கச்சேரி தொடரட்டும் !!

நண்பர்களே,

வணக்கம். செப்டெம்பர் புலரவிருப்பது நமது இதழ்களோடுமே என்பதில் மகிழ்ச்சி எனக்கு ! இன்றைய பகலில் உங்கள் கூரியர்கள் சகலமும் கிளம்பி விட்டன என்பதால் - நாளைய தினத்தை "டப்பா உடைக்கும் படலத்தோடு" துவங்கிடலாம் ! And ஆன்லைன் லிஸ்டிங்கும் தற்போது ரெடி ; so சந்தாவில் இல்லாத நண்பர்களுமே இதழ்களைக் கைப்பற்ற விரையலாம் !! 

http://lioncomics.in/monthly-packs/432-september-2017-pack.html

ஏற்கனவே ஒரு வண்டி பில்டப் தந்தாகி விட்டது என்பதால் - இனி  இதழ்களைப் பற்றிய உங்கள்  அலசல்களை ரசிப்பது தான் எனது ஜோலியாக இருக்கப் போகிறது  ! தோர்கல் இதழின் அட்டைப்படமும் சரி ; உட்பக்கங்களும் சரி - ரொம்பவே வித்தியாசமான வர்ண கலவையில் இருப்பதை பார்க்கப் போகிறீர்கள் ! அதிலும் இரவில் அரங்கேறும் காட்சிகள் கதைகளினூடே தலை காட்டும் பொழுது செம dark shades-ல் கலரிங் செய்துள்ளனர் ! அச்சில் அதை சமாளிக்க ஏகமாய் முயற்சித்துள்ளோம் ! அதற்கு நேர் மாறாய் SMURFS கதையில் முழுக்க முழுக்க செம டாலடிக்கும் கலர்கள் என்பதால் - ஓவராய் கண்ணை உறுத்தக் கூடாதே என்ற எண்ணத்தில் அங்கேயும் இயன்ற பல்டிக்கள் அடித்துள்ளோம் ! எத்தனை காலமானாலும் புதுசு புதுசாய் விஷயங்களைக் கற்றுக் கொள்ளும் நிலை மாத்திரம் மாறவே மாறாது போலும் ! இரு இதழ்களையும் புரட்டும் பொழுது கண்களுக்கு இதமாகத் தெரியின் - குக்கரைப் போல விசில் விடுவோம் - நிம்மதிப் பெருமூச்சோடு ! 

TEX & கிராபிக் நாவல் black & white-ல் கம்பீரமாய்த் தயாராகியுள்ள ! And ஏற்கனவே சொன்னது போல "என் சித்தம் சாத்தானுக்கே சொந்தம்" பற்றிய உங்களின் எண்ணங்கள் ; விமர்சனங்கள் ; அபிப்பிராயங்கள் என்னவாக இருக்கப் போகிறதோ ? என்ற பரபரப்பு டெண்ட் போட்டுக் குடியேறியுள்ளது எனக்குள் ! As always - நெளிந்து நிற்கும் விரல்களோடு ஜூரிக்களின் தீர்ப்புக்காகக் காத்திருப்பேன் ! அப்புறம் இம்மாத surprise பற்றிய உங்களின் எண்ணங்களையும் அறிந்திட சுவாரஸ்யம் எனக்குள் ! 

அப்புறம் கடந்த பதிவில் "இரத்தக் கோட்டை" சார்ந்த அலசல்கள் ; quiz shows  என்று  நீங்கள் தெறிக்க விட்டுக் கொண்டிருந்ததை வாய் திறந்து ரசித்துக் கொண்டிருந்தேன் !  ஒவ்வொரு இதழுக்கும் இது போல் treatment கிட்டின் - இந்த "பொம்மை புக்" முத்திரை சீக்கிரமே காணாது போய் விடுமென்பேன் !! Awesome guys !!

சரி...நாளை முதல் செப்டெம்பரின் கச்சேரி தொடங்கட்டுமே !! Let the music begin folks !!

Our Stall # 97

மாண்புமிகு அமைச்சர் நமது மதுரை ஸ்டாலில் ! 

கதையொன்று..பில்டப் கணிசம்....!

நண்பர்களே,

வணக்கம். விதம் விதமாய்க் கதைகள்; தொடர்கள் என்று பார்த்து விட்டோம் ! க்ரீன் மேனரின் மாறுபட்ட களங்களும் சரி; XIII–ன் தேடல்களும் சரி, நமக்குப் பரிச்சயமே! So ஒவ்வொரு மாதமும் கதைகளுள் பணியாற்றும் போதே-

- இது ஹிட்!

- இது மொக்கை!

- இது யோகமிருந்தால் தேறிடும்!

என்று ஏதேனுமொரு தீர்மானத்துக்கு வரச் சாத்தியமாகிடும்! And பத்துக்கு ஒன்பது தடவைகள் அந்த யூகங்கள் கிட்டத்தட்ட  சரியாகவே இருந்திடவும் செய்யும் ! ஆனால்-

எப்போதாவது ஒரு கதை தரும் அனுபவமானது – ‘நாயகன்‘ கமலஹாசனைப் பார்த்து க்ளைமேக்சில் கேட்கும் குழந்தையைப் போல – ”நீ தேறும் ரகமா? தேறா ரகமா?” என்று கேட்டிடச் செய்யும்! தற்போதுமே எனக்கு அது போலொரு அனுபவம்! ‘தென் பாண்டிச் சீமையிலே‘ என்று இளையராஜாவின் கரகர குரலில் பேக்கிரவுண்ட் இசை எழாதது மாத்திரமே குறைச்சல்; மற்றபடிக்கு அச்சாய் அந்தக் கேள்வியைக் கேட்பது போலவே இருக்கிறது – காத்திருக்கும் “என் சித்தம் சாத்தானுக்கே சொந்தம்” கிராபிக் நாவலைப் பார்த்து!

‘கிராபிக் நாவல் என்றால் என்ன?‘ என்ற கேள்வி அவ்வப்போது தலைதூக்குவதும், ஆளாளுக்கொரு விளக்கம் சொல்வதுமே நம் மார்க்கெட்டில் மாத்திரமின்றி – உலக காமிக்ஸ் அரங்கின் பல களங்களிலுமே வாடிக்கை தான்! ஆனால் செப்டம்பர் 1ம் தேதி “இது தான்டா மாப்பு- அக்மார்க் கிராபிக் நாவல்” என்று சொல்லிட நமக்கொரு வாய்ப்பு இருப்பது நிச்சயமென்றே சொல்வேன்!

‘ஓவர் பில்டப்‘ உடம்புக்கு ஆகாது என்பதை நிறையத் தருணங்களில் அனுபவத்தில் உணர்ந்தவன் என்ற விதத்தில் ரொம்பவே பீலா விடுவதில் இப்போதெல்லாம் எனக்கு நாட்டமிருப்பதில்லை! ஆனால் இது போன்ற கதைகளுள் பணியாற்றி விட்டு வெளிவரும் முதல் தருணத்தில் தலைக்குள் ஒரு தாங்கொணா வேகம் உருவாகியிருக்கும் – “ஆஹா... இதை நம்மவர்கள் படித்து அபிப்பிராயம் சொல்ல வேண்டுமே?! அது வரை ஆர்வத்தை அடக்குவது எவ்விதம் சாமி?” என்ற ரீதியில்! To cut a long story short – நேற்றிரவு தான் லயன் கிராபிக் நாவலின் இதழ் # 3-ன் மீதான பணிகளை நிறைவு செய்தேன்! “ஒரு முடியா இரவு” பாணியில் இதுவுமொரு b&w போனெல்லி ஆக்கமே! “Le Storie” என்ற தொடரில் அவர்களே சமீப ஆண்டுகளில் வெளியிட்டு வரும் இந்த கிராபிக் நாவல்கள் ஒவ்வொன்றும் ஒரு திசையில் பயணமாகும் விண்கல் எனலாம் ! இந்திய சிப்பாய்க் கலகப் பின்னணியில் ஒரு கதை; ஜப்பானிய சாமுராய் நாட்களைச் சார்ந்ததொரு கதை; 1920-களின் மாஃபியா ராஜ்யத்திலிருந்த அமெரிக்கர்களைப் பின்னணியாக்கியொரு கதை; பிரெஞ்சுப் புரட்சியின் நாட்களில் சொல்லப்பட்டதொரு கதை – என கற்பனைகளின் சிறகுகளை அவர்கள் அகலமாய் விரித்துப் பறக்க முற்பட்டு வருகின்றனர்! இதில் எதுவுமே ஒரு டாக்குமென்ட்ரி படத்தைப் போல வரலாற்றைச் சொல்லும் படைப்புகளாக இருப்பதில்லை என்பது தான் ஸ்பெஷாலிட்டியே! களங்கள்... பின்னணிகள் உலகின் பல நிஜ நிகழ்வுகள் என்றிருந்தாலும் – சொல்லப்படும் கதைகளோ கற்பனை மனிதர்களைக் கொண்டு; அவர்களது ஆசாபாசங்களைக் கொண்டு!

“என் சித்தம் சாத்தானுக்கே சொந்தம்” கூட 1970-களின் பிற்பகுதியை backdrop ஆகக் கொண்டு பிளவுபட்டுக் கிடந்த பெர்லின் நகரில் நடக்குமொரு உணர்வுப் போராட்டத்தைச் சொல்ல விழையும் ஆல்பமே! ‘நுவா‘ பாணி (Noir tales) என்று சொல்லப்படும் ஒருவித இரு்ணட கதைக்களம் தான் இது; ஆனால் அழுகாச்சிக்கு இங்கே  வேலை கிடையாது ! முறையிலாக் காதல்; காமம்; துரோகம்; மரண பயம் என பல இறுக்கமான உணர்வுகளை இந்தக் கதை மாந்தர்கள் அனுபவிப்பதை – ஏற்கனவே அகன்ற விழிகள் இன்னமும் அகலமாகிட ரசித்தேன்! கதையின் ஒரு பிரேமை நுணுக்கமாய் கவனிக்கத் தவறினாலுமே ஏதேனுமொரு முக்கிய சமாச்சாரத்தைக் கோட்டை விட்டது போலாகி விடுமென்பது போல கதாசிரியரும், ஓவியரும், பின்னியுள்ள  ஒரு taut வலை 110 பக்க நீளத்திற்கு நீண்டு செல்கிறது. கதையில் பணியாற்றி முடித்த கணத்தில் எனக்குள் எழுந்த முதல் சிந்தனையானது – ‘தொடரும் நாட்களில் ஒரு ரகளையான அனுபவம் ; முற்றிலும் contrasting சிந்தனைகளின் சிதறல்கள் காத்துள்ளது!‘ என்பதாக மாத்திரமே இருந்தது! “ஙே... இது தான் உன் ரசனை லட்சணமாக்கும் சாமி?” என்ற கேள்விகளுக்கும் பஞ்சமிருக்கப் போவதில்லை; அதே சமயம் –“ரொம்ப ரொம்ப மாறுபட்டதொரு தேர்வு!” என்ற ஆச்சர்யக்குறிகளுக்கும் குறைச்சல் இருக்கப் போவதில்லை என்றே நினைக்கத் தோன்றியது! எண்ணிக்கைகளில் எந்த அணி பாண்டிச்சேரி ரிசார்ட் அணியாக இருக்கப் போகிறது?... எந்த அணி கோட்டையிலுள்ள அணியாக இருக்கப் போகிறது என்ற கேள்வி மட்டுமே நமது செப்டம்பரை சுவாரஸ்யமாக்கிடவுள்ளது என்பேன்! “எ.சி.சா.சொ.” – புஸ்வாணமா? ஊசிப் பட்டாசா? யானை வெடியா? விடை காண ஆவலை அடக்க முடியவில்லை! ஒன்று நிச்சயம் - செப்டெம்பரில் நமது பொருளாளரும் சரி ; இணைய ஆராய்ச்சியில் அடித்து தூள் கிளப்பும் மாயாவி சிவா & நண்பர்களும் சரி - ரொம்பவே பிசியாக இருக்கப் போகிறார்கள் என்பதில் எனக்கு ஐயமே இல்லை ! இதோ அதன் அட்டைப்பட முதல் பார்வை & உட்பக்க டீசருமே!

அட்டைப்படம் – ஒரிஜினலின் ஈயடிச்சான் காப்பியே – சிற்சிறு வர்ண மெருகூட்டல்களோடு! உட்பக்கச் சித்திரங்கள் வில்லியம் வான்சின் classic ஸ்டைலிலோ; க்ரிஸ்டியன் டினாயெரின் சமகாலப் பரபரப்பு பாணியிலோ இராது – ஆனால் கதை நடக்கும் காலங்களையும், சூழல்களையும் நம் கண்முன்னே கொணர்ந்து நிறுத்தும் மாயாஜாலத்தைச் செய்கிறது! கதையில் பவனி வரும் பாத்திரங்களும் அழகுப் போட்டிக்குச் செல்லக் கூடியவர்களல்ல – மாறாகக் கரடுமுரடான தோற்றம் கொண்டவர்களே! ஆனால் நிஜ வாழ்க்கைகளில் லார்கோக்களின் மிடுக்குகளும்; ஷெல்டனின் ஸ்டைல்களும்; ஷானியாவின் வனப்புகளும் சாத்தியமாவது பெரும்பாலுமே நமது வண்ணக் கனவுகளில் மட்டும் தான் எனும் போது – இந்த சுமார் மூஞ்சிக் குமார்களும், குமாரிகளும் கதையோடு நம்மை  ஒன்றிடச் செய்வது போல் எனக்குத் தோன்றியது! ஸ்க்ரிப்டைப் பொறுத்த வரை ஒரிஜினல் இத்தாலிய வரிகள் சாட்டையடிகளாக இருந்திருக்க வேண்டும் என்பேன்; ஆங்கிலத்தில் மொழிமாற்றம் கண்டு நம்மைச் சேர்ந்த போதுமே அதன் வீரியம் அப்படியே இருந்தது! தமிழாக்கத்தில் இயன்றளவு நியாயம் செய்ய நிறைய மெனக்கெட்டிருக்கிறேன்; கதை தேறிடும் பட்சத்தில் – ஒரு சந்தோஷப் பெருமூச்சை விட மூச்சைப் பிடித்துக் காத்துக் கொண்டிருக்கிறேன்! So ஒரு பில்டப்பின் பின்னணி இது தான் !  

