Powered By Blogger

Saturday, March 27, 2021

திரும்ப வந்துட்டேன்னு சொல்லு !!

 நண்பர்களே,

வணக்கம். "வந்துட்டேன்னு சொல்லு ; போன மாதிரியே திரும்ப வந்துட்டேன்னு சொல்லு !!" 

மேற்படி வரிகளை தலைவர் பேசிய போது விசில் விட்டத்தைத் தாக்கியது ; ஆனால் அதே வரிகளை கொரோனா அண்ணாத்தே பேச நேரிடும் போது தேசமே மறுக்கா பேய் முழி முழிக்கத் தான் முடிகிறது !! இரண்டாம் அலை ; எகிறும் நம்பர்கள் ; காத்திருக்கும் கடின நாட்கள் என பேந்தப் பேந்த முழித்தபடிக்கே ஏப்ரலை எதிர்நோக்க வேண்டியுள்ளது ! போன வருஷம் இதே வேளைகளில் பூட்டிய வீடுகளுக்குள் இருந்தபடிக்கே பதிவுப் பக்கங்களை மட்டுமே (நமது) காமிக்ஸ் வடிகாலாக்கி நாட்களை நகர்த்திய அனுபவங்களெல்லாம் கண்முன்னே வந்து, ஏற்கனவே பேப்பர் விலைகளின் பேயாட்டத்தால் மிரண்டு கிடப்பவனை மேற்கொண்டும் பீதியாக்குகின்றன ! மார்ச் 22 - பேப்பர் & அட்டையின் அசாத்திய விலையுயர்வைக் கண்டிக்கும் கருப்பு தினமாய், இந்தியா முழுக்க அச்சகங்கள் அனுஷ்டிக்க, கூலாய் மறு தினமே டன்னுக்கு நான்காயிரத்தை உசத்தியுள்ளன இங்குள்ள பேப்பர் மில்கள் !! 2022-ல் அநேகமாய் நம்ம லக்கி லூக்கின் "புரட்சித்தீ "பாணியில் தான் வெளியீடுகள் அமைந்திட வேணும் - போலும் !! 2020 நவம்பருக்கும், இப்போதைக்கும் மத்தியில், ஆர்ட்பேப்பரின் விலைகளில்   நிகழ்ந்துள்ள ஏற்றம் - டன் ஒன்றுக்கு ரூ.37,000 !!! இந்த வருஷக் கடைசிக்குள் இந்த நம்பர் என்னவாக மாறியிருக்குமோ - ஆண்டவனுக்கும், ஆள்பவர்களுக்குமே வெளிச்சம் !!

"வந்துட்டேன்னு சொல்லு !! " என்று டயலாக் பேசிட இன்னொருவருமே தற்போது ரெடி !! ஆனால் இவரையோ நாம் கொண்டாடிடலாம் - தாரை தப்பட்டைகளோடு !! அவர் வேறு யாருமல்ல - நமது ஆதர்ஷ பெல்ஜியத்துக் கதாசிரிய ஜாம்பவானான ஷான் வான் ஹேம் தான் ! "போதும், இதுக்கு மேல் பொம்மை புக் படைப்புலகினில் உலாற்ற எனக்கு வயதுமில்லை ; தெம்புமில்லை !!" என்று சொல்லி தான் பணியாற்றி வந்த சகல தொடர்களிலிருந்தும் விடை பெற்றிருந்தார் வான் ஹேம் ! லார்கோ வின்ச் ; தோர்கல் ; XIII ; வெய்ன் ஷெல்டன் ; லேடி S என நிறைய prime தொடர்களை இன்றைய உச்சங்களுக்கு இட்டுச் சென்றதே இந்த அசாத்திய ஆற்றலாளர் தான் எனும் போது - அவர் விட்டுச் சென்ற வெற்றிடத்தை நிரப்பிட நிறைய புதுப் படைப்பாளிகள் கஜ கர்ணங்கள் செய்து பார்க்கின்றனர் தான் ; yet வான் ஹேம் - வான் ஹேம் தான் என்பதே இப்போது வரைக்குமான தீர்ப்பு ! ஆனால்...ஆனால்..மனுஷன் மனமிறங்கி மீள் வருகைக்கு புதுசாய் ஒரு களத்தை உருவாக்கியுள்ளார் என்பதே லேட்டஸ்ட் நியூஸ் ! தொடர்களை வெவ்வேறு புதியவர்களிடம் ஒப்படைத்து விட்டுள்ள நிலையில் வான் ஹேம் அவற்றினுள் மறுக்கா தலை நுழைக்க எண்ணிடவில்லை ; மாறாக அதனுள்ளேயே ஒரு ஸ்பெஷல் தடமிட முனைந்திருக்கிறார் ! "The Fortune of Winczlav" என்ற பெயரில் நேற்றைக்கு ரிலீஸ் ஆகியுள்ளது - லார்கோ விஞ்சின் (தத்துத்) தந்தை நெரியோ வின்ச் ; அவரது டாடி & அவருக்குமான டாடி என 3 தலைமுறைகளின் WINCH வரலாற்றை செம விறு விறுப்பாய் - 3 பாகங்களில் சொல்லிடும் முயற்சியின் பிள்ளையார் சுழியாய் ! XIII தொடரினில் spin-offs இருப்பது போல, லார்கோவுக்கும் long term திட்டமிடல்கள் ஏதேனும் இருக்குமோ ? என்ற கேள்வி எழுகிறது இந்த நொடியினில் ! கோப்புகளை வரவழைத்திருக்கிறேன் ; நமது மொழிபெயர்ப்பாளர் படித்து விட்டு தனது அபிப்பிராயத்தைச் சொல்லிட்டால் அதற்கேற்ப யோசித்திடணும் ! Meantime - உங்கள் அபிப்பிராயங்கள் என்னவோ folks ? இஸ்திரி ; ஜியாகிரபிலாம் பள்ளிக்கூடத்தோடே போதும் என்பீர்களா ? அல்லது - 'வான் ஹேம் நிச்சயம் சொதப்பிட மாட்டார் !' என்ற நம்பிக்கையில் இதனுள் நாமும் குதித்துப் பார்த்திடலாமா ?  ஏதுவாகயிருப்பினும், இது 3 பாகத்து ஆக்கம் எனும் போது இதனைப் பூர்த்தி செய்திட அங்கேயே இன்னும் குறைந்த பட்சம் ஒரு வருஷமாவது ஆகிடக்கூடும் ! So நாம் தீர்மானிக்க எக்கச்சக்க நேரமுண்டு !




Moving on, ஏப்ரலின் இதர இதழ்கள் பக்கமாய்ப் பார்வைகளை ஓடவிடுவதெனில், கும்பலாய் முன்னிற்போர் நமது உட்ஸிட்டி அட்ராசிட்டி பார்ட்டிகள் தான் ! "நீரின்றி அமையாது உலகு !" ஒரு மாறுதலுக்காக சிக் பில் ; குள்ளன் ; டாக்புல் & கிட் ஆர்டின் - என நால்வருமே கதையினில் முழுமையாய் ஈடுபட்டிருக்கும் சாகசமிது ! And இது துவக்க நாட்களின் படைப்பு என்பதால் பக்க நீளமும் ஜாஸ்தி ! So ஒரு முழுநீள சாகசம் வித் வழக்கமான கோணங்கித்தனங்கள் என்பதே இங்கன template ! போன வருஷத்தில் ஏதோவொரு பொழுதிலேயே நமது கருணையானந்தம் அவர்களால் மொழிபெயர்க்கப்பட்டு, நமது DTP டீமில் புதுசாய்ப் பணி செய்து வரும் சுபாவால் டைப்செட் செய்யப்பட்டிருந்த 60 பக்கக் கதையை எடிட்டிங்கின் பொருட்டு ஜாலியாய்க் கையில் எடுத்தால், வெகு சீக்கிரமே நெளிய வேண்டிப் போனது ! கார்ட்டூன்களுக்கு இப்போதெல்லாம் நாம் தவறாது பயன்படுத்தி வரும் அந்தப் பேச்சு வழக்கு நடையைக் காணவில்லை ; மாறாக அத்தினி பேரும் சும்மா இலக்கிய நடையில் பின்னு பின்னென்று பின்னிக் கொண்டிருந்தனர் ! சுத்தமாய் ஒட்டவே செய்யாத அந்த பாணியைத் திருத்த நானும் தம் கட்டிப் பார்த்தால் - அது புதுசாய் எழுதுவதை விடவும் சிரமமாயிருக்க, 7 பக்கங்களைத் தாண்டவே நாக்குத் தொங்கிப் போய்விட்டது ! இலக்கிய நடை to பேச்சு வழக்கு நடை மாற்றங்கள் என்பதோடு மட்டுமல்லாது, வசனங்களில் இயன்ற மட்டுக்கு ஹ்யூமர் நுழைக்கவும் வேண்டியிருந்ததெனும் போது - ரொம்பவே திணறிப் போய்விட்டேன் ! வேறு வழியே இல்லாது, அப்படியே மொத்தத்தையும்  திருப்பி அனுப்பி வைத்து, திருத்தி எழுதிடக் கோர வேண்டிப் போனது ! So 'இருக்கா' எழுதப்பட்டு ; 'இருக்கா' டைப்செட் செய்யப்பட்டு ; 'இருக்கா' எடிட்டும் செய்யப்பட்ட ஜாகஜத்தின் முதல் பார்வை இதோ ! 


ஒரிஜினல் அட்டைப்படம் ; கோகிலாவின் கைவண்ணத்தில் வண்ணங்கள் சற்றே மாற்றியமைக்கப்பட்டு !! உட்பக்கங்களைப் பொறுத்த வரைக்கும் இது டிஜிட்டல் யுகங்களுக்கு முன்பான படைப்பு எனும் போது அந்த கலரிங் பாணிகள் தான் கொஞ்சம் பல்லைக் காட்டுகின்றன ! ப்ரேமுக்கு ப்ரேம் அடர் வர்ணங்கள் !! 

Last, but not the least : இம்மாதத்து இதழ் # நான்காக இருந்திருக்க வேண்டிய "வைகறைக் கொலைகள்" one step back எடுத்து வைக்க, "ஜெரோனிமோ - ஒரு தலைவனின் கதை" one step forward வருகின்றது ! "வைகறைக் கொலைகள் " - ஒரு நிஜ சம்பவத்தின் காமிக்ஸ் உருவாக்கம் ! இன்றளவிற்கு முடிச்சவிழ்க்கப்படாத 3 நிஜக் கொலைகளை கதாசிரியர்  மிரட்டும் b&w ஓவியங்களில் (yes - சித்திரங்களல்ல, ஓவியங்கள்) சொல்லியிருக்கிறார் ! ஒவ்வொரு மாதமும் black & white கதைகளைக் கடைசியாய்க் கையில் எடுப்பது ; தட தடவென பணியாற்றுவது ; அச்சிடுவது - என்ற ரீதியிலேயே இதனையும் சில நாட்களுக்கு முன்னே கையில் எடுத்த போது எனக்கு ரொம்பவே ஜெர்க் அடித்தது ! ரொம்பவே அடர்த்தியான கதை ; இதன் பிரெஞ்சு மொழிபெயர்ப்பிலும் ஏக complexities & பற்றாக்குறைக்கு இன்டர்நெட்டில் நிறைய refer செய்து பணி செய்திட வேண்டியுள்ளது புரிந்தது ! ஆனால் இது எதையுமே அறியாதவனாய் கொஞ்ச காலம் முன்னே கருணையானந்தம் அவர்களிடம் எழுதச் சொல்லி இதனை  அனுப்பியிருந்தேன் & அவரும் இயன்ற மட்டிற்கு உழைத்துள்ளார் ! என் முன்னே விரிந்த 52 பக்கங்களை வாசித்த போது - இது இன்னொரு லெவெலில் பணியாற்றத் கோரிடுவது புரிந்தது ! நிறைய ; ரொம்பவே நிறைய நேரம் தந்து பேனா பிடிக்க வேண்டியிருப்பது புரிவதால், கொஞ்சமாய் நேரம் கிட்டும் தருணத்தினில் இதை முழுசாய் மாற்றி எழுத தீர்மானித்துள்ளேன் ! 

So அதனிடத்தில் "ஜெரோனிமோ" !!  And இக்ளியூண்டு பில்டப் கூட அவசியப்படா ஆக்கமிது என்பேன் ! அந்த அட்டைப்படமும், உட்பக்க preview-ம் நான் மாங்கு மாங்கென்று சொல்ல விழைவதை நொடியில் express செய்து விடுமென்பேன் !! கீழே பாருங்களேன் : 



Before I sign out, மாமூலான அந்த "சந்தா நினைவூட்டல்" folks !! அடுத்த வாரத்தினில் புது புக்ஸ் சகலமும் புறப்படவுள்ள தருணத்தில் - சந்தா எக்ஸ்பிரஸில் தொற்றிக் கொள்ள முயற்சியுங்கள் ப்ளீஸ் ! அவசியமெனில் 3 தவணைகளிலும் செலுத்திடலாம் நண்பர்களே ; please do join in !!

And - "கழுகு வேட்டை" இதழினில் போட்டோக்களை அனுப்பிட சந்தா நண்பர்கள் தினமும் நம்மவர்களை உலுக்கி வருவதால் Sunday & Monday இரு நாட்களின் அவகாசத்தினை கூடுதலாக்குகிறோம் !! சந்தா ரயிலில் ஏறிட எண்ணுவோரும் சரி, ஏற்கனவே இடம் பிடித்து, போட்டோ அனுப்ப மறந்தோரும் சரி, இந்த 2 நாட்களை பயன்படுத்திக் கொண்டால் சந்தோஷமே !! Bye folks...see you around !!

