திகில் இல்லா திகில் !

நண்பர்களே,

கோடைகள் பல தாண்டிய பின்னரும், நினைவில் 'பளிச்' என்று நின்றிடும் இன்னுமொரு இதழை நினைவு கூர்ந்திடும் முயற்சியே இந்தப் புதுப் பதிவு ! 

26 ஆண்டுகளுக்கு முன் - இதே மே மாதம் - நமது திகில் காமிக்ஸில் வெளிவந்திட்ட "பனிமலை பூதம்" உங்களில் எத்தனை பேருக்கு நினைவுள்ளதோ தெரியவில்லை...! ஆனால் இன்றைக்கும் எனது "பிரியமான பிரதிகள்" பட்டியலில் ஒரு பிரதான இடத்தில அமர்ந்திருக்கும் இதழ் இது ! 

திகில் இதழ் நம்பர் 5

வித்தியாசமான முயற்சிகளாய் அமைந்திட வேண்டுமென்ற முனைப்புடன் முதல் 3 இதழ்களையும் வெகு சிரத்தையோடு..சின்னச்சின்ன திகில் சிறுகதைகள்...ஒரு முழு நீள ஹாரர் கதை ; துணுக்குச் செய்திகள் என்று உருவாக்கி இருந்தோம். ஆனால் அன்றைய சமயம், 'ஒரே ஒரு முழுநீளக் கதை' என்றதொரு ரசனையைத் தாண்டி நாம் பிரவேசித்திருக்கா தருணம் என்பதால் இந்தப் புதிய முயற்சிகள் அசகாயத் தோல்விகளை சந்தித்தன ! முதல் இதழ் ஒரு curiosity -ல் முழுவதும் விற்பனையாகி விட்டது ; ஆனால் இதழ் 2 & 3 வாங்கிய தர்மஅடி இன்றைக்கும் நினைவில் நிற்கும் சமாச்சாரம் !  இன்றும் நம் வாசகராய் இருந்திட்டு வரும் ஒரு நண்பர் - துண்டும் துக்கடாவுமாய் கதைகளை வெளியிடுவது "பிச்சைக்காரன் எடுத்த வாந்தி" போல் இருப்பதாகக் கூட அபிப்ராயப்பட்டிருந்தார் - அன்று வந்திட்டதொரு போஸ்ட் கார்டு விமர்சனத்தில்! விற்பனையாளர்கள் தர்மசங்கடத்தில் நெளிந்திட..எனக்கோ எங்கே ஓடி ஒளிந்திடவென்று தெரியாத இக்கட்டு ! 'இது தேறுமா..சொதப்புமா ?' என்ற சந்தேகம் துளியும் இல்லாது - surefire  வெற்றி என்று நான் நினைத்திட்டதொரு ப்ராஜெக்ட் இத்தனை கேவலமாய் உதை வாங்கிடுவதைப் பார்க்கும் திராணி என்னுள் துளியும் இருந்திடவில்லை ! எல்லோரும் ஒருமுகமாய் சொன்ன சங்கதிகள் இவை தான் :

1 .பிட் பிட்டாய் உள்ள கதைகள் வேலைக்கு ஆகாது !    

2.பெரிய சைஸ் வேண்டாம்!!(பாக்கெட் சைஸ் மோகம் நம்மை ஆட்டிப்படைத்த வேளை அது )! 

3.விலை மூன்று ரூபாய் என்பது ரொம்ப ஜாஸ்தி !! 

So "Operation அந்தர்பல்டி" துவங்கிட்டது - முழு மூச்சாய் ! இதழ் நம்பர் நான்கில் மேற்படிக் குறைகள் அனைத்தையுமே நிவர்த்தி செய்ய முனைந்திருந்தேன் ! ஒரே முழுநீளக் கதையாக :பிசாசுக் குரங்கு" வெளியானது ; பெரிய சைஸ்-க்கு கல்தா கொடுத்து விட்டு புதிதாய்..ஒரு ரெண்டும்கெட்டான் சைஸ் -க்கு இறங்கி வந்திருந்தோம் ; ரூபாய் 2 .25 விலையில் !! அந்த வரிசையில் வந்திட்ட மறு இதழே - இந்தப் பதிவின் நாயகம் ! 

பெயரில் மட்டுமே (நிஜத்) திகிலைக் கொண்டிருந்த இந்த இதழின் முதற்பக்கமே...அடுத்து வரவிருந்த இரத்தப் படலத்தின் விளம்பரம் ! நண்பர் XIII பணக்குவியலை உற்றுப் பார்த்து நிற்கும் பரிச்சயமான சித்திரம் அன்றே ஒருவித எதிர்பார்ப்பை..வினாக்களை உண்டு பண்ணியது ! ஆனால் இத்தனை நீளமானதொரு தொடர் என்பதோ ; இத்தனை impact தந்திடப் போகும் கதைதொடர் என்பதையோ அன்று நான் துளியும் அறிந்திருக்கவில்லை !

"பனிமலை பூதம்" ஒரு சராசரி ஆக்க்ஷன் கதையே ."ஆஹா.ஒஹோ' வென்று சிலாகிக்கும் சங்கதிகள் அதில் அதிகம் கிடையாதென்ற போதிலும் - சுவாரஸ்யமான கதையே ! Fleetway நிறுவனத்தின் Action Library என்றதொரு தொடரிலிருந்து வந்திட்ட கதை இது ! இதோ அதன் முதல் பக்கத்தின் (சுமாரான) எனது ஸ்கேன் !

அழகாய் பாக்கெட் சைசில் வெளியிட்டிட வசதியான format -ல் இருந்திட்ட கதையை புதிய சைசுக்கு ஏற்றபடி அமைத்திட 'கச்சா முச்சா' வென எங்களது லைன் டிராயிங் ஆர்டிஸ்ட்கள் முயற்சித்திருந்தனர் !

18 பக்கங்களில் நிறைவுறும் இந்தக்கதையின் கீழே சின்னதொரு பெட்டிக்குள் பிரசுரமாகி இருந்த அன்றைய "வாசகர் கடிதங்களை" பாருங்களேன்!போஸ்ட் கார்ட்களில் வந்திடும் அன்றைய விமர்சனங்கள் ஆழமாய் இருந்திடாத போதிலும் அழகாய் இருப்பது வழக்கம் ! நம் போஸ்ட்கார்ட் விமர்சகர்களில் எவரேனும் இங்கே இருக்கிறீர்களா என்று தெரிந்திட ஆவல் எனக்கு - கையைக் கொஞ்சம் தூக்குங்களேன் சார்(s) !

சராசரியாய் ஒவ்வொரு இதழுக்கும் குறைந்த பட்சம் 50 கடிதங்கள் வந்திடும் ; அவற்றில் எதை வெளியிடுவது என்று தேர்ந்தெடுப்பது ஒரு சுவாரஸ்யமான பணியாக இருக்கும் ! "இவர் பெயர் ஏற்கனவே போன மாசம் வந்திருச்சு...திரும்பவும் வேண்டாம் " என்று அச்சுக் கோர்க்கும் எங்களது கம்பாசிடர் சொல்லிட்டால் அந்த விமர்சனம் reject ! So தபால் போட்டுவிட்டு ஆவலாய் இதழைப் பார்த்து தம் பெயரைக் காணாது அன்று வருந்திய நண்பர்கள் இங்கே இருப்பின் -  அதற்கான பழி முழுவதும் என்மேல் மாத்திரம் கிடையாது என்பதை சொல்லி வைக்கிறேன் !

தொடர்ந்திட்டது திகில் சிறுகதை "பிசாசு நடனம்" ! Fleetway  நிறுவனத்தின் "Misty " வார இதழில் ஆங்கிலத்தில் வெளி வந்திருந்த சிறுகதை இது ! அட்டகாசமான அதன் opening shot அட்டைபடத்திற்குப் பிரமாதமாய் அமைந்திடும் என்று நினைத்திருந்தேன் - எதிர்பார்த்தபடியே நம் ஓவியர் பின்னி பெடல் எடுத்திருந்தார் ! இங்கே வெளியிட்டுள்ள அட்டைப்படத்தின் scanning  தரம் வெகு சுமார் என்பதால் அவரது திறமைக்கு இது முழு நியாயம் செய்திடவில்லை என்பதே மெய் ! பின்னட்டையில் லயனின் கோடை மலர் விளம்பரம் வெளியிட்டிருந்தேன் !  இது பிரபல ஆங்கில எழுத்தாளரான Alistair Maclean எழுதிட்ட "ICE STATION ZEBRA " என்ற சூப்பர் ஹிட் நாவலின் அட்டைப்படத்தின் உல்டா !

நமது ஓவியரின் தயாரிப்பு இது...

அசல் 

அதைத் தொடர்ந்தது "விசித்திர உலகம் இது" என்றதொரு நிஜ சம்பவ மர்மங்கள் பற்றியதொரு தொடர்......!

"மெல்லிசையா.மரணத்தின் இசையா?" என்றதொரு கட்டுரையுடன் ! இதனை எழுதி இருந்த "டாக்டர் லோகநாத்" வேறு யாருமல்ல-எனது தந்தையே ! கிறிஸ்துமஸ் அன்று பிறந்த அவருக்கு எங்கள் பாட்டி "லோகநாதன்" என்று ஒரு பெயரும் வைத்திருந்தாராம் ! அந்தப் பெயரில் (கொஞ்ச காலமே வந்திட்ட) இந்தத் தொடரை எழுதியது என் தந்தையே ! 


இதழின் கடைசிக் கதையாக வந்திருந்ததும் கூட..இன்னுமொரு Fleetway தயாரிப்பே ! ஏஜெண்ட் ஜான் ஸ்டீல் துப்பறியும் "நாளை உனது நாள்" என்ற முழு நீளத் த்ரில்லர் - 1960 களின் ஒரு தயாரிப்பு.எனக்கு ரொம்பவும் பிடித்த ஹீரோக்களில் ஜான் ஸ்டீலும் ஒருவர் ; and  இந்தக் கதையின் யதார்த்தம் நான் மிகவும் ரசித்த விஷயம் ! 21 பக்கங்களில்...பாரிஸ் நகரில் நடந்தேறும் இந்தத் த்ரில்லரும் கூட பாக்கெட் சைஸ்-க்கு ஏற்ற வடிவத்தில் இருந்தது. பிரயத்தனப்பட்டு பெரிய சைசுக்கு மாற்றி இருந்தோம்.

