இரு நாட்கள்...ஓராயிரம் நினைவுகள் !

நண்பர்களே,

வணக்கம். ஏழென்ன – மாதம் பதினேழு இதழ்கள் கூடத் தயாரித்து விடலாம் போலும் ; box-set – டிபன் கேரியர் செட்கள் எல்லாம் ரெடி செய்து விடலாம் போலும் ; ஆனால் ஒரு புத்தக விழாவிற்குச் சென்று நண்பர்களுடன் பொழுதைக் கழித்தான பின்னர் – அந்த சந்தோஷங்களையும், மன நிறைவுகளையும் வார்த்தைகளில் வடிப்பது என்பது அதையெல்லாம் மீறியதொரு ராட்சஸப் பிரயத்தனம் என்பதைப் பல தடவைகள் உணர்ந்துள்ள போதிலும் – இந்தாண்டின் ஈரோட்டுத் திருவிழா ஒரு புது உயரத்தைக் கண்ணுக்குக் காட்டியுள்ளது! திங்களே இரவே இந்தப் பதிவைப் போட்டிருக்க வேண்டியது ; ஆனால் உடம்பு ஒட்டுமொத்தமாய் ஒத்துழைக்க மறுத்து விட்டபடியால் செவ்வாய் & புதன் ஏகமாய் விடுமுறை தினங்களாய் மாறிப் போய் விட்டன எனக்கு ! So - "சுடச்சுடப் பதிவுக்கு" வழி இல்லாது போயினும், சென்ற வார இறுதியின் மனநிறைவுகளைப் பதிவிடாது போக இயலாதே என்பதால் - better late than never பதிவிது !! 

வெள்ளிக்கிழமை நம் ஆபீஸே யுத்தகளம் போலக் காட்சி தர – உங்கள் CCC பிரதிகளைக் கூரியர்களுக்கு அனுப்பிய கையோடு நானும், ஜுனியர் எடிட்டரும் அரக்கப் பரக்க ஈரோட்டுக்கு ரயிலைப் பிடித்தோம். வழக்கம் போலவே புத்தக விழா நடைபெறும் திடலின் வாசலில் உள்ள ஹோட்டலில் ரூம் போட்டிருக்க, எங்கள் ரூம் ஜன்னல் வழியாகப் பார்க்கும் போது ஈரோடு விழா அரங்கு நிசப்தமாய் காட்சி தந்தது. சனிக்கிழமை காலையில் சாவகாசமாய் 11 மணிக்கு மேலாக அரங்கிற்கு நாங்கள் நடைபோட, மனம் என்னையறியாது சென்றாண்டின் ஆகஸ்ட் முதல் வார சனிக்கிழமையை நோக்கிப் பயணமானது! LMS-ன் ரிலீசை முன்னிட்டு நண்பர்கள் பரபரப்பே உருவாய்க் காத்திருந்ததும், ஸ்டாலுக்குள் கொஞ்ச நேரத்திலேயே நம் நண்பர்கள் திரள் விஸ்வரூபமெடுத்ததும் – சுற்றுமுற்றுமிருந்த ஸ்டால்களின் கடுகடுத்த பார்வைகளுக்கு மத்தியில் சந்தோஷங்களைப் பரிமாறிக் கொண்டதும் மனதில் நிழலாடியது! ஆனால் இம்முறையோ அரங்கின் வாயிலில் வேறு விதமானதொரு கூட்டம் !! தி்க்குமுக்காடச் செய்யுமளவிற்கு மாணவ / மாணவியரின் திரள் நின்று கொண்டிருந்தது – சாரை சாரையான லைன்களில்! ‘ஆஹா... இந்தப் பிள்ளைகள் அத்தனை பேரும் காமிக்ஸ் எனும் சுவையுணர்ந்திருப்பின் என்னவொரு அட்டகாச எதிர்காலமிருக்கும் காமிக்ஸ் துறைக்கு!‘ என்ற பகற்கனவோடு அரங்குக்குள் புகுந்தோம்! ஆனால் பிள்ளைகளோ – நம் ஸ்டாலை மட்டுமின்றி பெரும்பாலான ஸ்டால்களை சம்பிரதாயப் பார்வையோடு தாண்டிச் செல்ல, வறுத்தெடுக்கும் வெயிலும், கூட்ட நெரிசலும் ஒன்று சேர்ந்து அரங்கத்தை நண்பகல் வரை தீபாவளி நேரத்து T-நகர் ரங்கநாதன் தெரு ஜாடைக்கு உருமாற்றியிருந்தன ! 

நம் நண்பர்களில் சிலர் ஏற்கனவே அங்கே காத்திருக்க – இன்னும் சிலர் on the way என்ற தகவலும் கிட்டியது. CCC பிரதிகள் தாங்கிய பண்டல்களும் அந்நேரத்திற்கு ஸ்டாலுக்கு வந்து சேர்ந்திருக்க ஸ்மர்ஃப்கள் பற்றியும், லியனார்டோ பற்றியும் அரட்டை மையம் கொண்டிருந்தது! 

சற்றைக்கெல்லாம் பெரியதொரு அட்டைப்பெட்டி நிறைய மக்கன் பேடா (பெயர் சரி தானா??) சகிதம், பெங்களுர் நண்பர் அகமது பாஷா ஆஜராக, சந்தோஷப் பரிமாற்றங்கள் தொடர்ந்தன! ஃபோட்டோக்கள்; அரட்டைகள் எனப் பொழுது நகர்ந்த போதிலும் – மூச்சுத் திணறச் செய்யும் கூட்ட நெரிசலில் அதிக உற்சாகத்திற்கு வாய்ப்பிருக்கவில்லை என்பதால் அருகாமையிலிருந்த ஹோட்டலுக்குப் புறப்பட்டோம் – வயிற்றுக்குப் பெட்ரோல் போடும் பொருட்டு! 

அங்கே கூட்டமில்லை என்பதால் அரட்டைக் கச்சேரிகளும், ஃபோட்டோ படலங்களும் தொடர்ந்தன! மாலைப்பொழுது மேற்கொண்டும் நண்பர்கள் ஜோதியில் ஐக்கியமாகிடும் வேளையாக அமைந்து விட, நமது ஸ்டாலின் முன்னே கூட்டமாய் நின்று மறுபடியும் அமைப்பாளர்களின் கண்டனங்களைச் சம்பாதிக்க வேண்டாமென்ற அவாவில் – சென்றாண்டைப் போலவே அரங்கத்தின் பின்பக்கமிருக்கும் கார்-பார்க் பகுதியில் திரண்ட சற்றைக்கெல்லாம் கேள்விகள் பறக்கத் தொடங்கின! எப்போதும் போலவே ‘இரத்தப் படலம் வண்ணத் தொகுப்பு எப்போது?‘ என்ற வினாவே அதிகத் தடவைகள்; அதிக நண்பர்களிடமிருந்து எழுந்தன ! இங்கே நானொரு விஷயத்தைக் குறிப்பிடல் அவசியமென்று நினைக்கிறேன்!

துவக்கம் முதலாகவே இரத்தப்படலத்தின் பாகங்களைக் கையாளும் வேளைகளிலெல்லாம் ஒருவிதக் குழப்பமும், கலக்கமும் என்னுள் குடிகொண்டிப்பது வாடிக்கை ! 30 ஆண்டுகளுக்கு முந்தைய அந்நாட்களில் இரத்தப் படலத்தின் ஆங்கிலப் பதிப்புகளும் கிடையாது ; நெட்டைத் தேடி உருட்டினால் சிக்கிடக் கூடிய ஆங்கில ஸ்கான்லேஷன்களும் கிடையாதெனும் போது – பிரெஞ்சிலிருந்து மொழிபெயர்ப்பாகிடும் நமது ஸ்கிரிப்டுகளை மட்டுமே ஆதாரமாகக் கொண்டு நான் பணியாற்றிடத் தேவைப்படும் ! தவிர துவக்க ஆண்டுகளில் நமக்குக் கிட்டத்தட்ட 4 / 5 வெவ்வேறு பிரெஞ்சு மொழிபெயர்ப்பாளர்கள் உதவி வந்ததால் பாகம் 3-ஐ மொழிபெயர்த்தவரே பாகம் 4-ஐயும் செய்திடுவாரென்ற உத்திரவாதம் இருந்ததில்லை ! So - குழப்பமான கதைக்களம்; வெவ்வேறு மொழிபெயர்ப்பாளர்கள்; பிரெஞ்சில் மாத்திரமே உள்ள ஒரிஜினல்கள்; அவற்றை நமக்குப் புரியும் விதமாய் google செய்து பார்க்கும் வசதிகளின்மை என்பதே இரத்தப் படலத்தை சுற்றி நின்ற அந்நாட்களது அரண்கள்! இவற்றுக்கு மத்தியில் புகுந்து,  வேலை செய்வது ஒரு மண்டை நோவான சமாச்சாரம் என்பதால் என்னையும் அறியாது ஒருவித அலெர்ஜி நண்பர் XIII மீது எழுந்திருந்ததே நிஜம்! உச்சக்கட்டமாய் இரத்தப் படலத்தின் 1-18 தொகுப்பின் மீது கவனம் செலுத்தும் சமயம் வந்த போது -  எட்டிக்காயை ஜுஸாக்கிக் குடித்து பார்க்கும் உத்வேகத்தோடு தான் அந்தப் பணியினை நான் அணுகினேன்! கி்ட்டத்தட்ட 3 மாதங்கள், பரீட்சைக்கு நோட்ஸ் எடுக்கும் பிள்ளையைப் போல தட்டுத் தடுமாறி அந்தப் பணியினை நிறைவு செய்த போது- ஒரு massive பெருமூச்சு எழுந்தது மட்டுமின்றி '12-க்கும், 14-க்கும் இடைப்பட்ட நம்பரை இரயில் பெர்த்தில் கூட இனி கொஞ்ச காலத்திற்குப் பார்க்க அவசியம் நேரக் கூடாதேடா சாமி!‘ என்ற வேண்டுதல் என் உதடுகளில் இருந்தது ! சரி- இதழ் வெளியானதா; விற்பனையானதா; போட்ட முதலீடு திரும்பக் கிடைத்ததா- என்று பார்த்தால் – முன்பதிவுகளைத் தாண்டிய பாக்கிப் பிரதிகள் என்னைப் பார்த்துக் கண்ணடித்துக் கொண்டே கிடந்தன கிட்டத்தட்ட 18 மாதங்களாய்! So நண்பர் XIII எனது அபிமான, ஆதர்ஷ, ஆத்மார்த்த நாயகர் பட்டியலில் உயரமானதொரு இடத்தைத் தனதாக்கிக் கொள்ளவில்லை என்பதில் ரகசியமில்லை ! 