P.S : CINEBOOK ஆங்கில இதழ்களின் விற்பனை நிஜமான ஆச்சர்யம் தந்துள்ளது !! YAKARI & KENYA full sets கிட்டத்தட்ட காலி !! And Barracuda & லக்கி லூக்கின் இதழ்களும் றெக்கை கட்டி வருகின்றன !! Truly surprised & grateful !!

அப்புறம் சந்தா ரயிலில் இடம் பிடிக்கவோ ; பிடிக்க இயலாதோருக்கு உதவிடவோ - இதோவொரு வாய்ப்பும் !! கீழுள்ள சித்திரத்துக்கு ஜாலியான caption எழுதிட முயற்சியுங்கள் guys !! வெற்றி பெறும் 3 captions-க்கு தலா ஒரு ஜம்போ சீசன் 4 சந்தா நம் அன்புடன் ! அதனை நீங்களே எடுத்துக் கொள்ளலாம் ; அல்லது யாருக்கேனும் gift செய்திடவும் செய்யலாம் !  


Saturday, March 20, 2021

கதை பேசும் கலர்ஸ் !

 நண்பர்களே,

வணக்கம். பதிவை டைப் செய்ய அமர்ந்த நேரமே ரோஹித் ஷர்மாவும், கோலியும் பட்டாசு வெடிக்கத் துவங்கிட, பிஸியாய் வாய் பார்த்து லயித்திருந்தேன் அங்கே ! அதே பட்டாசை அவுக நமக்கு வெடித்துக் காட்ட, தெறித்து ஓடி வந்து விட்டேன் இங்கே ! எது எப்படியோ, ஆனை, அம்பாரி - என எதற்குள்ளேயாச்சும் தலைநுழைக்கும் முன்பாக - "கொரில்லா சாம்ராஜ்யம்" ஆல்பத்தின் அட்டைப்படத்தைக் கண்ணில் காட்டி விடுகிறேனே !! இல்லாங்காட்டி கரூர் ராஜசேகர் சாரிடம் இன்னொருக்கா மண்டையைச் சொரிந்திட வேண்டிப் போகும் !! So here you go ....







ஒரு பட்டாம்பூச்சியின் பரிணாம வளர்ச்சியைப் போல ஒரு துக்கனூண்டு, கொச கொச ஒரிஜினலை - ஒரு அற்புதமான அட்டைப்பட டிசைனாக்கிடும் நமது சென்னை ஓவியரின் கைவண்ணத்தினை ! வழி நெடுக, மாற்றங்களை செய்யச் சொல்லி, அவரது குடலின் நீள, அகலங்களை நான் உருவியதுமே தென்படக்கூடும் இந்த ஸ்கெட்ச்களில் !! இறுதி output செமையாய் வந்திருப்பதாய் எனக்குத் தோன்றியது ; ஆனால் வண்ணத்துப் பூச்சியை வரையச் சொன்னால் வௌவாலை வரையும் கலைஞன் நான் எனும் போது - artistical judgements செய்திட எனக்கு நிச்சயமாய்த் திறன் லேது தான் ! So நம் மத்தியிலுள்ள "கலைக்கண்ணர்கள்" வசம் ஒப்படைத்து விடுகிறேன் - இதற்கு மதிப்பெண்ணிடும் பணியினை !  Anyways,எழுத்துக்கள், லோகோ என்ற நகாசுப் பணிகளுடன் அச்சுக்குச் செல்லும் முன்பாய் இன்னும் கொஞ்சம் மேக்கப் ஏற்றி விடுவோம் என்பதால், should hopefully make for a memorable cover !!

காத்துள்ள ஏப்ரலின் இதழ்களுக்குள் புகுந்தால் 'தல' டெக்ஸ் வண்ணத்தில் டாலடிக்கும் "கழுகு வேட்டை" அச்சு முடிந்து பைண்டிங்கில் பிசியாக இருப்பது தென்படுகிறது !! And ஏற்கனவே நாம் ரசித்த கதையே என்றாலும், கலரில் பார்க்கும் போது மிரட்டுவது நிஜமே !! இதோ பாருங்களேன் :



மஞ்சள், ப்ளூ, சிகப்பு - என மூன்றே வர்ணங்கள் கூடுதலாகிடும் போது - சித்திரங்களின் கெத்து என்னமாய்க் கூடுதென்று பார்க்கும் போது, சகலத்தையும் வண்ணத்திலேயே வெளியிட்டு விடலாமே ? என்ற குடைச்சல் மண்டைக்குள் ஓடுகிறது தான் ! ஆனால் நம் பாக்கெட்களின் வலுவென்னவென்று நினைவுக்கு வரும் போது - 'உச்சு'கொட்டிவிட்டு நகர்ந்திடவே இயல்கிறது ! Phewww !!

கலரில் இம்மாதம் மிளிரவுள்ள அடுத்த ஆசாமி சென்றாண்டின் அறிமுகமான SODA !! கார்ட்டூன் பாணியிலான சித்திரங்களே என்றாலும், இந்தப் பாதிரி cum டிடெக்டிவின் கதை பாணி சற்றே dark ஆனதென்பதை நாமறிவோம் ! And இம்முறையும் அதற்கு விதிவிலக்கல்ல ! பெருசாய் ரூம் போட்டு யோசிக்கவெல்லாம் அவசியங்கள் ஏற்படுத்தா ஒரு சிம்பிளான கதைக்கரு தான் இம்முறையுமே ; ஆனால் அதை ரகளையாய் நகர்த்திச் சென்றதே படைப்பாளிகளின் வெற்றி என்பேன் ! And வண்டி வண்டியாய் டயலாக்கெல்லாம் வைக்காது, சித்திரங்களிலேயே ஒரு நூறு சிறுகுறிப்புகளை விதைத்துச் சென்று, வாசிப்போரை நொடி கூட ரிலாக்ஸ் செய்ய அனுமதிக்காது இந்த ஆல்பத்தின் முழுமையிலும் நம்மைக் கட்டுண்டு வைத்துள்ளதை பேனா பிடிக்கும் போது புரிந்து கொள்ள முடிந்தது !! As a result, இரண்டே நாட்களுக்கு மேல் பிடிக்கவில்லை மொழிபெயர்ப்புக்கு - simply becos இங்கே பணி கம்மி ; விறு விறுப்பு ஏகம் ! So கதையை முழுசாய் வாசிக்கும் உத்வேகத்திலேயே இரண்டு நாட்களில் போட்டுத் தாக்க முடிந்தது ! நிறைய இடங்களில் யதார்த்தமும், சில இடங்களில் சற்றே கவித்துவமும் தென்பட்டதால் - தமிழாக்கத்திலுமே அதே கலவையைக் கையாள முயற்சித்துள்ளேன் ! முழுசும் சுத்தத் தமிழாகவும் அல்லாது, முழுசும் பேச்சு வழக்காகவும் பயணிக்காது, இப்டியும்-அப்டியுமாய் கதையின் ஓட்டத்தோடு ஒத்துச் செல்லச் செய்ய முயற்சித்துள்ளேன் ! வாசிக்கும் போது நெருடாது நகர்ந்தால் தலை தப்பிக்கும் ! And நான் அவதானித்த அதே பரபரப்பு உங்களையும் தொற்றிக் கொண்டால், a job well done for the creators என்பேன் ! இதோ ஒரிஜினல் அட்டைப்படங்கள் + உட்பக்க preview !!


Just a note of caution folks : கதையோட்டத்தோடு, சித்திரங்களின் மீதும் ஒரு கண் இருக்கவே பயணித்தல் இங்கே அவசியமாகிடும் ; இல்லையேல் நிறைய சுவாரஸ்யச் சிறு புள்ளிகளைத் தவற விட்டு விடும் ஆபத்து உண்டு ! இங்கும், கதாசிரியர், ஓவியர் மாத்திரமன்றி, கலரிங் ஆர்டிஸ்ட்டுமே தகிக்க வைப்பதைக் காணலாம் ! கலர்ஸ்...கலர்ஸ்...கலர்ஸ்...!!

முழுசுமாய் பணிகள் நிறைவுற்று, திங்களன்று அச்சாகின்றார் SODA ! So மாதத்தின் அடுத்த 2 இதழ்களின் பணிகளில் எனது பொழுதுகள் கரைந்து வருகின்றன ! அதிலும் இம்முறை உட்ஸிட்டி அட்ராசிட்டிகள் செமத்தியாக இருப்பதால், கார்ட்டூன் கோட்டாவுக்கு ஒரு பூஸ்ட் நிச்சயம் என்பேன் ! அது சார்ந்த previews அடுத்த வாரத்திற்கு ! 

Before I sign out - சில கொசுறு தகவல்கள் :

மறதிக்கார ஜேசனின் தொடரினில் இனி அவரது அடையாளமான அந்த ரோமன் எழுத்துக்களிலான "XIII" மாற்றம் காணவுள்ளது ! சிரமங்களின்றி லோகம் முழுசும் சுலபமாய்ப் புரிந்திடும் பொருட்டு "13" என்றே இனி எழுதப்படும் ! So "இ.ப" மறுபதிப்பிலும் சரி, காத்துள்ள புது ஆல்பங்களிலும் சரி, நாமும் இதனைப் பின்பற்றிட வேண்டி வரும் ! நல்ல காலத்துக்கு இன்னமும் மறுபதிப்புக்கோ ; புது ஆல்பத்துக்கோ அட்டைப்படங்களை நாம் அச்சிட்டிருக்கவில்லை ! இந்த மாற்றம் பற்றிய உங்கள் சிந்தனைகள் என்னவோ guys ?

And புது ஆல்பங்களின் பணிகள் ஜரூராய் அரங்கேறி வருகின்றனவாம் ; இந்தாண்டினில் "இரத்தப் படலம் ஆல்பம் # 28" வெளியாகிடும் ! இதோ ஒரு b&w preview !!
Bye folks....see you around ! Have a bright Sunday !!

And சந்தா நினைவூட்டலுமே !!

Thursday, March 18, 2021

8347 கிலோமீட்டர்கள் !!

நண்பர்களே,

வணக்கம். 8347 கிலோமீட்டர்கள்  !! இலண்டனுக்கும் - சிவகாசிக்கும் இடையிலான தூரம் 8347 கிலோமீட்டர்கள் என்று கூகுள் சொல்லுகிறது ! அந்தத் தொலைவினில் ஒரு ஐநூறைக் கழித்து மீத ஏழாயிரத்துச் சொச்சம் கி.மீ.க்களை  ஜம்மென்று விமானப் பயணத்தில் செலவிட்டன - நமக்கான சில புத்தக பார்சல்கள் ! ஆனால் அந்த இறுதி 500 கிலோமீட்டரின் பயணத்தில் எண்ணிலடங்கா சிக்கல்கள் ; இடர்கள் ; சோதனைகள் ; செலவினங்கள் ; சுங்க வரிகள் ; இத்யாதி..இத்யாதி என நாய் படாத பாடு பட்டுவிட்டு, இறுதியாய் இந்தத் திங்களன்று தான் நம் அலுவலகம் வந்து சேர்ந்தன அவை ! Phewwww !! 

வேறொன்றுமில்லை folks - நாம் இறக்குமதி செய்த CINEBOOK ஆங்கில காமிக்ஸ் அடங்கிய பார்சல்களின் பயணத்தைக் பற்றிய வர்ணிப்பே மேற்படிப் பத்தி ! Anyways - புத்தகங்கள் பத்திரமாய் வந்திறங்கி விட்டுள்ளன எனும் போது இனி அடுத்த வேலையைப் பார்க்க வேண்டியது தான் !



அடுத்த சில நாட்களுக்குள் இவற்றின் முழுமையையும் நமது 2 ஆன்லைன் விற்பனைத்தளங்களிலும் upload செய்திடுவார்கள் நம்மவர்கள் ! அதன் பின்னே ஆன்லைனில் வாங்கிடலாம் ; அல்லது நம்மிடம் நேரடியாகவுமே வாங்கிடலாம் ! 

And லிஸ்டிங் போட்ட பிற்பாடு, maybe ஒரு ஆன்லைன் CINEBOOK புத்தக விழாவையும் போட்டுத் தாக்கிடலாமா ? என்று பார்க்கலாம் ! 

Of course - விலைகள் பாக்கெட்டுக்குள் பொத்தல்களைப் போடவே செய்யும் தான் ; இன்றைய அன்னியச் செலாவணியின் மதிப்பையும், இங்கு கட்ட அவசியப்படும் இறக்குமதி வரிகளையும், CINEBOOK விலைகளையும் கணக்கில் கொள்ளும் போது - விலை நிர்ணயத்தினில் இதற்கு மேலாய் சகாயங்கள் சாத்தியப்படவில்லை ! ஆனால் இந்தியாவில் இந்த CINEBOOK டைட்டில்களை விற்பவர்களுள் - நமது விலைகளை அடிச்சுக்க வேறு யாரும் நஹி என்பதை மட்டும் சொல்லிடலாம் ! AMAZON பக்கமாய் ஒருவாட்டி பார்வைகளை ஓட விட்டீர்களெனில் நிலவரம் புரிந்திடும் ! 

