ஒரு பெருமூச்சுப் பதிவு ..!

நண்பர்களே,

வணக்கம். அனைவருக்கும் பக்ரீத் நல்வாழ்த்துக்கள் ! அந்தக் காலத்துக் கரி எஞ்சின் ரயில் ஏதேனும் இந்த நொடியினில் என்னருகே இருந்திருந்தால், மலைத்தே போயிருக்கும், நான் விடும் பெருமூச்சைப் பார்த்து ! என்னப்பு சமாச்சாரம் என்கிறீர்களா ?

நார்மலானதொரு நாளாய் இது இருந்து ; நார்மலானதொரு லோகமாகவும் இது இருந்திருந்தால் – நேற்றைக்கு ஈரோட்டுப் புத்தகத் திருவிழா துவங்கியிருக்கும் ; மாலை ரயிலைப் பிடித்து சாமத்துக்கு நானும் ஈரோட்டில் ஐக்கியமாகியிருப்பேன் & இன்றைய பகல் பொழுதில் நமது வாசக சந்திப்பு அரங்கேறியிருக்கும் -ஒரு வண்டி ஸ்பெஷல் இதழ்களோடு :

- ஒற்றை நொடி ஒன்பது தோட்டா!

- கென்யா!

- T & T ஸ்பெஷல் (Tex & Tesha)

  (+)

- ஒரு சஸ்பென்ஸ்  B&W இதழ்

நாம் போட்டிருக்க வேண்டிய வாண வேடிக்கைகளில், பக்ரீதோடு தீபாவளியும், கிறிஸ்துமஸுமே, முன்கூட்டி இணைந்து கொண்டுவிட்டனவோ என்ற சந்தேகமே எழுந்திருக்கும் ! ஆனால் கண்ணுக்கே தெரியா ஒரு நுண்கிருமி பூமியையே புரட்டிப் போடுவதென்பது தான் divine design எனும் போது வாண வேடிக்கைகளை விடுவதற்கு ஏது வழி – பெருமூச்சே கதி ! So Phewwwwww !!

நோய்த் தாக்கங்களின் எதிரொலிகள் ஏதேதோ விதங்களில் ; ஏராள ஜனங்களைப் படுத்தியெடுத்து வரும் நிலையில் – காற்றில் கரைந்து போய்விட்ட விற்பனை வாய்ப்புகள் + வியாபார முனைப்புகள் பற்றியெல்லாம் இப்போது பெருசாய் தலையைப் பிய்த்துக் கொள்ளத் தோன்றுவதில்லை ! அங்கே பிய்க்கவும் பெருசாய் ஏதுமில்லை தான் என்றாலுமே இந்த வருஷத்தை ஆரோக்கியத்தோடு ; உசிரோடு கடத்தினாலே தம்புரானுக்கு நன்றி சொல்லியாக வேண்டும் என்ற புரிதல் புலர்ந்து விட்டுள்ளதால், எனது பெருமூச்சுப் படலம் பண இழப்புகளுக்கோசரமல்ல ! மாறாக – 2013 முதலாய் ஒவ்வொரு ஆகஸ்டின் முதல் வாரயிறுதினையும், ஈரோட்டுப் புத்தக விழாவினிலும், வாசகச் சந்திப்பினிலும், செம குஷியாய்ச் செலவிட்டுப் பழகியபின் பிற்பாடு இந்த திடீர் லீவு மண்டை காயச் செய்கிறது ! ஆண்டுதோறும் ஈரோடும், சென்னையுமே நண்பர்களைச் சந்திக்க வாய்ப்பு தரும் களங்கள் என்றிருந்தாலும் – ஈரோட்டில் முறையானதொரு அரங்கு ; சந்திப்பு ; கலந்துரையாடல் என்று செட் ஆகியிருக்க – ஆகஸ்டில் சார்ஜ் ஆகும் நமது பாட்டரிகள் ஜனவரி வரையிலும் வண்டியை இழுத்துப் போய் விடும் & ஜனவரியின் சென்னைப் புத்தக விழா அடுத்த 7 மாதங்களுக்கான ‘தம்‘மை நமக்கு வழங்கிடும் ! இம்முறையோ இறைவனின் சித்தம் வேறுவிதமாய் இருப்பதால் பழசை அசைபோட்டே பொழுதைப் போக்கிட வேண்டும் போலும் ! Phewwwwww!!

