Saturday, May 09, 2015

ஒரு தலைமுறைத் தலைவன்... !

நண்பர்களே,

வணக்கம். வர்ண பகவானின் கோடைக் கொடை நேற்றைய பொழுதை சிவகாசிக்கொரு ஈரமானதொரு நாளாக்கி விட  - நமக்கு பைண்டிங் செய்யும் நண்பரின் பணியிடத்தில் தினத்தின் பெரும்பகுதிக்கு மின்சாரம் இல்லாது போய் விட்டது ! ஆகையால் பகலில் நமக்கு வந்து சேர்ந்திருக்க வேண்டிய மார்ட்டினின் இதழ் இரவு தான் கிட்டியது என்பதால் கூரியர்கள் இன்று தான் கிளம்புகின்றன ! 3 தாட்டியமான b&w புத்தகங்கள் சற்றே சின்ன சைசில் + 1 வண்ண இதழ் மட்டும் பெரிய சைசில் - எனும் போது பேக்கிங்கும் ரொம்பவே நிதானமாய் செய்யும் அவசியம் ஏற்படுவதால் நம்மாட்கள் கவனமாய் செய்து வருகின்றனர் ! இம்மாத மறுபதிப்புகளைக் கையில் புரட்டும் போது ஒரு "முரட்டு" வேறுபாட்டை உணரப் போகிறீர்கள் ! நமக்கு வெள்ளைக் காகிதம் சப்ளை செய்து வரும் பேப்பர் ஆலை சமீபமாய் - Natural Shade என்ற பெயரிலொரு புதுவகைக் காகிதத்தைத் தயாரிக்கத் தொடங்கியுள்ளனர் ! இதனில் புத்தகங்களுக்கெனவே நல்ல திக்கான ரகக் காகிதங்களும் வருங்கின்றன ! பளீர் வெண்மை நிறத்தில் இல்லாது இவையொரு லேசான natural shade -ல் இருப்பது ஒரு வித வசீகரத்தை தருவதை உணர முடிந்தது ! நாம் வழக்கமாய் உபயோகிக்கும் வெள்ளைப் பேப்பரை விட இந்தப் புது ரகம் கொஞ்சமே கொஞ்சம் விலை கூடுதல் தான் ; ஆனால் இதழின் கனம் செமத்தியாக இருக்குமென்பதால் இம்மாதக் கூர்மண்டையர் + ஜா.நீ.கதைகளுக்கு இதனை பயன்படுத்தியுள்ளோம் ! And the result has been wonderful ! ஒரே சிக்கல் என்னவென்றால் புத்தகங்களின் எடை கூடிப் போவதால் - கூரியர் கட்டணங்களும் நம் பற்களைப் பதம் பார்க்கின்றன !! Anyways - இதழைப் பார்த்த பின்னே உங்கள் அபிப்பிராயங்களையும் அறிந்திட ஆவல் !

And இதோ - இது வரை நீங்கள் பார்த்திரா அந்த மறுபதிப்புகளின் முன்னட்டைகள் !
1984-ல் நமக்கு அறிமுகமானது முதலாய் - ஒரு பத்துப் பதினைந்து ஆண்டுகளுக்கு நம் மனச்சிம்மாசனங்களில் போட்டியில்லா தலைவனாய் கோலோச்சிய இந்த நீளமுக நாயகனைச் சுற்றியே லயன் காமிக்ஸின் ஆரம்பத்து வெற்றிகள் அரங்கேறின என்பதில் இரகசியம் ஏதுமில்லை ! அந்நாட்களில் ஸ்பைடர் கதைகள் வாங்குவதே ஒரு அலாதியான சந்தோஷ அனுபவம் ! டெல்லியில் இருந்த Fleetway-ன் இந்திய ஏஜெண்டின் அலுவலகத்தில் மாயாவி ; ஸ்பைடர் ; லாரன்ஸ்-டேவிட் கதைகளின் ஒரிஜினல் ப்ரிண்ட்ஸ் வண்டி-வண்டியாய் குமிந்து கிடக்கும். அந்நாட்களில் மலையாளத்தில் ; ஹிந்தியில் ; பெங்காலியில் என மாயாவியையோ ; லாரன்ஸ்-டேவிட்டையோ வேறு பதிப்பகங்கள் வாங்கிச் செல்வதுண்டு ; ஆனால் திருவாளர் சிலந்தியாரைச் சீந்த ஆளே இராது ! So நான் டில்லி செல்லும் சமயம் வாங்கிடும் கதைகள் நீங்கலாக எஞ்சியிருக்கும் அத்தனை ஸ்பைடர் கதைகளும் ஒரு வருஷம் கழிந்த நிலையிலும் பத்திரமாக துயில் பயில்வது வாடிக்கை ! ஆண்டாண்டு காலமாய் யாருமே கைவைக்காத கதைகளை நாம் காலி செய்வதில் அவர்களுக்கு ஏக மகிழ்ச்சி ; so வழக்கமான கதைக் கட்டணங்களிலிருந்து  ஸ்பைடருக்கு ரூ.200 தள்ளுபடி(!!!) உண்டு ! ஸ்பைடர் கதைகளுக்கு சித்திரம் தீட்டிய ஓவியர்கள் நிறையப் பேர் என்பதால் தினுசு தினுசாய் artwork இருப்பதை நாம் அறிவோம் ! அந்நாட்களிலோ - "யௌவன யுவனாய்" காட்சி தரும் ஸ்பைடரை முதலில் வெளியிட்டு விட்டு - அப்புறமாய் கீச்சல் பாணிகளிலான கதைகளில் கைவைப்போமே என்ற எண்ணம் எனக்குள் இருப்பதுண்டு ! ஆனால் டில்லிக்காரர்களுக்கோ இந்தப் பாகுபாடுகளெல்லாம் புரிவதில்லை - 'எல்லாம் ஒரே தொடரின் கதை தானே ?' எனபது அவர்களது எண்ணவோட்டம். இதனால் நான் டில்லி செல்லும் போதெல்லாம் இந்த கீச்சல் பாணிக் கதைகளை அடியில் போட்டுப் புதைத்து வைத்து விடுவேன் - மேலோட்டமாய் கைக்குச் சிக்கும் கதைகள் அனைத்துமே ஒ.கே. ரகமாய் இருக்கும் விதமாய் ! அந்த கண்ணாமூச்சி ஆட்டங்களை நடத்தி முடித்த தருணத்தில் வெளியான கதை தான் இந்த "இராட்சசக் குள்ளன்" ! இன்றைக்குப் படிக்கும் பொழுது நிறையவே ஹி..ஹி..ஹி..என பாம்பு டான்ஸ் ஆடத் தோன்றுவது எனது ஏழு கழுதை வயதின் வெளிப்பாடாய் இருப்பினும், அந்நாட்களில் இதனை வெளியிட்ட போது வாயெல்லாம் பல்லே - உத்திரவாத வெற்றியின் பொருட்டு ! 

ஸ்பைடர் கதைகள் வெளியானது இங்கிலாந்தில் என்றாலும் - அதன் பின்னணியில் இருந்த உழைப்பின் பெரும் பங்கு வேற்று நாடுகளைச் சார்ந்ததே ! டைஜெஸ்ட் சைசில் வெளியான 13 கதைகளை 6 வெவ்வேறு கதாசிரியர்கள் கையாண்டனர் ! சித்திரங்களோ - 5 வெவ்வேறு ஓவியர்களின் கைவண்ணத்தில் ! அமெரிக்கக் கதாசிரியர்கள் ; இத்தாலிய / ஸ்பானிஷ் ஓவியர்கள் என படைப்பாளிகளின் பாஸ்போர்ட்கள் வெவ்வேறு தேசங்களைப் பறைசாற்றினாலும் - அவர்களது இலட்சியம் -   இங்கிலாந்தில் துளிர்விட்டுக் கொண்டிருந்த அமெரிக்க சூப்பர் ஹீரோ காமிக்ஸ்க்கான ஆர்வத்தை உள்ளூர் வெளியீடுகளால் சரிக்கட்டுவதே ! அல்டோ மார்சுலெட்டா என்ற ஓவியரும், ஸ்காட் குடால் என்ற கதாசிரியரும் இணைந்து உருவாக்கிய THE SHRIVELLER என்ற இந்தக் கதை ஒரிஜினலாய் வெளியானது நவம்பர் 1967-ல் ! அரை செஞ்சுவரி அடிக்க இன்னும் 2 ஆண்டுகளே உள்ள நிலையிலும், நம்மில் ஒரு பெரும்பகுதியினருக்கு இவரொரு தலைமுறைத் தலைவனாய்த் தொடர்வது ஒரு அசாத்திய சாதனை தான் !  அட்டைப்படங்களைப் பொறுத்த வரை முன் + பின் அட்டைகள் அந்நாட்களது ஒரிஜினல் ஐரோப்பிய ஆக்கங்களே ! லேசான வண்ண மெருகூட்டல்களை மட்டுமே நாம் செய்துள்ளோம் ! இதோ அதன் ஒரிஜினல் :  

கதையைப் பற்றிப் புதிதாய் சொல்ல என்னவுள்ளது - அந்த வளமான கற்பனைகளை எண்ணிப் புன்னகைப்பதைத் தாண்டி ! போன இதழில் தலைவர் சிரசாசன SMS அனுப்பினார் எனில் - இதில் அவர் கைவசமுள்ள யுக்திகள் வேறு மாதிரியானவை ! So - சிறு வயதில் படித்ததை இந்த முதன்முறையான மறுபதிப்பு வழியாக நினைவுகூர்ந்திடக் காத்திருக்கும் நண்பர்களும் சரி ; முதல் தடவையாய்ப் படிக்கப் போகும் நண்பர்களும் சரி - ஒரு 30 நிமிட உற்சாகப் பயணத்துக்குத் தயார் ஆகிக் கொள்ளுங்கள் ! லாஜிக் ..லாஜிக் ..எனும் அந்த ஒற்றை சமாச்சாரத்தை கொஞ்ச நேரத்துக்கு பீரோவுக்குள் போட்டு அடைத்து விட்டால் - great fun awaits you !!

