தொடரும் ஒரு காதல் கதை !

 நண்பர்களே,

வணக்கம். போதி தர்மர் காலத்திலிருந்தே நமது வலைப்பக்கத்துப் பதிவுகளை எழுதி வருவது போலொரு பீலிங்கு எனக்கு ரொம்ப காலமாகவே ! தொடரும் இந்த வாரயிறுதிப் பழக்கத்தினில் ஒரு நடைமுறைச் சிக்கல் உண்டு !! ஒரு சமாச்சாரத்தை ஏதேனும் ஒரு பதிவினில் நான் ஏற்கனவே எழுதிவிட்டு, அதைச் சுத்தமாய் மறந்த கையோடு, மறுக்கா எங்கேனும் அதைப் பற்றியே எழுதி வைத்து பல்ப் வாங்கும் ஆபத்தே என்னை மிரட்டும் அந்தச் சிக்கல் ! ஆனால் நமது பொம்ம புக் பயணத்தினில், சில அட்டவணைகள் அட்சர சுத்தமாய் அதே பொழுதுகளில், சீராகத் தலைகாட்டுவதே இயல்பு எனும் போது, நானுமே அவற்றைப் பற்றி மறுக்கா மறுக்கா எழுதுவது தவிர்க்க இயலாதே போகிறது ! And இந்த நொடிதனில் நமது ஒட்டுமொத்த கவனக் குவிவும் ஈரோட்டுப் புத்தக விழாவின் மீதே எனும் போது - at the risk of sounding repetetive - அக்கட உலா செல்லல் அத்தியாவசியமாகிறது !

ஈரோடு !!! 

சில பொறாமைக்கார 'பன் நேசர்கள்' காதுகளில் புகை விட்டுத் திரியும் ஆபத்து மாத்திரம் இல்லையெனில் - கவிஞர் முத்துவிசயனார் இந்த நொடிதனில் தலைதூக்கி - "ஈரோடே ..... நீ வரவேற்கிறாய் எங்களைச் சீரோடே !!" என்ற ரீதியில் கவிதை மழையாய்ப் பொழிந்து தள்ளியிருக்கும் வாய்ப்புகள் செம bright !! பாவம்....அவர் காதுகளைக் கருகச் செய்யும் புண்ணியம் நமக்கு வேண்டாமே என்ற தயாள சிந்தையின் காரணத்தினால், ஆடிப்பெருக்குக்குப் பெருக்கெடுக்கும் காவிரியைப் போலாய் பொங்கிடும் கவிதைகளை உள்ளுக்குள்ளேயே போட்டு அடக்கிட வேண்டியதாகிப் போகிறது !!  Jokes apart, "ஆகஸ்ட்" என்றவுடனே இப்போதெல்லாம் நமக்கு நினைவுக்கு வருவது சுதந்திரதின விழாவின் ஆரஞ்சுச்சுளை முட்டாயும் ; ஈரோட்டுப் புத்தக விழாவும் தானே ? And அந்தப் புத்தக விழாவின் பெயரைச் சொல்லி, நண்பர்களின் ஒரு பெரும் திரளை அங்கே சந்திப்பதென்பது - 2013 முதலாய் நமக்கொரு அட்டகாசமானதொரு வாடிக்கையாகி விட்டுள்ளதல்லவா ? 

குறுக்கும், நெடுக்கும் பயணிக்கும் பல ரயில்கள் ஈரோட்டின் வழியாகவே செல்லும் எனும் போது, அது வரையிலும் ஈரோட்டுடனான எனது பரிச்சயம் - பிஸியான அந்த ரயில் நிலையத்தோடும், அங்குள்ள கடைகளில் செக்கச் செவேரென்று செங்கல்கட்டியாட்டம் அடுக்கிக் கிடக்கும் அல்வாக்களை மிரட்சியோடு பராக்குப் பார்ப்பதோடும் முடிந்திருந்தது ! முதன்முறையாய் 2013-ல் அந்த VOC பார்க் மைதானத்துப்  புத்தக விழாவினில், சொற்பமான நண்பர்கள் அணியினை மரத்தடியினில் சந்தித்தது இன்னமும் நினைவில் 'பளிச்' என்றுள்ளது ! தொடர்ந்த ஆண்டுகளில் - தொடர்ந்த நினைவலைகள் ஒவ்வொன்றுமே செம ரம்யம் என்பேன் !! குறிப்பிட்டுச் சொல்வதானால் :