மேஜையின் ஒரு பக்கம் கிராபிக் நாவல் கிடக்க, ‘தம்‘ பிடித்துக் கொண்டு சீரியஸான கதையோட்டத்தோடு நானும் ஓடுவது அரங்கேறிக் கொண்டிருந்த அதே வேளையில் – மறுகோடியில் ‘கிக்கிப்பிக்கி‘ என்று சிரித்துக் கொண்டே சுற்றி வரும் நமது ஸ்மர்ஃப்கள் ‘போஸ்‘ கொடுத்து நின்று வந்தது தான் எனது இம்மாத highlight! கார்ட்டூன்கள் எப்போதுமே டென்ஷன்களை பறக்கச் செய்யும் பார்ட்டிகள் என்றாலும் – ஸ்மா்ஃப் கதைகள் (என்னைப் பொறுத்த வரையிலாவது) சந்தோஷ உச்சங்கள் எப்போதுமே! அந்த நீல உலகில் குடியிருக்கப் பீம்பாய்கள்; மங்குனிகள்; பந்தாக்கள்; ஜீனியஸ்கள்; உம்மணாம் மூஞ்சிகள்; ஆல்-இன்-ஆல்கள் நாம் தினந்தோறும் சந்தித்திடும் ஜனங்களின் வார்ப்புகள் தானே? மனித குணங்களை; நமது நடைமுறைகளில் உள்ள பழக்கவழக்கங்களை பகடி செய்ய கதாசிரியர் இந்த நீலப் பொடியர்களை எவ்விதம் லாவகமாகப் பயன்படுத்தியுள்ளார் என்பதை   ரசிக்க நேரமெடுத்துக் கொண்டால் – இந்தத் தொடரோடு நாம் ரொம்பவே நெருக்கமாகிட முடியுமென்பேன்! “டாக்டர் ஸ்மர்ஃப்” - with due respects to all the good doctors – செம ரகளையானதொரு சிரிப்புத் தோரணம்! And இதோ – அதன் ஒரிஜினல் அட்டைப்படம்; அவர்கள் வடிவமைத்துத் தந்துள்ள ஸ்மர்ஃப்ஸ் எழுத்துருவோடு!

செப்டம்பரின் எஞ்சி நிற்கும் இதழானது நமது இரவுக் கழுகாரின் “கடல் குதிரையின் முத்திரை”! ரொம்ப ரொம்ப காலம் கழித்து ஒரு classic டெக்ஸ் சாகஸத்தை ரசிக்கும் அனுபவம் காத்துள்ளதென்பேன்! TEX-ன் கதை வரிசையினில் இது துவக்க நம்பர்களுள் உள்ளதொரு சாகஸம்! பிதாமகர் G.L. போனெல்லியின் படைப்பு என்ற விதத்தில் கதையில் பரபரப்பு அனல் பறக்கிறது! நமது வறுத்தக்கறிப் பிரியர் கார்ஸன் ரேஞ்சர் அலுவலகத்தில் மேஜராக யூனிபார்மில் காட்சி தருவதும்; கதைநெடுகிலும் கட்டம் போட்ட சட்டையில் சுற்றி வருவதும் ஒரு பக்கமெனில் – இரவுக் கழுகாரும், இளவல் கிட்டும் தெறிக்கவிடும் ஆக்ஷன் blocks மறுபக்கம்! ஏகப்பட்ட வசனங்கள்; ஏகப்பட்ட ஆக்ஷன் என்று தடாலடியாய் பயணிக்கும் இந்த ஆல்பத்தின் அட்டைப்படம் இதோ!

போனெல்லியின் அட்டைப்படமொன்றை நமது ஓவியரைக் கொண்டு வரைந்து முன்பக்க ராப்பராக்கியுள்ளோம்! Old is still very much Gold என்பதை நிரூபிக்கக் களமிறங்கும் இந்த இதழ் – செப்டம்பரின் முதல்வனாகிட இயலுமா? பதில் தொடரும் வாரங்களில் தெரிந்திடும் தானே?

Moving on – 2018-ன் அட்டவணையில் ஈரோட்டுச் சந்திப்பின் போது நான் கிரகித்துக் கொண்ட சில சமாச்சாரங்களையும்; சமீப நாட்களில் உங்களிடம் கேட்டிருந்த கேள்விகளுக்குக் கிட்டிய பதில்களையும்; விற்பனை stats-களையும் கொண்டு சன்னமான சில மாற்றங்களைச் செய்து ஒரு இறுதி வடிவம் தந்து முடித்திருக்கிறேன். தொடரும் நாட்களில் – “பஜ்ஜி தின்ன பயங்கரவாதி”; “போண்டா படலம்” என்று தலைக்குள் தினுசு தினுசாய் பெயர்களை ஓட்டிப் பார்த்து – தலைப்பு சூட்டும் பணியானது அரங்கேறிடும்! அதன் பொருட்டு தேர்வான கதைகளின் கதைச் சுருக்கங்களைக் கற்றையாகப் printout எடுத்து வைத்துக் கொண்டு – விட்டத்தை நோட்டமிட்டபடிக்கு சுற்றி வருகிறேன்! பெயர்கள் set ஆன பிற்பாடு கேட்லாக்கைத் தயாரிக்க வேண்டிய பணி மாத்திரமே பாக்கியிருக்கும்! So- அக்டோபரில் தீபாவளிக்கு முன்பாக – you will have all the details! முழுசாய் 365 நாட்களுக்கானதொரு அட்டவணை என்பதால் ஒன்றுக்குப் பத்துத் தடவை – நூறு தடவை என ஒவ்வொருவரது பார்வைக் கோணங்களிலும் பார்க்க முயற்சித்து வருகிறேன்! ‘’The Perfect Combo” என்பது மட்டும் ஒரு தடவையாவது சிக்கிவிடுமென்ற நம்பிக்கையில் எனது முயற்சிகள் தொடருகின்றன! பார்க்கலாமே?!

Before I sign off – செப்டம்பர் 1-ல் மதுரையில் துவங்கவிருக்கும் BAPASI புத்தக விழாவினில் நமது ஸ்டால் நம்பர் 97 என்ற சேதியைப் பகிர்ந்து கொள்கிறேனே? சென்றாண்டினில் மதுரையின் விற்பனை ரொம்பவே encouraging ஆக இருந்ததாய் ஞாபகம்! இம்முறையும் அந்த அதிர்ஷ்டம் தொடர வேண்டுமென்ற பிரார்த்தனையோடு விடைபெறுகிறேன் guys! Have a lovely weekend! Bye for now! See you around soon !

ஒரு காமிக்ஸ் கேரவனின் கதையிது...!

நண்பர்களே,

வணக்கம். சாப்பாட்டு மேஜையில் குந்தியிருக்கும் போது இன்னொரு இட்லி வேண்டுமென்றால் கூட புகை சமிக்ஞையில் தகவல் அனுப்பலாமா ? என்று நினைக்கத் தோன்றுகிறது! ‘புதுசாய் பேப்பர் ரகம் வந்திருக்கிறது அண்ணாச்சி !‘ என்று அப்பிராணியாய் வந்து சேரும் சேல்ஸ் rep-களிடம் கூட அதிரடியாய் ஏதாவது பஞ்ச் டயலாக் பேசும் ஆசை நாவில் நடனமாடுகிறது! வரிசையில் நின்று கொண்டிருக்கும் போது, நம்மூர்களுக்கே உரித்தான அந்த ‘முண்டியடித்து முன்னே போகும் கழக‘ உறுப்பினர்களைப் பார்த்தால் நடுமூக்கில் ‘நச்‘சென்று குத்துவோமா ? என்ற பரபரப்பு தொற்றிக் கொள்கிறது! (என்ன ஒரே பிரச்சனை – ‘மு.மு.போ.க.‘ உறுப்பினர்கள் முக்கால்வாசி நேரங்களில் மூணு புல் மீல்ஸ்களை,தனியாளாய் முழுசாய் ரவுண்ட் கட்டியடிக்கும் ஆகிருதியோடு இருப்பதால் நம்மள் கி பரபரப்பை சற்றே பொத்தி வைக்க வேண்டியிருக்கிறது!!) கடந்த 2 வாரங்களாய் நமது ‘தல‘ சார்ந்த தேடல்களில் லயித்துக் கிடந்ததன் விளைவுகள் தான் வருடந்தோறும் repeat ஆகிடும் இந்த பேமானித்தனங்கள் என்பது இந்நேரத்துக்குப் புரிந்திருக்குமே guys? என்ன தான் “நடுநிலை அவசியம்”; “ஓவராய் ஒரே நாயகருக்கு பில்டப் தரப்படாது”; “flagship hero-வாக இருப்பினுமே சராசரியாகவே நடத்திட வேண்டும்” என்றெல்லாம் மனதில் திடமாகக் கட்டளைகளைப் பதித்துக் கொண்டே தேடல்களுக்குள் புகுந்தாலும் – அந்த மஞ்சள் சொக்காய் சற்றைக்கெல்லாம் ஏதோ மெஸ்மரிசம் செய்து விடுகிறது! கடைவாயில் ஜலம்... 'லப்டப்பில்' ஒரு வேகம் என்ற கெமிக்கல் ரியாக்ஷன்கள் தாமாகவே கடைவிரிக்கத் தொடங்கி விடுகின்றன! "சரி - இன்னுமொரு ‘தல‘ புராணத்தை ஆரம்பித்து விட்டானாக்கும் ?" என்ற கொட்டாவிகளுக்கு அவசியமில்லை ; simply becos – இந்தப் பதிவானது ரொம்பவே நடைமுறை சார்ந்ததொன்று! சில பல விசில்கள் எழுந்திடவும் முகாந்திரங்கள் இருக்கப் போகின்றன ; சில பல வதனங்கள் கார்வண்ணமாகிப் போகவும் சமாச்சாரமிருக்கப் போகிறது - தொடரும் பத்திகளில்! So சுவாரஸ்யமான சில நடைமுறை நிஜங்களைப் பார்க்கலாமா?

நெய்வேலி, கோவை & ஈரோடு – என 3 பெருநகரங்களில் நமது காமிக்ஸ் கேரவன் ரவுண்டடித்து விட்டு ஊர் திரும்பியுள்ளது. வழக்கமாய் ஒவ்வொரு புத்தக விழாவின் இறுதியிலும், வரவு-செலவுக் கணக்குகள்; sales ரிப்போர்ட் என்ற ரீதியில் பார்த்து விட்டு அடுத்த வேலைக்குள் மூழ்கிப் போவது வழக்கம். ஆனால் இம்முறை அடுத்தடுத்த 3 விழாக்களின் இறுதியில் விற்பனையில் ஏதேனுமொரு pattern தென்படுகிறதாவென்று பார்க்க நினைத்தேன்! So மொத்தமாய் விற்பனை விபரங்கள்; திரும்பி வந்த ரிட்டன் புக்குகள் என சகலத்தையும் தலைப்புவாரியாக; genre- வாரியாகப் பாகுபடுத்திப் பார்த்த போது ராட்டினத்தில் ஏறியமர்ந்தது போலொரு உணர்வு! So இந்தக் காமிக்ஸ் கேரவன் சொல்லவிருக்கும் கதையே இவ்வாரத்துப் பதிவு! 

‘நல்ல சேதி... கெட்ட சேதி‘ என்றதொரு கார்ட்டூனை நாம் ரசித்திருக்கிறோம்! அதே பாணியில் என்னிடமும் சில நல்ல சேதிகள் + சில கெட்ட சேதிகள் உள்ளன! Let’s start off with the good ones.....!!

TEX!!! மங்களகரமாய் ஆரம்பிக்க இந்த மஞ்சள் சட்டை மாவீரனைத் தவிர்த்து வேறு யார் பொருத்தமான தேர்வாக இருக்க முடியும்? Without an iota of doubt - இன்னமும் விற்பனைகளில் முதல்வராய்த் திகழ்வது இந்த அதிரடி ரேஞ்சரே !! என்னதான் புதுசாய் நாயகர்கள் ; தொடர்கள் ; களங்கள் என்று நாம் 'தம்' பிடித்து முயற்சித்தாலும், இந்த டெக்ஸாஸ் சிங்கத்திடம் அத்தனையுமே மண்டியிட்டே தீர வேண்டியுள்ளது ! ஆண்கள், பெண்கள், சிறுசுகள், பெருசுகள் என்ற பாகுபாடின்றி இரவுக்  கழுகாரின் ரசிகர்கள் என்பது மீண்டுமொருமுறை நிரூபணமாகியுள்ளது ! "அட்டையை மாற்றினால் கதைகளுக்கிடையே வேற்றுமை ஏது ?" என்றதொரு விமர்சனம் முன்பு டெக்ஸுக்கு எதிராய் வைக்கப்பட்டிருந்தது நிஜமே ; ஆனால் 'நீ அட்டையை மாத்துவியோ ; சட்டையை மாத்துவியோ - நாங்க பட்டையைக் கிளப்பாம விடமாட்டோம் ' என்று TEX & co சொல்லாது சொல்வதை இந்த விற்பனை நம்பர்கள் புரியச் செய்கின்றன guys !   இந்த விற்பனைப் புள்ளிவிபரங்கள் என் தலைக்குள் லேசாய்க் கூடுகட்டியிருந்த சிலபல சிந்தனைகளையுமே  சுத்தம் செய்ய உதவியுள்ளன ! 

“ஓவர்டோஸ்” என்றதொரு அசுரன் நாளாசரியாய் டெக்ஸ் & கோ மீதான நமது ஈர்ப்பை மட்டுப்படுத்தி விடுவானோ என்ற பயம் என்னுள்ளே கணிசமாய்க் குடியிருந்தது நிஜமே! ஆனால் அது கடுகளவும் முகாந்திரமிலாப் பயம் மட்டுமே என்பதை நம்பர்கள் அடித்துச் சொல்கின்றன! நிறைய Tex டைட்டில்கள் இருந்தாலும், பரவலாய் சகலத்திலும் விற்பனை இருப்பது தெரிகிறது! அதற்காக பல நூறு இதழ்கள் விற்பனை என்றெல்லாம் நான் அள்ளி விட மாட்டேன்; ஆனால் நாங்கள் அனுப்பிடும் பிரதிகளுக்கும், வாபஸ் வந்திடும் பிரதிகளுக்குமிடையிலான ratio டெக்ஸின் விஷயத்தில் ரொம்பவே மனதுக்கு இதமளிப்பதாய் உள்ளன! 

அதே போல ‘பணால்‘ என்று போட்டுத் தள்ளப்பட்டிருக்கும் மாயை # 2 – விலைகள் சார்ந்தது! “60 ரூபாய் டெக்ஸ் – 120 ரூபாய் டெக்ஸை விடவும் ஜாஸ்தி விற்கக் கூடும்; So குறைந்த விலைகளில் நிறைய இதழ்கள் இருப்பின் – புத்தக விழா விற்பனைகளுக்கு உதவிடும்” என்ற ரீதியில் நான் நினைப்பதுண்டு! ஆனால் கையில் தூக்கினால் அது ஓமக்குச்சி நரசிம்மனாய்க் காட்சி தருவதை விடவும் குண்டு கல்யாணமாக வலம் வருவதையே ஜனம் விரும்புகிறது என்பதும் புரிகிறது! அதிலும் நமது hardcover இதழ்களுக்குக் கிட்டிடும் சிலாகிப்புகள் ஜிலீர் ரகம்! குறிப்பாக “சர்வமும் நானே” & “லயன் # 300” இம்முறை amongst the bestsellers! 

