சர்க்கஸாய் ஒரு சனிக்கிழமை !

 நண்பர்களே,

வணக்கம். கோவில்பட்டிக்கு கடலைமிட்டாய் ; சாத்தூருக்கு சேவு ; நெல்லைக்கு அல்வா என்பது போல் எங்க ஊரில் (ஒரு காலத்தில்) பக்கோடா செம famous ! பெரியதொரு ஆடம்பரமோ, பந்தாவோ இல்லாமல் பஜாருக்குள் இருக்கும் அந்தக் கடையின் முன்னே எந்நேரமும் மொய்யென்று கூட்டம் அப்பி நிற்கும் ! ராத்திரிக்கு பால்சோறு - பக்கோடா கூட்டணியில் தான் இக்கட ஆயிரக்கணக்கான வீடுகளில் இன்னமும் வண்டி running ! அதைக் கொறித்துப் பழகிப் வளர்ந்த பிள்ளைகள் திருமணமாகி வெளியூர்களுக்கு சென்று விட்டாலும், இங்கிருக்கும் தகப்பன்மார்கள் தவறாது பார்சல்கள் வாங்கி கூரியர்களில் போட்டுத் தாக்குவதுண்டு ! பக்கோடா famous என்றாலும், அந்தக் கடையின் இனிப்புகள், காரங்கள் சகலமுமே செமையாக இருக்கும் - so மூத்த பிள்ளை வீட்டுக்கு ; அடுத்த பிள்ளை வீட்டுக்கு ; கடைக்குட்டிக்கு என்ற ரீதியில் பிரித்துப் பார்சல் வாங்க வருவோரை வேடிக்கை பார்ப்பதே ஒரு அனுபவம் !! "ஆங்...ஒரு கிலோ பக்கோடா - மூணு பார்சல் அண்ணாச்சி ; அந்த மொத பார்சல்லே அரை கிலோ ஜிலேபி சேர்த்து வைச்சிருங்க ; ரெண்டாவதுலே பூந்தி லட்டு ; மூணாவதிலே மைசூர்பாகு ! அப்டியே அந்த ஜிலேபி பார்சலோட முக்கா கிலோ சிப்ஸ் போட்ருங்க ; பூந்தி லட்டு கூட ஓமப்பொடி ; மைசூர்பாகோட பாதுஷா ! இந்த சிப்ஸ் வைச்ச பார்சல் இருக்கில்லியா - அதோட கால் கிலோ கருப்பட்டி முட்டாய் ஜீரா ஊத்தாதது வேணும் ; பாதுஷா பார்சல்லே ஜீரா ஊத்தின கருப்பட்டி முட்டாய் ; அப்புறமா ஓமப்பொடி பார்சல்லே கோதுமை அல்வா அரை கிலோ !!" என்று ஒவ்வொரு பிள்ளைக்கும், மாப்பிள்ளைக்கும், பேரப்பிள்ளைக்கும் பிடித்தமான சமாச்சாரங்களை மாய்ஞ்சு மாய்ஞ்சு ஆர்டர் செய்வதை கிட்டக்க இருந்து கேட்கும் போதே, தலீவரின் கடுதாசிகளைப் படிச்சா மாதிரி நமக்கு கேரா இருக்கும் ; ஆனால் கடையில் நிற்கும் சிப்பந்திப் பசங்களோ செம அசால்ட்டாய் அதைக் கையாள்வார்கள் ! இன்றைய பகலில் நமது ஆபீசுக்குள் நுழைந்த போது எனக்கு அந்தப் பக்கோடா கடை ஞாபகமே தான்......!

"Smashing 70s-க்கு அவர் சந்தா கட்டியிருக்காரு....அதுக்கான free புக்கை வைச்சிருங்க ; புக்மார்க் மறந்திராதீங்க ! அவரே ரெகுலர் சந்தாவிலேயும் இருக்கார் - ஆனா டெக்ஸ் வில்லர் இல்லாத சந்தா - அதனாலே தோர்கல் புக் மட்டும் வைக்கணும் ! அது கூடவே 'கைப்புள்ள ஜாக்' இலவச புக் மறந்திடப்படாது ! ஊஹூம்....அவர் சுஸ்கி-விஸ்கிக்கு பணம் இன்னும் கட்டலே....அதை வைக்க வாணாம் ; ஆனா அதுக்கான அந்த செகப்பு கலர் புக்மார்க் மட்டும் வைச்சு விடலாம் !!"......" இல்லே - இது சுஸ்கி-விஸ்கி மட்டும் ஆர்டர் பண்ணுன சாருக்கு ; ஹே.. அது  "காமிக்ஸ் எனும் கனவுலகம்" FB க்ரூப்பிலேர்ந்து பணம் கட்டுனவங்களுக்கு - மறக்காம அந்த ஸ்டிக்கர் போட்ட புக்கான்னு பார்த்து வைக்கணும் ! ஆமா...அவங்க ரெகுலர் சந்தாவிலே இருக்காங்க தான் ; ஆனா Smashing-க்கு கட்டலை ; சுஸ்கி-விஸ்கி, தோர்கல் , டெக்ஸ் மட்டும் அனுப்பணும்,,,ஒரு free புக் மட்டும் தான் !!" என்ற ரீதியில் அங்கே நடந்து கொண்டிருந்த களேபரங்களை வாசலில் நின்றபடிக்கே பார்த்தும், கேட்கவும் செய்த எனக்கே கிறு கிறுவென்று வந்தது ! ஆனால் நம்மாட்கள் அந்தப் பக்கோடாக் கடையின் தேர்ந்த சிப்பந்திகளைப் போல, டெஸ்பாட்ச்சை அசால்ட் அறுமுகங்களாய்க் கையாண்டு கொண்டிருந்தனர் ! உள்ளே கால்வைத்தால் எனது அறைக்குள் போகவே பாதையில்லை - நெடுக பார்சல்கள் / டப்பிகள் / புக்குகள் என்ற ஆக்கிரமிப்புகள் !!  அது என்ன கதை, ஏது கதை என்பதோ, மாண்ட்ரேக் யார் - மயிலாடுதுரைக்காரரா - மதுராந்தகத்தாரா ? என்றோ நம்மாட்களுக்குத் தெரியாது தான் ! ஆனால் ஒவ்வொரு மாதத்தின் இறுதியிலும் இவற்றை உங்களிடம் கொண்டு சேர்ப்பது எத்தனை முக்கியம் என்பதை அழகாகத் தெரிந்து வைத்திருப்பவர்கள் ! நான் வித விதமாய் வடைகளைச் சுட்டுத் தள்ளினாலும், மறையைக் கழற்றிக் கையில் தர டிசைன் டிசைனாய்த் திட்டமிட்டாலும், அத்தனைக்கும் செவி சாய்த்து நடைமுறைப்படுத்தும் ஆற்றலாளர்கள் ! Of course - அங்கே இங்கே என சிற்சிறுப் பிழைகளுக்கு விதிவிலக்குகள் ஆகிட மாட்டார்கள் தான் ; ஆனால் இந்தப் பயணத்தின் ஒரு understated அங்கம் இவர்கள் என்பதில் எனக்கு ஐயங்களே கிடையாது ! முகம் சுழிக்க முகாந்திரங்கள் தராமல் இயன்றமட்டுக்கு அனைவருக்கும் பணியாற்றிட எண்ணும் இந்தச் சின்ன டீமுக்கு அவ்வப்போது கிடைப்பது என்னவோ விளக்குமாற்றுச் சாத்துக்களுமே - like yesterday !! ஈரோட்டிலிருந்து ஒரு வாசகர் ; Smashing '70s க்கு மாத்திரம் சந்தா + சுஸ்கி-விஸ்கி முன்பதிவு என்று செலுத்தியுள்ளவர்.....போன் செய்து - "மாண்ட்ரேக் புக் இங்கே எல்லா இடத்திலேயும் வித்துக்கிட்டு இருக்கு ; எனக்கு தான் அனுப்பலை நீங்க !!" கத்தித் தீர்த்திருக்கிறார் ! இங்கிருந்து யாரேனும் களவாடி புக்ஸை கொண்டு சென்றிருந்தால் தவிர, அதற்கு வாய்ப்பே இல்லை என்று அவரைப் புரியச் செய்ய முயன்றாலும் கூச்சல் மட்டுமே மறுமுனையிலிருந்து ! புரிந்து கொள்ளவே முடிவதில்லை - நமது பொறுமைகளுக்கு, சில தருணங்களில் இத்தனை சன்னமான திரிகள் தானா ? என்பதை ! Phewww !!

டெக்ஸ் வில்லர் புக்ஸ் ரெடியாகிட ஒரு நாள் கூடுதலாய் அவசியமாகிட்டதால் இதர புக்ஸும் காத்திருக்க வேண்டிப் போனது ! இது தான் நிலவரம் எனும் போது எங்கோ-யாரோ சொன்னதைக் கேட்டுக்கொண்டு இவர்களைக் காய்ச்சி எடுப்பானேன் ? இது போலான பஞ்சாயத்துக்களுக்கு இடம் தர வேண்டாமே என்பதால் தான், ரெடியாகிக் காத்திருந்த சுஸ்கி-விஸ்கி புக்ஸைக் கூட இன்று வரைக்கும் கோவைப் புத்தக விழாவில் விற்பனைக்கு வெளியே எடுத்திடவில்லை ! சற்றே முன்கூட்டி அவற்றை விழாவில் கண்ணில் காட்டியிருந்தால், நிச்சயமாய் விற்பனைக்குக் கைகொடுத்திருக்கும் தான் ; ஆனால் ஒரே சமயத்தில் அனைவருக்கும் கிடைக்கட்டுமே என்று எண்ணி, ஸ்டாலில் உள்ள பண்டலை இந்த நொடி வரைக்கும் உடைக்க அனுமதி தந்திருக்கவில்லை நான் ! And we get this !! 😑😑😑

நாளை கடைசி தினம் காணும் கோவை விழாவினை இந்த சு&வி.ரெட்டையர் சிறப்பிப்பார்கள் ! And இது வரைக்குமான கோவை அனுபவம் - செமத்தியோ செமத்தி !! வார நாட்களில் கூட பின்னிப் பெடலெடுத்துள்ள விற்பனைகள் ! By far - நமது இது வரைக்குமான கோவைப் புத்தக விழாக்களுக்குள், இந்த நடப்பாண்டே டாப் !! இந்த வாரயிறுதியும் அதே வேகத்தில் தொடர்ந்திடும் பட்சத்தில் புனித மனிடோ நம்மை ஜம்மென்று கரை சேர்த்திருப்பார் !! அப்புறம் கவிஞரே..ஞாயிறுக்கு கோவையில் மழை என்று forecast காட்டுகிறது ; உங்க கவிதைகளில் ஒண்ணை எடுத்து விட்டு அதை சித்தே தள்ளிப் போட முடியுதான்னு பாருங்களேன் ?!

Moving on, உடனடியாய் காத்திருக்கும் அடுத்த இதழ் - நம்ம கதை சொல்லும் காமிக்ஸ் வரிசையின் இதழ் # 2 - சின்ட்ரெல்லா !! இதோ - அதன் அட்டைப்பட preview & உட்பக்க preview க்களை உங்களிடம் காட்டும் சமயமே, மண்டைக்குள் யோசனைகள் பல குறுக்கும், நெடுக்கும் ஓட்டமெடுத்து வருகின்றன : 'ஆஹா....இதிலே எடுத்த உடனேயே ரெண்டு பெருசுக ரெண்டாம் கண்ணாலம் கட்டிக்குதுங்க ; இளவரசருக்கு (கதையிலே வர்றவருக்கு தான் !!) பொண்ணு பாக்கிறச்சே அழகான பாப்பாக்களா தேடுறாங்க ; இறுதியிலே இளவரசருக்கு பச்சக்குனு சின்டி பாப்பா இச்சு கொடுக்குது !!' இவற்றையெல்லாம் காரணம் காட்டி இந்தக் கதைக்குக் கட்டம் கட்ட வேண்டி வருமோ ? Go Back சின்டி !! என்று பலூன்கள் பறக்குமோ ? என்று பயந்து பயந்து வருது ! 

நிறையவே கனவுகளோடு துவங்கிய இந்தக் கதை வரிசையானது பெரிதாய் take off ஆகவில்லை என்பதே நிலவரம் ! Yes - கோவை புத்தக விழாவில் இதற்கு "பரவாயில்லை" ரக response கிட்டியுள்ளது தான் ; ஆனால் in general - ஜாக் கையில் ஒரு பிஸ்டலோ ; பிச்சுவாவோ இருந்திருந்தால் தலை தப்பியிருக்கும் போலும் ! நமது யூத் வாசக வட்டத்து இல்லங்களில் குட்டீஸ்கள் குறைவோ ; அல்லது அவர்கட்குக் கதை சொல்லிடும் மெனெக்கெடல்களுக்கு நம் மத்தியில் அவகாசம் குறைச்சலோ ; அல்லது ஒன்லி இங்கிலீபீஷ் என்ற எண்ணங்களோ ; அல்லது கரிச்சட்டிகளுக்குள் தலைகளை முக்கி எடுத்து யூத்தாய்க் காட்சி தரும் வட்டத்தின் இல்லங்களில் மிகுந்திருப்பது வளர்ந்த பிள்ளைகளோ-  காரணங்கள் எதுவாக இருப்பினும் the response has been very lukewarm ! பிறந்தநாள் பரிசளிக்க, நூலகங்களுக்கு அன்பளிப்பாக்கிடக் கூட இவை பயன்தரவில்லை எனும் போது மண்டையைச் சொரிய மட்டுமே முடிகிறது !  அடுத்த சீசனுக்கு இந்த முயற்சி தொடர்ந்திடும் பட்சத்தில் - இடைப்பட்ட நாட்களில் எனக்கு சிக்கிம் லாட்டரியில் ஒரு கோடி விழுந்திருக்க வேணும் தான் !! சிக்கிமுக்கு எந்த பஸ்னு வேற தெரிலியே...!

Next in line, ஈரோட்டுப் புத்தக விழா காத்திருக்க, "அங்கே என்ன இஸ்பெஷல் ?" என்ற கேள்வி எழுவது இயல்பே ! ஆனால் சின்னச் சின்ன சில நிகழ்வுகள் நமது திட்டமிடல்களுக்கு சற்றே நிதானங்கள் தேவை என்பதைச் சுட்டிக்காட்டியுள்ளன ! 50 ஆண்டுகளைத் தொட்டாச்சு ; வெளியீடுகளின் எண்ணிக்கை ஆயிரத்தை நோக்கிப் பயணிப்பதையும் பார்க்கிறோம் - ஆனாலும் இத்தனை காலமாய் நமது கிட்டங்கிகளில் உருப்படியான ரேக்குகள் கூட இருந்ததில்லை ! பலகைகள் மீது இங்கும் அங்குமாய் புக்ஸ் குந்தியிருப்பதே அரை நூற்றாண்டின் வாடிக்கை ! ஆனால் சமீப பொழுதுகளில் நமது வெளியீட்டு எண்ணிக்கைகளும், இதழ்களின் கையிருப்புகளும் உசக்கே பயணித்துக் கொண்டேயிருக்க, 'கிட்டங்கியில் இடம் இல்லா சாரே ; இனி புக்ஸ் வந்தால் பக்கத்து பொட்டலில் தான் இறக்கி வைக்கணும் !" என்று நம்மாட்கள் தாக்கல் சொன்ன போது 'திரு திருவென்று' முழிக்கவே முடிந்தது ! 

