Dial T.....

 நண்பர்களே,

CAUTION : ஒரு நெடும் பதிவு லோடிங் ....

வணக்கம். சிக்கின திக்கெல்லாம் இண்டிகேட்டரை போட்டுவிட்டு "ரிவர்ஸிலும் போவோம்... முன்னாடியும் போவோம்... புளிய மரத்திலும் ஏற்றுவோம்..." என்று கூத்தடிக்கும் நம்ம வண்டிக்கு எதுவுமே ஒரு முழுமையான சர்ப்ரைஸ் ஆகிடக் கூடாது தான். இதோ இன்று வரையிலும், Fab 5 மற்றும் Graphic Novel Twins சார்ந்த முன்பதிவுகள் செம மொக்கை போட்டு வருகின்றன என்ற புலம்பலுக்கு முற்றுப்புள்ளியே வைக்கவில்லை ; ஆனாலும் சூப்பர்மேன் பாணியில் "டாஹ்டா" என்று புதியதொரு திக்கில் தடதடக்க புதியதொரு ரயில் தடத்தைப் பற்றி அறிவிக்க அடியேன் ஆஜர்.

முன் செல்லும் பாதையில் கொஞ்ச காலத்திற்கேனும் பரீட்சார்த்த முயற்சிகள் வேண்டாமே என்பதாகவே உங்களது சமீபத்திய எண்ணவோட்டங்கள் இருப்பதாய் எனக்குள் ஒரு எண்ணம். Yes, "நாங்க சகலத்துக்கும் தயார்!"என்று முழங்கிடும் ஒரு சிறு வட்டம் இருப்பதை நான் மறுக்கப் போவதில்லை. ஆனால் நல்ல நாளைக்கே நமக்கு இருப்பது ஒரு ஆகச்சின்ன வட்டம். And அதற்குள் இன்றைக்கு இன்னொரு மினி வட்டம் வரையும் அவசியம் நேரும் போது, உள்ளங்கையில் போட்டுக் கொள்ளும் மருதாணிக் கோலம் அளவிற்கே நமது உள்வட்டம் சுருங்கிவிடும் அபாயம் இருக்கிறது.​So இந்த நொடியில் 'ஆடுறா ராமா...தாண்டுறா ராமா' என்று தினுசு தினுசாய் வித்தை காட்டுவதைக் காட்டிலும், பெரும்பான்மைக்கு பிடித்ததைப் படிக்கத் தரும் புண்ணியத்தையாவது கட்டிக் கொள்ளுவோமே என்று படுகிறது. ​"ஆஹா ஓவரா பில்டப் கொடுக்கிறானே?" என்று கடுப்பா? இதோ மேட்டருக்குள் நுழைகிறேன். 

போன வருஷம் கிட்டத்தட்ட இதே தருணத்தில் "ஒரு ஆயிரம் பக்க வெளியீடு போட்டே தீரணும்" என்று இங்கே குரல்கள் உரக்க ஒலித்தது நினைவிருக்கலாம். And அந்த ஆயிரம் பக்கங்களில் டெக்ஸின் இதுவரை மறுபதிப்பு கண்டிரா கிளாசிக்குகளை கலரில் போட்டுத் தாக்கினால் தெறி மாஸாக இருக்குமே என்ற எண்ணமும் தலைதூக்கி இருந்தது. ஆரம்பத்தில் மண்டையை மறுப்பில் நான் ஆட்டி வைத்தாலும், உங்களது ஒட்டுமொத்த உத்வேகத்தைக் கண்டபோது எனக்குமே அந்த சபலம் தொற்றிக் கொண்டதை மறுக்க மாட்டேன். மட மடவென ஆபீசில் மைதீனிடம் சொல்லி, ஒரு ஆயிரம் பக்க டெக்ஸ் சைஸிலான ஹார்ட் கவர் இதழின் மாதிரியையும் தயாரித்து, அதனை ஒரு போட்டோவும் எடுத்து, நமது வாட்ஸ்அப் கம்யூனிட்டியில் பகிர்ந்து இருந்தது நினைவிருக்கலாம். "தெய்வங்களா இத்தனை பெரிய புக்கை இத்தனை பக்கங்களோடு போடும் பட்சத்தில் - விலை ரூ.1800-ஐத் தொட்டு விடுமே பரவாயில்லையா?" என்று கேட்டிருந்த போது அதற்குமே டபுள் ஓகே என்று சொல்லியிருந்தீர்கள். 'சரி.... பார்த்துக் கொள்வோம்' என்றபடியே அந்த நொடியில் ஆறப்போட்டு இருந்தாலும், அடிமனதில் இது தொடர்பான சிந்தனை ஓட்டமெடுத்துக் கொண்டே தான் இருந்தது.

And ஓரளவிற்கு அது குறித்த shape எனக்குள் கிட்டியிருந்த போது போனெலியிடம் மெதுவாய் இது குறித்து வாயைத் திறந்தேன். 'இன்ன மாரி... இன்ன மாரி... எங்க ஊரில் டெக்ஸ் தலைகாட்டி 40 ஆண்டுகள் ஆகின்றன. அதைக் கொண்டாடும் வகையில் அடுத்த வருஷத்தில் ஒரு ஆயிரம் பக்க அதிரடி டெக்ஸ் இதழை கலரில் போட ஆசை. இது சரிப்படுமா? " என்று அவர்களிடம் கேட்டிருந்தோம். "அடடே அதற்குள் 40 ஆண்டுகள் ஓடிவிட்டனவா? பலே பலே" என்று முதுகில் தட்டிக் கொடுத்தவர்கள், 'கொஞ்சம் யோசித்து விட்டுச் சொல்கிறோம்' என்று பதிலளித்திருந்தார்கள். தொடர்ந்த பொழுதுகளில் அவர்கள் தெரிவித்தது -  "ஒரே புக் ஆயிரம் பக்கங்கள் என்பது தயாரிப்பில் ஐரோப்பியத் தரங்களுக்கே ஒரு நூறு தலைநோவுகள் தரக்கூடிய சமாச்சாரமாச்சே? இதனை இந்தியாவில் நீங்கள் செய்திடும் போது எத்தனை கவனமாய் பணி செய்தாலும் அச்சிலும் சரி பைண்டிங்கிலும் சரி, பூரண திருப்தி கிட்டுவது கடினம் என்பதே எங்களது அபிப்பிராயம். ஆகையால் ஒரே ஆயிரம் என்பதை மறுபரிசீலித்து தனித்தனி இதழ்களாய் அல்லது ஒன்றிரண்டு கதைகளின் தொகுப்புகளாய் இப்போது போலவே தொடர்ந்திடலாமே?" என்று பகிர்ந்திருந்தனர்.

