ஒரு விரல் குறுக்கிய பதிவு !

நண்பர்களே,

வணக்கம். இப்போதெல்லாம் 4 வாரங்களைக் கடத்துவது ஒரு யுகமாய்த் தோன்றுவது எனக்கு மட்டும் தானா ? என்று தெரியவில்லை......! ஜில் ஜோர்டனையும், அட்டையில் 'வரக்..வரக் ' என சொரிந்து கொண்டே நடை போட்ட ப்ளூகோட் பட்டாளத்தையும் உங்களுக்கு அனுப்பியதெல்லாம்  நான் ஏழாம் வகுப்புப் படித்த நாட்களின் தூரத்து நினைவுகள் போல் நிழலாடுகின்றன மண்டைக்குள் ! "இதழ் வந்தது ; பிரித்தோம் ; படித்தோம் - what next ?" என்ற கேள்விகள் உச்சரிக்கப்படாவிட்டாலும், அரங்கேறும் அரட்டைகளுக்கு மத்தியில் அவை இங்கே மௌனமாய் எழுந்து  நிற்பது போலொரு உணர்வு கூட எனக்குத் தோன்றுகிறது ! தொடரவிருக்கும் நமது 'தல ஸ்பெஷல்' கொஞ்ச வாரங்களுக்காவது உங்களை பிசியாக வைத்திருக்கப் போவது உறுதி என்பதால் - அந்த "what next ?" கேள்வியானது இம்மாதம் அத்தனை துரிதமாய்த் தலை தூக்காது என்றே நினைக்கிறேன் ! பைண்டிங் பணிகள் முடிந்து - இதற்கென ஆர்டர் கொடுத்துத் தயார் செய்யப்பட்டிருக்கும் ஸ்பெஷல் டப்பாக்களுக்குள் தஞ்சம் புகுந்து THE LION 250 இங்கிருந்து ஜூலை 3-ஆம் தேதி புறப்படும் ! நெய்வேலி புத்தக விழாவினில் இதனை வெளியிடுவது என்பதே ஒரிஜினல் பிளான் ; அப்படிப் பார்த்தால் - we are on target - becos நெய்வேலி விழா துவங்குவதும் 3-ம் தேதி தான் ! சமீப சமயங்களின் பாணியில் -" ஸ்பெஷல் இதழ்கள் - அச்சமயத்து  ஒரு புத்தக விழாவில் வெளியீடு ; நம் சந்திப்பு" என்பது இம்முறை சாத்தியமில்லாது போய் விட்டதில் வருத்தமே எனினும், ஈரோடு கூப்பிடு தொலைவில் உள்ளதென்ற விஷயத்தை நினைவுக்குக் கொணர்ந்து மனதைத் தேற்றிக் கொள்கிறோம் ! ஈரோட்டில் நமக்கு அதிர்ஷ்டமும், ஸ்டாலும் கிடைக்கும் என்ற நம்பிக்கையில் CCC ஜரூராய் தயாராகி வருகிறது ! அதற்குள் தாவும் முன்பாக - நெய்வேலி புத்தக விழாவில் நமது இதழ்கள் 2 வெவ்வேறு விற்பனையாளர்களின் ஸ்டால்களில் பிரதானமாய் விற்பனைக்குக் காட்சி தரும் என்ற (ஆறுதல்) சேதியைப் பகிர்ந்து கொள்கிறேன் ! நம் பணியாளரும் சில நாட்களுக்கு நெய்வேலியில் தங்கியிருந்து அந்த ஸ்டால்களில் நமது விற்பனைகளுக்கு முன்னுரிமை தந்திடும் முனைப்பில் செயல்பட்டிடுவார் ! So அந்தப் பக்கங்களுக்கு முற்றிலும் முதன்முறையாய் நம் இதழ்கள் அடியெடுத்து வைக்கக் காத்துள்ளன ; நிலக்கரி நகர் வாசகர்களிடம் கொஞ்சமேனும் ஒரு முத்திரை பதிக்க சாத்தியமாகிடும் பட்சத்தில் அதுவொரு சந்தோஷ முன்னேற்றமாய் இருந்திடும் ! Fingers crossed...!

வெளிச்ச வட்டத்தின் அடுத்த வாடிக்கையாளர்கள் நமது CCC -ன் கார்ட்டூன் கும்பலே என்பதால் நிஜமாகவே ஒரு ஜாலியான வேகத்தில் பணிகள் அரங்கேறி வருகின்றன ! CCC -ன் புக் # 3-ன் நாயகர் பற்றிய அறிமுகத்தை இந்த வாரம் வைத்துக் கொள்ளலாம் என்று தோன்றியதால் அந்த வேலையைப் பார்ப்போமா ? ஆசாமி உங்களுக்கு முற்றிலும் புதியவர் என்று சொல்ல முடியாது ; இவரொரு 'கெக்கே பிக்கே' சிரிப்புப் பார்ட்டி மட்டுமே என்றும் முத்திரை குத்திட முடியாது ! கார்டூன் ஸ்டைல் ஓவியங்களுடன், ஜாலியான கதை நகர்த்தலுடன், ஒரு உருப்படியான கதையையும் தாங்கி வரும் இந்தக் கட்டிளன்காளைக்குக் "கர்னல் க்ளிப்டன்" என்பதே நாமகரணம் ! ஏற்கனவே ஒரு நரை முடி கொண்ட மீசைக்காரர் நம் மத்தியில் சீரியசான பாணிகளில் சாகசம் செய்து வர ; இந்த மீசைக்கார பிரம்மச்சாரியோ அதே சாகசங்களை சற்றே கோணங்கித்தனப் பாணியில் நடத்துவதை விரைவில் பார்த்திடப் போகிறீர்கள். "காமெடி கர்னல்" என்ற பெயரில் ஏதோ ஒரு மாமாங்கத்தில் மினி-லயனில் (சரி தானா ?) ஒற்றை சாகசத்தில் மட்டுமே தலைக்காட்டிய இந்த பிரிட்டிஷ் துப்பறியும் சிங்கம் 2016-ல் கொஞ்சம் active ஆக நம்மிடையே வலம் வரும் சாத்தியங்கள் பிரகாசம் ! Of course இவருக்கு நீங்கள் தந்திடப் போகும் வரவேற்பு தான் long run-ல் இவரது தலைவிதியை நிர்ணயம் செய்திடும் முக்கிய அம்சமாக இருக்கப் போகின்றது என்றாலும் - இவர் தாக்குப் பிடிப்பார் என்றே எனக்குத் தோன்றுகிறது ! Cinebooks-ல் சில காலமாகவே வெளிவந்து கொண்டிருக்கும் க்ளிப்டன் அங்கே decent விற்பனைகளைச் சந்தித்து வருகிறாராம் ; அவற்றுள் சுவாரஸ்யமான கதைகளையாய் கடந்த முறை படைப்பாளிகளைச் சந்தித்த போது அள்ளிக் கொண்டு வந்திருப்பதால் என் மேஜை நிறைய இந்த மீசைக்காரர் விரவிக் கிடக்கிறார் ! பாரிஸ் செல்லும் சமயங்களில் எல்லாம் படைப்பாளிகளின் சமீபத்திய பிரெஞ்சு ஆல்பங்களைப் புரட்டிப் படம் பார்ப்பது எனது பொழுதுபோக்கு என்றாலும், அவர்களின் தலைமை நிர்வாகி அலுவலகத்தில் இருக்கும் பட்சத்தில் எனக்குப் பிரத்தியேக அழைப்பு வந்து விடும் - ததும்பி வழியும் அவரது ஷெல்புகளிலிருந்து ஆங்கில ஆல்பங்களை அப்புறப்படுத்தி இடத்தைக் கொஞ்சம் காலி செய்திடும் பொருட்டு ! "இவையெல்லாம் புதுசாய் வந்தவை...இது வேணுமா ? இது ஏற்கனவே உள்ளதா உன்னிடம் ?" என்று அக்கறையாய் விசாரித்து குறைந்த பட்சம் பத்து கிலோ எடையிலான ஆல்பங்களை நான் தோளில் போட்டுத் தூக்கிச் செல்வதை புன்சிரிப்போடு வேடிக்கை பார்ப்பது அவர் வழக்கம் ! குவிந்து கிடக்கும் ஆங்கில பதிப்புகளிலிருந்தும் ; வேறு சில அமெரிக்கப் பதிப்புகளிலிருந்தும் மாதிரிகளை அள்ளி வந்து விடும் போது நம் கதைத் தேர்வுகள் ; மொழிபெயர்ப்பு என சகலமுமே சுலபமாகி விடுகிறது என்பதால் - புஜமே கழன்று போனாலும் பரவாயில்லைடா சாமி ! என்று நான் தேட்டை போடுவது வாடிக்கை ! அதன் சமீபத்தைய பலனே க்ளிப்டன் !

க்ளிப்டனின் பின்னணியிலும் சரி, இம்மாதம் அறிமுகம் காணும் நம் லியனார்டோ தாத்தாவின் பின்னேயும் சரி - பெல்ஜிய காமிக்ஸ் படைப்புலகின் 2 ஜாம்பவான்களான டெ க்ரூட் & டர்க் தான் உள்ளனர் ! இந்த ஆற்றல்மிகு ஜோடியின் படைப்புகள் நிச்சயமாய் சோடை போகாதென்ற நம்பிக்கை எனக்குள்ளது !

ஜில் ஜோர்டான் கூட இதே போன்ற அடையாளங்களுக்குச் சொந்தக்காரரே ; அவருக்கும் கார்டூன் பாணி சித்திரங்கள் ; அவரும் ஒரு துப்பறிவாளர்; அங்கேயும் கதைக்கு மத்தியினில் humor ! ஆனால் ஜில்லாரை விட கிளிப்டன் சற்றே மாறுபட்டு எனக்குத் தோன்றுகிறார் - கதைகளில் புராதன நெடி அந்தளவுக்குத் தூக்கலாய் அடிக்காத காரணத்தால் ! So இந்தத் துப்பறியும் திலகம் நம்முடன் எத்தனை தொலைவு பயணிக்கிறார் என்பதை தொடரும் நாட்களில் அறிந்து கொள்ளும் ஆவலில் உள்ளேன் ! Fingers crossed once more !