• 2014-ல் LMS ரிலீஸ் சார்ந்த கும்மிகள் !! 
• 'தல' vs 'தளபதி' என்ற அப்போதைய செமத்தியான ரகளைகள் !
• "மின்னும் மரணம்" முழுவண்ணத் தொகுப்பின் அறிவிப்பு !
• நண்பர் சிபியின் பிறந்தநாளுக்கு மரத்தினடியில் கேக் வெட்டிய பொழுது !
• முதன்முதலாய் LE JARDIN ஹோட்டலில் ஒரு தம்மாத்துண்டு ஹாலை வாடகைக்கு எடுத்துக் கொண்டு நமது வாசகச் சந்திப்பினை நடத்தியது !
• தொடர்ந்த ஆண்டினில் எழுத்தாளர் சொக்கன் சாரை நமது விழாவுக்கு சிறப்பு விருந்தினராய் அழைத்து வந்த வேளை !
• இரத்தப் படல ரிலீஸ் & அது சார்ந்த ரவுசோ ரவுசுகள் !!
• கொரோனா எனும் கொடூரன் குறுக்கிடும் முன்பாய் 2019-ல் தெறிக்க விட்ட உற்சாகங்களுடனான சந்திப்பு !  
• பின்மாலைப்பொழுதுகளிலும், முன்னிரவுகளிலும் அங்குள்ள அந்த மரங்களுக்கே காதில் தக்காளிச் சட்னி கசியும் ரேஞ்சுக்கு நீண்டு சென்ற எண்ணற்ற நமது காமிக்ஸ் அளவளாவல்கள் ; கும்மாளங்கள் !!

இன்னமும் அந்தக் கொரோனா பூதம் பாட்டிலுக்குள் முழுமையாய் அடங்கிப் போயிருக்கவில்லை என்பதால் 2020 ; 2021 & 2022 என ஹாட்ரிக் அடித்துள்ளோம் - ஈரோட்டு சந்திப்புகளுக்கு கல்தா தந்த வகையினில் ! God Willing - 2023-ல் ; நமது 'தல' டெக்சின் 75-வது பிறந்தநாள் ஆண்டினில், விட்டதையெல்லாம் பிடிக்கும் வாய்ப்புகள் பிறக்குமென்று நம்புவோமாக !! Fingers crossed, an year in advance !!

Back to reality, வெள்ளி மாலையில் புதியதொரு இலக்கில் துவங்கிய புத்தக விழாவினில் நமக்கு மிதமான விற்பனை தான் ! ஆனால்...ஆனால்...சனிக்கிழமை காத்திருந்த விற்பனைச் சுனாமிக்கு வெள்ளி ஒரு அமைதியான முன்னுரை மட்டுமே என்பது தாமதமாகத் தான் புரிந்தது !! இந்த மாதிரியான மிரட்டலான விற்பனை நம்பர்களை சென்னைப் புத்தக விழாக்களில் மட்டுமே இதற்கு முன்பாய்ப் பார்த்திருக்கிறோம் ! போன வாரத்து கோவைப் புத்தக விழாவின் வாரயிறுதிகளில் செம brisk சேல்ஸ் எனும் போது, அந்த நம்பரை ஈரோட்டிலும்  தொட்டு விட சாத்தியப்படுமா ? என்ற வினா என்னுள் சத்தமின்றிக் குந்தியிருந்து ! அந்த நம்பரைத் தொட்டுப்புட முடிஞ்சா மாடி கிட்டங்கிக்கு இன்னொரு ரேக் செய்ய அட்வான்ஸ் தந்துப்புடலாமே !! என்ற ஆசை உள்ளுக்குள் அலையடித்தது ! இரண்டு வெவ்வேறு மாடிகளில் இங்கே கொஞ்சம், அங்கே கொஞ்சமென்று இறைந்து கிடக்கும் இதழ்களை சேகரித்து ஒட்டுக்கு ஒரே இடத்தில் ஒழுங்காய் அடுக்கிக் கொடுத்து விட்டால், நம்மாட்களின் பெண்டுகள் கழறுவது சற்றே மட்டுப்படுமே என்ற ஆதங்கம் தான் !! சனியும் புலர்ந்தது ; விழாவின் பிரதான நாளும் துவங்கியது & சுனாமியின் தாக்கமும் தான் !! 

