சின்னவர் vs சின்னவர்..!

நண்பர்களே,

வணக்கம். அநேகமாய் காத்திருக்கும் புது மாதத்து இதழ்களின் preview-களைக் கண்ணில் காட்டாமலேயே இடைப்பட்ட சில பல வாரங்களை ஒப்பேற்றச் சாத்தியமாகியுள்ள முதல் தருணம் இதுவாகத்தானிருக்குமென்று நினைக்கிறேன்! மே மாத மெகா இதழ்கள் ; XIII Spin-offs ; லக்கி லூக் Spin-off (Spoof ?); 'தோற்றோர் பட்டியல்' என்று விதவிதமான வடைகளை வாயால் சுடவொரு வாய்ப்புக் கிட்டியதால் புதுசுகளைக் களமிறக்கிட அவசியமின்றி நாட்களைக் கடத்தியாச்சு ! But இதோ – மாதம் முடிய ஒரே வாரம் எஞ்சியிருக்கும் தருவாயில், all புதுசுகளை ‘ஏக் தம்மில்‘ வலம் வரச் செய்திடத் தயாராகி விட்டேன்!

In some ways, இது “சின்னவர்களின் மாதம்”!! And நம்மளவிலாவது இரு ஜாம்பவான்களாய் உசந்து நிற்கும் இரு அசாத்தியர்களின் face to face மாதமும் கூட ! அதென்ன சின்னவர்களின் மாதம் என்கிறீர்களா ? இம்மாத அட்டவணையின் 2 பிரமுகர்கள் யாரென்று நினைக்கிறீர்கள்?

- இளம் TEX

- இளம் டைகர்

ஆக இரு ஜாம்பவான்களின் சின்ன வயதுச் சாகஸங்கள் பக்கமாய் பார்வை ஓடிடுவது ஒரே வேளையில் எனும் போது, காத்திருக்கும் ஜூன் மாதத்திற்கு – “சி.மா.” என்ற பெயர் சூட்டல் பொருத்தம் தானே?

ஜம்போவின் சீஸன் # 1-ல் அறிமுகமாகிய “சின்ன இரவுக்கழுகார்” ஒரு போக்கிரி அவதாரில் கலக்கிய இளம் பிராயத்து நாட்களைக் கதாசிரியர் மௌரோ போசெல்லியின் கைவண்ணத்தில் (காற்றுக்கு ஏது வேலி ?)ரசித்திருந்தோம் ! அந்த இளம் டெக்ஸ் கதையோட்டத்துக்கு இத்தாலியிலும், இன்னபிற டெக்ஸ் மார்க்கெட்களிலும் வரவேற்பு செமையாக இருந்திட, சற்றே ஆழமாய், அழுத்தமாய் டெக்ஸின் ப்ளாஷ்பேக்கினுள் பார்வைகளைப் பாய்ச்ச படைப்பாளிகள் கச்சைகட்டத் துவங்கினர். அதன் இன்னொரு பரிமாணம் தான் இம்மாத ஜம்போவில் நாம் ரசித்திடவுள்ள “சிங்கத்தின் சிறுவயதில்” 256 பக்க black & white ஆல்பம் ! டெக்ஸின் பெற்றோர்கள் யார் ? அவரது சகோதரர் ? பால்ய சகாக்கள் ? இளவயது அனுபவங்கள் ? என்று தீட்சண்யமாய் நமக்குச் சித்தரித்திட மௌரோ போசெல்லி மீண்டும் முயற்சித்திருக்கிறார் இந்த crackerjack இதழில் ! இத்தாலிய மொழியில் இந்த இதழ் ஈட்டியுள்ள landmark வெற்றி – டெக்ஸின் சகாப்தத்தில் இன்னுமொரு வைரக்கல் ! 

