விதத்தினில் ! இரு hardcover ஆல்பங்களுமாய்ச் சேர்த்து மொத்தம் 582 பக்கங்கள் & ரூ.1199 விலை என்பதே திட்டமிடல் !

இந்த FFS இதழில் புதுவரவுகள் எல்லோருமே refreshingly different! எல்லோருமே சமகாலத்து நாயக / நாயகியர் & இன்றைய நவீன உலகில் சுற்றி வரும் சாகஸக்காரர்கள்! And for a change, யாருமே லொங்கு லொங்கென்று ‘குருத‘யிலே காடு, மேடு, பள்ளம், பாலைவனமென்று சுற்றித் திரியும் கௌபாய்களல்ல! அந்த Wild West கோட்டாவை நாம் துவையோ, துவையென்று துவைத்து விட்டதாகப் படுவதால் – இந்தப் புதுயுகத்தினருக்கு வாய்ப்புத் தந்து பார்ப்போமே என்று நினைத்தேன்! 

ஆல்ஃபாவின் 3 பாக சாகஸம் பாரிஸில் துவக்கி, மாஸ்கோவுக்குத் தடதடக்கிறது – செம ரம்யமான சித்திரங்களின் பின்னணியினில்! இரத்தப் படல இரண்டாம் சுற்றின் ஓவியரான Jigounov தான் இங்கே ஓவியர் & அசத்தோ அசத்தென்று மனுஷன் அசத்துகிறார்! அதிலும் கதை நெடுகப் பயணிக்கும் அம்மணி பாரிஸ் & மாஸ்கோவை செம கலர்புல்லாக்குகிறார்! காத்திருக்கும் வாரங்களில் ட்ரெய்லர்களில் பார்த்திடலாம்! 

ஆல்ஃபா C.I.A-வின் ஏஜெண்டெனில் – அடுத்த புதுவரவான வின்செண்ட் சிஸ்கோ ப்ரெஞ்ச் அதிகாரவர்க்கத்தின் அதிரடிக் காரியங்களை ஓசையின்றி நிறைவேற்றிடும் ஏஜெண்ட்! பாரிஸின் வீதிகளில் இவரோடு ஓடி முடிக்கையில் நம்ம ஜாம் பஜார் அளவுக்குப் பாரிஸுமே பரிச்சயமாகியிருக்கும்! கதையின் ஏதேனும் ஒரு இடுக்கில் நமது பாரிஸ் நண்பர்களை பார்க்க முடிந்தாலும் ஆச்சர்யப்படக் கூடாது போலும் - சும்மா பாரிஸை அங்குலம், அங்குலமாய் அளந்துள்ளனர் ! Very contemporary நாயகர் & very current தொடர்! 

டேங்கோவோ வேறு மாதிரியானவர் & அவர் நமக்குக் கண்களில் காட்டிடவுள்ள பின்புலங்களுமே strikingly different! “என் பெயர் டேங்கோ” வில் தென்னமெரிக்காவின் பொலிவியா தேசமே பின்னணி! மாமூலான சீக்ரெட் ஏஜெண்ட் அல்ல இவர்; ஆனால் அதிரடிகளுக்குப் பஞ்சமே வைக்காதவர்! செம ரம்யமான சித்திரங்களும், கலரிங்கும் இந்த ஆல்பத்துக்கும் / தொடருக்கும் மெருகூட்டுகின்றன!

ஆக ஒருவழியாய் FFS சார்ந்த திட்டமிடல்கள் ஜுனில் இறுதிவடிவம் கண்டிருக்க, மொழிபெயர்ப்பினை யாரிடமும் ஒப்படைக்காது பகாசுரனாய் நானே பணியாற்றிடுவதென்று தீர்மானித்தேன்! So தொடர்ந்த ஒன்றரை மாதங்களில் தொலைந்து போன தூக்கங்களின் மத்தியில் TANGO  நீங்கலாக பாக்கி சகலப் பணிகளையும் நிறைவு செய்திட எப்படியோ சாத்தியப்பட்டது! And here we are now!!