ஆனால் உங்களுக்கோ – எனது இந்தக் குட்டிக்கர்ணங்களில் எதுவும் அவசியப்பட்டிருக்கவில்லை என்பதால் – கதையின் சுவாரஸ்யத்துக்குள் மூழ்கிடுவது சுலபக் காரியமாகியிருந்திருக்கும் – துவக்கம் முதலாக! கதையின் ஸ்டைல்; சஸ்பென்ஸ்; வான் ஹாமேவின் அதிரடிகள்; வான்சின் ஓவிய ஜாலங்கள் என்று positives களை மட்டுமே உங்களது பார்வைக் கோணங்கள் உள்வாங்கியிருந்திருக்கும்! So பந்திக்கு வந்தது பாயாசமாகவே இருப்பினும் – அதைக் கிளறும் ஆயாசத்தோடு நானும்; சுவைத்த பரவசத்தில் நீங்களும் இருப்பது கண்கூடு! Maybe எனக்குள் உள்ள அந்த "XIII அலெர்ஜி"யானது இரத்தப்படலத்தின் முழுவண்ணத் தொகுப்புக்குத் தடை போட்டு வருகிறதா ?- அல்லது 5 ஆண்டுகளுக்கு முன்னர் வெளியானதொரு கதையையே மறுபடியும் சாயம் பூசி, புதுசாய் பரிமாறுவதில் சுகமென்ன / சுவையென்ன இருந்திடக் கூடுமென்ற நியாயமான பயமுணர்ச்சி தடை போடுகிறதா ? என்ற சின்னக் குழப்பம் என்னுள்! Customized imprints என்றதொரு அஸ்திரத்தை “மின்னும் மரணம்“ எனும் அசாத்திய சாகஸத்திற்கு பயன்படுத்தினோமெனில், தொடரும் ஒவ்வொரு மறுபதிப்புக் கோரிக்கைக்கும் அதனையே கையிலெடுக்க நினைப்பது விவேகமா? அந்த நேரத்தையும், முதலீட்டையும், உழைப்பையும் புதிய கதைகளின் பக்கம் திருப்புவோமே என நான் ஒவ்வொரு முறையும் விளக்கினாலும் கூட இந்தக் கேள்விக்கு முற்றுப்புள்ளி விழும் அறிகுறிகளே காணோம்! இதை நான் இங்கே எழுதக் காரணமே – ஒருக்கால் என் மன அளவுகோல்கள் செய்திடும் தர ஒப்பீட்டை விட நிஜத்தில் இரத்தப் படலம் பன்மடங்கு உசத்தியோ? என்ற சந்தேகத்தை நண்பர்களின் கேள்விகள் கிளப்பி விடுகின்றன ! For once அந்த nostalgia சமாச்சாரங்களைக் கட்டிலுக்குக் கீழே கிடத்தி விட்டு மெய்யாகவே இரத்தப் படலம் - இரத்தம் சிந்த மீண்டுமொருமுறை உழைத்திட அருகதையான சமாச்சாரம் தானா என்று உரக்க சிந்தித்துப் பாருங்களேன்? (Andகோவையில் வசிக்கும் இரும்புக்கரத்தார்கள் இந்தப் போட்டிக்கு சேர்த்தி இல்லை !!)

மாலை, இரவாக – கார்-பார்க் பக்கமாய்ச் செல்லும் ஈரோட்டு மக்கள் அனைவருமே விநோதப் பார்வைகளை நம் பக்கம் வீசிச் செல்வது பற்றி நண்பர்கள் துளியும் கவலை கொண்ட மாதிரித் தோன்றவில்லை! எனக்கு ஏற்கனவே தொண்டையில் ‘கிச் கிச்‘ உயிரை வாங்கத் தொடங்க நான் விடைபெற்றுக் கிளம்பினேன்! ரூமுக்குச் சென்று படுத்த போது – மறு நாள் காலையில் காத்திருந்த நண்பர்கள் சந்திப்பை சமாளிப்பது எவ்விதமென்ற சிந்தனைகளில் லயிக்காது – ‘தெய்வமே... M.R. ராதா குரலிலாவது பேசிட காலையில முடிந்தாகணுமே!‘ என்ற ஆதங்கமே தலைதூக்கியிருந்தது ! மாத்திரைகளைப் போட்டுக் கொண்டு, ஹோட்டல் சமையல்காரரை வெந்நீர் கேட்டே கொலையாய் கொன்று விட்டு ஒருமாதிரியாகத் தூங்கச் சென்ற போது நள்ளிரவைத் தாண்டியிருந்தது! காலை சிற்றுண்டி, நண்பர் ஸ்டாலினின் இல்லத்தில் என்பது கடந்த சில ஆண்டுகளின் பழக்கம் என்பதால் சீக்கிரமே அதற்குக் கிளம்பிட வேண்டுமே என்ற நினைவூட்டலை மண்டை செய்திட - சரி; நாளைய பிழைப்பை காலையில் பார்ப்போமென்று கண்ணயர்ந்தேன்!

வழக்கம் போல காலையில் விழிப்புத் தட்டியது; ஆனால் நான் பயந்தபடியே எங்கள் ஊர் போர்வெல் குழாய்களில் வரும் காற்று மாத்திரமே என் தொண்டையிலிருந்து வெளிப்பட்டது! சும்மாவே ‘ததிகிநதும்‘ போடும் அழகான தொண்டை “ஹிஸ்... ஹிஸ்..“ என்று பாம்பைப் போல குரல் கொடுக்க, அரண்டு போனேன் மெய்யாகவே! நண்பர் ஸ்டாலினுக்கு ஃபோன் செய்து -"சார் நான் நேரடியாக 11-30 மணிக்கு மீட்டிங் ஹாலுக்கே வந்து விடுகிறேனே...?" என்று கிசுகிசுக்க – அவரோ – ‘நண்பர்களில் நிறையப் பேரையும் வீட்டுக்கு அழைத்திருக்கிறேன்; நீங்கள் பேசவே வேண்டாம் – டிபன் சாப்பிட்டு விட்டு மட்டும் போகலாமே?‘ என்று அன்புக் கோரிக்கை வைக்க மறுப்புச் சொல்ல மனம் ஒப்பவில்லை! So திரும்பவும் ஒரு லோட்டா வெந்நீரை உள்ளே தள்ளி விட்டுப் புறப்பட்டேன் நண்பர்களோடு ! பெவிகால் பெரியசாமி அவதாரமெல்லாம் ஆன்லைனுக்கு சுலபமாக இருக்கலாம் தான்; ஆனால் நிஜத்தில் வாய்க்கொரு திண்டுக்கல் பூட்டுப் போடுவது நடக்கிற காரியமா – என்ன? ஸ்டாலின்ஜி வீட்டில் குழுமியிருந்த நண்பர்களோடு ‘கானக் குயிலாய்‘ நான் அளவளாவி விட்டு ரூமுக்குத் திரும்பிய போது – மீட்டிங்கில் நிச்சயமாய் சைகை பாஷையைத் தான் கையிலெடுத்தாகணும் போலும் என்ற நிலையிலிருந்தேன்! 

பெருந்துறையில் கல்லூரி படித்து வரும் என் தங்கையின் மகனும் சனி மாலை முதலே புத்தக விழாவில் நம்மோடு இணைந்திருக்க – காலை 11.30-க்கு மீட்டிங் ஹாலுக்கு அவனுமே ஆஜரானான்! நாங்கள் தங்கியிருந்த அதே ஹோட்டலின் ஆறாவது மாடியில் இருந்தது அந்த சிறு அரங்கம்! 60 பேர் அமரக் கூடிய அந்த ஹாலில் ஏற்கனவே நண்பர்கள் கூடத் தொடங்கியிருக்க – புதுவையிலிருந்து, சேலத்திலிருந்து, பெங்களுரிலிருந்து, மதுரையிலிருந்து, கரூரிலிருந்து, ஈரோட்டின் அருகாமை நகர்களிலிருந்து என்றெல்லாம் புதுசும், பழசுமாய் நண்பர்கள் அறிமுகமாகினர்! Formal ஆனதொரு மீட்டிங் நமக்கு ஒத்துவராத விஷயமென்பதால் – ஜாலியாகவே ஆரம்பித்தேன் ‘தொண்டை சதி செய்து விடக் கூடாதே கடவுளே!‘ என்ற பீதியோடே!

ஏற்கனவே அறிவித்திருந்தபடி – இது தொடரவிருக்கும் ஆண்டிற்கான முன்னோட்டம் + நடப்பாண்டின் performance review என்பதால் எனது முதல் கேள்வியே – தற்போதைய நமது இதழ்களின் வெளியீட்டு எண்ணிக்கை சம்பந்தமானதாக இருந்தது! “ஆண்டுக்கு 48 இதழ்கள் என்பது ஓ.கே. தானா? அந்த 48-ல் மறுபதிப்புகள் 12 slot-களை ஆக்கிரமிப்பது விற்பனையின் பொருட்டு அவசியம் எனும் போது – எஞ்சி நிற்கும் 36 இதழ்களுமே புதியவைகளாக இருந்திடும் ! இந்த எண்ணிக்கை சரி தானா ? – ஜாஸ்தியா?“ என்று கேட்டு வைக்க –உற்சாகக் குரல்கள் பதில்களாய் பறக்கத் தொடங்கின! “நிச்சயம் ஓ.கே. தான்...!! நிறைய வெளியீடுகள் இருந்தால் மட்டுமே வாசகர்களுக்கு ஒரு நிறைவான choice கிடைக்கும்! ஆண்டுதோறும் ஏராளமாய் சினிமாக்கள் வெளியாகும் போது தான் தேர்ந்தெடுத்துப் பார்க்கும் option கிட்டுகிறது! வெளியாகும் படங்களே, குறைவாகி விட்டால் சுகப்படாது“ என்று பெரும்பான்மை கருத்துத் தெரிவிக்க – அதற்கு சற்றே மாறுபட்ட எண்ணங்களை புதுவையின் முதலைப் பட்டாளத்தினர் முன்வைத்தனர். மாதம் 7 இதழ்கள் வெளியாகும் இம்மாதம் போன்ற தருணங்களில் – ‘சுவாரஸ்யமான கதைகள் எவை? சற்றே “கடிகள்“ எவை?‘ என்ற ரீதியில் சிந்தனைகள் வாங்குபவர் மத்தியில் எழுவது சகஜமே என்று அவர்கள் சொன்ன போது அதிலுள்ள லாஜிக்கும் முன்நின்றது! நண்பர்களின் ஒரு சிறு அணியோ – ‘48ஐ விட ஜாஸ்தியாகவே எதிர்பார்க்கிறோம்‘ என்று போட்டுத் தாக்க – கலகலப்பிற்குப் பஞ்சமிருக்கவில்லை! நமது நிதி நிலைமைகள்; ஸ்டாக் வைக்க அவசியப்படும் கிட்டங்கிகள்; backissues பராமரிப்புகள் போன்ற விஷயங்களை கணக்கில் கொள்ளும் போது –நமது maximum எண்ணிக்கை 48-ஐத் தாண்டுவது சாத்தியமல்ல என்பதை விளக்கினேன். தவிர இன்னும் ஒரு சில ஆண்டுகளுக்காவது நமது வெளியீட்டு எண்ணிக்கை புஷ்டியானதொரு நம்பரை எட்டிப் பிடிக்க அவசியமிருப்பதால் தட்டுத் தடுமாறியாவது தற்போதைய tempo-வைத் தொடர்ந்திடும் அவசியத்தைச் சுட்டிக் காட்டினேன்!

