Powered By Blogger

Sunday, March 29, 2015

இன்னொரு ஞாயிறு...இன்னுமொரு பதிவு...மீண்டும் மூர்த்திகள் !

நண்பர்களே,

வணக்கம். இது மும்மூர்த்திகளில் இருவர் எழுந்தருளும் நேரம் ! "மாயாவி ; லாரன்ஸ்-டேவிட் ; ஜானி நீரோ என்று அந்தப் பெயர்களைக் கேட்டாலே இன்னமும் எனக்கு சிலிர்த்துப் போகும் ; நான் தாட்டியமாய் இருக்கும் போதே அந்த மறுபதிப்புகளை போட்டு முடிச்சிடுங்க - ப்ளீஸ் !" என்றவாறு இந்தாண்டின் சென்னைப் புத்தகவிழாவின் போது என் முன்னே புன்சிரிப்போடு  நின்ற முதியவரை மட்டுமன்றி, இது போன்ற "மும்மூர்த்தி வாஞ்சை" செண்டிமெண்ட்களை ஏராளமான முறைகள் என்னிடம் பகிர்ந்துள்ள அத்தனை vintage ரசிகர்களையும் இந்த நேரத்தில் நினைத்துப் பார்க்கத் தோன்றுகிறது ! இது பற்றி நாம் ஓராயிரம்   முறைகள் பேசி விட்டோம் ; விவாதித்து விட்டோம் ; வியந்து விட்டோம் ; சிரித்து உருண்டும் விட்டோம் தான் ; ஆனால் இன்னமும் இந்த மறுபதிப்பின் வேளைகளில் நிகழுமந்த விற்பனை மாயாஜாலத்தை விவரிக்க வார்த்தைகள் கிடையாது ! "ஏப்ரலின் வெளியீடுகளுள் மறுபதிப்புகளும் உண்டா ? அப்படியானால் ஒவ்வொன்றிலும் 25 கூடுதலாய்ப் போடுங்களேன் !" என்று  2 நாட்களுக்கு முன்பு கூட, கோவையின் ஒரு பிரதான புத்தக நிலையத்தின் உரிமையாளர் கோரியது போல் ஆங்காங்கே தவறாது நிகழ்வதுண்டு - "மாயாவி" என்ற பெயரைக் கேட்ட மறுகணம் !  

"புதுயுகக் கதைகள் ; மாறுபட்ட ரசனைகள்" என்றெல்லாம் தொண்டை நரம்பு புடைக்க நான் ஒரு பக்கம் சவுண்ட் விட்டுத் திரிய.."அது கிடக்கு அரை லூசு !" என்ற பாணியில் நமது இந்தப் புராதனச் சின்னங்களை இன்னமும் ரசிக்கும் அணி அநேகம் ! பால்ய நினைவூட்டல்களாய்ப் பார்த்தாலும் சரி ; குழப்படியற்ற சிம்பிளான கதைகளென்று பார்த்தாலும் சரி - இந்தக் கதைகள் உலகின் எந்தவொரு மொழியிலும் பெற்றிருக்காத வரவேற்பை நாம் யுகங்களாய்  நல்கி வருவது நிஜம் ! இங்கிலாந்தில் வெளியான இந்தக் கதைகள் பின்னாட்களில் இத்தாலிய மொழியில் ; பிரெஞ்சில் ; ஸ்பானிஷில் கூட வெளிவந்துள்ளன ! In fact - சமீபமாய் போனெல்லி அலுவலகத்தில் மர்ம மனிதன் மார்டினின் கதாசிரியரோடு பேசிக் கொண்டிருக்கும் போது - "நீங்கள் ஸ்பைடர் கதைகளையும் வெளியிட்டுள்ளீர்கள் தானே ?" என்று அவர் கேட்டார் !  எனக்கு நிஜமான ஆச்சர்யம் - இரண்டு காரணங்களின் பொருட்டு : முதல் ஆச்சர்யம் - "ஸ்பைடர்" என்றதொரு 1960's பிரிட்டிஷ் ஹீரோவை கூட   இவர் தெரிந்து வைத்திருக்கிறாரே என்று ; இரண்டாவது - நமது இதர வெளியீடுகளின் விபரங்களையும் மனுஷன் இத்தனை நுணுக்கமாய் கவனித்து வந்துள்ளாரே என்று ! அப்புறம் தான் தெரிந்தது 1970-களின் ஏதோ ஒரு தருணத்தில் இத்தாலியின் ஒரிஜினல் கூர்மண்டையரோடு சில காலத்துக்கு நம்மாள் போட்டி போட்டிருக்கிறார் என்று ! 

அதே போல ஸ்பானிஷ் மொழியிலும் மாயாவியின் பிரபல கதைகள் சகலம் + ஸ்பைடரின் சாகசங்களின் பெரும் பகுதி + லாரன்ஸ்-டேவிட்டின் சாகஸங்களென ஒரு முழு சுற்று வெளிவந்துள்ளன ! சொல்லப் போனால் இம்மாத லாரன்ஸ் - டேவிட் மறுபதிப்பான FLIGHT 731-க்கு நாம் அட்டைப்பட தோசை சுட்டிருப்பது ஸ்பானிஷ் மாவின் புண்ணியத்திலேயே! சமீபமாய் நமது புது இதழ்களுக்கான ராப்பர்கள் ஒரிஜினல்களைத் தழுவியே அமைத்து வருவதால் அதற்கென பெரியதொரு மெனக்கெடலுக்கு அவசியம் நேர்வதில்லை ! ஆனால் இந்த மறுபதிப்புகளின் விஷயத்தில் மட்டுமே சிக்கல்கள் அட்டைப்பட வடிவங்களில் எழுகின்றன ! ஒரிஜினல் டிஜிட்டல் பைல்கள் படைப்பாளிகளிடமே இல்லையெனும் போது - அட்டைப்படங்களுக்காக நாமிங்கே மொக்கை போடுவது வாடிக்கையாகி வருகிறது ! அந்நாட்களில் ப்ளீட்வே உருவாக்கியிருந்த அட்டைப்பட டிசைன்கள் அழகாய் இருப்பினும் அவற்றை நிறைய முறை நாம் பார்த்தாகி விட்டோமென்பதால் அவற்றினருகே செல்லும் அவசியங்களை சற்றே குறைத்திட நினைக்கிறோம். So இதர மொழிகளில் நம் மும்மூர்த்திகளின் உலாக்கள் நம் கவனத்தை அவ்வப்போது ஈர்ப்பது வாடிக்கையாகியுள்ளது இப்போது ! 

இதோ - அந்த ஸ்பானிஷ் அட்டைப்பட டிசைன் ; அதன் பின்னே ப்ளீட்வேயின் ஒரிஜினல் டிசைன் + நமது கூட்டணித் தயாரிப்பு ! தமிழில் நாம் அன்றைய நாட்களில் வெளியிட்ட FLIGHT 731-ன் அட்டைப்பட ஜாடையும் லேசாக இருந்திடும் பொருட்டு கொஞ்சம் பட்டி-டிங்கரிங் செய்துள்ளோம் ! இறுதி வடிவில் லாரன்ஸ் ஏதோ பரத அபிநயம் பிடிப்பது போல் தோற்றம் தந்தாலும் வழக்கமான துப்பாக்கி-கத்தி-கப்படா பாணியிலிருந்து இதுவொரு சின்ன மாற்றமாய் இருந்துவிட்டுப் போகட்டுமே என்று நினைத்தேன் ! May 1967-ல் ஒரிஜினலாய் உருவாக்கப்பட்ட இந்த லாரன்ஸ்-டேவிட் சாகசம் தான் தமிழுக்கு இந்த நாயகர்களை அறிமுகம் செய்து வைத்த கதை ! அன்றைய நாட்களில் இந்தக் கதைகள் ஏற்படுத்திய தாக்கம் well chronicled என்பதால் நான் என் பங்குக்கு அதனுள் தலைவிடப் போவதில்லை ! 



இந்தத் தொடர்கள் வெளியானது இங்கிலாந்தில் தான் எனினும் அவற்றின் படைப்பாளிகள் பெரும்பாலும் இத்தாலியர்களாகவோ, ஸ்பெயின் நாட்டவராகவோ தான் இருந்துள்ளனர் ! FLIGHT 731 கதைக்கு சித்திரம் போட்டவர் ரபேல் லோபெஸ் என்ற இந்த ஸ்பெயின் நாட்டு ஜாம்பவான் தான் ! 

இவர் பணியாற்றியுள்ள கதைகள் / தொடர்கள் பற்றிய பட்டியலைப் போட இங்கே இடம் பற்றாது - மனுஷன் அப்படியொரு பிரம்மிக்கச் செய்யும் எண்ணிக்கையிலான கதைகளை உருவாக்கியுள்ளார் ! லா-டே ஜோடியின் கதைகளில் மட்டும் 7 இவரது கைவண்ணம் ! 

1.தலை கேட்ட தங்கப் புதையல்
2.காற்றில் கரைந்த கப்பல்கள்.
3.பார்முலா X -13
4.FLIGHT 731
5.விண்ணில் மறைந்த விமானங்கள்
6.மஞ்சள் பூ மர்மம்
7.CID லாரன்ஸ்

இவை தவிர, இரும்புக்கை மாயாவி & ஸ்பைடர் - கதைகளுக்கும் நிறைய சித்திரங்கள் போட்டுள்ளார் ! கணினிகள் இலா அந்நாட்களிலேயே இத்தனை அதகளம் செய்த பெருமைக்குச் சொந்தக்காரர் ! 

தொடர்வது நமது ஆஸ்தான மாயாவியாரின் மறுபதிப்பு - "கொள்ளைக்கார மாயாவி" - for the umpteenth time ! இந்த இதழ் தமிழில் வெளியான நாட்களில் எனக்கு ரொம்பவே பிடித்திருந்ததொரு கதை ! கிளைமாக்சில் வில்லனைத் துரத்திச் செல்லும் மாயாவியின் நெஞ்சில் வந்து விழும் சம்மட்டி அடி ; அண்டங்காகம் சுமந்துவரும் அந்த விசித்திர ஆயுதம் ; நிழல்படைத் தலைவரை மூக்கோடு சேர்த்துக் குத்தும் sequence என்று மனதில் 'பச்சக்' என பதிந்து போன விஷயங்கள் ஏராளம் ! இன்று திரும்பவும் படிக்கும் போது கண்ணில்பட்டவை பெரும்பாலும் கதையின் லாஜிக் ஓட்டைகளும், மொழியாக்கத்தின் அன்றைய vintage பாணியுமே ! கதையைச் செப்பனிட இயலாதெனும் போது - மொழிநடையை சிறிதேனும் சீர் செய்திடவாவது முயற்சிப்போமே என்று ஆங்காங்கே கொஞ்சமாய் கை வைத்துள்ளேன் ! ஓரளவுக்குப் பற்கள் ஆட்டம் காணாது இப்போது கதையைப் படிக்க முடிந்திட்டால் - செலவிட்ட நேரம் உருப்படியானது என்றாகும் ! இனி வரும் நாட்களிலும் இது போல் (அவசியப்படும்) மாற்றங்களை மட்டும் செய்திடவுள்ளோம் - அதற்கான அவகாசம் கிடைக்குமென்ற நம்பிக்கையில் !

இதற்கான அட்டைப்படம் - ஒரிஜினல் டிசைனின் உபயமே - முன்னட்டைக்கு ! பின்னட்டையுமே கூட ஒரு ஸ்பானிஷ் நாட்டு ஓவியரின் கைவண்ணத்தின் தழுவல் - நமது பின்னணி வர்ணச் சேர்க்கைகளோடு ! "பார்க்கப்..பார்க்கப் பிடிக்கும் ரகம் " என்ற நம்பிக்கையோடு இந்த டிசைனை இரும்புக்கையாரின் இம்மாத இதழுக்கு ராப்பராக்குகிறோம் !  Genuinely curious to know how you find them !  



செப்டெம்பர் 1967-ல் உருவான இந்தக் கதைக்கு இன்றைய வயது 48 !! Still going strong !! உலகத்திலேயே இவை தற்போது லைவ்வாக வெளியாவது நமது தமிழில் மட்டுமே என்ற விதத்தில் நாம் பெருமைப்பட்டுக் கொள்வதா ? அல்லது (காமிக்ஸ்) உலகமே எங்கெங்கோ சவாரி செய்து கொண்டிருக்கும் வேளையில் கூட - புறப்பட்ட இடத்திலிருக்கும் மரங்களைச் சுற்றிய டூயட் காதலர்களாய் இன்னமும் நம்மைப் பார்த்துக் கொள்வதா ? - விடையறியாக் கேள்வியே ! 

