ஜெய் ஜம்பிங் ஜாக் !

 நண்பர்களே,

வணக்கம். நாக்கு வறள்கிறது ....குறுக்கெல்லாம் நோவுகிறது...முட்டிகள் ஐயா..தெய்வமே...என்று கதறுகின்றன...! ஆனால்...ஆனால்...surprise ...surprise ....மனசெல்லாம் மத்தாப்பூவாய் பூரித்துக் கிடக்கின்றது ! கடந்த 10+ வருஷங்களாய் தூக்கங்களைத் தொலைத்த இரவுகளுக்கு பஞ்சமே கிடையாது ; ஞாயிறுகள், பண்டிகைகள், நாள்,பொழுது,விசேஷங்கள் என எதை எதையோ மிஸ் செய்திருக்கிறோம் தான்....ஆனால்...ஆனால்...surprise...surprise .....அவையெல்லாமே இந்த நொடியில் சந்தோஷ நினைவுகளாகவே மனதில் நிழலாடுகின்றன ! Simply becos - இது போலான ஒற்றை நாளுக்கென யுகங்களாய் தவமிருந்தாலும் தப்பே இல்லை ! Enter the சென்னை புத்தக விழா 2023-ன் முதல் வாரயிறுதி & ஒரு வரலாறு படைக்கும் விற்பனை கண்ட மாலைப்பொழுது !!  Oh yes sir.....நேற்றைய தினமானது நம் நண்பர்களை நேரில் சந்திக்கும்  குதூகலத்தினை மாத்திரமன்றி, நமக்கொரு record breaking விற்பனையினையும் நல்கிய அற்புதப் பொழுது !! ஜெய் ஸாகோராயா நமஹ !!

எப்போதும் போலவே நேற்றைக்கும், நிமிடத்துக்கொரு பரவச அனுபவமென, சந்திக்க இயன்ற ஒவ்வொரு நண்பரிடமுமிருந்தும் கொஞ்சம் மின்சாரத்தை உள்வாங்கிக் கொள்ள முடிந்ததெனில் அது மிகையே அல்ல ! கண்ணில்பட்ட ஒவ்வொரு வதனத்திலும் சந்தோஷப் பிரவாகங்கள், உள்ளத்திலிருந்து பூத்திடும் முகம் நிரப்பும் புன்னகைகள் & கண்களில் ஒரு ஆவல் !! ஸ்டாலுக்குள் கால்பதித்த ஒவ்வொரு நண்பரிடமும் 'இது நம்ம வீட்டு விசேஷம்'  என்பதான உணர்வு ததும்புவதை உணர முடிந்தது ! டெக்ஸ் ; டைகர் ; XIII ; மாயாவி ; லக்கி இத்யாதி..இத்யாதி...950 புக்ஸ் ; ஊர்ப்பட்ட தேசங்களின் படைப்புகள் - என்பனவெல்லாம் நம் சாதனைகளே இல்லீங்க ; அவையெல்லாம் அப்டிக்கா ஓரமாய்ப் போய் விளையாட வேண்டிய குட்டிப் பையன்களே ! ஆனால் இந்த 51 ஆண்டு காலப் பயணமும் நம் ஒவ்வொருவருக்குமே சொந்தமானது, இந்த பொம்ம புக் முயற்சிகளின் முழுமையிலும் நம் ஒவ்வொருவருக்கும் பங்குண்டு - என்ற அந்த உணர்வானது - சிலாகிப்புகள், விற்பனைகள், வரவு-செலவுகள் என்பனவற்றையெல்லாம் தாண்டியதொரு அசாத்திய உச்சம் !! இம்மியும் சந்தேகமில்லை - நம் ஆயுட்கால சாதனை என்பது இதைத் தவிர்த்து வேறெதுவும் இல்லை !! And இந்த அன்புகளுக்கு அருகதையானவர்களாய் தொடர்ந்திட, என்ன பல்டியடித்தாலும் தப்பே இல்லையென்று தோன்றுகிறது !! 

