Powered By Blogger

Monday, June 29, 2020

3 கேள்விகளும் ; 3 பதில்களும் !

நண்பர்களே,

வணக்கம். "இரத்தப் படலம்" என்றாலே மண்டை உடைப்புப் படலங்களுக்கும் பஞ்சமிராதென்பதை yet again நிரூபித்துள்ளன கடந்த பத்து நாட்களின் நிகழ்வுகள் ! முதல்முறை 2010 -ல் கருப்பு-வெள்ளைத் தொகுப்பினை வெளியிட்ட நாட்களில் அவற்றை ஒட்டு மொத்தமாய் கொள்முதல் செய்திட ஒரு கூட்டணி முயற்சித்ததும், அது சாத்தியமாகாது போன பின்னே அரங்கேற்றிய ஆட்டங்களும் நமது வலைப்பக்க வருகைகளுக்கு முந்தையவை என்பதால் நினைவோடு மாத்திரமே அகன்று விட்டன ! அப்புறம்  2 ஆண்டுகளுக்கு முன்பாய்க் கலரில் வெளியிடத் திட்டமிட்ட வேளையில் இங்கு நடந்த ரகளைகள் வீரியத்தில் நிச்சயமாய் ஒரு சட்டமன்றத்துக்கே tough fight தந்திருக்கும் ! And இதோ, விளையாட்டாய்த் துவக்கியதொரு "முன்னூறு முயற்சி " முழுசாய் சிறகு விரித்தாலும் விரித்து கூடுமோயென்ற நிலையில்  கிளம்பியுள்ள வெப்பத்தை நான் நேரடியாய் உணராது போயினும், ஆங்காங்கே காமிக்ஸ் குழுக்களில் அங்கமாகியிருந்திடும் நம் நண்பர்கள் உணர்ந்து வருவதைச் சிறுகச் சிறுகக் காதில் வாங்கிய போது சலனங்கள் துவங்கின உள்ளுக்குள் ! போன பதிவின் இறுதியினில் ஸ்டீலுக்குப் பதிலாயொரு பின்னூட்டத்தில் நமது மகிஜி குறிப்பிட்டிருந்த வரிகள், பின்னூட்டத்து Load More கத்தைக்குள் புதைந்து போயிருந்தாலும், அதனில் தொனித்த சங்கடம் என்னைத் தாண்டிடவில்லை ! அது நேற்றைய நிகழ்வெனில், இன்றைய பொழுதும் ஒரு eye opener ஆக அமைந்தது ! 

And trust Doctors to know what's good & what's not !! இன்றைய காலையினில் கண்ணில்பட்ட நேசத்துக்குரிய 3 டாக்டர்களின் பின்னூட்டங்கள் உணர்த்தின ! டாக்டர் AKK ராஜா & நமது டாக்டர் செனா அனா - "இ.ப."வின் சங்கடப் பக்கத்தினையும், இதனில் நம் தரப்பின் சூழலையும் சீர்தூக்கிப் பார்த்திடும் பக்குவத்தையும், Dr ஹரிஹரன் அவர்கள் சிரம நாட்களிலும் இருளைத் தாண்டிட கையிலெடுக்க வேண்டிய உத்வேகம் பற்றியும் பதிவிட்டிருந்தனர் ! காலையில் இவற்றை அசை போடத் துவங்கிய போதே இந்த "இ.ப" திட்டமிடலினில் இன்னும் கொஞ்சம் சிந்தனைகளைத் தந்திருக்க வேண்டுமோ ? என்ற நெருடல் ஆட்கொள்ளத் துவங்கியது ! And பகடியென்ற பெயரில் அமிலத்தை நனைத்து - ஒரு டுபுக்கு ஐடியின் பின்னிருந்து ரொம்பவே மெனெக்கெட்டு அனுப்பி வைத்த நண்பரும் நமக்கு பரிச்சயமானவரே எனும் போது, ஒரேயொரு விஷயம் மட்டும் புலனானது : திட்டமிடப்பட்டுள்ள இந்த இதழ் - திட்டமிடப்பட்டுள்ள விலையினில் - திட்டமிடப்பட்டுள்ள இந்தக் காலகட்டத்திற்குள் வெளியாகும் பட்சத்தில் - இதனில் கிட்டிடக் கூடியது பண நிறைவாய் இருந்திடலாம் ; ஆனால் கிஞ்சித்தும் மன நிறைவாய் இராது ! நமது காரணங்களோ ; நியாயங்களோ என்னவாய் இருப்பினும் - காலத்திற்கொரு களங்கமாகவே இந்த முயற்சி பார்த்திடப்படும் என்பதை மறுக்க முடியவில்லை என்னால் !

நிஜ முகங்களோடு, அன்பின் மிகுதியில், மருத்துவ நண்பர்கள் கண்ணியதோடு முன்வைத்த சிந்தைகளும், போலி முகத்தோடு, ரௌத்திரத்தின் பிரவாகத்தோடு, கூசச் செய்யும்  வார்த்தைப் பிரயோகங்களோடு இன்னொரு அணி முன்வைத்த பகடியும் ஒரே நாளில் பதிவானது தான் நமது சிறு வட்டத்தின் இரு வேறு துருவங்களைப் பற்றி பிடரியில் அடித்துச் சுட்டிக்காட்டியது ! அன்பினையும், அக்கறையையும்,  coolers-களாக்கிப் பார்ப்பவர்களுக்கு நானொரு சூழ்நிலைக்கைதி என்பது புரிந்திடுவதும் ; ஏதேதோ குரோதங்களைக் கண்ணாடியாக்கிப் பார்ப்பவர்களுக்கு, நானொரு கொள்ளைக்காரனாய்த் தென்படுவதும் இயல்பே என்பதும் புரிந்தது ! நான் உதைபடுவது புதுசும் அல்ல ; என்னைப் பகடி செய்வோர் அலுத்துப் போகப்போவதுமில்லை ; ஆனால் இம்முறை இடையில் நின்றபடிக்கே சங்கடப்படும் நண்பர்கள் அநேகம் என்பதும் சரி, அவர்கட்குமே இந்த முயற்சி குறித்த சிறு நெருடல் இராது போகாதெனும் போது - 'இதுவும் கடந்து போகும்'  என்று ஓய்ந்து கிடக்க மனம் ஒப்பவில்லை !

To cut a long story short - இன்றைய சங்கடங்கள் மூன்று காரணங்களின் பொருட்டு என்பது அப்பட்டம் :

1 இந்தச் சிரம நாட்களில் இத்தகையதொரு செலவினை நண்பர்களின் தலைகளில் சுமத்துவது 

2 மூன்றே மாதங்கள் என்ற காலக்கெடு !

3 And அந்த விலை !

ரௌத்திரங்களையும், வன்மங்களையும் சற்றே தூர வைத்து விட்டு மேற்கண்ட 3 சமாச்சாரங்களிலும் தென்படும் ஒருவிதக் குதர்க்கத்தையும் ; அதனை நானே பிடிவாதமாய்ப் பின்பற்றிட நினைக்கும்  காரணத்தையும் அலசிட நமது பகடி நண்பர் & பின்னணிக் குழு முயற்சித்திருப்பின் - எனது அடிப்படை எண்ணமென்னவென்று புரிந்திருக்கும் ! அதைக் கிரகிக்கும் பொறுமையின்றி, குப்பைக்கூடையைத் தலையினில் கவிழ்க்கக் காட்டியிருக்கும் அவசரத்திலும், மும்முரத்திலுமே தெரிகிறது - என் மீதான கடுப்பில் மிகுதியில் எதைத் தொலைத்திருக்கிறார்கள் என்று ! But இன்றைய நமது சிறுவட்டத்தில் இத்தகைய ஜனமுமே ஒரு அங்கமே எனும் போது - யாரையும் நொந்து பிரயோஜனமில்லை - என்னைத் தவிர்த்து !

சிக்கல்கள் மூன்றுக்கும் இதோ நான் செய்திடவுள்ள பரிகாரங்கள் :

1 இந்தத் திட்டமிடலை அடுத்த மூன்றே மாதங்களுக்குள் நிறைவேற்றிட வேண்டுமென்ற பிடிவாதத்தைத் தளர்த்திக் கொள்கிறேன் ! இந்தாண்டின் எங்களது அச்சுப் பிரிவினரின் வண்டிகள் ஓடிட வேண்டுமென்ற வேகத்தினிலும் ; புதுச் சந்தா முயற்சிகளின் மத்தியில் "இ.ப" இடராகிடக்கூடாதே என்ற எண்ணத்தில் இட்ட இந்த நிபந்தனையை மாற்றியமைத்துக் கொள்வோம் ! மரம் வைத்தவர் தண்ணீர் விடாதா போய்விடுவார் - நமது பணியாட்களின் நிலைமைக்கு ? So அதனைப் பிரதான காரணமாக்கிட இனியும் விழைய மாட்டேன் ! அட, இன்றைக்கு இந்த "இ.ப" 300 என்றொரு சமாச்சாரம் சாத்தியமில்லாது போயிருப்பின் என்ன செய்திருப்போமோ - அதனையே இப்போது செய்திட்டால் போச்சு ! 

2 அக்டோபர் 30 வரையிலும் இப்போதை போலவே முன்பதிவுகள் அவரவரது வசதிகளுக்கேற்ப நடந்திடட்டும் ! அந்நேரத்திற்குள் ஒரு 150 / 170 முன்பதிவுகள் தான் தேறியுள்ளதென்றாலும் no worries ; தற்காலிகமாய் புக்கிங்குகளை ஒத்தி வைப்போம் 2021 ஏப்ரல் வரைக்கும். And 2021-ன் ரெகுலர் சந்தாப் பணிகள் பூர்த்தி கண்ட பின்பாய் மறுக்கா  "இ.ப' கடையை விரிப்போம் - மேற்கொண்டொரு 3 மாத அவகாசத்தோடு ! So ஏப்ரல், மே & ஜூன் 2021 "இ.ப."புக்கிங்குக்கான இரண்டாம் சாளரமாக இருந்திடும் எனும் பொழுது இன்றிலிருந்து கிட்டத்தட்ட ஓராண்டு கால அவகாசம் கிட்டியது போலாயிற்று !

3 And அந்த விலை ! சிக்கலான இன்றைய நாட்களில் இந்த விலை விண்ணுயரமாய்த் தென்படுவது புரிகிறது தான் ! So அதன் நியாயங்களை பற்றியெல்லாம் இன்னொருமுறை நான் 'தம்' கட்டும் நேரத்துக்கு - டப்பென்று சொல்லி விடுகிறேனே - அதற்கான எனக்குச் சாத்தியமாகிடும்  தீர்வினை :

  • கலரில் 1000 பிரதிகள் பிரிண்ட்ரன்னின் போது நமது விலை : ரூ.2600 ! அடுத்தாண்டின் இறுதியில் விலைவாசிகள் உச்சத்தில் இருந்தாலும் சரி, பாதாளத்தினுள் கிடந்தாலும் சரி இந்த "இ.ப" 300 முயற்சியின் விலையும் அதே இரண்டாயிரத்து அறுநூறாக இருந்திடும் !
  • "புலன்விசாரணை" புக்கினை அன்றைக்கு இலவசமாய்த் தந்திருந்தோம் ; அதற்கு மாத்திரம் இம்முறை ரூ.150 மட்டும் சேர்த்துக் கொள்வோம்.
  • ஆக "இ.ப' 300 project ரூ.2750 என்ற விலையுடன் வெளிவந்திடும்...... ! Plus Courier & Packing Charges of course ! 
  • ஆக தமிழகத்தினுள் ரூ.2900 (all inclusive) & பெங்களூரு ரூ.2975 என்றே இருந்திடும் ! 
இந்த முயற்சியில் கையைப் பிடித்தாலும் சரி, காலைப் பிடித்தாலும் சரி - அதனை நிரவல் செய்திடும் ஆற்றலை ஆண்டவன் அருளாது போக மாட்டார் ! தொண்ணூறு சதவிகிதத்தினர் மனமுவந்து பணம் தந்து, வெறும் பத்துப் பேர் குரோதத்தோடு தரும் பணமானது கூட நிச்சயமாய் நமக்கோ ; நம்மைச் சார்ந்தவர்களுக்கோ செரிமானமாகாது ! நீலம் ஒரு சொட்டோ ; பல சொட்டுக்களோ - அவை விட்டுச் செல்லும் கறைகளின் ஆயுள் ஜாஸ்தி என்பதால் செய்யவிருந்த தவறினை சந்தோஷமாய்த் திருத்திக் கொள்கிறேன் !

என்ன ஒரே விஷயம் - "மறுக்காவும் இ.ப'" என்ற நொடியில் - சில பல ஜாக்பாட்  விலைகளிலான resale சாத்தியங்கள் ஓய்ந்து போய்விட்டதில் வெளிப்பட்டிருக்கக்கூடிய புகைச்சல்கள், இந்த விலை குறைப்பின் புண்ணியத்தில் இன்னும் கொஞ்சம் ஜாஸ்தியாகிடக் கூடும் - வரும் நாட்களில் ! அதுமட்டுமன்றி - "பார்டா..இவ்ளோ விலையைக் குறைச்ச பிறகும் இதிலே லாபம் எவ்ளோ இருக்குமோ ?" என்ற அடுத்த கட்ட ஆராய்ச்சிகளுக்குள் அந்த ஆற்றல் வாய்ந்த அணி புறப்படுமென்பதிலும் ஐயமில்லை ! So விறு விறுவென்று சீசன் 3-ற்கு ரெடியாகிக் கொள்ளுங்க பகடி & கோ ! And எப்போதாச்சும் ஒரேயொருவாட்டி அந்த உழைப்புகளை ஏதேனுமொரு சந்தோஷச் செயலுக்கும் உரமாக்கித் தான் பாருங்களேன் ? அதனில் கிட்டக் கூடிய நிறைவு, இந்தக் கூத்துக்களில் கிட்டுவதை விடவும் அதிகமென்பதை அறியாதவர்களா நீங்கள் ? And stay assured - விலையினை டமக்கென்று குறைத்திருப்பினும் - தயாரிப்பினில் துளியும் compromises இன்றி "இ.ப" வெளிவந்திடும் என்பது எனது உத்திரவாதம் - whenever that is !


ஏற்கனவே பணம் அனுப்பியுள்ள நண்பர்களின் கூடுதல் தொகைகளை வாபஸ் செய்திடலாம் ; அல்லது 2021-ன் சந்தாக்கணக்குகளில் வரவு செய்திடலாம் ! And நாளைக்கு காலையில் லிஸ்டிங் தொகைகளைத் திருத்தி விடுவோம் ; so அதன் பின்பான முன்பதிவுகளுக்கு no worries !

So டி-வி ரியாலிட்டி ஷோக்களில் அரங்கேறும் கூத்துக்களுக்கு இணையான இந்த லேட்டஸ்ட் எபிசோடிற்கு எனக்கு சாத்தியமாகியுள்ள தீர்வைக் சொன்ன கையோடு  நான் கிளம்புகிறேன் folks ! நம்மைச் சுற்றியிருப்போர் அன்பில் மட்டுமல்ல ; நிதானங்களிலும் சளைத்தவர்களல்ல என்பதைப் புரிந்த பரம திருப்தி எனக்கு !

அதே சமயம் - 'யாரோ முகமில்லா ஆசாமி போடும் வெத்துக் கூச்சலுக்கோசரம் இந்த kneejerk ரியாக்ஷன் தேவை தானா ?' என்ற எண்ணம் உங்களுக்குள் எழுந்திருப்பது நிச்சயம் ! As always எனது பதில் ரொம்பவே சிம்பிள் guys : பிள்ளைக்கு விட்டுச் செல்வது புண்ணியங்களாய் இல்லாதே போனாலும், சாபங்களும், வயிற்றெரிச்சல்களாகவும் இருந்திட வேண்டாமே என்று நினைக்கிறேன் ! இது பொழுது போகா பத்துப் பேரின் ஆற்றமாட்டாமைகளின் வெளிப்பாடாய்  இருப்பினுமே - இத்தனை வன்மம் கலந்து வெளிப்படும் போது அதன் பலனில் விரல் நுனியினை வைக்கக்கூட கூசிடுகிறது எனக்கு ! இந்த விலை குறைப்பின் காரணமாய் நான்  இழக்கக்கூடிய ஏதோவொரு தொகை இங்கேயே என்றோ சம்பாதித்த ஒன்று தானே ? So - இங்கே சேர்த்ததைத் தானே இங்கேயே செலவிடவும் போகிறேன் ? திரும்பவும் என்றோ ஒரு நாளில் வாய்ப்பிருந்தால் ஈட்டிக் கொண்டால் ஆச்சு !' என்ற புரிதலோடு அடுத்த பணிக்குள் ஆழ்ந்திடுவோமே !

