Powered By Blogger

Friday, November 30, 2018

டிசம்பரும் வந்தாச்சு !

நண்பர்களே,

வணக்கம். இன்றைக்குக் காலையிலையே உங்கள் கூரியர்களின் சகலமும் புறப்பட்டு விட்டன - டிசம்பர் இதழ்களைச் சுமந்த வண்ணம் !! So பன்னிரெண்டாம் மாதம் புலரவிருப்பது - நமது இதழ்களோடு என்று வைத்துக் கொள்ளுங்களேன் !! சந்தா B-ன் சார்பாய் ஒரு black & white டெக்ஸ் ; ஒரு விலையிலா கலர் டெக்ஸ் ; சந்தா C கார்டூனின் சார்பில் மதியிலா மந்திரியார் ; மறுபதிப்புச் சந்தா D சார்பில் லக்கி க்ளாசிக்ஸ்-2 & ஜம்போவின் ACTION SPECIAL என்ற கூட்டணி, மேற்படி கூரியர் டப்பியினுள் இடம்பிடித்துள்ளது ! So இந்த வாரயிறுதியை நமது இதழ்களோடு செலவிட நேரம் எடுத்துக் கொள்ள உங்களுக்கு முடியுமாயின் - சூப்பர்  !! Happy Reading !!

ஆன்லைனிலும் லிஸ்டிங் ரெடி : http://lioncomics.in/monthly-p…/564-december-pack-2018-.html

அப்புறம் திண்டுக்கல்லில் தற்போது நடைபெற்றுவரும் புத்தக விழாவில் நமது ஸ்டால் நம்பர் : 81 !! அந்தப் பக்கமாயிருப்போர் ஒரு விசிட் அடிக்கலாமே - ப்ளீஸ் ? 

Sunday, November 25, 2018

ஒரு காமிக்ஸ் எழுச்சி !!

நண்பர்களே,

வணக்கம். அதிசயங்கள் ஓய்வதில்லை! போன சனி மாலை ‘டொய்ங்‘ என்ற ஓசையோடு எனது செல்போனில் SMS தகவலொன்று பதிவானது. மறுக்கா ஏதாச்சும் ஜவுளிக்கடையிலிருந்து ஆஃபர் சார்ந்த சேதியாகவோ; அல்லது க்ரெடிட் கார்டின் பாக்கியைக் கட்டாங்காட்டி உன்னையே தூக்கிப் போகவா ? என்ற மாதிரியான நினைவூட்டலாகவோ இருக்குமென்ற நினைப்பில் அசுவாரசியமாய்ப் பார்த்தால் – பாஸ்போர்ட் அலுவலகத்திலிருந்து அவசர அழைப்பு என்றிருந்தது! இது என்னடா புதுக் கூத்து ? என்றபடிக்கே மண்டையைச் சொறிய – திங்கட்கிழமை பதிவுத்தாலில் ஒரு நோட்டீஸும் வந்து சேர்ந்தது. அடித்துப் பிடித்து, செவ்வாய் கிழமை காலை மதுரையிலுள்ள மண்டல பாஸ்போர்ட் அலுவலகத்திற்குப் போனால் – செம கூட்டம்! ‘சரி, இன்றைய பொழுது இங்கே தான்!‘ என்றபடிக்கே தேவுடா காக்க, சுமார் 4 மணி நேரக் காத்திருப்புக்குப் பின்பாய் உள்ளே கூப்பிட்டு விட்டார்கள் ! எனக்கோ, இது போன வருடம் நான் இத்தாலியில் சிலபல வில்லங்கப் பாட்டிகளிடம் பறிகொடுத்திருந்த பாஸ்போர்ட் தொடர்பான விசாரணையிது என்பது மட்டும் மேலோட்டமாய்த் தெரிந்திருந்தது. “எவனாச்சும் நம்ம கடவுச்சீட்டைக் கொண்டு போய் ஏதாச்சும் வில்லங்கம் பண்ணித் தொலைச்சு, அது நம்ம சொட்டைத் தலைக்கு ஏழரையைக் கொண்டு வந்திருக்குமோ?” என்றெல்லாம் கலர் கலராய்ப் பீதிப்படலங்கள் தலைக்குள் படையெடுக்க, விசாரணை அதிகாரியானதொரு லேடி போன வருடத்து நிகழ்வுகளைப் பற்றி விசாரித்தார். நானும் சொந்தக்கதை, சோகக்கதையையெல்லாம் கொட்டிய கையோடு – அங்கே மிலன் தூதரகத்தில் வாங்கிய தற்காலிகப் பாஸ்போர்ட்டைக் காட்டினேன். அதையும் வாங்கிப் பரிசீலித்தவர் – ‘உங்க கிட்டே இருக்கிற மொத்த பாஸ்போர்ட்களையும் எடுத்துக்கிட்டு அடுத்த working day-ல் வந்து பாருங்க!‘ என்றபடிக்கு என்னை அனுப்பி விட்டார். 

'இது என்னடா வம்பாக் கீதே?' என்றபடிக்கு ஊர் திரும்பி, பீரோவில் தூங்கிக் கொண்டிருந்த 1985 முதலான பாஸ்போர்ட்களைத் தேடியெடுத்தேன் ! சும்மா கறுகறுவென்ற கேசம் தலைநிறைய ஆக்ரமித்திருந்த 1985-ன் பாஸ்போர்ட்டில் துவங்கி, அடுத்த 30+ ஆண்டுகளுக்குள்ளான பல்வேறு காலாவதியான / காலியாகிப் போன பாஸ்போர்ட்களைப் புரட்டப் புரட்ட – அவற்றிலிருந்த ஃபோட்டோக்கள் வாழ்க்கையின் / வழுக்கையின் பரிணாம வளர்ச்சியை பறைசாற்றியது போலிருந்தது! பெருமூச்சோடு அவற்றைத் தூக்கிப் பைக்குள் அடுக்கிக் கொண்டு, மறுநாள் மிலாடி நபியாக இருந்ததால் – வியாழன்று மறுபடியும் ‘சலோ மதுரை‘ என்று புறப்பட்டேன். திரும்பவும் அதே ஆபீஸ்; அதே வாட்டம் நிறைந்த பல மாவட்ட மக்கள் நெரிசல்; அதே ஜன்னலோர தேவுடாப் படலம் என்று எனது திருமணநாள்ப் பொழுது ரம்யமாய்த் துவங்கியது!! இம்முறை சித்தே முன்ஜாக்கிரதையாய் கையிலொரு முரட்டு காமிக்ஸ் தொகுப்பை எடுத்துச் சென்றிருக்க – நேரம் மெதுமெதுவாய் ஓடிடத் தொடங்கியது ! மதியம் வரைக்கும் என்னைக் கூப்பிடக் காணோம் ; கையிலிருந்த புக்குமே ஒருவித மொக்கையாகத் தொடர – தூக்கம் தான் கண்ணைச் சுழற்றியது! செல்போனையும் உள்ளே பயன்படுத்தக் கூடாதென்பதால், நெட்டை உருட்டவும் வழியின்றிப் போக, ஏதோ தகவல் தொடர்புகளற்ற கஜா தாக்கிய பூமியில் இருப்பது போல்ப்பட்டது ! மதியம் பக்கத்திலிருந்த ஹோட்டலில் வரட்டி போலிருந்த 2 சப்பாத்திகளை உள்ளே தள்ளிய கையோடு மறுக்கா காத்திருப்பைத் தொடர, என்னோடு குந்தியிருந்த ஒவ்வொருவராய் வேலை முடிந்து கிளம்பத் துவங்கினர். நாலரை மணிவாக்கில் பார்த்தால் அங்கே எஞ்சியிருந்தது நான் மாத்திரமே ! ‘கிழிஞ்சது போ…. இன்று போய் நாளை வா!‘ என்றாகிடுமோ என்ற பீதியுடன் நான் திருட்டு முழி முழித்து நிற்க,ஒரு மாதிரியாக என்னை உள்ளே அழைத்தார்கள் ! சிறுகச் சிறுக அதே அதிகாரி விளக்கிய பின்னே தான் புரிந்தது சேதி : ஒன்றரையாண்டுகளுக்குப் பிற்பாடு, இத்தாலிய போலீஸார் வேறு ஏதோ திருட்டுக்களைப் புலனாய்வு செய்த சமயம், அதே வில்லங்க பாட்டிமார்கள் வசமாய் அகப்பட்டிருக்கின்றனர் போலும். அவர்களது வீட்டைச் சோதனை போட்ட போது, எனது பாஸ்போர்ட்(கள்) உட்பட ஏகப்பட்ட தேட்டை சிக்கியுள்ளது! (Of course – என்னிடம் லவட்டிய பணத்தை பாட்டிமாக்கள் அன்றைக்கே ஸ்வாஹா பண்ணியிருப்பார்கள் என்பதால் அது கிடைத்திருக்க வாய்ப்பில்லை தான்!) So பாஸ்போர்ட்களை இத்தாலிய போலீஸார் முறைப்படி அங்குள்ள தூதரகங்களில் ஒப்படைக்க, அவர்களும் இங்கே மதுரைக்கு forward செய்துள்ளனர். ஆக லவட்டப்பட்டவற்றை உரிய விசாரணைக்குப் பின்பாய் திரும்ப ஒப்படைக்கவே என்னைக் கூப்பிட்டுவிட்டிருப்பது புரிந்தது ! மாலை ஐந்து மணி சுமாருக்கு ‘ஈஈஈஈ‘ என்ற இளிப்போடு புறப்பட்டவனுக்கு இத்தாலியின் போலீஸார் மீது எக்கச்கக்க மரியாதை துளிர்விட்டிருந்தது! என்னயிருந்தாலும் நமது ரேஞ்சரின் தேசமல்லவா? அங்கே சட்ட பரிபாலனம் நிச்சயமாய் நம்மவர் போட்டுக் காட்டியிருக்கும் கோடுகளை ஒட்டியே இருந்திடும் போலும் என்று நினைத்துக் கொண்டேன் ! So வாரத்தின் 2 தினங்களை மதுரையில் ஒரு அரசுத்துறையின் சேரைத் தேய்ப்பதிலேயே செலவிட்டு விட்ட கவலை ஒருபக்கமிருப்பினும், பாட்டிமாக்களிடமிருந்து மீண்ட பாஸ்போர்ட்கள் மகிழச் செய்தன ! Viva Italia !!!

Moving on கடந்த ஒரு வாரமும் காலத்தில் பின்நோக்கியதொரு பயணம் செய்த மாதிரியான உணர்வைக் கொணர்ந்தது - இம்முறையோ - இங்கிலாந்தின் புண்ணியத்தினில் ! குறிப்பாய்ச் சொல்வதானால் உபயம் : The Action Special!! இன்றைக்கு பிரான்கோ-பெல்ஜியம்; பஜ்ஜியும்-சொஜ்ஜியும் என்று எங்கெங்கெல்லாமோ சுற்றித் திரிந்தாலுமே – நமது முத்து காமிக்ஸிற்கும் சரி; லயனிற்கும் சரி - துவக்கப் புள்ளியானது பிரிட்டனின் காமிக்ஸ்களில் தானே ? ஆரம்ப நாட்களது நமது அத்தனை ஆரவார ஹிட்களுமே Fleetway குழுமத்தின் பலரகப்பட்ட கதைகளின் தமிழாக்கங்கள் தான் என்பதில் ஏது இரகசியம் ?

- இரும்புக்கை மாயாவி

- CID லாரன்ஸ் டேவிட்

- ஜானி நீரோ

- ஸ்பைடர்

- இரும்பு மனிதன் ஆர்ச்சி

- இரட்டை வேட்டையர்

- இரும்புக்கை நார்மன்

- ஜான் மாஸ்டர்

- செக்ஸ்டன் ப்ளேக்

- விச்சு & கிச்சு

- ஜோக்கர்

- ஒற்றைக் கண் ஜாக்

- மர்ம மண்டலம்

- Mr. Z

- ஸ்பைடர் குள்ளன்

-குண்டன் பில்லி 

- அதிரடிப் படை

- பெருச்சாளிப் பட்டாளம்

etc... etc...

என்று அவர்களது கதைக்களஞ்சியங்களிலிருந்து நாம் சேகரித்து ரசித்துள்ள தொடர்களுக்குத் தான் எத்தனை ரம்யம் ! ஆனால் மெதுமெதுவாய் நமது வயதுகளும், ரசனைகளும் கூடிப் போக – சிறுகச் சிறுக இத்தாலிய சாகஸங்கள் + ப்ரான்கோ-பெல்ஜியப் படைப்புகள் நமது செல்லப்பிள்ளைகளாகத் தொடங்கினார்கள்! And அதன் பின்விளைவாய் பிரிட்டனின் நேர்கோட்டுக் கதைகளெல்லாமே – ஏதோவொரு தூரத்து நாளின் ஞாபகங்களாய் மாத்திரமே நமக்கு உருமாறிடத் தொடங்கி விட்டன ! 