இந்த இதழில் எனக்குப் பிடிக்காது போன சங்கதி...உள் அட்டைகளில் எதுவுமே அச்சிடாமல் வெள்ளையாக விட்டுவிட்டது ! அன்றைய சமயம் இதழின் விலையினை கட்டுக்குள் வைத்திருக்கும் பொருட்டு மலிவான...ஆனால் வார்னிஷ் போட்டிடும் போது நன்றாகத் தோன்றிடும் Glazed  Newsprint எனும் காகிதத்தைப் பயன்படுத்தி வந்தோம். மெலிதாய் இருந்திடும் இந்தப் பேப்பரில் அச்சிடுவது என்பது மண்டை காயும் சமாச்சாரம்! So முன்பக்கம் அச்சிடுவதற்குள் பிராணனின் பாதி போயே போய் இருக்கும் ! இந்த அழகில் மறு பக்கம் வேறு அச்சிடவா ? என்ற கடுப்பின் பிரதிபலிப்பே இந்த வெள்ளைப் பக்கங்கள் !

இந்த இதழ் உங்களில் எத்தனை பேரிடம் உள்ளது...எத்தனை பேர் படித்திருப்பீர்கள் என்று தெரிந்து கொள்ள ஆர்வம் ! இந்த இதழ் வெளி வந்த போது பூமியினில் காலடியே வைத்திருக்காத நண்பர்களும் இங்கே இருக்கத் தான் வேண்டும் !! அவர்களுக்கும் இந்த (புராதன)  இதழ் பற்றிய பதிவு உற்சாகத்தைத் தந்திட்டா ல்  எனக்கு சந்தோஷமே !

அடுத்த சில நாட்களில் மீண்டும் ஒரு (புதிய) பதிவோடு சந்திக்கிறேன் ! Adios till then guys.....!

ஒரு காமிக்ஸ் ஞாயிறு ......!

நண்பர்களே,

திரும்பிய பக்கமெல்லாம் வசீகரமாய்ச் சிரிக்கும் Tintin மண்ணின் மைந்தனாய்ப் பாவிக்கப்படும் பெல்ஜியத் தலைநகரான Bruxelles-லிருந்து இந்தப் பதிவினை எழுதுகிறேன் !

Tintin & Snowy

 காமிக்ஸ்களில் ; சாக்லட்களில் ; தோரணங்களில் ; ரயில்நிலையத்தின் உட்சுவர்களில் என்று எங்கே சென்றாலும் துரத்தும் டின்டின் இன்னமும் நம் தமிழுக்கு வந்திடும் வேளை வந்திடவில்லை  - ஆனால் வேதாளத்தை மரத்திலிருந்து இறக்கிட தளராது நடை பயின்ற விக்ரமாதித்தன் போல் நானும் தம் கட்டி முயற்சித்துக் கொண்டே இருப்பேன். வண்ணம் ; சர்வதேசத் தரம் ; 'கெத்தான' விலை என்று டின்டின் பதிப்பகத்தினர் எதிர்பார்க்கும் சங்கதிகளில் முக்காலே மூன்று வீசம் இப்போது நம் அருகாமையில் ! விற்பனை எண்ணிக்கை மட்டும் இன்னும் சற்றே முன்னேறி விடும் நாள் டின்டின் நம்மோடு தமிழில் கை குலுக்கிடும் நாளாக இருந்திடும் !

நான் அமர்ந்திருக்கும் இன்டர்நெட் சென்டரிலிருந்து பார்த்தால் Tintin மண்டையினை மேலே தாங்கிப் பிடிக்கும் Lombard காமிக்ஸ்   நிறுவனத்தின் அலுவலகம் தெரிகிறது !

காமிக்ஸ் தலைநகரம் !

டின்டின் வெளியிடும் நிறுவனத்திற்கும் Lombard நிறுவனத்திற்கும் தொடர்பில்லை எனினும், "டின்டின் " என்ற பெயரில் எக்கச்சக்க ஆண்டுகளாய் ஒரு அற்புத காமிக்ஸ் இதழ் நடத்தி வந்த நிறுவனம் என்பதால் டின்டின் & snowy இவர்களது அலுவலகக் கூரையில் ஒய்யாரமாய் ஊஞ்சலாடுகிறார்கள் ! 

பிரெஞ்சு மொழியில் காமிக்ஸ் இதழ்

 எட்டு கழுதை வயசாகும் சங்கதியினை இது போன்ற சந்தர்ப்பங்களே நினைவுக்குக் கொண்டு வருகின்றன ! இதே அலுவலகத்திற்கு தம்மாத்துண்டு மீசையோடு ; கையில் பர்மா பஜார் பிரீப் கேஸ் சகிதம் ,  கோட் தைக்கப் பிரியப்பட்டதொரு மவுண்ட் ரோடு டைலரின் பரீட்சார்த்த முயற்சியினை அணிந்து நான் வந்தது - 27 ஆண்டுகளுக்கு முன்னர் என்பதை தலை சொல்லிடும் போது, உள்ளம் வேண்டாவெறுப்பாய்  ஏற்றுக் கொள்ள வேண்டிய கட்டாயம் ! ஆனால் காலம் புரட்டிப் போட முடியா ஒரே சங்கதி நம் காமிக்ஸ் காதல் மட்டுமே என்பதை என் கையில் உள்ள பையும்..அதனுள்ளே உள்ள காமிக்ஸ்களும் உணர்த்திடும் போது மெய்யான சந்தோஷம் என்னுள் !

லார்கோ வின்ச் இதழ்கள் சந்தாக்களுக்கு முமுமையாக அனுப்பியாகி விட்டது என்று அலுவலகத்தில் சனிக்கிழமை கேட்டுத் தெரிந்து கொண்டேன். கூரியர் & பதிவுத் தபாலில் மட்டுமே இதழ்கள் அனைத்தும் அனுப்பப்பட்டுள்ளன என்பதால் transit -ல்  தவறிட வாய்ப்புகள் குறைவே.இது வரை வந்துள்ள விமர்சனங்கள் ஒரு வழிகாட்டியாகக் கருதிடுவதென்றால்  லார்கோ நம்மிடையே அதிரடியான impact ஏற்படுத்திவிட்டார் என்பது சந்தேகமில்லா நிஜம் ! வேற்று மொழியில் சக்கை போடு போட்டதொரு திரைப்படத்தை தமிழில் ரீமேக் செய்யும் போது - வெற்றிக்கு ஒரு பாதி உத்திரவாதம் உண்டு என்பது போல் - ஆங்கிலத்தில் Cinebooks நம் லார்கோவை அதிரடி செய்ய அனுமதித்து 'இவர் நிச்சயம் தூள் கிளப்பும் ஆசாமி ' என்ற தைரியத்தை நிறையவே கொடுத்திருந்தார்கள் எங்களுக்கு! So தயக்கங்களின்றி லார்கோவை களம் இறக்கச் செய்திடுவதற்கு Cinebooks ஆங்கில இதழ்களும் ஒரு பிரதான காரணமே ! அவர்களுக்கு நம் நன்றிகள் !

மாறுபட்ட  விலைகள்  பற்றி மாறுபட்ட பல சிந்தனைகள் என்ற போதிலும் பெரும்பான்மையினர் இதே தரத்தைத் தொடர்ந்திடுவதில் தான் நாட்டம் கொண்டுள்ளனர் என்பது தெளிவாகத் தெரிகின்றது !  என்னைப் பொறுத்த வரை தரத்தில் compromise செய்வதாகத் துளியும் எண்ணமில்லை. நான் இன்னமும் அசை போட்டிடும் ஒரே விஷயம் : 

• ரூபாய் 100 விலையில் இரு கதைகள் வண்ணத்தில்+ கொஞ்சம் கருப்பு வெள்ளை என்ற இதே பாணியைத் தொடருவதா ? 
• அல்லது மாதம் ஒரு 50 ரூபாய் இதழ் (1 கதை வண்ணத்தில் + சிறிது black & white) 

 என்று streamline பண்ணிடுவதா என்பது மட்டுமே ! கைவசம் உள்ள 4 கருப்பு வெள்ளை இதழ்கள் 10 ரூபாய் விலையில் வந்திடும் (புதிய வெளியீடுகளின்) கடைசிப் பிரசுரங்கள் ! இனி எப்போதாவது மறுபதிப்பு செய்திடும் சமயங்களில் மட்டுமே இந்த  விலை ; இந்த format பார்த்திட இயலும்.So, let's savour them for now guys !  

அப்புறம் இன்னொரு அதிரடி சேதியும் கூட .... !

லார்கோவின் வண்ண வானவேடிக்கைகளைப் பார்த்த கையோடு    அடுத்து நமது முத்தான மூவரை சூப்பர் ஹீரோ சூப்பர் ஸ்பெஷலில் ; கருப்பு வெள்ளைப் பாணியில் ; புராதனக் கதைகளோடு கொணர்வதில் எனக்கே கொஞ்சம் தயக்கமாய் உள்ளது ! (கனவுகளின் காதலர் 'அட்ராசக்கை' ; 'அட்ராசக்கை' என்று உற்சாகத்தில் குரல் எழுப்புவது உங்களுக்கும் கேட்டுடுச்சா :-)  ) 

முன்னரைப் போல் கடைகளில் நம் இதழ்கள் விற்பனை ஆகிடும் பட்சத்தில் - பிடிக்காததொரு இதழ் வெளியாகும் சமயம் அதனை சும்மா ignore செய்து விட்டுப் போய்க் கொண்டே இருக்கலாம் ! வாங்கிட வேண்டுமென்ற கட்டாயங்கள் நிச்சயம் இருந்திருக்காது ! ஆனால் இப்போதோ நாம் நேரடி விற்பனை முறையில் இருக்கிறோம் என்பதால் - பிடிக்காத இதழாய் இருக்கும் பட்சத்திலும் கூட  உங்கள் 100 ரூபாய் பிளஸ் கூரியர் பணம் கோவிந்தாவாகிவிட வாய்ப்புள்ளது. So கொஞ்சமும் பிசிறின்றி ; உங்கள் பணத்திற்கான தரத்தை வழங்க வேண்டுமென்ற பொறுப்பு எங்களுக்கு அதிகமாகி உள்ளது ! சூப்பர் ஹீரோ சூப்பர் ஸ்பெஷல் தனி இதழாக வெளியிடுவதா...அல்லது அவ்வப்போது வந்திடும் வண்ணக் கதைகளோடு மாயாவி ;ஆர்ச்சி ஸ்பைடர் கதைகளை ஒன்றொன்றாய் ஒட்டுச் சேர்த்திடலாமா?KK-ன் கருத்து இங்கே ஏற்கனவே பதிவாகி விட்டதென்பதால்,அவர் நீங்கலாய் மற்ற நண்பர்கள் அனைவரும் கொஞ்சம் தெளிவு தந்திட உதவிடுங்களேன் !  அதற்காக சூப்பர் ஹீரோ கதைகளை முழு வண்ணத்தில் போடலாமே என்ற suggestions வேண்டாமே ப்ளீஸ் ? நடைமுறைக்குச் சாத்தியப்படா விஷயம் அது !