இன்னமுமொரு சுவாரஸ்யம் - “நிலவொளியில் நரபலி” கண்டு வரும் விற்பனை சார்ந்தது! அந்த ‘மினி‘ சைஸில் வண்ணம் என்ற பாணிக்கு நிரம்பவே ரசிகர்கள் இருப்பது புரிகிறது! இது பற்றி நமது கோவைக் கவிஞருமே ஏற்கனவே என்னிடம் பேசியிருந்தார் ! எப்போதுமே ஒரு விதமான பாக்கெட் சைஸுக்கான மோகம் நம்மிடையே மங்கவே மங்காது போலும்! மண்டைக்குள் சிந்தனைச் சக்கரங்கள் சுழன்றிடும் நேரம் folks!

‘தல‘க்கு அடுத்தபடியாக ஆக்ஷன் நாயகர்களுள் இம்முறை களத்தை அதிரச் செய்திருப்பது 3 சர்ப்ரைஸ் புது வரவுகள்! முதலாமவர் செம்பட்டைத் தலை ஜேசன் ப்ரைஸ்!! இவரது முப்பாக fantasy த்ரில்லரானது நிறைவான விற்பனையைச் சந்தித்துள்ளது! இதில் கவனிக்கப்பட வேண்டிய விஷயமொன்று இருப்பதாக நான் நினைக்கிறேன்! ‘டெக்ஸ்‘ என்ற பெயர் 32 ஆண்டுகளாய் நம் அணிகளில் ஒலித்து வருவது மாத்திரமின்றி; அவ்வப்போது மீடியா கவரேஜிலும் அடிபடும் பெயர் என்ற வகையில், புத்தகவிழா வருகையாளர்களுக்கும் பரிச்சயம் இருப்பதில் வியப்பில்லை தான்! ஆனால் ‘ஜே.பி்.‘ என்ற பெயர் சமீப காலத்து அலசல்களில் மாத்திரமே பிரசித்தம் பெற்றதொரு பெயரல்லவா? So – அந்த அலசல்களைப் பற்றி அரசல் புரசலாகவாவது கேட்டிருக்கும் வாய்ப்பு நமது காமிக்ஸ் ஆர்வல வட்டத்தைத் தாண்டிய casual readers-க்கும் கிட்டியிருக்கும் போல் படுகிறது ! அல்லது ஒருவிதத் திகிலூட்டும் அந்த அட்டைப்படங்களும், கதைகளின் பெயர்களும் புது வாசகர்களை ஈர்த்திருக்குமா ? சரியாக பதில் சொல்லத் தெரியவில்லை எனக்கு ! 

விற்பனையில் கலக்கியுள்ள புதுவரவு # 2 பிணம் புதைக்கும் வெட்டியான் புள்ளையாண்டானே! சமீப வரவு ; சமீப இதழ் என்ற ப்ளஸ் பாய்ண்ட்கள் மட்டுமே காரணமா ? அல்லது நமது அலசல்களிலும், FB ; வாட்சப் தகவல் பரிமாற்றங்களிலும் தெறித்த positive விமர்சனங்கள் இந்த விற்பனை வெற்றிக்குக் காரணமா? – சொல்லத் தெரியவில்லை! எது எப்படியோ – “தி அண்டர்டேக்கர்” புத்தக விழாக்களிலும் ஸ்கோர் செய்துள்ளார்! சற்றே offbeat நாயகர்களுக்கு என்றைக்குமே ஒருவித ஈர்ப்பு இருந்திடும் போலுள்ளது ! 

# 3 யாரென்பதில் – வியப்பில்லை தான்! அந்த மோனாலிசா ரகப் பார்வையுடனான அட்டைப்படமும் சரி, Lady S என்ற அந்தப் பெயரின் வசீகரமும் சரி, இந்த recent இதழைப் புத்தக விழாக்களில் ஒரு ஆதர்ஷக் கொள்முதல் பொருளாக்கியுள்ளது புரிகிறது ! தொடரும் இதழ்களிலும் அம்மணி சாதித்தால் கொங்கு மண்டலத்தில் இவருக்கொரு சிலை நிறுவ கடும் போட்டி நிலவுமென்பது நிச்சயம் ! "கண்டதும் காதல்" ரகம் - ஷானியாவைப் பொறுத்தமட்டிலும் ! 

“Decent Show” என்று சொல்லும் விதமாய் களம் கண்டுள்ளோர் நால்வர் – ஆக்ஷன் ஹீரோக்களின் பட்டியலிலிருந்து! முதலாமவர் நமது ‘W’ குழும முதலாளியான “லார்கோ வின்ச்”! ‘வித்தியாசமான கதை பாணி‘ என்ற முத்திரை இவருக்கு அழகாக set ஆகி விட்டதென்றே சொல்லலாம் போலும் ; பரவலாக இவரது சாகஸங்கள் சகலமுமே decent ஆன விற்பனை கண்டுள்ளன ! தொடர்ந்து நாலைந்து ஆண்டுகளாய் எல்லாப் புத்தக விழாக்களிலுமே விரும்பி வாங்கப்படும் இதழாக இவரது ஆல்பங்கள் அமைந்து வருவது சந்தோஷமானதொரு நிகழ்வு ! கையில் துப்பாக்கியோ, கனைக்கும் குதிரைகளோ இல்லாது போனாலும், சில நாயகர்கள் சாதிக்கத் தடைகளில்லை போலும் !  Too bad – இவரது தொடரில் ஜாஸ்திக் கதைகள் மீதமில்லை!!

டீசண்ட் பார்ட்டி # 2 நமது ரிப்போர்ட்டர் ஜானி! இதழ்களைப் புரட்டுவோர்க்கு இந்தக் கதைகளின் அழகான சித்திர பாணி + கலரிங் பாணி வசீகரம் செய்கின்றனவோ; அல்லது வருஷமாய்ப் படித்துப் பழகியதில் இந்த டிடெக்டிவ் மீது ஒரு மையல் நிலைக்கிறதோ தெரியவில்லை – ஆனால் சோடை போகா கோட்டைச்சாமி இந்த பிரான்கோ – பெல்ஜிய ரிப்போர்ட்டர்! விற்பனையில் அதகளம் பண்ணுகிறாரென்று சொல்ல முடியாது ; but ஓசையின்றி நமது ரஹானே போல பணியைச் செய்து விட்டுக் கிளம்பிடும் ரகம் இவர் ! 

மிஸ்டர் டீசண்ட் # 3 – ‘கேப்டன் பிரின்ஸ்‘ & கோ. எப்போதுமே மிகைப்படுத்தலின்றி, தானுண்டு, தன் வேலையுண்டு என்று சுற்றி  வரும் இந்தப் பரட்டைத் தலைக் கேப்டன் சத்தமின்றிக் கைதட்டல்கள் பெற்றிருக்கிறார் புத்தக விழாக்களில் ! சூப்பர் கேப்டன்!

Last in the list - நமது fantasy நாயகர் தோர்கல் ! எப்போதுமே ஒரு மந்திரவாதி ; மாய மண்டலம் சார்ந்த கதைகளெனில் நமக்குள்ளே ஒரு சன்னமான லயிப்பு தொடரும் போலுள்ளது ; சிறுவயதுகளில் நாம் கேட்டும், படித்தும் வளர்ந்த அம்புலிமாமா கதைகளின் தாக்கமோ - என்னவோ ?!! அதன் பலனாய் தோர்கல் கதைகள் doing decently ok ! 

“சத்தமின்றி யுத்தம் செய்வதில்” மட்டுமல்ல; விற்பனையில் சாதிப்பதிலும் தான் கில்லாடியென்பதைப் பதிவு செய்திருக்கும் ட்யுராங்கோ தான் நம் சிலாகிப்பிற்கான அடுத்த நாயகர் ! அந்த ராப்பரா? கதை பாணியா? புத்தக வடிவமைப்பா? முதல் புரட்டலில் தட்டுப்படும் ஹாலிவுட்டின் க்ளின்ட் ஈஸ்ட்வுட் பாணியிலான கதைக்களமா ? – வாசகர்களை ஈர்க்கக் காரணமாகயிருந்தது எதுவோ தெரியவில்லை ; ஆனால் wow! என்று மட்டும் சொல்வேன் இவரது விற்பனைகளைப்  பார்த்து! ரொம்பவே low profile நாயகராக ட்யுராங்கோவை கதாசிரியர் சித்தரித்திருப்பினும், அந்த அலட்டலில்லா பாணிக்கும் ஒரு ரசிகர் வட்டம் set ஆகியுள்ளது புரிகிறது ! 

“Surprise pack” என்ற பட்டத்தை இந்த விழாக்களில் ஈட்டியுள்ள இதழ்கள் 2  ! முதலாவது  Jeremiah ! “குமுதம்” கேள்வி பதிலின் சிலாகிப்பு ; நமது விவாதங்களில் பட்டையைக் கிளப்பிய எண்ணச் சிதறல்கள்; FB-ல் செய்யப்பட்ட ஆராய்ச்சிகள் என நிறையக் காரணங்களின் பொருட்டு இந்த இதழுக்கு வெளிச்ச வட்டம் கிட்டியிருப்பது புரிகிறது ! So விற்பனையிலும் ஜெரெமயா கைததூக்கி நிற்பதில் சந்தோஷமே!!

Surprise # 2 - உங்களால் யூகிக்கவே இயலாவொரு இதழ் ! (எனக்கு மட்டுமாவது) டபுள் சந்தோஷம் – “விண்ணில் ஒரு வேங்கை” இதழானது சூப்பராக விற்பனையாகியுள்ளதன் பொருட்டு! யுத்தப் பின்னணியுடனான இந்தக் கதை 3 புத்தக விழாக்களிலுமே தெரியுள்ளது - ஆச்சர்யமூட்டும் விதத்தினில் !  அதை வாங்கிச் சென்றோருக்குமே மகிழ்வு இருந்திருப்பின் சூப்பர் தான்! பாகம் 2 & 3 வெயிட்டிங் பாபு... ‘ம்ம்ம்‘ என்று மட்டும் கண்ணசைத்தால் டெம்போ வைத்தாவது அம்மணியை அழைத்து வந்து விடுவேன்! ஏதோ பார்த்து பண்ணுங்க சாமி!

ஆக்ஷன் ரவுண்டப்பில் அடுத்தது மும்மூர்த்திகள் + கூர்மண்டையரின் progress report ! 

வழக்கம் போல நமது மின்சாரத் திருடர் மாயாவி doing good! ஆனால் முந்தைய ஆண்டுகளைப் போல “ஹாாா... மாயாவியா??” என்று நாற்கால் பாய்ச்சலில் ஜனம் துள்ளிக் குதிப்பது மட்டுப்பட்டு வருவது புரிகிறது! முன்பெல்லாம் புத்தக விழாவின் முதல் வாரயிறுதிக்கு மாயாவி ஸ்டாக் தீர்ந்திருக்கும்! ஆனால் இப்போது மாயாவிகாருவுமே வாபஸ் வருகிறார்! ஆச்சர்ய நிஜம் !

மாயாவிக்கே இந்தப் பாடெனில் பூப்போட்ட டிராயர்காரர் பாடு எவ்விதமோ? என்ற உங்கள் மைண்ட்வாய்ஸ் இங்கே கேட்கிறது! ஆனால் ஆச்சர்யம் கொள்ளும் விதமாய், மனுஷன் அத்தனை சொதப்பவில்லை! ஜானிக்காகவோ, ஸ்டெல்லாவுக்காவோ – விற்பனைகள் எதெற்கென்று தெரியவில்லை ; ஆனால்  படகு முழுகிடவில்லை என்பது மட்டும் கண்கூடு ! இன்னொரு ஜோடியான CID லாரன்ஸ் & டேவிட் தான் இந்த மூவரணியினுள் best இந்தாண்டு! யெஸ் – இவர்களது மறுபதிப்புகள் எல்லாமே ரொம்பவே neat விற்பனை கண்டுள்ளன இம்முறை ! Strong show from a strong pair !

சரி... மும்மூர்த்திகள் பற்றிச் சொல்லியாச்சு; கூர்மண்டையர் சேதி என்னவோ? என்று கேட்கிறீர்களா? ‘என்னமோ போடா மாதவா...!‘ ஒரு காலத்துக் குற்றச் சக்கரவர்த்தி இன்றைக்கு பென்னியிடம் உதை வாங்காத குறை தான்! மறுபதிப்புகளுள் இந்தாண்டினில்  – the least performing தொடர் ஸ்பைடர் தான்! பேந்தப் பேந்த விழிக்கிறேன்!

ஆக்ஷன் ப்ளாக் முடிந்து விட்டதால் அடுத்த ஸ்டாப் நேராக கார்ட்டூன் காலனி பக்கமாய்! And நீங்களொரு கார்ட்டூன் காதலராய் இருக்கும் பட்சத்தில் தரையில் உருண்டு புரண்டு குதூகலிக்க ஏகமாய் காரணங்கள் காத்துள்ளன! அதே சமயம் நீவிர் கார்ட்டூன்களின் காதலர்களல்ல எனில் தொடரும் பத்திகள் உங்களுக்கு வெறும் academic interest-க்கு மாத்திரமே ! 

Simply put - அடித்து தூள் கிளப்பியுள்ளன கார்ட்டூன் இதழ்கள் – புத்தக விழா விற்பனைகளில் ! விடாப்பிடியாய் கார்ட்டூன் கதைவரிசைகளில் நமது நேரங்களையும், கவனங்களையும் முதலீடு செய்ததற்கான பலன்கள் மெதுமெதுவாக துளிர்விடத் தொடங்குவது புரிகிறது ! Early days தான் - இருப்பினும், கார்ட்டூன்கள் பக்கமாய் தீர்க்கமான ஆதரவு தென்படுவது கலக்கலான சந்தோஷச் சேதி என்பேன் ! 

பட்டியிலில் உசக்கே நிற்பது வழக்கம் போலவே திருவாளர் லக்கி லூக் தான்! இவருமே ஆங்கில காமிக்ஸ் இதழ்களில், டி.வி. தொடர்களில், மீடியாவில் என ரவுண்ட் கட்டும் நாயகரென்பதால் விழாக்களுக்கு வருகை தருவோர் லக்கியின் கதைகளை ஆர்வமாய்த் தேர்வு செய்வதில் வியப்பில்லை! முழு வண்ணம் ; அந்த clean storylines ; வண்ணத்தில் மிளிரும் artwork என நிறைய ப்ளஸ்கள் இருப்பதால் -  புது வாசகர்களைக் கூட நொடியில் தோள் மீது கை போட்டு நண்பர்களாக்கி விடுகிறார் இந்த ஒல்லிக் cowboy ! And “தரைக்கடியில் தங்கம்” தான் எண்ணிக்கையில் best seller – இதுவரையிலான புத்தக விழா விற்பனைகளில்!

இரண்டாமிடத்திலிருப்பவர் நாலடி உயரம் கூடத் தேறாதொரு சுட்டிப் புயல்! Oh yes – அந்தப் பால் வடியும் பாலகன் பென்னியைக் கண்டவுடன் காதல் casual readers-க்கு! அழகான சித்திரங்கள்; வர்ணங்கள் என்று பென்னி நொடியில் சகலரையும் அரவணைத்துக் கொள்வதில் no surprises! இந்தாண்டின் விற்பனை சரவெடி ! 