அதே போல - "பாத்தியால்லே ? ஒரு போடு போட்ட உடனே விலை குறைச்சுப்புட்டாப்ப்லே !!" என்ற அறிவு சார்ந்த ஐன்ஸ்ட்டின் ரக பதிவுகளை, தொடரும் நாட்களில் நீங்கள் பார்க்கவிருப்பதும் நிச்சயமே ! அவற்றைப்  பார்க்கும் போது ஒரு சிறு புன்னகையோடு தாண்டிச் செல்லும் பெருந்தன்மையும் உங்களதாகிட  வேண்டிக் கொள்வேன் ! என் பொருட்டு எவ்வளவோ சங்கடங்களை சுமந்துள்ள நீங்கள், இந்த ஒரேயொரு முறையும் தாண்டிச் செல்லுங்களேன் ப்ளீஸ் ?  Thank you again for being who you all are !!

Bye for now ! See you around !

P.S : நம் மீதான அன்பினில் தொடர்ந்து அதே 4100 / 4200 விலைகளில் நண்பர்கள் பணம் அனுப்பிட்டாலும், இங்கு அறிவித்துள்ள தொகை தவிர்த்த மீதம் அவரவரது 2021 சந்தா முன்தொகைகளாகவே கருதிடப்படும் ! So please do stick to the new prices only ! Maybe..just maybe 300 என்ற இலக்கு சற்றே அதிகமாகிடின் நன்மை கிட்டும் என்று வேண்டிக் கொள்ளுவோம் ! 

Saturday, June 27, 2020

ஒரு குக்கரும், ஒரு விசிலும் !

நண்பர்களே,

உஷார் : ஒரு LIC கட்டிடம் காத்துள்ளது !! 

வணக்கம். பெருசாய் யோசனைகளோ, திட்டமிடல்களோ ஒருபோதும் இருந்ததில்லை ; சனிக்கிழமை மாலையானால் பேப்பரும், பேனாவையுமோ – லாப்டாப்பையோ எடுத்துக் கொண்டு சப்பணமிடும் போது தான் என்ன எழுதுவதென்ற யோசனையே துவங்கிடும் ! And ‘இந்த வாரம் இதைப் பற்றித் தான் மொக்கை போடப் போகிறோம்‘ என்பதைத் தீர்மானித்த பின்னே, மனதில் தோன்றுவதை அப்படியே எழுத்தாக்கி ‘லொஜக்‘ என Publish பட்டனை அமுக்கி விடுவேன் ! ஆனால் – முதன் முறையாக... இல்லே, இல்லே... கடந்த நாலைந்து ஆண்டுகளில் முதன் முறையாக இந்தப் பதிவை செவ்வாய் காலையே எழுதத் தொடங்கினேன் – தொடர்ந்த 4 நாட்களாய் இதனை மனதில் அசைபோட்டபடிக்கே இருந்த பிற்பாடு இன்றைக்கு இதனைப் பகிர்ந்திடல் ஓ.கே. தான் என்று தோன்றிய பின்னே பதிந்துள்ளேன் ! ”பில்டப்பெல்லாம் பலமாய் உள்ளதே – புதுசாய் இன்னொரு நாலாயிரத்துக்கு என்ன குண்டைப் போடப் போகிறானோ?” என்ற பயம் மெதுவாய் துளிர் விடுகிறதா? No worries folks – இது நமது தற்போதைய நிலவரம் + காத்திருக்கும் அடுத்த சில மாதங்கள் சார்ந்ததொரு மனம் திறப்பு மாத்திரமே ! So உங்கள் பர்ஸ்களுக்குப் பாதகமில்லை – இப்போதைக்காவது!

இதோ இந்தப் பதிவை எழுதத் தொடங்கும் முந்தைய மாலையில் தான் மதுரை மாவட்டத்திலும் முழு ஊரடங்கு அறிவிக்கப்பட்டுள்ளது & maybe எங்கள் மாவட்டம் உள்பட மேலும் சில மாவட்டங்களில் அடுத்த சில நாட்களில் இது தொடரும் என்ற வதந்திகளும் சரளமாய்ச் சுற்றி வருகின்றன ! இந்தப் பதிவை நீங்கள் படிக்கும் வேளைக்கு அவை வெறும் வதந்திகள் தானா ? என்ற தெளிவு பிறந்திருக்கலாம் தான்!எது எப்படியோ, கொரோனா எனும் சுனாமி தனது தடத்தில் தமிழகத்தைக் காலுக்குள் போட்டு மிதித்து வரும் கொடுமை அத்தனை சீக்கிரத்துக்கு முடிவுக்கு வராது என்பது மட்டும் தெளிவாய்த் தெரிகிறது ! And மதயானையின் காலடியில் சிக்கிய தோங்காய் போல ஆங்காங்கே பிழைப்புகளும் தெறித்துப் போய் வரும் சூழலில் நாம் எங்கே நிற்கிறோம் ? என்ற கேள்வியை என்னை நானே விடாப்பிடியாய்க் கேட்டு வருகிறேன் – கடந்த 90+ நாட்களாய் ! பொதுவாய் அவரவருக்கு ஆயிரத்தெட்டுப் பிரச்சனைகள் இருக்கும் சந்தர்ப்பங்களிலும் – சற்றே ரிலாக்ஸ் செய்திட நீங்கள் இங்கு எட்டிப் பார்ப்பதில் no secrets ! ஏதேனும் காரணங்களால் நான் டல்லடித்துப் போய்க் கிடந்தாலுமே, அதனை எனது எழுத்துக்களில் பெரிதாய்ப் பிரதிபலிக்காது பார்த்துக் கொள்ள விழைவதுண்டு ! So ஒருவிதமான ‘all is well’ என்ற சோப்புக் குமிழிக்குள்ளேயே இங்கே நாம் ஒட்டுமொத்தமாய் பயணிக்கும் போது, என் மனசுமே அதனை நிஜமென நம்பி, தேறிக் கொள்ளும் கூத்துக்களும் அரங்கேறியுள்ளன என்பதால் the power of positivity மீது எனக்கொரு அசைக்க இயலா நம்பிக்கை என்று வைத்துக் கொள்ளுங்களேன் !

வரலாறு கண்டிரா இன்றைய பேரழிவின் முன்னே நமது சோப்புக் குமிழிகளின் வலு தான் எத்தனை காலம் தாக்குப்பிடிக்க வல்லது ? என்ற சீரிய ஆராய்ச்சியை மல்லாக்கப் படுத்து ; குப்புறப் படுத்து என நம்ம பஞ்சுமுட்டாய்த் தாடி லியனார்டோ தாத்தாவின் பாணியில் சமீபமாய் அரங்கேற்றிக் கொண்டிருக்கிறேன் ! மண்டைக்குள் ஏகப்பட்ட எண்ணங்கள் குறுக்கும், நெடுக்குமாய் சுழன்றடித்துக் கொண்டிருக்க, எங்கிருந்து ஆரம்பிக்க என்று தடுமாறுகிறது ! So ‘“கேள்வியும் - நானே; பதிலும் – நானே” பாணிக்கு சித்தே மாறிக் கொள்கிறேனே?!

1. இந்த நொடியில் நாம் எங்கிருக்கிறோம்? நிலவரம் தான் என்ன ?

- புளுகாமல் இதற்குப் பதில் சொல்வதாயின் – ஆர்ச்சியின் ‘கோட்டையைக் கடன் வாங்காமலே ; நம்ம சட்டித் தலையனின் கோணங்கித்தனங்கள் இல்லாமலேயுமே காலத்தில் ஏறக்குறைய 8 வருடங்கள் பின்னோக்கிச் சென்றிருக்கிறோம் என்பேன் ! 2012-ல் நமது “கம்பேக் ஸ்பெஷல்” வெளியான நாட்களில் வெளியே ‘ஹி...ஹி....ஹி‘ என்று பல்லைக் காட்டிக் கொண்டு உலா வந்தாலுமே ‘தெய்வமே... இந்தத் துவக்கத்தைத் தக்க வைத்துக் கொள்ள முடியுமா ?‘ என்ற கேள்வி உள்ளே ஊற்றடித்துக் கொண்டிருந்தது ! தொடர்ந்திட்ட நாட்களில், வாரங்களில், மாதங்களில், நமது பயணம் டாப் கியரைத் தொட்ட கதையெல்லாம் நமக்குத் தெரியும் ! ஆனால் அந்த  100 மாதங்களின் உழைப்பு – கொரோனாவின் (இது வரையிலான) 100 நாள் தாண்டவத்தின் புண்ணியத்தில் சரிந்திடும் சீட்டுக்கட்டுக் கோபுரம் போல போயிண்டே... its gone ! என்றாகிப் போன உணர்வு இன்றைக்கு !

Of course – அசாத்தியமானதொரு அரணாய் நமது சந்தா நண்பர்கள் இந்த நொடியில் நம்மைக் காத்து வருகிறார்கள் ! அவர்களது சந்தாக்களின் பாதுகாப்பானது மட்டும் நம்மை இன்று அரவணைக்காதிருப்பின் – ”கோவணத்தோடு அலாஸ்காவில் சுற்றித் திரிவது எப்படி?” என்ற புக் போட மட்டுமே நமக்குச் சாத்தியமாகியிருக்கும் ! எட்டுத் திக்குகளிலும் நீங்கள் பரவிக் கிடக்கிறீர்கள் என்பது தெரியும் folks ; அமெரிக்கா முதல் ஆஸ்திரேலியா வரையிலும் உங்கள் சந்தாக் கால்தடங்கள் பதிந்திருப்பது கடந்த 8+ ஆண்டுகளின் பரிச்சயமே ! ஒரேயொருவாட்டி நீங்கள் ஒட்டுமொத்தமாய் கிழக்கை நோக்கி நிற்கும் பட்சத்தில் – விழுந்து நமஸ்காரம் செய்து கொள்ள வசதியாக இருந்திடும் ! சத்தியமாய் இதுவொரு over the top ரியாக்ஷன் அல்ல ! மே துவக்கம் முதலாய் அலுவலகமும், நமது வெளியீட்டுப் படலமும், மறுதுவக்கம் கண்ட நாளிலிருந்து ஒவ்வொரு பத்து ரூபாய் நோட்டுகளிலுமே புது அர்த்தம் காண்பது போலுள்ளது ! பாதிக்கு மேலான நமது ஏஜெண்ட்கள் ‘தொடர்ந்து எல்லைக்கு அப்பால்‘ தொடர்ச்சியாய் இருந்து வர – அவர்களிடமிருந்து ஆர்டர்களும் நஹி ; வசூல்களும் zilch ! மீதமிருக்கும் முகவர்கள் கண்ணியமாய் நமக்குத் தோள் தந்து வருவதால் பேப்பர் கொள்முதல்கள்; பைண்டிங் கூலிகள் ; etc. என்ற செலவுகளை ஒன்றுக்குப் பாதியாகவாவது சரிக்கட்ட முடிகிறது ! இங்கே அவர்களுக்கும் ஒரு உளமார்ந்த கைகூப்பல் அவசியமாகிடுகிறது என்பேன் ! இந்தச் சிரம நாட்களிலுமே இயன்றமட்டிற்குப் பம்பரமாய்ச் சுழன்று வரும் அவர்கள் நம்மளவிற்கு வரங்களே ! ஆனால் “அலுவலக நிர்வாகச் செலவினங்கள்” என்றதொரு தலைப்பில் – மாதாமாதம் தலைதூக்கிடும் சம்பளம் ; ஓவர்டைம் ; மின்கட்டணம் ; கூரியர் செலவுகள் இத்யாதி...இத்யாதியென்ற செலவுகளைச் சமாளிக்க – சத்தியமாய் நாக்குத் தொங்கிப் போய் விடுகிறது - கடந்த 2 மாதங்களாய் ! And அதற்கான காரணம் - மாயமாகிப் போயுள்ள ஆன்லைன் சேல்ஸ் தான் ! 

I've probably said this before - but worth a repeat again !! நமது வண்டி ஓடுவது நாலு கால்களின் தாக்கான்களோடு guys! 
  • கால் # 1 : உங்களின் சந்தாக்கள் ! 
  • கால் # 2 : நமது முகவர்கள் வாயிலான விற்பனைகள் ! 
  • கால் # 3 : நமது புத்தக விழா விற்பனைகள் !
  • கால் # 4 : ஆன்லைன் sales ! 
இவற்றுள் கால் # 1 ஷங்கர் சிமெண்டின் உறுதியோடும், செட்டிநாடு சிமெண்டின் ஸ்திரத்தன்மையோடும் இருப்பதால் no worries - at least for now ! இரண்டாம் காலில் ஒரு பாதியினை கொரோனா அரித்திருப்பதால் அங்கே பழைய நியூஸ்பேப்பர்களைச் சுருட்டி வைத்து முட்டுக் கொடுத்திருக்கிறோம் ! புத்தக விழாக் காலான # 3 ஒட்டுமொத்தமாய் பணாலாகிப் போய்க் கிடப்பதில் இரகசியங்கள் ஏது ? நெய்வேலி – கோவை – ஈரோடு – மதுரை & திண்டுக்கல் என்ற circuit ஜுலை முதலாய்த் துவக்கம் கண்டு அக்டோபர் வரையிலும் ஓடி, குறைந்தபட்சமாய் ஒரு கௌரவமான தொகையினைக் கண்ணில் காட்டிடுவது வழக்கம் ! And இந்தத் தொகையே உங்களின் சந்தா வசூல்களை எதிர்பார்த்திடாது – மறு வருடத்துக் கதைகள் கொள்முதல்களுக்கு – துவக்கம் தர உதவி வந்த சங்கதிகள் ! போன வருடம் இந்நேரத்துக்கெல்லாம் போனெல்லியின் கதைப் பட்டியல் இறுதியாகி, ஆகஸ்ட்வாக்கில் அட்வான்ஸ் தொகைளை ஓரளவுக்கு அனுப்பி, டிஜிட்டல் கோப்புகளின் ஒரு பாதியைத் தருவித்திருந்தோம்! ஆனால் இந்த தபா கால் # 3 is gone எனும் போது, கதைத் தேடல்களுக்குள் புகுந்திடவே மனம் சண்டித்தனம் செய்து வருகிறது! And equally distressing – ஆன்லைன் விற்பனைகள் எனும் கால் # 4 கூட கிட்டத்தட்ட காணாது போய் விட்டதென்பதே!

மார்ச் இறுதி முதலாகவே நமது ஆன்லைன் ஆர்டர் தளங்கள் கஞ்சன் வீட்டுப் பந்தி போல காற்றாடவே செய்கின்றன ! தினப்படி நடந்து வந்த இந்த விற்பனைகளே நமது பணியாட்களின் சம்பளங்களுக்கு ; கூரியர் செலவுகளுக்கு ; ஆர்ட்டிஸ்ட் சம்பளங்களுக்கு ; மொழிபெயர்ப்புச் சன்மானங்களுக்கு ; நிர்வாகச் செலவுகளுக்குச் சமாளிக்கும் திறன் தந்து வந்தவை ! ஆனால் “லாக் டவுண் ; கூரியர்கள் ரத்து“ என்ற சூழலில் சுணக்கம் கண்ட ஆன்லைன் விற்பனைகள், இன்று ஒரேயடியாய்ப் படுத்த படுக்கையாகி விட்டிருப்பது விழி பிதுங்கச் செய்யும் சிக்கலாய் உருவெடுத்துள்ளது ! இதன் பொருட்டு யாரையும் நோவதில் பலனில்லை என்பது புத்திக்குத் தெரிகிறது ! இன்றைய சூழலில் ‘பொம்மை புக்குகள்‘ முக்கியத்துவப் படிகளில் உசரமானதொரு இடத்தைத் தக்க வைத்திடும் ஆற்றல் வாய்ந்தவையல்ல என்பதை ஏற்றுக் கொள்ளும் முதல் ஆள் நானே ! So கொஞ்சமே கொஞ்சமாய் சகஜ நிலைகள் திரும்பும் வரையிலாவது இந்தக் கால் # 4 தள்ளாட்டத்தோடே தொடர்ந்திடும் என்பது யதார்த்தம் !

ஆக ஒரேயொரு கால் மட்டும் திருமலை நாயக்கர் மஹாலின் தூணாட்டம் கம்பீரமாய் நின்றிட; இன்னொரு அரைவாசிக் காலைக் கொண்டு சரிக்கட்டியபடியே, ஒண்ணரைக் கால்களோடு  ‘டிங்கடி... டிங்கடி‘ என்று நொண்டியடித்து வருகிறோம் ! வார்னிஷ் பூசா நிஜ நிலவரமிது !

2. சரி... எப்படிச் சமாளித்து வருகிறாயோ அம்பி ?

