மாறா மாற்றங்கள் !

நண்பர்களே,

வணக்கம். இந்த வாரம் தேய்ந்து போன cliche திருமொழிகளைத் துவைத்தெடுக்கும் வா-ர-ர-ம்-ம்-ம் !! So ஆங்காங்கே க்ளீஷே கொழந்தைசாமி அவதார் தலைகாட்டினால் கண்டுகொள்ளாதீர்கள் ப்ளீஸ் !

⧭மாற்றம் ஒன்றே மாறாதது !!

ஆங்... போன வாரப் பதிவில் ஜானதன் கார்ட்லேண்டின் அளவில் அடிக்க நேர்ந்த பல்டி ; செய்திட அவசியமாகியிருந்த மாற்றங்கள் பற்றி எழுதியிருந்தேன் ! மாற்றங்களை நடைமுறைப்படுத்தி, அச்சிட்ட இதழாகக் கையிலேந்திப் பார்த்த போதுதான் அதுவரையிலும் இழுத்துப் பிடித்திருந்த மூச்சை விடமுடிந்தது ! நார்மலான சைஸில்; தெளிவான படங்களோடும்; பழக்கப்பட்ட அந்த எழுத்துருக்களோடும் படித்துப் பார்த்த போது ஜம்மென்று இருந்தது !  “சரி, இதெல்லாமே போன வாரத்துக் கதை தானே...! இப்போது எதற்கு?” என்கிறீர்களா? இருக்கே... தொடர்ந்து கதை இன்னுமிருக்கே...!!

எஞ்சியிருந்தது ஜம்போ சீஸன் 2-ன் முதல் இதழான “காலவேட்டையர்” எடிட்டிங் பணிகள் மட்டுமே என்பதை போன வாரம் சொல்லியிருந்தேன் ! And இந்தக் கதை ஒரு one-shot ஆக்ஷன் மேளா என்பது பற்றியும் ஏற்கனவே பகிர்ந்திருந்தேன் ! போன ஞாயிறு இதன் பணிகளுக்குள் புகுந்தேன் – ‘மள மள‘வென்று போட்டுத் தாக்கிய கையோடு மே மாத பராகுடா மீது ரேடாரைத் திருப்பலாமென்ற எண்ணத்தில் ! Black & White இதழே & இது கிட்டத்தட்ட 15 ஆண்டுகளுக்கு முன்பாகவே மொழிபெயர்க்கப்பட்டுத் தயாராகிக் கிடந்த script என்பதால் எவ்விதச் சிக்கல்களும் எழ வாய்ப்பில்லை என்று தைரியமாகயிருந்தேன் ! ஆனால்... ஆனால்... பக்கங்களைப் புரட்டப் புரட்ட லேசாயொரு நெருடலும் தொற்றிக் கொண்டது ! மர்ம மனிதன் மார்ட்டின் & மாயாஜால மன்னன் மாண்ட்ரேக் கதைகளின் ஜாடையில் கதை தடதடக்க, எனக்கோ லேசாயொரு குழப்பம் ! 15 வருடங்களுக்கு முன்பு இதன் ஆங்கில இதழைப் படித்தே கதையைத் தேர்வு செய்திருந்தது நினைவிருந்தது – ஆனால் கதையின் அவுட்லைனைத் தாண்டி வேறு பெருசாய் எதுவும் தற்சமயம் ஞாபகத்தில் இல்லை என்பதால், கதையின் ஓட்டம் புதுசாகவே தோன்றியது. இரு அத்தியாயங்கள் கொண்ட ஆல்பத்தின் பாதியைத் தொட்டிருந்த போதே லேசாயொரு குழப்பம் என்னுள் ! பரபரப்பான ஆக்ஷன் கதை தான்; சித்தே காதுல பூ ரகம் தான் ; ஆனால் ஜம்போவின் சீஸன் 2-ஐத் துவக்கித் தர இது சரியான புள்ளி தானா ? என்ற கேள்வி எழத் துவங்கியது !! பக்கங்களைப் புரட்டிக் கொண்டே 100-ம் பக்கத்தை எட்டிப் பிடித்திருந்த போது என்னுள் ஒரு தீர்மானம் தோன்றியிருந்தது – ‘Nopes... ஜம்போ காமிக்ஸில் நாம் சித்தரிக்க முனையும் “நூற்றுக்கு நூறு ஏற்புடைய காமிக்ஸ்” நிச்சயமாய் இதுவல்லவென்று !“ 15 ஆண்டுகளுக்கு முன்பாய் மெர்சலூட்டிய கதையானது இன்றைக்கு ஓ.கே.வாக  மட்டுமே தென்பட்டது ; தெறிக்கும் ஒரு துவக்கத்துக்கான களமாய்த் தட்டுப்படவில்லை ! கதைகள் என்னவென்று அறிவிக்கா நிலையிலேயே நம்மை நம்பி சந்தா செலுத்திய நண்பர்களுக்கு இப்படியொரு Season opener-ஐ அறிமுகம் செய்வது நிச்சயமாய் சுகப்படாது என்று திட்டவட்டமாய் முடிவெடுத்தேன் ! ராப்பர் அச்சாகி ரெடியாக உள்ளது; கதையும் வாங்கியாச்சு; DTP செய்து அச்சுக்கும் தயாராக உள்ளது ; ஆனால் பச்சைக்கொடி காட்ட மனசு வரவில்லை - at least - ஜம்போவின் முதல் இதழென்ற  ஸ்லாட்டினுக்கு !  !! 

⧭ A job well begun is half done....!

சரியாய்த் துவக்கம் காணுமொரு பணியானது – அப்போதே பாதி நிறைவானது மாதிரித் தான் என்பதை ஜம்போவின் முதல் சீஸன் உணர்த்தியிருந்தது ! இளம் TEX “காற்றுக்கென்ன வேலி” என ரகளையாய் பிள்ளையார்சுழி போட்டுத் தந்திருக்க – அழகான அட்டைப்படம்; தெளிவான கதையோட்டம்; தரமான தயாரிப்பு என்ற முத்திரைகளை ஜம்போவின் முதல் சீஸனின் முழுமைக்கும் தொடர்வது சாத்தியப்பட்டிருந்தது ! So அந்த மாதிரியானதொரு அதிரடித் துவக்கமே சீஸன் 2-க்கும் அவசியமென்று மனசு துடித்ததால் – வேறு யோசனைகளுக்கே இடம் தராது – ‘The Lone Ranger’-ஐ fast track செய்திடத் தீர்மானித்தேன் ! 6 பாகங்கள் – 138 பக்கங்கள் and பிரித்து மேயும் ஆக்ஷனுடனான அதிரடி சாகசம் என்பது தெரியுமாதலால், ஜம்போவின் launching pad-க்கு perfect என்று நினைத்தேன் !  So மே மாதம் அதனைக் களமிறக்கத் தயாராகிக் கொண்டு, ஜம்போவின் 2nd சீஸனையும் மே முதலாயென்று அமைத்துக் கொள்ளத் தீர்மானித்தேன் ! மே மாதம் ஏற்கனவே சில பல heavyweights காத்துள்ளனர் என்பது தெரியும் தான் ; ஆனால் கொஞ்சம் எக்ஸ்டராவாய்  உருண்டு, புரண்டு சிரமப்பட்டுவிட்டாலும் தப்பில்லை – இயன்றதில் best-ஐ முன்வைப்பது தான் சாலச் சிறந்தது என்றுபட்டது ! So ஜம்போ சீஸன் 2 மே முதலாய் folks ! And முதல் இதழே “தனியொருவன்“!!

⧭ஆட்றா ராமா... தாண்ட்றா ராமா...!

ஆக ஏப்ரலின் திட்டமிடலில் 3 வண்ண இதழ்கள் ரெடியாகியிருந்தன :

• - ஜானதன் கார்ட்லேண்ட் : குளிர்காலக் குற்றங்கள்
• - லக்கி லூக் : பரலோகத்திற்கொரு படகு
• - கேப்டன் ப்ரின்ஸ் : மரண வைரங்கள்

And ஒரே b&w இதழாய்த் திட்மிட்டிருந்த “கால வேட்டையர்”-ஐப் பின்தள்ளத் தீர்மானித்ததால் மொத்தம் மூன்றே புக்குகளோடு ஏப்ரலின் கூரியரை நிறைவு செய்திடலாமென்ற ரோசனை ஓடத் தொடங்கியது தலைக்குள் ! “ஊஹும்... ஒரு 128 பக்க முழுநீள ஆக்ஷன் கதையும் சேர்த்தி என்றிருந்த planning-ல், அதனை கழற்றிய கையோடு, வேறு எதையேனும் இணைக்காவிட்டால் லயிக்காதே !” என்று குரல் கேட்டது உள்ளுக்குள் ! 'சரி.... ‘தல‘ இல்லாத கூரியர் சுவைக்காது !' என்றபடிக்கு சுற்றுமுற்றும் பார்த்தால் Color Tex 32 பக்க சாகஸம் நினைவுக்கு வந்தது  ! ரைட்டு... இந்த வருஷம் இதுவரையிலும் அதனைக் கண்ணில் காட்டவில்லையே ; இந்த மாத ரயிலில் இணைத்துக் கொள்ளலாமென்று வேக வேகமாய் அதனைத் தயாரித்தோம் ! ஒரே நாளில் எழுதி, DTP செய்து அச்சுக்கும் தயார் செய்து, செவ்வாயன்றே முடித்தும் விட்டோம் ! ‘சூப்பரப்பு...‘ என்று என்னையே மெச்சிக் கொண்டே ஏப்ரலின் 4 all-color இதழ்களையும் கையிலெடுத்து ஜாலியாய்ப் புரட்டினேன் ! அப்போது தான் ஒரு விஷயம் லேஸ் லேசாய் உறைத்தது...! தடதடவென எழுதி, படபடவென முடிக்க சாத்தியப்பட்ட 32 பக்க இதழைப் படித்து முடிப்பதுமே சடுதியான சமாச்சாரமாகத் தானே .இருந்திட முடியும் ?! அதிலும் இந்த முறை நாம் கையிலெடுத்த கலர் Tex சிறுகதை செம வேகத்திலான நேர்கோட்டுக் கதையெனும் போது – படபடக்கும் பட்டாசாய்ப் பக்கங்கள் ஓட்டம் எடுத்து விடுகின்றன! 'ஆஹா... இதை பத்தே நிமிடங்களில் படித்து முடித்த கையோடு கொட்டாவி விடத் தோன்றுமே!!' என்ற கவலை குடிகொள்ளத் துவங்கியது மறுக்கா!!

⧭லெப்டிலே இண்டிகேட்டரைப் போட்டு... ரைட்டிலே கையைக் காட்டி, நேரா போ!!!

‘பளிச்‘ சென்று அந்த நொடியிலேயே மே மாதத்துக்கான Tex-ன் “பச்சோந்திப் பகைவன்” தயாராகிக் கிடப்பது மின்னலடித்தது மண்டைக்குள் ! ராப்பரும் ரெடி... கதையும் ரெடி என்ற மறுநொடியே  லியனார்டோ தாத்தாவுக்குப் போல பல்பு எரிந்தது பிரகாசமாய் ! வியாழன் காலையில் அதனைக் கையில் எடுத்து; அன்றைக்கே எடிட்டிங் முடித்து, வெள்ளி காலை அச்சுக்கு கொண்டு சென்று, சனி காலையில் புக்காகவும் ஆக்கி விட்டோம் !! So ஏப்ரலின் பட்டியல் ஒருமாதிரியாய் எனக்கு திருப்தி தரத் தொடங்கிய நொடியே டெஸ்பாட்சுக்கு ஏற்பாடு செய்திடச் சொல்லி ஆபீஸையே ரணகளமாக்கிட, உங்களது கூரியர்கள் சகலமும் புறப்பட்டு விட்டன – ஏப்ரலின் முதல் தேதியை உங்கள் கைகளில் செலவிடும் பொருட்டு ! கூத்தடிப்பது நமக்குப் புதிதல்ல தான்; குட்டிக்கரணங்கள் அன்றாடமே ; ஆனால் இம்மாதம் taking it to a different level என்பேன் ! எது எப்படியோ – all’s well that ends well !

ஆக எங்கோ துவங்கி, எப்படியோ பயணித்து, எவ்விதமோ நிறைவு கண்டுள்ள ஏப்ரலின் பாக்கி 2 இதழ்களின் preview இதோ ! 

ஒரிஜினல் அட்டைப்படம் ; கதாசிரியர் மோரிஸின் உச்சநாட்களில் உருவான vintage லக்கி சாகசம் & இம்முறையோ பாழும் பாலைவனமாயன்றி, மிஸிஸிப்பி நதியே நமது ஒல்லியாரின் கதைக்களம் !! நாம் ஏற்கனவே ரசித்த template கதை தான் ; ஆனால் வழக்கம் போல ஜாலியாய்க் கதாசிரியர் நகற்றிச் சென்றிருக்க, a pretty breezy read in the offing !! 

And இதோ - இம்மாத மறுபதிப்பின் preview !! (நானிருக்கும் கிர்ரில் இந்த ராப்பரை ஏற்கனவே கண்ணில்காட்டி  விட்டேனா - இல்லை இப்போது தானா ? என்பது கூட தெரியவில்லை !!) மறு ஒளிபரப்பாய் இருப்பின் sorry folks !! எப்போதோ ஒரு யுகத்தின் black & white கோடைமலரில் இடம்பிடித்த இந்த சாகசமானது இப்போது ஹை-டெக் வண்ணத்தில் வளம் வரக்காத்துள்ளது ! இதுவும் ஒரிஜினல் ராப்பர் - நமது DTP டீமின் கோகிலாவின் கைவண்ணத்தில் ! 

