Version 2.0 x 2

 நண்பர்களே,

வணக்கம். அதிகாரியோடு வாரத்தைக் கடத்தியான பின்னே - இதோ  மாமூலுக்கு இன்றைய பொழுதில் திரும்புகிறோம் ! வீட்டில் அடைந்து கிடப்பினும் , நாட்களின் ஓட்டம் நின்றபாடில்லை என்பதால், ஜூன் இதழ்கள் சார்ந்த பணிகள் ஒரு பக்கம் ஓடி வருகின்றன ! 4 இதழ்கள் கொண்டதொரு பிஸியான மாதம் என்பதால் இம்முறை ஆக்ஷனும் உண்டு ; கார்ட்டூனும் உண்டு ; black & white இதழும் உண்டு ; கிராபிக் நாவலும் உண்டு ! As always ஆக்ஷனே முதலில் கைதூக்கி நிற்பதால் - ரிப்போர்ட்டர் ஜானி தோன்றும் "காற்றில் கரைந்த கலைஞன்" தான் இன்றைய preview-ல் இடம்பிடிக்கின்றது !

ஜானி....ஐந்தாறு மாதங்களுக்கு முன்னே தான் இவரது டபுள் ஆல்பத்தில் பணியாற்றியது போலுள்ளது எனக்கு ; ஆனால் அதற்குள் 2021-ன் இதழுடனான புலனாய்வுக்கு வேளை புலர்ந்து விட்டது ! ஜானியின் version 2.0 கதைவரிசையினில் மேற்கொண்டுமொரு புது ஆல்பம் பிரெஞ்சில் வெளியாகியிருக்கும் நிலையில், பெர்சனலாக எனது சாய்ஸ் அந்த நவீன ஜானியாகவே இருந்திருக்கும் ! கடைசியாய் வெளிவந்த அந்த டபுள் ஆல்பத்தில் கூட, ஜானி 2.0 சாகஸமே எனக்குப் பிடித்திருந்தது ! ஆனால் பழகியதை ; பரிச்சயமானதை ஓரம்தள்ள உங்களுக்கு ஒரு போதும் பிடித்தம் இருப்பதில்லை என்பது நூற்றியொன்றாவது தடவையாக நிரூபணம் ஆனதால், நடப்பாண்டின் தேர்வுக்கு back to the classics !! எப்போதுமே ஜானி தொடரிலும் சரி, சிக் பில் தொடரிலும் சரி - துவக்க வரிசைக் கதைகள் ஓ.கே.வாகவும், பின்னுள்ளவை சுமார் ரகங்களாகவும் இருப்பது வாடிக்கை ! இரண்டுக்குமே ஓவியர் திபெத் என்பது தான் இங்கே சுவாரஸ்ய ஒற்றுமை ! Anyways - தற்போதைய ஜானி சாகசமானது 1979-ல் வெளியானதென்பதால் க்ளாசிக்ஸ் பட்டியலில் இடம் பிடிக்கிறது ! கதைத்தரத்திலும் செமத்தியாக அமைந்திருந்து உங்களது "ஜானி க்ளாசிக்ஸ்" பட்டியலுக்குள்ளும் இந்த ஆல்பம் புகுந்திடின் ஹேப்பி !!

As always, 44 பக்க சாகசம் ; அதன் ஒட்டுமொத்த கிளைமாக்ஸ் முடிச்சவிழ்ப்போ பக்கம் 44-ல் தான் !! ஜானி கதைகள் என்றாலே இது தான் trademark என்று நமக்குமே பழகிப் போய்விட்டது and  ஒவ்வொரு ஜானி ஆல்பத்தின் இறுதிப் பக்கத்துடனான மல்யுத்தத்தில் முன்மண்டை மேற்கொண்டு காற்றாடுவதுமே மாமூல் என்றும் ஆகிப் போய்விட்டது ! In fact இம்முறை முதல் 43 பக்கங்கள் அச்சுக்குத் தயாராக உள்ளன ; அந்த இறுதிப் பக்கம் மட்டும் இன்னமும் என் மேஜையில் ! வழக்கம் போல நமது கருணையானந்தம் அவர்களே இதற்குப் பேனா பிடித்துள்ளார் & வழக்கம் போலவே அவரது classic நடையினை யதார்த்த லெவெலுக்குக் கொண்டு வர நான் முயற்சித்துள்ளேன் ! தவிர, கதையின் க்ளைமாக்ஸை முழுசையும்  மாற்றி எழுதியுள்ளேன் ! As stories go , இந்த ஆல்பம் முந்தைய ஜானி இடியாப்பங்களை விட ரொம்பவே தேவலாம் என்பேன் ! கண்ணில் தென்படும் கொய்யாப்பழம் விற்பவரையும் ; கோவக்காய் விற்பவரையும் சந்தேகப்படாது - கதையை ஜானியுடன் ஸ்மூத்தாகவே நகற்றியுள்ளனர் ! And வழக்கம் போல் சித்திரங்களும், கலரிங்கும் தீ தான் !! 

