Powered By Blogger

Sunday, March 25, 2012

மறுபதிப்புக்கு மரியாதை !


நண்பர்களே,

வாணவேடிக்கைக்கு சிவகாசி தான் பிரசித்தம் என்று நினைத்தேன்...ஆனால் "மறுபதிப்பு" என்ற topic துவங்கியது முதல் உங்களின் வரவேற்பு நிஜமாகவே அதிரடி ரகம் தான்!...ஏராளமான பதிவுகள்...ஈ-மெயில்கள் ;ஐடியாக்கள் ;நேற்றைக்குப் பின்னிரவில் செய்த பதிவுக்கு அதற்குள் 700 + கண்ணோட்டங்கள் என்று அசரச் செய்யும் உற்சாகத் தோரணம் ! Phew !! நிஜமாகவே மண்டையைப் பிறாண்டிக் கொண்டு தான் இருக்கிறேன் ...உங்கள் ஆர்வத்துக்கு ஈடு கொடுக்க வழிகள் தேடி !  

இங்கே பலரும் கோருவது போல், மறுபதிப்புகள் அடிக்கடி வெளியிடுவது என்பது ஒரு possibility தான்...ஆனால் நடைமுறையில் உள்ள பிரச்னைகளை சிறிது சிறிதாய் களைந்து கொண்டே வந்திட சற்றே அவகாசம் நமக்குத் தேவை!

தற்சமயம் நேரடி விற்பனை என்பதால்...நமது விற்பனை எண்ணிக்கை இன்னும் சற்றே கூடிட வேண்டும். ஆங்காங்கே உள்ள பெரிய நகரங்களில் உள்ள தரமான புத்தகக் கடைகளுக்கு இதழ்கள் அனுப்பிடவும் முயற்சித்துக் கொண்டுள்ளோம் ! அது நடைமுறை ஆகிட்ட பின்னே இன்னும் சற்றே தைரியமாக செயல்பட்டிடலாம் !

அது தவிர எங்களது தயாரிப்பு ஏற்பாடுகள் இப்போது தான் சிறுகச் சிறுக இந்தப் புதிய பாணி...கம்ப்யூட்டர் மூலம் வண்ணச் சேர்க்கை ...வண்ண அச்சு ....என்பதற்குப் பரிச்சயமாகி வருகின்றன ..! "திடும்" என ஒரே நாளில் இதழ்களின் எண்ணிக்கையை அதிகரிப்பதென்பது அவர்கள் தலையில் நியாயமற்ற சுமையை ஏற்றியது போலாகிடும் ! So எங்களது backroom strength சற்றே பலப்படுத்தி விட்டு நம் வேகத்தை அதிகரிப்பது சரியாக இருந்திடும் என நினைக்கிறேன் !

எல்லாவற்றிற்கும் மேலாக, காற்றில் கற்பனைக் கோட்டைகளைக் கட்டிக் கொண்டிராமல்...சொல்வதை இம்முறை தப்பாமல் சாதித்துக் காட்ட வேண்டுமென்ற ஒரு உத்வேகம் என்னுள் ! "வந்தோமா..வீராவேசமாய் ரெண்டு பஞ்ச் டயலாக் விட்டோமா '..அப்புறம் காணமல் போனோமா என்ற கதையே இனி வேண்டாம் என்பதில் உறுதியாய் இருக்கிறேன் !

ஒன்று மட்டும் இப்போதைக்கு என்னால் சொல்ல முடியும் ! இவ்வருடத்தின் நடுப்பகுதி வரை சற்றே பொறுமை காட்டுங்கள் guys! உங்களை திக்குமுக்காடச் செய்யும் அறிவிப்புகள்..அதிர்வேட்டுக்கள் தயாராகி வருகின்றன ! நிச்சயம் disappoint ஆக மாட்டீர்கள் !

அப்புறம் காமிக்ஸ் க்ளாசிக்ஸ் அடுத்த மறுபதிப்பு என்னவென்று இப்போது இங்கே பார்த்தாலென்ன ?


"ஸ்பெஷல்" இதழ்களாக க்ளாசிக்ஸ் வெளியிடுவது பற்றிய உங்களின் சிந்தனைகள் நிஜமாகவே சூப்பரானதொரு concept தான்..!

So அடுத்த மறுபதிப்பு - எனது லிஸ்டிலும் சரி ..உங்கள் எவரின் லிஸ்டிலும் சரி. வந்திடாத 3  இதழ்களின் ஒரு combo !! நமது ஆரம்ப திகில் காமிக்ஸின் இதழ் 1 ; 2 & 3 - மூன்றையும் ஒன்றிணைத்து "திகில் க்ளாசிக்ஸ் " என்ற பெயரில் அதே ஒரிஜினல் (பெரிய) சைசில் வெளியிட நினைத்துள்ளேன் !

திகில் இதழ் # 1 முன் அட்டை 



1986 ஜனவரி..பிப்ரவரி & மார்ச்சில் இந்த இதழ்கள் பெரிய சைசில் Rs 3 விலையில் வெளியாகின ! ஒரு முழுநீளத் திகில் சித்திரக் கதை....சின்னச் சின்ன 4 -6 பக்கத் திகில் சிறுகதைகள்...அமானுஷ்ய சங்கதிகள்..கட்டுரைகள் என்று ஒரு வித்தியாசமான கலவையாக இந்த இதழ்கள் அமைந்திருந்தன !

