கற்றது கைமண்ணே !

 நண்பர்களே,

வணக்கம். ஒரு புளியைக் கரைத்துக் கொண்டிருந்த மாதத்தை வெற்றிகரமாய்த் தாண்டி விட்டுள்ள திருப்தியோடு இந்தப் பதிவினில் புகுந்திடுகிறேன் ! வெளியே தெரிவது வேறு மாதிரி இருப்பினும், நிஜத்தில் ஆந்தை விழியன் ஒரு சோம்பேறி மாடன் என்பதே நிஜம் ! நமது இத்தாலிய மொழிபெயர்ப்பாளரின் டிசிப்ளினோ ; பிரெஞ்சு மொழிபெயர்ப்பாளரின் வேகமோ ; கருணையானந்தம் அவர்களின் ஈடுபாடோ நிச்சயமாய் எனக்கு  தொலைதூரக் கனவுகளே ! கடைசி நேரம் வரை ஜவ்வு இழுத்து விட்டு, அச்சுக்கான deadlines கண்ணில் தென்படத் துவங்கிய பிற்பாடே இங்கே எஞ்சின் சூடேறும். So டெக்ஸ் வில்லர் போன்ற ஜாலியான களங்களன்றி,  நான் பேனா பிடிக்க அவசியப்படும் இதர ஆல்பங்களை ஒன்றுக்கொன்று இடைவெளிகளோடு அமைந்திடச் செய்யவே அட்டவணையினில் திட்டமிட முனைந்திடுவேன் ! ஆனால் இந்த அக்டொபரிலோ ஏதேதோ காரணங்களின் பொருட்டு அது இயலாக்காரியமாகிப் போக, கிட்டத்தட்ட மூன்று ஆல்பங்களின் 75 % மொழிபெயர்ப்புப் பொறுப்புகள் வழுக்கைத் தலையின் மீது விழுந்து வைத்திட - ரொம்பவே பாம்பு டான்ஸ் ஆட வேண்டிப் போனது ! இளமை இக்கட துள்ளிக் குதித்துக் கொண்டிருக்கவில்லை என்பதை ஒவ்வொரு தினமும் ஏதோவொரு விதத்தில் சுட்டிக் காட்டி வரும் நிலையில் -பேனாவைத் தூக்கிக் கொண்டு குந்தியை வேலைகளிலெல்லாம், "இது உனக்குத் தேவையா ? தேவையா ?" என்ற கேள்வி தான் எழுந்தது ! ஆனால் சோம்பேறி சுப்பண்ணாவை எப்படியோ தாஜா செய்து பின்னுக்குப் போகச் செய்ததில் இம்மாதத்துக் கதைகள் ஒவ்வொன்றின் சுவாரஸ்ய quotient க்குப் பெரும் பங்குண்டு என்பேன் ! ஒவ்வொரு பணியின் மத்தியிலும் ஏதேதோ காரணங்களுக்காக நிறையவே இன்டர்நெட் தேடல்களும் அவசியமாகிப் போக, ஒவ்வொரு தேடலின் பலனிலும் நான் கற்றுக்கொண்டது நிறைய !  இம்மாத ஆல்பங்கள் பெயரளவிற்கு மூன்றே என்றாலும் - in effect 5 சிங்கிள் ஆல்பங்களின் கூட்டணியே  (2 ஜானி + 1 XIII spin off + 2 பாக "மா துஜே சலாம்") ! ஜானியின் combo ஆல்பத்தில் க்ளாஸிக் ஜானி மாமூலான template என்பதாலும், அங்கே கருணையானந்தம் அவர்கள் பேனா பிடித்துவிட்டதாலும் பெருசாய்த் தேடல்களுக்கு முகாந்திரங்கள் இருக்கவில்லை ! ஜானி 2 .0 தான் பாடங்கள் பல நடத்திய புண்ணியவான் ! For starters - உளறிக் கொட்டும் அந்தப் புத்தக விநியோகம் செய்யும் போக்கிரிப் பயல் வெப்ஸ்டர் ! "மட்டசீறல் ; துப்பறிவாளர் பானி ; பருப்பு ' என்று பெனாத்தித் திரிபவனுக்கு Dyslexia என்றொரு குறைபாடு இருப்பதாய் கதையோட்டத்தில் சொல்லப்பட, அதனைப் பற்றி மேற்கொண்டு கொஞ்சம் ஆராய்ந்திட முனைந்தேன் ! Yes of course , டிஸ்லெக்ஷியா பற்றிக் கேள்விப்பட்டுள்ளேன் தான் ; ஆனால் அதன் பின்னணி பற்றி நெட்டில் வாசித்த போது தான் இது எத்தனை ஆழமானதொரு சமாச்சாரம் என்பது புரிந்தது ! இங்கு கதாசிரியரின் குசும்புமே அழகாய் வெளிப்பட்டதை உங்களில் எத்தனை பேர் கவனித்தீர்களா - தெரியாது : வார்த்தைகளை ; உச்சரிப்புகளை சரியாய்க் கையாள தடுமாறும் அந்தப் போக்கிரிக்குத் தரப்பட்டிருக்கும் பெயரான "வெப்ஸ்டர்" - ஆங்கிலத்தினில் பிரபல டிக்ஷ்னரி வெளியிடும் கம்பெனியின் நிறுவுனரான நோவா வெப்ஸ்டரின் பெயரே ! (https://en.wikipedia.org/wiki/Noah_Webster) 