அடுத்த மாதம் CCC என்பதால் லேசாகப் பின்சீட்டுக்குச் செல்லும் நம் ஒற்றைக்கையார் பற்றியும் இங்கே லேசாகப் பார்ப்போமே ? ஏற்கனவே நான் சொன்னபடி இந்தத் தொடரின் மிகச் சங்கடமான கதைகள் தொடரும் 2 பாகங்களின் தொகுப்பான :கறுப்பு விதவை" தான் என்பதில் துளியும் ஐயம் கிடையாது ! போட்டுத் தாக்கும் வன்முறை ; கையாளக் கஷ்டமான கதைக் களம் என இதன் ஆக்கத்தின் போது -கதாசிரியர் சீற்றமானதொரு மூடில் இருந்திருக்க வேண்டும் ! பெருசாய் சென்சார் செய்து கதையின் ஓட்டத்தைச் சீர்குலைக்கும் பாதையையும் தேர்வு செய்திடாமல் ; அப்படியே போட்டு பிய்ந்த விளக்குமாற்றுச் சாத்துக்கள் வாங்கும் ரஸ்தாவுக்குள்ளும் அடியெடுத்து வைக்காமல் இடைப்பட்டதொரு அந்தி மண்டல பாணியைக் கடைபிடிக்க முயற்சித்து வருகிறேன் ! செவ்விந்தியர்களின் இஷ்ட தெய்வம் குண்டக்க மண்டகானந்தா தான் என்னை இம்முறை காப்பாற்றியாக வேண்டும் ! (ஜெயசித்ராவிடம் 'லெப்ட்' வாங்கி விட்டு பட்டாப்பட்டி டிரௌசரொடு ஓரமாய்க் குந்தி இருக்கும் கவுண்டர் இப்போவே என் மனக்கண்ணில் முன்னும் பின்னும் ஓடிப் பிடித்து விளையாடி வருகிறார் !!!) Fingers crossed yet again !!!

இந்த அழகில் - பௌன்சர் தொடரில் இறுதி 2 ஆல்பங்கள் வேறொரு பதிப்பகத்தின் கூட்டணியில் ஏற்கனவே வெளியாகியுள்ளன ! அவற்றுக்கும் உரிமைகளை வாங்குவதா ? அல்லது 'சிவனே' என்று அந்த slot -ல் தளபதியைப் புகுத்தி விடுவதா ? என்ற ரோசனை மண்டைக்குள் !! 

ஆகஸ்டில் இந்தக் களேபரங்களுக்கு மத்தியில் நமது சிரசாசனத் தலைவரும், மின்சாரக் காதலரும் தலை காட்டுகிறார்கள் - மறுபதிப்புக் கோட்டாக்களோடு ! "உறைபனி மர்மம்" இதழின் பணிகளை நேற்றிரவு பார்த்துக் கொண்டிருந்த பொழுது நிஜமாகவே என் காதுகளில் மல்லிகைச் சரங்களின் மணம் தூக்கலாய் வீசியது போலொரு பிரமை ! But இதுவும் கூட CCC வெளியாகும் ஒரு ஜாலி மாதத்தில் அந்த feel good factor -ஐ உச்சப்படுத்த உதவினால் சூப்பரே என்று நினைத்துக் கொண்டேன் ! ஸ்டாக் நிலவரங்களை நோட்டம் விட்ட பொழுது - 'நயாகராவில் மாயாவி" கையிருப்பு அதள பாதாளத்தில் இருப்பதைப் பார்த்தேன் ; மறு கணம் அந்த மல்லிகைச் சரம் காதுகளில் மட்டும் என்றில்லாது மேஜையில், நாற்காலியில் சுற்றிக் கிடந்தாலும் ஒ.கே. ஒ.கே. என்று நினைக்கத் தோன்றியது ! The man is sheer magic ! 

பற்றாக்குறைக்கு நியூயார்க் நகரத்தை  அப்பத்தைப் பிய்த்துக் கொள்வதைப் போல அடியிலிருந்து லவட்டிச் செல்ல முயற்சிக்கும் ஆசாமியும் ஆகஸ்டில் உண்டெனும் போது கொத்துக்களுக்குப் பஞ்சமிராது ! நேற்றைக்கு இந்தக் கதையை முதன்முறையாகப் படித்துப் பார்த்த ஜூனியர் எடிட்டர் "செம சூப்பர் !!" என்று சான்றிதழ் வழங்கியுள்ளார் ! So என்றேனும் ஒரு புது வருடத்தில், திடீரென்று ஒரு 200 பக்க மொக்கை இதழில் நம் கூர்மண்டையரின் எஞ்சி நிற்கும் புதிய கதை வெளிச்சத்தைப் பார்க்க நேரிட்டாலும் ஆச்சர்யம் கொள்ளாதீர்கள் ! Fingers crossed - இம்முறையோ தமிழ் பேசும் நல்லுலகத்துக்கு அத்தகைய சோதனை புலர்ந்திடக் கூடாதே என்று !!

நாளைய பொழுது எனக்கொரு பயணப் பொழுது என்பதால் இரவில் ஆஜராக முயற்சிப்பேன் ! Have fun guys ! Enjoy the day & the week ahead !

Updates !! இன்னமுமொரு புது ஆக்ஷன் கௌபாய் கதைத் தொடருக்கும், ஒரு கார்டூன் தொடருக்கும் உரிமைகள் கிட்டியுள்ளன !

கடந்த 3.5 ஆண்டுகளாய் நம் அலுவலகத்தில் ஆர்வமாய்ப் பணி செய்து வந்த ஸ்டெல்லா மேரி நேற்றோடு விடை பெற்றுச் சென்று விட்டார் ! திருமணத்தைத் தொடர்ந்து குடும்ப இடமாற்றம் !! ஏற்கனவே பணியாற்றி வரும் Ms .துர்கா + புது வரவான Ms .வாசுகி தான் இனி front office -ல் இருப்பர் !

Caption எழுதும் போட்டிக்கான முடிவை வரும் ஞாயிறுப் பதிவில் பார்ப்போமே ?!

யாம் பெற்ற சிலிர்ப்பு....!!

நண்பர்களே,

வணக்கம்.வாரமெல்லாம் வேலைகளோடு சடுகுடு என்றான பின்னே, சனிக்கிழமை ஒரு வழியனுப்புப் படலத்தின் பொருட்டு, சென்னை விமான நிலையத்தில் தேவுடு காத்து முடித்து வீடு போய்ச் சேர்ந்த போது, நள்ளிரவை நெருங்கியிருந்தது ! 'கோழி கூவும் முன்னே எழுந்து பதிவை பேஷாய் எழுதிடலாமே !' என்று உறக்கத்தில் கனத்த விழிகள் லாஜிக்காகச் சொன்ன போது (என்) தலைக்கு மறுப்புச் சொல்லத் தெரிந்திருக்கவில்லை ! ஆனால் கோழிகள் கூவுவதற்கு முன்பான வேளைகளில் வேதாளங்கள் மாத்திரமே உலாற்றும் என்பதை தட்டுத் தடுமாறி எழுந்து உட்காரும் போது தான் புரிந்து கொள்ள முடிந்தது ! எனினும் இந்த வேளை கேட்ட வேளையின் ஏகாந்தம் கூட ஒரு வித ஜாலியாய்த் தோன்ற - "சண்முவம்....எடுர்ரா வண்டியை...அடிச்சு ஓட்டுடா..!" என்று கீ -போர்டோடு பேச்சு வார்த்தைகளைத் தொடங்க முடிந்தது ! Thus begins this week's post..!

வாரத்தின் துவக்கத்தை மும்முரமாய்த் துவக்கி, நடுப்பகுதியை மண்டையைப் பிய்க்காத குறையைக் கொண்டு சென்றான பின்னே, வார இறுதியின் தருணங்களில் 'பிரபா ஒயின்ஸ்' ஒனரைப் போல 'ஈஈஈஈ' என்று முத்துப் பற்கள் டாலடிக்கச் சுற்றி வந்து கொண்டிருக்கிறேன் ! அச்சு வேலைகளை சென்ற சனிக்கிழமை மதியமே துவக்க எண்ணிய நிலையில் பணியாளர் ஒருவர் வீட்டில் கீழே விழுந்து கையை உடைத்துக் கொண்டிருக்க, ஆட்பற்றாக்குறை என்று தலையைச் சொரிந்து கொண்டு நிற்க வேண்டியதாகிப் போனது ! ஆர்ட் பேப்பர் அச்சின் போது ஒரு ஆள் குறைச்சல் என்றால் கூட தலைநோவு ஏராளம் என்பதால் அவசரம் அவசரமாய் அதற்கொரு ஏற்பாடு செய்து விட்டு வேலைகளை ஆரம்பிக்கப் பார்த்தால் மிஷினில் மின்பழுது ! அதைச் சரிசெய்யும் எஞ்சினியர் மதுரையிலிருந்து வர வேண்டுமென்பதால் வழி மேல் விழி போட்டுக் காத்திருக்க - அவரறிவாராநம் அவசரத்தை ! பொங்கி வந்த பதட்டத்தையும், எரிச்சலையும் விழுங்கிக் கொண்டு சுவாமி பொறுமையானந்தா அவதாரம் எடுக்க ரொம்பவே பிரயத்தனங்கள் அவசியமாகின ! மனுஷனும் ஒரு வழியாய் மறு நாள் வந்து சேர்ந்து அரை மணி நேரத்தில் சீர் செய்து விட்டார் ! முப்பது நிமிடப் பனியின் பொருட்டு ஒன்றரை நாட்களைத் தொலைத்த கடுப்பைக் காட்டிக் கொள்ளாது வேலைகளை ஆரம்பித்த போது தான் கொஞ்சம் கொஞ்சமாய் சுவாசம் திரும்பியது ! அதிலும் 'தல'யின் மஞ்சள் சட்டை பக்கத்துக்குப் பக்கம் டாலடிக்கத் துவங்க, நீண்டதொரு இடைவெளிக்குப் பின்னே பார்க்க சாத்தியமான டெக்சின் வண்ண அதகளம் கண்ணைப் பறிக்கத் தொடங்கியது ! இதை நான் லொட்டு லொட்டென்று தட்டிக் கொண்டிருக்கும் வேலைக்கு ஓரிரு மணி நேரங்கள் முன்பாக அச்சுப் பணிகள் பூர்த்தியாகியுள்ளன - அட்டைப்படம் நீங்கலாக ! 

மாதிரிப் பக்கங்களைக் கொண்டு போட்டுப் பார்த்த 'டம்மி' இதழைக் கையில் தூக்கிப் பார்த்த போது ஏகமாய் உருளைக்கிழங்கு கொண்டு நிரப்பப்பட்ட சமோசா தான் நினைவுக்கு வந்தது ! எனக்கே அதன் பருமனைப் பார்த்த போது இரத்தம் சூடாகிட - குண்டு புக்ஸ் காதல் கண்மணியினரை எண்ணிப் பார்த்தேன்....!! உங்கள் கைகளின் வலுக்களைச் சோதிக்க இதோ இன்னுமொரு வாய்ப்பு வெகு விரைவில் guys ! அதுமட்டுமன்றி - LMS -க்குப் பின்பாக இந்த சைசில் வரக்காத்துள்ள முதல் குண்டூஸ் இதழ் என்பதால் - படிக்க வாகான இந்த அளவிற்கு இது இன்னுமொரு விளம்பரமாய் படுகிறது ! என்ன தான் பெரிய சைசில் இதழ்கள் அழகாய்க் காட்சி தந்தாலும் கூட பொனெல்லியின் இந்த format - பக்கத்திற்கு 3 அடுக்குப் படங்கள் என்ற அமைப்பு செம handy என்பதில் சந்தேகமே கிடையாது ! பிரான்கோ-பெல்ஜியக் கதைகளை மட்டும் பெரியதொரு மெனக்கெடலின்றி இந்த சைசுக்கு மாற்றம் செய்ய வழியிருப்பின், அடடா - அடடடா!! 