கூர்மண்டையர் பற்றிய முன்னோட்டத்திலிருந்து நகர்ந்தால் - அடுத்து காத்திருப்பவர் ஜேம்ஸ் பாண்டின் தூரத்துச் சொந்தக்காரரைப் போலான ஜானி நீரோ & ஸ்டெல்லா ! முன்னர் அறிவித்திருந்தது போல "மூளைத் திருடர்கள் " இதழாக அல்லாது - இன்னுமொரு சாகசமான "மலைக்கோட்டை மர்மம்" இம்முறை ஆஜராகிறது ! இதற்கு முன்பாக இந்தக் கதை மறுபதிப்புப் பட்டியலில் இடம் பெற்றிருக்கவில்லை என்பதாக ஞாபகம் - correct me if I'm wrong please ! அந்நாட்களில் இந்தக் கதை வெளியான போது இதையும் சரி ; கொலைக்கரம் இதழையும் சரி - படு சுவாரஸ்யமாய் படித்த நினைவுள்ளது ! மார்ட்டின் கதைகள் இடியாப்ப ரகமென்றால் - துளியும் குழப்பமின்றி ஒரே சீராய்ப் பயணம் செய்யும் ஜானி நீரோ ; லாரன்ஸ் டேவிட் கதைகள் ஒரு நிம்மதிப் பெருமூச்சை வரச் செய்யும் ரகம் ! கதைகளின் புராதன நெடி நமக்கொரு பொருட்டல்ல என்றிருப்பின் - இந்தக் கதைகள் சுலப வாசிப்புகளுக்கு ஒரு சூப்பர் வாய்ப்பு ! ஒவ்வொரு புத்தக விழாவின் போதும், இவையே இன்றெல்லாம் நமக்குக் கூடுதல் விற்பனையை ஈட்டித் தரும் இதழ்கள் எனும் போது - வியாக்கியானங்கள் பேசிடாது ஓசையின்றி இவற்றை ஒரு பக்கம் சுட்டு அடுக்க வேண்டியதும் நம் கடமையாகிறது ! அதே போல புத்தகக் கடைகளிலும், இந்த b&w மறுபதிப்புத் தொடர்களுக்கு சூப்பராய் வரவேற்புள்ளது எனும் போது இவற்றை commercial hits என்று பார்ப்பது தவிர்க்க இயலா யதார்த்தமாகிப் போகிறது ! இதோ - இம்மாத ஜா.நீ.சாகசத்தின் அட்டைப்படம் ! 

முன்னட்டை முத்து காமிக்ஸின் அந்நாளைய ராப்பர் டிசைனின் improved version - பின்னணி வர்ணக்கலவையோடு ! ஓவியர் காளியப்பா என்ற முது ஓவியர் '70-களில் வரைந்த டிசைன் நம்மிடம் இத்தனை காலம் பத்திரமாக இருந்ததால் அதனை பயன்படுத்தியுள்ளோம் ! கொஞ்சம் நிறையவே மேக் அப் போட்டது போல் தோன்றுவது நீங்கலாக - I thought Johnny looks o.k. ! பின்னட்டையோ - இந்தக் கதைக்கான ஒரிஜினல் Fleetway அட்டைப்படம் - கொஞ்சமே கொஞ்சமான நமது டெய்லர் வேலையுடன் ! ஜானி நீரோ கதைகளுக்கு ஒரு inspiration ஆக இருந்து வந்தது அந்நாட்களது இத்தாலிய நடிகரான மார்செல்லோ மாஸ்ட்ரோயானி தானாம் ! இதோ பாருங்களேன் அந்தக் கூலிங் கிளாசின் பின்னணியினை ! 

2015-ன் மறுபதிப்புகளில் பெரும் பகுதி அதற்குள்ளே நிறைவு பெற்றிட - எஞ்சியிருக்கும் 4 இதழ்களும் அடுத்தடுத்த சந்தர்ப்பங்களில் வெளிவந்திடும் ! ஸ்பைடரின் "எத்தனுக்கு எத்தன்" & லாரன்ஸ்-டேவிடின் "சிறைப் பறவைகள்" தயாராகி வருகின்றன - அடுத்த reprint களாய் வளம் வந்திட ! 

இம்மாதத்துத் தாமதத்தை ஈடு செய்யும் விதமாய் ஜூனின் இதழ்கள் ஜரூராய் தயாராகி வருகின்றன ! ஜூனுக்கு 3 இதழ்கள் - முழு வண்ணத்தில் என்பதால் சீக்கிரமே அவற்றை அச்சுக்குக் கொண்டு செல்லும் அவசியம் முன்நிற்கிறது ! கார்டூன் கோட்டாவை ப்ளூகோட் பட்டாளம் நிரப்பிக் கொள்கிறது - "தங்கம் தேடிய சிங்கம்" வாயிலாக ! இது படைப்பாளிகளே நமக்குப் பரிந்துரை செய்த கதை என்பதால் நிச்சயம் சோடை போகாது என்ற நம்பிக்கை எனக்குள்ளது ! அதே போல ஜாலியான வாசிப்புக்கு ஏற்ற இன்னொரு பிரான்கோ-பெல்ஜிய நாயகரான ஜில் ஜோர்டனும் ஜூனில் தலை காட்டுகிறார்- "துணைக்கு வந்த தொல்லை " வழியாக ! இதுவும் கூட ஜில் ஜோர்டான் கதைவரிசையில் one of the best என்ற படைப்பாளிகளின் சர்டிபிகேட் சகிதம் வரவிருப்பதால் சுவாரஸ்யத்துக்குப் பஞ்சமிராது ! ஜூனின் இதழ் # 3 - சற்றே கனமான களம் - "விடுதலையே உன் விலை என்ன ?" ரூபத்தில் ! அழுகாச்சிக் காவியமாக இல்லாது - இதுவொரு ருசிகரமான ஆக்ஷன் கதையாகவே இருந்திடும் - சைபீரியப் பனிமண்டலத்தைப் பின்னணியாகக் கொண்டு ! இதுவரையில் எங்கெங்கோ பயணித்துள்ள நமது காமிக்ஸ் ரயில் சைபீரியா திசையில் பிரயாணம் மேற்கொண்டுள்ளதா என்பது எனக்கு நினைவில் இல்லை - இருப்பின் இங்கே சொல்லிடலாமே ?

அப்புறம் கார்ட்டூன் ஸ்பெஷல் இதழுக்கென கதைத் தேர்வுகள் முடியும் கட்டத்தில் உள்ளன ! "முத்து காமிக்ஸில் கார்டூனா ?" என்ற ஆதங்கம் ஓரிரு நண்பர்களிடையே ; THE LION 250 என்ற பெயர் தேர்வுக்கான மொத்துக்கள் இன்னொரு பக்கமென கடந்த வாரத்து நமது மின்னஞ்சல்பெட்டி ரொம்பவே பிசியாக இருந்தது ! எந்தவொரு தீர்மானத்துக்கும் ஏகோபித்த ஆதரவு கிட்டுவது நடைமுறையில் எத்தனை சிரமம் என்பதை ஆயிரம் உதை வாங்கிய உரமேறிய முதுகைத் தடவிக் கொண்டே நினைத்துப் பார்த்துக் கொண்டேன் ! சிற்சிறு விஷயங்களுக்குக் கூட நண்பர்களில் சிலர் வீறு கொண்டெழும் பாங்குகள் காமிக்ஸ் மீதான ஈடுபாட்டின் காரணமாய் தான் என்பது எப்போதோ புரிந்த சங்கதி என்பதால் தற்காலிகமாய் "சுனா.பானா" அவதாரத்தை கையில் எடுத்துக் கொண்டு பிரச்சனைகளை மட்டுப்படுத்திக் கொள்ளவும் பழகி வருகிறேன் ! So - அந்த கெத்தொடெ இப்போதைக்குப் புறப்படுகிறேன் - காத்துக் கிடக்கும் பனிக்குள்ளும் / பணிகளுக்குள்ளும் புதைந்திடும் பொருட்டு ! 

கிளம்பும் முன்னே சின்னதாய் ஓரிரு updates :  சமீபத்திய பதிவில் - புதியதொரு படைப்பாளிக் குழுமத்தோடு கைகோர்க்க முயன்று வருவதாய்  பதிவிட்டிருந்தது நினைவிருக்கலாம் ! அதனில் வெற்றி என்பதால் - 2016-ல் புதுத் தொடர்கள் / நாயகர்கள் நம் திசையில் உதிக்கவிருப்பது நிச்சயமாகி விட்டது ! இப்போது ஓசையின்றி இன்னுமொரு கல்லை வீசிப் பார்க்கும் முயற்சியிலும் இறங்கியுள்ளோம் - ஒரு அழகான மாங்காய் கிட்டுகிறதா என்ற ஆசையோடு ! ஜெயம் கிட்டின் - மெகா சந்தோஷம் நிச்சயம் ! நமக்காக வேண்டிக் கொள்ளுங்களேன் guys !!See you around next week ! Bye till then !

P.S : மே மாதத்து இதழ்கள் இப்போது ஆன்லைன் விற்பனைக்கும் தயார் :

Sunday, May 03, 2015

மர்மத்தோடு மல்யுத்தம் !

நண்பர்களே,

வணக்கம். இந்த வாரத்தின் பெரும் பகுதிக்கு நான் மாயாவியாகிப் போனமைக்கு உருப்படியானதொரு சாக்கு வைத்திருக்கிறேன்! “மின்னும் மரணம்“ தலைக்குள் ஒரு மெகா கனவாய் குடி கொண்டிருக்க - அதனை கரைசேரக்கும் வரைக்கும் வேறு நினைப்புகளே இருந்திருக்கவில்லை! ஒரு வழியாக “மி.மி“- தரையிறங்கி, பாராட்டுக்களையும் பெற்றுத் தந்தான பின்னே- அடுத்த பணிக்குள் நுழைந்திட முயற்சிக்க- வண்டி  லேசாக மக்கர் பண்ணியது! ஏதோ முழுப் பரீட்சை எழுதி முடித்து விட்டு ஒரு வண்டி லீவை எதிர்நோக்கும் சின்னப்பிள்ளை போல மண்டைக்குள் புகுந்த மந்தத்தை ஒரு மாதிரியாக அடித்துத் துரத்தி விட்டு மே மாத இதழ்களின் பணிகளுக்குள் மும்முரமாகிட முயற்சித்தேன்!

‘விண்ணில் ஒரு வேங்கை’ சீராய் பயணம் செய்யும் ஒரு புதுக்கதை என்பதாலும், இதனை சில, பல மாதங்களுக்கு முன்பாகவே எழுதி முடித்திருந்தேன் என்பதாலும் – பெரியதொரு கஷ்டமே இல்லாது தயார் செய்ய முடிந்தது! அப்புறமாய் தான் மேஜையின் மூலையில் குவிந்து கிடந்த நமது ‘ம.ம.மா’ வின் கதையை தூக்கிக் கொண்டு வீட்டுக்குப் போனேன்- ராவோடு ராவாக எடிட்டிங் வேலைகளை முடித்து- சடுதியாய் அச்சிடலாமென்று! இது நமது கருணையானந்தம் அவர்கள் எழுதியிருந்த ஸ்கிரிப்ட் என்பதால் கதையைப் பற்றி எனக்குப் பெரியதொரு ஞானம் இருந்திருக்கவில்லை! பொதுவாக ரிப்போர்டர் ஜானி கதைகள் என்றாலோ; XIII ன் கதைகள் என்றாலோ ரொம்பவே உஷாராய் இருப்பது அனுபவ பாடம்! மனுஷனை கொஞ்ச நேரத்திற்குள் “காதல்“ திரைப்பட க்ளைமேக்ஸ் பரத் போல உருமாற்றம் செய்திடும் ஆற்றல் மேற்படி தொடர்களுக்கு உண்டு! அதையும் விட ஒருபடி மேலாக நமது மர்ம மனிதன் மார்ட்டின் தவறாமல் பெண்டைக் கழற்றும் ஒரு மாமன்னர் என்பதால் கொஞ்சம் ஜாக்கிரதையாகவே கதையை அணுக முயற்சித்தேன்! மிச்சத்தை வார்த்தைகளில் சொல்வதை விட- இந்தப் படங்கள் மார்க்கமாய் வெளிப்படுத்துவது சுலபம் என்று பட்டது!