​அவர்களது கவலை நியாயமானதே என்பதை மறுப்பதற்கே இல்லை தான். சொல்லப்போனால் மிகச் சரியாய் இதே காரணங்களை சொல்லியே நானுமே உங்களிடம் மறுப்புத் தெரிவித்துக் கொண்டிருந்தேன் ! ஆயிரம் பக்கங்கள் எனும் போது கிட்டத்தட்ட 65 துண்டு காகிதங்களில் அச்சிட்டு, அவற்றை ஒன்று கோர்த்து, தைத்து அதன்பின்னே ஹார்ட்கவர் பைண்டிங் செய்தாக வேண்டும். அந்த பருமன் & அந்த பழு தாங்கும் விதமாய் அட்டையும் சூப்பர் ஸ்டராங்காக இருத்தல் அவசியமாகிடும். சரி,எல்லாம் செய்துவிடலாம் தான். ஆனால் அந்த 65 துண்டுக் காகிதங்களைச் சேகரிக்கும் போது, ஒற்றக் காகிதம் விடுபட்டாலோ, இடம் மாறிப் போனாலோ அந்த புக்கே குப்பைக்குத் தான் போக நேரிடும். தவிர அத்தனை பருமனான இதழை இங்கு நமக்கு சாத்தியமாகிடும் பைண்டிங் இயந்திரங்களின் மூலம் தையல் செய்திடும் போது, ஐரோப்பியத் தரங்கள் ஒரு கனவாகவே இருந்திடும் என்பதை மறுக்க இயலவில்லை. So அவர்களது வாதத்தில் முழுமையான லாஜிக் இருப்பதை புரிந்து கொள்ள முடிந்தது.

​"இல்லைங்கண்ணா எங்க ஊர் முயலெல்லாம் மூணு கால்ல தான் நொண்டியடிக்கும்" என்று மறுக்கா பிட்டைப் போட்டுப் பார்க்கும் சபலம் உள்ளுக்குள் எழுந்தது தான். ஆனால் சுப்ரிமோ ஸ்பெஷல் வெளியிட்ட தருணத்திலேயே பைண்டிங்கில் இந்த பக்கக் குளறுபடிகள் / விடுதல்கள் சார்ந்த நோவுகள் கணிசமாகவே எழுந்திருந்தது நினைவுக்கு வந்தது. இது அதைக்காட்டிலும் முரட்டு புக் எனும்போது, பக்கப் பிழைகள் எழும் பட்சத்தில் குமுறி எடுத்துவிடுவீர்கள் என்ற பயமும் உள்ளுக்குள் விரவுவதை உணர முடிந்தது.ஆனால் 'மணந்தால் மகாதேவி - படித்தால் குண்டு புக்' என்று நீங்கள் ஒற்றைக் காலில் தான் நிற்பீர்கள் என்பதுமே தெரியாமல் இல்லை. So மறுபடியும் "இல்லைங்க சார்... நாங்கள் முடிந்த மட்டிற்கு கண்களில் விளக்கெண்ணெய் ஊற்றிப் பார்த்துக் கொள்கிறோம். அதிலும் நம்ம கண்களின் சைஸ் பற்றித் தான் உங்களுக்குத் தெரியுமே? So பிழையில்லாமல் பார்த்துக் கொள்கிறோம்" என்று மீண்டும் ஒருவாட்டி கேட்கவும் செய்தோம்.ஆனால் இத்தனை தசாப்தங்களாய் டெக்சோடு  பயணித்து வரும் ஜாம்பவான்களே கூட இத்தகையதொரு தடிமனான முயற்சிக்குள் தலைவைத்துப் படுத்திருக்கவில்லை என்பதால், "வேண்டாமே விஷப்பரீட்சை!" என்பதே அவர்களது பதிலாகவும் இருந்தது.

​தெய்வமே தீர்ப்பு சொன்ன பிற்பாடு, முன்சீப் கோர்ட்டில் போய் மனுப் போடுவது அரை அணாவிற்கு பலன் தரப் போவதில்லையே ?! So சத்தமில்லாமல் அதை அப்படியே விட்டுவிட்டு அவர்கள் முன்மொழிந்தது போல் தனித்தனி இதழ்களாக வெளியிட என்ன செய்யலாம் என்ற யோசனையோடு நாட்களை நகர்த்தினேன்.அதற்குள் 2026-ன் அட்டவணைத் தருணம் வந்துவிட அதனில் பிஸியாகி விட்டாச்சு. ஜனவரி பிறக்கும் வரை மேற்கொண்டு எதுவும் சிந்திக்கவும் இயலவில்லை. பிப்ரவரி பிறந்த பிற்பாடு what next? என்ற சிந்தனைகள் தலைக்குள் ஓடிய போது, தொங்கிக் கொண்டு நின்ற இந்தக் கிளாசிக் கலர் மறுபதிப்பு ப்ராஜெக்ட் பற்றிய நினைவு திரும்பியது. சரி, கிராபிக் நாவல் ட்வின்ஸ்  முன்பதிவுகளும் அதற்குப் பின்பான Fab 5 முன்பதிவுகளும் ஓடிக்கொண்டிருக்கின்றன ; இந்த நொடியில் அவற்றை கொஞ்சமாச்சும் கரைசேர்ப்பதே பிரதானம் and அதன்பின் இந்த க்ளாசிக் டெக்ஸ் பற்றி யோசித்துக் கொள்ளலாம் என்று தீர்மானித்தேன். ஆனால் ஓட்டம் எடுத்தவை நாட்கள்தானே அன்றி, முன்பதிவுகளின் துரிதமே அல்ல. 'ஹாவ்'  என்ற பெரும் கொட்டாவிகள் சகிதம், கிராபிக் நாவல்களுக்கும் சரி, Fab 5-க்கும்  சரி, தலா  212 + 228 முன்பதிவுகளைத் தாண்டி எதுவுமே சாத்தியப்படவில்லை.