And கொடுமையோ -- கொடுமை : இங்கிலாந்தின் காமிக்ஸ் மார்க்கெட்டும் கழுத்தை தேய்ந்து கட்டெறும்பாய் இழைத்துப் போயிருந்தது ! முன்பெல்லாம் - இங்கிலாந்துக்கு வேறு பணிகளின் நிமித்தம் போனாலும், அங்குள்ள அங்காடிகளில்  ; புத்தகக் கடைகளில் குவிந்து கிடக்கும் காமிக்ஸ் இதழ்களை பராக்குப் பார்ப்பது அத்தனை ரம்யமான அனுபவமாய் இருப்பதுண்டு ! ஆனால் அங்கும் (காமிக்ஸ்) வாசிப்பின் மீதான ஈர்ப்பு சரியத் துவங்கிட, எக்கச்சக்கமான இதழ்கள் மூட்டை கட்டப்பட்டன ! So பரிதாபமாய்க் காட்சி தந்து வந்தது பிரிட்டிஷ் காமிக்ஸ் சந்தையானது ! இந்த நிலையில் தான் இங்கிலாந்தின் முன்னணிப் பதிப்பகமான Rebellion Publishing, காணாமலே போகத் துவங்கியிருந்த 1960s...’70s' & 80s' களின் Fleetway கதைகளை / தொடர்களை தம் தேசத்துப் புதிய தலைமுறைக்கு அறிமுகம் செய்து வைக்கும் முயற்சியாகவும் ; பெருசுகளின் nostalgia மோகத்துக்குத் தீனி போடும் விதமாகவும் கையில் எடுத்திருந்தனர் – வெகு சமீபமாய்! Fleetway குழுமத்தினை வெவ்வேறு பதிப்புலக ஜாம்பவான்கள் வாங்கி / விற்று / கைமாற்றியிருக்க –இறுதியாய் சிலபல முக்கிய தொடர்களின் உரிமைகள் Rebellion வசம் வந்து சேர்த்துவிட்டன ! Black & White ஆல்பங்களாகவே இந்த மறுபதிப்புத் தொகுப்புகளை அவர்கள் திட்டமிட்டிருந்தாலும் – இயன்றமட்டுக்கு சித்திரங்களைத் துல்லியமான, மெருகுடன் வழங்கிட வேண்டுமென்ற உத்வேகத்தில் ரொம்பவே மெனக்கெட்டிருந்தனர் ! So 

இது தொடர்பான செய்திகள் காதில் விழுந்த பிற்பாடு, இருப்புக் கொள்ளவில்லை எனக்கு ! எங்கெங்கோ நாம் சுற்றித் திரிந்தாலும், நமது நதிமூலம் பிரிட்டனே எனும் போது, Rebellion நிறுவனத்துடன் தொடர்பு கொள்ளத் துவங்கினேன் - அவர்களது மறுவருகைக்கு ஒரு சலாம் போடும் விதமாய் !  அதைத் தொடர்ந்து சென்றாண்டு இலண்டனில் நடந்த புத்தக விழாவின் போது அவர்களை சந்தித்தது ரொம்பவே அற்புதமானதொரு அனுபவம் ! இந்த Fleetway மறுபதிப்புப் பணிகளை முன்நின்று கவனித்து வரும் நிர்வாகியும் – நம்மைப் போலவே அந்நாட்களில் ஸ்பைடரையும், ஆர்ச்சியையும், அதிரடிப்படையையும் படித்து, ரசித்து, வளர்ந்து வந்ததொரு அதிதீவிர காமிக்ஸ் காதலர்  போலும் ! ஒரு அரைமணி நேரத்துக்கு அவரோடு பேசியது – ஒரு முன்னணிப் பதிப்பகத்தின் டாப் நிர்வாகியோடு உரையாடிய உணர்வைத் துளியும் தந்திடவில்லை ; மாறாக – நாடி நரம்பெல்லாம் பிரிட்டிஷ் காமிக்ஸ் மீதான காதலோடு வாழ்ந்து வரும் ஒரு ஜாம்பவானுடன் ஜாலியாகப் பொழுதைக் கழித்த சந்தோஷமே மேலோங்கியது ! நாம் அந்நாட்களில் வெளியிட்டிருந்த Fleetway தொடர்களைப் பற்றி நானும் அள்ளி விட, ‘அட... இத்தனை பிரிட்டிஷ் படைப்புகள் உங்கள் மண்ணில் உலவியுள்ளனரா ?‘ என்று விழிகள் விரியக் கேட்டு வைத்தார் ! அந்தச் சந்திப்பின் நீட்சியாய், நமது துவக்கப் புள்ளிகளுக்கு சிறிதேனும் மரியாதை செய்திடும் விதமாய் ஒரு Fleetway ஸ்பெஷல் இதழைத் தயார் செய்திட வேண்டுமென்ற உத்வேகம் எனக்குள் ! எந்தவொரு template-ம் அல்லாத ஜம்போ காமிக்ஸ் தான் இதற்கு வாகான களமென்று தீர்மானித்தவனாக “The Action Special”-ஐத் திட்டமிட்டேன்!

அவர்களது மறுபதிப்புகளுள் முதலாவதாய் அமைந்திருந்த “ஒற்றைக்கண் ஜாக்” நமது மினி லயனிலும் ஏற்கனவே நமக்கு அறிமுகமான தொடரே என்பதால் வேகமாய் ‘டிக்‘ அடித்தேன்! அவர்களோ ஒரு 128 பக்க நீள இதழினை இந்த முரட்டு NYPD காவலருக்கென ஒதுக்கியிருந்தனர் ! ஆனால் நமக்கோ கொஞ்சம் புளியோதரை; கொஞ்சம் லெமன் ரைஸ்; கொஞ்சம் தயிர் சாதம் என்று கலந்து கட்டியடிக்கப் பிடிக்குமென்பதால் – “எச்யூஸ் மீ... ஒரு கூட்டணி இதழாய் அமைத்துக் கொள்ள அனுமதிப்பீர்களா?” என்று கேட்டு வைத்தேன் ! துளியும் தயக்கமின்றி – ”ஓ... யெஸ்! கதைத் தேர்வுகளைச் செய்து விட்டுச் சொல்லுங்கள் !” என்று பதில் போட்டார்கள்! அப்போது தான் அவர்களது அடுத்த புராஜக்டின் அறிவிப்பும் வெளியாகியிருந்தது! 

The Thirteenth Floor” என்ற பெயரில் ஒரிஜினலாய் வெளியான கதைகளை நாம் “மர்ம மண்டலம்” என்ற பெயரில் முயற்சித்திருந்தோம் – திகில் காமிக்ஸில் ! அந்தத் தொடரும் பிரிட்டனில் மறுபதிப்பாகிடவுள்ள சேதி தெரிந்தவுடன் – அதனையே நமது இதழின் கதைத்தேர்வு # 2 ஆக்கினேன்! உங்களில் எத்தனை பேருக்கு அந்தத் தொடர் நினைவுள்ளதோ - தெரியலை; ஆனால் செம புதிரான concept & கதைக்களம் என்பது அதனைப் படித்திருப்போர் அத்தனை பேருமே அறிவர் ! எனக்கும் அந்தத் தொடர் ஒரு personal favorite என்பதால் ‘சட்‘டென்று டிக் # 2 போட்டு வைத்தேன்! நாம் அதைத் தேர்வு செய்திருந்த வேளையில், இங்கிலாந்தில் அந்த இதழ் வெளியாகிட நிறையவே அவகாசமிருந்தது. பொதுவாய் இது மாதிரியான சூழல்களில், அங்கே இதழ் வெளியான பிற்பாடே டிஜிட்டல் கோப்புகளை நம்மோடு பகிர்ந்திடுவர் ! ஆனால் நாம் Fleetway சமுத்திரத்தில் காலமாய் மூழ்கிய முட்டைக்கண்ணர்கள் என்பதால் – இந்தத் தொகுப்புகளின் file-கள் சகலத்தையும் முன்கூட்டியே அனுப்புவதில் துளியும் தயக்கம் காட்டிடவில்லை ! 

M.A.C.H. 1” என்ற ஒரிஜினல் பெயருடன் அவர்களது மறுபதிப்பின் இன்னுமொரு திட்டமிடல் என் கண்ணில்பட, அதுவுமே நாம் மினி லயனில் வெளியிட்ட சாகஸம் என்று நினைவுக்கு வந்தது! “விடாதே... அதையும் அமுக்கு!!” என்று தயாரானேன்! So 3 வெவ்வேறு பாணிகளிலான தொடர்கள் என்ற combo தயாராய்பட்டது ! சன்னமாய் கார்ட்டூனும் இருந்தால் படிக்க சற்றே இலகுவாய் இருக்குமென்று தோன்றிட – “பலமுக மன்னன்” என்ற பெயரில் தமிழில் வெளிவந்த FACEACHE தொடரானதும் Rebellion-ன் மறுபதிப்புத் திட்டமிடலில் இருப்பதைச் சுட்டிக் காட்டினார்கள்! அப்புறமென்ன – “ரப்பர் மண்டையன் ரிக்கி” என்ற பெயர்சூட்டலோடு இந்தப் பொடியனையும் இணைத்துக் கொள்ளத் திட்டமிட்டேன்! Thus concluded the திட்டமிடல் for The Action Special!

இந்தச் சமாச்சாரங்களெல்லாம் கிட்டத்தட்ட ஓராண்டுக்கு முன்பாகவே அரங்கேறியிருக்க, கதைகள் சகலமுமே அப்போதே கைக்கு வந்து,   மொழிபெயர்ப்பும் செய்யப்பட்டு பீரோவினுள் கிடந்தன ! அடுத்தடுத்த இதழ்கள்; பணிகள் என்ற ஓட்டத்தில் சுத்தமாய் ஞாபகத்திலிருந்து Action ஸ்பெஷல் விலகியிருந்தது – போன மாதம் வரையிலும் ! அட்டைப்படத்தை உருவாக்கிடும் நேரம் வந்த போது தான் உதைக்கத் துவங்கியது ! பெரும்பாலும் Fleetway-ன் வாராந்திர காமிக்ஸ் பக்கங்களின் தொகுப்புகளை ஒன்றிணைத்து இதழாக்கிடும் போது ஒரிஜினல் அட்டைப்படம் என்று எதுவுமேயிருப்பதில்லை ! So அவை சகலத்துக்குமே நமது ஓவியர் தான் அந்நாட்களில் அட்டைப்பட டிசைன் போட்டிருப்பார் ! ஆனால் இப்போதோ – ஏவோவொரு கோவிலில் சாமி சித்திரங்கள் வரையும் கான்டிராக்டில் நமது ஓவியர் சில மாதங்களாக பிசியாகயிருக்க – என்ன செய்வதென்ற ரோசனையில் மூழ்கினேன். Rebellion பயன்படுத்திய அட்டைப்பட டிசைன் நமக்கு அத்தனை சுகப்படாது என்பதை ஒரே நொடியில் அனுமானிக்க முடிந்ததால் – அதன் நிழலில் தஞ்சமடைய சாத்தியப்படவில்லை ! அப்புறமாய் அதன் நடுநாயகமாயிருந்த ஒற்றைக்கண் ஜாக்கை மட்டும் லவட்டிக் கொண்டு, பின்னணிகளை இங்கும், அங்குமாய்த் தேற்றிட முற்பட்டோம் ! இறுதியில் தயாரான டிசைன் – நொடியில் Rebellion-ன் சம்மதத்தை ஈட்டியது! இதோ பாருங்களேன்!

 தொடர்வன – உட்பக்கங்களது preview-களும்!




இவற்றினுள் எடிட்டிங்கின் பொருட்டு உட்புகுந்த வேளையில் தான் ஏகமாய் nostalgia ! ஆங்கிலத்திலேயே கதைகள் இருப்பதால், புரிந்து கொள்ளல் சுலபமாகிடல்; சந்து-பொந்து; இண்டு-இடுக்கு என்றெல்லாம் சுற்றிடாது நேர் கோடாய்ப் பயணிக்கும் கதைகள்; பார்த்து, பரிச்சயப்பட்ட சித்திர பாணிகள் என்று ஏகப்பட்ட plus points இங்கே கண்ணில் பட்டன ! இந்த black & white கதைகளை, ஜாலியாய் நியூஸ்பிரிண்ட்டில் வெளியிட்டு,  நெஞ்சை நிமிர்த்தித் திரிந்த நாட்களை எண்ணி ஒரு ஏக்கப் பெருமூச்சை உதிர்த்தேன்! நமது வயதுகளும் சரி, ரசனைகளும் சரி இன்றைய அளவுகளை எட்டியிரா சமயங்களில் தான் வாழ்க்கை எத்தனை சுலபமாயிருந்தது?! பெருமூச்சோடே உலாவிய நொடியில் லேசாய் சில கேள்விகளும் எட்டிப் பார்க்கத் துவங்கின!

- 1. இன்றைய சூழலில் அந்நாட்களது பிரிட்டிஷ் காமிக்ஸ் தொடர்கள் / பாணிகள் ஈர்ப்பைத் தக்க வைக்குமென்று எதிர்பார்த்திடல் practical தானா ? மாயாவி; இஷ்பைடர் போன்ற மறு-மறு பதிப்புகளைப் பற்றிய கேள்வியல்ல அது ! மாறாக – நாம் அதிகம் துவைத்துத் தொங்கப் போட்டிரா second-line பிரிட்டிஷ் நாயகர்களைச் சார்ந்த வினா இது! What would be your general thoughts folks?

- 2. The Action Special உங்கள் கைகளை எட்டியான பின்னே, அதனைப் போலவேயொரு combo இதழை ஆண்டுக்கொரு தபா திட்டமிடலாமா ? Maybe – இதே நாயகக் கூட்டணியென்றில்லாது – வேறு சிலவற்றோடு ?

- 3. பிரான்கோ – பெல்ஜியப் படைப்புகள்; இத்தாலிய கிராபிக் நாவல்கள் என்று ஏதேதோ ஆறுவழிச் சாலைகளில் பயணித்துப் பழகியான பின்னே, இந்தப் பிரிட்டிஷ் பாணிகளை எவ்விதம் ஒப்பிடுவீர்களோ? என்றதொரு curiosity என்னுள் ! How would this style of story-telling rank in comparison?

இக்கேள்விகளைக் கேட்க காரணங்கள் இல்லாதில்லை folks! இங்கிலாந்தில் இந்த மறுவருகைக்கு செமையான வரவேற்பு கிட்டி வருவதால் – Fleetway-ன் offbeat கதைகளை / தொடர்களைத் தோண்டிப் பிடித்து, மெருகூட்டிப் பதிப்பிட்டு வருகிறார்கள் ! மேற்கொண்டும் எக்கச்சக்க காமிக்ஸ் பக்கங்களுக்கான உரிமைகளை Rebellion வெகு சமீபமாயும் கொள்முதல் செய்துள்ளது ! Misty என்ற திகில் வாரயிதழின் கதைகள் சில; Valiant-ல் வெளியான தொடர்களின் தொகுப்புகள் ; Scream ; Jinty ; Roy of the Rovers என்று ஏராளமான ஆல்பங்களைக் குவித்து விட்டனர். So நமக்குமே இவற்றின் மீது ஆர்வம் துளிர்விட வாய்ப்பிருப்பின் – தொடரும் ஆண்டுகளின் திட்டமிடலில் அவற்றை இணைத்துக் கொள்ள இயலும் தான் ! இது குறித்து என்ன நினைக்கிறீர்கள் guys ? இவற்றையெல்லாம் நாம் தாண்டித் தட தடத்து விட்டோமா ? அல்லது - இவற்றுள் மூழ்கிடும் ஆற்றல் இன்னமும் நம்மிடம் உள்ளதென்பீர்களா ? 

