நம்பர்களும் ..,நண்பர்களும்...!

நண்பர்களே,,  

வணக்கம். நம்பர்களுடனான நமது காதல் நித்தமும் தொடர்வதால் இந்தக் கணம் சற்றே விசேஷமாய்த் தோன்றுகிறதோ - என்னவோ ! பதிவு எண் : 100 ; மூன்றிலக்கங்களின் முதல் படி என்பதால் 99-க்கும் - 101-க்கும் இல்லாத மரியாதை இடையிலிருக்கும் திருவாளர் 100-க்கு சரளமாய்க் கிட்டுகிறது போலும் ! So இந்தப் பதிவை மாமூலானதொரு சமாச்சாரமாக்கிடாமல் 'விசேஷமாய்' ஏதேனும் அறிவிப்போடு வரச் செய்தால்  தேவலையே என நண்பர்கள் ஆங்காங்கே பதிந்திருப்பதைக் கவனிக்கத் தான் செய்தேன் ! ´'விசேஷ அறிவிப்பானது ' :

• "மின்னும் மரணத்தின்' மறுபதிப்பு பற்றியதாகவோ ;
• லயனின் 30-வது ஆண்டுமலர் பற்றியதாகவோ ;
• அல்லது 2014-ன் வெள்ளோட்டங்கள் பற்றியதாகவோ 

இருத்தல் தேவலை என்ற உங்களது mind voices எனக்குக் கேட்காமலில்லை ! ஆனால் இந்தக் கணத்திற்கு மெருகூட்டும் ஒரே காரணத்தைக் கையில் எடுத்துக் கொண்டு, எங்கோ தொலைவில் நிற்கும் சங்கதிகளின் மீது "சும்மாக்காச்சும்" இப்போவே வெளிச்சத்தைப் பாய்ச்ச முயற்சிப்பதை விட, மிக அருகாமையில் அடுத்த சில மாதங்களுக்குள் நம்மை எதிர்கொள்ளவிருக்கும் தீபாவளியைப் பற்றிப் பேசினால் என்னவென்று தோன்றியது எனக்கு !

நிஜத்தைச் சொல்வதானால் - இப்போதெல்லாம் மாதா மாதம் ரூ.100 / ரூ.200 என்று உங்கள் பர்ஸ்களுக்கு கண்ணி வெடி வைத்துக் கொண்டிருக்கும் இவ்வேளையில், தீபாவளி மலர் என்று தனியாகவொரு track வேண்டாமே என்பது தான் எனது எண்ணமாக இருந்தது ! ஆனால் ஒவ்வொரு சந்திப்பின் போதும், உங்களில் நிறையப் பேர் "தீபாவளி மலர்' இல்லாமல் நமது அட்டவணையில் ஒரு கிக் இல்லையே என்று ஆதங்கப்படுவதைக் கவனிக்கத் தான் செய்தேன் ! ஏறத்தாள 30 தீபாவளிகளுக்கு முன்பை ஒரு 'அக்மார்க்' உப்புமா இரும்பு மனிதன் ஆர்ச்சியின் கதையோடு துவங்கிய நமது தீபாவளிக் காதல்கள் வயதெனும் அரணையும் மீறி, இன்னமும் ஜீவனோடிருப்பது நிஜமாய் எனக்கு ஆச்சர்யமே ! பெரிய சைஸ்கள் ; பருமனான பாக்கட் சைஸ்கள் ; பல கதைக் combos ; சிங்கள் ஷாட் sagas ; என்று நிறைய நாம் பார்த்து விட்ட போதிலும், இன்றளவும் நமது 1987 லயன் தீபாவளி சூப்பர் ஸ்பெஷல் -ன் வெற்றியை வேறு எந்தத் திருநாளும் நமக்குக் காட்டியதில்லை ! 532 பக்கங்கள் ; 12 கதைகள் ; பாக்கட் சைஸ் - ரூ.10/ விலையில் என்பதை இன்று அசை போடும் போது, நாற்கால்ப் பாய்ச்சலில் குதி போடும் விலைவாசிகளின் தாக்கத்தை நன்றாகவே உணர முடிகிறது ! அன்று பத்து ரூபாயில் - 25% ஏஜென்ட் கமிஷன் கொடுத்த பின்னும் சாத்தியமான தயாரிப்பு budget - இன்று நமது வண்ண அவதாரில் வெறும் 10 பக்கங்களுக்கே போதாது ! Anyways , அக்டோபர் 1987 "சிங்கத்தின் சிறுவயதில்" பகுதியினில் கூப்பிடு தொலைவில் இருப்பதால் - மலரும் நினைவுகளை அங்கே தொடர்வதே உசிதம் !

Getting back on track -  இந்தாண்டு வரவிருக்கும் தீபாவளிக்கு நமது லயன்-முத்து அட்டவணையில் லார்கோவின் ஒரு ருத்ரதாண்டவம் மாத்திரமே திட்டமிடலில் இருந்தது. "ஆதலினால் அதகளம் செய்வீர்" திரைப்படமாகவும் வந்ததொரு action சரவெடி என்பதால் - அதனையும், துணைக்கு சன்ஷைன் லைப்ரரியில் மறுபதிப்பு ஒன்றையும் november-ல் தட்டி விட்டால் போதுமென்று நினைத்திருந்தேன் ! இடைச்செருகலாய் ஒரு தீபாவளி மலரைப் புதிதாய்த் திட்டமிட்டு, மீண்டுமொருமுறை இதற்கான பணம் அனுப்பச் சொல்லி உங்களை சிரமத்திற்கு உள்ளாக்குவதிலும் எனக்கு உடன்பாடில்லை ! தவிரவும் நமது front office பணியாளர்களுக்கு அவ்வப்போது நான் தந்து வரும் தலைநோவை இன்னமும் அதிகரித்திட வேண்டாமே என்ற தயாள சிந்தையும் பின்னணியில் உண்டு ! லயன்-முத்து சந்தாத் தொகை ரூ.1320 என்று சொல்லி வைத்தேன் முதலில் ; அப்புறமாய் காமிக்ஸ் க்ளாசிக்ஸ் பிரதிகளுக்கென ரூ.540 வரும், அதனையும் சந்தாக்களில் இணைத்துக் கொள்ளுங்கள் என்றேன் ; தொடர்ந்த மாதங்களில் - காமிக்ஸ் க்ளாசிக்ஸ் என்பன இனி சன்ஷைன் லைப்ரரி என்ற லேபிலோடு வருமென்று தெரியப்படுத்தினேன் ; அப்புறமாக +6 உதயம் - ரூ.375 சந்தாவோடு என்றும் சொல்லி வைத்தேன் ! நமது காமிக்ஸ் 'கலாச்சாரங்களுக்கோ' ; செல்லும் பாதையில் ஒரு நூறு புது சிந்தனைகளுக்கு இடமளிக்கும் பாங்குகளுக்கோ  - நம்மவர்கள் பரிச்சயமற்றவர்கள் என்பதால் ஒவ்வொரு முறையும், ஏதாவதொரு மாற்றத்தையும் அவர்களுக்குத் தெரிவிக்கும் சமயங்களில் அவர்களது மிரண்ட விழிகள் எனக்குள் சின்னதாய் ஒரு சங்கடத்தை உருவாக்கும் !  -இந்நிலையில், 'தீபாவளி மலர்' ; இதற்கென புது புக்கிங் ; புது பண வரவுகள் என்று சொல்லி அவர்களிடத்தில் - 'இவரென்ன பாஸா ? இல்லே லூசா ?" என்ற சந்தேகத்தை ஏற்படுத்திட வேண்டாமே என்ற சிந்தனை ஓடியதால் - ஆபத்பாந்தவனாய் உதவிக்கு வந்தது நமது +6 !

எந்தவொரு அழுத்தமான திட்டமிடலும் இல்லாது அவ்வப்போது மனதில் தோன்றுவதைச் செயலாக்கிட ஒரு மார்க்கமிருந்தால் தேவலை என்பதே +6-ன் பின்னணி என்பதால் இந்தத் திடீர் தீபாவளி மலர் ஆவலைப் பூர்த்தி செய்யக் கச்சிதமாய் அது suit ஆகுமென்று புரிந்தது ! எனினும் இந்தாண்டு இன்னமும் எஞ்சியுள்ள வெளியீடுகளின் எண்ணிக்கை கணிசமாகவே பாக்கியுள்ளன எனும் போது ரொம்ப flashy ஆகவோ ; ஒரு மெகா இதழாகவோ திட்டமிட வாய்ப்புகளில்லை என்பதையும் நினைவில் இருத்திடும் அவசியமும் முன்னின்றது ! பெரிதாய் - விரிவாய் ஒரு canvas இன்றி 'சிக்' கென ஒரு சித்திரமே சாத்தியம் என்ற புரிதலோடு சிந்திக்கலானேன் !  ஆங்காங்கே, அவ்வப்போது நண்பர்கள் தெரிவிக்கும் சின்னச் சின்ன ஆசைகளுக்கு on the spot பைசல் செய்வதைக் கடைபிடிக்காது - ' உரிய சமயம் வரட்டுமே' என்ற பொறுமை காப்பதன் மூலம், உங்களில் பலரின் பொறுமைகளுக்கும் சோதனைகள் வைப்பதை நான் அறியாதில்லை ! எனினும், அந்த நியாயமான கோரிக்கைகள் நிச்சயமாய் கிடப்பிற்கு அனுப்பப்படுவதில்லை ! கொஞ்சகாலமாகவே நமது டெக்ஸ் வில்லரின் "அந்த" சைஸ் இதழொன்று வேண்டுமென்ற கோரிக்கை எழுவதும் ; நான் அதனைக் கண்டும், காணாதும் விடுவதும் நீங்கள் மறந்திருப்பினும், நான் மறக்கவில்லை ! So  - இந்தாண்டு "ரேஞ்சரோடு தீபாவளி' கொண்டாடத் தயாராகுங்கள் ! உங்கள் அபிமான டெக்ஸ் & கோ. ஒரு 456 பக்க black & white இதழில்,2 முழு நீள சாகசங்களோடு ரூ.100/ விலையில் அதிரடி செய்யக் காத்திருக்கின்றனர் ! "நீதியின் நிழலில்" + "மரண தேசம் மெக்சிகோ" இரு மாறுபட்ட கதைக் களங்கள் + ஓவியப் பாணிகளும் கூட ! சமீபமாய் சற்றே 'அமானுஷ்ய' ரூட்டில் சவாரி செய்து வந்து டெக்ஸ் & டீம் இம்முறை மோதுவதோ 2 கால் எதிரிகளோடு மாத்திரமே ! இந்த இதழின் highlight ஆக டெக்ஸ் ரசிகர்களுக்கு ஒரு pleasant surprise -ம்  காத்துள்ளது ! அது என்னவாக இருக்குமென்பதை உங்கள் யூகங்களுக்கே விட்டு விடுவோமே - இப்போதைக்கு ! ('இந்தாண்டு டெக்ஸ் சற்றே ஓவர்டோஸ் '  என்ற mind voice ஒலித்திடும்  நண்பர்களுக்கு : 2014-ல் இரவுக் கழுகார் 2 அல்லது 3 கதைகளில் மாத்திரமே தலை காட்டுவார் ! )

தீபாவளியை black & white -ல் கழிய அனுமதிக்க வேண்டாமே என்ற அவாவில், நவம்பரில் நமது +6-ன் இன்னொரு இதழையும் வண்ணத்தில் கொணர உத்தேசித்துள்ளேன் ! புதியதொரு அறிமுகம் என்பதால் - அதற்கான ஏற்பாடுகளை முழுமைப்படுத்தி விட்டு 'start music ' சொல்லலாமே ?! So தொடரும் வாரங்களில் அதைப் பற்றியதொரு பதிவும், அறிவிப்பும் காத்துள்ளது !

"3 மாதங்களுக்குப் பின் வரும் தீபாவளி மலர் அறிவிப்பெல்லாம் ஒ.கே. ; இந்த மாதம் வரவேண்டிய ALL NEW ஸ்பெஷல் என்னாச்சு ?" என்ற உங்களின் logical கேள்வி எழுவதை உணர்கிறேன் ! திடீர் பயணமாய் நான் ஸ்பெயின் நாட்டிற்குக் கிளம்பிட வேண்டிப் போனதால் - A.N.S அச்சுப் பணிகளைத் துவக்கி விட்டு பெட்டியைத் தூக்கி விட்டேன் ! இந்தப் பக்கங்களை நான் எனது டயரியில் எழுதுவது கூட பார்சிலோனா செல்லும் பிசாசு வேக ரயிலில் - அருகாமையிலிருக்கும் ஒரு முதியவரின் கேள்விக்குறியான பார்வையினில் அமர்ந்தபடியே !  தொடர்ச்சியாய் பணிகளைப் பூர்த்தி செய்து இன்று (8-ஜூலை) சந்தாப் பிரதிகள் அனைத்தையும் அனுப்பி விட்டார்களென மைதீன் update செய்துள்ளான் ; so நாளை உங்களது கூரியர் அலுவலகங்களைத் தொடர்பு கொண்டிடலாமே ?!  இதோ - A.N.S -ன் அட்டைப்படம் !

வழக்கம் போலவே, இங்கு தெரியும் வர்ணங்களை விட அழுத்தமாய் அட்டைப்பட அச்சில் தெரிந்திடும் ; குறிப்பாக பின்னணிச் சிகப்பில் !பின்னட்டையில் 4 கதைகளின் preview -ம் இருந்தால் தேவலையே என தோன்றியதால் - சின்னச் சின்ன சித்திரங்களைத் தவிர்த்திட இயலவில்லை ! முன்னட்டை ஒரிஜினல் படைப்பே - பின்புலங்களிலும், வண்ணக் கலவைகளிலும் மாற்றங்களோடு ! இம்முறை மறவாமல் அட்டையில் நமது birthday boy -க்கு இடமளித்து விட்டோம் !

