Sunday, July 18, 2021

பதிலைத் தேடி....!

 நண்பர்களே,

வணக்கம். புது இதழ்கள் வெளியாகிய முதல் வாரத்தில் எப்போதுமே நிலவும் அமைதியைப் பார்க்கும் போது தான் "ஒரு தோழனின் கதை" மாதிரியான இதழ்களை அவ்வப்போது களமிறக்கணுமோ ? என்று தோன்றுடிவதுண்டு ! போன மாசம் இதே நேரத்தில் சும்மா தளமே கொதிநிலையில் இருக்க - For & Against என அலசல்கள் தூள் பறத்திக் கொண்டிருந்தன ! But இம்மாதமோ சர்ச்சைக்குரிய சமாச்சாரங்களெனில், அது பாத்திமாவின் ஆடை / ஆடையின்மை மட்டுமே தான் என்பதே நிலவரம் ! 

ஜேம்ஸ் பாண்ட்  கதைகளினில் எப்போதுமே பெண் பாத்திரங்களிடையே  துணிப்பஞ்சம் தலைவிரித்தாடுவதுண்டு தான் ; இம்முறையோ அம்மணி முற்றும் துறந்ததொரு மோன நிலையினில் உலவிட்டதால், அவரை அவர் போக்குக்கு விட்டு விட்டேன் ! இக்கட எனக்கொரு கேள்வி ! In fact இந்தக் கேள்வியினை அடுத்தாண்டின் அட்டவணை சார்ந்த கேள்விகளாய்க் கேட்டு வந்த (லாக்டௌன்) மே மாதமே கேட்டிட நினைத்திருந்தேன் தான் ; ஆனால் இந்த B & B ஸ்பெஷல் வெளியான பின்னே அதைக் கேட்டால் சற்றே பொருத்தமாயிருக்கும் என்று நினைத்தேன் ! So இதோ - அந்த இதழ் உங்களை எட்டிவிட்ட நிலையில் எனது கேள்வி(கள்) :

நிஜத்தைச் சொல்வதானால் - க்ளாஸிக் 007 கதைகளில் தென்படும் புராதனம், ஹைதர் அலி காலங்களை நினைவூட்டுவது போல்பட்டது எனக்கு ! இயன் பிளெமிங்கின் 007 நாவல்களின் சகலத்தையும் வாசித்திருப்போர்க்குத் தெரியும் - இந்தத் தொடரின் முதுகெலும்பே நேச நாடுகள் vs கம்யூனிச ரஷ்யா என்ற உரசல் நிகழ்ந்து வந்த பனிப்போர் நாட்களே என்பது ! அமெரிக்கா ; இங்கிலாந்து இத்யாதி என்றான மேற்கத்திய நாடுகள் நல்லவர்களாய், வல்லவர்களாய் வலம் வர, மர்மமான இரும்புத் திரைக்குப் பின்னுள்ள ரஷ்யர்கள் தெறிக்க விடும் வில்லன்களாய் அந்நாட்களில் பார்க்கப்பட்டதை பாண்ட் கதைகளில் அப்பட்டமாய்ப் பார்த்திட முடியும் ! ஆனால் இன்றைக்கோ  பாயசத்தில் போட்டுப் பிசைந்து சாப்பிடும் அப்பளம் ரேஞ்சுக்கு ரஷ்யாவே துக்கடா துக்கடாவாகி இருக்க, அந்தப் பனிப்போர் தினங்களெல்லாம் போயிண்டே ! So மாறியுள்ள உலக அரங்கினுள் ; மாறியுள்ள விஞ்ஞான உலகினில், இன்னமும் நமது க்ளாஸிக் நாயகர் செய்யும் அந்தக்காலத்து லூட்டிகள் ஜெர்க் அடிக்கச் செய்வது என்னை மட்டும் தானா - தெரியலை !! ஒரு திரைசீலையைக் கொண்டு முக்காடைப் போட்டுவிட்டு ஒரு உறுமும் முரட்டுப் புலியைச் சார்வாள் சமாளிப்பதையெல்லாம் எடிட் செய்யும் போது நாற்காலியை இறுகப் பற்றிக் கொள்ள வேண்டியிருந்தது எனக்கு - சிரிப்பில் எதையாச்சும் செய்து தொலைக்கப்படாதே என்று ! In contrast - இன்றைய அந்த ஜேம்ஸ் பாண்ட் 2.0 version செம ஸ்டைலாய் ; செம சமகாலத்து பாணிகளில் ; சமகாலத்து வில்லன்களோடு பொருதுவதெல்லாம் நெருடல்களேயின்றி வாசிக்க / ரசிக்க முடிகிறது - at least என்னளவிற்கு !  அந்த சமகாலத்து பாண்டையும், பாட்டையா காலத்து பாண்டையும் ஒப்பீடு செய்ய நினைப்பது அபத்தம் என்பது புரிகிறது ; so எனது கேள்வி அத்திக்கில் இல்லை ! 

நான் கேட்க நினைப்பதெல்லாம் very simple : இத்தோடு 4 க்ளாஸிக் பாண்ட் கதைகள் போட்டாச்சு - கடந்த ஒரு வருஷம்+ அவகாசத்தினில் (பட்டாம்பூச்சிப் படலம் ; விண்ணில் ஒரு வேதாளம் ; டாக்டர் நோ & இம்மாதத்து ஹாட் ஷாட்) So ஓரளவிற்கு நமது கையாளலில் இந்த பாண்டாரைப் பார்த்து விட்டாச்சு எனும் போது tell me please : 

1.இவரது கதைகள் வரும் ஆண்டுகளிலும் தொடர்வது ஓ.கே தானுங்களா folks ? 2022-ன் அட்டவணை 95 சதவிகிதம் நிறைவு கண்டுவிட்டுள்ள நிலையில் - this could be the last piece of the puzzle ! 

2.ஓ.கே. எனில் - இந்த பாண்ட் + பிளைசி  பார்முலாவே தொடரட்டுமா ? லேடி 007 & ஒரிஜினல் 007 அமைத்துள்ள இந்தக் கூட்டணி ரசிக்கின்றதா ?

மாடஸ்டிக்கு slot உறுதி என்ற நிலையில் அவரது கதையெல்லாம் வந்தாச்சு ! க்ளாஸிக் பாண்ட் பற்றிய உங்களின் எண்ணங்கள் மட்டும் தெரிஞ்சிடும் பட்சத்தில், அடுத்து என்ன செய்வதென்று தீர்மானிக்கலாம் ! Of course பழமைக்கு பெரிய 'ஜே' போடும் நம் மத்தியில், சிலருக்கு இந்தக் கேள்வியே குடாக்குத்தனமாய்த் தோன்றிடலாம் தான் ; ஆனால் கேட்டு வைப்பதில் தப்பில்லை ; மிஞ்சிப் போனால் ஒரு முட்டுச் சந்து தானே ? ஆகையால் - சொல்லுங்கண்ணே ; சொல்லுங்க !

இம்மாதத்து மீதக் கதைகளினில், கேள்விகளும் சரி, பெரிதாய் அலசல்களும் சரி, இருந்திட இயலாதென்பது எனது யூகம் ! Of course பாயசம் போட எண்ணிடும் வல்லுநர்கள் எதையேனும் குறை கண்டுபிடிக்காது விட மாட்டார்கள் தான் ; ஆனால் "பிரளயப் பயணம்" as near a perfect entertainer as possible - எனது பார்வையில்  ! டெக்ஸ் & full டீம் ஒரு சாகஸத்தின் முழுமையிலும் வலம் வந்தாலே அது தெறி ஹிட் என்பது ஒரு எழுதப்படா விதி ; அதிலும் இங்கே ஒரு வித்தியாசப் பின்புலத்தில், வித்தியாச எதிரியோடு டீம் மோதுவது எனும் போது 220 பக்கங்கள் 20 நிமிடங்களில் கரைந்திடுவது சாத்தியமே ! And வழக்கமான கார்சனின் லூட்டிகள் இம்முறை ஒரு மிடறு தூக்கல் எனும் போது  பாயசம் போடுவோர்க்குமே ஆயாசம் எழுந்திராதென்பேன் ! இதற்கு முந்தைய "நெஞ்சே எழு" ஆல்பமும் சரி, பிரளயப்பயணமும் சரி, வெகு சமீபப் படைப்புகள் என்பதால் இனி வரும் நாட்களில் ரொம்பவே பின்னோக்கிய கதைக்குவியல்களுக்குள் துழாவுவதன் சதவிகிதத்தை சற்றே குறைச்சலாக்கிக் கொள்வதில் தப்பில்லை என்று தோன்றுகிறது ! And 2022 அட்டவணையினில் கணிசமாகவே 'தல' & டீமின் புது சாகசங்கள் இடம் பிடிக்கின்றன என்பது ஒரு தற்செயலான highlight-ம் கூட ! அப்புறம் இம்முறை அந்த லாக்டௌன் நாட்களில் 'தல' சார்ந்த கேள்விகளுக்கு நீங்கள் தந்த பதில்களுள் பெரும்பான்மை அட்டவணையினில் நடைமுறை கண்டுள்ளன ! So அட்டவணை வெளியாகிடவுள்ள அக்டோபர் 15-ல் நீங்கள் மகிழ்ந்திடக் கூடுதலாயொரு காரணமும் இருந்திடும் !

Moving on to லக்கி லூக் - கலரில், அந்தப் பிரியத்துக்குரிய பார்ட்டிகளோடு ஓட்டமெடுக்கும் கதைகள் என்றென்றும் சோடை போயிடாது என்பதில்  எனக்கு அசைக்க முடியா நம்பிக்கை உள்ளது ! ஆனால் இங்கும் எனக்கொரு கேள்வி உண்டு - இத்தொடரின் மீதானதொரு பொதுவான பார்வையினில் ! நெட்டிலோ, இங்கிலீஷ் புக்சிலோ, லக்கியின் முழுமையினையும் வாசித்திருக்கக்கூடிய நண்பர்களுக்கு நான் சொல்ல வரும் சமாச்சாரம் புதிதாய் இராது தான் :

லக்கி தொடரினில் முதல் ஒரு டஜன் கதைகளில் சித்திர பாணி ரொம்பவே பழைய ஸ்டைல் ! லக்கியும் சரி, இன்ன பிற ஆசாமிகளும் சரி, நாம் தற்சமயம் பார்த்திருக்கும் மிடுக்கினில் இருப்பதில்லை ! இது வரையிலும் நாம் வெளியிட்டுள்ளவை 42 லக்கி ஆல்பங்கள் (என்று நினைக்கிறேன்) So தொடரினில் ஒரு கணிசமான பகுதியைப் போட்டுத் தாக்கியுள்ள நிலையினில் கொஞ்சம் கொஞ்சமாய் அந்தத் துவக்க டஜனுக்குள்ளேயும் பயணிப்பதா ? வேண்டாமா ? என்ற கேள்வி உள்ளுக்குள் ஓடுகிறது !  எனது குடைச்சலுக்கு இன்னொரு காரணமும் உள்ளது ! ஒரிஜினல் படைப்பாளிகளான மோரிஸ் & காஸினி இயற்கை எய்திய பின்னே, கதைப் பொறுப்பேற்றிருக்கும் புது டீமுக்கு நகைச்சுவைகள் அத்தனை சுகப்பட மாட்டேன்கின்றன !  So தொடரின் பின்பகுதியினில் வெளியாகிய "பாரிசில் ஒரு கௌபாய்" மாதிரியான  ஆல்பங்களுள் ஹ்யூமரை கொணர நாக்குத் தள்ளுகிறது ! So துவக்கத்து ஒரு டஜன் புராதனைச் சித்திரங்களுடன் ; பின்பகுதியில் சுமார் பத்தோ , பன்னிரண்டோ மித ஹ்யூமர் கதைகளுடன் என்ற நிலையில் இருக்க, நாம் என்ன செய்யலாம் என்பீர்கள் guys ?

*சிறுகச் சிறுகப் பழசுக்குள் பூந்துக்கலாமா - அந்த ஆர்ட்ஒர்க் பழகிக்கொள்ளும் என்ற நம்பிக்கையினில் ?

அல்லது

*நவீன பாணியிலான கதைகளோடு travel பண்ணுதல் தேவலாம் என்பீர்களா ? 

இதோ - அந்த ஆரம்ப டஜனின் கதைகளை பார்த்திரா நண்பர்களின் பொருட்டு ஒரு சாம்பிள் :

அப்புறம் சில updates :

1.இரத்தப் படலம் புக் # 1 அட்டகாசமாய் பிரிண்ட் ஆகியாச்சு ! புக் # 2-ல் மூன்றில் ஒரு பங்குமே அச்சு done ! புதன் கிழமைக்கு அதன் மீதமும் நிறைவுற்றிடும் ! ஏற்கனவே அட்டைப்படங்கள் பிரிண்ட் ஆகி விட்டன எனும் போது இனி பைண்டிங்கில் நிதானமாய் பணிகள் நடக்க அனுமதிப்பது மட்டுமே நமது வேலையாக இருந்திடும் ! So ஆகஸ்ட் புது புக்ஸ்களை அனுப்பிய சற்றைக்கெல்லாம் இவற்றையும் கிளப்பிடவுள்ளோம் !   

2. SMASHING '70s முன்பதிவுகள் going on at a fair clip !! மூன்று மாத  அவகாசத்துக்குள் எல்லையைத் தொட்டு விடலாமென்றே தோன்றுகிறது ! Fingers crossed !!

3. லயன் 400 இதழுக்கு 'தல' அட்டைப்படம் செம மாஸாக அமைந்திருப்பதாய் எனக்குத் தோன்றியது ! அந்த நகாசு வேலைகள் வரும் வாரத்தில் நடைபெறவுள்ளன ; நிச்சயமாய் புக்காக்கிப் பார்க்கும் போது செமத்தியாக இருக்குமென்று தோன்றுகிறது !

And before I sign out - இதோ நமது மீம்ஸ் டீமின் ரகளைகள் !! முதல் 5 மீம்ஸ் கரூர் டாக்டர் பார்த்தீபனின் கைவண்ணம் & இறுதியானது நண்பர் MKS ராம் !






MKS Ramm :

Bye all...have a cool Sunday ! See you around !

Wednesday, July 14, 2021

ஜித்தர்களின் ஜூலை !

 நண்பர்களே,

வணக்கம். க்ளாஸிக் 4 நாயகர்கள் கடந்த சில நாட்களாய் ஒளிவட்டத்தை ஆக்கிரமித்துக் கொள்ள - its now time for us to go back to normal ! "அப்டிக்கா ஓரமாப் போயி விளையாடுங்க கண்ணுகளா !" என்று 'பெருசுகளிடம்' சொல்ல புதுயுகத்தார்கள் நேற்றைக்கே கூரியரில் புறப்பட்டு விட்டார்கள் ! Yes, ஜூலையின் அதிரடிப் பார்ட்டிகள் இன்றைக்கு உங்கள் இல்லக்கதவுகளைத் தட்டிட உள்ளார்கள் ! 

இம்மாதம், யார் - எந்த இதழிலிருந்து வாசிப்புகளைத் துவக்கிடவுள்ளனர் ? என்பதே ஒரு ஜாலியான சமாச்சாரமாகிடக்கூடும் என்பேன் ; becos கார்ட்டூன் மேளா ; கௌபாய் அதிரடி ப்ளஸ் க்ளாஸிக் நாயகர் + நாயகி என்ற இந்த காம்போவினில் ஜனரஞ்சகத்தின் சகல முகங்களும் உள்ளன ! ஏற்கனவே நமது ஏஜெண்ட்கள், இம்மாத இதழ்களுக்குக் குஷியாய் ஆர்டர் தெரிவித்திருப்பதே அந்த ஜனரஞ்சகத்தின் தொடர்ச்சியாக எனக்குத் தென்பட்டது ! And நேற்றிரவு ஆன்லைன் லிஸ்டிங் போட்ட சற்றைக்கெல்லாமே அங்குமே ஒரு வேகம் தென்பட்டது ! So அத்தி பூத்தாற் போல ஒரே மாதத்தில் களமிறங்கிடும் இந்த ஜாம்பவான்களுடன் நீங்கள் அன்னம் தண்ணீர் புழங்க உள்ளதை தரிசிக்க ஆவலாய் வெயிட்டிங் !

அதிலும் சில பல மருத்துவர்களும், தொழிலதிபர்களும் ஆங்காங்கே, வேக வேகமாய் ஐப்ரோ பென்சில்களை வாங்கியாந்து மீசைகளுக்கும், புருவங்களுக்கும் உரம் ஏத்திய கையோடு -  "இன்னிக்கு ஆசுபத்திரி லீவுங்கோ ; ஆபீசுக்கு ஜூட்டுங்கோ !" என்ற போர்டுகளை மாட்டிடும் அழகைப் பார்க்க  தொலைநோக்கிகள் கிடைக்குமாவென்று அமேசானில் தேடிக் கொண்டிருக்கிறேன் ! இம்மாதத்து இளவரசி நிச்சயம் சோடை போக மாட்டாரென்பதால் ஜமாயுங்கோ gentlemen ! 

And இதோ - இம்மாத இதழ்களுக்கென நமது IT டீமின் நண்பர் கிரி அனுப்பியுள்ள போஸ்டருடன் ஆன்லைன் லிஸ்டிங்கின் links : 

https://lion-muthucomics.com/home/847-2021-july-pack.html

https://lioncomics.in/product/2021-july-pack/

Happy Shopping.....Happier Reading folks !!



Monday, July 12, 2021

தேர் இழுக்கும் தருணமிது !

 நண்பர்களே,

வணக்கம். 'நான் எதிர்பார்த்தது போலவே உங்களின் ரியாக்ஷன்ஸ் அமைந்து விட்டன guys' - என்றெல்லாம் நிச்சயமாய்ப் புளுகிட மாட்டேன் ! வேண்டுமானால் - "மனசுக்குள் நான் ஆசைப்பட்டது போலவே உங்களின் ரியாக்ஷன்ஸ் அமைந்து போனதில் செம ஹேப்பி guys !' என்று சொல்லலாம் - ஏனெனில்  அது தான் நிஜம் ! 