மூன்றாமிடத்தில் இருப்போர் நிச்சயமாய் நீங்கள் எதிர்பார்த்திடக் கூடிய நாயகர்களல்ல! ‘ஏனோ தெரியவில்லை என்னால் இவர்களது தொடர்களோடு ஒன்றிடவே முடியவில்லை!‘ என நான் சந்திக்கும் வாசகர்கள் பரவலாய் ஸ்மர்ஃப்ஸ் பற்றிப் புகார் வாசிப்பதுண்டு! ஆனால் புத்தக விழாக்களிலோ  பரவலாய் இவர்களது எல்லா ஆல்பங்களுமே விற்று வருகின்றன ! அதிலும் "வானம் தந்த வரம்" செமையாக sales ! So இந்த நீலப் பொடியர்கள் நிஜமாகவே not bad at all ! மண்டையைச் சொறியும் படங்கள் ஒன் டஜன் !

சிரிப்பு போலீஸ் அடுத்த இடத்தில் உள்ளனர் – courtesy: சமீபத்து சிக் பில் ஸ்பெஷல் ! அந்த hardcover collection தரும் ஈர்ப்பா ? classic கதைகளின் சேகரிப்பென்ற காரணமா ? என்று காரணத்தைப் pinpoint செய்யத் தெரியவில்லை - ஆனால் விற்பனையில் தூள்!  ஒற்றை புக் கூட வாபஸில்லை என்ற பெருமையை ஈட்டியுள்ள இதழும் கூட இது ! ஆனால் இவர்களது மற்ற ஆல்பங்களின் விற்பனை சொல்லிக் கொள்ளும் ரகத்தில் இல்லை என்பது தான் புதிரே! “ஒரு பைங்கிளிப் படலம்” போன்றவையெல்லாம் பரிதாபமாய் விற்பனை கண்டுள்ளன!

‘ஒற்றை slot-க்கு ஓ.கே.! முதலுக்கு மோசமில்லை‘ என்ற வர்ணனை கேரட் மீசைக்காரருக்குப் பொருந்தும்! “கர்னல் க்ளிப்டன்” கதைகள் எல்லாமே மிதமான விற்பனை கண்டுள்ளன என்பதால் இவருக்குக் கல்தாவும் அவசியமில்லை ; இட அதிகரிப்புக்கும் முகாந்திரமில்லை என்றாகிறது ! Variety என்பதற்கேனும் இவர் நிச்சயம் அவசியம் என்பேன் ! 

அதே சமயம் “2018-ன் அட்டவணையில் maybe 2 ஸ்லாட்கள் தரலாமா?” என்ற ‘ரோசனையை‘ எனக்குத் தந்திருந்த ப்ளுகோட் பட்டாளத்திற்கோ just about average sales! ஏனோ தெரியவில்லை - இந்த யுத்த பூமியின் சிரிப்பு நாயகர்களுக்கு அவ்வளவாய் ரசிகர்கள் கிட்டவில்லை புத்தக விழாக்களிலாவது ! So ஒரு சீட்டே போதும்டா சாமி இந்த நீல உடுப்புப் போராளிகளுக்கு என்று நினைத்துக் கொள்ளத் தோன்றுகிறது!

And "விட்டேனா பார் ?!!" என்று விற்பனையில் பிரித்து மேய்ந்துள்ளனர் இரு “மதில் மேல் பூனை” பார்ட்டிகள்! நமது குள்ளவாத்து மந்திரியாரும் சரி; ரின்டின் கேனும் சரி- நிச்சயமாய் ஆளுக்கொரு ஸ்லாட்டைத் தக்க வைத்திட சகல தகுதிகளும் வாய்த்தவர்களே என்பதை நம்பர்கள் புரியச் செய்கின்றன! இரு நாயகர்களின் (!!) ஆல்பங்களுமே விற்பனையில் சோடை போகவில்லை என்ற ஆச்சர்யத் தகவல் கைவசம் !  Maybe நாலுகாலாரின் விற்பனையில் ஒரு பூனையின் பங்களிப்பு கணிசமாக இருக்கலாமோ? என்ற சந்தேகம் எழாதில்லை தான்; ஆனால் எது எப்படியோ ரின்டின் கேன் நிச்சயமாய் “அந்தப் பக்கமாய் போய் விளையாடுறா தம்பி” ரகமல்ல ! So தடை பல தகர்த்தெழுடா பையா!!

ஆக கார்ட்டூன் ரிப்போர்ட்களோடு நான் அடுத்ததாய்  ‘ஜம்ப்‘ செய்திடவுள்ளது கிராபிக் நாவல்கள் பக்கமாய்! “தேவ ரகசியம் தேடலுக்கல்ல” & “இரவே... இருளே.... கொல்லாதே” & “ஒரு முடியா இரவு” definitely not bad at all ரகத்தில் அடைக்கலம் காண்கின்றன! அதிலும் ”தே.ர.தே.” – has been a consistent performer ! அதே சமயம் “சிப்பாயின் சுவடுகள்”; “வானமே எங்கள் வீதி”; “பாதைகளும், பயணங்களும்” ஆல்பங்களெல்லாம் அட்டகாசமான பயணிகளாக இருந்து வருகின்றன! “ஓஹோ... இது தான் நெய்வேலியாக்கும்?”; “அட... இது கோவைங்களாண்ணா?”; “சொல்லவேயில்லை... இது தான் ஈரோடுன்னு”; என்று நயமாகக் கேட்டுத் தெரிந்து கொண்டு பத்திரமாய், துளிச் சேதமுமின்றி சிவகாசிக்குத் திரும்பி விடுகின்றன! So அற்புதமான travelers ! இந்தப் பட்டியலில் க்ரீன் மேனருமே அடக்கம் என்பது தான் கொடுமையே! எண்ட குருவாயூரப்பா!

ஆக ஒரு மாதிரியாய் progress (முன்னேற்றம்) காட்டியோரின் ரிப்போர்ட்களை வாசித்து முடித்த கையோடு இனி ரிவர்ஸ் கியர் போட்டுத் தாக்கும் நாயகர்கள் பக்கமாய் பார்வையைத் திருப்பும் துரதிர்ஷ்டப் பணிக்குள் நுழைகிறேன் ! Guys – இவை விற்பனை சார்ந்த புள்ளி விபரங்கள் மட்டுமே; So உங்களின் ஆதர்ஷ நாயகர்(கள்) தொடரும் சொதப்பல் பட்டியலில் இருப்பின் அதற்கென என்னைக் கோபிக்க வேண்டாமே ப்ளீஸ்? எனக்குமே இதுவொரு சங்கடமான பணியே என்பதை மறவாதீர்கள்!

“இரத்தக் கோட்டை” இம்மாத வெளியீடு என்பதோடு டைகரின் க்ளாசிக்களுள் ஒன்றும் என்பதால் ‘இ.கோ‘ விற்பனையில் (ஈரோட்டில்) அழகாய் சாதித்துக் காட்டியுள்ளது! ஆனால்... ஆனால்... ஆனால்... அதைத் தாண்டிய சகல டைகர் இதழ்களுமே தர்ம அடி வாங்கியுள்ளது தான் வேதனை! சரி... மார்ஷல் டைகர் பிடிக்கலியா? ....இளம் டைகர் கதைகள் அத்தனை ரசிக்கலியா? பரவாயில்லை தான்! ஆனால் “தங்கக் கல்லறை” கூட ஒற்றை இலக்க எண்ணங்களில் விற்பனையாகியிருப்பதைத் தான் ஜீரணிக்கவே முடியவில்லை! இளம் டைகர் கதைகளெல்லாம் - உப்ப் !!  Maybe புதிதான வாசகர்களுக்கு அந்த அழுக்கு முகமும், புழுதி மண்டலங்களும் ரசிக்கவில்லையோ – என்னவோ?? ரொம்பவே சங்கடமான நிலை!!

டைகரின் நிலை இதுவெனில் கமான்சே தொடர் படும் அல்லல்கள் சொல்லி மாளா ரகம்! இதுவரையிலான ஏழோ-எட்டு ஆல்பங்களிலும் தலா 3 அல்லது 4 பிரதிகளே விற்றுள்ளன ஒவ்வொரு விழாவிலும் ! யதார்த்தம்; மிகைப்படுத்தல் இல்லாக்களம்; ஹெர்மனின் சித்திர ஜாலங்கள் என்று ஏதேதோ ப்ளஸ்கள் இருப்பினும் இந்தத் தொடருக்கொரு ‘ஸ்டார் பவர்‘ இல்லாதது பெரும் குறையாகவே தென்படுகிறது போலும்! நேற்றைக்கு வந்த ட்யுராங்கோ கூட ஒரே ஆல்பத்தில் ஒரு ரசிகர் படையை உருவாக்கியிருக்க – கமான்சே தொடரோ தட்டுத் தடுமாறுகிறது! Sad... really sad!

மீசைக்கார நாயகர்களுக்கு வெகுஜன ஒப்புதல் எட்டாக்கனிகள் போலும் – at least காமிக்ஸ் துறையிலாவது! நம்மிடையே decent ஆன மதிப்பெண்கள் பெற்றுள்ள வேய்ன் ஷெல்டன் – புத்தக விழா விற்பனைகளில் ரொம்பவே பின்தங்கி நிற்கிறார்! இம்மாத இதழான “ஒரு காகிதத்தைத் தேடி” யினை நீங்கலாகப் பார்த்தால் இதர ஷெல்டன் ஆல்பங்கள் எல்லாமே மிக மிக சுமாரான விற்பனைகளையே கண்டுள்ளன! புரியமாட்டேன்குதே இந்த லாஜிக் ?!

ஷெல்டன் பாடு இப்படியெனில் – டயபாலிக் பாடு அதை விடவும் தரைமட்டம்! ஈரோட்டில் மொத்தமாய் 2 புக்குகளே விற்பனையாகியுள்ளன என்று சொன்னால் நம்பத் தான் முடிகிறதா ? இத்தனைக்கும் இந்த இதழின் விலையும் குறைச்சல்; சலவை வெள்ளைப் பேப்பரில் பளிச்சிடவும் செய்கிறது! ஆனால் விற்பனையில்...????

“குறைந்த விலையில் black & white இதழ்கள் விற்பனைக்கு லட்டுக்கள்!” என்ற எண்ணம் நேற்று வரை எனக்குள் இருந்தது வாஸ்தவமே! ஆனால் மூன்று புத்தக விழாக்களிலுமாய்ச் சேர்ந்து கீழ்க்கண்ட நாயக/ நாயகியர் ஈட்டியுள்ள விற்பனை எண்ணிக்கைகள் எனது அபிப்பிராயத்தைப் பப்படமாக்கி விட்டுள்ளன!

- ராபின்

- மாடஸ்டி

- ஜுலியா

இவர்களது stuttering விற்பனைகளைப் பார்க்கும் போது – வித்தியாசமானதொரு சிந்தனையும் தோன்றுகிறது! மறுபதிப்புகள் + டெக்ஸ் தவிர்த்து மற்ற கதைகள் எதுவுமே b & w-ல் self எடுக்காதோ - இனி வரும் நாட்களில் ? என்பதே அந்த சந்தேகச் சிந்தனை! Of course மர்ம மனிதன் மார்ட்டின் “மோசமில்லை” என்ற ரகத்தில் நிற்கிறார்! அவரைத் தவிர்த்த மற்ற நாயக / நாயகியர் சோபிக்கத் தவறுவது வண்ணமின்மையின் பொருட்டுத் தானா ? கறுப்பு – வெள்ளையின் ஆயுட்காலம் ரொம்பவே மட்டுப்படத் தொடங்கி விட்டதோ? இன்றைய தலைமுறைக்கு வர்ணம் ஒரு அடிப்படை அத்தியாயவசியமோ? Thinking......

“சரி... வண்ணம் தானே வேண்டும்? எங்க கிட்டே அது திகட்டத் திகட்ட இருக்குது!” என்று கீழ்க்கண்ட மூவர் சொல்லிப் பார்க்கிறார்கள் தான்! 

- டைலன் டாக்

- சாகஸ வீரர் ரோஜர்

- பரூனோ பிரேசில்

ஆனால் “அந்த ஓரமாய்ப் போய் விளையாடுங்க தம்பிகளா!” என்று புத்தக விழாவில் வாசகர்கள் இவர்களிடம் சொல்லியிருப்பது புரிகிறது! இம்மாத புது இதழ் தவிர்த்து பாக்கி டைலன் டாக் இதழ்கள் எல்லாமே so so விற்பனைகளே !  ஒன்னுமே புரியலே... உலகத்திலே! என்னவோ நடக்குது... மர்மமா இருக்குது...!

ஆக இது தான் விற்பனைகள் வாயிலாய் எனக்குப் புரிபட்ட சேதிகள்! Of course – ஒற்றை நாளில் புதுப் புதுக் கதவுகளைத் திறந்து வைக்கவும்; பற்பல பழங்கதவுகளைப் படீர் படீரென்று அறைந்து சாத்தவும் நான் முனையப் போவதில்லை! நொடிப் பொழுதினில் தீர்மானம் எடுக்கும் knee-jerk reactions சத்தியமாய் அமலில் இருக்கப் போவதில்லை! மாறாக – long run-ல் மேய்ச்சலுக்கு அனுப்பப்பட வேண்டிய குதிரைகள் எவை? ஓய்வு தரப்பட்டு பரணுக்குப் பார்சலாகிட வேண்டிய குதிரைகள் எவை? என்ற பட்டியலைத் தயாரிக்க இதுவொரு துவக்கப் புள்ளியாக இருந்திடலாம்! சந்தாக்களே நமது ஜீவநாடி எனும் போது – சந்தாதாரர்களின் எண்ணவோட்டங்கள்; நமது வலைப்பதிவின் அலசல்கள் நல்கும் சேதிகள்; அப்புறமாய் ஆன்லைன் விற்பனைகளின் patterns & நமது ஏஜெண்ட்களின் விற்பனை patterns என்று சகலத்தையும் தொடரும் 2 மாதங்களில் உன்னிப்பாகக் கவனிக்கத் தீர்மானம் செய்துள்ளேன்! பார்க்கலாமே- அவற்றுள் புதைந்து கிடக்கும் சேதி என்னவாகயிருக்குமென்று!