மின்னும் மரணம் பணிகள் முடித்த சந்தோஷத்தில் நான்..! 
மி.மி. வெற்றி என்றான பின்னே நான்..! 
சரி...அடுத்த வேலைக்குள் தலையை விடுவோமா ?..மார்ட்டின் கதை waiting !
என்ன நடக்குது இங்கே ?
ஆஹா...தல எது ?...வால் எதுவென்று புரியலியே காஸ்டெல்லினி சார் !!  
ஒண்ணுமே புரியலே..உலகத்திலே...! 
வார்த்தைகளும் வேண்டுமா..?
ஆஹாஹா !! கதை ஒரு மார்க்கமா புரிஞ்சிடுச்சு !! At least புரிஞ்ச மாதிரி தோணுது !
Mr.Castellini rocks......as always !!!!
என் பணியிலேயே மிக மிகச் சிரமமான, சட்டையைக் கிழிக்கத் தோன்றும் பகுதி என்னவென்று கேட்டால்- முதல் படிவத்தை வாசித்து, எடிட்டிங் & பிழைதிருத்தம் செய்ய முயற்சிக்கும் அனுபவமே என்று தான் சொல்லுவேன்! ஒரு கத்தைப் பக்கங்களை டைப்செட்டிங் முடித்த கையோடு- கறுப்பு வெள்ளையில் பிரிண்ட் அவுட் எடுத்து, அழகாய் ஒரு tag போட்டுக் கட்டி- என் மேஜையில் மைதீன் வைத்து விட்டுப் புறப்படும் போதே எனக்கு மேல்மூச்சு ; கீழ்மூச்சு வாங்கத் தொடங்கும்! அதிலும் நான் எழுதியிருக்கா கதையாக இருக்கும் பட்சத்தில் - சிரமங்கள் இன்னமும் ஜாஸ்தி என்பதை முன்கூட்டியே மண்டை பறைசாற்றி விடும்! வறட்சியான கதைக்களமாகவோ, குழப்பமானதொரு knot கொண்டதாகவோ இருந்து - அதனை நானே மொழிபெயர்த்திருக்கும் பட்சத்தில் அந்தச் சமயங்களிலேயே சிறுகச் சிறுக மல்லுக்கட்டி கதை முடியும் தருவாய்க்குள் லேசாகப் பரிச்சயம் வளர்த்திருப்பேன் ! ஆனால் கருணையானந்தம் அவர்கள் ’மட மட’ வென்று எழுதித் தள்ளி, அப்புறம் டைப்செட்டிங் பணிகளும் அரங்கேறிய பின்னர் ஒட்டு மொத்தமாய் ஒரிஜினல் சித்திரங்கள் + ஆங்கில மொழிபெயர்ப்பு + தமிழில் பிரிண்ட்-அவுட் என ஒரு லாரி லோடு காகிதங்கள் என் முன்னே பார்க் செய்யப்படும் போது - மண்டை காய்வது வழக்கம்!

கதையைப் புரிந்து கொள்ள முயற்சிக்கும் பொருட்டு ஒரு மேலோட்டமான வாசிப்பைத் துவங்கும் போதே பலூன்கள் இங்கும் அங்குமாய் இடம் மாறிக் கிடப்பதை கண்கள் கவனிக்கும்! அதைச் சரிசெய்ய முயற்சிக்கும் போது ஆங்காங்கே எழுத்துப் பிழைகள் நெருடத் தொடங்கும்! அதை சிகப்பில் ரவுண்ட் போடத் துவங்குவதற்குள் கதையின் கோர்வை லேசாகக் குறைவது போலப்படும்.....அதைச் செப்பனிட ஆங்கில ஸ்கிரிப்ட் அவசியம் என்பதால் - இங்கே ஒரு கண், அங்கே ஒரு கண் என்று மந்தி போலத் தாவத் தேவைப்படும் ! பிரெஞ்சு to இங்கிலீஷ் மொழிபெயர்ப்பில் மேடம் பிளந்து கட்டியிருப்பதை சில இடங்களில் தமிழாக்கம் செய்வதில் மெலிதான பிழைகள் / பிசுறுகள் எழுந்திருப்பதை கவனிக்க முடிந்தால் அதை பட்டி-டிங்கரிங் செய்ய முயற்சித்தாக வேண்டும்! அதைத் தாண்டி வந்தால் ஆங்காங்கே நமது நாயகர்களுக்கு ‘பன்ச்’ டயலாக்குகளை நெருடலின்றி உள்ளே நுழைத்திட வேண்டியது நினைவுக்கு வரும்! ‘தல’ டெக்ஸ்க்கு ஒரு விதமாய் எழுதிடணும்; லார்கோவுக்கு இன்னொரு பாணியில் ; தளபதிக்கு முற்றிலும் வேறுவிதமாய் ! கார்ட்டூன்களுக்கென்றால் கேட்கவே வேண்டாம் ! So- ஏற்கனவே இந்த இடங்களிலிருக்கக் கூடிய நார்மல் டயலாக்குகளை சர்..சர்..ரென்று அடித்து விட்டு - உரமேறிய வார்த்தைகளை அங்கே திணித்தாக வேண்டும்! அதாவது இந்தக் கூத்து எல்லாமே - கதை நமக்குப் புரிந்து விட்டிருப்பின்!

இம்மாத மார்ட்டினின் சாகஸத்தைப் போலக் கதைகள் கிட்டும் நாட்களில்- ‘சேது’ படத்து விக்ரம் போலத் தான் விழிக்க வேண்டி வரும்! லேசாகப் பூசி மெழுகிடலாமென்று நினைத்தால் - இதழ் வெளியான அரை மணி நேரத்திற்குள் கூகுள் புண்ணியத்தில் ஆராய்ச்சிகளை செய்து நாம் சொதப்பிய சகலத்தையும் கிண்டிக் கிழங்கெடுத்து விடுவார்கள் என்ற ‘டர்’ நிறையவே இருக்கும் ! So- அடிடா கூகுளை... தேடுடா விஷயத்தை ! என்று கம்ப்யுட்டருக்குள் புகுந்து கதைகளின் பின்னணிகளை; வரலாற்று நிகழ்வுகளை ஆராய்ச்சிகள் செய்வது அவசியமாகும்! இவை சகலத்தையும் செய்து முடிக்கும் போது - அந்த பாவப்பட்ட first copy பிரிண்ட்-அவுட் இப்படித் தான் ரணகளமாய்த் தோற்றம் தரும்!



ஷப்பா.... அது போலொரு தேடலுக்குள் நுழையும் நாட்களில் தான் இத்தாலியில் நான் சந்தித்த அந்த மாமனிதனின் மகிமை முழுசாகப் புரிந்தது! நாலு டெக்ஸ் வில்லர், நாலு லக்கி லூக், நாலு தளபதியின் கதைகள் என்ற நார்மலான களங்களில் உலா வந்து விட்டு எப்போதாவது ஒரு மார்ட்டின் கதையை decipher செய்திட முயற்சிப்பதையே ஏதோ மலையேற்றம் பண்ணும் ரேஞ்சுக்கு நான் ‘பில்டப்’ கொடுத்து வரும் போது- வருஷம் முழுவதும் இந்தக் குழப்பக் குவியல்களே கதி என்று கதைகளை சரமாரியாய் உருவாக்கி வரும் திரு.ஆல்பிரெடோ காஸ்டெல்லினியினை நினைத்து மலைக்காதிருக்க முடியவில்லை! மனுஷன் எவ்வளவு ஆராய்ச்சிகள் செய்தாக வேண்டும், எத்தனை விஷயங்களை நினைவில் நினைவில் நிறுத்தியாக வேண்டும்!! Phew!!

இதோ- ஒரு வழியாகக் களம்காணக் காத்திருக்கும் மார்ட்டினின் ‘கனவின் குழந்தைகள்’ இதழின் அட்டைப்படம்! ஐரோப்பியப் பதிப்பின் ஒரிஜினலை அப்படியே பயன்படுத்திக் கொண்டு பின்னணிக் கலரிங்கில் மட்டுமே லேசாக மாற்றங்கள் கொண்டு வந்துள்ளோம் என்பதால் ராப்பரில் மார்ட்டின் செம ஸ்மார்ட்டாக இருப்பதைக் காணலாம்! பின்னட்டை நமது தயாரிப்பு ! கதையைப் பற்றி எக்கச்சக்கமாய் எழுதி விட்டதால் மேற்கொண்டும் ஓட்டுச் சேர்க்கும் அவசியம் இல்லையென்றே தோன்றுகிறது ! முதல் வாசிப்பிலேயே conquer செய்து விடலாமென்ற அவாக்களின்றி உள்ளே புகுந்தீர்களெனில் இந்தக் கதை நிச்சயமாய் உங்களை மெய்மறக்கச் செய்யும்! நிறைய தலைமுடிச் சேதாரம் நிகழும் தான்; ஆனால் பூமியின் ஒவ்வொரு மூலைமுடுக்கிலும் காத்திருக்கும் ஆண்டவனின் அதிசயங்களை எண்ணி வியக்காதிருக்க இயலாது! இந்தக் கதையின் களம் ஆஸ்திரேலியா! So - ஒரு down under பயணத்துக்குத் தயாராகிக் கொள்ளுங்கள் boss!

மே மாதத்து மீத 2 இதழ்களும் ‘தேமே’ என்று துளிச் சிரமும் தராது தயாரான மறுபதிப்புகள் ! மார்ட்டினோடு மல்லுக்கட்டி முடிக்கும் போது தான் ஆர்டினியின் கூர்மண்டை முதலாளியும், ஸ்டெல்லாவின் கூலிங் கிளாஸ் முதலாளியும் எத்தனை சாதுவானவர்கள் என்பது புரிகிறது! அவர்களது ராப்பர்கள் & preview (!!!) அடுத்த சில நாட்களில் இதழ்களை நாங்கள் அனுப்பிடும் தினத்துப் பதிவில் உங்கள் கண்களில் காட்டுகிறேன்!

அப்புறம் லயனின் 250வது இதழின் பெயர் சூட்டலுக்கு வந்துள்ள பெயர் பிரவாகத்தைக் கொண்டு அடுத்த 10 ஆண்டுகளுக்கான ஸ்பெஷல் இதழ்களுக்குப் பெயரிடலாம் என்று தெரிகிறது! Wow !! என்னவொரு ரகளை! ஆனால் நண்பர்களுள் பலரும் இது ‘தல’ டெக்ஸின் சூப்பர் இதழ் என்பதை மட்டுமே focus செய்திருப்பதும்; லயனின் 250வது இதழ் என்ற மைல்கல்லை பெயரில் நினைவூட்டத் தவறியிருப்பதும் தெரிகிறது ! ‘தல’ வரும் நாளெல்லாம் நமக்கு தீபாவளியே ; ஆனால் "250வது இதழ்" என்பது ஒரு பிரத்யேகத் தருணமல்லவா? So- `The லயன் 250’ என்ற சிம்பிளான பெயரையே வரவிருக்கும் நமது மைல்கல் இதழின் தலைப்பாகத் தேர்வு செய்கிறோம்! இதனை முன்மொழிந்த நமது பாசத்திற்குரிய தலீவருக்கும், மாயாவியாருக்கும் நமது வாழ்த்துக்களோடு- டெக்ஸின் கதாசிரியர் பொசெல்லியின் autograph தாங்கிய டெக்ஸ் இதழ்களைப் பெற்றுத் தர உறுதி சொல்கிறோம்! செம ஆர்வத்தோடு பங்கேற்ற அத்தனை நண்பர்களுக்கும் ஒரு ராட்சஸ thanks!!