பாருங்களேன் - கொட்டிக் கிடக்கும் பிரிட்டிஷ் காமிக்சின் இரண்டாம் வருகையின் பிரதிநிதிகளை !! 











Rebellion முன்னெடுத்திருக்கும் இந்த அதகள முயற்சி, பிரிட்டிஷ் காமிக்ஸ் வாசகர்களை செமத்தியாய்க் குதூகலிக்கச் செய்துள்ளது !  என்றோ ஒரு தூரத்துப் பழம்நாளில் படித்த கதைகளையெல்லாம் தற்சமயம் செம தரத்தில், மறுக்கா தரிசிப்பதை பெருசுகள் ரவுண்ட் கட்டிச் சிலாகிக்க ; சூப்பரஹீரோக்களையே ரசித்து வந்த இளசுகளுமே இந்த black & white ஜாலி கதைகளை ரசித்து வருகின்றனர் !! நாமும் இந்தப் புரட்சியில் ஒரு சிறு அங்கமாகிடல் சுகப்படுமா ? Would love to hear your thoughts !!

Before I sign out - சில ஜாலியான updates :

  1. நமது பிரார்த்தனைகளின் பலனோ ; அவரது ஆண்டவரின் கருணையோ - அல்லது இரண்டின் கலவையோ - தெரியாது ; ஆனால் நமது இத்தாலிய ஓவியர் இப்போது நலமாயுள்ளார் ! ஏகப்பட்ட பரிசோதனைகளுக்குப் பின்பாய் அவருக்கு சிறுநீரகத்தினில் நேர்ந்துள்ள பாதிப்பு - புற்று நோயல்ல என்று கண்டுள்ளனர் ! So முறையான வைத்தியங்கள் செய்து இப்போது நலமாகி, மீண்டும் நமக்காக படம் போடத் துவங்கி விட்டார் !! 2019-ல் அவரை நாம் அடிக்கடி சந்திக்கவிருக்கிறோம் !! 
  2. திண்டுக்கல் நகரில் இம்மாத இறுதியில் புத்தக விழா துவங்குகிறது ! இம்முறை நாமும் அங்கே பங்கேற்கிறோம் ! நமது ஸ்டால் நம்பர் 81 ! இங்கு நமக்கு இதுவொரு புது அனுபவமே என்பதால் - என்ன எதிர்பார்ப்பது என்ற யூகங்களின்றிப் பயணிக்கிறோம் ! Fingers crossed !!
  3. டிசம்பரில் இறுதியில் கும்பகோணம் நகரில் நடைபெறவுள்ள புத்தக விழாவிலும் பங்கேற்க எண்ணியுள்ளோம் ! Again - புதுக் களம் நமக்கு !! 
  4. அச்சிட்டதே குறைவான பிரதிகளே என்றாலும், அதன் இரண்டாம் தொகுப்பு வெளியாவதற்கு முன்பாகவே - ஜெரெமியா முதல் இதழ் விற்றுத் தீர்ந்து விட்டது !! Phew !!! 
  5. And "மின்னும் மரணம்" கூட ஒரு மாதிரியாய் 20-க்குக் குறைவான கையிருப்பை எட்டி விட்டது !! So கங்காரூ குட்டியைத் தூக்கித் திரிவது போல இனி தொடரும் புத்தக விழாக்களுக்கு "மி.ம" பிரதிகளைத் தூக்கித் திரிய அவசியப்படாது !! Phewwwwww !!
  6. எங்களது திருமண நாளினில் வாழ்த்துச் சொல்லிய நண்பர்கள் அனைவருக்கும் belated நன்றிகள் ! அன்றைய பொழுது முழுவதும் சேர்தேய்ப்புப் படலத்தில் ஓடிவிட்டிருக்க, இங்கே எட்டிக்கூடப் பார்த்திட இயலவில்லை !! Thanks guys !! 
  7. சந்தாப் புதுப்பித்தல்கள் இப்போது தான் வேகம் எடுக்கத் துவங்கியுள்ளது ! நேற்றைக்கு மாத்திரமே 20 + சந்தாக்கள் !!! Thanks a ton folks !! இதே வேகம் தொடர்ந்திட்டால் அற்புதமாக இருக்கும் !! மனசு வையுங்கள் ப்ளீஸ் ! 
Bye for now !! See you around !! Have a lovely Sunday !

Saturday, November 17, 2018

மார்க் போடும் நேரமிது !

நண்பர்களே,

வணக்கம். தீபாவளியின் பட்டாசுச் சத்தங்கள் கேட்டது போன வாரம் தான் எனினும், கஜா புயல் ; சர்கார் புயல் என்று ஏதேதோ அரங்கேறி - தீபாவளி நினைவுகளை தூரத்துக்குத் தள்ளிச் சென்றுவிட்டது போல்படுகிறது ! தினமொரு தலைப்புச் செய்தி என்று நாட்கள் பரபரப்பாய் ஓடும் இத்தருணத்தில் , நவம்பரின் புத்தகங்களை நினைவில் இருத்திடுவது அத்தனை சுலபமா - என்ன ? ஜேம்ஸ் பாண்டின் மிரட்டலான அறிமுகமும்  சரி ; டைகர் ஜாக்கின் ஊழித்தாண்டவமும் சரி ; நீல பொடியர்களின் கலாட்டாக்களும் சரி - எப்போதோ ஒரு யுகத்தின் நிகழ்வுகளைப் போலொரு பிரமையை ஏற்படுத்துகின்றன ! மூன்றும், நான்குமாய் மாதந்தோறும் இதழ்கள் வெளியாகும் போதே இந்தப்பாடெனில், துவக்க நாட்களின், மாதத்துக்கு 'ஒண்ணே ஒண்ணு ; கண்ணே கண்ணு" தருணங்களை எவ்விதம் சமாளித்தோமென்ற கேள்விக்கு பதில் தேடுகிறேன் !!

2018-ஐத் திரும்பிப் பார்க்கும் படலத்தினில், எஞ்சி நிற்பன செப்டம்பர் முதலான மாதங்கள்b! “இரத்தப் படலம்” எனும் ராட்சஸக் கடலை தத்தா-புத்தாவென எப்படியோ தாண்டியான பிற்பாடு செப்டபரில் tough-ஆன இதழ்கள் ஏதும் இருந்திட வேண்டாமென்ற முன்ஜாக்கிரதையில் திட்டமிடலை அதற்கேற்றதாக அமைத்திருந்தேன்! So ட்ரெண்டின் ஆல்பம் # 2; மாடஸ்டி பிளைஸி + டெக்ஸின் “சைத்தான் சாம்ராஜ்யம்” மறுபதிப்பு என சற்றே soft ஆன பணிகளாய் காத்திருந்தன! 

களவும் கற்று மற” – இந்தாண்டின் மறக்கவியலா இதழ்களுள் ஒன்றாக அமைந்தது தான் ஆச்சர்யங்களுள் உச்சம்! ட்ரெண்ட் ஒரு பேட்டைப் பிஸ்தாவோ; ஆக்ஷனில் பிரித்து மேய்ந்திடும் நாயகரோ அல்ல என்பதை அவரது அறிமுக சாகஸம் பதிவு செய்திருந்ததில், நம்மில் சிலருக்கு ஏமாற்றமே என்பதில் ஏது இரகசியம் ? ‘கமான்சே போயி இப்போ ட்ரெண்டா? ஹும்ம்ம்...!‘ என்ற பெருமூச்சுகள் தான் உரக்கவே கேட்டனவே ?! – அதனால் அவரது இரண்டாவது சாகஸத்திலாவது சித்தே பரவலாய் ஸ்கோர் செய்தால் தேவலாமே என்ற மெலிதான ஆதங்கம் எனக்குள்ளேயிருந்தது ! ஆனால் கதையைப் புரட்டிப் பார்க்கும் போது தான் புரிபட்டது – இதுவுமே ஒரு ஆக்ஷன் மேளாவே அல்லவென்று ! இன்னும் சொல்லப் போனால் – ஒரு சுள்ளானை விரட்டி, துரத்திப் போய், அவனை ஊர் மக்கள் தூக்கிலிடுவதை பராக்குப் பார்க்கும் பார்வையாளராய் மட்டும் மனுஷன் இம்முறை வலம் வருகிறார் என்பது புலனானது! எனது முதல் ரியாக்ஷன் ‘கிழிஞ்சதுடா சாமி!‘ என்பதே ! முதல் ஆல்பத்தை ஒரு மாதிரியாய் தூக்கி விட்ட நண்பர்கள் கூட இந்த முறை வறுத்தெடுக்கப் போகிறார்களோ ? என்ற பயம் கஜா புயலாய் தாக்கியது ! ஆனால் CINEBOOK தான் புண்ணியம் தேடிக் கொண்டது இந்த இக்கட்டில்! 2018-ன் கதைகளுக்கான பிரெஞ்சு to இங்கிலீஷ் மொழிபெயர்ப்புகளை ஓராண்டுக்கு முன்பே செய்து விட்டிருந்தோம் என்பதால் “களவும் கற்று மற” கூட அப்போதே மொழிமாற்றம் கண்டிருந்தது. ஆனால் CINEBOOK நிறுவனம் ட்ரெண்ட் தொடரை ஆங்கிலத்தில் சமீபமாய்த் துவங்கியிருக்க, அமேசானில் ரூ.650-க்கு ஆர்டர் போட்டு வாய்கியிருந்தேன்! So கதைக்கு French to English ஸ்கிரிப்டும், ஆங்கிலப் பதிப்புமே என் கைகளிலிருந்தன ! என்னதான் நமது மொழிபெயர்ப்பாளர் திறன்பட எழுதியிருப்பினும், ப்ரெஞ்சைத் தாய்மொழியாகக் கொண்டோரின் கைவண்ணம் வேறொரு உச்சத்தில் இருக்குமென்பது இம்முறையுமே ஊர்ஜிதமானது ! ரொம்பவே சுலபமாய்த் தோன்றினாலும் – இந்தக் கதையின் வழிநெடுகிலும் ஒரு மெலிதான சோகம் இழையோடுவதை Cinebook உபயத்தில் கிரகிக்க சாத்தியமானது ! ‘அட... பார்க்க செம நேர்கோட்டுக் கதை போலத் தோன்றினாலும் – இங்கொரு கி.நா. ஜாடை தெரிகிறதே!' என்று குஷியாகிப் போனேன் ! கிராபிக் நாவல்களென்றால் தெறித்து ஓடிய காலம் மாறி – அவற்றை பிரித்து மேயும் ஆர்வலர்களாய் நீங்கள் மாற்றம் கண்ட பின்னே, இத்தகைய கதைகள் ஸ்கோர் செய்யாது போகாது என்று என் உள்ளுணர்வு சொல்லியது. அந்த டீனேஜ் பிரெஞ்சுக் கவிஞரின் வரிகளை கதை நெடுக அந்தச் சுள்ளான் கௌபாய் பெனாத்தித் திரிய – இன்டர்நெட்டில் தேடித் துருவி ஒரு மாதிரியாய் தமிழாக்கங்களைச் செய்து வைத்தேன் ! So இந்தக் கதையினில் தென்பட்ட இனம்புரியா வசீகரம் உங்களையுமே ஸ்பரிசிக்கிறதாவென்ற ஆவலோடு காத்திருந்தேன்! சரியாக அதே சமயம் நண்பர் கார்த்திகைப் பாண்டியனும் அதே ஆர்தர் ரெம்போவின் கவிதைகளை தமிழாக்கம் செய்து விருதும் பெற்றிருக்க – இந்த இதழ் உங்களது ஆர்வங்களைத் தூண்டும் சமாச்சாரமாய் உருப்பெற்றது ! தொடர்ந்த நாட்களின் அலசல்கள்; அந்தச் சுள்ளான் கௌபாயின் கதாப்பாத்திரம் ஏற்படுத்திய தாக்கம் – இந்த இதழை வேறொரு லெவலுக்கு இட்டுச் சென்று விட்டிருந்தது ! ட்ரெண்ட் தொடருமே “களவும் கற்று மற”வின் பெயரைச் சொல்லி ஒரு உத்வேகம் பெற்றிருந்தது ! So ஜெய் கி.நா.என்று நினைத்துக் கொண்டேன் !!

செப்டம்பரில் இன்னொரு blockbuster இதழாகிப் போனது ‘தல‘யின் “சைத்தான் சாம்ராஜ்யம்”! ஏற்கனவே b&w-ல் அந்நாட்களில் கலக்கிய இந்த இதழை இம்முறை முழுவண்ணத்தில் ஆர்ட்பேப்பரில் பார்த்திடுவது செம ரம்யமான அனுபவமாயிருக்குமென்பதில் எனக்குத் துளி கூடச் சந்தேகம் இருக்கவில்லை ! தவிர, எனக்கு இக்ளியூண்டு வேலை கூட வைத்திடாது – autopilot-ல் இதழ் உருவாகிடல் சாத்தியம் என்பதால் நான் ஜாலியாகப் பராக்கு மாத்திரமே பார்த்து வந்தேன்! இந்தாண்டில் ஏஜெண்டுகள் ஆர்வமாய் வாங்கிய இதழ்களுள் இடம் # 3-ஐப் பிடித்தது “சை.சா.” தான்!

செப்டம்பரின் இதழ் # 3 பெரியதொரு ஹிட்டுமல்ல; சொதப்பலுமல்ல என்ற ரகம் ! மாடஸ்டி & கார்வினின் “விடுமுறை வில்லங்கம்” சமீபத்தைய மாடஸ்டியின் சறுக்கலுக்கொரு முற்றுப்புள்ளி வைத்த பெருமைக்குரியது என்ற மட்டிலும் எனக்கு சந்தோஷமே ! ஆனால் 100 கதைகள் கொண்ட இத்தொடரினில் நாம் ரசித்துள்ள “கழுகுமலைக் கோட்டை”; “பழிவாங்கும் புயல்” இத்யாதிகளெல்லாம் முற்றிலும் வேறொரு ரகம் என்பதுமே புரிந்தது ! So விடுமுறை வில்லங்கத்தில்  தலைதப்பியதே என்ற நிம்மதி எனக்கு !