கிளாசிக்சில் வேதாளர் கதைகளுக்கு கணிசமான வரவேற்பு இருந்திடுமென்பதை யூகிக்க பெரிய ஆற்றலெல்லாம் தேவைப்பட்டிருக்கவில்லை  & அடிப்படையில் நானுமே வேதளாரின் செம ரசிகனே எனும் போது, அவரின் கதைகளைத் தேடி ஓடியதில் எனக்கு மகிழ்வே ! இந்த காமிக்ஸ் பயணம் ; இந்த எடிட்டர் குல்லா என்றெல்லாம்  வாழ்க்கை என்னை எங்கெங்கோ இட்டுச் சென்றிடலாம்  ; ஆனால் இவற்றிற்கெல்லாமே துவக்கப் புள்ளி - ரொம்பச் சின்ன வயதினில் வேதாளரை ஆராதித்ததே என்பேன் ! வேதாளர் அணிந்திடும்  அந்த நிஜாரைப் போலவே என்னிடம் ஒன்று  அந்நாட்களில் இருந்ததும் சரி, இப்படியும், அப்படியுமாய் ஒரு துப்பாக்கியைச் செருகிக் கொண்டு வீட்டுக்குள்ளேயே டெங்காலியின் கானகங்களை உருவகப்படுத்திக் கொண்டு திரிந்ததும் சரி - பால்யத்துப் பசுமைகள் ! In fact அந்த BBC பேட்டியின் போது அவர்கள் ரொம்பவே கிண்டிக் கிழங்கெடுத்தது எனது அந்த Phantom நினைவலைகளைப் பற்றியே ! So வேதாளர் ஆல்பத்தினைத் திட்டமிட்ட போது, எப்படியும் கரை சேர்ந்திடுவார் என்ற நம்பிக்கை  இருந்தது !

ஆனால் இதர நாயகர்களை நீங்கள் எவ்விதமாய் அணுகிடுவீர்களோ ? என்றெல்லாம் உறுதிபடச் சொல்லத் தெரிந்திருக்கவில்லை எனக்கு ! கொஞ்ச காலம் முன்பு வரை நானே இவர்களைக் கண்டு தெறித்து ஓடியவன் தான் எனும் போது - ஆண்டவன் மேல் பாரத்தைப் போடுவதே எனக்கான வழியாய்ப் பட்டது ! But உங்களின் அந்தப் பழமைக் காதலை நான் இன்னமுமே சரியாகப் புரிந்து கொள்ளவில்லை என்பதை நேற்றும், இன்றும் எனக்கு உணர்த்தி விட்டீர்கள் guys ! எல்லாவற்றையும் விட - என்னை நிஜமாகவே மலைக்கச் செய்துள்ள விஷயம் - இங்கே பதிவாகியுள்ள வோட்டுக்களின் FOR & AGAINST விகிதாச்சாரமே ! Maybe ஒரு நாலைந்து நண்பர்கள் தவிர்த்து - பாக்கி அனைவருமே இந்த Smashing '70s அணிக்கு வோட்டுக்களைக் குத்தோ குத்தென்று குத்தியுள்ளது, எனது ஆந்தை விழிகளை - திருஷ்டி பொம்மையில் வரையப்பட்டிருக்கும் பூதத்தின் விழிகளின் அளவுக்கு விரிய வைத்துள்ளது ! நம்மில் பெரும்பான்மைக்கு பால்யங்களும், அந்நாட்களில் வாசிப்புகளும் ஒரு விடைதர இயலா சமாச்சாரம் என்பது தெரிந்த விஷயம் தான் ; ஆனால் அதன் பரிமாணம் இத்தனை ராட்சஸத்தனமானது என்பதை இத்தனை காலமான பின்னேயும் யூகிக்கத் தெரிந்திருக்கவில்லை எனக்கு ! So அந்த மே மாதத்தின் லாக்டௌன் தினங்களை ; நித்தமும் ஒரு பதிவென்று விளையாட்டாய் ஆரம்பித்ததை, எப்படி எப்படியோ பயணித்து, நம் பயணம் சார்ந்த நிறைய விஷயங்களைத் தெளிவு செய்திட அது உதவியதை - குருட்டு அதிர்ஷ்டம் என்று தான் சொல்ல வேண்டும் ! இல்லையெனில் - 2022 என்ற மைல்கல்லினை, என்ன தான் புதுசுகளாலும், பட்டுக்களாலும் நான் அலங்கரித்திருந்தாலுமே, உங்களின் பெரும்பான்மையிடம் முழுமையான அங்கீகாரங்களைப் பெற்றிராதே போயிருப்பேன் போலும்  ! Not that இப்போது இந்த ஒற்றை அறிவிப்போடு எனது பாடெல்லாம் தீர்ந்தது ; இனி விக்ரமன் சார் படத்தின் க்ளைமாக்ஸ் போல - சந்தோஷப் பாடல்கள் பாடிடலாம் என்ற பகற்கனவெல்லாம் கிடையாது ! In fact ஆண்டின் இந்த இரண்டாம் பாதியில் காத்திருக்கும் சவால்களையும், பணிகளையும் , பொறுப்புகளையும் பார்க்கும் போது மடக் மடக்கென்று தண்ணீரைக் குடிக்கத் தான் தோன்றுகிறது ! 

இதோ  :

  • அடுத்த மாதத்துக்கென லயன் 400  &
  • இரத்தப் படலம் மெகா இதழ்கள்  !
  • தொடர்ந்திடவுள்ள செப்டெம்பர் to டிசம்பர் என்ற 4 மாதங்களினில், 13 இதழ்கள் & அவற்றினுள் ஒரு "தீபாவளி மலர்" !
  • இடையினில் ஏதேனும் ஆன்லைன் புத்தக விழாவினை நடத்திடும் பட்சத்தில் - அதற்கென ஏதேனுமொரு எக்ஸ்டரா நம்பர் !
  • And ஜனவரியில் 50-வது ஆண்டுமலரின் மெகா பணிகள் + வேதாளர் 208 பக்க மெகா தொகுப்பு 

இப்போவே கண்ணைக் கட்டுதே என்று சொல்லத் தோன்றினாலும், உங்களின் புண்ணியங்களில் கொஞ்சம் சீக்கிரமே நான் சுதாரித்துக் கொள்ளமுடிந்துள்ளதால், பணியாற்ற ஓரளவுக்கு அவகாசம் கிட்டியுள்ளது ! இதற்குமே அந்த லாக்டௌன் தினங்களின் தினசரி ரகளைகளுக்குத் தான் நன்றி சொல்லிட வேண்டி வரும் ! 

And இதோ - நாளைக்கு முத்து ஆண்டுமலரின் கதைகளின் டிஜிட்டல் கோப்புகள் அனைத்தும் ஏக் தம்மில் அணிவகுத்து நமது மெயில் பாக்ஸை தெறிக்க விடவுள்ளன ! இத்தனை நாட்களாய் வெறுங்கையால் போட்டு வந்த முழத்தினை இனிமேல் கதைகளின் கோப்புகளில் போட ஆரம்பித்தால் - தேர் நகரத் துவங்கியிருக்கும் ! அதனோடு வேதாளரையும் சேர்த்தே இழுத்திட வேண்டி வருமெனும் போது - அடுத்த 6 மாசங்களுக்கு நீங்களுமே 'தம்' கட்டித் தயாராக இருந்திட வேண்டி வரும் folks ! ஏனெனில் காத்திருப்பது ஏப்பசாப்பையான தேரே அல்ல : திருவாரூர் தியாகேசரின் ஆழித் தேரின் பிரம்மாண்டத்தை ஆராதிக்க எண்ணிடுமொரு காமிக்ஸ் தேர் ! If ever there was a time for us all to pull together - இதுவே அது !! 

செவ்வாயன்று ஜூலை இதழ்கள் கூரியர்களில் பயணங்களைத் துவக்கிடும் ! And புதன் முதல் இந்த SMASHING '70s ஆன்லைன் லிஸ்டிங்களை  நம்மவர்கள் செய்திடுவார்கள் ! So பிஸியான உங்களின் இந்த நாட்களின் மத்தியில், நம்ம பொம்ம புக்குக்கும் நேரம் ஒதுக்கிடக் கோரியபடியே  இப்போதைக்குக் கிளம்புகிறேன் folks !! ஐயாயிரத்துச் சொச்சம் விலைக்கு ஒரு மாதம் முன்னே அமேசானில் ஆர்டர் செய்திருந்த வேதாளர் மெகா புக் சரியாக இன்றைக்கு மதியம் தான் கைக்கு கிட்டி !! So அதனுள் தொபுக்கடீரென குதிக்கக் கிளம்புகிறேன் ! பார்க்கப் பார்க்க கடைவாயெல்லாம் ஜலம் ஓடச்செய்திடும் அந்த அசாத்தியத் தரத்தினில் ஒரு பாதியைத் தொட்டுப் பிடிக்க நாம்  முனைந்தாலே இந்த ஜென்மம் சாபல்யம் கண்டிருக்கும் ! Fingers crossed !

Bye all....See you around !  Have a lovely week ahead !

Saturday, July 10, 2021

முன்னாடி...பின்னாடி...பின்னாடி..முன்னாடி...!

 நண்பர்களே,

Caution : நெடும் பதிவு ahead !!

வணக்கம். கதை சொல்றது தான் நம்ம வேலை… ஆனால் அந்தக் கதைகளுக்குப் பின்னாடியும் கதை(கள்) இருப்பது தான் சுவாரஸ்யமே! So let me tell you a குட்டி ஸ்டோரி…

1974 என்று ஞாபகம்!

நம்ம வயசிலான “பழங்களைத்” தவிர்த்து இங்குள்ள “யூத்படைக்கு” அந்த வருஷமோ; அந்நாட்களது நடப்புகளோ தெரிந்திருக்க வாய்ப்பிராது தான்! வரலாறு காணா அரிசித் தட்டுப்பாடு தலைவிரித்தாடிய நாட்கள் அவை! உலகின் வல்லரசுகளிடம் இந்தியா பிச்சைப் பாத்திரம் ஏந்தியது அந்நாட்களின் சோகம்! அந்தத் தட்டுப்பாடுகளின் பலனாய் பல அதிரடி அரசு உத்தரவுகள் அமலுக்கு வந்தன! கல்யாண வீடுகளில் அரிசிச் சாப்பாட்டு விருந்துக்கு கட்டுப்பாடுகள் விதிக்கப்பட்டன! ‘இத்தனை பேர் தான் சாப்பிடலாம்; அதற்கு மேல் பந்தியில் பரிமாறினால் அதிகாரிகள் ஆப்படிச்சிடுவார்கள்; கபர்தார்!‘ என்று பிள்ளையைப் பெற்ற புண்ணியவான்களுக்கு அறிவுறுத்தப்பட்டது! ‘அந்தக் கல்யாண வீட்டிலே ஆபீஸர்ஸ் புகுந்து இவையெல்லாம் எண்ணினாங்க தெரியுமோ?‘ என்று ஊருக்குள் பரவலாய் வதந்திகள் நிலவிய நாட்களவை! அந்நேரம் தான் எனது பெரியப்பாவின் புதல்விக்குத் திருமணம் உறுதி செய்யப்படடிருந்தது; மதுரைக்கு அருகாமையிலான திருப்பரங்குன்றத்தில் மண்டபமும் ஏற்பாடாகியிருந்தது! அந்நாளில் அந்தத் திருமணம் தான் குடும்பத்தின் வாரிசுகளுக்கான திருமணங்களில் முதலாவது என்பதால் பெரியப்பா, அப்பா, சித்தப்பா என சகோதரர்கள் அனைவரும் வரிந்து கட்டிக் கொண்டு ஏற்பாடுகளைச் செய்து கொண்டிருந்தனர்! மதுரை என் அப்பாவின் பூர்வீகம்; அங்கே பாட்டி பெரியதொரு வீட்டில் இருப்பார்; and திருமண ஏற்பாடுகள் குறித்த எல்லாக் கூத்துக்களும் அரங்கேறுவது அங்கே தான்! பேரப் பிள்ளைகள் மொத்தமாய் விடுமுறைகளுக்கு அங்கு சென்று கும்மாளமிடுவது வாடிக்கை என்பதால் சகோதரர்களது கல்யாணத் திட்டமிடல்களையும் பார்த்திட முடிந்தது!

‘ரோட்டு மேலே கல்யாண மஹால் இருக்குது… எந்த நேரம் வேணும்னாலும் Food Control ஆபீஸர்கள் ஆய்வுக்கு வரக்கூடும்; ஆகையால் பந்தியில் சாதம் பரிமாறும் அளவுகளில் ரொம்பவே ஜாக்கிரதையாக இருக்கணும்!‘ என்று அப்பா சொல்ல ஏற்கனவே எதையுமே கோக்கு மாக்காய் செய்திடப் பிரியப்படும் பெரியப்பா அதிரடியாய் – “அரிசிச் சாதமே இல்லாமல் ஒரு விருந்து தயார் பண்ணிடுவோம்!” என்றார்! அந்நாட்களிலெல்லாம் கல்யாண வீடுகளில் முதல் நாள் ராத்திரியும் சரி, திருமண தினத்து மதிய விருந்துகளும் சரி – அரிசிச் சோற்றைச் சுற்றியே உலவிடும்! சாம்பார் ஊற்றி ஒரு பந்தி; ரசம் ஊற்றி இன்னொன்று; மோர் ஊற்றி லாஸ்ட்டுக்கா – என்று ஆளாளுக்கு ஒரு படி சாதத்தைக் கபளீகரம் செய்வது வழக்கம்! So பெரியப்பாவின் அந்தப் ”புரட்சிகரமான அகுடியா”வைக் கேட்டு ஆளாளுக்குத் ‘திரு திரு‘வென விழித்தனர்! ஆனால் "இது கூட different–ஆ இருக்கும் போலவே!!" என்று எல்லோருக்கும் தோன்றவே – அடுத்த 2 நாட்களுக்குப் பாட்டி வீட்டு அடுக்களை தான் பரிசோதனைக் கூடமாகியது! ஆளாளுக்கு டக்கிலோ… ஸ்ப்ரிங் ரோல்… கபாப்… என்று எதையெதையோ செய்து வைத்து பொடி டிக்கெட்களான எங்களிடம் தந்து டேஸ்ட் பார்க்கச் சொன்னார்கள்! ஒவ்வொன்றும் ஏக தினுசான பூச்சி மருந்து போலச் சுவைத்தாலும் – ஆஹா… பேஷ்… பேஷ்… என்று சொல்லி வைத்தோம்! பெரியப்பாவோ செம குஷியாகிப் போனார்! “இது  போக பந்தியில் பரிமாற பப்ஸ் ஆர்டர் பண்ணலாம்; சமோசா ஆர்டர் பண்ணலாம்!” என்றவர் அன்றைய மதுரையின் டாப் பேக்கரியான ராஜா பார்லியில் ஆயிரம் பப்ஸ்களுக்கு ஆர்டர் தந்து வைத்தார்!

ஒரு மாதிரி வெள்ளோட்டங்களெல்லாம் முடிந்து, மெனுவும் final செய்யப்பட்டு சமையல்காரரிடம் விளக்கவும் பட்டது! அந்த மனுஷன் இஷ்ட தெய்வங்களையெல்லாம் வணங்கிய கையோடு தான் பாத்திரங்களில் கையே வைத்திருக்கக்கூடும்; மாறுபட்ட மெனுவை தெரிந்தமட்டுக்குச் செய்து வைத்தார்! பந்தி பரிமாறும் வேளைகளும் புலர்ந்த போது – சகோதரர்கள் அத்தினி பேருமே சாப்பிட அமர்ந்திருந்த ஜனத்தையே உற்று நோக்கிக் கொண்டிருந்தனர். இலையைப் போட்டு சப்ளையர்கள் “பெசல் ஐட்டங்களை” ஒவ்வொன்றாய் களமிறக்க – பசியில் அமர்ந்திருந்த மக்களின் முகங்கள் அஷ்டகோலாகின! பெரியப்பாவோ - “சேமியா உப்புமா இன்னும் போடட்டுமா? சோயா பிரியாணி டேஸ்ட் அள்ளுமே?!” என்று கிச்சுகிச்சு மூட்டிக் கொண்டிருந்தார்! நெய் ஊற்றி, பருப்பு ஊற்றி சாப்பிட்டுப் பழகியிருந்த மக்கள் கண்கள் வியர்க்க சாப்பிட்டுக் கிளம்பிய போது – தேக்ஸாக்களில் இன்னும் ஒரு சின்ன கிராமம் சாப்பிடக் கூடியளவுக்குப் பதார்த்தங்கள் மிஞ்சியிருந்தன! விருந்தினர் கிளம்பிய போது – “அண்ணா பப்ஸ் சாப்பிடுங்க; அத்தாச்சி பப்ஸ் சாப்பிடுங்க” என்று நாங்கள் பொடியன்கள் உபசரித்ததெல்லாம் நினைவில் உள்ளது! மண்டபமே காலி…. வீட்டாட்களைத் தவிர, என்ற போது சுமார் 800 பப்ஸ் மீதமிருந்தது! அவற்றைப் பார்த்த நொடியில் எனக்கே கிறுகிறுத்தது – பாவப்பட்ட பெரியப்பா எப்படிச் சமாளித்தாரோ; அவற்றையெல்லாம் என்ன செய்தாரோ – அறியில்லா!

கட்! கட்! இப்போது 1974லிருந்து நேராக 2015-க்கு! கல்யாண விசேஷத்துக்குப் பதிலாய் நமது காமிக்ஸ் கம்பேக் வைபவம்! இம்முறையோ அரிசித் தட்டுப்பாடுகளோ, கதைத் தட்டுப்பாடுகளோ லேது தான்! ஆனாலும் ஒரு முழியாங்கண்ணனுக்குத் திடீர் ஞானோதயம்! “இன்னும் எத்தினி நாட்களுக்குத் தான் சோறு-சாம்பாரு-கூட்டுன்னு கூத்தடிச்சிட்டு? உலகம் எவ்ளோ மாறிடுச்சி தெரியுமா? ப்ரான்கோ-பெல்ஜியத்திலேலாம் ஆமை வடை சாப்பிடறதே கிடையாது; ஆமையை வச்சே வடை தான் சுடறாங்க! நாமளும் அந்த ஜோதியில் ஐக்கியமாகிடுவோமா?" என்றபடிக்கு தினுசு தினுசாய் கி.நா.க்கள்; ரகம், ரகமாய் புதுத் தொடர்களைக் கொண்டு வந்து பந்திகளில் பரிமாறுகிறான்! “ஆஹா…. திவ்யமாயிட்டு! நன்னாயிட்டு!” என்று பந்தியில் அஜால் குஜால் அமளிகள் அரங்கேறிடுகின்றன! முழியாங்கண்ணனும் ஹேப்பி அண்ணாச்சி! ஆனால்… ஆனால்…

பந்தி முடிந்து, கை கழுவும் இடத்தில் சில முகங்களில் மெலிதான பசிரேகைகள் இன்னமும் தொடர்கின்றன ! "அந்த “சிப்பாயின் சுவடுகள்” சூப்பராமே…? நீ படிச்சே ?” என்ற வினவலுக்கு – “எங்கே? நான் அந்த ஸ்மர்ஃபையே தாண்டலை! போவியா?" என்று பதில் பறக்கிறது! “பனியில் ஒரு குருதிப்புனல்” டாப்பா இருந்ததாமே மாப்பு? புரிஞ்சுச்சா உனக்கு?” என்று இன்னொரு பக்கம் கேள்வி எழ – “எலேய். அந்த ”தோழனின் கதை” தான் புரியலேன்னு நினைச்சாக்கா – நம்மாளுங்க பண்ணின அலசல்கள் டாஸ்மாக் பூட்டியிருக்கப்போவே கிறுகிறுக்க வச்சிடுச்சி… நீ வேற!” என்று பதில்!