அப்புறம் நமது "KAUN BANEGA TRANSLATOR - சீசன் 2" போட்டியின் வெற்றியாளரை அறிவிக்கும் வேளையும் இதுவன்றோ ?! (ஏதோ ஒரு மாமாங்கத்தில் அது நடந்தது போன்ற பிரம்மை எனக்கு மாத்திரம் தானா ?) 36 நண்பர்கள் இதில் பங்கேற்க ஆவல் தெரிவித்திருந்தனர் ; ஆனால் மொழியாக்கம் செய்து அனுப்பியோரின் எண்ணிக்கை குறைவே !  நம்பர்களில் குறைவிருந்த போதிலும், நண்பர்களின் முயற்சிகளின் தரத்தில் குறை இல்லை ! வந்திருந்த ஆக்கங்களுக்குள் சிறந்ததாய் எனக்குப் பட்டது நண்பர் கார்த்திக் சோமலிங்காவின் எழுத்துக்களே ! சென்ற முறைத் தவற விட்ட முதலிடத்தை இம்முறை 'லபக்'கிய கார்த்திக்கிற்கு காங்க்ரத்ஸ் ! இரண்டாமிடத்தைப் பிடித்துள்ளது அன்றைய சுமார் மூஞ்சி குமார் என்ற ; இன்றைய சூப்பர் விஜயும் தான் !  Congrats too vijay ! கார்த்திக்கின் மொழியாக்கத்தை ANS -ல் பார்த்திட நாளை சாத்தியமாகும் என்பதால், இரண்டாமிடத்து (விஜயின்) translation -ஐ புதனன்று நான் ஊருக்குத் திரும்பியதும் ஏதாயினும் ஒரு தளத்தில் upload செய்து அதற்கான link இங்கு தர ஏற்பாடு செய்கிறேன் ! சென்ற போட்டிக்கான மதியில்லா மந்திரியின் சிறு கதைப் பாணி ஒரு விதமென்றால், இம்முறை வழங்கப்பட்டிருந்த Green Manor  முற்றிலும் மாறுபட்ட genre ! போட்டியில் கலந்து கொண்ட அனைவருமே அழகான முயற்சிகள் எடுத்துக் கொண்டிருந்தது ரசிக்கச் செய்தது ! A pat on the back guys ! Great job all...!

ANS -ன் பெரும்பான்மைப் பக்கங்களை ஆக்ரமிக்கும் "பிரளயத்தின் பிள்ளைகள்" கிராபிக் நாவலுக்கு உங்களின் response எவ்விதமென்று அறிந்திட நிஜமாய் ஆவலாய் உள்ளேன் ! வழக்கமான கதை பாணியோ ; இரண்டாம் உலக யுத்தத்தின் கோரங்களை வெளிச்சம் போட்டுக் காட்டி, நமது அனுதாபங்களைச் சம்பாதிக்கும் முயற்சியோ அல்ல இது ! ஒரு ஒடுக்கப்பட்ட இனத்தின் வாழ்க்கைப் பயணத்தில் யுத்தமெனும் பிரளயம் கொண்டு வரும் மாற்றங்களை ஒரு பயணமாய் சொல்லும் இந்தப் பக்கங்களுக்கு நாம் போடப் போகும் மார்க்குகள் என்ன ? Fingers crossed !

ரயில் பயணத்தின் போது தலைக்குள் ஓடிய சிந்தனைகளுள் -"அவ்வப்போது நான் காணாமல் போகிடும் தருணங்களில் இந்தப் பக்கத்தில் ஒரு சோம்பல் நிலவாதிருக்க என்ன செய்யலாம் ? " என்ற   எண்ணமும் சேர்த்தி ! நான் 'லீவு போட்டிடும்' வேளைகளில் மாத்திரம் உங்களில் ஒவ்வொருவராய்  turns எடுத்துக் கொண்டு இங்கு எழுதினால் எவ்விதமிருக்கும் ? காமிக்ஸ் பற்றிய தம் அனுபவங்கள் ; படித்து ரசித்த  (வேற்று மொழிப் படைப்புகளாக இருப்பினும் ) காமிக்ஸ்கள் பற்றி எழுதினால் - தொடர்ச்சியாய் எனது புராணங்களையே படித்து அயர்ச்சியை சந்திக்கும் நண்பர்களுக்குமொரு சின்ன மாற்றமாக இருந்திட வாய்ப்பாகுமே ? What say guys ? Worth a try ?

இந்த "100 பதிவுப் பயணம் " கொண்டாடப்பட வேண்டிய தருணம் என்றெல்லாம் நான் பகல் சொப்பனங்களில் ஆழ்ந்திருக்கவில்லை ! நமது பேங்க் விபரங்களை மாத்திரமே தாங்கி வந்த பதிவுகள் ; துவக்கத்தில் எழுதிய பல 10 வரிப் பதிவுகளும் இந்த 100-க்குள் ஐக்கியமென்பது நாம் அறிந்தது தானே ?! ஊர் கூடித் தேர் இழுக்கும் ஒரு அரங்கில் இளைப்பாற ஒரு இனிய தருணமாக இதைப் பார்ப்பதே பொருத்தமன்றோ ? ஆனால் கடந்த 18 மாதங்களில் என் வாழ்வில் ஒரு அங்கமாகி விட்ட இந்தப் பக்கத்தை - எனக்கே என்னைப் பல விதங்களில் அறிமுகம் செய்து வைத்துள்ளதொரு கருவியாய்ப் பார்க்க எனக்கு முடிகின்றது ! இங்கு பதிவிட்டுள்ள / பதிவிட்டு வரும் ஒவ்வொரு நண்பரின் எழுத்துக்களிலும் உணர சாத்தியமாகும்  காமிக்ஸ் காதல் ; சிந்தனைகளின் முதிர்ச்சி - ஒவ்வொரு வகையில் எனக்கு நிறையக் கற்றுத் தந்துள்ளதென்று சொல்வதற்கு  அவையடக்கம் காரணமாகாது ! "சிங்கத்தின் சிறு வயதில்" பகுதியைத் தொகுப்பாய் வெளியிட நினைப்பதை விட, இங்கு இந்த 4.75+ லட்சப் பார்வைகள் நல்கியுள்ள எண்ணிலடங்கா சந்தோஷத் தருணங்களை ; நகைச்சுவை மேளாக்களை ; ஒரு புத்தகம் ஆக்கிடும்  பட்சத்தில் - surefire ஹிட் ஆகுமென்பதில் ஐயமேது ?

இந்தப் 18 மாதங்களில் தான் எத்தனை - எத்தனை உணர்ச்சிப் பிரவாகங்கள் ? ஒரே நாளில் 2200+ பார்வைகள் என்ற உச்சம் ; 350+ பின்னூட்டங்கள் கொண்ட எக்கச்சக்கப் பதிவுகள் என்று அசத்திய அசாத்தியக் காமிக்ஸ் நேசம் ; அதே சமயம் ஒரு முழுப் பதிவையும், அது சார்ந்த பின்னூட்டங்களையும் மொத்தமாய் நீக்க நேர்ந்த சங்கட தினம் ; புதிதாய் நண்பர்கள் பலரை சம்பாதித்த சந்தோஷ வேளைகள் ; ஏதோவொரு மனத்தாங்கல் காரணமாய் அவர்களில் சிலர் தூரத்தை நாடிச் சென்ற துரதிர்ஷ்ட நேரங்கள் ; வெற்றிகளை வெறியோடு கொண்டாடிய நாட்கள் ; பிடித்தமில்லாது போன தங்கக் கல்லறைகளை துவைத்துத் தொங்கப் போட்ட சமயங்களென   - ஒரு 'சின்னப் புள்ளைங்க ' சமாச்சாரத்தின் பின்னே இத்தனை அனுபவங்கள் கதம்பமாய்ப் புனைந்திருப்பதை யார் தான் நம்புவர் ? அனுதினமும் இங்கு ஏதோ ஒரு வகையில் சந்தோஷத்தைப் பரப்பிட உதவிய அத்தனை 'சன்ஷைன் நெஞ்சங்களுக்கும் ' ஒரு salute ! ஏதோ ஒரு வகையில் உங்கள் ஒவ்வொருவரையும் எட்டிட நான் முயற்சித்துள்ளேன் ; அதில் வெற்றி கண்டேனா என்ற ஆராய்ச்சியை விட - எங்கோ சறுக்கி நண்பர்கள் சிலரை சங்கடப்படுத்தியுள்ளேன் என்பதை ஒத்துக் கொள்வதே பிரதானம் என்று தோன்றுகிறது ! எவரையும் காயப்படுத்திடும் எண்ணம் நிச்சயம் எனக்கில்லை ; எனினும் இந்த இணையப் பயணத்தில் என்னால் மனவருத்தம் கொள்ள நேரிட்ட அனைத்து நண்பர்களுக்கும் எனது unconditional apologies உரித்தாகட்டுமே  ! விலகி நின்றாலும் நாம் ஒரு நாளும் விரோதிகளல்ல என்பதையும் சரி ; காலத்தால் ஆற்றிட இயலாக் காயங்களே கிடையாதென்பதையும் ஒரு போதும் நான் மறவேன் ! Thanks guys - for being an integral part of life for me...!

நீண்டு செல்லும் இந்தப் பதிவை நிறைவு செய்யும் முன்னே சின்னதாய் ஒரு சந்தோஷப் பகிர்வு ! நம் நெடுநாள் காமிக்ஸ் நண்பரும் , இங்கு சமீபத்திய வருகையாளருமான பிரான்சிலிருக்கும் திருச்செல்வம் ப்ரபாநாத் - பிரான்சில் வசிக்கும் தமிழர்களிடையே நமது இதழ்களை அறிமுகம் செய்திடும் பொருட்டு முயற்சிகளைத் துவக்கியுள்ளார் ! தலை சுற்றச் செய்யும் air-mail கட்டணங்களையும் செலுத்தி நம்மிடமுள்ள சமீபத்திய இதழ்கள் அத்தனையிலும் ஒரு  சிறியளவுப் பிரதிகளைத் தருவித்துள்ளார் நண்பர் ! Let's wish him good luck !

நம்பர்கள் தராத பரிவை நண்பர்கள் தொடர்ச்சியாய் வெவ்வேறு ரூபங்களில் காட்டி வருவதே நாம் வாங்கி வந்த வரம் போலும்  !! Take care folks ! 

Almost New Special....

நண்பர்களே,

வணக்கம். வரவிருப்பது ALL NEW அல்ல - ALMOST NEW தான் என்பது தான் உங்களுக்கும் தெரியுமே ! So - மீண்டுமொருமுறை கதைத் தேர்வினில் அவசியமான மாற்றங்கள், இத்யாதிகளைச் சொல்லி போர் அடிக்கப் போவதில்லை ! 

நான்கு வெவ்வேறு கதைகள் இருப்பினும், இந்த ரூ.200 இதழுக்கு ஹீரோ என்று யாரும் கிடையாதென்பதே நிஜம் ! 

"கொலை செய்வீர் கனவான்களே" (GREEN MANOR ) ஒரு மாறுபட்ட பாணியிலான சிறுகதைகள் கூடிய தொகுப்பு ! இதில் நாயகரென்று எவரும் கிடையாது ! கார்ட்டூன் பாணியிலான சித்திரங்கள் ; ஆனால் மனிதனின் மறு பக்கத்தை வெளிச்சம் போட்டுக் காட்டும் ஆழம் கொண்ட கதைகள் இந்தப் புது வருகையின் பலங்கள். இதோ ஓரிரண்டு பக்கங்கள் உங்கள் பார்வைக்கு :

இந்தக் கதைத் தொகுப்பினில் ஒரு 7 பக்க அத்தியாயத்தை மொழிபெயர்த்துள்ளது நம் நண்பர்களுள் ஒருவர் ! யாரென்பதை இதழ் வெளியாகும் வேளையில் அறிந்து கொள்வோமே ! 

தொடரும் கதை # 2 - பிரெஞ்சில் COMANCHE என்ற பெயரில் வெளியானதொரு 15 அத்தியாயத் தொடரின் ஆரம்பம் ! நாயகனின் பெயர் முன்னிறுத்தப்பட்டு ; வெளிச்சத்தின் வட்டம் அவர் மீதிருப்பதே வழக்கம் என்ற போதிலும், இத்தொடரோ - அதன் மையப் புள்ளியாக நிற்கும் ஒரு இளம் பெண்ணின் பெயரைத் தாங்கி வருகின்றது ! COMANCHE எனும் அந்த யுவதி - சின்னதாய் ஒரு பண்ணையின் சொந்தக்காரி...தனியாகச் சிக்கல்கள் பலவற்றை சந்திக்கும் இப்பெண்ணுக்குத் தோள் கொடுக்க வருபவரே நாயகர் ரெட் டஸ்ட் ! யதார்த்தமானதொரு கதையோட்டம் ...கேப்டன் பிரின்ஸ் கதைகளுக்கு சித்திரங்கள் போட்ட அதே ஓவியரின் கைவண்ணம் ; brilliant கலரிங் என்று செல்லும் தோட்டா தேசத்தின்  ஒரு சில பக்கங்கள் இதோ :

கதை எண் 3-ம் கிராபிக் நாவலுமான "பிரளயத்தின் பிள்ளைகள்" மற்றுமொரு ஹீரோ இல்லா அனுபவம் ! இரண்டாம் உலக யுத்தத்தின் போது வாழ்க்கையைத் தொலைத்த ஒரு நாடோடிக் கூட்டத்தின் வலி கலந்த வாழ்க்கையை ஒரு டாகுமெண்டரி திரைப்படத்தின் பாணியில் உருவாக்கியுள்ளனர் ! Sepia எனப்படும் ஒரு வித செந்நிற வண்ணச் சேர்க்கையில் சொல்லப்பட்டிருக்கும் இந்தக் கதை போரின் காயங்களை மௌனமாய் வெளிப்படுத்த எத்தனிக்கும் ஒரு முயற்சி. இதன் ஆக்கத்தில் 4 ஆண்டுகளைச் செலவிட்டுள்ளார்  ஓவியர் பெடெண்ட் !  பாருங்களேன் :

இறுதியாய் வருவது "ஸ்டீல் பாடி ஷெர்லாக்கின் 21 பக்கக் கதைகள் (15+6). ஒரு சாராருக்கு ஒ.கே. வென்றும், பரவலாக 'not o .k ' என்றும் report card வாங்கி இருக்கும் இந்த சமீபத்திய வரவுகளின் ஆல்பம் # 1-ன் இறுதிப் பக்கங்கள் இவை ! Filler pages -க்கென வாங்கப்பட்ட இத்தொடரை இம்முறை படித்து விட்டு இறுதியாய் ஒரு தீர்மானம் செய்வோமே ? 

ALL NEW SPECIAL ஜூலை 8-ல் நம்மிடமிருந்து டெஸ்பாடச் செய்யப்படும். இம்முறை நேர்ந்துள்ள தாமதம் - GREEN MANOR கதைகளின் ஒரிஜினல் files நமக்குக் கிட்டிடுவதில் ஏற்ப்பட்ட சில பிரச்னைகளாலே ! முதல் பாகத்தின் 3 பக்கங்கள் விடுபட்டுப் போக ; அவற்றை மீண்டும் வரவழைக்க நாம் முயற்சிக்க,அந்தப் பொறுப்பிலிருந்தவர் விடுமுறையில் போய் விட்டதால் - தற்காலிகமாய் பணி செய்த புதியவர் தவறுதலாய் முதலில் அனுப்பிய அதே CD -ஐ இன்னொரு பிரதி எடுத்து திரும்பவும் அனுப்பிட,  மூன்றாம் முறையாய் DHL கூரியருக்குப் பணத்தை செலவழித்தே சிக்கலைத் தீர்த்திட இயன்றது !ஆனால் கதையை ஆர்ட் பேப்பரில் ; வண்ணத்தில் பார்க்கும் போது - பட்ட சிரமங்கள் மறந்து போயின ! நிச்சயமாய் GREEN MANOR ஒரு மாறுபட்ட அனுபவத்தை தரக் காத்துள்ளது !

