கேள்விகளோ கேள்விகள் !!

நண்பர்களே,

வணக்கம். இருட்டாய், ஒரு நீளமான டப்பி போலொரு உருவமாம்  ; அதற்குள்ளேயோ ஒரு முன்னூற்றிச் சில்லறை ஜனங்களாம் ; அத்தனை பேரும் குந்திக் கொண்டே ஏதேதோ ஒரு லோகத்தில் சஞ்சாரம் செய்ய, அந்த டப்பியோ 'ஜொய்ங்கென்று' 35000 அடி உசரத்துக்கு பறந்து சென்று  ஒட்டுமொத்தப் பேரையும் கண்டம் விட்டு கண்டம் இட்டுச் செல்லுமாம் ஒரு 18 மணி நேரத்துக்கு ! Welcome to பிட்டத்தைப் பதம் பார்க்கும் அமெரிக்காவுக்கொரு விமானப் பயணம் ! Oh yes – பஞ்சாப் நேஷனல் வங்கி போல் யாராவதொரு பரோபகாரியின் சகாயமாவது எனக்கும் கிட்டியிருப்பின், இதே பயணத்தை நானுமே சொகுசாய், கட்டையைக் கிடத்தியபடிக்கே மேற்கொண்டிருக்க முடியும் தான்; ஆனால் இங்கேயொரு புது நாலு சக்கர வண்டி வாங்கும் கிரயத்தை பிசுனஸ் க்ளாஸ் டிக்கெட்டுக்குக் கூசாமல் கேட்பதால் “நான் குந்திக்கினே பிரயாணம் பண்ணிக்கிறேங்க சார்!” என்போரின் கட்சியிலேயே ஆயுட்கால உறுப்பினராகி விட்டேன் !  நமது மிஷினரி இறக்குமதி பணியின் பொருட்டு திடுதிப்பென ஒரு பயணம் அவசியமாக, சிக்கிய ரெண்டு ஸ்வெட்டர்களை மட்டும் மூட்டை கட்டிக் கொண்டு புறப்பட வேண்டிப் போனது! சாமத்தில் மூன்று மணிக்கு விமானம் கிளம்ப, சற்றைக்கெல்லாம் லைட்களை அணைத்து விட்டு ‘தூங்குங்க மக்கா!‘ என்று சொல்லாமல் சொல்லிட, ஆளாளுக்கு இஷ்டப்பட்ட கனவுகளுக்குள் புகுந்து விட்டனர்! ஆனால் எனக்கோ குறுக்கு ஒரு பக்கம் நோவெடுக்க, பிட்டம் இன்னொரு பக்கம் பின்னியெடுக்க, சுற்றுமுற்றும் பார்வையைச் சுழல விட்டேன்! மூணாவது வரிசையில் அமர்ந்திருந்தவரின் முன்னிருந்த தம்மாத்துண்டு டி.வி.யில் விஜய் சேதுபதி செம குத்தாட்டம் போட்டுக் கொண்டிருந்தார்! சைடிலோ – தெலுங்குப் படம் மாதிரி ஏதோவொரு காரசாரமான ஐட்டம் ஓடிக் கொண்டிருந்தது. முன்வரிசையிலிருந்தவரோ ஏகாந்தமாய் குறட்டை விடத் தொடங்கியிருக்க, எனக்குப் பொறாமையாக இருந்தது – 'எப்படிங்காணும் கண்ணை மூடின நொடியே துபாய்க்குப் போய்விட முடிகிறது – உறக்கத்தில் ??' என்று ! சரி, நாம தான் தூங்கினாலுமே, கண்ணு ரெண்டுமே பாதி திறந்திருக்கிற மாதிரியே இருக்குமே – குழப்பத்தில் தூக்க தேவதை நம்மளை பை-பாஸ் செய்து போயிருப்பதில் வியப்பில்லை தான் ! என்று எனக்கு நானே சமாதானம் சொல்லிக் கொண்டு flight mode–ல் கிடந்த என் செல்போனை எடுத்து உருட்ட ஆரம்பித்தேன். கடைசியாக நமது வலைப்பக்கத்தில் எட்டிப் பார்த்த போது வாசித்திருக்க முடிந்திராப் பின்னூட்டங்களை சாவகாசமாய் படித்துக் கொண்டேயிருந்த போது – ‘அட… இதுக்கு இப்படிப் பதில் சொல்லியிருக்கலாமோ? – அதுக்கு அப்படி reply பண்ணியிருக்கலாமோ?