இதோ நம்மில் பலருக்கு காமிக்ஸின் மறு சொல்லாகிப் போய் விட்ட மாயாவியாரின் முக்கிய படைப்பாளிகள்   : 
Jesus Blasco
Tom Tully
கதாசிரியர் டாம் டல்லி ஸ்காட்லாந்து நாட்டைச் சார்ந்தவர் ! ஓவியர் ஜீசஸ் ப்ளாஸ்கோ ஸ்பெயினைத் தாயகமாகக் கொண்டவர்! "கொள்ளைக்கார  மாயாவியின்"  சித்திரங்களைப்  போட்டவர்  ஜீசஸ்  ப்ளாஸ்கோ இல்லையெனினும் கூட, அந்நாட்களில் இதர மாயாவி ஓவியர்களின் முன்மாதிரியே ப்ளாஸ்கோவின் பாணி தான் ! அந்நாட்களில் இங்கிலாந்தில் ஓவியர்களுக்குப் பஞ்சம் இருந்ததில்லை தான் ; ஆயினும் இந்தக் கதைவரிசைகளை அயல்நாட்டு ஓவியர்களிடம் ஒப்படைத்ததன் பின்னணி சிக்கன நடவடிக்கைகளே ! இங்கிலாந்தில் ஆகும் செலவுகளை விட, இத்தாலி ; ஸ்பெயின் போன்ற இடங்களில் இவற்றைத் தயாரித்து வாங்குவது பணம் மிச்சம் செய்திடவொரு முக்கிய வழியாக அமைந்திருந்தது ! சொல்லப் போனால் இந்தக் கதைகள் சகலத்தையும் அச்சிட்டதும் கூட இத்தாலியில் தான் ! Outsourcing சமீபத்திய நடைமுறையல்ல என்பது தெளிவு ! 

'ரமணா' பாணியில் சிக்கிய புள்ளிவிபரங்களை அள்ளித் தெளிப்பதொடு இந்த மறுபதிப்புகளில் எனது கடமை முடிந்து போகிறது ! மேலோட்டமாய்ப் புரட்டிப் பார்த்து விட்டு, மலரும் நினைவுகளுக்குள் மூழ்கியான பின்னே இதழ்களைப் பத்திரமாக உள்ளே வைத்துப் பூட்டி விடாது - please do give them a read ! உங்கள் வீட்டிலுள்ள இளம் வாசகர்களுக்கும் கூட இவை ஒரு சுலபமான துவக்கப் புள்ளியாக இருந்திடலாம் என்பதால் அவர்களுக்கும் படிக்கக் கொடுத்துப் பாருங்களேன் - ப்ளீஸ் ?! "காமிக்ஸ் சேகரிப்பு" என்பது ஒரு சுகமான ஹாபி தான் ; ஆனால் வாசிப்புக்கும் அதனில் ஒரு வாய்ப்பின்றிப் போகும் பட்சத்தில் வெறும் சேகரிப்புகள் மட்டுமே நெடு நாள் ஓடாதே ! 

புராதனங்களுக்குப் புத்துயிர் ஊட்டும் பணிகள் ஒரு பக்கம் கறுப்பு-வெள்ளை அச்சோடு நிறைவுபெற்றிருக்க, மறு பக்கமோ வண்ணச் சூறாவளிகளில் தளபதியும், கோமானும் நம்மை பிசியாக ஆழ்த்தி வருகின்றனர் ! "மின்னும் மரணம் " அச்சுப் பணிகள் 70% ஐத் தாண்டி விட்ட நிலையில் - லார்கோவின் பிரிண்டிங் குறுக்கே புகுந்துள்ளது ! வரும் வார இறுதிக்குள் அத்தனையையும் முடித்து விட்டு பைண்டிங் படையெடுப்பில் மூழ்கிடுவதே இப்போதைய அட்டவணை ! அடுத்த சனிக்கிழமை துவக்கம்  எங்கள் ஊரின் கோவில் திருவிழாவின் பொருட்டு புதன்கிழமை வரையிலும் விடுமுறை எனும் போது - மின்னும் மரணம் மெகா இதழினை ஏப்ரல் 19-க்குத் தயார் செய்திட ராட்சஸ முயற்சிகள் அவசியமென்பது இப்போதே புரிகிறது ! எங்களது பைண்டரின் நிலையை நினைத்தால் இப்போதே எனக்குப் பாவமாய் உள்ளது - நம்மவர்கள் தற்காலிகமாய் அவர் ஆபீசில் தான் குடித்தனமே செய்யப் போகிறார்கள் என்பது உறுதி !  இதில் தளபதியின் போஸ்டர் வேறு தயார் செய்தாகணும் - phew !!!  

Moving on, நமது தலையின் 330 + 220 + 110 பக்கக் கதைகளின் தொகுப்பான லயன் 250-வது இதழின் பணிகளும் இன்னொரு தடத்தில் தடதடத்து வருகின்றன ! இரண்டு கதைகள் கிட்டத்தட்ட 70% முடிவடையும் நிலையில் -துரதிஷ்டவசமாய் டெக்ஸ் கதைகளை மொழிபெயர்க்கும் இல்லத்தரசிக்கு சின்னதொரு விபத்தில் எலும்பு முறிவு நேர்ந்து ; அறுவை சிகிச்சைக்கும் அவசியமாகிப் போய் விட்டது ! நான் கைகளைப் பிசைந்த வண்ணம் இருந்த நிலையில் 15 நாட்கள் ஓய்வுக்குப் பின்னே கடமையுணர்வோடு சிரமப்பட்டேனும் தன பங்குப் பணிகளைப் பூர்த்தி செய்து அவர் ஒப்படைத்து விட்டதில் பூரித்துப் போய் விட்டோம் !! பணம் என்பதையெல்லாம் தாண்டி ஒருவித அர்ப்பணிப்பு இல்லையெனில் இது போன்ற செயல்வேகம் சாத்தியமே ஆகாது ! தலைவணங்குகிறோம் ! 

நேற்றுத் தான் 2015-ன் அட்டவணையும், திட்டமிடல்களும் துவங்கியது போலான உணர்வு தலைக்குள் இன்னமும் தேங்கிக் கிடக்க, வருடத்தின் முதல் 5 மாத இதழ்களின் பணிகள் நெருக்கி முடியும் தருணம் புலர்ந்து விட்டதும் புரிகிறது ! வழக்கமாய் ஆகஸ்டிலேயே மறு ஆண்டுக்கான யோசனைகளை ஆரம்பித்து வந்துள்ளேன் - கடந்த 2 வருஷங்களாய் ! அப்படிப் பார்க்கையில் இன்னமும் மூன்றே மாதங்களில் THE YEAR NEXT பற்றிய தீவிர பரிசீலனை துவங்கிடும் நேரமும் வந்து விடும் ! இம்முறை எனது வேலைகளை சுலபமாக்க அதிர்ஷ்டவசமாக ஒரு புதுப் பதிப்பகத்தின் பரிச்சயம் நமக்குக் கிட்டியுள்ளது ! 'எதைப் போட..? எதை வேண்டாமென்று சொல்ல ? ' என்று விழி பிதுங்கும் விதமுள்ளது அவர்களது படைப்புகள் ஒவ்வொன்றும் ! நமது தற்போதைய இதழ்கள் அத்தனையையும் பார்த்து விட்டு ரொம்பவே குஷியாகிய நிலையில் - உரிமைகளைத் தர சம்மதம் சொல்லியுள்ளனர் ! மின்னும் மரணம் தயாரிப்புப் பணிகள் நிறைவு பெற்றான பின்னே, கொஞ்சம் மூச்சு விட்டுக் கொண்டு, அவர்களை நேரில் சந்திப்பதாக திட்டம் ! So 2016-ல் நிறையவே அதிரடிகள் காத்துள்ளன folks ! அதற்குள் நமது விற்பனை எண்ணிக்கை கொஞ்சமே கொஞ்சமாய் புஷ்டியாகிடும் பட்சத்தில், அவர்கள் கோரும் ராயல்டிகளை செலுத்திட - முரட்டு அந்தர்பல்டிகளுக்கோ ; திரும்பவும் கடன் கோரி வங்கியின் கதவைத் தட்டுதலோ அவசியமாகாது போகலாம் ! நம்பிக்கையோடு முயற்சிகளை செய்து வருகிறோம் ! 

அடுத்த மாதம் முதல் ரேடியோ விளம்பரங்களை ஒவ்வொரு மாதத்து முதல் வாரங்களிலும் செய்வதாக உள்ளோம். தற்போதைக்கு சென்னை ; கோவை ; சேலம் ஆகிய மூன்று நகரங்களில் கவனம் செலுத்த உள்ளோம் ; இந்தப் பகுதிகளில் நல்ல reach உள்ள சேனல்கள் எவை ? என்பது பற்றிக் கொஞ்சம் சொல்லுங்களேன் guys ?

சரி ...இப்போதைக்கு நான் புறப்படும் வழியைப் பார்க்கிறேன்..! 'யார் ஜெயிச்சால் நமக்கென்ன ?" என்ற மோன நிலையில் ஞாயிறின் பகல்  பொழுதை பைனல்ஸ் பார்ப்பதில் செலவிட்டு விட்டு, அடுத்து காத்திருக்கும் பௌன்சரின் "கறுப்பு விதவை"யின் மொழிபெயர்ப்பில் செலவிடுவதாக உள்ளேன் ! See you around soon ! Bye for now ! 

P.S : ஏப்ரல் துவக்கத்தின் இதழ்கள் மூன்றும் (லார்கோ + மாயாவி + லாரன்ஸ்) ஏப்ரல் மூன்றாம் தேதி இங்கிருந்து புறப்படும் !  

Tuesday, March 24, 2015

இது கவிதை நேரம்..!

நண்பர்களே,

வணக்கம். ஒரு அவசர வேண்டுகோள்  : "மின்னும் மரணம்" தொகுப்பினில் ஒரே ஒரு பக்கம் காலியுள்ளது ! அதனில் நம் தளபதியைப் பற்றி குட்டிக் குட்டியாக ஹைக்கூ கவிதைகள் சிலவற்றைப் போட்டாலென்னவென்று     தோன்றியது ! So உங்களுள் உறையும் அந்த வைரமுத்துக்களையும், நா.முத்துகுமார்களையும் தட்டி எழுப்புங்களேன் ? ஆறு வரிகளுக்கு மிகாமல். அழகாய் நம் தளபதியாரைப் பற்றிய கவிதைகளாக எழுதி அனுப்பிடலாம் ! சீரியஸ் கவிதைகள் ; ஜாலியான கவிதைகள் - எல்லாமே welcome !

இந்த வேண்டுகோளை கடந்த பதிவின் பின்பகுதியினில்  இணைத்திட்டால்  நிறைய நண்பர்களின் கண்களில் படாமலே போகக் கூடுமென்பதால் இதற்கொரு தனிப்பதிவு status தந்துள்ளேன் ! உங்கள் கவிதை அருவிகளை இங்கேயே ஆறாய் ஓடச் செய்யுங்களேன் - அதனில் எல்லோரும் மூழ்கி களித்திடுவோமே ?! 

இது தவிர, இதழோடு நாம் தரும் அந்த வழக்கமான book-mark -ஐ நீங்களே பிரத்தியேகமாய் டிசைன் செய்திடும் வாய்ப்பும் உள்ளது ! நீங்கள் டிசைன் செய்திடும் அழகான ஆக்கத்தினை உங்களின் பெயரோடு சேர்த்து அச்சிடுவதாக உள்ளோம் !  இதுவுமே டைகரின் உருவமோ / செய்தியோ தாங்கியதாகவே இருத்தல் அவசியம் ! So why not get cracking ?

Sunday, March 22, 2015

ஒரு கோமானும்...ஒரு மர்ம மனிதனும்...!

நண்பர்களே,

வணக்கம். ஏப்ரலின் அட்டவணையில் ஒரு குட்டியான / ஜாலியான மாற்றமென்ற சேதியோடு இந்த வாரத்துப் பதிவுக்குப் பிள்ளையார் சுழி போடுகிறேனே..! (ஏற்கனவே அறிவித்திருந்த) நமது புது அறிமுகத்தின் "விண்ணில் ஒரு வேங்கை" மே மாதத்துக்கு இடம் மாறிட, நம் கோடீஸ்வரர் திடும் பிரவேசம் செய்கிறார் - "டாலர் ராஜ்யம்" வாயிலாக ! ஏப்ரலில் "மின்னும் மரணம்" பணிகள் நம்மை நிறையவே பிசியாக வைத்திருக்கும் தருணத்தில் லார்கோவையும் உள்ளே இழுத்துப் போட்டுக் கொண்டால் பளு கூடிடுமே என்ற எண்ணத்தில் மிஸ்டர். கோமானை ஒரு மாதம் கழித்தே களமிறக்கிடத் திட்டமிட்டிருந்தேன் ஒரிஜினலாய் ! ஆனால் 56 பக்கங்களினான "வி.வே."யோடும் ; 2 மறுபதிப்புகளோடும் ஏப்ரலின் துவக்கக் கோட்டாவை முடித்திட மனது கேட்கவில்லை ! (மறுபதிப்புகளை மெய்யாகவே, முழுசுமாய்ப் படிக்கும் நண்பர்களின் சதவிகிதம் என்னவாக இருக்குமென்ற ஒரு curiosity எனக்குள் !) எல்லாவற்றிற்கும் மேலாக -லார்கோவின் இந்த அதிர்வேட்டு சாகசத்தின் வேகம் அசாத்தியமானது என்பதால் சிரமங்களே தெரியவில்லை பணிகளில் !! So here comes the blue jeans billionaire - with his albums # 13 & 14 !

