பாயசம் எடு...கொண்டாடு..!

 நண்பர்களே,

தாமதமான மே தின வாழ்த்துக்கள் ! துவக்கத்திலேயே சொல்லி விடுகிறேனே - தொடரவுள்ள பதிவானது "அதிகாரி அலர்ஜி" கொண்டோருக்கு உகந்ததாய் இராதென்பதை ! நிறைய கடுப்சையும் ; கணிசமான காதோரப் புகைப்படலங்களையும் ஏற்படுத்திடக்கூடும் என்பதால் வேறொரு மஞ்சளுக்கு இன்றைக்கு 'விசில் போடுவது' சாதகமான பொழுதுபோக்காக்கிடலாம் என்பேன் ! 

ரொம்ப நாளாகவே இது எனக்குள் ஓடிக்கொண்டிருக்கும் எண்ணம் தான் ; ஆனால் சமீபப் பதிவுகளில் அலர்ஜி சார்ந்த ரியாக்ஷன்ஸ் சற்றே தூக்கலாய்த் தென்பட்டதால், அந்த நண்பர்கள் ஆசுவாசப்படுத்திக் கொள்ள சற்றே அவகாசம் தந்து விட்டு, யதார்த்தத்தைப் பதிவிட நினைத்தேன் ! 

"டெக்ஸுக்கு ஓவர் பில்டப் !"........

"டெக்ஸுக்கு ஓவராய் ஸ்லாட்ஸ் !"

"அட்டையை மாத்தினாக்கா இந்தக் கதைக்கும், அந்தக் கதைக்கும் வித்தியாசம் லேது !"

"ஒரே template !"

"அடுத்த நாயகர் வாய்ப்பையெல்லாம் தட்டிப் பறிக்கிறார் மஞ்சச்சட்டைக்காரர் !"

"வூட்டிலே அடுக்கி மட்டுமே வைக்கிறேன் டெக்ஸ் புக்ஸை !"

"ரசனைகளை பாழ் செய்யும் புண்ணியகோடி !"

பாயச அண்டாக்களின் பொதுவான உட்பொருட்கள் இவையே ! ஒவ்வொரு முறையும் 'தல' தலைகாட்டும் போது மேற்படி ஐட்டங்களோடு கொஞ்சம் இஞ்சி ; வத்தல் ; மிளகாய் ; சுக்கு ; கோங்கிறா காரமெல்லாம் சேர்க்கப்பட்டு பதமாய்ப் பாயாசமெனும் பானம் பரிமாறப்படுவதைப் பார்க்கிறோம் ! ஆனால் பாயசத்தை பரிமாற முற்படுவோரே அதற்கு முன்பாய் 'தல'யோடு ஒரு சத்தமில்லா சால்சா நடனம் ஆடி முடித்துவிட்டுத் தான் வருகின்றனர் என்பது பொதுவானதொரு சந்தேகம் ! எது எப்படியோ, யதார்த்தத்தின் முகத்தை இப்போது சித்தே பார்ப்போமே folks ?

வருஷம் 2012...மாதம் ஜனவரி ! 

• நமது மீள்வருகையின் முதல் இதழான "COMEBACK ஸ்பெஷல்" களம்காண்கிறது - வெளியீடு எண் 210 சகிதம் !  112 மாதங்கள் கடந்துள்ள நிலையில், இன்றைக்கு நானூறு கூப்பிடு தொலைவில் தென்பட, வெளியீடு எண் 396-ல் நிலைகொண்டிருக்கிறோம் ! Which means -  இடைப்பட்டுள்ள இந்த near தசாப்தத்தில் லயன் காமிக்ஸில் 186 இதழ்கள் வெளியாகியுள்ளன ! 
• அதே 2012-ல் முத்து காமிக்ஸின் வெளியீடு நம்பர் இருந்தது : 313-ல் ! இதோ இம்மாதம் தான் 450-ஐ தொட்டிருக்கிறோம் எனும் போது அங்கே வெளியாகியுள்ளவை 137 இதழ்கள் ! 
• இது தவிர சன்ஷைன் லைப்ரரியில் 22 ; ஜம்போவில் 20 & லயன் கிராபிக் நாவலில் 22 ! 
• ஆக மொத்தமாய் இந்த ஒன்பதரை ஆண்டுகளில் நமது ஒட்டுமொத்த output - 387 இதழ்கள் என்றாகிறது ! 

