Powered By Blogger

Wednesday, December 29, 2021

செய்வன "த்ரில்லாய்ச்" செய் !

 நண்பர்களே,

முன்குறிப்பு : "நான் கொஞ்சம் பிசி ; உன் மொக்கையை முழுசா படிக்க இப்போ நேரமில்லை !" என்று சொல்வோரா நீங்கள் ? நேராக பதிவின் கடைசிப் பகுதியில் சிகப்பில் உள்ள வரிகளுக்கு ஜம்ப் பண்ணி வாசித்த கையோடு நீங்கள் புறப்பட்டு விடலாம்  ! மாறாக, "லீவிலே தான் இருக்கேன் ; தோசை சுடற நேரத்திலேயோ ; பாத்திரம் தேய்க்குறே நேரத்திலேயோ வாசிச்சிப்புடுவேன் !" என்போரா நீங்கள்  ? - carry on with the reading !!

வணக்கம். கோலிவுட் பட க்ளைமாக்ஸ் காட்சிகளில் அடிக்கொரு தடவை பார்த்திருப்போம் - ரயில் கிளம்பி வேகம் எடுக்க ஆரம்பிக்கும் போது, பிளாட்பார்ம் டிக்கெட் கூட எடுத்திருக்காத ஈரோ சார் ரத்தம் சொட்டச் சொட்ட கையை நீட்டியபடிக்கே ஓடியாருவார் & ரயில் பெட்டியின் வாசலில் தொங்கிக்கொண்டே நிற்கும் ஈரோயினி கையை நீட்டியபடிக்கே "பிராணநாதா...கமான் ..கமான்  !!" என்று கிண்டியில் ரேசுக்குப் போகிறவரைப் போல கூவிக் கொண்டிருப்பார் ! இந்த மாதிரியான சீன்களைப் பார்க்கும் போதெல்லாம் - 'ஏண்டாப்பா டேய்...அது தான் ரயில் ரெண்டு நிமிஷத்தில் கெளம்பிடும்னு தெரியுமில்லே ? ரெண்டு நிமிஷங்களுக்கு முன்னே வந்து தொலைச்சிட்டா குடியா முழுகிடும் ?' என்று கடுப்பாக இருக்கும் ! ஆனால்..."செய்வன 'த்ரில்லாய்ச்' செய் " என்ற சினிமாக்களின் தாரக மந்திரங்களை அத்தினி சுலபமாய் மாற்ற முடியாது தானே ? ; so ரயில்வே ஸ்டேஷன்களின் slow motion sequences தொடர்ந்து கொண்டே இருக்கின்றன !

'அது சரி, இந்த விளக்கமெல்லாம் இப்போ எதுக்குடா தம்பி ?' என்கிறீர்களா ? Simply becos எரிச்சல்மூட்டும் அந்த ஈரோ சார் last நிமிட்டில் ஓடியாரும் சீனுக்கு நிகரான காட்சிகள் நம் தரப்பிலும் இவ்வாரத்தில் அரங்கேறி வந்துள்ளன & 'தேமே' என்று அவற்றைப் பராக்குப் பார்த்து வர வேண்டிப் போனது எனக்கு !! 

*FFS எனும் concept இறுதியானது 7 மாதங்களுக்கு முன்பாய் !!

*FFS இதழினை டிசம்பர் 29 -ம் தேதிக்கு டெஸ்பாட்ச் செய்திட வேண்டுமென தீர்மானித்ததும் அதே 7 மாதங்களுக்கு முன்பாய் !!

*FFS-ன் கதைகளுக்கு ஏற்பாடுகள் பூரணமானது 5 1/2 மாதங்களுக்கு முன்பாய் !

*FFS-ன் ஒட்டு மொத்த மொழிபெயர்ப்பும் ; டைப்செட்டிங்கும் ; எடிட்டிங்கும் நிறைவுற்றது 1 1/4  மாதங்களுக்கு முன்பாய் !

*FFS-ன் ஒட்டு மொத்த அச்சுப் பணிகளும் நிறைவுற்றது டிசம்பர் 10 தேதிக்கு !

நியாயப்படிப் பார்த்தால் பைண்டிங் & இத்யாதி வேலைகள் நிதான வேகத்தில் நடந்திருந்தால் கூட கிறிஸ்துமஸுக்குள் புக்ஸ் கைக்கு வந்திருக்க வேண்டும் & 4 நாட்கள் சாவகாசமாய் கிட்டியிருக்கும் - நம்மாட்கள் டெஸ்பாட்ச் செய்திட ! இது தான் இந்த டைரடக்கரின் திட்டமிடல் ! ஆனால் அட்டைப்பட டிசைனுக்கு போராட்டம் ; பைண்டிங்கில் சதிராட்டம் ; கனத்த பொட்டிகளுக்கோசரம் குத்தாட்டம்  என்று குறுக்கால நிறைய சண்டைக் காட்சிகள் அரங்கேறியதன் பலனாய், புக்ஸ் திங்கள் இரவுக்குத் தான் ஆபீஸ் வந்து சேர்ந்தன ! 

புக்ஸ் வந்து இறங்கும் போதே - "நாளைக்கே இம்புட்டையும் அனுப்பப் சொல்லி சாமியாடுவானே ? இந்த காண்டாமிருகக் கனத்திலான டப்பிக்குள்ளாற புக்ஸை அடைச்சு, வாயை ஓட்றதுக்கே ஆளாளுக்கு அரை டஜன் இட்லிக்களை கூடுதலா சாப்பிட தேவைப்படுமே ?"  என்ற நம்மாட்களின் பீதி தோய்ந்த மைண்ட்வாய்ஸ் எனக்குக் கேட்காத குறை தான் ! ஒண்ணு...ரெண்டு..மூணு....நாலு ...என குடும்பம் குட்டியோடு FFS ஆபீசுக்குள் வலது காலை எடுத்து வைத்துப் புகுந்த நொடியில், நம்மாட்களுக்கு உட்காரக் கூட இடம் நஹி ! So 'அடுத்த சில நாட்களுக்கு ஞான் ஆத்தும் டீயை வெளியிலே வைச்சு ஆத்திக்கும் ; நிங்கள் எண்ட ரூமை எடுத்துக் கொள்ளுங்கோ !' என்றபடிக்கே என் ரூமை திறந்து மொத்தத்தையும் அங்கே இறக்கச் செய்தேன் ! அப்பாலிக்கா ஆரம்பிச்சது தான் பாம்பே சர்க்கஸ் !!

டப்பிக்கள் நாம் எதிர்பார்த்ததைவிடவும் முரட்டுத்தனமாய் அமைந்து போயிருக்க, பசையின் ஈரம் காய்ந்த பாடைக் காணோம் !! "காய போடுங்க...விரிச்சுக் காய போடுங்க !" என்றபடிக்கே FFS மெயின் புக்ஸ்களை வேக வேகமாய்ப் புரட்டினேன் ! கடந்த 6 மாதங்களாய் என்னோடு வீட்டில் குடித்தனமே நடத்தியிருந்த அத்தனை கதை மாந்தர்களையும் புக்கில் பார்க்கும் போது கும்பகோணத்து அசோகா அல்வாவைப் பார்த்தது போல குஷியாய் இருந்தது ! Alpha....ம்ம்ம்...சிஸ்கோ...என்றபடிக்கே பக்கங்களைப் புரட்டினால்.திடு திடுப்பென சிஸ்கோவுடன், டேங்கோவும் ஆஜராகியிருக்கக் கண்டேன் ! "இது எப்போ இவங்க கூட்டணி போட்டாங்க - எனக்கே தெரியாம ?" என்றபடிக்கே புரட்டினால் - பைண்டிங்கில் பக்கங்களைத் தப்பாக வைத்துத் தைத்து விட்டிருப்பது புரிந்தது ! 'போலீஸ்...ஆம்புலன்ஸ்...பயர் சர்வீஸ்..மிலிட்டரி' என கூவாத குறையாய் நான் கத்திக் கூப்பாடு போட்டதில் 3 பேர் பைண்டிங் ஆபீசுக்கே ஓட்டமெடுத்திருந்தனர் - அங்கே பணி நடந்து கொண்டிருந்த பாக்கிப் பிரதிகளிலும் இது போலான குளறுபடி ஏதேனும் நேர்ந்துள்ளதாவென்று சரி பார்க்க ! ஆபீஸிலோ அத்தனை பேரையும், அவரவரது வேலைகள் என்னவாக இருப்பினும், தூக்கி ஓரம் கட்டிவிட்டு, புக்ஸை புரட்டச் சொல்லிப் பணித்தேன் ! 'சரி, நம்மாட்களில் யாரும் இதில் அரைப் பக்கத்தைக் கூடப் படிக்கும் பொருட்டு புரட்டப் போவதில்லை ; இப்புடியாச்சும் முழு புக்கையும் புரட்டட்டுமே !!' என்று மனசுக்குள் நினைத்துக் கொண்டேன் ! புரட்டினார்கள்.. புரட்டினார்கள்.... வாழ்க்கையின் ஒரத்துக்கே போகும் வரைப் புரட்டினார்கள் & at the end of it - மொத்தம் 3 புக்ஸ் மட்டும் உல்டா புல்டா பக்கங்களோடு இருப்பது கண்டுபிடிக்கப்பட்டது ! And அங்கே பைண்டிங்கில் இன்னொரு 6 பிரதிகள் !! 'அவற்றைக் கடாசுங்கள்' என்றபடிக்கே லைட்டாக ஒரு பெருமூச்சை விட்டுக் கொண்டேன் ! 

ஆனால் அது சற்றே அவசரப்பட்ட பெருமூச்சாகிப் போனது ! Becos ஜவ்வு மிட்டாய் படலங்கள் ஓய்ந்த பாடில்லை !!

இதழ்களில் இரண்டு - செம பருமன் எனும் போது, வாசிப்பு அடையாளங்களுக்கென bookmarks அவசியமாச்சே ?! And ஒன்றுக்கு நான்காய் அவற்றைத் தந்திடும் மஹாசிந்தனை கொஞ்சம் தாமதமாகவே எழுந்திருந்தது எனக்கு ! 'ரைட்டு...அதை டிஜிட்டலில் பிரிண்ட் போட்டால் ஒரு மணி நேரத்தில் வாங்கிப்புடலாமே' என்றபடிக்கே கோகிலாவுக்கு ஓலை அனுப்பினோம் - டிசைன் பண்ணி அவசரமாய் அனுப்பப் சொல்லி ! அந்தப் பொண்ணும், நமது அவசரம் புரிந்தவராய் மின்னல் வேகத்தில் அனுப்பி வைக்க, மைதீனிடம் கொடுத்து டிஜிட்டல் பிரிண்ட் போட அனுப்பினால், மண்டையைச் சொரிந்தபடிக்கே திரும்பினான் - ""டிஜிட்டல் ஸ்டுடியோவில் செம ரஷில் பணிகள் ஓடி வந்ததன் பலனாய் அவர்களிடம் பிரிண்டுக்கான Toner Inks காலியாகிடுச்சாம் ; நாளை தான் பெங்களூரிலிருந்து வருமாம் !" என்றான் ! ஊருக்குள் டிஜிட்டல் பிரின்டர்ஸ் நிறையவே இருந்தாலும், நாம் செல்வது அவர்களுள் லேட்டஸ்ட்டான மிஷினை வைத்திருக்கும் நிறுவனத்துக்கே & அவர்கள் தரும் ரிஸல்ட்ஸ் செமையாய் இருக்கும் ! மற்றவர்களிடம் அந்தத் தரம் இருப்பதில்லை என்பதை அனுபவத்தில் பார்த்துள்ளோம் ! கையைப் பிசைந்தபடிக்கே நில்லாமல்,  இங்கும் அங்குமாய் விசாரித்துவிட்டு சிவகாசியின் புறநகரில் உள்ள இன்னொரு புதுவரவிடம் ஓடினோம் ! Wow - அவரும் ஒரு புத்தம்புது மிஷினை வைத்திருந்தார் and மாதிரிகளை போட்டுப் பார்த்தோம் - செம ஹேப்பி ! 

ரைட்டு...பிரிண்ட் போட்டு வாங்கி வந்தால் வேலை முடிந்தது என்றபடிக்கே ஆபீசுக்குத் திரும்பி 'ஆபரேஷன் ரவுண்டு பன்' ஆரம்பித்தோம் ! போனவாட்டியே மிஸ் ஆன ரவுண்டு பன்னை இம்முறையாச்சும் உள்ளே நுழைக்கணுமே - என்றபடிக்கு ஒரு பன்னை வாங்கியாந்து டப்பிக்குள் புக்ஸோடு வைத்து ஒட்டி விட்டு, மொத்து மொத்தென்று நாலுவாட்டி கீழே போட்டுப் பார்த்தேன் - 'கூரியர் டெஸ்டிங்..கூரியர் டெஸ்டிங்' என்றபடிக்கே ! அப்புறமாய் பாக்ஸைப் பிரித்து பன்னும், புக்ஸும் நலமா ? என்ற பரிசோதித்தோம் ! கிங்கரர்கள் போல புக்ஸ்சார் அனைவருமே திடமாய், தாட்டியமாய் இருக்க, ரஷ் அவரில் பஸ்சுக்குள் சிக்கிய ஓமக்குச்சி நரசிம்மன் போல பன் பிதுங்கிக் கிடந்தது ! பொட்டியைத் திறந்த நொடியில் இது கருவாடாட்டம் வெளிப்பட்டால் சுகப்படாதே என்றபடிக்கே பன்னுக்குப் பதிலாய் என்ன வைக்கலாம் ? என்ற அவசர ஆலோசனைக்குழு போட்டு ஆராய்ந்தோம் ! மிகச் சரியாக அந்நேரம் தான் நம்ம STV அன்போடு அனுப்பியிருந்த மெகா திருப்பதி லட்டு பார்சலும் கூரியரில் வந்து சேர, பெருமாளின் பிரசாதத்தை கொஞ்சமாய் வாயில் போட்டபடிக்கே - "பன்னுக்குப் பதிலாய் லட்டு !! போய் இருக்கிற லட்டுகளிலே ஒரு சேம்பிள் வாங்கிட்டு வா மைதீன் !" என்று தீர்மானித்தேன் ! சோட்டா பீம் லட்டு ; திருப்பதி லட்டு ; ஸ்பெஷல் லட்டு - என 3 கிரேடுகளில் லட்டுக்கள் ஆஜராயின & மறுக்கா நாசா விஞ்ஞானிகளைப் போல "டப்பி ஓபன்...புக்ஸ் + லட்டு பேக்கிங்...டப்பி க்ளோஸ்....டப்பி crash test " என்ற பரிசோதனைகளை செய்து பார்த்தோம் ! மூன்று லட்டுக்களும் பூந்தியாய் மட்டுமே வெளியேறின இந்தப் பரிசோதனையின் முடிவில் ! மனம் தளராது - பேப்பரில் பேக் செய்யப்பட்டிருக்கும் plum cake ஒன்றை வாங்கி வரச் சொல்லி உள்ளே நுழைத்துப் பார்த்தால், ஊஹூம்..அது உள்ளே நுழைந்த பாடையே காணோம் ! "பக்கி பசிக்குதுனு எதையாச்சும் வாங்கித் தின்னுறானா ? இல்லாங்காட்டி மெய்யாலுமே டெஸ்டு தான் பண்ணுறானா ?" என்ற சந்தேகம் மைதீனுக்கு எழுந்துவிடக்கூடும் என்பதால் மேற்கொண்டு மைசூர்பாகு ; சூஸ்பெரி ; ஜாங்கிரி போன்ற ஐட்டங்களை வாங்கி வரச்சொல்லும் யோசனைகளைக் கைவிட்டேன் ! "ஸ்வீட் எடு..கொண்டாடு...!" என்று மாமூலுக்குத் தீர்மானித்த கையோடு, எலி சைசில் அல்லாது, நார்மல் அளவிலான சாக்லெட்டை வாங்கிட்டு வாப்பா !" என்று பணம் கொடுத்து அனுப்பிவைத்தேன் ! Sorry guys ; இந்தவாட்டியும் பன் கதை - அல்வா கதையாகிப் போய் விட்டது ! But ரொம்பச் சீக்கிரமே காத்திருக்கும் நமது Online புத்தக விழாவினில் - எல்லா கொள்முதல்களுக்குமே ஒரு ரவுண்டு பன் நிச்சயமாய் அனுப்பிடப்படும் ! Thats a promise !! பன்னின்றிப் பிரதிகள் வாராது !!