அடுத்த பாடம் படிக்கும் படலம் அரங்கேறியது சிலபல பிரெஞ்சுப் பெயர்களின் உச்சரிப்பு சார்ந்திருந்தது !

MARABOUT Publishing 

Bobigny 

Porsche 

Pierre Cardin 

Verviers 

மேற்படி வார்த்தைகளை ஆங்கில உச்சரிப்பின்படி தமிழாக்கம் செய்தால் என்ன கிட்டும் என்பதை நாமறிவோம் ! ஆனால் அவையே பிரெஞ்சுப் பெயர்களாகவோ ; பெல்ஜியத்து flemish பெயர்களாகவோ இருக்கும் பட்சங்களில் கிட்டிடும் உச்சரிப்புகளை நெட்டில் தேடிப்பிடித்துப் படித்த போது - 'அடங்கப்பா !!' என்று பெருமூச்சிட மட்டுமே முடிந்தது ! முதல் வார்த்தை "மேரபு" என்றும் ; பாரிஸின் suburb ஆன அடுத்த பெயரை  "பொபின்யீ  " என்றும் ; வார்த்தை # 3 குறிப்பிடும் பிரபல கார் வகையினை "போர்ஷா" என்றும் ; வார்த்தை # 4 சுட்டிக்காட்டும் உயர்தர fashion brand க்கு "பியர் கர்டோன்" என்றும் ; வார்த்தை # 5 அடையாளம் காட்டும் அந்த பெல்ஜிய சிறுநகருக்கு "வெர்வியே "  என்றும் உச்சரிப்பு என்பதை நாமாய் அறிந்திருக்க வாய்ப்பு தான் ஏது ? Of course - இவற்றைச் சரியாகவோ ; பிழையாகவோ உச்சரிப்பதால் கதையோட்டத்துக்கு எவ்வித பாதகமும் நேரப் போவதில்லை தான் & கிரீடங்கள் வழங்கப்படவோ ; பறிக்கப்படவோ வாய்ப்புகள் நஹி தான் ! ஆனால் நாம் கையாள்வது ஒரு பிரெஞ்சுக் கதை என்பதாலும், நம் மத்தியினில் பிரெஞ்சைப் பேசிடும் வாசகர்களும் உள்ளார்கள் எனும் போது - இது போன்ற சின்னஞ்சிறு பிழைகளும் தவிர்க்கப்பட வேண்டியவை என்றே பட்டது ! நம்மூர் 'பன்ருட்டி'யை அசலூரார் 'பன்ரொட்டி' என உச்சரித்தாலோ ; எழுதினாலோ நமக்கு சிரிப்பும், கடுப்பும் எழக்கூடும் தானே ? இதுவுமே அவ்வித சமாச்சாரமாகவே நான் பார்த்தேன் ! And yes - இன்னமுமே எனக்குத்  தெரியாது - if I got the pronounciations right ; ஆனால் இயன்றதை முயற்சித்துள்ளேன் என்பது மட்டும் தெரியும் ! 

