இது டின்டினின் உலகம் !

 நண்பர்களே,

வணக்கம். சொல்லாமல் கொள்ளாமல் வாரயிறுதியினில் காணாமல் போனதற்கு காரணங்கள் இரண்டு ! இப்போதெல்லாம் எனக்கும் சரி, எனது சகோதரனுக்கும் சரி, பொழுதுகளில் கணிசம் செலவாவது ஹாஸ்பிடல்களில் அல்லது கோவில் குளங்களில் ! எதற்கு-எப்போது அவசியம் எழுமென்றே தெரியாத நிலை இந்த வாரயிறுதியிலும் ; so இங்கே அட்டெண்டன்ஸ் போட இயலா இக்கட்டு !! காரணம் #  இரண்டோ - நமது பணிகள் சார்ந்தது ; and அதுவே இந்த வாரநாளின் மினி பதிவின் சாரமுமே !!

டின்டின் ! இந்த ஜாம்பவானின் தமிழ் உரிமைகளை நாம் பெற்றிருப்பது பற்றியும், காத்திருக்கும் மாதங்களில் அவரது ஆல்பங்கள் வெளியாகிடும் என்றும் அறிவித்திருந்தது நினைவிருக்கும் ! ஒரு அறிவிப்பை பந்தாவாய் பண்ணுவது சுலபம் ; ஆனால் அதனை நடைமுறை காணச் செய்வது செம tough என்பதை ஏகப்பட்ட முறைகள் அனுபவத்தில் உணர்ந்துள்ளேன் தான் ! ஆனால் அவற்றுள் எதுவுமே இந்த "டின்டின் அனுபவத்துக்கு" கிட்டே கூட வர இயலாதென்பதை கடந்த சில வாரங்களில் புரிந்து வருகிறேன் ! "தமிழில் டின்டின்" என்பது ஒரு நெடுங்கனவு என்றும், அதனை நனவாக்கிப் பார்த்திட 2016 முதலே மொக்கை போட்டு வருவதைப் பற்றியுமே முந்தைய பதிவினில் எழுதியிருந்தேன் ! இதில் கொடுமை என்னவென்றால்,படத்துக்கு பைனான்ஸ் ; கதை என்றெல்லாம் எதுவுமே தயாராகி இருக்காத நிலையிலும், கழுத்தில் ஒரு ஸ்டில் கேமராவை தொங்கவிட்டுக் கொண்டு ஈரோயினி செலெக்ஷனுக்குள் பிஸியாகிடும் "காதலிக்க நேரமில்லை" நாகேஷ் போல, டின்டினுக்கான உரிமைகளை வாங்குவதற்கு முன்பாகவே கதைத் தேர்வு மட்டுமல்லாது, அதன் பூர்வாங்க மொழிபெயர்ப்புப் பணிகளையும் துவங்கியிருந்தேன் - 2016-ன் மத்தியப் பொழுதினில் ! "பிராங்க்பர்ட் போறோம் ; படைப்பாளிகளை சந்திக்கிறோம் ; ரைட்ஸ் வாங்குறோம் ; மொழிபெயர்ப்பெல்லாம் முன்கூட்டியே ரெடியாகிப்புட்டால் நல்லது தானே" என்ற 'தொலைநோக்குப் பார்வை' தான் அதன் பின்னணி ! ஆனால் பிராங்க்பர்ட்டும் புலர்ந்து ; சந்திப்பும் நிகழ்ந்து ; நமது மெய்யான உசரம் என்னவென்றும் புரிந்து ; டின்டின் எனும் ஜாம்பவானைத் எட்டிப் பிடிக்க நாம் கணிசமாய் காம்பிளான் குடித்து ஏகமாய் வளர்ந்திட வேண்டிய அவசியத்தினையும் உணர்ந்தபடியே ஊர் திரும்பிய பிற்பாடும் - அந்த டின்டின் மொழிபெயர்ப்பின் நோட்டை மட்டும் கடாசிடாது பத்திரமாகவே வைத்திருந்தேன் ! In fact - 7 வருடங்களுக்குப் பின்னேயும் அது எனது மேஜையின் ஓரத்தினில் உறங்கி வருகிறது ! 

Cut to the present : உருண்டு, புரண்டு உரிமைகளை வாங்கி விட்டு, முதல் ஆண்டினில் வெளியிடுவதற்கென நாம் தேர்வு செய்துள்ள கதைகள் 4 :

மாயப் பந்துகள் 7 (7 Crystal Balls)

&

கதிரவனின் கைதிகள் (Prisoners of the Sun)

திபெத்தில் டின்டின் (Tintin in Tibet)

எரிநட்சத்திரத்தைத் தேடி...! (The Shooting Star)

So டபுள் ஆல்ப சாகசமான "மாயப் பந்துகள் 7" + "கதிரவனின் கைதிகள்" கதையிலிருந்து பயணத்தினை துவக்கலாம் என்றே திட்டமிடவும் செய்திருந்தோம் ! பொதுவாய் அத்தனை சுலபமாய் வளையாத மேல், அவசரம் என்றால் மட்டும் டாப் கியரை போட சம்மதிப்பது கொஞ்ச காலமாகவே நடைமுறை ! So மெய்யான அவசரமெனில் ஒரு 44 பக்க பிராங்கோ-பெல்ஜிய ஆல்பத்தை இரண்டோ, மூன்றோ நாட்களில் போட்டுச் சாத்தி விட இயலுமென்ற நம்பிக்கை எனக்கு நிரம்பவே உண்டு ! அதுவும் இது டின்டின் ; ஒரு ஆயுசின் கனவு - எனும் போது "வேட்டியை மடிச்சு கட்டிக்கினு உள்ளே புகுறோம் ; அட்ச்சு ஒரு வாரத்திலே தூக்குறோம் !" என்ற தெனாவட்டே மிகுந்திருந்தது ! வீட்டில் என்னிடம் டின்டின் முழு கலெக்ஷனும் உண்டு & in fact ஜூனியர் எடிட்டர் அதனை வாரம் ஒரு தபா மனப்பாடம் செய்யாத குறையாய் மேய்ந்து தள்ளுவதால், கைக்குள்ளும், காலுக்குள்ளும் டின்டின் ஆல்பங்கள் கிடப்பதுண்டு ! So ஒரு சுபயோக சுப தினத்தினில் டபுள் ஆல்பத்தின் முதல் பாகத்தை எடுத்து வைத்துக் கொண்டு புரட்டினேன் ! ஏற்கனவே இதனிலிருந்து 4 பக்கங்களை 2016-ல் மொழிபெயர்த்து வைத்திருந்ததையுமே எடுத்துக் புரட்டினேன் ! முதல் நொடியிலேயே இரண்டு விஷயங்கள் புரிபட்டன : ஒவ்வொரு ஆல்பமும் 61 பக்கங்கள் கொண்டவை எனும் போது - நமது மாமூலான 44 பக்க பிரான்க்கோ-பெல்ஜிய அளவீடுகள் இங்கே செல்லுபடியாகாது - என்பது புரிதல் # 1. And புரிதல் # 2 - இங்கே பக்கமொன்றுக்கு குறைந்த பட்சமாய் 13 or 14 பிரேம்கள் இருக்கின்றன என்பதும், ஒவ்வொன்றிலும் இரண்டு பேர் குட்டியாய் டயலாக் பேசுவதாக வைத்துக் கொண்டாலும் பக்கத்துக்கு சுமார் 25 to 30 டயலாக்குகள் எழுத வேண்டியிருக்கும் என்பது !! கொஞ்சமாய் வியர்த்து விட்டது - என் முன்னே காத்திருக்கும் பணியின் பரிமாணத்தை முழுசாய்ப் புரிந்த போது ! And டபுள் ஆல்பம் என்றால், 122 பக்கங்கள் ; தோராயமாய் 2500 to 3000 வசனங்கள் !! ரைட்டு, இதையெல்லாம் உருண்டு, புரண்டு தாண்டி விடலாமென்றால் கூட - காத்திருந்த இன்னொரு அசுரத்தனமான சவால் கண்களை அ-க-ல-மா-ய் விரியச் செய்தன !  

And அது தான் படைப்பாளிகளின் மொழிபெயர்ப்பு approval குழு ! பொதுவாய் நமது மொழிபெயர்ப்பாளர்கள் அத்தனை பேருக்குமே என்னைக் கண்டால் டர்...கடுப்ஸ்...காண்டு...பீதி என்று அலையடிப்பதுண்டு ! ஒவ்வொரு கதையிலும் முதல் 10 பக்கங்களை எழுதி அனுப்பிடச் சொன்ன பிறகே, மேற்கொண்டு தொடர்ந்திட அனுமதிப்பேன் & அந்தப் பத்துப் பக்கங்களில் பத்தாயிரம் நொரநாட்டியம் சொல்வேன் ! அதிலும் சென்னையில் இருக்கும் ஒரு சகோதரிக்கெல்லாம் நான் வாட்சப்பில் பதில் டைப் செய்ய ஆரம்பித்து விட்டாலே குளிர் ஜுரம் வராத குறை தான் ! ஆனால்....ஆனால்...மொத வாட்டியாய் இந்த ஆந்தையனுக்குமே ஒரு litmus test காத்திருப்பது பல்ஸ் ரேட்டை கொஞ்சமாய் எகிறச் செய்தது ! டின்டின் ஒவ்வொரு உலக மொழியினில் வெளியாகிடும் போதிலும், அந்த முழுமையான மொழிபெயர்ப்பினை, அந்தந்த மொழியின் 5 திறன் வாய்ந்த வல்லுநர்கள் கொண்டதொரு குழுவின் ஒத்தாசைகளோடு பரிசீலித்து, மாற்றங்கள் / திருத்தங்கள் செய்திடப் பரிந்துரைப்பர் ! இது அவர்களின் உலகளாவிய பழக்கம் என்பது சிறுகச் சிறுகத் தெரிய வர, எனது மலைப்பு மீட்டர் எகிற ஆரம்பித்தது ! ரைட்டு, டின்டினின் உலகுக்குள் புகுந்து, அங்கே அன்னம் தண்ணீர் புழங்கிப் பழகிப் பார்த்துக் கொண்டு, அவர்களின் எதிர்பார்ப்புகளுக்கு நியாயம் செய்திடும் ஆற்றல்களை நாம் வளர்த்துக் கொள்ளும் வரைக்கும் அடக்கி வாசிப்பதே உத்தமம் என்று புரிந்தது ! So எடுத்தயெடுப்பிலேயே டபுள் ஆல்பத்துக்குள் தலை நுழைப்பதற்குப் பதிலாய், சிங்கிள் ஆல்பத்தினுள் புகுந்தால் பணியும் சற்றே சுலபம் ; அவர்களின் எதிர்பார்ப்புகள் சார்ந்த புரிதலும் கிட்டிடும் என்று பட்டது ! So எனது alltime favorite ஆன "திபெத்தில் டின்டின்" இதழினை தமிழாக்கம் செய்திட அமர்ந்தேன் - 1980-ல் டில்லியில் வாங்கி, இங்கே காலிகோ பைண்டிங் போட்டு வைத்த அதே இதழுடன் !! "This book belongs to M.S.Srikanth Muthuvijayan" என்று அதன் index பக்கத்தில் எழுதியிருந்தது, 43 ஆண்டுகளுக்குப் பின்னேயும் தெளிவாய் புன்னகைக்க, கொஞ்ச நேரம் பழைய நினைவுகளுக்குள் நீந்தியபடியே புக்கை வெறிக்கப் பார்த்துக் கொண்டே இருந்தேன் ! And 3 வாரங்களுக்கு முன்பானதொரு இரவில் துவங்கினேன் பணியினை ! 

மனதுக்கு நெருக்கமானதொரு நண்பர் குழாமோடு பயணிக்கும் உணர்வே மேலோங்க, பரபரவென உட்புகுந்தேன் ! சுத்தமான உரைநடை பாணியா ? பேச்சு வழக்கு பாணியா ? - இந்தத் தொடருக்கு எது சுகப்படும் என்ற கேள்வி முதலில் எழுந்தது ! டின்டினுக்கு இரண்டுமே செட் ஆகும் தான் ; ஆனால் கேப்டன் ஹேடாக்குக்கு தூய தமிழ் அந்நியப்பட்டுத் தெரியும் என்று மனசு சொல்லியது ! But இரண்டையுமே முயற்சித்துப் பார்ப்போமே, என்றபடிக்கே முதல் 5 பக்கங்களை, இரண்டு பாணிகளிலுமே எழுதிப் பார்த்தேன் ! எனது gut feel சரி தான் என்றே புரிந்தது ; கரடு முரடான கேப்டனுக்கு தூய தமிழில் வசனங்கள் சுத்தமாய் ஒட்டவே இல்லை ! ரைட்டு, பேச்சு நடை, but without crude language என்று தீர்மானித்துக் கொண்டு பேனாவை பறக்க விட்டேன் ! 