Take care folks ! Bye or now !

பதில்கள் முடிவதில்லை !

நண்பர்களே,

மீண்டுமொரு ஞாயிறு வணக்கம் ! பொழுது விடியும் போதே "தொடரும்" போடப்பட்டு அந்தரத்தில் தொங்கும் "கேள்வி-பதில்" தொகுப்பின் மிச்சப் பாதியை இன்று கவனித்தாக வேண்டுமென்ற அலாரம் தலைக்குள் ஒலித்தது ! ALL NEW SPECIAL -ன் இறுதிக்கட்டப் பணிகள் நடந்தேறும் tight ஆன நேரமிது என்றாலும், இங்கு வருகை பதிவிடுவதும் முக்கியமே என்பதால் "உள்ளேன் அய்யா !". 

இதோ ஈரோடு விஜயின் கேள்விகள் தொகுப்பின் இறுதிப் பாகமும் ; அவற்றிற்கான எனது பதில்களும் :

========================================================================

* கிட்-லக்கியின் வரவேற்பைப் பொறுத்து சிறுவர்களுக்கான சிறப்பு இதழ் தொடங்கப்படுமா?

நல்ல கேள்வி தான் ; இங்கு நம் நண்பர்களும் ஆங்காங்கே, அவ்வப்போது இதே பாணியிலான வினாக்களை எழுப்பி உள்ளதும் கூட நினைவில் நிற்கிறது ! 

காமிக்ஸ் எனும் அறிமுக சுவையை இன்றைய தலைமுறை தானாய் தேடி, நாடிச் சென்று அடைந்திடும் சாத்தியங்கள் சொற்பமே ! For starters ,நமது இன்றைய பாணி / விலையிலான இதழ்கள் தெரு முனையில் உள்ள பெட்டிக் கடைகளில் கிட்டப் போவதில்லை. ஊருக்கு ஒன்றோ, இரண்டோ சற்றே பெரிய புத்தகக் கடைகளில் மாத்திரம் நம் இதழ்கள் கிடைத்தாலே அது பெரிய சமாச்சாரம் என்ற சூழ்நிலையில், நமது பால்ய காலத்து "அம்மாவிடம் பாக்கெட் money - பெட்டிக்கடையில் காமிக்ஸ்  " என்ற பார்முலா இன்றைக்கு வொர்க் அவுட் ஆகாது ! வீட்டின் பெரியவர்கள் initiative  எடுத்து சந்தா செலுத்தினாலோ ; வெளியே செல்லும் போது வாங்கிக் கொணர்ந்தாலோ தவிர, சிறுவர்களை நாம் எட்டிப் பிடித்திட வாய்ப்பேது ? இன்று நம் இதழ்களை ஆர்வமாய்ப் படித்து வரும் நண்பர்களின் குடும்பங்கள் ஒவ்வொன்றுமே நாமொரு சிறார் பத்திரிகை வெளியிடும் பட்சத்தில் துணை நிற்பர் என்பதில் சந்தேகமில்லை ; ஆனால் அந்த எண்ணிக்கை நமது தற்போதைய சந்தா பலத்தைத் தாண்டாது தானே ? மீண்டுமொரு இதழ் இதே சின்ன circulation சகிதம் வலம் வருவதில் வளமான எதிர்காலம் இருத்தல் மிகச் சிரமமே ! 

சந்தாக்களைப் பன்மடங்கு கூட்டுவது அல்லது மீண்டுமொருமுறை விற்பனையாளர்களைத் தேடிச் சென்று (கடன் தந்தாவது) விற்பனைக்கு முயல்வது என்பதே அச்சமயம் நமக்கிருக்கும் வழிமுறைகளாக இருக்கும். இந்தியாவின் ஒரு தலைசிறந்த குழுமம் நடத்திடும் புத்தக விற்பனை முனைக்கு நமது இதழ்களை supply செய்து விட்டு ; தூரத்தில்...ரொம்ப தூரத்திலாவது ...அதற்கான பணம் கிட்டிடும் வாய்ப்பு உள்ளதா ? என்று தன் கடந்த காலத்தைத் தேடிக் கொண்டிருக்கும் XIII -ஐப் போல நானும் "பே" என்ற முழியோடு நின்று வருகிறேன், கடந்த 4 மாதங்களாய் ! விற்பனையாளர்களைப் பொறுத்த வரை குமுதம், ஆனந்த விகடன் போன்ற பெரும் குழுமங்களைத் தாண்டிய சிறு பதிப்பகங்களுக்கு "விற்றால் காசு" என்பதே பரவலான நடைமுறை ! காமிக்ஸ் என்றால் சொல்லவே வேண்டாம் !  நாம் கடன் தரத் தயாரே ஆனால் கூட unsold copies வாபஸ் எடுப்பதென்பது நடைமுறை சாத்தியமாகாதே !     நமது தற்போதைய ஆர்ட் பேப்பர் காமிக்ஸ் இதழ்களில் ஒரு பொட்டு தண்ணீர் பட்டால் கூட கோவிந்தா தான் - புத்தகம் மொத்தமாய் ஒட்டிக் கொள்ளும் ! So - இந்த 'விற்காத பிரதிகளை வாபஸ் வாங்கிக் கொள்ளுகிறோம் '  பார்முலா நமக்கானது அல்ல எனும் போது - வெகுஜன புழக்கத்திற்கு ஒத்து வரும் விற்பனை முனைகளும் நமக்கானவையல்ல என்றே ஆகிடுகிறது !     

அடுத்த மாதம் துவக்கம் வேறு பத்திரிகைகளில் தொடர்ச்சியாய் விளம்பரம் செய்து இன்னும் நமது இரண்டாம் வருகையை அறிந்திரா காமிக்ஸ் பிரியர்களை சுவாரஸ்யப்படுத்திட முடிகிறதா என்று பார்த்திட உத்தேசம் ! அதன் புண்ணியத்தில் நமது தற்போதைய சந்தா base அதிகமானால் நமது தற்போதைய பயணப் பாதை கொஞ்சம் சுலபமாகும். யதார்த்தம் இப்படியிருக்க இன்னொரு புது முயற்சியில் 'தொபுக்'கென குதிப்பது விவேகமாகாதே !

கொசுறாய் ஒரு சேதியும் கூட : கொஞ்ச காலம் முன்னே ஒரு சர்வதேச காமிக்ஸ் ஜாம்பவானின் ஆசியப் பிரதிநிதிகள் நம்மைத் தொடர்பு கொண்டார்கள் - அவர்களது படைப்புகளை நாம் தமிழில் வெளியிட ஆர்வமாய் இருப்போமா என்ற கேள்வியுடன் ! தொடர்பு கொண்ட நிறுவனத்தின் ஆற்றலும், ஆளுமையும் ; படைப்புகளும் அசாத்தியமானவை என்பதால் -  பிரத்யேகமாய் ஒரு மாதாந்திரக் கார்ட்டூன் இதழ் ; ரூ.30 விலையில் என்ற பார்முலாவோடு அவர்களை 15 நாட்கள் இடைவெளிக்குப் பின்னதாக சந்தித்தேன் ! தரம், விலை, பாணி, எல்லாமே ஒ.கே. ஆகி விட்டது ; ஆனால் 'மாத இதழ்' என்பதிலும், எதிர்பார்க்கப்படும் விற்பனை எண்ணிக்கை : 10,000 பிரதிகள் என்பதிலும் அவர்களது முகத்திலிருந்த பிரகாசம் குறைந்து போனது ! 'மாதம் குறைந்த பட்சம் மூன்றோ, நான்கோ இதழ்கள் வெளியிடுங்களேன்' என்றும் ; "வெறும்" 10,000 பிரதிகள் தானா ? என்ற புருவ உயர்த்தலும் தலை காட்டிய போதே 'இது தேறாது' என்று என் மண்டைக்குள் ஒலித்தது. நாசூக்காய்ப் பேசி விட்டு விடை பெற்று வந்தேன் ! நம் மார்கெட்டுக்கென உள்ள பல limitations களை உணர்ந்து, புரிந்து பரிவு காட்டும் படைபாளிகளாய் இருந்தால் தவிர,நமது தற்சமய விற்பனை எண்ணிக்கையோடு குடும்பம் நடத்துவது இயலாக் காரியமே என்பது நான் கற்ற பாடம் !  

========================================================================

* கேப்டன் டைகரின் 'Arizona love' அடுத்தவருடமாவது வெளியாகுமா?

Arizona Love நிச்சயம் வெளியாகும் ; ஆனால் 2014-ல் அல்ல ! இந்த பாகத்தில் சித்திரங்கள் சென்சாரைத் தூண்டும் வகையில் உள்ளன என்பது நிஜம் தான் - but அதனை handle பண்ணிக் கொள்ள முடியுமென்ற நம்பிக்கை உள்ளது ! 

========================================================================

*சென்ற வருடத்தைக் காட்டிலும் வாசகர் வட்டம் விரிவடைந்திருக்கிறதா? தோராயமாக எவ்வளவு சதவீதம்?

நிச்சயமாய் கூடியுள்ளது - 15% வரை ! ஆனால் துவக்க எண்ணிக்கையே பெரிதல்ல எனும் போது அதில் 15% என்பது ஒரு giant leap ஆகாது தானே ? But - முன்பணம் கொடுத்து பிரதிகளை வாங்கிடும் விற்பனையாளர்களின் எண்ணிக்கை மெதுவாக - ஆனால் உறுதியாக முன்னேறி வருவது ஒரு ஆறுதலான அம்சம் !

========================================================================

* வாசகர்வட்டத்தையும், விற்பனையையும் அதிகரிக்கச் செய்ய ஏதேனும் புதிய முயற்சிகள் யோசிக்கப்பட்டிருக்கிறதா?

பள்ளிகளுக்கு சந்தாக்கள் விற்பனை செய்ய நண்பரொருவர் உதவ முன்வந்துள்ளார் ; ஆங்காங்கே நடைபெறும் குட்டியான புத்தகத் திருவிழாக்களிலும் பங்கேற்க உத்தேசித்துள்ளோம் ! உங்கள் நகரில் ஓரளவேனும் ஒ.கே. ரகத்திலான புத்தகக் கண்காட்சிகள் நடந்தேறும் பட்சத்தில் அவை பற்றித் தகவல்கள் சொல்லுங்களேன் - ப்ளீஸ் ? ஈரோடு விழாவிற்கு இயன்ற முயற்சிகளை நம் நண்பர்கள் செய்து வருகிறார்கள் ! நம்பிக்கையோடு காத்திருக்கிறோம் :-)

========================================================================

*நம்முடன் வியாபாரத் தொடர்பிலிருக்கும் பதிப்பகத்தார் யாராவது 3Dயில் காமிக்ஸ் வெளியிட்டிருக்கிறார்களா? பதில் 'ஆமாம்' எனில் நாமும் களமிறங்கிடும் வாய்ப்புள்ளதா?  ('ரத்தத்தடம்' ஏற்படுத்திய எண்ணங்கள்... )

3 D -க்கான தொழில் நுட்பமே வேறு ! பைசா கூடுதல் செலவின்றி அதனை   உங்களுக்கும், எனக்கும் சாத்தியமாக்கிக் காட்டி இருக்கும் நம் பணியாளர்கள் அவ்விதத்தில் பாராட்டுக்குரியவர்களே :-)

========================================================================

* நமது ஜூனியர் எடிட்டர் ஃப்ரெஞ்சு மொழி கற்றுக்கொண்டாரெனில் எதிர்கால மொழிபெயர்ப்புக்கு உதவுமே?

தற்சமயக் கல்லூரிக் கல்வியின் மத்தியினில் இதற்கென நேரமும், ஆர்வமும் கண்டு பிடித்தல் ஜூ. எ-க்கு சாத்தியமாகுமா என்பதற்கு விடை சொல்லத் தெரியவில்லை எனக்கு ! தவிரவும், ஒரு மொழியைக் கற்றுக் கொள்வதோடு அதில் புலமை வந்திடாது என்பதில் ரகசியம் ஏதும் இல்லையே ! தொடர்ச்சியாய் அதனில் உரையாடுவது ;அம்மொழியினில் நிறையப் படிப்பது என்பன அத்தியாவசியமன்றோ ? 

அது மட்டுமல்லாது - எழுதுவது என்பதொரு intense task ! அயர்ச்சி ஆட்கொள்ள அனுமதிக்காமல் தொடர்ச்சியாய் பேனா பிடிப்பதும் எத்தனை சிரமம் என்பதை எங்களது மொழியாக்க ஸ்கிரிப்ட்களைப் பார்த்தால் புலனாகும் ! 'காமிக்ஸ் பரிச்சயமே இல்லாத இல்லத்தரசி' என்ற அடையாளத்தோடு நமக்காகப் பணியாற்றும் பிரெஞ்சு மொழிபெயர்ப்பாளர் அனுப்பிடும் ஒவ்வொரு மாதக் கூரியரிலும் பரீட்சைப் பேப்பர் சைசில் 50-60 பக்க text இருக்கும் ! பணமெனும் ஒரு உந்துதலுக்கு அப்பாற்பட்ட அர்ப்பணிப்பு அவசியம் இப்பணிகளுக்கு ! So குருவி தலையில் இந்தப் பனங்காயை ஏற்றுவது இப்போதைக்கு சரியாகாது !

தவிரவும், அவன் பாதை எதுவென்பதை அவனே தீர்மானிக்கட்டுமே ? 'இதைச் செய் - அதைச் செய் ' என ஒரு போதும் என் தந்தை என்னை நிர்பந்தித்ததில்லை ! அந்நாட்களிலேயே எனக்கே சாத்தியமான சுதந்திரம் இன்றைய தலைமுறைக்கு  சுவாசத்தைப் போல் அத்தியாவசியமாகும் அல்லவா ?  

========================================================================

*நாற்பதாண்டு பாரம்பரிய கொள்கையைத் தகர்த்தெறிந்துவிட்டு 'குறித்தநேரத்தில் காமிக்ஸ் வெளியிடும்' வரலாறு காணாத நமது இந்த புதிய பாணி உங்களுக்கு எதை உணர்த்தியிருப்பதாக நினைக்கிறீர்கள்?

