பொங்கலோ பொங்கல் !!

நண்பர்களே,

வணக்கம். பொங்கல் நல்வாழ்த்துக்கள் !! இல்லமெங்கும் சந்தோஷமும், வளமும் செழிக்கட்டும் ! கரும்பும், பொங்கலும், புதுப்படமுமாய் கலகலக்கும் ஜாலியான இந்நாளில் நமது காமிக்ஸ் இதழ்களுக்கும் ஒரு ஓரமாய் இடமிருப்பின் - சூப்பர் !! இந்த வேளையில் நொய்-நொய் என்று ப்ளேடு போடாமல் என்ன எழுதுவதென்று யோசிக்கிறேன் !! "பொங்கல்" என்றாலே "பொங்கல் மலரும்" மலர்ந்திடும் அந்நாட்களே மனதில் நிழலாடுகின்றன ! அதுவும் நமது லயனுக்கு "தலைப் பொங்கலாய்" அமைந்த "கொலைப்படை" இதழ் பற்றிய ஞாபகங்கள் as always பசுமையாய் தொடர்கின்றன தலைக்குள் ! அந்த இதழைப் பற்றியும், அதன் தயாரிப்புப் பின்னணி பற்றியும் ஏகமாய் எழுதி இருக்கிறேன் என்பதால் மறுக்கா அதே பாட்டைப் பாடப் போவதில்லை  ! 

மாறாக - "மாதம்தோறும் 4 இதழ்கள்" என்ற இன்றைய template-க்கு பிள்ளையார் சுழி போட்டுத் தந்த 1987-ன் தை மாதத்தை நோக்கி எண்ணக் குதிரைகளை ஓடச் செய்ய நினைக்கிறேன் !! இன்னும் எத்தனை தூரம் நாம் பயணம் போனாலும் சரி, எத்தனை புது உயரங்களை உணர்ந்தாலும் சரி - 20 வயதுக் கொயந்தை பைய்யனாய் முப்பது ஆண்டுகளுக்கு முன்பாய் இதே ஜனவரியில் அனுபவித்த ஒரு த்ரில்லை எட்டிப் பிடிக்க முடியாதென்றே சொல்லுவேன் !! அந்நேரத்துக்கு முத்து காமிக்ஸின் நிர்வாகம் என் கைகளுக்கு வந்திரா நிலையில் - அதுவுமே என் கண்களுக்கொரு போட்டிக் கம்பெனியே !! அச்சூழலில் - லயன் காமிக்ஸ் ; திகில் ; ஜுனியர் லயன் காமிக்ஸ் & மினி லயன் - என 4 இதழ்களோடு களமிறங்கத் துணிந்தது - அசட்டுத் தைரியத்திலா ? வெற்றிகளை உணர்ந்த குசும்பிலா ? அல்லது புதுசையெல்லாம் உங்களிடம் காட்ட புதுப் புது தடங்கள் வேண்டுமே என்ற ஆர்வக்கோளாறினாலா ? - சொல்லத் தெரியவில்லை இன்றளவிற்கும் !! எது எப்படியோ - அலிபாபாவின் பொக்கிஷக் குகையைத் திறந்து பார்த்தவனின் வாயைப் போல என்னதும் அகலமாய் விரிந்து கிடந்தது - பிரான்க்கோ-பெல்ஜியப் பேழையை மாத்திரமின்றி, இத்தாலிய கதைச் சுரங்கத்தினையும் திறக்க முடிந்திருந்த அக்கணங்களில் !! 