கட்! கட்! கட்! இது மே‘ 2021… லாக்டௌன் பொழுது! ‘நெதம் ஒரு பதிவு என்று ரகளைகள் நடந்து கொண்டிருக்கையில் – அலசல் ”முத்து 50வது ஆண்டுமலர்” பக்கமாய்ப் பயணமாகிறது!

விரலுக்கேற்ற வீக்கமாய்; இடர்பொழுதுக்கேற்ற இடியாப்பமாய்  சுட நினைத்திருந்தவன் மண்டையில் சரிமாரியாகத் தட்டப்பட்ட  மத்தளமானது – எனது திட்டமிடலையும், பட்ஜெட்டையும் விசாலமாக்கிடுகிறது! ரைட்டு… கார்ட்டூன் ஒத்துக்கிட மாட்டேன்கிறது; ஒரு மாஸ் தருணத்துக்கு செம மாஸாய்ப் புதியவர்களை; டிடெக்டிவ்களை; ஆக்ஷன் நாயகர்களைக் களமிறக்குவதென்றும் தீர்மானமாகிறது! பந்தியில் பாதுஷா; பாதாம் அல்வா; பாம்பே ஸ்வீட்ஸ் என தூள் கிளப்பப் போவது புரிகிறது! ஆனால்… ஆனால்…

சன்னமான ஈனஸ்வரத்தில் குரல்கள் ஒலிக்கின்றன… “பாதாம் அல்வால்லாம் சர்தான்… பால்சாதம் கிடைக்குமா?“ என்று ! “இல்லீங்கண்ணா… சோறுலாம் நெம்ப சாப்பிடப்படாது; முழுசும் கார்போஹைட்ரேட்; ஏற்கனவே பிதுங்கும் தொப்பைகளை இன்னும் சாஸ்தியாக்கிடும்!” என்று சமையல்கார சந்தானம்  கண்களை உருட்டி உருட்டி விளக்குகிறான்! “ரசகுல்லா டேஸ்ட்டா தான் இருக்கும்; ஆனால் ஒரு வாய் ரசம் சாதம் கிடைக்காதா?” என்று பந்தியின் இன்னொரு பக்கமிருந்து இன்னொரு சன்னமான குரல் ! “அச்சச்சோ… ரசம்லாம் பழைய பஞ்சாங்கமுங்கோ; இந்த ரஸ்மலாய் சாப்டு பாருங்கோ – தித்திக்கும்!” என்று ச.ச. வாயில் ஊட்டுகிறான்! வழுக்கிக் கொண்டு தொண்டைக்குள்ளாற ரஸ்மலாய் போகிறது தான்; அதன் சுவை நாக்கில் படிவதும் புரிகிறது தான்; ஆனால் பழகிப் போனது  கிடைக்காத சிறு வருத்தம் மட்டும் அந்தக் கண்களில் மறைந்த பாடில்லை ! ஊரைக் கூப்பிட்டுத் திருவிழாவாய் நடத்த வேண்டிய வைபவத்தில் வருத்தங்களே இருக்கலாகாதே என்ற குயப்பத்தில் ச.ச. மண்டையைச் சொறிகிறான்!

கட்! கட்! கட்! இப்போ ஜுலை 2021-க்கு…. நடப்புக்கு… யதார்த்தங்களுக்குத் திரும்புறோம் : இன்னமும் கசங்கிக் கிழிந்த ஒற்றை ரூபாய் புக்குகள் ஆயிரங்களுக்கு ஏலங்களில் விற்பதைப் பார்க்கிறோம் ! சுடச்சுட ஜெராக்ஸ் எடுக்கப்பட்டு, சுடச்சுட photoshop செய்யப்பட்ட ஸ்பைடரின் டிஜிடல் பிரிண்ட் அட்டைப்படத்துடன் “விண்வெளிப் பிசாசு” சந்தைக்கு வருவதைப் பார்க்கிறோம் – அதுவும் ஒன்றுக்கு, இரண்டு அட்டைப்பட choice-களுடன்! இன்னமும் பழைய இதழ்களின் – ஸ்கேன் செய்யப்பட்ட pdf-களை விநியோகிப்பதே என் மகோன்னத லட்சியமென்று கருதி வரும் புரவலர்களைப் பார்க்கிறோம் ! அதற்கு நட்ட நடுவே – ‘மாற்றம் முன்னேற்றம்‘ என்று மல்லுக்கட்ட பார்க்குமொரு ஆந்தையன்! 

Oh yes- வாசிப்புகளின் நமது range இன்டர்நெட்டின் வருகையினைத் தொடர்ந்து ஏகமாய் முன்னேறி விட்டுள்ளது! And நம் பங்குக்கு இண்டு இடுக்குகளிலிருந்தும் ஏதேனும் வித்தியாசமான சமாச்சாரங்களைத் தேடிப் பிடித்து உங்கள் கைகளில் திணித்து விடுகிறோம் ! லார்கோ; தோர்கல்; அண்டர்டேக்கர்; ட்யுராங்கோ போன்ற சில மாஸ் (புது) நாயகர்களும் சரி, நிறைய b&w கிராபிக் நாவல்களும், SODA போன்ற offbeat நாயகர்களும் நமது இன்றைய அணிவகுப்பின் அங்கங்கள் ! இந்தக் காலத்தின் கட்டாயமான மாற்றங்கள் இப்போதெல்லாம் பழகியும் விட்டுள்ளது ! ஆனால்… ஆனால்… ஆனால்…

அவ்வப்போது – மல்லாக்கப்படுத்தபடிக்கே, அவரவரது பால்யத்து நினைவுகளைத் துறக்க மனமின்றி… “ப்ச்சு… என்ன இருந்தாலும் அந்த “பேரிக்கா போராட்டம்” மாதிரி வருமா ? அந்த ‘வைரஸ் X‘ மாதிரி வருமா?‘ என்ற பெருமூச்சுகள் கேட்காது போயின் நான் ஆச்சர்யப்படுவேன் – ரொம்ப ரொம்ப ஆச்சர்யப்படுவேன் ! கிடைப்பதைப் பிடித்ததாக்கிக் கொள்வது மகிழ்ச்சி; ஆனால் பிடித்ததே கிடைப்பது பெருமகிழ்ச்சி அல்லவா ? அந்தக் கோணத்தில் யோசிக்கும் போது – பழசை நினைத்தே காலத்தை ஓட்டும் நண்பர்களின் அந்த ‘இருக்கு – ஆனா இல்லே‘ மனநிலை புரிகிறது ! 

So மே மாதத்தின் இந்த அலசல் களேபரங்கள் ஓய்ந்ததொரு தினத்தில் நிரம்பவே யோசித்தேன்! பழசின் மீதான மையல் ஒருபோதும் தானாய்க் குறைந்திடாது ; நான் தொண்டை நரம்பு புடைக்க முயற்சித்தாலும் அந்தத் தேடல்கள் மட்டுப்பட்டிடாது என்பதில் இரகசியமே இருக்கவில்லை ! ஒரு சமாச்சாரம் எட்டும் தூரத்தில் இல்லாத வரையிலும், அதனையே தேடும் அந்த இயற்கையான உந்துதல்கள் நம் வட்டத்தில் ஒரு மிடறு அதிகம் எனும் போது – “மாயாவி மறுபதிப்பு போட மாட்டியா? ஸ்பைடர் வராதா? ஆர்ச்சிக்கு ஆப்பா?” என்ற கொந்தளிப்புகள் ஐந்தாறு ஆண்டுகளுக்கு முன்பு வரையிலும் உரக்க ஒலித்து வந்தன! சிறுகச் சிறுக மும்மூர்த்திகளின் மறுபதிப்புகள் போட ஆரம்பித்தோம்; ஸ்பைடர் & ஆர்ச்சியின் புது சாகஸங்களைக் கண்ணில் காட்ட ஆரம்பித்தோம் ; க்ளாசிக் ஜேம்ஸ் பாண்டை களமிறக்கவும் செய்தோம்! இவற்றையெல்லாம் காணாத வரையிலும் கண்ணீர் விட்ட நம்மவர்களே, இன்றைக்கு கண்கள் வியர்க்கத் தெறித்து ஓடுகின்றனர் - அந்நாளைய க்ளாஸிக் பாணிகளைக் கண்டு ! இதோ – இந்த once in a life time முத்து காமிக்ஸ் ஆண்டுமலரோடு இணைப்பாய் முதல் மாயாவியின் சாகஸத்தைத் தரலாமென்று நான் செல்ல – ‘ஆஹாங்?‘ என்றபடிக்கே கிட்டத்தட்ட அனைவருமே cool ஆக நகன்றாச்சு! So the bottomline is – கிடைக்காத வரையிலும், பழசெல்லாம் பொன் !

இந்த நொடியில் “கிடைக்காதது” பட்டியலில் இடம்பிடிப்பதென்னவோ? என்று யோசித்தால் - சுஸ்கி & விஸ்கி; ஸ்பைடரின் “கொலைப்படை”; ”விண்வெளிப் பிசாசு” போன்ற சமாச்சாரங்களைத் தாண்டிய பாக்கியெல்லாமே முத்து காமிக்ஸின் 1970’s சமாச்சாரங்களே!!

- வேதாளனின் ”பூவிலங்கு”

- ரிப் கிர்பியின் “ரோஜா மாளிகை ரகசியம்”

- காரிகனின் “வைரஸ் X“

- சார்லியின் “குரங்கு தேடிய கொள்ளைப் புதையல்”

- விங் கமாண்டர் ஜார்ஜின் “நெப்போலியன் பொக்கிஷம்”

என்று அடுக்கிக் கொண்டே ஒரு 70’s பட்டியலை நான் போட்டால் இன்றைய தேதி வரையிலும் பழசை மறக்கவியலா நண்பர்கள் தெறிக்கச் செய்திடுவார்கள் என்பது உறுதியாய் தெரிகிறது! ஆகையால்… ஆகையால்… ஆகையால்…

மே மாத நடு முதலாய் – நிறையவே யோசனை; நிறையவே திட்டமிடல்; நிறையவே மின்னஞ்சல் பரிமாற்றம் என்று ஏகமாய் behind the scenes நிகழ்ந்து வந்துள்ளன! And அவற்றின் பலனாய் – 2022 என்ற அந்த மைல்கல் ஆண்டினில் புதுசும் இருக்கும், பழசுமே இருக்கும்! அதுவும் நீங்கள் ஆராதிக்கும் முத்துவின் ‘70s வெளியீடுகளின் பிரதான நாயகர்களோடு! So இனியும் நீட்டி முழக்காமல் The Smashing 70’s திட்டமிடலை உங்கள் கண்ணில் காட்டுகிறேன்!

Yes!! நமது நெடுநாள் கனவான வேதாள மாயாத்மா மீண்டும் தமிழ் பேசவுள்ளார்! இந்திரஜால் காமிக்ஸிலும் சரி, ராணி காமிக்ஸிலும் சரி, இந்த முகமூடி நாயகர் ஏகமாய் தலைகாட்டியிருக்கிறார் தான்; ஆனால் இன்னமும் அவரது தொடரில் எக்கச்சக்கப் புதுக்கதைகள் மீதமுள்ளன தான்! திருச்சி விஜய் சார் - ஹேப்பியா? சௌந்தர் - ஹேப்பியா?

Yes!! வேதாளன் களமிறங்கும் போது, அவரது தோஸ்தான மாயாஜால மன்னன் மாண்ட்ரேக்கை நட்டாற்றில் விட்டுவிட முடியாதல்லவா? So – அந்நாட்களில் நிறையவே கொட்டாவிகளுக்குக் காரணகர்த்தாவாயிருந்த மனுஷனுமே மீள்வருகை செய்திடவுள்ளார் – ஆனால் இம்முறையோ முடிந்தமட்டிற்கு ஓவரோ – ஓவராய் காதில் சரங்களைத் தொங்கச் செய்யா கதைகளுடன்! In fact – மாண்ட்ரேக்கின் selected சாகஸங்கள் செம ஆக்ஷன் த்ரில்லர்களுமே! இயன்றமட்டுக்கு அவற்றைத் தேடிப்பிடிக்க முயற்சிக்கவுள்ளோம்! சமீபமாய் மாயாஜாலக்காரரைத் தேடிய நம் தலீவர் ஹேப்பியா?

Yes!! ஜென்டில்மேன் டிடெக்டிவ் is back too! ரிப் கிர்பியின் க்ளாஸிக் கதைகள் அழகான கதைக்களங்களுடன், எப்போதுமே கண்ணைக் கவரும் சித்திரங்களோடு மிரட்டியுள்ளன – முத்துவின் best ஆண்டுகளில்! “நாலுகால் திருடன்“; “மூன்று தூண் மர்மம்“; ”புதையல் வேட்டை“ என்று அடுக்கிக் கொண்டே போகலாம்! So அந்த ‘70களின் classy ரிப் கதைகளை target செய்வதே இப்போதைய இலட்சியம்! பிரசன்னா- ஹேப்பி?

Yes… ஜேம்ஸ் பாண்டுக்கு ஆற்றலிலும், மிடுக்கிலும் சவால்  விடக்கூடிய காரிகனும் மறுவருகை தந்திடவுள்ளார்! “டாக்டர் செவன்”; “வைரஸ் X“; “மடாலய மர்மம்“; கடலில் தூங்கிய பூதம்” என்று இந்த sure நாயகர் தந்துள்ள ‘ஹிட் லிஸ்ட்‘ ரொம்பவே பெரிது! பின்நாட்களில் ஓவியர் மாறிய பின்பாய் இந்தத் தொடரில் ஒரு தொய்விருந்தது தான்; ஆனால் Al Williamson பணியாற்றிய காலங்களில் செம க்ளாசிக் கதைகள் ஏராளமுண்டு இத்தொடரில் ! And நமது தேடல் அங்கேயே தானிருக்கும்!

So - “2022” எனும் உங்களின் எதிர்பார்ப்புகளை ஏகமாய் சுமந்து நிற்கும் ஆண்டினில் – முத்து காமிக்ஸின் மும்மூர்த்திகளுக்கு அடுத்தபடியாய் இடம்பிடித்து நிற்கும் “க்ளாசிக் 4” அழகாய், தாட்டியமாய் வலம் வந்திடுவர்!

முன்பதிவுகளுக்கு மாத்திரமே” எனும் அடையாளம் தாங்கி வந்திடவுள்ள இவை:

- மேக்ஸி சைஸில்...

- ஹார்ட் கவர்களுடன்...

- செம திக்கான உட்பக்கக் காகிதங்களுடன்...

- துல்லியமான சித்திரத் தரத்துடன்....

- Black & White–ல்....

- புதுக் கதைகள் + க்ளாசிக் கதைகள் என்ற கூட்டணியில்... !



ரைட்டு… எப்போதும் போலவே புது அறிவிப்புகளைத் தொடர்ந்து ஆளுக்கொரு கொத்துக் கேள்விகள் இருப்பது நிச்சயம்! So ஒவ்வொன்றாய் நீங்கள் கேட்டு – ஒவ்வொன்றாய் நான் பதில் சொல்ல தெம்பு லேது என்பதால், ‘கேள்வியும் நானே – பதிலும் நானே‘ என்று அமைத்திட விழைகிறேன்! So here goes:

1. முன்னே போக வேண்டிய வண்டி, திடுதிப்பென ரிவர்ஸ் கியர் போடுவது ஏனோ? கிராபிக் நாவல்கள்; புது முயற்சிகள் கண்டிடும் விமர்சனங்கள் “பின்னாடியே போவோமே” என்பது நினைக்கச் செய்து விட்டதோ?

பதில் : Not at all! எப்போதும் போலவே புதுத் திட்டமிடல்கள் தொடர்ந்திடவே செய்யும்! இந்தப் பேரிடர் நாட்களில் அழுகாச்சிகள் வேண்டாமே என்ற தீர்மானம் ஏற்கனவே எடுக்கப்பட்டதென்பதால் – கொஞ்ச காலத்துக்கு மட்டும் இருண்ட களங்கள் இராது தான்; ஆனால் அது நாம் வாழ்ந்து வரும் இந்தக் கொரோனா நாட்களின் பிரதிபலிப்பேயன்றி – விமர்சனங்களின் நீட்சி அல்ல ! தவிர 2022-ல் Muthu # 50 ; ஒற்றை நொடி… ஒன்பது தோட்டா… TEX தீபாவளி மலர் – போன்ற மெகா விலைகளிலான இதழ்கள் சற்றே ஜாஸ்தி என்பதால் பரீட்சார்த்தக் களங்களுக்கு அதிகமாய் வாய்ப்புகளிராது தான்; ஆனால் 2023 முதலாய் they’d be back for sure ! இருண்ட களங்கள் தவிர்த்து – புதுயுக நாயகர்கள் ஏகமாய் முத்து # 50–ல் இடம்பிடித்திடவுள்ளதே நமது வண்டி ரிவர்ஸ் கியரை அழுந்த அழுத்தவில்லை என்பதற்கான ஊர்ஜிதமாய் எடுத்துக் கொள்ளலாம்!

2022-ல் பந்தியில் அமர்ந்திடும் எவருக்கும் புன்னகைகளைத் தவிர்த்து வேறெதுவும் பலனாகிடக் கூடாதே என்ற ஒற்றை அவாவே தற்போதைய இந்தக் குட்டிக்கரணத்தின் பின்னணி!

