அதகளம் இங்கே ஆரம்பம் !

நண்பர்களே,

வணக்கம். தொந்தி அதுபாட்டுக்கு ஒரு பக்கம் தொங்கித் திரிந்தாலும், திடீரென ஏழெட்டு கிலோ குறைந்து, சும்மா லக்கி லூக் ஆகி விட்டாற்போலோரு பீலிங்கு ! "லாலாக்கு டோல் டப்பி மா" ரகத்திலான பாடல்கள் கூட இப்போது கவிதையாய்த் தோன்றுகின்றன ! கச கசவென புழுக்கம் எடுக்கும் இந்த அக்டொபரின் வெயிலில், கடைத் தெருவில் நடக்கும் போதுமே, யாரையும் மூக்கோடு சேர்த்துக் குத்தும் எரிச்சலெல்லாம் தோன்ற மாட்டேங்குது ! 'அட...இந்தத் திடீர் இலகுத்தன்மை ஏனோ ?' என்று யோசிக்கிறீர்களா ? வேறொன்றுமில்லை guys - நவம்பர்  இதழ்களில், எனது பணிகளைப் பூரணமாய் முடித்துவிட்டதன் தொடர்ச்சியாய் - இந்த 2018  அட்டவணையின் சகல toughies-களுக்குமே மங்களம் பாடியாச்சு  ! And காத்திருக்கும் டிசம்பரின் இதழ்கள் just a breeze எனும் போது - ஓராண்டின் பயணத்தினை முழுசாய் நிறைவு செய்திடும் தருணம் வெகு அருகே இருப்பது புரிகிறது ! அதன் பலனாய் உள்ளுக்குள்ளே மெலிதாய்ப் பிரவாகமெடுக்கும் அந்தக் குதூகலம் தான் இளையராஜாவின் BGM சகிதம் ஒரு ரம்யத்தைத் தருகிறது !

2018-ன் அட்டவணையின் முற்பாதி அத்தனை மென்னி முறிக்கும் பணிகளைத் தாங்கியிருக்கவில்லை தான் ; வழக்கமான ட்யுராங்கோ ; தோர்கல் போன்ற சில ஸ்பெஷல் இதழ்கள் நீங்கலாக ! ஆனால் இரண்டாம் பாதியிலோ "இரத்தப் படலம்" ; "டைனமைட் ஸ்பெஷல்" என்ற இரு WWF பயில்வான்கள் மட்டுமன்றி, "தீபாவளி மலர்" ; ஜம்போவில் JAMES BOND என்று back to back மாதங்களில் நிறையவே மிரட்டலான பணிகள் ! So நடப்பின் ஏப்ரலைத் தாண்டிய போதே மண்டைக்குள் ஒரு புயல் எச்சரிக்கைச் சின்னத்தை ஏற்றியது போலொரு உணர்வு குடிகொள்ளத் துவங்கிவிட்டது ! And தொடர்ந்த நாட்களில் ஒரு பணியிலிருந்து - அடுத்த பணிக்கான தாவல் என்று சதா நேரமும் ஒரு அரூப டென்ஷன் வேதாளமாய் என்னோடே தொங்கிக் கொண்டு பயணம் செய்வது போலவே இருந்தது ! அந்த பருமனான இதழ்கள் ஒன்றொன்றாய்க் கரை சேரத் துவங்கிய பிற்பாடே - இங்கே என் தோளிலிருந்த பளு கம்மியாகிக் கொண்டே போவதை ரசித்திட முடிகிறது ! Latest in that line - ஜம்போவின் இதழ் # 3 ஆக அமையவுள்ள ஜேம்ஸ் பாண்ட் 007 -ன் "பனியில் ஒரு பிரளயம்" !

