Powered By Blogger

Saturday, July 25, 2015

கேள்விகள் : 3 ; கோரிக்கை : 1

நண்பர்களே,

வணக்கம். சொற்பமான தருணங்கள் நீங்கலாக, அநேக நேரங்களில் பேப்பரையும், பேனாவையும் கையிலெடுத்துக் கொண்டு உட்காரும் வரையிலும் அந்த வாரத்தின் வலைப்பதிவினில் என்ன எழுதப் போகிறேன் என்பது பற்றியெல்லாம் பெரியதொரு திட்டமிடல் என்னுள் ஓடுவதில்லை! அப்போதைக்கு அறிமுகம் காணக் காத்திருக்கும் கதையைப் பற்றியோ; நாயகரைப் பற்றியோ முன்னோட்டமிடத் தொடங்கினால் சிறுகச் சிறுக பாக்கி விஷயங்கள் தத்தம் இடங்களில் நிலைகொண்டு விடுவது தான் வழக்கம். இந்த வாரமும் அதற்கு விதிவிலக்கல்ல! ஈரோட்டுப் புத்தக விழாவிற்கு நம்மவர்கள் தயாராகி வருவதையும், அதற்கான பிரதிகளைப் பண்டலிடுவதையும் பார்த்துக் கொண்டிருந்த சமயம் தான் இந்தப் பதிவின் plot எனக்குள் உதயமானது! கிட்டத்தட்ட 3 ½ ஆண்டுகளாய் கர்ணமடித்து இதழ்களின் கையிருப்பு எண்ணிக்கையை 80க்கு அருகாமைக்குக் கொணர்ந்திருக்கும் நிலையில் நமது ஸ்டாக் ரிப்போர்ட்டை மீண்டுமொரு முறை புரட்டிப் பார்த்தேன்! ‘அட... இதில் இன்னமும் இவ்வளவு இருப்பு உள்ளதா ?‘; ‘ம்ம்ம்... இந்தத் தொடரை ஜாக்கிரதையாய் தான் கையாளணும் போலும்;‘ என்றபடி scroll செய்த போது “டெக்ஸ் வில்லர் கதைகள்“ என்ற தலைப்போடு இருந்த பகுதியில் என் கவனம் நிலைகொண்டு நின்றது! அது சொன்ன சேதி இதுவே:
  • சிகப்பாய் ஒரு சொப்பனம் - 2
  • பூத வேட்டை - 4
  • நில்... கவனி... சுடு - 61
  • வல்லவர்கள் வீழ்வதில்லை - 120
  • கார்சனின் கடந்த காலம் - 55
  • நிலவொளியில் நரபலி - 427
  • LMS - ஹி! ஹி! ஹி!
  • காவல் கழுகு - 3

அதன் பின்னே நமது இரும்புக்கையாரின் இருப்பு விபரத்தையும் பார்த்து விடுவோமே என்று முயற்சித்த போது நயாகராவில் மாயாவிநஹி ஸ்டாக் மாயாவி‘யாகி விட்டதைப் பார்த்திட முடிந்தது! ஜனவரி சென்னைப் புத்தக விழாவின் போதே வாசகர்கள் குமுறு குமுறென்று குமுறியதைத் தொடர்ந்து இந்த இதழின் கையிருப்பு தரைதட்டிப் போயிருக்கும் என்பதை எதிர்பார்த்திருந்ததால் அதன் பொருட்டு பெரியதொரு ஆச்சர்யமில்லை என்னுள் ! டெக்ஸின் இந்தத் தாண்டவமும் பெரியதொரு வியப்பைத் தந்திடவில்லை என்றாலும் சில hard facts-களை மேஜைக்குக் கொண்டு வரும் வேளையாக இது எனக்குப்பட்டது !
  • 2012ன் நமது மறுவருகையைத் தொடர்ந்து நாம் இது வரை வெளியிட்டுள்ள இதழ்களின் எண்ணிக்கை 100!
  • இந்த நூறுக்குள் டெக்ஸின் சாகஸங்கள் எத்தனை என்று பார்த்த போது 10 இதழ்கள் என்று தெரிந்தது (லயன் 250ம் சேர்த்து)
  • 10 இதழ்களில் இருந்த கதைகளின் எண்ணிக்கை 13!
  • So - இந்த மூன்றாண்டுகளில் நமது flagship நாயகரின் பங்களிப்பு வெறும் 10% மாத்திரமே!
  • நிலவொளியில் நரபலி“ ரொம்பவே சீக்கிரமாய் காலியாகிப் போனதைத் தொடர்ந்து அதனை 2014-ல் மறுபதிப்பு செய்ததால் அதனில் மட்டும் ஓரளவிற்கு ஸ்டாக் உள்ளது.
  • அதன் (சமீபக்) கையிருப்பை மறந்து விட்டு இரவுக் கழுகாரின் இருப்புக் கணக்கைப் பார்த்தால் காற்றோட்டமான கிட்டங்கி மாத்திரமே கண்ணில் தட்டுப்படுகிறது!
  • சென்ற மாதம் வெளியான The லயன் 250 சந்தா / ஆன்லைன் நண்பர்களிடம் சாதித்தது ஒரு பக்கமெனில் விற்பனையாளர்கள் பலரையும் கூடப் பரபரப்படையச் செய்துள்ளது தான் icing on the cake! குட்டி ஊரான அருப்புக்கோட்டையில் கூட இது வரை 40 பிரதிகள் (நேரடி) விற்பனை செய்துள்ளார் அங்கிருக்கும் முகவர்! நெய்வேலி புத்தக விழாவில் ஸ்டால் அமைத்திருந்த இரு விற்பனையாளர்களுமே அங்கே சொல்லிக் கொள்ளும் விற்பனை காட்டவில்லை மின்னும் மரணம் & The லயன் 250 நீங்கலாக

மோவாயைத் தடவிக் கொண்டே இந்தப் புள்ளிவிபரங்களை திரும்பவும் அலசத் தொடங்கிய போது எனக்குள் இரண்டு கேள்விகள் தான் எஞ்சி நின்றன!
  1. டெக்ஸ் கதைகளின் ஆக்கிரமிப்பு சற்றே அதிகமென்று கடந்த ஆண்டின் கருத்துக் கணிப்பில் நண்பர்களின் ஒரு சாரார் அபிப்பிராயம் தெரிவித்திருந்தது சரி தானா?
  2. ஏழே நாட்களுக்கு முந்தைய எனது பதிவில் தான் “எல்லாவற்றிற்கும் ஒரு எல்லை இருத்தல் நலம்; அளவுக்கு மீறினால் பஞ்சாமிர்தம் கூட தித்திப்பின்றித் தெரியக் கூடும் !" என்று நான் நீ்ட்டி முழக்கியிருந்த பொதுவான கருத்துக்களெல்லாமே ‘டெக்ஸ்‘ எனும் இந்தப் பிரத்யேக phenomenon-க்குப் பொருத்திப் பார்ப்பது தான் தவறோ?
டெக்ஸ் கதைகள் வெளியாகும் வேளைகளில் பாராட்டுக்களோடு, விமர்சனங்களும் எழுவதை நான் அறியாதில்லை ! டுமீல்; ‘ணங் சத்‘ என்ற அதிரடிகள் தான் கதை நெடுகிலும் ; கதைகளிள் twist கிஞ்சித்தும் கிடையாது ; நேர்கோட்டில் பயணிக்கும் plot-கள் என்று ஆங்காங்கே படிக்க நேரிடுவது வாஸ்தவமே !  ஆனால் end of the day – இந்த மஞ்சள் சட்டை மாவீரரை ஆராதிப்பதில் நாம் அனைவருமே ஓரணியே என்பதை இந்த விற்பனை stats தெள்ளத் தெளிவாய்ப் பறைசாற்றுகின்றன அதுவும் ஒரு நாற்பது மாத அவகாசத்தினில்! 'ஒரு வேளை வெறும் 10% இடஒதுக்கீட்டில் மட்டுமே நம் ரேஞ்சர்கள் செயலாற்றி வருவதால் தான் இந்த டிமாண்டோ? எண்ணிக்கையில் டெக்ஸ் கதைகள் மிகுந்திடும் பட்சத்தில் இந்த விறுவிறுப்பைத் தக்கச் செய்வது சாத்தியமாகுமோ?' என்ற கேள்வியும் எனக்குள் ரவுண்டடிக்கத் தான் செய்கிறது! ஆனால் இந்த ஈரோட்டுப் புத்தக விழாவில் ‘தல‘யின் குறைச்சலான கையிருப்பின் பொருட்டு நாமொரு guaranteed விற்பனை இலக்கத்தைத் தவற விடுகிறோமோ என்ற உறுத்தல் அந்தக் கேள்வியை override செய்கிறது! இன்றைய தேதியில் விற்பனை விறுவிறுப்பும், ரொக்க வரவுகளும் பாலைவனத்தில் பதநீரைத் தேடுவது போல அரிதான விஷயங்களாகி விட்ட நிலையில் கண்முன்னே காத்திருக்கும் வாய்ப்புகளை தேவைக்கதிகமான நமது முன்ஜாக்கிரதையால் தவற விடுகிறோமோ ? என்ற சிந்தனை பலமாகவே குடிகொண்டு விட்டது