40 ஆண்டுகளாய் வாழைப்பழச் சோம்பேறிகளாய் இருந்து வந்துள்ளோம் என்பதையும் ; இத்தனை காலமாய் அத்தனையையும் சகித்து வந்துள்ள நண்பர்களுக்கு பதில் மரியாதை செய்திட இதைத் தாண்டியதொரு வாய்ப்புக் கிடைக்காது என்பதையும் உணர்த்தியுள்ளது ! பல முறை சொல்லியுள்ளேன் - ஆனால் திரும்பவும் சொல்லிடும் அவசியங்கள் குன்றிடவில்லை என்பதால் - மீண்டுமொருமுறை சொல்கிறேன் :  thanks a ton guys !

========================================================================

* வண்ணப்புத்தகங்களின் அணிவகுப்பால் உள்ளே வர இடம்கிடைக்காமல் தவிக்கும் மாடஸ்டியின் மார்கெட் பணால் ஆகிவிடும்போல் தெரிகிறதே?

எனக்கும் அதில் வருத்தமே ! ஆனால் மாடஸ்டி கதைகளுக்கு அத்தனை சீக்கிரம் மங்களம் பாடிடுவதாக நானில்லை ! உரிய நேரத்தில் மேற்கொண்டு பேசுவோம் (நம் ) இளவரசியைப் பற்றி !

========================================================================

*இனிவரவிருக்கும் (NBS போன்ற) சிறப்புவெளியீடுகளில் 'அந்தரத்தில் ஊசலாடும் கதைகளைச் சேர்க்கவேண்டாம்' என்ற நண்பர்களின் கோரிக்கை நிறைவேற்றப்படுமா?

டைகரின் கதை இம்முறை NBS -ல் ஊசலாடக் காரணமென்ன என்பதைப் பற்றி ஏற்கனவே எழுதியுள்ளேன் ! So - அது போன்ற தவறுகள் தொடராது !இன்னும் சில நண்பர்கள், லார்கோ ; ஷெல்டன் போன்ற prime series களின் அங்கங்களை தனித் தனி வெளியீடுகளாக மாத்திரமே வெளியிடுங்கள் ; இது போன்ற combo இதழ்களில் இடம் பெறச் செய்ய வேண்டாமென கோரியிருந்தனர் ! ஒரு மெகா இதழைத் திட்டமிடும் போது அவசியமாகும் முதல் காரியமே அதன் நட்சத்திர அங்கத்தினர்களைத் தேர்வு செய்வதே ! பிரதான நாயகர்களை ஒதுக்கி விட்டால், அந்த ஸ்பெஷல் உப்பு சப்பு இல்லாத உணர்வைத் தோற்றுவிக்கும் !

======================================================================= 

* ஜில்ஜோர்டான் 2014 ல் தலைகாட்டுவாரா?

சிரமமான கேள்வியே ! ஒரு தொடரை ஒரே கதையின் மூலம் தீர்மானிப்பதென்பது - ஒரேயொரு மாட்சில் களம் இறக்கி விட்டு,  'நீ செஞ்சுரி அடித்தால் மாத்திரமே தப்பித்தாய் கண்ணா ' என்று சொல்வதைப் போலாகும் ! முதல் முயற்சியில் ஜில் ஜோர்டான் decent ஆனதொரு ஆட்டத்தைத் தான் நமக்குக் காட்டினார் என்ற போதிலும், கதையில் வியாபித்திருக்கும் புராதனம் சற்றே நெருடலாய் உள்ளது எனக்கு ! லியர்ஸ் ஜெட்டில் ஏறி சுவிட்சர்லாந்திலிருந்து இரவு உணவுக்கு நியூயார்க் திரும்பும் லார்கோவை ஒரு பக்கம் வைத்துக் கொண்டு, ட்ரன்க் கால் போட்டுப் பேசி விட்டு, ரயில் டிக்கட் எடுத்து பாரிசுக்கு 4 மணி நேரம் 'லொடக் லொடக்' எனப் பயணிக்கும் ஜில் ஜோர்டானையும் அதே களத்தில் நிற்கச் செய்வது கொஞ்சம் கஷ்டமாகவே தோன்றுகிறது ! ஆனால் இது ஜோர்டானின் கதைகளைக் குறை சொல்லும் முயற்சியல்லவே ; அவற்றின் தரம் உலகறிந்ததே ! இங்கு நண்பர்களின் opinion எனக்கொரு தீர்மானமெடுக்க உதவும் !  What say guys ?

========================================================================

* சமீபத்தில் எல்லா வாசகர்களின் வயிறையும் பதம் பார்த்திட்ட கிட் ஆர்ட்டின்-ஷெரீப் ஜோடிக்கு அதிக வாய்ப்பளிக்கப்படுமா?

எதிர்பார்ப்புகளை மாத்திரமின்றி - ஒவ்வொரு முறையும் அதே சிரிப்புக் quotient சகிதம் ஒரு கதை அமைவதும், சரளமான வசன நடை அமைவதும் சாத்தியமாக வேண்டுமே என்ற கூடுதல் பொறுப்பையும் வுட் சிட்டி கோமாளிகள் இப்போது ஏற்படுத்தி விட்டனர் எனக்கு ! முயற்சிப்போமே ! நிச்சயம் 2014-ன் காலெண்டரில் இவர்களுக்கு ஒரு நல்ல இடமுண்டு ! 

 ========================================================================

*ஒரு மாற்றத்திற்காகவாவது திகில்/அமானுஷ்ய கதைகளுக்கு வாய்ப்பளிக்கப்படுமா?

ஜூனியர் எடிட்டரின் சமீப காலக் கோரிக்கையும் கூட இதுவே  ! பிரச்சனை என்னவெனில் - அமானுஷ்யக் கதை வரிசைகளில் இரு வெவ்வேறு பாணிகள் உள்ளன ! ஒன்று : நமது முந்தைய கறுப்புக் கிழவி ரக சிறுகதைகள் கொண்ட 4-6 பக்கத் தொகுப்புகள் ; மற்றொன்று - அமானுஷ்யக் கதை ரசிகர்களுக்கென உருவாக்கப்பட்ட hardcore த்ரில்லர்கள் ! இரத்தக் காட்டேரிகள் ; ட்ராகுலாக்கள் ; பிணம் தின்னிகள் ; zombies என்று கதை முழுக்க இவர்கள் (இவைகள் ??) உலவுவது இந்த வரிசையில் சகஜம் ! முதல் ரகம் இன்றைக்கு filler pages -க்குப் பிரயோஜனப்படுவதைத் தாண்டி அதிக பலனளிக்குமா தெரியவில்லை (நண்பர் ஜான் சைமன் மன்னிப்பாராக !) ; இரண்டாம் ரகம் நிச்சயமாய் ஒரு no - no ! நிஜமான த்ரில்லர் கதைகளுக்கு நானுமே வலை போட்டு வருகிறேன்...!

========================================================================

* மிக அவசியப்பட்டால்தவிர முத்தக்காட்சிகள் கூட வேண்டாமே என்ற வாசகர்களின் வேண்டுகோளுக்கு செவிசாய்க்கப்படுமா? பெற்றோர்கள் தங்கள் பிள்ளைகளுக்குத் தயக்கமின்றி நம் காமிக்ஸ்களை வாங்கிக்கொடுத்திட இந்த 'விரசமில்லா' நிலைப்பாடு நிச்சயம் உதவுமில்லையா?

இது பற்றி நாம் நிறையவே பேசி இருக்கிறோம் தானே ? எனினும், நம் நிலைப்பாட்டை தெளிவுபடுத்த மீண்டுமொருமுறை நேரம் செலவிடுவதில் தவறில்லை தானே  ! 

முத்தக் காட்சிகளோ ; இன்ன பிற வகை விரசங்களோ ஒரு ஆக்கத்தினுள் (காமிக்ஸ்களுக்கு மாத்திரமின்றிப் பொதுவாகவே) புகுத்தப்படுவதற்கு 2 மாறுபட்ட காரணங்கள் இருக்கலாம் !  ஒன்று - வாசகர்களிடையே சற்றே கிளர்ச்சியைக் கொணரும் வியாபர நோக்காய் இருத்தல் சாத்தியமே  ! காரணம் # 2 :  கதையின் போக்கிற்கு ; கதாப்பாத்திரங்களிடையே நிலவும் உறவின் தன்மைகளைச் சித்தரிப்பதற்கு ஒரு கருவியாய் அதனை படைப்பாளிகள் அமைத்திருக்கலாம் ! 

லார்கோ கதைகளில் பட்டாம் பூச்சிகளாய் வந்து போகும் அழகான யுவதிகள் - கண்ணுக்குக் குளிர்ச்சியூட்டுவதைத் தாண்டி லார்கோவின் playboy கேரக்டரை பதிவு செய்திடும் யுக்திகளாகவும் படைப்பாளிகள் பார்த்திடுகிறார்கள் ! ஷெல்டன் கதைகளில், உலகையே தரிசித்து முடித்து விட்டதொரு 50 வயதான ஆண்மகனின் பயணங்களையும், வழியில் அவன் சந்திக்கும் சிற்சில வசந்தங்களையும் வெளிச்சம் போடுவதே கதாசிரியரின் நோக்கம்.அது போன்ற சூழலில் நான் 'கத்திரி போடுகிறேன் பேர்வழி '  என்று இறங்குவது ஒரு ஆக்கத்தின் ஆத்மாவை ஆபரேஷன் செய்வதைப் போன்றது ! அங்கே நான் செய்திடக் கூடியது, ஆடைகளில் ; சம்பாஷணைகளில் கண்ணியம் தவறிடாமல் பார்த்துக் கொள்ளக் கூடியது மாத்திரமே ! இங்கு இன்னுமொரு குட்டி snippet : 

நாம் முன்பு சாணித் தாளில், ஒரு கலரில்,சொற்ப விலைகளில் கதைகளை வெளியிட்டு வந்த வரையிலும் 'எக்கேடோ கெட்டொழி ' என்று படைப்பாளிகள் நம் பாணிக்குள் அதிகமாய் மூக்கை நுழைப்பதில்லை ! ஆனால் இன்றோ - வண்ணத்திலும், தரத்திலும் அவர்களது அளவுகோல்களுக்கு நெருங்கி நாம் நிற்கும் வேளையில், கதைகளை நாம் கையாளும் பாணிகளிலும் நமக்கு restricted சுதந்திரம் மாத்திரமே உண்டு ! So - நானே நினைத்தால் கூட கண்ட இடத்தில்   கத்திரி போடுவதென்பது எனக்கும் சாத்தியமல்ல !  Cinebooks வெளியிடும் லார்கோ புக்குகளில் கூட முதல் பக்கத்தில் சின்னதாய் ஒரு வாசகம் இருக்கும் : "படைப்பாளிகளின் சம்மதத்தோடு, நமது மிதரசனை வாசகர்களின் பொருட்டு சித்திரங்களில் சின்ன அளவில் மாற்றம் செய்துள்ளோம் " என்று !  Cinebooks போன்றதொரு ஜாம்பவானுக்கே இந்தக் கட்டுப்பாடுகள் apply ஆகுமெனும் போது, சிவகாசியில் குந்தி இருக்கும் இந்த ஸ்பைடர் மண்டையனுக்கு மட்டும்  விதிவிலக்கு கிட்டுமா என்ன ? 

'காலங்கள் மாறி வருகின்றன ; உலகையே நம் வீட்டுக் கூடத்திற்குக் கொணரும் ஊடகங்களின் தாக்கம் அதிகரித்து விட்டது ; ஆகையால் இவ்விஷயங்களில் நமது சகிப்புத்தன்மைகளும் மாறிடல் அவசியம் என்றெல்லாம் நான் போதிக்கப் போவதில்லை ! ரசனை சார்ந்த விஷயங்களில் ஒவ்வொருவரின் நிலைப்பாடும் அவரது பிரத்யேகம் என்பதையும் ; தம் குழந்தைக்கு எதை ஊட்டுவது ; எதை ஒதுக்குவது என்பதும் ஒவ்வொருவரது தனிப்பட்ட தேர்வுகளே என்பதிலும் எனக்கு முழு உடன்பாடே ! ஆனால் நான் சொல்ல விழைவது ஒன்றே : நம் இதழ்களில் இந்த சங்கதிகள் தலைகாட்டுகின்றன எனில் - அது நான் முதலில் குறிப்பிட்ட  காரணம் # 2 -ன் பொருட்டு மாத்திரமே ! கிளர்ச்சியூட்டித் தான் வியாபாரம் செய்ய வேண்டுமென்றொரு அவசியம் தாங்கிய நாள் புலருமெனின், புளிய மரத்தடியில் வடை போட்டு விற்பேனே தவிர, விரசத்தை வியாபாரம் ஆக்க உடன்பட மாட்டேன் ! 

ALL NEW ஸ்பெஷலில் வரவிருக்கும் "பிரளயத்தின் பிள்ளைகள்" ஓரிரு இடங்களில் நிர்வாணக் காட்சிகளைக் கொண்டதொரு கதையே ! ஆனால் உலக யுத்தப் பேரழிவின் போது அரங்கேறிய அவலங்களை சித்தரிக்குமொரு ஆக்கத்தில் அந்தக் காட்சிகள் இடம் பெறுவது விரசத்தையோ; கிளர்ச்சியையோ உண்டு செய்யவல்ல ! அதனை உணராது, 'கத்திரி எடுத்தவன் கில்லாடி எடிட்டர்' என நான் செயல்படும் பட்சத்தில், ஆர்டினுக்குத் துணைக்குத் தான் நான் லாயக்காக இருக்க முடியும் ! 

நம் கதைகளை முதலில் கையாள்வது ஒரு இல்லத்தரசியே ! அதற்கு டைப்செட் செய்வதும் ஒரு மணமாகா பெண்மணியே ; இதழ்களை அனுப்பிடும் பணியில் ஈடுபட்டிருப்பதும் 2 பெண்களே ! So முகம் சுளிக்கச் செய்யும் பாங்கு எங்கேனும் எட்டிப் பார்த்திடவே கூடாதென்ற எச்சரிக்கை உணர்வு சதா காலமும் நம்மில் குடி கொண்டிருக்கும் ! Rest assured ! 

========================================================================

*  முன்கூட்டியே பணம் செலுத்திப் புத்தகம் வாங்கிடும் முகவர்கள்/விற்பனையாளர்களின் எண்ணிக்கையிலும் ஏற்றம் கண்டிருக்கிறோமா?