கொடுக்கப்பட்டிருந்த பணிகள் அனைத்தையும் முடித்து விட்டு, what next ? என்ற கேள்வியோடு நம்மாட்கள் நிற்க - அதற்குள்ளாக அவர்களை கசரத்து வாங்க அடுத்த பணியோடு காத்திருந்தேன் ! நீரின்றி அமையாது உலகு ; ஸ்டிக்கரின்றி அமையாது புக்கு ! So 2 திருத்தங்கள் பண்ணிட அவசரம் அவசரமாய் ஓட்டமெடுத்தனர் ஸ்டிக்கர்களை பிரிண்ட் செய்து வாங்கி வர ! இப்போதெல்லாம் நம்மாட்கள் எதுக்குமே அசருவதில்லை தான் ; ஆந்தை மண்டையன் ஒவ்வொருவாட்டியும் ஏதாச்சும் கோக்கு மாக்காகப் பண்ணச் சொல்லிக் குடலை உருவாது இருக்கமாட்டான் என்பது அவர்களை பொறுத்தவரைக்கும் ஒரு given ! ஆரம்பித்த ஸ்டிக்கர் ஒட்டல்ஸ் இரவு ஒன்பது வரை தொடர்ந்தது ! Phew !! இதற்கு மேலும் பெண்டு நிமிர்த்திட வேண்டாமென்று 'இன்று போய் நாளை வாங்கோ !' என்று வழியனுப்பினேன் ! 

ரைட்டு...புக்ஸ் சரி பார்த்தாச்சு ; புக் மார்க்ஸ் ரெடி ; சாக்லெட்டும் ரெடி ; டப்பாக்களும் ரெடி - பேக்கிங் ஆரம்பிக்கலாமென்றால் - அழகுக்கு அழகேற்றும் போட்டோக்களுடனான அவரவரது புக்ஸ்களை அவரவரது சந்தா / முன்பதிவு நம்பர்களோடு tally செய்து சரியாய் அனுப்பிடும் படலம் காத்திருந்தது ! ஆசை ஆசையாய் புக்கைத் திறந்து, பிள்ளைகளிடம் அவர்களது போட்டோக்களைக் காட்டும் ஆர்வத்தோடு இருப்பவர்களுக்கு, வேறேதேனும் பூச்சாண்டி மாமாவின் போட்டோ வெளிப்பட்டால் மெய்யாலுமே சங்கடமாகிப் போய்விடுமல்லவா ? So சந்தாவில் இருப்போரில்  போட்டோஸ் அனுப்பியோர் யார் ? ; போட்டோஸ் அனுப்பாதோர் யார் ? ; ஆன்லைனில் FFS முன்பதிவுகள் மட்டும் செய்து அவற்றுடன் போட்டோஸ் அனுப்பியிருப்போர் யார் ? ; அப்புறம் ஏஜெண்ட்களிடம் ஆர்டர் செய்து அவர்கள் வாயிலாய் போட்டோக்களை அனுப்பியிருப்போர் யார் ? - என ரகம் ரகமாய் பிரித்திட வேண்டியிருந்தது ! நம்மாட்கள் இன்றைக்கு காலையில் எட்டு மணிக்கெல்லாம் ஆஜராகி விட்டிருக்க, போட்டோஸ் sorting படலம் துவங்கியது ! And ஒன்பதரைக்கு ஆபீஸ் வந்து சேர்ந்த நேரம் முதலாய், தினுசு தினுசாய் அவ்வப்போது நான் சுட்டு வைக்கும் இது போலான இடியாப்பங்களை அவர்கள் கையாளும் நேர்த்தியை ரசித்துக் கொண்டிருக்கிறேன் ! சரிபார்த்துப், பார்த்து  டப்பாக்களுக்குள் அவர்கள் புகுத்தும் புக்ஸ்களின் முதல்பக்கத்தினிலிருந்து அவ்வப்போது புன்னகைக்கும் உங்களின் போட்டோக்களை பார்க்கும் போது மெய்யாலுமே எனக்கே ஜிவ்வென்றிருந்தது  ! Guys - இந்த இதழின் பாக்கி 311  பக்கங்களுமே உங்களுக்கு ரசிக்காது போனாலும் கூட, இதனில் நீங்கள் cherish செய்திட உருப்படியாயொரு காரணம் இருக்கவுள்ளது ; போட்டோக்கள் அனைத்துமே செம !! 

So நடு நடுவே உங்களின் எண்ணற்ற போன்களுக்குப் பதில் சொல்லியபடிக்கே நடந்த தெறிக்கும் பேக்கிங் படலமானது  ஒரு வழியாய் நிறைவுற்று, சந்தாக்கள் + FFS முன்பதிவுகள் முழுசும் கூரியர்களுக்குப் பயணமாகி விட்டன ! And நாளை காலை முதலாய் உங்கள் இல்லக் கதவுகளைத் தட்டிட FFS குடும்பம் தயாராகயிருக்கும் - - கூரியர் நண்பர்கள் மனசு வைக்கும் பட்சங்களில் ! உங்களின் உள்ளக் கதவுகளையுமே அவை தட்டிட வேண்டும் என்பதே எங்களது பிரார்த்தனைகள் !! All Fingers Crossed !! 

எது எப்படியோ - எனக்குள் ஒருவித PPD syndrome ! "இது என்னடா டேய் புதுக் கரடி என்கிறீர்களா ?"   10 மாசம் வயிற்றில் பிள்ளையைச் சுமந்து பயணிக்கும் தாய்க்கு, பிரசவத்துக்குப் பின்பாய் ஒரு வித மனச்சோர்வு ; ஒரு தற்காலிக வெறுமை தோணுமாம் ! அதனை PostPartum Depression என்கிறார்கள் ! நாம பிரசவத்தைக் கண்டோமா - வயிற்றில் சுமக்கும் அனுபவங்களைக் கண்டோமா  - இந்த PPD-தனை உணர்ந்திருக்க ? நாம் வளர்க்கும் வயிறுகளெல்லாமே பரோட்டாக்களும், பிரியாணிகளும் தரும் உபயங்கள் தானே ? இருப்பினும், என்னால் இந்த நொடியில், அந்தத் தாய்களின் உணர்வுகளோடு சன்னமாய்...ரொம்பச் சன்னமாய்  relate செய்திட முடிகிறது ! ஒரு பிரசவத்தின் பாதி அவகாசமே FFS எனும் இந்தக் கனவை நான் சுமந்து திரிந்திருப்பேன் ! And சுமந்து திரிந்த நாட்களின் ஒவ்வொன்றுமே ஏதோ ஒருவித  நோவையோ, படபடப்பையோ கொண்டு வந்தவைகளே ! ஆனால் இன்று அந்தக் கனவைத் தரையிறக்கிய வேளையில், தாண்டி வந்துள்ள ஒவ்வொரு நாளுமே விலைமதிப்பற்றவைகளாகத்  தென்படுகின்றன ! மாநிறமோ, ஆப்பிள் நிறமோ  ; குட்டையோ, நெட்டையோ ; வத்தலோ , தொத்தலோ - அந்தக் கனவெனும் மழலை(களை) இறக்கி வைத்த  நிம்மதியோடு ஒரு சன்னமான வெறுமையுமே உணர்கிறேன் !! தொடரும் நாட்களில் அந்த மழலை(கள்) ஓடியாடிடத் துவங்கிட்டால் - அந்த வெறுமையின் இடத்தில் சந்தோஷம்  குடியேறும் என்பது நிச்சயம் ! புனித மனிடோ அருள் புரிவாராக நம் மழலை(கள்) மீது !!

Happy Reading all !! And Advance Wishes for a Wonderful 2022 !! தொடரும் நாட்களில் நமது FFS குடும்பத்துக்குமே கொஞ்சம் நேரம் ஒதுக்கிட முனையுங்களேன் - ப்ளீஸ் ? 

And புத்தாண்டின் தினத்திலோ, அதன் மறுநாளான ஞாயிறிலோ சீனியர் எடிட்டருடன் அளவளாவ எண்ணிடும் பட்சத்தில் ஒரு ZOOM மீட்டிங்கையோ  ; அது போல ஏதோவொன்றையோ ஏற்பாடு செய்திடலாம் ! ஆர்வமிருப்பின் சொல்லுங்களேன் - ஜூனியரைக் கொண்டு ரெடி பண்ணிடலாம்  ! Bye all ....see you around soon !



Saturday, December 25, 2021

தொடும் தூரத்தில் FFS !

 நண்பர்களே,

வணக்கம். நேற்றோடு பத்து வருடங்கள் ஆகிவிட்டனவாம் - இந்த வலைப்பக்கத்தினில் நான் எழுதத் துவங்கி !! "டிசம்பர் 24, 2011" என்ற தேதி தாங்கிய அந்த முதல் பதிவின் screenshot ஒன்றோடு நண்பர் காரைக்கால் 'ரிப் கிர்பி' பிரசன்னா அனுப்பிய இந்தத் தகவலைப் படித்த போது - 'அடங்கொன்னியா...அதுக்குள்ளாற இம்புட்டு நேரம் ஓட்டம் பிடிச்சிருச்சா ?' என்ற எண்ணம் தான் மேலோங்கியது ! விளையாட்டாய்த் துவங்கியதொரு முயற்சியானது, இன்றைக்கு ஜாலியானதொரு காமிக்ஸ் நிழல்குடையாய் உருப்பெற்றிருப்பது நிச்சயமாய் உங்களின் ஜாலங்களால் தான்  ! நிஜத்தைச் சொல்வதானால் "COMEBACK ஸ்பெஷல்" என்று துவங்கிய இந்த இரண்டாம் இன்னிங்ஸானது, இன்று இத்தனை உத்வேகம் கொண்டிருப்பதன் தலையாய  காரணியே - பின்னிருந்து நீங்கள் ஒவ்வொருவரும் என்னை உந்தித் தள்ளிடக் காட்டி வந்திருக்கும் தளரா முனைப்பே !! And அது பிரதானமாய்  சாத்தியப்பட்டிருப்பது இந்த வலைப்பூவின் பக்கங்களின் வாயிலாகவே ! 

அந்தக் காலத்து Standard 10 மோட்டார் காரை ஒர்க் ஷாப்புக்குக் கொண்டு போய் விட்டாச்சு ; ஏதேதோ பட்டி, டிங்கரிங்கெல்லாம் செய்து, வண்டிக்குப் பெயிண்ட் அடித்து, எஞ்சினுக்கு ஆயிலெல்லாம் ஊற்றி, ஸ்டார்ட்டும் பண்ணியாச்சு தான் - ஜனவரி 2012-ல் ! ஆனால் துருப்பிடித்துக் கிடந்த டேங்கிலிருந்த பெட்ரோலானது, வண்டியினை எத்தனை தொலைவுக்கு இட்டுப் போயிருக்கும் என்பதையோ, பெட்ரோல் தீர்ந்திருக்கக்கூடிய  பட்சத்தில் மறுக்கா ரொப்பிக் கொள்ளும் முனைப்பு எனக்கு இருந்திருக்குமா ? என்பதையோ சத்தியமாய் அன்றைக்கு நான் அறிந்திருக்கவில்லை ! ஆனால் அந்த 2012 புத்தக விழாவினில் சந்தித்த நண்பர்களும் சரி, இங்கே வலைப்பூவினில் நான் செய்து கொண்ட ஏராளப் பரிச்சயங்களும் சரி, உள்ளுக்குள் உறைந்து வந்த சோம்பேறிமாடனை ஒட்டுமொத்தமாய் விரட்டியடித்த புண்ணியத்தை ஈட்டியதே நிஜம் ! மகிழ்வித்து மகிழ்வதென்பது எத்தனை பெரிய வரமென்பதை என்னை உணரச் செய்தோர் நீங்கள் & அதற்குப் பெரிதும் உதவிய இந்த வலைப்பக்கம் deserves a ton of credit ! 

