Powered By Blogger

Tuesday, April 28, 2020

கொஞ்சம் ஓவரோ ?

நண்பர்களே,

வணக்கம். "கொஞ்சம் ஓவராப் போயிட்டோமோ ? போவோம்ம்ம்ம் ..போயித் தான் பாப்போமே  !!" என்ற டயலாக் தான் நினைவுக்கு வருகிறது ! ஏனென்கிறீர்களா ? மார்ச்சின் ஒரு மாலைப் பொழுதில் ஆளாளுக்கு பால்கனிகளிலிருந்தும், வீதிகளில் அணிவகுத்தும், கரவொலி எழுப்பிய அந்த நாள் துவக்கம், இன்று வரையிலும் நாம் போட்டுத் தாக்கியிருக்கும் பதிவுகளின் எண்ணிக்கையினைப் பார்த்த பின்னே எழுந்த நினைப்புத் தான் - மேற்படி டயலாக் !! 

*மார்ச் 21 முதல் : 5 பதிவுகள் (மார்ச் மாதத்தினில்)

*ஏப்ரலில் இது வரைக்கும் : 11 பதிவுகள்

ஆக 37 நாட்களில் 16 பதிவுகளைப் போட்டுப் புரட்டி எடுத்திருக்கிறோம் blogger தளத்தை !! And இதோ இன்னும் கொஞ்சம் stats - உங்களின் லூட்டிகளை highlight செய்திட :

*இந்தப் 16 பதிவுகளுக்கென நீங்கள் இது வரையிலும் நல்கியுள்ள pageviews : 27499 !!

*இந்தப் 16 பதிவுகளுள் நீங்களும், நானும் செய்துள்ள பின்னூட்டங்களின் நம்பர் : 4558 !!

மேற்படி பின்னூட்ட எண்ணிக்கையில் நமது திருச்செந்தூர் பாணபத்திரர் ஒரு 300-க்குப் பொறுப்பேற்றிருக்கக் கூடும் ; அரசவைக்கு சமீபத்தில் தேர்வாகியுள்ள சேலத்துக் குமாரர் ஒரு 700-க்குப் பொறுப்பேற்கக்கூடும் ! பதில் சொல்கிறேன் பேர்வழி என்று நானொரு 500 பின்னூட்டங்கள் ? பாக்கி மூணாயிரத்தை ஆளும், பேருமாய்ச் சேர்ந்து லவட்டியுள்ளீர்கள் ! அதிலும் லேட்டாய் ஆஜராயினும், லேட்டஸ்ட்டாய் ரகளை செய்திடும் 'உப்மா' புகழ் sis ஒரு special mention பெற்றிடுகிறார்  ! 

ரைட்டு...இந்த லாக் டௌன் தொடருமா ? அல்லது தளருமா ? என்ற சஸ்பென்ஸுக்கு மத்தியினில் இந்த உ.ப.வில் பொழுதைப் போக்க இதோ சில கேள்விகள் உங்களிடம் :

1.ஒரேயொரு நாள் மட்டும் இந்த எடிட்டர் குல்லாயை உங்கள் தலைகளில் அணிந்து கொள்ளும் வாய்ப்புக் கிட்டினால் - நீங்கள் செய்திடக்கூடிய 3 செயல்கள் என்னவாக இருக்குமோ ? 

2.ஒரேயொரு சாகசத்தினில் மட்டும் TEX-ன் துணையாக கார்சனுக்குப் பதிலாய் வேறு நாயகர் / நாயகி யாரையேனும் தேர்வு செய்திடும் உரிமை உங்களுக்கு வாய்த்தால் - யாரைத் தேர்வு செய்வீர்கள் ? And ஏன் ? (நமது அணிவகுப்பின் மக்களில் இருந்து மட்டுமே தேர்வுகள் ப்ளீஸ் ) 

3.இந்த லாக் டௌனில் பூரி போட்ட நேரங்கள் நீங்கலாய் ; தோசை வார்த்த வேளைகள் நீங்கலாய் ; பாத்திரங்கள் துலக்கிய தருணங்கள் நீங்கலாய் (ஆண்குலம் தானுங்கோ ) - எதையேனும் வாசிப்பது ; எங்கேனும் குறட்டை விடுவது என்று நாட்கள் ஓடுகின்றன ! அதன் மத்தியில் போனில் உள்ள பட்டியலைப்  பார்த்து - யாரென்றே மறந்திருக்கக்கூடிய பெயர்களுக்கும் போன் அடித்துப் போடும் மொக்கைகளும் அடங்கும் தானே ? என் கேள்வி : கீழ்க்கண்ட நமது ஹீரோ / ஹீரோயினிக்களுக்கு போன் அடித்து  ஒரேயொரு கேள்வி கேட்கும் வாய்ப்புக் கிட்டினால் - இன்னா கேப்பீங்கோ  ? மறுமுனையில் இருப்போர் இவர்களாக இருக்கும் பட்சத்தில் : 

XIII
சிக் பில்
ஸ்பைடர் 
மாடஸ்டி 
ஸ்டெல்லா  (ஜானி நீரோவின் செகரட்டரி )
லார்கோ 

Bye guys...see you around !! Stay Safe !!

Saturday, April 25, 2020

கலரில் ஒரு கனவு..!

நண்பர்களே,

வணக்கம். வீட்டிலிருந்து பணி செய்வோர் ; வீட்டம்மாவுக்கெனப்  பணி செய்வோர் ; நாட்டுக்கெனப் பணி செய்வோர் ; நாட்டு நடப்பைப் பேசியே நாக்குத் தள்ளச் செய்யும் பணி செய்வோர் ; மல்லாக்கப் படுத்து டிக்டாக் பார்த்திடும் பணி செய்வோர் ; வாசலில் அமர்ந்தே வாட்சப்பில் வடாம் காயப்போடும் பணி செய்வோர் ; இத்யாதி...இத்யாதி என்று இந்த லாக்டௌன் நாட்கள் பலதரப்பட்ட மனுஷாளை இந்தச் சமூகத்துக்கு வெளிச்சம் போட்டுக் காட்டி வருகிறது ! நாமோ 'பொம்மை புக் புள்ளிங்கோ' என்ற அடையாளத்தையே மறந்தார்களாய் ஜாலியாய் அரட்டைகளுள் மூழ்கிக் கிடக்க, இந்த வாரத்திலாவது காமிக்ஸ் பக்கமாய் வண்டியைத் திருப்புவோமென்று நினைத்தேன் ! And கடந்த பதிவினில் சொன்னது போல, 2013-ல் வெளி வந்த நமது Hot & Cool ஸ்பெஷல் இதழை அலசுவது மாத்திரமன்றி, நண்பர் காமிக்லவர் ராகவன் suggest செய்த  இன்னொரு back in time & behind the scenes படலத்தினுள் குதித்திடவும் முயற்சிக்கலாம் ! அந்தப் பரிந்துரை இதுவே : //start with behind the scenes of Super Circus !//  இந்த ரிவர்ஸ் பெடல் போடும் படலங்கள் எல்லாமே நமக்கு மிர்ணா ரசிக மன்றத்தில் சேர்வதுக்கு இணையான குஷி மேட்டர் என்பதால் பின்னோக்கிய அந்தப் பயணத்தோடே ஆரம்பிப்போமே !  

1987 ஜனவரி !! கிழக்கிந்தியக் கம்பெனியின் சாம்ராஜ்யத்தை விரிவு செய்து கொண்டே சென்ற வெள்ளைக்கார துரைமார் கூட அந்நாட்களில் அத்தனை கெத்து காட்டியிருப்பார்களா ? என்பது சந்தேகமே !! ஆனால் இந்த 20 வயது தொழிலதிபர் cum எடிட்டர் அந்நாட்களில் ஆபீசுக்குப் பயணமாகும் சமயமெல்லாம், உள்ளுக்குள் 'ஒரேயொரு எடிட்டர் வரார் ; ஒரேயொரு எடிட்டர் வரார் !' என்ற சைரன் அலறாத குறை தான் ! ஏன் என்கிறீர்களா ? ஒன்றல்ல - இரண்டல்ல - மூன்றல்ல - மொத்தம் நான்கு இதழ்களை மாதா மாதம் வெளியிடும் வாய்ப்பு ஒரு குழந்தைப் பையனுக்குக் கிடைத்திட்டால், லோகமே ஒரு சுந்தர பூமியாய்த் தென்படாது போகுமா - என்ன ? அந்நாட்களில், நமது பிரின்டிங் பிரிவினில் 2 ஷிப்ட்களில் விடிய விடிய  வேலைகள் ஓடிக்கொண்டிருக்கும் என்பதால், ஞாயிறு மதியம் வரைக்கும் நமது அலுவலக ஷட்டர்கள் உசக்கேயே தான் நிலைகொண்டிருக்கும் ! நிறைய இரவுகளில் ஆர்டிஸ்ட்கள் ; அச்சுக் கோர்க்கும் பிரிவினருமே ஓவர்டைம் வேலை செய்து கொண்டிருப்பார்கள் என்பதால், சதா நேரமும் திருவிழாக்கோலத்திலிருக்கும் அந்த  ஆபிசிலிருந்து தூக்கம் சொக்கும் வரையிலும் கிளம்பவே மனம் வராது ! So ஒவ்வொரு நாளுமே ராக்கூத்துக்களை 2 மணி வரைக்கும் அடித்த பிற்பாடு தான் வீட்டுக்கே திரும்புவேன் ! அதன் பலனாய் காலைகளில் 11 மணி வரையிலும் கண் திறக்காது ! என் தம்பி, தங்கை எப்போதோ ஸ்கூலுக்குக் கிளம்பிப் போயிருக்க, அப்பாவும், தாத்தாவும் வெவ்வேறு நேரங்களில் ஆபீசுக்குக் கிளம்பியிருக்க, நானோ பிடாரியாட்டம் தூக்கத்தில் லயித்துக் கிடப்பேன் ! நமக்கோ வீட்டில் எப்போதுமே ராஜமரியாதை தான்  ; இரு பெண்பிள்ளைகளுக்குப் பின்னே பிறந்த ஆண் வாரிசு என்பதில் துவங்கி, அந்நாட்களில் இங்கிலீஷ் மீடியத்தில் படித்த முதல் புள்ளையாண்டான் என்பதில் தொடர்ந்து ; பள்ளியிலும் topper ஆக இருந்து வந்த கெத்தும் கைகோர்க்க  - என்றைக்குமே வீட்டில் நமக்கு மருவாதி ஒரு மிடறு ஜாஸ்தியே ! அதுவும் டூ டைம்ஸ் கடல் கடந்து பயணித்திருக்கும் எடிட்டர்ஜீ என்ற அடையாளமும் புதுசாய் ஒட்டிக்கொண்டிருக்கும் சமயம் கேட்கவும் வேண்டுமா - என்ன ? இடியே விழுந்தாலும் பகாசுரனாய்த் தூங்கும் புள்ளையின் தூக்கம் கெட்டு விடக்கூடாதென்று அந்த அறைக்கதவைச் சாற்றி வைத்தே வீட்டுக்குள் அம்மா மாத்திரம் வேலை செய்து கொண்டிருக்க, சாவகாசமாய்க் குளித்துக், கிளம்பி, நண்பகலுக்குக் கொஞ்சம் முன்னே ஆபீசுக்குள் என்ட்ரி ஆவது வழக்கம் !

ஆபீசே மின்சாரம் பாய்ந்தது போல் பரபரத்துக் கிடக்கும் அந்நேரத்துக்கு ! ஏஜெண்ட்கள் பொறுமையாய்க் காத்துக் கிடப்பர் - புதுசாய் மலர்ந்திருந்த ஜூனியர் லயன் & மினி லயனுக்கு டெபாசிட் கட்டி புக்குகளை வாங்கிச் செல்ல ! ஏற்கனவே ஏஜென்சி கொடுத்திருக்கும் நகர்களிலிருந்துமே போட்டி ஏஜெண்ட்கள் வந்திருப்பார் - 'நான் அவரை விட ஜாஸ்தி புக் வாங்கிக்குறேன் ; எனக்கு ஏஜென்சியை மாத்தி விடுங்க !' என்ற கோரிக்கையோடு ! மதுரையில் 1800 பிரதிகள் விற்றுக் கொண்டிருந்த நிலையில், புதுசாயொரு முகவர் வந்திருந்தார் அவ்விதமாய் ! நானோ குசும்புக்கு "ஏற்கனவே இருக்கிறவர் 2500 புக் எடுக்கிறார் சார் ; மாத்துறதா எண்ணமில்லை !" என்று அள்ளி விட்டேன் ! அவரோ துளியும் திகைக்காமல்,  "அதனாலென்ன ? நான் 3000 எடுக்குறேன் !" என்றபடிக்கே பைக்குள் கைவிட்டு, அதற்கான டெபாசிட் தொகையினை எடுத்து மேஜையில் வைத்ததெல்லாம் நேற்றைக்குப் போலுள்ளது !! மதுரை மாநகருக்கு மட்டுமே 3000 பிரதிகள் விற்ற நாட்களையெல்லாம் இன்றைக்கு நினைவு கூர்ந்தால், பெருமூச்சு ; சிறுமூச்சு ; நடுமூச்செல்லாமே விடத் தோன்றுகிறது !! Those were the days !!

4 இதழ்களை அந்த ஜனவரியில் கட்டவிழ்த்திருப்பினும், என்னைப் பொறுத்தவரைக்கும் அவற்றுள் சிகரமாய் எனக்குத் தென்பட்டது -  இரண்டே ரூபாய் விலையில் முழு வண்ணத்தில் வெளி வந்திருந்த ஜூனியர் லயன் காமிக்சின் முதல் இதழான லக்கி லூக்கின் "சூப்பர் சர்க்கஸ்" தான் ! லக்கி லூக்குடனான எனது முதல்ப் பரிச்சயமே - WESTERN CIRCUS என்ற பெயரில் 1970-களின் ஏதோவொரு பொழுதில் EGMONT என்ற பெரும் குழுமம் வெளியிட்ட ஆங்கில இதழ் தான் ! In fact லக்கியின் தொடருக்கு நாம் உரிமைகள் வாங்கிடும் வரையிலும் நான் படித்திருந்தே ஒரே லக்கி சாகசமும் அதுவே ! ஏதோவொரு வடநாட்டுப் பயணத்தின் போது, ஏதோவொரு பழைய புத்தகக் கடையில் என் தந்தை 1980-களில் வாங்கி வந்த புக் அது ! இன்றைய CINEBOOK ஆங்கிலப் பதிப்புகளில் மொழிபெயர்ப்பு அட்டகாசம் என்றால், அந்நாட்களின் EGMONT-ல் கொஞ்சமும் குறைவிலா அதகளம் தான் ! டெக்ஸ் வில்லரை ஒரு சீரியஸான ; ஆக்ஷன் கௌபாயாய்ப் பார்த்திருந்தவனுக்கு - கார்டூனில் கலக்கும் இந்த ஒல்லிக்குச்சிக் கௌபாய், செம கில்லியாய்த் தென்பட்டார் ! அந்த ஒரே புக்கை திரும்பத் திரும்பப் படித்தவனுக்கு அந்த வசனங்களெல்லாம் உறக்கத்தில் கூட நினைவிருக்கும் என்ற அளவுக்கு மனப்பாடம் ! அதிலும் சினம் கொண்ட அந்த சர்க்கஸ் யானை ஊருக்குள் அந்த வைரப்பல் வில்லனை விரட்டிப் போகும் sequences அசாத்தியமாய் உள்ளுக்குள் குடியேறியிருந்தன ! So பின்னாட்களில் எடிட்டர் எனும் குல்லாயும் சாத்தியமாகி ; பிரான்க்கோ-பெல்ஜியக் கதைக் கதவுகளும் நமக்குத் திறக்கும் வாய்ப்பும் கிட்டிய பின்னே, இந்த கார்ட்டூன் சூப்பர் ஸ்டாரை தமிழ் பேசச் செய்யும் ஆசை ஏகமாய் உள்ளுக்குள் பிரவாகமெடுத்தது !
ஆனால் மிட்டாய்க் கடைக்குள் புகுந்த பச்சைப் புள்ளையாய்  1985-ல் கண்ணில் பட்ட அத்தனை ஆக்ஷன் கதைகளுமே ஒன்றுக்கொன்று போட்டி போடுவதாய்த் தென்பட, கதைத்தேர்வுகளில் அவற்றிற்கே முன்னுரிமை தந்திடத் தோன்றியது - அந்த முதல் வருஷத்தில் ! And let's not forget : அந்த நாட்களில்  கபிஷ் ; விச்சு & கிச்சு ; ராமு & சோமு போன்ற பக்க நிரப்பிகள் மட்டுமே நமக்குக் கார்ட்டூன்களின் அடையாளங்கள் என்பதால் முதல் ஆண்டுக்கொள்முதலில் லக்கி லூக்குக்கு இடமிருக்கவில்லை ! இத்தனைக்கும் பாரிசில் தலைமையகம் கொண்டு செயல்பட்டு வந்த Dargaud Editeur நிறுவனமே லக்கியின் உரிமைகளை வைத்திருந்தனர் & அவர்களோடு ஏற்கனவே ஒப்பந்தங்கள் ஓடிக்கொண்டிருந்தன ! ஆனால் அவர்களிடம் நாம் செய்த முதல் கொள்முதல்களோ - XIII தொடர் + ஜாகஜ வீரர்  ரோஜரின் தொடர் ! So 1986-ல் இரண்டாவதுவாட்டி பொட்டிகளைத் தூக்கிக் கொண்டு பிராங்பர்ட் புறப்பட்ட சமயம் எனது இலக்குகளாய்ப் பிரதானமாய்த் தென்பட்ட நாயகர்கள் 4 பேர் !