"பொட்டலில் பொம்ம புக் !!" டைட்டில் சிறப்பாய் இருந்தாலும், அந்த இடத்துக்காரர் நாயை விட்டுக் கடிக்கப் பண்ணுவார் என்ற புரிதலோடு, தொப்புளை சுற்றி 16 ஊசிகள் போட்டுக் கொள்ளவும் திராணி தேறவில்லை ! So தீர்வு என்ன ? என்ற யோசனைக்கு - புத்தக ரேக்குகள் செய்து வாங்குவதே வழி ; ஒவ்வொரு ரேக்கிலும் 5 தட்டுக்கள் இருக்கும் பட்சத்தில் ஒன்றன் மீது ஒன்றாய் அடுக்கி இடத்தை manage செய்து கொள்ளலாம் என்று பட்டது ! தொடர்ந்த சுபயோக சுப ஜூன் மாதத்தினில், மதுரையிலிருந்து ரேக் செய்யும் நிறுவனத்தினர் வந்து நமது கிட்டங்கியை அளவெடுத்து இந்த முனையிலிருந்து அந்தக் கோடி வரைக்கும் எத்தனை ரேக்குகள் போட முடியும் என்ற கணக்குடன் ஒரு வரிசைக்கு ரூ.50,000 என்ற எஸ்டிமேட்டும் தந்தனர் ! மொத்தம் 4 வரிசைகள் அதே போல போடலாம் என்றும் சொன்ன போது 'கைத்தாங்கலாக யாராச்சும் என்னைப் பிடிங்கப்பா !!' என்று சொல்லாத குறை தான் ! வேற வழியே இல்லை என்றான பின்னே, first "ஒரேயொரு வரிசை போட்டுப்போம்ணே....சரியாய் வந்தா மேற்கொண்டு செஞ்சுக்குவோம் !" என்றேன் ! நாலாவது தினமே வந்தார்கள், மாட்டினார்கள், பில்லை நீட்டினார்கள், உடனடி பேதிக்கு மருந்தென்ன ? என்று என்னைத் தேட விட்டார்கள் ! ஒரு மாதிரியாய் புக்ஸை தட்டுக்களில் அடுக்கி, ஒவ்வொன்றின் பெயரையும் எழுதி ஒட்டிய போது, "இதே மாதிரி மேற்கொண்டு செஞ்சு வாங்கி குடுங்க சார் ; வசதியா இருக்குது !" என்று நம்மவர்கள் கோரிக்கை வைக்க "ஜெய் கோவைப் புத்தக விழாவாய நமஹ !!" என்ற நம்பிக்கையில் ரேக் # 2-க்கு ஆர்டர் செய்தோம் ! 

வந்தாங்க..மாட்டுனாங்க..பில்லு தந்தாங்க ..பேதி..!! ரிப்பீட்டு !! 3 நாட்களுக்கு முன்னே மாட்டி முடித்த ரேக்கினில் இதுநாள் வரைக்கும் அட்டைப்பெட்டிகளுக்குள் துயில் பயின்று கிடந்த hardcover இதழ்களை எடுத்து அடுக்கிக் கொண்டிருந்த சமயமாய் உள்ளே போய் பராக்குப் பார்த்தவனுக்கு சில பல ஷாக்குகள் !! இதுநாள் வரைக்கும் sold out என்ற நம்பிக்கையில் கடையைச் சாத்தியிருந்த நம்ம ஜெரெமியா ஆல்பம் # 2 "பயணங்கள் முடிவதில்லை" கணிசமான எண்ணிக்கையில் ஒரு அட்டைப்பெட்டிக்குள் கிடந்தது ! அடங்கொன்னியா...என்றபடிக்கே கொஞ்சம் முன்னே நகர்ந்தால், செமத்தியாய் டாலடிக்கும் "பிஸ்டலுக்குப் பிரியாவிடை" ரேக்கில் குதூகலமாய்க் குந்திக்கிடந்தது ! இத்தனை காலமாய் டப்பாக்களுக்குள் துயில் பயின்று வந்ததால் பெரிதாய்க் கண்ணில்பட்டிருக்கவில்லை ; ஆனால் இப்போது உடைத்து வெளியே எடுத்து அடுக்கும் போது தான் யதார்த்தம் பிடரியில் அறைகிறது ! "இந்த இதழில் ஸ்டாக் தங்கியது எவ்விதம் ? சூப்பர் ஹிட் இதழாச்சே ?" என்று யோசித்த போது தான், இது சந்தாவின் அங்கமே நஹி ; ஈரோட்டு ஸ்பெஷல் என 2018-ல் தயார் ஆனது என்பது புலனானது ! ஆக சந்தாவிலோ, முன்பதிவிலோ இடம்பிடிக்கா ஸ்பெஷல் இதழ்கள், அந்நேரத்து euphoria-வில் பரபரப்பாய் விற்பனையாவதைத் தாண்டி பெரிதாய் சாதிப்பதில்லை என்பதே நிஜம் ! இதற்கு ஒரே விதிவிலக்கு நம்ம மஞ்சள்சட்டை மாவீரரின் ஸ்பெஷல் இதழ்கள் ! அட்டவணையில் இடம்பிடித்தாலும் சரி, out of syllabus பாடமாய் இருந்தாலும் சரி, இவை கரைசேர்ந்து விடுகின்றன ! 

So மறுக்கா ஈரோடு..மறுக்கா ஸ்பெஷல்...மறுக்கா அட்டவணையில் இடம்பிடிக்காத ஸ்பெஷல் இதழ்...ரிப்பீட்டு !!! என்ற S.J சூர்யாவின் மாடுலேஷனில் தலைக்குள் குரல் கேட்டது !! இன்றைக்கு காகிதம் விற்கும் விலைகளில் புக்ஸை அச்சிட்டு கிட்டங்கியில் அடுக்கி அழகு பார்க்கும் 'தம்' - அதானி ஓனருக்கு மட்டுமே சாத்தியம் என்பதால் நம் முன்னே இருப்பன இரண்டே options :

***Zagor எனும் இந்தப் புதுவரவை முன்பதிவுக்கு அறிவித்திடல் ; with maybe 2 months time for the booking !! 

அல்லது

***2023-ன் அட்டவணையினில் ஜனவரி இதழாய் இந்தச் சிகப்பு பனியன்காரரை களமிறக்கல் ! 

So சொல்லுங்களேண்ணே - இரண்டில் எது சுகப்படக்கூடுமென்று ?

முன்பதிவு option ஓ.கே. எனில் - சைக்கிள் கேப்பில் "உயிரைத் தேடி" இதழையும் இணைத்திடல் ஓ.கே.வாகிடுமா guys ? 

And இந்தப் பட்டியலில் உள்ள இதழ்களையும் முன்பதிவுகளுக்குப் பரிசீலனை ப்ளீஸ் ?

STORY OF THE WEST (Color)

SPIDER vs. THE SINISTER SEVEN (Black & White)

 

யோசித்துச் சொல்லுங்களேன் ? முன்பதிவு இதழ்களென்றொரு லிஸ்ட் தந்து - அவற்றுள்ளிருந்து pick & book whatever you want என்ற வாய்ப்பளிக்கலாமோ ? 

அக்டொபரின் துவக்க நாட்களில் விடுமுறைகள் நெடுக கரம் கோர்க்கின்றன ! அந்நேரத்துக்கு ஒரு ஆன்லைன் விழா திட்டமிட்டு, இந்த முன்பதிவு இதழ்களைக் கொண்டு அந்த  'விலாவை' சிறப்பிக்கலாமோ ? Thinking caps on ப்ளீஸ் all ?

Further down the line, 2023-ன்  அட்டவணைக்கான புது வரவுகளில் ஒருவர் 'டிக்' ஆகியாச்சு & அதிகாரபூர்வமாய் நமது அணிவகுப்பினில் அங்கமாகிட மனுஷன் ரெடியாகி விட்டார் ! அந்தப் புது வரவு # 2 நம்மோடு கரம்கோர்க்க, இன்னும் கொஞ்ச அவகாசம் அவசியமாகிடும் போலும் ; நமக்கு நிரம்பவே நேரம் இருப்பதால் பொறுமையாய்க் காத்துள்ளோம் ! இருவருமே கௌபாய்கள் அல்ல என்பதே இங்கே ஸ்பெஷல் ! 

மீண்டும் சந்திப்போம் folks, bye for now !! Have a cool weekend !! 

திங்களன்று  உங்களின் ஆகஸ்ட்களைத் துவக்கிட நமது புது வரவுகள் உங்கள் வீட்டு வாசல்களில் காத்திருப்பார்கள் ! 

ஆன்லைன் லிஸ்டிங்களுமே ready ! Happy Shopping & Reading !!

https://lioncomics.in/product/august-pack-2022/

https://lion-muthucomics.com/latest-releases/977-august-pack-2022.html

சுழலும் சக்கரங்கள்...!

 நண்பர்களே, 

வணக்கம். நிறைய விதங்களில் செம சுவாரஸ்யமான வாரமிது - at least எனக்காவது  !! (பெண்டு கழன்று வரும் நம்மவர்கள் வேறு மாதிரியாய் இந்த வாரத்தை வர்ணிக்கக்கூடும் தான் !!) பெருசாய் ஒரு பட்டியலுடன் ; ஒரு வண்டிப் பணிகள் தொங்கலில் நின்று கொண்டிருந்ததைப் பற்றி 2 வாரங்களுக்கு முன்பாய் மூக்காலே அழுதிருந்தது நினைவிருக்கலாம் !! Surprise ...surprise ....கார்சனின் மேஜையில் பரிமாறப்பட்ட சுக்கா ரோஸ்ட்டைப் போல பணிகளை ஒவ்வொன்றாய் 'டிக்' அடித்துக் கொண்டே போக இந்த வாரத்தினில் சாத்தியமானது !! And நம்பச் சிரமமாக இருந்தாலும் - 80 சதவிகித மலையைத் தாண்டியாச்சு என்பதே நிலவரம் !! To start off - 'தல' !!

மௌன நகரம் !! ரொம்ப காலமாய், ரொம்பவாட்டி சொல்லியிருக்கும் சமாச்சாரம் தான் ; ஆனால் yet again ஒப்பிப்பதைத் தவிர்க்க முடிலீங்கோ ! இத்தாலியக் கதாசிரியர்களுக்கும், நமது தமிழ் சினிமாக்களின் கதைப் பார்ட்டிக்களுக்கும் நிச்சயமாய் ஏதோவொரு தனிப்பட்ட டெலிபதி அலைவரிசை இருக்க வேணுமென்பேன் ! இங்கே நாம் பார்க்கும் சமாச்சாரங்களின் சாயல்கள் அடிக்கடி அங்கே, நம்ம தல ஆல்பங்களில் தென்படுவதும், அங்கு தெறிக்க விடும் அனல்களின் பிரதிபலிப்புகள் நம்மூரில் வெள்ளித்திரையினில் தெரிவதும் இப்போதெல்லாம் சகஜம் என்றாகி விட்டது ! அதை ஊர்ஜிதம் செய்கிறது, இதோ இம்மாதத்து டெக்ஸ் த்ரில்லரான "மௌன நகரம்" ! இன்னமும் இதன் மீதான பணிகள் முடியவில்லை தான் ; இன்னுமொரு 60 பக்கங்களாவது எழுத வேண்டிக்கிடக்கிறது தான் ; ஆனால் அதற்குள்ளாய் எனக்கு நினைவுக்கு வந்திருக்கும் தமிழ் திரைப்படங்கள் 2 ! Maybe இந்த புக் வெளியான பிற்பாடு, எனக்குத் தெரிந்திருக்கா இன்னும் சில படங்கள் கூட உங்களுக்கு ஞாபகங்களுக்கு வரலாமோ - என்னவோ ! இதோ - ஆகஸ்டில் உங்களோடு அன்னம், தண்ணீர் புழங்கக் காத்திருக்கும் இரவுக்கழுகாரின் அட்டைப்பட முதல் பார்வை :

போனெல்லியின் அட்டைப்படங்களில் 'தல' தரும் போஸ்கள் ஒவ்வொன்றுமே ஹாலிவுட் ரேஞ் என்பதில் no secrets ! என்ன - அவர்களது வண்ணக் கலவை பாணிகள் சற்றே தட்டையாய் இருப்பதுண்டு ! ஆனால் நமக்கோ சினிமா போஸ்டர்கள் சாயல்களில் சும்மா 'பச்சக்' பச்சக்' என்று மனதில் ஒட்டிக் கொள்ளும் வர்ணமயமான டிசைன்களில் தான் நாட்டம் எனும் போது அவற்றை மறுபடியும் வரைய முனைவதுண்டு ! And இம்முறையும் அதுவே நடைமுறை !! இதோ - நமது சென்னை டிஜிட்டல் ஓவியர் உருவாக்கியிருக்கும் டிசைனுக்கு base ஆன போனெல்லி அட்டைப்படம் இதுவே :

அவருமே அட்சர சுத்தமாய்ப் போட்டுத் தாக்கி அனுப்பிய டிசைன் இதோ - இது தான் : 

'பளிச்' என்று இருந்தாலுமே - 'தல' தலைக்குக் கொஞ்சம் எர்வாமாட்டின் தேய்க்க வேண்டியிருப்பது போல் பட்டது ! ஏற்கனவே வர்ணங்களில், சின்னச் சின்ன பின்னணித் திருத்தங்களில் நிறையவே அவரைக் குடலை உருவி முடித்திருந்தோம் எனும் போது மண்டையை மேற்கொண்டு டிங்கரிங் பார்க்கச் சொல்லிக் கோரிட மனசு கேட்கலை ! ரைட்டு, என்றபடிக்கு  கோகிலாவிடம் டிசைனை ஒப்படைத்து 'தாண்டுறா ராமா...ஆடுறா ராமா !' என்று பழகிப் போன சர்க்கஸ்களை செய்யப் பணித்தேன் ! இறுதியாய் செய்த மாற்றங்களோடு தல தக தகவென மின்னிய போது தான் திருப்தியாய் இருந்தது ! Of course - உங்களின் கலைக்கண்ணோட்டங்கள் மாறுபடலாம் தான் ; ஆனால் எனக்கு, மாலையப்பனின் ஆரம்ப நாட்களின் பாணியில் இருப்பதாய்ப் பட்டது !! 

கதையைப் பொறுத்தவரைக்கும் உலகை உலுக்கும் புது template கிடையாது தான் ; but சின்னதொரு அத்துவான நகரில் நடக்கும் கண்ணாமூச்சி ஆட்டம் ரொம்பவே விறு விறுப்பாய் இருப்பதாகப் பட்டது ! கதாசிரியர் Ruju & புது ஓவியரின் கைவண்ணத்தில் செம crisp ஆக ஓட்டமெடுக்கிறது ! இதோ - உட்பக்க preview :

ரக ரகமாய், வித விதமாய் முந்திரி, ஏலக்காய் ; கிஸ்மிஸ் என்று போட்டு எத்தனை பாயாசங்கள் கிண்டினாலும் மாதத்தின் ஆயாசம் போக்கும் திறன் இந்த டாப் நாயகருக்கே என்பதை ஸ்லீப்பர் செல்களே ஒத்துக்க கொள்வர் ! Going to be no different this time too !