பத்தாண்டுகளுக்கு அப்பாலிக்கா - 819 பதிவுகள் ; கிட்டத்தட்ட ஐந்தரை மில்லியன் பார்வைகள் ; 210,836 பின்னூட்டங்கள் ; சுமார் 450 இதழ்கள் என்ற நம்பர்களோடு இந்த வலைப்பூ தொடர்ந்திட்டிருக்கும் என்று 2011-ல் யாரேனும் என்னிடம் சொல்லியிருப்பின் -  "போங்க பாஸு...காமெடி பண்ற  நேரத்துக்குப் போயி புள்ளீங்களைப் படிக்க வைப்பீங்களா ?" என்றபடிக்கே நகர்ந்திருப்பேன் தான் ! ஆனால் புனித மனிடோவின் சித்தம் இதுவே என்றிருக்கும் போது அதனை மாற்ற யாருக்கு முடியும் ? 

இந்தப் பதிவு சார்ந்த பயணத்தில் தான் எத்தனை-எத்தனை நினைவுகள் !!தமிழில் டைப்படிக்கத் திணறிய அந்த ஆரம்ப நாட்களும் சரி, மொக்கை இன்டர்நெட் வசதிகளோடு ராக்கூத்தடித்த நாட்களும் சரி, ஊர் ஊராய், தேசம் தேசமாய் இந்தப் பதிவுப் படலங்களைத் தொடர்கதையாக்கிய நாட்களும் சரி, உற்சாகத்தின் உச்ச நாட்களும் சரி, மணக்கும் மூ.ச.க்களையும், மயக்கும் மு.ச.க்களையும் தரிசித்த நாட்களும் சரி - இந்த 120 மாதங்களின் பயணத்தின் மறக்க இயலா துணைகளாகி விட்டுள்ளன ! காலுக்கடியே பெருச்சாளிகள் ஓட்டமெடுக்கும் ரேணிகுண்டா ரயில் நிலையத்தில் ராத்திரி 2 மணிக்கு டைப்படித்த கூத்து ; 'தல' & 'தளபதி' ஒருங்கே களம் கண்டிடவிருந்த ஈரோட்டுத் திருவிழாக் காலைப்பதிவு ; இரவு இரண்டே முக்காலுக்குப் படுத்த கையோடு 4 மணிக்கு எழுந்து வீட்டாரை எழுப்பிடக்கூடாதென பாத்ரூமில் குந்தியபடியே டைப்படித்த ஜனவரிப் பனிக்காலையின் புத்தக விழாப்பதிவு ; பெல்ஜியத்திலும், இத்தாலியிலும் பாஸ்போர்டைத் தொலைத்த தினங்களின் பதிவுகள் ;  தெற்கத்தியர்களின் போர்ச்சின்னங்கள் நிறைந்த அமெரிக்க தென்பகுதியினை Greyhound பஸ்ஸில் தாண்டிச் செல்லும் வேளையில் டைப்படித்த 'என் பெயர் டைகர்' பதிவு ; பிள்ளையின் திருமணப் பதிவு ; இரத்தப் படல ரணகளப் பதிவு ; லாக்டௌன் நாட்களின் நித்தமொரு பதிவு - என்று தலைக்குள் கலர் கலராய் ஏதேதோ நினைவலைகள் குறுக்கும் நெடுக்கும், மின்னலாய் ஓட்டமெடுக்கின்றன !!  என்றைக்கேனும் டொக்கு விழுந்த கண்ணோடு, "பாட்டையாவின் பல் போன வயசில்..." என்று ஏதாச்சும் எழுதுவதாக இருப்பின், doubtless எனது துவக்கப் புள்ளி இந்த டிசம்பர் 24-2011 ஆகத் தானிருக்கும் !  Thanks பிரசன்னா - நினைவூட்டியமைக்கு ! And இந்த வேளையினை சிறப்பிக்க இப்போது நம்ம இரும்புக் கவிஞர் "பத்தாண்டுப் பயணம்" என்ற பெயரில் ஒரு கவிதை பொழிவாரென்று எதிர்பார்க்கிறேன் ! போட்டுத் தாக்குங்க ஸ்டீல் ! 

Moving on, ஒரு பிரஷர் ஏற்றிய வாரத்தின் இறுதியினில் பணிகள் நிறைவடையும் சந்தோஷம் எனதாகிறது ! அட்டைப்படங்களை முடித்துத் தருவதில் நம்மைப் டிசைனர் போட்டுத் தள்ளியது ஒருபக்கமெனில், பைண்டிங்கில் ஆண்டின் இறுதி சார்ந்த ரஷ் - டயரிக்கள் தயாரிப்பினில் என்ற ரூபத்தில் பிராணனை வாங்கி விட்டது ! டயரி நிறுவனத்தின்  ஆட்கள் விடிய விடிய தவம் கிடக்க, நமது பணிகளை அம்போவெனக் கிடத்தி விட்டார்கள் பைண்டிங்கில் ! ஆளாளுக்குப் பிய்த்துப் பிடுங்குவதை சமாளிக்க முடியாத பைண்டிங் ஓனரோ செல்லை off பண்ணிவிட்டு கிளம்பிவிட்டார் & புதனிரவுக்கெல்லாம் இங்கே எனக்கு காதில் புகை வராத குறை தான் ! ஒரு மாதிரியாய் கெஞ்சிக் கூத்தாடி, நமது பணிகளை வியாழன் முதற்கொண்டு துவங்கப் பண்ணி, இதோ, நாளை முடிக்கவுள்ளார்கள் ! இன்னொரு பக்கமோ, குண்டு டப்பிக்கள் தயாரிப்பிலும் ஜவ்வு மிட்டாய் இழுவை ! அவர்களுமே திங்களன்று ஒப்படைக்கவுள்ளார்கள் ! So தொடரவுள்ள தினங்களில் நண்பர்களின் போட்டோக்கள் ஒட்டிய புக்ஸ்களை பார்த்து, பக்குவமாய், பதவிசாய், அவரவரது டப்பிக்களுக்குள் நுழைக்கும் படலங்களைத் துவக்கிட வேண்டி வரும் ! கடைசி நிமிடம் வரைக்கும் போட்டோக்கள் அனுப்பும் படலம் தொடர்ந்திட, நம்மாட்கள் இதனில் ஏதேனும் கோக்கு மாக்குகள் செய்து வைக்காமலிருந்தால் தலை தப்பிக்கும் ! தெய்வமே !!!! 

ரைட்டு...! டப்பி...குப்பி...சுப்பி...என எல்லாவற்றையும் உருண்டு புரண்டு ஏதோவொரு மார்க்கத்தில் தேற்றிடுவோம் என்று வைத்துக் கொள்ளுங்களேன் ;  காத்திருப்பதோ முற்றிலும் வேறொரு பரிமாணத்திலான சவால் ! நான் பரீட்சையினை எழுதி முடித்தது எப்போதோ ஒரு மாமாங்கத்தில் ; but இதோ, ஒரு வழியாய் மார்க் போடும் நேரம் நெருங்கியாச்சூ எனும் போது உள்ளுக்குள் 'கதக் கதக்' என்கிறது ! 'தெனாலி' படத்தில் உலக நாயகன் ஒப்பிப்பது போல் அடியேனிடம் இந்த நொடியில் ஒரு நெடும் பயம் லிஸ்ட் இருக்கி !! 

1.அட்டைப்படங்கள் அல்லாருக்கும் பிடிச்சிருக்கணுமே தெய்வமே ! விடிய விடிய அவற்றோடே அன்னம் தண்ணி புழங்கியவனின் கண்களுக்கு ஒவ்வொன்றுமே  மோனா லிசா ஓவியங்களாய்த் தெரியலாம் தான் ; ஆனால் வாசக ஜூரிக்களுக்குப் பிடித்தாகணுமே !!

2."கோல்டன் ஹீரோஸ் ஸ்பெஷல்" நீங்கலான பாக்கி 3 புக்குகளிலுமே, டோட்டலாய் புதியவர்கள் தான் கோலோச்சுகிறார்கள் எனும் போது நாயகர்கள் ; பாணிகள் ; கதைகள் என சகலமும் செட் ஆகிட வேண்டுமே ! 

3.ALPHA கதையின் ஆழம் ஜாஸ்தி & therefore துவக்க நாட்களது லார்கோ கதைகளை போல இங்கே நடு நடுவே வசனங்கள் ஜாஸ்தி ! "ஐயே... முழியாங்கண்ணன் ஏகப்பட்ட எஸ்டரா நம்பர்களைப் போட்டுப்புட்டானோ ? " என்று கண்சிவக்க மக்கள் ஆவலாய்க் காத்திருப்பரோ ?

4.மொழிபெயர்ப்பில் பிழை காண புலவர்கள் ஒரு அண்டாவினில் தீபாஞ்சலி எண்ணெயோடு காத்திருப்பரோ ?

5.எதிர்பார்ப்புகள் சில சமயங்களில் மெகா சத்ருக்கள் ஆகிடுவதுண்டு ! இங்கோ சில பல மாதங்களாய் ; எக்க + சக்க பில்டப்களை நான் கொஞ்சம் செய்திருக்க, நீங்களாகவும் கொஞ்சத்தை ஏற்றி வைத்துக் கொண்டிருக்க - அவற்றிற்கு நியாயம் செய்திட சாத்தியமாகிடணுமே !!

6. Post Festival Depression : "தீவாளி வருது...பட்டாசு வருது....லீவு வருது...தலைவர் படம் வருது....பட்சணம் வருது....புதுத் துணி வருது...!!! என்ற எதிர்பார்ப்புகள் பல தருணங்களில் தரும் அந்த high விலைமதிப்பற்றது !! And ஒரு வழியாய் மெய்யாலுமே பண்டிகையும் வந்து, கொண்டாட்டங்களும் நடந்து முடிந்திடும் போது ஒரு வித வெறுமை நம்மை ஆட்கொள்வதுமே உண்டு தான் ! "ம்ம்ம்....எல்லாம் ஆச்சு ; இனி மறுக்கா பள்ளிக்கூடத்துக்குப் போயி அந்த அக்பரையும், பாபரையும் படிக்கணும் !! Phewwwww !! அடுத்த பண்டிகைக்கு வேற இன்னும் நெறய நாள் கிடக்கு !!" என்ற கவலைகளுக்கு நிகராய் இங்கே ஒரு வெற்றிடம் உருவாகிடுமோ ? 

So நாய் சேகராட்டம் உடம்பை விறைப்பா வைத்துக் கொண்டு திரிந்தாலும் பாட்டம், லைட்டாக கதக்களி ஆடி வருவதென்னவோ நிஜமே ! ஆனால் பயங்கள் ஒரு பக்கமெனில் ஏகப்பட்ட கருப்பசாமிக் கோயில் கயிறுகளும் எட்டும் தொலைவினில் உள்ளன தான் ! And அவற்றுள் பிரதானமானது - FFS புக் # 2 ஆன "ஒற்றை நொடி..ஒன்பது தோட்டாக்கள்.." !! சில கதைகளின் அவுட்லைனைப் படிக்கும் போதே புரிந்து விடும் - இது சாதிக்கப் படைக்கப்பட்ட ஆக்கமென்பது ! அந்த ரகத்திலானது "ஓ.நோ.ஓ.தோ !" சில ஆண்டுகளுக்கு முன்பாய்  "பிஸ்டலுக்குப் பிரியாவிடை" அறிவிக்கப்பட்ட போது - "முற்றிலும் அறிமுகமில்லா one shot ; கார்ட்டூன் பாணியில்...இதென்ன விஷப் பரீட்சை ? " என்ற குரல்கள் காதில் விழாதில்லை தான் ! ஆனால் எனக்கோ நூற்றுக்கு நூறு சதவிகிதம் நம்பிக்கை இருந்தது அந்தக் கதையின் மீது ! So தகிரியமாய் களமிறக்கினோம் ; சமீப காலங்களின் செம ஹிட்ஸ் பட்டியலில் இணைந்தது ! அதே ரீதியிலான நம்பிக்கை இந்த 5 பாக மெகா த்ரில்லர் மீது எனக்குள்ளது ! என்ன - நெடும் கதை என்பதால் இயன்ற மட்டுக்கு ஒரு stretch -ல் படிக்க நீங்கள் நேரத்தைத் திரட்ட வேண்டி வரும் ! 


In fact - FFS புக் # 1 - ஆறு அத்தியாயங்கள் கொண்டது & FFS புக் # 2 - ஐந்து மெகா அத்தியாயங்கள் கொண்டது ! So கிட்டத்தட்ட 12 சிங்கிள் ஆல்பங்களின் வாசிப்பு அனுபவம் இந்த ஜனவரியில் காத்துள்ளது எனும் போது உங்களின் நேரங்கள் அத்தியாவசியமாகிடும்  ! So புக்கைத் தடவிப் பார்த்து விட்டு, அஸ்ஸியா டொன்கோவாவை பராக்குப் பார்த்து விட்டு, "FFS ஜூப்பர் " என்று போங்காட்டம் ஆடாது, மெய்யாகவே கதைகளுக்குள் குதித்திட முனைந்திடுங்கள் கைஸ் - ப்ளீஸ் ! And எனது பரிந்துரை இந்த வரிசையில் இருந்திடும் :

1 .எலியப்பா - because இதனை வாசிப்பது எளிதப்பா !

2 .என் பெயர் டேங்கோ - simply becos சிங்கிள் ஆல்பம் என்பதால் - பக்க நீளத்தில் the smallest of them all !

3"ஒற்றை நொடி ..ஒன்பது தோட்டாக்கள்" : அமெரிக்காவின் மாகாணங்களை அங்குள்ள நமது நண்பர்களுக்கு நிகராய் நாமும் தரிசிக்க இங்கே வாய்ப்புகள் in abundance !! கதையோ - தெறிக்க விடும் த்ரில்லர் ! So நேரம் கிடைக்கும் முதல் சந்தர்ப்பத்தில் go for this guys !!

4 அப்புறமாய் சிஸ்கோ - இது இரட்டை ஆல்பம் & இங்கு மூச்சிரைக்கச் செய்யும் ஆக்ஷன் அதிகம் ; வஜனங்கள் குறைச்சல் ! பற்றாக்குறைக்கு இனி வரும் நாட்களில் நம்ம பாரிஸ்வாழ் நண்பர்களுக்கு நகருக்குள் ஏதேனும் வழி தெரியாது போய்விடும் பட்சத்தில், "அந்த புல்வா டு ரூஷாஷுவா பக்கமா டிராபிக்கா கீதாம்பா...அந்த ரைட்லே கட் பண்ணி ட்ராக்கடியெரோ வழியா போயிடுப்பா !!" என்ற ரேஞ்சுக்கு கொட்டாம்பட்டியில் குந்தியபடிக்கே நம்மால் வழி சொல்ல இயலுமென்பேன் ! கதை சுற்றிச் சுழல்வது பாரிஸின் சந்து, பொந்திலெல்லாம் !!