அதன் பின்னே நான் கேட்டு வைத்த கேள்வி கிராபிக் நாவல்கள் பற்றியும் – அது தொடர்பாய் நண்பர்களின் தற்போதைய mindset பற்றியும்! ஆச்சரியமூட்டும் விதமாய் – ஏகோபித்த ‘No‘ என்றோ ; ‘ஐயோ... ஆளை விடுங்கள்‘ என்ற ரீதியிலோ நண்பர்களின் பதில்கள் அமைந்திடவில்லை! ஒரேயடியாக யுத்தம் தொடர்பான கதைகளாகவும்; வரலாறு சம்பந்தமான கதைக்களமாகவும் இல்லாது – மாறுபட்ட பாணிகளிலுள்ள ஆக்கங்களைப் படித்திட பெரும்பான்மை நண்பர்கள் ஆர்வம் தெரிவித்தது சந்தோஷ ஆச்சர்யமாக அமைந்தது! நம் போராட்டக்குழுத் தலைவர் கூட – சுலபமாய் புரியும் விதத்திலுள்ள கதைகள் எதுவாகினும் ஓ.கே.‘ என்று கருத்துச் சொன்னார் ! ‘அட... கிராபிக் நாவல்கள் என்ற genre-க்கு நம்மவர்கள் பகைவர்களல்ல; maybe தேர்வான கதைகள் சரியானவைகளாக அமைந்திடவில்லை போலும்!‘ என்ற புரிதல் மனதுக்கு இதமாக இருந்தது! So- back to the drawing board with more searches என்று நினைத்துக் கொண்டேன்!

அடுத்ததாக சில பல விஷயங்கள் நோக்கிப் பேச்சு திரும்பும் வேளையில், பொறுமையின்றி நம் இரவுக் கழுகாரைப் பற்றிய அறிவிப்புகளுக்காக நண்பர்கள் பரபரக்கத் துவங்கினர்! ஊரிலிருந்து ஒரு 7 அடி உயர பேனரை நான் கொண்டு வந்து, மீட்டிங் ஹாலில் தோரணம் கட்டியிருக்க – அதன் பொருட்டு நண்பர்களின் நாடித்துடிப்புகள் துரிதமாகியிருந்தது அப்பட்டமாய் தெரிந்தது! “தனிச் சந்தா உண்டா – டெக்ஸிற்கென?“ ; “என்ன குண்டு புக்?“ ; “எத்தனை குண்டு புக்?“ என்று கேள்விகள் ‘தல‘யின் தோட்டாக்களை விட வேகமாய் இடமும், வலமுமாய் காற்றைக் கிழித்திட – பெவிகால் பெரியசாமிக்கு தற்காலிகக் கல்தா கொடுத்தல் அவசியமாகிப் போனது! ரொம்பவே முன்பாக அறிவிப்புகளைச் செய்து விட்டால், அவை அமலாகும் தருணம் புலர்வதற்குள் ஆறிப் போன பழங்கஞ்சு effect எழுந்திடக் கூடுமே என்ற அச்சம் எனக்குள்ளே எப்போதுமே உண்டென்பதால் – அவசியமாகிடும் வரை மௌனத்தையே தாய்மொழியாக்கிட விழைந்து வருகிறேன்! ஆனால் ஏதாவது ஒரு அதிரடி அறிவிப்பு இருந்தே தீருமென்ற எதிர்பார்ப்புகளுடன் குழுமியிருந்த நண்பர்களை disappoint செய்திட மனம் ஒப்பவில்லை! So- ஜுனியர் எடிட்டரின் முதல் project பற்றிய அறிவிப்பை ஈரோட்டு ஸ்பெஷலாக்கினேன்! இரவுக் கழுகாரை black & white-ல் குண்டு புக்களில் பார்த்து விட்டோம்; வண்ணங்களில் பார்த்து விட்டோம்; மூன்று கதைத் தொகுப்பிலும் பார்த்து விட்டோம் எனும் போது – அவரை இன்னனும் நாம் ரசித்திடாத ஒரே அவதார் – MAXI TEX அவதாராக மாத்திரமே இருந்திட முடியும்! அதாவது – பக்க அளவில் 330-ஐத் தொட்டிடும் மெகா Tex சாகஸம் ஒன்றினை நமது வழக்கமான போனெல்லி சைஸில் அல்லாது – பிரான்கோ – பெல்ஜியக் கதைகளை நாம் வெளியிடும் அந்த பெரிய சைஸில் – ‘பளிச்‘ சித்திரங்களோடும், வண்ணத்திலும் ரசிப்பது நிச்சயம் ஒரு பரவச அனுபவமாய் இருக்குமென்று எங்களுக்குத் தோன்றியது ! So- அதுவே நம் அபிமான ரேஞ்சரின் ‘விஸ்வரூபமாய்‘ வரக் காத்துள்ளது – 2016ன் சென்னை புத்தக விழாவின் தருணத்தில்! விலை – கதை விபரம் – எல்லாமே அக்டோபர் இறுதியினில் நமது அட்டவணை 2016ல் பார்த்திடப் போகிறீர்கள்! And this will be a part of the regular subscription. 

இது தவிர, ‘டெக்ஸை மாதந்தோறும் வெளியிட்டுத், துவைத்துக் காயப் போட வேண்டாமே!‘ என்ற சிந்தனையி்லும் ஒரு பெரும்பான்மை ஒப்புதல் நண்பர்களிடையே நிலவியது! ‘மாதம் ஒரு டெக்ஸ்‘ என்பது நிச்சயம் overdose ஆகிப் போய்விடுமென்று தீவிர ‘தல‘ அபிமானிகள் கூட கருத்துச் சொல்ல – ஆசைகளை ஓரம்கட்டி விட்டு, யதார்த்தங்களுக்கு நம்மவர்கள் முன்னுரிமை தருவதைப் புரிந்து கொள்ள முடிந்தது ! ‘டெக்ஸ்‘ பற்றிய discussion ஓடிக் கொண்டிருக்கும் போதே 'மறுபதிப்புப் பட்டியலில் டெக்ஸ் உண்டா?' என்ற கேள்வியும் சூடு பிடித்தது ! “நிச்சயம் 1 ; லட்சியம் 2“ என்ற mindset என்னிடம் ஏற்கனவே என்னிடம் இருந்ததால் – அதற்கு ஒப்புதல் சொன்னது மட்டுமின்றி – மறுபதிப்பாகும் கதையினைத்  தேர்வு செய்திடும் சுதந்திரத்தை நண்பர்களிடமே ஒப்படைத்தேன். ஒரு மளிகைக்கடை லிஸ்ட் நீளத்திற்கான பட்டியலை ஆளாளுக்கு ஒப்பிக்க, இது வேலைக்கு ஆகாதென்று நானே மூன்று இதழ்களின் பெயரை பலகையில் எழுதிப் போட்டு – அதன் மீதான வாக்கெடுப்பை எடுத்தோம்! “பழி வாங்கும் புயல்“ முதலிடத்தைத் தட்டிச் செல்ல – “டிராகன் நகரம்“ slot # 2 ஐப் பிடித்தது ! So 2016-ல் “பழி வாங்கும் புயல்“ வண்ண மறுபதிப்பாய் வெளிவருவது உறுதி என்று நான் அறிவித்த போதே – ‘ஒன்று போதாது; அட்லீஸ்ட் 2 வேண்டும்!‘ என்ற கோஷங்கள் முழங்கின! எண்ணிக்கைகளை அதிகரித்துக் கொண்டே செல்லும்பட்சத்தில் சந்தாத் தொகைகள் உயரே... உயரே செல்லும் ஆபத்துள்ளது என்பதால் ஆர்வங்களை சற்றே மட்டுப்படுத்திக் கொள்ளும் கோரிக்கையை முன்வைத்து விட்டு அடுத்த டாபிக் பக்கம் வண்டியை நகற்றினேன்! And இந்த டாபிக்கின் மீது கவனம் இருக்கும் இத்தருணமே - 2016-ன் சந்தாக் கட்டணம் நிச்சயமாய் நடப்பாண்டின் பட்ஜெட்டை விடக் கூடுதலாய் இராதென்பதையும் சொல்லி வைத்துக் கொள்கிறேன்! 

தொடர்ந்து கேப்டன் டைகர் பற்றியும், அவரது எதிர்காலம் (நம்மிடையே தான்!!) பற்றியும் கேள்வி எழுப்பினேன்! நீண்டு செல்லும் plot கொண்ட Young Blueberry கதைகளை “டைகர்“ என்ற பெயருக்காவது தொடரலாமா – அல்லது கொஞ்ச காலம் ‘பிரேக்‘ கொடுத்துப் பார்ப்போமா? என்ற என் வினவலுக்கு சிந்தித்துப் பதில் சொல்லத் தொடங்கினர்! இறுதியில் “என் பெயர் டைகர்“ ஐந்து பாகத் தொடரினை ஒற்றை இதழாக்கி – முன்பதிவுக்கேற்றதொரு விலை நிர்ணயம் செய்து தயாரிக்கலாமே! என்பது பெரும்பான்மையினரின் அபிப்பிராயமாக இருந்தது! துண்டும், துக்கடாவுமாய் கதைகளைப் பிரித்து வெளியிட்டு அவற்றின் flow-க்கு வில்லங்கம் ஏற்படுத்துவதை விட – இது போன்ற "one-shot; buy if you wish" மார்க்கம் தேவலை என்று எனக்கும் பட்டது! ஆனால் அன்று குழுமியிருந்த 55 நண்பர்களைத் தாண்டிய உங்களது குரல்களுக்கும் முக்கியத்துவம் தரும் கடமை நமக்குள்ளது என்பதால் – இது பற்றிய உங்கள் சிந்தனைகளை வரவேற்கிறேன் guys! இறுதியான தீர்மானம் அனைவரது அபிப்பிராயங்களையும் அறிந்த பின்பே எடுக்கப்படும் !