2. அது என்ன 208 பக்கங்கள் ஒவ்வொரு புக்குக்கும்? அத்தனை பக்கங்களுக்கு ஒரே கதையா?

பதில்: Not at all! இந்த நாயகர்களின் கதைகளின் சகலமுமே (ஒரிஜினல்) செய்தித் தாள்களில் தினசரி stripகளாக வெளிவந்ததால் – தோராயமாய் 2-3 மாதங்களில் ஒவ்வொன்றும் நிறைவுறுவதாய் இருந்திடும்! So 208 பக்க மேக்ஸி சைஸிலான ஆல்பத்தில் - ஏழோ-எட்டோ முழுக்கதைகள் இடம்பிடித்திடும் ! அமெரிக்காவில் IDW Publishing என்ற பதிப்பகமும் சரி, Hermes Press பதிப்பகமும் சரி, இது போன்ற மெகா தொகுப்புகளை வெளியிட்டு செம அதகளம் காட்டியுள்ளனர்! ஐந்தாறு ஆண்டுகளுக்கு முன்பாய் சிகாகோவின் ஒரு காமிக்ஸ் ஸ்டோரில் இந்தத் தொகுப்புகளைப் பார்த்து மிரண்ட ஞாபகம் என்னுள் தொடர்கின்றன ! அதே பருமனுக்கோ, அதே தரத்துக்கோ நமக்குச் சாத்தியப்படாதென்றாலும் – அவற்றை முன்மாதிரியாய்க் கொண்டு, இயன்றமட்டிலும் பெஸ்டாகத் தர இயன்ற அத்தனை கரணங்களையும் அடித்திடவுள்ளோம்!

3. இந்தக் கதைகளுக்கெல்லாம் உரிமைகள் வாங்கணும்னாக்கா ரொம்ப பெரிய தொகைகளை ராயல்டியாக முடக்க வேணும் என்று 2 மாசத்துக்கு முன்னே சொன்னியேப்பா?

பதில்: Yes ; and அதனில் மாற்றம் இருக்கவுமில்லை தான்! நானுமே கடந்த 3 வருஷங்களாய் வேதாளன் கதைகளுக்கான உரிமைகளை மட்டும் வாங்கிடும் முனைப்பில் இயன்ற குட்டிக்கரணங்களையெல்லாம் அடித்துப் பார்த்துக் கொண்டேயிருந்தேன்! ஆனால் சொற்ப சர்குலேஷனில், சொற்ப விலைகளில் தக்கி முக்கி ஆண்டுக்கு ஐந்தாறு கதைகளை வெளியிடத் திட்டமிட்டாலுமே கூடத் தேறிடும் ராயல்டிக்கள் ஒரு மெகா குழுமத்தின் மினிமம் எதிர்பார்ப்புகளைத் தொடக்கூடச் செய்திடவில்லை என்பதால் ஜெயம் கிட்டியிருக்கவில்லை ! ஆனால் இம்முறையோ நிறைய யோசனைகளுக்குப் பின்பாய் – இழுப்பது ஒற்றைத் தேராக அல்லாது – 4 தேர்களாக இருக்கும் பட்சத்தில் வரம் கிடைக்குமென்ற நம்பிக்கை பிறந்தது ! Of course – இதனில் முதலீட்டு முடக்கம் எக்கச்சக்கமாய் இருக்கும் என்பதும் புரிந்தது ; ஆனால் ஒருவாட்டி மண்டைக்குள் ஒரு அவா குடியேறிவிட்டால் அது L&T சிமெண்ட் போட்டுக் குந்திவிடுகிறதே ! So இயன்ற சகல தரப்புகளிலிருந்தும் எப்படியாவது பணம் புரட்டிக் கொள்ளலாம் என்ற நம்பிக்கையில் சத்துக்கு மீறிய சாகஸத்தைச் செய்து பார்க்கத் துணிந்து விட்டோம் ! And இங்கே King Features குழுமமே மூச்சு விட்டுக் கொள்ள அவகாசம் தந்து நமக்கு அன்போடு கரம் கொடுத்திருப்பதால் மனசுக்குள் ஒரு தைரியம் பிறந்துள்ளது ! தவிர, சீனியர் எடிட்டருமே தன்னால் இயன்றதொரு தொகையினைக் கைமாற்றாகத் தரச் சம்மதம் சொல்லி உள்ளதால் – இந்த “க்ளாசிக் 4” கனவு – நனவாகிடவுள்ளது!

4. “மாசா மாசம் ஒரு கதை” என்று போடலாமே,? எதுக்காக தொகுப்புகள் ?

Simply put – உங்களின் “குண்டு புக் காதல்” தான் இங்கே பிரதான காரணம்! தனித்தனியாய் ஒல்லி இதழ்களாய் ஐப்பது ரூபாய்க்கும், அறுபது ரூபாய்க்கும் வெளியிடும் போது ஏற்படும் தாக்கத்தை விடவும் இத்தகைய தொகுப்புகள் உருவாக்கும் impact மிக அதிகம் என்பதை அனுபவத்தில் பார்த்தாச்சு! தவிர, மாதா மாதம் ஒரு கதை; சின்ன சைஸ் என்ற template எனில் அவை கடைகளில் விற்பனை; ரெகுலர் சந்தா; ரெகுலர் பிரிண்ட்-ரன் என்றான மாமூல் ரூட்களில் பயணித்திட வேண்டிவரும். இந்த க்ளாசிக் நாயகர்களை - விரும்புவோர் – விரும்பாதவரென சகலரின் சிரங்களிலும் கட்டிட நான் நிச்சயமாய் தயாராக இல்லை ! அது பழசை ஆராதிப்போருக்கு மாத்திரமே ; பந்தியில் பால்சோறு கேட்பவர்களுக்கு மட்டுமே – என்பதில் தெளிவாக உள்ளேன் ! So முன்பதிவு ரூட் ; தேவைப்படுவோர் மட்டுமே வாங்கிக்கலாம் ; மினிமம் ப்ரிண்ட்ரன் என்ற அடையாளங்கள் அத்தியாவசியப்படுகின்றன - இம்முயற்சிக்கு! And அதற்கு தொகுப்புகளே வசதி !

5. **MAXI சைஸாாாாா? அடுக்கி வைக்க சிரமமாக இருக்குமே?!

**இந்த விலையாாாாா?

**மாண்ட்ரேக்காாாாாா?

Sorry guys – நிரம்ப தி்ட்டமிடல்; நிறைய சிந்தனை; நிறைய முன்னேற்பாடுகளின் பலனாகவே இந்தச் செயலாக்க முறையினை எட்டியுள்ளோம் ! இவற்றுள் எதுவுமே; I repeat எதுவுமே மாற்றம் காண்பது சாத்தியமேயில்லை ! ஆகையால் அது குறித்த கேள்விகள் / வேண்டுகோள்கள் / அலசல்கள் / பகடிகள் வரும்பட்சத்தில் நான் பதிலளித்திட இயலா நிலையில் இருந்திடுவேன் ! So முன்கூட்டிய புரிதல்களுக்கு நன்றிகள்!

6. கலர்லே போடலாமேமமமமம??

Sorry again guys – இவை சகலமுமே ஒரிஜினலாய் black & white-ல் உருவாக்கப்பட்டு, வெளியானவைகளே ! மிகுந்த பிரயாசைகளுக்குப் பின்னே இவற்றை வெளியிடக் களமிறங்குகிறோம். இறங்கும் போதே கால்களை மேற்கொண்டும் ‘பப்பரக்காாா‘ என விரித்துக் கொள்ள ‘தம்‘ இல்லை! ஆகையால் IDW Publishing இதழ்களின் சித்திரத் துல்லியத்துடன், திக்கான பேப்பரில், அழகாய் b&w ஆல்பங்களாகவே இவை வெளியாகிடும் ! பரீட்சார்த்த முயற்சிகளே இவை & 2022 plus 2023 என இரு வருஷங்களுக்கு இதே template-ல் இவை தொடர்ந்திடும்!

இந்த template ஹிட்டாகிட்டால் 2024 முதலான முயற்சிகளுக்கு வண்ணம் சேர்ப்பது குறித்துத் திட்டமிடலாம் ! In case நமது பிரிட்டிஷ் மும்மூர்த்திகள் நாளாசரியாய் உங்களுக்கு போரடித்துப் போன கதையே இந்த ‘க்ளாசிக் நால்வருக்கும்‘ நிகழ்ந்திடும் பட்சத்தில் – என்ன செய்வதென்று அன்றைக்குத் தீர்மானிக்க வேண்டி வரும் ! So இலட்சியம் 2024 -ல் கலர்; நிச்சயம் தற்சமயத்து black & white !

7. ‘வைரஸ் X’; ‘ரோஜா மாளிகை ரகசியம்‘; அப்புறம் “பூவிலங்கு”லாம் வந்தே தீரணும்!

கதைத் தேர்வினைப் பொறுத்த வரையிலும், இங்கே படைப்பாளிகளின் கரம் பிடித்தே நாம் நடக்கவுள்ளோம் ! ஒரு குறிப்பிட்ட ஆண்டின், ஒரு குறிப்பிட்ட தேதியினில் துவங்கிடக்கூடிய கதையிலிருந்து – தொடர்ச்சியாய் அடுத்த இரண்டு ஆண்டுகளுக்கு வெளிவந்த கதைகளையே படைப்பாளிகள் நமக்குத் தந்திடுவர் !! உதாரணத்துக்கு ஜனவரி 1972 என ஒரு வேதாளன் கதை துவங்கிடுகிறதெனில் - 1972 ; 1973 என 2 ஆண்டுகளில் - தொடர்ச்சியாய் ; ஒன்றன்பின் ஒன்றாய் வெளியான கதைகளை நமக்குத் தந்திடுவார்கள் ! So 1974ல் ஒண்ணு; 1967ல் இன்னொன்னு; 1976ல் வெளியானதிலும் ஒண்ணு – என்ற “நீங்கள் கேட்ட பாடல்கள்” ரகத் தேர்வுகள் இங்கே நமக்கு சாத்தியமாகிடாது! ஏகப்பட்ட கதைகளை இங்கும் அங்குமாய்த் திரட்டி – the best years என்று ஒவ்வொரு நாயகருக்குமே fix செய்து வைத்துள்ளேன் ! தவிர, ஒவ்வொரு தொடரிலும் தலைசிறந்த ஓவியர்கள் பணியாற்றிய காலகட்டங்களை தேடிட முற்பட்டு வருகிறேன் ! So கண்ணுக்கும், கருத்துக்கும் விருந்து தந்திடக்கூடிய கதைகள் அமையுமென்று நம்புவோம் ! And ஏற்கனவே சொன்னது போல - இவற்றுள் ஏற்கனவே முத்துவில் வெளியிட்ட கிளாசிக் சாகசங்களும் இருந்திடும் ; நாம் இதுவரையிலும் படித்திரா புதுசுகளும் இருந்திடும் ! 

8.முத்து ஆண்டுமலர் # 50 கூட வேதாளன்  புக்குமே வருமா ?

ஒரே சமயத்தினில் இவை வெளிவந்திடுமே தவிர்த்து, கட்டாயமாய் இரண்டையுமே  வாங்கியாகணும் என்ற நிர்பந்தங்கள் இராது ! நமது 2022 ரெகுலர் சந்தா அறிவிப்பினில் இந்த க்ளாஸிக் 4 அணியின் SMASHING 70's இதழ்கள் இடம்பிடித்திடாது !  So ஜனவரியில் புது இதழோடு வேதாளனையுமே சந்தோஷமாய் ஏந்திட நினைப்போர் மட்டும் வாங்கிக் கொள்ளலாம்  ! 

9.முன்பதிவு எப்போது முதல் எப்போது வரைக்கும் ? 

2022-ன் அட்டவணை அக்டோபர் 14-ம் தேதி வெளியாகிடும் (சரஸ்வதி பூஜை ; ஆயுத பூஜை விடுமுறை நாளது !!) So ஜூலை 14 முதல் அக்டோபர் 14 வரை என 3 மாதங்கள் அவகாசம் - இந்த Smashing 70's நாயகர்களின் ஆல்பங்களை புக் செய்திட !

And of course - 2 தவணைகளில் புக் செய்தும் கொள்ளலாம் ! 

10.சுஸ்கி விஸ்கி இதே மாதிரி போடலாமே ? 

இந்த முயற்சியின் வெற்றியோ - தோல்வியோ தான் இது போலான சிறு பிரிண்ட்ரன் ; on demand கதைகளின் எதிர்காலத்தினைத் தீர்மானித்திடும் ! இரத்தப் படலம் முன்பதிவுகளைப் போலவே வாசக நண்பர்கள் + ஏஜெண்ட் நண்பர்கள் என்ற கூட்டணி - தோரயமாய் 600 - 700 புக்ஸ்களை உறுதி செய்திட்டால் இந்த Smashing 70's வண்டி தண்டவாளத்தினில் ஏறி விடும் ! பார்க்கலாமே - மெய்யாலுமே 'புலி வருது' என்றான பின்னே பரவலான ரியாக்ஷன்ஸ் என்னவாக உள்ளனவென்று ! 

இதுக்கும் மேல் உங்களிடம் கேள்விகள் இருக்குமோ இல்லியோ தெரியலீங்கோ - ஆனால் இதுக்கு மேலே பதில்களில்லை என்னிடம் ! So நடையைக் கட்டுகிறேன் - மேக் & ஜாக் அணியோடு ரவுண்டடிக்க ! இந்த classic நால்வரின் மறுவருகை குறித்த உங்களின் reactions எவ்விதமிருக்கும் என்ற கேள்வி தான் இந்த நொடியில் மெகா சைசில் நிற்கிறது ! புனித மனிடோ காப்பாராக ! Bye all...see you around ! Safe Weekend !!

Saturday, July 03, 2021

ஒரு சலனம் போயிண்டே....its gone !!

 நண்பர்களே,

வணக்கம் ! First things first.....'வலது கை தருவதை இடது கை கூட அறியலாகாது' என்பதில் எனக்கும் உடன்பாடே ; ஆனால் இந்த ஒருமுறை தண்டோரா அடிப்பதில் தப்பில்லை என்று தோன்றுகிறது ! Simply becos இங்கே கொடுத்துச் சிவந்திருக்கும் கரங்களின் பெரும்பான்மை உங்களது ! இன்று காலை நமது காலஞ்சென்ற ஓவியர் மாலையப்பன் அவர்களின் மனைவியின் வங்கிக்கணக்குக்கு ரூ.75,000/- அனுப்பிட முடிந்துள்ளது என்பதைத் தெரிவிப்பது எனது சந்தோஷக் கடமை ! எதனில் இவ்வட்டம் சிறியதோ, இல்லியோ -  நேசங்களில் வானளாவியது என்பதை இன்னொருமுறை நிரூபித்து விட்டீர்கள் ;  A big round of THANKS guys !!

இதோ - ஜூலை பிறந்து விட்டது ; இன்னுமொரு பத்து நாட்களில் புது இதழ்களை டெஸ்பாட்ச் செய்திட வேண்டி வருமென்பதால் - பரபரப்பாய் அச்சுக்குத் தயாராகி வருகிறோம் ! ஒரு ஜாம்பவான்களின் சங்கமிப்பு மாதமாய் இந்த ஜூலை அமையவிருப்பதால், பணிகளில் ஒரு இனம்புரியா உற்சாகம் தொற்றிக் கொள்கிறதை இம்முறை நன்றாகவே உணர்ந்திட முடிந்தது தான் ! நமது காமிக்ஸ் முதல்வரும் ; கார்ட்டூன்களின் முதல்வரும் - லேடி ஜேம்ஸ் பாண்ட் + ஒரிஜினல் ஜேம்ஸ் பாண்டுடன் கரம் கோர்க்கும் வாய்ப்பு தினமும் அமைந்திடாது எனும் போது, ஜூலை 2021 ரொம்பவே ஸ்பெஷலான பொழுதாகிட வேண்டும் தான் ! And இதோ - காத்திருக்கும் முக்கூட்டணியினில் நீங்கள் இன்னமும் பார்த்திரா இதழின் அட்டைப்பட முதல்பார்வை : 

ஒன்றுக்கு இரண்டாய் தெறிக்கும் அட்டைப்படங்கள் அமையப் பெற்ற இந்த ஆல்பமானது, போன வருஷத்து லாக்டௌன் வேளையினில் தான் இத்தாலியிலேயே வெளியானது ! And நமக்கு மாமூலாய் வந்திடும் புது இதழ்கள் சார்ந்த newsletter-ல் பளீர் சித்திரங்களுடன் இது கண்ணில்பட்ட நொடியிலேயே டிக் அடித்து விட்டேன் - நடப்பாண்டினில் நமது அட்டவணையினில் இது இடம்பிடித்தே தீர வேண்டுமென்று ! ஒரு சினிமாவுக்குப் பாட்டுக்கள் சிறப்பாய் அமைந்துவிட்டாலே அது ஹிட்டடிக்கும் வாய்ப்புகள் பிரகாசம் என்பது போல - நம்மைப் பொறுத்தவரையிலும் அட்டைப்பட சென்டிமென்டுக்கு மவுசு ஜாஸ்தி ! அந்த ஆங்கிளில் பார்த்தால் -பாயச அண்டாக்கள் பல குறுக்கிடினும், குழம்புக் குண்டாக்கள் பல தடை போடிடினும் -  "ஒரு பிரளயப் பயணம்" ஊர்ஜிதமான ஹிட்டே !  Because  இரட்டை ஆல்பங்களாய் வெளியான இந்த இதழ்களில் இருந்த 2 அட்டைப்படங்களுமே தீயாய் மிளிர்ந்தன ! எனக்கிருந்த கேள்வியோ - இவற்றுள் எதனை நமது முன்னட்டையாக்கிடுவது ? என்பது மாத்திரமே ! So நிறைய கோணங்களிலிருந்து முறைத்து முறைத்துப் பார்த்த பிற்பாடு - இனிஷியல் தலைவர்களைப் போல ஆளுக்கொரு திக்கில் க்ளோசப்பில் முறைத்துக் கொண்டிருந்த நம்மவர்களைத் தேர்வு செய்தேன் ! Hope my choice was right ! 