சந்தேகங்கள் இன்றி இன்னொரு சமாச்சாரமும் நேற்றைக்குப் பதிவாகியது & "ஜம்பிங் ஸ்டார் பேரவையின்" அதிகாரபூர்வமான அதகளம் ஸ்டார்ட்டு என்பது தான் அது ! பதுங்குகுழித் தலீவரும், ரவுண்டு பன் செயலருமாய் சங்கமென்று ஒன்றை நடத்தி வந்ததை....சாரி..சாரி..கைத்தாங்கலாய் உருட்டி வந்ததை, இத்தனை காலமாய்ப் பார்த்து வரும் நமக்கு, செம யூத்தான இந்தச் சிகப்புப் பேரவை செய்திடும் அதிரடிகளை வாய் பிளந்து ரசிக்கவே நேற்றைக்கு பொழுது சரியாக இருந்தது ! தலைவர் ஸாகோர் பாபு சார் - பை நிறைய ZAGOR டி-ஷர்ட்களோடும், டப்பி நிறைய அல்வாவோடும்  கண்ணில் படும் நண்டு நஸ்கானில் ஆரம்பித்து அத்தினி பேருக்கும் பதவிகளை வாரி வழங்கிய அழகிருக்கே...அட அட அட....காண கண்கோடி போதாது !! சொல்லி வைத்தாற்போல நேத்திக்கு நானும் சிகப்புச் சட்டையோடு ஆஜராகியிருக்க - ஸ்டால் முழுக்க 'சிகப்பு தான் எனக்குப் புடிச்ச கலரு...டொய்யுங்..டொய்யுங்..' .என்ற மீசிக் தான் ! அநேகமாய் நாமக்கல்லில் அடுத்த M.L.A எலெக்ஷனில் புதுத் தலீவர் சுயேட்சையாய், கோடாலி சின்னத்தில் நின்றாலும் ஆச்சர்யப்படுவதற்கில்லை - simply becos வோட்டு போடக்கூடிய அத்தினி பேருக்கும் ஏதாச்சும் பதவியினை முன்கூட்டியே அறிவித்து கவர் பண்ணும் அந்தத் திறனுக்கு நேற்று ஸ்டாலில் இருந்தோர் அனைவரும் சாட்சி !   

நேற்றைய விற்பனை highlight என்று பார்த்தால் - சந்தேகமின்றி 3 standout performers !! 

முதலாமவர் நம்ம 'தல' டெக்ஸ் தான் ! மலரைச் சுற்றும் வண்டுகளைப் போல, வரிசையாய் டெக்ஸ் இதழ்கள் அடுக்கப்பட்டிருந்த இடத்திலேயே நங்கூரமிட்டு நின்ற வாசகர்கள் அநேகர் ! 'போன வருஷத்து டெக்ஸ் full ஆ குடுங்க !!' என்று கேட்ட மஞ்சச்சட்டை காதலர்கள் எக்கச்சக்கம் !

இரண்டாவது standout performer - நம்ம V Comics !! முழுமையான பாராட்டுக்கள் ; சிலாகிப்புகள் ; வாழ்த்துக்கள் - "பிரியமுடன் ஒரு போராளி"க்கு !!

And மூன்றாம் standout performer அல்ல - performerssssss !! Yes - ஓராண்டின் முழு செட் புக்ஸ் வேணுமென்று வாங்கிப் போன நண்பர்கள் கணிசம் !! Smashing '70s - full set 5 கொண்டு வந்திருந்தோம் - காலி !! 2022 full set pack 3 கொண்டு வந்திருந்தோம் - காலி ! 2022-ல் சந்தாவுக்கு அப்பாற்பட்டு வெளியான ஸ்பெஷல் இதழ்களின் pack கொண்டு வந்திருந்தோம் - காலி !! Phew !!! அப்படியே இந்த ஜனவரியின் துவக்கங்களில் மட்டும் காலம் நின்று விட்டால் ; மறுக்கா மறுக்கா ஒரே வாரமானது தொடர்ந்து கொண்டேயிருக்க தோர்கலின் பாணியில் சாத்தியமாகிடுமெனில் - கிட்டங்கிகளைக் காலி பண்ணிவிட்டு வாயெல்லாம் பல்லாய் நின்று விடுவேனே !!  

2 ஆண்டுகளாய் தொடர்பு விட்டுப் போயிருந்த நண்பர்களில் பலர், புஜம் நோகும் பளுவிலான புக்ஸை அள்ளிப் போனதே நேற்றைக்கின் விற்பனைச் சாதனையின் பின்னணி என்பது புரிகிறது ! And இன்னொரு சந்தோஷ ஆச்சர்யம் - நேற்றைக்கு நான் பார்த்த (எனக்குப் புது) வாசகர்களில் பலரும் இளைஞர்கள் !! (ஸ்ரீபாபு சார்....ஹேப்பி அண்ணாச்சி !!) பலரும் in their late '20s & early '30s !! இவர்கள் அனைவருமே வருடாந்திர வாடிக்கையாளர்கள் மாத்திரமே - at least for now ! அனைவரின் நம்பர்களை பில் போடும் போது நம்மாட்கள் சேகரித்து வருவதால், தொடரும் பொழுதுகளில் அவர்களையும் சிறுக சிறுக நம் வட்டத்தின் ரெகுலர்களாக்கிட முயற்சித்துப் பார்க்க வேண்டும் !

நேற்றையின் top buyer திருவனந்தபுரத்தில் வசிக்கும் நண்பர் - ரூ.15000-க்கு போட்டுத் தாக்கினார் ! And அவர் காட்டிய ஆர்வமும், உற்சாகமும் simply wow !! மிகச் சரியாய் என் வயதிலானவர் ; வயதுகளெல்லாம் வெறும் நம்பர்களே என்பதை அழுத்தமாய் நேற்றைக்கு கோடிட்டுக் காட்டினார் !! 