செப்டம்பரில் – ரெகுலர் சந்தாவில் இல்லாது – ஜம்போவின் இதழ் # 2 ஆக வெளியான ஹெர்லக் ஷோம்ஸின் “குரங்கு சேட்டை”யுமே இடம் பிடித்திருந்தது ! 2 கதைகளடங்கிய இந்த முழுவண்ணக் கார்ட்டூன் ஆல்பம் பெரிய பாசாங்கெல்லாம் இல்லாத ஜாலியான, breezy read மாத்திரமே ! சொல்லப் போனால் – அந்த ‘அனஸ்தீஸியா‘ குரங்கு தலைகாட்டும் முதல் கதை ஓ.கே. என்றுபட்டது எனக்கு ! இரண்டாவது கதையில் அத்தனை வலுவில்லை என்றே நினைத்தேன் ! ஆனால் ரொம்பவே ஜாலியாய் நீங்கள் இந்த இதழை ஒட்டு மொத்தமாகவே ஏற்றுக் கொண்டதைப் பார்த்த போது ரொம்பவே ஹேப்பி ! ஜம்போவின் பயணத்தில் இதுவுமொரு சந்தோஷ எட்டாக அமைந்திட்டதில் டபுள் மகிழ்ச்சி ! 

அக்டோபரில் சந்தேகமின்றி highlight ஆகிடவிருந்தது நமது ‘தல‘யின் 70-வது பிறந்த நாள் மலரான “The டைனமைட் ஸ்பெஷல்” தான் ! 777+ பக்கங்கள் ; 500+ பக்க நீளத்துக்கு ஒரே Tex சாகஸம் என்ற ஈர்ப்புகள் காத்திருக்க – இந்த இதழ் ஆரவாரமாய் களமிறங்கியது! And இந்த நொடி வரையிலுமே விற்பனையில் இந்தாண்டின் # 1 இதழாகப் பட்டையைக் கிளப்பி வருகிறது !  Oh yes – “இரத்தப் படலம்” வண்ணத் தொகுப்பு சூறாவளியாய் தாக்கியது தான் ; ஆனால் ஏஜெண்ட்களின் ஒருசாரார் அதனை வாங்கி ரிஸ்க் எடுக்கப் பிரியம் கொள்ளவில்லை ! நாம் அச்சிட்டதே சொற்பம் ; அதனில் முன்பதிவுகள் நீங்கலாய் ஈரோட்டில் புத்தக விழாவில் ஒரு decent எண்ணிக்கை காலியானது ! So முகவர்களுள் ஒரு அணி கைகொடுத்ததைக் கொண்டே கரைசேர்ந்து விட்டிருந்தோம் ! ஆனால் “டைனமைட் ஸ்பெஷல்” சமாச்சாரமோ முற்றிலும் வேறொரு ரகம் ! சின்ன ஊர் – பெரிய ஊர் என்ற பாகுபாடின்றி அத்தனை ஏஜெண்ட்களும் அடித்துப் பிடித்து வாங்கியது மட்டுமல்லாது ; ஆன்லைனிலும் இதற்கிருந்து வரும் வரவேற்பு முற்றிலும் வேறொரு league–ல் உள்ளது ! எனக்கு நினைவு தெரிய – ஆன்லைனில் ஜாஸ்தியான விற்பனை கண்டுள்ள இதழ்களின் Top 3 பட்டியலுக்குள் டைனமைட் ஸ்பெஷலுக்கு இடமிருக்குமென்பது உறுதி ! அதே சமயம் – ‘தல‘ சிறையில் கல்லுடைத்த அந்த 500+ பக்க சாகஸத்தில் அனல் பற்றாதென்ற புகார் குரல்களும் கேட்கவே செய்தன ! வில்லனை நாலு காட்டு – காட்டவாவது பக்கங்களைக் கூடுதலாய் ஒதுக்கியிருந்தால் நிறைவாக இருந்திருக்குமோ என்ற எண்ணம் தென்பட்டது புரிந்தது ! “டெக்ஸின் பொற்காலம்” எனப்படும் அந்த 1-200 கதைகளை பெரியவர் போனெல்லி ஏகப்பட்ட ரகங்களில் சிருஷ்டித்திருந்தார் ! அதனில் இதுவுமொரு பாணி ; மற்றபடிக்கு சீரான அந்தக் கதையோட்டத்தில் முழுநிறைவே என்ற குரல்கள் தான் மெஜாரிட்டி ! எது எப்படியோ – அந்த ஆல்பத்தின் கதை # 2 விட்ட குறை, தொட்ட குறை சகலத்தையும் நிவர்த்தி செய்யும் விதத்தில் அதிரடியாய் அமைந்திருப்பதில் எல்லோருமே ஹேப்பியோ ஹேப்பி !

அக்டோபரின் வண்ண இதழ்களில் ரிப்போர்ட்டர் ஜானியின் “மரணம் சொல்ல வந்தேன்” கூட குறிப்பிடும்படியான வரவேற்பைப் பெற்றது! ஆனால் நிஜத்தைச் சொல்வதானால் வழக்கமான ஜானி கதைகளில் மண்டையை ‘மங்கு‘ மங்கென்று பிறாண்டினாலாவது ஏதாவது புரிபடுவதுண்டு! இம்முறையோ ரொம்பவே ‘மங்கு‘ மங்கென்றது தான் மிச்சம் ; புரிதல் குறைவே என்பேன் ! ஒரு 42 பக்க இடியாப்பத்தை இரண்டே பக்கங்களில் குருமா செய்து சுவைக்கும் பாணிக்கு, ஜானியின் புது அவதாரில்  விடுதலை தந்துள்ளார்கள் என்றமட்டில் ரொம்பவே நிம்மதி எனக்கு ! ஒரு துப்பறியும் சாகஸத்தை நார்மலான பாணியில் ரசித்த திருப்தி அங்கு உறுதி என்று சொல்வேன் !

மற்றொரு வண்ண இதழான கர்னல் க்ளிப்டனின் “யார் அந்த மிஸ்டர் X ?” நமது கேரட் மீசைக்காரருக்கு ஒரு lifeline தந்து புண்ணியம் தேடிக் கொண்ட இதழென்பேன் ! இந்த ஆல்பத்துக்கு மட்டும் உங்களது வரவேற்பு மிதமாக மாத்திரமே அமைந்திருப்பின் – மனுஷன் 2019-ல் தலைகாட்டிட வாய்ப்பில்லாது போயிருப்பார் ! Just miss !

அக்டோபரின் black & white ராபின் சாகஸமுமே கிட்டத்தட்ட அதே lifesaver தான்! ரொம்ப காலத்திற்குப் பின்னே ஒரு நேர்த்தியான ராபின் ஆல்பத்தை வாசித்த திருப்தியை “தெய்வம் நின்று கொல்லும்” தந்திருந்தது! Of course – கதையின் மையத்தை யூகிப்பதில் பெரிதாய் சிரமங்கள் இல்லையென்பது மைனஸ் பாய்ண்டே! ஆனால் (துப்பறியும்) ஆலைகளிலா ஊர்களில் நாம் ரொம்பவே கறார் காட்டினால், இந்த டிடெக்டிவ் பார்ட்டிகள் அழிந்து போகுமொரு இனமாகிப் போய்விடுவர் – நம்மட்டிலுமாவது ! Robin stays on !! 

நவம்பரில் தீபாவளி மலராய் 340+ பக்க சாகஸத்தோடு பலம் காட்டிய “காதலும் கடந்து போகும்” நடப்பாண்டின் “Best டெக்ஸ்” என்பதில் பெரிய மாற்றுக் கருத்துகள் இராதென்பேன் ! டைகர் ஜாக்கின் விஸ்வரூபம் இந்த இதழை ஒரு cult classic ரகத்திலானதாய் டெக்ஸ் பிரியர்களுக்கு மாற்றித் தந்திருப்பதை உங்கள் அனைவரின் எண்ணப் பதிவுகளும் பறைசாற்றின ! டெக்ஸ் சாகஸங்களில் இத்தகைய அதிரடி ஹிட்களை அன்னப்பட்சி போல பிரித்தெடுக்கும் ஆற்றலை மட்டும் ஏதேனுமொரு சூப்பர் மார்கெட்டில் வாங்கிட இயன்றால் – அடடா… வாழ்க்கை தான் எத்தனை பிரகாசமாகிடும் என்று தோன்றியது ! இந்த இதழுமே ஆன்லைனில் செமத்தியான விற்று வருமொரு இதழ் என்பது icing on the cake !!  

ஸ்மர்ஃப்களின் swansong ஆக வெளியான “காசு… பணம்… துட்டு” அந்த நீலப் பொடியர்களின் ரசிகர்களைக் குஷிப்படுத்திய இதழ் என்பதில் ஐயமில்லை ! எப்போதும் போலவே ஒரு நயமான கருவை எடுத்துக் கொண்டு செம ரசனையோடு அதனைக் கையாண்டிருந்தனர் படைப்பாளிகள் ! ஆனால் – “ச்சை… எனக்கு உஜ்ஜாலாவிலேயே கூட நீலமே புடிக்காது !” என்று நம்மில் முக்கால்வாசிப் பேர் முறைப்புக் காட்டும் போது இந்த விரலளவு மனிதர்கள் தான் என்ன செய்வார்கள்? ஹ்ம்ம்ம்ம்ம்… புத்தக விழா விற்பனைகளே இனி இந்த இதழைக் கரைசேர்த்திட வேண்டும் தெய்வமே ! அப்புறம் இந்த இதழ் சார்ந்ததொரு கொசுறுச் சேதியும் கூட! இதன் மொழிபெயர்ப்பை தமிழில் செய்தது ஒரு ஆர்டின் ரசிகரே ! இவர் அவ்வப்போது குழலும் ஊதுவார் என்று வைத்துக் கொள்ளுங்களேன் !

நவம்பரின் இன்னொரு பட்டாசாய் படபடத்தவர் நமது ஜேம்ஸ் பாண்ட் 007 தான்! “மினிமம் டயலாக், மேக்சிமம் ஆக்ஷன்” என்ற குறிப்போடு களமிறங்கியுள்ளனர் கதாசிரியர் – ஓவியர் ஜோடி ! அந்த மிரட்டலான இரவு சேஸிங் சீனோடு ஆரம்பிக்கும் பாண்டின் பயணம், முழுக்கவே டாப் கியரில் சீறிப் பாய்ந்தது தான் highlight ! ஜம்போ காமிக்ஸின் ஹாட்ரிக் இதழிது என்று சொல்லும் விதத்தில் வெற்றியை ஈட்டித் தந்துள்ள “பனியில் ஒரு பிரளயம்” லார்கோவின் வெற்றிடத்தை இட்டு நிரப்பினால் இனியெல்லாம் சுகமே என்பேன் !

So – டிசம்பரின் 3 இதழ்கள் நீங்கலாக இதுவரைக்குமான 2018 பயணம் சார்ந்த எனது தனிப்பட்ட கருத்துக்களே இவை ! அவரவருக்கு – அவரவரது பணிகள் சிறப்பானதாகவே தோன்றுவது வாடிக்கை தானென்றாலும் – இந்த மதிப்பீடுகள் செய்திடும் சமயம் – ‘எடிட்டர்‘ என்ற குல்லாவைத் துண்டாகக் கழற்றி தூர வைத்து விடவே நான் விழைந்துள்ளேன் ! இயன்றமட்டிலும் நேர்மையான அலசல்களை, சில behind the scenes கொசுறுச் சேதிகளோடு வழங்கிட முற்பட்டுள்ளேன் ! எனது பார்வையில் Jan to Nov வரைக்குமான இதழ்களின் தர breakup இவ்விதம் :

a) சூப்பரப்பு !! ரகம் … 14
b) அக்காங்.... குட் நைனா ! ரகம்… 13
c) ம்ம்ம்… அது வந்து… இன்னா சொல்ல வர்றேன்னா ? ரகம்... 9
d) ஆணியே பிடுங்க வாணாம் ! ரகம்… 2

Of course – நானே பீப்பீ ஊதி – நானே டான்ஸும் ஆடிவிட்டு – நானே ‘இது தில்லானா மோகனாம்பாள் ரகம்‘ என்று சொல்லிக் கொள்வது போலத் தோன்றிடலாம் தான்! அதனால் இந்த 38 இதழ்கள் (ரெகுலர் சந்தா 35 + ஜம்போ 3) மீதான உங்களது மதிப்பீடுகளையும் நீங்களும் ஒருவாட்டி செய்திடக் கோருகிறேன் guys! இதே பாணியில் a) – b) – c) – d) – என்று குறித்திடுங்களேன் – ப்ளீஸ் ! அதுமட்டுமன்றி, இந்தாண்டின் இதுவரையிலான பயணம் எவ்விதமிருந்துள்ளது என்பதையும் சொல்லிடலாமே folks ? 