ஒரு நூறு தடவைகள் படித்த அதே கதை தான் ; மனப்பாடமாய் அதன் வசனங்களும் தெரியும் தான் ; yet - அதே கதைக்குள் பணியாற்றும் போது தான் கதாசிரியர் Herge எத்தனை எத்தனை layer-களை இங்கே கட்டமைத்திருக்கிறார் என்பது புரிந்தது ! And ஒவ்வொரு கதாப்பாத்திரத்துக்கும் அவர் தந்திருக்கும் ஜீவன் எத்தகையது என்பதும் ஸ்பஷ்டமாய்ப் புரிந்தது ! உலகெங்கும் தலைமுறைகளைத் தாண்டி, கோடிக்கணக்கானோரின் மார்க்குகளை பெற்ற சாகசம் என்பதால் இங்கே கதைக்கு நாம் மார்க் போட முகாந்திரங்களே கிடையாது என்பது அப்பட்டம் ; நூறுக்கு நாலாயிரத்து நானூற்று எழுபது மார்க்குகள் போடலாம் ! சித்திரங்களுக்கும், கலரிங்குக்கும் அதே ; அதே - 4470 /100 ! So மொழிபெயர்ப்பெனும் ஜீவநாடியினை மட்டும் படைப்பாளிகளின் வழிகாட்டலோடு அழகாய் அமைத்து விட்டால், ஒரு பாகுபலி பாணியிலான அசாத்தியத்தை கண்முன்னே கொண்டு வர வாய்ப்பிருப்பது பணிக்குள் போகப் போக புரிந்தது ! And truth to tell - முன்னெப்போதும் நாமோ, வேறு யாருமோ, தமிழில் முயற்சித்திரா ஒரு எவரெஸ்ட் சிகரமிது என்பதுமே புரிந்தது ! நமது இதுவரையிலுமான சூப்பர் ஹிட்ஸ் பற்றி சிந்தித்துப் பார்த்தேன்.....மாயாவி...லக்கி லூக்....டெக்ஸ் வில்லர்...டைகர்....XIII ...என்ற ஜாம்பவான்கள் கண்முன்னே வந்து போயினர் ! ஆனால் அவர்களையெல்லாம் தாண்டிய இன்னொரு பரிமாணத்தில் டின்டின் இருப்பதாக எனக்குப்பட்டது ! Of course - இந்த அபிப்பிராயத்தில் உங்களுக்கு முரண்களிருக்கலாம் தான்... but trust me இதுவரைக்கும் நாம் பறந்திருக்காத ஒரு உசரம் டின்டினின் விமானத்துக்குத் தேவை என்பதை சீக்கிரமே நீங்களும் ஏற்றுக் கொள்வீர்கள் !

நகரும் ஒவ்வொரு பக்கத்தோடும், பிரெஞ்சில் இந்த ஸ்கிரிப்ட் கொண்டுள்ள ஆழத்தினையும், இங்கிலீஷ் மொழிபெயர்ப்பினில் அந்நாட்களில் அந்த ஜாம்பவான்கள் செய்திருக்கும் ஜால வித்தைகளையும் உள்வாங்கிட முடிந்தது ! டின்டின் கதைகள் சகலமும் இங்கிலீஷில் சரளமாய் கிட்டினாலுமே, ஒரிஜினல் பிரெஞ்சில் உள்ள ஏதேனும் குட்டி நுணுக்கத்தையும் மிஸ் செய்திடலாகாதே என்று நமது மொழிபெயர்ப்பாளரிடம் சொல்லி, பிரெஞ்சிலிருந்துமே எழுதி வாங்கியிருந்தோம் ! So இந்தாண்டை ஆங்கிலப் பதிப்பு...அந்தாண்டை ஆங்கில ஸ்கிரிப்ட்...and நடுவாக்கில் நான் என்று நாட்கள் ஓட்டமெடுத்தன !

கேப்டன் ஹேடாக் ! டின்டின் தொடரினை ஆராதிக்கும் அனைவருக்குமே தெரியும் - இந்த கடாமுடா கப்பல் கேப்டன் தான் இத்தொடரின் செல்லப்பிள்ளை என்பது ! முணுக்கென்றால் கோபம் கொள்ளும் மனுஷன் ; வாயைத் திறந்தாலே வசவுகள் அருவியாய் கொட்டினாலும், உள்ளுக்குள் சொக்கத் தங்கம் ! வெறும் வாசகனாய் இவரை ஓராயிரம்  தபா ரசித்திருப்பினும், இப்போதொரு கோமுட்டித் தலை எடிட்டனாய் ; முழியாங்கண் மொழிபெயர்ப்பாளனாய் தரிசிக்கும் போது, இந்தக் கதாப்பாத்திரத்தினை செத்துக்கிட Herge அவர்கள் எத்தனை மெனெக்கெட்டிருப்பார் என்பதை எண்ணி மலைக்காது இருக்க இயலவில்லை ! And இந்த மனுஷனின் வரிகளை ஒவ்வொரு உலக மொழியிலும் அமைத்திட,ஆங்காங்கே உள்ள மொழிபெயர்ப்பாளர்கள் எத்தனை அண்டா தண்ணீர் குடித்திருப்பார்கள் என்பதையும் எண்ணி மிரளாது இருக்க இயலவில்லை ! 

டின்டின் ரசிகர்களுக்குத் தெரியும் - அவரது Billions of blue blistering barnacles ; Thundering typhoons ...இத்யாதி இத்யாதிகளின் தாக்கம் என்னவென்று ! இவைகள் ஒரு மாலுமியின் கரடுமுரடான மொழியின் பிரதிபலிப்பு ; கோபத்தின் வெளிப்பாடு ; அதே சமயம் துளியும் நிஜ அர்த்தம் கொண்டவை அல்ல ! இவற்றை தமிழாக்கம் செய்ய ஆரம்பித்த போது தான் தலைவர் ரஜினி அடிக்கடி இமய மலைப்பக்கம் ஏன் போய்க்கொண்டிருந்தாரென்பது புரிந்தது ! ஒரு தனி நோட்டே போட்டேன் - கேப்டனின் இந்த கூக்குரல்களுக்குப் பொருந்தக்கூடிய தமிழ் வரிகளை எழுதி வைக்க ! கதைக்குள் போகப் போக, நேபாலிலும், பனிபடர்ந்த திபெத்திலும் டின்டின் & கேப்டன் & ஸ்நோயி செய்யும் பயணமானது என்னையும் இணைத்துக் கொண்டது போலவே தோன்றத் துவங்கியது ! Trust me guys - மூச்சா போக மூணு மணிக்கு எழுந்த கையோடு, கேப்டனின் வரிகளில் பட்டி டிங்கரிங் செய்த இரவுகள் கடந்த 3 வாரங்களில் அநேகம் ! நாட்கள் ஓட ஓட - இதுவொரு வித obsession போலானது ! லேமினேஷனுக்கோ, பிரின்டிங் இங்குக்கோ பேமெண்ட் கேட்டு மனுஷர்கள்  என் முன்னே அமர்ந்திருக்க, என் மண்டைக்குள்ளேயோ கேப்டன் ஹேடாக் "இப்புடி திட்டுவாரோ..? அப்புடி சவுண்டு விடுவாரோ ?" என்ற எண்ணம் ஓடிக்கொண்டிருக்கும் ! மைண்ட்வாய்ஸ் என்று எண்ணி நான்பாட்டுக்கு அவற்றை உரக்க உச்சரித்திருப்பின், பணம் கேட்டு வந்தவர்கள் என் சில்லுமூக்கை சிதறடித்திருப்பது நிச்சயம் ! போகப் போக, கதைக்குள் பயணிக்கப் பயணிக்க, கேப்டனோடு ரொம்பவே நெருங்கிடுவதாய் ஒரு பீலிங் எழுவதைத் தவிர்க்க இயலவில்லை ! And ஆங்காங்கே colorful வசவுகளை உருவகப்படுத்திட கொஞ்சம் கொஞ்சமாய் இயன்ற மாதிரிப் பட்டது ! சுத்தமாய் 18 நாட்கள் எடுத்தது - 61 பக்கங்கள் கொண்ட இந்த சாகசத்தினை எழுதி முடிக்க ! And நான் எழுதும் வேகத்துக்கே DTP பணிகளும் முடிந்திட, முந்தைய பொழுதின் பணியினை மறுநாளே திருத்துவது சாத்தியமானது ! ஒவ்வொரு நாளும் புதுசு புதுசாய் திருத்தங்கள் தலைக்குள் தோன்றும் and நம்மாட்களும் தினம்தோறும் corrections போட்டுப் போட்டே இளைத்துப் போகாத குறை தான் ! நம்பினால் நம்புங்கள் guys - இன்று மாலை என் மேஜைக்கு வந்திருப்பது டின்டினின் 7-வது செட் பிரிண்டவுட் ! இவ்வார இறுதி வரையிலும் பொறுமையாய் பரிசீலனை செய்தான பிற்பாடு, படைப்பாளிகளுக்கு ஒப்புதலுக்காக அனுப்பிட திட்டமிட்டுள்ளேன் ! And அங்கே தான் நீங்க வரீங்கோ - பிக்ச்சருக்குள் ! 

உங்களில் எத்தனை பேர் TINTIN fans என்பது எனக்குத் தெரியாது தான் ; இதோ - இந்த சந்தர்ப்பத்தில் அதனை தெரிந்து கொள்ளலாம் என்று தோன்றுகிறது ! நீங்களொரு TINTIN ரசிகராக இருந்து, அவரது ஆல்பங்களை (சு)வாசித்திருக்கும் பட்சத்தில் - இக்கட கைதூக்கிக் காட்டுவதோடு, கேப்டன் ஹேடாக்குக்கு பொருத்தமான அந்த க்ளாஸிக் வரிகளை மட்டும் வடிவமைத்தும் காட்டிடலாமே ப்ளீஸ் ? "அட...இது கூட செமையா இருக்கே !" என்று எண்ணச் செய்திடும் வரிகள் இங்கே கிட்டிடும் பட்சத்தில், ஓசையின்றி அவற்றை எனது ஸ்கிரிப்டில் இணைத்து, படைப்பாளிகளுக்கு அனுப்பிடுவேன் ! Once அவர்களின் approval கிட்டியான பின்னே - உங்கள் வரிகளில் எவையேனும் பயன்பட்டிருப்பின், அதனை இக்கட அறிவிக்கலாம் ! So டின்டின் fans...உங்களின் கற்பனைக் குதிரைகளை சித்தே கிளப்பி விடுங்களேன் ? And டின்டினுக்கு இதுவரையிலும் புதியவர்களான நண்பர்கள் - எனது இந்த பில்டப்பை பார்த்து, லைட்டான புன்சிரிப்பொன்றை உதிர்த்தபடிக்கே தூங்கப் போகலாம் ! 

Bye folks....காத்திருப்பது டின்டினின் உலகம் ! என் மேஜையினில் நடுநாயகமாய்   சலசலத்துக் கொண்டிருக்கும் இந்த 61 பக்கங்களை இது வரைக்கும் எத்தனைவாட்டி படித்திருப்பேன் ; இன்னமும் எத்தனைவாட்டி படிக்கப் போகிறேன் என்று சொல்லத் தெரியவில்லை ! But இந்தக் காக்கைக்கு பொன்குஞ்சாகவே இப்போது வரை தென்பட்டிடும் இந்த ஸ்கிரிப்ட் படைப்பாளிகளிடமும் ஒரு thumbs up பெற்று விட்டால் - ஒரு லோடு ரவுண்டு பன்களோடு, ரெண்டு லோடு ஸ்பாஞ் கேக்குகளையும் ஈரோட்டுக்கு இறக்கி விடலாம் ! Fingers crossed & God be with us !!   See you around ! Have a great week !

And TINTIN fans - உங்களின் சிந்தனைக் குல்லாக்களை போட்டுக் கொள்ளலாமே - ப்ளீஸ் ? இங்கே அனுப்பிட வேண்டாமே என்று எண்ணினால் lioncomics@yahoo.com க்கு மின்னஞ்சலிலும் அனுப்பலாம் ! Thanks in advnce !

And மே மாத ரெகுலர் இதழ்கள் சார்ந்த அலசல்களும் இங்கே தொடரட்டுமே - ப்ளீஸ் ?

மே.மு. & மே.பி......!