சரி ஸ்டாக்கில் இல்லாத இதழ்களை ‘மள மள‘வென்று மறுபடியும் தயார் செய்யலாம் என்று பார்த்தால் இரு விஷயங்கள் சிகப்புக் கொடியை உயர்த்தி நிற்கின்றன

முதலாவது சமாச்சாரம் இன்றைய பேப்பர் விலைகள்! 2013ல் வெளியான “சிகப்பாய் ஒரு சொப்பனம்“ & “பூத வேட்டை“ இதழ்களை அதே தரத்தில் இன்று மறுபதிப்பு செய்யும் பட்சத்தில் அவற்றை பழைய விலைக்கே திரும்பவும் கொணர்வது சாத்தியமே ஆகாது! டன் ஒன்றிற்கு சுமார் ரூ.21,000 விலையேற்றம் நிகழ்ந்துள்ளது - பேப்பர் விலைகளில் இடைப்பட்ட 2 ½ ஆண்டுகளில் சிக்கல் # 2 – நடப்பு வெளியீடுகளின் பணிகளுக்கு மத்தியில் இந்த மறுபதிப்பு மசாலாக்களையும் அரைக்க முயற்சிக்கும் போது முதலீட்டில் ; பைண்டிங்கில், நமது மிக்ஸி திணறத் தொடங்கி விடுகிறது!

So- இனி வரும் நாட்களில் “விற்பனைகளின் தலைமகனுக்கு“ சற்றே கூடுதலான print run ஒதுக்குவது காலத்தின் கட்டாயமென்பது புரிந்தாலும் what will be right number in a year for TEX? என்ற மண்டைக் குடைச்சல் ஆரம்பித்து விட்டது! தனியாகவொரு TEX சந்தா“ என்ற சிந்தனை எப்போதுமிலா வகையில் இப்போது கவர்ச்சிகரமாய் என் மனக்கண் முன்னே rampwalk செய்து வந்தாலும் அதை நடைமுறைக்குக் கொண்டு வருவது அத்தனை சுலபமல்ல என்பதும் புரியாதில்லை! இத்தாலிய மொழிபெயர்ப்புகளைத் துரிதப்படுத்த ஜுனியர் எடிட்டரின் புண்ணியத்தில் சிலபல ஏற்பாடுகள் உருவாகியிருப்பினும் 30 நாட்களுக்கொரு complete டெக்ஸ்“ என்ற கதிக்கு ஈடு கொடுப்பது சாத்தியமா ? என்பதைப் பார்க்கத் தான் வேண்டியிருக்கும்

இத்தாலிய மார்கெட்டில் மாதமொரு 100 பக்க டெக்ஸ் இதழ் வெளிவந்தாலும் அவை பெரும்பாலும் ஒரு கதையின் துவக்க பாகமாகவோ; இறுதி பாகமாகவோ இருப்பது தான் வாடிக்கை! 110 பக்கங்கள்; 160 பக்கங்கள்; 224 பக்கங்கள்; 340 பக்கங்கள் என ஏகப்பட்ட மாறுபட்ட நீளங்களில் TEX உருவாக்கப்படுவதால் ‘சடக்‘கென்று தொடரும் பலகையைப் போட்டு விட அவர்கள் தயங்குவதில்லை! நாமும் கூட முன்பு இந்தத் ‘தொடர்கதை டெக்ஸ்‘ தண்டவாளத்தில் இரயில் விட்டுப் பார்த்தவர்கள் தான்; ஆனால் நல்ல விறுவிறுப்பான கட்டத்தில் “மீதச் சாத்துகளை 30 நாட்களுக்குப் பின்னே நம்மவர் பட்டுவாடா செய்திடுவார் ! To be continued“ என்று நான் அறிவிக்க நேரிடும் போதெல்லாம் ஒரு வண்டி மானசீகக் குத்துக்கள் சிவகாசி நோக்கிப் பயணமாவது உறுதி என்பது புரிவதால் இந்தச் சாலையில் குதிரையை விடத் தயக்கமாக உள்ளது

என் முதல் கேள்வியானது :

சீரான விலையோடு,  இரண்டல்லது / மூன்று பாகங்களாய்  டெக்சின் கதைகள் தொடர்கதைகளாய் வலம் வர என்றேனும் ஒரு வேளை புலர்ந்தால் அதன் சாதக-பாதகங்கள் என்னவாக இருந்திடும் உங்கள் பார்வைகளில்?

விலையைப் பற்றிப் பிரச்சனையில்லை; கதைகளைப் பிரிக்க வேண்டாமே!“ என்ற school of thought-ன் மாணாக்கர்களாக நீங்கள் இருக்கும் பட்சங்களில்  

கேள்வி எண்:2 இது தான் : 

முழு நீளக்கதைகளெனும் போது ஓராண்டில் எத்தனை செட் மஞ்சள் சட்டைகளை நம்மவர் தயார் செய்து கையில் வைத்திருப்பது சரி வரும் என்று நினைக்கிறீர்கள் ? Maxi டெக்ஸ் ; Color டெக்ஸ் ; Giant டெக்ஸ் என்று விதவிதமான format-களில் இத்தாலியில் அவர்கள் செய்யும் அதகளங்களைப் பார்த்து நாமும் சூடு போட்டுக் கொள்ளாது நமக்கு ஏற்றதொரு பார்முலாவாக அமைத்துக் கொள்ளக்கூடியது தான் எதுவாக இருக்க முடியும் ?  இது பற்றி ஜுனியர் எடிட்டர் ஒரு குட்டியான project report தயார் செய்து என்னிடம் ஒப்படைத்துள்ளாரென்ற போதிலும் நமது ஒட்டுமொத்த ஆதர்ஷ நாயகரின் அட்டவணையை நிர்ணயிப்பது பற்றிய உங்களது inputs நம் திட்டமிடலுக்கு வலு சேர்க்குமே?!