Yes :-) 

========================================================================

ஒரு வழியாய் எனக்குத் தெரிந்த பதில்களைப் பதிவு செய்து விட்ட திருப்தியில் கிளம்புகிறேன் !எங்கேனும் 'கருத்து கந்தசாமி' ரேஞ்சில் ஏதேனும் சொல்லப்பட்டிருந்தால், அது முழுக்க முழுக்க எனது சொந்த அபிப்ராயங்களே என்ற disclaimer இங்கு நிச்சயம் அவசியம் ! உலகுக்கு சேதி சொல்ல நானோ ; இந்தத்  தளமோ ஒரு நாளும் முயற்சித்ததில்லை ; முயற்சிக்கப் போவதுமில்லை - என்பதை சமீபமாய் ஒன்றிரண்டாய் இங்கு ஒலித்துள்ள சலிப்புக் குரல்  நண்பர்களுக்கு நினைவூட்டும் கடமை எனக்குள்ளது ! 'இந்திரன்-சந்திரன்- அசகாய மொழிபெயர்ப்பாளன் ' என்ற பட்டயங்களை யாரும் இங்கிருந்து சுமந்து செல்லப் போவதில்லை என்பதை நன்றாகவே அறிவேன் ; 'காமிக்ஸ் நேசன் ; சகஜமானதொரு சக மனிதன் ' என்ற அடையாளம் கிட்டினாலே பாக்கியசாலி ஆக மாட்டேனா ? !  Enjoy the sunday folks ! 

பல கேள்விகளும் ; சில சிந்தனைகளும்...!

 நண்பர்களே,

வணக்கம். ஊருக்குத் திரும்பியதும், தொங்கலில் நின்று கொண்டிருந்த பணிகளை கொஞ்சமாய் கவனித்து விட்டு, நேற்றிரவே இங்கு ஆஜராக உத்தேசித்திருந்தேன் ; ஆனால் கும்பகர்ணனைத் தொற்றிக் கொண்ட   தூக்கம் எனது கண்ணிமைகளிலும் குடி கொண்டு விட்டதால் - சொப்பனங்களில் ஹாட்லைன் எழுதப் போய் விட்டேன் ! ஞாயிறு காலை login செய்து விட்டு எதைப் பற்றி எழுதலாமென்ற சிந்தனையோடு    தலையைச் சொறிந்த போது தான் சமீபமாய் நமது 'கேள்விகளின் நாயகர்' ஈரோடு விஜய் தொடுத்திருந்த கேள்விக் கணைகள் நினைவுக்கு வந்தன ! இயன்றதை பதிலாய் படைத்தாலே ஒரு பதிவு தயார் என்பதால் இதோ துவங்குகிறது எனது ஞாயிறு ! (கேள்விகள் சிகப்பிலும், எனது பதில்கள் black & white -ல் இருந்திடும் ! )

*அடுத்த சென்னை புத்தகத்திருவிழாவில் கருப்பு-வெள்ளை மறுபதிப்புகளுக்கு வாய்ப்பிருக்கிறதா?

ஆங்காங்கே எனது பின்னூட்டங்களில் மாத்திரமின்றி, சந்திக்கும் நண்பர்களோடு பேசிக் கொண்டிருக்கும் போதும் இந்த "மறுபதிப்புப்   படலம்" பற்றிய எனது இப்போதைய நிலைப்பாட்டை  மெலிதாகக் கோடிட்டுக் காட்டி வருகின்றேன் ! சென்றாண்டு காமிக்ஸ் க்ளாசிக்சில் முந்தைய மும்மூர்த்திகள் ; டிடெக்டிவ்கள், வலம் வருவார்களென்று அறிவித்தது ; வெகு சுமாரான வரவேற்பு + சந்தா சேகரிப்பில் ஏக மந்தம் காரணமாய் அத்திட்டம் பரணுக்குப் பார்ஸல் ஆனது என அனைத்திற்கும் நாம் சாட்சிகள் தானே ! இந்நிலையில் மீண்டும் b&w மறுபதிப்பிற்கு உயிரூட்டுவது என்பது சிரமங்கள் நிறைந்த முயற்சியே ! 2013-ன் ஒரு பாதி நிறைவடைந்திருக்கும் இத்தருணத்தில் பாக்கியுள்ள 6 மாதங்களில் நாம் சந்திக்க / சாதிக்கக் காத்துள்ள இதழ்களின் பட்டியலைப் பார்ப்போமே :

லயன் & முத்து காமிக்ஸ் - புது இதழ்கள் : 7 இதழ்கள் 

( ரூ.200 ; ரூ.100 ; ரூ.50 ; ரூ.40 என வெவ்வேறு விலைகளில்)    

சன்ஷைன் லைப்ரரி - வண்ண மறுபதிப்புகள் : 3 இதழ்கள் (ரூ.100 வீதம்)

+6 வரிசையில் - 5 இதழ்கள் (ரூ.50 வீதம்)

ஆக, தொடரும் ஆறு மாதங்களில் நம் முன்னே 15 இதழ்களுக்கான அட்டவணை தயாராய்க் காத்துள்ளது ! இந்தப் 15 இதழ்களுக்கும் பணியாற்றுவது ஒரு பக்கமெனில், அவை அவசியப்படுத்தப் போகும்    தயாரிப்புச் செலவுகள் + முதலீடுகள் தலையைச் சுற்ற வைக்கும் ஒரு அசுரத் தொகை ! நாம் தயாரிப்பதில் 30 - 35 % மாத்திரமே முதல் 30 நாட்களில் போணியாகும் என்பதால் பாக்கி இதழ்கள் நம் கிட்டங்கிக் கஜானாவில் துயில் பயிலுவது அவசியம் - அவ்வப்போது தலைகாட்டும் புத்தகத் திருவிழாக்களையும் ; e -bay விற்பனையையும்  எதிர்நோக்கி ! இங்கே தேவைப்படுவது வலுவான முதலீடு மாத்திரமின்றி - விசாலமான கிட்டங்கியும் கூட என்பதை சமீப நாட்களாய் நமது godown சந்தித்து வரும் இட நெரிசல் உணர்த்திகிறது ! இந்நிலையில் - எதிர்நோக்கியுள்ள 15 இதழ்களோடு புதிதாய் (!!) மறுபதிப்பு சமாச்சாரங்களையும் நான் கையில் எடுத்தால் - அது ஒட்டகத்தின் குறுக்கை ஒடித்த கதையாய்ப் போய் விடும் அபாயமுண்டு ! So - 2014 சென்னை திருவிழாவில் மறுபதிப்புகளும் இடம்பெறுவது close to impossible ! (அதாவது நமக்கு இந்தாண்டும் சென்னையில் ஸ்டால் தரும் பட்சத்தில் !!)

========================================================================

* 'திகில் நகரில் டெக்ஸ்' எப்போது முழுவதுமாக வெளிவரும்?

ஏராளமான நண்பர்கள் இதே கேள்வியை பல்வேறு தருணங்களில் எழுப்பி விட்டனர் ! "திகில் நகரில் டெக்ஸ்" ஒரு நார்மலான டெக்ஸ் சாகசம் மாத்திரமே ! தலைப்பைப் பார்த்தோ என்னவோ , நண்பர்களிடையே இக்கதைக்கு அதீத பில்டப் உருவாக்கி விட்டதால், அதனைக் கோரி எழும் குரல்களும் கூடி விட்டன ! 2014-ல் பட்டியலிட்டிடுவோமா ?

========================================================================

* தற்போது அதிக வரவேற்பு பெற்றுவரும் 'கிராபிக் நாவல்' களுக்காக ஒரு தனி புத்தகம் ஆரம்பிக்கப்படுமா?

மாமூலான கதைக் களங்களுக்கு அப்பாற்பட்டு நின்றிடும் படைப்புகளை கிராபிக் நாவல் என்று வரிசைப்படுத்துவதெனில் - சமீபத்திய டயபாலிக் கூட அந்தப் பட்டியலில் தானே சேர்ந்திடும் ! Anyways , ஒரு கிராபிக் நாவலைத் தேர்வு செய்வது மிகச் சிரமமான பணி என்பேன் ! கதைக் களத்தில் வேற்றுமை ; சித்திர பாணிகளில் ஒரு நவீனம் ;வழக்கமான காமிக்ஸ்களைத் தாண்டியதொரு தாக்கத்தை நம்மிடையே உண்டு செய்யும் ஆற்றல் என இவற்றிற்கான தேர்வு அளவுகோல்கள் மிகக் கடுமையானவைகள் ! 'அடிக்கடி GN -களை வெளியிடுகிறேன் பேர்வழி' என்று நான் புறப்பட்டால் அந்த அளவுகோல்களில் ஆங்காங்கே சிற்சில சமரசங்கள் செய்து கொள்ள வேண்டி வரும் ! So இப்போதைக்கு ஊறுகாயாய் பரிமாறப்படும் GN -கள் அவ்விதமே இருப்பது நமக்கும் நல்லதே ! 

இங்கே சின்னதாய் ஒரு இடைக்கதை ! சமீபமாய் ஒரு வேற்று மொழி   கிராபிக் நாவலைப் புரட்டும் வாய்ப்புக் கிட்டியது ! கோழிக் கீச்சலான அந்தச் சித்திரங்களிலும் ஒரு வசீகரம் தெரிந்ததால், மொழி புரியாது போயினும் பொறுமையாகக் கதையினை ரசிக்க முயற்சித்தேன். ஒரு சிறு நகரில் பிறந்து, வளர்ந்ததொரு ஆசாமி - பின்னாளில் தலை நகரத்தில் பணியாற்றும் போது ஒரு வார இறுதியில் தன சொந்த ஊருக்கு ஒரு ட்ரிப் அடிக்கிறான் ! தான் வளர்ந்த ; வாழ்ந்த தெருக்களை ; மைதானங்களை ; சுற்றித் திரிந்த புல்வெளிகளை ; நிதானமாய் ஒரு பார்வையிட்டு விட்டு, மறு நாள் மீண்டும் தலைநகர் நோக்கி ரயில் ஏறுகிறான் ! மிகச் சொற்ப வசனங்கள் ; பெரிதாய் ஒரு சுவாரஸ்யம் தரக் கூடிய கதையின்மை - ஆனால் இன்றைய நம் வாழ்வுகளில் ஒரு சின்ன ஒற்றுமையைக் கோடிட்டுக் காட்டும் பாணி என்று அமைந்திருந்தது இந்த GN ! வாழ்க்கையின் பக்கங்களைத் துடிப்போடு இன்று புரட்டும் நண்பர்களுக்கு இக்கதை "ஞே" என்ற முழிப்பை மாத்திரமே வழங்க வல்லது ; 40 s & 50 s இருக்கும் "பழங்களுக்கு" வேண்டுமெனில், கடந்து வந்த பாதையின் ஒரு வலி கலந்த சந்தோஷத்தை எங்கோ ஒரு சிறு மூலையில் நினைவுபடுத்தும் முயற்சியாக இது இருந்திடலாம் ! இவை போன்ற GN -கள் ஆங்காங்கே இருப்பினும் - அனைத்து ரக வாசிப்பு அனுபவங்களுக்கும் அவை  உகந்தவைகளாக அமைவது கஷ்டமே ! 

========================================================================

* 'சிங்கத்தின் சிறு வயதில்' ஒரு தொகுப்பாக வெளியாகுமா?

நினைவலைகளை நானே சிரமப்பட்டுப் பின்னோக்கித் திருப்பிட வேண்டியுள்ளது இந்தக் கால் நூற்றாண்டுக்கும்  முந்தையதொரு பயணத்தின் நதிமூலங்களைத் தேடிச் செல்லும் போது ! அப்படி இருக்கையில், இன்று நம் குடும்பத்தில் ஐக்கியமாகிடும் புது வரவுகளுக்கு "அந்த நாள் ஞாபகம் வந்ததே-வந்ததே " பாணியிலான மலரும் நினைவுகள் எத்தனை தூரம் ரசித்திடுமோ நானறியேன் ! இதழில் சில பக்கங்களை ஆக்ரமிக்க நீங்கள் அனுமதிப்பதே எனக்கு உச்ச பெருமிதம் ; நிச்சயமாய் இதனை தனியாய் ஒரு இதழாக வெளியிடும் உத்தேசமென்றும் கிடையாது ! 

========================================================================

* ஜூனியர் எடிட்டர் விக்ரம் தற்போது எந்தமாதிரியான பணிகளைக் கவனித்துவருகிறார்?

பொறியியல் கல்வியில் இரண்டாம் ஆண்டை முடித்து விட்டு மூன்றாம் ஆண்டுத் துவக்கத்தை எதிர்நோக்கியுள்ள ஜூனியர் எடிட்டர் தற்சமயம் கல்லூரிக்கு மாணவனாய் மாத்திரமே தனது கடமைகளைச் செய்து வருகிறார் ! காமிக்ஸ் எனும் சுவாசத்தை தாமதமாய் உணர்ந்துள்ள போதிலும், விட்டதைப் பிடிக்கும் வேகமும் ஆர்வமும் சமீபத்திய வரவுகள் அவருள் ! எனது ராடாருக்கு அப்பாற்பட்ட படைப்புகளைத் தேடித் பிடித்துப் படிப்பது ; அவற்றில் 'தேவலை' என்ற தொடர்களை எனது பார்வைக்குக் கொணர்வது ; எனது பொதுவான உரத்த சிந்தனைகளுக்கு ஒரு sounding board ஆக இருப்பது என்பது அவரது தற்சமயப் பொறுப்புகள். காமிக்ஸ் எனும் துறையிலோ ; நமது பிற தொழில்களிலோ அவர் கால் பதிக்க, ஆர்வத்தைத் தாண்டிய பல அவசிய அளவுகோல்கள் உள்ளதால், அவற்றை நிதானமாய்க் கற்றறிந்து வரட்டுமே என விட்டுள்ளேன். உயர் கல்விக்கான அவசியமும், அது வழங்கிடும் ஆற்றலும் எத்தனை முக்கியமென்பதை சராசரியான மனிதனை விட நான் நன்றாகவே அறிந்துள்ளது எனது நிதானத்தின் காரணம் ! 

30 ஆண்டுகளுக்கு முன்னே நானிருந்த சூழல் வேறு....! பள்ளிக் கல்வி முடித்த கையோடு - கல்லூரி சென்று மேற்கொண்டு படிக்கும் கலர் கலரான  கனவுகளோடு வரிசையில் நின்ற மாணவர்களுள் நானும் ஒருவனே ! ஆனால் தந்தையின் அன்றைய தொழில் நிலையும் சரி, குடும்பப் பொருளாதாரமும் சரி,  அதள பாதாளத்தில் இருந்ததால் - என்னைப் படிக்க வைக்கும் வசதி கூட அன்று ஒரு பகற்கனவாகவே போய் விட்டது !+2-வில் பள்ளிக்கு பீஸ் கட்ட நாக்குத் தள்ளிய நாட்கள் ஏராளம் ! So 17 வயதில் நான் பணியாற்ற வந்தது வேறு மார்க்கமின்றியே ! பெயருக்குப் பின்னே மூன்றெழுத்தாவது  இல்லாவிடின் தலையெழுத்தே நாறிடும் என்ற பயத்தில் மதுரை காமராசர் பல்கலைக்கழகத்தின் தொலை தூரக் கல்வித் திட்டத்தில் சேர்ந்து நான் correspondence course-ல் B.Com படித்ததெல்லாம் இன்று விளையாட்டான நினைவுகளாய் மாத்திரமே என்னுள் இருப்பினும், நான் கற்றிட முடியாது போன உயர் கல்வி என் தனையனுக்காவது சீராய்க் கிடைக்கட்டுமே என்ற ஒரு ஆசை தான் அவனைக் களமிறக்க அவசரம் வேண்டாமே என்ற சிந்தனையின் பின்னுள்ள சிந்தனை :-) 

========================================================================

* வருடத்தின் பாதியைத் தொட்டுவிட்டிருக்கும் நிலையில் அடுத்தவருடத்திற்கான தோராயமாண அட்டவணை ரெடியாகிவிட்டதா?