5 ALPHA !! 3 பாகங்கள் ; 139 பக்கங்கள் ! பக்க நீளத்தில் "ஓ.நொ.ஓ.தோ."-வில் கிட்டத்தட்ட பாதியே என்றாலும் intense ஆன சாகசமிது ! Again பாரிஸ் ; அப்புறம் மாஸ்கோ ; சர்வதேச க்ரைம் ; சர்வதேச உலவுப் பிரிவுகள்  - என்று நிற்காது ஓட்டமெடுக்கும் இந்தக் கதைக்கும் கணிசமாய் நேரம் ஒதுக்கிட அவசியமாகிடும் !! And அதற்கு உதவிட அந்த ரஷ்ய அம்மணி காத்திருப்பார் ஆவலாய் !!

6 அப்புறமாய் நம்ம தங்கங்கள் !! எவ்வித வரிசையில் வாசித்தாலும், ஸ்பைடர் + மாயாவி + செக்ஸ்டன் பிளேக் கூட்டணியினை ஜாலியாய் ரசிக்கலாம் ! 'பம்மல் சம்மந்தம்' படத்தில் கமல் சார் சொல்வது போல - "பழையவர்களை அனுபவித்து வாசிக்கணும் - ஆராயப்படாது !!" 

Of course - இது எனது பரிந்துரை மாத்திரமே ! ரசனைகளுக்கேற்ப இந்த வரிசையினை உல்டா-புல்டாவாக்கத் தோன்றினால் Sure !! And இதோ - FFS புக் # 2-ன் உட்பக்க preview :




இந்தக் கதையினுள்ளே புகுந்து வெளியேறுவதற்குள் ஏகப்பட்ட ஹாலிவுட் & கோலிவுட் சினிமாக்கள் நினைவுக்கு வந்தால் வியக்கவே மாட்டேன் ; மிரட்டியுள்ளனர் படைப்பாளிகள் !! ஒவ்வொரு பிரேமிலும் கட்டிடங்கள் ; பின்புலங்கள் ; பார்வைக் கோணங்கள் என என்னமாய் தெறிக்க விட்டுள்ளார் ஓவியர் !! Phew !! 

ஓ.கே....கிளம்பிட ரெடியாகும் முன்னே அந்தக் கார லட்டு # 2 பற்றிய சமாச்சாரத்தினுள் புகுந்திடலாமா ? In fact அதைச் சொல்லாமல் நான் கிளம்பினால், உருட்டுக்கட்டைகளோடு ஆட்டோ ஏறிடுவீர்கள் என்பது தெரியும் ! So without further ado - அந்த லட்டு # 2 ஒரு புதிய தொடர் ! And கொஞ்ச காலம் முன்னர் ஈரோட்டுப் புத்தக விழாவின் மரத்தடிச் சந்திப்பின் போது நண்பர்களில் யாரோ கேட்டிருந்த தொடர் அது ! "அதற்கு செட் ஆகிட  நமக்கு இன்னும் கொஞ்சம் நேரம் தேவை ; சற்றே ஆழம் கூடுதலான வரிசை அது !" என்று நான் பதிலும் சொல்லியிருந்தேன் ! ஆனால் இப்போதெல்லாம் தாத்தாக்களையும், வெட்டியான்களையுமே லெப்டுக்கா விட்டு, ரைட்டுக்கா வாங்கிடும் சூட்சமசாலிகளாய் நீங்கள் மாறியிருக்கும் சூழலில், இன்னமும் இந்தத் தொடரை அடை காத்திருப்பதில் அர்த்தமில்லை என்று தீர்மானித்தேன் ! ஆகையால் - அறிமுகம் I.R.$ !! இதன் நாயகர் ஒரு டிடெக்டிவோ ; போலீஸ்காரரோ ; கௌபாயோ கிடையாது ! மாறாக Internal Revenue Service என்றழைக்கப்படும்  வருமான வரித்துறை மாதிரியானதொரு அமெரிக்க அமைப்பின் "வசூலிஸ்ட் !!" வரி ஏய்ப்பு செய்திடும் முதலைகளை மோப்பம் பிடித்து அவர்களது கள்ளப்பணங்களை வலை போட்டுப் பிடிக்கும் ஒரு சாகஸக்காரர் ! 1999-ல் துவங்கிய இந்தத் தொடரானது பிரெஞ்சில் ரொம்பவே பிரசித்தம் & கிட்டத்தட்ட ஆண்டுக்கொரு புது ஆல்பம் என்ற ரீதியில் இதுவரையிலும் 22 இதழ்கள் வெளிவந்துள்ளன ! 

கௌபாய்களுக்கும், இதர நாயகர்களுக்கு மத்தியில் ஒரு balance கண்டுபிடிக்கும் முயற்சிக்கு இந்தப் புது வரவும் உதவிடுவார் என்ற நம்பிக்கை எனக்குள்ளது ! And oh yes - நாளையே இவரை இறக்கி விட்டு, நாளான்னிக்கே உங்கள் பர்ஸ்களுக்குப் புதிதாய் வெடியொன்றைப் பற்ற வைக்கப் போவதில்லை தான் ! நிறையவே நேரத்தையும், கவனத்தையும் மொழிபெயர்ப்பினில் கோரிட உள்ள இந்தத் தொடரினை நிதானமாய் study  செய்து, நிதானமானதொரு வேளையினில் எழுதி முடித்து, நிதானமோ, நிதானமான தருணத்தில் உங்களிடம் ஒப்படைப்போம் ! 

And 2022-ல் காத்துள்ள கதைகளின் கணிசத்தில் மொழிபெயர்ப்புக்கு முழி பிதுக்கும் சிரமங்கள் காத்துள்ளன என்பதையும் கடந்த 2 வாரங்களில் உணர்ந்திருக்கிறேன் ! So இன்னொரு புது கியரைத் தேடிப் பிடித்தாகணும்  போலும் அவற்றிற்கெல்லாம் நியாயம் செய்திட ! Phewwww !!

இப்போதைக்கு கிளம்புகிறேன் - டப்பாக்களின் பஞ்சாயத்து ஓய்கிறதாவென்று பார்த்திட ! Bye guys !! See you around !! Have a fun & festive weekend !! 

அனைவருக்கும் (தாமதமான) கிருஸ்துமஸ் நல்வாழ்த்துக்கள் folks !! 

Tuesday, December 21, 2021

ஒரு செவ்வாயின் உ.ப.!

 நண்பர்களே,

வணக்கம். காலத்துக்கேற்ப நாமும் சில விதிகளை மாற்றிக் கொள்ளணும் போலும் ! "300 பின்னூட்டங்களானால் உபபதிவு" என்ற கம்பெனி ரூல் நடைமுறையில் இருப்பது தெரியும் நமக்கு ! ஆனால் சமீப காலங்களில் இரும்புக் கவிஞர் வீறு கொண்டு களமிறங்கி, ஒவ்வொரு பின்னூட்டத்தினையும் தனது உரைநடை, செய்யுள், கவிதை,காப்பியம், இதிகாச வரிகளால் மெருகூட்டி வருவதால் , கம்பெனிக்கு அந்த வேகத்துக்கு ஈடு கொடுக்க தோதுப்பட மாட்டேன்கி ! So இனிமுதற்கொண்டு "400 பின்னூட்டங்களில் உப பதிவு" என்று ரூல்ஸை மாற்றினாலென்ன ? என்ற சீரிய சிந்தனையில் இந்தச் செவ்வாய் பகலைக் கழித்து வருகிறேன் ! 

SMASHING 70's ; SUPER 60's என்று போன பதிவினில் நான் சொல்லியிருந்தது குறித்து நிறையவே curiosity எழுந்திருப்பதைக் கண்டேன் ! "இது என்ன புதுக் கரடி ?" என்ற கேள்வியுமே எழுந்திருக்கக்கூடும் என்பதும் புரிகிறது ! அது புதுசாகவோ ; பெருசாகவோ ஏதுமில்லை guys !! வேதாளன் ; மாண்ட்ரேக் ; ரிப் கிர்பி & காரிகன் மெகா தொகுப்புகள் நடப்பாண்டினில் SMASHING '70s என்ற தடத்தினில் வெளிவரவுள்ளது நமக்குத் தெரியும் தான் ! And இவற்றிற்கான உரிமைகளை வாங்கிடும் பொழுதே, படைப்பாளிகளின் குறைந்தபட்ச ராயல்டி இலக்கினைத் தொடும் அவசியத்தின் பொருட்டு - 2 ஆண்டுகளுக்கான கதைகளை வாங்க நேர்ந்திருந்தது ! And அது  பற்றி ஏற்கனவே உங்களிடம் சொல்லியிருந்தேன் என்ற நினைவும் உள்ளது எனக்கு !  இந்த நாயகர்களின் டாப் கதைகள் உருவானது 1960 & 1970-களில் தான் என்பதால் நான் கதைத் தேர்வுகளை இந்த 2 தசாப்தங்களுக்குள்ளேயே செய்திருந்தேன் ! அதன் பலனாய் 2022-ன் தொகுப்புகளை SMASHING '70s என்ற பெயர் !! காத்திருக்கும் 2023-ன் தொகுப்புகள் - SUPER '60s என்ற பெயரினில் வெளிவந்திடும் ! நான் நேற்றைக்குக் குறிப்பிட்டிருந்தது இதனைத் தான் ! 

UNEDITED VERSION ! So வசனங்களில் திருத்தங்கள் இருந்திடும் !

2022-ன் நவம்பருக்கு முன்பாய் SMASHING '70s ஆல்பங்கள் நான்குமே வெளி வந்திருக்கும். So அவற்றிற்கான உங்களின் reactions-களை பொறுத்து  2023-ன் SUPER 60's க்கான திட்டமிடலிருக்கும் ! வேதாளர் நீங்கலான பாக்கி vintage நாயகர்கள் (ரிப் ; மாண்ட்ரேக் ; காரிகன்) தொடர்ந்திடணுமா ? அல்லது 2023 ஆண்டோடு போதுமா ? என்பதான தீர்மானங்களையும் அந்நேரம் எடுத்திட வேண்டி வரும் ! Maybe இதில் யாரேனும் இருவரைக் கழற்றி விட்டுவிட்டு, சார்லி & விங் கமாண்டர் ஜார்ஜை கூட்டணிக்குள் கொண்டு வரலாம் ; அல்லது வேதாளருக்கு mass ஆக ஸ்லாட்ஸ் தந்து விட்டு, பாக்கிப் பேருக்கு விடை தந்திடவும் செய்யலாம் ! எல்லாமே உங்களின் தீர்மானங்களாக இருந்திடவுள்ளன ! 

எது எப்படியோ - மொத்தமாய் இரண்டு ஆண்டுகளுக்கான ஒரு லோடு கதைகளின் மீது குந்தியிருக்கும் இந்த அனுபவம் செம த்ரில்லிங் !! And நேரம் கிடைக்கும் போதெல்லாம் கதைகளை படித்துப் பார்க்கும் போது மெய்யாகவே பிரமிக்கத் தோன்றுகிறது - அந்நாட்களில் கதை உருவாக்கத்தினில் படைப்பாளிகளின் செம ஷார்ப் திறன்களைக் கண்டு ! மாண்ட்ரேக் காதிலே சுற்றும் ரீல்கள் கூட செம நேர்த்தியாய், ரொம்பவே ரசிக்கும் விதமாய் உருவாகியுள்ளது சுலபக்காரியமே அல்ல ! And என்னை ரொம்பவே impress செய்தவை நமது ஜென்டில்மேன் டிடெக்டிவ் ரிப்பின் சாகசங்கள் ! ஒவ்வொன்றும் அவ்வளவு அழகு ; அவ்வளவு சுவாரஸ்யம் & அவ்வளவு மாறுபட்ட களங்கள் !! பின்னாட்களில் கதைகளின் பொறுப்பும் சரி, சித்திரங்களின் பொறுப்பும் சரி, கைகள் மாறிய பிற்பாடு இந்தத் தொடரை செம டப்ஸாவாக்கி விட்டனர் என்பதை கடுப்போடு பார்த்தவனுக்கு இந்த vintage '60s & '70s விருந்துகள் மெர்சலூட்டுகின்றன ! ஆண்டொன்றுக்கு 4 ஆல்பங்கள் வீதம் சுமார் 800 பக்கங்கள் எனும் போது - 2 ஆண்டுகளுக்கு 1600+ பக்கங்கள் என்றாகிறது ! And கிட்டத்தட்ட 75 சாகஸங்களாகிடும் இந்த 1600+ பக்கங்கள் ! Game arcade-களில்   அரங்கு முழுக்க கலர் கலராய்ப் பந்துகளைக் குவித்து விட்டு வாண்டுகளை உள்ளாற இறக்கி விட்டு விளையாட அனுமதிப்பார்கள் அல்லவா ? கிட்டத்தட்ட அது போன்றதொரு சூழலில் தான் நானிருக்கிறேன் கடந்த 3 மாதங்களாய் ! 1970-களின் பிற்பகுதிகளில் முத்து காமிக்ஸ் ஆபீசுக்கு King Features முகவர்களிடமிருந்து ஒரு பழுப்பு நிற முரட்டு கவரில் இந்தக் கதைகளின் ஒரிஜினல்கள் வளவளப்பான பிரிண்ட்களில் வந்து சேர்ந்திடும் & நிறைய நாட்கள் நான் ஆபீசுக்கு வரும் போது அதனை உடைத்து கதைகளை வெளியெடுத்து, முதல் ஆளாய் வாசிக்கும் வரைக்கும் கவரையே உடைக்காமல் பத்திரமாக வைத்திருப்பார்கள் ! அன்றைக்கு அவற்றினுள் மிஞ்சிப் போனால் இரண்டோ, மூன்றோ கதைகள் இருந்திடும் ! But அதுவே ஒரு செம குதூகல அனுபவமாக இருந்திடும் ! இன்றைக்கோ 75+ கதைகள் ; 1600+ pages !! Phewwwwww !! 