பற்றாக்குறைக்கு நமது 'தானைத் தலைவர் இஸ்பைடரின்' புதுப் புதுக் கதைகளையும், சட்டித் தலையனின் மெகா சாகசங்களையும் பொட்டலம் போட்டு வாங்கி வந்திருக்க -'ஐயோ..இந்த தெருவை வாங்கிப் போடவா ? இந்த ரோட்டை விலை பேசவா ? " என்ற கவுண்டரின் நமைச்சல் தான் எனக்குள்ளும் குடியிருந்தது ! மாதம் ஒன்றோ-ரெண்டோ தான் இதழ்கள் ; இதனில் குறைந்த பட்சமாய் 6 இடங்களை - ஸ்பைடர் + ஆர்ச்சி கூட்டணிக்குத் தந்தே தீர வேண்டிய கட்டாயம் எனும் போது எஞ்சிக் கிடைக்கும் 18 இதழ்களைக் கொண்டு நாம் அன்றைக்கு சீட் தர வேண்டியிருந்த கட்சித் தலைவர்களின் பட்டியல் பின்வருமாறு :

ரிப்போர்ட்டர் ஜானி

ப்ரூனோ பிரேசில்

கேப்டன் பிரின்ஸ்

ரெட்டை வேட்டையர்

லாரன்ஸ் & டேவிட் 

இரும்புக்கை நார்மன்

இரும்புக்கை உளவாளி

லக்கி லூக்

சிக் பில்

கராத்தே டாக்டர்

மறையும் மாயாவி ஜாக் ( ஹி..ஹி..ஞாபகம் இருக்கோ?)

சுஸ்கி & விஸ்கி 

இவர்கள் தவிர லெட்டர்பேட் கட்சிகள் ஏகமாய் இருக்கத் தான் செய்தன - ஸ்பைடர் குள்ளன் ; செக்ஸ்டன் பிளேக் ; மீட்போர் ஸ்தாபனம் etc etc என்று !! So ஒரு மெகா கூட்டணி ரெடி ; ஆனால் போட்டி போடும் களமோ மிகச் சொற்பமே என்ற நிலையில் துளியும் தயக்கம் தோன்றிடவில்லை - ஜுனியர் லயன் காமிக்ஸ் & மினி லயன் என 2 புது குட்டிகளை உலவ அனுமதிக்க !! அதுவரைக்கும் கலரில் நாம் முயற்சித்திருந்தது 1986 கோடை மலரில் - "ஈகில்மேன்" கதையினை மட்டும்தான் என்று ஞாபகம் ! பாக்கெட் சைசில், நியூஸ் பிரிண்டில் அந்த வர்ணங்களை இப்போது பார்க்கும் போது சிப்பு சிப்பாய் வந்தாலும், அதுவே அந்நாட்களில் நமக்கொரு அசாத்திய உயரம் என்பதை மறுப்பதற்கில்லை ! அந்த வண்ணப் பக்கங்களை புரட்டோ புரட்டென்று புரட்டுவதிலேயே என் விரல் ரேகைகள் தேய்ந்தது ஒருபக்கமெனில், "இந்த பாக்கெட் சைஸ் ; வண்ணம்" என்ற concept-ஐ நிரந்தரமாக்கினால் என்னவென்றே ஆர்வம் தலைதூக்கியது இன்னொரு பக்கம் !! 

