பிப்ரவரிக்கு ஹல்லோ !

நண்பர்களே,

            

வணக்கம். புது இதழ்களின் அட்டைப்படங்கள் & டீசர்களைக் கொண்டு எப்படியும் மாதத்தின் இரு பதிவுகளைத் தேற்றி விடுவேன் - வழக்கமாக ! ஆனால் இம்முறையோ சென்னைப் புத்தகவிழாவும், நமது பெல்ஜியத்து சஞ்சய் ராமசாமியும் இணைந்து ஜனவரியின் ஒளிவட்டத்தை ஒட்டுமொத்தமாகக் குத்தகைக்கு எடுத்துக் கொண்டதால்- ‘ஏக் தம்மில்‘ 4 ராப்பர்களும், டிரெய்லர்களும் இப்போது வரை திரைக்குப் பின்னேயே இருந்து விட்டன ! So - திரை விலகும் நேரத்தில்- let me get to work right away !

பிப்ரவரியின் “எதிர்பார்க்கப்படும் இதழ்களுள்” பிரதானமானது நமது ஜேசன் ப்ரைஸ் த்ரில்லரின் க்ளைமேக்ஸ் பாகம் தான் என்பதில் 99% கருத்து ஒற்றுமை இருக்குமென்று தோன்றுகிறது. அக்டோபர் & டிசம்பரில் இதன் துவக்க பாகங்கள் சரமாரியான கேள்விகளையும் முடிச்சுகளையும் முன்வைத்துச் சென்றிருந்தன ! துவக்கத்தில் மர்மக்கதை / டிடெக்டிவ் த்ரில்லர் போலக் காட்சி தந்து, போகப் போக திகில் + ஹாரர் + கஸ்பென்ஸ் என்று பயணித்து நம்மிடையே ஒரு இனம்புரியா எதிர்பார்ப்பைத் தூண்டி விடுவதில் கதாசிரியர் + ஓவியர் + கலரிங் ஆர்ட்டிஸ்ட்கள் வெற்றி கண்டிருந்தனர் ! இரண்டாவது பாகத்தை எழுதி முடிக்கும் போதே எனக்குள் லேசானதொரு கலக்கம் இருந்தது - இத்தனை முடிச்சுகளையும் போட்ட கதாசிரியர், தொங்கலில் விடாது அத்தனையையும் அவிழ்த்து விடுவாரா ? என்று ! So பாகம் # 3-க்குள் பேனாவை நுழைத்த சமயம் என்ன எதிர்பார்ப்பது என்று தெரியா ஒரு நிலையே எனக்கு ! பக்கங்கள் நகர, நகர கதாசிரியரின் கற்பனைக்களங்கள் விஸ்வரூபமெடுப்பதைப் பார்க்க முடிந்த போது ‘ஆ‘வென வாயைப் பிளக்கத் தான் முடிந்தது ! ஒற்றைப் போடு போடுவதில் - கதையின் முடிச்சுகள் ஒன்று பாக்கியில்லாமல் தீர்வு காண்பதை masterstroke என்று வர்ணிப்பதா ? வேறு விதமாகப் பார்ப்பதா ? என்று புரியவில்லை ! அந்தப் பணியை நீங்கள் கையில் எடுத்துக் கொள்வதே நியாயமாகயிருக்குமென்று நினைக்கிறேன்! ‘ஒரு திரைவிலகும் நேரம்‘- நாம் வாய் பிளக்கும் நேரமும் கூட! இதோ இதன் அட்டைப்பட first look!

இதுவுமே ஒரிஜினல் ராப்பரின் அட்சர சுத்தமான தமிழ் பிரதி மாத்திரமே ! தொடரின் அந்த இருண்ட கதைக்களத்துக்கு அட்டைப்படத்திலிருந்தே ஒரு sober பில்டப் தந்திட படைப்பாளிகள் எண்ணியிருப்பது தெளிவாகப் புரிந்ததால் – ‘ஜிங்கு சாங்‘ என்று ஏதாலது கலர்புல்லான ராப்பரைத் தயாரிக்கும் எண்ணமே எழுந்திடவில்லை ! பின்னட்டை மட்டும் நமது டிசைனர் கோகிலாவின் உருவாக்கம். And இதோ உட்பக்கங்களிலிருந்து ஒரு சின்ன டிரெய்லர் ! 

அதே மாறுபட்ட ஓவியப் பாணி ; மிரட்டலான பார்வைக் கோணங்கள் ; வர்ணச் சேர்க்கைகளில் அட்டகாசம் என்று இந்தத் தொடரில் முத்திரைகள் இம்முறையும் பிரதானமாகக் கண்ணில் படுகின்றன ! இந்த ஒற்றைப் பக்கத்தில் மட்டுமே எத்தனை பார்வைக் கோணங்கள் என்று பாருங்களேன் ! 

• முதல் frame - மேலிருக்கும் ஆசாமியின் பார்வை கீழிருக்கும் விதமாய் !
• Frame # 2 : விளிம்பிலிருப்பவளின் கோணத்திலிருந்து இந்த ஷாட் !
• Frame # 3 : க்ளோஸ் அப் !
• Frame # 4 : தூரத்து ஷாட் - மொத்தமாய் silhouette -ல் !
• Frame # 5 ; 6 & 7 : ஆக்ஷன் சித்திரங்கள் - சுற்றிச் சுற்றி ஒவ்வொரு சைடிலிருந்தும் ! 
• Frame 8 : இன்னமும் அதிரடி செய்யும் ஆசாமியின் முகத்தைக் காட்டாது - ஒரு midsection ஷாட் !!
• கடைசி Frame : இன்னமும் அவனது முகம் மறைவினில் தான் !! 

ஒற்றைப் பக்கத்தின் பின்னணியினில் தான் எத்தனை சிந்தனை ; உழைப்பு !! Phew !! ஒரு வித்தியாசமான ‘மினி தொடர்‘ நினைவுக்கு வருகிறது என்பதால் இந்த ஒட்டுமொத்த ‘ஜேஸன் பிரைஸ் அனுபவத்தை‘ப் பற்றி, தொடரும் வாரங்களில் ஏதேனும் ஒரு வேளையில் ஒரு கலந்துரையாடல் நடத்துவோமா guys? One of these Sundays பகலில் இதனைச் செய்து பார்க்கலாமா ?

Moving on - இம்மாத இரவுக்கழுகாரின் சாகஸமே வரிசையில் இரண்டாவது இடத்தைப் பிடிக்கிறது ! பெயரைப் போலவே இதற்கான ராப்பரும் வித்தியாசமானதென்பேன் ! Here you go – அந்த டிரேட் மார்க் மஞ்சள் சொக்காயின்றி சல்மான்கான் பாணியில் ஆறு பொட்டணமோ ; ஏழு பொட்டணமோ காட்டிக் கொண்டு நிற்பது சாட்சாத் நமது டெக்ஸ் வில்லரே தான் ! இதுவுமே இத்தாலிய ஒரிஜினல் டிசைனே - பின்னணியில் கலர் மாத்திரம் மாற்றப்பட்டு ! பின்னட்டையோ நமது ஓவியரின் கைவண்ணம். முன்னைப் பின்னாகவும், பின்னை முன்னாகவும் தான் ஆரம்பத்தில் திட்டமிட்டிருந்தேன். ஆனால் நம்மவரின் இந்த ‘சண்டையிலே கிழியாத சட்டையும் உண்டா?‘ போஸைப் பின்னுக்குத் தள்ளி விட மனது கேட்கவில்லை ! So முன்நிற்கிறார் ‘தல‘ - முன் எப்போதுமிலாக் கோலத்தில் ! 

கதையைப் பொறுத்தவரை இதுவும் Tex-ன் ‘பொற்காலக் கதைக் குவியலென்ற‘ 1-300 க்குள் இடம்பிடிக்குமொரு சாகஸம் ! In fact இந்த சாகஸம் இதழ்கள் நிர்: 106 & 107 ஆக இத்தாலியில் வெளியானவை. சற்றே பின்னோக்கிப் பயணிக்கும் சமயங்களில் டெக்ஸ் என்ற நாயகரும்; “டெக்ஸ்” என்ற அந்த brand-ம் கூட காலத்தின் ஓட்டத்தில் எவ்விதம் செதுக்கப்பட்டிருக்கிறது என்பது புரியும் ! இன்றைய மௌரோ போசெல்லி யுகத்து டெக்ஸுக்கும், செர்ஜியோ போனெல்லி காலத்து டெக்ஸுக்குமிடையே உள்ள மாற்றங்களுமே நாம் ஏதேனுமொரு பொழுதில் அலசி ஆராய வேண்டியதொரு தலைப்பு என்பேன் ! இதனையும் கூட இன்னொரு ஞாயிறுக்கென திட்டமிடுவோமா folks ?

வரிசையில் மூன்றாவதாக நின்று கொண்டு எட்டி, எட்டி குதிக்க முற்படுவதோ நமது மதியில்லா மந்திரியார்! இவரது கதைகளுக்கு நானொரு தீவிர ரசிகன் ! வழக்கமான காமெடிக் களங்களை நம்பிடாமல் ஒரு மாயாஜால லோகம் போலவொரு பாக்தாத்தை உருவாக்கி அதனில் காமெடிக் கூத்துகளை சரவெடியாய் அவிழ்த்து விடுவதென்பது லேசுப்பட்ட காரியமல்லவென்பேன் ! அதிலும் வார்த்தை விளையாட்டுக்களுக்கு ஏகமாய் முக்கியத்துவம் தந்து, கதைக்குப் பொருந்திப் போவது போல வரிகளை அமைப்பதிலும் கதாசிரியர் சிலம்பாட்டம் ஆடிடுவது வாடிக்கை ! இம்முறையும் அதே நிலவரமே ! ஒரே மாற்றம்- முதல் கதையின் நீளம் ! வழக்கமான 4/6 பக்கக் கதையாக அல்லாது 20 பக்கங்கள் ஓடிடுகிறது ! “என் ராஜ்யமே ஒரு கேரட்டுக்கு” – மனிதனின் பேராசைகளையும், பலவீனங்களையும் புன்னகைக்கும் விதத்தில் சொல்ல முற்படுமொரு முயற்சி ! இதோ அட்டைப்படம் + உட்பக்கமும்!

இதுவுமே ஒரிஜினல் ராப்பரே - பின்னணியை மட்டும் லேசாக மாற்றியமைத்து ! And உட்பக்கங்கள் எப்போதும் போலவொரு கலர்புல் தோரணம் ! “முழு நீளக் கதைகள்” என்ற பெட்ரோமேக்ஸே தான் வேண்டும் என்ற பிடிவாதங்களைக் கொஞ்சமே கொஞ்சமாய்த் தளர்த்திக் கொண்டு ஜாலியாக இந்த பாக்தாத்தினுள் புகுந்தால் - அரை மணி நேரத்திற்காவது உங்கள் முகங்களில் புன்னகைகளுக்கு உத்தரவாதம் என்பேன் !

Last in line- ஆனால் பலருக்கும் ஆதர்ஷத்தில் முதன்மையான மறுபதிப்பு நாயகர்களே தாட்டியமாய் நிற்கின்றனர் ! “CID லாரன்ஸ்” இதழின் அட்டைப்படம் இதோ ! 

இது நமது ஓவியரின் கைவண்ணமே ! ‘பளிச்‘சென்று இருப்பது போல் எனக்குத் தோன்றியது ; உங்களது அபிப்பிராயங்கள் என்னவோ என்றறிய ஆவல் ! 

So இம்மாதத்து நால்வர் அணி- உங்களது பிப்ரவரியினைக் கலர்புல்லாக்கிடத் தயாராகி நிற்கின்றது ! மாதம் பிறக்கும் போது உங்களிடம் தஞ்சமடைந்திடும் - கூரியர் நண்பர்களின் சகாயத்தோடு ! உங்களின் எண்ணங்களை, அபிப்பிராயங்களை, கதைகளை பற்றிய விமர்சனங்களுக்காக - we’ll be waiting !! See you around folks !Bye for now !

P.S: சின்னதொரு வேண்டுகோள் ப்ளீஸ் ?! நமது இதழ்களையும், அவை கிடைக்கும் இடங்களையும் போட்டு  மதுரையில் கேபிள் டி.வி.யில் விளம்பரம்  செய்ய நினைத்து வருகிறோம். அங்கே popular ஆன சேனல் எது ? என்றும் ; அதன் தொலைபேசி நம்பரும் அனுப்பிட முடியுமா guys? ஏற்கனவே கும்பகோணம் நகரில் இந்த முயற்சியை நடத்திப் பார்த்துள்ளோம் - அழகான results சகிதம் ! So சிறுகச் சிறுக ஒவ்வொரு மாவட்டமாய் இந்த முயற்சிகளைக் கையாண்டு பார்க்க நினைக்கிறோம்!  

And இது என்னவென்று யூகித்துச் சொல்லுங்களேன் பார்க்கலாம் ? 

ஒரு விடுமுறை நாளும்..ஒரு காலப் பயணமும் !

நண்பர்களே,

வணக்கம். புத்தாண்டு பிறந்த வேகத்தில் புத்தக விழா ; புத்தக விழா துவங்கிய வேகத்தில் வாசக சந்திப்பு ; வாசக சந்திப்பு தந்த வேகத்தில் XIII-ன் அறிவிப்பு ; அந்த அறிவிப்பின் வேகத்தில் வாசகக் கருத்து மழை என்று இந்த ஜனவரியே "வாயு வேக வாசுவாய்"  அமைந்துவிட்டுள்ளது நமக்கு !! ட்யுராங்கோ அண்ணாச்சியும், ப்ளூகோட் போட்ட பட்டாளங்களும் நம் முன்னே அணிவகுத்தது எல்லாமே ஏதோ ஒரு கி.மு. ; கி.பி. காலத்துச் சமாச்சாரம் போலத் தோன்றுகிறது மண்டைக்குள் ! XIII ஏற்படுத்திய செம களேபரங்களுக்கு மத்தியினில் -  பிப்ரவரி மாதமானது கூப்பிடு தொலைவில் காத்துக் கொண்டிருப்பத்தைச் சுலபமாய் மறந்திருக்கலாம் தான் ; ஆனால் கடந்த நாலைந்து ஆண்டுகளாய் உள்ளுக்குள் குடி புகுந்திருக்கும் அலாரக் கடிகாரம் குய்யோ-முறையோ என்று கூச்சல் போட்டுக் கொண்டே இருப்பதால்  - பிப்ரவரி பணிகள் பிசிறின்றி ஓடிக் கொண்டுள்ளன ! நான்கில் மூன்று தயாராகியும் விட்டன ! இரவுக்  கழுகாரின் இறுதிக்கட்டப் பணிகளும், இம்மாதத்து சந்தா surprise-ம் மாத்திரமே அடுத்த சில நாட்களில் தயாராகிட வேண்டியுள்ளன !! So  31-ல் இங்கிருந்து மொத்தமாய்க் கிளம்பி - முதல் தேதிக்கு உங்கள் ஊர்களில் கதவைத் தட்டிக் கொண்டிருப்பர் - ஜேசன் ப்ரைஸும் ; டெக்ஸும் மந்திரியாரும் ; லாரன்ஸ்-டேவிட் ஜோடியும் !! ஆனால் - இன்றைய பதிவில் அவர்களது ராப்பர்களையும், டீசர்களையும் போட்டு ஒப்பேற்றுவதை விடவும் ஒரு ஜாலியான பின்னோக்கிய பயணத்தினுள் வண்டியை விடவிருக்கிறேன்! தொடரும் ஞாயிறுப் பதிவு - பிப்ரவரி நாயகர்களின் மீது வெளிச்சத்தைப் பாய்ச்சிடும் பதிவென்று வைத்துக் கொள்வோமே ? 

கொஞ்ச காலம் முன்பாய் நமது டவுன் கிட்டங்கியை ஒதுக்கிய போது, ஏராளமாய் பழைய நெகட்டிவ்கள் ; அந்நாட்களில் நமது ஆர்டிஸ்ட்கள் பணி செய்த கதை ஒரிஜினல்கள் ; மங்கிப் போன ஜெராக்ஸ் பிரதிகள் ; எப்பெப்போதோ சேகரித்த புத்தகங்கள் என ஒரு சின்ன மலையே தேறியிருந்தது. அவற்றுள் மேலோட்டமாய் பார்வையை ஓடவிட்டு, சில பல பைல்கள் ; கரையான் விழுங்கியிருக்கா பழைய இதழ்கள் என்று மட்டும் மீட்டு விட்டு, மிச்சத்தைப் பின்னொரு மழைநாளில் கை பார்த்துக் கொள்ளலாம் என்று ஓரம் கட்டி வைத்திருந்தேன் / வைத்திருக்கிறேன். அந்த மழைநாள் இன்னமும் நமக்கு வந்திருக்காவிடினும், லேசானதொரு தூறல் நாள் சமீபமாய் எட்டிப் பார்த்தது ! கிடைத்த அவகாசத்தினில் அந்தப் பழங்குவியலுக்குள் தலை நுழைத்த போது - நமது சட்டித்தலையன் ஆர்ச்சியின் காலப் பயண மிஷினில் ஏறி 1988 -க்கே பயணமானதொரு பீலிங் எனக்கு ! அந்த மாலையின் அனுபவங்களே இந்தப் பதிவின் வித்து ! 

