வித்தையைக் காட்டு..இல்லை ஓரங்கட்டு !

 நண்பர்களே,

வணக்கம். 5 மில்லியன் பார்வைகள் !!! Oh wowww !! கோவைக் கவிஞரின் பங்களிப்பு இதனில் கணிசமான இருக்குமென்றாலுமே, இதுவொரு அசாத்திய மைல்கல் தானென்பதில் சந்தேகங்களில்லை ! Pat yourself on the backs guys - உங்கள் ஒவ்வொருவருக்கும் செல்ல வேண்டிய பெருமிதமிது ! And திட்டமிட கொஞ்சம் அவகாசம் எடுத்துக் கொள்வேன் - இந்த மைல்கல்லை சிறப்பிக்க ஏதேனும் செய்திடும் பொருட்டு !! 

ரொம்ப காலம் முன்னே வந்த "அபூர்வ சகோதரர்கள்" படத்தில் சிரிப்பு இன்ஸ்பெக்டராய் ரகளை செய்த ஜனகராஜ் சாரின் ஒரு வசனம் தான் எனக்கு நேற்றிலிருந்து மண்டைக்குள் ஓடி வருகிறது ! "இந்த விசாரணையிலே பல உண்மைகள் வெளியே வரும் போலிருக்குதே !!" என்று ஒரு பெருமித லுக்கோடு சொல்லுவார் ! அதே வசனமே இப்போது எனக்கும் பொருந்தும் - மைனஸ் that பெருமித லுக் ! 

சரி, ஸ்டெர்ன் புதுப் பார்ட்டி...அவர் மீதான தீர்மானத்தை சித்தே விசாரித்து விட்டு எடுப்போமென்று கிளம்பிய வண்டி அகஸ்மாத்தாய் 'விளிம்பு நிலை நாயகர்கள்' பற்றிய கேள்வியுடன் ஒரு குட்டி ஸ்டாப்பில் நின்றிட, 'திபு..திபு'வென அங்கே புச்சாய் நிறைய பேர் தொற்றிக் கொள்வதை மிரட்சியோடே பார்த்து வருகிறேன் ! நான் ரொமான்டிக்கா லுக் விட்டாலே அது கருப்பசாமி கோவிலில் தாயத்துக் கட்ட வேண்டிய அவசியத்தை ஏற்படுத்தும் எனும் போது - மிரண்ட லுக்குக்கு ஜெகம் தாங்குமா ? So அதை சரி பண்ணும் வழியை பார்த்தாக வேணும் தான் - தொடரும் நாட்களில் ! 

And ஒரு விஷயத்தைத் தெள்ளத் தெளிவாகிடுகிறேன் folks ! நாயக / நாயகியர் சார்ந்த உங்களின் உள்ளத்திறப்புகளின் பொருட்டு எனக்குத் துளியும் வருத்தம் கிடையாது ; எனது வருத்தமெல்லாம் என் மீதே !  விற்பனை நம்பர்கள் சொல்லும் சேதியானது சுவற்றில் தெளிவாக ; குண்டு குண்டு எழுத்துக்களில் பதிந்து கிடப்பது தெரிந்திருந்தாலும், அதனைக் கண்டும் காணாதும் இருந்து வந்தது நிச்சயமாய் எனது பிழையே ! And சுவற்றில் உள்ள அதே தகவல்கள் உங்களிடமிருந்து கடந்த சில நாட்களின் எனது வினாக்களுக்கான பதில்களில் கரைசலாய்க் கலந்து வருவதை கிட் ஆர்டின் கூட கவனிக்காது போக முடியாது தான் ! So அகன்ற விழிகள் இருந்தால் மட்டும் போதாது ; நிஜத்தை உணர்ந்திட புலன்களும் அகன்ற விழிப்போடு இருந்தாக வேண்டுமென்பது தான் எனக்கான பாடமென்று புரிகிறது !

