மில்லியனும்...நிறையவும்...

நண்பர்களே,

            

வணக்கம் ! மறந்து போனதொரு யுகத்தின் மீது... கண்ணில் பார்த்திரா அந்தக் கௌபாய் உலகின் மீது நமக்கிருக்கும் காதலைப் பற்றி நிறைய பேசி விட்டோம் ; சிலாகித்து விட்டோம் ! ஆனால் கடந்து சென்ற காலங்கள் மீதான மையலை - காத்திருக்கும் நாட்கள் மீது காட்டிட இதுவரையிலும் உருப்படியானதொரு சந்தர்ப்பம் கிட்டிய பாடில்லையே என்ற ஆதங்கம் எனக்குள் அவ்வப்போது தலைதூக்கிடும் ! எதிர்காலம் சார்ந்த கதைகள் - சர்வதேசக் காமிக்ஸ் உலகின் ஒரு ராட்சஸ அங்கம் என்பதையும்; இந்த genre-க்குள் தலைநுழைத்துப் பார்த்தால் பல நூறு தொடர்கள் இருப்பதும் நாமறிவோம் ! ஆனால் நம் ரசனைகளுக்கு ஏற்ற மாதிரியான கதைகளை அவற்றுள் தேடித் திரட்ட ஏகமாய் முயற்சித்தாலும் சொல்லிக் கொள்ளும்படியான வெற்றியில்லை எனக்கு ! Incals; Metaberons; Futura இத்யாதி... இத்யாதி என ஏகப்பட்ட தொடர்களை ஒவ்வொரு வருடமும் திரும்பத் திரும்பப் புரட்டோ புரட்டென்று புரட்டுவேன்- 'நாம் அவற்றை ரசிக்கும் தருணத்தை எட்டி விட்டோமா ?' என்ற கேள்வியோடே! ஆனால் ஏதேனும் ஒரு கட்டத்தில் சிற்சிறு நெருடல்கள் தென்படும் போது- ‘சரி... அடுத்த வருஷம் பார்ப்போமே!‘ என்று அவற்றை மீண்டும் அலமாரிக்குள் அடுக்கி விடுவேன்!

நெட்டில் நிறைய காமிக்ஸ் படிக்கும் நண்பர்களுக்கும், ஆங்கில கிராபிக் நாவல்களைத் தருவித்துப் படித்துப் பழகிய வாசகர்களுக்கும் எனது பயங்கள் அபத்தமாய்த் தோன்றிடலாம்தான்! ஆனால் நமது சிறு வாசக குடும்பத்தில் - நிதான நடை போட்டு மட்டுமே பழகியதொரு சாரார் இருப்பதையும் ; அவர்களையும் கூட நமது எல்லாப் பயணங்களிலுமே ஒரு அங்கமாக்கிக் கொள்வதின் அவசியத்தையும் மறக்க விரும்பவில்லை என்பதால் - ரொம்பவே cautious ஆக இருந்திட முயற்சித்து வந்துள்ளேன் ! நாம் தங்குதடையின்றி நேசிக்கும் அந்தப் பழமையையும்; நாம் கால்பதிக்க ஆசைப்படும் புதுமையையும் ஒன்றிணைக்கும் விதமாய் ஏதேனும் ஒரு கதைத் தொடர் கிட்டின்- நமது அடுத்த கட்டப் பயணத்தின் முதல் படி அதுவாகத் தானிருக்குமென்ற நம்பிக்கையோடு என் தேடல்களைத் தொடர்ந்து கொண்டிருந்தேன்! அப்போது நினைவுக்கு வந்தவர் தான் JEREMIAH! 