நினைவலை # 1 : 

புரட்டியிருக்கும் இந்த புக்கின் படங்களை கொஞ்சம் கூர்ந்து கவனியுங்களேன் - நமது லயனில் வெளிவந்து ரகளையான ஹிட்டடித்த இந்த சாகசத்தின் பெயர் நினைவுக்கு வருகிறதா ? இன்றைய நம் பயணத்தில் கௌபாய் ரசனைகளுக்கொரு பிரதான இடமிருக்கிறதெனில் -  இந்தப் புத்தகத்திற்கும், இதே போல் என்னிடமிருந்த இன்னுமொரு டஜன் இதழ்களுக்குமே அந்தப் பெருமை சாரும் ! ஏற்கனவே எங்கெங்கோ இதைப் பற்றி எழுதி இருப்பேன் தான் ; ஆனால் எனது பால்யங்களை அழகானதாய் உருமாற்றித் தந்த சமாச்சாரத்தை 40 ஆண்டுகளுக்குப் பின்னே அதே மெருகோடு பார்க்க முடிந்த போது - "ஏழு கழுதை வயசாகிப் போச்சோ நமக்கு ?" என்ற வழுக்கையைத் தடவியதொரு  மெல்லிய ஆதங்கத்தையும் தாண்டி - உள்ளுக்குள் பட்டாம்பூச்சிகளின் நர்த்தனங்களை உணர முடிந்தது ! இந்த இதழை தூக்கி வைத்துக் கொண்டு கௌபாய் டெக்ஸ் வில்லரை கௌ-மேன் ராமராஜனாக்க முனைந்தது மூன்றாம் வகுப்பின் விடுமுறைகளில் போது என்பது நினைவிருக்கிறது ! அப்போது படம் பார்ப்பதிலேயே அப்படியொரு சுவாரஸ்யத்தை எனக்குள் விதைத்த "தல" - ஐந்தாம் வகுப்பிலிருந்து, கழுதை வயசாகும் வரைக்கும்  என் தலைமாட்டில் காவல் கிடந்தவர் என்று சொல்லலாம் ! படிக்க, புரிந்து கொள்ள இயன்ற நாள் முதலாய் என் கற்பனைகளை கணிசமாய்க் குத்தகைக்கு எடுத்துக் கொண்ட கதைகளுள் இதுவும் ஒன்று ! சான் பிரான்சிஸ்கோ நகரில் தலையும் , டீமும் செய்யும் அதிரடிகளை என் தலைக்குள் உருவகப்படுத்திக் கொள்ள முயன்ற ராப்பொழுதுகள் ஒரு வண்டி !  கோக்கு மாக்காய் ஊற்றப்பட்டதொரு ஆம்லெட்டைப் போல உலக வரைபடத்தில் காட்சி தரும் அமெரிக்காவை நான் அடிக்கடித் தேடித் தேடிப் பார்த்துக் கொண்டது சான் பிரான்சிஸ்கோ எங்குள்ளது என்று அறிந்து கொள்ளவே !! அந்த நகரம், அந்தத் துறைமுகம், அங்குள்ள பார்கள், அந்த வீதிகள் ; அங்கே TEX & கோ. உலா வருவது என எல்லாமே மனத்திரையில் ஓடும் !! TOPSELLERS என்ற பிரிட்டிஷ் பதிப்பகம் ஆங்கிலத்தில் வெளியிட்ட அத்தனை  கதைகளும் - பெயருக்கேற்றபடியே - TOPSELLERS தான் !! 

நினைவலை # 2 :

மாயாவியின் சாகசம் என்பது obvious ; ஆனால் இந்தக் கத்தைப் பேப்பர்கள் என்னவென்று தெரியுமோ ? ஜெராக்ஸ் பிரதிகள் என்றதொரு சமாச்சாரமே கண்டுபிடிக்கப்படா காலத்தில் இங்கிலாந்திலிருந்து வந்திடும் ஒரிஜினல் வழு வழு பிரிண்ட்களின் மீதே அச்சிடப்பட்ட தமிழ் வசனங்களை நமது ஓவியர்கள் ஒட்டி, பணியாற்றுவார்கள். அவை பின்னர் நெகட்டிவ்களாக மாற்றப்பட்டு அச்சாகி விடும். இந்த வழு வழு ஒரிஜினல்களோ நாளாசரியாய் சிகப்படிக்கத் துவங்கி விடும் - ஏன் தெரியுமா ? தமிழ் வசனங்களை அந்த ஒரிஜினல்களின் மீது ஒட்டிட நம்மவர்கள் பயன்படுத்துவது பசையல்ல ; மாறாக - சைக்கிள் டயருக்கு பங்ச்சர் ஒட்டிடப் பயனாகும் சிகப்பு நிற ரப்பர்சொலுஷயனை ! வசனங்கள் எதையேனும் தப்பான இடத்தில ஆர்டிஸ்ட்கள் ஓட்டிடும் பட்சத்தில் கூட, சுலபமாய் அவற்றை அப்புறப்படுத்திவிட்டு முடியும் ! பசை ; கம் என்றால் பேப்பர் கிழிந்து விடும் ; ஆனால் இந்த சிகப்பு சொலுஷனில் அந்தத் தலைவலி லேது ! ஒரே சிக்கல் - நாள்பட ஒரிஜினல்கள் செந்நிறமாகி விடும். So பத்திரப்படுத்தும் பொருட்டு - ஒவ்வொரு இதழையும் நியூஸ் பிரிண்டில் அச்சிடும் வேளைகளில், வெள்ளைக் காகிதங்களில் ஒரு 10 ஷீட் மட்டும் சேர்த்துக் கொள்வோம் ! அந்தப் பத்து வெள்ளைத் தாள் பிரிண்ட்களுள் இரண்டு தெளிவான பேப்பர்களை மட்டும் எடுத்து, வெட்டி, பக்கங்களாகி, பத்திரமாய் பண்டல் போட்டு பரணுக்குப் பார்சல் செய்திடுவோம். இவையே எங்களது அந்நாட்களது archiving சிஸ்டம் ! அந்த "வெள்ளைக்" காகிதங்களும் இன்றைக்கு பல்லைக் காட்டும் மஞ்சளாய் மாறிப் போயோ ; ஒடிந்து விழும் ரஸ்க் துண்டுகள் போலவோ உருமாற்றம் கொண்டிருப்பது கால ஓட்டத்தின் கோலம் ! இது எஞ்சியுள்ளதொரு மாயாவியின் ஒரிஜினல் !! 

இங்கே ஒரு கொசுறுக் கிளைச் செய்தியும் கூட !! இந்த சிகப்பு ரப்பர் சொல்யூஷனுக்கு ஒரு சமயத்தில் தட்டுப்பாடும் தலைகாட்டியது !! விட்டேனா பார் - என்று சுத்துப்பட்டு ஊர்களுக்கெல்லாம் ஆட்களை அனுப்பி ஒரு 100 டியூப்களையாவது   வாங்கிப்   பதுக்கியிருப்பேன்  ! ஆர்டிஸ்ட்கள் வந்து "புது டியூப் வேணும் அண்ணாச்சி" - என்று நின்றால், பிதுக்கி எடுக்கப்பட்ட பழசை என்னிடம் முதலில் ஒப்படைத்தாக வேண்டும் !! ஆனாலும் இந்த சுடலைமுத்து அன்னிக்கே ரெம்போ ஸ்ட்ரிக்ட் !! அக்காங் !! 

நினைவலை # 3 :

இதைக் கொண்டு ஒரு முழுப் பதிவே போட்டுத் தாக்கியுள்ளதால் - புதுசாய் சொல்ல ஏதுமில்லை என்னிடம் ! இங்கே புத்தம் புதுசாய் இருப்பது இந்த இதழ் மட்டுமே !! புரட்டக்கூடப் படாது, அப்படியே பத்திரமாய், அட்டகாசமாய் இதழ் இருப்பதை பார்த்து அசந்தே போனேன் ! நாடோடி ரெமி !! இன்னமும் புத்தம்  புதுசாய் !!

நினைவலை # 4 :

BRUCE LEE காமிக்ஸ் தொடரின் மங்கிப் போன இந்த ஜெராக்ஸைப்  பார்த்த போது என்னையும் அறியாது கிக்கி-பிக்கி என்ற சிரிப்பைத் தவிர்க்க இயலவில்லை !  1981 / 82-ல் முத்து காமிக்ஸ் வாரமலர் என்ற விஷப்பரீட்சை அரங்கேறிய நாட்கள் நினைவுக்கு வந்தன ! எந்தப் புதுக் கதையோ, தொடரோ தபாலில் வந்து சேர்ந்தால், அதனை முதலில் படிக்கும் ஆசாமி நானே ! முத்து காமிக்சில் வெளியான முக்காலே மூன்று வீசம் ரிப் கிர்பி ; காரிகன் ; வேதாளம் ; மாண்ட்ரேக் கதைகளையெல்லாம் நான் படிக்காது மொழிபெயர்ப்புக்கே போனதாய் சரித்திரம் இருந்திராது. அப்படியிருக்கையில் திடுமென மறுபிரவேசம் செய்திருந்த திருவாளர் மு.த. வாரமலரில் ஏதேனும் புதுசாய்க் கதையினைப் போட வேண்டுமென்ற ஆர்வத்தில் - டில்லியிலிருந்து BRUCE LEE கதை ஒன்றை வாங்கிட சீனியரை நச்சரித்து காரியம் சாதித்திருந்தார். "ப்ரூஸ் லீ மேனியா" உச்சத்திலிருந்த நாட்களவை என்பதால் சீனியரும் தலையாட்டி இருந்திருக்க வேண்டும் !   கதையும் வந்து விட்டிருந்தது போலும் ; ஆனால் என் கண்ணில் அதைக் காட்டிடக்  கூடாதென்று திருவாளர் முனா.தனா சொல்லியிருந்திருக்கிறார் பணியாளர்களிடம். So சத்தமில்லாது அதனில் கலர் செய்யும் பணிகள் ; பிராசசிங் எல்லாமே நடந்து இதழை அச்சில் பார்க்க முடிந்த போதே இப்படியொரு சமாச்சாரம் அரங்கேறி இருப்பது எனக்குத் தெரிய வந்தது ! இந்தக் கூத்துக்களெல்லாம் நடப்பதற்கு ஓராண்டுக்கு முன்னரே "டிங்-டாங்" என்றதொரு இதழின் பொருட்டு நான் கதைகள் ; காமிக்ஸ் தொடர்கதைகள் என்றெல்லாம் சேகரித்து வைத்திருந்தேன் ! (அப்போது சிக்கியவர் தான் பின்னாட்களில் லயனில் வெளிவந்த ஈகில்மேன் !) "அட...நம் கண்ணில் இந்த ப்ரூஸ் லீ காமிக்ஸ் தட்டுப்படாது போச்சே ?!" என்ற ஆதங்கம் எனக்குள் சத்தமில்லாமல் குடியேறியது ! அந்த "டிங்-டாங்" முயற்சிக்கு டமால்-டுமீல்  காட்டி விட்டுத் தான் வாரமலர் அரங்கேறி இருந்தது என்பதால் செம கடுப்பில் இருந்த எனக்கு இந்த "ப்ரூஸ் லீ கிட்டாமை" வேறு  எரிச்சலைப் பன்மடங்காக்கியிருந்தது ! ஆனால் கதையைப் படிக்க ஆரம்பித்த போது - எனக்குள் எழுந்தது பாருங்களேன் ஒரு உற்சாகம் - சுரண்டல் லாட்டரியில் முதல் சீட்டிலேயே ஜாக்பாட் விழுந்ததைப் போல ! கதை சொல்லி மாளா மொக்கையாக இருந்தது ! நிறைய வசனங்கள் ; ப்ரூஸ் லீயின் முத்திரையான ஆக்ஷனுக்கு பெரியதொரு முக்கியத்துவமும் இல்லை ; சித்திரங்களும் சுமாரே ! முதல் பாகத்தைப் படித்த போதே - "இது நிச்சயமாய் தேறாது !" என்று எனக்குள் ஒரு gut feel ! இந்தச் சமாச்சாரத்தைத் தான் என் கண்ணில் கூடக் காட்டக் கூடாதென்று பதுக்கிப் பாதுகாத்தீர்களாக்கும் சாமிகளா ? Enjoy !! என்றபடிக்கு சந்தோஷமாய்க் கிளம்பினேன் ! எதிர்பார்த்தபடிக்கே 'சவ சவ' வேகத்திலேயே தொடர்ந்த பாகங்களும் நகர்ந்திட, ஒவ்வொரு இதழ் வெளியாகும் வேளையிலும் எனக்கு கார்ட்டூன் பார்த்தது போலொரு பீலிங்கு ! இத்னை அந்நாட்களில் மொழிபெயர்த்த முத்து காமிக்சின் மேனேஜர் பாலசுப்ரமணியம் கதையை நொந்து கொண்டே வேலை செய்வார் ! 35 ஆண்டுகளுக்கு முந்தைய அந்த நாட்களை நினைவுக்கு கொணர்ந்த பக்கமிது ! 

நினைவலை # 5 : 

And இதோ - திட்டமிடலின்றித் துவங்கி, திடுமென்று மரித்தும் போன அந்த இதழின் ஒரு பிரதி(நிதி) ! Conceptwise இதுவொரு பிரமாதமான முயற்சியே ! ஆனால் தேர்வான கதைகளிலிருந்து ; தயாரிப்பு ; விநியோகம் ; முதலீட்டு ஆற்றல் என எங்குமே மருந்துக்கு கூடத் திட்டமிடல் இல்லையென்பதால்  21 இதழ்களோடு தட்டுத் தடுமாறி காலாவதியாகிப் போனதில் ஆச்சர்யமில்லை தான் ! இதைப் போலொரு முயற்சியினை நல்ல திட்டமிடலோடு ; உருப்படியான கதைகளோடு வெளியிட வேண்டுமென்பது எனது நெடுநாள்க் கனவு ; ஆனால் வாசிப்புக் களங்கள் ஏகமாய் மாற்றம் கண்டுவிட்ட இந்நாளில் இதுவொரு non -starter என்பது அப்பட்டம் !!  

இந்த முயற்சியில் எனக்கு ரொம்பவே பிடித்ததொரு விஷயம் இருந்ததெனில் - அது நமது ஓவியர் உருவாக்கிய அந்த ஸ்டாம்ப் வடிவிலான லோகோ தான் ! அதுவும், அந்த "வாரமலர்" என்ற எழுத்துக்களும் "நாளெல்லாம் ரசிக்கலாம்" ரகம் !! 

நினைவலை # 6 :

பொறுமையாய்ப் படித்துப் பாருங்களேன் - இது என்னவாக இருக்குமென்று புரிகிறதாவென்று ?  Yes - எண்பதுகளில் நாம் வெளியிட்ட ஏதோவொரு டெக்ஸ் கதையின் ஆங்கில மொழிபெயர்ப்பு இது !! TOPSELLERS ஆங்கிலத்தில் வெளியிட்ட டெக்ஸ் கதைகளையாய் ஆரம்பத்தில் வாங்கி, தமிழில் வெளியிட்டு வந்தவரைக்கும் இத்தாலிய மொழிபெயர்ப்புக்கு அவசியம் தெரிந்திடவில்லை ! ஆனால் ஒருகட்டத்தில் வண்டி மேற்கொண்டு ஓடிட வேண்டுமெனில் - இங்கொரு இத்தாலிய மொழி அறிந்தவரைப் பிடித்தாக வேண்டும் என்ற சூழல் எழுந்தது ! அப்போதெல்லாம் தேடல்களுக்கு கூகுள் ஆண்டவர் லேது ; இன்டர்நெட் நஹி ; so நியூஸ்பேப்பர் விளம்பரம் ; இத்தாலியத் தூதரகத்தில் விசாரிப்பு என்றே தேடலைத் தொடங்கினோம். அவ்விதம் கிட்டியதொரு துப்பு - சென்னையில் வசிக்குமொரு பெண்மணி இத்தாலிய மொழியில் பெரும் புலமை கொண்டவர் என்ற தகவலைச் சொல்லியது. நேரில் சந்தித்துக் கேட்டுப் பார்க்கலாமென சீனியர் முயற்சித்த போது தான் புரிந்தது - அந்தப் பெண்மணி சென்னையின் ஒரு பிரம்மாண்டத் தொழில் குழுமத் தலைவரின் இல்லத்தரசி என்பது !! அவர்களது சென்னை வீடே ஒரு குட்டி அரண்மனை போன்றது !! இவர்களிடம் சென்று - நமது மாமூலான பஞ்சப் பட்டைப் பாடுவது எவ்விதம் ? பெண்டைக் கழற்றக் கூடிய இந்தப் பணிகளை செய்யக் கோருவது எவ்விதம் ? என்ற தயக்கம் தலைக்காட்டியது ! ஆனால் ஆங்காங்கே ஆண்டவன் நம் சார்பில் ஆஜராகி விடுவாரோ - என்னவோ ; மகிழ்ச்சியோடு சம்மதித்தார்கள் !! "இதுவொரு வித்தியாசமான, சவாலான முயற்சியாகத் தோன்றுகிறது ; நிச்சயம் செய்து தருகிறேன்" என்று ஒப்புக் கொண்டவர் - கிட்டத்தட்ட 20 இத்தாலிய கதைகளை நமக்கு மொழிபெயர்த்துத் தந்திருப்பார் !! "பேப்பரில், கட்டங்களுக்கு நம்பர் போட்டுவிட்டு மொழிபெயர்த்தால் போதும் மேடம்!" என்று சொன்னாலும், ஒவ்வொரு கதைக்கும் இதைப் போலொரு நோட்டை வாங்கி, ஒவ்வொரு பக்கத்தின் படங்களுக்கேற்ப கட்டங்களை வரைந்து - அதனுள் வசனங்களை ஆங்கிலத்தில் எழுதித் தருவார் ! கூச்சப்பட்டுக் கொண்டே நம்மால் இயன்ற சன்மானத்தை நாம் வழங்கிடும் போது புன்னகை மாறாது அதனை ஏற்றுக் கொண்டவர் அந்தக் கோடிகளின் அதிபதி !! கடவுள் இருக்கார் குமாரு !! அவரும் நிச்சயமொரு காமிக்ஸ் காதலர் குமாரு !! என்று தான் தோன்றுகிறது - அந்நாட்களை நினைக்கும் போது ! Phew !!

இன்னமும் கொஞ்சம் "மலரும் நினைவலைகள்" ஸ்டாக்கில்   உள்ளன ; ஆனால் இன்னுமொரு நாளின் பதிவுக்கென அவற்றை சேமித்துக் கொள்கிறேனே ?

குடியரசு தின வாழ்த்துக்கள் all !! மீண்டும் சந்திப்போம் !! 

18....6...3...1...XIII !

நண்பர்களே,
         
வணக்கம். வரலாற்றில் ஒரு கல்வெட்டுத் தருணத்தின் மத்தியில் நாமிப்போது பயணிக்கிறோம் என்ற உணர்வை நிச்சயமாய் மட்டுப்படுத்திட முடியவில்லை ! சமூகவலைத் தளங்களும், அவற்றின் ஆக்கபூர்வப் பலன்களும் ஒருசேர சமுதாயத்தை அரவணைக்கும் போது ஒவ்வொரு சாமான்யனுமே போராளியாய் உருப்பெறும் விந்தைகளை இந்த வாரம் முழுவதுமே நமக்கு வெளிச்சம் போட்டுக் காட்டியுள்ளது ! ட்யுராங்கோவிற்குப் பொருந்தியதோ இல்லையோ- ஆனால் 'சத்தமின்றி யுத்தம் செய்யும் ஆற்றல்' நமது இளைய சமுதாயத்திடம் அபரிமிதமாய் உள்ளதை தேசமே லயித்து, ரசித்து வருகிறது என்பேன் ! இந்த எழுச்சியில் நம் நண்பர்களில் சிலரும் கலந்து கொண்டதை ஃபோட்டோக்களில் பார்க்க முடிந்த போது - நிறைவாக இருந்தது!