கதையைப் பொறுத்தவரையிலும் இதன் inspiration - நமது இம்மாதத்து இன்னொரு மஞ்சள் சொக்காய்க்காரரின் ஆல்பமாக இருந்திருக்கலாமோ ? என்ற கேள்வி எழாது போகாது ! ஆனால் காட்டாற்று வெள்ளத்துக்கு கரைகள் அனைத்துமே சொந்தம் தானே ; so காட்டாற்று வெள்ளமாய், காட்டாற்றின் நடுவே அரங்கேறும் இந்த சாகசத்தை செமையாய் நான் ரசித்தேன் ! And மாமூலாய் டெக்சின் பன்ச் வரிகளையும், கார்சனின் டயலாக்களையும் மாற்றி எழுதுவதோடு எடிட்டிங்கினுள் புகுந்திடும் எனக்கு, இம்முறை முழுசாகவே பேனா பிடிக்கும் வாய்ப்பும் தொற்றிக் கொள்ள, குஷியாய் ரவுண்டடித்தேன் ! சொல்லப் போனால், இம்மாதத்தின் கதைகள் ஐந்திலுமே சாலடித்துள்ளது எனது பேனாவே ! More on that later ! டெக்சின் இந்த ஆல்பத்தினில் நாயகராய் நான் பாவிப்பது அதன் ஓவியரையே ! CID ராபின் ஆல்பங்களுக்கு ; மேஜிக் விண்ட் ஆல்பங்களுக்கென நிறையவே வரைந்திருக்கும் Corrado Mastantuono இங்கே செய்திருக்கும் ஜாலங்கள் அதகளம் !! அந்தப் படகில் ஏறி இந்த மனுஷனும் டெக்ஸ் & கோ.உடன் பயணம் செய்திருப்பாரோ - என்னமோ ; போட்டோ எடுத்தது போல ஒவ்வொரு பிரேமையும் அமைத்து, சித்திரங்கள் போட்டுள்ளார் ! இம்மாத இதழ்கள் உங்கள் கைகளை எட்டிடும் போது - வாசிப்புக்கு எதனை முதலில் தேர்வு செய்திட உள்ளீர்களோ ; நம்ம கவுண்டர் பாஷையில் சொல்வதானால் - 'செம டெலிகேட் பொஷிஷன்' ! இந்த 220 பக்கங்களும் கண்ணுக்கு வழங்கும் அந்த விருந்து, நமது பாயசக்கார பாசக்காரர்களையுமே எழுந்து நின்று கரவொலி எழுப்பச் செய்யாது போனால் ஆச்சர்யம் கொள்வேன் ! இதோ பாருங்களேன் guys :  

So இம்மாதம் முதலில் தயாராகி, முதலாவதாய் அச்சும் பூர்த்தி கண்டுள்ளது 'தல' தாண்டவமே ! திங்களன்று ஒல்லியாரின் 2 ஆல்ப ஆண்டுமலர் அச்சுக்குப் புறப்பட்டிங்ஸ் ! இதன் கடைசி 2 பக்கங்களை மட்டும் ஒரு நப்பாசையினில் நிறுத்தி வைத்துள்ளேன் ; எதிர்பார்த்திடும் ஒரு அறிவுப்புக்கான வாய்ப்பு அமைந்திடுமா ? என்ற எண்ணத்தில் ! புதன் வரையிலும் காத்திருந்து பார்த்துவிட்டு அச்சினைப் பூர்த்தி செய்திடவுள்ளோம் ! 

ஆக எஞ்சியிருப்பது நமது பிரிட்டிஷ் க்ளாஸிக் நாயக / நாயகியரின் கூட்டணி இதழே ! நிஜத்தைச் சொல்வதானால் இது போன மாதமே வெளிவந்திருக்க வேண்டியதொரு இதழ் என்பதால் மே மாதமே என் மேஜையினில் அடைக்கலமாகியிருந்தது எடிட்டிங்கின் பொருட்டு ! மாடஸ்டிக்கு நமது கருணையானந்தம் அவர்களும் ; க்ளாஸிக் ஜேம்ஸ் பாண்டுக்கு நமது புது வரவானதொரு சகோதரியும் பேனா பிடித்திருந்தனர் ! லாக்டௌன் புண்ணியத்தினில் ஜூன் மாதத்தில் ஒரு புக் கல்தா கண்டிட, THE B & B ஸ்பெஷல் ஜூலைக்கு நகன்றதால் - "அப்பாலிக்கா பார்த்துக்கலாமே ?!" என்று ஓரம்கட்டியிருந்தேன் ! ஒரு மாதிரியாய் அச்சுக்கு ரெடி செய்திடும் பொருட்டு பக்கக்கதைகளைத் தூக்கிக் கொண்டு போன ஞாயிறே பணிகளை ஆரம்பித்தேன் ! 

ஆனால்...ஆனால்...லாக்டௌன் சோம்பல்களின் உபயமா ? அல்லது ஏறிக்கொண்டே போகும் வயதின் பலனான மந்தமா ? - அல்லது முத்து ஆண்டுமலர் 50-க்கென ஒரு வண்டிப் பணிகள் குவிந்து கிடக்கையில், இங்கே இவற்றுள் பொழுதுகள் ஓட்டமெடுக்கின்றனவே ? என்ற ஆதங்கத்தின் பலனான தடுமாற்றமா ?  - சொல்லத்தெரியவில்லை ; ஆனால் எடிட்டிங்கில் எக்கச்சக்க மொக்கை போடும்படியாகிப் போனது ! மாடஸ்டியின் கதைகளிலும் சரி, 007-ன் கதைகளிலுமே சரி, ஒருவித வறண்ட நகைச்சுவையுணர்வு வரிகளில் இழையோடுவது வாடிக்கை ! அவற்றை இயன்றமட்டுக்கு தமிழுக்கும் கொணர்ந்தாலொழிய இரு தொடர்களின் நிஜ முகம் நம்மை எட்டாது என்பது எனது நம்பிக்கை ! இம்முறை புதியவரும் சரி, மூத்தவரும் சரி - அதனில் நிறையவே மாற்றங்களுக்கு இடம் தந்திருப்பது பக்கங்களைப் புரட்டப் புரட்டப் புரிந்தது ! மாடஸ்டி கதைகளில் எப்போதுமே வசனங்களும் எக்கச்சக்கமுண்டு ; so திருத்தங்களை போட ஆரம்பித்தால் அவை மெகா சீரியல்களாய் நீள்வது தவிர்க்க இயலாது ! So பேஸ்தடித்தபடிக்கே மொக்கை போட்டேன் ; போட்டேன் ; இந்த வாரத்தின் பாதி வரையிலும் மொக்கை போட்டேன் ! "அப்டியே இருந்திட்டுப் போட்டுமே !' என்று கூட நினைப்பு ஓடியது உள்ளுக்குள். ஆனால் இப்போதுதான் சமீபமாய் - "இளவரசிக்கு ஒரு நிரந்தர ஸ்லாட் உண்டு " என்று பகுமானமாய் அறிவிக்கவும் செய்திருந்தேன் ; இந்த நிலையில் சோம்பலின் காரணமாய் நகாசு வேலைகளில் நான் குறை வைத்தால் - பக்கத்திலேயே இன்னொரு பொங்கப்பானையை ஏற்றி இளவரசிக்கு கச்சேரிகளை ஆரம்பிக்க மேச்சேரிகளிலும், இன்னபிற ஸ்தலங்களிலும் தன்னார்வலர்கள் அணிதிரள்வது உறுதி என்றுபட்டது ! So புதன் ராவின் முக்கால் பங்குக்கு முழித்திருக்க வேண்டிப் போனது - தேவையான சகலன்களையும் மாற்றி எழுதிட ! Phew... என்றபடிக்கே வியாழன்று ஜேம்ஸ் பாண்டுக்குள் புகுந்தால் - புதிய பேனா ஏகமாய் கோட்டைகளும், ஓட்டைகளும் விட்டிருப்பதைக் கண்டு நாக்குத் தொங்கிப் போனேன் ! இதோ - இந்த சனிக்கிழமை அதிகாலை வரையிலும் ஜவ்வு இழுத்து விட்டது அதன் முழு மாற்றங்களுடனான ஸ்கிரிப்ட்தனை ரெடி பண்ணிட ! And இன்று பகல் முதல் மறு டைப்செட்டிங் வேலைகள் துவங்கியுள்ளன - அம்மணி ஜேம்ஸ் பாண்ட் + அய்யா ஜேம்ஸ் பாண்ட் ஆல்பங்களில் ! செவ்வாயாகிடுமென்று நினைக்கிறேன் - இரண்டும் பூர்த்தி கண்டிட ; so வாரத்தின் நடுவாக்கினில் அவை அச்சுக்குச் சென்றால் ஜூலை பணிகளுக்கு "சுபம்" போட்டிட முடிந்திருக்கும் ! Fingers crossed ! 

                                                            
                                                     JAMES BOND CLASSIC :

இங்கே இன்னொரு ஜாலியான சமாச்சாரமுமே சொல்லத்தோன்றுகிறது ! எனது இளம் பிராயத்துக் கனவு - இந்த கிளாசிக் ஜேம்ஸ் பாண்ட் கதைகளை எப்படியேனும் வெளியிட்டாகணும் என்பது ! நிறையவாட்டி இது பற்றிச் சொல்லியிருப்பேன் தான் ! அன்றைக்கு ராணி காமிக்சில் 007 கதைகளைக் கொத்திக் கொண்டு போயிருக்க, எனக்கோ மாடஸ்டியோடு மனசைத் தேற்றிக் கொள்ள வேண்டிப் போயிருந்தது ! "ச்சீ..ச்சீ..என்ன ஜெமுசு..நம்ம லேடி பாண்ட் எவ்ளோவோ தேவலை !" என்று எனக்கு நானே சமாதானம் சொல்லிக்கொண்டாலும், உள்ளுக்குள் "பருப்பு வடை போச்சே !! மீந்திருந்த சுசியத்தோடே குப்பை கொட்டுறா மாதிரி ஆகிப் போச்சே !" என்ற கவலை இருக்கவே செய்தது ! ஆனால்...ஆனால்....கிட்டத்தட்ட 37 வருஷங்களுக்கு அப்பால் - அய்யாவையும், அம்மணியையும் ஒரே வாரத்தினில் எடிட் செய்யும் வாய்ப்பு கிட்டியுள்ள பொழுதினில் என்னுள் உறங்கிக்கொண்டிருந்த அந்தக் கவலையை நிரந்தரமாய் துயில் கொள்ளச் செய்திட முடிந்துள்ளது ! எப்படி என்கிறீர்களா ? இம்மாதத்து 2 கதைகளையும் நேருக்கு நேர் ஒப்பீடு செய்திட சாத்தியமாகிட்ட பொழுதில் தான் புரிந்தது - மெய்யாலுமே நம்ம இளவரசி தரப்பில் தான் சரக்கு ஜாஸ்தி என்பது ! இம்முறை காத்துள்ள மாடஸ்டி சாகசம் - மெய்யாகவே சமீபத்தைய சுமார் ரகங்களிலிருந்து மாறுபட்டுள்ளது & சித்திரங்களுமே பளிச் ரகம் ! அதன் முன்னே - ஜேம்ஸாரின் கதையினில் ஆழம் குறைவாய்த் தென்பட்டது போலிருக்க, 'சும்மா தோணுது டோய் !' என்று நினைத்திருந்தேன். ஆனால் 007 கதையோடு கடந்த 2 நாட்களும் பயணித்ததில் தான் எனது அனுமானம் மெய்யே என்று புரிந்தது ! Man to Woman - இம்மாதத்து மோதலில் ஜெயம் நமது முதல் நாயகிக்கே - at least என்மட்டிலாவது  ! So 37 ஆண்டுகளாய் உள்ளுக்குள் இருந்ததொரு சலனம் இன்றைக்கு போயிண்டே ; போயே போச்சு !! 

And as I said - இது முழுக்கவே எனது எண்ணம் மாத்திரமே ! உங்கள்மட்டில் இந்த க்ளாஸிக் 007 vs மாடஸ்டி என்ற போட்டியினில் கெலிப்பது யாரென்றும் அறிந்திட ஆவல் guys !!

So உற்சாகமாய் கிளம்புகிறேன் guys - திண்டுக்கல் டிக் அவதாரத்தை தவிர்க்கச் செய்யும் நோக்கிலான அந்தப் பணியினுள் மூழ்கிட ! Bye all ...see you around ! Have a Safe weekend !!

Memes by MKS Ramm :







Saturday, June 26, 2021

இன்னொரு சனி...இன்னொரு பதிவு !

 நண்பர்களே,

வணக்கம். நீங்கள் அலசி அதகளம் செய்ததில் அதிரிபுதிரி மாதமாகிப் போன ஜூன் - சிறுகச் சிறுக நிறைவை நோக்கி நகர்ந்திட, ஒரு மெய்யான அதிரடி மாதமே நம் முன்னே காத்து நிற்கின்றது ! நிஜத்தைச் சொல்வதானால் நடப்பு மாதத்தில் ரிப்போர்ட்டர் ஜானியின் சாகசம் பற்றி எனக்குத் துளியும் பயம் இருந்திருக்கவில்லை தான் ! ஆனால் ப்ளூகோட் பட்டாளம் லைட்டாகவும், கிராபிக் நாவல் செமையாகவும் புளியைக் கரைத்திருந்தன ! ப்ளூகோட் தொடரினில் இழையோடும் அந்த அவலச் சுவை இம்முறை கொஞ்சம் தூக்கல் என்பது எனது எண்ணம் ! So உங்களின் குத்துக்கள் மூக்கிலா ? தொப்பையிலா ? என்பதே எனது கேள்வியாயிருந்தது ! ஆனால் surprise ..surprise .. சிலாகிப்புகள் !! ஆனால் நமது நண்பரொருரவர் அனுப்பியிருந்த மின்னஞ்சல் எனது அனுமானத்தை ஒட்டியே இருந்தது :

=========================================================================

சார், நான் மிக மிக மிக மிக minorityயாக இருப்பேன் என்பது தெரியும்... இருந்தாலும் எனக்கு ஆச்சர்யமாக உள்ளது... இந்த புத்தகம் எப்படி முழு நகைச்சுவை என எல்லாராலும் கொண்டாடப்படுகிறதென்று... !!?

இனியெல்லாம் ரணமே... ஆரம்பம் முதல் நோய்வாய்ப்பட்ட வீரர்கள்... சாவின் விளிம்பில் படும் துயரங்கள்... ஏமாற்றும் ஜெனரல்கள்... தண்ணீருக்கு கூட துப்பாக்கி தாக்குதல் நடத்த வேண்டிய சூழல்... எரியும் குடியிருப்பு வீடுகள்... ஆகா பரவாயில்லை... அனைவரும் சேர்ந்து ஊரைச் சரி செய்கிறார்களே... மனிதம் பிழைக்கிறது என நினைக்கும் போதே அந்த வீடுகளை உடைத்து எரியும் குண்டுகள்... ஓடும் வயதான முதியவரின் புலம்பல்... "திரும்ப இந்த ஊரைக் கட்டுவது ரொம்ப ரொம்ப கஷ்டம்தான்..."...

இதில் என்னால் எந்த இடத்திலும் மனம் விட்டு சிரிக்கவே முடியவில்லை... சில இடங்களில் கவுண்டமணி/செந்தில் சண்டையை சற்றே நினைவு படுத்தி.. ஆங்காங்கு கஷ்ட புன்னகை வேண்டுமெனில் என்னால் செய்ய முடியும்...!

இது ஒரு அற்புதமான கிராபிக் நாவல் என்னளவில்... போரின் துயரங்களை இதைவிட ஒரு சித்திரக்கதையில் பட்டவர்த்தனமாக சித்திரிக்க முடியாது... !

என்னைப் பொருத்தவரை... "இனியெல்லாம் ரணமே" தான் இந்த மாதத்தின் மனதை உலுக்கும் கிராபிக் நாவல்...  !

=============================================================

நண்பரின் மின்னஞ்சலில் உள்ள கூற்றுக்களை மறுக்க பெரிதாய் முகாந்திரங்களில்லை ; moreso அடுத்த ஆண்டுக்கென நான் தேர்வு செய்து வைத்திருக்கும் இன்னொரு ப்ளூ கோட் ஆல்பத்தோடு ஒப்பிடுகையில் எனக்கே லைட்டாக நெருடத்தான் செய்தது ! Simply becos அடுத்தாண்டிற்கென காத்திருக்கும் ஆல்பமானது இதே போர்க்கள பின்னணியில் இருந்தாலும், வலி, சோகம்,ரணமென்று நகராது பக்கத்துக்குப் பக்கம் சிரிப்பு வெடி போடுகிறது ! Out & out காமெடியாக அது இருந்திடவுள்ளதைப் பார்க்கும் போது, இந்தத் தொடரினிலும் கதைகளை பொறுக்கிட நிறையவே மெனெக்கெடணும் போலும் என்பது புரிகிறது ! 'தேமே' என Cinebook தேர்வுகளுக்கு வால்பிடிப்பது இந்த ஒற்றைத் தொடரிலாவது இனி வேலைக்கு ஆகாதென்று தீர்மானித்துள்ளேன் ! So வரும் ஆண்டுகளில் ப்ளூவார் வருவர் ; ஆனால் இயன்றமட்டுக்கு போரின் இரத்த சகதிகள் தெறிக்காத விதமாய் ! 

Looking ahead - நமது ஆண்டுமலர் மாதத்தைக் கொண்டாட பெரியதொரு கேக்கும், மெழுகுவர்த்திகளுமாய், லயன் அண்ணாத்தே கால் விரித்துக் காத்திருக்கிறார் ! And இப்போதைய வாடிக்கைப்படி லக்கி லூக் அந்த ஸ்லாட்டைத் தனதாக்கியுள்ளதால் - இதோ "லயன் ஜாலி ஆண்டுமலர்" அட்டைப்பட முதல்பார்வை + உட்பக்க பிரிவியூ படலம் : 

As usual இம்முறையும் 2 லக்கி சாகசங்கள் ; ஒன்றினில் திருவாளர் ரின்டின் கேன் ஏகமாய் செய்திடும் அலப்பரைகளோடு ! I repeat - இது ரின்டின் கேன் கதையல்ல ;  ரின்டின் கேனுக்கு முக்கியத்துவம் தரப்பட்டுள்ளதொரு நார்மலான லக்கி லூக் கதையே ! ஒரு கோடீஸ்வர மனுஷன் தன் சொத்து பத்துக்களையெல்லாம் ரி.டி.கே.வுக்கு எழுதி வைக்க - அதுவும் செம பணக்கார ஞானசூன்யம் ஆகிப் போகிறது ! அதன் பாடிகார்டாய் ; கார்டியனாய் நம்மவர் நியமனம் காண, ஜாலி ஜம்பர் & டால்டன் சகோஸ் செய்யும் அட்டூழியம்ஸ் என்று கதை டாப் கியர் போட்டுத் தூக்குகிறது ! எப்போதும் போலவே இந்தக் கூட்டணியோடு கைகோர்ப்பது செம ஜாலி அனுபவமாய் இருந்தது தான் ; அந்த ஜாலியின் பிரதிபலிப்பு பேனா பிடித்ததில் தென்படின் ஹேப்பி அண்ணாச்சி ! 