 நண்பர்களே,

வணக்கம். தெறிக்கச் செய்த ஒரு மேளா மெது மெதுவாய் நினைவுப் பேழைகளுக்குள் செட்டில் ஆகிடும் வேளையும் பிறந்திருக்க, இதோ - மே மாதத்து ரெகுலர் இதழ்கள் வெளிச்ச வட்டத்தைக் கோரிட ரெடியாகி வருகின்றன ! கடந்த இரண்டரை வாரங்களில் நமது ஆபீஸானது, ஜெமினி சர்க்கஸ் ரேஞ்சுக்கு இருந்ததென்று சொன்னால் அது மிகையே ஆகாது ! நாளொன்றுக்கு ஒவ்வொரு போனிலும் நூறுக்கும் மேற்பட்ட போன் அழைப்புகள்  ; நாளொன்றுக்கு 50+ கூரியர்ஸ் ; நாளொன்றுக்கு அரை டஜனுக்குக் குன்றாத லாரி ஷெட் பார்சல்கள் என்று திருவிழா கோலம் தான் ! நவரசங்களையும் கண்ணில் காட்டி விட்டிருந்தன இந்த மேளா சார்ந்த அனுபவங்கள் ! இதழ்களின் அறிவிப்பைத் தொடர்ந்து சிருங்காரம், உவகை என்று பார்த்தோம் ! "இ.ப. எனக்கு இல்லியா ?" என்று நடுநடுவே சிலர் வருந்திய  போது அழுகையைப் பார்த்தோம் ; "புக் வந்திடுச்சேய்ய்" என்ற சமயத்தினில், நகையினைப் பார்த்தோம் ; "எனக்கு கூரியர் வரலை !! கூரியர் ஆபீசில ரசீதை வாங்கிப் பார்த்துச் சொல்ல தெரியாம திரியிதுகள் !" என்று கண்சிவந்த போது ரௌத்திரத்தைப் பார்த்தோம்.......(பிப்ரவரி & மார்ச் மாதங்களுக்கான ரசீதுகளையே அவுக இன்னும் குடுக்கலை & அதற்கான payment இன்னமும் கூட தொங்கலில் நிக்குது என்பதெல்லாம் வேறொரு கதை !!) ; சகலத்தையும் இரண்டே பேராய் சமாளித்த நம் பெண்களிடம் தெரிந்ததோ அமைதி & அவர்களின் பொறுமையைக் கண்ட போதெல்லாம் பெருமிதம் என்னிடம் ! So இந்த மேளாவும் சரி, அதன் தொடர்ச்சியும் சரி - has been an experience & more !! Phewwww !! இன்னும் சொல்லப் போனால் இந்த மேளாவானது புதிதாய் நிறையவே வெளிச்சச் சாளரங்களை நமக்குத் திறந்து விட்டுள்ளது என்றும் சொல்லலாம் ! காத்திருக்கும் காலங்களில் இது போலான வாய்ப்பினை எவ்விதம் அட்டகாசமாய்ப் பயன்படுத்திடலாமென்று கணிசமான அகுடியாக்கள் தலைக்குள் ஓட்டமெடுத்து வருகின்றன ! நிதானமான வேளைதனில், பொறுமையாய்த் திட்டமிடுவோம் ! 

அடுத்த சில நாட்களில் May சந்தா இதழ்களினை டெஸ்பாட்ச் செய்திடத் தயாராகி வருகிறோம் !  ஏற்கனவே அவை சார்ந்த previews-களையும் பார்த்தாச்சு எனும் போது - புதுசாய் என்ன சொல்வதென்று அறியில்லா ! பொதுவாய் இது போலான தருணங்களில், சேரன் சார் வாடகைக்கு வண்டி எடுக்கும் கடையைத் தேடிப் பிடித்து, ஒரு சைக்கிளை எடுத்துப் போட்டு, "ஞாபகம் வருதே...ஞாபகம் வருதே..." என்று பாடியபடியே பிளாஷ்பேக்குக்குள் புகுவது வாடிக்கை ! ஆனா "ஏர்பேக் இருக்கு...ஷோல்டர்பேக் இருக்கு...! ஸ்கூல்பேக் இருக்கு....கம்பியூட்டர்பேக் இருக்கு ......! இந்த பிளாஷ்பேக் மட்டும் இல்லவே இல்லைன்னு" மண்டையும் கையை விரிக்க, அந்த மண்டையையே சொரிந்து கொண்டு நிற்கிறேன் !  

And தற்செயலாய் நமது 2024 சார்ந்த திட்டமிடலும், இணைதடத்தினில் ஓடிக்கொண்டிருக்கும் வேளை இது என்பதால், அக்கட பாய்வதே இவ்வார இறுதிக்கும் சரி, காத்துள்ள ஆண்டின் planning ஒரு இறுதி வடிவம் பெற்றிடுவதற்கும் சரி உதவிடும் என்று புரிந்தது ! So உசரத்தினில் இந்தப் பதிவு ஜோ டால்டனின் அளவே என்றாலும், அது தாங்கி நிற்கும் சாரம் ஆவ்ரேல் டால்டனின் உசரத்துக்கானது ! நடப்பாண்டில் பாதித் தொலைவு கூட இன்னமும் கடந்திருக்கவில்லை என்றாலும், ஓரளவுக்கு நாயக / நாயகிய சமீப வரவுகள் பற்றி, க்ளாஸிக் நாயகர்கள் ஏற்படுத்தி வரும் தாக்கத்தையோ, தூக்கத்தையோ பற்றி ; going ahead இன்னும் என்னென்ன செய்தால் தேவலாமாக இருக்கும் என்பது பற்றியெல்லாம் உங்களிடம் நிச்சயமாய்க் கருத்துக்கள் இருக்கும் என்பது உறுதி ! ("ஆமா..ஆமா.டெபினிட்லீ..டெபினிட்லீ !!" என்ற மைண்ட்வாய்ஸ் கேட்கிறது !) So எனது முதல் வினைவலே க்ளாஸிக் பார்ட்டிசிடமிருந்து தான் ! So here goes : 

QUESTION # 1 : 

அமெரிக்க க்ளாஸிக் நாயகர்கள் - அது தான் வேதாளர் ; மாண்ட்ரேக் ; ரிப் கிர்பி ; காரிகன் ; சார்லி ; விங்-கமாண்டர் ஜார்ஜ் & co !! இவர்களின் எதிர்காலம் நம் மத்தியில் எவ்விதமென்று ஒரு நல்லா சீட்டாப் பாத்து எடுத்துக் போடுங்கண்ணே : 

A.இவர்கள் அடுத்த ஆண்டுமே தொடர்ந்திட வேண்டுமென நீங்கள் விரும்பிடும் பட்சத்தினில், தற்சமயம் போல ஒரே நாயகரின் பத்துப் பன்னிரண்டு கதைகளை ஒரே புக்குக்குள் திணித்து அஜீரணம் ஏற்படுத்திடாது - ஆளுக்கு ஒன்றோ, இரண்டோ சாகசங்களென இடம் தந்து ஒரு கலவையான குண்டு புக்காய் திட்டமிடலாமா ?  ரெண்டு வேதாளர் கதைகள் ; ஒண்ணோ, ரெண்டோ ரிப் கிர்பி ; ஒண்ணோ இரண்டோ ஜார்ஜ் - etc etc என்று ! 

B.ஒரு ஆணியும் பிடுங்க வேணாம்டி செல்லம் ; இப்போதைக்கு இருக்கிறா மெரியே - ஒரே ஈரோ ;ஒரே புக் என்ற பார்முலா தொடரட்டும் என்பீர்களா ?

C.இல்லே....இந்த கோஷ்டியையே பொட்டி, படுக்கைகளைக் கட்டிக்கினு மொத ரயிலைப் புடிக்கச் சொல்லிட்டு அவுக இடங்களிலே கி.நா.வா போடலாம் என்பீர்களா ?

Question # 2 : 

"அமெரிக்காவுல கூப்ட்டாகோ ; பிரான்சிலே கூப்ட்டாகோ " என்று கூவும் வேளையிலேயே, நமது பிரிட்டிஷ் ஜாம்பவான்ஸ் பற்றியுமே ஒருவாட்டி review ப்ளீஸ் ? மாயாவியார் கி.பி.3210 -ல் கூட சுற்றில் இருப்பார் என்பதால் அவரை ஆட்டத்துக்கு சேர்க்கலாமா - வேணாமா ? என்ற கேள்வியே மதியற்றது என்றாகி விட்டது ! So அவர் நீங்கலாய் உள்ளோர் மத்தியிலிருந்து வேறு எந்த Fleetway பார்ட்டியை காணோமென்று கண்கள் பூக்கக் காத்திருக்கிறீர்களோ - if at all there are any !

Question # 3 : 

ஏற்கனவே காதிலே தக்காளி தொக்கு கசியுற அளவுக்குக் கேட்ட கேள்வியே இது !! ஆனால் ஆண்டுகளின் ஓட்டங்களும், அகவைகளின் முன்னேற்றங்களும், தொப்பைகளின் விஸ்தீரணங்களும்,எதிர்க்காலே வர்றது பசு மாடா ? மீன்பாடி வண்டியா ? என்பதை அனுமானிக்கவே கண்களைச் சிறுத்து, உற்று நோக்க அவசியப்படுத்திடும்  கண்ணாடிகளின் பவர்களும் உங்களின் அந்த லவ்ஸில் ஏதேனும் மாற்றங்களைக் கொணர்ந்திருக்காதா ? என்ற ஆதங்கமே என்னை இதனை yet again வினவச் செய்கிறது !! Very simple question யுவர் ஆனர்ஸ் ! 

• ROUTE 66 - 234 pages ; ஐந்து பாக செம racy த்ரில்லர் இது !
• ஒரு செம க்ளாஸிக் 285 pages கௌபாய் தொடர் ! முற்றிலும் வித்தியாசமான ஈரோ சகிதம் ! 
• 216 பக்க ட்யுராங்கோ பாணியிலான தொடர் - will make for 4 parts !
• ஒன்பது பாக black & white ஆக்ஷன் த்ரில்லர் !
• மூன்று பாக black & white spy த்ரில்லர் !

தற்சமயத்துக்கே நம்மிடம் உறங்கி வரும் நெடும் தொடர்கள் இவை ஒவ்வொன்றும் ! இன்றைய விலைவாசிகளில் இவற்றை ஒரே ஹார்ட்கவர் தொகுப்புகளாய் உருவாக்குவதெனில் தலா ரூ.600  ; ரூ.750 ; ரூ.550 ; ரூ.800 ; ரூ.300 என்ற ரேஞ்களில் விலைகள் இருந்தாக வேண்டும் ! 

சரி, வருஷத்துக்கு ஒரு தபா இவற்றுள் ஒன்றையோ, இரண்டையோ கோடை மலர், பொங்கல் மலர் என்று உள்ளே நுழைக்கலாமே ? என்று பார்த்தால் பட்ஜெட்டில் துண்டு விழுகிறது ! And more importantly - பெத்த சண்டியர் பெருமக்களாய் நம்முள் நிறைய பேர் குண்டு புக்ஸ் கொடி பிடித்தாலும், அவற்றினில் பொம்மை பார்ப்பதைத் தாண்டி உட்புகுந்து வாசிக்கும் பொறுமையினையோ, அவகாசத்தினையோ கொண்டிருப்பதாய் இப்போதெல்லாம் எனக்கு நம்பிக்கையே எழ மாட்டேன்கிறது ! அழகாய் ஹார்ட் கவரில் புக்ஸ் டாலடிப்பதை பார்த்துப்புட்டு, பக்கம் பக்கமாய், பத்தி பத்தியாய், தொண்டை நரம்புகள் புடைக்க, கதை மாந்தர்களும், நானும் பேசும் டயலாக்குகளை மேலோட்டமாய் வாசிச்சிப்புட்டு, "இந்த தீவாளிக்கு தலைக்கு எண்ணெய் வைச்சு குளிக்கிறோமோ-இல்லியோ - இந்த குன்டூவை (புக்கை தானுங்க) வாசிச்சே தீருறோம் !" என்று சபதம் எடுத்துக் கொள்வது போலவே இப்போதெல்லாம் எனக்கு அசரீரிகள் கேட்டு வருகின்றன ! இதை விடவும் கொடுமை, இங்கே சுழற்றிடும் கம்புகளை ஓசையின்றி கொல்லைப்பக்கமாய்ச் சாத்தி விட்டு, "அந்த 1986 கோடை மலர் இருக்குப்பு உம்மகிட்டே ? 1987 திகில் கோடை ஸ்பெஷல் இருக்கு உங்ககிட்டே ?" என்றே சம்பாஷணைகளைத் தொடர்வதும் கண்கூடு ! 

So இந்தக் கூத்துக்கள் எல்லாம் ஒருபக்கமெனில், நமக்கு ஊஞ்சலாடும் இயமை இன்னொரு பக்கம் ! பீரோக்களுக்குப் பழு கூட்டும் இதழ்களுக்கென நாக்கெல்லாம் தொங்கப் பணியாற்றுவதென்பது, 56 வயதான இந்த வாலிபனுக்குமே வரவர சிரமமாகிக் கொண்டே செல்கிறது ! அதே இடத்தில் இந்த நெடும் தொடர்களை ஒரிஜினல்களின் வார்ப்புகளாகவே அடுத்தடுத்த மாதங்களில் வெளிவந்திடும் நாங்கோ / ஐந்தோ சிங்கிள் இதழ்களாய் திட்டமிட்டோமெனில்  - என் பாடும் லேசு ; தீவாளிக்கு எண்ணெய் கிடைக்குதா ? இல்லியா ? என்ற கேள்வியுமே உங்களுக்கும் எழாதில்லியா ? ஒரிஜினலாய் இக்கதைகளின் ஒவ்வொரு அத்தியாயத்துக்கும், பிரெஞ்சில் அங்குள்ள காமிக்ஸ் ரசிகர்கள் நாலைந்து வருஷங்கள் காத்திருக்கின்றனர் ! ஆனால் நமக்கோ அத்தனை பெரிய காத்திருப்பெல்லாம் அவசியம் நஹி - maximum of 5 months per biggie episode என்பேன் ! இது தனியாகவே ஒரு சந்தா தடமாக அமைத்திட இயலுமெனில், நீளம் கருதியே நாம் விலகி நிற்க நேரிடும் கணிசமான புதுக் கதைகளும் நம் அணிவகுப்பினில் ஐக்கியம் ஆகிட வாய்ப்புகள் அநேகம் ! இதோ - காத்திருக்கும் மாதங்களிலேயே - "சம்மர் ஸ்பெஷல் ; ஆண்டு மலர் ; TEX - The Supremo ஸ்பெஷல்" என்று மிரட்டி வரும் இதழ்களை எண்ணி இப்போதே மடக் மடக் என்று தண்ணி குடித்து வருகிறேன் ! இந்த அழகில் அடுத்த ஆண்டின் அட்டவனைக்குள்ளேயும் சரமாரியாய் குண்டூசை இறக்கி விட இப்போதே பயந்து பயந்து வருது !