இளையவரின் பாணிக்கும் வாசகர்களிடையே கிட்டிய இந்த தடாலடி வெற்றியானது, புத்தம் புதுசாய் ஒரு டெக்ஸ் மாத இதழையே உருவாக்கும் அளவிற்கு போனெல்லியைத் தயார்ப்படுத்தியுள்ளது என்றால் அதன் impact என்னவென்று புரிந்து கொள்ள முடியும் தானே ? “TEX” என்ற லேபிலில் ஏற்கனவே கதைகள் மாதம்தோறும் களமிறங்கி வரும் நிலையில், போன நவம்பர் முதலாய் "TEX WILLER" என்ற லேபிலில் “போக்கிரி டெக்ஸ்” தனித்தடத்தில் தடதடக்கத் துவங்கியுள்ளார் ! அதே நண்பர்கள் (ரேஞ்சர்கள்) அணி ; அதே செவ்விந்தியக் கிளர்ச்சி ; ஆயுதக் கடத்தல் ; ஊழல்கார உள்ளூர் ஷெரீப் ; மோசடிக்காரப் பண்ணையார் ; என்ற ரீதியில் கதைகளைச் சொல்லி வருவது என்றைக்கேனும் அயர்வுக்கு வித்திட்டு விடக் கூடும் என்று நினைத்தார்களோ என்னவோ – முற்றிலும் புதுசானதொரு திசையில் “சின்னவரின்” வண்டியைச் செலுத்தி வருகிறார்கள் ! And எனக்குத் தெரிந்த வரைக்கும் இந்தப் புது TEX WILLER லேபிலும் சக்கை போடு போட்டு வருகிறது ! ஓவிய பாணிகளில் compromise ஏதுமின்றி, மிக அட்டகாசமான தரத்திலான ராபர்டோ டி ஆஞ்சலிஸின் உயிரோட்டமான சித்திரங்களும் வலு சேர்க்க – இந்த 64 பக்க ஆல்பங்கள் இத்தாலியின் புதிய தலைமுறையையும் சுண்டி இழுத்து வருகிறதாம் ! பெருமூச்சே முஞ்சுகிறது இந்தப் புது ‘புல்லெட் டிரெயின்‘ தடதடப்பதைப் பார்க்கும் போது ! ஏற்கனவே உள்ள தொடரில் அவர்கள் 700+ கதைகளோடு பிய்த்துப் பிடுங்கிக் கொண்டு, பாய்ந்து சென்று கொண்டிருக்க, இப்போது நம்மை உசுப்பேற்ற இந்தப் புது முயற்சியும் இணைந்து கொண்டு விட்டது ! 