"கோவையின் விற்பனை நம்பரை தொ-டு-வ-தா ? போவியா நீ.....அதை நான்காய் மடித்து ஜோப்பியில் நாங்க வைத்துக் கொள்வோமாக்கும் !" என்று ஈரோட்டு நண்பர்கள் தெறிக்க விட்டுள்ளனர் ரெகார்ட் படைக்கும் ஒரு விற்பனைத் தொகையுடன் !! அதிலும் ஒற்றை நண்பரின் கொள்முதல் மட்டுமே ரூ.18,000-க்குக் கொஞ்சம் குறைச்சல் !! And surprise ..surprise ...குடும்பத்தோடு வருகை தந்திருந்த அந்த நண்பரின் காமிக்ஸ் காதலுக்கோ, தெறிக்கவிட்ட மெகா கொள்முதலுக்கோ அவரது இல்லத்தரசி தடா போட்டிருக்கவில்லை !! நண்பரின் காமிக்ஸ் வேட்கைக்கொரு பெரும் thumbs up எனில், அவரது மறுபாதிக்கும், புதல்விக்கும் நமது மெகா சல்யூட் ! "இந்தக் காசுக்கு 2 பட்டுப்புடவைகள் வாங்கி இருக்கலாமே பாவி மனுஷா !!" என்று சொக்காயைப் புடித்து உலுக்கிடக்கூடிய  யதார்த்த மனைவியருக்கு மத்தியில் சகோதரி is quite a difference !! அவருமே நமது பொம்ம புக் உலகினில் உலவிப் பழகியவராக இருந்தால் வியப்படைய மாட்டேன் தான் !! Thank you to the family who made our day !!!