So மொட்டையும் போட்டாச்சு ; ஆனையிடம் ஆசீர்வாதமும் வாங்கியாச்சு ; இனி திங்கள் முதல் கிடா வெட்ட வேண்டியது தான் !! Monday வித் கூரியர் ; மாதப்பிறப்பு வித் காமிக்ஸ் - என்று ஆட்டத்தை ஆரம்பிக்கலாமா ?

மே மாதம் காத்திருக்கும் இதழ்களின் பட்டியல் இப்போதே மிரளச் செய்கிறது :

• ட்யுராங்கோ
• பராகுடா - The climax !!
• தி Lone ரேஞ்சர் 

பராகுடாவின் இரண்டாம் பாகத்தினுள் நுழைந்துள்ளேன் ; இன்னொரு பக்கம் தனியொருவனை கவனிக்கத் துவங்கவும் வேண்டும் !! எண்ட அம்மே !! ஞான் இப்போ விடைபெறும் !! Bye all ! See you around ! Have a cool Sunday !! 

P.S : Almost ரெடி என்ற நிலையிலான "காலவேட்டையர்" நிச்சயம் வெளியாகிடும் ; ஆனால் ஜம்போவின் சந்தாவின் அங்கமாகயிராது ! ஏதேனுமொரு புத்தக விழாவின் போது just like that வெளியாகிடும் ; and ஆன்லைனில் லிஸ்டிங் செய்யப்படும் & முகவர்களுக்குமே அனுப்பப்படும் ! So இஷ்டப்படும் நண்பர்கள் அந்நேரம் வாங்கிக்கொள்ளலாம் ! And சந்தாவினில் இந்த இதழுக்குப் பதிலாய் வேறொரு apt replacement சீக்கிரமே அறிவிப்பேன்  !! 

மாற்றம்..முன்னேற்றம்..குட்டிக்கரணம் !

நண்பர்களே,

வணக்கம். ஏழில்லை… பதினாலு கழுதை வயதானாலுமே சில பாடங்களை மண்டையில் ஏற்றிக் கொள்வது சிரமம் தான் போலும்! “அது தான் தெரிந்த விஷயமாச்சே… புதுசா ஏதாச்சும் சொல்லுப்பா !” என்கிறீர்களா? சரி, இப்போதைய பஞ்சாயத்து எதன் பொருட்டு என்று சொல்லி வைக்கிறேனே…!

அட்டவணையினைத் திட்டமிடும் போதே ஓராண்டின் இதழ்களை முழுவதுமாய் உருவகப்படுத்திடுவது ஓரளவுக்கேணும் அவசியப்படும்! கடந்த ஐந்தாறு வருஷங்களாய் இந்தக் கூத்துக்குப் பழக்கப்படுத்திக் கொண்டு விட்ட போதிலும் சில விஷயங்களை hands on செய்து பார்க்கும் போது தான் நிஜமான பரிமாணங்கள் புரிகின்றன!

ஜானதன் கார்ட்லேண்ட்! புது நாயகரின் அட்டைப்படத்தை போன ஞாயிறுக்கு கண்ணி்ல் காட்டிய கையோடு எடிட்டிங் வேலைகளுக்குள் திங்கள் புகுந்திருந்தேன்! இதுவுமே 2018-ல் எழுதப்பட்ட கதையென்பதால் இந்த ஜடாமுடிக்காரரோடு எனது முதல் பரிச்சயம் சில நாட்களுக்கு முன்பே! சிக்கல்களிலா நேர்கோட்டுக் கதைகள்; நமக்கு இப்போது ரொம்பவே பழக்கமாகிப் போய்விட்டுள்ள கௌபாய் பாணி எனும் போது கருணையானந்தம் அவர்களின் மொழிபெயர்ப்பிலும் பெரிதாய் மாற்றங்கள் அவசியப்படவில்லை. Details இன்னும் அழுத்தமாய் இருந்தால் தேவலாம் என்று தோன்றிய இடங்களில் மட்டும் மாற்றியெழுதியபடிக்கே அந்த 100 பக்க இரட்டை ஆல்பத்தை மங்களம் பாடி விட்டேன்! “ஹை… ஜாலி! பாக்கி நிற்பன லக்கி லூக்கின் கார்ட்டூனும், பிரின்ஸின் மறுபதிப்பும் தான்! முன்னதை ஓரிரு நாட்களில் எழுதி முடித்து விடலாம்; பின்னதில் எழுத்துப் பிழைகளை சரிபார்த்தால் போதும்! என்றபடிக்குக் குஷியாகி “குளிர்காலக் குற்றங்களை” அச்சுக்குத் தயார் பண்ணினோம்! காத்திருக்கும் மே & ஜுன் மாத ராப்பர்களோடு ஜானதன் கார்ட்லேண்டையும் அச்சிடுவதாகத் திட்டம் என்பதால் இன்னொரு பக்கம் நமது டிசைனரை முடுக்கிக் கொண்டிருந்தேன். ஏக் தம்மில் அரை டஜன் இதழ்களுக்கான ராப்பரைத் தயார் செய்து அச்சிட்டு விட்டால் 2 மாதங்களுக்கு நோ தலைவலி! என்பதால் சமீப காலங்களில் அதுவே நமது template. So சில தருணங்களில் உட்பக்கங்கள் தயாராகி ராப்பருக்குக் காத்திருப்பதும் உண்டு தான்! இம்முறையும் அது போலொரு வேளையே!

சரி, ராப்பர் தயாராகும் வரைக்கும் காத்திராது பக்கங்களை அச்சிடத் தொடங்கலாமென்னு பணிகள் துவங்கின! முதல் 16 பக்கங்கள் அச்சில் ரெடியாகி என்னை வந்து சேர்ந்த போது தான் “ஆண் பாவம்” பாண்டியராஜனைப் போல விழிக்கத் தொடங்கினேன்! சுருக்கமாய்ச் சொல்வதானால் ஜானதன் கார்ட்லேண்ட்டை அபூர்வ சகோதரர்கள் குள்ள கமல் வேடத்தில் பார்த்தது போலவே தோன்றியது எனக்கு! Compact size – புடலங்காய்; செலவுகளைக் கட்டுக்கள் வைத்திடல்; எதிர்கால இதழ்களுக்கென வெள்ளோட்டம் இத்யாதி… இத்யாதி என்று அதுவரைக்கும் தலைக்குள் லாஜிக் பேசி வந்த குரல் திடீரென்று ஈனஸ்வரத்தில் முக்கிடுவது போல்ப்பட்டது! ஒரிஜினல் ப்ரான்கோ-பெல்ஜிய அளவுகளிலிருந்து நமது ரெகுலர் சைஸுக்கு மாற்றும் போதே அளவுகளில் அடிவிழத் தான் செய்கிறது! ஆனால் இதுவோ அடியல்ல – இடி என்று தோன்றியது! ஒரு புது நாயகரை அறிமுகம் செய்வதே கத்தி மேல் நடக்கும் அனுபவம் மாதிரி! அவரை நீங்கள் ஏற்றுக் கொள்வீர்களா அல்லது முதுகில் மத்தளம் கொட்டுவீர்களா? என்பது பெரியதொரு சமாச்சாரம்! இந்த அழகில் புதியவரை குள்ள புக் அவதாரில் களமிறக்கினால் உங்களது கண்கள் எவ்விதம் சிவக்குமோ என்று கற்பனையாய்ப் பார்த்திடும் போதே பேதி எடுக்காத குறை தான்! ஏற்கனவே “மின்னும் மரணத்தை சைஸ் சைஸாக வெளியிட்டு சொதப்பிட்டே” என்று இன்றுவரைக்கும் சாத்துவோரும் உண்டெனும் போது இருபதோ-முப்பதோ ரூபாய்களை ஈட்டிடும் பொருட்டு நான் கார்ட்லேண்டை கொலை செய்தவனாகிடக்கூடும் என்பது உறைத்தது! சின்னச் சின்ன படங்கள்; நிறைய நிறைய ஸ்கிரிப்ட் என்ற அந்தப் பக்க அலங்கோலத்தை அப்படியே தூக்கிக் கடாசிவிட்டு அச்சுப் பணிகளை நிறுத்தச் சொல்லி விட்டேன்! இன்னொரு பக்கமோ ராப்பருக்கான பிராசஸ் பணிகள் நிறைவுற்று – அச்சுக்கான பிளேட்களுடன் மைதீன் ஆஜராகிட கிறுகிறுத்து விட்டது தலை! ‘அதையும் கடாசிடுங்க‘ என்றபடிக்கே – டிசைனர் பொன்னிடமும் சரி, நமது DTP அணியிடமும் சரி இந்த compact சைஸ் விஷப்பரீட்சையே வேணாம்; வழக்கமான ரெகுலர் சைஸிற்கு மாற்றம் செய்யத் துவங்குங்கள் என்றேன்! ‘வெயில் இன்னமும் வேகமெடுக்கும் முன்பாகவே நம்மாளுக்குக் கழறத் தொடங்கி விட்டது டோய்!‘ என்று நினைத்தார்களோ என்னவோ; எதுவும் பேசாது வேலைக்குள் இறங்கிவிட்டார்கள்! Cmpact சைஸுக்கென வசனங்களை சந்துக்குள்ளும் பொந்துக்குள்ளும் நுழைத்திருந்திருந்தவர்கள், மறுக்கா சகலத்தையும் redo செய்திடத் துவங்கியது பஞ்சுமூட்டையை தண்ணீரில் செமையாய் நனைத்து, மேல் வலிக்க வலிக்க சுமப்பது போலான பணி என்பது புரிந்தது! ஆனால் ஏதோவொரு கூமுட்டைக் கணக்கில் நான் போட்ட திட்டம் இந்த மட்டோடே உசிரை வாங்காது விட்டதே என்று மனதைத் தேற்றிக் கொண்டேன்! So சனி மாலை வரை இந்த “மறுக்கா பணிகள்” அரங்கேறியதால் அச்சுக்கு ஜடாமுடியார் செல்லவிருப்பது தி்ங்களிலேயே! Of course, பட்ஜெட்டில் உதைக்கிறது தான்- ஆனால் இது நம்பர்கள் மீது கவனமிருக்க வேண்டிய வேளையல்ல என்பதால் அந்த பக்கமாய் சிந்தனைகளை பயணிக்க அனுமதிக்கவேயில்லை!

ஒரு மாதிரியாய் இந்த பஞ்சாயத்து சரியாகிடுமென்ற நம்பிக்கை பிறந்த பிற்பாடு – பிரின்ஸ் மறுபதிப்பிலும், லக்கி லூக் மொழிபெயர்ப்பினுள்ளும் குதித்தேன்! மார்ச் முதல் வாரத்தில் சுமார் 20 பக்கங்களை எழுதி முடித்திருந்தவன் – கார்ட்டூன் தானே... அப்பாலிக்கா பார்த்துக்கலாம்! என்றபடிக்கே லக்கி லூக்கின் பணிகளைத் தள்ளிப் போட்டிருந்தேன்! ஆனால் ஜாலி ஜம்பரின் முதலாளி என்றைக்குமே நமது ஆத்ம நண்பர் தானே – பெரிதாய்ச் சிரமங்களை உருவாக்காது ‘டக் டக்‘கென்று ஒரே நாளில் தயாராகிட கடுவன் பூனை போல உலாற்றறித் திரிந்தவனுக்கு லேசாய் நிம்மதி பிறந்தது! கேப்டன் பிரின்ஸ் கதையையும் சூட்டோடு சூடாய் ஒரு வாசிப்பு விட்ட கையோடு – “கலர் இதழ்களில் எனது பணிகள் முடிஞ்சதுடோய்!” என்று சோம்பல் முறிக்கத் துவங்கினேன்!

எஞ்சியிருப்பது ஜம்போ காமிக்ஸின் சீஸன் 2-க்கு துவக்கம் தந்திடவுள்ள ”கால வேட்டையர்கள்” மாத்திரமே! And இது கிட்டத்தட்ட 15 ஆண்டுகளுக்கு முன்பாகவே மொழிபெயர்க்கப்பட்டு தயாராக இருந்த ஆல்பம் என்பதால் நம்மவர்கள் ‘மள மள‘வென்று டைப்செட் செய்து மேஜையில் அடுக்கிப் போட்டு விட்டார்கள்! தொடரவிருக்கும் பொழுதுகளில் அதன் எடிட்டிங்குக்கு நேரம் செலவிட்டால் ஏப்ரலில் combo தயாராகியிருக்கும்! ”ஆண்டவா..... இங்கேயும் ஏதாச்சும் பஞ்சாயத்து எழாதிருந்தால் உங்கள் கருணைக்கு காலமெல்லாம் கடமைப்பட்டிருப்பேன்!” என்றபடிக்கு அந்தப் பணிக்குள் புகுந்திட கச்சை கட்டிக் கொண்டிருக்கிறேன்!

என்ன ஒரே நெருடல்  – இந்த “மாற்றம் – முன்னேற்றம் – முட்டைக்கண்ணன்” படலத்தினால் அச்சுப் பணிகள் எல்லாமே கொஞ்சம் தாமதமாகி விட்டுள்ளன! திங்கள் முதல் லக்கி லூக் DTP; பிரின்ஸ் பிராசஸிங் என்று துவக்கி சகலத்தையும் முடித்திட அடுத்த 7 நாட்கள் போதுமாவென்று தெரியவில்லை! May be – just may be இந்த ஒரு முறை ஏப்ரலில் தான் டெஸ்பாட்ச் இருந்திடக் கூடும்!