And 2023-ன் SUPER '60s - "Buy All 4 (or) Buy Any 2" என்ற வசதியுடனும் வந்திடும் ! So பிரச்சார பீரங்கிகள் இதன் பொருட்டு இன்னொருக்கா 'தம்' கட்ட 2023-ல் அவசியங்கள் இராதென்று நம்பிடலாம் ! கதைகளின் தரம் + தயாரிப்புத் தரம் உங்களை சகல இதழ்களையும் வாங்கச் செய்யுமென்ற நம்பிக்கையே எனது இந்தத் தீர்மானத்தின் பின்னணி ! 

இதோ - 2022 சந்தாவினில் கூட ரூ.3000 செலுத்தி "எனது காமிக்ஸ் - எனது உரிமை" என்று pick & choose செய்திட ஒரு வாய்ப்பை நாம் தந்திருப்பினும், இன்று வரையிலும் அந்தத் தடத்தினில் புகுந்திருப்போர் வெறும் 6 நண்பர்கள் மாத்திரமே !! பாக்கி அத்தனை பேருமே "ஒரே நாடு-ஒரே காமிக்ஸ்" என்று ALL IN சந்தாவுக்கே 'ஜே' சொல்லியுள்ளனர் ! சந்தாச் சேர்க்கையினில் பயணிக்க இன்னமும் நிறைய தூரம் உள்ளது தான் ; ஆனால் இந்த 'ஒரு சோற்றுப் பதம்' சொல்லும் சேதி ரொம்பவே உற்சாகமூட்டுகிறது ! நமது தேர்வுகள் மீது நீங்கள் கொண்டுள்ள நம்பிக்கைக்கு ஐயாயிரத்து நூறு நன்றிகள் folks !!

ரைட்டு...FFS இறுதிக்கட்டப் பணிகளுக்குள் திரும்பவும் புகுந்திட கிளம்புகிறேன் ; see you around all ! Have a great week ! 

P.S : அப்புறம் அந்த கார லட்டு # 2 பற்றி லைட்டாய் !! இங்கே பூந்தி ரெடி ; லட்டு பிடிக்கச் சொல்லி நீங்கள் உத்தரவிட்டால் - 'சரிங்க ஆபீஸர்ஸ்" என்றபடிக்கு லட்டு பிடிக்க முனையணும் நான் ! அது பற்றி சனிக்கிழமையில் பதிவினில்  ! Trust me on this guys - இது யூகிக்க வாய்ப்பே இல்லாததொரு பண்டமாக்கும் ! So கவிஞர் வழக்கம் போல அள்ளி விட்டுக் கொண்டிருப்பதை, "ஒரு வேளைக்கு இதா கூட இருக்குமோ ?" என்ற யோசனைகளின்றி  ஜாலியாய்க் கடந்திடலாம் !! 

Saturday, December 18, 2021

காலிரிக்கி...கட்டை விரலிருக்கி.....!!

 நண்பர்களே,

வணக்கம். கஷ்டத்தில் பெரும் கஷ்டம் என்ன தெரியுமோ ?  ஒரு முக்கியப் பணியில் நமது பங்கினை பல்டியடித்துப் பூர்த்தி செய்து விட்டு, அடுத்த கட்டத்திற்கென மொத்தமாய்  அடுத்தவர்களிடம் பொறுப்புகளை ஒப்படைத்து விட்டு, பொறுமையாய்க் காத்திருப்பது  போல நடிப்பது தான் !! 

*ஒரு லோடு மொழிபெயர்ப்பு - டிக் ! 

*ஒரு வண்டி டைப்செட்டிங் - டிக் ! 

*வண்டி வண்டியாய் எடிட்டிங் - டிக் ! 

*பிராசஸிங் படலம் - டிக் ! 

*ப்ரிண்டிங் பஞ்சாயத்து - டிக் ! 

இவையெல்லாமே நமது கட்டுப்பாடுகளுக்குள் இருக்க, நாள்-நட்சத்திரம்-கிழமை-நேரம் என எதையும் பார்த்திடாது உருண்டு, புரண்டு all done !! 

அடுத்த இலக்கங்களோ

**அட்டைப்பட டிசைனிங் ; 

**அட்டைப்பட ப்ரிண்டிங் &  

**இறுதியாய் அட்டைகள் மீதான நகாசு வேலைகள் !

&

**then உங்களின் போட்டோக்களை ரெடி செய்வது !

&

then பைண்டிங்ங்க்க்க்க் பணிகள் !!

இறுதியாய் - உங்களின் கூரியர் டப்பிக்கள் தயாரிப்பு !

"அட, கஷ்டமான வேலைகளை முழுசும் ரெம்போ முன்னமே முடிச்சாச்சு ; இனி மாதம் மும்மாரி மழை பெய்ய வையுங்கள் ஆபீஸாரே !!" என்று சொல்லிய கையோடு அடுத்த வேலைகளுக்கும் மும்முரமாகிடலாம் என்ற கனவில் மிதந்திருந்தேன் தான் !! ஆனால் ஆளாளுக்கு விடறாங்களே பாருங்கள் - பிட்டத்தில் மிதிகள் ; டிக்கிலோனாவில் கட்டுப்போட்டபடியே குப்புறக் கிடக்கும் வடிவேல் போல கிடத்தாத குறை தான் ! 

அட்டைப்படங்களைப் பொறுத்தவரைக்கும் இது போன்ற ஸ்பெஷல் இதழ்களுக்கு நமது டிசைனர் பொன்னனிடமே பணிகளை ஒப்படைப்பது வாடிக்கை & இம்முறையும் அதே நடைமுறை & 3 மாதங்களுக்கு முன்னமே சகலத்தையும் ஒப்படைத்து விட்டிருந்தோம். தொடர்ந்த வாரங்களில் நம்மை ஊறப் போட்டு, ஊறப் போட்டு மொத்தியெடுத்தார் பாருங்கள் - அவ்வப்போது நீங்கள் கண்ணில் காட்டிடும் மு.ச.க்களெல்லாம் ஒன்றுமே இல்லை என்றாகிடும் அளவுக்கு ! எனக்கோ ஒரு நூறு திருத்தங்கள் சொல்லாது ஒரு விச்சு-கிச்சு டைஜெஸ்ட் அட்டைப்படத்துக்கே சம்மதம் சொல்ல மனசு கேட்காது ; இந்த அழகில் ஒரு மைல்கல் இதழுக்கு கேட்கவும் வேணுமா - என்ன ? திருத்தங்கள் ; மறு திருத்தங்கள் ; மறுமறுமறு திருத்தங்கள் என்று அவசியமாகிட, ஒவ்வொன்றுக்கும் ஒரு வாரம் சுவாஹாவாகிப் போயிருக்க, கிட்டத்தட்ட 700 பக்கங்களையும் பிரிண்ட் செய்து முடிக்கும் நேரத்துக்கே அட்டைப்படம் # 1 ரெடியாகியிருந்தது ! புக் # 2 - "ஒற்றை நொடி..ஒன்பது தோட்டாக்கள்" and அதற்கான 5 அத்தியாயங்களின் ஒரிஜினல் அட்டைப்படங்களும் ரொம்பவே சுமாரோ சுமார் stuff ! So ஒரிஜினலை அப்படியே கொஞ்சம், கொஞ்சம் உல்டா பண்ணி ராப்பர் தேற்றிடும் முயற்சி எனக்கு கொஞ்சமும் ரசிக்கவில்லை ! So ஒரே நேரத்தில் பொன்னனையும் பணி செய்யச்சொல்லி ; இன்னொரு பக்கம் கோகிலாவையும் ஒரு டிசைனை உருவாக்கச் சொல்லிப் பணித்தது பற்றாதென்று - பெங்களூருவில் உள்ளதொரு புது டிசைனரிடமுமே அதே பணியை ஒப்படைத்திருந்தேன் ! சொல்லி வைத்தாற்போல மூவருமே இந்த ராப்பரை சொதப்போ சொதப்பென்று சொதப்பித் தர - 'சிவனே' என்று ஒரிஜினலையே போட்டுப்புடுவோமா ?? என்றெல்லாம் நினைப்பு ஓட ஆரம்பித்தது ! கழிந்திடும் ஒவ்வொரு தேதியும் வயிற்றில் நயம் புளியைக் கரைக்க, நானாக ஏதேதோ reference-களை உருட்டியெடுத்து ஒரு ஐடியாவினைத் தந்திட, அதனைக்கொண்டு பொன்னன் உருவாக்கிய டிசைனில் ஒரு மார்க்கமாய் "கண்டேன் கண்ணாளனை !!" என்று பெருமூச்சு விட முடிந்தது ! அடித்துப் பிடித்து பிராசஸிங் செய்து முடித்து, அச்சும் முடித்தால் - நகாசு வேலைகளின் பொருட்டு மறுக்கா ஜவ்வுமிட்டாய்ப் படலம் துவங்கியது டிசைனருடன் !! விடியும் ஒவ்வொரு பொழுதும் எகிறும் BP-ஐ கண்ணில் காட்ட, இவ்வார முதல் நாளில் தான் நகாசு வேலைகளுக்கான கோப்புகள் தயாராகின ! அவசரம் அவசரமாய் அவற்றை ரெடி செய்து எடுத்துக் கொண்டு அந்தப் பணிகளைச் செய்து தரும் கான்டிராக்டரைத் தேடிப் போனால், அவர்களிடம் ஆண்டின் இறுதி சார்ந்த பணிகள் மலையளவுக்கு குவிந்து கிடக்கின்றன ! "திங்கட்கிழமை (20th Dec) முடிச்சு தாரேன் சார் !" என்று அவர் சொல்ல, விக்கித்துப் போய்க் காத்திருக்கிறோம் !! இன்னொரு பக்கமோ, குளிர் காலத்து நோவுகளின் காரணமாய் பைண்டிங்கில் கணிசமாய் ஆட்கள் லீவு போட்டுப் போயிருக்க, ஸ்டீலின் கவிதைகளைப் போல பணிகள் பற்களை ஆட்டம் காணச் செய்யும் வேகத்தில் நகன்று வருகின்றன !! So பைண்டிங்கிலும், அட்டைப்பட finishing பணிக்கெனவும், நம்மாட்கள் நாள் முழுக்க தேவுடு காத்து வருகின்றனர் !! குட்டிக் கரணங்கள் அடித்தாவது இம்மாதத்தின் இறுதி தினங்களுக்குள் புக்ஸை தயார் செய்து முரட்டு டப்பிக்களுக்குள் அடைத்திடுவோமென்ற நம்பிக்கையில் பொழுதுகள் நகர்ந்து வருகின்றன ! புத்தாண்டு தினத்தினில் கூரியர்கள் டெலிவரி செய்வார்களா ? என்பதை ஊர்ஜிதம் செய்து கொள்ள வேண்டும் தொடரும் நாட்களில் ! Phewwwwww !!

ஒரு பக்கம் காது வழியே புகை விட்டுக் கொண்டிருந்தாலும் - அடுத்தடுத்து ஆக வேண்டிய பணிகளைக் கவனித்தாக வேண்டுமல்லவா ? சென்னைப் புத்தக விழாவும் இம்முறை 17 தினங்களுக்கென அறிவிக்கப்பட்டிருக்க, நமக்கு ஸ்டால் கிடைக்கும் பட்சத்தில், உங்களை சுவாரஸ்யமாய் நம் திக்கில் திரும்பிடச் செய்யும் பொருட்டு சன்னமாய் சில திட்டமிடல்களைச் செய்தாலென்னவென்று தோன்றியது ! Of course - "இந்த பட்ஜெட்டே ஓவர் ; இதிலே மேற்கொண்டுமா ?" என்ற புகை சிக்னல்ஸ் ஆங்காங்கே எழுமென்பது புரியாதில்லை தான் ! ஆனால் 2 ஆண்டுகளின் புத்தக விழா விற்பனைகள் சுத்தமாய் பூஜ்யமாகிப் போயிருக்க, overall நிதி நிலைமையில், அவை விட்டுச் சென்றிருக்கும் பெரும் வெற்றிடத்தை கொஞ்சமே கொஞ்சமாகவேணும் ரொப்பிட முயற்சிகளை மேற்கொள்ள வேண்டியது காலத்தின் கட்டாயமாகிடுகிறது ! So சென்னையில் நமக்கு ஸ்டால் கிடைத்திட்டால் அங்கே தலைகாட்ட 'தல' கலக்கல் கலரில் தயாராகி வருகிறார் ! இதோ - The LION LIBRARY இதழ் # 1-ன் அட்டைப்பட முதல் பார்வை ! இன்னமும் கொஞ்சம் மெருகூட்டல் பாக்கியுள்ளதெனினும், அதற்கு முன்பான output இது : 

And வண்ணத்தில் மிளிர தயாராகி வரும் இரவுக் கழுகாரின் உட்பக்கப் preview இதோ : 

ஜனவரியின் hardcover இதழ் # 3 ஆக இதனைத் தெறிக்க விட தற்சமயம் பணிகள் ஏக ஜரூர் நம்மிடத்தில் ! And லயன் லைப்ரரி வரிசைக்கான லோகோ முயற்சிகளிலுமே பிசியாக இருந்தோம் ! இதோ கொஞ்சமாய் நம்மாட்கள் கைவண்ணங்கள் : 










உங்களின் அபிப்பிராயம்ஸ் ப்ளீஸ் ?

அட்டைப்படங்களைக் கண்ணில் காட்டும் நேரத்தினில் FFS இதழுடனான சந்தாதாரர்கள் ஸ்பெஷல் இதழின் அட்டையினையும் காட்டி விடுகிறேனே folks ?  
Mr.எலியப்பா எனும் ப்ளூ கலர் யானையார் தான் இந்த இதழ்களின் show stopper ! சர்க்கஸிலிருந்து தப்பி வரும் இந்த யானையை பெற்றோருக்குத் தெரியாது வீட்டில் பதுக்கி வைக்க முயற்சிக்கும் குட்டிப் பசங்களின் லூட்டிகள் தொடராய் இந்த இணைப்புகளில் இடம்பிடித்திடவுள்ளன ! தொடர்கதையாய்ப் படித்திடவும் செய்யலாம் ; தனித்தனிக் குட்டிக் கதைகளாகவும் இவற்றை ரசித்திடலாம் என்பது இதன் highlight ! And சீனியர் எடிட்டரின் "அந்தியும் அழகே" இடம் பிடித்திடுவது இந்த இணைப்பினில் தான். ஒவ்வொரு 6 மாதங்களுக்கும் ஒருமுறை இவை தொகுப்புகளாகி, விற்பனைக்கு வந்திடும் ! 