And இங்கே நமது நண்பர்கள் அட்டகாசமாய் உருவாக்கியுள்ளதொரு வாட்சப் குழுவின் பங்களிப்பினை நான் சிலாகிக்காது போனால் - ஸ்பைடரின் அசிஸ்டண்டாகி, ஆயுசுக்கும் தானைத் தலைவரிடம் மிதிபடும் விதி எனதாகிடக்கூடும் !   நண்பர்களின் privacy களுக்கு இம்சை கொடுக்க வேண்டாமே என்று சும்மா எட்டி மட்டும் பார்த்து விட்டு, நான் வெளியேறியிருந்த சமயமே நூற்றிச் சொச்சம் அங்கத்தினர்கள் இருந்தனர் அந்த க்ரூப்பில் ! ஸ்டாலில் நமது பண்டல்களை உடைக்கும் நேரத்திலிருந்து, அண்ணாச்சி லுங்கி கட்டிக்கொண்டு புக்ஸை அடுக்கும் நேரலை வரைக்கும் சுடச் சுட அங்கே போட்டோக்களாகவும், வீடியோக்களாகவும், ஜாலியான மீம்ஸ் சகிதம் தெறித்துக் கொண்டிருந்தது ! And விழா துவங்கிய பொழுது முதலாய் உள்ளூரிலும், அருகாமைகளில் உள்ள நண்பர்களும், தம்வீட்டு விசேஷத்தை முன்னின்று நடத்தும் உத்வேகத்தோடு ஸ்டாலுக்குப் படையெடுத்து வருவது கண்கொள்ளாக் காட்சி ! அதிலும் பாகுபலி 3 ஷூட்டிங்குக்கு லீவு சொல்லி விட்டு, நமது ஸ்டாலில் போட்டுத் தாக்கிவரும் அந்த மீம்ஸ் மன்னர் காட்டி வரும் அக்கறை - simply stunning ! ஒட்டுமொத்த பாசிட்டிவ் சிந்தனைகளின் வலிமை என்னவென்பதை ஒருங்கிணைந்து கண்முன்னே காட்டி வருகிறார்கள் நண்பர்கள் அத்தனை பேருமே !! தூரத்தில் இருந்தாலும் கூட, அவரவரால் இயன்ற விதங்களில் அந்தக் குழுவினை உயிர்ப்போடு வைத்திருந்து, உற்சாகங்கள் இம்மியும் குன்றிடாது பார்த்துக் கொள்கின்றனர் ! என்றேனும் ஒரு தூரத்து தினத்தில் - "இந்த பொம்ம புக் பயணத்தில் என்னடாப்பா சம்பாரிச்சே ?" என்று யாராச்சும் கேட்கும் பட்சத்தில், இம்மியும் யோசிக்காது  - "அன்பைச் சம்பாரிச்சோமுங்க சார் ! நல்ல மனுஷங்களின் அக்கறைகளைச் சம்பாரிச்சோசோமுங்கண்ணா ! எதிர்பார்ப்புகள் இல்லாத அரவணைப்புகளைச் சம்பாரிச்சோம் சார் !!" என்று சொல்வேன் ! அந்த மூன்று "அ"-க்களுக்குமே அந்நேரத்துக்குள் GST போட்டுத் தாக்கியிராதிருக்க இப்போவே புனித மனிடோவிடம் ஒரு மகஜரைப் போட்டு வைப்போம் !! Thanks a ton guys !! ஈரோட்டில் நாம் ஈட்டக்கூடிய ஒவ்வொரு ரூபாயிலும், உங்கள் ஒவ்வொருவரின் பங்களிப்பும் ஏதேனுமொரு ரூபத்தில் இருக்குமென்பது நிச்சயம் !! இன்னமும் 10 நாட்கள் காத்திருக்க, வர்ண பகவான் மட்டும் சற்றே மனம் இளகினால் ஈரோட்டில் இந்தாண்டு ஒரு புது அத்தியாயம் எழுதிடல் சாத்தியமாகிடும் என்பது உறுதி !! 

And இன்றைய விற்பனையின் தளபதிகள் பரிச்சயமான அதே முகங்களே !! "மாயாவி...மாயாவி....ஓ மை மாயாவி !!" என்று மாயாவி புக்ஸை அள்ளிக்கொள்ளும் நோஸ்டால்ஜியா நேசர்கள் ; அதன் பின்பாய் "டெக்ஸோடு தெறி" என்று 'தல'யை வேட்டையாடும் அணி பிரதானமென்றால் - கார்ட்டூன் பார்ட்டிஸ்களும் மஞ்சள் நகரில் உற்சாகமாய் புது இல்லங்கள் தேடிப் பயணித்துள்ளனர் ! கணிசமான குடும்பங்கள் இன்று நம் ஸ்டாலுக்கு வருகை தந்திருக்க, லக்கி லூக் ; smurfs என்று வாண்டுகள் ஆளுக்கொரு புக்கைத் தூக்கிப் போவதை நண்பர்களின் போட்டோ updates தெரிவிக்கின்றன ! அது மட்டுமன்றி "பீன்ஸ்கொடியில் ஜாக்"  & இன்றைக்கு ஸ்டாலுக்கு வந்து சேர்ந்த சிண்ட்ரெல்லாவும் குட்டிகளின் கொள்முதல் லிஸ்ட்களில் !!!

And before I forget - சனி பகலில் சிண்ட்ரெல்லா சந்தா புக்ஸ் அனுப்பியாச்சூ ! திங்களன்று உங்கள் வீட்டுக் குட்டீஸ்களிடம் ஒப்படைத்திடலாம் folks !! 