And இங்கே கதை # 2 ஆக இடம்பிடித்திருக்கும் "பேய் நகரம்" கூட இன்னொரு க்ளாஸிக் ! டால்டன்கள் இல்லாத குறையை வேறொரு இரட்டையர் அணி நிரவல் செய்கிறது ! So சிரிப்புக்கு சிறப்பாய் உத்திரவாதம் தந்திடவுள்ள இந்த இதழ் ஏற்கனவே ரெடி நம்மளவினில் ! 

And ஏற்கனவே சொல்லியிருந்த விஷயமே - but still for those who might have forgotten  : இது ஹார்டகவர் இதழல்ல ! இனி வரும் நாட்களில், முந்நூறுக்கு மேற்பட்ட விலையிலான இதழ்கள் மட்டுமே (அதாவது மினிமமாக 3 பாகங்கள் / கதைகள் கொண்ட இதழ்கள்) ஹார்டகவர் option சுமந்து வந்திடும் ! இன்றைய சங்கை நசுக்கும் விலைவாசிகளின் மத்தியில் இந்தச் செலவினத்தை சிறு இதழ்களுக்குப் பொருத்திட இயலவே மாட்டேன்கிறது ! So புக் கையில் கிடைத்த உடன் என்னைச் சாத்த துடைப்பங்களைத் தேடாதீர்கள் - ப்ளீஸ் ! ஆனால் அட்டையினில் மினுமினுக்கும் எழுத்துக்கள் மெருகூட்டிடும் என்பது கொசுறுத் தகவல் ! 

நடப்பு மாதத்தினில் 15-ம் தேதி தான் இதழ்களை அனுப்பியுள்ளோம் என்பதால் ஜூலை இதழ்கள் கூட அதனை அனுசரித்தே வெளிவந்திடும் ! இன்னமும் நிறைய மாவட்டங்களில் கடைகள் / முகவர்கள் இயங்கத்துவங்கியிரா நிலையில் சித்தே GO SLOW அவசியமாகிப் போகிறது ! ஆனால் அதே பரிந்துரை எனக்கு எந்தவொரு விதத்திலும் சாத்தியமாகிடாது போலும் ! ஏதேதோ கதை பேசிக்கொண்டு - "ஆங்...அதுக்குத் தான் நேரம் கிடக்குல்லே ; இதைத் தான் அப்பாலிக்கா பாத்துக்கலாமில்லே ?" என்று பணிகளைப் புறம்தள்ள முடிந்த வரைக்கும் அடிவயிற்றைக் கலக்கவில்லை தான் ! ஆனால் 2 வாரங்களுக்கு முன்னொரு தினத்தினில், முன்னிற்கும் மெகா பணிகளினை தேதிவாரியாய் எழுதி, அவற்றிற்கு நாம் தயாராகிட வேண்டிய deadlines களையும் குறித்துப் பார்த்த போது மெய்யாலுமே உதறல் எடுத்து விட்டது ! 

*லயன் # 400  மெகா டெக்ஸ் புக்

* இரத்தப் படலம் வண்ணத்தொகுப்புகள் 

*2022 அட்டவணை இறுதிப்படுத்தல் ; அது சார்ந்த கதைகளுக்கு சகல ஏற்பாடுகளையும் செய்தல் ; and most importantly, அவற்றிற்கான 'டப்பை' தயார் செய்து அனுப்பிடல் !

*2022 கேட்லாக் ரெடி செய்தாக வேண்டும் ! 

*லயன் தீபாவளி மலர் with டெக்ஸ் 

* And the Daddy of them All : முத்து காமிக்ஸ் ஆண்டுமலர் # 50 !

இவை சகலமும் அக்டொபர் இறுதிக்குள் எங்கள்மட்டில் நூற்றுக்கு நூறு பணிநிறைவு கண்டிருக்க வேண்டும் !  முத்து காமிக்ஸ் ஆண்டுமலரை விரலுக்கேற்ற வீக்கமாய் நான் திட்டமிட்டிருந்ததை, உங்களின் அன்பான முட்டுச்சந்துப் பேச்சு வார்த்தைகளைத் தொடர்ந்து  அவசரமாய் மாற்றிக் கொள்ள நேரிட்டதால்,  புது ப்ளான்னிங் ; அதற்கான படைப்பாளிகள் ஒப்புதல் என்று ஏகமாய் நேரம் ஓடிவிட்டது ! And இதோ இந்தத் திங்கள் முதலே அதன் மீதான வேலைகளைத் துவக்கிட முடிந்துள்ளது ! 

இதன் மத்தியில் நார்மலான பணிகளிலேயே ஒரு கணிசம் என் திக்கில் திசை திரும்பிவிட்டுள்ளன - தவிர்க்க இயலா சில துரதிர்ஷ்ட சூழல்களின் பலனாய் ! நமக்குப் பேனா பிடிக்கக்  கொஞ்சம் கொஞ்சமாய்த் தயாராகி வந்ததொரு தென் மாவட்ட சகோதரி பற்றி சமீபமாய்ச் சொல்லியிருந்தேன் தானே...அவரது கணவர் கொரோனாவுக்கு பலியாகி விட்டிருக்க, இடிந்து போயுள்ளார் !! தகவல் கேட்ட போது எனக்கே தூக்கிவாரிப் போட்டதெனும் போது அவரது நிலையைப் பற்றி யோசிக்கவே மனம் கனக்கிறது ! And இந்த நேரத்தில் "பணியினை முடிச்சு அனுப்புறீங்களா ? புண்ணாக்கை எழுதறீங்களா ?" என்று கேட்கவே நா கூசுகிறது ! So தொடரும் மாதங்களின் சில ரெகுலர் பணிகளையும் ஒட்டு மொத்தமாய் மேஜையினில் குவித்து வைத்துள்ளேன் ! இன்னொரு பக்கமோ, நமது பிரெஞ்சு to இங்கிலீஷ் மொழிபெயர்ப்பாளர் மூட்டு மாற்று அறுவை சிகிச்சையினை கோவையினில் செய்திருக்கிறார் and 2 மாதங்களாகியும் ரொம்பவே சிரமப்பட்டு வருகிறார் ! So அவருமே தாற்காலிகமாய்ப் பணியாற்ற இயலா நிலையினில் இருக்க, அங்கும் இங்குமாய் ஜூனியர் தேடியதில் 2 பிரெஞ்சு நாட்டவர்களை மாற்றாகப் பிடிக்க முடிந்துள்ளது ! என்ன ஒரே சிக்கல் - அவர்களின் பிரெஞ்சுப் புலமை A-1 என்ற போதிலும் அவர்களின் ஆங்கிலப் புலமை சற்றே சுமார் ! So அந்த ஆங்கில ஸ்கிரிப்டை தமிழாக்கம் செய்திடும் பொருட்டு நமது கருணையானந்தம் அவர்களுக்கு அனுப்பினால் அதனில் சிக்கல் ! ரைட்டு...கோவைக்கே அனுப்பி, அம்மையாருக்கு மூட்டுவலி சற்றே தேவலாமென்று ஆன பிற்பாடு இன்னொருவாட்டி மொழிபெயர்க்கச் சொல்லலாம் ; ஒருக்கால் அது லேட்டாகும் என்று தோன்றினால் - அந்த ஆல்பத்தினையும் தக்கி முக்கியாவது நானே எழுதிட எண்ணியுள்ளேன் ! So என் மேஜை ஒரு பக்கமாய் பள்ளமாகாத குறை தான் - குவிந்து கிடைக்கும் பிரிண்ட் அவுட்களின் பளுவினில் ! இக்கட ஒரு சுவாரஸ்ய இடைச்செருகலுமே :

Deadwood Dick என்றதொரு அறிமுக நாயகரின் சாகசம் "நரகத்துக்கு நடுவழியே" என்று வெளிவரவுள்ளதை கவனித்திருப்பீர்கள் ! போனெல்லியின் உருவாக்கமே இது & இந்த மனுஷனும் வன்மேற்கின் நாயகன் தான் ! ஆனால் கறுப்பினர் என்பது வேறுபாடு ! தற்போதைய எனது மேஜை நிரப்பிகளுள் இவரும் ஒருவர் ! இந்த நாயகரின் பணிகளுக்குள் நான் புகுந்த நேரம் தான் - இக்கட  "ஒரு தோழனின் கதை" கி.நா.வில் "பப்பி ஷேம் படங்களை நீ எப்புடிப் போடப் போச்சு ?" என்ற பஞ்சாயத்து செம வேகமாய் ஓடிக்கொண்டிருந்தது ! அங்கே பதில்களைப் போட்டு விட்டு, இங்கே மொழிபெயர்ப்புக்குள் புகுந்தால் சிரித்து மாளவில்லை ! விஷயம் என்னவென்றால் இந்தக் கறுப்பின நாயகரும், அவரது தோஸ்த்தும் கதையின் முற்பாதியினில் பேசிக் கொள்வது முழுக்கவே  செம கரடு முரடு பாஷையினில் / பாணியினில் !! சம்பாஷணைகள் மட்டுமன்றி, கதையோட்டத்தோடு கலந்து வரும் சில அறிமுகங்கள் நாம் இதுவரைக்கும் பரிச்சயம் கொண்டிரா பாணிகளில் உள்ளன ! இதுவொரு வீரியமான நாவலின் காமிக்ஸ் உருமாற்றம் எனும் போது - வரிகளை சற்றே நாசூக்காக்குகிறேன் பேர்வழி என்று நான் புறப்பட்டால் - கதாசிரியரின் / நாவலாசிரியரின் தலைக்குள்ளிருந்து துளிர்த்த ஹீரோவை நம் சவுகர்யத்துக்கு மாற்றிய பிழை செய்தவனாவேன் ! படங்களில் உள்ள சில அஜால் குஜால் விஷயங்களை பலூன்களின் பொருத்தலால் சமாளித்து விடலாம் தான் ; ஆனால் முக்கியக் கதாப்பாத்திரங்களின் அறிமுக முன்பாதியினில் நான் நோண்டினேன் எனில் - Deadwood Dick - திண்டுக்கல் Dick ஆகிடுவார் என்பதே பயம் ! அதே சமயம் இதுக்கொரு முட்டுச் சந்தை நீங்கள் ஆங்காங்கே ரெடி பண்ணிடுவீர்களே என்ற பயமும் இன்னொரு பக்கம் ! சொல்லுங்களேன் guys ? திண்டுக்கல் டிக் ok தானா ? இல்லாங்காட்டி முட்டுச் சந்தில் next மீட் பண்ணிப்போமா ? (ஆனாலும் இந்த முட்டுச் சந்து மச்சம் நமக்கு ரொம்ப ஸ்பெஷலு தானுங்க !!)

அப்புறம் 2022-ன் கதைகளை இறுதிப்படுத்திட மே லாக்டௌன் மாதத்து வினவல்கள் ரொம்பவே உதவின என்பதை நான் சொல்லியே தீரணும் ! தினம் தினம் கேள்வி கேட்டு குடலை உருவியது போலிருப்பினும், நிறையவே 'இப்டியா ? அப்டியா ?' கேள்விகளுக்கு விடை காண முடிந்திருந்தது ! Of course - உங்களின் பரிந்துரைகள் எல்லாமே நடைமுறை கண்டிருக்கும் என்றெல்லாம் இல்லை தான் ; நான்பாட்டுக்கு இண்டிகேட்டர்களை ஒட்டு மொத்தமாய்ப் போட்டு விட்டு மெட்ரோ ரயிலுக்குத் தோண்டுவதை போல பாதாளத்தில் தோண்டவும் செய்திருப்பேன் தான் ! ஆனால் in general உங்களின் உள்ளப்பகிரல்கள் நிறையவே உதவியுள்ளன ! So thanks on that again guys !! அப்புறம் இந்த வாரத்து புதனன்று "ஆத்தா...நான் பாஸாயிட்டேன் !" ; "பாப்பாத்தியம்மா மாடு பத்துனா !!" ; "என் ஆளோட செருப்பை காணோம் " என்ற ரீதியில் கவித்துவமான தலைப்புகளை தேற்றி உள்ளேன் - அடுத்தாண்டின் இதழ்களுக்குச் சூட்டி, கேட்லாக்கில் புகுத்திடும் பொருட்டு ! முடிந்த மட்டுக்கு சைவமாகவே பெயர்களை அமைக்க முற்பட்டுள்ளேன் ; அதை மீறியும் சித்தே காசிமேடு கவுச்சி மார்க்கெட் வாசம் வீசினால் - spare me guys : கதைகள் அந்த ரகத்தினில் இருந்திருக்கும் ! 

Moving on, இ.ப. பிழைத்திருத்தங்கள் ஓடிக்கொண்டுள்ளன ஆபீசில் ! Corrections போட்டுத் தந்திருந்த நண்பர்களில் சிலர் பிரமாதமாகவும், சிலர் ஆர்வ மிகுதியினில் பொங்கோ பொங்கென்று பொங்கவும் செய்திருப்பதால் - லைட்டாக சிண்டைப் பிய்க்க வேண்டிய கட்டாயம் எழுந்துள்ளது எனக்கு ! தேவையான ஆணியெது ? தேவையில்லாத ஆணியெது ? பின்னே வரும் பாகங்களில் இடறிடாது பிடுங்கக் கூடிய ஆணியெது ? என்ற அலசல்களும் இப்போது எனது அட்டவணையில் இணைந்திருக்க, இந்நேரத்துக்கு அச்சுக்குச் சென்றிருக்க வேண்டிய நாம் - a week behind schedule !! இதன் மத்தியில் "ஜூலை 1 வரைக்குமாச்சும் முன்பதிவுத் தேதிகளை நீட்டிக்கப்படாதா ?" என்று நம்மாட்களிடம் நிறைய கண்சிவத்தல்கள் !! ஒன்றேகால் ஆண்டுகளின் அவகாசமும் நிறைவுக்கு வந்து தானே தீர வேண்டுமென்பதை அவர்களுக்குப் புரிய வைக்க நம்மவர்கள் படாத பாடு பட்டு வருகின்றனர் ! நம்மிடம் புக் செய்யவில்லை என்றாலுமே, நமது முகவர்களிடம் கூட வாங்கிக் கொள்ளலாமே guys ? இதோ சின்னமனூர் போன்ற சிறு ஊரின் முகவர் கூட 20 புக்ஸ் ஆர்டர் செய்துள்ளார் ! So இங்கே நாம்பாட்டுக்கு கல்லாவைத் திறந்து வைத்திருந்து, சிக்கும் சில்லறையை வாங்கிப் போட்டுக் கொண்டே போகும் பட்சங்களில், இந்தப் பேரிடர் நாட்களிலும் பெரும் ரிஸ்க் எடுக்கும் முகவர்கள் பாடு சிக்கலாக்கிடக்கூடும் அல்லவா ? So புக்கிங்ஸ் நம்மிடம் நிறைவுற்றதாகவே கருதிடுங்கள் guys ; இதழ் வெளியாகும் ஆகஸ்ட் இறுதியினில் முகவர்களின் சிறு பட்டியலையும் தந்து விடுகிறோம் ; தேவைப்படுவோர் அவர்களிடமிருந்தே நேரடியாய் வாங்கிக் கொள்ளலாம் ! 

ரைட்டுங்கோ...பதிவை நிறைவு செய்திடும் நேரமிது ! வீட்டிலுள்ள என் மேஜைக்கு மேலே ஒரு போர்டில் - உத்தேசமாய் ஒவ்வொரு பணிகளையும் நிறைவு செய்திட வேண்டிய தேதிகள் எவையெவை ? எந்தக் கதைக்கு அடுத்து எந்தக் கதை ? என்று நான் குறித்து வைத்திருக்கும் விபரங்கள்  - என்னை இந்த நொடியினில் கூட  முறைத்துக் கொண்டுள்ளன ! ஒரே ஆல்பத்தில் தொடர்ச்சியாய்ப் பணியாற்றுவது ரொம்பவே படுத்துவது போலிருப்பதால் - காலையில் Deadwood Dick ; மதியம் மேக் & ஜாக் கார்ட்டூன் ; மாலை : முத்து ஆண்டுமலர் பணிகளின் ஆக்ஷன் அதகளக் கதை # 1 என்று அட்டவணையினை குடாக்காட்டம் அமைத்துக் கொண்டுள்ளேன் ! ஒவ்வொன்றும் ஒரு விதம் என்பதால் - இது கூட ஒரு லூசுத்தனமான சுவாரஸ்ய அனுபவமாகயிருப்பதையும் உணர முடிகின்றது !  

இந்தக் கூத்துக்களுக்கு இடையிடையே இன்னொரு சத்தமில்லா முயற்சியும் ஓடி வருது ! அதனில் மட்டும் ஜெயம் கிட்டி - பட்டாப்பட்டியின் மீதமும் டார் டாராயிடும் என்பது மட்டும் புரிகிறது ! ஸ்டெல்லா கிட்டே சொல்லி, நம்ம ஜானி நீரோ தீவாளிக்கென வேங்கி வச்சிருக்கக்கூடிய பூப்போட்ட டிராயர் ஒன்றை முன்ஜாக்கிரதையாய் லவட்டியாகணும் போலும் !!

Bye all ...மறை கழன்ற எனது தினங்களைத் தொடர்ந்திடக்  கிளம்புகிறேன் ! See you around !! Have a safe weekend all !

MEMES 😄😄

MKS Ram :



DR.A.K.K.Raja :


Dr.Partheeban, Karur :




Thursday, June 24, 2021

RIP ஓவியரே !