மேற்படித் திட்டமிடல்களில் கதைகளிலோ; கதைத் தேர்வுகளிலோ எவ்வித மாற்றங்களும் இருந்திடப் போவதில்லை; they are set in stone ! ஆனால் இந்த அட்டைப்பட அணிவகுப்பு விஷயத்தில் தான் என்னுள் முழுசாய்த் தெளிவில்லை ! இது வரையிலுமான 456 அட்டைப்படங்களும் இதழினில் 52 பக்கங்களில் வைத்திட நினைத்திருந்தேன் தான் &அதன் பொருட்டு   நீங்களுமே என்னைப் போலவே ஆர்வமாக இருப்பீர்களென்று எண்ணியிருந்தேன் ! ஆனால் அதற்கென சமவிகித எதிர்ப்பு பதிவாகிட, அதனை புக்கினில் ஒரு அங்கமாக்கிடும் தீர்மானத்தை drop பண்ணியாச்சு ! அதே சமயம் "வேணும்" என்போரின்  மத்தியிலும் நிறையவே மாறுபட்ட எண்ணச் சிதறல்கள் !! "A4 சைசில் வேணும் ; ஒரிஜினல் சைசில் வேணும் ; முன்னும், பின்னும் சேர்த்தே வேணும் ; அட்டையில்லாத பக்குகளுக்கு இவற்றை ராப்பர்களாக்கிக் கொள்வோம் !" etc etc என்ற ரீதியினில் !! ஆனால் அதையெல்லாம் நடைமுறை செய்திட அபத்தமானதொரு பட்ஜெட் அவசியமாகிடும் என்பதால் - that's a total no - no too ! So 52 பக்க பிரத்யேக தனி இதழ் ; பக்கத்துக்கு 9 ராப்பர்கள் எனும் thumbnail format ; ரூ.60 விலை ' தேவையெனில் வாங்கிக் கொள்ளலாம் என்பதே திட்டமிடலாக இருந்திடும் ! So புக்கோடே சேர்த்தே இல்லியா ?? என்ற விநாவல்கள் வேணாமே - ப்ளீஸ் ?! நேற்றிங்கே பதிவான DEFINITE NO-க்களை உதாசீனம் செய்திட இயலாது தானே guys ? 

So 11 அத்தியாயங்கள் கொண்டதொரு பாகுபலி இதழின் திட்டமிடல் இதுவே! For sure, “ப்ச்ச்… இதுக்கு தான் துரைப்பாண்டி பில்டப்பாக்கும்?! ஐயே… இந்தக் கதைகள்லாம் ரொம்ப சுமாராச்சே? எனக்கு முன்னமே தெரியுமே!” என்று உதட்டைப் பிதுக்க ஆர்வலர்கள் ஆரவாரமாய் இன்று முதல் கிளம்பிவிடுவர் என்பது தெரிந்த சமாச்சாரமே ! More power to them! ஆனால் கலரில் இந்த ஆக்ஷன் அதகளங்களை – ரகரகமான தேசங்களின் பின்னணியில் பார்க்கும் அனுபவம் அட்டகாச ரகம் என்பது எனக்குத் தெரியும்; ஜனவரியில் உங்களுக்கும் தெரிந்திடும்! So நவம்பரின் நடுவாக்கிலேயே அச்சுக்குத் தயாராகி விடுவோம் – நடப்புப் பணிகளுக்குச் சேதங்களின்றி!

And முத்திரை பதிக்க விழையுமொரு ஆல்பத்தில் நமது முதுகெலும்பாகிய உங்களின் முத்திரையின்றிப் போனால் ரசிக்காதே?! So – சந்தாவினில் இணைந்திடும் சகல நண்பர்களும் தங்களது ஃபோட்டோக்களை அனுப்பி வைத்தால், இந்த hardcover ஆல்பத்தின் முதல் பக்கத்தில் அவற்றை அச்சிட்டுவோம்! It will be your very own souvenir on a landmark occasion! என்ன ஒரே விஷயம்: டிசம்பர் 5-க்கு முன்பாய் உங்கள் போட்டோக்கள் அவசியமாகிடும்!

"சந்தா கட்டாதவன்லாம் மனுஷனா தெரியமாட்டானா?" என்று உடனே குரல் உசத்த எண்ணும் புயச்சீப் புயல்களுக்கு சற்றே 'ப்ரேக்' தந்த மாதிரியும் இருக்குமென்பதால் – சந்தாவில் இணைய இயலா நண்பர்களுக்குமே இந்த ஆப்ஷன் உண்டு – இந்த இதழுக்கு மட்டும் ரூ.1299 (கூரியர் சேர்த்து) முன்பணம் அனுப்பி, முன்பதிவு செய்திடும் பட்சத்தில்! அவர்களுமே முன்பதிவு செய்திட இறுதித் தேதி டிசம்பர் 5 !