To cut a long story short - வண்டிக்குள் குந்தியுள்ள நாயக / நாயகியரை விடவும் - footboard -ல் தொங்கிக் கொண்டே சவாரி செய்து வரும் "விளிம்பு நிலைப்" பார்ட்டிக்களே நம்மிடையே ஜாஸ்தி என்பது தான் வார்னிஷ் அடிக்காத நிஜமென்றாகிறது ! Variety என்ற ஒற்றை வேட்கையின் உந்துதலில் நான் விரட்டி விரட்டி புதுசாய் அய்யாக்கமார்களையும், அம்மிணிம்மாக்களையும் நம் கரைகளுக்கு கொணர்ந்திட கடந்த பத்தாண்டுகளில் அடிக்காத கரணங்கள் கிடையாது ! ஆனால் variety மட்டுமே ஒரு விருந்தை ருசிக்கச் செய்து விடாது ; சில சமயங்களில் ரெண்டே குழம்பு ; ரெண்டே கூட்டு என்று சுவையாய்ப் பரிமாறப்படும் சிக்கனச் சமையல்கள் கூட வயிற்றையும், மனசையும் ரொம்பிடச் செய்யுமென்பது புரிகிறது ! இதோ இந்தப் பட்டியலைக் கொஞ்சமாய்ப் பார்ப்போமே :

• கமான்சே 
• ஜெரெமியா
• LADY S 
• மதியில்லா மந்திரி
• Smurfs 
• சுட்டிப் புயல் பென்னி
• சாகச வீரர் ரோஜர்
• டைலன் டாக்
• க்ரைம் லாயர் ஜூலியா 
• மேஜிக் விண்ட்
• லியனார்டோ
• ரின்டின் கேன்
• ஜானதன் கார்ட்லெண்ட் 
• ஒற்றைக்கண் ஜாக்
• விண்ணில் ஒரு வேங்கை பைலட் அம்மணி 
• ப்ருனோ பிரேசில் 
• டிடெக்டிவ் ஜெரோம் 
• ஜில் ஜோர்டன்

மேற்படி பட்டியல் என் நினைவாற்றலுக்கு உட்பட்ட "கடந்த 9 + ஆண்டுகளுக்குள்ளாக நாம் முயற்சித்து "ரிஜிட்" என்று முத்திரை குத்தியுள்ள நாயக / நாயகியரின்" பட்டியல் மாத்திரமே !  For sure இந்த லிஸ்டில் இன்னமுமே ஆட்களை இணைக்க நான் மறந்திருக்கலாம் ! ஒவ்வொரு ஹீரோவுக்கும் போதிய வாய்ப்புகளை தந்திருப்போம் தான் - ஜடாமுடி ஜானதன் ; பைலட் அக்கா ; ஒற்றைக்கண்ணார் போன்றோரைத் தவிர்த்து ! அவர்களது கேஸ்களில் ஒரு பானைச் சோறுக்கு ஒரு பருக்கையே பதம் என்று நாம் ஏகோபித்த தீர்மானத்துக்கு வந்திருந்ததால் மேற்கொண்டும் வாய்ப்புத் தந்து தான் தீர்மானத்துக்கு வந்திட வேண்டுமென்ற அவசியம் இருந்திருக்கவில்லை ! So இந்த 'ரிஜிட்' லிஸ்டின் பொருட்டு யாரையும் நோவதில் பலன் இராது தான் !

இப்போது விஷயம் அதுவல்ல ! இதோ - இந்த பட்டியல் # 2 பக்கமாய்ப் பார்வைகளை ஓடவிடுங்களேன் :

• டிரெண்ட் 
• ஸ்டெர்ன்
• மாடஸ்டி 
• ஜேம்ஸ் பாண்ட் க்ளாஸிக் 
• ப்ளூகோட்ஸ்
• ஹெர்லாக் ஷோம்ஸ் 
• க்ளிப்டன்
• மேக் & ஜாக் 
• தி Lone ரேஞ்சர் 
• CID லாரன்ஸ் & டேவிட்
• மர்ம மனிதன் மார்ட்டின்
• CID ராபின்
• ஆர்ச்சி