முதன்முறையாக ஈரோட்டுக்குப் பயணமானது 2013-ல் என்று ஞாபகமுள்ளது ! நண்பர் ஸ்டாலினின் முயற்சிகளின் பலனாக 2012-ல் வேறு பதிப்பகங்களோடு கூட்டுக் குடித்தனம் பண்ணியிருந்த நாம் – 2013-ல் தனி ஸ்டால் பெற்றிடும் அளவுக்குத் தேறியிருந்தோம் ! நமது பதிவுகளில் பின்நோக்கிப் பயணித்தால் ஏழு வருடங்களுக்கு முன்பான அந்தச் சின்னத் துவக்கத்தை அழகாய் நினைவு கூர்ந்திட முடிகிறது : http://lion-muthucomics.blogspot.com/2013/08/blog-post_14.html !நேரம் கிடைத்தால் நீங்களுமே அந்தப் பதிவுக்குள் புகுந்து தான் பாருங்களேன்!! இதோ over the years – ஈரோடு நாட்களின் ஒரு அணிவகுப்புமே : 

ஏழெட்டு ஆண்டுகளின் ஓட்டத்தில் அங்காங்கே ரிவர்ஸ் கியர் போட்டிருக்கும் முன்மண்டைகளையும்; பார்வார்ட் கியர் போட்டுள்ள மத்தியப் பிரதேசங்களையும் கவனித்தீர்களெனில், அவையே ஒரு தனிக்கதை சொல்லும் !! Phewwww!

When it all began - 2013 :

2013 

Followed by 2014 :

And this is 2015 :

எழுத்தாளர் திருமிகு.N சொக்கன் அவர்கள் பங்கேற்ற 2016 - 

HERE'S 2017 :

FROM இரத்தப்படல  2018 :

பின்னோக்கிய நினைவுகள் கொணரும் உணர்வுகள் ; சந்தோஷங்கள் வார்த்தைகளுக்குள் அடங்கிடும் ரகமல்ல எனும் போது நான் அதனைச் செய்திட முனைந்திடக்கூடப்போவதில்லை ! ஒரு குண்டாச் சோற்றுக்கு ஒரேயொரு சோறை உதாரணமாக்கிடுவதாயின் - கலப்படமிலா மகிழ்வும், ஆனந்தமும் தாண்டவமாடும்  2017 -ன் அந்த இரும்புக்கவிஞரின் போட்டோவை மட்டுமே சொல்லுவேன் !! இப்போது சொல்லுங்களேன் - எனது பெருமூச்சுகளுக்குப் பின்னணி உள்ளதாயென்று !! Phewwww !!

Looking ahead – இந்த ஆகஸ்டின் ரெகுலர் இதழ்களைப் பற்றிய preview-க்குள் புகுந்திடலாமா? இதுவொரு '4 புக் மாதம்' எனும் போது எங்களுக்கு ஜுலையின் காலாட்டும் அவகாசம் லேது ; மாறாக காலில் வெந்நீரை ஊற்றியது போலவே சுற்றித் திரிய வேண்டியுள்ளது ! ஆனால் வாசிப்பில் இம்முறை உங்களுக்கு choice அதிகம் என்பதால் சுவராஸ்ய மீட்டர் எகிறும் வாய்ப்புகளுமே அதிகம் என்பேன் ! Moreso because – இம்மாதத்து சந்தா A-வின் சார்பில் ஆஜராகிடுவது நமது மறதிக்கார XIII ! இரத்தப் படலத்தின் மூன்றாம் சுற்று : 2132 மீட்டர் என்ற விசித்திரமான பெயருடன் துவங்குகிறது ! 

