போட்டோ...13 ...லார்கோவுக்குப் பேனா....!

 நண்பர்களே,

வணக்கம். 1980-களின் துவக்கமோ - என்னமோ புரட்சித் தலைவர் சிவகாசி வந்திருந்தார் ! அரசியலென்றால் வீசம்படி எவ்வளவென்று தெரியாத நாட்களவை ! ஏதோவொரு பொதுத் தேர்தலில் அவரது கட்சி ஒட்டுமொத்தமாய்த் தோல்வியைத் தழுவியிருக்க, வெற்றியைத் தந்திருந்த இரண்டே தொகுதிகளுள் சிவகாசியும் ஒன்றாகயிருக்க, நன்றி சொல்ல இங்கு வருகை தந்திருக்கிறார் ! அச்சக அமைப்பின் சங்கத்தில் அவருக்கு வரவேற்பு திட்டமிடப்பட்டிருந்தது & அந்நாட்களில் சீனியர் எடிட்டர் தான் சங்கத்தின் (மெய்யாலுமே செயல்பட்ட) செயலர் என்பதால் என்னையும் அங்கு கூட்டிப் போயிருந்தார் ! திபு திபுவென்று கூட்டம் ; அதனுள் திடீர் பரபரப்பு ; சுள்ளானாக இருந்த எனக்கு எதுவும் அவ்வளவாய்த் தெரியவில்லை & வருகை தந்திருப்பது யாரெல்லாம் என்பது  கிஞ்சித்தும் புரியவில்லை ! ஆனால் அரை நிமிடம் தான், கண் கூசும் கலரில், அசாத்தியமான personality சகிதம் ஒரு உருவம் உற்சாகமாய் மேடையேறுவதைப் பார்க்க முடிந்த கணத்தில், சுற்று வட்டாரத்தில் இருந்த பாக்கிப் பேரெல்லாம் காணாதே போய் விட்டது போலிருந்தது ! மேடையில் நடுநாயகமாக புன்சிரிப்புடன் அவர் கரம் கூப்பி நின்ற போது அரங்கில் இருந்த அத்தனை கண்களும் அவர் மீதே ! பின்னாட்களில் அரசியல், ஆட்டுக்குட்டி இத்யாதிகளெல்லாம் மண்டைக்குள் ஏறத்துவங்கிய பின்னே - 'அவர் இதைச் செய்தார் ; இவர் அதைச் செய்யலை !' என்று ஏதேதோ கேட்கவும், வாசிக்கவும் துவங்கிய பிற்பாடு எண்ணங்கள், அபிப்பிராயங்கள் என ஏதேதோ உருவாகிடத் துவங்கின ! ஆனால் அன்றைக்கு முதன்முறையாய்ப் பார்த்த அந்த ஆளுமை ; ஆயிரம் பேரின் மையத்திலும் துளி முயற்சியுமின்றி கவனங்களைத் தனதாக்கிடும் வல்லமை மண்டைக்குள் நிலைத்து நிற்கின்றது ! 

அது சரி , அம்பி இந்த வேளையிலே இதை எதுக்கு சொல்லுது ? என்ற கேள்வியா ? Very simple folks ....!

ஒரு லேட்டஸ்ட் பாணி க்ரைம் த்ரில்லர் முழு வண்ணத்தில் ; ஒரு popular கார்ட்டூன் அணி - எக்ஸ்டரா நீள காமெடி மேளாவுடன் ; ஒரு அசாத்திய சித்திர விருந்துடனான மிரட்டும் கி.நா.படைப்பு & ஒரு மறுபதிப்பு !! இவையே இம்மாதத்து மெனு ! நார்மலாய்ப் பார்த்தால் அந்த மறுபதிப்பு தான் ஒளிவட்டத்தின் கடைசிக் கற்றையைச் சொந்தமாக்கியிருக்க வேண்டும் ! 

ஆனால்...ஆனால்...இங்கு நடப்பது என்னவோ ? 