*இரும்புக்கை உளவாளி வில்சன்
*BATMAN 
*கராத்தே டாக்டர் 
*லக்கி லூக்  

அந்நாட்களில் லக்கி லூக் ஹிந்தியிலும் வெளி வந்து கொண்டிருந்தார் - வண்ணத்தில் ; நமது தற்போதைய MAXI  சைசில் ! டில்லியில் இருந்த கோவர்ஸன்ஸ் பதிப்பகம் இதனைச் செய்து கொண்டிருந்ததால் - நாமும் அதே பாணியில், கலரில் முயற்சிக்கத் தயாரெனும் பட்சம் - லக்கி லூக்கைத் தமிழ் பேசச் செய்ய அனுமதி கிட்டிடும் என்பது பிராங்பர்ட் சந்திப்பின் போது புரிந்தது ! ஆனால் எனக்கோ அந்தப் பெரிய ஸைஸைப் பார்த்த மறுகணமே பேதி எடுக்காத குறை தான் - becos 1986-ல் திகில் காமிக்ஸின் முதல் 3 இதழ்களையும் அந்தப் பெரிய சைசில் போட்டு விட்டு, நான்  வாங்கிய சாத்துக்களை 'கைப்புள்ளை' கூட கட்டதுரையிடம் வாங்கியிருக்க முடியாது ! So பெரிய சைசுக்கு வாய்ப்பே இல்லை என்ற தீர்மானத்தில் அன்றைய இரவு ரூமில் அமர்ந்து லக்கியையும் பாக்கெட் சைசுக்குள் அடைக்க வழியுண்டா ? என்று தேடினேன் ! பின்னாட்களில் அந்தக் கொடுமைகளையும் ஓரிரு சந்தர்ப்பங்களில் நிகழ்த்தினோம் என்றாலும், அந்த முதல் ஆல்பத்துக்குப் பாக்கெட் சைஸ் என்ற திட்டமிடலோடு படைப்பாளிகளிடம் போய் நின்றால், பிய்ந்த விளக்குமாற்றால் தான் சாத்துவார்கள் என்று உள்ளுக்குள் உடுக்கையடித்தது ! So 'பெருசும் ஆகாது ; சிறுசும் சுகப்படாது ; விலையும் அந்நாட்களின் அந்த ரூ.2 என்ற வரம்பினைத் தாண்டிடக்கூடாதென்ற' நிர்ப்பந்தங்கள் இருக்க - ஏதோவொரு குருட்டுத்தனமான கணக்கைப் போட்டு அந்த மீடியம் சைசில் முழு வண்ணம் என்ற முயற்சிக்கு டிக் அடித்தேன் ! மறு நாள் மதியம் Dargaud ஸ்டாலுக்குப் போன சமயம், எனது திட்டமிடலைச் சொன்ன போது பொறுமையாய்க் கேட்டுக் கொண்டார்கள் ! அவர்கள் மட்டும், அந்த MAXI சைசில் தான் லக்கியை அனுமதிப்போமென்ற பிடிவாதம் காட்டியிருக்கும் பட்சத்தில் - 'ஊருக்குப் போய் கலந்து பேசி கடுதாசி போடுறேன்' என்று தான் நடையைக் கட்டியிருப்பேன் என்பது உறுதியே ! ஏனெனில் லக்கியின் மீதிருந்த மையலைக் காட்டிலும், பெரிய சைஸ் மீதிருந்த 'டர்' ஜாஸ்தி அப்போது  ! அந்நாட்களில் டார்கோ நிறுவனத்தின் உரிமைகள் விநியோகத் தலைமைப் பொறுப்பில் இருந்த திருமதி ஆந்த்தியா ஷாகிள்டன் நமது மார்க்கெட்டின் விசித்திர பாக்கெட் சைஸ் மோகம் பற்றியறிவார் ! So கொஞ்ச நேர சிந்தனைக்குப் பின்னே சம்மதமென்று சொன்னார் நமது கோரிக்கைக்கு ! ஒரு வேளை  முட்டைக்கண்ணன் மனசு -கினசு மாறியவனாய் மறு நாளைக்கு வந்து ஏதாச்சுமொரு மூக்குப் பொடிடப்பி சைசுக்குப் புக்கைப் போடட்டுமா ? என்று கேட்டு வைப்பதற்கு முன்பாய் இசைவைச் சொல்லி வைத்தால் தேவலாமென்று நினைத்திருப்பாரோ என்னவோ !! நான் செம குஷியாய் கைகுலுக்கி விட்டுக் கிளம்பினேன் !

ஆனால் ஸ்டாலில் இருந்து நாலு எட்டு வைப்பதற்குள் இன்னொரு விஷயம் மண்டைக்குள் உறைக்க, திரும்பவும் ஓடினேன் அவரிடம் ! முந்தைய வருடம் இப்படித் தான் XIII தொடரின் இரண்டாவது ஆல்பத்தைப் பார்த்து மெய் மறந்து போனவனாய், அதெல்லாம் ஒரு நெடும் தொடரின் பாகம் # 2 என்பதை  அறியாமலே, அதனிற்கு ஆர்டர் செய்திருந்தேன் ! ஆனால் 3 மாதங்கள் கழித்து "இரத்தப் படலம்" ஆல்பம் # 1-ன் போட்டோ பிரிண்ட்கள் ஏர்மெயிலில் வந்து சேர்ந்த போது பேய் முழி முழித்தது ; அப்புறமாய் தான் இது 13 பாகங்களாய்   ஓடவிருக்கும் மெகா தொடர் என்பதைக் கேட்டறிந்து வாய் பிளந்தது, என்று சகலமும் அப்போது நினைவுக்கு வந்தது ! So இம்முறையும் அப்படியே விட்டு, அவர்களும் லக்கி தொடரின் முதல் ஆல்பத்தைத் தூக்கி அனுப்பி வைத்தால் எனது WESTERN CIRCUS கனவு இதழ் சொதப்பிடுமே என்ற பயத்தில் -"I want WESTERN CIRCUS....only WESTERN CIRCUS !!" என்று திருமதி ஷாகிள்டனிடம் சொல்லி வைத்தேன் ! அவருமே புன்னகையோடு தலையசைக்க, அடுத்த பிட்டைப் போடும் வேலையையும் ஆரம்பித்தேன் - தயக்கத்தோடே !

"அது வந்து....பிராங்பர்ட் புத்தக விழா முடிஞ்ச பிற்பாடு நானும் பாரிசுக்கு வர்றதா இருக்கேன் ; அங்கே வச்சு  இந்தக் கதைக்கான ஒரிஜினல்களை நான் வாங்கிக்க  ஏதாச்சும் வழி பண்ண முடியுமா ?" என்று கேட்ட போது அவர் முகம் மாறிப் போனது !! கம்பியூட்டர் ஏதும் இல்லாத அந்த நாட்களில், அத்தனையுமே Manual Typing தான் எனும் போது, ஊர் திரும்பிய பின்னே அவர்களுக்கு குறுக்கைக் கழற்றும் அளவுக்கு வேலைகள் குவிந்திருக்கும் என்பது தெரியாதில்லை தான் ! அது மட்டுமன்றி, அந்நாட்களில் நமக்கு வழங்கப்படும் black & white பிரோமைட் போட்டோ பிரிண்ட்களை அவர்களது Archives பிரிவிலிருந்து வரவழைப்பதென்பது பொறுமையைச் சோதிக்கும் சமாச்சாரம் என்பதையும் அறிவேன் தான் ! புளியோதரையைக் கட்டிக் கொண்டு ஸ்டூடியோ வாசலில் தேவுடா காக்காத குறையாய்த் தான் அவற்றைச் சேகரிக்க வேண்டி வரும் !! இதில் கொடுமை என்னவெனில், அந்நாட்களில் இந்தக் கதைகளையெல்லாம் black & white-ல் வெளியிடத் தீர்மானித்த மாங்காய் மடையன் அநேகமாய் நான் மாத்திரமே ! இதர மொழிகளில் வெளியிடும், இதர தேசத்துப் பதிப்பகங்கள் அனைத்துக்குமே கலர் தான் template என்பதால், ஒரு பெரும் தொகையினை டெபாசிட்டாய் வாங்கி வைத்துக் கொண்டு அவர்கள் அனைவருக்குமே 4 கலர்களுக்கான  பாசிட்டிவ் பிலிம்களை அனுப்புவார்கள் பாரிஸிலிருந்து ! அந்தந்த தேசங்களில் அச்சுப் பணிகள் முடிவுற்ற பின்னே பிலிம்களை ரிட்டர்ன் செய்தும் விடுவார்கள் ! முறைப்படிப் பார்த்தால் - லக்கி லூக்கை கலரில் வெளியிடுவதென்ற தீர்மானம் எடுத்த பிற்பாடு, இந்த வழிமுறைகளைத் தான் நாமும் பின்பற்றியிருக்க வேண்டும் ! மற்ற எல்லோரையும் போல ஒரு வைப்புத் தொகையை டெபாசிட் செய்து விட்டு, Air Cargo-வில் Freight Collect-ல் வந்திடும் பாசிட்டிவ் பிலிம்களுக்கு வாடகை தந்து க்ளியர் செய்து, அச்சிட்ட பிற்பாடு, மறுக்கா வாடகை தந்து இங்கிருந்து அனுப்பியிருக்க வேண்டும் ! ஆனால் ஒரே கோவணத்தை துவைத்துக் காயப்போட்டு, மறுநாளைக்கும் அணியும் நமக்கெல்லாம் இதைக் கேட்ட போதே கேராகிப் போனது !!

  • டெபாசிட் கட்ட வசதி லேது !
  • Air Cargo கட்டணமென்றால் காதில் பிளட் வருது !
  • அச்சிட்ட பிற்பாடு பிலிம்களைத் திருப்பி அனுப்பிட  இரண்டாவது கட்டணமென்றால் பயத்தில் மூச்சா வருது !
  • எல்லாவற்றிற்கும் மேலாய் - அந்நாட்களில் பாசிட்டிவ் பிலிம்களிலிருந்து அச்சிடுவதெனில், அதற்குப் பயன்படுத்த வேண்டிய பிராசசிங் வழிமுறைகள் காஸ்ட்லீயான விஷயம் ! நாம் பயன்படுத்தியதோ நெகட்டீவ்களிலிருந்து ப்ராசஸிங் செய்திடும் சஸ்தாவான யுக்திகள்  ! So அந்த கூடுதல்  செலவை நினைத்தாலே வியர்த்துக் கொட்டுது !
என்பதை ஏற்கனவே அவர்களிடம் ஒப்பித்திருந்தேன் என்பதால், எனது கோரிக்கையைக் கேட்ட்டவர் உதட்டைப் பிதுக்கினார் ! "குறைந்த பட்சம் ஒரு வாரமாச்சும் ஆகுமே - bromide prints ஆர்டர் செய்து வரவழைக்க ! நாங்கள் ஊருக்குத் திரும்பும் மறுநாளே  நீயும் வந்து நின்று, பிரிண்ட் வேண்டுமென்றால் எப்படி முடியும் ?" என்ற போது எனக்கு முகம் தொங்கிப் போனது ! அந்நாட்களில் இந்த ஒரிஜினல்கள் கனமான பிலிம் டப்பிக்களில் பேக் செய்யப்பட்டு Sea Mail வாயிலாகத் தான் வந்திடும் - சாவகாசமாய் இரண்டரை மாதங்கள் கழித்து ! நானோ, 'ஊருக்குப் போறோம் ; அலப்பரையைக் குடுக்கிறோம் ; ஜனவரியில், கலரிலே புது வரிசையிலே லக்கியைக் களமிறக்குறோம் !' என்ற கனவில் இருந்தேன் !  இது போன்ற திரும்பிப்பார்க்கும் தருணங்களில் தான் புரிகிறது, அந்நாட்களில் நம்மைக் கைதூக்கி விட ஒவ்வொரு படைப்பாளி நிறுவனமும் எத்தனை பரிவைக் காட்டியுள்ளனர் என்பது !! என்ன நினைத்தாரோ, தெரியாது -  தரையை தொடும் நீளத்துக்குத் தொங்கிக் கிடந்த எனது முகரைக்கட்டையைப் பார்த்தவர், "அடுத்த வெள்ளி மாலைக்குள் எப்படியேனும் பிரிண்ட்களுக்கு ஏற்பாடு செய்து விடுகிறேன் ! சனிக்கிழமை நாங்கள் பணியாற்றுவதில்லை என்பதால் ஆபீசுக்கு வந்து அவற்றைச் சேகரித்துப் போக உனக்கு வசதிப்படாது  ; ஆனாலும் அவற்றைக் கையோடு வீட்டுக்கு எடுத்துப் போய் விட்டு, சனிக்கிழமை பகலில் உன்னை பாரிஸின் ஏதேனுமொரு இடத்தில் சந்தித்துத் தந்து விடுகிறேன் ! ஹாப்பியா ?" என்று கேட்டார் ! எனக்கோ தலீவர் படத்தின் முதல் நாள் ஷோவுக்கு டிக்கெட் கிடைத்த பீலிங்கு !! ஒரு நூறு நன்றிகளை சொல்லி விட்டு கிளம்பினேன் ! 

Looking back - அத்தனை மெனெக்கெடலுக்கு நாம் சத்தியமாய் ஓர்த்தே கிடையாது தான் - அவர்கள் வெறும் வியாபாரக் கண்ணோட்டத்தில் பார்த்திருக்கும் பட்சத்தில் என்பது புரிகிறது ! அவர்கள் நாட்டில் கொஞ்சம் பட்டாணிச் சுண்டலும், கொஞ்சம் பொறிகடலையும் வாங்கும் காசைத் தான் நாம் ராயல்டி என்ற பெயரில் எல்லாப் படைப்பாளிகளுக்குமே தந்து கொண்டிருந்தோம் ! தவிர, நம்மை விடவும் மெகா மெகாப் பதிப்பகங்களுக்கு ஒதுக்கிட வேண்டிய நேரங்களை எவ்வித சங்கடங்களையும் காட்டிடாது நமக்குத் தர ஒருத்தர் பாக்கியின்றி அத்தனை பேருமே முன்வந்தார்கள் ! அன்றைக்கு திருமதி.ஷாகிள்டனின்பார்வையில், கிடாவெட்டுக்குப் பறக்கும் இந்தக் கவுண்டரின் கொப்பளிக்கும் ஆர்வம் மட்டுமே பிரதானமாய்த் தெரிந்திருக்க வேண்டும் ; என்னால் நேர்ந்திட்ட சுமைகள் ஒரு பெரும் சிக்கலாய் அவருக்குத் தெரிந்திருக்கவில்லை !  'இல்லே...முறைப்படி அடுத்த ஒரு மாசத்துக்குள்ளாற தான் காண்டிராக்ட் ரெடி பண்ண முடியும் ; அதுக்குப் பின்னே நீ காசை அனுப்பிய பிற்பாடு தான் ஒரிஜினல்களை அனுப்ப வசதிப்படும் !' என்று அவர் கறாராய்ச் சொல்லியிருந்தால், நிச்சயமாய் அதனில் தவறேதும் இருந்திராது ! என்ன -  "1987 ஜனவரியில் ரிலீஸ்" என்ற எனது கலர் கனவுகள் மெய்யாகிடுவது மட்டும் ரொம்பவே தள்ளிப்போயிருக்கும் ! So நிறைய அலுவலகச் சம்பிரதாயங்களை byepass செய்து, நம் ஆர்வங்களுக்கு உதவிட அவர் அன்றைக்குக் காட்டிய பரிவே கார்ட்டூன் தடம் போட உதவிய முதல் தண்டவாளம் என்பேன் !

இந்த தயாளங்கள் இன்றளவிற்கும் தொடர்கதைகளே ! இதோ இந்த மார்ச் மாதத்தில் கூட அதற்கொரு 'பளிச்' நிரூபணம் கிட்டியது ! '5 நிமிட வாசிப்பு ; படித்த நொடியே என்னைக் கட்டுண்டு போகச்செய்ததொரு பொம்மை புக் ; மார்ச்சில் சர்ப்ரைஸாக வருகிறதென்று' நான் சொன்னது நினைவிருக்கலாம் ! அந்தப் புது ஆல்பம் என் கண்ணில் பட்டதே இந்த மார்ச் ஒன்பதாம் தேதி தான் ! அன்றைக்கே மின்னஞ்சலைத் தட்டி விட்டேன் - "இந்த ஒரு ஆல்பத்தை மட்டும் fasttrack செய்து உடனே கைக்குக் கிடைக்கச் செய்ய ஏதேனும் வாய்ப்புள்ளதா ?" என்ற கோரிக்கையோடு ! இந்த கொரோனா கொடூரம் ஐரோப்பாவில் நங்கூரமிடத் துவங்கி, ஒவ்வொரு தேசத்தையும் தெறிக்க விட்டுக் கொண்டிருந்த அந்தத் துவக்க நாட்களிலும், மார்ச் 10 தேதிக்கே மின்னஞ்சலில் காண்டிராக்ட் வந்தது ! மறு நாளே நாம் பணம் அனுப்பிட, அதிலிருந்து இரண்டாவது நாளில் டிஜிட்டல் கோப்புகள் மின்னஞ்சலில் காத்துக் கிடந்தன !! இந்த ஹை-டெக் யுகத்தில் கூட மொத்தமே மூன்றே நாட்களில் ஒரு புத்தம் புதுக் கதைக்கு ஒப்பந்தம் செய்து, வைரஸின் தாக்கத்துக்கு மத்தியிலும் கதையினை வரவழைப்பது என்பது nothing short of a miracle !! 

Exit பிராங்பர்ட், பாரிசுக்கு கிளம்பியது ; அந்தப் பயணத்தின் போது ஒரு பிரவுன் பூதத்திடம் சிக்கித் தெறித்தது ; தப்பிப் பிழைத்து ஓட்டமெடுத்தவன், மறு நாள் "கராத்தே டாக்டர்" ; "சூப்பர் பைலட் டைகர்" & "மறையும் மாயாவி ஜாக்" கதைகளை வெளியிட்டு வந்த Vaillant Miroir Sprint Publications எனும் நிறுவனத்தைச் சந்தித்தது ; அவர்களது ஆபீசில் கொக்கோ கோலா டின்னை ஸ்டைலாய்த் திறக்கிறேன் பேர்வழியென்று வெள்ளை நிறப் பேண்ட் முழுக்க ஊற்றிக் கொண்டது   ; அந்தத் தொடர்கள் மிதமான உப்மாக்களே என்பதை அறியாதவனாய் அவற்றிற்கு நமது சம்மதத்தைச் சொன்னது ; பெருசாய் எதையோ சாதித்த உற்சாகத்தில் ரயில் மூலமாய் ஸ்விட்சர்லாந்தின் தலைநகர் ஸ்யூரிக் நகருக்கு பராக்குப் பார்க்கப் புறப்பட்டுச் சென்றது ; அழகோவியமான அந்த பூமியில் வரிசை வரிசையாய் அணிவகுத்து நின்ற புகழ்பெற்ற சுவிஸ் பேங்குகளை தவிர்த்து அங்கே வேறு எதையும் காணோமே என்று விழித்தது ; 'ரைட்டு...நானும் பார்த்துட்டேன்லே சுவிச்சர்லாந்தை' என்று பீற்றிக் கொள்ளும் பொருட்டு, சிலபல போட்டோக்களை எடுத்து விட்டு, மறுபடியும் பாரிசுக்குத் திரும்ப ராத்திரி ரயிலைப் பிடித்தது - என்று எல்லாமே வேக வேகமாய் நடந்தேறிய நிகழ்வுகள் ! 

