இன்று ஒரு புது நாள்....

நண்பர்களே,

வணக்கம். எல்லாம் கடந்து போகும் என்பதை கடந்த சில “இயல்புக்குத் திரும்பும் நாட்கள்” சுட்டிக் காட்டும் போது, நாமும் அதற்கொரு விதிவிலக்காக முடியுமா ? So - இதோ தொடர்வோம் பாதியில் நின்று போன டிசம்பர் மாதத்து அலசல்களை ! இந்த வாரத்தின் துவக்கத்தில் ஒரு மின்னஞ்சல் கிட்டியிருந்தது - 2016-ன் அதிரடிப் புது வரவான ஜேஸன் ப்ரைஸைப் பற்றி ! அதனை உங்களோடு பகிர்வதில் சுவாரஸ்யம் இருக்குமென்று பட்டதால் - here it is:

“பார்க்க ‘பிதாமகன்‘ விக்ரம் போலிருக்கும் இந்த டிடெக்டிவ் எத்தனை முடிச்சுகளைத் தான் கடைசி பார்டில் அவிழ்க்கப் போகிறார் ? எனக்கு நினைவு தெரிய நம் புக்ஸில் இது போல் ஒரு செம சஸ்பென்ஸ் த்ரில்லர் வந்ததே கிடையாது ! க்ளைமேக்ஸில் இத்தனை தொங்கிக் கொண்டிருக்கும் முடிச்சுகளையும் கதாசிரியர் எப்படித் தான் சரிசெய்யப் போகிறாரோ ? பாவம் !”

இரண்டாவது பாகத்தை எழுதி முடித்து விட்டு பேனாவை மூடும் முன்பாக எனக்குள் தோன்றியதும் கனகச்சிதமாய் இதே உணர்வுகள் தான் ! காத்திருக்கும் (இறுதி) 46 பக்கங்களுக்குள் கதாசிரியர் வெளிச்சமிட்டுக் காட்ட வேண்டிய மர்மங்களின் பின்னணிகள் தான் எத்தனை- எத்தனை ? என்பதை நினைத்துப் பார்க்கும் போதே மலைப்பாக இருந்தது ! ‘பர பர‘வென்று க்ளைமேக்ஸ் பாகத்தினை வாசிக்கத் தோன்றினாலும் - அதன் மீது பணியாற்றும் வேளை புலரும் வரைக்கும் சஸ்பென்ஸ் தலைக்குள் தொடரட்டுமே, என்று தீர்மானித்தேன் ! மூன்று பாகங்கள் கொண்ட இந்தக் கதைத் தொடரை ஒற்றை ஆல்பமாய் இணைத்து வெளியிடாது- பாகம் பாகமாய் வெளியிட்டதன் பின்னணி கூட இதுவே தான்!

Whodunit ரகக் கதைகளை (அதாவது- குற்றங்களுக்குக் காரணகர்த்தா யார்? என்ற ரீதியிலான மர்மக் கதைகள்) வெற்றி கொள்ளச் செய்வதாயின் வாசகர்களின் ஆர்வமான பங்களிப்பும் அவசியம் என்பது பதிப்புலகின் எழுதப்படாத விதி ! So “எழுதப்பட்ட விதி”யில் துவங்கிய இந்தச் சிறு பயணத்தின் ஒவ்வொரு கட்டத்திலும் நிறையவே சிந்திக்க, பாயைப் பிறாண்ட கதாசிரியர் ஏற்பாடு செய்து தந்திருக்கும் முகாந்திரங்களை நாமும் சிறுகச் சிறுக மனதில் ஊறப் போட்டு - கதையின் பின்னணி என்னவாகயிருக்குமென்று யூகிக்க முயல்வதும் இந்த “ஜேஸன் ப்ரைஸ் அனுபவத்திற்கொரு” முக்கிய அங்கமாக இருக்குமென்று பட்டது ! ஒரே இதழாய் மூன்று பாகங்களையும் வெளியிடும் பட்சத்தில் ‘கட கட‘வென்று படித்து முடித்து விட்டு, அடுத்த மாதம் மறந்து விடுவோம் ! ஆனால் இப்போதோ இந்த லயிப்பு மனுதுக்குள் ஓரிரு மாதங்களுக்காவது ரீங்காரமிடுவது ஒரு மாறுபட்ட அனுபவம் தானே ? தவிர, ஒரே ஆல்பமாய் – கூடுதல் விலையில் ஒரு புது நாயகருடன் வெளிவரும் “புது பாணிக் கதை” என்ற மறுநொடியிலேயே வாசகர்களுள் ஒருசாரார் க்ளிசரின் இல்லாமலேயே தாரை தாரையாய் (!!) கண்களில் ஜலப்பிரவாகத்தை ஓட விடுவதும் possible என்று பட்டது ! வாய்ப்பளிக்காமலே இதனை மூலை சேர்த்து விடுவார்களோ என்ற பயம், பாகம் பாகமாய்ப் பிரித்து வெளியிடும் தற்சமயம்  தவிர்க்கப்பட்டதாக நினைத்தேன் ! எல்லாவற்றிற்கும் மேலாய் - “மறைக்கப்பட்ட நிஜங்கள்” இதழில் ஆங்காங்கே மௌனமாய் விரவிக் கிடக்கும் முடிச்சுகள் தான் எத்தனை ? என்று யோசித்துப் பார்ப்பதே ஒரு த்ரில்லான காரியம் என்பேன்! இதோ- மேஜரான கதை knot நீங்கலாக ஆங்காங்கே எழுப்பப்பட்டிருக்கும் சன்னமான கேள்விக் கணைகளின் பட்டியல் :