நிஜத்தைச் சொல்வதானால் ”இ.ப.” ஆல்பங்களின் எடிட்டிங் என்பது கடுங்காப்பியைக் காலையும், மாலையும் 'கபக் கபக்'கென்று குடிக்கும் அனுபவங்களுக்குச் சமானம் என்பேன் ! துவக்க நாட்களின் முதல் சுற்றில், கதைகளில் ஒரு அசுர வேகம் இருந்தாலுமே நாம் அவற்றைத் தனித்தனிப் பாகங்களாய்ப், பெரிய இடைவெளிகளில் வெளியிட்டு வந்தோம் எனும் போது – முந்தைய ஆல்பங்களின் கதைப்போக்கை நினைவு கூர்வது ; கதை மனிதர்களை ஞாபகம் வைத்திருந்து, சொதப்பாது பணியாற்ற முயற்சிப்பதென்பது ஏகமாய் குடலை வாய்க்கு வரச் செய்திடும் ! And அந்நாட்களில் “இ.ப.”வின் ஆங்கிலப் பதிப்புகளும் கிடையாதெனும் போது சாத்தியப்பட்ட ப்ரெஞ்சு மொழிபெயர்ப்புகளின் மீது ஊன்றிக் கொண்டே தான் தட்டுத் தடுமாறி நடை போட்டிட வேண்டி வரும் ! வருடங்கள் ஓட்டமெடுத்த நிலையில் – “இ.ப.” இரண்டாம் சுற்றினை நாம் சமீபத்தில் கலரில் வெளியிட்ட போதுமே Cinebook-ன் ஆங்கிலப் பதிப்புகள் வந்திருக்கவில்லை தான் ; ஆனால் சந்தேகங்கள் எழுந்திடும் இடங்களிலெல்லாம் இன்டர்நெட்டின் சகாயத்தோடு ப்ரெஞ்சு மொழிபெயர்ப்புகளை ; எனது புரிதல்களைச் சரிபார்க்கச் சாத்தியப்பட்டதால் நோவு குறைந்திடுமென்று நம்பினேன் ! ஐயகோ !! அந்த நம்பிக்கையைப் பணால் பணாலென பொடனியிலேயே போட்டுச் சாத்தியது - புதுக்கதாசிரியர் போட்டுத் தந்திருந்த “மேபிளவர்” என்ற  புது ரூட்! அமெரிக்கக் குடியேறிகளின் இஸ்திரி...ஜாக்கிரபி என்று எங்கெங்கோ சுற்றிய கதையின் / கப்பலின் பயணத்தைப் புரிவதற்குள் பொறுமைகளின் கையிருப்புகள் பரபரவென்று காலாவதியாகின ! So முதல் சுற்றிலாவது ஞாபகங்களைத் தூசி தட்டுவதோடு முடிந்த பணிகளானவை, இரண்டாம் சுற்றின் போது திணறத் திணற அடிப்பது போலிருந்தது ! 

இது தான் நிலவரம் என்றிருக்கும் போது ”2132 மீட்டர்” என்று “இ.ப.” சுற்று # 3 பற்றிய அறிவிப்பைப் போன வருஷம் பார்த்த போது கலவையான உணர்வுகள் உள்ளுக்குள் தலைதூக்கின ! "ஆஹா... தொங்கலில் இரண்டாம் சுற்று நிற்கும் நிலையில் இந்தச் சுற்றினை நாம் கண்டும், காணாது இருக்க இயலாதே !!" என்று புரிந்தது. அந்த நொடியில் “மறுபடியும் மேபிளவர்” என்றவுடன் மலங்க மலங்க முழிக்காதிருக்கவும் முடியவில்லை ! சரி... இருக்கவே இருக்கிறார் நமது கருணையானந்தம் அங்கிள் & இருக்கவே இருக்கிறார் கூகுள் ஆண்டவர் என்ற தைரியத்தில் அட்டவணையில் நமது மறதிக்காரரைச் சேர்த்து வைத்தேன் !

2020-ம் புலர்ந்து, மாதங்களும் ஓட்டமெடுத்து வந்தாலும், உள்ளுக்குள்ளிருந்த பீதி காரணமாய் ”2132 மீட்டர்” ஆல்பத்தை டிக் அடிக்கத் தயக்கம் நிறையவே இருந்தது ! 'இன்னிக்கு அஷ்டமி. நாளன்னிக்கு தசமி...' என்ற கதையாய்த் தள்ளிப் போட்டுக் கொண்டே போக – ஒரு கட்டத்தில் this is the moment ; இனியும் ஒத்திப் போட வழி லேது என்பது புரிந்தது ! So ஒரு சுபயோக சுபதினத்தில், சுமார் 45 பக்கங்களை கொண்ட பிரெஞ்சு to இங்கிலீஷ் மொழிபெயர்ப்பும் தயாராகியது & அதை அப்படியே நமது கருணையானந்தம் அவர்களுக்கு கைமாற்றி விட்டேன் ! And அவரும் சிரத்தையோடு எழுதியனுப்பியிருந்தார் – குழப்பமான இடங்களை மட்டும் blank ஆக விட்டபடிக்கு ! டைப்செட்டிங் மூன்றே நாட்களில் நிறைவுற்று – பிரிண்ட் அவுட்கள் ஜுனின் இறுதியிலேயே என் மேஜையில் செட்டில் ஆகிவிட்டன ! நல்ல நாளைக்கே நாழிப்பால் கறப்பவன் – அடுத்த ஒரு மாதத்துக்கு அவற்றை quarantine-ல் போட்டு வைத்த மாதிரி ஓரம் கட்டிவிட்டேன் ! And இனிமேலும் லேட் பண்ணினால் ஆகஸ்ட் இதழ்கள் ‘அரோகரா‘ ஆகிடும் என்ற நிலையில், புதன் மாலை (29-ஜுலை) இஷ்ட தெய்வங்களையெல்லாம் வேண்டிய கையோடு XIII-க்கு  ஹலோ சொல்லத் தயாராகினேன் !