தம்மாத்தூண்டு குழந்தைக்குக் கூட இந்தப் பெயரானது செம பரிச்சயம் எனும் போது - இவருக்கோசரம் நான் ஒரு அறிமுகமோ - பில்டப்போ தருவதெல்லாம் அனாவசியம் தானே ? அதற்குப் பதிலாய் - இம்முறை நாம் சந்திக்கவுள்ள BOND பற்றி லேசாயொரு கோடு மட்டும் போட்டுக் காட்டல் தேவலாம் என்று பட்டது ! ஷான் கானரியில் ஆரம்பித்து ; ராஜர் மூர் ; பியர்ஸ் ப்ராஸ்னன் ;  டானியல் கிரைக் என்று நிறைய வெள்ளித்திரை பாண்ட்களை நாம் பார்த்தாச்சு ! காமிக்ஸ் மேடையிலும் செய்தித் தாள் தொடர்களாய் ; சில முழுநீள ஆல்பங்களாய் - வெவ்வேறு வித artwork களில் 007-ஐ நாம் பார்த்திருக்கிறோம் ! ராணி காமிக்சின் முதல்சுற்றில் சும்மா திளைக்கத் திளைக்க இவர் தானே வலம் வந்தவர் ? அந்நாட்களில் இவரது கதையுரிமைகள், மயிரிழையில் நம் கையை விட்டுப் போயிருக்க -  அது குறித்து ஏகப்பட்ட கவலை எனக்குண்டு ! ஆனாலும் - "சீ..சீ...இது புளிக்கிற பழமாக்கும் ; ஐயே...படம்லாம் ரெம்போ சுமார் !!" என்று எனக்குள்ளேயே என்னைச் சமாதானம் செய்து கொள்வேன் ! மாதம் முதல் தேதிக்கான அவர்களது "அடுத்த வெளியீடு" விளம்பரம் மீது ரொம்பவே அக்கறை எடுத்துக் கொள்வேன் - simply becos அந்த ஒண்ணாம் தேதி இதழ் "ஜேம்ஸ் பாண்ட்" சாகசமாய் இருந்திடும் பட்சத்தில், நாம் ஏதாச்சும் ஏப்பை சாப்பையான நாயகரைக் களமிறக்கி வைத்து, உதைபடக் கூடாதே எனும் பொருட்டு ! So JB வர்றார் என்று தெரிந்தால் - நான் நம்ம இஸ்பைடரையோ ; சட்டித் தலையன் ஆர்ச்சியையோ தயார் பண்ணிவிடுவது வாடிக்கை !  நாட்கள்  நிறையவே ஓடிவிட்டன - எண்பதுகளின் அந்த வேளைகளிலிருந்து ! And ஜேம்ஸ் பாண்டுமே ஏகமாய் மாற்றம் கண்டுவிட்டுள்ளார் - இடைப்பட்டுள்ள இந்தக் காலகட்டத்தில் ! சிலபல ஆண்டுகளுக்கு முன்பாக அமெரிக்காவில் 007-க்கு புதியதொரு இன்னிங்ஸ் துவக்கிட  டைனமைட் காமிக்ஸ் நிறுவனம் ஆர்வம் காட்டிட - "அட..!" என்றவொரு சிறு சுவாரஸ்யத்தைத் தாண்டிப் பெரிதாய் நான் வேகம் காட்டிடவில்லை ! அமெரிக்க பாணிகள் இந்த பிரிட்டிஷ் ரகசிய ஏஜெண்ட்க்கு எத்தனை தூரம் சுகப்படுமோ என்ற சந்தேகம் தான் ! ஆனால் முதல் இதழ் வெளியான போது நெட்டில் கிட்டிய படங்களும் சரி ; அலசல்களும் சரி - இதுவொரு அதிரடியின் ஆரம்பப் புள்ளி என்பதை உணர்த்தின ! அதைத் தொடர்ந்து மெது மெதுவாய் 007-ன் புது அவதாரின் முன்னேற்றத்தை தொடர்ச்சியாய்க் கவனித்துக் கொண்டே வந்தேன் ! இரண்டாவது ஆல்பமும் மிரட்டலாய் வெளியாகி தூள் கிளப்ப - எனக்கு இருப்புக் கொள்ளவில்லை ;  டைனமைட்டோடு தொடர்பைத் துவங்கி, போன வருஷமே JB-ன் உரிமைகளை வாங்கியும் விட்டோம் !

ஜம்போவின் முதல் இதழாய் இவரையே தயார் செய்வது தான் எனது முதல் எண்ணம் ! ஆனால் அதற்குப் பின்பாய் இளம் TEX கதைகளை போனெல்லியில் ஒரு புது பாணியில் முன்னெடுத்துச் செல்லவிருக்கும் விபரம் தெரிய வந்த போது - "இளம் தல' ஜம்போவின் தடத்துக்கு சூப்பர் ஆரம்பமாய் இருப்பாரென்று பட்டது ! சரி, இதழ் # 2 JB தான் என்று மனதை மாற்றிக் கொண்டேன் ! அப்போது தான் ஹெர்லக் ஷோம்சின் ஏஜெண்ட்களிடமிருந்து ஒரு மின்னஞ்சல் வந்தது - தொடரின் பிதாமகரான ஜூல்ஸ் அவர்களின் 90-வது பிறந்தநாள் நெருங்குகிறது என்றும் ; நமது அட்டவணையினில் அவ்வேளைக்கு ஹெர்லக் வெளிவருவதாயின் சிறப்பாகயிருக்குமென்றும் ! நம்மையும் ஒரு உருப்படியாய் மதித்து அவர்கள் ஒரு கோரிக்கையை முன்வைக்கும் போது - மறுக்கவாவது தோன்றுமா ? சத்தமின்றி இதழ் # 2 என்ற ஸ்தானத்தை "ஒரு குரங்கு சேட்டை"க்கு நல்கிய கையோடு - JB-க்கு அதன் அடுத்த நம்பரை ஒதுக்கினேன் !