அதிலும் எங்கோவொரு பழைய புத்தகக் கடையில் லுக்கி லூக்கின் WESTERN CIRCUS ஆங்கிலப் பதிப்பைப் படித்த நாள்முதலாய் அதனை தமிழில் வெளியிட்ட தீரும் ஆசை ஒரு வெறியாகவே தலைக்குள் உருமாறியிருந்தது ! விலையும் அந்நாட்களில் கட்டுக்குள் இருத்தல் அவசியமெனும் போது - ரொம்பவெல்லாம் யோசிக்க இடமிருக்கவில்லை ! "விலை ரூ.2 தான் ; முழு வண்ணம் தான் ; இதனில் எந்த compromise-ம் கிடையாது ; மிச்சம் மீதிக்கு நீ என்ன வேணும்னாலும் செஞ்சுக்கோடாப்பா !! என்று தலை சொல்லிவிட, ஒரு நூறு தடவை கீழிருந்து மேலாய் costing போட்டுக் கொண்டேயிருந்தேன் ! 25 % ஏஜெண்டுகள் கமிஷன் + இன்னுமொரு 5 % புத்தகங்களை அனுப்பும் சரக்கு கட்டண வகையில் எனும் போது - நமக்கு மிஞ்சுவது புக் ஒன்றுக்கு ரூ.1 -40 மட்டுமே எனும் போது ஆந்தை முழி - பிசாசு முழியானது தான் மிச்சம் ! அன்றைக்கெல்லாம் இப்போதைப் போல ஒரே நேரத்தில் 4 வர்ணங்களை அச்சிடும் இயந்திரங்களும் சரி, pre press செயல்முறைகளும் சரி, நம்மிடம் லேது எனும் போது ஒற்றை ஒற்றை கலராய் தான் அச்சிட்டாக வேண்டும் ! பொதுவாய்ப் பொறுமையெல்லாம் போயே விடும் மாத இறுதியில் 'லொடக்கு-லொடக்கு' என்று ஒவ்வொரு வர்ணமாய் அச்சாவதைப் பார்க்கும் போது ! ஆனால் ஜுனியர் லயனின் அந்த முதல் all color இதழை அச்சிடும் சமயங்களில், புதுசாய் போட்ட குட்டிகளை கண்ணிமைக்காது பார்த்துக் கொண்டிருக்கும் பூனையைப் போல மிஷின் ஹாலிலேயே கிடப்பேன் - ஒவ்வொரு கலரும் ஏறுவதை ரசித்துக் கொண்டே ! அதுமாத்திரமின்றி அப்போதுவரைக்கும்  கார்ட்டூன்கள் என்றால் மிஞ்சி மிஞ்சி விச்சு & கிச்சு ; கபிஷ் இத்யாதிகள் தான் கைதூக்கி நிற்கும் மொழிபெயர்ப்பு னுபவம் என்ற வகையில்  ! So முதல்தடவையாக ஒரு முழுநீள கார்ட்டூன் கதையை மொழிபெயர்த்ததும், அது எவ்விதம் அமைய போகிறதோ ? என்ற த்ரில்லுமே தலைக்குள் ததும்பிக் கிடந்தது ! அப்போதெல்லாம் பைண்டிங் பணிகள் நம்மிடத்திலேயே தான் நடைபெறும் என்பதால் அச்சு முடிந்த அரை மணிநேரத்துக்கெல்லாமே ஒரு மாதிரி இதழைத் தூக்கிக் கையில் ஏந்த சாத்தியமாகியது !! அதிலும் ஒரு நீளமான ஹாட்லைன் மாதிரி ஏதோவொன்றை முதல் பக்கத்தில் எழுதி வைத்திருக்க - அதை புதுசாய்ப் படிப்பது போல் வரி விடாது படித்துப் படித்துப் பார்த்துக் கொண்டேன் ! அட்டைப்படத்தில் ஏதாச்சும் வித்தியாசம் காட்ட வேண்டுமே என்று புள்ளிப் புள்ளியாய் நர்லிங் செய்ததும் சரி ; இதழை ஏகப் பெருமிதத்தோடு படைப்பாளிகளுக்கு அனுப்பியதும் சரி - lifetime memories !! அன்றைக்கே hardcover ; அட்டகாச தரம் என்ற கப்பலில் 'பூவாய்ங்' என்று ஹார்ன் அடித்தபடிக்கே பயணம் செய்தவர்களுக்கு அருகாமையில் ஒரு தம்மாத்துண்டு தோணியை  ஒட்டிக் கொண்டே - "எப்பூடி ?" என்று கேட்கிறோமே என்ற லஜ்ஜையெல்லாம் அன்றைக்கு எழவேயில்லை எனக்கு - simply becos நமக்கு அன்றைக்கு அந்தத் தோணியே ஒரு cruiser-க்கு சமானம் ! 