Phew!! ஒரு மாதிரியாய் ஒரு  டஜன் பக்கங்களில் ஒரு இதழை விவரித்து விட்டாயிற்று!! இனி let’s move on the rest of the stuff !

2022-ல் இன்னொரு highlight – “KENYA” இதழாகவே இருந்திடவுள்ளது என்பதில் எனக்குத் துளியும் ஐயங்களில்லை! கொரோனா இடர்கள் குறுக்கிட்டிராவிடின் 2 வருஷங்களுக்கு முன்னரே களம் கண்டிருக்க வேண்டிய தொகுப்பு இது; லேட்டானாலும் லேட்டஸ்டாய் கோடை மலராய் களம் காண்கிறது இந்த 230 பக்கத் த்ரில்லர்!

தொடரவுள்ள இதழ்களின் பெரும்பான்மை தம்மைத் தாமே தேர்வு செய்து கொள்கின்றன என்று தான் சொல்வேன்! ஆக்ஷன் ஜானரில்!

- க்ளாஸிக் ரிப்போர்டர் ஜானி

- தோர்கல்

- SODA

- ட்ரெண்ட்

- மார்ட்டின்

- மாடஸ்டி

- க்ளாஸிக் ஜேம்ஸ் பாண்ட்

- டெட்வுட் டிக்

ஆகியோர் தலா ஒரு ஸ்லாட்டைத் தக்க வைத்துக் கொள்கின்றனர்! ட்ரெண்ட் பற்றிய சந்தேகம் மெலிதாய்த் தலைதூக்கியிருந்தது தான்; ஆனால் “பகலறியா பூமி” தந்த ஊக்கம் இந்த சிகப்புச்சட்டை நாயகரை ஆட்டோமேடிக்காக உட்புகுத்திட உதவியது!

இளவரசி மாடஸ்டியின் ஸ்லாட்டுக்கோ ஒரு நெடுங்கால உத்திரவாதம் தந்துள்ளேன் & நடப்பாண்டின் “வெனிஸ் படலம்” சாகஸத்திலும் அம்மணி did well என்பதால் – அவரது தேர்வும் சுலபமானது! தவிர, ப்ளைசியையும், பாண்டையும் இணைக்கும் அந்த முயற்சியானது விற்பனையில் சோபித்த காரணத்தால் B&B ஸ்பெஷல் இனியொரு ரெகுலர் feature ஆகிடவுள்ளது! So க்ளாஸிக் ஜேம்ஸ் பாண்ட் 007 – இளவரசியின் தோள்களில் உப்பு மூட்டை!

டெட்வுட் டிக்கோ – “தேர்வு பண்றியா? சங்கைக் கடிக்கவா?” என்று மிரட்டும் தில்லை ஒரே இதழில் பெற்றிருக்க – “சரிங்க ஆபீஸர்!” என்று அவருக்கும் கேட்டைத் திறந்து விட்டாச்சு!

So ஆக்ஷன் ஜானரில் ட்யுராங்கோ நீங்கலாய் பாக்கிப் பேர் சகலமும் ஆஜர்! ட்யுராங்கோ தொடர் நிறைவுற்றதால் அவருக்கு இனி மனங்களில் மட்டுமே இடம் என்பதைச் சொல்லவும் வேணுமா – என்ன ?

கார்ட்டூனைப் பொறுத்தவரையிலும்:

- லக்கி லூக் 

- சிக் பில்

- ‘எலி‘யப்பா (who's this ?????)

- ப்ளூகோட்ஸ்

- மேக் & ஜாக்

ஆகியோர் மாத்திரமே இடம்பிடிக்கின்றனர்! க்ளிப்டன் தாத்தாவுக்கு இந்த ஒற்றை வருஷம் ப்ரேக் தந்து விட்டு, 2023-ல் மறுக்கா யோசிப்போம் அவரது தேர்வு பற்றி! ஹெர்லக் ஷோம்ஸ் தொடரிலோ ஒரேயொரு சிறுகதை மட்டுமே மீதமுள்ளது என்பதால் அவரை உள்ளே நுழைக்க வழியில்லை! So நடப்பாண்டினில் extra ஆகிடும் சிரிப்புப் பார்ட்டி - "எலியப்பா" மட்டுமே ! இவரொரு சர்க்கஸ் யானை !! அங்கிருந்து தப்பி ஊருக்குள் புகுந்திட, அதற்குத் தஞ்சம் தருகின்றனர் குட்டீஸ் சிலர் ! வீட்டுக்கே கூட்டிப் போய் எளியப்பாவைப் பாத்துக்கிட்டு, தொடர்ந்திடும் ரகளைகள் 6 பக்க குட்டி சிரிப்பு வெடிகள் ! And இவை ரெகுலர் தடத்தில் அல்லாது வருகின்றார் ! அது பற்றி பதிவின் இறுதியினில் ! 