பெரிய சைசுக்கும் சரி...மூன்று ரூபாய் விலைக்கும் சரி ...இந்தக் கதம்பம் போன்ற கதைக் கலவைக்கும் சரி..அப்போது ரொம்பவே சுமாரான வரவேற்பு ! So 'துண்டைக் காணோம்' 'துணியைக் காணோம்' என்ற கதையாக டபக்-கென்று இதழ் நம்பர் நான்கு முதல் நமக்குப் பரிச்சயமான முழுநீளக் கதை என்ற பார்முலாவுக்கே திரும்ப வேண்டியதாகிப் போச்சு ! இன்னமும் கூட அப்போதைக்கு வந்த சில வாசகர் கடிதங்கள் எனக்கு நினைவில் உள்ளது !! "பிச்சைக்காரன் வாந்தி எடுத்தது போல் துண்டும் துக்கடாவுமாய் இதழ் உள்ளதாய் கூட ஒரு நண்பர் எழுதி இருந்தார் ! அந்தக் காலத்தில்..அந்த வயதில் ஒரு சறுக்கலை சமாளிக்கும் உறுதி அவ்வளவாய் கிடையாதென்பதால் ரொம்பவே தளர்ந்து போனேன் !

பின் அட்டை 
என்னை சந்தித்திடும் நமது வாசக நண்பர்களுக்கு எனது இந்தத் தேர்வு ஆச்சர்யத்தை ஏற்படுத்திடாது என்று தான் நினைக்கிறேன்! பலரிடமும் நான் பகிர்ந்து கொண்டிடும் விஷயம் தான் இது ! எனக்கு மனசுக்குப் பிடித்த இதழ்களின் பட்டியலில் இந்த முதல் மூன்று திகில் இதழ்களுக்கும் ரொம்பவே நெருக்கமான இடம் உண்டு !


அதிலும், திகில் இதழ் 1 ல் வந்திட்ட ஜெட் வீரர் லோகனின் அசாத்தியத் த்ரில்லர் உங்களில் எத்தனை பேருக்கு நினைவிருக்குமோ தெரியவில்லை..! எனது ஆல்-டைம் favorite கதைகளில் அதுவும் ஒன்று ! Fleetway நிறுவனத்தின் வெளியீடான இந்தக் கதை "Seven Went to Sirius" என்ற தலைப்பில் 1962 ல் வந்திட்டது !


முதல் முறை நான் இந்தக் கதையைப் படிக்க வாய்ப்புக் கிட்டியது நான் 10th விடுமுறையின் போது என் தந்தையுடன் டெல்லி சென்றிட்ட போது ! போகும் ஊரில் எல்லாம் நிறையப் புத்தகக் கடைகளைப் பரிச்சயம் செய்திருக்கும் வழக்கம் என் தந்தைக்கு உண்டென்பதால் இஷ்டத்துக்கு புத்தகங்களை உருட்ட அனுமதிப்பார்கள் ! Connaught circus க்கும் ஜன்பத்-க்கும் இடையில் உள்ளதொரு பெரிய புத்தகக் கடையின் பரணில் இருந்து பழைய ஸ்டாக் காமிக்ஸ்களை நான் துளாவும் போது சிக்கியது இந்த இதழ் ! பல ஆண்டுகள் கழித்து அதே கதையை மொழிபெயர்க்கும் பொது ரொம்பவே ரசித்து எழுதியது நினைவில் உள்ளது ! இது தவிர இதழ் # 3 -ல் வந்திட்ட "பயங்கரப் பூனைகள்" கதையும் அட்டகாச விறுவிறுப்பு ! முதல் முறையாக இந்த இதழ்களைப் படிக்கப் போகும் நண்பர்கள் மெய்மறக்கப் போவது உறுதி !! மே இரண்டாம் வாரத்தில் இதழ் கிடைத்திடும் !

இந்த "திகில் க்ளாசிக்ஸ்"மறுபதிப்பு  எனக்கும் சரி..உங்களுக்கும் சரி..நிச்சயம் நிறைவானதொரு இதழாக இருக்குமென்ற ஆசையில் இப்போதைக்கு கும்பகர்ணனின் லோகத்தைத் தேடிச் செல்கிறேன் !மீண்டும் ஒரு பதிவோடு சந்திக்கும் வரை ..adios people !



Friday, March 23, 2012

எனது Top 20 !


நண்பர்களே,

சென்ற வார நித்திரைக்கு ஈடு செய்யும் விதத்தில் இவ்வாரம் கொஞ்சமாச்சும் சுறுசுறுப்பாய் இயங்கிடுவோமே என்ற எண்ணம் தலைதூக்கியது ! So - இன்று முதல், இவ்வார இறுதி வரை - தினமும் ஒரு பதிவோடு உங்களை போட்டுத் தாக்குவதாக உத்தேசம்! Be warned guys !

இந்த வலைப் பதிவில் இது வரை அதீத ஆர்வத்தையும், கருத்துப் பதிவுகளையும் ஈட்டிய பெருமை - தலை வாங்கிக் குரங்கின் மறுபதிப்புப் பற்றிய அறிவிப்பே ! காமிக்ஸ் க்ளாசிக்ஸில் லயன், திகில் , மினி-லயன் மறுபதிப்பு செய்திடுவது பற்றிய proposalக்கு கிடைத்துள்ள உற்சாக வரவேற்பைத் தொடர்ந்து மூன்று மாத இடைவெளியில் நமது golden oldies இதழ்கள் மறுபதிப்பாய் வந்திடும்!