What say folks ? தீவாளி ? தலைக்கு எண்ணெய் தானா ? Or "மாற்றம்,முன்னேற்றம்,சிங்கிள் இதழ்கள்" - என்று முழங்கலாமா ? This question for the final time - this year !!

Question # 4 : 

யார் பிடிக்கும் ? யாரை எவ்வளவு பிடிக்கும் ? என்ற கேள்விகளை அப்புறமாய்ப் பார்த்துக் கொள்வோமே ! இப்போதைக்கு - "ஐயோ..தெய்வமே....இந்த ஈரோ / ஈரோயினி மட்டும் வேணவே வாணாம் !" என்று நீங்கள் தெறித்தடித்து ஓடுவது யாரைக் கண்டு ?  

Question # 5 : 

அட்டவணைகள் தயார் பண்ணிடும் ஒவ்வொரு சமயத்திலும் "புதுசாய் ஆரையாச்சும் இழுத்து உள்ளாற போட்டாகணுமே !!" என்ற நமைச்சல் எனக்கு எடுப்பதுண்டு ! அந்நாட்களில் ஜெய்ஷங்கர் படங்களில் வெள்ளைக்காரர்களை கதையினில் காட்டணும் என்றால் ரோட்டோரமாய் பாயாவும், ஆப்பமும் அடித்துக் கொண்டிருக்கும் கோவா டூரிஸ்ட்களில் யாரையாச்சும் புடிச்சாந்து, பச்சை கோட், பிங்க் சூட் என்று மாட்டி விட்டு, வாயில் ஒரு பைப்பையும் கொடுத்துப்புட்டு, பழைய இம்பாலா காரில் 'சொய்ங்' என்று கொண்டு வந்து இறக்குவார்கள் !   எனது "புதுசு" சார்ந்த இந்த அரிப்பு கூட சில தருணங்களில் அவ்விதம் அமைந்திருக்கலாம் தான் ! So இம்முறை கொஞ்சம் முன்ஜாக்கிரதை முன்சாமியாக இருக்க விழைகிறேன் !  தாக்கமென்று எதையாச்சும் இந்தப் "புதுசுகள்" ஏற்படுத்தாது போகாது !' என்ற எனது அபிப்பிராயம் மெய் தானா ?அல்லது, நானாக ஒரு கற்பனை லோகத்தில் சஞ்சாரம் செய்து வருகிறேனா பிராணநாதாஸ் ? நீங்கள் சந்தாக்களின் அங்கத்தினராய் அல்லாது - கடைகளில் மட்டுமே வாங்குவோராய் இருக்கும் பட்சங்களில், இத்தகைய புது நாயகர்களைக் கண்டு உற்சாகம் கொள்வீர்களா - ஓட்டமெடுப்பீர்களா ?

Question # 6 : 

ஒரு சிம்பிள் கேள்வி : குட்டி விலையிலான இந்த பாக்கெட் சைஸ் காமிக்ஸ் இதழ்களை ரெகுலர் சந்தா தடமாக்கிட்டால் சுகப்படுமா ? சங்கடப்படுத்துமா ? 

ரூ.30 விலையிலான இந்த இதழ்கள் ஆன்லைன் மேளாவிலும் சரி, முகவர்களிடமும் சரி, செமையாகவே ஸ்கோர் செய்துள்ளன ! புத்தக விழாக்களுக்கு பள்ளிச் சீருடைகளில் வருகை தந்திடும் மாணாக்கருக்கு, அவர்கள் கையில் உள்ள தொகை என்னவோ - அதற்கே விற்றிடவும் எண்ணியுள்ளோம் ! 25 இருந்தால் 25-க்கு ; 20 இருந்தால் 20-க்கு ! So - "பேப்பர் தரம் செரி இல்லே..வாங்குறவுகள்லாம் கண்ணிலே ஜலம் வைச்சுண்டிருக்காக" என்ற ரீதியிலான எண்ணச் சிதறலைத் தாண்டியபடியே, இவற்றை 2024-ன் ரெகுலர்களாக்கிடலாமா ?   

ரைட்டு..இப்போதைக்கு இந்த அரை டஜன் கேள்விகளுக்கு ஜாலியாய் பதிலளித்தீர்களெனில் - எனது திட்டமிடலுக்கு ரொம்பவே உதவிடும் ! பரபரவென ஓட்டமெடுத்து வரும் டின்டின் மொழிபெயர்ப்பினைத் தொடர்ந்திட இப்போதைக்கு நான் கிளம்புகிறேன் ! Bye all ...see you around ! Have a fun weekend ! 

அப்புறம் - நேற்றைக்கு நமது YouTube சேனலில் போட்ட லேட்டஸ்ட் மொக்கையின் லிங்க் :  https://www.youtube.com/watch?v=9XNy8PCGQDg

பரபர 10 !!

 நண்பர்களே,

வணக்கம். இப்போதெல்லாம் எல்லாமே fast forward-ல் ஓட்டமெடுப்பது போலவே உள்ளது !! உசிரைக் கொடுத்து பணியாற்றிய ஆன்லைன் மேளாவின் 10 புக்குகளுமே ஏதோவொரு மாமாங்கத்தில் உருவானதாய் உள்ளுக்குள் தோன்றுவதைப் பார்க்கும் போது அந்த உணர்வைத் தவிர்க்க இயலவில்லை ! 

• "உயிரைத் தேடி" வண்ண இதழ் 
• குட்டி புக்ஸ் 3 
• மேகி கேரிசன் 
• கிராபிக் நாவல் 
• டெக்ஸ் / மாயாவி / லக்கி லூக் மறுபதிப்புகள் 

என்று ஒரு கத்தை இதழ்கள் கடந்த 3 நாட்களாய் மழைக்கு மத்தியில் நம் ஆபீசுக்குப் படையெடுப்பாய் வந்து சேர, ஜாலியாய் பராக்கு பார்த்துக் கொண்டிருந்தேன் ! And நேற்றைக்கு அவற்றினை நம்மாட்கள் பேக் பண்ணி டெஸ்பாட்ச் செய்வதை அதை விடவும் செம ஜாலியாய் ரசித்துக் கொண்டிருக்க முடிந்தது ! ஆன்லைன் மேளாவினில் நீங்கள் ஆர்டர் செய்திருந்த இன்ன பிற இதழ்களும் சேர்ந்து கொள்ள - சுமோ மல்யுத்த வீரர்களின் சைஸுக்கான பார்சல்கள் கூரியர் நோக்கிப் படையெடுத்துக் கொண்டிருந்தன ! இன்றைக்கும், நாளைக்குமாய் டெஸ்பாட்ச்சினை நம்மாட்கள் முடித்து விடுவார்கள் ; so கூரியர் பட்டுவாடாக்களுக்கென கொஞ்சமாய் பொறுமை ப்ளீஸ் ! 🙏🙏

And இந்தப் பரபர 10 - குட்டிக்கரண குத்தாலப்பனான நமக்கே ஒரு first ever எனும் போது - புக்ஸை ஏக் தம்மில் பெற்று, பெட்டிகளை உடைத்துப் புரட்டும் உங்களின் அனுபவங்களை இவ்வாரத்தினில் தெரிந்திட ஆவலாய் இருப்போம் ! ஒற்றைப் பிள்ளை பெறுவதே பெரும் பிரயத்தனம் எனும் போது - மீன் குஞ்சுகளாட்டம் பத்தைப் பெற்றுப் போட்டிருக்கிறோம் !! So சொல்லுங்களேன் folks - இந்த ஒட்டு மொத்த அனுபவம் எவ்விதமிருந்ததென்று ? இயன்றால் ஒரு selfie - மொத்த புக்சோடும் ப்ளீஸ் ?

And guess what - "உயிரைத் தேடி" black & white இதழின் ஸ்டாக் நிலவரம் அதற்குள் செம குறைவாயிட்டூ !! கலருமே வெறித்தனமான வேகத்தில் ஆர்டர்களைக் கண்டு வருகின்றன ! மிரண்ட மகிழ்ச்சி !!

Bye all ...see you around ! Have a great week ahead ! And good luck with the couriers !!

ஒரு மே தின குட்டிக்கதை 😎

 நண்பர்களே,

வணக்கம். அநேகமாய் கரைவேட்டிக்கார மேடைப் பேச்சாளர்களுக்கு  அப்புறமாய், தமிழ்நாட்டில் தொட்டதுக்கெல்லாம் ஒரு குட்டிக்கதை வைத்திருப்பது அடியேனாகத் தானிருக்கும் என்பேன் ! So இதோ - இந்த மே தினத்துக்கான  குட்டிக்கதையோடு ஆஜர் !

எல்லாம் ஆரம்பித்தது 1979-ல் ; நான் ஏழாப்பு படித்துக் கொண்டிருந்த கி.மு. காலமது ! அப்பாவின் பூர்வீகம் மதுரை என்பதால், அவரது தாயார் ரொம்பவே தளர்ந்து போன பின்னாட்கள் வரையிலும், மதுரையிலேயே தனியாக வசித்து வந்தார் ! ஊரின் நட்ட நடுவே ஒரு நெருக்கடியான சந்துக்குள் இடம் ; நடுவில் திறந்த முற்றம் ; மாடியில் விசாலமான, புராதன அறைகள், விளையாட ஏகமாய் இடம் - என்ற அந்தக் காலத்து வீட்டுக்கு ஏகப்பட்ட பேரப்பிள்ளைகளும் விடுமுறைகளில் போது மொய்யென்று படையெடுப்பது வாடிக்கை ! 

அப்படிப்பட்டதொரு காலாண்டு விடுமுறை விசிட் முடிந்த கையோடு, ஏதோ காரணத்தின் பொருட்டு, நான் மட்டும் ஒரு நாள் முன்னதாக ஊர் திரும்பிடுவதாக இருந்தேன். அப்போதெல்லாம் மதுரை பெரியாரில், 2 பஸ் நிலையங்கள் இருப்பதுண்டு ; ஒன்று - ரெகுலர் பஸ்களுக்கு and இன்னொன்று எக்ஸ்பிரஸ் பஸ்களுக்கு !! ஊருக்குத் திரும்பிடுவதற்கான பணத்தோடு அந்த கெத்தான (!!) நிலையத்தில் ஒரு மதியப்பொழுதினில் நின்று கொண்டிருந்தேன் ! சாதா பஸ்கள் அழுகாச்சி கி.நா.க்களைப் போல உருட்டோ உருட்டென்று உருட்டியே ஊர் கொண்டு சேர்க்கும் என்பதைத் தாண்டி,  அந்த எக்ஸ்பிரஸ் பஸ் ஸ்டாண்டைத் தேடிப் போவதற்கு என்னிடம் இன்னொரு காரணமும் இருந்தது ! அதற்கு அடுத்த வாசலில் சும்மா 'ஜே ஜே' என்று ஓடிக்கொண்டிருக்கும் "அசோக் பவன்" எனும் ஹோட்டலில், வெஜிடபிள் பிரியாணியானது வாசனையிலேயே ஆளை தூக்கும் ஆற்றல் கொண்டது. அங்கே ஒரு பிரியாணியை போட்டுத் தாக்கிய கையோடு, எக்ஸ்பிரஸ் ஸ்டாண்டுக்கு நடந்தால், அங்குள்ள கடையில் ரோஸ்மில்க் தேவாமிர்தமாய் ருசிக்கும் ! So ரெண்டையும் 'ஏக் தம்மில்' ருசிக்கும் மகத்தான திட்டத்தோடும், அதற்கான காசோடும், அங்கே ஆஜராகிய தருணத்தில் தான் விதி விளையாடியது ! ரோஸ் மில்க் விற்கும் கடையானது ஒரு புக் ஷாப்பும் கூட ! இங்கிலீஷில் புக்ஸோ, காமிக்ஸோ மதுரையில் வெகு சொற்பமான இடங்களிலேயே அந்நாட்களில் கிடைத்திடும் ! So அப்பாவோடு அத்தகைய இடங்களுக்கு விசிட் அடித்த அனுபவத்தில், ரோஸ்மில்க் கடையிலிருந்த சின்ன ரேக்கில் என்னென்ன  அடுக்கி வைக்கப்பட்டுள்ளன ? என்று கண்கள் ஆட்டோமேட்டிக்காக ஸ்கேன் செய்ய ஆரம்பித்தன ! அப்போது தான் "FLIGHT 714" என்றொரு பெரிய சைசிலான ஆல்பம் கண்ணில்பட்டது ! பார்த்த மாத்திரத்திலேயே புரிந்தது - அதுவொரு காமிக்ஸ் இதழ் என்பது ! 