1. யார் அந்த ராய் ஃபேகண்டம் கதாப்பாத்திரம் ? மார்கன் ஃபாடாய் எழுதிய நாவல்களில் அவனுக்கு அடிக்கடி தலைகாட்ட என்ன ஜோலி ?

2. பழைய போலீஸ் குறிப்புகளைத் தேடிப் பார்க்கும் போது 4 ஆண்டுகளுக்கு முன்பாக இரு மர்மக் கொலைகள் நடந்ததாகவும் ; அந்த சடலங்கள் மீது விநோதமான சில சடங்குகள் செய்யப்பட்ட அடையாளங்கள் இருப்பதாக வருகிறது ! அதற்கும் தற்போதைய நிகழ்வுகளுக்கும் சம்பந்தம் என்னவாக இருக்க முடியும் ?

3. கஞ்சாக் கூடத்திலிருக்கும் இந்த ஜடாமுடி ஆசாமி யார் ? இலண்டன்... கெய்ரோ... ஸ்காட்லாந்த் என அவன் வலம் வருவது ஏனோ ?

4. அவன் கழுத்தில் தொங்கும் வட்ட வடிவிலான தாயத்து ; எகிப்தியக் கல்லறைத் தேடல்கள்... இவற்றின் முக்கியத்துவங்கள் என்னவாக இருக்கும் ?

5. கறுப்பழகி க்ளோவின் மகனான சிறுவன் ஜெஃப்ரியை உள்ளுர் ரௌடிகள் ரவுண்ட் கட்டுகின்றனர் ! தொடர்ந்து நிகழ்வது என்ன ? அந்த முரடன்கள் இரத்தக்களரியாகி செத்துக் கிடப்பது ஏன் ? எவ்விதம் ?

6. அந்த ஆளரவமிலா ஸ்காட்லாந்துத் தீவில் வீடு முழுக்க உள்ள கிறுக்கல்களின் அர்த்தமென்ன ? எல்லாவற்றிற்கும் சிகரமாய் ஜேஸன் ப்ரைஸ் பற்றிய புத்தகங்கள் அங்கே எழுதிக் கிடப்பது எவ்விதம் ? நம்மூரின் நம்பிக்கைகளான நாடி ஜோதிடம் ; ஏடு... போன்றவற்றின் தழுவலா இது ?

7. அந்தத் தீவில் பதுங்கிக் கிடந்து ஜேஸனை எதிர்பார்த்துக் காத்திருப்பது யார் ?

முதலிரு பாகங்களையும் கையில் வைத்துக் கொண்டே- க்ளைமேக்ஸ் பாகத்தை வாசிப்பது நிச்சயமாய் நமக்கொரு த்ரில்லான அனுபவமாய் இருக்குமல்லவா ? அதையும் தான் ரசித்துப் பார்ப்போமே ? 2008-ல் முதல் பாகம்; ‘09-ல் பாகம் # 2 & 2010-ல் இறுதிப் பாகமென மூன்றாண்டுகள் பிரயாணம் செய்ததொரு த்ரில்லரை நாம் மூன்றே மாதங்களுக்குள் பூர்த்தி செய்வது நிச்சயம் மோசமில்லை என்றே நினைத்தேன் !