Moving on, ஒரு குடும்பஸ்தனின் அல்லல்களை தெறிக்கச் செய்யும் கற்பனைகளோடு கலந்து கட்டியடித்திருக்கும் ஜாம்பவான் வான் ஹாமின் "தோர்கல்" !! நினைவைப் பறித்துக் கொண்டனர் கடவுளர் ; ஷை-கான் என்ற பெயருடன் க்றிஸ் ஆப் வல்நாருடன் செம டாவடித்தபடிக்கே கடற்கொள்ளையனாய் காலத்தை ஒட்டி வருகிறான் மனுஷன் ! மனைவி ஆரிஷியாவோ, குழந்தைகள் ஒநாய்க்குட்டி, மற்றும் ஜோலனுடன் நாடுகடத்தப்பட்டு தத்தளித்து வருகிறார் !! உச்சக்கட்டமாய் நம்ம XIII பாணியில் தன் சுயத்தையே மறந்து போயிருக்கும் தோர்கலின் தீவிலேயே ஆரிஷியாவும் சேவகம் செய்யும் கொடுமை நிகழ, தொடரும் காலகட்டத்து நிகழ்வுகளே - "கூண்டிலோரு கணவன்" !! 2 அத்தியாயங்கள் கொண்ட ஆல்பமிது - தனித்தனிக் கதைகளாய் வாசிக்கவும் செய்திடலாம் ; அந்த "ஷைகான்" சுற்றின் சங்கிலித்தொடராகவும் பார்த்திடலாம் ! பல்லடத்துப் பக்கமாய் தோர்கலுக்குச் சிலை வைக்க இடம் தேடிக்கொண்டிருக்கும் நமது சரவணகுமார் சாரின் முன்கதைச் சுருக்கத்தோடு as always வண்ணத்தில் மிளிரவுள்ள ஆல்பத்தின் முதல் பார்வை இதோ :

முன்னும் பின்னுமே ஒரிஜினல் டிசைன்களே - இக்ளியூண்டு மெருகூட்டல்களோடு !! உபயம் : கோகிலா ! And கதையின் மொழிபெயர்ப்புப் பணிகளை கருணையானந்தம் அவர்கள் வழக்கம் போல் கையாண்டிருக்க, மாமூலான மாற்றி எழுதும் படலங்கள் மாத்திரமே என் வேலையானது ! தோர்கல் தொடரின் ஸ்கிரிப்ட், க்ளாஸிக் பாணியில் இருப்பினும், ஆங்கிலத்தில் CINEBOOK இதற்கெனச் செய்திருக்கும் மொழியாக்கம் வேறொரு உச்சம் ! நீள நீளமான வாக்கியங்களில் அவர்கள் அடைத்திருக்கும் விஷயங்களையும், ஸ்டைல்களையும் தமிழில் பிரதிபலிக்கச் செய்யத் தவறினால் வாசிப்பினில் நிச்சயமாய் ஒரு சிறு நெருடல் நேரக்கூடும் என்பது எனது அபிப்பிராயம் ! So அத்தகைய இடங்களைக் கணிசமாகவே மாற்றி எழுத 2 நாட்களைச் செலவிட, தோர்கலார் புதன்வாக்கில் அச்சுக்கு ரெடியாகி விட்டார் ! இதோ - உட்பக்க previews - 2 கதைகளிலிருந்துமே :

தோர்கலை நிறைவுக்குக் கொணர்ந்த கையோடு, கைப்புள்ள ஜாக் ! கார்ட்டூன் ; குட்டி நாயகன் ; புது வரவு ; பரிச்சயமான வன்மேற்கு - இது போதாதா இந்தப் 16 பக்க இதழை மின்னலாய் போட்டுத்தாக்க ? இதோ - நண்பர் சூட்டிய பெயருடன் LOSER JACK - தமிழில் :

Next in line - நம்ம மாண்ட்ரேக் ஸ்பெஷல் இதழுடன் விலையில்லா இணைப்பாய் வந்திடவுள்ள குட்டி புக்கின் பணிகள் ! சின்ன புக் என்றாலும் இந்த நாயகருக்குப் பேனா பிடிப்பது நாக்கைக் கொண்டு தெருவைச் சுத்தம் செய்வதற்குச் சமானம் என்பேன் simply becos ஒரிஜினலின் அசாத்திய ஸ்டைல் அத்தகையது ! வியாழன் இரவின் முக்கால்வாசியினை இந்த அதிரடிக்காரருடன் செலவிட்டதால் bingo - அவருமே நாளை அச்சுக்குச் செல்லத் தயாராகி வருகிறார் ! அவர் யார் என்பதை மட்டும் கூரியர் டப்பிக்களைப் பிரிக்கும் தருணத்தில் நீங்களே பார்த்துக் கொள்ளுங்களேன் ! 

So ஆகஸ்டின் (ரெகுலர்) அத்தியாயத்தை கரை சேர்க்க புனித மனிடோ மகத்தாய் உதவியிருக்க, இதோ - இனி தடத்தில் இடம்பிடித்திடா ஸ்பெஷல் இதழ்களுக்குள் கவனங்களை செலுத்த வேண்டியது தான் !! அதற்கு முன்பாய் 2023 அட்டவணை சார்ந்த பணிகளுக்குள் கொஞ்சமாய்ப் புகுந்தால் - எனது வெள்ளிக்கிழமையினை வெளிச்சமாக்க, 2 புதுத் தொடர்கள் கண்ணில்பட்டன ! இரண்டுமே நமக்கு நிரம்பப் பிடிக்கும் ஜானர்கள் என்ற உடனே ஆர்வத்தை அடக்க முடியலை ; குறுக்கும், நெடுக்குமாய் மின்னஞ்சல்களை அனுப்பி, நமது கோரிக்கையினை முன்வைத்துள்ளோம் ! ஐரோப்பாவில் தற்சமயமாய் கோடை கொளுத்தோ கொளுத்தென்று போட்டுத் தாக்கிவருவதால் - நிறைய பேர் விடுமுறைகளில் உள்ளனர் ! So நாளைக்கே பதிலும், ஒப்புதல்களும் கிடைத்து விடுமென்று சொல்ல மாட்டேன் ; ஆனால் whenever it comes - இந்த 2 தொடர்களுமே நமது அட்டவணைக்குள் automatic தேர்வுகளாகிடுவது சர்வ நிச்சயம் !!  புதுசைக் கண்ட உடனே சாமியாடியாச்சு ; ஆனால் ஏற்கனவே இறுதி செய்யப்பட்டிருந்த அட்டவணையிலிருந்து குறைந்தபட்சமாய் 2 ஸ்லாட்களை கழற்றி விட்டால் தான் புதியவர்களுக்கு இடம் தர இயலும் என்ற நிதரிசனம் முன்னிற்கிறது ! 'கோட்டை அழி...கோடு பூராத்தையும் அழி...பரோட்டா முதல்லேர்ந்து சாப்பிடலாம் !" என்ற கதையாக ஆரம்பிச்சாச்சு கூத்துக்களை ! 

இந்த நொடியில் உங்களுக்கான கேள்விகள் guys :

1. ஸ்டைலிஷ் நாயகர் ALPHA ; அது தானுங்க, அஸ்ஸியா டோங்கோவாவை காதலிக்கும் பணியோடு களமிறங்கிய புது ஏஜெண்ட் ......! இம்மாதத்துக் "காலனின் காகிதம்" பாணியில் இவரது அடுத்த ஆல்பமும் ஒரு பரபரப்பான ஒன் ஷாட் ஆல்பமே ! 2023-க்கு இவ்ருக்கு ஒரு டிக்கெட் வழங்கிடலாமா ? அல்லது ஒரேடியாய் டிக்கெட் தந்து ஊட்டுக்கு அனுப்பிடணுமா ? FFS இதழின் முப்பாக சாகசத்தினையும், இம்மாதத்து சிங்கிள் ஆல்பத்தினையும் வாசித்திருக்கும் நண்பர்களே - உங்களின் பதில்கள் மட்டும் ப்ளீஸ் ?

2. இந்த வாரத்தின் எனது சுவாரஸ்யங்களின் உச்சமே - தாத்தாஸ் பட்டாளத்தின் இரண்டாம் ஆல்பத்தின் மொழிபெயர்ப்புப் படலமே ! "அந்தியும் அழகே.." (முதல் ஆல்பம்) ரொம்பவே intense என்று கருதினால், இந்த இரண்டாம் பாகம் செம முரட்டு கதைக்களம் ! கூகுள் துணையும், கணிசமாய்ப் பொறுமையும் இல்லாங்காட்டி இந்தப் பல்போன தாதாக்களை சமாளிப்பதற்குள் நம்ம பல்லு-கில்லெல்லாம் ஆடிப் போய்விடும் என்பதை இம்முறையும் உணர முடிந்தது ! முதல் பாகத்தை கைக்கெட்டும் தொலைவிலேயே வைத்துக் கொண்டு - அதிலிருந்த அதே 'எவனா இருந்தா எனெக்கென்ன ?' பாணியினில் இதன் பணிகளை வெள்ளியிரவு பூர்த்தி செய்தேன் ! அந்த நொடியில் உங்களிடம் கேட்க வேண்டுமென்று எனக்குத் தோன்றிய கேள்வி இதுவே :

இந்தத் தொடரானது நாமெல்லாம் நினைத்திருப்பதைக் காட்டிலும் (or maybe நான் நினைத்திருந்ததைக் காட்டிலும்) செம அழுத்தமானது ; ஆழமானது ! கதாசிரியர் ஒவ்வொரு அத்தியாயத்திலும் கி.நா. கியர்களை மேலே மேலே ஏற்றிச் செல்வது அப்பட்டமாய்ப் புரிகிறது ! "வித்தியாச வாசிப்பு" என்பதற்கு இவர்கள் ஒரு அடையாளமாய்த் தொடரட்டுமா 2023-ல் ? அல்லது இவர்களை ரெகுலர் தடத்தினில் அல்லாது நகற்றிடல் நலமா ? என்பதே உங்களுக்கான கேள்வி ! Given a choice - நம்ம பொம்ம புக் உலகினில் இந்த "என்றும் மார்க்கண்டேயர்கள்" தவறாது இடம்பிடிக்க வேண்டுமென்பதே எனது அவாவாக இருந்திடும் ! ஆனால் இவர்களோடு பொழுதுகளைக் கழிக்க உங்களின் மத்தியிலான யூத்களுக்கு நேரம் ஒதுக்கிட இயலுமா ? என்ற கேள்விக்கு பதிலை உங்களிடமிருந்தே தெரிந்து கொள்ள விழைகிறேன் !! 

1. ALPHA - IN என்றோ ALPHA - OUT என்றோ முதல் கேள்விக்கு பதிலும் ;
2. தாத்தாஸ் - IN என்றோ தாத்தாஸ் - SIDETRACK என்றோ இரண்டாம் கேள்விக்கும் பதில் தந்திட்டால் எனது தீர்மானங்களுக்கு உதவிடும் folks !! 

And please note : ALPHA....தாத்தாஸ் இரு தொடர்களையும் நீங்கள் வாசித்திருந்தால் மட்டுமே கருத்துக்களைப் பதில்களாக்கிடக் கோருகிறேன் ! சும்மாவாச்சும், எங்கோ க்ரூப்பிலோ ; FB-யிலோ யாராச்சும் ஆத்தியிருந்த கதையைக் காதில் வாங்கியபடிக்கே சொல்லிடும் அபிப்பிராயங்கள் நமக்கு பயன்கள் நல்கிடாது ! So ப்ளீஸ் guys !!

ரைட்டு...ZAGOR பணிகள் + தல குறைபடிப் பக்கங்களுக்குள் புகுந்திடக் கிளம்புகிறேன் ! 

கோவையில் புத்தக விழாவினில் நேற்றைய தினம் மெதுவான ஆரம்பம் என்றாலும், இன்றைக்கு தெறி மாஸ் !! எஞ்சியிருக்கும் 10 நாட்களுமே இதே அனல்வேகம் தொடர்ந்திட புனித மனிடோவும், கோவைக்காரவுகளும் மனம் வைப்பார்களாக !! 

Bye all ...see you around !! Have a fun weekend !!

P.S : "சுஸ்கி & விஸ்கி" முன்பதிவுகளுக்கும் மறந்து விடாதீர்கள் - ப்ளீஸ் :

https://lion-muthucomics.com/special-release/961-prebooking-for-suske-wiske-special.html

ஜூஸ் பிழிய வாரீகளா ?

 நண்பர்களே,

வணக்கம். சும்மா ஜிலோன்னு ஐயா நிக்குறாரு...! எதிர்த்தாப்லே லைனா நம்மவர்கள் நிக்குறாங்க ! வலது கையை மட்டும் தூக்கிப்புட்டு. ஆரஞ்சு பழத்தை சூஸ் பிழியுற பாணியிலே விரல்களை சுழட்டுறேன்... வரிசையிலே முதல்லே நிக்கிற ஸ்டீல் - சீவக சிந்தாமணியிலே ஆரம்பிச்சு. Quantum Physics வரைக்கும் குட்டிக்கதைகள் சொல்லி ஒப்பிக்கிறாரு, ஒத்த குளறுபடி இல்லாம !! அடுத்து நிக்கிறவரை பாக்குறேன்...இன்னொருக்கா விரல்களால் சூஸ் பிழியுறேன்...அடடே...நம்ம செனா அனா சார் தானே அது ? ....'நேற்றுஇல்லாதமாற்றமதுஎன்னத்து....காற்றுஎன்காதில்ஏதோசொன்னத்து...இதுதாண்டாப்புஎன்பதா? செந்தூர்முருகனருளாலேஸ்பைடர்கதைப்பழக்கண்டுவென்றுஏழாயிரம்ரூபாய்க்குபுக்ஸ்போடுவீராக' என்று மூச்சுத் திணற ஒப்பிக்கிறார் ! லைட்டான கலவரத்தோடே அடுத்த ஆள் நோக்கி நடக்கிறேன் ...இன்னொரு சூஸ்...இம்முறையே நிப்பவர் நம்ம தலீவர் !!  "ஓங்கி அடிச்சா பதினெட்டு டன் தெரியுமா ? பதுங்கு குழியிலே பால்பாயாசம் சாப்பிடுவேன்....சங்கத்தேர்தலிலே சகட்டுமேனிக்கு கள்ள வோட்டு குத்துவேன் ! பழைய தலைவன்னு நினைசீங்களா ? ஒற்றைத் தலைவர்டா....!!" என்று சூறாவளி வஜனம் பேசுகிறார் ! 'கிழிஞ்சது போ' என்றபடிக்கே அடுத்த ஆஜானுபாகுவான உருவத்திடம் போய் நின்று 'எதுக்கும் இருக்கட்டுமே' என்று ரெண்டு பழத்தைச் சேர்த்தே சூஸ் பிழியுறேன் !! "டெக்ஸ் வில்லர் அவர்கள் இம்முறையும் என்னை ஏமாற்றவில்லை ! கார்சன் அவர்கள் அந்தச் சிறப்பான சுக்காவைக் கடிக்க முற்படும் வேளையில் அந்த சொட்டைத்தலை வெயிட்டர் அவர்களின் கண்களில் அன்பு ஓடுவதை கண்டு ஒரு கணம் பஸ் என்றும் பாராமல் கண்களில் தாரை தாரையாய் நீர் வச்சுண்டேன் ! உடனடியாக எனது கண்ணீருக்கு வடிகால் தேடிக் கடுதாசி எழுத கை பரபரத்தது ; ஆனால் இல்லத்தரசி அவர்கள் அருகில் இருக்கவே, பேனா அவர்களைத் தேடிப் பிடிக்கும் வேகம் தானாய் வடிந்து போனது என்பதைத் தெரிவிக்கக் கடமைப்பட்டுள்ளேன் சார் ! அப்புறமாய் அந்த நடன அழகியை பார்த்த நொடியே ஒரு sister பீலிங்கு   !" என்று கூச்சத்தோடு பேச ஆரம்பிக்க, 'எண்ட குருவாயூரப்பா !!' என்றபடிக்கே நகர்கிறேன் ! அடுத்த பார்ட்டிக்கு சூஸ் பிழிய நினைத்துக்கொண்டிருக்கும் போதே - "அதிகாரி என்றாலே அராஜகம் செய்பவர் என்று நாக்கு மேலே பல் போட்டுப் பேசுறவர்களைப் பார்த்து நான் கேக்கிறேன் - தட்டைமூக்கர் சுட்டா மட்டும் தக்காளிச் சட்னியா வருகுது ? மஞ்சள் சொக்காயை தோய்ச்சுப் போடக்கூட நேரம் இல்லாமல் கடமை...கண்ணியம்...சுட்டுப்பாடு ன்னு ஒரு லட்சியத்தோட வாழற எங்க தல என்ன தொக்கா  ? என்ன தக்காளித் தொக்காங்கிறேன் ?" என்று பொங்குகிறார் ! ஆத்தாடியோவ் !! இது எதுவும் சரிப்படாது போலிருக்கே, என்றபடிக்கே  விரல்களை ஜோப்பிக்குள் திணித்துக் கொண்டே நடக்க -  "சார்... இன்னிக்கு சனிக்கிழமைங்கிறதினால பதிவா ? பதிவுங்கிறதாலே சனிக்கிழமையா ?" என்ற குரல்  கேட்கிறது !! அட, நம்ம சேலம் குமார் சார் ! 