முதல் பக்கத்திலேயே... முதல் ப்ரேமிலேயே ஏதோ செல்போன் டவர் மாதிரியான உசரத்தில், நம்மாள் கையில் ஒரு உயர்ரகத் துப்பாக்கியோடு சுடத் தயாராக இருக்க, ‘அட... கப்பலைக் காணோம்... இஸ்டரி.. ஜாக்கிரபியைக் காணோம் !‘ என்று மனசு துள்ளியது. மெதுமெதுவாய் பக்கங்கள் நகர்ந்திட, வேக வேகமாய் எனக்குள் ஒரு நம்பிக்கை துளிர்விடத் தொடங்கியது ! ‘இந்தவாட்டி தெளிய வைத்துச் சாத்த மாட்டார்கள் போலும் !‘ என்று !! ஓவியர் வில்லியம் வான்ஸ் சித்திர ஜாலங்களில் இந்தத் தொடருக்கென ஒரு புது உச்சத்தை நமக்குக் கண்ணில் காட்டிச் சென்றிருக்கிராரெனில், அவரது மறைவுக்குப் பின்னே பொறுப்பேற்றிருக்கும் இந்தப் புது ஓவியர் முற்றிலும் வேறொரு லெவலில் மிரட்டி வருவது நாம் அறிந்ததே ! அதிலும் இந்தப் பாகத்தின் ஓவிய துல்லியம் கூரை மேலேறி நின்று கொண்டாட வேண்டியதொரு அற்புதம் ! கதை நெடுக நடமாடும் பெண்களின் முகங்களின் நுணுக்கங்களிலிருந்து, வாஷிங்டனின் வீதிகளைப் படம் பிடித்திருக்கும் லாவகம் வரை மனுஷன் செய்துள்ள அதகளங்களைக் கல்லறையிலிருக்கும் அமரர் வான்ஸ் கூட ஆரவாரமாய்க் கொண்டாடியிருப்பார் ! பக்கத்துக்குப் பக்கம், பாட்டம் பாட்டமாய் ஆளாளுக்கு வரலாற்றுப் பாடம் நடத்தியதே முந்தைய இதழ்களின் நடைமுறை என்ற போது, ஓவியரின் மாயாஜாலம் மழுங்கியே தென்பட்டது எனக்கு ! ஆனால் surprise... surprise... இம்முறை வசனங்களில் ஏகச் சிக்கனம் என்றதால், சித்திரங்கள் வீறுகொண்டு எழுந்து உலவியது போல் எனக்குத் தோன்றியது ! So மிரண்டு கிடந்தவனுக்கு உற்சாகம் தொற்றிக் கொள்ள, 14 பக்கங்களைத் தொட்டு விட்டேன் ஒன்றரை மணி நேரங்களுக்குள் !

அங்கே சின்னதாய் நெருட, பிரெஞ்சு ஸ்க்ரிப்டில் எனது குழப்பத்துக்கு விடை தெரியக் காணோம் ! சரி... பார்த்துக் கொள்ளலாமென்று பக்கங்களை புரட்டினால், சில இடங்களில் கருணையானந்தம் அவர்களும் சில வசனங்களை blank ஆக விட்டு வைத்திருப்பதைக் கவனித்தேன் ! அங்கே நிரப்ப வேண்டிய சமாச்சாரம் என்னவோ என பிரெஞ்சு ஸ்க்ரிப்டை மறுக்கா உருட்டினால் எனக்கும் முட்டி தட்டியது ! நமது மொழிபெயர்ப்பாளர் பிரெஞ்சில் ஆற்றல் கொண்டவர் தான் எனினும், ஒரு தேர்ந்த எழுத்தாளரல்ல எனும் போது அவரது ஸ்கிரிப்ட் எப்போதுமே ஒரு கம்பியூட்டர் பாடத்தைப் போலவே இருந்திடும் ! சில நேரங்களில், நமக்கு கிட்டும் ஸ்கிரிப்ட்டில் ஒரு கதை சொல்லும் பாங்கு இழையோடினால் மொழிபெயர்ப்பினில் ரொம்பவே உதவிடும் - அதிலும் மர்ம மனிதன் மார்ட்டின் ; XIII போன்ற கதைத்தொடர்களில் ! கொஞ்ச நேரம் ப்ரிண்ட் அவுட்களையும், பிரெஞ்சு மொழிபெயர்ப்பையும் மலங்க மலங்க பார்த்துக் கொண்டே அமர்ந்திருந்தேன் ! மணி 11 ஆகியிருந்தது ! ரைட்டு... விஷப்பரீட்சைக்கு இது களமுமல்ல...அதற்கான நேரமுமல்ல என்ற தீர்மானத்தில் பரபரவென்று பாரிஸில் உள்ள நமது படைப்பாளிகளுக்கு ஒரு மின்னஞ்சலைத் தட்டி விட்டேன் : “இ.ப. புது ஆல்பத்தின் பணிகளில் எனக்குக் கொஞ்சம் கேள்விகள் உள்ளன... நெடுந்தொடரில் குத்துமதிப்பாய் எதையேனும் பூசி மெழுகி வைத்து, நாளைக்குக் கதையின் போக்கில் அதுவே பிழையான புரிதல்களுக்கு வழிவகுத்திடக் கூடாதே என்று பயமாக உள்ளது ! ‘இதற்கான Cinebook இங்கிலீஷ் pdf கிடைக்குமா - ப்ளீஸ் ?‘ என்று எழுதிவிட்டு கட்டையைக் கிடத்தினேன்.