ஏனோ தெரியலை - ஆனால் சுக்கா ரோஸ்ட்டைப் பார்த்த கார்சனைப் போல,முதல் பார்வையிலேயே, அந்த இதழ் என்னை உன்மத்தம் கொள்ளச் செய்திருந்தது ! ஆசை ஆசையாய் புக்கை எடுத்துப் புரட்டினேன் ; அள்ளும் வண்ணத்தில், அட்டகாசமான, தெளிவான சித்திரங்களில் பக்கத்துக்கு பக்கம் சரவெடியாய் ஆக்ஷனும், சிரிப்பும் படையெடுப்பது தெரிந்தது ! செம ஸ்மார்ட்டாய் ஒரு ஹீரோ ; துணைக்கு சுவாரஸ்யமாய் பாத்திரங்கள் என்று கதை தெறிக்க விடுவதை அந்த முதல் புரட்டலிலேயே உணர முடிந்தது !பின்னட்டையைப் புரட்டினால், வரிசை ஒன்றுக்கு 4 இதழ்கள் வீதம், 5 வரிசைகளில் அதே நாயகனின் தொடரினில் கிட்டத்தட்ட 20+ ஆல்பங்களின் அட்டைப்படங்கள் பட்டையைக் கிளப்பிக் கொண்டிருந்தன ! 'ஆத்தாடி..இத்தனை புக்ஸ் உள்ளனவா இந்த ஈரோ கதையிலே ?" என்று மலைத்துப் போனேன் ! அது வரையிலும் வேதாளர் ; மாண்ட்ரேக் ; இந்த்ரஜால் காமிக்ஸ் ; மாலைமதி ; முத்துவின் Fleetway சரக்கு ; அப்புறம் அமெரிக்காவிலிருந்து இறக்குமதி செய்யப்பட்டு விற்கப்பட்ட Gold Key காமிக்ஸ் என்பனவற்றைத் தாண்டி கலரில் இந்தத் தரத்தில் நான் எதையுமே பார்த்ததில்லை ! அது மட்டுமன்றி, கிட்டத்தட்ட 64 பக்கங்களுடன் அந்த FLIGHT 714 ஆல்பம் இருந்தது என்னை அசரடித்துக் கொண்டிருந்தது - becos எனது அதுவரைக்குமான வாசிப்பின் பாக்கிக் கதைகளெல்லாம், மித நீளங்களே ! நொடியில் பிரியாணி மோகமும் சரி, ரோஸ் மில்க் தாபமும் சரி, தடமேயின்றிக் காணாது போக, எனது மையல் முழுக்கவே அந்த காமிக்ஸின் மீதிருந்தது ! விலையைப் பார்த்தேன் - ரூ.72 என்று போட்டிருந்தது ! மிரண்டே போனேன் ; அந்நாட்களில் அதுவொரு ராஜாவின் சன்மானத்துக்குச் சமானமான தொகை ! பிரியாணி கட் ; ரோஸ் மில்க் nyet என்றாலுமே, புக்கை வாங்கிட என் கைவசமிருந்த  பணம் போதாதென்பது புரிந்தது ! ஊருக்குத் திரும்பும் நினைப்பே சுத்தமாய் அற்றுப் போக ; ஒரு சைக்கிள் ரிக்ஷாவில் ஏறி நேராக விளக்குத்தூணுக்கே திரும்பினேன் ! கெஞ்சிக் கூத்தாடியாவது, அப்பாவிடம் அந்தக் காசைக் கேட்டு வாங்கிக் கொண்டு, புக்கை கொள்முதல் பண்ணிய பிற்பாடே சிவகாசி போவதென்ற வைராக்கியம் ! Surprise ...surprise ...கேள்வியே இன்றி காசைத் தர, அடுத்த இருபதாவது நிமிடத்தில் FLIGHT 714 இதழைக் கைப்பற்றியிருந்தேன் !  And அந்த ஆல்பத்தின் நாயகனின் பெயரோ - உலகெங்கும் எதிரொலிக்கும் டின்டின் !!

காமிக்ஸ் உலகினை கடந்த 94 ஆண்டுகளாய் ஆண்டு வரும் டின்டின் எனும் அசாத்தியனுடனான எனது முதல் பரிச்சயம் அது தான் ! And அந்த பெல்ஜிய ஜாம்பவான் விரைவிலேயே தமிழ் பேச உள்ளதே இந்த ஸ்பெஷல் பதிவின் சாரம் ! Oh yes - TINTIN in Tamil .....and pretty soon too !!

நெஞ்சோடு அணைத்திருந்த FLIGHT 714 இதழுடன் ஊருக்குப் புறப்பட்ட போது ஒரு நண்பனை உடன் அழைத்து செல்வது போலானதொரு உணர்வு தான் எனக்குள் ! அந்தக் காலத்து பஸ்கள் பெரிய சக்கரங்கள் கொண்ட மாட்டு வண்டிகளுக்கு இணையானவை என்பதால் சாவகாசமாகவே  ஊருக்குக் கொண்டு சேர்த்தார்கள் ! வீட்டுக்குள் நுழைந்ததும் முதல் வேலையாய் பரபரவென்று டின்டின் புக்கினுள் மூழ்க ஆரம்பித்த போது - இதுவரையிலும் உணர்ந்திரா ஒரு வாசிப்பு ஆனந்தத்தை உணர முடிந்தது ! மெர்செலாக்கிய கதைக்களம் ; செதுக்கப்பட்டிருந்த கதாப்பாத்திரங்கள் ; செம clean சித்திரங்கள் ; அட்டகாசமான வசனங்கள் ; கலக்கலான கலரிங் என்று சகலமும் போட்டுத் தாக்கிட, அன்றைய தினம் முழுசையும் FLIGHT 714 சகிதமே செலவிட்டேன் ! And அதன் பின்னட்டையில் அச்சிடப்பட்டிருந்த இதர டின்டின் ஆல்பங்களைச் சேகரிப்பதே இனி வாழ்க்கையின் லட்சியம் என்பது போல் தோன்றியது ! மிகச் சரியாக அந்தச் சமயம் எங்களது பள்ளி லைப்ரரிக்கு புதுசாய் புக்ஸ் கொள்முதல் செய்யும் பணியும் துவங்கியிருந்தது ! "தெய்வமே....டின்டின் புக்ஸையும் எப்படியாச்சும் நூலகத்துக்குக் கொண்டு வந்து சேர்த்துப்புடுங்க - ப்ளீஸ்" என்று வேண்டிக் கொண்டேன் ! ஆனால் ஆண்டவனோ ஆஸ்டெரிக்ஸ் & ஒபெலிக்ஸ் ஆல்பங்களை ஏகமாகவும், டின்டின் ஆல்பங்களைக் கொஞ்சமாகவும் லைப்ரரிக்கு கொண்டு வந்திருந்தார் ! பெருமாள்கோவில் வாசல் பண்டாரம் - "பன்னீர் 65 தான் வேணுமென்று" அடமெல்லாம் பிடிக்க முடியாதில்லையா ? So கிட்டிய அந்த 2 டின்டின் இதழ்களை மேயோ மேயென்று மேய்ந்து தள்ளினேன் ! தொடர்ந்த ஒன்றரை ஆண்டுகளுக்குள், கல்கத்தாவின் பழைய புக் சந்தைகளிலிருந்து ; டில்லியின் புத்தகக் கடைகளிலிருந்து ; சென்னையின் மவுண்ட் ரோடில் அந்நாட்களில் இருந்த கென்னெடி புக் ஷாப்பிலிருந்து என அப்பாவின் பயண உபயங்களில், டின்டினின் 21 ஆல்பங்களைச் சேகரித்திருந்தேன் ! 

தொடர்ந்த பத்தாண்டுகளில் அவற்றை எத்தனை நூறு தடவைகள் வாசித்திருப்பேன் என்ற கணக்கே இராது - ஒவ்வொரு ஆல்பமும் ஒரு அசாத்தியப் பயணத்தில் நம்மை இட்டுச் செல்வதை சலிப்பே இன்றி ரசித்திருக்கிறேன் ! அதிலும் டின்டினின் தோஸ்த்துகளாக பக்க வாத்தியங்களை இசைக்கும் க்வாட்டர் ரசிகரான கேப்டன் ஹாடாக் ; ஞாபக மறதிக்கார புரஃபஸர் கேல்குலஸ் ; கம்பிளிப்பூச்சி மீசைகள் வைத்துச் சுற்றித் திரியும் டிடெக்டிவ் ரெட்டையர்ஸ் தாம்ப்சன் & தாம்சன் - என அத்தனை பேருமே தத்தம் பாத்திரங்களில் மிளிர்வதை ஒவ்வொரு ஆல்பத்திலும் இமைதட்டாமல் ஆராதித்திருக்கிறேன் !   கதைகள் ஒவ்வொன்றும் தோண்டி எடுக்கப்பட்ட ரத்தினங்கள் என்பதில் உலகெங்கும் யாருக்குமே ஐயங்கள் லேது ! 

இங்கே சின்னதொரு interlude ! இங்கிலீஷில் டின்டின் சாகசங்களை ஏற்கனவே ரசித்திருக்கும் நண்பர்கள், தொடரும் சில பத்திகளை skip செய்திடலாம் : இது முழுக்கவே டின்டினுடன் பரிச்சயம் இல்லாத நண்பர்களுக்கோசரம் மட்டுமே ! 

நான் தலையில் தூக்கி வைத்துக் கூத்தாடும் 

இந்த டின்டின் யார் ? 

இவரது கதை பாணி என்ன ? 

கதைகளில் அப்படி என்ன தான் ஸ்பெஷல் ? 

என்ற கேள்விகள் உங்களுக்குள் எழுவது இயல்பே ! So here goes :

1.யாரிந்த டின்டின் ?

டின்டின் ஒரு இளம் பெல்ஜிய பத்திரிகை ரிப்போர்ட்டர் ! ஸ்நோயி என்றதொரு க்யூட்டான குட்டி நாய் இவரது இணைபிரியா கூட்டாளி ! நம்ம ஜாலி ஜம்ப்பர் பாணியில் அவ்வப்போது ஸ்நோயிவுமே யோசனைகள் சொல்லும் ; மனசாட்சியோடு மல்லு கட்டும் ! தனது பணி நிமித்தம் டின்டின் புலனாய்வுகள் பல செய்திட அவசியமாகிட, சாகசங்களும், ஆபத்துக்களும் அவரை விடாப்பிடியாய்த் துரத்துவது வாடிக்கை ! ஒழுக்கமான மனுஷன் ; எப்படிப்பட்ட சிக்கல்களிலும் கலங்காதவர் ! பார்க்க குட்டிப் பையனாட்டம் 'சிக்'கென்று இருந்தாலும் செம தில் பார்ட்டி !

2.இவரது கதை பாணி ஆக்ஷனா ? கார்ட்டூனா ? 

Without a doubt - இவை சகலமும் அதிரடி ஆக்ஷன் மேளாக்களே ! இந்தியாவுக்கு பயணமாகி, டில்லியில் கால்பதித்து, தொடர்ந்து திபெத்தில் சாகஸத் தேடல் ; ஸ்காட்லாந்தின் ஆள் அரவமற்ற தீவினில் புலனாய்வு ; ஆழ்கடலுக்குள் புதையல் வேட்டை ; தென்னமெரிக்க இன்கா பூமியில் அசாத்திய அதிரடிகள் ; நிலவுக்குப் பயணமாகும் சாகசம் etc etc என இங்கே அடுக்கிக் கொண்டே போகலாம் ! ஆனால் கதைகளை செம தரமான நகைச்சுவை கலந்து சொல்லியிருப்பதே இந்தத் தொடரின் இமாலய வெற்றியின் பின்னணி ! டின்டினின் உற்ற நண்பரான கேப்டன் ஹாடாக் ஒரு உற்சாக பானப் பிரியர் & முணுக்கென்றால் மூக்கின் மேல் கோபம் வரும் சூடான பார்ட்டி ! அவர் அடிக்கும் லூட்டிகள் இந்தத் தொடரின் highlights என்றால் மிகையாகாது !! நிலாவுக்குப் பயணமாகும் ராக்கெட்டில் புறப்படும் மனுஷர் போகும் வழியிலேயே செம்மையாய் சுதி ஏற்றுக் கொண்டு, 'ஏய்..கதவை திறங்கப்பா...வாக்கிங் போகணும் !' என்றபடிக்கே விண்வெளியில் குதித்து, பாட்டுப் பாடிக் கொண்டே சுற்றிச் சுற்றி வருவதையெல்லாம் முதன்முறையாக ரசித்திடவுள்ளோர் கேப்டனுக்கு ரசிகர் மன்றம் வைக்கத் தீர்மானித்தால் வியப்பே கொள்ள மாட்டேன் ! அதே போல எந்நேரமும் ஆராய்ச்சியும், கையுமாய்த் திரியும் புரஃபஸர் கால்குலஸ் திடீரென்று கோபமாகி 'என்னோட ஜூடோ கலையைப் பாக்குறியா ? பாக்குறியா ?" என்று எகிறும் sequence நரசிம்ம ராவ்காருவைக்கூட நகைக்கச் செய்து விடும் ! கேப்டன் ஹாடாக் அடிக்கும் உயர்தரச் சரக்கை லேசாக நக்கிப் பார்த்த பின்னே, மனசாட்சியோடு போராட்டம் நடத்தி விட்டு "தீர்த்தத்தில்" குளித்து விட்டு, குத்தாட்டம் போடும் ஸ்நோயியை வாரி அணைக்கத் தோன்றாது போயின் ஆச்சர்யம் கொள்வேன் ! 'துப்பறிகிறோம் பேர்வழி' என்று முக்குக்கு முக்கு பல்ப் வாங்கும் டிடெக்டிவ் ரெட்டையர்கள்  தாம்ப்சன் & தாம்சன் (பெயர்களில் ஒரு "ப்" மட்டுமே வேறுபாடு) ; கோடீஸ்வர சுல்தானின் மகனான சேட்டைக்கார அப்துல்லா - என்று இந்தத் தொடரின் கதைமாந்தர்கள் ஒவ்வொருவருமே தத்தம் பாணிகளில் செம நேர்த்தியாய் காமெடி கலவையுடன் கதைகளை நகர்த்திட உதவி இருப்பதைக் காண முடியும் ! 

