ஒரு டிசம்பர் தோரணம் !

 நண்பர்களே,

வணக்கம். எங்களைப் பொறுத்தவரையிலுமாவது 2020 ஒரு முற்றுக்கு வந்து விட்டது ! Yes- டிசம்பரின் இதழ்கள் நான்கும் தயாராகி, பைண்டிங்கில் குடியேறியுள்ளன ! வரும் வியாழனன்று டப்பிகளுக்குள் ஐக்கியமாகி வெள்ளி / சனிக்கு உங்கள் இல்லத்துக் கதவுகளை அவை தட்டிட வேண்டும் ! So அட்டவணை பூர்த்தி கண்டுள்ளதோ - இல்லையோ ; ஒரு வரலாற்று நிகழ்வான ஆண்டிலும், நம் தலை தண்ணீருக்கு மேலே தட்டுத்தடுமாறித் தொடர்ந்திட்ட அதிசயத்துடன் இந்த வருடத்துக்கு விடை தந்திட முனைந்துள்ளோம் ! சன்னமானதொரு பெருமூச்சும், விசாலமானதொரு நன்றி கூறும் பிரார்த்தனையும் இந்த நொடியினில் ரொம்பவே தேவையெனத் தோன்றுகிறது ! Boy..oh boy !!

எது எப்படியோ – இந்தாண்டின் ரெகுலர் அட்டவணை மார்ச் வரை நீண்டு போவதால் 3 மெகா இதழ்கள் இன்னமும் பெண்டிங் உள்ளன !

- ஜனவரியில் முத்து 49-வது ஆண்டுமலராய் தோர்கல் 5 பாக ஆல்பம் !

- பிப்ரவரியில் MAXI லயனின் 3 பாக ARS MAGNA !!

- மார்ச்சில் 3 பாக அசாத்தியமான “பிரளயம்” கிராபிக் நாவல்!

So தொடரவுள்ள ஒவ்வொரு மாதத்திலுமே ஒரு மெகா ரகளையான வாசிப்பனுபவம் காத்துள்ளது என்பேன் ! And கேக்கின் மீதான ஐஸிங்காகச் சொல்லக்கூடியது - மூன்று இதழ்களுமே தெறிக்க விடச் செய்யும் ஹிட்களாக அமைவதில் ஐயங்களில்லை என்ற ஜாலி சேதியே ! தோர்கல் பில்டப்களுக்கு அப்பாற்பட்டவராகி விட்டார் ! ARS MAGNA ஒரு க்ளாஸிக் என்பது நம்மில் பலருக்கும் தெரியும் & “பிரளயம்” பிடரியில் அறையவுள்ளதிலும் சந்தேகங்களில்லை ! So டிசம்பருக்கு டாட்டா சொன்ன கையோடு, தொடரவுள்ள மாதங்களுக்கான எனது planner-ஐப் பார்த்திடும் போது ஒரு மெல்லிய இளிப்பு குடிகொள்வதைத் தவிர்க்க .இயலவில்லை ! ஆண்டின் பெரும்பகுதிக்கு இஞ்சி தின்ற எதுவோ போலவே பொழுதுகளைக் கடத்தி வந்தவனுக்கு இப்போது home stretch-ஐப் பார்த்தது போலான உணர்வு !

மெகா இதழ்கள் தவிர்த்து நான் எதிர்பார்த்திருப்பது MAXI லயனின் இறுதி ஸ்லாட்டை நிரப்பிடப் போகும் ஆல்பத்தை எண்ணியே ! அறிவிக்கப்பட்டவை 6 MAXI இதழ்கள் ! அவற்றுள் MAXI-க்களாகவே இதுவரை வெளியாகியுள்ளவை மூன்று :

- இருளின் மைந்தர்கள் TEX – பாகம் 1

- இருளின் மைந்தர்கள் TEX – பாகம் 2

- பிசாசுப் பண்ணை லக்கி லூக்

பிப்ரவரியில் காத்துள்ள ARS MAGNA' வாண்டு ஸ்பெஷல்களின் 2 ஸ்லாட்களையும் ஒன்றிணைத்து ரூ.300 விலையிலான ஆல்பமாய் வரவுள்ளதால் MAXIs # 4 & 5 ஓவராகிடும் ! So எஞ்சி நிற்பது அந்த இறுதி ஸ்லாட் ! அதனை MAXI சைஸிலேயே லக்கி லூக்கின் “கௌபாய் எக்ஸ்பிரஸ்” or “சூ…மந்திரகாளி” மறுபதிப்புகளோடு நிறைவு செய்திடலாம் ! Or – அந்தக் களத்தினில் நமது ‘தல‘யின் வண்ண மறுபதிப்பில் ஏதோவொன்றை (டெக்ஸ்) ரெகுலர் சைஸிலேயே போட்டுத் தாக்கிடலாம் ! எந்த மஞ்சள்சட்டையார் அந்த ஆறாவது ஸ்லாட்டை ஆக்ரமித்தாலுமே உத்தரவாதமான ‘ஹிட்‘ என்பதில் ஏது ஐயம் ? So எந்த மஞ்சளுக்குக் கைதூக்கிடப் போகிறீர்கள் guys?