Moving on- “கார்ட்டூன் ஸ்பெஷல்“ இதழ் இந்தாண்டில் உறுதி என்பதோடு- அதனையே நமது முத்து காமிக்ஸின் இதழ் #350 ஆகவும் அமைத்திட்டாலென்னவென்று தோன்றியது! ஒரே கல்லில் இரண்டு மாங்காய் என்ற கதையாகிடுமே என்ற சூப்பர் சிந்தனை பிரசன்னமானதன் பலனாக - முத்துவின் அடுத்த மைல்கல் தருணத்தை சிரிப்பலைகளோடு கொண்டாடிடலாமே ?! கதைகளுக்கான சில ஏற்பாடுகள், சில முயற்சிகள் செய்து வருகிறேன் ! அவற்றைத் துரிதப்படுத்தி - ஜூலை 31-ல் துவங்கும் ஈரோட்டுப் புத்தகத் திருவிழாவின் நடுவே ஒரு ஞாயிறின் போது இந்த இதழை unveil செய்திட முயற்சிப்போம் ! So- ஜூலையில் லயன் #250, ஆகஸ்டில் முத்து #350 என நமக்குக் காத்திருக்கும் பல precious moments-களை நம்மால் இயன்றளவுக்கு அட்டகாசமாக்கிடும் பொருட்டு ரசித்துப் பணியாற்றும் ஆர்வத்தோடு நடையைக் கட்டுகிறேன் ! 

தொடரும் 3 நாட்கள் எங்கள் ஊரின் இரண்டாவது அம்மன் கோவில் திருவிழாவையொட்டி விடுமுறைகளே என்பதால் - தொடரும் வெள்ளியன்று புது இதழ்கள் இங்கிருந்து புறப்படும்! கொஞ்சம் ‘மி.மி’ hangover; கொஞ்சம் ‘ம.ம.மா’ புண்ணியம்; கொஞ்சம் விடுமுறைகளின் தாக்கம் என்ற கலவையால் இம்மாத இதழ்கள் சற்றே தாமதம் காண்பதற்கு apologies! இதனை ஈடு செய்யும் விதமாய் ஜூனின் இதழ்கள் மே 31-ல் உங்கள் கைகளில் இருக்கச் செய்வோம் ! See you around guys! Bye for now !

Sunday, April 26, 2015

ஒரு பறக்கும் பால்யம் !

நண்பர்களே,

வணக்கம். ஒற்றை வாரத்துக்குள் மின்னும் மரணத்தின் புண்ணியத்தில் ஒரு திருவிழாவை வாழ்ந்து பார்த்ததொரு அனுபவத்தோடு தரைக்குத் திரும்புகிறேன் - இந்தப் பதிவோடு ! ஆனால் பாருங்களேன் - இதுவும் கூட விண்ணில் எழும்பும் ஒரு சுகமான அனுபவத்தைப் பற்றியது என்பதால் - காற்றில் மிதக்கும் பாக்கியம் அடியேனுக்கு இன்னும் கொஞ்ச காலம் தொடர்கிறது! தலையைச் சுற்றி மூக்கைத் தொடுவது மே மாதத்து விண்ணில் ஒரு வேங்கையின் முன்னோட்டத்தின் பொருட்டே என்பதை இந்நேரம் நீங்கள் புரிந்திருப்பீர்கள் என்பதால் - let's get into it guys !

LADY SPITFIRE என்பது தான் நாம் இம்மாதம் காணக் காத்திருக்கும் பிரெஞ்சுக் கதைத்தொடரின் ஒரிஜினல் பெயர். இது இரண்டாம் உலக யுத்தத்தின் களத்தை மையமாகக் கொண்டதொரு பெண் பைலட்டின் சாகசம் ! கிராபிக் நாவல்கள் பாணிகளில் நிஜக் கதைகளின் தழுவல்களாக இல்லாது வழக்கமான மசாலாத் தூவல்களோடு, அட்டகாசமான சித்திரங்களோடும், அதிரடி ஆக்ஷனோடும் இருந்திடும் !  அதெல்லாம் சரி, உலகயுத்தக் கதை பற்றியதொரு முன்னோட்டப் பதிவின் தலைப்பில் "பால்யங்களுக்கு" வேலை என்னவோ என்ற கேள்வி உங்களைக் குடையும் பட்சத்தில் இதோ அதற்கான 'ஹி..ஹி..' ரகத்திலான பதில். உங்களது இளமைக்காலத்து காமிக்ஸ் நினைவுகள் கரெண்ட் கம்பிகளைத் தேடித்திரியும் இரும்புக்கையார்களையும், ஏற்நெற்றி கொண்ட சிலந்தி மனிதர்களையும் ; பயர் இஞ்சினுக்கு அடித்ததின் மிச்சப் பெயிண்டில் மூழ்கி எழுந்த உலோகத் தலையர்களையும் சுற்றிப் பிணைந்திருப்பின், அடியேனின் soooooooooooooooo loooooooooooooong ago பால்யத்தின் காமிக்ஸ் கனவுகளில் ஒரு பெரும் பகுதி இரண்டாம் உலக யுத்த களத்தில் தீரங்கள் பல செய்த மனிதர்களையும், மிஷின்களையுமே சார்ந்து இருந்து வந்தன ! எழுபதுகளில், நான் வளர்ந்த நாட்களில் - இங்கிலாந்தில் காமிக்ஸ் பிரவாகமெடுத்துப் பொங்கிக் கொண்டிருந்ததொரு தருணம் என்பதைப் பின்னாட்களில் உணர்ந்து கொள்ள முடிந்தது. கார்டூன்கள் ; புட்பால் கதைகள் ; சாகசக் கதைகள் ; ரொமான்ஸ் கதைகள் ; பெண்களுக்கான கதைகள் ; திகில் கதைகள் ; பாக்கெட் சைஸ் இதழ்கள் ; ஆல்பம்கள் ; வாரப் பத்திரிகைகள் ' ஆண்டுமலர்கள் என்று ரவுண்ட் கட்டி FLEETWAY & DC THOMSON பதிப்பகங்கள் அடித்து வந்தன golden age அது ! அன்றைய விலைகள் மிகவும் குறைச்சல் என்பதால் இவை இங்கிலாந்திலிருந்து சரளமாய் இறக்குமதி செய்யப்பட்டு, இந்தியப் பெருநகரக் கடைகளில் ஆரம்ப நாட்களிலும், ஒரு இடைவெளிக்குப் பின்னே பழைய புத்தகக் கடைகளிலும் கிடைப்பதுண்டு. என் தந்தையின் புண்ணியத்தில் எங்கள் வீட்டில் சதா நேரமும் ஒரு லாரி லோடு காமிக்ஸ் கிடக்குமென்பதால் - எனது நேரங்களில் பெரும்பங்கு அந்தக் கத்தைக்குள் குடியிருப்பதிலேயே செலவாகிடுவது வழக்கம்.

PHANTOM கதைகள் மீது அதீத மையல் கொண்டு வளர்ந்தவன், ஒரு கட்டத்துக்கு மேலே கொஞ்சம் கொஞ்சமாய் இந்த யுத்தகளக் கதைகளுக்குள் ஐக்கியமாகத் தொடங்கினேன். அதிலும், விமான யுத்தக் கதைகளில் ஏனோ தெரியவில்லை அப்படியொரு பிரமிப்பு தோன்றுவது வழக்கம். ரொம்பச் சீக்கிரமே அந்நாட்களது பிரிட்டிஷ் ; ஜெர்மானிய ; அமெரிக்கப் போர்விமானங்களின் பெயர்கள் எல்லாமே அத்துப்படியாகியது ! இன்றைக்குப் போல நொடியில் கூகிள் தேடல்களுக்கு வழியில்லாத சமயம் அதுவென்பதால் இது போன்ற offbeat தேடல்களுக்கு அவ்வளவாக வழி கிடையாது என்பதால் - you just had to read more to know more! அந்தப் பசியில், அந்தத் தேடலில் பிறந்தது தான் பிரிட்டிஷ் விமானப் படையில் ஒரு பாயும் புலியாய் செயல்பட்டு அசாத்தியமாய் சாதித்து வந்த ஸ்பிட்பயர் ரக விமானத்தின் மீதான காதல் ! நான் கண்ணிலே பார்த்திருக்கவே வாய்ப்பிலாததொரு உலகம் ; எனக்குத் துளி கூடப் பரிச்சயம் இல்லா மாந்தர்கள் ; கிஞ்சித்தும் தொடர்பில்லா ஒரு யுத்த களம் - ஆனால் அதற்குள்ளும் சுவாரஸ்யமாய் புகுந்திட முடிந்ததெனில் - அது அந்நாட்களது பிரிட்டிஷ் கதை சொல்லும் பாணிகளுக்கு ஒரு பறைசாற்று ! ஒவ்வொரு கதையிலும் வரும் விமானிகளோடு எனக்கு ஏதோ ஒரு நேசம் தோன்றியது ; ரட்-டட்-டட்-டட் என விமானத்தின் மிஷின்கன்கள் நாஜிக்களின் விமானங்களை நோக்கிச்  சீறும் போது, அந்த விசையில் இருப்பது என் விரல்கள் என்பது போல் தோன்றும் ! "சொய்ன்ன்ன்ங்க்" என்று ஜெர்மானிய விமானங்கள் குண்டடிபட்டு சமுத்திரத்தை நோக்கி வீழும் போது 'செத்தாண்டா சைத்தான்!' என்ற உற்சாகம் பொங்கியெழும் ! ஜெர்மானியர்கள் என்றாலே எதிரிகள் என்பது போலான mindset சின்னவயதில் தோன்றியதாலோ-என்னமோ முதன் முதலாய் பிரான்க்பர்டில் புத்தக விழாவினில் பங்கேற்க ஜெர்மனி சென்ற போது கூட - வில்லன்களின் தேசத்துக்குப் போவது போலொரு லேசான உணர்வு இருந்தது !! காமிக்ஸ் வெளியிடத் தொடங்கிய பின்னர் யுத்தக் கதைகளை உங்கள் தலைகளில் 'பர பர' வென சுமத்தும் ஆர்வம் எனக்குள் மலையாய் இருந்தது தான் ! ஆனால் அந்தக் கதைவரிசைகளில் பெரும்பகுதி one -shots என்பதால் ஒரு நிலையான நாயகன் ; ஒரு அணி என்று இருப்பதில்லை ! So தெளிவான hero-oriented கதைகளுக்குப் பழகியிருந்த நமக்கு இது போன்ற random கதைகள் சரிப்படாது என்று மனதுக்குப் பட்டதால், "பெருச்சாளிப் பட்டாளம்" ; "மின்னல் படை" போன்ற ஹீரோக்கள் கொண்ட கதைத்தொடர்களைத் தாண்டி வேறு களங்களுக்குள் வேகமாய் டைவ் அடிக்கும் தைரியம் இருந்திருக்கவில்லை ! (தப்பிச்சோம்டா சாமி என்ற மைண்ட் வாய்ஸ் கேட்குது !!)  ஒரு மாதிரியாக எங்கெங்கோ நம் தேடல்கள் இட்டுச் சென்ற பின்னே, இந்த யுத்தக் கதைகள் மீதான ஒரு வேட்கை சன்னமாகிப் போனது ! அவ்வப்போது ஏதேனும் war backdrop -ல் கதைகள் தட்டுப்படும் பொழுது அவற்றைக் கொஞ்சம் கூடுதல் வாஞ்சையோடு பரிசீலனை செய்வேன் ; ஆனால் கதைகளில் ஒரு சுறுசுறுப்பு தட்டுப்படாவிட்டால் சத்தம் காட்டாமல் ஓரம் கட்டிவிடுவது வாடிக்கை. "வானமே எங்கள் வீதி" கதையிலும் வலுவாக இருந்ததால் சந்தோஷமாக அதனைத் தேர்வு செய்தேன் ! அந்த சமயம் தான் ஜூனியர் எடிட்டரின் தேடல்களில் இந்த LADY SPITFIRE கதை என் பார்வைக்கு வந்து சேர்ந்தது !