வியாழன் காலையில் முட்டைக் கண்களைத் திறந்ததே லாப்டாப்பில் முகத்தில் தான் !  ஆங்கிலப் படிவம் இருந்தால், தடுமாற்றமின்றிப் பணிகளை முடித்து விட முடியுமே என்ற நினைப்போடே படுத்தவனுக்கு விடியற்காலையில் வேறு சிந்தனைகள் ஓடவேயில்லை ! மின்னஞ்சலைப் பார்த்தால் – எனது மெயில் கிடைத்த இருபதாவது நிமிடமே நான் கோரியிருந்த pdf சகிதம் அவர்களது பதிலும் கிட்டியிருந்தது : "Of course –இதோ நீ கேட்ட இங்கிலீஷ் pdf ! ஒத்தாசைகள், எப்போது தேவைப்பட்டாலும் கேட்கத் தயங்க வேண்டாம்  ! All the best !’ என்று எழுதியிருந்தனர் ! 'அட்றா சக்கை' என்றபடிக்கே pdf-ஐ டவுன்லோட் செய்த கையோடு பக்கங்களை எடுத்துக் கொண்டு மறுபடியும் துவக்கத்திலிருந்தே புறப்பட்டேன் ! ஒரு ஒரிஜினல் பிரெஞ்சு எழுத்தாளர் பேனா பிடிப்பதற்கும், அந்த மொழியினைக் கற்ற நம்மவர் பேனா பிடிப்பதற்குமிடையே புரிதல்களில் பெரிதாய் வேற்றுமை எனக்கு கண்ணில்படவில்லை தான் ! ஆனால் பேனா பிடிப்பவர் ஒரு எழுத்தாளராய் ; கதை சொல்பவராய் இருக்கும் போது வரிகளில் தென்படும் சுலபத்தன்மை தான் தூக்கலாய்க் கொடி பிடித்துத் தெரிந்தது !  ஏற்கனவே ப்ளூ கோட்ஸ் ; தோர்கல் போன்ற சில ஆல்பங்களிலும் இது போன்ற அனுபவம் எனக்கிருந்துள்ளது தான்; ஆனால் அவை எல்லாமே நேர்மறையான கதைகள் என்பதால் பெரிதாய் எந்தவொரு குழப்பங்களும் அன்றைக்குத் தோன்றியதில்லை ! ஆனால் இதுவோ ஒரு தடதடக்கும் இடியாப்ப கிராபிக் நாவல் எனும் போது, சின்னச் சின்ன வித்தியாசங்கள் கூட ஏதேனும் குழப்பிடக் கூடுமோ ? என்ற பயம் தலைதூக்கியதால் முதற் பக்கத்திலிருந்தே redo செய்து கொண்டே புறப்பட்டவன் மதியத்திற்குள் பாதிப் பக்கங்களை முடித்திருந்தேன் !