நாம் சமீபமாய்ப் பார்த்து வரும் அந்த 32 பக்க மினி கலர் TEX சாகஸங்கள் இந்தப் புது (போக்கிரி) டெக்ஸ் முயற்சிகளுக்கொரு வெள்ளோட்டம் என்பது இப்போது புரிகிறது ! அதாகப்பட்டது, பெரியவர் செர்ஜியோ போனெல்லியின் துவக்க நாட்களில் டெக்ஸ் கதைகள் 75 பக்கங்களிலும் இருந்திடும் ; 100 பக்கங்களையும் ஆக்கிரமித்திடும் ; 160+ ; 190+ ; 240+ என்றும் வெவ்வேறு விதமான நீளங்களில் பயணிப்பது வாடிக்கை ! நம்மைப் போல முழுமையான கதைகளையே ஓரிதழாய் வெளியிடும் அவசியமெலாம் அவர்களது மார்க்கெட்டில் நஹி ! So ஒரு 190 பக்க சாகஸமானது, இதழ் நம்பர் 36-ன் இறுதியில் கொஞ்சமாய் ஆரம்பித்து  ; 37-ல் ஓடி ; 38-ல் முடிவதெல்லாம் சர்வ சாதாரணம்! (எனது கேச அழகு(!!)க்கு இந்த நூல் பிடித்து கதையின் தலையையும்; வாலையும் இனம் காணும் முயற்சிகளுக்கும் பெரும் பங்குண்டு ! போனெல்லியில் ஆண்டுதோறும் கதைத் தேர்வுகளைத் தெரிவிக்கும் வேளையிலேயே அவை எந்த இதழ் to எந்த இதழ் ஓடுகின்றன என்பதைத் தெளிவாகத் தெரிவித்திட வேண்டும் ; 'டெக்ஸ்' எனும் சமுத்திரத்தில் சவாரி செய்யும் அவர்களது records பிரிவு இல்லையேல் தடுமாறிப் போவார்கள்! ) So டெக்ஸ் சிங்கள் ஆல்பங்கள் (110 பக்கங்கள்) ; ஒன்றரை ஆல்பங்கள் (160+ பக்கங்கள்) ; டபுள் ஆல்பங்கள் என்றெல்லாம் கலந்து கட்டி அடித்து வந்தார்கள் துவகத்தில் ! சிறுகச் சிறுக கதாசிரியர்கள் மாற்றம் கண்ட வேளைகளில் கதைகளின் நீளங்கள் சீராகத் துவங்கின! And மௌரோ போசெல்லி அவர்கள் TEX எடிட்டராய் பொறுப்பேற்கத் துவங்கிய பிற்பாடு ஸ்பஷ்டமாய் "220 பக்கங்கள் – டபுள் ஆல்பம்" என்பதே நார்மலான format என்றாகியது ! MAXI டெக்ஸ் என்ற பெயரில் வெளியாகும் ஸ்பெஷல்கள் மட்டும் 330 பக்கங்கள் என்று அமைத்துக் கொண்டார்கள் ! So ஒரு டெக்ஸ் சாகஸத்தை விவரிப்பதென்றால் அதற்குக் குறைந்தபட்சம் 220 பக்கங்கள் அவசியமென்றதொரு அரூப விதி நடைமுறையிலிருக்க, பற்பல கதாசிரியர்களும் அதற்கேற்பவே திட்டமிடத் துவங்கினர் ! அவ்விதமிருக்க, வெகு சமீபமாய் அறிமுகமான COLOR TEX ஸ்பெஷல் ஆல்பங்களில் – 4 அல்லது 5 சிறுகதைகளின் வண்ணத் தொகுப்புகளை இணைத்து வெளியிட்டு ஆச்சர்யமூட்டும் ஹிட்டடித்தனர் ! புதுசாய் ஏ-க-ப்-ப-ட்-ட கதாசிரியர்களை இனம் கண்டு ; புத்தம் புது ஓவியர்களிடம் பொறுப்புத் தந்து இந்த மினி சமோசாக்களை, செம சுவையாய் உருவாக்கிடுவதில் வெற்றி கண்டார் போசெல்லி ! நம்மைப் போலவே இத்தாலியிலும் – “அட… நம்மவரை இது போன்ற சின்னஞ்சிறு களத்திலுமே ரசிக்க முடியுமா? திறமையான கதாசிரியரின் கைவண்ணம் சாத்தியமாயின் கடுகுமே சுவையூட்ட முடியும் போலும் !” என்று வியக்கத் தொடங்கினர் ! பின்நாட்களில் பெருசு பெருசாய், நீள நீளமான சாகஸங்களை வாசிக்கும் பொறுமை வாசகர்களிடையே குன்றிப் போனாலோ ; புதுசாய் ஒரு crisp பாணியைக் கையிலெடுக்க போனெல்லி பதிப்பகம் நினைத்தாலோ – அதற்கான ஏற்பாடுகள் முன்கூட்டியே தயாராக இருந்திட வேண்டுமென்ற தீர்க்கதரிசனம் மௌரோ போசெல்லிக்கு இருந்ததாலேயே இந்தச் சிறுகதை track-க்குத் தனது ஆசீர்வாதங்களை வழங்கியிருக்கிறார் என்பது இப்போது புரிகிறது ! அந்த மினி கலர் சாகசங்களின் வெற்றி அனுபவம் கைகொடுக்க, மௌரோ போசெல்லியே நேரடியாய்க் களமிறங்கி “போக்கிரி டெக்ஸ்” வரிசையின் (இதுவரையிலான) எல்லாக் கதைகளையும் எழுதியுள்ளார் ! இங்கிருந்தபடிக்கே, இத்தாலி இருக்கக்கூடிய மேற்கு திசையை நோக்கிப் பெருசாய் ஒரு வணக்கத்தைப் போடத் தோன்றுகிறது ! போசெல்லி… நீர் தேவுடு !!