இதற்கு மேலும் திரும்பிப் பார்த்துக் கொண்டேயிருப்பின் கழுத்து பிடித்துக் கொள்ளும் என்பதால் – முன்னே பார்க்கத் தொடங்குவோமா ? இதோ, டிசம்பரின் கார்ட்டூன் சீஸன் தொடர்கிறது – மதியிலா மந்திரியாரின் உபயத்தில்! “கனவெல்லாம் கலீபா” மந்திரியாரின் ஆல்பங்களுள் ஒரு ஜாலியான addition ஆக இருந்திடுமென்பதில் எனக்குத் துளியும் சந்தேகமில்லை ! வழக்கம் போலவே 6 பக்க / 8 பக்கத் தொகுப்புகளாய் கதைகள் அமைந்திருக்க, ஒவ்வொன்றுமே ஒரு பட்டாசு! As always, வார்த்தை விளையாட்டுக்கள் இங்கே நிரம்ப இடம்பிடித்திருக்க – அவற்றைத் தமிழுக்குக் கொணர நிறையவே குட்டிக்கரணம் அடித்துள்ளேன் ! ஆனால் மொழி சார்ந்த சில சூட்சமங்களை எத்தனை வேக வேகமாய் பல்டியடித்தாலுமே அடுத்த மொழிக்குக் கொண்டு செல்வது சாத்தியமாகாது தானே ? So ஒரிஜினல் இங்கிலீஷ் இதழைக் கையில் வைத்துக் கொண்டே ஒப்பிட்டுப் பார்க்கும் ஆர்வலர்கள் சித்தே கனிவோடு அணுகிடக் கோருகிறேன் ! இதோ – இந்த இதழுக்கான நமது அட்டைப்படம் & உட்பக்கங்களின் preview! 
அட்டைப்படம் நமது ஓவியர் மாலையப்பனின் கைவண்ணம்! 2019-ன் நமது பயணத்தில் மந்திரியார் நம்மோடு இருந்திடப் போவதில்லை என்பதொரு சோகமென்றாலும் – இந்த இதழுக்கு நீங்கள் தந்திடக் கூடிய reviews பாசிட்டிவ்வாகயிருப்பின் – நிச்சயமாயொரு மறுவருகைக்கு may be 2020-ல் வாய்ப்புகள் புலரக் கூடுமென்ற நம்பிக்கை ஒரு ஓரமாயுள்ளது ! Fingers crossed !
அப்புறம் டிசம்பரில் ஜம்போவும் உண்டு – ‘The Action Special” ரூபத்தில் ! Fleetway-ன் க்ளாசிக்குகளை மறுக்கா பார்க்கும் அனுபவம் ரொம்பவே வித்தியாசமாக உள்ளது! காத்திருக்கும் ஞாயிறில் அதன் எடிட்டிங்கில் தான் எனது பொழுது ஓடவுள்ளது !

டிசம்பருக்கு எங்கள் பணிகள் 75%-க்கும் மேலாய் பூர்த்தியாகியிருக்க – நம்மவர்கள் ஜனவரியின் நடுவே பரபரப்பாய் ஓடிக்கொண்டுள்ளனர் ! ஒரு பயணம் (2018) முடிந்தது போலத் தோன்றினாலும் – அடுத்தது தம் கட்டிக் காத்திருப்பது தெரிவதால் – காலாட்டிக் கொண்டு ஓய்வு எடுத்தது போதுமடா சாமி என்று நானுமே mode மாறியாச்சு ! ஒரு பக்கம் ஜனவரியின் அட்டைப்படங்களின் தேர்வுகள் ; 3 மில்லியன் ஹிட்ஸ் ஸ்பெஷல் சார்ந்த ரோசனைகள் ; புதுக் கதைகளுக்கு அனுப்ப வேண்டிய ராயல்டி தொகைகளை புரட்டிட அடிக்கும் குட்டிக்கரணங்கள் ; ஜம்போ - சீசன் 2 சார்ந்த கதைத் தேடல்கள் ; "ஈரோடு ஸ்பெஷல்"க்கு என்ன ஸ்பெஷல் ? என்று ஏதேதோ யோசனைகளோடும், முயற்சிகளோடும் எனது நாட்களும் பிஸியாகத் துவங்கி விட்டன !  சந்தாக்களைப் புதுப்பிக்கும் mode-க்கு நீங்களுமே மாறிட்டால் நம் பயண வேகம் இன்னும் சூடு பிடிக்குமன்றோ ? Please do chip in folks !! Bye for now ! See you around !

P.S. : Before I sign out : இன்னமுமொரு கோரிக்கை !! இதுவும் பணம் சார்ந்த வேண்டுகோளே ; ஆனால் இம்முறை நமக்கோசரமல்ல ! நமது நண்பர் (சென்னை) செந்தில் சத்யாவின் இல்லத்தரசிக்கு கடந்த சில மாதங்களாகவே இக்கட்டான உடல்நிலை !! ஈரோடு புத்தக விழாவினில் சத்யா ஆஜரான போதுமே மனைவியை ஆஸ்பத்திரியில் விட்டு விட்டுத் தான் ஓட்டமாய் ஓடிவந்திருந்தார் ! அப்போது முதலாகவே மருத்துவமனை வாசமே அவரது மனைவிக்கு ! ஆண்டவன் கருணையோடு, நிறைய சிகிச்சைகளுக்குப் பின்பாய் அவர் இப்போது நலமாகி, வீடு திரும்பிடும் நாளும் நெருங்கியுள்ளது !! ஆனால் இத்தனை நெடிய மருத்துவப் போராட்டத்தின் செலவுகளைத் தாக்குப் பிடித்திடுவதில் சத்யா ரொம்பவே திண்டாடிப் போயுள்ளார் ! தொடரும் வாரம் மனைவியை வீட்டுக்கு அழைத்துச் சென்றிட மருத்துவமனைக்கொரு பெரிய தொகையினை அடைக்க வேண்டிய நெருக்கடியில் உள்ளார் ! அவரது சக்திக்குட்பட்ட தொகையினைப் புரட்டியிருப்பினும், இன்னமும் கொஞ்சம் குறைபாடு உள்ளது ! நம்மால் இத்தருணத்தில் ஏதேனும் ஒத்தாசை செய்திட முடிந்தால், நண்பரின் சிரமம் ஓரளவுக்கு மட்டுப்பட்டிட வாய்ப்புள்ளது !! நண்பர்களுள் யாரேனும் ஒருவர் இதன் ஒருங்கிணைப்புப் பொறுப்பை ஏற்றுக் கொண்டால், சிறப்பாக இருக்குமென்று நினைக்கிறேன் !! கரம் கோர்ப்போமா all? 






இவ்வாரத்தினில் அமெரிக்க மார்வல் காமிக்ஸ் குழுமத்தின் ஜாம்பவான் படைப்பாளியான திரு ஸ்டான் லீ அவர்கள் இயற்கை எய்தியுள்ளதொரு வருத்தமான சேதி ! எண்ணற்ற சூப்பர் ஹீரோ கதைகளுக்கும், எண்ணற்ற புதுமைகளுக்கும் இவரே முழு முதற் பிதாமகர் !! Rest in peace Sir !!!

நமது YOUTUBE சேனலில் புதியதொரு வீடியோ guys https://youtu.be/d5WyDCK_I04

Sunday, November 11, 2018

க்வாட்டரோடு மீண்டும் !!

நண்பர்களே,

வணக்கம். சில பல வாரங்களுக்கு முன்பாய் 2018-ன் முதல் 5 மாதங்களது இதழ்களை அலசி ஆராய்ந்திருந்தோம் – “க்வாட்டரும் கடந்து போகும்” என்றதொரு அறிவுபூர்வமான தலைப்பின் கீழ் ! தொடரும் பொழுதினில் இந்தாண்டின் அடுத்த சில மாதங்களை நோக்கி zoom செய்திடுவதாய் திட்டமிட்டிருந்தேன்; ஆனால் 2019-ன் அட்டவணை அறிவிப்பு; ஜேம்ஸ் பாண்ட்; நவம்பர் இதழ்களது அலசல்கள் என்று இடையினில் heavyweight topics தலைநுழைக்க, திட்டம் பணாலாகிப் போனது! Anyways – டிசம்பர் இதழ்கள் மீதான எனது பணிகள் முடிந்து ஏக காலமாகியிருக்க – கிடைத்திருக்கும் குட்டியூண்டு அவகாசத்தினில், விடுபட்டுப் போன பணிகளையெல்லாம் செய்து வருகிறேன்! இதுவே waiting list-ல் உள்ள பணி தான் எனும் போது – இந்த ஞாயிறை அதற்கென ஒதுக்கினால் தேவலாமென்று பட்டது ! So here goes!

ஜுன்’18 பெரியதொரு ஆரவாரமிலா ; ஸ்பெஷல் இதழ்கள் ஏதுமிலா மாதமாய் அமைந்திருப்பினும் – அந்த மாதம் களம் கண்ட 3 நாயகர்களுமே தத்தம் பிரிவுகளில் ஜாம்பவான்களே!

- லார்கோ வின்ச்     - டெக்ஸ் வில்லர்    - மாயாவி

என்ற பெயர்களை ஒருசேரப் பார்க்கும் கணம் – “அட்றா சக்கை... ஒரு செம விருந்து காத்துள்ளது!” என்ற எண்ணம் தலைதூக்கியிருப்பின் நிச்சயம் அதனில் தவறு இருந்திராது தான்! ஆனால் ஜாம்பவான்களும் சில வேளைகளில் ஜாங்கிரியென்று பிலிம் காட்டி விட்டு – ஜுர மருந்தை வாயில் ஊற்றிட வல்லவர்களே என்பதை ஜுன்’18 நிரூபித்துக் காட்டியது! இதில் கொடுமை என்னவென்றால் – காத்திருப்பதொரு ‘பிம்பிலிக்கா பிலாக்கி‘ அனுபவமே என்பது எனக்குத் தெள்ளத் தெளிவாய், ரொம்ப முன்னமே தெரியும் ! லார்கோ தொடரில் – “வான் ஹாம் பணியாற்றிய இறுதி ஆல்பம்!” என்ற பில்டப்போடு ஆல்பங்கள் 19 & 20 தயாரான சமயமே நமக்கு இந்த ஆக்கங்களின் preview பிரெஞ்சில் கிட்டியிருந்தன ! படம் பார்க்கையில் வழக்கம் போல லார்கோவின் மெர்சலாக்கும் ஆக்ஷன்; ஒரு புதிரான அழகி; லண்டனின் ரம்யமான பின்னணிகள் என்று வசீகரமானதொரு சாகஸமாகவே தென்பட்டது! ஆனால் Cinebook வெகு சீக்கிரமே இவற்றை ஆங்கிலத்தில் வெளியிட்டிருக்க – அவற்றைத் தருவித்திருந்தேன் முதல் வேலையாக ! அதைப் படிக்கத் துவங்கிய போதே மெதுமெதுவாய் ஜெர்க் அடிக்கத் துவங்கியது ! முதல் பாகத்தைப் படித்து முடிந்த சமயமே எனக்கு வியர்க்கத் துவங்கியிருந்தது – இதனை தமிழில் எவ்விதம் கையாள்வதென்ற யோசனையில் ! And பாகம் இரண்டையும் முடித்த சமயம் சந்தேகமேயின்றித் தெரிந்தது – இந்த ஆல்பம் நாம் பார்த்துப்,  பழகி, ரசித்து வந்த லார்கோவைக் கண்ணில் காட்டிடும் ரகமல்லவென்று ! ஆனால் ஒரு prime நாயகரின் ஆல்பம் ; அதுவும் வான் ஹாம் போன்ற அசுரரின் கைவண்ணத்திலானது எனும் போது – அதனை ஓரம்கட்டுவது சுலபமல்ல என்பதும் புரிந்தது ! So மொத்துக்கள் நிச்சயம் ; சில தீவிர லார்கோ அபிமானிகளுக்கு ஏமாற்றமும் நிச்சயமென்ற புரிதலோடே தான் “பிரியமுடன் பிரளயம்” இதழினுள் பணியாற்றப் புகுந்தேன் ! கதைநெடுக பாட்டையாக்களும்; பாட்டிமார்களும் அடிக்கும் லூட்டிகள் ஒரு பக்கமெனில்; சொகுசுக் கார் ட்ரைவர் ; கப்பலின் கேப்டன் ; ஜெட் விமானத்தின் பைலட் – என எதிர்ப்படும் சகலருமே ஜல்சாவோ-ஜல்சா மூடில் சிக்கித் திரிய, எனக்கோ மொழிபெயர்ப்பதற்குள் முழி பிதுங்கி விட்டது ! சில இதழ்கள் ”நிச்சயிக்கப்பட்ட ஹிட்கள்” என்றிருப்பதைப் போல – சொற்பமான சிலவோ “நிச்சயிக்கப்பட்ட சொதப்பல்கள்” என்பதை நெற்றியிலேயே பச்சை குத்தித் திரிவதுண்டு ! இரண்டு சூழ்நிலைகளிலுமே நான் செய்யக் கூடியது பெரிதாய் ஏதுமிராது – இயன்றமட்டிலும் டயலாக்குகளை உயிர்ப்போடு அமைக்க முனைவதைத் தாண்டி! “பிரியமுடன் பிரளயத்திலோ” – நான் முயற்சித்தது விரசங்களை இயன்றமட்டிலும் கட்டுக்குள் வைத்திட மாத்திரமே ! ஆங்கில ஒரிஜினலையும், நமது தமிழ்ப் பதிப்பையும் ஒருசேரப் படித்துப் பார்த்தோருக்கு என் பாடின் பரிமாணம் நிச்சயம் புரிந்திருக்கும்! So அழகானதொரு அட்டைப்படம், powerful ஆனதொரு நாயகர்; கலக்கலான கலரிங் என்றிருந்தாலும் “பிரியமுடன் பிரளயம்” – 2018-ன் “பப்படம் of the Year” என்ற பட்டத்துக்குப் போட்டி போட்டதே ஜுனின் சோகம் !

ஆனால் லார்கோவின் சறுக்கலை ஈடு செய்வது போலொரு செம வீரியமான ஆக்ஷன் மேளாவை டெக்ஸ் வில்லர் நடத்திக் காட்டியதால் மாதம் # 6-ல் நம் தலைதப்பியது ! “நடமாடும் நரகம்” அந்த classic பாணிச் சித்திரங்கள் + பட்டாசாய்ப் பொரியும் கதைக்களத்தோடு 200+ பக்கங்களுக்குத் தடதடக்க – எனக்குள் பெரியதொரு நிம்மதிப் பெருமூச்சு ! மிதமான நாயக / நாயகியர் கோட்டை விட்டால் கூட அத்தனை பெரிய ரணம் தெரிய மாடேன்கிறது ; ஆனால் மெகா ஸ்டார்கள் தடுமாறிட்டால் ரணகளமாகிறதல்லவா ? புனித தேவர் மணிடோவின் புண்ணியத்தில் ஜுனின் சேதாரங்கள் massive ஆக இருந்திடவில்லை ! And மாயாவியின் “நடுநிசிக் கள்வன்” அம்மாதத்து இறுதி இதழ் என்ற போது, வண்டி சகஜமாய் ஓடிவிட்டது ! என்னைப் போலவே நீங்களுமே லார்கோவின் பொருட்டு கொண்ட கவலை ஜுனின் அலசல்களில் தெறிப்பதை நிரம்பவே பார்க்க முடிந்தது ! And அடுத்த லார்கோ ஆல்பம் இரண்டு மடங்கு வீரியமாய் அமைந்திட வேண்டி வரும் என்ற எண்ணத்தை அடக்கவும் முடியவில்லை ! Fingers crossed !