ரைட்டு....அப்புறமாய் அந்தக் கார லட்டு # 1 பற்றி ஒரு வழியாய்ப் பார்த்திடலாமா guys ? 

"அடக்கி வாசிச்சால் போதுமே !!" என்ற அணியினரின் முணுமுணுப்பு இங்கேயும் எழுந்திடலாம் என்பது புரிகிறது ! அதன் பொருட்டே இது சார்ந்த அறிவிப்பினைத் தள்ளிப் போட்டு வந்தேன் ! இன்னும் சொல்லப் போனால்,  அறிவிக்கிறேன் பேர்வழி என ஆரம்பித்து, "காரவாலா லட்டுக்களின் எண்ணிக்கை மொத்தம் 3" என்பதையுமே நான் உளறிக் கொட்டி விடும் வாய்ப்புகள் உண்டென்பதால் - 'மௌனம் தேவலாம்' என்ற நினைப்பினில் இருந்தேன் ! But ஓவர் பில்டப்கள் எப்போதுமே உடம்புக்கு ஆகாதென்பதால் லட்டு # 1 பற்றி இந்தப் பதிவினில் சொல்லிடுகிறேனே ! 

"கார லட்டு" என்று நான் குறிப்பிட்டது - "சுஸ்கி & விஸ்கி" பாணியிலான ஜாலி கதைவரிசை அல்ல இது என்று அடையாளம் காட்டிடும் பொருட்டே ! And நம்ம நண்பர்களில் சிலர் கொண்டுள்ள "மறுபதிப்புக் கனவு" சார்ந்த இதழும் அல்ல இது ! So "இரட்டை வேட்டையரா ?" ; "ஜான் மாஸ்டரா ?" ; "கொலைப்படையா ?" என்ற கற்பனைகளினில் திளைத்திருந்த நண்பர்கள் மன்னிச்சூ ! ஏற்கனவே TEX க்ளாசிக்ஸ் ; சுஸ்கி-விஸ்கி க்ளாசிக்ஸ் - என்றான repeat நிலையில், மேற்கொண்டும் ரிவர்ஸ் கியர் போடத் தோணலை எனக்கு !  

....மாறாக இதுவொரு புது ஆல்பம் !

....நமக்குப் பிடித்தமான கௌபாய் ஜானரில் !

....And இதுவொரு ஒன்ஷாட் எனலாம் !

....ஆனால் இதனில் உள்ள விசேஷம் ரொம்பவே unique !!

....வன்மேற்கின் பற்பல பரிமாணங்களை 1700-களின் இறுதியிலிருந்து 1900-ன் துவக்கங்கள் வரையிலுமாய் முன்னெடுத்துச் செல்வது பிரான்க்கோ-பெல்ஜிய காமிக்ஸ் படைப்புலகில் ஜாம்பவான்கள் 16 பேர் !! Yes - you read it right !! இந்த ஆல்பத்தின் படைப்பினை மொத்தமாய் 16 கதாசிரியர்கள் + ஓவியர்கள் கையிலெடுத்துள்ளனர் ! 

....கதையின் பின்னணியாக ஓட்டமெடுக்கும் நூலிழை அத்தனை கதைகளுக்கும் ஒரு பொதுவான அம்சமாகிடுவதால், ஒன்றன் பின் ஒன்றாய் நகர்ந்திடும் கதைகளை சீராய் வாசிக்க முடிகிறது ! கதைகளின் ஓட்டத்தோடு வன்மேற்கின் பரிணாம வளர்ச்சியினையும் அழகாய் கண்முன்னே ரசித்திட இயல்கிறது !! 

....GO WEST YOUNG MAN - என்ற பெயருடன் வெகு சமீபமாய் பிரெஞ்சில் வெளியாகி பிரமாதமான வரவேற்பினைப் பெற்று வரும் இந்த ஆல்பத்துக்கான தமிழ் உரிமைகளை வாங்கியுள்ளோம் ! "மேற்கே போ மாவீரா !!" என்ற பெயருடன் பொருத்தமானதொரு தருணத்தினில் இந்த ஆல்பம் உங்கள் முன்னே ஆஜராகிடும் !! 

....சமீபமாய் OTT தளத்தினுள் வெவ்வேறு படைப்பாளிகள் உருவாக்கிய தொடர்கள் ஒன்றிணைந்து வெளியானதை போல இந்த முயற்சி ரொம்பவே வித்தியாசமானதாய் தென்படுகிறது ! ஒவ்வொரு டீமின் படைப்பாளிகளும் இங்கே முத்திரை பாதிக்க செய்துள்ள அதகளங்களை கொஞ்சம் பாருங்களேன் : 









வன்மேற்கு !! முன்னெப்போதும் இல்லாத ஒரு புதுவிதப் பார்வையில்...ஒரு புதுவித பாணியினில் !! இதனுள் புகுந்திட செம ஆவலாய் ஞான் வெயிட்டிங் ! நிங்களுக்குமே அதே ஆவல் இருக்குமென்கில் "வாகான தருணம்" ஒன்றினை ஏற்படுத்திடலாம் - ஒரு சுபயோக சீக்கிர சுபதினத்தினில் !!

லட்டுஸ் # 2 & 3 கொஞ்சம் முரட்டு லட்டுஸ் என்பதால் அவற்றை FFS ரிலீஸ் ; SMASHING 70's ரிலீசுக்கு அப்புறமாய் வைத்துக் கொள்வோமே ? 

புறப்படுகிறேன் guys - இன்னுமொரு சஸ்பென்ஸ் இதழுக்காக பேனா பிடித்து வரும் பணியின் க்ளைமாக்ஸுக்குள் புகுந்திட ! Bye all ....see you around !! 

காலிரிக்கி...கட்டை விரலிருக்கி.....!!

P.S : சந்தா 2022 நினைவூட்டல் folks !! காத்திருக்கும் ஆண்டின் அத்தனை லூட்டிகளிலும் உங்களின் அண்மை நமக்கு அவசியம் - ப்ளீஸ் !!

Sunday, December 12, 2021

ஒரு எருதின் ஆண்டின் மீதான பார்வை !!

 நண்பர்களே,

வணக்கம். ரொம்ப காலத்துக்குப் பின்பாய் ஒரு ஞாயிறு காலையில் பதிவை டைப் செய்கிறேன் இன்றைக்கு ! மூன்று வாரங்களுக்கும் குறைச்சலான நாட்களே நடப்பாண்டினில் எஞ்சியிருக்க, ஆர்வமாய், நம்பிக்கையாய், 2022 க்கு நல்வரவு சொல்லிட உங்களைப் போலவே நாங்களும் காத்திருக்கின்றோம் !! And புத்தாண்டினை வாஞ்சையோடு எதிர்பார்த்திட, "ஜனவரி 6 தேதியினில் சென்னைப் புத்தக விழா துவங்கவுள்ளது !" என்ற தகவலும் ஒரு காரணியாக அமைந்திடுவதால், புனித மனிடோவிடம் கரம் கூப்புகிறோம் - ஸ்டால் கிடைத்து, விற்பனை சிறக்க வேண்டுமே என்று !! Fingers crossed big time !! 

இக்கடயோ பணிகள் சீராய் முன்னேறி வருவதை பராக்குப் பார்த்தபடிக்கே  நாட்களை கொஞ்சமே கொஞ்சமாய் லாத்தலாய்க் கழித்து வருகின்றேன் ! FFS புக் # 1 & 2 அச்சுப் பணிகள் நாளையோடு நிறைவுறுகின்றன !! இவை இரண்டும் தான் மெகா இதழ்கள் எனும் போது ஏழு கடல்களையும், ஏழு மலைகளையும் தாண்டி முடித்துவிட்ட பீலிங்கு !! And நாளையே "கோல்டன் ஹீரோஸ் ஸ்பெஷல்" இதழுமே அச்சாகி விடும் என்பதால் - எஞ்சியிருக்கப்போவது 16 பக்க "எலியப்பா" சிறு இதழ் மாத்திரமே ! அந்த இதழின் highlight - சீனியர் எழுதிடும் "அந்தியும் அழகே" பகுதி தான் & ஒரு மாதிரியாய் அதனையும் தேற்றியாச்சு எனும் போது - செவ்வாய்க்கிழமைக்குள் FFS பணிகளின் முழுமையும் அச்சு நிறைவுற்று, பைண்டிங் படலத்தினில் ஆழ்ந்திருப்போம் ! என்றென்றைக்கோ, எப்பப்போதோ துவங்கிய  பணிகளின் முழுமையும் ஒரு வழியாய் நிறைவுறுவதைப் பார்க்கும் போது, பெரியதொரு நிம்மதி பெருமூச்சோடு, சன்னமானதொரு ஏக்கப் பெருமூச்சும் வெளிப்படுகிறது ! பண்டிகைகளுக்கு இணையாக, அவை  சார்ந்த முஸ்தீபுகளுக்கும், எதிர்பார்ப்புகளுக்குமே நம் மனங்களில் ஜிலீரென்ற இடம் உண்டு தானே ? இனியொரு முறை இது போலொரு தருணம் வாய்க்க இன்னும் 13 வருஷங்கள் காத்திருக்கணுமே !!!  Bring on the LION 50 !!!!

And சந்தாக்களும், FFS முன்பதிவுகளும் செம சீராய் முன்னேறிய வண்ணமுள்ளன என்பது செம சந்தோஷ சேதி ! பைண்டிங் துவங்கிடவுள்ள இவ்வாரத்தின் பிற்பகுதியே உங்களின் போட்டோக்களை அனுப்பிட கடைசி வாய்ப்பாகிடும் folks ! So அதன் பின்னான சந்தாக்களுக்கு போட்டோ இணைக்கும் வாய்ப்பு கிட்டுவது கடினம். ஆனால் எப்படியும் இறுதி நிமிடத்தில் ரயிலில் தொற்றிக் கொள்வோரின் எண்ணிக்கையும் கொஞ்சம் இருக்கும் என்பதால், அவர்களின் பொருட்டு ஒரு ஐம்பது புக்ஸ்களை மட்டும் பைண்டிங் செய்திடாது, நிறுத்தி வைத்திட எண்ணியுள்ளேன் ! அவ்வித late சந்தாக்கள் கிட்டியான பின்னே, அவர்களின் போட்டோக்களும் கிட்டியான பின்னே, அந்த 50 பிரதிகளை ஜனவரியில் ஏதேனுமொரு தருணத்தில் பைண்ட் செய்து அனுப்பிட நினைத்துள்ளேன் ! ஆனால் அவை நிச்சயமாய் "இன்னிக்கு ஆர்டர் - நாளைக்கி புக்ஸ்" கதையாக இருக்க வாய்ப்பிராது ; will definitely take time !! ஆகையால் இவ்வாரத்துக்குள் சந்தாக்களோ, முன்பதிவுகளோ செய்திட நேரமெடுத்துக் கொண்டீர்களெனில், உங்கள் பாடும், எங்கள் பாடும் சுளுவாகிடும் ! ப்ளீஸ் guys !! 

ரைட்டு, இவ்வாரம் எதைப் பற்றி எழுதிடலாமென்று யோசிக்கும் போது - ஆண்டின் review காத்துள்ளது கைதூக்கி நிற்பது கண்ணில் படுகிறது ! சீன காலெண்டரின்படி 2021 எருதின் ஆண்டாம் !! So எருதினை ஆய்வோமா ?

டெக்னிகலாய் பார்த்தால் இம்முறை அமைந்திருப்பது ஒன்பது மாதங்களது சந்தாவே என்றாலும், இதழ்களின் எண்ணிக்கை கணிசம் என்பதால் - கண்முன்னே ஏகப்பட்ட புக்ஸ் அனுவகுப்பது போலொரு பிரமை !! And 2021-ல் வெளியாகியுள்ள இதழ்களின் பட்டியலைப் பார்க்கும் போது "கழுகு வேட்டை" வண்ண blockbuster இதழிலிருந்து துவங்கிய இந்தப் பயணத்தின் பெரும் பகுதி, full steam ல் ஓட்டமெடுத்திருப்பது புரிகிறது !! அவற்றை கொஞ்சம் ரகம் பிரித்துப் பார்த்தால் - கீழ்க்கண்ட சுவாரஸ்ய data கிட்டுகிறது :

  • டெக்ஸ் ஆல்பங்கள்  - 7 + 1 = 8 (அந்த + 1 - "சிகப்பாய் ஒரு சிலுவை" ஆன்லைன் Bookfair ஸ்பெஷல்)
  • கார்ட்டூன் ஆல்பம்ஸ் - 7 ( லக்கி லூக் - 2 ; சிக் பில் -1 ; மேக் & ஜாக் - 1 ; ப்ளூ கோட்ஸ் -1 ; ஹெர்லாக் ஷோம்ஸ் -1  ; மீசைக்கார கிளிப்டன் -1 )
  • கி.நா.கள் - 4 +1 = 5 (அந்த +1 - "சித்திரமும் கொலைப்பழக்கம் "!!)
  • ஆக்ஷன் / டிடெக்டிவ் ஆல்பம்ஸ் - 5 (SODA ; தோர்கல் ; ரிப்போர்ட்டர் ஜானி ; ஜேம்ஸ் பாண்ட் & மாடஸ்டி கூட்டணி ; XIII )
  • கௌபாய் ஆல்பம்ஸ் - 5 (டெட்வுட் டிக் ; ட்யுராங்கோ ; ட்ரெண்ட் ; ட்யூக் & ஜெரோனிமோ)
  • Others - 1 (மாயாவி - கொரில்லா சாம்ராஜ்யம்)

ஆக மொத்தம் : 30 இதழ்கள் (சிகப்பாய் ஒரு சிலுவை சேர்த்தால் 31)

இந்த stats பார்க்கும் போது சுவாரஸ்யமாகவுள்ளது becos :

😎இம்முறை - டெக்ஸுக்கு இணையான எண்ணிக்கையினில் கார்ட்டூன்களும் இடம் பிடித்துள்ளன ! இடம்பிடித்துள்ளது மட்டுமல்லாது - அவை சாதிக்கவும் செய்துள்ளன ! In fact , மீசைக்காரர் கிளிப்டன் நீங்கலான பாக்கி ஆறு கார்ட்டூன் இதழ்களுமே நிறைவாய் ஸ்கோர் செய்துள்ளன ! 