அப்புறம் லார்கோவின் அறிமுகத்தைத் தொடர்ந்து புதிதாய் கொஞ்சம் கார்ட்டூன் கதைத் தொடர்களையும் அறிமுகப்படுதினாலென்ன என்று நண்பர் Ramesh கேள்வி  எழுப்பி இருந்தார்... நிஜமான ஆதங்கமே !  என்னைப் பொறுத்த வரை கார்ட்டூன் தொடர்களில் ஆழம் இல்லாது போகும் பட்சத்தில் அவற்றை அதிகம் ரசித்திட இயலாது. பெயரளவில் மாத்திரம் கார்டூனாக உள்ள தொடர்கள் நிறையவே உள்ளன - ஏன் லக்கி லூக் கதைகளிலேயே ரொம்பவும் கவனமாய்க் கதைகளைத் தேர்வு செய்யாவிடின் சொதப்பலான ஒன்றிரண்டு வந்து சேரும் அபாயம் உண்டு. Cinebooks ஆங்கிலத்தில் வெளியிட்ட லக்கி லூக் கதைத் தேர்வுகள் ரொம்பவே சுமார் என்பது எனது அபிப்ராயம். So நிஜமாய்த் தரமான  கார்ட்டூன் தொடர் கண்ணில் படும் சமயம் நிச்சயம் அவற்றை மிஸ் பண்ணிட மாட்டேன் !

அது சரி... ஆங்கிலத்தில் அசாத்திய வெற்றி பெற்ற ASTERIX & OBELIX கார்ட்டூன்  தொடர்களைப் பற்றி உங்களில் எவருமே அதிகமாய் கேள்வி எழுப்பியதில்லியே   ? எனது சின்ன வயது favorites -களில் இத்தொடருக்குப் பெரியதொரு அபிமானம் உண்டு !

ASTERIX & OBELIX

வயிறு பசியில் உறுமும் சமயம் துவங்கி விட்டதால் இப்போதைக்கு விடை பெறுகிறேன் guys  ! IPL மேட்ச்கள் ..மின்வெட்டு ... அக்னி நட்சத்திரப் புழுக்கம் எண்ணெய் வழியும் முகம் என்பதெல்லாம் வேற்று மண்டலத்து சங்கதிகளாய்  இந்த தேசங்களில் புலப்படும் போதிலும் ஊர் திரும்பும் நாளுக்குக் காத்திருக்கிறேன் ! Can't wait to be back home...இன்னமும் லார்கோவை கூட நான் பார்த்திடவில்லையே !

 

சிறகடிக்கும் சிந்தனைகள்..

நண்பர்களே,

சின்னதாய் ஒரு எச்சரிக்கை ! புதிதாய் ஏதேனும் அறிவிப்பைத் தாங்கியோ....பழையதொரு இதழை அசைபோட்டோ நான் எழுதிடும் வழக்கமான பக்கமல்ல இது ! சமீபமாய் என்னை "விடாது கறுப்பு" பாணியில் துரத்தி வரும் மொபைல் இன்டர்நெட்டின் படுத்தல்களின் புண்ணியத்தால் இங்கே அதிகம் தலை காட்ட முடியாது போயிட்டது ! So இடைப்பட்ட நாட்களில் எங்கள் பக்கம் நடந்தேறிய சங்கதிகள்...என் மண்டைக்குள் ஓடிய சிந்தனைகள்...இங்கே நண்பர்கள் பலரும் எழுதி வரும் பின்னூட்டங்களுக்கு எனது பொதுவான பதில்கள் என்று ஒரு கலவையானதொரு பதிவு இது !எதிர்பார்ப்புகளின்றிப் படித்தால் நிச்சயம் மொக்கையாகத் தோன்றாதென்று நம்ம்ம்பி எழுதுகிறேன்! Fingers crossed ! 

"வசந்த காலத்து ஐரோப்பாவின் அழகே அழகு" என்று நான் ஆரம்பித்தால் 'இது ஏதோ பயணக் கட்டுரைடா சாமி'  என்று உங்களில் முக்கால்வாசிப் பேர் குதிங்கால் பிடறியில் அடிக்க ஜூட் விடுவீர்கள் என்பது நான் அறிந்ததே ! இருப்பினும் அந்த தேய்ந்து போன டயலாகை கைவிட்டிட இயலா சூழ்நிலை.நான்கு ஆண்டுகளுக்கொரு முறை ஜெர்மனியில் அச்சுத் தொழிலின் தலைசிறந்த நிறுவனங்கள் தத்தம் புதுக் கண்டுபிடிப்புகளை , நவீனங்களை showcase செய்திட DRUPA என்றதொரு பிரம்மாண்டமான show நடத்திடுவது உண்டு. 

Dusseldorf நகரில் தற்சமயம் நடந்து வரும் இந்த ராட்சசக் கண்காட்சியினை பார்வையிடச் சென்ற மக்கள் வெள்ளத்தில் 'பராக்குப்' பார்த்திடச் சென்ற நானும் ஐக்கியம் ! Dusseldorf நகரில் தற்சமயம் ரூம் எடுத்துத் தங்கிட வேண்டுமெனில் சொத்து பத்துக்களை விற்றுக் கொண்டு வந்தால் தான் ஆயிற்று என்பதால்..அருகாமையில் உள்ள Cologne நகரில் ஜாகை எனக்கு!நகரின் மையத்தில் உள்ள அற்புதமான தேவாலயத்தின் படிகளில் அமர்ந்து, மாலை ஒன்பது மணி வரை இதமாய் முகம் காட்டும் சூரிய வெளிச்சத்தை ரசித்துக் கொண்டே எனது லேப்டாப்பில் இந்தப் பதிவை 'லொட்டு லொட்டென' தட்டிக் கொடுத்து தயாரிக்க முனைந்து கொண்டிருக்கிறேன்!

Cologne Dome

"முத்து காமிக்ஸ் Surprise ஸ்பெஷல்" கிடைக்கப் பெற்ற நண்பர்கள் அட்டகாசமாய் review செய்து வருவதை படித்திடும் போது மனதுக்கு நிறைவாக இருந்தது ! லார்கோ வின்ச் கதைகள் எத்தகைய சவாலாய் அமைந்திட்டது என்பதைப் பற்றி "காமிக்ஸ் டைம் "  பகுதியில் எழுதி இருந்தேன்...இங்கேயும் அது பற்றிப் பேசி இருந்தோம்!கதாசிரியர் Van Hamme தன் மனதில் உருவாக்கிட்ட அந்த லார்கோவை துளியும் சேதமில்லாது உங்களிடம் கொண்டு வந்து சேர்த்திட வேண்டுமென்ற வேட்கை மட்டுமிலாது, பிரெஞ்சில்,ஆங்கிலத்தில் இக்கதைகளைப் படித்துள்ள நம் நண்பர்கள், தமிழ் version படித்திடும் போது துளியும் எமாற்றமடையக் கூடாதென்ற அவா என்னுள்.இன்னும் பரவலாய் விமர்சனங்கள் வந்த பின்னரே எங்கள் முயற்சிகளுக்கு மதிப்பெண் போட்டிட முடியுமென நினைக்கிறன் !இங்கே ஒரு கொசுறு செய்தியும் கூட...! நான் சிவகாசியிலிருந்து கிளம்பியது 10 நாட்களுக்கு முன்னர் என்பதால் உள் இன்னர் பக்கங்கள் அச்சான போது மட்டுமே பார்க்க முடிந்தது. Complete ஆன முழு இதழை நான் இன்னமும் பார்க்கவில்லை ! So இன்னமும் இதழ் கைக்குக் கிடைக்கப் பெறாத நண்பர்கள் கொஞ்சம் ஆறுதல் கொண்டிடலாமே - துணைக்கு நானும் இருக்கிறேன் என்று!!


சிவகாசியில் ஆண்டுக்கு மூன்று பொங்கல்கள் கொண்டாடுகிறோம் என்பது நிறையப் பேருக்குத் தெரிந்திருக்க வாய்ப்பில்லை தான் ! தைப் பொங்கல் எப்போதும் போல் ; பங்குனியில் அம்மன் கோவில் பொங்கல் ; மூன்றாவதாய் சித்திரையில் இன்னுமொரு அம்மன் கோவில் பொங்கல் என்று சிவகாசியே திருவிழா கோலத்தில் தற்போது உள்ளது ! ஞாயிறு துவங்கி புதன் முடிய விடுமுறைகளே எங்களுக்கு.இருப்பினும் எங்களது ஊழியர்கள் பைண்டிங்கில் இருந்து வந்திட்ட முதல் batch பிரதிகளை அனுப்பிடும் பொருட்டு வேலைக்கு வந்திருந்தனர் ! நம் வாசகர்களில் பெரும்பான்மைக்கு என்னைத் தெரியுமோ இல்லையோ..எங்களது நிறுவனத்தில் 35 + ஆண்டுகளாய்ப் பணியாற்றிடும் ராதாக்ருஷ்ணன், குரல் அளவிலாது உங்களில் அனைவருக்கும் பரிச்சயமானவர் என்பது நான் அறிவேன் ! எதற்கும் அயராத இவரோடு பணியாற்றுவது சமீபத்திய addition ஆன Ms ஸ்டெல்லா மேரி ! பணியில் ஆர்வமும் ; சலிப்பின்றி தொலைபேசி அழைப்புகளுக்குப் பதில் சொல்லிடும் நேர்த்தியும் இந்த சின்னப் பெண்ணின் பிளஸ் points ! அத்தோடு தயாரிப்புப் பணிகளின் பக்கம் சர்வமுமாய் இருந்திடும் மைதீன் எங்களது மிகப் பெரிய பலம் ! கதைகளை அச்சுக்கோர்வை செய்திடும் கம்ப்யூட்டர் டிசைன் ஆர்டிஸ்ட்களை தாஜா செய்து பணிகளை முடித்துக் கொண்டு வருவதில் துவங்கி..அச்சுப் பிரிவினில் வேலை வாங்கி ; பைண்டிங்கிற்கு நடையாய் நடந்திடுவது என்று இவர் ஒரு ஆல்-இன் -ஆல் அழகுராஜா !அவர்களுக்கு நிச்சயம் உங்கள் பாராட்டுகளில் பெரும் பங்கு சாரும் !