எல்லாமே அந்த சூஸ் பிழியுற சிக்னல் பண்ற வேலையோ ? என்றபடிக்கே ஒரு பெரிய சொடுக்கை மட்டும் போடுறேன் - அத்தினி பேருமே நார்மலுக்குத் திரும்பிடுகிறார்கள் ! "அச்சச்சோ...மணி ஏழாக போகுதே....நான் தூங்குற நேரமாச்சே?" ; "அதிகாரியின் காலியே ஆகாத பிஸ்டலை இந்த மாசம் பேரீச்சம்பழக்காரன் லவட்டிட்டுப் போயிடுறானாமே - ஏசப்பா ..உமக்கு நன்றி !!" ; "யாகவா முனிவரும், ஜப்பானிய பகுத்தறிவாளர் யகுமா குமமாட்டோவும்  ஒற்றை இடத்தில ஒத்த கருத்தோடு இருப்பதை - "நீயும் நானும் ஒண்ணு..நான் தின்னுவதோ ரவுண்டு பன்னு !!" என்ற வரிகளில் நாம் உணரும் அதே வேளையில் பன்னில் சேர்க்கப்படும் ரசாயனங்கள் பற்றிய கேள்வியும் நம்முன்னே எழுகிறது !" என்று கலவையாய்க் குரல்கள் ஒலிக்க, தெறித்தடித்து கண்விழிக்கிறேன் !! ஆத்தாடியோவ்....அத்தினியுமே கனவு தானா ? 

மலங்க மலங்க கொஞ்ச நேரத்துக்கு முழித்த பிற்பாடு தான் புரிகிறது - கடந்த ஒரு வாரமாய் நம்ம மாயாஜால மன்னன் மாண்ட்ரேக்கோடு கொட்டிய குப்பையின் பலனே இந்தக் கலவரமான கனவெல்லாம் என்பது !! இன்னமும், இந்த நொடி வரைக்குமே அந்த hangover தொடர்கிறது என்றால் பார்த்துக் கொள்ளுங்களேன் - இன்னா ரவுசு விட்டிருப்பார் பென்சில் மீசைக்காரர் என்று !!

MANDRAKE The Magician !! காமிக்ஸ் உலகின் அதீத சக்தி கொண்ட சூப்பர் ஹீரோக்கள் வரிசையில் மனுஷன் செம முன்னோடி எனலாம் ! சூப்பர்மேன் அறிமுகம் கண்டது 1938-ல் ! BATMAN அறிமுகம் ஆனது 1940-ல் ! ஸ்பைடர்மேன் தலை காட்டியது 1962-ல் ! The Incredible Hulk கூட அதே 1962 தான் ! ஆனால் சில்க் அங்கியும், சதுரத் தொப்பியும் போட்ட நம்மாள் இவர்கள் அனைவருக்குமே சீனியர் - 1934 born !! வேதாளரை உருவாக்கிய அதே Lee Falk தான் மாண்ட்ரேக்கின் பிதாமகருமே ! கல்லூரியில் படித்துக் கொண்டிருக்கும் போதே இந்த மாயாஜாலக்காரரை Lee Falk உருவாக்கி விட்டாராம் ! ஜட்டியை சட்டைக்கு மேலே மாட்டிக் கொண்டு இஷ்டத்துக்கு பறந்து, பாய்ந்து லூட்டியடிக்கும் சூப்பர்மேனை ஏற்றுக் கொள்வதைப் போல, 'பிச்சக்' என்று பிசினைப் பீச்சி விட்டு அதில் வலைகட்டிப் பறக்கும் ஸ்பைடர்மேனை ஏற்றுக் கொள்வது போலவே, மாண்ட்ரேக்கின் மாயாஜால கண்கட்டி வித்தைகளை ஜனம் ரொம்ப காலமாய், உலகின் பல்வேறு மொழிகளில் ஏற்றுக் கொண்டு விட்டுள்ளனர் ! இதில் ஒரு கூத்து என்னவெனில் அந்நாட்களில் அமெரிக்காவில் லியோன் மாண்ட்ரேக் என்ற நிஜவாழ்க்கை மேடை மந்திரவாதியும் இருந்துள்ளாராம் ! அவரைப் பார்த்து Lee Falk காமிக்ஸ் நாயகரை சிருஷ்டித்தாரா ? அல்லது காமிக்ஸ் நாயகரைப் பார்த்து தனது கெட்டப்பை லியோன் மாற்றிக் கொண்டாரா ? என்பதை இங்கே போனால் அலசி ஆராய்ந்திடலாம் : https://en.wikipedia.org/wiki/Mandrake_the_Magician#Leon_Mandrake 

ஆராய்ச்சிகளெல்லாம் ஒருபுறமிருக்க - இந்த SMASHING '70ஸ் தனித்தடத்தின் மூன்றாம் இதழில் தான் க்ளாஸிக் காமிக்ஸ் காதலர்களுக்கான நிஜமான லிட்மஸ் பரிசோதனை காத்துள்ளது என்பேன் ! 

• வேதாளர் - சொல்லவே வேணாம் ; மாஸ் நாயகர் ! 
• ரிப் கிர்பி - மாஸ் நாயகராய் இல்லாவிடினும் நம்மை நைஸ் பண்ணும் வித்தைகள் அறிந்தவர் ! 

ஆனால் நார்தாவின் ஆளான நம்மாள் மாண்ட்ரேக்கோ வித்தைகள் மட்டுமே அறிந்தவர் !!  லாஜிக் தேடும் நண்பர்கள் ஆளுக்கொரு சம்மட்டியோடு மூ.ச.வாசலில் காத்திருப்பர் என்பது புரிந்தாலுமே - 1938 முதல் 2013 வரையிலும் கிட்டத்தட்ட 75 ஆண்டுகளுக்கு உலகெங்கிலும் தாக்குப்பிடித்திருக்கும் இந்த மாயாஜால மனுஷனை அத்தனை சுலபமாய் மட்டம் தட்டிவிட இயலாது என்பதே நிஜம் ! முக்கால் நூற்றாண்டுக்குத் தாக்குப் பிடித்திருக்கும் எதுவுமே ; யாருமே முழு தத்தியாய் இருத்தல் அசாத்தியமன்றோ ? So ஒரு நெடும் இடைவெளிக்குப் பின்பாய் நம் கரைகளில் ஒதுங்கியிருப்பவருக்கு சிகப்புக் கம்பளம் விரித்தாலும் சரி, விரிக்காது போனாலும் சரி - இடுப்பிலே உள்ள லங்கோட்டை உருவாத வரையிலும் 'வெற்றி...வெற்றி..!!' என்று கரூர் ராஜசேகரன் சாரோடு சேர்ந்து நானும் குரல் கொடுக்க ஏதுவாக இருக்கும் ! 

மாண்ட்ரேக்குடன் எனது பரிச்சயம் ரொம்பச் சின்ன வயதிலேயே என்பதை உங்கள் காதுகளில் கெட்சப் கசியும் ரேஞ்சுக்கு ஏற்கனவே சொல்லியிருப்பேன் ; ஆனால் எனக்கு நினைவில் நின்ற கதைகளின் பட்டியல் அந்த ராட்சஸக் கரையான் கதையைத் தாண்டியும் உண்டு ! அந்நாட்களில் இந்திரஜால் காமிக்ஸில் ரெகுலராய் வலம் வந்த மாண்ட்ரேக்கின் தொடரில் The Camel என்றொரு மாறுவேஷப் பார்ட்டி வில்லன் வருவான் ! அவனோடு மாண்ட்ரேக் மோதும் கதை இன்னமும் நினைவில் நிற்கிறது ! அப்புறம் சமையல்காரனாய் மாண்ட்ரேக்கிடம் பணியாற்றும் ஹோஜோ தான் இன்டெர்-இன்டெல் உளவு அமைப்பின் ரகசியத் தலைவர் என்ற உண்மை தெரிய வரும் கதையுமே செம  favorite !! ஜூடோவில் பத்தாவது பெல்ட் வாங்கியிருக்கும் ஹோஜோ வில்லன்களைப் பந்தாடுவதை அம்புட்டு ஆர்வமாய் ரசித்த நாட்கள் அவை ! பின்னாட்களில் எடிட்டர் குல்லாவை மாட்டிக் கொண்டு மாண்ட்ரேக் கதைகளை முத்து காமிக்சில் மறுக்கா நுழைத்த வேளையில் "8" கும்பலோடு மோதும் சாகஸங்கள் லயிக்கச் செய்தன தான் ; ஆனால் ஒருகட்டத்தில் இவர் மீதான மையல் ஏகத்துக்குக் குன்றியிருக்க, அந்நாட்களில் வாங்கிய கதைகளில்  3 பிரசுரம் காணாமலே கையில் தங்கி விட்டன ! இடைப்பட்டிருக்கும் இந்த 20+ ஆண்டுகளில் நாம் எங்கெங்கோ, எதிலெதிலோ சவாரி செய்தாச்சு ; புதுசு புதுசாய் நாயகர்கள்...ஜானர்கள் என்று பார்க்கவும் செய்தாச்சு ! ஆனால் பழமை மீதான soft corner உங்களிடம் இன்னமும் தொடர்கிறது என்பதை மறுப்பதற்கில்லை - at least ஒரு கணிசமான எண்ணிக்கையிலானோரிடமாவது ! 'பிரிவின் தூரம் பாசத்துக்குத் தூண்டுகோல்.........Absence makes the heart grow fonder' என்று மேல்நாட்டு அறிஞர் மேஜர் சுந்தர்ராஜன் சொன்னாரோ, சொல்லலியோ தெரியலை - ஆனால் அதனை நம்பி இந்த ஆகஸ்டில் மாண்ட்ரேக்கை களமிறக்க all is ready !!   

இதோ - அட்டைப்பட முதல் பார்வை - நமது சென்னை ஓவியரின் கைவண்ணத்தில் ! Of course நெட்டில் கிட்டிய வெவ்வேறு டிசைன்களை ஒருங்கிணைத்து, அதே நெட்டில் கிட்டிய வர்ணச் சேர்க்கையினையுமே அழகாய் நுழைத்து, ஜூனியர் எடிட்டரின் கைவண்ணத்து நகாசு வேலைகளுடன் நீங்கள் மெகா சைசில் பார்த்திடவுள்ள அட்டைப்படத்தின் முதற்பார்வை இதோ :  

("ஸ்பெஷல்" என்ற எழுத்துருக்கள் ; பின்னட்டையில் வரும் சில எழுத்துக்கள் - நகாசு வேளைகளில் இடம்பிடிக்கும் !)

கதைகளைப் பொறுத்தவரைக்கும் மொழிபெயர்ப்பு முழுக்க முழுக்க நமது கருணையானந்தம் அவர்களின் கைவண்ணமே ! எடிட்டிங் செய்து, மேலோட்டமாய் மாற்றி எழுதியதுக்கே கனவுகளில் பாயசச் சட்டிகளோடு பெருசுப் பெருசாய் ஆட்கள் தட தடவெனக் குறுக்கேயும் நெடுக்கேயும் ஓடுகிறார்கள் - இந்த அழகில் நானே 200 பக்கங்களையும் மொழிபெயர்த்திருப்பின் - அடுத்த வருஷத்து ஈரோட்டுச் சந்திப்பு வரைக்குமே ஆரஞ்சு பழங்களை சூஸ் புழிஞ்சிட்டே இருந்திருப்பேன் என்பது நிச்சயம் !! விதவிதமான ஜானர்களிலான கதைகள் ; சவாலான கதைகள் என்று எதெதெற்குள்ளோ தலை நுழைத்து விடுவதற்குத் துளியும் தயங்காதவனுக்கு இந்த க்ளாஸிக் நேர்கோட்டுக் கதைகளுக்குள் பயணிப்பது next to impossible !! அவற்றைச் சளைக்காது இன்றளவும் கையாண்டு வரும் அங்கிளுக்கு இங்கொரு round of applause அத்தியாவசியம் என்பேன் ! க்ளாஸிக் நாயகர்கள்...க்ளாஸிக் கதை பாணி...க்ளாஸிக் எழுத்து நடை - என்ற கூட்டணி அரிதல்லவா ? And பேனா பிடிக்க அவசியமின்றிப் போனாலும் இந்த SMASHING 70's தனித்தட இதழ்கள் ஒவ்வொன்றுமே - குறுக்கைச் சுத்தமாய்க் கழற்றிக் கையில் கொடுத்து விடும் hard taskmasters ! இருநூற்றுப் பன்னிரண்டு பக்கங்கள் இம்முறை ; வேலை பார்க்கப் பார்க்கப் பார்க்க வந்து கொண்டே இருப்பது போலொரு பிரமை !! DTP செக்ஷனிலுமே இந்த ஆல்பங்கள் அநியாயத்துக்கு வேலை இழுக்கும் ; இந்த ஒற்றை ஆல்பத்தில் பணியாற்றும் நேரத்துக்கு அரை டஜன் கலர் இதழ்களை அசால்ட்டு ஆறுமுகமாய் பந்தாடிட இயலும் !! So சகலத்தையும் இந்த வாரத்தில் தக்கி முக்கி கரை சேர்த்து, அச்சும் முடித்தாயிற்று ! இனி பைண்டிங் காவடிகள் மாத்திரமே பாக்கி ! 

And இந்த வாரத்தில் எடுக்க நேர்ந்த இன்னொரு காவடி ரத்தக் கண்ணீர் ரகம் ! மார்ச் துவக்கத்திலேயே நடப்பாண்டுக்குத் தேவையான ஆர்ட்பேப்பர் மற்றும் வெள்ளைத்தாள்களை கணிசமாய் வாங்கிப் போட்டிருந்ததால் - பேப்பர் மார்க்கெட்டின் அன்றாட நகர்வுகளைப் பற்றித் தெரிந்திருக்கவில்லை நான் ! சரி, இன்னும் காரிகன் ஸ்பெஷலுக்கு மட்டும் பேப்பர் வாங்கிப் போட்டுப்புட்டால், அடுத்தாண்டு அடுத்த கொள்முதலைப் பார்த்துக் கொள்ளலாம் என்ற நினைப்பில் பேப்பர் ஸ்டோருக்கு போன் போட்டேன் ! "அண்ணாச்சி,...நல்லா இருக்கேளா ? இந்த மெரி பேப்பர் இத்தினி ரீம் வேண்டியிருக்குது....செக்க போட்டு குடுத்தனுப்பிட்டு வண்டிய கோடவுனுக்கு போக சொல்லட்டுமா ?" என்று வெள்ளந்தியாய்க் கேட்டு வைத்தேன் ! ஜெயிலுக்குப் போய்விட்டு வெளியே வரும் கவுண்டர் ஒத்தை ரூபாய்க்கு தேங்காய் கேட்டு கடையில் நிற்கும் போது அந்தக் கடைக்காரர் ஒரு பார்வை பார்ப்பாரில்லையா - அதே லுக் தான் எனக்கும் கிட்டியிருக்கும் நான் பேசியிருந்தது மட்டும் வீடியோ காலாக இருந்திருக்கும் பட்சத்தில் ! "ஹா ஹா ஹா...அண்ணே ரொம்ப நாளா பாரின் டூர் கீர் போயிருந்திருப்பீகளோ ? நடப்பே தெரிய காணோமே ?!!" என்றார் அந்தப்பக்கமிருந்தவர் ! "கிலோவுக்கு ரெண்டோ..மூணோ ஓவா விலை ஏத்தியிருப்பீங்க ; அது தானே ? ஒண்ணும் பிரச்சனையில்லை...பாத்துக்கலாம் !" என்றேன் லைட்டாய் உள்ளுக்குள் தலைதூக்கிய எரிச்சலை மறைத்தபடிக்கே ! "ஹோ..ஹோ..ஹோ..! சந்தேகமே இல்ல,,...அண்ணே ஊரிலேயே இல்லை போல !! ரெண்டு ரூவா...மூணு ரூவாவா ? டன் ஒண்ணுக்கு இன்னிக்கு விலை என்ன தெரியுமா ? _____ இத்தனை ஆயிரம் !!" என்றார் ! என் தலைக்குள் கடைசியாய் மார்ச் கொள்முதலின் விலை மட்டுமே தங்கியிருக்க, அந்த மனுஷன் சொன்ன விலையை கால்குலேட்டரில் அடித்துப் பார்த்த போது -  விலை முப்பத்தி ஓராயிரம் ரூபாய்கள் கூடியிருக்கு என்று வந்தது !! அந்த நொடியில் எனக்குள் உருவாக்கம் பெற்ற வார்த்தைகளை  கலாமிட்டி ஜேன் உதிர்த்திருந்தாலே காதுகள் கருகிப் போயிருக்கும் !! சொல்ல முடியாத பிரளயமாய் ஆத்திரம், ஆற்றமாட்டாமை, கடுப்பு, கொலைவெறி, கெட்ட கெட்ட வார்த்தைகள், சாபங்கள் - என்று ஏதேதோ வாயிலிருந்து கொட்டித் தள்ள, அந்த முனையில் இருந்த பேப்பர் ஸ்டோர் அண்ணாச்சியும் தன் பங்குக்கு பேப்பர் உற்பத்தியாளர்களை சகட்டு மேனிக்கு திட்டித் தள்ளினார் ! கொஞ்சமாய் ஆசுவாசப்படுத்திக் கொண்ட பின்னே மார்க்கெட் நிலவரம் என்னவென்று அவரிடம் கேட்டேன் !! அவர் விளக்கியதன் சாரம் இதுவே : 