2004-ல் முதல் பாகமான "கதை சொல்லும் கரென்சி" வெளியாகிட,சரியாக ஓராண்டின் இடைவெளிக்குப் பின்னே இரண்டாம் பாகமான - "டாலர் ராஜ்யம்" வெளிவந்திருந்தது 2005-ல் ! இது போன்ற த்ரில்லர் கதைகளை ஒரு முழு ஆண்டின் break விட்டு வெளியிடும் பதிப்பகங்களின் தைரியங்களும் ; வாசகர்களின் பொறுமைகளும் உண்மையிலேயே நமக்கு அன்னியமாய்த் தோன்றுமொரு விஷயம் ! இதோ - டாலர் ராஜ்யத்தின் அட்டைப்படத்தின் first look :


சமீப நாட்களது பாணியின் தொடர்ச்சியாக ஒரிஜினல் டிசைன்களே இம்முறையும் முன் & பின் அட்டைப்படங்களுக்குப் பயன்படுத்தப்பட்டுள்ளன - சிற்சிறு மாற்றங்களோடு ! லார்கோவின் அந்த வித்தியாசமான முகத்தை நாம் வரைய முற்பட்டால் ரணகளமாகிப் போவதால் 'சிவனே' என்று ஒரிஜினல்களையே உடும்புப் பிடியாகப் பிடித்துக் கொண்டு வருகிறோம் ! Hope it looks o.k! உட்பக்கங்களில் இருந்தும் இதோ குட்டியாய் ஒரு டிரைலர் :


வழக்கமான அக்மார்க் அதிரடிகள் ; வழக்கமான பிசினஸ் சிக்கல்கள் ; பொறிகளுக்குள் மாட்டி விட்டு பின்னே வெளியேறும் வழக்கமான லாவகம் என லார்கோவின் கதைகளின் சகல template களும் இந்த சாகசத்திலும் முழுவீச்சில் உண்டு ! ஆனால் opening sequence தான் கதையின் ஹைலைட்டே ; செம அதிரடியான துவக்கம் ! லார்கோவின் கதைகளில் சுவாரஸ்யத்துக்கு என்றுமே பஞ்சம் கிடையாதென்பதொடு - அவை என்றைக்குமே மொழிபெயர்ப்புக்கு அற்புதமான வாய்ப்புகள் தரும் களங்களாக இருப்பதுண்டு ! இம்முறை கருணையானந்தம் அவர்கள் மொழிபெயர்ப்பின் முதல் படியினை செய்திருக்க, லார்கோ ; சைமன் வசனங்கள் + final touches எனது பேனாவினது ! நம் கோடீஸ்வரரை மீண்டுமொரு ஹிட் நாயகனென்று நிரூபிக்க இந்தக் கதை ஒரு சூப்பர் வாய்ப்பு !

கோமான் to மர்ம மனிதன் - இத்தாலியப் புராணம் தொடர்கிறது - சென்ற வாரம் நான் விட்ட இடத்திலிருந்தே ! போனெல்லி அலுவலகத்தில் டெக்ஸ் கதாசிரியரையும், அவர்களது பணிக்கூடத்தையும் பரக்கப் பரக்க வேடிக்கை பார்த்துக் கொண்டிருந்ததில் நேரம் போனதே தெரியவில்லை ! அட..டெக்ஸ் புதிய இதழ்களின் ராப்பர்களா இவை ? என்றபடிக்கு வாய் பிளப்பது ஒரு பக்கமெனில், டைலன் டாக் ; மார்ட்டின் ; இன்ன பிற போனெல்லி கதாநாயகர்களின் அணிவகுப்பு என திரும்பிய திசையெல்லாம் யாராவது ஒருத்தர் சுவற்றிலிருந்து என்னைப் பார்த்து சிரிப்பதோ - முறைப்பதோ நடந்து கொண்டிருந்தது ! ஒரு பெரிய corporate அலுவலகத்தின் ஜாடையில் இல்லாது போனெல்லியின் ஆபீஸ் ஒரு studio லுக்குடன் வித்தியாசமாக இருப்பதுண்டு ! ஒவ்வொரு அறைக்குள்ளும் ஏதோவொரு நாயகரின் கதைகளுக்கான பணிகள் ; மேஜை நிறைய கதைகளின் ஸ்க்ரிப்ட்டும் ; ஓவிய மாதிரிகளும் என்று குவிந்து கிடப்பதைப் பார்க்க முடிந்தது !

அப்போது உயரமான,கம்பீரமானதொரு வெண்தாடி மனிதர் அங்கு பிரசன்னமாக அவரை அறிமுகம் செய்து வைக்கும் முன்பாகவே அடையாளம் கண்டு கொள்ள முடிந்தது எனக்கு ! மர்மமனிதன் மார்டின் கதைத்தொடரின் படைப்பாளியான ஆல்ப்ரெடொ காஸ்டெல்லி தான் அவர் ! சென்ற முறையே அவரை நான் சந்திக்க வாய்ப்புக் கிட்டயிருந்த போதிலும், 'ஹலோ' சொல்வதைத் தாண்டி ஏதும் பேசிட வாய்ப்பில்லாது போயிருந்தது ! ஆனால் இம்முறையோ என்னை தனது அறைக்குக் கூட்டிச் சென்று ஜாலியாகப் பேசிக் கொண்டிருந்தார் ! அவரது அறைக்குள் வரலாறு சம்பந்தப்பட்ட புத்தகங்களின் சேகரிப்பு ஒரு வண்டி இருப்பதைக் காண முடிந்தது ! மார்ட்டினின் கதைகள் வரலாறு + எதிர்காலமென ஒரு புதுமையான combo-வில் இருப்பதால் அதற்கென ஏராளமாய் பின்னணி research அவசியம் என்பது ஒரு குழந்தைக்குக் கூடத் தெரிந்திருக்கும் தான் ; ஆனால் பரீட்சைக்குப் படிப்பது போல இத்தனை ஆழமாய் அதனுள் படைப்பாளிகள் மூழ்கிடுவதை நேரில் பார்க்கும் போது பிரமிப்பு தாளவில்லை !

"ஹ்ம்ம்ம்... முத்து காமிக்ஸ் !" என்று அழுத்தமாய்ச் சொன்னவர் சமீபத்திய ம.ம.ம.இதழ் ஒன்றை     நீட்டினார்  என்னிடம் ! அவரது முதுகுக்குப் பின்னே தெரிந்த கம்பியூட்டர் திரையில் "சரித்திரத்தைச் சாகடிப்போம் " என தமிழில் முரட்டு எழுத்துக்களோடு ஒரு black & white பக்கம் பிரதானமாக நின்றது !! என்றோ ஒரு சமயத்தில் நாம் வெளியிட்டிருந்த மார்ட்டின் கதையினை ஸ்கேன் செய்து தனது கம்ப்யூட்டரில் அவர் வைத்திருந்ததைப் பார்த்த போது எனக்கு  'ஜில்'லென்று இருந்தது ! இந்தத் தலைப்புக்கு அர்த்தமென்ன? என்ற கேட்ட மனுஷனுக்கு என்னமோ ஒரு விளக்கம் சொல்லி வைத்தேன் ! "எனக்கு அந்தத் தடியான புக்கில் இன்னும் இரண்டு வேண்டுமே..!!" என்று அவர் கோரிக்கை ஒன்றை முன்வைத்த போதே அவர் நமது LMS பற்றித் தான் பேசுகிறார் என்பதைப் புரிந்து கொள்ள முடிந்தது ! அதனில் வந்திருந்த "கட்டத்துக்குள் வட்டம்" கதை அவரது favorites களுள் ஒன்று என்றும் ; LMS -ல் அதனைப் பார்த்த போது மிகுந்த சந்தோஷம் கொண்டதாகவும் சொன்ன போது எனக்குத் தலை கால் புரியவில்லை ! 

தமிழில் மார்டினுக்குள்ள வரவேற்பு பற்றியும், அந்தக் கதையின் தன்மை காரணமாய் அது டெக்ஸ் போன்ற bestsellers உடன் போட்டி போடுவது சாத்தியமாகாது தான் என்றும் அவரே சொன்ன போது அவரது யதார்த்தம் புரிந்தது / பிடித்தது ! 1982-ல் மார்ட்டின் கதைகளைத் தொடங்கியவர் இன்னமும் இதற்கென இத்தாலிய மொழியிலொரு தீவிர வாசக வட்டமிருப்பதை இயல்பாய்ச் சொன்னார் ! நாம் இதுவரை ம.ம.ம. கதைகளை அளவாகவே பயன்படுத்தி வந்திருப்பதால் ஆழமான "மார்ட்டின் ஞானம்" எனக்கிருக்கவில்லை எனும் போது பொதுவாகவே பேசிக் கொண்டிருந்தேன் ! அடுத்த மாதம் மார்ட்டினின் சாகசம் வெளியாகவிருப்பதால் அது பக்கமாய்ப் பேச்சு திரும்பியது ! கனவின் குழந்தைகள் + பிரபஞ்சப் பயணிகள் என 2 பாகக் கதையிது ; இதற்கென நமக்கு வந்திருந்த CD க்கும், ஒரிஜினல் இதழுக்குமிடையே முதல் சில பக்கங்களில் வேற்றுமை இருப்பதைக் குறிப்பிட்டு கேள்வி எழுப்பினேன் ! பல்லாயிரக்கணக்கான பக்கங்களை உருவாக்கிய மனுஷனுக்கு ஒவ்வொரு கதையும் துல்லியமாய் நினைவில் நிற்கும் போல ; உடனே டிஜிடல் பைல்களின் நிர்வாகியை வரவழைத்து ஏதோ சொல்லிட, சற்றைக்கெல்லாம் ஒரு பச்சை நிற தடிமனான ஆல்பமும், ஒரு மெலிதான மார்ட்டின் இதழும் அங்கே வந்து சேர்த்தன ! ஒரிஜினலாய் இந்தக் கதையினை மாதந்திர வெளியீடாகத் தயாரித்த சமயம் முதல் 10 பக்கங்களை வேறொரு விததமாய் உருவாக்கி இருந்ததாகவும், பின்னாட்களில் அதனை ஒரு தொகுப்பாய் வெளியிட்ட வேளைதனில் சில மாற்றங்களைச் செய்ததாகவும் விளக்கினார் ! So மாற்றங்களால் கதை துளியும் மாறிடாது என்றும் புரியச் செய்தார் ! கம்பியூட்டராவது - கத்திரிக்காயாவது - ஒரு கைதேர்ந்த ஆற்றலாளரின் நினைவாற்றலின் முன்னே இயந்திரங்கள் பிச்சை தான் எடுக்க வேண்டுமென்று தோன்றியது ! ஜெர்மனியில் ; அமெரிக்காவில் ; துருக்கியில் ; செர்பியாவில் ; குரோவேஷியாவில் என வெளியாகியிருக்கும் மார்டினை ஆசியத் துணைக்கண்டத்தில் வெளியிடும் ஒரே பதிப்பகம் நாமே என்பதை அவர் matter of fact சொன்ன போது இல்லாத காலரைத் தூக்கி விட்டுக் கொள்ளத் தோன்றியது ! மாறுபட்ட ரசனைகளுக்கும் ஸ்வாகதம் சொல்லும் எங்கள் வாசகர்களுக்கொரு பேட்டி தர  இயலுமா என்று நான் கேட்ட போது - of course !!" என்று சொல்லி தனது மின்னஞ்சல் முகவரியைத் தந்தார் ! So அவரிடம் கேட்க உங்களுக்குக் கேள்விகளிருப்பின் - please do mail me ! 