இன்னொரு சுவாரஸ்யம் - இன்னொரு கதம்ப இதழுடனான "முத்து கோடை மலர்" !! இங்கே 1 புதியவர் & 2 பழகியவர்கள் !! புதியவரான  ரூபின் – சிகாகோ போலீஸ் டிபார்ட்மெண்டின் பெண் டிடெக்டிவ்! சித்திர பாணியில் சற்றே SODA-வைப் போல் இவர் காட்சி தந்தாலும், முழுக்க முழுக்கவே இவரொரு ஆக்ஷன் cop தான்! இவருக்குப் பின்னே ஒரு குட்டியூண்டு கொசுறு கதையும் உண்டு! ஆண்டுதோறும் பரிசீலனைகளுக்கென ஒரு குட்டி யானையில் ஏற்றும் அளவிற்கான புதுக்கதை printout-களை கோவையிலுள்ள நமது பிரெஞ்சு மொழிபெயர்ப்பாளரின் இல்லத்துக்கு அனுப்பி வைத்து, அவற்றை மேலோட்டமாய்ப் படித்துப் பார்த்து அபிப்பிராயம் சொல்லக் கோரிடுவது வழக்கம். 2020-ன் இறுதியிலும் அதே வேலையைச் செய்திருந்தோம் – ஜனவரி & பிப்ரவரி வாக்கில் அவர் தரக்கூடிய inputs-களை தொடரும் இதழ்களில் நடைமுறைப்படுத்தலாமென்ற எண்ணத்தில்! துரதிர்ஷ்டவசமாய் அவருக்கு மூட்டு மாற்று அறுவை சிகிச்சை அவசியமாகிப் போக, அதனில் பிசியாகி விட்டார்! And அந்த சிகிச்சையின் தொடர்ச்சி ரொம்பவே சிரமமானதாய் இருந்து போக, ஜுலை வரையிலுமே ரொம்பவே தடுமாறிப் போய் விட்டார். So இந்த இடைப்பட்ட நாட்களில் நமது பிரெஞ்சு மொழிபெயர்ப்புக்கென அவரை இம்சை பண்ணிடாமல் மாற்று ஏற்பாட்டினை செய்திருந்தேன்! அதன்படி ஒரு சென்னைப் பெண்மணி நமக்கு ஒத்தாசை செய்து வந்தார். ”ஆஹா… ஓஹோ..!” என்ற தரத்தில் இல்லாது போனாலும் மோசமில்லை என்றிருக்க, அதனைக் கொண்டே வண்டியோட்டி வந்தேன்! And அவருக்கு அனுப்பப்பட்டிருந்த கதைகளுள் ரூபீனின் இந்த சாகஸமும் சேர்த்தி! அவரும் எழுதியனுப்பியிருக்க, கடைசியாய் இதனில் பணியாற்ற எண்ணியிருந்தேன்! இதனிடையே நமது கோவை மொழிபெயர்ப்பாளர் நலம் பெற்றிருக்க, எனக்கு மெசேஜ் போட்டிருந்தார்! ”போர்… பெரும் அக்கப் போர்… எல்லாம் ஒருவழியாய் ஓய்ந்தது! எதையாவது எழுதணும் போலிருக்குதே!” என்றார்! எட்டும் தொலைவில் எழுபதைத் தொட்டிடவுள்ளவர்; ஆண்டவன் கருணையில் அற்புதமானமொரு குடும்பமும், அளப்பரிய செல்வமும் கொண்டவர்! நாம் தரும் பேரீச்சம்பழங்களுக்கென மாங்கு மாங்கென்று எழுதித் தள்ள சிஞ்சித்தும் அவசியமில்லாதவர்! ஆனால் கடந்த 22 ஆண்டுகளாய் இதனை ஒரு தவமாய் செய்து வரும் ஆற்றலாளர்!! ”புதுசா கதை அனுப்ப லேட்டாகும்னா சிரமப்பட வேணாம்; ஏற்கனவே என் கையிலே குவிஞ்சு கிடக்கிற புதுக் கதைகளிலேர்ந்து எதையாச்சும் எடுத்து எழுதட்டா?” என்று அவரே கேட்க; நான் ”ரைட்டு!” என்று மண்டையை ஆட்டி வைத்தேன்! மறுநொடியே – “அந்தப் பெண் போலீஸ் கதையை எழுதட்டுமா? ரொம்ப சுவாரஸ்யமா இருந்தது!” என்றார்! அவர் குறிப்பிட்டது ரூபீனைத் தானென்பது புரிந்தது & அந்த ஆல்பத்துக்கான மொழிபெயர்ப்பு ஏற்கனவே என் கைகளில் இருந்தது தான்! ஆனால் அவர் குரலிலிருந்த ஆர்வம் என் வாயை அடைத்தது! “ஓ.கே. மேடம்… அதைப் போட்டுத் தாக்குங்க!” என்று சொன்ன கையோடு, என்னிடம் ஏற்கனவேயிருந்த இங்கிலீஷ் ஸ்க்ரிப்டை ஓரம்கட்டி விட்டேன்! இதோ- இந்தப் பதிவுக்கு ஓரெயொரு நாள் முன்பாக கோவையிலிருந்து கூரியர் வந்துள்ளது !So இரண்டுவாட்டி மொழிபெயர்ப்பு கண்ட இந்த cop நமது மைல்கல் ஆண்டினில் மகளிர் கோட்டாவினை இளவரசியோடு திறமையாகப் பூர்த்தி செய்கிறார்!