மேற்படி மக்கா நமது தற்போதைய அணிவகுப்பின் முன்னணி வீரர்கள் ; at least என் மனசிலாவது ! ஆனால் இவுக அனைவருமே விதவுட்டில் வாசல்படியில் ஏதேதோ காரணங்களின் பொருட்டு தொங்கிக் கொண்டே பயணித்து வரும் பார்ட்டிகள் என்பதே நிதரிசனத்தின் தீர்ப்பு ! Again - இவை சகலமுமே ரசனைசார் விஷயங்களெனும் போது - இங்கே nobody is at fault !!  சிறுகச் சிறுக நமக்கென இருக்கும் ஓய்வின் அவகாசங்கள் குறுகிக் கொண்டே செல்லும் இந்நாட்களில், இடர்கள் ஏதேதோ புதுப்புது பூதங்களின் ரூபங்களில் தலை தூக்கும் இந்த நாட்களில் - முன்னெப்போதையும் விட இனி நமது தேர்வுகளின் பின்னணியில் அசட்டு நம்பிக்கைகளுக்கும் ; variety என்ற ஒற்றைக் கேடயத்தின் பின்னே ஒளிந்திட சில ஹீரோக்களுக்கு வாய்ப்புத் தரும் பாங்குகளுக்கும் இனி ஜாஸ்தி இடமிராது போலும் ! 

PERFORM !! or PERISH !!

வித்தையைக் காட்டு..இல்லாங்காட்டி நடையைக் கட்டு !!

விளிம்புநிலை நாயகர்களுக்கு மாத்திரமன்றி, இந்தத் தகவல் நமக்குமே தானென்பதில் எனக்குள் கிஞ்சித்தும் ஐயமில்லை ! ஒரு லார்கோவின் வெற்றியைச் சொல்லியே இனியும் ஒரு உப்மா நாயகரை உங்கள் தலைகளில் கட்டிட இயலாது ! ஒரு டெக்சின் அதிரடியைக் காட்டி ஒரு ராபினை உங்களிடம் வேண்டா வெறுப்பாய் போணி பண்ணிட முடியாது ! ஒரு லக்கி லூக்கைக் காட்டி ஒரு க்ளிப்டனை வியாபாரம் பண்ணிட முடியாது ! Oh yes - நம் மீதான வாஞ்சையில் "எதைப் போட்டாலும் வாங்குவோம் !" என்ற கட்சியில் நிறைய நண்பர்கள் தொடரவே செய்யலாம் தான் ; ஆனால் ஏதோவொரு தினத்தில் - பத்திரப்படுத்தத் தோன்றும் இதழ்களை விடவும், பழைய பேப்பர்காரரிடம் போட வேண்டிய இதழ்களின் எண்ணிக்கை ஜாஸ்தியாகிடும் போது அந்த வாஞ்சைகளே பரிசீலனைகளுக்கு உட்படுவது தவிர்க்க இயலா நிகழ்வாகிடும் தான் ! அத்தகைய நாள் புலரும் வரையிலும் நான் 'தேமே' எனக் காத்திருந்துவிட்டு அப்புறமாய் "ஐயோ..ஆத்தாடி..."என்று அலறிட்டால் அது காலம்கடந்த கூக்குரலாகிப் போயிருக்கும் ! ஒவ்வொரு பத்தாண்டுகளுக்கும் இப்போதெல்லாம் ; இனியெல்லாம் நம்மை நாமே reinvent செய்து கொள்ள வேண்டி வருமென்பது இன்றைய நமது வாழ்க்கைகளின் எழுதப்படா விதி ! So அதற்கு தலைசாய்த்து - அவசியப்படும் களை எடுப்புகள் ; அவசியப்படும் வலுப்படுத்தல்கள் பக்கமாய் 2022-ன் சந்தாவிலிருந்தே கவனங்கள் நல்கப்படும் ! சந்தாக்களின் அட்டவணையினை உங்களிடம் ஒப்படைக்க இன்னமும் 4 மாதங்கள் இருப்பினும், அதற்கான பின்னணிப் பணிகளை நாங்கள் ஜூன் 30 க்குள்ளேயே பூர்த்தி செய்திட வேண்டி வரும் ; so இவ்வாரத்துக் கேள்வி-பதில் session அதன் பொருட்டு ஏகமாய் எனக்கு உதவியுள்ளது என்பேன் ! So அதன் பொருட்டு பதிலளிக்க ஆர்வம் காட்டிய அனைத்து நண்பர்களுக்கும் ஒரு வண்டி நன்றிகள் ! And இதோ - மிச்சம் மீதி வைத்திருந்த கேள்விகள் : இன்றைய கோட்டாவுக்கு :

கேள்வி # 1 :

நமது முதல் நாயகி....இளவரசி....மாடஸ்டி !! 

a .கடைசி 3 ஆண்டுகளில் இவரது சாகசங்களை முழுமையாய்ப் படித்தீர்களா guys ? 

b .இவரது சாகசங்களில் எவையேனும் உங்களின் சமீபத்தைய மீள்வாசிப்பினில் இடம்பிடித்துள்ளனவா ? If yes - எந்தக் கதை (கள்) ?