• இன்றைக்குப் பெரிய பேப்பர் மில்கள் கணிசமாய் தம் உற்பத்திகளை ஏற்றுமதி செய்து வருகின்றனர் ; 
• உட்பொருட்கள் தட்டுப்பாட்டால், மித விலை ரகங்களின் உற்பத்திகளை ரொம்பவே குறைத்துக் கொண்டு விட்டனர் ! 
• ஒவ்வொரு நகர விநியோகிஸ்தருக்கும் ஒரு குறிப்பிட்ட கோட்டாவில் மட்டுமே சரக்கு வழங்கப்படுகிறது & அந்தக் கோட்டாவின் 70 சதவிகிதத்தை மாத இறுதிக்குள் மில் supply செய்தாலே அது அவர்களின் குலசாமிப் புண்ணியமாம் !! 
• கொரோனா கூத்துக்கள் ஒரு வழியாய் மங்களம் கண்டு, பள்ளிகள் மீண்டும் இயங்கத்துவங்கியிருக்க - புக்ஸ் ; நோட்புக்ஸ் ; டயரி ; கைடு என்று சகலத்துக்கும் தெறி டிமாண்ட் ! 
• So உற்பத்தி குறைவு ; தேவையோ தாறுமாறு என்ற சூழல் ! விளைவு : வாய்க்கு வந்த விலைக்குக் காகிதம் விற்பனை காண்கிறது !! 

To cut a long story short - அண்டா..குண்டா...சட்டி...பாத்திரம்...என்று சகலத்தையும் ஜாமீனாய் பேங்க்கில் ஒப்படைத்து, ஒரு குறுகிய அவகாசத்து லோனை வாங்கி - தெருத் தெருவாய்ப் பிச்சை எடுக்காத குறையாய் பேப்பரை கொள்முதல் செய்திட நானும் ஜூனியர் எடிட்டரும் இறங்கினோம் ! கையில் ரொக்கத்தை வைத்துக் கொண்டு 2 டன் கேட்டால் - "அப்டி ஓரமாய் போயி வெளயாடுங்க தம்பி !!" என்ற பதிலே கிட்டியது ! சளைக்காது கொஞ்சம் கொஞ்சமாய், மொத்தம் 4 பேரிடம், வெவ்வேறு பெயர்களில் பில் போட்டு இயன்ற அளவிற்குப் பேப்பரை வெறித்தனமாய் வாங்கிக் குவித்து விட்டோம் ! இந்த 2 நாட்களில் நாம் வாங்கியுள்ள பேப்பரை மட்டும் எண்ணி நான்கே மாதங்களுக்கு முன்பாய்க் கொள்முதல் செய்திருந்தால் - விலைகளில் கிட்டியிருந்த சகாயத்தைக் கொண்டே 6 மாதத்து ஆபீஸ் நிர்வாகச் செலவுகளை ஒப்பேற்றியிருக்கலாம் !! லிட்டர் லிட்டராய் ஜெலுசில் குடித்தாலும் தீராது இந்த வயிற்றெரிச்சல் !! கொரோனா காலங்களின் விலையேற்றங்களையெல்லாம் தூக்கிச் சாப்பிட்டு விட்டிருக்கும் வரலாறு கண்டிராத price hikes தற்போது அமலில் உள்ளவை ! And அடுத்த ஆண்டுக்கென பேப்பர் வாங்கிட டிசம்பர்வாக்கில் தயாராகிடும் போது அடுத்த ஷாக் படலம் எவ்விதம் இருக்குமென்பது ஆண்டவனுக்கே வெளிச்சம் !! Of course அடுத்த வருஷம் நமது இதழ்களில் சின்னதான விலையேற்றங்கள் இருக்கும் தான் - ஆனால் இந்தப் பிராந்தன்கள் மனசாட்சிகளேயின்றிச் செய்திருக்கும் விலையேற்றங்களை அதே விகிதத்தில் உங்கள் தலைகளில் ஏற்றி விடும் மடத்தனத்தை நிச்சயமாய் நாம் செய்திடுவதாக இல்லை & அது எஞ்சியிருக்கும் கொஞ்ச நஞ்ச (காமிக்ஸ்) வாசிப்பினையும் போட்டுத் தள்ளிடும் புண்ணியத்தையே சேர்க்கும் ! So பற்களை இறுகக் கடித்துக் கொள்வோம் ; இயன்ற விரயங்களை கத்திரி போட முனைவோம் ; இயன்ற luxury-களை இதழ்களில் மட்டுப்படுத்திட முனைவோம் !! 

ஆனால் இன்றைய பொழுதுகளின் இந்த விலை வெறியாட்டங்களின் நிஜமான impact நம்மைப் பொறுத்தவரையிலும் 2024-ல் தெரியாது போகாதென்பேன் ! டாலரின் மதிப்பு இப்போதே ரூ.80-ஐக் கடந்து விட்டிருக்க, அடுத்த வருஷம் இந்நேரமேல்லாம் பேப்பரின் விலை என்னவாக இருக்குமென்று யூகிக்கக் கூட பயமாகவுள்ளது !! ஏனுங்கண்ணா...அந்த நியூசுபிரிண்ட் பேப்பர் இன்னா கம்பீரமா இருக்கு தெரியுமா ? புக்கு எடையும் குறைஞ்சிடும்,...கூரியரில் காசும் கம்மியாகிப்புடும் !! The Stone Age beckons.....!! Phew !!!!

On to better stuff, சுஸ்கி-விஸ்கி முன்பதிவுகளுக்கு எதிர்பாரா இன்னொரு திக்கிலிருந்து சுளையாய் ஒரு ஆர்டர் கிட்டியுள்ளது ! நண்பர்கள் ஆங்காங்கே நடத்தி வரும் FB க்ரூப்களில் அவ்வப்போது ஏதேனும் (காமிக்ஸ்) போட்டிகள் வைப்பதும், பரிசாய் நமது இதழ்களை வழங்குவதும் நடைமுறையில் இருந்து வருவதை அறிவீர்கள் ! அவ்விதமானதொரு முயற்சியிலோ - நம்மிடம் 2022 க்கு சந்தா செலுத்திடும் நண்பர்களை ஊக்குவிக்கும் விதமாய் சு & வி ஸ்பெஷல் இதழினை அந்த க்ரூப்பின் admins தங்கள் கைக்காசைப் போட்டு வாங்கித்தர வாக்களித்திருந்துள்ளனர் போலும் ! And கிட்டத்தட்ட நூற்றிச்சொச்சம் நண்பர்கள் நம்மிடம் சந்தா செலுத்தி விட்டு அங்கே பதிவும் செய்திட - அவர்கட்கு சுஸ்கி & விஸ்கி வண்ண இதழினை அன்புப்பரிசாய் அனுப்பிடும் பொருட்டு நம்மிடம் FB க்ரூப் நிர்வாகிகள் பணம் கட்டியுள்ளனர் !! சந்தாக்கள் கிட்டுவதே ஒரு பெரும் பேறு ; அடுத்த கட்டமாய் இந்த சு & வி ஸ்பெஷலுமே மொத்த போணி எனும் போது, தொடர்கதைகளாகிடும் இத்தகைய நன்றிக்கடன்களை எவ்விதம் ஈடுசெய்வதென்றே புரியவில்லை ! Phewwww !! 'விடிய விடிய வேலை பார்த்து கை ஒடியது ; கண் சொக்குது' என்ற பஞ்சப்பாட்டுக்களைப் பாடத் தோன்றும் வேலைகளிளெல்லாமே இது போன்ற அன்புள்ளங்கள் எனது ஆந்தைக் கண்முன்னே நிழலாடிட, நோவுகள் சகலமும் மாயமாய் மறைந்தே விடுகின்றன !! இந்த அன்புக்கும், நேசத்துக்கும் ஈடாய் சஞ்சீவி மலையையே தலையில் சுமந்து தூக்கி வந்தாலும் தப்பில்லை தான் !! Thanks a ton guys !!! You are our Rock of Gibraltar !! 

And சுஸ்கி-விஸ்கி இதழுக்கு ஹாலந்திலிருந்தும் ஆர்டர் தெறித்து வருகிறது ; so காத்திருக்கும் ஜூலை 25 க்கு முன்பாய் உங்களின் பிரதிக்கு முன்பதிவு செய்திட்டால் நலமென்பேன் !! I repeat - சின்னதொரு பிரிண்ட் ரன்னே இந்த இதழுக்கு !! 

ஓசூர் புத்தக விழா திங்களோடு நிறைவுறவுள்ளது ! இதோ அண்ணாச்சி - ஒரு ஸ்பெஷல் விருந்தினருடன் !!

அடுத்த வாரம் கோவை மாநகரில் கேரவன் கேம்ப் அடித்திடவுள்ளது ! அங்கு நமது ஸ்டால் # 116 !! கொடீசியா அரங்கம் !! And சகோ.கடல்யாழ் அக்கட நம் சார்பில் ஸ்டாலில் உதவிடக்காத்திருப்பார் !! நேரம் கிட்டும் போதெல்லாம் கவிஞர் பாய்ந்து பாய்ந்து புகுந்து கவிதை மழைகளால் உங்களை நனைப்பார் !

Bye all...ஆகஸ்டில் 'தல' தாண்டவமின்றிப் போகாது - அவரோடு சவாரி செய்ய நான் கிளம்புகிறேன் ! இடைப்பட்ட நேரத்தில் இங்கே நீங்களும் ஆரஞ்சு சூஸ் பிழியும் முத்திரைகளை பயின்று ஏதாச்சும் கோக்குமாக்கு மாயாஜாலங்கள் செய்திடலாம் தான் !! See you around !! Have a cool weekend !!

LEON MANDRAKE !!

ஒரு பணிமலைப் படலம் !

 நண்பர்களே,

வணக்கம். சில நேரங்களில் மெய்யாலுமே சந்தேகம் எழுவதுண்டு - நமது ஸ்கிரிப்ட்களை எழுதுவதெல்லாம் யாரோ என்று !! சும்மா ஒரு பட்டியலைப் போட்டுத் தான் பார்ப்போமே - 50 ஆண்டுகளாய்த் தட தடத்து வரும் இந்த காமிக்ஸ் எக்ஸ்பிரஸின் இந்த நொடியின்  (production) பின்னணி என்னவென்று ?

To start off : 

• எழுபதைத் தொடவிருக்கும் ஒரு பிரெஞ்சு எழுத்தாள அம்மணி !
• எழுபதுகளின் பின்பகுதிகளில் பயணித்துக் கொண்டிருக்கும் ஒரு தமிழ் மொழிபெயர்ப்பாளர் !

அப்பாலிக்கா :

• ஒரேயொரு முழுநேர DTP பணிப்பெண்  !
• ஒரேயொரு பகுதிநேர டிசைனிங் பணிப்பெண்  !
• இவர்களையெல்லாம் ஒருங்கிணைக்கும் ஒரு ஆல்-இன்-ஆல் அழகுராஜா - ஒற்றை காமிக்சைக் கூட வாசித்திருக்கா சிறப்புடன் !

அப்புறமாய் :

• நிர்வாக ஏற்பாடுகள் ; தயாரிப்பு ஒருங்கிணைப்பு ; எப்போவாச்சும் பேனா பிடிப்பதென்ற பொறுப்புகளுடன் one ஜூனியர் எடிட்டர் !

And இவர்களுடன் :

• Once upon a time - தலை நிறைய கேசமும், ஆந்தைக்கண் நிறையக் கனவுகளுமாய் புகுந்து, இன்றைக்கு கேசத்தைத் தொலைத்திருப்பினும், கனவுகளைத் தொலைத்திருக்கா ஒரு மு.ச. & மூ.ச.காதலன் - எடிட்டர் என்ற அடையாளத்துடன் ! 

இந்த ஆட்பலத்துடன், மாதத்துக்கு ஒரு தபா ஒரேயொரு கையெழுத்துப் பத்திரிகையை உருப்படியாய்  ரெடி செய்திட முடிந்தாலே அது பெரும் அதிசயமாகப் பார்க்க வேண்டிய சமாச்சாரம் ! ஆனால் - ஆனால்...... இது தான் ஆண்டொன்றுக்கு தோராயமாய் 6000+ பக்கங்களைக் கடந்த 10+ ஆண்டுகளாய் உருவாக்கி வரும் டீம் என்று சொன்னால் நம்புற மாதிரியா இருக்கு ? "ரைட்டப்பு...இப்போ அதுக்கு இன்னான்றே ?" என்ற கேள்வி தானே ? இதோ -  ஓட்டமெடுத்துக் கொண்டிருக்கும் ஆண்டின் மூன்றாவது க்வாட்டரில், அகஸ்மாத்தாய்ச்  சேர்ந்திருக்கும் ஒரு அசாத்தியப் பணிமலையினை மிரள மிரளப் பார்த்துக் கொண்டிருக்கும் தருணத்தில் தான் தலைக்குள் கலவையாய் சிந்தனைகள் பிரவாகமெடுத்து வருகின்றன !! தொடரவிருக்கும் 30 நாட்களுக்குள் நாங்கள் தயார் செய்திட வேண்டியிருப்பது எம்புட்டுப் பக்கங்களை என பாக்குறீகளா ?

• டெக்ஸ் - "மௌன நகரம்" - 224  பக்கங்கள் Black & White
• மாண்ட்ரேக் ஸ்பெஷல் - 208 பக்கங்கள் Black & White
• மாண்ட்ரேக் இதழுடன் ஒரு ஜாலி இணைப்பு - ?? பக்கங்கள் 
• தோர்கல் - "கூண்டிலோரு கணவன்" - 100  பக்கங்கள் - Color
• கைப்புள்ள ஜாக் - விலையில்லா இணைப்பு - 16 பக்கங்கள் - Color

கதை சொல்லும் காமிக்ஸ் :

• சிண்ட்ரெல்லா - 40 பக்கங்கள் - Color 

புத்தக விழா ஸ்பெஷல்ஸ் :

• சுஸ்கி - விஸ்கி ஸ்பெஷல் - 112 பக்கங்கள் - Color 
• ZAGOR - 256 பக்கங்கள் - Color

ஆக, இந்த ஆகஸ்டிற்கென மெனுவில் காத்திருப்பன  956 பக்கங்கள் - அந்த மாண்ட்ரேக் இதழுக்கான இணைப்பைச் சேர்க்காமலே ! And இதில் செம கூத்தென்னவென்றால் இந்த பட்டியலுக்குள் - 3 ஹார்ட்கவர்களும் சேர்த்தி ! 