கொஞ்ச நேரம் காலாட்டிக் கொண்டிருக்கலாமென எழுந்த போது தான் சில விஷயங்கள் பிடரியில் சாத்துவதை உணர முடிந்தது ! Without a doubt - மூன்றாம் சுற்றின் இந்த முதல் ஆல்பம் ஒரு அசாத்தியத் த்ரில்லர் ! இதற்கு முந்தைய ஆல்பங்களில் தென்பட்ட தொய்வுகளையெல்லாம் ஈடு செய்திடும் விதமாய் இந்தப் புதுச் சுற்றில் தெறிக்க விட்டிருக்கிறார் கதாசிரியர் ! வழக்கமாய் ஆடியில் ஆரம்பிக்கும் புதிர்களை, மறு சித்திரைக்கு சாவகாசமாய் முடிச்சவிழ்க்க முனைந்திடும் பாணிகளைக் கடாசி விட்டு, இந்த ஆல்பத்தினில் ஆங்காங்கே jigsaw puzzle போலத் துளிர்விட்ட முடிச்சுகள் ஒவ்வொன்றுக்குமே இந்த ஆல்பத்தினிலேயே புரிதல்களும் கிடைத்திட கதாசிரியர் வழிசெய்திருப்பதை உணர்ந்த போது எனக்கு மூஞ்சியெல்லாம் பல் ! சம்பந்தமே இல்லாது தோன்றும் சமாச்சாரங்களைக் கூட கதைக்கு crucial ஆன லிங்க்களாய் உருமாற்றும் லாவகத்தைப் பார்த்த போது பிரமிக்காது இருக்க முடியவில்லை. இங்கொன்றும், அங்கொன்றுமாய் முன்னே இடப்பட்டிருந்த புள்ளிகளெல்லாம் என்ன மாதிரியானதொரு ரங்கோலிக்கென Yves Sente திட்டமிட்டிருந்தார் என்பதை இந்த ஆல்பத்தில் செமையாய் புரிந்திட முடிகிறது ! என்ன ஒரே சமாச்சாரம் – இரண்டாம் சுற்றின் முந்தைய இதழ்கள் சகலத்தையும் ஒருவாட்டி 'தம்' கட்டிப் படித்து விட்டு இந்த ஆல்பத்தினுள் புகுந்தால் – “இந்தாள் அந்நாளைய வில்லன் ஆனந்தராஜா ? அல்லது இந்நாளைய காமெடியன் ஆனந்தராஜா ? என்ற ரீதியிலான கதைக்குழப்பம் எழாதிருக்கும் ! Cinebook-ன் ஆங்கிலப் பதிப்பின் உதவியோடு எடிட்டிங்கில் மறுக்கா புகுந்த போது, சில இடங்களில் திருத்தங்களும், கதையின் க்ளைமேக்ஸ் பகுதிகளில் மொத்தமாகவே மாற்றி எழுதவும் தேவைப்பட்ட போதிலும், கதையின் விறுவிறுப்பின் புண்ணியத்தில் பெரிதாய் சோர்வு தலைதூக்கிடவில்லை ! In fact இத்தனை பக்கங்களை அலுப்பின்றி நான் மாற்றி எழுதியது ரொம்ப ஆண்டுகளுக்கு பின்பாக இப்போது தான் என்று சொல்வேன் ; இல்லையேல் முக்கியபடிக்கே தான் வேலைகள் ஓடிடும் ! (கடைசியாக இம்மாதிரி ஜாலியாய் redo செய்தது மார்டினின் “கனவுகளின் குழந்தைகள்”!)

Yves Sente - கதாசிரியர் 

ஓவியர் Youri Jigounov

Coloring : Bruno Tatti

கதையின் ஓட்டத்தோடு ஏகப்பட்ட புதுப்புதுச் சமாச்சாரங்களையும் தெரிந்து கொள்ள முடிந்தது ! "Designated Survivor" என்றால் என்ன? தலைநகர் வாஷிங்டன் D.C.யில் வானளாவிய உசரமான கட்டிடங்கள் ஏன் கிடையாது ? அமெரிக்க அரசியல் சாசனங்களின் புதிரான விதிமுறைகள் என்ன ? என்றெல்லாம் தெரிந்து கொண்ட திருப்தியோடு க்ளைமேக்ஸுக்கு வந்தால் ஒற்றைப் பக்கத்தில் தெறிக்கும் காமெடியும், மறுபக்கத்தில் தெறிக்கச் செய்யும் ஆக்ஷனும் இடம்பிடிப்பதைப் பார்க்க முடிந்த போது – “ஆஹா. இந்த கதாசிரியர் மனுஷன் - ஜாம்பவானான வான் ஹாமிற்கே செம tough fight” தந்திடுவார் போலிருக்குதே என்று பட்டது !! Phewwwww !!!