வருஷா வருஷம் கதைக் கொள்முதல்கள் நவம்பர் to பிப்ரவரி என்ற phase-ல் முற்றுப்புள்ளி கண்டிட வேண்டியவைகள் ! இந்நேரத்துக்குள் ரெகுலர் சந்தாக்கள் மாத்திரமன்றி, ஜம்போவின் சந்தாக்களுக்குமான கதைகளை இறுதி செய்திருப்பேன் ! So realistically speaking – ஆண்டின் பாக்கி 8 மாதங்களுக்குக் கதைகளுக்கோசரம் பணம் புரட்டும் அவசியங்கள் இருக்கக் கூடாது ! அதாவது – குரங்கு வேலைகளில் நாட்டமில்லாவொரு நார்மலான ஆசாமி எடிட்டராக இருக்கும் பட்சத்தில்! ஆனால் இங்கே தான் “நார்மல்” என்றால் வீசம்படி என்னவெனக் கேட்கும் ஆந்தை விழியன் அல்லவா எடிட்டர் குல்லாயை மாட்டிக் கிடக்கின்றான் ? கண்ணில் தென்படும் புதுப் படைப்புகளே; சமீபமாய்ச் சாதித்து வரும் புதுப் பதிப்பகங்களை பார்த்த நொடியே தலைக்குள் ஒரு வேதாளம் கொட்டகை போட்டு அமர்ந்து விடுவதால் – எப்போது வெளியிடலாம்?‘ என்ற புரிதல் இல்லாமலே கூட கதைகளை வாங்கி அடுக்கிடும் “கதையோமேனியா” தலைவிரித்தாடுவது சமீப ஆண்டுகளின் வாடிக்கை! இந்த நொடியில் என் கைவசமுள்ள பல ஜானர் one-shot-களை ; மினி தொடர்களைக் கொண்டு ஜம்போ சீஸன் 6 வரைக்கும் வண்டியினை ‘ஜிலோ‘வென்று ஓட்ட முடியும் தான் ! அட, இந்த லாக்டவுணின் ஏப்ரலில் கூட ஒரு அட்டகாச கௌபாய் ஒன்-ஷாட்டிற்குக் கான்டிராக்ட் போட்டு வாங்கி வைத்திருக்கும் ஒரே பக்கி இந்த சிவகாசி பேமானியாகத் தானிருக்க முடியும் ! So நள்ளிரவில் வயிறு பிறாண்டும் போது பிரிட்ஜைத் திறந்து உருட்டும் பாணியில் – ஆண்டின் நடுவாக்குகளிலும் தொடரும் எனது ஷாப்பிங் குடாக்குத்தனங்களுக்குப் பயன்படுமே என்ற நோக்கில் ஜம்போவின் சந்தாத் தொகைகளை மட்டும் வைப்பு நிதியாக்கிப் பத்திரப்படுத்தி வைப்பேன் ! அந்த டெப்பசிட் தொகையே தற்போது மானம் காத்து வருகிறது ! ஆனால் நம் நேரமோ என்னவோ – ஜம்போவின் சீஸன் 3-க்கு 330+ சந்தாக்களே தேறியுள்ளன ! ரெகுலர் சந்தாதாரர்கள் அனைவருமே ஜம்போவின் ஜோதியில் ஐக்கியமாகியிருக்கும் பட்சங்களில் இன்னும் கொஞ்சம் இலகுவாகியிருக்கும் நம் பாடு ! ஆனால் இந்தமட்டிற்குத் தேறியதே இப்போதைய சூழலில் பெரிய சமாச்சாரமாய்த் தென்படுவதால் no complaints!

3. ஆக இரத்தப் படலம் மறுபதிப்பு தரைதட்டிப் போன கல்லாவைத் தேற்றுவதற்கோசரம் தானாக்கும் ?

For sure not ! இந்த ப்ராஜெக்டின் எதிர்காலம் செப்டம்பர் 15-க்கு முன்பாய்த் தெளிவாகாது எனும் போது இதன் பொருட்டு நண்பர்கள் இன்று அனுப்பி வரும் தொகைகளை ஒவ்வொரு லட்சமாய்ச் சேர்ந்த நொடியில் fixed deposit ஆகப் போட்டு வைப்பதில் முதல் நாளிலிருந்தே தெளிவாக உள்ளேன் ! ‘இன்னிக்கு பத்தாயிரம் தேறுச்சா – கூரியருக்கு குடுத்திடு ; இருபதாயிரம் வசூலா – சம்பளத்தைப் போட்டுப்புடு !‘ என்று இந்தச் சிரம நாட்களைச் சுலபமாக்கிக் கொள்ளும் சபலமெல்லாம் நிச்சயமாய் என்னை ஆட்டிப் பார்க்கவில்லை – simply becos வைரஸின் தாண்டவம் மேற்கொண்டும் மோசமாகி இந்த 'இ.ப' முயற்சியைக் கைவிடும் மாதிரியானதொரு சூழல் ஒருக்கால் எழும் பட்சத்தில் – அவரவரது பணங்களை அந்த நொடியே வாபஸ் செய்திட வேண்டியது நம் தலையாய கடமையல்லவா ? அரும்பாடுபட்டு வளர்த்திருக்கும் நம்பிக்கையை நாசம் செய்வது முறையாகாது என்பதால், இன்றைக்குத் தின்று ஏப்பம் விட்டுவிட்டு, அன்றைக்கு திருட்டு முழி முழிக்க சத்தியமாய்த் திராணியில்லை !  So முழுசாய் 300 என்ற இலக்கு எட்டப்படும் வரையிலும் இந்தப் பணங்களில் தம்புடி கூட நம் இன்றைய செலவுகளின் பொருட்டு ‘கோவிந்தா‘ போடப்படாது என்று தைரியமாக நம்பலாம்‘ ! So இந்த நொடியின் இக்கட்டுகளுக்கு "இ.ப' ஒரு மருந்தென்ற டுபுக்கு நினைப்பெல்லாம் நஹி & இந்த நொடியில் இது வரைக்குமான முன்பதிவுத் தொகைகள் ஒற்றை ரூபாய் கூடக் குறையாது pretty much safe in the Bank ! And in any case, இது வரையிலான முன்பதிவு வேகங்கள் உசைன் போல்ட்டுக்கு சவால் விடுபவைகளாய் இல்லை எனும் போது, எனக்குள் சபலங்கள் துளிர்க்கவும் வாய்ப்புகள் close to zero ! 

4. சரி... குறுகிய எதிர்காலத்துக்குத் திட்டங்கள் என்ன ?

இதோ- ஜுலை முதலான ரெகுலர் இதழ்கள் + ஜம்போ சீஸன் 3-ன் மீத இதழ்களைக் கணக்கிட்டால் இன்னமும் காத்திருப்பவை 32 இதழ்கள் ! மே மாதத்திலும் சரி, ஜுனிலும் சரி, சந்தாப் பிரதிகள் தவிர்த்து ஏஜெண்டுகளிடமும், மிகக் குறைச்சலான ஆன்லைன் வாசகர்களிடமும் விற்றிடச் சாத்தியமாகியுள்ளது - வெளியே சொல்லிக்கொள்ள இயலா ஒரு சிறு எண்ணிக்கையே ! So இந்த 2 மாதங்களில் மட்டுமே கிட்டங்கிக் கையிருப்பு ‘டமக்‘ கென்று எகிறியுள்ளதால் ஜுலை முதலாகவே நாம் அச்சிடப் போகும் பிரதிகளின் எண்ணிக்கையையும் அதே ‘டமக்‘ ரேஞ்சில் குறைப்பதாக உள்ளோம் ! குறைக்கப்படும் இந்த பிரிண்ட் ரன்னில் – புதுசாய் ஒரு costing போட்டுப் பார்த்தால் ட்ரௌசர் கழன்று போகும் என்பது புரிகிறது தான் ; ஆனால் அசாதாரணமானதொரு சூழலில் பற்களை இறுகக் கடித்துக் கொள்வதைத் தவிர்த்து வேறு வழிகளில்லை என்பதால் - To Beelzebub with numbers ; we plan to just ride this phase through ! பிரிண்ட்-ரன்னைக் குறைப்பது மட்டுமன்றி, ரெகுலர் தடத்து இதழ்களை இந்த டிசம்பருக்குள் பூர்த்தி செய்ய விழையாது – சந்தா நண்பர்களின் சம்மதங்களோடு, இவற்றை மார்ச் 2021 வரையிலும் நீட்டிக்கவும் எண்ணியுள்ளேன் ! அள்ளி அடித்து மாதந்தோறும் 4 புக் ; 5 புக் என மந்தம் விரவிய மார்க்கெட்டில் வெளியிட்டு, எஞ்சியிருக்கும் நமது முகவர்களையும் சிரமத்துக்குள்ளாக்கிய புண்ணியம் வேண்டாமே என்று தோன்றுவதால் இந்த எண்ணம் ! So ரெகுலர் சந்தா மார்ச் 2021-ல் நிறைவு கண்டிடும் ! Sorry guys – இந்த downscaling தவிர்க்க இயலாக் கட்டாயமாகி நிற்கின்றது ; மூலையில் சிக்கிய பெருச்சாளி நான் இப்போதைக்கு ! 

But இந்த யுக்திகளால் சிக்கல்கள் மட்டுப்பட்டு விட்டன என்றாகாது, becos இந்தத் தீர்மானத்திற்கு இன்னொரு சிரமப் பரிமாணமும் இல்லாதில்லை ! ப்ரிண்ட் ரன்னைக் குறைத்துக் கொள்ளலாம் தான் ; வெளியீடுகளை மேற்கொண்டு 3 மாதங்களுக்கு நீட்டித்துக் கொள்ளலாம் தான் ; நம்மளவிற்கு ஈரத் துணிகளை போஜனச் செரிமானப் பகுதிகளைச் சுற்றிக் கட்டிக் கொள்ளவும் செய்யலாம் தான் ; ஆனால் டிசம்பரில் முற்றுப் பெற வேண்டிய இதழ்களை மேற்கொண்டு 3 மாதங்களுக்கு நீட்டிக்கும் போது – 3 கூடுதல் கூரியர் பில்களும் 'திடும் திடுமென்று' போட்டுத் தாக்கும் தானே !? ஏற்கனவே போன மாதம் முதலாய்க் கட்டணங்களைக் கூரியர் நிறுவனங்கள் ஏற்றியுள்ள சூழலில், an additional 3 months கூரியர் கட்டணம் + ரிஜிஸ்டர் பார்சல் + ஏர்மெயில் கட்டணம் + அட்டைப் பெட்டிகள் எனில் – தோராயமாய் ரூ.85,000 பழுத்து விடும் ! தொடரும் மாதங்களில், நிலவரங்கள் சகஜத்தை நோக்கித் திரும்பிடும் பட்சங்களில், இந்தக் கூடுதல் தொகையினை யாசகம் கோராது சமாளித்து விட முடியும் தான் ! ஆனால் ஒரு துரதிர்ஷ்டச் சூழலில் நோயின் தாக்கங்கள் மட்டுப் பெறாது போயின் – tough ! So “மேற்கொண்டு நூறு ரூபாய் அனுப்புங்களேன்; நூற்றைம்பது அனுப்புங்களேன் ப்ளீஸ்” என்று உங்களை நச்சரிப்பதற்குப் பதிலாய் கலர் இதழில் ஒன்றான ரிங்கோ + b&w இதழான "தோட்டா தேசம்"  மட்டும் இம்முறை கழற்றி விடலாமா ? என்பதே எனது கோரிக்கை ! பெருசாய் ஒரு தாக்கத்தை ஏற்படுத்தியிரா இந்த இரு இதழ்களையும் பின்னர் பார்த்துக்கொள்ள நீ்ங்கள் இசைவு சொல்லும் பட்சத்தில், இந்தக் கூடுதல் கூரியர் பளுவினைச் சமாளித்து விட முடியும் ! What say folks ? (Today's question # 1இதனில் சம்மதமோ, சங்கடமோ - தயங்காது இங்கேயே பதிவிடக் கோருகிறேன் ! இங்கொரு விதமாகவும், அப்பாலிக்கா FB-ல் அல்லது க்ரூப்களில் வேறொரு விதமாகவோ எழுதுவதால் பலன் இராதே ? 

5. புதுச் சந்தா பற்றிய thoughts ?

ஒற்றை வரியில் சொல்வதாயின் – அட்டவணையே ரெடி !

For sure – தற்போதைய ஆடம்பரங்களோ, ஜிகினா வேலைகளோ அடுத்த சந்தாவினில் இருந்திடாது ! And விற்பனையில் தள்ளாட்டம் காணா தாட்டியவான்கள் மட்டுமே 2021-ல் வலம் வருவர் ! விளிம்பில் நின்று வரும் நாயக / நாயகியரோ ; சென்டிமென்டின் காரணமாய்த் துண்டு போட்டு வரும் ஹீரோ / ஹீரோயின்களோ ; கிட்டங்கி காதலர்களோ - காத்திருக்கும் 2021-ன் ஒன்பது மாதச் சந்தாவினில் இடம் காண மாட்டர் ! God willing, அடுத்தாண்டிற்குள் நோயின் தீவிரம் கட்டுக்குள் வந்திருந்தாலுமே, நிறைய ஜீவனங்கள் back to normal திரும்பிடுவது அத்தனை சுலபமல்ல என்பதில் ஏது சந்தேகம் ? So தரைதட்டிக் கிடக்கக் கூடிய பிழைப்புகள் திரும்பவும் உரம் பெறும் வரைக்கும், உங்கள் சிரமங்களுக்கு நமது சந்தாக்கள் ஒரு கூடுதல் காரணமாகிடாது ! 

அதே சமயம் - புத்தக விழாக்கள் ; கடைகளில் விற்பனைகள் போன்ற சமாச்சாரங்கள் ஓரளவுக்கேனும் சகஜத்துக்குத் திரும்பிட வேண்டியிருக்கும், நமது விலைகள் அபத்தமாகிப் போகாதிருக்க !! "சந்தா 550 & பாக்கி விற்பனை மார்க்கங்கள் எல்லாம் சேர்த்தே இன்னுமொரு  சன்ன எண்ணிக்கையே மொத்த விற்பனையும்" என்பதான சூழல் அடுத்த ஆண்டிலும் spill over ஆகின, கையெழுத்துப் பத்திரிகை ரேஞ்சுக்குத் தள்ளப்பட்டிருப்போம் & அத்தகையதொரு சூழலில் வேறு வழியே இன்றி நடைமுறைக்கு வந்தாக வேண்டிய விலைகளை நினைத்தாலே வயிற்றைக் கலக்குகிறது ! Would be a nightmare for sure !!

கடந்த 8 ஆண்டுகளாய் கதைகளைத் திட்டமிட்டு ; விலைகளைத் திட்டமிட்டு, பக்காவாய் ஒரு சந்தாத் தொகையை அறிவிப்பதெல்லாமே – குறைந்தபட்சமாய் 500 to 550 சந்தாக்களாவது தேறிடும் என்ற திட நம்பிக்கையில் ! In fact நமது ஒட்டுமொத்தக் கட்டிடமும் நிற்பதே இந்த நம்பிக்கை எனும் column-களின் மீதே!

ஆனால் -

Post Pandemic (!!!) 2021-ல் “550” என்ற நம்பர் சாத்தியமாகாது போயின் – அது நமது அஸ்திவாரங்களையே அசைத்துப் பார்த்து விடும் என்பது தான் bottom line ! So முன்னெப்போதையும் விட, காத்திருக்கும் 2021-ல் உங்கள் சந்தாக்களின் மதிப்பு,  எகிறிடும்  தங்கத்துக்கு இணையானதாக இருந்திடவுள்ளது ! And இது நாள் வரைக்கும் ஓராண்டின் முழுமைக்கும் நீங்கள் வாசிக்கவிருப்பது எதை ? என்ன விலைக்கு ? என்பதை focus லைட் போட்டு வெளிச்சமிட்டுக் காட்டி ; அப்புறமாய்ச் சந்தா சேகரித்து வந்துள்ளோம் ! ஆனால் இம்முறையோ சந்தாச் சேகரிப்பின் வெற்றியைப் பொறுத்தே இதழ்களின் விலைகள் அமைந்திட இயலும் என்பது மாதிரியானதொரு குடாக்குத்தனமான, கையைப் பிசையும் சூழல் ! So here is what I have in mind :

- "550 to 600 சந்தாக்கள்" எப்படியும் தேறிடும் என்ற நம்பிக்கையில் ரூ.3000 to 3300 சுமாருக்கு ஒரு தொகையினை அறிவித்திடலாம் ! இது ஏப்ரல் 2021 to டிசம்பர் 2021-க்கான திட்டமிடலாக இருந்திடும் ! 

- வழக்கம் போல ”கிச்சடிச் சந்தா” ; ”பச்சடிச் சந்தா” என்றெல்லாம் இந்த ஒருமுறை குழப்பிக்கொள்ளாது  – ஒரு All-in சந்தா & ஒரு அதிகாரியிலாச் சந்தா என்று மட்டுமே திட்டமிட ஆசை ! Maybe just once - கார்ட்டூன்கள் அனைவரது இல்லங்களுக்குள்ளுமே நுழைந்திட அனுமதித்துத் தான் பார்க்கலாமா folks ? (Today's Question  # 2) ..அல்லது கார்ட்டூன்கள் இல்லாத சந்தாவுமே திட்டமிடல் அவசியம் என்பீர்களா ? 