வழக்கம் போல் பணிகளை முடித்து விட்டு, அச்சுக்குத் தயாராகும் தருணத்தில் - "ஒரு சர்வதேச ஸ்டார் நாயகரின் இதழிது ; அட்டைப்படங்களை அவர்கள் ஒரு தபா பார்த்து ஓ.கே. சொல்லிவிட்டால் தேவலாம் !" என்று தோன்றிட, ராப்பரை அவர்களுக்கு மின்னஞ்சலில் அனுப்பி வைத்தேன்  ! எனது அந்தத் தீர்மானத்துக்கு இன்னொரு காரணமும் உண்டு ! ஜேம்ஸ் பாண்டின் அமெரிக்க வெளியீடுகளுக்கு ஒன்றுக்கு மேற்பட்ட டிசைன்களில் ராப்பர்கள் தயார் செய்துள்ளனர் ! இந்த பாணிக்கு "Variant covers" என்று பெயர் ! So கதை ஒன்றே எனினும் அதற்கு டிசைன் டிசைனாய் வெவ்வேறு ராப்பர்கள் இருப்பதுண்டு ! (ஆர்வலர்களும் ஒவ்வொரு ராப்பரிலும் ஒரு புக் வாங்கிடுவார்கள் போலும் !! ) So நமக்கு வந்திருந்த டிஜிட்டல் கோப்புகளில் மொத்தம் 9 வெவ்வேறு அட்டை டிசைன்கள் இருந்தன ! ஒவ்வொன்றுமே மிரட்டலாய் இருக்க, நிறையவே இன்னிக்கி-பிங்கி -பாங்க்கி போட்டுப் பார்த்த பிற்பாடே ஒரு டிசைனைத் தேர்வு செய்தேன். அது பொருத்தமாய் உள்ளதா ? என்பதை படைப்பாளிகளே பார்த்துச் சொல்லிவிட்டால் தேவலாம் என்று மனத்துக்குப் பட்டது ! டிசைனை அனுப்பிவிட்டுக் காத்திருந்தால் - அந்த ஒப்புதல் வழங்கும் ப்ராசஸ் கொஞ்சம் நேரமெடுத்தது ! சின்னச் சின்ன குறைகளையும் அவர்கள் துல்லியமாய்ச் சுட்டிக்காட்டி, திருத்தங்கள் போடச் செய்ய - அட்டை இன்னமும் மெருகேறியது புலப்பட்டது ! And இதோ - அந்த அட்டையின் முதற்பார்வை folks :

முன்னட்டையும் சரி ; பின்னட்டையும் சரி - 100 சதவிகிதம் ஒரிஜினல்களே - நமது பெயர்களையும் லோகோவையும் நுழைக்கும் வேலைகள் நீங்கலாக ! இருப்பினும், இதிலுமே அவர்கள் காட்டிய கவனம் செம அற்புதம் ! "இந்த ஸ்டைல் font வேண்டாம் ; இதை இங்கே பொருத்துங்கள் ; அதை அங்கிருந்து நகற்றுங்கள்" என்ற ரீதியில் அவர்கள் தந்த input களை ஜூனியர் எடிட்டரின் மேற்பார்வையில் செய்தோம் ! இறுதியான result - ரொம்பவே வித்தியாசமானதொரு அட்டைப்படம் என்று எனக்குப் பட்டது ! உங்களுக்குமே "RK பாணியில்" கலையுணர்வுடனான விமர்சனங்கள் தோன்றாது - "அடடே..!!" என்பது தான் தீர்ப்புகளாய் இருந்திடும் பட்சத்தில் பிரமாதமாய் இருந்திடும் !