நமது ஆதர்ஷ லக்கி லூக்கின் முழு செட் (ஆல்பம் 71 நீங்கலாக) தற்சமயம் நம் கைவசம் !! And இதுவரையிலும் படித்திரா கதைகள் எக்கச்சக்கமிருப்பதைப் பார்க்கும் போது கடைவாய் ஓரமாய் ஜொள் வடிகிறது தான் ; ஆனால் ஏப்ரல் இதழ்களின் பணிகள் கையைக் கட்டி வைத்திருப்பதால், புக்ஸை ரசிப்பதைத் தாண்டிப் பெரிதாய் எதுவும் செய்ய முடிந்திருக்கவில்லை !! 

கார்ட்டூன்கள் வரிசையில் நமது ப்ளூகோட் நண்பர்களின் ஆல்பங்களும் கைவசமுள்ளன - நாமின்னமும் தமிழில் முயற்சித்திருக்கா ஆல்பங்களுடன் !! 

அப்படியே - ரொம்ப காலமாய் தமிழுக்கு கூட்டி வரச் சொல்லி ஒரு சிறு அணி கோரி வந்த YAKARI கதைகளுள் 10 ஆல்பங்களும் உள்ளன ஸ்டாக்கில் ! உங்கள் வீட்டுக் குட்டீஸ்களுக்குக் கதை சொல்ல இது அற்புதத் தேர்வாக இருக்கக்கூடும் - along with லக்கி லூக் !

தொடரும் சரக்கெல்லாமே கொஞ்சம் heavyweights !!

பராகுடா - 6 தனித்தனி ஆல்பங்களில் !

DAMOCLES - 2 தனித்தனி ஆல்பங்களில் ! 

LADY S - 5 ஆல்பங்கள் 

KENYA - முழு செட் 

அப்புறம் மறதிக்கார XIII-ன் full set + 2 XIII Mystery ஆல்பங்களும் கைவசமுள்ளன ! 

ஆக light reading + heavyweight reading - என இரு வசதிகளுக்கும் ஏதேனும் தேறக்கூடும் இந்தப் பட்டியலுள் ! So பட்ஜெட் ஒத்துழைக்கும் பட்சங்களில், தொடரும் நாட்களில் - try browsing the list people !

Happy Shopping & Happier Reading !! Bye for now all !

Saturday, March 13, 2021

வள்ளியப்பன் alias சுருளிராஜன் !!

 நண்பர்களே,

வணக்கம். 'வள வளா' வள்ளியப்பனுக்கு டாட்டா சொல்லிவிட்டு 'சுறுக்' சுருளிராஜன் ஆகத் தீர்மானித்த நாள் முதலாய் வாரயிறுதிகள் சற்றே விசாலமாய்த் தெரியத் துவங்கியுள்ளன ! பதிவினை தயார் செய்திட தவறாது செலவாகி வந்த ஐந்தோ / ஆறு மணி நேரங்களை இப்போது அம்மாதத்து இதழ்களுக்கெனச் செலவிட முடிவதால் ஆபீசில் நம் DTP அணியும் ஹேப்பி ! And true to the new form - இதோ நேராய் இவ்வாரயிறுதிப் பதிவின் சமாச்சாரங்களுக்குள் புகுந்திடுகிறேன் !

சென்னைப் புத்தக விழா 2021 !!

ஒரு பேரிடருக்குப் பின்பான முதல் மேஜர் புத்தகத் திருவிழா ; அதுவும்  பொங்கல் விடுப்போடு ஒத்துச் செல்லும் மாமூலான அந்த ஸ்லாட்டில் கிடையாது எனும் போது - என்ன எதிர்பார்ப்பதென்று சத்தியமாய்த் தெரிந்திருக்கவில்லை ! நமக்கு ஸ்டால் உறுதியான பின்னே, புக்ஸை பேக் செய்ய முனைந்த சமயத்தில், வழக்கமான அளவுகளில் எல்லா டைட்டில்களிலும் அனுப்புவதா ? அல்லது முன்ஜாக்கிரதையோடு அடக்கி வாசிப்பதா ? என்று எதுவுமே தெரிந்திருக்கவில்லை ! சரி, போன வருஷத்து விற்பனையினை ஒரு வழிகாட்டியாய்க் கொண்டு, அதனிலிருந்து ஒரு கால் பங்கைக் குறைத்து அனுப்புவோம் என்று தீர்மானித்தேன் ! 14 நாட்கள் அரங்கேறிய விழாவின் முடிவினில் நமக்கு மட்டுமென்றில்லை ; பங்கேற்ற அத்தனைப் பதிப்பகங்களின் முகங்களிலும் ஒரு மெல்லிய புன்னகை !! ஓராண்டாய் நாய் படாத பாடு பட்டு வந்த பதிப்புலகிற்கு சென்னை தெளித்துள்ள பன்னீர் காலத்துக்கும் நினைவினில் நின்றிருக்கும் ! இதைவிட மிரட்டலான விற்பனைகள் பார்த்த ஆண்டுகள் பல இருந்துள்ளன தான் ; எதிர்வரும் ஆண்டுகளில் புதிய உச்சங்கள் காத்திருக்கவும் செய்யலாம் தான் ; ஆனால் ஒரு சொகுசான நாளில் கிட்டும் புஹாரி பிரியாணியை விட, பசித்துக் கிடக்கும் வேளைக்கு வாய்க்கும் இட்லிக்கு மரியாதை ஜாஸ்தியன்றோ ? அந்த வகையில் இந்தாண்டின் புத்தக விழாவினை தெறிக்கச் செய்த சென்னையுள்ள திசைக்கு ஒரு பெருவணக்கம் ! மாநகரம்..மாநகரம் தான் ; அதன் கெத்து - கெத்து தான் !

விற்பனை சார்ந்த தகவல்களுக்குள் டைவ் அடிக்கும் முன்பாய் ஒரு விஷயத்தை highlight செய்திட நினைக்கிறேன் ! பொதுவாய் புத்தக விழாக்களின் விற்பனை pattern-களை பெருசாய் அலசும் வாய்ப்பெல்லாம் அமைந்திருப்பதில்லை எனக்கு ; 'எது நல்லா ஓடுச்சு ? எது மொக்கை போட்டுச்சு ? ' என்ற ரீதியில் மேலோட்டமான வினவல்களோடு, கல்லா கட்டிய தொகையினைக் கொண்டு, அடுத்த 6 மாதங்களை எவ்விதம் ஓட்டுவதென்ற திட்டமிடல்களுக்குள் புகுந்திருப்பேன் ! ஆனால் சமீபமாய் ஜூனியர் எடிட்டர் ஏற்பாடு செய்திருக்கும் ஏதோவொரு புது software-ன் புண்ணியத்தில், நம்மாட்கள் ஊருக்குத் திரும்பிய பத்தாவது நிமிடத்தில் விற்பனைகளின் ஜாதகமே என் மேஜைக்கு ஒரு கற்றைக் காகிதங்களில் வந்து சேர்ந்திடுகிறது ! So அவற்றைக் கொண்டு நிதானமாய் அலசினால் விற்பனைகள் மட்டுமன்றி, இன்னொரு பொதுவான pattern-ம் புலனாகிறது ! "புத்தக விழாக்களின் விற்பனைகள் ஒருவித 'அந்த நொடியின் உந்துதல்' சார்ந்த சமாச்சாரங்கள் ; ஏதேனும் ஒரு தலைப்போ, ஒரு அட்டைப்படமோ, இன்ன பிற சமாச்சாரமோ வாடிக்கையாள வாசகரைக் கவர்ந்திட, அதனை வாங்கிடுகிறார் !" என்பதே எனது அனுமானமாய் இருந்தது ! ஆனால் கடந்த 2 ஆண்டுகளின் தகவல்கள் சொல்லும் சேதியே வேறு ரகம் ! புத்தக விழாக்களில் வாங்கிடும் வாசகர்களில் ஒரு கணிசப் பகுதியினர் - கிட்டத்தட்ட ரெகுலர் வாசகர்களே ! ஆண்டுக்கொரு தபா சென்னையில் வாங்க மட்டும் செய்கிறார்களா ; அல்லது இதர சமயங்களில் ஆன்லைனிலும் வாங்குவரா என்பது தெரியலை ; but  அவர்களுக்கு புது வரவுகள் எவை ? ஸ்பெஷல் வரவுகள் எவை ? இங்கு அலசப்படும் ஹிட் இதழ்கள் எவை என்பதிலெல்லாமே நல்லா தெளிவு உள்ளது விற்பனையாகியுள்ள டைட்டில்களிலும், நம்பர்களிலும் பிரதிபலிக்கின்றது ! So - 'இவை  சும்மா casual ஆன விற்பனைகள் தானே - இவற்றின் சேதிகளை பெரியதொரு pointer ஆக எடுத்துக் கொள்ள அவசியமில்லை !' என்ற நினைப்புகளுக்கு பெரியதொரு முழுக்குப் போடணும் போலும் ! These are trueblue stats & deserve all our attention on the way ahead !!

வழக்கம் போலவே நல்ல சேதி - கெட்ட சேதி என்று 2 பிரிவுகள் and as always - நல்லதிலிருந்தே ஆரம்பிக்கிறேனே !! 

இப்போதெல்லாம் இதைச் சொல்லும் போது ஒரு கொட்டாவி தவிர்க்க இயலா தோழனாகிப் போகிறது ! "மாயாவி சார் இந்தப் புத்தக விழாவிலும் பின்னிப் பெடல் எடுத்து விட்டார் ; மாயாவி சாரே ரேக்கிலிருந்து பரந்த முதல் ஆசாமி ; மாயாவி சார் தான் இந்த தபாவும் புத்தக விழாவின் நாயகர் ! ஹாவ்வ்வ்வ் " என்று சொல்லிவிடுகிறேன் ! கடந்த ஓரிரு ஆண்டுகளில் இந்த மாயாவி சார் மோகம் சற்றே மட்டுப்பட்டுத் தெரிந்ததென்னவோ வாஸ்தவம் தான் ; "ரைட்டு, இந்த evergreen நாயகருக்குமே வயசாகிடுத்து போலும் !" என்று நினைத்துக் கொண்டேன் ! In fact - இங்கிலாந்தில் அந்த STEEL CLAW தொகுப்பு வெளியாகிடவுள்ள தகவல் வந்த சமயம், "நியூயார்க்கில் மாயாவி" & இதர மறுபதிப்புக் கதைகளுக்கு உரிமைகளை வாங்குவோமா ? வேணாமா ? என்ற சலனம் கூட லைட்டாக எட்டிப் பார்த்தது ! ஆனால் எனக்குள் குடியிருக்கும் முந்திரிக்கொட்டை முத்தண்ணா - அந்த சலனத்தை மண்டையில் தட்டிப் படுக்கப் போட்டிருந்தது ! அதன் பலனாய் சாத்தியமான "நியூயார்க்கில் மாயாவி" தான் இந்தாண்டின் topseller - எண்ணிக்கையினில் !! பெரிய சைஸ் ; பளீர் அட்டைப்படம் ; சின்ன விலை ; ஆதர்ஷ மாயாவி - என்ற combo போட்டுத் தாக்கியுள்ளது விற்பனையில் ! And ஏனோ தெரியலை - "மர்ம தீவில் மாயாவி" ஆல்பமும் அதிரடி சேல்ஸ் !! வாசிக்கிறார்களோ - சேமிக்கிறார்களோ - மாயாவியை நேசிக்கிறார்கள் என்பது மட்டும் நூற்றுச் சொச்சமாவது தடவையாய் நிரூபணமாகியுள்ளது ! நேரம் மட்டும் இருந்திருப்பின் - "யார் அந்த மாயாவி" இதழையுமே களமிறக்கியிருப்போம் ! A chance wasted !!

இந்தாண்டின் surprise package நம்ம சட்டித்தலையன் ஆர்ச்சி தான் ! வண்ணத்திலான அந்த மாக்சி சைஸ் இதழும் சரி, பாக்கி b&w இதழ்களும் சரி, போட்டி போட்டு விற்றுள்ளன ! So மாயாவியாருக்குச் சொன்ன அதே பன்ச் லைனைத் தான் நமது சிகப்பனுக்கும் சொல்லணும் போல : வாசிப்போ, சேமிப்போ - நேசிப்புக்கு குறைவில்லை ! என்ன - நம்மில் பலருக்கு இரும்பு மண்டையன் குளிர் ஜுரத்தை வரவழைப்பதால் அடக்கி வாசிக்க வேண்டிப் போகிறது ! But undoubtedly இந்தாண்டின் வெற்றிக் கதைகளுள் ஒன்று !!