'அல்லாரும் அப்டி ஓரமாப் போயி வெளயாடுங்க கண்ணுங்களா !' என்றபடிக்கு நடுநாயகமாக டாலடிக்கிறார் மறுபதிப்பில் சுழன்றடிக்கும் நமது 'தல' டெக்ஸ் !! சுற்றிலும் எத்தனை பேர் இருப்பினும், அந்த மஞ்சள் சட்டை சதுர தாடைக்காரர் அத்தனை போரையும் தனது ஆளுமையால் ஊதித் தள்ளுவதைப் பார்க்கும் போது, 1980-களின் அந்த நாள் தான்  நினைவுக்கு வந்தது ! 

"கழுகு வேட்டை" !! சந்தாவின் முதல் புள்ளியாய் இந்த இதழே இருந்திட வேண்டுமென்பதை நண்பர் மகியின் தொகை கிடைக்கப் பெற்ற தினமே தீர்மானித்திருந்ததால், அட்டைப்பட டிசைனிங்குக்கு ; நகாசு வேலைகளுக்கு ; எடிட்டிங்குக்கென கணிசமான அவகாசம் கிட்டியிருந்தது ! எப்போதுமே தயாரிப்பினில் இயன்ற அத்தனையையும் செய்யத் தோன்றுவதே நமது இயல்பு என்றாலும், இம்முறை இதுவொரு மைல்கல் இதழாக இருந்திடவுள்ள சூழலில், leave no stones unturned என்று தீர்மானித்தேன் ! And இங்கே போனெல்லியின் சகாயமும் கொஞ்சம் உண்டு ! அவர்களது TEX கருப்பு வெள்ளைப் பதிப்புகளே பின்னாட்களில் இத்தாலிய செய்தித்தாளுடனான ஒரு மெகா கூட்டணியினில் கலரூட்டப்பட்டு மிரட்டலாய் வலம் வரத்துவங்கின என்பதை அனைவரும் அறிவோம் ! So நமக்கு அந்த வண்ணக்கதைகளின் உரிமைகளை அவர்கள் வழங்கும் போது, ஒரிஜினலாய் b&w-ல் வெளியான போது போடப்பட்ட அட்டைப்பட டிசைன்களையே வழங்கிடுவர்  ! அந்த செய்தித்தாளுடன் கரம்கோர்த்த முயற்சியினால் உருவாக்கப்பட்ட பிரத்யேக அட்டைப்படங்களை இதுவரையிலும் அவர்கள் நமக்குத் தந்ததில்லை ! ஆனால் எனக்கோ அந்த exclusive கவர்களைப் பார்க்கும் போதெல்லாம் ஜொள்ளுப்பிரவாகமே எடுக்கும் ! இம்முறை கேட்டுத் தான் பார்ப்போமே என்று மெதுவாய் ஒரு கோரிக்கையை முன்வைக்க, மறுப்பின்றி அனுப்பித் தந்தார்கள் !! And அதுவே இப்போது நமது கழுகு வேட்டையின் முகப்பிற்குப் புது மெருகூட்டிடுகிறது ! Of course அவர்களது டிசைனை நாம் கோகிலாவைக் கொண்டு நமக்கேற்றார் போல மாற்றியமைத்ததும், பொன்னனைக் கொண்டு அந்த நகாசு வேலைகளைச் செய்திட்டதும் தொடர்ந்தன தான் ; ஆனால் ஓவியர் Claudio Villa-வின் அந்த மிரட்டும் டிசைனே இங்கு show stopper !! அப்புறம் பழைய "எல் ம்யூர்டோ" - எடிட்டிங்கின் போது சரியான உச்சரிப்பாய் மாற்றம் கண்டது ; அதற்கோசரம் சில வாடிய முகங்கள் நம் மத்தியில் இருக்குமே ; அவர்கட்கு எவ்விதம் சமாதானம் சொல்வது ? என்ற ரோசனை ஓடியது - என பணிகள் நிறைவுற்றன ! 