​ஆனால் இன்னொருபுறமோ மரணத்தை மறந்தது மம்மியாகவே  இருந்தாலும், தெறிக்கவிடுவதில் டெக்ஸ்  சகலருக்கும் டாடி  என்பதை ஏப்ரல் நிரூபித்துக் கொண்டிருந்தது. மறுபக்கமோ கிங் ஸ்பெஷலில் வேதாளரும், இன்ன பிற ஜாம்பவான்களும், ரவுண்டு கட்டி அடிக்க, மெகா சைஸில் டின்டின் தனக்கே உரித்தான அடையாளத்துடன் சக்கை போடு போட்டுக் கொண்டிருந்தார். ​ஆக தற்காலிகமாகவாவது வாசகப் பெரும்பான்மை  கேட்பதைத் தருவதே சரியான தீர்மானம் என்று மனதில்பட்டது. நேரங்கள் கிடைப்பதே குதிரைக் கொம்பு என்றாகி வரும் இக்காலத்தில் 'தல' என்ற ஒற்றைச் சொல்லுக்குத் தலைவணங்கி, தேவையான வாசிப்பு அவகாசங்களை நீங்கள் தரத் தவறுவதில்லை என்பது புரிந்தது. So அதனைச் சாதகமாக்கிக் கொண்டு ஒரு பிரத்தியேக டெக்ஸ் கலர் கிளாசிக்  தடத்தை அறிவிக்க உத்தேசித்திருக்கிறோம். காத்திருக்கும் ஆகஸ்ட் முதலாய் ‘The TERRIFIC TEX சந்தா' என்ற பெயரில்  TTS எக்ஸ்பிரஸ் தததடக்கக் காத்துள்ளது. ஏற்கனவே டெக்ஸ் கதைகளில் எவற்றையெல்லாம் நீங்கள் 'தம்' கட்டிப் பரிந்துரை செய்திருந்தீர்களோ, அவை சகலத்தையுமே மண்டைக்குள் ஒரு ஓரத்தில் சேமித்தே வைத்திருந்தேன். So அவற்றை தனித்தனி இதழ்களாக்கினால் எத்தனை ஆல்பங்களை  உருவாக்கிட முடியும் என்று கணிக்கும் முயற்சியில் இறங்கினேன்.

​அந்தத் திக்கில் புகுந்த போதுதான் அடுத்த சவால் காத்திருப்பது புரிந்தது. நீங்கள் கோரியிருந்த மறுபதிப்பிற்கான கதைகள் எல்லாமே குறைந்தது 35-40 ஆண்டுகளுக்கு முன்னே Black & White-ல் நாம் வெளியிட்டிருந்தவை. அந்நாட்களில் இன்டர்நெட்டும் கிடையாது,. டெக்ஸ் கதைகளில் எத்தனை இருக்கும்? என்பதும் நமக்குத் தெரியாது. இரண்டு ஆண்டுகளுக்கு ஒருவாட்டி மொத்தமாய் ஒரு 20-30 இத்தாலிய டெக்ஸ் புக்குகளை நமக்கு அஞ்சல் மூலம் பார்சலாக்கி அனுப்பி வைப்பார்கள். அவற்றுள் பொம்ம பார்த்துவிட்டு 'ஆங் இது ரைட் , இது ஓ.கே ' என்றபடிக்கு கதைகளைத் தேர்வு செய்வதே அன்றைய வாடிக்கை.And முழுக்க முழுக்கவே கடிதங்களும், அதன் பின்பான காலங்களில் Fax செய்திகளுமே தகவல் பரிமாற்றக் கருவிகள். 35+ ஆண்டுகளுக்குப் பின்னே அன்று அனுப்பிய Fax தகவல்கள் சகலமும் சுத்தமாய் வெளுத்துப் போய் காலிக் காகிதங்களாகியிருக்க, கடுதாசிகளோ File-ல் போட்டது பாதி, போடாதது மீதி என்று போன இடமே தெரியவில்லை.