வெற்றி எனும் மங்களகரமான தலைப்பின் போது - மங்களகரமான மஞ்சளை மறக்க இயலுமா ? So ஒரு ஜோடிக் கொட்டாவிகளோடு இந்தத் தகவலையும் மறுஒலிபரப்புப் பட்டியலில் சேர்த்திடுகிறேனே :

டெக்ஸ் வில்லர் !! 'பேர கேட்டாலே சும்மா அதிருதுலே !!" என்ற டயலாக் நம்ம 'தல' ஒருத்தருக்கு நிரந்தரமாய்ப் பொருந்தும் போலும் !! 2020 -ன்  பிற்பகுதியில்  வெளியாகி, 2021 -ன் முற்பகுதியிலேயே காலியாகிப் போன இதழ்கள் 3 ! And அவை மூன்றுமே நமது இரவுக்கழுகாரின் இதழ்களே - எனும் போது எனக்கு ஏன் வியப்பே எழ மாட்டேன்கிறதோ  ?? "எதிரிகள் ஓராயிரம்" ; "பந்தம் தேடிய பயணம்" & "தீபாவளி with டெக்ஸ்" என்ற லிஸ்டில் எஞ்சியிருந்த மிக சொற்ப புக்ஸும் சென்னையில் இரண்டே நாட்களில் காலி ! And இவை நீங்கலாய்க் கையிலிருந்த 28 டைட்டில்களில் கலந்து கட்டி சேல்ஸ் ! அவற்றுள் 2020 -ன் வெளியீடுகள் நல்லாவே தூக்கலாய் விற்றுள்ளன !! Icing on the cake என்பதனால் - அது சந்தேகமின்றி "மரண முள்" தான் ! வண்ண இதழ் ; க்ளாஸிக் சாகஸம் ; சமீப இதழ் - என்பனவெல்லாம் இதன் விற்பனையின் பின்னணிகளா ? என்று சொல்லத்தெரியவில்லை ; ஆனால் - செம சேல்ஸ் ! நடப்பாண்டைத் தாண்டிடாது இந்த இதழும் - என்பது உறுதி ! காசியப்பன் பாத்திரக் கடை அண்டாக்களில் கிண்டப்படும்  கிஸ்மிஸ் போட்ட பாயசங்கள் இவருக்கு கிச்சுகிச்சு மட்டுமே ஊட்டுகின்றன ! மூத்திரச் சந்துகளில் நடத்த முனையப்படும் மண்டகப்படிகள் இவரிடம் மந்தகாசப் புன்னகையினையே ஈட்டுகிறது ! 'ஒரே மாதிரியான கதைகள் ; மிடிலேடா சாமீ ' என்ற புலம்பல் பந்துகளைப் பக்குவமாய் பவுண்டரிக்கு மேலே பறக்க விடுகிறார் ! சேவாக் ; சச்சின் ; ரிஷாப் பண்ட் - என காலங்களுக்கேற்ப அதிரடிக்காரர்கள் மாறிடலாம் அரங்கினில் ; ஆனால் இந்த திடகாத்திரரை மட்டும் இடம் மாற்ற யார் எண்ணினாலும் - "வாய்ப்பில்லியே ராஜா !!" என்பதே பதிலாகிறது ! Take a bow 'தல' !! You are an immoveable force !! உங்களை வாசிக்கிறார்களா ? சேமிக்கிறார்களா ? என்பதெல்லாம் ஒரு பொருட்டே அல்ல - simply becos நாங்கள் உங்களை சுவாசிக்கிறோம் !

லக்கி லூக் : இந்த மஞ்சள்சட்டையருமே "வெற்றி - ஒரு தொடர்கதை" என்பதை ஊர்ஜிதம் செய்து கொண்டே போகும் ஜாம்பவான் ! சின்ன சைஸ் ; மாக்சி சைஸ் ; புது இதழ் ; மறுபதிப்பு - எதுவாக இருப்பினும், பரிச்சயமான அந்த ஒற்றைநாடி முகம் மட்டும் அட்டைப்படத்தினில் இருந்தால் - குதூகலமே புலனாகிறது !! No different this time too !! பயங்கரமாய் ஸ்பின் எடுக்கும் செபாக் மைதானத்தினில் பேட்டிங் செய்திடத் தடுமாறும் ஆட்டக்காரர்களைப் போல கார்ட்டூன் எனும் ஜானரின் இதர பிரதிநிதிகள் அத்தினி பேருமே தட்டுத் தடுமாறி வரும் வேளையினில், இந்த ஒல்லிப் பிச்சான் மட்டும் ரோஹித் ஷர்மாவைப் போல நொறுக்கித் தள்ளுகிறார் ! அதிலும் 'பரலோகத்திற்கொரு படகு" ; பிசாசுப் பண்ணை & 2020 லக்கி ஆண்டு மலர்  smash hits !! கொஞ்ச நேரம் இவரது விற்பனை நம்பர்களையே இமைதட்டாது பார்த்துக் கொண்டே இருந்தேன் - தலைக்குள் ஏதேதோ சிந்தனைகள் சகிதம் ! ஹ்ம்ம்ம் !! More on this later...!

வெற்றிநடைக்கு ஒரு மெருகூட்டும் அடுத்தவர் நமது 007 !! சொற்ப விலையிலான black & white ஜேம்ஸ் பாண்ட் ஆல்பங்களும் சரி ; கலரின் ஜேம்ஸ் 2.0 ஆல்பங்களும் சரி, பரபரப்பாய் விற்பனை கண்டுள்ளன ! ரொம்பவே பரிச்சயமான பெயர் & ரொம்பவே பிடித்தமான நபர் எனும் போது இவரது hits வியப்புக்கு வழி கோலவில்லை ! 

நல்ல சேதியின் அடுத்த அத்தியாயங்களில் இடம் பிடிப்போர் மூவருமே போரிஸ் ஜான்சனின் தேசத்துப் புள்ளீங்கோ ! இந்தாண்டினில் CID லாரன்ஸ்-டேவிட் வழக்கத்தை விடவும் வேகமாய் களமாடியுள்ளனர் & ஸ்டெல்லாவின் முதலாளியும் இம்முறை சளைக்காது ஈடு கொடுத்துள்ளார் ! நிறைய ரெகுலர் தடுத்து current நாயக ' நாயகியர் 'தேமே' என குச்சி ஐஸ் சப்பிக்கொண்டிருக்க, சீனியர் சிடிசென்ஸ் டாட்டா காட்டிக் கொண்டே முந்தியுள்ளனர் ! And நான் மட்டும் என்ன இளப்பமா ? - என ஸ்பைடர் சாரும்  இந்த வருஷம் தில்லாய் கெத்து காட்டியுள்ளார் ! மாயாவி ரேஞ்சுக்கு இல்லாவிடினும், ஆர்ச்சியின் நடப்பாண்டுக்கு இல்லாவிடினும், கூர்மண்டையர் முந்தைய ஆண்டுகளைக் காட்டிலும் தேவலாமே !

அடுத்த சந்தோஷ சேதி - என்று சொல்வதாயின், ஜம்போவின் இதழ்களின் பெரும்பான்மை  ஆரவாரமாய் இல்லாவிடினும், அழகாய் ஸ்கோர் செய்திருப்பதைச் சொல்லணும் ! 'ஹீரோக்களின் பெயரைக் காணோமே ?' என்றெல்லாம் தயங்கிடாது, சரளமாய் இந்த oneshots-களை ஜனம் வாங்கியுள்ளனர் ! And குறிப்பிட்டுச் சொல்வதானால், இங்கே அலசப்பட்டு, சிலாகிக்கப்பட்ட இதழ்கள் எல்லாமே ஒரு லெவல் கூடுதல் விற்பனை கொண்டிருப்பது கண்கூடு ! 'நில்...கவனி...வேட்டையாடு..' ; 'பிரிவோம் சந்திப்போம்' ; மா..துஜே ஸலாம்'  ; அர்ஸ் மேக்னா என உங்களிடம் தரச் சான்றிதழ் பெற்ற சரக்கெல்லாமே done well !! "இன்ன மெரி...இன்ன மெரி இளநிக்கடை இசக்கியப்பன் கடையிலே இளநி தேனா இனிக்குது ; சர்பத் கடை சடகோபன் கிட்டே டேஸ்ட் அள்ளுது" ; டீக்கடை தேனப்பன் கடையிலே இஞ்சி டீ ஏ-1ன்னு" நீங்க தர்ற பாராட்டுப் பாத்திரங்களின் மதிப்பு இங்கே பிரதிபலிப்பதாய் தோன்றுகிறது ! அதற்காக பல்லி விழுந்த பாலில் டீ போடும் தருணங்களில் குமட்டில் குத்த வேணாமென்றெல்லாம் சொல்லவில்லை ; இதோ இம்மாதத்து ராபினுக்கு விழும் கொட்டுக்கள் என் மண்டையில் விழுவதாகவே உணர்கிறேன் ! ஆனால் the power of positivity - ஓராண்டுக்கும் மேலாய் நிலைப்பது தான் இங்கே highlight என்றுபட்டது ! 

கார்ட்டூன்கள் பக்கமாய்ப் பார்வைகள் ஓடிடும் போது இம்முறை ஒரு sweet surprise காத்துள்ளது - நமது நீலப் பொடியர்கள் விற்பனையில் சோடை போகாததன் புண்ணியத்தில் !  வியப்பூட்டும் விதமாய் இம்முறை விற்பனை எண்ணிக்கையில் - லக்கி லூக்குக்கு அடுத்த இடம் Smurfs களுக்கே !! ஒருக்கால் பெற்றோர்கள் இவற்றை தம் குட்டீஸுக்கு வாங்கித் தந்துள்ளனரா ? அல்லது கார்ட்டூன் சேனல்களில் இந்த பொடியர்களைப் பார்த்த பரிச்சயத்தில் குட்டிஸ்களே தேர்வு செய்து கொண்டனரா ? - தெரியலை ; ஆனால் the net result has been good ! 

ஆச்சர்யமூட்டும் விதமாய் மூன்றாம் இடத்தில இருப்பது யார் தெரியுமோ - நமது ஹெர்லக் ஷோம்சார் தான் ! பொதுவாய் இவரது (சொற்ப) டைட்டில்கள் எங்கேனும் கண்ணுக்குத் தெரியா விதமாய் ஒதுங்கி விடுவது வாடிக்கை ! ஆனால் surprise ...surprise ...நமது லண்டன் காத்தாடி ராமமூர்த்திக்கு இம்முறை செழுமையான வரவேற்பு ! Stands third in the cartoons !

Reasonably ok - என்று சொல்லும் விதமாய் அமைந்துள்ளன - ப்ளூகோட் பட்டாளம் & சிக் பில்லின் விற்பனைகள் ! So குறைந்தபட்ச உத்திரவாதத்தில் தலை தப்பிக்கிறார்கள் இந்த இருவருமே !

தொடர்வது bad news & கார்டூனிலிருந்தே அதனை ஆரம்பிக்கிறேனே !

கேரட் மீசைக்காரர் Clifton தான் அந்த பிரஷ் மீசை நிறைய மண் வாங்கியிருக்கும் முதல்வர் ! மொத்தமாய் 4 டைட்டில்கள் உள்ளன கைவசம் & நான்கும் சேர்த்து உருவாக்கியிருக்கும் விற்பனைத் தொகையானதைக் கொண்டு ஒரு கிராமத்துச் சந்தையில் நாலு பூமெக்ஸ் அண்டடாயர் கூட கொள்முதல் செய்திட இயலாதென்பதே சோகம் ! ஏற்கனவே ரெகுலர் ஆன்லைன் விற்பனைகளிலும் இவரொரு செல்லப்பிள்ளை அல்ல எனும் போது - looks very much like the end of the road for க்ளிப்டன் !! நடப்பாண்டினில் இந்த பிரிட்டிஷ் உளவாளியைப் பார்ப்பதே நமக்கினி இறுதி முறையாய் இருக்கும் போலும் !! 

'க்ளிப்தனை விட துளியூண்டு தேவலாம்' என்று சொல்வது சமீப வரவுகளான மேக் & ஜாக் ஜோடியே ! ஆனால் அவர் பாடியிருப்பது முகாரியெனில், இவர்கள் இசைப்பதோ கொஞ்சமும் விடுதலில்லா சோக கீதமே !! மூன்று டைட்டில்ஸ் இணைந்து கொணர்ந்திருக்கும் விற்பனைத் தொகையைக் கொண்டு சென்னையில் நமக்கு கம்பியூட்டர் பில் போடா உதவிய நண்பனின் ஒற்றை தினத்து சம்பளத்தைக் கூடப் போட்டிருக்க இயலாது !! ஆன்லைன் விற்பனைகளில் இவர்களது performance எவ்விதம் உள்ளதென்று பார்க்க உத்தேசித்துள்ளேன் & இந்த சிகாகோ ஜோடிக்கு இறுதியாய் ஒரு வாய்ப்பை 2022-ல் தர எண்ணியுள்ளேன் ! சண்ட மாருதங்களாய் செயல்பட்டார்களெனில் சூப்பர் ; இல்லையேல் சமீப தினங்களில் அரங்கேறி வரும் சீட் பங்கீட்டில் ஒரு முக்கிய கட்சிக்குக் கிட்டி வரும் அல்வாவே மேக் & ஜாக் ஜோடிக்கு நாமும் தர வேண்டிப் போகும் ! தனிப்பட்ட முறையில் எனக்கு ரொம்பவே பிரியமானதொரு நகைச்சுவை ஜோடியும் மேடையேறி இப்படிச் சொதப்புவதை பார்க்கும்  போது கண்கள் வேர்க்கின்றன ! 

ஏற்கனவே மதியில்லா மந்திரியாரும் கல்தா பட்டியலில் இருக்கும் நிலையில் ; ஹெர்லோக் ஷோம்ஸ் தொடரினில் புதுக் கதைகள் லேது எனும் போது - காத்திருக்கும் காலங்களில் - 'கார்ட்டூன் என்றொரு ஜானர் இருந்தது இங்கே' என்று கல்வெட்டில் பதித்து நமக்கு நாமே நினைவூட்டிக் கொள்ளணும் போலும் ! எத்தனை முயன்றும், கார்ட்டூன்களை அக்மார்க் குயந்தைக சமாச்சாரமாகவே கருதிடும் பாங்கு truly disappointing !!