இப்போது பதிவின் முதல் வரியை ஒருவாட்டி வாசியுங்களேன் - நான் சொல்ல வருவது புரியும் !! பெருசாய் ஒரு திட்டமிடலெல்லாம் இன்றி, திடீர் திடீரென நாமே நிர்மாணித்துக் கொள்ளும் உசரங்களைத் தாண்டிக் குதிக்கும் முயற்சிகளில் இது நாள் வரைக்கும் மூக்காந்தண்டைகளைப் பெயர்த்துக் கொள்ளாமல் தப்பியுள்ளோமெனில் - காமிக்ஸை நேசிக்கும் ஒரு கடவுளரின் கரம் இந்தப் பயணத்தின் சுக்கான் மீதிருந்தாலொழிய not possible at all அல்லவா ? இந்த நொடியில் பேந்தப் பேந்தத் தேடிக் கொண்டிருக்கிறேன் - அந்த அரூப சக்தியின் லேட்டஸ்ட் ஒத்தாசைப் படலத்தினை !!

Becos at this point of time, சுஸ்கி & விஸ்கி ஸ்பெஷல் மட்டுமே அச்சு பூர்த்தி  கண்ட நிலையில் உள்ளது ! பாக்கி சகலமுமே - வெவ்வேறு கம்பியூட்டர்களிலும், மேஜைகளிலும், இறைந்து கிடந்து வருகின்றன - DTP / எடிட்டிங் / பிரிண்டிங் பணிகளை எதிர்நோக்கி ! உரிய நேரத்திற்குள் அவை சகலத்தையும் கரை சேர்த்திட அந்தப் புனித மனிடோ தனது இதர ஜோலிகளையெல்லாம் சற்றே ஒத்திப் போட்டு விட்டு கரம் தந்தால் தானுண்டு !! தெய்வமே !!

ரைட்டு...தற்போதைக்குப் பூர்த்தி கண்டுள்ள அந்தச் சுட்டிகளையே இந்த வாரப்பதிவின் focus ஆக வைத்துக் கொள்வோமா ?

Suske en Wiske !! சரியாகச் சொல்வதானால் இவர்களது மறுவருகையின் முதல் விதை மண்ணைச் சந்தித்தது - 2014-ல் ஒரு விருதுநகர் ரயில் நிலையத்து இரவினில் தான் ! அமர்க்களமாய் நமது 2012+ மறுவருகை அமைந்திருக்க, புது ஜானரிலான இதழ்கள் ஒருபக்கம் மெது மெதுவாய்க் காலூன்றிக் கொண்டிருக்க, இங்கே நமது வலைப்பதிவுப் பக்கங்களிலும் "முப்பதே நாட்களில் முன்னூறு மூ.ச.க்களை சமாளிப்பது எப்படி ?" என்ற பாடங்களைப் படித்தபடிக்கே வண்டி ஜாலியாய் ஓடிக்கொண்டிருந்த வேளைகள் அவை ! "சுஸ்கி-விஸ்கி" க்ளாசிக்ஸ்களை மறுக்கா கொண்டு வரலாமே ? என்ற கேள்வி ஒரு இரவு நேரத்து கும்மியின் போது இங்கே பதிவாகியிருந்தது ! நானோ, பெங்களூரு போகும் பொருட்டு விருதுநகர் ரயில்நிலைய பிளாட்பாரத்தில்  குந்தியிருந்தேன் - பக்கத்து பெஞ்சில் பர்மா கடை பரோட்டாவை மேயு மேயென்று மேய்ந்து கொண்டிருந்த ஒரு கோஷ்டியைக் கண்டு கொள்ளாமலிருக்கும் பிரம்மப் பிரயத்தனத்துடன் ! கண்டுகொள்ளாமலிருக்க கண்களுக்கு சாத்தியப்பட்டாலும், மூக்காருக்கும், லிட்டர் லிட்டராய் ஜொள்ளை உற்பத்தி செய்து கொண்டிருந்த நாக்காருக்கும் முடியணுமே ?!! 

"போங்கடா டேய்..." என்றபடிக்கே மனதை பரோட்டாவிலிருந்து இடம் மாறச் செய்யும் முனைப்பில் லேப்டாப்பை திறந்து பதிவுக்குள் புகுந்தேன் ! "சு.வி" கோரிக்கைக்கு, தட்டிக் கழிக்கும் விதமாய் ஏதோவொரு பதில் சொன்னது மட்டும் நினைவிருக்கிறது - simply becos எனக்கு இந்த dutch படைப்பு அந்தக் காலங்களிலேயே ரொம்பவே கொயந்தப்புள்ளைத்தனமாய்த் தென்பட்ட சமாச்சாரம் ! 1987-களின் ரசனை அளவுகோல்களுக்கே சுஸ்கி & விஸ்கி செம குட்டீஸ் கதைகளாய்த் தென்பட்டிருக்க, 2014-ல் "க்ரீன் மேனர்" ; இரவே..இருளே..கொள்ளாதே போலான கதைகளின் ஒப்பீட்டில் எனக்கு இந்தப் பொடிப்பசங்க துளி கூட ரசிக்கவில்லை தான் ! In fact எனக்கு ரொம்ப காலமாகவே ஒரு கேள்வியுண்டு - "நம்மாட்கள் இந்தக் கதைகளை தலையில் தூக்கி வைத்து  கொண்டாடுகிறார்களே ?! How come  ???"  என்று ! 

'ஈயம் பூசுனா மாறி ஒரு உருட்டு...பூசாத மாறி இன்னொரு உருட்டு' என்று அந்த நொடியில் கோரிக்கையைச் சமாளித்திருந்தாலுமே, எனக்குள் லைட்டாய் ஒரு எண்ணம் - 'கலரில் ; ஆர்ட்பேப்பரில் போட்டால் இந்தத் தொடர் டாலடிக்குமோ ? நாம தான் தட்டிக் கழிச்சிட்டே போறோமோ ?' என்ற ரீதியில் ! அப்போதெல்லாம் ஆண்டுக்கு 18+ புக்ஸ் போல் குறைவாய் மட்டுமே நமது திட்டமிடல்கள் இருந்து வந்தன ; so லொடக்கென்று ரெண்டோ-மூணோ ஸ்லாட்களை ஏற்படுத்துவது கம்பு சுத்தும் கடினமெல்லாம் கிடையாது தான் ! இருந்தாலும் தயக்கமே மேலோங்கியது ! கொசுக்கடிக்குள் பொழுதை நகற்றிக் கொண்டிருக்க, இரவு பத்தேமுக்காலுக்கு வர வேண்டிய ரயிலானது செம லேட் ; நடுச்சாமத்துக்கு முன்னே வராதென்று ஸ்பீக்கரில் அலறியது ! நியாயமாய்ப் பார்த்தால் கொலைவெறி பொங்கியிருக்க வேண்டும் உள்ளாற ; ஆனால் surprise ...surprise ...எனக்கோ செம குஷியாகிப் போனது  !! தம்மாத்துண்டு பேக் மட்டுமே லக்கேஜ்  என்பதால் தூக்கிக் கொண்டு விறு விறுவென்று வாசலுக்குப் போய் ஒரு ஆட்டோவைப் பிடித்து "அண்ணாச்சி...பர்மாக்கு விடுங்க !!" என்றேன் கெத்தாய் ! அப்போதெல்லாம்   ரயில் நிலையத்திலிருந்து கால் கிலோமீட்டர் தொலைவிலேயே பர்மாவின் கிளையொன்றிருந்தது !! ரயிலின் தாமதத்தால் புண்பட்ட மனதை பரோட்டோவால் ஆற்றிய பின்னே, உலகத்தையே ஒருவித தயாளத்தோடு பார்க்கும் குணம் குடியேறியிருந்தது ! பின்னியெடுக்கும் கொசுக்கடிக்கு மத்தியில் இன்னொரு மணி நேரத்தை பிளாட்பாரத்தில் ஒப்பேற்ற வேண்டிய அவசியம் கூட அந்த இரவினில் கடுப்பேற்றவில்லை ! அப்போது எழுந்தது தான் - ஹாலந்தின் திசையில், சுஸ்கி-விஸ்கி உரிமைகளுக்கென ஒரு கல்லை வீசிப் பார்ப்போமே என்ற எண்ணம் ! 

கிட்டத்தட்ட 20+ ஆண்டுகளாய் அவர்களோடு தொடர்பிருக்கவில்லை எனும் போது, ஆட்கள் யாரையும் தெரிந்திருக்க வாய்ப்பில்லை தான் ; so முன்னேயும், பின்னேயுமாய் மின்னஞ்சல் பரிமாற்றங்கள் நாட்களை விழுங்கிடும் என்று தான் நினைத்திருந்தேன் ! So உடனடியாய் பதில் கிட்டுமென்ற எதிர்பார்ப்பெல்லாம் இல்லாமல் ஒரு மின்னஞ்சலைத் தட்டி விட்டேன் ! ஆனால் surprise ...surprise ....விழுங்கிய பரோட்டா வயிற்றுக்குள் கிரைண்டரை ஓட்ட ஆரம்பிக்கும் முன்பாகவே அப்போது அங்கே பொறுப்பிலிருந்த ஒரு இளம் பெண் மின்னல் வேகத்தில் பதில் போட்டு விட்டார் ! ஆஹா....செம வேகமாக உள்ளதே !! என்றபடிக்கே துவக்கியது தான் சுஸ்கி-விஸ்கி மறுவருகையின் துவக்கப் புள்ளி ! 

ஆனால் எனக்குள் இருந்த அந்த ஒருவித நம்பிக்கையின்மை - என்னை முழுமூச்சாய் முயற்சிக்க அனுமதிக்கவில்லை ! "கொஞ்சம் யோசிச்சிப்போமே...!! இப்போ தான் மெது மெதுவா உப்மா...ஊசிப்போன வடைங்கிற ரீதியிலான நம் மீதான விமர்சனங்கள் மறைய ஆரம்பிக்குது ; இந்த நேரத்திலே சூதானமா இருந்தா தேவலியே !!" என்ற ஸ்பீட்ப்ரேக்கரோடே பயணிக்க, ஒரு மாதத்தை ஜவ்வு இழுத்திருந்தேன் ! அதற்குள் ஏனோ தெரியலை - அந்தப் பக்கத்திலிருந்தும் பதில் இல்லை ! "ரைட்டு...ஐரோப்பிய புத்தக விழா circuit துவங்கியிருக்கும் ; இன்னும் 2 மாதங்களுக்கு பிசியாக இருப்பார்கள் !" என்று எனக்கு நானே விளக்கம் சொல்லிக்கொண்டு "மின்னும் மரணம்" or ஏதோவொரு புராஜெக்ட்டுக்குள் மும்முரமாகிப் போனேன் ! So சு&வி. தேர் நடுவழியிலேயே அம்போவென நிற்பது போலாகி விட்டது ! 

கொஞ்சமாய் அவகாசமும், கையில் டப்பும் இருந்ததொரு தருணத்தில் - "இந்தவாட்டி final பண்ணிடனும் !" என்ற முனைப்பில் அவர்களோடு தொடர்பு கொண்டேன் ! ஆனால் இம்முறையும் surprise ...but வேறு மாதிரியான surprise !! மின்னலாய் செயலாற்றிய அந்தப் பெண்மணி அந்த நிறுவனத்திலிருந்து பணிவிலகி இருந்தார் !! நேரடிப் பரிச்சயம் இல்லாத போதிலும் அவருடன் தகவல் பரிமாற்றங்கள் ரொம்பவே சுலபமாய் இருந்திருக்க, அந்த நேரமே உரிமைகளை வாங்கிடாது போனோமே என்று என் மீதே கடுப்பாக இருந்தது எனக்கு ! புதிதாய் அந்தப் பொறுப்புக்கு வருபவரிடம் பிள்ளையார் சுழியிலிருந்து fresh ஆக ஆரம்பிக்க வேண்டுமே என்ற அயர்வுமே சேர்ந்து கொள்ள அப்படியே தொங்கலில் கிடந்து போயின அந்த முயற்சிகள் ! தொடர்ந்த பொழுதுகளில், புதுசு புதுசாய் ஏதேதோ குட்டிக்கரணங்களில் பிஸியாகிட, வாரங்கள் / மாதங்கள் / வருஷங்கள் ஓடியே விட்டன ! 

ஒரு வழியாய் அந்த கொரோனா காலங்களின் லாக்டௌன் பொழுதுகளில் கொஞ்சம் நிதானிக்கவும், உங்களின் சு.வி.கோரிக்கையினை நினைவூட்டிக்கொள்ளவும் அவகாசம் கிட்டியது ! அந்த வேளைகளில் அங்கே ஹாலந்திலுமே Work from Home ; எவ்விதப் புத்தக விழாக்களிலும் லேது என்பதால், சுணக்கங்களின்றி நமது கோரிக்கைகளை முன்வைக்க சாத்தியப்பட்டது ! And அவர்கள் அன்போடு நமது கதைத்தேர்வுகளுக்கும் இசைவு சொல்லிட - சுஸ்கி & விஸ்கி ஸ்பெஷல் 1 நனவாகிட all was in place !! இன்னமும் நிறைய "மனத்தளவுப் பாலகர்கட்குக்" கனவு இதழாய் தொடர்ந்திடும் இந்தச் சுட்டீஸ் album நம் பக்கமாய் மறுவருகை செய்திட சாத்தியமானதன் பின்னணி இதுவே ! 

டின்டின்...ஆஸ்டெரிக்ஸ்...லக்கி லூக் ரேஞ்சுக்கு Suske & Wiske சர்வதேச அரங்கில் அசுர வெற்றிக்கொடி நாட்டியிருக்காது போயிருக்கலாம் தான் ; ஆனால் அவர்களது தேசத்தில் / மொழியில் இவர்கள் ஜாம்பவான்களோ - ஜாம்பவான்கள் ! So நிறைய தரக்கட்டுப்பாட்டு கோரிக்கைகளுடன் "எங்கள் செல்லக் கண்மணிகளை உங்க மொழியிலே ஒப்படைக்கிறோம்...பார்த்துக்கோங்க !!" என்று சொல்லவும் படைப்பாளிகள் மறக்கவில்லை ! So ரொம்பவே பயந்து, பயந்து பணியாற்றியுள்ளோம் இதன் ஒவ்வொரு அங்குலத்தினிலும் ! அட்டைப்படங்களை அச்சாய் அவர்களின் ஒரிஜினல் பாணிகளில் அமைத்தால் நலமென்று தீர்மானித்தோம் ; so here you go : 

அந்த தலைப்பின் எழுத்துருக்கள் மட்டும் லயனின் துவக்க நாட்கள் முதலாய்ப் பணியாற்றிய (ஓவியர்) காளிராஜனின் கைவண்ணம் ! வாழ்க்கையில் நான் பணியமர்த்திய முதல் இளைஞன் என்று காளிராஜனை அடையாளம் காட்டலாம் தான் ; ஆனால் அதையெல்லாம் தாண்டி எனக்கொரு தம்பியைப் போலவே பல வருடங்களுக்கு நமது எக்கச்சக்கப் பதிப்புகளுக்குத் தோள் தந்தவன் அவன் ! 1984-ல் முன்னூறு ரூபாய் சம்பளத்திற்கு அவனை அமர்த்திய போது எனக்கு வயது 17 & சொச்சம் என்றால், அவனுக்கு அப்போது வயசு 17  தான் ! பெரிய பயிற்சியெல்லாம் கிடையாது ; ஆனால் ரொம்பவே நேர்த்தியாய் ப்ரஷ் பிடித்து clean strokes-ல் பணியாற்றுவான் ! பின்னாட்களில் சிகாமணி ; மாலையப்பன் போன்ற ஜாம்பவான்களுடன் பணியாற்றும் வாய்ப்பு கிட்டியபோது செமத்தியாய் தானும் முன்னேற்றம் கண்டவன் ! "ராஜா...ராணி..ஜாக்கி..!" என்ற அந்த எழுத்துக்களையும், அந்நாட்களின் ஞாபகங்களையும் மட்டும் இந்த ஆல்பத்தின் மூலமாய் மீட்டுக் கொள்ள முடிகிறது - simply becos அந்தத் துவக்க நாட்களின் நியூஸ்பிரிண்ட் பதிப்புக்கும், காத்திருக்கும் உயர் தர hardcover முழுவண்ண ஆல்பத்துக்கும் மத்தியில் "ஒற்றுமை" என்று சொல்லிக்கொள்ள வேறெதுவுமே கிடையாது ! 