- MAXI சைஸில் லக்கி லூக்

or

- ரெகுலர் (டெக்ஸ்) சைஸில் ; கலரில் இரவுக்கழுகார் !

ஒல்லிப்பிச்சானுக்கே உங்கள் ஓட்டெனில் – அதை குதிரை மீதே சவரம் செய்து பயணம் செய்யும் சாகஸத்துக்கா ? அல்லது விரல் நீண்ட மாயாஜாலக்காரர் கதைக்கா ? என்பதையும் சொல்லி விடுங்களேன் ப்ளீஸ் ? திட்டமிடலில் தொக்கி நிற்பது இந்த ஒற்றை இதழ் மட்டுமே என்பதால் – இது குறித்து ஜல்தியாய் ஒரு தீர்மானத்துக்கு வந்தோமெனில் மேற்கொண்டு ஆக வேண்டிய வேலைகளைப் பார்த்து விட்டு புது அட்டவணைப் பணிகளில் சிறுகச் சிறுக விரல் நனைக்கத் துவங்கி விடுவேன் !

நடப்பாண்டின் ஒரு நகைமுரணைப் பற்றியும் இங்கே சுட்டிக்காட்ட நினைக்கிறேன்! ஆரவாரமாய் ஜனவரியில் துவங்கிய ரெகுலர் அட்டவணையானது ஜானவாசக் கார் போல ஆடியசைந்து பயணித்து வரும் நிலையில், ஏப்ரலில் துவக்கம் கண்ட ஜம்போ சீஸன் 3 இதோ- இந்த டிசம்பரோடு சுபம் காண்கிறது ! லேட்டாய் ஆரம்பித்தாலும் லேட்டஸ்டாய்த் தாக்குவது தானே தமிழகத்துத் தற்போதைய trend ? So அந்த பாணியில் நடப்பாண்டினில் சடுதியாய் சீஸன் 3-ன் ஆறு இதழ்களுமே களம் கண்டுவிட்டுள்ளன !!

- பிரிவோம் சந்திப்போம்

- ஜேம்ஸ் பாண்ட் 007 – நில்… கவனி… கொல்!

- தனித்திரு… தணிந்திரு… (Old Pa Anderson)

- மா துஜே சலாம் (ரஷ்ய செச்சன்ய யுத்தகளம்)

- கால வேட்டையர்

 &

- தி Lone ரேஞ்சர் – தகிக்கும் பூமி

பிப்ரவரியிலும், மார்ச்சிலும் களம் கண்ட ஜம்போவின் சீஸன் 2 இதழ்களான “அந்தியில் ஒரு அத்தியாயம்” (மார்ஷல் சைக்ஸ்) & “நில்…கவனி…வேட்டையாடு” (Zaroff) இதழ்களையுமே கணக்கில் சேர்த்துக் கொண்டால் 2020-ன் ஜம்போ count மொத்தம் 8 ஆகிடும் ! “சூப்பர் 6” என்று ரெகுலர் தடம் சார்ந்த நாயகர்களோடே முயன்றிட்ட எக்ஸ்ட்ரா இதழ்களின் தடத்தினை சற்றே tweak செய்து, one-shots களுக்கான பிரத்யேகத் தடமாக்கினாலென்ன ? என்ற மகாசிந்தனை ஒரு ரயில்ப் பயணத்தின் அப்பர்பெர்த்தில் துளிர்விட்ட போது, ஒற்றை ஆண்டின் ஆர்வக்கோளாறாக மாத்திரமே இது அமைந்திடக் கூடுமென்றே நினைத்திருந்தேன் ! ஆனால் இஷ்டப்பட்ட ஜானர்களையெல்லாம் வரம்புகளின்றி முயற்சிக்கும் சுதந்திரம் ரொம்பவே பிடித்துப் போனதால் சீஸன் 2-க்கு பிள்ளையார் சுழி போடும் ‘தகிரியம்‘ துளிர் விட்டது ! And உங்களுக்கும் இந்த freewheeling பாணி பிடித்திருந்ததால் – ஜம்போ இனி ‘அம்போ‘வாகிடாதென்ற நிச்சயம் பிறந்துள்ளது ! And இந்த 2020-ல் நாம் பார்த்துள்ள ஜம்போ இதழ்கள் ஒவ்வொன்றுமே ஒரு விதமல்லவா ?