எந்தெந்தக் கதைகளை மறுபதிப்பு செய்திடலாம் என்பது பற்றி ஒவ்வொருவருக்கும் ஒரு தனிப்பட்ட choice ; ஒரு லிஸ்ட் இருந்திடுமென்பது உறுதி !  நினைவலைகளை பின்னோக்கி ஓடவிட்டால்..எனது டாப் 20 கதைகள் எவையாக இருக்குமென்று தெரிந்து கொள்ள எனக்கே ஆசை தோன்றியதின் பலனே இந்தப் பதிவும்..பட்டியலும் !



  • தயாரிப்பின் பொது 'பளிச்' என்று நினைவில் நின்றிட்ட கதைகள் ...
  • விற்பனையில் செம வரவேற்புப் பெற்ற இதழ்கள் .....
  • என்றும் ரசிக்கக் கூடிய ரகக் கதைகள்..... 
  • அது மட்டுமல்லாது நம்மிடம் எப்போதோ விட்டுத் தீர்ந்த இதழ்கள் ....


என்று நான்கு அளவுகோள்களைப் பயன்படுத்தி எனது தேர்வுகளை செய்திட்டேன் ! இதோ எனது லிஸ்ட் :

லயன் காமிக்ஸ் :



  1. மனித எரிமலை (இரும்புக்கை நார்மன் )
  2. டிராகன் நகரம் (டெக்ஸ் வில்லர்) 
  3. பழி வாங்கும் புயல் மர்ம எதிரி இதழில் வந்திட்ட மாடஸ்டி சாகசம்)
  4. ஒரு பனிமலை பயங்கரம் (காரிகன்)  
  5. கார்சனின் கடந்த காலம் (டெக்ஸ் வில்லர்)
  6. எமனுக்கு எமன் (யுத்தக் கதை)  
  7. மாஸ்கோவில் மாஸ்டர் (ஜான் மாஸ்டர்)
  8. எத்தனுக்கு எத்தன்   (ஸ்பைடர் )

பழி வாங்கும் புயல்  

திகில் :

  1. நரகத்தின் எல்லையில் (கேப்டன் பிரின்ஸ் )
  2. சைத்தான் துறைமுகம்   
  3. ப னிமண்டலக் கோட்டை 
  4. கறுப்புக் கிழவி ஸ்பெஷல் 
  5. சைத்தான் சாம்ராஜ்யம் (டெக்ஸ் வில்லர்)
  6. சிரித்துக் கொல்ல வேண்டும் (BATMAN)
  7. அப்பல்லோ படலம் (ப்ருனோ பிரேசில்)

மினி-லயன் :

  1. சூப்பர் சர்க்கஸ் (லக்கி லூக்)
  2. புரட்சித் தீ (லக்கி லூக்)
  3. பயங்கரப் பொடியன் (லக்கி லூக்)
  4. மினி லயன் சம்மர் ஸ்பெஷல் 
  5. காசில்லாக் கோடீஸ்வரன் (ரிப் கிர்பி)
நிச்சயமாக உங்கள் ஒவ்வொருவரின் லிஸ்டும் நிறைய மாறுபட்டு இருக்குமென்பது உறுதி ! இவை எனது மனதுக்குப் பிடித்த தேர்வுகள் தானே ஒழிய - இவை தான் மறுபதிப்புக்கான இறுதிப் பட்டியல் என்றோ..நமது பெஸ்ட் இதழ்கள் என்றோ கருதிடத் தேவை இல்லை !



உதாரணத்திற்கு - ஸ்பைடரின் "எத்தனுக்கு எத்தன்   " இதழைச் சொல்லலாம்...! அக்மார்க் 'காதுலே பூ' கதை இது என்பதில் இரு வேறு கருத்துக்கள் இருக்க முடியாது - ஆனால் நமது லயனின் தலைவிதியையே மாற்றி அமைத்திட்ட ஒரு சாதனை இதழ் என்ற பெருமையில் எனது  டாப் 20 ல் இடம் பிடிக்கின்றது !  

மினி லயனின்  ம்மர் ஸ்பெஷல் எத்தனை பேருக்கு நினைவிருக்குமோ தெரியவில்லை...ஆனால் வெளி வந்து 2 வாரங்களுக்குள் இரு முறை reprint செய்திடும் அளவுக்கு அமர்க்களமாய் விற்பனையான இதழ் இது ! So  விற்பனையில் சாதனை செய்த பெருமை இந்தப் பட்டியலுக்குள் நுழைந்திடும் தகுதியைத் தருகின்றது !



உங்களின் தேர்வுகளை ஒரு லிஸ்டாக்கி..இங்கே பதிவு செய்திடுவதோடு lioncomics@yahoo.com என்ற நமது முகவரிக்கு ஒரு ஈ -மெயில் ஆகவும் அனுப்பிடக் கோருகிறேன் !  Happy List making !!

Wednesday, March 21, 2012

ஒரு குரங்கு..ஒரு நாய்..ஒரு லயன் !


நண்பர்களே,

சந்தேகமின்றி விசித்திரமான தலைப்பு தான் .....! முழுவதும் படித்த பின்னர் காரணம் புரிந்திடும் !

சென்ற வாரம் சற்றே பிஸியான வாரமாய் அமைந்திட்டது...சில பர்சனல் வேலைகளால் ! So - தற்காலிகமாய் மாயாவி ஆக வேண்டியதாகிப் போச்சு ! Sorry people !

மீண்டும் ஒரு sorry ..! இம்முறை "தலைவாங்கியாரின்" தாமதத்துக்கு ! 

எவ்வளவோ முறைகள்..'ஹி..ஹி .." என்று அசடு வழிந்து அடியேன் அதில் நிறையவே தேர்ச்சி பெற்றிருந்தாலும் ...இம்முறை ஒரு legitimate காரணம் உள்ளது லேசான ஆறுதல்..!