தமக்கையின் இல்லத்திலொரு விசேஷம் என்பதால் ஞாயிறு காலையில் சீக்கிரமே கிளம்ப வேண்டியுள்ளதால் இவ்வாரத்துப் பதிவை இதற்கு மேல் நீட்டிட அவகாசமில்லை ! So இத்தாலியப் புராணத்தையும், இவ்வாரத்துப் பதிவையும் நிறைவு செய்வதற்கு முன்பாய் குட்டியாய் சில துணுக்குச் சேதிகள் : 

  • டெக்சின் ஒவ்வொரு புது இதழும் 190,000 இதழ்கள் விற்பனை காண்கின்றனவாம் - இத்தாலிய மொழியினில் மட்டும் !
  • இத்தாலிக்கு அடுத்தபடியாக பிரேசில் நாட்டில் டெக்சுக்கு வெறித்தனமான ரசிகப் பட்டாளம் உண்டாம் !! 
  • டெக்சின் விற்பனை எண்ணிக்கைகளைப் பின்தொடரும் நாயகர் டைலன் டாக் தானாம் !! 
  • டைலன் டாக் ரசிகர் மன்றம் என 2 தனித்தனிக் குழுக்கள் இத்தாலியில் உள்ளனவாம் ! 
  • நாம் இதுவரை "வீதியெங்கும் உதிரம்" & "நள்ளிரவு நங்கை"  இதழ்களில்  215 பிரதிகள் இத்தாலியில் விற்றுள்ளோம் !! இது நமது சென்னை விற்பனைகளை எட்டிப்பிடிக்கும் எண்ணிக்கை !! 
  • டெக்ஸ் கதை வரிசைகளில் நமக்கொரு குட்டியான சந்தோஷச் சேதி காத்துள்ளது !! Wait n' watch...! 
  • நமது 2013 தீபாவளி மலரில் வெளியான டேவிட் போநெல்லியின் பேட்டி தான் அவரது முதல் பேட்டியாம் !! நிஜமான சந்தோஷத்தொடு அதைச் சொன்னார் டேவிட் ! 
  • "மின்னும் மரணம்" அச்சுப் பணிகள் துவங்கி மூன்று நாட்களாகி விட்டன ! Touch wood - இது வரையிலான வேலைகள் பிரமாதமாக நடந்தேறியுள்ளன ! இன்னுமொரு வாரம் 'தம்' பிடித்து இரவு, பகல் பாராது நமது டீம் உழைப்பை நல்கிட்டால் அட்டகாசம் தான் !! Fingers crossed !!
  • ஒரு விதத்தில் "மின்னும் மரணம்" ஒரு ரெகார்ட் செய்திடவுள்ளது என்று நினைக்கிறேன் ! அது என்னவாக இருக்குமென்ற யூகங்களை உங்களிடம் விட்டு விடுகிறேன் ! இதழ் வெளியாகும் சமயம் அது என்னவென்று சொல்கிறேனே..! 
  • ஏப்ரல் 13-23 தேதிகளுக்குள் நடந்திடும் சென்னை புத்தக சங்கமத்தில் நாம் பங்கேற்கிறோம் !
  • சென்னையில் நிறைய கடைகளை எட்டிப் பிடிக்க முயற்சித்தும் வருகிறோம் ; இம்மாதம் துவக்கம் கீழ்க்கண்ட கடைகள் அனைத்திலும் நமது இதழ்கள் கிடைக்கும் :  

Discovery Book Palace,
No-6,Mahavir complex,First floor,
Munusamy salai,
K.K.Nagar west
Chennai-600078
cell-9940446650,ph no-044 65157525

Park Book House
20/2,EVR Periyar high road,
Near golden cafe,
Peramet,
chennai-3, cell- 94448 96858

Sri Eswar Enterprises
Archana arcade,new no-27,old no-16
Natesan street
T.Nagar
Chennai-600017,cell-98846 68667,
ph no-o44 24345902,24339591

Bella Publishers & Book Sellers
52,Ranganathan street,
T.nagar,
Chennai-17,cell- 94441 01894,ph no-044 24341622,24311644

New Book Lands
52,C,North usman road,Basement,
Near panagal park
Fly over north end,
T.nagar
Chennai-17,
cell- 98402 27776,98402 907776,ph-044 2815 8171,28156006

T.Raja sekar,
M/S.Books Corner,
AB-2,Second avenue,
opp;Spencers dairy building,
Anna nagar
chennai-40,
cell-98415 67467,ph -044 42172388

தொடர்ந்து ஊர் ஊராய் பயணம் மேற்கொண்டு நமது விற்பனை முயற்சிகளை செய்து வருகிறோம் ! ஒன்றுக்குப் பாதி சொதப்பலாகுவதும், வசூல்களுக்கு மல்லுக்கட்டுவதும் ஆங்காங்கே நிறையவே நிகழ்ந்தே வருகிறது என்பதை மறுப்பதற்கில்லை ; ஆனால் 'தம்'கட்டிக் கொண்டு ஆனமட்டிலும் முயற்சித்து வருகிறோம் - ஆண்டவனும், காமிக்ஸ் ரசிகர்களும் நம்மைக் கரை சேர்ப்பார்கள் என்ற நம்பிக்கையோடு ! மீண்டும் அடுத்த வாரம் சந்திப்போம் guys ! Bye for now ! 

Sunday, March 15, 2015

"ஒரு நாயகன்...ஒரு சகாப்தம் ! "



*சின்னதொரு அறைக்குள்ளே இரண்டு பேர் அமர்ந்திருக்கும் காட்சி !

*இடது பக்கமாய், முன் frame -ல் இடம் பிடித்திருப்பது ஒரு 25 வயது இளைஞன். கறுப்பு கோட் ; வெள்ளைக் காலர் ; அடர் சிகப்பு டை என்ற உடுப்புடன் ! கையில் ஒரு பேனாவும், pad -ம் .

*அவனது முகத்தின் வலது பக்கம் மட்டுமே 90 டிக்ரீ கோணத்தில் பார்வைக்கு இருந்தாக வேண்டும். சவரம் செய்யப்பட முகம் ; அடர்த்தியான புருவம் ; படிய வாரப்பட்ட கறுப்புத் தலைமுடி. பார்க்கும் போது ஒரு படித்த பத்திரிகையாளனின் தோரணை அவசியம்.

*அவனுக்கு எதிரே, சுமார் மூன்றடி தூரத்தில் ஒரு சொகுசான சாய்வு  நாற்காலி ; முதுகுக்கு ஒரு கனத்த குஷனோடு பிரவுன் நிறத்தில். 

*வலது கால் மேல் இடது கால் போட்டுக் கொண்டு அதனில் ஒரு பெரியவர் அமர்ந்திருக்கிறார். Frame-ன் மையம் அவர் தான்.

*அவரது முகத்தில் நிறைய சுருக்கங்கள் ; புதராய் மீசை ; ஒரு ஆட்டு தாடி ; வதனத்திலொரு இறுக்கம். அவரது வலது பக்கம் முழுமையாகவும், இடது பக்கத்தின் ஒரு பகுதியும் தெரிந்தாக வேண்டும்.

*தலையின் முன்பகுதியில் பிளாட் போட்டு விற்குமளவிற்கு காலியிடம் ; வெளீர் கேசம் ; லார்ட் லபக்தாஸ் ரேஞ்சிற்கு இடது கையில் ஒரு பைப் புகைந்து கொண்டிருக்கிறது..அந்தக் கிழ உருவத்தின்  வாய்க்குக் கொஞ்சம் அருகினில். 

* அவரைத் தாண்டி ஒரு சதுர வடிவிலான ஜன்னல். அதன் மத்தியில் சிலுவை வடிவில் சட்டங்கள். ஜன்னலுக்கு மறு பக்கம் செங்கல் சுவர் ; மெலிதாக வெளிச்சம் உள்ளே பாய்கிறது !

*ஜன்னலின் விளிம்பில் ஒரு கிளாஸ் ; அதன் பின்னே ஒரு குடுவை ; ஓரத்தில் சின்னக் குடுவையும் , ஒரு தட்டும். 

*பெரியவரின் முழுக்கைச் சட்டை வெள்ளையில் ; sleeveless  ஓவர்கோட் அடர் பச்சை ; பழுப்பு நிறக் கால் சராய் ! பெரியவர் முகத்தில் லேசாக வெளிச்சம் தெரிய வேண்டும் ! 

வணக்கம் நண்பர்களே....ஒரு ஞாயிறு காலையில் அரைத் தூக்கத்தில் எழுந்து வந்திருக்கும் உங்களுக்கு இதெல்லாம் என்னவென்ற சிந்தனையா ? பக்கம், பக்கமாய் நாம் படித்துச் செல்லும் காமிக்ஸ் கதைகளில் ; பல சமயங்களில் ஒற்றை நொடியில் நாம் தாண்டிச் செல்லும் சித்திரங்களில் ஒரேயொரு கட்டத்தை ஓவியர் வரைந்திடும் பொருட்டு கதாசிரியர் எழுதியிருக்கக் கூடிய விளக்கவுரையின் சின்ன சாம்பிள் மட்டுமே இது ! சித்திரத்தை என் முன்னே வைத்துக் கொண்டே நான் எழுதிய மேற்படி விளக்கங்களை அந்தக் கதாசிரியர் தன் கற்பனையில் மட்டுமே வடிவமைத்துப் பார்த்து இதைப் போல 4 மடங்கு விபரங்களோடு எழுதியிருப்பார் ஸ்க்ரிப்டில் ! (ஒரேயொரு கட்டத்துக்கு இந்தப் பாடு !! ஒரு பக்கத்துக்கு எத்தனை கட்டங்கள் ? ; எத்தனை பக்கங்கள் ஒரு கதைக்கு ? ; எத்தனை கதைகள் ஒரு தொடருக்கு ?யோசித்துத் தான் பாருங்களேன்..!!)  

அதெல்லாம் சரி அண்ணாத்தே ...ஆனால் காலங்கார்த்தாலே இந்தக் காலட்சேபம் எதற்கோ ? என்ற உங்களின் மைண்ட் வாய்ஸ் loud n ' clear ஆகக் கேட்பதால் விஷயத்துக்கு வருகிறேன் ! மேற்சொன்ன விபரங்களின் பலனாக வரையப்பட்ட சித்திரமானது 15 நாட்களுக்கு முன்னே இத்தாலியில் வெளியாகியுள்ள ஒரு (புது) டெக்ஸ் கதையின் முதல் frame ! வருஷமோ 1913 ; இடமோ நியூ யார்க் நகரிலொரு முதியோர் இல்லம் ; பழம் நினைவுகளை மீட்டெடுக்கும் கோரிக்கையோடு அந்தப் பத்திரிகையாளர் அமர்ந்திருப்பது வேறு யார் முன்புமல்ல - நமது வறுத்தகறிப் பிரியர் கிட் கார்சனின் முன்னே !! நக்கலும், நையாண்டியுமாய் இத்தனை காலம் நாம் பார்த்துப் பழகியிருந்த வெள்ளிமுடியார் மோட்டு வளையைப் பார்த்துக் கொண்டே பேசத் துவங்குகிறார் ; பாதியிலேயே மனுஷன் "கொர்ர்" என்ற குறட்டையோடு நித்திரையில் ஆழ்ந்திட, ஒரு நர்சம்மா உள்ளே புகுந்து, "patient -ஐ தொந்தரவு செய்யாதீர்கள் !" என்ற மாமூல் வசனம் பேசுகிறார் !! என்ன கொடுமை போனெலி சார் ? என்ற திகைப்போடு இருக்கும் உங்களுக்கு ஆச்சர்யங்கள் இன்னும் ஓய்ந்தபாடில்லை ! நம் தளபதிக்குச் சவால் விடும் நீண்ட, சுருள் கேசம் ; ஆளை உலுப்பும் இளமைத் தோற்றம் ; பட்டாசாய் அனலடிக்கும் கதாப்பாத்திரமென பக்கங்களைப் புரட்டும் போது ஒரு இளைஞன் மையமாக வலம் வருவது 'பளிச்' என்று புலனாகும் ! அட...இந்த மஞ்சள் சட்டையை இதுக்கு முன்னே அடிக்கடி பார்த்த மாதிரி இருக்கே ? என்ற சிந்தனையில் ஆழ்ந்தால் - அது தான் நம் 'தல' என்று பிடரியில் அடித்துச் சொல்கிறது கதை ! அதிசயங்களும் அத்தோடு ஓயவில்லை ; பிரான்கோ-பெல்ஜிய ஆல்பங்களின் அதே அளவு ; அதே hardcover வடிவமைப்பு ; அதே 46 பக்க நீளம் ; அதே முழு வண்ணம் என இந்தப் புது ஆல்பம், இதுநாள்வரைக்குமான டெக்சின் இத்தாலிய பாணிக்கொரு புது இலக்கணத்தை எழுதுகிறது ! "ஒரு நாயகன்...ஒரு சகாப்தம்" என்பது இந்த பிரமிக்கச் செய்யும் கதையின் தலைப்பு !