இந்தக் கூத்து ஒருபக்கமெனில் - அதனில் பாதி விலையில் "மினி-லயன்" என்ற பெயரில் இன்னொரு பாக்கெட் சைஸ் ஆக்ஷன் கதைவரிசை கச்சை கட்டி நின்றது ! ACTION லைப்ரரி என்றதரு fleetway வரிசையினில் வெளியான கதைகளை அங்கே களமிறக்கியிருந்தோம் ! வெற்றி-தோல்விகள் என்ற கணக்குகளுக்கெல்லாம் அப்பால் நின்று அந்த நாட்களை இன்றைக்கு நினைவுகூர்ந்தால் - இந்தப் பயணத்தில் நாமெல்லாம் ஒன்றிணைந்த இரகசியம் மெது மெதுவாய்ப் புரிந்த மாதிரியுள்ளது ! அன்றைக்கே கனவு காணும் உரிமைகளை எனக்குத் தந்துள்ளீர்கள் ; அந்தக் கனவுகள் உங்களது கனவுகளாகவும் உருமாற்றம் செய்து கொள்ளும் பெருந்தன்மை காட்டியுள்ளீர்கள் ; காலப்போக்கில் உங்கள் கனவுகளே என் கனவுகளாகவும் மாறிப் போகும் மாயாஜாலம் நிகழ்ந்துள்ளது ! இந்த மந்திர நிகழ்வுகளுக்கெல்லாம் துவக்கப் புள்ளி 30 ஆண்டுகளுக்கு முன்பான ஒரு தை மாதத்தின் நாட்களிலும் புதையுண்டு இருக்கக்கூடும் என்று நினைத்துப் பார்க்கும் போது சந்தோஷமாகவும், மலைப்பாகவும் உள்ளது - நாட்களது ஓட்டத்தை எண்ணி !! "மனித வேட்டை" என்று திகிலில் ஒரு த்ரில்லரும், "பழி வாங்கும் பாவை" எனும் TEX சாகசமும்  (அதுவும் பாக்கெட் சைசில் !!) அந்த மாதத்தை நிறைவு செய்திருக்க, மறக்க இயலா நாட்களாய் அமைந்து போயின அவை !! Phew !! 360 மாதங்கள் ஓடிவிட்டன !! 

Back to real time - இதோ காத்திருக்கும் அடுத்த 'தல' சாகஸத்தின் அட்டைப்பட preview ! மீண்டும் முன் + பின் - ஒரிஜினல் டிசைன்கள் - லேசான வர்ண மாற்றங்களோடு மட்டும் ! And உட்பக்கங்களில் சித்திர துல்லியம் தொடர்கிறது - இன்னுமொரு ஓவியரின் கைவண்ணத்தில் ! தெறிக்கச் செய்யும் ஆக்ஷன் காத்துள்ளது guys !! அது மட்டுமன்றி - பிப்ரவரியில் COLOR TEX பிரீ இதழும் உண்டு - ABCD சந்தா நண்பர்களுக்கு ! இப்போது வரைக்கும் சந்தாவில் இணைந்திருக்க நண்பர்கள் இனியும் தாமதிக்க வேண்டாமே - ப்ளீஸ் ? 

சென்னைப் புத்தக விழாவினில் ஆரம்ப 2 நாட்கள் நமக்கு விற்பனையில்  மிதமே என்றாலும்  நேற்றைக்கு அட்டகாச sales ! தொடரும் விடுமுறைகளிலும் விற்பனை களை கட்ட நமக்காக வேண்டிக் கொள்ளுங்களேன் guys - கிட்டங்கியின் சுமை ஆளை அசத்துகிறது !! Before I sign off - இதோ நம் ஆபீசில் இன்று காலை நம்மவர்கள் பொங்கல் வைத்து அசத்திய காட்சி ! இது எனக்கு 33 -வது வருஷம் பணியில் பொங்கல் கொண்டாடும் வகையில் ; ஆனால் முதன்முறை இது போலொரு அழகான பொங்கலை கொண்டாடுவதில் !! Lovely start to my day !! Bye all !! See you around !

 PHOTOS FROM CHENNAI BOOK FAIR - courtesy நண்பர் k v ganesh !!