அப்புறம் கிராபிக் நாவல் ஜானரினில் தாத்தாக்களின் ஒற்றை ஆல்பம் மாத்திரமே !

தாத்தாக்களின் தேர்வு உங்களின் வெகு சமீபத்தை வோட்டுக்களின் பலனே guys! ஓரிரு பிசிறடித்த குரல்கள் நீங்கலாகப் பாக்கிப் பேர் தாத்தாக்கள் அணிவகுப்பிற்கு வலு சேர்ப்பித்திருப்பதால், இந்தக் கிழ இளவரசர்கள் உட்புகுகின்றனர் – நம் மத்தியிலான இளவரசர்களுக்குப் பிடித்திருந்தாலும், இல்லாது போனாலும் ! கொஞ்ச காலத்துக்கேணும் அழுகாச்சிகள்; dark கதைகள் வேணாமே என்ற உங்களின் அபிப்பிராயங்களில் எனக்குமே உடன்பாடென்பதால் – கொஞ்ச காலத்துக்காவது கி.நா.தனித்தடம் will be on the backburner ! So கி.நா. ரசிகர்கள் மன்னிச்சூ !

So that leaves us with – TEX!!! தலைவாழை விருந்தின் நளபாகமே மஞ்சள்சட்டையார் தானெனும் போது, அவருக்கு எத்தனை ஸ்லாட்கள் என்பது மாத்திரமே கேள்வி! நீங்களே எண்ணிப் பார்த்துக் கொள்ளுங்களேன் guys! இளம் டெக்ஸ் கதைவரிசையும் தொடர்கிறது & அதன் அடுத்த ஸ்டாப் மெபிஸ்டோவுடனான மோதல் சாகஸமே எனும் போது, 2022-ன் தீபாவளி highlight அதுவாகவே இருக்கவுள்ளது – in color!! மாதமொரு டெக்ஸ் இல்லியா??? என்ற கேள்வி தொடரும் என்பது இந்த நொடியில் எனது யூகம்! And அதற்கான பதில் – பதிவின் back end-ல் உள்ளது! புத்தாண்டின் முழுமைக்கும் மாதமொரு TEX உண்டு என்று மட்டும் இப்போதைக்குச் சொல்லிடுகிறேனே ?!