வித்தியாசமான சித்திரங்கள் ; எனது favorite ஸ்பிட்பயர் விமானங்களுக்கு கதையினில் ஒரு முக்கிய பங்கு ; பிரான்கோ பெல்ஜிய making என்ற விசிடிங் கார்டோடு இந்தக் கதை கைநீட்டிய பொழுது அந்தக் கரத்தைப் பற்றிக் குலுக்கும் ஆசையை தவிர்க்க இயலவில்லை. யுத்தப் பின்னணியில் பொதுவாக இங்கிலாந்தவர்கள் அல்லது அமெரிக்கர்கள்  சாதிப்பது போல கதைகள் இருப்பதே பெரும்பான்மை ; ஆனால் இந்தக் களமோ - ஒரு பிரெஞ்சுப் பெண் பைலட் இங்கிலாந்தின் அணியில் இணைந்து சாகசம் செய்வது போன்ற கதையோட்டம் இருந்ததை ரசிக்க முடிந்தது ! தவிரவும், தடித் தடியான ஆம்பிளைப் பசங்களின் ஹீரோ அணிவகுப்புக்கு மத்தியில் ஒரு மென்மையான பெண் நாயகி அறிமுகம் ஆவதும் நம் கழகக் கண்மணிகளில் சிலருக்கு உற்சாகம் தரக் கூடும் என்றும் தோன்றியது ! So "விண்ணில் ஒரு வேங்கை" தமிழ் பேசும் நல்லுலக வானில் பறக்கத் தயாரானது இப்படித் தான் ! எங்கோ - எப்போதோ நடந்த யுத்தம் தான் எனினும், மனித குல வரலாற்றில் ஒரு மறக்க இயலா இரத்த அத்தியாயமாகிப் போன அந்த நாட்களை சிறிதேனும் தரிசிக்க முயற்சிப்பது வித்தியாசமான கதைத்  தேடல்களுக்கு ஒரு குட்டிப் படியாகப் பார்ப்போமே ?

இதோ - "வி.ஒ.வே." இதழின் அட்டைப்படத்தின் first look ! ஒரிஜினலை முன்னட்டைக்கு அப்படியே பயன்படுத்தியுள்ளோம் - லேசான வர்ண முன்னேற்றத்தோடு ! பின்னட்டை நமது தயாரிப்பே ! படைப்பாளிகள் இந்த டிசைனைப் பார்த்து விட்டு ஒரு ஸ்மைலியை பதிலாக அனுப்பினார்கள் என்பதால் - I guess we got it right !



இதோ - இந்தத் தொடரின் படைப்பாளிகள் - கதாசிரியர் ; ஓவியர் ; கலரிங் ஆர்டிஸ்ட் என்ற வரிசையில் !
Author : Sebastien Latour
Artist : Vicanovic Maza
Coloring Artist : Clement Sauve
And, எப்போதும் போலவே - இதோ உட்பக்கங்களின் டீசரும் ! அந்த சித்திர பாணி ; வர்ணக் கலவைகள் டாலடிப்பதோடு - சமீப காலமாய் தவிர்க்க இயலாது போய் விட்ட "இச்சக்..பச்சக்" கலாச்சாரமும் தொடர்வதைப் பார்க்கலாம் ! பாருங்களேன் - இந்த "இ..ப.." வியாதி 'தல'யின் கதைகளைக் கூட விட்டு வைக்கவில்லை !! (அது சரி, 2012 முதலாய் இது வரை நாம் வெளியிட்டுள்ள கதைகளுள் "இ.ப" தலைகாட்டுவது எத்தனை இதழ்களில் (!!) என்ற கணக்கை எடுத்து வரலாற்றுக்குப் பெருமை சேர்ப்போமா ?)


பிழை திருத்தங்கள் போடா பக்கமிது ! 
காடு, மேடு, பள்ளமென தளபதியோடும், பௌன்சரோடும் சுற்றித் திரிந்த இடைவெளியில், விண்ணில் பறக்கும் இந்த அனுபவம் ரொம்பவே relaxed ஆக இருந்ததை உணர முடிந்தது ! மொழிபெயர்ப்பிலும், துளி கூடச் சிரமமின்றி , ஜாலியாய் சுற்றி வர முடிந்தது! தளபதியின் மெகா இதழ் அசுரத்தனமாய் நிற்கும் போது இது போன்ற நார்மல் இதழ்கள் துக்கடவாகத் தோற்றம் தருவது தவிர்க்க இயலாது தான் ; but I still have a feeling this Lady will do fine !!

அப்புறம் தளபதியின் ஸ்பெஷல் தடபுடலாய் தயார் ஆனது முதலாய் அடுத்த மண்டைக்குடைச்சல் குடி கொள்ளத் துவங்கி விட்டது - 'தல'யின் ஸ்பெஷல் துளியும் விடுதலின்றி தூள் கிளப்பியாக வேண்டுமே என்று ! இம்முறை தேர்வாகியுள்ள 3 டெக்ஸ் கதைகளுமே ஒன்றுக்கொன்று தொடர்பில்லாப் பாணிகள் என்பதால் - மூன்றையும் ஒரு சேர வண்ணத்தில் பார்க்கப் போவது ஒரு அதிரடி அனுபவமாக இருக்குமென்பது உறுதி ! மூன்றிலுமே, டீம் டெக்ஸ் முழு பலத்தோடு பிரசன்னமாவதால், சுவாரஸ்ய மீட்டர் உச்சத்தில் நிற்பது நிச்சயம் ! And by the way - தல தாண்டவமாடும் இந்த லயன் இதழ் # 250-க்கு ஒரு பொருத்தமான பெயராக suggest பண்ணுங்களேன் ? ஏதேனும் ஒரு 'பளிச்' பெயர்சூட்டும் நண்பருக்கு ஒரு வித்தியாசமான பரிசு இம்முறை  ! டெக்சின் கதாசிரியர் போசெல்லியிடம் ஆடோகிராப் பெற்றோரு டெக்ஸ் இதழை வரவழைத்துத் தருவதாக உள்ளோம் ! So அந்த சிந்தனைக் குதிரைகளை தட்டி விடலாமே guys ?

சென்ற பதிவின் பெரும்பான்மைத் தீர்மானம் கார்ட்டூன் ஸ்பெஷல் மட்டுமாவது இந்தாண்டுக்கே இருக்கட்டுமே என்றிருப்பதால் - OH YES !! என்று தலையாட்டுகிறேன் ! இந்தாண்டில் காமெடி கோட்டா சற்றே பலவீனமாய் இருப்பது நிஜமே என்பதால் - ஒரு ஜாலி-ஜாலி இதழைத் தயாரித்தால் போச்சு ! திட்டமிடலுக்கு அவகாசம் எடுத்துக் கொள்கிறேன் - அட்டகாசமான அறிவிப்போடு வரும் பொருட்டு ! அதன் மத்தியில் இந்த கார்ட்டூன் ஸ்பெஷல் இதழுக்கும் ஒரு பெயரை யோசித்து வையுங்களேன்  ? See you around folks ! Have an awesome day!

Friday, April 24, 2015

வேங்கையின் விஸ்வரூபம் !

நண்பர்களே,

வணக்கம். ஒவ்வொரு பால்யத்து தீபாவளியின் போதும் பண்டிகை சார்ந்த எதிர்பார்ப்போடு நாட்களைக் குஷியாய்க் கடத்துவதும்; வெடி வாங்குவது, துணி வாங்குவது என உற்சாக மீட்டரின் துள்ளலோடு திரிவதும், ஒவ்வொரு புது நாளின், புது அனுபவங்களையும் ஏகாந்தமாய் உணர்வதும் - ஒரு வழியாக D -DAY புலரும் சமயம் சந்தோஷத்தில் தலை கால் புரியாது ஆடுவதும் தவறாத jolly நிகழ்வுகள் !! ஆனால் மூக்குக்குக் கீழே கம்பிளிப்பூச்சி போலொரு ரோமக்கற்றை அரும்பத் தொடங்கிய நாள் முதலாய் - 'இதுலாம் பொடிப் பசங்களுக்கு..!' என்ற கித்தாய்ப்போடு அந்தப் பரபரப்புக்கு விடை கொடுத்ததே யதார்த்தம் ! சில பல யுகங்களாய்த் தோன்றும் இத்தனை ஆண்டுகளுக்குப் பின்னே, ஒரு கால இயந்திரத்தினில் ஏறிப் பின்னோக்கிச் சென்று, அந்நாட்களது அதே ஆனந்தத்தை ; உற்சாகத்தை, அனுபவிக்க கடந்த 75+ நாட்களொரு வாய்ப்பாக அமைந்தன என்றால் - எல்லாப் புகழும் - மின்னும் மரணத்துக்கும், அதன் நாயகனுக்கும், அதன் பின்னணிகளான உங்களுக்குமே !  !! 

நிறையப் பேசி விட்டோம் ; நிறைய எழுதியும் விட்டேன் - so இந்த முயற்சியின் பின்னணி பற்றியோ, அதன் பணிச்சுமைகள் பற்றியோ நிச்சயமாய் நான் மேற்கொண்டு எழுதப் போவதில்லை ! ஞாயிறன்று உங்கள் ஒவ்வொருவரின் முகங்களிலும் வியர்வைக்கு மத்தியில் மிளிர்ந்த அந்த ஆயிரம் வாட்ஸ் பிரகாசம் சொன்ன கதைகளும், இங்கே பதிவாகியுள்ள பாராட்டுப் பிரவாகங்களும், மின்னஞ்சலில் வந்துள்ள எண்ணச் சிதறல்களும் - "மின்னும் மரணம்" an absolute smash hit என்பதை சந்தேகமறப் பறைசாற்றியான பின்னே, பின்னணிக் கஷ்டங்கள் அத்தனையும், போன இடமே தெரியவில்லை !! இந்த அன்பையும், சந்தோஷங்களையும், பெருமிதங்களையும் தரிசிக்க ஏழு சமுத்திரங்களையும் கூடத் தாண்டலாம் என்ற எண்ணம் தான் மேலோங்குகிறது !