Of course இவற்றுள் கணிசமான மறுபதிப்புகள் ; துண்டும், துக்கடாவுமான மினி இதழ்களுக்கும் ஒரு வெளியீட்டு நம்பர் என்றெல்லாம் இருக்கும் தான் ! "சரி, ரைட்டு - ரமணா பாணியில் அடுக்கிட்டு போறியே - எதுக்குடாப்பா ?" என்ற கேள்வி தோன்றிடுகிறதா ? (தோணாட்டியுமே) சொல்கிறேன் :

இந்த மீள்வருகையின் போக்கினில் எத்தனை எத்தனையோ நாயக / நாயகியரைப் பார்த்திருப்போம் தான் ! "வந்தார்...வென்றார் " என்று பலரும் ; "வந்தார்...சென்றார் !" என்று சிலரும் இதனில் அடக்கம் ! யாருக்கு எவ்வளவு ஸ்லாட்ஸ் கிட்டியுள்ளன ? என்பதையெல்லாம் ஒரு மழை நாளில் சாவகாசமாய் தேடிப் பார்க்கலாம் தான் ; ஆனால் நம்ம 'தல' இந்த இடைப்பட்ட நாட்களில் தலைகாட்டியுள்ளது எத்தனை இதழ்களில் ? என்ற கேள்வி எனக்குள்ளிருந்து வந்தது ! 'ரைட்டு, ஆபீஸ் திறந்த பிற்பாடு நம்மாட்களை கனக்குப் போடச்சொல்லலாம்' என்று தோன்றியது ! ஆனால் நம்ம STV கிட்டே கேட்டா சுலபமாய் ஜோலி முடிஞ்சிடுமே என்ற நினைப்பில் காலையில் ஒரு மின்னஞ்சலைத் தட்டி விட்டால், அடுத்த முக்கால் மணி நேரத்துக்குள் ரமணாவுக்குச் சித்தப்பா ரேஞ்சுக்குப் புள்ளி விபரங்களை அனுப்பித் தாக்கித் தள்ளியிருந்தார் ! So அந்த நம்பர்களை சரி பார்க்கும் பொறுப்பை நண்பர் கலீல் போன்ற ஆர்வலர்களிடம் விட்டு விட்டு, மேட்டருக்குள் நான் நுழைந்திடுகிறேன் :

கடந்துள்ள இந்த ஒன்பதரை ஆண்டுகளில் - 

*தனி இதழ்கள்

*ஸ்பெஷல் இதழ்கள்

*மினி இதழ்கள்

*மினி இதழ்களின் தொகுப்புகள்

*இன்ன சில நாயகர்களுடன் இணைந்தான ஸ்பெஷல்  இதழ்கள்

*மறுபதிப்புகள் 

என ஒட்டுமொத்தமாய் 82 இதழ்களில் டெக்ஸ் வில்லர் & கோ.ரகளை செய்திருக்கின்றனர் ! (எந்த வருஷத்தில் - எவை ? என்ற பெயர் பட்டியலையும் STV அனுப்பியிருந்தார் தான் ; ஆனால் அவற்றை பின்னூட்டங்களில் அவரே போடுவாரென்று எதிர்பார்ப்போம் ! )