- And வழக்கம் போல அக்டோபர் இறுதியில் அட்டவணையினை வெளிட்டு – மார்ச் 2021 வரையிலும் கால அவகாசம் தந்திட இயலும் – 3 தவணைகளில் சந்தாக்களைச் செலுத்திட! Of course – இதழ்களின் விலைகள் மட்டும் சந்தா சேகரிப்பு நிறைவுறும் வரையிலும் குறிப்பிடப்பட்டிராது !

- So if all goes well – அறிவித்தபடியே இதழ்கள், தாக்குப் பிடிக்கக்கூடிய விலைகளில் வெளியாகும் ! ஆனால்........ஆனால்.......துரதிர்ஷ்டங்கள் ஒரு தொடர்கதையாகிப் போய், சுணக்கங்கள் சந்தாக்களிலும் தொற்றிக் கொள்ளும் பட்சத்தில் – தேறிடும் சந்தா எண்ணிக்கையினை அடிப்படையாகக் கொண்டே இதழ்களின் விலைகளை மறுநிர்ணயம் செய்ய வேண்டி வரும் ! 

- Simply put – '9 மாதங்களுக்கு ஒரு 30 புக்' அறிவிக்கிறோம் என்று வைத்துக் கொள்ளுங்களேன் ; ஆனால் 5 மாத அவகாசத்தினில் சந்தாக்கள் 300 தான் தேறுது ; 350 தான் தேறுது' எனில் – அறிவிக்கப்பட்ட சந்தாத் தொகையில் மாற்றமிராது ; ஆனால் இதழ்களின் individual விலைகளை மேற்கொண்டும் அதிகம் செய்து ; 26 புக்கோ ; 27 புக்கோ மட்டுமே வெளியிடுவது போலிருக்கும் !

- So சிரம நாட்களில் சன்னமாகிப் போகும் லட்டுக்களின் பருமனைப் போல ; சுருங்கிப் போகும் தோசைகளின் விசாலங்களைப் போல – இம்முறை நமது சந்தா நம்பரைப் பொறுத்தே அட்டவணையின் அளவும் அமைந்திடும் ! So இலட்சியம் 600 !! அவகாசம் 5 மாதங்கள் ! சாதித்து விட்டோமெனில் – மாமூலான விலைவாசி உயர்வுகளை ஈடு செய்திடும் அத்தியாவசிய விலையேற்றங்களைத் தாண்டிப் பெரிதாய் யார் கைகளையும் கடிக்காது தான் ! So நம்பிக்கை கொள்வோம் – இத்தனை காலம் நம்மைக் கரை சேர்த்து வந்துள்ள ஆண்டவனும், நீங்களும் இந்தப் புதுப் பயணத்திலும் துணை நிற்பீர்கள் என்ற நம்பிக்கையோடு!

- A NOTE HERE PLEASE : நான் முறையாய்த் தொகையினை அறிவிக்கும் வரையிலும், பணம் அனுப்பிட வேண்டாமே - ப்ளீஸ் ! இந்த இரத்தப் படலம் Project சார்ந்த திட்டமிடலும் செப்டம்பரில் இப்படியோ-அப்படியோ தீர்மானமான பின்பாய் – சற்றே தெளிந்த நிலையில் சகலத்தையும் தீர்மானித்துக் கொள்வோமே ? எதுவுமே ஸ்திரமாய்த் தென்படா இந்த நொடியில்  எவ்வித knee jerk ரியாக்ஷன்களையும் செய்திட வேண்டாமென்று நினைக்கிறேன் ! So நாட்களின் நகர்வுக்கேற்ப நமது தீர்மானங்களும் அமைந்திடட்டுமே ? 

6. சரி, ”இரத்தப் படலம்” பின்னொரு சந்தர்ப்பத்துக்கென தள்ளிச் செல்லும் கட்டாயம் உருவானால் அதனை எவ்விதம் கையாள உத்தேசம்  ?

இங்கொரு விளக்கம் அத்தியாவசியமென்று நினைக்கிறேன் ! இத்தனை காலம் விடாப்பிடியாய் மறுத்து வந்தவன் இந்த நொடியில் அடித்திருக்கும் U-டர்ன் குறித்து சில நண்பர்களுக்கு வருத்தமிருக்கலாம் தான் ; வியப்புமிருக்கலாம் தான் ! In fact அது நிறைய அலசல்களுக்கும், விவாதங்களுக்கும் உட்பட்டதொரு தலைப்பாக இருந்திருப்பின், நிச்சயமாய் ஆச்சர்யமில்லை எனக்கு ! Truth to tell -  அரைத்த மாவையே அரைக்காட்டி ஜென்ம சாபல்யம் காண முடியாதென்று ஒற்றைக் காலில் நின்று வந்த "இ.ப" ஆர்வலர்களின் stand குறித்து எனக்கு உள்ளுக்குள் துளியும் மகிழ்விருக்கவில்லை  ! இவ்வளவு பணமும், உழைப்பும் புதுக் கதைகள் பக்கமாய்த் திரும்பிட சாத்தியமானால் ஏகப்பட்ட மாயாஜாலங்கள் நிகழ்த்திட முடியுமே ; அதைப் புரிந்து கொள்ளாமல் அதே புளிச்ச மாவில் ; அதே புளிச்ச ஊத்தப்பங்களை ஊற்றுவதில் என்ன சுவாரஸ்யம் தான் இருக்க முடியும் ? என்று தான் ஒவ்வொரு முறையுமே எனக்குள் எண்ணங்கள் ஓடும் ! Was no different this time as well ! இந்தப் பொறுப்பினில் 36 ஆண்டுகளைச் செலவிட்ட பின்னே, மாமூலாய் மரத்தைச் சுற்றி பாட்டுப் பாடி, டான்ஸ் ஆடும் வேஷங்களைக் கட்டுவதில் இக்ளியூண்டு த்ரில் கூட எழுவதில்லை இப்போதெல்லாம் ! Of course ரெகுலர் இதழ்களில் உள்ள கமர்ஷியல் கதைகளையும் இதே காரணம் சொல்லி நான் உதறிடும் பட்சத்தில் பிழைப்பு நாறிடும் தான் ! நான் சொல்ல வருவது ஸ்பெஷல் இதழ்கள் பற்றி ! புதுசாய் ; சவாலாய்ச் செய்திட கிட்டும் சந்தர்ப்பங்கள் மட்டுமே உள்ளுக்குள் ஒரு adrenaline rush கொணர்வதை உணர்கிறேன் ! இது தான் எனது நிலைப்பாடாக இருந்தது 10 நாட்களுக்கு முன்பாய் - "இ.ப' ...மறுக்கா போடுப்பா !!" என்ற கச்சேரி துவங்கிய தருணத்திலும் ! எப்போதும் போலவே எனது அசுவாரஸ்யத்தைப் பதிவிட்டு அடுத்த பணிகளுக்குள் புகுந்திட முயன்ற போது தான் சில விஷயங்கள் முகத்தில் அறைந்தார் போல புரிந்தன : நாளொன்றுக்கு சுமார் 30 மின்னஞ்சல்கள் வந்து கிடக்கும் நமது Inbox-ல் இன்றைக்கு நூலான்படைக்கு இடையே மூன்றோ-நாலோ இருந்தாலே பெரும் பாடாய் இருப்பது மனதை அரிப்பது போலொரு உணர்வு ! ஓயாது அலறும் நமது அலுவலக போன்கள் இப்போதெல்லாம் மௌன விரதத்தைக் கடைப்பிடித்து வரத் துவங்கியிருக்க, நம்மவர்களும் அமைதியாய் கம்பியூட்டர் ஸ்க்ரீன்களை வெறித்தபடிக்கே அமர்ந்திருக்க, இந்தியா தோல்வியைத் தழுவக்காத்துள்ள மேட்ச் நடக்கும் ஸ்டேடியம் போல ஆபீஸ் முழுக்க நிசப்தம் ! லாக் டௌன் முடிந்த முதல் மாதத்தில் (மே) கூட இத்தனை மோசமில்லை ; ஆனால் ஜூனின் இந்த 3 வாரங்கள், சாத்தான்குளத்து விசாரணை அதிகாரிகளின் பாணியிலேயே இருந்து வந்துள்ளன ! நான் கேபினுக்குளிருந்து மணியடித்தால் கூட எழுந்து வந்து என்னவெனக் கேட்க நாலைந்து நிமிடங்கள் ஆகிடுமெனும் அளவுக்கு பிசியாக இருந்த நம்மவர்கள் , வேலையின்றி மாலை நாலுக்கும், ஐந்துக்கும் வீடு திரும்புவது ரொம்பவே வயிற்றைக் கலக்கியது ! And சமீப நாட்களாய் ஒவ்வொரு சம்பள தினத்தன்றும் மெலிந்த கவர்களைக் கையில் வாங்கப் பணியாட்கள் தடுமாறுவதைப் பார்த்திடும் போது ஒருவித ஆற்றமாட்டாமை உள்ளுக்குள் வியாபித்து நிற்பதைத் தவிர்க்க இயலவில்லை ! வெகு சமீபத்தில் ஒரு ஆளில்லா நிசப்த மாலையில், ஆபீசில் நான் மட்டுமே இருந்ததொரு தருணத்தில், யதார்த்தத்தை ஒரு பேப்பரில் எழுதி பார்க்க முனைந்தேன் ! அந்த நேரத்தில் நான் பதிவு செய்த விஷயங்கள் இவையே :
  • For sure இம்முறை புதுச் சந்தாக்களை ஜனவரியில் துவக்கிட வாய்ப்பேயில்லை !! 
  • சென்னையில் 2021 ஜனவரிப் புத்தக விழா பற்றிய ஆரூடங்கள் தற்சமயத்துக்கு Nostradamus-க்கே சாத்தியப்படாது !
  • நமது அச்சகத்தில் பெரும்பாலும் அச்சாவது பள்ளி புக்ஸ் ; கைடு ; நோட்புக் ; வினாத் தாள்கள் போன்றவைகளே ! கொரோனாவின் புண்ணியத்தில் பள்ளிகளோ, கல்லூரிகளோ என்றைக்குத் திறக்குமென்பதெல்லாம் யாரது யூகத்திலும் சாத்தியமில்லை என்பதால் அந்த ஆர்டர் ஒட்டு மொத்தமாய்க் காலி ! So காமிக்ஸ் சார்ந்த பணியாட்கள் மட்டுமன்றி, அச்சகப் பிரிவின் பணியாட்களுமே - கொஞ்ச காலத்துக்காவது இந்த சுணக்கங்களின் தாக்கங்களை, மெலிந்த கவர்களோடு உணர்வது தவிர்க்க இயலாத சங்கதி !  
  • இவை எல்லாவற்றிற்கும் சிகரமாய் - அந்த 5 வயதுச் சிறுமியின் புற்று நோய் இன்னல் ! வழக்கமாய் இது போன்ற தருணங்களில் இயன்றதொரு தொகைக்கு  சத்தமின்றி ஒரு செக் எழுதி அனுப்பி விடுவேன் ! ஆனால் அந்த நொடியில் அதன் பொருட்டும் ஒரு நூறு சிந்தனைகள் அவசியமாகிய சூழல் ! 

ஒரே சமயத்தில் – ஒரே நேர்கோட்டில், இந்த நான்குமே சந்தித்திட, இவற்றிற்கு நிவாரணம் கிட்டுமாயின் "இ.ப' விஷயத்தினில் U-டர்ன் மட்டுமல்ல ; இங்கிலீஷில் உள்ள சகல எழுத்துக்களுக்குமே தலா ஒரு டர்ன் அடித்தாலும் தப்பேயில்லை என்றே தோன்றியது ! காற்று வாங்கும் அலுவலகத்தில் ; ஈயோட்டும் அச்சகத்தினில் ; பல்லிளிக்கும் வங்கியிருப்பினில் ; அல்லல்படும் சிறுமிக்கு உதவுவதில் - பவர் ஸ்டார் பெயரை ஜெபித்தால் மாற்றங்கள் உண்டாகுமென்று யாரேனும் சொல்லியிருந்தால்கூட அந்த நொடியில் சம்மதம் சொல்லியிருப்பேன் ! So ‘வேண்டாமே இ.ப.!‘ என்று பிடிவாதம் காட்டியவன் குட்டிக்கரணம் – முட்டிக்கரணம் என சகலத்துக்கும் சிறுகச் சிறுகத் தயாராகி விட்டேன் ! ஆனால் அறிவித்து விட்ட போதிலும் உள்ளுக்குள் ஒருவிதக் குற்ற உணர்வு தோன்றாதில்லை தான் ; and அவை தலைதூக்கும் பொழுதுகளில்  எல்லாமே எனது பின்னூட்டங்களில் ஒருவித அவநம்பிக்கை தொனிப்பதை எனக்கே தவிர்க்க இயலவில்லை தான் ! ரெமோவும், அம்பியும் மாதிரி - என்று வைத்துக் கொள்ளுங்களேன் ! ஆனால் சிறுகச் சிறுக பார்வைக்கோணங்கள் மாறிடும் போது, பயணங்களுக்குமே ஒரு புதுப் பரிமாணம் தென்படுவதாய்த் தோன்றியது ! So Project "இ.ப" துவக்கம் கண்டிட, எனது மறுப்புகள் மெதுவாய் விலகியது இந்தப் பின்னணியில் தான் ! 

நண்பர்களின் ஆதங்கங்களுக்கும், ஆர்வங்களுக்கும், இணையாய் ஆர்டர்களும் கிட்டிடும் பட்சத்தில் – great !  ஆனால் இறைவனின் சித்தம் வேறாக இருந்து, இந்த முயற்சியை ஒத்திப் போட அவசியமாயின் நிச்சயமாய் வருத்தமும் கொள்ள மாட்டேன் ! பெருசாய் வேலையில்லாதவொரு தருணத்தினில் at least I gave it my best shot என்ற திருப்தியோடு, நண்பர்களின் பணங்களை வாபஸ் பண்ணிய கையோடு – ‘த்ரிஷா இல்லாங்காட்டி நயன்தாரா‘ என்று 2021 சந்தா அறிவிப்பினில் பிஸியாகிடுவேன் ! So இ.ப. 2020 ஒரு சந்தர்ப்பத்தின் / சந்தர்ப்பவாதத்தின் பிள்ளையே !! Not for a minute am I going to refute it !! உள்ளுக்குள் இதன் பொருட்டு நெருடல்கள் எனக்கிருந்தாலும், அவற்றை விழுங்கிக் கொள்ள அவசியமாக்குகின்றன இன்றைய சிரமச் சூழல்கள் ! எடிட்டராய் எனது அவா வேறாக இருந்தாலும், ஒரு பப்ளிஷராய் எனது தீர்மானம் இன்னொன்றாய் அமைந்திடுவதை இந்த நொடியினில் தவிர்க்க இயலவில்லை ! Moreso because, பெரும் பத்திரிகைக் குழுமங்களில் நூற்றுக்கணக்கான பணியாட்களைக் கழற்றி விடும் நிகழ்வுகளைப் பார்க்கிறேன் தான் ; ஆனால் அத்தகையதொரு துரதிர்ஷ்டம் நமது சிறு குருவிக்கூட்டுக்கு நிகழாதிருக்க ஏதேனுமொரு முயற்சி உதவிடின் - எனது வைராக்கியங்களைக் கடாசிடத் தயக்கம் பறந்து விடுகிறது ! தொலைவிலிருந்தபடியே 'அந்தர் பல்டி' என்ற ரேஞ்சில் கணை வீசும் நண்பர்களுக்கு passion + business என்ற இரண்டுக்கும் மத்தியிலொரு மெல்லிய கோட்டினில் பயணிக்க முனைந்திடுபவனின்,பாடுகள் புரிபடாது போவதில் no surprises ! ஆனால் இந்த ஒற்றைத் தருணத்தில், அந்தக் கணைகளின் பொருட்டு எனது தூக்கங்கள் கெட்டிடப் போவதில்லை - simply becos அதற்கோசரம் ஏற்கனவே வேறு காரணிகள் கணிசமாகவே உள்ளனவே ! So good luck with the barbs guys !!


7. “சரிப்பா… இதுக்குப் பதிலா புது புக்குகளை ; ஸ்பெஷல்களை அறிவிச்சு, அதுக்கு முன்பதிவு பண்ணினா அந்தப் பணத்தில் பணியாட்கள் வூட்டிலே அடுப்புகள் எரியாதா ? அந்தப் பாப்பாவின் வைத்தியச் செலவுக்கும் அந்தப் பணம் பிரயோசனப்படாதா ?