ஏதோவொரு யுகத்து பெல்ஜியப் பயணத்தின் போது, படைப்பாளிகளின் அலுவலக அலமாரிகளை உருட்டும் போது இந்தத் தொடரைப் பார்த்திருந்தது ஞாபகமிருந்தது. அந்நாட்களில் நியூஸ்பிரிண்டோடு மட்டுமே நமக்கு நட்பு என்பதால் இந்தத் தொடரை இரண்டே நிமிடங்களது புரட்டலுக்குப் பின்பாய் திரும்ப வைத்து விட்டேன்! சமீபமாய் அந்தத் தொடர் நினைவுக்கு வர, பொறுமையாய் அதன் பின்னணி பற்றிய ஆராய்ச்சிகளைத் தொடங்கினேன் ! தோண்டத் தோண்ட கிடைத்த தகவல்கள் ஆந்தை விழிகளை இன்னும் அகலமாக்கிக் கொண்டே போயின ! பிரான்கோ பெல்ஜியக் காமிக்ஸ் சமுத்திரத்தின் Cult Classics பட்டியலில் உரக்கத் பேசப்படும் தொடர்கள் மூன்று – என்று சிறுகச் சிறுக அறியத் தொடங்கினேன் ! Lt. Blueberry (கேப்டன் டைகர்); கமான்சே & Jeremiah தான் அந்த 3 என்று நிறைய இடங்களில் வாசிக்க முடிந்த போது என் தேடல் இன்னும் சுறுசுறுப்பானது ! கதைக்களம் என்ன? எத்தகைய தொடரிது ? என்று நமது பெல்ஜிய ஆலோசகரிடம் கேட்ட போது- நீளமானதொரு மின்னஞ்சல் அனுப்பியிருந்தார், ‘ஆஹா-ஓஹோ!‘ என்ற சிலாகிப்புகளோடு ! 

20ம் நூற்றாண்டின் அமெரிக்காவே இந்தத் தொடரின் களம்! அரசியலில் நிறவெறி; துவேஷம் ; உள்நாட்டுக் கலகம் தலைதூக்கும் ஒரு நாளில் ‘பூம்ம்ம்ம்‘ என்று ஒரு அணுகுண்டை வீசத் தீர்மானம் எடுக்கிறார் தலைமைப் பதவியிலிருப்பவர் ! ஒற்றை நாளில் அமெரிக்கா ஒரு மெகா சுடுகாடாகிப் போகிட ; ஆங்காங்கே சிற்சிறு குழுக்களில் சொற்பமான மனிதர்களே எஞ்சியிருக்கின்றனர் ! ஒரே வெடிகுண்டால் 300 ஆண்டுகளின் வளர்ச்சி தரைமட்டமாகிப் போயிருக்க - புது வாழ்வு தேடி என்றோ ஒரு யுகத்தில் அமெரிக்காவில் கால்பதித்த முன்னோடிகளைப் போலவே நிர்மூலமான நகரங்களுக்கு மத்தியில் மக்கள் ஒரு மறுவாழ்வு தேடுகிறார்கள்! அராஜகம், வெறித்தனம், கொலை, கொள்ளை என சகலமும் தலைவிரித்தாடுகிறது சட்டமறியா இந்தப் புது சமூகத்தில் ! ஒரே நாளில் கடிகார முள் திரும்பியதைப் போல நாகரீக அமெரிக்கா வன்மேற்கைப் போலக் காட்சி தருகிறது!

நமது நாயகர் ஜெரெமயாவும், அவரது தோஸ்த் கெர்டியும் சிற்சிறு வேலைகளைச் செய்து பிழைப்பு நடத்தும் சாமான்யர்கள் ! வெறுப்பும், கோபமும், வன்முறையும் தலைவிரித்தாடும் இந்த நவநாகரீக உலகின் சிதிலங்களுக்கிடையே நம் நண்பர்கள் சுற்றி வருவதே இந்தத் தொடரின் பின்னணி!

கேப்டன் பிரின்ஸ் & கமான்சே கதைகளின் பிதாமகரான ஹெர்மன் தான் இந்தத் தொடரின் கதாசிரியர் & ஓவியர் ! 1979-ல் தொடக்கம் கண்டு இன்றும் தொடர்வதில் இது வரை 34 ஆல்பங்கள் உள்ளன ! ஐரோப்பாவின் பல மொழிகளில் செம ஹிட்டடித்துள்ளன ! ஒவ்வொரு கதையுமே தனித்தனி வாசிப்புக்கும் உகந்ததுதான் என்பதால் இவற்றை ஒட்டுமொத்தமாய்ப் படித்தாலோ; ஒற்றையாய் ரசித்தாலோ சிரமமிராது ! டி.வி. தொடராகவும்; திரைப்படமாகவும் உருமாற்றம் கண்டுள்ள தொடரிது!