​So 788 கதைகள் என்ற அசுர உயரத்தில் இருக்கும் டெக்ஸின் தொடருக்குள்ளிருந்து நாம் 1988-ல் போட்ட கதையின் இத்தாலியத் தலைப்பு எது? நம்பர் எது? என்றெல்லாம் தேடுவது என் முன்மண்டையில் கேசத்தைத் தேடுவதைக் காட்டிலும் கடினமான பணியாகிப் போனது. வேறு வழியே இன்றி டெக்ஸ் கதைகளில் நாம் தோராயமாய் தேர்வு செய்ய ஆரம்பித்த காலகட்டத்திலிருந்து ஒவ்வொரு இதழுக்குமான முன்னோட்டங்களை போனெலியின் வெப்சைட்டிலிருந்து ஆங்கிலத்தில் வாசிக்கத் துவங்கினேன். அதற்கு முன்பாக இங்கு நாம் மறுபதிப்பு செய்திட எண்ணியிருக்கும் கிளாசிக்ஸ்களின் கதைச்சுருக்கத்தைத் தெரிந்து கொள்ள மெனக்கெட்டிருந்தேன்.​"இது பேங்க் கொள்ளை பற்றிய கதை", "இது செவ்விந்தியப் புரட்சிக் கதை", "இது ஆயுதக் கடத்தல் பற்றிய கதை" என்று ஒவ்வொரு சாகசத்துக்குமான கருக்களை மேலோட்டமாய் குறித்து வைத்துக் கொண்டு, அதில் தலைகாட்டிடும் வில்லன்கள், சகாக்கள், ஊர்கள் என்ற பெயர்களையும் குறித்து வைத்துக் கொண்டேன்.அப்புறமாய் நான் வாசிக்கும் முன்னோட்டங்களில் அவை tally ஆகின்றனவா? என்றபடிக்கே புரட்டிக் கொண்டே போனேன். கிட்டத்தட்ட  தொடரில் 300 இதழ்களின் கதைச் சுருக்கங்களை கரைத்துக் குடித்த பிற்பாடு, நம் தேடல் பூர்த்தி கண்டிருந்தது.கண்ணோ ஒரு பக்கத்துக்கு இஸ்துக்கினு இருந்தது. மொத்தம் ஆறு கதைகள் - 968 பக்கங்களை ஆக்கிரமித்திருந்தன. 'அய்யா போதும்.... இதுக்கு மேலேயும் தேட தம் லேது!' என்றபடிக்கே அடுத்து இவற்றை எவ்விதம் நமக்கான இதழ்களாக்குவது என்ற திட்டமிடலுக்குள் புகுந்தேன்.

​இங்கேயுமே ‘மணந்தால் மமிதா பைஜூவைத்தான்’ என்ற அடம் பிடிப்பீர்கள் என்பது புரிந்தது. 'ஒவ்வொரு கதையையும் ஒட்டே புக்காகத்  தான் போடணும்!' என்ற குரல்கள் கேட்கும் என்பதை யூகிக்க முடிந்தது. ஆனால் இங்கோ இன்னொரு மாதிரியான சிக்கலும் தலைதூக்கி நிற்பது புரிந்தது. இதோ நீங்கள் கோரியிருந்த கதைகளின் பட்டியலும், பக்க எண்ணிக்கைகளும் சார்ந்த விபரங்களும் : நிதானமாய் பாருங்களேன் :

• ​எல்லையில் ஒரு யுத்தம்: 220 பக்கங்கள்
• மரண தூதர்கள்: 65 பக்கங்கள்
• ​நள்ளிரவு வேட்டை: 182 பக்கங்கள்
• ​இரும்புக்குதிரையின் பாதையில்: 152 பக்கங்கள்
• ​சாத்தான் வேட்டை: 224 பக்கங்கள்
• ​ரத்த முத்திரை: 120 பக்கங்கள்

ஆக இரண்டு சாகசங்கள் தவிர்த்த மீதம் அனைத்தும் தினுசு தினுசான பக்க எண்ணிக்கைகளில் பயணிக்கின்றன ! So ஒவ்வொரு இதழுக்கும் ஒரு தினுசான விலை நிர்ணயம் செய்ய வேண்டியிருக்கும். சீரற்ற விலைகளில் இவற்றை தனித்தனியாய் - "இந்தப் புத்தக விழா Special, அந்த ஆன்லைன் ஸ்பெஷல்" என்று ரிலீஸ் பண்ணும் பட்சத்தில் ஏகமாய் குழப்பம் தலைதூக்கிடும் என்பதும் புரிந்தது ! ஒரு ரெகுலரான தடத்தில் மாதா மாதம் சீராக வெளியாகும் இதழ்களைத் தவிர, தோதுக்கேற்ப எப்போது வந்தாலும் ஹிட் அடிக்கும் ஆற்றல் நம்ம இரும்புக்கை மாயாவியாருக்கு மட்டுமே உண்டு என்பதுதான் bottomline. ஓ யெஸ்.... டெக்ஸ் வில்லரை எந்தக் களத்தில் இறக்கி விட்டாலும் பட்டையைக் கிளப்பி விடுவார் என்ற நம்பிக்கை உள்ளதுதான் ; ஆனால் விற்பனை சார்ந்த நடைமுறைகளுக்கு சீரற்ற விலைகளும், சீரற்ற இடைவெளிகளும் பெரும் தலைவலிகளாகிப் போவதை இப்போதெல்லாம் பார்க்க முடிகிறது. ​So, போட்டால் ஒரே மெகா 1000 பக்க புக்காக அல்லது இவற்றை ஒரு கிளாசிக் சந்தாவாக்கி இயன்ற மட்டிலும் சீரான பக்க அளவுகளோடும் , விலைகளோடும் வெளியிடுவதே உசிதம் என்று இந்த உசிதமணிக்குத் தோன்றியது. ஒரே மெகா ஆல்பம் என்ற கனவு சாத்தியமில்லை என்றான பிற்பாடு இரண்டாவது option மட்டுமே நமக்கு எஞ்சி நிற்கின்றது.

சாத்தான் வேட்டை 220 பக்க சாகசம். So, இதனை தலா 110 பக்கம் வீதம் இரு ஆல்பங்களாக ஆக்கி அடுத்தடுத்த மாதங்களில் வெளியிட்டால் என்ன? என்று நினைக்கத் தோன்றியது. ஆகஸ்டில் முதல் இதழ் என்றால் தொடரும் செப்டம்பரிலேயே அடுத்த அத்தியாயத்துடன் முடித்து விடலாம்! And இவை சகலமுமே ஏற்கனவே வெளிவந்த கிளாசிக்ஸ் தான் என்னும்போது, "ஐயோ கதை தொங்கலில் நிற்குதே, கிளைமாக்ஸ் என்னான்னு தெரியாமல் சிண்டை பிய்த்துக்கொள்வது போல் உள்ளதே" என்று கூக்குரலிட அவசியங்கள் இராது என்றும் நினைக்கத் தோன்றியது. Anyways, யுகங்களாய் போனெல்லியில் புதுப்படைப்புகளுக்குமே இதுதான் நடைமுறை எனும்போது அந்த அனுபவத்தினை நாமும் சற்றே உணர்ந்து தான் பார்ப்போமே? என்று நினைத்தேன். And உள்ளபடிக்கே வாசிப்புக்கு நேரம் ஒதுக்க நீங்கள் தடுமாறிக்கொண்டிருக்கும் இந்தக் காலகட்டத்தில், இது போன்ற தவணை முறை வாசிப்பு வாய்ப்புகள் உங்களுக்கு மெய்யாலுமே ஒரு உபகாரமாகவும் அமைந்திடக் கூடும் என்றும் நினைத்தேன். So, இந்த TERRIFIC TEX சந்தாவின் டெம்ப்ளேட் இதுவாகவே இருந்துவிட்டால் தேவலாம் என்று படுகிறது.