ஸ்டாலில் எவையெல்லாம் காலியோ, அவற்றினில் மேற்கொண்டு புக்ஸ் அனுப்பிட சனிக்கிழமை மாலையில் நம்மாட்கள் கிட்டங்கியிலிருந்து அள்ளி வந்த வேளையில் நான் அங்கு தானிருந்தேன் !! அந்த டைட்டில்களை கொஞ்ச நேரம்  மௌனமாகப் பார்த்துக் கொண்டேயிருந்தேன் !! மாயாவி....லாரன்ஸ்-டேவிட்....லக்கி லூக்....டெக்ஸ் வில்லர்....கென்யா...பீன்ஸ்கொடியில் ஜாக்....Alpha ....கலவையாய் கொஞ்சம் கார்ட்டூன்ஸ் !! No அர்ஸ் மேகினா....No கி.நா......No ஷெல்டன்....No லேடி S .....No மர்ம மனிதன் மார்ட்டின்....No அழுத்தமான கதைகள் !! இப்டிக்கா திரும்பினால் கூரியருக்கென போட்டு அடுக்கியிருந்த டப்பிக்களில் கணிசமாய் வேதாளர் boxes ..ரிப் கிர்பி boxes ...மாண்ட்ரேக் boxes ...! கையில் மிஞ்சியிருந்த டப்பிக்களை வேறேதோ புக்ஸ் அனுப்பிட நம்மாட்கள் பயன்படுத்துகிறார்கள் போலும் என்றெண்ணி - "இந்த டப்பாக்களில் வேற புக்ஸ் அனுப்பாதீங்க ; அதுபாட்டுக்கு உள்ளே இருக்கட்டும்" என்றேன் !! "ஊஹூம்...இவற்றினுள் உள்ள அனைத்துமே SMASHING 70s புக்ஸ் தான் சார் ; இன்னமும் Smashing-க்கு தினமும் புதுசா சந்தா கட்டுறாங்க சார் ; அந்தந்த box லேயே வைச்சு அனுப்புறோம் !!" என்று நம்மவர்கள் பதில் சொன்ன போது எனக்கு மறுக்கா மண்டை blank ஆகிப் போனது !! 

"மூக்கை முன்னூறு தபா சுத்துற கதைகளை எதுக்குடா தேடித்திரியுறே ? எதை பிரியமா வாங்குறாங்களோ - அதைச் சிவனேன்னு போட்டுப்புட்டு போக வேண்டியது தானே ? ரசனையை உசத்துறேன் ; ரசத்துக்கு பொடி போடுறேன்னு எதுக்கு உனக்கு இந்த வேண்டாத வேலை ?" என்று என்முன்னே குந்தியிருந்த மாண்ட்ரேக் சார் கேட்பது போலவே இருந்தது !!  இந்தப் புள்ளிகளை நிறையவாட்டி இந்தக் கடைசிப் பத்தாண்டுகளில் பார்த்தாச்சு தான் & இதே கேள்விகளை ஏகப்பட்டவாட்டி என்னையே கேட்டுக் கொண்டும் விட்டாச்சு தான் ! ஆனால் அவையெல்லாமே இந்த SMASHING '70ஸ்க்கு முன்பான பொழுதுகள் !! இம்முறை இந்த க்ளாஸிக் நாயகர்கள் + high quality books என்ற கூட்டணியிலான சந்தாப் பிரிவு மாற்றி எழுதியிருப்பது எக்கச்சக்கச் சந்தா இலக்கணங்களை :

**4 இதழ்களையும் சேர்த்து வாங்கினால் மட்டுமே சந்தா என்றோம் - வேதாளர் நீங்கலாய் மீதப் பேர் கிட்டங்கிக்குக் குடி வந்திடப்படாதே என்ற பயத்தினில் !! 

**வேதாளருக்குப் பணம் செலுத்தும் போதே - ரிப் கிர்பிக்கும் அட்வான்ஸ் அவசியமென்றோம் முகவர்களிடம் - அதே பய முகாந்திரத்தினில் ! 