ஆக காத்திருக்கும் புத்தாண்டின் திட்டமிடல்கள் இவையே! நிஜத்தைச் சொல்வதானால் FFS தேர்வுகள் நடந்தான நொடியே அட்டவணையின் 90% முடிந்த மாதிரியிருந்தது – simply becos அதற்கொரு 1200 ரூபாய்; KENYA இதழுக்கொரு 500 ரூபாய்; அப்புறமேட்டுக்கு டெக்ஸ் இதழ்களுக்கென சுமார் ரூ.1600 எனும் போதே பட்ஜெட் மூவாயிரத்தைத் தாண்டி விட்டது! So பாக்கியிருக்கக்கூடிய ரூ.1800/-ல் சுடக் கூடிய வடைகளும் ஜாஸ்தியிருக்க முடியாது & அந்த வடைகளுமே பெரும்பாலும் தம்மைத் தாமே தேர்வு செய்து கொண்டு விடுகின்றன! Maybe “எந்த SODA ஆல்பத்தை தேர்வு பண்றது? எந்த லக்கி லூக்கைப் போடறது ?” என்ற ரீதியிலான கேள்விகள் மாத்திரமே எனக்கென எஞ்சி நின்றன! So பல விதங்களில் சுலபமான பணியே இம்முறை!

And சற்றே நிதானித்துப் பார்த்தால் – மாமூலான எனது ரிஸ்க் எடுக்கிற ரஸ்க் சமாச்சாரங்கள் இந்த அட்டவணையினில் மருந்துக்கும் இராதென்பது புரியும்! Of course – FFS-ன் முழுமையுமே புது வரவுகளே எனும் போது அவர்களின் தேர்வுகளின் பின்னணிகள் ரிஸ்க் இல்லாது போகாது தான்! ஆனால் அவை எல்லாமே நவீன யுகத் த்ரில்லர் படைப்புகளே எனும் போது – காலமாய் நாம் ரசித்து வரும் ஆக்ஷன் ஜானரினுள் ஐக்கியமாகிடச் சிரமங்களிராது என்பதே எனது யூகம்! மாறாக – பரீட்சார்த்தக் களங்கள் என்று சொல்லும் விதத்தினில் இந்த அட்டவணையினில் ஏதுமிராது என்பதே நான் அடிக்கோடிட விரும்பிய விஷயம்! இது பலருக்கு “ஷப்பாடி!” என்ற நிம்மதிப் பெருமூச்சையும், சிலருக்கு “ஷ்ஷ்ஷ்” என்ற ஏக்கப் பெருமூச்சையும் வரச்செய்திடும் என்பது புரிகிறது தான்! ஆனால் அடிப்படையில் ‘அண்ணனை எப்போ திண்ணையிலிருந்து கிளப்பலாம்? என்று ஏதேதோ காரணங்களின் பொருட்டு உஷ்ணங்கள் உலா வரும் வேளைதனில், அவர்கள் சுடப் பட்டாணிக் கடலைகளை நாமே வழங்குவானேன்? தவிர, ஒரு மைல்கல் ஆண்டின் பொழுதுகளை இயன்றமட்டுக்கு ஜாலியானதாய் அமைத்துக் கொள்ள – tried & tested ஆக்ஷன் ஜானரையே  பிரதானமாய் பயன்படுத்திக் கொள்வோமே என்று நினைத்தேன்! Of course – ஆன்லைன் புத்தக விழாக்கள் இருக்கவே இருக்கின்றன – ரெகுலர் தடத்திற்குத் தொந்தரவுகள் இன்றி எனது பல்டிகளை முயற்சித்துப் பார்க்க!






















ரைட்டு… இனி வழக்கம் போலவே அந்தக் கேள்வியும் நானே… பதிலும் நானே segment!

1. இரத்தப் படலம் அடுத்த ஆல்பத்தைக் காணலியே?

- புதியது அக்டோபர் 2022ன் இறுதியில் தான் ரிலீசே ஆகிறது! So அது வரும் முன்பாய் நான் அறிவித்து வைத்து, அப்புறமாய் படைப்பாளிகளின் அட்டவணையில் தாமதம் ஏதேனும் நேர்ந்தால், இங்கே போராட்டக்களத்திற்கு ஆர்வமாய் ஆள் சேருவது தொடர்கதையாகிடும்! So அவர்கள் வெளியிடட்டும் முதலில்!

2. மாசமொரு TEX ஏன் இல்லே?

- பொறுமை ப்ளீஸ்… மாதமொரு டெக்ஸை நீங்கள் தரிசிக்காது, போக மாட்டீர்களென்பது எனது உத்தரவாதம்! எப்படி – எவ்விதம் என்ற பாடுகளை என்னிடம் விட்டு விடுங்களேன் guys! Have a set of plans in place for that !! உச்சரிக்கும் ஒவ்வொரு வார்த்தையம் வித விதமாய் interpret செய்யப்படும் வேளைகளில், பேச்சைக் குறைப்பதில் தப்பில்லை தானே? So செயலில் பார்த்து விட்டுப் போவோமே ?