 நண்பர்களே,

வணக்கம். ஒரு வருத்தமான சேதியோடு உபபதிவு ! நமது மூத்த ஓவியர் மாலையப்பன் அவர்கள் கடந்த 5-ம் தேதி (ஜூன் 5) இறைவனிடம் ஐக்கியமாகி விட்டுள்ளார் ! இன்று காலை நண்பர் அனுப்பியதொரு FB தகவலைத் தொடர்ந்து அவரது வீட்டாரிடம் விசாரித்த போது இந்தச் சங்கடச் செய்தியைச் சொன்னார்கள் ! நமது அலுவலகத்திற்கு ஓவியர் கடைசியாய் வந்து நிறைய காலம் ஆகிப்போயிருந்த நிலையில் நமது நம்பர்களை அவரது வீட்டம்மா வைத்திருந்திருக்கவில்லை போலும் ! ஓவியரிடமும் தான் செல்போன் கிடையாதே ! ஆகையால் தகவல் சொல்லாது விட்டு விட்டார்கள் ! கொஞ்ச காலமாகவே low B.P. இருந்து வந்துள்ள நிலையில் அதிகாலை 3 வாக்கில் அசவுகரியமாய் உணர்ந்திருக்கிறார் போலும் ! வீட்டில் ஏதோ கைப்பக்குவங்கள் செய்து தந்துவிட்டு மருத்துவமனைக்கு கூட்டிச் செல்வதற்குள்ளாய் காலன் அழைத்துச் சென்று விட்டிருக்கிறார் ! 30 ஆண்டுகளுக்கும் மேலாய் என்னோடு சரளமாய் ; பல சமயங்களில் குழந்தைத்தனமாய் பழகிய மனுஷனை மூப்பு வென்று விட்டுள்ளது ! மரணித்த போது அவரது வயது 69 தான் ....போகும் வயதே அல்ல தான் !! 

1984-ல் ஒரு ஜூலையில் நமது துக்கனூண்டு ஆபீஸ் ரூமில் முதல்முறையாக அவரை சந்தித்தது இன்னமும் எனக்கு மறக்கவில்லை ! பாளையங்கோட்டையிலிருந்து அடிக்கடி தந்தையின் ஆபீசுக்கு நோட்புக் ராப்பர் டிசைன்கள் போட்டுக் கொண்டு வரும் மனுஷனை எனக்கு அப்போதே பழக்கமுண்டு தான் ! ஆரம்ப ஆண்டுகளில் நமக்கு பைண்டிங் செய்து வந்த பெரியவருமே மேலப்பாளையத்திலிருந்து வருபவரே என்பதால், அவரிடம் தகவல் சொல்லி மாலையப்பனை வரவழைத்திருந்தேன் ! முதல் டிசைனாய்  நான் தந்திருந்தது - பின்னாட்களில் "புரட்சித் தலைவன் ஆர்ச்சி"யின் அட்டைப்படமாய் மிளிர்ந்த படத்தினையே ! அது எனக்கு அத்தனை பிடிக்கவில்லை என்பது வேறு கதை ஆனால் அந்த முதல் பணிக்கு அந்நாட்களில் நான் தந்தது ரூ.100 தான் ! திருநெல்வேலியிலிருந்து வந்து போக பஸ் காசுக்கு ரூ.10 தனி ; சாப்பாட்டுக்கென ரூ.5 !! இன்றைய தலைமுறைக்கு இவை எல்லாமே நம்ப இயலா நம்பர்களாகவே இருக்கக்கூடும் ; ஆனால் trust me guys - அந்நாட்களில் நான் 27 நாள் ஐரோப்பா சுற்றி வந்த விமான டிக்கெட்டே ரூ.9000 தான் ! 

தொடர்ந்த காலங்களில்  - எனது எதிர்பார்ப்புகள் என்ன ? என்ன மாதிரியான ஜிங்கு ஜாங் கலர்களை நான் கோருவேன்? என்பதெல்லாம் அவருக்கு அத்துப்படி ! அதிலும் ஸ்பைடர் டிசைன் என்றால் மனுஷனுக்கு செம குஷி ஆகிடும் ! இன்னமும் அந்த "கடத்தல் குமிழிகள்" ; சதுரங்க வெறியன் " அட்டைப்படங்களெல்லாம் தெறிக்கும் நினைவுகளாய் என்னுள் உள்ளன ! நடு நடுவே கோவில்களில் சுவர்களில் சித்திரம் போடும் காண்டிராக்டுகளுக்கு கூப்பிடும் போது என்னிடம் தயங்கியவாறே நிற்பார் ; அங்கே கணிசமான சன்மானங்களுக்கு வாய்ப்புண்டு என்பதால் நான் தடுக்க மாட்டேன் ; ஆறேழு மாதங்கள் கழிந்த பின்னே மீண்டும் வந்திடுவார் ! அங்கே கோவில்களில் போட்ட சித்திரங்களை ; அங்கே அணிவித்த பொன்னாடைகளை ; பாராட்டு மடல்களைக் காட்டி விட்டு அந்த டிரேட்மார்க் சிரிப்பைச் சிரித்து வைக்கும் போது அத்தனை பெருமிதம் மிளிரும் அவரிடம் ! 

ஆனால் கோவில்களில் அந்தப் பணிகள் ரொம்பவே பெண்டைக் கழற்றுவதால், அடிக்கடி சுகவீனங்களும் பலனாகிட்டன !  பின்னாட்களில் நமது ஊதியங்களையுமே கணிசமாய்க் கூடுதலாகி இருந்ததால் இயன்ற மட்டுக்கும் அந்தப் பணிகளைத் தவிர்த்து வந்தார் ! ஆனால் அந்த வரதா புயல் ; தொடர் மழைகள் என்ற காலத்தில் ரொம்பவே தளர்ந்து போனதால் சிவகாசிக்கு வந்து செல்லக்கூட தடுமாற ஆரம்பித்தார் ! And அந்தத் தளர்ச்சியின் பிரதிபலிப்பு பணிகளிலும் தென்பட்டது தவிர்க்க இயலாப் பின்விளைவாகிப் போனது ! ஒரு டிசைனைப் பூர்த்தி செய்ய ஒரு வாரமே ஜாஸ்தி என்ற நிலை மாறி, ஒரு மாதம் அவசியமென்றாகிய சூழலில் தான் நாம் வெளியீடுகளின் எண்ணிக்கைகளை திடுமென அதிகரித்திருந்தோம் ! So சிறுகச் சிறுக ஒரிஜினல் டிசைன்கள் ; டிஜிட்டல் ஓவியர்களென்று நாமும் நகர்ந்திட, ஓவியரும் ஒய்வு நாடிட துவங்கினார் ! அவரை கடைசியாய் நான் பார்த்தது 2019-ன் இறுதியில்....! இன்றைக்கு போட்டோக்களில் நினைவுகளாய் மட்டும் தொடர்கிறார் ! விதிகளின் வரிகள்....!!

நமது 50-வது ஆண்டு விழாவின் சமயம் பழைய ஆட்கள் அனைவரையுமே கௌரவிக்க எண்ணியிருந்தேன் ; ஆனால் இறைவனின் சித்தம் வேறாக இருந்துவிட்டுள்ளது ! நம்மால் இயன்றதொரு தொகையினை அவரது குடும்பத்தாரிடம் தந்திட எண்ணியுள்ளேன் ! காலச்சக்கரத்தின் ஓட்டத்தை இது போன்ற தருணங்களில் தான் முழுமையாய்ப் புரிந்து கொள்ள முடிகிறது ! Pheww !!

எண்ணற்ற நமது ஹிட் இதழ்களுக்கு உறுதுணையாய் நின்றிருந்தவருக்கு நமது வணக்கங்கள் & நன்றிகள் !!  ஆண்டவனிடம் அடைக்கலம் கண்டுள்ளவரின் ஆன்மா நிம்மதி காணட்டும் !! RIP ஓவியரே !! 

Saturday, June 19, 2021

ஒரு கதையிண்ட கதா !

 நண்பர்களே,

உஷார் : நெடும் பதிவு ahead ! பொறுமை குறைச்சலானோர் நேராய் பதிவின் bottom-க்கு ஜரிகண்டி ப்ளீஸ் ! 

வணக்கம். ஒரு "மெட்டல் மண்டையன்" இதற்கு முன்பாய் நம் மத்தியில் இத்தனை பரபரப்பை ஏற்படுத்தியது - போன வருஷத்து ஆர்ச்சியின் மாக்சி சைசிலான "பனி அசுரர்" இதழ் கலரில் வெளியான சமயம் தானென்று நினைக்கிறேன் ! அந்த சிகப்புச் சட்டித் தலையன் பேசியே பொழுதைக் கடத்துவான், இந்த விண்வெளி மண்டையனோ மௌனத்திலுமே வண்டி ஒட்டி விட்டான் ! Jokes apart - ஒரு all color மாதத்து இதழ்களின் மத்தியில் - அளவில் பாதியாய் இருந்தும், கவனத்தின் முழுமையையும் கபளீகரம் செய்துள்ள "ஒரு தோழனின் கதை" - என்னைப் பொறுத்த வரையிலும் ஒரு ஹிட்டா ? ; மிஸ்ஸா ? என்பதை விட ஒரு "மெகா அனுபவம்" என்பதாகவே நினைவில் தங்கிடும் ! இந்த இதழ் வெளியான பிற்பாடு பழைய பாட்டா சப்பல்ஸ் பிய்ந்திடவும் செய்யும் ; வழுக்கைத் தலையில் சில பரிவட்டங்கள்  கட்டவும்படும்  என்பதே எனது எதிர்பார்ப்புகளாய் இருந்தன ! (என்ன - சப்பல்சின் வீச்சு நான் யூகித்திருந்த விகிதாச்சாரத்தை விடக் கம்மியாகவும், பரிவட்ட எண்ணிக்கைகள் அதிகமிருந்ததும் செம pleasant surprise !  தேங்க்ஸ் all) துவக்கத்தில் கிட்டிய பூசைகளின் தடங்கள் மறையும் முன்னமே பிரவாகமெடுத்த சிலாகிப்புகள் - எனது யூகங்களைப் பூரணமாய் மெய்ப்படுத்தின ! 

"ஒரு தோழனின் கதை" இங்கே அலசோ அலசென்று அலசப்படும் வேளையில் கொஞ்சமாய் மண்டையை உருட்ட முனைந்தேன் - சென்றாண்டினில் இதனை அட்டவணைக்கென டிக் செய்த சமயத்தில் எனது thought process-ன் முழுமை என்னவாக இருந்ததென்று ! இதனில் பெரும்பகுதி ஏற்கனவே நான் இங்கு எப்போதாவது ஒப்பித்ததாகவே இருக்கலாம் தான் ; அவ்விதத்தில் இதுவொரு மறுஒலிபரப்பே எனில் - blame it on my மறதி please ! 

பொதுவாய் பணியில் எனது சக்கரங்களை சுழலச் செய்வன மூன்று சமாச்சாரங்கள் ! 

Of course - ஒரு தொழிலாய் ; கொஞ்சமேனும் பணம் ஈட்டித் தரும் வாய்ப்பாய் இதனைப் பார்த்திடுவதை மறுப்பதற்கில்லை என்பதால் - அந்த 3 சமாச்சாரங்களுள் ஒன்றாய் லாப நோக்கமும்  இருந்திடும் ! ஆனால் நிச்சயமாய் அதற்கான இடம் # 3 தான் ; moreso இந்தப் பேரிடர் காலங்களில் தலை தண்ணீருக்கு மேலிருந்தாலே சந்தோஷம் என்பதால், வரவு-செலவு கணக்குகளை பார்க்கும் நேரமே அல்ல இது, என்பது போன வருஷமே செய்ததொரு தீர்மானம் !

So மீதமிருப்பவை 2 factors & அவையே என்னுள் ஒரு சுவாரஸ்யத்தை உயிர்ப்போடு தொடரச் செய்கின்றன என்பேன் ! முதலாவதும், பிரதானமானதும் : ரக ரகமாய் ; வித விதமாய் ; கலர் கலராய்க் கதைகளை எங்கெங்கிருந்தோ உருட்டிப் புரட்டி எடுத்து வந்து உங்களிடம் ஒப்படைப்பதில் கிட்டும் அந்தச் சன்னமான ஒரு திருப்தி !  ஆண்டின் கதைத் தேர்வு நேரங்களே எனக்கு தீபாவளி ; பொங்கல் ; ரம்சான் ; கிருஸ்துமஸ் ; முழுப்பரீட்சை லீவுகள் - all rolled in one ! "லாட்டரியில் 15 லட்சம் ஜாக்பாட் அடிச்சிருக்கு " என்றவுடன் - "இந்த ரோட்டை வாங்கட்டுமா ? இந்தத் தெருவை வாங்கிப் போடட்டா ? இந்த ஆத்தை வாங்கட்டுமா ?" என்று பரபரக்கும் கவுண்டரைப் போல கதைத் தேர்வு நாட்களில் உள்ளங்கையிலிருந்து உச்சந்தலை வரைக்கும் நமைச்சல் எடுக்கும். (இல்லீங்க...தோல் டாக்டரைப் பார்க்கலாம் தேவை இல்லீங்க !!) கையில் இருப்பதோ குறிப்பிட்ட ஸ்லாட்ஸ் மட்டுமே ; பையில் இருப்பதோ அரைக்காசுப் பணம் மட்டுமே என்றாலும், வெள்ளை மாளிகையையும், பக்கிங்ஹாம் அரண்மனையையும், ஐபெல் டவரையும் வாங்கப் போகும் அம்பானி-அதானி ஓனரைப் போல சலம்புவது, ஒவ்வொரு ஆண்டையும் எனக்குத் திருவிழாவாக்கும் தருணங்கள் ! 

And வெவ்வேறு ஜானர்களில் நாம் கதைகளை வெளியிடத் துவங்கிய நாட்கள் முதலாய் எனது கதைத்தேர்வுத் திருவிழாவானது வேறொரு லெவெலுக்கு உயர்ந்தது என்று சொல்லலாம் ! மாமூலான டிடெக்டிவ் ; கௌபாய் என்ற ரசனைகளிலிருந்து கார்ட்டூன்ஸ் ; ஹாரர் ; கிராபிக் நாவல்ஸ் என்று நாம் கிளை விட, புலி வேஷம் கட்டிக்கிட்டு ஆட்டம் போட எனக்கான களம் விரிவடைந்தது போலிருந்தது ! So வித்தியாசமான தொடர்களை / நாயக / நாயகியரைத் தேடிக் கொண்டு வந்து உங்கள் முன்னே ஒப்படைக்கும் த்ரில்ஸ் ஒரு மிடறு கூடியது போலவே உணர ஆரம்பித்தேன் ! 

புதுசாய் எதையாச்சும் கண்ணில் காட்டி உங்களிடம் ஷொட்டு வாங்கும் அந்த முனைப்பே - கமான்சே ; லார்கோ ; ஷெல்டன் ; லேடி S ; ஜெரெமியா ; ஜூலியா ; மேஜிக் விண்ட் ; பராகுடா ; Damocles ; ப்ளூகோட்ஸ் ; மேக் & ஜாக் ; பென்னி ;  லியனார்டோ ; எண்ணற்ற கிராபிக் நாவல்கள் என இந்தப் பத்தாண்டுகளில் பல்டிக்களின் நிஜப்பின்னணி ! ஷொட்டுக்கள் - கொட்டுக்களாய் மாற்றம் கண்டதும் நிறையவே உண்டு தான் ; ஆனாலும், 'திரிஷா இல்லாட்டி நயன்தாரா இல்லாட்டி காந்திமதி' என்று உருண்டு கொண்டே செல்வது எனக்குப் பழகிப் போய்விட்டதொரு addiction ஆகி விட்டுள்ளது ! ஒவ்வொரு ஆண்டின் அட்டவணையிலும் யாரையாச்சும் புதுசாய்க் கண்ணில் காட்ட முனைவதுமே இந்தப் பின்னணியினில் தான் ! அதிலும் நாம் புழங்கும் கதைக்களங்களின் பெரும்பான்மை - scanlation-களில் இருந்தால் தவிர ஆங்கிலத்தில் வாசிக்கும் வாய்ப்புக்கள் கொண்டவையல்ல எனும் போது -'பாருங்கோ சார்...பெரிய கண்ணுப் பார்ட்டி கம்பி மேலே நடக்குது ; இப்போ கர்ணமும் போடுது !! அல்லாரும் ஒருவாட்டி ஜோரா கைதட்டுங்கோ !!" என்று உங்களின் முன்னே வித்தை காட்டும் ஆர்வம் கூடிடுவதுண்டு ! 

And கிராபிக் நாவல்களும், ஒன்-ஷாட் கதைகளுமே நம் தேடல்களின் ஒரு அங்கமாகிய பின்னே எனக்கான லைசென்ஸ் இன்னமும் ரொம்பவே வீரியமானதாக உணர்ந்தேன் ! ஒரு எடிட்டராய் எனக்கு bright ; light ; ஜாலியான கதைகளே பிடிக்கும் ; ஆனால் ஒரு மொழிபெயர்ப்பாளனாய் சற்றே dark கதைகள் ; மென்சோகப் படைப்புகளென்றால் சப்புக் கொட்டத் தோன்றும் ! So உங்களிடமிருந்து "கி.நா. லைசென்ஸ்" கிட்டிய பின்னே - "ஐயோ பீரோலு...சிலுவரு பேட்டரி ....பாரின் சரக்கு....சட்டி...சாமானு.." என்று ஆடாத குறை தான் ! ரிப்போர்ட்டர் ஜானியைப் போல ஒரு ரெகுலரான நாயகரின் தொடரினிலிருந்து நல்லதாக ஒரு கதையைத் தேர்வு செய்து உங்களிடம்  ஒப்படைப்பதும் குஷி தான் ; ஆனால் அதே நேரம் ஒரு புதியவரையோ, அல்லது என்னவென்றே நீங்கள் அறிந்திருக்கா ஒரு கி.நா.வையோ ஒப்படைக்கும் போது உள்ள த்ரில் செம ஜாஸ்தி ! அந்த த்ரில் சார்ந்த தேடலின் பலனே  - நமது dark கி.நா.க்கள் ; கண்ணான கண்ணே ; பிஸ்டலுக்குப் பிரியாவிடை ; பனியில் ஒரு குருதிப்புனல் ; கோழைகளின் பூமி ; மா துஜே ஸலாம் ; அர்ஸ் மேக்னா போன்ற offbeat ஆக்கங்கள் ! கரணம் தப்பினால் ஒவ்வொரு தேர்விலும் பலப்பல பாட்டா சப்பல்ஸ்களை முகத்தோடு முகமாய் முத்தம் கொஞ்சும் வாய்ப்புகளுக்குப் பஞ்சமே இராதென்று தெரிந்தே இருக்கும் தான் ; ஆனாலும் அந்த ரிஸ்க் எடுக்க நான் தயங்கினால் எதுவுமே சாத்தியமாகிடாதென்பது தான் bottomline ! So இவை போன்ற கோக்குமாக்கான தேர்வுகளை செய்யத் துணிந்திடும் ஒவ்வொருமுறையும் என்னுள் நிகழும் அந்த adrenaline rush தான் இங்கே பிரதானம் ! 