Anyways, இரவுக்கழுகாரின் கதை # 3-ன் preview -ஐ இந்த வாரம் மேலோட்டமாய்ப் பார்த்து விடுவோமா ? முகமில்லா மரணதூதன் ஒரு வித ஆக்ஷன் + டிடெக்டிவ் பாணியில் நகரும் கதை ! ரொம்ப காலம் கழித்து ஒரு ஆஜானுபாகுவான வில்லன் வில்லர் முன்னே நெஞ்சை நிமிர்த்தி களமிறங்குவது தான் highlight ! பல் போன சொட்டைகளை சலூனில் வைத்துச் சுளுக்கு எடுப்பதற்கு டாட்டா காட்டி விட்டு, சண்ட மாருதமாய் தல ஆக்ஷனில் இறங்குவது அட்டகாசமெனில் - வெருண்டோடும் மாட்டு மந்தையை அவர் கட்டுப்பாட்டுக்குள் கொண்டு வருமொரு sequence ஒரு visual delight ! நான் சமீபத்தில் சந்தித்த டெக்சின் தற்போதைய பிதாமகரான மௌரொ போசெல்லியின் கைவண்ணமே இந்தக் கதை ! மனுஷனுக்குள் உறையும் "டெக்ஸ் காதல்" frame -க்கு frame மிளிர்வதைக் காண முடிந்த போது சிலிர்ப்பாக இருந்தது ! யாம் பெற்ற சிலிர்ப்பு - விரைவில் நம் வாசக வையகத்துக்கும் - என்ற சிந்தனையே செமகுஷியாய் இருந்தது !!

Tex-ன் கதாசிரியர் பற்றிய பேச்சு எழுந்துள்ள இந்தத் தருணத்தில் சின்னதாயொரு sidetrack ! சமூகவலைத் தளங்களை சில கோபதாபங்களின் ஆக்ரோஷமான வெளிப்பாடுகளுக்கும் பெரும் படைப்பாளிகள் கூட எவ்விதம் பயன்படுத்துகிறார்கள் என்பதை சமீபத்தில் பார்க்க முடிந்த போது சந்தோஷம் மேலோங்கவில்லை ! தென்னமெரிக்காவில் - குறிப்பாக பிரேசில் நாட்டில் 'தலை'க்கு ஒரு பெரும் வாசகப் பட்டாளம் உண்டு ! அட்டகாசமான பீச்கள் ; கண்சிமிட்டும் சில பல பட்டாம்பூச்சிகளின் எழில்கள் ; தனியா புட்பால் மோகம் என்ற அடையாளங்களைத் தாண்டி - இத்தாலிக்கு அப்புறமாய் டெக்ஸ் கதைகளை மிக அதிகம் வெளியிட்டுள்ள தேசம் என்ற பெருமையும் அந்நாட்டுக்கு உண்டு ! (குடிபெயர இடம் நாடித் திரியும் சிலரது கண்களில் ஒரு வெளிச்சம் பரவுகிறதா ?!!) இங்குள்ள ஒரு பிரபல இளம் காமிக்ஸ் ஓவியர் ஒருவர் அமெரிக்காவின் மார்வெல் நிறுவனத்துக்கு ஏகமாய் சித்திரங்கள் போட்டுத் தரும் ஆற்றலாளர் ! சிறுவயது முதலே டெக்சை ஆராதித்து வளர்ந்திருந்த ஆசாமி என்பதால் என்றேனும் தன ஆதர்ஷ நாயகனுக்கொரு கதையில் சித்திரங்கள் தீட்டிட வேண்டுமென்ற தீரா மோகம் கொண்டிருக்கிறார் ! பெட்டிகளில், ரசிகர்கள் சந்திப்பினில் இந்த ஆசையை வெளிப்படையாய் சொல்லி வந்த மனுஷன் சென்றாண்டின் இறுதியில் பொனெல்லியுடன் இதற்கான பேச்சு வார்த்தைகளுக்குப் பிள்ளையார் சுழி போட்டிருக்கிறார் ! 'டில்லிக்கு ராஜாவானாலும் பள்ளிக்குப் பிள்ளை தானே..?' பிரபல ஓவியராய் இருப்பினும் கூட - போனெல்லி தம் நடைமுறைப்படி ஒவ்வொரு புது ஓவியருக்கும் - முக்கியக் கதாப்பாத்திரங்களை வெவ்வேறு கோணங்களில் போட்டு அனுப்பும்படி ; துப்பாக்கிகள்  குதிரைகள், பழங்குடியினர் போன்ற அத்தியாவசியங்களையும் போட்டுக் காட்டும்படிப் பணித்துள்ளனர் ! மௌரொ போசெல்லி தான் இந்தப் பேச்சு வார்த்தைகளுக்குப் பொறுப்பேற்று இருந்திருக்கிறார் ! ஒரு மாதிரியாய் பிரேசிலில் இருந்து சித்திர சாம்பிள்களை தனது மார்வெல் பணிகளுக்கு மத்தியினில் ஓவியர் போட்டு அனுப்ப அது ஒ.கே. ஆகி பிப்ரவரியில் ஒரு புதுக் கதையில் இணைந்து பணியாற்ற வாய்ப்பு இருக்கலாம் என போசெல்லி கோடியிட்டுக் காட்டி இருக்கிறார் ! இவரும் செம பிஸி ; ஓவியரும் பிஸியோ பிஸி என்பதால் இடையே தத்தம் வேலைகளுக்குள் மூழ்கிடும் தருணத்துக்கு முன்பாக ஓவியக் கட்டணங்கள் பற்றிய பேச்சு வார்த்தைகள் லேசான துவக்கத்துக்குப் பின்னே முன்னேற்றம் கண்டிருக்கவில்லை போலும் ! அமெரிக்கப் படைப்பாளிகளுக்கு இதழ்களின் விற்பனைகளில் ஒரு விகிதம் ராயல்டியாக வழங்கப்படும் போலும் ; அதே எதிர்பார்ப்பில் பிரேசில் ஓவியரும்துண்டை போட்டு வைக்க - ஐரோப்பிய திட்டமிடல்கள் வேறு விதம் ; இங்கே ஒரு வரையறுக்கப்பட்ட சன்மானம் மாத்திரமே வழங்கப்படும் என்று போனெல்லி தரப்பு சொல்லியுள்ளது ! 'சரி..பேசிக் கொள்ளலாம்' என்றதோடு ஓவியர் வேறு வேலைகளுக்குள்ளே புகுந்து விட்டு, சில மாதங்களுக்குப் பின்னே மீண்டும் பொனெல்லியைத் தொடர்பு கொண்டிருக்கிறார் ! இருவருக்குமே ஆங்கிலம் தாய்மொழியல்ல எனினும், பொதுவான மொழி என்ற விதத்தில் மின்னஞ்சல் பரிமாற்றம் இங்கிலீஷிலேயே இருந்துள்ளது ! இடையில் நேர்ந்த ஏதோ ஒரு விதப் புரிதலின் குறைபாடு ஓவியருக்கு எரிச்சலைக் கிளப்பிட, வார்த்தைகளில் உஷ்ணம் ஏறத் துவங்கியுள்ளது ! போனெல்லி தரப்பிலிருந்து போசெல்லி நறுக்கென்று ஒரு பதில் போட்டு விட்டு, எங்களைப் பொறுத்தவரை இத்தோடு இந்த chapter close என்று கதவைச் சாத்தி விட்டார் ! பொங்கியே பொங்கி விட்டார் ஓவியர் - அச்சில் ஏற்ற இயலா வார்த்தைப் பிரயோகங்களுடனான ஒரு மின்னஞ்சலை அனுப்பியது மட்டுமன்றி - ஒட்டு மொத்த மின்னஞ்சல் கத்தையையும் தூக்கி face book -லோ ஏதோவொரு சமூக வலைத்தளத்திலோ போட்டும் விட்டார் ! அழுக்குத் துணிகள் ஒவ்வொரு வீட்டிலும் இருப்பது இயல்பே ; ஆனால் அவற்றை முற்சந்திச் சலவை செய்ய முற்படும் போது சங்கட உணர்வே தலை தூக்குகிறது ! என்ன தான் மனத்தாங்கல் எனினும் - தடித்த வார்த்தைகள் அதற்கொரு தீர்வல்ல என்பதையும் ஓவியர் உணராது போனது துரதிர்ஷ்டவசமே ! இந்தக் கோபதாபங்கள் வீதியில் வெளிச்சம் கண்டான பின்னே ஓவியரின் ரசிகர்கள் ஒரு அணியாகி போசெல்லியைத் திட்டித் தீர்க்க, ஷப்பா..என்ற பெருமூச்சே மிஞ்சியது ! What a mess....!!!

Moving on, நேற்று மட்டும் 'தல' ராப்பருக்கென 7  வெவ்வேறு கலர் combinations முயற்சித்துப் பார்க்கும் படலம் நடந்தேறியது ! 7th time lucky என்ற கதையாக இறுதியான டிசைனே என்னை நிம்மதியோடு தூங்க அனுமதித்தது ! New Art பாணிகள் எல்லாம் இல்லாது வழக்கமான  நம் ஓவியரின் டிசைன் + டிசைனரின் கைவண்ணம் என இந்த அட்டைப்படம் எப்போதும் போலவே இருக்கப் போவது உறுதி என்றாலும் டெக்சின் வசீகரம் இதன் highlight ! பாமாயிலில் சுட்ட அரை டஜன் பஜ்ஜிகளை உள்ளே தள்ளிய பேஸ்த்தடித்த தோரணையோடு KING SPECIAL ராப்பரில் காட்சி தந்த 'தல' க்கும் - இம்முறை யௌவனமாய்க் காட்சி தரும் தலைக்கும் ஒரு striking contrast ! And எல்லாவற்றிற்கும் மேலாக பாம்பன் பாலம் சைசுக்குக் காட்சி தரும் அந்த முதுகைப் பார்க்கும் போது (இதழின் முதுகை !!!) பல் சுளுக்கிக் கொள்ளும் அளவுக்கு முகம் விரிகிறது புன்னகையில் !! தொடரும் வாரத்தில் பைண்டிங் படையெடுப்புகள் தொடரும் எனும் போது - ஜூலை ஆரம்பத் தேதிகளுக்கு 'தல தரிசனம்' நிச்சயமே ! நெய்வேலியில் மட்டும் ஸ்டால் கிடைத்திருக்கும் பட்சத்தில் அட்டகாசமாய் இருந்திருக்கும் ! Phew....!!! நிதானமாய், அழகாய் பைண்டிங் பணிகள் செய்திட மனுஷனுக்கு அவகாசம் தந்திடும் எண்ணத்தில் ரிலீஸ் தேதி என்று தற்போதைக்கு எதையும் நான் commit செய்யப் போவதில்லை ! So எனது அடுத்த ஞாயிறுப் பதிவு வரையிலும் பொறுமை - ப்ளீஸ் ! தயாரிப்பின்  அந்தர்பல்டிக்கள் பற்றித் துளியும் நம் front office பெண்களுக்குத் தெரியாது ; பைண்டிங்கிலிருந்து இதழ்கள் புறப்படும் 1 மணி நேரம் முன்பு வரை அவர்கள் 'தேமே' என இருப்பதே வழக்கம் என்பதால் அவர்களிடம் வினவல் வியர்த்தமே ! 