Anyways – back to the present – செப்டம்பரின் பணிகள் ஜரூராய் நடந்தேறி வருகின்றன! காத்திருக்கும் டபுள் ஆல்பம் நமது fantasy நாயகரான தோர்கலின் “கனவு மெய்ப்பட வேண்டும்!” And வழக்கம் போலவே சீனியர் எடிட்டரை இதன் மொழிபெயர்ப்புகளைச் செய்திடக் கோரியிருந்தேன்! டபுள் ஆல்பத்தின் முதலாவது ஆல்பத்தில் “அடடே... தேவலியே!” என்று தோன்றியது ; மிகச் சொற்பமான டயலாக்குகள் மட்டுமே இருந்த போதிலும் ! ஆனால் பேனா பிடிக்கும் பணியானது ஒரு தொடர் பணியாகயின்றி – அவ்வப்போதைய சமாச்சாரங்களாக இருந்திடும் பட்சத்தில் நேரக்கூடிய சகல சிரமங்களையும் இரண்டாவது ஆல்பத்தில் சீனியர் சந்தித்திருப்பது புரிந்தது. ஏகமாய் வசனங்கள் ; கோர்வையாய்ச் சொல்லப்பட வேண்டிய வரிகள் என்று கதை நெடுக இருந்திட, மொழிபெயர்ப்பின்  flow ரொம்பவே தேங்கிடுவதாய்ப் பட்டது !  கதையின் சவாலான ஸ்கிரிப்டுக்கு நியாயம் செய்ய முயற்சிக்காது போனால் – ஒரிஜினல் ஆங்கில வடிவத்தைக் கையிலேந்தியபடிக்கு பத்திக்குப் பத்தி பிழைகளைச் சுட்டிக் காட்டும் படலங்கள் தலைதூக்கக் கூடுமென்று பட்டதால் – ‘வம்பே வேணாமே!‘ என்று கிட்டத்தட்ட முழுசையுமே புதிதாய் எழுதிடும் பணியினை நேற்றைக்குத் தான் முடித்து வைத்தேன். நான் சுத்தியுள்ள கம்பு அட்சர சுத்தமென்று நான்நிச்சயம் சொல்லப் போவதில்லை ; but ஓரளவேனும் தேறிடும் என்ற நம்பிக்கையுள்ளது !  தொடரும் நாட்களில் அச்சுப் பணிகள் தொடங்கிடும்! And இதோ – அட்டைப்படத்தின் preview! வழமை போலவே முன் & பின் ராப்பர்கள் ஒரிஜினல்களே!

Before I sign off – இதோ நமது இரத்தப் படலத் தொகுப்பின் முன்பதிவுப் பட்டியல்! இரண்டே வாரங்களுக்குள் 110+ முன்பதிவுகள்; அதுவுமே நமது இதழ்களில் இது சார்ந்த விளம்பரங்கள் இல்லாத போதே என்பதைக் கருத்தில் கொண்டால் இதுவொரு smashing beginning என்பேன்! துவக்க வேகம் தொடரும் நாட்களிலும் தொடரின்  – ஒரு சாதனை இதழ் நம் கண்முன்னே நனவாகி நிற்கும் நாள் தூரத்தில் இல்லை என்பேன்! Keep those bookings going folks! Yoohoo!

மீண்டும் சந்திப்போம்! அது வரை have a fun weekend! Bye for now!

கேள்விகள் இன்னும் கொஞ்சமாய்...!

நண்பர்களே,

வணக்கம். சுதந்திரதின வாழ்த்துக்கள் !! சிக்கும் விடுமுறை நாட்களே - வீடெங்கும் கடைவிரித்துக் கிடைக்கும் புது காமிக்ஸ் ஆல்பங்களை படித்து ரசிக்கும் நேரமாகிடுவதால் கொஞ்சம் லேட்டாக இங்கே ஆஜராகிறேன் ! இந்த வாய்ப்புக்காகவாவது வருஷத்தில் ஒரு ரெண்டு / மூணு ஆகஸ்ட் மாதங்கள் புலர்ந்தால் தேவலை என்றே தோன்றுகிறது ! But first things first : 

TEX தேர்வுகள் குறித்து நான் எழுப்பியிருந்த கேள்விகளுக்கு ஒரு லோட் தெளிவான பதில்கள் கிட்டியிருப்பதில் செம ஹேப்பி அண்ணாச்சி ! பரவலான அபிப்பிராயங்கள் என்ன சொல்கின்றனவென்பதை மண்டைக்குள் இருத்திக் கொண்டு  'தல' தேர்வுகளை செய்யும் போது அந்தப் பணி சற்றே சுலபமாய் தெரிகிறது ! So thanks for the inputs folks !! தேடலில் கண்ணில்படும் சமீபத்துக் கதைகள் தற்போதைய TEX எடிட்டரான மௌரோ போசெல்லியின் பன்முகத்தன்மையை அட்டகாசமாய் வெளிச்சம் போட்டுக் காட்டுகின்றன - நூற்றியோராவது தடவையாக ! டெக்ஸ் கதாசிரியர்களுள் பெரியவர் போனெல்லிக்கு அப்புறமாய் க்ளாடியோ நிஸ்சி தான் ராட்சசராய் நின்றிருந்தார் படைப்புகளில் ! ஆனால் போசெல்லி 'தல'யை ஒரு முற்றிலும் புதுப் பரிமாணத்துக்கு இட்டுச் செல்வதாக எனக்குத் தோன்றுகிறது ! பாருங்களேன் - தேடலில் சிக்கியதொரு ஆல்பத்தின் preview ! 

இது போன்ற crisp லைன் டிராயிங்குகளைப் பார்க்கும் போது - இவற்றை ரசிக்க black & white பாணியை அடித்துக் கொள்ள முடியாதென்ற மனதுக்குப் பட்டது ! வர்ணங்கள் கபால்-கபாலென்று கவனத்தை ஈர்த்து விடும் பொழுது ஓவியரின் அந்த அசுரப் பிரயத்தனங்கள் ஒளிவட்டத்தை சற்றே இழந்து விடுவது போல் தோன்றுவது எனக்கு மட்டும் தானா ? Ideally - இங்கே நாம் போனெல்லின் பார்முலாவைப் பின்பற்றுவது தான் சூப்பர் என்பேன் : ஒரு சாகசத்தை முதன்முறையாக ரசிக்கும் போது அது black & white ஆகவே இருந்து விடுவது ; பின்னாட்களில் அது மறுபதிப்புக் காணும் சமயம் வண்ணத்தில் ரசிப்பது ! கம்பியூட்டர் திரைகளிலும், வாட்சப் சேதிகளிலும் கலர் பக்கங்களைப் பார்க்கும் பொழுது - "ஆஹா....இந்த அழகை ரசிக்க முடியாது போகிறதே !!" என்று நண்பர்களுள் சிலர் ஏங்குவது  புரிகிறது தான் ; ஆனால் இந்த ஒரிஜினல் லைன் டிராயிங்கில் உள்ள அந்த வசீகரம் a class apart என்பேன் !! இது பற்றிய உங்கள் எண்ணங்கள் என்னவோ ? டெக்ஸ் planning-ல் இறுதி முடிச்சுக்கான இந்தப் பதிலையும் சொல்லி விட்டீர்களெனில் என் வேலை சுலபமாகிப் போகும் ! So ஆங்காங்கே லைட்டாக கசிந்து கொண்டிருக்கக் கூடிய வாயோர H2O-வை நாசூக்காய்த் துடைத்துக் கொண்டே பதில் சொல்லுங்களேன் guys ? 

2018 அட்டவணையில் லைட்டான "மதில் மேல் பூனை " பார்ட்டியாக நிற்கும் ஒரு மீசைக்காரரைப் பற்றி அடுத்ததாகக் கொஞ்சம் பேசி விடுவோமா - எனது தெளிவின் பொருட்டு ? இந்த மீசைக்காரர் நமது ரோமியோ பார்ட்டி கிடையாது - மாறாக "நான் கலீஃபாவாகியே தீருவேன்"  என்று பெனாத்தித் திரியும் மந்திரியார் ! Make no mistake - எனக்கு நிரம்பவே பிடித்த நாயகர் இவர் ! ரொம்பவே வித்தியாசமான அந்தக் கதை களம் ; கற்பனை வளம் ; வார்த்தைஜாலங்கள் என்று இதனில் ரசிக்க ஓராயிரம் உண்டு என்பது என் தனிப்பட்ட எண்ணம். ஆனால் நம்மவர்களில் ஒரு பகுதியினருக்கு இவரை filler pages பார்ட்டியாக மாத்திரமே பார்க்க முடிகிறது என்பதில் ரகசியம் நஹி ! "துண்டும் துக்கடாவுமாய் உள்ள கதைகளுக்குள் ஒன்றிட முடியவில்லை !" என்று மந்திரியார் பற்றி அவர்கள் சொல்லும் புகார் ! So சின்னதாயொரு விடுமுறையா - மந்திரிக்கும், ஜால்ராவுக்கும் ? அல்லது business as usual ? "இதெல்லாம் ஏன் கேட்டுக்கிட்டுத் திரியுறீங்க ? கேள்வியே அனாவசியம் !" என்று உங்களுள் சிலர் பொங்கப் போவதும் நானறிவேன் ; ஆனால் கார்ட்டூன் எனும் genre-ஐ "மாவு கலந்த பாலோ ? ; பிளாஸ்டிக் அரிசியோ ? " என்ற ரீதியில் சந்தேகத்தோடு அணுகிடும் ஒரு அணி இன்னமுமே உள்ள நிலையில், இயன்றமட்டுக்கு ஒரு common ground நம்மிடையே இருந்தால் தேவலாம் என்பதே எனது நிலைப்பாடு ! So இந்தக் கேள்விக்கு react செய்வதை விடுத்து ; பதில் மாத்திரம் ப்ளீஸ் ?

வண்ண மறுபதிப்புகள் பற்றியும் ஒரு கேள்வியோடு நடையைக் கட்டுகிறேன் folks ! நமது ஒல்லிப்பிச்சான் Lucky Luke கதைகளுள் மறுபதிப்பிட உங்களது TOP சாய்ஸ் எதுவோ ? ஏதேனும் 3 கதைகளை மட்டுமே பரிந்துரை செய்யலாமெனில் உங்களது லிஸ்ட் என்னவாக இருக்கும் ? பெரும்பான்மையின் ஆர்வத்துக்கேற்ப எனது தேர்வு அமைந்துள்ளதா என்று பார்க்கலாமே ? 

கிளம்பும் முன்பாய் "இரத்தப் படலம்" பற்றிய updates ! இதுவரை கிட்டியுள்ள முன்பதிவுகள் 78 ! நாளை காலை அந்தப் பட்டியலை டைப் செய்து இங்கே upload செய்கிறேன் ! நேற்றைய மாலை சிவகாசியில் ஆலங்கட்டி மழை + அசாத்திய இடி முழக்கம் என்ற அதிசயம் நிகழ்ந்ததால் கம்பியூட்டர்கள் எதையும் இயக்கவே வழி இருக்கவில்லை ! So பட்டியல் காலையில் !! Bye for now !!

தேடலே ஒரு தொடர்கதையாய்....!

நண்பர்களே,

வணக்கம். இரண்டு நாட்களாய் தொண்டையிலிருந்து கார்பொரேஷன் குழாயைப் போல 'புஸ்ஸ்...புஸ்ஸ்ஸ்' என்று காற்று மட்டுமே வெளிப்பட, "போட்றா மாத்திரைகளை" என்று விழுங்கிவிட்டு ஒரு கும்பகர்ணத் தூக்கத்தைப் போட்டால் - கனவெல்லாம் கலர்கள் !! உங்கள் கற்பனைக் குதிரைகள்  தறி கெட்டுப் போவதற்கு முன்பாய் - அந்தக் "கலர்களுக்கு" கனவில் என்ன ரோல் என்று சொல்லிவிடுகிறேனே !  மஞ்சள் சொக்காய் போட்டுக்கொண்டு ஒருத்தர் தெற்கேயும், வடக்கேயும் ரவுண்ட் அடிக்க ; ஆட்டுத்தாடி ஆரஞ்சு சொக்காய் ஆசாமியோ எதை எதையோ விழுங்கிக் கொண்டிருக்க, தட்டை மூக்குடனான ஊதா சொக்காய் பார்ட்டி பீப்பீ ஊதிக் கொண்டே தலைக்குள் தாண்டவம் நடத்தி வர, ரணகளம் தான் ! ஈரோட்டின்  ஹேங்கோவரா ?  இரத்தக் கோட்டை / TEX 70-ன்சிந்தனைகளா ? என்று சொல்லத் தெரியவில்லை - ஆனால் கண்மூடும் மறு கணமே அந்த அரிசோனா பாலையும்....அதனை ஆராதிக்கும் நம்மவர்களின் முகங்களுமே தென்படுகிறது ! 

But பண்டிகையும் முடிந்தாச்சு ; பட்டாசும் வெடிச்சாச்சு ; பட்சணமும் ருசிச்சாச்சு என்றான பின்னே நடைமுறைக்குத் திரும்பத் தானே வேணும் ? And here we are - காத்திருக்கும் நாட்களையும், இதழ்களையும் எதிர்நோக்கிடும் உற்சாகத்தோடு ! நிறைய விதங்களில் ஆகஸ்ட் ஒரு முக்கிய மாதம் நமக்கு ! புத்தக விழாக்கள், சந்திப்புகள் என்பது ஒருபக்கமிருக்க, மறு ஆண்டின் அட்டவணை தயாரிப்புத் துவங்கும் நேரமும் இதுவே ! வெவ்வேறு சந்தாக்களில் நாயக / நாயகியரைத் தேர்வு செய்வது முதல் பணியெனில் -நாம் தரவிருக்கும் ஒன்றோ - இரண்டோ slot-களை நிரப்பிட அவர்களது கதை வரிசைகளிலிருந்து சுவாரஸ்யமான சாகசங்களுக்காகச் சல்லடை போடுவது இரண்டாம் கட்டம் ! இங்கு தான் படைப்பாளிகளின் சிண்டுகளும், நமது பிரெஞ்சு மொழிபெயர்ப்பாளரின் சிண்டும் படாத பாடு பட்டுப் போகும் ! 

லார்கோ ; ஷெல்டன்  தோர்கல் போன்ற தொடர்களில் சிக்கலேதும் கிடையாது - simply becos வரிசைக்கிரமப்படி அத்தனை ஆல்பங்களையும்  போட்டு விடுவது தான் நடைமுறை ! ஆனால் லக்கி லூக் ; சிக் பில் ; ரிப்போர்ட்டர் ஜானி ; ரோஜர் போன்ற ஆஞ்சநேயர் வால் நீளக் கதைவரிசைகளைக்  கொண்டோரின் விஷயங்களில் எக்கச்சக்க research அவசியப்படும் ! இதற்கென நான் கடைபிடிக்கும் யுக்திகள் பற்றி நிறையவே எழுதியுள்ளேன் ; ஆனால் இம்முறை ஒரு புதியதொரு திக்கிலிருந்து சன்னமான ஒத்தாசையும் கிடைத்துள்ளது தான் highlight ! 