3.சரிப்பு....இந்த 24 ஆல்ப தொடரானது அப்படி எந்த வகையில் உலகத்தை ஆளும் ஒரு தொடராக சிலாகிக்கப்படுகிறது ? What is so special about it ?

இதோ - சிலபல தகவல்களை பகிர்ந்திடவா ? 

**எனது ஞாபகம் சரியாக இருக்கும் பட்சத்தில் இது வரையிலும் 128 உலக மொழிகளில் டின்டின் பிரசுரிக்கப்பட்டுள்ளது ! We must be # 129 !!

**உலகெங்கும் இது வரையிலும் தோராயமாய் 30 கோடி பிரதிகள் விற்றுள்ளன !

**மனிதன் நிலாவில் கால் பாதித்தது 1969-ல் ! ஆனால் டின்டினின் கதைகளில் நிலாப்பயணம் தத்ரூபமாய்க் காட்சிப்படுத்தப்பட்டது அதற்கு 16 ஆண்டுகளுக்கு முன்னமே (in 1953 !!)

**2006-ல் தலாய் லாமாவிடம் "திபெத்தின் மெய் உணரும்" உச்ச விருதினை பெற்ற பெருமை டின்டினுக்கு உண்டு !

**காமிக்ஸ் நாயகராய் மட்டுமன்றி, தொலைக்காட்சித் தொடர்களாய் ; அனிமேஷன் திரைப்படங்களாய் ; 5 திரைப்படங்களாக  டின்டின் கோலோச்சியுள்ளார் ! (ஸ்டீவன்  ஸ்பீல்பெர்கின் கைவண்ணத்தில் ஹாலிவுட்டில் உருவான கடைசிப் படம் மொக்கை என்பது வேறு கதை !!) 

**டின்டினின் நிலாப்பயணம் ; திபெத் பயணம் ; இன்கா பூமிப் பயணமெல்லாம் செம popular வீடியோ கேம்களாக ரிலீஸ் ஆகியுள்ளன ! இதோ - நடப்பாண்டில் கூட டின்டின் இந்தியா வரும் சாகசம் வீடியோ கேமாகிடவுள்ளது !

**கடிகாரங்களில் ஆரம்பித்து, காப்பி குடிக்கும் mug ; சாக்லேட் ; கீ-செயின் ;  டி-ஷர்ட் ; வாட்ச் ; வாட்டர் பாட்டில் etc etc என்று டின்டினின் உருவத்தைத் தாங்கி நிற்கும் பொருட்கள் எக்கச்சக்கம் ! பெல்ஜியத்தில் போய் இறங்கினால், மூன்று விஷயங்கள் தவிர்க்க இயலா அத்தியாவசியங்களாகிடுவதை நானே உணர்ந்திருக்கிறேன் ! முதலாமவது  பெல்ஜிய சாக்லேட் ; இரண்டாவது : உருளை கிழங்கில் அவர்கள் செய்யும் fries (இது french fries என்று அழைக்கப்பட்டாலும் தாய்வீடு பெல்ஜியமே !!) மூன்றாவது : டின்டின் !

**எண்ணற்ற தபால்தலைகள் டின்டினை கௌரவிக்க வெளியிடப்பட்டுள்ளன !அது மாத்திரமன்றி, பெல்ஜிய நாணயங்களிலும் டின்டினின் வதனம் பொரிக்கப்பட்டுள்ளது !

**1929-ல் முதன் முதலாய் உலகினை டின்டின் பார்க்க நேரிட்டது ஒரு பெல்ஜிய தினசரியின் சிறுவர் மலர் இணைப்பினில் !  "ஹெர்ஜ்" என்ற புனைப்பெயரில் அதனை உருவாக்கிய ஜாம்பவானின் நிஜப் பெயர் Georges Prosper Remi ! 

**80 ஆண்டுகளுக்கு முன்பாக உருவான சாகசம் கூட இன்றைக்கும் இம்மி கூடப் புராதன நெடியின்றி தெறிக்க விடுகிறது !

**ஒரு ஆல்பத்தின் அட்டைப்படத்துக்கென ஹெர்ஜ் உருவாக்கி, அப்படியே கிடந்து போனதொரு ஓவியம் 2021-ல் இருபத்தியெட்டுக் கோடி ரூபாய்களின் இணையான தொகைக்கு ஐரோப்பாவில் ஏலம் போயுள்ளது ! உலகிலேயே மிக காஸ்ட்லியான காமிக்ஸ் சித்திரம் என்ற பெருமையை இது ஈட்டியுள்ளது ! 

**உலகளாவிய மொத்த விற்பனை எண்ணிக்கைகளில் நமது லக்கி லூக் ; சுஸ்கி & விஸ்கி - டின்டினுக்கு tough தரும் ஆற்றல் கொண்டிருப்பதாய்த் தெரியலாம் தான் ! ஆனால் பெரியதொரு வித்தியாசமுண்டு - becos வெறும் 24 ஆல்பங்களைக் கொண்டே டின்டின் சாதித்திருப்பதை மற்ற தொடர்கள் மிக மிகக் கூடுதலான ஆல்பங்களின் எண்ணிக்கைகளோடே சாதித்துள்ளன ! 

**ஹெர்ஜின் அந்தத் தெளிந்த நீரோடை போலான சித்திர பாணி பிராங்கோ-பெல்ஜிய காமிக்ஸ் உலகினில் ஒரு மைல்கல்லாக பார்க்கப்படுகிறது ! Ligne Claire என்று அழைக்கப்படும் இவரது இந்த கிரிஸ்பான சித்திர பணியினை பின்னாட்களில் கணிசமான ஓவியர்கள் பின்பற்றியுள்ளனர் !

இப்போது சொல்லுங்களேன் guys - இந்த நாயகர் நமது சிலாகிப்புகளுக்கு உகந்தவரா ? இல்லையா என்று ?!

ரைட்டு....'ரமணா' mode-ல் இருந்து, மறுபடியும் முழியாங்கண்ணன் mode-க்குத் திரும்பிடலாமா ? டின்டின் எனும் ஜாம்பவானை தமிழில் உலவச் செய்ய வேண்டுமென்பது துவக்க நாட்கள் முதலே எனது கனவென்பதில் no secrets ! 1985-ல் பிராங்கபர்ட் புத்தக விழாவினில் - திறந்த வீட்டுக்குள் எதுவோ நுழைந்தது போல, டின்டின் பதிப்பக ஸ்டாலில் புகுந்து ரைட்ஸ் கேட்டு, செம பல்பு வாங்கியதைப் பற்றி ஏற்கனவே எழுதியுள்ளேன் தானே ? "பல்பு படலம்" அத்தோடு ஓய்ந்திருக்கவில்லை என்பது தான் மேட்டரே ! நமது இரண்டாவது இன்னிங்ஸ் துவங்கிய பிற்பாடு, தரத்தில், கலரில், கணிசமான  முன்னேற்றங்களுடன் உலவிடுகிறோமே என்ற தகிரியத்தில் டின்டின் என்ற மாமரத்தினை நோக்கி கல் வீசினால் நிச்சயமாய் மடியில் பழம் விழும் என்ற குருட்டு நம்பிக்கை எப்படியோ உள்ளுக்குள் குடியேறி இருந்தது ! So 2016-ன் ஒரு சுபயோக சுபதினத்தினில் ஜூனியர் எடிட்டரும், நானுமாய் படைப்பாளிகளின் முன்னே ஆஜராகியிருந்தோம் ! 

'நேரா போறோம்...நம்ம புக்ஸ காட்டுறோம்...பேசறோம்....full cash அஞ்சே நிமிஷத்தில் வாங்கிட்டு திரும்பறோம் !" என்று செம கெத்தாய் ஜூனியரிடம் பில்டப்பெல்லாம்  தந்து வைத்திருந்தேன் ! அங்கே பொறுப்பிலிருந்த டாப் நிர்வாகி எனக்கு ஏற்கனவே  பரிச்சயமானவர் என்பதால் நிச்சயம் காரியம் ஜெயமாகிடும் என்ற நம்பிக்கை ! அன்பாய் வரவேற்றார் ; நட்பாய்ப் பேசினார் தான் ; ஆனால் தான் நிர்வகிக்கும் டின்டின் பத்தோடு பதினொன்று ரகமல்ல என்பதால் ஹெர்ஜ் அவர்களின் எஸ்டேட் உலகெங்கும் விதித்திடும் கணிசமான நிபந்தனைகளுக்கு ; தரம் சார்ந்த எதிர்பார்ப்புகளுக்கு ஈடு தந்திட இயன்றாலொழிய உரிமங்கள் சாத்தியமே ஆகாதென்று கண்ணியமாய்ச் சொன்னார் ! அந்த நொடியில் நமது உசரமென்ன ? என்பது மெய்யாலுமே எனக்குப் புரிந்தது ! உள்ளூரில் நாம் பெத்த சண்டியர் என்றாலும், அசலூர்களின் ஒப்பீட்டில் நாம் இன்னமுமே பச்சை மண்களே என்பதை மறுக்க முடியவில்லை !  நண்பரின் பேச்சிலிருந்த நயமான லாஜிக் ; நியாயம் எல்லாமே ஸ்பஷ்டமாக மண்டையில் ஏறியது ! அந்த நொடியினில் வீராப்பாய்ப் பேசி உரிமைகளுக்குத் துண்டைப் போட்டிருக்கலாம் தான் ; but எனக்கே அந்தத் தருணத்தினில் நாமின்னும் டின்டினுக்கு ரெடியாகவில்லை என்பது புரிந்தது ! So இன்னமும் உரம் சேர்த்துக் கொண்டதொரு பின்னாளில் மீண்டும் வருகிறோமென்று சொல்லி விட்டு விடைபெற்றோம் ! 

In hindsight - அதுவே சரியான தீர்மானம் என்பது புரிகிறது ! தயாரிப்பின் டெக்னிக்கல் விஷயங்களில் கணிசமான முன்னேற்றங்கள் இடைப்பட்டிருக்கும் இந்த 7 ஆண்டுகளில் அரங்கேறியுள்ளன ! And அவற்றை நடைமுறைப்படுத்திட ஏற்ற தொழில் நுணுக்கங்கள் நம்மிடம் உள்ளனவா ? இல்லையா ? என்று பகுத்தாய்ந்திடவும் இந்த ஏழாண்டுகள் உதவியுள்ளன ! So தெளிவானதொரு திட்டமிடல் சகிதம், போன ஆண்டினில் டின்டின் குழுமத்தின் முன்னே மறுபடியும் ஆஜரானேன் ! இடைப்பட்ட காலங்களில் நாம் என்ன செய்து வருகிறோம் ? எந்தெந்த பதிப்பகங்களோடெல்லாம் கரம் கோர்த்து வருகிறோம் ? என்பதை அவர்களுமே கவனித்து வந்துள்ளனர் ! நிறைய பேசினோம் ; நிறைய கேட்டுக் கொண்டேன் ; நிறைய புரிந்தும் கொண்டேன் ! And இறுதியாய், கிட்டத்தட்ட 5 மாதங்களின் பிரயத்தனங்களின் பின்பாய், அவர்களின் இசைவும் கிட்டியது ! இந்த பிப்ரவரியில் ராயல்டி தொகையினையும் செலுத்தி கோப்புகளை வாங்கிய நொடியில் எனக்குள் ஏதேதோ நினைவுகள் - கலவையாய் !

