ஒரு கேள்வி + ஒரு முன்மொழிவு

 நண்பர்களே,

வணக்கம். பொதுவாய் முச்சந்தியில் வைத்து அழுக்குத் துணிகளைச் சலவை செய்வதில் எனக்குப் பிடித்தம் கிடையாது ; ஆனால் இன்றைக்கு அதனில் இழுக்கப்பட்டிருப்பது நானுமே எனும் போது இந்த பதில் அவசியமென்று நினைக்கிறேன் ! "உயிரைத் தேடி"  (at least அந்தப் பெயரென்றே தீர்மானித்திடும் பட்சத்தில் !) ஆகஸ்ட்டில் வருகிறதென்று நான் அறிவித்ததைத் தொடர்ந்து வேடிக்கையொன்று  அரங்கேறியுள்ளது  ! And  நான் பயணிக்கா FB பக்கங்களில் இது பதிவாகியிருக்க, நண்பர்கள்  எனக்கு அனுப்பித் தந்துள்ளனர் ! 

விஷயம் இது தான்  : நண்பர் கலீல் இலங்கையிலிருந்து வெளிவரும் புது காமிக்ஸ் பதிப்பகம் இந்த "உயிரைத் தேடி" கதையினைச் சிங்களத்தில் வெளியிட ஏற்கனவே உரிமைகளை வாங்கியுள்ளதாகவும், நான் இதற்கான தமிழ் உரிமைகளை வைத்திருப்பதால் அவர்கள் பலத்த ஏமாற்றம் அடைந்துள்ளதாகவும், அவர்களது ஏகப்பட்ட முயற்சிகள் கானல் நீராகி விரயமாகி விட்டதாகவும், எழுதியுள்ளார் ! தினமலரில் ஏற்கனவே இது தொடர்பாய்ப் பேசி விட்டதாகவும், நான் குறுக்கிட்டுள்ளதால் தான் புதியவர்களின் கனவு இதழானது பாழாகி விட்டதாகவும் வாசித்தேன் ! தவிர, நான் இந்த மாதிரி இந்தஇந்தக் கதைகளுக்கெல்லாம் உரிமைகள் வாங்கியிருக்கேன் என்று கோடிட்டுக் காட்டாததுமே எனது பிழையாகப் பார்க்கப்படுகிறது ! அட, நான் ஏற்கனவே ஒரு கதைக்கோ, தொடருக்கோ உரிமைகளை வாங்கிவிட்டுள்ளேன் எனும் பட்சத்தில் அதை நான் தண்டோரா போடும் அவசியம் தான் என்ன இருக்க முடியும் சார் - முறைப்படி நீங்கள் படைப்பாளிகளை அணுகும் வேளையில் அவர்களே சொல்லி விடுவார்களே ? 

இதன் பின்னணியில் கடந்த 10 தினங்களில் நண்பர் கலீலுடனும் ; இலங்கையைச் சார்ந்த (??) பதிப்பகத்துடனும்  பகிர்ந்த விஷயங்களை இங்கே நான் பகிர்ந்திடுவது தொழில்முறை நாகரீகம் ஆகாது என்பதால் விலாவரியாக அதனுள் போக நான் விரும்பவில்லை ! ஆனால் சிம்பிளாக ஒரேயொரு கேள்வி  + ஒரேயொரு முன்மொழிவை இங்கே நான் முன்வைக்கிறேனே ?

எனது கேள்வி : சிங்கள உரிமைகளை அவர்கள் வாங்கியிருப்பின் - நாம் தமிழில் அதே கதையை வெளியிடுவதனால் அதற்கென்ன சேதாரம் நிகழக் கூடுமோ ? சத்தியமாய்ப் புரியவில்லை ! அவர்கள் தடத்தில் அவர்கள் பயணிக்கப் போகிறார்கள் ; நமது தடத்தில் நாம் !

எனது முன்மொழிவு : ரைட்டு...ஏதோவொரு கோணத்தில் தமிழில் நாம் வெளியிடுவதால் இது சிங்களத்தில் விற்றிடாது என்றே வைத்துக் கொள்வோமே - இப்படிச் செய்தாலென்ன ? 