தொடர்ந்த உரையாடல்களின் போது ரிப்போர்டர் ஜானிக்கு ஆதரவாய் சில நண்பர்கள் கருத்துச் சொல்ல – என் மனதில் நிழலாடிக் கொண்டிருந்ததொரு எண்ணத்தையும் வெளிப்படுத்தினேன்! இந்த அக்டோபரோடு பிரான்கோ-பெல்ஜிய காமிக்ஸ் உலகுடன் நமது தொடர்புக்கு அகவை 30 ஆகிறது! அதன் ஒரு சின்ன celebration ஆக அன்று முதல் இன்று வரை going strong நாயகர்களின் digest ஒன்றினை வெளியிடலாமே என்பது தான் எனது அந்த அவா! உற்சாகமாய் அதற்கு ஆதரவு கிட்டிய போதிலும் – மீண்டுமொரு வாக்கெடுப்பில் கேப்டன் பிரின்ஸ் தொடரில் எஞ்சி நிற்கும் சிறுகதைகளின் தொகுப்பானதொரு புது ஆல்பம் - ரிப்போர்டர் ஜானியை விடக் கூடுதலாய் வாக்குகள் பெற்றது! So- 2016-ன் ஒரு வாகான தருணத்தில் கேப்டன் பிரின்ஸின் புதுக்கதைகள் அடங்கிய சிறுகதைத் தொகுப்பு அழகாக வெளிவந்திடும்!

இறுதியாய் “பௌன்சர்“ பற்றிய கேள்வியை எழுப்பி வைத்தேன் – அதன் தாக்கம் நண்பர்கள் மத்தியினில் எவ்விதமுள்ளதென்பதை நேரடியாகத் தெரிந்து கொள்ளும் பொருட்டு! சென்னிமலை நண்பர் ஒருவர் நீங்கலாகப் பெரும்பான்மை வாசகர்கள் பௌன்சரின் அந்த ரணகள அதிரடி பாணிக்கு ரசிகர்களே என்பது தெள்ளத் தெளிவாகப் புரிந்தது! “For mature audience“ என்ற லேபில் மட்டும் இதற்குப் போட முடிந்தால் இன்னும் நலம் என நண்பர் ப்ளுபெர்ரி தெரிவித்தார்! (அது நடைமுறை சாத்தியமல்ல என்பது வேறு விஷயம்!!) இடையே ஒரு மிகச் சிறிய டீ பிரேக் நீங்கலாய் முழுவீசசில் நகன்ற சந்திப்பானது முழுசாய் 3 மணி நேரங்களை விழுங்கியிருந்தது அப்போது தான் புலனானது! இதற்கும் மேலாய் நம் கச்சேரிகளைத் தொடர்ந்தால் வயிறுகள் போடும் பசிக் கூச்சல்கள் பெரிதாகிடக் கூடுமென்பதால் சின்னதொரு summary உடன் அந்த சந்திப்பை நிறைவு செய்தோம்!

தொடர்ந்த க்ரூப் போட்டோ படலம்; நண்பர்களுக்கு விடைகொடுத்தல் இத்யாதிகளோடு அவசரமாய் கிளம்ப வேண்டிய அவசியமில்லா நண்பர்களோடு மதிய உணவும் அருந்த சமயமிருந்தது! சகலத்தையும் முடித்து விட்டு ரூமுக்கு நான் கிளம்பிய போது என் தொண்டையில் யாரோ உப்புத் தாளைத் தடவியிருந்த உணர்விருந்த போதிலும் – மனது முழுவதும் திருப்தியும், மகிழ்வும் நிறைந்து கிடந்தன! ‘தோளில் கைபோடுங்கள் சார் – போட்டோ போசுக்கு‘ என்ற உரிமையோடு கேட்ட நண்பரின் குரலும்; ‘நான் எடிட்டர் கூட அமர்ந்து சாப்பிட்டுக் கொண்டிருக்கிறேன்... நீ அவரோடு பேசுறியா?‘ என்று ஒலித்த பெருமிதக் குரலும்; சென்னிமலை முருகன் ஆலயத்திலிருந்து மாலையும்; பட்டுத் துண்டும், சாமி படமும் கொணர்ந்து தந்த அந்த அன்பரின் நேசமும்; ஈரோட்டில் நானிருந்த ஒன்றரை நாளுக்கு ஒவ்வொரு நண்பரும் இந்த சிவகாசி சாமான்யனிடம் காட்டிய அன்பும், பரிவும் நிச்சயமாய் ஏழேழு ஜென்மங்களுக்கும் மறந்திடாது! எத்தனை எத்தனை அந்தர் பல்டிக்கள் நாங்கள் அடித்தாலும் நீங்கள் காட்டிடும் நேசத்துக்கு நிச்சயம் நியாயம் செய்திட இயலாது என்பது அப்பட்டம் ! இந்த அன்புக்கு என்றைக்கும் நாங்கள் தகுதியானவர்களாகத் தொடர்ந்தாலே போதும் – இந்தப் பிறவிக்கொரு அர்த்தம் கிடைத்திருக்கும் ! Thanks guys – thanks for everything & more! மீண்டும் சந்திப்போம் - ஞாயிறின் பதிவோடு ! Bye until then ! 

Chalo ஈரோடு !!

நண்பர்களே,

வணக்கம். பல நேரங்களில் வண்டியில் ஏறியமர்ந்த பின்னே எஞ்சினை ஸ்டார்ட் செய்து, கியரை மாற்றினாலே சவாரி துவங்கிடுவது வழக்கம். டிஜிட்டல் கோப்புகள் வந்து சேர்வதில் தாமதம் ; அட்டைப்பட டிசைன்கள் செட் ஆகாது போவது  ; அச்சுப் பிரிவில் பணியாட்கள் பற்றாக்குறை ; இயந்திரப் பழுதுகள் போன்ற சிக்கல்கள் தலைதூக்குவதுண்டுதான்; ஆனால் அவற்றை சமாளிப்பது பெரியதொரு பிரயத்தனமாக இராது.

ஆனால்-

சில தருணங்களில் வண்டி ஸ்டார்டே ஆகாமல், கீழே இறங்கி, வேஷ்டியை மடித்துக் கட்டிவிட்டு ‘ஏலேலோ ஐலசா‘ என்று ‘தம்‘ கட்டித் தள்ளினாலும் அங்குலம் அங்குலமாய் வண்டி நகரும் அனுபவங்களும் உண்டு! இம்மாத இதழ்களின் பணிகள் ‘ஏலேலோ‘ ரகத்தைச் சார்ந்ததாய் அமைந்து போனதில் தான் எங்களின் திருவாளர் முதுகார்கள் புண்ணாகிப் போய் கிடக்கின்றனர் ! மறுபதிப்பு இதழ்களான ‘உறைபனி மர்மம்‘ & ‘எத்தனுக்கு எத்தன்‘ பெரிதாய் மெனக்கெடல்கள் ஏதுமின்றித் தயாராகி நிற்க- புதுவரவுகளோ ஒவ்வொன்றும் ஒவ்வொரு விதத்தில் நம் பொறுமைகளுக்குப் பெரும் சோதனைகளை முன்வைத்தன!

ஆரம்பத்தில் சிக்கல்கள் துவங்கியது நமது அட்டைப்பட டிசைன் பணிகளில்! CCC-க்கு மாத்திரமே தேவைப்பட்ட டிசைன்களின் எண்ணிக்கை மொத்தம் 10! (4 இதழ்களுக்கு முன் & பின் என 8 டிசைன்களும்; அவற்றிற்கான box-க்கு இருபக்கங்களது டிசைன் என a total of 10!) இது தவிர இம்மாதத்திற்கென முதலில் திட்டமிட்டிருந்த பௌன்சர் இதழுக்கென 2 டிசைன்கள் + கடைசி நிமிட மாற்றமான மேஜிக் விண்டாருக்கென 2 டிசைன்கள் என பட்டியல் நீண்டு கொண்டு 14-ல் சென்று நின்றது! நமது டிசைனர் பொன்னன் நல்ல திறமைசாலியெனினும், timeline என்றதொரு பதத்திற்கு அவரது அகராதியில் பொருளே வேறு! ஒவ்வொரு மாதமும் கடைசி நிமிடத் தாண்டவங்கள் தான் நமக்கு நடைமுறை ! ஆனால் இம்முறையோ மொத்தம் 14 டிசைன்கள் எனும் போது கடைசி வார ராக்கூத்துகளில் இத்தனையையும் திருப்தியாக செய்து முடிப்பது இயலாக் காரியம் என்பதால் ஜுலையின் நடுவிலிருந்தே என் நச்சரிப்புகளைத் தொடங்கி விட்டேன். ஆனால் மனஷனுக்கு வேறு நெருக்கடியான வேலைகளும் இருந்தனவோ என்னவோ தெரியவில்லை- இம்முறை நம் பணிகளின் பக்கம் கவனம் செலுத்துவதற்கான அறிகுறிகள் கூட கண்ணில் தட்டுப்படவில்லை. வழக்கம் போல என் வெண்கலத்தொண்டையை உச்சஸ்தாயிக்குக் கொண்டு சென்று பார்த்தும் தேர் எல்லையை விட்டே நகன்ற வழியைக் காணவில்லை. சரி- இதற்கும் மேல் கைகளைக் கட்டிக் கொண்டு பொறுமையின் ரூபமாய் தொடர்ந்தால் இந்த மாதம் சட்னி தான் என்பது புரிந்து போக- emergency நடவடிக்கைகளைத் தொடங்கினோம். இத்தனை காலமாகியும்  சித்திரப் பணிகளுக்கென ஒரு ஓவியரையும் ராப்பர் டிசைனிங்கிற்கென பொன்னனையும் தாண்டி நாமொரு second line உருவாக்கியிருக்கவில்லை என்பது ரொம்ப காலமாகவே என்னை உறுத்தி வரும் விஷயம்! இம்மாதம் அந்த அஜாக்கிரதைக்கான பலன்களை ஒட்டுமொத்தமாகவே உணர முடிந்தது! 'அங்கே-இங்கே' என ஓடி உள்ளுரில் இன்னொரு டிசைனர்; சென்னையில் அந்த image branding நிறுவனம் என தேடிப் பிடித்துப் பணிகளை ஒப்படைத்தோம். ஜுனியர் எடிட்டர் தன் பங்கிற்கு வலையில் தேடல்களைத் தொடங்கிட - சென்னையில் இன்னுமொரு அனுபவசாலி graphic designer கிட்டினார்! ஆளாளுக்கு இரண்டல்லது மூன்று option-களுடன் ராப்பர் டிசைன்களை அனுப்பி வைக்க - திரும்பிய திசையிலெல்லாம் கர்னல் கிளிப்டன்களும், லியனார்டோ தாத்தாக்களும் தான் தென்பட்டனர் - கலர் கலரான பின்னணிகளில் ! அவற்றிலிருந்து filter செய்து ராப்பர்களை ஒருவழியாகத் தேர்வு செய்யும் வேளையில் பொன்னனும் மீண்டும் ஜோதியில் கலந்திட – ஒரே அட்டைப்பட மேளா தான்! நடுவே ஸ்மஃர்ப் நிறுவனத்தினர் – 'ராப்பரில் கிளை வேண்டாம்; புதர் வேண்டாம்; பழம் வேண்டாமென‘ instructions வழங்கிட – CCC-ன் டிசைன்களும், மற்ற 2 இதழ்களின் அட்டைகளும் தயாராவதற்குள் எனக்கு ஒன்றிரண்டு அகவைகள் சட்டென்று அதிகமாகிப் போய்விட்ட மாதிரியொரு உணர்வு!