And before I sign out – இதோ சின்னதாயொரு டீசர்! And சின்னதாயொரு அறிவிப்பு ! 

க்ரீன் மேனர் தொடருக்குப் பின்பாய் ஒரு சீரியஸான கதைக்களத்தை கார்ட்டூன் பாணியிலான சித்திரங்களுடன் சொல்லும் கதைகள் / தொடர்கள் வேறு ஏதேனும் கண்ணில் படுகின்றனவா என்று பார்த்துக்கொண்டேயிருப்பது எனக்கொரு வழக்கம் ! 2016-ன் ஏதோவொரு தருணத்தில் - படைப்பாளிகளைச் சந்திக்கும் வாய்ப்பு கிட்டியிருந்த நேரமது !  "இரவே..இருளே கொல்லாதே" & "தேவ இரகசியம் தேடலுக்கல்ல" கதைகளின் வெற்றியினைத் தொடர்ந்து அவற்றில் மேற்கொண்டு 2 பிரதிகளை பந்தாவாய் அவர்கள் கையில் திணித்து விட்டுப் பேசிக்கொண்டிருந்த போது - "அடுத்து என்ன மாதிரியான கதைகளைத் தேடுகிறீர்களோ ?" என்று கேட்டார்கள் ! "ப்ளூபெரி (கேப்டன் டைகர்) போலொரு கௌபாய்த் தொடரையும் ; லக்கி லூக்கைப் போலொரு கார்ட்டூன் தொடரையும் தேடுகிறேன்" என்றேன் ! "அவையெல்லாம் ஒரு யுகத்திற்கு ஒருமுறை துளிர்க்கும் தொடர்களாச்சே ?!" என்றபடிக்கே ஒரு 6 பக்க பிரிண்டவுட்டை என் முன்னே போட்டார் ! அதனில் அவர்கள் வசமிருந்த கௌபாய்த் தொடர்களின் பட்டியலிருந்தது ! அவற்றின் பெரும்பான்மை one shots ; தொடரென்று பயணிக்கும் கதைகள் அவ்வளவாய்க் கண்ணில் படவேயில்லை ! ஆர்வமாய் மேலிருந்து கீழாயும் ; கீழிருந்து மேலாயும் அந்தக் காகிதங்களைப் பரிசீலனை செய்து கொண்டே போனாலும் 'பச்சக்' என்று மனதில் நிற்கும் விதமாய் எதுவும் தட்டுப்படவில்லை ! "சரி...ஊருக்குப் போய் கடுதாசி போடறேன் !" என்றபடிக்குத் தான் நடையைக் கட்ட வேணும் போலும் என்ற சங்கடம் உள்ளுக்குள் உறுத்தியது !! ஏனெனில் அன்றைய தினம் அவர்களது துறையின் உதவியாளர்கள் யாருமே பணியில் இல்லை ! ஆனாலும்  'இத்தினி தொலைவிலிருந்து வந்திருப்பவனுக்கு உருப்படியாய் ஏதாச்சும் செய்தால் தேவலியே !' என்ற எண்ணத்தில் சீனியர் மேனேஜரே எக்கச்சக்கமான ஆல்பங்களை என் முன்னால் குவித்திருந்தார் !! So அத்தனையையும் பராக்குப் பார்த்துவிட்டு, அவர்கள் தந்த காபியையும் வாயில் ஊற்றிக் கொண்டு வெறும் கையை வீசியபடியே விடைபெற கூச்சமாக இருந்தது !! ஆனால் அவரோ "எங்கள் கேட்டலாக்கில் ஒன்று கூடவா உனக்கு ரசிக்கலைடாப்பா ? விட்டேனா பார் !!" என்று அவர்களது சமீபத்துப் படைப்புகளை அங்கே மலை போல் குவித்திட்டார் !! அத்தனையும் ஹார்டகவரில், மிரட்டும் தயாரிப்புத் தரங்களில் மினுமினுக்க அடுத்த ரவுண்ட்  வாய் பார்க்கும் படலம் துவங்கியது ! ஆனால் இம்முறையோ ஒரு கார்ட்டூன் பாணி western கவனத்தைக் கோரியது ! ஆர்வமாய்ப் புரட்டினேன் - அது முற்றுப்பெறுமொரு one shot தொடரா ? - அல்லது கொஞ்ச தூரமெனும் பயணிக்கும் தொடரா ? என்று தெரிந்து கொள்ள ! "தொடரும்" என்று 46 -வது பக்கத்தில் தென்பட, வேகமாய் அது பற்றி விசாரித்தேன் ! 4 பாகங்களில் முற்றுப்பெறவுள்ளதொரு மினி-தொடர் என்று சொன்னவர், கொஞ்சமாய் கதையின் அவுட்லைனையும் சொன்னார் ! அப்போது 2 பாகங்கள் மட்டுமே வெளிவந்திருந்தது என்று ஞாபகம் !! தலைக்குள் லேசாய் பல்பு எரிவது போல் அப்போதே தோன்றிட, தொடரும் பாகங்கள் எப்போது வெளியாகுமென்று விசாரித்தேன்! "சரி...இந்தத் தொடர் முழுமை பெறும் போது நிச்சயமாய்ப் பரிசீலனை செய்திடுவோம் " என்று துண்டை லேசாய் விரித்து வைத்தபடிக்கே விடைபெற்றேன் ! என்னை ஈர்த்தது 2 விஷயங்கள் : முதலாவது அந்த கார்ட்டூன் சித்திர ஸ்டைல் ! இரண்டாவது அந்தக் கதையினில் தென்பட்ட வலு ! படைப்பாளிகள் விரும்பியிருப்பின் அதனை ஒரு சீரியஸ் பாணியிலேயே எடுத்துச் சென்று வெற்றி கண்டிருக்க முடியும் என்று தோன்றியது ! ஆனால் கதையை கொஞ்சம்  இலகுத்தன்மையோடு முன்னெடுத்துச் செல்வதே அவர்களது நோக்கம் என்பது புரிந்த போது - மனதில் "பச்சை மாளிகை" தான் வியாபித்து நின்றது ! ஆனால் அவர்கள் என்னிடம் காட்டிய ஆல்பங்களை முழுசுமாய்ப் புரட்டிய போது சன்னமாயொரு நெருடல் எழாதில்லை தான் ! லேஸ் லேசாய் கதையினில் எட்டிப் பார்த்த அடல்ட்ஸ் ஒன்லி விஷயங்கள் கொஞ்சம் பிரேக் போடச் செய்தன ! 'சரி..இன்னும் 2 வருஷங்கள் உள்ளன தானே...அப்போ பார்த்துக்கலாம் !" என்றபடிக்கு அடுத்த பணிகளுக்கும் புகுந்தேன் ! முன்னாட்களைப் போல ஞாபக சக்தியை மட்டுமே நம்பியிருப்பது வேலைக்கு ஆகாது என்ற ஞானம் சில பல ஆண்டுகளுக்கு முன்பே கிட்டிவிட்டதன் காரணத்தால் இது போன்ற புது தேடல்கள் பற்றிய notes களை ஒரு பிரத்யேக டைரியில் குறித்து வைத்திருக்கிறேன் ! And அதனை ஒவ்வொரு நாலு மாதமும் திறந்து புரட்டுவது எனது வாடிக்கை ! சமீபத்தயதொரு புரட்டலின் போது தான் இந்தக் கதை தொங்கலில் நிற்பது நினைவுக்கு வந்திட - அவசரம் அவசமாய் பாக்கி 2 ஆல்பங்களைப் பற்றி விசாரித்தேன் ! சீக்கிரமே அவை இரண்டும் pdf file களாக வந்து சேர - ஒட்டு மொத்தமாய் 4 பாகங்களையும் வைத்துக் கொண்டு விட்டத்தை விரிந்த கண்களோடு நோட்டமிடும் ஆராய்ச்சியைத் தொடங்கினேன் ! "கதை ஓ.கே. ; சித்திர பாணியும் நிச்சயமாய் நமக்கு ரசித்திடும் ; ஆனால் அந்த அடல்ட்ஸ் ஒன்லி ? " என்று ரோசனை ஓடியது !! ஆனால் பரக்குடா தொடருக்கு அப்பாலிக்கா இந்தக் கதையின் சமாச்சாரங்கள் - துளி கூட ஒரு விஷயமாகிடாது என்று புரிந்தது ! தூக்கலாய் விரசமோ ; முகம் சுளிக்கச் செய்யக்கூடிய  சமாச்சாரங்களோ இங்கு லேது & எடிட்டிங்கில் அதனை சுலபமாய் சரிக்கட்டி விடலாமென்று புரிந்தது ! அதன் தொடர்ச்சியாய்  அந்த ஞாயிறு தான் "கார்ட்டூன் பாணியில் ஒரு சீரியஸ் கதை உள்ளதுங்கோ ; அதை போடலாமா ?" என்ற கேள்வியை இங்கே பதிவினில் உங்களிடம் முன்வைத்தேன் ! உங்களது பதில்களும் செம positive ரகத்திலிருக்க - அப்போதே துவக்கினேன் அந்த 4 பாகத் தொடரின்  உரிமைகளை வாங்கிடும் முயற்சிகளை !! So உங்களை  பீஸ்ச்சி சொல்லி நொய்யு..நொய்யென்று அவ்வப்போது நான் நச்சரிப்பதும் not without reason folks !! End of the day - you are  the ones who help me take a call on what you will end up reading !! அந்த தொடரின் உரிமைகளும் சமீபத்தில் நமதாகிட - அதனையே ஈரோடு ஸ்பெஷலின் புக் # 1 ஆக shortlist செய்துள்ளேன் ! இன்னமும் கொஞ்சம் அவகாசம் எடுத்துக் கொண்டு அடுத்த ஆல்பத்தையும் அறிவித்த கையோடு முன்பதிவுகள் பக்கமாய் பார்வைகளை ஓடச் செய்யலாம் ! "கென்யா வரலியா ? அமெரிக்கா ஊத்திக்கிச்சா ?" என்ற கேள்விகளையும் கொஞ்சமே கொஞ்சமாய் உள்ளடக்கிக் கொள்ளக் கோருகிறேன் guys - simply becos இறுதித் தீர்மானத்திற்கு இன்னமும் ஒரு சில தெளிவுகள் அவசியப்படுகின்றன எனக்கு ! And படைப்பாளிகள் சரமாரியான ஐரோப்பிய book festival சீசனில் பிஸியாகயிருப்பதால் அவர்களிடமிருந்தும் சில தகவல்களுக்காக waiting !! So தற்போதைய நிலவரப்படி ஈரோடு 2019-ன் பயணத்தின் முதல் புள்ளி இது ! தொடரவுள்ள 2 வாரங்களுக்குள் நான் தெளிவு பெற்ற கையோடு உங்களிடம் வருகிறேன் - மேற்கொண்டு தகவல்களோடு !!  

மீண்டும் சந்திப்போம்! Bye for now all !! Have an awesome Sunday!

எட்டும் தொலைவில் ஏப்ரல் !!

நண்பர்களே,

வணக்கம். இப்போதெல்லாம் ஒரோபோரோ மோதிரமெல்லாம் தேவைப்படுவதில்லை காலப்பயணம் போக  ; நாட்கள் தாமாகவே பிசாசு வேகத்தில் ஓட்டமெடுக்கின்றன !! At least என்னளவிற்காவது ! காதுக்கு மப்ளர் மாட்டிய குளிர் காலைகள் போனயிடம்  தெரியலை ; மாறாகக் காதிலே புகை வரும் அனல் நாட்கள் ஆரம்பித்து விட்டன ! So சகலமும் வேக வேகமாய் ஓட்டமெடுத்து வர, நாமும் அந்த வேகத்துக்கு ஈடுதந்தாக வேண்டுமல்லவா ? இதோ மார்ச்சின் இதழ்களுக்கு இனி மனதில் இடம் என்றபடிக்கு ஏப்ரலை நோக்கிப் பார்வைகளை ஓட்டலாமா ? ஏப்ரலின் முதல் வாரம் எங்களது நகரின் முதல் திருவிழா வேளை என்பதால் எப்போதுமே ஒருவிதப் பரபரப்பு தொற்றிக் கொள்வதுண்டு !! பற்றாக்குறைக்கு "கோடை மலர்" ; சம்மர் ஸ்பெஷல் " "வெயில் ஸ்பெஷல் " ; "காத்தாடி ஸ்பெஷல்" என்றெல்லாம் எதையேனும் கிளப்பிவிட்டு உங்களது அந்நாட்களின் பள்ளி விடுமுறைகளை ஜாலியாக்கிடும் பொருட்டு கூத்தடிப்பதும் வாடிக்கை என்பதால் ஏப்ரல் எப்போதுமே நமக்கொரு ஆதர்ஷ மாதமாக இருந்துவந்துள்ளது ! And இம்முறையும் அதனில் மாற்றமிராதென்றே நினைக்கிறேன் - simply becos இந்த ஏப்ரலில் இரு அழகான தருணங்கள் இணைந்திடவுள்ளன !! முதலாவது நமது லயனின் இதழ் # 350 !!