மறுபதிப்பு என்பதால் தயாரிப்பில் பெரியதொரு பணி எனக்குக் கிடையாது ; so 'மட மட' வென உள் inner பக்கங்கள் அச்சாகி விட்டது.  அட்டைபடப் பணிகளில் தான் சோதனையே ....! துரதிர்ஷ்டவசமாக நமது ஓவியரை ஒரு தெரு நாய் கடித்து புண்ணியம் சம்பாதித்துக் கொண்டது !  (நம் ஓவியர் ஒரு மாற்றுத் திறனாளி என்பது இங்கே குறிப்பிட வேண்டிய விஷயம் !) 

So - அட்டைபடப் பணி ரொம்பவே சோதித்து விட்டது ! வேறு வழி இல்லாமல் நம்மிடம் இருந்திட்ட இன்னொரு டெக்ஸ் டிசைனை மெருகூட்டி இந்த இதழுக்குப் பொருத்தமாக்கிட மண்டை காய்ந்து போய் விட்டது ! நாளொன்றுக்கு 10 மணி நேர மின்வெட்டும் சரி..வெள்ளிக்கிழமைகள் நிலவிடும் முழு நாள் மின்சார விடுமுறையும் சரி....சிவகாசியின் சுறுசுறுப்புக்கு சூப்பரான road block ஆக அமைந்து வருகின்றன ! 




ஒரு வழியாக அச்சுப் பணிகள் முடிந்து பைண்டிங் வேலைகள் துவங்கி உள்ளன....வரும் திங்கள் முதல் "தலைவாங்கிக் குரங்கு" உங்களைத் தேடிப் புறப்பட்டு வந்திடும் ! இந்த இதழில் "மறுபதிப்புப் பட்டியல்" இடம்பெறுகின்றது...Top 20 கதைகளின் பட்டியலோடு - என்பது கொசுறு சேதி ! நிச்சயம் எனது தேர்வுகளுக்கு பல மாதிரியான reactions இருந்திடுமென்பது உறுதி !

தாமதத்தை ஈடு செய்யும் வகையில் இன்னமும் கூட ஒரு நல்ல சேதி..! லயனின் புதிய வெளியீடான "எமனின் தூதன் டாக்டர் 7 " கூட தயாராகி வருகின்றது ! வரும் வாரத்தில் அதுவும் உங்கள் கைகளில் இருந்திடும் ! காரிகனின் action சாகசம் + ரிப் கிர்பியின் "கன்னித் தீவில் ஒரு காரிகை" இந்த இதழில் இடம்பெறுகின்றன ! இரு கதைகளுக்குமே அசாத்திய சித்திரங்கள் தான் highlight !  


அட்டைப்படங்கள் எப்படி வந்துள்ளன என்பது பற்றி உங்களின் அபிப்ராயங்களைத் தெரிந்து கொள்ள ஆர்வமாய் காத்துள்ளேன்...! Please do write ! 

மீண்டும் இந்த சனிக்கிழமை ஒரு பதிவோடு உங்களை சந்திக்கிறேன் ! அதற்கு மத்தியில் ஆங்காங்கே பதிலுக்குக் காத்திருக்கும் சென்ற வாரத்து postings க்கு பதில் பதிவுகள் செய்திடுவேன் ! Take Care folks ! 

Saturday, March 10, 2012

ஒரு சகாப்தம் ஓய்ந்தது !


நண்பர்களே,

இன்றைய பதிவுக்கு நான் தயார் செய்து கொண்டிருந்த பொது தான் பிரான்சிலிருந்து சோகமான சேதி தாங்கிய ஈ-மெயில் வந்திட்டது.....!

நமது கேப்டன் டைகர் கதைவரிசையின் பிரதான ஓவியரான ஷான் ஜிராட் புற்று நோயை எதிர்த்தான நீண்டதொரு போராட்டத்தைத் தொடர்ந்து நேற்றிரவு காலமடைந்து விட்டார் !  ரொம்ப நாட்களாகவே உடல் நலமின்றி இருந்து வந்த ஜிராட் அவர்களின் மறைவு காமிக்ஸ் உலகிற்கு ஒரு ஈடு செய்ய இயலா இழப்பு என்பதில் ஐயமே கிடையாது.

ஓவியர் ஜிராட்


1938 -ல் பாரிஸ் நகரின் அருகே பிறந்து ; ஓவியப் பள்ளியில் பயிற்சி பெற்ற பின் விளம்பரத் துறையிலும், பேஷன் துறையிலும் டிசைன் ஓவியராகப் பணியாற்றி விட்டு அப்புறமாய் காமிக்ஸ் துறை நோக்கி தனது பார்வையினை செலுத்தினார் !

மோபியஸ் என்ற புனைப்பெயரில் சில sci -fi கதைகளுக்கும் ; ஜப்பானிய மங்கா கதைகளுக்கும் சித்திரம் தீட்டியுள்ளார் என்ற போதிலும் இவரை வெற்றிக்கு வெளிச்சம் போட்டுக் காட்டியது லெப்டினன்ட் ப்ளுபெர்ரி (நமது கேப்டன் டைகர்) தொடரே !



பிற்காலத்தில் திரைப்படங்களுக்கு storyboard தயார் செய்து கொடுத்த பெருமையும் இவருக்கு உண்டு.

நம் டைகர் கதைகள் மட்டும் அல்லாது,  " XIII - இரத்தப் படலம்"  கதைத் தொடரின் பாகம் 17 -ஆன "அயர்லாந்துப் படலம்" கதைக்கான சித்திரங்கள் கூட ஜிராட் கைவண்ணமே !