நாளை (வியாழன்) அடுத்த batch பிரதிகள் அனுப்பிடுவோம் ! நிச்சயம் இவ்வார இறுதிக்குள் அனைவருக்கும் இதழ்கள் கிடைத்து விடும் ! (அயல்நாட்டு வாசக நண்பர்களுக்கு முதல் batch-ன் போதே அனுப்பியாகி விட்டது ) !கொஞ்சம் கொஞ்சமாய் புதுப் பாணிக்கு..தயாரிப்புகளுக்குப் பரிச்சயமாகி வருகின்றோம் நாங்கள்.விரைவில் பைண்டிங் தாமதங்களை கட்டுக்குள் கொண்டு வந்திட்டால், ஒரே நாளில் அனைவருக்கும் இதழ் அனுப்பிட சாத்தியமாகிடும் !  அந்நாள் நிச்சயம் தொலைவில் இல்லை !

அப்புறம், வண்ணத்தில் காமிக்ஸ் பற்றி Youtube பதிவோடு Tamil Comics Lover எழுதி இருந்தார் !  2008 -ல் upload செய்திடப்பட்ட வீடியோ அது என்பதைக் கவனிக்க முடிந்தது. ! சந்தேகமின்றி கவலை தரும் விஷயமே ! இந்தத் தயாரிப்புகள் பற்றி முழுதாய் விபரம் தெரிந்திடாமல் நான் இப்போது சொல்லிடும் எந்தக் கருத்தும் பொருத்தமாய் இருந்திடாது ! So ஊருக்குத் திரும்பிய பின்னர் இது பற்றி நிச்சயம் விசாரித்திடுவேன் ! அது வரை கொஞ்சம் பொறுமையாய் இருப்போமே..ப்ளீஸ் ?

இங்கே எக்கச்சக்கமான இயக்கங்கள் (லார்கோ நற்பணி ; சூப்பர் ஹீரோஸ் மன்றம் ; டைகர் அணி ) உருவாகி இருக்கும் அழகை ரசிக்காது இருக்க முடியவில்லை ! கள்ள வோட்டும் போட்டு விட்டு அதை ஒப்புக் கொள்ளும் அந்த நல்ல உள்ளங்களின் ஆர்வத்திற்கு நிச்சயம் பலனில்லாது போகாது :-) விரைவில் சில அதிரடி அறிவிப்புகள் இது சம்பந்தமாய் வந்திடும் !  பொறுத்திருந்து பாருங்களேன் !

அடுத்தடுத்து கூடுதல் விலையில் இதழ்கள் வந்திடுவது ஒரு சிரமத்தை உண்டாக்குமா ; இல்லையா என்ற கேள்வியினை தொடரும் நம் இதழ்களிலும் எழுப்பிடவிருக்கிறேன் ! இன்னும் கொஞ்சம் புதிய சந்தாக்கள் சேகரிக்க முடிந்திடும் பட்சத்தில் ஆண்டொன்றிற்கு எங்களால் கணிசமான அளவு இதழ்களை வெளியிட முடியுமென்ற நம்பிக்கை எனக்குள் திடமாய் உள்ளது ! "Gift a Subscription" என்ற பாணியில் உங்களுக்குப் பரிச்சயமானவர்களுக்கு நீங்கள் சந்தா செலுத்திடும் திட்டத்தை நடைமுறைப்படுத்தலாமா என்ற எண்ணமும் உள்ளது ! தட்டுத் தடுமாறிக் கிடந்த நம் காமிக்ஸ் தற்சமயம் எட்டிப் பிடித்திருக்கும் ஒரு வேகத்தை தொய்வின்றித் தொடர்ந்திட உங்கள் உதவி எப்போதையும் விட இப்போது தேவை நண்பர்களே ! உங்கள் ஆர்வத்தை exploit செய்து கல்லா கட்ட நினைக்கிறோமென்று தவறாய் எண்ணிட மாட்டீர்களென்ற நம்பிக்கையில் உங்கள் முன் கோரிக்கையினை வைக்கின்றேன் !

உங்களின் பாக்கெட்டுக்கு சேதாரத்தை சற்றே மட்டுப்படுத்திட வேண்டுமெனில் லார்கோ வின்ச் ; லக்கி லூக் ; டைகர் ; சிக் பில் போன்ற கதைகளை ஒற்றை இதழாய் வெளியிட்டால் குறைந்த பட்சம் Rs .45 - என்று விலை நிர்ணயம் செய்திட முடியும். 48  முழு வண்ணப் பக்கங்கள் பிளஸ் கொஞ்சமாய் கறுப்பு வெள்ளை பக்கங்கள் இருந்திட முடியும் அப்படிப்பட்டதொரு இதழில் ! அட்டைப்படம் சற்றே மெல்லிய அட்டையில் வந்திடும். இந்த option ஓ.கே என்று நினைத்தால் மாதம் ஒரு இதழ் என்பது சுலபமாய் சாத்தியமே ! ஒரு trial பார்ப்போமா அது போல ?

இதில் ஒரே சிக்கல் என்னவென்றால் லார்கோ வின்ச் தொடரில் அனைத்துக் கதைகளுமே இரு பாகங்களில் நிறைவுறும் ரகம் ! So ஒற்றை இதழாய் லார்கோவை வெளியிடும் பட்சத்தில் கதை அந்தரத்தில் தொங்கிக் கொண்டிருக்கும் - இரண்டாம் பாகம் மறு மாதம் வந்திடும் வரை ! So லார்கோ மட்டும் சிங்கள் சிங்கமாய் வந்திடாமல் doubles அடிக்க அவசியப்படும் ! அப்புறம் புதிதாய் இன்னும் சில கதைத் தொடர்களைத் துரத்திச் சென்று கொண்டிருக்கிறேன்...! இவ்வாண்டின் பாக்கி இதழ்கள் அனைத்தையும் பிளான் செய்து முடித்த பின்னர் புதுத் தொடர்களை 2013 -க்கு அதிரடியாக வைத்துக் கொள்ளலாமென்று திட்டம் ! So வாண வேடிக்கைகள் தொடரும் !!

'என்ன எழுதினேன் ?' என்று தெரியாமலே இத்தனை நேரம் ஏதேதோ எழுதி இருக்கிறேன் ! நாளைக் காலை இதை நானே படிக்கும் போது அசடு வழியப் போகிறேனா தெரியவில்லை ! முன்னமே சொன்னது போல் இது ஒரு light  hearted பதிவு மட்டுமே ! Take care guys !

 

எதிர்பாராததை எதிர்பாருங்கள் !!

நண்பர்களே,

மொக்கையானதொரு இன்டர்நெட் லிங்க் கடுமையானதொரு எதிரி என்பதை அனுபவப்பூர்ணமாய் உணர்ந்து கொண்டே இப்பதிவை எழுதுகின்றேன் ! என் சிந்தனைகள் சீராய் ஓடிடும் சமயம், எனது வயர்லெஸ் நெட் கோபித்துக் கொள்ள....அது நிதானத்துக்கு வந்திடும் தருணத்தில் நான் மோட்டு வளையத்தை முறைத்துப் பார்த்த கதை தான் !! எனினும், here goes ... !

எனது கடைசிப் பதிவில், உங்கள் பக்கமாய் ஒரு Surprise வரக் காத்துள்ளதெனக் குறிப்பிட்டிருந்தது நிச்சயம் நினைவிருக்கும் ! அந்த surprise  இதோ..இங்கே..!  

நமது schedule படி இப்போது "லயன் சூப்பர் ஹீரோ சூப்பர் ஸ்பெஷல்" உங்களை சந்திக்கத் தயாராகி இருந்திருக்க வேண்டும்...! (முதல் பிரதியினை தாளா தாகத்தில் காத்திருக்கும் கனவுகளின் காதலருக்கு அனுப்பிட ஏற்பாடு கூட ஆச்சு !)ஆனால்...வழமை போல் எதாச்சும் உல்டா வேலை பார்த்திடாவிட்டால் அதில் நம் முத்திரை இருந்திடாதே !! "சூப்பர் ஹீரோ சூப்பர் ஸ்பெஷல்" இதழின் பணிகள் அனைத்தும் 15 நாட்கள் முன்னரே முடிவு பெற்று விட்ட போதிலும் ; இறுதி எடிட்டிங் பணிகளில் எனக்குக் கொஞ்சம் திருப்தி ஏற்படவில்லை. மனோஹரா பாணியில் ஸ்பைடரும் ; மாயாவியும் பேசும் வசனங்களை நிறையவே trim பண்ணாவிட்டால் பலூனுக்குள் சங்கதிகளை அடக்கிடும் முயற்சியில் எழுத்துக்கள் அளவில் ரொம்பவே சிறிதாகப் போய்விடுவதை பார்த்திட முடிந்தது ! மீண்டும் ஒரு முறை உங்கள் கண்களை சோதித்திட பிரியப்படாத காரணத்தால் - சூப்பர் ஹீரோக்களை சீராட்டி பாராட்டி இன்னுமொரு மாதத்திற்கு எங்கள் கைக்குள்ளே வைத்திருந்து ஜூன் நடுவில் ரிலீஸ் செய்திடலாமெனத் தீர்மானித்தேன் ! (யாரோ விசில் அடித்து ஆரவாரம் செய்வது கேட்கிறதே ?!!)   

முந்தைய ஏற்பாட்டின்படி ஜூன் மாதம் வரவிருந்த லார்கோ வின்ச் பாகம் 1 & 2  இன்னொரு பக்கம் பாதி முடிந்த நிலையில் இருந்தது நினைவுக்கு வந்திட ...அவ்விரு கதைகளையும் ஒருங்கே வெளியிட்டு..ஒரு ஸ்பெஷல் இதழாக ஆக்கினால் என்னவென்று தோன்றியது ! விளைவு - முத்து காமிக்ஸ் SURPRISE ஸ்பெஷல் !! 

இந்த திடீர் மாற்றம் என் மண்டைக்குள் உதித்ததே வெகு சமீபமாய் என்பதால் - லார்கோவின் பணிகளை முடித்திட இரவும் பகலும் நிறையவே பிரயத்தனப்பட்டோம் ! வெறுமனே லார்கோவின் இரு கதைகளை மட்டும் வெளியிட்டு மங்களம் பாடிடாமல் கூடுதலாக வேறு என்ன சேர்த்திடலாமென மண்டையைப் பிராண்டிய போது - மறுபதிப்பாக வெளியிட்டிடத் தயாராகி இருந்த திகில் பாகம் 1 நினைவுக்கு வந்தது ! So - லார்கோவின் அறிமுகக் கதைகள் - "என் பெயர் லார்கோ" & "யாதும் ஊரே...யாவரும் எதிரிகள்" அட்டகாசமான ஆர்ட் பேப்பரில், முழுவண்ணத்திலும் ; திகில் இதழின் பாகம் 1 பிரமாதமான வெள்ளைத்தாளில் black & white ல் எனத் தீர்மானித்தேன் ! 