ரைட், இப்போது ஆங்காங்கே எழக்கூடிய மைண்ட் வாய்ஸ்களை "கேள்வியும் நானே -பதிலும் நானே" பாணியில் கையாள்வதாய் இருந்தால் இதோ இப்படித்தான் அரங்கேறிடும் என்று எண்ணுகிறேன்:

1.கேள்வி: ஆங்.. ரெண்டு பாகம் கொண்ட புக்கா வெளியிட்டுப்புட்டு அதில் ஒரு பாகம் மட்டும் காலியாகிப் போச்சுன்னா, இன்னொரு பாகம் யூஸ் இல்லாம போயிடுமே, அதுக்கு என்ன பண்ணுவ?

​பதில்: ரொம்ப சிம்பிள். ஆன்லைன் லிஸ்டிங் போடப் போடுவதே ஒரு சாகசம் பூர்த்தி கண்ட பிற்பாடு என்றுதான் திட்டமிட்டுள்ளோம். இரு பாகங்களையும் இணைத்து ஒரே பேக்காக மாத்திரமே லிஸ்டிங் செய்வோம், விற்பனையும் செய்வோம். So, வாங்கினால் செட்டாக வாங்கும் வாய்ப்பு மட்டுமே வழங்கப்படும். புத்தக விழாக்களிலும் இதுவேதான் பாலிசியாகத் தொடர்ந்திடும். இதோ டின்டினின் மாயப் பந்துகள் ஏழு & கதிரவனின் கைதிகள் கூட இரு தனித்தனி ஆல்பங்களாகத்தானே வெளிவந்துள்ளன ? ஆனால் நாம் அவற்றை பிரித்து விற்பனை செய்வதில்லை. So அதே பாணி இங்கேயும் தொடர்ந்தால் ஓ.கே தானே?

​2.கேள்வி:  எப்போதிலிருந்து இது ஆரம்பம்டா தம்பி?

பதில் : ஆகஸ்ட் '26 முதலான ஈரோடு புத்தக விழாவிலிருந்து ஆரம்பிக்க உத்தேசம். இந்த சந்தாக்களில் இணைந்திட உங்களுக்குக் கொஞ்சம் அவகாசம் தந்தது போலவும் இருக்கும்; இதழ்களின் தயாரிப்பிற்கு நமக்கு கொஞ்சம் மூச்சு விடும் நேரமும் கிட்டியிருக்கும்.

​3.கேள்வி: சந்தா தொகை எம்புட்டு?

​பதில்: ரெகுலர் சந்தாக்களில் உள்ளோருக்கு ரூ.1800. அவர்களுக்குத் தனியாக கூரியர் கட்டணங்கள் இராது. சந்தாவில் இல்லாதோர் எனில் தமிழகத்திற்குள் ரூ. 2250. 

இங்கே இந்த கூரியர் தொகை ஒரு பஞ்சாயத்தாகி வருவது நான் அறியாததல்ல. மாசா மாசம் இதற்கென இவ்வளவு தண்டம் அழணுமா? என்ற கேள்வியோடு Fab 5 முன்பதிவிற்கு சிலர் தயங்கியிருப்பதாக ஆங்காங்கே வாசிக்கத்தான் செய்துள்ளேன். உள்ளதைச் சொல்லப்போனால், ஒவ்வொரு மாதமும் புத்தகங்களை கூரியர் செய்திட ஆகும் செலவுகளின் முழுமையையும் ஒருபோதும் உங்களிடம் நாம் pass on செய்வதில்லை. இன்று கூட்டப்பட்டுள்ள கூரியர் கட்டணங்கள் + அந்த Packing Boxes கிரயங்களைச் சேர்க்கும்போது வரும் முழுச் செலவினில் 30 சதவீதத்தை நாமே ஏற்றுக்கொண்டு, மீதத்தை மாத்திரமே உங்களிடம் கோருகிறோம். இதுவுமே நோவுதான் எனில், அதைத் தவிர்க்க சத்தியமாய் வேறு மார்க்கமே கிடையாது. And ரெகுலர் சந்தாக்களில் உள்ளோருக்கு இதுபோலான தருணங்கள் தான் கூடுதலாகப் பலன்களைக் கண்ணில் காட்டக்கூடிய நேரங்கள்.