சுனாமிக்கு நிகரான எழுச்சியினை  சமூகம் கண்டு வரும் வேளைதனில் - நமது பதிவினிலும் ஒரு மினி வாசக விஸ்வரூபம் அரங்கேறியுள்ளதெனலாம் ! எத்தனை பேர் கவனித்தீர்களோ தெரியவில்லை; ஆனால் 376 பின்னூட்டங்களைத் தாங்கி நிற்கும் சமீபப் பதிவினில் கருத்துச் சொல்லவும், active ஆகப் பங்கேற்கவும் நேரம் ஒதுக்கியுள்ளது மொத்தம் 80 நண்பர்கள் ! சமீபமாய் வேறெந்தப் பதிவுக்கும் இத்தனை மௌனங்கள் கலைந்ததாக எனக்கு நினைவில்லை ! நினைவைத் தொலைத்து விட்டு; சலனமின்றி நிற்கும் ஒரு மௌன மனிதனுக்கோசரம் இத்தனை குரல்கள் என்பதே ஒரு சாதனை என்று படுகிறது ! And இது முகஸ்துதியின் பொருட்டு எழுதப்பட்ட  சம்பிரதாய வார்த்தைகளல்ல guys - உங்கள் ஒவ்வொருவரின் எண்ணப் பகிரல்களுமே பற்பல புதுப்பரிமாணங்களை எனக்கு அறிமுகம் செய்து தருகின்றன ! ஒவ்வொரு புத்தகவிழாவிலும் ‘நான் தவறாமல் பதிவுகளை... பின்னனூட்டங்களை follow செய்கிறேன் சார்!‘ என்று சொல்லிச் செல்லும், மௌன வாசகர்களும் சிறுகச் சிறுகக் கலந்துரையாடலில் ஒரு அங்கமாகிடின் - நம் பாதையும், பயணமும் ஜெகஜோதியாகிடாதா?

“சரி... பில்டப்பெல்லாம் சரி ! அவசரச்  சட்டம போட்டாச்சா ? ஒப்புதல் வாங்கியாச்சா ?” என்ற ரீதியில் 'புஷ்டியணியும்' , 'புல்தடுக்கிப் பயில்வான்' அணியும் காத்திருப்பது புரிகிறது ! சிலபல நாட்களுக்கு முன்பாகவே இது பற்றிய எனது தீர்மானத்தை நான் எடுத்து விட்டேன் என்ற போதிலும்- “படைப்பாளிகள்” என்ற உச்ச அதிகாரம் கொண்டோரின் இசைவுக்காக வெயிட்டிங் ! அவர்கள் தற்போது இரு முக்கிய சர்வதேச புத்தகவிழாக்களின் பொருட்டு பிசியாக இருப்பதால் பதில் கிட்ட தாராளமாய் ஒரு மாதத்துக்கும் மேலாக எடுக்கும் ! கதாசிரியர் வான் ஹாம்மே முதல் ஓவியர் வான்ஸ் வரையிலும் நமது திட்டமிடல் பயணமாகி அவர்களது சம்மதங்களும் கிடைத்திட வேண்டும் - இத்தனை பெரிய project எனும் போது ! “பேச்சைக் குறைக்க மாட்டேன்கிறானே...!” என்ற மெல்லிய கடுப்ஸ் உங்களுக்குள் குடியேறும் முன்பாகத் திரையை விலக்கி விடுகிறேனே - எனது thought process-ன் மீதாக ?

Please note guys: இது நுமது வரைபடம் மாத்திரமே ! இதன் மீதான இறுதித் தீர்மானம் படைப்பாளிகளின் கைகளில் என்பதால் ஏதேனும் மாற்றங்களுக்கும் வாய்ப்புண்டு ! And இந்த முயற்சியானது கிட்டத்தட்ட 1½ ஆண்டுகள் கழித்தே நனவாகும் ரகம் என்பதால் - விலைகள் பற்றிய அறிவிப்பினை முன்பதிவு துவங்கிடும் வேளையிலேயே என்னால் பகிர்ந்திட முடியும் ! So இப்போதைக்கு இது இதழின் தயாரிப்புத் திட்டங்கள் பற்றி மாத்திரமே !

18 பாகங்களாய்; 6 பாகங்களாய்; 3 பாகங்களாய்; ஒரே பாகமாய் - என இந்த இதழுக்கான சாத்தியங்கள் மொத்தமும் நான்காக நம் முன்னே நின்றன ! ஒவ்வொன்றுக்கும் நிறைகளும், குறைகளும் நிறையவே கண்ணில் பட்டன ! ஆனால் அவற்றையும் மீறி இதனில் எனக்குப் புலப்பட்டது உங்கள் ஒவ்வொருவரின் உத்வேகங்களே ! ஒரு லேண்ட்மார்க் இதழ் மாத்திரமின்றி - இரத்தப் படலமே நமது மறுபதிப்புக் கோரிக்கைகளுள் இறுதி மெகா பிராஜெக்டாக இருந்திட இயலுமென்பதாக புரிந்து கொள்ள முடிந்தது ! மாயாவி, ஸ்பைடர், இத்தியாதிகள் திகட்டத் திகட்ட மறுபதிப்பாகிக் கொண்டிருக்க; டெக்ஸின் classics; லக்கி க்ளாசிக்ஸ்; சிக்பில் ஸ்பெஷல்ஸ் போன்றவையும் உண்ணும்விரதங்களுக்கு அவசியமின்றியே வெளிவந்து கொண்டிருக்க ; ‘இரத்தக் கோட்டையும்‘ உறுதி என்றாகியிருக்க – எஞ்சிடக் கூடியது ‘வேதாளன் எப்போது?‘; ‘ஆர்ச்சி எப்போது?‘; ‘ஜான் மாஸ்டர் உண்டா?‘ என்ற ரீதியிலான கோரிக்கைகளாகத் தானே இருந்திட முடியும் ? அவற்றை உரிய வேளைகள் புலரும் போது சிறுகச் சிறுக கையாண்டு கொள்ளலாமென்ற உறுதி உள்ளதால் - இரத்தப் படலமே மறுபதிப்புப் பேராளிகளின் இறுதி சாம்ராஜ்ய வேட்கையாக இருந்திட முடியும் என்பதை உணர்ந்த போது - ஒவ்வொருவரது கோரிக்கையுமே அந்தளவிற்கு முக்கியமாய்த் தோன்றத் தொடங்கின எனக்கு ! So - ஏதேனும் ஒரு முடிவை என்னளவில் எடுத்துக் கொண்டு - அதற்கு இசைவு சொல்லும் பின்னூட்டங்களைத் தேடிடாது – ஒவ்வொரு பாதையையுமே சாவகாசமாய் பரிசீலனை செய்து பார்க்கத் தொடங்கினேன் ! நண்பர்கள் இங்கும், அங்குமாய் ஊசலாடிக் கொண்டிருந்தாலும் அவர்களுள் இந்தக் ‘கனவு இதழ்‘ ஒரு மறக்க இயலா நினைவாய் உருப்பெற்றிட வேண்டுமே என்ற படபடப்பு நிறையவே தெரிந்தது ! Of course- “பதின்மூன்றாம் நம்பர் ஆணியே பிடுங்க வேண்டாமே ?” என்ற குரல்களும் என் கவனத்தைத் தப்பவில்லை ; ஆனால் 95% க்கு முன்னே 5% என்ற விகிதாச்சாரம் கெலிக்க வாய்ப்பேது ?

"மாதம் ஒரு இதழ்- 18 மாதங்களுக்கு; அல்லது 18 பாகங்கள்- தனித்தனியாய், ஒற்றை ஆண்டுக்குள் நிறைவு பெறுவதாக" என்ற proposal தான் என்னளவில் மிக மிகச் சுலபமாய்த் தென்பட்டது ! வழக்கமான பணிகளோடு ஒரு 48 பக்க இதழை இணைத்துக் கொள்வதென்பது பஞ்சுமிட்டாய் சாப்பிடும் சுலபப் பணி என்பதால் இதனில் என் ஆந்தை விழிகள் சற்றே அழுந்தவே பதிந்தன தான் ! விலையும் கட்டுக்குள் இருந்திடும் என்ற ப்ளஸ் பளிச்சிடவும் செய்தது ! ஆனால் சில அனுபவப் பாடங்கள் இந்தப் பயணப் பாதைக்கு சிகப்புக் கொடி காட்டின ! எல்லா முயற்சிகளுமே ஆரம்பம் காணும் போது கரகோஷங்களோடு துவங்கினாலும், நாட்கள் செல்லச் செல்ல அவற்றின் மீதான ஈர்ப்பு ATM-களின் கையிருப்புகளைப் போல வற்றிப் போவது நாம் பார்த்து வரும் சமாச்சாரம் ! Fleetway மறுபதிப்புகளில் ஆரம்பித்து; “என் பெயர் டைகர்”; ‘Super 6” முன்பதிவுகளில் என இந்த blowing hot & cold பாங்கை நாம் பார்த்திடத் தான் செய்கிறோம். So துவக்க இதழ்கள் ‘பர பர‘வென்று விற்பனையாகி விட்டாலும், நடுவில் ஒரு தொய்வு தொற்றிக் கொள்ளும் பட்சத்தில், வண்டியை ‘தட்டுத் தடுமாறித் தான் எல்லை சேர்க்க வேண்டி வரும் என்ற பயம் தலைகாட்டியது. அடுத்ததாக நெருடியது ‘நடுவிலே சில இதழ்களைக் காணோம்‘ syndrome ! 18 பாகங்கள் என்ற தொடர் சங்கிலியின் இடையே சிற்சிறு கண்ணிகள் காணாது போயின் - மொத்தமுமே பேய்முழி முழித்த பாடாகி விடும் என்பது நிதர்சனம். புத்தக விழாக்களிலோ / ஆன்லைன் ஸ்டோரிலோ இடைப்பட்ட சில பாகங்கள் கூடுதலாய் விற்றுப் போய் விட்டால்- தலைப்பகுதியும், வால்பகுதியும் தத்தளித்த நிலையாகிப் போகும்! முன்னர் ‘கார்சனின் கடந்த காலம்‘ இரு பாகங்களாய், வெளியாகி கையில் கிடந்த வேளையில், பாகம் 2 முந்திக் கொண்டு தீர்ந்து போனது! க்ளைமேக்ஸ் பாகமின்றி ஆரம்பத்தை மட்டும் கையிருப்பில் வைத்துக் கொண்டு தடுமாறிய பிழைப்பு XIII ன் கதையிலும் தொடர வேண்டாமே என்று பட்டது! காரணம் # 3 – சமீப புத்தக விழாக்களில் காண முடிந்த sales pattern! “18 இதழ்கள் சேர்ந்து ஒரு கதையாகிடும்” என்று கைநிறைய இதழ்களை அள்ளித் தந்தால் அதனில் மிரட்சியடையும் பாணியே அதிகமிருக்குமென்பது நம்மவர்கள் சொல்லும் விற்பனைப் புள்ளி விபரம்! அதே வேளையில் அந்த உதிரி இதழ்கள் சில பல தொகுப்புகளாய் அமைந்திடும் பட்சத்தில் - அந்த விற்பனை பாணியே மாறிப் போகிறது! Last but not the least – ஒரு மறு மறு பதிப்பை- புதியவர்கள் ஆதரிப்பார்கள்; ஆராதிப்பார்கள் என்ற நம்பிக்கையானது – “இருப்பதை மறந்து- பறப்பதைப் பிடிக்க முனைவது போலாகும்” என்று அழுத்தமாய் மனதில் பட்டது! இந்த வண்ண மறு மறுபதிப்பை படித்தாலும் சரி; சேகரித்தாலும் சரி- அதற்கென இத்தனை உத்வேகம் காட்ட நம்மவர்கள் தயாராகக் காத்திருக்கும் போது - முதல் மரியாதை வேறு எங்கு முறையாகிடும்? என்ற கேள்வி எழுந்த போது பதிலில்லை எனக்குள்! May be ரூ.100 / ரூ.120 என்ற விலை வைத்து ஒவ்வொரு சிங்கிள் ஆல்பத்துக்குமே hard cover போட்டு- ஒட்டுமொத்தமாய் 18 பாகங்ககளை அடக்கிக் கொள்ளவொரு slipcase-ம் தந்திடலாம் தான்; ஆனால் ஆர்வங்களை மாத்திரமின்றி - எங்களது தயாரிப்புத் தரங்களையும் over a period of 18 months & 18 books 18 துளியும் ஏற்ற இறக்கமின்றித் தக்க வைப்பது இமாலயச் சிரமம் என்ற யதார்த்தம் புரிந்தது ! So இந்த option க்கு ‘NO’ போட்டேன்!

தொடர்ந்தது 3 பாகங்கள் வீதம் மொத்தம் 6 ஆல்பங்கள் என்ற வரைவு! இங்கே அந்த 6 தனித்தனி ஆல்பங்களை இடைவெளி விட்டு வெளியிடுவதா ? - அல்லது ஏக் தம்மில் மொத்தத்தையும் ரிலீஸ் செய்வதா ? எது சுகப்படும் ? என்ற கேள்வி எழுந்தது! ஒற்றை ஆல்பங்களின் கதையில் நான் முன்வைத்த பற்பல வாதங்கள் இதனையுமே பிரித்து வெளியிடும் பட்சத்தில் சந்திக்க வேண்டி வருமென்பது புரிந்தது! So - எத்தனை பாகமாய்ப் போட்டாலும் சரி, அவற்றை ஏக காலத்தில் வெளியிடுவதே தீர்வு என்பதை அழுத்தமாய் எனக்குள் சொல்லிக் கொண்டேன்! அந்தத் தெளிவோடு இந்த 6 ஆல்பங்கள் கொண்ட செட் என்ற வரைவைப் பார்வையிட்ட போது- நிறைகளே நிறையத் தெரிந்தன! இந்தத் தொடரை படைப்பாளிகளே இதே போலவே மும்மூன்று கதைகள் இணைந்த Integral இதழ்களாகவே வெளியிட்டு வந்திருப்பது நினைவுக்கு வந்தது! 6 அட்டைப்படங்கள்; அவ்வப்போது எடுத்துப் படிக்க வசதியாக அதிக எடையின்றி இருக்கும் இதழ்கள் என்று மேற்கொண்டும் posiives மனதி்ல் நிழலாடின! நான் மல்லாக்கப் படுத்துக் கொண்டே விட்டத்தை வெறிக்க வெறிக்க பார்த்துக் கொண்டு “பதினெட்டு... ஆறு... மூணு... ஒன்ணு... பதிமூன்று” என்று பெனாத்திக் கொண்டிருப்பதைக் கவனித்த ஜுனியர் எடிட்டர்- உச்சந்தலையில் தேய்த்து விட சிலபல எலுமிச்சைகளை வாங்கிக் கொண்டு வந்த கையோடு பேச்சுக் கொடுத்தார். உரக்கப் பேசி, மனதிலுள்ள சந்தேகங்களை எழுப்பிடும் போது- வெளியிலிருந்து விடைகள் கிடைக்கின்றனவோ; இல்லையோ- உள்ளுக்குள்ளேயே ஒரு தெளிவு கிட்டுவதை அந்த நொடியில் உணர முடிந்தது! பொதுவாக எனது தீர்மானங்களுக்குள் ஜு.எ. தலையையோ; மூக்கையோ நுழைப்பதில்லை! ஆனால் அப்பனின் சொற்பக் கேசமும் நட்டுக்குத்தி நிற்பதைப் பார்க்கும் சராசரிப் பிள்ளையின் ஆதங்கத்தோடு ஜு.எ. தனது யோசனைகளையும் சொல்ல முன்வந்த போது, அவருமே அந்த “6 ஆல்பங்கள்- 3 கதைகள் வீதமாய்; ஒரே சமயத்தில் ரிலீஸ்” என்ற கட்சியில் இருப்பது புரிந்தது! அது மட்டுமில்லாது- இந்த 6 ஆல்பங்களையும் அடுக்கிப் பத்திரப்படுத்த ஒரு அயல்நாட்டு மாதிரியையும் காட்டிய போது என் மண்டைக்குள் LED பல்புகள் எரிந்தது போலொரு பிரகாசம்! “ரைட்டு... இந்த option திறந்த நிலையிலேயே இருக்கட்டும்; அடுத்த இரண்டையும் பரிசீலித்து விட்டுத் தீர்மானிப்போம்” என்று அடுத்த மகாச்சிந்தனைக்குள் தாவினேன்!

“ஒவ்வொரு ஆல்பத்திலும் 6 பாகங்கள்; மொத்தம் 3 ஆல்பங்கள்! And ஏக காலத்தில் மூன்றுமே ரிலீஸ்” என்றது தான் அந்த அடுத்த பயணப் பாதை! “இது தான் தேவலை” என்று அடியேன் துவக்கத்தில் மனதில் fix செய்திருந்தது இந்த ரூட்டைத் தான் என்றபோது- இதன் நிறைகளைத் தேடுவதை விடக் குறைகள் என்னவாக இருக்குமென்றே மனம் பரபரத்தது! ஆறு பாகங்கள் ஒரே ஆல்பத்தில் எனும் போது- இதுவும் கூட எடையில் சற்றே ஜாஸ்தி என்ற ரகமாகவே அமையுமோ? என்ற கேள்வி மனதில் எழுந்தது! அதே போல- XIII போன்ற heavy ஆன கதையினில் ஒரே மூச்சில் 6 பாகங்களை வாசிப்பது ஸ்டீல்க்ளா போலவோ, பழனிவேல் போலவோ XIII-ன் அதிதீவிர பக்தர்களுக்குச் சாத்தியமாகிடலாம்- ஆனால் நம் போன்ற சாமான்யர்களுக்கு அது சற்றே ஓவராக இருக்குமோ? என்ற கேள்வி உறுத்திக் கொண்டேயிருந்தது! எடையும் ஒன்றே முக்கால் கிலோவைத் தொட்டிருக்கும் எனும் போது- பயணங்களுக்குத் துணையாகிட இது அத்தனை சுகப்படாது என்று தோன்றத் தொடங்கியது! So- மகத்தான குறைகளின்றிப் போனாலுமே இந்த option பக்கமாய் தலையசைக்க தயக்கமே மேலோங்கியது! ஆக இறுதி ஜம்ப்; ஏக் தம்; ஏக் இதழ்!‘ என்ற ஃபார்முலாப் பக்கமாய்!

'பிடாரியாயக் கனக்கும்; தூக்கித் திரியும் போது புஜம் கழன்று போகும்; படுத்துக் கொண்டு படித்தால் தொப்பை தெறித்துப் போகும்; இதழின் விலையை மனையாள் தற்செயலாய்க் கவனித்தால் 108 ஆம்புலன்ஸிற்க்குத் தேவை ஏற்படும்; ‘படிக்க‘ என்பதை விட- பார்த்துப் பரவசப்பட என்பதற்கே இது சரிப்படும்! என்று வரிசையாய் நெகடிவ்கள் கோரஸாய்ப் கைதூக்கி நிற்பது புரிந்தது! ஆனால் அவை சகலத்தையும் சகட்டுமேனிக்கு வீழ்த்தி விட்டு முன்நின்றது அந்த பிரம்மாண்ட factor மாத்திரமே! "உலகிலேயே யாரும் செய்திருக்கா முயற்சி; ஆயிரம் பேரே நம் ஆட்பலமென்றாலும் ஆற்றலில் அசுரர்களுக்குச் சளைத்தவர்களல்ல நாம் !" என்ற இறுமாப்பினை இந்த “ஒரே இதழ் 18 ஆல்பங்கள்” என்ற தீர்மானம் தந்திடுமென்று தெள்ளத் தெளிவாய்ப் புலனானது! பைண்டிங்கில் பிழைகளுக்கு நிறைய சாத்தியங்கள்; கூரியரில் இவற்றை அனுப்பிட நாக்குத் தொங்கிப் போய் விடும் என்று தயாரிப்பின் சிரமங்களும் சைரன் ஒலியெழுப்பின தான்! ஆனால் உங்கள் கனவுகளை நனவாக்கிப் பார்க்கும் இத்தகைய பிரம்மாண்டமான வாய்ப்பு, எனது career-ல் இனியொரு முறை எழுமா? என்பது சந்தேகமே என்ற நிலையில்- முட்டித் தான் பார்ப்போமே? என்ற உந்துதல் உரம் கொண்டது!