வெரி சிம்பிள் சாரே ! புது இதழ்களின் Special அறிவிப்பெனில் முன்பதிவில் ஒரு 450 பிரதிகள் + ஏஜெண்ட்கள் & ஆன்லைன் மூலமாக ஒரு மரியாதைப்பட்ட நம்பர் & ஈரோடு + சென்னைப் புத்தக விழாக்களின் புண்ணியத்தில் இன்னொரு ஓ.கே.வான நம்பர்  என்று கரைத்து விடலாம் ! So நான் costing போடும் போதே “பிரிண்ட்ரன் : பூசணிக்காய்" என்றில்லாவிடினும், ஒரு தண்ணீர்ப்பழமாகவாவது திட்டமிட்டு ஆரம்பிக்க இயல்வதுண்டு ! ஆனால் இன்றைக்கோ முன்பதிவில் 450 தேறுமா ? என்ற கேள்வி ஒரு பக்கமிருக்க, மீதத்தைப் பற்றிக் கேட்கவே வேணாம் – சுத்தமாய் washout தான் ! ஏற்கனவே  நடப்புச் சந்தாவின் விலை கூடுதலான இதழ்களையே பின்னே..பின்னே என நகற்றி வரும் சூழலில், புதுசாய் ஒரு ஸ்பெஷல் என்று இந்நேரம் அறிவித்தால் - என்னைப் பார்த்து எனக்கே சிரிக்கத் தோன்றிடும் ! Moreover புது ஆல்பங்களுக்குமே இன்றைய யதார்த்த சூழலில் “பிரிண்ட் ரன் 400-450 தான்” என்ற பிள்ளையார் சுழியோடு ஆரம்பிக்கும் பட்சங்களில், விலைகள் குடலை வாய்க்குள் கொணரும் உயரங்களைத் தொட்டு நிற்கும் ! And ஏற்கனவே “ஒற்றை நொடி.. ஒன்பது தோட்டா” ; ARS MAGNA ; “கென்யா” போன்ற முரட்டுக் கைகள் சகலத்துக்கும் நார்மலான நமது விலைகளைத் தெரிவித்து, அவற்றிற்கான கான்டிராக்டுகளும் போடப்பட்டு, ராயல்டிகளும் அனுப்பியாச்சு ! இந்தச் சூழலில் நான் பாட்டுக்கு – ‘கோட்டை அழிங்க… அழிங்க… மறுக்கா பொர்டா சாப்பிடப் போறேன், முதல்லேர்ந்து !!‘ என்று ஆரம்பித்து, ஆயிரம், ரெண்டாயிரம் என்றெல்லாம் விலைகளைச் சொன்னால் நம் படைப்பாளிகள் பேந்தப் பேந்த முழிக்க ஆரம்பித்து விடுவார்கள் ! புதுசாய் ஒரு பேச்சு வார்த்தை ; புதுசாய் சில ஒப்பந்தங்கள் ; புதுசாய் சில ராயல்டி தொகைகள் - என எல்லாமே புதிதாகிட வேண்டிப் போகும் ! And in any case - சிக்கின, சிக்கின புக்கையெல்லாம் "முன்பதிவுக்கு மட்டும்" என்ற ரேஞ்சுக்குக் கொண்டு செல்லும் பட்சத்தில், வரும் காலங்களில் நானே கதை எழுதிட, ஜூனியர் எடிட்டர் படம் போட்டிட - அதை நாங்களே படித்தும் கொள்வது என்ற பொழுது புலர்ந்திருக்கும் ! So ஓ.நொ,ஓ.தோ ; கென்யா ; Ars Magna  இதழ்கள் எல்லாமே ஒரு சகஜ சமயத்தின் நார்மலான விலைகளுடனான, நார்மலான விற்பனைகளுக்கே ! Maybe 2021 ஈரோட்டின் வேளையில், உலகம் நார்மலுக்குத் திரும்பியிருக்கும் பட்சத்தில், அந்தப் பட்டாசுகளை அங்கே போட்டுத் தெறிக்க விடுவோம் என்று நினைத்தேன்! ஆக இன்றைக்குப் பெரியதொரு பிரின்டரன்னுக்கு இயல்பாகவே அவசியமில்லா "இ.ப."மறுபதிப்பு மட்டுமே சாத்தியமாகிறது ! 

So இது தான் இன்றைய நிலவரம் ; எனது நிலைப்பாடு ; இத்யாதி..இத்யாதி எல்லாமே ! 

‘இதெல்லாம் யாருப்பா கேட்டா ?‘ என்ற கேள்வி சிலருக்கும்; ‘மண்டையன் சென்டிமெண்டைப் பிழி பிழின்னு பிழியறான்டோய் !‘ என்ற பகடி சிலருக்கும் இந்தப் பதிவுப் பிரவாகத்தைப் படித்த நொடியினில் தோன்றலாம் தான் !

Again இது ஏன் என்பதற்கான பதில் ரொம்பவே சிம்பிள் ! சூடத்தை அணைத்துச் சத்தியம் செய்தாலுமே, நையாண்டி செய்திடவே விழையும் அன்பர்களின் தரப்பைத் திருப்திப்படுத்த முனைவதென்பது காளை மாட்டின் காம்பைத் தேடுவதற்குச் சமானம் என்ற புரிதல்கள் என்றைக்கோ புலர்ந்து விட்டதென்பதால் இந்தப் பிரசங்கம் பகடிகளுக்குச் சமாதானமாயல்ல !

And நம் சிரமங்களில் தோள் தர நிபந்தனைகளின்றித் தயாராகயிருக்கும் நண்பர் அணிக்கு இத்தனை விளக்கங்கள் அவசியமே லேது தான் என்பதுமே புரிகிறது ! So அவர்கட்குமே இது அத்தியாவசியமாகிடாது போகலாம் தான் !

On the other hand, இந்தப் பத்தி பத்தியான பொழிப்புரைகளெல்லாமே பிரதானமாய் எனக்கு நானே தலையைத் தெளிவுபடுத்திக் கொள்ளும் பொருட்டு ; 90 + நாட்களாய் குக்கருக்குள் திரண்டு நின்ற பிரஷரை லைட்டாக வெளியேற்றும் நோக்கில் என்று வைத்துக் கொள்ளுங்களேன் ! "ஏன்யா....நான் சரியா தானே பேசிட்டிருக்கேன் ?" என்று ஊர்ஜிதம் தேடும் பஞ்சாயத்து சங்கிலி முருகனைப் போல a reality check of sorts என்று எடுத்துக் கொள்ளுங்களேன் !

அதே போல நிபந்தனைகளின்றி அன்பையும், பணத்தையும் நீங்கள் என்னிடம் ஒப்படைத்திருந்தாலும், அவற்றிற்கு நான் செய்திட உத்தேசித்துள்ள நியாயங்களை பகிர்ந்திடுவது தானே பொருத்தம் ?! So தலைக்குள் அடைசலாய் நின்ற சகலத்தையும் பதிவாக்கிப் பகிர்ந்த திருப்தியோடு, சற்றே ஜாலியான சில updates தந்த கையோடு நடையைக் கட்டுகிறேன் folks ! எது எப்படியோ - ஆண்டவனின் கருணை தொடரும் மட்டிலும் எந்தவொரு குட்டிக்கரணம் அடித்தேனும் நம் பயணம் தொடர்ந்து கொண்டேயிருக்கும் ! வேகம் மட்டுப்பட்டிருக்கலாம் - சாலையின் கரடுமுரட்டுத்தன்மையின் பொருட்டு ; ஆனால் வண்டி ஒரு போதும் நின்றிடாது ! Maybe இந்தக் கொடுங்கோல வைரஸின் வெறியாட்டம் இன்னும் உக்கிரமடைந்து, ஜீவனங்களும் மேலும் மேலும் பெரும் தடுமாற்றம் கண்டு போயின் - மூவாயிரம்  எனும் சந்தாக்கள் கூட ஆண்டின் இறுதியினில் ஒரு மன்னரின் பணயத்தொகையாய்த் தென்படவும் செய்யலாம் தான் ! அப்படியொரு நாளும் புலர்ந்திடும் துரதிர்ஷ்டம் ஒரு வேலை நிகழ்ந்தால் -  மறுக்கா நியூஸ்பிரிண்ட் ; சன்ன விலைகள் ; அடக்கி வாசித்தல் என்ற திட்டமிடல்களையும்   ஆராயாது விட மாட்டோம் - தலை தண்ணீருக்கு வெளியே இருந்திட வேண்டுமெனும் முயற்சிதனில் ! That will of course be a last option !! But we will stay extremely flexible !!

1.விற்பனையில் இந்தச் சிரம நாட்களிலும் ரகளை பண்ணிக் கொண்டிருப்பவர் யாரென்று யூகிப்பவர்களுக்கு நயமான சேமியாப் பாயசம் நம் பரிசாய் ! Oh yes – அதிகாரி தான் மே மாதத்திலும் சரி, ஜுனிலும் சரி, இதர இதழ்களின் விற்பனையை விட சுமார் 25% உசந்து நிற்கிறார் ! வர வர பாயசங்கள் விற்பனைகளைத் தூக்கி விடும் magic potions ஆகி விட்டனவோ என்னவோ ?! அல்லது பாயாச மாஸ்டருக்கு வயசாகிடுத்தோ ?

2. முழுக்கவே பெண்களாய் கதைநெடுகிலும் ரவுசு செய்யும் one-shot ஆல்பமொன்றின் rights வாங்கியுள்ளோம்!

3. நெடுநாள் விளம்பரமாய் மட்டுமே தொடர்ந்திடும் ஒரு ஜாம்பவானின் படைப்பும் கூட வெளிச்சத்தைப் பார்த்திடும் வேளை புலர்ந்திடக்கூடும் !

4. அதே போல இன்னொரு தாய்க்குலம் நமது அணிவகுப்பில் இடம் பிடிக்க ரெடி – ரொம்பச் சீக்கிரமே !

5. And பிடரியோடு அறையும் சித்திரத் தரத்தில் இன்னொரு கௌபாய் one-shot தற்சமயம் நமது கையிருப்பில் !

 Bye all! See you around! Stay Safe!

P.S.: ”வோட்டுப் போடச் சொன்னதுலாம் வெட்டி வேலையா கோப்பால்ல்ல்ல் ??” என்ற கண்சிவத்தல் வேணாமே ப்ளீஸ் – நடப்பாண்டின் சந்தாக்களை மார்ச் வரைக்கும் நீட்டிக்கும் எண்ணத்தின் பொருட்டு ! மறுபடியுமொரு ஊரடங்கு என்ற மாதிரியான இறுக்கம் + எங்களது மாவட்டத்தில் இவ்வாரத்தினில் எகிறி வரும் வைரஸ் தாக்கங்கள்  என் தீர்மானத்தை influence செய்துள்ளன ! Sorry guys !!

Thursday, June 25, 2020

The Powers of Prayers...!

நண்பர்களே,

வணக்கம். பூமிக்கே நேரம் சரியில்லை எனும் போது சாமான்யர்கள் நமக்கும் கடின நாட்கள் தொடர்கதையாகிடுவதில் வியப்பில்லை தான் போலும் ! ஒவ்வொரு திக்கிலிருந்தும் சமீப காலங்களில் வந்திடும் செய்திகளின் பெரும்பான்மை  சங்கடமூட்டுபவைகளாகவே இருந்து வர - இதோ அதற்கொரு புது வரவு ! 

நமது நண்பர் ஜேடர்பாளையம் சரவணகுமார் சில மாதங்களுக்கு முன்பாய் சுகவீனப்பட்டிருந்ததும், அதனைத் தொடர்ந்து ஈரோட்டில் ஒரு முக்கிய அறுவை சிகிச்சைக்கு ஆளாகியதும், ஆண்டவன் அருளோடு நலம் பெற்றதையும் நாம் மறந்திருக்க மாட்டோம் ! ஆனால் இந்த 2020 கொணர்ந்து வரும் இன்னல்களின் இன்னொரு பரிமாணமாய், நண்பருக்கு மேற்கொண்டும் ஒரு அறுவை சிகிச்சை அவசியப்படுகிறதாம் ! எங்கோ - யாருக்கோ நேர்ந்திடும் சுகவீனங்கள் வெறும் செய்திகளாய் ; தகவல்களாய், காதில் விழும் சமயம் ஒரு நிமிடப் பரிதாபத்தை மட்டுமே வழங்கி விட்டு நமது உலகினுள் மீண்டும் மூழ்கிடுவதே பொதுவான வாடிக்கை ! ஆனால் இது யாருக்கோ இல்லை ; நம்மோடு காலமாய்த் தோள் உரசி நின்ற நண்பருக்கே எனும் போது இயன்ற ஒத்தாசைகளைச் செய்திடுவது நம் கடமையாகிறது ! இந்தச் சிரம நாட்களில் அவரவரது பாடுகளே சொல்லிக்கொள்ளும் விதமாய் இல்லை எனும் போது, இந்நேரத்தில் உதவிக் கரம் நீட்டக் கோருவது உங்களை தர்மசங்கடங்களில் ஆழ்த்திடக்கூடுமென்பது புரிகிறது தான் ! ஆனால் நோயோடு போராடிக் கொண்டிருப்பவரையும், அவரது வலிகளையும் ஒரு கணம் பரிவோடு பார்த்திட்டோமெனில், நமது சிரமங்கள் அத்தனை பெரிதில்லை என்று கருதத் தோன்றிடலாம் ! இதோ அவரது சகோதரர் கரூர் குணாவின் வங்கி கணக்கு விபரம்   : 

Gunasekaran M
Karur Vysya Bank
Account No - 1152155000135404 
Branch Name - KARUR - LNS (WEST), 
IFSC - KVBL0001152 

கொஞ்சமோ, கணிசமோ - நமக்கு இயன்ற தொகைகளை நேரடியாய் இந்தக் கணக்குக்கு அனுப்பி வைத்து நண்பரின் நலம் காக்க உதவிடுவோமே - ப்ளீஸ் ? And நிதியாய் ஒத்தாசை செய்திடும் நிலையில் இல்லாத நண்பர்கள் பிரார்த்தனைகளை தம் பங்களிப்பாய்த் தந்திடவும் கோருகிறேன் !

And நம் பிரார்த்தனைகளுக்கு மேற்கொண்டும் ஒரு அவசியம் எழுந்துள்ளது folks ! கடந்த 19 ஆண்டுகளாய் நமக்கு பிரெஞ்சு மொழிபெயர்ப்பாளராய், குன்றா ஆர்வத்தோடு செயல்பட்டு வரும் குடும்பத் தலைவியிடமிருந்தது போன வாரம் கிட்டிய வாட்சப் தகவல்கள் நெஞ்சைப் பிசைந்தன ! வெகு சமீபமாய் அவருக்கு இருதயத்தில் 2 அடைப்புகள் இருப்பது கண்டுபிடிக்கப்பட்டுள்ளதாம் ! தவிர, நுரையீரலும் தளர்ந்திருப்பதாய் டாக்டர் சொல்லியிருக்க, ரொம்பவே மனமுடைந்து போயிருந்தார் ! 'எதற்கும் புதுசாய் இனொரு மொழிபெயர்ப்பாளரைத் தேடி வைத்துக் கொள்ளுங்கள் ; திடீரென நான் காணாது போய் விட்டால் நீங்கள் திண்டாடக்கூடாதே !!' என்று அவர் பகடியாய்ச் சொல்ல முயன்றாலும், அவரது உள்ளத்து பயங்களை, குழப்பங்களை புரிந்து கொள்ள முடிந்தது ! அடைப்புகளை நீக்கி, stent பொருத்திட அவரது இருதயவியல் டாக்டர் அறிவுறுத்தியுள்ள போதிலும், இப்போதைக்கு அது வேண்டாம் ; மருந்து, மாத்திரைகளிலும், உடற்பயிற்சியிலும் சரி செய்திடப் பார்க்கலாமென்று தீர்மானித்திருப்பதாய்ச் சொன்னார் ! ஆண்டவன் புண்ணியத்தில் வசதிகளுக்கோ ,வாய்ப்புகளுக்கோ துளி கூடக்  குறையில்லாதவரே ; ஆனால் 65+ அகவையில் நேர்ந்திடக்கூடிய நியாயமான பயங்கள் அவரை அலைக்கழிப்பதை உணர முடிந்தது ! இயன்றமட்டுக்கு தைரியமூட்டும் விதமாய்ப் பேசிய கையோடு, டாக்டரின் பரிந்துரையை இன்னுமொரு முறை பரிசீலிக்கவும் கோரிக்கை வைத்தேன் ! And நானும், நம் வாசகக் குடும்பமும் நிச்சயமாய் அவரை நமது பிரார்த்தனைகளில் இணைத்துக் கொள்வோமென்றும் வாக்குத் தந்திருக்கிறேன் ! இன்னல்களும், இடர்களும் எத்தனை வந்தாலும் எழுந்து நின்று சாதித்துக் காட்டும் டைகருக்கும், XIII-க்கும், 'தல' டெக்ஸுக்கும் (yes..there have been Tex works in French too !)  பேனா பிடித்தவருக்கு அந்த காமிக்ஸ் நாயகர்களின் ஆற்றலும், திடமும் கிட்டிட வேண்டிக் கொள்வோமே folks !! பிரார்த்தனைகளின் ஆற்றலை இந்தப் பிரபஞ்சமே அறியும் தானே ? 