இதே பாணியினில் ராயலான சொதப்பலுக்குச் சொந்தக்காரர்கள் ஆக்ஷன் ஜானரிலும் உள்ளனர் !! கமான்சே எப்போதும் போலவே சிங்காரச் சென்னைக்கு புது மாப்பிளையாய்ப் புறப்பட்டுப் போய், காலரில் வைத்த அந்த மஞ்சளின் மெருகு கூடக் கலையாது அலுங்காமல், குலுங்காமல் பத்திரமாய்த் திரும்பியுள்ளார் வீட்டுக்கு ! ஒரே saving grace ; "கமான்சே பேக்" என்று நாம் போட்டிருந்த பாக்கெட்டினில் மொத்தம் 4 full sets விற்றுள்ளன ! கிடைக்கும் முதல் அவகாசத்தினில் இந்தத் தொடரின் ஒன்பதோ - பத்து புக்ஸை உள்ளடக்கவல்ல slipcase ஒன்றினைத் தயாரித்து, அதற்கென விலையேதும் கூட்டிடாது, மொத்த பேக்காகவே என் கொள்ளுப் பேரன் காலம் வரையிலும் வைத்திருந்து விற்கணும் போலும் ! ஒரு ஜாம்பவானின், ஹிட் தொடர் நம் மத்தியில் இத்தனை சொதப்புவது ரொம்பவே சங்கடமூட்டுகிறது ! ஜெரெமியா கூட இந்தளவுக்கு சாத்து வாங்கலை எனும் போது - கமான்சே உருவாக்கும் record மறக்கப்பட வேண்டியவொன்று ! 

Slipcase # 2 - தயாரிக்க வேண்டியது 'W' குழுமத்தின் முதலாளிக்குமே என்று சொல்லிட வேண்டும் தான் ! லார்கோ சமீப ஆண்டுகளை விட, இம்முறை கொஞ்சமாய் தெரியுள்ளார் தான் ! ஆனால் இந்த ப்ளூ ஜீன்ஸ் பில்லியனரை நம் கிட்டங்கியிலிருந்து வழியனுப்ப இன்னும் ஏக காலமாகும் போலும் !! Truly perplexing ! 

Slipcase # 3 - நரைமீசை ரோமியோ ஷெல்டனுக்கே ! இவரும் லார்கோவைப் போலவே இம்முறை an improved performance என்றாலும், Wayne Shelton-க்குப் புதுசாய் பல இல்லங்கள் தேடித் தருவது கிட்டங்கியின் கட்டாயம் ! 

சாத்துக்களில் ரணமாகி, மூஞ்செல்லாம் காயம் தாங்கி நிற்கும் இன்னும் 2 பிரெஞ்சு தொடர்கள் உள்ளன - ப்ருனோ பிரேசில் & கேப்டன் பிரின்ஸ் ரூபத்தில் ! "சாக மறந்த சுறா" நம் கிட்டங்கியை ஒருபோதும் மறவாது என்பது ஊரறிந்த விஷயம் தான் ; ஆனால் இந்த தபா பிரின்சும் வாங்கியுள்ள மொத்துக்கள் ஒரு வண்டி !! புராதனங்கள் சிறுகச் சிறுக ஓரம் கட்டப்படாவிடின், நீங்களே அந்தப் பொறுப்பைக் கையில் எடுத்து விடுவீர்கள் போலும் !! ஆனால் அந்த லாஜிக் ப்ரூனோ பிரேசிலுக்கும், பிரின்சுக்கும் பொருந்தினாலும், செம சமயுகத் தொடரான லார்கோவுக்குப் பொருந்த மறுக்கிறதே ? வடிவேலுக்குப் பஞ்சாயத்துப் பண்ணப் போன சங்கிலி முருகன் போல தான் மடக் மடக்கென்று சொம்புத் தண்ணீரை குடிக்க வேண்டியுள்ளது !

சிகப்பு லைட் ஏரியாவிடினும், தனது பெயருக்கு நேராய் ஆரஞ்சு லைட் கண்சிமிட்டும் இன்னொரு ஹீரோவும் இல்லாதில்லை & believe it or not - அவர் ரிப்போர்ட்டர் ஜானியே !! அவரது லேட்டஸ்ட் வெளியீடான "ஆதலினால் கொலை செய்வீர்" இதழைத் தவிர்த்த பாக்கி சகல டைட்டில்களிலும் விற்றுள்ளதைக் கொண்டு கவுண்டருக்கு வெற்றிலை பாக்கோ ; செந்திலுக்கு முறுக்கோ மட்டுமே வாங்கிட முடியும் !! "சொம்பு தண்ணீ பத்தலையே மைதீன்....அந்த டிரம்மையே ஆலமரத்தடிக்குக் கொண்டு வர முடியுமா ??"

ஒற்றை இலக்க விற்பனையோடு, கூட்டத்துக்குள் நசுக்கப்படும் இன்னொரு தொடர் ஜில் ஜோர்டன் ! Again பிராங்கோ பெல்ஜிய படைப்புலகின் பிரதம தொடர்களில் ஒன்று, நம் மத்தியில் திருவிழாவில் காணாது போன குழந்தையாட்டம் விழித்து நிற்பது sad !! 

"மொக்கை" என்று வந்துவிட்டால் - பிரெஞ்சு மொழியென்ன ? இத்தாலிய மொழியென்ன ? எல்லாமே ஒன்று தான் என்றே எடுத்துக் கொள்ளணும் போலும் !  மேஜிக் விண்ட் தொடரின் 3 ஆல்பங்கள் சேர்ந்து வாங்கியுள்ள உதை - WWF மல்யுத்தங்களில், தார் பீப்பாய் போன்ற ஆசாமிகள் எதிராளியை மல்லாக்கப் போட்டுவிட்டு, கயிற்றில் ஏறி நின்று, திடும் திடுமென அவன் மீதே குதிப்பதற்கு சமமானது ! 

"உதவியாளன் க்ரோவ்சோ போடும் மொக்கை பெருசா ? அல்லது டைலன் டாக் தொடருக்கு நீங்கள் தரும் கும்மாங்குத்துக்கள் பெருசா ?" என்றொரு பட்டிமன்றம் நடத்தினால், திண்டுக்கல் லியோனி தெறித்து ஓடி விடுவார் ! சுத்தமான, நயமான, மஸ்கொத் அல்வா தான் அவருக்கு வாய் நிறைய தர இயன்றிருப்பது !! போகிற போக்கில், இத்தாலிய ஆக்கங்களில் 'தல' டெக்ஸ் & மர்ம மனிதன் மார்ட்டின் தவிர்த்து, பாக்கிப் பேருக்கெல்லாம் நெஞ்சங்களில் மட்டுமே ஜாகைகள் தந்தாக வேண்டும் போலும் ! 

ஆனால் சைக்கிள் கேப்பில் ஸ்கோர் செய்துள்ள இத்தாலியர் - நம்ம 'பாட்டீம்மா போட்டுத் தள்ளும் கழகத்து தலீவர்' !! அந்தப் பெரிய சைஸ் ; பளிச் அட்டைப்படங்கள் ; உட்பக்கச் சித்திர அமைப்புகள் என்ற கூட்டணி வேலை செய்ததா ? அல்லது வேறு காரணங்களா ? தெரியலை - டயபாலிக் has seen decent sales !

குறுக்கால புகுந்து சாகுபடி செய்துள்ள இன்னொரு நாயகர் - நமது சகஜ வீரர் தான் ! ரோஜரின் "நேற்றைய நகரம்" நடப்பாண்டின் புத்தக விழா விற்பனையில் நான்காம் இடத்தினில் !! "சந்தாவில் அல்லாத இதழ் " என்பதால் நிறைய பேரை அது அந்நேரம் சென்றடைந்திருக்கவில்லையோ - என்னமோ ; சென்னையில் rocking sales !!

ஓரளவுக்கு மானத்தைக் காத்துக் கொண்டுள்ளனர் டிரெண்ட் & தளபதி டைகர் ! நிச்சயமாய் மோசமில்லை என்பேன் - இரு தொடர்களிலுமான விற்பனை ! 

Same goes for XIII ! புது இதழ்களான "2132 மீட்டர்" & "சதியின் மதி" ஓ.கே என்ற விற்பனை !! அனலெல்லாம் பறக்கலை ; ஆனால் definitely decent !

ஆச்சர்யம் தொடர்கிறது - நமது 'தானைத் தலைவி' ரூபத்திலும் ! Oh yes , மீன் பிடிக்கிறாரோ, நண்டு பிடிக்கிறாரோ, மாடஸ்டி இம்முறை விற்பனையிலொரு குறைந்தபட்ச சாதனைக் கோட்டைத் தொட்டுப் பிடித்து இருப்பது உற்சாகமூட்டுகிறது ! 

ஆனால் ஒரு தலைவியின் வெற்றி, அடுத்த தயைவிக்கு கை கொடுக்கக் காணோம் !! நம்மூர் கட்சித் தலீவர்கள் போல ஏதாச்சும் ஒரு புயட்சி செய்யக் கிளம்பிய அமாயாவுக்கு ஆருமே பெருசாய் ஆதரவு தராது டீலில் விட்டுப்புட்டீங்களே மகாஜனங்களே ? அந்தப் பரந்த மனசு என்னமாய் சலனம் கொள்ளும் ? பட்டவர்த்தனமான பல்ப் ! அம்மணிக்கும்..நேக்கும் !!

Before I wind up - சங்கடத்தின் உச்சம் பற்றி !! நடப்பாண்டில் சென்னை விற்பனையில் தோர்கல் ரொம்பவே...ரொம்ப ரொம்பவே கோட்டை விட்டுள்ளார் !! ஜனவரி இதழான "அழகிய அகதி" நீங்கலாய் பாக்கி அனைத்துமே shocking numbers !! சத்தியமாய் இதை எவ்விதம் எடுத்துக் கொள்வதென்றோ ; இதன் பின்னணிச் சேதி என்னவென்றோ புரிந்து கொள்ளத் தெரியலை !! 'மைதீன்...டிரம் பத்தாதுடாப்பா ; தண்ணி ட்ரக்கருக்கு சொல்லிடேன் !!' Phew !!

ஆனால் இம்முறை பார்த்திட முடிந்த silver streak பற்றியும் சொல்லிடுகிறேனே ?! பழசோ, புதுசா ; கலரோ ; black & white ஆல்பமோ - கிட்டத்தட்ட அனைத்து கிராபிக் நாவல்களுமே இம்முறை செமையாய் ஸ்கோர் செய்துள்ளன ! மாறி வரும் ரசனைகளுக்கொரு வழிகாட்டியோ ? புரிந்திட முழி பிதுங்கி நிற்கிறேன் !  'யப்பா சாமி...டிரக்கர் கான்சல் ;  கம்மாய்க்குள்ளே குதிச்சு நானே குடிச்சுக்கிறேன் !!'

Bye guys..இந்தப் பதிவின் துவக்க வரியினைப் பொய்யாக்கி விட்டு, வள்ளியப்பனாகவே விடை பெறுகிறேன் ! So "சுருக்கா மேட்டரை சொல்லுப்பூ ?"  என்று எண்ணிடும் நண்பர்கள், மார்டினின் "உண்மையின் உரைகல்" இதழோடு இம்முறை பொழுதைச் செலவிடலாம் ! இந்த விற்பனைகளின் தகவல்களை தலைக்குள் அசைபோட ;  நம் அடுத்தாண்டின் திட்டமிடலில் இவற்றின் takeaway-களுள் அவசியமானவற்றை இணைக்க என்செய்வதென்ற மகா சிந்தனைகளோடு சவாரி செய்திட, தொடரும் வாரங்களும், மாதங்களும் எனக்கு அவசியமாகிடும் ! நிச்சயமாய் kneejerk ரியாக்ஷன்ஸ் இராது தான் ; அதே சமயம் அத்தியாவசியக் கசப்புகளை விழுங்கவும் தயங்க மாட்டோம் தான் !

Bye all ; see you around !! Have a fun weekend ! 

பின்னாடி குறிப்புங்கோ :

நம் சென்னை ஓவியர் பிரித்து மேய்ந்துள்ளார் - அடுத்த பதிவினில் நான் கண்ணில் காட்டவுள்ள கலர் அட்டைப்படத்தினில் !

கொரில்லா சாம்ராஜ்யத்துக்கு அட்டைப்படம்  வருது !!

"கழுகு வேட்டை" (சந்தாதாரர்கள்) விலையில்லா இதழ்களின் போட்டோக்கள் ப்ளீஸ் ? வரும் திங்கள் அதற்கான last date folks !! அதனை விசாலன் வரையிலும் நீட்டிக்கிறோம் (18th மார்ச்) !

அப்புறம் சந்தா எக்ஸ்பிரஸ் தடதடக்கத் துவங்கிவிட்டது  - ஒருவழியாய் !! இன்னமும் 2021-ன் சந்தாவினில் இடம்பிடித்திரா நண்பர்களுக்கு இதனையே ஒரு நினைவூட்டலாக்கிட அனுமதியுங்களேன் ப்ளீஸ் ? "சும்மா வாரா வாரம் இங்கே நொய்யு..நொய்யு'ன்னு துட்டுக்கு அடிபோடறியே ?" என்று எனது அனற்றல்கள் உங்களுக்கு நெருடிடக்கூடும் என்பது புரிகிறது தான் ! ஆனால் இந்த யாசிப்பே நம் ஒட்டுமொத்த (காமிக்ஸ்) வாசிப்பின் பின்னணி எனும் போது, சந்தோஷமாகவே கையேந்திக் கரம் கூப்புகிறேன் ! Please do jump in asap folks !!


Thursday, March 11, 2021

போர்முனையில் தேவதைகள் !