அந்த முதல் frame !
பாவ்லோ எலுடெரி செர்பியரி - இந்த ஆல்பத்தை உருவாக்கியுள்ள இத்தாலிய படைப்பாளியின் பெயர் தான் இது ! 71 வயதான இவரது சித்திர பாணி அசாத்திய நுணுக்கங்கள் கொண்டது ! கொஞ்சம் 'adults only ' ரகக் காமிக்ஸ் தொடர்களுக்கு சித்திரங்கள் போட்டுக் கொண்டிருந்தவருக்கு கௌபாய் கதைவரிசைகள் மீதும் மையல் உண்டு ! So டெக்சின் ஒரு பரீட்ச்சார்த்த புது முயற்சிக்கான முழுப் பொறுப்பும் இவரிடம் வழங்கப்பட்டிருக்க, மனுஷன் அதகளம் செய்துள்ளார் ! 

டெக்சை கார்சன் சந்திக்கும் முதல் தருணம் ; டெக்சின் இளவயது பரபரப்பு ; தோற்றங்களில் ஏக மாற்றங்கள் என டெக்ஸ் கதைவரிசையில் இதுவொரு மைல்கல் இதழாக அமைந்திடுமென்பது உறுதி ! வெளியாகி அங்கு ஏக பாராட்டுக்களைப் பெற்றுள்ளதாம் இந்தப் புது பாணி !! 'அட..டெக்சுக்கு இனி இது தான் புதுப் பாதையா??" என்ற கேள்வியை நான் தயங்கி மெதுவாய்க் கேட்டு வைக்க , சிரித்துக் கொண்டே - என் முன்னே இம்மாததது  டெக்ஸ் இதழ்  # 653-ஐ தூக்கிப் போட்டார்கள் ! வழக்கமாய் வெளியாகும் கதைகளில் துளியும் மாற்றமின்றி அந்த வண்டி சீராய் மாதம் 200,000 பிரதிகள் விற்பனையோடு ஓடிக் கொண்டுள்ளது ! இந்த புது முயற்சி ஒரு தனித் தண்டவாளம் ! "பெல்ஜியப் பாணிகளை நாங்கள் எட்டிப் பிடிக்க நினைத்தால் அதுவும் எங்களுக்குச் சுலபமாய் சாத்தியமே !" - என ஐரோப்பிய காமிக்ஸ் உலகிற்கொரு பிரகடனமாய் இது இருக்குமோ ? என்ற எண்ணம் எனக்குள் எழாது இல்லை ! Anyways, இந்த அட்டகாசத்தை நாம் தமிழில் ரசித்திடுவோமா folks ? இந்தாண்டின் அட்டவணையில் ஏதாச்சும் லேசாகப் பட்டி, டிங்கரிங் செய்தால், இந்தப் புது யுக டெக்சை சுடச் சுட நாமும் ரசித்துவிடலாம் ! Thoughts on this please ?
போனெல்லி குழுமத் தலைவர் டேவிட் & ஓவியர் செர்பியரி  

'ஆ' வென இந்த ஆல்பத்தை நான் வாய் பார்த்துக் கொண்டிருந்த சமயம் ரிப் கிர்பி ஜாடையில் ஒரு மனிதர் அறைக்குள் வந்து  'ஹலோ..!' என்று என் முன்னே கை நீட்டியபடி நின்றார் ! "இவர் தான் மவ்ரோ போசெல்லி..! டெக்ஸ் கதைகளின் தற்போதைய டாப் கதாசிரியர் என்று எனக்கு அறிமுகம் செய்து வைத்த போது நான் பதறியடித்து எழுந்து கைகுலுக்கினேன் ! "கார்சனின் கடந்த காலம்" ; "நிலவொளியில் நரபலி" போன்ற நமது classic டெக்ஸ் கதைகளின் கர்த்தாவான இவருக்கு போனெல்லி அலுவலகத்திலேயே தனியாக ஒரு தளத்தில் அலுவலகம் அமைத்துக் கொடுத்துள்ளனர் ! கிளாடியோ நிஸ்ஸி பிரதம எழுத்தாளராக கொஞ்ச காலம் முன்பு வரையிலும் பணியாற்றி விட்ட, தற்போது ஒருவித ஓய்வில் இருக்கும் தருணத்தில் போசெல்லி தான் இப்போது டெக்ஸ் கதைகளின் பிதாமகர் !  "நேரம் இருந்தால் உங்களோடு கொஞ்ச நேரம் பேச வேண்டும் சார் !" என்று நான் கோரிக்கை வைக்க - "லயன் காமிக்ஸ் ! இந்தியா ! oh sure !!"  என்ற போது எனக்கு உற்சாகம் ஜிவ்வென்று எகிறியது ! இதை பீற்றல் பரமசிவமாய் நிச்சயம் நான் சொல்லவில்லை guys - ஆனால் போனெல்லி நிறுவனத்தில் ஒருத்தர் பாக்கியில்லாது நமது "டெக்ஸ் காதலை" பற்றி ; நமது இதழ்களைப் பற்றி சிலாகிக்கும் போது எனக்கு நிஜமாகவே கூச்சமாக இருந்தது ! குரோவேஷியா மொழியிலான பதிப்புகள்  ; டச் மொழியிலான பதிப்புகள்  ; பிரேசில் நாட்டின் பதிப்புகள் என மிரளச் செய்யும் தரத்தில் மாதிரிகள் அவர்களது மேஜைகளில் கிடப்பினும், நமது ஒவ்வொரு இதழையும் அவர்கள் அத்தனை வாஞ்சையோடு அரவணைப்பதைப் பார்க்கும் போது நான் நெளியத் தான் செய்தேன் ! ஆனால் அவர்கள் நம்மை குஷிப்படுத்தவோ ; "அட...சவலைப் பிள்ளையைக் கொஞ்சமாய் தட்டிக் கொடுப்போமே !" என்ற ரீதியில் ஒப்புக்கோ சொல்லவில்லை என்பது தெள்ளத் தெளிவாய்ப் புரிந்தது ! இந்தியா போன்றதொரு தொலைதூர நாட்டிலும் தங்கள் படைப்புகளுக்கு இத்தகையதொரு சின்ன - ஆனால் விசுவாசமான வாசகர் வட்டம் இருப்பதை அவர்கள் பெருமிதமாய்க் கருதுவது புரிகிறது !  
கதாசிரியர் போசெல்லி 
திங்கள்கிழமை காலையில் மாமூலான பணிகளைப் பார்ப்பதே ஒரு சோம்பலான காரியம் எனும் போது, அன்றைக்கு விருந்தாளியாய் யார் வந்து நின்றாலும் ஒரு மெல்லிய அயர்வு தோன்றுவது சகஜம் தானே ?! So  அவர்களது பிசியான அட்டவணையை நாம் பாழ் செய்கிறோமோ ? என்ற மெல்லிய தயக்கம் எனக்குள் இருந்தது தான் ; ஆனால் அவர்களோ துளியும் முகம் சுளிக்காமல் என் ஒவ்வொரு கோரிக்கைக்கும் விலாவாரியாய் பதில் தந்து, மலையாய் புது இதழ்களைத் தந்து, ஒவ்வொன்றுக்கும் ஒரு விளக்கம் சொல்லி, என்னை நெகிழச் செய்தனர் ! கீழ் தளத்தில் இருந்த திரு. போசெல்லியின் அலுவலகத்திற்கு என்னை கூட்டிப் போய்க் காட்டிய போது, 'நம்ம தலையின்' தாய் வீட்டை கண்குளிர ரசித்தேன் ! சுவரெங்கும் சித்திரங்கள் ; செவ்விந்தியப் பழங்குடியினரின் பல்வேறு வகைகளைக் குறிக்கும் ஒரு பெரிய chart ; ஏகப்பட்ட reference books ; வண்டி வண்டியாய் டெக்ஸ் இதழ்கள் ; பற்றாக்குறைக்கொரு வின்செஸ்டர் (பொம்மைத்) துப்பாக்கி என அந்த அறையே ஒரு கௌபாய் உலகின் பிரதிநிதியாய்க் காட்சி தந்தது ! மேஜை முழுக்க புதுக் கதைகளுக்கான ஸ்க்ரிப்ட்கள் ; (அவற்றை இன்னமும் டைப்ரைட்டரில் தான் போசெல்லி பதிவு செய்கிறாராம் !!) ; பல்வேறு ஓவியர்களிடமிருந்து வந்திருந்த சித்திரக் குவியல்கள் ; ஒரு பக்கம் எடிட்டிங் செய்திட ஒரு உதவியாளர் என சர்வம் டெக்ஸ் மயம் (மாயம் ?)  ! பாருங்களேன்...! 







வெறும் மொழிமாற்றம் மட்டுமே செய்து விட்டு அலப்பரை செய்யும் நாம் எங்கே ? முழுக்க முழுக்க creative  அற்புதங்கள் நிகழ்த்தும் இவர்கள் எங்கே ? என ஒரு கணம்  என் மண்டைக்குள் சிந்தனை ஓடிய போது - நம்மையும் அறியாது குடிவந்திருந்த கொஞ்சநஞ்ச தலைக்கனமெல்லாம் தலை தெறிக்க ஓட்டம் பிடித்ததை உணர முடிந்தது ! அத்தனை மாயாஜாலங்களையும் நிகழ்த்தும் ஜாம்பவான்கள் அமைதியாய் புன்னகையோடு நிற்பதைப் பார்க்கும் போது 'தம்பி...தரைக்கும், பாதத்துக்கும் இடைவெளி ஆகவே ஆகாது !" என்று என் மைண்ட்வாய்ஸ் உரக்கவே சொல்லியது ! நான் கேட்ட கேள்விகளுக்கெல்லாம் புன்சிரிப்பு மாறாது பதில் சொன்ன போசெல்லி, வீட்டுக்கு அன்று சீக்கிரமே புறப்படுவதாக இருந்ததால் அவரை ஒரு பிரத்யேகப் பேட்டி எடுக்க இயலாது போனது ! ஆனால் தனது நம்பரையும், மின்னஞ்சல் முகவரியையும் தந்து - "என்ன கேட்கணுமோ, அதனை தாராளமாய்க் கேளுங்கள் ; நிச்சயம் பதில் சொல்கிறேன் !" என்று அன்பாகச் சொன்னார் ! "ஊருக்குத் திரும்பிய பின்னே எங்களது வாசகர்களையே கேள்விகளைத் தொடுக்கக் கோருகிறேன் சார் ! "என நான் சொன்ன போது அதே புன்னகை ! So - தற்போதைய 'தல'யின் தலைவரிடம் நீங்கள் கேட்க விரும்பும் கேள்விகள் என்னவோ guys ? அத்தனையையும் ஒரு மொத்தமாய் அவருக்கு அனுப்பி, அவரது பதில்களை நமது லயனின் 250-வது இதழில் போடுவோமா ? உங்கள் கேள்விக் கணைகளை இங்கு பதிவாகவோ ; அல்லது "QUESTIONS TO MR BOSELLI "  என்ற தலைப்போடு மின்னைஞ்சலாகவோ அனுப்பிடலாமே ! 

அவருக்கு விடை கொடுத்து விட்டு, திரும்பவும் மேல்தளத்திலிருந்த போனெல்லி அலுவலகம் திரும்பிய போது அங்கொரு ஆறடி உயர வெண்தாடி மனிதர் காத்திருந்தார் - முகத்திலொரு பெரிய புன்னகையோடு ! "ஹலோ..முத்து காமிக்ஸ் !" என்றபடியே கைகுலுக்கியவரை எனக்கு அடையாளம் தெரிந்தது ! மர்ம மனிதன் மார்ட்டின் கதைகளின் பிதாமகரான அல்பிரெடோ காஸ்டெல்லி தான் அவர் ! 

அவரை சந்தித்தது பற்றி......அடுத்த பதிவில் ! காமிக்ஸ் எனும் இந்தக் காலஇயந்திரச் சவாரியில் எனக்குக் கிட்டும் அனுபவங்கள் சகலமுமே  ஒரு ஆயுளுக்கும் நிலைக்கும் சங்கதிகள் என்பது உறுதி ! படைப்பாளிகளுக்கும், வாசகர்களுக்கும் மத்தியினில் ஒரு போஸ்ட்மேனாகப் பணிபுரியும் இந்த மகிழ்வு ரொம்பவே வித்தியாசமானது என்பதை ஒவ்வொரு நாளும் எனக்கு உணர்த்தத் தவறுவதில்லை !  தூக்கமும், "மின்னும் மரணமும்" அழைப்பதால் - இப்போதைக்கு விடை பெற்றுக் கொள்கிறேனே ! Bye for now all ! See you around soon ! 


P.S: ஐரோப்பாவில் சுற்றித் திரிந்த போது எங்கோ என் கண்ணில்பட்ட படமிது ! கௌபாய் காதலர்களான நீங்கள் இதற்குப் பொருத்தமாயொரு funny caption எழுதி அனுப்புங்களேன் - பரிசாக ஒரு டெக்ஸ் ஒரிஜினல் இதழ் !!  

Saturday, March 07, 2015

பன்னிரண்டு - Part 2 !