‘ என்ற ஞானோதயங்கள் மாறி மாறி மின்னலடித்தன! ஒரே பக்கமாய் சப்பணமிட்டிருந்ததில் கால் சேலாக மரத்துப் போயிருக்க லேசாக நடக்கலாமே என்றபடிக்கு இருட்டுக்குள் மெதுவாய் நடைபோட்டேன்! நடுவாக்கிலிருந்த pantry பகுதியினுள் இரண்டு ஏர் ஹோஸ்டஸ் பெண்மணிகள் ஜாலியாகக் கதை பேசிக் கொண்டிருப்பது தெரிந்தது! “வண்டியிலே ஏறினவுடனேயே குடிக்க ஜுஸ் இத்யாதிகள் தான் தந்தோம்லே – அதுக்குள்ளாற பசிச்சிடுச்சா?" என்பது போல அவர்களுள் ஒருவர் லுக்கு விட, அடுத்தவரோ – ஓரத்திலிருந்த சிறு திண்டை சுட்டிக் காட்டினார். ரெண்டு டிரேக்களில் பிஸ்கட்களும், வேர்கடலை பாக்கெட்டுகளும் பரப்பியிருக்க, பக்கத்தில் ஜுஸ் டப்பிகளும், பெப்ஸி, கோக் ஐட்டங்களும் இருப்பது தெரிந்தது. ‘அடடே முழிச்சிருக்கிறதிலே இப்டிக்கா சலுகையா?‘ என்றபடிக்கே ரெண்டு பிஸ்கட்டையும், கொஞ்சம் தக்காளி ஜுஸையும் ஊற்றிக் கொண்டு என் இடத்துக்குத் திரும்புவதற்குள் பார்த்தால் – ‘அய்… என்னமோ சாப்பிட இருக்குதுடோய்‘" என்று ஒரு எட்டுப் பத்து பேர் எழுந்து pantry பக்கமாய் திபு திபுவென்று வேக நடை போடுவது தெரிந்தது! இலவசங்கள் மீதான நமது அளப்பரிய காதலை ஆகச் சரியாகக் கணித்து வைத்ததன் பலனாய்த் தான் அந்த வேளையிலுமே  பிஸ்க்கெட்டுகளை ரெடியாக  தட்டில்  போட்டு வைத்திருந்தார்கள் போலும் என்பதை உணர்ந்த கணமே - அந்த அம்மணிகள் தீர்க்கதரிசனத்துக்கு லேசான ஏப்பத்துடன் ஒரு 'ஜே' போட்டு வைத்தேன் !!  சரி…. நம்மைப் போன்ற ராக்கோழிகளுக்குப் பஞ்சம் இல்லை போலும் என்றபடிக்கே ஜன்னல் மூடிகளை லேசாக மேலே ஏற்றி விட்டு வெளியே எட்டிப் பார்த்தேன்! கும்மிருட்டு; காரிருள்; இருள் போர்வை என்று சொல்வோமே – அது ஒட்டுமொத்தமாய் கலவையாக்கியது போல ஒரு அடர்கறுப்பு ! ‘ச்சை… இரயில்லே; பஸ்சிலேனாக்கா – ஜன்னல் வெளியே ஏதாச்சும் பராக்குப் பார்த்திட்டிருக்கலாம்‘ என்று தோன்றியது!' அத்தனை பேரும் ஒரு மாதிரியாய் தூக்கத்தில் லயித்துக் கிடக்க, எனக்கோ படம் பார்க்கவும் பிடிக்கவில்லை! மறுக்கா போய் ஜூஸ் ரொப்ப முனைந்தால் - "இவன் குடுத்த காசை ஜூஸ்லேயும், பிஸ்கெட்லேயுமே கழிச்சிடறே தீர்மானத்திலே  வந்திருப்பானோ ?" என்று அம்மணிகள் நினைத்திடக் கூடுமே என்ற சங்கோஜம் !! சரி.... விமானத்திலுள்ள பொழுதுபோக்கு திரையில் செஸ் ஆடிப் பார்ப்போமே - என்று அந்த கேமை தேடித் பிடித்து ஆரம்பித்தால், அதற்கான ரிமோட்டில் பட்டன்கள் ஒவ்வொன்றும் நாயடி-பேயடி வாங்கியிருப்பது தெரிந்தது ! குதிரையை நகற்ற முயல்வதற்கு பாகுபலியே வந்தால் தான் ஆச்சு போல என்றபடிக்கு ஒவ்வொரு பட்டனோடும் மல்யுத்தம் செய்து அலுத்துப் போக  அதை அணைத்துவிட்டு மறுபடியும் மண்டையைப் பிறாண்ட ஆரம்பித்தேன் !! "ஆஹா...… சனியிரவு எழுத வேண்டிய பதிவை ஒரு நாலைந்து நாள் அட்வான்ஸாக பண்ணி விடலாமே !" என்று தோன்றிட, சத்தமில்லாமல் என் பைக்குள்ளிருந்த நோட்டை  தேடித் துளாவி எடுத்து வைத்துக் கொண்டேன் ! So சில நூறு மக்களின் ஏகாந்த உறக்கத்தின் மத்தியில், உருவான பதிவே இன்றைய அத்தியாயத்தின் ஆரம்பப்  பகுதி !