பொதுவாய் ஒரு கதை ஹிட்டடிக்கும் என்பது உறுதிபடத் தெரிந்தாலுமே அதற்கு over the top பில்டப்களைத் தர முயற்சிப்பதில்லை ! ஓவராய் வாயைச் செலவழித்து விட்டு, ஓவராய் எதிர்பார்ப்புகளைக் கிளப்பி விட்டு, அப்பாலிக்கா ஓவராய் முட்டுச்சந்துகளைத் தேடிப் பயணம் பண்ணுவானேன் ? என்ற முன்ஜாக்கிரதையில் மேலோட்டமாய் நாலு பிட்டைப் போட்ட கையோடு அடுத்த இதழுக்குத் தாவுவது என் வழக்கம். ஆனால் முதன்முறையாக அந்தப் பழக்கத்துக்கு ஒரு விதிவிலக்கு இருந்து போகட்டுமே என்ற எண்ணம் ”2132 மீட்டர்” ஆல்பத்தின் புண்ணியத்தில் எனக்குள் தோன்றுவதால் – இந்த வாரம் the preview’s focus will be on XIII & nobody else ! 'அது சரி, வாங்குன காசை விட ஜாஸ்தியாய் இந்தவாட்டி தம்பி கூவுறாப்டி... ஏன்னு தான் தெரியல!‘ என்ற லேசான அல்லது பலமான எண்ணம் உங்களுக்குள் ஓடினால் தப்பில்லை தான் ! Simply becos - "இ.ப" இரண்டாம் சுற்றின் முந்தைய பாகங்களின் கதையோட்டம் என்மட்டிற்காவது ரொம்பவே படுத்தி எடுத்தது போலத் தோன்றியதால் – மிரண்டு கிடந்தவனுக்கு, இந்த ஆல்பம் அடிக்கும் பரபரப்பு சிக்ஸர் ஒவ்வொன்றுமே 12 ரன்கள் பெறுமானமானதாய்த் தெரிகிறது ! அதனால் தான் “வருங்கால சனாதிபதி அண்ணன் XIII வாழ்க!” என்று தம் கட்டிக் கூவிடுகிறேன் ! அதுவும் அந்தக் கடைசி 2 பக்கங்களில் ரஃபேல் போர்விமானமாய் சீறிடும் கதையானது வேறு லெவல் ! அடுத்த அத்தியாயத்தோடு இந்தச் சுற்று நிறைவுறுகிறது என்பது போல காதில் சேதிகள் விழுந்தன! ஆனால் தற்போது கோடை விடுமுறைகளில் உள்ள படைப்பாளிகள் ஆகஸ்ட் மத்தியில் திரும்பிய பிற்பாடு விசாரித்தால் தான் சரியான தகவல்கள் தெரியும் ! எது எப்படியோ – செல்போன் டவரை ரிப்பேர் பண்ண டுப்பாக்கியும் கையுமாய் நம்மாள் ஏறுவது ஏனோ ? என்ற கேள்விகளுக்குத் காத்திருக்கும் விடைகள் இந்தத் தொடருக்கு ஒரு லோடு பூஸ்ட்டைத் தந்துள்ளது மட்டும் நிஜம் ! Phewwwwww !!

இதோ – ஒரிஜினல் டிசைனுடனான நமது அட்டைப்படம் & உட்பக்கப் preview ! செவ்வாயன்று அச்சுக்குச் செல்கின்றன – ஜம்போவின் ஜேம்ஸ் பாண்டுடன் ஜோடி சேர்ந்து கொண்டு ! 2019-ல் ரிலீஸ் ஆன இந்த 2132 மீட்டர் இதழுக்கு state of the art கலரிங் பாணி எனும் போது அதிலும் ரகளை காத்துள்ளது ! So 'வந்துட்டாருன்னு சொல்லு... 10 வருஷத்துக்கு முந்தைய ஜேஸனாகவே வந்துட்டாருன்னு சொல்லு !' என்று தகிரியமாய்க் கூவுகிறேன் !! 

Moving on, ‘இ.ப.‘ & ஸ்பைடரார் முன்பதிவுகள் பற்றி :

- இ.ப. தற்போதைய புக்கிங் # 92 தான் ! அந்த துவக்கத்து euphoria வடியத் துவங்கிய பின்னரும் ஆர்வங்கள் தொடர்ந்திடுமா ? என்பது தான் மில்லியன் டாலர் கேள்வி ! இன்னமும் மூன்று மாத அவகாசமுள்ளது எனும் போது we'll wait & watch !

- And ஸ்பைடர் முன்பதிவின் number : 22 !

ஸ்பைடர் இதழானது சின்ன விலையிலானது என்பதால் இதழ் வெளியாகும் தருணத்தில் வண்டி வேகம் கண்டிடும் என்று நினைக்கிறேன் ! XIII ஸ்பெஷல் தான் காத்திருக்கும் 90 நாட்களில் எவ்விதம் பயணிக்கவுள்ளது என்று அறிந்திட ஆர்வமாய்க் காத்திருப்பேன்! For now உங்களது முன்பதிவுத் தொகைகள் பத்திரமாய் டெப்பாஸிட்டாய் துயின்று வருகின்றன !