பக்க அமைப்புகளில் ஒரிஜினல்களின் நேர்த்தி ; அந்நாட்களில் ஓவராய் டப்ஸாவாய்த் தென்பட்ட சில பகுதிகளுக்கு கத்திரி போட்டிருக்க, இன்று அவை துளியும் சேதமின்றி ஆஜராகியிருக்கும் அழகு ;  கண்ணில் ஒத்திக் கொள்ளத் தூண்டும் துல்லியமான கலரிங் ; தொடத்தொட வழுக்கிக் கொண்டே போகும் ஸ்பெஷல் ரக ஆர்ட்பேப்பர்  ; டாலடிக்கும் கலர் பிரின்டிங் ; hardcover  - என்று எல்லாமே இந்த டிஜிட்டல் யுகத்தின் முன்னேற்ற முத்திரைகளாய் காட்சி தருகின்றன ! And icing on the cake  - அந்த நாட்களின் செம average மொழியாக்கத்தினை ஒட்டுமொத்தமாய் மாற்றியமைத்துள்ளோம் !  "உன்ர கிட்டே எக்ஸ்டரா நெம்பர் போட சொல்லிக் கேட்டேனா ? உன்னே கேட்டேனா ?" என்று சட்டையைப் பிடிக்கும் பொங்கலோ பொங்கலெல்லாம் இதன் பொருட்டு  எழ வாய்ப்புகள் சொற்பம் என்றே சொல்லுவேன் - simply becos ஒரிஜினலில் இருந்த மொழிபெயர்ப்பு இன்றைக்கு இந்த ஆல்பத்தைப் புதிதாய்ப் படிக்கக்கூடிய வாசகரை தெறித்தடித்து ஓடச் செய்யும் ரகத்திலேயே இருந்ததென்பதால் ! So "பழமைக்குக் கேடு செஞ்சுப்புட்டான் பாவிப்பய !!" என்ற நெற்றிக்கண்கள் திறக்கும் படலங்கள் இன்னமுமே நடைமுறை கண்டாலும், ''சாரிங்கண்ணா...உங்க நெற்றிக்கண் பார்வைகளை ஏதாச்சும் ஒரு பர்னால்..அல்லாங்காட்டி சைபால் களிம்பு போட்டு ஆத்திக்கிறேன் ; ஆனா 55 வயசுக் கடாமாடாய் நான் பொறுப்பேற்றிருக்கும் ஒரு இதழினில், இது மாதிரியான  மொழிநடையை, nostalgia என்ற பெயரைச் சொல்லி அனுமதிக்க வாய்ப்பே இல்லீங்கண்ணா !!" என்பதே எனது பதிலாக இருக்கும் ! So உங்கள் ஆதர்ஷ சுஸ் & விஸ் இருப்பார்கள் - நயமாய் ; தரமாய் ; பற்களை ஆடச் செய்யாத மொழிநடையினில் ! And இந்த 2 கதைகளையுமே மறுக்கா rewrite செய்து தந்து, இந்த முழியாங்கண்ணனின் தாவு மேற்கொண்டும் தீராதிருக்க உதவிய கண்ணனின் பெயரை அடிச்சுக் கேட்டாலும் சொல்லவே மாட்டேனே !! ஊஹூம்...மூச் !! (ஷப்பா....இந்த தபா மூ.ச.confirm-னா, நமக்குத் பேச்சுத் துணைக்கு ஆளும் confirm !! மைதீன்...அந்த ப்ளீச்சிங் பவுடரை சந்துக்குள்ள ஓரமா ஒளிச்சு வைச்சிருப்பா...வர்ற மனுஷன் பாண்ட்ஸ் பவுடர்னு நினைச்சு பூசிடப் போறாரு !! ) 

இந்த இதழ் ரெகுலர் சந்தாத் தடத்திலும் கிடையாது ; முன்பதிவுகளிலும் கிடையாது என்பதாலும், "கார்ட்டூன்" என்ற 'கெட்ட வார்த்த' ஜானரைச் சார்ந்தது என்பதாலும், இதன் பிரிண்ட் ரன் - நமது இ.ப. வண்ணத் தொகுப்பின் எண்ணிக்கையினை ஒட்டிய சொற்பமான நம்பரே ! So இதன் விலை நமது வழக்கங்களைக் காட்டிலும் கூடுதலே - ரூ.330 ! இதே முயற்சி ஒரு ஆக்ஷன் நாயகரின் கதையோடோ ; 'தல' சாகஸத்தோடோ இருந்திருப்பின், நாங்கள்பாட்டுக்கு தைரியமாய், வழக்கமான எண்ணிக்கையில் அச்சிட்டு, "இருப்பில் இருந்தாலும் விற்றுக்கலாம்" என்ற நம்பிக்கையில் காத்திருந்திருப்போம் ; விலையினையும் சற்றே குறைவாய் நிர்ணயித்திருந்திருப்போம் ! ஆனால் கார்ட்டூன் ; கொயந்த பசங்க புக்ஸ் என்ற முத்திரை கொண்ட பதிப்புகளை ரொம்பவே தயக்கங்களோடே கையாள வேண்டியுள்ளது ! சமீபத்தைய "கதை சொல்லும் காமிக்ஸ்" (பீன்ஸ்கொடியில் ஜாக்) இதற்கொரு classic example !! சந்தா எண்ணிக்கை நார்மலில் மூன்றில் ஒரு பங்கு கூட நஹி & முகவர்கள் இதனில் பெரிதாய் ஆர்வம் காட்டிடவில்லை எனும் போது - கமான்சே கூடவும், ஜூலியாவோடும் ஜாக் செம அரட்டையில் ஈடுபட்டிருக்கிறார் நமது கிட்டங்கியினில் ! இது வரையிலும் 200 புக்ஸ் விற்றிருந்தோமெனில் அது பரமபிதாவின் கடாட்சம் என்பதே unvarnished truth !!  இந்த நேரத்துக்கு 'தல' சிறுகதைகளை ஒரு தொகுப்பாக்கி - இதே நூறு ரூபாய் விலைக்கு வெளியிட்டிருந்தால், முக்கால்வாசியை இந்நேரத்துக்கு  விற்று கையைத் தட்டியிருக்கலாமோ ? என்ற சலனங்கள் இதுபோலான வேளைகளில் தலைக்குள் ஓடுவதைத் தவிர்க்க இயலவில்லை தான் !! ஆகையால் - "சுஸ் & விஸ் விலையைக் கேட்டீகளா....? ஒரு கோடி அப்பு...ஒரு கோடி !!" என்ற விசனக்குரல்கள் எங்கேனும் ஒலிப்பின், அவர்கட்கு ஜாக் & beanstalk இதழினை நமது அன்புடன் அனுப்பிடலாம் ! 

So உங்களின் 35 ஆண்டுப் பரிச்சய வாண்டுகள், யதார்த்தத்தை ஒட்டியதொரு எண்ணிக்கையினில் உங்களுக்கெனத் தயாராகி வருகின்றனர் ! நிலவரம் இக்கட இவ்விதமிருக்க, இன்னொருபக்கம் செமத்தியான ஒரு சேதி எனது காலையை சூப்பர் டூப்பராக்கியுள்ளது ! ஹாலந்திலிருந்து சுஸ்கி & விஸ்கி ரசிகர் மன்றத் தலைவர் ஏற்கனவே தொடர்பினில் இருக்க, அங்குள்ளதொரு பிரத்தியேக சுஸ்கி & விஸ்கி கடையிலிருந்து decent எண்ணிக்கையில் நமது இந்த இதழுக்கு ஆர்டர் வந்துள்ளது ! "இது துவக்க ஆர்டர் அண்ணாச்சி...எங்க சுஸ் & விஸ் ரசிகர்கள் இன்னும் கணிசமாய் உள்ளனர் ! அவர்களுக்கெல்லாம் உங்க இதழைப் பற்றி நாங்கள் ஒரு ஈ-மெயில் தட்டி விட்டோமெனில் இன்னும் கூடுதல் ஆர்டர்கள் உறுதி ! So உங்க அட்டைப்படத்தை மட்டும் அதற்கோசரம் அனுப்பித் தர முடியுமா ?" என்று கேட்டிருந்தனர் ! "ஐயோ...அண்ணா...ஊம்னு ஒரு வார்த்தை சொல்லுங்க ....ஷேர் ஆட்டோ பிடிச்சாச்சும் நானே ஹாலந்துக்கு ஒரு நடை வந்து அட்டையைக் கண்ணிலே காட்டிட்டுத் திரும்பிடறேன் !!" என்று அடித்துப் பிடித்துப் பதிலைப் போட்டாச்சு ! அநேகமாய் ஒரு தமிழ் இதழின் அட்டைப்படத்தை ஐரோப்பாவில் இருப்போர் முந்திக் கொண்டு பார்ப்பது இதுவே இரண்டாவது  தபாவாக இருக்கும் என்பேன் (ARS MAGNA was the first occasion) !! அப்புறம் நம்ம முகமூடிப் பார்ட்டி டயபாலிக்கின் ரசிகர்களுக்கு செம tough தருவார்கள் - இந்த சுஸ் & விஸ் ரசிகர்கள் என்பது புரிகிறது ! Simply incredible passion !!

அங்குள்ள வெறித்தனமான நேசத்தினில் ஒரு பகுதி நமக்கு சாத்தியமானாலே நம் தலை தப்பி விடும் ! And தொடரும் காலங்களில் இந்த சுட்டீஸ் டீம் நம் மத்தியில் ஒரு ரெகுலர் இடம் பிடிக்க அருகதை கொண்டோரா ? என்ற தீர்ப்பெழுதும் பொறுப்புமே உங்கள் வசம் உள்ளது guys !! So கைகளில், கால்களில், உள்ள அத்தனை விரல்களையும் cross செய்தபடிக்கே காத்திருப்பேன் - இந்த இதழுக்கான உங்களின் மார்க்குகளை எதிர்நோக்கி ! 

ரைட்டு...இனி முன்பதிவுகள் துவக்கிடலாம் - சு.&வி.ஸ்பெஷலுக்கு !

• நீங்கள் நமது சந்தாக் குடும்பத்தின் அங்கமாய் இருக்கும் பட்சத்தில் உங்களுக்கு 10% டிஸ்கவுண்ட் இருந்திடும் ! (உங்களுக்கு புக்கின் விலை ரூ.300)
• And வரும் ஜூலை 25-க்கு முன்பாய் நீங்கள் முன்பதிவு செய்திடும் பட்சத்தில், ஆகஸ்டின் இதழ்களோடு சேர்த்து கூரியரில் அனுப்பிடவும் செய்யலாம் - without additional charges !
• அதற்குப் பின்பாய் ஆர்டர் செய்திடும் பட்சத்தில் கூரியர் கட்டணங்கள் will be as applicable ! 
• Oh yes, கோவைப் புத்தக விழாவின் பிற்பாதியில் போதும் சரி, ஈரோட்டுப் புத்தகவிழாவின் முழுமையிலும் சரி, இந்த இதழ் நமது ஸ்டாலில் கிடைக்கும் ! So ஏதேனுமொரு இலக்கினில் வாங்கிக்கொள்வதென நீங்கள் தீர்மானிக்கும் பட்சத்தில் - ஒரேயொரு வாட்சப் மெசேஜ் - KOVAI ....ERODE என்ற ரீதியில் 73737 19755 என்ற நம்பருக்குத் தட்டி விடுங்கள் ப்ளீஸ் ! அதற்கேற்ப புக்ஸை அங்கே அனுப்பிட எங்களுக்கு இது பெரிதும் உதவும் ! 
• சந்தாவினில் ஆர்வமில்லை ; புத்தக விழாவுக்குப் போகும் சாத்தியங்களுமில்லை - என்ற நண்பர்கள் ஆன்லைனில் ஆர்டர் செய்து கொள்ளலாம் ! 
• கடைகளில் வாங்கிடும் நண்பர்கள், உங்கள் முகவர்களிடம் அழுத்தமாய் ஒரு வார்த்தை சொல்லி வைத்தீர்களெனில் அவர்களை ஆர்டர் செய்திட தூண்டுகோலாகிடக்கூடும் folks !! மறவாது உங்கள் முகவர்க்கு ஒரு phone ப்ளீஸ் !

அடிக்கடி சொல்வது போல - பந்து இப்போது உங்கள் பக்கம் !! பார்த்து ஆடுங்கோ புலீஸ் !! 

அப்புறம் ZAGOR இதழுக்குமே முன்பதிவு பண்ணிப்போடுறோமே ? என்று கேட்கக்கூடிய நண்பர்களுக்கு - அதுகுறித்த அறிவிப்பு முறையாய் வரும் வரை பொறுமை காக்கக் கோருவேன் ! In any case ஏற்கனவே மாண்ட்ரேக் hardcover + சுஸ்கி-விஸ்கி hardcover + டெக்ஸ் இதழ் என்றிருக்கக்கூடிய August கூரியர் டப்பியில், ZAGOR இதழையும் நுழைக்க வாய்ப்பே இராது ! That will need to be a separate box & a booking !! So இந்த நொடியில் அந்தச் சோப்புச் சட்டைக்காரரையும் உள்ளுக்குள் இழுத்துப் போட்டுக் குழப்பிக்க வேணாமே என்று பார்த்தேன் !! 

நடையைக் கட்டுகிறேன் guys ; bye for now ! Have a fun weekend !! See you around !!

P.S : ஓசூர் புத்தக விழாவினில் நமது ஸ்டால் நம்பர் 40 ! அங்குள்ள HOTEL HILLS-ன் அரங்கினில் விழா துவங்கியுள்ளது ! அந்தப் பகுதியினைச் சார்ந்த நண்பர்கள் - please do drop in !! 

ஒரு பொடியன்..ஒரு நூறு பெயர்கள்..!

 நண்பர்களே,

வணக்கம். உங்களுக்குள் உறங்கிக் கொண்டிருக்கும் அந்தப் பெயரிடும் மிருகத்தை ரொம்ப ரொம்ப முன்னமே ஞான் தட்டி எழுப்பியிருக்கணும் போலும் - பெயர் தெரியாது தவித்துத் திரிந்து கொண்டிருந்த நம்ம XIII-க்கே படா ஷோக்கா ஏதாச்சும் ஒரு பெயரை முன்மொழிந்திருக்க மாட்டீர்களா ?!! கதாசிரியர் வான் ஹாமே திகைச்சுப் போகும் விதமாய், வித விதமான பெயர்களை நீங்கள் போட்டுத் தாக்குவதில், அந்தப் பெயர்களில் சிலவற்றையாச்சும் பயன்படுத்திடும் நோக்கில் கூட மனுஷன் கூடுதலாய் இன்னும் ரெண்டு பாகங்களை எழுதி இருக்கக்கூடும் ! வரலாறு படைக்கும் வாய்ப்பு மிஸ்ஸாகிப் போச்சே !!

இப்போது கூட ஒண்ணும் கெட்டுப் போகலை தான் ; LOSER JACK கதாசிரியருக்கு இங்கே பதிவாகிக்கிடக்கும் பெயர்களை அனுப்பி வைத்தால், பொடியனுக்குமே ஒவ்வொரு பாகத்திலும் XIII பாணியில்  ஒரு பெயரிட்டு ரசிக்க வாய்ப்பிருக்கக்கூடும் ! Anyways வண்டி வண்டியாய்க் குவிந்து கிடந்த பெயர்களுள் ஜாக்கின் குணாதிசயங்களுக்கு மட்டுமன்றி, அடிக்கடிக் கூப்பிடவும் பொருத்தமானதாய் எனக்குப் பட்ட பெயர்கள் கீழ்க்கண்டவைகளே :

*கைப்புள்ள ஜாக் - selvas 

*சுள்ளான் ஜாக் - கிட் ஆர்டின் கண்ணன் 

*சோப்ளாங்கி  ஜாக் - கிட் ஆர்டின் கண்ணன்

இவை தவிர்த்து என் மண்டைக்குள் ஓடியிருந்த பெயர்கள் 2 :

*சுட்டிப்பூஜ்யம் ஜாக்

*மங்குணி ஜாக் 

இதில் எனக்கு சில சந்தேகங்கள் :

1."மங்குணி ஜாக்" என்ற பெயரை நண்பர்கள் யாரேனும் முன்மொழிந்துள்ளனரா இங்கே ? தேடிப் பார்த்தவரைக்கும் தெரியக் காணோம் எனக்கு !