3. கார்ட்டூன் அம்புட்டுத் தேனா?

துரதிர்ஷ்ட நிஜம்! தொடரும் காலங்களில் லக்கி; சிக் பில்; ப்ளூகோட்ஸ் & மேக் & ஜாக் என்ற வட்டத்துக்குள் மட்டுமே நீச்சலடித்தாக வேண்டும்! முட்டி, மோதிப் பார்த்து விட்டேன் guys கடந்த 10 ஆண்டுகளில் !! இதற்கு மேல் வலுவில்லை என்னில் !!

4. க்ளாஸிக் நாயகர்கள் யாருமே கிடையாதா?

Smashing 70’s ஒரு கணிசமான கதைக்களஞ்சியமாய் உலா வரவுள்ளது 2022 & 2023-ல்! அங்கே மறுபதிப்புகள் + புதுசு என்று எல்லாமே இருந்திடும் – solid ஆன க்ளாஸிக் நாயகர்களுடன்! ஆகையால் பிரிட்டிஷ் க்ளாஸிக் நாயக உலாவிலிருந்து அமெரிக்கக் க்ளாஸிக் நாயக உலாக்களுக்கு for a change மாறித் தான் பார்ப்போமே?!

5. மாயாவி???

முதல் முத்து காமிக்ஸ் இதழான “இரும்புக்கை மாயாவி” ஆல்பத்தை அதே சைஸில் வெளியிடலாமா? என்று சில காலம் முன்பாகக் கேட்டிருந்த போது செம lukewarm response! யாருமே கண்டுகொண்டதாகவே தெரியவில்லை!

இதுவரையிலும் மறுபதிப்பு கண்டிராத “ஒற்றைக் கண் மர்மம்”; “ப்ளாக்மெயில்”; “பறக்கும் பிசாசு” போலான மாயாவி கதைகளின் ஒரிஜினல்களைப் படைப்பாளிகள் ரெடி செய்து முடிக்கும் வரையிலும் அவற்றை மறுபதிப்பிட வழியில்லை! So மாயாவியைப் பார்க்க வேண்டுமெனில் – ஏற்கனவே மறுபதிப்பு கண்டவற்றுள் இருந்தே தான் நமது தேர்வுகள் இருந்தாக வேண்டும். So அரைத்த மாவையே மேற்கொண்டும் அரைக்க வேண்டாமே?! But ஒரு மைல்கல் தருணத்தினில் மாயாவி வேணுமே....என்று நினைப்பீர்களெனில், முதல் மாயாவி புக்கை ரெடி செய்திட வேணும் தான் ! What say folks ?

6. ஜேம்ஸ் பாண்ட் 2.0???

ஒற்றை டபுள் ஆல்பம்; ரூ.250/- விலையில் என்பதே இவருக்கான திட்டமிடலாக இருக்க முடியும்! ஆனால் நடப்பு அட்டவணையில் இவரை நுழைப்பதாயின் – குறைந்தபட்சம் 3 ரெகுலர் இதழ்களையாவது கழற்றி விட வேண்டி வரும்! ஏற்கனவே இதழ்களின் மொத்த எண்ணிக்கை குறைச்சலாக உள்ள இந்த வேளையில் மேற்கொண்டும் குறைந்திட வேண்டாமே என்று ஜேம்ஸ் கதைகளை கையில் இறுகப் பிடித்துக் கொண்டு காத்துள்ளோம் – 2023-க்கென!

7. உயிரைத் தேடி…???

“உயிரைத் தேடி” கலரில் தயாராகி வருகிறது! தயாரான முதல் தருணத்தில் மொட்டை மாடியில் ஒரு புக் ஃபேர் போட்டுத் தாக்கிடலாம்! Again 2022-ன் agenda-வில் தவறாது இடம்பிடித்திடும்!

8. ஜம்போ சீஸன் 5??

அநேகமாய் Smashing 70’s நிறைவுறும் வரையிலும் ஜம்போவின் அடுத்த சீஸன் on hold இருந்திட வேண்டி வரும்! பணியாற்றவும் சரி; படிக்கவும் சரி; செலவிடவும் சரி 2022-ன் அறிவிப்புகளே தேவைக்கதிகம் என்ற எண்ணம் எனக்கு!

9. சந்தாப் பிரிவுகள்?

- எப்போதும் போலவே ஒரு `all-in` சந்தா!