​4.கேள்வி: "இப்படியே பழசைப் போட்டுக்கிட்டே போனாக்கா வழுக்கிப் பாறையில மோதி வழுக்கை பிளந்துடும் ; ஆமா சொல்லிப்புட்டேன்"  

​பதில்: Oh yes.....இத்தகைய சீரிய எச்சரிக்கைகள் நொடிப்பொழுதில் பாய்ந்தோடி வரும் என்பதும் obvious. ரெகுலர் தடம் ஒருபுறம் இருக்க, சைடுல - "பாருங்கோ சார் சர்க்கஸ் பண்றேன், பவுசு காட்டுறேன்"னு பரீட்சார்த்த முயற்சிகளில் பல்லைப் பெயர்த்துக்க இதுக்கு மேலேயும் 'தம்'மோ 'தில்'லோ ஸ்டாக்கில் இல்லை என்பதுதான் நிலவரம். மேகி காரிசன் & தாத்தாஸ் கிராபிக் நாவல் pack மொத்தமே 212 பிரதிகள் தான் முன்பதிவு கண்டுள்ளன. And உலகத் தொலைக்காட்சிகளில் முதல் முறையாக வெறும் 300 பிரதிகள் அச்சிட உள்ளோம். இந்த பிரிண்ட்ரன்னுக்கு மெய்யாலுமே ஏற்றதொரு விலையை நாம் நிர்ணயிக்க நேர்ந்தால், வழுக்கும் பாறைகள் நிரம்பிய பட்டி தொட்டிகளில் இருந்து எழக்கூடிய புகைச் சமிக்கைகளை புதுக்கோட்டையில் கூடப் பார்க்க முடிந்திருக்கும். இந்தத் துக்கணூண்டு பிரிண்ட்ரன்னில் கதைகளுக்கான ராயல்டி தொகையே தேறிடாது என்பதுதான் வார்னிஷ் அடிக்காத நிஜம். பாக்கித் தயாரிப்புச் செலவுகளின் முழுமையுமே தேசப் பிதாவின் கணக்கில் எழுதுவதைத் தவிர வேறு வழியே இல்லை. இதில் கொடுமை என்னவெனில் - கூடுதலாய் பிரிண்ட் செய்து கையிருப்பில் வைத்திருந்து விட்டு, விற்காது தேங்கியிருக்கும் பட்சத்தில் பின்னாட்களில் ஸ்கூல் பசங்களுக்கும் கொடுக்க ஏற்ற இதழ்களல்ல  இவை ! So எனது 42 கால அனுபவத்தில் இதைக் காட்டிலும் கபாலத்தைக் காயப்படுத்திக்கொள்ள ஒரு செமத்தியான சந்தர்ப்பம் அமைந்ததே கிடையாதுதான். 

'ஆங்.. நீ ரூபாய் 200-ன்னு விலை வெச்சதால்தான் சுணக்கம், இல்லாங்காட்டி விட்டம் வரை ஆர்டர்கள் விரிஞ்சிருக்கும்' என்று ஒரு ஏழு பத்திக்கான விளக்கமும் வழுக்கிக்கிட்டு வர ரொம்ப நேரமெடுக்காது என்பதுமே புரிகிறது. ஆனால் ரெகுலர் தட விலைகளை விடவும் குறைவான விலைகளுடன் இன்னொரு பக்கம் முன்பதிவுகளாய் ஓடிக்கொண்டிருக்கும் Fab 5 கூட 16 வயதினிலே சப்பாணியாய் தான் 228 முன்பதிவுகளுடன் நொண்டியடித்து வருகின்றது எனும்போது, நம் மத்தியில் "எதைப் போட்டாலும் படிக்க ரெடி" என்ற டீம் ரொம்ப ரொம்ப குட்டியாகிப் போய்விட்டது என்பதை உணர முடிகிறது. சுடும் நிஜம் இதுவே.  இம்முறை இந்த முன்பதிவு முயற்சிகளுக்கு நாம் தரவுள்ள விலையானது - இந்த நிலவர மாற்றம் குறித்த ஞானத்தை ஈட்டத் தேவையான புத்திக் கொள்முதல் முதலீடு என்றே எடுத்துக் கொள்கிறோம். 

ஒரு பக்கத்து நிலவரம் இவ்விதமிருக்க, வானவில்லின் மறு முனையிலோ ஏப்ரல் மாதம் - டின்டின், டெக்ஸ், King ஸ்பெஷல் etc இம்மிகூடச் சுணக்கமின்றி விற்பனையில் அனல் கிளப்புவதைக் காணும்போது பெரும்பான்மையின் இன்றைய mood ஸ்பஷ்டமாய் புரிகிறது. The way I see things, நிலவரம் ரொம்பவே simple மக்களே : ஜாம்பவான்களான இந்தியாவும், ஆஸ்திரேலியாவும், இங்கிலாந்தும் ஆடக்கூடிய test match-களைப் பார்க்க ஜனம் எப்போதும் போலவே ஆவலாய் வருகிறதுதான். மாறாக அடுத்தநிலை வஸ்தாதுகளான ஆப்கானிஸ்தானும், பங்களாதேஷும் ஆடினால் - மிகச் சன்னமான அதிதீவிர ரசிகப் பெருமக்கள் மட்டுமே ஆஜராகிடுகிறார்கள். காத்திருக்கும் காலங்களில் இயன்றமட்டும் ஜாம்பவான்களின் மேட்ச்களையே நம்ம கிரவுண்டில் நடத்திடலாமே ? என்ற சிந்தனையின் நீட்சியே இந்த க்ளாஸிக் சந்தா முயற்சி ! தவிர - இது 2026-ல் நீங்கள் கேட்ட ஆயிரம் பக்க டெக்சின் கன்டென்ட் மாத்திரமே ! So ஒரேயடியாய் பின்னோக்கிய பயணம் தானா ? என்ற கேள்விகளுக்கு இங்கு அவசியங்கள் லேது !

But முன்செல்லும் நாட்களில், வாசிப்புக்கு அவகாசங்களும், பொறுமைகளும்  குன்றிக்கொண்டே செல்லும் பட்சத்தில் லொஜக்-மொஜக்கென முடிவுறும்  T20 மேட்ச்கள் தான் வேலைக்கு ஆகும் போலும் !! இப்போதே கனமான களங்கள் பக்கமாய் குறைந்து வரும் ஈர்ப்புகள் இதைத்தான் சுட்டிக்காட்டுவதாய் எனக்குப் படுகிறது. So, 'இந்தக் கோட்டச்சாமி தலைகீழாகத்தான் குதிப்பான்!' என்று இத்தனை  காலமாய் பிடிவாதமாய் செய்து வந்து விஷப்பரீட்சைகள் தான் கொஞ்ச காலத்துக்கேனும் pause mode-க்குச் செல்லவுள்ளதே தவிர, ரெகுலர் தடத்தின் திட்டமிடல்கள் எப்போதும் போலவே தொடர்ந்திடும் ! 