கதையைப் பொறுத்தவரை - ஒற்றை வரியில் சொல்வதானால் - "ரணகள அதகளம்!" என்று மட்டுமே சொல்வேன் ! இயன் பிளெமிங்கின் ஜேம்ஸ் பாண்ட் கதாப்பாத்திரம் ஒரிஜினலாய்த் துவக்கம் கண்டது அவரது ஒரு டஜன் நாவல்களில் தான் ! 1954-ல் துவங்கிய இந்த நாவல் வரிசையின் சகலத்தையும் படிக்கும் வாய்ப்பு கிட்டியிருப்போருக்கு ஜேம்ஸ் பாண்ட் கதாப்பாத்திரம் பற்றி ஒரு லெவல் கூடுதலான புரிதலிருக்கும் என்பது நிச்சயம் ! ஒவ்வொரு பணியின் போதும் JB அணியும் உடையிலிருந்து, கொண்டு போகும் ஆயுதம் வரைக்கும் காட்டும் அக்கறைகளை சிலாகிக்க இயன் பிளெமிங் நிறையவே மெனெக்கெட்டிருப்பார் ! அது போதாதென்று - ஒவ்வொரு தருணத்திலும் ஜேம்ஸ் பாண்ட் பருகும் ட்ரிங்க் பற்றியுமே ; அவரது பெண்தோழிகள் பற்றியுமே விலாவரியாக தகவல்கள் பார்த்திட இயலும் ! அப்புறம் அந்த பிரிட்டிஷாருக்கே உரித்தான ஒரு dry humor-ம் ஹீரோவிடம் தெறிக்கும் விதமாய் சம்பாஷணைகள் இருப்பது வாடிக்கை ! "The Man with a License to Kill !!" என்பதே கதாசிரியர் உருவாக்கப்படுத்திய JB-ன் அறிமுகம். ஆக பணியில் அவர் துளி கூட ஈவு-இரக்கம்  காட்டாது போட்டுத் தள்ளிக் கொண்டே போவது தான் இவரது வாடிக்கை !  இந்த ஒட்டு மொத்த package தான் ஜேம்ஸ் பாண்ட் எனும் கதாப்பாத்திரம் எனும் போது, தினசரிகளில் மும்மூன்று கட்டங்களாய் வெளியாகிடக்கூடிய strip feature கதைகளில் இதன் சாரத்தை முழுமையாய்க் கொணர்வது ரொம்ப ரொம்ப கஷ்டம் ! ஆனால் இந்த முழு நீள ஆல்பத்திலோ - கதாசிரியர் இயன் பிளெமிங் மனதில் உருவாக்கப்படுத்தியிருந்த அக்மார்க் 007-ஐ படு சிரத்தையாய் புதியதொரு வார்ப்பில் உருவாக்க முனைந்துள்ளதை பார்க்கலாம் ! அந்த வெள்ளித்திரையில் நாம் பார்த்து பிரமிக்கும் action sequences இங்கும் ஏராளமாய் உண்டு ! சித்திரங்களை அவர்கள் வரைந்துள்ள கோணங்களை ரசிக்க மட்டுமே ஒரு நாள் முழுசும் எடுத்துக் கொள்ளலாம் ! அப்புறம் இன்னொரு சுவாரஸ்ய விஷயமும் கூட ! "டமால்..டுமீல்.கும்... நங்..." என்ற காமிக்ஸ் sound effects எதுவுமே ஒரிஜினலில் தந்திட  படைப்பாளிகள் முனைந்திடவில்லை ! So நாமுமே மௌனமே அங்கு தேவலாம் என்று விட்டு விட்டோம் !! ஒரு புதுவித அனுபவம் காத்துள்ளது guys - ஆக்ஷன் தெறிக்கும் பக்கங்களில் ! ஒரிஜினலின் அதே ஆணழகர் ; கோட் மடிப்புக் கலைந்து போகுமே என்று கவலை கொள்பவர்  ; துப்பாக்கிகளை காதலிகளாய் நேசிக்கும் ஆர்வலர் ; துளியும் தயங்காது கண்ணுக்குள் விரலை (literal ஆகவுமே !!) விடும் சாகசக்காரர் என்று இங்கே ஒரு faithful reproduction of the real 007 காத்துள்ளது என்பேன் !! எழுதும் போதே கதையின் பரபரப்பு என்னையும் தொற்றிக் கொள்ள - மொத்தத்தையும் மூன்றே நாட்களில் நிறைவு செய்ய சாத்தியப்பட்டது ! எனக்கு நினைவிருக்க, சமீபத்தில் இத்தனை வேகமாய் நான் பணி செய்த கதை இதுவே !