ஆக 4 பாதைகளில்- இரண்டை ‘ஊஹும்‘ என்று நிராகரித்தான பின்னே எஞ்சி நின்றன:

- 6 ஆல்பம்பங்கள்- ஒவ்வொன்றிலும் 3 கதைகள் என்ற அமைப்பில்!
            (OR)
- ஒரே ராட்சஸ ஆல்பம் – 18 பாகங்களையும் இணைத்துக் கொண்டு!

இரண்டிலும் நிறையவே நிறைகள்; நிறையவே வாசக அபிமானம் தென்பட்டன எனும் போது விஞ்ஞானபூர்வமான ‘இன்க்கி... பின்க்கி... பாங்க்கி...‘ வழிமுறையைக் கையிலெடுக்க மனம் ஒப்பவில்லை! ஆறு ஆல்பங்களாகப் பிரிக்கும் போது, ஒவ்வொன்றின் individual விலைகளும் ஓரளவுக்கு ஓ.கே.வாகத் தெரியுமென்பதால்- பற்பல இல்லங்களில் சிலபல பூரிக்கட்டைகள் காங்கோக்களாய் உருமாற்றம் காண அவசியமின்றிப் போகலாம் என்ற யதார்த்தம் பளீரிட்டது! ஆனால் ஏதேனும் ஒரு பக்கமாய்த் தலையசைத்து, இதர நண்பர்களின் வருத்தங்களைச் சம்பாதிப்பதை விடவும், சிரமங்களை சிரத்தில் ஏற்றிக் கொண்டாவது- இரண்டுக்குமே thumbsup தந்தாலென்னவென்று தோன்றியது! “கட்டை விரலை விரயம் செய்வானேன்?” என்ற சிந்தனை உதயமான கணவே- “ஆனது ஆகட்டும்! இரண்டு குதிரைகளிலுமே இம்முறை சவாரி செய்திடுவோம் ! 6 ஆல்பங்களா? ஒரே இதழா? அல்லது இரண்டுமேவா? எதை வாங்குவது ? என்ற தீர்மானத்தை முன்பதிவு வேளையில் நீங்களே செய்து கொள்ளுங்கள் guys!” என்று தீர்மானித்தேன்!

So- இரத்தப் படலம் வண்ணத் தொகுப்பு முதன் முறையாகவும் (and probably இறுதித் தடவையாகவும்) இத்தகையதொரு இரட்டை அவதாரத்தில் ஆஜராகவுள்ளது! Of course- சத்தியமாய் இது நம் சக்திக்கு மிதமிஞ்சிய முயற்சியே என்பது புரிகிறது! ஆனால் உங்களைக் கனவு காணச் சொல்லி ஊக்குவிப்பவன் நானே எனும் போது; அவற்றை நனவாக்கிடும் பளுவைச் சுமக்கப் பின்வாங்கவும் கூடாது தானே?! ஆனது ஆகட்டும்- நிறைய அவகாசமுள்ளதே- we will give it our best shot & more என்று தீர்மானித்தேன்!

So இது தான் நிலவரம்! And சைஸைப் பொறுத்தவரை நாம் வழக்கமாய் பயன்படுத்தி வரும் அதே சைஸ் தான் நடைமுறை கண்டிடும்! “தலையில்லாப் போராளி” சைஸுக்கு இதனையும் தயாரிப்பதெனில் விலைகள் out of control போய் விடுமென்பது மாத்திரமின்றிப் பைண்டிங்கில் இதற்கென பிரத்யேகமான பெரிய சைஸ் தையல் மிஷினும் அவசியப்படும்! ஆகையால் கனவுகள், கெட்ட சொப்பனங்களாகவும் மாறிடாது போக அணை போடும் கடமை எனக்குள்ளது! நண்பர் ஸ்டீல்க்ளா அடுத்த 18 மாதங்களுக்கு பற்பல 'புர்ஜ் கலீபா' உயரக் கோபுரங்களை இங்கே எழுப்புவார் என்பதில் ரகசியமில்லை என்றபோதிலும் - சைஸில் மாற்று சிந்தனைக்குத் துளியும் இடமில்லை என்பதே bottomline ! விலைகள்; பேக்கிங் முறைகள் பற்றியெல்லாம் நிறையவே திட்டமிடல் தேவை என்பதால்- படைப்பாளிகளின் ஒப்புதல் தெரிந்தான பின்பே அந்த முயற்சிகளுக்குள் கால் பதிப்போம்! So நாளையே விலையைச் சொல்லி வைத்து; முன்பதிவைத் துவங்கிடலாமே? என்ற அவசரங்கள் காட்டிட வேண்டாமே ப்ளீஸ்? முறையான; நிதானமான திட்டமிடல்களுக்கு அவசியம் இங்கே ஒரு வண்டியுள்ளது! அவற்றை நடப்பு இதழ்களின் வேலைகளுக்கு இடையூறின்றி நடத்திட எனக்கு நிறைய நிறைய space தேவை! ஆகையால் என்னிடமிருந்து அறிவிப்பை நாலே வாரங்களில் எதிர்பார்த்து விட்டு- ‘அம்புட்டுத் தானா? பூட்ட கேஸா?‘ என்ற ரீதியில் சங்கடம் கொள்ள வேண்டாமே? The Project is pretty much on! ஓசையின்றி எங்கள் பணிகள் துவங்கியிருக்கும்!

விரல்கள் இதற்கு மேலும் எழுதவோ; டைப் அடிக்கவோ ஒத்துழைக்க மறுப்பதால் இப்போதைக்கு விடை பெறுகிறேன் ! எனது எண்ணங்கள் / திட்டமிடல்கள் 100% பிழையற்றவைகளாக இராது தான் என்பது புரிகிறது ! ஆனால் சரியோ- தவறோ- ஒரு முடிவுக்கு வந்தான பின்னர் அதனோடே பயணிப்பது தானே முன்செல்லும் மார்க்கம் ? ஆகையால் "நாட்டாமை....தீர்ப்பெ மாத்திச் சொல்லு !!" என்று மீண்டும் ஒரு rethink இங்கே நிகழ்த்திடக் கோர வேண்டாமே - ப்ளீஸ் ? அதே போல   -  "உன் லாஜிக்கில் நிறைய ஓட்டைகள் உள்ளன ; இது விரலுக்குப் பொருந்தா வீக்கம் ; ஆகையால் நீ பூட்ட கேஸே மாமே  !" என்ற நோஸ்ட்ரடாமஸ்  பாணியிலான   நீள நீள மின்னஞ்சல்களிலும் ஆற்றல்  விரயம் வேண்டாமே - ப்ளீஸ் ? இனி முன்செல்லும் வழி மீது மாத்திரமே விழிகளைப் பதிப்போமே ? இது ஒரு ஒட்டு மொத்த மெகாக் கனவினை மெய்ப்பிக்குமொரு ராட்சஸ முயற்சி    ! அபிப்பிராய பேதங்களின்றி ஆளுக்கொரு கைப்பிடித்தாலே இந்தத் தேர் கிளம்பும் !!

Of course - முன்பதிவில் "600 " எனும் அந்த மந்திர இலக்கை எட்டிப் பிடித்தலும் இந்த முயற்சியின் முதுகெலும்பே என்பதை மறந்திடலாகாது !! நூறு, இருநூற்று என்ற எண்ணிக்கையிலேயே முன்பதிவுகள் தடுமாற்றம் காணில் - நிச்சயமாய் எல்லா மகாசிந்தனைகளுமே புலிக்கேசி வடிவேலின் கனவுகளாகிப் போய் விடுமென்ற எச்சரிக்கைப் பலகையும் சாலையோரத்தில் திடமாய் நிற்பதை நினைவூட்டுகிறேன்  ! நல்லதே நடக்குமென்ற நம்பிக்கையோடு வலது காலை முன்வைப்போமே ? 

And மறக்கும் முன்பாக - அந்தப் "புலன்விசாரணைப் பாகம்" - முன்பதிவுகளுக்கொரு பரிசாய் உண்டென்பதையும் சொல்லி விடுகிறேனே ?!Bye all! See you around!

P.S : பிப்ரவரி 3  முதல் 12 வரையிலும் திருப்பூர் புத்தக விழா நடைபெறவுள்ளது ! நாமும் அங்கிருப்போம் ! பத்மினி கார்டன்ஸ், காங்கேய சாலை என்பது முகவரி ! எப்போதும் போல் உங்களை எதிர்பார்த்திருப்போம் guys !!

நிதானமும் நல்லதே !!

நண்பர்களே,

வணக்கம். இரத்தப் படலத்தின் பொருட்டு நண்பர்களின் மௌனங்கள் கலைவது சுவாரஸ்யமான சில பல சிந்தனைகளையும் முன்வைக்க உதவியுள்ளதில் எனக்கு ரொம்பவே மகிழ்ச்சி ! விலை சார்ந்தும், ஆண்டின் காமிக்ஸ் பட்ஜெட்கள் குறித்தும் நண்பர்கள் நம் நலன் கருதி வெளிப்படுத்தியுள்ள அபிப்பிபிராயங்களும் நிச்சயமாய் கவனத்துக்கு உரியவைகளே !! ஏற்கனவே இது நாம கடந்து வந்துள்ளதொரு தலைப்பு தான் எனினும், இந்த "குண்டு புக்" காதல் வேளையில் நண்பர்களின் words of caution பற்றிய அளவளாவல் தவறில்லை என்று நினைத்தேன் ! So விலை சார்ந்த எண்ணங்கள் பற்றிய எனது two cents...! கண்ணுக்குத் தெரியும் சிக்கலைச் சொல்லி விட்டீர்கள் - சுலபமாய் ! புலப்படா விடையைத் தான் தேடி வருகிறேன் 5 ஆண்டுகளாய் ! இது விலைகளுக்கோ ; எண்ணிக்கைகளுக்கோ நான் செய்திடும் நியாயப்படுத்தலும் அல்ல ; உங்கள் சிந்தனையினில் குறை காணும் முயற்சியுமல்ல ! மாறாக - ஒரு unique சூழலில் ஒற்றையாய் அமர்ந்திருக்கும் எனது நிலையின் பகிர்வு மாத்திரமே !  

கோழி முதலில் வந்ததா ? முட்டை முதலில் வந்ததா ? என்றால் நம்மைப் பொறுத்தவரையிலும் கோழி தான் முதலில் என்பேன் ! காமிக்ஸ் ரசிப்போரின் எண்ணிக்கை '90 களின் நடுவிலிருந்து சிறுகச் சிறுகக் குறைந்து கொண்டே சென்று - 2000 -களின் மதியினில் ஒரு மிகக் குறுகிய வட்டத்தினுள் நிலை கொண்ட பின்னே தான் நமது version 2 .0 நடைமுறைக்கு வந்தது ! ("நீ அன்றைக்கே இதை இப்படிச் செய்திருக்க வேண்டும் ; அதை அப்படிச் சரிபடுத்தியிருக்க வேண்டுமென" ஆங்காங்கே அறிவுரைகள் விரைவில் நல்கப்படும் என்பதை அறிந்தும் தான் இதைப் பதிவிடுகிறேன் ;simply because '95 க்குப் பிற்பாடான அந்த இருண்ட நாட்களின் சிரமங்களையும், வலிகளையும் அறிந்தவன் நான் மாத்திரமே என்பதால் !)  பத்து ரூபாய்க்கு வெளியாகிய பிரான்க்கோ-பெல்ஜியக் கதைகளை மாதம் வெறும் 4000 பிரதிகள் மாத்திரமே அச்சிட்டு, அவற்றுள் 1500 ஐ வருஷங்களாய்க் கையிருப்பில் வைத்திருந்தது தானே 2010 வரைக்குமான நிலவரம் ? ரூ.200 விலையில் 852 பக்கங்களோடு இரத்தப் படலம் B & W வெளியாகி அவற்றை விற்பனை செய்திட நாக்குத் தொங்க 20 மாதங்கள் காத்திருந்ததும் நாம் அறிந்த விஷயம் தானே ? So காமிக்ஸ் வாசிப்பினைத் தீர்மானிக்கும் ஒரு இறுதிக் காரணியாக விலைகளைப் பார்த்திடுவதில் எனக்கு உடன்பாடில்லை ! 

இதோ - ஒவ்வொரு ஆண்டும் புத்தக விழாக்களில் நம்மை அடையாளம் கண்டு, அந்நேரம் ஆர்வமாய் காமிக்ஸ் வாங்கிடும் வாசகர்கள் அடுத்த புத்தக விழா வரையிலும் தம் கொள்முதல்களையோ ; வாசிப்புகளையோ தொடர்வதில்லை என்பது தானே யதார்த்தம் ? Granted - சென்னை போன்ற பெருநகரினில் நமது ஏஜென்ட்கள் எண்ணிக்கை மிக மிகக் குறைவே ! ஆனால்  ஈரோடு / சேலம் போன்ற நகரங்களில் குறைந்த பட்சம் ஐந்தாறு கடைகளில் நமது இதழ்கள் கிடைக்கின்றன எனும் போது - நிச்சயமாய் அங்கே சின்னதொரு மெனக்கெடலின் பின் நம் இதழ்களைத் தேடித் பிடிப்பதில் சிரமம் இருந்திடக் கூடாது தானே ? But 5 ஆண்டுகளும் ; 5 புத்தக விழாக்களும் கழிந்தான நிலையிலும் அங்கெல்லாம் நமது விற்பனை எண்ணிக்கைகளில் ஒரு குட்டியூண்டு முன்னேற்றம் கூடக் கிடையாது என்பது தான் நிஜம். So நமக்குப் பிடிக்கிறதோ - இல்லையோ ; அதனை ஏற்றுக் கொள்வது கசப்பாக இருக்கிறதோ - இல்லையோ - காமிக்ஸ் வாசிப்பென்பது இன்னமுமே ஒரு வெகுஜன ரசனையுமல்ல  ; அத்தியாவசியமுமல்ல என்பதே bottomline !!

இது தான் நமக்குக் கிட்டியுள்ள களம் எனும் பொழுது, அதனை எண்ணி விசனப்பட்டுக் கொண்டிருந்த நாட்கள் தான் நமது version 1.0 -ன் இறுதி வேளைகள் ! ஆனால் அதுவே நம் பலமாகவும் மாறிட வாய்ப்புண்டு என்ற புரிதல் பிறந்ததன் பலனே version 2.0 ! சர்க்கஸ் கூடாரம் அமைத்து, ஊர் கூடிக் கைதட்டும் பொழுது கம்பி மேல் நடப்பதும் சாகசமே ;  சாலையோரமாக கம்பி கட்டி விட்டு, டோலக்கு அடித்துக் கொண்டே "பாருங்க ஷாமியோவ் !!" என்றபடிக்கே அதே கம்பி மேல் பத்துப் பேர் முன்னே நடப்பதும் கூட சாகசமே என்று புரிய எனக்கும் அவகாசம் அவசியப்பட்டது ! அந்தப் புரிதலுக்குப் பின்பாகவே மாற்றங்கள் வடிவங்களிலும், விற்பனை பாணிகளிலும், விலைகளிலும் அரங்கேறின ! சின்னதொரு வட்டமே ; ஆனால் காமிக்ஸ் நேசத்தில் எஞ்சி நிற்கும் கூட்டம் ! அகவைகளில், ரசனைகளில் அடுத்த லெவெலில் நிற்கும் அணி ! அவர்களது ரசிப்புகளுக்கு மட்டுமன்றி, மாறிவிட்டிருக்கும் சந்தையின் தர அளவுகோல்களுக்குமே நியாயம் செய்திடும் ஒரு மினிமம் தரத்திற்கு நம்மை நாமே reinvent செய்து கொள்ளல் அவசியம் என்பது காலத்தின் கட்டயாமாகி நின்றது !  

வடிவம், தரம், விலைகள்,உற்சாகம் என சகலமும் புதுசாகி நின்ற பொழுது நம் பயணம் வேகமெடுத்தது ! ஆனால் அன்றைக்கே எனக்குள் இந்த விலைகள் குறித்த நெருடல் இல்லாதில்லை ! எங்களது அலுவலகத்துக்கு கையில் நூறு ரூபாயை மட்டுமே வைத்துக் கொண்டு வந்து - டபுள் த்ரில் ஸ்பெஷலையும் ; இன்னும் ஏதோவொரு இதழையும் பெருமூச்சோடு பார்த்துக் கொண்டு நின்ற சிறுவனைப் பற்றி எழுதியிருந்தது நினைவுள்ளது ! ஆனால் சர்க்கஸ்களுக்கே கூட்டம் சேர நாக்குத் தொங்கும் இன்றைய  நாட்களில், ஒரு சாலையோர சாகஸக்க்காரனுக்கு உள்ள limitations புரிபட்டதால் - வேறு வழியின்றி தொடர்ந்திட்டோம் !

நாட்கள் நகர நகர, நமது இந்த இரண்டாம் வருகை ஒரு fluke அல்ல ; இம்முறை இது தொடரப் போகும் நிஜமே என்பது உங்களுக்கும், எங்களுக்கும் ஊர்ஜிதமான போதே நம் மீதான எதிர்பார்ப்புகளும் அதிகமானது தானே நாம் கடந்து வந்துள்ள நாட்கள் ? ஒரு NBS திறந்துவிட்ட கனவுகளின் கதவுகள் ஓராயிரமல்லவா ? ஆயிரம் ரூபாய்க்கொரு மறுபதிப்பென்பது உங்கள் கனவுகளை நிஜமாக்கும் எங்கள் பணிகளின் ஒரு பகுதி தானே ?

ஒரு பொழுதும் மறுபதிப்புகள் பற்றிய எனது சிந்தைகளை நான் இரகசியமாக்கியவனல்ல ! Given a choice மாயாவிகாருவோ ; மின்னும் மரணங்களோ ; இரத்தப் படலங்களோ நிச்சயமாய் எனது அட்டவணையின் மேற்பகுதியில் இருந்திருக்கவே செய்யாது ! ஆனால் உங்கள் உற்சாகங்கள் தான் நாமின்று surf செய்யும் அலைகளின் மேலடுக்கு எனும் பொழுது அந்த  உற்சாகங்கள் மீது ஈரத் துணியைப் போட்டு வைப்பது, நமக்கு நாமே கால்கட்டைப் போட்டுக் கொள்வதற்கு சமானம் என்றே நான் பார்க்கிறேன் ! 