நண்பர்களே,

வணக்கம். ஞாயிறு அதிகாலை மூட்டைகளைக் கட்டிக் கொண்டு  சின்னதானதொரு பயணம் செல்ல வேண்டியிருப்பதால் பதிவுக்கு ஒரு நாள் புரமோஷன் ! டிடெக்டிவ் நாயகர்களைப் பற்றி போன ஞாயிறு நாம்  பார்க்கத் துவங்கியதும், இடைப்பட்ட தருணத்தில் மார்ச் இதழ்கள் வெளியானதும் சில நாட்களுக்கு முந்தைய நிகழ்வுகள் போலத் தோன்றவில்லை தலைக்குள் ! அடுத்தடுத்து எதற்குள்ளாவது தலைநுழைத்து வருவதால் சதா நேரமும் fast forward -ல் இருப்பது போலொரு உணர்வு !!   Anyways, சென்ற வாரத்தின் தொடர்ச்சியை பார்ப்போமே ?! 

பட்டியலைத் தொடங்கும் முன்னே சின்னதாய் ஒரு விஷயம் : இந்தப் பட்டியல் எந்தவொரு குறிப்பிட்ட வரிசையிலும் இல்லை என்பதால் நம் சீனியர் அறிமுகங்கள்  -ஜூனியர் அறிமுகங்கள் என்ற பாகுபாடிராது ! ஞாபகப்படுத்திப் பார்க்கும் போது எனக்குத் தோன்றுவதை இங்கே பதிவிடுகிறேன் ! லயன் காமிக்ஸ் வெளியான துவக்க ஆண்டில் இதழ் # 6 (??) தலைக்காட்டியதொரு துப்பறியும் குழுவை இன்றைக்கு நம்முள் எத்தனை பேருக்கு நினைவிருக்குமோ நானறியேன் - ஆனால் "மீட்போர் ஸ்தாபனம்" என்ற பெயரோடு "கபாலர் கழகம்" இதழில் அறிமுகமான துப்பறியும் டீமே இந்த வாரப் பட்டியலைத் துவக்கும் நபர்கள் ! THE SEEKERS என்ற பெயரோடு இங்கிலாந்தில் 1966 முதல் '71 வரை தினசரி ஸ்ட்ரிப்களாக இவர்களது 27 சாகசங்கள் வெளியாகியுள்ளன ! ஜேகப் ; சுசன் என்ற முக்கிய கதாப்பாத்திரங்களும், இந்தத் தொடரின் மையப் புள்ளிகள் !  லேசாக மாடஸ்டி பிளைசியின் ஜாடையிலிருக்கும் சித்திரங்களோடு 5 ஆண்டுகள் ஓடிய இந்தத் தொடர் அத்தனை பெரிய வெற்றியை ஈட்டவில்லை ; ஆனால் அவை 'மோசமில்லை' என்பதே எனது அபிப்பிராயம்   ! 

பட்டியலில் அடுத்த இடமும் ஒரு இங்கிலாந்துப் படைப்புக்கே ! THE HUNTERS என்ற பெயரோடு Fleetway தங்களது BATTLE வார இதழில் வெளியிட்டு வந்தனர் ! பரபரப்பான அந்த ஜோடியே நமது லயனில் அறிமுகமான இரட்டை வேட்டையர் ! இங்கிலாந்தின் கதாசிரியரும், ஒரு ஸ்பானிஷ் ஓவியரும் கூட்டணி போட்டு உருவாக்கிய இந்தக் கதைகள் நம் இதழ்களில் சக்கைபோடு போட்டன ! அதிலும் "ஆப்பிரிக்க சதி"  என்ற இதழ் மறக்க இயலா ஒரு ஹிட் இதழ் ! இங்கிலாந்தின் உளவுத் துறைக்காகப் பணியாற்றும் இந்த ஜோடி டிடெக்டிவ்கள் என்று சொல்வதை விட ஆக்ஷன் மன்னர்கள் என்று வர்ணிப்பதே பொருத்தமாக இருக்கும் !

Next on the list - இவரும் ஒரு பிரிட்டிஷ் தயாரிப்பே...! டென்னிஸ் ஆட்டக்காரராகவும், இரகசிய ஏஜெண்டாகவும் டபுள்-ஆக்ட் கொடுத்த ஜான் மாஸ்டர் ஒரு "அழகான ஹீரோ" என்பதில் சந்தேகமே இருக்க முடியாது ! மொத்தம் இரண்டே கதைகள் மட்டுமே உருவாக்கப்பட்டது தான் ஏனென்று புரியவில்லை ; ஆனால் அந்த இரண்டையுமே நாம் வெளியிட்டு புண்ணியம் சேர்த்துக் கொண்டோம் ! (சதி வலை & மாஸ்கோவில் மாஸ்டர்). அட்டகாசமான சித்திரங்கள், அதிரடி ஆக்ஷன் + தெளிவான storyline இந்த மினி தொடரின் அடையாளங்கள் !   

பட்டியலின் டிடெக்டிவ் # 15 தான் இம்மாதம் ஒளிவட்டத்தை ஏற்று நிற்கும் ராபின் ! 1988-ல் இத்தாலியில் உருவாக்கப்பட்ட இந்த அலட்டல் இல்லா நாயகர் 2005 வரை அங்கே 200 சாகசங்களில் வலம் வந்துள்ளார் ! NICK RAIDER என்ற ஒரிஜினல் பெயர் கொண்ட இம்மனுஷனை உருவாக்கியவர் டெக்ஸ் வில்லர் கதைகளின் ஒரு முக்கிய கதாசிரியரான கிளாடியோ நிஸ்ஸி ! ராபினை படைத்திட ஒரு inspiration ஆக இருந்தது ஹாலிவுட் நடிகரான ராபர்ட் மிட்சம் செய்த சில டிடெக்டிவ் ரோல்கள் தானாம் ! ராபினோடு அவ்வப்போது துணை வரும் மார்வின் என்ற உதவியாளருக்கும் கூட ஹாலிவுட்டின் பின்னணி உண்டு - நடிகர் எட்டி மர்பி ரூபத்தில் ! இத்தாலிய காமிக்ஸ் ஜாம்பவான்களான பொனெல்லியின் படைப்புகளுள் ஒரு out & out துப்பறியும் நாயகர் என்ற பட்டத்துக்குத் தகுதியானவர் ராபின் மாத்திரமே என்று கூட சொல்லலாம் ! இதர கதைவரிசைகள் சகலமும் ஹாரர் ; கௌபாய் ; எதிர்காலக் கதைகள் ; கிராபிக் நாவல்கள் ; வரலாற்றில் நிகழும் சாகசங்கள் என்ற பாணியில் இருந்திட்ட போது ராபின் மட்டும் ஒரு அக்மார்க் போலீஸ்காரராய் வந்து வெற்றி ஈட்டியது ஸ்பெஷல் ! 

Robert Mitchum


நமது இதழ்களில் ராபின் தலைகாட்டத் துவங்கியது '90 களின் மத்தியில் என்றொரு ஞாபகம் ! ஒரே ஒரு இதழ் நீங்களாய் பாக்கி அனைத்துக் கதைகளுமே எவ்வித சிக்கல்களுமின்றி கரை சேர்ந்துள்ளன இது வரை ! ராபினின் இதழ் # 100 & 200 மட்டும் வண்ணத்தில் வெளியாகியுள்ளன ! LMS -ல் சாகசம் # 100 வெளியிட்டுள்ள நிலையில் - எஞ்சி நிற்கும் 200-வது இதழை கலரில் வெளியிடலாமா ? What say all ? (இந்த இதழின் வர்ணங்கள் அட்டகாசமாய் உள்ளன என்பது கொசுறுச் சேதி !)

பட்டியலுக்குள் தலைவிடும் அடுத்த ஆசாமியும் ஒரு கலப்படமில்லா டிடெக்டிவ் என்றே சொல்லலாம் ! ஒப்புக்குப் பத்திரிகை ரிபோர்டர் என்று மனுஷன் சொல்லிக் கொண்டாலும், பத்திரிகை ஆபீஸ் பக்கமாய் அவர் தலை வைத்துப் படுத்த நாட்கள் சொற்பமே என்று நினைக்கிறேன் ! Yes, நமது அபிமான 'இடியப்பப் புகழ்' ரிப்போர்டர் ஜானி தான் பட்டியலில் # 16 ! "இரத்தக் காட்டேரி மர்மம்" என்ற இதழோடு நமது திகில் காமிக்ஸில் 1986-ல் தலை காட்டிய இந்த பிரான்கோ-பெல்ஜிய வீரரின் ஒரிஜினல் பெயர் RIC HOCHET ! ஜெர்மனியில் ரிக் மாஸ்டர் என்றும், இத்தாலியில் ரிக் ரொலண்ட் என்றும், பின்லாந்தில் ரிக்கு ஒஸ்கா என்றும், ஹாலந்தில் ரிக் ரிங்கர்ஸ் என்றும், சுவீடனில் ரிக் ஹார்ட் என்றும் அறியப்படும் இந்த lovable hero உருவானது 1955-ல் ! இது வரையிலும் 78 ஆல்பம்கள் வெளியாகியுள்ளன பிரெஞ்சு மொழியில் ! (நாம் வெளியிட்டுள்ளது...??) வழக்கமான டிடெக்டிவ் கதைகளின் பாணியிலிருந்து கொஞ்சம் விலகி நிற்பதே ஜானியின் ஸ்பெஷாலிட்டி என்று சொல்லலாம் ! ஒரு சின்ன புள்ளியை மத்தியில் இட்டு விட்டு அதைச் சுற்றி வளைவும், நெளிவுமாய் கோலங்களை சகட்டு மேனிக்குப் போட்டு விட்டு அத்தனையையும் கடைசி இரு பக்கங்களில் சரி செய்வதே இந்தக் கதை பாணி ! பிரான்க்பர்ட் புத்தக விழாவின் போது இவரது ஆல்பத்தைப் படம் பார்த்து தேர்வு செய்து விட்டு, கதையையும் வாங்கியான பின்னே, பிரெஞ்சு மொழிபெயர்ப்பு கைக்கு வந்தான பிறகு நான் முழித்த முழி இன்னமும் நினைவில் உள்ளது ! ஆனால் இடியாப்பங்களை ரசிப்பதும் நமக்குப் பிடித்த பொழுதுபோக்கு என்பதால் ஜானியின் ராஜ்ஜியம் தொடர்கிறது ! 

தொடர்பவர் ஒரு புராதன ஆசாமி ; ஆனால் நாவல் உலகில் அதகள நாயகராய் வலம் வந்தவர் ! தொழில்முறை வழக்கறிஞர் என்ற போதிலும் இவரொரு முதல்தர டிடெக்டிவ் என்பதில் சந்தேகமே கிடையாது ! யெஸ்.. கொஞ்ச காலம் மட்டும் காமிக்ஸ் ஸ்ட்ரிப்களாகவும் சுற்றி வந்த பெர்ரி மேசன் தான் பட்டியலில் அடுத்தவர் ! 1950-களில் உருவாக்கப்பட்ட இவரது கதைகளில் சுவாரஸ்யத்துக்குப் பஞ்சமே இராது ; இது வரை மூன்றோ-நான்கோ கதைகளை நாம் வெளியிட்டுள்ளது போல் நினைவு எனக்கு ! 

புராதனத்தின் தொடர்ச்சியாய் முதலைப்படை பட்டாளம் சகிதம் சுற்றி வந்த ப்ரூனோ பிரேசிலையும் இந்த லிஸ்டுக்குள் நுழைத்துக் கொள்ளலாம் ! உருவான நாட்களில் ஜேம்ஸ் பாண்ட் பாணியை மனதில் கொண்டிருந்தார் கதாசிரியர் கிரெக் என்பதில் துளியும் சந்தேகம் கிடையாது ! 1969-1995 வரை 11 ஆல்பங்களில் சாகசம் செய்த ப்ரூனோ இன்று நம் மனங்களில் மட்டுமே இடம் பிடிக்கும் நிலைமையில் உள்ளதே நிஜம் ! 

பட்டியலின் அடுத்த டிடெக்டிவ் துளி அறிமுகம் கூடத் தேவைபட்டிடா ஒரு அசாத்திய ஜாம்பவான் ! THE DARKNIGHT DETECTIVE - வழக்கமான துப்பறியும் பாணிக்கு அந்நியமானவர் எனினும், இவரின்றி இப்பட்டியல் முழுமையாகாதே ! உலகெங்கும் கொண்டாடப்படும் BATMAN -ஐ மீண்டும் நம் இதழ்களுக்குக் கொண்டு வர இயன்ற முயற்சிகளைச் செய்திடுகிறோம் ; fingers crossed !

"ரொம்பப் பிரபலம்" என்ற நிலையிலிருந்து -'relatively lesser known' என்ற அடைமொழிக்குச் சொந்தக்காரர்கள் அடுத்த இடங்களைப் பிடிக்கும் டிடெக்டிவ்கள்  ! And moreover - மூவருமே பிரான்கோ-பெல்ஜியக் குழந்தைகள் ! 