349-க்கும் ; 351-க்கும் மத்தியிலான நம்பர் தான் ; ஏதேனும் ஒருவிதத்தில் மாதா மாதம் ஏதேனுமொரு மெகா இதழைக் கண்ணில் பார்த்து வரும் பொழுதுகளே இவை ! இருந்தாலும் அந்த "350" என்ற நம்பரோடு மெலிதாயொரு வசீகரம் மிளிர்வதாய் எனக்கொரு நினைப்பு !! நியாயப்படிப் பார்த்தால் - "அகவை 35" என்றான சிங்கத்துக்கு இந்நேரம்  வெளியீடு எண் 420 ஓடிக்கொண்டிருக்க வேண்டும் தான் ! கிட்டத்தட்ட 70 இதழ்கள் இன்னமும் பின்தங்கி நிற்கிறோமெனும் போது இங்கே பீற்றிக் கொள்ள முகாந்திரங்கள் அதிகமிருக்கக்கூடாது தான் ! ஆனால் ஆமையாய்த் தவழ்ந்து திரிந்த நமக்கு இந்த நம்பரே ஆண்டவனும், நீங்களும் இணைந்து சாத்தியமாக்கியுள்ள வரங்கள் எனும் போது அதனை சிலாகிக்காது போவானேன் ? Enter - புது நாயகர் ஜானதன் கார்ட்லேண்ட் - ஒரு டபுள் ஆல்பத்தோடு - இந்த ஸ்பெஷல் பொழுதுக்கு வர்ணமூட்டிட !!

இந்த மீசைக்காரர் உருவானது 1974-ல் ! குதிரையில் ஏறி லொங்கு லொங்கென்று பாலைவனமும், பள்ளத்தாக்குமாய்ச் சுற்றித் திரியும்  பரிச்சயமான கௌபாய் அல்ல இவர் ! மாறாக - காட்டினில் பொறி வைத்து விலங்குகளை வேட்டையாடும் trapper ! வெள்ளைக்காரர்கள் எப்போதுமே நல்லவர்கள் ; "வோ..வோ.." என்றபடிக்கே வலம் வந்த கையோடு காக்கை, குருவி போல சுடப்பட்டு வீழ்ந்திடும் செவ்விந்தியரெல்லாம் மோசமானவர்கள் என்ற ஒருவித காமிக்ஸ் template-க்கு ஜானதனை ஒரு விதிவிலக்காகவே உருவாக்கினார் கதாசிரியை லாரன்ஸ் ஹார்லே ! இயற்கையோடு ஒன்றிச் செல்லும் இந்தத் தொடரினில்  வன்மேற்கின் செவ்விந்திய மக்களை பரிவோடு பார்த்திடும் பாணியை ரசித்திடலாம் ! 56 வயதிலேயே புற்று நோய்க்குப் பலியாகிப் போன இந்தக் பெண் எழுத்தாளர் - ஆண்களே கோலோச்சி வரும் காமிக்ஸ் பிரபஞ்சத்தில் ஒரு வித்தியாசமான அடையாளத்தை ஜானதன் கார்ட்லேண்ட் தொடரின் மார்க்கமாய் விட்டுச் சென்றுள்ளார் ! மொத்தமே 10 ஆல்பங்கள் கொண்ட இந்த series, இன்றைக்கும் பிரான்க்கோ-பெல்ஜிய காமிக்ஸ் உலகினில் பேசப்படும் விஷயமாய் இருப்பது லாரன்ஸ் ஹார்லேயின் கற்பனைத் திறனுக்கொரு சான்று ! இதோ தமிழ் பேசவிருக்கும் ஜானதனின் முதல் ஆல்பத்தின் முதல் பார்வை - நமது டிசைனர் பொன்னனின் கைவண்ணத்தில் ! And இங்கொரு நினைவூட்டல் folks : இது compact size-ல் வரவுள்ள இதழ் ! So கூரியரைத் திறக்கும் நொடியில் no shocks or அர்ச்சனைஸ்  ப்ளீஸ் !

ஒவ்வொரு பக்கத்திலும் பேனல்களின் எண்ணிக்கை குறைச்சலே & சித்திரங்களும் bold ஆக இருப்பதால் இவற்றை compact சைசில் ரசிப்பதில் சிரமமிராது என்ற நம்பிக்கை உள்ளது எனக்கு ! பாருங்களேன் உட்பக்க preview ஒன்றினை !!

And here are the creators :

கதாசிரியை 

Artist Michel Blanc-Dumont

ஏப்ரலை ஜாலியாய் எதிர்நோக்க "லயன் # 350" ஒரு காரணமெனில் - அந்த இதழினில் உங்களது அடையாளமாய் ஏதேனும் ஒரு சிறு விஷயமாவது இருத்தல் அவசியமன்றோ ? So இதுவரைக்குமான இந்த 349 இதழ்களுள் உங்களது TOP 3 இதழ்களை பட்டியலிட நேரம் எடுத்துக் கொள்ள முடியுமா guys ? ஆரம்ப நாட்களது ஸ்பைடராக இருந்தாலும் சரி ; சமீபத்தைய சமாச்சாரங்களாக இருந்தாலும் சரி, உங்களது இன்றைய கண்ணோட்டத்தில் லயனின் TOP மூன்று இதழ்களாக எவற்றைப் பார்த்திடுவீர்களென்று மட்டும் குறிப்பிட்டு எழுத நேரம் உள்ளோர்க்கு எனது முன்கூட்டிய நன்றிகள் - நேரமும், பொறுமையும் இலாதோர் சிரமம் மேற்கொண்டிட வேணாமே என்ற வேண்டுகோளுடன் !

ஏப்ரலில் reason to celebrate # 2 : ஜம்போ காமிக்சின் சீசன் # 2-ன் துவக்கமே என்பேன் !! Action Special மிதம் ; ஜெரெமியா 50 - 50 என்பதைத் தாண்டி, பாக்கி 4 இதழ்களுமே hits என்ற பின்னே, சீசன் 2 மீது எனக்கே ஒருவித லயிப்பு எழத்துவங்கியது !! இயன்றால் 6/6 வாங்கிட வேண்டுமென்ற ஆசை ஆட்டிப்படைக்க - இயன்ற மட்டிற்கு ரகளையான கதைகளாய்த் தேர்வு செய்திட முயற்சித்துள்ளேன் ! இளம் டெக்ஸ் ; Lone Ranger & ஜேம்ஸ் பாண்ட் 007 சொல்லி வைத்து அடிக்கும் கில்லிகள் என்பதால் அவர்கள் மூவருமே முழுசாய் புள்ளிகளை ஈட்டி விடுவார்களென்ற நம்பிக்கை உள்ளது ! எஞ்சிருக்கும் 3 ஸ்லாட்களில் ரகத்துக்கொரு கதையாய் புகுத்த முயற்சித்ததின் பலனாய் "கால வேட்டையர்" இதோ இந்த ஏப்ரலைத் தெறிக்கச் செய்யத்  தயாராகி வருகிறார்கள் !! இந்த இதழைப் பொறுத்தவரை third time lucky என்பேன் !! ஏனெனில் இதை நாம் வெளியிட எண்ணியிருந்தது கிட்டத்தட்ட 15 ஆண்டுகளுக்கு முன்பாய் ! In fact விளம்பரமும் செய்திருந்தோம் என்று ஞாபகம் ! ஆனால் குஞ்சு பொரிக்கும் முன்னமே ரோஸ்டுக்கு மசால் தடவத் தயாராவது எத்தனை பெரிய மடமை என்பது அன்றைக்கே புரிய நேர்ந்தது - படைப்பாளிகள் கோரிய ராயல்டி தொகையினைப் புரட்ட இயலாது தட்டுத் தடுமாறிய போது ! கழுத்தின் மீது கத்தியாய், வேறு செலவினங்கள் அலையலையாய் போட்டுத் தாக்கிய அன்றைய சூழலில், "இதோ அடுத்த வாரம் ; இன்னும் பத்தே நாட்களில்.." என்று பணமே அனுப்பாது ஜவ்வு மிட்டாயாய் இழுக்க - அவர்களோ  நமது கோரிக்கையையே மறந்தே போய் விட்டார்கள் ! நானுமே மௌனமாய் இருந்துவிட்டேன் அன்றைக்கு ! 2014-ல் நமது மறுவருகை சூடு பிடித்து ஓடத்துவங்கிய தருணத்தில் இந்த ஆல்பம் மீண்டும் நினைவுக்கு வந்திட, மறுக்கா தொடர்பு  கொண்டேன் - உரிமைகளுக்கோசரம்  !! "அட..போடா டேய்...உன்னோட ஓப்பனிங் நல்லா தானிருக்கும் ; ஆனால் பினிஷிங் தேறாது !" என்று படைப்பாளிகள் நினைத்தார்களோ - என்னவோ பதிலே போடவில்லை ! எனக்கும் லஜ்ஜை பிடுங்கித் தின்ன, மீண்டும் நினைவூட்ட திராணியின்றி மௌனியாகிவிட்டேன் ! ஆனால் ஜெரெமியா & ஹெர்லாக் ஷோம்ஸ் கதைகளின் பொருட்டு அவர்கள் கதவுகளை மறுபடியும் தட்டும் அவசியம் எழுந்த போது - ராயல்டியினில் முன்னாட்களது மொக்கை போடும் படலம் இராது என்று சூடத்தை அணைத்து சத்தியம் பண்ணாத குறையாய் கூத்தாடிட - ஒரு மாதிரியாய் அவர்களும் ஓ.கே. சொன்னார்கள் ! ஜெரெமியா - மொத்தம் 6 கதைகள் ; ஹெர்லாக் ஷோம்ஸ் 5 கதைகள் என ஏக் தம்மில் ஆர்டர் போட்ட போது உள்ளுக்குள் நிறையவே உதறல் தான் ! மிகக் குறுகிய காலத்துக்குள் மொத்தமாய் தொகையினை அனுப்ப வேண்டுமென்ற நிர்பந்தம் இருந்த போது தான் அந்த வருடத்து ஈரோட்டுப் புத்தக விழா பிரமாதமாய்க் கைகொடுத்தது !! அந்த விற்பனைத் தொகைகளை அலுங்காது, குலுங்காது ராயல்டிக்கென சேதாரமின்றி அனுப்பிட முடிந்த போது ஒரு பெரிய நிம்மதிப் பெருமூச்சு உள்ளுக்குள் ! 'சரி...இவன் முன்போல் சட்டி நிறைய அல்வா கிண்டவில்லை  என்பதை அவர்கள் புரிந்து கொண்டதைத் தொடர்ந்து - "காலவேட்டையர் புளீஸ் !" என்று துண்டை விரிக்கத் தயாரானேன், வெகு சமீபமாய் ! ஒற்றைக் கதையோடு நில்லாது, ஹெர்மனின் வேறு சில one-shots களையுமே  சேர்த்து வாங்கிடவும் ஏற்பாடு செய்துவிட - நீண்ட நெடுநாளாய் விளம்பரமாய் மாத்திரமே ரவுண்டடித்துக் கொண்டிருந்த இந்த ஆக்ஷன் த்ரில்லர்  இதோ ஜம்போவின் இரண்டாவது சீசனுக்கு சுவாகதம் சொல்லத் தயாராகி வருகிறது ! And இதோ - அதன் அட்டைப்படத்துக்கென shortlist செய்துவைத்துள்ள சில டிசைன்களின் previews ! Of course இன்னமும் நிறைய மாற்றங்களுக்கு இங்கே வாய்ப்புண்டு தான் - so கூரியர் கவரில் இருக்கப்போகும் இதழின் ராப்பர் மாறுபாட்டிடவும் கூடும் !

ஜம்போவின் சீசன் 2-ல் ஒரு சுவாரஸ்யச் செய்தியுமுள்ளது !! பழம் தின்று கோட்டை போட்டு நிற்கும் சிங்கத்தையும் ; முத்துவையும்  - ஒற்றை வயதே ஆகிடும் ஆனை தூக்கிச் சாப்பிட்டு விட்டது - சந்தாக்களின் எண்ணிக்கையினில் !! Yes folks - நடப்பாண்டினில் லயனுக்கும், முத்துவுக்கும் உள்ள சந்தாதாரர்களை விட, Season 2 ஜம்போ காமிக்ஸுக்கு enrol செய்துள்ள நண்பர்கள் அதிகம் ! எனக்கே இதன் பின்னுள்ள லாஜிக் புரியவில்லை தான் ; ஆனால் வாழ்க்கையில் நமக்குப் புரியாமலே போய்விடும் எக்கச்சக்க விஷயங்களின் பட்டியலோடு இதுவும் இணைந்துவிட்டுப் போகட்டுமென்றிருக்கிறேன் !! எது எப்படியோ - ஜம்போ சீசன் 2 is ready to rock & roll !! Join in the fun all !!

அப்புறம் "ஈரோடு ஸ்பெஷல் இதழ்கள்" பற்றிய இறுதி முடிவெடுக்கும் நேரத்தை நெருங்கி நிற்கிறோம் ! ஏப்ரலில் சகல விபரங்களும் உங்கள் வசமிருக்கும் for sure !!

அப்புறம் கொஞ்சமாய் updates - நமது ஆதர்ஷ நாயகர் பற்றி :

குல்லாக்காரர் மோரிஸ்கோ தலைகாட்டினால் ஏதேனும்  வில்லங்க வில்லன் தோன்றாது போவானா - என்ன ? இம்முறை ஒரு அமானுஷ்ய வில்லி !! டெக்சின் இதழ் # 701-ல் !!

இது அடுத்த வாரம் ஹார்டகவரில், வண்ணத்தில் வரவுள்ள 256 பக்க போக்கிரி  TEX அதிரடியின் preview !! Ufffffff !!! 

And போக்கிரி டெக்ஸ் தான் தற்போதைக்கு இத்தாலியைக் கலக்கி வரும் ஹீரோ என்பதை நிரூபிக்க - இதோவொரு 64 பக்க ஆல்பம் !!

பற்றாக்குறைக்கு ஏப்ரலில் காத்துள்ளதோ ஒரு MAXI TEX !!