முன்பெல்லாம் ஒரு நூறு ரூபாய் இதழைக் கொண்டு நான்கு வாரங்களையும், நாலைந்து பதிவுகளையும் நாம் ஒப்பேற்றினோம் ! ஆனால் இன்று யோசித்துப் பாருங்களேன் நிலவரத்தை : 

• 4 பாகங்கள் கொண்ட ட்யுராங்கோ  
• ஒரு முழுநீள டெக்ஸ்  
• ஒரு ப்ளூ கோட் சாகசம் 
• ஒரு மாயாவி மறுபதிப்பு 

நமக்குப் பத்து நாட்களுக்குத் தாக்குப் பிடிக்க மாட்டேன்கிறது ! ட்யுராங்கோ என்றோ ஒரு தூர நாளில் வெளியானதொரு இதழாய்க் காட்சி தருவது நிச்சயம் எனக்கு மட்டுமல்ல என்பேன் ! Of course - 2016 -ன் பாதி இதழ்களையே இன்னமும் படிக்க நேரமின்றியுள்ள நண்பர்களும் கணிசமே ; ஆனால் அதன் பொருட்டு எண்ணிக்கைகளில் பிரேக் போடுவதென்பது நம் சின்ன வட்டத்தின் எனர்ஜிக்கும் பிரேக் போட்டது போலாகிடும் என்பதே எனது பயம் ! 

இதோ - இப்போது கூட இந்த இரத்தப் படலம் முயற்சியானதை நடைமுறைக்குக் கொணர்வதில்  குறைந்த பட்சம் ரூ.இருபது லட்சம் சம்பந்தப்பட்டுள்ளது ! And இதன் பணிகளில் ஒட்டு மொத பெண்டும் கழன்றே போகுமென்பதிலும் இரகசியமேது ? ஆனால் இது தான் நம்மை சந்தோஷம் கொள்ளச் செய்யும் தாரக மந்திரமெனில், அதற்கு நாங்கள் ரெடி என்று கைதூக்கி நிற்பது கடமையன்றோ ? இந்தப் பதிவின் துவக்கத்தில் நான் சொன்ன விஷயத்தை இங்கே அடிக்கோடிட்டு முனைகிறேன் !! நானிருப்பதொரு "unique" இடத்தினில் ! கம்பிமேல் நிற்கும் எனக்கு, மேலே வானமும், கீழே மண்சாலையும் தான் என்றாலும், உங்களின் சிறுசிறு கனவுகளை நிஜமாக்கும் சாவியுமே என்னிடம் இருப்பது தானே தவிர்க்க இயலா யதார்த்தம் ? எனது தலையாட்டலோ, மறுப்போ தானே - உங்களின் ஒரு ஆதர்ஷ இதழின் வருகைக்கும், இல்லாமைக்கு இடையிலான வித்தியாசம் ? சத்தியமாய் இதனை அகங்காரத்தின் வெளிப்பாடாய்ச் சொல்லவில்லை ; ஆனால் சில வேளைகளில் எனது அவஸ்தைகளின் முழுப் பரிமாணங்களும் கண்ணுக்குப் புலப்படுவது இல்லை என்பதால்தான் இதனை இங்கு குறிப்பிட வேண்டிப் போகிறது ! 

Oh yes ...ஒரு ஆதர்ஷ உலகினில், நிறையப் பேர் காமிக்ஸ் படிக்கவும், நிறைய நிறுவனங்கள் விளம்பரங்கள் தரவும் தயாராகும் வேளையில் விலைகள் தாமாய் கீழிறங்கி விடும் ! ஆனால் அந்த ஆதர்ஷ உலகு தோர்கல் தேடித் திரியும் மூன்றாம் உலகை விடக் கூடுதல் தூரத்திலிருக்கும் பொழுது என் கட்டுக்குள் உள்ள சமாச்சாரங்கள் சொற்பம் தானே guys ?

இரத்தப் படலத்தை சைஸ் சுருக்கிடும் பட்சத்தில் விலையினை சற்றே கட்டுக்குள் கொண்டு வர வாய்ப்புண்டு ! Maybe TEX கதைகளின் சைசில் அதனை முயற்சிக்கலாம் தான் ! உங்களுக்கு ஓ.கே. எனில் I'm game for it !! 

வேறெதெற்காக இல்லையெனினும் - வேலைப் பளுவின் காரணமாகவேணும் அடுத்தாண்டினில் நமது நம்பர்களை மட்டுப்படுத்துவது பற்றி நிச்சயம் சிந்திப்போம் !! உங்கள் எண்ணங்களிலுள்ள நியாயம் நிச்சயம் என் கவனத்தைத் தப்பவில்லை ! And நம் பொருட்டு, நீங்கள் கொள்ளும் அக்கறைகளும், தொலைநோக்குச் சிந்தனைகளும் எத்தனை உயர்வானவை என்பதும் புரிகிறது !! So நிச்சயமாய் துளியும் வருத்தமுமில்லை !  

அப்புறம் இந்த "1250 குண்டு"புக்கை இப்போதைக்கு உங்கள் தலைகளில் போட்டு விடுவேனோ என்ற பயம் வேண்டாம் !! இதனை approve செய்யவே மாதங்கள் பிடிக்கும் ; அப்புறம் அதன் உரிமைகளை வாங்கிட சில மாதங்கள் & அதன் பின்னே இதனில் பணியாற்ற பல பல மாதங்கள் !! So அதற்கு நிறையவே நேரமுள்ளது ! 

அப்புறம் நடப்பாண்டினில் ஏற்கனவே பிராமிஸ் செய்திருந்த இரத்தக் கோட்டை & maybe அந்த இன்னொரு cowboy ஆல்பம் மட்டுமே அறிவிக்கப்பட்டதைத் தாண்டி வரவிருப்பவை !!  அவையும், புத்தக விழாக்களின் பொழுது கூடிடும் நண்பர்களின் உற்சாக லெவெல்களை அதிகரிக்கும் பொருட்டே தவிர்த்து - ஆண்டின் நம் turnover-ஐ அதிகம் செய்திடும் நோக்கிலானதல்ல என்பதை நீங்களும் அறிவீர்கள் ! 

Before I sign off -  இரத்தப் படலத்திற்கென நண்பர் ராகவன் பரிந்துரைக்கும் அந்த "18 மாதம் - 18 இதழ்கள் - நார்மல் விலை - ஒரு slipcase " என்ற அந்த option பற்றியும் கொஞ்சம் சிந்திக்கலாமே guys ? ரூ.75 விலையில் 18 நார்மல் சந்தா  இதழ்கள் எனும் பொழுது ரூ.1350 + அந்த slipcase கிரயமாய் இன்னுமொரு ஐம்பது என்று வைத்துக் கொண்டாலும், ரூ.1400-ல் வேலை ஆகிவிடும் தான் !! அனைவருக்கும் கிடைத்தது போலவுமிருக்கும் ; விலைகளும் சல்லிசாய் (at least in comparison !!!) அமைந்தது போலவுமிருக்கும் ! நான் முன்னமே சொன்னது போல, மறுபதிப்புப் பந்துகள் என்றைக்குமே உங்கள் கோர்ட்டில் தான் ! அவற்றை எவ்விதம் ஆடச் சொல்கிறீர்களா, அதன்படி நான் ரெடி !  கோஹ்லியும், கேதார் ஜாதவும் ஆடியது போல் ஆடுவதா ? சற்றே நிதானமாய் ஆடுவதா ? சொல்லுங்கள் - செய்கிறோம் !!  Bye for now all !!

P.S : நேற்றைக்கு "குண்டுக் கட்சி" ; இன்றைக்கு "நிதானக் கட்சி" என்று jumping jack ஆக நான் காட்சிதரலாம் என்பது புரிகிறது ! இது புது இதழ்கள் சார்ந்ததொரு தீர்மானமாக இருப்பின், சரியோ-தப்போ - நிச்சயமாய் எனது எண்ணங்களை செயல்படுத்திக் கொள்ள நொடியும்  தயங்கியிருக்கமாட்டேன் ! ஆனால் ஒரு மறுபதிப்பு - வாசக ஆர்வங்கள் பொருட்டு எனும் பொழுது - அதனில் யார் மனதும் கோணிட வேண்டாமே என்பதே எனது அவா !  !! 

அதே போல இந்தப் பதிவின் பொருட்டு -  ""இ.ப."" முயற்சியை மூட்டை கட்டி விட்டதாகவோ, பின்வாங்கிவிட்டதாகவோ பொருள்படுத்திக் கொள்ள வேண்டாமே - ப்ளீஸ் ? இரத்தப் படலம் - ஆகஸ்ட் 2018 -க்கு நிச்சயமாய் உண்டு !  அதனை best ஆக நடைமுறை காணப் செய்ய வெவ்வேறு வழிவகைகளைத் தேடித் கொள்ள முயற்சிப்பதே தற்போதைய விவாத மேடைகளின் நோக்கம் ! 

"குண்டு" நல்லது !

நண்பர்களே,

வணக்கம். ரொம்ப நாளாகி விட்டது ஒரு பதிவுக்கு பின்னூட்ட எண்ணிக்கை ஒரே நாளில்  300-ஐத் தாண்டி !! இதுவே இரத்தப் படலம் கொணரும் உணர்வுகளுக்கொரு இண்டிகேட்டர் என்று கூட எடுத்துக் கொள்ளலாம் போலும் !! So நமது சமீபத்து சம்பிரதாயப்படி இதோ ஆஜராகிறேன் -ஒரு உப்மாப் பதிவுடன்....சாரி...சாரி..உப பதிவுடன் !!

நமக்குப் பரிச்சயமான இந்தப் XIII தொடர் போல் - பதினாலு (XIV) ; பதினைந்து (XV) என்று  வேறு தொடர்கள் ஏதேனும், இதே போல ஒரே knot-ஐ சுமந்து கொண்டு இத்தனை நீளமாய் பயணமாகியுள்ளனவா ? என்ற curiosity எனக்குள் அவ்வப்போது எழுந்திடுவதுண்டு ! எனது அந்தத் தேடல்களில் - நெடும்பயணமாய்த் தொடரும்  சில பல sci-fi கதைகள் சிக்கியுள்ளன தான் ; ஆனால் அந்த எதிர்காலத்து உலகின் கதை  ரசனைக்குள் நாம் உட்புக இப்போது தான் சிறிது சிறிதாகத் தயாராகி வருகிறோமெனும் பொழுது உடனடியாய் ஒரு  'தொபுக்கடீர்' டைவ் சரிப்படாது என்று பட்டது ! 

அதே சமயம் ஒரு வித்தியாசமான  கதைத் தொடரானது கண்ணில் படவே செய்தது ! 1250 பக்கங்கள் கொண்ட ஒரே மெகா-மெகா-மெகா கதையது ! அசாத்திய சித்திரங்கள் ; இதுவரையிலும் நாம் சுற்றி வந்திருக்கா ஒரு முற்றிலும் மாறுபட்ட கதைக்களம் என்று செல்லும் இந்தத் தொடரை தூரத்திலிருந்து ரசிப்பதோடு ஒதுங்கியிருந்தேன் ! ஆனால் இப்போது சிறுகச் சிறுக நம்மை ஆட்கொண்டு வரும் இந்த "குண்டு" புக் காதலானது எனது சிந்தனைகளையும் மெல்ல மெல்ல மாற்றியமைத்திடும் போல்படுகிறது !! "இரத்தப் படலத்தின் பக்க நீள ரெக்கார்டை முறியடிக்க வேறு கதைகள் உண்டா ?" என்று அவ்வப்போது என்னிடம் வினவும் நண்பர்களுக்கு இந்த ஆல்பம் குறித்த சேதியானது  ஒரு 1250 வாட்ஸ் பல்ப் பிரகாசத்தை நல்கிடக்கூடும் ! இந்த வாரம் பிறந்ததும் முதல் காரியமாய் அந்தப் பக்கங்களை முழுமையாய் வரவழைத்து - நமது மொழிபெயர்ப்பாளரிடம் ஒப்படைத்து ஒரு அபிப்பிராயம் கோர வேண்டியது தான் ! கதை நமக்கு ஏற்றதொன்றாய் அமைந்திடும் பட்சத்தில்...."உலகத் தொலைகாட்சி வரலாற்றில் முதன்முறையாக.........!!!" என்ற அந்தக் கட்டைக் குரல் மாடுலேஷனை என்றைக்கேனும் ஒருநாள்  ஒரு ஆந்தைக்கண்ணன் இரவல் வாங்கிட நேர்ந்தால் ஆச்சர்யம் வேண்டாமே ?! Bye now all !! Enjoy the evening & the week ahead !! See you around !

நயாகரா நாட்கள் !!

நண்பர்களே,

வணக்கம். தமிழர் திருநாள் வாழ்த்துக்கள் ! இல்லமெல்லாம் உவகையும், உற்சாகமும் பொங்கலாய்ப் பொங்கட்டும் !! கரும்பும், சர்க்கரைப் பொங்கலும், புதுப் படங்களும் துணையிருக்கும் இந்த அழகான தினத்தினில் நமது காமிக்ஸ்களுக்கும் உங்களருகே இடமிருப்பின் - நமக்கு அதை விடப் பெருமை வேறென்ன இருந்திட முடியும் ?

ஓட்டமாய் ஓடி விட்ட 7 நாட்களுக்கு  முன்பாய் சென்னைப் புத்தக விழாவினில் சனி & ஞாயிறின் பாதிப் பொழுதுக்கு நண்பர்களை சந்தித்த அனுபவம் வழக்கம் போல எங்களது பேட்டரிகளை அடுத்த ஆறு மாதங்களுக்காவது உச்சத்தில் ஓடச் செய்து விடுமென்பது நிச்சயம் ! என்னதான் கடிதங்கள் ; மின்னஞ்சல்கள் ; வலைப்பதிவுகள் என்றெல்லாம் தகவல் தொடர்பு சாதனங்கள் நமக்குப் பணியாற்றினாலும், அந்த old fashioned நேருக்கு நேர் சந்திப்புகளின் ரம்யம் நிச்சயமாய் ஒரு தனி ரகம் தான் !! ஒவ்வொரு வாசக / வாசகியரின் ஆதர்ஷக் கதைகளைப் பற்றியறிந்து கொள்வதும், இந்தச் சின்ன வாசக வட்டத்தினுள் இருக்கும் பற்பல பரிமாணங்கள் பற்றி உணர்ந்து கொள்ள முடிவதும் real eye openers !!

வழக்கம் போலவே இம்முறையும் நிறைய புது வாசகர்களோடு கை குலுக்கும் அனுபவம் கிட்டியது மனநிறைவைத் தந்தது என்றாலும் - இம்முறையின் நிஜமான highlight 'காமிக்ஸ் வாசிப்பு என்பது ஆம்பிளைப் பசங்களின் ஏகாதிபத்தியமே ! 'என்ற ரீதியிலான சிந்தனையைத் தவிடு பொடியாக்கிய மகளிர் அணியின் வருகையே !! நான் பார்த்த அந்த ஒன்றரை நாளில் நமது ஸ்டாலுக்கு வருகை தந்தோரில் நான்குக்கு ஒன்று என்ற விகிதம் பெண்களே !! ஒரு இல்லத்தரசி காமிக்ஸ் நேசத்தோடு இருப்பின், அந்தக் குடும்பத்தில் நமக்கு நிச்சயம் பிரகாசமான எதிர்காலம் உண்டென்பது உறுதி !! "மாடஸ்டி பிளைசி எங்கே ??" என்றபடிக்கு தேடலைத் தொடங்கிய தாயாரோடு பொறுமையாய் வலம் வந்தவரும் ஒரு காமிக்ஸ் ரசிகையே ; பிரதான மகளிர் கல்லூரியில் பிரெஞ்சு விரிவுரையாளரும் கூட !! "அந்தக் காலத்தில் நாங்க படிச்ச அதே லாரன்ஸ் -டேவிட் கதைகளா ? " என்றவாறே தம் பேரப்  பிள்ளைகளுக்கு அவற்றை வாஞ்சையோடு புரட்டிக் காட்டினார் திருவள்ளூரிலிருந்து வருகை தந்திருந்ததொரு மூத்த வாசகி ! (அந்தப் பிள்ளைகள் பாட்டியை முறைத்துக் கொண்டு நின்றது வேறொரு சமாச்சாரம் !!) "வேதாளன்" கதைகள் போட மாட்டிங்களா ? என்று கேள்விக் கணை தொடுத்த நிறைய வாசகர்களுள், சில பல மகளிரணியினரும் சேர்த்தி !! அதே போல நிறையவே டீன் ஏஜ்  வாசகர்களையும்  நம் ஸ்டால் பக்கம் இம்முறை பார்க்க முடிந்தது ஒரு செம high !! With all due respect to our senior readers - இள ரத்தத்தின் வருகை எந்தவொரு முயற்சிக்கும் இன்றியமையா அவசியம் அல்லவா ? And - கையில் ஒரு சிறு தாளோடு - "டேய்....டயபாலிக் அங்கே இருக்கு பார்டா....!" ; "இந்த டெக்ஸ் ஏற்கனவே என்கிட்டே இருக்குடா" என்றபடிக்கே தம் தேர்வுகளைச் செய்வதை பார்க்க முடிந்த போது - இந்த ரசனையானது நம்மோடு மறைந்து போகாதென்பது புரிந்தது !! 