இதில் CCC-ன் box நமக்கும் ஒரு முதன்முறை என்பதால் டப்பா செய்வதற்கான நபரைப் பிடித்து அதற்கென ஒரு பிரத்தியேக die செய்தும் வாங்க வேண்டியிருந்தது. வழக்கமான நமது பணி வட்டத்திற்குள் உள்ள நபர்களுக்கு நாம் எப்போதுமே காலில் வெந்நீரை ஊற்றித் திரியும் அரை லூசுகள் என்பது தெரியும்தான்; ஆகையால் முகம் சுளிக்காது நமது அவசரமோ அவசரங்களுக்கு இயன்றளவு ஒத்துழைப்பது வாடிக்கை. ஆனால் இவரோ புதியவர்! இவரிடமும் போய் ராக்கூத்தடிக்க நேரிட்டது தான் கொடுமையோ கொடுமை! ஒரு மாதிரியாக அவரையும் தாஜா செய்து டப்பாக்களைத் தயார் செய்து வாங்கி வந்தால் – smurf பக்கங்களின் approval-க்கான காத்திருப்பு தொடங்கியது! ஒரு வழியாக அந்த ஸ்பீட் பிரேக்கரையும் தாண்டி, அச்சுப் பணிகளை முடித்திருந்த போது வெள்ளிக்கிழமை காலை (நேற்றைக்கு) புலர்ந்திருந்தது!

வியாழன் இரவு நான் முடிந்திருந்த  இதழ்களை ஒருசேரக் கையில் வைத்துப் புரட்டிக் கொண்டிருக்க – தற்செயலாகக் கர்னல் க்ளிப்டனின் சில பக்கங்களில் லயித்து நின்ற என் கண்கள் மொச்சக்கொட்டை சைசுக்கு அகன்று நின்றன! அந்த இரண்டு பக்கங்களிலும் ‘லி‘ என்ற எழுத்துக் காணாமல் போகும் வியாதியானது மறுபடியும் தலைதூக்கியிருப்பது புரிந்தது! ‘ஜோலி‘ – ‘ஜோ‘ என்றும்; ‘டாலி‘ – ‘டா‘ என்றும் என்னைப் பார்த்துப் பல்லிளிக்க – கதிகலங்கிப் போய் ஒரிஜினல் file-களைத் தேடிப் பிடித்து சரி பார்த்தோம்! எங்களது கலர் கோப்புகளில் எல்லாமே சரியாக இருக்க – பிராசஸிங்கிற்கு அனுப்புவதற்கு முன்பாக பணி முடித்த அந்த file-களில் ஒருசிலவற்றை  curve செய்திட நமது புது DTP பணிப்பெண் மறந்து போயிருந்ததும்; அதன் பலனாய் Coreldraw மென்பொருளின் வெவ்வேறு versions காரணமாய் ‘லி‘ ஸ்வாஹா ஆனதும் புரிந்தது! சும்மாவே பழுக்கும் முதுகு இப்படியொரு சொதப்பலில் தாக்கே பிடிக்காது என்பதால் ராவோடு ராவாக ஸ்டிக்கர்கள் செய்ய ஓடினோம் வியாழன் பின்னிரவில் ! வெள்ளிக்கிழமை காலை ஆபீஸில் நம்மவர்கள் அத்தனை பேரும் ஸ்டிக்கர் ஒட்டி விளையாடும் குழந்தைகளாய் உருமாறிப் போனது தான் நடந்தது ! அந்தப் பணிகளை முடித்து விட்டு இதழ்களை CCC-ன் box க்குள் நுழைத்து விட்டு – அப்புறமாய் பாக்கி 3 இதழ்களையும் சேர்த்து ஆக மொத்தம் 7 இதழ்களை கூரியர் டப்பாக்களுக்குள் போட்டு pack செய்து despatch செய்வதற்குள் எல்லோருக்குமே போதும் போதுமென்று ஆகிப் போனது ! And இது மறுபடியும் ஒரு "வெள்ளிக்கிழமை despatch தினம்" என்பதால் கூரியர் நண்பர்கள்  பட்டுவாடாவில் சொதப்பினால் திங்கட்கிழமை வரை காத்திருக்க வேண்டிய கடுப்ஸில் நண்பர்களின் அர்ச்சனைகளும் நமக்குக் காத்திருக்குமென்பதை அறியாதில்லை! So- ‘பணிகள் முடிந்தனடா சாமி!‘ என்று பெருமூச்சு விடுவதா? ; ‘ஸ்மஃப் ஒப்புதலின் காரணமாய் ஒரு வார தாமதம் நிகழ்ந்து விட்டதே!‘ என்று ஆதங்கப்படுவதா? 'உருண்டோ-புரண்டோ இத்தனை இதழ்களையும் கரைசேர்த்து விட்டோமே!!' என்று பெருமிதப்பட்டுக் கொள்வதா ? – அல்லது 'எனக்கு புக் கிடைக்கவில்லை !!' யென சனிக்கிழமை மாலைகளில் காத்திருக்கும் சாத்துகளுக்காக brace செய்வதா ?என்று துளியும் புரிதலின்றி ஒரு மந்தகாஸமான நிலையில் உள்ளேன் ! But please be sure we have given it our everything ! இதே CCC- ஐ 4 தனித்தனி இதழ்களாகப் பிரித்திருக்கும் அவசியமின்றி ஒரே தடி புக்காகப் போட முடிந்திருக்கும் பட்சத்தில் - அட்டைப்பட டிசைன்; பிரிண்டிங்; பைண்டிங் என பலயிடங்களில் நேரமும்; பணமும் மிச்சமாகியிருக்குமே என்ற ஆதங்கமும் தலையின் இன்னொரு பக்கம்! But as always - இந்தப் பணிகள் தந்த அனுபவங்களையும் உள்வாங்கிக் கொள்கிறோம்!

And finally on to the real thing! இதோ இன்று (சனி) உங்களைத் தேடி வர வேண்டிய இம்மாத இதழ்களின் இறுதி வடிவங்கள் & previews! ஏற்கனவே அவ்வப்போது முழுவதும் முற்றுப் பெற்றிரா ராப்பர்களை உங்கள் கண்களில் காட்டியிருந்தாலும் – இவையே final versions!

BOX

இதழ் # 350 ஆக CCC-ன் ஆட்டத்தைத் தொடங்கி வைப்பது நமது வுட்சிட்டி கோமாளிகள் தான்! So - "காமிக்ஸ் டைம்" பகுதி இடம்பிடித்திருப்பதும் இந்த இதழில் மட்டுமே! வழக்கமான உட்சிட்டி கூத்துக்கள்; வழக்கமான ஆர்டினின் அட்டகாசங்கள் என்று ஓடும் இந்தக் கதையில் பல காலம் கழித்து சிக் பில்லுக்கு சற்றே வெயிட்டானதொரு ரோல் உண்டு! So அந்த சந்தோஷத்தில் மனுஷனும் ஒரு ‘உம்மா‘ frame-ல் புண்ணியம் தேடிக் கொள்கிறார்!

அடுத்ததாய் உங்களை நோக்கிச் சீறிப் பாய்ந்து வருவது நமது கர்னல் க்ளிப்டன்!  ‘ஏழு நாட்களில் எமலோகம்‘ செம racy ஆக்ஷன் த்ரில்லர்! க்ளிப்டனின் கதைகள் எல்லாமே ஆக்ஷன் த்ரில்லர் ரகங்களே – சொல்லப்பட்ட விதங்களில் நயமான காமெடிப் பூச்சோடு! And கார்ட்டூன் பாணிச் சித்திரங்களும் இங்கே அமல் என்பதால் சுலபமாய் படித்து ரசிக்க முடிந்திடும்! அப்புறம் ஜாலியாக நகற்றப்பட்டிருக்கும் இந்தக் கதைக்கு லைட்டான மொழிபெயர்ப்பு treatment மாத்திரமே தந்துள்ளோம்! So இங்கே ‘Operation பூதக்கண்ணாடி‘க்கு அவசியம் வேண்டாமே - please ?

தொடர்வது புதுவரவான லியனார்டோ! இவரொரு பரீட்சார்த்த முயற்சி தான் என்பதில் ஐயமில்லை- ஆனால் ரொம்பவே முக்கியமான பரீட்சை இது என்பதிலும் எனக்கு சந்தேகமில்லை – simply becos இது தான் பிரான்கோ-பெல்ஜியக் கதைவரிசைகளுள் ரொம்பவே பிரசித்தமான ஒற்றைப் பக்கம் / 2-3 பக்க நகைச்சுவைக் கதம்பங்களின் முதல் முயற்சி தமிழில்! முழுநீளக் கதைகள் மட்டுமே நம் தட்டுக்களில் பரிமாறப்பட்டு வந்திருக்கும் நிலையில் – மதியில்லா மந்திரி; லக்கி லூக் சிறுகதைகள்; ஸ்டீல்பாடி ஷெர்லாக் போன்ற 4/5 பக்கக் கதைகளைக் கூட நாம் இலைகளின் முனைகளில் ஸ்வீட்களாக மாத்திரமே பாவித்துப் பழகி வந்துள்ளோம்! முதன்முறையாக அதுவே ஒரு முழு நீள விருந்தாகப் பரிமாறப்பட உள்ள இத்தருணத்தில் இவற்றிற்கு உங்களது reactions எவ்விதமிருக்குமென்று அறிந்திட ஆர்வமாய் உள்ளோம்! ‘லியனார்டோ‘ தொடரானது பிரெஞ்சில் ரொம்ப ரொம்பப் பிரசித்தம் – இது வரை 46 ஆல்பங்கள் வெளிவந்துள்ளன இந்த வரிசையில்! And இந்த gags கள் பெரும்பாலும் லாஜிக் ஏதும் பார்த்திடா ஜாலி சமாச்சாரங்கள் என்பதால் – just sit back; relax & enjoy please! சித்திரங்களின் பின்புலத்தில் ஒரு பூனையும், எலியும் ஆங்காங்கே தனி ஆவர்த்தனம் நடத்தித் திரிவதையும் பார்த்திடலாம்; So நிதானமாய் சித்திரங்களையும் ரசித்திட நேரம் எடுத்துக் கொள்ளுங்களேன்! Again இது லைட்டான களம் என்பதால் மிக லைட்டான மொழிபெயர்ப்பு பாணி மாத்திரமே இங்கேயும் !