- டெக்ஸ் இல்லாததொரு சந்தா!

என 2 பிரிவுகள் இருந்திடும்! இது தவிர-

“இல்லே… எனக்கு இதெல்லாம் சுகப்படாது; இஷ்டப்பட்டதை மட்டுமே நான் வாங்கிக்கணும்!” என்பது உங்களின் ஆசையா? பிரச்சனையே இல்லை தான்; ரூ.3000/- அனுப்பி வையுங்கள் – உங்கள் கணக்கில் வரவு செய்து, சந்தா  நம்பர் ஒன்றையும் தந்து விடுவார்கள்! அந்தந்த மாதங்களில் நீங்கள் சாவகாசமாய் ஃபோன் செய்து “இது வேணும்; இது வேணாம்!” என்று சொன்னால் போதும்; புக்ஸ் அதற்கேற்ப அனுப்பிடப்படும்! உங்கள் கணக்கிலும் புக் கிரயங்கள் + கூரியர் கட்டணங்கள் கழிக்கப்பட்டு மீதத் தொகை முன்எடுத்துச் செல்லப்படும்! So “பிடிக்காததைத் தலையிலே கட்டிப்புட்டானுங்க” என விசனங்களுக்கு அவசியங்கள் இராது!

என்ன ஒரே கண்டிஷன் – ரெகுலர் டெஸ்பாட்ச் தினத்தன்றே இதனையும் செய்திடல் சாத்தியமாகிடாது! அது நிறைவுற்ற மறுநாளில் இந்தச் சந்தா கையில் எடுக்கப்படும்!

10.சீனியர் எடிட்டர் ???

"அந்தியும் அழகே.." என்று புத்தாண்டின் 12 மாதங்களுக்கும் சீனியர் எடிட்டர் தனது நினைவுகளைத் தட்டித் தர முயற்சிக்கவுள்ளார் - விலையில்லா சிறு இதழினில் ! 

ரைட்டு… இதற்கு மேலும் எழுதிக் கொண்டே போனால், டைப்படிப்பவர் சட்டையைக் கிழிப்பதும், வாசிப்போர் பாயைப் பிராண்டுவதும் நிகழக்கூடுமென்பதால் இங்கே ‘சுபம்‘ போட்டு விட்டுக் கிளம்புகிறேன்!

Of course – தொடரும் பொழுதுகளில் இந்த அட்டவணையின் நிறை + குறைகள் Surf எக்செல் போட்டு அலசிடப்படும் என்பதில் ஐயங்களில்லை எனக்கு! பார்வைக் கோணங்களுக்கேற்ப அவை ஏற்படுத்தக் கூடிய தாக்கமும் மாறுபட்டிடும் என்பதும் புரிகிறது! So உங்களின் take எதுவாகயிருப்பினும் – உஷ்ணமின்றிப் பதிவிடுங்களேன் guys!

And “எண்ணிக்கை ரொம்பக் குறைச்சல்; ஏமாந்து போனேன்!” என்ற ரீதியிலான பதிவுகள் வேணாமே ப்ளீஸ்? காத்திருப்பது கலரில் 2000+ பக்கங்கள் + black & white-ல் 2000+ பக்கங்கள் எனும் போது, மாதந்தோறும் சராசரியாய் 333 பக்கங்கள் காத்துள்ளன – உங்கள் வாசிப்புக்கென! அவற்றோடு ஜம்போ சீசன் 4 -ல் எஞ்சியுள்ள இதழ்கள் ; Smashing 70`s இதழ்கள்; திடீர் திடீரென்றான புக்ஃபேர் இதழ்கள் என்பனவற்றையும் சேர்த்துக் கொண்டால் இன்னமும் எண்ணிக்கை எகிறும்! இம்முறை புத்தக எண்ணிக்கை குறைவென்றாலும் பெரிய புக்ஸ்; குண்டு புக்ஸ் கணிசமோ கணிசம்! So ஆண்டவன் அருளோடு அடுத்த பயணத்துக்கு ரெடியாகிக் கொள்வோமா folks?

And before I sign out, எலியப்பா பற்றி !! இதோ - நீங்களே பார்த்துக் கொள்ளுங்களேன் !! 

Bye all! See you around!! And thanks for reading this !! 

சந்தாக்களின் ஆன்லைன் லிஸ்டிங்களும் போட்டாச்சு : 



And புறப்படும் முன்பாய் இதோ :