"ரமணா" பட்டியலிலிருந்து இன்னொரு பட்டியல் நோக்கி இப்போ நாம் zoom பண்ணினாக்கா - முன்னே தென்படுவது நமது தற்போதைய கையிருப்பு இதழ்களின் லிஸ்ட் ! 'ராமசாமி' புக்ஸ் இத்தினி இருக்கு ; கோயிந்தசாமி புக்ஸ் இத்தினி இருக்கு !' என்ற பட்டியலை பார்த்துக் கொண்டே போகும் போது "டெக்ஸ் வில்லர் கதைகள்" என்ற தலைப்பும் இடம்பிடித்து நிற்பதைக் காண்கிறோம் ! "ரைட்டு...82 புக்சிலே ஆக்ட் குடுத்த மனுஷனோட புக்ஸ் ஸ்டாக் இல்லாட்டி தானே ஆச்சர்யம் ?" என்றபடிக்கே பட்டியலை வாசித்தால், அடடே - வெறும் 20 புக்ஸ் தான் கையிருப்பில் உள்ளன !! அந்த இருபதிலும் ஒன்றேயொன்று, கண்ணே கண்ணென்று ஹார்ட்கவர் இதழாய் "ஈரோட்டில் இத்தாலி" மாத்திரமே ஸ்டாக்கில் உள்ளது ! பாக்கி அனைத்துமே - வெளியான இரண்டோ / மூன்றோ ஆண்டுகளுக்குள்  SOLD OUT ! Many even faster !!

அப்படியே இன்னொருக்கா zoom பண்ணினாக்கா - நமது ஒட்டு மொத்தக் கையிருப்புப் பட்டியல் again நம் முன்னே - ஆனால் இம்முறையோ வெறும் ஒரு நம்பராய் ! மைதீனைக் கொண்டு அவற்றை எண்ணிப் பார்க்கச் சொல்கிறேன் - ஆத்தாடி 268 titles கையிருப்பில் உள்ளன ! 

இப்போ இன்னா பண்றோம் ? கணித மேதைகளை மனதில் வேண்டிக் கொண்டே இந்தப் புள்ளி விபரங்கள் சொல்லும் கணக்கை இலகுவாய்ப் புரியும் facts களாய் உருமாற்றம் செய்திட முனைகிறோம் :

Post 2012 - நமது மொத்த வெளியீடுகளின் எண்ணிக்கை : 387 

Less : தற்போதைய கையிருப்பு                                                    : 268 

ஆக - இந்தப் 10 ஆண்டுகளின் மத்தியில் நம்மிடம் தீர்ந்து போயுள்ள இதழ்களின் எண்ணிக்கையானது 119 மட்டுமே ! பாக்கி அனைத்திலுமே கணிசமாயோ ; கொஞ்சமாகவோ ஸ்டாக் உள்ளது தான் !

இதே கணக்கை நம்ம தல இதழ்களுக்கும் போடறோம் :

Post 2012 - நமது TEX -மொத்த வெளியீடுகளின் எண்ணிக்கை : 82 

Less : தற்போதைய கையிருப்பு                                                              : 20 

ஆக இந்தப் 10 ஆண்டுகளில் 62 டெக்ஸ் இதழ்கள் சூட்டோடு சூடாய்க் காலியாகியுள்ளன ! 

சதவிகிதமென்று இதனையே மாற்றிப் பார்த்தால் : 100 டெக்ஸ் இதழ்களை நாம் வெளியிடும் பட்சத்தில் - அவற்றுள்  76% விற்றுத் தீர்ந்து விடுவது உறுதி என்று கட்டியம் கூறுகின்றன மஞ்சளாரின் நம்பர்கள் !  இந்தச் சாதனை நிகழ்ந்திருப்பது குறுகலானதொரு அவகாசத்துக்குள் அல்லவே அல்ல ; முழுசாய் பத்தாண்டுகளின் பொழுதினில் ! And டெக்ஸ் நம்மிடையே அறிமுகம் கண்டது 1985-ல் எனும் போது, இது அவரது 36-வது ஆண்டு - தமிழ் பேசும் கரைகளினில் !  So அவரது ஆளுமையினை ஒரு fluke என்றோ ; அகஸ்மாத்தான நிகழ்வென்றோ ; ரசனைகளில் மலிந்ததொரு சரக்கென்றோ புறம்தள்ள நமது பாசக்கார பாயசக் கரத்தார்களுக்குமே சாத்தியப்படாதென்பேன் ! 