"வெள்ளியிரவு ரயில் ஏறினால், நடுச்சாமத்தில் ஏதோவொரு ஸ்டேஷனில் மாறி, சனி அதிகாலையில் பாரிஸ் ; அங்கே ஒரு ரூமைப் போட்டுப்புட்டுத் தங்கறோம் ; பகலிலே WESTERN CIRCUS ஒரிஜினல்களை திருமதி.ஷாகில்டனைச் சந்திச்சு வாங்கிடறோம் ; அப்பாலிக்கா ஊரில் இருப்போர்க்கு ஆளுக்கொரு பென்சில், ரப்பர், குச்சி முட்டாய் என்று ஏதேனும் souvenirs வாங்கிவிட்டால் மூட்டையைக் கட்டிவிட்டு, ஞாயிறு காலையில் இந்தியாவுக்குத் திரும்புறோம் !" என்ற திட்டமிடல் தலைக்குள் தெளிவாக இருந்தது ! ரயிலையும் பிடித்தேன் ; காலையில் ஆறரை மணிவாக்கில் பாரிஸின் Gare Du Lyon ஸ்டேஷனையும் எட்டிப் பிடித்தேன் ! அதிகாலையில் சிலு சிலுவென்ற காற்றோடு பாரிஸ் ரொம்பவே ரம்யமாகத் தென்பட்டது எனக்கு ! மூன்றே நாட்களுக்கு முன்னே, பூதத்துடனான இக்கட்டின் போது, அதே நகரத்தை தெரிந்த அத்தனை கெட்ட வார்த்தைகளாலும் கழுவிக் கழுவி ஊத்தியிருந்தேன் தலைக்குள் ! ஆனால் காட்சிகள் மாறும் போது ; சூழல்கள் மாறும் போது, சிந்தனைகளும்  மாறிடும் என்பது புரிந்தது ! 'அன்பே வா' தலைவரைப் போல துள்ளிக் குதித்தபடிக்கே ஸ்டேஷனை விட்டு வெளியேறியவன் கண்ணில் "லாட்ஜ்" என்ற போர்டுகள் தென்படுகின்றனவா என்று பார்த்தேன் ! ஐரோப்பாவின் ஒவ்வொரு முக்கிய நகரிலும் ரயில் நிலையம் ஊருக்குள்ளே மையமாய் இருப்பது வாடிக்கை & அவற்றைச் சுற்றியே குறைச்சலான வாடகையிலான லாட்ஜ்களும் இருக்குமென்பதை இந்நேரத்துக்குத் தெரிந்து வைத்திருந்தவனாய் எதிரே போன தெருவினுள் விறு விறுவென்று நடக்க ஆரம்பித்தேன் ! சற்றைக்கெல்லாம் ரோட்டின் ரெண்டு பக்கங்களுமே தங்கும் விடுதிகள் கண்ணில் படத் துவங்கின !  

ரொம்பவே டப்ஸாவாகவும் தெரியாத, அதே சமயம் ரொம்பவே பாக்கெட்டுக்கு வெடி வைக்காத மாதிரியான ஹோட்டலைத் தேடியபடியே நடந்தவன் ஏதோ ஒன்றினுள் புகுந்தேன் ! மேஜைக்குப் பின்னே புல் மீல்ஸை ரெண்டாய் அடிக்கக்கூடிய தோரணையில் ஒரு தாட்டியமான பிரெஞ்சு ஆசாமி தூங்கி வழிந்து கொண்டிருந்தார் ! என் பின்னேயே ஒரு இளம் வெள்ளைக்கார ஜோடியும் ரூம் கேட்டு வர, அவர்கள் பிரெஞ்சில் கொடுத்த குரலுக்கு ரிசப்ஷனில் இருந்த மனுஷன் கண்விழித்துக் கொண்டார் ! முதலில் போனவன் நானே என்ற உரிமையில் 'ஒரு சிங்கிள் ரூம் வேண்டும்' என்று கேட்டேன் ! என்னை ஏற-இறங்கப் பார்த்தவர் எனக்குப் பின்னே நின்ற ஜோடியைக் கூப்பிட்டு மட மட வென புக்கிங் செய்து சாவியைக் கையில் தந்து அனுப்பி வைத்தார் ! ராவினில், ரயிலில் தொலைத்த தூக்கத்தை ரூமில் கொஞ்ச நேரமேனும் தொடரும் ஆசையில் இருந்த எனக்கோ எரிச்சலாய் இருந்தது ! மறுபடியும் கொஞ்சம் குரலை உசத்தி "ரூம் ?" என்று கேட்டேன் ! "பாசப்போர்ட் ?" என்று கையை நீட்டியவரிடம் தயாராகயிருந்த எனது பாஸ்போர்ட்டை தந்தேன் ! கையில் வாங்கிப் புரட்டி ,அங்குலம் அங்குலமாய் எழுத்துக்கூட்டி வாசிக்க ஆரம்பித்தவர் ஏனோ தெரியலை - என்னை நிமிர்ந்து பார்க்கவும், மறுபடியும் பாஸ்போர்ட்டினுள் மூழ்கவுமாய் இருந்தார் ! எனக்கு லைட்டாக நெருட ஆரம்பித்தது ! சர்வதேச டூரிஸ்ட்கள் மிகுந்ததொரு நகரே என்றாலும், பாரிசில் பிரெஞ்சு ஞானமின்றிக் குப்பை கொட்டுவது அத்தனை சுலபமல்ல என்பதை ஏற்கனவே உணர்ந்திருந்தேன் ! 'இந்த மொக்கைச்சாமி புதுசாய் என்ன கேட்கப் போகிறானோ ?' என்றபடிக்கே காத்திருந்தவனிடம் - "டமில் ?" என்று கேட்டான் ! 'அட..பரவாயில்லையே..... மொக்கைச்சாமியும், மூளைச்சாமி தான் போலும்' என்று நினைத்துக் கொண்டே "Yes ...from Tamilnad .." என்று பதில் சொன்னேன் ! டப்பென்று பாஸ்போர்ட்டை மூடி, கையில் தந்து விட்டு - "சாரி..நோ ரூம் !" என்று அவன் மொட்டைக்கட்டையாய்ச் சொன்ன போது எனக்கு செம கடுப்பாக இருந்தது ! 'உனக்கு என்ன தான்ப்பா பிரச்சனை ?' என்று நான் இங்கிலீஷில் கேட்க, அவன் இங்கிலீஷும், பிரெஞ்சும் கலந்த பாஷையில் ஏதோ பதில் சொல்ல சுத்தமாய் எதுவும் புரியவில்லை ! 'ஒரே ஒரு நாளுக்குத் தான் ரூம் வேணும் ; நாளை காலை கிளம்பிடுவேன்" என்று அவனிடம் வாதம் பண்ணிக்கொண்டிருந்த நேரத்துக்கு, எனக்குப் பின்னே வந்து, எனக்கு முன்னமாய்  ரூம் பெற்றுச் சென்றிருந்த ஜோடி நாஷ்டாவுக்கென கீழே இறங்கி வந்திருந்தனர் ! நாங்கள் பாஷை புரியாது போட்டுக்கொண்டிருந்த மல்யுத்தத்திற்கு தீர்வு காணும் விதமாய் அந்தப் பெண்மணி குறுக்கிட்டு ரிசப்ஷன் மொக்கையிடம் பேசிவிட்டு என்னிடம் அழகான மழலை இங்கிலீஷில் பேச ஆரம்பித்தாள் !

அப்புறம் தான் புரிந்தது சிக்கல் என்னவென்று ! 1983-ன் கலவரங்களைத் தொடர்ந்து  ஸ்ரீலங்காவிலிருந்து நம்மவர்கள் ஏகமாய்ப் புலம் பெயர்ந்து ஐரோப்பாவில் தஞ்சம் அடைய முயற்சித்தது வரலாறு ! 1986 வாக்கில் அவர்களில் ஒரு கணிசமான எண்ணிக்கை பிரான்சில்  ; குறிப்பாய் பாரிஸில்  குடியேற முயற்சித்துக் கொண்டிருந்துள்ளனர் போலும் ! கலவர மண்ணிலிருந்து வருவோரும் கலவரப் பார்ட்டிகளாகவே இருப்பர் என்பது அப்போதைய பிரெஞ்சுப் பிரஜைகளின் சிந்தனையாக இருந்திட, இந்த ரிசப்ஷன் பீம்பாயும் ஒத்த எண்ணத்துக்காரனாக இருந்திருக்கிறான் ! கோழி திருடியவனைப் போல அதிகாலையில் நான் முட்டைக் கண்களை உருட்டிக் கொண்டு நின்றது பற்றாதென,  எனது பாஸ்போர்ட்டில் "Tamilnadu" என்று எழுதியிருப்பதை பார்த்த அந்தச் சூரப்புலி, நானுமே புலம் பெயர்ந்திட முயற்சிக்கும் 'டமில்' மக்களுள் ஒருவன் என்று நினைத்து விட்டிருக்கிறான் ! அடுத்த வரியில் INDIA என்று எழுதியிருப்பதைக் கவனிக்கக் கூட விட்டிருக்கவில்லை - அவனுக்குள் குடியிருந்த துவேஷம் ! அந்தப் பெண்ணிடம் நான் நிலவரத்தை விளக்கிட, அவள் பிரெஞ்சில் அவனுக்குப் பாடம் எடுக்க, அப்படியும் அவனுக்கு முழுசாய்த் திருப்தி வந்த மாதிரித் தெரியலை ! அரை மனசாய் முனகிக் கொண்டே என் பாஸ்போர்ட்டை மறுபடியும் வாங்கிக் கொண்டவன் - "No Luggage ?" என்று கேட்டான் ! "இருக்கே..இதோ இருக்கே !"- என்று என் பெட்டியை முன்னே தள்ளினேன் ! "அதை இப்படிக் கொடு !" என்கிற மாதிரி அவன் ஏதோ சொல்ல, பெட்டியை நகற்றி வைத்தேன் ! சரி, லிப்ட் ஏதும் இல்லாத அந்தப் புறாக்கூட்டு ஹோட்டலின் மேல்தளத்துக்குப் பெட்டியைச் சுமந்து போக ஒத்தாசை செய்யப் போகிறான் போலும் என்று நான் நினைத்துக் கொண்டேயிருந்த நொடியில், அந்தக் குரங்கன் அப்படியே பெட்டியைத்  திறந்து தலைகீழாய் அங்கிருந்த மேஜை மீது கவிழ்த்தினான் ! வடிவேலு பாஷையில் சொல்வதானால் "அத்தினியையும்  அல்லா சல்லையாக்கிபுட்டானே நன்னாரிப்பய !!" என்று தான் கொதித்திருக்க வேண்டும் ! எனக்கு ரத்தம் தலைக்கேறி விட்டிருந்தது ; 'நீ ரூமும் தர வேண்டாம், புண்ணாக்கும் தர வேண்டாம் ! பெட்டியை திரும்ப அடுக்கிக் கொடு, நான் கிளம்புகிறேன் !" என்று கத்தினேன் ! ஆனால் அவனோ புரியாதது மாதிரி என் பெட்டிக்குள் பார்வையை ஓட விடுவதிலேயே குறியாய் இருந்தான் ! அந்தப் பட்டாணிக்கடலை மூளைக்குள் என்ன ஓடியிருக்குமோ - ஆண்டவனுக்கே வெளிச்சம் ; ஆனால் பெட்டிக்குள் ஏதேனும்  துப்பாக்கியோ  ; வெடி குண்டோ வைத்திருக்கிறேனா ? என்று தடியன் சோதனை செய்வதாக எனக்குப்பட்டது ! அவன் கையைப் பட்டென்று விலக்கி விட்டு,  வெளியே கிடந்த துணிமணி ; இத்யாதிகளை பர பரவென்று அள்ளி பெட்டிக்குள்ளே  திணித்த கையோடு, அவனிடமிருந்த பாஸ்போர்டையும் பிடுங்கி கொண்டே நடையைக் கட்டினேன் ! பாவப்பட்ட அந்தப் பெண்ணிடம் ஒரு தேங்க்ஸ் சொல்லக்கூட அந்த நொடியில் எனக்குத் தோன்றவில்லை !

வெளியே வந்தவனுக்கு அந்த நொடியில் யாரையாச்சும் செவிளோடு அறையணும் போலிருந்தது ! அரை அவருக்கு முன்னே வரையிலும் 'பாரிஸ்..பியூடிபியுல் பாரிஸ் !' என்று பாடத் தோன்றிய வாயிலோ இப்போது நுரை தள்ளாத குறை தான் ! அடுத்து எதிர்ப்பட்ட ஹோட்டலுக்குள் நுழைந்து ரூம் கேட்டேன் ; நிமிர்ந்து பார்த்தபடிக்கே உதட்டை மட்டும் பிதுக்கி விட்டுக் குனிந்து கொண்டார் அங்கிருந்த பெண்மணி ! அடுத்த 20 நிமிடங்களுக்கு இதுவே தொடர்கதையானது ; சொல்லி வைத்தார் போல அடுத்தடுத்த ஹோட்டல்கள் எல்லாமே full என்கிற மாதிரியான பதிலையே சொன்னர் ! ஆனால் எனக்கோ அந்தச் சிக்கலின் நதிமூலம் நம் தோலின் நிறம் என்பதாகவேபட்டது ! 'அடப் போங்கடா டேய்...!' என்றபடிக்கு பாரிஸின் YMCA விடுதியைத் தேடிப் போவோமா ? என்ற நினைப்பு உள்ளுக்குள் எழுந்தது ! ஆனால் விரல் நுனியில் கூகுள் இல்லாத அந்நாட்களில், பாஷை தெரியா புதியதொரு ஊரில், விசாரித்து, ஒரு இடத்தைத் தேடிக் கண்டுபிடிப்பதென்பது மொட்டைத்தலையில் முடி முளைக்கச் செய்வதற்குச் சமமான சிரம காரியம் ! மறுக்கா பெட்டியைத் தூக்கிக் கொண்டே Gare du Lyon ஸ்டேஷனுக்கு நடந்து  போய், அங்கே இருக்கக்கூடிய டூரிஸ்ட் ஆபீஸ் திறக்கும் வரைக் காத்திருந்து, அவர்களிடம் இடத்தைக் கேட்டுத் தெரிந்து கொண்டு, அப்பாலிக்கா மெட்ரோ ரயிலேறி அங்கே போக வேண்டுமென்பதை நினைக்கும் போதே - ஸ்டீலின் கவிதை வரிகளை படிக்கப் போகும் பீதி உள்ளுக்குள் எழுந்தது ! 'ரைட்டு...ஆனது ஆச்சு , இங்கே  கண்ணில்படும் மிச்சசம்மீதி ஹோட்டல்களிலும் விசாரித்து விட்டு தீர்மானம் பண்ணலாம் !' என்றபடிக்கே நடக்க ஆரம்பித்தேன் !

ஒரு வழியாய் அடுத்த ஹோட்டலில் இருந்த புண்ணியவாளனுக்கு நான்  அவனது ஹோட்டலைத் தரைமட்டமாக்கிடப் போகும் டெர்ரர் பார்ட்டியாய்த் தென்படவில்லை போலும் ! 'ரூம் இருக்கு....ஆனாக்கா சுத்தம் பண்ணி ஒப்படைக்க ஒரு அவராச்சும் ஆகும் ; அது வரைக்கும் காத்திருக்கணும் !' என்றார் ! (அப்போல்லாம் இந்த 12 noon  செக் அவுட் வாடிக்கையெல்லாம் கிடையாது !!) அதைக் கேட்ட பிற்பாடு தான் தலைக்குப் போயிருந்த இரத்தம் சற்றே சமனப்பட்டது ! 'பரால்லே.....இந்த ஊரிலே இருக்கிற அத்தினி பேரும் டொமருங்க இல்லே தான் போலும்  !!' என்று தோன்றியது ! தம்மாத்துண்டு ரிசப்ஷன், அந்தப்பக்கமாய்ப் போனால் மாடிக்குப் போகும் படிக்கட்டு ; இந்தப் பக்கம் காலை பிரேக்பாஸ்ட் கூடம் என்றிருக்க, அக்கடாவென அமர்ந்து காத்திருக்க இடமேதும் இல்லை ! 'சரி, ஒரு மணி நேரத்தில் திரும்புகிறேன் !' என்றபடிக்கே வெளியே நடந்தவனுக்கு அடுத்த ஒற்றை மணி நேரத்தைக் கழிக்க எங்கே போவதென்று தெரியவில்லை ! அதே தெருவில் சற்றே தள்ளித்  தென்பட்டதொரு பெஞ்சில் திருவாளர் பொதுஜனத்தில் ஒருவர் சுருண்டு படுத்திருந்தார் ! ரைட்டு...ரொம்ப யோசிப்பது வேலைக்கு ஆகாதுடா சாமீ என்றபடிக்கே அவரது கால்பக்கமாய் மீதமிருந்த இடத்தில் அமர்ந்து கொண்டேன் ! அடுத்த ஒரு மணி நேரம் நகர்வேனா என்று அடம்பிடிக்க, எனக்கோ உள்ளுக்குள் லைட்டாய் வேறொரு  பயம் ! படுத்துக் கிடக்கும் உள்ளூர் பார்ட்டியின் அப்ரஸிட்டியாக என்னைப் பாவித்து சாலையில் போவோர்-வருவோர் சில்லறையைப் போட்டுப் போனால் மானக்கேடாகிடுமே என்று !! குனிந்த தலையை நிமிர்த்த திராணியின்றி, அடுத்த 60 நிமிடங்கள் கரைய அங்கேயே காத்திருந்தேன் ! ஒரு வழியாய் ரூம் கிடைத்த பிற்பாடு தான் திருமதி.ஷாகில்டனுக்கு போன் செய்திட ஜீவன் வந்தது ! உற்சாகமாய்ப் பேசியவர், பிரோமைட் பிரிண்ட்கள் முந்தைய இரவே வந்து விட்டதாகவும், நான்  எங்கே தங்கியிருக்கிறேனோ, அங்கேயே கொணர்ந்து ஒப்படைத்து விடுவதாகவும் சொன்ன போது தான், நான் தங்கியிருந்த புறாக்கூட்டின் பொருட்டு லைட்டாய் தர்மசங்கடமாய் இருந்தது ! ஆனால் வேறு வழி ? அட்ரஸையும், ஹோட்டல் பெயரையும் சொன்ன கையோடு அவசரம் அவசரமாய்க் குளித்து ரெடியாகிக் காத்திருந்தேன் !

அடுத்த 45 நிமிடங்களில் ஸ்நேகமான புன்னகையோடு ஹோட்டலின் வாசலில் ஆஜரானவரின்  மார்போடு அணைத்து நின்றது ஒரு ஆரஞ் நிறப் பெட்டி ! லக்கியின் black & white ப்ரிண்ட்ஸ் அவற்றுள் தான் சுடச் சுடக் காத்திருந்தன !! அதைக் கையில் தந்து விட்டு, "Good Luck ..Safe trip !!"  என்று கிளம்பியவரை அதன் பின்னே நான் பார்த்திடவே இல்லை ! அடுத்த எட்டுப் பத்து வருடங்களுக்கு மத்தியில் ஐரோப்பா செல்லும் அவசியங்களும் எழவில்லை & Dargaud நிறுவனம் இன்னொரு ஜாம்பவான் நிறுவனமான LOMBARD உடன் இணைந்த பிற்பாடு, முற்றிலும் புதுசாய் அதிகாரிகள் பொறுப்பேற்றனர் ! So திருமதி ஷாகிள்டன் பற்றி தகவல்கள் இல்லை !