5.கேள்வி: இனி மரத்தைச் சுற்றி டூயட் மட்டும்தான் பாடப்போறோமா? கமர்ஷியல் கதைகள் மட்டும்தான் கோலோச்சப்போகுதா இனி?

பதில்: ண்ணா....அந்த shift ஏற்கனவே நடந்து வருகிறது. 'Crisp reading' தான் தாரக மந்திரம் என்று என்றைக்குத் தீர்மானித்தோமோ - அன்றைக்கே ரெகுலர் தடத்தினில் லைட்டாகத் தடுமாறும் ஹீரோக்களுக்குமே கல்தா தரத் தொடங்கி விட்டோம் தானே? ​So, இன்றைக்கு நமது regular சந்தாக்களில் உலவிடும் நாயகப் பெருமக்கள் அனைவருமே விற்பனை சார்ந்த அளவுகோல்களிலும் சரி, வாசக அபிமானத்திலும் சரி பாஸ் ஆனவர்கள் மாத்திரமே. ஏதேனும் ஒற்றை அளவுகோலில் தடுமாறினால் கூட  சரக்கென்று சீட்டு கிழிக்கப்பட்டு விடுகிறது !. சொல்லப் போனால் இந்தப் பயணத்திலிருந்து நாம் இறக்கி விட்டிருக்கும் ஹீரோக்களைக் கொண்டே நாலு போட்டிக் கடைகள் நடத்தலாம் எனும்போது, ஓசையின்றி அந்த filtering படலமானது ஏற்கனவே தொடங்கியாச்சு. But in many ways, இது காலத்தின் கட்டாயம் தான் !  படிக்கிறீர்களோ - இல்லையோ, நம் மீதுள்ள அன்பின் காரணமாய் சகலத்தையும் வாங்கி  பீரோக்களுள் குவிப்பதைக் காட்டிலும், படிக்க உங்களை ஈர்க்கவல்ல இதழ்களை மட்டுமே தேர்வு செய்வது a step in the right direction தானே ?

ஆனால் அதற்காக புதுவரவுகளே இனி வர மாட்டார்கள் என்றெல்லாம் இல்லை. இதோ கவனமாய் இந்தத் தரவுகளை உள்வாங்கிட முயற்சித்துப் பாருங்களேன்:

​*டின்டின் அறிமுகம் கண்டு அதகள வெற்றியும் கண்டுள்ளார். இவரது தொடரில் இருப்பனவோ 23 albums மட்டுமே.

​*சமூராய்ஸ் வந்தனர் - வென்றனர். அவர்களது தொடரிலோ மொத்தமே 6 ஆல்பம்ஸ் தான்.

​*வைல்ட்கேட் இன்னொரு சமீப அறிமுகம். இவரது தொடரிலோ மொத்தமே 4 ஆல்பம்ஸ் தான்.

​*இதோ வில்லியம் வான்ஸ்-ன் ப்ரூஸ் ஹாக்கர் தொடரை அறிவித்துள்ளோம். அதனில் இருப்பதோ ஏழே ஆல்பம்ஸ் தான்.

​*அடுத்த மாதம் அறிமுகமாகவிருக்கும் ரெட் கன் தொடரிலோ இரண்டே ஆல்பம்ஸ்!

​*போன பதிவில் நான் அறிவித்திருந்த BLACKSAD தொடரிலோ மொத்தமே 6 ஆல்பம்ஸ் தான்.

ஆக , நாம் புதியவர்களுக்கான கேட்டை மூடவே கிடையாது. மாறாக 100, 200, 300 கதைகள் கொண்ட நெடும் தொடர்கள் பக்கமாக இப்போதெல்லாம் வண்டியை விடுவது கிடையாது. Short & sweet-ஆன தொடர்களாய் மட்டுமே பார்த்துப் பார்த்துத் தேடித் தேடி முயற்சிக்க முனைந்து வருகிறோம். So நம் தேடல்களும் தொடரும் தான், புது வரவுகளும் வருவர் தான். ஆனால் மொத்தமே 14 மீட்டிங்களை நடத்தினாலே போதும் - தேர்தலைச் சந்தித்து விடலாம் என்ற நம்பிக்கையுடன் களமாடும் புதுயுக template போலவே, சன்னமான கதை இருப்பினைக் கொண்ட புதியவர்களுக்கு மட்டுமே முன்னுரிமை தர விழைந்து வருகிறோம். ஆகையால் ரெகுலர் தடத்தில எப்போதும் போலவே variety தொடர்ந்திடும் தான் - நீங்கள் அவற்றை ரசிக்கும் வரையிலும்!