பரபரப்பாய் பணிகள் நடந்தேறி இன்று காலை அச்சுப் பணிகள் முழுவதும் நிறைவடைந்து விட்டன ! லார்கோ வின்ச் நிஜமாகவே சர்வதேசத் தரத்தில் வந்திருப்பதாய் எனக்குத் தோன்றியது ; சீக்கிரமே உங்கள் கரங்களில் இந்த இதழ் ஐக்கியமாகிடும் போது உங்களின் reactions என்னவாக இருந்திடுமெனத் தெரிந்திட ஆவல் தாளவில்லை!வழக்கமாய் லயனில் எழுதிடும் ஹாட்லைனில் நான் நிறைய எழுதி நீங்கள் பார்த்திருப்பீர்கள்...ஆனால் முத்து காமிக்ஸில் காமிக்ஸ் டைம் பகுதியில் அவ்வளவு விரிவாய் நான் எழுதிய நினைவே இல்லை ! அந்தக் குறையை (?!!) நிவர்த்தி செய்திட இம்முறை ஒன்றுக்கு..இரண்டு முழுப் பக்கங்கள் எழுதியுள்ளேன் ! இந்த இதழுக்கு நான் Surprise ஸ்பெஷல்" எனப் பெயரிட்டதன் முழுக்காரணங்களும் இதில் பார்த்திடப் போகிறீர்கள் ! 

அட்டைப்படத்தினைப் பொறுத்தவரை முதலில் புதிதாய் நாமாக ஒரு டிசைன் செய்திருந்தோம் ; ஆனால் லார்கோவின் கதைகளுக்கு முடிந்த மட்டிற்கு ஒரிஜினல் டிசைன்களையே பின்பற்றிடும்படி படைப்பாளிகள் கருத்துத் தெரிவித்திட, வேறு வழியின்றி அவர்கள் உருவாக்கிய அதே சித்திரத்தை சற்றே வண்ணங்கள் மெருகேற்றி ..பின்னணியில் சில்வர் கலர் சேர்த்து சற்றே improved look கொடுத்திடப் பிரயாசை எடுத்துள்ளோம் ! இது நமது வழக்கமான பாணியிலிருந்து மாறுபட்டுத் தெரியும் ஸ்டைல் என்ற போதிலும் - ஆளை அடிக்கும் சிவப்பு..நீலம் என்ற சங்கதி இல்லாமல் அமைதியானதொரு பாணியாக எனக்குப் பட்டது ! தனுஷ் சொல்லும் வசனம் இதற்கும் பொருந்துமென நினைக்கிறேன்.."இந்த பாணி ஓவியத்தைப் பார்த்தால் புடிக்காது...பார்த்துகிட்டே இருந்தால் தான் புடிக்கும்!"  

அச்சுப் பணிகள் நிறைவு பெற்றுவிட்டன ....இனி பைண்டிங் வேலைகளே ! வரும் சனிக்கிழமை (மே 5 )  கூரியர் மூலம் இதழ்கள் உங்களைத் தேடித் புறப்பட்டிட - எங்களால் முடிந்த முயற்சிகள் அனைத்தையும் எடுத்திடுவோம் ! தமிழக அரசின் சமச்சீர் பாடநூல்களின் பணிகள் சிவகாசியில் பரவலாய் நடந்தேறி வருவதால் பைண்டிங் வேலைகள் எக்கச்சக்கமான நெருக்கடியில் உள்ளது ! அரசு கொடுத்திட்ட முப்பது நாள் காலக்கெடுவிற்குள் புத்தகங்களை முடித்து ஒப்படைக்காவிட்டால் நாள் ஒன்றிற்கு பில் தொகையில் ௦0.5 % தண்டம் விதிக்கப்படும் என்பது அரசின் விதி ; so சிவகாசியில் பல அச்சக அதிபர்களின் தற்காலிக ஜாகை பைண்டிங் செய்து தந்திடும் நிறுவனங்களின் திண்ணைகளிலே தான் ! அந்த திண்ணையில் காத்திருக்கும் பட்டியலில் நாமும் சேர்ந்து கொள்ள போர்வை, தலையணை சகிதம் தயார் ! Hopefully not too long a wait .....for me...for you ! 

காரணம் எதுவாக இருப்பினும் சவாலானதொரு கதைத்தொடரை விரைவாகவே உங்கள் முன் கொண்டு வந்து நிறுத்திடுவதில் எனக்கு மகிழ்ச்சியே ! XIII முழுத் தொகுப்பிற்குப் பின் எனக்கு சிரமமானதொரு பணியாக ஏதும் இருந்திடவில்லை என்பதே நிஜம் ! லார்கோ தொடர்கள் பெண்டு நிமிர்த்திடுவதில் XIII -க்கு கொஞ்சமும் சளைத்தவர் அல்ல என்பது தொடரும் அத்தியாயங்கள் தெளிவாகவே சொல்லுகின்றன ! 

சூப்பர் ஹீரோ சூப்பர் ஸ்பெஷல் பட்டி..டிங்கரிங் பணிகள் முடிவு பெற்று ஜூன் 20 -ல் தயாராகிடும் ! அதனைத் தொடரவிருப்பது நமது "லயன் நியூ லுக் ஸ்பெஷல்" ஜூலை 15 -ல் !! சற்று தொலைவில் இன்னொரு நூறு ரூபாய் இதழாக கேப்டன் டைகரின் "தங்கக் கல்லறை" மறுபதிப்பு வேறு !

ஓவராய் நூறு ரூபாயில் ஸ்பெஷல் இதழ்கள் வந்திடுவதும் ஒ.கே. தானா என்ற சின்னதொரு கேள்வி என் மனதுக்குள் உள்ளது !அதை ஆமோதிக்கும் விதமாய் நம் நண்பர் R .T .முருகன் இரண்டொரு நாட்களுக்கு முன்னே ஒரு கடிதமாய் எழுதியுள்ளார் ! பாக்கெட்டுக்கு சேதாரம் உண்டாக்கிடக் கூடாதென்பது அவரது caution ! இதுவும் நிச்சயம் கவனத்தில் கொண்டிட வேண்டிய சங்கதியே !! What say folks ?

     

  

ஒரு விடையும்..வடையும் !!

அன்பர்களே ;  நண்பர்களே ; ஆண்டு மலருக்கு பெயர் சூட்ட முனைந்த ஆர்வலர்களே ; இரவெல்லாம் கண் முழித்து ஒவ்வொரு காமிக்ஸ் வலைப்பதிவாய் ரசித்து விட்டு பகலில் அலிபாபா குகை போல் வாய் திறந்து கொட்டாவி விடும் கோமான்களே.. !!

நீங்கள் எல்லோருமே ஆர்வமாய் (ஹாவ் ......) எதிர்பார்த்திட்ட வேளை வந்தே விட்டது !! Yes -  வடை தரும் நேரம் இது !!

வடை ஊசிப் போயிடாமல் இருக்க சிவகாசி ஆனந்த பவனில் சொல்லி வைத்திருந்ததால் - அவர்களும் ஐஸ்பெட்டியில் அதைத் தூக்கிப் பத்திரப் படுத்தியுள்ளதாகத் தகவல் ! So - தினமும் 'பொசுக் பொசுக்'கென போயிடும் மின்சாரத்தால் வடை ஊசிப் போயிருக்கக் கூடாதென்ற வேண்டுதலோடும் ; வெற்றி பெற்றிடும் நண்பர் விக்கோ வஜ்ரதந்தி உபயோகித்து வலுவான கடவாய்ப் பற்கள் கொண்டவராய் இருப்பாரென்ற நம்பிக்கையோடும் அடியேன் வடை தந்திடும் படலத்தைத் துவக்குகிறேன் !  

பெரும் சிந்தனை பல செய்து ;தலைப்புகள் பல சூட்டிய அன்புள்ளங்கள் அனைத்துக்கும் முதலில் எனது நன்றிகள்! தினுசு தினுசாய் நிறைய பெயர்கள் suggest செய்யப் பட்டிருந்த போதிலும் நடுவர் குழு (!!!) பெருத்த ஆலோசனைக்குப் பின் கீழ்க்கண்ட தலைப்புகளை shortlist  செய்திட்டது ! 

• கோடையில் ஒரு கலாட்டா - John Simon
• லக்கி லயன் ஆண்டு மலர் - Radja
• லக்கி லயன் ஸ்பெஷல் - Rafiq Raja ; Podiyan ; coimbatoorilirinthu sateel claw
• லயன் 'நியூ லுக்' ஸ்பெஷல் - Saint Satan
• லயன் 'Birthday' ஸ்பெஷல் - Saint Satan ; Venkat Denver 

பெயர்கள் பலவற்றை ஐந்தாக சுருக்கிய பின்னே தான் நிஜமான குழப்பம் துவங்கியது ! ஒவ்வொன்றாய் ஆராய்ந்து (!!) அவற்றின் நிறை குறைகளை அலசிட்டால் என்னவென்று தோன்றியது ! 

"லக்கி லயன் ஆண்டுமலர்"  & "லயன் லக்கி ஸ்பெஷல்" - இவ்விரு பெயர்களுமே அழகாய்...பொருத்தமாய் உள்ளன என்பதில் ஐயமே இல்லை ! ஆனால் "I want more emotions boss " என்ற கதை தான் ! இன்னும் கொஞ்சம் expressiveஆக..இன்னும் கொஞ்சம் அழுத்தமாய் இருந்தால் தேவலையே என்ற எண்ணம் தலைதூக்கியது ! So கனத்த இதயத்தோடு மேற்படி இரு பெயர்களையும் விலக்கிட தீர்மானம் நிறைவேற்றப்பட்டது !! 

அடுத்தபடியாக Venkat (டென்வர்) & வடைப் பிரியர் புனித சாத்தான் தேர்வு செய்திருந்த "லயன் Birthday ஸ்பெஷல்" தேர்வுக்கு வந்தது ! ரத்தினச் சுருக்கமாய்...yet மிகப் பொருத்தமாய் தலைப்பு உள்ளதில் மிகுந்த சந்தோஷப்பட்டோம் ! பாதி வடையை அமெரிக்கா வரைக் கொண்டு போக சம்மதமாவென DHL கூரியரில் விசாரிக்க ஆள் அனுப்பிட நினைத்தேன் !அப்போது தான் நண்பர் ஜான் சைமன் அனுப்பிட்ட கடைசிப் பதிவு வந்து சேர்ந்து எங்களை பிரேக் போட வைத்தது ! 