2018-ல் வெளிவரவுள்ள ரிப்போர்ட்டர் ஜானி கதையானது அவரது புது அவதாரின்ஆல்பம் # 2 ! இரண்டு ஆண்டுகளுக்கு முன்னிருந்தே இந்த ஜானி version 2.0 புழக்கத்தில் உள்ளதை நாமறிவோம் ; ஆனால் அந்தக் கதையோட்டத்தைப் பற்றிச் சரியானதொரு கணிப்புக்கு வர எனக்கு சாத்தியமாகியிருக்கவில்லை ! ஆனால் திடீரென ஒருநாள் எனக்கு வந்ததொரு சேதியில் - "சார்....நமது ஜானியின் புது வரிசையின் ஆல்பம் # 2 பிரமாதம் ! Our Johnny is back !" என்றிருந்தது ! யாரிடமிருந்து ? என்று பார்த்தால் பாரிஸிலிருந்து நண்பர் ராட்ஜா அனுப்பியிருந்த தகவல் அது ! பிரெஞ்சில் அந்த ஆல்பம் வெளியான சற்றைக்கெல்லாம் அதனைப் படித்துவிட்டுத் தனது அபிப்பிராயத்தைப் பகிர்ந்துள்ளார் என்பதை புரிந்து கொண்டு அந்தத் தகவலைத் தலைக்குள் சேமித்துக் கொண்டேன் சந்தோஷமாய் ! என்ன தான் நாம் ஒரு திறமையான மொழிபெயர்ப்பாளரின் உதவியோடு கதைகளை அலச முனைந்தாலுமே, அவர் நம்மைப் போலொரு காமிக்ஸ் fan அல்ல என்பது தான் யதார்த்தம் ! So நம் வட்டத்துக்கு ஒத்த கதையிது ; ஒத்து வரா சங்கதியிது என்ற நிர்ணயம் அவருக்கு அத்தனை சுலபமல்ல ! "இது இப்டி உள்ளது....அது அப்டி உள்ளது....இனி உங்கள் பாடு" என்று ஒதுங்கிக் கொள்வார் ! நானோ கைதேர்ந்த விஞ்ஞானபூர்வ ஆய்வுகளை செய்து பார்த்து, கொத்துக் கொத்தாய் கேசத்தை இழந்த பிற்பாடு - மகா அஸ்திரமான "இங்கி-பிங்கி-பாங்கி"யை வெளியெடுத்து விடுவேன் ! அந்த அஸ்திரம் சில நேரங்களில் பாகுபலி ரேஞ்சுக்கு அமைந்து விடுவதுமுண்டு ; சில தருணங்களில் "துயில் எழுந்த பிசாசு" ரேஞ்சுக்கு இருந்திடுவதுமுண்டு ! ஆனால் நம் வட்டத்தைச் சார்ந்தவர் ; அயல் மொழியினைத் தாய்மொழி போல் பேசக் கூடியவர் என்ற தகுதிகளைக் கொண்டவரின் பரிந்துரை என் வேலையை ரொம்பச் சுலபமாகி விடுகிறது ! 2018-ன் முதல் டிக் பெற்ற சாகசம் அதுவே ! தொடரும் நாட்களில் , இணையத்தில், வேற்று மொழிகளில் என ஸ்பெஷல் கவனம் தரக்கூடிய கதைகளை படிக்கும் நண்பர்கள் அவை சார்ந்த தகவல்களை நமக்கு அனுப்பி வைப்பது ஆக்கபூர்வமான ஒத்தாசைகளாய் இருக்கும் தானே ? 

எனது தேடல்களை வருஷா வருஷம் லக்கியிடமிருந்து ஆரம்பிப்பது வழக்கம் ; and இம்முறையும் அதே சம்பிரதாயம் தொடர்ந்தது !  கிட்டத்தட்ட லக்கியின் 90 % கதைகள்  Cinebook புண்ணியத்தில் இப்போது ஆங்கிலத்தில் கிடைப்பதால் - எனது எர்வாமாட்டின் ஆர்டர் லேசாக மட்டுப் பெறுகிறது ! படைப்பாளிகளிடமிருந்து ஆங்கிலப் படிவங்களின் pdf பைல்கள் சுலபமாய்க் கிட்டிவிடும் என்றாலும், அசோக சக்கரவர்த்தி காலத்து ஆளான எனக்கு, ஒரிஜினல் புக்கைக் கையில் ஏந்திப் படிக்கும் சுகம் கிடைக்காவிடின் படிக்கும் ஆர்வமும் எழுவதில்லை ! கம்பியூட்டர் திரையில் படிப்பது ; பிரிண்ட் போட்டுப் படிப்பது என்பதெல்லாம் நமக்கு ஒத்து வராத விஷயங்கள் !  So எங்கெங்கெல்லாம் ஆங்கிலப் பதிப்புகள் சாத்தியமோ, அங்கெல்லாம் அதனை தேடிப் பிடித்து வாங்கிவிடுவேன். புக் ஒன்று 932 ரூபாய் என்று Amazon-ல் பார்க்கும் போது காரமான சூப் புரையேறியது போலான பீலிங் எழுவதுண்டுதான் ; ஆனால், அத்தியாவசியங்களில் கஞ்சத்தனம் கதைக்கு ஆகாதே ?!! So கடந்த 4 வாரங்களாக வாயில் புல்லோடு லக்கியும், கோடு போட்ட பனியன்களோடு டால்டன்களும்  காட்சி தரும் கலர் கலரான புக்குகளே எனது சாப்பாட்டு வேளைத் தோழர்களாக இருந்து வருகின்றனர் ! ஜாம்பவான்கள் பணியாற்றிய தொடர்களை ; அவர்களது உச்சங்களின் கோலோச்சலின் போது ருசிக்கும் வரம் நமக்கு அருளப்பட்டிருப்பது லக்கியின் தொடரில் கண்கூடாய்த் தெரிகிறது ! இந்த ஒல்லிப்பிச்சான் ஹீரோவை நாம் நேசிக்கத் தொடங்கிய 1987-ன் போது கதாசிரியராக கோசினியும், ஓவியராக மோரிஸும் பணியாற்றிப் படைத்திருந்த சூப்பர்-டூப்பர் கதைகள் ஒரு வண்டி தயாராகக் காத்திருந்தன ! So சூப்பர் சர்க்கஸ் ; புரட்சித் தீ ; பொடியன் பில்லி ; கௌபாய் எக்ஸ்பிரஸ் ; ஜெஸ்ஸி ஜேம்ஸ் ; கோச் வண்டியின் கதை etc etc என்று தோண்ட தோண்ட புதையல்களாய்க் கிட்டின நமக்கு ! அவற்றையெல்லாம் வரிசைக்குப் போட்டுத் தாக்கிவிட்டு, இப்போது அடுத்த தலைமுறைப் படைப்பாளிகளின் கதைகளை படிக்கும் போது அந்த ZING ...ZIP மிஸ்ஸிங் என்பது அப்பட்டமாய்ப் புரிகிறது ! So "பழைய குருடி..கதவைத் திறடி.." என்ற கதையாக 1960-களின் துவக்கத்தில் உருவான கதைகளுள் நாம் வெளியிடாதவைகளாக என்னவுள்ளது என்ற சல்லடை போடும் படலம் தொடர்கிறது ! கடந்த 10 நாட்களுக்குள் பழசும், புதுசுமாய்க் கலந்து குறைந்தது 15 லக்கி இதழ்களை வாசித்ததன் பலனாய் சில சூப்பர் ஆல்பங்கள் சிக்கியுள்ளன ! So அடுத்த ஓரிரண்டு ஆண்டுகளுக்காவது இந்தப் புலம்பல்கள் அவசியமாகாது என்பேன் ! 

ப்ளூகோட் பட்டாளத்தின் கதைகளுமே இப்போது ஆங்கிலத்தில் வரத் துவங்கியிருப்பதால் அங்கேயுமே பர்ஸ் பழுக்கும் படலம் தொடர்கிறது ! அதனில் ஒரு சுவாரஸ்ய நிகழ்வொன்று ! பொதுவாக நமது பிரெஞ்சு - ஆங்கில மொழிமாற்றப் பணிகள் 1  வருடம் அட்வான்ஸில் ஓடுவது வழக்கம். இப்போது கூட 2018-ன் இறுதிக் quarter-ன் கதைகள் மீதான பணிகள் ஓடிவருகின்றன !  நமது மொழிபெயர்ப்பாளர் மட்டும் டெங்குக் காய்ச்சலில் அவதியுற்றிராவிடின் இந்நேரம் 2019-க்குள் கால் பதித்திருப்போமென்பது நிச்சயம் !! So போன வருடத்தின் ஒரு சமயம், ப்ளூகோட் பட்டாளத்தின் கதையொன்றை தேர்வு செய்து அதனை பிரெஞ்சிலிருந்து மொழிபெயர்த்து வாங்கி விட்டிருந்தேன்.ஆனால் அப்புறமாய் "நானும் சிப்பாய் தான்" கதையின் ஆங்கிலப் பதிப்பு என்கண்ணில் பட, "அட..இதுவே நல்லாத் தானே இருக்கு ? இதையே போட்டு விட்டுப் போவோம் !" என்று தீர்மானித்து செயல்பட்டேன். So அந்த பிரெஞ்சு மொழிமாற்றம் என் பீரோவிலேயே உறங்கி வந்தது ஓராண்டாய் ! இப்போது 2018-க்கான Bluecoats கதையைத் தேர்வு செய்திடும் பொருட்டு - Cinebook-ன்பதிப்புகளில் ஒரு நாலைந்துக்கு ஆர்டர் போட்டு வைத்தேன் ! பார்சல் வந்த சமயம்பார்த்தால் - அதனுள் ஒரு புக், நம்மிடம் ஏற்கனவே மொழிபெயர்ப்பு செய்யப்பட்டு நிலுவையில் உள்ள அதே கதை தான் ! தொடர்ந்த நாட்களில் அந்த ஆல்பங்கள் சகலத்தையும் படித்து முடித்த போது - அந்தக் கதையே best ஆகத் தோன்ற, 2018-ன் பட்டியலுக்குள் அது நுழைகிறது ! இப்போது சுவாரஸ்யம் என்னவெனில் என் கையில் ஒரு உயர்தர ; ஒரிஜினல் பிரெஞ்சு மொழியாக்கமும் உள்ளது ; அதே கதைக்கு நம்மூரில் நமது ரெகுலர் மொழிபெயர்ப்பாளர் எழுதித் தந்துள்ள ஸ்கிரிப்ட்டும் உள்ளது ! இதன் தமிழாக்கத்தில் பணியாற்றும் போது இரண்டையுமே வைத்துக் கொண்டொரு ஒப்பீடு செய்து பார்க்கும் ஆவல் எனக்குள்ளே ஏகமாய் உள்ளது ! தாய்மொழியில் இருக்கக் கூடிய புலமைக்கும் , பயின்றதொரு மொழியில் ஏற்படுத்திக் கொள்ளும் புலமைக்கும் மத்தியினில்  போட்டி வைப்பது முறையல்ல தான் ; ஆனால் தற்செயலாய் அமைந்துள்ள இந்த சந்தர்ப்பத்தை உருப்படியாய் பயன்படுத்திடுவதாக உள்ளேன் ! இதற்காகவே கூட ப்ளூகோட் பட்டாளம் ஆண்டின் ஆரம்பத்திலேயே தலைக்காட்டக் கூடும் என்பேன் !  Can't wait to get to work on it !!

கார்ட்டூன் சந்தாவின் "நிச்சயங்கள்" பட்டியலில் சிக் பில்லுக்கும் இடமுண்டு என்பதாலும், இந்தத் தொடரிலும் 70 கதைகள் உள்ளன என்பதாலும், இங்கேயும் வழக்கம் போல் தேடல் படலம் ! ஆனால் சென்றாண்டே மூன்றோ/ நான்கு கதைகளை shortlist செய்து வைத்திருந்தோம் என்பதால் இந்தத் தடவை அந்த மாவைக் கொண்டே தோசை சுட்டு விட்டேன் ! நமது டைகரும் சரி ; டெக்ஸும் சரி - அதிரடி செய்த அதே OK CORRAL-க்கு நமது சிரிப்புப் போலீஸ் படை பயணம் செய்தால் என்னவாகுமோ - அதனை இம்முறை பார்க்கவிருக்கிறோம் ! 

கதைகளுக்குள் சல்லடை போடும் பணியானது - ஒரு புது வரவின் பொருட்டும் இந்த வாரம் முதல் அரங்கேறவுள்ளது ! ஏற்கனவே இந்தத் தொடர் மீது எனக்கொரு (பெரிய) கண் இருந்ததால் - அது பற்றியதொரு பொதுவான ரிப்போர்ட்டை பெல்ஜியத்தில் உள்ள நமது ஆலோசகரிடம் கோரிக் பெற்றிருந்தோம். அதனை இப்போது எடுத்து பரீட்சைக்குப் படிக்கும் பிள்ளையைப் போல மண்டைக்குள் ஏற்ற முயற்சித்து வருகிறேன் ! நமது மொழிபெயர்ப்பாளருமே இந்தத் தொடருக்கு green signal கொடுத்து விட்டால் - ஒரு முற்றிலும் மாறுபட்ட பாணிச் சிரிப்பு மேளா நமக்கு காத்துள்ளது ! "அப்டின்னா கேரட் மீசைக்காரர் கிடையாதா ?" "Smurfs அவ்ளோ தானா ?".." பென்னி பூட்ட கேஸ் தானா ?"... "ரின்டின்க்கு டிங்கு டாங் தானா ?" என்ற கேள்விகளெல்லாம் கார்ட்டூன் காதலர்களின்மனங்களில் இந்நேரம் உதிக்கத் தொடங்கியிருக்கும் என்பது புரிகிறது ! Rest assured guys - நிச்சயமாய் கார்ட்டூன் சந்தா எப்போதும் போலவே colorful & vibrant ஆக இருந்திடும் ! So "யாருக்கு  வீட்டிலிருந்து கல்தா கொடுக்கப் போறானோ இந்த மாங்காய்ப் பயல் ?" என்ற பயம் அனாவசியம் !