PAUL FORAN என்ற துப்பறியும் ஹீரோ நமக்குப் "பிசாசுக் குரங்கு" வாயிலாக அறிமுகம் ! இவரது ஓவியங்களை வரைந்தவர் நமக்கு ரொம்ப ரொம்ப நெருக்கமான (மாயாவி புகழ்) ஜீசஸ் ப்ளாஸ்கோ ! 1968-ல் துவங்கிய இவரது சாகசங்களில் நாம் மூன்று ஆல்பங்களை வெளியிட்டுள்ளோம் ! (அவற்றின் பெயர்கள் நினைவுள்ளதா guys ?)
அடுத்தவர்  சைக்கிளில் சாவகாசமாய் சுற்றி வரும் கோட் போட்ட கண்ணாடிக்காரர் ! இது வரை இரண்டே இதழ்களில் நம்மிடம் இவர் தலைகாட்டியிருப்பினும், தொடரும் காலங்களில் இவருக்கு கூடுதலாய் வாய்ப்புகள் தருவதில் தவறிராது என்றே சொல்லத் தோன்றுகிறது ! Yes - டிடெக்டிவ் ஜெரோம் தான் நான் குறிப்பிடும் ஆசாமி ! இது வரை 24 ஆல்பங்கள் வெளியாகியுள்ள இத்தொடருக்கு பிரான்சில் நல்ல வரவேற்புள்ளது ! இவருக்கொரு இரண்டாம் இன்னிங்க்ஸ் தான் தந்து பார்ப்போமா folks ? 

தொடர்பவர் புராதன டிடெக்டிவ் ; ஆனால் நிறையவே ரசிகர்களை ஈட்டியுள்ள ஆசாமி ! நம்மைப் பொறுத்த வரை இவர் இன்னமும் முழுமையாய் பாஸ் மார்க் வாங்கியிருக்கா ஒரு man on trial ! 1956-ல் பெல்ஜியத்தில் உருவாக்கப்பட்ட ஜில் ஜோர்டான் - ஒரு பாரிஸ் நகரத்து டிடெக்டிவ். எந்தவொரு சிக்கலும் இவருக்குக் கஷ்டமானதல்ல ! லொட லோடவென பேசிக் கொண்டே திரியும் உதவியாளனோடு இவர் செய்யும் சாகசங்கள் ஐரோப்பிய காமிக்ஸ் வாசகர்கள் மத்தியில் மிகவும் பிரபலம் ! ஆண்டுக்கொரு ஆல்பம் என இவரது கதைகளை சற்றே நிதானமாய் கையாண்டு வரும் நாம் - அவருக்குக் கூடுதலாய் வாய்ப்புகள் தரலாமென்று நினைக்கிறீர்களா ? 

இந்த வாரத்து டஜனைப் பூர்த்தி செய்பவர் இந்தப் பட்டியலுக்குள் ஒரு surprise inclusion என்றே சொல்லலாம் ! ரேஞ்சர் பிரிவில் முக்கிய அதிகாரிகள் என்ற முறையில், நம் இரவுக்கழுகாரையும், கார்சனையும் இங்கே இணைப்பதில் தவறில்லை என்று நினைத்தேன் ! மர்மங்களை துப்புத் துலக்கும் நேரங்களை விட, பலரது பல்செட்களை மாற்றி அமைப்பதே இவர்களது பணியும், பாணியும் என்றாலும் கூட - 'தலைவாங்கிக் குரங்கு' ; 'மரணத்தின் நிறம் பச்சை' போன்ற மர்ம த்ரில்லர்களை முன்னின்று தீர்த்து வாய்த்த பெருமை இவர்களைச் சாரும் அன்றோ ? So இன்றைய ஒரு டஜன் டிடெக்டிவ்களின் பட்டியலை முழுமைப்படுத்துகிறார் 'தல' ! 

மாடஸ்டி ; சார்லி போன்ற நாயக / நாயகியரும் ஏதோ ஒரு விதத்தில் இந்தப் பட்டியலுக்குள் நுழையத் தகுதி வாய்ந்தவர்களா ? - இல்லையா ? என்ற விவாதங்களை உங்களிடம் ஒப்படைத்து விட்டு, இப்போதைக்கு நான் ஊருக்குக் கிளம்பும் ஏற்பாடுகளைச் செய்யக் கிளம்புகிறேன் ! இந்தப் பட்டியலில் உள்ள நாயகர்கள் தவிர, one shot டிடெக்டிவ்கள் நிறையவே உண்டு நம் அணிவகுப்பில் ; but அவர்களை இங்கே  நுழைக்க நான் முயற்சிக்கவில்லை என்பதும் postscript ! So this is just a small list !

See you around soon ! Adios for now ! 

P.S : சென்ற பதிவில் கேட்டிருந்த ரிப் கிர்பி கதைகளின் எண்ணிக்கை தொடர்பான கேள்விக்கு முதலில் (சரியான) விடை அனுப்பியுள்ள நண்பர் R கெளதம் நிதிஷ் - குட்டிப் பரிசான அந்த ரிப் கிர்பி வண்ண இதழைப் பெற்றிடுவார் - நான் ஊருக்குத் திரும்பியான பின்னே ! உங்கள் முகவரியை அனுப்பிடுங்களேன் நிதிஷ் ! 


கடல் கடந்த கார்சனின் கடந்த காலம் . போனெல்லி நிறுவனத்தின் நிர்வாகி Mrs.Ornella நமது இதழுடன்:  https://www.facebook.com/LionMuthuComicsSivakasi/photos/a.1388570328040814.1073741828.1388544204710093/1616849731879538/?type=1

Sunday, March 01, 2015

பயங்கரப் பன்னிரண்டு !

நண்பர்களே,

வணக்கம். "சண்டே எக்ஸ்பிரஸ்" தொடர்கிறது - நமது மார்ச் பட்டியலின் இறுதி இதழின் டீசரோடு ! (காலையில் தான் இரயிலில் சென்னை வந்து இறங்கினேன் என்பதாலும், கொஞ்சம் background தேடலுக்கு அவசியம் ஏற்படுத்திய பதிவிது என்பதாலும்  நமது ரயில் இந்தவாட்டி கொஞ்சம் லேட் !! )  இரு தடிமனான, வண்ண பிரான்கோ-பெல்ஜியக் கௌபாய் இதழ்களுக்கு மத்தியில் பல்லி போல் ஒட்டிக் கொண்டு வரக் காத்திருக்கும் கறுப்பு-வெள்ளை இத்தாலிய டிடெக்டிவ் ராபினின் சாகசம் தான் அது ! "எத்தர்களின் எல்லை" - ஒரு நெடும் இடைவெளிக்குப் பின்னதாக வெளி வரும் CID ராபினின் பிரத்யேக இதழ் ! வழக்கமான நமது black & white சைசில்,அழகான சித்திரங்களோடு , ஒரு சிம்பிளான ஆக்ஷன் கதையோடு இம்முறை களம் காணும் ராபின், நம் உலகக் கோப்பை அணியில் அஜிங்கிய ரஹானே போன்றவர் என்று சொல்லலாம் ! எப்போதுமே பெருந்தலைகளை ஒளிவட்டத்தை ஏற்றுக் கொள்ள அனுமதித்து விட்டு, ஓசையின்றி தன் பங்குக்கு வெளுத்துக் கட்டி விடும் ரஹானேவின் பாணியில் ராபின் இம்முறை செயல்பட்டிருப்பதாய் எனக்குப் பட்டது ! இதோ இதழின் அட்டைப்படம்+ உட்பக்க டிரைலர்கள் ! 



மாலையப்பனின் டிசைன் + நமது டிசைனரின் பட்டி-டிங்கரிங் அட்டைப்படத்தின் உருவாக்கப் பின்னணி ! இது டெக்சாஸ் - மெக்சிக எல்லையில் நடந்தேறும் ஒரு சாகசம் என்பதால் கதையின் மனிதர்கள் மண்டையில் stetson தொப்பிகளோடு அவ்வப்போது திரிவதைக்  காணலாம்! அதே போல இது வரையிலும் வந்த ராபின் கதைகளுக்கு இல்லாத ஒரு புது (அழகு) பாணியில் சித்திரங்கள் இருப்பதையும் பார்த்திட முடியும் ! முடிச்சுகள் ; சிக்கல்கள் என பொறுமையைத் துளியும் சோதிக்காது சீராக - நேர்கோட்டில் செல்லும் ராபினின் பாணியை ரசிக்க முடிந்தது எனக்கு ! 2016-ல் மனுஷனுக்கு கணிசமான வாய்ப்புகள் தந்தே தீருவது என்ற எண்ணத்தையும் எனக்குள் வலுவாக விதைத்துள்ளது ! மேஜர் சுந்தர்ராஜன் பாணியில் சொல்வதானால் - the coming year will see more of this detective ! "டிடெக்டிவ்" என்ற தலைப்பில் நாம் உலாற்றும் இந்த வேளையில் கொஞ்சமாய்த் திரும்பிப் பார்த்து, இது வரையிலும் நாம் சந்தித்துள்ள (காமிக்ஸ்) துப்பறியும் சாம்புக்களைப் பட்டியல் போட்டுப்  பார்த்தாலென்னவென்று தோன்றியது ! அதன் பலனே - இந்த ஞாயிறின் பதிவு ! 

நமது காமிக்ஸ் பிள்ளையார் சுழி மும்மூர்த்திகள் வாயிலாகப்  போடப்பட்டது  என்பதை நாமறிவோம் ; அந்த மூவருமே தத்தம் பாணிகளில் துப்பறிவாளர்களும் கூட என்பதால் நமது பட்டியலின் முதல் 3 பெயர்களும் அவர்களதே ! இரும்புக்கை மாயாவி நிழல்படையின் ஏஜெண்ட் என்ற முறையிலும், லாரன்ஸ்& டேவிட் ஜோடியும் ஏதோ ஒரு வகை அரசு உளவாளிகள் என்பதாகவும், ஜானி நீரோ இங்கிலாந்தின் MI 6 உளவுப் பிரிவின் முன்னாள் ஏஜெண்ட் என்ற ரீதியிலும் இந்தத் "துப்பறிவாளர்" தொப்பிகளுக்கு தகுதி கொண்டவர்களாகின்றனர் ! மாயாவியின் கதைகள் - adventure + கொஞ்சம் fantasy என்ற ரீதியில் பெரும்பாலும் இருப்பினும், ஒவ்வொரு முறையுமொரு இருட்டு அறைக்குள் குந்தியிருக்கும் நிழல் 1 என்ற பாஸ் அவருக்கு உத்தரவுகள் வழங்கிட, இவரும் அதை நிறைவேற்றக் கிளம்புவது ஒரு உருப்படியான ஏஜெண்டின் ஜாடை அங்கே தெரிவது மாமூல் ! அதே போல லாரன்சும், மொட்டை டேவிட்டும் ஒரு குற்றத்தைத் துப்புத் துலக்கும் அக்மார்க் டிடெக்டிவ் ரகத்துக்குள் அடைபடுவதில்லை - ஒரு பெரும் சிக்கல் ; ஆபத்து ; பிரச்சனை என எழும் நேரங்களில் அவற்றை வேரறுக்க புறப்படும் (முதிய) புலிகள் இவர்கள் ! ஜானி நீரோவின் கதையும் கூட இதைப் போலவே தான் -லட்சணமான அந்தக் காரியதரிசியோடு உலகைச் சுற்றி வரும் ஒரு ஜேம்ஸ் பாண்ட் பாணி ஆசாமி என்று சொல்லலாம் ! 

பட்டியலின் முதல் 'அக்மார்க்' டிடெக்டிவ் என்று சொல்வதானால் அது நம் கண்ணாடிக்கார ஆசாமி தான் ! "புதையல் வேட்டை" இதழின் மூலம் அறிமுகமான ரிப் கிர்பி ஒரு தொழில்முறை துப்பறிவாளர் என்பதால் ஒவ்வொரு முறையும் அவரது கதைகளில் ஒரு குற்ற முடிச்சு (சின்னதோ-பெரிதோ) இருப்பது வாடிக்கை ! 1946-ல் உருவாக்கப்பட்டவர் எனும் போது இவர் டெக்ஸ் வில்லருக்கே கூட சீனியர் தான் ! அலெக்ஸ் ரெமண்ட் என்ற அமெரிக்கப் படைப்பாளியின் கைவண்ணத்தில் துவங்கிய ரிப் - தினசரி செய்தித்தாட்களில் சக்கை போடு போட்டதைத் தொடர்ந்து உலகின் பல நாடுகளில் அவரது சாகசங்கள் அறிமுகமாயின ! 1999 வரைத் தொடர்ந்த இந்த ஜென்டில்மேன் டிடெக்டிவ் மொத்தம் 197 சாகசங்களில் இடம் பிடித்துள்ளார் ! புது யுகக் கதைகளின் வருகையைத் தொடர்ந்து நம் இதழ்களில் VRS வழங்கப்பட்ட இவருக்கு இன்னமும் ஆங்காங்கே ரசிகர்கள் இருப்பது நிச்சயம் ! அது சரி - நாம் இது வரை வெளியிட்டுள்ள ரிப் கதைகள் எத்தனையோ ? சரியாக விடை சொல்லும் முதல் நண்பருக்கு ஒரு குட்டியான ரிப் கிர்பி அமெரிக்க (வண்ண) இதழ் நம் அன்பளிப்பாய் இருந்திடும் ! 