தொடர்ந்தது தான் பெரும் சவால் : போட்டோக்களை சேகரிப்பது ; சந்தாதாரர்கள் பெயர்கள் ஒன்றாகயிருக்க, அவர்கள் அனுப்பி வைத்த போட்டோக்களினடியில் போடக் கோரிய பெயர்கள் வேறாக இருக்க - அந்தப் பஞ்சாயத்துக்களை சிக்கலின்றிக் கையாள நம்மவர்களுக்கு அவகாசம் தந்ததே ஓரளவுக்கு சேதாரங்களை (இதுவரையிலுமாவது) மட்டுப்படுத்தியுள்ளது ! 

And yes - "கழுகு வேட்டை" புக்கினில் தமது போட்டோக்களை பார்த்திட விரும்பும், சந்தாவில் இல்லாத நண்பர்களுக்கும் வாய்ப்பு இதோ துவங்குகிறது   ! நீங்கள் செய்ய வேண்டியதெல்லாம் இது தான் :  ஞாயிறு (ஏப்ரல் 4 ) முதல் ஏப்ரல் 11 வரையிலும் உங்கள் போட்டோக்கள் + தேவையான புக்ஸிற்கான பணத்தினை அனுப்பினால், தொடரும் மறு வாரத்தினில்  உங்கள் போட்டோக்களுடனான  புக்ஸை 'ஏக் தம்மில்' முடித்து அனுப்பிடலாம் ! Please note : இது ஒருசேரச் செய்திட மட்டுமே சாத்தியப்படும் ; "நேத்திக்கே அனுப்பிட்டேன், இன்னுமா ரெடியாகலை ?" என கண்சிவந்து இங்கே எதுவும் ஆகிடாது ! So பொறுமை அத்தியாவசியம் please !  And ஏப்ரல் 11-க்குப் பின்பாய் இதற்கான தேதி நீட்டிக்கப்பட மாட்டாது என்பதையும் சொல்லி விடுகிறேன் folks !

அப்படியே அடுத்த deadline சார்ந்த சமாச்சாரமுமே ! "இரத்தப் படலம்" வண்ணத்தொகுப்பின் முன்பதிவினை சந்தா சேகரிப்புகளின் பொருட்டு தாற்காலிகமாய்ப் பரணிற்கு ஏற்றியிருந்தது நினைவிருக்கலாம் ! And அதனை மீண்டும் தரைக்குக் கொணரும் தருணம் புலர்ந்து விட்டது ! So மே 31 வரையிலும் இதன் முன்பதிவு அரங்கேறிடும் ! So இறுதி முறையாய் இ.ப.தொகுப்பினை சேகரிக்க எண்ணும் நண்பர்கள் இந்த சந்தர்ப்பத்தை பயன்படுத்திடலாம் ! ஜூன் முதல் தேதிக்கு அச்சுக்கு கிளம்பி விடுவோம் என்பதால் அதன் பின்னே நம்மிடம் வாங்கிட வழிகள் இராது ! So பந்து மறுக்கா உங்கள் பக்கமே folks ! பாதிக்கிணற்றைத் தாண்டியுள்ள நிலையில், மீதத்தையும் தாண்டி விட்டோமெனில், அடுத்த பணிகள் பக்கமாய்ப் பார்வைகளை ஓட விடலாம் ! 

"ஒற்றை நொடி .ஒன்பது தோட்டா"..... "கென்யா".... and  இன்னும் சில தயாராகி, பேந்தப் பேந்த நிற்கின்றன , என்றைக்கு, எப்போது ஸ்லாட் கிடைக்குமோ ? என்ற பரிதவிப்பினில் ! So முன்னே நிற்கும் இந்த "13" ரயில்வண்டியானது ஊர் சென்று சேர்ந்து விட்டால் - பின்னே லைனில் நிற்கும் ரயில்களுக்கு வழி பிறக்கக்கூடும் ! இதில் கொடுமை என்னவெனில், "ஓ.நொ.ஓ.தோ" - "இ-ப'வுக்கு tough கொடுக்கவல்ல தெறிக்கும் த்ரில்லர் ! அதனில் 60% பணிகளை முடித்து வைத்துக் கொண்டு, ஓராண்டாய் அடைகாத்து வருகின்றேன் ! And "கென்யா" கிட்டத்தட்ட 90% complete !  Of course நடப்பாண்டில் ஈரோடு புத்தக விழா நிஜமாகிடும் பட்சத்தில் அதுவொரு வாகான வாய்ப்பே ; ஆனால் நித்தமும் ஒலித்து வரும் கொரோனா அபாயச் சங்கானது நமக்கெல்லாம் ஆண்டின் மத்தியினில் என்ன சேதியினை சொல்லக் காத்துள்ளதோ ? என்பது புதிராய் உள்ள நிலையில் திட்டமிடவே டரியல் எடுக்கிறது !! So இப்போதைக்கு "13" முழுமை கண்டால் அடுத்த project சார்ந்து திட்டமிட இயலும் !