ஒரு மெகா இதழுக்குப் பிரியாவிடை (தயாரிப்பில்) தரும் வேளையில் அடுத்த மாறுபட்ட இதழுக்குள் ஜாலி நீச்சல் அடித்து வருகிறோம் !  CCC -ன் தாடிக்கார விஞ்ஞானித் தாத்தா தான் எனது கடந்த வாரத்து தோழர் என்பதால் எதைப் பார்த்தாலும், யாரைப் பார்த்தாலும் 'கெக்கே பிக்கே' என எதையாவது பேசணும் போல் தோன்றுகிறது ! 4 பக்கங்கள் ; 3 பக்கங்கள் என குட்டிக் குட்டியான கதைகளின் தொகுப்பிது என்றாலும் - ரொம்பவே வித்தியாசமான கதாப்பாத்திரங்கள் நம் விலாக்களுக்குக் கிச்சு கிச்சு மூட்டுகின்றனர் ! Of course இந்தக் காமெடி பாணி slapstick ரகங்களில் தானிருக்க முடியும் - கதைகளின் நீளங்களைக் கணக்கில் கொள்ளும் போது ! So ஒரு நெடுங்கதையோடு சேர்ந்த classic காமெடியை எதிர்பார்த்திடாது ஜாலியாய்ப் பொழுது போக்கிடும் mindset சகிதம் இந்த ஜீனியசின் வீட்டுக்குள் அடிவைத்தால் - நிச்சயம் எமாற்றங்களிராது ! இந்தத் தாத்தாவின் தொடரில் மட்டுமே கிட்டத்தட்ட 45+ ஆல்பங்கள் உள்ளன எனும் போது இந்த சிறுகதை gags பாணிகளுக்கு அங்குள்ள ரசனையைப் புரிந்து கொள்ள முடியும் ! இது போன்ற குட்டிக் குட்டி சிரிப்புச் சரவெடிகளை ரசிக்க நாம் தயாரிகும் பட்சங்களில் நிறைய கார்ட்டூன் தொடர்கள் காத்துள்ளன ! ஆனால் அவற்றை filler pages களாக வெளியிட அனுமதி நஹி ! So அவை மட்டுமே இணைந்து ஒரு பிரத்தியேக ஆல்பமாய் இருந்திடத் தான் வேண்டும் ! அது நமக்கு ஒ.கே.ஆகிட வாய்ப்புண்டா guys ?

கார்ட்டூன்கள் பற்றிய தலைப்பினில் உலாவித் திரியும் போது ஒரு ஜாலியான update ! வுட்சிடியின் கோமாளிக் கும்பலின் கதைகளில் பெரும் பகுதி இன்னமும் டிஜிடல் கோப்புகளாக மாற்றம் கண்டிருக்கவில்லை என்பதை நான் அவ்வப்போது முனகித் திரிவது வாடிக்கை தானே ? 2016-ன் அட்டவனையை இறுதி செய்திடும் பணிகளில் ஒரு அங்கமாக - லேட்டஸ்ட் டிஜிட்டல் ஆக்கங்கள் எவை என்று கேட்டு வைத்திருந்தேன் ! ஜிலீர் என்றதொரு மின்னஞ்சலில் - 70 கதைகள் கொண்ட சிக் பில் வரிசையினில் இது வரைக்கும் 38 ஆல்பங்கள் கலரில் டிஜிட்டல் பைல்களாக தயாராகி விட்டன என்ற சேதி வந்தது ! And இவற்றில் ஒரு பாதியாவது நாம் இன்னமும் வெளியிட்டிருக்காக் கதைகள் என்பதைப் பட்டியல் சொன்ன போது லானாவை முதன்முறை பார்த்த ஆர்டினைப் போல 'ஆர்ஹியூ' தான் சொல்லத் தோன்றியது ! பற்றாக்குறைக்கு மின்னஞ்சலின் கடைசி வரி அதே லாணவைப் பார்த்த ஷெரிப் டாக்புள் போல துள்ளிக் குதிக்கச் செய்தது ! "கடந்த ஆண்டுகளில் நீங்கள் விடாப்பிடியாய் சிக் பில் பைல்கள் குறித்து கேட்டு வருவது கவனத்தில் தான் உள்ளது ; இன்னமும் டிஜிடல் பைலாக மாற்றம் கண்டிருக்கா கதை ஏதாவது குறிப்பாக உங்களுக்கு அவசியமெனில் தெரியப்படுத்துங்கள். அதனை எங்கள் பணிப் பட்டியலில் முன்னிலைக்குக் கொண்டு வந்து ஆவன செய்கிறோம் ! " என்று எழுதியிருந்தார்கள் ! ஓரமாய் நின்று பெருமாள் கோவில் வாசலில் பொங்கல் வாங்கிச்சாப்பிடும் பாணியில் நாம் கதைகளைக் கோரிப் பெற்றுவரும் நிலையினில் கூட, நமது அவாக்களைக் கூர்ந்து கவனித்து, அவற்றிற்கு முன்னுரிமை தர படைப்பாளிகள் முன்வந்திருப்பது அவர்களது பெருந்தன்மைகளுக்கு ஒரு எடுத்துக்காட்டு !! So 2016-ல் ஆர்ட்டின் & கோ. சிக் பில் என்ற அந்த ஆசாமியையும்,குள்ளனையும் கூட்டிக் கொண்டு நம் முன்னே சாகசம் செய்வது டபுள் confirmed !! 

புதுத் துவக்கங்கள் என்ற வரிசையில் இந்த வாரம் இன்னமுமொரு விஷயம் பிரான்கோ-பெல்ஜிய உலகினில் உதயம் கண்டுள்ளது ! செவ்வாய் காலை தபாலில் வந்த ஒரு அட்டைப்பெட்டியைப் பிரித்தால் உள்ளே ரிபோர்டர் ஜானியின் புதியதொரு ஆல்பம் காட்சி தந்தது  அட..முடிந்து பொய் விட்ட தொடர் மீண்டும் ஓடத் துவங்கியுள்ளதோ ? என்ற கேள்வியோடு உள்ளே புரட்டினால் செம மாற்றங்கள் ! புதியதொரு ஓவிய-கதாசிரியக் கூட்டணி என்பதை அப்போது தான் கவனித்தேன் ! காலம் காலமாய் நாம் பழகிப் போன அந்த ஜானி சித்திர பாணிக்கு விடுதலை கொடுத்து புதியதொரு ஸ்டைலில் செம ஸ்பீடாகக் கதை பயணிக்கிறது ! கதையைப் படித்து அதன் மீதொரு கருத்துச் சொல்லிட நம் மொழிபெயர்ப்பாளரை அணுகியுள்ளோம் ! அவர் thumbs up தந்தால் - 2016-ல் புதிய பாணி ஜானி அறிமுகமாகிடுவார் ! 

மொழிபெயர்ப்பாளர் ; கருத்துக்கள் ; அபிப்பிராயங்கள் என்ற தலைப்பினில் இருக்கும் போதே ஒரு சந்தோஷச் சேதி ! காலமாய் நாம் போட்டு வைத்திருக்கும் அரதப் பழைய ரூட்களிலேயே நம் சிந்தனைகளும், செயல்பாடுகளும் தொடர்ந்து வர, இள ரத்தத்தின் சிந்தனைகள் வேறு விதமாய் அமைவதை சமீபமாய் காண வாய்ப்புக் கிட்டியது ! பிரெஞ்சுக் கதைகளின் தேர்வுகளை நான் விஞ்ஞான பூர்வமாய் தேர்வு செய்திட முயற்சிப்பதெல்லாம் ஒரு பக்கமெனினும் இறுதியில் இங்க்கி..பிங்க்கி..பாங்க்கி போடாத குறை தான் ! இதனைக் கவனித்த ஜூனியர் எடிட்டர் அங்கே இங்கே என எப்படியோ தேடிப் பிடித்து பெல்ஜியத்தில் வசிக்கும் ஒரு நூலக நிர்வாகியைப் பிடித்திருக்கிறார் ! இந்தப் பெண்மணி 30 ஆண்டுகளாய் ஒரு பொது நூலகத்தின் காமிக்ஸ் பிரிவின் நிர்வாகி ! நாம் கோரும் கதைகளின் 75% இவருக்கு அத்துப்படியாக உள்ளது ! So ஒரு குட்டியான சன்மானத்துக்கு பிரதியுபகாரமாக நாம் கோரும் கதைகள் பற்றிய விமர்சனம் + பரிந்துரைத்தல்களை தர முன்வந்துள்ளார் !! இதற்கென நாம் தந்திடவிருக்கும் தொகை ஐரோப்பிய தரங்களின்படி பொரிகடலைக்குத் தான் சமானம் எனினும், தங்கள் மொழியின் ஆக்கங்கள் ஒரு தூர நாட்டில் பிரசுரம் காண தனது அபிப்பிராயங்கள் உதவிடக்கூடும் என்ற சிந்தனையே எனக்கு நிறைவைத் தருகிறது என்று அவர் சொல்லியுள்ளார் ! So தொடரும் காலங்களில் கதைகளை குருட்டுப் பூனை போலத் தேர்வு செய்யாமல் நிஜமான ஒரு வழிகாட்டுதலோடு கொண்டு செல்ல ஜூ.எ. போட்டுக் கொடுத்துள்ள ரூட் ரொம்பவே பயன்படும் ! 