“ரசனை”; “நாயகர்களின் தரவரிசைகள்” என்று சீரியஸாக கடந்த 2 வாரங்களைக் கடந்திருக்க – அதன் தொடர்ச்சியாய் எனக்குள் எழுந்து நின்ற கேள்விகளை கேட்பதோடு பதிவைத் துவங்கிட நினைக்கிறேன் ! தற்போது நம்மிடையே active ஆக உள்ள நாயகர்களுள் யாருக்கு எந்த க்ளாசில் டிக்கெட் வழங்குவது ? என்பது பற்றி வெளிச்சம் போட்டுக் காட்டி விட்டீர்கள் ! இப்போது நான் கோருவது - நமது 2012 -ன் மறுவருகைக்குப் பின்பாய் அறிமுகம் கண்டுள்ள நாயக / நாயகியருள் - TOP  1 - 2 -3 என்ற இடங்களை யாருக்கு வழங்குவீர்களென்பதையே ! Please note : டெக்ஸ் வில்லர் ; டைகர் ; மாயாவி ; பிரின்ஸ் போல ஏற்கனவே சுற்றி வந்து கொண்டிருந்த & தற்போதும் சுற்றி வந்து கொண்டிருக்கும் நாயகர்களை ஆட்டத்துக்கே சேர்த்திட வேண்டாமே ? முற்றிலும் புதுசாய் இந்த 6+ ஆண்டுகளில் நம்மிடையே உலாவத் துவங்கியுள்ளவர்களில், உங்களின் TOP 3 தேர்வுகளைச் சொல்லுங்களேன் ? 

இதோ - உங்கள் வசதிக்காக - இந்த 74 மாதங்களில் நாம் பார்த்திருக்கும் புதியவர்களின் லிஸ்ட் : (விடுதல்கள் இருப்பின் சொல்லுங்களேன் !!)

1. லார்கோ வின்ச்
2. வெய்ன் ஷெல்டன் 
3. டேஞ்சர் டயபாலிக்
4. கமான்சே 
5. ஸ்டீல்பாடி ஷெர்லாக் 
6. ஜில் ஜோர்டன் 
7. மேஜிக் விண்ட்
8. டைலன் டாக்
9. ஜூலியா 
10. ரின்டின் கேன்
11. பௌன்சர் 
12. ஜேசன் ப்ரைஸ்
13. அண்டர்டேக்கர்
14. ஜெரெமியா
15. டிடெக்டிவ் ஜெரோம் 
16. ப்ளூ கோட் பட்டாளம்
17. கர்னல் கிளிப்டன்
18. SMURFS 
19. பென்னி 
20. லியனார்டோ 
21. தோர்கல் 
22. லேடி S
23. ட்யுராங்கோ

நானிதைக் கோரிட "சும்மாக்காச்சும்" என்பதைத் தாண்டியொரு காரணமுள்ளது ! ஒரு நாயகரை / நாயகியை அறிமுகம் செய்திடுவது சுலபம் ; அவர்களது தொடர்கள் உங்களது ஈர்ப்பைத் தக்க வைப்பது தான் கடினம் என்பதை நடைமுறையில் பார்த்து வருகிறேன் ! Very clearly - அந்நாட்களைப் போல யாரைக் கொணர்ந்தாலும் ரசிக்கும் வயதிலோ, ரசனை விளிம்புகளிலோ நாமிப்போது இல்லை ! So இனி வரும் நாட்களில் ஒரு புதியவரை கையைப் பிடித்து நம்பக்கமாய் இழுத்து வரும் முன்பாய் ஒன்றுக்கு நாலு தடவை நான் யோசிக்கத் தேவைப்படுமென்பது புரிகிறது ! So உங்களது பட்டியலில் பரவலாய் உசக்கே இருப்பது யார் ? என்று தெரிந்து கொள்வது எனக்கு நிச்சயம் உதவும் என்றெண்ணுகிறேன் ! So please do pick your Top 3 !