- மார்ஷல் சைக்ஸ் – ஒன் ஷாட் கௌபாய்… சற்றே pathos சகிதம் !

- Zaroff – Pure thrills; ஒரு exotic பின்புலத்தில் ; மலைக்கச் செய்யும் சித்திரங்களுடன் !

- பிரிவோம்… சந்திப்போம் – மறுபடியுமொரு ஒன் ஷாட் கௌபாய் இதழ்! ஆனால் இதனிலுள்ள கதைமாந்தர்கள் ஒவ்வொருவரும் a different shade of grey ! மனித மனதைத் தோலுரித்துக் காட்ட முயன்ற முயற்சி!

- ஜேம்ஸ் பாண்ட் 2.0 – நவீன யுக espionage பற்றிச் சொன்ன ஒரு old school spy ! Again – ஜப்பானின் வித்தியாசப் பின்புலத்தில் !

- தனித்திரு … தணிந்திரு – ஒன் ஷாட்! ஹெர்மனின் அதகளத் தூரிகையோடு ! சொல்லப்பட்டது கதையல்ல… நாகரீகத்தின் ஒரு அவலப் பக்கமே !

- மா…துஜே…சலாம் – பார்த்திரா புதுக்களம்… படித்திரா புதுப் பாணி ! ஒரு கிழவியும், ஒரு புள்ளைத்தாச்சி நாயும் 96 பக்கங்களுக்கு நம்மைக் கட்டுண்டு செய்ய  மடியுமென்று நிரூபித்த கதை!

- கால வேட்டையர் – மெதுமெதுவாய் Sci-fi பக்கமாய் அடிவைத்திட ஒரு முதற்படி ! காதுல கணிசமான புய்ப்பமே என்றாலும், காமிக்ஸ் உலகின் ஒரு மெகா அங்கத்தின் பக்கமாய்ப் பாராமுகமாய் நாம் இருந்திட முடியாதென்பதற்கு ஒரு சிறு நினைவூட்டல் !

- தி Lone ரேஞ்சர்             -  டிசம்பர் 2020

Looking ahead – காத்திருக்கும் சீஸன் 4-ம் ‘திக்குக்கொரு தினுசு‘ என்றே அமைந்திடவுள்ளது ! சில நேரங்களில் கதாநாயகர்கள் / நாயகிகள் / தொடர்கள் / சீரான கதைவரிசைகள் என்பதையெல்லாம் தூக்கிக் கடாசி விட்டு, சிக்கிய சிக்கிய சுவாரஸ்யங்களையெல்லாம் படிப்பதும் ஒரு ரம்யமே என்பதை நாம் சிறுகச் சிறுக உணர்ந்து வருகிறோம் ! எனது கதைத் தேர்வுகள் மட்டும் சோடை போகாது தொடர்ந்திடும் பட்சத்தில், ஆனையார் ஆண்டுக்குப் பன்னிரெண்டு தபா பிளிறும் சாத்தியங்களும் இல்லாது போகாது – maybe in the distant future !

இதோ – நடப்பு மாதத்து ஜம்போவின் அட்டைப்பட preview & உட்பக்க previews ! 

ஒரிஜினல் அட்டைப்படமே ; லேசான வர்ண மெருகூட்டலுடன் ! கதையைப் பொறுத்தவரையிலும் “தனியொருவன்” ஆல்பத்தின் மெலிதான தொடர்ச்சியாகவும் இதைப் பார்த்திடலாம் ! அதற்காக அந்தக் கதையை மறுக்கா மனப்பாடம் செய்தாக வேண்டும் என்றெல்லாம் சொல்ல மாட்டேன் ; but துவக்கப் புள்ளியைப் பற்றிய ஞாபகம் இருப்பின், இந்த இறுதி புள்ளியினைப் புரிந்திட சுலபமாகிடும் ! And மாமூலான டமால்-டுமீல் சமாச்சாரங்கள் இம்முறையுமே ஜாஸ்தி இராது ! வன்மேற்கின் ஒரு யதார்த்த முகத்தோடே தொடர் பயணிக்கிறது ! சொல்லப் போனால் அமெரிக்க வரலாறு ; அரசியல் என்றெல்லாமே கூட கதாசிரியர் தொட்டுச் செல்கிறார் ! So வழக்கமான வெஸ்டர்ன் கதை பாணிகளில் அல்லாது, இங்கே மொழிபெயர்ப்பில் நிறையவே சிரத்தை தர அவசியப்பட்டுள்ளது ! என்ன – கலரிங் செம டார்க் வண்ணங்களில் இருப்பதால், பக்கத்துக்குப் பக்கம் அமாவாசை இருட்டுக்குள் ஆளாளுக்குச் சுற்றித் திரிவது போலவே உள்ளது மட்டுமே நெருடியது ! 