பசங்களின் சத்தமிலா தேடல் ஒருபக்கமெனில் - சீனியர்களின் அதகள சேகரிப்பின் வேகம் எப்போதையும் விட இம்முறை ஒரு மிடறு தூக்கல் !! நமது புது ரேக்குகளில் - மறுபதிப்புகளுக்கென ஒரு பிரதான இடம் ஒதுக்கி, வரிசை வரிசையாய் மாயாவிகாரு ; லாரன்ஸ்-டேவிட் ; ஜானி நீரோ ; ஸ்பைடர் என்று அடுக்கி வைத்திருந்ததால் - உள்ளே நுழைந்த மறு கணமே - ஆயிரம் வோல்ட்ஸ் பல்பின் பிரகாசத்தை முகங்களில் அவர்கள் படர விட்டதை ஒரு நூறு தடவைகளாவது தரிசித்திருப்பேன் ! "நியூ ஜெர்சியிலிருந்து வருகிறேன்" என்றபடிக்கே தன்னை அறிமுகம் செய்து கொண்டு என் கையைப் பிடித்துக் கொண்டு பேசத் துவங்கிய மூத்த வாசகர் அங்கொரு முன்னணி அமெரிக்க நிறுவனத்தின் தலைமைப் பொறுப்பில் இருப்பவர் !! ஆனால் மாயாவியைப் பற்றியும், ஜானி நீரோவைப் பற்றியும் பேசத் தொடங்கியவர் நமது சுட்டிப் புயல் பென்னிக்கே சவால் விடக் கூடிய உற்சாகத்தோடு கொப்பளித்தார் !! பற்பல வருடங்களாய் இந்த மும்மூர்திகளைத் தேடி வந்தவர் ஆன்லைனில் தற்செயலாய் நம்மைக் கண்டு பிடித்ததாகவும், ஆசை தீர மறுபதிப்புகள் சகலத்தையும் வாங்கி கொண்டதாய்ச் சொன்னவர், மறுபடியும் ஒரு கத்தைப் பிரதிகளை அள்ளிக்  கொண்டார் ! "சார்..இந்த லார்கோவைப் படித்துப் பாருங்கள் ; சும்மா மெர்செலாகிடுவீங்க !!" என்று வாசகர் கணேஷ் சொல்லிப் பார்த்தாலும் ; ஊஹூம் ....!! பருப்பு வேகுவதாக இல்லை !! அருவியாய் 15  நிமிடங்கள் கொட்டித் தள்ளியவர் - "இந்தப் பிரதிகளை வாங்கும் பொருட்டு இந்தியாவுக்கு ஒரு டிரிப் அடிக்கும் கட்டாயம் நேர்ந்திருந்தாலும் - நிச்சயமாய் அதனைச் செய்திருப்பேன் !!" என்ற போது எனக்கு தூக்கி வாரிப் போடவெல்லாம் இல்லை ; இப்போதெல்லாம் மாயாவியின் மகிமை தான் பழகிப் போய் விட்டதே !! இன்னொரு மூத்த வாசகரோ - கரங்களை விரித்துக் கொண்டு - "ஆகா...இத்தனை மறுபதிப்புகளா ?" என்றபடிக்கே உட்புகுந்தவர் - இயன்றிருந்தால் அந்த மாயாவி ரேக்கையே கட்டிப் பிடித்திருப்பார் !! ஒவ்வொரு ஆண்டும் மறுபதிப்புச் சந்தாக்களை போனி செய்திடும் நேரங்களில் எனக்குள் ஒரு சின்ன உறுத்தல் இருப்பதுண்டு - நான் செய்துள்ள முதலீட்டின் பொருட்டு உங்களை கசரத் வாங்குகிறேனோ என்று !! ஆனால் இத்தனை மூத்த வாசகர்களுக்கு இவை ஏதோவொரு விதத்தில் பூரிப்புத் தருகின்ற பட்சத்தில் - அந்த முதல் தலைமுறைக்கு நாம் செய்திடும் முதல் மரியாதையாக இது இருந்துவிட்டுப் போகட்டுமே என்று இப்போது தோன்றுகிறது !!

இப்போது இந்தப் பதிவை டைப் அடித்துக் கொண்டிருக்கும் சமயம் கூட, சென்னையிலிருந்து நம்மவர்கள் கேட்டனுப்பியுள்ள புத்தகங்களில் மின்சாரக் கரத்தார் தான் முதலிடம் பிடிக்கிறார் ! And விற்பனையில் இரண்டாமிடம் பிடித்திருப்பது எப்போதும் போலவே நமது இரவுக் கழுகார் !! "வரிசைக்கு ஒரே மாதிரி சைசில், ஒரே மாதிரி விலைகளில் TEX என்ற லோகோவுடனும் கதைகளாகப் போட்டுத் தாக்குகிறீர்கள் ; இதில் படித்த புக் எது ? என்னிடம் இல்லாத புக் எது ? என்றே தெரிய மாட்டேன்கிறது !!" என்று குறைபட்டுக் கொண்டதொரு  வாசகர் நீங்கலாய் - சர்வமும் டெக்ஸ் மாயமே/ மயமே !! And இதுவரையிலும் ஜாஸ்தி விற்றுள்ள இதழ் "சர்வமும் நானே !" ஒரு வரிசை முழுக்க டெக்ஸ் இதழ்களை அடுக்கிப் பார்ப்பது ஒரு ரம்யமான அனுபவம் என்பதை நானே போன வாரம் தான் உணர்ந்தேன் ! இம்முறை இன்னொரு சந்தோஷம் - கார்ட்டூன்கள் ஈட்டி வரும் வெற்றி ! லக்கி லூக்  as always சிக்ஸர் அடித்து வருகிறார் ! அதிலும் லக்கி கிளாஸிக்ஸ் அதிரடி !! ஆனால் இம்முறை SMURFS பெற்று வரும் வரவேற்பு மாத்திரமன்றி ; CLIFTON ; சிக் பில் என்று பரவலாய் கார்ட்டூன் நாயகர்கள் விற்பனை கண்டு வருகிறார்கள் ! என்பதை குஷியோடு பார்த்து வருகிறேன் ! "ச்சை...எனக்கு கார்டூனே புடிக்காது !!" என்று ஒதுங்கி நின்றோர் சிறுகச் சிறுக மாற்றம் கண்டு வருகிறார்களா ? அல்லது இது புதியவர்களின் கொள்முதல்களா ? என்பது தெரியவில்லை - ஆனால் கார்ட்டூன்கள் ஆரோக்கியமாய் இருப்பது கண்கூடு !! 

"விற்பனை" என்ற தலைப்பில் லயித்துக் கிடக்கும் வேளைதனில் - சேந்தம்பட்டியிலிருந்து வந்திருந்த சிறு வித்வான் குழுவும் சரி ; சென்னையின் சில நண்பர்களும் சரி ; நாமக்கல் / காரைக்கால் நண்பர்களும் சரி  - நம் விற்பனைக்குச் செய்திட்ட  முயற்சிகள் பற்றி நான் எழுதாது போனால் நிச்சயமாய் சாமி கண்ணைக் குத்தி விடும் !! (அதுவும் குத்த சுலபமாய் கோழிமுட்டை சைசில் கண்கள் இருக்கும் போது குறிதப்பவும் வாய்ப்பு லேதில்லையா ? ) புத்தகங்களை வரிசைக்கிரமமாக / genre ரீதியாய் அடுக்கித் தர உதவியதில் துவங்கி, நமது கிரெடிட் கார்டு மிஷினை இயக்குவதில் தொடர்ந்து ; பில்லிங்கில் உடன் நின்றதில் கிளைவிட்டு ; வருகை தரும் புதியவர்களுக்கு விளக்கம் சொல்லி - விற்பனையில் சிக்ஸர்கள் அடித்தது வரையிலும், ஒவ்வொருவரும் இதனைத் தம் வீட்டு விசேஷம் போலப் பாவித்துச் சுற்றிச் சுழன்று வந்ததை  காண முடிந்தது என் புத்தக விழா அனுபவத்தின் உச்ச highlight !! "ஒரு திரைக்கதை போட்டி நடந்து வருகிறது ; அதற்கு உதவிடக் கூடிய கதைகளைத் தேடுகிறேன் " என்றபடிக்கு வந்தார் ஒரு உதவி இயக்குனர் ! மறு கணம் அவர் கைகளில் குவிந்தன ஒரு கத்தை இதழ்கள் நம் நண்பர்களின் புண்ணியத்தில் !! "டெல்லியில் ஒரு தமிழ் பள்ளி நடத்துகிறோம் ; அங்கே சிறார்களுக்கு வாசிப்பை ஊக்குவிக்க ஏதாச்சும் இருக்குமா ?" என்ற கேள்வி எழும் முன் - அவர் முன்னே பென்னியும், நீலப் பொடியர்களும், லக்கி லூக்கும் அணிவகுத்துக் கிடந்தனர் !! ரெண்டே புக் வாங்கும் உத்தேசத்தோடு உள்ளே நுழையும் casual readers கூட பில் போட ஸ்டால்லின் மறு கோடியை எட்டும் போது கையில் ஒரு மினி லாரி லோடோடு சந்தோஷமாய்க் காட்சி தந்ததை இரு நாட்களுமே எண்ணற்ற முறைகள் பார்த்திட முடிந்தது !! தலையில் வம்படியாய்க் கட்டி விடும் விற்பனை யுக்திகள் அங்கே புழக்கத்தில் இல்லை ; மாறாக  அன்பான காமிக்ஸ் நேசங்களின் பரிமாற்றங்கள் ; பரிந்துரைகள் விரவிடும் போது -  வாங்கிச் சென்றவர்கள் அனைவரிடமுமே ஒரு புன்னகையும் ஒட்டிக் கொண்டதில் வியப்பில்லை !! "நான் TEX விற்கிறேன் ; நான் "தளபதி" இதழ்களை முந்தச் செய்கிறேன் " என்று அவர்களுக்குள் போட்டி வேறு !! ஏதேனும் ஒரு மூலையில் ஸ்டாக் தீர்ந்து போனால், பண்டலைப் பிரித்து அதனை நிரவல் செய்வது ; குறைந்து வரும் இதழ்களின் நிலவரத்தைக் கவனித்துக் கொள்வது ; சந்தா பற்றிய கேள்விகளுக்கு லாவகமாய்ப் பதில் சொல்லுவது ; சந்தாவின் சவுகர்யங்கள் பற்றி புதியவர்களுக்குப் பாடம் எடுப்பது ; இவை சகலத்துக்கும் மத்தியில் இடையிடையே ஆஜராகிய நண்பர்களோடு அரட்டையும் அடிப்பது, ஆசையாய் போட்டோ எடுத்துக் கொள்ளக் கோரும் அன்பர்களுக்கு உதவிடுவது என்று நம் ஸ்டாலில் அந்த இரு தினங்களும் அரங்கேறிய நண்பர்களின்  உழைப்பு - காமிக்ஸ் காதலின் விஸ்வரூப வெளிப்பாடு ! நிச்சயமாய் புத்தகங்களை அள்ளிச் சென்றோர்க்கு அன்பான இந்த "அதிரடிப் படை" யாரென்றெல்லாம் தெரிந்திருக்க வாய்ப்பில்லை ; எவ்விதப் பிரதிபலனையோ / அங்கீகாரத்தையோ  நம் பட்டாளமும் எதிர்பார்த்திடவுமில்லை ! ஆனால் அந்த 2 நாட்களிலுமே தலா ஒன்றரை இலட்சத்தைத் தொட்ட விற்பனை நம்பர்கள் முழுக்க முழுக்க நம் நண்பர்களின் மாயாஜாலமே !! புத்தக விழாவுக்கென எங்கெங்கிருந்தெல்லாமோ ஜனத் திரள் அணிவகுக்கிறது ; கையில் அட்டவணையை வைத்துக் கொண்டு ஸ்டால் ஸ்டாலாய் ஏறி, இறங்கி தத்தம் புத்தக வேட்டைகளை நடத்துவதே அவர்கள் இலக்கு ! ஆனால் "அர்ஜுனனின் வில்லுக்கு  இலக்கு அந்தப் பறவையின் கருவிழி மாத்திரமே" என்பது போல்.- ஸ்டால் நம்பர் 624 & 625 மட்டுமே கதியென்று குவிந்திருந்த நமது அன்பின் அடையாளங்களுக்கு "நன்றி" என்ற ஒற்றை வார்த்தை சத்தியமாய் நியாயம் செய்திடாது ! நாங்கள் நனைந்து வரும் இந்த நயாகரா அன்பு நீர்வீழ்ச்சிக்கு இன்னும் எத்தனை எத்தனை  "மின்னும் மரணங்கள்" போட்டாலும் சரி ;  இரத்தக் கோட்டைகளை /  இரத்தப் படலங்களைத் தெறிக்க விட்டாலும் சரி...ஈடே ஆகாது !  ஒன்று மட்டும் நிச்சயம் guys : உங்கள் ஒவ்வொருவரையும் சந்தோஷத்தில் ஆழ்த்திட எனக்குத் தெரிந்த ஒரே யுக்தி - comics & more comics தான் !! கனவு காணுங்கள் guys - விசாலமாய் ; வண்ணமயமாய் !! அவற்றை  நிஜமாக்க  ஏழு கடல்களோ - எட்டு கடல்களோ தாண்டிடத் தலையை அடகு வைத்தாவது முயற்சிப்போம் ! In the meantime - A STANDING OVATION FROM ALL OF US !!

கடல்களைக் கடக்கும் முயற்சிகள் ஒரு பக்கமிருக்க, இரத்தக் கோட்டை & இரத்தப் படலம் பற்றிய அறிவிப்புகள் பற்றிக் கொஞ்சமாய்ப் பேசுவோமா இனி ? "இரத்தக் கோட்டை " இந்தாண்டின் ஈரோட்டுக்கென போன வருஷமே வாக்குறுதி தந்திருந்தேன் என்பதால் - இந்த 5 ஆல்பங்கள் இணைந்த தொகுப்பை ஹார்ட் கவரில் தூள் கிளப்பிடலாம் ! "தோட்டா தலைநகரம்"  தனியான one-shot என்பதால் அதனையும் இத்தோடு சேர்க்கத் தான் வேண்டுமா ? தனியாக அதனை எப்போது வேண்டுமானாலும் வெளியிட்டுக் கொள்ளலாமே guys ? ஒரு தொடர் முற்றுப் பெற்ற பின்னே அந்த ஆல்பமும் முற்றுப் பெறுவது போலிருப்பது தானே பொருத்தமாக இருக்கும் ? What say all? SUPER 6 பாணியில் இதனையும் நம்பரிட்ட லிமிடெட் எடிஷன் ஆக வெளியிடுவதெனில் - நம்பர்களோடு வெறும் 1200 பிரதிகள் மட்டுமே அச்சிட்டு  ; விலை ரூ.450 என்று நிர்ணயம் செய்திடலாம் ! ( லக்கி கிளாசிக்ஸ் கிட்டத்தட்ட 925  பிரதிகள் காலி ; இன்னும் 200 + மட்டுமே கையிருப்பு !!!!! ஜாலி !! ஜாலி !!) So "இரத்தக் கோட்டை " all set to roll in August '17 !! முன்பதிவுகளை April'17 முதல் துவக்கிக் கொள்வோமா?

அப்புறம் ஒவ்வொரு புத்தக விழாவிலும் ஏதேனும் சன்னமானதொரு surprise இதழ் இருந்தால் தேவலையே ! என்று நண்பர்கள் அடிக்கடி சொல்வது எனக்கு ஞாபகம் இல்லாதில்லை ; ஆனால் இழுத்து வைத்துக் கொள்ளும் பணிகளே ஏராளம் எனும் பொழுது, புதுசாய் மேற்கொண்டும்  தேவையா ? என்ற எண்ணத்தில் சத்தமின்றி ஒதுங்கி விடுவேன் ! ஆனால் இம்முறை ஈரோட்டிலிருந்து அந்த surprise இதழுக்கொரு பிள்ளையார் சுழி போடுவதென்று தீர்மானித்து விட்டதன் பிரதிபலிப்பே - "அந்த இன்னுமொரு கௌபாய் நாயகரையும் களமிறக்கிடுகிறேன் !" என்ற எனது promise !  ரொம்பவே வித்தியாசமான நாயகர் ; நமக்குப் புதுசான களம் ; அட்டகாசச் சித்திரங்கள் என்ற இந்த surprise package பயணிக்கிறது ! இதன் முதல் 3  பாகங்களை தொகுப்பாக்கி ஒற்றை இதழாய்  வெளியிடலாம் ! "ஆசாமி யார் ? அவர் பூர்வீகம் என்ன ?" என்பதெல்லாமே ஈரோட்டில் ஆகஸ்ட் முதல் வாரம் சந்திக்கும் வரைக்கும் சஸ்பென்சாகவே தொடர விடுவோமா ? ஓ.கே. எனில் - "இ.கோ." + "சஸ்பென்ஸ் ஸ்பெஷல்" என்ற இந்த டபுள் டமாக்காவிற்கு ஏப்ரல்'17  முதல் முன்பதிவு தொடங்கிடலாம் !!  Sounds good folks ?

Finally - "இரத்தப் படலம்" வண்ணத் தொகுப்புப் பற்றி !! ஒரு ராட்சச முயற்சிக்கு இது பூர்வாங்க வேளை என்பதால் - கொஞ்சமே கொஞ்சமாய்ப் பொறுமையோடும், நிதானத்தோடும் இதனை அணுகிட உங்கள் புரிதலைக் கோருகிறேன் !  2018-க்கென இதனை நிர்ணயம் செய்துள்ளேன் ! நிச்சயமாய் அதனில் மாற்றங்கள் இராது ! ஆனால் சென்னையா ? ஈரோடா ? என்பதில் இன்னும் சற்றே தெளிவு அவசியம் எனக்கு ! அதே போல - "ஒற்றை இதழாய் !!" ; "பிரித்து 3 பாகங்களாய் !" என்பதிலும் நண்பர்களிடையே மாறுபட்ட சிந்தனைகள் இருப்பதைக் காண முடிந்தது ! 852 பக்கங்களை ஆர்ட்பேப்பரில் ஒரே இதழாக்கினால், பீம்பாய் smurf சைசுக்கு இதழின் தாட்டியம் அமைந்திடும் என்பதில் ஐயமில்லை ! Handling-ல் ; கூரியர் பட்டுவாடாக்களில் இந்தக் குண்டோ குண்டு இதழ் சேதமாகிடாது தப்பித்த வேண்டுமெனில் பிரத்யேக பேக்கிங் box -ம் அவசியமாகிடும் ! So ஆறு பாகங்கள் கொண்ட 3 இதழ்கள் ; ஒரே சமயத்தில் ரிலீஸ் என்பதே தேவலாம் என்று எனக்குத் தோன்றுகிறது ! அடுத்தாண்டின் வெளியீடு என்பதால் இப்போதே விலை நிர்ணயம் செய்வது சிக்கலான சமாச்சாரம் என்பதால் - இந்தாண்டு ஈரோட்டில் இரத்தப் படலம் விலை & முன்பதிவு வசதிகள் பற்றிச் சொல்கிறேனே ? இவை போன்ற மறுபதிப்பு / மெகா இதழ்களை இனியும் நிறைய அச்சிட்டு ஸ்டாக் வைத்துக் கொண்டு குட்டி போட்ட பூனை போல் ஊர் ஊராய்த் தூக்கித் திரிவதாக இல்லை என்பதால் - 1000 என்ற பிரிண்ட் ரன் சரிப்படுமா ? என்பது பற்றி யோசிக்கவும் அவகாசம் அவசியப்படும் ! அதுமட்டுமன்றி,  இதன் black & white தொகுப்பு வெளியானது 2010-ல் தான் எனும் போது - 8 ஆண்டுகளுக்குள் வண்ண தொகுப்பினில் 1000 பிரதிகள் விற்குமா - என்றும் அவதானிக்க வேண்டும் அல்லவா ? "மௌனமாய் பதிவுகளைத் தவறாமல் படிக்கிறேன் " என்று என்னிடம் சென்னையில் சொன்ன நண்பர்கள் ஏராளம் ! அவர்களுக்கும் எனது கேள்வி இது தான் : "இரத்தப் படலம் வண்ணத் தொகுப்பு - ஒன்றோ / ஒன்றரை ஆண்டோ கழிந்த நிலையில் சுமார் ரூ.2000 விலையில் வெளியாகும் பட்சத்தில் வாங்கிட ஆர்வம் காட்டுவீர்களா ? " "மௌனம் சம்மதம்" என்ற ஹைதர் அலி காலத்துப் பழமொழிகளை நம்புவானேன் - உங்கள் அபிப்பிராயங்களை கேட்டுத் தெரிந்து கொள்ளும் வாய்ப்பிருக்கும் போது ?