இன்றைய நிலையில் நம் முன்னே இருப்பது - இந்திய கிரிக்கெட் அணியின் முன்னே இருக்கும் பிரச்னையை ஒத்தது : Problem of Plenty !! எதை ஒதுக்குவது ; எதை இணைப்பது என்பதே பிரதான சிக்கல் நமக்கிப்போது ! எனினும், yes - என்னுள் 2014-க்கான அட்டவணை தயார் !
========================================================================

*கிட் லக்கியை +6ன் முதல் இரண்டு வெளியீடுகளாகக் கொண்டுவர இருந்த திட்டத்தில் திடீர் மாற்றம் ஏன்?

அறிவிக்கப்பட்டதைத் தாண்டிய சின்னச் சின்ன surprises அவ்வப்போது நமக்கு அவசியங்களே ! டைம் டேபிள் போட்டு சீராய்ச் செல்வது நன்றாக உள்ளதென்ற போதிலும், எப்போதாவது ஒரு குட்டி பல்டி அடிப்பதன் சுகமே தனி தானே ! "நிலவொளியில் ஒரு நரபலி " அத்தகையது.

========================================================================

* ஆகஸ்டில் சென்னையில் நடைபெறவிருக்கும் ( உறுதியில்லாத தகவல்) காமிக்-கானில் நாமும் பங்கேற்கிறோமா?

'உறுதியில்லாத் தகவல்' என்று நின்றது ; 'நிறைவேறா ஆசை ' என்ற பட்டியலுக்குப் பயணமாகி விட்டது ! COMIC CON அமைப்பாளர்களுக்கு சென்னை மீது அத்தனை நம்பிக்கையில்லை என்பதே நிஜம் ! அடுத்த தென்னிந்திய COMIC CON ஹைதராபாத் செல்வதாக அமைப்பாளர்கள் சொல்லக் கேட்டேன் !

========================================================================

* சமீப நாட்களில், வாசகர்களின் எந்த வகையான கேள்விகள் உங்களுக்கு மனவருத்தத்தை ஏற்படுத்தின?

சுவாரஸ்யமான கேள்வி ! 'விமர்சனங்கள் என்னைப் பாதிக்காது' ; 'என் வழி தனி வழி ' - என்றெல்லாம் எவரேனும் பீட்டர் விட்டால் அது உட்டாலக்கடிப் பட்டியலின் உச்ச இடங்களில் ஒன்றை ஆக்ரமிக்கும் என்பது திண்ணம் ! மாற்றுக் கருத்துக்களை எதிர்க்கொள்ளுவதென்பது எனக்கு மாத்திரமின்றி - இங்குள்ள ஒவ்வொரு நண்பருக்கும் சுலபக் காரியமல்ல என்பது நிதர்சனம் ! ஆனால் அவற்றை நாம் எவ்விதம் கையாள்கிறோம் என்பதில் தான் பொறுமைக்கும், அனுபவத்திற்கும் முக்கிய பங்கு செல்கிறது என்று சொல்லத் தோன்றுகிறது ! 

அடிப்படையில் நானொரு சந்தோஷ விரும்பி ! பிரச்னைகள் ; சிக்கல்கள் சூழ்ந்திருக்கும் சமயங்களிலும் கூட , நமக்கென ஆசீர்வதிக்கப்பட்டிருக்கும் சிற்சிறு நல் விஷயங்களை முன்னிலைப்படுத்தி வாழ்க்கையின் பக்கங்களை வெளிச்சமாய்ப் பார்த்திடப் பிடிக்கும் எனக்கு ! எப்போதாவது இங்கே தெரிவிக்கப்படும் சில மாற்று சிந்தனைகள் ; அபிப்ராயங்கள் இரத்த ஓட்டத்தை வேகப்படுத்திடும் ரகத்தில் இருக்கும் பட்சத்தில், நானும் அதே வெப்பத்தோடு பதிலளிப்பது - இடியாப்பத்தை இன்னும் நாலு சுழி சுற்றி விட்டதுக்கு சமானமாகும் என்பதை அனுபவம் உணர்த்தியுள்ளது! So அவசியமென்று நான் கருதிடும் எனது பதில்களை ஆங்காங்கே பதிவு செய்வதோடு என் தலைக்குள் அந்த அத்தியாயத்திற்கு "சுபம்" போட்டு விடுவேன் ! நிறைய நேரங்களில் சங்கிலியாய்த் தொடரும் விவாதங்களில் நான் மேற்கொண்டு கலந்து கொள்ளாது செல்வதற்குக் காரணமும் இதுவே !அவசியமென என் சிந்தை ஏற்றுக் கொள்ளும் திருத்தங்களைத் தாண்டிய எந்தவொரு கருத்தையும் நான் இங்கிருந்து தலைச் சுமையாய்க் கொண்டு சென்றிடும்  பட்சத்தில் , என்னை வருத்திக் கொள்வதோடு மட்டுமல்லாது  - அது எனது பணியிலும் எதிரொலித்து  ; என்னைச் சார்ந்து / சூழ்ந்து நிற்போரையும் காயப்படுத்திடும் அபாயம் உண்டென்பதால் - சமீபமாய் என்றில்லை ; எப்போதுமே இங்கிருந்து நான் சந்தோஷங்களை மாத்திரமே எடுத்துச் செல்வேன் ! 

திரும்பவும் இங்கே கிரிக்கெட் உவமையோடு சின்னதாய் ஒரு கிளை : 

டி-வி. அம்பயர்கள் வந்த பின்னரும் கூட ஏதாவதொரு தெளிவற்ற சூழல் எழும் போது - சந்தேகத்தின் பலன் பாட்ஸ்மனுக்கு வழங்கப்படும் தானே ?! அதே சூழல் நமக்கும் கூடப் பொருந்துமென்றே நினைக்கிறேன் !   நண்பர்களின் கேள்விகள் ; அபிப்ராயங்கள் ; சிந்தனைகள் அனைத்துமே கூர்ந்த அறிவாற்றலின் பலன்களே என்பதில் ஐயமில்லை. வேற்று மொழி காமிக்ஸ்களைப் படிப்பது ; இன்டர்நெட்டில் ஆராய்ச்சி செய்வது ; சக வாசக நண்பர்களிடையே கலந்தாலோசிப்பது என்றெல்லாம் நிறைய thought process அவற்றின் பின்னே இருப்பதை நான் உணர்கிறேன். ஆனால் எத்தனை முயன்றாலும், எனது காலணிகளில் இருந்து எனது பக்கத்துப் பார்வையைப் பரிச்சயமாக்கிக் கொள்வது நிச்சயமாய் யாருக்கும் சாத்தியமற்றது என்பதும் நிஜமே ! இதனை இறுமாப்பின் பறைசாற்றலாய் நான் சொல்லிட வரவில்லை ; மாறாக யதார்த்தத்தின் வெளிப்பாடாய் மாத்திரமே பதிவிடுகிறேன் ! எனது நிஜமான  நிலை என்ன ? ; என்னை எதிர்நோக்கியுள்ள சங்கடங்கள்/ சந்தோஷங்கள் / சவால்கள் என்ன ?ஒவ்வொரு மாதமும் பணம் புரட்ட எனக்கு அவசியப்படும் பல்டிகள் என்ன ? தெரிவிக்கப்படும் ஒவ்வொரு அபிப்ராயங்களையும் செயலாக்கிடுவதில் உள்ள தடைகள் என்னவென்றெல்லாம்  நீங்கள் அறிந்திடுவது அசாத்தியம அன்றோ  ? So- உங்களுக்கு இயன்ற எல்லைக்குள்ளிருந்து கேள்விகளைத் தொடுக்கிறீர்கள் என்பதை நான் உணரும் போது -benefit of the doubt-சந்தேகத்தின் பலனை (மேஜர் சுந்தர்ராஜன் மன்னிப்பாராக !) உங்களுக்கு வழங்குவது தானே முறை ? இதில் நான் விசனப்படுவது முறையாகாதே ?! கூட்டிக்-கழித்துப் பார்த்தால் கணக்கு நேராகிடும் என்ற நம்பிக்கை என்னுள் நிறையவே உள்ளது ! So no worries !

விதண்டாவாதங்கள் ; காரமான மொழி நடையில் சொல்லப்படும் கருத்துகள் - சொல்லப்பட்ட விதங்களுக்காக அவ்வப்போது எரிச்சலை உண்டு செய்வது நிஜமே ! ஆனால்  அவை ஏதோ ஒரு வித ஆற்றமாட்டாமையின் வெளிப்பாடுகளே என்பதால் - அவற்றிற்கு மறு பார்வையைத் தந்திடாது நடையைக் கட்டுவதற்கு இப்போதெல்லாம் கற்று விட்டேன் ! 

========================================================================
* கேப்டன் டைகருக்கு தற்போது ஏற்பட்டிருக்கும் சிறு சறுக்கலை நேர் செய்ய ஏதேனும் அதிரடித்திட்டம் உருவாகிவருகிறதா?

கேப்டன் டைகருக்கானதொரு புதிய "அதிரடித் திட்டத்தை  " உருவாக்கக் கூடிய படைப்பாளர் சென்றாண்டே காலனிடம் சரணாகதி ஆகி விட்டதால், நாம் செய்யக் கூடியது பெரிதாய் என்ன இருந்திட முடியும் ?! 

டைகரின் ஒவ்வொரு கதையும் ஒரு "தங்கக் கல்லறை" யாக ; ஒரு "மின்னும் மரணமாக" அமைந்திட வேண்டுமென்ற நமது எதிர்பார்ப்புகள் - ஒவ்வொரு முறையும் சச்சின் சதம் அடிக்க வேண்டுமென்ற ஆசைக்கு சமமாகாதா ? நமது துவக்க காலத்து டைகர் கதைகளின் பதிப்புகளை பொறுத்த வரை - எந்தவொரு வரிசையையும் மதிக்காது - சூப்பரான கதைகளை மாத்திரமே பொருக்கி எடுத்து வெளியிட்டோம். ஆகையால் நீங்கள் படித்த கதைகளின் பெரும்பான்மை சூப்பர் ஹிட்களாய் அமைந்ததில் வியப்பில்லை ! ஆனால் இப்போது நாம் வரிசையாய் செல்ல நினைப்பதால் டைகரின் the good ; the bad & the ugly  -ஐ தரிசிப்பது தவிர்க்க இயலா விஷயமாகி விட்டது ! 'சறுக்குவது மீண்டும் எழுவதற்கே' என்ற நம்பிக்கையில் தொடர்வோமே !  

========================================================================

காலையில் சாப்பிட்ட டிபன் அதற்குள்ளாகவே செரித்து விட்டதால் - 'விஜயின் கேள்வித் தொகுப்பு -2' -க்கான பதில்களை இன்னொரு பதிவில் பார்த்துக் கொள்ளலாமென  பிறாண்டும்  எனது "மத்தியப் பிரதேசம்" எகமனதாய்த் தீர்மானம் நிறைவேற்றியுள்ளதால் - இப்போதைக்குப் புறப்படுகிறேன் ! மீண்டும் அடுத்த வார இறுதியினில் சந்திக்கிறேன் folks ! Take care ! 

காசு...பணம்...துட்டு...money..money !!

நண்பர்களே,

வணக்கம். தமிழ் திரையிசையின் சமீபத்திய இலக்கியச் சேர்க்கைப் பாடலை நினைவூட்டுவது நிச்சயம் இந்தப் பதிவின் தலைப்பின் நோக்கமல்ல ! சென்ற வாரம் நடந்து முடிந்த பெங்களூரு COMIC CON திருவிழாவில் கலந்து கொண்டு திரும்பிய போது மனதில் பட்ட முதல் சங்கதியே இந்தப் பதிவின் தலைப்பாய் உதித்து விட்டது  ! 

உலகெங்கும் காமிக்ஸ் என்பது மிரட்டலான வரவு-செலவு நம்பர்களை வரவழைக்கும் ஒரு மாபெரும் வியாபாரமும் கூட என்பதால் - வெற்றிகரமான ஒவ்வொரு காமிக்ஸ் நாயகரின் வருகையைத் தொடர்ந்தும்  டி-ஷர்ட் ; போஸ்டர் ; பரிசுப் பொருட்கள் வியாபாரம்  ; டி-வி சீரியல்கள் ; சில சந்தர்ப்பங்களில் திரைப்படங்கள் என்றெல்லாம் ஏராளமான commercial spinoffs இருந்திடுவது வழக்கம் ! ஆனால் 'கன்னித் தீவு சிந்துபாத்தைத்' தாண்டி காமிக்ஸ் எனும் உலகினுள் உலவத் தயங்கிடும் இங்கோ இவையெல்லாம் வெறும் "அயல்நாட்டுப் பீற்றல்களாகவே' இருந்து வந்துள்ளன - COMIC CON எனும் இந்த நிறுவனத்தின் முயற்சிகள் துவங்கிடும் வரையிலாவது!! அமெரிக்காவின் பரந்து  விரிந்த மாகாணங்களில் comics conventions என்பன சுவாரஸ்யம் தரும் தொடர் நிகழ்வுகள் ; அவற்றை கொஞ்சமாய் உள்வாங்கிக் கொண்டு இயன்றளவிற்கு நமது நாட்டில் செயல்படுத்திக் காட்டிட முனைந்த அந்த தைரியசாலிகளுக்கு ஒரு சலாம் போடலாம் ! தென்னிந்தியாவில் முதல் முறையாகக் கால் பதிக்க 2012 -ல் COMIC CON துணிந்த போது, பெங்களூரு தரவிருக்கும் வரவேற்பு எவ்விதம் இருக்குமோ என்ற தயக்கம் அதன் அமைப்பாளர்களுக்கு இருந்தது நிஜம் தான் ! ஆனால் இரு கரம் திறந்து கர்நாடகத் தலைநகர் தந்த உற்சாக அணைப்பு அவர்களது எதிர்பார்ப்புகளைப் பன்மடங்கு தாண்டி இருந்தது என்பதை சீக்கிரமே புரிந்து கொள்ள முடிந்தது ! 2012 தந்த வெற்றியின் பரிமாணத்தை இவ்வாண்டின்  அனலடிக்கும் ஸ்டால் கட்டணங்கள் அழகாய் உணர்த்தின !  இருமடங்கைத் தொட்டது கட்டணங்கள் மட்டுமல்ல - பங்கேற்கும் நிறுவனங்களின் எண்ணிக்கையும் கூடவே என்பதை ஸ்டால்களின் layout படத்தைப் பார்த்த போதே புரிந்திட முடிந்தது ! 