ரூமுக்குத் திரும்பியவன், ஏதோ புதையலைப் பார்ப்பது போல அந்த ஆரஞ் பொட்டியைத் திறந்து black & white-ல் மினுமினுத்த ஒவ்வொரு பக்கத்தையும் அடுத்த அரை மணி நேரத்துக்கேனும் ரசித்துக் கொண்டிருந்தேன் ! ஊருக்குத் திரும்பியது ; இந்தக் கதையை நானே தான் மொழிபெயர்ப்பேன் என்று வைராக்கியமாக மொக்கைகளுக்கு மத்தியில் முயற்சித்தது ; black  & white பக்கங்களில் படு ஸ்பீடாய்த் தயாரான பக்கங்களை அப்புறமாய் 4 கலர்களுக்கான நெகட்டிவ்களாய் எடுத்து, அதனில் பிராசசிங் பணியாளர்கள் 10 நாட்களாய்ப் பணியாற்றிய பின்னர் ஒரு சுபயோக சுபதினத்தில் அச்சிடத் துவங்கியது - என்று எல்லாமே கலர் கனவுகளின் அங்கங்களாய் அமைந்து போயின ! அதன் மத்தியில் நமது ஓவியர் மாலையப்பனிடம் சொல்லி, ஒரிஜினல் டிசைனைப் போலவே ஒரு ஓவியத்தை,  colorful ஆகப் போட்டு வாங்கி, அட்டைப்படத்தையும் பிரிண்ட் செய்து மொத்தமாய்க் கையில் ஏந்திப் பார்த்த நொடியில் டென்சிங்காவது, இலெவென்சிங்காவது - இமய மலையை நான் ஓட்டமாகவே ஏறிப்பிடித்து கொடி நட்டியது போலான பீலிங்கு ! Yes of course - 6 மாதங்களுக்கு முன்பே 1986 கோடை மலரின் முதல் 64 பக்கங்கள் (?? maybe more / maybe less) முழு வண்ணத்தில் வெளியிட்டிருந்தோம் தான் ! ஆனால் இம்முறை புக்கே முழுசுமாய் கலர் என்பதோடு, முற்றிலுமே புதிதானதொரு ஜானரை அறிமுகம் செய்திடப்போகிறோம் என்ற குஷியும் இணைந்து கொள்ள - "சூப்பர் சர்க்கஸ்"  - சூப்பரோ சூப்பராகவே தென்பட்டது எனக்கு ! காமிக்ஸ் வாசிப்புகளுக்கோ ; ரசனைகளுக்கோ அப்பாலான எனது தாத்தா கூட, கலரிலான அந்த புக்கை ஆர்வத்தோடு புரட்டுவதைப் பார்த்த போது ரொம்பப் பெருமையாக இருந்தது ! And விற்பனையிலும் அந்த ஜனவரி 1987 ஒரு மைல்க்கல் மாதமாய் அமைந்து போக, எனது சந்தோஷங்களை விவரிக்கவும் வேணுமா ?

சிறுவயதுக் கனவு ; கண்முன்னே கலரில் மெய்யாகிக் கிடக்க ; லக்கி லூக் எனும் அந்த iconic character உங்களின் ஏகோபித்த பாராட்டுக்களையும் ஈட்டியிருக்க ; கார்ட்டூன் எனும் புதுத் தடமும் துவக்கம் கண்டிருக்க ;  icing on the cake ஆக - ரூ.2 விலையில் இந்தக் கனவு சாத்தியமாகியதில் மகிழாது இருக்க முடியுமா - என்ன ? அப்புறமாய் ஏதேதோ குட்டிக்கரணங்கள் ; குரங்கு பல்டிக்கள் ; ஆயிரம், ரெண்டாயிரம் விலைகளுக்கெல்லாம் கலர் மேளாக்கள் என்று நிறைய பார்த்து விட்டோம் தான் !

ஆனால் -

லோகத்திலேயே எந்தவொரு  பேமானிப் பதிப்பகமும் செய்ய நினைத்திருக்கா ஒரு குடாக்குச் செயலாக இரண்டு ரூபாய் விலையில் லக்கியை அறிமுகம் செய்திட சாத்தியமான அந்த நாட்களும், அந்த இதழும் very very dear to my heart !!

அதே போல -

பக்கம் பக்கமாய், பத்தி பத்தியாய் ஏதேதோ ஹாட்லைன்கள் ; காமிக்ஸ்டைம்கள் ; வலைப்பதிவுகள் என்றெல்லாம் எழுதிக் கிழித்துள்ளேன் தான் ! ஆனால் இருபது வயதில், பூமிக்கே (!!!!) ஒரு சேதி சொல்லும் வேகம் உள்ளுக்குள் துளிர் விட்டதன் பலனாக, இந்த இதழின் முதற்பக்கத்தில் நான் எழுதிய தலையங்கம் எனக்கு ரொம்பவே ஸ்பெஷல் ! அந்தச் சுள்ளான் வேளையில் எனக்கு கிட்டத்தட்ட இரண்டரை ஆண்டு அனுபவம் இருந்ததெல்லாம் நிஜமே ; ஆனால் எனது பேனாமுனை ரொம்ப ரொம்ப raw-ஆக இருந்த நாட்களவை ! (இன்றைக்கு என்ன வாழுதாம் ? என்று கேட்டால் 'ஹி..ஹி..' தான் பதிலுங்கோ !!) அன்றைய பொழுதில் என் மனதில் பட்டதை அழகாய்ச் சொன்னது போலொரு ஞாபகம் எனக்கு ! என்னிடம் இப்போது அந்த புக்கும் இல்லை ; அந்தத் தலையங்கமும் லேது ; but ரெண்டோ / மூணோ ஆண்டுகளுக்கு முன்னே தற்செயலாய் அந்த புக்கைப் புரட்ட வாய்ப்புக்கு கிட்டிய போது படித்தேன் & I felt good !!

Thus ends - நிறையாக காரணங்களின் பொருட்டு எனக்கு மறக்கவியலா இதழாகிப் போன அந்த சூப்பர் சர்க்கஸ் பற்றிய மலரும் நினைவுகள் ! Ufff !! ஈரைப் பேனாக்கி, பேனைப் பெருமாள் ஆக்குவது நமது ஸ்பெஷாலிட்டி என்று  கேள்விப்பட்டிருப்பீர்கள் ; ஆனால் இம்முறையோ ஒரு பெருச்சாளியையே மடியில் ஏற்றிவிட்டிருக்க, அது டைனோசராய் விஸ்வரூபம் எடுத்ததில் ஆச்சர்யமேது ? வேறு எதற்காக இந்த லாக்டௌனை அகற்றுகிறார்களோ, இல்லியோ : இந்த LIC  உசரத்துப் பதிவுகளிலிருந்து உங்களை மீட்கவாவது பணிகளை மறுக்கா துவக்கினால் தேவலாம் போலும் ! எனக்கே மிடிலே !!

அதற்கு மேலும் டைப்ப தெம்பு லேது என்பதால் - Hot & Cool ஸ்பெஷல் பற்றிய மீள்பார்வை அடுத்த பதிவினில் ! ஆங்காங்கே பலப்பல மைக்கேல் ஜாக்க்சன்களும், பிரபு தேவாக்களும் at a time ரெண்டு கால்களையும் உசத்திப் போடும் steps சகிதம் நடனப் போட்டிக்குத் தயாராகி வரும் வேளைகளுக்கு மத்தியில், இதற்குப் பதிவிடவும் முயற்சியுங்களேன் folks ?

1. சூப்பர் சர்க்கஸ் ஒரிஜினல் 1987 இதழை முதன்முறையாக நீங்கள் படித்த நாட்கள் நினைவுள்ளதா ? என்ன வயதுகளோ உங்களுக்கெல்லாம் அன்றைக்கு ?

2. இன்னமும் அந்த ஒரிஜினல் பிரதிகளை பத்திரமாய் வைத்திருப்போர் - உங்களுள் எத்தனை பேரோ ? உங்கள்வசம் அது இருப்பின், ஒரு selfie ப்ளீஸ் - with the book of course !!

3. முதல்வாட்டி படித்த போது அந்த கார்ட்டூன் ஜானர் ரசித்ததா ? அல்லது - ஆக்ஷனிலேயே வண்டியோட்டி வந்த அந்நாட்களில் இது ஏமாற்றத்தைத் தந்ததா  ?

And lastly :

4. லக்கியின் all time best TOP 3 ல் இந்த இதழ் இடம்பிடித்திடுமா - உங்களின் தேர்வுகளில் ?

Bye guys....see you around !! Stay Home & Stay Safe !!

P.S : சிங்கத்தின் சிறுவயதில் கட்டுரையினில் ஏதோவொரு பாகத்தில் XIII தொடரின் முதல் ஆல்பம் + லுக்கி லூக்கின் ஒரிஜினல் files சேர்ந்து வந்ததாய் எழுதியிருப்பேன் ! அது தவறு ; அன்றைக்கு வந்தவை XIII & ரோஜரின் மர்மக் கத்தி ஒரிஜினல்ஸ் ! 
1986-ல் ------ பாரிஸின் பிரசித்தி பெற்ற அம்மணியோடு ! 

Friday, April 24, 2020

அத்திந்தோம்....!!

நண்பர்களே,

வணக்கம். இதோ ஜட்ஜ் 'J ' அவர்களின் தீர்ப்பு !!

------------------------------------------------------------------------------------------------------------

முதல் பரிசு:

செல்வம் அபிராமி மற்றும் பார்த்தீபன் பகிர்ந்து கொள்கிறார்கள்.

இரண்டாம் பரிசு

பத்மநாபன்.

மூன்றாம் பரிசு: அனு மற்றும் குமார் சேலம் பகிர்ந்து கொள்கின்றனர்.

ஐவருக்கும் வாழ்த்துக்கள்.

எதிர்வரும் ஈரோடு புத்தகத் திருவிழாவில் ஐவருக்கும் எம் சார்பில் பரிசளிக்க உள்ளோம் என்பதை பணிவோடு சமர்ப்பிக்கின்றேன்.

J
------------------------------------------------------------------------------------------------------------

போகிற போக்கில் அரசவையில் நம்ம வித்வான்கள் அனைவரையும் அமரச் செய்யவே ஒரு புது மண்டபம் கட்ட வேண்டி வரும் போலும் !! அப்புறம் ஒவ்வொரு தீர்ப்பின் போதும், நமது ஜட்ஜமார்கள் காட்டி வரும் பரோபகாரமும் மிரளச் செய்கிறது !!  நன்றிகள் J சார் ; நன்றிகள் முந்தைய ஜட்ஜ் சார்ஸ் !! 

ரைட்டு...பாட்டெழுதப் புலவர்கள் ரெடி ; கவி பாட ஒரு க்ரூப் ரெடி ; இனி அடுத்து டான்ஸ் போட்டி ஒண்ணை போட்டு விட வேண்டியது தானோ ? '' So பயிற்சியை ஆரம்பிக்கிறீர்களா கலைஞர்களே ? அத்திந்தோம்....!! Open Kangnam style !!!

Bye all for now !!
ஏ.இ.பி.கு.

அப்புறம் டான்ஸுக்கும் தோழிமார்  இருந்தாக்கா முன்கூட்டியே கம்பெனிட்டே சொல்லி பெர்மிஷன் வாங்கிக்கணும் அப்பு ! திடு திடுப்புன்னு வீடியோ -கீடியோ அனுப்பி சில பல பிஞ்சு மனசுகளை இங்கே பஞ்சர் ஆக்கிடப்படாது !! 

Monday, April 20, 2020

லாக்டவுன் உ.ப.

நண்பர்களே,

வணக்கம். இன்றைக்கு நம்முள் எத்தனை பேர் பணிக்குத் திரும்பியுள்ளனரோ, தெரியலை - ஆனால் நாலே ஆட்களைக்கொண்டு பணியாற்ற முயன்ற நமது பைண்டிங் பிரிவினைப் பூட்டச் சொல்லி அதிகாரிகள் வலியுறுத்திவிட்டதால், இக்கட no பணி ! இன்னொரு 2 வாரங்களுக்கேனும்  வரிசையில் நின்று ரவுண்ட் பன்னை வாங்கும் போட்டிகளில் தான் பொழுதைக் கழித்தாக வேண்டும் போலும் ! நாட்களை நகர்த்துவது பெரும் பிரயத்தனமாய் இருக்கும் இந்த வேளையினில், ஆங்காங்கே நிறையவே பதிவுகளை பார்க்க முடிந்தது - காமிக்ஸ் வாசிப்பென்பது மெய்யானதொரு stress-buster ஆக உதவிடுவதாய் ! நமது தீவிர காமிக்ஸ் வாசகரும், முத்து நகரின் ஒரு மெகா தொழிலதிபருமானதொரு நெருங்கிய உறவினர் நேற்றைக்கு எனக்கு வாட்சப்பில் அனுப்பிய குறுந்தகவல் இது : 

"Annachi, I must have read at least 50 comics including Rathap Padalam in the lockdown. I have not read a single book otherwise ; no Sashi Tharoor ; no Bill Bryson ; no Frederick Forsyth. Thank you for keeping us us sane in this crazy time !"

ஆங்காங்கே FB -ல் ; வாட்சப் குழுக்களில் எதிரொலிக்கும் இது போன்ற பதிவுகளையும் சில நண்பர்கள் எனக்கு மின்னஞ்சலில் அனுப்பியிருக்க - இந்த இருண்ட நாட்களிலும் ஒரு வெள்ளிக்கீற்றை இனம் காண முடிந்த சன்னமான மகிழ்ச்சி உள்ளுக்குள் ! "இவை என்றென்றும் சாஸ்வதமான சமாச்சாரங்களே ; என்றைக்கும் படிக்கவல்ல களங்களே"  - என்று நாம் அடிக்கடி  டமாரம் அடித்து வந்தாலுமே, நானே அதையெல்லாம்  - "உலகத் தொலைக்காட்சிகளில் முதன்முறையாக "  ரக விளம்பர யுக்திகளாகவே தான் பார்த்திடுவதுண்டு ! Yes of course - சில எவர்க்ரீன் கதைகளை நீங்கள் முச்சூடும் படிப்பதுண்டு என்பதில் ரகசியங்கள் இல்லை தான் ; ஆனால் இயந்திரகதியிலான நமது வாழ்க்கை ஓட்டங்களின் மத்தியில், வாசிப்புக்கென நேரம் ஒதுக்குவதே குதிரைக்கொம்பு ; இந்த அழகில், மீள்வாசிப்புக்கெல்லாம்  யாரிடம் இருக்கப் போகிறது நேரம் ? என்ற எண்ணமே மேலோங்கும் ! But lo behold - இதோ இந்த லாக்டௌன் நாட்கள் காமிக்ஸின் நிரந்தரத்தன்மையை வெளிச்சம் போட்டுக் காட்டி வருவதை மகிழ்வோடு பார்த்திடும் போது, நமது காமிக்ஸ் தான் என்றில்லை - பொதுவாய் எந்தவொரு  'பொம்மை புக்' பரிச்சயமும்  இல்லாதோர் மீது அனுதாபமே தோன்றுகிறது ! எத்தனை ரம்யங்களை அவர்கள் நுகர்ந்திட இயலாதே போகிறது ? 

ரைட்டு....இந்த உ.ப.வின் முதல் கேள்வியானது : இந்த லாக் டௌன் நாட்களில் - ஜாலியான அரட்டை ; கும்மி, என்பதைத் தாண்டி, காமிக்ஸ் வாசிப்புக்கென உங்களுள் எத்தனை பேருக்கு நேரம் ஒதுக்க முடிந்துள்ளது guys ? இது சும்மா டைம்-பாஸ் கேள்வியே ; ஆகையால் பீலாக்களுக்கு அவசியமிராது ! Yes ; படித்தீர்களெனில் -

அதனுள் கார்ட்டூன்களுக்கு இருந்த இடம் கூடுதலா : கம்மியா ? 

அதிகாரிக்கென ஒதுக்கிய வாசிப்பு நேரம் கம்மியா ? கூடுதலா ?

என்னிடம் இன்னொரு கேள்வியுமே உண்டு :

இங்கு குழுமிடும் நீங்கள் சகலருமே காமிக்ஸ் ஆர்வலர்கள் ; 'பொம்ம புக் புரவலர்கள்' என்பதில் no doubts !! உங்கள் இல்லங்களில் ; உங்கள் நட்பு வட்டங்கள் மத்தியினில் உங்களது இந்த வாசிப்புப் பழக்கத்தை எவ்விதம் பார்த்திடுகிறார்களோ ? மாசா மாசம் கூரியரில் 'கொயந்த புள்ளே பொஸ்தவம்' வந்து சேரும் போது ; வாரயிறுதிகளின் ராப்பொழுதுகளில், பின்னூட்டமிட 'புளியாம்..புளியாம்' என்று போன் பொத்தான்களை அமுக்கிக் கிடக்கும் போது ; புத்தகவிழா நேரங்களில், ஈரோட்டு வாசக சந்திப்புத் தருணங்களில், மூட்டைகளைக் கட்டிக்கொண்டு 'ஜாலிலோ ஜிம்கானா' என்று நீங்கள் டாட்டா சொல்லிவிட்டுக் கிளம்பிட எத்தனிக்கும் போதெல்லாம் வீட்டில் கிட்டுவது என்னவாக இருக்கும் ?

Option A : கலாமிட்டி ஜேனின் #@*%&(@ பாணியில் 'அன்பான' குசல விசாரிப்புகள்  ?

Option B : " நான் ஒரேயொரு காக்ரா-சோளி கேட்டா அதுக்கு நொள்ளைன்னுட்டு இங்கே காசைக் கரியாக்க என்ன வேலைலாம் பாக்குது பாரேன் ?" என்ற முணுமுணுப்புஸ் ?

Option : C : 'இது பூட்ட கேஸ் ; என்னமோ பண்ணித் தொலைச்சுக்கட்டும் !'

Option D : "ஹை...புக் வந்துருச்சா ? வந்துருச்சா ? எனக்கு ஒண்ணு ?"


Option E : ச்சை...எனக்கு புக்கே பிடிக்காது ! 

தகிரியமாய்  நிஜமான பதில்கள் ப்ளீஸ் ?

Before I sign out - FB-ல் கண்ணில்பட்டதென தம்பி செந்தில் சத்யா அனுப்பியிருந்ததை இங்கே பகிர்ந்திடுகிறேனே :

Bye all...see you around !! Stay Home & Stay Safe !!

ஏ.பி.கு. (ஏக்கம்லாம் இல்லாத பின்குறிப்பு) 

போன பதிவில் தந்திருந்த அந்த 'இங்கிலீஷ் கவிதை' மொழிபெயர்ப்புப் போட்டிக்கு வியாழன் வரை டைம் உண்டு ! அது வரையிலும் முயற்சிக்கும் நண்பர்களின் ஆக்கங்களை ஜட்ஜ்  செய்திடாய் போகிறவரை, வியாழன் காலையில் நான் உங்களுக்கு அறிமுகம் செய்திடுவேன் !