😎'தல' டெக்ஸ் ஓவர்கில் ; அதிகம் ; சாஸ்தி ; என்ற ரீதியிலான விசனங்களுக்கு பின்புலன்களே நஹி என்பதும் புரிகிறது ! ஒன்பது மாத சந்தாவினில் அவர் பிடித்துள்ள இடம் 7 மட்டுமே ! விற்பனையில் பாக்கி அத்தனை பேரும் ஜட்கா வண்டிகளில் தக்கி முக்கி முன்னேறிக் கொண்டிருக்கும் வேளையில், பென்ஸ் காரில் சொய்ங்ங்ங்க்க்க்க் என்று முன்னேறிப் போகும் நாயகருக்கு இந்த வாய்ப்புகள் கூடத் தராது போனெனெனில் என்னை மிஞ்சிய பேமானி எடிட்டரும் இருக்க முடியாது, என்னை மிஞ்சிய முட்டாள் பதிப்பாளரும் இருக்க முடியாது !  

😎நமது ஆக்ஷன் நாயகர்கள் pretty much நம்மோடு நெடும் தொலைவு பயணிக்கவுள்ளோர் என்பது அப்பட்டமாகிறது ! இரண்டு ஆண்டுகளுக்கு முன்னே அறிமுகமான SODA நம் மத்தியில் ஒரு நிரந்தரனாகி விட்டுள்ளார் ! ரிப்போர்ட்டர் ஜானியும் சரி, தோர்கலும் சரி ; XIII -ம் சரி - automatic choices ! And ஜேம்ஸ் பாண்ட் + இளவரசி கூட்டணியுமே கொஞ்ச காலத்துக்காவது அசைக்க முடியா இடம்பிடித்துள்ளதொரு ஜோடியாகிப் போய்விட்டுள்ளது ! Maybe அடுத்த முறை க்ளாஸிக் ஜேம்ஸ் பாண்ட் vs ஜேம்ஸ் பாண்ட் 2 .0 என்றிருக்கலாம் தேர்வுப் படலமானது ! So நமது ஆக்ஷன் டீம் pretty much sorted out என்பேன் ! 

😎And நமது கௌபாய்க் கூட்டணியுமே ஆரோக்கியமே என்பேன் ! ட்யுராங்கோ என்றைக்குமே சோடை போனதில்லை & நடப்பாண்டிலும் மனுஷன் ஹிட்டடிக்கத் தவறவில்லை ! அவரது தொடருக்குப் புத்துயிர் ஊட்ட படைப்பாளிகளும் தீர்மானித்திருக்க, அவர் தொடர்ந்திடுவாரென்று எதிர்பார்க்கலாம் ! அதே போல - அதே படைப்பாளியின் இன்னொரு கௌபாய் தொடரான "LONESOME " 4 ஆல்பங்கள் கொண்டதொரு சங்கிலியாய் தயாராகி வருகின்றது ! அதனில் ஏற்கனவே 3 பாகங்கள் வெளியாகியாச்சு & # 4 - 2022-ன் பிற்பகுதியினிலோ அல்லது 2023 -ன் துவக்கத்திலோ வெளியாகவுள்ளது ! அவற்றிற்கான உரிமைகளும் வாங்கியாச்சு எனும் போது - பாகம் 4 தயாரான கையோடு, ட்யுராங்கோ பாணியிலேயே ஒரு 4 பாக hardcover அதிரடி இதழாய்த் திட்டமிட்டு விடலாம் ! 

தவிர,  சாத்வீகமாகவும் நம்மைக் கவர்ந்திட இயலுமென்பதை நிலைநாட்டியுள்ள டிரெண்ட் ஒரு இடத்துக்கு நிச்சயம் ஒர்த் தானே ?

And அதிரடிப் புதுவரவு டெட்வுட் டிக் நடப்பாண்டின் பளிச் அறிமுகம் அல்லவா ? தொடரினில் உள்ளதே மொத்தம் 7 பாகங்கள் & அவற்றுள் நாம் இரண்டை வெளியிட்டிருக்கிறோம் எனும் போது, இவர் நம்முடன் மிஞ்சிப் போனால் 2022 & 2023 -ல் மட்டுமே பயணிக்க சாத்தியப்படும் ! But வரும் வரைக்கும் மனுஷன் நம்மை மகிழ்விக்கத் தவற மாட்டார் என்பதே எனது அபிப்பிராயம் !!

And இறுதி கௌபாய் தான் ஒரு கேள்விக்குறியோடு நிற்கும் ட்யூக் !! "ஒருமுறை கொன்று விடு" என்று அறிமுகமானவரை எனக்குப் பிடிக்கவே செய்திருந்தது தான் ; ஆனால் உங்கள் மத்தியில் நிறைய தக்காளிகளை மனுஷன் வாங்க நேரிட்டது தான் நிஜம் ! இன்றைய தக்காளி விலைகள் மட்டும் அன்றைக்கும் இருந்திருப்பின், நான் ஓவர்னைட்டில் ஒபாமா ஆகியிருப்பேன் தான் !! Phewww !!


😎கி.நாக்களைப் பொறுத்தவரையிலும் a real mixed bag !! 

"ஒரு தோழனின் கதை" & "அந்தியும் அழகே" - இவை இரண்டும் ஈட்டிய சிலாகிப்புகளும் செம ரகம் ; எதிர்கொண்ட விமர்சனங்களும் கணிசம் !! விற்பனை அளவுகோல்களில் பார்த்தல் இவையிரண்டுமே blockbusters ! So இவற்றைக் கட்டியணைத்தோருக்கும் சரி, கழுவி ஊற்றியோருக்கும் சரி, அந்த விற்பனை வெற்றியினில் சமபங்கு உண்டு என்பதால் thanks guys !! தாத்தாக்கள் விற்பனையிலும் தாதாக்கள் என்றாகி விட்டுள்ள நிலையில், இவர்கள் நம் மத்தியில் இனி permanent ஆகிடுவர் ! 

அந்தத் தகுதி நாகரீக வெட்டியான் ஸ்டெர்ன்னுக்கும் தரலாமா ? என்பதை சொல்லிட maybe நீங்களே பொருத்தமான நபர்களாய் இருப்பீர்கள் guys ! முதல் ஆல்பம் கூட "சற்றே ஓ.கே." என்றிருக்க, இரண்டாம் ஆல்பமான "காட்டான் கூட்டம்" has been a real hit !

விமர்சனம் / விற்பனை - என 2 அளவீடுகளின்படியும் மொக்கை என்று அமைந்து போனது "சித்திரமும் கொலைப்பழக்கம்" மட்டுமே ! Sorry on that folks !!

இந்தாண்டின் எனது personal ஞாபகங்கள் என்று குறிப்பிடுவதாயின் - மொழிபெயர்ப்பில் முயற்சிக்கக் கிட்டிய பன்முக வாய்ப்புகளையே சொல்லுவேன் ! மாமூலான பணிகளிலிருந்து விலகி நிற்பனவே இப்போதெல்லாம் என் மண்டைக்குள்ளொரு வேகத்தைத் துளிர் விடச் செய்கின்றன என்பதில் ரகசியங்களேது ? "தோழனின் கதை" ஒரு தினுசாயும் ; புதுப் பயல் "டெட்வுட் டிக்" க்குக்கென முற்றிலும் இன்னொரு விதமாயும் ; "அந்தியும் அழகே" தாத்தாக்களுக்கு வேறொரு பாணியிலும் ; ஸ்டெர்ன் ஆல்பங்களுக்கு yet another பாணியிலும் பணியாற்ற அவசியப்பட்ட நாட்கள் இந்த 30 இதழ் குவியலின் மத்தியிலும் நினைவில் தங்கியுள்ளன ! அவற்றில் எத்தனை சதவிகிதம் சொதப்பினேன் ? எத்தனை சாதித்தேன் ? என்று சொல்லக்கூடிய ஜூரிஸ் நீங்களே என்றாலும், என்னளவிற்கு எஞ்சிடுபவை ஜாலி எண்ணங்களே ! பற்றாக்குறைக்கு FFS இதழுக்கென "ஒற்றை நொடி..ஒன்பது தோட்டாக்கள் " & ALPHA நெட்டி கழற்றிய பணிகள் ! So மரத்தைச் சுற்றி ஓடி, டூயட் பாடும் அந்த மாமூல்களிலிருந்து விலகிடக் கிடைத்த வாய்ப்புகளே இந்த ஒன்பது மாதப் பயணத்தின் எனது நினைவுகள் !!

ரைட்டு, இனி உங்களுக்கான கேள்விகள் இதோ folks :

1 .நடப்பாண்டின் ALBUM OF THE YEAR என்று எதைத் தேர்வு செய்வீர்களா ? ("ஹுக்கும்....இன்னும் பாதி மூட்டையை டப்பிகளிலிருந்து பிரிக்கவே இல்லே ; என் கல்யாண ஆல்பத்தை செலெக்ட் பண்ணலாமா ?" என்ற மைண்ட்வாய்ஸ்கள் கொஞ்சம் உரக்கவே கேக்கி !!)

2 .நடப்பாண்டின் TOP அட்டைப்படம் ?

3 .நடப்பாண்டின் TOP அறிமுக நாயகர்ர்ர்ர் யாரோ ?

  • a) டெட்வுட் டிக்
  • b) ஸ்டெர்ன்
  • c) தாத்தாக்கள்
  • d) ட்யூக் 

4 .ஸ்டெர்ன் தொடர்ந்திடலாமா ? 

5 .நடப்பாண்டில் ரொம்பவே சோதித்த இதழ் எது ?

  • a) ஜெரோனிமோ 
  • b) சித்திரமும் கொலைப்பழக்கம் 
  • c) ஒரு தோழனின் கதை 
  • d) The B & B ஸ்பெஷல் (மாடஸ்டி & JB 007 )
  • e) வேறு ஏதேனும் ?

6 .நடப்பாண்டினில் 'தல' graph எப்படி ? உசக்கே செல்கிறதா ? நேர்கோட்டிலா ? கீழ்நோக்கியா ?

7.ட்யூக் ? தொடரலாமா ? 

கொஞ்சமாய் பதில்சொல்ல நேரம் எடுத்துக் கொள்ளுங்களேன் folks - மௌனமே சுகமென்று நீங்கள் தொடர்ந்தால், நான்பாட்டுக்கு "வெடிக்க மறந்த வெடிகுண்டு"களை கொண்டு வந்து சேர்த்தாலும் சேர்த்துத் தொலைப்பேன் ! So உங்களின் எண்ணப் பகிர்வுகள் நிரம்ப உதவிடும் ! So please do reply all !!

Bye folks ...enjoy your Sundays !! மீண்டும் சந்திப்போம் ! 



Saturday, December 04, 2021

தங்கம்...சொக்கத் தங்கம்...!!

 நண்பர்களே,

வணக்கம்.  வாரத்தின் துவக்கத்தில் புக் டெஸ்பாட்ச் இருக்க நேர்ந்தால், உங்களின் வாசிப்பு வேகங்கள் நிச்சயமாய் ஜாலி ஜம்பருக்குப் போட்டி தரப் போவதில்லை என்பது கடந்த சில நாட்களின் பாடம் !  வாரயிறுதிக்கு புக்ஸ் உங்களிடம் இருக்கும் விதமாகவே சமீப ஐந்தாறு மாதங்களில், எல்லா டெஸ்பாட்ச் தேதிகளுமே அமைந்திருந்ததால் - சூட்டோடு சூடாய் உங்களின் வாசிப்புகள் + அலசல்கள் அரங்கேறியதைப் பார்க்க முடிந்திருந்தது ! இம்முறை செவ்வாய் என்பதால் ஸ்லோவாய் வாசிப்ஸ் போலும் !!

Anyways - இம்மாதத்து 4 இதழ்கள் கூட்டணியினில், ஸ்டெர்ன் சார்ந்த உங்களின் பாசிட்டிவ் எண்ணங்கள் தொந்தியில் மில்க்க்ஷேக் வார்க்கின்றன ! முதல் ஆல்பத்தில் மதில் மேல் பூனையாய் இந்த மனுஷனுக்கான opinion இருந்திட, உங்களிடம் வாக்கெடுப்பொன்றை நடத்திய பின்னேயே இவருக்கான மறுவாய்ப்பு தரத் தயாராகி இருந்தேன் ! இருந்தாலுமே லைட்டாய் ஒரு பீதி உள்ளுக்குள் இல்லாதில்லை தான் - ஆண்டின் இறுதி மாதத்தினை சொதப்பாது நகற்ற இந்த நாகரீக  வெட்டியான் ஒத்துழைக்க வேண்டுமே - என்று ! இது வரைக்குமான உங்களின் பகிர்வுகள், சின்னதொரு திசைகாட்டியாய் இருக்கும் பட்சத்தில் - ஸ்டெர்ன் சாதிக்கிறாரோ, இல்லியோ, சொதப்பவில்லை என்பது புரிகிறது ! இன்னும் நிறையவே காத்திருப்போம் - இந்த மனுஷன் நம் மத்தியில் தொடர்ந்திட உங்களின் ஏகோபித்த க்ரீன் சிக்னல் கிடைக்கிறதாவென்று அறிந்திட ! 

க்ரீன் சிக்னலோ ; ரெட் சிக்னலோ - இவர்களுக்கு நீங்கள் தந்திடவுள்ளது எதுவாயினும், டாட்டா சொல்லிக் கிளம்பிடவுள்ள ஹெர்லக் & வேஸ்ட்சன் ஜோடியின் ஆல்பமும் "Not Bad" என்ற ரீதியில் துவக்க விமர்சனங்கள் ஈட்டியிருப்பது குறித்து மகிழ்ச்சியே !! In many ways - நம் வீட்டுக் குட்டீஸ்களுக்குக் கதை சொல்ல இந்த ஜாலி ஜோடி பயன்படக்கூடுமென்பது எனது எண்ணம். அதிலும், அலாவுதீன் பூதம் ; மந்திரம், தந்திரமென்ற concepts கொண்ட இந்த இதழானது அவர்களுக்கு செமையாய் ரசித்திடக்கூடும் ! So இந்த வாரயிறுதியில் முயற்சித்துப் பார்க்கலாமே folks ?