“தனியொருவன்” தொடர வேண்டிய ஒருவனா ? ‘அப்பாலிக்கா பார்த்துக்கலாம்‘ என சொல்லப்பட வேண்டியவனா ? என்பதை இனி நீங்களே தீர்மானித்தாக வேண்டும் folks!

And இதோ- போன வாரம் தலை மட்டும் காட்டிய க்ளிப்டனின் உட்பக்க preview :

IMAGE COMING SHORTLY 

As cartoons go – இது பக்கத்துக்குப் பக்கம் உங்களை விலா நோகச் செய்யப் போகும் கதையெல்லாம் நஹி ! மாறாக ஒரு ஜாலியான ஆக்ஷன் கதையை பிரிட்டிஷ் வாழ்க்கைமுறை சார்ந்த பகடிகளோடு, கார்ட்டூன் சித்திரங்களுடன் சொல்லிட முனையும் முயற்சியாய் இதைப் பார்த்திட்டால் no disappointments for sure ! பரபரவென படித்துக் கொண்டே போகாது, சித்திரங்களையும் கர்னலின் முகபாவனைகளையும் நிதானமாய் ரசித்துக் கொண்டே போனால் அந்நாட்களது மூத்த நகைச்சுவையாளர் திரு.பாலையா அவர்களின் ஜாடைகள் தென்படலாம் !

And இம்மாதத்தின் இதழ் # 3 – நமது ‘தல‘ சிங்கிள் ஆல்பமான “ஒரு கசையின் கதை!” போன மாதம் திகட்டத் திகட்ட 672 பக்கங்களுக்கு ரவுசு செய்திருக்கும் நம்மவருக்கு இந்தாண்டின் இறுதி slot அத்தனை பெரிதில்லை தான்! In fact 86 பக்கங்கள் மட்டுமேயான இந்தக் குட்டிப் பட்டாசு போன மாதத்து ஆயிரம்வாலாவின் முன்னே வெங்காய வெடியாகத் தோன்றக்கூடும் தான்! ஆனால் 12 மாதத் திட்டமிடலை 15 மாதங்களுக்கு நீட்டிக்க நேரிடும் போது இது போன்ற எதிர்பாரா வறட்சிகளும் தலைகாட்டக்கூடும் தான்! In fact காத்திருக்கும் 64 பக்க கலர் டெக்ஸ் தொகுப்பானது மட்டுமே, புது அட்டவணை வரையிலான டெக்ஸ் சாகஸம்! Maybe நீங்கள் MAXI லயனின் அந்தக் கடைசி ஸ்லாட்டுக்கு இரவுக்கழுகாரையே தேர்வு செய்திடும் பட்சத்தில் இடையே ஒரு quick ஜாக்பாட் அடித்திட வாய்ப்புள்ளது! Depends on எந்த மஞ்சளுக்கு ‘ஓ‘ போடவுள்ளீர்கள்!! இதோ இந்த சிங்கிள் ஆல்பத்துக்கான அட்டைப்பட முதல்பார்வை! And இது சில காலம் முன்பாகவே நமது ஓவியர் மாலையப்பன் வரைந்தது! Probably நடப்பாண்டின் ஒரே அட்டைப்படம் நம் ஆஸ்தான ஓவியரின் கைவண்ணத்தினில்!

Looking ahead, ஜனவரியின் சென்னைப் புத்தக விழா சார்ந்த தீர்மானத்தினை அரசும், BAPASI-ம் எடுத்திட்ட பின்னரே நமக்கு ஏதேனும் தெளிவு பிறக்கும்! விழா இம்முறை நடந்திட்டால்; நமக்கு ஸ்டால் கிடைத்திடும் பட்சத்தில் சென்னைக்கு நமது கேரவன் உருண்டோடி வரும்! அவ்விதம் நிகழ வாய்ப்பின்றிப் போகும் பட்சத்தில் ஜனவரியில் நமது ஆன்லைன் புத்தக விழா இருந்திடும்! And போன தபா போலவே இம்முறையும் out of the blue இதழாய், இதழ்களாய் எதையேனும் களமிறக்க முடிகிறதா ? என்று பார்த்திட வேண்டும்!