அதே போல - அட்டைப்பட ஓவியங்களுக்குமொரு அயல்நாட்டு ஓவியரைத் தேடும் பணியில் ஜூ.எ. ஈடுபட்டிருக்க - "carry on !" என்று கொடியசைத்துள்ளேன் ! முதுமை  நம் ஆஸ்தான ஓவியரை வேகமாய் பற்றிக் கொண்டு வர, பணியாற்றுவதில் அவருக்கு சிரமங்கள் தலைதூக்கி வருகின்றன ! ஏற்கனவே நாம் ஒரிஜினல் அட்டைப்படங்களை உபயோகிக்கும் பாணிக்கு மற்றம் கண்டு விட்ட போதிலும், ஒரு ஓவியரின்றி வண்டி முழுசுமாய் நகராது என்பதே யதார்த்தம் ! So அந்தத் தேடலை உலகளவில் செய்து பார்ப்போமே என்ற அவனது ஆசை நியாயமாகவே பட்டது ! தேடல்கள் நடந்து வருகின்றன என்றாலும், அதற்கான பலன்கள் கிட்ட இன்னமும் அவகாசம் பிடிக்கும் என்றே நினைக்கிறேன் ! இதோ சமீபத்தில் எகிப்தில் வசிக்கும் ஒரு ஓவியர் போட்டு அனுப்பிய அட்டைப்பட டிசைனின் மாதிரி பென்சில் ஸ்கெட்ச் ! வயதான இந்தப் "பழங்கள்" யாரென்று அடையாளம் தெரிகிறதா ? "சாமி...இவர்களை இந்தக் கோலத்தில் பிரசுரித்தால் என்னை கழுத்தை நெரித்து விடுவார்கள் எங்கள் வாசகர்கள் ! "என்று அவருக்குப் புரிய வைக்க முயற்சித்துப் பார்க்கிறோம் ! அது சரி...இந்தப் பெருசுகள் என்ன பேசிக் கொண்டிருக்குமென்று உங்கள் கற்பனைகளில் தோன்றுகிறது guys? ஒரு caption contest-ஐக் கொண்டு இந்த ஞாயிறை அதிரச் செய்வோமா ? சூப்பரான caption எழுதும் நண்பருக்கு ஒரு FLEETWAY ஒரிஜினல் ஆங்கில இதழ் நம் பரிசு !

கிளம்பும் முன்பாக சின்னதொரு வேண்டுகோள் & பெரியதொரு தேங்க்ஸ் ! சமீப நாட்களில் ஒரு அட்டகாச நிகழ்வெனில் அது கடந்த பதிவுக்கு நீங்கள் செய்திருந்த விமர்சன ; அபிப்பிராய மேளா தான் என்பேன் ! தேங்க்ஸ் அதற்கே ! ஆக்கபூர்வமான இந்த பாணி இதழ்கள் வெளியாகும் ஒவ்வொரு சமயத்திலும் நமக்கொரு வழிகாட்டியாய் நின்று உதவிட உங்கள் ஒத்துழைப்புகள் தொடர வேண்டும் என்பதே வேண்டுகோள் ! அதற்காக சீரியசான , ஆராய்ச்சி mode -கள் தான் தேவை என்றில்லை - எப்போதும் போல் ஜாலியாய், காமிக்ஸ் எனும் சந்தோஷத்தின் கொண்டாட்டமாய் தொடரட்டுமே ? Keep rocking folks ! வேதாளம் உலவும் வேளையில் தொலைத்த உறக்கத்தைத் தேடி இனி  நான் புறப்படுகிறேன் ! மீண்டும் சந்திப்போம் ! அது வரை have fun  !  

P.S : ஞாயிறு பதிவைக் காணோமே இன்னமும் ? என்ற கேள்வியோடு சீனியர் எடிட்டரின் வாட்சப் சேதி என் போனில் !! 

C+C+C = 350 !

நண்பர்களே,

வணககம ! வார நாட்களில் ஒரு பகுதியினைச் சொந்த வேலைகள்  நிமித்தமாய்  சென்னையில் செலவிட்டான பின்னே ஊர் திரும்பினால், சின்னதொரு இமயமலை சைசுக்குப் பணிகள் குவிந்து கிடப்பதைப் பார்க்க முடிந்தது ! ஆண்டின் எஞ்சியுள்ள நாட்களுக்கான திட்டமிடல்களையும் ; குறிப்பாக ஜூலை & ஆகஸ்ட் மாதங்களின் அட்டவணைகளையும் கையிலெடுத்த போது கிராபிக் நாவல்களைக் கண்ட நண்பர்களைப் போல உதறல் எடுக்காத குறை தான் ! பெரிய அப்பாடக்கராய் வாக்குறுதிகளை வலம்-இடமென அள்ளி விட்டு விட்டு சாவகாசமாய் ‘திரு திரு’வென விழிப்பது நமக்கொன்றும் புதிதல்ல என்பதால் – கூடுதல் உத்வேகத்துடன் வேலைகளை முடுக்கி விடப் பழகி வருகிறேன் ! காத்திருக்கும் முதல் இதழ் – ‘தல’யின் தாண்டவம் என்பதால் என் பணிகள் அந்தமட்டிற்குச் சுலபமாகின்றன! கதை ஆரம்பித்த பத்தாவது பக்கத்திலேயே வில்லன் யாரென்று அடையாளம் காட்டி விடுவது டெக்ஸின் கதாசிரியர்களின் பாணிகள் எனும் போது – “தம்பிக்குக் கும்பாபிஷேகம் எங்கே? எப்போது?“ என்ற கேள்விகள் மட்டுமே நம் மனதில் எஞ்சியிருப்பது வழக்கம்! அதுவும் இந்த set கதைகளில் ‘தல’யின் முஷ்டிகள் overtime வேலை பார்த்துள்ளதால் –நான் பெரிதாக மண்டையைப் புரட்டி டயலாக் எழுதும் வேலைகளெல்லாம் பார்த்திட அவசியங்கள் நேர்ந்திடவில்லை! வழக்கம் போல டெக்ஸின் வரிகளில் வீரியமும்; கார்சனின் கோட்டாவில் கலாட்டாக்களையும் கொண்டு வந்ததைத் தாண்டி... ‘ணங்...’ ‘கும்...’ ‘படீர்...’ ‘தொபீர்’ என்று எழுதி வைத்ததோடு கையைத் தட்டிவிட முடிந்தது!

‘தல’யின் சாகஸம் # 2 – பிரம்மன் மறந்த பிரதேசம்! 224 பக்க நீளம் கொண்ட இந்தக் கதையின் பின்னணியில் சில பல தமிழ் சினிமாக்கள் நிலைகொண்டிருப்பது நிச்சயம்! ‘காதல் கொண்டேன்’ தனுஷ் ரேஞ்சிற்கொரு வில்லன்... dynamite ஆக்ஷன்... கனடாவின் அடர்கானகப் பின்னணி; வித்தியாசமானதொரு கதையோட்டம் என நாம் ரொம்பவே ரசித்த கதையிது! அதிலும் கார்சனுக்கு டயலாக் எழுதுவதற்கு இந்த ஆல்பத்தில் லட்டுப் போல பல சந்தர்ப்பங்கள் கிட்டின என்பதால் என் பேனாவும் வெரி ஹாப்பி! பாருங்களேன் இந்த சாகஸத்தின் ஒரு சில பக்கங்களை!

எங்கள் பணிகள் சகலமும் முடிவுற்று , அச்சுப் பணிகள் திங்கள் முதல் தொடங்குகின்றன ! அட்டைப்படமும் அட்டகாசமாய் தயாராகி வந்தி்ட – எல்லாமே தத்தம் இடங்களில் பொருந்திக் கொள்ளுமென்ற நம்பிக்கையோடு காத்திருக்கிறேன் ! 

மேஜையிலிருந்து ஒரு ரயில் வண்டி pack off ஆகிட, அடுத்த எக்ஸ்பிரஸைக் கொணர்ந்து ‘பார்க்’ பண்ணிடப் பொழுது சரியாக உள்ளது ! இம்முறை தடம் # 1 ல் காத்திருப்பது நமது முத்துவின் இதழ் # 350 என்பதை நான் சொல்லவும் வேண்டுமா என்ன? 4 தனித்தனிக் கதைகள் / இதழ்கள் அடங்கியதொரு Box Set-ல் வரவுள்ள இந்த இதழுக்கு சில மாதங்களுக்கு முன்பாகவே நடந்த பெயர் சூட்டல்களை நண்பர் ஒருவரின் உதவியோடு தேடியெடுத்துப் பார்வையிட்ட போது “The Classic Cartoon Collection“ என்ற பெயர் செம பொருத்தமாக இருப்பதாகத் தோன்றியது! ஆர்டினை நேற்றைக்கும்; நீல மனுஷர்களை இன்றைக்கும் தனது display-ல் சுமந்து திரியும் தீவிர கார்ட்டூன் ரசிகரான நண்பர் kid ஆர்டின் கண்ணனின் தேர்வு இது!  வாழத்துக்கள் நண்பரே! பரிசாக அந்தப் பதிவில் ஏதேனும் அறிவித்து வைத்திருந்தேனா என்பது நினைவில்லை – ஆவேசப்பட்டிருக்காமல், கம்பெனிக்குக் கட்டுப்படியாகக் கூடிய பரிசாக நான் promise செய்திருந்திருக்கும் பட்சத்தில் – நிச்சயமாய் அதனை நிறைவேற்றிடுவோம்!

பெயர் வைத்தாயிற்று ; கதைகள் 4-ன் தேர்வுகளும் (என்னளவில்) ஆச்சு என்றான பின்னே பணிகள் பரபரவென்று பட்டையைக் கிளப்பத் தொடங்கி வி்ட்டன! இது போன்றதொரு ஜாலி வாய்ப்பு அடிக்கடி கிட்டாதென்பதால் கதைகளின் மொழிபெயர்ப்புப் பணிகளை கருணை அவர்களோடு பகிர்ந்து கொள்ள மனமின்றி, வேதாளம் போல சகலத்தையும் என் கையிலேயே வைத்துக் கொண்டிருக்கிறேன்! பௌன்சரின் செம டார்க்கான “கறுப்பு விதவை“ கதையினை மேஜையின் ஒரு பக்கம் விரித்து வைத்துக் கொண்டு பேய்முழி முழித்துக் கொண்டிருக்க, மறுபக்கமோ ccc-ன் (!!!) நாயகர்கள் தான் என் நாட்களை இலகுவாக்கி வருகின்றனர்! 

இடைச்செருகலாய் இங்கே பௌன்சரின் இந்த இறுதி ஆல்பத்தைப் பற்றிக் கொஞ்சம் சொல்லிக் கொள்கிறேன்! இந்தத் தொடரிலேயே மிக violent & மிக gross ஆன கதை - காத்திருக்கும் “கறுப்பு விதவை“ தான் என்பதில் சந்தேகமே கிடையாது! இரத்தக்களரி...ரொம்பவே தூக்கலாய் adults only நெடி என்ற இந்த ஆல்பத்தை உங்களுக்கும், எங்களுக்கும் சேதாரமின்றி கரைசேர்ப்பதற்குள் ‘எர்வாமேட்டின்‘ வேட்டையில் அமேசான் கானகங்களுக்குப் போகிறேனோ இல்லையோ ; உள்ளூர் கருவேலங்காடுகளில் என்னைச் சீக்கிரமே பார்த்திட இயலுமென்று நினைக்கிறேன் ! அவசரமாய் மொழிபெயர்த்து விட்டு, நிதானமாய் உதை வாங்குவதை விட, சற்றே அவகாசம் எடுத்துக் கொண்டு முகச்சுளிப்புகளுக்கு இடம் தந்திடாது இதனைத் தயாரிக்க வேண்டுமென்ற வேட்கையில் முதல் நாளிரவு எழுதுவதை ஒரு நாள் கழித்து review செய்து திருத்தங்கள் / மாற்றங்களை அமலாக்குவது என்று முயற்சிகள் செய்து வருகிறேன்! ஆகஸ்டில் வரக்காத்துள்ள இந்த இதழ் சந்தேகமின்றி “கத்தி மேல் கதக்களி“ என்பதில் ஐயமில்லை!