 நண்பர்களே,

வணக்கம். சென்னைப் புத்தக விழா அழகாய் நிறைவுற்றிருக்க, நம்மவர்கள் இன்று காலை ஊர் திரும்பினர் ! விற்பனை சார்ந்த தகவல்களும், நம்பர்களும் என் மேஜையில் கிடக்க, நானோ SODA சார்வாளோடான பயணத்தில் பிசி ! அவருக்கும், சிக் பில்லுக்கும் முதல் மரியாதை செய்தான பின்னே, சென்னையின் புள்ளிவிபரங்களுக்குள் புகுந்திட உத்தேசித்துள்ளேன் ! So இந்த வாரயிறுதிக்கான பதிவில் அது பற்றி !

In the meantime - நெடுநாள் கழித்து ரெகுலர் பதிவுகள் 300+ என்ற பின்னூட்ட எண்ணிக்கைகளைத் தொடத் துவங்கியிருக்க, கம்பெனி ரூல்ஸ்படி உபபதிவு அவசியமென்பதை நினைவூட்டிக் கொள்ள வேண்டிப் போனது ! மார்ச்சின் புது புக்ஸ் இன்னமும் மெருகுடனே தொடரும் வேளையினில் - ஏப்ரலுக்குள் பார்வைகளை ஓடச் செய்வது ரொம்பவே premature ஆக இருக்கும் என்பதால், வேறொரு திக்கில் இந்த உ.ப. இருந்திடல் நலமென்று பட்டது ! So 2021-ன் சந்தாவினில் எஞ்சி நிற்கும் ஒற்றை காலி ஸ்லாட்டைப் பூர்த்தி செய்திடவுள்ள இதழைப் பற்றிச் சுருக்கமாய் ஒரு preview செய்ய நினைத்தேன் !!

போர்முனையில் தேவதைகள்...!

ஜம்போ சீசன் 4-ன் இறுதி இடத்தினில் மிளிரவுள்ள இதழ் இதுவே !! உலக பெண்கள் தினத்தன்று இந்த இதழை அறிவிக்க நினைத்திருந்தேன் - ஆனால் நம்ம மாயாவி சார் அதிரடியாய் கவனங்களைத் தனதாக்கியதால், சாத்தியப்படவில்லை ! மாமூலான ரகக் கதைத் தேடல்களுக்கு அவசியங்களின்றி ; நாயக பிம்பங்களின் பின்னான ஓட்டங்களின்றி, வித்தியாசமான கதைகளை களமிறக்க ஜம்போ நமக்கு ரொம்பவே உதவிடுவதில் no secrets ! நீங்கள் தரும் அந்த சுதந்திரமே தினுசு தினுசான ஜானர்களையும் பரிசீலிக்கும் தகிரியத்தை எனக்கு நல்கிடுகிறதென்பதிலுமே no secrets too ! அத்தகையதொரு ஜாலியான தேடலின் போது கண்ணில்பட்ட ஆல்பம் தான் "போர்முனையில் தேவதைகள்!

ரொம்பவே சமகாலத்துக் கதையிது என்பதோடு ஒன்றரை மாதங்களுக்கு முன்னர் தான் பிரெஞ்சிலேயே வெளியாகியுள்ளது என்பதும் highlight ! மத்திய கிழக்கில் யுத்தம் அரங்கேறி வரும் பின்னணியில், ISIS ; ஜிகாத் என பேப்பர்களிலும், டிவி நியூஸ்களிலும் நாம் கேட்டிடும் விஷயங்களை முற்றிலுமொரு புது பார்வைக்கோணத்தில் காமிக்ஸ் படைப்பாக, அட்டகாசமான சித்திரங்களுடன் உருவாக்கியுள்ளனர் ! இதில் icing on the cake என்ன தெரியுமோ ? கிட்டத்தட்ட 15 ஆண்டுகளாய் தீவிரவாதம் சார்ந்த கேஸ்களை விசாரிக்கும் ஜட்ஜாக இருந்தவரே இங்கே கதாசிரியருக்கு முக்கிய ஆலோசகர் ! பெண்களும் போர்முனைக்குப் பயணம் செய்திட நினைக்கும் போது அதனைத் தடுக்க நினைக்கும் பிரெஞ்சு உளவு அமைப்பு ; அவர்களோடு அந்தப் பெண்கள் நடத்தும் ஆடுபுலியாட்டம் ; செம வித்தியாசமான க்ளைமாக்ஸ் - என இந்த ஆல்பம் தெறிக்கும் வீரியத்துடன் தட தடக்கிறது ! 




லொடக் லொடக்கென பாலைவனங்களுக்குள் குருதையில் நமது நாயகர்கள் அடிக்கும் ஷண்ட்டிங்கிலிருந்து இது நிச்சயம் ஒரு செம மாற்றமாய் இருக்கும் என்று சொல்வேன் ! And இந்த one shot ஆல்பத்தை உருவாக்கியுள்ள அதே படைப்பாளிகளே ஒரு ஆர்ப்பரிக்கும் முப்பாக ஆக்ஷன் த்ரில்லரையுமே உருவாக்கியுள்ளனர் ! சொல்லப்போனால், அந்த 3 part ஆல்பத்தின் அதிரடி வெற்றிக்குப் பின்னர் தான் "போர்முனையில் தேவதைகள்" ஆல்பமே திட்டமிடப்பட்டுள்ளது ! அந்த 162 பக்க சாகசமானது மதம் சார்ந்த பின்னணியுடனான கதை என்பதால், அது நம் வாசக வட்டத்தினை எவ்விதத்திலும் சங்கடப்படச் செய்யாத விதமாய் இருக்குமா ? என்ற பரிசீலனைகள் ஓடிக்கொண்டுள்ளன ! அது ஓகே.எனில் - 2022-ல் ஒரு மிரட்டலான ரகளை ரெடியென்பேன் ! 

So ஒரு பக்கம் 55 வருஷங்களுக்கு முன்னே உருவான கதையினை  வண்ணத்தில் பார்க்கக் கச்சை கட்டி வரும் அதே வட்டமானது, ஒரு செம current சாகஸத்தையும் (சு)வாசிக்கவுள்ளது ! இந்தியாவின் நீள அகலங்களை அலசினாலுமே உங்களை போன்றதொரு பன்முகத்தன்மை கொண்ட (காமிக்ஸ்) வாசக வட்டத்தைக் கண்ணில் பார்க்கவே சாத்தியப்படாது ! பீட்சாவும் ஓ.கே. ; மோர்சாதமும் ஓ.கே. எனும் போது - சமையல் மாஸ்டராக இருப்பது செம உற்சாக அனுபவமாகிடுகிறது !!  

ஆக ஜம்போ சீசன் 4 -ன் பட்டியல் இதுவே :

  1. ஜெரோனிமோ - ஒரு தலைவனின் கதை
  2. அண்டர்டேக்கர் - ஒரு வெள்ளைச் செவ்விந்தியன்
  3. One Shot க்ரைம் த்ரில்லர் - சித்திரமும் கொலைப்பழக்கம்
  4. One Shot க்ரைம் த்ரில்லர் - வைகறைக் கொலைகள் (Black & white )
  5. One Shot Fiction - உளவும் கற்று மற (மாத்தா ஹாரியின் கதை)
  6. One Shot Fiction - போர்முனையில் தேவதைகள் 

சந்தா எக்ஸ்பிரஸுக்கான சகல முஸ்தீபுகளும் நம் தரப்பில் பரபரப்பாய் நடந்தேறி வருகின்றன ! And கடந்த ஒரு வாரமாய் அதனில் இடம் பிடிப்பதில் நீங்கள் முனைப்பு காட்டத் துவங்கியுள்ளது உற்சாக மீட்டர்களை பரபரக்கச் செய்து வருகின்றன ! சந்தாக்களில் இணைந்திட இதே வேகமும், உத்வேகமும் தொடரின் - 2021 ஒரு ரகளையான பயணமாய் அமைந்திடுமென்பதில் துளியும் ஐயமில்லை எனக்கு ! And நினைவூட்டுகிறேன் folks - "கழுகு வேட்டை" கலர் புக்கில் உங்கள் போட்டோக்கள் இடம்பெற்றிட வேண்டுமெனில் உங்கள் சந்தா நம்பர் + போட்டோ - என இரண்டையும் அனுப்பிட மார்ச் 15 தான் கடைசி நாள். So please hurry !!

ரைட்டு...பணிகளைத் தொடர நான் கிளம்புகிறேன் ! See you around all ! Bye for now !!

Monday, March 08, 2021

போடுங்கய்யா வோட்டு...! போடுங்கம்மா வோட்டு..!

 நண்பர்களே,

வணக்கம். முன்னெல்லாம் தியேட்டர்களில் இன்டெர்வல் முடிஞ்சு படம் தொடரும் முன்பாய், காத்திருக்கும் இங்கிலீஷ் படங்களுக்கோ ; கார்ட்டூன்களுக்கோ டிரெய்லர் போடுவார்கள். படத்தைப் பார்ப்பதை விட, அந்த 'டிரெய்லர் படலம்' செம சுவாரஸ்யமாய் இருக்கும் ! அந்த அனுபவம் தான் உங்களின் நேற்றைய உற்சாகங்களைப் பார்க்கும் போது நினைவுக்கு வந்தது ! அது மட்டுமன்றி, இங்கு இதுவரையிலும் மௌனத்தை மட்டுமே மொழியாகக் கொண்டிருந்த நண்பர்களையும் கூட வாக்களிக்க வெளிக்கொணர்ந்திருந்த அந்த உற்சாகம் - icing on the cake !!

சோப்புச் சட்டைக்காரரா ? 

மஞ்சச் சட்டைக்காரரா

கறுப்புச் சட்டைக்காரரா ? 

சிரிப்புக்காரரா ? 

என்ற ரேஸில் உங்களின் ரசனைகளும் பிரதிபலிப்பது முன்செல்லும் நாட்களில் எனக்கு ரொம்பவே பயன் தருமென்பது உறுதி ! ஒவ்வொரு தபாவும், உங்களிடம் கேட்டுக் கேட்டே தீர்மானங்களை செய்வது நடைமுறை சாத்தியமல்ல எனும் போது - இது மாதிரியான தருணங்கள் ஒரு பானைச் சோறையும் சுவைக்கும் அவசியங்களை எனக்கு மட்டுப்படுத்தி விடுகின்றது ! 

On to the subject - ஒவ்வொரு பார்ட்டியின் (எனது பார்வையிலான) நிறைகளையும், குறைகளையும் லைட்டாக தொட்டுச் செல்கிறேன் - மிச்சம் மீதம் உள்ள வாக்குகளை செலுத்தவுள்ளோரின் வசதிக்காக !

Option # 1 :சோப்பு கோட்டு ஜொலிக்குது !!

இரும்புக்கை மாயாவியின் "கொரில்லா சாம்ராஜ்யம்" - முழுவண்ண மறுபதிப்பு : 

நம்ம ஹீரோக்கள் சண்டைக் காட்சிகளில் நாலு சாத்து வாங்குவார்கள், வாயோரம் கசியும் உதிரத்தைத் துடைத்துக் கொள்வார்கள் ; அப்புறமாய்த் தான் வில்லனைப் பொளந்து கட்டுவார்கள் ! ஆனால் இன்னொரு பாணியும் இருக்கும் ; எடுத்த எடுப்பிலேயே எதிராளியை நடுமூக்கில் நச்சு நச்சென்று குத்தி தள்ளுவார் ஹீரோ ! மாயாவியின் "கொரில்லா சாம்ராஜ்யம்" சாய்சினில் அரங்கேறுவது பாணி # 2 ! துவக்கம் முதலே முன்னணியில் உள்ள மனுஷனின் பலமென்று இங்கே நான் கருதுவது வண்ணங்களின் வர்ண ஜாலங்களையே ! ரெகுலரான black & white மறுபதிப்பெனில் - இந்தமட்டுக்கு வாக்குகளை மாயாவி சார் அள்ளியிருப்பாரா ? என்பது ஐயமே ! So ஒரு நெடுநாளைய வாக்குறுதி நிஜமாகிடும் சாத்தியம் இந்த evergreen நாயகரை முன்னணியில் பவனி வரச் செய்கிறது என்பது எனது எண்ணம் ! 

Positives

விற்பனையில் 200 சதவிகித உத்திரவாதம் தரவல்ல இதழ் என்பதில் no secrets at all !!

தயாராய் உள்ளன டிஜிட்டல் கோப்புகள் ; அட்டைப்படத்தை மட்டும் டிசைன் செய்து தயார் பண்ணிவிட்டால் - Maggy நூடுல்ஸ் ரெடி !

Negatives : 

புராதன நெடி இந்த 1960-களின் ஆக்கத்தில் விரவியிருப்பது தவிர்க்க இயலா சமாச்சாரமே

மறுபதிப்பே !

Option # 2 : மஞ்சளின் மகத்துவம் !

முழுவண்ணத்தில், ரெகுலர் சைசில் ; ஓவியர் சிவிடெல்லியின் கைவண்ணத்திலான TEX - "பொக்கிஷம் தேடிய பயணம்" !!