இல்லை... இது பொன்முட்டையிடும் வாத்தைப் பொரியல் போடும் முயற்சியாக மாறி விடக்கூடும்! வேண்டாமே இந்த ஓவர்டோஸ்!என்ற சிந்தனை உங்களை ஆட்கொள்கிறதா

அப்படியானால் கேள்வி எண் 3 இதோ 

ஆண்டின் வழக்கமான அட்டவணையில் நார்மலாக இடம்பிடிக்கக் கூடிய மூன்றோ நான்கு டெக்ஸ் அதிரடிகள் நீங்கலாக நாம் திட்டமிடக்கூடிய கூடுதல் கதைகளை customized imprints’ குடையின் கீழே ஐக்கியமாக்குவது பற்றிய உங்கள் அபிப்பிராயங்கள் என்னவோ? ஆயிரம்... ரெண்டாயிரம் என்ற விலைகளில் அல்லாது தாக்குப் பிடிக்கக் கூடியதொரு விலையோடு ‘தேவையானோர் முன்பதிவு செய்து வாங்கிக் கொள்ளலாம்‘ என சந்தாக்களோடு சம்பந்தப்படுத்தாது ஒரு தனிப்பட்ட ‘புல்லட் டிரெயின்‘ தடத்துக்கு TEX -ன் கூடுதல் எண்ணிக்கைகளைத் திசைதிருப்பினால்  நலம் தருமா? Thoughts on that please? திரும்பவும் சொல்கிறேன் ரெகுலர் சந்தாக்களில் / அட்டவணைகளில் டெக்ஸின் தற்போதைய பங்களிப்பு தொடரும் போதே கூடுதலான திட்டமிடல்களை மாத்திரமே இன்னொரு parallel தடத்தில் ஏற்றுவது பற்றியான உரத்த சிந்தனையே இது! What would be your take on this guys ?

இது 2016ன் அட்டவணைத் தயாரிப்பின் final stages என்பதோடு இப்போதைய திட்டமிடல்கள் தான் 2016 ஜனவரியின் சென்னைப் புத்தக விழாவிலாவது டெக்ஸின் புஷ்டியான பங்களிப்பை உறுதிப்படுத்த உதவும் என்பதாலும் இந்தக் கேள்விகள் இப்போது அவசியமாகின்றன ! So- தொப்பி போட்ட நம் ஆத்ம நண்பர்களின் அட்டவணையை நிர்ணயிக்கும் பொருட்டு நமது சிந்திப்புத் தொப்பிகளை தலையிலேற்றிப் பார்ப்போமா ? And - here is a little surprise too !
Moving on, CCC-ன் மூன்று இதழ்கள் ஏற்கனவே அச்சாகி பைண்டிங்கில் உள்ளன ! ஆனால் நமது நீலக் குட்டி மனிதர்களின்  கதையுடனான இதழ் # 4 தயாராவதில் தான் தாமதமே தலைதூக்குகின்றது! For a change – நம் பக்கத்துப் பணிகளை சுணக்கங்கள் ஏதுமின்றி முடித்து விட்டிருந்தாலும் - அவற்றின் ஒவ்வொரு சிறு நுணுக்கங்களும் படைப்பாளிகளின் பலகட்ட ஒப்புதல்களுக்கு உட்பட்டவைகளாக உள்ளன ! நமது இத்தனை கால அனுபவத்தில் இத்தனை துல்லியத் தர ஒப்பீட்டை வேறெந்தப் படைப்புப் பதிப்பகமும் நடைமுறைப்படுத்தியதாக எனக்கு நினைவேயில்லை! So- அவர்களது தலையசைப்பிற்காகக் காத்துள்ளது வண்டி! அது கிட்டிய 3 நாட்களுக்குள்ளாக இதழ் தயாராகி விடும் என்ற நிலையில்- கடந்த சில பல நாட்களாகவே மெயில்பாக்ஸை உற்று நோக்கிய வண்ணமே எங்கள் பொழுதுகள் கரைந்து வருகின்றன! நிலவரம் இது தான் என்பதால் CCC-ன் வெளியீட்டுத் தேதி நிச்சயமாய் ஆகஸ்டின் துவக்கத் தேதிகளில் தானிருக்க முடியும்! ஒரு உலகளாவிய வெற்றிப் படைப்பை நிர்வகித்து வரும் நிறுவனத்துடன் இது தான் நமது முதல் வியாபாரத் தொடர்பு என்பதால் ‘நொய் நொய்'யென்று‘ அவர்களை நச்சுப் பிடுங்கிடத் தயக்கமாகவும் உள்ளது; அதே சமயம் நாசூக்கான நினைவூட்டல்களோடு நமது அவசரத்தையும் தெரியப்படுத்தாமல் நாமில்லை! And இன்னொரு விஷயமும் கூட : ஒரு வழியாக தமிழ் பேசும் ஸ்மர்ப்களின் “பொடி பாஷைக்கு“ படைப்பாளிகளின் சம்மதத்தை வாங்கி விட்டோம் அவர்களையும் குஷிப்படுத்தக் கூடியதொரு 'பொடி ஏற்பாட்டோடு !' So- தற்போதைய quality check-ல் பச்சைக் கொடி சிக்னல் கிட்டி விட்டால் ஸ்மர்ப் எக்ஸ்பிரஸ் குதூகலமாய் கிளம்பி விடும்!
இம்மாதத்து “கார்ட்டூன் மேளா“ பிரதான இடத்தைப் பிடித்திருப்பினும் நமது “சிரஞ்சீவிகளும்“ சத்தமின்றி ஒளிவட்டத்தை ஈர்க்கக் காத்திருக்கிறார்கள்! மின்சாரத்தை மதிய லஞ்ச் ஆக்கிடும் மாயாவியும், சிலந்தி வலைகளை வாஞ்சையோடு நாம் பார்க்கவொரு காரணம் கண்டுபிடித்த குற்றச் சக்கரவர்த்தியும் தான் அந்த சிரஞ்சீவி ஜோடி! சாலையின் மறுபக்கம் பென்ஸ் கார் ஓடினாலும் சரி; BMW; போர்ஷே என ஒசத்தி ரகங்கள் ஷண்டிங் அடித்தாலும் சரி- எங்களது அம்பாஸிடர் கார் அலுங்காமல், குலுங்காமல் சவாரியைத் தொடரும் என்று நிரூபித்து வரும் இந்த 1960 ஆசாமிகளின் preview இதோ!

1984ல் இந்த இதழ் தயாரான சமயம் நாம் ரூ.60/- கொடுத்துப் போட்டு வாங்கிய ஒரிஜினல் டிசைன் இன்றளவிற்குப் பத்திரமாய், நயமாய் இருப்பதால் அதனையே ஸ்கேன் செய்து லேசான வர்ணமாற்றங்களோடு களமிறக்குகிறோம்! சமீப மாதங்களைப் போலவே இம்முறையும் மறுபதிப்புகளுக்கு மட்டும் அந்த natural shade காகிதம் என்பதால் ஒரு நிஜமான antique feel இருக்கப் போவது உறுதி! நியூயார்க்கை அட்லஸில் மட்டுமே நம்மில் பலரும் பார்த்து வந்த வயதுகளில் வெளியான இந்த சாகஸம் சுமார் 30 ஆண்டு இடைவெளிக்குப் பின்னே மீண்டுமொரு முறை தலைகாட்டுகிறது! இன்று நியூயார்க்கிலேயே வசிக்கும் வாசகர்களும் நம்மிடையே உண்டென்ற நிலையில் அந்த நகரையே நகற்றிச் செல்ல எத்தனிக்கும் எத்தன் பற்றிய இந்தக் கதைக்கு நாம் எவ்விதம் react செய்திடவுள்ளோமென்று அறிய ஆவல்

ஒன்று மட்டும் நிச்சயம்  Fleetway குழுமம் கரைந்து போய் காலம் நிறையக் கடந்து விட்டது ! அவர்கள் மட்டும் இன்னமும் உயிரோடிருப்பின் தமிழ் கூறும் காமிக்ஸ் உலகிற்கு நிச்சயமாய் இலண்டனில் ஒரு சிலை எழுப்பியிருப்பார்கள்!! என்றும் மாறா இளமையோடு அவர்களது படைப்புகளை நம்முலகில் வெற்றிநடை போடச் செய்துள்ள பெருமை நிச்சயமாய் உங்களது guys!