And தொடர்வது நமது நீலப் பொடியர்கள் தான்! Smurfs பற்றி நிறையவே பில்டப் தந்து; நிறைய எழுதித் தள்ளி விட்டதால் அதே மாவை மறுஅரவை செய்யப் போவதில்லை! மாறாக – இந்த இதழின் அமைப்பே படைப்பாளிகளின் உந்துதல்களால் stylish ஆக அமைந்திருப்பதைப் பற்றித் தான் highlight செய்திடப் போகிறேன்! “இதுவொரு ஊதா உலகம்“ என்ற தலைப்பு இருப்பினும் – அட்டைப்படப் பின்புலன் 'பளீர்' மஞ்சளாக இருப்பது ஏனோ? என்ற கேள்வியை மட்டும் ஓரம்கட்டி விட்டு இதழுக்குள் புகுந்திட்டால் உங்களுக்கு அந்த style மாற்றம் தென்படலாம்! படைப்பாளிகளின் அறிமுகம்; கதை ; தொடரக் காத்திருக்கும் smurf விளம்பரங்கள் என்று சிம்பிளாக முடிந்திடும் இதழிது! கதைக்குள் முதன்முறையாகப் புகுந்திடவிருக்கும் நண்பர்களுக்கு இந்த நீலக் குட்டி மனுஷன்கள் பேசும் ‘பொடி ஸ்மர்பி' பாஷை சற்றே விநோதமாகப் படலாம்! ஆனால் படிக்கப் படிக்க இதுவே இந்தத் தொடரின் மேல் ஒரு ஈர்ப்பை ஏற்படுத்தும் காரணியாக அமையப் போவது நிச்சயம் ! And இந்த ‘பொடி‘ பாஷையை அமைக்க நமது வாசக நண்பர் லக்கி லிமட்டுக்கு இங்கேயொரு extra big thanks ! ஏகப்பட்ட மெனக்கெடலொடு நண்பர் இந்த "மொழியினை" உருவாக்கியிருப்பது கண்கூடு ! படைப்பாளிகளின் நிபந்தனைகளின்படி ‘ஸ்மர்பி‘ பாஷைக்கும் அவசியமிருப்பதால் நண்பர் லக்கி பாணியில் நம்மால் 100% செயல்படுவது சாத்தியமாகவில்லை ; ஆனால் இந்தப் ‘பொடி ஸ்மர்பி‘ பாஷையின் புண்ணியத்தால் வரும் நாட்களில் நமது அகராதிகளில் பல புதிய வார்த்தைகள் இடம்பிடிக்கும் சாத்தியக் கூறுகள் பிரகாசம் என்பேன்! இந்த நீலப் பொடியர்களை நிதானமாய் ரசிக்க அவகாசம் எடுத்துக் கொண்டு ஒவ்வொரு frame தனிலும் சிற்சிறு சித்திர ஜாலங்களில்  ஓவியர் கொணர்ந்திருக்கும் லேசான முகமாற்றங்களை கவனித்துத் தான் பாருங்களேன்! லேசான உதட்டுக் கோடுகளை இப்படிப் போட்டு புன்சிரிப்புகளையும்; அப்படிப் போட்டு கோபதாபங்களையும்; இன்னும் கொஞ்சம் மாற்றி பயங்களையும் ஓவியர் படைத்துள்ள லாவகம் அட்டகாசம்! And தவறாது உங்கள் வீட்டு சுட்டீஸ்களின் கண்களில் இந்த இதழையும் ; லியனார்டோவையும் காட்டிடுங்களேன் – please!

இம்மாதப் புது இதழ் பட்டியலின் இறுதியில் வந்திடும் மேஜிக் விண்ட் பற்றி! அடக்கமான சைஸ்; வசியம் செய்திடும் அட்டைப்படம் ; நேர்கோட்டுக் கதைக்களம் என இதுவும் ஒரு easy read தான்! நிச்சயமாய் cartoon போட்டிகளுக்கு மத்தியிலும் இதுவும் score செய்திடுமென்று நம்புகிறோம்!

இன்றைய பொழுதும், ஞாயிறின் காலைப் பொழுதும் ஈரோட்டுப் புத்தகவிழாவினில் camp என்பதால் ( 8 & 9 ஆகஸ்ட் ) உங்களை சந்திக்கும் ஆர்வத்தோடு ஜு.எ. சகிதம் நமது ஸ்டால் நிர்: 152-ல் காத்திருப்போம்! Please do visit us folks! அப்புறம் சென்னையில் ‘மின்னும் மரணம்‘ வெளியான சமயம் நாம் பரீட்சித்துப் பார்த்த – சிறு அரங்கம் – சில மணி நேர நண்பர்கள் சந்திப்பு முயற்சியை இம்முறை ஈரோட்டிலும் தொடரவிருக்கிறோம் (பக்கத்து ஸ்டால்களுக்கு இடைஞ்சல் தராது ஓரம் கட்டிக் கொள்வோமே என்ற முன்ஜாக்கிரதை தான்!!).

புத்தக விழா நடைபெறும் V.O.C. பூங்காவின் நுழைவு வாயிலில் உள்ள LE JARDIN ஹோட்டலில் ஞாயிறு காலை 11-30 முதல் மதியம் 1-30 வரை சிறு ஹால் ஒன்றினை எடுத்துள்ளோம். ஜாலியான அரட்டைகளுக்கும், 2015-ன் இதுவரையிலான review & 2016-க்கான suggestions-க்கு இந்த சந்திப்பு பயன்பட்டால் சந்தோஷமே! The welcome mat is out guys! உங்கள் வருகைகள் நம் பயணத்துக்கு பெரிதும் வலு சேர்க்கும்! அவசியம் வந்திடுங்களேன்! See you around! Bye for now!

P.S : வெள்ளி மாலைக்குள் உங்கள் சந்தாப் பிரதிகள் எல்லாமே கூரியரில் கிளம்பி விட்டன ; அவற்றின் ரசீதுகள் எங்களுக்கு சனி மாலை தான் ஒட்டுமொத்தமாய்க்  கைக்குக் கிடைக்கும் ! So கூரியர் tracking நம்பர் கோரி பகலில் போன் அடிப்பதில் பிரயோஜனம் இராது - சற்றே பொறுமை அவசியமாகிடலாம்- ப்ளீஸ்  ! 

And ஆன்லைன் விற்பனைகளுக்கான லிஸ்டிங்கும் தயார் : http://lioncomics.in/monthly-packs-july-2015/15684-august-2015-pack.html

ஒரு பொடிப் பதிவு !

நண்பர்களே,

வணக்கம். ரிமோட் கண்ட்ரோலில் வீட்டுக் கதவுகள் திறக்கின்றன; டி.வி.க்கள் ஸ்விட்ச்-ஆன் ஆகின்றன; ஏன் விமானங்களே கூடப் பறக்கின்றன! ஆனால் சிறியதொரு ஆபீஸையும், சுருக்கமான நமது டீமையும் ரிமோட்டில் நிர்வகிக்க வழி தெரிந்த பாடைக் காணோமே! என்ற அங்கலாய்ப்போடு சென்ற வாரத்தின் நான்கு நாட்களைக் கழித்தேன்! வழக்கம் போலவே ‘திடு திடுப்‘பென பயணமொன்று அவசியமகிட - இங்கே போட்டது, போட்டபடிக் கிடக்க நான் புறப்பட்டாக வேண்டியதொரு அவசரம்! ‘ஆனால் மைதீன் இருக்க பயமேன்?‘ என்ற கதையாக சிக்கிய சந்தர்ப்பங்களிலெல்லாம் போனில் மைதீனின் குடலை உருவியே- நமது CCC-ன் மூன்று இதழ்களைக் கரைசேர்த்து விட முடிந்தது ! க்ளிப்டன்; லியனார்டோ தாத்தா & வுட்சிடியின் சட்டப் பரிபாலன அதிகாரிகள் உங்களை சந்திக்கத் தயாராகி நிற்க – ஏற்கனவே நமது 2 சிரஞ்சீவிகளும் தயார் – மறுபதிப்புகளோடு ! So- நான் தொலைவில் இருந்தால் கூட பெரியதொரு தடுமாற்றமின்றி ஆகஸ்டின் பெரும்பான்மை இதழ்கள் தயாராகி விட்டன! 

ஆனால் போன வாரப் பதிவினில் நான் கோடிட்டிருந்த ஸ்மர்ஃப் படைப்பாளிகளின் ‘கண்ணில் castoroil’ ரகத் தரசோதனைகளில் தான் நாட்கள் விரயம் சென்ற வண்ணமிருந்தன ! அங்குலம், அங்குலமாய் ஒவ்வொரு பக்கத்தையும், ஒவ்வொரு சித்திர frame-ஐயும் நுணுக்கமோ- நுணுக்கமாய் ஆராய்ந்திட ஒரு மெகா-டீமே அமெரிக்கா-ஐரோப்பா என இருவேறு தளங்களிலிருந்து செயல்பட்டு வருவதை மலைப்போடு பார்த்துக் கொண்டிருந்தோம்! நம் தரப்பில் அட்டைப்படத்தை மட்டுமின்றி; ஸ்மர்ஃப்களின் பெயரைக் கூட அழகாய் வடிவமைத்திட புதியதொரு branding design நிறுவனத்தைப் பிடித்து – அட்டகாசமாய் பணி செய்து வாங்கியிருந்தோம்!

Just a Trial Version !!! Not the final cover !!! 