அப்புறம் இனி வரும் இந்த லாக்டௌன் நாட்களின் ஒவ்வொரு பதிவிலும் ஜாலியாய் ஏதேனுமொரு backissue பற்றிய மீள்பார்வைகளை நடத்திடலாமா guys ? பொழுது போனது போலவும் இருக்கும் ; பழைய நினைவுகளை அசைபோட்டது போலவும் இருக்கும் ; அந்த இதழ்கள் வெளியான நாட்களில் இங்கே நம் வலைப்பதிவில் அரங்கேறிய லூட்டிகளை revisit செய்தது போலவும் இருக்கும் அல்லவா ? Hot & Cool ஸ்பெஷல் இதழ் நினைவுள்ளதா guys ? அதனிலிருந்து ஆரம்பிப்போமா அடுத்த பதிவு முதலாய் ? உங்களிடம் அந்த புக் இருக்கும் பட்சத்தில், தூசி தட்டி எடுத்து அதை இஷ்டைலாய் கையில் ஏந்தியபடிக்கு ஒரு selfie அனுப்புங்களேன் - அவற்றை post செய்த கையோடு அந்த இதழை மறுக்கா அலசிடலாம் !  

Saturday, April 18, 2020

ஜெய் பாகுபலி !!

நண்பர்களே,

வணக்கம். குகைப் பாதைக்குள் தவண்டு செல்லும் ரயிலுக்கு, தொலைவினில் லேசாய் வெளிச்சக் கீற்று தென்படுவதால்  - இருட்குகைக்கொரு முடிவுரை சீக்கிரமே கண்ணில்படுமென்ற நம்பிக்கை பிறக்கிறது ! Yup ...இந்தப் பதிவை டைப்படிக்கும் வேளையினில் தமிழகத்தினுள்ளே கொரோனா பாதிப்புகளின் வேகம் சற்றே மட்டுப்பட்டுத் தென்படுகிறது !  அதன் பலனாய்,  வரும் 20-ம் தேதி முதலாய், பாதி ஆட்பலத்துடன், பஞ்சாயத்துப் பகுதிகளில் உள்ள தொழில் கூடங்கள் செயல்படலாம் என்பதால் - ஊருக்கு வெளியிலுள்ள நமது பைண்டிங் அலுவலகம் திங்கட்கிழமையிலிருந்து இயங்கத் துவங்குமென்ற நம்பிக்கை உள்ளது ! இன்னமும் 1 புக் அச்சிடும் பணிகள் பாக்கியுள்ளது  & in any case டெஸ்பாட்ச்சின் பொருட்டு நாம் ஆபீஸைத் திறப்பதற்கும் அனுமதி கிடையாதென்பதால், ஏப்ரலின் இதழ்களை இந்த ஊரடங்கு நீட்டிப்பின் முடிவுரையின் நொடியினில் உங்களிடம் ஒப்படைத்து விடலாமென்று தோன்றுகிறது !! கடந்த 8 ஆண்டுகளாய், அடித்துப் பிடித்து, தாமதப் பேயைக் கழுத்தைப் பிடித்து வெளியே தள்ளும் வாடிக்கையை கற்று வந்திருந்தோம் ! நாமெல்லாம் ஓவர் நல்ல பிள்ளைகள் ஆவதெல்லாம் இயற்கைக்கே கொஞ்சம் டூ டூ மச்சாய்த் தோன்றியது போலும் ; 'சித்தே ஓய்வெடுங்கோ மக்கா !' என அமரச் செய்து விட்டுள்ளது ! எல்லாம் அவர் செயல் எனும் போது go with the flow என்பதே நமக்கிருக்கும் மார்க்கம் !

எது எப்படியோ - கிட்டத்தட்ட மூன்றரை வாரங்களாக தின்ன ; தூங்க ; நெட்டை நோண்ட ; மறுக்கா தூங்க ; நெட்டை நோண்ட ; தின்ன என்று நாட்களைக் கடத்திய பிற்பாடு, பணிகளுக்குள் திங்கள் முதலாய் முனைப்போடு புகுந்திட எண்ணியுள்ளேன் ! துவக்க வாரத்தில் "ஒற்றை நொடி..ஒன்பது தோட்டா" மொழியாக்கம் உச்சஸ்தாயியில் ஓடியது என்னவோ நிஜம் தான் ! இந்த ஆல்பத்தின் மொழியாக்கம் ஒரு செம சுவாரஸ்யச்சவாலாய் முன்னின்றதன் பலனாய், கவிஞர் பாணபத்திரரின் பின்னூட்ட  வேகத்தில் முதல் 3 பாகங்களின் பணிகள் பிய்த்துப் பிடுங்கிச் சென்றன ! ஆனால் ஒருவித அசாதாரண சூழல் உலகெங்கும் நிலவும் நிலையில், குன்றா முனைப்போடு வேலைகளுக்குள் கவனம் செலுத்த இயலாதே போயிற்று ! பற்றாக்குறைக்கு நகராட்சியினர் ஒரு நாள் காலையில் வீட்டுக் கதவைத் தட்டி, "இக்கட வைரம் ஆனந்த் விஜயன் யாரு சார் ?" என்று கேட்க, அப்படி யாரும் இல்லியே சார் இங்கே" என்றேன் ! ஆனால் "விலாசம் இது தானென்று" உடன் வந்திருந்த நகராட்சி சுகாதார இன்ஸ்பெக்டர் சொல்ல, "விக்ரம் அரவிந்த் விஜயன் என்று தான் என் பையன் இருக்கிறான்  !" என்று சொன்னேன் ! "அவர் எங்கேயும் இப்போதைக்கு பாரின் போயிட்டு வந்திருக்காரா  ?" என்று கேட்டார்கள் !  "ஆமாம் சார் , பிப்ரவரி பத்தாம் தேதிவாக்கிலே ஐரோப்பா போயிட்டு வந்திருந்தான் !" என்று சொன்னேன் ! அப்புறம் பேசியதில் தான் தெரிய வந்தது - பிப்ரவரி 14-ம் தேதிக்கு இத்தாலியிலிருந்து டில்லி வழியாக ஜூனியர் ஊர் திரும்பியிருந்த தகவல், பிழையாய்  மார்ச் 14 என்று உள்ளூர் அதிகாரிகளிடம் பதிவாகியிருந்த சமாச்சாரம் ! "இதோ பாருங்க சார் தேதிகளை ! விசாவே மார்ச் 8 க்கு முடிந்துள்ளது ; இதில் எப்புடி மார்ச் 14-க்கு அவன் திரும்பியிருக்க முடியுமென்று" விளக்கம் சொல்ல முயன்ற போதிலும்  - "சாரி சார்...எங்களுக்கு வந்த தகவலின்படி home quarantine உங்களுக்கு " என்று சொல்லி, வாசலில் ஸ்டிக்கரை ஒட்டியும் விட்டார்கள் ! தேசத்துக்கே ஊரடங்கு என்பது சீக்கிரமே அறிவிக்கப்பட்ட நிலையில், ஸ்டிக்கர் இல்லாவிடினும் நாங்கள் எங்கேயும் போயிருக்க வாய்ப்பில்லை தான் ; இருந்தாலும், வாசலிலிருந்த ஸ்டிக்கர் நெருடலாகவே இருக்க, வேலைகளுக்குள் முழு மனசாய்ப் புகுந்திட இயலவில்லை ! பற்றாக்குறைக்கு தினத்துக்கும் கிரிக்கெட் ஸ்கோர் போல ஏறி வந்த தேசத்தின் / மாநிலத்தின் பாதிப்பு எண்ணிக்கையுமே புளியைக் கரைக்க, "வேலைகளை நேரம் வர்றச்சே பாத்துக்கலாம் !" என்று மண்டைக்குள் தோன்றியது ! So அதன் தொடர்ச்சியாய் இங்கே நமது வலைப்பதிவிலும் ஊர்க்கதை ; உலகக்கதை என்ற ஏதேதோ அரட்டைகள் சூடு பிடித்ததைத் தொடர்ந்து, இந்தக் கும்மிகளில் பங்கேற்பதிலேயே எனது பொழுதுகள் கரைந்து விட்டன !

நாட்களின் ஓட்டத்தோடு, ஏதோவொரு விடுமுறையில் இருப்பது போலாய் Eat..Sleep..Repeat என்ற வாடிக்கையே தொடர, அவ்வப்போது தொழிலின் எதிர்காலம் சார்ந்த கவலைகள் தலைதூக்கும் போதெல்லாம், அவற்றை மறக்க எதையேனும் வாய்க்குள் போட்டு ரைஸ் மில்லாய் அரைக்கத் துவங்கும் வழக்கம் தொற்றிக் கொண்டது ! எண்ணற்ற கடலை மிட்டாய்கள் ; ரவுண்டு பன்கள் ; வாழைப்பழங்கள் ; கேரட்கள் உள்ளுக்குள் போய் தொந்தியை சமன் செய்தது நிகழ்ந்திட, அதன் பலனாய் தற்காலிகமாய் உறக்கமும், அதன் பலனாய் பிடுங்கல் பற்றிய சிந்தனைகளிலிருந்து விடுதலையும் கிட்டியதென்னவோ நிஜமே ! ஆனால் காத்திருக்கும் 2 வாரங்களுக்குப் பின்னான திங்கட்கிழமை முதலாய், எத்தினி நொறுக்குத்தீனிகளை நொங்கியெடுத்தாலும் - no running away from reality என்பது புரிகிறது !  தொடர்ந்திடும் இந்த 40 நாள் முடக்கம் ஒட்டுமொத்தமாய் தேசத்தை ; லோகத்தை எத்தனை உலுக்கி எடுத்துள்ளதென்பது ஊருக்கே தெரியும் ! ஒவ்வொரு துறையினரிடமும் பேசும் போதெல்லாம் முந்திக் கொண்டு அவர்கள் வைக்கும்  ஒப்பாரிகளில் ; புலம்பல்களில், காய்ந்து போகும் கபாலமானது, நாம் சொல்ல வந்ததையே மறந்து விடுகிறது ! So மறுபடியும் சீட்டில் அமர்ந்து பணிகளைத் துவக்கிட முற்படும் போது தான் இந்த இக்கட்டின் நிஜப் பரிமாணமும் புரிந்திடும் என்று தோன்றுகிறது !  71 ரூபாயாக இருந்ததொரு அமெரிக்க டாலர் தற்சமயமாய் ரூ.77-ஐ தொட்டுப் பிடிக்க 'தம்' கட்டிக்கொண்டுள்ளது ! 77 ரூபாயாக இருந்த யூரோ இன்று ரூ.84 ! பேப்பர் கொள்முதலில் துவங்கி, அச்சிடும் உட்பொருட்கள் ; ராயல்டி பட்டுவாடாக்கள் என அத்தனையுமே இனி கழுத்தைச் சுற்றி எவ்விதம் இறுக்கக் காத்துள்ளன என்பதை மே 5 முதலாய் நெஞ்சைப் பிடித்துக் கொண்டே தான் கண்டுபிடித்தாக வேண்டும் ! அப்புறம் காத்திருப்பதோ -  ஏஜெண்ட்களிடம் முன்பாக்கிகளை வசூல் செய்திட முற்படும் "செருப்புத் தேய்க்கும் படலங்கள்" ! இந்தப் பிரளயத்துக்குப் பின்னே எத்தனை பேர் தொழிலில் எஞ்சியிருக்கப் போகின்றனர் ? எஞ்சிடுவோரில் கடன்களை பைசல் செய்யும் சூழலில் எத்தனை பேர் இருக்கப் போகின்றனர் ?  அவர்கள் நல்லெண்ணங்களோடு இருந்தாலுமே இந்தப் பணமுடை காலத்திலிருந்து விடுபட்டு, கொஞ்சமாய்ப் பணம் புரட்டியனுப்ப அவர்களுக்கு எத்தினி நாழி ஆகிடுமோ ? என்பதெல்லாம் anybody's guess ! And it's not like - "விலைவாசி ஏறிப்புடிச்சி மகா ஜனங்களே ; ஆகையால் விலை கூட்டணும் !" என்று ஒற்றை வரியை முதல்பக்க மேற்கோடியில் பதித்த கையோடு விலையேற்றிட முடியும் என்ற சூழல் இன்றைக்கு இல்லை - at least for us ! 'பொம்மை புக்' ரேஞ்சுக்கு நமது இன்றைய விலைகளே ஜாஸ்தி எனும் போது, இதற்கு மேலும் விலையினை இந்த நொடியில் உசத்தி, ஒட்டகத்தின் முதுகை முறித்த மடமையைச் செய்யத் துணிவில்லை ! So கடிப்போம் பற்களை ; தொந்திகளைச் சுற்றிக் கட்டத்  தேடுவோம்  தண்ணீரில் முக்கிய துண்டுகளை ; என்பதே இப்போதைக்கான watchwords ஆக இருந்திட முடியும் !

இதையெல்லாம் இங்கே நான் பஞ்சப்பாட்டாய்ப் பாடிடுவது உங்கள் ஜோப்பிகளை ஏதேனுமொரு ரூபத்தில் பஞ்சராக்கும் நோக்கில் அல்ல folks ! இன்றைய பொழுதில் யாரிடம் தானில்லை ஒரு பஞ்ச புராணம் ? டியூன்கள் மாறிடலாம் தான் ; சுதிகள் மாறிடக்கூடும் தான் ; ஆனால் எல்லோரது பாடல்களின் வரிகளிலும்   புதைந்திருக்கக்கூடிய வலிகளில் மட்டும் இந்த நாட்களில் பெரிதாய் மாற்றங்கள் இராதென்பேன் !   On the contrary - இந்தச் சிரமப் பகிரல்களை உங்களிடம் ஒப்பிப்பதோ - ஓரிரு கோரிக்கைகளை முன்வைக்கும் முகாந்திரங்களாய் மட்டுமே :

1 நல்ல நாளைக்கே வாசிப்பினில் "அத்தியாவசியம்" என்ற சொகுசுகளெல்லாம் கிடையாது நமக்கு ! 'பொம்ம புக் ' என்ற அடையாளமும், அதன் பலனாய் 'அப்டிக்கா ஓரமாய் போயி விளையாண்டுக்கோ கண்ணு !' என்ற உபதேசங்களுமே நமக்கான gifts ! இந்தச் சூழலில் இந்தச் சின்னஞ்சிறு வாசக வட்டம் தொடர்ந்து தோள் கொடுப்பது மாத்திரம் இல்லாது போயின் - இந்நேரத்துக்குப் பஞ்சு மிட்டாய் தான் விற்றுக் கொண்டிருந்திருப்போம் - "லயன் மார்க் முட்டாய் " என்ற லேபிலில் இஸ்பைடரையோ ; சட்டிதலையனையோ போட்டபடிக்கு ! My request at this point of time is : சந்தாக்களில் சேர்ந்திட நிதிநிலைமை இடம் கொடுக்காது போயினும் - இந்த ஊரடங்கு அத்தியாயங்கள் முற்றுப் பெற்றான பின்னே, மாதம்தோறும் ஒன்றோ / இரண்டோ இதழ்களையாவது ஆன்லைனில், அல்லது உங்களுக்கு அருகாமையில் இருக்கக்கூடிய கடைகளில் தொடர்ந்து வாங்கிடுங்களேன் ப்ளீஸ் ? எல்லாமே ஒரு habit தான் எனும் போது - தொடர் வாசிப்பும் பழகிப் போய் விடும் ; அதனிலிருந்து விலகி நின்றோமெனில் அந்த வாடிக்கையுமே பழகிடும் ! காமிக்ஸ் வட்டத்தினுள் ஒரு சிறு அங்கமாகவேணும் நீங்கள் ஒவ்வொருவருமே தொடர்ந்திட  வேண்டுமென்பதே எனது வேண்டுகோள் ! 

2 நிறைய பாக்கெட்டுகளுக்குள் தற்சமயம் நிறைய வெற்றிடம் இருப்பின் வியப்பேதும் நஹி அதன் பொருட்டு ! அதனாலென்ன guys - உங்களால் இன்றைய சூழலிலும் நமக்கு ஒத்தாசை செய்திட மார்க்கமுண்டு தான் ! நேரம் கிடைக்கும் போது உங்களின் வாட்சப் குழுக்களில் ; FB பக்கங்களில் ; ட்விட்டர் ; இன்ஸ்டாகிராம் கணக்குகளில் காமிக்ஸ் பற்றி ஏதேனும் எழுதலாமே - ப்ளீஸ் ? கைவசம் உள்ள முந்தைய இதழ்களைப் பற்றியோ ; நமது தற்போதைய நாயகர்களைப் பற்றியோ பதிவிட்டீர்களெனில், ஒவ்வொன்றும் ஒரேயொரு புது வாசகரை உருவாக்கித் தந்தாலுமே சிறப்பு தானே ? So பணமல்ல இங்கே அவசியமாகிடுவது ; மனமே ! 

3 இன்றைக்கு பூமிக்கே தேவை நம்பிக்கையும், பாசிட்டிவ் சிந்தனைகளும் தான் ! நிஜம் அதுவே எனும் போது, அந்த பூமியின் ஒரு தம்மாத்துண்டு மூலையில் ; ஒரு தம்மாத்துண்டு தொழிலில் அமர்ந்துள்ள நமக்கும் அவை தேவைப்படாது போயிடுமா - என்ன ? So நம் மீதான வருத்தங்கள் ; விமர்சனங்கள் ; நெருடல்கள் என்னவாயிருப்பினும் - அவற்றை பொதுவெளிகளில் அலசிக் காயப்போடும் routine-களுக்கொரு குட்டி பிரேக் ப்ளீஸ் ? மகிழ்ச்சியோ ; இகழ்ச்சியோ - அவை ராபின் நீலம் போலவே என்பேன் !! ஒற்றைச் சொட்டு விட்டால்  ஒரு வாளித் தண்ணீரும் அதன் நிறமாகிப் போகும் தானே ? So பாசிட்டிவ் சொட்டு நீலம் கொஞ்ச காலத்துக்கேனும் ப்ளீஸ் ? 'ஓஹோ.....உன் போக்குக்கு ஜால்றா போட்டுக்கிட்டே வரச் சொல்றியாக்கும்  ? என்ற கேள்வி எழலாம் தான் ! ஒவ்வொரு இதழிலும் குறைகளே இல்லை என்று நான் சொன்னால் அது எத்தனை பெரிய டூபாக்கூராய் இருக்குமோ, அத்தனை பெரிய பீலாவே - ஒவ்வொரு இதழிலும் நிறைகளே இல்லையென்று சொல்லிடும் பட்சத்திலும் ! So நான் தற்காலிகமாய்க் கோருவதெல்லாமே அந்த நிறைகளை focus செய்யுங்களேன் என்று மட்டுமே ! அப்புறம் திட்ட வேண்டிய விஷயங்கள் மறந்து போய்ட்டா என்ன பண்றது ? என்ற யோசனையா ? No worries....ஒரு 48 பக்க கோடு போட்ட நோட்டுப் போட்டு அதனில் எழுதி வைத்திருந்து ஞாபகமாய் அப்புறமாய்க் கூடத் திட்டிக்  கொள்ளலாமில்லையா ? 