Before I wind off – ஈரோட்டிற்கு ஆகஸ்ட் 8 & 9 தேதிகளில் எட்டிப் பார்ப்பதாய் திட்டமிட்டுள்ளோம் ! ஸ்மர்ப்ஸ் சங்கதி சற்றே துரிதமாய் அரங்கேறியிருப்பின் பணிகளை சீக்கிரமே முடித்துக் கொண்டு அதற்கு முந்தைய வார இறுதியில் ஈரோடு செல்ல சாத்தியமாகி இருந்திருக்கும்! But என்னால் உறுதி சொல்ல இயலா ஒரு சூழலில் ஈரோடு வர எண்ணிடும் உங்கள் பயணத் திட்டங்களையும் தொங்கலிலேயே தொடர விட எனக்குப் பிரியமில்லை. So CCC அதற்கு முன்பே தயாராகி / வெளியாகி விடும்; வாரயிறுதியில் உங்களை சந்திப்பதை மட்டுமே agenda-வாகக் கொண்டு புத்தக விழாவுக்கு டிக்கெட் போட்டுள்ளேன்! Please do visit us folks – with family!! 

ஞாயிறின் பகல்பொழுதில் ஒரு பயணம் காத்திருப்பதால் இந்தப் பதிவை சற்றே அட்வான்ஸ் செய்துள்ளேன்! And before I sign off - சமீபமாய் தேவையில்லா சர்ச்சைகளுக்கு இடம் தந்து வரும் இந்த அனாமதேய ஐ-டி-க்கள் பற்றிய எனது காலம் கடந்த two cents ! சொல்ல வரும் அபிப்பிராயம் சாதகமானதோ ; பாதகமானதோ - அதனை ஒரு மாற்றுப் பெயரில் முன்வைக்கும் அவசியம் எழும் போதே அவர் நம்மோடு ரெகுலராய் உறவாடி வரும் ஒரு வாசகரே என்பது தெளிவு தான் ! கருத்து யுத்தங்களும், ஈகோ மோதல்களும் அரங்கேறும் தளமாக நமது வலைப்பக்கம் இருந்த ஆரம்பத்து நாட்களில் தொடங்கிய இந்த "அனாமதேயக் கலாச்சாரம்" தானாகவே ஒயட்டுமென்று நான் அதற்கு பெரியதொரு கவனத்தைத் தந்திடவில்லை. தேவையின்றி நாமே வெளிச்சத்தை இது போன்ற முயற்சிகளுக்குத் தந்து இதனைக் கூடுதலாய் வளர்க்க உதவுவானேன் ? என்று நான் இதனில் ஒரு studied silence -ஐ தொடர்ந்து வந்தேன். ஆனால் இன்றைக்கு நமது வாசக வட்டம், ஒருவரையொருவர் பெர்சனலாகத் தெரிந்து வைத்துக் கொள்ளும் நெருக்கத்துடன் செயல்பட்டுவரும் ஒரு சந்தோஷ சூழலிலும் அந்த முகமூடிகளின் பிரயோகத்தை முன்பு போலவே விட்டேந்தியாய்ப் பார்க்க முடியவில்லை  ! உரிமையோடு நாம் உறவாடும் நபருக்கொரு முகமூடி முகமும் உண்டெனும் போது அது நெருடலாகவே இருப்பது மட்டுமன்றி - 'இது இவர் தானோ ? இது அவர் தானோ ?' என்ற ரீதியில் அடிமனதில் மெல்லிய சந்தேகங்கள் எழுவதும் இயல்பு தானே ? 

Yes, of course - "இது இன்னார் தான் !" என்று தெரிந்து இந்த பூலோக வாசத்தை நாம் கூடுதல் அர்த்தமுள்ளதாக்கிக் கொள்ளப்போவதில்லை தான் ! போர்வையோடு "அவர்கள்"  காலமெல்லாம் கடந்தாலும் பூமி எப்போதும் போலவே தான் சுழலப் போகிறது !  ஆனால் பதிவிடும் சிந்தைகளுக்குச் சொந்தம் கொண்டாடக் கூடவொரு முகமூடி தேவைப்படுமளவுக்கு இங்கே இருப்போர் கொடுங்கோலர்களோ ; புல்தடுக்கிப் பயில்வான்களோ இல்லையே ! Why then the need or the craving for anonymity ???

காலணாவுக்குப் பெறாததொரு விஷயத்தின் பொருட்டு நிறையப் பேரின், நிறைய எனர்ஜி விரயம் ஆவது மட்டுமன்றி, தேவையிலா விவாதங்களும், மனக்கசப்புகளும் மட்டுமே மிஞ்சுகின்றன ! ஒரு மைல்கல் இதழ் வெளியான 3 வாரங்களுக்குள்ளாகவே ; இன்னுமொரு மைல்கல் ஒரே வாரத்தில் காத்திருக்கும் வேளைதனில் - இங்கே ஓடும் நமது  பின்னூட்டங்களின் பெரும்பகுதி தேவையற்ற திசைநோக்கிப் பயணம் போகும் போதே - நாம் செல்லும் பாதை சரியில்லை என்பது புரிவதில் சிரமம் தானேது ? எனக்கொரு சூப்பர் சக்தி கிட்டி - நித்தமும் இங்கே வருகை தந்து moderator ஆகச் செயல்படுவது  சாத்தியமே ஆகினும் கூட அதனை நான் செய்திடப் பிரியம் கொள்ள மாட்டேன் - simply because இங்கு வருகை தருவோர் சகலருமே நம் நண்பர்கள் ; காமிக்ஸ் காதலர்கள் ! "இது சரி ; இது சரியல்ல".... என்று நான் சொல்லியா சகலகலா வல்லவர்களான நம்மவர்களுக்கு discipline பற்றித் தெரியவொரு அவசியம் எழுந்திடப் போகிறது ? ஒரு துரதிர்ஷ்ட நாளில் அப்படியொரு வேளையும் புலர்ந்தே விட்டதெனில் - இந்தப் பதிவுப் பக்கத்தைச் 'சிவனே' என்றொரு தகவல் பலகையாக மட்டுமே உருமாற்றி விட்டு நடையைக் கட்டத் தான் தீர்மானிப்பேனே தவிர்த்து - வகுப்பறை வாத்தியாராய் அவதாரமெடுக்க நிச்சயம் முனைந்திட மாட்டேன் ! Call that a sign of weakness..? sure enough, but I'd rather err on the side of softness towards friends ! And simply because I still trust better sense will prevail !

நம்மிலிருக்கக் கூடிய குழந்தைத்தனங்களை ஸ்மர்ப்களை ரசிப்பதற்கும், பென்னியை பாராட்டுவதற்குமே விட்டு விட்டு - பாக்கி சமயங்களில் நம் திறன்களுக்கேற்ற மனிதர்களாய் நிஜ முகம் காட்டும் தைரியத்தோடு உலா வருவோமே ?  போதுமே இந்தப் போர்வைகளும், முகமூடிகளும் ! Bye for now all ! See you around ! 

Sunday, July 19, 2015

ப.பட்டி இருக்க பயமேன் ?