கேள்வி # 2 :

கார்ட்டூன் அணியினரை நினைக்க நினைக்க எனக்கு அழுகாச்சியே வருகிறது ! ஏற்கனவே Clifton கதைகளின் குறிப்பிட்ட கதைகள் நீங்கலாய் பாக்கி எல்லாமே சுமார் ரகங்களென இருக்கும் நிலையில் - 2022 முதலாய் நமது கேரட் மீசைக்காரருக்குப் பிரியாவிடை தர எண்ணியிருந்தேன் ! And ஹெர்லாக் ஷோம்ஸ் தொடரில் இன்னமும் மிஞ்சி இருப்பதே ஒன்றோ, இரண்டோ கதைகள் மட்டுமே ! So நடைமுறையில் லக்கி லூக் ; சிக் பில் ; ப்ளூகோட்ஸ் & மேக் & ஜாக் மட்டுமே நமது சிரிப்பு அணியினர் ! அதனில் ப்ளூ பார்ட்டிஸ் & மேக் & ஜாக் தள்ளாடிடும் பட்சத்தில் - ஐயகோ !! கேள்வி இதோ :

a ப்ளூகோட் பட்டாளம் :  இவர்கள் தொடரலாமா  ! வேணாமா  ? பதில் ப்ளீஸ் ?

b  மீள்வாசிப்புகளுக்கு இவர்களின் கதைகளுள் எவையேனும்  வாய்ப்புப் பெற்றனவா ?

கேள்வி # 3 :

மேக் & ஜாக் செம வித்தியாசமான கதைக்களம் & அந்த நாயகர் இருவருமே ஒரு மாமூலான மந்தபுத்தி காமெடி பார்ட்டிகள் கிடையாது தான் ! இவர்களது இதுவரையிலான 3 இதழ்களின் மீது உங்களின் தீர்ப்புகள் என்னவோ ஜூரி பெருமக்களே ?

a நன்னாயிட்டு ! தொடரலாம் !

b நன்னாரி சர்பத்  குடிக்க காசு குடுத்து ஆயாளை அனுப்பிடுங்கோ ! மிடிலே !

c இன்னும் ஒரு வருஷம் வாய்ப்பு தருவோமே ? பாவம்..டெம்போல்லாம் வைச்சு சிகாகோவிலேர்ந்து வந்திருக்காங்க ! 

கேள்வி # 4 :

அமைதியாய் , அழகாய் பயணிக்கும் தொடரென்று ட்ரெண்ட் என்னுள் முத்திரை பாதித்திருந்தது ! But நான் வக்கீல் வண்டுமுருகன் மாத்திரமே எனும் போது again to you juries :

டிரெண்ட் கதைகளில் இன்னும் இரண்டே ஆல்பங்கள் பாக்கி ! அவற்றுக்கு வாய்ப்புத் தர எண்ணியிருந்தேன் - நேற்று வரைக்கும் ! இன்றோ அவரைச் சுற்றியொரு வட்டத்தை வரைந்து வைத்திருக்கிறேன் ! சொல்லுங்களேன் guys :

a .ட்ரெண்ட் உங்களின் மதிப்பெண்களை பெறுவதாயின், எவ்வளவு வாங்கிடுவாரோ ?

b .இதுவரையிலுமான 6 ஆல்பங்களையும் வாசித்துள்ளீர்களா ?

c .மீள்வாசிப்பு ???

இன்றைய பொழுதுக்கு இந்தக் கேள்விகளே போதும் என்பதால், இந்தப் புள்ளியில் இன்றைய டாட்டா காட்டி விட்டு நான் நகர்கிறேன் folks ! Bye for now !! Safe Friday to all !!

பி.கு : வாசலில் தொங்கிடாது, ஜம்மென்று சீட்டில் அமர்ந்து சவாரி செய்யும் நாயக / நாயகியரைத் தேர்வு செய்திட உதவும் / உதவப்போகும் அத்தனை பேருக்கும் again a big thanks !!