நிஜத்தைச் சொல்வதானால் - பாக்கிப் பேரின் டெபாசிட்களையெல்லாம் 'தல' காலி பண்ணி விடுவாரென்றே நான் நினைத்திருந்தேன் ! ஆனால் பெஞ்சமின் பிராங்க்ளின் எழுதிய வரிகளே இங்கு எனக்கு நினைவுக்கு வந்தன : Nothing is certain - except death & taxes !! மேஜர் சுந்தர்ராஜன் பாணியில் மறுக்கா சொல்வதானால் - "மரணமும், வரிகளும் தான் லோகத்தில் சர்வ நிச்சயமான சமாச்சாரங்கள் !!" 'தல'யே ஆனாலும், சில தருணங்களில் போட்டியில் tough fight களை சந்தித்தே திறனும் போலும் !!

Positives :

முழு வண்ணம் ; முழு நீள சாகசம் ; ஓவியர் சிவிடெல்லியின் மாயாஜாலம் !

Again - விற்பனையில் 200 சதவிகித உத்திரவாதம் தரவல்ல இதழ் என்பதில் no secrets at all !!

And again - தயாராய் உள்ளன டிஜிட்டல் கோப்புகள் ; அட்டைப்படத்தை மட்டும் டிசைன் செய்து தயார் பண்ணிவிட்டால் - Top Ramen நூடுல்ஸ் ரெடி !

Negatives :

ஏற்கனவே குறுக்கும் நெடுக்கும் வலம் வருபவரே எனும் போது - பெரிதாயொரு novelty factor மட்டும் மிஸ்ஸிங் ! 

Option # 3 : கருப்பு தான் எனக்கு புடிச்ச கலரு,,,,டொய்யுந்,,டொய்யுந்.!

ஸ்டெர்ன் - ஆல்பம் # 2 :

வண்டி வண்டியாய் பீட்டர்களோ ; பன்ச்களோ இந்த ஒடிசலான வெட்டியானிடம் இராது  ; ஆனால் வாழ்க்கையின் வலிநிரம்பிய யதார்த்த முகமே இந்த கி.நா. தொடரின் பலம் ! வன்மேற்கிலும் ஒரு இலக்கிய ரசிகன் வலம் வந்திட முடியுமென்று காட்டும் பன்முக ஆற்றலாளன் ! இவரது முதல் ஆல்பத்துக்குச் சளைக்கா இன்னொரு soft flowing ஆல்பம் அதன் பாகம் 2 ! 

Positives :

Like for Like - கி.நா. சந்தா இதழினில் விழுந்திட்ட வெற்றிடத்தை இன்னொரு கி.நா.வே நிரவல் செய்வது !

அந்த கார்ட்டூன் பாணிச் சித்திரங்களின் இதம் !

Negatives :

Too early in the day - ஸ்டெர்னின் முதல் ஆல்பத்தினையே இன்னமும் 90 சதவிகித நண்பர்கள் வாசித்திருக்கா நிலையில், அடுத்ததையும் தலையில் கட்ட முனைவது ஓ.கே. தானா ? என்ற ஐயம் !

கதையினை வரவழைத்து ; மொழியாக்கம் இத்யாதி என சகலத்தையும் இனிதான் துவங்கிட வேண்டி வரும் ! முதலிரண்டும் ரெடிமேட் நூடுல்ஸ் எனில், இது சடுதியாய்க் கிளற வேண்டிவரும் உப்மா ..இல்லே..இல்லே..கிச்சடி !

Option # 4 : சிரிப்பே சிறப்பு : 

ஹெர்லக் ஷோம்சின் - புலனாய்வுப் பூதம் !!

மாறுவேஷ மன்னன் ஹெ.ஷோ. இதுவரையிலும் சிங்கமாய் ; புலியாய். குதிரையாய் ; குரங்காய் வேஷம் போட்டுப் பார்த்திருப்பீர்கள் ; ஆனால் ஒரு பூதமாய் வேஷமிடுவதை பார்க்க ஆசையெனில் நீங்கள் குத்த வேண்டியது கார்ட்டூன் சின்னத்தினில் ! வழக்கம் போல ஜாலியான, லாஜிக் இல்லா காமெடி மேளா !

Positives :

கரடு முரடான ஆசாமிகளாய் சுற்றி வந்து கொண்டிருக்கும் சூழலில், a whiff of humor !! மனதை இலகுவாக்கிட, நம் வீட்டுக் குட்டீஸ்களுக்கும் கதை சொல்லிட - ஏற்றதொரு தேர்வு !

கதை கைவசம் ரெடி ! பேனா பிடிக்க மட்டுமே அவகாசம் தேவைப்படும் !

Negatives : 

'குலுங்கக் குலுங்கச் சிரிக்க மட்டுமே வேணும் ' என்பதே உங்களின் கார்ட்டூன் எதிர்பார்ப்பெனில் கொஞ்சம் கஷ்டமே ! கதையின் concept ; அந்தச் சித்திர பாணி ; கதை நகர்த்தல் - என சகலத்தையும் ஒட்டு மொத்தமாய் ரசித்திட முடிந்தால் தான் இந்த அனுபவம் முழுமையடையும் !

So வேட்பாளர்களின் முக்கியஸ்தர்களை அறிமுகம் செய்தாச்சு !!  மீதமுள்ள ஓட்டுக்களை ; மீதமுள்ள நண்பர்கள் செலுத்திட மேற்படி brief உதவிடின் - நான் ஹேப்பி அண்ணாச்சி !

Bye all ; see you around ! Have a great week !!

Saturday, March 06, 2021

கடன் தீர்க்கும் நேரமிது !

 நண்பர்களே,

வணக்கம். 2 நாட்களுக்கு முன்னே மார்ச் புக்சின் பேக்கிங் பணிகள் மும்முரமாய் நடந்து கொண்டிருந்த பிற்பகல் வேளை அது ! 'பர்ரக்..சர்ரக்' என்று ப்ரவுண் டேப்பால் டப்பிகளுக்கு பிளாஸ்திரி ஓட்டும் ஓசை மட்டும் என் அறைக்கு வந்து கொண்டிருந்தது ! ஏப்ரலில் வரவுள்ள SODA இதழுக்கு பேனா பிடிக்க முயன்று கொண்டிருந்தவன், 'சித்தே உலாத்துவோமே' என்று எழ, முன்னாபீஸில் நம்மாட்கள் கூரியர்களுக்கான பைசா கோபுரங்களைக் கட்டிக் கொண்டிருப்பதை கண்ணாடி வழியாய்ப் பார்த்திட முடிந்தது ! கடந்த 100+ மாதங்களாய் இதுவொரு மாதாந்திரச் சடங்காகிப் போயிருக்கும் நிலையில் - ஏனோ தெரியலை, இம்மாதம் நடந்து கொண்டிருந்த yet another பேக்கிங் படலத்தை இமை தட்டாது பார்த்துக் கொண்டேயிருக்கத் தோன்றியது ! நமது செகண்ட் இன்னிங்ஸ் துவங்கிய பிற்பாடு, ஓராண்டின் திட்டமிடல்  மறு ஆண்டின் மார்ச் வரையிலும் நீண்டு செல்வது இதுவே முதன்முறை என்பது தலைக்குள் லேசாய் ஓட்டமெடுக்க, 12 மாதங்கள் பின்னோக்கி, நினைவுகள் நகர்வதைத் தவிர்க்க இயலவில்லை ! 'எல்லாமே நலம்' என்று ஓடிக்கொண்டிருந்த நாட்டுக்கே  - ஒரு கொடூரத்தின் துவக்கப்புள்ளியாய் ;  மறக்கவியலா ரணங்களின் துவக்க மாதமாய், போன மார்ச் அமைந்து போன ஞாபகங்கள் நிழலாடின ! பெருமூச்சோடு அமர்ந்த போது, இத்தனை களேபரங்களுக்கு மத்தியிலும் நமது பயணம் தட்டுத் தடுமாறியேனும் தொடர்ந்திருப்பதை எண்ணி மேலிருப்பவரையும் ; முன்னிருப்போரையும் நோக்கிக் கரம் கூப்பத் தான் தோன்றியது ! இந்த கொரோனா சூறாவளியில் எண்ணற்ற ஆலமரங்களே தடம் தெரியாது மாயமாகிப் போயிருக்க, ஒடிசலான நாணலாய் நாமெல்லாம் தாக்குப் பிடித்து நிற்பதென்பது, nothing short of a miracle என்றுபட்டது ! புனித மனிடோவுமொரு காமிக்ஸ் காதலரே என்பதை இது நிரூபிக்காது போயின், வேறேது தான் நிரூபிக்கப் போகிறதென்று நினைத்துக் கொண்டேன் !! 

Back to reality - மார்ச்சின் புக்ஸ் தினுசு தினுசாய் உங்கள் முன்னே இறைந்து கிடக்கும் இந்த வேளையில், அவற்றுள் புகுந்திட நிறையப் பேருக்கு இன்னமும் நேரம் கிடைத்திருக்காது என்பதில் no secrets ! அப்படியே நேரம் கிடைத்திடின் - வாசிப்புக்கென இந்த நான்கில் எதை முதலில் தேர்வு செய்வதென்ற கேள்வி உங்கள் முன்னிருப்பின், எனது suggestion இம்மாதத்தில் அறிமுகம் கண்டுள்ள புதியவரான ஸ்டெர்ன் தோன்றும் "வழியனுப்ப வந்தவன்" கிராபிக் நாவலாகத் தானிருக்கும் ! ரொம்பவே impress செய்துள்ள Maffre சகோதரர்களின் உருவாக்கமான இந்த ஆல்பத்தை நான் பரிந்துரைக்க இன்னொரு காரணமும் உண்டு ! ரூ.125 விலையிலான இந்த இதழ் வந்திருப்பது - ரூ.250 விலையிலான "பிரளயம்" கிராபிக் நாவலின் இடத்தினில் ! So நாம் இன்னமும் ரூ.125 விலைக்கான இன்னொரு இதழை 2020-ன் சந்தா நண்பர்களுக்குத் தரக் கடமைப்பட்டுள்ளோம் ! "வழியனுப்ப வந்தவன்" இதழையும், இந்தப் புது வரவு ஸ்டெர்னையும் நீங்கள் சடுதியாக வாசிப்புக்கு உட்படுத்தி, "இவர் ஓ.கே. தான் ; தேறிடுவார் !!" என்ற முத்திரை குத்தினீர்களெனில்,- இவரது ஆல்பம் # 2-ஐ கூடிய சீக்கிரமே வரவழைத்து ; தயார் செய்து,அதனை அந்தக் கடன் தீர்க்கும் ஆல்பமாக்கி விடலாமென்று நினைத்தேன் ! மாறாக, "ஸ்டெர்ன் அத்தினி ஷார்ப் இல்லே மாமூ ; இந்தாள் வோணாம் !!" என்றோ - "ஆசாமி ஓ.கே. தான் ; ஆனால் back to back அவர் ஆல்பங்களே என்பதுலாம் டூ மச்" என்றாலோ  - கடன் தீர்க்க நம் முன்னே உள்ளே இதர options-களைக் கடை விரிக்க வேண்டி வரும் !  

"அந்த options தான் என்னடாப்பா ?" என்று நீங்கள் கேட்டாலும் சரி, கேட்காவிடினும் சரி, சொல்லி வைக்கிறேன் guys !!

நம்மிடம் கையில் பிரெஞ்சு மொழிபெயர்ப்பு சகிதம் தயாராக உள்ள கிராபிக் நாவல்களின் லிஸ்ட் இது :

கதிரவன் கண்டிரா கணவாய் 

விதி எழுதிய வெள்ளை வரிகள்

காலனின் கால்தடத்தில் !

தமிழாக்கத்துக்கு மட்டும் 'தம்' கட்டிடும் பட்சத்தில் இவற்றுள் ஏதேனும் ஒன்றை சட்டுப்புட்டென்று ரெடி செய்து விடலாம் தான் ; மூன்றுமே black & white கி.நா ஆல்பங்களே !!

'இல்லேடா தம்பி, வெய்ய காலம் ஆரம்பிக்குது  ; நீ போடற மொக்கைக்கே தெறிக்குது, இதிலே மேற்கொண்டும்  கி.நா படலம்லாம் தாங்காது'" என்று அபிப்பிராயப்பட்டீர்களெனில் - உங்கள் முன்னே நான் வைத்திடக்கூடிய அடுத்த சாய்ஸ் :

முழுவண்ணத்தில், ஆர்ட்பேப்பரில் - 

இரும்புக்கை மாயாவியின் "கொரில்லா சாம்ராஜ்யம்"

முதன் முதல் பதிப்பின் போது (maybe 1974 ??)கலரில் மிரட்டிய இந்த இதழானது, பின்னாட்களில் black & white-ல் மட்டுமே தலைகாட்டியிருந்தது ! புதுசாய் டிஜிட்டல் கலரிங் செய்யப்பட்டு, நம்மிடம் ஓராண்டுக்கும் மேலாகவே துயின்று வரும் இந்த இதழை அந்த கடன் தீர்க்கும் slot-க்கு நுழைப்பதெனில் செம ஈஸி நமக்கு !! 

ரைட்டு, அதுவும் வேணாம்னா - கார்ட்டூன் பக்கமாய் கொஞ்சம் பார்வைகளை படரச் செய்தால் - this is what we have ready :

ஹெர்லாக் ஷோம்ஸ் - "அலாவுதீனும், ஒரு புலனாய்வுப் பூதமும் "

மெர்ச்சலூட்டும் காமெடி மேளா இது ; ரம்மி ஆடும் அலாவுதீன் விளக்குப் பூதத்துடன் !! இங்கிலாந்தின் டாப் டிடெக்டிவுக்கு இந்தத் தொங்கு மீசை பூதமானது செய்திடும் ஒத்தாசைகளை நீங்கள் ரசிக்கத் தயாரெனில், நாளைக்கே பேனாவில் மசியை நிரப்பி தமிழாக்கத்துக்குள் ரவுண்டடிப்பதே எனது ஜாலியாகிடும் ! 2021-ன் அட்டவணைக்கான இதழே இது ; but no worries at all , அந்த இடத்துக்கு ஹெர்லாக் ஷோம்ஸ் தொடரில் எஞ்சியிருக்கும் ஒற்றை ஆல்பத்தைப் போட்டு man for man நிரவல் செய்திடலாம் !