பாடம் # 3 - கதை சார்ந்தது !  ஜானியின் கதைக்குள் சாகச வீரர் ரோஜர் இடம்பிடிப்பதை கதை படித்துவிட்டோர் அறிந்திருப்பர் ! ஆனால் அறிந்திருக்கக் கஷ்டமான சேதி - இந்தக் கதையினில் பயன்படுத்தப்பட்டுள்ள "மேரபு பதிப்பகம்" என்பது 1949 முதலாய் இயங்கிவரும் ஒரு நிஜ  பிரெஞ்சுக் கம்பெனி என்பதும் ; அதன் நிறுவனரின் நிஜப் பெயரும் ஜெரார்டு தான் என்பதும் ; அவர்களின் தலைமையகம் இருப்பதுமே வெர்வியே நகரில் தான் என்பதும்  ; பிளாஷ் புக்ஸ் என்ற பெயரில் அவர்கள் வெளியிட்டு வந்ததும் ; அந்நாட்களில் சாகச வீரர் ரோஜர் கதைகளை இந்நிறுவனம் வெளியிட்டதுமே !  கதையினில் தலைகாட்டும் (ரோஜரின்) கதாசிரியர் ஹென்றி வெர்ன்ஸ் கூட நிஜத்தின் பிரதிபலிப்பே என்பதை உணர்ந்த போது - மொத்த ஆல்பமுமே  எத்தனை தூரத்துக்கு யதார்த்ததோடு பின்னியுள்ளது என்பது புரிந்தது ! ஒன்றரையணா பிரயோஜனமற்ற தகவல்களாக இவையெல்லாமே தென்படக்கூடும் தான் ; ஆனால் எழுதும் போதே நடத்தும் இன்டர்நெட் தேடல்களில் கிட்டிய இந்தத் தகவல்கள் எல்லாமே எனக்கு striking ஆக தோன்றின ! Hence இந்தப் பகிர்ந்திடும் படலம் ! 

நிஜத்தோடு பிணைந்ததென்றில்லாது - கிட்டத்தட்ட நிஜத்தின் நகலாய்ப் பயணிக்கும் XIII - spin off பற்றி அடுத்து !  'ஓங்கி அடிச்சா 13 டன் வெயிட்டாக்கும் ; "இரத்தப் படலம் " போ-ட்ட-டே- தீரணும் ; உடல் மண்ணுக்கு ; அண்டராயர் அண்ணன் ஜேசனுக்கு   " என்றெல்லாம் தெறிக்க விடும் நண்பர்கள் அணி கூட இது சார்ந்த பின்னூட்டங்களை இடக்காணோம் எனும் போது - உங்களில் இன்னமுமே பலர் இதனை வாசித்திருக்கவில்லை  - என்பதே என்மட்டிலான புரிதல் ! So ரொம்பவே போட்டு உடைக்காது மேலோட்டமாகவே பயணித்தல் நலமென்று படுகிறது ! இந்த ஆல்பத்தோடு பயணிக்கும் போது எனக்கு ஒருவித deja vu உணர்வு தான் ! அமெரிக்க அதிபர் ஜான் கென்னெடி படுகொலை பற்றி முன்னெப்போதோ நிறையவே வாசித்திருந்தது அத்தனையும் மனதுக்குள் மறுக்கா ஓட்டமுடுப்பதாகவே தோன்றியது ! 