நண்பர்களே,

வணக்கம். "500+ பின்னூட்டங்களா ? OMG !!" என்றபடிக்கே சென்ற வாரப் பதிவின் பிற்பகுதிக்குள் புகுந்தால் கொஞ்ச நேரத்தில் ராட்டினத்தில் ஏறியது போலொரு கிறுகிறுப்பு !! Load more தொல்லை ஒரு பக்கம் பிடுங்கித் தின்னும் போது நண்பர்களுக்கு இத்தனை பொறுமை எவ்விதம் சாத்தியமாகிறது என்ற கேள்வி தான் எனக்குள் பிரதானமாய் ஓங்கி நின்றது! 'தலை எது ..? வால் எது ?' என்ற பரிசீலனைகளைச் செய்து சாலமன் பாப்பையா ரேஞ்சுக்கு தீர்ப்பு சொல்கிறேன் பேர்வழி என்று நான் இறங்கினால் எஞ்சியிருக்கும் மிச்சம் சொச்சமும் அரோகராவாகிடும் ; august பணிகளின் உச்சத்துக்குள் அமர்ந்திருக்கும் இத்தருணத்தில் அங்கே கோட்டை விடும் வாய்ப்புகளும் பிரகாசம் ஆகிப் போகும் என்பதால் let's just move on folks ! என்ற விண்ணப்பத்தை முன்வைத்து விட்டு புதிய பதிவுக்குள் புகுந்திடுகிறேனே !  

வழக்கம் போல கதைகளின் முன்னோட்டம், பின்னோட்டம்; ‘வருகிறது வந்தே விட்டது பாணியில் எழுதி-எழுதி என் பேனாவுக்கே அலுத்து விட்டதால் இந்த ஞாயிறு லேசாக ‘ஜெர்க்‘ அடிக்கிறது ! So ஒரு மாற்றத்திற்காகவாவது வேறு பக்கமாய் கவனத்தைத் திருப்புவோமே என்று நினைத்தேன் ! So CCC-ன் கதை preview-களை பிரதானமாய் எதிர்பார்த்திருந்த நண்பர்கள் ஷமிப்பார்களாக இதுவொரு unplugged ரகப் பதிவு மாத்திரமே!

3 ஆண்டும் சில மாதங்களும் பயணித்த நேரத்திற்குள் 100 இதழ்கள் நம் கண்முன்னே ஆஜராகியிருக்கின்றன என்ற தகவலை சென்ற வாரம் நண்பர்களின் புண்ணியத்தில் தெரிந்து கொள்ள முடிந்தது ! இவற்றுள் மறுபதிப்புகளின் எண்ணிக்கை ஒற்றை இலக்கத்திலேயே தான் எனும் போது புது வரவுகள் / புதுக் கதைகளின் பங்களிப்பே பிரதானம் என்பதும் புரிகிறது ! புள்ளி விபரங்களில் டைகர்களான நண்பர்கள் இன்னும் சற்றே மெனக்கெட்டால் இந்த 100 இதழ்களின் மொத்தப் பக்க எண்ணிக்கையும் என்னவாகயிருக்குமென்று அறிந்து கொள்ள இயலும் ! தோராயமாய் ஒரு கணக்குப் போட்டாலே சுமார் 6000+ பக்கங்கள் தேறிடும் என்று எனக்குப்பட்டது! கும்பகர்ணனின் உடன்பிறப்பாய் நடமாடி வந்த லயனின் முதல் அவதாரத்திற்கொரு அசாத்திய நம்பராக இது நிச்சயமிருக்கும் தான் ! இன்றைய புதுயுகத்திற்கு முடிந்தளவு ஈடு தர நினைத்திடும் லயனின் version 2-க்கும் இதுவொரு sizable நம்பர் தானா ? என்பதைச் சொல்லிட வேண்டியவர்கள் நீங்களே ! ஆனால் இங்கே நான் இந்த நம்பர்களோடு சடுகுடு ஆடுவது காலரைத் தூக்கி விட்டுக் கொள்ளும் பொருட்டல்ல... மாறாக எனக்குள் மெலிதாக முளைவிடும் ஒரு முன்ஜாக்கிரதையின் பொருட்டே! வாழ்க்கையின் சகல சங்கதிகளுக்கும் ஒரு ஆயுட்காலத்தை நிர்ணயி்த்துள்ளார் மேலேயுள்ளவர் ! அப்படிப் பார்க்கையில் ரசனைகளுக்கும் நிச்சயமாய் ஒரு shelf life இருந்திடுவது தானே இயற்கை ? ஆறாயிரமோ - ஏழாயிரமோ இந்தப் பக்கங்கள் சகலமும் இரண்டே பேர்களின் பேனாக்கள் தந்த உழைப்பு என்பதை கருத்தில் கொண்டு பார்க்கும் போது மூன்று கேள்விகள் எனக்குள் :

கேள்வி # 1: நமது மொழிபெயர்ப்பு இலாக்காவின் துவாரபாலகர்களாய் நானும், திரு. கருணையானந்தம் அவர்களுமே தொடரும் இந்த நிலைக்கு கொஞ்சம் கொஞ்சமாகவேணும் ஒரு மாற்றம் கொணர்வது அவசியமாகாதா ? எனக்கே சில நேரங்களில்  இதே ‘பன்ச்சை‘ போன வருஷத்து டெக்ஸ் கதைக்கும் எழுதி விட்டோமோ ? என்ற சந்தேகம் எழுகின்ற சமயம் இது ! லக்கி லூக்குக்கு ஏற்கனவே இதே நையாண்டி வசனத்தை வேறொரு கதையில் பிரயோகித்து விட்டோமோ? என்ற குழப்பம் எழாதில்லை ! So அதே பாணிகளைப் படித்துப் படித்து உங்களுக்கு ஒருவித சலிப்புத் தட்டும் முன்பாகவே (அது வந்து ஒரு மாமாங்கம் ஆச்சு ! என்ற சில குரல்கள் loud & clear too !கொஞ்சம் கொஞ்சமாகவாவது புது வரவுகளை இந்த இலாக்காவினுள் நுழைக்கும் முயற்சிக்கு ஒரு பிள்ளையார் சுழி போடும் தருணம் தான் எதுவாக இருக்குமோ ? 