படைப்புலகின் இந்த அசுரர்களை எண்ணி பிரமிக்காதிருக்க முடியவில்லை !! ஒவ்வொரு மாதமும் அவர்கள் உருவாக்கும் பக்கங்களின் எண்ணிக்கை ஆயிரத்தைத் தொடுமெனும் போது, அவர்களது பின்னணி டீமின் பலத்தை கற்பனையில் கூட உருவாக்கப்படுத்திட இயலவில்லை !! Breathtaking !!!

மீண்டும் சந்திப்போம் guys ; பெருமூச்சோடு இப்போதைக்கு கிளம்புகிறேன் !! See you around !! Have a fun Sunday !!

புத்தகங்கள் பதினொன்று...!

நண்பர்களே,

வணக்கம். நிறைய நேரங்களில் 'பில்டப்' கச்சேரிகளை நாம் யாருமே சீரியஸாக எடுத்துக் கொள்வதில்லை !! நூற்றுப் பதினேழாவது தபாவாய் "உலகத் தொலைக்காட்சிகளில் முதல் முறையாக" என்று கூவும் அறிவிப்பாளரையும் ; "இந்த படத்திலே எனக்கு ரொம்ப வித்தியாசமான ரோல் !" என்றபடிக்கே மரத்தைச் சுற்றி நர்த்தனமாடும் நாயகர்களையும் நாம் கொட்டாவிகளோடு பார்ப்பது தானே மாமூல் ? அதே போலத் தான் "7 முதல் 77 வரையிலும்  - வீட்டிலுள்ள அனைவருக்கும் !!" என்ற நமது tagline-ம் கூட என்று நினைக்கிறேன் !! "அட - கேட்க நல்லாயிருக்கே ?" என்பதைத் தாண்டி அந்தத் திக்கில் அதிகமாய் சிந்தையைச் செலவிட்டிருக்க மாட்டோம் தான் !!  நிஜத்தைச் சொல்வதானால் இந்த வரியினை நாம் சுட்டது நமது படைப்பாளிகளிடமிருந்தே !! பெல்ஜியத்திலுள்ள லோம்பா குழுமத்தின் இதழ்களை முன்னர் அலங்கரித்த வரிகளால் கவரப்பட்டு, அதனை இரவல் வாங்கிக் கொண்டோம் !! இதோவொரு சாவகாச சனி மாலையில் அதனை அசை போட்டிடும் போது தான் அந்த வரிகளுக்கு நியாயம் செய்திட வேண்டுமெனில் நாம் பயணிக்க வேண்டிய தொலைவு இன்னும் எத்தனை ? என்பது புரிகிறது !! ஆனால் இந்தாண்டின் முதல் 3 மாதங்கள் ஓரளவுக்கு நமக்கு நிறைவாய் நிறைவுற்றிருக்கும் நிலையில் -  "7 to 77" என்ற அந்தப் பிராமிசினை கொஞ்சமே கொஞ்சமாய் நிறைவேற்றியுள்ளோமோ - இந்தப் 12 வாரங்களில்  ? என்று சிந்திக்கத் தோன்றுகிறது !! So தொடரும் இந்தப் பதிவு - இந்தாண்டின் முதல் மூன்று மாதங்கள் பற்றிய மினி அலசல் மாத்திரமன்றி ; உங்களில் எத்தனை பேர் இந்த 11 இதழ்களையுமே வாசித்துள்ளீர்கள் என்று நான் தெரிந்து கொள்வதற்குமே !! அதனால் இதுவொரு முதுகு சொரிந்துவிடும் படலமாய்ப் பார்த்திடல் வேண்டாமே - ப்ளீஸ் ? Nothing more than a simple performance rating !! Moreover அடுத்த மூன்றே மாதங்களில் "2020" என்று ஒரு பேப்பரில் எழுதி வைத்துக் கொண்டு - வீட்டிலும், ஆபீஸிலும் உள்ள அத்தனை மோட்டுவளையங்களையும் டிசைன் டிசைனாய்ப் பார்க்கத் துவங்கிவிடும் நேரம் புலர்ந்திருக்கும் என்பதால் - உங்களது சிற்சிறு inputs கூட எனது தீர்மானங்களுக்குப் பெரிதும் உதவிடும் guys !! So படித்ததில் பிடித்ததும், பிடிக்காததும் என்னவென்பதைச் சொல்லிடலாம் இங்கே !! 

Doubtless, ஜனவரியின் ஓட்டப்பந்தயத்தில் துவக்கக் கோட்டில் நின்றது மூவரென்றாலுமே, கோப்பைக்கென ஓடியது இருவரே என்பதில் சந்தேகம் லேது !! முதன்முறையாக 'தல' தஸ்ஸு-புஸ்சென்று மூச்சு வாங்கியபடிக்கே தூரத்து மூன்றாவதாய் ஓடி வர, "பராகுடா "& தோர்கல்" சிட்டாய்ப் பறந்து கொண்டிருந்தது தான் ஜனவரியின் highlight !! சின்னதொரு வித்தியாசத்தில் கோட்டை முதலில் எட்டிப்பிடித்தது "சிகரங்களின் சாம்ராட்" என்பது எனது அபிப்பிராயம் ! அதிலும் அந்தக் காலப்பயணம் சார்ந்த கதை நம்மிடையே ஏற்படுத்திய தர்க்கங்கள் ; தாக்கங்கள் ரொம்ப ரொம்ப நாட்களுக்கு நினைவை விட்டு நீங்கிடா விஷயமென்பதில் மாற்றுக்கருத்து இருக்காது அல்லவா guys ?! இங்கே சில கேள்விகள் கேட்க ஆசை எனக்கு :

தோர்கல் இன்றைக்கொரு டாப் நாயகராய் நம்மிடையே எழுந்து நிற்பது - அவரது இதழ்களின் விற்பனையிலும் பிரதிபலிக்கின்றது ! ஜானி 2.0 ; ஜேம்ஸ் பாண்ட் 2.0 ; இளம் டெக்ஸ் என்றெல்லாம் traditional நாயகர்களைக் கூட புது யுக அவதார்களில் இன்று ரசித்திடும் நாம் - இந்த fantasy நாயகரை ; அவரது கற்பனைகளின் உச்சக் கதைகளை ரசிப்பது எவ்விதமோ ? டெக்ஸ் வில்லரையே "அப்பாலிக்கா போய் விளையாடுங்களேன் ப்ரோ !!" என்று சொல்லச் சாத்தியமாகிடும் ஆற்றல் தோர்கலுக்குக் கிட்டியதன் மாயம் தான் என்னவாகயிருக்கக்கூடும் ?

Question # 2 : ஒரு டெக்சின் வெற்றி - ஒரு டைகரைக் கொணர்ந்தது ! ஒரு டைகரின் வெற்றி ஒரு பௌன்சரை ; ஒரு கமான்சேவை ; ஒரு டிரெண்ட்டை ; ஒரு ஜானதன் கார்ட்லெண்டை துளிர்க்கச் செய்தது - நம்மிடையே ! So ஒரு குறிப்பிட்ட நாயகரின் வெற்றி, அவர் சார்ந்த ஜானரில் இன்ன பிற கதைகளும், தொடர்களும் தொடர்ந்திடுவதற்கான ஆரம்பப் புள்ளியாகிடுகிறது ! அதே ரீதியில் தோர்கலின் வெற்றி - இன்னும் சில fantasy நாயகர்களின் வருகைக்கு அறிகுறியா ? தேடலாமா - இன்னமும் சில fantasy பார்ட்டிகளை ? அல்லது "பிடுங்கின மட்டுக்குப் போதும் ராசா !!" என்பீர்களா ?

Moving on - பராகுடா மீதும் கிட்டத்தட்ட identical கேள்விகள் எனக்கு !! ஒரு தமிழ் சினிமாவின் திரைக்கதைக்குச் சவால் விடும் திருப்பங்களும், சென்டிமென்ட்களும் நிறைந்த "அலைகடலின் அசுரர்கள்"  - காமிக்ஸ் வாசிப்பனுபவத்திற்கு முற்றிலும் புதுசு என்பதால் நமக்கு ரசிக்க இயன்றதா ? அல்லது சித்திரங்களின் ஜாலங்களில் மற்ற எல்லாமே பின்னணிக்குப் போய் விட்டதால் திறந்த வாய் மூடாது போயிற்றா நமக்கு ?

Plus a repeat on Question # 2 : இந்தக் கடற்கொள்ளையர் ஜானரில் இன்னமும் நிறையவே கதைகள் உள்ளன தான் ! "அலைகடலின் அசுரர்கள்" - க்ளைமாக்ஸ் பாகம் தொடரும் மாதங்களில்  வெளிவந்தானபின்னே - சந்தோஷ நினைவாய் அதனை இருத்திக் கொண்டு வாடிக்கையான வேலைகளைப் பார்த்திடலாம் என்பீர்களா ? அல்லது - இன்னுமொரு PIRATES ON THE SEAS கதைக்கு / தொடருக்கு  "ஜே" போடுவீர்களா folks ? நான்பாட்டுக்கு ஒரு ஆவேசத்தில் முட்டைக்கண்ணில் ஒரு முகமூடியை மாட்டிக்கொண்டு கிளம்பிடக்கூடாதில்லயா ?

மித வலுவிலான கதைகளோடு ஆண்டவனே பயணித்தாலும் நமது குக்கரில் அந்தப் பருப்பு வேகாது என்பதை எண்ணற்ற தடவைகள் நிரூபித்துக் காட்டிவிட்டீர்களெனும் போது - இரவுக்கழுகாரெல்லாம் விதிவிலக்காகிட இயலுமா - என்ன ? "சாத்தானின் சீடர்கள்" விஷயத்தில் எனது அனுமானத்திற்கு வலு சேர்த்த விஷயங்கள் நிறைய : பெரியவர் போனெல்லியின் கதையிது ! "GOLDEN TEX"  என்று இன்றைக்கும் சிலாகிக்கப்படும் அந்த முதல் 300 கதைகளுள் இடம்பிடித்த சாகசம் என்றவிதத்தில் இதன் மீது எனக்கு நிரம்பவே அபிமானம் தோன்றியது ! Plus கதையின் (இத்தாலிய) வாசக அலசல்களிலும்  நிறையவே positive ரேட்டிங் செய்யப்பட்டிருக்க - பக்கங்களைப் புரட்டிய போது சுவாரஸ்ய விஷயங்கள் வரிசையாக கண்ணில்பட்டன !  சாத்தான் பூஜை ; நரபலி ; முகமூடியணிந்த கும்பல் ; நிறைய ஆக்ஷன் என்றெல்லாம் கதை ஓடுவதைப் பார்த்த போது கதை தேறிடுமென்றுபட்டது ! Sadly அது நிகழாது போக - வசனங்களில் சடுகுடு ஆடி, குறைகள் ரொம்பவே glaring -ஆகத் தெரியாதிருக்கச் செய்வதிலியே நாக்குத் தொங்கிப் போய்விட்டது !  So "சாத்தானின் சீடர்கள்" என்னளவில் 5 /10 தான் !!

பிப்ரவரியை நான் சற்றே 'தேமே' என்று திட்டமிட்டுவிட்டதாய் அந்நேரம் எனக்குள் லேசாயொரு ஜெர்க் இருந்தது நிஜமே ! ரிப்போர்ட்டர் ஜானி கதைகள் எப்போதுமே மதில் மேல் பூனை ரகங்கள் தான் என்னைப் பொறுத்தமட்டிலும் ! Extraordinary !! என்றெல்லாம் சிலாகிக்க இடமிராது ; ஆனால் நிச்சயமாய் சராசரிக்கும் மேலிருக்கும் என்பதே எனது அனுவபவம் + அபிப்பிராயம் ! இந்த அழகில் புது ஜானியை எவ்விதம் நீங்கள் ஏற்றுக்கொள்வீர்களோ என்ற பயமும் சேர்ந்து கொள்ள - ஜானி 2 .0 ஆல்பத்தினுள் பணியாற்றத் துவங்கும் வரைக்கும் இந்த இதழை நிறையவே அவநம்பிக்கையோடு தான் பார்த்துக்கொண்டிருந்தேன் ! ஆனால் மொழியாக்கத்தை மாற்றி எழுதத் துவங்கும் சமயமே - கதையின் ஒருவித இலகுத்தன்மையை கண்டு லேசாய் நிம்மதி கொண்டேன் ! 42 பக்கங்களுக்கு சட்டிக்குள் உப்பு, மிளகு.காரம்,புளிப்பு,இனிப்பு.தித்திப்பு,உவர்ப்பு என்று சகல "ப்புக்களையும் " போட்டு கிண்டோ கிண்டென்றுகிண்டிய கையோடு - கடைசி இரண்டே பக்கங்களில் கூட்டு ; குழம்பு ; பொரியல் என்று சமைத்துப் பரிமாறும் நோவுகள் இங்கிருக்காது என்று புரிந்த போதே - இதனை நிச்சயம் நீங்கள் புறம்தள்ள மாட்டீர்களென்ற நம்பிக்கை பிறந்தது !! ஜானி 2 .0 ஒரு ஹிட் என்பதை நீங்கள் ஊர்ஜிதம் செய்துவிட தருணத்தில் - இங்கே ஒரேயொரு கேள்வியே என்னிடம் :

இந்தத் தொடரின் ஆல்பம் # 3 வெளியாகிவிட்டது ! And இதனை நாம் பிரெஞ்சிலிருந்து மொழிபெயர்த்தும் விட்டோம் ! ஒருவித காமெடி கலந்த க்ரைம் த்ரில்லர் என்று இதனைச் சொல்லலாம் ! My question for you is : க்ரைமுக்கும், காமெடிக்கும் ஒத்துப் போகுமா ? என்பதே !! Yes என்றால் 2020 -ன் அட்டவணையில் இது இடம் பிடித்திடும் ! "வேண்டாமே...ஒரு சீரியஸ் நாயகர் சிரிக்க வைக்க முனைவது - முனியாண்டி விலாசின் மெனுவில்   மைசூர்பாகைத் தேடுவதற்குச் சமானம் !!" என்பீர்களெனில் - "புது ஜானியின்" கதை # 1 இடம்பிடித்திடும் தொடரும் ஆண்டுக்கு !!