அப்புறம் அந்த ஓவியம் + கலரிங் பாணிகள் பற்றியும் சொல்லாது போக இயலாது ! எதிராளியை சம்மட்டியைக் கொண்டு JB சாத்தும் போது, வாசிக்கும் உங்களுக்குமே தலையைக் குனிந்து கொள்ள தோன்றினால் - எனக்கு ஆச்சர்யம் இராது ! அத்தனை நேர்த்தி ஓவியங்களில் ! And வர்ணச் சேர்க்கையின் மிரட்டலை விளக்க தொடரும் உட்பக்கங்கள் போதுமென்பேன் :

ஏதேனும் ராசியா - என்று சொல்லத் தெரியவில்லை - ஆனால் இதுவரைக்குமான ஜம்போ இதழ்களின் அச்சு ; தயாரிப்புத் தரங்கள் தாமாய் set ஆகி விட்டுள்ளன ! இம்முறையும் அதற்கொரு விதிவிலக்கல்ல என்பேன் ! கண்ணில் ஒற்றிக் கொள்ளும் விதத்தில் அச்சு அமைந்துவிட்டுள்ளது ! அச்சான பக்கங்களை புரட்டும்  இந்த வேளையிலேயே  எனக்குக் குளிர் ஆட்டுகிறது - முதல் பார்வையில் உங்களது reactions களை அறிந்திடும் ஆசையினில் !! ஜம்போவுக்கு சந்தா செலுத்தியிரா வாசகராய் நீங்கள் இருப்பின் - you are missing out on something special ! குறைவான பிரிண்ட்ரன் மட்டுமே எனும் போது கடனுக்கு வாங்கிடும் முகவர்களுக்கு இது அனுப்பப்பட மாட்டாது ! ஆன்லைனில் தான் முந்திட வேண்டி வரலாம் !

நவம்பரின் "தெறிக்கும் ஆக்ஷன்" ஜம்போவில் மட்டும் தான் என்றில்லை ; நம் 'தல'யின் தீபாவளி மலரிலும் தான் !! டைனமைட் ஸ்பெஷல் ஒரு சாத்வீக டெக்ஸைக் கண்ணில் காட்டியதெனில் - இம்முறையோ ஒரு தீபாவளிப் பட்டாசு ரக இரவு கழுகு waiting !! இந்த ஆல்பம் நிச்சயமாய் சுகப்படுமென்று இதனைத் தேர்வு செய்த போதே எனக்குப் புரிந்து கொள்ள முடிந்தது தான் ; ஆனால் கதையினுள் பணியாற்றும் போது தான் அதன் முழு வீச்சும் ; வீரியமும் புரிபட்டது !! டைகர் ஜாக்கும் சரி ; நம்மவரும் சரி - சும்மா பின்னிப் பெடல் எடுத்துள்ளார்கள் !! வழக்கமான பில்டப் போலவே இதுவும் தோன்றலாம் தான் ; ஆனால் trust me guys - நவம்பர் 6 தேதிக்கு நீங்கள் வெடிக்கவிருக்கும் எங்கள் ஊர் சமாச்சாரங்களுக்குத் துளியும் விடுதலிலா அதிரடி இது !!

And பற்றாக்குறைக்கு இம்மாதத்து விலையில்லா Color Tex -ம் ஒரு கண்குளிர் விருந்து ! "புனிதப் பள்ளத்தாக்கு" yet another வித்தியாசமான டெக்ஸ் சிறுகதை !! கதையின் விஸ்தீரணம் குன்றிடும் போதெல்லாமே கதாசிரியர்கள் காட்டிடும் கற்பனை வளம் இம்முறையும் பிரமிக்கச் செய்கிறது ! Here you go - ஒரு டீசரோடு !!

அச்சுப் பணிகள் இப்போதே 90 % நிறைவுற்றுவிட்ட நிலையில் - சிரமங்களே இல்லாது - மாதக் கடைசிக்கு முன்பாய் இதழ்களை உங்களிடம் ஒப்படைத்து விடுவது உறுதி guys ! நீங்களே சொல்லுங்களேன் - எப்போது வேண்டுமென்ற தேதியை !! மீண்டும் சந்திப்போம் folks ; Bye for now !! Have a terrific Sunday !

P.S : அடுத்த பதிவு - (அதாவது அடுத்த ரெகுலர் பதிவு) 2019ன் அட்டவணையுடனான பதிவாக அமைந்திடவுள்ளது ! வரும் வெள்ளிக்கிழமை -  ஆயுத பூஜைக்கு மறுநாள் விடுமுறை தானே ? டி.வி.களுள் மூழ்கிடும் நேரத்தில் இங்கேயும் கொஞ்சம் எட்டிப் பார்த்தீர்களெனில் அட்டவணையை அரங்கேற்றி விடலாம் ! What say all ?