இந்தத் தருணத்தில் ஒரு பழைய புராணத்தைச் சற்றே உரக்க, மறுக்கா பாடும் அவசியம் இருப்பதாகவும் எனக்குத் தோன்றுகிறது.உங்களுக்குத் தெரியாததல்ல guys - இது சமூக வலைத்தளங்களில் influencers நம்மை கரம் பற்றி ஒவ்வொரு திக்கிலும் இட்டுச்செல்லும் காலங்கள். ஒரு தம்மாத்துண்டு வெத்தலைப்பெட்டியை வாங்கவோ, ஒரு புகையிலை சுருக்குப்பையை வாங்கவோ நினைத்தால் கூட "இக்கடா ராரா....அக்கட போ...போ... என்று வழிகாட்ட Insta-விலும் இன்னபிற தளங்களிலும் ஓராயிரம் பேர் படையெடுத்துக் காத்திருப்பது கண்கூடு. அந்தக் கோணத்தில் பார்வையிட்டால், சமூக வலைத்தளங்களில் பிஸியாக இருக்கும் நீங்களுமே காமிக்ஸ் சார்ந்த influencers தான். உங்களது குரலுக்கு நிச்சயமாய் நீங்களே உணர்ந்திருக்கா ஒரு வெயிட் உண்டு. உங்களது பங்களிப்புகள் இன்னும் சற்றே வீரியமாய் இருக்கும் பட்சத்தில் - 'இந்த பொம்ம புக் எனக்கு செட்டாகுமா? இதை படிக்கலாமா- வேணாமா?' என்ற மதில் மேல் பூனையான நண்பர்களுக்கு ஒரு தெளிவு கிட்டிட உதவிடக் கூடும் .​சமீபகாலமாகவே அந்த வழிகாட்டல்கள் குறைந்து கொண்டே போவதுமே பரிச்சயமான ஜாம்பவான்களைத் தவிர்த்த புதுவரவுகள் பக்கம் புது வாசகர்களின் பார்வைகள் அதிகம் திரும்பிடாது போகவொரு காரணமோ என்றும் நினைக்கத் தோன்றுகிறது. "இது எதுக்கு ரிஸ்க்..? சகுவாரோவா, சாமுராயோ - யாருன்னே தெரியலையே?!" என்று ஒதுங்கக்கூடிய நண்பர்களையும், வாசித்து, ரசித்திருக்கும் நீங்கள் சரியாக வழிநடத்த முடியும் தான். அது நிகழும் பட்சத்தில்  - இந்த "ஈரோ கல்தா" படலமும் தொடர்கதை ஆகிடாது &  புதியவர்களைத் தேடிப்பிடிக்கும் உத்வேகமும் தொடர்ந்திடும் தான்.

'சர்தான் ,  புக்க படிக்கவே நேரத்தை காணோம், இதுல வழியை காட்ட... கிளிய காட்ட எவனுக்குடா தம்பி சீவன் இருக்கு ?' - என்கிறீர்களா? பத்தி பத்தியாய் பெருசாய் எழுதினால்தான் என்றில்லையே guys... "படித்ததில் பிடித்தது" என்று சிம்பிளாக அந்த புக்கின் கவரை போட உங்களது Insta-விலோ, FB- யிலோ ; வாட்சப் குரூப்பிலோ மெனக்கெட்டால் அதுவே கூட நான் தொண்டை கிழியக் கத்துவதை காட்டிலும் கூடுதல் பலன் நல்கிடக்கூடும். ​Make no mistake guys.....நம் ஆகச் சிறிய வட்டத்திற்கு இது ஒரு முக்கிய காலகட்டம். முன்செல்லும் பாதைகள் இனி கமர்ஷியலாக மட்டுமே இருக்குமா? அல்லது வழக்கம் போலவே வெரைட்டியாக  இருக்குமா? என்பதை தீர்மானிக்க போவது நீங்களே. So, இந்தத் தருணத்து மெனக்கெடல்கள் will go a long way என்பதில் எனக்கு ஐயமே இல்லை.

கேள்வி 6 : என்னமோ போப்பா.. ஏதேதோ சொல்லுறே.. கேட்டுக்கிறோம்...ஒரே புக்குன்னு கண்ட கனவு தான் நெசமாகலை...புக்குகளை பிரிச்சு பிரிச்சு போட்டு பிராணனை வாங்கியே தான் தீரணுமா?

பதில்: ண்ணா...நிலவரத்தை உள்ளது உள்ளபடிக்கே, ஒளிவு மறைவின்றி கூட்டிக் குறைக்காது ஒப்பித்துவிட்டேன்.இங்கே இன்னமும் ஒரு விஷயம் நான் செய்யக்கூடியது உள்ளது!இந்த ஒன்பது ஆல்பங்களும் வெளியான பிற்பாடு மொத்தமாய் நீங்கள் பத்திரப்படுத்த எண்ணும் பட்சத்தில், உத்தேசமாய் ரூ.100 to 120 ரூபாய் கிரயத்துக்கு ஒரு கெட்டிமனான slip case-ஐ தயார் செய்து வழங்கிட வாய்ப்புண்டு.So தனித்தனி இதழ்களாய் இருப்பனவற்றை மொத்தமாய் The Terrific Tex Collection'26 என்று அதனுள் அடுக்கி பத்திரப்படுத்திக் கொள்ளலாம்.மற்றபடிக்கு இன்றைய மார்க்கெட் நிலவரமும், விற்பனை சூழல்களும், முன்மொழியும் சில பல நிபந்தனைகளுக்கு யாருமே விதிவிலக்காகிட முடியாது என்பது தான் bottom line.புரிந்து கொள்வீர்கள் என்ற நம்பிக்கை எனக்குள் உள்ளது. புரிந்துகொள்ளாதோர் அன்போடு மூ.ச பக்கம் இட்டுச் செல்ல அழைக்கும் பட்சத்தில் மறுப்பின்றி ஆஜராகிடவும் காத்திருப்பேன்.ஏற்கனவே காலையிலேயே ஒரு ரவுண்டு bleaching powder போட்டு fresh ஆக்கி வைத்தாயிற்று. So நாளையு‌ம் லீவு தானே.. எப்போ கூப்பிட்டாலும் வர நானாச்சு...!

7.கேள்வி : அப்போ ஆன்லைன் மேளா பீப்பீப்பீ தானா?

பதில் : Not at all.... மே மாதம் என்பதை ஆண்டின் பிற்பகுதிக்கு நகற்றிட வேண்டியது தான். நானே ஒரு pool of books முன்மொழிகிறேன் and அவற்றிலிருந்து நீங்கள் எவற்றை தேர்வு செய்கிறீர்களோ - அவற்றை ஆன்லைன் ஸ்பெஷல்ஸ் ஆக்கிடுவோம்! பந்து பூரணமாய் உங்க தரப்பிலேயே இருந்திடும் guys! ஓ.கேவா?

Bye all... See you around! Have an awesome long weekend! 

P.S : புது புக்ஸ் அடுத்த வாரத் துவக்கத்தில் கிளம்பிடும் !