Back to the present – இதோ “சிங்கத்தின் சிறுவயதில்” அட்டைப்பட முதல் பார்வை ! 

Of course – ஒரிஜினல் டிசைனே ; வர்ணங்களில் மட்டுமே மாற்றங்களோடு ! And ஜம்போவின் தயாரிப்பில் எப்போதுமே ஒரு notch உசத்தி தென்பட வேண்டுமென்ற அவாவில் – இதழின் பெயரினை மினுமினுக்கச் செய்துள்ளோம் ! புக்கைக் கையில் ஏந்திடும் போது அதனை ரசித்திடலாம் ! And 256 பக்க ஆல்பம் எனும் போது அட்டை to அட்டை கதையிருக்கும் ! ஜம்போவின் இன்னொரு template ஆன – “No நொச-நொச; only கதை!” என்ற ஃபார்முலா இம்முறையும் அமலிலிருக்கும் ! இதன் எடிட்டிங்கை திங்களுக்குள் முடித்து, அச்சுக்குக் கொண்டு செல்லும் பரபரப்பே இந்த நொடியில் எனக்கு !

அடுத்த “சின்னவர்” – நாம் ஏற்கனவே ரசித்துள்ள ஒரு black & white சாகஸத்தை இம்முறை தரமான, வண்ணத்திலான பெரிய சைஸில் நமக்கு நடத்திக் காட்ட முனைந்திடும் இளம் டைகர் ! “இளமையில் கொல்” நமது கௌ-பாய் ஸ்பெஷல் இதழில் வெளியான சாகஸம் என்று ஞாபகம் ! தட்டை மூக்காரின் துவக்க நாட்கள் ; அவர் பட்டாளத்தில் சேர்ந்தது எவ்விதம் ? பிறப்பால் தெற்கத்தியராக இருந்தாலும் வடக்கின் படையில் அவர் நுழைந்தது எவ்விதம் ? சும்மா பீப்பீ ஊதும் பொறுப்பிலிருந்த மனுஷன் அடுத்தடுத்து புரோஷன்களைக் கண்டது எவ்விதம் ? என்றெல்லாம் சொல்ல முனையும் இந்தத் துவக்கப் புள்ளியைக் கலரில் – (சற்றே புராதனமான) அடர் வண்ணங்களில் பார்த்திடவிருக்கிறோம் ! டைகரின் அடையாளமான அந்த அசாத்திய மதியூகம் அவரது ஆயுட்காலத் துணை என்பதை இந்த ஆல்பம் நமக்குச் சொல்லும்! புதுசாய் படிப்போர்க்கு மட்டுமன்றி, தளபதியாரின் ரசிகக் கண்மணிகளுக்கும் இந்த இதழ் நிச்சயமாய் லயிக்குமென்று நினைக்கிறேன்! இதோ இந்த classic மறுபதிப்பின் ஒரிஜினல் அட்டைப்படம் – துளியும் மாற்றமின்றி ! திரு.மோபியஸ் போன்றதொரு ஜாம்பவானின் கைவண்ணம் இந்த அட்டைப்படம் எனும் போது, அதனை நோண்டுவது குசும்பாகிப் போகும் என்பதால், ‘சிவனே‘ என்று ஒரிஜினலை அப்படியே தந்துள்ளோம் ! 

‘சின்னத் தல‘ ஆல்பத்தின் நீளமோ – நவீனமோ ‘சின்னத் தளபதியின்‘ ஆல்பத்தில் நஹி என்றாலும் தற்செயலாய் அமைந்து விட்டுள்ள இந்த ‘நேருக்கு-நேர்‘ நமக்கெலாம் நிச்சயம் சுவாரஸ்யத்தை ஒரு மிடறு ஜாஸ்தியாக்கிடும் என்று நினைக்கிறேன் ! And மக்களே – இது தற்செயலான pairing தான்! பிலீவ் மீ!