‘சூப்பரப்பு!.....படைப்பாளிகள் பார்த்த மாத்திரத்திலேயே அசந்து போகப் போகிறார்கள்! என்ற நம்பிக்கையோடு அதனை  பெல்ஜியத்துக்கு அனுப்பினோம்! ணங்! என்ற சத்தம் மாத்திரமே கேட்கவில்லையே தவிர அதனோடு இணைந்து வரவேண்டிய பாக்கி சங்கதிகள் சகலமும் ஆஜராகின! பறக்கும் பொறி... காதில் ஒரு ‘கொய்ங்ங்‘ ஓசை... சில்லுமூக்கில் லேசான தக்காளிச் சட்னி ஒழுகல் என்று நிறையவே சேதாரத்தை உண்டு பண்ணியிருந்தது படைப்பாளிகளின் பதில்! ‘ராப்பரின் ஒரிஜினல் டிசைனை துளி கூட நோண்டக் கூடாது... பின்புலத்தில் நீங்கள் வரைந்துள்ள புதர்... மரக்கிளை... தொங்கும் hazelnut என சகலத்தையும் குப்பைக் கூடைக்கு அனுப்புங்கள் –ப்ளீஸ்!‘ என்று சொல்லியிருந்தனர். இது பற்றாதென்றால் உட்பக்கங்களில் ஒவ்வொரு இண்டு, இடுக்கிலும் செய்திட அவசியமாகிடும் மாற்றங்கள்; திருத்தங்கள் என நீளமாக ஒரு பட்டியலும் இணைக்கப்பட்டிருந்தது! இரண்டு பக்கங்களுக்கு ஒரு முறை அவர்களது trademark லோகோ மற்றும் பெயர் இடம்பெற்றாக வேண்டும் என்ற வலியுறுத்தல் வேறு ! "ஆஹா...ஈரோட்டுக்கு லேட்டாகிறதே !" என்ற ஆதங்கத்தில் இந்த இதழை அவசரம் அவசரமாய் நாம் அச்சிட்டிருந்திருக்கும் பட்சத்தில் ரொம்பவே சிக்கலாகிப் போயிருக்கும் போல் தெரிகிறதே! என்று மண்டைக்குள் சிந்தனை உதயமானது அப்போது தான் ! எல்லாவற்றிற்கும் கீழே- முக்கியம் என்று குறிப்போடு – 'எக்காரணம் கொண்டும் ஒரிஜினல் டிராயிங்கின் ஒரு செ.மீ. கூட ‘கட்‘ ஆகக் கூடாது! So எழுத்துக்களை ஒரிஜினல் பலூன்களுக்குள்ளாகவே அடக்குவதில் கவனம் செலுத்துங்கள்!‘ என்றும் குறிப்பிட்டிருந்தனர்! இதே நிபந்தனைகளை ஒரு லார்கோவுக்கோ, ஒரு டைகருக்கோ; ஒரு XIII-க்கோ படைப்பாளிகள் இட்டிருக்கும் பட்சத்தில் – அவற்றில் அவசியப்படக்கூடிய ஸ்கிரிப்டை ஒரிஜினில் பலூன்களுக்குள் அடைக்க பிரம்மனே திணறியிருப்பார்! இந்த நீலப்பொடியர்கள் கதைகளில் ‘வளவள‘ வசனங்களுக்கு அவசியங்களே கிடையாதென்பதால் – லேசாக எழுத்துக்களின் அளவுகளை சுருக்குவதன் மூலமே படைப்பாளிகளின் அவாக்களுக்கு செவி சாய்ப்பது சாத்தியமாகிப் போனது! So இங்கும், அங்குமாய் ஏதேனும் ஒன்றிரண்டு இடங்களில் மட்டும் எழுத்துக்கள் உங்கள் கண்களுக்கு சோதனை நடத்திப் பார்க்கும் பட்சத்தில் – apologies in advance guys! இதனில் நமக்கு வேறு options துளியும் இல்லை! So திரும்பவும் ஒரு தடவை – துவக்கம் முதல் பணிகளைச் செய்வது போலான அயர்ச்சி இருந்தாலும் – அதனை வெளிக்காட்டிக் கொள்ளாமல் நம்மவர்களை மறுபடியும் நீலப்பொடியர்களோடு “பழகிப் பார்த்திடச்“ சொல்லிப் பணித்தேன்! இது வரை லேசு பாசான சந்தேகமாகத் தானிருந்தது; ஆனால் இப்போது confirmed- இவர் பாஸல்ல – லூசு தான்!என்ற முணுமுணுப்பு அவர்களது, உதடுகளில் இருந்திருப்பது நிச்சயம் – ஏனெனில் ஒரே கதையில் மூன்றாவது தடவையாகப் பணி செய்யும் நெருக்கடி இம்முறை! முதல் தடவை ஸ்மர்ஃப் பாஷையோடு டைப்செட் செய்தார்கள்; அப்புறமாய் அதைப் பொடி பாஷையாக்க அனுமதி கிட்டிய போது மீண்டும் மாற்றங்கள்! மூன்றாவது மாற்றம் – பலூன்களின் சைஸ்களின் பொருட்டு என்பதால் அவர்களது சலனங்கள் புரிந்து கொள்ளக்கூடிய ரகமே! ஆனால் நமது இத்தனை ஆண்டுகால; இத்தனை இதழ் தயாரிப்பு அனுபவங்களுள் இதுபோன்றதொரு சவாலான production process இதுவரை நாம் சந்தி்த்திரா விஷயம் என்ற போது – தஞ்சாவூர் பொம்மைகளாய் தலையாட்டுவது அவசியமாகி விட்டுள்ளது! 

தட்டுத் தடுமாறி ஒருவழியாய் சகல திருத்தங்களையும் செய்து சமர்ப்பித்து விட்டு – படைபாளிகளின் ஒப்புதல்களை வாங்குவதிலேயே இன்றுவரைக்கும் நேரம் பறந்து விட்டதால் – இனி திங்கட்கிழமை தான் இந்தக் குட்டி மனுஷர்கள் அச்சுப் பிரிவுக்குள் புகுந்திடுவர். And  அந்த அட்டைப்பட ஒப்புதல் மாத்திரம் இன்னமும் அந்தரத்தில் ஊசலாடுகிறது - திங்கட்கிழமை அவர்கள் பணிக்குத் திரும்பி இதற்கு ஒ.கே. சொல்லிடும் வரையிலும் ! So அதுவும் முடிந்து, அச்சு; பைண்டிங்; box set-ல் அடைக்கும் வேலைகள்; அந்த box set-ஐ உங்கள் சந்தா டப்பாக்களுக்குள் நுழைத்து pack செய்திடும் வேலைகள் என சகலமும் நடந்தேறிட 4 நாட்களாவது ஆகிடும்! So- வரும் வெள்ளியன்று CCC + மறுபதிப்பு x 2 + ஆகஸ்டின் இதழ் # 7 ஆன மேஜிக் விண்டின் “கறுப்புக் காகிதங்கள்“ உங்களைத் தேடிப் புறப்படும்!

பௌன்சரின் “கறுப்புக் விதவையின்“ இடத்தில் “கறுப்புக் காகிதங்கள்“ இடம்பிடிப்பது கூட இந்த நீலப்பொடியர்களின் பெண்ட் கழற்றும் பணிகளின் பொருட்டே அவசியமாகிப் போனதொரு மாற்றம் ! பௌன்சர் தொடரிலேயே மிகவும் freakish ஆன இந்தக் கதையைக் கையாள நிறையவே அவகாசமும், நிதானமும் தேவை! ஆனால் அரக்கப் பரக்க ஓடிக் கொண்டும், மாற்றங்கள் செய்து கொண்டும் உள்ள தற்போதைய சூழலில் பௌன்சரையும் பந்தியில் அமர்த்தி சொதப்பிடக் கூடாதே என்ற தயக்கத்தில் – ஜூரிடவுணின் ஒற்றைக்கரத்தாரை அடுத்த மாதத்திற்கு transfer செய்து விட்டேன். அவரிடத்தில் ஏற்கனவே தயாராகியிருந்த ‘மேஜிக் விண்ட்‘ இடம்பிடிக்கிறார் – ஒரு 96 பக்க முழு வண்ண சாகஸத்தோடு! இது மே.வி.யின் ஆல்பம் # 2 போல விட்டலாச்சார்யா பாணிக் கதையல்ல; நார்மலானதொரு ஆக்ஷன் த்ரில்லரே! இதோ- அதன் ராப்பர் – ஒரிஜினல் சித்திரத்தோடே – துளியும் மாற்றங்களின்றி! 

தொடரும் கதைகளைப் படித்திருக்கும் தைரியத்தில் இந்தத் தொடர் மெதுமெதுவாய் வேகம் பிடிக்கும் ஜாதி என்பதை சொல்லிக் கொள்கிறேன்! 

ஈரோட்டில் வெள்ளி மாலை முதல் புத்தக விழா துவங்கியுள்ளது! நாம் ஸ்டால் நம்பர் 152ல் உள்ளதும் ஏற்கனவே நீங்கள் அறிந்த விஷயம் தானே? சென்றாண்டு LMS வெளியீடு ; ‘மின்னும் மரணம்‘ முன்பதிவு என்ற இரட்டை அதிரடிகள் நம் திட்டமிடல்களில் இருந்த காரணத்தால் – காற்றிலொரு மின்சாரம் கலந்திருப்பதை உணர முடிந்தது! அதனை இம்முறையும் எதிர்பார்த்திருக்கக்கூடிய நண்பர்கள் சற்றே ஏமாற்றம் கொண்டிருக்கலாம் தான்; ஆனால் இந்த ஸ்மர்ஃப் சடுகுடு நாம் துளியும் எதிர்பாரா நிகழ்வு! இது மட்டும் நம் நேரங்களை இத்தனை தூரம் ‘ஸ்வாஹா‘ செய்யாதிருப்பின் ஆகஸ்ட் ஒன்றிற்கு CCC-ன் ரிலீஸோடு நாம் ஈரோட்டில் ஆஜராகியிருந்திருப்போம்! தவிர – சென்ற முறை LMS வெளியீடு மாதங்கள் பலவற்றிற்கு முன்பே ஈரோட்டை நோக்கிய திட்டமிடலில் உருவானது எனும் போது அதனை இம்முறையும் duplicate செய்திட நாம் முயற்சித்திருந்தால் ரொம்பவே செயற்கையாக இருந்திருக்கும். லயன் 250வது இதழை நெய்வேலி புத்தக விழாவில் ரிலீஸ் செய்திடலாமென்ற அவாவில் ஜுலை வரை தள்ளிக் கொண்டே வந்திருந்தோம் ! ஆனால் ஜுன் நடுவே நமது விண்ணப்பம் நிராகரிக்கப்பட்டதென்று நெய்வேலியில் நிர்வாகிகள் தகவல் சொன்ன போது நாம் செய்திடக் கூடியது அதிகமிருக்கவில்லை. So - ஈரோட்டில் “அதிர்வெடி ரிலீஸ்“ என்று இம்முறை இல்லாதிருப்பினும் – CCC சுவாரஸ்யத்தில் துளியும் குறை வைத்திடாதென்ற நம்பிக்கை எனக்குள்ளது ! நான்கு மாறுபட்ட Cartoons – நிச்சயம் ரசிக்கவொரு அழகான தருணமாய் இருந்திடும் ! 