இந்தக் குரங்கு வேலைகள் ஒரு பக்கம் ஓடிக் கொண்டிருக்க – துளியும் சிரமம் தரா clean; காமெடிக் கதை கையில் சிக்கிய மறுகணம் அதைப் பிறாண்டி வைக்காத குறையாய் ஒரே நாளில் 46 பக்க ஆல்பத்தை எழுதித் தள்ள முடிந்தது – சென்ற ஞாயிற்றுக்கிழமையினில் ! அவசரம்...கடைசி நேர இக்கட்டு.. என்ற சூழ்நிலைகளில் இது போல ‘ஏக் தம்‘ முயற்சிகள் செய்துள்ளோம் தான் – but 46 பக்க ஆல்பத்தை ஒரே பகலில் தாண்டியிருப்பது எனக்கு இதுவே முதல் முறை ! அந்தப் பணியின் நிழல் தலைக்குள் நடனமாட, இங்கே உங்களது பின்னூட்டங்களைப் படிக்க நேர்ந்த போது ‘கிராபிக் நாவல் காய்ச்சல்‘ பற்றிக் கொஞ்சம் தெளிவாகவே புரிந்து கொள்ள முடிந்தது! என்ன தான் “வாசிப்புக்கள விரிவாக்கம்“; “உலக விஷயங்களை லேசாகவேணும் நுகர்ந்து பார்த்திடல்“ என்று நான் பெரிய பிஸ்தாவைப் போல காரணங்கள் கற்பித்தாலும் – ஒற்றை விஷயத்தை மறைக்கவோ / மறுக்கவோ / மறக்கவோ இயலாதென்று புரிகிறது ! "பொழுதுபோக்கு" ; "சந்தோஷச் சமயங்களின் எதிர்பார்ப்புகள்" என்பனவே காமிக்ஸ் படிப்பதன் (பெரும்பான்மையான) பின்நோக்கமெனும் போது – அவற்றிற்குக் கனமான கதைக்களங்கள் நியாயங்கள் செய்வது சுலபமல்ல என்பது அப்பட்டம் ! என்னையே உதாரணமாய் எடுத்துக் கொண்டால் – இதோ ஒரே நாளின் பகலினில் ஒரு கார்ட்டூன் கதையை எழுதி முடிக்கும் போது நோவு விரல்களில் மாத்திரமே உள்ளது; உள்ளத்திலோ உவகை ; ஆனால் “விடுதலையே... உன் விலையென்ன ?“ கதையின் எடிட்டிங் பணிகளுக்கு மட்டுமே நான் போட்ட மொக்கை 3 நாட்களிருக்கும்! Of Course ஒரே stretch-ல் நான் எடிட்டிங் வேலையில் மூழ்கியிருப்பின் 3 நாட்கள் பிடித்திருக்காது தான் – ஆனால் ஒரே stretch-ல் அதற்குள் லயித்திட சிரமமாக இருந்தது என்பது தான் நிஜம் ! 2016-ன் அட்டவணைத் திட்டமிடலில் தீவிரமாய் இருந்து வரும் இத்தருணத்தில் இந்த இதழும்; உங்களின் பகிர்வுகளும் எனக்கு மிகப் பெரிய ஒத்தாசை செய்துள்ளது என்றால் அது மிகையாகாது ! இத்தோடு கிராபிக் நாவல்களுக்கு கோவிந்தா ! என்ற ரீதியிலான அவசரத் தீர்மானமாக இதனைப் பார்த்திடல் வேண்டாமே ?! வரும் நாட்களில்  "absolute hit "  என்றாலொழிய கி.நா. க்களைப் போட்டு உங்களைச் சூடு போடப் போவதில்லை என்பதாக மட்டும் பொருள் கொண்டிடலாம் ! (மடிபாக்கத்திலும், தாரமங்கலத்திலும் லட்டு அவசரமாய் அதிரடியாய் விற்பனையாகிறதாமே ?!! மெய் தானா ? )   

ஒவ்வொரு முறையும், ஒவ்வொரு மாதத்து இதழ்களையும் இந்தத் தடவை போல அலசி, ஆராய்ந்து எனக்கு feedback தந்திட்டால் நிச்சயமாய் நிறைய முன்னேற்றங்களிருக்கும் guys! So please do continue the good work! அதற்காக “விமர்சகத் தொப்பியை“ இறுக்கமாய் மாட்டிக் கொண்டு, இறுக்கத்தோடு பக்கங்களைப் புரட்டச் சொல்லிட மாட்டேன்; எப்போதும் போல ஜாலியாகக் கதைகளை அணுகும் போதே உங்களுக்கு நேர்ந்திடும் நெருடல்கள்; தென்பட்டிடும் நிறைகள் பற்றிச் சொல்வதே பிரயோஜனமாக இருந்திடுமல்லவா?

அப்புறம் நான் கொஞ்க காலமாகவே நினைத்து வந்த “மாற்றி யோசி“ சமாச்சாரத்தைப் பற்றி கடந்த பதிவில் நண்பர்கள் ஜாலியாகக் குறிப்பிட்டிருந்ததை சந்தோஷத்தோடு கவனித்தேன் ! இனி வரும் ஒவ்வொரு மாதமும், ஒவ்வொரு இதழையும் படித்தான பின்னே அவற்றிற்குப் பொருத்தமான “உங்கள் தலைப்புகள்“ இங்கே முன்மொழியலாமே ? 12 மாதங்களுக்கு முன்பாக, சின்னக்கதைக் குறிப்புகளோடும்; இன்டர்நெட் ஆராய்ச்சிகளோடும் அவசரம் அவசரமாய் நான் சூட்டிடும் பெயர்கள் எல்லாத் தருணங்களிலும் perfect-ஆக அமைந்திட இயலாதென்பதில் இரகசியமேது ? So- கதையை முழுமையாக ரசித்தான பின்பு உங்கள் மனதுகளில் எழுந்திடும் ‘பளிச்‘ தலைப்புகளை இங்கே பதிவிட்டு ஜாலி மீட்டரை உயரச் செய்திடலாமே ?!

அப்புறம் நிலக்கரி நகரிலிருந்து இம்முறையும் நமக்குக் குச்சி மிட்டாய் தான் கிட்டியுள்ளது - புத்தகவிழாப் பங்கேற்பு ரீதியினில் ! இடப்பற்றாக்குறை ; சாரி என்று கை விரித்து விட்டார்கள் ! :-(

Before I wind off, இரு நாட்களுக்கு முன்பான ஒரு குட்டி நிகழ்வின் பகிர்வு! காலையில் நமது மெயில்பாக்ஸைப் பார்த்தால் அதில் இத்தாலியிலிருந்து ஒரு மின்னஞ்சல்! டைலன் டாக்; டயபாலிக்; மர்ம மனிதன் மார்டின் ரசிகர்களின் கொள்முதல் மெயிலாக இருக்குமென்ற எண்ணத்தில் கொட்டாவியோடு திறந்து பார்த்தால் – அது மர்ம மனிதன் மார்ட்டினின் படைப்பாளியான திரு.ஆல்பிரெடோ காஸ்டெல்லி அவர்களிடமிருந்து வந்திருந்த மின்னஞ்சல் ! நமது சமீப வெளியீடான “கனவுகளின் குழந்தை“ இதழ்களை நமது ஆன்லைன் ஸ்டோரில் வாங்க முயற்சித்து விட்டு- அது முடியாமல் போக- எப்படி வாங்கலாம்? என்ற கேள்வி கேட்டிருந்தார் மனுஷன்! பதறியடித்துக் கொண்டு – “ஐயோ... தெய்வமே... உங்களிடமெல்லாம் பணம் வாங்கிக் கொண்டு புத்தகங்களை அனுப்பினால் ஆத்தா கண்ணைக் குத்தி விடுவாள்!“ என்றபடிக்கு எத்தனை பிரதிகள் தேவையென்று கேட்டு மெயில் தட்டி விட்டேன். மார்ட்டின் கதையில் 4 பிரதிகளும்; “நித்தமும் குற்றம்“ (டயபாலிக்) இதழில் 4 பிரதிகளும் அனுப்பிட இயலுமாவென்று கேட்டார். ‘அட.... டயபாலிக்கில் இவருக்கும் ஆர்வமா?‘ என்ற ஆச்சர்யத்தோடு மின்னஞ்சலைத் தொடர்ந்து படித்தால் – அந்தக் கதையின் ஆசிரியரே அவர் தான் என்றும் புரிந்தது! அவசரம் அவசரமாய் அவர் கேட்ட 8 இதழ்களையும் ஏர்-மெயிலில் அனுப்பி விட்டு அவருக்குத் தகவல் சொன்ன போது சந்தோஷத்தோடு பதில் போட்டுள்ளார். அடுத்த மார்ட்டின் கதையை நாம் வெளியிடும் தருணம் அதற்கென ஏதேனும் கட்டுரைகளோ; பிரத்தியேகச் சித்திரங்களோ தேவைப்பட்டால் அதனைப் பூர்த்தி செய்து தர ஆவலாய் உள்ளதாகவும் அவர் எழுதியிருந்ததைப் படித்த போது கால் தரையில் படவில்லை! ஒரு டாப் ஐரோப்பியக் கதாசிரியர், சில பல ஆயிரம் விற்பனை காணும் ஒரு பிராந்திய மொழிப் பதிப்பகத்தையும் மதித்து இத்தனை வாஞ்சையாய் எழுதுவது நிச்சயம் ஒரு தினசரி நிகழ்வல்ல ! நமது நெஞ்சார்ந்த நன்றிகளைச் சொல்லியதோடு - அவரது பார்வையில் அவரது Top 3 மார்ட்டின் கதைகளைத் தேர்வு செய்து சொல்லும்படிக் கேட்டுள்ளேன்! வாரயிறுதியில் ஆற அமர யோசித்து விட்டுச் சொல்லுவதாக promise செய்துள்ளார் ! காலர்களைத் தூக்கி விட்டுக் கொள்ளவொரு மெய்யான காரணத்தைத் தந்திடும் இது போன்ற தருணங்கள் நம் ஒவ்வொருவருக்கும் சொந்தம் guys ! So a big pat on the backs!

மீண்டும் சந்திப்போம்! அது வரை – enjoy the day & the week ahead !

ஹேப்பி அண்ணாச்சி !