இளம் டாக்டர் ஜோடி ; கணவர் cupboard முழுக்க காமிக்ஸ் ஆல்பங்களால் நிரப்பித் திரிவதைப் பற்றி மனைவி என்னிடம் சொல்லிக்கொண்டிருக்கும் நொடியிலேயே மனுஷன் 2022 full set-ஐ அள்ளிக் கொண்டிருந்தார் !! வாங்கி வீட்டுக் கிளம்பியவர் , திடு திடுவென திரும்பி வந்து Specials Pack ஒன்றையும் வாங்கிப் போனார் !!

'2 வருஷம் முன்னே 'தலையில்லாப் போராளி' வாங்கி குடுத்து என் நண்பன் ஒருத்தன் என்னை வாசிக்க வைச்சான்; இப்போ கிறுக்கு பிடிச்சி டெக்ஸ் full set வாங்கிட்டு இருக்கேன்' என்று சொன்னதொரு நண்பரும் யூத்தின் பிரதிநிதியே ! தமிழில் ஏழு லட்சம் வாசகர்களைக் கொண்டதொரு podcast செய்து வருகிறாராம் & அதனிலும் நம்ம 'தல' பற்றிப் பேசியுள்ளனராம் !! 

'பச்சக்' பச்சக்' என்று போட்டோக்கள் எடுக்கப்பட, வழக்கம் போல போவோர்-வருவோரின் முகங்களில் 'இத்தினி பேருக்கு இந்த கொயந்த புள்ள புக் ஸ்டாலில் இன்னா ஜோலி ?' என்ற கேள்வி நெளிவதை பார்க்க முடிந்தது ! 

ஒரு புதுமண ஜோடி !! கணவரின் ஆர்வத்துக்கு தடை சொல்ல மனமின்றி மனைவி போரடித்துப் போய் நிற்க, கணவரோ காமிக்ஸ் புதையலைக் கண்டதும் bachelor ஆகிவிட்ட குதூகலத்தில் இதை புரட்ட, அதை அள்ள, என்று ரவுண்டு கட்ட ஆரம்பித்தார் ! 

And நேற்றைக்கு கணிசமான பெண்களின் வருகையுமே இருந்தது நமது ஸ்டாலில் ! வாங்கினார்களோ, இல்லியோ - பொறுமையாய் புக்ஸை புரட்டிக் கொண்டிருப்பதை பார்க்க முடிந்தது !! 

இன்னொரு highlight - வீட்டிலுள்ள குட்டீஸ்களுக்கென ஷாப்பிங் செய்திட முனைந்த டாடிக்கள் !! லக்கி லூக் ; பென்னி ; smurfs என்று வாங்கிப் போனார்கள் ! And சிண்ட்ரெல்லா புக்கைப் பார்த்து விட்டு, அந்தக் கதையை தன தந்தையிடம் ஒப்பித்த ஒரு குட்டீசின் அழகை மெய்மறந்து ரசித்தோம் - நானும், பிரசன்னாவும் ! இந்த fairytale comics முயற்சி வியர்த்தமாகிப் போச்சே என்ற ஆதங்கம் என்னுள் இருந்தது நிஜமே ; ஆனால் - இது போலான காட்சிகள் அந்த நெருடல் மீது ஒரு வாளி குளிர்ந்த நீரை ஊற்றி விடுகிறது ! எல்லாம் அழகே - இந்த காமிக்ஸ் உலகினில் எல்லாம் அழகே !!

ரைட்டு...ஞாயிறு காலையே புத்தக விழாவில் ஆஜராகக் கிளம்பிட வேணுமென்பதால் இப்போதைக்கு நடையை கட்டுகிறேன் ! And yes - இன்றைய தினத்தின் Times of India நாளிதழில் பக்கம் 2-ல் ஒரு அரைப்பக்கக் கட்டுரையை பிரசுரித்து நமக்கு செம பூஸ்ட் தந்துள்ளனர் !! ரொம்பவே பொருத்தமான தருணத்தின் நிகழ்வு என்பதால் - அதனிலுள்ள சில பிழைகளைத் தாண்டியும் மகிழ்கிறோம் !! நான் சுட்டிக் காட்டியிருந்த திருத்தங்களையும் போட்டிருந்தார்களெனில் மகிழ்வு இரட்டிப்பாகியிருக்கும் ! Anyways நமது உளமார்ந்த நன்றிகள் இந்த ஊடக ஜாம்பவானுக்கு ! 

Bye all...இன்றைய பொழுதும் ஜம்பிங் ஜாக் பேரவையின் அலப்பறைகளுடனும், விற்பனை சாதனைகளுடனும் தொடர்ந்திடும் பட்சத்தில் - "எங்கே ? எப்போது ?" பகுதியில் விளம்பரப்படுத்தப்பட்டிருந்த "ஸாகோர் கலர் Special" fast track செய்திட முனைவோம் ! ஜெய் ஜம்பிங் ஜாக் !! See you at the fair guys !! 

P.S : இத்தாலியில் கூட ஒரு செம active ஜம்பிங் ஜாக் பேரவை உள்ளது போலும் ; 60 புக்ஸ் ஆர்டர் தந்துள்ளனர் !!