டிசம்பரின் இன்னுமொரு சுவாரஸ்யமான இதழாக நான் பார்த்தது டெக்ஸின் “நீதிக்கு நிறமேது?” இதழையே ! ஜேஸன் ப்ரைஸ் பாணியில் இங்கே அதிரடிகளோ, ஆச்சர்யங்களோ கிடையாது ; நேர்கோட்டுக் கதை சொல்லலே என்றபோதிலும் இதனிலொரு முக்கிய வித்தியாசம் உள்ளதென்று சொல்வேன் ! பொதுவாய் இரவுக்கழுகாரின் கதைகளில் ஒருவிதமான வெறுமை இருப்பதில்லை ! அநீதி ஆசாமிகளை அடித்து துவம்சம் செய்து நல்லவர்களைக் காப்பாற்றுவார் நம்மவர் ! ஆனால் இம்முறையோ அந்த நீக்ரோ கைதியும் சரி, சூதாடி டாய்லும் சரி, செத்துப் போய் விடுகிறார்கள் – டெக்ஸின் முன்னேயே ! அந்தக் கைதிக்கொரு நியாயமான விசாரணை அவசியமென்ற ஆர்வத்தினாலேயே தன் உற்ற தோழனையும், ஊர் மக்களையுமே எதிர்த்து நிற்கும் டெக்ஸால் கூட அந்த tragedy-ஐத் தவிர்த்திட முடியாது போவதாய் கதையமைக்கப்பட்டிருப்பது சற்றே வித்தியாசமாய்ப் பட்டது. அதுமட்டுமன்றி, இறுதியாக வில்லனுக்கான தண்டனையைத் தருவதும் ‘தல‘ அல்ல ; சவுக்கடி பட்டதொரு கறுப்பின ஆசாமி என்பதைக் கவனியுங்களேன் ! எல்லாவற்றிற்கும் சிகரம் வைத்தாற்போல – டெக்ஸ் & கார்சன் கசப்போடு அந்த நகரை விட்டுப் புறப்படும் இறுதிப் பக்கம் - மாமூலான happy ending கிடையாது ! உற்ற நண்பனோடு மோத வேண்டிய நிர்ப்பந்தம் ; படுகாயத்தோடு படுக்கையில் கிடக்கும் நிலையில் அவனை விட்டுப் புறப்படுவது ; காப்பாற்ற எண்ணிய கைதி அநியாயமாய் மாண்டு போன விதத்தில் தோல்வி ; நிறவெறி தலைவிரித்தாடும் அந்தப் பகுதியில் மாற்றங்களென எதுவுமே நிகழவில்லையே என்ற ஆதங்கம் - என்று பல சங்கடங்கள் மனதை அரிக்க நாயகர் விடைபெறுவது டெக்ஸ் கதைகளில் அடிக்கடி நாம் காண்பதல்ல ! கதைகள் # 200-300 வரையிலான படைப்புகளில் இது போன்ற மெல்லிய கசப்பு சுவை விரவிக் கிடப்பதைக் காணலாம் என்று இத்தாலிய ரசிகர்கள் சொல்கிறார்கள் ! இறுதியில் வென்றது நீதியல்ல... முரட்டுத்தனமும், பழிவாங்கும் வேட்கையுமே என்ற theme நம்மவருக்கு தினசரி நிகழ்வில்லையே ?! So 2016-ன் துவக்கம் ஒரு மாமூலான கதையோடு என்றால் - அதன் இறுதியோ ஒரு off beat கதையோடு !

அப்புறம் அந்த 2016-ன் ரிப்போர்ட் கார்டைப் பூர்த்தி செய்து, ஃபோட்டோ எடுத்து நமது அலுவலக மொபைலுக்கு வாட்சப்பில் அனுப்பவாவது செய்யலாமே ? இதுவரையிலும் அந்தப் படிவத்தை விட்டுத் தர யாருக்கும் மனம் ஒப்பவில்லை போலும் - கடுதாசிகள் வருகின்றனவா என்று போஸ்ட்மேன் வரவை எதிர்நோக்கிக் காத்திருந்ததே மிச்சம்! Please do share your thoughts folks! ஆண்டுக்கு ஒரு முறை இது போன்ற தருணங்களிலாவது மௌனங்களைத் கலைக்க நீங்கள் மெனக்கெடாது போயின், நிச்சயமாய் ரசனைகளின் அளவுகோல்களில் நாம் அனைவருமே ஒரே பக்கத்தில் தானிருக்கிறோமா - இல்லையா ? என்பதே ஜேஸன் ப்ரைஸ் மர்மமாகிவிடக் கூடும் !