ஞாயிறின் உற்சாகப் பொழுதைப் பற்றி நண்பர்கள் இங்கும், இன்ன பிற தளங்களிலும் அமர்க்களமாய் பதிவு செய்திருக்கும் நிலையில் திரும்பவும் அதைப் பற்றி நான் வண்டி வண்டியாய் எழுதுவதை விட - இந்தவொரு விடுமுறைப் பொழுது எனக்குள் விதைத்துள்ள சிந்தனைகளைப் பற்றிப் பேசுவது இன்னமும் பொருத்தமாக  இருக்குமென்று தோன்றியது ! But before I ramble on, அன்றைய தினத்தை ஒரு குட்டித் திருவிழாவாக்கிய நண்பர்களைப் பற்றிக் குறிப்பிடாது நகர்வது நியாயமாகாது ! கிட்டேயும், தூரமுமான ஊர்களிலிருந்து புறப்பட்டு வந்திருந்த நமது நண்பர்களின் மத்தியில், சேந்தம்பட்டி கோஷ்டி அதிரடிப் பிரவேசம் செய்திட, இதுவொரு formal புத்தக வெளியீட்டு விழா என்ற தோரணை துளி கூட இல்லாது - ஜாலியான நண்பர்கள் சங்கமமாகவே காட்சி தந்தது ! சயனித்துக் கொண்டிருந்த புத்தக விழாவே நம் ரகளைகளில் லேசாக எழுந்து அமர்ந்தது என்று சொல்லலாம் ! NBS வெளியீட்டின் உச்சத்துக்குப் பின்பாக நண்பர்களின் ஜாலிக் கச்சேரிகளை ரசிக்கும் வாய்ப்பில்லாது போயிருந்த என் தந்தைக்கு - ஞாயிறின் உற்சாகம் வார்த்தைகளில் விவரிக்க இயலா ஒரு மிகப் பெரிய பூஸ்ட் ! முத்து காமிக்ஸின் துவக்க நாட்களில் இது போலெல்லாம் எந்தவொரு நிகழ்வுக்கோ; வாசகர்களுடனான குறைந்தபட்ச interaction-களுக்கோ துளி கூட வாய்ப்பில்லாத நிலையில் - இன்றைய அமளி-துமளிகள் அவருக்குக் கட்டுக்கடங்கா சந்தோஷம் தரும் தருணங்கள் ! 


இரண்டாயிரம் ரூபாய்க் கட்டணத்தில் ஒரு அழகான indoor அரங்கம் இரண்டு மணி நேர அவகாசத்துக்குக் கிடைக்கப் பெற்ற நிலையில் யாருக்கும் இடைஞ்சல்களின்றி, பக்கத்து ஸ்டால்களின் கோபப் பார்வைகளை சம்பாதிக்காது குப்பை கொட்ட முடிந்தது நமது நல்யோகமே ! பத்திரமாய்ப் பார்சலுக்குள் பதுங்கியிருந்த இதழினை வெளியீட்டு வேளையில் unveil செய்யும் வரைக்கும் அது வாசகர்களின் கண்களில் லேசாய்க் கூடச் சிக்காது இருந்துள்ளது இதுவே முதல் முறை எனும் போது எதிர்பார்ப்புகளின் அளவுகள் எப்போதையும் விட இம்முறை அதிகமிருப்பதை என்னால்   நன்றாகவே உணர முடிந்தது ! NBS இதழும் சரி ; LMS இதழும் சரி, நண்பர்கள் ஸ்டாலுக்கு வருகை தருவதற்கு முன்பாகவே கூரியரில் இல்லம் தேடிப் பயணித்திருந்ததால் அந்நேரங்களில் அந்த X-Factor மிஸ்ஸிங் என்று நினைத்தேன் ! ஆனால் இம்முறை வெளியீட்டு தினம் ஒரு ஞாயிறாய் அமைந்ததாலும்  சரி ; பணியின் கடுமையின் காரணமாய் தயாரிப்பை சீக்கிரமாய் முடிக்க இயலாது போனதாலும் சரி - இந்த surprise சாத்தியம் கண்டது !






படித்த கதை தான் எனும் போது இந்த இதழின் சுவாரஸ்யமே தயாரிப்பிலும், அட்டைப்படத்திலும் தான் மையல் கொண்டிருக்கும் என்பதைப் பச்சைக் குழந்தை கூட யூகித்திருக்கும் ! So ராப்பரை தரிசிக்கும் வரை நண்பர்கள் பலருக்கும் வயிற்றுக்குள் பட்டாம்பூச்சிகள் டான்ஸ் அரங்கேற்றம் கண்டு கொண்டிருக்கும் என்பதையும் யூகிப்பதில் சிரமம் தான் எது ? பார்சலைப் பிரித்த கணம் நண்பர்களின் கண்களில் சந்தோஷம் வேகமாய்ப் பரவுவதைப் பார்க்கும் வரைக்கும் எனக்குள் ஒரு மௌனமான பயம் இருந்தது என்பதை சொல்லியாகணும் ! தினமும் பார்த்துக் கொண்டே இருக்கும் எனது கண்களுக்கு சுந்தரத் தோற்றம் தந்த நம் உடைந்த மூக்காரின் டிசைன் - உங்களுக்குப் பிடிக்காது போய் விட்டால் - மொத்தக் கதையும் கந்தலாகிப் போய் விடுமே என்ற பயத்தில் நியாயம் உண்டு தானே ? NBS-ன் ராப்பர் 'ஆகா-ஓகோ' ரகமாய் இல்லாது போனாலும், அன்றைய பொழுது நமது மறு வருகையின் ஆரம்ப காலகட்டம் என்பதாலும், அந்த இதழ் நமக்கு ஒரு மெகா path breaker என்பதாலும் பெரிதாய் உதை வாங்காது தலை தப்பியிருந்தது ! ஆனால் மின்னும் மரணமோ அத்தகைய சலுகையை எனக்குத் தரவல்லதல்ல என்பதும் ; பிழைகளுக்கு மன்னிப்பே இராது என்பதும் அப்பட்டமாய்த் தெரிந்தது ! "தளபதிக்குத் துரோகம் செய்து விட்டான் !" என்ற சாத்துக்கள் கிட்டும் வாய்ப்பு ஒருபக்கமெனில் - ஆயிரம் ரூபாய்க்கான இதழ் என்றான பின்னே 'பிம்பிலிக்கா பிலாக்கி' என்று அட்டைப்படம் பல்லை இளித்தால் ஆங்காங்கே உள்ள கொத்தவால் சாவடிகளில் அழுகிய தக்காளிகளுக்கு கடும் டிமாண்ட் எழுந்து விடாதா ? 

நம் அலுவலகத்துக்கு வந்திடும் காமிக்ஸுக்கு சம்பந்தம் இல்லா நபர்களிடம் ஓசையின்றி இந்த டிசைனைக் காட்டி அவர்களது feedback களைச் சேகரிக்கவும் செய்தேன் ; ஆனால் அதில் கிடைத்த தெளிவை விட குழப்பமே ஜாஸ்தி ! "ஷேவிங் பண்ணாம இருக்காரே அண்ணாச்சி.....இவரைப் போய் அட்டையிலேயா போட போறீங்க ?" என்று ஒருத்தர் கேட்டு வைக்க - இன்னொருவரோ - "அட..ஆயிரம் ரூபாய் புக்குங்குறீங்க ......நல்லா கலர் கலரா டிசைன் போடாம என் இப்டி லைட் கலர்லே டிசைன் ?" என்று புளியைக் கரைத்து விட்டார் ! இன்னொருத்தரோ..."இந்த பிள்ளைய அட்டைலே போடலாம்லே அண்ணாச்சி ? " என்று சில்க்கைக் குறிப்பிட்டுக் கேட்டார் ! 'அட போங்க சாமிகளா .....ஓவராய் யோசனை கேட்டால் ஆணியே பிடுங்க முடியாது !' என்ற தீர்மானத்தில் எங்கள் ரசனைகள் + பொன்னனின் திறமைகள் மீது நம்பிக்கை வைத்து இந்த டிசைனைக் கரை சேர்த்தோம் ! அது தவறல்ல என்பதை உங்கள் ஆரவாரங்கள் உணர்த்திய கணமே என் தோள்களின் மீதிருந்ததொரு சுமை விலகியது போல் உணர்ந்தேன் ! உட்பக்கங்களின்   அச்சு decent ஆக வந்திருந்ததாலும், ராப்பருக்கு ஏகப்பட்ட ஜிகினா வேலைகள் செய்திருந்ததாலும் - தளபதியின் ஆற்றலோடும், கதையின் வீரியத்தோடும் அவை கூட்டணி சேரும் போது என் சிரத்துக்கு சேதாரமிராது என்பது புரிந்தது ! 

நண்பர்களின் பிரதிகளை அவரவர் கைகளில் ஒப்படைக்க, அவர்களோ மைக்கைத் தூக்கி என் தந்தையிடமும், என்னிடமும் ஒப்படைத்து விட்டனர் ! என் தந்தை பிசியாக இருந்த நாட்களில் சிவகாசியின் அச்சுத் தொழில் சங்கத்தில் பதவிகள் வகித்தவர் என்ற முறையில் மேடைகளில் பேசியது உண்டு ; புரட்சித் தலைவர் M.G.R அவர்களைக் கொண்டு நடத்தியதொரு கூட்டமெல்லாம் கூட எனக்கு நினைவில் உள்ளது ! So அவர் ஜாலியாகப் பேச ஆரம்பிக்க, நானோ பின்னாடி ஒரு சேரைத் தேடிப் பிடித்துக் கொண்டு பதுங்கி விட்டேன் !

"நண்பர்களே" என்று பேனாவைப் பிடிப்பதோ - கீ-போர்டைத் தட்டுவதோ சுலபமான வேலைகள் எனும் போது மைக்குக்கு முன்னே 'பெபெபே ' படலம் நடத்துவானேன் என்ற முன்ஜாக்கிரதை தான் ! ஆனால் நண்பர்கள் விடாப்பிடியாய் கோர்த்து விட, அன்றைய தினமொரு அழகான நாள் என்பது புரிந்ததன் பலனாகவோ - என்னவோ  ஒரு சொற்பொழிவை எப்படியோ ஆற்றோ ஆற்றென்று ஆற்றித் தள்ளினேன் !