ஷெரிடன் சகோதரர்கள் - கென்னெடி சகோதரர்கள் ; வில்லியமின் பெண்மோகம் - அதிபரின் பேசப்பட்ட சிலபல கிச்சா-முச்சா உறவுகள் ; கதையினில் வரும் ஜூலியா ப்ரூக்ஸ் - நிஜத்தின் மார்லின் மன்றோ ; ஜூலியாவின் கொலை-நிஜத்தினில் மர்லினின் "தற்கொலை" ; வில்லியமின் மனைவி கார்டெலியா - நிஜத்தினில் Jacqueline Onassis என்று ஏகப்பட்ட இணைகோடுகள் சிந்தனைகளில் நிழலாடின ! 

And இடையிடையே டெமோகிராட் கட்சியின் கோட்பாடுகள் ; தென்மாகாணங்களில் அவர்களுக்கிருந்த உறவுகள் , கு க்ளக்ஸ்  க்ளான்  என்று ஏதேதோ தேடல்களில் ஆழ்ந்திட்ட போது - மொத்த XIII தொடரின் முதுகெலும்புமே 1963-ல் நிகழ்ந்த அந்த டால்லஸ் படுகொலையினில் வேர்கொண்டிருப்பதை முழுமையாய்ப் புரிந்து கொள்ள இயன்றது ! நிஜத்தை காமிக்ஸ் பக்கங்களில் பிரதிபலிக்கச் செய்த சமாச்சாரத்தை ஒரிஜினல் கதாசிரியர் வான் ஹாம் இந்த அளவிற்குப் போட்டு உடைத்ததாய் எனக்குத் தெரியவில்லை ; ஆனால் இந்த spin-off ஆசிரியர் அதைக் கச்சிதமாய்ச் செய்துள்ளார் ! ஒட்டுமொத்த ஆல்பமுமே எனக்கு அமெரிக்க அரசியல் ; அடிவேரில் அங்கே குடியிருக்கும் நிறவெறி ; இனவாதம் பற்றியதொரு டியூஷனை எடுத்து என்றால் மிகையில்லை ! மொத்த XIII சதியுமே திட்டமிடப்படுவது - "அமெரிக்கா - வெள்ளை அமெரிக்கர்களுக்கே" என்ற ஒற்றைக் கோட்பாட்டின் பொருட்டுத் தானே ?  பணத்தாசை ; பதவியாசை ; மத ஈடுபாடுகள் என்ற சமாச்சாரங்கள் சகலமும் அப்பாலிக்கா தொற்றிக்கொண்ட புட்போர்ட் பயணிகள் தானே ? 

"அன்னையே உன்னை வணங்குகிறேன் !" 