பிப்ரவரியில் எனக்கு ரிசல்ட் பற்றிய "டர்" இல்லாத 2 இதழ்களும் இடம்பிடித்திருந்தன ! முதலாவது "வைக்கிங் தீவு மர்மம்" !! தல சாத்வீக அவதாரிலும் ரசிக்கும் விதமே மிளிர்வதை நீங்களாகவே தான் மறுபதிப்பினில் கூறியிருந்தீர்கள் எனும் போது அங்கே எனக்கேது டென்க்ஷன் ? ஜாலியான வண்ண ஆல்பம் ; நீங்களும் ஹேப்பி ; ஞானும் ஹேப்பி ! இங்கொரு குட்டி ஹேப்பி சேதியும் : வண்ண மறுபதிப்பு டெக்ஸ் ஆல்பங்கள் சகலமும் ஒரிஜினல் கல்கத்தா ரசகுல்லாக்களைப் போல சரேல் சரேலென்று காணாது போகின்றன ஸ்டாக்கிலிருந்து !! கார்சனின் கடந்த காலத்தில் துவங்கி, டிராகன் நகரம் ; பவளச் சிலை மர்மம் ; சைத்தான் சாம்ராஜ்யம் முதல், சமீபத்தைய TEX Color சிறுகதைகளின் மறுபதிப்பு # 1 முதற்கொண்டு almost காலி ! 2013-ன் இதழ்களில் ஏகம் இன்னமும் கையிருப்பில் மொய்யென்று இருக்க, recent reprints பறக்கின்றன !! ஒண்ணுமே புரிலீங்கோ !! Tex Color reprints எனும் போதே இந்த சமாச்சாரத்தையும் சொல்லிவிடுகிறேன் ! சென்றாண்டின் அந்த மினி டெக்ஸ் கலர் சாகசங்கள் தொகுப்பு # 2 ஏற்கனவே அச்சாகி ரெடியாகி விட்டது !! மார்ச்சில் புது இதழ்களின் பரபரப்பில் அதை அறிவிக்க போன வாரம் மறந்தும் போச்சு ! இதோ அதன் அட்டைப்பட preview : அடுத்த சில நாட்களில் இது ஆன்லைனில் லிஸ்டிங் ஆகிடும் என்பதால் தேவைப்படுவோர் அங்கே வாங்கிக்கொள்ளலாம் ! Better still - ஏப்ரல் இதழ்களோடு சேர்த்து வாங்கி கொண்டால் கூரியர் விரயம் மிச்சமாகிடலாம் !

பிப்ரவரியில் ஜாலியாய் என்னை எதிர்நோக்கச் செய்த இன்னொரு இதழ் "நடனமாடும் கொரில்லாக்கள்" ! அந்தச் சிரிப்பு மேளா - சிறப்பாய் அமைந்திடுமென்ற நம்பிக்கையினை நீங்களும் மெய்ப்படுத்திட - இங்கேயும் ஒற்றைக் கேள்வியே எனக்கு : "மேக் & ஜேக் இதுவரையிலுமான 2 இதழ்களிலுமே 80 + மார்க்குகள் வாங்கியுள்ள நிலையில் 2020 -ல் இரண்டு ஸ்லாட்களுக்கு தகுதியுள்ளவர்களாவார்களா ? அல்லது "ஒன்றே நன்று !" என்பீர்களா ?

"ஜெரெமியா - தொகுப்பு 2" தான் பிப்ரவரின் X factor !! "தேறுமா ? தேறாதா ? ; ஓடுமா ? ஓடாதா ?" என்று துளியும் கணிக்க இயலா சூழலில் களம் கண்ட இதழிது !! And உங்களின் அபிப்பிராயங்களும், இரு வெவ்வேறு துருவங்களில் நிலைகொண்டிருக்க, இங்கே இனி கேள்விகளுக்கு அவசியம் நஹி என்று தீர்மானித்துள்ளேன் ! விற்பனையின் துரிதமோ ; துரிதமின்மையோ தான் இனி இங்கொரு வழிகாட்டுதல் தந்திட வேண்டும் !! 

நடப்பு மாதத்தில் கணிசமான கேள்விகள் இருந்தன தான் என்னுள் !!

**ஜேம்ஸ் பாண்டின் அதிரடி இன்னொரு லெவெலுக்குச் செல்லும் இந்த பாணி புதிதாய் இருந்தவரையிலும் ஓ.கே ! ஆனால் இரண்டாவது ஆல்பம் என்ற பிற்பாடு அந்த novelty factor இருக்க வாய்ப்பில்லையெனும் போது உங்களது reactions எவ்விதமிருக்குமோ ? என்ற கேள்வி !!

**அப்புறம் ஹெர்லாக் ஷோம்ஸ் மறுபதிப்பிலும் identical கேள்வி !! முதல் வண்ண இதழில் பரிச்சயம் ஏற்பட்ட பிற்பாடு - ஆல்பம் # 2 வெற்றியினைத் தொடருமாவென்று !!

**Last but not the least : "முடிவிலா மூடுபனி" கி,நா.வை எவ்விதம் வரவேற்பீர்களோ என்ற கேள்வியுமே !!

மூன்றுக்குமே நீங்கள் இதுவரைக்கும் தந்துள்ள பதில்கள் emphatic enough என்பதால், மண்டைக்குடைச்சலின்றி அடுத்த மாதத்துப் பணிகளில் பிசியாகிக் கிடக்கிறேன் ! இங்கே உங்கள் அலசல்களைத் தொடர்ந்திட்டாலே போதுமென்பேன் - புதிதாய்க் கேள்விகளை எழுப்பிடும் அவசியங்களின்றி !!

So...

டெக்ஸ் கதைகள் ஜனரஞ்சகத்துக்கும்....

தோர்கல் கதைகள் கற்பனைகளின் பரிமாண அலசல்களுக்கும்...

ஜேம்ஸ் பாண்ட் கதை புதுயுகப் பிரஜைகளுக்கும்....

கார்ட்டூன்கள் மனதை இலகுவாக்கிடவும்....

பராகுடா - நாம் பார்த்திராவொரு யுகத்தின் கதைகளை கலர்புல்லாகச் சொல்லிடவும்...

கிராபிக் நாவல் - தனிமையும், முதுமையும் எவ்வித சத்ருக்களென்று யதார்த்தமாய்ச் சொல்லிடவும்...

உதவிடின் - 7 to 77 வரை ஆளுக்கொரு சமாச்சாரம் இங்கிருக்க வாய்ப்புகள் உண்டு தானோ ? மகளிர் அதிகமாய் வினையாற்றும்  களமாய் காமிக்ஸ் இருப்பதில்லை என்பது இங்கொரு பொதுவிதி !! Of course - ரெகுலராய் காமிக்ஸ் படிக்கும் சகோதரிகள் நிரம்பவே உண்டென்பதை அறிவேன் தான் ; ஆனால் 80 % - 20 % என்பதே காமிக்ஸ் வாசக வட்டத்தின் ஆண்-பெண் break-up ஆக இருந்திடக்கூடும் ! இன்னுமிங்கே என்ன மிஸ்ஸிங் ? என்பதை அந்தச் சிறுபான்மை மகளிர் அணி மட்டும் சொல்லிட மெனெக்கெட்டால் நமது பார்வை இன்னும் முழுமையடையக்கூடும் !!

Before I  sign out - சில updates :

1."ஈரோடு ஸ்பெஷல்" பற்றிய அறிவிப்பு ஏப்ரலில் என்று அட்டவணையில் அச்சிட்டிருந்தது நினைவிருக்கலாம் !! நிறைய உருட்டல்களுக்குப் பிற்பாடு ஈரோடுக்கென பிரத்யேக இதழ்கள் 2 என்பதை உறுதி செய்துள்ளேன்  !! அவை எவையென்பதையும் கிட்டத்தட்ட தீர்மானம் செய்தாகிவிட்டது !! So ஏப்ரல் இதழ்களில் அவை சார்ந்த விளம்பரங்கள் இருந்திடும் !! அதற்கு முன்பாய் -  அந்த 2 ஸ்லாட்களைப் பிடித்திடவுள்ள ஆல்பங்கள் எவையென்று யூகிக்க ஆசையா folks ? Go ahead & try giving it a guess ?

2.க்ரீன்மேனர் கதையினைப் போலொரு  கார்ட்டூன் பாணி artwork !! ஆனால் கதையோ ஒரு சுவாரஸ்ய ஆக்ஷன் !! இதன் உரிமைகளை வாங்கியுள்ளோம் ! வாகான வாய்ப்புக்கு வெயிட்டிங் !!

3.அரசியல்...வரலாறு...குற்றம்...புலனாய்வு....இரத்தக்களரி...ஒரு தூரத்து தேசம்....!! இவையே வெகு சமீபமாய் நான் வாசிக்க நேர்ந்ததொரு b & w கிராபிக் நாவலின் களம் !! சற்றே கனமானதென்பதில் no doubts !! ஆனால் முயற்சிக்க நீங்கள் ரெடியென்றால் - நிச்சயமாய் நாமும் ரெடி !! I repeat - கனமான களமே !!

4.ஆண்டின் ஒரு quarter நிறைவுற்றிருக்க - இதுவரைக்கும் சந்தாவினில் ஏதோவொரு காரணத்தினால் இணைந்திடாது போன நண்பர்கள் - ஏப்ரல் to டிசம்பர்'19 சந்தாவினில் இணைந்திடலாம் !! ஆபீசுக்கு ஒரு மின்னஞ்சலோ ; போனோ அடித்தால் விபரங்கள் சொல்வார்கள் !!

Bye all...have a sparkling week-end !! See you around !!

Marching with March !!

நண்பர்களே,

வணக்கம். ஒரு சுட்டெரிக்கும் வெயில் நாளில் திடுமெனவொரு இதமான காற்று வீச ; கருமேகங்கள் எங்கிருந்தோ ஆஜரான மறு நொடி  - அதுவரை மண்டை காயச் செய்த வெப்பம்  காணாது போவதுண்டு தானே ? அதே போலத் தான் - என் நிலவரமும்   !! போன வாரம் இதே நேரத்தில், தேங்கிக் கிடந்த அத்தனை பணிகளையும் ஒப்பேற்ற 'லோ லோ'வென்று மொக்கை போட்டபடிக்கே சுற்றித் திரிந்தவன் - இப்போது ஜாலியாய் டி-வி-முன்னே அமர்ந்து ஒரு மெய்யான வீரரை தேசமே கொண்டாடுவதை ரசித்துக் கொண்டிருக்கிறேன் !! யுத்தக் கதைகள் ; விமானச் சண்டை சாகசங்கள் என்று ஏகமாய் சின்ன வயதில் படித்த சமாச்சாரங்கள் இன்றைக்கு நிஜமாய் கண்முன்னே அரங்கேறுவதைப் பார்க்கும் போதுமிரட்டலாய்த் தெரிகிறது !! Hail Bravehearts !!!

நாலு இதழ்களை உங்கள் கைகளில் ஒப்படைத்த பிற்பாடுக்கும் ; முற்பாடுக்கும் (??!!) மத்தியில் தான் எத்தனை வேறுபாடு ? இம்முறை நிச்சயமாய் லேட்டாகிடப் போகிறதென்ற டென்க்ஷனில் உச்சா போகாத உராங்குட்டான் போல  27-ம் தேதி வரை சுற்றித் திரிந்தவனுக்கு, நமது பைண்டிங் நண்பர் கடைசி நிமிடத்தில் (வழக்கம் போல்) கைதூக்கி விட்டு விடுவாரென்பது புரிபட்ட  நொடியில் பல்லெல்லாம் வாயாகிப் போனது ! But இனிமேல் தான் பரீட்சைப் பேப்பர்களைத் திருத்தும் பணிகளுக்குள் நீங்கள் புகுந்திடவுள்ளீர்களெனும் போது - அந்தப் "புன்னகை மன்னன் புருஷோத்தமன்" அவதாரைத் தற்காலிகமாய் பின்னணியிலேயே தொடரச் செய்தல் க்ஷேமம் என்பது புரிகிறது !! "எல்லாம் ஓ.கே. !!" என்று உங்கள் பக்கமிருந்தொரு பரவலான thumbsup கிட்டின் - "பு.ம.பு"-ஐ மறுக்கா கூப்பிட்டுக் கொள்ளலாம் தானே ?! இம்மாதத்து 4 இதழ்களுள் 3 புத்தம்புது ஆக்கங்கள் எனும் போது, அவற்றினை மேலோட்டமாயொரு புரட்டு புரட்ட மட்டுமே பெரும்பான்மைக்கு இதுவரையிலும் சாத்தியப்பட்டிருக்கும் என்று நினைக்கிறேன் ! So அவை சகலத்தையும் நீங்கள் படித்து, அலசி முடிக்கும் வரைக்கும் பொறுமையாய் காத்திருப்பேன் !!