ஒரு மாதிரியாய் மைக்கின் முன்னே சொதப்பாது தப்பிய சந்தோஷமும், இதழ் பெற்ற பாராட்டுக்களும் ஒன்று சேர, மதிய உணவிற்கு அருகாமையிலிருந்த உணவகத்துக்கு மண்டையைப் பிளக்கும் வெயிலில் நடை போட்ட போது கூட 'ஜில்'லென்றதொரு உணர்வே மேலோங்கி நின்றது ! உடன் வந்த அத்தனை நண்பர்களின் கைகளிலும் ஒன்றரைக் கிலோ "மி.மி" தகதகக்க - கைக்குழந்தைகளைப் போல அவற்றைப் பத்திரமாய், பதவிசாய் அவர்கள் சுமந்து வந்ததே வீடியோப் பதிவுக்கு உகந்ததொரு காட்சி !! அரங்கில் இருக்கும் சமயமே, வண்டி வண்டியாய் க்ரூப் போட்டோக்கள் எடுத்துக் கொள்ளும் சமயமே   ; இதழைப் புரட்டிப் புரட்டி ரசிக்கும் சைக்கிள் கேப்பிற்குள் ஆன்லைன் சென்று பின்னூட்டங்கள் இட்டு வருவதும் நடந்து வந்ததால் - ஒரு லைவ் telecast பார்த்த உணர்வு சென்னைக்கு வந்திருக்கா நண்பர்களுக்குக் கிட்டியிருப்பது உறுதி !  



கிட்டத்தட்ட 45 பேர் அந்தக் குட்டியான ஹாலை நிரப்பிட, சந்தோஷமாய் சாப்பிடத் தொடங்கிய போது ரொம்பவே நிறைவாக இருந்தது ! சாப்பிட்டான பின்னே திரும்பவும் ஸ்டாலுக்குச் சென்றது ; அங்கே நண்பர்களோடு வழக்கம் போல கதை பேசியது ; வரக் காத்திருக்கும் திகில் இதழைப் பற்றியான கேள்விகளுக்கு மழுப்பலாய்ப் பதில் சொல்வது ; கார்ட்டூன் ஸ்பெஷல் பற்றி கிண்டிக் கிழங்கெடுக்க முயற்சித்த நண்பர்களுக்கு நம் பாணி பெவிகால் அல்வாவை பதிலாகத் தந்தது என எல்லாமே மதிய வெப்பத்தின் நடுவே அரங்கேறியது !


இரவு ரயிலைப் பிடித்து வந்திருந்த நண்பர்கள் தூக்கமின்மையால் தள்ளாட, உள்ளூர் நண்பர்கள் ஒவ்வொருவராய் விடை பெற, நானும், ஜூனியரும் என் தந்தை சகிதம் வீட்டுக்குப் புறப்பட்ட போது மணி நாலரையிருக்கும் ! ஜனவரியின் சென்னையைப் போலவோ ; ஈரோட்டின் பொழுதுகளைப் போலவோ நம் அரட்டைகள் இரவு வரைத் தொடர்ந்திட ஏப்ரலின் வெப்பம் இடம் தரவில்லை என்பதால் சீக்கிரமே கிளம்ப வேண்டியதாகிப் போனது ! அவகாசம் குறைவாக இருப்பினும், ஆனந்தம் நிறைவாக இருந்த திருப்தியோடு நாங்கள் வீடு திரும்பினோம் ! இன்னமும் கூடுதலாய் நண்பர்களை சந்திக்க வாய்ப்பிருந்திருக்கும் பட்சத்தில் அன்றைய தினம் இன்னமும் அட்டகாசமாய் அமைந்திருக்குமென்பதில் ஐயமேயில்லை ; ஆனால் இன்னும் கொஞ்சம் முன்கூட்டிய திட்டமிடலுக்கு நமது தயாரிப்பு schedule இடம் தந்திருக்கும் பட்சத்தில் - நமது பட்டாளத்தின் வலு கூடுதலாய் இருந்திருக்குமென்பது நிச்சயம் ! கடைசி வாரம் வரை 'இழுத்துக்கோ-பறிச்சுக்கோ' என்ற கதையாய் நாம் மல்லுக்கட்டி வந்ததில் தான் இரகசியம் எது ?! எது, எவ்விதம் இருப்பினும் துளியும் சந்தேகமின்றி இந்த ஞாயிறு நமக்கொரு 'அட்சய திரிதியை" தான் ! தெற்கத்தியர் தங்கத்தை ஒன்றரைக் கிலோப் பாளங்களாய் நாம் கையில் ஏந்த முடிந்துள்ள நாள் நமக்கு தங்கத் திருநாள் தானன்றோ ? Thanks ever so much for making that a sparkling sunday folks !! It was an absolute privilege catching up with you all ! 


Before I move on,  "முன்பதிவு செய்தவர்களுக்கு மட்டும் தானா dust jacket ? போஸ்டர் ? ; கடைகளில் வாங்குவோருக்கும் அதைக் கொடுத்தால் என்ன ?" என்ற கேள்விகள் எதிர்பார்த்தபடியே எழுந்துள்ளன ! இதற்கான பதில்களை நாம் எல்லோரும் தான் அறிவோமே ? However much I try - எல்லாத் தருணங்களிலும் நானொரு எடிட்டராக மாத்திரமே தொடர்வது நடைமுறை சாத்தியமில்லா விஷயம் ! சில சமயங்களில் நானொரு பதிப்பாளராகவும் ; வியாபாரியாகவும் இருக்கும் அவசியங்கள் எழத் தான் செய்கின்றன ! அது போன்ற சமயங்களில் இந்த மாதிரியான சிற்சிறு நெருடல்கள் நேர்வதை நானும் உணர்கிறேன் ! முன்பதிவு செய்யும் நண்பர்களுக்கும், கடைகளில் வாங்கும் நண்பர்களுக்குமிடையே நம் கண்களில் எவ்வித வேற்றுமைகளும் கிடையாது தான் ! ஆனால், இடையினில் ஒன்றோ - இரண்டோ விற்பனை மையங்கள் ஏஜெண்ட்களின் ரூபத்தில் இணைந்து கொள்ளும் பொழுது அவர்களது இலாபங்களும் picture-க்குள் வருவது தவிர்க்க இயலாது போகின்றனவே ? Maybe இனி வரும் நாட்களில் இது போன்ற முன்பதிவு இதழ்களுக்கு இரண்டல்லது,  மூன்று தவணைகளாய் முன்பதிவு செய்திடும் வாய்ப்புகளையும் செய்து பார்க்கலாம் - வாசகர்களின் சுமையை மட்டுப்படுத்தும் விதமாக !

ஞாயிறின் மீதான சிந்தனைகளில் லயிக்கும் போது ஒருசில விஷயங்கள் என் தலைக்குள் தோன்றின ! முன்செல்லும் பாதைக்கு அவை ரொம்பவே பயன்தரக் கூடுமென்பதால் அதைப்பற்றியும் கொஞ்சம் உரக்க சிந்திப்பதில் தப்பில்லை என்று பட்டது ! நமது மறுவருகையைத் தொடர்ந்தான  காமிக்ஸ் பயணத்தில் ஏதேனும் ஒரே ஒரு standout feature பற்றிக்  குறிப்பிட்டுச் சொல்லுமொரு அவசியம் எழுந்தால், வாசகர்களிடையே நிலவும் ஜாலியான நட்பைப் பற்றிய சிலாகிப்பே எனது தேர்வாக இருக்கும் ! இன்டர்நெட் , ஸ்மார்ட் போன் ; வாட்சப் ; வலைப் பதிவுகள் ; முகநூல் என  கருத்துப் பரிமாற்றங்களுக்கு இன்று ஏகப்பட்ட வாய்ப்புகள் இருப்பதால் "காமிக்ஸ் வாசிப்பு" எனும் ஒரு குடைக்குக் கீழே குழுமும் நண்பர்கள் அந்தப் பரிச்சயங்களை தம் வாழ்வுகளின் ஒரு சிறு அங்கமாக்கிக் கொள்வதைப் பார்க்கும் பொழுது  ரொம்பவே சந்தோஷமாக உள்ளது ! Of course - அவ்வப்போது சிற்சிறு உரசல்கள் ; கருத்து மோதல்கள் எழுவது சகஜமே - ஆனால், அவற்றைத் தாண்டிச் செல்லும் பக்குவங்களும் உங்களிடையே இருக்கும் என்பதில் எனக்கு சந்தேகமில்லை ! எப்போதும் நமது ஸ்டால்களில்  அல்லது, ஏதோவொரு  மரத்தடியில் நடக்கும் நமது புத்தக விழாச் சந்திப்பை இம்முறை ஒரு அரங்கினில் அரங்கேற்றிப் பார்த்த போது - இதனை கொஞ்சம் அடுத்தபடிக்குக் கொண்டு செல்வது ஒரு பயனுள்ள அனுபவமாய் இருக்குமென்பது புரிகிறது ! பால்யங்களை மீட்டெடுக்கும் முயற்சிக்கு மறுபதிப்புகள் உதவிடுகின்றன எனும் பொழுது  ; இன்றைய நமது இயந்திரத்தனமான வாழ்க்கைகளின் ஒரு அயர்ச்சியை லேசாகவேணும் போக்கிட இது போன்ற நண்பர்கள் சந்திப்புகள் ; வெளியூர் பயணங்கள் ; காமிக்ஸ் கலந்துரையாடல்கள் உதவக் கூடுமோ ? ஆண்டின் பிரதானப் பெருநகரத்துப் புத்தக விழாக்கள் எவை என்று பட்டியலிட்டால் (ஜனவரியின்) சென்னை விழா ; நெய்வேலிப் புத்தகக் கண்காட்சி ; ஈரோட்டுத் திருவிழா மற்றும் சேலத்து விழாக்கள்  தான் முன்நிற்கும் ! ஆண்டுக்கு ஏதேனும் ஒரு ஊரைத் தேர்வு செய்து கொண்டு அந்தப் புத்தக விழாவின் சமயம் அங்குள்ள ஒரு நல்ல ஹோட்டலில் ஒரு அரங்கை காலை 11 to  மாலை 5 வரை எடுத்துக் கொண்டு நமது சந்திப்புகளை நடத்திப் பார்த்தால் என்ன என்று நினைத்தேன் ? நண்பர்களைப் பேசச் சொல்லிக் கேட்க இம்முறையே விருப்பம் கொண்டிருந்தேன் ; ஆனால் நேரமின்மையால் அது சாத்தியமாகவில்லை ! நமக்கே நமக்கென ஒரு அரங்கு கிட்டும் போது - பிறருக்குத் தொல்லை ; நம் கச்சேரிகளைக் கண்டு புகார் செய்யும் அக்கம்பக்கத்துக் கடைக்காரர்களின் கோபக்கணைகள் ; அடுத்த முறை ஸ்டால் கிடைக்காதோ என்ற பீதிகள் ஏதுமின்றி relaxed -ஆக இருக்க முடிவதை இம்முறை என்னால் உணர முடிந்தது ! மதிய உணவும் அங்கேயே என்ற ஏற்பாடோடு திட்டமிட்டால் - ஜாலி அரட்டைகள் ; காத்திருக்கும் புது வெளியீடுகள் பற்றிய முன்னோட்டங்கள் ; முன்செல்லும் பாதைக்கு உதவிடக்கூடிய நண்பர்களின் சிந்தனைகள் ; சில ஜாலியான மலரும் நினைவுகள் என்று நிறைய விஷயங்களுக்கு நேரம் கிட்டுமல்லவா ? Without overdoing it - ஆண்டுக்கு ஒரே ஒரு முறை மட்டும் இப்படியொரு சந்திப்பை plan பண்ணினால் என்ன guys ? நமது பயண இலக்கு சுவாரஸ்யமே எனினும், அதன் பொருட்டு நாம் ஒன்றிணைந்து செய்யும் இந்தப் பயணமும் கூட அதே அளவுக்கு சுவாரஸ்யம் தான் என்பது நிதரிசனமாய்த் தெரியும் போது - why don't we give it a try ?