2000 -2010 வரையில் "Inside Moebius " என்ற பெயரில் தன்னையே ஒரு காமிக்ஸ் பாத்திரமாக வடித்து, தனது இதர படைப்புகளோடு உலா வருவது போல் ஒரு கதைத் தொடரினை ஆறு ஆல்பங்களில் 700 பக்கங்களுக்கு உருவாக்கி இருந்தார் ! ஓவியங்களின் மூலையில் "Gir " என்ற சின்னதொரு கையெழுத்தே இவரின் அடையாளம் ! 

நேற்றிரவு அவரது 73 -வது வயதில், காலனின் கரங்களுக்குள் அமைதி தேடிட்டார் ! உலகம் முழுவதும் எண்ணற்ற காமிக்ஸ் ரசிகர்களின் கண்ணுக்கும் கருத்துக்கும் விருந்து படைத்த ஒரு அற்புத மனிதருக்கு நமது கண்ணீரே அஞ்சலியாகட்டும்....! மனிதர் மறைந்திட்டாலும் அவரின் படைப்புகள் இன்றைக்கும்..என்றைக்கும் நம்மை மெய்சிலிர்க்கச் செய்து கொண்டே இருக்குமென்பது உறுதி !

Adieu Moebius ....! We will miss you ! 

Wednesday, March 07, 2012

சல்யூட் கேப்டன் டைகர் !


நண்பர்களே,

இரண்டு நாட்களுக்கு உங்களை சஸ்பென்சில் விட வேண்டும் என்றெல்லாம் எண்ணம் கிடையாது ! But தமிழில் டைப் செய்து,போட்டோக்களை இணைத்து, உருப்படியாக ஒரு பதிவினை செய்திடுவென்பது நிறையவே நேரம் எடுக்கின்றது ! So திங்கட்கிழமை மேலும் ஒரு பதிவு செய்திட எனக்கு "தம்" இல்லை என்பதே விஷயம் !

பேப்பரும், பேனாவும் எடுத்துக் கொண்டு எழுதும் பொது வந்திட்டிடும் சரளம்...சிந்திப்பதில் பாதி ; டைப் அடிப்பதில் மீதி என்ற கம்ப்யூட்டர் சமாச்சாரத்தில் இன்னும் எனக்கு வரவில்லை என்றே சொல்லுவேன் !

முன்னுரையை இத்தோடு மூட்டை கட்டி விட்டு நேரடியாக விஷயத்துக்கு செல்வோமே ?


"படித்ததில் பிடித்தது எது?" என்ற கேள்வியினை நான் சமீபத்தில் இங்கே எழுப்பி இருந்ததும் சரி ...நமது இதழ்களின் "டாப் நாயகன்" என்று யாரைத் தேர்வு செய்வீர்களென்ற கேள்விக்கு வந்திருந்த பதில்களும் சரி..சந்தேகத்திற்கே இடமின்றி தெரிவித்த சமாச்சாரம் ஒன்றே :  

கேப்டன் டைகர் !!





சமீபத்தில் இங்கே வந்த பதிவுகளில் பெரும்பான்மையும் "டைகர் கதைகள் எப்போ?" என்ற தொனியில் இருப்பதை கவனிக்காமல் இருந்திருக்கவே முடியாது ! "அசைக்க முடியா ஹீரோ # 1" நமது கேப்டன் டைகர் தான் என்பது இங்கேயும் சரி ; நமது பிற வாசகர்களின் கடிதங்கள்..கருத்துக்களின் மூலமும் சரி, crystal clear ஆக உறுதி செய்யப்பட்டுள்ளது !

So நமது காமிக்ஸ்கள் ஒரு second wind எடுத்துக் கொண்டு ஆட்டத்தைத் துவக்கி இருக்கும் 2012 -ல் கேப்டன் டைகர் சாகசங்களும் இடம்பெற்றிட வேண்டும் என்று தீர்மானித்தேன். டைகர் கதைகள் ஆங்காங்கே தொடர்ச்சிகளை எதிர்பார்த்து நின்று கொண்டிருப்பது உங்களுக்கு நன்றாகவே தெரியும்..So அவற்றை நியாயமான வரிசையில் தொடந்திடுவது என்ற தீர்மானத்தில் உள்ளேன் !

முதல் கட்டமாக..டைகரின் இளம் பிராய சாகசங்கள் "இளமையில் கொல்" மூலம் நமது லயன் காமிக்ஸின் 200 -வது இதழான "கௌபாய் ஸ்பெஷல்" தொடங்கி இருந்ததன அல்லவா ? முதல் மூன்று பாகங்கள் அந்த இதழில் வந்திருந்தன..!

அவற்றின் அடுத்த மூன்று கதைகளுக்கான உரிமைகளை வாங்கியாச்சு என்பதே இன்றைய பதிவின் சந்தோஷமான சேதி ! 

இதோ பாகம் 4 ; 5 மற்றும் 6 -ன் ஒரிஜினல் அட்டைப்படங்கள் !! 


பாகம் 4

பாகம் 5



இவை எப்போது வெளி வரும் என்பதை "லயன் சூப்பர் ஹீரோ சூப்பர் ஸ்பெஷல்" இதழில் அறிவிக்கவிருக்கிறேன் !

பாகம் 6 
அது வரை பொறுமை காக்க வேண்டுமே..ப்ளீஸ் !!


இந்த "புதன் பதிவு" திருப்தியான சேதி சொல்லும் பதிவாக இருந்திருக்குமென்ற
 நம்பிக்கையில் இப்போதைக்கு விடை பெறுகிறேன் !