Before I sign off - இந்தாண்டின் புத்தக விழாவினில் மட்டுமன்றி - சமீப வாசக சந்திப்புகளிலும் கிட்டிய அனுபவங்களுள் மறக்க இயலா ஒன்று பற்றி :

சென்னையில் வசிக்கும் ஒரு அழகான குடும்பம் அது ! கைக்குழந்தையோடு கணவரும், கர்ப்பிணி மனைவியும் மாத்திரமின்றி, அவரது பெற்றோர்களும் புத்தக விழாவிற்கு வருகை தந்திருந்தனர் ஞாயிறன்று ! கணவர் நமது தீவிர ரசிகர் போலும் ; ஆனால் சென்றாண்டில் ஏதோ காரணங்களால் சந்தாவும் செலுத்திடவில்லை ; நிறைய இதழ்களை வாங்கிடவும் செய்யவில்லை ! காமிக்ஸ் கொள்முதலுக்கென நிறையச் செலவிடுவதை மனைவி கண்டித்திருந்தாரோ என்னவோ - இம்முறை தாஜா செய்து நம் ஸ்டாலுக்கு அழைத்து வந்துவிட்டார் ! வந்த மனுஷன் - பட்டாசுக கடைக்குள் புகுந்த பாலகனைப் போல உற்சாகத்தில் துள்ளிக் குதிக்க ஆரம்பித்து விட்டார் ! பெற்றோர்கள் சிறுவயது முதலே அவரது காமிக்ஸ் ஆர்வத்தை ஊக்குவித்தவர்கள் என்பதாலோ, என்னவோ - அங்கிருந்த நாற்காலியில் ஓய்வாக அமர்ந்து விட்டு மகனின் ஆனந்த் தாண்டவத்தை ரசித்துக் கொண்டிருந்தனர் - "வேணும்னா வாங்கிக்கோப்பா !! " என்றபடிக்கே ! கணவரோ தன்னிலையில் இல்லை !! - "ஐயோ..என் பெயர் டைகர் இருக்கு !!" ; "அச்சச்சோ....மின்னும் மரணம் - அந்த பெரிய புக் சொன்னேனலே...அதை வாங்கப் போறேன் !!" ; "ப்ளீஸ்பா..இந்த வருஷம் சந்தா கட்டிடுறேனே ? ! " ; "ஹேய்ய்ய்..டெக்ஸ் வில்லர் "சர்வமும் நானே" வாங்கிக்கட்டுமா ?"...;"அந்த கார்ட்டூன் புக் பாரேன் - வாங்கணும் !!" என்று மனைவியிடம் விண்ணப்பங்களையும் , தாஜாப் படலங்களையும் , அடக்க இயலா ஆர்வத்தையும்  ஒரு சேர   சர்ர் சர்ரென்று பதிவு செய்து கொண்டிருந்தார் !  கணவரே கைக்குழந்தையாகி விட்டதைக் கண்டு - கண்டிக்கவும் மனதின்றி - "பார்த்து வாங்கிக்கோங்க" என்று சொல்லி விட்டு ஒதுங்கி நிற்க துணைவியார் முயற்சிக்க, நொடிக்கு நொடி - கணவரின் உற்சாகம் உச்சத்துக்குச் சென்று கொண்டிருந்தது ! "காமிக்ஸ் காதல்" ரொம்பவே  வித்தியாசமானது மேடம்....உங்களை சங்கடப்படுத்தவும் அவருக்கு மனதில்லை ; இவற்றின் மீதான நேசத்தை உதறவும் முடியவில்லை அவருக்கு !" என்று நான் சொல்ல "புரிகிறது சார் !" என்று அனுசரணையாய் பதில் சொன்னார் " அதற்குள் "ஹை...தலையில்லாப் போராளி !!" ; " ஹை...ஈரோட்டில் இத்தாலி !!" " ஹை....என் பெயர் டைகர் black & white -லே "  என்று நம்மவரின் குரல் உச்சத்துக்குச் சென்று கொண்டிருந்தது! அந்தக் குரலில்   ஒலித்த   கலப்படமில்லா உற்சாகம்  உள்ளுக்குள் என்னை என்னவோ செய்தது ! எத்தனையோ சாமங்களில் விழித்திருந்து செய்த வேலைகளின் பளுவோ, பாரமோ சார்ந்த நினைவுகள் அந்த ஒற்றை நொடியில் கரைந்தே போய் விட்டது போல் உணர்ந்தேன் ! ஒரேயொரு முகத்தில் இந்தப் புன்னகையைக் கொணர்வது சாத்தியமாகின் கூட அதன் பொருட்டு ஓராண்டின் முழுமைக்கும் கண்முழித்திருப்பதில் தப்பில்லை என்று அந்த நொடியில் தோன்றியது !! இந்த ஒன்றரை நாட்களில் நான் ஒட்டு மொத்தமாய்த் தரிசித்த அந்த சந்தோஷங்களைத் தொடரச் செய்ய இன்னமும் ஒரு ஆயுள் இரவல் வாங்கினாலும் போதாது என்று தோன்றியது  !!! அசாத்தியமானது நம் காமிக்ஸ் குடும்பம் !! Privileged to be a part of all this !!!

மீண்டும் சந்திப்போம் !! Bye for now !!

புதிய தலைமுறை டிவி நமது ஸ்டாலில்  இன்று !

வரம் வாங்கிய தினங்கள் !!

நண்பர்களே,

வணக்கம். நிறையக் கதைகளுக்கு நிறைய ஸ்கிரிப்ட்களை எழுதியிருக்கிறேன்  ; ஆனால் சில நேரங்களில் மேலிருப்பவர் நமக்கென எழுதும் ஸ்கிரிப்ட்களின் ரம்யத்தோடும், டைமிங்கோடும் போட்டி போட சான்ஸே இல்லையென்பேன் ! இதோ - நமது பதிவு எண் 350 புலர்ந்திருப்பது சென்னைப் புத்தக விழாவும், நண்பர்கள் சந்திப்பும் ஒன்றிணைந்ததொரு அழகான தருணத்தில் எனும் போது "அட...தற்செயலான நிகழ்விது !" என்று எண்ணிக் கடக்க இயலவில்லை ! All the more reason to think - படைத்தவரும் ஒரு காமிக்ஸ் காதலரே என்று !

முதன்முறையாக டபுள் ஸ்டால் ; புது ரேக்குகள் ; கிரெடிட் கார்டு மிஷின், PAYTm பதிவு என்பதோடு - கதைகளை genre வாரியாக வரிசைப்படுத்தும் முயற்சி என நிறையவே வீட்டுப்பாடம் போட்டுவிட்டே நம்மவர்களை சென்னைக்கு அனுப்பி வைத்திருந்தோம். புத்தக விழா  துவங்கியது, சென்னையில் இந்த  வெள்ளிக்கிழமை மாலை என்றாலும், இந்தப் பதிவின் முதல் புள்ளி ஆரம்பிப்பது தேசத்தின் தலைநகரில் ! பிரெஞ்சு அரசு நமக்கென அன்போடு ஒரு மான்யம் வழங்க முன்வந்திருப்பது பற்றி ஏற்கனவே பதிவிட்டிருந்தேன் ; பகிர்ந்திருந்தேன் ! ஆனால் எல்லாமே மின்னஞ்சல்கள் வாயிலான பரிமாற்றங்களாகவே இது வரையிலும் அமைந்திருக்க, இதற்குப் பெரிதும் உறுதுணையாய் நின்றிருந்த பிரெஞ்சுக் கலாச்சார மையத்தின் தலைமை அதிகாரிகளை சந்தர்ப்பம் கிட்டும் பொழுது நேரில் சந்தித்து நமது நன்றிகளைச் சொல்லியாக வேண்டுமே என்ற குடைச்சல் எனக்குள் குடியிருந்தது ! அப்போது பிரான்சிலிருந்து வந்ததொரு புது மின்னஞ்சல் ஒரே கல்லில் இரு மாங்காய்களை விழச் செய்ய உதவிய போது குஷியாகிப் போனேன் ! கடந்த 32 ஆண்டுகளின் பிரான்க்கோ-பெல்ஜியக் கதைத் தேடல்களில் கொஞ்சம் வெற்றிகள் ; கொஞ்சம் பல்புகள் என்று சம விகிதத்தில் ஈட்டி இருப்போம் தான் ! ஆனால்  ஐரோப்பியக் காமிக்ஸ் உலகின் முன்னணிப் பதிப்பகங்களின் லைசென்சிங் பிரிவுகளின் முக்கிய தலைகள் அனைவரோடும் பரிச்சயம் செய்து கொள்ள முடிந்தது இந்த முயற்சிகளின் ஒரு அசாத்திய ப்ளஸ் பாயிண்ட் !  போட்டி நிறுவனங்களைச் சார்ந்தவர்களாக இருப்பினும், இந்த லைசென்சிங் heads-க்கு மத்தியினில் ரொம்பவே  சகஜ நட்புண்டு ! ஒவ்வொரு முக்கிய சர்வதேசப் புத்தகவிழாவிலும் சந்தித்துக் கொள்ளும் பொழுது தத்தம் புதுமுயற்சிகள் பற்றிப் பேசிக் கொள்வார்கள் !  அவர்களில் பெரும்பாலோனருக்கு எனது சொட்டைத் தலை ரொம்பவே பழக்கமானதொன்று என்பதால் ஆசிய / இந்திய மார்க்கெட் பற்றிய பேச்சு எழும் போதெல்லாம் நம்மைப் பற்றிய தகவல்களை பரிமாற்றம் செய்து கொள்வார்கள் என்பது எனக்குத் தெரியும் ! "பௌன்சர்" உரிமைகளை வாங்கி இருக்கிறீர்களாமே ? ; SMURFS தமிழ் பேசப் போகிறார்களாமே ?" ; SOLEIL நிறுவனத்தோடு கைகோர்க்கப் போகிறீர்களாமே ? என்று இதர நிறுவனத்தினர் என்னைப் பார்க்கும் போது விசாரிப்பது வாடிக்கை ! அவர்களுக்குள்ளானதொரு சமீப உரையாடலின் பலனாய் நம்மைத் தேடி வந்ததே அந்தப் புது மின்னஞ்சல் ! "நாங்களும் ___ ஆண்டுகளாய் பிரான்க்கோ-பெல்ஜிய மார்க்கெட்டில் உள்ளது உங்களுக்குத் தெரியுமென்று நினைக்கிறோம் ; எங்கள் மொழிப படைப்புகளை நீங்கள் ஆண்டாண்டு காலமாய் தமிழில் வெளியிட்டு வருவதைப் பற்றி சமீபமாய்க் கேள்விப்பட்டோம் ! இந்திய சந்தையில் உங்கள் வாயிலாக எங்களது படைப்புகளும் அறிமுகம் காணச் செய்திட ரொம்பவே ஆர்வமாக உள்ளோம் ! லைசன்சிங் பிரிவின் தலைவரான நான் சீனா செல்லும் வழியில் , ஒரு நாளைக்கு புது டில்லி புத்தக விழாவினில் எட்டிப் பார்த்திடவுள்ளேன் ! அந்நேரம் உங்களை சந்திக்க முடிந்தால் சந்தோஷம் !" என்று போட்டுத் தாக்கியது அந்த மின்னஞ்சல் ! "ஆஹா...ஆஹாஹா !!" என்பதைத் தவிர்த்து வேறு எதுவும் தோன்றவில்லை அந்தக் கணத்தில் !! புதியவரைச் சந்தித்தது போலவும் ஆயிற்று ; பிரெஞ்சுக் கலாச்சார மையத்தினரைப் பார்த்து நன்றி சொன்னது  போலவும் ஆச்சு என்று தோன்றியதால் "OKKKKKK " என்று அப்போதே பதிலைப் போட்டு விட்டு, டிக்கெட்டையும் போட்டு விட்டேன் ! சனிக்கிழமை இங்கே சென்னையில் நமது ஸ்டாலில் நண்பர்களை சந்திக்க இருந்திட வேண்டும் என்பதால் வெள்ளியன்றே ஓட்டமாய் ஓடிவிட்டுத் திரும்பிடத் திட்டம் !

சிலு சிலு வென்று குளிர் அடிக்கும் டெல்லியில் சென்று இறங்கி ; புதியவரை மதியமாய் சந்திக்கக் சென்றேன் ! அதற்கு முன்பாக எனக்கு நானே நிறைய விதிகளை போட்டுக் கொண்டிருந்தேன் ! "எக்கச்சக்கமாய் நாயகர்கள் / நாயகியர் ஏற்கனவே காத்துக் கிடக்கின்றனர் ; ஆளுக்கு ஒரு ஸ்லாட் ; அரை ஸ்லாட் என்று தீர்த்தம் வழங்கியது போலத் தான் இடங்களை சுருக்கமாய் ஒதுக்கிட முடிகிறது ! So புதுசாய் அவர்களது படைப்புகளைப் பார்த்தவுடனே பொங்கிடாதே சாமி ; நிதானம் !! go easy !! control !! என்று ஒப்பித்துக் கொண்டே அவர் முன்னே போய் நின்றேன் !! பிரெஞ்சு நாட்டவருக்கே உரித்தான புன்னகையோடு பேசத் தொடங்கியவரோடு நொடியில் நட்பாகிட முடிந்தது ! கடந்த 10 ஆண்டுகளாய் இந்தத் துறையில் உள்ளதாய்ச் சொன்னவரிடம் - நமது வண்டி 32 ஆண்டுகளாய் அவர்களது கரைகளில் மீன்பிடித்து வருவதைச் சொன்ன போது திகைத்தே போனார் ! ஊர் கதை ; உலகக் கதை என்று ஏதேதோ பேசி விட்டு, ஒரு மாதிரியாய் அவர் தனது IPAD ஐத் திறந்து தங்களது சமீபத் படைப்புகளைக் காட்டத் தயாராகிய போது நான் சேரை இறுக்கமாய்ப் பிடித்துக் கொண்டு - "சொன்னதுலாம் நினைவு இருக்கட்டும் தம்பி !!" என்று எனக்கு நானே நினைவூட்டிக் கொண்டேன் !! அவர் சர் சர்ரென்று பக்கங்களைப் புரட்டிக் கொண்டே ஒவ்வொரு கதையைப் பற்றியும் விளக்கிக் கொண்டே போக என் மண்டைக்குள் "கொய்ங்க்க் " என்று ஒரு ராட்சஸக் குடைச்சல் சத்தம் கேட்கத் தொடங்கியது ! "ஐயையோ..இது ரசகுல்லா மாதிரித் தோணுதே  ; ஆத்தாடி இந்தப் பால் அல்வா அள்ளுதே !! கிளிஞ்சது போ --- இந்த ரவா லட்டு கலக்கல் !!" என்று கடைவாய்ப் பக்கமாய் என் கட்டுப்பாடுகளைக் காற்றில் பறக்க விட்டு விட்டு ஜலப் பிரவாகம் துவங்கியிருந்தது !! காலில் பூட்ஸ் இருந்தாலும் பரவாயில்லை ; கட்டைவிரலோ - மொத்தக் காலோ - சிக்கியதை இப்போதே தொண்டைக்குள் திணித்துக் கொள்வோமே என்ற நமைச்சல் படுத்தி எடுக்கத் தொடங்கியது ! தொடர்ந்து   ஒன்றரை மணிநேரம் நமது நாலுகாலார் ரின்டின் கேன் சூப்பையோ ; சோப்பையோ பார்க்கும் வேளையில் எவ்விதம் உணருவார் என்பதை நேர்பட உணர்ந்திடும் அனுபவம் கிட்டியது !  பத்தியம் இருக்க வேண்டிய வேளையில் ஒரு மார்வாடித் திருமண விருந்தே முன்விரிக்கப்பட்டால் அந்த நாக்கு தான் நாலு தெரு நீளத்துக்கு நீளாது என்ன செய்யும் ? சரியாக சீல் செய்யப்படாத தண்ணீர் லாரியிலிருந்து ஒழுகுவதை போல "சள  சள"வென்று ஜொள்ளு தான் கொட்டாது போகுமா ? அவருடன் கைகுலுக்கி விட்டுக் கிளம்பும் வேளையில் என் டயரியில் ஒரு 10 தொடர்களின் பெயர்களாவது கிறுக்கப்பட்டிருந்தன் ; நமது மின்னஞ்சலுக்கு அவற்றின் மாதிரிகளும் வந்து கிடந்தன !!