கேள்வி # 2 : TOP 3 யாரென்று அடையாளம் காட்டி விட்டு - "உப்மா 3 ' யாரென்று சொல்லாது போவது முறையாகாதே ? So இந்தப் புதியவர்கள் பட்டியலுள் உங்களது Bottom 3 யாரென்பதையும் சொல்லி விடுங்களேன் ? அவ்வப்போது வனவாசம் போகும் நாயகர்கள் சில காலத்து கடும் உறக்கத்துக்குப் பின்பாய் நம்மிடையே புனர்ஜென்மம் எடுப்பது உண்டெனும் போது  - யாரை தொடர் உறக்கத்திலேயே ஆழ்த்திடல் நலமென்று தெரிந்து வைத்திருப்பதும் தேவலாம் தானே ? 

கேள்வி # 3 : Comeback ஸ்பெஷல் துவக்கம், இப்போது வரை சுமார் 230 இதழ்கள் வெளிவந்திருக்கும் என்பது ஒரு மொட்டைக் கணக்கு ! சட்டென்று உங்களை நினைவு கூர்ந்திடச் சொன்னால் இவற்றுள் மனதுக்கு வரும் முதல் 3 இதழ்கள் எவையாக இருக்குமோ ? 'டப்'பென்று பதில் ப்ளீஸ் ? No ஆழ்ந்த சிந்தனைஸ் !!  உங்கள் மனக்கண்ணில் அவை இடம்பிடிக்க காரணம் எதுவென்பதல்ல முக்கியம் இங்கே  ! கதையின் பொருட்டோ ; தயாரிப்பின் பொருட்டோ ; சேகரிப்பின் பொருட்டோ - எதன் காரணமாய் அவை உங்கள்  மனதுகளில்  நிழலாடினாலும் பரவாயில்லை - just let us know please !

"ஆங்...ஒண்ணுமே நினைவில்லியே கண்ணு ....மச மசன்னு என்னமோ கலர் கலரா மட்டுமே மண்டையிலே ஓடுது.....அப்பாலிக்கா ஒண்ணுமே நிக்கலியே  !!" என்று பதிலளிக்கும்  அணியாக இருப்பினும் no issues (?!!!) இதற்கான பதிலை -  "Only மச மச " என்று சொன்னாலும் போதும் ! 

கேள்வி # 4 : இந்த 230-க்கு முந்தைய சுமார் 500 + இதழ்களை தேடித் திரிந்து, பழைய பேப்பர் கடைகளுக்கு படையெடுக்கும் அலாவுதீன் கில்ஜிக்கள் சொற்பமாகவேணும் இன்னமும் உண்டென்பதில் ஐயமில்லை ! எனது கேள்வியானது : தற்போதைய இந்த 230 + இதழ்களுள் நீங்கள் தேடித் திரியும் out of print ஆல்பங்கள் எவையேனும் உண்டா ? என்பதே ! அலாவுதீன் கில்ஜி ரேஞ்சுக்கு இறங்கிப் படையெடுக்காவிடினும், நம்ம ஸ்டீல் பாடி ஷெர்லாக் ரேஞ்சுக்காச்சும் எந்த இதழையாவது தேட முற்படுகிறீர்களா ? 

கேள்வி # 5 : அந்தக் காலம் போல வருமா ?" என்பது நமக்கெல்லாம் ஏதேதோ விதங்களில் பிடித்தமான டயலாக்கே !! "சூடா பஜ்ஜி சாப்பிட்டுக்கிட்டே படிச்ச இதழ்" ; "10 கிலோமீட்டர் சைக்கிள் மிதிச்சுப் போய் வாங்கிட்டு வந்த புக்கு" ; "பைக்குள்ளாற மறைச்சு வய்சு ஸ்கூலிலே படிச்ச இதழ் " என்று ஏதேதோ காரணங்களின்  பொருட்டு நமக்கு வாஞ்சையான இதழ்களை பத்திரப்படுத்தி, அவ்வப்போது மறுவாசிப்புப் போடும் பழக்கம் நிறைய பேருக்கு இருக்கலாம் ! அல்ல எனது இப்போதைய வினவில் !! நான் கேட்பதெல்லாம் - "இந்த நடப்பு bunch -ல் ; அதாவது இந்த 230 + இதழ்களுள் மறுவாசிப்புக்கென உங்களைத் தூண்டியுள்ள இதழ்களின் பட்டியல் ப்ளீஸ் ? இங்கேயுமே ஒரு FIRST 3 என்று இருந்தால் போதும் !!