Moving on – இம்மாத இதழ்களுள் கலக்கக் காத்திருக்கும் கார்ட்டூன் பார்ட்டிகள் இதோ! அத்தி பூத்தாற் போலவே இப்போதெலாம் கார்ட்டூன் இதழ்கள் தலைகாட்டுகின்றன எனும் போது – உட்சிட்டியின் இந்த ரகளைப் போலீஸாரின் ரவுசுகளை நான் செமத்தியாக ரசித்தேன்! “ஒரு ஷெரீப்பின் சாஸனம்!” நமது ரவுண்ட் பன் மண்டை டாக்புல்லின் ஒரு டெரர் முகத்தைக் கட்டவிழ்த்துக் காட்டுமொரு கெக்கே-பிக்கே மேளா என்பேன் ! நகருக்குள் அராஜகம் தலைவிரித்தாட – அதை அடக்க தனது புஜபல பராக்கிரமத்தை சார்வாள் கடைவிரிக்க, 44 பக்கங்களுக்குக் கூத்து தொடர்கிறது ! ‘கும்-கும்‘ என்று குத்தும் ஆக்ஷன் சாகஸங்களுக்கு இணையாக இந்த கார்ட்டூன் அலப்பரைகளையும் நீங்கள் ரசித்திட மட்டும் ஓ.கே. சொல்லி விட்டால், ஆகா… ஆகாகா… மாதா மாதம் எனது பணிகள் இன்னமுமே ரம்யமாகிப் போய்விடுமே !! நொடிக்கு நூறு தோட்டாக்களை உமிழும் கதைளிலெலாம் லாஜிக் பார்க்காது – இந்தச் சிரிப்புப் பார்ட்டிகளைத் தரத் தணிக்கைகளுக்கு உட்படுத்துகிறீர்களே… இது நியாயமாங்க சாரே ?

இதோ அட்டைப்பட முதல் பார்வை – again ஒரிஜினல் டிசைனோடே! வர்ணச் சேர்க்கைகள் மட்டும் நமது DTP அணியின் கோகிலாவின் கைவண்ணம் ! And எழுத்துருக்கள் ஓவியர் சிகாமணி! தொடர்வது உட்பக்கத்தின் preview-ம்! Enjoy!

Last but not the least – இதோ இம்மாத சந்தா B-ன் ஆல்பத்தின் முதல் பார்வையுமே ! மர்ம மனிதன் மார்ட்டினின் அட்டைப்படங்களை நாமாய் வரைய முற்படும் போதெலாம், கிராமத்தில் கோழி திருடிவிட்டு மாட்டிக் கொள்பவர்களின் லுக்கே சாத்தியப்பட்டு வந்துள்ளது! So வம்பே வேணாம்டா சாமி ! என்ற நினைப்பில் ஒரிஜினல் அட்டைப்படத்தை அப்படியே பயன்படுத்தியிருக்கிறோம் ! “நியூட்டனின் புது உலகம்” அட்டைப்படத்தில் மாற்றமின்றி உட்பக்கச் சித்திரங்களிலும் அட்டகாசமாய் மிளிரவுள்ள இதழ் ! படு ஸ்டைலிஷான சித்திரங்களோடு மார்ட்டின், கதைநெடுக வலம் வருகிறார் !

So சின்ன ஜாம்பவான்கள் இருவர் + ஒரு சிரிப்பு டீம் + ஒரு மர்ம ஜாம்பவான் என்றதொரு கூட்டணி உங்களைச் சந்திக்கக் காத்துள்ளது - எதிர்வரும் மாதத்தில் ! ஏதோ பார்த்துப், பதவிசாய்க், கரைசேர்த்து விடுங்கள் சகோக்களே…! எலெக்ஷன்களில் சில பல கூட்டணிகள் வாங்கியுள்ள தர்ம அடி ஏற்படுத்திடும் கிலியே இந்தக் கோரிக்கையின் பின்னணி ! நாங்க சாத்வீகக் கூட்டணி சாமியோவ் !

மீண்டும் சந்திப்போம் all ! Have a fun weekend ! Bye for now !!