ஆனால்...ஆனால்...நீங்கள் தெறிக்க விட்டிருக்கும் வாணவேடிக்கைகளில் எங்கள் மூஞ்சிகளில் முழுக்கக் கரி ! வேதாளருக்குச் சவாலிட்டார் ரிப் கிர்பி ! ரிப்புக்கு tough தருகிறார் மாண்ட்ரேக் !! "காரிகன் எப்போ ??" என்று நம்மவர்களை இப்போதெல்லாம் அதட்டுகிறார்கள் முகவர்கள் !! 

இன்னொரு பக்கமோ Soda ; சர்பத் என்ற இதழ்களை மாங்கு மாங்கென்று பணியாற்றித் தயாரித்து அதே முகவர்களிடம் கொண்டு போனால்,,"சரி...சரி...5 புக் அனுப்பி வையுங்க...அடுத்த மாசமா காசு தர்றேன் !" என்கிறார்கள் ! சத்தியமாய்த் தெரிலீங்கோ இந்த நொடியில் எது சரியென்று !! 

And yes - இந்த செம ஹிட் பட்டியலில் இம்மாதத்து சுஸ்கி & விஸ்கியையுமே சேர்த்துக்கோங்கோ ப்ளீஸ் ! தீபாவளியை தரிசிக்கும் வரைக்கும் இந்த dutch ஜோடி நம் கிட்டங்கிகளில் இருந்தால் நான் ரொம்ப ரொம்ப வியப்பு கொள்வேன் ! And அதே கதை தான் - வேதாளர் + ரிப் + மாண்ட்ரேக் ஆல்பங்களுக்குமே !! நடப்பாண்டின் இறுதிக்கு முன்பாய் இவர்கள் மூவருமே சிவகாசிக்கு விடைதந்திருப்பார்கள் என்பது நிச்சயம் !! இவர்கள் அனைவருக்கும் மத்தியிலான பொதுவான அம்சங்கள்  என்னவென்று ஆராய பெரியதொரு ராக்கெட் விஞ்ஞானமெல்லாம் அவசியமாகிடாது !!

• *அனைவருமே க்ளாஸிக் நாயக / நாயகியர் !
• *அனைவருமே பால்யங்களின் நினைவூட்டிகள் !
• *நேர்கோடே எங்கள் மூச்சு !" என்போர் இவர்கள் சகலரும் !
• *அட்டகாசத் தயாரிப்புத் தரங்கள் !
• *சேகரிக்க அழகான இதழ்கள் !
• *ஹார்ட்கவர்ஸ் !

இதோ - மேஜை மீது குவிந்து கிடக்கும் தொடரும் மாதங்களது tough stories பக்கமாய்ப் பார்வை தன்னிச்சையாய் ஓடுகின்றது !! 2023-ன் இறுதி செய்யப்பட்ட அட்டவணை பக்கமாகவும் ஒரு துரிதப் பார்வை நீள்கிறது !  பார்த்த கையோடு கண்ணாடி முன்னே போய் நின்றால், ரின்டின் கேனுக்குச் சித்தப்பு போலொரு பேமானி மண்டையன் தான் அங்கே தென்படுகிறான் !! அவ்ரெல் டால்டன் கூட அந்த பேமானி மண்டையனை விட விவேகமானவனாக தென்படுகிறான் இந்த நொடியினில் ! என்ன சொல்கிறீர்கள் folks அந்த அனுமானத்தினைப் பற்றி ?

க்ளாசிக்ஸ் காதல் தான் topic எனும் நிலையில் இதோ - நெடுநாள் அறிவிப்பாய் தொடர்ந்து வரும் இன்னொரு classy கிளாசிக் !! சீக்கிரமே உங்களை சந்திக்கத் தயாராகி வருகிறது !!

சீக்கிரமே முன்பதிவு விபரங்களோடு உங்களை சந்திக்கிறேன் ! Adios for now amigos !! See you around ! Have a rocking Sunday !!

Photos from Erode :