வழக்கமான Sci fi ரகக் கதைகளின் ஜீரணிக்கச் சிரமம் தரும் அதீத கற்பனைகளுமின்றி ; அதே சமயம் அரைத்த அதே மாவாகவுமின்றி – புதிதாய் தோன்றிய Jeremiah தொடருக்கான உரிமைகளுக்குப் பொறுமையாய் விண்ணப்பித்துவிட்டு காத்திருந்தோம் ! இதன் உரிமைகளைக் கையாளும் நிறுவனம் நமக்கு ஏற்கனவெ பரிச்சயமே என்றாலும் - இன்று அவர்களது உயரம் ரொம்பவே அதிகம் ! So நிறைய பொறுமை ; நிறைய முயற்சிகள் + ஒரு எதிர்பாரா திசையிலிருந்து கிடைத்த மகத்தான ஒத்தாசை என்று பலவும் சேர்ந்து இந்தத் தொடருக்கான உரிமைகளை நமக்குப் பெற்றுத் தந்துள்ளன!

நமது 2 மில்லியன் ஹிட்ஸ் மைல்கல்கல்லின் பொருட்டு  வெளியிட எண்ணியுள்ள MILLION & MORE SPECIAL இதழிற்கு இந்தத் தொடரின் முதல் 3 கதைகள் அடங்கிய முதல் சுற்றையே மனதில் கொண்டு காய்கள் நகர்த்தியிருந்தேன்! திங்கள் பகலில் அதற்கான thumbs up ஒரு வழியாகக் கிடைத்திட – இதோ ஆஜராகி விட்டேன் சேதியை உங்களோடு பகிர்ந்திட! ஜெரெமயாவின் மூன்று கதைகள் இணைந்த 136 பக்க INTEGRAL ஆக நமது MMS ஹார்ட் கவருடன் அட்டகாசமாய் இந்தாண்டின் இறுதிக்கு முன்பாகவே வெளிவந்திடும் ! உரிமைகள் கிடைப்பது உறுதியாகாத வரையிலும் மொழிபெயர்ப்புப் பணிகளைக் கூட துவக்கவில்லை என்பதால் இனித் தான் பிரெஞ்சு --> ஆங்கிலம் --> தமிழ் என்ற பயணத்தைத் தொடங்கியாக வேண்டும் ! மொழிபெயர்ப்புப் பணிகள் நிறைவாகும் தருணம் - இதழின் வெளியீட்டுத் தேதியை உறுதிப்படச் சொல்லி விடுகிறேன் !  

So சூப்பர் 6-ன் எல்லா இதழ்களுக்குமான அறிவிப்பு முறைப்படித் தயாரென்பதால் – முன்பதிவுகளில் துரிதம் காட்டத் தொடங்கலாம் guys! கதைக் களங்களை இறுதி செய்திடாத வரையிலும் உங்களை பணமனுப்பச் சொல்லி குடலை உருவ எனக்குத் தோன்றவில்லை! நாங்கள் இப்போது தயாரென்பதால் – பந்து இனி உங்கள் பக்கம் !

அதே சமயம் “MMS ல் தோர்கல் கிடையாதா? புது கௌ-பாய் கதை கிடையாதா?” என்று முகம் சுளிக்க நண்பர்களுள் சிலரிருப்பது நிச்சயம் ! “கேள்வி கேட்பானேன்? பின்னே எங்கள் முடிவுகளை அமல்படுத்தாமல் போவானேன்?” என்று கண் சிவக்கவும் இன்னொரு அணி நிச்சயம் ! "இருக்கும் கதைத் தொடர்கள் பற்றாதென்று இதை இப்போது யார் கேட்டார்கள் ?" என்ற அணி இன்னொரு திக்கில் இருக்கக்  கூடுவதும்  possible ! So - நம் பயணத்தின் ஒரு அழகான புதுக் சேர்க்கையினை எண்ணி மகிழ்வதா ? தயங்குவதா ? என்றறியா நிலையில் நிற்கிறேன் உங்கள் முன்னே ! 