4 .நிறைய தருணங்களில் அவற்றின் நெடும் காலப் பாதிப்பென்னவென்று அறியாமலே, ஆர்வக்கோளாறுகளில் கொஞ்சப் பேர் செய்திடும் இந்த back issues pdf விநியோகத்தை இந்தத் தருணத்திலாவது மூட்டை கட்டிடலாமே guys ? இரண்டு நாட்களுக்கு முன்னே கூட "மினி லயன் முதல் 2 இதழ்கள் " என்று பெருமையாய் ஸ்கேன் செய்து சுற்றில் விட்டுள்ளார் வாசகர் ஒருவர் ! அது நமது மறுபதிப்புப் பட்டியலில் உள்ள இதழ் எனும் போது ஒற்றை நொடியில் அதன் எதிர்காலத்தை துவம்சம் செய்த புண்ணியத்தை ஈட்டியுள்ளார் அந்த வாசகர் ! இன்றைய பொழுதில் விற்கும் ஒவ்வொரு புக்கும், இந்தப் பயணத்தின் ஆயுட்காலத்தை ஒவ்வொரு நிமிட அளவுக்கு நீட்டிக்கும் ஆற்றல் கொண்டதெனில் ; இது போன்ற "கடைத் தேங்காய்-தெருப் பிள்ளையார் முயற்சிகள்" அதே பயணத்தின் ஆயுளை ஒவ்வொரு மணி நேர அளவுக்கு நசுக்கும் திறன் கொண்டவை ! தெரிந்தே குரல்வளை மீது கால்வைக்கும் பழக்கங்களை இப்போதேனும் உதறிட முயற்சியுங்களேன் ப்ளீஸ் ? பழைய புக்குகளை கோடி ரூபாய் கூட சொல்லிக் கொள்ளுங்கள் ; அதனை வாங்கும் சக்தியோடு உங்களிடம் யாரேனும் சிக்கினால் அது உங்கள் இருவருக்கும் மட்டுமே பொதுவானதொரு சமாச்சாரமாகிடும் ! அதனில் தலைநுழைக்க யாருக்கும் உரிமை இராது ! ஆனால்  pdf ஆக்கி ஊருக்கு விநியோகிக்கும் இந்த பரோபகாரம் வேண்டாமே ? You are making life more difficult for us !!

5 The next request : சற்றே தர்மசங்கடத்தை ஏற்படுத்துவது : உடனே இல்லையென்றாலும், வாய்ப்பு அமையும் போது ஆளாளுக்கு ஒரேயொரு முந்தைய இதழையேனும் வாங்கி உங்கள் நண்பர்களுக்கோ ; பள்ளிக்கூட / ஆபீஸ் / அபார்ட்மெண்ட் லைப்ரரிக்கோ பரிசாகத் தந்திடுவது பற்றி யோசித்துப் பாருங்களேன் - ப்ளீஸ் ? Each book that travels out from our stock will now mean more than it ever did !! யதார்த்தமாய்ப் பேசுவதெனில் இந்தாண்டின் புத்தக விழாக்களின் நிலவரம் எவ்விதமிருக்கும் ? அங்கே என்ன மாதிரியான விற்பனைகளை இந்தாண்டின் முழுமைக்கும் எதிர்பார்த்தல் சரிப்படும் ? என்பதெல்லாம் பதிப்பகத் துறையின் ஜாம்பவான்களையே தடுமாறச் செய்து வரும் கேள்விகள் ! அட, ரெகுலர் புத்தகக் கடைகளிலேயே கூட அடுத்த 6 மாதங்களுக்கு வியாபாரம் எவ்விதம் இருக்குமென்பதை யூகிக்க வழியில்லை ! So ஆன்லைன் விற்பனையின் வேகத்தை  நாம் வளர்த்தல் எப்போதையும்  விட  இப்போது முக்கியத்துவம் பெற்று நிற்கின்றது ! Just a request guys !! அதற்காக, நாளையேவோ ; அல்லது ஊரடங்கு முடிவுற்ற மறு நாளேவோ, உங்கள் ஆர்டர்களை எதிர்பார்ப்போம் என்றெல்லாம் இல்லை !! வாழ்க்கையில் இந்த நொடியில் பொம்மை புக்குகளைத் தாண்டிய முக்கிய சமாச்சாரங்கள் ஒரு நூறு உண்டென்பதை ஏற்றுக் கொள்ளும் முதல் ஆசாமி நானே ! ஏதேனும் பிறந்த நாள்கள் ; திருமண நாட்கள்,பண்டிகைகள் போன்ற வேளைகளில் காமிக்ஸ்களை ஒரு பரிசாக்குவது பற்றிய சிந்தனைகள் எழுந்தாலுமே சூப்பர் ! 

6. சந்தாவின் லாயல்டி பாயிண்ட்ஸ் மீட்பதன் பொருட்டு, சட்டித் தலையன் ஆர்ச்சியின் வண்ண இதழ் மே மாதம் நம் அன்புடன் கிட்டிடும் என்று அறிவித்திருந்தேன் அல்லவா ? அதனை ஆண்டின் மூன்றாம் க்வாட்டருக்கு நகற்றிட எண்ணுகிறேன் ! நிச்சயமாய் அல்வா கிண்டும் முயற்சியல்ல இது ; கலரிங் செய்யப்பட்டு டிஜிட்டல் கோப்புகள் தயாரே ! ஆனால் குடலை வாய்க்குக் கொண்டு வரப்போகும் தற்போதைய பேப்பர் விலைகள் கொஞ்சமே கொஞ்சமாய் நிதானத்துக்குத் திரும்பினால் தேவலாமே என்றதொரு சிறு ஆசையே ! Hope you will be o.k. with it !

7.இடைப்பட்ட 40 நாட்கள் எதிர்பாரா விதத்தில் கபளீகரமாகிப் போவதால், ஒரு நாலைந்து இதழ்களை நடப்பாண்டில் இனிவரவுள்ள மாதங்களுக்குள் பகிர்ந்திட வேண்டி வரும் ! ஆகையால்  நடப்பு மாதத்திலேயே 5 இதழ்கள் இருந்திடும் ! இது போன்ற மாதங்கள் இன்னும் சில இருந்திடும் நடப்பாண்டில் ! So - "overkill" என்ற விமர்சனங்கள் வேண்டாமே - ப்ளீஸ் ?

8. Last but not the least - சந்தா !! ரெகுலர் சந்தாவின் ஏப்ரல் to டிசம்பர் திட்டமிடலிலோ  / ஜம்போவின் சீசன் 3 சந்தாவிலோ  இணைந்திரா நண்பர்கள் வசதிப்படும் போது முயற்சிக்கலாமே - please ?  

இவற்றையெல்லாம் சொல்லி, உங்களின் தலைகளுக்குள் ஏற்கனவே இருக்கும் நோவுகள் பற்றாதென, புதுசாய் ஒரு பாட்டத்தை ஏற்றிடுவதில் எனக்குப் பெரிதாய் ஆர்வம் இல்லை தான் ! கட்டையோ-நெட்டையோ, நாமாகவே சமாளிப்பதே உசிதமென்றிருந்தேன். ஆனால் நேற்றைக்கு காமிக்லவர் ராகவன் அனுப்பியதொரு அமெரிக்க பத்திரிகை செய்தியைப் படித்த போது, காமிக்ஸ் உலக ஜாம்பவான்களே என்னமாய் ஆட்டம் கண்டுள்ளனர் என்பது புரிந்தது ! அப்புறமே இந்தப் பதிவினை டைப் செய்யத் தீர்மானம் செய்தேன் ! அமெரிக்கா முழுசுக்கும் பிரதான காமிக்ஸ் இதழ்கள் சகலத்தையும் விநியோகிக்கும் Diamond Book Distributors நிறுவனமானது நிலைமை நார்மலாகும் வரை யாரும், எதையும் அனுப்ப வேண்டாமெனச் சொல்லி கேட்டை ஒட்டுமொத்தமாய்ப் போட்டு விட்டார்கள் - April 1 முதலாய் ! Dark Horse Comics திடு திடுப்பென வெளியீடுகளை நிறுத்திக் கொண்டுள்ளது ; IDW நிறுவனமுமே ! மார்வெல் காமிக்ஸ் மூன்றில் ஒரு பங்குக்குக்  கத்திரி போடும் தீர்மானத்தை அறிவித்துள்ளது ! ஜூலையில் தவறாது அரங்கேறிடும் உலகின் நம்பர் 1 காமிக்ஸ் திருவிழாவான (அமெரிக்காவின்) San Diego காமிக் கான் இந்தாண்டு ரத்து செய்யப்பட்டுள்ளது ! நியூயார்க்கில் நடைபெறும் BookExpo-வுக்கும் இந்தாண்டு பூட்டுப் போட்டு விட்டார்கள் ! ஏற்கனவே பாரிஸ் புத்தக விழா ; லண்டன் விழா & இத்தாலியின் போலோனியா விழாக்கள் காலி ! So உலகக் கோடீஸ்வரர்களுக்கே இந்த கதி எனும் போது, கர்சீப்பால் கோவணம் கட்டித் திரியும் நாமெல்லாம் எம்மாத்திரம் ?

ஆனால் இங்கொரு சின்ன வெள்ளிக்கீற்றுமே (அட...அது தான் silver lining-ங்க) உண்டென்பதை நான் சொல்லியாக வேண்டும் ! வெகுஜன விற்பனைக்கு உட்படும் mega இதழ்கள் பெரும்பாலும் யானைகள் போலென்று வைத்துக் கொள்ளுங்களேன் ; தடுமாறினால் எழுந்து கொள்வது சுலபமே அல்ல  ! ஆனால் குண்டுச் சட்டிக்குள் 'குருதே' ஓட்டும் நம் போன்றோரெல்லாமே பூனைகள் மாதிரி ! மதிலில் இருந்தே பல்டியடித்தாலும் - 'வியாவ் !!' என்று ஒரு சவுண்டைக் கொடுத்து விட்டு நொண்டிக்கொண்டேனும் நடையைக் கட்டியிருப்போம் ! So பூமியில் ஆளுக்கொரு சவால் என்றான சூழலில், நம் முன்னே நிற்பதை எவ்விதம் சமாளிக்கவுள்ளோம் என்பதில் தான் இந்த எருமைக்கடா வயசுக்கான அனுபவம் கைகொடுக்கிறதா ? என்று பார்த்தாக வேண்டும் ! So the game's well & truly on !! ஜெய் பாகுபலி ! Wish us luck guys !!

And இந்த 'கொரோனாவுக்குப் பின்னே" என்ற காலகட்டத்தினில் நாம் முன்னெடுக்கக் கூடிய முயற்சிகள் பற்றிய ஆக்கபூர்வமான யோசனைகளும் வரவேற்கப்படுகின்றன!! "டிஜிட்டல் காமிக்ஸ்" என்பது நமக்குச் சாத்தியமல்ல என்பதால், அது சார்ந்த பரிந்துரைகள் நீங்கலாய் everything else under the sun is welcome indeed !! அப்புறம் இது ஜீவிக்க முனையும் ஒரு survival தருணம் என்பதால், "ரெண்டாயிரம் பக்கம் ; ரெண்டாயிரம் ரூபாய் ; ரெண்டு மெபிஸ்டோ கதைகள்" என்ற ரீதியிலான முன்மொழிவுகள் வேண்டாமே - ப்ளீஸ் ?

Moving on, ஒரு வழியாய் இதோ - காத்திருக்கும் 'தல' சாகஸ அட்டைப்படத்தில் முதல்பார்வை ! ஒரிஜினல் டிசைனே ; வர்ண மாற்றங்கள் மட்டுமே நமது உபயம் !
உட்பக்க கோப்புகள் கையில் இல்லை என்பதால் artwork பற்றித் தெரிந்து கொள்ள பின்னட்டையைப் பார்த்துக் கொள்ளுங்களேன் ? அட்டகாச சித்திர பாணியில் ஓவர் அலம்பல் இல்லாதொரு அதிகாரியின் தரிசனத்துடன் நேர்கோட்டில் ஓடும் சாகசமிது ! So சில பல பாயச விரும்பிகள் வேறொரு தருணத்துக்குக் காத்திருக்க வேண்டி வரலாம் !

அப்புறம் காலேஜ் வாசலின் பானிப்பூரிவாலாக்கள் போல், நம் மத்தியில் புலவர்களும், கவிஞர்களும்  கணிசமோ, கணிசமாய்  இருந்தாலும், பாடகர்களின் எண்ணிக்கையோ கொரோனா தடுப்புக்கான PPE கையிருப்பைப் போலவே சொற்பம் என்பது புரிகிறது ! நண்பர் மிதுனனும், நண்பர் மேச்சேரி ஜெயகுமாரும் தலைகாட்டியுள்ளது தவிர்த்து - குருவும், சிஷ்யரும் மட்டுமே செவிகளை மிரட்டியுள்ளனர் ! இதில் டூயட் வேறு !!! இந்த இசைமழையில் நனைந்து தீர்ப்புச் சொல்ல நானும் ஜட்ஜ்களை நியமித்து அவர்கள் யாருக்கேனும் ஜல்ப்புப் பிடித்துக் கொண்டால் வம்பாகிப் போய் விடுமென்பதால் நானே தீர்ப்புச் சொல்லி விடுகிறேன் - செயலர் வெற்றி பெற்றாரென்று ! ஆக இனி அரசவையில் ஸ்டீல் குந்தியிருக்கும் ஸ்டூலுக்குக் கிட்டக்கே இன்னொன்னை போட்ட கையோடு - அவர் இயற்றும் (!!!) பாடல்களை பாடும் பொறுப்பு சங்கத்துச் செயலருக்கே ! அந்த மட்டுக்கு இந்தப் போட்டியில் பாணபத்திரரே கலந்து கொள்ளாதது அந்தச் செந்தூர்வேலனின் கருணையே என்பேன் ! அரோகரா !! https://youtu.be/TnA_kb0-QvY : இந்த லிங்க்கை க்ளிக் செய்து ஒரு இசை மழையில் நனைய தயாராகும் முன்பாய் உங்கள் இஷ்ட தெய்வங்களை நினைத்துக் கொள்ளுங்களேன் folks !!

ரைட்டு...கவிதை இயற்ற புலவர்ஸ் ரெடி ; பாடிட வித்வானும் ரெடி ; இனி எழுத்தாணி பிடிக்கத்  திறன் கொன்டோரைத் தேடுவதே அடுத்த பணி ! இதோ - சமீபத்தில் எனக்கு கிட்டிய பல நூறு வாட்சப் forward சேதிகளுள் இடம்பிடித்திருந்ததொரு சிம்பிள் ஆங்கிலக்கவிதை ! படிக்கும்போது இன்றைய யதார்த்தத்தை அழகாய், மிகையின்றிச் சொல்லியிருந்தது போலப்பட்டது ! உங்களது task : இதனை தமிழில் அழகாய் மொழிபெயர்த்துப் பதிவிட வேண்டியதே !
உங்களுக்குள் புதைந்து கிடக்கும் அந்த சிங்கத்தை  கட்டவிழ்த்து விடுங்களேன் guys ! Full steam ahead !!

கிளம்பும்  முன்பாய் சில உலக நடப்புகள் ; இன்றைய சூழலுக்கேற்ற சேதிகள் :

  • சென்னையின் கண்ணகி நகரில் வசிக்கும் சிறார்களின் துணையோடு UNICEF அமைப்பு  இந்த கொரோனா வைரஸ் பற்றியொரு 8 பக்க காமிக்ஸ் இதழை உருவாக்கியுள்ளது ! தமிழ் ; இங்கிலிஷ் & மலையாளத்தில் அது தயாராகியுள்ளது ! https://www.thehindu.com/news/cities/chennai/a-comic-book-on-covid-19-from-childrens-sketches/article31283642.ece
  • ஏப்ரல் 13 முதல் இத்தாலியில் புத்தகக் கடைகள் திறக்க அனுமதிக்கப்பட்டுள்ளனர் ! 'தல' துளி பாதிப்புமின்றித் தொடர்ந்து வருகிறார் - இந்தச் சிரம நாட்களுக்கு மத்தியிலும் ! 
  • இங்கிலாந்திலும், ஐக்கிய அரபு தேசங்களிலும் ஆன்லைன் புத்தகவிழாக்கள் துவங்கவுள்ளன !! ஊரடங்கு நாட்களிலும் ஒரு புத்தக விழாவின் variety வாசகர்களுக்குக் கிடைக்கவுள்ளது ! Seems an awesome idea !!
  • அமெரிக்காவில் ஏகப்பட்ட புக் ஸ்டோர்கள் தள்ளாட்டம் கண்டு கொண்டிருக்கும் நிலையில், ஆன்லைனில் crowd funding மூலமாய்ப் பணம் புரட்டும் முயற்சிகள் கைகொடுத்து வருகின்றன ! 

  • சிறார் புக்ஸ் முன்னுரிமை பெறுகின்றன U.K. அமேசானின் பட்டுவாடாப் பட்டியலில் ! 

Bye all ; have an awesome weekend ! See you around !! STAY HOME & STAY SAFE !!

Tuesday, April 14, 2020

வணக்கம் சார்வரி !

நண்பர்களே,

வணக்கம். மனைவாசம் இன்னமும் நீள்வது ஊர்ஜிதம் ஆயாச்சு ! நாள் என்ன ? கிழமை என்ன ? பொழுதென்ன ? என்ற  கணக்கெல்லாம் மறந்தாச்சு ! பொழுது புலர்ந்து, பொழுது சாய்வதற்குள் ஓராயிரம் சிந்தனைகள் ; தடுமாற்றங்கள் ; குழப்பங்கள் என்று தலைமுடியில் மிச்சம் மீதியையும் பறிகொடுத்தாச்சு ! வாட்சப்பிலும், ட்விட்டரிலும், FB பக்கங்களிலும் அட்லாண்டா முதல் அமிஞ்சிக்கரை வரை லோகத்தின் அத்தனை மண்டலங்களின் சேதிகளையும் உள்வாங்குவதே அன்றாடம் என்று தலையெழுத்தாகிப் போச்சு !  ஆனால் நடப்பதெல்லாம் நம் நன்மைக்கே என்று அப்பட்டமாய்த் தெரிவதால், நாளைய இடுக்கண்களைத் தவிர்க்கும் பொருட்டு இன்றே சற்றே நகுகிக் கொள்வோமே ? கடந்த 3 வாரங்களாக இங்கே நாம் செய்து வருவது கூட அதையே தான் என்பதை இந்தத் தளத்தின் புள்ளிவிபரங்கள் சொல்கின்றன !! பகல் பொழுதில் நேற்றைக்கு "ரமணா" படம் பார்த்தவன் இதைக் கூடச் சொல்லாவிட்டால் கோலிவுட்டுக்கே இழுக்காகிடாதா ?