கோடையில் ஒரு கலாட்டா " என்ற பெயர்சூட்டல் சச்சின் டெண்டுல்கரின் புது hairstyle  போல 'நச்' என்று இருப்பதாகப்பட்டது !!  சரி...லேட்டாக வந்தாலும் லேட்டஸ்ட் ஆக உள்ள இந்தப் பெயருக்கே வடை தந்திடலாமென்று முடிவு செய்திட்டு இறுதியாய் ஒரு முறை பட்டியலின் பெயர்களை வாசித்தேன் !! 

"கோடையில் ஒரு கலாட்டா" என்பது அழகாய் இருப்பினும் ஒரு கதையின் பெயர் போலத் தோணுதே என்று எண்ணம் தலை தூக்கியது ! அப்போது தான் புனித சாத்தான் அவர்களின் இன்னுமொரு தேர்வான "லயன் நியூ லுக் ஸ்பெஷல்" பளீரென்று ஒளி விடுவது புலனாயிற்று !! நமது புது அவதாரை விவரிப்பது போலவும்...ரெம்பவே cool & modern ஆகவும் இப்பெயர் உள்ளதென்று மனசுக்குப் பட்டது ! 

Guys...இது நண்பர் புனித சாத்தான் அல்ல !! 

'இது..இது..இதைத் தான் நான் எதிர்பார்த்தேன்' என்று நொடியில் தேர்வுக் குழு இந்தப் பெயரையே தேர்வு செய்து ஒரு மனதாய் முழு வடையினையும் நண்பர் புனித சாத்தான் அவர்களுக்கு வழங்கிடத் தீர்மானித்தது !!  Hoorayyy!! Three Cheers to Saint Satan !!! வெற்றி பெற்றிட்ட நம் நண்பருக்கு கூரியர் மூலம் ஒரு மசால் வடை இன்று அனுப்பி வைக்கப்படும் ! அவர் அந்த வடையை ரசித்து..ருசித்து சாப்பிடும் தருணத்தை காமெராவில் புடித்து அனுப்பினால்..அந்த அற்புதப் புகைப்படத்தை இங்கே வெளியிட நான் தயார் ! 

இப்படியாக வரலாற்றுச் சிறப்புமிக்க இந்த "வடை தரும் படலமும்" நமது ஆண்டுமலருக்குப் பெயர் சூடும் படலமும் இனிதே நிறைவு பெறுகின்றது!!   "லயன் நியூ லுக் ஸ்பெஷல்" - லக்கி லூக்கின் இரு அற்புதக் கதைகளுடன் வண்ணத்தில் ஜூலை 15 -ல் அழகாய் வந்திடும் ! 

"இது கள்ளாட்டை..!!.வடை வாங்க 'சம்திங்' கொடுத்து கரெக்ட் பண்ணிட்டாங்க"-ன்னு விசனப்படும் உள்ளங்களே... மனம் தளர வேண்டாம் ! விரைவிலேயே "பஜ்ஜிக்கு ஒரு போட்டி" நடத்தி உங்களை மெய்சிலிர்க்கச் செய்வேன் என்பது உறுதி !! See you soon everybody !! 

இடையே ஒரு தேர்தலும்..இடையே ஒரு தீர்மானமும் !

நண்பர்களே 

கொஞ்சம் பயணம் ; கொஞ்சம் பணிகள் என்று ஒரு வாரத்துக்கு இங்கே தலை காட்ட முடியாது போயிற்று ! Sorry!

புதிய இதழ்(கள்) சுறுசுறுப்பாய் தயாராகி வருகின்றன ! கனவுகளின் காதலர் நமது "சூப்பர் ஹீரோ ஸ்பெஷலுக்கு" ஆதரவு திரட்ட அணி அமைத்து அரும்பாடு பட்டுக் கொண்டிருப்பது கண்கூடாய்த் தெரியும் போது, அவரது வேகத்துக்கு நாமும் ஈடு கொடுத்தாகணுமே :-)

புதுக்கோட்டை இடைத்தேர்தலுக்கு இன்னும் நாட்கள் உள்ள போதிலும் இங்கே நம் வலைப்பதிவில் நடந்தேறி வரும் online poll அமர்க்களமாய் ஓடிக் கொண்டிருப்பதைக் கவனித்தேன் !கள்ள ஓட்டுக்கள்..நல்ல ஓட்டுக்கள்...கடத்தப்பட்ட ஓட்டுக்கள் ...என்று பல விதமாய் நமது online poll க்கு வாக்களித்திருந்தாலும் - எதிர்பார்த்தபடியே கேப்டன் டைகர் கதைகள் தான் தூள் கிளப்பியுள்ளன ! 

கேப்டன் டைகர் கதைகளுக்கு உள்ள எதிர்பார்ப்பும் ; வரவேற்பும் நிஜமாகவே என்னை சிந்திக்கச் செய்தது ! மீண்டும் ஒரு முறை என்னிடமிருந்த டைகரின் வண்ண ஆல்பங்களைப் புரட்டினேன்...! பெரிய சைசில் ; வண்ணத்தில் ; டைகரின் தங்கக் கல்லறை கதையினை படிக்கும் போது எனக்குள்ளே - பதினேழு ஆண்டுகளுக்கு முந்தைய அதே பரபரப்பு ! 1995 -ல் சிங்கப்பூரில் இந்த இதழின் ஆங்கிலப் பதிப்பை வாங்கி - சென்னை திரும்பும் விமானத்தில் அரைத் தூக்கத்தில் படிக்க ஆரம்பித்தது ; படிக்கப் படிக்க தூக்கம் கரைந்தோடிட உற்சாகத்தில் துள்ளியது எல்லாமே நேற்றுப் போல் நினைவில் ஓடிட...இந்தப் பதிவின் துவக்கம் என் மனதில் முளை விட்டது !!

So - நம் மறுபதிப்புப் படலத்தின் திடீர் இடைச்சொருகலாக - நமது முத்து காமிக்ஸில் வெளியாகி நம்மை மெய்மறக்கச் செய்த - "தங்கக் கல்லறை - பாகம் 1 & 2  - வண்ணத்தில் ; உயர்தர ஆர்ட் பேப்பரில் ; பெரிய சைசில் ; ஒரே இதழாக வரவிருக்கின்றது ! இரு கதைகளையும் கொண்ட ஒரே ஆல்பத்தினை ஒரிஜினலின் அற்புதமான அட்டைப்படத்துடனேயே ஆகஸ்ட் நடுவில் நீங்கள் ரசித்திடலாம் ! 

தங்கக் கல்லறை

மறுபதிப்பு ஒருபுறமிருக்க..டைகரின் புதிய கதைகளும் இனி தொடர்ந்து வெளியிட்டிட ஏற்பாடுகளைத் துவக்கி விட்டேன் ! So அந்தரத்தில் தொங்கிக் கொண்டிருக்கும் டைகர் கதைகளின் தொடர்ச்சிகள் சீக்கிரமே வெளிச்சத்தைப் பார்த்திடும் !

இவை தவிர புதிதாய் கொஞ்சம் கதைத் தொடர்களைப் பின்பற்றிடவும் முயற்சித்து வருகின்றேன் ...முயற்சிகள்  முழுமை அடையும் போது அறிவிப்பு வந்திடுவது முதலில் இங்கேயாகத் தானிருக்கும் !

அப்புறம் இன்னொரு விஷயமும் கூட...! வெகு விரைவிலேயே உங்களுக்கு ஒரு Surprise காத்துள்ளது ! அது என்னவென்ற யூகங்கள் உங்களில் ஓடிக் கொண்டிருக்கும் சமயமே நான் நடையைக் கட்டுகிறேன் - IPL மேட்ச் பார்த்திட !

அந்த Surprise தான் எனது அடுத்த பதிவாக இருந்திடும் !Take care guys !! See you around soon !

நினைவோ ஒரு பறவை !

நண்பர்களே,

இது நிச்சயம் 'சிகப்பு ரோஜாக்களின்' சூப்பர்ஹிட் பாடலின் முணுமுணுப்பு அல்ல...ஒரு நிஜப் பறவையின் பெயரைக் கொண்டதொரு முந்தைய இதழின் நினைவு கூரும் படலமே !

கால் நூற்றாண்டுக்கு முன்னே நமது மினி லயனில் வந்திட்ட "ஒரு கள்ளப் பருந்தின் கதை"  உங்களில் எவ்வளவு பேருக்கு நினைவில் நின்றிட்டதோ நானறியேன் ...ஆனால் எனக்கு நிறைய திருப்தி அளித்த  இந்த இதழ் இன்னமும் என் நினைவில் நிழலாடுகின்றது !

இதழ் எண் 10

 இந்த இதழின் ஆரம்பப் பக்கமே freehand drawing-ல் மிகத் திறமைசாலியான நமது ஓவியர் ஒருவர் வரைந்திட்ட காமிக்ஸ் விளம்பரம் !! Batman-ஐ கொண்டு நமது லயன் ; திகில் & மினிலயன் காமிக்ஸ்களுக்கு சந்தா விளம்பரம் தயாரித்து இருந்தோம் ! அன்றைக்கு மூன்று இதழ்களின் மொத்த சந்தாத் தொகையே ரூபாய் 75 தான் !! பாருங்களேன் அந்த விளம்பரத்தை :

இதழின் முதல் கதை & என்னைப் பொறுத்த வரை பிரதானமான கதை சார்லியினதே !! இதனை சார்லியின் கதை என்று சொல்லிடுவதை விட  அவரது நண்பர் ஸ்வீனியின் கதை என்று சொல்வது தான் பொருத்தம் !
ஓசையின்றி தெளிவாய் ஓடும் நீரோடை போலான இந்தக் கதை இரு வண்ணத்தில் வந்திருந்தது ! தொடர்ந்து விச்சு & கிச்சு ; இயற்கையின் பாதையில் எனும் ஒரு பக்க பொது அறிவு சித்திரத் துணுக்கு ; குண்டன் பில்லியின்  நான்கு பக்க சிரிப்புத் தோரணம் ; வால்ட் டிஸ்னியின் ஸ்கேம்ப் நாய்க் குட்டியின் 2  பக்கக் கார்டூன் ; ரிப்லியின் "நம்பினால் நம்புங்கள்" ஒரு பக்கம் ; நானே வடிவமைத்ததொரு குறுக்கெழுத்துப் போட்டி என்று நிறைய filler pages !!