17 வயதான பொடிப்பயலாகக் காமிக்ஸ் உலகினுள் கால்பதித்த வேளையில் உலகைத் தூக்கி நிறுத்தப் போகிறோமென்ற உத்வேகமோ ; கடைசி வரைக்கும் இந்தத் துறையினில் தொடர்வோமேன்ற கனவுகளெல்லாம் என்னுள் இருந்ததில்லை ! பத்திரிக்கை துறையினில் காலம் தள்ள வேண்டுமென்ற லட்சியமெல்லாம் அது என்னவென்று தெரியாமலே இருந்தது தான் ; ஆனால் படித்து, முடித்து, ஆபீசில் அமர்ந்த பிற்பாட்டுக்கு அதெல்லாம் தானாய் நிகழும் என்றே எண்ணியிருந்தேன் ! But 'அம்போ'வென நட்டாற்றில் விடப்பட்டிருந்த 1983-ல் - "காலேஜ் போகாமல் வெட்டியாய் ஊரைச் சுற்றித் திரிகிறானே" - என்ற பரிகாசத்துக்கு ஆளாகிடப்படாதே !! காலேஜ் போவதைக் காட்டிலும் எனக்கு முக்கியமான ஒரு புழைப்பு உள்ளதென்று" என் நண்பர்களிடம் சொல்லிக் கொள்ள ஒரு முகாந்திரம் மட்டுமே பிரதானமாய்த் தேவைப்பட்டிருந்தது ! ஆக ஏதோவொரு நோக்கில் ; ஏதோவொரு கட்டாயத்தில், 1984-ல் இத்துறையினுள் அமிழ்ந்திட நேர்ந்தது என்பதே நிஜம் ! So "அன்றைக்கே டின்டின் போடணும் ; சூப்பர்மேன் போடணும் ; மிக்கி மவுஸ் போடணும் ; டெக்ஸ் வில்லர் போடணும் என்றெல்லாம் நெற்றியில் வீரத் திலகமிட்டு வீர சபதம் எடுத்தேன் ; சூளுரைத்தேன் " என்று சினிமா பாணியில் அள்ளி விட என்னிடம் flashback லேது ! 

எனது பால்யங்களை வண்ணமயமாக்கிய கதை நாயகர்களை உங்களிடமும் காட்டிட வேணும் ; அந்த முயற்சியில் கெளரவமாய் ரெண்டு காசு சம்பாதிக்க முடிந்தால், வீட்டிலிருந்த கஷ்டங்களுக்கு சன்னமாகவாச்சும் நிவாரணம் கிடைக்குமே ?! என்பதே அந்த நேரத்தின் சிம்பிளான கனவாக இருந்தது ! என் தாத்தாவின் ரூபத்தில் ஆண்டவன் துணை நின்றார் ; ஏதேதோ செய்தேன் ; ஸ்பைடர் கைகொடுத்தார் ; ஆர்ச்சி அடுத்த படியேற உதவினார் ; டெக்ஸ் வில்லரெனும் ஜாம்பவான் தனது குதிரையின் ஓரத்தில் தொற்றிக் கொள்ள வாய்ப்புத் தந்தார் ; ஜாலி ஜம்பருக்குப் போட்ட தீவனத்தில் ஒரு கையை நமக்கும் போட்டார் லக்கி லூக் ; பிராங்கோ-பெல்ஜிய காமிக்ஸ் உலகு நம்மை தத்தெடுத்துக் கொண்டது ; இத்தாலிய காமிக்ஸ் உலகம் குளிர் தெரியாதிருக்கப் போர்வை தந்தது ; பசி அறியாதிருக்க அன்பானதொரு வாசக வட்டம் வாய்த்தது - and இதோ 39 ஆண்டுகளுக்குப் பின்பாய் டின்டின் எனும் சிகரத்தினை தொட்டுப் பார்க்கும் அண்மையில் நிற்கின்றோம் ! 

'அட...நாம பாக்காத காமிக்சா ? வாரம் ஒரு புதுத் தொடரெல்லாம் பார்த்தவுக தானே நாமெல்லாம் ? இதிலே சிகரம்...தகரம்னுலாம் திடீர் செண்டிமெண்ட் சப்போட்டாவைப் புளியோ புளியென்று புளிவானேன் ?' என்ற உங்களின் மைண்ட்வாய்ஸ் எனக்குக் கேட்கிறது guys ! My answer is pretty simple : 

பெர்சனலான ஒரு பெரும் கனவு நனவாகிடுவதன் மகிழ்வு மாத்திரமே இது ! நிறைய பயணித்துள்ளோம் ; நிறைவாய்ப் பயணித்தும் உள்ளோம் ; ஏகப்பட்ட கதை நாயகர்களோடு அன்னம்-தண்ணீரெல்லாம் புழங்கியும் உள்ளோம் தான் - but உங்களுக்கெல்லாமே ஸ்பைடர் மீது ; மாயாவி மீது ; சுஸ்கி-விஸ்கி மீதென்ற மறக்க முடியா பால்யக் காதல்கள் உள்ளதைப் போல எனக்குமே 4 மெகா காதல்கள் இருந்ததுண்டு ! And இத்துறைக்குள் நீடிக்கும் வரம் கிட்டிய பிற்பாடு, அவற்றை உங்களோடும் பகிர்ந்திடும் பெரும் கனவிருந்து வந்துள்ளது ! வேதாளர் எனது காதல் # 1 என்றால், டெக்ஸ் வில்லர் கனவு # 2 !  And காதல் # 3 - ஆஸ்டெரிக்ஸ்  & காதல் # 4 - சாட்சாத் டின்டின்னே தான் ! 

இங்கே ஐயமின்றி முடி சூடிய சக்கரவர்த்திகள் ஆஸ்டெரிக்ஸ் & ஒபெலிக்ஸ் ஜோடியே ! ஆல்பம் ஒன்றுக்கு கிட்டத்தட்ட 45 லட்சம் புக்ஸ் விற்பனையாகின்றன இன்றைக்கு ! இதோ, காத்திருக்கும் அக்டொபரில் அடுத்த ஆல்பம் வரவுள்ளதாம் ; பிரெஞ்சு புத்தக விற்பனையாளர்கள் அத்தனை பேரும் சப்புக் கொட்டிக்கொண்டு காத்துள்ளனர் ! And இங்கே ஒரு கொடுமை என்னவென்றால் சுமார் 20 ஆண்டுகளுக்கு முன்பு வரைக்கும் ஆஸ்டெரிக்ஸ் தொடருக்கான உரிமைகளை சந்தை செய்து வந்தது நமக்கு ரொம்பவே பரிச்சயமான நிறுவனம் தான் & அந்த நாட்களில் இந்தத் தொடரின் விற்பனைகளும் இத்தனை அசாத்திய உச்சங்களில் இருந்திருக்கவில்லை ! So நாம் நியூஸ்பிரிண்ட்டில் குப்பை கொட்டிக் கொண்டிருந்த காலகட்டங்களில் சீரியஸாக முயன்றிருந்தால் maybe ஆஸ்டெரிக்ஸ் தமிழ் பேசி இருக்கக் கூடும் ! ஆனால் இந்தக் கதைத் தொடரின் முதுகெலும்பே மொழிபெயர்ப்பும், பெயர்களை வைத்துச் செய்திடும் பகடிகளும், பிரெஞ்சு மண் சார்ந்த வட்டார வழக்கிலான காமெடிகளிலுமே எனும் போது - இவற்றை மொழிமாற்றம் செய்து அதே ரீதியிலான வெற்றிகளை ஈட்ட முடியுமா ? என்பதில் ஒரு நூறு சந்தேகங்கள் இருந்தன & இருக்கின்றன ! So ஜாம்பவான்களை அண்ட ஒரு வித பயம் இருப்பதே நிஜம் ! 

எஞ்சியிருந்த 3 கனவுகளில் டெக்ஸை வெகு காலம் முன்பே நனவாக்கியாச்சு & வேதாளரை சமீபத்தில் ! So டின்டின் மட்டுமே எட்டா உயரத்தில், எட்டா கனவாகவே தொடர்ந்திட, அவரை அண்டும் ஆவல் மட்டும் உள்ளுக்குள் கனன்று கொண்டே இருந்தது ! And இதோ - தொடும் தூரத்தினில் அந்தக் கனவுமிருக்க, விக்கிரமன் பட பாணியினில் சென்டிமென்டை பிழிவதைத் தவிர்க்க இயலவில்லை guys ! "உயிரைத் தேடி" போலான உங்களின் பால்யத்துக் கனவொன்று நனவாகிடும் வேளையில், நீங்கள் கொள்ளும் உற்சாகத்துக்கு ஈடாக இதைப் பார்த்து விட்டு மன்னிச்சூ ! ஏழு கழுதை வயசான பின்னேயும் எப்போதாச்சும் ஒரு உற்சாகத் துள்ளலில் தப்பில்லீங்களே ? 

So இதுவே நிலவரம் ! கிட்டத்தட்ட இரண்டரை மாதங்களுக்கு முன்பாகவே உரிமைகளை வாங்கிய பிற்பாடு, வாகானதொரு தருணத்தினில் அறிவிக்கும் பொருட்டு வாய்க்கு பெவிகால் போட்டு வைப்பதற்குள், போதும்- போதுமென்றாகிப் போச்சு ! இனியும் தாமதித்தால் மண்டை தாங்காதென்பதால் சொல்லியாச்சு ! இனி திட்டமிடலைப் பற்றியும் சொல்லிடடுங்களா ? 

*உலகெங்கும் வெளியாகிடும் அதே சைசில் ; அதே அமைப்பில் ; அதே அட்டைப்படங்களுடன் இங்கும் வந்திட வேண்டுமென்பது அவசியம். So மேக்சி சைசில் 64 பக்கங்களுடன் முழு வண்ணத்தில் டின்டின் உங்களை சந்திக்கவுள்ளார் ! 'இந்த லே-அவுட் லுச்சாவா இருக்கு ; இந்த சைஸ் பேஜாரா கீது ; இதுக்கு பாக்கெட் சைஸ் தான் குன்சா இருக்கும்' போன்ற அபிப்பிராயங்களுக்கு துரதிர்ஷ்டவசமாய் இங்கே இடமிராது ! Sorry guys ! 

*இதன் தயாரிப்புப் பணிகளுக்கு நம்மிடமுள்ள திறன்கள் போதாதென்பதால், அடுத்தகட்ட தொழில்நுட்பங்கள் கொண்டிருக்கும் வெளிமாநில அச்சுக் கூடத்திடமே பணிகளை ஒப்படைக்கவுள்ளோம் ! 

*சந்தாவினில் இடம்பிடித்திருக்கா இதழ் எனும் போது - இது முன்பதிவுக்கென்ற ரூட்டில் தான் பயணித்திட வேண்டியிருக்கும் ! 

*சந்தாவோடயே சொல்றதுக்கு என்ன கொள்ளை உனக்கு ? பிரிச்சி பிரிச்சி பணம் அனுப்பிட்டே இருக்கணுமா ?" என்ற மைண்ட்வாய்சா ? Sorry folks ; certain things are not in my control ! சில தருணங்களில் நமது முயற்சிகள் காயாகி, கனியாகி, கூடைக்குள் விழுந்திட எத்தனை அவகாசம் பிடிக்குமென்பதை கணிக்க இயல மாட்டேங்குது ! போன வருஷத்தின் பிற்பாதியினில் துவங்கிய முயற்சிகள் இதோ - இந்த பிப்ரவரி வரைக்கும் எடுத்துள்ளது ! So முறையாய் அறிவிப்பு வரும் ; அதற்கேற்ப கணிசமான அவகாசம் தந்து முன்பதிவுகளைத் துவக்கிடுவோம் !

*நடப்பாண்டின் ஆகஸ்டில் - ஈரோட்டில் டின்டின் உங்களை சந்திக்க ரெடியாகிடுவார் என்பதே இந்த நொடியின் சிந்தனை ! And இந்தத் தொடரின் தெறிக்க விடும் top சாகசம், 2 பாக த்ரில்லராய் 'ஏக் தம்மில்'  வெளிவரவிருக்கின்றது   ! 7 CRYSTAL BALLS & PRISONERS OF THE SUN" என்ற பெயர்களில் இங்கிலீஷில் வெளியான டபுள் ஆல்பம்ஸ் - "7 ஸ்படிகப் பந்துகள்" + "கதிரவனின் கைதிகள்" என்று தமிழில் காத்துள்ளன ! 

*அதைத் தொடரவிருப்பன 2 தெறிக்கும் சிங்கிள் ஆல்பம்ஸ் ! ஆண்டொன்றுக்கு 4 ஆல்பங்கள் என்பதே திட்டமிடல் !

So தற்போதைய ஆன்லைன் மேளாவின் ஆர்டர்களை அனுப்பி முடித்த கையோடு விரைவிலேயே, டின்டின் முன்பதிவு குறித்த விபரங்களைப் பகிர்ந்திடுவோம் - எனது உற்சாகம் உங்களையும் தொற்றாது போகாதென்ற நம்பிக்கையில் !!! புனித மனிடோ எப்போதும் போலவே நம்மை வழிநடத்துவாராக ! 

Bye folks ..have a beautiful day ! ஆன்லைன் மேளா களை கட்டட்டும் !!

ஒரு நெடும் வாரயிறுதியில்....