இருண்ட தினங்கள் சீக்கிரமே விலகி, நம் காமிக்ஸ் குடும்பத்தின் இரு அங்கங்களுமே சீக்கிரம் நலமாய்த் திரும்பிய சேதியை அறிவிக்கும் வரத்தை ஆண்டவன் எனக்குத் தருவாராக !

Bye all ! See you around ! 

Tuesday, June 23, 2020

தவணை ஒன்று ; சிந்தனை இரண்டு !

நண்பர்களே,

வணக்கம். மறுக்கா "இரத்தப் படலம்" சார்ந்ததொரு மினி பதிவிது ! 'ஆத்தாடியோவ்' என்று தெறிக்கக்கூடிய நண்பர்கள், இம்மாதத்து இதழ்களின் அலசல்களை இங்கே தொடர்ந்த கையோடு Netflix-ல் படம் பார்க்கக் கிளம்பிடலாம் தான் ! தொடரும் வரிகளில் நிச்சயமாய் உங்களுக்கு சுவாரஸ்யம் ஏதும் இருக்க வாய்ப்புகள் குறைவே ! 
2 நாட்களுக்கு முந்தைய பின்னூட்டங்களில், 2 தவணைகளில் "இரத்தப் படலம்" முன்பதிவுகளைச் செய்து கொள்ளும் வசதியினை தர சம்மதித்திருந்தது எனக்கு இப்போது தான் நினைவுக்கு வந்தது ! And இன்றே அதற்கான ஆன்லைன் லிஸ்டிங் செய்து விட்டிருக்கிறோம் - முதல் தவணையில் ரூ.2000 செலுத்தும் வகையில் ! இரண்டாம் தவணைக்கான லிங்கினை 45 நாட்களுக்குப் பின்னே தயார் பண்ணிடலாம் - மீதத் தொகைக்கு நீங்கள் தயாராகி இருக்கக்கூடுமென்ற நம்பிக்கையில் ! 45 நாட்களிலோ ; அல்லது 89-வது நாளிலோ மீதத்தை செலுத்தினால் கூடப் போதும் தான் ! 

(or)

ஒரேயடியாய் பணம் தொடர்பாகவே பேசிக் கொண்டிருப்பதில் நெருடலாய் இருப்பதால் - இம்முயற்சி றெக்கை கண்டிடும் பட்சத்தில் நாம் செய்திடக்கூடிய சமாச்சாரங்களைப் பற்றிப் பேசலாமென்று தோன்றுகிறது ! 

For starters - XIII தொடரின் ஏகப்பட்ட ஒரிஜினல் அட்டைப்படங்களுள் மூன்றைத் திரட்டி, அவற்றை தலா Volume 1 & 2 & 3 -க்கு ராப்பர்களாக்கியிருந்தோம் - போன முறை ! இந்தத் தடவை கொஞ்சம் புதுசாய் Cover Variants என்ற சமாச்சாரத்தை நடைமுறைப்படுத்திட நினைத்தேன் ! அமெரிக்காவில் இந்த பாணி ரொம்பவே பிரசித்தம் ! ஒரு ஆல்பத்துக்கு மூன்றோ அல்லது நான்கோ  வெவ்வேறு ராப்பர்களை டிசைன் செய்து, அவற்றை கலவையாய் அட்டைப்படங்களாய் அமைத்திடுவதுண்டு ! So புக் ஒன்றாக இருந்தாலும், அட்டைப்படங்கள் விதம் விதமாய் இருந்திடுவதுண்டு ! Of course - கடைகளில் வாங்கிடாது, ஆன்லைனில் வாங்கும் போதோ ; சந்தாக்களில் வாங்கிடும் போதோ - யாருக்கு எந்த ராப்பர் கிட்டும் என்பது புக் கைக்கு கிடைக்கும் வரையிலும் உறுதியாகத் தெரிந்திடாது ! இதோ பாருங்களேன் அதற்கொரு லேட்டஸ்ட் சாம்பிள் :


ஒரே இதழுக்கு எத்தனை ரகளையான ராப்பர்கள் உருவாக்கியுள்ளனர் என்று தான் பாருங்களேன் !! நமக்கோ இம்முறை பிரிண்ட்ரன் மொத்தமே 300 பிரதிகள் எனும் போது maybe இரண்டோ / மூன்றோ வித cover variants சாத்தியமே - provided படைப்பாளிகள் இதற்குச் சம்மதம் சொல்லும் பட்சத்தில் ! முழுக்கவே சேகரிப்பின் பொருட்டு என்றதொரு தொகுப்பை இது போன்ற சின்னச் சின்ன குட்டிக்கரணங்களின் வாயிலாய் சுவாரஸ்யமூட்ட முயற்சிக்கலாம் - உங்களுக்கும் ஓ.கே எனில் ! மாறாக, "ஊஹூம்...என்க்கு ஒரிஜினல் ஈயே தான் அட்சர சுத்தமாய் அடிச்சாகணும் ; புது ஈ அடிச்சால்லாம் தெய்வ குத்தமாகிப் போகும் !!அப்புறம் ஜேசன் கனவிலே வந்து கண்ணைக் குத்திப்புடுவார் !" என்று நினைப்பதாயின் 'சிவனே' என்று இந்த cover variants எண்ணத்துக்குக் கல்தா தந்திடுவேன் - அந்த வேலையும் மிச்சம்டா சாமீ என்றபடிக்கே ! நமக்கு வேற முகம் நிறைஞ்சு கண் இருப்பதால் ஜேசன் கண்ணை மூடிக்கிட்டு எங்கனக்குள்ளாற குத்தினாலும் சேதமாகிப் போகும் இல்லியா ? 

அப்புறம் இந்த ஆல்பத்தினில் உங்கள் முகங்களையும் இணைத்துப் பார்த்திட ஆசை இருக்கும் பட்சத்தில் - 3 ஆண்டுகளுக்கு முன்பாய் கேப்டன் பிரின்ஸ் இதழினில் செய்தது போல இம்முறையும் முயற்சிக்கலாம் ! உங்களின் high resolution photo-வினை ஈ-மெயிலில் அனுப்பினால், அவற்றை டிஜிட்டலில் பிரிண்ட் போட்டு புக்கின் ஆரம்பப் பக்கமாக்கிடலாம் ! "அழகு பார்க்க மட்டுமே இந்த இதழ்" எனும் போது - அந்த அழகுக்கு அழகோ அழகு சேர்க்க முயற்சிப்பது இந்த அழகப்பனின் கடமையல்லவா ? So முன்பதிவுகளோடு உங்கள் புகைப்படங்களும் புளீஜ் ! 

அப்புறமாய் இன்னமும் சில யோசனைகள் தலைக்குள் நீச்சலடிக்கின்றன தான் ! ஆனால் இந்தக் கொடுங்காலத்தினில் இந்த முயற்சி நனவாகிடும் சாத்தியங்கள் பற்றிய ஆரூடம் சொல்ல யாருக்கும் ஆற்றலில்லா இவ்வேளையில், அடுப்பின்றி, மாவின்றி ; சட்டியின்றி, நான்பாட்டுக்கு வடையாய்ச் சுட்டிட முற்படுவது கோமாளித்தனம் என்பதால் - லக்கி லூக்குக்கு பேனா பிடிக்கப் புறப்படுகிறேன் ! The ball is truly in your court now XIII lovers ! அதை எவ்விதம் நீங்கள் கையாண்டாலும் என்னளவில் ஓ.கே. தான் ! இந்தச் சிரம காலத்தில் இத்தனை பணத்தை விரயம் செய்ய வேண்டாமே என்று எண்ணினீர்களெனிலும் நிச்சயமாய் புரிந்து கொள்வேன் ! 

Bye all...see you around !

Saturday, June 20, 2020

கும்மிடிப்பூண்டி to க்வீன் எலிசபெத் !

நண்பர்களே,

வணக்கம். எழுதச் சோம்பேறித்தனப்பட்டு வீடியோ பதிவாய்ப் போடுவோமென்று தீர்மானித்தால் அதை Youtube க்கு அப்லோட் செய்வதற்குள் சந்நியாசமே வாங்கிடலாம் போலுள்ளது ! சனிக்கிழமை மாலை என்பதால் நெட் இத்தனை டப்ஸாவாக உள்ளதா ? அல்லது பொதுவாகவே இது தான் லட்சணமா - தெரியவில்லை - ஆனால் கடுப்பில் அதிகாரியைப் போல் சில்லுமூக்குகளைத் தேடி கைகள் பரபரக்கத்தான் செய்கின்றன ! நெட் போடும் மொக்கை ஒரு பக்கமென்றால் கும்மிடிப்பூண்டியில் ஆரம்பித்து க்வீன் எலிசபெத் வரை  நீட்டி முளக்கும் எனது பாணி இன்னொரு பக்கம் - முழுசாய் 42 நிமிடங்களுக்கு ஓடுகிறது Vlog !! So கூடுதலாய் ரெண்டு பரோட்டாக்களையோ   ; ஒரு தட்டு உப்புமாவையோ தெம்பாய் உள்ளே தள்ளிக் கொண்டு, ஹெட் செட்களை மாட்டினீர்களெனில் சரியாக இருக்கும் என்பேன் ! 

இதோ இன்றைய வீடியோ பதிவுக்கான லிங்க் : https://youtu.be/DMvFJX9KTvU

அப்புறம் இன்றைய இரத்தப் படல நிலவரம் :

முகம்மது அராபத், மயிலாடுதுறை - 1 
சுரேஷ் நடராஜன், ஆஸ்திரேலியா - 3 
சுரேஷ், மதுரை - 1 

டோட்டல் : 5 புக்ஸ் 

Keep going people !! 

அப்புறம் - ஏதோவொரு யுகத்தில் ஜூனியரின் மேற்பார்வையில் துவங்கிய இந்தப் பணி ஒரு மாதிரியாய் நிறைவு கண்டுள்ளது இப்போது !! Hope this will help !

Bye all...see you around !!

Thursday, June 18, 2020

Here we go...!

நண்பர்களே,

வணக்கம். As always கொஞ்சம் குடிமிப்பிடிகள் இருந்தாலே ஒரு லாஜிக் அறியா தேடல் களைகட்டும் போலும் ! இந்த முறையும் அதற்கொரு விதிவிலக்கல்ல என்பதை நிரூபிக்க கடந்த சில தினத்து டிக்கிலோனா பின்னூட்ட ஆட்டங்கள் உதவியுள்ளன ! எது எப்படியோ - இதோ இன்று முதல் இந்த "இரத்தப் படல 300" -க்கான  முன்பதிவு & கவுண்ட்டௌன் துவக்கம் காண்கிறது !  ஏற்கனவே அறிவித்த விபரங்களை இன்னொரு தபா ஸ்பஷ்டமாய் இங்கே அறிவித்தும் விடுகிறேனே - குழப்பங்கள் எவ்விதத்திலும் தலைகாட்டக் கூடாதெனும் பொருட்டு :

*"இரத்தப் படலம்" பாகம் 1 to 18 ப்ளஸ் புலன்விசாரணை முழு வண்ணத்தில் - ஏற்கனவே வெளியான அதே ரெகுலர் சைசில் !

**ஆர்ட்பேப்பரில் 1000 பக்கங்கள் கொண்ட ஒற்றை புக் பைண்டிங்கில் நடைமுறை சாத்தியமா ? என்பதைக் கண்டறிந்த பின்னே இது குறித்து இறுதி செய்யப்படும் ! ஒருக்கால் அத்தனை கனமான புக்கினை பைண்ட் செய்வதில் டெக்னிகல் சிக்கல்கள் இருப்பின், 2 வால்யூம்களாய் புக்ஸ் தயாரிக்கப்படும் ! Ultimately, உங்கள் பணத்துக்கும் , பொருளுக்கும்  நானே பொறுப்பு எனும் போது - எனது தீர்மானத்தை லாஜிக் மாத்திரமே வழிநடத்துமே தவிர்த்து, இஸ்தரியோ , ஜாங்கிரியோ பெயர் சொல்லுமென்ற கற்பனைகளாக இராது ! So இதனில் எனது முடிவு விவாதங்களுக்கு உட்பட்டதாக இராது ! லட்சியம் ஒன்றே ! சிக்கலெனில் இரண்டே ! 

**ஸ்லிப்கேஸ் கிடையாது. 

**குறைந்த பட்சமாய் 300 புக்குகளுக்கு முன்பதிவு - முழுத் தொகைகளுடன் 90 நாட்களுக்குள் கிட்டினால் மட்டுமே இந்த பிராஜெக்ட் முன்னெடுத்துச் செல்லப்படும் !

**முன்பதிவுக்கான கால அவகாசம் : 17 ஜூன்'20 முதல் செப்டம்பர் 15' வரையிலும் !

**இதழின் விலை : ரூ.3900 + கூரியர் & பேக்கிங் கட்டணமாய் ரூ.200 ; ஆக மொத்தம் ரூ.4100 . Rs.4200 for Bengaluru.

**முன்பதிவு இலக்கைத் தொட்ட 120 நாட்களுக்குள் - அதாவது ஜனவரி 15 2021-க்கு முன்பாக புக் தயாரித்து அனுப்பப்படும் ! 

**ஒருக்கால் முன்பதிவு இலக்கை எட்ட இயலாது போயின் வசூலித்த தொகைகள் திரும்ப அனுப்பப்படும் ; அல்லது பணம் செலுத்தியவர் சம்மதிக்கும் பட்சத்தில் அவர்களது பெயரில் 2021-ன் சந்தாவில் வரவு செய்யப்படும் ! முன்பதிவு செய்திடும் நேரமே இந்த option குறித்து தெரிவித்திடல் அவசியம் ! 

**எவ்விதக் குறிப்புகளும் இன்றிச் செய்யப்படும் முன்பதிவுகள் - சந்தாவிற்கு carry forward செய்திடும் சம்மதத்துடனானதாய்க் கருதப்படும் !  

**இதழினைத் தயாரிப்பதாகயிருப்பின், இந்தக் கொரோனா மந்த நாட்களில் மட்டுமே பணிகள் சாத்தியமாகிடும் என்பதால்  இந்த முன்பதிவின் கால அவகாசம் எக்காரணம் கொண்டும் நீட்டிக்கப்பட மாட்டாது. So it's either 90 days or bust !! 

**ஆன்லைனில் லிஸ்டிங் செய்யப்பட்டுள்ளது : http://lioncomics.in/pre-booking-xiii/732-xiii-the-collector-s-300-a-19-part-full-collection-limited-edition-in-colour-tn-courier-post.html

**அயல்நாட்டு போஸ்டல் சேவை தற்காலிகமாய் இந்தியாவில் நிறுத்தப்பட்டுள்ளதால் இந்த இதழினை ஸ்ரீலங்காவிற்கு அனுப்பிட கட்டணங்களைக் கண்டறிய சாத்தியமாகாது ! உத்தேசமாய் இப்போதைக்கு இதழின் விலையினை மட்டும் (ரூ.3900) அனுப்பி முன்பதிவு செய்து கொண்டு அப்புறமாய் ஏர் மெயில் கட்டணத்தொகைகளை அனுப்பிடலாம் !  

**இதர நாட்டினருக்குமே நடைமுறை இதுவே ! Cost of the book now ; the shipping costa later on...!

**தினம்தோறும் முன்பதிவு விபரங்கள் இங்கே update செய்யப்படும் ! 

**இந்தச் சிரம நாட்களில் இத்தகையதொரு முயற்சியினை முன்னெடுப்பதில் எனக்குள் நிரம்பவே நெருடல்கள் குடியிருப்பதை இங்கே ஒளிவின்றிப் பதிவு செய்கிறேன் ! வாசகர்களின் தொடர் வலியுறுத்தல்களுக்கு செவி சாய்க்கும் பொருட்டு மாத்திரமே இத்தனை பணத்திலான இதழை மறு-மறு-மறுபதிப்பிட சம்மதம் தெரிவித்துள்ளேன்  ! ஒருக்கால் இலக்கை எட்டிட  இம்முறை சாத்தியப்படாது போயின் - எனது பணிநாட்களுக்குள் இந்த முயற்சி இனியொருமுறை தூசி தட்டிடப்படாது என்பதையும் சந்தேகங்களுக்கு இடமின்றிப் பதிவு செய்திடுகிறேன் ! So "இரத்தப் படலம்" இதழின் பொருட்டு இன்னொரு 'மறுபதிப்பு முஸ்தீபு' அடுத்த 7 ஆண்டுகளுக்கு மத்தியிலாவது  சர்வ நிச்சயமாய் சாத்தியமாகாது !