இவற்றைத் தொடர்ந்து "துப்பறியும் ஜூனியர்" என்றதொரு சமர்த்து சிறுவனின் ஆறு பக்க crime whodunit சிறுகதை ! "வைர நெக்லஸ்" என்ற தலைப்பில் கதாசிரியர் பெயர் ஏதுமின்றி வெளியாகி இருந்த இக்கதையை எழுதியது அடியேனே !  பெயர் போட்டிட மறந்து போகவில்லை...மாறாக மனம் ஒப்பவில்லை என்பதே நிஜம் !  எனது இளவயதில் Encyclopedia Brown என்ற பெயரில் ஒரு கெட்டிக்கார சிறுவன் அவனைச் சுற்றி நடந்தேறும் சின்னச்சின்ன குற்றங்களின் முடிச்சவிழ்க்கும் விதமாய் சுவாரஸ்யமான சிறுகதைகள் அடங்கிய ஐந்தாறு புக்குகள் படித்திருந்தேன் ! அவற்றில் ஒன்றை உல்டா அடித்து உருவானது தான் இந்த வைர நெக்லஸ் சிறுகதை ! "சுட்ட" கதை என்பதால் அதற்க்கு கிரெடிட் ஏற்றுக் கொள்ள கூச்சமாய் இருந்தது !  So  எழுதியவரின் பெயரின்றி இக்கதை உலா வந்ததன் பின்னணி இது தான் !

இதனைத் தொடர்ந்து அப்போதைய பரபரப்பான ஹீரோக்களான இரட்டை வேட்டையரின் " ஆழ்கடல் சதி " என்ற action thriller ; "தெரிந்தவரைப் பற்றித் தெரியாதவை" என்ற பெயரில் அப்போதைய ஹாலிவுட் பிரபலமான சில்விஸ்டர் ஸ்டாலோன் பற்றியதொரு feature article ;  "பரட்டைத்தலை ராஜா"-வின் இரு பக்கக் கார்டூன் ;  "ஒற்றைக் கண் ஜாக் " எனும் ஒரு fleetway  நிறுவனப் படைப்பு என்று எக்கச்சக்கமான variety காட்டிய இதழ் இது !

"பளிச்" ரகத்தில் ஒரு சூப்பர் ஸ்டார் இந்த இதழில் கிடையாதென்ற போதிலும் மிக நிறைவாக விற்பனையும் ; விமர்சனங்களும் ஈட்டிய பெருமைசாலி இந்த இதழ் ! இந்த இதழின் அட்டைப்படத்திற்கும் உள்ளே இருந்திட்ட கதைகளுக்கும் எந்த சம்பந்தமும் இருந்திடாது...! இங்கேயும் Fleetway நிறுவனத்தின் பங்களிப்பே !! அவர்களது LION Annual ஒன்றின் அட்டைப்பட டிசைனை எங்களது ஓவியரைக் கொண்டு வரைந்து தயார் செய்திருந்தோம் ! கணினிகள் இல்லாக் காலம் என்பதால் இந்த கிராபிக்ஸ் உட்டாலக்கடி வித்தை செய்திட அன்றைக்கு வழி கிடையாது !

எனக்குப்  பிடித்த இதழ்களில் இதுவும் ஒன்று ! உங்களில் எத்தனை பேரிடம் இந்த இதழும் ; அதனைப்  படித்திட்ட அனுபவமும் உள்ளதென்று அறிய ஆவல் ! Take care people !

சிங்கத்தின் சிறுவயதில் - 19 !

நண்பர்களே,

இன்றையப் புதுப் பதிவு - சிங்கத்தின் சிறுவயதில்-பாகம் 19 !

முடிந்தளவு உங்கள் குரல்வளைக்கு சேதம் நேர்ந்திடக் கூடாது என்ற நினைவு கொண்டே எழுதி இருக்கிறேன்! எனினும் உஷார் !  

ஜாலியாய் ஒரு சேதி !

நண்பர்களே,

நிறையவே ஆக்க்ஷன் காட்சிகளைப் பார்த்தாகிவிட்டோம் சமீப நாட்களில்..!  So ஒரு மாறுதலுக்கு / ஆறுதலுக்கு  காமெடி நோக்கி நமது பார்வைகளைக் கொஞ்சம் திருப்பிட்டால் என்னவென்று தோன்றியது ! அத்தோடு மட்டுமல்லாது இங்கே என்னால் உணர முடிகின்ற ஒரு அதீத எனர்ஜியினை .....ஆற்றலினை சின்னதாய் நம் எல்லோருக்கும் பிரயோஜனமாய் ; சந்தோஷமாய்ப் பயன்படுத்திடுவோமே என்றும் நினைத்தேன் ! 'பில்டப்' போதுமென்றால் இனி நேராய் விஷயத்துக்கு வருகின்றேன் !

தொடரும் மே & ஜூன் மாதங்களில் சூப்பர் ஹீரோ சூப்பர் ஸ்பெஷல் (கனவுகளின் காதலர் 'நற நற' வெனப் பற்களைக் கடிக்கும் சத்தம் கேட்குது!) ; லார்கோ வின்ச் கதைகள் & திகில் மறுபதிப்பு என காலெண்டர் புல்லாக உள்ளது. மின்வெட்டு நிலவரம் சற்றே தேவலாம் எனும் பட்சத்தில் பத்து ரூபாய் விலையிலான ரிப்போர்ட்டர் ஜானியின் "மரணத்தின் நிசப்தம்"  சைக்கிள் கேப்பில் புகுந்திடும் !

அடுத்து என்னவென்று எண்ணங்களை ஓட விட்ட போது ஜூலையும் சரி ..நமது லயனின் பிறந்தநாளும் சரி நினைவுக்கு வந்து நின்றன !எக்கச்சக்க இடைவெளிக்குப் பின்னே ஒரு திருப்தியான ஆண்டுமலர் வெளியிடுவது பற்றி சிந்தித்துக் கொண்டிருந்தேன் ! (நண்பர் அருண் பிரசாத் கூட இது பற்றி சமீபத்தில் பதிவிட்டிருந்ததும் நினைவுள்ளது!

ஒரு நீண்ட இடைவெளியினைத் தகர்த்திட நம் காமெடி கௌபாயை விடப் பொருத்தமான நபர் வேறு யார் இருந்திட முடியும் ? So வரும் ஜூலை 15 -ல் இரண்டு அட்டகாசமான முழு வண்ணக் கதைகளோடு லக்கி லுக் ; ஜாலி ஜம்பர் & டால்டன் கோஷ்டி உங்களை சந்திப்பார்கள் - நமது 28 -வது ஆண்டுமலரில் ! 

பனியில் ஒரு கண்ணாமூச்சி

"பனியில் ஒரு கண்ணாமூச்சி" - கதை நம்பர் 1 ! அமெரிக்க எல்லையைத் தாண்டித் தப்பித்து கனடாவுக்குள் புகுந்திடும் இந்தத் திருட்டு சகோதரர்களை லக்கி லூக்கும் ; ஜாலி ஜம்பரும் (நாலு கால் ஜம்பரே!!) மீட்டுக் கொண்டு வரும் அட்டகாசக் காமெடித் தோரணம் இது ! முழு வண்ணத்தில்...ஆர்ட் பேப்பரில் ! 

கதை நம்பர் 2 : "ஒரு வானவில்லைத் தேடி..!"  The Wagon Train என்ற பெயரில் வந்திட்ட இந்தக் கதை ஒரு ஆரம்ப கால லக்கி சாகசம் ! புதியதொரு வாழ்க்கையை ; வசந்தத்தைத் தேடி அமெரிக்காவின் கிழக்கிலிருந்து மேற்கு நோக்கிப் பயணிக்கும் ஒரு கூடார வண்டி ஜனத்தின் அட்டகாசமான கதைக் களம் ; அழகான சிரிப்புத் தோரணம் என்று இது ஒரு surefire hit ! 

ஒரு வானவில்லைத் தேடி..!

இந்த இரு கதைகள் தவிர குண்டன் பில்லி கதைகள் ; நிறைய கொசுறுகள் என்று ஒரு அழகான ஆண்டுமலராய் ரூபாய் 100 விலையில் மிளிர்ந்திடும் !

அடிக்கடி ரூபாய் 100 விலையிலான இதழ்களை வெளியிடுவது ஓ.கே. தானா என்ற கலக்கம் என்னுள் இல்லாது இல்லை ! 'செலவழிக்கத் தயாரான வாசகர்கள் சிக்கிட்டாங்க..பர்சுக்கு வெடி வைக்கிறான் டோய்' என்று மட்டும் நினைத்திட வேண்டாமே ப்ளீஸ் ? தரமான இதழ்களை எங்கேயும் compromise செய்திடாமல் வெளியிடும் எனது வேட்கைக்கும்;படித்திடும் உங்கள் ஆர்வத்துக்குமான ஒரு சின்ன விலை இது !

இந்த இதழுக்கு வழக்கம் போல் "லயன் ஆண்டு மலர்" என்று பெயரிட்டு விடலாம் ! ஆனால் இன்னும் சற்றே creative-ஆக ஒரு பெயரை வைத்திட உங்களின் கற்பனைக் குதிரைகளை..உங்களின் பாசிடிவ் எனர்ஜியை உலாவ விடலாமே என்று நினைத்தேன் ! So இந்த இதழுக்குப் பெயர் சூட்டப் போவது உங்களில் ஒருவரே...! Think of something cool guys !! 

நிச்சயம் பலரும் ஒரே பெயரினை suggest செய்திட வாய்ப்புள்ளது என்பது தெரிந்ததே ! ஆனால் இது ஒரு ஜாலியான போட்டி மட்டுமே என்பதால் - ஒரே சூப்பர் பெயரினை நிறையப் பேர் எழுதிடும் பட்சத்தில் அனைவருக்கும் வடை பகிர்ந்தளிக்கப்படும் ! Take Care folks...நாளை சந்திப்பேன்..இன்னுமொரு புதுப் பதிவோடு !!

நெஞ்சிலிருந்து நேராய் !

நண்பர்களே,

வாழ்க்கையின் ஒவ்வொரு நாளும் ஒரு அனுபவமே என்பதில் நான் திட நம்பிக்கை கொண்டவன்...! 