கனவாய்த் தோன்றி ; கனவு இதழாய் உருமாறி விட்டுள்ள மின்னும் மரணம் இப்போது history என்று ஆகி விட்ட நிலையில் - "அடுத்து என்ன ?" என்ற கேள்வி நீங்கள் எழுப்புவதற்கு முன்பாகவே என் தலைக்குள் நர்த்தனம் புரியத் தொடங்கி விட்டது ! "XIII ; இரத்தப் படலம் ; இரத்தக் கோட்டை" என்றெல்லாம் நண்பர்களின் வோட்டுக்கள் பதிவாகிடுவது எனக்குத் தெரிகிறது - ஆனால் நிஜத்தைச் சொல்வதானால் அவற்றுள் எனக்கொரு சுவாரஸ்யத்தை வளர்த்திடவே முடியவில்லை ! எப்போதாவது சாப்பிட்டால் தித்திக்கும் மைசூர்பாகை தினசரி டிபன் ஆக்கிப் பார்க்கும் தப்பைச் செய்ய வேண்டாமே என்ற எச்சரிக்கையுணர்வு + மின்னும் மரணம் அளவுக்கு மேற்சொன்ன கதைகளில் (at least எனக்கு மட்டுமாவது) ஈர்ப்பு குறைவே  என்பதும் காரணங்கள் ! (கோயம்புத்தூர் பக்கமாய் "பணால்" என்று ஏதோ வெடிக்கும் ஓசை கேட்பது எனக்கு மட்டும் தானா ??) தவிர, இறுக்கமான களங்களுக்குள் திரும்பவும் புகுந்திட நம் வண்டியில் தற்காலிகமாகவாவது 'தம்' இல்லை என்பதும் சாயம் பூசா நிஜம் ! ஏதேனும் ஒரு ஜாலியான சூப்பர்-ஹிட் கதைத் தொடர் - அது கார்ட்டூனாக இருந்தாலும் சரி ; சூப்பர்-ஹீரோ சப்ஜெக்டாக இருந்தாலும் சரி ; டிடெக்டிவ் ரகமாக இருந்தாலும் சரி - கண்ணில்படும் சமயம் அடுத்த மெகா திட்டமிடலை வைத்துக் கொள்வோமே ?! உங்களிடம் அதற்கான suggestions ஏதேனும் இருப்பின், I would be more than happy to lend my ears ! திரும்பவுமொரு மறுபதிப்புக் குதிரையில் ஏறி இந்த மெகா சவாரிகள் வேண்டாமே - ப்ளீஸ் !

"தில் இருந்தால் திகில் உண்டு"....என்ற tagline சகிதம் நாம் கட்டவிழ்த்துள்ள புதுக் கதைவரிசைகளும் ஒரு பொறுமையான காத்திருப்பின் பலனே ! பேய்-பிசாசுக் கதைகள் ; த்ரில்லர் கதைகளின் ரசிகர் என்ற முறையில் "திகில்" இதழை தட்டி எழுப்பிக் கொண்டு வரக் கோரி ஜூனியர் எடிட்டர் என்னிடம் நிறையவே கோரிக்கை வைத்திருந்தார் ! ஆனால் உருப்படியாய் கதைகளைத் தேடித் பிடிக்காது - உள்ளதைக் கொண்டே வடை சுட எனக்குப் பிரியம் இருக்கவில்லை என்பதால் அவனுக்கும் அல்வா கிண்டி வந்தேன் !   சமீபத்திய புதிய பதிப்பகத்தின் சந்திப்பைத் தொடர்ந்து இதற்கான சில கதவுகள் திறந்துள்ளதால் - திகில்-சீசன் 2 வரும் ஜனவரி முதல் அரங்கேறிடுகிறது ! 'முழு வண்ணத்தில்' என்பதை மட்டும் இப்போதைக்குச் சொல்லிக் கொள்கிறேன் ; மற்ற எல்லாமே - நவம்பரின் ட்ரைலர் படலத்தின் போது ! அதே போல இந்த சீசன் 2 - சரியாக ஜனவரி 2016-டிசம்பர் 2016 வரையிலுமான காலகட்டத்துக்கு மாத்திரமே ! புதுசாய் ஒரு கதைவரிசையைத் தொடங்கி விட்டு, அப்புறமாய் கதைப்பஞ்சத்தின் காரணமாய் அதனில் உப்மா கதைகளைப் போட்டு ரொப்பும் வேலைகள் நிச்சயமாய் இராது ! தற்போது 12 கதைகள் என் தேர்வில் உள்ளன - இம்முயற்சிக்கு  நியாயம் செய்யும் விதமாக ! So they will be the backbone of Season-2 ! தொடரும் நம் தேடல்கள் மேற்கொண்டு (நல்ல) கதைகளை கரைசேர்த்தால் - maybe  அதன்  ஆயுள் நீண்டிடலாம் !

And இறுதியாக - கார்ட்டூன் ஸ்பெஷல் பற்றி ! 'ஜனவரியின் சென்னை விழாவின் போது ஓட்டை வாய் உலகநாதனாய் அவதாரம் எடுத்ததொரு கணத்தின் வெளிப்பாடான இந்தக் கார்ட்டூன் ஸ்பெஷல் பற்றி அப்புறமாய் வாயே திறக்கக் காணோமே ?; - என்ற கேள்விகளோடு நண்பர்கள் என்னை இம்முறை சுற்றி வளைக்காத குறை தான் !  ஆனால் என் மௌனத்தின் காரணமே - இந்தாண்டின் நமது எகிறும் பட்ஜெட் தான் ! சந்தாவுக்கு நெருக்கி ரூ.4000 + மி.மி.யின் பொருட்டு இப்போது ரூ.1000 எனும் போது - உங்கள் பர்ஸ்களுக்கு இந்தாண்டின் சேதாரம் இதுவரையிலுமே ரூ.5000 என்ற நிலையில் - மேற்கொண்டு "துட்டு..துட்டு.." என்று நச்சரிக்க ரொம்பவே உறுத்தலாய் உள்ளது ! அனைவரது ஆர்வங்களும் ஒரே நிலையில் இருப்பினும், அனைவரது  வசதிகளும் அதே ஒற்றுமையோடு இருத்தல் சாத்தியமாகாது எனும் நிலையில் - தினுசு தினுசாய் இதழ்களை வெளியிட்டு சிரமங்களை உண்டு செய்யத் தயக்கமாக உள்ளது ! இப்போதே 'ஆயிரம் ரூபாய்க்கு பொம்மை புக்கா ???' என்று எத்தனை இல்லங்களில் பறக்கும் பூரிக்கட்டைகள் தென்பட்டனவோ ?! இந்த நிலையில் கார்ட்டூன் ஸ்பெஷலுக்கென ஒரு தொகை + முத்து காமிக்ஸ் இதழ் # 350-ன் பொருட்டு இன்னொரு தொகை என்ற அவசியங்களை உருவாக்குவது சரியாகுமா ? தவிர, இப்போது தான் வேங்கையின் விஸ்வரூபத்துடன் மின்னும் மரணம் வெளிவந்துள்ள  நிலையில், ரொம்பவே சீக்கிரமாய் "என் பெயர் டைகர்" collection -ஐயும் கொணர்வது ஒரு வித overkill ஆகிடாதா ? பற்றாக்குறைக்கு அடுத்த 45 நாட்களுக்குள் 'தல'யின் தாண்டவம் வேறு - ரூ.450-க்குக் காத்துள்ளதையும் மறந்திடக் கூடாதல்லவா ? So ஓரிரு மாத இடைவெளிகளுக்குள் ரூ.1000 ; ரூ.450 ; ரூ.400 என்று சரமாரியாய்ப் போட்டுத் தாக்குவது  ; அதுவும் கௌபாய் கதைகளாகவே துவைத்துத் தொங்கப் போடுவது ஒ.கே. தானா ? என்ற சந்தேகம் என்னை போட்டு உலுப்பி வருகிறது! 'பேசாமல் 2016-ன் திட்டமிடல்களோடு இவற்றை சேர்த்துக் கொண்டாலென்ன ?' என்ற சிந்தனை மெலிதாக எட்டிப் பார்க்கத் தான் செய்கிறது ! "பணம் பிரச்சனையல்ல" என்று நீங்கள் எண்ணினால் கூட - இந்த "கௌபாய் overkill " பற்றி சற்றே சிந்தித்துப் பாருங்களேன் ? 2015-ல் எஞ்சியிருக்கும் பட்டியலில் கௌபாய் கதைகள் இதோ :

டெக்ஸ் வில்லர் - 

  • 330 பக்கங்கள் + 220 பக்கங்கள் + 110 பக்கங்கள் (இதழ் # 250) 
  • 330 பக்கங்கள் (பனிமலையில் ஒரு புதையலைத் தேடி )
  • 220 பக்கங்கள் - "எமனின் எல்லையில்"

மேஜிக் விண்ட் : 96 பக்கங்கள்

பௌன்சர் : கறுப்பு விதவை - 112 பக்கங்கள்

கமான்சே - 
88 பக்கங்கள் (சாத்வீகமாய் ஒரு சிங்கம் + சீற்றத்தின் நிறம் சிகப்பு)

Maybe this can be an option : 2015-க்கு கார்டூன் ஸ்பெஷல் இதழினை மட்டும் திட்டமிட்டுக்  கொண்டு - "என் பெயர் டைகர்" collection -ஐ 2016-க்குக் கொண்டு சென்றாலென்ன ? நிதானமாய் சிந்தித்துச் சொல்லுங்களேன் guys - அதன் பின்னே ஒரு முடிவெடுப்போமே?!

புறப்படும் முன்பாய் துவங்கிய இடத்துக்கே மீண்டுமொருமுறை பயணிப்பதை தவிர்க்க இயலவில்லை ! மேஜையின் ஒரு ஓரத்தில் மினுமினுக்கும் THE COMPLETE SAGA-வைப் பார்க்கும் போது 'ஷப்பா..!!; என்றதொரு பெருமூச்சு எழுவதை உணர முடிகிறது ! அது பணி முடிந்ததன் நிம்மதிப் பெருமூச்சா..? பட்ட சிரமங்கள் வீண் போகவில்லையே என்ற சந்தோஷப் பெருமூச்சா ..? அந்தப் பரபரப்புகளை miss செய்திடும் ஆதங்கப் பெருமூச்சா..? அல்லது - இனியொரு சவால் இது போல் அமையத் தான் செய்யுமா ? என்ற ஏக்கப் பெருமூச்சா..?  தூக்கத்தில் விடை தேடிச் செல்கிறேன் !! மீண்டும் சந்திப்போம் !! Have a great weekend !