நண்பர்களே,

வணக்கம்! இப்போதெல்லாம் வதனத்தில் ஒரு மழைமேக இருள் சூழ்வதற்கும்; கோடையின் வெளிச்சம் பரவுவதற்கும் மைய காரணிகளாக அமைவது அந்தந்த மாதத்து நம் இதழ்களின் தரங்களும்; அவை பெற்றிடும் வரவேற்போ / உதைகளோ தான்! BATMAN-ன் பரம வைரியைப் போல “ஈ.ஈ.ஈ.“யென்று பல்லைக் காட்டித் திரிகிறேன் என்றாலே அம்மாத இதழ்கள் ‘ஹிட்’ என்று இப்போதெல்லாம் நம்மாட்கள் புரிந்து கொள்கின்றனர்! மாறாக- வறுத்த கறியைக் காலமாய் கண்டிராத கார்சனைப் போல சுற்றித் திரிந்தால் - அது வீங்கிப் போன மண்டையை நான் நீவிக் கொள்ளும் ‘கி.நா’ மாதம் என்று பொருள் எடுத்துக் கொள்கின்றனர்! June மாதத்து இதழ்கள் மூன்றுமே தயாரிப்பில் அழகாய் அமைந்தது மட்டுமின்றி – குழப்பமிலாக் கதைக்களங்களின் புண்ணியத்தில் வரவேற்பைப் பெற்று விட்டதால் ஒரு சுமாரான‘க்ளோஸ்-அப்’ மாடலாக நடமாட முடிகிறது ! ரொம்பவே early days இவை என்பதும் ; நண்பர்களில் ஒரு சிறுபகுதியினர் மாத்திரமே இதுவரையிலும் thumbs up அபிப்பிராயங்களைப் பகிர்ந்துள்ளனர் என்ற போதிலும் – அந்த ஆரம்ப response தான் அம்மாதம் முழுவதுமே தொடர்வதை அனுபவத்தில் புரிந்து வைத்திருக்கிறேன்! So- thanks in advance guys!

இம்மாத surprise package என்று நான் பார்த்திடுவது காரட்தலை ஜில்லாரைத் தான்! ஒன்றரையாண்டு இடைவெளிக்குப் பி்ன்னே மனுஷன் தலைகாட்டுவது ஒரு பக்கமிருக்க – லார்கோக்களையும், ஷெல்டன்களையும் அக்குளுக்குள் அடைக்கலம் செய்து பழகிவிட்ட நம் நண்பர்களின் ஒரு பகுதிக்கு ஜில்லாரின் நேர்கோட்டு, சுலபக் கதைக்களங்கள் எவ்வித அனுபவத்தைத் தரக் காத்துள்ளதோ என்ற சின்ன ‘டர்ர்ர்’ எனக்குள்ளே இருந்தது தான் ! ஆனால் இடியாப்பங்களும், நூடுல்சும் நமது மெனுக்களில் முக்கிய இடம்பிடித்திருப்பினும் ஆவி பறக்கும் இட்லிகள் out of fashion ஆவதில்லை என்பதை உணர்த்தியுள்ளீர்கள் ! And எனது தயாரிப்புத் தரப்புப் பார்வையிலும் இது போன்ற கதைகளில் பணியாற்றுவது ஒரு ஜாலியான அனுபவமே – எப்போதுமே! எழுதத் துவங்கும் வேளைகளில் ஒரு பௌன்சரோ; ஒரு லார்கோவோ; ஒரு கிராபி்க் நாவலோ தரும் சவால்கள் இறுக்கமான விதங்களெனில் இது போன்ற ஜாலிக் கதைகள் / கார்ட்டூன் மேளாக்கள் வேறு விதமான சவால்களை முன்வைப்பது வாடிக்கை ! ‘காமெடி’ என்ற பெயரில் அபத்தமாய் எதையும் எழுதித் தொலைக்கக் கூடாதென்ற அவசியம் ஒரு பக்கம் என்றால் – தூய தமிழ் அல்லாத நடையை நிதானத்தோடு கையாண்டிட தேவைப்படுவது மறுபக்கம். ஆனால் எழுதும் போதும் சரி ; பின்னர் எடிட்டிங் செய்யும் போதும் சரி- வண்டி ‘சர்ர்ரென்று’ பயணமாகிடும். So- சுலபக் களங்கள் கொண்ட கதைகள் ஒன்றுக்கு இரண்டாய் அமைந்து விட்டதில் விஜயன் ஹேப்பி அண்ணாச்சி !

இந்த ‘ஹேப்பி நாட்களுக்கு’ ஆயுட்காலம் இன்னமும் ஜாஸ்தி என்பதை என் மேஜை மீது கிடக்கும் ஒரு கத்தைப் பக்கங்கள் பறைசாற்றுகின்றன! அந்தப் பக்கங்களின் முழுமையிலும் ‘டெக்ஸ்’ என்ற பெயருக்குத் திரும்பிப் பார்க்கும் ஒரு தொப்பிவாலாவின் ஆயிரம்வாலா அதிரடிகள் காத்துள்ளன எனும் போது என் எதிர்பார்ப்பின் பின்னணி உங்களுக்குப் புரிந்திருக்கும்! Yes- தொடரவிருக்கும் “The Lion 250“ மெகா இதழில் அதகளத் தாண்டவம் நடத்தவுள்ளார் நமது இரவுக் கழுகார் ! கதைகள் மூன்றும் நீளங்களில் மாறுபட்டிருப்பினும் – சுவாரஸ்யங்களிலும்; ஆக்ஷனிலும் ஒன்றின் கையை மற்றது பற்றிக் கொண்டு ஜாலியாக நடை போடுகின்றன ! 340 பக்க “ஓக்லஹோமா“ தான் இந்த இதழின் முதுகெலும்மே என்பதால் இந்த வாரத்தின் preview-ஐ அதன் மீது நிலைகொள்ளச் செய்வோமா ?

இத்தாலிய டெக்ஸை விதம் விதமாய்; மாறுபட்ட நீளங்களில்; சைஸ்களில் கொண்டாடுவது போனெல்லி குழுமத்தின் பொழுதுபோக்கு என்பதை நாமறிவோம்! அவற்றுள் MAXI என்ற வரிசையில் 330+ பக்க நீளங்களோடு வெளிவரும் தடிமனான கதைகள் ரொம்பவே பிரசித்தம் ! MAXI வரிசையில் 1991ல் வெளியான ‘தல’யின் அதிரடி தான் “ஓக்லஹோமா“! வழக்கம் போல – “சுண்டல் விற்ற சுப்பன்“ ; “பரலோகத்திற்கொரு பார்சல்“ என்ற ரீதியில் தலைப்புகளை வைக்காமல் – ஒரிஜினலின் பெயரையே இந்தக் கதைக்கு முன்மொழிய எனக்குத் தோன்றியதன் காரணத்தைக் கதையைப் படிக்கும் போது நீங்களே புரிந்து கொள்வீர்கள்! கதையின் முழுமைக்கும் மனிதர்கள் எத்தனை பிரதானமாய் வலம் வருகிறார்களோ; அதற்குத் துளிகூடக் குறைவில்லாமல் அந்த பூமியும் கதையோடு ஐக்கியமாகி நிற்பதைப் பார்த்திடப் போகிறீர்கள் ! So- இந்த ஒருமுறையாவது தலைப்பு பின்னிருக்கை எடுத்துக் கொள்ள, கதைக்கு முன்சீட்டை ஒப்படைப்போமே என்று பார்த்தேன்! அதே சமயம்- கதையைப் படித்தான பின்பு – பொருத்தமான / பரபரப்பான தலைப்பை நண்பர்கள் சூட்டினால் – நம் பால்மணம் மாறாத தலீவர் அதனைப் பார்த்து மகிழ்ந்திட ஒரு வாய்ப்பாகிடுமல்லவா?

கதையைப் பொறுத்த வரை – எனக்கு ஒரு விஷயத்தில் துளி கூடச் சந்தேகமே கிடையாது ! அதாவது இதன் ஆசிரியர் கியான்கார்லோ பெரார்டி சத்தமில்லாமல் பாலிவுட் & கோலிவுட் திரைப்படங்களை ரசித்து வந்திருக்கிறார் என்று ! டெக்ஸைத் தூக்கி விட்டு அதே இடத்தில் தலைவரையோ (தாரமங்கலத்தாரல்ல!!!!) ; இன்னும் சிலபல அட்டகாசமான நமது திரைநாயகர்களையோ குடிகொள்ளச் செய்தால் ஒரு மெகா-ஹிட் திரைப்படம் ரெடி என்று சொல்லலாம்! பட்டாசாய் வெடிக்கும் ஆக்ஷன்; குடும்ப சென்டிமெண்ட்; நட்பின் வலிமை; பாசத்தின் பிணைப்பு என்று சகலமும் இதனில் உண்டு! ஒரு குத்துப் பாட்டோ; entry song ஒன்றோ மட்டும் தான் இல்லை; பாக்கி ஜனரஞ்சகச் சமாச்சாரங்கள் அத்தனையும் ‘உள்ளேன் ஐயா!!’ என்று கைதூக்குகின்றன! குக்லியமொ லெட்டரீயின் அலட்டலில்லா சித்திர பாணியில் ‘தல’யும்; ‘தாத்தா’வும் சும்மா ‘தக தக’வென மின்ன – வண்ணத்தில் சொல்லவுமா வேண்டும்?

வழக்கமாய் இத்தனை நீ-ள-மா-ன கதையை எழுத; எடிட் செய்ய மலைப்பாகயிருக்கும்! ஆனால் கருணையானந்தம் அவர்களின் base writing மூன்றே வாரங்களில் ஓடி முடிய; அதன் மேலான எனது மாற்றங்கள்; ‘தல’யின் பன்ச் வசனங்கள்; தாத்தாவின் நையாண்டிகள் எல்லாமே படு ஸ்பீடாய் அரங்கேறின! சமீபமாய் நாம் சந்தித்த மெகா “மின்னும் மரணம்“ வசனப்பிரவாகத்தில் திளைத்ததெனில் இங்கே – “கும்“; “ணங்“; “டுமீல்“; க்ராஷ்“; “ஆஆஆ“; “படீர்“; “விஷ்ஷ்“ மயம் தான்! “The லயன் 250“ இறுதிப் பக்கத்தில் – "இந்த இதழில் மொத்தம் ‘எத்தனை தோட்டாக்கள் சுடப்பட்டன?’ ; ‘எத்தனை முகரைகள் மாற்றியமைக்கப்பட்டன?’ என்றதொரு பொது அறிவுப் போட்டியே நடத்திடலாமா என்ற யோசனை தலைக்குள் ஓடுகிறது!

அனல் பறக்கும் கதைகளாய் இந்த வாரம் முழுவதும் பார்த்தும் / படித்தும் எனக்கே நடையில் ஒரு swagger; மைதீனிடமும், ஸ்டெல்லாவிடமும் ‘பன்ச்’ டயலாக் பேசத் தோன்றும் ஒரு குறுகுறுப்பு; யாரையாவது ‘ணங்’ என்று நடுமூக்கில் குத்துவோமா? என்ற துடிதுடிப்பு குடிபுகுந்துள்ளது! அப்புறம் – தளபதியின் mega இதழில் “கவிதைச் சோலையொன்று"(!!!) இடம்பிடித்திருந்ததெனும் போது – ‘தல’யின் மெகா இதழில் ஒரு கட்டுரைப் போட்டியாவது வைக்காவிட்டால் வரலாறு மன்னிக்காதே ! :-) So :

1. இது வரையிலான டெக்ஸின் சாகஸப் பட்டியல் (நமது இதழ்களில்).