மெய்யாலுமே அவர்களிடம் இந்த SURVIVAL கதைக்கான உரிமைகள் - சிங்களத்துக்கோ  ; தமிழுக்கோ ஏற்கனவே இருக்கும் பட்சத்தில், 

(அல்லது )

ஏற்கனவே வெளியிட்டிருக்கும் அந்த முதல் இதழுக்காவது உங்களிடம் உரிமைகள் இருக்கும் பட்சத்தில், அவற்றை ஊர்ஜிதம் செய்து படைப்பாளிகள் ஒரேயொரு மின்னஞ்சலை மட்டும் எனக்கு அனுப்பட்டுமே - அடுத்த நொடியில் நாம் தமிழில் "உயிரைத் தேடி" வெளியிடுவதை வாபஸ் வாங்கிக் கொள்கிறேன் ! 

புதிதாய் ஒரு முயற்சியின் மீது வெந்நீர் ஊற்றிய பாவம் நமக்கெதுக்கு ? பீரோவுக்குள் துயில் பயிலும் ஒரு வண்டிக்கதைகளோடு இதுவும் இணைந்து கொண்டு, maybe ரெண்டு வருஷங்களுக்குப் பின்பாய் வெளிவந்துவிட்டுப் போகட்டுமே ?

டீலுங்களா ? 

இந்தக் குறும்பதிவுக்குப் பதிலாய் FB ; வாட்சப் க்ரூப்களில் எனது யோக்கியதாம்சங்கள் ; எனது லாயக்குகள் மிக அழகாய் அலசப்படுமென்பதில் எனக்கு ஐயமேயில்லை ! அட, நான் அயோக்கியனென்றே இருந்து விட்டுப் போகட்டுமே சார்ஸ் - உங்களிடம் நான் செருப்படி வாங்குவதென்ன புதிதா ; முன்னாட்களில் நான் செய்திருந்த பிழைகளுக்கான just desserts என்றே அவற்றைப் பார்த்திடுகிறேன் !  ஆனால் புதிய முயற்சியின் உன்னதங்களை நிரூபிக்க அழகாய் நானேயொரு வாய்ப்பை உங்களுக்கு லட்டு போல வழங்கியுள்ளேன் எனும் போது - அதனை பயன்படுத்திக் கொள்ளல் தானே இந்த நொடியில்  பிரதானமாகிட வேண்டும் ? அதை விடுத்து  என் தலையை ஆங்காங்கே உருட்டத் துவங்கிடும் நொடியிலேயே உங்கள் தரப்பின் சாயம் வெளுத்திடாதா ?  

புதியவர்களின் வருகையினைத் தடுப்பதோ, தடை போடுவதோ எனது நோக்கமே அல்ல ; ஏற்கனவே முழங்கால்களை சிராய்த்து வரும் இந்தத் தொழிலில் முறையாக இன்னொருத்தர் துணைக்கு இருந்தால் என் திக்கில் வீசப்படும் துடைப்பங்களாவது கொஞ்சம் வேகம் குன்றிடுமே என்று சந்தோஷமே படுவேன் ! அதனால் தான் இந்த விஷயத்தில் நிலவரத்தையும், நிஜத்தையும் பொதுவெளிக்குக் கொணர கடந்த 2 வாரங்களில் நான் முனையவேயில்லை ! ஆனால் சில மௌனங்களுக்கு எப்போதுமே மாற்று அர்த்தங்கள் கற்பிக்கப்படும் போது இந்தப் பொதுவெளிப் பகிர்தல் தவிர்க்க இயலாது போகிறது ! இந்த விஷயத்தில் நான் பொதுவில் பகிர்ந்திடும் முதலும், இறுதியும் இந்தப் பதிவாக மட்டுமே இருந்திடும் ; so please bear with me just this once folks !!

Thanks ....அவசியமே இல்லா ஒரு பதிவை வாசித்ததற்கு   !