ஜுலைகள் நமது லயனின் ஆண்டுமலர் மாதங்கள் எனும் போது – எப்போதுமே எனக்குள்ளே ஒருவிதக் குஷி குடியேறி விடும் ! சில வருடங்களுக்கு முன்பாக கேப்டன் பிரின்ஸ் சிறுகதைகள் + பெட்டி பார்னோவ்ஸ்க்கியின் spin-off என்ற தலைநோவுக் கூட்டணி சொதப்பியதைத் தவிர்த்து – ஆண்டுமலர் இதழ்கள் பெரியதொரு மொக்கை போட்டதாய் எனக்கு நினைவே இல்லை ! இம்முறையோ – “லூட்டி with லக்கி” ஆண்டுமலராய் களமிறங்க – செம ஜாலியான அனுபவம் all the way! 2 புத்தம் புதிய கதைகள் ; அதிலும் லக்கியின் கார்ட்டூன்கள் என்ற போதே பேனா பிடிக்க என் விரல்களில் நமைச்சல் எடுத்தது ! அதிலும் “திசைக்கொரு திருடன்” சூப்பர்-டூப்பர் கதையென மனதுக்குப்பட – எழுதும் போதே இதனை நீங்கள் எவ்விதம் சிலாகிப்பீர்களென்ற ரேஞ்சிற்கு என் கற்பனைகள் சிறகுகள் விரித்தன! கிருஸ்துமஸ் புலரும் முன்பாக வான்கோழி பிரியாணியை எண்ணிச் சப்புக் கொட்டுவது முறையல்ல தான்; ஆனால் லக்கி லூக் + 4 டால்டன்கள் என்ற ரகளையான கூட்டணி பிரித்து மேயும் போது – வெற்றிக்கு 99% உத்தரவாதம் உண்டென்ற தைரியம் தான் என்னுள் ! அந்த ஆல்பத்தின் இரண்டாவது கதையான “ஸ்டேட் பாங்க் of டால்டனிலும்” டால்டன்களின் மொத்தப் பரிவாரமுமே கூத்துக்களைத் தொடர்ந்திட, ஆண்டுமலர் – ஆரவார மலரானதில் no surprises! And ஹார்ட்கவர் பைண்டிங்; சூப்பரான அட்டைப்படம் என்ற icings, கேக்கை மேலும் சுவையூட்ட – ஜுலை ‘ஓஹோ‘வென்று துவங்கியதில் வியப்பில்லை தான் ! 

புதுசாய் நம் பக்கம் கரை சேர்ந்த கனடாவின் காவல் வீரர் ட்ரெண்ட் ஜுலைக்கொரு X-factor-ஐத் தந்த புண்ணியவான்! நான் வழக்கம் போல “வீரன்... சூரன்...”! என்று கொடுத்திருந்த பில்டப்பை எத்தனை தூரம் சீரியஸாக எடுத்திருந்தீர்களோ - தெரியாது; ஆனாலும் இவர் மீதொரு எதிர்பார்ப்பு இருந்தது நிச்சயம் ! “பனிமண்டல வேட்டை” கலக்கலான கலரில்; அட்டகாசமான சித்திரங்களோடு, நீட்டாக வந்து இறங்க – எனக்குள் இதனை நீங்கள் வரவேற்கக் காத்திருக்கும் விதம் சார்ந்து பெரியதொரு குறுகுறுப்பு ! ‘ஏக் மார் – தோ துக்கடா; பக்கடா‘ என்றெல்லாம் இந்தப் புதுவரவு ஆக்ஷன் கதக்களி ஆடப் போவதில்லையென்பது எனக்கு நன்றாகவே தெரியும் என்பதால் – ouy & out ஆக்ஷன் ரசிகர்களுக்கு இவரொரு ‘ஙே‘ பார்ட்டியாகவே தென்படுவாரென்பது குறித்து எனக்குள் ஐயங்களில்லை ! ஆனால் நிச்சயமாய் ஒரு ஓரமாய் குந்திக் கொண்டு மிக்சர் சாப்பிட வேண்டிய பார்ட்டியுமல்ல இவர் என்ற நம்பிக்கை நிறையவே இருந்தது ! எனது யூகங்கள் சரியே என்று சொல்லும் விதமாய் – இந்த இதழ் மீதான தீர்ப்பு split verdict ஆகவே இருந்தது ! But இந்திய கிரிக்கெட் அணியில் K.L. ராகுல் போன்ற சில வீரர்களை தொலைநோக்கோடு ஆதரிப்பதைப் போலவே – இந்தக் கனடா காவலரை ‘எடுத்தோம்-கவிழ்த்தோம்‘ என்ற ரீதியில் அணுகிடாது இவரைப் பொறுமையாகக் கையாள்வதென்று நான் முன்னமே தீர்மானித்திருந்தால் 50-50 தீர்ப்பு கூட எனக்கு ஓ.கே. என்றே பட்டது ! 

ஜுலையின் இதழ் # 3 வண்ணத்தில் “எரிமலைத் தீவில் பிரின்ஸ்” என்பதால் அங்கேயும் thumbs-up சுலபமாய்ச் சாத்தியப்பட்டது ! மறுபதிப்புகள் – அதுவும் உங்கள் தேர்வுகளின் அடிப்படையிலான மறுபதிப்புகள், என் பிழைப்பை எப்போதுமே எளிதாக்கிடுவதால் – நோகாமல் ஒரு ‘ஹிட்‘டைப் பதிவு செய்த திருப்தி!

ஜுலையின் highlight என்னைப் பொறுத்த வரையிலும் “ஜம்போ காமிக்ஸின்” debut தான் ! “லயன் + ஜுலை” என்ற அதே கெமிஸ்ட்ரி தொடரட்டுமே என்ற பகுத்தறிவு நிறைந்த சிந்தனை உரமேற்ற – இளம் TEX-ன் “காற்றுக்கேது வேலி?” அதிரடியாய் உங்களோடு கைகுலுக்கத் தயாரானது ! Truth to tell – இந்த இதழை பந்தாவாய் அறிவித்து விட்டேனே தவிர – நிறையவே starting troubles ! அட்டைப்படம் துவக்கத்தில் உருப்படியாய் ‘செட்‘ ஆகவில்லை ; கதையின் ஓட்டத்திலுமே மெலிதாயொரு கிலேசம் எனக்கு! நாம் இது நாள் வரை பார்த்துப் பழகியிருந்த டெக்ஸ் template-லிருந்து மாறுபட்டு ஓடும் இளம் டெக்ஸின் saga-வை எவ்விதம் ஏற்றுக் கொள்வீர்களோ ? என்ற தயக்கமே அதன் பின்னணி ! அதே போல – “why ஜம்போ?” என்ற கேள்விகளுக்குப் பத்தி பத்தியாய் பதில் எழுதாது – செயலில் பதிலைப் பதிவிட வேண்டுமென்ற ஆசை இருக்கவே, இதழின் தயாரிப்பிலும் இயன்றமட்டிற்குக் குட்டிக்கரணம் அடிக்க முனைந்தோம்! கிட்டத்தட்ட மொத்த மொழிபெயர்ப்பையுமே இதன் பொருட்டு redo செய்தோம் ; அட்டைப் படத்தில் ; தயாரிப்பில் ; சாத்தியமான நகாசு வேலைகளைச் செய்தோம் ! So ஜம்போ #1 உங்கள் கைகளை எட்டிப்பிடித்த வேளையில் இங்கே நான் மூச்சைப் பிடித்துக் கொண்டு காத்திருந்தேன் – reactions எவ்விதம் இருக்கப் போகின்றனவோ என்ற டர்ரில் ! ஆரம்பமே ஈனஸ்வரமாகிப் போயின் – ஜம்போவின் ட்ரவுசர் கழன்றிடுமே என்ற பயம் தான் ! பற்றாக்குறைக்கு அந்த ஜம்போ லோகோவுக்கும் உங்களது take என்னவாக இருந்திடுமோவென்றும் யூகிக்கத் தெரியவில்லை ! ஆனால் ஆபத்பாந்தவரான போனெல்லியின் பிரியமான புதல்வர் – என் பயங்கள் சகலத்தையும் துவம்ஸம் செய்த கையோடு உங்கள் அனைவரின் ஏகோபித்த கரகோஷங்களையும் ஈட்டித் தந்து ஜுலையை ஒரு அட்டகாசப் பொழுதாக்கி விட்டார் ! துளியும் சந்தேகங்களின்றி இந்த இதழொரு smash hit என்பதை உணர்ந்த போது – “TEX” என்ற அந்த மந்திரச் சொல்லின் மகிமை ஆயிரத்துப் பதினெட்டாவது தடவையாக ஊர்ஜிதமானது ! எனது துவக்கத் திட்டமோ ஜம்போவின் முதல் இதழாக James Bond-ஐக் களமிறக்குவதே! ஆனால் அதனை மொழிபெயர்க்கும் பொருட்டு பொறுமையாய் அமர நேரம் கிடைக்காதே போனதால் – அதனிடத்தில் “காற்றுக்கேது வேலி” யை உட்புகுத்தினேன் – அதன் மொழிபெயர்ப்பை நமது கருணையானந்தம் அவர்கள் செய்து தந்து விடுவாரே என்ற எதிர்பார்ப்பில் ! ஆனால் அதை ஏகமாய் redo செய்கிறேன் பேர்வழியென்று – James Bond-க்குச் செலவிடக் கூடிய அவகாசத்தை விட இரட்டிப்பு நேரம் செலவிட்டதெல்லாம் கிளைக் கதை! So ஒரு சோம்பலின் பலனாய் ஜம்போ #1 அதிரடித் துவக்கம் கண்டது தான் நிஜம்!

ஆகஸ்ட் ‘18 பற்றிய பேச்செடுத்தாலே உங்கள் காதுகளில் தக்காளிச் சட்னி ஓடிடுமென்பதில் சந்தேகம் லேது ! ஈரோடு வாசக சந்திப்பு பற்றியும் ; இரத்தப் படலம் வண்ணத் தொகுப்பு ரிலீஸ் பற்றியும், வண்டி வண்டியாய்; லோடு லோடாய் எழுதி விட்டாச்சு தானே ? So புதிதாய் அதன் வரலாறு ; பூகோளம் பற்றியெல்லாம் எழுதுவதைக் காட்டிலும் – அந்த நாட்களின் அனுபவங்களை ஒரு பறவையின் பார்வையில் பார்த்தலே நலமென்றுபடுகிறது! துளியும் சந்தேகமின்றி – நமது இத்தனை ஆண்டுக் கூத்துப் பட்டறைகளின் போக்கில், வெளியிடுவதற்கு முன்பாகவும், பின்பாகவும்,  இது போன்றதொரு ஆரவாரத்தைக் கிளப்பிய இதழை நாம் பார்த்ததில்லை என்பது மெய்யே ! அச்சிட்டது பிசாத்து 800 பிரதிகளே என்றாலும் அவற்றை விற்பனை செய்திட நிச்சயமாய் சில மாதங்களாவது செலவாகும் என்றே எண்ணியிருந்தேன்! ஆனால் இத்தனை துரிதத்தில் கிட்டங்கியைக் காலி செய்யச் சாத்தியமானதன் புண்ணியம் முழுக்க முழுக்கவே உங்களையே சாரும் ! இதழின் கதையில் புதுமைகள் இருக்க வாய்ப்பில்லை என்றாலும் – அதன் making-ல் நாம் காட்டிய மெனக்கெடலை நீங்கள் தலையில் தூக்கிக் கொண்டாடியதே – அசுவாரஸ்யமாய் இருந்த விளிம்புநிலை வாசகர்களையும் சுழலினுள் ஈர்த்த காரணி ! அது நாள் வரைக்கும்... “ம்ம்ம்... பாத்துக்கலாம்... பாத்துக்கலாம்... ம்ம்ம்... வாங்கிக்கலாம்... வாங்கிக்கலாம்” என்றிருந்தோரையும் கூட ஒற்றை நாளில் சூடேற்றிட உங்களது சிலாகிப்புகள் எனும் மாயாஜாலமே உதவியது ! So எண்ணி 25 நாட்களில் நாம் கையைத் தட்டி விட்டு, டெண்ட் கொட்டகையைப் பிரிக்கும் அதிசயம் நிகழ்ந்தது! அதே சமயம் – “தொலைநோக்குப் பார்வையோடு” இதனில் ஒன்றுக்கு மேற்பட்ட இதழ்களை வாங்கிப் போட்ட நண்பர்களையும் ஒரு காரணமாகச் சொல்லிடலாம் – இந்த இதழ் காலியானதற்கு ! 😄

And இதற்கு முந்தைய மெகா இதழ் சார்ந்த நமது அனுபவப் பாடமுமே “இரத்தப் படலம்” சமாச்சாரத்தில் உதவியது என்பதில் ஐயமில்லை ! விலை குறைய உதவுமே!” என்ற எண்ணத்தில் 1300? 1400? பிரதிகளை அச்சிட்டு விட்டு – மூன்றரை வருஷங்களாய் குட்டியைச் சுமந்து திரியும் குரங்கு போல “மின்னும் மரணம்” இதழ்களை சுமந்து வருவது தலைக்குள் சைரன் ஒலிக்கச் செய்ய – இரத்தப் படலத்தின் பிரிண்ட்ரன்னை மூன்றிலக்கத்திலேயே நிறுத்திக் கொள்வதென்ற முன்ஜாக்கிரதை குடிகொண்டது என்னுள் ! Of course – மிகக் குறைவான நம்பரே என்பதால் ஒரு சிலருக்கு இந்த இதழ் கிடைக்காது போய் விட்டது தான்! ஆனால் இப்போது சகலமும் டிஜிட்டல் கோப்புகளே எனும் போது சில பல ஆண்டுகளுக்குப் பின்பாய் – “ரொம்பவே அத்தியாவசியம்" எனும் பட்சத்தில் மறு-மறு பதிப்பு சுலபமே ! இங்கே தான் நண்பர்கள் சிலரின் ”ஆவணப்படுத்தும் வேட்கை” நெருடலாகி நிற்கிறது ! 