Looking beyond ஆகஸ்ட் - பிரயாணங்களின் மத்தியில் கிடைத்த அவகாசங்களில் 2016-க்கான அட்டவணையினை முழுமையாகப் பரிசீலிக்க முடிந்தது ஒரு highlight. உங்களின் ‘டெக்ஸ்‘ suggestions ; ஜுனியரின் சிலபல சிந்தனைகள் ; நமது ஏஜெண்ட்களின் விற்பனை feedback என கிட்டிய inputs-களை ஒருங்கிணைத்து – இந்த முறை ஒரு ஜனரஞ்சக அட்டவணையைத் தயாரித்துள்ளேன் ! வழக்கம் போலவே இந்த முன்னோட்டங்கள் அடங்கிய booklet அக்டோபரின் இறுதியில் உஙகள் கைகளை வந்தடையும் ! Maybe – just maybe நமது அட்டவணையினை வெளியிடுவதை ஒட்டிய தருணத்தில் ஏதேனும் புத்தக விழா அமைந்திடும் பட்சத்தில் அந்நகரில் ஹோட்டல் ஹால் ஒன்றினை ஏற்பாடு செய்து நமது சந்திப்பு + 2016-ன் அட்டவணை பற்றிய கலந்துரையாடலை வைத்துக் கொள்ளலாம்! இன்னமும் இரண்டரை மாதங்கள் உள்ளன என்ற போதிலும் – என் தலைக்குள் ஓடிய சிந்தனையின் பதிவு மாத்திரமே இது! ஒவ்வொரு ஆண்டும் இதனை ஒரு வழக்கமாகக் கூட கொள்வதும் ஒரு possibility தான்! இத்தருணத்தில் சென்னையில் நமது நண்பர் துவக்கியுள்ள Three Elephants புத்தக கடையானது நமது சந்திப்புகளுக்கு ஒரு சுலபக்களமாகவும் இருக்க வாய்ப்புள்ளது என்பதை சொல்லிடலாம் ! அவர்களது வியாபாரத்துக்கு இடைஞ்சல் இல்லா வகையில் தேதியையும், நேரத்தையும் முன்கூட்டியே  நாம் சொல்லி விட்டால் – நாம் அங்கே சந்திக்க இயன்ற ஏற்பாடுகளை செய்து தர நண்பர் தயாராக உள்ளார்! So - சென்னையின் மையத்தில், நாம் சந்தித்துக் கொள்ள ஒரு அழகான இடம் உள்ளதென்பதை நம் நினைவுகளுக்குள் இருத்திக் கொள்ளவோமாக!

வழக்கம் போல இம்முறையும் மற்ற பணிகளின் பெயரைச் சொல்லி விமானத்தில் ஏறி அமர்ந்தாலும் – கிடைக்கும் சிற்சிறு அவகாசங்களுக்கிடையே படைப்பாளிகளை சந்திக்கும் மின்னல் ஓட்டங்களை தொடர்ந்திடவே செய்தேன்! இம்முறையோ என் தலைக்குள் 2016ன் அட்டவணையின் blueprint தயாராகியிருந்த நிலையில் – புதிதாய் கதைகளைத் / தொடர்களை ஆராய்ச்சி செய்கிறேன் பேர்வழி என்ற வேகத்தில் குழப்பங்களை விலை கொடுத்து வாங்கக் கூடாதென்ற வைராக்கியம் நிறையவே இருந்தது! ஆனால் அதெல்லாம் அவர்களது வளாகத்தினுள் நுழையும் வரைக்கும தானே?! அவர்கள் பங்கிற்கு இந்தாண்டின் மூன்றாம் quarter-க்கான வெளியீடுகளை சரமாரியாக என் முன்னே அடுக்கி வைத்து- எனது மனவுறுதியை சோதித்தே தீருவேன் என்று அடம்பிடித்தனர்! அதிலும் குறிப்பாக லார்கோ பாணியில் ஒரு இளம் கோடீஸ்வரரின் கதையானது – அட்டகாசமான சித்திரத் தரத்தோடு என்னைக் கடுமையாய் சபலப்படுத்தியது ! 

“Le Redempteurs” என்ற பெயரில் துவங்கியுள்ள இந்தத் தொடரின் முதல் ஆல்பம் மாத்திரமே தற்போதைக்கு வெளிவந்துள்ளது! மூன்று ஆல்பங்கள் கொண்டதொரு சைக்கிளாக இது இருந்திடும் என்று சொன்னவுடன் என் கடவாய் ஜலப்பிரவாகத்தை லேசாகக் கட்டுக்குள் கொண்டு வந்து விட்டு – முதல் சுற்று முடிந்தான பிறகு ஒட்டுமொத்தமாய் இவற்றை வெளியிட திட்டமிட்டுக் கொள்கிறோம் என்று சொல்லி வைத்தேன். அவர்களது திட்டமிடல்களும் ஆல்பத்தின் வரவேற்பை சம்பந்தப்படுத்தியே இருப்பதால் – ‘வானமே எங்கள் வீதி‘ கதையாக – நட்டநடுவில் ‘தொடரும்‘ பலகையை மாட்டி விட வேண்டாமே என்று பார்தேன்!

XIIIன் இரத்தப்படலத்தின் பாகம் 24- இரண்டாம் சுற்றின் இறுதி ஆல்பமாக இருந்திடும் என்றும் – நவம்பர் 30--ல் வெளிவரும் என்றும் சொன்னார்கள் ! லேசாக தைரியத்தைத் திரட்டிக் கொண்டு "இது மெய்யாலுமே இறுதிப் பாகம் தானா ?" என்று கேட்டு வைத்தேன் ! புன்னகை மாத்திரமே எனக்குப் பதிலாகக் கிட்டியது ! நண்பர் "XIII -ன் விற்பனை எப்படிப் போகிறது ? " என்றும் கேட்ட பொழுது காங்கிரஸ் சின்னத்தைக் காட்டினார்கள் - "5 இலட்சம்' என்பதை உணர்த்திட! 15,000 ஆல்பங்கள் விற்றாலே sequel ; பாகம் 2/3 என்ற நடை போடுவது பதிப்புலகில் சகஜமெனும் நிலையில் அரை மில்லியன் விற்பனை காணும் ஒரு மனுஷனை அத்தனை சீக்கிரமாய் VRS கொடுத்து அனுப்பி விடுவார்களா - என்ன ? என்று மனசுக்குள் நினைத்துக் கொண்டேன் ! அதற்கும் மேலாக அதே topic-ல் சஞ்சாரம் செய்வது நம் சிரத்துக்கு சேதம் ஏற்படுத்தக்கூடும் என்பதால் சட்டென்று வேறு பக்கமாய்க் குதிரையைத் திருப்பினேன் ! பெட்டி பெட்டியாய்க் குவிந்து கிடந்த வேற்று மொழிப் பதிப்புகளையும் புரட்டிக் கொண்டே அவர்களிடம் அதைப் பற்றியும் கேட்டுக் கொண்டிருந்தேன் ! இத்தாலிய மொழியில் வெளிவந்து கொண்டிருந்த ரிப்போர்டர் ஜானி கதைகள் செம classy ஆக இருப்பதைப் பார்க்க நேரிட்டது ! அதனில் ஒரு பிரதியையும் கேட்டு வாங்கி வந்தேன் - ஏதாவது நமக்கு உதவிடும் விஷயங்கள் கிட்டுமா என்று பார்த்திட !

And எப்போதும் போலவே நமக்கு மொழிபெயர்ப்புகளில் உதவிடும் பொருட்டு - ஆங்கிலப் பதிப்புகளை ஏன் பைக்குள் திணிக்க அவர்களும் ஆன உதவிகள் செய்தனர் ! அது போதாதென்று - புதிதாய் ஒரு 4 பாக ஆக்ஷன் திரில்லர் one -shot  கதை ஆங்கிலப் பதிப்பாகிட பூர்வாங்க ஏற்பாடுகள் நடந்து வருவதாகவும், இப்போதைக்கு ஆங்கில ஸ்கிரிப்ட் மட்டுமே தயாராகி உள்ளதாகவும் சொல்லி - அதனிலிருந்து ஒரு பிரிண்ட் அவுட்டும் எடுத்துத் தந்தனர் ! இதழே தயார் ஆகும் முன்பாய் அதன் ஸ்க்ரிப்டை நம்மிடம் தந்திடத் தயங்கா அவர்களது பெருந்தன்மைக்கு ஒரு வண்டி நன்றிகளைச் சொல்லி விட்டு நான் புறப்பட்டேன் - புஜம் வலிக்க புத்தக சுமையோடு ! அவற்றை ஊர் திரும்பும் வழியிலேயே படித்ததில் தலைக்குள் ஒரு பரிச்சயமான ரீங்காரம் எழத் தொடங்கி விட்டுள்ளது ! அந்த ரீங்காரத்தோடே கால் கட்டை விரல்களை ரசிக்கும் ஒரு ஆர்வமும், உத்வேகமும் எழுவதையும் உணர முடிகின்றது ! "ஆண்டவா...என்னைக் காப்பாற்றும் ; என்னிடமிருந்து நம் வாசகர்களையும் காப்பாற்றும் !" என்ற சிந்தனை தான் தலைக்குள் வழிநெடுகிலும் ! 

Before I sign off,  - இந்த நாட்டையே கனவு கண்டிட ஊக்குவித்த நிகரில்லாத் தலைவரின் மறைவைப் பற்றி......! ஒரு மகாமனிதரின் மறைவை எண்ணி ஒட்டு மொத்தமாய் ஒரு தேசமே பிரவாகமாய்க் கண்ணீர் வடித்த போதும், அவரது அசாத்திய வாழ்க்கைப் பயணத்தைப் பற்றிப் படிக்க இயன்ற போதும்  தான் 'இப்படியும் ஒரு புனிதர் நம்மிடையே வசித்து வந்திருக்கிறாரே..!' என்பது பதிவானது !  ஜனத்தொகையில் ஒன்று குறைவு  ; -1 என்பது தான் நிஜக் கணக்காக இருப்பினும், அந்த ஒன்றின் ஈடு ஒரு கோடிக்கும் அதிகம் என்பதும் புரிந்தது ! இறுதி வரை தான் நேசித்ததைச் செய்யும் பாக்கியம் ஆண்டவனின் செல்லப் பிள்ளைகளுக்கு மாத்திரமே சாத்தியம் போலும் ! நமக்கெல்லாம் மேன்மைதகு கலாம் அவர்களின் பிரிவு ஒரு தீரா இழப்பாய் இருப்பினும், தனது பிரியமான புதல்வர்களுள் ஒருவர்  தன மடியிலேயே துயில் பயில தஞ்சம் புகுந்ததில்  ஆண்டவருக்கு நிச்சயம் சந்தோஷமே மிஞ்சியிருக்கும் ! RIP Sir  ! You will forever guide this nation !