கரம் கொடுப்போமே - ப்ளீஸ் ?

நண்பர்களே!

வணக்கம் !! சில மாதங்களுக்கு முன்னே நமது நண்பர் கரூர் ராஜசேகருக்கு திடீர் உடல்நலக் குறைவு ஏற்பட்டதைத் தொடர்ந்து, நம் நண்பர்களில் பலரும் அவருடைய சிகிச்சைக்கு தம்மால் இயன்ற நிதியுதவி +  அக்கறையான விசாரிப்பு + பிரார்த்தனைகளைச் செய்து நேசக்கரம் நீட்டியது நாமறிந்ததே!  அதன் பலனாய் இன்று அவருடைய உடல்நலம் வெகுவாகத் தேறியிருப்பதாக நமக்கு செய்திகள் வரும்போது இந்த "பொம்மை புக் " நட்பு வட்டத்தின் மகத்தான ஆற்றலை எண்ணி ஆயிரத்துஒன்றாவது தடவையாக வியக்காமல் இருக்கமுடியவில்லை!! சென்றமுறை ஈரோடு புத்தகவிழாவில் நாம் சந்தித்த அதே பழைய ராஜசேகராக மீண்டும் தன் உற்சாகப் பங்களிப்பை எதிர்வரும் நாட்களிலும் நண்பர் செய்யவார் என்று உங்கள் அனைவரையும் போலவே நானும் ஆவலோடு காத்திருக்கிறேன்!

நண்பர்கள் தம் நேசக்கரத்தை மீண்டும் ஒருமுறை நீட்டிடும் வேளை இதுவென்று தோன்றுகிறது! ஆனால், இம்முறை அது நம் நண்பர்களில் வேறொருவருக்கானது!

கோவையைச் சேர்ந்த நண்பர் 'ப்ளைஸி பாபு'வை உங்களில் பலரும் அறிவீர்கள் என்றே நினைக்கிறேன்...!  சில நாட்களுக்கு முன்பு நண்பருக்கொரு ஆண்குழந்தை பிறந்திருக்கிறது. ஓரிரு நாட்களுக்கு முன்பு  குழந்தையைப் பரிசோதித்த டாக்டர்  அந்தக் குழந்தையின் இருதயத்தில் பிரச்சினை இருப்பதைக் கண்டறிந்திருக்கிறார்! டாக்டருடைய பரிந்துரையின்பேரில் சிகிச்சைக்காக இன்று திருவனந்தபுரத்திலுள்ள SCT hospital-க்கு குழந்தையை கொண்டு சென்றிருக்கிறார்கள் ! அங்கே குழந்தையைப் பரிசோதித்த டாக்டர்கள், வரும் வெள்ளியன்று வருகை புரியவிருக்கும் சிறப்பு மருத்துவர் குழுவுக்காகக் காத்திருக்கும்படி அறிவுறுத்தியிருக்கிறார்களாம்!!

நண்பர் கரூர் குணா மூலமாக இந்தச் செய்தியை கேள்விப்பட்ட நம் நண்பர்கள் பலரும் தங்களால் இயன்ற உதவியை ஏற்கனவே செய்யத் தொடங்கிவிட்டதாக செய்தி வந்திருக்கிறது! நமது தளத்தில் இந்தச் செய்தி பரிமாறப்படுமானால் இன்னும் கூடுதலாக அவருக்கு உதவிகள் கிடைக்கக்கூடுமே என்று தோன்றியதாலேயே இந்தப் பதிவு!!

நண்பரின் குழந்தைக்கு நல்லமுறையில் சிகிச்சை பெற்று பூரண சுகம் பெற எல்லாம் வல்ல இறையருளைப் பிரார்த்திப்போம்!

நண்பருக்கு உதவிட நினைப்பவர்கள் பின்வரும் வாட்ஸ்அப் எண்களில் தொடர்புகொண்டு அவருடைய வங்கிக் கணக்கு விவரங்களைப் பெற்றிடலாமே ! 

கரூர் குணா : 9786822001

ஈரோடு விஜய் : 7598325050

கிட்ஆர்டின் கண்ணன் : 9787222717

சிறு துளியும் பெரு வெள்ளமாகிடக்கூடும் தானே folks ? நண்பரின் இந்த இக்கட்டான தருணத்தில், நம்மால் இயன்றதைச் செய்திட முயற்சிப்போமே ?  நிதியில் உதவிடும் நிலையில் இல்லாதோர், தத்தம் பிரார்த்தனைகளில் அந்த மழலையை கொணர்ந்தாலும் கூட அதுவுமே   நிச்சயம்  உதவிடும் என்பது எனது நம்பிக்கை ! கரம் கொடுப்போமே - ப்ளீஸ் ?