Looking ahead - புதுச் சந்தாவின் முதற்புள்ளியினில் நாம் நின்று கொண்டிருந்தாலுமே, எனது பார்வையானதோ - 2022 மீது ஓடிக்கொண்டிருக்கிறது ! நிறைய காரணங்களின் பொருட்டு வழக்கத்தை விடவும் சடுதியாகவே அடுத்தாண்டின் திட்டமிடலிலும் முனைப்பு காட்டிட வேண்டியுள்ளதால் இந்த early bird அவதார் ! And அந்தத் திட்டமிடல்களின் ஒரு அங்கமாய் ஒரு கேள்வியும் ; அதன் நீட்சியாய் ஒரு கோரிக்கையும் : 

லார்கோ வின்ச் தொடரினில் கதாசிரியர் வான் ஹாம் VRS வாங்கிக் கொண்டதும், புதியதொரு கதாசிரியரின் துணையோடு ஓவியர் Francois Boucq தொடர்வது பற்றியும்  முன்னமே பேசியிருக்கிறோம் ! And அவர்களது முதல் கூட்டுப்படைப்பு கொஞ்ச மாதங்களுக்கு முன்னே 2 பாக ஆல்பமாய் ரெடி ! ஆனால் சிக்கல் என்னவெனில், கதையோட்டம் ஏகமாய் big business / பங்குச் சந்தை நுணுக்கம் சார்ந்த தொனியில் பயணிப்பதால், ரொம்பவே ஜெர்க் அடித்தது எனக்கு ! அதனை மொழிபெயர்ப்பது முழிபிதுங்கும் பணியாய் இருக்கும் என்ற அச்சமும் எனது ஜெர்க்குக்கு ஒரு காரணம் ! எனது கேள்வி இதுவே : லார்கோ தொடரினில் இதை skip செய்திடலாமா - அல்லது இதுவும் வேணுமா ? தாண்டிச் செல்லலாம் எனில், no probs ! "இல்லே..இதுவும் வேணுமே !!" என்பதே பெரும்பான்மையின் கோரிக்கையெனில் - இதோ எனது counter கோரிக்கை ! இதனை மொழிபெயர்க்க தம்மோ, பொறுமையோ, அவகாசமோ நிச்சயமாய் நம் அணிக்கு லேது ! So பேனா பிடிக்க திறனும், தெளிவும் உள்ளதென்ற நம்பிக்கை கொண்டோர் can give it a try ! இப்போதே இந்த முயற்சிக்குத் துவக்கம் தந்தால் தான் 2022-ன் அட்டவணைக்குள் இதனை நுழைக்க இயலுமா ? இயலாதா ? என்பதற்கான விடை கிட்டும் என்பதால் இப்போதே Kaun Banega Translator ? ஆட்டத்தைத் துவக்கி விடலாம் ! 