Before I sign out – இரத்தப் படலம் வண்ண முன்பதிவுகள் சார்ந்ததொரு quick note ! "157" என்ற நம்பரில் புக்கிங்குகள் நிலை கொண்டிருக்க, ஏப்ரல் 2021 & மே 2021 என்ற 60 நாட்களது slot மட்டுமே மேற்கொண்டான புக்கிங்களுக்கு அவகாசமாய்த் தந்திடவுள்ளோம் ! And எண்ணிக்கை 250-ஐ தொட்ட கணமே பணிகளைத் துவக்குவதாகவுள்ளோம் – மீதம் 50+ புக்கிங்குகள் எப்படியும் தேறிவிடும் என்ற நம்பிக்கையினில் ! So ஈரோடு 2021 நடைமுறையாகிடும் பட்சத்திலும் சரி, நிகழாது போனாலும் சரி - ஆகஸ்ட் 2021-ல்  இந்த மறுக்கா-மறுக்கா-மறுக்கா மெகா இதழ் வெளிவந்திடும் ! இதுவே திட்டமிடல் ! And மே 31 2021க்குள் வண்டி பிக்கப்பே ஆகவில்லையெனில் ஜுன் முதல் தேதிக்கு அவரவரது முன்பணங்கள் வாபஸ் செய்திடப்படும் - முழுமையாய் ! There will be no further time extensions at all !! 

இதற்கிடையே அவ்வப்போது ‘எனக்கு 6 மாசம்லாம் காத்திருக்கப் பொறுமை லேது ; பணத்தைத் திருப்பியனுப்புங்க !‘ என்ற ஓரிரு கோரிக்கைகள் வராமல் இல்லை ! So ஏதேனும் காரணங்களின் பொருட்டு இந்த முன்பதிவுகளிலிருந்து நீங்கள் பின்வாங்கிட விரும்பிடும் பட்சத்தில் – your last date to do that will be December 15, 2020 ! இந்தத் தேதிக்குப் பின்பாய் வாபஸ் கோரிக்கைகள் வரவேற்கப்பட மாட்டாது என்பதைத் தெளிவாக்கிடுகிறேன் folks ! இது பணம் சார்ந்த விஷயமாக மட்டுமே இருந்திடும் பட்சத்தில் 157 பேருமே நாளையே காசைத் திரும்பக் கேட்டாலும், அந்தக் கோரிக்கையின் மசி உலரும் முன்னமே பைசா சுத்தமாய் திரும்ப ஒப்படைக்கும் ஏற்பாடுகள் ரெடியே ! ஆனால் இந்தத் திட்டமிடலின் எதிர்காலமே உங்கள் ஒவ்வொரு புக்கிங்குகள் என்ற செங்கல்களின் மீது அமர்ந்திருப்பதால் இடையிடையே செங்கல்களை உருவிட அனுமதித்தால் கட்டிய மொத்தமும் சரிந்தது தான் பலனாகிடும்! So back out செய்ய நினைத்திடும் பட்சத்தினில் டிசம்பர் 15க்கு முன்பே செய்திட்டால் – தயாராகியிருக்கும் கட்டுமானத்தின் பலத்தை நானும், நீங்களும் சரியாய்க் கணித்த புண்ணியம் கிட்டும்! So டிசம்பர் 15-க்குப் பின்பாய் இது குறித்து நம்மவர்களிடம் குரலை உசத்திட வேண்டாமே ப்ளீஸ் !

And while on the topic of இரத்தப் படலம் - இந்தப் புது ஆல்பங்களுடனான இரண்டாம் சுற்று இன்னும் எத்தனை தொலைவுக்கு நீண்டிடும் ? எப்போது நிறைவு கண்டிடும் ? என்ற தகவல்களும் படைப்பாளிகளிடமிருந்து கிட்டியுள்ளன ! சுவாரஸ்யமான அதனை வாகான நேரத்தில் பகிர்ந்திடுவேன் folks !

ஒரு கத்தை தோர்கல் பக்கங்கள் எடிட்டிங்கோசரம் காத்திருப்பதால் அடியேன் அங்கு நகர்கிறேன் folks ! இந்த வாரத்தினில் டெஸ்பாட்ச் இருக்குமென்பதால், அடுத்த ஞாயிறின் பதிவுப் படலத்தை உங்கள் முதற்பார்வைகள் ; நடுப்பார்வைகள் ; சைடுப் பார்வைகள் என ஏதோவொன்றால் நகர்த்திடுவோம் ! So கொஞ்சமாய் நேரத்தை ஒதுக்கிக் கொள்ளுங்களேன் - please ! Bye for now ! See you around !