 நண்பர்களே,

வணக்கம். 'வந்தே பாரத்' ரயில் பெட்டிகளாட்டம் பணிகள் ஒன்றன் பின் ஒன்றாய்ப் படையெடுக்க - இந்த வாரமானது புலர்ந்ததும் தெரியக் காணோம் ; முடிவுக்கு வந்திருப்பதும் புரியக் காணோம் !! For that matter, ஒரு மாதத்துப் பணிகள் நிறைவுறுவது எப்போது ? ; அடுத்த மாதத்தின் வேலைகள் துவங்கிடுவது எப்போதென்றே தெரியாததொரு நிலையில் "உயிரைத் தேடி" கதையில் ஆங்காகே வலம் வரும் அந்த ஸோம்பிக்களைப் போலவே சுற்றி வருகின்றேன் ! பற்றாக்குறைக்கு இதுவொரு நெடும் வாரயிறுதி எனும் போது - காத்துள்ள மே தினத் திங்களின் ஆன்லைன் மேளாவுக்கும், அன்றைக்கான ஜாலி பதிவுக்கும் தயார் ஆகிக்கின வேண்டி கீது ! படா டமாஷ் தான் வாத்தியாரே ! இதன் மத்தியில் மே மாத புக்ஸ் மூன்றும் ரெடியாகி எனது மேஜையில் 'தேமே' என உறங்கிக் கொண்டிருக்கின்றன ! நல்ல காலத்துக்கு மூன்றிலுமே எனக்கான பணிகள் மித ரகமே என்பதால் அடுத்த சில நாட்களில் I should be able to breeze through them - hopefully !

And இப்போவே சொல்லிக்கிறேன் guys - மே மாதத்தின் ரெகுலர் இதழ்கள் உங்களை மே 10 தேதிவாக்கிலேயே வந்து சேரும் ! பைண்டிங்கில் தொடர்ந்து பணிமழை பொழியச் செய்துள்ளோம் எனும் போது , அவரும் கொஞ்சம் மூச்சு விட அவகாசம் கோரியுள்ளார் ! So "ஏப்ரலில் மே உண்டா நைனா ?" என்ற கவித்துவக் கேள்விகள் வாணாமே - ப்ளீஸ் ? ஆன்லைன் மேளாவின் புக்ஸ் despatch விடுமுறை முடிந்த மறுநாள் துவங்கிடும் என்பதுமே இங்கே கொசுறுச் சேதி ; தொடர்ந்து இந்த வாரம் முழுக்கச் சாத்தி வந்து கொண்டிருக்கும் மதிய / மாலை மழைகள் பைண்டிங் வேலைகளுக்கு செம இடையூறாகி வருகின்றன ! இதோ, இந்தப் பதிவினை டைப்பும் இந்த வேளையில் கூட வர்ண பகவான் வெளுத்து வாங்கிக் கொண்டிருக்கிறார் ! கோடையில் வருண பகவானின் கொடையானது கொஞ்சமே கொஞ்சமாய் தாமதமாகிடும் பட்சத்தில், ஹார்ட் கவர் இதழ்கள் நன்றாகக் காய்ந்து விடவும், உங்களை எட்டிப்பிடித்திடும் வேளைகளில் கேக் டப்பிக்களைப் போல 'ஜம்'மென்று இருக்கவும் உதவிடும் ! Fingers crossed ! 

"மே 1 ஒரு நாளுக்கான ஆன்லைன் மேளா நீட்டிப்புக்கோசரம் புச்சா பொஸ்தவம் ஏதாச்சும் இல்லீங்களா ?" என்ற வினவல்களும் ஆங்காங்கே கண்ணில் படாதில்லை தான் ! ஏற்கனவே தயார் செய்திருக்கும் "பரபர 10" க்கே நாக்கு, மூக்கு, முழியாங்கண் என்ற சகல அவயங்களும் திசைக்கு ஒன்றாய்த் தொங்கி நிற்க, இது போதாதென இன்னும் புதுசாய் இழுத்து விட்டால், நம்மாட்கள் சொல்லாமல் கொள்ளாமல் சந்நியாசம் வாங்கிப்புடுவாங்க ! So ஜாலி பதிவைக் கொண்டு அந்த விடுமுறை நாளை அஜீஸ் பண்ணிக்கோங்க guys ! And இந்த நொடியில் இங்கொரு அன்பின் அடையாளத்தினை பகிர்ந்திடாது இருக்க இயலவில்லை ! சென்னையைச் சார்ந்த நண்பர் ; காமிக்ஸை செமத்தியாக லவ்வுபவர் - ஆன்லைன் மேளாவின் பொருட்டு நம்மாட்கள் திணற திணறப் பணியாற்றியுள்ளதற்குத் தனது பாராட்டினைத் தெரிவிக்கும் விதமாய், கிருஷ்ணா ஸ்வீட்சிலிருந்து மிரளச் செய்யும் தொகைக்கான இனிப்புகளையும், காரங்களையும் வாங்கி கூரியரில் அனுப்பியுள்ளார் ! நம் வீட்டுக்கு வாங்கவே நிர்மலா சீதாராமன் மேடம் ரேஞ்சுக்கு யோசித்து பட்ஜெட் போட அவசியமாகிடும் இந்நாட்களில், நண்பரின் இந்தப் பெரிய மனசு மலைக்கச் செய்கிறது ! டீம் சார்பில் பதினோறாயிரம் நன்றிகள் சார் !  இத்தகைய அசாத்தியங்களெல்லாம் நம்மூர்களின் வெகுஜனப்  பத்திரிகைகளின் எடிட்டர்களுக்கு கூட அனுபவிக்கக் கிடைக்குமா ? என்ற கேள்வியே என்னுள் இந்த நொடியில் ஓடிடுகிறது ! Truly blessed !

ரைட்டு...மே புலர சொற்ப இடைவெளியே உள்ள தருணத்தினில் அவற்றின் previews-க்குள் நுழையலாமுங்களா ? 

To start off - மே மாதத்தின் பிரதம நாயகர் நமது இரவுக் கழுகாரே தான் ! வெள்ளி முடியாரும் உடனிருக்க, பரந்த புல்வெளிகளில் ஒரு காதல் யுத்தத்தில் பஞ்சாயத்துப் பண்ணும் பொறுப்பேற்கிறார்கள் - தெறிக்கும் ஆக்ஷனுடன் ! இது உருவாக்கப்பட்டதே கலரில் என்பதால், செம அழகான வர்ணங்களில் பக்கங்கள் மிளிர்கின்றன ! எனது ஞாபகம் சரியாக இருக்கும் பட்சத்தில் இந்த ஆல்பம் பற்றி நாம் முதலில் பேசியது 2021-ன் (இரண்டாம்) லாக்டௌன் சமயத்தில் ! "தினத்துக்குமொரு பதிவு" என்று ஏதேதோ லூட்டியடித்த அந்த நாட்களின் போது shortlist செய்யப்பட கதை இது ; கிட்டத்தட்ட 2 ஆண்டுகளுக்குப் பின்பாய் வெளிச்சத்தைப் பார்த்திடவுள்ளது !  எங்கோ வாசித்த நினைவுள்ளது - "கொரியன் சினிமாக்கள் அப்படியே நமது சென்டிமென்ட்ஸ் ; நமது உணர்வுகளைப் பிரதிபலிக்கும் விதமிருப்பதால் தான் நம்மாட்கள் அங்குள்ள சீரியல்களை, திரைப்படங்களை inspiration ஆக அடிக்கடி எடுத்துக் கொள்கின்றனர்" என்று ! Maybe டெக்சின் உலகமுமே பல விதங்களில் நம்ம கோலிவுட் படைப்பாளிகளுக்கான inspiration ஆக இருந்திடுமோ - என்னமோ ; சூப்பராய் நாலு பாட்டு, ஐட்டம் டான்ஸ் என்று மட்டும்  இக்கதையுடன் சேர்த்து ரெடி பண்ணினால், சில்வர் ஜூப்ளி confirmed ! இதோ - இந்த கலக்கல் கலரிலான ஆல்பத்தின் preview : 

ஒரிஜினல் அட்டைப்படமே ; சின்னதான வர்ண மெருகூட்டலோடு ! And அந்த எழுத்துரு - உபயம் நண்பர் ஜெகத் !

And புதியதொரு ஓவிய பாணியில் உட்பக்கங்கள் செம தெளிவாய் இருப்பது, தெளிவான இந்தக் கதையோட்டத்துக்கு உரம் சேர்ப்பதாய் நினைத்தேன் ! இதோ - பாருங்களேன் :

So கண்களுக்கு இதமானதொரு 'தல' சாகசம் உங்களுக்கு வெயிட்டிங் ! 

Moving on, மே மாதத்து புக் # 2 கூட ஒரு வன்மேற்கின் ரகளை தான் ! ஆனால் இம்முறையோ - ரொம்பவே அழகான பாணியில், வன்மேற்கின் யதார்த்த முகத்தை அங்கே குடிபெயர ஐரோப்பாவிலிருந்து புலம்பெயர்ந்திடும் ஒரு குடும்பத்தின் பயணத்தோடு சொல்லியுள்ளனர் ! வன்மேற்கின் அத்தியாயம் - 1 என்ற tagline சகிதம் வரக்காத்துள்ள இந்தத் தொடரானது இத்தாலியில் செம popular ! இங்கே நம் மத்தியிலும் இதற்கு அழகானதொரு வரவேற்பு கிட்டினால் இது நம் மத்தியில் ஒரு நிரந்தரமாகிடக் கூடும் என்பேன் ! இதோ - ஒரிஜினல் அட்டைப்படமும், உட்பக்க பிரிவியூவும் :

மொழிபெயர்ப்பு நமது கருணையானந்தம் அவர்கள் என்பது அந்த பிரிவியூ பக்க வாசிப்பிலேயே புரிந்திருக்கும் என்று நினைக்கிறேன் ! க்ளாஸிக் கதைக்கு ஏற்ற க்ளாஸிக் பாணி !

மே மாதத்தின் ஒரே black & வைட் இதழாக ஆஜராகவுள்ளது நமது V காமிக்சின் "தப்புத் தப்பாய் ஒரு தப்பு !" ஏஜெண்ட் ராபினின் அந்த 2.0 அவதார் தொடர்ந்திட, செம crisp ஆக இந்த இரண்டாம் சாகசமும் அமைந்துள்ளது ! மார்வின் மற்றும் முழு டீமும் ஆஜராகிட, நியூயார்க்கின் குற்ற முகத்தினை ராபினோடு பார்த்திடக் காத்திருக்கிறோம் ! As always மின்னலாய் பறக்கவுள்ளதொரு வாசிப்பை வழங்க V வெயிட்டிங் ! இதோ - yet another ஒரிஜினல் அட்டைப்படத்துடனான ஆக்கம் : 

So காத்துள்ளது ஒரு செம விறுவிறுப்பான மாதம் guys ! அவற்றின் பணிகளை நிறைவு செய்திடப் புறப்படும் கையோடு சின்னச் சின்னதாய் சில updates :

1 .தானைத் தலைவர் இங்கிலாந்தில் மறுக்கா பட்டையைக் கிளப்பி வருகிறார் போலும் - "விண்வெளிப் பிசாசு" நெடும் ஜாகஜம் மறுபதிப்புக் கண்டுள்ளது ! நமது டாக்டர் சாரிடம்  ஒரிஜினல் மொழிபெயர்ப்பினை மேம்படுத்தக் கோரி விட்டு இதனை களமிறக்கிப்புடலாமா கவிஞரே ? 

2. தலைவரைப் போலவே இரும்புக்கையாருமே அங்கே doing well போலும் ! வரிசையாய் கதைகளைத் தேர்வு செய்து, அட்வொர்க் மேம்படுத்தல் செய்து வெளியிட்டு வருகிறார்கள் ! சீக்கிரமே "பறக்கும் பிசாசு" & "ஒற்றைக்கண் மர்மம்" வரலாம் போலும் ! 

3.நமது ப்ளூ ஜீன்ஸ் பில்லியனரின் புது சாகசத்தை க்ளைமாக்ஸ் பாகம் இந்தாண்டின் இறுதியில் வெளி வரவுள்ளது ! அதன் மத்தியில் லார்கோவின் திரை அவதார் மறுக்கா  வேகமெடுத்துள்ளது ! "டாலர் ராஜ்ஜியம்" என்ற பெயரில் நாம் வெளியிட்ட ஆல்பத்தின் ஒரிஜினலைத் தழுவி படப்பிடிப்பு பால்கெரியாவில் துவங்கியுள்ளதாம் ! தொடர்ந்து தாய்லாந்திலும், பெல்ஜியத்திலும் ஷூட்டிங் காத்துள்ளதாம் !

4.புதியதொரு ஹாரர் சிறுகதைத் தொடரின் உரிமங்கள் வாங்கிட ரெடியாகி வருகிறோம் ! ஹாரர் உங்களுக்கு ரசிக்குமா guys ? ஒன்றிலிருந்து பத்து வரைக்குமான ஸ்கேலில் மார்க் போடுவதாயின் ஹாரர் ஜானருக்கு உங்களின் மதிப்பெண்கள் என்னவாக இருக்குமோ ?

5.அதே போல, கீழ்க்கண்ட சமீப வரவு நாயகர்களுக்கும் மார்க்ஸ் போட ரெடியா folks ?

• SODA - ? /10 
• டேங்கோ - ?/10 
• ஏஜெண்ட் சிஸ்கோ : ?/10 

😀😎Bye all...திங்களன்று ஜாலியான புதுப்பதிவில் மறுக்கா சந்திப்போமா ? And சின்னதொரு reminder கூட : மே 1-ம் தேதி மாத்திரம் நமது ஆன்லைன் புத்தக மேளா தொடர்ந்திடவுள்ளது !  See you around....have a cool long weekend !