**P.S :இந்த முயற்சி வெற்றி பெறும் பட்சம், வசூல் தொகையிலிருந்து ரூபாய் .ஒரு லட்சம் அரிய வகைப் புற்று நோயால் அவதிப்படும் 5 வயதுச் சிறுமியின் அறுவை சிகிச்சைக்கொரு சிறு பங்காய் அனுப்பிடப்படும். In case சிறுமிக்கான பணம் அதன் முன்பாகவே வசூலாகி, அவளது வைத்தியங்கள் நிறைவுற்றிருக்கும் பட்சத்தில் நமது ஒரு லட்சம் அடையாறு கேன்சர் செண்ட்டருக்கு நன்கொடையாய் வழங்கப்படும் ! 

Good luck with the bookings guys ; you are going to need it for sure !!

Bye all !! See you around !

Tuesday, June 16, 2020

இது சோடா டைம் !

நண்பர்களே,

வணக்கம். புது புக்குகள் பெரும்பான்மைக்குக் கிடைத்தும், சிறுபான்மைக்குக் கடுப்பேத்திக் கொண்டும் இருப்பது புரிகிறது ! இம்மாத இதழ்கள் எல்லாமே light reading சமாச்சாரங்கள் என்பதாலோ என்னவோ, ஹாயாக ஜமுக்காளத்தையும், சொம்பையும் வெளியெடுத்து ஆலமரத்தடியில் குழுமிட ஜனத்துக்கு நேரம் கிட்டியுள்ளது ! And ஒரு மதியப்பொழுது அந்த ஜரூரில்  ஓடியிருப்பினும், இது ஜூன் இதழ்களின் நேரம் என்பதிலோ, ஒளிவட்டம் அவற்றின் மீது பதிந்து நிற்பதே பிரதானம் என்பதிலோ எனக்குக் குழப்பமே இருக்கவில்லை ! 

SODA !! இதுவரைக்குமான விமர்சனங்கள் எல்லாமே செம பாசிட்டிவ் என்பதில் லேசாய் உள்ளுக்குள் ஒரு உற்சாகத் துள்ளல் ! இது ரொம்பவே சீக்கிரம் & இன்னமும் அலசல்களின் பெரும்பகுதி காத்துள்ளது என்பது புரிகிறதால் - இப்போதே பீப்பீ smurf ஆகிடும் அவாவுக்கு அணை போட்டு வருகிறேன் ! தொடரும் நாட்களில் இம்மாத இதழ்களை வாசித்திடவுள்ள நண்பர்கள், "திசை மாறிய தேவதை" யிலிருந்து துவங்கிடும் பட்சத்தில், இந்தப் புதியவரின் எதிர்காலம் குறித்தொரு தீர்மானத்துக்கு வர இயலும் என்பேன் ! And போன பதிவில் சொன்ன அதே விஷயத்தை இங்குமொருவாட்டி ரிப்பீட் செய்கிறேன் : மட மடவென வாசித்துப் போனீர்களெனில், திரு திருவெனத் தான் முழித்து நிற்பீர்கள் - இறுதியில் ! சித்திரங்களும், கதை சொல்லும் ஆற்றல் கொண்டவை என்பதை நிரூபிக்கும் இந்தக் கதைக்கு உரிய கவனம் + அவகாசம் ப்ளீஸ் !  

அதே போல உங்களின் வாசிப்பு # 2 ஆக ஜேம்ஸ் பாண்ட் 007 அமைந்திடின் மகிழ்வேன் - simply becos இன்றைய hyper modern உலகினில், எழுபதுகளின் பாண்டுக்கு இன்னமும் எவ்வித வரவேற்பு உள்ளதென்றறியவொரு curiosity ! ராணி காமிக்சில் அந்நாட்களில் இவற்றை நாம் படித்த நாட்களில் நமது வயதுகளும் வேறு, உலகமும் வேறு ! இன்றைக்கு எல்லாமே மாறியிருக்க, இந்த classic 007 எவ்விதம் உங்களோடு அன்னம் தண்ணி புழங்குகிறார் என்று தெரிந்திட ஆவல் ! 

பாக்கி 2 இதழ்களையும் வாசிப்பு வரிசையின் எந்த இடத்தினில் பொருத்தினாலுமே ஓ.கே. தான் - ஏனெனில் அவற்றின் தீர்ப்புகள் பற்றி தோராயமான ஞானம் எனக்கு ஏற்கனவே உண்டு ! நமது 'தல' ஒரு breezy read சாகஸத்தில் தலை காட்டும் போது யாருக்கும் அலுப்புத் தட்டாது என்பது ஊருக்கே தெரிந்த விஷயம் தானே ?! 

அப்புறம் ப்ளூகோட் பட்டாளம் ! கதை எப்படியிருந்தாலும் "இது கார்ட்டூன் ; நமக்கு சுகப்படாது" என்பதே பாதிக்கும் மேலானோரின் தீர்மானம் என்பது ஆன்லைன் ஆர்டர்களில் இந்த ஒற்றை புக் விடுபட்டு நிற்கும் போதே புரிகிறது ! எத்தனை அழகான சித்திரங்களோடும், மிரட்டும் வர்ணங்களோடும் கார்டூன்களைக் கையில் தந்தாலும் 'உவ்வே' என்பதே ரியாக்ஷனாகிடும் போது நான் செய்திடக்கூடியது அதிகம் இருப்பதில்லை தான் ! So கார்ட்டூன் காதலர்களின் ஆராதிப்பையும், இந்த ஜானரை வெறுப்போரின் துவேஷத்தையும்  மாறி மாறிப் பெற்றிடவுள்ள இதழான "போர்முனையில் ஒரு பாலகன்" இம்மாத personal favorite ! இயன்றால் இம்மாதத்து இதழ்கள் நான்கையுமே வாசித்திட / வாங்கிட முயற்சியுங்கள் folks - எல்லாமே சுலப வாசிப்புக்கு களங்கள் தான் ! 

அப்புறம் "தாலி கட்ட விடுபட்டோர்  படலம்" பற்றி......oops..."இரத்தப் படலம்" பற்றிப் பேசும் முன்பாய் இன்னொரு நிகழ்வு - எதற்கும் துளிகூடச் சம்பந்தம் இல்லா வகையில் : 

ஐந்தே வயதானதொரு சிறுமி ! ஏதோவொரு அரிய வகைப் புற்று நோயின் தாக்கத்தால் முகத்தின் வலது பாதி மட்டும் விகாரமாய் வீங்கிப் போய் அல்லாடுகிறாள் ! அவளது தந்தையோ தினக்கூலி வேலை செய்திடும் சாமான்யர் ! மகளின் வேதனையைப் பார்க்கச் சகிக்காதவராய் இயன்ற அத்தனை சமூக நல அமைப்புகளிடமும் கையேந்தி நிற்கிறார் ! அவற்றுள் ஒன்று ketto எனும் பணம் திரட்டித் தரும் வலைத்தளம் ! இந்தச் சிறுமியின் புகைப்படத்தோடு, அவளது சுகவீனம் பற்றி எழுதி, ketto அனுப்பியிருந்ததொரு நிதி கோரல் தற்செயலாய் நெட்டில் உலாற்றிக் கொண்டிருக்கும் போது கண்ணில் பட்டது - நேற்று காலையில் ! பார்த்த நொடி முதலாய் நெஞ்சைப் பிசைந்தது ! எனக்கு முடிந்ததொரு மிகச் சிறு தொகையை அனுப்பிவிட்ட பின்னரும் கூட வேலையில் கவனத்தைத் திருப்பிட இயலவில்லை ! அந்தக் குழந்தையின் அல்லலும், அந்தப் பெற்றோர்களின் ஆற்றமாட்டாமையையும் எத்தனை முயன்றும் மனதிலிருந்து நீக்கிட முடியவில்லை ! 

சரி, blog பக்கமாய் விசிட் அடிப்போமென்று வந்தால் இங்கே "படலம்" பற்றிய படலம் நாற்பத்தி எட்டாவது தபா ஆரம்பித்திருந்தது ! 'ஆறடி உசரத்துக்கு ஜேசன் வேணும்  ; அவரோட சித்தப்பாரு நாலடி உசரத்துக்கு நல்லா கலரா இருக்கோணும் ; அவுக கூடவே விசாரணையும் வரணும் ; அப்புறம் டப்பி போடறதா ? தொப்பி போடறதா  ? என்று யோசித்துச் சொல்றேன் !'  என்ற ரீதிகளில் யோசனைகள் 'சொய்ங் சொய்ங்' என்று குறுக்கும் மறுக்குமாய்ப் பறந்திடுவதைப் பார்த்த அந்த முதல் நொடியில், மாமூலான அயர்வைத் தாண்டி ஒரேயொரு விஷயம் தான் உள்ளுக்குள் ஓடியது : எங்கோ இருக்கக்கூடிய உபரிப் பணங்களும், என்னிடமிருக்கக்கூடிய உபரி உழைப்பும் ஒன்றிணைந்து -  அந்தப் பிஞ்சிற்கு வளர்ந்திருக்கும் உபரித் திசுக்களை களைந்திட உதவிடக்கூடுமெனில் - எந்தக் கூத்துக்கும் தயார் என்றுபட்டது !  

So "உசரத்திலும், அகலத்திலும் ஒன்னரை இன்ச் பெருசாய் அதே புக் வந்தா மட்டும் தான் இஸ்டரி ; ஜாங்கிரி  எல்லாமே நம்மைப் பாராட்டும்  ! அதற்கென ஆயிரம் ரூவா ஜாஸ்தியானாலும் பரவாயில்லை !" என்ற முன்மொழிவுகள் ஜரூராய்க் கிளம்பி வந்த போதிலும், நான் சகலத்துக்கும் மண்டையை மண்டையை ஆட்டிக் கொண்டிருந்ததே மேற்படிக் காரணத்துக்காகத் தான் ! Of course அந்தச் சிறுமியின் அறுவை சிகிச்சைக்கு அவசியப்படுவது ரொம்பப் பெரிய தொகை & அது நம் சக்திக்கு  மீறியதும் கூட ! ஆனால் இந்த "பொ.தே.ப." project நிஜமாகிடும் பட்சத்தில், நமக்கு கிடைக்கக்கூடிய பணத்திலிருந்து அந்தப் பிள்ளைக்கு ஒரு லட்ச ரூபாய் தர சாத்தியமானால், கொஞ்சமேனும் உதவிகரமாக இருக்குமே என்றுபட்டது ! அப்புறம் முதவாட்டி கண்ணாலத்தை மிஸ் செய்தோருக்கு, மறுக்கா தாலி ஏற்பாடுகள் செய்திட விழையும் நமது ஆர்வலர்களின் முயற்சிகளுக்கும் இக்ளியூண்டு லாஜிக் சாயம் பூசியது போலிருக்குமேயென்றும்பட்டது  ! "ஏலே...தேங்காய் உடைக்கிறதானா உன் காசிலே உடைச்சுக்க வேண்டியது தானே வெண்ணெய் ?  என்கிட்டே வசூல் பண்ணி உடைச்சு புண்ணியம் தேடணுமாக்கும் ? " என்ற கேள்வியா ? No worries : நான் தேட முனையும் புண்ணியம் இருவருக்கும் சேர்த்தே தான் ! அதே போல "இந்த ஒத்தைப் புள்ளைக்கு ஏதோ சிறு ஒத்தாசை செஞ்சுப்புட்டா - லோகத்தையே காப்பாத்திட்டதா நினைப்பாக்கும் ?" என்ற கேள்வியும் எழலாம் தான் ! நிச்சயமாய் இல்லை தானுங்க  ! This is way too big a world for us to hold an umbrella to ! ஆனால் சிறு துளிகள் தானே பெருவெள்ளங்களின் துவக்கப் புள்ளிகள் ? 300 பேரின் நிதியுதவியோடு நாம் செய்திட நினைக்கும் இந்த முயற்சி maybe ஒரு 30 பேரிடமாவது சன்னமாய் ஒரு தாக்கத்தை ஏற்படுத்திடாதா ? அவர்கள் பின்னாட்களில் இது போல் தம் சக்திகளுக்கு உட்பட்ட உதவிகளை செய்திட மாட்டார்களா ? என்ற எதிர்பார்ப்பும் தான் உள்ளுக்குள் !

So முதல்கட்டமாக ஆர்வலர்களுள் யாரேனும் நமக்கு ரூ.25,000 பணம் அனுப்பி வைத்தால் , அதனை அந்தப் பிள்ளையின் வைத்தியச் செலவிற்கொரு தற்சமயத்து contribution ஆக அனுப்பிவிட்டு, தாலிகள் தேடும் படலத்துக்குள் புகுந்திடலாம் ! 

***இஸ்டரி போற்றாவிடினும் பரவாயில்லை ; ஏற்கனவே வெளியான அதே சைசில் ; புலன் விசாரணை சகிதம் ஒற்றை புக்காய்  ரூ.3900 விலையில் வெளியிடலாம் - 300 பேருக்கு இந்தத் தேடல் அத்தியாவசியமாகயிருக்கும் பட்சத்தில் ! 

***இல்லே.. தேடலும் முக்கியம் ; இஸ்டரியும்  போற்றியே தீரணுமெனில் - "வாய்ப்பே இல்லே ராஜா !" - என்பதே எனது பதிலாக இருந்திடும் ஏற்கனவே சுட்ட வட்ட வடையை, புதுசாய் சதுர வடிவில் சுட்டு வைத்து , இரட்டிப்பு விலையையும் நிர்ணயித்து, ஏற்கனவே வாங்கியிருப்போரையுமே இந்தக் கடின நாட்களில் சபலம் கொள்ளச் செய்வதன் லாஜிக் எனக்குப் பிடிபடவில்லை ! தவிர, புதுசாய்த் தாலி கட்ட சாரை சாரையாய் நண்பர்கள் வெயிட்டிங் என்பது மெய்யாகின் ஏற்கனவே நிம்மதியாய்க் குடித்தனம் பண்ணிக்கொண்டு இருப்போரைப் பார்த்துக் கண் சிமிட்ட வேண்டிய  அவசியங்கள் தான் ஏதோ ?!கிடைக்கத் தவறிய புக் அதே சைசில் மறுபடியும் புதுசாய்க் கிடைக்குமெனில் அதைக் கொண்டாடாது அக்கரையே இன்னும் பச்சை என்று தடுமாறுவானேன் ? Collectors கோசரமும் புது சைசுக்கென இன்றைக்குக்  குரல் கொடுப்பதே உங்கள் அவாவெனில் - sorry & no thank you ! The collectors are doing just fine ! Smurfs இதழ்களை போடுங்களேன் என்று கூடத் தான் சில Collectors என்னிடம் கோரிக்கை வைத்து வருகிறார்கள் ! கொடி பிடிப்பது என்றாகி விட்டால் அப்புறம் அவர்களின் சார்பிலும் ஒரு கொடியைப் பிடித்திடலாமே ? வியாபாரி எனும் குல்லாயைக் கூட அணிந்து கொள்ளலாம் தான் ; ஆனால் கசாப்புக்கடைக்காரரின் குல்லாய் எனக்கு வேண்டவே வேணாம் சாமி ! So மாக்சி ; மினி என்ற இஸ்டரிப் போற்றல்களுமே  எனக்கு வேண்டாம் ! Not my cup of tea at all !!

***பேக்கிங் & கூரியர் கட்டணங்கள் தனி ! தற்போதைய ரேட்களில் அது என்னவென்பதை நாளைக்கு கண்டறிய இயலும் ! And there will be NO slipcase !

***தயாரிப்புக்கு 120 நாட்கள் ; This will be AFTER the succesful completion of the pre-bookings !

***மினிமம் இலக்கு 300 பிரதிகள் & அதனைத் தொட்டிட மாக்ஸிமம் அவகாசம் 90 நாட்களே ! முழுதாய் முன்பதிவுகளும், முழுதாய்த் தொகைகளும்  கிடைக்கப் பெற்ற பின்னரே இது சார்ந்த பணிகள் துவக்கம் கண்டிடும் ! In case பிரம்மச்சார்யமே தேவலாம் என்ற ஞானத்திலோ  ; புதுசாய் மனையாளைத் தேட முனைந்தால், ஆத்தில் பூரிக்கட்டைகள் பறக்கும் வாய்ப்புகள் எழக்கூடும் என்ற பீதியிலோ, அல்லது வேறேதேனும் காரணங்களாலோ மினிமம் இலக்கைத் தொட இயலாது போயின், மொத்த புராஜெக்டும் ஊத்தி மூடப்படும் !

***"இல்லே....ஒன்னரை இன்ச்சில் வரலாறை மிஸ் பண்ணிடும் பட்சத்தில், தாலி கட்ட எங்களுக்கு ஆர்வமே லேது ; மணந்தால் MAXI மகாதேவி தான் !! என்பது தான் நிலைப்பாடெனில், களைப்பு நீங்க ஒரு சோடா குடித்த கையோடு, இம்மாதத்து SODA படியுங்களேன் நண்பர்களே ! We'll just move on from this & get on with life !