மார்ச்சின் இதழ்களுள் எனது favorite எதுவாக இருக்குமென்று யூகிப்பதில் சிரமமேதும்  இராதென்றே நினைக்கிறேன் ! Oh yes - ஜேம்ஸ் பாண்ட் 007 கதையினை எழுதும் போதே நிரம்ப ரசித்தேன் தான் ! தெறிக்கும் ஆக்ஷன் ; the enemy within என்ற கதையாய், எதிரிகள் வெகு நெருக்கத்தில் இருப்பது ; சினிமா பாணியில் அரங்கேறிய chasing சீன்கள் என்று நெடுக பராக்குப் பார்த்துக் கொண்டே தான் பணியாற்றினேன் ! ஆனால் அவை எல்லாவற்றையும் விட இந்தப் புதுயுக ஜேம்ஸ் பாண்ட் கதைகளில், ஒரு மொழிபெயர்ப்பாளனை முழிபிதுங்கச் செய்யும் தரத்தில் ஒரிஜினல் ஸ்கிரிப்ட் இருந்தது தான் நினைவில் தொடர்ந்திடும் விஷயம் !   நல்ல நாளைக்கே crisp ஆக எழுதப் பிடிக்காது & தெரியாது எனக்கு ! ஆனால் இங்கோ நாலு வரிகளில் மாமூலாய் அடக்கிட வேண்டிய மேட்டர்களை ஒரே வீரிய வரியில் போட்டுத் தாக்கியிருக்க - அவற்றைத் தமிழாக்கும் பொருட்டு அடிக்க அவசியப்பட்ட கரணங்கள் நிரம்ப நாட்களுக்கு நினைவில் தங்கி நிற்கும் ! And இங்கொரு சின்ன விளக்கமுமே ! போன ஜேம்ஸ் பாண்ட் இதழில் ஆக்ஷன் பக்கங்களின் "டமால்..டுமீல்" சமாச்சாரங்களை முற்றிலுமாய் அடக்கி வாசித்த பிற்பாடு -  'பழைய குருடி..கதவைத் திறடி..!' என்று இப்போது DTS சவுண்ட் எபக்ட்களை நாடியது ஏனோ ? என்ற கேள்வி எழுந்திடலாம் ! சொல்லப் போனால் முதல் படிவத்தில் எடிட்டிங் செய்து முடித்திருந்த வேளையிலும், மௌன மொழியிலேயே தான் பாண்டை சாகசம் செய்திட விட்டிருந்தோம். பொதுவாய் நான் எடிட்டிங் செய்திடும் வார்ப்புகள் எல்லாமே black & white -ல் தான் இருந்திடுவதுண்டு ! So நிறைய நேரங்களில் கதையின் முழுமையையும் நானே வண்ணத்தில் பார்க்க நேரிடுவது அச்சின் போது தான் !  அதே பழக்கம் இங்கேயும் தொடந்தாலும், நிறைய தரைக்கடியிலான சண்டைக் காட்சிகள் காரிருளில் நடைபெறுவதாயிருப்பதைக் கண்ட போது, ஒரிஜினல் டிஜிட்டல் கோப்புகளை ஒருவாட்டி பார்க்கத் தோன்றியது ! கணினியின் திரைக்குள் உற்றுப் பார்த்தால் - லாந்தர் விளக்கு வெளிச்சம் கூட அந்தப் பக்கங்களில் மிஸ்ஸிங் என்பது தெரிந்தது !! 'இங்கே சுடுகிறார்களா ? சடுகுடு ஆடுகிறார்களா ?' என்பதே சந்தேகமாகிப் போகும் விதத்தில் அத்தனையும் இருட்டு sequences-ல் இருக்க, முழுக்கதையையும் கலரில் ஒருவாட்டி பிரிண்ட் போட்டுப் பார்த்தேன் ! நிறையவே இருள் ; நிறையவே ஆக்ஷன் ; நிறையவே மௌனம் என்ற கூட்டணி கொஞ்சமே கொஞ்சமாய் எனக்கு நெருடுவதாய்த் தோன்ற, வேறு வழியின்றி "ஜெய் ஒனுமாட்டூபீயுஹ் !!" (onomatopoeia) என்று தீர்மானித்தேன் ! ஒரு செயலை விளக்கும் விதத்திலும், அந்தச் செயலின் ஓசையையுமே பிரதிபலிக்கக் கூடிய "டுமீல்.....ணங்க்..கும்....".ரக வார்த்தைகளை இந்த "ஓணானை வேஷ்டியிலே போட்டுக்கிட்டியா ?" என்று ஆங்கிலத்தில் அழைப்பார்கள் ! அதற்கு முன்பாய் 2 ஸ்டிக்கர் ஷீட்களில் ஆசை தீர "பூம் ; டுமீல் ; கிராக் ! க்ராஷ் " சமாச்சாரங்களை அச்சிட்டு புக்கோடு தந்திடுவதெனத் தீர்மானித்திருந்தேன் ! மௌனமே ஓ.கே. என்போருக்கு no worries ; "ஆனால் எனக்கு ஸ்பீக்கரைப் போட்ட்டே தீரணும் !!" எனக்கூடிய நண்பர்கள், ஸ்டிக்கர்களை உரித்து ஒட்டிக்கொள்ளலாமென்பதே பிளான் ! ஆனால்  அந்தந்த ஆக்ஷன் sequences அரங்கேறும் வளைவு, நெளிவு கோணங்களுக்கேற்ப ஸ்டிக்கர்களை வடிவமைப்பதும் சரி, அந்தந்த shape-களில் ஒவ்வொரு ஸ்டிக்கரையும் உரித்திடும் விதமாய் தயாரிப்பதும் செம கஷ்ட காரியமென்பது தலைக்குள் உஷ்ணம் குறைந்தபோது புரிந்தது !  So வேறு வழி தெரியாது "தொபுக்கடீர்" என்று மாமூல் பாணிக்குத் திரும்பினோம் !

ஜேம்ஸ் பாண்டின் பணிகளுக்குத் துளியும் குறையா சுவாரஸ்யத்தோடே இம்மாத டெக்ஸ் கதைக்குள்ளும் உலாற்ற முடிந்தது ! ஒரு மெகா ஆல்பம் என்றாலே நம்மை அறியாது அங்கே வண்டி வேகம் எடுத்து விடுவதை,  260 பக்கங்கள் கொண்ட பருமனான புக்கைக் கையில் ஏந்தும் நொடியே புரிந்து விடுமென நினைக்கிறேன் ! அந்த பருமன் + clean சித்திரங்கள் என்றாலே பாதிக் கிணற்றை நாம் தாண்டிவிட முடிகிறதோ ? எது எப்படியோ - ஒரு மாமூலாகா கதைக்களமும் இம்முறை வாய்த்திருக்க - ஜாலியாக ரேஞ்சர்களுடனான பாலைவனப் பயணம் அரங்கேறியது ! எனக்கு இங்கொரு கேள்வி  guys !! இதுவரைக்கும் நம்மவர்கள் பாலைவனங்களில் சுற்றித் திரிந்திருக்கும் கதைகள் எல்லாமே decent ஆக ஸ்கோர் செய்துள்ளதாக எனக்குள் லேசாய் ஒரு எண்ணம் ! Am I right on it ? அல்லது பாலைவனங்களில் உப்மா கிண்டியுள்ள கதைகள் ஏதேனும் உங்களுக்கு நினைவுக்கு வருகின்றனவா ?  And இம்முறை கார்சனை சற்றே தூக்கிப் பிடிக்கும் விதமாய் கதாசிரியர் வடிவமைத்துள்ளதுமே ஒரு முதன்முறையா ? அல்லது இதற்கு முன்பான சாகசங்கள் எதிலாவது இதே பாணியை நாம் பார்த்திருக்கிறோமா ? ஞாபகப்படுத்திப் பாருங்களேன் ?

கார்ட்டூன்கள் எப்போதுமே எனக்கு செல்லப் பிள்ளைகள் எனும் போது - "விற்பனைக்கு ஒரு பேய்" மீது வாஞ்சையான பார்வையைப் பதிக்க இயன்றதில்  வியப்பிருக்கவில்லை தான் ! And இந்த மறுபதிப்புகள் இரண்டுமே சுமார் 25+ ஆண்டுகளுக்கு முன்பானவை எனும் போது, அந்த எலும்புக்கூடுகள் ராவில் துரத்தி ஓடும் sequence-ஐத் தாண்டி வேறெதுவும்  நினைவில் தங்கியிருக்கவில்லை ! So புதுசாய் ஒரு கதையைப் படிப்பது போலவே இருந்தது எனக்கு ! பற்றாக்குறைக்கு இந்தக் கதைகள் சகலத்துக்கும் வர்ணமூட்டப்பட்டுள்ளது வெகு சமீபமாகவே என்பதால், லேட்டஸ்ட் தொழில்நுட்பங்களை பணிகளில் உட்புகுத்த அவர்களுக்கு சாத்தியப்பட்டுள்ளது ! புக்கை ஒருவாட்டி புரட்டினாலே வண்ணங்களில் தென்படும் ஒருவித classiness அப்பட்டமாய்த் தெரிந்திடும் ! So  பெரிய சைசில், அழகு வர்ணங்களில் டாக்டர் வேஸ்ட்டையும், அவரது துப்பறியும் அண்ணாத்தையையும் நிரம்பவே ரசித்தேன் தான் ! இங்கொரு கேள்வி folks : இந்தத் தொடரினில் உள்ள மொத்தக் கதைகளே சொற்பம் தான் ; 11 in total ! அவற்றுள் நான்கை வண்ணத்தில் போட்டு விட்டோம். எஞ்சியிருக்கும் ஏழு கதைகளுள் நாம் இதுவரையிலும் வெளியிட்டிருக்கா புதுசுகள் மூன்றோ, நான்கோ தான் தேறும் ! தொடரும் ஆண்டுகளில் அவற்றையும் வெளியிடலாமா ? இந்த 'டமாஸ்' பார்ட்டிகளோடு பயணம் செய்வது ரசிக்கிறதா ? உங்கள் thoughts ப்ளீஸ் ?

தத்தம் பாணிகளில் மார்ச்சின் முதல் 3 இதழ்களும் என்னை லயிக்கச் செய்திருந்த போதிலும், என்னளவில் பணிகளின் போது மனதைப் பறிகொடுத்தது சந்தேகமின்றி "முடிவிலா மூடுபனி" கிராபிக் நாவலிடம் தான் !! இதுபற்றி நண்பர்களின் அலசல்கள் ஜாஸ்தி துவங்கியிருக்கவே இல்லை எனும் போது - இங்கே நானாய் விடும் அலப்பறைகள்  "பீப்பீ smurf " ஊதிடும் குழலாகவே பார்க்கப்படும் என்பது புரிகிறது ! ஆனால் ஒரு எடிட்டர்  புடலங்காயாய் அல்லாது, ரெகுலரான வாசகனாய் மட்டுமே எனதுஅபிப்பிராயங்களை முன்வைப்பதாயின் - எனது வோட்டு இம்மாதம் without a doubt - "மு.மூ" க்குத் தான் ! இந்த ஆல்பத்தின் டிஜிட்டல் கோப்புகள் எனக்கு வந்து சேர்ந்தது 2016 -ன் மத்தியில் ! ஓரிரண்டு ஆண்டுகளுக்கு ஒருவாட்டி  கதைத் தேர்வுகளுக்கென ஒரு மெகா பெட்டியில் அவர்களது சமீபத்து இதழ்களைக் கலவையாக்கி போனெல்லியிலிருந்து நமக்கு அனுப்பிடுவதுண்டு !  சகலத்தையும் பத்திரமாய் பீரோவில் அடுக்கிக் கொண்டு நேரம் கிட்டும் போது பரிசீலிப்பது வழக்கம் ! இந்த Le storie தொடரிலிருக்கும் கதைகள் என்னை ரொம்ப காலமாகவே உசுப்பி விட்டுக் கொண்டேயிருந்தன தான் ! வெள்ளையர் ஆட்சியின் போது - நம் மண்ணில் அரங்கேறிய சிப்பாய்க் கலகம் சார்ந்ததொரு கிராபிக் நாவல் உள்ளதென்று இங்கே பதிவில் நாலைந்து வருஷங்களுக்கு முன்பாகவே எழுதியிருந்தது நினைவிருக்கலாம் ! அது தான் இந்த கருப்பு-வெள்ளை கிராபிக் நாவலின் தனித்த தடம் இத்தாலியில் துவங்கியிருந்த வேளையுமே ! So வித்தியாசமான இந்தக் கதைகளை முயற்சித்துப் பார்க்கும் உத்வேகத்துக்குப் பஞ்சமே இருக்கவில்லை என்னுள் ! ஆனால் நமது முதற்சுற்று கிராபிக் நாவல்களைக் கண்டு தெறித்து ஓடிய நண்பர்கள், "கி.நா" என்றாலே குளிர் ஜுரம் கண்ட கரடிகளாய் தத்தம் குகைகளுக்குள் பதுங்கிட்டதும் நம் வரலாறு (!!!) தானே ? So   கொஞ்ச காலத்துக்கு "கி.நா" என்பதே ஒரு 'கெட்ட வார்த்தை' போல் பாவிக்கப்பட்டதால் டிக்கியை மூடிக் கொண்டிருக்க அவசியப்பட்டது எனக்கு ! ஆனால் இடைப்பட்ட அந்த ஆண்டுகளில் போனெல்லியில் அந்த Le Storie தொடரானது பர பரவென வேகமெடுத்திருக்க, ஒரு நெடும் பட்டியல் அங்கே தயாராகியிருந்தது ! So 2017 -ல் இவற்றைத் தமிழுக்குக் கொணர்ந்தே தீருவதென்ற வேகம் எனக்குள்ளும் துளிர்விட்டு சமயம், இந்தக் கதைவரிசையின் சில நல்ல தேர்வுகளை மட்டும் அனுப்பிடக் கோரியிருந்தேன் ! அதன் பலனாய்க் கிட்டிய ஒரு கத்தையினுள் இதுவுமொன்று ! பொதுவாகவே வரலாற்றின் ஏதேனுமொரு period-ல் அரங்கேறும் விதமாய் அமைந்திருக்கும் கதைகள் எனக்குள் ஒரு fascination-ஐ ஏற்படுத்தத் தவறுவதில்லை ! இதுவுமொரு 100 ஆண்டுகளுக்கு முந்தைய பிரான்சில் அரங்கேறும் கதை என்பதை கவனித்த போதே முதல் சுற்றிலேயே கை நம நமத்தது இதனை டிக் அடித்திட ! ஆனால் 2017-ன் லயன் கிராபிக் நாவல் தடத்துக்கென வேறு 3 கதைகள் தேர்வானதால், "முடிவிலா மூடுபனி" - மூடாக்குப் போட்ட மூடுபனியாகவே தொடர்ந்திட்டது இப்போது வரையிலும்  !