பட்டியலின் அடுத்த இடம் பிடிப்பவர் விங் - கமாண்டர் ஜார்ஜ் ! Johnny Hazard என்பது இவரது ஒரிஜினல் பெயர் ! இவரும் அமெரிக்க தினசரி செய்தித்தாட்களின் நாயகரே ; இவரும் கூட ஒரு புராதன ஹீரோவே ! துவக்கத்தில் அமெரிக்க விமானப்படையின் பைலட்டாக அறிமுகம் காண்பவர் பின்னாட்களில் ஒரு இரகசிய ஏஜெண்டாக செயல்படுகிறார் ! 1944-ல் துவங்கிய ஜார்ஜ் 1977 வரையிலும் சாகசம் செய்தான பின்னே ஒய்வு கண்டவர் ! இவரது கதைகளை நினைகூர்ந்திடும் போதெல்லாம் "நெப்போலியன் பொக்கிஷம்" நினைவுக்கு வருவதைத் தவிர்க்க இயலாது எனக்கு ! சரியாக 40 ஆண்டுகளுக்கு முன்பான நமது முத்து காமிக்ஸில் வெளிவந்த இதழ் அது என்று நினைக்கிறேன் ! 

பட்டியலின் ஆறாவது இதழுக்குச் சொந்தக்காரார் ஒரு சூப்பர் டிடெக்டிவ் என்பதில் மாற்றுக் கருத்தே இருக்க முடியாது ! இவரும் அமெரிக்கரே ! ரிப் கிர்பியின் படைப்பாளரான அலெக்ஸ் ரெமண்ட் இங்கும் ஒரு முக்கிய பங்கெடுத்துக் கொண்டார் ! துவக்க நாட்களில் சீக்ரெட் ஏஜெண்ட் X -9 என்று அறிமுகமானவர் பின்னாட்களில் நாமறிந்த பிலிப் காரிகன் என்ற அவதாரம் கண்டார் ! 1934-ல் துவங்கியவர் என்ற வகையில் நம் நாயகர்களின் சூப்பர் சீனியராக இவரைச் சொல்லலாம் ! 1996 வரைத் தொடர்ந்த காரிகனுக்கு adventure + துப்பறியும் பாணி என இரு முகங்கள் உண்டு என்பதாலோ என்னவோ - அவரது கதைகள் இங்குமன்றி ; அங்குமன்றி இருப்பது போலொரு உணர்வுக்கு இடமளித்தன ! பலன் ? சுமார் 60 ஆண்டுகள் ஒடியதெனினும் "ஆதர்ஷ நாயகர் என்ற பெயரை ஈட்ட அவருக்கு சிரமாகவே இருந்து வந்துள்ளது ! "வைரஸ் X " ; "கடலில் தூங்கிய பூதம்" போன்ற அதிரடிகளால் நம் ஞாபகங்களில் காரிகன் இடம்பிடிப்பினும் ஒரு mass hero என்ற நிலையை எட்டினாரா என்பதை எனக்கு சொல்லத் தெரியவில்லை ! What say folks ?

அடுத்த துப்பறிவாளர் Fleetway -ன் ஜான் சில்வர் ! இவரும் கூட ஒரு விமானியே எனினும் அவரைப் பதவி நீக்கம் செய்து விட்டு, அதையே பகடைக் காயாகப் பயன்படுத்தி வேலை வாங்கும் உளவுத் துறையும் இங்கு தலைகாட்டுவதால் ஜான் சில்வரும் இங்கே இடம்பிடிக்கிறார் ! ஒரிஜினலாய் இவரும் கூட ஒரு JH தான் ; இவரது ஒரிஜினல் பெயர் JOHN HAVOC ! இவரது கதைகள் முத்து காமிக்ஸில் கொஞ்சமும், பின்னாட்களில் மேத்தா காமிக்ஸில் நிறையவும் வெளியாகின என்பது 30 ஆண்டுகளுக்கு முன்பான "வரலாற்றுக் குறிப்புகள்" !! 

முத்து காமிக்ஸின் முதல் பிரான்கோ-பெல்ஜிய நாயகர் என்ற பெருமைக்குச் சொந்தக்காரர் தான் நமது லிஸ்டின் அடுத்த நபர் ! 1969-ல் உருவாக்கப்பட்ட ஜெஸ் ஒரு போலீஸ்காரர் என்ற முறையில் துப்பறியும் களப் பணிகளில் ஈடுபடும் ஒரு அமைதியான ஆசாமி ! வாயில் பைப் ; மேலே ஒரு ஓவர்கோட் என்பதே இவரின் அடையாளங்கள் ! (ரிப் கிர்பியை அவ்வப்போது நினைவுபடுத்துவது நிஜமே !!) ஜில் ஜோர்டான் கதைகளுக்கு சித்திரங்கள் போட்ட மாரிஸ் டிலோ தான் இந்தத் தொடரின் துவக்கக் கதைகளுக்கும் ஓவியங்கள் போட்டவர் ! 1996 தான் இவருக்கும் ஒய்வு வழங்கப்பட்ட ஆண்டு ! (அது என்ன - நிறைய டிடெக்டிவ் கதைகள் 1990-களின் மத்தியில் 'மங்களம்' கண்டுள்ளன ?? புது பாணிகளுக்கு ஈடு தர இயலாமையா ??)  
JESS LONG

இரகசிய ஏஜெண்ட்கள் பற்றிய பட்டியலானது - எஜென்ட்களுக்கெல்லாம் 'தல' யான 007-ஐ சேர்த்திடாது முழுமை பெறுமா - என்ன ? Yes ; 1970-களின் அசைக்க இயலா டாப் நாயகராய் உலகெங்கும் உலவிய ஜேம்ஸ் பாண்ட் தான் நமது பட்டியலில் அடுத்தவர் ! பிரிட்டிஷ் உளவுத்துறையின் தலைசிறந்த ஏஜெண்ட் ; "கொல்லும் லைசன்ஸ்'-க்குச் சொந்தக்காரராகிய இவர் நம்மிடம் செய்த சாகசங்களை விட ராணி காமிக்ஸில் செய்த அதிரடிகள் ஜாஸ்தி ! அதனாலேயே என்னவோ - அன்னார் மீது எனக்கொரு லைட்டான கடுப்பு உண்டு ! தினசரிகளில் தொடராய் ; முழுநீளக் கதைகளாய் ; திரைப்படங்களின் தழுவல்களாய் 007-ன் சாகசங்கள் உலகெங்கும் வெளியாகியுள்ள போதிலும், நமது மார்கெட்டில் தினசரிகளின் தொகுப்புகளே பெரும்பாலும் வெளியாகியுள்ளன ! திரையின் மாயத்தை காமிக்ஸில் 007 கொண்டு வருவதில் வெற்றி கண்டாரா என்பது மில்லியன் டாலர் கேள்வியே ! 

பட்டியலில்  பத்தாவது  இடம்  ஒரு  பேய் வீரருக்கே ! சொல்லப் போனால் இந்த ஆசாமியின் உருவாக்கம் 18-ஆம் நூற்றாண்டில் என்ற விதத்தில் இவருக்கே பேயாகப் புளிய மரங்களில் உறையும் வயசு தான் !! இங்கிலாந்தில் 1893-ல் துவங்கியவை செக்ஸ்டன் பிளேக்கின் சாகசங்கள். ஆரம்பத்தில் நாவல்களை அறிமுகம் கண்டவர் மிகப் பிரபல்யமானதைத் தொடர்ந்து காமிக் நாயகராகவும் புரமோஷன் கண்டார் ! Fleetway இவரது கதைகளை தொடர்களாய் வாரம்தோறும் வெளியிட, நாம் அவற்றில் சிலவற்றை '80 களின் இறுதிகளில் வெளியிட்டோம் ! பின்னாட்களில் "விக்டர் டிராகோ" என்ற பெயரோடு தொடர்ந்த இவரது கதைகள் நிஜமான டிடெக்டிவ் த்ரில்லர்ஸ் என்று சொல்லலாம் ! திரைப்படங்களாகவும் ; நிறைய டி.வி. சீரியல்களாகவும் களமிறங்கியுள்ள செக்ச்டனை நாம் போதிய அளவு பயன்படுத்திடவில்லை என்பதே நிஜம் ! 

தொடரும் ஆசாமியும் Fleetway-ன் குழந்தையே ! ஏஜென்ட் ஜான் ஸ்டீல் இரண்டாம் உலக யுத்தப் பின்னணியில் சாகசம் செய்யத் துவங்கிய மனுஷன்; பின்னாட்களில் ஒரு தனியார் துப்பறிவாளராய்  அவதாரம் கண்டார் ! பக்கத்துக்கு இரண்டே கட்டங்கள் என்ற அந்த classic பாணியில் அழகான சித்திரங்களோடு Thriller Library என்றதொரு கதைவரிசையில் நயமாக இவரது கதைகள் இங்கிலாந்தில் வெளியாகின. SPY 13 என்ற பெயரில் தொடங்கி, பின்னாட்களில் ஜான் ஸ்டீல் என மாற்றம் கண்டு ; பச்சக் என என்றோ ஒரு சமயம் ஜான் ஹேவக் என்ற பெயரையும் தாங்கிக் கொண்டு நடமாடத் தொடங்கியவர் இவர் ! முத்து காமிக்ஸில் இவரை நாம் அவ்வப்போதும், திகிலில் ஒரு முறையும் சந்தித்துள்ளதாய் ஞாபகம் ! லயனில் கூட 1990's-ல் எட்டிப் பார்த்திருப்பார் ! 

டிடெக்டிவ்களின் பிதாமகரே இன்றைய பயங்கரப் பன்னிரண்டு பட்டியலின் இறுதி ஆசாமி ! சர். ஆர்தர் கொனன் டாயிலின் அமர படைப்பான ஷெர்லாக் ஹோல்ம்ஸ் தான் இந்த வாரப் பதிவை நிறைவு செய்யும் துப்பறிவாளர் ! நாவல்களை உலகை இன்று வரை மெய்மறக்கச் செய்து வரும் ஷெர்லாக் கதைகளும் தினசரி ஸ்ட்ரிப்களாய் ; முழுநீளக் கதைகளாய் ;கிராபிக் நாவல்களாய் உலகெங்கும் பிரசித்தம் கண்டுள்ளன ! நாம்'90 களில் வெளியிட்டவை தினசரிகளின் தொகுப்புகளே ! ஒரிஜினல் டிடெக்டிவ் என்ற பட்டத்துக்கு 100% பொருத்தமான இவரது ஆல்பங்கள் பிரான்கோ-பெல்ஜியப் படைப்பாளிகளின் கைவன்னங்களிலும் அட்டகாசமாய் வெளிவந்துள்ளன ! உங்களுக்கு ஆர்வமிருப்பின் அவற்றையும் நாம் முயற்சிக்க முயற்சிக்கலாம் ! What say all ?

இன்னமும் ஒரு டஜன் துப்பறிவாளர்கள் நமது காமிக்ஸ் பட்டியலில் காத்திருப்பினும், கர்ஜிக்கும் என் வயிறு அவர்களை அடுத்த ஞாயிறுக்கு ஒத்திப் போடச் சொல்லி ஏகமனதாய் தீர்மானம் போட்டுள்ளது ! So - 'பயங்கரப் பன்னிரண்டு' படலம் அடுத்த வாரமும் தொடரும் ! அது வரையிலும் இன்றைய இந்தப் பதிவில் ஆங்காங்கே நான் எழுப்பியுள்ள கேள்விகளுக்கு உங்களின் அபிபிராயங்களை / பதில்களைப் பகிர்ந்தால் சந்தோஷமே !

மார்ச்சின் புது இதழ்கள் மூன்றும் பைண்டிங்கில் உள்ளன ! மேலோட்டமாய் அவற்றை சரி பார்க்கவும்  ஒரு நாள் அவகாசம் எடுத்துக் கொண்டு புதனன்று கூரியரில் மொத்தமாய் அனுப்பிடவுள்ளோம் ! So வியாழன்று ஒற்றைக்கையரையும். தளபதியையும் சந்திக்கலாம் ! அது வரை bye folks ! See you around !