ஜூன் 1 காலையில் பெங்களூருவின்   கோரமங்களா உள்ளரங்கிற்குள் கால் வைத்த போது - மதுரை சித்திரைத் திருவிழாப் பொருட்காட்சிக்குள் தவறுதலாய்  நுழைந்து விட்டதான உணர்வைத் தவிர்க்க இயலவில்லை ! சந்து -பொந்து ; இண்டு- இடுக்கு - ஒரு இடம் பாக்கியின்றி அத்தனை மார்க்கங்களிலும் ஏதோவொரு  ஸ்டால் அமைத்து சென்றாண்டின் வெற்றியின் பலன்களை COMIC CON அறுவடை செய்திடுவதை உணர முடிந்தது ! ஐரோப்பா ; அமெரிக்காக்களில் காமிக்ஸ் பதிப்பகங்களின் எண்ணிக்கை கணிசமானது என்பதால் இது போன்ற COMICS SHOWS-களில் ஓவியர்கள் ; கதாசிரியர்கள் ; பதிப்பகப் பிரதிநிதிகள் பிரதான இடம் பிடிப்பதும் ; பின்னணியில் டி-ஷர்ட் ; போஸ்டர் விற்பனை போன்ற இதர வியாபாரங்கள் களை கட்டுவதும் வாடிக்கை ! 

அமெரிக்காவில்....   

ஆனால் இந்தியாவில் அது போன்ற சாத்தியம் கிடையாதென்பதால், விரல் விட்டு எண்ணி விடக் கூடிய காமிக்ஸ் நிறுவனங்கள் - ஒரு மந்தை டி-ஷர்ட் கடைகளுக்கு மத்தியினில் புதையுண்டு போனதே மிச்சம் என்றானது !  இந்தியாவின் அடையாளமான "அமர் சித்ர கதா" பிரதானமாய் முன்பக்கத்து ஸ்டால்களை ஆக்ரமிக்க, இங்கொன்றும் அங்கொன்றுமாய் அமெரிக்காவின் Dark Horse Comics  ; இங்கிலாந்தின் Cine Books மற்றும் நம் நாட்டு Campfire கிராபிக் நாவல்ஸ் "உள்ளேன் அய்யா " போடும் சூழ்நிலை ! ஆங்கிலம் அல்லாத பிராந்திய மொழியின் ஒரே காமிக்ஸ் பதிப்பகம் என்ற பெருமையே போதும் ; 'முன் பக்க ஸ்டால் அவசியமில்லை ' என்ற பாணியில் நமக்கான ஸ்டால் B10 சற்றே உள்ளடித்து இருந்தது ! 

'பெங்களூருவின் ட்ராபிக் படு மோசமா ? சென்னையினதா ?' என்ற பட்டி மன்றத்தோடு காலை ஒன்பதரைக்கு மேல் நாங்கள் கோரமங்களா சென்றடைந்து பார்த்தால் - நமக்கு 1 மணி நேரம் முன்பாகவே ஆஜராகிக் காத்திருக்கும் நண்பர்கள் குழாம் பெரிதாய் இருந்தது ! நம் ஆட்கள் வண்டியிலிருந்து புத்தக பண்டல்களைப் பிரித்து எடுத்து வரும் வேளைக்குள் நமது நண்பர்கள் படை 'பர பர' வென பானர்களைக் கட்டி ; உட்சுவர்களில் நாம் கொண்டு வந்திருந்த பல்வேறு printout களை ஓட்டும் வேலைகளில் மும்முரமாகி விட்டார்கள் ! பத்து நிமிட வியர்வைக்குப் பின்னே பரிதாபமாய்க் காட்சி தந்த ஸ்டால் - 'பளிச் ' தோற்றத்தை இரவல் வாங்கிக் கொள்ள - நம் பணியாட்கள் புது இதழ்களை அடுக்கத் துவங்கும் போதே நண்பர்களின் உற்சாகமும் உச்சஸ்தாயிக்குச் செல்வதை உணர முடிந்தது ! 

வண்ணத்தில் முதன்முறையாக அவதாரமெடுத்திருக்கும் டெக்சையும்   சரி ; செமத்தியான பில்டப்போடு வருகை தந்திருக்கும் டயபாலிக்கையும் சரி - இந்த 2 நாள் மேளாவின் நாயகர்கள் என்று சொல்லும் அளவிற்கு அத்தனை ஆவல் நண்பர்களிடேயே - இவ்விரு இதழ்களையும் பார்த்திட ! எல்லாவற்றையும் விட - 'ஒரே மாதத்தில் 4 இதழ்கள் ; அதுவும் முதல் தேதியன்றே !' என்பதை நண்பர்கள் அனைவரும் ஏகமாய்க் கொண்டாடிய போது - எங்களது அயோடெக்ஸ் தேய்ந்த முதுகுகளுக்கு வலி போன இடம் தெரியவில்லை ! "It 's gone ' என்று இதைத் தான் விளம்பரமாய் சொல்லி இருப்பார்களோ ?!! காலை 11 மணிக்குத் தான் அதிகாரபூர்வமாய் COMIC CON  2013 துவங்கும் ; அதன் பின்னரே விற்பனையைத் துவக்கலாம் என்பது விதி என்ற போதிலும், அதற்காகப் பொறுமை காக்கும் நிலையில் நண்பர்கள் இல்லவே இல்லை ! ஸ்டாலை சீரமைத்த மறு கணம் நமது RK & வேலுவை அனைவரும் ரவுண்ட் கட்டிட, சூப்பர் ஜூனின் 4 இதழ்களும் ஜரூராய் வியாபரம் ஆகத் தொடங்கின ! எல்லாவற்றையும் விட, அளவிலும் சரி ; எடையிலும் சரி - முதன்மை இடத்தைப் பிடித்த நமது "இரத்தப் படலம் " 1-18 முழு collection -ல்  நம்மிடமிருந்த 8 பிரதிகளுக்கு சொல்லி மாளாப் போட்டி !! இதற்காகவே காலை 8-30 மணி முதல் காத்திருந்த நண்பர்களும் உண்டு !!

இதழ்களை வாங்கிப் பரபரப்பாய் புரட்டிடும் நண்பர்களது கூட்டம் ஒரு பக்கமெனில், ஸ்டாலின் மறுமுனையில் தத்தம் சிந்தனைகளை என்னோடு பகிர்ந்த நண்பர்களது வட்டமும் பெரிதாய் இருந்தது ! அதிர்ஷ்டவசமாய் இம்முறை நமக்கு அடுத்து இருந்த ஸ்டாலின் உரிமையாள சகோதரர்களும் நமது அதி தீவிர வாசகர்கள் என்பதால் - நாம் இங்கும் அங்கும் நின்று அளவளாவிக் கொண்டிருப்பதை சிறிதும் கண்டிக்கவில்லை ! சென்னைப் புத்தகத் திருவிழாவின் அனுபவங்களுக்குப் பின்னே 'இந்த பக்கத்து ஸ்டால்' மேட்டர்களில்    கொஞ்சமேனும் ஜாக்கிரதை அவசியமே என்ற mindset-ல் இருந்த எனக்கு நம் 'அண்டைக் கடை அன்பர்களின் ' சிரித்த முகங்கள் பெரும் ஆறுதலாய் அமைந்தது ! Thanks a ton bros !! சற்றைக்கெல்லாம் நம் நண்பர்களின் வருகைப் பதிவேடு 'விறு விறு' வென்று எகிறிட - நமது ஸ்டாலைச் சுற்றிலும் சரியான கூட்டம் ! நண்பர்களில் முக்காலே மூன்று வீசம் தம்மை நிஜப் பெயர்களால் அறிமுகம் செய்து கொண்டார்களோ - இல்லியோ ; இங்குள்ள வலைப்பெயர்களால் ஒருவரையொருவர் கலாய்த்த வண்ணமிருந்தனர் ! நண்பர்களோடு நான் ஐக்கியமாகி நின்று கொண்டிருந்த போது - பெருமதிப்பிற்குரிய ஓவியர் ட்ராட்ஸ்கி மருது அவர்கள் தம் துணைவியாரோடும், ஒரு மாணவரோடும் நம் ஸ்டாலுக்கு முன்னே நின்று பேசிக் கொண்டிருப்பதைக் கவனித்தேன் ! சித்திரங்களின் உலகில் தன்னிகரற்ற ஆற்றலாளர் என்ற முறையிலும், 2012 ஜனவரியில் சென்னையில் நமது Comeback Special இதழை வெளியிட்டு நமக்குப் பெருமை சேர்த்தவர் என்ற முறையிலும், என்றும் நம் மரியாதைக்குரிய மருது சாரோடு கொஞ்ச நேரம் பேசிக் கொண்டிருந்தேன் ! தொடரும் இதழ்களில் அந்தந்த படைப்புகளின் ஓவியர்களைப் பிரதானமாய் வெளிச்சமிட்டுக் காட்டினால் இன்னும் சிறப்பாய் இருக்குமென அவர் சொல்லிய போது - நமது புது இதழ்களில் அதனைச் செயல்படுத்துவதாக வாக்களித்தேன் ! சந்தோஷமாய், நிறைய உற்சாக வார்த்தைகளோடு நம்முடன் நேரம் செலவிட்ட மருது சாருக்கு நமது நன்றிகள் என்றுமுண்டு !!

மருது சார் , துணைவியார், அவரது மாணவர் ; பின்னணியில் புதுவை ஆராய்ச்சி மாணவி பிரபாவதி

கையில் ஒரு பெரிய அட்டை பெட்டியோடு ஆஜரானார் நமது பெங்களூரு வாழ் நண்பரொருவர் ! பெட்டியைப் பிரித்து உள்ளிருந்த ச்வீட் டப்பாக்களைப் பிரித்து நண்பர்கள் அனைவருக்கும் தந்த கையோடு  "இரத்தப் படலம் " முதல் இரு பாகங்களை மட்டுமாவது வண்ணத்தில் போடுங்களேன் என்று ஏகமாய்க் கோரிக்கை வைக்கத் துவங்கினார் ! தேவையெனில் அப்படி ஒரு இதழுக்கான முதலீட்டில் பங்கெடுக்கத் தயாராக இருப்பதாகவும் சொல்லி - வான்சின் சித்திர மாயாஜாலத்திற்கிருக்கும் வீரியத்தை மீண்டுமொருமுறை நினைவுக்குக் கொணர்ந்தார் ! தொடர்ந்த அடுத்த 2 மணி நேரங்களுக்கு நம் நண்பர்கள் சரமாரியாய்க் கேட்ட கேள்விகளில் பிரதானமானவைகள் இவையே : 

•  "பவளச் சிலை மர்மம்" கதையினை மறுபதிப்பு செய்யுங்களேன் ?
• "கார்சனின் கடந்த காலம் " இரு பாகங்களையும் வண்ணத்தில்  போடலாமே ? 
• "அடுத்த ஆண்டின் மறுபதிப்புகள் என்ன ? " 
• லயனின் 30-வது ஆண்டுமலர் அறிவிப்பு எப்போது ?
• "மின்னும் மரணம் " மறுபதிப்பு ?
• மாதம் 4 என்பது பேராசை என்றாலும் - 2 சாத்தியம் தானே ? 
• சென்சார் பற்றி ; மொழிபெயர்ப்பு பற்றி ஆங்காங்கே சிலர் தெரிவிக்கும் விமர்சனகளின் மீது உங்களின் சிந்தனை என்ன ?
• மாயாவி ; ஸ்பைடர் ; லாரன்ஸ்-டேவிட் கதைகள் மறுபதிப்பு கிடையவே கிடையாதா ? 
• "ALL NEW ஸ்பெஷலில் வரும் கதைகள் எவை ?
• இரத்தப் படலம் புதுக் கதைகள் எப்போது ? 
• BATMAN ; PHANTOM கதைகள் போடும் உத்தேசம் உள்ளதா ?  
• நாமாய் ஏதேனும் ஒரு கதாப்பாத்திரத்தை உருவாக்கிட முயற்சித்தால் என்ன ? 
• டெக்ஸ் வில்லர் இனி எல்லாமே வண்ணத்தில் தானே ??
• +6 -ல் வேறு என்ன செய்வதாக உத்தேசம் ? 
• ஆண்டுக்கொரு NBS பாணியிலான "தடி" புத்தகம் போடலாமே ?
• கேப்டன் டைகர் கதைகளில் "Arizona Love " பாகமும் வெளிவருமா - அல்லது அந்தக் கதையினில் தூக்கலாய் இருக்கும் விரசம் காரணமாய் ஒதுக்கி வைக்கப்படுமா ?
• இந்தாண்டு டெக்ஸ் வில்லர் பிரதான இடத்தில் இருப்பது போல் தெரிகிறதே - கேப்டன் டைகரை "தூக்கிப் பிடிக்க" என்ன செய்வதாக உத்தேசம் ?
• விளம்பரங்கள் செய்யலாமே ?
• தீபாவளி மலர் ???? 