‘முன்பதிவு மாத்திரமே‘ என்றதொரு குறுகிய, பிரத்யேகத் தடத்தில் தோர்கலை ஏற்றி விட வேண்டாமே ; இந்தத் தொடரின் கதைகள் நார்மலான விலைகளில் தொடரட்டுமே ?!' என்று முன்வைக்கப்பட்ட கோரிக்கைகள் நியாயமாகத் தோன்றியதால் - தோர்கலை ரெகுலரான இதழ்களாக மாத்திரமே வெளியிடுவதென்று தீர்மானித்தேன் ! Given a choice, இந்தாண்டின் சந்தா C-ல் லியனார்டோவையும் ; சந்தா D–லிருந்து 2 மறுபதிப்புகளையம் கழற்றி விட்டு அந்த இடத்தில் 3 ரெகுலர் தோர்கல் கதைகளைக் களமிறக்கத் தயாராகத் தானிருந்தேன் ! In fact இக்கட்டான பண நெருக்கடிக்கு மத்தியிலும் அதன் பொருட்டு கதைகளும் வாங்கி விட்டோம் ; மொழிபெயர்ப்பும் தயாராக உள்ளது ! ஆனால் ஒரு ரோஜரை replace செய்து வாங்கிய அபிஷேகமே போதும் ; மேற்கொண்டு அட்டவணையில் டிங்கரிங் செய்து புதுசு புதுசாய் சாத்துக்கள் வாங்க வேண்டாமே என்ற எண்ணம் உதயமாக - "மாற்றங்கள் நல்லதல்ல" என்று தீர்மானித்தேன்  ! So 2017-ன் முதல் இதழாகத் தோர்கலைத் தலைகாட்டச் செய்வது தான் இப்போதைய எனது option ! 2016 ஏப்ரலில் சந்தா Z நிஜமாகியிருக்கும் பட்சம் – யாருக்கும் சிரமமின்றி தோர்கலை அங்கே என்ட்ரி ஆகச் செய்திருக்கலாம் ; ஆனால் வெள்ளம், மழை..... சென்னைப் BAPASI புத்தக விழா ஒத்தி வைப்பு ; ஜனவரியின் ரெகுலர் சந்தா சேகரிப்பில் சுணக்கம் என்று நிறையக் காரணங்களால் சந்தா Z-ஐ டீலில் விட்டாகும் சூழல் உருவானதைத் தொடர்ந்து தோர்கலை இடையில் புகுத்தவும் வழியில்லாது போய் விட்டது ! அதற்கு மத்தியில் JEREMIAH-வை நிஜமாக்கும் வாய்ப்பும் கிட்டிய போது – வித்தியாசமானதொரு தொடருக்குள் கால்பதிக்க கிட்டும் வாய்ப்பைத் தவற விட மனம் கேட்கவில்லை ! இது தான் நிலவரம் ! நிஜம் ! 

இதன் பொருட்டுப் புன்னகைப்பதோ ; போட்டுத் தாக்குவதோ – இனி உங்கள் choice ! ‘பழைய நாட்களைப் போல சொதப்புகிறீர்கள் ; இது தேறாது....தோர்கலைப் போடாமல் வழக்கம் போல் குட்டிச்சுவர் பண்ணுகிறீர்கள்  ; எனக்கு இதில் வருத்தம்; அதில் ஏமாற்றம் !‘ என பிரமாதமாய்த் தாளித்து நீளமான மின்னஞ்சல் நேற்றே பிள்ளையார் சுழி போட்டு விட்டதால் – மேற்கொண்டு ‘முதல் மரியாதைகள்‘ தொடரும் வாய்ப்புகள் பிரகாசம் என்பது புரிகிறது ! நல்ல கதைகளை ; புதுக் களங்களைத் தேடி ஓடும் என் அவா எல்லா நேரங்களிலும் எல்லோருக்கும் புரிந்திட வாய்ப்பில்லை என்பதுமே புரிகிறது ! நொடிப் பொழுதில் நெற்றிக்கண்களைத் திறப்பது இப்போதெல்லாம் நண்பர்களுக்கு சராசரி நிகழ்வுகளாகி விட்டதென்பதும் புரிகிறது ! ஆனால் ஒவ்வொரு முகத்திலுமோரு சந்தோஷப புன்னகையினை மலரச் செய்வதே எங்கள் லட்சியம் என்பதை மெய்ப்பிக்க - என் புன்னகையைத் தக்க வைத்துக் கொண்டு சக்தியிருக்கும் வரை என் முயற்சிகளைத் தொடர்கிறேன்  – எல்லாம் ஆண்டவனின் சித்தமென்ற திட நம்பிக்கையில் ! பயணங்களுக்கோ ; புன்னகைகளுக்கோ முடிவிருப்பின், வாழ்க்கையின் சுவாரஸ்யம் தொலைந்து விடுமன்றோ ? So the travels continue guys.....with JEREMIAH alongside too !!

ஈரோட்டில் சந்திப்போம் guys! Stay cool until then!