'நிறையவே பதிவுகளோடு துவக்கியாச்சே...இன்னும் ஒரே ஒரு பதிவோடு இந்த வாரத்தை நிறைவு செய்திட்டாலென்ன' ? என்ற சிந்தனையுடன் ! So சனிக்கிழமை சந்திப்போமா திரும்பவும் ?

நான் ரெடி...நீங்க ரெடியா ?



Monday, March 05, 2012

புயலாய் ஒரு அறிமுகம் !


மீண்டும் நானே...!

மீண்டும் ஒரு முந்தையப் பதிவின் தொடர்ச்சியே இது !

மீண்டும் தலைவர் Van Hamme -வின் ஒரு அமர்க்களமான  படைப்பு நமது காமிக்ஸ்களில் அட்டகாசம் செய்திடவிருப்பது பற்றிய சேதியே இது..!


யெஸ்....அதிரடி அறிமுகமாய் லார்கோ வின்ச் தமிழுக்கு அடியெடுத்து வைக்கும் சமயம் நெருங்கி விட்டது !

விளம்பரங்களாய்..டிரைலர்களாய்....மட்டுமே பூச்சாண்டி காட்டிக் கொண்டிருந்த இந்தப் புதிய தொடரின் உரிமைகளை ஒரு வழியாகப் பெற்றாகியாச்சு !

( இனி வரும் இந்த மினி அறிமுகப் படலத்தை ஆங்கிலத்தில் லார்கோ வின்சின் சாகசங்களைப் படித்துப் பரிச்சயம் உள்ள நண்பர்கள் skip செய்திடலாமே ......)


லார்கோ வின்ச் அடிப்படையில் ஒரு கவலை இல்லா playboy ; எதையும் சாதிக்கும் உறுதியும் ஆற்றலும் கொண்ட அசகாய சூரர்..பற்றாக்குறைக்கு ஒரு மஹா மஹா கோடீஸ்வரர் ! இவரைத் தேடி வரும் பிரச்னைகளின் களங்களும் சரி..வீரியமும் சரி....பிரமிப்பை உருவாக்கும் ரகம் !


தனது கோடிக்கணக்கான செல்வச் செழிப்புகளை பராமரித்துக் கொண்டே தன்னைச் சுற்றிப் பின்னப் படும் சதி வலைகளை லார்கோ முறியடிப்பது ஒவ்வொரு சாகசத்தின் highlight ! 46 +46 = ஆக மொத்தம் 92 பக்கங்களில் ஒவ்வொரு கதையும் நிறைவுற்று, அடுத்த இதழில் புதிய சாகசம் துவங்குகிறது !

ஜெட் வேகத்தில் சென்றிடும் கதைகள் ; பிரமிக்கச் செய்யும் ஆக்க்ஷன் என்று பக்காவான இந்தக் commercial த்ரில்லர் , இதுவரை 18 அல்பம்கள் வெளி வந்துள்ள நிலையில், ஆண்டுதோறும் 500,000௦௦௦ ௦௦௦ பிரதிகள் விற்பனையாகி வருகின்றது !  லார்கோ - ஐரோப்பாவின் தற்சமய காமிக்ஸ் கிங் ; வசூல் ராஜா என்று சொல்லிட்டால் தவறில்லை தான் !



1990 -ல் ஜனித்த லார்கோ வின்ச் கதைகள் 2001 -ல் ஒரு டிவி தொடராகவும் ; 2008 ம் ஆண்டின் இறுதியில் ஒரு ஆக்க்ஷன் திரைப்படமாய் பிரெஞ்சு மொழியிலும் வந்துள்ளன !  

இது வரை மொத்தம் ஒன்பது முழுக் கதைகள் (18 பாகங்கள்)  கொண்ட இந்தத் தொடரின் துவக்கமாக - முதல் இரண்டு கதைகளும் இந்த ஆண்டு நமது முத்து காமிக்ஸில் வரவிருக்கின்றன !

வேங்கையாய் ஒரு வாரிசு


"வேங்கையாய் ஒரு வாரிசு" + "செல்வத்தின் நிறம் சிகப்பு" என்ற தலைப்புகளுடன் லார்கோ தனது ஆட்டத்தை துவக்குகிறார் !

செல்வத்தின் நிறம் சிகப்பு 

இரத்தப் படலம் போல ஒரே கதையாகப் பயணிக்காமல் தனித்தனி சாகசங்களாய் இந்தத் தொடர் இருப்பதினால், விறுவிறுப்புக்கும் ; வேகத்திற்கும் பஞ்சமே வைத்திடாமல் top gear-ல் பறக்கின்றது ! Not too long a wait now !!


இன்றைய வாக்குறுதிக் கோட்டாவை கொட்டாவிகளுக்கு மத்தியிலும்
முடித்து விட்டேன் என்ற சின்ன திருப்தியோடு கிளம்புகிறேன்...!

'பொன் கிடைத்தாலும் புதன் கிடைக்காது' என்பார்கள்..வரும் புதனில் இங்கே நமக்குக் கிடைக்கவிருக்கும் சூப்பர் சேதி என்னவாக இருக்கும் ? சிந்தித்துக் கொண்டே தூக்கத்தை அரவணைப்போமே !!  Take care folks !

   



எல்லைகள் தாண்டுவதற்கே !!


நண்பர்களே,

தேர்தல் கமிஷனுக்கு அஞ்சாமல் வாக்குறுதிகளை வழங்கிடும் சுதந்திரம் தற்சமயம் யாருக்கு உள்ளதோ, இல்லையோ - நிச்சயம் நமக்கு உள்ளது என்று சொல்வேன் !