அப்புறம் மறதிக்கார XIII + "குண்டு" சின்னவரை ஓரிரு வேகவாசிப்பாள நண்பர்களைத் தாண்டி வேறு யாரும் சீண்டிய பாடைக் காணோமென்பதும் புரிகிறது ! அதற்கென நேரம் ஒதுக்கிட வார நாட்களில் வாய்ப்புகள் குறைவே எனும் போது - தொடரும் நாட்களில் அவர்களோடு நீங்கள் அன்னம் தண்ணீர் புழங்க வாய்ப்புக் கிட்டுகிறதாவென்று பார்க்கலாம் !!

ரைட்டு....மசி மணம் மாறியிருக்கா 4 இதழ்களோடு உங்களின் நாட்கள் நகர்ந்து வரும் அதே சமயத்தில், எங்களது நாட்களை நாங்கள் நகர்த்துவது யாரோடு ? என்று பார்க்கிறீர்களா ? இதோ பாருங்களேன் : 

FFS-ன் புக் # 1 & 2-ல் புது வரவுகள் ; ஆக்ஷன் டிடெக்டிவ்ஸ் ; ஸ்டைலிஷ் newcomers என்று இருக்க, இதோ - இது தான் நமது FFS புக் # 3 preview !! "நீ சான் பிரான்சிஸ்கோ போய்க்கோ இல்லே சாயல்குடிக்குப் போய்க்கோ ! நீ ஆல்பாவைக் கூட்டிட்டு வா ; இல்லே தீட்டாவைக் கூட்டிட்டு வா !! நீ ஹார்ட்கவர் போட்டுக்கோ ; இல்லே ப்ரவுண்கவர் போட்டுக்கோ !! ஆனாக்கா நாங்க வர்றச்சே கொயந்தைப் புள்ளீங்களை ஓரமா ஒதுங்கி நின்னு விளையாடச் சொல்லு தம்பி !!" என்று சொல்வது போல மிரட்டல் காட்டும் நமது கிளாசிக் நாயகர்களின் இதழுக்காக அட்டைப்படம் இதுவே folks !! மாயாவியின் அந்த இரும்புக்கரமும், நம்ம சிலந்தியாரும் - ஒரிஜினல் ஓவியரின் கைவண்ணத்தில் தெறிக்க விடுவதாக எனக்குத் தோன்றியது ! இருவருமே தலைகாட்டவுள்ளது சிற்சிறு சாகசங்களில் மட்டுமே என்றாலும் - ஒரு மைல்கல் தருணத்தில் அவர்களது பங்களிப்பும் இருக்குமென்ற மகிழ்வு பெரிதல்லவா ? அதிலும் "குற்றச் சக்கரவர்த்தி" கலரில் ரகளை செய்கிறார் !! பாருங்களேன் : 

கலரில் சாகஸம் செய்வது டிடெக்டிவ் செக்ஸ்டன் பிளேக்குமே கூட !! புது யுக சித்திர பாணியில், புது யுக டிஜிட்டல் வர்ணங்களுடன் இந்த க்ளாஸிக் ஹீரோ மிளிர்வதைப் பாருங்களேன் !!

Black & White-ல் நமது மார்க்கண்டேய மாயாவியார் கலக்குகிறார் - ஒரு புது மினி சாகசத்துடன் : 

And செக்ஸ்டன் ப்ளேக்கின் முழுநீள b&w சாகஸம் தான் இந்த 68 பக்க combo இதழின் அதிரடி முதுகெலும்பே !! 

கருணையானந்தம் அவர்களின் க்ளாஸிக் பாணியிலேயே இந்த கோல்டன் ஹீரோஸ் ஸ்பெஷலின் மொழிபெயர்ப்பு இருந்திடும் என்பதால் - நாயகர்கள் யாரும் நவீன பாணிக்கு மாற்றம் கண்டிருக்க மாட்டார்கள் !! So "அந்த நாள் நாயகர்" கோட்டாவினை இந்த "கோ.ஹீ.ஸ்பெ" அழகாய்ப் பூர்த்தி செய்திடுமென்று எதிர்பார்க்கலாம் ! அடுத்த சில நாட்களில் அச்சேறவுள்ள இந்த க்ளாஸிக் நாயகர்களே இப்போதைய எங்களின் கவனங்களை ஆக்கிரமித்து வருவோர் !! And சந்தேகங்களின்றி, உங்களின் கவனங்களையும் இப்போது ஈர்த்திடுவர் என்பது திண்ணம் ! 

டிசம்பர் இதழ்களுக்குள் புகுந்திடவும், உங்களின் அலசல்களைப் பகிர்ந்திடவும் நேரமெடுத்துக் கொள்ளுங்கள் - ப்ளீஸ் ! நானிப்போது "நிழல்களின் சாம்ராஜ்யத்தில்" ஓரம்கட்டப் புறப்படுகிறேன் guys !!

Before I sign out - பாருங்களேன் நமது தாத்தாக்களின் வெள்ளித்திரை லூட்டிகளை !! 





அந்த சிகப்பு டிரக் ; மாசமாயிருக்கும் பேத்தி ; கண்ணாடித் தாத்தா ; தோஸ்து தாத்தாஸ் என அட்சர சுத்த details பாருங்களேன் !! படம் பிரெஞ்சில் ரிலீஸ் ஆன உடனே நமது பிரான்ஸ்வாழ் நண்பர்களை பார்க்கச் சொல்லி அபிப்பிராயம் கேட்ட்டாகணும் ; மறவாதீர்கள் guys !!

And yes - சந்தா 2022 எக்ஸ்பிரஸில் இடம்பிடிக்கவும் ; இடம்பிடித்துள்ளோர் போட்டோக்களை அனுப்பிடவும் கூட மறந்திட வேண்டாமே folks !! Bye for now....see you around ! Have a chill weekend !!

Tuesday, November 30, 2021

ஒரு டிசம்பர் டான்ஸ் !

நண்பர்களே,

வணக்கம். ஊரெல்லாம் வெள்ளப்பெருக்கெடுத்து ஓடும் வேளைகளில் கூட, சும்மா ஜிலோவென்று வெயில் அடிக்கும் ஊர் - எங்களது ! ஆங்காங்கே சாலைகளில் போட்டிங் போகும் கொடுமைகளை ட்விட்டரிலும் ; டி-வியிலும் பார்த்த கையோடு, பிக் பாஸ் பார்க்கக் கிளம்பி விடுவார்கள் எங்கள் ஜனம் ! ஆனால் கடந்த சில நாட்களாய் எங்களுக்கே ரிவிட் அடித்து வருகிறார் வருண பகவான் ! ராத்திரிகளெல்லாம் கொட்டோ கொட்டென்று கொட்டித் தீர்த்த மழையில் பைண்டிங் ஆபிஸுக்குப் போகும் சாலையே குளமாகிப் போயிருக்க -  டிசம்பர் புக்ஸ் இன்று காலை தான் டப்பிக்களில் அடைக்கலமாகிப் பயணங்களைத் துவங்கியுள்ளன ! So உங்கள் ஊர்களில் படகு விடும் நிலவரங்கள் இல்லையெனில் - நாளை முதற்கொண்டு பட்டுவாடாக்கள் துவங்கிட வேணும் ! மழை தேவன் மனசு வைப்பாராக !!

So ஒரு ரொம்பவே புதிரான கூட்டணியிலான புக்ஸ் இம்மாதம் உங்கள் இல்லங்களின் கதவுகளைத் தட்டக் காத்துள்ளன !! 

**மறதிக்கார நண்பர் XIII-ன் இந்தப் புது ஆல்பத்தை முழுமையாய் உள்வாங்கிட - இரண்டாம் சுற்றின் முந்தைய இதழ்களையெல்லாம் ஒரு புரட்டாவது புரட்ட அவசியமாகிடலாம் ! வழக்கம் போல் "தொடரும்" என்ற கொக்கியோடு இந்த ஆல்பமுமே நின்றாலும், ஏகப்பட்ட ஆக்ஷன் blocks உண்டென்பதால், அவற்றையும், சித்திர ஜாலங்களையும் ரசிக்கவே பொழுது போறாதென்பேன் !

**"சின்னவர்" சமாச்சாரத்திலுமே கொஞ்சமே கொஞ்சமாய் flashbacks சார்ந்த ஞாபகங்கள் இருந்தால் தேவலாம் என்பேன் - becos "எதிரிகள் ஓராயிரம்" ; "காற்றுக்கென்ன வேலி ?" போன்ற இளம் டெக்ஸ் backissues களோடு இணைந்தே இந்த சாகசத்தின் முடிச்சும் பயணிக்கிறது ! 320 பக்க குண்டு புக் ; so கணிசமாய் நேரமும் ஒதுக்கிக் கொள்ளுங்கோ - ப்ளீஸ் !

**சிறப்பு டிடெக்டிவ் ஷோம்சும், சிரிப்பு டாக்டர் வேஸ்ட்சன்னும் - எப்போதும் போலவே லாஜிக்காவது, ஒண்ணாவது - என்று லூட்டி அடிக்கின்றனர் - ஒத்தாசைக்கு அலாவுதீன் பூதத்தையும் வைத்துக் கொண்டு ! So ஒரு அரை அவருக்காவது அவரவர்களது லாஜிக் லட்சுமணசுந்தரம் அவதார்களுக்கு விடை தந்திடாவிடின், மத்தளம் கொட்டவே அவசியப்படும் - என் சிரத்தில் !

**And "காட்டான் கூட்டம்" !! புது வெட்டியானின் இலக்கியத் தேடலின் பலனான ஒற்றை நாளே இந்த ஆல்பம் ! கரடு முரடான வன்மேற்கு ; அதன் கோக்குமாக்கான மக்கள் - இவர்களின் மத்தியில் ஒரு கலா ரசிக வெட்டியான் என்பதே இங்கு cocktail ! So  "இது தான் கதை ! இது தான் ட்விஸ்ட் ; இது தான் க்ளைமாக்ஸ்" - என எதிர்பார்த்துத் தேடினீர்களெனில் நிச்சயமாய் கிட்டிடாது ! And சித்திர பாணிகள் + கலரிங்குமே இங்கு ரசிக்கப்பட வேண்டிய முக்கிய அங்கங்களே ! பர பரவென வரிகளை மட்டும் வாசித்து விட்டு 'வரட்டா ?' எனக் கிளம்புவதே உங்களின் பாணியெனில், இம்முறை கொஞ்சமே கொஞ்சமாய் மாற்றம் அவசியமாகிடலாம் ! 

So கொஞ்சம் preparations கோரிடும் கூட்டணி இம்முறை ! தேர்ந்த ஜூரிக்களான உங்களுக்கு இதையெல்லாம் நான் சொல்லிட வேண்டிய  அவசியங்கள் இராது தான் ; but என் திருப்திக்காகவாச்சும் சொல்லி வைத்து விடுவோமே என்று தோன்றியது !! நாளை முதல் உங்களின் அலசல்களுக்கு spotlight-ஐ ஒதுக்கிடுவோமா ? Happy reading all !!

அப்புறம் ஆன்லைன் லிஸ்டிங்ஸ் ரெடி :

https://lion-muthucomics.com/latest-releases/890-december-pack-2021.html

https://lioncomics.in/product/december-pack-2021/

Happy shopping too !

மீண்டும் சந்திப்போம் ; நான் அட்டவணையின் 12 மாதங்களுக்குள் எந்தெந்த இதழ்களை எங்கெங்கே புகுத்துவதென்ற சிண்டைப் பிய்க்கும் பணியினைத் தொடரக் கிளம்புகிறேன் ! கதைகளைத் தேர்வு செய்வதை விடவும், அவற்றை slot செய்திடும் பணியானது செம tough என்பதை பத்தாவது தபாவாய் உணர்ந்து வருகிறேன் - கடந்த பத்தாண்டுகளில் !! Bye all...see you around !!

கிளம்பும் முன்பாய் - மறுபடியும் FFS முன்பதிவு / உங்கள் போட்டோக்கள் சார்ந்த நினைவூட்டல் guys ! நிறையப் பேர் அனுப்பி வருகின்றனர் ; ஆனால் இன்னமும் கணிசம் வந்திட வேண்டியுள்ளது ! லேட்டாய் வந்தாலும் லேட்டஸ்ட்டாய் வருவது இங்கு சாத்தியமாகாது என்பதை நினைவூட்டுகிறேன் ; so சற்றே வேகம்ஸ் ப்ளீஸ் ! அப்புறம் சில விஷயங்களுமே :

1.நீங்கள் அனுப்பும் போட்டோக்கள் கொஞ்சமேனும் ஷார்ப்பாய் இருந்தால் தேவலாம் ; ரொம்பவே மொசு மொசுவென்ற இமேஜஸ் நிறையவே வந்துள்ளன !  அவை ஒரு முழுப் பக்க சைசுக்குப் பெரிதாய் அச்சாகும் போது - "இந்த அண்ணாச்சி ஆரு ?" என்ற கேள்வியினை உங்களுக்கே எழுப்பிடும் !! 

2 .தவிர, இயன்றமட்டுக்கு நேர்வசமான போட்டோக்களாய் இருந்தால் புக்கிலும் அவை பொருத்தமாய் உட்கார்ந்திடும் ! மாறாய் wide angle-களில் எடுத்து அனுப்பிடும் போட்டோக்களை படுக்கவசமாகவே அச்சிட சுகப்படும் ! அவை புக்கில் பார்க்கும் போது பாந்தமாய் இருக்க கஷ்டப்படும் ! So கவனம் ப்ளீஸ் !! 

3 .உங்களின் போட்டோக்களோடு சந்தா நம்பர்ஸ் ப்ளீஸ் ? மூன்றோ நான்கோ நபர்கள் ஒரே பெயருடனும் உள்ளனர் எனும் போது குளறுபடிகளுக்கு வாய்ப்புகள் ஏகம் ! So ப்ளீஸ் - வெறும் போட்டோக்களை மொட்டையாய் அனுப்பிட வேணாமே ?     

And இந்தக் கோரிக்கைகள், போட்டோக்களை இனி அனுப்பிடவுள்ள நண்பர்களுக்கு மாத்திரமே ; ஏற்கனவே குவிந்து கிடக்கும் மெயில் பாக்சில் மேற்கொண்டும் போட்டோக்களைக் குவித்தால், நம்மாட்களின் கதை கந்தலாகிப் போகும் !

And இதோ - போன பதிவில் நான் பிராமிஸ் செய்த "டேங்கோ" உட்பக்கப் பிரிவியூ :