புத்தாண்டும்... சென்னைப் புத்தக விழாவும் கூப்பிடு தொலைவில் காத்திருப்பது தெரிகிறது ! வழக்கம் போல நம்பிக்கையைத் துணைக்கு அழைத்துக் கொண்டு BAPASI -ன் இந்த விழாவுக்கு விண்ணப்பித்துள்ளோம் ! துவக்க ஒன்றிரண்டு ஆண்டுகளில் எழுந்த, நம் மீதான புகார்களைத் - தொடரும் ஆண்டுகளில் தவிர்த்துக் கொள்ள நாம் முயற்சித்து வெற்றி கண்டோம் என்பதால், அமைப்பாளர்களின் கருணைப் பார்வை நம் மீது விழுமென்ற நம்பிக்கையோடு காத்துள்ளோம் ! All fingers crossed in all angles ! அவ்விதம் ஸ்டால் கிட்டிவிடும் பட்சத்தில் முதல் வாரத்து சனியும், ஞாயிறின் பகல் பொழுதிலும் ஸ்டாலில் டேரா போட்டிருப்போம் ஜுனியரும், நானும் ! புது டெல்லிப் புத்தக விழா கூட அதே வேளையில் தான் துவக்கம் காண்கிறதென்பதால் ஞாயிறு மாலை அங்கே தலைகாட்டுவதாய் உத்தேசம் ! So சனி & ஞாயிறில் நமக்கென நேரம் ஒதுக்கிட முயற்சிக்கலாமே folks ?! ரூபாய் நோட்டுப் பிரச்சனை தலைதூக்கிய நாள் முதலாய் - புத்தகக் கடைகளில் நிகழ்ந்திடும் பொதுவான sales ரொம்பவே உதைக்கிறதாய் முகவர்கள் சொல்லி வருகின்றனர் ! புது மாதம் - புது ஆண்டு – அரசின் இறுக்கத் தளர்வுகளுக்கும், கொஞ்சம் சுலபமான சூழலுக்கும் வழிவகுக்குமென்ற நம்பிக்கையோடு புத்தக விழாவை எதிர்நோக்குகிறோம். சீக்கிரமே PayTm ஜோதியிலும் ஐக்கியமாகத் தீர்மானித்துள்ளோம் - மாறுகின்ற தருணங்களுக்கு நியாயம் செய்யும் விதமாய் !

ஜனவரியின் வண்ண இதழ்களின் பணிகள் 70% நிறைவடைந்துள்ள நிலையில், தொடரும் வாரத்தில் அச்சுக்குச் செல்லத் தயாராகி வருகிறோம் ! புது வரவு ட்யுராங்கோ ஒரு ‘அக்மார்க் கௌபாய்‘ என்பதை தினமும் எனக்கு உணர்த்தி வருகிறார் ! டெக்ஸ் வில்லருக்கும், கேப்டன் டைகருக்கும் மத்தியில் தனக்கென ஒரு அடையாளத்தை ஏற்படுத்திக் கொள்வார் இந்த மனுஷன் என்பது எனது எதிர்பார்ப்பு ! `Good ol` Westerns' – என்ற classic பாணிக்கு 100% நியாயம் செய்திடப் போகும் இந்தக் கதைகள் ஒவ்வொன்றின் தலைப்புமே ஒரு template-ல் அமைத்துள்ளோம் ! இதழ் வெளி வந்து, அதனை நீங்கள் வாசிக்கும் வேளையில் அந்தத் தலைப்புகளுக்கான logic நிச்சயம் புரியும் ! And இது நமது முத்துவின் 45-வது ஆண்டுமலரும் கூட என்பதால் உங்களது ‘மலரும் நினைவுகளுக்கென‘ இரண்டு பக்கங்கள் காலியாகக் காத்துள்ளன ! மூத்த வாசகர்கள் மட்டுமன்றி, இடையில் இணைந்து கொண்டோரும் முத்துவுடனான உங்கள் நினைவுகளை இங்கே பகிர்ந்து கொண்டால், அவற்றை இதழுக்குள்ளும் இணைத்து விடுவேனே ? So- contributions please?

இறுக்கமானதொரு வாரத்தைத் தாண்டியிருக்கும் வேளையில் - இதோ இந்த வேளையை கொஞ்சமாய் ஜாலியாக்கிடவொரு caption போட்டி! வெற்றி பெறும் நண்பருக்கொரு Super 6 சந்தா அன்பளிப்பு ! Get cracking guys ! 

Before I sign off, சந்தா 2017-ன் ஒரு நினைவூட்டலும் கூட !!காத்திருக்கும் புதுப் பயணத்தினில் இணைந்து கொள்ள இன்றே சந்தாத் தொகைகளை அனுப்பிடலாமே - ப்ளீஸ் ? மீண்டும் சந்திப்போம் !

P.S : முத்து காமிக்ஸ் 45 !! - இது அவசரமான தேவை folks ; இயன்றமட்டிலும் துரிதம் ப்ளீஸ் ?