மாதா மாதம் வெளியாகும் இதழ்களைப் படிக்கவே நேரம் குறைச்சலாகிக் கிடக்கும் சூழலில் – எல்லா இதழ்களையும் சுடச்சுட ஸ்கேன் செய்து pdf பைல்களாக்கிச் சுற்றில் விடும் சிலரது ஆர்வங்களை எவ்விதம் பார்த்திடுவதென்று எனக்குச் சுத்தமாய்ப் புரியவில்லை ! ”ஆவணப்படுத்துதல்” அவசியமாவது – ஒரு சமாச்சாரம் காணாதோ – அழிந்தோ போய் விடக் கூடுமென்ற அபாயம் இருக்கும் பட்சங்களில் மட்டுமே என்று சொல்கிறது எனது சிற்றறிவு ! ஆனால் தடித் தாண்டவராயன்கள் போல அத்தனை ஒரிஜினல் டிஜிட்டல் கோப்புகளையும் பத்திரப்படுத்திக் கொண்டு நாங்கள் இங்கே குந்திக் கிடக்க – வெளியாகும் இதழ்களை சூட்டோடு சூடாய் ஸ்கேன் செய்து சாதிக்கப் போவது என்னவோ - புரியவில்லை !? Maybe இன்னொரு ஐந்து+ ஆண்டுகளில் புதுச் சுற்று வாசகர்களின் பொருட்டு,குறிப்பிட்ட சில out of print இதழ்களை மறு பதிப்பு செய்து வெளியிட நமக்குள்ள வாய்ப்புகளை, வீதிக்கு வீதி சுற்றி வரும் இந்த வாட்சப் க்ரூப் pdf-கள் சிதைத்து விடக்கூடுமென்பதைப் புரிந்திடல் அத்தனை பெரிய சிரமம் தானா ? “நான் விக்கலியே... சும்மா சேகரிப்புக்குத் தானே?” என்று லாஜிக்கான கேள்விகளை(!!!) ஆவணப்படுத்தும் நமது ஆர்வல நண்பர்கள் முன்வைக்கலாம் ! ஆனால் நாங்கள் இப்போதைக்காவது ஜார்கண்டுக்கோ ; பீகாருக்கோ ; டும்பக்குட்டூவுக்கோ குடிமாறிப் போகும் அபிப்பிராயத்திலில்லை எனும் போது இந்த முயற்சிகளுக்கு முகாந்திரங்கள் தான் என்னவென்று புரியமாட்டேன்கிறது ! ரெண்டு ரூபாய்க்கும் ; மூன்று ரூபாய்க்கும் சாணித் தாளில் அச்சிட்டு ; நாங்களுமே பழைய பிரதிகளாய் மட்டும் ஆவணங்களை வைத்திருக்கும் ஆதிகாலத்து இதழ்களைப் பத்திரப்படுத்த, ‘தம்‘ கட்டிய முன்னாளது ஸ்கேனிங் படலங்களைக்கூட ஏதோவொரு கோணத்தில் புரிந்து கொள்ள முடிகிறது ! ஆனால் இதோ இந்த ஜுலையில் வெளியான “பனிமண்டல வேட்டையை”க் கூட ஸ்கேன் செய்து இப்போதே சுற்றில் விடும் பாங்கை என்னவென்பதோ ? நம் கிட்டங்கியிலுள்ள ஸ்டாக் தீருவதற்குள் நான் போய்ச் சேர்ந்து ஒரு மகாமகம் ஆகியிருக்கும் என்பது தான் யதார்த்தம் எனும் போது – இது மாதிரியான அவசியமிலா வியர்வைச் சிந்தல்கள், என்றைக்கோ ஒரு தூரத்து நாளில் நம் நிறுவனம் ரெண்டு காசு பார்க்கக் கூடிய வாய்ப்புகளை சுத்தமாய் நசுக்கிடும் சமாச்சாரங்களாகிடாதா ? இதோ “மின்னும் மரணம்” இதழைச் சுமந்து திரிந்து கொண்டிருக்கும் போதே – அதனையும் ஸ்கேன் செய்து சுற்றில் விட்டுள்ள அன்பர்களின் திசையை நோக்கித் திரும்பி தலையைச் சொரியத் தான் தோன்றுகிறது ! இவற்றையெல்லாம் இலை மறை-காய் மறைச் செயல்களாய்ச் செய்து வந்த நாட்கள் மலையேறி – ‘இதெல்லாம் ஒரு மேட்டரா?‘ என்ற ஜாலியோடு தத்தம் தொழில்நுணுக்கப் பாண்டித்துவங்களின் வெளிப்பாடுகளாய் இப்போது செய்து வருவதற்கு காமிக்ஸ் காதலென்று பெயருமல்ல ; நிச்சயம் ஆரோக்கியமான போக்குமல்ல ! ஆக்கபூர்வமான முயற்சிகளுக்கு உங்களின் திறன்கள் பயனாகிடும் பட்சத்தில், பலன்கள் நம் அனைவருக்குமே ! அதை மாத்திரம் ஞாபகப்படுத்திய கையோடு கிளம்புகிறேன் – ஜனவரியின் கார்ட்டூன் மேளாவினுள் பணியாற்ற ! 

போதனை பண்ணிடும் ரேஞ்சுக்கு நீ புத்தனல்ல!‘ என்ற ஒரு சில இலக்குகளில் நெற்றி நரம்புகள் புடைக்கலாமென்பதும் ; சில பல வாட்சப் க்ரூப்களில் எனக்கு surf excel குளியல் தரும் முஸ்தீபுகள் சுறுசுறுப்படையக்கூடும் என்பதும் புரிகிறது தான் ! ஆனால் புத்தனோ – பித்தனோ – இது நிச்சயம் போதனையல்ல ; நட்பின் வட்டங்களே சில தருணங்களில் தெரிந்தும், தெரியாதும் ஏற்படுத்திடும் சேதங்கள் சார்ந்த ஆதங்கமே ! தவிர, தனிப்பட்ட அபிப்பிராய பேதங்களுக்கு வடிகால்கள் தேடிட, இவற்றையோரு யுக்தியாய்க் கையில் எடுப்பதும் எந்தவூர் ராஜ தந்திரமோ - தெரியவில்லையே ! நிதானமாய் ; உஷ்ணங்கள் குன்றியதொரு வேளையில், மேலுள்ள பத்தியை மறுக்கா படித்துத் தான் பாருங்களேன் – யதார்த்தம் புரிந்திடக் கூடும் ! ஆகச் சின்ன வட்டத்தின் குண்டுச் சட்டிக்குள் குதிரை ஓட்டும் முயற்சி இது guys ! "அட..ஜாலிக்காண்டி தானே ?!" என்றபடிக்கு குதிரையையே வேக வைத்து சூப் போட்டுப் பார்க்க வேண்டாமே என்பது மாத்திரமே எனது வேண்டுகோள் ! எப்படியோ – இந்த ஞாயிறை சுறுசுறுப்பாக்கிடவும் ; சில “அர்சசனைத் திறமைகளை” பட்டை தீட்டிக் கொள்ளவும் அடியேனின் மேற்படி வேண்டுகோள் உதவியிருக்குமென்ற நம்பிக்கையோடு நடையைக் கட்டுகிறேன் ! 

Before I sign out - இதோ டிசம்பரில் இதழ்களின் preview சார்ந்ததொரு முதல் பார்வை !! நம் அபிமான ஒல்லிப்பிச்சான் கௌபாயின் LUCKY CLASSICS-2 தயாராகி வருகிறது - 2 crackerjack மறுபதிப்புகளோடு !! வெளியான காலத்தில் - "மேடையில் ஒரு மன்மதன்" இதழும் சரி ; "அதிரடிப் பொடியன்" சாகசமும் சரி - பட்டையைக் கிளப்பிய கதைகள் !! அவற்றை இப்போது மேம்படுத்தப்பட்ட தரத்தில் வாசிக்கும் அனுபவம் நிச்சயம் ரம்யமூட்டும் என்பது உறுதி ! இதோ அந்த இதழின் அட்டைப்படத்துக்கான முயற்சிகளிலிருந்து ஒரு சாம்பிள் ! இந்த இரண்டில் ஏதேனும் ஒன்று ஓ.கே.வெனில் - உங்கள் தேர்வு ஏதுவாக இருக்கும் folks ?


Bye guys! See you around! 

Tuesday, November 06, 2018

ஒரு தூரத்து தீபாவளியன்று...!!

நண்பர்களே,

வணக்கம். நமது ரேஞ்சர் குழுவினரிடம் இரவல் வாங்கிய வரிகளோடு பதிவுக்கொரு துவக்கம் தருவதே பொருத்தமாக இருக்குமென்று நினைக்கிறேன் !! "அனைவருக்கும் அதிரடியான..அதகளமான...ஆசமான...அற்புதமான...அட்டகாசமான...தீபாவளி நல்வாழ்த்துக்கள் உரித்தாகுக !! இல்லமெங்கும் சந்தோஷமும், ஒளியும் பரவட்டும் - நிலைக்கட்டும் !!

ஒவ்வொரு தீபாவளிக்கும் கழுத்துச் சுளுக்கிக் கொள்ளும் அளவுக்குப் பின்னே திரும்பிப் பார்த்த வண்ணம் - 1984 தீபாவளி மலரிலிருந்து, தொடர்ந்திட்ட ஒவ்வொரு memorable ஸ்பெஷல் இதழ் பற்றியும் சிலாகிப்பது நமக்கொரு வாடிக்கை !! 'அந்த நாள் போல வருமா ? ; அந்தக் கதைகள் போல் வருமா ?' என்று சப்புக் கொட்டிக் கொள்வதுமே இந்நேரத்து template தானன்றோ ? ஆனால் இந்தவாட்டியும் அதே வாடகைச் சைக்கிளை எடுத்துக் கொண்டு, அதே சேரன் போல, அதே ரிவர்ஸ் கியரைப் போடாது -  ஒரு மாறுதலுக்கு, நமது சட்டித் தலையனின் கால இயந்திரமான "கோட்டை"யை இரவல் வாங்கிக் கொண்டு ஒரு பத்துப் பன்னிரண்டு  வருடங்கள் முன்னே போய்ப் பார்த்தாலென்ன என்று தோன்றியது !! Maybe அடுத்த decade-ல் நமது தீபாவளி மலர் திட்டமிடல் எவ்விதம் இருக்குமோ என்று தான் யோசித்துப் பார்ப்போமே ? 

இன்னுமொரு யுகமாயினும் நாம் அந்த மஞ்சள் சொக்காய் மனுஷன் மீதான மையலைத் தொலைத்திருக்க மாட்டோம் என்பதை யூகிக்க ரின்டின் கேனுக்கே சாத்தியப்படும் எனும் போது-  2030-ன் தீபாவளி மலருக்கான probables பட்டியலின் உச்சியில் TEX என்று கொட்டை எழுத்தில் இருக்குமென்பது  திண்ணம் ! நிச்சயமாய் அதற்குள்ளாக போனெல்லி இன்னொரு 400 இதழ்களையாவது டெக்ஸ் தொடரில் போட்டுத் தாக்கி,  அதகளம் செய்திருப்பார்கள் எனும் போது - TEX 1000 என்ற ராட்சச மைல்கல்லை தொட்டிருப்பார்கள் ! நாமும் 'தஸ்ஸு..புஸ்ஸு..' என்று மூச்சிரைக்கவாவது ஒரு 1500 பக்க  TEX மேக்சியோ-மேக்சி ஆல்பத்தின் முஸ்தீபில் இறங்கி, வழக்கம் போலவே விழி பிதுங்கி நின்று கொண்டிருப்போம் ! அந்நேரத்திற்குள் கதாசிரியர் மௌரோ போசெல்லி டெக்சின் இளம் பிராயத்து தேடல்களை இன்னமும் துல்லியமாய்ப் புட்டுப் புட்டு வைத்திருப்பார் எனும் போது - "சிங்கத்தின் சிறுவயதில்.." என்று பெயரிட்டு டெக்சின் யூத் சாகசங்களோடு ஒரு 500 பக்கத்தையும் ; மெபிஸ்டோ + யமா கூட்டணியிலான வில்லன்களோடு நமது ரேஞ்சர்கள் மோதும் அட்டகாசத்தை இன்னொரு 1000 பக்கங்களுக்குப் போட்டு நிரப்பிட நம்மிடம் திட்டமிடல் இருக்கக்கூடும் என்பதில் சந்தேகமில்லை !! நமது இத்தாலிய ஓவியர் தனது சுகவீனத்திலிருந்து எப்போதோ மீண்டு, நமக்கு நிறையவே சித்திரங்களை போட்டுக் கொண்டிருக்க - ஒரு ராப்பரை அவரும், பின்னட்டையை நமது வயோதிக மாலையப்பனும் போட்டிருப்பார்கள் ! நானோ மூக்கில் ஒரு கண்ணாடியை மாட்டிக் கொண்டு - காமிக் லவர் பரிந்துரைத்த "சாவுக்கு சங்கு" என்ற தலைப்பை ஞாபகம்  வைத்துக் கொண்டு, அதையே மெபிஸ்டோ சாகசத்துக்கான தலைப்பாக்கி விட்டு, " மரணதேவனுக்குப் பிரியமான பிரதிநிதி நானாக்கும் !! பரலோகத்தில் பிளாட் போட்டுத் தரும் நிபுணன் நான் !!" என்ற ரீதியில் அப்போதும் பன்ச் எழுதிக் கொண்டிருப்பேனோ என்னவோ ?! 'மனுஷன்  ரிட்டையர் ஆனாலும் - பேனாவுக்கு விடுதலை தர மாட்டாரோ ?" என்று அப்போதைய எடிட்டர் தலையைப் பிய்த்துக் கொண்டிருக்கக்கூடும் ! 