கேள்வி # 2: இதே சங்கதி  மறுபக்கத்திற்கும் பொருந்தும் தானே? எத்தனை காலம் தான் எங்கள் இருவருக்கும் இந்தப் பணிகளை துடிப்போடு செயல்படுத்திடும் ஆற்றல் தொடரும் ?  வெவ்வேறு  விதங்களில் இது  தான் ஆண்டாண்டு காலமாக எங்கள் பிழைப்புகளே என்றாலும் இன்றைய சூழல் முற்றிலும் மாறுபட்டது என்பது தானே யதார்த்தம் ? பணிசெய்வது ஒரு சிறு வட்டத்துக்கே என்றால் கூட இதனிலுள்ள எதிர்பார்ப்புகள் முன்பு எப்போதும் இருந்திடாத ரகம் இன்றைக்கு ! இன்டர்நெட்டின் ஒரிஜினல் கோப்புகளோடு ஒப்பீடு ; ஆங்காங்கே நண்பர்களின் ஸ்கான்லேஷனுடனான வரிக்கு வரி comparisons; இதை இப்படிச் செய்திருக்கலாமே; அதை அப்படிச் செய்திருக்கலாமே !' என்ற ஜாலியான அறிவுரைகள் நிறைந்ததொரு களத்தினில் நித்தமும் குதிரை ஒட்டுவதென்பது  கம்பி மேல் நடப்பது போலவே! Improvise செய்கிறோமென்று இரண்டு வரி சேர்த்து எழுதினால் 'டண்டணக்கா' ; 'எடிட் செய்கிறேன் பேர்வழி !' என்று இரண்டு வரியை கபளீகரம் செய்தால் 'டணக்கு நக்கா' ! அந்த நாட்களில் நம்மில் முக்கால்வாசி வாசகர்கள் அரைடிராயர் பாலகர்களே என்ற போது - "மாயாவி சண்டை செய்தார் !" ; "ஜானி கராட்டே வெட்டு வெட்டினார்" போன்ற டயலாக்குகள் கூட செல்லுபடியாகிவிட்டன ! ஆனால் இன்று நம் வட்டத்தின் அகவைகளும், ஆற்றல்களும் வேறொரு தளத்தில் உள்ளன எனும் போது ஒவ்வொரு பந்திலும் ஒரு பவுண்டரி அடிக்க வேண்டியதொரு கண்ணுக்குப் புலப்படா அவசியம் நிலவுகின்றதல்லவா ? இதனை ஒரு சவாலாய் ஏற்று நாங்கள் பணியாற்றினாலும் - boredom factor உங்களுள் எட்டிப் பார்த்திடுமோ என்ற மெல்லிய கவலை எங்களுக்குள் எட்டிப் பார்ப்பது இயல்பு தானே ? அந்த சலனங்களை சத்தமின்றி உள்ளே தள்ளிப் பூட்டி வைக்கும் திறன் தொடர்ந்திடுமா எங்களுக்கும் என்பதே கேள்வி # 2 ! 

கேள்வி # 3: “மாற்றங்கள் மட்டுமே மாற்றமில்லாதவை !“ blah blah blah என்று நான் பிளேடு போடும் அவசியமேது ? அது தான் நாம் அனைவரும் காலம் காலமாய் கேட்டுப் பழகிப் போன cliché ஆயிற்றே ? பழமையைத் தழுவுவதைத் தாரக மந்திரமாய் கொண்டுள்ள நம் நண்பர்களை  மொழிபெயர்ப்பு இலாக்காவினுள் இள ரத்தம் / புது ரத்தத்தைப் புகுத்துவது தொடர்பான இந்த மாற்றத்துக்கு மகிழ்ச்சியோடு உடன்படச் செய்யவது எப்படியோ? என்பதே எனது கேள்வி # 3. 

1974-ல் வந்த மாயாவி & லாரன்ஸ் கதைகளின் பாகவதர் பாணியிலான வசனங்களை லேசாக மாற்றுவதற்கே மின்னஞ்சல்களில் சோடாவைத் தெளித்துத், தெளியத் தெளிய கும்மாங்குத்து குத்துகிறார்கள் ! நம் குட்டி வாசக வட்டத்தின் ஒரு கணிசமான சதவிகிதம் ‘மாற்றங்களே no-no' ரகம் தான் எனும் போது அவர்களது முகச்சுளிப்புகளை சம்பாதிப்பதற்கு மனம் ஒப்புவதில்லை!என் தலைக்குள் ஓடும் கேள்வி இது தான்: : என்றோ ஒரு தருணத்தில் செய்ய அவசியமாகிடப் போகும் இந்த வேலைக்கு 2016ல் ஒரு துவக்கம் தந்து தான் பார்க்கலாமா?

இதை ஏன் கேட்பானேன்? சத்தமில்லாமல் செய்து விட்டுப் போகலாமே?“ என்ற mind voice ஓடும் தியேட்டர்கள் உங்கள் தலைகளுக்குள் இருப்பின் அதற்கான பதிலாக இதை எடுத்துக் கொள்ளுங்களேன் :

இட்லிக்குத் தொட்டுக் கொள்ள எனக்குத் தேங்காய் சட்னி பிடிக்குமா;  ?வெங்காய சட்னி பிடிக்குமா? என்பது நீங்கலாக இப்போதைக்கு எனது வரலாறு ; பூகோளம் ; writing style என சகலமும் உங்களுக்கு அத்துப்படி எனும் போது சத்தமின்றி புதுசாய் ஒருவரின் எழுத்துநடையை உட்புகுத்துவது நடவாக் காரியம் ! ஒற்றை நொடியில் சோற்றுக்குள் பதுங்கியிருப்பது பூசணியா ? தர்ப்பூசணியா? என்பது அம்பேலாகி விடும் ! So சத்தமின்றிப் புதுமுக அறிமுகம்  என்ற option ruled out!

“சிவனே என்று ஒழுங்காய் ஓடிக் கொண்டிருக்கிற வண்டியை நோண்டுவானேன் ? தலையில் மண்ணள்ளிப் போட்டுக் கொள்ளும் யானை தான் நினைவுக்கு வருகிறது!“ என்று பற்களின் நறநறப்புப் பின்னணி இசையோடு mind-voice ரிலீசாகியிருக்கும் தியேட்டர்களின் சொந்தக்காரர்களுக்கு எனது பதில் இது :

உணர்ச்சிவசப்படாது சற்றே பொறுமையாய் சிந்தித்தால் இந்த மாற்றம் சிறுகச் சிறுகவேணும் என்றோ ஒரு நாள் அவசியப்படப் போவது உறுதி என்பது உங்களுக்குப் புரியாது போகாது ! ‘டெக்ஸ் கதைகளில் மறுபதிப்புகள் வேண்டும்‘ என்ற கோரிக்கை எழும் சமயமெல்லாம் நான் சொல்லும் அதே பதிலையே இங்கேயும் இணைத்தால் தப்பில்லை என்று படுகிறது ! ஒவ்வொரு “டிராகன் நகர“ மறுபதிப்பின் நேரத்திற்கும் அந்த 655+ புதுக் கதைகளின் தொகுப்புக்குள் எத்தனை எத்தனை “டைனோசர் நகரங்களும்“ "கார்சனின் நடந்த காலங்களும் " காத்துள்ளனவோ என்பது போலவே எழுத்தாற்றலோடு இன்னும் எத்தனை எத்தனை திறமைசாலிகள் காத்துள்ளனரோ ? மாற்றமே வேண்டாமென்று நம் ரசனைகளின் சாளரங்களை குறுக்கிக் கொள்வதை விடப் புதுக் காற்றும், புது ஒளியும் உட்புக வாய்ப்பிருப்பின் வரவேற்கும் mindset கொள்ள முயற்சிப்பது தவறில்லை தானே ? நிறையவே அவகாசம் இருப்பதால் பொறுமையாய் நமது சிந்தனைக் குல்லாக்களை அணிந்து தான் பார்ப்போமே ?