எப்போதுமே உச்சபட்ச சிரமம் தலையெடுப்பது 'தல' சார்ந்த தேடல்களில் தான் என்பதில் no secrets ! 70 கதைகள் ; அத்தனைக்குமே  சீரான பக்க நீளங்கள் - என்றதொரு அடையாளம் தாங்கிய குவியலிலிருந்து filter செய்வதே பிராணனில் பாதியை விலையாகக் கேட்கும் முயற்சி எனும் போது, கிட்டத்தட்ட 700-ஐத் தொட்டுப் பிடிக்கவுள்ளதொரு மெ-காஆஆ தொடரிலிருந்து கதைகளை தேர்வு செய்வது என்ன மாதிரியான வேலையாக இருக்கக் கூடுமென்பதை யூகிக்கலாம் தானே ? அதுவும் கதைகளின் பக்க நீளங்கள் பற்றிச் சொல்லவும் வேண்டுமா ? 76 பக்கங்கள் ; 94 பக்கங்கள் ; 110  பக்கங்கள் ; 178 ; 192 ; 220 ; 240 ; 260 ; 330 ; 500+ பக்கங்கள் என்று இஷ்டத்துக்கு பயணிக்கும் தொடரிது ! "கதை செமையாகத் தெரிகிறதே !" என்று பின்தொடர்ந்தால் - "260 பக்கங்கள்" என்று ஒரு ரெண்டும்கெட்டான் விலைக்கு அடிப்போடும் குத்துக்கல் ஜிங்கென்று ஆஜராகி நிற்கும் ! "சரி...மேற்கொண்டு புரட்டுவோம்" என்று போனால் - ஓவிய பாணியில் ஒரு compromise செய்யும் அவசியம் தலைதூக்கி நிற்கும் !  "சார்...என்ன செய்வீங்களோ தெரியாது ; ஆனால் டெக்ஸுக்கு "சித்தப்பாமேரி" தோற்றத்திலுள்ள கதைகள் வேண்டாமே !!" என்ற ஈரோட்டுக் கோரிக்கைகளுள் ஒன்று என் காதில் இன்னமும் ஒலித்துக் கொண்டிருக்க, 'டிக்' அடித்திருந்த 2 கதைகள்  இப்போது waiting list-க்கு இடம் மாறிவிட்டுள்ளன ! கதைகளுள் ஒருவித ஒற்றுமை தொடர்ந்திட வேண்டாமே ; முடிந்த மட்டிலும் variety காட்ட வேண்டுமே என்ற ஆசை தொற்றிக் கொள்ளும் போது - வழக்கமான ஆயுதக் கடத்தல் ; செவ்விந்தியக் கிளர்ச்சி பாணியிலான கதைகளை நாசூக்காய் ஒதுக்கவும் வேண்டி வரும் ! நடப்பாண்டின் TEX  கதைத் தேர்வுகள் தெர்மோகோல் போட்டு மூடப்படாத வைகையையும் பற்றி எரியச் செய்திருக்கவில்லை எனும் பொழுது - தொடரும் ஆண்டுக்கான தேடல்கள் இன்னமுமே உத்வேகத்தோடு இருக்க வேண்டுமே என்ற வேட்கை ஒரு வித வெறியாகவே உள்ளுக்குள் பதுங்கியுள்ளது என்பேன் ! 

In an ideal world - ஆண்டின் சகல இதழ்களுமே சூப்பர் ஹிட்களாகிட வேண்டுமென்பதே எதிர்பார்ப்பாய் இருக்கும் தான் ! ஆனால் நடைமுறையில் 75 % -ஐத் தாண்டி விட்டாலே பெரும் பிரயத்தனம் என்பது புரிந்தாலுமே -காத்திருக்கும் TEX 70 ஆண்டானது ஒரு சரவெடிச் சூறாவளியாய் இருந்திட வேண்டுமென்ற ஆர்வம் என்னைப் பரோட்டா சூரியாக மாறச் செய்கிறது !  ஒரு TEX கதை பட்டியலைப் போட்டு வைப்பது ; அப்புறம் நாலு நாள் கழிந்த பின்னே..."இல்லே.இல்லே ...கோட்டை அழி...முதல்லேர்ந்து பரோட்டா சாப்பிடுறேன் " என்று ஆரம்பிப்பதே பிழைப்பு என்றாகியுள்ளது ! அதுவும் AFTER ஈரோடு - இந்த டெக்ஸ் எதிர்பார்ப்புகளுக்கு பூரண நியாயம் செய்யும்  பொருட்டு - இணையத்தை உருட்டோ உருட்டென்று உருட்டி வருகிறேன் ! "லக்ஷணமான" டெக்ஸ் தான் லட்சியம் - என்ற கூடுதல் கண்டிஷன் நிறையவே சிந்தனைகளை அவசியமாக்குகின்றன ! இந்தாண்டின் ஹிட்டான "இரும்புக் குதிரையில் ஒரு தங்கப் புதையல்" நிறைவான கதையே ; ஆனால் ஓவியர் Jose Ortiz -ன் அந்த  ஓவிய பாணியினை நாம் நிராகரித்திருப்பின், இந்த classic த்ரில்லரைத் தவற விட்டிருப்போம் தானே ?!

அதே போல இன்னொரு மகாசிந்தனையுமே ஒரு நள்ளிரவில் தோன்றியது ! "Variety காட்டுகிறேன் பேர்வழி என்று படுத்துவானேன் ? TEX என்றாலே அதிரடி தானே ? சிவனே என்று "சட்டம் அறிந்திராச் சமவெளி"யைப் போன்ற கதைகளையாகத் தேர்வு செய்து போட்டால் வேலை முடிந்து விடாதா ? " என்று நினைக்கத் தோன்றியது ! ஆனால் மறு கணமே, வெள்ளையுடை தேவதைகள் BG மியூசிக்கோடு - "ஒரு குறிப்பிட்ட template கதைகளாக மட்டுமே தேர்வு செய்வதாயின் -  "கியூபா படலம்" போன்ற சற்றே 'ரிஸ்க்கான' கதைகளை ஓரம் காட்ட வேண்டிவரும் தம்பி ! பர்வால்லியா ?" என்று கேட்பதும் கேட்டது ! வெள்ளை டிரஸ் பொம்மனாட்டிகளையும் சரி, டார்க் கலர் உடுப்பணிந்த லேடீஸ்களையும் சரி - உங்கள் முன்னேயே நிற்கச் செய்து ஒரு தீர்மானத்துக்கு வந்தால் தேவலாம் என்று பட்டது ! சொல்லுங்களேன் guys - 

1.டெக்ஸ் கதைத் தேர்வுகளில் கதைகள் 100% & சித்திரங்கள் 100% ஸ்கோர் செய்ய வேண்டுமென்பதே நியதியா ? அல்லது கதைகள் ஓ.கே. எனில் சித்திரங்களின் cut off மதிப்பெண்களைக் கொஞ்சம் குறைத்துக் கொள்ளலாமா ?

2 .மூன்றாம் பக்கத்தைப் புரட்டும் போதே ஒரு நாலைந்து சில்லுமூக்குகள் சேதாரம் கண்டிருக்கும் கதைகள் உங்கள் சாய்சா ?

3.இல்லீங்கோ ; தற்போதுள்ள பாணியில், கதைகளில் variety காட்டும் முயற்சிகளே க்ஷேமம் என்பீர்களா ?

4.மாயாஜாலம் ; அமானுஷ்யம் + TEX >>>>>>> இது சரிப்படாது ! டபுள் ஓ.கே. ! உங்கள் பதில் என்னவோ ?

TEX கதைகளின் இறுதிப் பட்டியலை அடுத்த 7 நாட்களுக்குள் தயார் செய்திட எண்ணியுள்ளதால் - your inputs would help !!

அப்புறம் நமது "இரத்தப் படலம்" வண்ணத் தொகுப்பு பற்றிய update :

ஆன்லைனில் லிஸ்டிங் போட்டது முதலாய் செம விறுவிறுப்பு முன்பதிவில் ! And இதில் ஆச்சர்யமே - payment pattern-ல் தான் ! கிட்டத்தட்ட 75% முன்பதிவாளர்கள் இரு தவணையில் பணம் அனுப்பும் வசதியினை நாடிடாது முழுத் தொகையையும் அனுப்பி வருகின்றனர் !! வெள்ளி & சனி நான் ஆபீஸ் செல்லவில்லை என்பதால் முன்பதிவின் சரியான நம்பரை சொல்லத் தெரியவில்லை ! ஆனால் somewhere between 60 - 70 என்று நினைக்கிறேன் ! திங்கட்கிழமை ஒரு உபபதிவு போடும் அவசியம் நேர்ந்தால், அந்த புக்கிங் பட்டியலையே போட்டுத் தாக்கி விடலாம் ! தொடரும் நமது செப்டெம்பர் இதழ்களிலும்  இது சார்ந்த விளம்பரங்களை வெளியிட்டால் - வலைக்கு விலகி நிற்கும் நண்பர்களும் முன்பதிவில் கலந்து கொள்வார்களென்ற நம்பிக்கை நிறையவே உள்ளது ! முன்பதிவு 300-ஐ தொட்டு  விட்டாலே - கதைகளின் டிஜிட்டல் பைல்களுக்கு ஆர்டர் செய்து விட்டு, வேலைகளைத் துவக்கி விடுவோம்  ! So we are waiting !! இதோ ஆன்லைன் புக்கிங் லிங்க் :

http://lioncomics.in/xiii-rathap-padalam/429-pre-booking-for-xiii-the-complete-collection-in-color-tamil-nadu.html

புறப்படும் முன்பாய் குட்டியாய் சில சந்தோஷ updates :

1.நமது கேரவன் அடுத்து மதுரை நோக்கிப் பயணமாகவுள்ளது ! மதுரை புத்தக விழாவினில் பங்கேற்க விண்ணப்பித்துள்ளோம் ; அமைப்பாளர்களின் இசைவு கிடைக்கும் பட்சத்தில் செப்டெம்பர் 1 அங்கே இருப்போம் !

2.சென்னை கோட்டூர்புரத்தில் உள்ள பேரறிஞர் அண்ணா நூற்றாண்டு நினைவு நூலகத்தில் நமது இதழ்களுள் ஒரு சிறு பகுதியினை தருவித்துள்ளார்கள் ! விரைவில் லக்கியும்; நீலப் பொடியர்களும், கிட் ஆர்டின்னும் ; ரின்டின்னும் அங்கே சாகசம் செய்திடுவார்கள் !

3. வாசக சந்திப்பின் போது ஜாலியாய் நடத்திய அந்தப்   போட்டிக்குப் பரிசாய் நமது ஓவியங்களை வழங்கியதற்கு நிறைய சந்தோஷ மின்னஞ்சல்கள் !! எங்களைப் பொறுத்தவரை இவை தினப்படி சமாச்சாரங்களாய்த் தோன்றினாலும்,  உங்கள் பார்வைகளில் அவற்றிற்கான மதிப்பீடே தனி என்பது புரிகிறது !! 

Bye all...see you around ! Have a sparkling sunday !

ஆமோஸோடு ஆரம்பம் !

நண்பர்களே,

வணக்கம். புது வாரத்தின் தொடக்கத்தோடு பணிகளும், பொறுப்புகளும், வழக்கம் போல் நம்மை ஸ்வாஹா செய்திருக்கும் என்றே நினைக்கிறேன்  ! ஈரோட்டின் நினைவுகள் ஏதாவதொரு ரூபத்தில்  மனதில் நிழலாடிக் கொண்டே இருந்தாலும், வாழ்க்கைச் சக்கரங்கள் சுற்றியாக வேண்டுமல்லவா ? And அதற்குள் தேதி  8 ஆகிவிட்டது ; இன்னமும் மூன்றே வாரங்களுக்குள் செப்டெம்பரின் இதழ்களோடு ஆஜராகிட வேண்டுமே என்ற பரபரப்பும் தொற்றிக் கொண்டு விட, காலையில் SMURFS ; மாலையில் கிராபிக் நாவல் என்று எனது நாட்கள் நகர்ந்து வருகின்றன ! நாளைய விருந்துக்கு நான் பணி செய்து வரும் வேளைதனில், இம்மாதத்து இதழ்களை பற்றிய அலசல்களுக்குள் புகுந்திட்டாலென்ன all ? அதிலும் அந்தக் கண்ணாடிக்காரர் கர்னல் ஆமோசின் இதழிலிருந்து ஆரம்பித்தால் ஆட்டம் சூடு பிடித்து விடுமென்று நினைக்கிறேன் ! 

இந்த spin-off சாகஸத்தைப் பொறுத்த வரையிலும் - வழக்கமான சந்தாவின் ஏதேனுமொரு பிரிவிற்குள் நுழைக்க எனக்கு அத்தனை ரசிக்கவில்லை ! சந்தா E இதற்கு வாகானதொரு களமே என்றாலுமே , அதனில் முற்றிலுமாய் புதிதான கதைவரிசைகளை ; one -shot களை மட்டுமே பயன்படுத்த நினைத்திருப்பதால் கர்னலுக்கு அங்கே இடமிருப்பதாக எனக்குத் தோன்றவில்லை ! So இந்த bookfair slot தான் இதற்கு சரி வருமென்று தீர்மானித்தேன் ! XIII கதையோடு நேரடியாய் இந்த ஆல்பத்துக்கு தொடர்பில்லையெனினும், இரத்தப் படலத்தின் ஒரு மையக்  கதாப்பாத்திரத்தை இன்னும் கொஞ்சம் நெருக்கமாய் நாம் அறிந்துகொள்ள இந்த ஆல்பம் பயன்படக்கூடும் ! இதன் ஓவியர் நமக்கு பவுன்சரின் புண்ணியத்தில் நன்றாகவே பரிச்சயமான Boucq தான் ! ஒரிஜினல் அட்டைப்படத்தோடு, துளியும் ஜிகினா வேலைகளின்றி வெளி வந்திருக்கும் இந்த சீரியஸ் ரக கதை -சர்வதேச உளவுத்துறைகளின் கள்ளன்-போலீஸ் ஆட்டத்துக்கொரு உதாரணம் என்று சொல்லலாம் போலும் ! இவர்கள் விடாக்கொண்டர்கள் என்றால் - எதிராளிகள் கொடாக்கண்டர்கள் !! நிதானமாய் இதனைப் படித்திட நேரம் ஒதுக்குங்களேன் guys ? இதனை ஆன்லைனில் வாங்கிட : http://lioncomics.in/xiii-rathap-padalam/427-xiii-colonel-amos.html

• அப்புறம் இம்மாத ஹீரோ நமது டைகரை மறுபதிப்பில் ரசிக்க சாத்தியமானதா ?
• டைலனின் "கொலையுதிர் காலம்" சுகப்பட்டதா ? பக்கத்துக்குப் பக்கம் தெறிக்கச் செய்யும் அந்தக் கொலைகார "கோஹ்லெம்" concept பற்றிய உங்களின் அபிப்பிராயம் என்னவோ ? 
• நம்மவரின் மறுபதிப்பு - "மரணத்தின் நிறம் பச்சை" ? How did it fare ?
• And நமது நரைமுடி ரோமியோ ஷெல்டன் சாகசம் பற்றியுமே பேசலாமே ?

Let 's get cracking guys ?! மீண்டும் சந்திப்போம் ! Bye for now !

இது 3  ஆண்டுகளுக்கு முன்பான நமது ஈரோடு ஸ்டால் !! Phew !!

வந்தனம் ஈரோடு !

நண்பர்களே,

வணக்கம். நிறைய முறை அனுபவித்து விட்ட உணர்வுகளே  ; நிறையத் தடவைகள் பார்த்து விட்ட காட்சிகளே ; நிறையத் தடவைகள் கேட்டு விட்ட வரிகளே ...! ஆனால் ஒவ்வொரு முறையும் அவையெல்லாமே ஒரு புது உச்சத்தைத் தொட முயற்சித்துக் கொண்டே இருக்கும் போது - அவை உண்டாக்கும் தாக்கங்களும் விஸ்வரூபம் எடுத்துக் கொண்டே செல்கின்றன ! துளியும் குன்றா காமிக்ஸ் நேசம், நம் மீதான நிபந்தனைகளற்ற  அன்பு மழை  என்ற உணர்வுகளின் குவியல் ; நெடு நாள் நண்பர்களாய் அங்கே அத்தனை பேரும் கைகோர்க்கும் அந்தக் காட்சிகளின் ரம்யம் ; ஒவ்வொரு சந்திப்பின் போதும் பறக்கும் கேள்விக் கணைகள் -  நான் விவரித்த விஷயங்கள் இவையே என்பதை புரிந்து கொள்ள நாமெல்லாம் லியனார்டோ தாத்தாவாக இருக்க வேண்டியதில்லை தானே ? நேற்றைய ஈரோட்டுப் புத்தக விழாவின் பகலில் நடந்த நமது வாசக சந்திப்புப் படலமும், அதன்பின்பாய் அந்தி புலரும் நேரம் முதல் ஊரடங்கும் வேளை வரைக்கும் தொடர்ந்த அளவளாவல்களும் ; இன்று காலை மறுபடியும் நண்பர் ஸ்டாலினின் இல்லத்தில் தொடர்ந்த கலகலப்புகளும் ஒரு ஆயுளுக்குத் தேவையான சந்தோஷ நினைவுகளைத் தந்துள்ளன  என்றால் அது மிகையில்லை ! 