"ஒரு தோழனின் கதை" பிரான்சின் top பதிப்பகமான க்ளெனாவின் ஒரு பிரத்யேக வரிசையின் படைப்பு ; 2015-ல் வெளியானது ! போன வருஷத்து லாக்டௌன் சமயத்தில் செய்த மாமூலான தேடலில் கண்ணில் பட்ட கதை !

இங்கே நமது படைப்பாளிகளைப் பற்றியும் சொல்லியாகணும் ! நமது மெயின் பிக்ச்சர் எப்போதுமே ஆக்ஷன் & கௌபாய் என்பதை அறிவார்கள் ! ஆனால் அவ்வப்போது நான் தோலான்-துருத்தி என ஏதேதோ ஜானர்களிலான கதைக்கோப்புகளையுமே கேட்டபடியே இருப்பேன் ! ஒவ்வொன்றையும் சளைக்காது அனுப்பித் தருவார்கள் - "இதுலாம் உனக்கு செட் ஆகுமா ?" என்ற கேள்விகளுக்கே இடமின்றி ! அவ்விதச் சுதந்திரமும், அன்பும் இல்லையெனில் நான் இந்தப் பரீட்சார்த்தங்கள் திக்கில் தலைவைத்துப் பார்க்கக் கூட வாய்ப்பிராது ! Of course - பிரான்சில் வசிக்கும் நம் நண்பர்களிடம் எப்போதோ ஒருமுறையெனில் கோரிடலாம் ; ஆனால் வாரத்தில் ரெண்டுவாட்டி குடலை உருவினேனெனில் - அந்த ஊரில் இருக்கக்கூடிய ஜார்கண்ட் பக்கமாய்க் குடி மாறிடுவர் ! கோப்புகளை வரவழைத்துப் பார்த்த நொடியில் "ரிஸ்க்...ரஸ்க்...".என்று தலைக்குள் ஒரு குரல் ஒலிக்கத் துவங்கியது ! அந்தக் கணத்தில்  கார்ட்டூன் பாணியிலான அந்த மொக்கைச் சித்திரங்களை நான் ரொம்ப கண்டுகொள்ளவெல்லாம் இல்லை ; சித்திர பாணிகளைக் கொண்டு ஒரு கதையை எடை போடாதே என்பதைத் தான் க்ரீன் மேனர் கற்றுத் தந்திருந்ததே ! நிறையவே நெட்டில் அலசினேன் ; ஏகோபித்த குரல்கள் சிலாகிப்புகளாகவே இருக்கக் கண்டேன் ; அப்புறமும் to be safer - கோவையிலுள்ள நமது மொழிபெயர்ப்பாளரிடம் முழுக்கதையையும் இங்கிலீஷில் எழுதிக் கேட்டு வாங்கி ; அவரது அபிப்பிராயங்களையும் கேட்டுக் கொண்டேன் ! அப்புறமும் முழுசாய் திருப்தி கிட்டவில்லை, இங்கிலீஷ் ஸ்கிரிப்ட் கத்தையை மேலோட்டமாய் வாசிக்கத் துவங்கினேன் ! கதையில் இழையோடும் dark humour எனக்கு ரொம்பவே பிடித்தது !! தமிழாக்கம் செய்திடும் போது இங்கெல்லாம் ஸ்கோர் செய்திட வாய்ப்புகள் பிரகாசம் என்று தோன்றிய நொடியிலேயே கதையை டிக் அடித்து விட்டேன் ! ஏனெனில் - என்னுள்ளான சக்கரச் சுழற்சிகளுக்கு உதவிடும் அந்தக் காரணி # 2 - மொழிபெயர்ப்பினில் ஸ்கோர் செய்யக் கூடிய வாய்ப்புகள் மீதான காதலே ! 

உலகத்திலேயே செம போரான பணி என்னவென்று என்னை யாரும் கேட்கப்போவதில்லை தான் ; ஆனால் கேட்டார்கள் என்று வைத்துக் கொள்ளுங்களேன் - "பேனா பிடிப்பவனுக்கு பெருசாய் வாய்ப்பே தராது ஒரே சீராய் ஓட்டமெடுக்கும் கதைகளில் பணியாற்றுவது தான்..." என்பேன் !எக்கச்சக்கமாய்க் குவிந்து கிடப்பதிலிருந்து ஒரு மாமூலான க்ளாஸிக் ஜேம்ஸ் பாண்ட்  கதையையோ ; ஒரு மாடஸ்டி கதையையோ ; ஒரு விங் கமாண்டர் ஜார்ஜ் கதையையோ வாங்கிக் கொணர்ந்து வெளியிடுவதில் பெருசாய் த்ரில் இருப்பதில்லை எனக்கு ; simply becos அவையெல்லாமே இங்கிலீஷில் உள்ளவை ; எப்போது வேண்டுமானாலும் நீங்கள் படித்துக்கொள்ளக் கூடியவை & more importantly - ஒரு மொழிபெயர்ப்பாளனாய் ஸ்கோர் செய்திட இம்மியும் வாய்ப்பளிக்கா படைப்புகள் ! ஒரு டெக்சின் பன்ச் வரிகளுக்கு  அவசியங்களோ ; கார்சனின் நையாண்டி வரிகளுக்குத் தேவைகளோ அவற்றினில் இராது ! ஒரு ஜேம்ஸ் பாண்ட் 2.0-வின் ஸ்டைலான டயலாக்கள் முன்வைக்கும் சவால்கள் அங்கே இராது ! கார்ட்டூன் ஆல்பத்தில் புன்னகைகளை விரியச் செய்திடும் வாய்ப்புகள் இந்த நேர்கோட்டு கிளாசிக் கதைகளில் இராது ! ஒரு இருண்ட கிராபிக் நாவலின் மூடுக்கேற்ப பேனா பிடிக்க முயன்று, அதனில் ஓரளவுக்குத் தேறியும் விட்டால் கிடைக்கும் திருப்தி அங்கே சாத்தியமல்ல  ! 

So ஒரே படைப்பினில் நான் எதிர்பார்த்த ரிஸ்க் + மொழிபெயர்ப்பின் த்ரில் சாத்தியமாகிடக்கூடும் என்று "ஒரு தோழனின் கதை" உறுதி கூறுவதாக எனக்குத் தோன்றியதால் தான் துளியும் தயக்கமுமின்றி இதனுள் குதிக்கத் துணிந்தேன் ! இவை தான் இந்த ஆல்பத்தின் தேர்வின் நிஜமான பின்னணிகள் ! அதே சமயம்,these very same two factors தான் -  " இந்தக் கதை சுத்தமாய் ஒர்க் அவுட் ஆகாவிட்டால், உங்க காசு தண்டம் போகாது ; ஈடாய் வேறேதாவது தருவேன் ! " என்றும் என்னைச் சொல்ல வைத்தன ! Simply becos - இந்த ஒற்றைத் தேர்வின் பின்னாலிருந்தவை மட்டும் இம்மி கூட பதிப்பக லாஜிக் கொண்ட  சமாச்சாரங்களே அல்ல ! முழுக்க முழுக்கவே உங்களைத் திகைக்கச் செய்யும் அவாவும், முடிந்தால் உங்களிடமொரு ஷொட்டு வாங்கும் சுயநலமுமே எனும் போது - மொத்தமாய் இந்த முயற்சி சொதப்பிடும் பட்சத்தில் அதனை ஈடுசெய்யும் பொறுப்பு எனக்கு இருப்பதாய் நினைத்தேன் !! இதுவே நான் பெனாத்தித் திரிந்ததன் பின்னிருந்த சிந்தனை ! More on that at the bottom of this post guys !

இந்தியாவில் ஏதேனுமொரு மொழியில், ஏதேனுமொரு சுவாதீனமான காமிக்ஸ் எடிட்டரிடம் இதே கதையைக் கொடுத்துப் பார்த்தோமெனில் துண்டைக் காணோம், துணியைக் காணோமென்று ஓட்டமெடுத்திருப்பார் ! அங்கு தான் வாசகர்களாகிய நீங்கள் உங்கள் முத்திரையைப் பதிக்கிறீர்கள் !  'ரிஸ்க் எடுக்கிறேன்...ரஸ்க் எடுக்கிறேன்' என்று நான் செய்திடும் குரங்குக்கூத்துக்களை on merits பரிசீலிக்க நீங்கள் மட்டும் தயாரில்லையெனில் - மாசம் 2 மஞ்ச சட்டைக்காரர்கள் ; நடு நடுவே மாயாவிகாரு - என்று தான் நமது வண்டி ஓடிக்கொண்டிருக்கும் !  139 கோடி ஜனம் வசிக்கும் இந்த தேசத்தில் - இத்தனை பக்குவப்பட்ட காமிக்ஸ் வாசக வட்டம் இந்த ஆயிரத்துச் சொச்சத்தைத் தாண்டி வேறெங்கும் இருக்குமென்று நான் சத்தியமாக நினைக்கவில்லை !  So அந்த நம்பிக்கையும் கைகோர்க்க - மெட்டல் மண்டையன் தமிழ்நாட்டுக்கு வருகை தருவது சாத்தியமாகியது ! 

ரைட்டு...நிரம்பவே ரிஸ்க் நிறைந்ததொரு இதழை களமிறக்கியாச்சு & ஆண்டவன் புண்ணியத்தில், பெரும் சேதாரமுமின்றி தலையும் தப்பிடுத்து ! In fact ஸ்டார் நாயகர்களின் ஹிட் இதழ்களுக்கு நிகரான அல்லது அதை விடவும் ஜாஸ்தியான அலசல்கள் ; சிலாகிப்புகளை மெட்டல் மண்டைக்காரன் ஈட்டி விட்டான் ! 

So what does that mean for us ? 

ஏற்கனவே நான் சொன்னது போல - இது ஹிட்டா ? சுமாரா ? என்ற கேள்விகளெல்லாமே இரண்டாம் பட்சமே ! இதுவொரு சுவாரஸ்யமான அனுபவம் என்பதே இதிலிருந்து நான் கொண்டு செல்லவுள்ள நினைவுகள் ! மாறுபட்ட படைப்புகள் நம் மத்தியினில் ஒரு அணிக்கு ரொம்பவே extreme ஒவ்வாமையை உருவாக்குவதையும் கணக்கில் கொண்டாக வேண்டும் ; இன்னொரு அணிக்கு பிடித்திடுவதையும் கருத்தில் கொண்டாக வேண்டும் தான் ! "ஹா....அதான் நிறையப் பேருக்குப் பிடிச்சுப் போச்சுல்லே ; இதே ரீதியில் கதைகளைத் தேடுறது தான் இனி வேலை !" என்று நினைக்கப் போவதில்லை ! In fact -  "கதை இருக்கு....ஆனா கதை இல்லை !! புரிஞ்சிருச்சு,,,ஆனா புரியலை !!" என்ற திரிசங்கு நிலையில் நண்பர்களுள் கணிசமானோர் இருக்கக்கூடுமென்பதே எனது gutfeel !! அவர்களது பொறுமைகளையும், எனது அதிர்ஷ்ட தேவதையின் அண்மையையும் தொடர்ச்சியாய் பரிசோதனைகளுக்கு ஆளாக்கிடக் கூடாதில்லையா ? கம்பி மேல் என்றைக்கோ ஒருவாட்டி நடக்கலாம் தான் ; ஆனால் கம்பில பொழுதன்னிக்கும் நடப்பேன் என்ற அடம் ஆரோக்கியத்துக்கு ஆகாதில்லியா ? So புரிதலில் சிரமங்களைக் கோரிடாத படைப்புகளாய்த் தேடுவதற்கே வரும் நாட்களில் முன்னுரிமை தர முனைவோம் ! சேதங்கள் யாருக்குமின்றி, சுவாரஸ்யங்கள் எல்லோருக்குமே இருக்கும் விதமாய் எனது தேர்வுகளை  வாசகர் friendly ஆக அமைக்கும் பொறுப்பு இருப்பது புரிகிறது ! Phewwwwwwwww !! (அந்த மஞ்சள் சட்டைக்காரங்களுக்கு ஒரு கோயில் கட்டணும் போலிருக்கு !!

And yes - ஆஞ்சநேயர் வாலாய் நீண்டுவிட்ட பதிவினை நிறைவுக்குக் கொணரும் முன்பாய் அந்த replacement சமாச்சாரம் பற்றி

இந்த ஆல்பத்தின் தேர்வின் பின்னணியினில் உள்ள non commercial காரணிகள் பற்றியும், அவற்றின் காரணமாய் எனக்கொரு தார்மீகப் பொறுப்பு இருப்பதாய் நான் நினைப்பது பற்றியும் சொல்லியிருந்தேன் ! அதையும் தாண்டி, என்ன தான் சூடத்தை அணைத்து சத்தியம் செய்யாத குறையாய் இந்த ஆல்பத்தை டீசெண்டான நோக்கினில் நாம் வெளியிட்டாலுமே,  உசுப்பி விட்டுக் காசு பார்க்குமொரு முயற்சியாய் இதனைக் கருதிட நிச்சயமாய் ஆர்வலர்களுக்குப் பஞ்சமே இராதென்பதுமே எனது யூகமாகவும் இருந்தது ! அந்த யூகமுமே பொய்க்கவில்லை என்பதை இதோ - சமீப நாட்கள் நிரூபித்தே வருகின்றன ! நண்பர் மொஹிதீன் போல  நேரடியாய் தங்கள் நெருடல்களை முன்வைப்போருக்கு நமது நியாயங்களைப் புரியச் செய்து விடலாம் தான் ; ஆனால் நோய்வாய்ப்பட்ட மனங்களோடு இந்த ஆல்பத்தை பிட்டுப் படத்தோடு ஒப்பிடும் நேசங்களும், 'ஆமா..ஆமா..டெபினிட்லீ !! ' என்று அதற்கு முட்டுத் தரும் மூத்த (!!) நெஞ்சங்களும் இருக்கும் இந்தச் சிறு காமிக்ஸ் உலகினில் - I need to back my words with deeds ! பொழுது போகாத ஒரு சிறு அணிக்கு எதையும் நிரூபிப்பது என் நோக்கமேயல்ல இங்கே  ! மாறாக - எனது உள்ளுணர்வின் உந்துதலில் செய்த தேர்வானது பிழையாகிப் போகும் பட்சத்தில், அதனை நிவர்த்திக்க லட்ச ரூபாய் விரயமானாலும் கூட, நான் தடுமாற மாட்டேன் என்பதன் மூலம் அந்தப் படைப்பின் மீது எனக்கிருந்த நம்பிக்கையினையும், படைப்பாளிகளின் மீதான எனது அபிமானத்தையும் reitirate செய்திட இதனை ஒரு வாய்ப்பாக நான் பார்த்திடுகிறேன் ! I know this might sound corny ; but என்றைக்குத் தான் எனக்கு மண்டை ஒரு நிலையில் இருந்துள்ளது ?  ஆகையால் இதுவே எனது திட்டமிடல் :

லக்கி லூக்கின் 75-வது ஆண்டான இதனை சற்றே அழகாய்க் கொண்டாடிட சில திட்டங்கள் உள்ளன ! More on that later !! அவற்றின் ஒரு அங்கமாய்  நடப்பாண்டின் இறுதிக்குள் சில லக்கி மறுபதிப்புகளுமே உண்டு ! ரெகுலர் சைசில் ; தனித்தனி இதழ்களாய் ரூ.100 விலைகளில் அவை இருந்திடும் & அவற்றுள் ஒன்று - "சூ மந்திரகாளி !"  இம்மாதத்து கிராபிக் நாவலை சுத்தமாய் ஏற்றுக் கொள்ள இயலா வாசகர்கள் செய்ய வேண்டியதெல்லாம் இதுவே : 

"ஒரு தோழனின் கதை" புக்கின் முதல் பக்கத்தில் "NO" என்று ஸ்கெட்ச் பேனாவால் பெருசாய் எழுதி, ஒரு போட்டோ மட்டும் எடுத்து அதனை நமது அலுவலக வாட்சப் நம்பருக்கு (98423 19755) தங்கள் முகவரிகளோடு அனுப்பினால் "சூ மந்திரகாளி" புக்கானது - உரிய நேரத்தில் விலையின்றி அவர்களுக்கு அனுப்பிடப்படும். சந்தாவினில் உள்ளோரெனில் கூரியர் கட்டணங்களுக்கு அவசியமிராது ; சந்தாவில் அல்லாதோர் கூரியர் கட்டணம் மட்டும் செலுத்திட வேண்டி வரும். இது முறையான முன்னுதாரணம் ஆகிடாதென்ற நண்பர்களின் நல்லெண்ணங்களை நான் நிச்சயமாய் மதிக்கின்றேன் தான் ; and இதனை இனியொரு தொடர்கதையாக்கிட அனுமதிக்கவும் போவதில்லை தான் ! ஆனால் இந்த ஒற்றைத் தருணத்தில் மட்டுமே please permit me to stand by my words folks ! 

எது எப்படியோ - எனக்கு ஒரு விஷயத்தில் செம திருப்தி !! அடுத்த ஆறு மாசத்துக்குத் தேவையான மீம்ஸ் போட லட்டு லட்டா content கொடுப்பதில் ஐயாவுக்கு ஜெயமோ ஜெயம் ! வைகைப் புயல் ; தானைத் தலீவர் கவுண்டர் ; அப்பாலிக்கா இந்த egg eyes !! வேற யாரும் கிட்டக்க வந்துக்க முடியாதே !! பாருங்களேன் இந்த அட்டகாசங்களை !! எல்லாப் புகழும் நண்பர் MKS ராமுக்கே !! மற்ற நண்பர்கள் அனுப்பியுள்ள மீம்ஸ் அடுத்த பதிவினில் !! 

இந்தக் குவியலுள் best என எதைச் சொல்வீர்களோ guys ? 😍😍

Bye all....see you around ! Have a beautiful weekend !

And இம்மாதத்தின் பாவப்பட்ட மீத இதழ்களின் பக்கமாயும் இனி பார்வைகளை ஓடச் செய்வோமே ப்ளீஸ் ?