Again வேறொரு பார்வையில் இதை அணுகிட்டால் : 

கடந்த பத்து வருடங்களில் - நமது மொத்த "SOLD OUT" இதழ்கள் : 119 

& 

அவற்றுள் டெக்சின் பங்களிப்பு                                                                   : 60  

கிட்டத்தட்ட சரி பாதி ! அதாவது லக்கி லூக் ; டைகர் ; அவர்..இவர்...என அனைவருமாய்ச் சேர்ந்து செய்துள்ள விற்பனை சார்ந்த சாதனையை நமது இரவுக்கழுகார் ஒற்றையாளாய் சமன் செய்திருக்கிறார் ! IPL போட்டிகளில் நம்ம 'தல' கோலோச்சுவதை விடவும் அதகளம் நம்ம காமிக்ஸ் 'தல' நடத்தும் ராஜாங்கம் எனும் போது, அவரை அநேகர் ஆராதிப்பதில் அதிசயமேது ? And தட்டுத்தடுமாறும் ஒரு சிறு வட்டத்தினை தாங்கிப் பிடிக்க, 'தல' மீது - ஒரு publisher என்ற வகையில் நான் ஒரு மிடறு கூடுதல் வாஞ்சை காட்டுவதில் மர்மம் தான் ஏது ?

And நடப்பாண்டின் தீபாவளி மலரில், கேப்டன் டைகரின் ஸ்லாட்டில் டெக்ஸ் & கோ.வே இடம்பிடிப்பதிலும் அதிசயமேது ? Yes..it's official folks !! டைகரின் ஓவியப் பணிகள் இன்னமும் நிறைவுறவில்லையாம் ! So அதன் ஒரிஜினல் அட்டவணையான ஜூன் 2021-க்கு வெளிவரும் வாய்ப்புகள் ரொம்பவே கம்மி ! அநேகமாய் நமது முத்துவின் 50-வது ஆண்டினில் 'தளபதி' ஒரு முக்கிய பங்கெடுப்பார் என்றே எதிர்பார்க்கலாம் ! 

Before I wind up, நிறைவாய் இதை மட்டும் சொல்லிக்கொள்கிறேனே : ஒவ்வொரு ஹிட் நாயகருக்குமென ஒரு shelf life இருப்பதைப் பார்க்கிறோம் ! அன்றைய மாயாவி இன்றைக்கும் ஆக்டிவாக இருப்பது - 'அந்த நாள் ஞாபகம்' மூத்த வாசகர்களின் புண்ணியத்திலும் ; விடாப்பிடியாய் சேகரிக்கும் ஆர்வம் காட்டும் உங்களது புண்ணியங்களிலும் என்பதை உணர்கிறோம் ! எண்பதுகளில் கலக்கிய ஸ்பைடர் இன்றைக்கு உறக்கம் கிடத்துகிறாரென்று சொல்வதும் காதுகளில் விழுகிறது ! இளவரசியும், க்ளாஸிக் ஜேம்ஸ் பாண்டும் ஒரு தாண்டிச் சென்ற தலைமுறையின் அடையாளங்களாய்ப் பார்க்கப்படுவது இன்றைய நடைமுறை ! ஆனால் லக்கி லூக் ; டைகர் ; XIII போன்ற சொற்பமானோரே இன்றைக்கும் தேஜஸ் குன்றாது மிளிர்ந்து வருகின்றனர் ! And அவர்களுள் தலைமகன் நமது 'தல' என்பதை யார் மறுத்தாலும், நான் மறப்பதாகயில்லை ! 

"Facts are stubborn....statistics are flexible" என்று பிரபல எழுத்தாளர் மார்க் ட்வைன் சொன்னாராம் ! அதாவது - "நிஜங்கள் பிடிவாதமானவை ; ஆனால் புள்ளிவிபரங்கள் எப்படியும் வளைந்து கொடுக்க வல்லவை" என்று பொருள்படுவதாய் ! But ஒரே சமயத்தில் நிஜங்களே புள்ளி விபரங்களாகவும், புள்ளி விபரங்களே நிஜங்களாகவும் மாறிட்டால் ? அவற்றைக் கொண்டாடுவது தானே முறை ? 

And பாயசக்கார்ஸ் - நீங்களும் இணைந்து கொள்ளுங்களேன் கொண்டாட்டத்தில் ? 

Bye all....see you around ! Have a safe weekend !! And மே மாதத்து அலசல்கள் தொடரட்டுமே ?