ஆரம்பிப்பது எங்கே ?  ;  முடிப்பது எங்கே ?  என்று தெரியாது விழிப்பதுமே ஒரு சுவாரஸ்யமான அனுபவமே என்பதை 2012 சென்னைப் புத்தக விழாவிலிருந்தே உணர்ந்து வருகிறேன் ! இந்த ஈரோட்டு விழாவும் அதற்கு விதிவிலக்கல்ல ! முழுவீச்சில் ஒரு வாசக சந்திப்பு நடைபெற்ற  போன வருடம் - இந்த ஒட்டு மொத்த அனுபவமுமே எவ்விதமிருக்குமென்று நம்மில் யாருக்கும் தெரிந்திருக்காது என்பதால் அங்கே அந்த novelty factor பிரதானமாய் இருந்தது ! And அதற்கேற்ப நண்பர்கள் குழுமிட, ஒரு ரகளையான தினமன்று சாத்தியமானது ! ஆனால் எப்போதுமே ஒரு வெற்றியை சுவைப்பதை விட, அதனைத் தக்க வைத்துக் கொள்வதும், அதற்கு மெருகூட்டுவதும் ரொம்பவே சிரமமான காரியங்கள் என்பதில் எனக்குள் ஐயங்களிருக்கவில்லை ! So இம்முறை நமது சந்திப்புக்கு சென்றாண்டுக்கு ஈடு தரும் அளவிலான attendance இருக்குமா ? என்றதொரு கேள்வி எனக்குள் இருக்கவே செய்தது ! ஆனால் எப்போதும் போல் நமது சேந்தம்பட்டிக் குழு ஏற்பாடுகளைக் கையிலெடுத்துச் செய்திட - லார்ட் லபக்தாஸ் போல  ஈரோட்டுக்கு வந்து சேர்வது மாத்திரமே எனது வேலையாக இருந்தது ! And சனிக்கிழமை காலை Le Jardin ஹோட்டலின் அருகாமையில் கண்ணுக்குத் தெரிந்த திசைகளிலெல்லாம் நம் நட்பு வட்டங்கள் மட்டுமே தென்படத் தொடங்க ஆட்டம் துவங்கிவிட்டது புரிந்தது ! எங்கெங்கிருந்தோ அடித்துப் பிடித்து, தத்தம் பணிகளையெல்லாம் ஓரம்கட்டி விட்டு, தம் வீட்டு வைபவம் போல உத்வேகத்தோடு ஆஜராகிவந்த ஒவ்வொருவரையும் பார்த்த போது, சூப் வாளியைப் பார்த்த ரின்டின் கேனைப் போல எனது உற்சாக மீட்டர் தெறிக்கத் தொடங்கியது. நிகழ்ச்சியைத் துவக்கிய சமயம் கணிசமான காலி இருக்கைகள் தென்பட்ட போதும், வெகு சீக்கிரமே அரங்கம் FULL என்பதை உணர முடிந்தது ! அன்றைய விழாவின் மையப் புள்ளி நமது tsi-nah-pah வின் "இரத்தக் கோட்டை" தான் என்பதால் - அதன் ரிலீசோடு நிகழ்ச்சியினை துவக்கம் செய்த போது, எனது தலைக்குள்ளோ - "இது போன வருடத்தின் இதே தருணத்தின் கனவன்றோ ? நாட்கள் தான் எத்தனை துரிதமாய் ஓட்டம் பிடிக்கின்றன !!"  என்ற சிந்தனையே பிரதானமாய் ஓடிக்கொண்டிருந்தது ! இன்னமுமே இதனைத் தடவி, அழகு பார்த்து சிலாகிக்கும் படலத்தை பெரும்பான்மை நண்பர்கள் தாண்டியிருக்கவில்லை என்பதை அறிவேன் ! Maybe நாளை முதலாய் இந்த ஆல்பத்தினுள் புகுந்திட நேரம் கிடைப்பின், அது பற்றிய உங்களது எண்ணங்களை இங்கே பதிவிடுங்களேன் folks ? Hardcover இதழ்கள் என்பதெல்லாம் ஒரு சீமான் தேசத்து, தூரத்துக் கனவாய் இருந்த நாட்களெல்லாம் போய் - நடப்பாண்டில் இது ஐந்தாவது hardcover என்ற நாட்களில் நாமெல்லாம் உலவி வருகிறோம் என்பதை நம்ப முடிகிறதா ? The power of dreams !!

"இரத்தக் கோட்டை" ரீலீஸைத் தொடர்ந்து நான் பேசியது ; சஸ்பென்ஸ் இதழாய் XIII மர்மம் தொடரின் "கர்னல் ஆமோஸ்" இதழை அறிமுகம் செய்தது ;  நடுவே நண்பர்களுக்கு நடத்திய காமிக்ஸ் நினைவுத் திறன் போட்டியின்லூட்டிகள் என்றெல்லாம் நிமிடங்கள் செம ரகளையாய் கழிந்த போதிலும், "அந்த" முக்கிய அறிவிப்பு உண்டா ? இல்லையா ? என்பதிலேயே அநேக நண்பர்கள் தீவிரமாய்க் காத்திருந்தது புரிந்தது ! And "அந்த" அறிவிப்பு எது தொடர்பானது என்பதில் சந்தேகம் வேண்டுமா - என்ன ?  

கனவுகளுக்கொரு ரம்யமான பழக்கம் உண்டு  - ஒன்று நிறைவேறியான பின்னே அதனைத் தொடர்வதோ, ஒரு படி மெகா சைசில் இருப்பது வாடிக்கை என்ற விதத்தில் ! And அது மீண்டுமொருமுறை நிஜமாகியுள்ளது - "இரத்தப் படலம்" ஒரு முழுவண்ணத் தொகுப்பு என்ற ரூபத்தில் ! சிலபல ஆண்டுகளாகவே இந்தக் கோரிக்கையினை நண்பர்கள் முன்வைத்து வருவதும்,  "பார்ப்போமே !" என்று நான்தட்டிக் கழித்து வந்ததிலும் இரகசியமேது ?  இம்முறை அதற்கான தருணம் மெய்யாகவே புலர்ந்திருப்பதாய் நினைக்கத் தோன்றுகிறது - நண்பர்களின் வேகத்தைப் பார்க்கும் பொழுது ! And so - இதோ அதற்கான முறையான அறிவிப்பு !

• வெறும் 800 பிரதிகளே விற்பனை இலக்கென்ற நிர்ணயத்தோடு 848 முழுவண்ணப் பக்கங்களோடு - 3 தொகுப்புகள் இணைந்ததொரு  பிரத்யேக slipcase-ல் இதனைத் திட்டமிட்டுள்ளோம் !
• ஒற்றை இதழாய் - இரண்டேகால் கிலோ எடையோடு இந்த இதழைத் தயாரிப்பதில் ஒரு பிரம்மாண்டம் நிச்சயம் இருக்கும் தான் ; ஆனால் தயாரிப்பில் ; சேகரிப்பில் ; வாசிப்பில் ஏகமாய் நடைமுறை சிக்கல்கள் கொண்ட அந்த முயற்சியை விடவும், இந்த 3 தொகுப்பென்ற பாணி நிரம்ப சுலபமென்பதில் சந்தேகங்கள் கிடையாது ! 
• இந்தத் தொகுப்பின் விலை ரூ.2200 ; slipcase ; கூரியர் / ஏர்மெயில் கட்டணங்கள் தனி !
• இது முன்பதிவின் விலை மாத்திரமே ; கடைகளில் / புத்தக விழாக்களில் வாங்கிடுவதாக இருப்பின், விலை கூடுதலாய் இருக்கும் !
• தற்சமயம் ரூ.1200 முன்பதிவுக்கென அனுப்பினால் போதுமானது. பாக்கித் தொகையினை 31/01/2018-க்கு முன்பாய் அனுப்பிடல் வேண்டும்.
• குறைந்த பட்சம் 400 முன்பதிவுகள் அத்தியாவசியம்  - இந்த முயற்சி நனவாகிட ! So நமது நண்பர் XIII-ன் விதியை தமிழில் நிர்ணயிக்கப் போகும் பொறுப்பு உங்களிடமே இனி !
• ஜனவரிக்குள் முன்பதிவுகள் ; அடுத்த ஈரோட்டு விழாவினில் இதழ் ரிலீஸ் என்பதே இலட்சியம் ! Maybe ; just maybe - 'தட தடவென' முன்பதிவுகள் கிட்டிடும் பட்சத்தில் ஏப்ரல் 2018-ல் இதனை அழகு பார்க்கும் சாத்தியங்களும் இருக்கலாம் !
• பாகங்கள் 1 - 18 அதே ஒரிஜினல் மொழிபெயர்ப்போடு வெளிவந்திடும் ! Proofreading பணியினில் நமக்கு ஒரு கூட்டு முயற்சி ரொம்பவே அவசியம்  என்பதால் - இதற்கு உதவிட உங்களை பெரிதும் எதிர்பார்த்திருப்போம் guys !!
• "இரத்தக் கோட்டை" பாணியிலேயே  - ஓவியர் வான்சின் ஒரிஜினல் அட்டைப்பட டிசைன்கள் மட்டுமே 3 ஆல்பங்களுக்குமே அட்டைப்படங்களாக அமைக்கப்படும். Plus - XIII சார்ந்த செய்திகள் தவிர்த்து இங்கே வேறெந்த விஷயங்களுக்கும் இடமிராது ! Will be a total dedication to XIII !
• முன்பதிவு செய்திடும் முதல் 200 நண்பர்களுக்கு "Codename மின்னல்" என்றதொரு பேட்ஜ் + wristband உண்டு ! 
• நண்பர்களின் உதவியோடு இந்த முயற்சிக்கென ஒரு பிரத்யேக FB பக்கமொன்றை உருவாக்கிட எண்ணியுள்ளேன் ! ரெகுலராக XIII சார்ந்த செய்திகள் ; நினைவுகள் ; என இதனில் சுவாரஸ்யத்தைத் தொடர முனைவோம் ! 
• நாளைய தினமே ஆன்லைன் லிஸ்டிங்கும் செய்து விடுவோம் என்பதால் புக்கிங்கள் சுலபமாகிடக் கூடும் ! 

தொடர்ந்த பொழுதுகளில் - 2018 அட்டவணை பற்றியும், SUPER 6 பற்றியும் ; நமது 'தல' 70 க்கு என்ன திட்டமிடல் என்பது பற்றியும்  - கருத்துக்கள் ; கேள்விகள் ; கோரிக்கைகள் என ஓராயிரம் கணைகள் பறக்கத் துவங்கின ! நேரப் பற்றாக்குறை ஒருபக்கமிருக்க, இந்த சந்திப்பில் உங்களிடமிருந்து நான் கிரகித்துக் கொண்ட சில விஷயங்களை நடைமுறைப்படுத்திப் பார்க்க - back to the drawing board அவசியமென்று நான் நினைத்ததால் - பெவிக்கால் பெரியசாமியாகவே நான் நிறைய நேரத்துக்கு உலவி வந்தேன் ! நிஜத்தைச் சொல்வதானால் - 4 மணி நேர சந்திப்பில் - நேரம் நிறைய மிச்சமிருந்து போயின் என்ன செய்வதென்று தெரியாமல் முழித்து நிற்க  கூடாதே என்ற முன்ஜாக்கிரதையில் 2018 -ன் அட்டவணையையும் கையில் கொண்டே வந்திருந்தேன் ! ஆனால் இன்னும் 4 நேரங்கள் கூடுதலாய் இருந்திருந்தாலுமே அதனைப் பையிலிருந்து வெளியே எடுத்திருக்க அவசியமோ / அவகாசமோ இருந்திராதென்று இப்போது புரிகிறது ! So பத்திரமாய் அது என்னோடே வ்வேடு திரும்புகிறது - சிறுசிறு மாற்றங்களோடும், மெருகூட்டல்களோடும் தீபாவளிக்கு முன்பாய் உங்களைச் சந்திக்கும் பொருட்டு !

இன்னமுமே ஒரு அதிரடி அறிவிப்புக்கான சமாச்சாரமுமே எனது கைப்பைக்குள் பதுங்கியிருந்து - அவசியம் நேர்ந்திடும் பட்சத்தில் ஆஜராகிட ! But அதனிலுமே மெலிதான fine-tuning தேவை என்று எனக்கு உங்களோடு உரையாடிய பொழுதில் பட்டதால் - அதற்கான அவகாசத்தையும் எடுத்துக் கொண்டு இன்னமுமே பக்காவான திட்டமிடலோடு உங்கள் முன்னே இன்னொரு தருணத்தில் ஆஜராவேன் ! So இப்போதைக்கு யூகக் குதிரைகள் திக்குக்கொன்றாய் உலவிட விட வேண்டியது தான் guys !!

ஒரு இலட்சம் விஷயங்கள் தலைக்குள் நீச்சல் அடித்துக் கிடப்பினும், உங்களின் அன்பெனும் அலை அவையனைத்தையும் பின்கொண்டு சென்று விடுவதால் - நிதானத்துக்குத் திரும்பிய பிற்பாடு அவற்றைப் பகிர்ந்திட முயற்சிப்பேன் ! இன்னமுமொரு சந்திப்பை ஒரு ஆயுட்கால நினைவுப் பொக்கிஷமாய் எங்களுக்கு மாற்றித் தந்த உங்கள் ஒவ்வொருவருக்கும் எங்களது நெஞ்சார்ந்த நன்றிகள் folks ! சிறு துளிகள் தான் பெரு வெள்ளங்களுக்கு அச்சாரமன்று படித்திருக்கிறோம் ! அது நிஜமாகும் நாளொன்று புலராது போகாது என்ற நம்பிக்கை முன்னெப்போதையும் விட இப்போது துளிர் விட்டு நிற்கிறது ! நம் பயனத்திற்கொரு புது அர்த்தம் வழங்கும் இந்த ஈரோடு நகருக்கு என்றென்றும் நமது வந்தனங்கள் ! 

See you around all ! "இரத்தக் கோட்டை" பற்றிய விமர்சனங்கள் + ஆகஸ்ட் இதழ்கள் சார்ந்த அலசல்களோடு தொடர்வோமா - வரும் வாரத்தில் ? Bye now !