இத்தனை காலம் கழித்து ஒரு வலைப்பதிவு துவக்கி..அதன் சந்தோஷமான தருணங்களை ரசித்திட சந்தர்ப்பம் கிடைத்திட்ட எனக்கு ; கடந்த ஓரிரு தினங்களாய் இங்கே நடந்தேறி வரும் மறக்கத்தக்க சமாச்சாரங்கள் - அதன் கறுமையான பக்கங்களையும் பார்த்திட ஒரு வாய்ப்புத் தந்துள்ளது ! 

எங்கே ஆரம்பித்தது...யாரால் ஆரம்பித்தது...எதற்காக ஆரம்பித்தது இந்த சச்சரவு என்ற ஆராய்ச்சிகளெல்லாம் எனக்கு இங்கே அவசியமாகப்படவில்லை. For the simple reason that I still think we are all one big family !

ஈகோ எனும் பயனில்லா பிரகஸ்பதி நம்மிடையே ஊடுறுவி ; அசிங்கமான பல செயல்பாடுகளுக்குக் காரணமாகி உள்ளான் என்பது மட்டும் பட்டவர்த்தனமாகத் தெரிகின்றது ! காமிக்ஸ் களத்தில் நான் பெரியவனா ? ....நீ பெரியவனா ?...எனது காமிக்ஸ் ஞானம் உன்னதை விட சிறப்பானதா..? யாருக்கு யார் நெருக்கம் ? என்ற யூகங்கள்..கற்பனைகள்..அரையணாவிற்குப்  பிரயோஜனமில்லா விரோதங்களுக்கே வழி வகுத்துள்ளது ! 

Guys..எனக்கு ஒரு விஷயம் சிறிதும் புரியவில்லையே.. ? நாம் ஒண்ணும் ஊழலை ஒழித்திட யுத்தம் செய்திடும் புரட்சியாளர்களோ ; உலகிற்கு விடிவு கால சேதியினை அறிவிக்கும் தூதர்களோ அல்லவே !! காமிக்ஸ் எனும் ஒரு அழகான பொழுது போக்குக் கலையை ஆராதிக்கும் அடிமைகள் தானே நாம் எல்லாம் ?! இதில் நம்மிடையே இத்தனை வன்மம் வளர்த்துக் கொண்டிடத் தேவை தான் என்ன ?  

நம் இதழ்கள் வந்து கொண்டிருக்கும் போதும் சரி....நின்றிருந்த போதும் சரி.. என்னைப் பற்றி எழுந்திடும் பாராட்டுக்களோ ; பரிகாசங்களோ என்னை ஒரு போதும் பாதித்தது இல்லை ! ஏனெனில் நான் செய்து வருவது ஒரு glorified postman's job என்பதை ஒருக்கணமும் நான் மறந்திட்டதில்லை ! எங்கோ இருக்கும் சில திறமைசாலிகளின் கற்பனைகளில் உருவான படைப்புகளை புதியதொரு வடிவத்தில் உங்களிடம் கொண்டு வந்து சேர்ப்பது மட்டும் தானே எனது contribution ! So பாராட்டுக்கள் என் தலைக்கு சென்றிட அனுமதித்திடாமல் இருப்பது எத்தனை சுலபமோ ; அத்தனை சுலபமே பரிகாசங்களை உதறித் தள்ளிடுவதும் ! 

எந்த ஒரு வேலை நாளின் போதும் எங்களது அலுவலகத்திற்கு வந்திடவோ ; நான் ஊரில் இருக்கும் பட்சத்தில் என்னை சந்தித்திடவோ உங்களில் யாருக்கும் தடைகள் என்றைக்குமே கிடையாதே ! பிரச்னைகளை...நிஜமான ஆதங்கங்களை என்னிடம் தெரிவிக்க நினைத்தால் செவி கொடுக்க நான் தயாரே ! தொலைபேசியில் அவ்வப்போது என்னை எட்டிப்பிடித்திட முயற்சிக்கும் நண்பர்களுக்குப் பெரும்பாலும் வெற்றி கிட்டிடுவதில்லை - simply because my job demands a lot of travel ! நான் ஏற்கனவே எழுதி இருந்தது போல - அச்சு இயந்திரங்களை இறக்குமதி செய்து...முழுமையாகப் புதுப்பித்து ; பின்னர் விற்பனை செய்திடுவதே நமது பிரதான தொழில். மிஷின்களைப் பார்வையிடும் பொருட்டு உலகெங்கும் பயணிப்பதும் ; பின்னர் அவற்றை விற்பனை செய்திட உள்நாட்டுக்குள் அலைந்திடுவதும் அவசியங்கள். So பெரும்பான்மையான சமயங்களில் ஆபிசில் நான் இருந்திடுவதில்லை என்பதால் உங்களின் தொலைபேசி அழைப்புகளுக்கு கவனம் செலுத்த இயலாது போகின்றது ! என்றைக்குமே நான் என்னை அவ்ளோ பெரிய 'அப்பாடக்கரா' நினைத்துக் கொண்டு ஒதுங்கி இருப்பதெல்லாம் இல்லை !  ! 

விஷ்வா ; ரகு ; டாக்டர் சதீஷ் ; சிங்கபூர் தயாளன் ; பிரகாஷ் மற்றும் சில வாசக நண்பர்கள் இவ்வருட சென்னைப் புத்தகக் கண்காட்சியில் நமது ஸ்டாலில் - நமது விற்பனைக்கு உதவிடும் நோக்கில் தத்தம் சொந்தப் பணிகளை விட்டுவிட்டு ஏராளமான உதவிகளை செய்திட்டனர் !  அதை நம் வாசகர்களின் ஆர்வமாய் நான் பார்த்திட்டேன் ......அதனையே அவர்களது ஆக்ரமிப்பாய் பார்த்திடவும் இயலும் என்பது இங்கே வந்து விழுந்திடும் சில பதிவுகள் சொல்லுகின்றன ! விஜயனோ...லயன் காமிக்ஸோ ...நிச்சயம் அத்தனை பெரிய brands அல்லவே...என்னோடு சேர்ந்திருப்பதால் அவர்கள் பெருமை தேடிக் கொள்ள நினைக்கிறார்கள் என்ற குற்றச் சாட்டு மெய்யாவதற்கு !! அந்த உதவிகளை உங்களில் யார் செய்திட முன்வந்தாலும் மலர்ந்த முகத்தோடு நாங்கள் வரவேற்போம் என்பதே நிஜம் ! அதே சமயம் மாறுபட்ட பார்வையில் சிலர் பார்த்திடுகிறார்கள் என்ற காரணத்துக்காக அன்பான வாசகர்களிடமிருந்து ஒதுங்கி நிற்பதும் தேவை அல்லவே !

CD  வடிவில் காமிக்ஸ்ளை யார் வாங்கி இருந்தாலும், அது பற்றிய முழு விபரங்களையும், ஆதாரங்களோடு எனக்குக் கொடுத்திட்டால் அதனை நிச்சயம் பரிசீலிப்பேன் ! வெறும் குற்றச்சாட்டுக்கள் சேற்றை வாரி தூற்றுவதற்குச் சமானமே ; அதில் எனக்கு எப்போதும் உடன்பாடு கிடையாது ! 

அப்புறம் ஒருவரது மதத்தைக் குறிப்பிட்டு பதிவு செய்வது மன்னிக்க முடியா..தரமற்ற செயல் ! அந்தப் பதிவை நான் விலக்கி விட்டதோடு - அந்த செயலுக்கு எனது மன்னிப்புகளை சமர்ப்பிக்கிறேன் ! இப்போது முதல் பெயரில்லா ; ஈ-மெயில் முகவரி இல்லா பதிவுகள் செய்திட இயலாது ! அதே போல் தரமற்ற பதிவுகள் வரும் பட்சத்தில் அவற்றை நான் அவ்வப்போது காலி பண்ணுவதாக உள்ளேன் ! 'ஜால்ரா மட்டும் தான் இங்கே அடிக்கணுமா?' என்று யாரேனும் நண்பர்கள் கேள்வி எழுப்பினால் - அதற்கான பதிலை நான் சொல்லிடத் தேவை இருக்கப் போவதில்லை- கேள்வி கேட்கும் நண்பர்களுக்கே பதிலும் நிச்சயம் தெரியும் என்ற காரணத்தினால் ! விமர்சனங்களையோ ; ஆக்கபூர்வமான சிந்தனைகளையோ கண்டு ஒதுங்கிடும் ஆசாமி அடியேன் அல்ல என்பது தெரிந்த ரகசியமே !  

Last but not the least -  அழகாய்...தரமாய் சென்று கொண்டிருக்கும் நமது இதழ்களின் புதிய பாதையும் சரி...இந்த வலைப் பதிவின் பயணமும் சரி....இது போன்ற சலசலப்புகளின் பொருட்டு நிச்சயம் சுணங்கிடவோ..தடைப்பட்டிடவோ செய்யாது ! எனது பணியும் சரி..பாணியும் சரி....ரொம்பவே diplomacyக்கு அவசியம் ஏற்படுத்திடும் சங்கதிகள் ! எல்லோரது ஈடுபாடும் அவசியமென்று எண்ணுவதால் உங்களின் கருத்துக்களுக்கு நிறையவே செவி சாய்ப்பேன்..! ஆனால் ஒரு முடிவு எடுத்திடும் போது அது நிச்சயம் அனைவரது அபிமானத்தையும் எனக்கு ஈட்டித் தந்திடுமென்று நான் நினைப்பதே இல்லை ! "திமிர் புடிச்சவன்..இஷ்டத்துக்கு முடிவெடுக்கிறான் பார் " என்று நினைக்கும் நண்பர்கள் நிச்சயம் இருக்கத் தான் செய்வார்கள் என்பது நான் அறிந்ததே !!! சமீபத்திய ரிப் கிர்பி & காரிகன் ஒய்வு பற்றி நான் செய்த அறிவிப்புக்கு வந்திட்ட mixed reactions அதற்கொரு சான்று ! ஆலோசனைகள் கேட்கிறேன் என்பதால் நான் மனதளவிலோ ; சிந்தனைகளிலோ பலவீனமானவன் என்ற கணிப்பு இருந்திடும் பட்சத்தில் அதனை துவம்சம் செய்திட ஒரு வாய்ப்பாகவே இந்தத் தருணத்தை நான் பார்க்கிறேன் ! 

நம் பயணம் தொடரும் நண்பர்களே...எப்போதும் போல்..உற்சாகமாய்..! ஆண்டவன் அருளும் ; உங்கள் அண்மையும் இருந்திடும் வரை வானமே நமக்கு எல்லை !  கடமையைச் செய்வோம் ; பலன்களை ஆண்டவன் தந்திடுவான் !! Take Care Folks !