So - இதோ இன்றைய பதிவு எண் 2 - புதியதொரு அறிவிப்போடு !

எல்லைகள் தாண்டுவோமா ? என்ற கேள்வியினை கொஞ்ச நாட்களுக்கு முன்னே இங்கே நான் எழுப்பியதும் ; தொடர்ந்து சுவையான பல கருத்துக்கள் பதிவானதும் நினைவிருக்கலாம் ....!

அதன் ஆரம்பமாய் - நம் எல்லைகளை அகலமாக்கும் முயற்சியின் முதல் படியாய் - ஒரு Graphic Novel நம் லயனில் விரைவில் களம் காண்கிறது !

ஒரு மாமூலான ஹீரோவை மையம் கொண்டிடாமல்....வழக்கமான கதைக் களங்களை பின்பற்றிடாமல்.....மிகைப்படுத்தல் அதிகம் அல்லாத, நிஜ வாழ்க்கையின் பிம்பங்களாய் ; மாறுபட்ட ஓவியங்களுடன், சற்றே முதிர்ந்த ரசனைக்காக உருவாக்கப்பட்டவை graphic novel கள்  ..!

நமது அபிமான எழுத்தாளரான Van Hamme -ன் கைவண்ணத்தில் நமக்கு நன்றாகவே பரிச்சயமான கௌபாய் உலகை மையமாகக் கொண்டு ; அன்றைய கரடுமுரடான, வாழ்க்கையினை சித்தரிக்கும் "Western " எனும் காமிக்ஸ்நாவல் நமது லயனில், முழு வண்ணத்தில் வரவிருக்கிறது !



 நாம் இது வரை அடிவைக்காத கதைக்களம்... சோகம் இழையோடும் வித்தியாசமான சித்திரங்கள் ; அதை விட வெகு வித்தியாசமான வண்ணக் கலவை என்று இது ஒரு மாறுபட்ட அனுபவமாய் நமக்கு இருந்திடப் போவது உறுதி ! 



மாறுபட்ட வண்ணக் கலவையோடு !


"எமனின் திசை மேற்கு !" இந்தாண்டின் இரண்டாம் பாதியில் வரவிருக்கிறது!

வண்ணத்தில் இதழ்கள் தயாரிக்கும் தைரியம் வந்த பின்னர் நம்மை எதிர்நோக்கி இருக்கும் சவாலான பலதரப்பட்ட களங்கள், நமது இரண்டாவது இன்னிங்க்சை வேறு ஒரு பரிமாணத்துக்கு இட்டுச் செல்லுமென்ற நம்பிக்கை எனக்குள் !   Exciting times ahead folks ...!!

இது வாக்குறுதி நேரம் அல்லவா..? So 'இன்றைக்கு இன்னுமொரு blockbuster பதிவு காத்துள்ளது!என்ற புதிய வாக்குறுதியோடு இப்போதைக்கு நடையைக் கட்டுகிறேன் ! Catch you soon !!




ஒரு பீலா படலம் !


நண்பர்களே,

சென்ற வார ஊர் சுற்றலின் போது நமது படைப்பாளிகள் சிலரையும் சந்திக்கும் வாய்ப்பு அமைந்தது !

மப்பும் மந்தாரமுமாய் இருந்திட்ட ஒரு ஐரோப்பியக் காலையினில் அவர்களது அலுவலகத்தினுள் நுழைந்த மறுகணமே என் கண்ணில் பட்டது நமது XIII - ன் "இரத்தப் படலம்" தொகுப்பு தான் ! உள்ளே போனவுடனேயே "இன்னும் குறைந்தது 3 பிரதிகளாவது உடனே அனுப்புங்கள் !" என்றார்கள் ; நான் மண்டையை ஆட்டிக் கொண்டே என்ன சமாச்சாரம் என்று விசாரித்தேன்...



ஆண்டுதோறும் ஜனவரி இறுதியினில் பிரான்சின் ஒரு சிறு நகரமான Angouleme -ல் ஒரு காமிக்ஸ் திருவிழா (!!) நடந்திடும். சின்னச் சின்ன கதாசிரியர்கள் ; வளர்ந்து வரும் ஓவியர்கள் அத்தனை பேரும் ; ஜாம்பவான்களில் ஒரு சிலரும் அங்கே காமிக்ஸ் ரசிகர்களுக்கு மத்தியில் ஐக்கியமாகி இருப்பது வழக்கம். பதிப்பகங்கள் தத்தம் புது வெளியீடுகளை showcase செய்து அவற்றை promote செய்திடும் முயற்சியில் ஈடுபட்டிருப்பார்கள்.

இந்த ஆண்டு நடந்த விழாவின் போது நமது "இரத்தப் படலம்" முழுத் தொகுப்பினை தங்களது ஸ்டாலில் வைத்திருந்தார்கள் போலும் ; அதனைப் பார்வையிட்ட பிரெஞ்சுக் காமிக்ஸ் ரசிகர்கள் ரொம்பவே சந்தோஷப்பட்டார்களாம்! தங்களது மொழியினில் வந்திட்டதொரு தொடரை அவர்களே இன்னும் முழுமையாக வெளியிடவில்லை எனும் போது எங்கோ தொலைதூரத்தில் உள்ளதொரு இந்திய மொழியில் இது போல ஒரு Complete Collection வந்திருப்பதைப் பார்த்த எல்லோருக்குமே பெருமிதமாம் !

அது மட்டும் அல்ல ....