இங்கே சின்னதாயொரு catch உள்ளது guys : வழக்கமாய் நண்பர்கள் வசம் ஒப்படைக்கும் பணிகளில் நான் முழுமையாய் உட்புகுந்து அவசியமென எனக்குத் தோன்றிடும் மாற்றங்களை கணிசமாகவே, வெகு கணிசமாகவே செய்வதுண்டு ! நண்பர்களின் outputs சற்றே raw ஆக இருப்பினுமே, அவற்றைச் செப்பனிட்டு வந்தேன் ! ஆனால், இதுவோ பல்லெல்லாம் ஆட்டம் காணச் செய்யும் பணியெனும் போது - நான் மறுக்கா உள்ளே புகும் வாய்ப்புகள் பூஜ்யம் ! So பேனா பிடிப்போரின் script ஓ.கே. எனில் ரைட்டு - லார்கோவை அட்டவணைக்குள் நுழைத்திடலாம் ! ஊஹூம்...scripts பட்டி டிங்கரிங்களின்றித் தேறாதென்று இருப்பின், அப்படியே பரண் பக்கமாய்த் தான் அவற்றைச் சாத்தி வைக்க நேரிடும் ! So மணந்தால் மஹாதேவி ; சொதப்பினால் பரணிலுள்ள கறுப்புக் கிழவி - என்பதே ஆட்ட விதிகள் ! முயற்சிக்க முனைவோர் இங்கோ, மின்னஞ்சலிலோ கைதூக்கிடலாம் ! 

ரைட்டு...ஏப்ரல் இதழ்களின் அலசல்களுக்குள் பிஸியாகிட முயற்சியுங்களேன் folks என்றபடிக்கே நான் கிளம்புகிறேன் - "நெஞ்சே எழு" டெக்ஸுடனான பயணத்திற்கு ! இன்னமும் ஒரு 25% சந்தா நண்பர்கள் சந்தா டிக்கெட் போடாது இருப்பதை நினைவூட்டிவிட்டு, கிளம்பினால் தேவலாம் என்று பட்டதால் - இன்னொரு நினைவூட்டல் all !

Bye all...see you around ! Have a cool weekend !

P.S : நண்பர்களின் அரவணைப்புகள் பற்றியும், இந்தப் பேரிடர் நாட்களில் அவரவருக்கு சாத்தியப்பட்டு வரும் ஒத்தாசைகளை செய்திடுவது பற்றியும் இம்மாத ஹாட்லைனில் எழுதியிருந்தேன் ! அந்த மசி உலர்ந்திருக்கும் முன்பாய் மின்னஞ்சலொன்று வந்திருந்தது - கணிசமான பணப் பரிமாற்றத் தகவலுடன் ! ரொம்பச் சீக்கிரமே இந்தப் பேரிடர் நாட்களின் தன்மையினைப் புரிந்து கொண்ட நமது பொருளாளர்ஜி சந்தாவினில் இணைந்திட இயலா நண்பர்களின் பொருட்டு மொத்தமாய் அனுப்பியுள்ள தொகைக்கு, நாம் அறுபதாயிரம் நன்றிகளைச் சொல்லிட வேண்டும் ! அதிலும், இல்லத்தில் அதிமுக்கிய நிகழ்வு காத்திருக்கும் தருவாயிலும், "என் வாக்கினை நான் காத்திடத் தவறிடல் தப்பாகிடும் சார் !" என்ற வரிகளுடன் !! 

லட்சம் ; அறுபது ; என்று நம்பர்களுக்குள் அடைப்பதல்ல இங்கு நீங்கள் ஒவ்வொருவரும் காட்டி வரும் அன்புகளானது ! And பணமே அன்புகளின் அளவுகோல்களாகிடவும் செய்யாது ! இங்கே ஒவ்வொரு சனியிரவும் காத்திருந்து ஆஜராகி "Me the first" என்று பதிவிடும் அந்த ஆர்வங்களுக்குப் பின்னுள்ள அன்புக்குமே கூட விலைமதிப்பேது ? Phew !!

நிறைய..நிறைய..நிறைய கடன்பட்டுக் கொண்டே போகிறேன் folks - உங்கள் அனைவரிடமும் ! இவற்றையெல்லாம் தீர்க்கும் வரையிலாவது பணியாற்ற உடம்பிலும், உள்ளத்திலும் வலுவிருக்கப் பெருந்தேவன் மனிடோவிடம் கோரிக்கையினைப் போட்டு வைக்கணும் !! And thanks a ton sir !!