2. அவற்றுள் உங்களது Top 5 தேர்வுகள்.

3. டெக்ஸின் நிறைகள் / குறைகள் – உங்கள் பார்வைகளில்?

மேற்படி கேள்விகளுக்கு அவரவர் பதில்களை இப்போது முதலே இங்கே பதிவிடத் தொடங்கினால் இதழின் உட்பக்கங்களில் இயன்றவற்றை இணைக்க ஏதுவாயிருக்கும்! So- get cracking pardners! 

அப்புறம் – டெக்ஸின் இதழை ஜூலையில் அல்லாது ஆகஸ்டிற்கு, ஈரோட்டுப் புத்தக விழாவின் போது கொண்டு செல்லலாமே என்ற கேள்விக்கான பதில் நமது வெளியீட்டு நம்பர்களிலேயே உள்ளதெனும் போது – நான் பெரிதாய் மெனக்கெட அவசியமிராதென்று நினைக்கிறேன்! லயனின் இதழ் # 249 & முத்துவின் # 349-ம் தற்போதைய நமது இருக்கைகள் எனும் போது – தொடரும் மாதத்தில் வேறு இதழாக எதை நுழைத்தாலும் – 250 & 350-க்கென நாம் திட்டமிட்டுள்ள மைல்கல் இதழ்கள் redundant ஆகிடுமே? முன்பைப் போல சன்ஷைன் லைப்ரரி என்ற லேபில் இப்போது கிடையாதென்பதால் – இடைப்பட்ட ஜூலைக்கு அந்த லேபிலில் எதையாவது வெளியிட்டு ஒப்பேற்றுவதும் சாத்தியமில்லை அல்லவா? தவிர, ஒவ்வொரு ஸ்பெஷல் இதழுக்கும் நாம் சந்திப்பதென்பதில் எனக்கு மட்டற்ற மகிழ்ச்சி தான் என்றாலும் – அது ஒவ்வொரு தடவையும் பிரயாணச் செலவுகள் / வேலைகளைப் போட்டு விட்டு வருதல் போன்ற அசௌகரியங்களையும் உங்களுக்கு உண்டாக்குவதை மறப்பதற்கில்லை! கூடுதலாய் ஒரு மாத அவகாசம் கிடைத்திடும் பட்சத்தில் சாவகாசமாய் அச்சிட; பைண்டிங் செய்திட ஏதுவாகத் தானிருக்கும் – but ஜூலையில் "தற்காலிக லீவு" என்ற போர்டைத் தொங்க விட்டாலன்றி கணக்கு உதைக்குமல்லவா?

Moving on – ஆவலாய் எதிர்பார்க்கப்படும் கார்ட்டூன் ஸ்பெஷலின் 4 கதைகளும் ஒருவழியாகப் படைப்பாளிகளின் சம்மதங்களோடு கான்டிராக்ட்களாக உருமாறி விட்டன ! லியனார்டோ தாத்தா அந்த நான்கில் ஒன்று என்பது obvious ; அதே போல ஸ்மர்ஃப்கள் கதை # 2ன் இடத்தைப் பிடித்திருப்பதும் ஓட்டைவாய் உ.நா.வின் புண்ணியத்தில் அப்பட்டம்! பாக்கி 2 இடங்கள் யாருக்கென்ற யூகங்களை இன்னமும் சிறிது காலத்திற்குத் தொடருவோமே? - ‘தல’யின் மெகா இதழ் சூரிய வெளிச்சத்தைப் பார்க்கும் வரையிலாவது! இப்போதே அத்தனையையும் போட்டு உடைத்து விட்டால் 2 மாதங்களுக்குப் பின்னே இதழ் வெளிவருவதற்குள் ‘ஆறிப் போன பதார்த்தம்’ போலான உணர்வு தலைதூக்கி விடுமென்பதால் things will be under wraps!

கதைகளின் தேர்வுகளில் திரையிருப்பினும் இதழ்களின் அமைப்பினில் இரகசியம் தொடர்ந்திட காரணம் இருப்பதாக நான் நினைக்கவில்லை! இந்தாண்டின் ஜனவரி சென்னைப் புத்தக விழாவில் கார்ட்டூன் ஸ்பெஷலை அறிவித்த போதே மாறுபட்ட பல கதைகள் ஒரே இதழில் இடம்பிடிக்கவிருக்கும் சூழலில் - அவை வெவ்வேறு போட்டிப் பதிப்பகங்களின் படைப்புகளாக இருப்பதைத் தவிர்க்க இயலாதென்பதைப் புரிந்திருந்தேன். So அவை தனித்தனி இதழ்களாய் – ஆனால் ஒரே டப்பாவில் அடைக்கப்பட்ட gift set போல வெளிவந்திடுவது தான் தீர்வு எனத் தீர்மானித்திருந்தேன். ஜனவரியின் ambitious திட்டமிடலின் போது இந்த இதழினில் குறைந்தபட்சம் 6 கதைகள் என்ற ஆசை (பேராசை?!!) தலைக்குள் குடியிருந்த நிலையில் – “உலகத் தொலைக்காட்சிகளில் முதல் முறையாக“ ஒரு கதம்ப ஸ்பெஷலாகவும் ; 6 தனித் தனி இதழ்களின் இணைப்பிலான தொகுப்பாகவும் அமைந்திடும் என்பதே plan – நாள் 1 முதலாய்! அதனால் தான் : கதம்ப ஸ்பெஷல் வேண்டும் / வேண்டாம்  ; சரி  / சரியில்லை என்ற தர்க்கம் சமீபமாய் இங்கே ஓடிக் கொண்டிருந்த போது கூட – ‘பொறுமை ப்ளீஸ்..உதைக்கும் அவசியம் எழும் பட்சத்தில், நானே நினைவுபடுத்திக் கேட்டு வாங்கிக் கொள்கிறேனே !" என்று சொல்லி வைத்திருந்தேன் ! இப்போது 4 கதைகள் மட்டும் தான் என்றாலும் கூட  - அவையும் மாறுபட்ட (போட்டி) நிறுவனங்களின் படைப்புகள் என்றான சூழலில் – the plan is definite !

4 இதழ்கள் x ரூ.60 = ரூ.240/- என்ற விலை கடைகளில் வாங்குவோர்க்கும்  ; ரூ.210/- விலைக்கான (அறிவிக்கப்பட்ட) ஓரிரு இதழ்களின் இடத்தினில் இந்த box-set சந்தாதாரர்களுக்கும் - என்பதே திட்டமிடல்! அட்டவணையை நோண்டாது – “கா.ஸ்பெஷல்“இதழுக்கென தனியாகப் பணமனுப்பக் கோரிடலாமென்ற ஆசை எனக்கு உண்டு தான் ; ஆனால் டாஸ்மாக் வாசலில் பரதம் பயிலும் பெருமான்களைப் போல வேலைப் பளுவும், நிதி நெருக்கடியும் ஆட்டுவித்து வரும் நிலையில் – ஓவர் ஆசை வேண்டாமென்று தீ்ர்மானிக்கும் கட்டாயம் நமதாகிறது! இதன் பொருட்டு சில முகம் சுளிப்புகள் + காதில் புகை சமிக்ஞைகளின் உற்பத்திகளும் நேர்ந்திடுமென்பது எதிர்பார்க்கக் கூடியதே என்பதால் – முதுகில் நயம் விளக்கெண்ணையாகத் தடவிக் கொண்டு ‘ஹெஹேஹே... வலிக்கலையே...!’ என்று போஸ் கொடுக்க வாகாக முதுகைக் காட்டிக் கொண்டு நின்று கொள்வதைத் தவிர்த்து வேறு வழி தெரியவில்லை ! அப்புறம் drop ஆகும் இதழ்கள் எவை என்பதைப் பற்றி "கா.ஸ்பெ" கதைகள் அறிவிப்புப் பதிவினில் சொல்கிறேனே..! அந்தக் கல்தாப் பட்டியலில் மாடஸ்டி கிடையாது என்ற சேதியோடு அடியேன் புறப்படுகிறேன்! June மாத விமர்சனங்கள + ‘தல’ இதழுக்கான contributions தொடரட்டுமே- ப்ளீஸ்?! See you around all...bye for now !!

P.S : ஈரோட்டில்..."தல" வெளிவர வாய்ப்பில்லாது போயின் கூட அவருக்கொரு மெகா tribute செய்திடவொரு யோசனை எனக்குள் உள்ளது ! பந்தியில் அமர நமக்கு இடம் உறுதியான பின்பு அதைப் பற்றிப் பேசுவோமே..! 

குறுக்கே ஒரு குட்டிப் பதிவு !

நண்பர்களே,

வணக்கம். நேற்று மாலை உங்களைத் தேடி ஜூன் மாத்து 3 இதழ்களும் புறப்பட்டு விட்டன ! பள்ளி துவங்கும் வேளை என்பதால் பைண்டிங்கில் ஏகப்பட்ட வேலைப்பளு ! So ஓரிரு நாட்களுக்கு முன்பாகவே இதழ்களை அனுப்பும் எங்கள் அவா பூர்த்தியாகிடவில்லை And இம்முறை மூன்றே சன்னமான / வண்ண இதழ்கள் மட்டுமே என்பதால் சமீப வழக்கமான அட்டை டப்பா பாக்கிங் சாத்தியமாகிடவில்லை ! கொஞ்சமேனும் thickness இருந்தால் தவிர, அட்டை டப்பாக்கள் தயாரிப்பில் சைடில் பின் அடிக்க gets to be impossible ; உரிய குறைந்தபட்ச பருமன் இல்லாது போகும் இது போன்ற நேரங்களில் ஆரம்ப நாட்களைப் போல துணிக் கவரே நமக்கு மார்க்கமாகிறது ! So செலவைக் குறைக்க ஆரம்பிச்சுட்டான் டோய் என்ற பீதிக்குத் தேவையில்லை !

And இம்மாத இதழ் # 3-ன் அட்டைப்படம் & டீசர் இதோ ! கம்பியூட்டர் இல்லாதொரு இடத்தில் நான் இருப்பதால் போனிலிருந்து முதல் முறையாக போடும் பதிவினை நீளமாய் அமைத்திட தெம்பில்லை ! So இதழ்கள் பற்றிய உங்களின் எண்ணங்களை - விமர்சனங்களை முன்வைக்க உதவும் ஒரு பக்கமாய் இதை பயன்படுத்திடலாமே ! உங்கள் எண்ணங்களை அறியக் காத்திருப்போம் ஆவலாய் !  See you again on sunday folks ! Bye for now !