அடுத்த ஸ்டாப் பிரெஞ்சு மையம் என்பதால் பர பரவென்று அங்கே ஓட்டம் பிடித்தேன் ! தூதரகங்களும், வெளிநாட்டு வர்த்தக மையங்களும் அணிவகுத்து நிற்கும் டில்லியின் கம்பீரமான பகுதியது !! OLA -வின் புண்ணியத்தில் சரியான நேரத்துக்கு அவர்களது கதவைத் தட்ட முடிந்தது ! அங்கு சென்ற போது 30+ ஆண்டுகளுக்கு முன்பான சில பல நினைவுகள் அலையடித்தன ; 1985-ல் இதே முகவரியினில் தவம் கிடந்ததொரு நாள் சார்ந்த ஞாபகங்கள் அவை ! (இன்னொரு நாளுக்கு அது !!) அட்டகாசமாய்த் தோற்றம் தந்த மையத்தினுள் ஏராளமான கெடுபிடிகளுக்குப் பின்பாய் புகுந்து சென்று காத்திருந்த போது - முந்தைய சந்திப்பின் தாக்கமே தொடர்ந்து கொண்டிருந்தது ! "பறந்தது போது...தரையிறங்கு புண்ணியவாளா !!" என்றபடிக்கு மையத்தின் தலைவரைச் சந்திக்கத் தயாராகிக் கொண்டேன் ! குளிர்காலங்களில் டில்லியில் ஜட்கா வண்டிக்காரரே கோட் போட்டிருப்பது வாடிக்கை எனும் போது - இத்தனை உயரதிகாரி தடபுடலாக வந்து நிற்கப் போகிறார் ; சோம்பேறித்தனப்பட்டுக் கொண்டு எப்போதும் போல நாம் வந்து நிற்கிறோமே ?! என்று லேசாக உள்ளுக்குள் உதறத்  தொடங்கியது அந்த கம்பீரமான காத்திருப்பு அறையினுள் அமர்ந்திருந்த போது ! ஆனால் சற்றைக்கெல்லாம் "மிஸ்டர் விஜயன் ?" என்றபடிக்கு என் முன் ஆஜரானவர் என்னை விடவும் சிம்பிளாய் நின்ற போது - "தப்பிச்சோம்டா சாமி!!" என்ற பெருமூச்சே மேலோங்கியது ! அவர்களது மீட்டிங் ஹாலுக்கு இட்டுச் சென்று அடுத்த 20 நிமிடங்களை நமக்காக ஒதுக்கியவருக்கு இயன்ற விதங்களிலெல்லாம் நன்றி சொன்னேன் ! மாறாத புன்னகையோடு அவர் நம் மார்க்கெட் பற்றியும், நம் வாசகக் குடும்பம் பற்றியும் ரொம்ப ரொம்ப ஆர்வமாய் விசாரித்தார் ! " அது எப்படி, இங்கே ஒரு மூலையில் உள்ளதொரு காமிக்ஸ் வாசகர்களுக்கு  எங்கோ ஒரு தூர தேசத்துப் படைப்புகளின் மீது - இத்தனை காலம் முன்பிலிருந்தே காதலாகி விட்டுள்ளது ? என்று வியப்போடு கேட்டார் !! ரொம்பவே பெருமையாய், நமது வாசகர்களின் ரசனைகளைப் பற்றியும் சிலாகித்தவர் -" really unique " என்று சொன்ன போது உங்கள் ஒவ்வொருவரின் காமிக்ஸ் நேசத்துக்கான சான்றிதழாய் அதனைப் பார்த்திட முடிந்தது ! இன்னும் நிறைய பேசினார் - தொடரவிருக்கும் இந்தாண்டின் இறுதியில் உள்ள அவர்களது சில திட்டமிடல்களைப் பற்றியும் ! உரிய சமயம் வரும் போது அவற்றைப் பற்றி விரிவாய்ச் சொல்கிறேன் guys - இன்னும் சில சந்தோஷ நாட்கள் நமக்குக் காத்துள்ளன என்பது மட்டும் இப்போதைக்கு ! ஒரே நாளில் இதுக்கு மேல் வேறென்ன வரங்கள் கிட்டிட இயலும் ? என்ற மனநிறைவோடு நான் விடைபெற்று டில்லியின் BP எந்தச் செய்யும் டிராபிக்கினூடே விமான நிலையத்தை எட்டிப் பிடித்தேன் ! "விமானம் தாமதம்" என்று சந்தோஷமாய், சிரித்த முகத்தோடு சொன்ன ஜெட் ஏர்வேஸ் பணியாளரிடம் லேசாய் ஏமாற்றத்தைப் பகிரக் கூடத் தோன்றவில்லை - நானிருந்த உற்சாகத்தில் ! "எந்நேரமாச்சும் சென்னை கொண்டு சேர்த்து விட்டால் போதும் "என்றபடிக்கு அன்றய நினைவுகளை அசை போடத் தொடங்கியவனுக்கு இரவு மணி 11 ஆனதும் உரைக்கவில்லை ; 2  மணி சுமாருக்குத் தான் சென்னை வந்து சேர்ந்ததொரு சிரமமாகவும் தோன்றவில்லை ! ஒரு மார்க்கமாய் கட்டையைக் கிடத்திய போது மணி மூன்றைத் தொட்டிருந்தது !

காலையில் புத்தக விழாவில் நண்பர்கள் சந்திப்பு என்ற ஞாபகத்தோடு தூங்கப் சென்றதாலோ - என்னவோ : கண்ணைத் திறக்கும் போதே முகத்திலொரு புன்னகையும் இலவச இணைப்பாய் ஒட்டிக் கொண்டிருந்தது ! ஒரு மாதிரியாய் ஜுனியரும், நானும் புத்தக விழா அரங்கிற்குச் சென்ற போது நமது நண்பர்கள் அங்கே ஏற்கனவே ஆஜர் ! சேந்தம்பட்டிக் குழுவினர் எண்ணிக்கையில் குறைவாகயிருந்தாலும், ஆளுக்கொரு MAY I HELP YOU ? என்ற பேட்ஜ்களோடு ஸ்டாலில் அதகளம் செய்துகொண்டிருந்தனர் ! வெள்ளி மாலை சென்னையில் உள்ள நம் நண்பர்கள் புத்தகங்களை ஒதுக்கி, sort out செய்வதில் போட்டு வைத்திருந்த பிள்ளையார் சுழியை சேந்தம்பட்டி கம்பெனி சனியின் பொழுதுக்கு அட்டகாசமாய்த் தொடர்ந்து கொண்டிருந்தனர் ! வருகை தரும் புதியவர்களுக்கு உதவிடுவதில் துவங்கி, பில்லிங்கில் ஒத்தாசை ; கிரெடிட் கார்டு மிஷினில் நம்மவர்களுக்கு பயிற்சி தருவது ; புத்தகங்கள் காலியாகும் நொடியே பண்டல்களிருந்து மாற்றுப் பிரதிகளை எடுத்து அடுக்குவது ; வாசகர்கள் கேட்கும் கேள்விகளுக்கு பதில் தந்திடுவது என தூள் கிளப்பிக் கொண்டிருந்தனர் ! காரைக்கால் ; பெங்களூரு & சென்னை நண்பர்களும் குழுமத் துவங்க,  - போட்டோக்கள் ; அரட்டைகள் ; ஜனவரியின் விமர்சனங்கள் என்று காலைப் பொழுது சிட்டாய்ப் பறந்து போனது ! இம்முறை டபுள் ஸ்டால் என்பதால் பக்கத்துக்கு கடையினர்  யாருக்கும் பெரியதொரு நெருடலை ஏற்படுத்தா வண்ணம் நமது நண்பர்கள் அரட்டை சாத்தியமானது ! ட்யுராங்கோவின் தாக்கத்திலிருந்து நண்பர்கள் எவருமே மீளவில்லை என்பதை நேற்றைய பொழுது தெளிவாய்க் காட்டியது ! அந்த அட்டைப்படத்தில் துவங்கி, கதை பாணி ; சித்திரங்கள் ; வர்ணங்கள் ; தயாரிப்புத் தரம் என்று ஏகத்துக்கு ட்யுராங்கோ நமது நாடித் துடிப்புகளை எகிறச்  செய்துள்ளார் என்பதை அறிய முடிந்த போது சந்தோஷமாக இருந்தது ! And ஜனவரியின் ப்ளூ கோட் சாகசமும் ஏகோபித்த பாராட்டுகளை பெற்றதை நேற்றைய தினத்தின் இன்னுமொரு highlight ஆகப் பார்த்தேன் ! ஓராண்டு விடுமுறைக்குப் பின்பாய், ஆண்டின் முதல் இதழாய் கார்ட்டூன் சந்தாவில் தலைகாட்டும் இந்தக் காமெடிப் போராளிகள் ஏனோ-தானோ response பெற்றிருப்பின், நிச்சயமாய் அவர்களது எதிர்காலம் கேள்விக்குறியாகியிருக்கும் - நம் இதழ்களுள் ! ஆனால் அதெற்கெல்லாம் இடமே தராது "பச்சக்" என்று முத்திரை பதித்து விட்டார்கள் என்பதில் more than happy !

நேற்றைய பொழுதின் இன்னொரு சந்தோஷ விஷயம் - சிறுகச் சிறுகக் கூடிவரும் சுட்டீஸ்கள் ஆர்வங்கள் ! பெற்றோர்களுடன் வருகை தரும் நிறையப் பொடுசுகளுக்கு  லக்கி லூக் பரிச்சயமானதொரு முகமாக உள்ளார் ! SMURFS ; சிக்பில் என்றும் சுவாரஸ்யமாய்ப் புரட்டுவதை பார்க்கும் பொழுது - எதிருள்ள பாதையில் ஒளிக்கீற்று ஸ்பஷ்டமாய்த் தெரிகிறது ! இன்னொரு welcome முன்னேற்றம் - வாசகியரின் ஆர்வங்களும் !! காமிக்ஸ் என்பது "பசங்க சமாச்சாரம் மட்டுமல்ல என்பதை நேற்றைக்கு கண்கூடாய்ப் பார்க்க இயன்றது !  "வீட்டில் லைப்ரரியே வைத்திருக்கிறேன் சார் - வேண்டுமானால் நமது காமிக்ஸ் இதழ்களிலிருந்து என்ன கேள்வி வேண்டுமானாலும் கேட்டுப் பாருங்களேன் ?" என்று சவால் விடும் அளவுக்கு அந்த வளர்ச்சி உள்ளதென்பதை பார்க்க இயன்ற போது உற்சாகமாய் இருந்தது ! நேற்றைய இன்னுமொரு icing on the cake - நிறைய சீனியர் வாசகர்களை சந்திக்க முடிந்த அனுபவம் !

"கட்சி மீட்டிங்கின் பொருட்டு சென்னை வந்தோம் சார் ! நானும், எனது சகோதரரும் நெடுங்காலத்து வாசகர்கள் ; உங்க ஸ்டாலைப் பார்க்க முடிந்ததில் ரொம்பவே மகிழ்ச்சி" என்று பூரித்தவர்கள் ; "கை கொடுங்கள் சார் ; எங்கள் பால்யங்களை இன்னமும் நினைவுபடுத்திக்கொள்ள வாய்ப்பு ஏற்படுத்தி வருகிறீர்கள் !!" என்று முகம்நிறைய மகிழ்ச்சியோடு வருகை தந்தவர்கள் ; "என் மகளின்று தமிழகத்தின் நம்பர் 1 வார இதழில் பணியாற்றுகிறாள் ; நான் ஊக்குவித்த நமது காமிக்ஸ் வாசிப்புப் பழக்கமே அவளது தமிழுக்கும், இன்றைய பணிக்கும் வேர்கள்" என்றுபெருமிதம் கொண்ட தந்தையையும் ; "அம்மா வாங்கி கொடுத்த முதல் இதழ் "கடத்தல் குமிழிகள் !" என்ற சிலாகிப்போடு இன்றுவரையிலும் நம் இதழ்கள் மீது குன்றாக் காதல் கொண்ட அந்த அழகான குடும்பம்  ; "வேதாளன் கதைகள் என் போட மாட்டேங்கிறீர்கள் ?" : என்று உரிமையோடு கோரும் அன்னையார் என்று நேற்றைய தினம் ஏராளமான அழகான நொடிகளைத் தன்னுள்ளே கொண்டிருந்தது ! இந்தியாவின் ஜாம்பவான் காமிக்ஸ் பதிப்பகத்தின் சென்னைக் கிளை மேலாளரோ - நம் ஸ்டாலில் ஒரு மணிநேரமாவது செலவிட்டிருப்பார் - அன்பின் மிகுதியால் ! தமிழ் ஹிந்து நாளிதழின் எடிட்டோரியல் குழுவினரோ நம்மைப் பார்த்த சமயம் சிலிர்க்கச் செய்யும் பாராட்டு மழையில் திக்குமுக்காடச் செய்தனர் !  நூற்றாண்டைக் கடந்ததொரு பதிப்புலக விருட்சத்தின் முன்னே நாமெல்லாம் குட்டியான குடைக் காளான்கள் மாத்திரமே என்றாலும், காமிக்ஸ் எனும் நேசம் சாத்தியமாக்கித் தரும் இத்தகைய அனுபவங்கள் என்றென்றும் மறக்க இயலாதவை !! மதிய உணவு நண்பர்களோடு - மீண்டும் ஸ்டாலில்  அரட்டை என்று பொழுது ஓடியதே தெரியவில்லை ! மாலை மேற்கொண்டும் சென்னை நண்பர்கள் குழுமத் துவங்க, சிங்கப்பூரிலிருந்தும், கோவையிலிருந்தும் நண்பர்கள் "ஹலோ " சொல்லி வந்து நின்ற போது நிறைவாக இருந்தது !

முதலில் காலியாகிப் போனது "சர்வமும் நானே" ! அதைத் தொடர்ந்து லக்கி கிளாஸிக்ஸ் ! அப்புறம் ட்யுராங்கோ ! மூன்றுக்கும் மத்தியினில் உள்ள ஒற்றுமை அவை மூன்றுமே hardcover / ஸ்பெஷல் இதழ்கள் என்பதை புரிந்திட நான் லியனார்டோவாய் இருக்க வேண்டியதில்லை தான் !! Point noted ! மாயாவியைப் பற்றிப் பேசாது போனால் மூத்த நண்பர்கள் கண்ணைக் குத்தி விடுவார்கள் என்பதால் நமது evergreen நாயகரைப் பற்றியும் !! ஒரு வரிசை முழுக்க மாயாவி இதழ்களை பார்க்கும் சமயம் சிலபல முகங்களில் பளீரிடத் தொடங்கும் அந்தப் பிரகாசத்துக்குப் பின்னே லாஜிக் இருக்க இயலாது ; ஆனால் நிறையவே காமிக்ஸ் நேசமுள்ளது ! தான் அந்நாட்களில் படித்த புத்தகங்களை வரிக்கு வரி வாசித்துக் காட்டி, தன மகளிடம் பெருமிதம் கொள்ளும் தந்தையைப் பார்க்க முடிந்த போது ரொம்பவே நெகிழ்வாய் உணர்ந்தேன் ! இன்றைய தலைமுறையின் பிரதிநிதியான அந்தப் பெண் - தந்தையின் சிலாகிப்பின் பின்னணிகளை புரிந்து கொண்டாரோ - இல்லையோ, ஆனால் அவர் முகத்தில் தெரிந்த அப்பட்டமான மகிழ்வின் பொருட்டு பொறுமையாய் காது கொடுத்துக் கொண்டிருந்தார் ! "தேசம் தேசமாய் வாழ்ந்து வந்தவன் ; இன்றைக்கு இந்தியப் பெருநகரங்களுக்கு மத்தியில் வாழ்க்கை - ஆனால் மாயாவி மட்டுமே அன்றைக்கும், இன்றைக்கும் எங்கள் வாழ்வில் தொடர்புள்ளிகள் " என்றபடிக்கு தனது விசிட்டிங் கார்டை நீட்டிய மூத்த அரசு உச்சப் பதவியின் சொந்தக்காரர் ; "மிச்சம் மீதமிருக்கும் மாயாவியும் எனக்கு உடனே கிடைக்க வழியுள்ளதா ?"  என்று எதிர்பார்ப்போடு கேட்கும் வாசகர் ; "எங்க அப்பா வாங்கி கொடுத்த புக் சார் இது ! " என்றபடிக்கு புன்னகைக்கும் வாசகி - என மாயாவியின் வசீகரம் வற்றாது தொடர்கிறது ! And இம்முறை பரவலாய்க் கேட்கப்பட்ட இன்னுமொரு கேள்வி - "அண்ணன் ஆர்ச்சி ஆஜராகப் போவது எப்போது ?" என்பதே ! 'ஹி..ஹி..' என்று நான் ஒப்பேற்றி வைத்தாலும், நனைத்து சட்டித் தலையனுக்கான ஆதரவு பெருகி வருவது கண்கூடு ! Uffffff !!

ஒவ்வொரு மேஜர் புத்தக விழாவிற்கும் ஏதாச்சும் ஸ்பெஷல் அறிவிப்பு இருக்குமே சார் - இம்முறை என்னதோ ? என்ற கேள்வி இம்முறையும் எழாதில்லை ! இப்போதெல்லாம் மாதா மாதம் ஏதேனுமொரு ஸ்பெஷல் இதழ் வரும் விதமே நம் அட்டவணை உள்ளதெனும் பொழுது - புதுசாய் இதற்கு மேலும் என்ன அறிவிப்பது ? உங்கள் பர்ஸ்களை இன்னமும் பொத்தல் போடத்  தான் வேண்டுமா ? என்று தோன்றும் ! ஆனால் இங்கு வந்து உங்களின் உற்சாகங்களை நேரில் உணரும் பொழுது கட்டைவிரல் ரொம்பவே ருசியானதொரு பதார்த்தமாய்த் தெரியத் தொடங்கி   விடுவதன் மர்மம் தான் என்னவென்று புரிய  மாட்டேன்கிறது !  So - 2 இரத்தச் சமாச்சாரங்களும்  ஒரு அதிகாரப்பூர்வமான துவக்க தந்து விடுவோமா இந்த வேலையினில் ? கோட்டையை ஈரோட்டிலும், படலத்தை சென்னையிலும் வைத்துக் கொள்வோமா ? நான் ரெடி !! நீங்க ? 

நேற்றிரவு கிளம்பும் முன்னர் நம் ஸ்டாலின்  அருகினில் காவல்துறையினர் சிலர் புத்தகங்களை வேடிக்கை பார்த்துக் கொண்டிருந்தனர் ! அப்போது அமைதியாய் ஒரு வாசகர் நமது ஸ்டாலைப் பார்வையிட்டபடியே - நான் உங்கள் சந்தாதாரர் ! சந்தாவில் வந்திருக்கா இதழ்கள் வேறு ஏதேனும் உள்ளனவா ? " என்று கேட்டார். நான் லக்கி கிளாசிக்ஸ் இத்தலைக் காட்டிய போது - "SUPER 6 -ம் சந்தா கட்டி விட்டேன்" என்றவர் -"நீங்கள்     ஆங்கிலப் பதிப்புகளும் விற்பனை செய்கிறீர்களாமே ? அவை கிடைக்குமா ? " என்று வினவினார் ! "ஆன்லைனில் லிஸ்டிங் உள்ளது சார்" என்றபடிக்கே நமது CINEBOOK கேட்டலாகை எடுத்துக் காட்டினேன் ! இவற்றுள் தமிழில் வெளி வந்திருக்கா இதழ்கள் எவையெல்லாமோ - அவை அனைத்தும் வேண்டுமே ; பணம் கட்டி விடுகிறேன் - வீட்டுக்கு அனுப்பிவிடுகிறீர்களா ? என்றபடிக்கு தனது முகவரியை எழுதிக் கொடுத்தார் ! கிளம்பும் சமயம் "நானொரு முன்னாள் பாராளுமன்ற உறுப்பினர் !" என்ற போது தான் உரைத்தது - போலீஸ் பந்தோபஸ்து அங்கிருந்ததன் காரணம் !! ஸ்நேகமாய் விடைபெற்ற பொழுது "ஓரளவுவுக்காச்சும்  லாபமாக ஓடுகிறதா ?" என்ற விசாரித்தார் ! "சந்தோஷமாக ஓடுகிறது சார் !" என்று நான் பதிலளித்த போது புன்சிரிப்போடு நகர்ந்தார் !

கடந்த 2 நாட்களை மட்டுமன்றி எங்களது சமீபக் காலங்களையும் விவரிக்க அந்த வரி மெத்தப் பொருத்தம் என்பேன் !! Thanks ever so much all !! This has been a truly memorable phase in life ! Bye for now ! See you around !

இவர் ப்ளூ கோட் பிரியர் !! 

இவரோ பென்னி ரசிகர் ! இவருக்கு நானே ரசிகர் !