*பாரிசில் நான் ஒரு பிரவுன் பூதத்திடம் தப்பித்த கதையினைப் பதிவிட்ட தினத்தின் பார்வைகள் : 3190.

*கேப்ஷன் போட்டியும், தெற்கத்திய ஜட்ஜமார் அதற்கான தீர்ப்பையும் சொன்ன  2 பதிவுகள் வெளியான தினங்களின் பார்வைகள் தலா 2865 & 2754 !

*கவிதை  இங்கு ஆறாய் ஓடிய பதிவும், ஸ்டீல் நம்மையெல்லாம் துவம்சம் செய்து கொண்டிருந்த வேளையினில் அசல்நாட்டு ஜட்ஜஐயாக்கள் குறுக்கே புகுந்து தீர்ப்புச் சொன்ன பதிவுகளும் வெளியான தினங்களின் பார்வைகள் again ஒரு high : 2843 & 2906 !

*போன வாரம் 'நான் சந்திக்கவிரும்பும் VIP " என்ற பதிவு வெளியாகிய தினம் ஈட்டியதும் ஒரு மெகா நம்பரிலான பார்வைகள் : 3219 !

*இரு தினங்களுக்கு முன்போ - "விடிய விடிய பேசிட விரும்பும் நபர்" என எனது தாத்தா பற்றிய பதிவின் ஞாயிறிலோ ஒரு peak : 3467 !!

Of course , இந்தப் பதிவு நம்பர்களின் ஒரு பாதிக்கு கவிஞர் பாணபத்திரரும், சேலத்து குமாரரும் பொறுப்பேற்பர் என்பது புரிகிறது ! ஆனால் அந்த எண்ணிக்கையை நீக்கிப் பார்த்தாலுமே, இந்த லாக்டௌன் தினங்களின் இறுக்கமான பொழுதுகளை சற்றே இலகுவாக்கிக் கொள்ள இங்கு நீங்கள் தலைகாட்டும் தருணங்கள் உதவிடுவது புரிகிறது ! So எப்போதையும் விட இப்போது நட்புக்களின் அண்மை ; மனதை இலகுவாக்கிடும் அரட்டைகள் ; ஒரு பாசிட்டிவ் சூழலின் ஆதர்ஷம், இத்யாதிகள், நமக்கெல்லாம் எத்தனை அவசியம் என்பது புரிகிறது ! எட்டரை ஆண்டுகளுக்கு முன்னே "blogging" என்ற விஷயத்தைக் கையில் எடுத்த போது - புத்தாண்டு வைராக்கியங்கள் போலவே இதன் ஆயுளும் மிஞ்சிப் போனால் சில  வாரங்களுக்கோ / மாதங்களுக்கோ தானிருக்கும் என்றே நினைத்திருந்தேன் ! ஆனால் உங்கள் உற்சாகம் எனும் நீரோட்டம் எனது சோம்பல்களைக் கரைத்து, இந்தப் பதிவையும் சரி, அதன் பலனாய் நமது இதழ்களையும்  சரி,இத்தனை நேர்த்தியாய் முன்னெடுத்துச் செல்லுமென்பது சத்தியமாய் நான் எதிர்பார்த்திரா ஒன்று ! Moreso today - காமிக்ஸ் பற்றிப் பெரிதாய் எதையும் எழுதாமலுமே, கடந்த மூன்று வாரங்களாய் இங்கே வண்டி ஓடுகிறதைப் பார்க்கும் போது, இங்கு துளிர்க்கும் நட்புக்களின் வலிமையை எண்ணி வியக்காதிருக்க முடியவில்லை !  Take a bow all !

ரைட்டு...! காமிக்ஸ் பற்றிய previews தந்திட, அட்டைப்படங்களோ, உட்பக்கங்களோ கைவசமில்லை என்பதால், சமீப வழக்கத்தைத் தொடர்வதே வழி என்றாகிறது ! உலகைப் புரட்டிப் போடும் முக்கியத்துவம் வாய்ந்த சிலபல கேள்விகளை ஒரேயொரு குருக்களின், ஒரேயொரு உள்ளூர் சிஷ்யர் கேட்டிருந்தது ஐ.நா.சபை வரைக்கும் அதிர்வலைகளை ஏற்படுத்தியிருந்தது நினைவிருக்கலாம் ! சபையினர் இப்போதைக்கு சித்தே பிசி என்பதால் அந்த மஹாப் பொறுப்பை நான் கையில் எடுத்துக் கொள்கிறேன் ! இதோ - காத்திருக்கும் கணைகள் :

* இன்னும் 24 மணிநேரத்தில் உலகம் அழிந்துவிடும் என்ற நிலையில் உங்களுக்கு ஒரே ஒரு புத்தகம் மட்டும் மறுவாசிப்புக்கு அனுமதிக்கப்பட்டால் உங்கள் தேர்வு எதுவாக இருந்திடும் ?

ஈரைப் பேனாக்கி ; பேனைப் பெருமாள் ஆக்குவதில் நம்ம கீர்த்தி எட்டுத் திக்கும் பிரசித்தம் என்பதால், மேற்படித் தம்மாத்துண்டுக் கேள்விக்கு, வணிகவியல் பரீட்சைக்கான answer sheets போல வண்டி நீளத்துக்கொரு பதில் கிட்டினால் என்னைத் திட்டாதீர்கள் - நம்ம டிசைனே அப்படியென்று வைத்துக் கொள்ளுங்களேன் !

கேள்வியிலேயே "மறுவாசிப்புக்கு" என்றிருப்பதால், அது ஏற்கனவே படித்ததொரு  புக்காய் மட்டுமே இருக்க முடியும் என்றாகிறதல்லவா ? So யோசிக்கிறேன் ...இதுவரைக்கும் படித்ததில் செம ஸ்பெஷல் எதுவாக இருக்கக் கூடுமென்று ! நினைவு தெரிந்த நாள் முதலாய், எனது புத்தகத் துணைகளென்று பார்த்தால் - அவை வண்டி வண்டியாய் காமிக்ஸ் இதழ்களாகவே இருந்துள்ளன ! அமெரிக்காவில் அப்போது வெளியான Gold Key Comics எனும் அட்டகாச கார்ட்டூன் இதழ்கள் இறக்குமதி செய்யப்பட்டு, ஒற்றை ரூபாய்க்கோ ; இரண்டு ரூபாய்களுக்கோ (!!!) விற்பனையாகிடும் ! சென்னை ; மும்பை ; டில்லி ; கொல்கத்தா போன்ற பெருநகரங்களில் மட்டுமே இவை கிடைக்கும் என்பதால், தனது உள்நாட்டு ரவுண்டுகளின் போது, என் தந்தை மறக்காமல் கத்தை கத்தையாக வாங்கி வருவார் ! அவற்றினில் வெளியான கதைகள் / கார்ட்டூன் நாயகர்கள் / நாலுகாலர்கள் எல்லோருமே அந்நாட்களில் அமெரிக்க டி-வி.ஷோக்களின் ஹிட்ஸ் என்பது எனக்கு ரொம்பவே பின்னாட்களில் தான் தெரியும் ! Baby Snoots என்றொரு ப்ளூ கலர் யானை ; Chip & Dale எனும் 2  குட்டி அணில்கள் (chipmunks ) ; Beep Beep The Road Runner எனும் தீக்கோழி மாதிரியான 4 பறவைகள் ; Super Goof எனும் ஒரு மங்குனி சூப்பர் மேன் ; வால்ட் டிஸ்னியின் டொனால்டு டக் ; அங்கிள் ஸ்க்ரூஜ் ; அப்புறம் Beagle Boys எனும் 3 ஜெயில் பறவைகள் ; Porky Pig எனும் மொழுக் மொழுக் பன்றி ; Daffy Duck எனும் வாயாடி வாத்து ; Yosemite Sam எனும் ஆரஞ்சு தாடிக் கொள்ளைக்காரன் ; Tweety & Sylvester எனும் குருவி + பூனை ஜோடி ; Bugs Bunny எனும் சமர்த்து முசல் ; Gyro Gearloose எனும் லியனார்டோ மாதிரியான விஞ்ஞானிக் கொக்கு - என்று அதனில் அவர்கள் போட்டுத் தாக்கிய கதைவரிசைகளை இன்றைக்கு முழுவதும் சிலாகித்துக் கொண்டே போகலாம் ! இன்று நாம் பழகியுள்ள லக்கி லூக் பாணிகளோ ; smurfs பாணிகளோ இந்தக் கார்ட்டூன் தொடர்களில் கிடையாது ! ஆறோ / எட்டோ / பத்தோ பக்கங்கள் ஓடக்கூடிய செம ஜாலியான ; செம சிம்பிளான ; செம ரகளையான கதைகள் அவை ஒவ்வொன்றுமே ! காத்திருக்கும் நமது "வாண்டு ஸ்பெஷல்" இதழில் வெளியிட இவற்றுள் எந்தத் தொடருக்கு உரிமைகள் கிடைத்தாலுமே கும்பிடு போட்டு வாங்கிடுவேன் தான் ; ஆனால் இவை அனைத்துமே கிட்டத்தட்ட அரை நூற்றாண்டுக்கு முன்பான சமாச்சாரங்கள் என்பதால் பெரும்பான்மைக்கு டிஜிட்டல் கோப்புகள் இல்லை !  எல்லாம் முறையாய் உள்ள வால்ட் டிஸ்னியின் உரிமைகளைப் பெற்றிடும் மார்க்கமோ நமக்கு சாத்தியமற்றது ! So எப்போதாவது அந்த இதழ்களை எண்ணி, கனவு கண்டு கொள்வதோடு சரி ! 

ரகளை செய்த எனது அந்நாட்களது காமிக்ஸ் சேகரிப்பினுள் இன்னொரு முக்கிய இடம் பிடித்திருந்தவை டெக்ஸ் வில்லரும் ; வேதாள மாயாத்மாவும் ; மாயாஜால மன்னன் மாண்டிரேக்கும் தான் ! டெக்சின் black & white சாகசங்கள் கொண்ட பத்தோ, பன்னிரண்டு இதழ்கள் ஒரு பக்கமும், வேதாளம் + மாண்டிரேக்கின் கலரிலான இந்திரஜால் காமிக்ஸ் இதழ்கள் இன்னொரு பக்கமும் குவிந்து கிடக்க நான் இங்கி-பிங்கி போட்டு எதை படிப்பதென்று தேர்வு செய்யாத குறை தான் !  அதிலும் டெக்சின் "டிராகன் நகரம்"  ஆங்கில இதழை காது வழியே வெளியேறக்கூடிய அளவிற்கு இருநூறு முறையேனும் வாசித்திருப்பேன் ! அந்தக் கதை மட்டும் தான் என்றில்லை ; டெக்சின் திடரிலிருந்து முத்துக்களையாய்த் தேர்வு செய்து Topsellers எனும் பிரிட்டிஷ் பதிப்பகம் வெளியிட்டிருக்க, அவை சகலத்தையுமே மேயோ மேயென்று மேய்வது வாடிக்கை !  வேதாளனின் கதைகளோ இன்னொருபக்கம் எனக்குள்ளே 'பச்சக்' என ஒட்டியிருக்க, அவர் போட்டிருப்பது போலொரு தம்மாத்துண்டு ஜட்டியை மாட்டிக் கொண்டு, போகும் ஒவ்வொரு சித்திரைப் பொருட்காட்சிக் கடைகளிலும் அவர் வைத்திருப்பது போலான முத்திரை மோதிரம் கிடைக்குமாவென்று ஆவலாய்த் தேடியதும் அந்நாட்களது ஞாபகங்களுள் ஒன்று ! அந்நாட்களது இந்திரஜால் காமிக்ஸ் வாராவாரம் கலரில் பின்னியெடுப்பார்கள் எனும் போது வீட்டுக்கு அருகாமையில் இருக்கும் புஸ்தகக்கடையில் தவறாது அவற்றை வாங்கிடுவேன் ! ரிப் கிர்பி ; சார்லி போன்ற அமெரிக்க நாயகர்களோடு அறிமுகம் வளர்ந்தது அப்படித் தான் !

Growing up, காமிக்ஸ்களிலிருந்து துப்பறியும் சிறுவர் நாவல்கள் பக்கமாய்  ஐந்தாப்போ என்னமோ படிக்கும் போது கவனங்கள் திரும்பியது - The Three Investigators எனும் 15 + கதைகள் கொண்ட தொடரின் உபயத்தில் ! மூன்று விடலைப் பசங்கள் ; அமெரிக்காவின் சான் டியேகோவில் (??) பள்ளிப்படிப்பின் மத்தியில் ரகளையான பல மர்மங்களை விடுவிப்பதே இந்தத் தொடர் ! ஒவ்வொன்றுமே அந்த வயதினரை கட்டுண்டு போகச் செய்யும் அதகளங்கள் !! அவற்றின் hardcover பதிப்புகள் அந்நாட்களது முத்து காமிக்ஸ் அலுவலகத்து மாடியின் லைப்ரரியில் கிடக்கும் ! ஒன்றுபாக்கியின்றி அத்தனையையும் வீட்டுக்கு லவட்டி வந்து வெறியோடு வாசிப்பேன் ! தொடர்ந்து The Hardy Boys எனும் 50 + கதைகள் கொண்ட கதை வரிசை என்னைப் பைத்தியமாக்கிய நாட்கள் !! ஒவ்வொரு வடஇந்திய டூருக்கு முன்னேயும் அந்தத் தொடரிலிருந்து எந்தெந்த புக்குகள் வேண்டமுமென்று ஒரு தாளில் நான் குறித்துக் கொடுத்தால், தவறாது அவற்றை வாங்கி வந்து விடுவார் தந்தை ! ரயிலிலிருந்து அவர் வீடு திரும்பும் போது கையிலிருக்கும் ரசகுல்லா டின்னையும்,  சூட்கேசில் மேல்வாக்கில் இருக்கும் Hardy Boys புக்குகளையும் எதிர்பார்த்தே முந்தைய ராத்திரியிலிருந்தே தூக்கம் பிடிக்காது பரபரப்பு தொற்றிக் கொண்டிருக்கும் !! Enid Blyton எனும் பிரிட்டிஷ் பெண் எழுத்தாளரின் The Famous Five ; The Five Findouters போன்ற சிறார் நாவல்களும், அந்நாட்களில் பள்ளிக்கூட லைப்ரரியில் நிறைந்து கிடக்கும் ! அவற்றை எடுத்துக் போனால் ஒரே நாளில் வாசித்து விட்டு மறுநாள் அடுத்த புக்கைக் கோரி நின்றதுண்டு !

ஆனால் மறுக்கா காமிக்ஸ் பக்கம் உன்மத்தம் கொள்ளச் செய்தது எட்டாவது படிக்கும் சமயத்திலானதொரு பயணமே !  முழுப்பரீட்சை விடுமுறைகளின் போது, என் தந்தையின் டில்லி + மும்பை ட்ரிப்பில் என்னையும் அழைத்துப் போயிருந்தார் ! நாள் முழுக்க அவரது பணிகளைக் கவனிக்க இங்கும் அங்கும் ஓடும் போது என்னையும் உடன் அழைத்துப் போவார் ! "சீய்" என்றிருக்கும் - பழைய டில்லியின் சாந்தினி சவுக் சதுக்கத்தின் அழுக்குப் படிந்த சந்து பொந்துகளுக்குள் குந்திக் கிடக்கும் காலெண்டர் விற்பனையாளர்களை சந்திக்க விதியே என நானும் அப்பாவோடு போகும் போது ! இப்போது போல அன்றைக்கெல்லாம் ஒலாக்களும் லேது ; கொக்கோ கோலாக்களும் லேது என்பதால் லொட லொடக்கும் ஆட்டோக்களிலும், டாப் இல்லாத கைவண்டி ரிக் ஷாகளிலும் தான் பிளக்கும் அந்த மே மாதத்து வெயிலில் பவனி வந்தாக வேண்டும் !  நடுவாக்கில் எப்போதேனும் , ஏதேனும் புஸ்தகக் கடைக்கு கூட்டிப் போவார்கள் என்ற ஒற்றை கேரட் செழுமையாய் மூக்குக்கு முன்னே தொங்கிக்கொண்டிருக்க, நானும் கழுதையாய் ஓடிக் கொண்டிருப்பேன் ! ஒரு வழியாய் அந்தக் கேரட்டும் வாய்க்கு எட்டியது - Janpath பகுதியில் இருந்ததொரு செமையான புக் ஷாப்பில் ! அந்தக் கடை ஓனருக்கு என் தந்தை லேசாய்ப் பரிச்சயம் போல ; என்னை அங்கேயே கொஞ்ச நேரம் விட்டுச் செல்லலாமா ? என்று கேட்டதுக்கு  ஓ.கே. சொன்னார் ! 'தோ..வந்துடறேன்..' .என்றபடிக்கு மாலை 4 மணிவாக்கில் கிளப்பியவர் திரும்ப வந்த போது மணி இரவு எட்டேமுக்கால் !! மூஞ்சி பெயர் தெரியாத புது ஊர் ; செல்போன்  இல்லாத நாட்கள் ; தட்டுத் தடுமாறும் ஹிந்தி மட்டும் தெரிந்ததொரு  பன்னிரெண்டோ / பதின்மூன்றோ வயதுப் பிள்ளையாண்டனை தகிரியமாய் ஏதோவொரு புக் ஷாப்பில் தனியாக விட்டுக் கிளம்பிட எப்படி முடிந்தது ? என்று இப்போது யோசித்துப் பார்க்கிறேன் நான் ! "சர்தான்...வீட்டில் தான் 5 உருப்படி உள்ளதுல  ; ஒண்ணு குறைஞ்சாலும் 4 மிச்சமிருக்குமே !" என்ற தைரியமாகத் தானிருந்திருக்குமோ ? ஆனால் அந்த நாலரை மணி நேரத்திற்குள் கண்ணில்படும் காமிக்ஸையெல்லாம் தனியாய் அடுக்கி வைக்கத் துவங்கிய என்னைப் பார்த்து அந்த ஓனர் குஷியாகி விட்டாரோ, என்னவோ - "ஒரு mezzanine தளம் போலிருந்த மத்திமமான மாடியில் இன்னமும் நிறைய புக்ஸ் ஸ்டாக் உள்ளது ; போய்ப் பார்க்க இஷ்டமா ?" என்று கேட்டார் ! நம்ம 'ஆத்தா ஹை...ஜாத்தா ஹை' ஹிந்தி அங்கே கைகொடுக்க, ஒரு பணியாளோடு என்னை அந்தத் தளத்துக்கு ஏணியில் ஏற்றி அனுப்பி வைத்தார் ! உள்ளே நான் பார்த்ததொரு புத்தக சொர்க்கம் என்றே சொல்ல வேண்டும் ! விற்காது கிடந்த காமிக்ஸ் குவியலாய் ஒரு பக்கம் ; புதிதாய் வந்திருக்கும் காமிக்ஸ் இன்னமும் டப்பிகள் உடைக்காத நிலையில் இன்னொரு பக்கம்  ; அட்டை கிழிந்து / முனைகள் கசங்கி - என்றிருந்த காமிக்ஸ் வேறொரு திக்கில் என்று இறைந்து கிடந்தன ! இன்னிக்குக்  கிட்டங்கி குப்பை முழுசையும்  இந்த முட்டைக்கண்ணனிடம் போணி பண்ணிடலாமென்று அந்த ஓனருக்குத் தோன்றியதோ, என்னவோ - ஐஸ் காபி ஒன்றை  வரவழைத்துக் கொடுத்தார் ! அதைச் சப்பியபடியே நான் எடுத்து வைத்த புக்குகளின் எண்ணிக்கை அறுபதோ / எழுபதோ இருக்கும் ! 