இம்முறை சிக்கலின் பெரும்பங்கு எழுந்தது அட்டைப்படத்தினில் தான் ! சமீப காலமாகவே ஒரிஜினல் ராப்பர்களை ஏதேனும் வர்ண மெருகூட்டல்களோடு ; மாற்றங்களோடு பயன்படுத்துவதே நடைமுறை என்றாகியுள்ளதை நீங்கள் அறிவீர்கள் ! ஜானியின் இந்த சாகசத்துக்குமே அதையே செய்தும் விடலாமென எண்ணியிருந்தேன் & ஒரு மாதம் முன்பாய் இதனை ரெடி செய்திட நம்மாட்களிடம் சொல்லியிருந்தேன் ! ஆனால் இந்த ஆல்பத்துக்கான ஒரிஜினல் டிசைனோ ரொம்பவே சுமாராய் ; ரொம்பவே சுரத்தின்றி இருப்பதை அப்புறம் தான் கவனித்தேன் ! வெவ்வேறு கலர் பின்னணிகளை பொருத்திப் பார்த்து ஏதேதோ குட்டிக்கரணங்கள் அடித்துப் பார்த்தோம் ; ஊஹூம் ...உறங்கும் அட்டைப்படம் உறங்கிக் கொண்டே தானிருந்தது ! ரைட்டு...இதைத் தேற்ற முயற்சிக்கும் நேரத்துக்கு கொஞ்சம் செலவு பண்ணி, புதுசாயொரு டிசைனே போட்டு விடலாமென்று தீர்மானித்தவனாய் நமது சென்னை டிசைனரிடம் கேட்டேன் ! 'உடனே போட்டுத் தருகிறேன் !" என்றிட, நானும் மின்னஞ்சலில் ஜல்தியாய் நமக்கு ஏற்றார் போலொரு மாதிரியைத் தேர்வு செய்து அனுப்பி வைத்தேன் ; பின்னணிக்கான வர்ண சேர்க்கை எவ்விதம் வேண்டும் என்ற reference சகிதம் ! சரியாய் 24 மணி நேரங்களுக்குள் லொஜக்கென கிட்டிய  டிசைன் இதோ - இதுவே !  

பட்டாம்பூச்சியின் பரிணாம வளர்ச்சி !! 

அச்சுக்குச் செல்ல அந்த இறுதிப் பக்கம் நீங்கலாய் பாக்கி எல்லாமே ரெடி ! காமிக்ஸ்டைம் பகுதி மாத்திரம் அடுத்த வாரயிறுதியினில் இந்த லாக்டௌன் சூழலைப் பொறுத்து மாற்றங்களுக்கு உட்படக்கூடும் ! மற்றபடிக்கு  we are good to go on this !!

Before I shift topics - உங்களுக்கான கேள்வி guys :

2022-ன் அட்டவணையின் பெரும்பான்மை ரெடி - முத்துவின் 50-வது ஆண்டுமலர் நீங்கலாய் ! அதற்கென ஒருசில திட்டமிடல்கள் உள்ளன தான் ;  அது பற்றி இன்னொரு ஞாயிறில் கொஞ்சம் பேசலாம் (maybe next sunday) ! இந்த நொடியில் எனது கேள்வி ரொம்பவே சிம்பிள் : 

"ரிப்போர்ட்டர் ஜானி - அட்டவணையில் இடம் பிடிச்ச்ச்சே தீர வேண்டிய நாயகரா ? அல்லது ஒற்றையாண்டுக்கு இவர் ஓய்வெடுப்பின் ஓ.கே. தானா ?" 

ஒரு டைட்டான அட்டவணையினில் absolutely essential என்றோருக்கு மட்டுமே இடமிருக்க முடியும் என்பதால் எனது மேற்படிக்கேள்வி ! So இதை தெய்வக்குற்றம் ரேஞ்சுக்குப் பார்த்திடாது பதில் ப்ளீஸ் ? அவசியமென்று எண்ணினால் fine ; ரசனைசார் விஷயத்துக்கு விளக்கம் தேவைப்படாது ! ஆனால் "அத்தியாவசியமில்லை" என்று எண்ணிடும் பட்சத்தில், அது குறித்து சிம்பிளாய் ஒரு விளக்கமும் ப்ளீஸ் ?

உங்களின் கேள்வி # 2 - ஏற்கனவே கேட்டிருந்தாலுமே !! 

லக்கி லூக்கின் version 2.0 பாணியில் வெகு சமீபத்தில் வெளியாகியுள்ள ஆல்பம் பிரெஞ்சில் ரொம்பவே அழகாய் வரவேற்புப் பெற்றுள்ளதாம் ! நமக்கு வந்திருக்கும் கோப்புகளை பார்க்கும் போது எனக்கு இந்த ஆல்பம் அட்டகாசமாய்த் தென்படுகிறது ! ஆனால் மாமூல்களைத் தாண்டிய பயணங்களில் உங்களின் தயக்கங்கள் உலகப்பிரசித்தம் என்பதால் மண்டையை நோண்டியபடிக்கே காத்திருக்கிறேன் ! வேறொரு மொழியில் லக்கி லூக்கை வெளியிடும் எடிட்டரொருவர் எனக்குப் பரிச்சயம் ; அவரிடம் சமீபத்தில் பேசிக்கொண்டிருக்கும் போது - இந்தக் கதையைப் பற்றி செமத்தியாய் சிலாகித்தார் !! சொல்லுங்களேன் guys - இது பிடுங்க வேண்டிய ஆணியா ? இல்லியா ? நாளைய தினம் லக்கி பதிப்பகத்துடன் ஒரு ஆன்லைன் மீட்டிங் இருப்பதால், இது குறித்தான நமது பதிலைச் சொல்ல வேண்டியிருக்கும் ! Is it a definite NO ??? பரிசீலனைக்கு அவசியமே லேதுவா ?

Bye all....மாடஸ்டி அழைப்பதால் கிளம்புகிறேன் ! See you around !! Stay home...stay safe !!