"அட...கார்டூன்லாம் என் பேரப்புல்லீங்கோ பட்ச்சுப்பாய்ங்க ; யூத்தான எனக்கு ஆவுறா மேரி ஏதாச்சும் சொல்லு வாத்தியாரே !" என்று ரவுண்டு கட்டுகிறீர்களா ? இருக்கவே இருக்காரு நம்ம 'தல' !! 

"பொக்கிஷம் தேடிய பயணம் "

சும்மா கனகச்சிதமா அதே ரூ.125 விலைக்கு கலரில் ரெடியா கீது கையிலே ! எடிட்டிங் செஞ்சு, அட்டைப்படம் மட்டும் அச்சிட்டா - சும்மா 'ஜிலோ'ன்னு தாக்கிப்புடலாம் ! 

இவை தவிர, இன்னும் கொஞ்சம் புது ஆர்ச்சி கதைகள் ; இஸ்பய்டர் / மாயாவி b&w மறுபதிப்புகள் ; மார்ஷல் டிலான் கதை ; புயட்சி அம்மிணி அமாயா கதை ; காரிகன் கதை ; மாண்ட்ரேக் கதை என்றும் பீரோவில் உள்ளன ! ஆனால் இவர்களைக் கொண்டு ரூ.125 கடனை அடைப்பதாயின், நூத்திச் சில்லறைப் பக்கங்களுக்கான கூட்டணி இதழாய்த் தான் தயாரிக்க வேண்டி வரும் ! And அங்கே புராதன மணம் நாசியெல்லாம் அடைக்கும் என்பதிலும் ரகசியங்கள் நஹி ! So not an ideal option !!

தொடரும் நாட்களில் STERN உங்களிடம் ஈட்டிடும் விமர்சனங்களைக் கருத்தில் கொண்டு STERN ஆல்பம் # 2-ஐ களமிறக்குவதா ? வேண்டாமா ? எனத் தீர்மானிக்கவுள்ளேன் ! In the meantime இதர options-களுள் ஏதேனுமொன்று நம்மிடையே ஏகோபித்த ஆதரவைக் காணின், அப்டிக்கா வண்டியைத் திருப்பிட உத்தேசம் ! பார்க்கலாமே !

Before I sign out - பதிவில் நான் நீட்டி முழக்குவதை பாதி படித்து, பாதி படிக்கா நண்பர்களின் பொருட்டு - ஒரு செய்திச் சுருக்கம் போல recap : 

1.2020-ன் சந்தா இம்மாதத்துடன் நிறைவுற்று விட்டது guys ! So ஏப்ரலில் புதுச் சந்தா இதழ்கள் களம் காணும் ! So இன்னமும் சந்தாக்கள் புதிப்பித்திரா பட்சங்களில், please do now !!

2.அப்புறம்  "கழுகு வேட்டை" இதழில் போட்டோவினை இணைக்க  விரும்பும் 2021 சந்தா நண்பர்கள் - please do rush ! மார்ச் 15 வரையே அதற்கான அவகாசம் !

3.மார்ச் இதழ்கள் ஆன்லைன் லிஸ்டிங் செய்யப்பட்டுள்ளன ! லிங்க்ஸ் இதோ :

https://lion-muthucomics.com/latest-releases/675-march-pack-2021.html 

https://lioncomics.in/product/2021-march-pack/



4. சென்னைப் புத்தக விழாவின் கடைசி 3 நாட்கள் தொடரவுள்ளன !! நமது ஸ்டால் நம்பர்ஸ் 105 & 106 !! புது இதழ்கள் உட்பட - ஒரு வண்டி புக்ஸ் உங்களுக்கெனக் காத்துள்ளன ! Please do drop in !!

Bye all ; see you around !! 

IMAGES :


காலனின் கால்தடத்தில்..!

கதிரவன் கண்டிரா கணவாய் 

விதி எழுதிய வெள்ளை வரிகள் 

பொக்கிஷம் தேடிய பயணம் 
ஸ்டெர்ன் 



Thursday, March 04, 2021

பொம்ம பொஸ்தவ தினம் ?

 நண்பர்களே,

வணக்கம். மார்ச் மாதத்து முதல் வியாழன் உலக புத்தக தினமாம் ! எதெதுக்கோ தினங்கள் இருக்கும் போது - இது இருப்பதில் நிச்சயமாய்த் தப்பே நஹி ! ஏப்ரல் 23 தான் சர்வதேச புத்தக தினம் ; இந்த மார்ச்சின் விசால கிழமை சமாச்சாரம் இங்கிலாந்தில் மட்டுமே என்றும் எங்கோ படித்தேன் ! அட,அதுவும் இருக்கட்டும் ; இதுவும் இருக்கட்டுமே ?!  ரைட்டு...எவ்வளவோ புத்தகங்கள் குவிந்து கிடந்தாலும், நமக்கு இந்த 'பொம்ம புக்ஸ்'னா தனி இஷ்டம் எனும் போது - இந்த நாளில் உங்களின் ALLTIME Favorite Comics பற்றிச் சொல்லுங்களேன் ? நமது இதழ்களுள் தான் என்றில்லாது - இங்கிலீஷில் அல்லது இன்ன பிற மொழிகளில் வாசித்த காமிக்ஸ்களையும் இந்த ஆட்டத்துக்குச் சேர்த்துக் கொள்ளலாமே ?

அப்புறம் இன்றைக்கு கூரியரில் கிளம்புகின்றன மார்ச்சின் இதழ்கள் ! மாலை ஆன்லைன் லிஸ்டிங்கும் இருந்திடும் ! So மார்ச்சில் தாமத மார்ச் இம்முறை ; sorry guys !!

மீண்டும் சந்திப்போம் ! Bye for now !!

Wednesday, March 03, 2021

உளவும் கற்று மற !

 நண்பர்களே,

வணக்கம். காத்திருக்கும் ஜம்போ சீசன் 4-க்கென இதுவரையிலும் 4 இதழ்களை மட்டுமே கண்ணில் காட்டியிருந்தோம் ! Numbers 5 & 6 பின்னே அறிவிக்கப்படுமென்று விளம்பரங்களில் பார்த்திருப்பீர்கள் ! 

அவற்றுள் # 5-க்கான தேர்வு ஆச்சு  ; in fact கிராபிக் நாவல் பாணியிலான லக்கி லூக்கின் புது ஆல்பத்தை ஏகமானதாய் நாம் ஏற்றிருப்பின், # 6 ஸ்லாட்டையும் அது எடுத்திருந்திருக்கும் ! ஆனால் 'சீரியஸ் லக்கி அத்தனை சுகப்படவில்லையே !' என்ற அதிருப்தி தலைகாட்டியுள்ளதால், அந்த இறுதி இடத்துக்கான தேடலைத் தொடர்ந்திடுகிறேன் ! சீரியஸ் லக்கி for another day I guess !!

"உளவும் கற்று மற !!" - இதுவே ஜம்போவின் இதழ் # 5 ஆக இருந்திடவுள்ளது ! 'இன்னாடா டேய்...ஊருக்குள்ளாற விவசாயிங்க நாக்குத் தள்ள போராடிக்கிட்டிருக்கும் வேளையிலே நீ உழவை மறக்க சொல்றியே ?' என்று கண்சிவக்க முனைவோருக்கு ஒரு சன்னமான சுட்டிக்காட்டல் - இது "ள" ; not "ழ" ! தலைப்பில் நாம் மறக்கச் சொல்ல நினைப்பது உளவாளிகள் செய்திடும் "உளவு வேலைகளை" ! 

"மாடா ஹாரி" என்ற பெயரைக் கேள்விப்பட்டிருக்கும் நண்பர்களுக்கு - இந்த ஆல்பத்தின் தலைப்பு might ring a bell ! ஐரோப்பாவில் 1900 களின் துவக்கத்தில் ஒரு செம கவர்ச்சிக்கன்னியாய் மேடைகளில் நடனமாடிய அம்மணி இவர் ! ஹாலந்து நாட்டைச் சார்ந்தவர் ; பார்ப்போரை தன் தாராளமயக் கொள்கைகளால் சுலபமாய்க் கவிழ்க்கும் கலையில் தேர்ச்சி பெற்றிருந்தார் ! முதலாம் உலக யுத்தத்தினில் ஜெர்மானியர்களுக்காக உளவு பார்த்திடவும் இவர் துணிந்ததே - வரலாற்றில் இவருக்கு இடம்பிடித்திட உதவியது !! நேச நாட்டுத் துருப்புகளிடம் மாட்டா ஹாரி சிக்கி, ஒரு firing squad முன்னே நிற்க நேர்ந்து கதை முடிந்த வேளையினில் அவருக்கு வயது 41 மட்டுமே ! மாமூலாய் firing squad முன்னே நிற்போருக்கு கண்கள் கட்டப்படுமாம் - மரணத்தை நேருக்கு நேராய்ப் பார்த்திடும் அனுபவம் வேண்டாமே, என்ற எண்ணத்தில் ! ஆனால் மாட்டாவோ அதெல்லாம் வேண்டாம் என்றபடிக்கே, தன்னைச் சரமாரியாய் சுட்டுக் கொல்ல நின்ற பிரெஞ்சு வீரர்களைப் பார்த்து flying kiss அனுப்பியபடியே தோட்டாக்களை வாங்கினாராம் !! இந்தப் பெண் உளவாளியின் கதையே "உளவும் கற்று மற "!!   அட்டகாசமான சித்திரங்கள், பிரமாதமான கலரிங் பாணி என மிரட்டும் இந்த offbeat ஆல்பம் ரொம்பவே சமீபப் படைப்பே ; சூட்டோடு சூடாய் தமிழுக்கு கொணர முனைகின்றோம் ! 

So மாறுபட்ட one shots-க்கான களம் நம் ஜம்போ என்பதை நிரூபிக்க yet another வாய்ப்பாக இதனைப் பார்த்திடுகிறேன் ! நம்பிக்கைகளை நிஜமாக்கிட இந்த ஆல்பம் உதவுமென்ற உறுதி உள்ளுக்குள் இருக்க, இதோ சின்னதாய் ஒரு preview : 









கதை சுழல்வதே கவர்ச்சியினை மூலதனமாக்கியதொரு அழகியைச் சுற்றி எனும் போது ஆங்காங்கே சித்திரங்களில் கொஞ்சம் ஜிலீர் படலங்கள் உள்ளன தான் ; பார்த்திட வேண்டும் அவற்றை எவ்விதம் சமாளிப்பதென்று !

So நமது 2021 சந்தா எக்ஸ்பிரஸ் கிட்டத்தட்ட முழுமை காண்கிறது - இன்னும் ஒரேயொரு ஸ்லாட் மட்டும் நிரவலுக்குக் காத்துள்ளது ! அதற்கென ஒரு வண்டிக் கதைகள் பரிசீலனையில் உள்ளதால் - not too long a wait !!

இன்னமும் சந்தாக்களில் இடம் போட்டிரா நண்பர்களுக்கு இந்தத் தருணத்தில் நினைவூட்டும் கையோடு - "கழுகு வேட்டை" ஹார்டகவர் இதழினில் உங்கள் போட்டோக்கள் இடம் பெற்றிட வேண்டுமாயின் - photos அனுப்பிட இன்னும் 10 நாட்களே உள்ளன என்பதையும் ஞாபகப்படுத்திடுகிறேனே ! மார்ச் 15 க்கு இதழ் அச்சுக்குச் செல்லவுள்ளதால் - அதன் முன்பாய் இப்பணிகள் நிறைவு கண்டிட வேண்டி வரும் ! So please note - மார்ச் 15-க்குள் கிட்டும் போட்டோக்கள் மட்டுமே உங்களது புக்கில் இடம்பிடித்திடும் ! தாமதமாய்க் கிட்டிடும் பட்சங்களில் 'தல' தரிசனம் மட்டுமே காத்திருக்கும் ! 

And before I sign out - சென்னைப் புத்தக விழா பற்றிய மினி update : 

மார்ச் இதழ்கள் தயாரிப்பில் சற்றே தாமதம் காண்பதால், மறுபதிப்பு இதழான "கௌபாய் எக்ஸ்பிரஸ்" இதழை மட்டும் நமது ஸ்டாலுக்கு அனுப்பியுள்ளோம் ! So அந்தப் பக்கமாய் விசிட் அடித்திடும் பட்சத்தில், சவாரி + சவரம் செய்திடும் லக்கியை பார்த்திடலாம் ! அப்புறம் - "சந்தாவுக்கு அனுப்புறதுக்கு முன்னமே, பொது விற்பனைக்கு எப்புடி அனுப்பப் போச்சு ?" என்ற கண்சிவத்தல்கள் வேண்டாமே - ப்ளீஸ் ?! இருப்பது இன்னும் ஒரே வாரம் தான் என்பதால், நன்றாய் விற்கக்கூடிய லக்கியினை மட்டும் சென்னைக்கு அனுப்பியுள்ளோம் - only because its a reprint !

மீண்டும் சந்திப்போம் ! Have a great week !