"ஞாயிற்றுக்கிழமை வந்தோமா கழகக் கண்மணிகளே; டைகரின் தம்பிகளே... சிங்கத்தின் உடன்பிறப்புகளே என்று நாலு பத்தி எழுதிட்டு; ரெண்டு படத்தை / டிரைலரைப் போட்டுட்டு; 'கேப்ஷன் எழுதுங்க கேப்ஸ்யூல் சாப்பிடுங்க' என்று ஏதாவது ஒரு பிட்டைப் போட்டு விட்டுப் போகும் போதே டிரவுசரில் ஒரு பக்கம் காணாமல் போயிருக்கும்! இதில் இப்படிக் கேள்விகளை எழுப்பி விட்டு, முதுகிலே நீயாவே parachute தேங்காய் எண்ணெயைத் தடவிக் கொண்டு போஸ் வேற குடுக்கறே... என்னமோ போடா மாதவா !“ என்ற mind voice ஓடும் என் மண்டைக்கும்; அதன்மீது  மிச்சமிருக்கும் கேசங்களின் நலன் பற்றிய அக்கறை கொண்ட நண்பர்களின் mind voice களுக்கும்  பதில் இதோ:

சரவணபவனிலோ; அஞ்சப்பரிலோ அன்றைய மெனுக்களையோ; புதிய மெனுக்கள் பற்றிய ஆலோசனைகளையோ வாடிக்கையாளர்களிடம் கேட்கும் நேரமோ / அவசியமோ இருந்திடாது தான் ! ஆனால் தெருக்கோடியிலுள்ள வீட்டு மெஸ்கள் அதே போன்ற விதமாய் இயங்குவது அசாத்தியம் தானே? “காரம் இன்னும் கூட்டணுமா ? குறைக்கணுமா ?“ ; “புதுசாய் ஏதேனும் ஸ்வீட் செய்யணுமா?“ என்று கேட்பது போலத் தானே நாமும் ? இருக்கின்ற சிறுவட்டத்தை தக்க வைப்பது மட்டுமன்றி அவர்களை சந்தோஷமாய் தக்க வைப்பதுமல்லவா முக்கியம்? So இந்த முயற்சியில்  சில பல டிரவுசர்கள் கிழிய நேரிட்டால் இருக்கவே இருக்கு  "ஹி...ஹி...ஹி...!" ; இருக்கவே இருக்கு கோடு போட்ட பட்டாப்பெட்டி!

டின் வாங்கும் படலத்தின் முதல் அத்தியாயத்தை மங்களகரமாகத் தொடங்கி விட்ட திருப்தியில் டி.வா.ப.2-க்குள் இனி குதிக்கும் பணியைத் தொடங்கிடவா?

2016-ன் அட்டவணைக்குள் ; எஞ்சியுள்ள இந்தாண்டின் பணிகளுக்குள் என்ற எனது மந்தித் தாவல்களுக்கு மத்தியில் இன்னுமொரு சலனம் எழத் தான் செய்தது! இதற்கும் ஒரு சின்ன வட்டம் சொன்னோம்லே?!“ என்று கும்மாங்குத்து குத்தப் போவது உறுதியெனில் இன்னொரு பெரும்பான்மை புகை சமிக்ஞைகளைக் காதுகள் வழியாய் கிளப்பிடத் தயாராகப் போவதும் உறுதி ! அது தான் நமது கதைத் தொடர்களின் எண்ணிக்கை தொடர்பான மண்டகப்படி!

‘மேஜிக் விண்டின்‘ “கறுப்புக் காகிதங்கள்“ கதையின் பணிகள் என் மேஜையில் கிடக்கின்றன! இன்னொரு பக்கமோ தோர்கலின் ஆல்பங்கள் எடிட்டிங் எதிர்நோக்கி ஓய்வெடுக்கின்றன ! அதற்குக் கீழேயோ கமான்சேவின் ‘சாத்வீகமாய் ஒரு சிங்கம்‘!! In fact சா.ஒ.சி. தயாராகி மாதங்கள் 5 ஆகி விட்டன ! The லயன் 250 குறிப்பிட்ட தருணத்தில் வெளிவந்திட வேண்டுமென்பதன் பொருட்டு சடுகுடு ஆடியதன் பலனாய் கமான்சே குறட்டைசே அவதாரம் எடுக்க நேரிட்டது!

இவற்றையெல்லாம் பார்த்த போது எனக்குள் ஒரு குட்டியான நெருடல் variety வேண்டுமென்ற மோகத்தில் நிறைய தொடர்களைக் கையாண்டு வருவதும் கூட ஒரு வித மைனஸ் தானோ என்பதாக ! 1985-ல் பிராங்க்பர்டில் துவங்கிய அந்தக் "கொள்முதல் மேளாவில்" தான் இந்த "ஏகப்பட்ட கதைத் தொடர் காதலின்" ஆரம்பப் புள்ளி உள்ளது. ஒரே சமயத்தில் அத்தனைப் பதிப்பகங்களைக் கண்ட குஷியில் தலைகால் புரியாது கதைகளாக வாங்கிக் குவித்தது ; அவற்றையெல்லாம் ‘ஏக்-தம்மில்‘ உங்களுக்கு அறிமுகம் செய்திட எழுந்த வேட்கை என்பதெல்லாம் இப்போதைக்கு well documented என்ற போதிலும் சில தருணங்களில் is less the better option? என்று கேட்டுக் கொள்ளத் தோன்றுகிறது. பாருங்களேன் தற்சமயமாய் நாம் active ஆகக் கையாண்டு வரும் தொடர்களின் பட்டியலையும் அவற்றுள் எஞ்சியுள்ள கதைகளின் நம்பர்களையும்: (இது 2015-ன் வெளியீடுகளுக்கு அப்புறமாய் மீதமிருக்கக் கூடிய எண்ணிக்கை ! And it isn't very precise ; என் தலைக்குள் நினைவில் நின்ற நம்பர்களின் அணிவகுப்பே ! )

நாயகர் / நாயகி           பாக்கியுள்ள          தொடரின் status
                           கதைகள்
 டெக்ஸ் வில்லர்   -    (சுமார்) 590                   Ongoing
லார்கோ வின்ச்    -              2                          Ongoing
வேய்ன் ஷெல்டன் -         4                     முடிந்தது 
 கேப்டன் டைகர்   -            16                         ?
மேஜிக் விண்ட்    -            129                        முடிந்தது
கமான்சே          -                   9                      முடிந்தது
தோர்கல்          -                   31                  Ongoing
 லக்கி லூக்        -         (சுமார்) 50                   Ongoing
 சிக் பில்                -       (சுமார்) 50                 முடிந்தது
இரத்தப் படலம்    -           1                          முடிந்தது
மர்ம மனிதன் மார்டின் - (சுமார்) 240                 Ongoing
ப்ளூகோட்              -             54                Ongoing
மாடஸ்டி          -          (சுமார்) 75                 முடிந்தது
C.I.D. ராபின்        -    (சுமார்)  180                முடிந்தது
 ரிப்போர்டா ஜானி -   (சுமார்) 60         முடிந்தது & மறுபடியும் துவங்குகிறது

ஜில் ஜோர்டன்    -                                        முடிந்தது
விடிய விடிய விஞ்ஞானி       -   46                   Ongoing
பௌன்சர்         -                      2                    முடிந்தது

மேற்படிப் பட்டியல் நீங்கலாக இன்னமும் ரின்டின் கேன்; ஜுலியா; ஸ்மர்ப்ஸ்; கர்னல் க்ளிப்டன் என்று ஒரு உப பட்டியலுக்குள் இடம்பிடிக்குமளவிற்கு நாயகர்கள் இருப்பதால் என் தலைக்குள் ரீங்காரமிடும் கேள்வி இதுவே:

§ 2016ன் அட்டவணையினை சுவாரஸ்யமாக்கிடும் பொருட்டு இன்னமும் புதுஅறிமுகங்களை இணைத்திடுவது அவசியம் தானா?
§  ஆண்டில் 1 slot – 2 slot என்ற ரீதியில் பல தொடர்கள் கையாளப்படுவது உங்களுக்கு ஓ.கே. தானா?
§  ஆரம்பம் முதலே கல்யாணப் பந்தி போல ஏகப்பட்ட பதார்த்தங்களோடே நமது இலைகள் இருப்பது பழகியான நிலையில் variety ஆக ருசி மட்டும் பார்ப்பதை விட குறைச்ச ரகங்களை ஒரு கட்டு கட்டுவது பற்றிய உங்கள் சிந்தனைகள் என்னவாயிருக்கும்?
§   For instance – ஆண்டுக்கு 4 லக்கி லூக்; 4 சிக் பில்; 4 மேஜிக் விண்ட்; 4 ரிப்போர்டர் ஜானி என்ற ரீதியில் நம் அட்டவணைகள் இருந்தால் உங்களின் reactions எவ்விதமிருக்கும்? அருகாமையிலுள்ள துடைப்பங்கள் அவசரமாய் தேடப்படும் அவசியம் எழுந்திடுமா ? அல்லது- why not? என்ற கேள்வியை முன் வைப்பீர்களா?