"அக்காங்...முதவாட்டி படிக்கவே நேரத்தை காணோம்...இதிலே மறுக்காவா  ?? சும்மா போவியா ?"  என்ற பதில் கொண்டுள்ள அணியா நீங்கள் ? No worries - உங்கள் பதிலை : "No மறுக்கா !!" என்று போட்டாலும் போதும் ! 

Last Question : நமது சட்டித் தலையன் ஆர்ச்சியிடன் அந்தக் கால இயந்திரத்தை ஆட்டையைப் போட்ட கையோடு, குடு குடுவென்று காலத்தில் முன்னோக்கிச் செல்வது மட்டும் சாத்தியமாகின் - இன்றிலிருந்து இன்னுமொரு 5 ஆண்டுகள் கழித்து நாமெல்லாம் எப்படியிருப்போம் / எங்கிருப்போமென்று கண்கூடாய்ப் பார்த்திடவே செய்யலாம் ! இன்னும் டாலடிக்கும் மண்டையோடும், காது வரை நீளும் வாயோடும் நான் சுற்றித் திரிவேன் என்ற மட்டில் நிச்சயம் ! ஆனால் நம்மிடம்  ஒரு கால இயந்திரம் இல்லை எனும் போது - கற்பனை + ஆழ்சிந்தனை   என்ற இரண்டையும் கொண்டு - 2023 -ல் நமது காமிக்ஸ் ரசனைகள் ; வாசிப்புகள் ; தேர்வுகள் எவ்விதமிருக்கக் கூடுமென்று யூகித்துத் தான் சொல்லுங்களேன் - ப்ளீஸ் ? இன்றைக்கொரு 10 ஆண்டுகளுக்கு முன்பாய் ஒரு பௌன்சரை நம்மிடையே கனவில் கூட உருவாக்கப்படுத்தியிருக்க இயலாது தானே ? ஒரு லார்கோ பாணிக்  கதையை நாம் ஆர்வத்தோடு ஏற்றிருப்போமென்ற யூகங்கள் தான் இருந்திருக்க முடியுமா ? So ரசனைகளில் நிகழ்ந்திடும் மாற்றங்கள் ஓசையின்றி நம்மிடையே படர்ந்துள்ளன ! 5 years down the line - அந்த ரசனை மாற்றங்கள் எவ்விதம் இருக்கக் கூடுமென்ற யூகங்கள் ? Please note : இதுவொரு ஜாலியான / சிரத்தையான யூகமாய் மாத்திரமே இருந்திடட்டுமே  !!

So இந்தக் கேள்விகளோடு நடைமுறைக்கு ஜம்ப் பண்ணுவோமா ? இதோ - ஏப்ரலின் நமது இரவு கழுகாரின் அடுத்த சிங்கிள் ஆல்பத்தின் அட்டைப்பட முதல்பார்வை & உட்பக்க பிரிவியூ !! இம்முறையும் ஒரு சூப்பர் -டூப்பர் சித்திர விருந்து காத்துள்ளது - அட்டகாச இளமையான டெக்ஸோடு !! பாருங்களேன் : 

முன்னட்டை நமது ஓவியரின் கைவண்ணம் ; பின்னட்டை - ஒரிஜினல் ! அடுத்தடுத்து படுக்கை வச ராப்பர் வேண்டாமே என்று எண்ணியதால் - இம்முறை ஒரிஜினலுக்கு பின்சீட் ! 

அப்புறம் "புலன்விசாரணை" மொழிபெயர்ப்புக்  குறித்து மேற்கொண்டும் 4 விண்ணப்பங்கள் !! ஆனால் அவ்வளவு உழைப்பு வியர்த்தமாகிடலில் எனக்கு உடன்பாடில்லை ! So சென்ற பதிவின்படி 3 நண்பர்கள் மட்டுமே களமிறங்கிடுவர் ! திங்கட்கிழமை அனைவரது கைகளிலும் அந்தப் பக்கங்கள் இருந்திடும் !! Good luck !!!

இதோ - லேட்டஸ்ட் முன்பதிவுப் பட்டியல் on the way ! Maybe இதிலும் உங்கள் பெயரைக் காணோமெனில் - திங்கட்கிழமை ஒரு மின்னஞ்சலை மட்டும் தட்டி விடுங்களேன் ப்ளீஸ் ? இன்னமும் பதிவு செய்திருக்கா நண்பர்கள் - அடுத்த list-க்குள் உட்புக முயற்சிக்கலாமே ?

Bye all ! Have a lovely Sunday !!