இந்தத் தருணத்தில் ஆர்வலர்கள் அல்லாதோரின் மனங்களில் ஒரு கேள்வி நிழலாடிடும் என்பது புரிகிறது எனக்கு !  "விடாப்பிடியாக இப்படி நாலு பேர் சேர்ந்திட்டுக் கேட்டாக்கா அவரவர் ஆசைப்படும் புக்குகளையும் தயார் பண்ணுவியா அப்பு ?'" என்ற வினா நிறைய மனங்களில் ஒலித்து வருமென்பது சர்வ நிச்சயம் ! 

எனது பதில் சிம்பிள் ! 

இதுவொரு பரீட்சை !  இந்தச் சிரம நாட்களிலும், இத்தனை பணம் தந்து அரைத்த அதே மாவை ஆர்வமாய்க் கொள்முதல் செய்திட வாசகர்கள் மெய்யாகவே முண்டியடித்துக் கொண்டு இருக்கும் பட்சத்தில், அவர்களை ஒரு untapped business opportunity என்று கருத வேண்டியது தான் ! அவர்களது தேவைகளைப் பூர்த்தி செய்திடும் பொறுப்பை நாம் விடாப்பிடியாய் நிராகரித்து வருவதே, தொடர்ச்சியாய் யார் யாரோ - ஏதேதோ கூத்துக்களை  அரங்கேற்றிடக் காரணமாகிப் போகின்றன ! இந்த முறை நாமே முயற்சித்துப் பார்ப்போம் ; ஜெயமெனில் அவசியமாகிடும் இதழ்களை ஆடிக்கொருவாட்டி, அமாவாசைக்கு இன்னொருவாட்டி என இதைப்  போலவே ஒரு premium விலையில் தயாரிப்போம் - முன்பதிவுகளின் பெயரில் ! இதனில் கிட்டக்கூடிய பணத்தைக் கொண்டு நமது ரெகுலர்  சந்தாத்தடத்தை வலுப்படுத்திக் கொள்ள சாத்தியப்படுமேயாயின் - why not ?  

And if this trial falls flat on its face - கையைத் தட்டி விட்டு ரெகுலர் பணிகளை எப்போதும் போல் கவனிப்போம் !

அப்புறம் ச்சும்மா ஒரு பின்குறிப்பையுமே இங்கு இணைத்தல் நலமென்று நினைக்கிறேன் :  உரத்த குரல்களோ ; பிடிவாதக் குரல்களோ, உத்தரவிடும் குரல்களோ, ஏளனக் குரல்களோ, ஒரு போதும் இந்தக் கோவேறு கழுதையின் போக்கினை / பயணத்தைத் தீர்மானித்திடாது ! அதுக்கே தாகமெடுத்து ; எதிர்ப்படும் சுனையும் ரசித்தாலொழிய - சொட்டு நீர் நாவில் ஒட்டாது - தடிப்போடவோ, தாஜா செய்யவோ ஜாம்பவான்கள் எத்தினி பேர், எத்தினி திக்கிலிருந்து  படையெடுத்தாலுமே ! 'திமிர பாரேன் !' என்பதே இதற்கான ரியாக்ஷனாய் இருப்பின் - 'டாங் யூ !' என்பதே பதிலாக இருக்கும்  ! 

Please stay assured, என்ன குட்டிக்கரணங்கள் அடித்தாலும் எனது focus ஒரு போதும் மாறிடாது !  As always, we march looking ahead ! Bye for now all ! 

இப்போது களைப்பு நீங்க SODA டைம் !! Please do keep the June reviews going ! See you around all !

Saturday, June 13, 2020

மீண்டுமொரு 'பச்சக்..பச்சக்'.படலம் !

நண்பர்களே,

வணக்கம். சில தருணங்களில் சந்தோஷிக்க சின்னச் சின்ன விஷயங்களே போதும் என்பதை yet again நிரூபித்த நாளிது !! போன மாதத்தின் பெரும் பகுதிக்கு - 'பார்சல் வந்தில்லா ; கூரியர் சொதப்பிட்டன் ; புக்ஸ் கிட்டில்லா ..!' என்று ஒலித்து வந்த சோகக் குரல்களின் மத்தியில், புக்ஸ் சார்ந்த அலசல்களையும், அபிப்பிராயங்களையும்  கண்ணில் பார்த்திடவே நிரம்ப சிரமப்பட்டது ! ஆனால் இம்முறையோ கூரியர் நிறுவனங்கள் (பெரும்பான்மைக்கு) 'கன்'னாய் செயல்பட்டிருக்க - நீங்க ஹேப்பி & in turn நாங்களும் ஹேப்பி ! 

'ஓராயிரம் புக்ஸ்' என்ற மைல்கல்லைத் தொட இன்னமும் எவ்வளவு இதழ்கள் பாக்கி என்ற கணக்கெல்லாம் தெரியலை ; ஆனால் ஒவ்வொரு புது இதழையும், முதல் புக்கைப் போலவே ரசிக்கும் அந்தப் பாங்கும் சரி ; ரொம்பவே ஆராய்ந்தால் கண்ணில் பிழைகள் தட்டுப்படுமோ  என்ற பயமும் சரி, இன்னமும் கொஞ்சமும் குறையாது தொடர்கின்றன ! So உங்களைப் போலவே  புக்குகளை இப்டிக்கா & அப்டிக்கா புரட்டியபடியே அழகு பார்த்துக் கொண்டே தான் இருக்கிறேன் ! இது புது இதழ்கள் மீதே spotlight பாய்ந்திட வேண்டிய வேளை என்பதால் வேறெதைப் பற்றியும் எழுதிடத் தோன்றவில்லை ! அதே சமயம் உங்களில் பெரும்பான்மை இன்னமும் புக்ஸைப் புரட்டியே இருக்க மாட்டீர்கள் எனும் பொழுது, இதழ்களைப் பற்றிய பின்னணிகளை உளறி வைத்து உங்களின் வாசிப்புகளுக்கு வெடி வைத்த புண்ணியம் வேண்டாமே என்றும் தோன்றுகிறது ! So இந்த வாரத்தின் பெரும்பான்மைக்கு உங்களின் first thoughts & first opinions கொண்டே வண்டியை ஒட்டிட வேண்டியது தான் !

கதைகளுக்குள் நீங்கள் மூழ்கிடவுள்ள இந்த வேளையினில் - போன வாரத்துப் பதிவினில் கேட்டிருந்த கேள்விக்கான உங்களின் பதில்களைப் பற்றிய அலசலிலும், அதன் நீட்சியாய் இன்னும் சில கேள்விகளையும் மட்டும் கேட்டு வைத்தல் நலமென்று நினைக்கிறேன் ! 

கேள்வி 1 :

சந்தாவினில் எஞ்சிடக்கூடிய 31 இதழ்கள் !! இவற்றை டிசம்பர் 31-க்குள் நிறைவு செய்திடல் நலமா ? அல்லது 2021 -ன் மார்ச் 31 வரைக் கொண்டு செல்வது தேவலாமா ?

மொத்தமாய் (இதுவரையிலும்) 362 ஓட்டுக்கள் பதிவாகியிருக்க - அவற்றின் breakup இதோ : 

*நம்பிக்கையே ஜெயம் ! டிசம்பர் 31-க்குள் நிறைவுறச் செய்யலாம் - 169 votes

*வேகம் சூடு போடும் ; விவேகம் சோறு போடும் ! 
மார்ச் 2021 வரை நீட்டிப்பதே நலம் ! - 120 votes

*எப்படி அமைந்தாலும் எனக்கு ஓகே தானுங்கோ - 73 votes


இவற்றுள் ஒரு சிறு பங்கு டுபுக்கு ஓட்டுக்கள் இருக்க நேர்ந்தாலுமே - பெரும்பான்மையின் எண்ணம் "proceed as normal " என்ற பச்சைக் கொடி ! However சுமார் 35 சதவிகித நண்பர்கள் "go slow" என்ற சிகப்புக் கொடியை ஆட்டியுள்ளனர் எனும் போது அதன் பின்னணியை outright உதாசீனம் செய்வதும் விவேகமாகாது என்பதுமே புரிகிறது ! துளியும் ஸ்திரத்தன்மையின்றி, நம்மைச் சுற்றிய நிலவரங்கள் நித்தமும் மாற்றம் கண்டு வரும் இந்த வேளையினில், ஒரு முக்கிய தீர்மானம் எடுக்கும் முன்னே நிறைய விஷயங்களை கவனத்துக்கு கொண்டு வரவேண்டுமென்பதை கேட்கப்பட்ட கேள்வி # 2-க்கான உங்களின் பதில்கள் உணர்த்தியுள்ளன !

கேள்வி # 2 :

காத்திருக்கும் 4 புது இதழ்களுள் நீங்கள் முதலில் படித்திடப் போவது எந்த இதழை ? 

மொத்த ஓட்டுக்கள் : 207 & அவற்றின் breakup :

*கைதியாய் டெக்ஸ் -  75 votes

*SODA - திசை மாறிய தேவதை - 70 votes

*ஜேம்ஸ் பாண்ட் 007 - விண்ணில் ஒரு வேதாளம் - 33 votes

*போர்முனையில் ஒரு பாலகன் - 29 votes

As always, பெரிதாய் புருவங்களை இங்கு உயர்த்திட முகாந்திரங்கள் இருப்பதாய்த் தோன்றாவிடினும் - என்னளவில் இங்கே 4 முக்கிய செய்திகள் பொதிந்து நிற்பதாய் நான் நினைக்கிறேன் ! 

பாய்ண்ட் # 1சில பல கலாய்ப்போர் சங்கங்கள் அதிகாரியினை அவ்வப்போது வாரிட முனைந்தாலும், அவர்களுக்கு பிம்பிலிகா பிலாக்கி தந்தவராய் மனுஷன் உச்சத்தில் நிற்பதில் நிரம்பவே மகிழ்வு எனக்கு ! நமது தலைமகன் நலமெனில், நாமும் நலமாகத் தழைக்கும் வாய்ப்புகள் பிரகாசம் தானே folks ? So ரேஞ்சரானாலும் சரி, கைதியானாலும் சரி, வாசிப்புத் தரவரிசையினில் என்றைக்கும் நம்மவரே  # 1 என்பது  பதிவாகியுள்ளது ரொம்பவே reassuring !!

பாய்ண்ட் # 2 : ஒரு புது வரவுக்கு ; அட்டவணையினில் இருக்கக்கூடிய surprise factor-க்கு உங்கள் மத்தியில் என்ன மாதிரியான மதிப்புள்ளது என்பதை நேர்படப் பார்க்கக் கிட்டியுள்ள வாய்ப்பும் மகிழ்வூட்டும் படலமே எனக்கு ! இது நாள் வரையிலும் அபிப்பிராயங்களாய் ; அலசல்களாய் உங்களின் எண்ணப் பகிர்வுகளை பார்த்திருப்பேன் தவிர, இது போலானதொரு point blank வோட்டெடுப்பில் பார்த்ததாக ஞாபகமில்லை ! SODA என்ற புது நுழைவுக்கு டெக்ஸுக்குப் போட்டி தரும் வீரியமும், ஆற்றலும் சாத்தியமாகியுள்ளதெனில் - அதற்கு அந்த novelty factor & புதுச்சென்ற மவுசு தானே காரணமாகிடக்கூடும் ? ஒவ்வொரு முறையும், அரைத்த அதே மாவோடு குடித்தனம் பண்ணாது, யாரையேனும் புதுசாய் அட்டவணைக்குள் நான் புகுத்திட குட்டிக் கரணம் அடிப்பதே இத்தகைய ஆர்வங்களை விதைக்கும்  பொருட்டே ! அந்த மட்டிற்கு எனது பல்டிகளுக்கு பலனிருப்பதில் ஹேப்பி !! என்ன - அப்புறமாய் அந்த நாயக / நாயகியர் சோபிக்கிறார்களா ? அல்லது பரணுக்குப் பொட்டலமாகிறார்களா ? என்பது an entirely different story ! 

பாய்ண்ட் # 3 : கார்ட்டூன் ஜானருக்கு  முடிந்த கொடிகளையெல்லாமே  நான் ஆட்டோ ஆட்டென்று ஆட்டிப் பார்த்தாலும், அது கட்டக்கடாசியில் நிற்பது ரொம்பவே சங்கடத்தைத் தந்தாலும் - அதனில் பெரிதாய் ஆச்சர்யமில்லை எனக்கு ! கார்ட்டூன்களில் - லக்கி லூக் & சற்றே அடுத்த லெவெலில் சிக் பில் நீங்கலாய், பாக்கி உருப்படிகளை நம்மில் பெரும்பான்மையினர் கொலு பொம்மைகள் ரேஞ்சுக்கே பாவித்து வருவதில் இரகசியம் தான் ஏது ? இது குறித்து பாட்டம் பாட்டமாய்ப் புலம்பியும் பிரயோஜனம் கிஞ்சித்தும் இல்லை எனும் போது,  ப்ளூ கோட் பட்டாளத்தின் வாசிப்புத் தரவரிசையின் அந்த last place finish பெரிதாய் அதிர்வுகளை ஏற்படுத்தவில்லை ! 

பாய்ண்ட் # 4இந்தாண்டின் துவக்கத்தில் நாற்பது ரூபாய் விலையினில் இந்த சுலப வாசிப்புத் தடத்தினை (சந்தா D ) உருவாக்கிய போதும் சரி ; அந்நாட்களது ராணி காமிக்ஸின் ஜேம்ஸ் பாண்ட் தொடர் நம்மிடையே மறுவருகை செய்திடவுள்ளதை அறிவித்த போதும் சரி, தொடரும் மாதங்களின் வாசிப்புப் பட்டியலில் இவையே முத்லிடத்தைப் பிடித்து நிற்குமென்ற நினைப்பு என்னுள்ளே கணிசமாகவே இருந்தது ! But surprise ..surprise ...யதார்த்தம் அதுவல்ல என்று இந்த poll காட்டியுள்ளது ! விலைகளோ ; சுலப வாசிப்புகளோ உங்களைப் போன்ற (காமிக்ஸ்) பழம் தின்று கோட்டை போட்ட ஜாம்பவான்களுக்கொரு பொருட்டல்ல ; உங்களின் சுவாரஸ்யங்களை ஒற்றை ராத்திரியில் கைப்பற்றுவதெல்லாம் அத்தனை சுலபமே கிடையாதென்று சொல்லியுள்ளதாய் எனக்குத் தோன்றுகிறது ! ஜேம்ஸ் பாண்டின் இந்த மூன்றாமிடம் நிதர்சனத்தின் நிஜ வெளிப்பாடே எனில்,am truly surprised !! 

At this point of time - இந்தாண்டினில் எஞ்சியிருக்கக்கூடிய இதழ்கள் சார்ந்து  உங்களிடம் கேட்க எனக்கு இன்னமும் கொஞ்சம் கேள்விகள் உள்ளன ! And வாகாய் ஒரு வோட் பூத் நமக்கு ஓசியில் சிக்கியிருக்கும் போது, அதைத் துவைத்துத் தூங்கப் போடாது விட்டு விடுவோமா - என்ன ? So கோச்சுக்காது கொஞ்சம் பதில்கள் ப்ளீஸ் !! இதோ அதே தலத்தில் நாம் எழுப்பியுள்ள 3 வெவ்வேறு polls சார்ந்த லிங்குகள் :  

POLL # 1 : கிராபிக் நாவல்கள் உங்களின் ஆதர்ஷத் தரவரிசையில் தற்சமயம் பிடித்திருக்கும் இடம் எதுவோ folks ?


POLL # 2 : நடப்பாண்டில் ரொம்பவே எதிர்பார்த்திருக்கும் இதழ் ?


POLL # 3 : நடப்பாண்டினில் உங்களின் காமிக்ஸ் கொள்முதலின் பின்னணி எவ்விதம் இருக்குமோ ?


As always உங்களின் எண்ணங்களை அறிந்து கொள்வது எனக்கு ரொம்பவே உதவிடும் என்பதால் மூன்று தனித்தனி பூத்களிலும் 'பச்சக் பச்சக்' என்று 3 ஓட்டுக்களை போட்டு உதவிடக் கோரியபடியே நடையைக் கட்டுகிறேன் ! I repeat - மூன்றே ஓட்டுக்கள் மாத்திரமே ! And உங்களின் வாட்சப் க்ரூப்களிலும் இந்த மூன்று லிங்குகளையும் பகிர்ந்திடவும் கோருகிறேன் !! 

Bye all....see you around ! Have a good weekend ; and please stay healthy & safe !!
கண்ணில்பட்டதொரு XIII Gamebox டப்பியின் அட்டை !