William Vance


காமிக்ஸ் உலகின் all -time great  ஓவியரும் ; இந்தத் தொடரின் அசகாய வெற்றிக்குக் காரணமுமான வில்லியம் வான்ஸ் நமது இதழை பாராட்டினாராம் !  முதுமை காரணமாய் ஓய்வுக்குச் சென்று விட்ட வான்ஸ் தற்போது ஸ்பெயின் நாட்டில் ஒரு சின்னஞ்சிறு கிராமத்தில் அமைதியாகப் பொழுதைக் கழிக்கிறாராம் ! அவரது பிரத்யேக லைப்ரரி-க்கு ஒரு பிரதியும் ; கதாசிரியர் Van Hamme -க்கு ஒரு பிரதியும் அனுப்பிட வேண்டுமென்று அவர்கள் சொன்ன போது எனக்கு புல்லரித்துப் போனது ! எங்கோ ஒரு மூலையில் ; பீற்றிக் கொள்ளக் கூடிய circulation எதுவும் இல்லாத நமக்கு - இத்தனை பெரிய ஜாம்பவான்களிடமிருந்து கிடைத்த அங்கீகாரம்  ஒரு இமாலய சாதனையாய்த் தோன்றியது !

ஒரு தரமான படைப்பை அழகாய் ரசித்து அதனை இத்தனை தூரம் கொண்டு வந்திட்ட உங்கள் அத்தனை பேருக்கும் அந்தப் பாராட்டில் சம பங்குண்டு guys !!  Hats off !

சந்தோஷமாய் இருந்த அந்தத் தருணத்தை உங்களோடு அன்றே பங்கிட நினைத்தேன் ; ஆனால் எனது சாம்சங் Galaxy Tab-ல் தமிழில் டைப் செய்தால் தூர்தர்ஷனில் வரும் ஜுனூன் தமிழை தயாரித்துத் தந்து புண்ணியம் சேர்த்தது...so ஊர் திரும்பும் வரை பொறுமை காக்க வேண்டிய நிர்பந்தம் !


"பீலா படலம்" இன்னும் ஓயவில்லை ..இன்னும் கொஞ்சம் பாக்கி உள்ளது !

உலகின் வேற்று மொழிகளில் XIII தொடரின் கதைகள் மறுபதிப்பாகும் போது பெரும்பாலுமே ஒரிஜினலில் உள்ள அதே அட்டைப்பட டிசைன் தான் பயன்படுத்தப்படும். In fact புதிதாய் நாமாக ஒரு coverpage உருவாக்கிட நினைத்தால் கூட அதனை முன்கூட்டியே படைப்பாளிகளுக்கு அனுப்பி அவர்களது சம்மதத்தைப் பெற்றிட வேண்டும் என்பது தான் ஒப்பந்தம். ஆனால் ஆரம்பம் முதலே நமக்கு மட்டும் இதில் முழு சுதந்திரம் உண்டு...நமது அட்டைப்படங்கள் 'பளிச்' என்று வண்ணமயமாக இருப்பதால் நம்மை இந்த விதி கட்டுப்படுத்திடுவதில்லை ! இரத்தப் படலம் இதழுக்கான நமது அட்டைபடம், ஒரிஜினலின் சித்திரங்களை அப்படியே கொண்டு வண்ணக் கலவையில் மட்டும் சற்றே மாற்றம் செய்திருந்த ஒன்று !அது கூட ஒரிஜினலை விட 'பளிச்' என்று இருப்பதாய் அவர்கள் சொல்லக் கேட்ட போது எனது பல்வரிசையினை காட்சிப் பொருளாக்கினேன் !

ஒரிஜினலின் அட்டைபடம் 


Last but not the least, அடுத்த முறை ஸ்பெயின் நாட்டுக்குப் பயணமாகும் போது வில்லியம் வான்ஸ் அவர்களை சந்திக்க ஆசை என்று சொன்னேன்... !ஓய்வில் இருப்பதால் அவர் பெரும்பாலும் சந்திப்புகளை தவிர்ப்பதாகவும் ஒரே ஒரு முறை..சிறியதொரு சந்திப்புக்கு அவரிடம் பேசி ஏற்பாடு செய்து தருவதாக வாக்களித்துள்ளார்கள் !

சந்தடி சாக்கில் கதாசிரியர் Van  Hamme அவர்களையும் சந்திக்க முடியுமாவென கேட்டு இருக்கிறேன் !  Fingers Crossed !!

Jean Van Hamme

XIII புராணத்தில் இன்னும் ஒரே ஒரு சேதி !

இரத்தப் படலம் தொடர் மீண்டும் வரவிருப்பது பற்றி போன மாதம் பதிவு செய்திருந்தேன் அல்லவா ? புதியதொரு ஓவியர் ; கதாசிரியர் கூட்டணியில் தொடருக்கு புற்றுயிர் ஊட்டி உள்ளார்கள் ! ஆண்டுதோறும் ஒரு புது ஆல்பம் இனி வெளி வரும் என்று தகவல். ஐரோப்பாவில் இந்த இதழுக்கு மிக அருமையான வரவேற்பு கிட்டி உள்ளதாம் !

இரத்தப் படலம் - புது வெளியீடு !


So 2012 -ன் இறுதிக்குள் தமிழில் இந்த புதிய சாகசத்தை நீங்கள் படிக்கப் போகிறீர்கள் ! இதற்கான பணிகள் தொடங்கி விட்டன !

இந்தப் பதிவுக்கு இத்தோடு மங்களம் ; but இன்றைக்கு இன்னும் சில (!) பதிவுகள் தொடர உள்ளன ! உஷார் !