இன்னிக்கு இவனுக்கு என்னாச்சு? நம் ஃபார்முலாக்களின் ஆணிவேர்களை அசைத்துப் பார்க்கும் இந்த கொலைவெறி ஏனோ?“ என்று தலைக்குள் வெப்பம் கொண்டிடும் நண்பர்களுக்கு : please guys... இவையெல்லாமே வெறும் உரத்த சிந்தனைகளே ! உங்களின் பரவலான சம்மதங்களின்றி எந்தவொரு policy decision-ம் ‘எடுத்தோம்  கவிழ்த்தோம்‘ என்று  அமலுக்கு வந்திடாது! So- கேள்விகளுக்கான பதில்களை நையாண்டிகளின் பூச்சோடோ; ரௌத்திரத்தின் மெருகோடோ அமைத்திட மெனக்கெட வேண்டாமே - ப்ளீஸ்! Energy spent on that would surely be of better use when applied to these questions !

சைஸில் மாற்றம் -
விலைகளில் மாற்றமோ மாற்றம் -
கலரில் மாற்றம் -
ரசனைகளில் மாற்றத்தின் ஆரம்பநிலை -
எண்ணிக்கைகளில் மாற்றம் -

என்று இத்தனை ‘டிக்‘ அடிக்க நாம் பச்சைக்கொடி காட்டி விட்ட நிலையில் இந்தக் கேள்விகளுள் உள்ள விஷயங்களையும் லேசாகப் பரிசீலனை செய்து தான் பார்த்திடலாமே ப்ளீஸ்?!

மறுபடியும் வலியுறுத்துகிறேன் இன்றைய பதிவின் சகல சங்கதிகளும்  வெறும் feelers மாத்திரமே ! So இவை தான் வரும் நாட்களின் பார்முலாக்களோ ?  என்ற குஷி / குழப்பம் will be premature ! பொறுமையாய், ஒவ்வொரு வினவலுக்கும் பதில் தர நீங்கள் முன்வரும்பட்சத்தில் ரொம்பவே சந்தோஷப்படுவேன்! And சத்தியமாய் இது எங்கள் பணிகளை நீங்கள் உரக்கச் சிலாகிக்கும் ஒரு hidden agenda வுடன் எழுதப்பட்ட பதிவுமல்ல ! ரியாலிட்டி ஷோ என்ற பெயரில் TRP  ரேடிங்க்சை ஏற்றிக் கொள்ளும் பாணிகள் நமக்கு நிச்சயம் அந்நியமே ! 

More importantly – மௌனப் பார்வையாளர்களாய் மாத்திரமே தொடர்ந்து வரும் நண்பர்களும் பதில் சொல்ல மெனக்கெட்டால் ஆந்தைவிழியார் இன்னமும் ஹேப்பி அண்ணாச்சி ! Simply because இவை அனைத்துமே நம் அனைவரும் சம்பந்தப்பட்ட விஷயங்கள் ! 

And please guys – தெரிவிக்கப்படும் கருத்துக்கள் உங்களுக்கு ஏற்புள்ளவைகளாக இருப்பின் / இல்லாவிடின் +1 என்றோ -1 என்றோ உங்கள் அபிப்பிராயங்களை  மட்டும் பதிவு செய்து விட்டு நகர்ந்திடக் கோருகிறேன்! இதுவொரு குட்டியான கருத்துக் கணிப்பு போன்ற சமாச்சாரம் மாத்திரமே So “இந்தக் கட்சிக்கு எப்படி ஓட்டுப் போடப் போச்சு?“ என்ற ரீதியில் தர்க்கங்கள் வேண்டாமே?!So- தைரியமாக உங்கள் பார்வைகளைப் பதிவிடுங்களேன் guys – யார் என்ன நினைப்பார்களென்ற தயக்கங்களின்றி ? 

சரி- கேள்விகள், கத்திரிக்காய் என்று உங்களை ஞாயிறு காலையில் படுத்தியது போதுமென்பதால் ஜாலியான சங்கதிக்குள் தலைநுழைப்போமா? இதோ நமது உட்சிடியின் கோமாளிகளின் இந்தாண்டின் முதல் சாகஸத்தின் முன்னோட்டம்! ஒரிஜினலின் வர்ண மாற்றத்தோடு வந்திடும் அட்டைப்படம் நமது சமீபத்தைய trend-ஐப் பின்பற்றுகிறது ! 
இன்னமும் பணிகள் முடிவாகா ராப்பர் இது ! 
உட்பக்கங்களின் ஒரு சின்ன டீஸரும் இதோ! வழக்கம் போல ஷெரீப்பும், ஆர்டினும் கலக்குவதாலோ என்னவோ,படைப்பாளிகளே ராப்பரில் அவர்களிருவரையும் பிரதானமாக focus செய்துள்ளனர்! சமீப சிக் பில் கதைகளின் template இம்முறையும் பின்பற்றப்படுகிறது- ஒரு அழகான இளம் பெண்ணைக் சுற்றிக் கதை சுழன்று வருவதில்! கொடுமை என்னவெனில் சமீப காலமாய் பௌன்சர் கதைகளிலும், டைகர் கதைகளிலும், சில பல லார்கோ கதைகளிலும் வரும் அந்த ‘பச்சக்‘ பாணியை இத்தனை காலமும் சைவமாய் இருந்து வந்துள்ள சிக் பில்லும் கடைபிடிக்கிறார் !

அப்புறம் caption எழுதும் போட்டிக்கான முடிவை அறிவிக்காவிட்டால் வரலாற்றுப் பிழையாகிப் போய்விடுமென்பதால் இதோ அதற்கான முடிவு! ஏகப்பட்ட பின்னூட்டங்களுக்கு மத்தியில் நீந்தி ஒரு மாதிரியாக நான் தேர்வு செய்த caption இதோ! நமது வாழ்த்துக்களுடன் நண்பருக்கு அந்த Fleetway இதழைப் பரிசாக அனுப்புகிறோம்! 

selvan abirami :
"லாரன்ஸ் : டேவிட் ! ஏன் மேலே பாத்து சுட்டே ?? வார்னிங் ஷாட்டா ?

டேவிட் :நோ ! லஞ்ச் ஷாட். . இரண்டு பேர்ட்டயும் காசில்லை .....இப்ப சுட்ட காடையைத்தான் ரோஸ்ட் பண்ணி மத்தியானம் சாப்பிடனும் ...."

அப்புறம் ஒரு சந்தோஷ சேதி - ஈரோடு புத்தக விழாவின் தொடர்பாக ! நமக்கு இம்முறை ஸ்டால் ஒதுக்கப்பட்டுள்ளது - கிட்டத்தட்ட சென்றாண்டின் அதே இடத்தினில் ! போன வருஷம் நமது ஸ்டால் எண் 153 எனில், இம்முறை 152 ! So காத்திருப்போம் உங்கள் வருகைகளுக்கு - ஆவலாய் ! Please do come - with family ! 

சரி... இதற்கும் மேலாக இந்த பதிவை நீட்டிட வண்டியில் ‘தம்‘ இல்லை என்பதால் நடையைக் கட்டுகிறேன்! மீண்டும் சந்திப்போம்! அது வரை enjoy the Sunday!

ERODE STALL LAYOUT :