நிஜத்திலான போய்ஸ்பொன்னார்ட் மாளிகை !

இந்த இத்தாலிய கிராபிக் நாவல்கள் சார்ந்த reviews ; அலசல்கள் நிறையவே நெட்டில் இருப்பதால், யானையின் தூரைத் தடவுகிறோமா ? தும்பிக்கையைத் தடவுகிறோமா ? என்ற சந்தேகமின்றி - எதிர்நோக்கியுள்ள கதைகளின் தன்மைகளை ஓரளவுக்கேனும் புரிந்து கொள்ள சாத்தியமாகுகிறது ! So இந்தக் கதையின் சுலபத்தன்மை + சோகத்தன்மை பற்றி ஒரு கோடி கண்டிட இயன்றது எனக்கு ! More than anything else - இதற்கென வரையப்பட்டிருந்த சித்திரங்களில் பெரும்  துல்லியமெல்லாம் இல்லாவிடினும், எனக்கென்னமோ அந்த ஒருவித rustic simplicity-ல் ஒரு வசீகரம் தென்பட்டது ! நடப்பாண்டில் கிராபிக் நாவல்கள் தொடர்கின்றன என்பது தீர்மானமான கணமே "முடிவிலா மூடுபனி" க்கு நேராக ஒரு டிக் போட்டு விட்டேன் ! And yes - இந்தக் கதையினில் நான் பணியாற்றியது மொத்தமாகவே 2 நாட்களுக்குத் தான் எனும் போது, நியாயப்படிப் பார்த்தால்  அதனுடன் ஒன்றிடும் வாய்ப்புகள் குறைச்சலாகத் தானிருந்திருக்க வேண்டும் ! ஆனால் முன்னும், பின்னுமாய் பயணிக்கும் கதையின் காலகட்டங்கள் ; தனிமையில் அந்த போலீஸ்காரர் நடத்த முனையும் தேடல்கள் ; புலனாய்வுகள் ; தனக்குத் தானே புலம்பிக் கொள்ளும் இடங்கள் என்று நிறையவே விஷயங்களிருந்தன என் கவனத்தைத் தக்க வைத்துக் கொள்ள ! Icing on the cake - அந்த anticlimax நிரம்பிய climax தான் என்பேன் !! கதாசிரியர் லேசாய் மெனக்கெட்டிருந்தால் கூட கதை மாந்தர்களில் யாரையேனும் இன்னும் கொஞ்சம் டெவெலப் செய்து - அவருக்கு கொலை செய்திடும் முகாந்திரத்தையும் வலுவாக்கி - கிளைமாக்சில் ஒரு twist தந்திருக்கலாம் தான் ! அட, எனக்கே கூட இந்தக் கதையை இன்னும் வேறொரு ரூட்டில் எடுத்துக் போயிருக்கவொரு வழி தென்பட்டதென்றால் - கதாசிரியர்க்கு அது புலப்படாது போயிருக்குமா - என்ன ? ஆனால் அந்த பரிச்சயமான பாணிகளே வேணாமே என்பவராய் - நிஜ வாழ்வில் நடந்திடக்கூடிய விதமாய் ஒரு சுலப க்ளைமாக்ஸை நிர்ணயிக்கத் துணிந்ததை ரொம்பவே ரசித்தேன் நான் !! முடிவிலா மூடுபனி - போய்ஸ்பொன்னார்ட்  கிராமத்துக்கு மாத்திரமானது மட்டுமல்ல - ஒரு முதியவரின் சிந்தைகளை விடாப்பிடியாய் போர்த்திக் கிடக்கும் இருளுக்குமே என்பதை கதாசிரியர் சொல்ல முனைந்ததை எனக்கு ரொம்பவே ரசிக்க முடிந்தது !

Maybe இதற்கு தனிப்பட்ட இன்னொரு காரணமும் இருக்கக்கூடுமென்று தோன்றுகிறது ! பொதுவாய் இந்த போய்ஸ்பொன்னார்ட் மாதிரியான குட்டியூண்டு கிராமங்களை கதைகளிலும், சினிமாக்களிலும் தான் நாம் பார்த்திருப்போம் ! நிறைய தடவைகள் - இது மாதிரியான குக்கிராமங்களில் வாழ்க்கை எவ்விதம் தானிருக்குமோ ? என்ற கேள்விகள் எனக்குள் எழுந்ததுண்டு ! 2014-ல் இதனை நேரில் கண்டு உணர்ந்திடும் வாய்ப்பு எனக்கு கிட்டியது - அதுவும் இதே போலொரு பிரெஞ்சு கிராமத்தில் !! வழக்கமாய் நமது அச்சு இயந்திரக் கொள்முதல் சார்ந்த தொழிலின் நிமித்தம் நான் பையைத் தூக்கிக் கொண்டு தெருத் தெருவாய் அலைவதெல்லாமே பெருநகரங்களில் ; அல்லது தொழில் நகரங்களில் என்று தானிருக்கும் ! ஆனால் 5 ஆண்டுகளுக்கு முன்பாய் மிஷின் ஒன்றை கொள்முதல் செய்திருந்தோம் பிரான்சின் உட்பகுதியிலிருந்த ஒரு மலையோர கிராமத்தில் ! அதனைப் பார்வையிட முதலில் போயிருந்த சமயம் பிரெஞ்சு விற்பனையாளர் என்னை காரில் இட்டுச் சென்றிருந்தார் ; so பேசிக்கொண்டே போன போது, லேசாய் மட்டுமே கண்ணில் பட்டது அந்தத் தூங்குமூஞ்சி கிராமம் ! ஒன்றரை மாதங்கள் கழித்து அந்த இயந்திரத்தை லோட் செய்ய வேண்டிய வேளை வந்த போது, பிரெஞ்சு டீலர் வேறொரு பணியில் தான் பிசியாக இருப்பதால் உடன் வர இயலாது ; நீயாகவே போய் பார்த்துக்கொள்ளேன் ! என்று சொல்லி விட்டார் ! அதற்கென உள்ள எஞ்சினியர்கள் பணிகளைக் கனகச்சிதமாய்ச் செய்திடுவர் ; அதனைப் பராக்குப் பார்ப்பதைத் தாண்டி, சாமான்கள் விட்டுப் போகாமல் சகலமும் லோட் ஆகிவிட்டனவா ? என்று சரி பார்ப்பது மாத்திரமே எனது பணியாக இருக்குமென்பதால், நானும் ஓ.கே. என்றபடிக்கு முகவரியை வாங்கி கொண்டு கிளம்பிவிட்டேன் பாரிஸிலிருந்து ! முதலில் Dijon என்ற இன்னொரு பெருநகருக்கு ரயில் ; அங்கிருந்து ஒரு குட்டி நகருக்கு இன்னொரு குட்டி ரயில் ; அப்பாலிக்கா அங்கிருந்து மூன்றாவதாயொரு பொம்மை ரயில் மாதிரியானதொன்றில் அந்த கிராமத்துக்குப் பயணம் என்று அன்றைய நாளின் காலை கடந்து போனது ! ஒரு மாதிரியாய் இரண்டே தண்டவாளங்கள் கொண்ட அந்த கிராமத்தின் ரயில்வே நிலையத்திலிருந்து (!!!!) வெளிப்பட்டால் ஈ-காக்கை கூடத் தென்படவில்லை அங்கே ! அந்த ஊரிலிருந்தே ஒரு சின்ன விடுதியில் தங்க புக்கிங் செய்திருந்தேன் என்பதால் - பொடி நடையாய் பெட்டியை இழுத்துக் கொண்டு நடந்த போது - காலத்தில் பின்னோக்கிச் திரும்பிவிட்டோமோ ? என்ற சந்தேகம் தான் !! அந்தக்காலத்து black & white ஆங்கிலப் படங்களில் வரும் தினுசில் வீடுகள் ; பண்ணைகள் ; கடைகள் என்று முற்றிலும் புதிதான காட்சிகள் ! அந்த கிராமத்தின் மொத்த ஜனத்தொகையே 1800 தான் என்பதை ஏற்கனவே கூகுளில் படித்திருந்தாலும் - நேரில் பார்க்கும் போது ரொம்பவே வித்தியாசமாகயிருந்தது ! அந்தப் பகுதிகளுக்கு அசலூர்க்காரர்கள் வருகை தருவதெல்லாம் ஆடிக்கொரு தபா-அமாவாசைக்கொரு தபா என்பதும் புரிந்தது - ஆளாளுக்கு என்னை விநோதமாய்ப் பார்த்த பார்வைகளில் ! விடுதியில் பெட்டியைப் போட்டு விட்டு ஊரைச் சுற்றிப் பார்ப்போமே (!!!) என்று நடைபோட்டேன் ; இந்த கிராபிக் நாவலில் வரும் போய்ஸ்பொன்னார்ட் கிராமத்தை போலவே, ஒரு சின்ன சதுக்கம், அங்கே சில கடைகள் ; சில pub-கள் ; சில ஹோட்டல்கள் என்றபடிக்கு  முடிந்துவிட்டது ! பாக்கி எல்லாமே அங்குள்ள குடியானவர்களின் பண்ணைகளும், வீடுகளும் தான் ! ஒவ்வொரு வீட்டிலும் ஒரு குட்டி கார் ; அப்புறம்  என் திருட்டு முழியைப் பார்த்து 'வள் வள்'   என்று குரைத்து நிற்கும் நாய் என்பதே  மாமூலான template ஆக தென்பட்டது ! திராட்சை பயிரிடுவதும், அவற்றை ஒயின் செய்ய விற்பதுமே அங்கே பிழைப்பு என்பதை ஏற்கனவே வாசித்திருந்தேன் ! திரும்பின  பக்கமெல்லாம் தென்பட்ட அந்தத் தொங்கு தோட்டங்களைப் பராக்குப் பார்த்தபடிக்கே, கண்ணில் பட்டதொரு சின்ன சூப்பர்மார்கெட்டில் நுழைந்து சாப்பிட வாங்கிக் கொண்டு ரூமுக்குத்  திரும்பினேன் !  அன்றைய மாலைப்பொழுதையும்,அந்த நிசப்த இரவையும் ரூமிலிருந்தபடிக்கே ரொம்ப நேரம் அசை  போட்டுக் கொண்டிருந்தது இன்னமும் நினைவில் உள்ளது எனக்கு !  நான்கு மணி நேர பயணத் தொலைவினில், உலகின் ஒரு அசாத்திய நாகரீக நகரம் காத்திருக்க - இங்கோ இன்னமும் அதன் சுவடைக் கூடக் கொண்டிரா ஒரு வாழ்க்கை நிலவுகிறதே என்ற முரண் ரொம்பவே புதிராகப்பட்டது எனக்கு ! இந்த மக்களுக்குமே வாழ்க்கைச் சக்கரங்கள் பரபரப்பின்றி ஓடுகின்றன என்பதை புரிந்து கொள்ள முடிந்த போது - ஒரு இனம்சொல்ல இயலா பீலிங் உள்ளுக்குள் !! So போய்ஸ்பொன்னார்ட் கிராமத்தை கிராபிக் நாவலில் பார்க்க முடிந்த போது, அந்தக் குக்கிராம வாழ்க்கையோடு ஒன்றிப் போக கூடுதலாய் சாதியப்பட்டுள்ளது போலும் எனக்கு !! Whatever the reasons - மனித உணர்வுகளை முகமூடிகளின்றிச் சொல்ல முனைந்துள்ள கதாசிரியரை எனக்கு ரொம்பவே பிடித்துப் போய் விட்டது !! அதிலும் இவர் டைலன் டாக் கதைகளுமே பேனா பிடிப்பவர் எனும் போது, அங்கே செம அசைவமாய் ; violent  ஆகக் கதைகளை புனைந்திருக்கக்கூடியவரின் இந்த இன்னொரு முகம் all the more interesting !!

இந்த ஞாயிறை இம்மாத இதழ்களுள் எதனைப் படித்து அலசிடவும் நீங்கள் நேரமெடுத்துக் கொண்டாலும் அடியேன் ஹேப்பி தான் ! வாசிப்பின் முன்னணியில் கிராபிக் நாவல் இருக்க நேரிட்டால் ஹேப்பியா-ஹேப்பி !! Bye guys ; கிளம்புகிறேன் இப்போதைக்கு ! Have a sunny Sunday !! See you around !!