கிளம்பும் முன்பாய் - பல முறைகள் நாம் (சு)வாசித்துள்ளதொரு தலைப்பினில் சமீபமாய்க் கிட்டியதொரு லெட்டர் பற்றி : 

=================================================================

அன்பின் ஆசிரியருக்கு,

வணக்கம். நீங்களும் நம் காமிக்ஸ் குடும்பத்தில் உள்ள அனைவரும் நலம் என நம்புகிறேன்.

வெகு நீண்ட நாட்களுக்குப் பிறகு உங்களுக்கு எழுதுகிறேன். மிகவும் துயரமான இந்தக் காலக்கட்டத்தைக் கடந்து வருவதில் நம் காமிக்ஸ் எனக்குப் பெருந்துணையாக உள்ளது என்று சொன்னால் அது மிகையில்லை. கொரோனா ஆரம்பித்த காலத்தில் பொள்ளாச்சி அருகேயிருந்த பழங்குடி இன மக்களுக்கு என்னுடைய பதிப்பாளர் எதிர் வெளியீடு அனுஷின் சகாயத்தோடு வேண்டிய உதவிகளைச் செய்து கொண்டிருந்தோம். ஆனால் நாட்கள் நகர நகர எங்களுடைய நிலைமையும் மிக மோசமாகிக் கொண்டிருக்கிறது என்பதே உண்மை. உளச்சோர்வு பெரிதாக என்னை ஆக்கிரமிக்கும் சமயங்களில் எல்லாம் நம்முடைய காமிக்ஸிடம்தான் தஞ்சம் புகுகிறேன். அதிலும் குறிப்பாக அதிகாரியின் கதைகள் அனைத்தையுமே கிட்டத்தட்ட மறுவாசிப்பு செய்து விட்டேன். எத்தனைதான் டைகரின் மிகப்பெரிய விசிறியாக இருந்தாலும் இருண்ட காலங்களில் நம் முகங்களில் சிறிதளவு ஒளியையேனும் கொண்டு வருபவை கார்ட்டூன்களும், அதிகாரியும் மட்டுமே. அதற்காக உங்களுக்கு என் நன்றி. இந்தப் பயணம் தடையின்றி தொடர என் பிரார்த்தனைகளும் வாழ்த்துகளும். அண்மையில் நம்மை நீங்கிச் சென்ற வாசகர் ஜே எஸ் கே-வின் பொருட்டு ஒரு காமிக்ஸை வெளியிடுவதென்பது மகத்தான காரியம். தேவையின்றி உங்களைக் காயப்படுத்தும் சங்கதிகளைத் தவிர்த்து காமிக்ஸ் பணிகளில் தொய்வின்றி ஈடுபடுங்கள். உங்களோடு நாங்கள் எப்போதும் இருக்கிறோம். உங்களுக்கு மீண்டும் என் நன்றியும், அன்பும்.

பிரியமுடன்,

கார்த்திகைப் பாண்டியன்

=================================================================

நண்பர் ஒரு தீவிர டைகர் அபிமானி என்பதில் ரகசியங்கள் இல்லை எனும் போது, அவரது மின்னஞ்சலில் 'தளபதி' vs 'தல' என்ற போட்டி நோக்கெல்லாம் இருப்பதாய் நான் நினைக்கவேயில்லை ! மாறாக - இந்த சிரம நாட்களில் அந்த 'feel good factor ' க்கு அதிகாரியாரே ஒரு மிடறு உசத்தி என்ற கருத்தை அடிக்கோடிடுவதாய் மட்டுமே பார்த்திடுகிறேன் ! So பாயசங்களுக்கு பரணை உருட்டாதீங்கோ சம்முவம்ஸ் !!  And கார்ட்டூன்கள் பற்றியும் நண்பர் எழுதியுள்ளது செம்மையாய் மனத்தைக் குளிர்விக்கிறது !! துரதிர்ஷ்டவசமாக  வெகுஜன ஆதரவு நம் சிரிப்பு பார்ட்டிகளுக்கு இல்லாது போயினும் - அவர்களின்பால் அவ்வப்போது பாய்ந்திடும் கனிவான ஒளிவட்டங்கள் warms the heart !! நன்றிகள் கா.பா. சார் !! 

Bye guys... See you around !  2021-ன் கேட்லாக் பணிகள் அழைப்பதால் நடையைக் கட்டுகிறேன் !!  Have a cool weekend &  Do Stay Safe !!