இதுவோ - ஒரு உலக அரசியல் அரங்கின் ட்யூஷன் !! ரஷ்ய இரும்புத்திரைக்குப் பின்னுள்ள அரசியல் ; மத்திய ஆசியா வரை அவர்களது பெரும் தேசம் நீண்டிடுவதால், இஸ்லாமிய வேர்களோடு உரசிடுவது ; செச்சென்யா எரிச்சல்கள் ; அங்கே அரங்கேறிய இரத்தக் களரிகள் ; 1999-ல் துவங்கிய இரண்டாவது ரஷ்ய-செச்சென் யுத்தம் பற்றி ; இன்றைய செசென்யா  சூழல்கள் என்று அத்தனைக்குள்ளும் இன்டர்நெட் சவாரிக்கு நடத்திட சந்தர்ப்பங்கள் கிட்டின during the course of this work ! உதாரணத்துக்கு - பக்கம் 46 -ஐச் சொல்வேன் ! பஸாயேவ் பேசும் போது - "1944-ல் எங்களைக் கழுத்தறுத்தீர்களே ; அதை போலவா ?" என்றொரு கேள்வி கேட்பதற்கு வசனம் இருந்தது ! மேலோட்டமாய் நானும் பூசி மெழுகி விட்டுத் தாண்டியிருக்கலாம் தான் ; ஆனால் மனசு கேட்கவில்லை ! நெட்டில் உருட்டிய போது தான் - அரைமில்லியன் மக்களை இடம்பெயரச் செய்ய ரஷ்யத் தலைமை தீர்மானித்ததும், அதனில் நிகழ்ந்த உயிர் பலிகளும் பற்றிய தரவுகள் கண்ணில் பட்டன ! அதனுள் புகுந்தால் கண்கள் ஈரமாவதைத் தவிர்க்க இயலாது ! அதே போல செசென்யா யுத்தத்தினில் தலைநகர் குரொஸ்னிக்கு நேர்ந்த அடிகளைப் பற்றிய தேடல்கள் கொண்டு வந்த வயிற்றைப் பிசையும் நிஜங்கள் ஏராளம் ! அந்த யுத்தத்தினில் மெய்யாகவே பெண் வீராங்கனைகள் (அமேஸான்ஸ்) பயன்படுத்தப்பட்டது ; வெள்ளைப் பாஸ்பரஸ் குண்டு வீச்சு நிகழ்ந்தது ; ஐ.நா.அனுப்பிடும் ரேஷன் பொருட்கள் சூறையாடப்பட்டது - என எக்கச்சக்க நிகழ்வுகளை வாசிக்க முடிந்தது ! எங்கோ ஒரு முடுக்கில் கிடக்கும் இந்தக் குட்டி தேசம் இன்றைக்கு மீண்டும் ரஷ்யக் கட்டுப்பாட்டிலேயே ஒரு பொம்மை அதிபரோடு உள்ளது என்பதையும் வாசித்த போது அந்த மண்ணில் நிகழ்ந்துள்ள மரண தாண்டவத்தை வீரியம் புரிந்தது ! நம் அண்டை மண்ணிலும் நிகழ்ந்த இத்தகைய நெஞ்சை உலுக்கும் போர் பற்றியதொரு ஆல்பத்தை ஒரு பெல்ஜியக்  கதாசிரியர் கையில் எடுத்திருப்பதாய்க் கேள்விப்பட்டேன் ! நிஜத்தை சித்தரிக்கும் முயற்சியாய் அது அமையின் - நம் சொந்தங்கள் அனுபவித்த ரணங்களை  பிடரியில் அறையும் விதத்தில் பார்த்திட இயலக்கூடும் ! தெரியவில்லை - அது எத்தனை காலமெடுக்கும், பூர்த்தி காணவென்று ! ஏது, எப்படியோ - யுத்தமெனும் அரக்கனின் கோர முகத்தை சற்றே நெருடா பாணியில் சொன்ன "மா துஜே சலாம்" எனக்கொரு eye opener !! 

ரைட்டு - இனி உங்களின் அலசல்கள் தொடர்ந்திட வழி வீட்டுக் கிளம்புகிறேன் ! புறப்படும் முன்பாய் ஒரு கேள்வி இங்கு & 1 கேள்வி நமது ஓசியில் ஒட்டுப் போடும் தளத்தினுள் :

அடுத்த அட்டவணையில் ஜானிக்கு 1 ஸ்லாட் & 1 சிங்கிள் ஆல்பமே ! So அதனை இட்டு நிரப்பிட க்ளாஸிக் ஜானி வேணுமா ? 2.0 ஜானி வேணுமா ? சொல்லுங்களேன் பிளீஸ் ! 

And இதோ - அந்த ஆன்லைன் வோட்டிங்குக்கான லிங்க் :

https://strawpoll.com/dkd2pfaob

Bye all...see you around !! Have a cool Sunday !