எட்டேமுக்காலுக்குத் திரும்பிய தந்தை எதுவுமே சொல்லாது, அத்தனைக்கும் பணம் கொடுக்க, மொத்தத்தையும் அள்ளிக் கொண்டு ரூமுக்குத் திரும்பிய போது அந்த சாந்தினி சவுக் அப்படியொன்றும் கலீஜாய்த் தெரியக் காணோம் எனக்கு ! அன்றைக்கும் சரி, பின்னாட்களில் தொழில் தள்ளாட்டம் கண்டு கிடந்த போதிலுமே சரி, புத்தகக் கொள்முதல்களில் ஒரு நாளும் தந்தை குறை வைத்ததே இல்லை ! எங்கு பயணம் போனாலுமே வீடு திரும்பும் போது ஒரு வண்டி புக்ஸ் சர்வ நிச்சயமாய் இருந்திடும் அவரது சூட்கேஸினுள் ! அன்றைக்கு நான் டில்லியில் அள்ளிப்போட்டிருந்த  அந்தக் கத்தையில் இருந்த புக்குகளுள் TINTIN in TIBET - பிரான்க்கோ-பெல்ஜிய ஆல்பத்தின் ஆங்கிலப் பதிப்பும் இருந்தது ! அதற்கு முன்பாய் ஒரேயொரு TINTIN இதழை கண்ணில் பார்த்திருந்தேன் - மதுரையின் அந்நாட்களது திருவள்ளுவர் பஸ் ஸ்டாண்டில் இருந்த புக் ஷாப்பில் ! Flight 731 என்ற அந்த ஆல்பத்தின் விலை அப்போதே எண்பது ரூபாய் ! அந்நாட்களில் அதெல்லாம் செம பெரிய தொகை என்பதால் மூன்று நாட்களாய் பேச்சுவார்த்தை நடத்தி, அம்மாவிடம் காசு வாங்கிப் போய் அதனை வாங்கியிருந்தேன் ! (அப்பா மதுரைக்கு வந்திருக்கவில்லை அப்போது) அந்த புக்கை ஐம்பது முறையேனும் வாசித்திருப்பேன் என்பதால் TINTIN மீது செம பைத்தியம் ! அதற்குப் பின்பாய் TINTIN கண்ணில்பட்டது அங்கே டில்லியில் தான் என்பதால் செம ஆசையாய் அந்த ஆல்பத்தை வாங்கியிருந்தேன் ! 

ரூமுக்குத் திரும்பிய பிற்பாடு, அவசரம் அவசரமாய் கட்டிலில் மொத்த புக்குகளையும் அடுக்கிய கையோடு அந்த டின்டின் சாகசத்தை வாசிக்க ஆரம்பித்தவன் மெய் மறந்து போனேன் ! ஹிமாலய சிகரங்களில் விபத்திற்கு உள்ளாகிடும் விமானத்தினில் தங்களுக்கு ரொம்பவே வேண்டப்பட்ட சாங் எனும் சீனப் பையன் உயிர் தப்பியிருப்பதாகவும், தன்னைக் காப்பாற்றும்படி மன்றாடுவதாகவும் டின்டின்னுக்கு திடீரென கனவில் தோன்றிட,  கேரட் மண்டைக்கார ரிப்போர்ட்டர் டின்டின் திபெத்துக்குப் பயணமாகி, கேப்டன் ஹெடாக்கின் துணையோடு பனியில் தேடலைத் துவக்குவதே கதை !! இந்திய விஜயம் ; இமாலய சிகரங்களோடு அறிமுகம் ; நெடிதுயர்ந்த பனிமலைகளில் Yeti எனப்படும் ராட்சஸப் பனிமனிதனைப் பின்தொடர்தல் என்று இந்த 54 பக்க ஆல்பம் செய்த ஜாலங்கள் என்னை கட்டிப்போட்டது ! இறுதியில் சாங்கை அந்தப் பனிமனிதனிடமிருந்து மீட்டு அழைத்துப் போக, அது சோகத்தில் ஓலமிடுவது போல் கதைக்கு முற்றுப்புள்ளி வைத்திருப்பார் கதாசிரியர் ஹெர்ஜ் ! ஒரு அற்புதமான ஆக்ஷன் த்ரில்லரை இத்தனை அழகாய் ; காமெடி கலந்து, மனதை உருக்கும் செண்டிமெண்ட் கொண்டு சொல்ல முடியும் என்பதை நான் உணர்ந்த முதல் தருணம் அதுவே ! அன்று இரவே அந்த புக்கை 2 வாட்டி படித்தும் எனக்குப் போதவில்லை ! டில்லியிலிருந்து மும்பை செல்லும் ரயிலில் மட்டுமே அரை டஜன்வாட்டியாவது  படித்திருப்பேன் !

மின்சார ரயிலின் பிழிந்தெடுக்கும் கூட்டங்களைக் கண்டு மிரண்டபடிக்கே மும்பையிலும் அப்பாவோடு ஓட்டம் ; மாதுங்கா ; மாஹிம் ; தாதர் ; போர்ட் பகுதிகளில் இருந்த எண்ணற்ற பழைய புத்தகக் கடைகளில் வேட்டை என்று நாட்கள் ஓடினாலும், எக்கச்சக்க Gold Key Comics கிடைத்திருந்தாலும், எனக்குள்ளே ஜெகஜோதியாய் நிறைந்து நின்றது டின்டின்னின் அந்த சாகசமே ! மும்பையில் மேற்கொண்டு சில secondhand டின்டின் புக்குகளும்  கிடைத்திட, அத்தனையையும் பொக்கிஷங்களாக்கி ஊர்திரும்பிய பின்னேயும் தினமும் பாராயணம் செய்யாத குறை தான் ! ஸ்கூல் லைப்ரரியில் ஆஸ்டெரிக்ஸ் கதைகளை வாய் பிளந்து வாசித்த நாட்கள் ; ஷெர்லாக் ஹோம்ஸ் நாவல்கள் ; பெரி மேசன் நாவல்கள் ; அப்புறமாய் அலிஸ்டர் மக்ளீன் த்ரில்லர்கள் ; ஜேம்ஸ் பாண்ட் நாவல்கள் ; தமிழில் துப்பறியும் சாம்பு ; சுஜாதாவின் அசாத்தியங்கள் என்று ஏதேதோ வாசிக்கும் பழக்கம் தொடர்ந்த போதிலும், டின்டின் என் நெஞ்சுக்கும், என் தலைமாட்டிற்கும் அருகிலேயே தான் தொடர்ந்தார் ! 1984 -ல் எடிட்டர் குல்லாவை மாட்டிய நாள் முதலாய் காமிக்ஸ் தவிர்த்து வேறெதுவும் பெருசாய் வாசிக்கும் நேரங்களும் கிட்டவில்லை ; அது சார்ந்த முனைப்பும் தோன்றிடவில்லை என்பது தான் நிஜமே ! கிடைக்கும் முதல் ஓய்வான தருணத்தில், புதுசாய் எந்த காமிக்சைப் போட்டுத் தாக்கி உங்களை மிரட்டலாம் ? என்ற எண்ணமே ஊற்றடிக்கும் !  So இலக்கியங்கள் ; இதிகாசங்கள் என்றெல்லாம் நம் நண்பர்களில் பலரைப் போல் கரைத்துக் குடிக்கும் ஆர்வம் எனக்குத் தோன்றியதே கிடையாது ! Maybe எவ்வித இலக்கிய பரிச்சயங்களும் கிடையாதென்பதாலோ, என்னவோ, இன்றைக்கும் எனது எழுத்து நடையில் குறிப்பிட்ட அந்த set of words நீங்கலாய்ப் புதுமைகள் எட்டிப் பார்ப்பதில்லை ! இன்றைய நாட்களிலோ கண்ணாடியை மாட்டிக் கொண்டு, குண்டாய் ஏதேனும் புக்கைக் கையில் தூக்க முனையும் பத்தாவது நிமிஷத்திலேயே  எத்தனை தொலைவிலிருந்தாலும் செல்வி நித்திரா தேவி ஷேர் ஆட்டோவாச்சும் பிடித்து,  திடு திடுவென ஓடியாந்து "வந்துட்டேன் மாமா !!" என்று அரவணைத்துக் கொள்கிறார் ! So இனி கொட்டப் போகும் குப்பையினுள், காமிக்ஸ் தவிர்த்து வேறேதேனும் இடம்பிடிப்பதாக இருப்பின், அது VRS க்குப் பின்னான நாட்களில் நடந்தால் தான் ஆயிற்று ! So ஒற்றை நாளில் லோகம் அழியப் போவது உறுதி என்றாகிப் போயிடும் பட்சத்தில், Tintin in Tibet இதழைத் தான் கையில் தூக்கிக் கிளம்புவேன் ; வெறித்தனமாய் வாசிப்பதோடு மட்டுமல்லாது - maybe அதனில் லயித்து காலனும் நம்மை ரட்சித்து விடுவாரென்ற நம்பிக்கையிலும் ! Without a doubt my all-time ; all-weather favorite !!

இந்தத் தருணத்தில் நீங்கள் ஒவ்வொருவருமே உங்களின் all time best புக் பற்றிப் பேசிடலாமே guys - சின்னதொரு மாற்றத்துடன் ? "ஒரேயொரு காமிக்ஸ் எடுத்துக்கலாம் ; அது போக வேறேதேனும் புக் ஒன்றையும் எடுத்துக்கலாம் !" என்ற நிலையில் உங்கள் தேர்வுகள் எவையாக இருக்குமோ ? எழுதுங்களேன் ப்ளீஸ் ?

அப்புறம் ஒரேயொரு குருக்களின் ஒரேயொரு சிஷ்யரின் இன்னொரு கேள்விக்குமே பதில் சொல்லிடலாமென்று நினைக்கிறேன் : 

* இதுவரை நிறைவேறாத உங்கள் லட்சியம் ?

டின்டின்னை இதுவரையிலும் தமிழுக்கு கொணர முடிந்திடாது இருப்பதே "நிறைவேறா லட்சிய லிஸ்டின்" உச்சியினில் இருந்திடும் சமாச்சாரம் ! நிறையவே முயற்சித்திருக்கிறேன் ; முயற்சித்துக் கொண்டுமிருக்கிறேன் ! ஆனால் பெல்ஜியத்தின் அடையாளச்  சின்னங்களுள் ஒன்றாய்க் கருதும் அளவுக்கு டின்டின் அங்கே வாழ்க்கையின் ஒரு அங்கம் எனும் போது - அவரைத் தாரை வார்த்துத் தர  ரொம்பவே தயங்குகிறார்கள் ! வேதாளம் & விக்கிரமாதித்தன் கதையாய் தொடர்ந்து முயற்சிக்கணும் !! ஹ்ம்ம்ம்...!!

சிஷ்யகோடியின் இன்னும் சிலபல கேள்விகள் எஞ்சியிருப்பினும், அவற்றை டைப்படித்தே நாக்குத் தொங்கியிரா இன்னொரு வேளைக்கென ஒத்திப் போடுகிறேன் ! இப்போதைக்கு நடையைக் கட்டும் முன்பாய்,  புலர்ந்துள்ள இந்தத் தமிழ்ப் புத்தாண்டை இரு கரம் கூப்பி வரவேற்ற கையோடு - நம் மத்தியில் நடமாடும் எக்கச்சக்கக் கலைஞர்களிடம்  ஊற்றெடுக்கும் லோடு லோடான திறமைகளை இறக்கி வைக்க ஒரு வழி தேடுவோமே என்றுபடுகிறது ! கொலைவெறி கொண்டதொரு அரசவைப் புலவரை அடையாளம் கண்டாயிற்று என்றான பின்னே - பாடல்களை பாடிட  ஒரு கானக்குரலைத் தேடுவதன்றோ அடுத்த வேலை ? So 60 நொடிகளுக்கு மிகாதவாறு, உங்களுக்குப் பிடித்தமான பாடல் எதையேனும் பாடி ஒரு வீடியோ க்ளிப்பை அனுப்பினால், அவற்றை நமது YouTube சேனலில் upload  செய்து கொரோனாவையே மிரட்டிடலாம் என்றுள்ளேன் ! ஹைட்ரொக்ளோரோக்வின் மருந்தெல்லாம் வேலை பார்க்குதோ இல்லியோ - ஸ்டீல் எழுதிய (!!!) பாட்டு ரேஞ்சுக்கு உங்களின் தொண்டைகளில் உதயமாகும் கானங்களும் இருப்பின், செத்தாண்டா கொரோனா சேகரு !!

அப்புறம் request # 3 : லாக் டவுன் நீடித்திருக்கும் இந்நிலையில் வீட்டில் கடமைகளை மிக சிறப்பாய்ச் செய்து வரும் நண்பர்கள் ஒரு selfie எடுத்து அனுப்பினால், அதனை இங்கே சரமாரியாக post செய்திடுவேன் ! அது சர்.ஜடேஜா வாளைக் கையாளும் லாவகத்தோடு நீங்கள் துடைப்பத்தைக் கையாளும் அழகாய் இருந்தாலும் சரி ; 'புசு புசு'வென உப்பும் பூரி போட்டுத் தரும் பொன்னான காட்சியாக இருந்தாலும் சரி ; 'உன்னைச் சொல்லிக் குற்றமில்லை !!" என்ற பாடலோடு பாத்திரம் துலக்கும் பண்பான படப்பிடிப்பாய் இருந்தாலும் சரி - you can send them all !! போட்டோக்கோசரம், வேலை செய்வது போல் பிம்பிலிக்கா பிலாக்கி காட்டும் போங்கு வேலைகள் இல்லாது - மெய்யாலுமே பணி செய்தால் மட்டுமே கம்பெனி விதிமுறைகளுக்கு உட்பட்டதாகிடும் ! lioncomics@yahoo.com என்ற மின்னஞ்சலுக்கு "லாக் டௌன் நாட்கள்" என்ற header தந்து போட்டோக்களை அனுப்பிடலாம் ! கானக்குரலோன்களின் கச்சேரி கிளிப்களையுமே !!

அரசவைப் பாடகர் யாரென்பதை தேர்வு செய்திட 2 ஜட்ஜ்கள் as usual நியமனம் செய்யப்படுவர் ! ஹெட்செட்டை மாட்டிக் கொண்டு ஸ்டீல் பாடக்கூடிய பாடலுக்கு செவிகொடுக்கும் அந்த அனுபவத்தை சித்தே யோசித்துப் பாருங்களேன் - அடடடடாடா !!! யாருக்கு அந்தப் புளகாங்கிதங்களெல்லாம் காத்துள்ளனவோ - தெய்வமே !!

அனைவருக்கும் நமது தமிழ்ப்புத்தாண்டு வாழ்த்துக்கள் !! இன்னல்களுக்கு மொத்தமாய் விடைதந்து அனுப்பி வைக்கவொரு  அருமருந்தாய் இந்த சார்வரி நமக்கெல்லாம் அமையட்டும் ! Bye all ! See you around !! Have an awesome day & a lovely year ahead ! 
பி.கு : தேர்வாகும் அரசவைக் கவிஞருக்கு கூடுதலாய் ஒரு ரவுண்ட் பன் என்பதோடு, அடுத்த வாசக சந்திப்பின் போது ஒரு பாட்டுப் பாடும் வாய்ப்பும் வழங்கப்படும் - ஒரு ஜம்போ சீசன் 3 சந்தாவோடு ! 


THE LOCKDOWN DAYS !!!!
விடுகதையோஓஓஓஓ...இந்த வாழ்க்கை !!!
தீர்ப்புச் சொன்ன டெக்சாஸ் ஜட்ஜய்யா - மகேந்திரன் பரமசிவம் !!



ஊருக்கு உழைப்பவன் !! 
தம்பி செந்தில் சத்யா !
ஆங்...எடுத்தாச்சா ? எடுத்தாச்சா ? எடுத்தாச்சா ?
சரவணன் குமார், சின்னமனுர் 
தீயா வேலை செய்யணும் கொமாரு !!
 சேலம் டெக்ஸ் விஜயராகவன்

ஷப்பா..மல்லாக்கப் படுத்து விட்டத்தைப் பாக்குறது என்னா சுகம் ?ஷல்லூம்  பெர்னாண்டஸ் & பெபினா குட்டி !


இங்கே ஒரே பிஷி !! 
திருப்பூர் ப்ளூபெர்ரி & ஜூனியர் 


படாதே......தரையிலே தூசியே படாதே !!
தரையில் தூசி படாதிருக்க லேட்டஸ்ட் டெக்னீக்கை பயன்படுத்தும் அதிகாரியின் அன்பர் ரம்மி !

மூன்றெழுதில் என் மூச்சிருக்கும்...! "கடமை" அது...கடமை !!
சோதனைச் சாவடி ட்யூட்டியில் நண்பர் கணேஷ்குமார் 



சட்னி மீது சட்னி வந்து என்னைச் சேரும் !
அதை ஆட்டித் தந்த பெருமையெல்லாம் தம்பி சிவாவைச் சேரும் ! 
.......திருப்பூர் சிவாவைச் சேரும் ! 




ரம்-பம்-பம்.....ஆ-ரம்-பம்.....அ-ரம்-பம்-பம்....பே-ரி-ன்-ப-ம் !! 
ஏழு எட்டு வாரமாச்சு கண்ணே..சோறு வடிக்கப் படிக்கலைடி கண்ணே !!
கரூர் P.சரவணன் 


அங்கே என்ன சத்தம்மா......... ? 
சமையல் பண்ணிட்டிருக்கேன் மாமா !! 
நண்பர் சிபி..திருப்பூர் ! 


'தல'...ஊன்னு ஒரு வார்த்தை சொல்லுங்க...ஊர்லேர்ந்து லாரி லாரியா ஆளுகளை இறக்கிப்புடலாம் ! 
கைப்புள்ளை கிட் ஆர்டின் & டெரர் ஜூனியர்ஸ்