ஒவ்வொரு கேள்விக்கும், அவர்களது எதிர்பார்ப்புக்கு ஏற்ப எனது பதில்கள் இருப்பின் முகத்தில் மின்னலாய் மலரும் அந்த சந்தோஷம் - காமிக்ஸ் எனும் காதலை சுவைத்திட வயது என்றுமொரு தடையாய் இருந்திடாது என்பதை உணர்த்திட்டது! இடையே மூவர் அணி கொண்ட நண்பர்கள் குழுவொன்று வந்தது நமது ஸ்டாலுக்கு ! நமது தீவிர ரசிகர்களான அம்மூவருமே ஓவியர்கள் ! அதிலொருவர் 'அமர் சித்ர கதா ' விற்குப் பணியாற்றும் திறமையாளர் ! அவர் ஓவியப் பணி செய்த சில ACK இதழ்களைக் காட்டி விட்டு, தனது முயற்சிகளுக்கு ஒரு துவக்கம் கொடுத்தது நமது காமிக்ஸ்களே என்றும் சொன்னார் ! அந்த மூவர் மட்டுமல்லாது, இம்முறை COMIC CON -ல் என்னை சந்தித்த பல புது நண்பர்களும் - வெவ்வேறு நிறுவனங்களில் 'creative heads ' ஆக இருந்து வருவதாக சொல்லியது சந்தோஷமான ஒற்றுமை ! அனைவருமே தங்களது திறமைகளை சித்திர உலகின்பால் திசை திருப்பியது நமது காமிச்சே என்று சொன்ன போது - இந்த "சிந்துபாத் -லைலா" சமாச்சாரத்திற்கிருக்கும் வீரியம் தெள்ளத் தெளிவாகவே புரிந்தது ! அப்போது இன்னுமொரு நண்பர் வந்திருந்தார் - கைகளில் 3 இத்தாலிய காமிக்ஸ் இதழ்களோடு ! நமது நெடுநாள் வாசகராய் தம்மை அறிமுகம் செய்து கொண்டவர் பெங்களூருவில் தற்போது பணியாற்றுவதாகவும், இதன் முன்பு இத்தாலியிலும் சில காலம் பணியில் இருந்ததாகவும் குறிப்பிட்டார். இத்தாலியர்களின் காமிக்ஸ் நேசம் நாம் அறிந்த சங்கதி தானே ; பணியிடத்தில் நிறைய காமிக்ஸ் நண்பர்கள் கிட்டியதாகவும் ; அவர்களிடம் நமது டெக்ஸ் வில்லர் ; மார்டின் ; CID ராபின் கதைககளைக் காட்டிப் பெருமைப்பட்டதாகவும் சொன்னார் !  'இந்தக் கதைகளையும் போடச் சொல்லுங்கள் ; எங்கள் மொழியில் இவை பெரும் ஹிட்ஸ்' என்று சொல்லி அவரது இத்தாலிய நண்பர்கள் அனுப்பியிருந்த 3 காமிக்ஸ் புத்தகங்களை என் கையில் கொடுத்தார் ! அவை எனக்கு ஏற்கனவே பரிச்சயமான தொடர்களே என்ற போதிலும், இத்தாலியர்களின் காமிக்ஸ் காதலை உணர்த்தும் தூதாய் அதனைப் பார்த்தேன் ! நன்றிகளோடு அவற்றைப் பெற்றும் கொண்டேன் ! பெங்களூருவில் பணியாற்றும் நம்மவர்கள் குடும்பங்களோடு வந்திருந்து நம் ஸ்டாலில் செலவிட்ட நேரங்கள் அழகான பொழுதுகள் ! அனைவருமே, தங்கள் வீட்டுக் குழந்தைகளை காமிக்ஸ் கடலினுள் "ஆழ்த்திடுவது" உறுதி என்று சொன்ன போது - இந்தக் கணினியுலகிலும் நம் சித்திரக் கதை சகாப்தத்திற்கு ஒரு எதிர்காலம் காத்துள்ளது என்ற தைரியம் துளிர் விட்டது! 

மதிய உணவு நேரத்திற்கு கொஞ்சமாய் கூட்டம் குறைந்திட, நானும் ஜூனியர் எடிட்டரும் இதர ஸ்டால்களை ஒரு ரவுண்ட் விட்டோம். Cinebooks ஸ்டாலில் நிறைய collections இருந்த போதிலும், அவர்களது 'சூடான ' விலைகள் பாக்கெட்களில் ஓட்டை போடுவதை உணர முடிந்தது !  'உங்களது விலைகளில் ஐந்தில் ஒரு பங்கிற்கு ஆர்ட் பேப்பரில் தமிழில் புத்தகங்கள் கிடைக்கின்றன' என்று நம் நண்பர்களில் பலரும் அவர்களிடம் சொல்லி வைத்திருந்ததை நானறிவேன் என்பதால் என்னை அறிமுகம் செய்து கொள்ளவில்லை. பத்தாயிரம் ரூபாய்களுக்கு பிரதிகளை வாங்கி விட்டு நடையைக் கட்டினேன். இதே பிரதிகள் தேவையெனில் நமக்கு இலவசமாகவே நம் படைப்பாளிகளின் archives-லிருந்து கிட்டும் என்ற போதிலும், அவற்றிற்கான தபால் / கூரியர் செலவுகள் நம்மைச் சார்ந்தவை. நான் நேரில் செல்லும் போது இஷ்டத்துக்கு அள்ளிக் கொண்டு வருவது சாத்தியம் எனினும், அவற்றை தபால் மூலம் வரவழைப்பது சிரமமாக உள்ளதென்பதால் பத்து ரோஸ் நிற காந்தித் தாத்தா நோட்டுகளுக்கு விடுதலை கொடுப்பது தேவலை எனத் தீர்மானித்தேன். Dark Horse Comics ஸ்டாலில் கொஞ்ச நேரம் அலசி விட்டு சில இதழ்களை 'வாங்கலாமா-வேண்டாமா ?' என மனதுக்குள் பட்டி மன்றம் நடத்திய போது - சுலப விடை தந்தது அதன் முதுகில் ஒட்டியிருந்த விலை ஸ்டிக்கர் !! இதழ் ஒன்று ரூபாய் 3000 என்ற போது யோசிக்க அவசியமே இன்றி புக்கைத் திரும்ப வைத்து விட்டேன் ! டாலர் ; யூரோ பணங்களின் மதிப்பு நாளுக்கு நாள் உயரே உயரே சென்று கொண்டிருப்பதால் இறக்குமதிகளின் கிரயங்களும் லார்கோவின் பிரத்யேக ஜெட் விமானத்தைப் போல் விண்ணைத் தொடுவதை உணர முடிந்தது !

மாலை நேரம் நெருங்க பெங்களுருவின் இளைஞர்கள்-யுவதிகளின் அணிவகுப்பு COMIC CON -ல் விழி பிதுங்கும் கூட்டத்தைக் கொணர்ந்தது ! 'பின்பக்கமாய் நமது ஸ்டால் அமைந்தது கூட நல்லதுக்கே' என நான் நினைக்கத் தொடங்கினேன் - நடைபாதையிலிருந்த ஜன நெரிசலையும் ; அங்கிருந்த ஸ்டால்கள் பட்ட சிரமத்தையும் கண்டு ! கொஞ்ச நேரத்திற்குள் வெளியே மழையும் பிடித்துக் கொள்ள - உள்ளே மூச்சுத் திணறாத குறை தான் ! காலையிலிருந்து நின்று கொண்டே இருந்ததில் கழன்று போன முதுகை கொஞ்சம் பட்டி-டிங்கரிங் பார்க்காது போனால் மறு நாள் ஆஜராக முடியாது போகும் என்பதால் ஆறு மணி சுமாருக்கு விடை பெற்றுக் கிளம்பினோம் ! வெளியே சாரை சாரையாய் நின்ற கூட்டம் - திகைக்கச் செய்தது ! கூட்டத்தைப் பார்த்து விட்டு ஆட்டோக்காரர் கேட்ட கட்டணம் அதை விடக் கூடுதல் திகைப்பைத் தந்திட, வண்டியை எடுத்துக் கொண்டு கிளம்பினோம் - ஸ்டாலில் RK  &  வேலுவை விட்டு விட்டு !

இரண்டாம் நாள் காலையில் திரளான நம் நண்பர்கள் வட்டம் நான் ஸ்டாலுக்கு வரும் முன்னேரே காத்திருந்தது ! முன்தினம் வாங்கி இருந்த இதழ்களைப் படித்திருந்தவர்கள் பாராட்டுக்களைச் சொல்ல ; பக்கங்களை மாத்திரம் புரட்டி இருந்த நண்பர்கள் கருத்துக்களைச் சொல்ல - கொஞ்ச நேரத்திற்கெல்லாம் ஒரு full fledged கேள்வி - பதில் session களை கட்டி விட்டது ! இடையே, நம் பக்கத்து ஸ்டால் நண்பரின் சகோதரர் சென்னையிலிருந்து அரக்கப் பறக்க பஸ் பிடித்து வந்திருந்தார் நம்மை சந்திக்கவே ! முதல் நாளோ - அதிகாலை ரயிலில் நண்பரொருவர் வந்திருந்தார் ஹைதராபாதிலிருந்து - 2 மணி நேரங்களை நம்மோடு செலவிடும் பொருட்டு !புது வரவான நண்பர்களை நமது வலைப்பதிவிற்கும், தங்கள் நட்பு வட்டத்திற்கும் அறிமுகமாக்கிக் கொண்ட பாங்கு இதுவொரு பிரத்யேகக் குடும்பமே என்ற எனது நம்பிக்கையை வலுவாக்கியது ! அனைவரது முகங்களிலும் பிரதிபலித்த அந்த மகிழ்ச்சியும், நிறைவும் - இது "துட்டு..டப்பு..money .."க்கு அப்பாற்பட்டதொரு விஷயம் என்பதை உரக்கப் பிரகடனம் செய்தது ! இம்முறை நிறையவே பெண் வாசகர்கள் வந்திருந்ததும் ; மொழி புரியாதவர்கள் கூட வண்ணமயமான நம் இதழ்களை ; நம் நாயகர்களை நின்று தரிசனம் செய்தது சில pleasant moments !

இடமில்லா காரணத்தால் துயில் பயின்ற பானர்

விற்பனை என்று பார்த்திடும் போது இம்முறை மொத்தம் நாம் கல்லா கட்டியது ரூ.59,000-க்கு மாத்திரமே ! சென்றாண்டு நம்மிடம் ஸ்டாக் இருந்த full set -ன் கிரயம் ரூ.950 என்பதால் - அதனிலேயே விற்பனையின் ஒரு பெரும் தொகை ஈட்டுவது சாத்தியமாகியது ! ஆனால் இம்முறையோ - full set நலிந்து போய் ரூ.250-க்கு மாத்திரமே தேறியதால் - அதன் பங்கு சொற்பமே ! தவிர இது முழுக்க முழுக்க உள்ளூர் youngsters -களின் இரு நாட் பொழுதுபோக்கு ஸ்தலம் என்றாகிப் போய் விட்டதால் - இங்கு பெரிதாய் ஒரு விற்பனையை எதிர்பார்ப்பது யதார்த்தமாகாது என்பது புரிந்தது ! நண்பர்களை சந்திக்க ; நமது பயணத்தை கொஞ்சமேனும் விளம்பரப்படுத்திட மாத்திரமே COMIC CON பயனாகும் என்பதை முதல் நாளே நான் உணர்ந்திருந்ததால் - விற்பனை தொகை எனக்குப் பெரிதாய் ஒரு சங்கடத்தை ஏற்படுத்திடவில்லை ! ஒன்றரை நாட்களை பிரியமானவர்களின் அண்மையில் செலவிட்ட திருப்தி பிரதானமாய்த் தெரிந்தது ! கிளம்பும் முன் பிடித்துக் கொண்ட நண்பர்கள் - "தீபாவளி மலர் ????" என்ற கேள்வியோடு மறியல் செய்ய - "நிச்சயம் சிந்திப்பேன்" என்ற வாக்குறுதியோடு புறப்பட்டேன் ! தேர்தல் வாக்குறுதியாக இது இராது என்பதை மாத்திரம் இப்போதைக்கு சொல்லிடுகிறேன் ; மீத விபரங்கள் பண்டிகைக்கு ஒரு மாதம் முன்னே ! 

முதல் நாளும் சரி ; இரண்டாம் நாளும் சரி - நம் ஸ்டாலில் முழு நேரமும் செலவிட்ட பல நண்பர்கள் வீடு திரும்பிய போது அவசியப்பட்ட முதுகுவலித் தைல பாட்டில்கள் எத்தனையோ நானறிவேன் ! அவர்களுக்கும் சரி - நம்மை சந்திக்க எங்கெங்கோவிருந்தெல்லாம்  வந்திருந்த நண்பர்களுக்கும் சரி - எங்களது சிரம் தாழ்ந்த நன்றிகள் என்றும் உரித்தாகுக ! எவரையும் மறதியால் புண்படுத்திட வேண்டாமே என்ற ஒரே காரணத்தால் இந்தப் பதிவினில் COMIC CON -க்கு வருகை புரிந்த நம் நண்பர்களின் பெயர்களை குறிப்பிடவில்லை ! Thanks a ton folks !! புறப்படும் போது நண்பர் ஷலூம் பெர்னான்டெஸ் எனக்கு ஒரு அழகான gift wrapped பார்சலை வழங்கினார் - சிவகாசிக்கும் நம்மை சந்திக்க உடன் வந்திருந்த தம் துணைவியாரின் சார்பாக ! இதோ - அதனுள் இருந்த அற்புதம் !  

நண்பரும், துணைவியாரும் தேடிப் பிடித்து இதை எனக்கு வழங்கியதன் பொருள் புரிபட அதிக சிந்தனை அவசியமில்லை தான் - ஆனால் இதனை வழங்கிடத் தோன்றிய அந்த சிந்தனைக்கும், அன்புள்ளங்களுக்கும் எனது வணக்கங்கள் ! 

கடவுள் தந்த கொடையே - எனக்குக் கிட்டி இருக்கும் இந்தப் பணியும் - இந்தப் பணி கொணர்ந்திருக்கும் இந்தப் பரிவான நெஞ்சங்களும் ! I feel truly blessed ! மீண்டும் சந்திப்போம் guys ! Take care !

சின்னதாய் சில updates :

1.டயபாலிக் இத்தாலிய ரசிகர்களிடமிருந்து கொணர்ந்திருக்கும் ஆர்டர்கள் இது வரை 87 பிரதிகள் !!

2.இந்தியாவில் AMAZON - online புத்தக விற்பனைக்கும் தயாராகியுள்ளது நாம் அறிவோம் ! அதனில் பதிவு செய்ய முயன்று வருகின்றோம் !

3.ஈரோடு புத்தகத் திருவிழாவினில் நமக்கு தனி ஸ்டால் பெற்றிடும் முயற்சிக்கு அங்குள்ள நமது நண்பர்கள் படை தீவிரமாய் முயற்சித்து வருகின்றது !  Fingers crossed !

4.நமது முந்தைய இதழில் பிரசித்தியான ஒன்றினை ஸ்கேன் செய்து சமீபமாய் நண்பரொருவர் இணையதளத்தில் upload செய்துள்ளார் ! இணையத்தில் காமிக்ஸ் பிரசுரிக்க நமக்கே உரிமைகள் கிடையாது என்பது தான் யதார்த்தம் ! இது போன்ற ஆர்வத்தின் வெளிப்பாடுகள் சில வேளைகளில் இந்திய மார்கெட் மீது அயல்நாட்டுப் பதிப்பகங்கள் முகம் சுளிக்கக் காரணமாகின்றன ! தயவு செய்து அதனை களைந்திடும்படி   நண்பரைக் கோருகிறேன் ! வேண்டாமே இது போன்ற முயற்சிகள் !

5.சென்னைக்கு COMIC CON இன்னும் எட்டாக் கனியாகவே இருந்திடும் போலவே தெரிகிறது. அவர்களது ராடாரில் இருப்பது ஹைதரபாத் !