2.And மற்ற பெயர்களை முன்மொழிந்திருப்பதாய் நான் குறிப்பிட்டிருக்கும்  நண்பர்களின் தகவல்கள் சரி தானா ? Or வேறு யாரேனும் அந்தப் பெயரை அதற்கு முன்னமே இங்கே பதிவு செய்துவிட்டார்களா ? 

கவுண்டரும், பிரபுவும் டுபாக்கூர் லாட்டரி சீட்டை வைத்துக் கொண்டு பேங்க் வாசலில் பேண்ட் செட் முழங்க ஆஜரான கதையாய், மேற்படிப் பட்டியலில் பெயரிட்டவரை நான் தப்பாகக் குறிப்பிட்டு சொதப்பி வைத்திருக்கக்கூடாதில்லையா ? So - விபரங்களை ஒருக்கா ஊர்ஜிதம் செய்திடுங்களேன் ப்ளீஸ் ?

இந்த 5 பெயர்களை உற்றுப் பார்த்துக் கொண்டேயிருந்த பிற்பாடு, போட்டியிலிருந்து வெளியேறிடும் நாமகரணங்களை முதலில் தேர்வு செய்திட நினைத்தேன் :

*"சுள்ளான் ஜாக்" என்பது catchy ஆக இருந்தாலும், சகலத்திலும் முட்டையிடும் ஜாக்கின் குணத்துக்கு பொருந்துவதாய் எனக்குத் தெரியலை ! Maybe லக்கி லூக் கதைகளில் வரும் அந்த பொடியன் பில்லி போலான பாத்திரத்துக்கு "சுள்ளான்" என்ற அடையாளம் ஓ.கே.வாகிடக்கூடும் என்று பட்டது ! So சலோ "சுள்ளான்" என்றேன் !

*அடுத்ததாக "சுட்டிப்பூஜ்யம் ஜாக்" என்ற பெயர் ஜாக்கின் சொதப்பலை சுட்டிக்காட்டும் விதமாய் இருந்தாலும், கதையின் நடுவே "அடேய்..மங்குணி ; அடேய் கைப்புள்ள ! அடேய் சோப்ளாங்கி..." என்ற ரீதியில் கூப்பிட முடியாதில்லையா ? "அடேய் சுட்டிப்பூஜ்யம்" என்பது கொஞ்சம் ட்ராமா வசனமாட்டம் தெரியக்கூடும் என்பதால் அதற்கும் ஒரு டாட்டா சொன்னேன் !

எஞ்சியிருந்த 3 பெயர்களுமே பொருத்தமாய் இருக்க, "மங்குணி" என்ற அடைமொழி அசமந்தத்தையும், சற்றே கூமுட்டைத்தனத்தையும் குறிப்பிடும் விதமாய் இருப்பது நெருடியது ! ஜாக் கெட்டிக்காரனாக இருந்து, அதிர்ஷ்டம் அவன் பக்கம் இல்லாது போயின், பயபுள்ளை தோற்றுக்கொண்டும் இருக்கலாமில்லையா ? So அது தெரியாமல் அவனுக்கு "மங்குணி" என்ற முத்திரை தருவது முறையாகாது தானே ? So மங்குணி ரிஜிட் !

ஆக, நேரடி மோதல் "கைப்புள்ள vs சோப்ளாங்கி" என்றாகியது ! மறுக்கா நிரம்ப ரோசனைகள் !! End of the day, வைகைப் புயலாரின் உபயத்தில் தமிழ் அகராதியினில் இடம்பிடிக்காத குறையாய் நம் மத்தியில் காலத்தால் அழியா (!!!) ஒரு இடத்தைப் பிடித்திருக்கும் அந்தக்  "கைப்புள்ள" கதாப்பாத்திரம் தான் வென்றது ! "கைப்புள்ள ஜாக்" பச்சாதாபத்தையும் ஏற்படுத்திடக்கூடும், லைட்டான டம்மி பீஸாகவும் அர்த்தம் தந்திடக்கூடும் ; தோற்கும் மங்குணியாகவும் புரிபடக்கூடும் ; and it's loads easier on the tongue too ! ஆகையால் இந்தக் குள்ள வாத்து ஹீரோ தமிழில் "கைப்புள்ள ஜாக்" என்று அன்போடு அறியப்படுவாராக !! பெயர் சூட்டிய நண்பர் selvas (ரைட்டு தானுங்களே ??) அவர்களுக்கு kudos !! LJ கதைகளின் தொகுப்பு என்றைக்கு வெளியானாலும் அதிலொரு பிரதி உங்களுக்கு நமது அன்புடன் அனுப்பிடப்படும் ! 

Phewwww !! சுஸ்கி-விஸ்கி பணிகளுக்குள் மூழ்கிடக் கிளம்புகிறேன் guys !! Bye for now !! See you around !!

மறுக்கா ஆரம்பிக்கலாமுங்களா ?

 நண்பர்களே,

வணக்கம். நம்மூர் அரசியல்வாதிகளுக்கு அப்புறமாய், பெயர் சூட்டுவதில் மன்னாதி மன்னர்கள் யாரென்றே கேள்வி எழுந்திடும் பட்சத்தில், ஒரு சின்னதான 'பொம்ம புக்' வட்டத்தைத் தாண்டித் தேடவே வேண்டியிராது என்பேன் ! சும்மா ஆளாளுக்குத் தெறிக்க விடும் வாணவேடிக்கைகள் எங்க ஊரின் தீபாவளி பட்டாசுகளுக்கே சவால் விடும் போலும் ! காத்திருக்கும் ஞாயிறினில் - நீங்கள் பரிந்துரைத்திருக்கும்  பெயர்க்குவியல்களுக்குள் முத்துக் குளித்து, LOSER JACK புள்ளையாண்டானுக்கான (தமிழ்ப்) பெயரைத் தேர்வு செய்திடுவதாக உள்ளேன் ! நம் மத்தியில் வெறும் விளம்பரமாய் தோன்றியதுக்கே பொடியனுக்கு இத்தனை அலப்பறை சாத்தியமாகிறதெனில் - கதைகளோடு சந்திக்கும் போது என்ன ரவுசு விடக்காத்துள்ளானோ - தெரியில்லா !! Anyways - இந்தப் புது வரவுக்கு நீங்கள் தந்திருக்கும் சரவெடி வரவேற்பைப் பற்றி  படைப்பாளிகளுக்கு இன்றைக்கு ஜாலியாய்ச் சொல்லியிருந்தேன் ; விடுமுறை தினமாக இருந்தாலும் செம உற்சாகமாகி பதில் போட்டுள்ளனர் !! உங்களின் இந்த infectious enthusiasm-ஐ  மட்டும் ஒரு பாட்டிலில் அடைக்கச் சாத்தியப்படுமெனில் - அடடா, ஜோப்பிக்குள் திணித்துக் கொண்டு போகும் இடத்துக்கெல்லாம் கொண்டு போய் விடுவேனே !!  

இதில் கூத்தென்ன தெரியுமோ ? ஒரேயொரு பெயர் வைக்கக் கோரினால் இக்கட ஒரு நூறு பெயர்கள் பிரவாகமெடுத்து வருகின்றன !! ஆனால் வருடாந்திர அட்டவணைக்கோசரம் 2023-ன் கதைகளுக்குப் பெயர் தேடும் படலத்தில் நானிங்கே போட்டு வரும் மொக்கைகளோ சொல்லி மாளா ரகம் !! 

*மரணம் : ஊஹூம்...பெயர்களில் அபசகுனம் வாணாம் !!

*படலம் : ஊஹூம்...எனக்கே காதில் கெட்சப் கசியும் ரேஞ்சுக்கு இதைப் போட்டுத் துவைத்தெடுத்தாச்சு !

*மர்மம் : ஊஹூம்...P .T .சாமி காலத்தோடே காலாவதியான பெயர் பாணி இது !

இப்டிக்கா வரிசையாய் 'தவிர்க்க வேண்டிய பதங்கள்' கொண்டதொரு பட்டியலைக் குறித்து வைத்துக் கொண்டு, அவை இடம்பிடிக்கா விதமாய்ப் பெயர் சூட்டுவதற்குள், கிராமத்துப் பாட்டிகளின் காதுகளில் தொங்கும் பாம்படங்கள் பாணியில் நம்ம நாக்கார் தொங்காத குறை தான் !! இந்த அழகில் 2023 அட்டவணையின் களேபரங்கள் போதாதென, மாண்ட்ரேக் ஸ்பெஷல் இதழினில் இடம் பிடித்திடும் 8 கதைகளுக்குமே பெயர் கோரி மைதீன் நிற்பது தெரிகிறது !! அடங்கப்பா......!! 

Moving on , நேற்றைய பதிவினில் "ஸ்பைடர் சார்" புதுக் கதைக்கு  உங்களின் ஏகோபித்த thumbs up மெய்யான வியப்பே ! 

• முடங்கிக்கிடக்கும் நமது பணம் வெளிப்பட வேண்டுமென்ற அவா மேலோங்கியதா ? 
• அல்லது நம்ம கூர்மண்டையர் காதல் புது வேகம் கண்டுள்ளதா ? 
• Or சேகரிப்புக்கென வாங்கும் பழக்கம் தொடர்கிறதாவென்று சொல்லத் தெரியவில்லை எனக்கு ! 

Of course மேற்படி மூன்று காரணங்களுமே வெவ்வேறு விகிதாச்சாரங்களில் பின்னணியில் இருப்பது உறுதி ; but still நெகடிவாக எவ்வித எண்ணச் சிதறல்களும் இல்லாது போனதில், சன்னமான நிம்மதிப் பெருமூச்சு !! கொஞ்சமாய் திட்டமிட அவகாசம் எடுத்துக் கொண்டு ; முகவர்களிடமும் பேசி விட்டு, "SPIDER vs THE SINISTER 7" கதையினை முன்பதிவுக்களத்தில் குதிக்கச் செய்ய வேண்டியது தான் !! இந்தத் தீர்மானம் மனதில் ஓடும் போதே இன்னொரு சமாச்சாரமும் மனதில் ஓடிவருகிறது - "ஆகா...இந்த ஸ்பைடர் சாகசத்துக்குமே ஒரு பெயரிடும் பொறுப்பை நம்ம பொதுக்குழுவிடம் நேற்றிக்கே ஒப்படைக்காது போனோமே !!" என்று .....!! So இந்த ஆல்பத்துக்கானதொரு சிறப்பான பெயரைச் சூட்டிடுவீராக புலவர்களே !! "சாம்பார் சோறு சாப்பிட்ட ஸ்பைடர்" ; " சுரக்காய்க் கூட்டுக்கு உப்பில்லை ஸ்பைடர்" என்ற ரீதியில் அல்லாது, கொஞ்சமே கொஞ்சமாய் சிந்தனைக் குதிரைகளைத் தட்டி விட்டு, உருப்படியான முன்மொழிவுகளை சபைக்குக் கொண்டு வரலாமே - ப்ளீஸ் ? 

ரைட்டு...அடுத்த ரவுசுக்கு வழி ஏற்படுத்தியாச்சு எனும் போது அடுத்த டாபிக்குக்கும் நகர்ந்திடலாமா ? பீரோவைத் திறக்கும் போது கண்ணில் பட்ட அடுத்த ஆல்பம் பற்றிப் பேசிடலாமா ? 

ஒரு வெகுஜன, பால்யத்து நாயகரைப் பற்றி நேற்றைக்கு பார்த்தோமெனில், இன்றைக்கு, நாம் விரும்பும் வன்மேற்கின் ஜானரிலான ஒரு யதார்த்த கதையினை / தொடரினைப் பற்றிப் பேசிடுவோமா ? "STORY OF THE WEST".....வன்மேற்கின் பல பரிமாணங்களை மிகையின்றி, பன்ச் வரிகளின்றி, தெறிக்கும் ஆக்ஷன் ஹீரோக்களின்றிப் பார்த்திட முனைந்திடும் ஒரு இத்தாலியக் கதை வரிசை ! ரொம்ப ரொம்ப வருஷங்களுக்கு முன்னே இதனிலிருந்து ஒரேயொரு கதையினை முயற்சித்திருந்தோம் ; ஆனால் ஏனோ அதைத் தொடர்ந்திருக்கவில்லை ! கொஞ்ச காலத்துக்கு முன்னமே இது ஞாபகத்துக்கு வந்திருக்க, நமது ரேடாரினில் இடம்பிடித்த சற்றைக்கெல்லாம், தொடரின் உரிமைகளை வாங்கியிருந்தோம் ! 

ஒவ்வொரு ஆல்பமும் 96 பக்கங்கள் ; கலரில் !! அயர்லாந்திலிருந்து புலம் பெயர்ந்து அமெரிக்க மேற்கிற்கு வந்திறங்கும் ஒரு குடும்பத்துடன் தொடர் துவக்கம் காண்கிறது ! அவர்களது பயணங்கள் ; வன்மேற்கின் raw ஆன பூமியினில்  காலூன்றிடச் சந்திக்கும் சவால்கள் ; போராட்டங்கள் என செம சுவாரஸ்யமாய், கதையினை நகர்த்திக் செல்கின்றனர் ! இடையிடையே வன்மேற்கின் நிஜ மனிதர்களும் (வயட் ஏற்ப் ; கிட் கார்சன் ; கலாமிட்டி ஜேன் etc) கதையோடு இணைந்து தலைகாட்டுகின்றனர் ! "ஜெரோனிமோ" பாணியில் இதை வரலாற்று ஆவணமாகவெல்லாம் உருவாக்கிடாது, அழகான கதையாகவே முன்னெடுத்துச் செல்கின்றனர் !! ஒவ்வொரு ஆல்பத்தினையும் தனிக்கதையாகவும் வாசிக்கலாம் ; தொடரின் சங்கிலியின் ஒரு கண்ணியாகவும் எடுத்துக் கொள்ளலாம் ! நமது டெக்ஸ் சைசில், compact ஆக வெளியிடலாம் ! நெடும் கதைகளல்ல எனும் போது பணியாற்ற எனக்கும், வாசிக்க உங்களுக்கும் சிரமங்கள் இராதென்றே நினைக்கிறேன் ! இதோ ஒரிஜினல்களின் சில பக்கங்கள் :

Right....here's my question for the day : 

நூற்றி முப்பதோ, முப்பதைந்தோ விலைக்கு இதனை வெளியிடலாம் எனும் போது முன்பதிவு, சைடு பதிவெல்லாம் அவசியமாகிடாதென்பது எனது அபிப்பிராயம் ! ஏதேனும் ஒரு விடுமுறை ஸ்பெஷலாகவோ, புத்தக விழா ஸ்பெஷலாகவோ களமிறக்கலாம் தான் ! இதனை அவ்விதம் ஒரு வாகான தருணத்தினில் வெளியிடும் பட்சத்தில், வாங்கும் / வாசிக்கும் ஆர்வம் எழுந்திடுமா folks ? சொல்லுங்களேன் ப்ளீஸ் !

Yes ....ஜமாய்ச்சிடுவோம் !! என்பதே உங்களின் பதிலாக இருக்கும் பட்சத்தில் - STORY OF THE WEST என்ற இந்தத் தொடரின் பெயரை தமிழில் சற்றே நயமாய் மொழிமாற்றம் செய்திட உங்களின் பரிந்துரை என்னவாக இருக்குமோ ? (தீர்ந்தான்டா கொமாரு !!) 

So மறுக்கா ஆரம்பிக்கலாமுங்களா ?

Bye all....See you around !! அப்புறம் ஜூலை இதழ்களின் அலசல்களுமே களம்காணட்டுமே ப்ளீஸ் ? (சம்பத் & any other earlybirds ; உங்களின் மின்னல் மாயாவி வேக அலசல்களை இங்கேயொருமுறை copy paste பண்ணுங்களேன் ?) 

Have a great weekend folks !!