அந்நேரத்திற்கு black & white என்பதெல்லாம் முழுசுமாய்க் காலாவதியாகிப் போயிருக்காதா - என்ன ?  So முழுசாய் 1500 பக்கங்களும் வண்ணத்தில் தக தகத்திட வேண்டுமென்று திட்டமிட்டிருப்போம் ! டெக்ஸ் அணியினில் அன்றைக்குமே அத்தனை பேரும் single பசங்களாகவே சுற்றித் திரிய, maybe சற்றே சுவாரஸ்யத்தைக் கூட்டிடும் பொருட்டு - ஒரு பெண் ரேஞ்சரையும் எப்படியேனும் உள்ளே நுழைத்திட போனெல்லி வழி கண்டுபிடித்திருக்கக்கூடும்  ! சும்மாவே சாமியாடும் நமது வெள்ளிமுடியார் கார்சன் - ஒரு அழகான யுவதியோடு சாகசம் செய்யும் பட்சத்தில், அலப்பரைகளுக்குப் பஞ்சமே வைத்திடாது - கதை நெடுக நமக்கு கிச்சுக் கிச்சு மூட்டிடுவது விளைவாகிடக் கூடும் ! And கிட் வில்லருக்கும், அந்தப் பெண் ரேஞ்சுருக்குமிடையே ஒரு மெல்லிய ரொமான்ஸ் இழையோடுவது போல் அவ்வப்போது track அமையின் - சுவாரஸ்ய மீட்டர் இன்னமும் எகிறிடக் கூடும் ! "வோ'...; ஆகட்டும் இரவுக் கழுகாரே..' என்ற ரீதியில் மட்டும் சிக்கனமாய்ப் பேசிக் சுற்றி வரும் டைகருக்குமே கூடுதல் முக்கியத்துவம் வழங்கப்பட்டு - பழங்குடி மக்களின் சில பல வரலாற்றுத் தகவல்களோடு பின்னிப் பிணைந்த சாகசங்களும் உருவாகிடக் கூடும் ! அப்புறம் அந்த "வன்மேற்கு மாத்திரமே " என்ற ஆடுகளம் ஏற்கனவே சிறுகச் சிறுக மாற்றம் கண்டு, கனடா..மெக்சிகோ ; க்யூபா ; ஆர்ஜென்டினா என்று விரிந்து நிற்பது - மேற்கொண்டும் சிறகு விரித்து - ஐரோப்பாவில் நம்மவர்கள் கால் பதிப்பது போலவும் உருமாற்றம் கண்டிடலாம் !! யார் கண்டது - இத்தாலியிலேயே அவர்களை சாகசம் செய்யச் செய்து (சு)வாசிக்கும் நாளொன்று புலர்ந்திடவும் கூடுமோ ? எது எப்படியோ - கீழேயுள்ள இந்தப் பகடியான உருவம் அன்றைக்குமே நம்மவருக்கு இருந்திடாது - அப்போதும் ஆணழகராகவே மிளிர்ந்திடுவார் என்று தைரியமாய் நம்பலாம் ! 

ஒருகட்டத்தில் TEX spin-offs என கார்சனுக்கு ; கிட் வில்லருக்கு ; டைகர் ஜாக்குக்கு - என்றும் தனித்தனியாய்த் தொடர்கள் உருவாகிடக் கூடுமோ ? அவ்விதமாகும் பட்சத்தில் ஒரு பாக்ஸ் செட்டில் - 4 ரேஞ்சர்களின் சாகசங்களடங்கிய ஆல்பங்களைத் திணித்து - THE ULTIMATE COLLECTION என்று பெயரிட்டிட மாட்டோமா - என்ன ? Of course - "டெக்ஸ் ஓவர்டோஸ்" என்று ஒலிக்கும் குரல்கள் அன்றைக்கும் இருக்கும் தான் ; ஆனால் இன்றைக்குப் போலவே, அன்றைய பொழுதிலும் - கூரியர் டப்பாவினை உடைத்த கையோடு முதல் புக்காக டெக்சின் சாகஸத்தைத் தான் அவர்கள் எடுத்துப் புரட்டுவார்கள் என்பதும் நிச்சயம் ! 

அப்போதெல்லாம் கூரியர்கள் ரொம்பவே personalize ஆகிப் போயிருக்க, GPS டிராக்கிங் சகிதம் தேடிடச் சாத்தியமானதாக ஆகியிருக்கக் கூடும் ! அப்போதும், அதே புல்லட் வண்டியை   உருட்டிக் கொண்டேயாவது போய், நமது கோவைக் கவிஞர்,கோவைக்கு 15 மைல் முன்னேயே கோழிகூவும் முன்பாகவே மடக்கி   கூரியரைப் பெற்றுக் கொண்ட கையோடு - "என் வாழ்நாளில் பார்த்த அட்டைப்படத்தில் இது தான் பெஸ்ட் !" என்று ஒவ்வொரு மாதமும் கவிதைகளாய்ப் பொழிந்திடுவார் ! நமது பொருளாளர்ஜியோ - "சங்க இலக்கியமும், டெக்சின் மீதான மையலின் காரணமும்" என்றொரு நெடும் ஆராய்வை சமர்ப்பிக்க - அதன் மீதான அலசல்கள் சும்மா தெறித்து ஓடும் !!  அப்போதுமே - "இந்த 1500 பக்க புக்கைப் படிக்க உங்களுக்கு எத்தனை நேரமாகிறது ? சித்தே நேரத்தைக் குறித்துச் சொல்லுங்களேன் !" என்று நான் தலையை நுழைக்க - சோடாப்புட்டிக் கண்ணாடிகளோடே வலம் வரக் கூடிய  முக்கால்வாசி நண்பர்கள் - "8 மணி நேரம்...10 மணி நேரம்" என்று பதிலளிக்கக் கூடும் ! எத்தனை தம் பிடித்தாவது புக்கை முழுசுமாய்ப் பிடிக்காது தூங்க மாட்டோம் என்ற மட்டுக்கு உறுதியைச் சொல்லலாம் தானே ?! 

அந்நேரத்துக்குள் எதிர்காலம் சார்ந்த கதைகளுக்குமே  நாம் சிறுகச் சிறுகத் தயாராகியிருப்போம் என்றும் ஒரு பட்சி சொல்கிறது என் காதில் ! கரூர் டாக்டர் ராஜா மன்றாடிக் கோரி வரும் வலெரியன் தொடரானதோ ; The Incal தொடரோ அப்போது நம்மிடையே சூப்பர்ஹிட் தொடர்களாக வலம் வந்திடும் வாய்ப்புகள் பிரகாசமாக இருக்கக் கூடும் !! So ஒரு வலெரியன் மெகா இதழும் ; Incal தொகுப்பும் கூட தீபாவளி மலராய் தட தடக்கும் வாய்ப்புகள் ஏகம் என்பேன் ! 'தலையிலாப் போராளி' சைசில், ஹார்டுகவரில்..முழு வண்ணத்தில்...ஒரு பாக்ஸ் செட்டோடு வெளியாகிடக் கூடிய இந்த ஆல்பம் "இரத்தப் படலம்" ஏற்படுத்திய சாதனைகளையும் முறியடிக்கக் கூடும் ! அதே சமயம் - "ச்சை...எனக்கு ராக்கெட் விடக் கூடப் புடிக்காது ; இந்த அழகிலே ராக்கெட்டிலே போற மனுஷாள் கதைலாம் நான் கேட்டேனா ?" என்று ஒரு கணிசமான அணியானது முகம் முழுக்க கடுப்பைச் சுமந்து நிற்கக் கூடிய வாய்ப்புகளும் பிரகாசமாயிருக்கக் கூடும் ! அந்நேரத்துக்கு FB ; வாட்சப் க்ரூப்கள் என்பனவெல்லாம் புராதனங்களாகிப் போயிருக்க, அடுத்த கட்டமாய்  face to face chat-களை பதிவு செய்து அவற்றை வலையில் உலாவிடச்  செய்யும்  app-கள் எக்கச்சக்கமாய் இருந்திடக்கூடும் ! So படித்த கையோடு ஆங்காங்கே குத்தாட்டம் போடும் அழகுகளையும் ; சும்மா "கிழி..கிழி..கிழி.."என்று தொங்கப் போடும் ரம்யங்களையும் நாம் ரசிக்க இயலும் ! 

அப்புறம் நம்மிடையே கிராபிக் நாவல் காதலானது கொஞ்சம் கொஞ்சமாய் வீரியமேறி - அப்போதைக்கு ஒரு அசைக்க இயலா ரசனையாய் மாறிப் போயிருப்பினும் வியப்பதற்கில்லை !! "எட்டுத் திக்கிலிருந்தும் உருவாகும், எவ்வித கி.நா.க்களும் இங்கே படித்து ; சுவைத்து ; ரசித்து ; ருசித்து ; அலசப்படும் !" என்று போர்டு வைக்காத குறையாக - கிராபிக் நாவல்களை ஆவலாய் எதிர்நோக்கியிருப்போம் !! JAYBIRD என்ற பெயரில் ஓரிரு ஆண்டுகளுக்கு முன்பாய் வெளியான ஒரு சித்திர மெகா விருந்தைக் கூட ருசி பார்க்கும் தில் அந்நாளில் நமக்கு வந்திருக்குமோ - என்னவோ ? மொத்தக் கதையிலும் பத்தே வரிகளுக்கு மிகுந்திடாது வசனங்கள் !! ஒரு பூட்டப்பட்டுக் கிடக்கும் வீட்டினுள் வசிக்கும் 2 சிறு குருவிகள் தான் இந்த நாவலின் பாத்திரங்களே ! சுகவீனமாயுள்ள தாய்க் குருவி, மிரண்டு போயிருக்கும் தனது பிள்ளையை வீட்டை விட்டு வெளியேறிட விடாது, வீட்டினுள்ளேயே வைத்திருக்கப் பிரியப்படுகிறது ! அவற்றின் நம்பிக்கைகள் ; பயங்கள் ; குழப்பங்கள் என்றொரு  இருண்ட வாழ்க்கையினை ஒரு  சித்திரப் பிரளயத்தில் சொல்ல முற்படும் ஆல்பமிது ! ஒன்றரை வருடங்களாய் இதனை எடுத்துப் புரட்டுவது ; பக்கங்களைப் பார்த்துக் கொண்டே யோசிப்பது ; அப்புறமாய் மீண்டும் பீரோவுக்குள் வைத்துப் பூட்டுவது என்றான வாடிக்கைக்கு அந்த தூரத்து ஆண்டினில் நிச்சயமாய் மாற்றமிருக்கும் என்று தோன்றுகிறது !! 
அந்நேரத்துக்கு "இரத்தப் படலம்" சுற்று # 5 துவங்கியிருக்க, "நண்பர் XIII-ன் பூர்வீகம் ஆஸ்திரேலியாவில்" என்றொரு knot-ல் கதை புதியதொரு திக்கில் தடதடத்துக் கொண்டிருக்கக் கூடும் ! அந்நேரத்துக்கு மேற்கொண்டும் ஒரு ஏழோ-எட்டோ பெயர்கள், நம்மவருக்குச் சூட்டப்பட்டிருப்பது நிச்சயம் ! And மெயின் கதைத் தொடரின் துரிதத்துக்கு ஈடு தரும் விதமாய் spin -offs களுமே துவம்சம் பண்ணிச் சென்றிட - "மறுக்கா XIII  - மொத்தமாய் ; முழுசாய் ; பெருசாய் !!" என்ற கோரிக்கை வலுப்பெற்றிடக் கூடும் ! So "இரத்தப் படலம் - ஒரு புதிய பார்வை !!" என்ற பெயரில் 2030-ன் தீபாவளி மலர் தயாராகிடும் சாத்தியங்களையும் ஒரேயடியாய் தள்ளுபடி செய்வதற்கில்லை !! 

And கதாசிரியர் வான் ஹாம் அப்போதும் அட்டகாசமாய் உட்புகுந்து - XIII தொடருக்கு அதிரடியாய்ப் பங்களிப்புகளைத் தொடர்ந்திடவே செய்வார் - தற்போது அறிவித்திருக்கும் "புலன்விசாரணை - II"-ன் பாணியினில் !! And அன்றைக்குமே நமக்கு மூச்சிரைக்கும் - J VAN HAMME என்ற அந்தப் பெயரினை ஒரு பிரெஞ்சு ஆல்பத்தின் முகப்பில் பார்த்திடும் போதெல்லாம் !! 
10 ஆண்டுகளின் தூரத்தில் - கார்ட்டூன்கள் பாகுபாடுகளின்றி ரசிக்கப்படக்கூடியதொரு ஜானராக புரொமோஷன் கண்டிருக்கும் என்பதிலும் எனக்கு ஐயமில்லை ! இதோ - தொடரவிருக்கும் ஒற்றை ஆண்டை - அரை டஜன் கார்டூன்களோடு மட்டுமே கரை கடக்கவிருக்கிறோம் எனும் போதே 'பளிச்'என்று தெரிந்து விடும் - நாம் எதை miss செய்கிறோமென்று !! So நிச்சயமாய் 2030-களின் தீபாவளி மலர் - ஒரு "ALL GENRE SPECIAL " என்று அமைந்திருந்து - ஒரே பாக்ஸ் செட்டினுள் - கார்ட்டூன் ஆல்பம்ஸ் ; TEX மெகா இதழ் ; கிராபிக் நாவல் என்றிருப்பினும் வியப்பு கொள்ள வேண்டியிராது என்று தோன்றுகிறது!

இன்றைய கனவுகளே, நாளைய நிஜங்கள் என்பதை எண்ணற்ற தடவைகள் பார்த்து விட்டோமெனும் போது - தகிரியமாய்க் கனவுகளில் திளைப்பதில் தப்பில்லை என்பேன் !! இதோ - இந்தப் பண்டிகை நாளில் குடும்பத்துடன் நேரம் செலவிட்ட பிற்பாடு - நீங்களும் உங்களின் (காமிக்ஸ்) கனவுகளை இங்கே களமிறக்கித் தான் பாருங்களேன் ? சும்மா-சும்மா பின்னே திரும்பிப் பார்த்துப் பெருமூச்சிடுவதற்குப் பதிலாய், இந்த looking ahead பாணியானது  நமக்கொரு  ஆரோக்கியமான மாற்றமாய் அமைந்திட்டால் - all will be well !! 

Have a safe Diwali all !!! Bye & see you around !!

P.S : இன்னுமொரு LMS புக் கைவசமுள்ளது - இதோ இந்தச் சித்திரத்துக்குப் பொருத்தமாய் கேப்ஷன் எழுதும் வெற்றியாளருக்கு !! Go for it guys !!